𑁧𑁨. 𑀳𑀁𑀘𑀺𑀯𑀕𑁆𑀕𑁄

[𑁧𑁧𑁧] 𑁧. 𑀕𑀤𑁆𑀭𑀪𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀳𑀁𑀘𑀺 𑀢𑀼𑀯𑀁 𑀏𑀯𑀫𑀜𑁆𑀜𑀲𑀻𑀢𑀺 𑀅𑀬𑀫𑁆𑀧𑀺 𑀕𑀤𑁆𑀭𑀪𑀧𑀜𑁆𑀳𑁄 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂𑀬𑁂𑀯 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀕𑀤𑁆𑀭𑀪𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁧𑁨] 𑁨. 𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀬𑁂𑀦 𑀲𑀢𑁆𑀢𑀼𑀩𑀺𑀮𑀗𑁆𑀕𑀸 𑀘𑀸𑀢𑀺 𑀅𑀬𑀫𑁆𑀧𑀺 𑀅𑀫𑀭𑀸𑀤𑁂𑀯𑀺𑀧𑀜𑁆𑀳𑁄 𑀦𑀸𑀫 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁧𑁩] 𑁩. 𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀤𑁆𑀤𑀳𑀸𑀲𑀺 𑀲𑀺𑀗𑁆𑀕𑀸𑀮𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂𑀦 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 ‘𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀓𑀭𑁄𑀢𑀺, 𑀦 𑀲𑁄 𑀥𑀫𑁆𑀫𑁄. 𑀬𑀫𑀳𑀁 𑀓𑀭𑁄𑀫𑀺, 𑀅𑀬𑀫𑁂𑀯 𑀥𑀫𑁆𑀫𑁄’𑀢𑀺 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀞𑀸𑀦𑀧𑁆𑀧𑀢𑁆𑀢𑀁 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑀻𑀫𑀸𑀬 𑀤𑁆𑀯𑁂 𑀉𑀧𑁄𑀲𑀣𑀸 𑀓𑀢𑀸’’𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀅𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀼𑀲𑀸𑀯𑀸𑀤𑀻, 𑀧𑀼𑀩𑁆𑀩𑁂𑀧𑀺 𑀫𑀼𑀲𑀸𑀯𑀸𑀤𑀻𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀼𑀲𑀸𑀦𑀯𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀦𑀓𑁆𑀔𑀢𑁆𑀢𑀁 𑀖𑀼𑀝𑁆𑀞𑀁 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 ‘‘𑀬𑀓𑁆𑀔𑀩𑀮𑀺𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 𑀢𑁂𑀲𑀼 𑀢𑁂𑀲𑀼 𑀘𑀘𑁆𑀘𑀭𑀭𑀘𑁆𑀙𑀸𑀤𑀺𑀝𑁆𑀞𑀸𑀦𑁂𑀲𑀼 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀓𑀧𑀸𑀮𑀓𑁂𑀲𑀼 𑀩𑀳𑀼𑀁 𑀲𑀼𑀭𑀁 𑀞𑀧𑀬𑀺𑀁𑀲𑀼. 𑀅𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀦𑀺𑀤𑁆𑀥𑀫𑀦𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦𑁆𑀦𑀸𑀕𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀆𑀮𑁄𑀓𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀫𑀕𑁆𑀕𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸𑀧𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀏𑀓𑀁 𑀩𑁆𑀭𑀸𑀳𑁆𑀫𑀡𑀁 𑀫𑀼𑀔𑀥𑁄𑀯𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀥𑀦𑀮𑁄𑀮𑀸 𑀳𑁄𑀦𑁆𑀢𑀺, 𑀇𑀫𑀁 𑀥𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀬𑀣𑀸 𑀫𑀁 𑀉𑀧𑀓𑀘𑁆𑀙𑀓𑀦𑁆𑀢𑀭𑁂 𑀓𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀕𑀭𑀸 𑀦𑀻𑀳𑀭𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀫𑀦𑀼𑀲𑁆𑀲𑀪𑀸𑀲𑀸𑀬 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀳. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀓𑁄 𑀫𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳. ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀫𑀬𑁆𑀳𑀁 𑀤𑁆𑀯𑁂 𑀓𑀳𑀸𑀧𑀡𑀲𑀢𑀸𑀦𑀺 𑀅𑀢𑁆𑀣𑀺. 𑀲𑀘𑁂 𑀫𑀁 𑀉𑀧𑀓𑀘𑁆𑀙𑀓𑀦𑁆𑀢𑀭𑁂 𑀓𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀬𑀣𑀸 𑀦 𑀓𑁄𑀘𑀺 𑀧𑀲𑁆𑀲𑀢𑀺, 𑀢𑀣𑀸 𑀦𑀕𑀭𑀸 𑀦𑀺𑀓𑁆𑀔𑀸𑀫𑁂𑀢𑀼𑀁 𑀲𑀓𑁆𑀓𑁄𑀲𑀺, 𑀢𑀼𑀬𑁆𑀳𑀁 𑀢𑁂 𑀓𑀳𑀸𑀧𑀡𑁂 𑀤𑀲𑁆𑀲𑀸𑀫𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀥𑀦𑀮𑁄𑀪𑁂𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀢𑀣𑀸 𑀓𑀢𑁆𑀯𑀸 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁄𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀺𑀗𑁆𑀕𑀸𑀮𑁄 𑀧𑀼𑀘𑁆𑀙𑀺 ‘‘𑀓𑀢𑀭𑀝𑁆𑀞𑀸𑀦𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺? ‘‘𑀅𑀲𑀼𑀓𑀁 𑀦𑀸𑀫𑀸’’𑀢𑀺. ‘‘𑀅𑀜𑁆𑀜𑀁 𑀣𑁄𑀓𑀁 𑀞𑀸𑀦𑀁 𑀕𑀘𑁆𑀙𑀸’’𑀢𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑁄 𑀫𑀳𑀸𑀲𑀼𑀲𑀸𑀦𑀁 𑀧𑀢𑁆𑀯𑀸 ‘‘𑀇𑀥 𑀫𑀁 𑀑𑀢𑀸𑀭𑁂𑀳𑀻’’𑀢𑀺 𑀆𑀳. 𑀢𑀢𑁆𑀣 𑀦𑀁 𑀑𑀢𑀸𑀭𑁂𑀲𑀺. 𑀅𑀣 𑀲𑀺𑀗𑁆𑀕𑀸𑀮𑁄 ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀉𑀢𑁆𑀢𑀭𑀺𑀲𑀸𑀝𑀓𑀁 𑀧𑀢𑁆𑀣𑀭𑀸’’𑀢𑀺 𑀆𑀳. 𑀲𑁄 𑀥𑀦𑀮𑁄𑀪𑁂𑀦 ‘‘𑀲𑀸𑀥𑀽’’𑀢𑀺 𑀧𑀢𑁆𑀣𑀭𑀺. 𑀅𑀣 𑀦𑀁 ‘‘𑀇𑀫𑀁 𑀭𑀼𑀓𑁆𑀔𑀫𑀽𑀮𑀁 𑀔𑀡𑀸𑀳𑀻’’𑀢𑀺 𑀧𑀣𑀯𑀺𑀔𑀡𑀦𑁂 𑀬𑁄𑀚𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀢𑁆𑀢𑀭𑀺𑀲𑀸𑀝𑀓𑀁 𑀅𑀪𑀺𑀭𑀼𑀬𑁆𑀳 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀘 𑀫𑀚𑁆𑀛𑁂 𑀘𑀸𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑀁 𑀧𑀸𑀢𑁂𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀘𑁂𑀯 𑀢𑁂𑀫𑁂𑀢𑁆𑀯𑀸 𑀘 𑀲𑀼𑀲𑀸𑀦𑀯𑀦𑀁 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀼𑀓𑁆𑀔𑀯𑀺𑀝𑀧𑁂 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁩. ‘‘𑀲𑀤𑁆𑀤𑀳𑀸𑀲𑀺 𑀲𑀺𑀗𑁆𑀕𑀸𑀮𑀲𑁆𑀲, 𑀲𑀼𑀭𑀸𑀧𑀻𑀢𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀺, 𑀓𑀼𑀢𑁄 𑀓𑀁𑀲𑀲𑀢𑀸 𑀤𑀼𑀯𑁂’’𑀢𑀺.

