𑁧𑁩. 𑀓𑀼𑀲𑀦𑀸𑀴𑀺𑀯𑀕𑁆𑀕𑁄

[𑁧𑁨𑁧] 𑁧. 𑀓𑀼𑀲𑀦𑀸𑀴𑀺𑀚𑀸𑀢𑀓𑀯𑀡𑁆𑀡𑀦𑀸

𑀓𑀭𑁂 𑀲𑀭𑀺𑀓𑁆𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀫𑀺𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀳𑀺 𑀫𑀺𑀢𑁆𑀢𑀲𑀼𑀳𑀚𑁆𑀚𑀜𑀸𑀢𑀺𑀩𑀦𑁆𑀥𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀫𑀳𑀸𑀲𑁂𑀝𑁆𑀞𑀺 𑀅𑀬𑀁 𑀢𑀬𑀸 𑀚𑀸𑀢𑀺𑀕𑁄𑀢𑁆𑀢𑀥𑀦𑀥𑀜𑁆𑀜𑀸𑀤𑀻𑀳𑀺 𑀦𑁂𑀯 𑀲𑀤𑀺𑀲𑁄, 𑀦 𑀉𑀢𑁆𑀢𑀭𑀺𑀢𑀭𑁄, 𑀓𑀲𑁆𑀫𑀸 𑀏𑀢𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀭𑁄𑀲𑀺, 𑀫𑀸 𑀓𑀭𑁄𑀳𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀸𑀭𑁂𑀲𑀼𑀁. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀧𑀦 ‘‘𑀫𑀺𑀢𑁆𑀢𑀲𑀦𑁆𑀣𑀯𑁄 𑀦𑀸𑀫 𑀳𑀻𑀦𑁂𑀳𑀺𑀧𑀺 𑀲𑀫𑁂𑀳𑀺𑀧𑀺 𑀅𑀢𑀺𑀭𑁂𑀓𑁂𑀳𑀺𑀧𑀺 𑀓𑀢𑁆𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀢𑁂𑀲𑀁 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀪𑁄𑀕𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀓𑀼𑀝𑀼𑀫𑁆𑀩𑀭𑀓𑁆𑀔𑀓𑀁 𑀓𑀢𑁆𑀯𑀸 𑀅𑀕𑀫𑀸𑀲𑀻𑀢𑀺 𑀲𑀩𑁆𑀩𑀁 𑀓𑀸𑀴𑀓𑀡𑁆𑀡𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀅𑀢𑁆𑀢𑀦𑁄 𑀖𑀭𑁂 𑀧𑀯𑀢𑁆𑀢𑀺𑀬𑀸 𑀆𑀭𑁄𑀘𑀺𑀢𑀸𑀬 𑀲𑀢𑁆𑀣𑀸 ‘‘𑀕𑀳𑀧𑀢𑀺, 𑀫𑀺𑀢𑁆𑀢𑁄 𑀦𑀸𑀫 𑀔𑀼𑀤𑁆𑀤𑀓𑁄 𑀦𑀢𑁆𑀣𑀺, 𑀫𑀺𑀢𑁆𑀢𑀥𑀫𑁆𑀫𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁄𑀯𑁂𑀢𑁆𑀣 𑀧𑀫𑀸𑀡𑀁, 𑀫𑀺𑀢𑁆𑀢𑁄 𑀦𑀸𑀫 𑀅𑀢𑁆𑀢𑀦𑀸 𑀲𑀫𑁄𑀧𑀺 𑀳𑀻𑀦𑁄𑀧𑀺 𑀲𑁂𑀝𑁆𑀞𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀲𑀩𑁆𑀩𑁂𑀧𑀺 𑀳𑁂𑀢𑁂 𑀅𑀢𑁆𑀢𑀦𑁄 𑀧𑀢𑁆𑀢𑀪𑀸𑀭𑀁 𑀦𑀺𑀢𑁆𑀣𑀭𑀦𑁆𑀢𑀺𑀬𑁂𑀯, 𑀇𑀤𑀸𑀦𑀺 𑀢𑀸𑀯 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀻𑀘𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑁄 𑀚𑀸𑀢𑁄, 𑀧𑁄𑀭𑀸𑀡𑀸 𑀧𑀦 𑀦𑀻𑀘𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀲𑀸𑀫𑀺𑀓𑀸 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀓𑀼𑀲𑀦𑀸𑀴𑀺𑀕𑀘𑁆𑀙𑁂 𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀁 𑀦𑀺𑀲𑁆𑀲𑀸𑀬 𑀉𑀚𑀼𑀕𑀢𑀓𑁆𑀔𑀦𑁆𑀥𑁄 𑀧𑀭𑀺𑀫𑀡𑁆𑀟𑀮𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀮𑀤𑁆𑀥𑀲𑀫𑁆𑀫𑀸𑀦𑁄 𑀭𑀼𑀘𑀫𑀗𑁆𑀕𑀮𑀭𑀼𑀓𑁆𑀔𑁄 𑀅𑀢𑁆𑀣𑀺, ‘‘𑀫𑀼𑀔𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀏𑀓𑁄 𑀫𑀳𑁂𑀲𑀓𑁆𑀔𑁄 𑀤𑁂𑀯𑀭𑀸𑀚𑀸 𑀦𑀺𑀩𑁆𑀩𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑁄 𑀅𑀳𑁄𑀲𑀺. 𑀢𑀤𑀸 𑀭𑀸𑀚𑀸 𑀏𑀓𑀲𑁆𑀫𑀺𑀁 𑀏𑀓𑀢𑁆𑀣𑀫𑁆𑀪𑀓𑁂 𑀧𑀸𑀲𑀸𑀤𑁂 𑀯𑀲𑀢𑀺, 𑀢𑀲𑁆𑀲 𑀲𑁄 𑀣𑀫𑁆𑀪𑁄 𑀘𑀮𑀺. 𑀅𑀣𑀲𑁆𑀲 𑀘𑀮𑀺𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀯𑀟𑁆𑀠𑀓𑀻 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢𑀸, 𑀫𑀫 𑀏𑀓𑀢𑁆𑀣𑀫𑁆𑀪𑀓𑀲𑁆𑀲 𑀫𑀗𑁆𑀕𑀮𑀧𑀸𑀲𑀸𑀤𑀲𑁆𑀲 𑀣𑀫𑁆𑀪𑁄 𑀘𑀮𑀺𑀢𑁄, 𑀏𑀓𑀁 𑀲𑀸𑀭𑀢𑁆𑀣𑀫𑁆𑀪𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀦𑀺𑀘𑁆𑀘𑀮𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀭𑀼𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑀸 𑀅𑀜𑁆𑀜𑀢𑁆𑀣 𑀅𑀤𑀺𑀲𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀫𑀼𑀔𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀤𑀺𑀝𑁆𑀞𑁄 𑀯𑁄 𑀢𑀤𑀦𑀼𑀘𑁆𑀙𑀯𑀺𑀓𑁄 𑀭𑀼𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁂 ‘‘𑀤𑀺𑀝𑁆𑀞𑁄, 𑀤𑁂𑀯, 𑀅𑀧𑀺𑀘 𑀢𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀺𑀲𑀳𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀓𑀺𑀁𑀓𑀸𑀭𑀡𑀸’’𑀢𑀺? 𑀫𑀬𑀜𑁆𑀳𑀺 𑀅𑀜𑁆𑀜𑀢𑁆𑀣 𑀭𑀼𑀓𑁆𑀔𑀁 𑀅𑀧𑀲𑁆𑀲𑀦𑁆𑀢𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀫𑁆𑀳, 𑀢𑀢𑁆𑀭𑀧𑀺 𑀞𑀧𑁂𑀢𑁆𑀯𑀸 𑀫𑀗𑁆𑀕𑀮𑀭𑀼𑀓𑁆𑀔𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫. 𑀇𑀢𑀺 𑀦𑀁 𑀫𑀗𑁆𑀕𑀮𑀭𑀼𑀓𑁆𑀔𑀢𑀸𑀬 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀺𑀲𑀳𑀸𑀫𑀸𑀢𑀺. 𑀕𑀘𑁆𑀙𑀣, 𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀁 𑀣𑀺𑀭𑀁 𑀓𑀭𑁄𑀣, 𑀫𑀬𑀁 𑀅𑀜𑁆𑀜𑀁 𑀫𑀗𑁆𑀕𑀮𑀭𑀼𑀓𑁆𑀔𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀩𑀮𑀺𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀲𑁆𑀯𑁂 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀭𑀼𑀓𑁆𑀔𑀲𑁆𑀲 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀭𑀼𑀓𑁆𑀔𑀤𑁂𑀯𑀢𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀯𑀺𑀫𑀸𑀦𑀁 𑀦𑀸𑀲𑁂𑀲𑁆𑀲𑀦𑁆𑀢𑀺, 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑀻 𑀧𑀼𑀢𑁆𑀢𑀓𑁂 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀧𑀭𑁄𑀤𑀺. 𑀢𑀲𑁆𑀲𑀸 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀯𑀟𑁆𑀠𑀓𑀻𑀦𑀁 𑀧𑀝𑀺𑀓𑁆𑀓𑀫𑀦𑀽𑀧𑀸𑀬𑀁 𑀅𑀧𑀲𑁆𑀲𑀦𑁆𑀢𑀺𑀬𑁄 𑀢𑀁 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 𑀭𑁄𑀤𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀭𑀼𑀓𑁆𑀔𑀤𑁂𑀯𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀳𑁄𑀢𑀼, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀤𑀲𑁆𑀲𑀸𑀫𑀺, 𑀲𑁆𑀯𑁂 𑀯𑀟𑁆𑀠𑀓𑀻𑀦𑀁 𑀆𑀕𑀢𑀓𑀸𑀮𑁂 𑀫𑀫 𑀓𑀸𑀭𑀡𑀁 𑀧𑀲𑁆𑀲𑀣𑀸’’𑀢𑀺 𑀢𑀸 𑀤𑁂𑀯𑀢𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀯𑀟𑁆𑀠𑀓𑀻𑀦𑀁 𑀆𑀕𑀢𑀯𑁂𑀮𑀸𑀬 𑀓𑀓𑀡𑁆𑀝𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑀓𑀻𑀦𑀁 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀭𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀲𑀼𑀲𑀺𑀭𑀁 𑀯𑀺𑀬 𑀓𑀢𑁆𑀯𑀸 𑀭𑀼𑀓𑁆𑀔𑀫𑀚𑁆𑀛𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀔𑀦𑁆𑀥𑀫𑀢𑁆𑀣𑀓𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀻𑀲𑀁 𑀓𑀫𑁆𑀧𑀬𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀫𑀳𑀸𑀯𑀟𑁆𑀠𑀓𑀻 𑀢𑀁 𑀓𑀓𑀡𑁆𑀝𑀓𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 ‘‘𑀲𑀼𑀲𑀺𑀭𑀭𑀼𑀓𑁆𑀔𑁄 𑀏𑀲𑁄 𑀦𑀺𑀲𑁆𑀲𑀸𑀭𑁄, 𑀳𑀺𑀬𑁆𑀬𑁄 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀩𑀮𑀺𑀓𑀫𑁆𑀫𑀁 𑀓𑀭𑀺𑀫𑁆𑀳𑀸’’𑀢𑀺 𑀏𑀓𑀖𑀦𑀁 𑀫𑀳𑀸𑀭𑀼𑀓𑁆𑀔𑀁 𑀕𑀭𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀭𑀼𑀓𑁆𑀔𑀤𑁂𑀯𑀢𑀸 𑀩𑁄𑀥𑀺𑀲𑀢𑁆𑀢𑀁 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀲𑁆𑀲 𑀲𑀸𑀫𑀺𑀦𑀻 𑀚𑀸𑀢𑀸.

𑀢𑀲𑁆𑀲𑀸 𑀧𑀝𑀺𑀲𑀦𑁆𑀣𑀸𑀭𑀢𑁆𑀣𑀸𑀬 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀩𑀳𑀽 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀯𑀺𑀫𑀸𑀦𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀫𑀚𑁆𑀛𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑀬𑀫𑀸𑀦𑀸 ‘‘𑀪𑁄, 𑀤𑁂𑀯𑀢𑀸, 𑀫𑀬𑀁 𑀫𑀳𑁂𑀲𑀓𑁆𑀔𑀸 𑀳𑀼𑀢𑁆𑀯𑀸𑀧𑀺 𑀤𑀦𑁆𑀥𑀧𑀜𑁆𑀜𑀢𑀸𑀬 𑀇𑀫𑀁 𑀉𑀧𑀸𑀬𑀁 𑀦 𑀚𑀸𑀦𑀺𑀫𑁆𑀳, 𑀓𑀼𑀲𑀦𑀸𑀴𑀺𑀤𑁂𑀯𑀢𑀸 𑀧𑀦 𑀅𑀢𑁆𑀢𑀦𑁄 𑀜𑀸𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀫𑁆𑀳𑁂 𑀯𑀺𑀫𑀸𑀦𑀲𑀸𑀫𑀺𑀓𑁂 𑀅𑀓𑀸𑀲𑀺, 𑀫𑀺𑀢𑁆𑀢𑁄 𑀦𑀸𑀫 𑀲𑀤𑀺𑀲𑁄𑀧𑀺 𑀅𑀥𑀺𑀓𑁄𑀧𑀺 𑀳𑀻𑀦𑁄𑀧𑀺 𑀓𑀢𑁆𑀢𑀩𑁆𑀩𑁄𑀯. 𑀲𑀩𑁆𑀩𑁂𑀧𑀺 𑀳𑀺 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀲𑀳𑀸𑀬𑀓𑀸𑀦𑀁 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀲𑀼𑀔𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺𑀬𑁂𑀯𑀸’’𑀢𑀺 𑀫𑀺𑀢𑁆𑀢𑀥𑀫𑁆𑀫𑀁 𑀯𑀡𑁆𑀡𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁧. ‘‘𑀓𑀭𑁂 𑀲𑀭𑀺𑀓𑁆𑀔𑁄 𑀅𑀣 𑀯𑀸𑀧𑀺 𑀲𑁂𑀝𑁆𑀞𑁄, 𑀦𑀺𑀳𑀻𑀦𑀓𑁄 𑀯𑀸𑀧𑀺 𑀓𑀭𑁂𑀬𑁆𑀬 𑀏𑀓𑁄;

𑀓𑀭𑁂𑀬𑁆𑀬𑀼𑀫𑁂𑀢𑁂 𑀩𑁆𑀬𑀲𑀦𑁂 𑀉𑀢𑁆𑀢𑀫𑀢𑁆𑀣𑀁, 𑀬𑀣𑀸 𑀅𑀳𑀁 𑀓𑀼𑀲𑀦𑀸𑀴𑀺 𑀭𑀼𑀘𑀸𑀬’’𑀦𑁆𑀢𑀺.

𑀢𑀢𑁆𑀣 𑀓𑀭𑁂 𑀲𑀭𑀺𑀓𑁆𑀔𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 𑀲𑀤𑀺𑀲𑁄𑀧𑀺 𑀫𑀺𑀢𑁆𑀢𑀥𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀣 𑀯𑀸𑀧𑀺 𑀲𑁂𑀝𑁆𑀞𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀥𑀺𑀓𑁄𑀧𑀺 𑀓𑀭𑁂𑀬𑁆𑀬. 𑀦𑀺𑀳𑀻𑀦𑀓𑁄 𑀯𑀸𑀧𑀺 𑀓𑀭𑁂𑀬𑁆𑀬 𑀏𑀓𑁄𑀢𑀺 𑀏𑀓𑁄 𑀚𑀸𑀢𑀺𑀆𑀤𑀻𑀳𑀺 𑀳𑀻𑀦𑁄𑀧𑀺 𑀫𑀺𑀢𑁆𑀢𑀥𑀫𑁆𑀫𑀁 𑀓𑀭𑁂𑀬𑁆𑀬. 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀏𑀢𑁂 𑀫𑀺𑀢𑁆𑀢𑀸 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀓𑀺𑀁𑀓𑀸𑀭𑀡𑀸? 𑀓𑀭𑁂𑀬𑁆𑀬𑀼𑀫𑁂𑀢𑁂 𑀩𑁆𑀬𑀲𑀦𑁂 𑀉𑀢𑁆𑀢𑀫𑀢𑁆𑀣𑀦𑁆𑀢𑀺 𑀲𑀩𑁆𑀩𑁂𑀧𑁂𑀢𑁂 𑀲𑀳𑀸𑀬𑀲𑁆𑀲 𑀩𑁆𑀬𑀲𑀦𑁂 𑀉𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀪𑀸𑀭𑀁 𑀯𑀳𑀫𑀸𑀦𑀸 𑀉𑀢𑁆𑀢𑀫𑀢𑁆𑀣𑀁 𑀓𑀭𑁂𑀬𑁆𑀬𑀼𑀁, 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀢𑁄 𑀢𑀁 𑀲𑀳𑀸𑀬𑀓𑀁 𑀫𑁄𑀘𑁂𑀬𑁆𑀬𑀼𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀳𑀻𑀦𑁄𑀧𑀺 𑀫𑀺𑀢𑁆𑀢𑁄 𑀓𑀸𑀢𑀩𑁆𑀩𑁄𑀬𑁂𑀯, 𑀧𑀕𑁂𑀯 𑀇𑀢𑀭𑁂. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀁 𑁋 𑀬𑀣𑀸 𑀅𑀳𑀁 𑀓𑀼𑀲𑀦𑀸𑀴𑀺 𑀭𑀼𑀘𑀸𑀬𑀦𑁆𑀢𑀺, 𑀬𑀣𑀸 𑀅𑀳𑀁 𑀭𑀼𑀘𑀸𑀬𑀁 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀅𑀬𑀜𑁆𑀘 𑀓𑀼𑀲𑀦𑀸𑀴𑀺𑀤𑁂𑀯𑀢𑀸, 𑀅𑀧𑁆𑀧𑁂𑀲𑀓𑁆𑀔𑀸𑀧𑀺 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀭𑀺𑀫𑁆𑀳, 𑀢𑀢𑁆𑀭𑀧𑀸𑀳𑀁 𑀫𑀳𑁂𑀲𑀓𑁆𑀔𑀸𑀧𑀺 𑀲𑀫𑀸𑀦𑀸 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀩𑀸𑀮𑀢𑀸𑀬 𑀅𑀦𑀼𑀧𑀸𑀬𑀓𑀼𑀲𑀮𑀢𑀸𑀬 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀇𑀫𑀁 𑀧𑀦 𑀅𑀧𑁆𑀧𑁂𑀲𑀓𑁆𑀔𑀫𑁆𑀧𑀺 𑀲𑀫𑀸𑀦𑀁 𑀧𑀡𑁆𑀟𑀺𑀢𑀤𑁂𑀯𑀢𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁂𑀳𑀺𑀧𑀺 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁂𑀳𑀺 𑀲𑀫𑀯𑀺𑀲𑀺𑀝𑁆𑀞𑀪𑀸𑀯𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀳𑀻𑀦𑁄𑀧𑀺 𑀧𑀡𑁆𑀟𑀺𑀢𑁄 𑀫𑀺𑀢𑁆𑀢𑁄 𑀓𑀸𑀢𑀩𑁆𑀩𑁄𑀢𑀺.

