𑁧𑁧. 𑀧𑀭𑁄𑀲𑀢𑀯𑀕𑁆𑀕𑁄

[𑁧𑁦𑁧] 𑁧. 𑀧𑀭𑁄𑀲𑀢𑀚𑀸𑀢𑀓𑀯𑀡𑁆𑀡𑀦𑀸

𑁧𑁦𑁧. ‘‘𑀧𑀭𑁄𑀲𑀢𑀜𑁆𑀘𑁂𑀧𑀺 𑀲𑀫𑀸𑀕𑀢𑀸𑀦𑀁, 𑀛𑀸𑀬𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄, 𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺. 𑁋

𑀇𑀤𑀁 𑀚𑀸𑀢𑀓𑀁 𑀯𑀢𑁆𑀣𑀼𑀢𑁄 𑀘 𑀯𑁂𑀬𑁆𑀬𑀸𑀓𑀭𑀡𑀢𑁄 𑀘 𑀲𑀫𑁄𑀥𑀸𑀦𑀢𑁄 𑀘 𑀧𑀭𑁄𑀲𑀳𑀲𑁆𑀲𑀚𑀸𑀢𑀓𑀲𑀤𑀺𑀲𑀫𑁂𑀯. 𑀓𑁂𑀯𑀮𑀜𑁆𑀳𑁂𑀢𑁆𑀣 ‘‘𑀛𑀸𑀬𑁂𑀬𑁆𑀬𑀼’’𑀦𑁆𑀢𑀺 𑀧𑀤𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀲𑁆𑀲𑀢𑁆𑀣𑁄 𑁋 𑀯𑀲𑁆𑀲𑀲𑀢𑀫𑁆𑀧𑀺 𑀅𑀧𑀜𑁆𑀜𑀸 𑀛𑀸𑀬𑁂𑀬𑁆𑀬𑀼𑀁 𑀑𑀮𑁄𑀓𑁂𑀬𑁆𑀬𑀼𑀁 𑀉𑀧𑀥𑀸𑀭𑁂𑀬𑁆𑀬𑀼𑀁, 𑀏𑀯𑀁 𑀑𑀮𑁄𑀓𑁂𑀦𑁆𑀢𑀸𑀧𑀺 𑀧𑀦 𑀅𑀢𑁆𑀣𑀁 𑀯𑀸 𑀓𑀸𑀭𑀡𑀁 𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀲𑁄 𑀏𑀓𑁄𑀯 𑀲𑀧𑀜𑁆𑀜𑁄 𑀲𑁂𑀬𑁆𑀬𑁄𑀢𑀺.

𑀧𑀭𑁄𑀲𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁦𑁨] 𑁨. 𑀧𑀡𑁆𑀡𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀤𑀼𑀓𑁆𑀔𑀨𑀼𑀝𑁆𑀞𑀸𑀬 𑀪𑀯𑁂𑀬𑁆𑀬 𑀢𑀸𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀡𑁆𑀡𑀺𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀉𑀧𑀸𑀲𑀓𑁄 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀫𑀽𑀮𑀧𑀡𑁆𑀡𑀸𑀤𑀻𑀦𑀺 𑀘𑁂𑀯 𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀻𑀦𑀺 𑀘 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀢𑀲𑁆𑀲𑁂𑀓𑀸 𑀥𑀻𑀢𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑀸 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑀦𑁆𑀦𑀸𑀕𑀢𑀸 𑀓𑁂𑀯𑀮𑀁 𑀦𑀺𑀘𑁆𑀘𑀧𑁆𑀧𑀳𑀲𑀺𑀢𑀫𑀼𑀔𑀸. 𑀢𑀲𑁆𑀲𑀸 𑀲𑀫𑀸𑀦𑀓𑀼𑀮𑁂𑀲𑀼 𑀯𑀸𑀭𑁂𑀬𑁆𑀬𑀢𑁆𑀣𑀸𑀬 𑀆𑀕𑀢𑁂𑀲𑀼 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀺𑀲𑁆𑀲𑀸 𑀯𑀸𑀭𑁂𑀬𑁆𑀬𑀁 𑀯𑀢𑁆𑀢𑀢𑀺, 𑀅𑀬𑀜𑁆𑀘 𑀦𑀺𑀘𑁆𑀘𑀧𑁆𑀧𑀳𑀲𑀺𑀢𑀫𑀼𑀔𑀸. 𑀓𑀼𑀫𑀸𑀭𑀺𑀓𑀸𑀥𑀫𑁆𑀫𑁂 𑀧𑀦 𑀅𑀲𑀢𑀺 𑀓𑀼𑀫𑀸𑀭𑀺𑀓𑀸𑀬 𑀧𑀭𑀓𑀼𑀮𑀁 𑀕𑀢𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀕𑀭𑀳𑀸 𑀳𑁄𑀢𑀺, ‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀺𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀥𑀫𑁆𑀫𑁄, 𑀦𑀢𑁆𑀣𑀻’𑀢𑀺 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀥𑀻𑀢𑀭𑀁 𑀧𑀘𑁆𑀙𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀡𑁆𑀡𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀯𑀻𑀫𑀁𑀲𑀦𑀯𑀲𑁂𑀦 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀭𑀳𑀲𑁆𑀲𑀓𑀣𑀁 𑀓𑀣𑁂𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀡𑁆𑀳𑀺. 𑀲𑀸 𑀕𑀳𑀺𑀢𑀫𑀢𑁆𑀢𑀸𑀯 𑀭𑁄𑀤𑀦𑁆𑀢𑀻 𑀓𑀦𑁆𑀤𑀦𑁆𑀢𑀻 ‘‘𑀅𑀬𑀼𑀢𑁆𑀢𑀫𑁂𑀢𑀁, 𑀢𑀸𑀢, 𑀉𑀤𑀓𑀢𑁄 𑀅𑀕𑁆𑀕𑀺𑀧𑀸𑀢𑀼𑀪𑀸𑀯𑀲𑀤𑀺𑀲𑀁, 𑀫𑀸 𑀏𑀯𑀭𑀽𑀧𑀁 𑀓𑀭𑁄𑀣𑀸’’𑀢𑀺 𑀆𑀳. ‘‘𑀅𑀫𑁆𑀫, 𑀫𑀬𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀢𑁆𑀯𑀁 𑀳𑀢𑁆𑀣𑁂 𑀕𑀳𑀺𑀢𑀸, 𑀦 𑀘 𑀓𑀺𑀮𑁂𑀲𑀯𑀲𑁂𑀦. 𑀯𑀤𑁂𑀳𑀺, 𑀅𑀢𑁆𑀣𑀺 𑀤𑀸𑀦𑀺 𑀢𑁂 𑀓𑀼𑀫𑀸𑀭𑀺𑀓𑀸𑀥𑀫𑁆𑀫𑁄’’𑀢𑀺. ‘‘𑀆𑀫, 𑀢𑀸𑀢, 𑀅𑀢𑁆𑀣𑀺. 𑀫𑀬𑀸 𑀳𑀺 𑀮𑁄𑀪𑀯𑀲𑁂𑀦 𑀦 𑀓𑁄𑀘𑀺 𑀧𑀼𑀭𑀺𑀲𑁄 𑀑𑀮𑁄𑀓𑀺𑀢𑀧𑀼𑀩𑁆𑀩𑁄’’𑀢𑀺. 𑀲𑁄 𑀥𑀻𑀢𑀭𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀧𑀭𑀓𑀼𑀮𑀁 𑀧𑁂𑀲𑁂𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, ‘‘𑀘𑀺𑀭𑀲𑁆𑀲𑀫𑀸𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀉𑀧𑀸𑀲𑀓, 𑀓𑀼𑀫𑀸𑀭𑀺𑀓𑀸 𑀘𑀺𑀭𑀁 𑀧𑀝𑁆𑀞𑀸𑀬 𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑀸𑀯, 𑀢𑁆𑀯𑀁 𑀧𑀦 𑀦 𑀇𑀤𑀸𑀦𑁂𑀯 𑀏𑀯𑀁 𑀯𑀻𑀫𑀁𑀲𑀲𑀺, 𑀧𑀼𑀩𑁆𑀩𑁂𑀧𑀺 𑀯𑀻𑀫𑀁𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀬𑀁 𑀧𑀡𑁆𑀡𑀺𑀓𑀉𑀧𑀸𑀲𑀓𑁄𑀢𑀺 𑀅𑀢𑀻𑀢𑀯𑀢𑁆𑀣𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑀺𑀲𑀫𑁂𑀯. 𑀢𑁂𑀦 𑀧𑀦 𑀲𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀳𑀢𑁆𑀣𑁂 𑀕𑀳𑀺𑀢𑀫𑀢𑁆𑀢𑀸 𑀧𑀭𑀺𑀤𑁂𑀯𑀫𑀸𑀦𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁨. ‘‘𑀬𑁄 𑀤𑀼𑀓𑁆𑀔𑀨𑀼𑀝𑁆𑀞𑀸𑀬 𑀪𑀯𑁂𑀬𑁆𑀬 𑀢𑀸𑀡𑀁, 𑀲𑁄 𑀫𑁂 𑀧𑀺𑀢𑀸 𑀤𑀼𑀩𑁆𑀪𑀺 𑀯𑀦𑁂 𑀓𑀭𑁄𑀢𑀺;

𑀲𑀸 𑀓𑀲𑁆𑀲 𑀓𑀦𑁆𑀤𑀸𑀫𑀺 𑀯𑀦𑀲𑁆𑀲 𑀫𑀚𑁆𑀛𑁂, 𑀬𑁄 𑀢𑀸𑀬𑀺𑀢𑀸 𑀲𑁄 𑀲𑀳𑀲𑀁 𑀓𑀭𑁄𑀢𑀻’’𑀢𑀺.