𑀢𑀢𑁆𑀣 𑀲𑀤𑁆𑀤𑀳𑀸𑀲𑀻𑀢𑀺 𑀲𑀤𑁆𑀤𑀳𑀲𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀧𑀢𑁆𑀢𑀺𑀬𑀸𑀬𑀲𑀻𑀢𑀺 𑀅𑀢𑁆𑀣𑁄. 𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀻𑀢𑀺 𑀏𑀢𑀲𑁆𑀲 𑀳𑀺 𑀲𑀺𑀧𑁆𑀧𑀺𑀓𑀸𑀲𑀢𑀫𑁆𑀧𑀺 𑀦𑀢𑁆𑀣𑀺. 𑀓𑀼𑀢𑁄 𑀓𑀁𑀲𑀲𑀢𑀸 𑀤𑀼𑀯𑁂𑀢𑀺 𑀤𑁆𑀯𑁂 𑀓𑀳𑀸𑀧𑀡𑀲𑀢𑀸𑀦𑀺 𑀧𑀦𑀲𑁆𑀲 𑀓𑀼𑀢𑁄 𑀏𑀯𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀢𑀯 𑀲𑀸𑀝𑀓𑀁 𑀥𑁄𑀯𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸 𑀓𑀢𑁆𑀯𑀸 ‘‘𑀯𑀜𑁆𑀘𑀺𑀢𑁄 𑀯𑀢𑀫𑁆𑀳𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁧𑁪] 𑁪. 𑀫𑀺𑀢𑀘𑀺𑀦𑁆𑀢𑀻𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀘𑀺𑀦𑁆𑀢𑀻 𑀅𑀧𑁆𑀧𑀘𑀺𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀚𑀦𑀧𑀤𑁂 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀣𑁂𑀬𑁆𑀬𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀫𑀸𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀧𑀼𑀦 𑀧𑀸𑀣𑁂𑀬𑁆𑀬𑀁 𑀲𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀫𑀸𑀲𑀁, 𑀧𑀼𑀦 𑀫𑀸𑀲𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀓𑀼𑀲𑀻𑀢𑀪𑀸𑀯𑁂𑀦 𑀘𑁂𑀯 𑀦𑀺𑀯𑀸𑀲𑀝𑁆𑀞𑀸𑀦𑁂 𑀘 𑀅𑀧𑁂𑀓𑁆𑀔𑀸𑀬 𑀢𑀬𑁄 𑀫𑀸𑀲𑁂 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀁𑀲𑀼. 𑀅𑀣 𑀦𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 ‘‘𑀘𑀺𑀭𑀁 𑀯𑁄, 𑀆𑀯𑀼𑀲𑁄, 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀅𑀓𑀭𑁄𑀦𑁆𑀢𑀸𑀦𑀁, 𑀓𑀲𑁆𑀫𑀸 𑀏𑀯𑀁 𑀘𑀺𑀭𑀸𑀬𑀺𑀢𑁆𑀣𑀸’’𑀢𑀺? 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑁂𑀲𑀁 𑀲𑁄 𑀆𑀮𑀲𑀺𑀬𑀓𑀼𑀲𑀻𑀢𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀥𑀫𑁆𑀫𑀲𑀪𑀸𑀬𑀫𑁆𑀧𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀫𑁂𑀯 𑀆𑀮𑀲𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀮𑀲𑀸 𑀓𑀼𑀲𑀻𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀢𑁂 𑀅𑀮𑀲𑀸, 𑀧𑀼𑀩𑁆𑀩𑁂𑀧𑀺 𑀅𑀮𑀲𑀸 𑀘𑁂𑀯 𑀦𑀺𑀯𑀸𑀲𑀝𑁆𑀞𑀸𑀦𑁂 𑀘 𑀲𑀸𑀮𑀬𑀸 𑀲𑀸𑀧𑁂𑀓𑁆𑀔𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀦𑀤𑀺𑀬𑀁 𑀢𑀬𑁄 𑀫𑀘𑁆𑀙𑀸 𑀅𑀳𑁂𑀲𑀼𑀁, 𑀩𑀳𑀼𑀘𑀺𑀦𑁆𑀢𑀻, 𑀅𑀧𑁆𑀧𑀘𑀺𑀦𑁆𑀢𑀻, 𑀫𑀺𑀢𑀘𑀺𑀦𑁆𑀢𑀻𑀢𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑁂 𑀅𑀭𑀜𑁆𑀜𑀢𑁄 𑀫𑀦𑀼𑀲𑁆𑀲𑀧𑀣𑀁 𑀆𑀕𑀫𑀺𑀁𑀲𑀼. 𑀢𑀢𑁆𑀣 𑀫𑀺𑀢𑀘𑀺𑀦𑁆𑀢𑀻 𑀇𑀢𑀭𑁂 𑀤𑁆𑀯𑁂 𑀏𑀯𑀫𑀸𑀳 ‘‘𑀅𑀬𑀁 𑀫𑀦𑀼𑀲𑁆𑀲𑀧𑀣𑁄 𑀦𑀸𑀫 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀓𑁂𑀯𑀝𑁆𑀝𑀸 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀚𑀸𑀮𑀓𑀼𑀫𑀺𑀦𑀸𑀤𑀻𑀦𑀺 𑀔𑀺𑀧𑀺𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑀺, 𑀫𑀬𑀁 𑀅𑀭𑀜𑁆𑀜𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺. 𑀇𑀢𑀭𑁂 𑀤𑁆𑀯𑁂 𑀚𑀦𑀸 𑀅𑀮𑀲𑀢𑀸𑀬 𑀘𑁂𑀯 𑀆𑀫𑀺𑀲𑀕𑀺𑀤𑁆𑀥𑀢𑀸𑀬 𑀘 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀢𑀬𑁄 𑀫𑀸𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀼𑀁. 𑀅𑀣 𑀓𑁂𑀯𑀝𑁆𑀝𑀸 𑀦𑀤𑀺𑀬𑀁 𑀚𑀸𑀮𑀁 𑀔𑀺𑀧𑀺𑀁𑀲𑀼. 𑀩𑀳𑀼𑀘𑀺𑀦𑁆𑀢𑀻 𑀘 𑀅𑀧𑁆𑀧𑀘𑀺𑀦𑁆𑀢𑀻 𑀘 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀺. 𑀢𑁂 𑀅𑀢𑁆𑀢𑀦𑁄 𑀅𑀦𑁆𑀥𑀩𑀸𑀮𑀢𑀸𑀬 𑀚𑀸𑀮𑀕𑀦𑁆𑀥𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀸𑀮𑀓𑀼𑀘𑁆𑀙𑀺𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀫𑀺𑀢𑀘𑀺𑀦𑁆𑀢𑀻 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄 𑀚𑀸𑀮𑀕𑀦𑁆𑀥𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀜𑁆𑀘 𑀚𑀸𑀮𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑁂𑀲𑀁 𑀓𑀼𑀲𑀻𑀢𑀸𑀦𑀁 𑀅𑀦𑁆𑀥𑀩𑀸𑀮𑀸𑀦𑀁 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀧𑀲𑁆𑀲𑁂𑀦 𑀚𑀸𑀮𑀓𑀼𑀘𑁆𑀙𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀸𑀮𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀲𑀤𑀺𑀲𑁄 𑀳𑀼𑀢𑁆𑀯𑀸 𑀉𑀤𑀓𑀁 𑀆𑀮𑀼𑀴𑁂𑀦𑁆𑀢𑁄 𑀚𑀸𑀮𑀲𑁆𑀲 𑀧𑀼𑀭𑀢𑁄 𑀧𑀢𑀺𑀢𑁆𑀯𑀸 𑀧𑀼𑀦 𑀚𑀸𑀮𑀓𑀼𑀘𑁆𑀙𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀪𑀸𑀕𑁂𑀦 𑀨𑀸𑀮𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀲𑀤𑀺𑀲𑁄 𑀉𑀤𑀓𑀁 𑀆𑀮𑀼𑀴𑁂𑀦𑁆𑀢𑁄 𑀧𑀘𑁆𑀙𑀺𑀫𑀪𑀸𑀕𑁂 𑀧𑀢𑀺. 𑀓𑁂𑀯𑀝𑁆𑀝𑀸 ‘‘𑀫𑀘𑁆𑀙𑀸 𑀚𑀸𑀮𑀁 𑀨𑀸𑀮𑁂𑀢𑁆𑀯𑀸 𑀕𑀢𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀚𑀸𑀮𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀁𑀲𑀼. 𑀢𑁂 𑀤𑁆𑀯𑁂𑀧𑀺 𑀫𑀘𑁆𑀙𑀸 𑀚𑀸𑀮𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀉𑀤𑀓𑁂 𑀧𑀢𑀺𑀁𑀲𑀼. 𑀇𑀢𑀺 𑀢𑁂𑀳𑀺 𑀫𑀺𑀢𑀘𑀺𑀦𑁆𑀢𑀺𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥𑀁.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁪. ‘‘𑀩𑀳𑀼𑀘𑀺𑀦𑁆𑀢𑀻 𑀅𑀧𑁆𑀧𑀘𑀺𑀦𑁆𑀢𑀻, 𑀉𑀪𑁄 𑀚𑀸𑀮𑁂 𑀅𑀩𑀚𑁆𑀛𑀭𑁂;

𑀫𑀺𑀢𑀘𑀺𑀦𑁆𑀢𑀻 𑀧𑀫𑁄𑀘𑁂𑀲𑀺, 𑀉𑀪𑁄 𑀢𑀢𑁆𑀣 𑀲𑀫𑀸𑀕𑀢𑀸’’𑀢𑀺.

𑀢𑀢𑁆𑀣 𑀩𑀳𑀼𑀘𑀺𑀦𑁆𑀢𑀻𑀢𑀺 𑀩𑀳𑀼𑀘𑀺𑀦𑁆𑀢𑀦𑀢𑀸𑀬 𑀯𑀺𑀢𑀓𑁆𑀓𑀩𑀳𑀼𑀮𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀅𑀬𑀫𑁂𑀯 𑀦𑀬𑁄. 𑀉𑀪𑁄 𑀢𑀢𑁆𑀣 𑀲𑀫𑀸𑀕𑀢𑀸𑀢𑀺 𑀫𑀺𑀢𑀘𑀺𑀦𑁆𑀢𑀺𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀚𑀻𑀯𑀺𑀢𑀸 𑀢𑀢𑁆𑀣 𑀉𑀤𑀓𑁂 𑀧𑀼𑀦 𑀉𑀪𑁄𑀧𑀺 𑀚𑀦𑀸 𑀫𑀺𑀢𑀘𑀺𑀦𑁆𑀢𑀺𑀦𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀳𑀮𑁆𑀮𑀓𑀸 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀩𑀳𑀼𑀘𑀺𑀦𑁆𑀢𑀻 𑀘 𑀅𑀧𑁆𑀧𑀘𑀺𑀦𑁆𑀢𑀻 𑀘 𑀇𑀫𑁂 𑀤𑁆𑀯𑁂 𑀅𑀳𑁂𑀲𑀼𑀁, 𑀫𑀺𑀢𑀘𑀺𑀦𑁆𑀢𑀻 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀺𑀢𑀘𑀺𑀦𑁆𑀢𑀻𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁧𑁫] 𑁫. 𑀅𑀦𑀼𑀲𑀸𑀲𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑀸𑀬𑀜𑁆𑀜𑁂 𑀫𑀦𑀼𑀲𑀸𑀲𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀼𑀲𑀸𑀲𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑀻 𑀏𑀓𑀸 𑀓𑀼𑀮𑀥𑀻𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑀡𑀥𑀫𑁆𑀫𑁂 𑀅𑀦𑀦𑀼𑀬𑀼𑀢𑁆𑀢𑀸 𑀆𑀫𑀺𑀲𑀕𑀺𑀤𑁆𑀥𑀸 𑀳𑀼𑀢𑁆𑀯𑀸 𑀬𑀢𑁆𑀣 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀕𑀘𑁆𑀙𑀦𑁆𑀢𑀺, 𑀢𑀸𑀤𑀺𑀲𑁂 𑀦𑀕𑀭𑀲𑁆𑀲 𑀏𑀓𑀤𑁂𑀲𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀅𑀣𑀲𑁆𑀲𑀸 𑀫𑀦𑀼𑀲𑁆𑀲𑀸 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺. 𑀲𑀸 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 ‘‘𑀲𑀘𑁂 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺, 𑀫𑀬𑁆𑀳𑀁 𑀮𑀸𑀪𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺. 𑀬𑀣𑀸 𑀏𑀢𑀁 𑀧𑀤𑁂𑀲𑀁 𑀅𑀜𑁆𑀜𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀫𑀬𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀽𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬𑁂, 𑀅𑀲𑀼𑀓𑀝𑁆𑀞𑀸𑀦𑁂 𑀘𑀡𑁆𑀟𑁄 𑀳𑀢𑁆𑀣𑀻, 𑀘𑀡𑁆𑀟𑁄 𑀅𑀲𑁆𑀲𑁄, 𑀘𑀡𑁆𑀟𑁄 𑀫𑁂𑀡𑁆𑀟𑁄, 𑀘𑀡𑁆𑀟𑁄 𑀓𑀼𑀓𑁆𑀓𑀼𑀭𑁄 𑀘𑀭𑀢𑀺, 𑀲𑀧𑀭𑀺𑀲𑁆𑀲𑀬𑀝𑁆𑀞𑀸𑀦𑀁, 𑀫𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀣𑀸’’𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀲𑀸𑀲𑀢𑀺. 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀓𑀸 𑀪𑀺𑀓𑁆𑀔𑀼𑀦𑀻𑀧𑀺 𑀢𑀁 𑀧𑀤𑁂𑀲𑀁 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦 𑀑𑀮𑁄𑀓𑁂𑀲𑀺. 𑀢𑀲𑁆𑀲𑀸 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺𑀬𑀸 𑀯𑁂𑀕𑁂𑀦𑁂𑀓𑀁 𑀕𑁂𑀳𑀁 𑀧𑀯𑀺𑀲𑀦𑁆𑀢𑀺𑀬𑀸 𑀘𑀡𑁆𑀟𑁄 𑀫𑁂𑀡𑁆𑀟𑀓𑁄 𑀧𑀳𑀭𑀺𑀢𑁆𑀯𑀸 𑀊𑀭𑀼𑀝𑁆𑀞𑀺𑀓𑀁 𑀪𑀺𑀦𑁆𑀤𑀺. 𑀫𑀦𑀼𑀲𑁆𑀲𑀸 𑀯𑁂𑀕𑁂𑀦 𑀉𑀧𑀥𑀸𑀯𑀺𑀢𑁆𑀯𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑀁 𑀊𑀭𑀼𑀝𑁆𑀞𑀺𑀓𑀁 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀫𑀜𑁆𑀘𑁂𑀦𑀸𑀤𑀸𑀬 𑀪𑀺𑀓𑁆𑀔𑀼𑀦𑀽𑀧𑀲𑁆𑀲𑀬𑀁 𑀦𑀬𑀺𑀁𑀲𑀼. 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀅𑀬𑀁 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀬𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀘𑀭𑀦𑁆𑀢𑀻 𑀊𑀭𑀼𑀝𑁆𑀞𑀺𑀓𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀆𑀕𑀢𑀸’’𑀢𑀺 𑀧𑀭𑀺𑀳𑀸𑀲𑀁 𑀅𑀓𑀁𑀲𑀼. 𑀢𑀫𑁆𑀧𑀺 𑀢𑀸𑀬 𑀓𑀢𑀓𑀸𑀭𑀡𑀁 𑀦 𑀘𑀺𑀭𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀅𑀲𑀼𑀓𑀸 𑀅𑀦𑀼𑀲𑀸𑀲𑀺𑀓𑀸 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀬𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀘𑀭𑀫𑀸𑀦𑀸 𑀘𑀡𑁆𑀟𑁂𑀦 𑀫𑁂𑀡𑁆𑀟𑀓𑁂𑀦 𑀊𑀭𑀼𑀁 𑀪𑀺𑀦𑁆𑀤𑀸𑀧𑁂𑀲𑀻’’𑀢𑀺 𑀢𑀲𑁆𑀲𑀸 𑀅𑀕𑀼𑀡𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲𑀸 𑀅𑀜𑁆𑀜𑁂 𑀅𑀦𑀼𑀲𑀸𑀲𑀢𑀺𑀬𑁂𑀯, 𑀲𑀬𑀁 𑀧𑀦 𑀦 𑀯𑀢𑁆𑀢𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀤𑀼𑀓𑁆𑀔𑀫𑁂𑀯 𑀅𑀦𑀼𑀪𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀓𑀼𑀡𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀅𑀦𑁂𑀓𑀲𑀓𑀼𑀡𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀢𑀢𑁆𑀣 𑀯𑀲𑀦𑀓𑀸𑀮𑁂 𑀏𑀓𑀸 𑀘𑀡𑁆𑀟𑀲𑀓𑀼𑀡𑀺𑀓𑀸 𑀫𑀳𑀸𑀯𑀢𑁆𑀢𑀦𑀺𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺. 𑀲𑀸 𑀢𑀢𑁆𑀣 𑀲𑀓𑀝𑁂𑀳𑀺 𑀧𑀢𑀺𑀢𑀸𑀦𑀺 𑀯𑀻𑀳𑀺𑀫𑀼𑀕𑁆𑀕𑀩𑀻𑀚𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 ‘‘𑀬𑀣𑀸 𑀇𑀤𑀸𑀦𑀺 𑀇𑀫𑀁 𑀧𑀤𑁂𑀲𑀁 𑀅𑀜𑁆𑀜𑁂 𑀲𑀓𑀼𑀡𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀓𑀼𑀡𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀤𑁂𑀢𑀺 ‘‘𑀯𑀢𑁆𑀢𑀦𑀺𑀫𑀳𑀸𑀫𑀕𑁆𑀕𑁄 𑀦𑀸𑀫 𑀲𑀧𑁆𑀧𑀝𑀺𑀪𑀬𑁄, 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀘𑁂𑀯 𑀘𑀡𑁆𑀟𑀕𑁄𑀡𑀬𑀼𑀢𑁆𑀢𑀬𑀸𑀦𑀸𑀤𑀻𑀦𑀺 𑀘 𑀲𑀜𑁆𑀘𑀭𑀦𑁆𑀢𑀺, 𑀲𑀳𑀲𑀸 𑀉𑀧𑁆𑀧𑀢𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀢𑀺, 𑀦 𑀢𑀢𑁆𑀣 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀲𑀓𑀼𑀡𑀲𑀗𑁆𑀖𑁄 𑀢𑀲𑁆𑀲𑀸 ‘‘𑀅𑀦𑀼𑀲𑀸𑀲𑀺𑀓𑀸’’𑀢𑁂𑀯 𑀦𑀸𑀫𑀁 𑀅𑀓𑀸𑀲𑀺.