𑀭𑀼𑀘𑀸𑀤𑁂𑀯𑀢𑀸 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀯𑀲𑀗𑁆𑀖𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀲𑀤𑁆𑀥𑀺𑀁 𑀓𑀼𑀲𑀦𑀸𑀴𑀺𑀤𑁂𑀯𑀢𑀸𑀬 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀼𑀘𑀸𑀤𑁂𑀯𑀢𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀼𑀲𑀦𑀸𑀴𑀺𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀲𑀦𑀸𑀴𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁨𑁨] 𑁨. 𑀤𑀼𑀫𑁆𑀫𑁂𑀥𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑀁 𑀮𑀤𑁆𑀥𑀸𑀦 𑀤𑀼𑀫𑁆𑀫𑁂𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑁄, 𑀢𑀣𑀸𑀕𑀢𑀲𑁆𑀲 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀫𑀼𑀔𑀁 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀆𑀯𑁂𑀴𑀸𑀯𑁂𑀴𑀸𑀪𑀽𑀢𑀸 𑀬𑀫𑀓𑀬𑀫𑀓𑀪𑀽𑀢𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀉𑀲𑀽𑀬𑀫𑁂𑀯 𑀓𑀭𑁄𑀢𑀺. ‘𑀩𑀼𑀤𑁆𑀥𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀸’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀯𑀡𑁆𑀡𑀁 𑀲𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀉𑀲𑀽𑀬𑀫𑁂𑀯 𑀓𑀭𑁄𑀢𑀻’’𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀅𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀫 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀉𑀲𑀽𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑀦𑀕𑀭𑁂 𑀏𑀓𑀲𑁆𑀫𑀺𑀁 𑀫𑀕𑀥𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑁄 𑀅𑀳𑁄𑀲𑀺 𑀳𑁂𑀝𑁆𑀞𑀸 𑀯𑀡𑁆𑀡𑀺𑀢𑀲𑀤𑀺𑀲𑀸𑀬 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀣 𑀦𑀁 ‘‘𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀅𑀬’’𑀦𑁆𑀢𑀺 𑀲𑁄 𑀭𑀸𑀚𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀅𑀓𑀸𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀢𑀢𑁆𑀣 𑀢𑀢𑁆𑀣 𑀞𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀦𑁄 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀭𑀽𑀧𑀁, 𑀅𑀳𑁄 𑀕𑀢𑀺, 𑀅𑀳𑁄 𑀮𑀻𑀴𑀸, 𑀅𑀳𑁄 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺, 𑀏𑀯𑀭𑀽𑀧𑁄 𑀦𑀸𑀫 𑀲𑀩𑁆𑀩𑀲𑁂𑀢𑀯𑀭𑀯𑀸𑀭𑀡𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀫𑀗𑁆𑀕𑀮𑀳𑀢𑁆𑀣𑀺𑀫𑁂𑀯 𑀯𑀡𑁆𑀡𑁂𑀲𑀺.

𑀭𑀸𑀚𑀸 𑀫𑀗𑁆𑀕𑀮𑀳𑀢𑁆𑀣𑀺𑀲𑁆𑀲 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀲𑀽𑀬𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀢𑀁 𑀧𑀩𑁆𑀩𑀢𑀧𑀸𑀤𑁂 𑀧𑀸𑀢𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀸𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸 𑀢𑀬𑀸 𑀅𑀬𑀁 𑀦𑀸𑀕𑁄 𑀲𑀺𑀓𑁆𑀔𑀸𑀧𑀺𑀢𑁄’’𑀢𑀺 𑀆𑀳. ‘‘𑀲𑀼𑀲𑀺𑀓𑁆𑀔𑀸𑀧𑀺𑀢𑁄, 𑀤𑁂𑀯𑀸’’𑀢𑀺. ‘‘𑀦 𑀲𑀼𑀲𑀺𑀓𑁆𑀔𑀺𑀢𑁄, 𑀤𑀼𑀲𑀺𑀓𑁆𑀔𑀺𑀢𑁄’’𑀢𑀺. ‘‘𑀲𑀼𑀲𑀺𑀓𑁆𑀔𑀺𑀢𑁄, 𑀤𑁂𑀯𑀸’’𑀢𑀺. ‘‘𑀬𑀤𑀺 𑀲𑀼𑀲𑀺𑀓𑁆𑀔𑀺𑀢𑁄, 𑀲𑀓𑁆𑀔𑀺𑀲𑁆𑀲𑀲𑀺 𑀦𑀁 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑁄𑀧𑁂𑀢𑀼’’𑀦𑁆𑀢𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀲𑀬𑀁 𑀑𑀢𑀭𑀺𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑁂𑀦 𑀳𑀢𑁆𑀣𑀺𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸𑀯 𑀳𑀢𑁆𑀣𑀺𑀫𑁆𑀳𑀺 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑁄𑀧𑀺𑀢𑁂 𑀲𑀬𑀫𑁆𑀧𑀺 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀳𑀢𑁆𑀣𑀺𑀁 𑀧𑀧𑀸𑀢𑀸𑀪𑀺𑀫𑀼𑀔𑀁 𑀓𑀸𑀭𑁂𑀢𑁆𑀯𑀸 ‘‘𑀢𑁆𑀯𑀁 ‘𑀫𑀬𑀸 𑀏𑀲 𑀲𑀼𑀲𑀺𑀓𑁆𑀔𑀸𑀧𑀺𑀢𑁄’𑀢𑀺 𑀯𑀤𑁂𑀲𑀺, 𑀢𑀻𑀳𑀺𑀬𑁂𑀯 𑀢𑀸𑀯 𑀦𑀁 𑀧𑀸𑀤𑁂𑀳𑀺 𑀞𑀧𑁂𑀳𑀻’’𑀢𑀺 𑀆𑀳. 𑀳𑀢𑁆𑀣𑀸𑀘𑀭𑀺𑀬𑁄 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸𑀯 ‘‘𑀪𑁄 𑀢𑀻𑀳𑀺 𑀧𑀸𑀤𑁂𑀳𑀺 𑀢𑀺𑀝𑁆𑀞𑀸’’𑀢𑀺 𑀳𑀢𑁆𑀣𑀺𑀲𑁆𑀲 𑀧𑀡𑁆𑀳𑀺𑀓𑀸𑀬 𑀲𑀜𑁆𑀜𑀁 𑀅𑀤𑀸𑀲𑀺, 𑀫𑀳𑀸𑀲𑀢𑁆𑀢𑁄 𑀢𑀣𑀸 𑀅𑀓𑀸𑀲𑀺. 𑀧𑀼𑀦 𑀭𑀸𑀚𑀸 ‘‘𑀤𑁆𑀯𑀻𑀳𑀺 𑀧𑀼𑀭𑀺𑀫𑀧𑀸𑀤𑁂𑀳𑀺𑀬𑁂𑀯 𑀞𑀧𑁂𑀳𑀻’’𑀢𑀺 𑀆𑀳, 𑀫𑀳𑀸𑀲𑀢𑁆𑀢𑁄 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑁂𑀳𑀺 𑀅𑀝𑁆𑀞𑀸𑀲𑀺. ‘‘𑀧𑀘𑁆𑀙𑀺𑀫𑀧𑀸𑀤𑁂𑀳𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀺𑀫𑀧𑀸𑀤𑁂𑀳𑀺 𑀅𑀝𑁆𑀞𑀸𑀲𑀺, ‘‘𑀏𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀬𑁄 𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑁂𑀦𑁂𑀯 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀅𑀧𑀢𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀘𑁂 𑀧𑀳𑁄𑀲𑀺, 𑀆𑀓𑀸𑀲𑁂 𑀦𑀁 𑀞𑀧𑁂𑀳𑀻’’𑀢𑀺 𑀆𑀳.

𑀆𑀘𑀭𑀺𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀇𑀫𑀺𑀦𑀸 𑀲𑀤𑀺𑀲𑁄 𑀲𑀼𑀲𑀺𑀓𑁆𑀔𑀺𑀢𑁄 𑀳𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀦𑀺𑀲𑁆𑀲𑀁𑀲𑀬𑀁 𑀧𑀦𑁂𑀢𑀁 𑀏𑀲 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀲𑁆𑀲 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑁂𑀲𑀺 ‘‘𑀢𑀸𑀢, 𑀅𑀬𑀁 𑀭𑀸𑀚𑀸 𑀢𑀁 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄, 𑀦 𑀢𑁆𑀯𑀁 𑀏𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄. 𑀲𑀘𑁂 𑀢𑁂 𑀆𑀓𑀸𑀲𑁂𑀦 𑀕𑀦𑁆𑀢𑀼𑀁 𑀩𑀮𑀁 𑀅𑀢𑁆𑀣𑀺, 𑀫𑀁 𑀬𑀣𑀸𑀦𑀺𑀲𑀺𑀦𑁆𑀦𑀁𑀬𑁂𑀯 𑀆𑀤𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀸’’𑀢𑀺. 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀲𑀢𑁆𑀢𑁄 𑀢𑀗𑁆𑀔𑀡𑀜𑁆𑀜𑁂𑀯 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 ‘‘𑀫𑀳𑀸𑀭𑀸𑀚, 𑀅𑀬𑀁 𑀳𑀢𑁆𑀣𑀻 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀦 𑀢𑀸𑀤𑀺𑀲𑀲𑁆𑀲 𑀫𑀦𑁆𑀤𑀧𑀼𑀜𑁆𑀜𑀲𑁆𑀲 𑀤𑀼𑀩𑁆𑀩𑀼𑀤𑁆𑀥𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑁄, 𑀧𑀡𑁆𑀟𑀺𑀢𑀲𑁆𑀲 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑀲𑁆𑀲 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑁄, 𑀢𑀸𑀤𑀺𑀲𑀸 𑀦𑀸𑀫 𑀫𑀦𑁆𑀤𑀧𑀼𑀜𑁆𑀜𑀸 𑀏𑀯𑀭𑀽𑀧𑀁 𑀯𑀸𑀳𑀦𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀢𑀜𑁆𑀘𑁂𑀯 𑀯𑀸𑀳𑀦𑀁 𑀅𑀯𑀲𑁂𑀲𑀜𑁆𑀘 𑀬𑀲𑀲𑀫𑁆𑀧𑀢𑁆𑀢𑀺𑀁 𑀦𑀸𑀲𑁂𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄𑀯 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁨. ‘‘𑀬𑀲𑀁 𑀮𑀤𑁆𑀥𑀸𑀦 𑀤𑀼𑀫𑁆𑀫𑁂𑀥𑁄, 𑀅𑀦𑀢𑁆𑀣𑀁 𑀘𑀭𑀢𑀺 𑀅𑀢𑁆𑀢𑀦𑁄;

𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘, 𑀳𑀺𑀁𑀲𑀸𑀬 𑀧𑀝𑀺𑀧𑀚𑁆𑀚𑀢𑀻’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁄 𑀤𑀼𑀫𑁆𑀫𑁂𑀥𑁄 𑀦𑀺𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀢𑁆𑀣𑀁 𑀘𑀭𑀢𑀺. 𑀓𑀺𑀁𑀓𑀸𑀭𑀡𑀸? 𑀲𑁄 𑀳𑀺 𑀬𑀲𑀫𑀤𑀫𑀢𑁆𑀢𑁄 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀳𑀺𑀁𑀲𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀳𑀺𑀁𑀲𑀸 𑀯𑀼𑀘𑁆𑀘𑀢𑀺 𑀓𑀺𑀮𑀫𑀦𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀁, 𑀢𑀤𑀢𑁆𑀣𑀸𑀬 𑀏𑀯 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀢𑀺𑀝𑁆𑀞 𑀤𑀸𑀦𑀺 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀆𑀓𑀸𑀲𑁂𑀦 𑀲𑁂𑀢𑀯𑀭𑀯𑀸𑀭𑀡𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀞𑀺𑀢𑁄’’𑀢𑀺 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀯𑁂𑀕𑁂𑀦 𑀭𑀜𑁆𑀜𑁄𑀧𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑀘𑁂 𑀫𑀬𑁆𑀳𑀁 𑀉𑀧𑀪𑁄𑀕𑀢𑁆𑀣𑀸𑀬 𑀆𑀕𑀢𑁄𑀲𑀺, 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀳𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀲𑀺, 𑀆𑀘𑀭𑀺𑀬𑁄 𑀑𑀢𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀕𑀳𑀢𑁄’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀫𑀦𑀸𑀧𑀁 𑀢𑁂, 𑀢𑀸𑀢, 𑀓𑀢𑀁 𑀇𑀥𑀸𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀢𑀼𑀝𑁆𑀞𑀳𑀝𑁆𑀞𑁄 𑀦𑀕𑀭𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀯𑀸𑀭𑀡𑀁 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀓𑀮𑀭𑀚𑁆𑀚𑀁 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀤𑀸𑀲𑀺, 𑀏𑀓𑀁 𑀆𑀘𑀭𑀺𑀬𑀲𑁆𑀲, 𑀏𑀓𑀁 𑀅𑀢𑁆𑀢𑀦𑀸 𑀅𑀕𑁆𑀕𑀳𑁂𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑁂𑀯 𑀧𑀦 𑀭𑀜𑁆𑀜𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀳𑀢𑁆𑀣𑀕𑀢𑀫𑁂𑀯 𑀚𑀸𑀢𑀁. 𑀲𑁄 𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀕𑀥𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀳𑀢𑁆𑀣𑀸𑀘𑀭𑀺𑀬𑁄 𑀆𑀦𑀦𑁆𑀤𑁄, 𑀳𑀢𑁆𑀣𑀻 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀫𑁆𑀫𑁂𑀥𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁨𑁩] 𑁩. 𑀦𑀗𑁆𑀕𑀮𑀻𑀲𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀩𑁆𑀩𑀢𑁆𑀣𑀕𑀸𑀫𑀺𑀁 𑀯𑀸𑀘𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀁 𑀓𑀣𑁂𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀁 𑀦 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀫𑀗𑁆𑀕𑀮𑁂 𑀅𑀯𑀫𑀗𑁆𑀕𑀮𑀁 𑀯𑀤𑀦𑁆𑀢𑁄 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘𑀸’’𑀢𑀺 𑀇𑀤𑀁 𑀅𑀯𑀫𑀗𑁆𑀕𑀮𑀁 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀣𑁂𑀢𑀺. 𑀅𑀯𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀫𑀗𑁆𑀕𑀮𑀸𑀦𑀺 𑀅𑀘𑀺𑀦𑁆𑀢𑀬𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀏𑀯𑀭𑀽𑀧𑀸𑀦𑀁 𑀫𑀗𑁆𑀕𑀮𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀓𑀸𑀢𑀼𑀁 𑀲𑀫𑀢𑁆𑀣𑀸 𑀳𑁄𑀣𑀸’’𑀢𑀺 𑀯𑀤𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀮𑀸𑀴𑀼𑀤𑀸𑀬𑀻 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀲𑀩𑁆𑀩𑀢𑁆𑀣 𑀅𑀪𑀸𑀲𑀺𑀢𑀩𑁆𑀩𑀯𑀸𑀘𑀁 𑀪𑀸𑀲𑀢𑀻’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀮𑀸𑀴𑀼𑀤𑀸𑀬𑀻 𑀇𑀤𑀸𑀦𑁂𑀯 𑀤𑀦𑁆𑀥𑀧𑀭𑀺𑀲𑀓𑁆𑀓𑀦𑁄 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀧𑀼𑀩𑁆𑀩𑁂𑀧𑀺 𑀏𑀯𑀭𑀽𑀧𑁄 𑀅𑀳𑁄𑀲𑀺, 𑀦𑀺𑀘𑁆𑀘𑀁 𑀮𑀸𑀴𑀓𑁄𑀬𑁂𑀯 𑀏𑀲𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀯𑀸𑀘𑁂𑀲𑀺. 𑀢𑀤𑀸 𑀢𑁂𑀲𑀼 𑀫𑀸𑀡𑀯𑁂𑀲𑀼 𑀏𑀓𑁄 𑀤𑀦𑁆𑀥𑀧𑀭𑀺𑀲𑀓𑁆𑀓𑀦𑁄 𑀮𑀸𑀴𑀓𑁄 𑀫𑀸𑀡𑀯𑁄 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀤𑀦𑁆𑀥𑀪𑀸𑀯𑁂𑀦 𑀧𑀦 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀉𑀧𑀓𑀸𑀭𑁄 𑀳𑁄𑀢𑀺, 𑀤𑀸𑀲𑁄 𑀯𑀺𑀬 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑁂 𑀦𑀺𑀧𑀦𑁆𑀦𑁄 𑀢𑀁 𑀫𑀸𑀡𑀯𑀁 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀆𑀳 ‘‘𑀢𑀸𑀢, 𑀫𑀜𑁆𑀘𑀧𑀸𑀤𑁂 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀬𑀸𑀳𑀻’’𑀢𑀺. 𑀫𑀸𑀡𑀯𑁄 𑀏𑀓𑀁 𑀧𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀏𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀁 𑀅𑀮𑀪𑀦𑁆𑀢𑁄 𑀅𑀢𑁆𑀢𑀦𑁄 𑀊𑀭𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀭𑀢𑁆𑀢𑀺𑀁 𑀔𑁂𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀉𑀝𑁆𑀞𑀸𑀬 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀢𑀸𑀢, 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀘𑀭𑀺𑀬, 𑀏𑀓𑀲𑁆𑀲 𑀫𑀜𑁆𑀘𑀧𑀸𑀤𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀁 𑀅𑀮𑀪𑀦𑁆𑀢𑁄 𑀊𑀭𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀫𑁆𑀳𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀅𑀬𑀁 𑀅𑀢𑀺 𑀯𑀺𑀬 𑀫𑀬𑁆𑀳𑀁 𑀉𑀧𑀓𑀸𑀭𑁄, 𑀏𑀢𑁆𑀢𑀓𑀸𑀦𑀁 𑀧𑀦 𑀫𑀸𑀡𑀯𑀓𑀸𑀦𑀁 𑀅𑀦𑁆𑀢𑀭𑁂 𑀅𑀬𑀫𑁂𑀯 𑀤𑀦𑁆𑀥𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀣𑀁 𑀦𑀼 𑀔𑁄 𑀅𑀳𑀁 𑀇𑀫𑀁 𑀧𑀡𑁆𑀟𑀺𑀢𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀅𑀳𑀁 𑀇𑀫𑀁 𑀫𑀸𑀡𑀯𑀁 𑀤𑀸𑀭𑀼𑀅𑀢𑁆𑀣𑀸𑀬 𑀧𑀡𑁆𑀡𑀢𑁆𑀣𑀸𑀬 𑀘 𑀯𑀦𑀁 𑀕𑀦𑁆𑀢𑁆𑀯𑀸 𑀆𑀕𑀢𑀁 ‘𑀅𑀚𑁆𑀚 𑀢𑁂 𑀓𑀺𑀁 𑀤𑀺𑀝𑁆𑀞𑀁, 𑀓𑀺𑀁 𑀓𑀢’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀅𑀣 𑀫𑁂 ‘𑀇𑀤𑀁 𑀦𑀸𑀫 𑀅𑀚𑁆𑀚 𑀫𑀬𑀸 𑀤𑀺𑀝𑁆𑀞𑀁, 𑀇𑀤𑀁 𑀓𑀢’𑀦𑁆𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀢𑀺. 𑀅𑀣 𑀦𑀁 ‘𑀢𑀬𑀸 𑀤𑀺𑀝𑁆𑀞𑀜𑁆𑀘 𑀓𑀢𑀜𑁆𑀘 𑀓𑀻𑀤𑀺𑀲’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑁄 ‘𑀏𑀯𑀭𑀽𑀧𑀁 𑀦𑀸𑀫𑀸’𑀢𑀺 𑀉𑀧𑀫𑀸𑀬 𑀘 𑀓𑀸𑀭𑀡𑁂𑀦 𑀘 𑀓𑀣𑁂𑀲𑁆𑀲𑀢𑀺. 𑀇𑀢𑀺 𑀦𑀁 𑀦𑀯𑀁 𑀦𑀯𑀁 𑀉𑀧𑀫𑀜𑁆𑀘 𑀓𑀸𑀭𑀡𑀜𑁆𑀘 𑀓𑀣𑀸𑀧𑁂𑀢𑁆𑀯𑀸 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀧𑀡𑁆𑀟𑀺𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢 𑀫𑀸𑀡𑀯, 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀭𑀼𑀅𑀢𑁆𑀣𑀸𑀬 𑀯𑀸 𑀧𑀡𑁆𑀡𑀢𑁆𑀣𑀸𑀬 𑀯𑀸 𑀕𑀢𑀝𑁆𑀞𑀸𑀦𑁂 𑀬𑀁 𑀢𑁂 𑀢𑀢𑁆𑀣 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀪𑀼𑀢𑁆𑀢𑀁 𑀯𑀸 𑀧𑀻𑀢𑀁 𑀯𑀸 𑀔𑀸𑀤𑀺𑀢𑀁 𑀯𑀸 𑀳𑁄𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀤𑀸𑀭𑀼𑀅𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀢𑁄 𑀢𑀢𑁆𑀣 𑀲𑀧𑁆𑀧𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀆𑀘𑀭𑀺𑀬, 𑀲𑀧𑁆𑀧𑁄 𑀫𑁂 𑀤𑀺𑀝𑁆𑀞𑁄’’𑀢𑀺 𑀆𑀭𑁄𑀘𑁂𑀲𑀺. ‘‘𑀲𑀧𑁆𑀧𑁄 𑀦𑀸𑀫, 𑀢𑀸𑀢, 𑀓𑀻𑀤𑀺𑀲𑁄 𑀳𑁄𑀢𑀻’’𑀢𑀺? ‘‘𑀲𑁂𑀬𑁆𑀬𑀣𑀸𑀧𑀺 𑀦𑀗𑁆𑀕𑀮𑀻𑀲𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀫𑀦𑀸𑀧𑀸 𑀢𑁂 𑀉𑀧𑀫𑀸 𑀆𑀳𑀝𑀸, 𑀲𑀧𑁆𑀧𑀸 𑀦𑀸𑀫 𑀦𑀗𑁆𑀕𑀮𑀻𑀲𑀲𑀤𑀺𑀲𑀸𑀯 𑀳𑁄𑀦𑁆𑀢𑀻’’𑀢𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸𑀡𑀯𑀓𑁂𑀦 𑀫𑀦𑀸𑀧𑀸 𑀉𑀧𑀫𑀸 𑀆𑀳𑀝𑀸, 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀁 𑀧𑀡𑁆𑀟𑀺𑀢𑀁 𑀓𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀫𑀸𑀡𑀯𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 ‘‘𑀳𑀢𑁆𑀣𑀻 𑀫𑁂 𑀆𑀘𑀭𑀺𑀬 𑀤𑀺𑀝𑁆𑀞𑁄’’𑀢𑀺 𑀆𑀳. ‘‘𑀳𑀢𑁆𑀣𑀻 𑀦𑀸𑀫, 𑀢𑀸𑀢, 𑀓𑀻𑀤𑀺𑀲𑁄’’𑀢𑀺? ‘‘𑀲𑁂𑀬𑁆𑀬𑀣𑀸𑀧𑀺, 𑀦𑀗𑁆𑀕𑀮𑀻𑀲𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀳𑀢𑁆𑀣𑀺𑀲𑁆𑀲 𑀲𑁄𑀡𑁆𑀟𑀸 𑀦𑀗𑁆𑀕𑀮𑀻𑀲𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀤𑀦𑁆𑀢𑀸𑀤𑀬𑁄 𑀏𑀯𑀭𑀽𑀧𑀸 𑀘 𑀏𑀯𑀭𑀽𑀧𑀸 𑀘. 𑀅𑀬𑀁 𑀧𑀦 𑀩𑀸𑀮𑀢𑀸𑀬 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁄𑀡𑁆𑀟𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺 𑀫𑀜𑁆𑀜𑁂’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀦𑀺𑀫𑀦𑁆𑀢𑀦𑁂 𑀉𑀘𑁆𑀙𑀼𑀁 𑀮𑀪𑀺𑀢𑁆𑀯𑀸 ‘‘𑀆𑀘𑀭𑀺𑀬, 𑀅𑀚𑁆𑀚 𑀫𑀬𑀁 𑀉𑀘𑁆𑀙𑀼 𑀔𑀸𑀤𑀺𑀫𑁆𑀳𑀸’’𑀢𑀺 𑀆𑀳. ‘‘𑀉𑀘𑁆𑀙𑀼 𑀦𑀸𑀫 𑀓𑀻𑀤𑀺𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀗𑁆𑀕𑀮𑀻𑀲𑀸’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀣𑁄𑀓𑀁 𑀧𑀢𑀺𑀭𑀽𑀧𑀁 𑀓𑀸𑀭𑀡𑀁 𑀓𑀣𑁂𑀲𑀻’’𑀢𑀺 𑀢𑀼𑀡𑁆𑀳𑀻 𑀚𑀸𑀢𑁄.

