𑁧𑁦. 𑀮𑀺𑀢𑁆𑀢𑀯𑀕𑁆𑀕𑁄

[𑁯𑁧] 𑁧. 𑀮𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀪𑀺𑀓𑁆𑀔𑀽 𑀘𑀻𑀯𑀭𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀫𑀸𑀦𑀸 𑀬𑁂𑀪𑀼𑀬𑁆𑀬𑁂𑀦 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀢𑀦𑁆𑀢𑀺𑀁 𑀞𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑁄𑀕𑁄 𑀦𑀸𑀫 𑀳𑀮𑀸𑀳𑀮𑀯𑀺𑀲𑀧𑀭𑀺𑀪𑁄𑀕𑀲𑀤𑀺𑀲𑁄. 𑀧𑁄𑀭𑀸𑀡𑀓𑀸 𑀳𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀤𑁄𑀲𑀁 𑀅𑀚𑀸𑀦𑀺𑀢𑁆𑀯𑀸 𑀯𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀧𑀸𑀓𑀦𑁆𑀢𑁂 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑀸𑀧𑀭𑁄 𑀓𑀽𑀝𑀓𑁆𑀔𑀥𑀼𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀅𑀢𑁆𑀢𑀦𑁄 𑀚𑀬𑁂 𑀯𑀢𑁆𑀢𑀫𑀸𑀦𑁂 𑀓𑁂𑀴𑀺𑀫𑀡𑁆𑀟𑀮𑀁 𑀦 𑀪𑀺𑀦𑁆𑀤𑀢𑀺, 𑀧𑀭𑀸𑀚𑀬𑀓𑀸𑀮𑁂 𑀧𑀦 𑀅𑀓𑁆𑀔𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀓𑁆𑀔𑁄 𑀦𑀝𑁆𑀞𑁄’’𑀢𑀺 𑀓𑁂𑀴𑀺𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑁂𑀢𑁆𑀣 𑀧𑀢𑀺𑀭𑀽𑀧𑀓𑀸𑀭𑀡’’𑀦𑁆𑀢𑀺 𑀅𑀓𑁆𑀔𑁂 𑀆𑀤𑀸𑀬 𑀅𑀢𑁆𑀢𑀦𑁄 𑀖𑀭𑁂 𑀳𑀮𑀸𑀳𑀮𑀯𑀺𑀲𑁂𑀦 𑀭𑀜𑁆𑀚𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑁂 𑀆𑀤𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀅𑀓𑁆𑀔𑁂𑀳𑀺 𑀓𑀻𑀴𑀸𑀫𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀲𑀫𑁆𑀫𑀸’’𑀢𑀺 𑀓𑁂𑀴𑀺𑀫𑀡𑁆𑀟𑀮𑀁 𑀲𑀚𑁆𑀚𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀸𑀚𑀬𑀓𑀸𑀮𑁂 𑀏𑀓𑀁 𑀅𑀓𑁆𑀔𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀢𑀣𑀸 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀕𑀺𑀮𑀸𑀳𑀺 𑀢𑀸𑀯, 𑀧𑀘𑁆𑀙𑀸 𑀇𑀤𑀁 𑀦𑀸𑀫𑁂𑀢𑀦𑁆𑀢𑀺 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀘𑁄𑀤𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁧. ‘‘𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸, 𑀕𑀺𑀮𑀫𑀓𑁆𑀔𑀁 𑀧𑀼𑀭𑀺𑀲𑁄 𑀦 𑀩𑀼𑀚𑁆𑀛𑀢𑀺;

𑀕𑀺𑀮 𑀭𑁂 𑀕𑀺𑀮 𑀧𑀸𑀧𑀥𑀼𑀢𑁆𑀢𑀓, 𑀧𑀘𑁆𑀙𑀸 𑀢𑁂 𑀓𑀝𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀮𑀺𑀢𑁆𑀢𑀦𑁆𑀢𑀺 𑀫𑀓𑁆𑀔𑀺𑀢𑀁 𑀭𑀜𑁆𑀚𑀺𑀢𑀁. 𑀧𑀭𑀫𑁂𑀦 𑀢𑁂𑀚𑀲𑀸𑀢𑀺 𑀉𑀢𑁆𑀢𑀫𑀢𑁂𑀚𑀲𑀫𑁆𑀧𑀦𑁆𑀦𑁂𑀦 𑀳𑀮𑀸𑀳𑀮𑀯𑀺𑀲𑁂𑀦. 𑀕𑀺𑀮𑀦𑁆𑀢𑀺 𑀕𑀺𑀮𑀦𑁆𑀢𑁄. 𑀅𑀓𑁆𑀔𑀦𑁆𑀢𑀺 𑀕𑀼𑀴𑀓𑀁. 𑀦 𑀩𑀼𑀚𑁆𑀛𑀢𑀻𑀢𑀺 ‘‘𑀅𑀬𑀁 𑀫𑁂 𑀕𑀺𑀮𑀢𑁄 𑀇𑀤𑀁 𑀦𑀸𑀫 𑀓𑀭𑀺𑀲𑁆𑀲𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀕𑀺𑀮 𑀭𑁂𑀢𑀺 𑀕𑀺𑀮𑀸𑀳𑀺 𑀅𑀭𑁂. 𑀕𑀺𑀮𑀸𑀢𑀺 𑀧𑀼𑀦𑀧𑀺 𑀘𑁄𑀤𑁂𑀦𑁆𑀢𑁄 𑀯𑀤𑀢𑀺. 𑀧𑀘𑁆𑀙𑀸 𑀢𑁂 𑀓𑀝𑀼𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀢𑁂 𑀅𑀓𑁆𑀔𑁂 𑀕𑀺𑀮𑀺𑀢𑁂 𑀧𑀘𑁆𑀙𑀸 𑀏𑀢𑀁 𑀯𑀺𑀲𑀁 𑀢𑀺𑀔𑀺𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑁂𑀦𑁆𑀢𑀲𑁆𑀲𑁂𑀯 𑀯𑀺𑀲𑀯𑁂𑀕𑁂𑀦 𑀫𑀼𑀘𑁆𑀙𑀺𑀢𑁄 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀔𑀦𑁆𑀥𑀁 𑀦𑀸𑀫𑁂𑀢𑁆𑀯𑀸 𑀧𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀸𑀦𑀺𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀲𑀥𑀧𑀭𑀺𑀪𑀸𑀯𑀺𑀢𑀁 𑀯𑀫𑀦𑀬𑁄𑀕𑀁 𑀤𑀢𑁆𑀯𑀸 𑀯𑀫𑁂𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀫𑀥𑀼𑀲𑀓𑁆𑀓𑀭𑀸𑀤𑀬𑁄 𑀔𑀸𑀤𑀸𑀧𑁂𑀢𑁆𑀯𑀸 𑀅𑀭𑁄𑀕𑀁 𑀓𑀢𑁆𑀯𑀸 ‘‘𑀧𑀼𑀦 𑀏𑀯𑀭𑀽𑀧𑀁 𑀫𑀸 𑀅𑀓𑀸𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀦𑀸𑀫 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀢𑀯𑀺𑀲𑀧𑀭𑀺𑀪𑁄𑀕𑀲𑀤𑀺𑀲𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀡𑁆𑀟𑀺𑀢𑀥𑀼𑀢𑁆𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺𑀁, 𑀓𑀽𑀝𑀥𑀼𑀢𑁆𑀢𑁄 𑀧𑀦𑁂𑀢𑁆𑀣 𑀦 𑀓𑀣𑀻𑀬𑀢𑀺, 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣. 𑀬𑁄 𑀧𑀦 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀦 𑀧𑀜𑁆𑀜𑀸𑀬𑀢𑀺, 𑀲𑁄 𑀦 𑀓𑀣𑀻𑀬𑀢𑁂𑀯𑀸’’𑀢𑀺.

𑀮𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁯𑁨] 𑁨. 𑀫𑀳𑀸𑀲𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀉𑀓𑁆𑀓𑀝𑁆𑀞𑁂 𑀲𑀽𑀭𑀫𑀺𑀘𑁆𑀙𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀓𑁄𑀲𑀮𑀭𑀜𑁆𑀜𑁄 𑀇𑀢𑁆𑀣𑀺𑀬𑁄 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀢𑀣𑀸 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄, 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀢𑀸 𑀘. 𑀫𑀬𑀜𑁆𑀘 𑀇𑀫𑀁 𑀤𑀼𑀮𑁆𑀮𑀪𑀁 𑀔𑀡𑀲𑀫𑀯𑀸𑀬𑀁 𑀮𑀪𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀩𑀼𑀤𑁆𑀥𑀧𑀽𑀚𑀁 𑀯𑀸 𑀓𑀸𑀢𑀼𑀁 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀦 𑀮𑀪𑀸𑀫, 𑀫𑀜𑁆𑀚𑀽𑀲𑀸𑀬 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀯𑀲𑀸𑀫, 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫, 𑀢𑀢𑁄 𑀬𑀁 𑀲𑀓𑁆𑀔𑀺𑀲𑁆𑀲𑀸𑀫, 𑀢𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫, 𑀤𑀸𑀦𑀸𑀤𑀻𑀦𑀺 𑀘 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫. 𑀏𑀯𑀁 𑀦𑁄 𑀅𑀬𑀁 𑀔𑀡𑀧𑀝𑀺𑀮𑀸𑀪𑁄 𑀲𑀨𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀓𑀸𑀭𑀡𑀁 𑀓𑀣𑀬𑀺𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀉𑀬𑁆𑀬𑀸𑀦𑀧𑀸𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀉𑀬𑁆𑀬𑀸𑀦𑀁 𑀲𑁄𑀥𑁂𑀳𑀻’’𑀢𑀺 𑀆𑀳. 𑀉𑀬𑁆𑀬𑀸𑀦𑀧𑀸𑀮𑁄 𑀉𑀬𑁆𑀬𑀸𑀦𑀁 𑀲𑁄𑀥𑁂𑀦𑁆𑀢𑁄 𑀲𑀢𑁆𑀣𑀸𑀭𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀼𑀤𑁆𑀥𑀁, 𑀤𑁂𑀯, 𑀉𑀬𑁆𑀬𑀸𑀦𑀁, 𑀅𑀧𑀺𑀘𑁂𑀢𑁆𑀣 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀼, 𑀲𑀫𑁆𑀫, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀫𑁆𑀧𑀺 𑀲𑁄𑀲𑁆𑀲𑀸𑀫𑀸’’𑀢𑀺 𑀅𑀮𑀗𑁆𑀓𑀢𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀙𑀢𑁆𑀢𑀧𑀸𑀡𑀺 𑀦𑀸𑀫𑁂𑀓𑁄 𑀅𑀦𑀸𑀕𑀸𑀫𑀻 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀆𑀲𑀗𑁆𑀓𑀫𑀸𑀦𑁄 𑀫𑀼𑀳𑀼𑀢𑁆𑀢𑀁 𑀞𑀢𑁆𑀯𑀸 𑀧𑀼𑀦 ‘‘𑀲𑀘𑀸𑀬𑀁 𑀧𑀸𑀧𑀓𑁄 𑀪𑀯𑁂𑀬𑁆𑀬, 𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬, 𑀅𑀧𑀸𑀧𑀓𑁂𑀦 𑀇𑀫𑀺𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀉𑀧𑀸𑀲𑀓𑁄 𑀩𑀼𑀤𑁆𑀥𑀕𑀸𑀭𑀯𑁂𑀦 𑀭𑀜𑁆𑀜𑁄 𑀧𑀘𑁆𑀘𑀼𑀝𑁆𑀞𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀯𑀸 𑀦 𑀅𑀓𑀸𑀲𑀺, 𑀢𑁂𑀦𑀲𑁆𑀲 𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀢𑁆𑀢𑀫𑀦𑀪𑀸𑀯𑀁 𑀜𑀢𑁆𑀯𑀸 𑀉𑀧𑀸𑀲𑀓𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺 ‘‘𑀅𑀬𑀁, 𑀫𑀳𑀸𑀭𑀸𑀚, 𑀉𑀧𑀸𑀲𑀓𑁄 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄’’𑀢𑀺 𑀭𑀸𑀚𑀸 ‘‘𑀦 𑀇𑀫𑀺𑀦𑀸 𑀑𑀭𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀲𑁆𑀲 𑀲𑀢𑁆𑀣𑀸 𑀕𑀼𑀡𑀁 𑀯𑀡𑁆𑀡𑁂𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀉𑀧𑀸𑀲𑀓, 𑀯𑀤𑁂𑀬𑁆𑀬𑀸𑀲𑀺 𑀬𑁂𑀦 𑀢𑁂 𑀅𑀢𑁆𑀣𑁄’’𑀢𑀺 𑀆𑀳. 𑀉𑀧𑀸𑀲𑀓𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀏𑀓𑀤𑀺𑀯𑀲𑀁 𑀉𑀧𑀭𑀺𑀧𑀸𑀲𑀸𑀤𑁂 𑀫𑀳𑀸𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑁄 𑀢𑀁 𑀉𑀧𑀸𑀲𑀓𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑀁 𑀙𑀢𑁆𑀢𑀫𑀸𑀤𑀸𑀬 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀢𑁆𑀯𑀁 𑀓𑀺𑀭, 𑀉𑀧𑀸𑀲𑀓, 𑀩𑀳𑀼𑀲𑁆𑀲𑀼𑀢𑁄, 𑀅𑀫𑁆𑀳𑀸𑀓𑀜𑁆𑀘 𑀇𑀢𑁆𑀣𑀺𑀬𑁄 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀘𑁂𑀯 𑀉𑀕𑁆𑀕𑀳𑁂𑀢𑀼𑀓𑀸𑀫𑀸 𑀘, 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀢𑀸𑀲𑀁 𑀥𑀫𑁆𑀫𑀁 𑀯𑀸𑀘𑁂𑀬𑁆𑀬𑀸𑀲𑀻’’𑀢𑀺. ‘‘𑀤𑁂𑀯, 𑀕𑀺𑀳𑀻𑀦𑀁 𑀦𑀸𑀫 𑀭𑀸𑀚𑀦𑁆𑀢𑁂𑀧𑀼𑀭𑁂 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀸 𑀯𑀸𑀘𑁂𑀢𑀼𑀁 𑀯𑀸 𑀦𑀧𑁆𑀧𑀢𑀺𑀭𑀽𑀧𑀁, 𑀅𑀬𑁆𑀬𑀸𑀦𑀁 𑀏𑀯 𑀧𑀢𑀺𑀭𑀽𑀧’’𑀦𑁆𑀢𑀺. 𑀭𑀸𑀚𑀸 ‘‘𑀲𑀘𑁆𑀘𑀁 𑀏𑀲 𑀯𑀤𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀇𑀢𑁆𑀣𑀺𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀘 𑀥𑀫𑁆𑀫𑀯𑀸𑀘𑀦𑀢𑁆𑀣𑀸𑀬 𑀘 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀬𑀸𑀘𑀸𑀫𑀺, 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑁂𑀲𑀼 𑀓𑀢𑀭𑀁 𑀬𑀸𑀘𑀸𑀫𑀻’’𑀢𑀺 𑀆𑀳. 𑀢𑀸 𑀲𑀩𑁆𑀩𑀸𑀧𑀺 𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑀫𑁂𑀯 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀏𑀯𑀫𑀸𑀳 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀇𑀢𑁆𑀣𑀺𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀜𑁆𑀘 𑀉𑀕𑁆𑀕𑀡𑁆𑀳𑀺𑀢𑀼𑀜𑁆𑀘 𑀇𑀘𑁆𑀙𑀦𑁆𑀢𑀺, 𑀲𑀸𑀥𑀼 𑀯𑀢 𑀲𑀘𑁂 𑀣𑁂𑀭𑁄 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀘𑁂𑀯 𑀯𑀸𑀘𑁂𑀬𑁆𑀬 𑀘𑀸’’𑀢𑀺. 𑀲𑀢𑁆𑀣𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀣𑁂𑀭𑀁 𑀆𑀡𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀇𑀢𑁆𑀣𑀺𑀬𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺 𑀘𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑀺 𑀘.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀘𑀽𑀴𑀸𑀫𑀡𑀺 𑀦𑀝𑁆𑀞𑁄. 𑀭𑀸𑀚𑀸 𑀢𑀲𑁆𑀲 𑀦𑀝𑁆𑀞𑀪𑀸𑀯𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 ‘‘𑀲𑀩𑁆𑀩𑁂 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑁂 𑀫𑀦𑀼𑀲𑁆𑀲𑁂 𑀕𑀳𑁂𑀢𑁆𑀯𑀸 𑀘𑀽𑀴𑀸𑀫𑀡𑀺𑀁 𑀆𑀳𑀭𑀸𑀧𑁂𑀣𑀸’’𑀢𑀺. 𑀅𑀫𑀘𑁆𑀘𑀸 𑀫𑀸𑀢𑀼𑀕𑀸𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀘𑀽𑀴𑀸𑀫𑀡𑀺𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑀸 𑀅𑀤𑀺𑀲𑁆𑀯𑀸 𑀫𑀳𑀸𑀚𑀦𑀁 𑀓𑀺𑀮𑀫𑁂𑀦𑁆𑀢𑀺. 𑀢𑀁 𑀤𑀺𑀯𑀲𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀝𑁆𑀞𑁄. 𑀬𑀣𑀸 𑀢𑀸 𑀇𑀢𑁆𑀣𑀺𑀬𑁄 𑀧𑀼𑀩𑁆𑀩𑁂 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀳𑀝𑁆𑀞𑀢𑀼𑀝𑁆𑀞𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺 𑀘𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑀺 𑀘, 𑀢𑀣𑀸 𑀅𑀓𑀢𑁆𑀯𑀸 𑀲𑀩𑁆𑀩𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸𑀯 𑀅𑀳𑁂𑀲𑀼𑀁. 𑀢𑀢𑁄 𑀣𑁂𑀭𑁂𑀦 ‘‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀅𑀚𑁆𑀚 𑀏𑀯𑀭𑀽𑀧𑀸 𑀚𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀸 𑀏𑀯𑀫𑀸𑀳𑀁𑀲𑀼 ‘‘𑀪𑀦𑁆𑀢𑁂, 𑀭𑀜𑁆𑀜𑁄 𑀘𑀽𑀴𑀸𑀫𑀡𑀺𑀁 𑀧𑀭𑀺𑀬𑁂𑀲𑀸𑀫𑀸𑀢𑀺 𑀅𑀫𑀘𑁆𑀘𑀸 𑀫𑀸𑀢𑀼𑀕𑀸𑀫𑁂 𑀉𑀧𑀸𑀤𑀸𑀬 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑁂 𑀓𑀺𑀮𑀫𑁂𑀦𑁆𑀢𑀺, 𑀦 𑀚𑀸𑀦𑀸𑀫 𑀓𑀲𑁆𑀲 ‘𑀓𑀺𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀢𑁂𑀦𑀫𑁆𑀳 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸’’𑀢𑀺. 𑀣𑁂𑀭𑁄 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀢𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀫𑀡𑀺 𑀓𑀺𑀭 𑀢𑁂, 𑀫𑀳𑀸𑀭𑀸𑀚, 𑀦𑀝𑁆𑀞𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀅𑀲𑀓𑁆𑀔𑀺 𑀧𑀦 𑀢𑀁 𑀆𑀳𑀭𑀸𑀧𑁂𑀢𑀼’’𑀦𑁆𑀢𑀺. ‘‘𑀪𑀦𑁆𑀢𑁂, 𑀲𑀩𑁆𑀩𑀁 𑀅𑀦𑁆𑀢𑁄𑀚𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑁂𑀦𑁆𑀢𑁄𑀧𑀺 𑀦 𑀲𑀓𑁆𑀓𑁄𑀫𑀺 𑀆𑀳𑀭𑀸𑀧𑁂𑀢𑀼’’𑀦𑁆𑀢𑀺. ‘‘𑀫𑀳𑀸𑀭𑀸𑀚, 𑀫𑀳𑀸𑀚𑀦𑀁 𑀅𑀓𑀺𑀮𑀫𑁂𑀢𑁆𑀯𑀸𑀯 𑀆𑀳𑀭𑀡𑀽𑀧𑀸𑀬𑁄 𑀅𑀢𑁆𑀣𑀻’’𑀢𑀺. ‘‘𑀓𑀢𑀭𑁄, 𑀪𑀦𑁆𑀢𑁂’’𑀢𑀺? ‘‘𑀧𑀺𑀡𑁆𑀟𑀤𑀸𑀦𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑀭𑀁 𑀧𑀺𑀡𑁆𑀟𑀤𑀸𑀦𑀁, 𑀪𑀦𑁆𑀢𑁂’’𑀢𑀺? ‘‘𑀫𑀳𑀸𑀭𑀸𑀚, 𑀬𑀢𑁆𑀢𑀓𑁂𑀲𑀼 𑀆𑀲𑀗𑁆𑀓𑀸 𑀅𑀢𑁆𑀣𑀺, 𑀢𑁂 𑀕𑀳𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀏𑀓𑁂𑀓𑀁 𑀧𑀮𑀸𑀮𑀧𑀺𑀡𑁆𑀟𑀁 𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀯𑀸 𑀤𑀢𑁆𑀯𑀸 ‘𑀇𑀫𑀁 𑀧𑀘𑁆𑀘𑀽𑀲𑀓𑀸𑀮𑁂 𑀆𑀳𑀭𑀺𑀢𑁆𑀯𑀸 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀧𑀸𑀢𑁂𑀣𑀸’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑁂𑀦 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀢𑀲𑁆𑀫𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀢𑀺. 𑀲𑀘𑁂 𑀧𑀞𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀸𑀢𑁂𑀦𑁆𑀢𑀺, 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀏𑀯𑀁 𑀫𑀳𑀸𑀚𑀦𑁄 𑀘 𑀦 𑀓𑀺𑀮𑀫𑀺𑀲𑁆𑀲𑀢𑀺, 𑀫𑀡𑀺𑀜𑁆𑀘 𑀮𑀪𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀣𑁂𑀭𑁄 𑀅𑀕𑀫𑀸𑀲𑀺.

𑀭𑀸𑀚𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀬𑁄 𑀤𑀺𑀯𑀲𑁂 𑀤𑀸𑀧𑁂𑀲𑀺, 𑀦𑁂𑀯 𑀫𑀡𑀺𑀁 𑀆𑀳𑀭𑀺𑀁𑀲𑀼. 𑀣𑁂𑀭𑁄 𑀢𑀢𑀺𑀬𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀫𑀳𑀸𑀭𑀸𑀚, 𑀧𑀸𑀢𑀺𑀢𑁄 𑀫𑀡𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀧𑀸𑀢𑁂𑀦𑁆𑀢𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀫𑀳𑀸𑀢𑀮𑀲𑁆𑀫𑀺𑀁𑀬𑁂𑀯 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀫𑀳𑀸𑀘𑀸𑀝𑀺𑀁 𑀞𑀧𑀸𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ‘𑀲𑀩𑁆𑀩𑁂 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑀫𑀦𑀼𑀲𑁆𑀲𑀸 𑀘 𑀇𑀢𑁆𑀣𑀺𑀬𑁄 𑀘 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀏𑀓𑁂𑀓𑁄𑀯 𑀅𑀦𑁆𑀢𑁄𑀲𑀸𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀽’𑀢𑀺 𑀯𑀤𑁂𑀳𑀻’’𑀢𑀺 𑀣𑁂𑀭𑁄 𑀇𑀫𑀁 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀫𑀡𑀺𑀘𑁄𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀤𑀸𑀬 𑀫𑀡𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀑𑀲𑀓𑁆𑀓𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁, 𑀧𑀸𑀢𑁂𑀢𑀼𑀁 𑀤𑀸𑀦𑀺 𑀯𑀝𑁆𑀝𑀢𑀻’’𑀢𑀺 𑀫𑀡𑀺𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀆𑀤𑀸𑀬 𑀅𑀦𑁆𑀢𑁄𑀲𑀸𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀘𑀸𑀝𑀺𑀬𑀁 𑀧𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑀩𑁆𑀩𑁂𑀲𑀁 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀫𑀡𑀺𑀁 𑀅𑀤𑁆𑀤𑀲𑀁𑀲𑀼. 𑀭𑀸𑀚𑀸 ‘‘𑀣𑁂𑀭𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀁 𑀅𑀓𑀺𑀮𑀫𑁂𑀢𑁆𑀯𑀸𑀯 𑀫𑁂 𑀫𑀡𑀺 𑀮𑀤𑁆𑀥𑁄’’𑀢𑀺 𑀢𑀼𑀲𑁆𑀲𑀺, 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑀫𑀦𑀼𑀲𑁆𑀲𑀸𑀧𑀺 ‘‘𑀣𑁂𑀭𑀁 𑀦𑀺𑀲𑁆𑀲𑀸𑀬 𑀫𑀳𑀸𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀫𑁆𑀳𑀸’’𑀢𑀺 𑀢𑀼𑀲𑁆𑀲𑀺𑀁𑀲𑀼. ‘‘𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑁂𑀦 𑀭𑀜𑁆𑀜𑁄 𑀘𑀽𑀴𑀸𑀫𑀡𑀺 𑀮𑀤𑁆𑀥𑁄’’𑀢𑀺 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑁄 𑀲𑀓𑀮𑀦𑀕𑀭𑁂 𑀘𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀧𑀸𑀓𑀝𑁄 𑀚𑀸𑀢𑁄.

𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀕𑀼𑀡𑀁 𑀯𑀡𑁆𑀡𑀬𑀺𑀁𑀲𑀼 ‘‘𑀆𑀯𑀼𑀲𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀩𑀳𑀼𑀲𑁆𑀲𑀼𑀢𑀢𑀸𑀬 𑀧𑀡𑁆𑀟𑀺𑀘𑁆𑀘𑁂𑀦 𑀉𑀧𑀸𑀬𑀓𑀼𑀲𑀮𑀢𑀸𑀬 𑀫𑀳𑀸𑀚𑀦𑀁 𑀅𑀓𑀺𑀮𑀫𑁂𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀭𑀜𑁆𑀜𑁄 𑀫𑀡𑀺𑀁 𑀤𑀲𑁆𑀲𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀆𑀦𑀦𑁆𑀤𑁂𑀦𑁂𑀯 𑀧𑀭𑀳𑀢𑁆𑀣𑀕𑀢𑀁 𑀪𑀡𑁆𑀟𑀁 𑀤𑀲𑁆𑀲𑀺𑀢𑀁, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀫𑀳𑀸𑀚𑀦𑀁 𑀅𑀓𑀺𑀮𑀫𑁂𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀢𑀺𑀭𑀘𑁆𑀙𑀸𑀦𑀳𑀢𑁆𑀣𑀕𑀢𑀁 𑀪𑀡𑁆𑀟𑀁 𑀤𑀲𑁆𑀲𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀢𑀲𑁆𑀲𑁂𑀯 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑀦𑁆𑀢𑀭𑀸𑀦𑀺 𑀯𑀺𑀘𑀭𑀺𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁆𑀣𑀸𑀕𑀸𑀭𑀫𑁆𑀧𑀺 𑀧𑀓𑁆𑀓𑁄𑀲𑀺. 𑀇𑀢𑁆𑀣𑀺𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀸𑀤𑀻𑀦𑀺 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀼𑀕𑁆𑀕𑀧𑀺𑀝𑁆𑀞𑁂𑀲𑀼 𑀞𑀧𑁂𑀢𑁆𑀯𑀸 𑀤𑀸𑀲𑀺𑀬𑁄 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀁𑀲𑀼. 𑀅𑀣𑁂𑀓𑀸 𑀉𑀬𑁆𑀬𑀸𑀦𑀫𑀓𑁆𑀓𑀝𑀻 𑀲𑀸𑀔𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀸 𑀤𑁂𑀯𑀺𑀁 𑀧𑀺𑀴𑀦𑁆𑀥𑀦𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀼𑀕𑁆𑀕𑀧𑀺𑀝𑁆𑀞𑁂 𑀞𑀧𑀬𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀫𑀼𑀢𑁆𑀢𑀸𑀳𑀸𑀭𑀁 𑀧𑀺𑀴𑀦𑁆𑀥𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀤𑀸𑀲𑀺𑀬𑀸 𑀧𑀫𑀸𑀤𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺, 𑀤𑀸𑀲𑀻𑀧𑀺 𑀢𑀁 𑀭𑀓𑁆𑀔𑀫𑀸𑀦𑀸 𑀢𑀳𑀁 𑀢𑀳𑀁 𑀑𑀮𑁄𑀓𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬𑁂𑀯 𑀦𑀺𑀤𑁆𑀤𑀸𑀬𑀺𑀢𑀼𑀁 𑀆𑀭𑀪𑀺. 𑀫𑀓𑁆𑀓𑀝𑀻 𑀢𑀲𑁆𑀲𑀸 𑀧𑀫𑀸𑀤𑀪𑀸𑀯𑀁 𑀜𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀑𑀢𑀭𑀺𑀢𑁆𑀯𑀸 𑀫𑀳𑀸𑀫𑀼𑀢𑁆𑀢𑀸𑀳𑀸𑀭𑀁 𑀕𑀻𑀯𑀸𑀬 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑀸𑀲𑀁 𑀫𑀓𑁆𑀓𑀝𑀻𑀦𑀁 𑀤𑀲𑁆𑀲𑀦𑀪𑀬𑁂𑀦 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀲𑀼𑀲𑀺𑀭𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑀸 𑀯𑀺𑀬 𑀢𑀁 𑀭𑀓𑁆𑀔𑀫𑀸𑀦𑀸 𑀦𑀺𑀲𑀻𑀤𑀺.

𑀲𑀸𑀧𑀺 𑀔𑁄 𑀤𑀸𑀲𑀻 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀫𑀼𑀢𑁆𑀢𑀸𑀳𑀸𑀭𑀁 𑀅𑀧𑀲𑁆𑀲𑀦𑁆𑀢𑀻 𑀓𑀫𑁆𑀧𑀫𑀸𑀦𑀸 𑀅𑀜𑁆𑀜𑀁 𑀉𑀧𑀸𑀬𑀁 𑀅𑀤𑀺𑀲𑁆𑀯𑀸 ‘‘𑀧𑀼𑀭𑀺𑀲𑁄 𑀤𑁂𑀯𑀺𑀬𑀸 𑀫𑀼𑀢𑁆𑀢𑀸𑀳𑀸𑀭𑀁 𑀕𑀳𑁂𑀢𑁆𑀯𑀸 𑀧𑀮𑀸𑀢𑁄’’𑀢𑀺 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀆𑀭𑀓𑁆𑀔𑀫𑀦𑀼𑀲𑁆𑀲𑀸 𑀢𑀢𑁄 𑀢𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 ‘‘𑀘𑁄𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀧𑀼𑀭𑀺𑀲𑀸 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀘𑁄𑀭𑀁 𑀕𑀡𑁆𑀳𑀣, 𑀘𑁄𑀭𑀁 𑀕𑀡𑁆𑀳𑀣𑀸’’𑀢𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀺. 𑀅𑀣𑁂𑀓𑁄 𑀚𑀸𑀦𑀧𑀤𑁄 𑀩𑀮𑀺𑀓𑀸𑀭𑀓𑀧𑀼𑀭𑀺𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀫𑁆𑀧𑀫𑀸𑀦𑁄 𑀧𑀮𑀸𑀬𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 ‘‘𑀅𑀬𑀁 𑀘𑁄𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 ‘‘𑀅𑀭𑁂, 𑀤𑀼𑀝𑁆𑀞𑀘𑁄𑀭, 𑀏𑀯𑀁 𑀫𑀳𑀸𑀲𑀸𑀭𑀁 𑀦𑀸𑀫 𑀧𑀺𑀴𑀦𑁆𑀥𑀦𑀁 𑀅𑀯𑀳𑀭𑀺𑀲𑁆𑀲𑀲𑀻’’𑀢𑀺 𑀧𑀭𑀺𑀪𑀸𑀲𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 ‘𑀦 𑀕𑀡𑁆𑀳𑀸𑀫𑀻’𑀢𑀺 𑀯𑀓𑁆𑀔𑀸𑀫𑀺, 𑀅𑀚𑁆𑀚 𑀫𑁂 𑀚𑀻𑀯𑀺𑀢𑀁 𑀦𑀢𑁆𑀣𑀺, 𑀧𑁄𑀣𑁂𑀦𑁆𑀢𑀸𑀬𑁂𑀯 𑀫𑀁 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 𑀦’’𑀦𑁆𑀢𑀺. 𑀲𑁄 ‘‘𑀆𑀫, 𑀲𑀸𑀫𑀺, 𑀕𑀳𑀺𑀢𑀁 𑀫𑁂’’𑀢𑀺 𑀆𑀳. 𑀅𑀣 𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀭𑀸𑀚𑀸𑀧𑀺 𑀦𑀁 𑀧𑀼𑀘𑁆𑀙𑀺 ‘‘𑀕𑀳𑀺𑀢𑀁 𑀢𑁂 𑀫𑀳𑀸𑀲𑀸𑀭𑀧𑀺𑀴𑀦𑁆𑀥𑀦’’𑀦𑁆𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀇𑀤𑀸𑀦𑀺 𑀢𑀁 𑀓𑀳’’𑀦𑁆𑀢𑀺. ‘‘𑀤𑁂𑀯, 𑀫𑀬𑀸 𑀫𑀳𑀸𑀲𑀸𑀭𑀁 𑀦𑀸𑀫 𑀫𑀜𑁆𑀘𑀧𑀻𑀞𑀫𑁆𑀧𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀲𑁂𑀝𑁆𑀞𑀺 𑀧𑀦 𑀫𑀁 𑀫𑀳𑀸𑀲𑀸𑀭𑀧𑀺𑀴𑀦𑁆𑀥𑀦𑀁 𑀕𑀡𑁆𑀳𑀸𑀧𑁂𑀲𑀺, 𑀲𑁄𑀳𑀁 𑀢𑀁 𑀕𑀳𑁂𑀢𑁆𑀯𑀸𑀯 𑀢𑀲𑁆𑀲 𑀅𑀤𑀸𑀲𑀺𑀁, 𑀲𑁄 𑀦𑀁 𑀚𑀸𑀦𑀸𑀢𑀻’’𑀢𑀺.

𑀭𑀸𑀚𑀸 𑀲𑁂𑀝𑁆𑀞𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀕𑀳𑀺𑀢𑀁 𑀢𑁂 𑀇𑀫𑀲𑁆𑀲 𑀳𑀢𑁆𑀣𑀢𑁄 𑀫𑀳𑀸𑀲𑀸𑀭𑀧𑀺𑀴𑀦𑁆𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑀳𑀁 𑀢’’𑀦𑁆𑀢𑀺. ‘‘𑀧𑀼𑀭𑁄𑀳𑀺𑀢𑀲𑁆𑀲 𑀫𑁂 𑀤𑀺𑀦𑁆𑀦’’𑀦𑁆𑀢𑀺. 𑀧𑀼𑀭𑁄𑀳𑀺𑀢𑀫𑁆𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺, 𑀲𑁄𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀕𑀦𑁆𑀥𑀩𑁆𑀩𑀲𑁆𑀲 𑀫𑁂 𑀤𑀺𑀦𑁆𑀦’’𑀦𑁆𑀢𑀺 𑀆𑀳. 𑀢𑀫𑁆𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀼𑀭𑁄𑀳𑀺𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂 𑀫𑀳𑀸𑀲𑀸𑀭𑀧𑀺𑀴𑀦𑁆𑀥𑀦𑀁 𑀕𑀳𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑀳𑀁 𑀢’’𑀦𑁆𑀢𑀺. ‘‘𑀓𑀺𑀮𑁂𑀲𑀯𑀲𑁂𑀦 𑀫𑁂 𑀯𑀡𑁆𑀡𑀤𑀸𑀲𑀺𑀬𑀸 𑀤𑀺𑀦𑁆𑀦’’𑀦𑁆𑀢𑀺. 𑀢𑀫𑁆𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺, 𑀲𑀸 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀆𑀳. 𑀢𑁂 𑀧𑀜𑁆𑀘 𑀚𑀦𑁂 𑀧𑀼𑀘𑁆𑀙𑀦𑁆𑀢𑀸𑀦𑀜𑁆𑀜𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀢𑁄. 𑀭𑀸𑀚𑀸 ‘‘𑀇𑀤𑀸𑀦𑀺 𑀯𑀺𑀓𑀸𑀮𑁄 𑀚𑀸𑀢𑁄, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀧𑀜𑁆𑀘 𑀚𑀦𑁂 𑀅𑀫𑀘𑁆𑀘𑀸𑀦𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀺𑀴𑀦𑁆𑀥𑀦𑀁 𑀅𑀦𑁆𑀢𑁄𑀯𑀴𑀜𑁆𑀚𑁂 𑀦𑀝𑁆𑀞𑀁, 𑀅𑀬𑀜𑁆𑀘 𑀕𑀳𑀧𑀢𑀺𑀓𑁄 𑀩𑀳𑀺𑀯𑀴𑀜𑁆𑀚𑁄, 𑀤𑁆𑀯𑀸𑀭𑁂𑀧𑀺 𑀩𑀮𑀯𑀸𑀭𑀓𑁆𑀔𑁄, 𑀢𑀲𑁆𑀫𑀸 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑀸𑀦𑀫𑁆𑀧𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀦 𑀲𑀓𑁆𑀓𑀸. 𑀏𑀯𑀁 𑀦𑁂𑀯 𑀩𑀳𑀺𑀯𑀴𑀜𑁆𑀚𑀦𑀓𑀸𑀦𑀁, 𑀦 𑀅𑀦𑁆𑀢𑁄, 𑀉𑀬𑁆𑀬𑀸𑀦𑁂 𑀯𑀴𑀜𑁆𑀚𑀦𑀓𑀸𑀦𑀁 𑀕𑀳𑀡𑀽𑀧𑀸𑀬𑁄 𑀤𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂𑀦 ‘𑀲𑁂𑀝𑁆𑀞𑀺𑀲𑁆𑀲 𑀫𑁂 𑀤𑀺𑀦𑁆𑀦’𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 𑀅𑀢𑁆𑀢𑀦𑁄 𑀫𑁄𑀓𑁆𑀔𑀢𑁆𑀣𑀸𑀬 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀲𑁂𑀝𑁆𑀞𑀺𑀦𑀸𑀧𑀺 ‘𑀧𑀼𑀭𑁄𑀳𑀺𑀢𑀲𑁆𑀲 𑀫𑁂 𑀤𑀺𑀦𑁆𑀦’𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 ‘𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀢𑁆𑀣𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀧𑀼𑀭𑁄𑀳𑀺𑀢𑁂𑀦𑀸𑀧𑀺 ‘𑀕𑀦𑁆𑀥𑀩𑁆𑀩𑀲𑁆𑀲 𑀫𑁂 𑀤𑀺𑀦𑁆𑀦’𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 ‘𑀩𑀦𑁆𑀥𑀦𑀸𑀕𑀸𑀭𑁂 𑀕𑀦𑁆𑀥𑀩𑁆𑀩𑀁 𑀦𑀺𑀲𑁆𑀲𑀸𑀬 𑀲𑀼𑀔𑁂𑀦 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀕𑀦𑁆𑀥𑀩𑁆𑀩𑁂𑀦𑀸𑀧𑀺 ‘𑀯𑀡𑁆𑀡𑀤𑀸𑀲𑀺𑀬𑀸 𑀫𑁂 𑀤𑀺𑀦𑁆𑀦’𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 ‘𑀏𑀓𑀦𑁆𑀢𑁂𑀦 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀇𑀫𑁂𑀳𑀺 𑀧𑀜𑁆𑀘𑀳𑀺𑀧𑀺 𑀘𑁄𑀭𑁂𑀳𑀺 𑀦 𑀪𑀯𑀺𑀢𑀩𑁆𑀩𑀁, 𑀉𑀬𑁆𑀬𑀸𑀦𑁂 𑀫𑀓𑁆𑀓𑀝𑀸 𑀩𑀳𑀽, 𑀧𑀺𑀴𑀦𑁆𑀥𑀦𑁂𑀦 𑀏𑀓𑀺𑀲𑁆𑀲𑀸 𑀫𑀓𑁆𑀓𑀝𑀺𑀬𑀸 𑀳𑀢𑁆𑀣𑁂 𑀆𑀭𑀼𑀴𑁆𑀳𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀘𑁄𑀭𑁂 𑀅𑀫𑁆𑀳𑀸𑀓𑀁 𑀦𑀺𑀬𑁆𑀬𑀸𑀤𑁂𑀣, 𑀫𑀬𑀁 𑀢𑀁 𑀓𑀺𑀘𑁆𑀘𑀁 𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀼, 𑀧𑀡𑁆𑀟𑀺𑀢, 𑀲𑁄𑀥𑁂𑀳𑀻’’𑀢𑀺 𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀤𑀸𑀲𑀧𑀼𑀭𑀺𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂 𑀧𑀜𑁆𑀘 𑀚𑀦𑁂 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀲𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀆𑀭𑀓𑁆𑀔𑀁 𑀓𑀢𑁆𑀯𑀸 𑀓𑀡𑁆𑀡𑀁 𑀤𑀢𑁆𑀯𑀸 ‘‘𑀬𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀓𑀣𑁂𑀦𑁆𑀢𑀺, 𑀢𑀁 𑀫𑀬𑁆𑀳𑀁 𑀆𑀭𑁄𑀘𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀯𑁂𑀮𑀸𑀬 𑀲𑁂𑀝𑁆𑀞𑀺 𑀢𑀁 𑀕𑀳𑀧𑀢𑀺𑀓𑀁 𑀆𑀳 𑁋 ‘‘𑀅𑀭𑁂, 𑀤𑀼𑀝𑁆𑀞𑀕𑀳𑀧𑀢𑀺, 𑀢𑀬𑀸 𑀅𑀳𑀁, 𑀫𑀬𑀸 𑀯𑀸 𑀢𑁆𑀯𑀁 𑀓𑀳𑀁 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑀤𑀸 𑀢𑁂 𑀫𑀬𑁆𑀳𑀁 𑀧𑀺𑀴𑀦𑁆𑀥𑀦𑀁 𑀤𑀺𑀦𑁆𑀦’’𑀦𑁆𑀢𑀺 𑀆𑀳. 𑀲𑁄 ‘‘𑀲𑀸𑀫𑀺 𑀫𑀳𑀸𑀲𑁂𑀝𑁆𑀞𑀺, 𑀅𑀳𑀁 𑀫𑀳𑀸𑀲𑀸𑀭𑀁 𑀦𑀸𑀫 𑀭𑀼𑀓𑁆𑀔𑀲𑀸𑀭𑀧𑀸𑀤𑀓𑀁 𑀫𑀜𑁆𑀘𑀧𑀻𑀞𑀫𑁆𑀧𑀺 𑀦 𑀚𑀸𑀦𑀸𑀫𑀺, ‘𑀢𑀁 𑀦𑀺𑀲𑁆𑀲𑀸𑀬 𑀧𑀦 𑀫𑁄𑀓𑁆𑀔𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀅𑀯𑀘𑀁, 𑀫𑀸 𑀫𑁂 𑀓𑀼𑀚𑁆𑀛, 𑀲𑀸𑀫𑀻’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄𑀧𑀺 𑀲𑁂𑀝𑁆𑀞𑀺𑀁 𑀆𑀳 ‘‘𑀫𑀳𑀸𑀲𑁂𑀝𑁆𑀞𑀺, 𑀢𑁆𑀯𑀁 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀤𑀺𑀦𑁆𑀦𑀓𑀫𑁂𑀯 𑀫𑀬𑁆𑀳𑀁 𑀓𑀣𑀁 𑀅𑀤𑀸𑀲𑀻’’𑀢𑀺? ‘‘𑀫𑀬𑀫𑁆𑀧𑀺 𑀤𑁆𑀯𑁂 𑀇𑀲𑁆𑀲𑀭𑀸, 𑀅𑀫𑁆𑀳𑀸𑀓𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀞𑀺𑀢𑀓𑀸𑀮𑁂 𑀓𑀫𑁆𑀫𑀁 𑀔𑀺𑀧𑁆𑀧𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀓𑀣𑁂𑀲𑀺𑀦𑁆𑀢𑀺. 𑀕𑀦𑁆𑀥𑀩𑁆𑀩𑁄𑀧𑀺 𑀧𑀼𑀭𑁄𑀳𑀺𑀢𑀁 𑀆𑀳 ‘‘𑀩𑁆𑀭𑀸𑀳𑁆𑀫𑀡, 𑀓𑀤𑀸 𑀢𑀬𑀸 𑀫𑀬𑁆𑀳𑀁 𑀧𑀺𑀴𑀦𑁆𑀥𑀦𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀅𑀳𑀁 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑀝𑁆𑀞𑀸𑀦𑁂 𑀲𑀼𑀔𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀣𑁂𑀲𑀺𑀦𑁆𑀢𑀺. 𑀯𑀡𑁆𑀡𑀤𑀸𑀲𑀻𑀧𑀺 𑀕𑀦𑁆𑀥𑀩𑁆𑀩𑀁 𑀆𑀳 ‘‘𑀅𑀭𑁂 𑀤𑀼𑀝𑁆𑀞𑀕𑀦𑁆𑀥𑀩𑁆𑀩, 𑀅𑀳𑀁 𑀓𑀤𑀸 𑀢𑀯 𑀲𑀦𑁆𑀢𑀺𑀓𑀁 𑀕𑀢𑀧𑀼𑀩𑁆𑀩𑀸, 𑀢𑁆𑀯𑀁 𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀧𑀼𑀩𑁆𑀩𑁄, 𑀓𑀤𑀸 𑀢𑁂 𑀫𑀬𑁆𑀳𑀁 𑀧𑀺𑀴𑀦𑁆𑀥𑀦𑀁 𑀤𑀺𑀦𑁆𑀦’’𑀦𑁆𑀢𑀺? 𑀪𑀕𑀺𑀦𑀺 𑀓𑀺𑀁𑀓𑀸𑀭𑀡𑀸 𑀓𑀼𑀚𑁆𑀛𑀲𑀺, ‘‘𑀅𑀫𑁆𑀳𑁂𑀲𑀼 𑀧𑀜𑁆𑀘𑀲𑀼 𑀏𑀓𑀢𑁄 𑀯𑀲𑀦𑁆𑀢𑁂𑀲𑀼 𑀖𑀭𑀸𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑀸 𑀲𑀼𑀔𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀓𑀣𑁂𑀲𑀺𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀬𑁄𑀚𑀺𑀢𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀢𑀣𑀢𑁄 𑀅𑀘𑁄𑀭𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀓𑁆𑀓𑀝𑀺𑀬𑀸 𑀕𑀳𑀺𑀢𑀧𑀺𑀴𑀦𑁆𑀥𑀦𑀁 𑀉𑀧𑀸𑀬𑁂𑀦𑁂𑀯 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀕𑁂𑀡𑁆𑀟𑀼𑀫𑀬𑀸𑀦𑀺 𑀩𑀳𑀽𑀦𑀺 𑀧𑀺𑀴𑀦𑁆𑀥𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀫𑀓𑁆𑀓𑀝𑀺𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀕𑀻𑀯𑀸𑀲𑀼 𑀕𑁂𑀡𑁆𑀟𑀼𑀧𑀺𑀴𑀦𑁆𑀥𑀦𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀢𑀭𑀸 𑀫𑀓𑁆𑀓𑀝𑀻 𑀧𑀺𑀴𑀦𑁆𑀥𑀦𑀁 𑀭𑀓𑁆𑀔𑀫𑀸𑀦𑀸 𑀉𑀬𑁆𑀬𑀸𑀦𑁂 𑀏𑀯 𑀦𑀺𑀲𑀻𑀤𑀺.