𑀲𑀸 𑀏𑀓𑀤𑀺𑀯𑀲𑀁 𑀯𑀢𑁆𑀢𑀦𑀺𑀫𑀳𑀸𑀫𑀕𑁆𑀕𑁂 𑀘𑀭𑀦𑁆𑀢𑀻 𑀅𑀢𑀺𑀫𑀳𑀸𑀯𑁂𑀕𑁂𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀬𑀸𑀦𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀤𑀽𑀭𑁂 𑀢𑀸𑀯𑀸’’𑀢𑀺 𑀘𑀭𑀢𑀺𑀬𑁂𑀯. 𑀅𑀣 𑀦𑀁 𑀬𑀸𑀦𑀁 𑀯𑀸𑀢𑀯𑁂𑀕𑁂𑀦 𑀲𑀻𑀖𑀫𑁂𑀯 𑀲𑀫𑁆𑀧𑀸𑀧𑀼𑀡𑀺, 𑀲𑀸 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀘𑀓𑁆𑀓𑁂𑀦 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑀢𑀸. 𑀲𑀓𑀼𑀡𑀚𑁂𑀝𑁆𑀞𑀓𑁄 𑀲𑀓𑀼𑀡𑁂 𑀲𑀫𑀸𑀦𑁂𑀦𑁆𑀢𑁄 𑀢𑀁 𑀅𑀤𑀺𑀲𑁆𑀯𑀸 ‘‘𑀅𑀦𑀼𑀲𑀸𑀲𑀺𑀓𑀸 𑀦 𑀤𑀺𑀲𑁆𑀲𑀢𑀺, 𑀉𑀧𑀥𑀸𑀭𑁂𑀣 𑀦’’𑀦𑁆𑀢𑀺 𑀆𑀳. 𑀲𑀓𑀼𑀡𑀸 𑀉𑀧𑀥𑀸𑀭𑁂𑀦𑁆𑀢𑀸 𑀢𑀁 𑀫𑀳𑀸𑀫𑀕𑁆𑀕𑁂 𑀤𑁆𑀯𑀺𑀥𑀸 𑀙𑀺𑀦𑁆𑀦𑀁 𑀤𑀺𑀲𑁆𑀯𑀸 𑀲𑀓𑀼𑀡𑀚𑁂𑀝𑁆𑀞𑀓𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀓𑀼𑀡𑀚𑁂𑀝𑁆𑀞𑀓𑁄 ‘‘𑀲𑀸 𑀅𑀜𑁆𑀜𑀸 𑀲𑀓𑀼𑀡𑀺𑀓𑀸 𑀯𑀸𑀭𑁂𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀘𑀭𑀫𑀸𑀦𑀸 𑀤𑁆𑀯𑀺𑀥𑀸 𑀙𑀺𑀦𑁆𑀦𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁫. ‘‘𑀬𑀸𑀬𑀜𑁆𑀜𑁂 𑀫𑀦𑀼𑀲𑀸𑀲𑀢𑀺, 𑀲𑀬𑀁 𑀮𑁄𑀮𑀼𑀧𑁆𑀧𑀘𑀸𑀭𑀺𑀦𑀻;

𑀲𑀸𑀬𑀁 𑀯𑀺𑀧𑀓𑁆𑀔𑀺𑀓𑀸 𑀲𑁂𑀢𑀺, 𑀳𑀢𑀸 𑀘𑀓𑁆𑀓𑁂𑀦 𑀲𑀸𑀲𑀺𑀓𑀸’’𑀢𑀺.

𑀢𑀢𑁆𑀣 𑀬𑀸𑀬𑀜𑁆𑀜𑁂 𑀫𑀦𑀼𑀲𑀸𑀲𑀢𑀻𑀢𑀺 𑀬𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀬𑀸 𑀅𑀜𑁆𑀜𑁂 𑀅𑀦𑀼𑀲𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀬𑀁 𑀮𑁄𑀮𑀼𑀧𑁆𑀧𑀘𑀸𑀭𑀺𑀦𑀻𑀢𑀺 𑀅𑀢𑁆𑀢𑀦𑀸 𑀮𑁄𑀮𑀼𑀧𑁆𑀧𑀘𑀸𑀭𑀺𑀦𑀻 𑀲𑀫𑀸𑀦𑀸. 𑀲𑀸𑀬𑀁 𑀯𑀺𑀧𑀓𑁆𑀔𑀺𑀓𑀸 𑀲𑁂𑀢𑀻𑀢𑀺 𑀲𑀸 𑀏𑀲𑀸 𑀯𑀺𑀳𑀢𑀧𑀓𑁆𑀔𑀸 𑀳𑀼𑀢𑁆𑀯𑀸 𑀫𑀳𑀸𑀫𑀕𑁆𑀕𑁂 𑀲𑀬𑀢𑀺. 𑀳𑀢𑀸 𑀘𑀓𑁆𑀓𑁂𑀦 𑀲𑀸𑀲𑀺𑀓𑀸𑀢𑀺 𑀬𑀸𑀦𑀘𑀓𑁆𑀓𑁂𑀦 𑀳𑀢𑀸 𑀲𑀸𑀲𑀺𑀓𑀸 𑀲𑀓𑀼𑀡𑀺𑀓𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀦𑀼𑀲𑀸𑀲𑀺𑀓𑀸 𑀲𑀓𑀼𑀡𑀺𑀓𑀸 𑀅𑀬𑀁 𑀅𑀦𑀼𑀲𑀸𑀲𑀺𑀓𑀸 𑀪𑀺𑀓𑁆𑀔𑀼𑀦𑀻 𑀅𑀳𑁄𑀲𑀺, 𑀲𑀓𑀼𑀡𑀚𑁂𑀝𑁆𑀞𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀦𑀼𑀲𑀸𑀲𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁧𑁬] 𑁬. 𑀤𑀼𑀩𑁆𑀩𑀘𑀚𑀸𑀢𑀓𑀯𑀡𑁆𑀡𑀦𑀸

𑀅𑀢𑀺𑀓𑀭𑀫𑀓𑀭𑀸𑀘𑀭𑀺𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑁂 𑀕𑀺𑀚𑁆𑀛𑀚𑀸𑀢𑀓𑁂 (𑀚𑀸. 𑁧.𑁯.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀦 𑀢𑁆𑀯𑀁 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯. 𑀤𑀼𑀩𑁆𑀩𑀘𑀪𑀸𑀯𑁂𑀦𑁂𑀯 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀓𑀭𑁄𑀦𑁆𑀢𑁄 𑀲𑀢𑁆𑀢𑀺𑀧𑁆𑀧𑀳𑀸𑀭𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀮𑀗𑁆𑀖𑀦𑀝𑀓𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄 𑀅𑀳𑁄𑀲𑀺. 𑀲𑁄 𑀏𑀓𑀲𑁆𑀲 𑀮𑀗𑁆𑀖𑀦𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀢𑁆𑀢𑀺𑀮𑀗𑁆𑀖𑀦𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀆𑀘𑀭𑀺𑀬𑁄 𑀧𑀦𑀲𑁆𑀲 𑀘𑀢𑀼𑀦𑁆𑀦𑀁𑀬𑁂𑀯 𑀲𑀢𑁆𑀢𑀻𑀦𑀁 𑀮𑀗𑁆𑀖𑀦𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀦 𑀧𑀜𑁆𑀘𑀦𑁆𑀦𑀁. 𑀲𑁄 𑀏𑀓𑀤𑀺𑀯𑀲𑀁 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀲𑀼𑀭𑀸𑀫𑀤𑀫𑀢𑁆𑀢𑁄 ‘‘𑀧𑀜𑁆𑀘 𑀲𑀢𑁆𑀢𑀺𑀬𑁄 𑀮𑀗𑁆𑀖𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 ‘‘𑀆𑀘𑀭𑀺𑀬, 𑀢𑁆𑀯𑀁 𑀧𑀜𑁆𑀘𑀲𑀢𑁆𑀢𑀺𑀮𑀗𑁆𑀖𑀦𑀲𑀺𑀧𑁆𑀧𑀁 𑀦 𑀚𑀸𑀦𑀸𑀲𑀺, 𑀏𑀓𑀁 𑀲𑀢𑁆𑀢𑀺𑀁 𑀳𑀭. 𑀲𑀘𑁂 𑀮𑀗𑁆𑀖𑀺𑀲𑁆𑀲𑀲𑀺, 𑀧𑀜𑁆𑀘𑀫𑀸𑀬 𑀲𑀢𑁆𑀢𑀺𑀬𑀸 𑀯𑀺𑀤𑁆𑀥𑁄 𑀫𑀭𑀺𑀲𑁆𑀲𑀲𑀻’’𑀢𑀺. 𑀲𑁄 𑀲𑀼𑀝𑁆𑀞𑀼 𑀫𑀢𑁆𑀢𑀢𑀸𑀬 ‘‘𑀢𑁆𑀯𑀜𑁆𑀳𑀺 𑀫𑀬𑁆𑀳𑀁 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀘𑀢𑀲𑁆𑀲𑁄 𑀮𑀗𑁆𑀖𑀺𑀢𑁆𑀯𑀸 𑀧𑀜𑁆𑀘𑀫𑀸𑀬 𑀲𑀢𑁆𑀢𑀺𑀬𑀸 𑀤𑀡𑁆𑀟𑀓𑁂 𑀫𑀥𑀼𑀓𑀧𑀼𑀧𑁆𑀨𑀁 𑀯𑀺𑀬 𑀆𑀯𑀼𑀢𑁄 𑀧𑀭𑀺𑀤𑁂𑀯𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀇𑀫𑀁 𑀩𑁆𑀬𑀲𑀦𑀁 𑀧𑀢𑁆𑀢𑁄𑀲𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁬. ‘‘𑀅𑀢𑀺𑀓𑀭𑀫𑀓𑀭𑀸𑀘𑀭𑀺𑀬, 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀺;

𑀘𑀢𑀼𑀢𑁆𑀣𑁂 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀧𑀜𑁆𑀘𑀫𑀸𑀬𑀲𑀺 𑀆𑀯𑀼𑀢𑁄’’𑀢𑀺.