𑀧𑀼𑀦𑁂𑀓𑀤𑀺𑀯𑀲𑀁 𑀦𑀺𑀫𑀦𑁆𑀢𑀦𑁂 𑀏𑀓𑀘𑁆𑀘𑁂 𑀫𑀸𑀡𑀯𑀸 𑀕𑀼𑀴𑀁 𑀤𑀥𑀺𑀦𑀸 𑀪𑀼𑀜𑁆𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀔𑀻𑀭𑁂𑀦. 𑀲𑁄 𑀆𑀕𑀦𑁆𑀢𑁆𑀯𑀸 ‘‘𑀆𑀘𑀭𑀺𑀬, 𑀅𑀚𑁆𑀚 𑀫𑀬𑀁 𑀤𑀥𑀺𑀦𑀸 𑀔𑀻𑀭𑁂𑀦 𑀘 𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 ‘‘𑀤𑀥𑀺𑀔𑀻𑀭𑀁 𑀦𑀸𑀫 𑀓𑀻𑀤𑀺𑀲𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀗𑁆𑀕𑀮𑀻𑀲𑀸’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀅𑀬𑀁 𑀫𑀸𑀡𑀯𑁄 ‘𑀲𑀧𑁆𑀧𑁄 𑀦𑀗𑁆𑀕𑀮𑀻𑀲𑀲𑀤𑀺𑀲𑁄’𑀢𑀺 𑀓𑀣𑁂𑀦𑁆𑀢𑁄 𑀢𑀸𑀯 𑀲𑀼𑀓𑀣𑀺𑀢𑀁 𑀓𑀣𑁂𑀲𑀺, ‘𑀳𑀢𑁆𑀣𑀻 𑀦𑀗𑁆𑀕𑀮𑀻𑀲𑀲𑀤𑀺𑀲𑁄’𑀢𑀺 𑀓𑀣𑁂𑀦𑁆𑀢𑁂𑀦𑀸𑀧𑀺 𑀲𑁄𑀡𑁆𑀟𑀁 𑀲𑀦𑁆𑀥𑀸𑀬 𑀮𑁂𑀲𑁂𑀦 𑀓𑀣𑀺𑀢𑀁. ‘𑀉𑀘𑁆𑀙𑀼 𑀦𑀗𑁆𑀕𑀮𑀻𑀲𑀲𑀤𑀺𑀲’𑀦𑁆𑀢𑀺 𑀓𑀣𑀦𑁂𑀧𑀺 𑀮𑁂𑀲𑁄 𑀅𑀢𑁆𑀣𑀺, ‘𑀤𑀥𑀺𑀔𑀻𑀭𑀸𑀦𑀺 𑀧𑀦 𑀦𑀺𑀘𑁆𑀘𑀁 𑀧𑀡𑁆𑀟𑀭𑀸𑀦𑀺 𑀧𑀓𑁆𑀔𑀺𑀢𑁆𑀢𑀪𑀸𑀚𑀦𑀲𑀡𑁆𑀞𑀸𑀦𑀸𑀦𑀻’𑀢𑀺 𑀇𑀥 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀧𑀫𑀁 𑀦 𑀓𑀣𑁂𑀲𑀺, 𑀦 𑀲𑀓𑁆𑀓𑀸 𑀇𑀫𑀁 𑀮𑀸𑀴𑀓𑀁 𑀲𑀺𑀓𑁆𑀔𑀸𑀧𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁩. ‘‘𑀅𑀲𑀩𑁆𑀩𑀢𑁆𑀣𑀕𑀸𑀫𑀺𑀁 𑀯𑀸𑀘𑀁, 𑀩𑀸𑀮𑁄 𑀲𑀩𑁆𑀩𑀢𑁆𑀣 𑀪𑀸𑀲𑀢𑀺;