𑀩𑁄𑀥𑀺𑀲𑀢𑁆𑀢𑁄 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀉𑀬𑁆𑀬𑀸𑀦𑁂 𑀲𑀩𑁆𑀩𑀸 𑀫𑀓𑁆𑀓𑀝𑀺𑀬𑁄 𑀉𑀧𑀥𑀸𑀭𑁂𑀣, 𑀬𑀲𑁆𑀲𑀸 𑀢𑀁 𑀧𑀺𑀴𑀦𑁆𑀥𑀦𑀁 𑀧𑀲𑁆𑀲𑀣, 𑀢𑀁 𑀉𑀢𑁆𑀢𑀸𑀲𑁂𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀕𑀡𑁆𑀳𑀣𑀸’’𑀢𑀺. 𑀢𑀸𑀧𑀺 𑀔𑁄 𑀫𑀓𑁆𑀓𑀝𑀺𑀬𑁄 ‘‘𑀧𑀺𑀴𑀦𑁆𑀥𑀦𑀁 𑀦𑁄 𑀮𑀤𑁆𑀥’’𑀦𑁆𑀢𑀺 𑀢𑀼𑀝𑁆𑀞𑀧𑀳𑀝𑁆𑀞𑀸 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑀺𑀬𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀲𑁆𑀲 𑀅𑀫𑁆𑀳𑀸𑀓𑀁 𑀧𑀺𑀴𑀦𑁆𑀥𑀦’’𑀦𑁆𑀢𑀺 𑀆𑀳𑀁𑀲𑀼. 𑀲𑀸 𑀫𑀓𑁆𑀓𑀝𑀻 𑀅𑀲𑀳𑀫𑀸𑀦𑀸 ‘‘𑀓𑀺𑀁 𑀇𑀫𑀺𑀦𑀸 𑀕𑁂𑀡𑁆𑀟𑀼𑀧𑀺𑀴𑀦𑁆𑀥𑀦𑁂𑀦𑀸’’𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀢𑁂 𑀧𑀼𑀭𑀺𑀲𑀸 𑀤𑀺𑀲𑁆𑀯𑀸 𑀧𑀺𑀴𑀦𑁆𑀥𑀦𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀤𑀁𑀲𑀼. 𑀲𑁄 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤𑀁 𑀢𑁂 𑀤𑁂𑀯 𑀧𑀺𑀴𑀦𑁆𑀥𑀦𑀁, 𑀢𑁂 𑀧𑀜𑁆𑀘𑀧𑀺 𑀅𑀘𑁄𑀭𑀸, 𑀇𑀤𑀁 𑀧𑀦 𑀉𑀬𑁆𑀬𑀸𑀦𑁂 𑀫𑀓𑁆𑀓𑀝𑀺𑀬𑀸 𑀆𑀪𑀢’’𑀦𑁆𑀢𑀺 𑀆𑀳. ‘‘𑀓𑀣𑀁 𑀧𑀦 𑀢𑁂, 𑀧𑀡𑁆𑀟𑀺𑀢, 𑀫𑀓𑁆𑀓𑀝𑀺𑀬𑀸 𑀳𑀢𑁆𑀣𑀁 𑀆𑀭𑀼𑀴𑁆𑀳𑀪𑀸𑀯𑁄 𑀜𑀸𑀢𑁄, 𑀓𑀣𑀁 𑀢𑁂 𑀕𑀳𑀺𑀢’’𑀦𑁆𑀢𑀺? 𑀲𑁄 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀲𑀗𑁆𑀕𑀸𑀫𑀲𑀻𑀲𑀸𑀤𑀻𑀲𑀼 𑀦𑀸𑀫 𑀲𑀽𑀭𑀸𑀤𑀬𑁄 𑀇𑀘𑁆𑀙𑀺𑀢𑀩𑁆𑀩𑀸 𑀳𑁄𑀦𑁆𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁨. ‘‘𑀉𑀓𑁆𑀓𑀝𑁆𑀞𑁂 𑀲𑀽𑀭𑀫𑀺𑀘𑁆𑀙𑀦𑁆𑀢𑀺, 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢’’𑀦𑁆𑀢𑀺.

𑀢𑀢𑁆𑀣 𑀉𑀓𑁆𑀓𑀝𑁆𑀞𑁂𑀢𑀺 𑀉𑀧𑀓𑀝𑁆𑀞𑁂, 𑀉𑀪𑀢𑁄𑀩𑁆𑀬𑀽𑀴𑁆𑀳𑁂 𑀲𑀗𑁆𑀕𑀸𑀫𑁂 𑀲𑀫𑁆𑀧𑀳𑀸𑀭𑁂 𑀯𑀢𑁆𑀢𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀲𑀽𑀭𑀫𑀺𑀘𑁆𑀙𑀦𑁆𑀢𑀻𑀢𑀺 𑀅𑀲𑀦𑀺𑀬𑀸𑀧𑀺 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬 𑀅𑀧𑀮𑀸𑀬𑀺𑀦𑀁 𑀲𑀽𑀭𑀁 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀏𑀯𑀭𑀽𑀧𑁄 𑀲𑀗𑁆𑀕𑀸𑀫𑀬𑁄𑀥𑁄 𑀧𑀢𑁆𑀣𑁂𑀢𑀩𑁆𑀩𑁄 𑀳𑁄𑀢𑀺. 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀦𑁆𑀢𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀫𑁆𑀫𑀦𑁆𑀢𑀦𑀓𑀸𑀮𑁂 𑀉𑀧𑁆𑀧𑀦𑁆𑀦𑁂 𑀫𑀦𑁆𑀢𑀻𑀲𑀼 𑀬𑁄 𑀅𑀓𑀼𑀢𑀽𑀳𑀮𑁄 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀫𑀦𑁆𑀢𑀁 𑀦 𑀪𑀺𑀦𑁆𑀤𑀢𑀺, 𑀢𑀁 𑀇𑀘𑁆𑀙𑀦𑁆𑀢𑀺, 𑀢𑀸𑀤𑀺𑀲𑁄 𑀢𑁂𑀲𑀼 𑀞𑀸𑀦𑁂𑀲𑀼 𑀧𑀢𑁆𑀣𑁂𑀢𑀩𑁆𑀩𑁄 𑀳𑁄𑀢𑀺. 𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀻𑀢𑀺 𑀫𑀥𑀼𑀭𑁂 𑀅𑀦𑁆𑀦𑀧𑀸𑀦𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀲𑀳𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀺𑀬𑀧𑀼𑀕𑁆𑀕𑀮𑀁 𑀧𑀢𑁆𑀣𑁂𑀦𑁆𑀢𑀺, 𑀢𑀸𑀤𑀺𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀢𑁆𑀣𑁂𑀢𑀩𑁆𑀩𑁄 𑀳𑁄𑀢𑀺. 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀦𑁆𑀢𑀺 𑀅𑀢𑁆𑀣𑀕𑀫𑁆𑀪𑀻𑀭𑁂 𑀥𑀫𑁆𑀫𑀕𑀫𑁆𑀪𑀻𑀭𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑁂 𑀯𑀸 𑀧𑀜𑁆𑀳𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀧𑀡𑁆𑀟𑀺𑀢𑀁 𑀯𑀺𑀘𑀓𑁆𑀔𑀡𑀁 𑀇𑀘𑁆𑀙𑀦𑁆𑀢𑀺. 𑀢𑀣𑀸𑀭𑀽𑀧𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀢𑁆𑀣𑁂𑀢𑀩𑁆𑀩𑁄 𑀳𑁄𑀢𑀻𑀢𑀺.

𑀏𑀯𑀁 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀯𑀡𑁆𑀡𑁂𑀢𑁆𑀯𑀸 𑀣𑁄𑀫𑁂𑀢𑁆𑀯𑀸 𑀖𑀦𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀫𑀳𑀸𑀫𑁂𑀖𑁄 𑀯𑀺𑀬 𑀲𑀢𑁆𑀢𑀸𑀳𑀺 𑀭𑀢𑀦𑁂𑀳𑀺 𑀧𑀽𑀚𑁂𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀲𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁯𑁩] 𑁩. 𑀯𑀺𑀲𑁆𑀲𑀸𑀲𑀪𑁄𑀚𑀦𑀚𑀸𑀢𑀓𑀯𑀡𑁆𑀡𑀦𑀸

𑀦 𑀯𑀺𑀲𑁆𑀲𑀲𑁂 𑀅𑀯𑀺𑀲𑁆𑀲𑀢𑁆𑀣𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑁆𑀲𑀸𑀲𑀪𑁄𑀚𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽 ‘‘𑀫𑀸𑀢𑀭𑀸 𑀦𑁄 𑀤𑀺𑀦𑁆𑀦𑀁, 𑀧𑀺𑀢𑀭𑀸 𑀦𑁄 𑀤𑀺𑀦𑁆𑀦𑀁, 𑀪𑀸𑀢𑀭𑀸, 𑀪𑀕𑀺𑀦𑀺𑀬𑀸, 𑀘𑀽𑀴𑀫𑀸𑀢𑀭𑀸, 𑀘𑀽𑀴𑀧𑀺𑀢𑀭𑀸, 𑀫𑀸𑀢𑀼𑀮𑁂𑀦, 𑀫𑀸𑀢𑀼𑀮𑀸𑀦𑀺𑀬𑀸 𑀤𑀺𑀦𑁆𑀦𑀁. 𑀅𑀫𑁆𑀳𑀸𑀓𑀁 𑀕𑀺𑀳𑀺𑀓𑀸𑀮𑁂𑀧𑀺 𑀪𑀺𑀓𑁆𑀔𑀼𑀓𑀸𑀮𑁂𑀧𑀺 𑀏𑀢𑁂 𑀤𑀸𑀢𑀼𑀁 𑀬𑀼𑀢𑁆𑀢𑀭𑀽𑀧𑀸𑀯𑀸’’𑀢𑀺 𑀜𑀸𑀢𑀻𑀳𑀺 𑀤𑀺𑀦𑁆𑀦𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀯𑀺𑀲𑁆𑀲𑀢𑁆𑀣𑀸 𑀳𑀼𑀢𑁆𑀯𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀫𑀬𑀸 𑀥𑀫𑁆𑀫𑀤𑁂𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀜𑀸𑀢𑀻𑀳𑀺𑀧𑀺 𑀅𑀜𑁆𑀜𑀸𑀢𑀻𑀳𑀺𑀧𑀺 𑀤𑀺𑀦𑁆𑀦𑀓𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀯 𑀧𑀭𑀺𑀪𑁄𑀕𑁄 𑀓𑀸𑀢𑀩𑁆𑀩𑁄. 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀳𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀪𑀺𑀓𑁆𑀔𑀼 𑀬𑀓𑁆𑀔𑀧𑁂𑀢𑀅𑀢𑁆𑀢𑀪𑀸𑀯𑀢𑁄 𑀦 𑀫𑀼𑀘𑁆𑀘𑀢𑀺, 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀦𑀸𑀫𑁂𑀲 𑀯𑀺𑀲𑀧𑀭𑀺𑀪𑁄𑀕𑀲𑀤𑀺𑀲𑁄. 𑀯𑀺𑀲𑀜𑁆𑀳𑀺 𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀓𑀫𑁆𑀧𑀺 𑀅𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀓𑀫𑁆𑀧𑀺 𑀫𑀸𑀭𑁂𑀢𑀺𑀬𑁂𑀯. 𑀧𑀼𑀩𑁆𑀩𑁂𑀧𑀺 𑀯𑀺𑀲𑁆𑀲𑀸𑀲𑁂𑀦 𑀤𑀺𑀦𑁆𑀦𑀁 𑀯𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲𑁂𑀓𑁄 𑀕𑁄𑀧𑀸𑀮𑀓𑁄 𑀓𑀺𑀝𑁆𑀞𑀲𑀫𑁆𑀩𑀸𑀥𑀲𑀫𑀬𑁂 𑀕𑀸𑀯𑁄 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀕𑁄𑀲𑀸𑀮𑀁 𑀓𑀢𑁆𑀯𑀸 𑀭𑀓𑁆𑀔𑀦𑁆𑀢𑁄 𑀯𑀲𑀢𑀺. 𑀲𑁂𑀝𑁆𑀞𑀺𑀦𑁄 𑀘 𑀓𑀸𑀮𑁂𑀦 𑀓𑀸𑀮𑀁 𑀕𑁄𑀭𑀲𑀁 𑀆𑀳𑀭𑀢𑀺. 𑀅𑀣𑀲𑁆𑀲 𑀕𑁄𑀲𑀸𑀮𑀸𑀬 𑀅𑀯𑀺𑀤𑀽𑀭𑁂 𑀲𑀻𑀳𑁄 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀕𑀸𑀯𑀻𑀦𑀁 𑀲𑀻𑀳𑀲𑀦𑁆𑀢𑀸𑀲𑁂𑀦 𑀫𑀺𑀮𑀸𑀢𑀸𑀦𑀁 𑀔𑀻𑀭𑀁 𑀫𑀦𑁆𑀤𑀁 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀲𑀧𑁆𑀧𑀺𑀁 𑀆𑀤𑀸𑀬 𑀆𑀕𑀢𑀁 𑀲𑁂𑀝𑁆𑀞𑀺 𑀧𑀼𑀘𑁆𑀙𑀺 ‘‘𑀓𑀺𑀁 𑀦𑀼 𑀔𑁄, 𑀲𑀫𑁆𑀫 𑀕𑁄𑀧𑀸𑀮𑀓, 𑀫𑀦𑁆𑀤𑀁 𑀲𑀧𑁆𑀧𑀻’’𑀢𑀺? 𑀲𑁄 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺. ‘‘𑀅𑀢𑁆𑀣𑀺 𑀧𑀦, 𑀲𑀫𑁆𑀫, 𑀢𑀲𑁆𑀲 𑀲𑀻𑀳𑀲𑁆𑀲 𑀓𑀢𑁆𑀣𑀘𑀺 𑀧𑀝𑀺𑀩𑀦𑁆𑀥𑁄’’𑀢𑀺? ‘‘𑀅𑀢𑁆𑀣𑀺𑀲𑁆𑀲 𑀲𑀸𑀫𑀺, 𑀏𑀓𑀸𑀬 𑀫𑀺𑀕𑀫𑀸𑀢𑀼𑀓𑀸𑀬 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄’’𑀢𑀺. ‘‘𑀲𑀓𑁆𑀓𑀸 𑀧𑀦 𑀢𑀁 𑀕𑀸𑀳𑀸𑀧𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀦𑀮𑀸𑀝𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑁂 𑀮𑁄𑀫𑀸𑀦𑀺 𑀯𑀺𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀭𑀚𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀢𑀁 𑀫𑀺𑀕𑀫𑀸𑀢𑀼𑀓𑀁 𑀯𑀺𑀲𑁆𑀲𑀚𑁆𑀚𑁂𑀳𑀺, 𑀲𑁄 𑀢𑀲𑁆𑀲𑀸 𑀲𑀺𑀦𑁂𑀳𑁂𑀦 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀘𑀫𑁆𑀫𑀦𑀔𑀤𑀸𑀞𑀸 𑀘𑁂𑀯 𑀯𑀲𑀜𑁆𑀘 𑀫𑀁𑀲𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀳𑀮𑀸𑀳𑀮𑀯𑀺𑀲𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀲𑁄 𑀕𑁄𑀧𑀸𑀮𑀓𑁄 𑀚𑀸𑀮𑀁 𑀔𑀺𑀧𑀺𑀢𑁆𑀯𑀸 𑀉𑀧𑀸𑀬𑁂𑀦 𑀢𑀁 𑀫𑀺𑀕𑀫𑀸𑀢𑀼𑀓𑀁 𑀕𑀡𑁆𑀳𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀲𑀻𑀳𑁄 𑀢𑀁 𑀤𑀺𑀲𑁆𑀯𑀸𑀯 𑀩𑀮𑀯𑀲𑀺𑀦𑁂𑀳𑁂𑀦 𑀢𑀲𑁆𑀲𑀸 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀕𑁄𑀧𑀸𑀮𑀓𑁄𑀧𑀺 𑀘𑀫𑁆𑀫𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀧𑀭𑁂𑀲𑀼 𑀲𑀺𑀦𑁂𑀳𑁄 𑀦𑀸𑀫 𑀦 𑀓𑀸𑀢𑀩𑁆𑀩𑁄, 𑀏𑀯𑀁 𑀩𑀮𑀲𑀫𑁆𑀧𑀦𑁆𑀦𑁄𑀧𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀓𑀺𑀮𑁂𑀲𑀯𑀲𑁂𑀦 𑀲𑀁𑀲𑀕𑁆𑀕𑀁 𑀦𑀺𑀲𑁆𑀲𑀸𑀬 𑀫𑀺𑀕𑀫𑀸𑀢𑀼𑀓𑀸𑀬 𑀲𑀭𑀻𑀭𑀁 𑀮𑁂𑀳𑀦𑁆𑀢𑁄 𑀯𑀺𑀲𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁩. ‘‘𑀦 𑀯𑀺𑀲𑁆𑀲𑀲𑁂 𑀅𑀯𑀺𑀲𑁆𑀲𑀢𑁆𑀣𑁂, 𑀯𑀺𑀲𑁆𑀲𑀢𑁆𑀣𑁂𑀧𑀺 𑀦 𑀯𑀺𑀲𑁆𑀲𑀲𑁂;

𑀯𑀺𑀲𑁆𑀲𑀸𑀲𑀸 𑀪𑀬𑀫𑀦𑁆𑀯𑁂𑀢𑀺, 𑀲𑀻𑀳𑀁𑀯 𑀫𑀺𑀕𑀫𑀸𑀢𑀼𑀓𑀸’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀧𑀼𑀩𑁆𑀩𑁂 𑀲𑀪𑀬𑁄 𑀅𑀢𑁆𑀢𑀦𑀺 𑀅𑀯𑀺𑀲𑁆𑀲𑀢𑁆𑀣𑁄 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀅𑀯𑀺𑀲𑁆𑀲𑀢𑁆𑀣𑁂, 𑀬𑁄 𑀧𑀼𑀩𑁆𑀩𑁂𑀧𑀺 𑀦𑀺𑀩𑁆𑀪𑀬𑁄 𑀅𑀢𑁆𑀢𑀦𑀺 𑀯𑀺𑀲𑁆𑀲𑀸𑀲𑀺𑀓𑁄𑀬𑁂𑀯, 𑀢𑀲𑁆𑀫𑀺𑀁 𑀯𑀺𑀲𑁆𑀲𑀢𑁆𑀣𑁂𑀧𑀺 𑀦 𑀯𑀺𑀲𑁆𑀲𑀲𑁂, 𑀦𑁂𑀯 𑀯𑀺𑀲𑁆𑀲𑀸𑀲𑀁 𑀓𑀭𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀯𑀺𑀲𑁆𑀲𑀸𑀲𑀸 𑀪𑀬𑀫𑀦𑁆𑀯𑁂𑀢𑀺, 𑀬𑁄 𑀳𑀺 𑀫𑀺𑀢𑁆𑀢𑁂𑀧𑀺 𑀅𑀫𑀺𑀢𑁆𑀢𑁂𑀧𑀺 𑀯𑀺𑀲𑁆𑀲𑀸𑀲𑁄, 𑀢𑀢𑁄 𑀪𑀬𑀫𑁂𑀯 𑀆𑀕𑀘𑁆𑀙𑀢𑀺. 𑀓𑀣𑀁? 𑀲𑀻𑀳𑀁𑀯 𑀫𑀺𑀕𑀫𑀸𑀢𑀼𑀓𑀸, 𑀬𑀣𑀸 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀢𑀯𑀺𑀲𑁆𑀲𑀸𑀲𑀸𑀬 𑀫𑀺𑀕𑀫𑀸𑀢𑀼𑀓𑀸𑀬 𑀲𑀦𑁆𑀢𑀺𑀓𑀸 𑀲𑀻𑀳𑀲𑁆𑀲 𑀪𑀬𑀁 𑀅𑀦𑁆𑀯𑁂𑀢𑀺, 𑀉𑀧𑀕𑀢𑀁 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀯𑀺𑀲𑁆𑀲𑀸𑀲𑀯𑀲𑁂𑀦 𑀲𑀻𑀳𑀁 𑀫𑀺𑀕𑀫𑀸𑀢𑀼𑀓𑀸 𑀅𑀦𑁆𑀯𑁂𑀢𑀸 𑀉𑀧𑀕𑀢𑀸𑀢𑀺𑀧𑀺 𑀅𑀢𑁆𑀣𑁄.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀸𑀲𑁂𑀝𑁆𑀞𑀺 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀲𑁆𑀲𑀸𑀲𑀪𑁄𑀚𑀦𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁯𑁪] 𑁪. 𑀮𑁄𑀫𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀲𑁄𑀢𑀢𑁆𑀢𑁄 𑀲𑁄𑀲𑀺𑀦𑁆𑀦𑁄 𑀘𑁂𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀝𑀺𑀓𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀼𑀦𑀓𑁆𑀔𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀼𑀦𑀓𑁆𑀔𑀢𑁆𑀢𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑁄 𑀳𑀼𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀺𑀘𑀭𑀫𑀸𑀦𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑀲𑁆𑀲 𑀥𑀫𑁆𑀫𑀁 𑀭𑁄𑀘𑁂𑀦𑁆𑀢𑁄 𑀤𑀲𑀩𑀮𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀢𑀲𑁆𑀲 𑀓𑀸𑀮𑀓𑀜𑁆𑀚𑀺𑀓𑀅𑀲𑀼𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀕𑀺𑀳𑀺 𑀳𑀼𑀢𑁆𑀯𑀸 ‘‘𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄, 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁. 𑀬𑀲𑁆𑀲 𑀘 𑀔𑁆𑀯𑀸𑀲𑁆𑀲 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺 (𑀫. 𑀦𑀺. 𑁧.𑁧𑁪𑁬) 𑀯𑁂𑀲𑀸𑀮𑀺𑀬𑀁 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀁 𑀅𑀦𑁆𑀢𑀭𑁂 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑀼 𑀅𑀯𑀡𑁆𑀡𑀁 𑀪𑀸𑀲𑀢𑀺.

𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲𑁂𑀯𑀁 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀓𑁄𑀥𑀦𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀦𑀓𑁆𑀔𑀢𑁆𑀢𑁄 𑀫𑁄𑀖𑀧𑀼𑀭𑀺𑀲𑁄, 𑀓𑁄𑀥𑀯𑀲𑁂𑀦𑁂𑀯𑀫𑀸𑀳, 𑀓𑁄𑀥𑀯𑀲𑁂𑀦𑀸𑀧𑀺 𑀧𑀦 ‘𑀦 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺 𑀯𑀤𑀦𑁆𑀢𑁄 𑀅𑀚𑀸𑀦𑀺𑀢𑁆𑀯𑀸𑀧𑀺 𑀫𑀬𑁆𑀳𑀁 𑀕𑀼𑀡𑀫𑁂𑀯 𑀪𑀸𑀲𑀢𑀺. 𑀦 𑀔𑁄 𑀧𑀦 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀫𑀬𑁆𑀳𑀁 𑀕𑀼𑀡𑀁 𑀚𑀸𑀦𑀸𑀢𑀺. 𑀫𑀬𑁆𑀳𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀙 𑀅𑀪𑀺𑀜𑁆𑀜𑀸 𑀦𑀸𑀫 𑀅𑀢𑁆𑀣𑀺, 𑀅𑀬𑀫𑁆𑀧𑀺 𑀫𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀯. 𑀤𑀲𑀩𑀮𑀜𑀸𑀡𑀸𑀦𑀺 𑀅𑀢𑁆𑀣𑀺, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀅𑀢𑁆𑀣𑀺, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀅𑀢𑁆𑀣𑀺, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀅𑀢𑁆𑀣𑀺, 𑀅𑀬𑀫𑁆𑀧𑀺 𑀫𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀯. 𑀏𑀯𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀁 𑀧𑀦 𑀫𑀁 𑀬𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄’𑀢𑀺, 𑀲𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 ‘‘𑀲𑀼𑀦𑀓𑁆𑀔𑀢𑁆𑀢𑁄 𑀓𑀺𑀭, 𑀲𑀸𑀭𑀺𑀧𑀼𑀢𑁆𑀢, 𑀓𑁄𑀭𑀓𑁆𑀔𑀢𑁆𑀢𑀺𑀬𑀲𑁆𑀲 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀫𑀺𑀘𑁆𑀙𑀸𑀢𑀧𑁂 𑀧𑀲𑀦𑁆𑀦𑁄, 𑀫𑀺𑀘𑁆𑀙𑀸𑀢𑀧𑁂 𑀧𑀲𑀻𑀤𑀦𑁆𑀢𑁂𑀦 𑀧𑀦 𑀫𑀬𑀺 𑀏𑀯 𑀧𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀳𑀜𑁆𑀳𑀺 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 ‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀲𑀸𑀭𑁄’𑀢𑀺 𑀩𑀸𑀳𑀺𑀭𑀓𑀁 𑀫𑀺𑀘𑁆𑀙𑀸𑀢𑀧𑀁 𑀯𑀻𑀫𑀁𑀲𑀦𑁆𑀢𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺𑀁, 𑀢𑀧𑀲𑁆𑀲𑀻 𑀲𑀼𑀤𑀁 𑀳𑁄𑀫𑀺 𑀧𑀭𑀫𑀢𑀧𑀲𑁆𑀲𑀻, 𑀮𑀽𑀔𑁄 𑀲𑀼𑀤𑀁 𑀳𑁄𑀫𑀺 𑀧𑀭𑀫𑀮𑀽𑀔𑁄, 𑀚𑁂𑀕𑀼𑀘𑁆𑀙𑀻 𑀲𑀼𑀤𑀁 𑀳𑁄𑀫𑀺 𑀧𑀭𑀫𑀚𑁂𑀕𑀼𑀘𑁆𑀙𑀻, 𑀧𑀯𑀺𑀯𑀺𑀢𑁆𑀢𑁄 𑀲𑀼𑀤𑀁 𑀳𑁄𑀫𑀺 𑀧𑀭𑀫𑀧𑀯𑀺𑀯𑀺𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀩𑀸𑀳𑀺𑀭𑀓𑀢𑀧𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀚𑀻𑀯𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀘𑁂𑀮𑀓𑁄 𑀅𑀳𑁄𑀲𑀺 𑀭𑀚𑁄𑀚𑀮𑁆𑀮𑀺𑀓𑁄, 𑀧𑀯𑀺𑀯𑀺𑀢𑁆𑀢𑁄 𑀅𑀳𑁄𑀲𑀺 𑀏𑀓𑀯𑀺𑀳𑀸𑀭𑀻. 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀫𑀺𑀕𑁄 𑀯𑀺𑀬 𑀧𑀮𑀸𑀬𑀺, 𑀫𑀳𑀸𑀯𑀺𑀓𑀢𑀺𑀪𑁄𑀚𑀦𑁄 𑀅𑀳𑁄𑀲𑀺, 𑀯𑀘𑁆𑀙𑀓𑀕𑁄𑀫𑀬𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀺, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀢𑁆𑀣𑀸𑀬 𑀅𑀭𑀜𑁆𑀜𑁂 𑀏𑀓𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀫𑁆𑀧𑀺 𑀯𑀺𑀳𑀭𑀦𑁆𑀢𑁄 𑀳𑀺𑀫𑀧𑀸𑀢𑀲𑀫𑀬𑁂 𑀅𑀦𑁆𑀢𑀭𑀝𑁆𑀞𑀓𑁂 𑀭𑀢𑁆𑀢𑀺𑀁 𑀯𑀦𑀲𑀡𑁆𑀟𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀺𑀢𑁆𑀯𑀸 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺. 𑀲𑁄 𑀬𑀣𑀸 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀳𑀺𑀫𑁄𑀤𑀓𑁂𑀦 𑀢𑀺𑀦𑁆𑀢𑁄, 𑀢𑀣𑁂𑀯 𑀤𑀺𑀯𑀸 𑀯𑀦𑀲𑀡𑁆𑀟𑀢𑁄 𑀧𑀕𑁆𑀖𑀭𑀦𑁆𑀢𑁂𑀳𑀺 𑀉𑀤𑀓𑀩𑀺𑀦𑁆𑀤𑀽𑀳𑀺 𑀢𑁂𑀫𑀬𑀺. 𑀏𑀯𑀁 𑀅𑀳𑁄𑀭𑀢𑁆𑀢𑀁 𑀲𑀻𑀢𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀦 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀤𑀺𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀺𑀢𑁆𑀯𑀸 𑀭𑀢𑁆𑀢𑀺𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺. 𑀲𑁄 𑀬𑀣𑀸 𑀤𑀺𑀯𑀸 𑀅𑀩𑁆𑀪𑁄𑀓𑀸𑀲𑁂 𑀆𑀢𑀧𑁂𑀦 𑀧𑀭𑀺𑀴𑀸𑀳𑀧𑁆𑀧𑀢𑁆𑀢𑁄, 𑀢𑀣𑁂𑀯 𑀭𑀢𑁆𑀢𑀺𑀁 𑀦𑀺𑀯𑀸𑀢𑁂 𑀯𑀦𑀲𑀡𑁆𑀟𑁂 𑀧𑀭𑀺𑀴𑀸𑀳𑀁 𑀧𑀸𑀧𑀼𑀡𑀸𑀢𑀺, 𑀲𑀭𑀻𑀭𑀸 𑀲𑁂𑀤𑀥𑀸𑀭𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀣𑀲𑁆𑀲 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑀅𑀬𑀁 𑀕𑀸𑀣𑀸 𑀧𑀝𑀺𑀪𑀸𑀲𑀺 𑁋

𑁯𑁪. ‘‘𑀲𑁄𑀢𑀢𑁆𑀢𑁄 𑀲𑁄𑀲𑀺𑀦𑁆𑀦𑁄 𑀘𑁂𑀯, 𑀏𑀓𑁄 𑀪𑀺𑀁𑀲𑀦𑀓𑁂 𑀯𑀦𑁂;

𑀦𑀕𑁆𑀕𑁄 𑀦 𑀘𑀕𑁆𑀕𑀺𑀫𑀸𑀲𑀻𑀦𑁄, 𑀏𑀲𑀦𑀸𑀧𑀲𑀼𑀢𑁄 𑀫𑀼𑀦𑀻’’𑀢𑀺.

𑀢𑀢𑁆𑀣 𑀲𑁄𑀢𑀢𑁆𑀢𑁄𑀢𑀺 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀲𑀼𑀝𑁆𑀞𑀼 𑀢𑀢𑁆𑀢𑁄. 𑀲𑁄𑀲𑀺𑀦𑁆𑀦𑁄𑀢𑀺 𑀳𑀺𑀫𑁄𑀤𑀓𑁂𑀦 𑀲𑀼𑀲𑀺𑀦𑁆𑀦𑁄 𑀲𑀼𑀝𑁆𑀞𑀼 𑀢𑀺𑀦𑁆𑀢𑁄. 𑀏𑀓𑁄 𑀪𑀺𑀁𑀲𑀦𑀓𑁂 𑀯𑀦𑁂𑀢𑀺 𑀬𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺, 𑀢𑀣𑀸𑀭𑀽𑀧𑁂 𑀪𑀺𑀁𑀲𑀦𑀓𑁂𑀯𑀦𑀲𑀡𑁆𑀟𑁂 𑀏𑀓𑁄 𑀅𑀤𑀼𑀢𑀺𑀬𑁄𑀯 𑀅𑀳𑁄𑀲𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀦𑀕𑁆𑀕𑁄 𑀦 𑀘𑀕𑁆𑀕𑀺𑀫𑀸𑀲𑀻𑀦𑁄𑀢𑀺 𑀦𑀕𑁆𑀕𑁄 𑀘 𑀦 𑀘 𑀅𑀕𑁆𑀕𑀺𑀫𑀸𑀲𑀻𑀦𑁄. 𑀢𑀣𑀸 𑀲𑀻𑀢𑁂𑀦 𑀧𑀻𑀴𑀺𑀬𑀫𑀸𑀦𑁄𑀧𑀺 𑀦𑁂𑀯 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀯𑀸 𑀆𑀤𑀺𑀬𑀺𑀁, 𑀦 𑀘 𑀅𑀕𑁆𑀕𑀺𑀁 𑀆𑀕𑀫𑁆𑀫 𑀦𑀺𑀲𑀻𑀤𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀏𑀲𑀦𑀸𑀧𑀲𑀼𑀢𑁄𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀧𑀺 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀯𑁂𑀢𑀁 𑀏𑀲𑀦𑀸 𑀕𑀯𑁂𑀲𑀦𑀸 𑀉𑀧𑀸𑀬𑁄 𑀩𑁆𑀭𑀳𑁆𑀫𑀮𑁄𑀓𑀲𑁆𑀲𑀸’’𑀢𑀺 𑀏𑀯𑀁 𑀢𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀧𑀲𑀼𑀢𑁄 𑀅𑀦𑀼𑀬𑀼𑀢𑁆𑀢𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑀅𑀳𑁄𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀼𑀦𑀻𑀢𑀺 ‘‘𑀫𑀼𑀦𑀺 𑀔𑁄 𑀏𑀲 𑀫𑁄𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀏𑀯𑀁 𑀮𑁄𑀓𑁂𑀦 𑀲𑀫𑁆𑀪𑀸𑀯𑀺𑀢𑁄 𑀅𑀳𑁄𑀲𑀺𑀦𑁆𑀢𑀺 𑀤𑀻𑀧𑁂𑀢𑀺.

𑀏𑀯𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀫𑀭𑀡𑀓𑀸𑀮𑁂 𑀉𑀧𑀝𑁆𑀞𑀺𑀢𑀁 𑀦𑀺𑀭𑀬𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀯𑀢𑀲𑀫𑀸𑀤𑀸𑀦𑀁 𑀦𑀺𑀭𑀢𑁆𑀣𑀓’’𑀦𑁆𑀢𑀺 𑀜𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀢𑀁 𑀮𑀤𑁆𑀥𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀲𑁄 𑀆𑀚𑀻𑀯𑀓𑁄 𑀅𑀳𑁄𑀲𑀺’’𑀦𑁆𑀢𑀺.

𑀮𑁄𑀫𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁯𑁫] 𑁫. 𑀫𑀳𑀸𑀲𑀼𑀤𑀲𑁆𑀲𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂’’𑀢𑁆𑀬𑀸𑀤𑀺𑀯𑀘𑀦𑀁 (𑀤𑀻. 𑀦𑀺. 𑁨.𑁨𑁧𑁦) 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀣𑀸𑀕𑀢𑁂 𑀳𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀦𑀸𑀴𑀓𑀕𑀸𑀫𑀓𑁂 𑀚𑀸𑀢𑁄𑀯𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀢𑁆𑀢𑀺𑀓𑀫𑀸𑀲𑀲𑁆𑀲𑁂𑀯 𑀓𑀸𑀴𑀧𑀓𑁆𑀔𑀅𑀫𑀸𑀯𑀲𑀺𑀬𑀁. 𑀏𑀯𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀕𑁆𑀕𑀲𑀸𑀯𑀓𑀬𑀼𑀕𑁂 ‘‘𑀅𑀳𑀫𑁆𑀧𑀺 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀉𑀢𑁆𑀢𑀭𑀲𑀻𑀲𑀓𑁂 𑀫𑀜𑁆𑀘𑀓𑁂 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂 𑀯𑀺𑀲𑀫𑁂 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂, 𑀲𑀸𑀔𑀸𑀦𑀕𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀜𑁆𑀜𑁂𑀲𑀁 𑀘𑀫𑁆𑀧𑀸𑀭𑀸𑀚𑀕𑀳𑀸𑀤𑀻𑀦𑀁 𑀫𑀳𑀸𑀦𑀕𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀽’’𑀢𑀺 𑀬𑀸𑀘𑀺. 𑀲𑀢𑁆𑀣𑀸 ‘‘𑀫𑀸, 𑀆𑀦𑀦𑁆𑀤, 𑀇𑀫𑀁 ‘𑀔𑀼𑀤𑁆𑀤𑀓𑀦𑀕𑀭𑀓𑀁, 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑀁 𑀲𑀸𑀔𑀸𑀦𑀕𑀭𑀓’𑀦𑁆𑀢𑀺 𑀯𑀤𑁂𑀳𑀺, 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀲𑀼𑀤𑀲𑁆𑀲𑀦𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀸𑀮𑁂 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀯𑀲𑀺𑀁, 𑀢𑀤𑀸 𑀇𑀤𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂𑀦 𑀭𑀢𑀦𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀫𑀳𑀸𑀦𑀕𑀭𑀁 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀦𑁆𑀢𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁨𑁪𑁧 𑀆𑀤𑀬𑁄) 𑀓𑀣𑁂𑀲𑀺.

𑀢𑀤𑀸 𑀧𑀦 𑀫𑀳𑀸𑀲𑀼𑀤𑀲𑁆𑀲𑀦𑀁 𑀲𑀼𑀥𑀫𑁆𑀫𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀲𑀢𑁆𑀢𑀭𑀢𑀦𑀫𑀬𑁂 𑀢𑀸𑀮𑀯𑀦𑁂 𑀧𑀜𑁆𑀜𑀢𑁆𑀢𑀲𑁆𑀫𑀺𑀁 𑀓𑀧𑁆𑀧𑀺𑀬𑀫𑀜𑁆𑀘𑀓𑁂 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀺𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺, 𑀏𑀢𑁆𑀣 𑀙𑀦𑁆𑀤𑀁 𑀓𑀭𑁄𑀳𑀻’’𑀢𑀺 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀯𑀼𑀢𑁆𑀢𑁂 𑀫𑀳𑀸𑀲𑀼𑀤𑀲𑁆𑀲𑀦𑁄 ‘‘𑀫𑀸 𑀤𑁂𑀯𑀺 𑀏𑀯𑀁 𑀅𑀯𑀘, 𑀅𑀣 𑀔𑁄 ‘𑀏𑀢𑁆𑀣 𑀙𑀦𑁆𑀤𑀁 𑀯𑀺𑀦𑁂𑀳𑀺, 𑀫𑀸 𑀅𑀧𑁂𑀓𑁆𑀔𑀁 𑀅𑀓𑀸𑀲𑀻’𑀢𑀺 𑀏𑀯𑀁 𑀫𑀁 𑀑𑀯𑀤𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸, 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀅𑀚𑁆𑀚𑀸𑀳𑀁 𑀓𑀸𑀮𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀤𑁂𑀯𑀻 𑀭𑁄𑀤𑀫𑀸𑀦𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀣𑀸 𑀯𑀢𑁆𑀯𑀸 𑀭𑁄𑀤𑀺 𑀧𑀭𑀺𑀤𑁂𑀯𑀺. 𑀲𑁂𑀲𑀸𑀧𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀇𑀢𑁆𑀣𑀺𑀬𑁄 𑀭𑁄𑀤𑀺𑀁𑀲𑀼 𑀧𑀭𑀺𑀤𑁂𑀯𑀺𑀁𑀲𑀼. 𑀅𑀫𑀘𑁆𑀘𑀸𑀤𑀻𑀲𑀼𑀧𑀺 𑀏𑀓𑁄𑀧𑀺 𑀅𑀥𑀺𑀯𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀩𑁆𑀩𑁂𑀧𑀺 𑀭𑁄𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀮𑀁, 𑀪𑀡𑁂, 𑀫𑀸 𑀲𑀤𑁆𑀤𑀫𑀓𑀢𑁆𑀣𑀸’’𑀢𑀺 𑀲𑀩𑁆𑀩𑁂 𑀦𑀺𑀯𑀸𑀭𑁂𑀢𑁆𑀯𑀸 𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸 𑀢𑁆𑀯𑀁 𑀤𑁂𑀯𑀺 𑀭𑁄𑀤𑀺, 𑀫𑀸 𑀧𑀭𑀺𑀤𑁂𑀯𑀺. 𑀢𑀺𑀮𑀨𑀮𑀫𑀢𑁆𑀢𑁄𑀧𑀺 𑀳𑀺 𑀲𑀗𑁆𑀔𑀸𑀭𑁄 𑀦𑀺𑀘𑁆𑀘𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀅𑀦𑀺𑀘𑁆𑀘𑀸 𑀪𑁂𑀤𑀦𑀥𑀫𑁆𑀫𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀤𑁂𑀯𑀺𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁫. ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀢𑀢𑁆𑀣 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺 𑀪𑀤𑁆𑀤𑁂 𑀲𑀼𑀪𑀤𑁆𑀤𑀸𑀤𑁂𑀯𑀺, 𑀬𑀢𑁆𑀢𑀓𑀸 𑀓𑁂𑀳𑀺𑀘𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀅𑀦𑀺𑀘𑁆𑀘𑀸𑀬𑁂𑀯 𑀦𑀸𑀫. 𑀏𑀢𑁂𑀲𑀼 𑀳𑀺 𑀭𑀽𑀧𑀁 𑀅𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁…𑀧𑁂… 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸. 𑀬𑀁𑀓𑀺𑀜𑁆𑀘𑀺 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀁 𑀭𑀢𑀦𑀁, 𑀲𑀩𑁆𑀩𑀁 𑀢𑀁 𑀅𑀦𑀺𑀘𑁆𑀘𑀫𑁂𑀯. 𑀇𑀢𑀺 ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀕𑀡𑁆𑀳. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺, 𑀲𑀩𑁆𑀩𑁂 𑀳𑁂𑀢𑁂 𑀉𑀧𑁆𑀧𑀸𑀤𑀥𑀫𑁆𑀫𑀺𑀦𑁄 𑀘𑁂𑀯 𑀯𑀬𑀥𑀫𑁆𑀫𑀺𑀦𑁄 𑀘 𑀉𑀧𑁆𑀧𑀚𑁆𑀚𑀦𑀪𑀺𑀚𑁆𑀚𑀦𑀲𑀪𑀸𑀯𑀸𑀬𑁂𑀯, 𑀢𑀲𑁆𑀫𑀸 ‘‘𑀅𑀦𑀺𑀘𑁆𑀘𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘 𑀅𑀦𑀺𑀘𑁆𑀘𑀸, 𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀺𑀁 𑀧𑀢𑁆𑀯𑀸𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯. 𑀲𑀩𑁆𑀩𑁂𑀯 𑀳𑁂𑀢𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫, 𑀪𑀺𑀚𑁆𑀚𑀫𑀸𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀦𑀸𑀫. 𑀢𑁂𑀲𑀁 𑀉𑀧𑁆𑀧𑀸𑀤𑁂 𑀲𑀢𑀺𑀬𑁂𑀯 𑀘 𑀞𑀺𑀢𑀺 𑀦𑀸𑀫 𑀳𑁄𑀢𑀺, 𑀞𑀺𑀢𑀺𑀬𑀸 𑀲𑀢𑀺𑀬𑁂𑀯 𑀪𑀗𑁆𑀕𑁄 𑀦𑀸𑀫 𑀳𑁄𑀢𑀺, 𑀦 𑀳𑀺 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀞𑀺𑀢𑀺 𑀦𑀸𑀫, 𑀦𑀸𑀧𑀺 𑀞𑀺𑀢𑀁 𑀅𑀪𑀺𑀚𑁆𑀚𑀦𑀓𑀁 𑀦𑀸𑀫 𑀅𑀢𑁆𑀣𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀧𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺𑀫𑁂 𑀅𑀦𑀺𑀘𑁆𑀘𑀸 𑀔𑀡𑀺𑀓𑀸 𑀇𑀢𑁆𑀢𑀭𑀸 𑀅𑀥𑀼𑀯𑀸 𑀧𑀪𑀗𑁆𑀕𑀼𑀦𑁄 𑀘𑀮𑀺𑀢𑀸 𑀲𑀫𑀻𑀭𑀺𑀢𑀸 𑀅𑀦𑀤𑁆𑀥𑀦𑀺𑀬𑀸 𑀧𑀬𑀸𑀢𑀸 𑀢𑀸𑀯𑀓𑀸𑀮𑀺𑀓𑀸 𑀦𑀺𑀲𑁆𑀲𑀸𑀭𑀸, 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦 𑀫𑀸𑀬𑀸𑀫𑀭𑀻𑀘𑀺𑀨𑁂𑀡𑀲𑀤𑀺𑀲𑀸. 𑀢𑁂𑀲𑀼 𑀪𑀤𑁆𑀤𑁂 𑀲𑀼𑀪𑀤𑁆𑀤𑀸𑀤𑁂𑀯𑀺, 𑀓𑀲𑁆𑀫𑀸 𑀲𑀼𑀔𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺, 𑀏𑀯𑀁 𑀧𑀦 𑀕𑀡𑁆𑀳 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄𑀢𑀺, 𑀲𑀩𑁆𑀩𑀯𑀝𑁆𑀝𑀯𑀽𑀧𑀲𑀫𑀦𑀢𑁄 𑀢𑁂𑀲𑀁 𑀯𑀽𑀧𑀲𑀫𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀤𑁂𑀯𑁂𑀓𑀁 𑀏𑀓𑀦𑁆𑀢𑀢𑁄 𑀲𑀼𑀔𑀁, 𑀢𑀢𑁄 𑀅𑀜𑁆𑀜𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀏𑀯𑀁 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀲𑁆𑀲𑀧𑀺 𑀫𑀳𑀸𑀚𑀦𑀲𑁆𑀲 ‘‘𑀤𑀸𑀦𑀁 𑀤𑁂𑀣, 𑀲𑀻𑀮𑀁 𑀭𑀓𑁆𑀔𑀣, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀤𑁂𑀯𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀸𑀳𑀼𑀮𑁄, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁯𑁬] 𑁬. 𑀢𑁂𑀮𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀯𑀲𑁂𑀲𑀓𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀼𑀫𑁆𑀪𑀭𑀝𑁆𑀞𑁂 𑀲𑁂𑀤𑀓𑀁 𑀦𑀸𑀫 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑁄 𑀚𑀦𑀧𑀤𑀓𑀮𑁆𑀬𑀸𑀡𑀺𑀲𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀭 𑀳𑀺 𑀪𑀕𑀯𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, ‘𑀚𑀦𑀧𑀤𑀓𑀮𑁆𑀬𑀸𑀡𑀻 𑀚𑀦𑀧𑀤𑀓𑀮𑁆𑀬𑀸𑀡𑀻’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑁂𑀬𑁆𑀬, 𑀲𑀸 𑀔𑁄 𑀧𑀦𑀲𑁆𑀲 𑀚𑀦𑀧𑀤𑀓𑀮𑁆𑀬𑀸𑀡𑀻 𑀧𑀭𑀫𑀧𑀸𑀲𑀸𑀯𑀺𑀦𑀻 𑀦𑀘𑁆𑀘𑁂, 𑀧𑀭𑀫𑀧𑀸𑀲𑀸𑀯𑀺𑀦𑀻 𑀕𑀻𑀢𑁂. ‘𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀘𑁆𑀘𑀢𑀺 𑀕𑀸𑀬𑀢𑀻’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑁂𑀬𑁆𑀬. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑀽𑀮𑁄. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬 ‘‘𑀅𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀲𑀫𑀢𑀺𑀢𑁆𑀢𑀺𑀓𑁄 𑀢𑁂𑀮𑀧𑀢𑁆𑀢𑁄 𑀅𑀦𑁆𑀢𑀭𑁂𑀦 𑀘 𑀫𑀳𑀸𑀚𑀦𑀓𑀸𑀬𑀲𑁆𑀲 𑀅𑀦𑁆𑀢𑀭𑁂𑀦 𑀘 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀧𑀭𑀺𑀳𑀭𑀺𑀢𑀩𑁆𑀩𑁄, 𑀧𑀼𑀭𑀺𑀲𑁄 𑀘 𑀢𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀲𑁆𑀲𑀢𑀺 ‘𑀬𑀢𑁆𑀣𑁂𑀯 𑀦𑀁 𑀣𑁄𑀓𑀫𑁆𑀧𑀺 𑀙𑀟𑁆𑀟𑁂𑀲𑁆𑀲𑀲𑀺, 𑀢𑀢𑁆𑀣𑁂𑀯 𑀢𑁂 𑀲𑀻𑀲𑀁 𑀧𑀸𑀢𑁂𑀲𑁆𑀲𑀸𑀫𑀻’’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀢𑁂𑀮𑀧𑀢𑁆𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀫𑀸𑀤𑀁 𑀆𑀳𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. 𑀉𑀧𑀫𑀸 𑀔𑁄 𑀫𑁆𑀬𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄 𑁋 ‘𑀲𑀫𑀢𑀺𑀢𑁆𑀢𑀺𑀓𑁄 𑀢𑁂𑀮𑀧𑀢𑁆𑀢𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀢𑀸𑀬𑁂𑀢𑀁 𑀲𑀢𑀺𑀬𑀸 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀓𑀸𑀬𑀕𑀢𑀸 𑀦𑁄 𑀲𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀺 𑀲𑀼𑀲𑀫𑀸𑀭𑀤𑁆𑀥𑀸’𑀢𑀺 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁫.𑁩𑁮𑁬) 𑁋