𑀢𑀢𑁆𑀣 𑀅𑀢𑀺𑀓𑀭𑀫𑀓𑀭𑀸𑀘𑀭𑀺𑀬𑀸𑀢𑀺 𑀆𑀘𑀭𑀺𑀬 𑀅𑀚𑁆𑀚 𑀢𑁆𑀯𑀁 𑀅𑀢𑀺𑀓𑀭𑀁 𑀅𑀓𑀭𑀺, 𑀅𑀢𑁆𑀢𑀦𑁄 𑀓𑀭𑀡𑀢𑁄 𑀅𑀢𑀺𑀭𑁂𑀓𑀁 𑀓𑀭𑀡𑀁 𑀅𑀓𑀭𑀻𑀢𑀺 𑀅𑀢𑁆𑀣𑁄. 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀻𑀢𑀺 𑀫𑀬𑁆𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲𑀧𑀺 𑀲𑀫𑀸𑀦𑀲𑁆𑀲 𑀏𑀢𑀁 𑀢𑀯 𑀓𑀭𑀡𑀁 𑀦 𑀭𑀼𑀘𑁆𑀘𑀢𑀺, 𑀢𑁂𑀦 𑀢𑁂 𑀅𑀳𑀁 𑀧𑀞𑀫𑀫𑁂𑀯 𑀓𑀣𑁂𑀲𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀘𑀢𑀼𑀢𑁆𑀣𑁂 𑀮𑀗𑁆𑀖𑀬𑀺𑀢𑁆𑀯𑀸𑀦𑀸𑀢𑀺 𑀘𑀢𑀼𑀢𑁆𑀣𑁂 𑀲𑀢𑁆𑀢𑀺𑀣𑀮𑁂 𑀅𑀧𑀢𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀮𑀗𑁆𑀖𑀬𑀺𑀢𑁆𑀯𑀸. 𑀧𑀜𑁆𑀘𑀫𑀸𑀬𑀲𑀺 𑀆𑀯𑀼𑀢𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀇𑀤𑀸𑀦𑀺 𑀧𑀜𑁆𑀘𑀫𑀸𑀬 𑀲𑀢𑁆𑀢𑀺𑀬𑀸 𑀆𑀯𑀼𑀢𑁄𑀲𑀻𑀢𑀺. 𑀇𑀤𑀁 𑀯𑀢𑁆𑀯𑀸 𑀆𑀘𑀭𑀺𑀬𑀁 𑀲𑀢𑁆𑀢𑀺𑀢𑁄 𑀅𑀧𑀦𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀆𑀘𑀭𑀺𑀬𑁄 𑀅𑀬𑀁 𑀤𑀼𑀩𑁆𑀩𑀘𑁄 𑀅𑀳𑁄𑀲𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀩𑁆𑀩𑀘𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁧𑁭] 𑁭. 𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀘𑁆𑀘𑀼𑀕𑁆𑀕𑀢𑀸𑀢𑀺𑀩𑀮𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀢𑁂𑀭𑀲𑀓𑀦𑀺𑀧𑀸𑀢𑁂 𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁧𑁩.𑁧𑁦𑁪 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀯𑀸𑀘𑀁 𑀦𑀺𑀲𑁆𑀲𑀸𑀬 𑀦𑀝𑁆𑀞𑁄, 𑀧𑀼𑀩𑁆𑀩𑁂𑀧𑀺 𑀦𑀝𑁆𑀞𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀲𑀩𑁆𑀩𑁄 𑀇𑀲𑀺𑀕𑀡𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀑𑀯𑀸𑀤𑀸𑀘𑀭𑀺𑀬𑀁 𑀓𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀇𑀲𑀺𑀲𑀢𑀸𑀦𑀁 𑀑𑀯𑀸𑀤𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑁂 𑀯𑀲𑀢𑀺. 𑀢𑀤𑀸 𑀏𑀓𑁄 𑀘𑁂𑀢𑁆𑀣 𑀧𑀡𑁆𑀟𑀼𑀭𑁄𑀕𑀻 𑀢𑀸𑀧𑀲𑁄 𑀓𑀼𑀞𑀸𑀭𑀺𑀁 𑀕𑀳𑁂𑀢𑁆𑀯𑀸 𑀓𑀝𑁆𑀞𑀁 𑀨𑀸𑀮𑁂𑀢𑀺. 𑀅𑀣𑁂𑀓𑁄 𑀫𑀼𑀔𑀭𑀢𑀸𑀧𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀥 𑀧𑀳𑀸𑀭𑀁 𑀤𑁂𑀳𑀺, 𑀇𑀥 𑀧𑀳𑀸𑀭𑀁 𑀤𑁂𑀳𑀻’’𑀢𑀺 𑀢𑀁 𑀢𑀸𑀧𑀲𑀁 𑀭𑁄𑀲𑁂𑀲𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀦 𑀤𑀸𑀦𑀺 𑀫𑁂 𑀢𑁆𑀯𑀁 𑀤𑀸𑀭𑀼𑀨𑀸𑀮𑀦𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑀦𑀓𑀸𑀘𑀭𑀺𑀬𑁄’’𑀢𑀺 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀲𑀺. 𑀢𑀤𑀸 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑀧𑀸𑀤𑁂 𑀏𑀓𑁄 𑀢𑀺𑀢𑁆𑀢𑀺𑀭𑁄 𑀯𑀲𑀢𑀺. 𑀲𑁄 𑀲𑀸𑀬𑀁 𑀧𑀸𑀢𑀁 𑀢𑀲𑁆𑀫𑀺𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀞𑀢𑁆𑀯𑀸 𑀫𑀳𑀸𑀯𑀲𑁆𑀲𑀺𑀢𑀁 𑀯𑀲𑁆𑀲𑀢𑀺. 𑀢𑀁 𑀲𑀼𑀢𑁆𑀯𑀸 𑀏𑀓𑁄 𑀮𑀼𑀤𑁆𑀤𑀓𑁄 ‘‘𑀢𑀺𑀢𑁆𑀢𑀺𑀭𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀤𑁆𑀤𑀲𑀜𑁆𑀜𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀥𑀺𑀢𑁆𑀯𑀸 𑀆𑀤𑀸𑀬 𑀕𑀢𑁄.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀤𑁆𑀤𑀁 𑀅𑀲𑀼𑀡𑀦𑁆𑀢𑁄 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀢𑀺𑀢𑁆𑀢𑀺𑀭𑁄 𑀯𑀲𑀢𑀺, 𑀓𑀺𑀁 𑀦𑀼 𑀔𑁄 𑀢𑀲𑁆𑀲 𑀲𑀤𑁆𑀤𑁄 𑀦 𑀲𑀽𑀬𑀢𑀻’’𑀢𑀺 𑀢𑀸𑀧𑀲𑁂 𑀧𑀼𑀘𑁆𑀙𑀺. 𑀢𑁂 𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑁄 𑀉𑀪𑁄𑀧𑀺 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀲𑀁𑀲𑀦𑁆𑀤𑁂𑀢𑁆𑀯𑀸 𑀇𑀲𑀺𑀕𑀡𑀫𑀚𑁆𑀛𑁂 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁭. ‘‘𑀅𑀘𑁆𑀘𑀼𑀕𑁆𑀕𑀢𑀸𑀢𑀺𑀩𑀮𑀢𑀸, 𑀅𑀢𑀺𑀯𑁂𑀮𑀁 𑀧𑀪𑀸𑀲𑀺𑀢𑀸;