𑀢𑀢𑁆𑀣 𑀬𑁄 𑀤𑀼𑀓𑁆𑀔𑀨𑀼𑀝𑁆𑀞𑀸𑀬 𑀪𑀯𑁂𑀬𑁆𑀬 𑀢𑀸𑀡𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀨𑀼𑀝𑁆𑀞𑀸𑀬 𑀢𑀸𑀬𑀺𑀢𑀸 𑀧𑀭𑀺𑀢𑀸𑀬𑀺𑀢𑀸 𑀧𑀢𑀺𑀝𑁆𑀞𑀸 𑀪𑀯𑁂𑀬𑁆𑀬. 𑀲𑁄 𑀫𑁂 𑀧𑀺𑀢𑀸 𑀤𑀼𑀩𑁆𑀪𑀺 𑀯𑀦𑁂 𑀓𑀭𑁄𑀢𑀻𑀢𑀺 𑀲𑁄 𑀫𑀬𑁆𑀳𑀁 𑀤𑀼𑀓𑁆𑀔𑀧𑀭𑀺𑀢𑀸𑀬𑀓𑁄 𑀧𑀺𑀢𑀸𑀯 𑀇𑀫𑀲𑁆𑀫𑀺𑀁 𑀯𑀦𑁂 𑀏𑀯𑀭𑀽𑀧𑀁 𑀫𑀺𑀢𑁆𑀢𑀤𑀼𑀩𑁆𑀪𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀢𑁆𑀢𑀦𑁄 𑀚𑀸𑀢𑀸𑀬 𑀥𑀻𑀢𑀭𑀺 𑀯𑀻𑀢𑀺𑀓𑁆𑀓𑀫𑀁 𑀓𑀸𑀢𑀼𑀁 𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀓𑀲𑁆𑀲 𑀓𑀦𑁆𑀤𑀸𑀫𑀻𑀢𑀺 𑀓𑀲𑁆𑀲 𑀭𑁄𑀤𑀸𑀫𑀺, 𑀓𑁄 𑀫𑁂 𑀧𑀢𑀺𑀝𑁆𑀞𑀸 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀬𑁄 𑀢𑀸𑀬𑀺𑀢𑀸 𑀲𑁄 𑀲𑀳𑀲𑀁 𑀓𑀭𑁄𑀢𑀻𑀢𑀺 𑀬𑁄 𑀫𑀬𑁆𑀳𑀁 𑀢𑀸𑀬𑀺𑀢𑀸 𑀭𑀓𑁆𑀔𑀺𑀢𑀸 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀲𑁄 𑀧𑀺𑀢𑀸𑀬𑁂𑀯 𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀧𑀺𑀢𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀅𑀫𑁆𑀫, 𑀭𑀓𑁆𑀔𑀺𑀢𑀢𑁆𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀢𑀸𑀢 𑀭𑀓𑁆𑀔𑀺𑀢𑁄 𑀫𑁂 𑀅𑀢𑁆𑀢𑀸’’𑀢𑀺. 𑀲𑁄 𑀢𑀁 𑀖𑀭𑀁 𑀦𑁂𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀧𑀭𑀓𑀼𑀮𑀁 𑀧𑁂𑀲𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀧𑀺𑀢𑀸 𑀏𑀢𑀭𑀳𑀺 𑀧𑀺𑀢𑀸𑀯, 𑀥𑀻𑀢𑀸 𑀘 𑀏𑀢𑀭𑀳𑀺 𑀥𑀻𑀢𑀸𑀯, 𑀢𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀡𑁆𑀡𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁦𑁩] 𑁩. 𑀯𑁂𑀭𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑀢𑁆𑀣 𑀯𑁂𑀭𑀻 𑀦𑀺𑀯𑀺𑀲𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀓𑀺𑀭 𑀪𑁄𑀕𑀕𑀸𑀫𑀁 𑀕𑀦𑁆𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑁂 𑀤𑀺𑀲𑁆𑀯𑀸 ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀲𑀸𑀯𑀢𑁆𑀣𑀺𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀕𑁄𑀡𑁂 𑀧𑀸𑀚𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀯𑀺𑀳𑀸𑀭𑀁 𑀕𑀢𑁄 𑀲𑀢𑁆𑀣𑀼 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀕𑀳𑀧𑀢𑀺 𑀧𑀡𑁆𑀟𑀺𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸 𑀅𑀯𑀺𑀮𑀫𑁆𑀩𑀫𑀸𑀦𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀏𑀓𑀁 𑀕𑀸𑀫𑀓𑀁 𑀦𑀺𑀫𑀦𑁆𑀢𑀦𑀁 𑀪𑀼𑀜𑁆𑀚𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀯𑀲𑀺𑀢𑁆𑀯𑀸𑀯 𑀯𑁂𑀕𑁂𑀦 𑀕𑁄𑀡𑁂 𑀧𑀸𑀚𑁂𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀫𑁂𑀯 𑀆𑀕𑀦𑁆𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀳𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀸𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀘𑁄𑀭𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀺𑀩𑁆𑀪𑀬𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀉𑀤𑀸𑀦𑀯𑀲𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁩. ‘‘𑀬𑀢𑁆𑀣 𑀯𑁂𑀭𑀻 𑀦𑀺𑀯𑀺𑀲𑀢𑀺, 𑀦 𑀯𑀲𑁂 𑀢𑀢𑁆𑀣 𑀧𑀡𑁆𑀟𑀺𑀢𑁄;

𑀏𑀓𑀭𑀢𑁆𑀢𑀁 𑀤𑀺𑀭𑀢𑁆𑀢𑀁 𑀯𑀸, 𑀤𑀼𑀓𑁆𑀔𑀁 𑀯𑀲𑀢𑀺 𑀯𑁂𑀭𑀺𑀲𑀽’’𑀢𑀺.

𑀢𑀢𑁆𑀣 𑀯𑁂𑀭𑀻𑀢𑀺 𑀯𑁂𑀭𑀘𑁂𑀢𑀦𑀸𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄. 𑀦𑀺𑀯𑀺𑀲𑀢𑀻𑀢𑀺 𑀧𑀢𑀺𑀝𑁆𑀞𑀸𑀢𑀺. 𑀦 𑀯𑀲𑁂 𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀲𑁄 𑀯𑁂𑀭𑀻𑀧𑀼𑀕𑁆𑀕𑀮𑁄 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀯𑀲𑀢𑀺, 𑀢𑀢𑁆𑀣 𑀧𑀡𑁆𑀟𑀺𑀢𑁄 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦 𑀯𑀲𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀏𑀓𑀭𑀢𑁆𑀢𑀁 𑀤𑀺𑀭𑀢𑁆𑀢𑀁 𑀯𑀸, 𑀤𑀼𑀓𑁆𑀔𑀁 𑀯𑀲𑀢𑀺 𑀯𑁂𑀭𑀺𑀲𑀽𑀢𑀺, 𑀯𑁂𑀭𑀻𑀦𑀜𑁆𑀳𑀺 𑀅𑀦𑁆𑀢𑀭𑁂 𑀯𑀲𑀦𑁆𑀢𑁄 𑀏𑀓𑀸𑀳𑀫𑁆𑀧𑀺 𑀤𑁆𑀯𑀻𑀳𑀫𑁆𑀧𑀺 𑀤𑀼𑀓𑁆𑀔𑀫𑁂𑀯 𑀯𑀲𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀳𑀫𑁂𑀯 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀅𑀳𑁄𑀲𑀺’’𑀦𑁆𑀢𑀺.

𑀯𑁂𑀭𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁦𑁪] 𑁪. 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀤𑀁 𑀧𑀦 𑀚𑀸𑀢𑀓𑀁 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀺𑀓𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀉𑀭𑀘𑀓𑁆𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑁄 𑀏𑀓𑁄 𑀦𑁂𑀭𑀬𑀺𑀓𑀲𑀢𑁆𑀢𑁄 ‘‘𑀪𑀦𑁆𑀢𑁂, 𑀓𑀺𑀁 𑀦𑀼 𑀔𑁄 𑀧𑀸𑀧𑀓𑀫𑁆𑀫𑀁 𑀅𑀓𑀸𑀲𑀺’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀬𑀸 𑀇𑀤𑀜𑁆𑀘𑀺𑀤𑀜𑁆𑀘 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁪. ‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺.