𑀇𑀤𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀲𑀼𑀢𑁆𑀢𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀻 𑀉𑀢𑁆𑀢𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸. 𑀲𑀸 𑀳𑀺 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸, 𑀦𑀸𑀢𑀺𑀭𑀲𑁆𑀲𑀸, 𑀦𑀸𑀢𑀺𑀓𑀺𑀲𑀸, 𑀦𑀸𑀢𑀺𑀣𑀽𑀮𑀸, 𑀦𑀸𑀢𑀺𑀓𑀸𑀴𑀸, 𑀦𑀸𑀘𑁆𑀘𑁄𑀤𑀸𑀢𑀸, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀓𑀯𑀡𑁆𑀡𑀁, 𑀅𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁, 𑀢𑀲𑁆𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸. 𑀙𑀯𑀺𑀓𑀮𑁆𑀬𑀸𑀡𑀁, 𑀫𑀁𑀲𑀓𑀮𑁆𑀬𑀸𑀡𑀁, 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀁, 𑀅𑀝𑁆𑀞𑀺𑀓𑀮𑁆𑀬𑀸𑀡𑀁, 𑀯𑀬𑁄𑀓𑀮𑁆𑀬𑀸𑀡𑀦𑁆𑀢𑀺 𑀇𑀫𑁂𑀳𑀺 𑀧𑀦 𑀧𑀜𑁆𑀘𑀳𑀺 𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸 𑀦𑀸𑀫. 𑀢𑀲𑁆𑀲𑀸 𑀳𑀺 𑀆𑀕𑀦𑁆𑀢𑀼𑀓𑁄𑀪𑀸𑀲𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦𑁂𑀯 𑀤𑁆𑀯𑀸𑀤𑀲𑀳𑀢𑁆𑀣𑁂 𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀺𑀬𑀗𑁆𑀕𑀼𑀲𑀸𑀫𑀸 𑀯𑀸 𑀳𑁄𑀢𑀺 𑀲𑀼𑀯𑀡𑁆𑀡𑀲𑀸𑀫𑀸 𑀯𑀸. 𑀅𑀬𑀫𑀲𑁆𑀲𑀸 𑀙𑀯𑀺𑀓𑀮𑁆𑀬𑀸𑀡𑀢𑀸. 𑀘𑀢𑁆𑀢𑀸𑀭𑁄 𑀧𑀦𑀲𑁆𑀲𑀸 𑀳𑀢𑁆𑀣𑀧𑀸𑀤𑀸 𑀫𑀼𑀔𑀧𑀭𑀺𑀬𑁄𑀲𑀸𑀦𑀜𑁆𑀘 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀁 𑀯𑀺𑀬 𑀭𑀢𑁆𑀢𑀧𑀯𑀸𑀴𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀳𑁄𑀢𑀺. 𑀅𑀬𑀫𑀲𑁆𑀲𑀸 𑀫𑀁𑀲𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺 𑀦𑀔𑀧𑀢𑁆𑀢𑀸𑀦𑀺 𑀫𑀁𑀲𑀢𑁄 𑀅𑀫𑀼𑀢𑁆𑀢𑀝𑁆𑀞𑀸𑀦𑁂 𑀮𑀸𑀔𑀸𑀭𑀲𑀧𑀽𑀭𑀺𑀢𑀸𑀦𑀺 𑀯𑀺𑀬, 𑀫𑀼𑀢𑁆𑀢𑀝𑁆𑀞𑀸𑀦𑁂 𑀔𑀻𑀭𑀥𑀸𑀭𑀸𑀲𑀤𑀺𑀲𑀸𑀦𑀺. 𑀅𑀬𑀫𑀲𑁆𑀲𑀸 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀢𑀸. 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸 𑀲𑀼𑀥𑁄𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀔𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲𑀸 𑀅𑀝𑁆𑀞𑀺𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺𑀯𑀲𑁆𑀲𑀲𑀢𑀺𑀓𑀸𑀧𑀺 𑀧𑀦 𑀲𑀫𑀸𑀦𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀢𑀺 𑀦𑀺𑀩𑁆𑀩𑀮𑀺𑀧𑀮𑀺𑀢𑀸. 𑀅𑀬𑀫𑀲𑁆𑀲𑀸 𑀯𑀬𑁄𑀓𑀮𑁆𑀬𑀸𑀡𑀢𑀸.

𑀧𑀭𑀫𑀧𑀸𑀲𑀸𑀯𑀺𑀦𑀻𑀢𑀺 𑀏𑀢𑁆𑀣 𑀧𑀦 𑀧𑀲𑀯𑀦𑀁 𑀧𑀲𑀯𑁄, 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀲𑀯𑁄 𑀏𑀯 𑀧𑀸𑀲𑀸𑀯𑁄, 𑀧𑀭𑀫𑁄 𑀧𑀸𑀲𑀸𑀯𑁄 𑀧𑀭𑀫𑀧𑀸𑀲𑀸𑀯𑁄, 𑀲𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀧𑀭𑀫𑀧𑀸𑀲𑀸𑀯𑀺𑀦𑀻. 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀉𑀢𑁆𑀢𑀫𑀧𑁆𑀧𑀯𑀢𑁆𑀢𑀺 𑀲𑁂𑀝𑁆𑀞𑀓𑀺𑀭𑀺𑀬𑀸. 𑀉𑀢𑁆𑀢𑀫𑀫𑁂𑀯 𑀦𑀘𑁆𑀘𑀁 𑀦𑀘𑁆𑀘𑀢𑀺, 𑀕𑀻𑀢𑀜𑁆𑀘 𑀕𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬𑀸𑀢𑀺 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀆𑀕𑀘𑁆𑀙𑁂𑀬𑁆𑀬, 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀣𑁂𑀯𑀁 𑀫𑀳𑀸𑀚𑀦𑀫𑀚𑁆𑀛𑁂 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀦𑀘𑁆𑀘𑀫𑀸𑀦𑀸𑀬 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑁂𑀲𑀼 𑀅𑀗𑁆𑀕𑀼𑀮𑀺𑀨𑁄𑀝𑀦𑁂𑀲𑀼 𑀘𑁂𑀮𑀼𑀓𑁆𑀔𑁂𑀧𑁂𑀲𑀼 𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀩𑀦𑁆𑀥𑀦𑀸𑀕𑀸𑀭𑀢𑁄 𑀏𑀓𑀁 𑀘𑁄𑀭𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀕𑀴𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀢𑀺𑀢𑁆𑀢𑀺𑀓𑀁 𑀲𑀼𑀧𑀭𑀺𑀧𑀼𑀡𑁆𑀡𑀁 𑀢𑁂𑀮𑀧𑀢𑁆𑀢𑀁 𑀢𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀴𑁆𑀳𑀁 𑀕𑀸𑀳𑀸𑀧𑁂𑀢𑁆𑀯𑀸 𑀏𑀓𑀁 𑀅𑀲𑀺𑀳𑀢𑁆𑀣𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺 ‘‘𑀏𑀢𑀁 𑀕𑀳𑁂𑀢𑁆𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀲𑀫𑀚𑁆𑀚𑀝𑁆𑀞𑀸𑀦𑀁 𑀕𑀘𑁆𑀙. 𑀬𑀢𑁆𑀣𑁂𑀯 𑀘𑁂𑀲 𑀧𑀫𑀸𑀤𑀁 𑀆𑀕𑀫𑁆𑀫 𑀏𑀓𑀫𑁆𑀧𑀺 𑀢𑁂𑀮𑀩𑀺𑀦𑁆𑀤𑀼𑀁 𑀙𑀟𑁆𑀟𑁂𑀢𑀺, 𑀢𑀢𑁆𑀣𑁂𑀯𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀸’’𑀢𑀺. 𑀲𑁄 𑀧𑀼𑀭𑀺𑀲𑁄 𑀅𑀲𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀢𑀚𑁆𑀚𑁂𑀦𑁆𑀢𑁄 𑀢𑀢𑁆𑀣 𑀦𑁂𑀲𑀺. 𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀚𑀻𑀯𑀺𑀢𑀼𑀓𑀸𑀫𑀢𑀸𑀬 𑀧𑀫𑀸𑀤𑀯𑀲𑁂𑀦 𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀲𑀓𑀺𑀫𑁆𑀧𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀦 𑀑𑀮𑁄𑀓𑁂𑀲𑀺. 𑀏𑀯𑀁 𑀪𑀽𑀢𑀧𑀼𑀩𑁆𑀩𑀫𑁂𑀯𑁂𑀢𑀁 𑀯𑀢𑁆𑀣𑀼, 𑀲𑀼𑀢𑁆𑀢𑁂 𑀧𑀦 𑀧𑀭𑀺𑀓𑀧𑁆𑀧𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀫𑀸 𑀔𑁄 𑀫𑁆𑀬𑀸𑀬𑀦𑁆𑀢𑀺 𑀏𑀢𑁆𑀣 𑀧𑀦 𑀢𑁂𑀮𑀧𑀢𑁆𑀢𑀲𑁆𑀲 𑀢𑀸𑀯 𑀓𑀸𑀬𑀕𑀢𑀸𑀲𑀢𑀺𑀬𑀸 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀓𑀢𑀫𑁂𑀯. 𑀏𑀢𑁆𑀣 𑀧𑀦 𑀭𑀸𑀚𑀸 𑀯𑀺𑀬 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁, 𑀅𑀲𑀺 𑀯𑀺𑀬 𑀓𑀺𑀮𑁂𑀲𑀸, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀼𑀭𑀺𑀲𑁄 𑀯𑀺𑀬 𑀫𑀸𑀭𑁄, 𑀢𑁂𑀮𑀧𑀢𑁆𑀢𑀳𑀢𑁆𑀣𑁄 𑀧𑀼𑀭𑀺𑀲𑁄 𑀯𑀺𑀬 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀓𑁄 𑀯𑀺𑀧𑀲𑁆𑀲𑀓𑀬𑁄𑀕𑀸𑀯𑀘𑀭𑁄. 𑀇𑀢𑀺 𑀪𑀕𑀯𑀸 ‘‘𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀮𑀧𑀢𑁆𑀢𑀳𑀢𑁆𑀣𑁂𑀦 𑀢𑁂𑀦 𑀧𑀼𑀭𑀺𑀲𑁂𑀦 𑀯𑀺𑀬 𑀲𑀢𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀓𑀸𑀬𑀕𑀢𑀸𑀲𑀢𑀺 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀪𑀺𑀓𑁆𑀔𑀽 𑀇𑀫𑀁 𑀲𑀼𑀢𑁆𑀢𑀜𑁆𑀘 𑀅𑀢𑁆𑀣𑀜𑁆𑀘 𑀲𑀼𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀢𑁂𑀦 𑀧𑀼𑀭𑀺𑀲𑁂𑀦 𑀓𑀢𑀁 𑀢𑀣𑀸𑀭𑀽𑀧𑀺𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑁂𑀮𑀧𑀢𑁆𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀲𑀼𑀓𑀭𑀫𑁂𑀯𑁂𑀢𑀁. 𑀓𑀲𑁆𑀫𑀸? 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂𑀦 𑀧𑀼𑀭𑀺𑀲𑁂𑀦 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀦𑀻𑀬𑀫𑀸𑀦𑀢𑀸𑀬. 𑀬𑀁 𑀧𑀦 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑁂𑀦 𑀲𑀢𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀪𑀺𑀲𑀗𑁆𑀔𑀢𑀁 𑀤𑀺𑀩𑁆𑀩𑀭𑀽𑀧𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀧𑀸𑀧𑀼𑀡𑀺𑀁𑀲𑀼, 𑀏𑀢𑀁 𑀤𑀼𑀓𑁆𑀓𑀭’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑀲𑀢𑀲𑁆𑀲 𑀲𑀩𑁆𑀩𑀓𑀦𑀺𑀝𑁆𑀞𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀢𑀤𑀸 𑀘 𑀭𑀜𑁆𑀜𑁄 𑀕𑁂𑀳𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀼𑀜𑁆𑀚𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀫𑀫 𑀩𑀳𑀽 𑀪𑀸𑀢𑀭𑁄, 𑀮𑀘𑁆𑀙𑀸𑀫𑀺 𑀦𑀼 𑀔𑁄 𑀅𑀳𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁, 𑀉𑀤𑀸𑀳𑀼 𑀦𑁄’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀆𑀕𑀢𑁂𑀲𑀼 𑀥𑀫𑀓𑀭𑀡𑀁 𑀆𑀤𑀸𑀬 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀅𑀦𑁆𑀢𑀭𑀔𑀚𑁆𑀚𑀓𑀁 𑀔𑀸𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀢𑁂 𑀅𑀯𑁄𑀘𑀼𑀁 𑁋 𑀓𑀼𑀫𑀸𑀭, 𑀦 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀭𑀚𑁆𑀚𑀁 𑀮𑀪𑀺𑀲𑁆𑀲𑀲𑀺, 𑀇𑀢𑁄 𑀧𑀦 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀦𑀕𑀭𑀁 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀚𑁆𑀚𑀁 𑀮𑀘𑁆𑀙𑀲𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀺𑀬𑀁 𑀧𑀭𑀺𑀧𑀦𑁆𑀣𑁄 𑀅𑀢𑁆𑀣𑀺, 𑀢𑀁 𑀅𑀝𑀯𑀺𑀁 𑀧𑀭𑀺𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀬𑁄𑀚𑀦𑀲𑀢𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺, 𑀉𑀚𑀼𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀳𑀺 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑁄 𑀦𑀸𑀫. 𑀢𑀢𑁆𑀣 𑀬𑀓𑁆𑀔𑀺𑀦𑀺𑀬𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀸𑀫𑁂 𑀘 𑀲𑀸𑀮𑀸𑀬𑁄 𑀘 𑀫𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀯𑀺𑀢𑀸𑀦𑀁 𑀫𑀳𑀸𑀭𑀳𑀲𑁂𑀬𑁆𑀬𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀧𑀝𑀲𑀸𑀡𑀺𑀬𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀢𑁆𑀢𑀪𑀸𑀯𑀁 𑀫𑀡𑁆𑀟𑁂𑀢𑁆𑀯𑀸 𑀲𑀸𑀮𑀸𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂 𑀧𑀼𑀭𑀺𑀲𑁂 𑀫𑀥𑀼𑀭𑀸𑀳𑀺 𑀯𑀸𑀘𑀸𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀓𑀺𑀮𑀦𑁆𑀢𑀭𑀽𑀧𑀸 𑀯𑀺𑀬 𑀧𑀜𑁆𑀜𑀸𑀬𑀣, 𑀇𑀥𑀸𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀆𑀲𑀦𑀸𑀦𑀺 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀭𑀽𑀧𑀮𑀻𑀮𑀸𑀯𑀺𑀮𑀸𑀲𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 𑀓𑀺𑀮𑁂𑀲𑀯𑀲𑀺𑀓𑁂 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀚𑁆𑀛𑀸𑀘𑀸𑀭𑁂 𑀓𑀢𑁂 𑀢𑀢𑁆𑀣𑁂𑀯 𑀦𑁂 𑀮𑁄𑀳𑀺𑀢𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀔𑀸𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀭𑀽𑀧𑀕𑁄𑀘𑀭𑀁 𑀲𑀢𑁆𑀢𑀁 𑀭𑀽𑀧𑁂𑀦𑁂𑀯 𑀕𑀡𑁆𑀳𑀦𑁆𑀢𑀺, 𑀲𑀤𑁆𑀤𑀕𑁄𑀘𑀭𑀁 𑀫𑀥𑀼𑀭𑁂𑀦 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀦, 𑀕𑀦𑁆𑀥𑀕𑁄𑀘𑀭𑀁 𑀤𑀺𑀩𑁆𑀩𑀕𑀦𑁆𑀥𑁂𑀳𑀺, 𑀭𑀲𑀕𑁄𑀘𑀭𑀁 𑀤𑀺𑀩𑁆𑀩𑁂𑀦 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑁂𑀦, 𑀨𑁄𑀝𑁆𑀞𑀩𑁆𑀩𑀕𑁄𑀘𑀭𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁂𑀳𑀺 𑀤𑀺𑀩𑁆𑀩𑀲𑀬𑀦𑁂𑀳𑀺 𑀕𑀡𑁆𑀳𑀦𑁆𑀢𑀺. 𑀲𑀘𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀢𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀭𑀚𑁆𑀚𑀁 𑀮𑀘𑁆𑀙𑀲𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀳𑁄𑀢𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀺𑀁 𑀢𑀸 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀧𑀭𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀭𑀺𑀢𑁆𑀢𑀯𑀸𑀮𑀼𑀓𑀜𑁆𑀘𑁂𑀯 𑀧𑀭𑀺𑀢𑁆𑀢𑀲𑀼𑀢𑁆𑀢𑀜𑁆𑀘 𑀆𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀘 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂 𑀆𑀳 𑁋 ‘‘𑀅𑀳𑀁 𑀢𑀓𑁆𑀓𑀲𑀺𑀮𑀸𑀬𑀁 𑀭𑀚𑁆𑀚𑀁 𑀕𑀳𑁂𑀢𑀼𑀁 𑀕𑀘𑁆𑀙𑀸𑀫𑀺, 𑀢𑀼𑀫𑁆𑀳𑁂 𑀇𑀥𑁂𑀯 𑀢𑀺𑀝𑁆𑀞𑀣𑀸’’𑀢𑀺. 𑀅𑀣 𑀦𑀁 𑀧𑀜𑁆𑀘 𑀚𑀦𑀸 𑀆𑀳𑀁𑀲𑀼 ‘‘𑀫𑀬𑀫𑁆𑀧𑀺 𑀅𑀦𑀼𑀕𑀘𑁆𑀙𑀸𑀫𑀸’’𑀢𑀺. ‘‘𑀦 𑀲𑀓𑁆𑀓𑀸 𑀢𑀼𑀫𑁆𑀳𑁂𑀳𑀺 𑀅𑀦𑀼𑀕𑀦𑁆𑀢𑀼𑀁, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀺𑀭 𑀬𑀓𑁆𑀔𑀺𑀦𑀺𑀬𑁄 𑀭𑀽𑀧𑀸𑀤𑀺𑀕𑁄𑀘𑀭𑁂 𑀫𑀦𑀼𑀲𑁆𑀲𑁂 𑀏𑀯𑀜𑁆𑀘𑁂𑀯𑀜𑁆𑀘 𑀭𑀽𑀧𑀸𑀤𑀻𑀳𑀺 𑀧𑀮𑁄𑀪𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀫𑀳𑀸 𑀧𑀭𑀺𑀧𑀦𑁆𑀣𑁄, 𑀅𑀳𑀁 𑀧𑀦 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺. ‘‘𑀓𑀺𑀁 𑀧𑀦, 𑀤𑁂𑀯, 𑀫𑀬𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑁄 𑀧𑀺𑀬𑀸𑀦𑀺 𑀭𑀽𑀧𑀸𑀤𑀻𑀦𑀺 𑀑𑀮𑁄𑀓𑁂𑀲𑁆𑀲𑀸𑀫, 𑀫𑀬𑀫𑁆𑀧𑀺 𑀢𑀣𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀢𑁂 𑀧𑀜𑁆𑀘 𑀚𑀦𑁂 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀬𑀓𑁆𑀔𑀺𑀦𑀺𑀬𑁄 𑀕𑀸𑀫𑀸𑀤𑀻𑀦𑀺 𑀫𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀼 𑀭𑀽𑀧𑀕𑁄𑀘𑀭𑁄 𑀧𑀼𑀭𑀺𑀲𑁄 𑀢𑀸 𑀬𑀓𑁆𑀔𑀺𑀦𑀺𑀬𑁄 𑀑𑀮𑁄𑀓𑁂𑀢𑁆𑀯𑀸 𑀭𑀽𑀧𑀸𑀭𑀫𑁆𑀫𑀡𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀣𑁄𑀓𑀁 𑀑𑀳𑀻𑀬𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁 𑀪𑁄, 𑀣𑁄𑀓𑀁 𑀑𑀳𑀻𑀬𑀲𑀻’’𑀢𑀺 𑀆𑀳. ‘‘𑀤𑁂𑀯, 𑀧𑀸𑀤𑀸 𑀫𑁂 𑀭𑀼𑀚𑁆𑀚𑀦𑁆𑀢𑀺, 𑀣𑁄𑀓𑀁 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀫𑁆𑀪𑁄, 𑀏𑀢𑀸 𑀬𑀓𑁆𑀔𑀺𑀦𑀺𑀬𑁄, 𑀫𑀸 𑀔𑁄 𑀧𑀢𑁆𑀣𑁂𑀲𑀻’’𑀢𑀺. ‘‘𑀬𑀁 𑀳𑁄𑀢𑀺, 𑀢𑀁 𑀳𑁄𑀢𑀼, 𑀦 𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀆𑀤𑀸𑀬 𑀅𑀕𑀫𑀸𑀲𑀺. 𑀲𑁄𑀧𑀺 𑀭𑀽𑀧𑀕𑁄𑀘𑀭𑀓𑁄 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀚𑁆𑀛𑀸𑀘𑀸𑀭𑁂 𑀓𑀢𑁂 𑀢𑀁 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀦𑀸𑀦𑀸𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀕𑀸𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼, 𑀢𑀢𑁆𑀣 𑀲𑀤𑁆𑀤𑀕𑁄𑀘𑀭𑀓𑁄 𑀑𑀳𑀻𑀬𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀫𑁆𑀧𑀺 𑀔𑀸𑀤𑀺𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀕𑀦𑁆𑀥𑀓𑀭𑀡𑁆𑀟𑀓𑁂 𑀧𑀽𑀭𑁂𑀢𑁆𑀯𑀸 𑀆𑀧𑀡𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀢𑀢𑁆𑀣 𑀕𑀦𑁆𑀥𑀕𑁄𑀘𑀭𑀓𑁄 𑀑𑀳𑀻𑀬𑀺. 𑀢𑀫𑁆𑀧𑀺 𑀔𑀸𑀤𑀺𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀸𑀦𑀁 𑀤𑀺𑀩𑁆𑀩𑀪𑁄𑀚𑀦𑀸𑀦𑀁 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀑𑀤𑀦𑀺𑀓𑀸𑀧𑀡𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀢𑀢𑁆𑀣 𑀭𑀲𑀕𑁄𑀘𑀭𑀓𑁄 𑀑𑀳𑀻𑀬𑀺. 𑀢𑀫𑁆𑀧𑀺 𑀔𑀸𑀤𑀺𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀲𑀬𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀢𑀢𑁆𑀣 𑀨𑁄𑀝𑁆𑀞𑀩𑁆𑀩𑀕𑁄𑀘𑀭𑀓𑁄 𑀑𑀳𑀻𑀬𑀺. 𑀢𑀫𑁆𑀧𑀺 𑀔𑀸𑀤𑀺𑀁𑀲𑀼, 𑀩𑁄𑀥𑀺𑀲𑀢𑁆𑀢𑁄 𑀏𑀓𑀓𑁄𑀯 𑀅𑀳𑁄𑀲𑀺.