𑀯𑀸𑀘𑀸 𑀳𑀦𑀢𑀺 𑀤𑀼𑀫𑁆𑀫𑁂𑀥𑀁, 𑀢𑀺𑀢𑁆𑀢𑀺𑀭𑀁 𑀯𑀸𑀢𑀺𑀯𑀲𑁆𑀲𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀘𑁆𑀘𑀼𑀕𑁆𑀕𑀢𑀸𑀢𑀺 𑀅𑀢𑀺𑀉𑀕𑁆𑀕𑀢𑀸. 𑀅𑀢𑀺𑀩𑀮𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀲𑀦𑁂𑀦 𑀅𑀢𑀺𑀩𑀮𑀲𑀪𑀸𑀯𑀸. 𑀅𑀢𑀺𑀯𑁂𑀮𑀁 𑀧𑀪𑀸𑀲𑀺𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦 𑀪𑀸𑀲𑀺𑀢𑀸. 𑀢𑀺𑀢𑁆𑀢𑀺𑀭𑀁 𑀯𑀸𑀢𑀺𑀯𑀲𑁆𑀲𑀺𑀢𑀦𑁆𑀢𑀺 𑀬𑀣𑀸 𑀢𑀺𑀢𑁆𑀢𑀺𑀭𑀁 𑀅𑀢𑀺𑀯𑀲𑁆𑀲𑀺𑀢𑀁 𑀳𑀦𑀢𑀺, 𑀢𑀣𑀸 𑀏𑀯𑀭𑀽𑀧𑀸 𑀯𑀸𑀘𑀸 𑀤𑀼𑀫𑁆𑀫𑁂𑀥𑀁 𑀩𑀸𑀮𑀧𑀼𑀕𑁆𑀕𑀮𑀁 𑀳𑀦𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀕𑀡𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀦𑀝𑁆𑀞𑁄, 𑀧𑀼𑀩𑁆𑀩𑁂𑀧𑀺 𑀦𑀝𑁆𑀞𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀼𑀔𑀭𑀢𑀸𑀧𑀲𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁧𑁮] 𑁮. 𑀯𑀝𑁆𑀝𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀘𑀺𑀦𑁆𑀢𑀬𑀦𑁆𑀢𑁄 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀉𑀢𑁆𑀢𑀭𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺 𑀫𑀳𑀸𑀯𑀺𑀪𑀯𑁄. 𑀢𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀬𑀁 𑀏𑀓𑁄 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄 𑀅𑀳𑁄𑀲𑀺 𑀩𑁆𑀭𑀳𑁆𑀫𑀯𑀡𑁆𑀡𑀻. 𑀅𑀣 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀓𑀢𑁆𑀢𑀺𑀓𑀙𑀡𑁂 𑀦𑀓𑁆𑀔𑀢𑁆𑀢𑁂 𑀖𑀼𑀝𑁆𑀞𑁂 𑀲𑀩𑁆𑀩𑁄 𑀮𑁄𑀓𑁄 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀲𑀳𑀸𑀬𑀓𑀸 𑀅𑀜𑁆𑀜𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀲𑀧𑀚𑀸𑀧𑀢𑀺𑀓𑀸 𑀅𑀳𑁂𑀲𑀼𑀁. 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀦 𑀤𑀻𑀖𑀭𑀢𑁆𑀢𑀁 𑀩𑁆𑀭𑀳𑁆𑀫𑀮𑁄𑀓𑁂 𑀯𑀲𑀺𑀢𑀢𑁆𑀢𑀸 𑀓𑀺𑀮𑁂𑀲𑁂𑀲𑀼 𑀘𑀺𑀢𑁆𑀢𑀁 𑀦 𑀅𑀮𑁆𑀮𑀻𑀬𑀢𑀺. 𑀅𑀣𑀲𑁆𑀲 𑀲𑀳𑀸𑀬𑀓𑀸 ‘‘𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲𑀧𑀺 𑀏𑀓𑀁 𑀇𑀢𑁆𑀣𑀺𑀁 𑀆𑀦𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀢𑁆𑀢𑀺𑀓𑀙𑀡𑁄 𑀖𑀼𑀝𑁆𑀞𑁄, 𑀢𑀼𑀬𑁆𑀳𑀫𑁆𑀧𑀺 𑀏𑀓𑀁 𑀇𑀢𑁆𑀣𑀺𑀁 𑀆𑀦𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀦 𑀫𑁂 𑀅𑀢𑁆𑀣𑁄 𑀇𑀢𑁆𑀣𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑀦𑁆𑀥𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀏𑀓𑀁 𑀯𑀡𑁆𑀡𑀤𑀸𑀲𑀺𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸 𑀢𑀲𑁆𑀲 𑀖𑀭𑀁 𑀦𑁂𑀢𑁆𑀯𑀸 ‘‘𑀢𑁆𑀯𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀲𑀬𑀦𑀺𑀖𑀭𑀁 𑀧𑁂𑀲𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀁 𑀲𑀬𑀦𑀺𑀖𑀭𑀁 𑀧𑀯𑀺𑀝𑁆𑀞𑀫𑁆𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑁂𑀯 𑀑𑀮𑁄𑀓𑁂𑀢𑀺, 𑀦𑀸𑀮𑀧𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀯𑀁 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀉𑀢𑁆𑀢𑀫𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀫𑀁 𑀦𑁂𑀯 𑀑𑀮𑁄𑀓𑁂𑀢𑀺, 𑀦𑀸𑀮𑀧𑀢𑀺, 𑀇𑀤𑀸𑀦𑀺 𑀦𑀁 𑀅𑀢𑁆𑀢𑀦𑁄 𑀇𑀢𑁆𑀣𑀺𑀓𑀼𑀢𑁆𑀢𑀮𑀻𑀮𑀸𑀬 𑀑𑀮𑁄𑀓𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀢𑁆𑀣𑀺𑀮𑀻𑀮𑀁 𑀤𑀲𑁆𑀲𑁂𑀦𑁆𑀢𑀻 𑀧𑀳𑀝𑁆𑀞𑀸𑀓𑀸𑀭𑁂𑀦 𑀅𑀕𑁆𑀕𑀤𑀦𑁆𑀢𑁂 𑀯𑀺𑀯𑀭𑀺𑀢𑁆𑀯𑀸 𑀳𑀲𑀺𑀢𑀁 𑀅𑀓𑀸𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀑𑀮𑁄𑀓𑁂𑀢𑁆𑀯𑀸 𑀤𑀦𑁆𑀢𑀝𑁆𑀞𑀺𑀓𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀅𑀝𑁆𑀞𑀺𑀓𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀺, 𑀲𑀓𑀮𑀫𑁆𑀧𑀺 𑀢𑀁 𑀲𑀭𑀻𑀭𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀯𑀺𑀬 𑀧𑀜𑁆𑀜𑀸𑀬𑀺. 𑀲𑁄 𑀢𑀲𑁆𑀲𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀢𑀁 𑀢𑀲𑁆𑀲 𑀖𑀭𑀸 𑀑𑀢𑀺𑀡𑁆𑀡𑀁 𑀏𑀓𑁄 𑀇𑀲𑁆𑀲𑀭𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀤𑀺𑀲𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀦𑁂𑀲𑀺, 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀦𑀓𑁆𑀔𑀢𑁆𑀢𑀁 𑀑𑀲𑀺𑀢𑀁. 𑀯𑀡𑁆𑀡𑀤𑀸𑀲𑀺𑀬𑀸 𑀫𑀸𑀢𑀸 𑀥𑀻𑀢𑀼 𑀆𑀕𑀫𑀦𑀁 𑀅𑀤𑀺𑀲𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀲𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀲𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀢𑀗𑁆𑀔𑀡𑀜𑁆𑀜𑁂𑀯 𑀢𑀲𑁆𑀲𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺’’𑀦𑁆𑀢𑀺. 𑀅𑀣𑀲𑁆𑀲𑀸 𑀫𑀸𑀢𑀸 𑀭𑁄𑀤𑀦𑁆𑀢𑀻 ‘‘𑀥𑀻𑀢𑀭𑀁 𑀫𑁂 𑀦 𑀧𑀲𑁆𑀲𑀸𑀫𑀺, 𑀥𑀻𑀢𑀭𑀁 𑀫𑁂 𑀲𑀫𑀸𑀦𑁂𑀣𑀸’’𑀢𑀺 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀅𑀝𑁆𑀝𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 ‘‘𑀇𑀫𑁂 𑀢𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀯𑀡𑁆𑀡𑀤𑀸𑀲𑀺𑀁 𑀆𑀦𑁂𑀢𑁆𑀯𑀸 𑀢𑀼𑀬𑁆𑀳𑀁 𑀅𑀤𑀁𑀲𑀽’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀇𑀤𑀸𑀦𑀺 𑀲𑀸 𑀓𑀳’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀦𑀁 𑀉𑀬𑁆𑀬𑁄𑀚𑁂𑀲𑀺’’𑀦𑁆𑀢𑀺. ‘‘𑀇𑀤𑀸𑀦𑀺 𑀢𑀁 𑀲𑀫𑀸𑀦𑁂𑀢𑀼𑀁 𑀲𑀓𑁆𑀓𑁄𑀲𑀻’’𑀢𑀺? ‘‘𑀦 𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀲𑀘𑁂 𑀲𑀫𑀸𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀭𑀸𑀚𑀸𑀡𑀫𑀲𑁆𑀲 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀭𑀸𑀚𑀸𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀓𑀺𑀭 𑀯𑀡𑁆𑀡𑀤𑀸𑀲𑀺𑀁 𑀲𑀫𑀸𑀦𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀸𑀚𑀸 𑀭𑀸𑀚𑀸𑀡𑀁 𑀓𑀸𑀭𑁂𑀢𑀻’’𑀢𑀺 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀉𑀭𑁂 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢𑀁, 𑀲𑀸𑀫𑀺, 𑀅𑀢𑁆𑀢𑀦𑁄 𑀢𑁂 𑀅𑀦𑀦𑀼𑀘𑁆𑀙𑀯𑀺𑀓𑀁 𑀮𑀤𑁆𑀥’’𑀦𑁆𑀢𑀺 𑀧𑀭𑀺𑀤𑁂𑀯𑀢𑀺. 𑀲𑁂𑀝𑁆𑀞𑀺𑀧𑀺 𑀧𑀼𑀢𑁆𑀢𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀕𑀘𑁆𑀙𑀢𑀺.

𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀫𑀬𑁆𑀳𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀕𑀸𑀭𑁂 𑀯𑀲𑀦𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁. 𑀲𑀘𑁂 𑀇𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀺, 𑀫𑀳𑀸𑀕𑁄𑀢𑀫𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑀸𑀧𑀺 𑀔𑁄 𑀯𑀡𑁆𑀡𑀤𑀸𑀲𑀻 𑀢𑀁 𑀓𑁄𑀮𑀸𑀳𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁𑀲𑀤𑁆𑀤𑁄 𑀦𑀸𑀫𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀑𑀢𑀭𑀺𑀢𑁆𑀯𑀸 ‘‘𑀉𑀲𑁆𑀲𑀭𑀣, 𑀉𑀲𑁆𑀲𑀭𑀣, 𑀲𑀸𑀫𑀻, 𑀫𑀁 𑀭𑀸𑀚𑀧𑀼𑀭𑀺𑀲𑀸𑀦𑀁 𑀤𑀝𑁆𑀞𑀼𑀁 𑀤𑁂𑀣𑀸’’𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀲𑀳𑀸𑀬𑀓𑀧𑀭𑀺𑀯𑀼𑀢𑁄𑀯 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀲𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀘𑀻𑀯𑀭𑀲𑀸𑀝𑀓𑁂 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀪𑀬𑁂 𑀉𑀧𑁆𑀧𑀦𑁆𑀦𑁂 𑀲𑀸𑀲𑀦𑀲𑁆𑀲 𑀕𑀼𑀡𑀁 𑀚𑀸𑀦𑀺𑀢𑁆𑀯𑀸 ‘𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀫𑀸𑀦𑁄 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀲𑀼𑀘𑀺𑀦𑁆𑀢𑀺𑀢𑁂𑀦 𑀫𑀭𑀡𑀫𑀼𑀢𑁆𑀢𑁄 𑀘𑁂𑀯, 𑀧𑀩𑁆𑀩𑀚𑀺𑀢𑁄 𑀘 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀢𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀯 𑀅𑀢𑁆𑀢𑀦𑁄 𑀪𑀬𑁂 𑀉𑀧𑁆𑀧𑀦𑁆𑀦𑁂 ‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀭𑀡𑀪𑀬𑀸 𑀫𑀼𑀢𑁆𑀢𑁄, 𑀅𑀢𑀻𑀢𑁂 𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀪𑀬𑁂 𑀉𑀧𑁆𑀧𑀦𑁆𑀦𑁂 ‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀭𑀡𑀪𑀬𑀢𑁄 𑀫𑀼𑀘𑁆𑀘𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑁄 𑀯𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀏𑀓𑁄 𑀯𑀝𑁆𑀝𑀓𑀮𑀼𑀤𑁆𑀤𑀓𑁄 𑀅𑀭𑀜𑁆𑀜𑀸 𑀩𑀳𑀽 𑀯𑀝𑁆𑀝𑀓𑁂 𑀆𑀳𑀭𑀺𑀢𑁆𑀯𑀸 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀕𑁄𑀘𑀭𑀁 𑀤𑀢𑁆𑀯𑀸 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀳𑀢𑁆𑀣𑁂 𑀯𑀝𑁆𑀝𑀓𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀩𑀳𑀽𑀳𑀺 𑀯𑀝𑁆𑀝𑀓𑁂𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀲𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀦𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀇𑀫𑀺𑀦𑀸 𑀤𑀺𑀦𑁆𑀦𑀁 𑀕𑁄𑀘𑀭𑀜𑁆𑀘 𑀧𑀸𑀦𑀻𑀬𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀅𑀬𑀁 𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀢𑀺. 𑀲𑀘𑁂 𑀧𑀦 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀅𑀳𑀁 𑀫𑀺𑀮𑀸𑀬𑀺𑀲𑁆𑀲𑀸𑀫𑀺, 𑀅𑀣 𑀫𑀁 𑀫𑀺𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀦 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀓𑀭𑁄𑀦𑁆𑀢𑁄 𑀫𑀺𑀮𑀸𑀬𑀺𑀢𑁆𑀯𑀸 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑁄 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀦 𑀕𑀡𑁆𑀳𑀺𑀁𑀲𑀼. 𑀮𑀼𑀤𑁆𑀤𑀓𑁄 𑀩𑁄𑀥𑀺𑀲𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀲𑀼 𑀯𑀝𑁆𑀝𑀓𑁂𑀲𑀼 𑀧𑀭𑀺𑀓𑁆𑀔𑀻𑀡𑁂𑀲𑀼 𑀧𑀘𑁆𑀙𑀺𑀁 𑀦𑀻𑀳𑀭𑀺𑀢𑁆𑀯𑀸 𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀳𑀢𑁆𑀣𑀢𑀮𑁂 𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀅𑀬𑀁 𑀯𑀝𑁆𑀝𑀓𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀫𑁂𑀯 𑀕𑀢𑁄. 𑀅𑀜𑁆𑀜𑁂 𑀯𑀝𑁆𑀝𑀓𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀦 𑀧𑀜𑁆𑀜𑀸𑀬𑀲𑀺, 𑀓𑀳𑀁 𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀮𑀼𑀤𑁆𑀤𑀓𑁂𑀦 𑀕𑀳𑀺𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸 𑀫𑀼𑀢𑁆𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑀁 𑀢𑁂𑀦 𑀤𑀺𑀦𑁆𑀦𑀁 𑀕𑁄𑀘𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀦𑀻𑀬𑀁 𑀅𑀧𑀺𑀯𑀺𑀢𑁆𑀯𑀸 𑀉𑀧𑀸𑀬𑀘𑀺𑀦𑁆𑀢𑀸𑀬 𑀫𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁮. ‘‘𑀦𑀸𑀘𑀺𑀦𑁆𑀢𑀬𑀦𑁆𑀢𑁄 𑀧𑀼𑀭𑀺𑀲𑁄, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺;

𑀘𑀺𑀦𑁆𑀢𑀺𑀢𑀲𑁆𑀲 𑀨𑀮𑀁 𑀧𑀲𑁆𑀲, 𑀫𑀼𑀢𑁆𑀢𑁄𑀲𑁆𑀫𑀺 𑀯𑀥𑀩𑀦𑁆𑀥𑀦𑀸’’𑀢𑀺.