𑀢𑀢𑁆𑀣 𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸𑀢𑀺 𑀲𑀫𑀼𑀤𑁆𑀤𑀦𑁆𑀢𑀭𑁂 𑀘𑀢𑀲𑁆𑀲𑁄 𑀯𑀺𑀫𑀸𑀦𑀧𑁂𑀢𑀺𑀬𑁄 𑀮𑀪𑀺𑀢𑁆𑀯𑀸 𑀢𑀸𑀳𑀺 𑀅𑀲𑀦𑁆𑀢𑀼𑀝𑁆𑀞𑁄 𑀅𑀢𑁆𑀭𑀺𑀘𑁆𑀙𑀢𑀸𑀬 𑀧𑀭𑀢𑁄 𑀕𑀦𑁆𑀢𑁆𑀯𑀸 𑀅𑀧𑀭𑀸 𑀅𑀝𑁆𑀞 𑀅𑀥𑀺𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄𑀢𑀺 𑀏𑀯𑀁 𑀲𑀓𑀮𑀸𑀪𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀦𑁆𑀢𑁄 𑀧𑀭𑀢𑁄 𑀧𑀭𑀢𑁄 𑀮𑀸𑀪𑀁 𑀧𑀢𑁆𑀣𑁂𑀦𑁆𑀢𑁄 𑀇𑀤𑀸𑀦𑀺 𑀘𑀓𑁆𑀓𑀫𑀸𑀲𑀤𑁄 𑀇𑀤𑀁 𑀉𑀭𑀘𑀓𑁆𑀓𑀁 𑀧𑀢𑁆𑀢𑁄𑀲𑀺. 𑀢𑀲𑁆𑀲 𑀢𑁂 𑀏𑀯𑀁 𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲 𑀢𑀡𑁆𑀳𑀸𑀬 𑀳𑀢𑀲𑁆𑀲 𑀉𑀧𑀳𑀢𑀲𑁆𑀲 𑀢𑀯 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂. 𑀧𑀸𑀲𑀸𑀡𑀘𑀓𑁆𑀓𑀁, 𑀅𑀬𑀘𑀓𑁆𑀓𑀦𑁆𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀔𑀼𑀭𑀥𑀸𑀭𑀁 𑀅𑀬𑀘𑀓𑁆𑀓𑀁 𑀢𑀲𑁆𑀲 𑀫𑀢𑁆𑀣𑀓𑁂 𑀧𑀼𑀦𑀧𑁆𑀧𑀼𑀦𑀁 𑀧𑀢𑀦𑀯𑀲𑁂𑀦 𑀪𑀫𑀦𑁆𑀢𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳. 𑀯𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀲𑁄𑀧𑀺 𑀦𑁂𑀭𑀬𑀺𑀓𑀲𑀢𑁆𑀢𑁄 𑀅𑀢𑁆𑀢𑀦𑁄 𑀧𑀸𑀧𑁂 𑀔𑀻𑀡𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁦𑁫] 𑁫. 𑀤𑀼𑀩𑁆𑀩𑀮𑀓𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀫𑁆𑀧𑁂𑀢𑀁 𑀯𑀦𑁂 𑀓𑀝𑁆𑀞𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀢𑁆𑀢𑀲𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀫𑀭𑀡𑀪𑀻𑀭𑀼𑀓𑁄 𑀅𑀳𑁄𑀲𑀺, 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀯𑀸𑀢𑀲𑁆𑀲 𑀯𑀸 𑀯𑀻𑀚𑀦𑁆𑀢𑀲𑁆𑀲 𑀲𑀼𑀓𑁆𑀔𑀤𑀡𑁆𑀟𑀓𑀲𑁆𑀲 𑀯𑀸 𑀧𑀢𑀦𑁆𑀢𑀲𑁆𑀲 𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀫𑀳𑀸𑀭𑀯𑀁 𑀭𑀯𑀦𑁆𑀢𑁄 𑀧𑀮𑀸𑀬𑀢𑀺. 𑀢𑀲𑁆𑀲 𑀳𑀺 ‘‘𑀫𑀭𑀺𑀢𑀩𑁆𑀩𑀁 𑀫𑀬𑀸’’𑀢𑀺 𑀲𑀢𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀲𑀘𑁂 𑀳𑀺 𑀲𑁄 ‘‘𑀅𑀳𑀁 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀦𑁂𑀬𑁆𑀬, 𑀦 𑀫𑀭𑀡𑀁 𑀪𑀸𑀬𑁂𑀬𑁆𑀬. 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀢𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸𑀯 𑀪𑀸𑀬𑀢𑀺. 𑀢𑀲𑁆𑀲 𑀲𑁄 𑀫𑀭𑀡𑀪𑀻𑀭𑀼𑀓𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀫𑀭𑀡𑀪𑀻𑀭𑀼𑀓𑁄 𑀫𑀭𑀡𑀁 𑀪𑀸𑀬𑀢𑀺, 𑀪𑀺𑀓𑁆𑀔𑀼𑀦𑀸 𑀦𑀸𑀫 ‘𑀅𑀯𑀲𑁆𑀲𑀁 𑀫𑀬𑀸 𑀫𑀭𑀺𑀢𑀩𑁆𑀩’𑀦𑁆𑀢𑀺 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀫𑀭𑀡𑀪𑀻𑀭𑀼𑀓𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀫𑀸 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀢𑁆𑀢𑀫𑀦𑀸 𑀳𑁄𑀣, 𑀦𑀸𑀬𑀁 𑀇𑀤𑀸𑀦𑁂𑀯 𑀫𑀭𑀡𑀪𑀻𑀭𑀼𑀓𑁄, 𑀧𑀼𑀩𑁆𑀩𑁂𑀧𑀺 𑀫𑀭𑀡𑀪𑀻𑀭𑀼𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀢𑁆𑀢𑀦𑁄 𑀫𑀗𑁆𑀕𑀮𑀳𑀢𑁆𑀣𑀺𑀁 𑀆𑀦𑁂𑀜𑁆𑀚𑀓𑀸𑀭𑀡𑀁 𑀲𑀺𑀓𑁆𑀔𑀸𑀧𑁂𑀢𑀼𑀁 𑀳𑀢𑁆𑀣𑀸𑀘𑀭𑀺𑀬𑀸𑀦𑀁 𑀅𑀤𑀸𑀲𑀺. 𑀢𑀁 𑀆𑀴𑀸𑀦𑁂 𑀦𑀺𑀘𑁆𑀘𑀮𑀁 𑀩𑀦𑁆𑀥𑀺𑀢𑁆𑀯𑀸 𑀢𑁄𑀫𑀭𑀳𑀢𑁆𑀣𑀸 𑀫𑀦𑀼𑀲𑁆𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀦𑁂𑀜𑁆𑀚𑀓𑀸𑀭𑀡𑀁 𑀓𑀸𑀭𑁂𑀦𑁆𑀢𑀺. 𑀲𑁄 𑀢𑀁 𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑁄 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀴𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀮𑀸𑀧𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀲𑁄 𑀢𑀢𑁆𑀣 𑀫𑀭𑀡𑀪𑀻𑀭𑀼𑀓𑁄 𑀅𑀳𑁄𑀲𑀺, 𑀯𑀸𑀢𑀲𑀤𑁆𑀤𑀸𑀦𑀺 𑀲𑀼𑀢𑁆𑀯𑀸 𑀓𑀫𑁆𑀧𑀫𑀸𑀦𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀲𑁄𑀡𑁆𑀟𑀁 𑀯𑀺𑀥𑀼𑀦𑀺𑀢𑁆𑀯𑀸 𑀯𑁂𑀕𑁂𑀦 𑀧𑀮𑀸𑀬𑀢𑀺, 𑀆𑀴𑀸𑀦𑁂 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀜𑁆𑀚𑀓𑀸𑀭𑀡𑀁 𑀓𑀭𑀡𑀓𑀸𑀮𑁄 𑀯𑀺𑀬𑀲𑁆𑀲 𑀳𑁄𑀢𑀺, 𑀓𑀸𑀬𑀲𑁆𑀲𑀸𑀤𑀁 𑀯𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀯𑀸 𑀅𑀮𑀪𑀦𑁆𑀢𑁄 𑀓𑀫𑁆𑀧𑀫𑀸𑀦𑁄 𑀯𑀺𑀘𑀭𑀢𑀺.

𑀭𑀼𑀓𑁆𑀔𑀤𑁂𑀯𑀢𑀸 𑀢𑀁 𑀤𑀺𑀲𑁆𑀯𑀸 𑀔𑀦𑁆𑀥𑀯𑀺𑀝𑀧𑁂 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫. ‘‘𑀩𑀳𑀼𑀫𑁆𑀧𑁂𑀢𑀁 𑀯𑀦𑁂 𑀓𑀝𑁆𑀞𑀁, 𑀯𑀸𑀢𑁄 𑀪𑀜𑁆𑀚𑀢𑀺 𑀤𑀼𑀩𑁆𑀩𑀮𑀁;

𑀢𑀲𑁆𑀲 𑀘𑁂 𑀪𑀸𑀬𑀲𑀺 𑀦𑀸𑀕, 𑀓𑀺𑀲𑁄 𑀦𑀽𑀦 𑀪𑀯𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀬𑀁 𑀏𑀢𑀁 𑀤𑀼𑀩𑁆𑀩𑀮𑀁 𑀓𑀝𑁆𑀞𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁄 𑀯𑀸𑀢𑁄 𑀪𑀜𑁆𑀚𑀢𑀺, 𑀢𑀁 𑀇𑀫𑀲𑁆𑀫𑀺𑀁 𑀯𑀦𑁂 𑀩𑀳𑀼𑀁 𑀲𑀼𑀮𑀪𑀁, 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀺𑀚𑁆𑀚𑀢𑀺. 𑀲𑀘𑁂 𑀢𑁆𑀯𑀁 𑀢𑀲𑁆𑀲 𑀪𑀸𑀬𑀲𑀺, 𑀏𑀯𑀁 𑀲𑀦𑁆𑀢𑁂 𑀦𑀺𑀘𑁆𑀘𑀁 𑀪𑀻𑀢𑁄 𑀫𑀁𑀲𑀮𑁄𑀳𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀓𑀺𑀲𑁄 𑀦𑀽𑀦 𑀪𑀯𑀺𑀲𑁆𑀲𑀲𑀺, 𑀇𑀫𑀲𑁆𑀫𑀺𑀁 𑀧𑀦 𑀯𑀦𑁂 𑀢𑀯 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀪𑀸𑀬𑀻𑀢𑀺.