𑀦𑀸𑀬𑀁 𑀤𑀥𑀺𑀁 𑀯𑁂𑀤𑀺 𑀦 𑀦𑀗𑁆𑀕𑀮𑀻𑀲𑀁, 𑀤𑀥𑀺𑀧𑁆𑀧𑀬𑀁 𑀫𑀜𑁆𑀜𑀢𑀺 𑀦𑀗𑁆𑀕𑀮𑀻𑀲’’𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸 𑀯𑀸𑀘𑀸 𑀑𑀧𑀫𑁆𑀫𑀯𑀲𑁂𑀦 𑀲𑀩𑁆𑀩𑀢𑁆𑀣 𑀦 𑀕𑀘𑁆𑀙𑀢𑀺, 𑀢𑀁 𑀅𑀲𑀩𑁆𑀩𑀢𑁆𑀣𑀕𑀸𑀫𑀺𑀁 𑀯𑀸𑀘𑀁 𑀩𑀸𑀮𑁄 𑀤𑀦𑁆𑀥𑀧𑀼𑀕𑁆𑀕𑀮𑁄 𑀲𑀩𑁆𑀩𑀢𑁆𑀣 𑀪𑀸𑀲𑀢𑀺, ‘‘𑀤𑀥𑀺 𑀦𑀸𑀫 𑀓𑀻𑀤𑀺𑀲’’𑀦𑁆𑀢𑀺 𑀧𑀼𑀝𑁆𑀞𑁄𑀧𑀺 ‘‘𑀲𑁂𑀬𑁆𑀬𑀣𑀸𑀧𑀺, 𑀦𑀗𑁆𑀕𑀮𑀻𑀲𑀸’’𑀢𑀺 𑀯𑀤𑀢𑁂𑀯. 𑀏𑀯𑀁 𑀯𑀤𑀦𑁆𑀢𑁄 𑀦𑀸𑀬𑀁 𑀤𑀥𑀺𑀁 𑀯𑁂𑀤𑀺 𑀦 𑀦𑀗𑁆𑀕𑀮𑀻𑀲𑀁. 𑀓𑀺𑀁𑀓𑀸𑀭𑀡𑀸? 𑀤𑀥𑀺𑀧𑁆𑀧𑀬𑀁 𑀫𑀜𑁆𑀜𑀢𑀺 𑀦𑀗𑁆𑀕𑀮𑀻𑀲𑀁, 𑀬𑀲𑁆𑀫𑀸 𑀅𑀬𑀁 𑀤𑀥𑀺𑀫𑁆𑀧𑀺 𑀦𑀗𑁆𑀕𑀮𑀻𑀲𑀫𑁂𑀯 𑀫𑀜𑁆𑀜𑀢𑀺. 𑀅𑀣 𑀯𑀸 𑀤𑀥𑀻𑀢𑀺 𑀤𑀥𑀺𑀫𑁂𑀯, 𑀧𑀬𑀦𑁆𑀢𑀺 𑀔𑀻𑀭𑀁, 𑀤𑀥𑀺 𑀘 𑀧𑀬𑀜𑁆𑀘 𑀤𑀥𑀺𑀧𑁆𑀧𑀬𑀁. 𑀬𑀲𑁆𑀫𑀸 𑀤𑀥𑀺𑀔𑀻𑀭𑀸𑀦𑀺𑀧𑀺 𑀅𑀬𑀁 𑀦𑀗𑁆𑀕𑀮𑀻𑀲𑀫𑁂𑀯 𑀫𑀜𑁆𑀜𑀢𑀺, 𑀏𑀤𑀺𑀲𑁄 𑀘𑀸𑀬𑀁 𑀩𑀸𑀮𑁄, 𑀓𑀺𑀁 𑀇𑀫𑀺𑀦𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀸𑀴𑀓𑀫𑀸𑀡𑀯𑁄 𑀮𑀸𑀴𑀼𑀤𑀸𑀬𑀻 𑀅𑀳𑁄𑀲𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀗𑁆𑀕𑀮𑀻𑀲𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁨𑁪] 𑁪. 𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀢𑁆𑀢𑀲𑀫𑁆𑀧𑀦𑁆𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀸𑀦𑀺 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀉𑀧𑁄𑀲𑀣𑀸𑀕𑀸𑀭𑀚𑀦𑁆𑀢𑀸𑀖𑀭𑀸𑀤𑀺𑀯𑀢𑁆𑀢𑀸𑀦𑀺 𑀘 𑀲𑀸𑀥𑀼𑀓𑀁 𑀓𑀭𑁄𑀢𑀺, 𑀘𑀼𑀤𑁆𑀤𑀲𑀲𑀼 𑀫𑀳𑀸𑀯𑀢𑁆𑀢𑁂𑀲𑀼 𑀅𑀲𑀻𑀢𑀺𑀔𑀦𑁆𑀥𑀓𑀯𑀢𑁆𑀢𑁂𑀲𑀼 𑀘 𑀧𑀭𑀺𑀧𑀽𑀭𑀓𑀸𑀭𑀻𑀬𑁂𑀯 𑀳𑁄𑀢𑀺, 𑀯𑀺𑀳𑀸𑀭𑀁 𑀲𑀫𑁆𑀫𑀚𑁆𑀚𑀢𑀺, 𑀧𑀭𑀺𑀯𑁂𑀡𑀁 𑀯𑀺𑀢𑀓𑁆𑀓𑀫𑀸𑀴𑀓𑀁 𑀯𑀺𑀳𑀸𑀭𑀫𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀸𑀦𑀻𑀬𑀁 𑀤𑁂𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀁 𑀧𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀲𑀢𑀫𑀢𑁆𑀢𑀸𑀦𑀺 𑀥𑀼𑀯𑀪𑀢𑁆𑀢𑀸𑀦𑀺 𑀅𑀤𑀁𑀲𑀼, 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀢𑀁 𑀦𑀺𑀲𑁆𑀲𑀸𑀬 𑀩𑀳𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀏𑀢𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀬𑀁 𑀪𑀺𑀓𑁆𑀔𑀼 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀧𑀼𑀩𑁆𑀩𑁂𑀧𑁂𑀢𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘 𑀇𑀲𑀺𑀲𑀢𑀸𑀦𑀺 𑀨𑀮𑀸𑀨𑀮𑀢𑁆𑀣𑀸𑀬 𑀅𑀭𑀜𑁆𑀜𑀁 𑀅𑀕𑀦𑁆𑀢𑁆𑀯𑀸 𑀏𑀢𑁂𑀦𑁂𑀯 𑀆𑀦𑀻𑀢𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀲𑀢𑀇𑀲𑀺𑀧𑀭𑀺𑀯𑀸𑀭𑁄 𑀧𑀩𑁆𑀩𑀢𑀧𑀸𑀤𑁂 𑀯𑀺𑀳𑀸𑀲𑀺. 𑀢𑀤𑀸 𑀳𑀺𑀫𑀯𑀦𑁆𑀢𑁂 𑀘𑀡𑁆𑀟𑁄 𑀦𑀺𑀤𑀸𑀖𑁄 𑀅𑀳𑁄𑀲𑀺, 𑀢𑀢𑁆𑀣 𑀢𑀢𑁆𑀣 𑀧𑀸𑀦𑀻𑀬𑀸𑀦𑀺 𑀙𑀺𑀚𑁆𑀚𑀺𑀁𑀲𑀼, 𑀢𑀺𑀭𑀘𑁆𑀙𑀸𑀦𑀸 𑀧𑀸𑀦𑀻𑀬𑀁 𑀅𑀮𑀪𑀫𑀸𑀦𑀸 𑀓𑀺𑀮𑀫𑀦𑁆𑀢𑀺. 𑀅𑀣 𑀢𑁂𑀲𑀼 𑀢𑀸𑀧𑀲𑁂𑀲𑀼 𑀏𑀓𑁄 𑀢𑀸𑀧𑀲𑁄 𑀢𑁂𑀲𑀁 𑀧𑀺𑀧𑀸𑀲𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀏𑀓𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑁄𑀡𑀺𑀁 𑀓𑀢𑁆𑀯𑀸 𑀧𑀸𑀦𑀻𑀬𑀁 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀤𑁄𑀡𑀺𑀁 𑀧𑀽𑀭𑁂𑀢𑁆𑀯𑀸 𑀢𑁂𑀲𑀁 𑀧𑀸𑀦𑀻𑀬𑀁 𑀅𑀤𑀸𑀲𑀺. 𑀩𑀳𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁂𑀲𑀼 𑀢𑀸𑀧𑀲𑀲𑁆𑀲 𑀨𑀮𑀸𑀨𑀮𑀢𑁆𑀣𑀸𑀬 𑀕𑀫𑀦𑁄𑀓𑀸𑀲𑁄 𑀦𑀸𑀳𑁄𑀲𑀺. 𑀲𑁄 𑀦𑀺𑀭𑀸𑀳𑀸𑀭𑁄𑀧𑀺 𑀧𑀸𑀦𑀻𑀬𑀁 𑀤𑁂𑀢𑀺𑀬𑁂𑀯. 𑀫𑀺𑀕𑀕𑀡𑀸 𑀘𑀺𑀦𑁆𑀢𑁂𑀲𑀼𑀁 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀧𑀸𑀦𑀻𑀬𑀁 𑀤𑁂𑀦𑁆𑀢𑁄 𑀨𑀮𑀸𑀨𑀮𑀢𑁆𑀣𑀸𑀬 𑀕𑀦𑁆𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀢𑀺, 𑀦𑀺𑀭𑀸𑀳𑀸𑀭𑀢𑀸𑀬 𑀅𑀢𑀺𑀯𑀺𑀬 𑀓𑀺𑀮𑀫𑀢𑀺, 𑀳𑀦𑁆𑀤𑀫𑀬𑀁 𑀓𑀢𑀺𑀓𑀁 𑀓𑀭𑁄𑀫𑀸’’𑀢𑀺. 𑀢𑁂 𑀓𑀢𑀺𑀓𑀁 𑀅𑀓𑀁𑀲𑀼 ‘‘𑀇𑀢𑁄 𑀧𑀝𑁆𑀞𑀸𑀬 𑀧𑀸𑀦𑀻𑀬𑀁 𑀧𑀺𑀯𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑁂𑀦 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀨𑀮𑀸𑀨𑀮𑀁 𑀕𑀳𑁂𑀢𑁆𑀯𑀸𑀯 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀏𑀓𑁂𑀓𑁄 𑀢𑀺𑀭𑀘𑁆𑀙𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀫𑀥𑀼𑀭𑀫𑀥𑀼𑀭𑀸𑀦𑀺 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀸𑀤𑀻𑀦𑀺𑀕𑀳𑁂𑀢𑁆𑀯𑀸𑀯 𑀆𑀕𑀘𑁆𑀙𑀢𑀺. 𑀏𑀓𑀲𑁆𑀲 𑀅𑀢𑁆𑀣𑀸𑀬 𑀆𑀪𑀢𑀁 𑀨𑀮𑀸𑀨𑀮𑀁 𑀅𑀟𑁆𑀠𑀢𑁂𑀬𑁆𑀬𑀲𑀓𑀝𑀪𑀸𑀭𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀧𑀜𑁆𑀘𑀲𑀢𑀢𑀸𑀧𑀲𑀸 𑀢𑀤𑁂𑀯 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀢𑀺𑀭𑁂𑀓𑀁 𑀙𑀟𑁆𑀟𑀺𑀬𑀺𑀢𑁆𑀣.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀓𑀁 𑀦𑀸𑀫 𑀯𑀢𑁆𑀢𑀲𑀫𑁆𑀧𑀦𑁆𑀦𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀸𑀦𑀁 𑀢𑀸𑀧𑀲𑀸𑀦𑀁 𑀨𑀮𑀸𑀨𑀮𑀢𑁆𑀣𑀸𑀬 𑀅𑀕𑀦𑁆𑀢𑁆𑀯𑀸 𑀬𑀸𑀧𑀦𑀁 𑀉𑀧𑁆𑀧𑀦𑁆𑀦𑀁, 𑀯𑀻𑀭𑀺𑀬𑀁 𑀦𑀸𑀫 𑀓𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁪. ‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀯𑀸𑀬𑀸𑀫𑀲𑁆𑀲 𑀨𑀮𑀁 𑀧𑀲𑁆𑀲, 𑀪𑀼𑀢𑁆𑀢𑀸 𑀅𑀫𑁆𑀩𑀸 𑀅𑀦𑀻𑀢𑀺𑀳’’𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀯𑀢𑁆𑀢𑀧𑀽𑀭𑀡𑀸𑀤𑀺𑀓𑁂 𑀓𑀫𑁆𑀫𑀲𑁆𑀫𑀺𑀁 𑀯𑀸𑀬𑀫𑁂𑀣𑁂𑀯, 𑀦 𑀉𑀓𑁆𑀓𑀡𑁆𑀞𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀯𑀸𑀬𑀸𑀫𑀲𑁆𑀲 𑀦𑀺𑀧𑁆𑀨𑀮𑀢𑀸𑀬 𑀅𑀪𑀸𑀯𑀢𑁄. 𑀇𑀢𑀺 𑀫𑀳𑀸𑀲𑀢𑁆𑀢𑁄 ‘‘𑀯𑀸𑀬𑀸𑀫𑁄 𑀦𑀸𑀫𑁂𑀲 𑀲𑀨𑀮𑁄𑀯 𑀳𑁄𑀢𑀻’’𑀢𑀺 𑀇𑀲𑀺𑀕𑀡𑀁 𑀆𑀮𑀧𑀦𑁆𑀢𑁄 ‘‘𑀯𑀸𑀬𑀸𑀫𑀲𑁆𑀲 𑀨𑀮𑀁 𑀧𑀲𑁆𑀲𑀸’’𑀢𑀺 𑀆𑀳. 𑀓𑀻𑀤𑀺𑀲𑀁? 𑀪𑀼𑀢𑁆𑀢𑀸 𑀅𑀫𑁆𑀩𑀸 𑀅𑀦𑀻𑀢𑀺𑀳𑀁. 𑀢𑀢𑁆𑀣 𑀅𑀫𑁆𑀩𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀁, 𑀢𑁂𑀳𑀺 𑀧𑀦 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀆𑀪𑀢𑀸𑀦𑀺. 𑀢𑁂𑀲𑀼 𑀲𑀫𑁆𑀧𑀦𑁆𑀦𑀢𑀭𑀸𑀦𑀁 𑀉𑀲𑁆𑀲𑀦𑁆𑀦𑀢𑀭𑀸𑀦𑀁 𑀯𑀸 𑀯𑀲𑁂𑀦 ‘‘𑀅𑀫𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀬𑁂 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀇𑀲𑀺𑀲𑀢𑁂𑀳𑀺 𑀲𑀬𑀁 𑀅𑀭𑀜𑁆𑀜𑀁 𑀅𑀕𑀦𑁆𑀢𑁆𑀯𑀸 𑀏𑀓𑀲𑁆𑀲 𑀅𑀢𑁆𑀣𑀸𑀬 𑀆𑀦𑀻𑀢𑀸 𑀅𑀫𑁆𑀩𑀸 𑀪𑀼𑀢𑁆𑀢𑀸, 𑀇𑀤𑀁 𑀯𑀸𑀬𑀸𑀫𑀲𑁆𑀲 𑀨𑀮𑀁. 𑀢𑀜𑁆𑀘 𑀔𑁄 𑀧𑀦 𑀅𑀦𑀻𑀢𑀺𑀳𑀁, ‘‘𑀇𑀢𑀺 𑀆𑀳 𑀇𑀢𑀺 𑀆𑀳𑀸’’𑀢𑀺 𑀏𑀯𑀁 𑀇𑀢𑀺𑀳𑀻𑀢𑀺𑀳𑁂𑀦 𑀕𑀳𑁂𑀢𑀩𑁆𑀩𑀁 𑀦 𑀳𑁄𑀢𑀺, 𑀧𑀘𑁆𑀘𑀓𑁆𑀔𑀫𑁂𑀯 𑀢𑀁 𑀨𑀮𑀁 𑀧𑀲𑁆𑀲𑀸𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀲𑀺𑀕𑀡𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀢𑀸𑀧𑀲𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁨𑁫] 𑁫. 𑀓𑀝𑀸𑀳𑀓𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀺𑀓𑀢𑁆𑀣𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀲𑀤𑀺𑀲𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀤𑀸𑀲𑀻𑀧𑀺𑀲𑁆𑀲 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑁂 𑀏𑀓𑀢𑁄𑀯 𑀯𑀟𑁆𑀠𑀺𑀁𑀲𑀼. 𑀲𑁂𑀝𑁆𑀞𑀺𑀧𑀼𑀢𑁆𑀢𑁂 𑀮𑁂𑀔𑀁 𑀲𑀺𑀓𑁆𑀔𑀦𑁆𑀢𑁂 𑀤𑀸𑀲𑁄𑀧𑀺𑀲𑁆𑀲 𑀨𑀮𑀓𑀁 𑀯𑀳𑀫𑀸𑀦𑁄 𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀮𑁂𑀔𑀁 𑀲𑀺𑀓𑁆𑀔𑀺, 𑀕𑀡𑀦𑀁 𑀲𑀺𑀓𑁆𑀔𑀺, 𑀤𑁆𑀯𑁂 𑀢𑀬𑁄 𑀯𑁄𑀳𑀸𑀭𑁂 𑀅𑀓𑀸𑀲𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀘𑀦𑀓𑀼𑀲𑀮𑁄 𑀯𑁄𑀳𑀸𑀭𑀓𑀼𑀲𑀮𑁄 𑀬𑀼𑀯𑀸 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺, 𑀦𑀸𑀫𑁂𑀦 𑀓𑀝𑀸𑀳𑁂𑀓𑁄 𑀦𑀸𑀫. 𑀲𑁄 𑀲𑁂𑀝𑁆𑀞𑀺𑀖𑀭𑁂 𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀦 𑀫𑀁 𑀇𑀫𑁂 𑀲𑀩𑁆𑀩𑀓𑀸𑀮𑀁 𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀓𑀺𑀜𑁆𑀘𑀺𑀤𑁂𑀯 𑀤𑁄𑀲𑀁 𑀤𑀺𑀲𑁆𑀯𑀸 𑀢𑀸𑀴𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀮𑀓𑁆𑀔𑀡𑁂𑀦 𑀅𑀗𑁆𑀓𑁂𑀢𑁆𑀯𑀸 𑀤𑀸𑀲𑀧𑀭𑀺𑀪𑁄𑀕𑁂𑀦𑀧𑀺 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀧𑀘𑁆𑀘𑀦𑁆𑀢𑁂 𑀔𑁄 𑀧𑀦 𑀲𑁂𑀝𑁆𑀞𑀺𑀲𑁆𑀲 𑀲𑀳𑀸𑀬𑀓𑁄 𑀲𑁂𑀝𑁆𑀞𑀺 𑀅𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀲𑁂𑀝𑁆𑀞𑀺𑀲𑁆𑀲 𑀯𑀘𑀦𑁂𑀦 𑀮𑁂𑀔𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘𑀅𑀳𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄’𑀢𑀺 𑀯𑀢𑁆𑀯𑀸 𑀢𑀁 𑀲𑁂𑀝𑁆𑀞𑀺𑀁 𑀯𑀜𑁆𑀘𑁂𑀢𑁆𑀯𑀸 𑀢𑀲𑁆𑀲 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀲𑀼𑀔𑀁 𑀯𑀲𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀬𑀫𑁂𑀯 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀅𑀲𑀼𑀓𑀁 𑀦𑀸𑀫 𑀫𑀫 𑀧𑀼𑀢𑁆𑀢𑀁 𑀢𑀯 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀁, 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀦𑁆𑀥𑁄 𑀦𑀸𑀫 𑀫𑀬𑁆𑀳𑀜𑁆𑀘 𑀢𑀬𑀸, 𑀢𑀼𑀬𑁆𑀳𑀜𑁆𑀘 𑀫𑀬𑀸 𑀲𑀤𑁆𑀥𑀺𑀁 𑀧𑀢𑀺𑀭𑀽𑀧𑁄, 𑀢𑀲𑁆𑀫𑀸 𑀢𑁆𑀯𑀁 𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀢𑁆𑀯𑀸 𑀏𑀢𑀁 𑀢𑀢𑁆𑀣𑁂𑀯 𑀯𑀲𑀸𑀧𑁂𑀳𑀺, 𑀅𑀳𑀫𑁆𑀧𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀮𑀺𑀔𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲𑁂𑀯 𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀚𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀁 𑀧𑀭𑀺𑀩𑁆𑀩𑀬𑀜𑁆𑀘𑁂𑀯 𑀕𑀦𑁆𑀥𑀯𑀢𑁆𑀣𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺. ‘‘𑀓𑀲𑁆𑀲 𑀧𑀼𑀢𑁆𑀢𑁄𑀲𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲𑀸’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸𑀕𑀢𑁄𑀲𑀻’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀓𑀝𑀸𑀳𑀓𑁄 ‘‘𑀇𑀤𑀁 𑀤𑀺𑀲𑁆𑀯𑀸 𑀚𑀸𑀦𑀺𑀲𑁆𑀲𑀣𑀸’’𑀢𑀺 𑀧𑀡𑁆𑀡𑀁 𑀅𑀤𑀸𑀲𑀺. 𑀲𑁂𑀝𑁆𑀞𑀺 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 ‘‘𑀇𑀤𑀸𑀦𑀸𑀳𑀁 𑀚𑀻𑀯𑀸𑀫𑀺 𑀦𑀸𑀫𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀥𑀻𑀢𑀭𑀁 𑀤𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲 𑀧𑀭𑀺𑀯𑀸𑀭𑁄 𑀫𑀳𑀦𑁆𑀢𑁄 𑀅𑀳𑁄𑀲𑀺. 𑀲𑁄 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀲𑀼 𑀯𑀸 𑀯𑀢𑁆𑀣𑀕𑀦𑁆𑀥𑀸𑀤𑀻𑀲𑀼 𑀯𑀸 𑀉𑀧𑀦𑀻𑀢𑁂𑀲𑀼 ‘‘𑀏𑀯𑀫𑁆𑀧𑀺 𑀦𑀸𑀫 𑀬𑀸𑀕𑀼𑀁 𑀧𑀘𑀦𑁆𑀢𑀺, 𑀏𑀯𑀁 𑀔𑀚𑁆𑀚𑀓𑀁, 𑀏𑀯𑀁 𑀪𑀢𑁆𑀢𑀁, 𑀅𑀳𑁄 𑀧𑀘𑁆𑀘𑀦𑁆𑀢𑀯𑀸𑀲𑀺𑀓𑀸 𑀦𑀸𑀫𑀸’’𑀢𑀺 𑀬𑀸𑀕𑀼𑀆𑀤𑀻𑀦𑀺 𑀕𑀭𑀳𑀢𑀺. ‘‘𑀇𑀫𑁂 𑀧𑀘𑁆𑀘𑀦𑁆𑀢𑀯𑀸𑀲𑀺𑀪𑀸𑀯𑁂𑀦𑁂𑀯 𑀅𑀳𑀢𑀲𑀸𑀝𑀓𑁂 𑀯𑀴𑀜𑁆𑀚𑀺𑀢𑀼𑀁 𑀦 𑀚𑀸𑀦𑀦𑁆𑀢𑀺, 𑀕𑀦𑁆𑀥𑁂 𑀧𑀺𑀲𑀺𑀢𑀼𑀁, 𑀧𑀼𑀧𑁆𑀨𑀸𑀦𑀺 𑀕𑀦𑁆𑀣𑀺𑀢𑀼𑀁 𑀦 𑀚𑀸𑀦𑀦𑁆𑀢𑀻’’𑀢𑀺 𑀯𑀢𑁆𑀣𑀓𑀫𑁆𑀫𑀦𑁆𑀢𑀺𑀓𑀸𑀤𑀬𑁄 𑀕𑀭𑀳𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑀸𑀲𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀝𑀸𑀳𑀓𑁄 𑀦 𑀤𑀺𑀲𑁆𑀲𑀢𑀺, 𑀓𑀳𑀁 𑀕𑀢𑁄, 𑀧𑀭𑀺𑀬𑁂𑀲𑀣 𑀦’’𑀦𑁆𑀢𑀺 𑀲𑀫𑀦𑁆𑀢𑀸 𑀫𑀦𑀼𑀲𑁆𑀲𑁂 𑀧𑀬𑁄𑀚𑁂𑀲𑀺. 𑀢𑁂𑀲𑀼 𑀏𑀓𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀢𑁂𑀦 𑀓𑀢𑀁, 𑀕𑀦𑁆𑀢𑁆𑀯𑀸 𑀦𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. ‘‘𑀲𑁂𑀝𑁆𑀞𑀺 𑀓𑀺𑀭 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀢𑀻’’𑀢𑀺 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄 𑀚𑀸𑀢𑁄. 𑀓𑀝𑀸𑀳𑀓𑁄 ‘‘𑀲𑁂𑀝𑁆𑀞𑀺 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀦 𑀲𑁄 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀫𑀁 𑀦𑀺𑀲𑁆𑀲𑀸𑀬𑁂𑀯𑀲𑁆𑀲 𑀆𑀕𑀫𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀲𑀘𑁂 𑀧𑀦𑀸𑀳𑀁 𑀧𑀮𑀸𑀬𑀺𑀲𑁆𑀲𑀸𑀫𑀺, 𑀧𑀼𑀦 𑀆𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀺 𑀧𑀦𑁂𑀲 𑀉𑀧𑀸𑀬𑁄. 𑀫𑀫 𑀲𑀸𑀫𑀺𑀓𑀲𑁆𑀲 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀤𑀸𑀲𑀓𑀫𑁆𑀫𑀁 𑀓𑀢𑁆𑀯𑀸 𑀢𑀫𑁂𑀯 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀫𑀚𑁆𑀛𑁂 𑀏𑀯𑀁 𑀪𑀸𑀲𑀢𑀺 ‘‘𑀅𑀜𑁆𑀜𑁂 𑀩𑀸𑀮𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀸𑀮𑀪𑀸𑀯𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀢𑁂𑀲𑀁 𑀪𑁄𑀚𑀦𑀯𑁂𑀮𑀸𑀬 𑀅𑀧𑀘𑀺𑀢𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀪𑀼𑀜𑁆𑀚𑀦𑁆𑀢𑀺, 𑀫𑀬𑀁 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀪𑁄𑀚𑀦𑀓𑀸𑀮𑁂 𑀧𑀝𑀺𑀕𑁆𑀕𑀳𑀁 𑀉𑀧𑀦𑁂𑀫, 𑀔𑁂𑀴𑀫𑀮𑁆𑀮𑀓𑀁 𑀉𑀧𑀦𑁂𑀫, 𑀪𑀸𑀚𑀦𑀸𑀦𑀺 𑀉𑀧𑀦𑁂𑀫, 𑀧𑀸𑀦𑀻𑀬𑀫𑁆𑀧𑀺 𑀩𑀻𑀚𑀦𑀺𑀫𑁆𑀧𑀺 𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑀸𑀫𑀸’’𑀢𑀺 𑀬𑀸𑀯 𑀲𑀭𑀻𑀭𑀯𑀴𑀜𑁆𑀚𑀦𑀓𑀸𑀮𑁂 𑀉𑀤𑀓𑀓𑀮𑀲𑀁 𑀆𑀤𑀸𑀬 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀕𑀫𑀦𑀸 𑀲𑀩𑁆𑀩𑀁 𑀤𑀸𑀲𑁂𑀳𑀺 𑀲𑀸𑀫𑀺𑀓𑀸𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀧𑀓𑀸𑀲𑁂𑀲𑀺.