𑀢𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀧𑀼𑀭𑀺𑀲𑁄 𑀤𑀼𑀓𑁆𑀔𑀁 𑀧𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀉𑀧𑀸𑀬𑁂𑀦 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑀬𑀦𑁆𑀢𑁄 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸 𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀇𑀤𑀸𑀦𑀺 𑀧𑀦 𑀫𑀬𑀸 𑀘𑀺𑀦𑁆𑀢𑀺𑀢𑀓𑀫𑁆𑀫𑀲𑁆𑀲 𑀨𑀮𑀁 𑀧𑀲𑁆𑀲. 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀫𑀼𑀢𑁆𑀢𑁄𑀲𑁆𑀫𑀺 𑀯𑀥𑀩𑀦𑁆𑀥𑀦𑀸, 𑀫𑀭𑀡𑀢𑁄 𑀘 𑀩𑀦𑁆𑀥𑀦𑀢𑁄 𑀘 𑀫𑀼𑀢𑁆𑀢𑁄𑀲𑁆𑀫𑀺 𑀅𑀳𑀦𑁆𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀓𑀸𑀭𑀡𑀁 𑀆𑀘𑀺𑀓𑁆𑀔𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀭𑀡𑀫𑀼𑀢𑁆𑀢𑁄 𑀯𑀝𑁆𑀝𑀓𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀝𑁆𑀝𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁧𑁯] 𑁯. 𑀅𑀓𑀸𑀮𑀭𑀸𑀯𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀤𑁆𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀓𑀸𑀮𑀭𑀸𑀯𑀺𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀁 𑀯𑀸 𑀦 𑀉𑀕𑁆𑀕𑀡𑁆𑀳𑀺. 𑀲𑁄 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀬𑀸 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀉𑀧𑀝𑁆𑀞𑀸𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀉𑀕𑁆𑀕𑀳𑁂𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀚𑁆𑀛𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀧𑀞𑀫𑀬𑀸𑀫𑁂𑀧𑀺 𑀫𑀚𑁆𑀛𑀺𑀫𑀬𑀸𑀫𑁂𑀧𑀺 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀧𑀩𑀼𑀤𑁆𑀥𑀧𑀩𑀼𑀤𑁆𑀥𑀓𑁆𑀔𑀡𑁂𑀬𑁂𑀯 𑀫𑀳𑀸𑀲𑀤𑁆𑀤𑀁 𑀓𑀭𑁄𑀢𑀺, 𑀪𑀺𑀓𑁆𑀔𑀽 𑀦𑀺𑀤𑁆𑀤𑀁 𑀦 𑀮𑀪𑀦𑁆𑀢𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀭𑀢𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀁 𑀯𑀸 𑀓𑀸𑀮𑀁 𑀯𑀸 𑀅𑀓𑀸𑀮𑀁 𑀯𑀸 𑀦 𑀚𑀸𑀦𑀸𑀢𑀻’’𑀢𑀺 𑀢𑀲𑁆𑀲 𑀅𑀕𑀼𑀡𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀅𑀓𑀸𑀮𑀭𑀸𑀯𑀻, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀮𑀭𑀸𑀯𑀻𑀬𑁂𑀯, 𑀓𑀸𑀮𑀸𑀓𑀸𑀮𑀁 𑀅𑀚𑀸𑀦𑀦𑀪𑀸𑀯𑁂𑀦 𑀘 𑀕𑀻𑀯𑀸𑀬 𑀯𑀝𑁆𑀝𑀺𑀢𑀸𑀬 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘𑀲𑀢𑁂 𑀫𑀸𑀡𑀯𑁂 𑀲𑀺𑀧𑁆𑀧𑀁 𑀯𑀸𑀘𑁂𑀢𑀺. 𑀢𑁂𑀲𑀁 𑀫𑀸𑀡𑀯𑀸𑀦𑀁 𑀏𑀓𑁄 𑀓𑀸𑀮𑀭𑀸𑀯𑀻 𑀓𑀼𑀓𑁆𑀓𑀼𑀝𑁄 𑀅𑀢𑁆𑀣𑀺, 𑀢𑁂 𑀢𑀲𑁆𑀲 𑀯𑀲𑁆𑀲𑀺𑀢𑀲𑀤𑁆𑀤𑁂𑀦 𑀉𑀝𑁆𑀞𑀸𑀬 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑀺. 𑀲𑁄 𑀓𑀸𑀮𑀫𑀓𑀸𑀲𑀺. 𑀢𑁂 𑀅𑀜𑁆𑀜𑀁 𑀓𑀼𑀓𑁆𑀓𑀼𑀝𑀁 𑀧𑀭𑀺𑀬𑁂𑀲𑀦𑁆𑀢𑀸 𑀘𑀭𑀦𑁆𑀢𑀺. 𑀅𑀣𑁂𑀓𑁄 𑀫𑀸𑀡𑀯𑀓𑁄 𑀲𑀼𑀲𑀸𑀦𑀯𑀦𑁂 𑀤𑀸𑀭𑀽𑀦𑀺 𑀉𑀤𑁆𑀥𑀭𑀦𑁆𑀢𑁄 𑀏𑀓𑀁 𑀓𑀼𑀓𑁆𑀓𑀼𑀝𑀁 𑀤𑀺𑀲𑁆𑀯𑀸 𑀆𑀦𑁂𑀢𑁆𑀯𑀸 𑀧𑀜𑁆𑀚𑀭𑁂 𑀞𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑁄 𑀲𑀼𑀲𑀸𑀦𑁂 𑀯𑀟𑁆𑀠𑀺𑀢𑀢𑁆𑀢𑀸 ‘‘𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀯𑀲𑁆𑀲𑀺𑀢𑀩𑁆𑀩’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀓𑀤𑀸𑀘𑀺 𑀅𑀢𑀺𑀭𑀢𑁆𑀢𑀺𑀁 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀅𑀭𑀼𑀡𑀼𑀕𑁆𑀕𑀫𑀦𑁂. 𑀫𑀸𑀡𑀯𑀸 𑀢𑀲𑁆𑀲 𑀅𑀢𑀺𑀭𑀢𑁆𑀢𑀺𑀁 𑀯𑀲𑁆𑀲𑀺𑀢𑀓𑀸𑀮𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀺𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀦𑀺𑀤𑁆𑀤𑀸𑀬𑀫𑀸𑀦𑀸 𑀕𑀳𑀺𑀢𑀝𑁆𑀞𑀸𑀦𑀫𑁆𑀧𑀺 𑀦 𑀧𑀲𑁆𑀲𑀦𑁆𑀢𑀺. 𑀅𑀢𑀺𑀧𑀪𑀸𑀢𑁂 𑀯𑀲𑁆𑀲𑀺𑀢𑀓𑀸𑀮𑁂 𑀲𑀚𑁆𑀛𑀸𑀬𑀲𑁆𑀲 𑀑𑀓𑀸𑀲𑀫𑁂𑀯 𑀦 𑀮𑀪𑀦𑁆𑀢𑀺. 𑀫𑀸𑀡𑀯𑀸 ‘‘𑀅𑀬𑀁 𑀅𑀢𑀺𑀭𑀢𑁆𑀢𑀺𑀁 𑀯𑀸 𑀯𑀲𑁆𑀲𑀢𑀺 𑀅𑀢𑀺𑀧𑀪𑀸𑀢𑁂 𑀯𑀸, 𑀇𑀫𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀲𑀺𑀧𑁆𑀧𑀁 𑀦 𑀦𑀺𑀝𑁆𑀞𑀸𑀬𑀺𑀲𑁆𑀲𑀢𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀕𑀻𑀯𑀁 𑀯𑀝𑁆𑀝𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 ‘‘𑀅𑀓𑀸𑀮𑀭𑀸𑀯𑀻 𑀓𑀼𑀓𑁆𑀓𑀼𑀝𑁄 𑀅𑀫𑁆𑀳𑁂𑀳𑀺 𑀖𑀸𑀢𑀺𑀢𑁄’’𑀢𑀺 𑀆𑀘𑀭𑀺𑀬𑀲𑁆𑀲 𑀓𑀣𑁂𑀲𑀼𑀁. 𑀆𑀘𑀭𑀺𑀬𑁄 ‘‘𑀑𑀯𑀸𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀪𑀸𑀯𑁂𑀦 𑀫𑀭𑀡𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁯. ‘‘𑀅𑀫𑀸𑀢𑀸𑀧𑀺𑀢𑀭-𑀲𑀁𑀯𑀤𑁆𑀥𑁄, 𑀅𑀦𑀸𑀘𑁂𑀭𑀓𑀼𑀮𑁂 𑀯𑀲𑀁;

𑀦𑀸𑀬𑀁 𑀓𑀸𑀮𑀁 𑀅𑀓𑀸𑀮𑀁 𑀯𑀸, 𑀅𑀪𑀺𑀚𑀸𑀦𑀸𑀢𑀺 𑀓𑀼𑀓𑁆𑀓𑀼𑀝𑁄’’𑀢𑀺.

𑀢𑀢𑁆𑀣 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀤𑁆𑀥𑁄𑀢𑀺 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀢𑁂𑀲𑀁 𑀑𑀯𑀸𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀁𑀯𑀟𑁆𑀠𑁄. 𑀅𑀦𑀸𑀘𑁂𑀭𑀓𑀼𑀮𑁂 𑀯𑀲𑀦𑁆𑀢𑀺 𑀆𑀘𑀭𑀺𑀬𑀓𑀼𑀮𑁂𑀧𑀺 𑀅𑀯𑀲𑀫𑀸𑀦𑁄, 𑀆𑀘𑀸𑀭𑀲𑀺𑀓𑁆𑀔𑀸𑀧𑀓𑀁 𑀓𑀜𑁆𑀘𑀺 𑀦𑀺𑀲𑁆𑀲𑀸𑀬 𑀅𑀯𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀸𑀬𑀁 𑀓𑀸𑀮𑀁 𑀅𑀓𑀸𑀮𑀁 𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀲𑁆𑀲𑀺𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀦 𑀯𑀲𑁆𑀲𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀯𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀮𑀁 𑀯𑀸 𑀅𑀓𑀸𑀮𑀁 𑀯𑀸 𑀏𑀲 𑀓𑀼𑀓𑁆𑀓𑀼𑀝𑁄 𑀦 𑀚𑀸𑀦𑀸𑀢𑀺, 𑀅𑀚𑀸𑀦𑀦𑀪𑀸𑀯𑁂𑀦𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄𑀢𑀺. 𑀇𑀤𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀓𑀸𑀮𑀭𑀸𑀯𑀻 𑀓𑀼𑀓𑁆𑀓𑀼𑀝𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀓𑀸𑀮𑀭𑀸𑀯𑀺𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁨𑁦] 𑁧𑁦. 𑀩𑀦𑁆𑀥𑀦𑀫𑁄𑀓𑁆𑀔𑀚𑀸𑀢𑀓𑀯𑀡𑁆𑀡𑀦𑀸

𑀅𑀩𑀤𑁆𑀥𑀸 𑀢𑀢𑁆𑀣 𑀩𑀚𑁆𑀛𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀺𑀜𑁆𑀘𑀫𑀸𑀡𑀯𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲𑀸 𑀯𑀢𑁆𑀣𑀼 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀫𑀳𑀸𑀧𑀤𑀼𑀫𑀚𑀸𑀢𑀓𑁂 (𑀚𑀸. 𑁧.𑁧𑁨.𑁧𑁦𑁬 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀇𑀤𑀸𑀦𑁂𑀯 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀩𑁆𑀪𑀸𑀘𑀺𑀓𑁆𑀔𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀢𑀲𑁆𑀲𑁂𑀯 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀢𑁂𑀦 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀭𑁄 𑀤𑀺𑀦𑁆𑀦𑁄 𑀳𑁄𑀢𑀺 ‘‘𑀪𑀤𑁆𑀤𑁂, 𑀬𑀁 𑀇𑀘𑁆𑀙𑀲𑀺, 𑀢𑀁 𑀯𑀤𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀏𑀯𑀫𑀸𑀳 ‘‘𑀦 𑀫𑀬𑁆𑀳𑀁 𑀅𑀜𑁆𑀜𑁄 𑀯𑀭𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀇𑀢𑁄 𑀧𑀦 𑀢𑁂 𑀧𑀝𑁆𑀞𑀸𑀬 𑀅𑀜𑁆𑀜𑀸 𑀇𑀢𑁆𑀣𑀻 𑀓𑀺𑀮𑁂𑀲𑀯𑀲𑁂𑀦 𑀦 𑀑𑀮𑁄𑀓𑁂𑀢𑀩𑁆𑀩𑀸’’𑀢𑀺. 𑀲𑁄 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑁄𑀴𑀲𑀲𑀼 𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑁂𑀲𑀼 𑀓𑀺𑀮𑁂𑀲𑀯𑀲𑁂𑀦 𑀏𑀓𑀺𑀢𑁆𑀣𑀺𑀫𑁆𑀧𑀺 𑀦 𑀑𑀮𑁄𑀓𑁂𑀲𑀺.