𑀏𑀯𑀁 𑀤𑁂𑀯𑀢𑀸 𑀢𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺, 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑁆𑀪𑀬𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀦𑀸𑀕𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀩𑁆𑀩𑀮𑀓𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁦𑁬] 𑁬. 𑀉𑀤𑀜𑁆𑀘𑀦𑀻𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀔𑀁 𑀯𑀢 𑀫𑀁 𑀚𑀻𑀯𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀢𑁂𑀭𑀲𑀓𑀦𑀺𑀧𑀸𑀢𑁂 𑀘𑀽𑀴𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 (𑀚𑀸. 𑁧.𑁧𑁩.𑁪𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀁 𑀧𑀦 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑁆𑀣 𑀢𑁂 𑀘𑀺𑀢𑁆𑀢𑀁 𑀧𑀝𑀺𑀩𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀏𑀓𑀺𑀲𑁆𑀲𑀸 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀬𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀲𑀻𑀮𑀩𑁆𑀬𑀲𑀦𑀁 𑀧𑀢𑁆𑀯𑀸 𑀓𑀫𑁆𑀧𑀦𑁆𑀢𑁄 𑀯𑀺𑀘𑀭𑀫𑀸𑀦𑁄 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀲𑀼𑀔𑀁 𑀮𑀪𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂𑀢𑀺 𑀅𑀢𑀻𑀢𑀯𑀢𑁆𑀣𑀼𑀧𑀺 𑀘𑀽𑀴𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀁 𑀨𑀮𑀸𑀨𑀮𑁂 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀧𑀼𑀢𑁆𑀢𑀁 𑀘𑀽𑀴𑀢𑀸𑀧𑀲𑀁 𑀏𑀢𑀤𑀯𑁄𑀘 ‘‘𑀢𑀸𑀢, 𑀢𑁆𑀯𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀤𑀸𑀭𑀽𑀦𑀺 𑀆𑀳𑀭𑀲𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀆𑀳𑀭𑀲𑀺, 𑀅𑀕𑁆𑀕𑀺𑀁 𑀓𑀭𑁄𑀲𑀺, 𑀅𑀚𑁆𑀚 𑀧𑀦 𑀏𑀓𑀫𑁆𑀧𑀺 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀤𑀼𑀫𑁆𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀦𑀺𑀧𑀦𑁆𑀦𑁄𑀲𑀻’’𑀢𑀺? ‘‘𑀢𑀸𑀢, 𑀢𑀼𑀫𑁆𑀳𑁂𑀲𑀼 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂𑀲𑀼 𑀏𑀓𑀸 𑀇𑀢𑁆𑀣𑀻 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀮𑁄𑀪𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑀼𑀁 𑀆𑀭𑀪𑀺, 𑀅𑀳𑀁 𑀧𑀦 ‘𑀢𑀼𑀫𑁆𑀳𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀦 𑀕𑀘𑁆𑀙𑀺𑀁, 𑀅𑀲𑀼𑀓𑀝𑁆𑀞𑀸𑀦𑁂 𑀧𑀦 𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀺, 𑀇𑀤𑀸𑀦𑀺 𑀕𑀘𑁆𑀙𑀸𑀫𑀳𑀁 𑀢𑀸𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀲𑀓𑁆𑀓𑀸 𑀏𑀢𑀁 𑀦𑀺𑀯𑀢𑁆𑀢𑁂𑀢𑀼’’𑀦𑁆𑀢𑀺 𑀜𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢, 𑀕𑀘𑁆𑀙, 𑀏𑀲𑀸 𑀧𑀦 𑀢𑀁 𑀦𑁂𑀢𑁆𑀯𑀸 𑀬𑀤𑀸 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀢𑀺, 𑀲𑀧𑁆𑀧𑀺𑀮𑁄𑀡𑀢𑀡𑁆𑀟𑀼𑀮𑀸𑀤𑀻𑀳𑀺 𑀯𑀸 𑀧𑀦𑀲𑁆𑀲𑀸 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 ‘𑀇𑀤𑀜𑁆𑀘𑀺𑀤𑀜𑁆𑀘𑀸𑀳𑀭𑀸’𑀢𑀺 𑀢𑀁 𑀓𑀺𑀮𑀫𑁂𑀲𑁆𑀲𑀢𑀺. 𑀢𑀤𑀸 𑀫𑀬𑁆𑀳𑀁 𑀕𑀼𑀡𑀁 𑀲𑀭𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀇𑀥𑁂𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀫𑀦𑀼𑀲𑁆𑀲𑀧𑀣𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀸 𑀅𑀢𑁆𑀢𑀦𑁄 𑀯𑀲𑀁 𑀕𑀫𑁂𑀢𑁆𑀯𑀸 ‘‘𑀫𑀁𑀲𑀁 𑀆𑀳𑀭, 𑀫𑀘𑁆𑀙𑀁 𑀆𑀳𑀭𑀸’’𑀢𑀺 𑀬𑁂𑀦 𑀬𑁂𑀦 𑀅𑀢𑁆𑀣𑀺𑀓𑀸 𑀳𑁄𑀢𑀺, 𑀢𑀁 𑀢𑀁 𑀆𑀳𑀭𑀸𑀧𑁂𑀢𑀺. 𑀢𑀤𑀸 𑀲𑁄 ‘‘𑀅𑀬𑀁 𑀫𑀁 𑀅𑀢𑁆𑀢𑀦𑁄 𑀤𑀸𑀲𑀁 𑀯𑀺𑀬 𑀓𑀫𑁆𑀫𑀓𑀸𑀭𑀁 𑀯𑀺𑀬 𑀘 𑀓𑀢𑁆𑀯𑀸 𑀧𑀻𑀴𑁂𑀢𑀻’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀓𑁄𑀯 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁬. ‘‘𑀲𑀼𑀔𑀁 𑀯𑀢 𑀫𑀁 𑀚𑀻𑀯𑀦𑁆𑀢𑀁, 𑀧𑀘𑀫𑀸𑀦𑀸 𑀉𑀤𑀜𑁆𑀘𑀦𑀻;

𑀘𑁄𑀭𑀻 𑀚𑀸𑀬𑀧𑁆𑀧𑀯𑀸𑀤𑁂𑀦, 𑀢𑁂𑀮𑀁 𑀮𑁄𑀡𑀜𑁆𑀘 𑀬𑀸𑀘𑀢𑀻’’𑀢𑀺.

𑀢𑀢𑁆𑀣 𑀲𑀼𑀔𑀁 𑀯𑀢 𑀫𑀁 𑀚𑀻𑀯𑀦𑁆𑀢𑀦𑁆𑀢𑀺 𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀫𑀁 𑀲𑀼𑀔𑀁 𑀚𑀻𑀯𑀦𑁆𑀢𑀁. 𑀧𑀘𑀫𑀸𑀦𑀸𑀢𑀺 𑀢𑀸𑀧𑀬𑀫𑀸𑀦𑀸 𑀧𑀻𑀴𑀬𑀫𑀸𑀦𑀸, 𑀬𑀁 𑀬𑀁 𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀳𑁄𑀢𑀺, 𑀢𑀁 𑀢𑀁 𑀧𑀘𑀫𑀸𑀦𑀸. 𑀉𑀤𑀓𑀁 𑀅𑀜𑁆𑀘𑀦𑁆𑀢𑀺 𑀏𑀢𑀸𑀬𑀸𑀢𑀺 𑀉𑀤𑀜𑁆𑀘𑀦𑀻, 𑀘𑀸𑀝𑀺𑀢𑁄 𑀯𑀸 𑀓𑀽𑀧𑀢𑁄 𑀯𑀸 𑀉𑀤𑀓𑀉𑀲𑁆𑀲𑀺𑀜𑁆𑀘𑀦𑀖𑀝𑀺𑀓𑀸𑀬𑁂𑀢𑀁 𑀦𑀸𑀫𑀁. 𑀲𑀸 𑀧𑀦 𑀉𑀤𑀜𑁆𑀘𑀦𑀻 𑀯𑀺𑀬, 𑀉𑀤𑀓𑀁 𑀯𑀺𑀬 𑀖𑀝𑀺𑀓𑀸, 𑀬𑁂𑀦 𑀬𑁂𑀦𑀢𑁆𑀣𑀺𑀓𑀸 𑀳𑁄𑀢𑀺, 𑀢𑀁 𑀢𑀁 𑀆𑀓𑀟𑁆𑀠𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀘𑁄𑀭𑀻 𑀚𑀸𑀬𑀧𑁆𑀧𑀯𑀸𑀤𑁂𑀦𑀸𑀢𑀺 ‘‘𑀪𑀭𑀺𑀬𑀸’’𑀢𑀺 𑀦𑀸𑀫𑁂𑀦 𑀏𑀓𑀸 𑀘𑁄𑀭𑀻 𑀫𑀁 𑀫𑀥𑀼𑀭𑀯𑀘𑀦𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑁂𑀢𑁆𑀯𑀸 𑀢𑁂𑀮𑀁 𑀮𑁄𑀡𑀜𑁆𑀘 𑀬𑀜𑁆𑀘 𑀅𑀜𑁆𑀜𑀁 𑀇𑀘𑁆𑀙𑀢𑀺, 𑀢𑀁 𑀲𑀩𑁆𑀩𑀁 𑀬𑀸𑀘𑀢𑀺, 𑀤𑀸𑀲𑀁 𑀯𑀺𑀬 𑀓𑀫𑁆𑀫𑀓𑀸𑀭𑀁 𑀯𑀺𑀬 𑀘 𑀓𑀢𑁆𑀯𑀸 𑀆𑀳𑀭𑀸𑀧𑁂𑀢𑀻𑀢𑀺 𑀢𑀲𑁆𑀲𑀸 𑀅𑀕𑀼𑀡𑀁 𑀓𑀣𑁂𑀲𑀺.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀳𑁄𑀢𑀼, 𑀢𑀸𑀢, 𑀏𑀳𑀺 𑀢𑁆𑀯𑀁 𑀫𑁂𑀢𑁆𑀢𑀁 𑀪𑀸𑀯𑁂𑀳𑀺, 𑀓𑀭𑀼𑀡𑀁 𑀪𑀸𑀯𑁂𑀳𑀻’’𑀢𑀺 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀆𑀘𑀺𑀓𑁆𑀔𑀺, 𑀆𑀘𑀺𑀓𑁆𑀔𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀲𑀤𑁆𑀥𑀺𑀁 𑀧𑀺𑀢𑀭𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