𑀅𑀣𑁂𑀓𑀸 𑀬𑀓𑁆𑀔𑀺𑀦𑀻 ‘‘𑀅𑀢𑀺𑀔𑀭𑀫𑀦𑁆𑀢𑁄 𑀯𑀢𑀸𑀬𑀁, 𑀅𑀳𑀁 𑀢𑀁 𑀔𑀸𑀤𑀺𑀢𑁆𑀯𑀸𑀯 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀅𑀝𑀯𑀺𑀬𑀸 𑀧𑀭𑀪𑀸𑀕𑁂 𑀯𑀦𑀓𑀫𑁆𑀫𑀺𑀓𑀸𑀤𑀬𑁄 𑀬𑀓𑁆𑀔𑀺𑀦𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑁂 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀓𑁄𑀫𑀸𑀭𑀲𑀸𑀫𑀺𑀓𑁄 𑀫𑁂, 𑀅𑀬𑁆𑀬𑀸’’𑀢𑀺. ‘‘𑀅𑀫𑁆𑀪𑁄, 𑀅𑀬𑀁 𑀏𑀯𑀁 𑀲𑀼𑀓𑀼𑀫𑀸𑀮𑀸 𑀧𑀼𑀧𑁆𑀨𑀤𑀸𑀫𑀲𑀤𑀺𑀲𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀼𑀫𑀸𑀭𑀺𑀓𑀸 𑀅𑀢𑁆𑀢𑀦𑁄 𑀓𑀼𑀮𑀁 𑀙𑀟𑁆𑀟𑁂𑀢𑁆𑀯𑀸 𑀪𑀯𑀦𑁆𑀢𑀁 𑀢𑀓𑁆𑀓𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸, 𑀓𑀲𑁆𑀫𑀸 𑀏𑀢𑀁 𑀅𑀓𑀺𑀮𑀫𑁂𑀢𑁆𑀯𑀸 𑀆𑀤𑀸𑀬 𑀦 𑀕𑀘𑁆𑀙𑀲𑀻’’𑀢𑀺? ‘‘𑀦𑁂𑀲𑀸, 𑀅𑀬𑁆𑀬𑀸, 𑀫𑀬𑁆𑀳𑀁 𑀧𑀚𑀸𑀧𑀢𑀺, 𑀬𑀓𑁆𑀔𑀺𑀦𑀻 𑀏𑀲𑀸, 𑀏𑀢𑀸𑀬 𑀫𑁂 𑀧𑀜𑁆𑀘 𑀫𑀦𑀼𑀲𑁆𑀲𑀸 𑀔𑀸𑀤𑀺𑀢𑀸’’𑀢𑀺. ‘‘𑀅𑀬𑁆𑀬𑀸, 𑀧𑀼𑀭𑀺𑀲𑀸 𑀦𑀸𑀫 𑀓𑀼𑀤𑁆𑀥𑀓𑀸𑀮𑁂 𑀅𑀢𑁆𑀢𑀦𑁄 𑀧𑀚𑀸𑀧𑀢𑀺𑀬𑁄 𑀬𑀓𑁆𑀔𑀺𑀦𑀺𑀬𑁄𑀧𑀺 𑀓𑀭𑁄𑀦𑁆𑀢𑀺 𑀧𑁂𑀢𑀺𑀦𑀺𑀬𑁄𑀧𑀻’’𑀢𑀺. 𑀲𑀸 𑀕𑀘𑁆𑀙𑀫𑀸𑀦𑀸 𑀕𑀩𑁆𑀪𑀺𑀦𑀺𑀯𑀡𑁆𑀡𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀲𑀓𑀺𑀁 𑀯𑀺𑀚𑀸𑀢𑀯𑀡𑁆𑀡𑀁 𑀓𑀢𑁆𑀯𑀸 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀁 𑀅𑀦𑀼𑀩𑀦𑁆𑀥𑀺, 𑀤𑀺𑀝𑁆𑀞𑀤𑀺𑀝𑁆𑀞𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀓𑁆𑀓𑀲𑀺𑀮𑀁 𑀧𑀸𑀧𑀼𑀡𑀺. 𑀲𑀸 𑀧𑀼𑀢𑁆𑀢𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀏𑀓𑀺𑀓𑀸𑀯 𑀅𑀦𑀼𑀩𑀦𑁆𑀥𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀦𑀺𑀲𑀻𑀤𑀺. 𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑁂𑀚𑁂𑀦 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀺𑀩𑁆𑀩𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀲𑀸𑀮𑀸𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀓𑁆𑀓𑀲𑀺𑀮𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀕𑀘𑁆𑀙, 𑀇𑀫𑀺𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺 𑀫𑀦𑀼𑀲𑁆𑀲𑀁 𑀧𑁂𑀲𑁂𑀲𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀲𑁆𑀲𑀸𑀫𑀺𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀬𑁆𑀬, 𑀅𑀬𑀁 𑀫𑁂 𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀲𑀸𑀫𑀺𑀓𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑁂𑀲𑀸 𑀫𑀬𑁆𑀳𑀁 𑀧𑀚𑀸𑀧𑀢𑀺, 𑀬𑀓𑁆𑀔𑀺𑀦𑀻 𑀏𑀲𑀸, 𑀏𑀢𑀸𑀬 𑀫𑁂 𑀧𑀜𑁆𑀘 𑀫𑀦𑀼𑀲𑁆𑀲𑀸 𑀔𑀸𑀤𑀺𑀢𑀸’’𑀢𑀺 𑀆𑀳. 𑀲𑀸𑀧𑀺 ‘‘𑀧𑀼𑀭𑀺𑀲𑀸 𑀦𑀸𑀫 𑀅𑀬𑁆𑀬𑀸 𑀓𑀼𑀤𑁆𑀥𑀓𑀸𑀮𑁂 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀯𑀤𑀦𑁆𑀢𑀻’’𑀢𑀺 𑀆𑀳. 𑀲𑁄 𑀉𑀪𑀺𑀦𑁆𑀦𑀫𑁆𑀧𑀺 𑀯𑀘𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀲𑁆𑀲𑀸𑀫𑀺𑀓𑀪𑀡𑁆𑀟𑀁 𑀦𑀸𑀫 𑀭𑀸𑀚𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀬𑀓𑁆𑀔𑀺𑀦𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀓𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀢𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑁄 𑀦𑁆𑀳𑀸𑀢𑀯𑀺𑀮𑀺𑀢𑁆𑀢𑁄 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀺𑀭𑀻𑀲𑀬𑀦𑀁 𑀅𑀪𑀺𑀭𑀼𑀳𑀺. 𑀲𑀸𑀧𑀺 𑀬𑀓𑁆𑀔𑀺𑀦𑀻 𑀅𑀢𑁆𑀢𑀦𑁄 𑀉𑀧𑀓𑀧𑁆𑀧𑀦𑀓𑀁 𑀆𑀳𑀸𑀭𑀁 𑀆𑀳𑀭𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀲𑀺𑀭𑀺𑀲𑀬𑀦𑁂 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀭𑀜𑁆𑀜𑁄 𑀭𑀢𑀺𑀯𑀲𑁂𑀦 𑀲𑀼𑀔𑀁 𑀲𑀫𑀧𑁆𑀧𑀺𑀢𑀲𑁆𑀲 𑀦𑀺𑀧𑀦𑁆𑀦𑀓𑀸𑀮𑁂 𑀏𑀓𑁂𑀦 𑀧𑀲𑁆𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑁄𑀤𑀺. 𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁, 𑀪𑀤𑁆𑀤𑁂, 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀫𑀕𑁆𑀕𑁂 𑀤𑀺𑀲𑁆𑀯𑀸 𑀆𑀦𑀻𑀢𑀸, 𑀢𑀼𑀫𑁆𑀳𑀸𑀓𑀜𑁆𑀘 𑀕𑁂𑀳𑁂 𑀩𑀳𑀽 𑀇𑀢𑁆𑀣𑀺𑀬𑁄, 𑀅𑀳𑀁 𑀲𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑁂 𑀯𑀲𑀫𑀸𑀦𑀸 𑀓𑀣𑀸𑀬 𑀉𑀧𑁆𑀧𑀦𑁆𑀦𑀸𑀬 ‘𑀓𑁄 𑀢𑀼𑀬𑁆𑀳𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀕𑁄𑀢𑁆𑀢𑀁 𑀯𑀸 𑀚𑀸𑀢𑀺𑀁 𑀯𑀸 𑀚𑀸𑀦𑀸𑀢𑀺, 𑀢𑁆𑀯𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 𑀆𑀦𑀻𑀢𑀸 𑀦𑀸𑀫𑀸’𑀢𑀺 𑀲𑀻𑀲𑁂 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸 𑀯𑀺𑀬 𑀫𑀗𑁆𑀓𑀼 𑀪𑀯𑀺𑀲𑁆𑀲𑀸𑀫𑀺. 𑀲𑀘𑁂 𑀢𑀼𑀫𑁆𑀳𑁂 𑀲𑀓𑀮𑀭𑀚𑁆𑀚𑁂 𑀇𑀲𑁆𑀲𑀭𑀺𑀬𑀜𑁆𑀘 𑀆𑀡𑀜𑁆𑀘 𑀫𑀬𑁆𑀳𑀁 𑀤𑀤𑁂𑀬𑁆𑀬𑀸𑀣, 𑀓𑁄𑀘𑀺 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀓𑁄𑀧𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺. ‘‘𑀪𑀤𑁆𑀤𑁂, 𑀫𑀬𑁆𑀳𑀁 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀦 𑀓𑀺𑀜𑁆𑀘𑀺 𑀳𑁄𑀦𑁆𑀢𑀺, 𑀦𑀸𑀳𑀁 𑀏𑀢𑁂𑀲𑀁 𑀲𑀸𑀫𑀺𑀓𑁄. 𑀬𑁂 𑀧𑀦 𑀭𑀸𑀚𑀸𑀡𑀁 𑀓𑁄𑀧𑁂𑀢𑁆𑀯𑀸 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀜𑁆𑀜𑁂𑀯𑀸𑀳𑀁 𑀲𑀸𑀫𑀺𑀓𑁄. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀲𑀓𑁆𑀓𑀸 𑀢𑀼𑀬𑁆𑀳𑀁 𑀲𑀓𑀮𑀭𑀝𑁆𑀞𑁂 𑀯𑀸 𑀦𑀕𑀭𑁂 𑀯𑀸 𑀇𑀲𑁆𑀲𑀭𑀺𑀬𑀜𑁆𑀘 𑀆𑀡𑀜𑁆𑀘 𑀤𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀲𑀘𑁂 𑀭𑀝𑁆𑀞𑁂 𑀯𑀸 𑀦𑀕𑀭𑁂 𑀯𑀸 𑀆𑀡𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀣, 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑀸𑀦𑀁 𑀉𑀧𑀭𑀺 𑀫𑀫 𑀯𑀲𑀁 𑀯𑀢𑁆𑀢𑀦𑀢𑁆𑀣𑀸𑀬 𑀆𑀡𑀁 𑀤𑁂𑀣𑀸’’𑀢𑀺. 𑀭𑀸𑀚𑀸 𑀤𑀺𑀩𑁆𑀩𑀨𑁄𑀝𑁆𑀞𑀩𑁆𑀩𑁂𑀦 𑀩𑀤𑁆𑀥𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀸𑀥𑀼, 𑀪𑀤𑁆𑀤𑁂, 𑀅𑀦𑁆𑀢𑁄𑀯𑀴𑀜𑁆𑀚𑀦𑀓𑁂𑀲𑀼 𑀢𑀼𑀬𑁆𑀳𑀁 𑀆𑀡𑀁 𑀤𑀫𑁆𑀫𑀺, 𑀢𑁆𑀯𑀁 𑀏𑀢𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀓𑀸𑀮𑁂 𑀬𑀓𑁆𑀔𑀦𑀕𑀭𑀁 𑀕𑀦𑁆𑀢𑁆𑀯𑀸 𑀬𑀓𑁆𑀔𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀭𑀸𑀚𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀅𑀝𑁆𑀞𑀺𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀦𑁆𑀳𑀸𑀭𑀼𑀘𑀫𑁆𑀫𑀫𑀁𑀲𑀮𑁄𑀳𑀺𑀢𑀁 𑀔𑀸𑀤𑀺, 𑀅𑀯𑀲𑁂𑀲𑀸 𑀬𑀓𑁆𑀔𑀸 𑀫𑀳𑀸𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀓𑀼𑀓𑁆𑀓𑀼𑀝𑀓𑀼𑀓𑁆𑀓𑀼𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀢𑁆𑀢𑀲𑁂𑀲𑁂 𑀅𑀓𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀤𑁆𑀯𑀸𑀭𑀁 𑀬𑀣𑀸𑀧𑀺𑀳𑀺𑀢𑀫𑁂𑀯 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀨𑀭𑀲𑀽𑀳𑀺 𑀓𑀯𑀸𑀝𑀸𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀁 𑀦𑀺𑀯𑁂𑀲𑀦𑀁 𑀅𑀝𑁆𑀞𑀺𑀓𑀧𑀭𑀺𑀓𑀺𑀡𑁆𑀡𑀁 𑀤𑀺𑀲𑁆𑀯𑀸 ‘‘𑀲𑀘𑁆𑀘𑀁 𑀯𑀢 𑀲𑁄 𑀧𑀼𑀭𑀺𑀲𑁄 𑀆𑀳 ‘𑀦𑀸𑀬𑀁 𑀫𑀬𑁆𑀳𑀁 𑀧𑀚𑀸𑀧𑀢𑀺, 𑀬𑀓𑁆𑀔𑀺𑀦𑀻 𑀏𑀲𑀸’𑀢𑀺. 𑀭𑀸𑀚𑀸 𑀧𑀦 𑀓𑀺𑀜𑁆𑀘𑀺 𑀅𑀚𑀸𑀦𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀅𑀓𑀸𑀲𑀺, 𑀲𑀸 𑀬𑀓𑁆𑀔𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀩𑁆𑀩𑀁 𑀚𑀦𑀁 𑀔𑀸𑀤𑀺𑀢𑁆𑀯𑀸 𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀤𑀺𑀯𑀲𑀁 𑀢𑀲𑁆𑀲𑀸𑀬𑁂𑀯 𑀲𑀸𑀮𑀸𑀬𑀁 𑀧𑀭𑀺𑀢𑁆𑀢𑀯𑀸𑀮𑀼𑀓𑀁 𑀲𑀻𑀲𑁂 𑀓𑀢𑁆𑀯𑀸 𑀧𑀭𑀺𑀢𑁆𑀢𑀲𑀼𑀢𑁆𑀢𑀜𑁆𑀘 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀞𑀺𑀢𑀓𑁄𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀲𑀓𑀮𑀭𑀸𑀚𑀦𑀺𑀯𑁂𑀲𑀦𑀁 𑀲𑁄𑀥𑁂𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀸𑀦𑀺 𑀑𑀲𑀸𑀭𑁂𑀢𑁆𑀯𑀸 𑀥𑀽𑀫𑀁 𑀤𑀢𑁆𑀯𑀸 𑀦𑀯𑀫𑀸𑀮𑀸 𑀩𑀦𑁆𑀥𑀺𑀢𑁆𑀯𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 ‘‘𑀅𑀫𑁆𑀪𑁄, 𑀬𑁄 𑀧𑀼𑀭𑀺𑀲𑁄 𑀤𑀺𑀩𑁆𑀩𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀺𑀁 𑀬𑀓𑁆𑀔𑀺𑀦𑀺𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺, 𑀲𑁄 𑀅𑀢𑀺𑀯𑀺𑀬 𑀉𑀴𑀸𑀭𑀲𑀢𑁆𑀢𑁄 𑀥𑀺𑀢𑀺𑀫𑀸 𑀜𑀸𑀡𑀲𑀫𑁆𑀧𑀦𑁆𑀦𑁄, 𑀢𑀸𑀤𑀺𑀲𑁂 𑀧𑀼𑀭𑀺𑀲𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁂 𑀲𑀩𑁆𑀩𑀭𑀝𑁆𑀞𑀁 𑀲𑀼𑀔𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀭𑀸𑀚𑀸𑀦𑀁 𑀓𑀭𑁄𑀫𑀸’’𑀢𑀺. 𑀅𑀣 𑀲𑀩𑁆𑀩𑁂 𑀅𑀫𑀘𑁆𑀘𑀸 𑀘 𑀦𑀸𑀕𑀭𑀸 𑀘 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑁂 𑀇𑀫𑀁 𑀭𑀚𑁆𑀚𑀁 𑀓𑀸𑀭𑁂𑀣𑀸’’𑀢𑀺 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀲𑁄 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁬. ‘‘𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀯𑀲𑁂𑀲𑀓𑀁, 𑀢𑁂𑀮𑀧𑀢𑁆𑀢𑀁 𑀬𑀣𑀸 𑀧𑀭𑀺𑀳𑀭𑁂𑀬𑁆𑀬;

𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂, 𑀧𑀢𑁆𑀣𑀬𑀸𑀦𑁄 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩’’𑀦𑁆𑀢𑀺.

𑀢𑀢𑁆𑀣 𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀧𑀸𑀧𑁂𑀢𑁆𑀯𑀸 𑀲𑀫𑀪𑀭𑀺𑀢𑀁. 𑀅𑀦𑀯𑀲𑁂𑀲𑀓𑀦𑁆𑀢𑀺 𑀅𑀦𑀯𑀲𑀺𑀜𑁆𑀘𑀦𑀓𑀁 𑀅𑀧𑀭𑀺𑀲𑁆𑀲𑀸𑀯𑀦𑀓𑀁 𑀓𑀢𑁆𑀯𑀸. 𑀢𑁂𑀮𑀧𑀢𑁆𑀢𑀦𑁆𑀢𑀺 𑀧𑀓𑁆𑀔𑀺𑀢𑁆𑀢𑀢𑀺𑀮𑀢𑁂𑀮𑀧𑀢𑁆𑀢𑀁. 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀳𑀭𑁂𑀬𑁆𑀬, 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬. 𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂𑀢𑀺 𑀢𑀁 𑀢𑁂𑀮𑀪𑀭𑀺𑀢𑀁 𑀧𑀢𑁆𑀢𑀁 𑀯𑀺𑀬 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀓𑀸𑀬𑀕𑀢𑀸𑀲𑀢𑀺𑀬𑀸 𑀕𑁄𑀘𑀭𑁂 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀲𑀢𑀺𑀬𑀸 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀕𑁄𑀘𑀭𑁂 𑀦 𑀯𑀺𑀓𑁆𑀔𑀺𑀧𑀢𑀺, 𑀢𑀣𑀸 𑀧𑀡𑁆𑀟𑀺𑀢𑁄 𑀬𑁄𑀕𑀸𑀯𑀘𑀭𑁄 𑀭𑀓𑁆𑀔𑁂𑀬𑁆𑀬 𑀕𑁄𑀧𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀏𑀢𑀲𑁆𑀲 𑀳𑀺 𑁋

‘‘𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄;

𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳’’𑀦𑁆𑀢𑀺. (𑀥. 𑀧. 𑁩𑁫);

𑀢𑀲𑁆𑀫𑀸 𑁋

‘‘𑀲𑀼𑀤𑀼𑀤𑁆𑀤𑀲𑀁 𑀲𑀼𑀦𑀺𑀧𑀼𑀡𑀁, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑀁;

𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻, 𑀘𑀺𑀢𑁆𑀢𑀁 𑀕𑀼𑀢𑁆𑀢𑀁 𑀲𑀼𑀔𑀸𑀯𑀳𑀁’’. (𑀥. 𑀧. 𑁩𑁬);

𑀇𑀤𑀜𑁆𑀳𑀺 𑁋

‘‘𑀤𑀽𑀭𑀗𑁆𑀕𑀫𑀁 𑀏𑀓𑀘𑀭𑀁, 𑀅𑀲𑀭𑀻𑀭𑀁 𑀕𑀼𑀳𑀸𑀲𑀬𑀁;

𑀬𑁂 𑀘𑀺𑀢𑁆𑀢𑀁 𑀲𑀁𑀬𑀫𑁂𑀲𑁆𑀲𑀦𑁆𑀢𑀺, 𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸’’. (𑀥. 𑀧. 𑁩𑁭);

𑀇𑀢𑀭𑀲𑁆𑀲 𑀧𑀦 𑁋

‘‘𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑁄;

𑀧𑀭𑀺𑀧𑁆𑀮𑀯𑀧𑀲𑀸𑀤𑀲𑁆𑀲, 𑀧𑀜𑁆𑀜𑀸 𑀦 𑀧𑀭𑀺𑀧𑀽𑀭𑀢𑀺’’. (𑀥. 𑀧. 𑁩𑁮);

𑀣𑀺𑀭𑀓𑀫𑁆𑀫𑀝𑁆𑀞𑀸𑀦𑀲𑀳𑀸𑀬𑀲𑁆𑀲 𑀧𑀦 𑁋

‘‘𑀅𑀦𑀯𑀲𑁆𑀲𑀼𑀢𑀘𑀺𑀢𑁆𑀢𑀲𑁆𑀲, 𑀅𑀦𑀦𑁆𑀯𑀸𑀳𑀢𑀘𑁂𑀢𑀲𑁄;

𑀧𑀼𑀜𑁆𑀜𑀧𑀸𑀧𑀧𑀳𑀻𑀦𑀲𑁆𑀲, 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬𑀁’’. (𑀥. 𑀧. 𑁩𑁯);

𑀢𑀲𑁆𑀫𑀸 𑀏𑀢𑀁 𑁋

‘‘𑀨𑀦𑁆𑀤𑀦𑀁 𑀘𑀧𑀮𑀁 𑀘𑀺𑀢𑁆𑀢𑀁, 𑀤𑀽𑀭𑀓𑁆𑀔𑀁 𑀤𑀼𑀦𑁆𑀦𑀺𑀯𑀸𑀭𑀬𑀁;

𑀉𑀚𑀼𑀁 𑀓𑀭𑁄𑀢𑀺 𑀫𑁂𑀥𑀸𑀯𑀻, 𑀉𑀲𑀼𑀓𑀸𑀭𑁄𑀯 𑀢𑁂𑀚𑀦𑀁’’. (𑀥. 𑀧. 𑁩𑁩);

𑀏𑀯𑀁 𑀉𑀚𑀼𑀁 𑀓𑀭𑁄𑀦𑁆𑀢𑁄 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂.

𑀧𑀢𑁆𑀣𑀬𑀸𑀦𑁄 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀆𑀭𑀪𑀺𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀧𑀢𑁆𑀣𑁂𑀦𑁆𑀢𑁄 𑀧𑀺𑀳𑁂𑀦𑁆𑀢𑁄 𑀯𑀼𑀢𑁆𑀢𑀦𑀬𑁂𑀦 𑀲𑀓𑀁 𑀘𑀺𑀢𑁆𑀢𑀁 𑀭𑀓𑁆𑀔𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸 𑀧𑀦𑁂𑀲𑀸 𑀤𑀺𑀲𑀸 𑀦𑀸𑀫? 𑁋

‘‘𑀫𑀸𑀢𑀸𑀧𑀺𑀢𑀸 𑀤𑀺𑀲𑀸 𑀧𑀼𑀩𑁆𑀩𑀸, 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸;

𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀉𑀢𑁆𑀢𑀭𑀸.

‘‘𑀤𑀸𑀲𑀓𑀫𑁆𑀫𑀓𑀭𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬, 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻’’𑀢𑀺. (𑀤𑀻. 𑀦𑀺. 𑁩.𑁨𑁭𑁩) 𑁋

𑀏𑀢𑁆𑀣 𑀢𑀸𑀯 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 ‘‘𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸.

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸, 𑀬𑀫𑀤𑁆𑀤𑀲𑀸 𑀲𑀼𑀧𑀺𑀦𑁂 𑀙𑀩𑁆𑀩𑀺𑀲𑀸𑀡’’𑀦𑁆𑀢𑀺. (𑀚𑀸. 𑁧.𑁧𑁬.𑁧𑁦𑁪) 𑁋

𑀏𑀢𑁆𑀣 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀤𑀺𑀲𑀸𑀯 ‘‘𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸.