𑀅𑀣𑀲𑁆𑀲 𑀧𑀘𑁆𑀘𑀦𑁆𑀢𑁄 𑀓𑀼𑀧𑁆𑀧𑀺, 𑀧𑀘𑁆𑀘𑀦𑁆𑀢𑁂 𑀞𑀺𑀢𑀸 𑀬𑁄𑀥𑀸 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀢𑀬𑁄 𑀲𑀗𑁆𑀕𑀸𑀫𑁂 𑀓𑀢𑁆𑀯𑀸 ‘‘𑀇𑀢𑁄 𑀉𑀢𑁆𑀢𑀭𑀺 𑀫𑀬𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀼𑀁. 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀩𑀮𑀓𑀸𑀬𑀁 𑀲𑀁𑀳𑀭𑀺𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀳𑀁 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀸𑀫𑀺, 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀬𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀚𑀬𑀧𑀭𑀸𑀚𑀬𑁄𑀧𑀺 𑀅𑀦𑀺𑀩𑀤𑁆𑀥𑁄, 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀫𑀸𑀢𑀼𑀕𑀸𑀫𑁄 𑀤𑀼𑀧𑁆𑀧𑀭𑀺𑀳𑀸𑀭𑁄, 𑀢𑁆𑀯𑀁 𑀇𑀥𑁂𑀯 𑀦𑀺𑀯𑀢𑁆𑀢𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀦 𑀲𑀓𑁆𑀓𑀸, 𑀤𑁂𑀯, 𑀫𑀬𑀸 𑀦𑀺𑀯𑀢𑁆𑀢𑀺𑀢𑀼’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀆𑀳 ‘‘𑀢𑁂𑀦 𑀳𑀺 𑀏𑀓𑁂𑀓𑀁 𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀲𑀼𑀔𑀤𑀼𑀓𑁆𑀔𑀚𑀸𑀦𑀦𑀢𑁆𑀣𑀁 𑀏𑀓𑁂𑀓𑀁 𑀫𑀦𑀼𑀲𑁆𑀲𑀁 𑀧𑁂𑀲𑁂𑀬𑁆𑀬𑀸𑀣𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀦𑀕𑀭𑁂 𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀩𑀮𑀓𑀸𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀏𑀓𑁂𑀓𑀁 𑀧𑀼𑀭𑀺𑀲𑀁 ‘‘𑀅𑀫𑁆𑀳𑀸𑀓𑀁 𑀆𑀭𑁄𑀕𑁆𑀬𑀁 𑀆𑀭𑁄𑀘𑁂𑀢𑁆𑀯𑀸 𑀤𑁂𑀯𑀺𑀬𑀸 𑀲𑀼𑀔𑀤𑀼𑀓𑁆𑀔𑀁 𑀚𑀸𑀦𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺. 𑀲𑀸 𑀆𑀕𑀢𑀸𑀕𑀢𑀁 𑀧𑀼𑀭𑀺𑀲𑀁 ‘‘𑀭𑀸𑀚𑀸 𑀓𑀺𑀫𑀢𑁆𑀣𑀁 𑀢𑀁 𑀧𑁂𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀼𑀔𑀤𑀼𑀓𑁆𑀔𑀚𑀸𑀦𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀲𑀤𑁆𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀭𑀸𑀚𑀸 𑀤𑁆𑀯𑀢𑁆𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀤𑁆𑀯𑀢𑁆𑀢𑀺𑀁𑀲 𑀚𑀦𑁂 𑀧𑁂𑀲𑁂𑀲𑀺, 𑀲𑀸 𑀲𑀩𑁆𑀩𑁂𑀳𑀺𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀣𑁂𑀯 𑀅𑀓𑀸𑀲𑀺.

𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀚𑀦𑀧𑀤𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀣𑁂𑀯 𑀤𑁆𑀯𑀢𑁆𑀢𑀺𑀁𑀲 𑀚𑀦𑁂 𑀧𑁂𑀲𑁂𑀲𑀺, 𑀲𑀸 𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀢𑀣𑁂𑀯 𑀯𑀺𑀧𑁆𑀧𑀝𑀺𑀧𑀚𑁆𑀚𑀺𑀬𑁂𑀯. 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀚𑀬𑀓𑁆𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑁂 𑀞𑀢𑁆𑀯𑀸 ‘‘𑀦𑀕𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑀽’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀓𑀮𑀦𑀕𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀧𑀝𑀺𑀚𑀕𑁆𑀕𑀸𑀧𑁂𑀦𑁆𑀢𑁄 𑀤𑁂𑀯𑀺𑀬𑀸 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀓𑀸𑀬𑀁 𑀤𑀺𑀲𑁆𑀯𑀸 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀏𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀬𑀦𑀁 𑀅𑀪𑀺𑀭𑀼𑀳𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀏𑀯𑀁 𑀅𑀯𑀘, 𑀭𑀸𑀚𑀸𑀧𑀺 𑀕𑀭𑀼, 𑀅𑀓𑀼𑀲𑀮𑀫𑁆𑀧𑀺 𑀪𑀸𑀬𑀸𑀫𑀺, 𑀦 𑀲𑀓𑁆𑀓𑀸 𑀫𑀬𑀸 𑀏𑀯𑀁 𑀓𑀸𑀢𑀼’’𑀦𑁆𑀢𑀺 𑀆𑀳. ‘‘𑀘𑀢𑀼𑀲𑀝𑁆𑀞𑀺𑀬𑀸 𑀧𑀸𑀤𑀫𑀽𑀮𑀺𑀓𑀸𑀦𑀁 𑀦𑁂𑀯 𑀭𑀸𑀚𑀸 𑀕𑀭𑀼, 𑀦 𑀅𑀓𑀼𑀲𑀮𑀁 𑀪𑀸𑀬𑀦𑁆𑀢𑀺. 𑀢𑀯𑁂𑀯 𑀭𑀸𑀚𑀸 𑀕𑀭𑀼, 𑀢𑁆𑀯𑀁𑀬𑁂𑀯 𑀘 𑀅𑀓𑀼𑀲𑀮𑀁 𑀪𑀸𑀬𑀲𑀻’’𑀢𑀺. ‘‘𑀆𑀫, 𑀤𑁂𑀯𑀺, 𑀲𑀘𑁂 𑀢𑁂𑀲𑀫𑁆𑀧𑀺 𑀏𑀯𑀁 𑀪𑀯𑁂𑀬𑁆𑀬, 𑀦 𑀏𑀯𑀭𑀽𑀧𑀁 𑀓𑀭𑁂𑀬𑁆𑀬𑀼𑀁’’. ‘‘𑀅𑀳𑀁 𑀧𑀦 𑀚𑀸𑀦𑀫𑀸𑀦𑁄 𑀏𑀯𑀭𑀽𑀧𑀁 𑀲𑀸𑀳𑀲𑀺𑀬𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀩𑀳𑀼𑀁 𑀯𑀺𑀧𑁆𑀧𑀮𑀧𑀲𑀺, 𑀲𑀘𑁂 𑀫𑁂 𑀯𑀘𑀦𑀁 𑀦 𑀓𑀭𑁄𑀲𑀺, 𑀲𑀻𑀲𑀁 𑀢𑁂 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀻𑀲𑀁, 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑁂𑀧𑀺 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂 𑀦 𑀲𑀓𑁆𑀓𑀸 𑀫𑀬𑀸 𑀏𑀯𑀭𑀽𑀧𑀁 𑀓𑀸𑀢𑀼’’𑀦𑁆𑀢𑀺. 𑀲𑀸 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀭𑀻𑀭𑁂 𑀦𑀔𑀯𑀴𑀜𑁆𑀚𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀮𑁂𑀦 𑀕𑀢𑁆𑀢𑀸𑀦𑀺 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀓𑀢𑁆𑀯𑀸 𑀤𑀸𑀲𑀺𑀬𑁄 𑀆𑀡𑀸𑀧𑁂𑀲𑀺 ‘𑀭𑀜𑁆𑀜𑀸 𑀓𑀳𑀁 𑀤𑁂𑀯𑀻’𑀢𑀺 𑀯𑀼𑀢𑁆𑀢𑁂 ‘𑀕𑀺𑀮𑀸𑀦𑀸’𑀢𑀺 𑀓𑀣𑁂𑀬𑁆𑀬𑀸𑀣𑀸’’𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀜𑁆𑀜𑁄 𑀧𑀝𑀺𑀧𑀣𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀤𑁂𑀯𑀺𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁, 𑀤𑁂𑀯𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀺𑀮𑀸𑀦𑀸, 𑀤𑁂𑀯𑀸’’𑀢𑀺. 𑀲𑁄𑀧𑀺 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀓𑀺𑀁 𑀢𑁂, 𑀪𑀤𑁆𑀤𑁂, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀯𑀸𑀭𑁂 𑀭𑀸𑀚𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀢𑁆𑀯𑀫𑁆𑀧𑀺, 𑀫𑀳𑀸𑀭𑀸𑀚, 𑀚𑀻𑀯𑀲𑀺 𑀦𑀸𑀫, 𑀫𑀸𑀤𑀺𑀲𑀸𑀧𑀺 𑀇𑀢𑁆𑀣𑀺𑀬𑁄 𑀲𑀲𑁆𑀲𑀸𑀫𑀺𑀓𑀸𑀬𑁂𑀯 𑀦𑀸𑀫𑀸’’𑀢𑀺 𑀆𑀳. ‘‘𑀓𑀺𑀁 𑀏𑀢𑀁, 𑀪𑀤𑁆𑀤𑁂’’𑀢𑀺? 𑀢𑀼𑀫𑁆𑀳𑁂𑀳𑀺 𑀦𑀕𑀭𑀁 𑀭𑀓𑁆𑀔𑀦𑀢𑁆𑀣𑀸𑀬 𑀞𑀧𑀺𑀢𑁄 𑀧𑀼𑀭𑁄𑀳𑀺𑀢𑁄 ‘‘𑀢𑀼𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑀁 𑀧𑀝𑀺𑀚𑀕𑁆𑀕𑀸𑀫𑀻’’𑀢𑀺 𑀇𑀥𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀓𑀭𑁄𑀦𑁆𑀢𑀺𑀁 𑀫𑀁 𑀧𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀦𑀁 𑀧𑀽𑀭𑁂𑀢𑁆𑀯𑀸 𑀕𑀢𑁄𑀢𑀺. 𑀭𑀸𑀚𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀓𑁄𑀥𑁂𑀦 𑀢𑀝𑀢𑀝𑀸𑀬𑀦𑁆𑀢𑁄 𑀲𑀺𑀭𑀺𑀕𑀩𑁆𑀪𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁄𑀯𑀸𑀭𑀺𑀓𑀧𑀸𑀤𑀫𑀽𑀮𑀺𑀓𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀡𑁂, 𑀧𑀼𑀭𑁄𑀳𑀺𑀢𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀚𑁆𑀛𑀪𑀸𑀯𑀧𑁆𑀧𑀢𑁆𑀢𑀁 𑀓𑀢𑁆𑀯𑀸 𑀦𑀕𑀭𑀸 𑀦𑀻𑀳𑀭𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀣𑀸’’𑀢𑀺 𑀆𑀳. 𑀢𑁂 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀚𑁆𑀛𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀤𑁆𑀥𑀸 𑀢𑀸𑀬 𑀤𑀼𑀝𑁆𑀞𑀤𑁂𑀯𑀺𑀬𑀸 𑀭𑀸𑀚𑀸 𑀧𑀼𑀭𑁂𑀢𑀭𑀫𑁂𑀯 𑀧𑀭𑀺𑀪𑀺𑀦𑁆𑀦𑁄, 𑀅𑀚𑁆𑀚 𑀤𑀸𑀦𑀸𑀳𑀁 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀅𑀢𑁆𑀢𑀸𑀦𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂 𑀧𑀼𑀭𑀺𑀲𑁂 𑀆𑀳 ‘‘𑀪𑁄, 𑀢𑀼𑀫𑁆𑀳𑁂 𑀫𑀁 𑀫𑀸𑀭𑁂𑀦𑁆𑀢𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸𑀯 𑀫𑀸𑀭𑁂𑀣𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀅𑀳𑀁 𑀭𑀸𑀚𑀓𑀫𑁆𑀫𑀺𑀓𑁄, 𑀩𑀳𑀼 𑀫𑁂 𑀓𑀫𑁆𑀫𑀁 𑀓𑀢𑀁, 𑀩𑀳𑀽𑀦𑀺 𑀫𑀳𑀸𑀦𑀺𑀥𑀺𑀝𑁆𑀞𑀸𑀦𑀸𑀦𑀺 𑀚𑀸𑀦𑀸𑀫𑀺, 𑀭𑀸𑀚𑀓𑀼𑀝𑀼𑀫𑁆𑀩𑀁 𑀫𑀬𑀸 𑀯𑀺𑀘𑀸𑀭𑀺𑀢𑀁. 𑀲𑀘𑁂 𑀫𑀁 𑀭𑀜𑁆𑀜𑁄 𑀦 𑀤𑀲𑁆𑀲𑁂𑀲𑁆𑀲𑀣, 𑀩𑀳𑀼𑀥𑀦𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀫𑀬𑀸 𑀭𑀜𑁆𑀜𑁄 𑀲𑀸𑀧𑀢𑁂𑀬𑁆𑀬𑁂 𑀆𑀘𑀺𑀓𑁆𑀔𑀺𑀢𑁂 𑀧𑀘𑁆𑀙𑀸 𑀓𑀸𑀢𑀩𑁆𑀩𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑀁 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀓𑀲𑁆𑀫𑀸 𑀪𑁄, 𑀩𑁆𑀭𑀸𑀳𑁆𑀫𑀡, 𑀫𑀬𑀺 𑀮𑀚𑁆𑀚𑀁 𑀦 𑀅𑀓𑀸𑀲𑀺, 𑀓𑀲𑁆𑀫𑀸 𑀢𑁂 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀅𑀳𑀁 𑀲𑁄𑀢𑁆𑀣𑀺𑀬𑀓𑀼𑀮𑁂 𑀚𑀸𑀢𑁄, 𑀫𑀬𑀸 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑀢𑁆𑀢𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑁄 𑀦 𑀓𑀢𑀧𑀼𑀩𑁆𑀩𑁄, 𑀢𑀺𑀡𑀲𑀮𑀸𑀓𑀫𑀢𑁆𑀢𑀫𑁆𑀧𑀺 𑀅𑀤𑀺𑀦𑁆𑀦𑀁 𑀦𑀸𑀤𑀺𑀦𑁆𑀦𑀧𑀼𑀩𑁆𑀩𑀁, 𑀮𑁄𑀪𑀯𑀲𑁂𑀦 𑀧𑀭𑁂𑀲𑀁 𑀇𑀢𑁆𑀣𑀻 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀦 𑀑𑀮𑁄𑀓𑀺𑀢𑀧𑀼𑀩𑁆𑀩𑀸, 𑀳𑀲𑁆𑀲𑀯𑀲𑁂𑀦𑀸𑀧𑀺 𑀫𑀼𑀲𑀸 𑀦 𑀪𑀸𑀲𑀺𑀢𑀧𑀼𑀩𑁆𑀩𑀸, 𑀓𑀼𑀲𑀕𑁆𑀕𑁂𑀦𑀸𑀧𑀺 𑀫𑀚𑁆𑀚𑀁 𑀦 𑀧𑀻𑀢𑀧𑀼𑀩𑁆𑀩𑀁, 𑀅𑀳𑀁 𑀢𑀼𑀫𑁆𑀳𑁂𑀲𑀼 𑀦𑀺𑀭𑀧𑀭𑀸𑀥𑁄. 𑀲𑀸 𑀧𑀦 𑀩𑀸𑀮𑀸 𑀮𑁄𑀪𑀯𑀲𑁂𑀦 𑀫𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀫𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀫𑀁 𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀁 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸 𑀫𑀫 𑀆𑀘𑀺𑀓𑁆𑀔𑀺𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀝𑁆𑀞𑀸. 𑀅𑀳𑀁 𑀦𑀺𑀭𑀧𑀭𑀸𑀥𑁄, 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀧𑀦 𑀆𑀕𑀢𑀸 𑀘𑀢𑀼𑀲𑀝𑁆𑀞𑀺 𑀚𑀦𑀸 𑀲𑀸𑀧𑀭𑀸𑀥𑀸, 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀬 𑀯𑁄 𑀯𑀘𑀦𑀁 𑀓𑀢𑀁, 𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙, 𑀤𑁂𑀯𑀸𑀢𑀺. 𑀭𑀸𑀚𑀸 𑀢𑁂 𑀘𑀢𑀼𑀲𑀝𑁆𑀞𑀺 𑀚𑀦𑁂 𑀩𑀦𑁆𑀥𑀸𑀧𑁂𑀢𑁆𑀯𑀸 𑀤𑁂𑀯𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀬𑀸 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀢𑀁, 𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀓𑀢𑀁, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑁂 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 ‘‘𑀇𑀫𑁂𑀲𑀁 𑀘𑀢𑀼𑀲𑀝𑁆𑀞𑀺𑀚𑀦𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀣𑀸’’𑀢𑀺 𑀆𑀡𑀸𑀧𑁂𑀲𑀺.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋 ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀏𑀢𑁂𑀲𑀁 𑀤𑁄𑀲𑁄, 𑀤𑁂𑀯𑀻 𑀅𑀢𑁆𑀢𑀦𑁄 𑀭𑀼𑀘𑀺𑀁 𑀓𑀸𑀭𑀸𑀧𑁂𑀲𑀺. 𑀦𑀺𑀭𑀧𑀭𑀸𑀥𑀸 𑀏𑀢𑁂, 𑀢𑀲𑁆𑀫𑀸 𑀦𑁂𑀲𑀁 𑀔𑀫𑀣. 𑀢𑀲𑁆𑀲𑀸𑀧𑀺 𑀤𑁄𑀲𑁄 𑀦𑀢𑁆𑀣𑀺, 𑀇𑀢𑁆𑀣𑀺𑀬𑁄 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑁂𑀦 𑀅𑀢𑀺𑀢𑁆𑀢𑀸. 𑀚𑀸𑀢𑀺𑀲𑀪𑀸𑀯𑁄 𑀳𑀺 𑀏𑀲. 𑀏𑀢𑀸𑀲𑀁 𑀔𑀫𑀺𑀢𑀩𑁆𑀩𑀬𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀏𑀢𑀺𑀲𑁆𑀲𑀸𑀧𑀺 𑀔𑀫𑀣𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑁂 𑀘𑀢𑀼𑀲𑀝𑁆𑀞𑀺𑀧𑀺 𑀚𑀦𑁂 𑀢𑀜𑁆𑀘 𑀩𑀸𑀮𑀁 𑀫𑁄𑀘𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀬𑀣𑀸𑀲𑀓𑀸𑀦𑀺 𑀞𑀸𑀦𑀸𑀦𑀺 𑀤𑀸𑀧𑁂𑀲𑀺. 𑀏𑀯𑀁 𑀢𑁂 𑀲𑀩𑁆𑀩𑁂 𑀫𑁄𑀘𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀦𑁆𑀥𑀩𑀸𑀮𑀸𑀦𑀁 𑀦𑀸𑀫 𑀅𑀯𑀢𑁆𑀣𑀼𑀓𑁂𑀦 𑀯𑀘𑀦𑁂𑀦 𑀅𑀩𑀦𑁆𑀥𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀧𑀺 𑀧𑀡𑁆𑀟𑀺𑀢𑀸 𑀧𑀘𑁆𑀙𑀸𑀩𑀸𑀳𑀁 𑀩𑀤𑁆𑀥𑀸, 𑀧𑀡𑁆𑀟𑀺𑀢𑀸𑀦𑀁 𑀓𑀸𑀭𑀡𑀬𑀼𑀢𑁆𑀢𑁂𑀦 𑀯𑀘𑀦𑁂𑀦 𑀧𑀘𑁆𑀙𑀸𑀩𑀸𑀳𑀁 𑀩𑀤𑁆𑀥𑀸𑀧𑀺 𑀫𑀼𑀢𑁆𑀢𑀸. 𑀏𑀯𑀁 𑀩𑀸𑀮𑀸 𑀦𑀸𑀫 𑀅𑀩𑀦𑁆𑀥𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀧𑀺 𑀩𑀦𑁆𑀥𑀸𑀧𑁂𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀩𑀤𑁆𑀥𑁂𑀧𑀺 𑀫𑁄𑀘𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁦. ‘‘𑀅𑀩𑀤𑁆𑀥𑀸 𑀢𑀢𑁆𑀣 𑀩𑀚𑁆𑀛𑀦𑁆𑀢𑀺, 𑀬𑀢𑁆𑀣 𑀩𑀸𑀮𑀸 𑀧𑀪𑀸𑀲𑀭𑁂;

𑀩𑀤𑁆𑀥𑀸𑀧𑀺 𑀢𑀢𑁆𑀣 𑀫𑀼𑀘𑁆𑀘𑀦𑁆𑀢𑀺, 𑀬𑀢𑁆𑀣 𑀥𑀻𑀭𑀸 𑀧𑀪𑀸𑀲𑀭𑁂’’𑀢𑀺.

𑀢𑀢𑁆𑀣 𑀅𑀩𑀤𑁆𑀥𑀸𑀢𑀺 𑀅𑀩𑀦𑁆𑀥𑀺𑀢𑀩𑁆𑀩𑀬𑀼𑀢𑁆𑀢𑀸. 𑀧𑀪𑀸𑀲𑀭𑁂𑀢𑀺 𑀧𑀪𑀸𑀲𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀬𑀸 𑀇𑀫𑀁 𑀤𑀼𑀓𑁆𑀔𑀁 𑀅𑀕𑀸𑀭𑁂 𑀯𑀲𑀦𑀪𑀸𑀯𑁂𑀦 𑀮𑀤𑁆𑀥𑀁, 𑀇𑀤𑀸𑀦𑀺 𑀫𑁂 𑀅𑀕𑀸𑀭𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦, 𑀤𑁂𑀯𑀸’’𑀢𑀺 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀚𑀦𑀁 𑀫𑀳𑀦𑁆𑀢𑀜𑁆𑀘 𑀯𑀺𑀪𑀯𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀝𑁆𑀞𑀤𑁂𑀯𑀻 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀦𑁆𑀥𑀦𑀫𑁄𑀓𑁆𑀔𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀳𑀁𑀘𑀺𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀤𑁆𑀭𑀪𑀧𑀜𑁆𑀳𑀸 𑀅𑀫𑀭𑀸, 𑀲𑀺𑀗𑁆𑀕𑀸𑀮𑀁 𑀫𑀺𑀢𑀘𑀺𑀦𑁆𑀢𑀺 𑀘;

𑀅𑀦𑀼𑀲𑀸𑀲𑀺𑀓𑀤𑀼𑀩𑁆𑀩𑀘𑀁, 𑀢𑀺𑀢𑁆𑀢𑀺𑀭𑀁 𑀯𑀝𑁆𑀝𑀓𑀁 𑀧𑀼𑀦;

𑀅𑀓𑀸𑀮𑀭𑀸𑀯𑀺 𑀩𑀦𑁆𑀥𑀦𑀦𑁆𑀢𑀺.