‘‘𑀢𑀤𑀸 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀯 𑀏𑀢𑀭𑀳𑀺 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸. 𑀘𑀽𑀴𑀢𑀸𑀧𑀲𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀤𑀜𑁆𑀘𑀦𑀻𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁦𑁭] 𑁭. 𑀲𑀸𑀮𑀺𑀢𑁆𑀢𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀸𑀥𑀽 𑀔𑁄 𑀲𑀺𑀧𑁆𑀧𑀓𑀁 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀳𑀁𑀲𑀧𑀳𑀭𑀦𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑁂𑀓𑁄 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀮𑀺𑀢𑁆𑀢𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. ‘‘𑀲𑀸𑀮𑀺𑀢𑁆𑀢𑀓𑀲𑀺𑀧𑁆𑀧’’𑀦𑁆𑀢𑀺 𑀲𑀓𑁆𑀔𑀭𑀸𑀔𑀺𑀧𑀦𑀲𑀺𑀧𑁆𑀧𑀁 𑀯𑀼𑀘𑁆𑀘𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺, 𑀦 𑀧𑀦 𑀲𑀺𑀓𑁆𑀔𑀸𑀓𑀸𑀫𑁄, 𑀦 𑀧𑀝𑀺𑀧𑀢𑁆𑀢𑀺𑀲𑀸𑀥𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀏𑀓𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀤𑀸𑀬 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁆𑀯𑁂 𑀲𑁂𑀢𑀳𑀁𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑀁 𑀤𑀳𑀭𑀁 𑀆𑀳 ‘‘𑀇𑀫𑀁 𑀧𑀘𑁆𑀙𑀺𑀫𑀳𑀁𑀲𑀁 𑀲𑀓𑁆𑀔𑀭𑀸𑀬 𑀅𑀓𑁆𑀔𑀺𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀸𑀢𑁂𑀫𑀻’’𑀢𑀺. 𑀇𑀢𑀭𑁄 ‘‘𑀓𑀣𑀁 𑀧𑀸𑀢𑁂𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀧𑀳𑀭𑀺𑀢𑀼’’𑀦𑁆𑀢𑀺 𑀆𑀳. 𑀇𑀢𑀭𑁄 ‘‘𑀢𑀺𑀝𑁆𑀞𑀢𑀼 𑀢𑀸𑀯𑀲𑁆𑀲 𑀑𑀭𑀢𑁄 𑀅𑀓𑁆𑀔𑀺, 𑀧𑀭𑀢𑁄 𑀅𑀓𑁆𑀔𑀺𑀫𑁆𑀳𑀺 𑀢𑀁 𑀧𑀳𑀭𑀸𑀫𑀻’’𑀢𑀺. 𑀇𑀤𑀸𑀦𑀺 𑀧𑀦 𑀢𑁆𑀯𑀁 𑀅𑀲𑀦𑁆𑀢𑀁 𑀓𑀣𑁂𑀲𑀻𑀢𑀺. ‘‘𑀢𑁂𑀦 𑀳𑀺 𑀉𑀧𑀥𑀸𑀭𑁂𑀳𑀻’’𑀢𑀺 𑀏𑀓𑀁 𑀢𑀺𑀔𑀺𑀡𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀧𑀭𑀺𑀬𑀦𑁆𑀢𑁂 𑀓𑀢𑁆𑀯𑀸 𑀢𑀲𑁆𑀲 𑀳𑀁𑀲𑀲𑁆𑀲 𑀧𑀘𑁆𑀙𑀢𑁄 𑀔𑀺𑀧𑀺. 𑀲𑀸 ‘‘𑀭𑀼’’𑀦𑁆𑀢𑀺 𑀲𑀤𑁆𑀤𑀁 𑀅𑀓𑀸𑀲𑀺, 𑀳𑀁𑀲𑁄 ‘‘𑀧𑀭𑀺𑀲𑁆𑀲𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀤𑁆𑀤𑀁 𑀲𑁄𑀢𑀼𑀁 𑀆𑀭𑀪𑀺. 𑀇𑀢𑀭𑁄 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀁 𑀯𑀝𑁆𑀝𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀭𑀪𑀸𑀕𑁂 𑀅𑀓𑁆𑀔𑀺𑀁 𑀧𑀳𑀭𑀺. 𑀲𑀓𑁆𑀔𑀭𑀸 𑀇𑀢𑀭𑀫𑁆𑀧𑀺 𑀅𑀓𑁆𑀔𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀸. 𑀳𑀁𑀲𑁄 𑀫𑀳𑀸𑀭𑀯𑀁 𑀭𑀯𑀦𑁆𑀢𑁄 𑀧𑀸𑀤𑀫𑀽𑀮𑁂𑀬𑁂𑀯 𑀧𑀢𑀺. 𑀢𑀢𑁄 𑀢𑀢𑁄 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀕𑀭𑀳𑀺𑀢𑁆𑀯𑀸 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂 𑀓𑀢’’𑀦𑁆𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀭𑀳𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀏𑀢𑀲𑁆𑀫𑀺𑀁 𑀲𑀺𑀧𑁆𑀧𑁂 𑀓𑀼𑀲𑀮𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀲𑀮𑁄𑀬𑁂𑀯 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀅𑀢𑀺𑀫𑀼𑀔𑀭𑁄 𑀳𑁄𑀢𑀺 𑀩𑀳𑀼𑀪𑀸𑀡𑀻, 𑀢𑀲𑁆𑀫𑀺𑀁 𑀓𑀣𑁂𑀢𑀼𑀁 𑀆𑀭𑀤𑁆𑀥𑁂 𑀅𑀜𑁆𑀜𑁂 𑀑𑀓𑀸𑀲𑀫𑁂𑀯 𑀦 𑀮𑀪𑀦𑁆𑀢𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀓𑀤𑀸 𑀦𑀼 𑀔𑁄 𑀏𑀢𑀲𑁆𑀲 𑀯𑀘𑀦𑀼𑀧𑀘𑁆𑀙𑁂𑀤𑀓𑀁 𑀓𑀜𑁆𑀘𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸𑀭𑀽𑀧𑀁 𑀏𑀓𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀧𑀻𑀞𑀲𑀧𑁆𑀧𑀻 𑀲𑀓𑁆𑀔𑀭𑀸𑀔𑀺𑀧𑀦𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀳𑁄𑀢𑀺. 𑀕𑀸𑀫𑀤𑀸𑀭𑀓𑀸 𑀢𑀁 𑀭𑀣𑀓𑀁 𑀆𑀭𑁄𑀧𑁂𑀢𑁆𑀯𑀸 𑀆𑀓𑀟𑁆𑀠𑀫𑀸𑀦𑀸 𑀩𑀸𑀭𑀸𑀡𑀲𑀺𑀦𑀕𑀭𑀤𑁆𑀯𑀸𑀭𑀫𑀽𑀮𑁂 𑀏𑀓𑁄 𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀫𑀳𑀸𑀦𑀺𑀕𑁆𑀭𑁄𑀥𑁄 𑀅𑀢𑁆𑀣𑀺, 𑀢𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀓𑀸𑀓𑀡𑀺𑀓𑀸𑀤𑀻𑀦𑀺 𑀤𑀢𑁆𑀯𑀸 ‘‘𑀳𑀢𑁆𑀣𑀺𑀭𑀽𑀧𑀓𑀁 𑀓𑀭, 𑀅𑀲𑁆𑀲𑀭𑀽𑀧𑀓𑀁 𑀓𑀭𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 𑀲𑀓𑁆𑀔𑀭𑀸 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀧𑀡𑁆𑀡𑁂𑀲𑀼 𑀦𑀸𑀦𑀸𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀸𑀦𑀺 𑀧𑀡𑁆𑀡𑀸𑀦𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀸𑀦𑁂𑀯 𑀅𑀳𑁂𑀲𑀼𑀁.

𑀅𑀣 𑀩𑀸𑀭𑀸𑀡𑀲𑀺𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀉𑀲𑁆𑀲𑀸𑀭𑀡𑀸𑀪𑀬𑁂𑀦 𑀲𑀩𑁆𑀩𑁂 𑀤𑀸𑀭𑀓𑀸 𑀧𑀮𑀸𑀬𑀺𑀁𑀲𑀼, 𑀧𑀻𑀞𑀲𑀧𑁆𑀧𑀻 𑀢𑀢𑁆𑀣𑁂𑀯 𑀦𑀺𑀧𑀚𑁆𑀚𑀺. 𑀭𑀸𑀚𑀸 𑀦𑀺𑀕𑁆𑀭𑁄𑀥𑀫𑀽𑀮𑀁 𑀧𑀢𑁆𑀯𑀸 𑀭𑀣𑁂 𑀦𑀺𑀲𑀺𑀦𑁆𑀦𑁄 𑀧𑀢𑁆𑀢𑀸𑀦𑀁 𑀙𑀺𑀤𑁆𑀤𑀢𑀸𑀬 𑀙𑀸𑀬𑀁 𑀓𑀩𑀭𑀓𑀩𑀭𑀁 𑀤𑀺𑀲𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀲𑀩𑁆𑀩𑁂𑀲𑀁 𑀧𑀢𑁆𑀢𑀸𑀦𑀁 𑀙𑀺𑀤𑁆𑀤𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀓𑁂𑀦𑁂𑀢𑀸𑀦𑀺 𑀏𑀯𑀁 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀻𑀞𑀲𑀧𑁆𑀧𑀺𑀦𑀸, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀼𑀧𑀘𑁆𑀙𑁂𑀤𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀳𑀁, 𑀪𑀡𑁂, 𑀧𑀻𑀞𑀲𑀧𑁆𑀧𑀻’’𑀢𑀺 𑀧𑀼𑀘𑁆𑀙𑀺. 𑀯𑀺𑀘𑀺𑀦𑀦𑁆𑀢𑀸 𑀫𑀽𑀮𑀦𑁆𑀢𑀭𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀭𑀺𑀲𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀏𑀓𑁄 𑀫𑀼𑀔𑀭𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀣𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀢𑀁 𑀦𑀺𑀲𑁆𑀲𑀤𑁆𑀤𑀁 𑀓𑀸𑀢𑀼’’𑀦𑁆𑀢𑀺. 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀮𑀪𑀦𑁆𑀢𑁄 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯𑀸𑀢𑀺. 𑀭𑀸𑀚𑀸 𑀧𑀻𑀞𑀲𑀧𑁆𑀧𑀺𑀁 𑀖𑀭𑀁 𑀦𑁂𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀸𑀡𑀺𑀬𑀁 𑀙𑀺𑀤𑁆𑀤𑀁 𑀓𑀸𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀙𑀺𑀤𑁆𑀤𑀸𑀪𑀺𑀫𑀼𑀔𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀸𑀴𑀺𑀫𑀢𑁆𑀢𑀸 𑀲𑀼𑀓𑁆𑀔𑀸 𑀅𑀚𑀮𑀡𑁆𑀟𑀺𑀓𑀸 𑀧𑀻𑀞𑀲𑀧𑁆𑀧𑀺𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀉𑀧𑀝𑁆𑀞𑀸𑀦𑀓𑀸𑀮𑁂 𑀆𑀕𑀢𑀁 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀆𑀭𑀪𑀺. 𑀅𑀣𑀲𑁆𑀲 𑀲𑁄 𑀧𑀻𑀞𑀲𑀧𑁆𑀧𑀻 𑀲𑀸𑀡𑀺𑀘𑁆𑀙𑀺𑀤𑁆𑀤𑁂𑀦 𑀏𑀓𑁂𑀓𑀁 𑀅𑀚𑀮𑀡𑁆𑀟𑀺𑀓𑀁 𑀧𑀘𑁆𑀙𑀺𑀬𑀁 𑀧𑀯𑁂𑀲𑁂𑀦𑁆𑀢𑁄 𑀯𑀺𑀬 𑀢𑀸𑀮𑀼𑀢𑀮𑀫𑁆𑀳𑀺𑀬𑁂𑀯 𑀧𑀸𑀢𑁂𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀆𑀕𑀢𑀸𑀕𑀢𑀁 𑀦𑀸𑀴𑀺𑀬𑀁 𑀢𑁂𑀮𑀁 𑀧𑀯𑁂𑀲𑁂𑀦𑁆𑀢𑁄 𑀯𑀺𑀬 𑀕𑀺𑀮𑀢𑀺, 𑀲𑀩𑁆𑀩𑀸 𑀧𑀭𑀺𑀓𑁆𑀔𑀬𑀁 𑀕𑀫𑀺𑀁𑀲𑀼. 𑀢𑀲𑁆𑀲𑁂𑀢𑀸 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀸 𑀅𑀟𑁆𑀠𑀸𑀴𑁆𑀳𑀓𑀫𑀢𑁆𑀢𑀸 𑀅𑀳𑁂𑀲𑀼𑀁.