‘‘𑀅𑀕𑀸𑀭𑀺𑀦𑁄 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸, 𑀅𑀯𑁆𑀳𑀸𑀬𑀺𑀓𑀸 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀺;

𑀏𑀲𑀸 𑀤𑀺𑀲𑀸 𑀧𑀭𑀫𑀸 𑀲𑁂𑀢𑀓𑁂𑀢𑀼, 𑀬𑀁 𑀧𑀢𑁆𑀯𑀸 𑀤𑀼𑀓𑁆𑀔𑀻 𑀲𑀼𑀔𑀺𑀦𑁄 𑀪𑀯𑀦𑁆𑀢𑀻’’𑀢𑀺. (𑀚𑀸. 𑁧.𑁬.𑁯) 𑁋

𑀏𑀢𑁆𑀣 𑀧𑀦 𑀦𑀺𑀩𑁆𑀩𑀸𑀦𑀁 ‘‘𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 ‘‘𑀔𑀬𑀁 𑀯𑀺𑀭𑀸𑀕’’𑀦𑁆𑀢𑀺𑀆𑀤𑀻𑀳𑀺 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀤𑀺𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀫𑀢𑀕𑁆𑀕𑁂 𑀧𑀦 𑀲𑀁𑀲𑀸𑀭𑁂 𑀓𑁂𑀦𑀘𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁂𑀦 𑀲𑀼𑀧𑀺𑀦𑁂𑀦𑀧𑀺 𑀅𑀕𑀢𑀧𑀼𑀩𑁆𑀩𑀢𑀸𑀬 𑀅𑀕𑀢𑀧𑀼𑀩𑁆𑀩𑀸 𑀤𑀺𑀲𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀢𑁆𑀣𑀬𑀦𑁆𑀢𑁂𑀦 𑀓𑀸𑀬𑀕𑀢𑀸𑀲𑀢𑀺𑀬𑀸 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀏𑀯𑀁 𑀲𑀢𑁆𑀣𑀸 𑀦𑀺𑀩𑁆𑀩𑀸𑀦𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀭𑀚𑁆𑀚𑀧𑁆𑀧𑀢𑁆𑀢𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑁂𑀮𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁯𑁭] 𑁭. 𑀦𑀸𑀫𑀲𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀚𑀻𑀯𑀓𑀜𑁆𑀘 𑀫𑀢𑀁 𑀤𑀺𑀲𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀦𑀸𑀫𑀲𑀺𑀤𑁆𑀥𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀓𑀼𑀮𑀧𑀼𑀢𑁆𑀢𑁄 𑀦𑀸𑀫𑁂𑀦 𑀧𑀸𑀧𑀓𑁄 𑀦𑀸𑀫. 𑀲𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀪𑀺𑀓𑁆𑀔𑀽𑀳𑀺 ‘‘𑀏𑀳𑀸𑀯𑀼𑀲𑁄, 𑀧𑀸𑀧𑀓, 𑀢𑀺𑀝𑁆𑀞𑀸𑀯𑀼𑀲𑁄, 𑀧𑀸𑀧𑀓𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀮𑁄𑀓𑁂 𑀧𑀸𑀧𑀓𑀁 𑀦𑀸𑀫 𑀮𑀸𑀫𑀓𑀁 𑀓𑀸𑀴𑀓𑀡𑁆𑀡𑀺𑀪𑀽𑀢𑀁 𑀯𑀼𑀘𑁆𑀘𑀢𑀺, 𑀅𑀜𑁆𑀜𑀁 𑀫𑀗𑁆𑀕𑀮𑀧𑀝𑀺𑀲𑀁𑀬𑀼𑀢𑁆𑀢𑀁 𑀦𑀸𑀫𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀦𑀸𑀫𑀁 𑀅𑀯𑀫𑀗𑁆𑀕𑀮𑀁, 𑀅𑀜𑁆𑀜𑀁 𑀫𑁂 𑀦𑀸𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀦𑀸𑀫𑀁 𑀦𑀸𑀫 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁, 𑀦𑀸𑀫𑁂𑀦 𑀓𑀸𑀘𑀺 𑀅𑀢𑁆𑀣𑀲𑀺𑀤𑁆𑀥𑀺 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀦𑀸𑀫𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀳𑀻’’𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀢𑀲𑁆𑀲𑀸𑀬𑀁 𑀦𑀸𑀫𑀲𑀺𑀤𑁆𑀥𑀺𑀓𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀦𑀸𑀫𑀲𑀺𑀤𑁆𑀥𑀺𑀓𑁄 𑀫𑀗𑁆𑀕𑀮𑀁 𑀦𑀸𑀫𑀁 𑀆𑀳𑀭𑀸𑀧𑁂𑀢𑀻’’𑀢𑀺. 𑀅𑀣 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀦𑀸𑀫𑀲𑀺𑀤𑁆𑀥𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀢𑀓𑁆𑀓𑀲𑀺𑀮𑀸𑀬𑀁 𑀩𑁄𑀥𑀺𑀲𑀢𑁆𑀢𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀢𑀲𑁆𑀲𑁂𑀓𑁄 𑀫𑀸𑀡𑀯𑁄 𑀧𑀸𑀧𑀓𑁄 𑀦𑀸𑀫 𑀦𑀸𑀫𑁂𑀦. 𑀲𑁄 ‘‘𑀏𑀳𑀺, 𑀧𑀸𑀧𑀓, 𑀬𑀸𑀳𑀺, 𑀧𑀸𑀧𑀓𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀦𑀸𑀫𑀁 𑀅𑀯𑀫𑀗𑁆𑀕𑀮𑀁, 𑀅𑀜𑁆𑀜𑀁 𑀦𑀸𑀫𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀘𑀭𑀺𑀬, 𑀫𑀬𑁆𑀳𑀁 𑀦𑀸𑀫𑀁 𑀅𑀯𑀫𑀗𑁆𑀕𑀮𑀁, 𑀅𑀜𑁆𑀜𑀁 𑀫𑁂 𑀦𑀸𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀆𑀘𑀭𑀺𑀬𑁄 𑀅𑀯𑁄𑀘 ‘‘𑀕𑀘𑁆𑀙, 𑀢𑀸𑀢, 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀁 𑀏𑀓𑀁 𑀫𑀗𑁆𑀕𑀮𑀦𑀸𑀫𑀁 𑀕𑀳𑁂𑀢𑁆𑀯𑀸 𑀏𑀳𑀺, 𑀆𑀕𑀢𑀲𑁆𑀲 𑀢𑁂 𑀦𑀸𑀫𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀦𑀸𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀕𑀸𑀫𑁂𑀦 𑀕𑀸𑀫𑀁 𑀘𑀭𑀦𑁆𑀢𑁄 𑀏𑀓𑀁 𑀦𑀕𑀭𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀘𑁂𑀓𑁄 𑀧𑀼𑀭𑀺𑀲𑁄 𑀓𑀸𑀮𑀓𑀢𑁄 𑀚𑀻𑀯𑀓𑁄 𑀦𑀸𑀫 𑀦𑀸𑀫𑁂𑀦. 𑀲𑁄 𑀢𑀁 𑀜𑀸𑀢𑀺𑀚𑀦𑁂𑀦 𑀆𑀴𑀸𑀳𑀦𑀁 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀸𑀫𑀓𑁄 𑀏𑀲 𑀧𑀼𑀭𑀺𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀚𑀻𑀯𑀓𑁄 𑀦𑀸𑀫𑁂𑀲𑁄’’𑀢𑀺. ‘‘𑀚𑀻𑀯𑀓𑁄𑀧𑀺 𑀫𑀭𑀢𑀻’’𑀢𑀺? ‘‘𑀚𑀻𑀯𑀓𑁄𑀧𑀺 𑀫𑀭𑀢𑀺, 𑀅𑀚𑀻𑀯𑀓𑁄𑀧𑀺 𑀫𑀭𑀢𑀺, 𑀦𑀸𑀫𑀁 𑀦𑀸𑀫 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁, 𑀢𑁆𑀯𑀁 𑀩𑀸𑀮𑁄 𑀫𑀜𑁆𑀜𑁂’’𑀢𑀺. 𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀦𑀸𑀫𑁂 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺.

𑀅𑀣𑁂𑀓𑀁 𑀤𑀸𑀲𑀺𑀁 𑀪𑀢𑀺𑀁 𑀅𑀤𑀤𑀫𑀸𑀦𑀁 𑀲𑀸𑀫𑀺𑀓𑀸 𑀤𑁆𑀯𑀸𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀚𑁆𑀚𑀼𑀬𑀸 𑀧𑀳𑀭𑀦𑁆𑀢𑀺, 𑀢𑀲𑁆𑀲𑀸 𑀘 ‘‘𑀥𑀦𑀧𑀸𑀮𑀻’’𑀢𑀺 𑀦𑀸𑀫𑀁 𑀳𑁄𑀢𑀺. 𑀲𑁄 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀧𑁄𑀣𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀇𑀫𑀁 𑀧𑁄𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀢𑀺𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. ‘‘𑀓𑀺𑀁 𑀧𑀦𑀲𑁆𑀲𑀸 𑀦𑀸𑀫’’𑀦𑁆𑀢𑀺? ‘‘𑀥𑀦𑀧𑀸𑀮𑀻 𑀦𑀸𑀫𑀸’’𑀢𑀺. 𑀦𑀸𑀫𑁂𑀦 𑀥𑀦𑀧𑀸𑀮𑀻 𑀲𑀫𑀸𑀦𑀸𑀧𑀺 𑀪𑀢𑀺𑀫𑀢𑁆𑀢𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀥𑀦𑀧𑀸𑀮𑀺𑀬𑁄𑀧𑀺 𑀅𑀥𑀦𑀧𑀸𑀮𑀺𑀬𑁄𑀧𑀺 𑀤𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀦𑀸𑀫𑀁 𑀦𑀸𑀫 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁, 𑀢𑁆𑀯𑀁 𑀩𑀸𑀮𑁄 𑀫𑀜𑁆𑀜𑁂𑀢𑀺. 𑀲𑁄 𑀦𑀸𑀫𑁂 𑀫𑀚𑁆𑀛𑀢𑁆𑀢𑀢𑀭𑁄 𑀳𑀼𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀕𑁆𑀕𑀫𑀽𑀴𑁆𑀳𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀕𑁆𑀕𑀫𑀽𑀴𑁆𑀳𑁄𑀫𑁆𑀳𑀺, 𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀦𑀸𑀫’’𑀦𑁆𑀢𑀺? ‘‘𑀧𑀦𑁆𑀣𑀓𑁄 𑀦𑀸𑀫𑀸’’𑀢𑀺. ‘‘𑀧𑀦𑁆𑀣𑀓𑁄𑀧𑀺 𑀫𑀕𑁆𑀕𑀫𑀽𑀴𑁆𑀳𑁄 𑀳𑁄𑀢𑀻’’𑀢𑀺? ‘‘𑀧𑀦𑁆𑀣𑀓𑁄𑀧𑀺 𑀅𑀧𑀦𑁆𑀣𑀓𑁄𑀧𑀺 𑀫𑀕𑁆𑀕𑀫𑀽𑀴𑁆𑀳𑁄 𑀳𑁄𑀢𑀺, 𑀦𑀸𑀫𑀁 𑀦𑀸𑀫 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁 𑀢𑁆𑀯𑀁 𑀧𑀦 𑀩𑀸𑀮𑁄 𑀫𑀜𑁆𑀜𑁂𑀢𑀺’’. 𑀲𑁄 𑀦𑀸𑀫𑁂 𑀅𑀢𑀺𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢, 𑀦𑀸𑀫𑀁 𑀭𑁄𑀘𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀘𑀭𑀺𑀬, 𑀚𑀻𑀯𑀓𑀸𑀧𑀺 𑀦𑀸𑀫 𑀫𑀭𑀦𑁆𑀢𑀺 𑀅𑀚𑀻𑀯𑀓𑀸𑀧𑀺, 𑀥𑀦𑀧𑀸𑀮𑀺𑀬𑁄𑀧𑀺 𑀤𑀼𑀕𑁆𑀕𑀢𑀸 𑀳𑁄𑀦𑁆𑀢𑀺 𑀅𑀥𑀦𑀧𑀸𑀮𑀺𑀬𑁄𑀧𑀺, 𑀧𑀦𑁆𑀣𑀓𑀸𑀧𑀺 𑀫𑀕𑁆𑀕𑀫𑀽𑀴𑁆𑀳𑀸 𑀳𑁄𑀦𑁆𑀢𑀺 𑀅𑀧𑀦𑁆𑀣𑀓𑀸𑀧𑀺, 𑀦𑀸𑀫𑀁 𑀦𑀸𑀫 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁, 𑀦𑀸𑀫𑁂𑀦 𑀲𑀺𑀤𑁆𑀥𑀺 𑀦𑀢𑁆𑀣𑀺, 𑀓𑀫𑁆𑀫𑁂𑀦𑁂𑀯 𑀲𑀺𑀤𑁆𑀥𑀺. 𑀅𑀮𑀁 𑀫𑀬𑁆𑀳𑀁 𑀅𑀜𑁆𑀜𑁂𑀦 𑀦𑀸𑀫𑁂𑀦, 𑀢𑀤𑁂𑀯 𑀫𑁂 𑀦𑀸𑀫𑀁 𑀳𑁄𑀢𑀽’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀤𑀺𑀝𑁆𑀞𑀜𑁆𑀘 𑀓𑀢𑀜𑁆𑀘 𑀲𑀁𑀲𑀦𑁆𑀤𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁭. ‘‘𑀚𑀻𑀯𑀓𑀜𑁆𑀘 𑀫𑀢𑀁 𑀤𑀺𑀲𑁆𑀯𑀸, 𑀥𑀦𑀧𑀸𑀮𑀺𑀜𑁆𑀘 𑀤𑀼𑀕𑁆𑀕𑀢𑀁;

𑀧𑀦𑁆𑀣𑀓𑀜𑁆𑀘 𑀯𑀦𑁂 𑀫𑀽𑀴𑁆𑀳𑀁, 𑀧𑀸𑀧𑀓𑁄 𑀧𑀼𑀦𑀭𑀸𑀕𑀢𑁄’’𑀢𑀺.

𑀢𑀢𑁆𑀣 𑀧𑀼𑀦𑀭𑀸𑀕𑀢𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸 𑀧𑀼𑀦 𑀆𑀕𑀢𑁄, 𑀭-𑀓𑀸𑀭𑁄 𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀦𑀸𑀫𑀲𑀺𑀤𑁆𑀥𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀦𑀸𑀫𑀲𑀺𑀤𑁆𑀥𑀺𑀓𑁄 𑀇𑀤𑀸𑀦𑀺𑀧𑀺 𑀦𑀸𑀫𑀲𑀺𑀤𑁆𑀥𑀺𑀓𑁄𑀬𑁂𑀯, 𑀆𑀘𑀭𑀺𑀬𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀸𑀫𑀲𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁯𑁮] 𑁮. 𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀸𑀥𑀼 𑀔𑁄 𑀧𑀡𑁆𑀟𑀺𑀢𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀽𑀝𑀯𑀸𑀡𑀺𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀤𑁆𑀯𑁂 𑀚𑀦𑀸 𑀏𑀓𑀢𑁄 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑀸 𑀪𑀡𑁆𑀟𑀁 𑀲𑀓𑀝𑁂𑀦𑀸𑀤𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀮𑀤𑁆𑀥𑀮𑀸𑀪𑀸 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀢𑁂𑀲𑀼 𑀓𑀽𑀝𑀯𑀸𑀡𑀺𑀚𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀳𑀽 𑀤𑀺𑀯𑀲𑁂 𑀤𑀼𑀩𑁆𑀪𑁄𑀚𑀦𑁂𑀦 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀓𑀺𑀮𑀦𑁆𑀢𑁄, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀖𑀭𑁂 𑀦𑀸𑀦𑀕𑁆𑀕𑀭𑀲𑁂𑀳𑀺 𑀬𑀸𑀯𑀤𑀢𑁆𑀣𑀁 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀚𑀻𑀭𑀓𑁂𑀦 𑀫𑀭𑀺𑀲𑁆𑀲𑀢𑀺. 𑀅𑀣𑀸𑀳𑀁 𑀇𑀫𑀁 𑀪𑀡𑁆𑀟𑀁 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑀁 𑀢𑀲𑁆𑀲 𑀤𑀸𑀭𑀓𑀸𑀦𑀁 𑀤𑀲𑁆𑀲𑀸𑀫𑀺, 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑁆𑀢𑀦𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀅𑀚𑁆𑀚 𑀪𑀸𑀚𑁂𑀲𑁆𑀲𑀸𑀫, 𑀲𑁆𑀯𑁂 𑀪𑀸𑀚𑁂𑀲𑁆𑀲𑀸𑀫𑀸’’𑀢𑀺 𑀪𑀡𑁆𑀟𑀁 𑀪𑀸𑀚𑁂𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑀁 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀅𑀓𑀸𑀫𑀓𑀁 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀪𑀸𑀚𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀅𑀢𑀺𑀧𑀧𑀜𑁆𑀘𑁄 𑀢𑁂 𑀓𑀢𑁄, 𑀇𑀥𑀸𑀕𑀦𑁆𑀢𑁆𑀯𑀸𑀧𑀺 𑀘𑀺𑀭𑁂𑀦 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄 𑀲𑁄, 𑀉𑀧𑀸𑀲𑀓, 𑀇𑀤𑀸𑀦𑁂𑀯 𑀓𑀽𑀝𑀯𑀸𑀡𑀺𑀚𑁄, 𑀧𑀼𑀩𑁆𑀩𑁂𑀧𑀺 𑀓𑀽𑀝𑀯𑀸𑀡𑀺𑀚𑁄𑀬𑁂𑀯. 𑀇𑀤𑀸𑀦𑀺 𑀧𑀦 𑀢𑀁 𑀯𑀜𑁆𑀘𑁂𑀢𑀼𑀓𑀸𑀫𑁄 𑀚𑀸𑀢𑁄, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑁂𑀧𑀺 𑀯𑀜𑁆𑀘𑁂𑀢𑀼𑀁 𑀉𑀲𑁆𑀲𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀧𑀡𑁆𑀟𑀺𑀢𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀅𑀜𑁆𑀜𑁂𑀦 𑀯𑀸𑀡𑀺𑀚𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀯𑀡𑀺𑀚𑁆𑀚𑀁 𑀓𑀭𑁄𑀢𑀺, 𑀢𑀲𑁆𑀲 ‘‘𑀅𑀢𑀺𑀧𑀡𑁆𑀟𑀺𑀢𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑁂 𑀩𑀸𑀭𑀸𑀡𑀲𑀺𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀯𑀡𑀺𑀚𑁆𑀚𑀁 𑀓𑀢𑁆𑀯𑀸 𑀮𑀤𑁆𑀥𑀮𑀸𑀪𑀸 𑀧𑀼𑀦 𑀩𑀸𑀭𑀸𑀡𑀲𑀺𑀁 𑀆𑀕𑀫𑀺𑀁𑀲𑀼. 𑀅𑀣 𑀦𑁂𑀲𑀁 𑀪𑀡𑁆𑀟𑀪𑀸𑀚𑀦𑀓𑀸𑀮𑁂 𑀅𑀢𑀺𑀧𑀡𑁆𑀟𑀺𑀢𑁄 𑀆𑀳 ‘‘𑀫𑀬𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀮𑀤𑁆𑀥𑀩𑁆𑀩𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀢𑁆𑀯𑀁 𑀧𑀡𑁆𑀟𑀺𑀢𑁄, 𑀅𑀳𑀁 𑀅𑀢𑀺𑀧𑀡𑁆𑀟𑀺𑀢𑁄. 𑀧𑀡𑁆𑀟𑀺𑀢𑁄 𑀏𑀓𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺, 𑀅𑀢𑀺𑀧𑀡𑁆𑀟𑀺𑀢𑁄 𑀤𑁆𑀯𑁂’’𑀢𑀺. ‘‘𑀦𑀦𑀼 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀪𑀡𑁆𑀟𑀫𑀽𑀮𑀓𑀫𑁆𑀧𑀺 𑀕𑁄𑀡𑀸𑀤𑀬𑁄𑀧𑀺 𑀲𑀫𑀲𑀫𑀸𑀬𑁂𑀯, 𑀢𑁆𑀯𑀁 𑀓𑀲𑁆𑀫𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀮𑀤𑁆𑀥𑀼𑀁 𑀅𑀭𑀳𑀲𑀻’’𑀢𑀺. ‘‘𑀅𑀢𑀺𑀧𑀡𑁆𑀟𑀺𑀢𑀪𑀸𑀯𑁂𑀦𑀸’’𑀢𑀺. 𑀏𑀯𑀁 𑀢𑁂 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 𑀓𑀮𑀳𑀁 𑀅𑀓𑀁𑀲𑀼.

𑀢𑀢𑁄 𑀅𑀢𑀺𑀧𑀡𑁆𑀟𑀺𑀢𑁄 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀏𑀓𑀲𑁆𑀫𑀺𑀁 𑀲𑀼𑀲𑀺𑀭𑀭𑀼𑀓𑁆𑀔𑁂 𑀧𑀯𑁂𑀲𑁂𑀢𑁆𑀯𑀸 ‘‘𑀢𑁆𑀯𑀁 𑀅𑀫𑁆𑀳𑁂𑀲𑀼 𑀆𑀕𑀢𑁂𑀲𑀼 ‘𑀅𑀢𑀺𑀧𑀡𑁆𑀟𑀺𑀢𑁄 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀮𑀤𑁆𑀥𑀼𑀁 𑀅𑀭𑀳𑀢𑀻’𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀫𑀬𑁆𑀳𑀁 𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀬𑀼𑀢𑁆𑀢𑀪𑀸𑀯𑀁 𑀯𑀸 𑀅𑀬𑀼𑀢𑁆𑀢𑀪𑀸𑀯𑀁 𑀯𑀸 𑀏𑀲𑀸 𑀭𑀼𑀓𑁆𑀔𑀤𑁂𑀯𑀢𑀸 𑀚𑀸𑀦𑀸𑀢𑀺, 𑀏𑀳𑀺, 𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀅𑀬𑁆𑀬𑁂 𑀭𑀼𑀓𑁆𑀔𑀤𑁂𑀯𑀢𑁂, 𑀅𑀫𑁆𑀳𑀸𑀓𑀁 𑀅𑀝𑁆𑀝𑀁 𑀧𑀘𑁆𑀙𑀺𑀦𑁆𑀤𑀸’’𑀢𑀺 𑀆𑀳. 𑀅𑀣𑀲𑁆𑀲 𑀧𑀺𑀢𑀸 𑀲𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀓𑀣𑁂𑀣𑀸’’𑀢𑀺 𑀆𑀳. ‘‘𑀅𑀬𑁆𑀬𑁂, 𑀅𑀬𑀁 𑀧𑀡𑁆𑀟𑀺𑀢𑁄, 𑀅𑀳𑀁 𑀅𑀢𑀺𑀧𑀡𑁆𑀟𑀺𑀢𑁄. 𑀅𑀫𑁆𑀳𑁂𑀳𑀺 𑀏𑀓𑀢𑁄 𑀯𑁄𑀳𑀸𑀭𑁄 𑀓𑀢𑁄, 𑀢𑀢𑁆𑀣 𑀓𑁂𑀦 𑀓𑀺𑀁 𑀮𑀤𑁆𑀥𑀩𑁆𑀩𑀦𑁆𑀢𑀺. 𑀧𑀡𑁆𑀟𑀺𑀢𑁂𑀦 𑀏𑀓𑁄 𑀓𑁄𑀝𑁆𑀞𑀸𑀲𑁄, 𑀅𑀢𑀺𑀧𑀡𑁆𑀟𑀺𑀢𑁂𑀦 𑀧𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀮𑀤𑁆𑀥𑀩𑁆𑀩𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀁 𑀅𑀝𑁆𑀝𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀤𑁂𑀯𑀢𑀸𑀪𑀸𑀯𑀁 𑀯𑀸 𑀅𑀤𑁂𑀯𑀢𑀸𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀮𑀸𑀮𑀁 𑀆𑀳𑀭𑀺𑀢𑁆𑀯𑀸 𑀲𑀼𑀲𑀺𑀭𑀁 𑀧𑀽𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀸𑀲𑀺, 𑀅𑀢𑀺𑀧𑀡𑁆𑀟𑀺𑀢𑀲𑁆𑀲 𑀧𑀺𑀢𑀸 𑀚𑀸𑀮𑀸𑀬 𑀨𑀼𑀝𑁆𑀞𑀓𑀸𑀮𑁂 𑀅𑀟𑁆𑀠𑀚𑁆𑀛𑀸𑀫𑁂𑀦 𑀲𑀭𑀻𑀭𑁂𑀦 𑀉𑀧𑀭𑀺 𑀆𑀭𑀼𑀬𑁆𑀳 𑀲𑀸𑀔𑀁 𑀕𑀳𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁮. ‘‘𑀲𑀸𑀥𑀼 𑀔𑁄 𑀧𑀡𑁆𑀟𑀺𑀢𑁄 𑀦𑀸𑀫, 𑀦 𑀢𑁆𑀯𑁂𑀯 𑀅𑀢𑀺𑀧𑀡𑁆𑀟𑀺𑀢𑁄;

𑀅𑀢𑀺𑀧𑀡𑁆𑀟𑀺𑀢𑁂𑀦 𑀧𑀼𑀢𑁆𑀢𑁂𑀦, 𑀫𑀦𑀫𑁆𑀳𑀺 𑀉𑀧𑀓𑀽𑀴𑀺𑀢𑁄’’𑀢𑀺.