𑀲𑁄 𑀏𑀯𑀁 𑀧𑀭𑀺𑀲𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀘𑁆𑀘𑀦𑁆𑀢𑀲𑀫𑀻𑀧𑀁 𑀆𑀕𑀢𑀓𑀸𑀮𑁂 𑀲𑀲𑀼𑀭𑀁 𑀅𑀯𑁄𑀘 ‘‘𑀢𑀸𑀢, 𑀫𑀫 𑀓𑀺𑀭 𑀧𑀺𑀢𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀘𑁆𑀙𑀢𑀺, 𑀢𑀼𑀫𑁆𑀳𑁂 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀣, 𑀅𑀳𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀣𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀓𑀝𑀸𑀳𑀓𑁄 𑀩𑀳𑀼𑀁 𑀧𑀡𑁆𑀡𑀸𑀓𑀸𑀭𑀫𑀸𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀧𑀸𑀢𑀭𑀸𑀲𑀓𑀸𑀮𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀭𑀻𑀭𑀯𑀴𑀜𑁆𑀚𑀦𑀢𑁆𑀣𑀸𑀬 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀧𑀸𑀯𑀺𑀲𑀺. 𑀓𑀝𑀸𑀳𑀓𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀮𑀲𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀤𑀓𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀲𑀸𑀫𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀬𑀢𑁆𑀢𑀓𑀁 𑀇𑀘𑁆𑀙𑀣, 𑀢𑀢𑁆𑀢𑀓𑀁 𑀥𑀦𑀁 𑀤𑀲𑁆𑀲𑀸𑀫𑀺, 𑀫𑀸 𑀫𑁂 𑀬𑀲𑀁 𑀅𑀦𑁆𑀢𑀭𑀥𑀸𑀧𑀬𑀺𑀢𑁆𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀯𑀢𑁆𑀢𑀲𑀫𑁆𑀧𑀤𑀸𑀬 𑀧𑀲𑀻𑀤𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀦𑀢𑁆𑀣𑀺 𑀢𑁂 𑀫𑀫 𑀲𑀦𑁆𑀢𑀺𑀓𑀸 𑀅𑀦𑁆𑀢𑀭𑀸𑀬𑁄’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀦𑀕𑀭𑀁 𑀧𑀸𑀯𑀺𑀲𑀺. 𑀫𑀳𑀦𑁆𑀢𑁄 𑀲𑀓𑁆𑀓𑀸𑀭𑁄 𑀅𑀳𑁄𑀲𑀺, 𑀓𑀝𑀸𑀳𑀓𑁄𑀧𑀺𑀲𑁆𑀲 𑀦𑀺𑀭𑀦𑁆𑀢𑀭𑀁 𑀤𑀸𑀲𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀅𑀣 𑀦𑀁 𑀏𑀓𑀸𑀬 𑀯𑁂𑀮𑀸𑀬 𑀲𑀼𑀔𑀦𑀺𑀲𑀺𑀦𑁆𑀦𑀁 𑀧𑀘𑁆𑀘𑀦𑁆𑀢𑀲𑁂𑀝𑁆𑀞𑀺 𑀆𑀳 ‘‘𑀫𑀳𑀸𑀲𑁂𑀝𑁆𑀞𑀺, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀧𑀡𑁆𑀡𑀁 𑀤𑀺𑀲𑁆𑀯𑀸𑀯 𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀤𑀸𑀭𑀺𑀓𑀸 𑀤𑀺𑀦𑁆𑀦𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀓𑀝𑀸𑀳𑀓𑀁 𑀧𑀼𑀢𑁆𑀢𑀫𑁂𑀯 𑀓𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀧𑀺𑀬𑀯𑀘𑀦𑀁 𑀯𑀢𑁆𑀯𑀸 𑀲𑁂𑀝𑁆𑀞𑀺𑀁 𑀢𑁄𑀲𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀝𑀸𑀳𑀓𑀲𑁆𑀲 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑁄 𑀲𑁂𑀝𑁆𑀞𑀺𑀥𑀻𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀏𑀳𑀺, 𑀅𑀫𑁆𑀫, 𑀲𑀻𑀲𑁂 𑀫𑁂 𑀊𑀓𑀸 𑀯𑀺𑀘𑀺𑀦𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀆𑀕𑀦𑁆𑀢𑁆𑀯𑀸 𑀊𑀓𑀸 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀧𑀺𑀬𑀯𑀘𑀦𑀁 𑀯𑀢𑁆𑀯𑀸 ‘‘𑀓𑀣𑁂𑀳𑀺, 𑀅𑀫𑁆𑀫, 𑀓𑀘𑁆𑀘𑀺 𑀢𑁂 𑀫𑀫 𑀧𑀼𑀢𑁆𑀢𑁄 𑀲𑀼𑀔𑀤𑀼𑀓𑁆𑀔𑁂𑀲𑀼 𑀅𑀧𑁆𑀧𑀫𑀢𑁆𑀢𑁄, 𑀉𑀪𑁄 𑀚𑀦𑀸 𑀲𑀫𑁆𑀫𑁄𑀤𑀫𑀸𑀦𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀸𑀢, 𑀫𑀳𑀸𑀲𑁂𑀝𑁆𑀞𑀺 𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀅𑀜𑁆𑀜𑁄 𑀤𑁄𑀲𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀆𑀳𑀸𑀭𑀁 𑀕𑀭𑀳𑀢𑀻’’𑀢𑀺. ‘‘𑀅𑀫𑁆𑀫, 𑀦𑀺𑀘𑁆𑀘𑀓𑀸𑀮𑀫𑁂𑀲 𑀤𑀼𑀓𑁆𑀔𑀲𑀻𑀮𑁄𑀯, 𑀅𑀧𑀺𑀘 𑀢𑁂 𑀅𑀳𑀁 𑀢𑀲𑁆𑀲 𑀫𑀼𑀔𑀩𑀦𑁆𑀥𑀦𑀫𑀦𑁆𑀢𑀁 𑀤𑀲𑁆𑀲𑀸𑀫𑀺, 𑀢𑀁 𑀢𑁆𑀯𑀁 𑀲𑀸𑀥𑀼𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀪𑁄𑀚𑀦𑀓𑀸𑀮𑁂 𑀕𑀭𑀳𑀦𑁆𑀢𑀲𑁆𑀲 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀼𑀭𑀢𑁄 𑀞𑀢𑁆𑀯𑀸 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀕𑀸𑀣𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀅𑀕𑀫𑀸𑀲𑀺. 𑀓𑀝𑀸𑀳𑀓𑁄𑀧𑀺 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀦𑀼𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀩𑀳𑀼𑀥𑀦𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑀺𑀭𑁂𑀓𑀫𑀸𑀦𑀻 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑁂𑀝𑁆𑀞𑀺𑀥𑀻𑀢𑀸𑀬 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀉𑀧𑀦𑁂𑀢𑁆𑀯𑀸 𑀓𑀝𑀘𑁆𑀙𑀼𑀁 𑀆𑀤𑀸𑀬 𑀧𑀭𑀺𑀯𑀺𑀲𑀦𑁆𑀢𑀺𑀬𑀸 𑀪𑀢𑁆𑀢𑀁 𑀕𑀭𑀳𑀺𑀢𑀼𑀁 𑀆𑀭𑀪𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦𑁂𑀯 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁫. ‘‘𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀅𑀦𑁆𑀯𑀸𑀕𑀦𑁆𑀢𑁆𑀯𑀸𑀦 𑀤𑀽𑀲𑁂𑀬𑁆𑀬, 𑀪𑀼𑀜𑁆𑀚 𑀪𑁄𑀕𑁂 𑀓𑀝𑀸𑀳𑀓𑀸’’𑀢𑀺.

𑀢𑀢𑁆𑀣 𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄𑀢𑀺 𑀬𑁄 𑀅𑀢𑁆𑀢𑀦𑁄 𑀚𑀸𑀢𑀺𑀪𑀽𑀫𑀺𑀢𑁄 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄 𑀳𑁄𑀢𑀺, 𑀬𑀢𑁆𑀣𑀲𑁆𑀲 𑀚𑀸𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀲𑁄 𑀩𑀳𑀼𑀫𑁆𑀧𑀺 𑀯𑀺𑀓𑀢𑁆𑀣𑁂𑀬𑁆𑀬, 𑀯𑀫𑁆𑀪𑀦𑀯𑀘𑀦𑀁 𑀯𑀜𑁆𑀘𑀦𑀯𑀘𑀦𑀁 𑀯𑀤𑁂𑀬𑁆𑀬. 𑀅𑀦𑁆𑀯𑀸𑀕𑀦𑁆𑀢𑁆𑀯𑀸𑀦 𑀤𑀽𑀲𑁂𑀬𑁆𑀬𑀸𑀢𑀺 𑀇𑀫𑀁 𑀢𑀸𑀯 𑀯𑀸𑀭𑀁 𑀲𑀸𑀫𑀺𑀓𑀲𑁆𑀲 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀤𑀸𑀲𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸 𑀓𑀲𑀸𑀳𑀺 𑀧𑀳𑀭𑀺𑀢𑁆𑀯𑀸 𑀧𑀺𑀝𑁆𑀞𑀺𑀘𑀫𑁆𑀫𑀼𑀧𑁆𑀧𑀸𑀝𑀦𑀢𑁄 𑀘 𑀮𑀓𑁆𑀔𑀡𑀸𑀳𑀦𑀦𑀢𑁄 𑀘 𑀫𑀼𑀢𑁆𑀢𑁄𑀲𑀺. 𑀲𑀘𑁂 𑀅𑀦𑀸𑀘𑀸𑀭𑀁 𑀓𑀭𑁄𑀲𑀺, 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀆𑀕𑀫𑀦𑀯𑀸𑀭𑁂 𑀢𑀯 𑀲𑀸𑀫𑀺𑀓𑁄 𑀅𑀦𑁆𑀯𑀸𑀕𑀦𑁆𑀢𑁆𑀯𑀸𑀦 𑀤𑀽𑀲𑁂𑀬𑁆𑀬, 𑀇𑀫𑀁 𑀕𑁂𑀳𑀁 𑀅𑀦𑀼𑀆𑀕𑀦𑁆𑀢𑁆𑀯𑀸 𑀓𑀲𑀸𑀪𑀺𑀖𑀸𑀢𑁂𑀳𑀺 𑀘𑁂𑀯 𑀮𑀓𑁆𑀔𑀡𑀸𑀳𑀦𑀦𑁂𑀦 𑀘 𑀚𑀸𑀢𑀺𑀧𑁆𑀧𑀓𑀸𑀲𑀦𑁂𑀦 𑀘 𑀢𑀁 𑀤𑀽𑀲𑁂𑀬𑁆𑀬 𑀉𑀧𑀳𑀦𑁂𑀬𑁆𑀬. 𑀢𑀲𑁆𑀫𑀸 𑀇𑀫𑀁 𑀅𑀦𑀸𑀘𑀸𑀭𑀁 𑀧𑀳𑀸𑀬 𑀪𑀼𑀜𑁆𑀚 𑀪𑁄𑀕𑁂 𑀓𑀝𑀸𑀳𑀓, 𑀫𑀸 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀤𑀸𑀲𑀪𑀸𑀯𑀁 𑀧𑀸𑀓𑀝𑀁 𑀓𑀸𑀭𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀻𑀢𑀺 𑀅𑀬𑀫𑁂𑀢𑁆𑀣 𑀲𑁂𑀝𑁆𑀞𑀺𑀦𑁄 𑀅𑀥𑀺𑀧𑁆𑀧𑀸𑀬𑁄.

𑀲𑁂𑀝𑁆𑀞𑀺𑀥𑀻𑀢𑀸 𑀧𑀦 𑀏𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑀻 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀩𑁆𑀬𑀜𑁆𑀚𑀦𑀫𑁂𑀯 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀓𑀝𑀸𑀳𑀓𑁄 ‘‘𑀅𑀤𑁆𑀥𑀸 𑀲𑁂𑀝𑁆𑀞𑀺𑀦𑀸 𑀫𑀫 𑀓𑀼𑀮𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀏𑀢𑀺𑀲𑁆𑀲𑀸 𑀲𑀩𑁆𑀩𑀁 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀪𑀢𑁆𑀢𑀁 𑀕𑀭𑀳𑀺𑀢𑀼𑀁 𑀦 𑀯𑀺𑀲𑀳𑀺, 𑀦𑀺𑀳𑀢𑀫𑀸𑀦𑁄 𑀬𑀣𑀸𑀮𑀤𑁆𑀥𑀁 𑀪𑀼𑀜𑁆𑀚𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀓𑀝𑀸𑀳𑀓𑁄 𑀯𑀺𑀓𑀢𑁆𑀣𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀝𑀸𑀳𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁨𑁬] 𑁬. 𑀅𑀲𑀺𑀮𑀓𑁆𑀔𑀡𑀚𑀸𑀢𑀓𑀯𑀡𑁆𑀡𑀦𑀸

𑀢𑀣𑁂𑀯𑁂𑀓𑀲𑁆𑀲 𑀓𑀮𑁆𑀬𑀸𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀓𑀫𑁆𑀫𑀸𑀭𑁂𑀳𑀺 𑀭𑀜𑁆𑀜𑁄 𑀅𑀲𑀻𑀦𑀁 𑀆𑀳𑀝𑀓𑀸𑀮𑁂 𑀅𑀲𑀺𑀁 𑀉𑀧𑀲𑀺𑀗𑁆𑀖𑀺𑀢𑁆𑀯𑀸 𑀅𑀲𑀺𑀮𑀓𑁆𑀔𑀡𑀁 𑀉𑀤𑀸𑀳𑀭𑀢𑀺. 𑀲𑁄 𑀬𑁂𑀲𑀁 𑀳𑀢𑁆𑀣𑀢𑁄 𑀮𑀸𑀪𑀁 𑀮𑀪𑀢𑀺, 𑀢𑁂𑀲𑀁 𑀅𑀲𑀺𑀁 ‘‘𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀫𑀗𑁆𑀕𑀮𑀲𑀁𑀬𑀼𑀢𑁆𑀢𑁄’’𑀢𑀺 𑀯𑀤𑀢𑀺. 𑀬𑁂𑀲𑀁 𑀳𑀢𑁆𑀣𑀢𑁄 𑀮𑀸𑀪𑀁 𑀦 𑀮𑀪𑀢𑀺, 𑀢𑁂𑀲𑀁 𑀅𑀲𑀺𑀁 ‘‘𑀅𑀯𑀮𑀓𑁆𑀔𑀡𑁄’’𑀢𑀺 𑀕𑀭𑀳𑀢𑀺. 𑀅𑀣𑁂𑀓𑁄 𑀓𑀫𑁆𑀫𑀸𑀭𑁄 𑀅𑀲𑀺𑀁 𑀓𑀢𑁆𑀯𑀸 𑀓𑁄𑀲𑀺𑀬𑀁 𑀲𑀼𑀔𑀼𑀫𑀁 𑀫𑀭𑀺𑀘𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀜𑁆𑀜𑁄 𑀅𑀲𑀺𑀁 𑀆𑀳𑀭𑀺. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀲𑀺𑀁 𑀯𑀻𑀫𑀁𑀲𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑀺𑀁 𑀆𑀓𑀟𑁆𑀠𑀺𑀢𑁆𑀯𑀸 𑀉𑀧𑀲𑀺𑀗𑁆𑀖𑀦𑁆𑀢𑀲𑁆𑀲 𑀫𑀭𑀺𑀘𑀘𑀼𑀡𑁆𑀡𑀸𑀦𑀺 𑀦𑀸𑀲𑀁 𑀧𑀯𑀺𑀲𑀺𑀢𑁆𑀯𑀸 𑀔𑀺𑀧𑀺𑀢𑀼𑀓𑀸𑀫𑀢𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀢𑀲𑁆𑀲 𑀔𑀺𑀧𑀦𑁆𑀢𑀲𑁆𑀲 𑀦𑀸𑀲𑀺𑀓𑀸 𑀅𑀲𑀺𑀥𑀸𑀭𑀸𑀬 𑀧𑀝𑀺𑀳𑀢𑀸 𑀤𑁆𑀯𑀺𑀥𑀸 𑀙𑀺𑀚𑁆𑀚𑀺. 𑀢𑀲𑁆𑀲𑁂𑀯𑀁 𑀦𑀸𑀲𑀺𑀓𑀸𑀬 𑀙𑀺𑀦𑁆𑀦𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀭𑀜𑁆𑀜𑁄 𑀓𑀺𑀭 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑁄 𑀅𑀲𑀺𑀁 𑀉𑀧𑀲𑀺𑀗𑁆𑀖𑀦𑁆𑀢𑁄 𑀦𑀸𑀲𑀺𑀓𑀁 𑀙𑀺𑀦𑁆𑀤𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀅𑀲𑀺𑀁 𑀉𑀧𑀲𑀺𑀗𑁆𑀖𑀦𑁆𑀢𑁄 𑀦𑀸𑀲𑀺𑀓𑀸𑀙𑁂𑀤𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀭𑀸𑀚𑀸 𑀧𑀦 𑀢𑀲𑁆𑀲 𑀯𑁂𑀚𑁆𑀚𑁂 𑀤𑀢𑁆𑀯𑀸 𑀦𑀸𑀲𑀺𑀓𑀸𑀓𑁄𑀝𑀺𑀁 𑀨𑀸𑀲𑀼𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀮𑀸𑀔𑀸𑀬 𑀧𑀝𑀺𑀦𑀸𑀲𑀺𑀓𑀁 𑀓𑀸𑀭𑁂𑀢𑁆𑀯𑀸 𑀧𑀼𑀦 𑀢𑀁 𑀉𑀧𑀝𑁆𑀞𑀸𑀓𑀫𑁂𑀯 𑀅𑀓𑀸𑀲𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀦 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀏𑀓𑀸 𑀥𑀻𑀢𑀸 𑀘𑁂𑀯 𑀪𑀸𑀕𑀺𑀦𑁂𑀬𑁆𑀬𑁄 𑀘 𑀅𑀳𑁂𑀲𑀼𑀁. 𑀲𑁄 𑀉𑀪𑁄𑀧𑀺 𑀢𑁂 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂𑀬𑁂𑀯 𑀯𑀟𑁆𑀠𑀸𑀧𑁂𑀲𑀺. 𑀢𑁂 𑀏𑀓𑀢𑁄 𑀯𑀟𑁆𑀠𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀭𑀸𑀚𑀸𑀧𑀺 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑁄𑀧𑀺 𑀇𑀫𑀲𑁆𑀲 𑀭𑀚𑁆𑀚𑀲𑁆𑀲 𑀲𑀸𑀫𑀺𑀓𑁄𑀯, 𑀥𑀻𑀢𑀭𑀁 𑀏𑀢𑀲𑁆𑀲𑁂𑀯 𑀤𑀢𑁆𑀯𑀸 𑀅𑀪𑀺𑀲𑁂𑀓𑀫𑀲𑁆𑀲 𑀓𑀭𑁄𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑁄 𑀲𑀩𑁆𑀩𑀣𑀸𑀧𑀺 𑀜𑀸𑀢𑀓𑁄𑀬𑁂𑀯, 𑀏𑀢𑀲𑁆𑀲 𑀅𑀜𑁆𑀜𑀁 𑀭𑀸𑀚𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀥𑀻𑀢𑀭𑀁 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀤𑀲𑁆𑀲𑀸𑀫𑀺, 𑀏𑀯𑀁 𑀦𑁄 𑀜𑀸𑀢𑀓𑀸 𑀩𑀳𑀽 𑀪𑀯𑀺𑀲𑁆𑀲𑀦𑁆𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀚𑁆𑀚𑀸𑀦𑀁 𑀫𑀬𑀫𑁂𑀯 𑀲𑀸𑀫𑀺𑀓𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 ‘‘𑀉𑀪𑁄𑀧𑁂𑀢𑁂 𑀯𑀺𑀲𑀼𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀪𑀸𑀕𑀺𑀦𑁂𑀬𑁆𑀬𑀁 𑀅𑀜𑁆𑀜𑀲𑁆𑀫𑀺𑀁 𑀦𑀺𑀯𑁂𑀲𑀦𑁂, 𑀥𑀻𑀢𑀭𑀁 𑀅𑀜𑁆𑀜𑀲𑁆𑀫𑀺𑀁 𑀯𑀸𑀲𑁂𑀲𑀺.