𑀭𑀸𑀚𑀸 𑀢𑀸𑀲𑀁 𑀧𑀭𑀺𑀓𑁆𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀅𑀢𑀺𑀫𑀼𑀔𑀭𑀢𑀸𑀬 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀕𑀺𑀮𑀦𑁆𑀢𑀸 𑀓𑀺𑀜𑁆𑀘𑀺 𑀦 𑀚𑀸𑀦𑀺𑀢𑁆𑀣, 𑀇𑀢𑁄 𑀤𑀸𑀦𑀺 𑀉𑀢𑁆𑀢𑀭𑀺 𑀚𑀻𑀭𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣. 𑀕𑀘𑁆𑀙𑀣, 𑀧𑀺𑀬𑀗𑁆𑀕𑀼𑀤𑀓𑀁 𑀧𑀺𑀯𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀭𑁄𑀕𑀁 𑀓𑀭𑁄𑀣𑀸’’𑀢𑀺 𑀩𑁆𑀭𑀸𑀳𑁆𑀫𑀡𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀺𑀳𑀺𑀢𑀫𑀼𑀔𑁄 𑀯𑀺𑀬 𑀳𑀼𑀢𑁆𑀯𑀸 𑀓𑀣𑁂𑀦𑁆𑀢𑁂𑀦𑀸𑀧𑀺 𑀲𑀤𑁆𑀥𑀺𑀁 𑀅𑀓𑀣𑀦𑀲𑀻𑀮𑁄 𑀅𑀳𑁄𑀲𑀺. 𑀭𑀸𑀚𑀸 ‘‘𑀇𑀫𑀺𑀦𑀸 𑀫𑁂 𑀓𑀡𑁆𑀡𑀲𑀼𑀔𑀁 𑀓𑀢’’𑀦𑁆𑀢𑀺 𑀧𑀻𑀞𑀲𑀧𑁆𑀧𑀺𑀲𑁆𑀲 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑁄 𑀕𑀸𑀫𑁂 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀲𑀺𑀧𑁆𑀧𑀁 𑀦𑀸𑀫 𑀮𑁄𑀓𑁂 𑀧𑀡𑁆𑀟𑀺𑀢𑁂𑀳𑀺 𑀉𑀕𑁆𑀕𑀳𑀺𑀢𑀩𑁆𑀩𑀁, 𑀧𑀻𑀞𑀲𑀧𑁆𑀧𑀺𑀦𑀸 𑀲𑀸𑀮𑀺𑀢𑁆𑀢𑀓𑀫𑀢𑁆𑀢𑁂𑀦𑀸𑀧𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁭. ‘‘𑀲𑀸𑀥𑀼𑀁 𑀔𑁄 𑀲𑀺𑀧𑁆𑀧𑀓𑀁 𑀦𑀸𑀫, 𑀅𑀧𑀺 𑀬𑀸𑀤𑀺𑀲 𑀓𑀻𑀤𑀺𑀲𑀁;

𑀧𑀲𑁆𑀲 𑀔𑀜𑁆𑀚𑀧𑁆𑀧𑀳𑀸𑀭𑁂𑀦, 𑀮𑀤𑁆𑀥𑀸 𑀕𑀸𑀫𑀸 𑀘𑀢𑀼𑀤𑁆𑀤𑀺𑀲𑀸’’𑀢𑀺.

𑀢𑀢𑁆𑀣 𑀧𑀲𑁆𑀲 𑀔𑀜𑁆𑀚𑀧𑁆𑀧𑀳𑀸𑀭𑁂𑀦𑀸𑀢𑀺 𑀧𑀲𑁆𑀲, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀔𑀜𑁆𑀚𑀧𑀻𑀞𑀲𑀧𑁆𑀧𑀺𑀦𑀸 𑀅𑀚𑀮𑀡𑁆𑀟𑀺𑀓𑀸𑀧𑀳𑀸𑀭𑁂𑀦 𑀘𑀢𑀼𑀤𑁆𑀤𑀺𑀲𑀸 𑀘𑀢𑁆𑀢𑀸𑀭𑁄 𑀕𑀸𑀫𑀸 𑀮𑀤𑁆𑀥𑀸, 𑀅𑀜𑁆𑀜𑁂𑀲𑀁 𑀲𑀺𑀧𑁆𑀧𑀸𑀦𑀁 𑀓𑁄 𑀆𑀦𑀺𑀲𑀁𑀲𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀺𑀧𑁆𑀧𑀕𑀼𑀡𑀁 𑀓𑀣𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀻𑀞𑀲𑀧𑁆𑀧𑀻 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀮𑀺𑀢𑁆𑀢𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁦𑁮] 𑁮. 𑀩𑀸𑀳𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀲𑀺𑀓𑁆𑀔𑁂𑀬𑁆𑀬 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀮𑀺𑀘𑁆𑀙𑀯𑀺𑀭𑀸𑀚𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀣𑀽𑀮𑀗𑁆𑀕𑀧𑀘𑁆𑀘𑀗𑁆𑀕𑀸 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑀲𑀤𑀺𑀲𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀢𑀲𑁆𑀲 𑀦𑀸𑀫 𑀮𑀺𑀘𑁆𑀙𑀯𑀺𑀭𑀜𑁆𑀜𑁄 𑀢𑀸𑀯 𑀅𑀪𑀺𑀭𑀽𑀧𑀲𑁆𑀲 𑀢𑀸𑀤𑀺𑀲𑀸 𑀪𑀭𑀺𑀬𑀸 𑀣𑀽𑀮𑀗𑁆𑀕𑀧𑀘𑁆𑀘𑀗𑁆𑀕𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸, 𑀓𑀣𑀁 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀣𑀽𑀮𑀲𑀭𑀻𑀭𑀸𑀬 𑀏𑀯 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀅𑀪𑀺𑀭𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣𑁂𑀓𑀸 𑀚𑀦𑀧𑀤𑀺𑀢𑁆𑀣𑀻 𑀣𑀽𑀮𑀲𑀭𑀻𑀭𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀪𑀢𑀺𑀁 𑀓𑀼𑀭𑀼𑀫𑀸𑀦𑀸 𑀭𑀸𑀚𑀗𑁆𑀕𑀡𑀲𑁆𑀲 𑀅𑀯𑀺𑀤𑀽𑀭𑁂𑀦 𑀕𑀘𑁆𑀙𑀫𑀸𑀦𑀸 𑀲𑀭𑀻𑀭𑀯𑀴𑀜𑁆𑀚𑀧𑀻𑀴𑀺𑀢𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀣𑀲𑀸𑀝𑀓𑁂𑀦 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀭𑀻𑀭𑀯𑀴𑀜𑁆𑀚𑀁 𑀫𑀼𑀜𑁆𑀘𑀺𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀉𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀯𑀸𑀢𑀧𑀸𑀦𑁂𑀦 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀯𑀭𑀽𑀧𑁂 𑀅𑀗𑁆𑀕𑀡𑀝𑁆𑀞𑀸𑀦𑁂 𑀲𑀭𑀻𑀭𑀯𑀴𑀜𑁆𑀚𑀁 𑀫𑀼𑀜𑁆𑀘𑀫𑀸𑀦𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀳𑀸𑀬 𑀦𑀺𑀯𑀸𑀲𑀦𑁂𑀦𑁂𑀯 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀲𑀭𑀻𑀭𑀯𑀴𑀜𑁆𑀚𑀁 𑀫𑁄𑀘𑁂𑀢𑁆𑀯𑀸 𑀔𑀺𑀧𑁆𑀧𑀁 𑀉𑀝𑁆𑀞𑀺𑀢𑀸, 𑀇𑀫𑀸𑀬 𑀦𑀺𑀭𑁄𑀕𑀸𑀬 𑀪𑀯𑀺𑀢𑀩𑁆𑀩𑀁, 𑀏𑀢𑀺𑀲𑁆𑀲𑀸 𑀯𑀢𑁆𑀣𑀼 𑀯𑀺𑀲𑀤𑀁 𑀪𑀯𑀺𑀲𑁆𑀲𑀢𑀺, 𑀯𑀺𑀲𑀤𑁂 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑁄 𑀧𑀼𑀢𑁆𑀢𑁄 𑀮𑀩𑁆𑀪𑀫𑀸𑀦𑁄 𑀯𑀺𑀲𑀤𑁄 𑀧𑀼𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀫𑀬𑀸 𑀅𑀕𑁆𑀕𑀫𑀳𑁂𑀲𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀲𑁆𑀲𑀸 𑀅𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀆𑀳𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑀸 𑀢𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸, 𑀦 𑀘𑀺𑀭𑀲𑁆𑀲𑁂𑀯 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀧𑀦𑀲𑁆𑀲𑀸 𑀧𑀼𑀢𑁆𑀢𑁄 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀣𑀸𑀭𑀽𑀧𑀁 𑀯𑀘𑀦𑁄𑀓𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀤𑁂𑀯, 𑀲𑀺𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀦𑀸𑀫 𑀲𑀺𑀧𑁆𑀧𑀁 𑀓𑀲𑁆𑀫𑀸 𑀦 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀬𑀢𑁆𑀭 𑀳𑀺 𑀦𑀸𑀫𑀸𑀬𑀁 𑀫𑀳𑀸𑀧𑀼𑀜𑁆𑀜𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀳𑀸𑀬 𑀧𑀝𑀺𑀘𑁆𑀙𑀦𑁆𑀦𑀸𑀓𑀸𑀭𑁂𑀦 𑀲𑀭𑀻𑀭𑀯𑀴𑀜𑁆𑀚𑀁 𑀓𑀼𑀭𑀼𑀫𑀸𑀦𑀸 𑀢𑀼𑀫𑁆𑀳𑁂 𑀆𑀭𑀸𑀥𑁂𑀢𑁆𑀯𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀁 𑀲𑀺𑀧𑁆𑀧𑀸𑀦𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁮. ‘‘𑀲𑀺𑀓𑁆𑀔𑁂𑀬𑁆𑀬 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺, 𑀲𑀦𑁆𑀢𑀺 𑀲𑀘𑁆𑀙𑀦𑁆𑀤𑀺𑀦𑁄 𑀚𑀦𑀸;