𑀢𑀢𑁆𑀣 𑀲𑀸𑀥𑀼 𑀔𑁄 𑀧𑀡𑁆𑀟𑀺𑀢𑁄 𑀦𑀸𑀫𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀸𑀭𑀡𑀸𑀓𑀸𑀭𑀡𑀜𑁆𑀜𑀽 𑀧𑀼𑀕𑁆𑀕𑀮𑁄 𑀲𑀸𑀥𑀼 𑀲𑁄𑀪𑀦𑁄. 𑀅𑀢𑀺𑀧𑀡𑁆𑀟𑀺𑀢𑁄𑀢𑀺 𑀦𑀸𑀫𑀫𑀢𑁆𑀢𑁂𑀦 𑀅𑀢𑀺𑀧𑀡𑁆𑀟𑀺𑀢𑁄 𑀓𑀽𑀝𑀧𑀼𑀭𑀺𑀲𑁄 𑀦 𑀢𑁆𑀯𑁂𑀯 𑀯𑀭𑀁. 𑀫𑀦𑀫𑁆𑀳𑀺 𑀉𑀧𑀓𑀽𑀴𑀺𑀢𑁄𑀢𑀺 𑀣𑁄𑀓𑁂𑀦𑀫𑁆𑀳𑀺 𑀛𑀸𑀫𑁄, 𑀅𑀟𑁆𑀠𑀚𑁆𑀛𑀸𑀫𑀓𑁄𑀯 𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂 𑀉𑀪𑁄𑀧𑀺 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀜𑁆𑀜𑁂𑀯 𑀓𑁄𑀝𑁆𑀞𑀸𑀲𑀁 𑀕𑀡𑁆𑀳𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀏𑀲 𑀓𑀽𑀝𑀯𑀸𑀡𑀺𑀚𑁄𑀬𑁂𑀯𑀸’’𑀢𑀺 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀯𑀸𑀡𑀺𑀚𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀓𑀽𑀝𑀯𑀸𑀡𑀺𑀚𑁄𑀬𑁂𑀯, 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁯𑁯] 𑁯. 𑀧𑀭𑁄𑀲𑀳𑀲𑁆𑀲𑀚𑀸𑀢𑀓𑀯𑀡𑁆𑀡𑀦𑀸

𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀧𑀼𑀘𑁆𑀙𑀸𑀧𑀜𑁆𑀘𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀭𑀪𑀚𑀸𑀢𑀓𑁂 (𑀚𑀸. 𑁧.𑁧𑁩.𑁧𑁩𑁪 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑀲𑀩𑀮𑁂𑀦 𑀲𑀁𑀔𑀺𑀢𑁆𑀢𑁂𑀦 𑀓𑀣𑀺𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀯𑀺𑀢𑁆𑀣𑀸𑀭𑁂𑀦 𑀩𑁆𑀬𑀸𑀓𑀸𑀲𑀻’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀓𑀣𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀁 𑀯𑀺𑀢𑁆𑀣𑀸𑀭𑁂𑀦 𑀩𑁆𑀬𑀸𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀩𑁆𑀬𑀸𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀺𑀳𑀸𑀲𑀺. 𑀧𑀭𑀺𑀯𑀸𑀭𑁄𑀧𑀺𑀲𑁆𑀲 𑀧𑀜𑁆𑀘 𑀢𑀸𑀧𑀲𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀉𑀧𑀟𑁆𑀠𑀁 𑀇𑀲𑀺𑀕𑀡𑀁 𑀆𑀤𑀸𑀬 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀅𑀕𑀫𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀲𑀫𑀬𑁄 𑀚𑀸𑀢𑁄. 𑀅𑀣 𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 ‘‘𑀆𑀘𑀭𑀺𑀬, 𑀓𑀢𑀭𑁄 𑀯𑁄 𑀕𑀼𑀡𑁄 𑀮𑀤𑁆𑀥𑁄’’𑀢𑀺 𑀅𑀥𑀺𑀕𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀯𑀢𑁆𑀯𑀸 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑀸 𑀳𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀼𑀢𑁆𑀯𑀸𑀧𑀺 𑀅𑀪𑀩𑁆𑀩𑀝𑁆𑀞𑀸𑀦𑀢𑁆𑀢𑀸 𑀆𑀭𑀼𑀧𑁆𑀧𑁂 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸 ‘‘𑀆𑀘𑀭𑀺𑀬𑀲𑁆𑀲 𑀅𑀥𑀺𑀕𑀫𑁄 𑀦𑀢𑁆𑀣𑀻’’𑀢𑀺 𑀆𑀴𑀸𑀳𑀦𑁂 𑀲𑀓𑁆𑀓𑀸𑀭𑀁 𑀦 𑀓𑀭𑀺𑀁𑀲𑀼.

𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀸𑀮𑀓𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀅𑀧𑀺 𑀆𑀘𑀭𑀺𑀬𑀁 𑀅𑀥𑀺𑀕𑀫𑀁 𑀧𑀼𑀘𑁆𑀙𑀺𑀢𑁆𑀣𑀸’’𑀢𑀺 𑀆𑀳. ‘‘𑀆𑀫, 𑀧𑀼𑀘𑁆𑀙𑀺𑀫𑁆𑀳𑀸’’𑀢𑀺. ‘‘𑀓𑀺𑀁 𑀓𑀣𑁂𑀲𑀻’’𑀢𑀺? ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀢𑁂𑀦 𑀯𑀼𑀢𑁆𑀢𑀁, 𑀅𑀣𑀲𑁆𑀲 𑀅𑀫𑁆𑀳𑁂𑀳𑀺 𑀲𑀓𑁆𑀓𑀸𑀭𑁄 𑀦 𑀓𑀢𑁄’’𑀢𑀺 𑀆𑀳𑀁𑀲𑀼. 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 ‘‘𑀢𑀼𑀫𑁆𑀳𑁂 𑀆𑀘𑀭𑀺𑀬𑀲𑁆𑀲 𑀯𑀘𑀦𑀢𑁆𑀣𑀁 𑀦 𑀚𑀸𑀦𑀸𑀣, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀆𑀘𑀭𑀺𑀬𑁄’’𑀢𑀺 𑀆𑀳. 𑀢𑁂 𑀢𑀲𑁆𑀫𑀺𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀧𑀺 𑀦 𑀲𑀤𑁆𑀤𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮𑀸 𑀫𑀫 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀤𑀳𑀦𑁆𑀢𑀺. 𑀇𑀫𑀁 𑀢𑁂𑀲𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑀸 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑀫𑀧𑀤𑀫𑀢𑁆𑀣𑀓𑁂 𑀫𑀳𑀦𑁆𑀢𑁂𑀦𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀞𑀢𑁆𑀯𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀜𑁆𑀜𑀸𑀦𑀼𑀪𑀸𑀯𑀁 𑀯𑀡𑁆𑀡𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁯. ‘‘𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀁, 𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄, 𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀧𑀭𑁄𑀲𑀳𑀲𑁆𑀲𑀫𑁆𑀧𑀻𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀫𑁆𑀧𑀺. 𑀲𑀫𑀸𑀕𑀢𑀸𑀦𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀩𑀸𑀮𑀸𑀦𑀁. 𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸𑀢𑀺 𑀢𑁂 𑀏𑀯𑀁 𑀲𑀫𑀸𑀕𑀢𑀸 𑀅𑀧𑀜𑁆𑀜𑀸 𑀇𑀫𑁂 𑀩𑀸𑀮𑀢𑀸𑀧𑀲𑀸 𑀯𑀺𑀬 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀭𑁄𑀤𑁂𑀬𑁆𑀬𑀼𑀁 𑀧𑀭𑀺𑀤𑁂𑀯𑁂𑀬𑁆𑀬𑀼𑀁, 𑀭𑁄𑀤𑀫𑀸𑀦𑀸𑀧𑀺 𑀧𑀦 𑀅𑀢𑁆𑀣𑀁 𑀯𑀸 𑀓𑀸𑀭𑀡𑀁 𑀯𑀸 𑀦𑁂𑀯 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄𑀢𑀺 𑀏𑀯𑀭𑀽𑀧𑀸𑀦𑀁 𑀩𑀸𑀮𑀸𑀦𑀁 𑀧𑀭𑁄𑀲𑀳𑀲𑁆𑀲𑀢𑁄𑀧𑀺 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄𑀯 𑀲𑁂𑀬𑁆𑀬𑁄 𑀯𑀭𑀢𑀭𑁄𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑁄 𑀲𑀧𑀜𑁆𑀜𑁄𑀢𑀺? 𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣𑀁 𑀅𑀬𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀯𑀺𑀬𑀸𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑁂 𑀞𑀺𑀢𑁄𑀯 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀸𑀧𑀲𑀕𑀡𑀁 𑀩𑀼𑀚𑁆𑀛𑀸𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄. 𑀢𑁂𑀧𑀺 𑀢𑀸𑀧𑀲𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀭𑁄𑀲𑀳𑀲𑁆𑀲𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁦𑁦] 𑁧𑁦. 𑀅𑀲𑀸𑀢𑀭𑀽𑀧𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀼𑀡𑁆𑀟𑀺𑀬𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀓𑀼𑀡𑁆𑀟𑀥𑀸𑀦𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀮𑀺𑀬𑀭𑀸𑀚𑀥𑀻𑀢𑀭𑀁 𑀲𑀼𑀧𑁆𑀧𑀯𑀸𑀲𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀓𑀼𑀘𑁆𑀙𑀺𑀦𑀸 𑀕𑀩𑁆𑀪𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀅𑀳𑁄𑀲𑀺, 𑀅𑀥𑀺𑀫𑀢𑁆𑀢𑀸 𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼. 𑀲𑀸 𑀏𑀯𑀁 𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀪𑀺𑀪𑀽𑀢𑀸𑀧𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑁄 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄. 𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣𑁂𑀯 𑀭𑀽𑀧𑀁 𑀤𑀼𑀓𑁆𑀔𑀁 𑀦𑀢𑁆𑀣𑀻’’𑀢𑀺 (𑀉𑀤𑀸. 𑁧𑁮) 𑀇𑀫𑁂𑀳𑀺 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀥𑀺𑀯𑀸𑀲𑁂𑀲𑀺. 𑀲𑀸 𑀲𑀸𑀫𑀺𑀓𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 𑀢𑀜𑁆𑀘 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀯𑀦𑁆𑀤𑀦𑀲𑀸𑀲𑀦𑀜𑁆𑀘 𑀆𑀭𑁄𑀘𑁂𑀢𑀼𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀲𑀢𑁆𑀣𑀸 𑀯𑀦𑁆𑀤𑀦𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 ‘‘𑀲𑀼𑀔𑀺𑀦𑀻 𑀳𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸, 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺 𑀆𑀳. 𑀲𑀳 𑀯𑀘𑀦𑁂𑀦𑁂𑀯 𑀧𑀦 𑀪𑀕𑀯𑀢𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀚𑀸𑀢𑀁 𑀤𑀺𑀲𑁆𑀯𑀸 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄’’𑀢𑀺 𑀅𑀢𑀺𑀯𑀺𑀬 𑀢𑀣𑀸𑀕𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀅𑀳𑁄𑀲𑀺.

𑀲𑀼𑀧𑁆𑀧𑀯𑀸𑀲𑀸𑀧𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀸𑀢𑀼𑀓𑀸𑀫𑀸 𑀧𑀼𑀦 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀢𑀁 𑀧𑁂𑀲𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄 𑀳𑁄𑀢𑀺. 𑀲𑀢𑁆𑀣𑀸 𑀲𑀼𑀧𑁆𑀧𑀯𑀸𑀲𑀸𑀬 𑀤𑀸𑀦𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀸𑀬 𑀣𑁂𑀭𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀢𑀲𑁆𑀲𑀸 𑀤𑀸𑀦𑀁 𑀧𑀝𑀺𑀕𑁆𑀕𑀳𑁂𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀲𑀼𑀧𑁆𑀧𑀯𑀸𑀲𑀸 𑀧𑀼𑀢𑁆𑀢𑀁 𑀲𑀻𑀯𑀮𑀺𑀓𑀼𑀫𑀸𑀭𑀁 𑀫𑀡𑁆𑀟𑁂𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀝𑀺𑀧𑀸𑀝𑀺𑀬𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦𑀻𑀢𑁂 𑀣𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 ‘‘𑀓𑀘𑁆𑀘𑀺 𑀢𑁂, 𑀲𑀻𑀯𑀮𑀺, 𑀔𑀫𑀦𑀻𑀬’’𑀦𑁆𑀢𑀺 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀲𑁄 ‘‘𑀓𑀼𑀢𑁄 𑀫𑁂, 𑀪𑀦𑁆𑀢𑁂, 𑀲𑀼𑀔𑀁, 𑀲𑁆𑀯𑀸𑀳𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀯𑀲𑀺’’𑀦𑁆𑀢𑀺 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀲𑀺. 𑀲𑀼𑀧𑁆𑀧𑀸𑀯𑀸𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀢𑁆𑀢𑀸𑀳𑀚𑀸𑀢𑁄 𑀫𑁂 𑀧𑀼𑀢𑁆𑀢𑁄 𑀅𑀦𑀼𑀩𑀼𑀤𑁆𑀥𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀲𑀢𑁆𑀣𑀸 ‘‘𑀅𑀧𑀺 𑀦𑀼 𑀲𑀼𑀧𑁆𑀧𑀯𑀸𑀲𑁂 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂 𑀧𑀼𑀢𑁆𑀢𑁂 𑀇𑀘𑁆𑀙𑀲𑀻’’𑀢𑀺 𑀆𑀳. ‘‘𑀲𑀘𑁂, 𑀪𑀦𑁆𑀢𑁂, 𑀏𑀯𑀭𑀽𑀧𑁂 𑀅𑀜𑁆𑀜𑁂 𑀲𑀢𑁆𑀢 𑀧𑀼𑀢𑁆𑀢𑁂 𑀮𑀪𑁂𑀬𑁆𑀬𑀁, 𑀇𑀘𑁆𑀙𑁂𑀬𑁆𑀬𑀫𑁂𑀯𑀸𑀳’’𑀦𑁆𑀢𑀺. 𑀲𑀢𑁆𑀣𑀸 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀻𑀯𑀮𑀺𑀓𑀼𑀫𑀸𑀭𑁄𑀧𑀺 𑀔𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂𑀬𑁂𑀯 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀧𑀼𑀜𑁆𑀜𑀯𑀸 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀧𑀣𑀯𑀺𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀸𑀧𑀼𑀡𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀲𑀻𑀯𑀮𑀺𑀢𑁆𑀣𑁂𑀭𑁄 𑀦𑀸𑀫 𑀏𑀯𑀭𑀽𑀧𑁄 𑀫𑀳𑀸𑀧𑀼𑀜𑁆𑀜𑁄 𑀧𑀢𑁆𑀣𑀺𑀢𑀧𑀢𑁆𑀣𑀦𑁄 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀁 𑀆𑀧𑀚𑁆𑀚𑀺, 𑀅𑀳𑁄 𑀫𑀸𑀢𑀸𑀧𑀼𑀢𑁆𑀢𑀸 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁𑀲𑀼, 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀅𑀓𑀁𑀲𑀽’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀢𑀢𑁆𑀣𑀸𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀲𑀻𑀯𑀮𑀺𑀦𑁄 𑀫𑀳𑀸𑀧𑀼𑀜𑁆𑀜𑀢𑁄𑀯 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀦𑀺𑀯𑀸𑀲𑁄 𑀘 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀧𑁆𑀧𑀢𑁆𑀢𑀺 𑀘 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀫𑀽𑀮𑀓𑀸𑀯, 𑀲𑀼𑀧𑁆𑀧𑀯𑀸𑀲𑀸𑀬𑀧𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀓𑀼𑀘𑁆𑀙𑀺𑀦𑀸 𑀕𑀩𑁆𑀪𑀧𑀭𑀺𑀳𑀭𑀡𑀤𑀼𑀓𑁆𑀔𑀜𑁆𑀘 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀤𑀼𑀓𑁆𑀔𑀜𑁆𑀘 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀫𑀽𑀮𑀓𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑁄𑀲𑀮𑀫𑀳𑀸𑀭𑀸𑀚𑀸 𑀫𑀳𑀦𑁆𑀢𑁂𑀦 𑀩𑀮𑁂𑀦𑀸𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲𑁂𑀯 𑀅𑀕𑁆𑀕𑀫𑀳𑁂𑀲𑀺𑀁 𑀅𑀢𑁆𑀢𑀦𑁄 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀦 𑀧𑀼𑀢𑁆𑀢𑁄 𑀧𑀺𑀢𑀼 𑀫𑀭𑀡𑀓𑀸𑀮𑁂 𑀦𑀺𑀤𑁆𑀥𑀫𑀦𑀤𑁆𑀯𑀸𑀭𑁂𑀦 𑀧𑀮𑀸𑀬𑀺𑀢𑁆𑀯𑀸 𑀩𑀮𑀁 𑀲𑀁𑀳𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀆𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀺 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 ‘‘𑀬𑀼𑀤𑁆𑀥𑀁 𑀤𑁂𑀫𑀻’’𑀢𑀺 𑀧𑀝𑀺𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀦 𑀫𑀸𑀢𑀸 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀬𑀼𑀤𑁆𑀥𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑀼, 𑀢𑀢𑁄 𑀤𑀸𑀭𑀽𑀤𑀓𑀪𑀢𑁆𑀢𑀧𑀭𑀺𑀓𑁆𑀔𑀬𑁂𑀦 𑀓𑀺𑀮𑀦𑁆𑀢𑀫𑀦𑀼𑀲𑁆𑀲𑀁 𑀦𑀕𑀭𑀁 𑀯𑀺𑀦𑀸𑀯 𑀬𑀼𑀤𑁆𑀥𑁂𑀦 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀲𑁄 𑀫𑀸𑀢𑀼 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀭𑀼𑀦𑁆𑀥𑀺, 𑀦𑀸𑀕𑀭𑀸 𑀲𑀜𑁆𑀘𑀸𑀭𑀁 𑀅𑀮𑀪𑀫𑀸𑀦𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀲𑁆𑀲 𑀭𑀜𑁆𑀜𑁄 𑀲𑀻𑀲𑀁 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀤𑀁𑀲𑀼. 𑀓𑀼𑀫𑀸𑀭𑁄 𑀧𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑁄 𑀏𑀢𑀭𑀳𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀕𑀳𑀺𑀢𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀁 𑀆𑀧𑀚𑁆𑀚𑀺. 𑀬𑀁 𑀧𑀦 𑀲𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 ‘‘𑀮𑀸𑀪𑀻𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺, 𑀬𑀜𑁆𑀘 𑀯𑀺𑀧𑀲𑁆𑀲𑀺𑀩𑀼𑀤𑁆𑀥𑀓𑀸𑀮𑁂 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀲𑀳𑀲𑁆𑀲𑀕𑁆𑀖𑀦𑀓𑀁 𑀕𑀼𑀴𑀤𑀥𑀺𑀁 𑀤𑀢𑁆𑀯𑀸 𑀧𑀢𑁆𑀣𑀦𑀫𑀓𑀸𑀲𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀮𑀸𑀪𑀻𑀦𑀁 𑀅𑀕𑁆𑀕𑁄 𑀚𑀸𑀢𑁄. 𑀲𑀼𑀧𑁆𑀧𑀯𑀸𑀲𑀸𑀧𑀺 ‘‘𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀕𑀡𑁆𑀳, 𑀢𑀸𑀢𑀸’’𑀢𑀺 𑀧𑁂𑀲𑀺𑀢𑀪𑀸𑀯𑁂𑀦 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀓𑀼𑀘𑁆𑀙𑀺𑀦𑀸 𑀕𑀩𑁆𑀪𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀚𑀸𑀢𑀸.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁦. ‘‘𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦, 𑀧𑀺𑀬𑀭𑀽𑀧𑁂𑀦 𑀅𑀧𑁆𑀧𑀺𑀬𑀁;

𑀤𑀼𑀓𑁆𑀔𑀁 𑀲𑀼𑀔𑀲𑁆𑀲 𑀭𑀽𑀧𑁂𑀦, 𑀧𑀫𑀢𑁆𑀢𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀢𑀢𑁆𑀣 𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦𑀸𑀢𑀺 𑀅𑀫𑀥𑀼𑀭𑀫𑁂𑀯 𑀫𑀥𑀼𑀭𑀧𑀢𑀺𑀭𑀽𑀧𑀓𑁂𑀦. 𑀧𑀫𑀢𑁆𑀢𑀫𑀢𑀺𑀯𑀢𑁆𑀢𑀢𑀻𑀢𑀺 𑀅𑀲𑀸𑀢𑀁 𑀅𑀧𑁆𑀧𑀺𑀬𑀁 𑀤𑀼𑀓𑁆𑀔𑀦𑁆𑀢𑀺 𑀏𑀢𑀁 𑀢𑀺𑀯𑀺𑀥𑀫𑁆𑀧𑀺 𑀏𑀢𑁂𑀦 𑀲𑀸𑀢𑀭𑀽𑀧𑀸𑀤𑀺𑀦𑀸 𑀆𑀓𑀸𑀭𑁂𑀦 𑀲𑀢𑀺𑀯𑀺𑀧𑁆𑀧𑀯𑀸𑀲𑀯𑀲𑁂𑀦 𑀧𑀫𑀢𑁆𑀢𑀁 𑀧𑀼𑀕𑁆𑀕𑀮𑀁 𑀅𑀢𑀺𑀯𑀢𑁆𑀢𑀢𑀺 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀪𑀕𑀯𑀢𑀸 𑀬𑀜𑁆𑀘 𑀢𑁂 𑀫𑀸𑀢𑀸𑀧𑀼𑀢𑁆𑀢𑀸 𑀇𑀫𑀺𑀦𑀸 𑀕𑀩𑁆𑀪𑀧𑀭𑀺𑀳𑀭𑀡𑀕𑀩𑁆𑀪𑀯𑀸𑀲𑀲𑀗𑁆𑀔𑀸𑀢𑁂𑀦 𑀅𑀲𑀸𑀢𑀸𑀤𑀺𑀦𑀸 𑀧𑀼𑀩𑁆𑀩𑁂 𑀦𑀕𑀭𑀭𑀼𑀦𑁆𑀥𑀦𑀲𑀸𑀢𑀸𑀤𑀺𑀧𑀢𑀺𑀭𑀽𑀧𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑀸, 𑀬𑀜𑁆𑀘 𑀇𑀤𑀸𑀦𑀺 𑀲𑀸 𑀉𑀧𑀸𑀲𑀺𑀓𑀸 𑀧𑀼𑀦𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀏𑀯𑀭𑀽𑀧𑀁 𑀅𑀲𑀸𑀢𑀁 𑀅𑀧𑁆𑀧𑀺𑀬𑀁 𑀤𑀼𑀓𑁆𑀔𑀁 𑀧𑁂𑀫𑀯𑀢𑁆𑀣𑀼𑀪𑀽𑀢𑁂𑀦 𑀧𑀼𑀢𑁆𑀢𑀲𑀗𑁆𑀔𑀸𑀢𑁂𑀦 𑀲𑀸𑀢𑀸𑀤𑀺𑀧𑀢𑀺𑀭𑀽𑀧𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑀸 𑀳𑀼𑀢𑁆𑀯𑀸 𑀢𑀣𑀸 𑀅𑀯𑀘, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀭𑀚𑁆𑀚𑀧𑁆𑀧𑀢𑁆𑀢𑀓𑀼𑀫𑀸𑀭𑁄 𑀲𑀻𑀯𑀮𑀺 𑀅𑀳𑁄𑀲𑀺, 𑀫𑀸𑀢𑀸 𑀲𑀼𑀧𑁆𑀧𑀯𑀸𑀲𑀸, 𑀧𑀺𑀢𑀸 𑀧𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.