𑀢𑁂 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀪𑀸𑀯𑀁 𑀧𑀢𑁆𑀢𑀸 𑀅𑀢𑀺𑀯𑀺𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀭𑀸𑀚𑀓𑀼𑀫𑀸𑀭𑁄 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀫𑀸𑀢𑀼𑀮𑀥𑀻𑀢𑀭𑀁 𑀭𑀸𑀚𑀕𑁂𑀳𑀸 𑀦𑀻𑀳𑀭𑀸𑀧𑁂𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀫𑀳𑀸𑀇𑀓𑁆𑀔𑀡𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀤𑀢𑁆𑀯𑀸 ‘‘𑀓𑀺𑀁 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀫𑁆𑀫, 𑀢𑀬𑀺 𑀓𑀭𑁄𑀦𑁆𑀢𑀺𑀬𑀸 𑀅𑀦𑀺𑀧𑁆𑀨𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀯𑀢𑁆𑀯𑀸 𑀬𑀣𑀸 𑀫𑀫 𑀫𑀸𑀢𑀼𑀮𑁄 𑀭𑀸𑀚𑀸 𑀥𑀻𑀢𑀭𑀁 𑀅𑀦𑁆𑀢𑁄𑀕𑁂𑀳𑀸 𑀦𑀻𑀳𑀭𑀸𑀧𑁂𑀢𑀺, 𑀢𑀣𑀸 𑀓𑀭𑁄𑀳𑀻’’𑀢𑀺 𑀆𑀳. 𑀲𑀸𑀥𑀼, 𑀲𑀸𑀫𑀺, 𑀅𑀳𑀁 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀸𑀫𑀺 ‘‘𑀤𑁂𑀯, 𑀭𑀸𑀚𑀥𑀻𑀢𑀸𑀬 𑀉𑀧𑀭𑀺 𑀓𑀸𑀴𑀓𑀡𑁆𑀡𑀻 𑀅𑀢𑁆𑀣𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄𑀧𑀺 𑀦𑀢𑁆𑀣𑀺, 𑀅𑀳𑀁 𑀭𑀸𑀚𑀥𑀻𑀢𑀭𑀁 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀩𑀳𑀼𑀆𑀯𑀼𑀥𑀳𑀢𑁆𑀣𑁂 𑀧𑀼𑀭𑀺𑀲𑁂 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀫𑀡𑁆𑀟𑀮𑀧𑀻𑀞𑀺𑀓𑀸𑀬 𑀳𑁂𑀝𑁆𑀞𑀸𑀫𑀜𑁆𑀘𑁂 𑀫𑀢𑀫𑀦𑀼𑀲𑁆𑀲𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀉𑀧𑀭𑀺𑀫𑀜𑁆𑀘𑁂 𑀭𑀸𑀚𑀥𑀻𑀢𑀭𑀁 𑀞𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑀖𑀝𑀸𑀦𑀁 𑀅𑀝𑁆𑀞𑀼𑀢𑁆𑀢𑀭𑀲𑀢𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀓𑀸𑀴𑀓𑀡𑁆𑀡𑀺𑀁 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀼𑀲𑀸𑀦𑀁 𑀦𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀢𑀢𑁆𑀣 𑀕𑀫𑀦𑀤𑀺𑀯𑀲𑁂 𑀅𑀫𑁆𑀳𑁂𑀳𑀺 𑀧𑀼𑀭𑁂𑀢𑀭𑀫𑁂𑀯 𑀣𑁄𑀓𑀁 𑀫𑀭𑀺𑀘𑀘𑀼𑀡𑁆𑀡𑀁 𑀆𑀤𑀸𑀬 𑀆𑀯𑀼𑀥𑀳𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀭𑀣𑀁 𑀲𑀼𑀲𑀸𑀦𑀤𑁆𑀯𑀸𑀭𑁂 𑀏𑀓𑀧𑀤𑁂𑀲𑁂 𑀞𑀧𑁂𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑁂 𑀫𑀦𑀼𑀲𑁆𑀲𑁂 𑀲𑀼𑀲𑀸𑀦𑀯𑀦𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀲𑀼𑀲𑀸𑀦𑁂 𑀫𑀡𑁆𑀟𑀮𑀧𑀻𑀞𑀺𑀓𑀁 𑀧𑀲𑀸𑀭𑁂𑀢𑁆𑀯𑀸 𑀫𑀢𑀓𑁄 𑀯𑀺𑀬 𑀧𑀝𑀺𑀓𑀼𑀚𑁆𑀚𑁄 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚. 𑀅𑀳𑀁 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀢𑀯 𑀉𑀧𑀭𑀺 𑀫𑀜𑁆𑀘𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀘𑁂 𑀲𑀬𑀸𑀧𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀢𑀲𑁆𑀫𑀺𑀁 𑀔𑀡𑁂 𑀫𑀭𑀺𑀘𑀘𑀼𑀡𑁆𑀡𑀁 𑀦𑀸𑀲𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀔𑀺𑀧𑁂𑀬𑁆𑀬𑀸𑀲𑀺. 𑀢𑀬𑀸 𑀔𑀺𑀧𑀺𑀢𑀓𑀸𑀮𑁂 𑀫𑀬𑀁 𑀭𑀸𑀚𑀥𑀻𑀢𑀭𑀁 𑀧𑀳𑀸𑀬 𑀧𑀮𑀸𑀬𑀺𑀲𑁆𑀲𑀸𑀫. 𑀅𑀣 𑀢𑁆𑀯𑀁 𑀭𑀸𑀚𑀥𑀻𑀢𑀭𑀁 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀢𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺. 𑀲𑁄 ‘‘𑀲𑀸𑀥𑀼 𑀲𑀼𑀦𑁆𑀤𑀭𑁄 𑀉𑀧𑀸𑀬𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀲𑀸𑀧𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀭𑀸𑀚𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀥𑀻𑀢𑀸𑀬𑀧𑀺 𑀢𑀁 𑀅𑀦𑁆𑀢𑀭𑀁 𑀆𑀘𑀺𑀓𑁆𑀔𑀺, 𑀲𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀓𑀼𑀫𑀸𑀭𑀲𑁆𑀲 𑀲𑀜𑁆𑀜𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀼𑀲𑀸𑀦𑀁 𑀕𑀘𑁆𑀙𑀦𑁆𑀢𑀻 𑀆𑀭𑀓𑁆𑀔𑀫𑀦𑀼𑀲𑁆𑀲𑀸𑀦𑀁 𑀪𑀬𑀚𑀦𑀦𑀢𑁆𑀣𑀁 𑀆𑀳 𑁋 ‘‘𑀫𑀬𑀸 𑀭𑀸𑀚𑀥𑀻𑀢𑀸𑀬 𑀫𑀜𑁆𑀘𑁂 𑀞𑀧𑀺𑀢𑀓𑀸𑀮𑁂 𑀳𑁂𑀝𑁆𑀞𑀸𑀫𑀜𑁆𑀘𑁂 𑀫𑀢𑀧𑀼𑀭𑀺𑀲𑁄 𑀔𑀺𑀧𑀺𑀲𑁆𑀲𑀢𑀺, 𑀔𑀺𑀧𑀺𑀢𑁆𑀯𑀸 𑀘 𑀳𑁂𑀝𑁆𑀞𑀸𑀫𑀜𑁆𑀘𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀁 𑀧𑀞𑀫𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀢𑀫𑁂𑀯 𑀕𑀳𑁂𑀲𑁆𑀲𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀪𑀯𑁂𑀬𑁆𑀬𑀸𑀣𑀸’’𑀢𑀺. 𑀭𑀸𑀚𑀓𑀼𑀫𑀸𑀭𑁄 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑁆𑀣 𑀦𑀺𑀧𑀚𑁆𑀚𑀺. 𑀫𑀳𑀸𑀇𑀓𑁆𑀔𑀡𑀺𑀓𑀸 𑀭𑀸𑀚𑀥𑀻𑀢𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀡𑁆𑀟𑀮𑀧𑀻𑀞𑀺𑀓𑀸𑀞𑀸𑀦𑀁 𑀕𑀘𑁆𑀙𑀦𑁆𑀢𑀻 ‘‘𑀫𑀸 𑀪𑀸𑀬𑀻’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀫𑀜𑁆𑀘𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀼𑀫𑀸𑀭𑁄 𑀫𑀭𑀺𑀘𑀘𑀼𑀡𑁆𑀡𑀁 𑀦𑀸𑀲𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀺. 𑀢𑁂𑀦 𑀔𑀺𑀧𑀺𑀢𑀫𑀢𑁆𑀢𑁂𑀬𑁂𑀯 𑀫𑀳𑀸𑀇𑀓𑁆𑀔𑀡𑀺𑀓𑀸 𑀭𑀸𑀚𑀥𑀻𑀢𑀭𑀁 𑀧𑀳𑀸𑀬 𑀫𑀳𑀸𑀭𑀯𑀁 𑀭𑀯𑀫𑀸𑀦𑀸 𑀲𑀩𑁆𑀩𑀧𑀞𑀫𑀁 𑀧𑀮𑀸𑀬𑀺, 𑀢𑀲𑁆𑀲𑀸 𑀧𑀮𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑁄𑀧𑀺 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺, 𑀕𑀳𑀺𑀢𑀕𑀳𑀺𑀢𑀸𑀦𑀺 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀲𑀩𑁆𑀩𑁂 𑀧𑀮𑀸𑀬𑀺𑀁𑀲𑀼. 𑀓𑀼𑀫𑀸𑀭𑁄 𑀬𑀣𑀸𑀲𑀫𑁆𑀫𑀦𑁆𑀢𑀺𑀢𑀁 𑀲𑀩𑁆𑀩𑀁 𑀓𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺.

𑀇𑀓𑁆𑀔𑀡𑀺𑀓𑀸 𑀕𑀦𑁆𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀧𑀓𑀢𑀺𑀬𑀸𑀧𑀺 𑀲𑀸 𑀫𑀬𑀸 𑀢𑀲𑁆𑀲𑁂𑀯𑀢𑁆𑀣𑀸𑀬 𑀧𑀼𑀝𑁆𑀞𑀸, 𑀧𑀸𑀬𑀸𑀲𑁂 𑀙𑀟𑁆𑀟𑀺𑀢𑀲𑀧𑁆𑀧𑀺 𑀯𑀺𑀬 𑀚𑀸𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀥𑀻𑀢𑀭𑀁 𑀫𑀳𑀸𑀤𑁂𑀯𑀺𑀁 𑀓𑀸𑀭𑁂𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀫𑀸𑀦𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄𑀧𑀺 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑁄 𑀢𑀲𑁆𑀲𑁂𑀯 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀭𑀸𑀚𑀽𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀧𑀝𑀺𑀲𑀽𑀭𑀺𑀬𑀁 𑀞𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀲𑁆𑀲 𑀮𑀸𑀔𑀸 𑀯𑀺𑀮𑀻𑀬𑀺, 𑀧𑀝𑀺𑀦𑀸𑀲𑀺𑀓𑀸 𑀪𑀽𑀫𑀺𑀬𑀁 𑀧𑀢𑀺. 𑀲𑁄 𑀮𑀚𑁆𑀚𑀸𑀬 𑀅𑀥𑁄𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀭𑀺𑀳𑀲𑀦𑁆𑀢𑁄 ‘‘𑀆𑀘𑀭𑀺𑀬, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀔𑀺𑀧𑀺𑀢𑀁 𑀦𑀸𑀫 𑀏𑀓𑀲𑁆𑀲 𑀓𑀮𑁆𑀬𑀸𑀡𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀸𑀧𑀓𑀁. 𑀢𑀼𑀫𑁆𑀳𑁂𑀳𑀺 𑀔𑀺𑀧𑀺𑀢𑁂𑀦 𑀦𑀸𑀲𑀺𑀓𑀸 𑀙𑀺𑀚𑁆𑀚𑀻𑀬𑀺𑀢𑁆𑀣, 𑀫𑀬𑀁 𑀧𑀦 𑀔𑀺𑀧𑀦𑁆𑀢𑀸 𑀫𑀸𑀢𑀼𑀮𑀥𑀻𑀢𑀭𑀁 𑀮𑀪𑀺𑀢𑁆𑀯𑀸 𑀭𑀚𑁆𑀚𑀁 𑀧𑀸𑀧𑀼𑀡𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁬. ‘‘𑀢𑀣𑁂𑀯𑁂𑀓𑀲𑁆𑀲 𑀓𑀮𑁆𑀬𑀸𑀡𑀁, 𑀢𑀣𑁂𑀯𑁂𑀓𑀲𑁆𑀲 𑀧𑀸𑀧𑀓𑀁;

𑀢𑀲𑁆𑀫𑀸 𑀲𑀩𑁆𑀩𑀁 𑀦 𑀓𑀮𑁆𑀬𑀸𑀡𑀁, 𑀲𑀩𑁆𑀩𑀁 𑀯𑀸𑀧𑀺 𑀦 𑀧𑀸𑀧𑀓’’𑀦𑁆𑀢𑀺.

𑀢𑀢𑁆𑀣 𑀢𑀣𑁂𑀯𑁂𑀓𑀲𑁆𑀲𑀸𑀢𑀺 𑀢𑀤𑁂𑀯𑁂𑀓𑀲𑁆𑀲. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀇𑀢𑀺 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀢𑀁 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀮𑁄𑀓𑀲𑀫𑁆𑀫𑀢𑀸𑀦𑀁 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀅𑀦𑁂𑀓𑀁𑀲𑀺𑀓𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑁄𑀯 𑀏𑀢𑀭𑀳𑀺 𑀅𑀲𑀺𑀮𑀓𑁆𑀔𑀡𑀧𑀸𑀞𑀓𑁄, 𑀪𑀸𑀕𑀺𑀦𑁂𑀬𑁆𑀬𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀺𑀮𑀓𑁆𑀔𑀡𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁨𑁭] 𑁭. 𑀓𑀮𑀡𑁆𑀟𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀢𑁂 𑀤𑁂𑀲𑀸 𑀢𑀸𑀦𑀺 𑀯𑀢𑁆𑀣𑀽𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀺𑀓𑀢𑁆𑀣𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀣 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀓𑀝𑀸𑀳𑀓𑀚𑀸𑀢𑀓𑀲𑀤𑀺𑀲𑀸𑀦𑁂𑀯.

𑀇𑀥 𑀧𑀦𑁂𑀲 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀤𑀸𑀲𑁄 𑀓𑀮𑀡𑁆𑀟𑀼𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀧𑀮𑀸𑀬𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀯𑀸𑀲𑀺𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀲𑀦𑀓𑀸𑀮𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸𑀧𑀺 𑀢𑀲𑁆𑀲 𑀕𑀢𑀝𑁆𑀞𑀸𑀦𑀁 𑀅𑀚𑀸𑀦𑀦𑁆𑀢𑁄 ‘‘𑀕𑀘𑁆𑀙, 𑀓𑀮𑀡𑁆𑀟𑀼𑀓𑀁 𑀧𑀭𑀺𑀬𑁂𑀲𑀸’’𑀢𑀺 𑀅𑀢𑁆𑀢𑀦𑀸 𑀧𑀼𑀝𑁆𑀞𑀁 𑀲𑀼𑀓𑀧𑁄𑀢𑀓𑀁 𑀧𑁂𑀲𑁂𑀲𑀺. 𑀲𑀼𑀓𑀧𑁄𑀢𑀓𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀢𑀁 𑀦𑀕𑀭𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀓𑀮𑀡𑁆𑀟𑀼𑀓𑁄 𑀦𑀤𑀻𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘𑁂𑀯 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀤𑁆𑀥𑀺𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀉𑀤𑀓𑁂 𑀓𑀻𑀴𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀦𑀤𑀻𑀓𑀻𑀴𑀁 𑀓𑀻𑀴𑀦𑁆𑀢𑀸 𑀇𑀲𑁆𑀲𑀭𑀚𑀸𑀢𑀺𑀓𑀸 𑀢𑀺𑀔𑀺𑀡𑀪𑁂𑀲𑀚𑁆𑀚𑀧𑀭𑀺𑀪𑀸𑀯𑀺𑀢𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀤𑀺𑀯𑀲𑀪𑀸𑀕𑀫𑁆𑀧𑀺 𑀉𑀤𑀓𑁂 𑀓𑀻𑀴𑀦𑁆𑀢𑀸𑀦𑀁 𑀲𑀻𑀢𑀁 𑀦 𑀩𑀸𑀥𑀢𑀺. 𑀅𑀬𑀁 𑀧𑀦 𑀓𑀮𑀡𑁆𑀟𑀼𑀓𑁄 𑀔𑀻𑀭𑀕𑀡𑁆𑀟𑀽𑀲𑀁 𑀕𑀳𑁂𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀢𑀁 𑀔𑀻𑀭𑀁 𑀦𑀼𑀝𑁆𑀞𑀼𑀪𑀢𑀺. 𑀦𑀼𑀝𑁆𑀞𑀼𑀪𑀦𑁆𑀢𑁄𑀧𑀺 𑀉𑀤𑀓𑁂 𑀅𑀦𑀼𑀝𑁆𑀞𑀼𑀪𑀺𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀻𑀲𑁂 𑀦𑀼𑀝𑁆𑀞𑀼𑀪𑀢𑀺. 𑀲𑀼𑀓𑀧𑁄𑀢𑀓𑁄𑀧𑀺 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀏𑀓𑀺𑀲𑁆𑀲𑀸 𑀉𑀤𑀼𑀫𑁆𑀩𑀭𑀲𑀸𑀔𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀓𑀮𑀡𑁆𑀟𑀼𑀓𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀻𑀲𑁂 𑀦𑀼𑀝𑁆𑀞𑀼𑀪𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀭𑁂, 𑀓𑀮𑀡𑁆𑀟𑀼𑀓 𑀤𑀸𑀲, 𑀅𑀢𑁆𑀢𑀦𑁄 𑀚𑀸𑀢𑀺𑀜𑁆𑀘 𑀯𑀲𑀦𑀝𑁆𑀞𑀸𑀦𑀜𑁆𑀘 𑀅𑀦𑀼𑀲𑁆𑀲𑀭, 𑀔𑀻𑀭𑀕𑀡𑁆𑀟𑀽𑀲𑀁 𑀕𑀳𑁂𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀬 𑀲𑀼𑀔𑀲𑀁𑀯𑀟𑁆𑀠𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀻𑀲𑁂 𑀫𑀸 𑀦𑀼𑀝𑁆𑀞𑀼𑀪𑀺, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁭. ‘‘𑀢𑁂 𑀤𑁂𑀲𑀸 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀅𑀳𑀜𑁆𑀘 𑀯𑀦𑀕𑁄𑀘𑀭𑁄;

𑀅𑀦𑀼𑀯𑀺𑀘𑁆𑀘 𑀔𑁄 𑀢𑀁 𑀕𑀡𑁆𑀳𑁂𑀬𑁆𑀬𑀼𑀁, 𑀧𑀺𑀯 𑀔𑀻𑀭𑀁 𑀓𑀮𑀡𑁆𑀟𑀼𑀓𑀸’’𑀢𑀺.