𑀩𑀸𑀳𑀺𑀬𑀸 𑀳𑀺 𑀲𑀼𑀳𑀦𑁆𑀦𑁂𑀦, 𑀭𑀸𑀚𑀸𑀦𑀫𑀪𑀺𑀭𑀸𑀥𑀬𑀻’’𑀢𑀺.

𑀢𑀢𑁆𑀣 𑀲𑀦𑁆𑀢𑀺 𑀲𑀘𑁆𑀙𑀦𑁆𑀤𑀺𑀦𑁄 𑀚𑀦𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀲𑀺𑀧𑁆𑀧𑁂𑀲𑀼 𑀲𑀘𑁆𑀙𑀦𑁆𑀤𑀸 𑀚𑀦𑀸 𑀅𑀢𑁆𑀣𑀺𑀬𑁂𑀯. 𑀩𑀸𑀳𑀺𑀬𑀸𑀢𑀺 𑀩𑀳𑀺𑀚𑀦𑀧𑀤𑁂 𑀚𑀸𑀢𑀸 𑀲𑀁𑀯𑀟𑁆𑀠𑀸 𑀇𑀢𑁆𑀣𑀻. 𑀲𑀼𑀳𑀦𑁆𑀦𑁂𑀦𑀸𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀳𑀸𑀬 𑀧𑀝𑀺𑀘𑁆𑀙𑀦𑁆𑀦𑁂𑀦𑀸𑀓𑀸𑀭𑁂𑀦 𑀳𑀦𑁆𑀦𑀁 𑀲𑀼𑀳𑀦𑁆𑀦𑀁 𑀦𑀸𑀫, 𑀢𑁂𑀦 𑀲𑀼𑀳𑀦𑁆𑀦𑁂𑀦. 𑀭𑀸𑀚𑀸𑀦𑀫𑀪𑀺𑀭𑀸𑀥𑀬𑀻𑀢𑀺 𑀤𑁂𑀯𑀁 𑀅𑀪𑀺𑀭𑀸𑀥𑀬𑀺𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀺𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀁 𑀲𑀺𑀧𑁆𑀧𑀸𑀦𑀁 𑀕𑀼𑀡𑀁 𑀓𑀣𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸 𑀏𑀢𑀭𑀳𑀺𑀧𑀺 𑀚𑀬𑀫𑁆𑀧𑀢𑀺𑀓𑀸𑀯, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀸𑀳𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁦𑁯] 𑁯. 𑀓𑀼𑀡𑁆𑀟𑀓𑀧𑀽𑀯𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀦𑁆𑀦𑁄 𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀓𑀤𑀸𑀘𑀺 𑀏𑀓𑀫𑁂𑀯 𑀓𑀼𑀮𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀓𑀤𑀸𑀘𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀏𑀓𑀢𑁄 𑀳𑀼𑀢𑁆𑀯𑀸, 𑀓𑀤𑀸𑀘𑀺 𑀕𑀡𑀩𑀦𑁆𑀥𑀦𑁂𑀦, 𑀓𑀤𑀸𑀘𑀺 𑀯𑀻𑀣𑀺𑀲𑀪𑀸𑀕𑁂𑀦, 𑀓𑀤𑀸𑀘𑀺 𑀲𑀓𑀮𑀦𑀕𑀭𑀁 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸. 𑀢𑀤𑀸 𑀧𑀦 𑀯𑀻𑀣𑀺𑀪𑀢𑁆𑀢𑀁 𑀦𑀸𑀫 𑀅𑀳𑁄𑀲𑀺. 𑀅𑀣 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑀸𑀕𑀼𑀁 𑀤𑀢𑁆𑀯𑀸 ‘‘𑀔𑀚𑁆𑀚𑀓𑀁 𑀆𑀳𑀭𑀣𑀸’’𑀢𑀺 𑀆𑀳𑀁𑀲𑀼. 𑀢𑀤𑀸 𑀧𑀦𑁂𑀓𑁄 𑀧𑀭𑁂𑀲𑀁 𑀪𑀢𑀺𑀓𑀸𑀭𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀢𑀲𑁆𑀲𑀁 𑀯𑀻𑀣𑀺𑀬𑀁 𑀯𑀲𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀬𑀸𑀕𑀼𑀁 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀔𑀚𑁆𑀚𑀓𑀁 𑀧𑀦 𑀤𑀲𑁆𑀲𑀸𑀫𑀻’’𑀢𑀺 𑀲𑀡𑁆𑀳𑀲𑀡𑁆𑀳𑀁 𑀓𑀼𑀡𑁆𑀟𑀓𑀁 𑀯𑀟𑁆𑀠𑀸𑀧𑁂𑀢𑁆𑀯𑀸 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀅𑀓𑁆𑀓𑀧𑀡𑁆𑀡𑁂𑀦 𑀯𑁂𑀞𑁂𑀢𑁆𑀯𑀸 𑀓𑀼𑀓𑁆𑀓𑀼𑀴𑁂 𑀧𑀘𑀺𑀢𑁆𑀯𑀸 ‘‘𑀇𑀤𑀁 𑀩𑀼𑀤𑁆𑀥𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀞𑀺𑀢𑁄 ‘‘𑀔𑀚𑁆𑀚𑀓𑀁 𑀆𑀳𑀭𑀣𑀸’’𑀢𑀺 𑀏𑀓𑀲𑁆𑀫𑀺𑀁 𑀯𑀘𑀦𑁂 𑀯𑀼𑀢𑁆𑀢𑀫𑀢𑁆𑀢𑁂 𑀲𑀩𑁆𑀩𑀧𑀞𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀽𑀯𑀁 𑀲𑀢𑁆𑀣𑀼 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀲𑀢𑁆𑀣𑀸 𑀅𑀜𑁆𑀜𑁂𑀳𑀺 𑀤𑀻𑀬𑀫𑀸𑀦𑀁 𑀔𑀚𑁆𑀚𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀫𑁂𑀯 𑀧𑀽𑀯𑀔𑀚𑁆𑀚𑀓𑀁 𑀧𑀭𑀺𑀪𑀼𑀜𑁆𑀚𑀺.

𑀢𑀲𑁆𑀫𑀺𑀁𑀬𑁂𑀯 𑀧𑀦 𑀔𑀡𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀺𑀭 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀓𑀼𑀡𑁆𑀟𑀓𑀔𑀚𑁆𑀚𑀓𑀁 𑀅𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀅𑀦𑁆𑀢𑀫𑀲𑁄 𑀤𑁄𑀯𑀸𑀭𑀺𑀓𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀤𑀼𑀕𑁆𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀳𑀦𑁆𑀤 𑀪𑁄, 𑀲𑀢𑀁 𑀕𑀳𑁂𑀢𑁆𑀯𑀸, 𑀤𑁆𑀯𑁂 𑀲𑀢𑀸𑀦𑀺 𑀕𑀳𑁂𑀢𑁆𑀯𑀸, 𑀧𑀜𑁆𑀘 𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀲𑀢𑁆𑀣𑀸𑀭𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀥𑀦𑀁 𑀕𑀳𑁂𑀢𑁆𑀯𑀸 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀥𑀦𑀁 𑀕𑀳𑁂𑀢𑀼𑀁 𑀆𑀭𑀪𑀺. 𑀫𑀦𑀼𑀲𑁆𑀲𑀸 𑀤𑀺𑀕𑀼𑀡𑀘𑀢𑀼𑀕𑁆𑀕𑀼𑀡𑀅𑀝𑁆𑀞𑀕𑀼𑀡𑀸𑀤𑀺𑀯𑀲𑁂𑀦 𑀤𑀤𑀦𑁆𑀢𑀸 𑀦𑀯 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀅𑀤𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀤𑀼𑀕𑁆𑀕𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑁂𑀦 𑀧𑀽𑀚𑁂𑀲𑀺.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀫𑀳𑀸𑀤𑀼𑀕𑁆𑀕𑀢𑁂𑀦 𑀤𑀺𑀦𑁆𑀦𑀁 𑀓𑀼𑀡𑁆𑀟𑀓𑀧𑀽𑀯𑀁 𑀅𑀚𑀺𑀕𑀼𑀘𑁆𑀙𑀦𑁆𑀢𑁄 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺, 𑀫𑀳𑀸𑀤𑀼𑀕𑁆𑀕𑀢𑁄𑀧𑀺 𑀩𑀳𑀼𑀥𑀦𑀜𑁆𑀘 𑀲𑁂𑀝𑁆𑀞𑀺𑀝𑁆𑀞𑀸𑀦𑀜𑁆𑀘 𑀮𑀪𑀺𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑀬𑀸 𑀅𑀚𑀺𑀕𑀼𑀘𑁆𑀙𑀦𑁆𑀢𑁂𑀦 𑀢𑀲𑁆𑀲 𑀓𑀼𑀡𑁆𑀟𑀓𑀧𑀽𑀯𑁄 𑀧𑀭𑀺𑀪𑀼𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀭𑀼𑀓𑁆𑀔𑀤𑁂𑀯𑀢𑀸𑀬 𑀳𑀼𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑁄𑀬𑁂𑀯, 𑀢𑀤𑀸𑀧𑀺 𑀘𑁂𑀲 𑀫𑀁 𑀦𑀺𑀲𑁆𑀲𑀸𑀬 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀮𑀢𑁆𑀣𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀭𑀡𑁆𑀟𑀭𑀼𑀓𑁆𑀔𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀢𑀲𑁆𑀫𑀺𑀁 𑀕𑀸𑀫𑀓𑁂 𑀫𑀦𑀼𑀲𑁆𑀲𑀸 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑀸 𑀳𑁄𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀙𑀡𑁂 𑀲𑀫𑁆𑀧𑀢𑁆𑀢𑁂 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀼𑀓𑁆𑀔𑀤𑁂𑀯𑀢𑀸𑀦𑀁 𑀩𑀮𑀺𑀓𑀫𑁆𑀫𑀁 𑀅𑀓𑀁𑀲𑀼. 𑀅𑀣𑁂𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀢𑁂 𑀫𑀦𑀼𑀲𑁆𑀲𑁂 𑀭𑀼𑀓𑁆𑀔𑀤𑁂𑀯𑀢𑀸 𑀧𑀝𑀺𑀚𑀕𑁆𑀕𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀁 𑀏𑀭𑀡𑁆𑀟𑀭𑀼𑀓𑁆𑀔𑀁 𑀧𑀝𑀺𑀚𑀕𑁆𑀕𑀺. 𑀢𑁂 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀘𑁂𑀯 𑀔𑀚𑁆𑀚𑀪𑁄𑀚𑁆𑀚𑀸𑀦𑀺 𑀘 𑀆𑀤𑀸𑀬 𑀕𑀘𑁆𑀙𑀺𑀁𑀲𑀼. 𑀲𑁄 𑀧𑀦 𑀓𑀼𑀡𑁆𑀟𑀓𑀧𑀽𑀯𑀜𑁆𑀘𑁂𑀯 𑀉𑀴𑀼𑀗𑁆𑀓𑁂𑀦 𑀘 𑀉𑀤𑀓𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀏𑀭𑀡𑁆𑀟𑀭𑀼𑀓𑁆𑀔𑀲𑁆𑀲 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀤𑁂𑀯𑀢𑀸 𑀦𑀸𑀫 𑀤𑀺𑀩𑁆𑀩𑀔𑀚𑁆𑀚𑀓𑀸𑀦𑀺 𑀔𑀸𑀤𑀦𑁆𑀢𑀺, 𑀫𑀬𑁆𑀳𑀁 𑀤𑁂𑀯𑀢𑀸 𑀇𑀫𑀁 𑀓𑀼𑀡𑁆𑀟𑀓𑀧𑀽𑀯𑀁 𑀦 𑀔𑀸𑀤𑀺𑀲𑁆𑀲𑀢𑀺, 𑀓𑀺𑀁 𑀇𑀫𑀁 𑀅𑀓𑀸𑀭𑀡𑁂𑀦 𑀦𑀸𑀲𑁂𑀫𑀺, 𑀅𑀳𑀫𑁂𑀯 𑀦𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀔𑀦𑁆𑀥𑀯𑀺𑀝𑀧𑁂 𑀞𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀲𑀘𑁂 𑀢𑁆𑀯𑀁 𑀇𑀲𑁆𑀲𑀭𑁄 𑀪𑀯𑁂𑀬𑁆𑀬𑀸𑀲𑀺, 𑀫𑀬𑁆𑀳𑀁 𑀫𑀥𑀼𑀭𑀔𑀚𑁆𑀚𑀓𑀁 𑀤𑀤𑁂𑀬𑁆𑀬𑀸𑀲𑀺. 𑀢𑁆𑀯𑀁 𑀧𑀦 𑀤𑀼𑀕𑁆𑀕𑀢𑁄, 𑀅𑀳𑀁 𑀢𑀯 𑀧𑀽𑀯𑀁 𑀦 𑀔𑀸𑀤𑀺𑀢𑁆𑀯𑀸 𑀅𑀜𑁆𑀜𑀁 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀫𑀸 𑀫𑁂 𑀓𑁄𑀝𑁆𑀞𑀸𑀲𑀁 𑀦𑀸𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁯. ‘‘𑀬𑀣𑀦𑁆𑀦𑁄 𑀧𑀼𑀭𑀺𑀲𑁄 𑀳𑁄𑀢𑀺, 𑀢𑀣𑀦𑁆𑀦𑀸 𑀢𑀲𑁆𑀲 𑀤𑁂𑀯𑀢𑀸;

𑀆𑀳𑀭𑁂𑀢𑀁 𑀓𑀼𑀡𑁆𑀟𑀧𑀽𑀯𑀁, 𑀫𑀸 𑀫𑁂 𑀪𑀸𑀕𑀁 𑀯𑀺𑀦𑀸𑀲𑀬𑀸’’𑀢𑀺.

𑀢𑀢𑁆𑀣 𑀬𑀣𑀦𑁆𑀦𑁄𑀢𑀺 𑀬𑀣𑀸𑀭𑀽𑀧𑀪𑁄𑀚𑀦𑁄 𑀳𑁄𑀢𑀺. 𑀢𑀣𑀦𑁆𑀦𑀸𑀢𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁂𑀯𑀢𑀸𑀧𑀺 𑀢𑀣𑀸𑀭𑀽𑀧𑀪𑁄𑀚𑀦𑀸𑀯 𑀳𑁄𑀢𑀺. 𑀆𑀳𑀭𑁂𑀢𑀁 𑀓𑀼𑀡𑁆𑀟𑀧𑀽𑀯𑀦𑁆𑀢𑀺 𑀏𑀢𑀁 𑀓𑀼𑀡𑁆𑀟𑀓𑁂𑀦 𑀧𑀓𑁆𑀓𑀧𑀽𑀯𑀁 𑀆𑀦𑁂𑀳𑀺, 𑀫𑀬𑁆𑀳𑀁 𑀪𑀸𑀕𑀁 𑀫𑀸 𑀯𑀺𑀦𑀸𑀲𑁂𑀳𑀻𑀢𑀺.

𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁄 𑀑𑀚𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀧𑀼𑀭𑀺𑀲, 𑀢𑁆𑀯𑀁 𑀓𑀺𑀫𑀢𑁆𑀣𑀁 𑀫𑀁 𑀧𑀝𑀺𑀚𑀕𑁆𑀕𑀲𑀻’’𑀢𑀺 𑀆𑀳. ‘‘𑀤𑀼𑀕𑁆𑀕𑀢𑁄𑀫𑁆𑀳𑀺, 𑀲𑀸𑀫𑀺, 𑀢𑀁 𑀦𑀺𑀲𑁆𑀲𑀸𑀬 𑀤𑀼𑀕𑁆𑀕𑀢𑀪𑀸𑀯𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀬 𑀧𑀝𑀺𑀚𑀕𑁆𑀕𑀸𑀫𑀻’’𑀢𑀺. ‘‘𑀪𑁄 𑀧𑀼𑀭𑀺𑀲, 𑀫𑀸 𑀘𑀺𑀦𑁆𑀢𑀬𑀺, 𑀢𑀬𑀸 𑀓𑀢𑀜𑁆𑀜𑀼𑀲𑁆𑀲 𑀓𑀢𑀯𑁂𑀤𑀺𑀦𑁄 𑀧𑀽𑀚𑀸 𑀓𑀢𑀸, 𑀇𑀫𑀁 𑀏𑀭𑀡𑁆𑀟𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀕𑀻𑀯𑀸𑀬 𑀕𑀻𑀯𑀁 𑀆𑀳𑀘𑁆𑀘𑀞𑀺𑀢𑀸. 𑀢𑁆𑀯𑀁 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑀓𑀝𑁂𑀳𑀺 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀓𑀸𑀭𑁂𑀳𑀺, 𑀭𑀸𑀚𑀸 𑀢𑁂 𑀢𑀼𑀲𑁆𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑀭𑀥𑀸𑀬𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀭𑀸𑀚𑀸𑀧𑀺 𑀢𑀲𑁆𑀲 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀇𑀢𑀺 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀕𑁆𑀕𑀢𑁄 𑀏𑀢𑀭𑀳𑀺 𑀤𑀼𑀕𑁆𑀕𑀢𑁄𑀯, 𑀏𑀭𑀡𑁆𑀟𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀡𑁆𑀟𑀓𑀧𑀽𑀯𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁧𑁦] 𑁧𑁦. 𑀲𑀩𑁆𑀩𑀲𑀁𑀳𑀸𑀭𑀓𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀲𑀁𑀳𑀸𑀭𑀓𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀲𑀩𑁆𑀩𑀲𑀁𑀳𑀸𑀭𑀓𑀧𑀜𑁆𑀳𑁄 𑀲𑀩𑁆𑀩𑀸𑀓𑀸𑀭𑁂𑀦 𑀉𑀫𑀗𑁆𑀕𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺.

𑀲𑀩𑁆𑀩𑀲𑀁𑀳𑀸𑀭𑀓𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀧𑀭𑁄𑀲𑀢𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀭𑁄𑀲𑀢𑀫𑁆𑀧𑀺 𑀧𑀡𑁆𑀡𑀺𑀓𑀁, 𑀯𑁂𑀭𑀻 𑀘 𑀫𑀺𑀢𑁆𑀢𑀯𑀺𑀦𑁆𑀤𑀓𑀁;

𑀤𑀼𑀩𑁆𑀩𑀮𑀜𑁆𑀘 𑀉𑀤𑀜𑁆𑀘𑀦𑀻, 𑀲𑀸𑀮𑀺𑀢𑁆𑀢𑀫𑁆𑀧𑀺 𑀘 𑀩𑀸𑀳𑀺𑀬𑀁;

𑀓𑀼𑀡𑁆𑀟𑀓𑀧𑀽𑀯𑀲𑀩𑁆𑀩𑀲𑀁𑀳𑀸𑀭𑀓𑀦𑁆𑀢𑀺.