𑀢𑀢𑁆𑀣 𑀢𑁂 𑀤𑁂𑀲𑀸 𑀢𑀸𑀦𑀺 𑀯𑀢𑁆𑀣𑀽𑀦𑀻𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀢𑁆𑀣 𑀢𑁂 𑀯𑀲𑀺𑀢𑀁, 𑀦 𑀢𑁂 𑀔𑀢𑁆𑀢𑀺𑀬𑀥𑀻𑀢𑀸𑀤𑀻𑀦𑀁 𑀓𑀼𑀘𑁆𑀙𑀺𑀤𑁂𑀲𑀸. 𑀬𑀢𑁆𑀣 𑀯𑀸𑀲𑀺 𑀧𑀢𑀺𑀝𑁆𑀞𑀺𑀢𑁄, 𑀦 𑀢𑀸𑀦𑀺 𑀔𑀢𑁆𑀢𑀺𑀬𑀥𑀻𑀢𑀸𑀤𑀻𑀦𑀁 𑀓𑀼𑀘𑁆𑀙𑀺𑀯𑀢𑁆𑀣𑀽𑀦𑀺. 𑀅𑀣 𑀔𑁄 𑀤𑀸𑀲𑀺𑀓𑀼𑀘𑁆𑀙𑀺𑀬𑀁 𑀢𑁆𑀯𑀁 𑀯𑀲𑀺 𑀘𑁂𑀯 𑀧𑀢𑀺𑀝𑁆𑀞𑀺𑀢𑁄 𑀘𑀸𑀢𑀺. 𑀅𑀳𑀜𑁆𑀘 𑀯𑀦𑀕𑁄𑀘𑀭𑁄𑀢𑀺 𑀢𑀺𑀭𑀘𑁆𑀙𑀸𑀦𑀪𑀽𑀢𑁄𑀧𑀺 𑀏𑀢𑀫𑀢𑁆𑀣𑀁 𑀚𑀸𑀦𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀅𑀦𑀼𑀯𑀺𑀘𑁆𑀘 𑀔𑁄 𑀢𑀁 𑀕𑀡𑁆𑀳𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀅𑀦𑀸𑀘𑀸𑀭𑀁 𑀘𑀭𑀫𑀸𑀦𑀁 𑀫𑀬𑀸 𑀕𑀦𑁆𑀢𑁆𑀯𑀸 𑀆𑀭𑁄𑀘𑀺𑀢𑁂 𑀅𑀦𑀼𑀯𑀺𑀘𑁆𑀘 𑀚𑀸𑀦𑀺𑀢𑁆𑀯𑀸 𑀢𑀯 𑀲𑀸𑀫𑀺𑀓𑀸 𑀢𑀸𑀴𑁂𑀢𑁆𑀯𑀸 𑀘𑁂𑀯 𑀮𑀓𑁆𑀔𑀡𑀸𑀳𑀢𑀜𑁆𑀘 𑀓𑀢𑁆𑀯𑀸 𑀢𑀁 𑀕𑀡𑁆𑀳𑁂𑀬𑁆𑀬𑀼𑀁, 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀜𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀻𑀲𑁂 𑀅𑀦𑀼𑀝𑁆𑀞𑀼𑀪𑀺𑀢𑁆𑀯𑀸 𑀧𑀺𑀯 𑀔𑀻𑀭𑀁. 𑀓𑀮𑀡𑁆𑀟𑀼𑀓𑀸𑀢𑀺 𑀢𑀁 𑀦𑀸𑀫𑁂𑀦𑀸𑀮𑀧𑀢𑀺.

𑀓𑀮𑀡𑁆𑀟𑀼𑀓𑁄𑀧𑀺 𑀲𑀼𑀯𑀧𑁄𑀢𑀓𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀫𑀁 𑀧𑀸𑀓𑀝𑀁 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 ‘‘𑀏𑀳𑀺, 𑀲𑀸𑀫𑀺, 𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀆𑀳. 𑀲𑀼𑀓𑁄 ‘‘𑀦 𑀏𑀲 𑀫𑀁 𑀳𑀺𑀢𑀓𑀸𑀫𑀢𑀸𑀬 𑀧𑀓𑁆𑀓𑁄𑀲𑀢𑀺, 𑀕𑀻𑀯𑀁 𑀧𑀦 𑀫𑁂 𑀯𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸𑀯 ‘‘𑀦 𑀫𑁂 𑀢𑀬𑀸 𑀅𑀢𑁆𑀣𑁄’’𑀢𑀺 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀬𑀣𑀸𑀤𑀺𑀝𑁆𑀞𑀁 𑀲𑁂𑀝𑁆𑀞𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀲𑁂𑀝𑁆𑀞𑀺 ‘‘𑀅𑀬𑀼𑀢𑁆𑀢𑀁 𑀢𑁂𑀦 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀡𑀁 𑀓𑀸𑀭𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀦𑀁 𑀆𑀦𑁂𑀢𑁆𑀯𑀸 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀮𑀡𑁆𑀟𑀼𑀓𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀮𑀡𑁆𑀟𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁨𑁮] 𑁮. 𑀩𑀺𑀴𑀸𑀭𑀯𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀯𑁂 𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 𑀢𑀲𑁆𑀲 𑀓𑀼𑀳𑀓𑀪𑀸𑀯𑁂 𑀆𑀭𑁄𑀘𑀺𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀽𑀲𑀺𑀓𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀫𑀳𑀸𑀲𑀭𑀻𑀭𑁄 𑀲𑀽𑀓𑀭𑀘𑁆𑀙𑀸𑀧𑀓𑀲𑀤𑀺𑀲𑁄 𑀳𑀼𑀢𑁆𑀯𑀸 𑀅𑀦𑁂𑀓𑀲𑀢𑀫𑀽𑀲𑀺𑀓𑀸𑀳𑀺 𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀅𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀢𑀁 𑀫𑀽𑀲𑀺𑀓𑀬𑀽𑀣𑀁 𑀤𑀺𑀲𑁆𑀯𑀸 ‘‘𑀇𑀫𑀸 𑀫𑀽𑀲𑀺𑀓𑀸 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀽𑀲𑀺𑀓𑀸𑀦𑀁 𑀆𑀲𑀬𑀲𑁆𑀲 𑀅𑀯𑀺𑀤𑀽𑀭𑁂 𑀲𑀽𑀭𑀺𑀬𑀸𑀪𑀺𑀫𑀼𑀔𑁄 𑀯𑀸𑀢𑀁 𑀧𑀺𑀯𑀦𑁆𑀢𑁄 𑀏𑀓𑁂𑀦 𑀧𑀸𑀤𑁂𑀦 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀸𑀬 𑀘𑀭𑀫𑀸𑀦𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀮𑀯𑀸 𑀏𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑁆𑀯𑀁 𑀓𑁄 𑀦𑀸𑀫𑁄’’𑀢𑀺 𑀧𑀼𑀘𑁆𑀙𑀺. ‘‘𑀥𑀫𑁆𑀫𑀺𑀓𑁄 𑀦𑀸𑀫𑀸’’𑀢𑀺. ‘‘𑀘𑀢𑁆𑀢𑀸𑀭𑁄 𑀧𑀸𑀤𑁂 𑀪𑀽𑀫𑀺𑀬𑀁 𑀅𑀞𑀧𑁂𑀢𑁆𑀯𑀸 𑀓𑀲𑁆𑀫𑀸 𑀏𑀓𑁂𑀦𑁂𑀯 𑀞𑀺𑀢𑁄𑀲𑀻’’𑀢𑀺. ‘‘𑀫𑀬𑀺 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀧𑀣𑀯𑀺𑀬𑀁 𑀞𑀧𑁂𑀦𑁆𑀢𑁂 𑀧𑀣𑀯𑀻 𑀯𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀢𑀺𑀝𑁆𑀞𑀸𑀫𑀻’’𑀢𑀺. ‘‘𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀓𑀲𑁆𑀫𑀸 𑀞𑀺𑀢𑁄𑀲𑀻’’𑀢𑀺? ‘‘𑀫𑀬𑀁 𑀅𑀜𑁆𑀜𑀁 𑀦 𑀪𑀓𑁆𑀔𑀬𑀸𑀫, 𑀯𑀸𑀢𑀫𑁂𑀯 𑀪𑀓𑁆𑀔𑀬𑀸𑀫𑀸’’𑀢𑀺. ‘‘𑀅𑀣 𑀓𑀲𑁆𑀫𑀸 𑀲𑀽𑀭𑀺𑀬𑀸𑀪𑀺𑀫𑀼𑀔𑁄 𑀢𑀺𑀝𑁆𑀞𑀲𑀻’’𑀢𑀺? ‘‘𑀲𑀽𑀭𑀺𑀬𑀁 𑀦𑀫𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀻𑀮𑀯𑀸 𑀏𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀫𑀽𑀲𑀺𑀓𑀕𑀡𑁂𑀦 𑀲𑀤𑁆𑀥𑀺𑀁 𑀲𑀸𑀬𑀁 𑀧𑀸𑀢𑀁 𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺.

𑀅𑀣𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀫𑀦𑀓𑀸𑀮𑁂 𑀲𑀺𑀗𑁆𑀕𑀸𑀮𑁄 𑀲𑀩𑁆𑀩𑀧𑀘𑁆𑀙𑀺𑀫𑀁 𑀫𑀽𑀲𑀺𑀓𑀁 𑀕𑀳𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀫𑀼𑀔𑀁 𑀧𑀼𑀜𑁆𑀙𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀫𑀽𑀲𑀺𑀓𑀕𑀡𑁄 𑀢𑀦𑀼𑀓𑁄 𑀚𑀸𑀢𑁄. 𑀫𑀽𑀲𑀺𑀓𑀸 ‘‘𑀧𑀼𑀩𑁆𑀩𑁂 𑀅𑀫𑁆𑀳𑀸𑀓𑀁 𑀅𑀬𑀁 𑀆𑀲𑀬𑁄 𑀦𑀧𑁆𑀧𑀳𑁄𑀢𑀺, 𑀦𑀺𑀭𑀦𑁆𑀢𑀭𑀸 𑀢𑀺𑀝𑁆𑀞𑀸𑀫. 𑀇𑀤𑀸𑀦𑀺 𑀲𑀺𑀣𑀺𑀮𑀸, 𑀏𑀯𑀫𑁆𑀧𑀺 𑀆𑀲𑀬𑁄 𑀦 𑀧𑀽𑀭𑀢𑁂𑀯, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀫𑀼𑀲𑀺𑀓𑀸 𑀢𑀦𑀼𑀢𑁆𑀢𑀁 𑀕𑀢𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀲𑀺𑀗𑁆𑀕𑀸𑀮𑁂 𑀆𑀲𑀗𑁆𑀓𑀁 𑀞𑀧𑁂𑀢𑁆𑀯𑀸 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀧𑀝𑁆𑀞𑀸𑀦𑀓𑀸𑀮𑁂 𑀲𑁂𑀲𑀫𑀽𑀲𑀺𑀓𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀬𑀁 𑀧𑀘𑁆𑀙𑀢𑁄 𑀅𑀳𑁄𑀲𑀺. 𑀲𑀺𑀗𑁆𑀕𑀸𑀮𑁄 𑀢𑀲𑁆𑀲 𑀉𑀧𑀭𑀺 𑀧𑀓𑁆𑀔𑀦𑁆𑀤𑀺, 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀕𑀳𑀡𑀢𑁆𑀣𑀸𑀬 𑀢𑀁 𑀧𑀓𑁆𑀔𑀦𑁆𑀤𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀪𑁄 𑀲𑀺𑀗𑁆𑀕𑀸𑀮, 𑀇𑀤𑀁 𑀢𑁂 𑀯𑀢𑀲𑀫𑀸𑀤𑀸𑀦𑀁 𑀦 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬, 𑀧𑀭𑁂𑀲𑀁 𑀧𑀦 𑀯𑀺𑀳𑀺𑀁𑀲𑀦𑀢𑁆𑀣𑀸𑀬 𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸 𑀘𑀭𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁮. ‘‘𑀬𑁄 𑀯𑁂 𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸, 𑀦𑀺𑀕𑀽𑀴𑁆𑀳𑁄 𑀧𑀸𑀧𑀫𑀸𑀘𑀭𑁂;

𑀯𑀺𑀲𑁆𑀲𑀸𑀲𑀬𑀺𑀢𑁆𑀯𑀸 𑀪𑀽𑀢𑀸𑀦𑀺, 𑀩𑀺𑀴𑀸𑀭𑀁 𑀦𑀸𑀫 𑀢𑀁 𑀯𑀢’’𑀦𑁆𑀢𑀺.

𑀢𑀢𑁆𑀣 𑀬𑁄 𑀯𑁂𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺𑀤𑁂𑀯. 𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀥𑀚𑀁 𑀓𑀭𑀺𑀢𑁆𑀯𑀸, 𑀓𑀽𑀝𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀉𑀲𑁆𑀲𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀸𑀲𑀬𑀺𑀢𑁆𑀯𑀸𑀢𑀺 ‘‘𑀲𑀻𑀮𑀯𑀸 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀲𑀜𑁆𑀚𑀸𑀢𑀯𑀺𑀲𑁆𑀲𑀸𑀲𑀸𑀦𑀺 𑀓𑀢𑁆𑀯𑀸. 𑀩𑀺𑀴𑀸𑀭𑀁 𑀦𑀸𑀫 𑀢𑀁 𑀯𑀢𑀦𑁆𑀢𑀺 𑀢𑀁 𑀏𑀯𑀁 𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸 𑀭𑀳𑁄 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀯𑀢𑀁 𑀓𑁂𑀭𑀸𑀝𑀺𑀓𑀯𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀫𑀽𑀲𑀺𑀓𑀭𑀸𑀚𑀸 𑀓𑀣𑁂𑀦𑁆𑀢𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀲 𑀕𑀻𑀯𑀸𑀬𑀁 𑀧𑀢𑀺𑀢𑁆𑀯𑀸 𑀳𑀦𑀼𑀓𑀲𑁆𑀲 𑀳𑁂𑀝𑁆𑀞𑀸 𑀅𑀦𑁆𑀢𑁄𑀕𑀮𑀦𑀸𑀴𑀺𑀬𑀁 𑀟𑀁𑀲𑀺𑀢𑁆𑀯𑀸 𑀕𑀮𑀦𑀸𑀴𑀺𑀁 𑀨𑀸𑀮𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀫𑀽𑀲𑀺𑀓𑀕𑀡𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀺𑀗𑁆𑀕𑀸𑀮𑀁 ‘‘𑀫𑀼𑀭𑀼 𑀫𑀼𑀭𑀽’’𑀢𑀺 𑀔𑀸𑀤𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀞𑀫𑀸𑀕𑀢𑀸𑀯 𑀓𑀺𑀭𑀲𑁆𑀲 𑀫𑀁𑀲𑀁 𑀮𑀪𑀺𑀁𑀲𑀼, 𑀧𑀘𑁆𑀙𑀸 𑀆𑀕𑀢𑀸 𑀦 𑀮𑀪𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀽𑀲𑀺𑀓𑀕𑀡𑁄 𑀦𑀺𑀩𑁆𑀪𑀬𑁄 𑀚𑀸𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀫𑀽𑀲𑀺𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀺𑀴𑀸𑀭𑀯𑀢𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁨𑁯] 𑁯. 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀬𑀁 𑀲𑀺𑀔𑀸 𑀧𑀼𑀜𑁆𑀜𑀳𑁂𑀢𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀳𑀓𑀜𑁆𑀜𑁂𑀯 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀽𑀲𑀺𑀓𑀭𑀸𑀚𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀤𑀯𑀟𑀸𑀳𑁂 𑀉𑀝𑁆𑀞𑀺𑀢𑁂 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀲𑀻𑀲𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀲𑀓𑀮𑀲𑀭𑀻𑀭𑁂 𑀮𑁄𑀫𑀸𑀦𑀺 𑀛𑀸𑀬𑀺𑀁𑀲𑀼, 𑀭𑀼𑀓𑁆𑀔𑀁 𑀆𑀳𑀘𑁆𑀘 𑀞𑀺𑀢𑀝𑁆𑀞𑀸𑀦𑁂 𑀧𑀦 𑀫𑀢𑁆𑀣𑀓𑁂 𑀘𑀽𑀴𑀸 𑀯𑀺𑀬 𑀣𑁄𑀓𑀸𑀦𑀺 𑀮𑁄𑀫𑀸𑀦𑀺 𑀅𑀝𑁆𑀞𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀲𑁄𑀡𑁆𑀟𑀺𑀬𑀁 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁄 𑀙𑀸𑀬𑀁 𑀑𑀮𑁄𑀓𑁂𑀦𑁆𑀢𑁄 𑀘𑀽𑀴𑀁 𑀤𑀺𑀲𑁆𑀯𑀸 ‘‘𑀉𑀧𑁆𑀧𑀦𑁆𑀦𑀁 𑀤𑀸𑀦𑀺 𑀫𑁂 𑀪𑀡𑁆𑀟𑀫𑀽𑀮’’𑀦𑁆𑀢𑀺 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀢𑀁 𑀫𑀽𑀲𑀺𑀓𑀸𑀤𑀭𑀺𑀁 𑀤𑀺𑀲𑁆𑀯𑀸 ‘‘𑀇𑀫𑀸 𑀫𑀽𑀲𑀺𑀓𑀸 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀸𑀬 𑀘𑀭𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀲𑀻𑀮𑀯𑀸 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀦𑁆𑀦𑀸𑀫𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀦𑀸𑀫𑀸’’𑀢𑀺. ‘‘𑀅𑀣 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀭𑀓𑁆𑀔𑀦𑀢𑁆𑀣𑀸𑀬𑀸’’𑀢𑀺. ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸 𑀅𑀫𑁆𑀳𑁂 𑀭𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁 𑀅𑀗𑁆𑀕𑀼𑀝𑁆𑀞𑀕𑀡𑀦𑀁 𑀦𑀸𑀫 𑀚𑀸𑀦𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀸𑀬 𑀕𑀫𑀦𑀓𑀸𑀮𑁂 ‘𑀏𑀢𑁆𑀢𑀓𑀸’𑀢𑀺 𑀕𑀡𑁂𑀢𑁆𑀯𑀸 𑀧𑀘𑁆𑀘𑀸𑀕𑀫𑀦𑀓𑀸𑀮𑁂𑀧𑀺 𑀕𑀡𑁂𑀲𑁆𑀲𑀸𑀫𑀺, 𑀏𑀯𑀁 𑀲𑀸𑀬𑀁 𑀧𑀸𑀢𑀁 𑀕𑀡𑁂𑀦𑁆𑀢𑁄 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀭𑀓𑁆𑀔 𑀫𑀸𑀢𑀼𑀮𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀓𑀸𑀮𑁂 ‘‘𑀏𑀓𑁄 𑀤𑁆𑀯𑁂 𑀢𑀬𑁄’’𑀢𑀺 𑀕𑀡𑁂𑀢𑁆𑀯𑀸 𑀧𑀘𑁆𑀘𑀸𑀕𑀫𑀦𑀓𑀸𑀮𑁂𑀧𑀺 𑀢𑀣𑁂𑀯 𑀕𑀡𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀺𑀫𑀁 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀇𑀥 𑀧𑀦 𑀫𑀽𑀲𑀺𑀓𑀭𑀸𑀚𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 ‘‘𑀪𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚, 𑀦𑀸𑀬𑀁 𑀢𑀯 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀢𑁆𑀣𑀓𑁂 𑀘𑀽𑀴𑀸 𑀞𑀧𑀺𑀢𑀸, 𑀓𑀼𑀘𑁆𑀙𑀺𑀓𑀸𑀭𑀡𑀸 𑀧𑀦 𑀞𑀧𑀺𑀢𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁯. ‘‘𑀦𑀸𑀬𑀁 𑀲𑀺𑀔𑀸 𑀧𑀼𑀜𑁆𑀜𑀳𑁂𑀢𑀼, 𑀖𑀸𑀲𑀳𑁂𑀢𑀼 𑀅𑀬𑀁 𑀲𑀺𑀔𑀸;

𑀦𑀸𑀕𑀼𑀝𑁆𑀞𑀺𑀕𑀡𑀦𑀁 𑀬𑀸𑀢𑀺, 𑀅𑀮𑀁 𑀢𑁂 𑀳𑁄𑀢𑀼 𑀅𑀕𑁆𑀕𑀺𑀓𑀸’’𑀢𑀺.

𑀢𑀢𑁆𑀣 𑀦𑀸𑀕𑀼𑀝𑁆𑀞𑀺𑀕𑀡𑀦𑀁 𑀬𑀸𑀢𑀻𑀢𑀺 ‘‘𑀅𑀗𑁆𑀕𑀼𑀝𑁆𑀞𑀺𑀕𑀡𑀦𑀸’’𑀢𑀺 𑀅𑀗𑁆𑀕𑀼𑀝𑁆𑀞𑀕𑀡𑀦𑀸 𑀯𑀼𑀘𑁆𑀘𑀢𑀺, 𑀅𑀬𑀁 𑀫𑀽𑀲𑀺𑀓𑀕𑀡𑁄 𑀅𑀗𑁆𑀕𑀼𑀝𑁆𑀞𑀕𑀡𑀦𑀁 𑀦 𑀕𑀘𑁆𑀙𑀢𑀺 𑀦 𑀉𑀧𑁂𑀢𑀺 𑀦 𑀧𑀽𑀭𑁂𑀢𑀺, 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀮𑀁 𑀢𑁂 𑀳𑁄𑀢𑀼 𑀅𑀕𑁆𑀕𑀺𑀓𑀸𑀢𑀺 𑀲𑀺𑀗𑁆𑀕𑀸𑀮𑀁 𑀦𑀸𑀫𑁂𑀦 𑀆𑀮𑀧𑀦𑁆𑀢𑁄 𑀆𑀳. 𑀏𑀢𑁆𑀢𑀸𑀯𑀢𑀸 𑀢𑁂 𑀅𑀮𑀁 𑀳𑁄𑀢𑀼, 𑀦 𑀇𑀢𑁄 𑀧𑀭𑀁 𑀫𑀽𑀲𑀺𑀓𑁂 𑀔𑀸𑀤𑀺𑀲𑁆𑀲𑀲𑀺. 𑀅𑀫𑁆𑀳𑁂𑀳𑀺 𑀯𑀸 𑀢𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀅𑀮𑀁 𑀳𑁄𑀢𑀼, 𑀦 𑀫𑀬𑀁 𑀇𑀤𑀸𑀦𑀺 𑀢𑀬𑀸 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀸𑀫𑀸𑀢𑀺𑀧𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀫𑀽𑀲𑀺𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁩𑁦] 𑁧𑁦. 𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸 𑀯𑀸𑀘𑀸 𑀘 𑀪𑀼𑀜𑁆𑀚𑀲𑁆𑀲𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀯𑀢𑁆𑀣𑀺𑀬𑀁 𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭𑁂𑀓𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀸𑀲𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀭𑀢𑁆𑀢𑀺𑀁 𑀅𑀢𑀺𑀘𑀭𑀺𑀢𑁆𑀯𑀸 𑀤𑀺𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀢𑁆𑀣𑀼𑀦𑀫𑀸𑀦𑀸 𑀦𑀺𑀧𑀚𑁆𑀚𑀢𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀺𑀁 𑀢𑁂 𑀪𑀤𑁆𑀤𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀯𑀸𑀢𑀸 𑀫𑁂 𑀯𑀺𑀚𑁆𑀛𑀦𑁆𑀢𑀻’’𑀢𑀺. ‘‘𑀅𑀣 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀺𑀦𑀺𑀤𑁆𑀥𑀫𑀥𑀼𑀭𑀸𑀦𑀺 𑀧𑀡𑀻𑀢𑀧𑀡𑀻𑀢𑀸𑀦𑀺 𑀬𑀸𑀕𑀼𑀪𑀢𑁆𑀢𑀢𑁂𑀮𑀸𑀤𑀻𑀦𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀬𑀁 𑀲𑀸 𑀇𑀘𑁆𑀙𑀢𑀺, 𑀢𑀁 𑀢𑀁 𑀆𑀳𑀭𑀺𑀢𑁆𑀯𑀸 𑀤𑁂𑀢𑀺, 𑀤𑀸𑀲𑁄 𑀯𑀺𑀬 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀲𑀸 𑀧𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀁 𑀧𑀯𑀺𑀝𑁆𑀞𑀓𑀸𑀮𑁂 𑀦𑀺𑀧𑀚𑁆𑀚𑀢𑀺, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀚𑀸𑀭𑁂𑀳𑀺 𑀲𑀤𑁆𑀥𑀺𑀁 𑀯𑀻𑀢𑀺𑀦𑀸𑀫𑁂𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀫𑀺𑀲𑁆𑀲𑀸 𑀲𑀭𑀻𑀭𑁂 𑀯𑀺𑀚𑁆𑀛𑀦𑀯𑀸𑀢𑀸𑀦𑀁 𑀧𑀭𑀺𑀬𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀓𑀤𑀺𑀯𑀲𑀁 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀤𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀦 𑀧𑀜𑁆𑀜𑀸𑀬𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀺𑀭 𑀫𑁂 𑀲𑀭𑀻𑀭𑁂 𑀯𑀸𑀢𑀸 𑀯𑀺𑀚𑁆𑀛𑀦𑁆𑀢𑀺, 𑀲𑁆𑀯𑀸𑀳𑀁 𑀢𑀲𑁆𑀲𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀘𑁂𑀯 𑀧𑀡𑀻𑀢𑀧𑀡𑀻𑀢𑀪𑁄𑀚𑀦𑀸𑀦𑀺 𑀘 𑀧𑀭𑀺𑀬𑁂𑀲𑀸𑀫𑀺, 𑀲𑀭𑀻𑀭𑀫𑀲𑁆𑀲𑀸 𑀖𑀦𑀁 𑀯𑀺𑀧𑁆𑀧𑀲𑀦𑁆𑀦𑀘𑁆𑀙𑀯𑀺𑀯𑀡𑁆𑀡𑀁 𑀚𑀸𑀢𑀁, 𑀯𑀸𑀢𑀭𑁄𑀕𑀲𑁆𑀲 𑀧𑀦 𑀧𑀭𑀺𑀬𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀅𑀳𑀁 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑁄𑀯 𑀇𑀥𑀸𑀕𑀫𑀦𑀲𑁆𑀲 𑀑𑀓𑀸𑀲𑀁 𑀦 𑀮𑀪𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀸𑀧𑀪𑀸𑀯𑀁 𑀜𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, ‘𑀏𑀯𑀁 𑀦𑀺𑀧𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀭𑁄𑀕𑁂 𑀅𑀯𑀽𑀧𑀲𑀫𑀦𑁆𑀢𑁂 𑀇𑀤𑀜𑁆𑀘𑀺𑀤𑀜𑁆𑀘 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀧𑀼𑀩𑁆𑀩𑁂𑀧𑀺 𑀢𑁂 𑀧𑀡𑁆𑀟𑀺𑀢𑁂𑀳𑀺 𑀓𑀣𑀺𑀢𑀁, 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀧𑀦 𑀦 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀏𑀓𑀲𑀢𑀭𑀸𑀚𑀥𑀸𑀦𑀻𑀲𑀼 𑀔𑀢𑁆𑀢𑀺𑀬𑀓𑀼𑀫𑀸𑀭𑀸 𑀘 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀸 𑀘 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀅𑀣𑁂𑀓𑁄 𑀚𑀦𑀧𑀤𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀅𑀝𑁆𑀞𑀸𑀭𑀲 𑀘 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁𑀬𑁂𑀯 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀤𑀼𑀲𑁆𑀲𑀻𑀮𑀸 𑀅𑀳𑁄𑀲𑀺 𑀧𑀸𑀧𑀥𑀫𑁆𑀫𑀸𑀢𑀺 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯.

𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀑𑀯𑀸𑀤𑀕𑀳𑀡𑀸𑀬 𑀑𑀓𑀸𑀲𑀁 𑀦 𑀮𑀪𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸 𑀫𑀸𑀡𑀯𑀺𑀓𑀸 𑀇𑀫𑀁 𑀯𑀜𑁆𑀘𑁂𑀢𑁆𑀯𑀸 𑀦𑀺𑀧𑀚𑁆𑀚𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀲𑁆𑀲𑀸 𑀭𑁄𑀕𑀸𑀦𑀼𑀘𑁆𑀙𑀯𑀺𑀓𑀁 𑀪𑁂𑀲𑀚𑁆𑀚𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀢𑀸𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀲𑀧𑁆𑀧𑀺𑀔𑀻𑀭𑀭𑀲𑀸𑀤𑀻𑀦𑀺 𑀫𑀸 𑀅𑀤𑀸𑀲𑀺, 𑀕𑁄𑀫𑀼𑀢𑁆𑀢𑁂 𑀧𑀦 𑀧𑀜𑁆𑀘𑀧𑀡𑁆𑀡𑀸𑀦𑀺 𑀨𑀮𑀸𑀤𑀻𑀦𑀺 𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀯𑀢𑀫𑁆𑀩𑀮𑁄𑀳𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀳𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑁆𑀯𑀸 𑀭𑀚𑁆𑀚𑀼𑀁 𑀯𑀸 𑀬𑁄𑀢𑁆𑀢𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀕𑀳𑁂𑀢𑁆𑀯𑀸 ‘𑀇𑀤𑀁 𑀢𑁂 𑀭𑁄𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀪𑁂𑀲𑀚𑁆𑀚𑀁, 𑀇𑀤𑀁 𑀯𑀸 𑀧𑀺𑀯, 𑀉𑀝𑁆𑀞𑀸𑀬 𑀯𑀸 𑀢𑀬𑀸 𑀪𑀼𑀢𑁆𑀢𑀪𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀯𑀤𑁂𑀬𑁆𑀬𑀸𑀲𑀺. ‘‘𑀲𑀘𑁂 𑀪𑁂𑀲𑀚𑁆𑀚𑀁 𑀦 𑀧𑀺𑀯𑀢𑀺, 𑀅𑀣 𑀦𑀁 𑀭𑀚𑁆𑀚𑀼𑀬𑀸 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀭𑀼𑀓𑁆𑀔𑁂𑀦 𑀯𑀸 𑀮𑀢𑀸𑀬 𑀯𑀸 𑀓𑀢𑀺𑀘𑀺 𑀧𑀳𑀸𑀭𑁂 𑀧𑀳𑀭𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀓𑀧𑁆𑀧𑀭𑁂𑀦 𑀧𑁄𑀣𑁂𑀬𑁆𑀬𑀸𑀲𑀺, 𑀲𑀸 𑀢𑀗𑁆𑀔𑀡𑀜𑁆𑀜𑁂𑀯 𑀉𑀝𑁆𑀞𑀸𑀬 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 ‘‘𑀪𑀤𑁆𑀤𑁂, 𑀇𑀫𑀁 𑀪𑁂𑀲𑀚𑁆𑀚𑀁 𑀧𑀺𑀯𑀸’’𑀢𑀺 𑀆𑀳. ‘‘𑀓𑁂𑀦 𑀢𑁂 𑀇𑀤𑀁 𑀆𑀘𑀺𑀓𑁆𑀔𑀺𑀢’’𑀦𑁆𑀢𑀺? ‘‘𑀆𑀘𑀭𑀺𑀬𑁂𑀦, 𑀪𑀤𑁆𑀤𑁂’’𑀢𑀺. ‘‘𑀅𑀧𑀦𑁂𑀳𑀺 𑀢𑀁, 𑀦 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀡𑀯𑁄 ‘‘𑀦 𑀢𑁆𑀯𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀺𑀯𑀺𑀲𑁆𑀲𑀲𑀻’’𑀢𑀺 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀭𑁄𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀪𑁂𑀲𑀚𑁆𑀚𑀁 𑀯𑀸 𑀧𑀺𑀯, 𑀬𑀸𑀕𑀼𑀪𑀢𑁆𑀢𑀸𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁦. ‘‘𑀬𑀣𑀸𑀯𑀸𑀘𑀸 𑀘 𑀪𑀼𑀜𑁆𑀚𑀲𑁆𑀲𑀼, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀩𑁆𑀬𑀸𑀳𑀭;

𑀉𑀪𑀬𑀁 𑀢𑁂 𑀦 𑀲𑀫𑁂𑀢𑀺, 𑀯𑀸𑀘𑀸 𑀪𑀼𑀢𑁆𑀢𑀜𑁆𑀘 𑀓𑁄𑀲𑀺𑀬𑁂’’𑀢𑀺.

𑀢𑀢𑁆𑀣 𑀬𑀣𑀸𑀯𑀸𑀘𑀸 𑀘 𑀪𑀼𑀜𑁆𑀚𑀲𑁆𑀲𑀽𑀢𑀺 𑀬𑀣𑀸 𑀢𑁂 𑀯𑀸𑀘𑀸, 𑀢𑀣𑀸 𑀪𑀼𑀜𑁆𑀚𑀲𑁆𑀲𑀼, ‘‘𑀯𑀸𑀢𑀸 𑀫𑁂 𑀯𑀺𑀚𑁆𑀛𑀦𑁆𑀢𑀻’’𑀢𑀺 𑀯𑀸𑀘𑀸𑀬 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀓𑀢𑁆𑀯𑀸 𑀪𑀼𑀜𑁆𑀚𑀲𑁆𑀲𑀽𑀢𑀺 𑀅𑀢𑁆𑀣𑁄. ‘‘𑀬𑀣𑀸𑀯𑀸𑀘𑀁 𑀯𑀸’’𑀢𑀺𑀧𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺, ‘‘𑀬𑀣𑀸𑀯𑀸𑀘𑀸𑀬𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀅𑀬𑀫𑁂𑀯 𑀅𑀢𑁆𑀣𑁄. 𑀬𑀣𑀸𑀪𑀼𑀢𑁆𑀢𑀜𑁆𑀘 𑀩𑁆𑀬𑀸𑀳𑀭𑀸𑀢𑀺 𑀬𑀁 𑀬𑀣𑀸 𑀢𑁂 𑀪𑀼𑀢𑁆𑀢𑀁, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀩𑁆𑀬𑀸𑀳𑀭, ‘‘𑀅𑀭𑁄𑀕𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀕𑁂𑀳𑁂 𑀓𑀢𑁆𑀢𑀩𑁆𑀩𑀁 𑀓𑀭𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀬𑀣𑀸𑀪𑀽𑀢𑀜𑁆𑀘𑀸’’𑀢𑀺𑀧𑀺 𑀧𑀸𑀞𑁄, 𑀅𑀣 𑀯𑀸 𑀅𑀭𑁄𑀕𑀫𑁆𑀳𑀻𑀢𑀺 𑀬𑀣𑀸𑀪𑀽𑀢𑀫𑁂𑀯 𑀯𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀉𑀪𑀬𑀁 𑀢𑁂 𑀦 𑀲𑀫𑁂𑀢𑀺, 𑀯𑀸𑀘𑀸𑀪𑀼𑀢𑁆𑀢𑀜𑁆𑀘 𑀓𑁄𑀲𑀺𑀬𑁂𑀢𑀺 𑀬𑀸 𑀘 𑀢𑁂 𑀅𑀬𑀁 𑀯𑀸𑀘𑀸 ‘‘𑀯𑀸𑀢𑀸 𑀫𑀁 𑀯𑀺𑀚𑁆𑀛𑀦𑁆𑀢𑀻’’𑀢𑀺 𑀬𑀜𑁆𑀘 𑀢𑁂 𑀇𑀤𑀁 𑀧𑀡𑀻𑀢𑀪𑁄𑀚𑀦𑀁 𑀪𑀼𑀢𑁆𑀢𑀁, 𑀇𑀤𑀁 𑀉𑀪𑀬𑀫𑁆𑀧𑀺 𑀢𑀼𑀬𑁆𑀳𑀁 𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀉𑀝𑁆𑀞𑀸𑀬 𑀓𑀫𑁆𑀫𑀁 𑀓𑀭𑁄𑀳𑀺. ‘‘𑀓𑁄𑀲𑀺𑀬𑁂’’𑀢𑀺 𑀢𑀁 𑀕𑁄𑀢𑁆𑀢𑁂𑀦𑀸𑀮𑀧𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀓𑁄𑀲𑀺𑀬𑀩𑁆𑀭𑀸𑀳𑁆𑀫𑀡𑀥𑀻𑀢𑀸 ‘‘𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑀓𑁆𑀓𑀸 𑀫𑀬𑀸 𑀏𑀲 𑀯𑀜𑁆𑀘𑁂𑀢𑀼𑀁, 𑀉𑀝𑁆𑀞𑀸𑀬 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀓𑀫𑁆𑀫𑀁 𑀅𑀓𑀸𑀲𑀺. ‘‘𑀆𑀘𑀭𑀺𑀬𑁂𑀦 𑀫𑁂 𑀤𑀼𑀲𑁆𑀲𑀻𑀮𑀪𑀸𑀯𑁄 𑀜𑀸𑀢𑁄, 𑀇𑀤𑀸𑀦𑀺 𑀦 𑀲𑀓𑁆𑀓𑀸 𑀇𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀏𑀯𑀭𑀽𑀧𑀁 𑀓𑀸𑀢𑀼’’𑀦𑁆𑀢𑀺 𑀆𑀘𑀭𑀺𑀬𑁂 𑀕𑀸𑀭𑀯𑁂𑀦 𑀧𑀸𑀧𑀓𑀫𑁆𑀫𑀢𑁄𑀧𑀺 𑀯𑀺𑀭𑀫𑀺𑀢𑁆𑀯𑀸 𑀲𑀻𑀮𑀯𑀢𑀻 𑀅𑀳𑁄𑀲𑀺. 𑀲𑀸𑀧𑀺 𑀩𑁆𑀭𑀸𑀳𑁆𑀫𑀡𑀻 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀺𑀭𑀫𑁆𑀳𑀺 𑀜𑀸𑀢𑀸’’𑀢𑀺 𑀲𑀢𑁆𑀣𑀭𑀺𑀧𑀺 𑀕𑀸𑀭𑀯𑁂𑀦 𑀦 𑀧𑀼𑀦 𑀅𑀦𑀸𑀘𑀸𑀭𑀁 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸 𑀇𑀤𑀸𑀦𑀺 𑀚𑀬𑀫𑁆𑀧𑀢𑀺𑀓𑀸𑀯, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀼𑀲𑀦𑀸𑀴𑀺𑀯𑀕𑁆𑀕𑁄 𑀢𑁂𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀲𑀦𑀸𑀴𑀺 𑀘 𑀤𑀼𑀫𑁆𑀫𑁂𑀥𑀁, 𑀦𑀗𑁆𑀕𑀮𑀻𑀲𑀫𑁆𑀩𑀓𑀝𑀸𑀳𑀁;

𑀅𑀲𑀺𑀮𑀓𑁆𑀔𑀡𑀓𑀮𑀡𑁆𑀟𑀼𑀓𑀁, 𑀩𑀺𑀴𑀸𑀭𑀕𑁆𑀕𑀺𑀓𑀓𑁄𑀲𑀺𑀬𑀦𑁆𑀢𑀺.