𑁧𑁪. 𑀅𑀲𑀫𑁆𑀧𑀤𑀸𑀦𑀯𑀕𑁆𑀕𑁄

[𑁧𑁩𑁧] 𑁧. 𑀅𑀲𑀫𑁆𑀧𑀤𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀫𑁆𑀧𑀤𑀸𑀦𑁂𑀦𑀺𑀢𑀭𑀻𑀢𑀭𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑁄, 𑀅𑀓𑀢𑀜𑁆𑀜𑀽 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀦 𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽, 𑀧𑀼𑀩𑁆𑀩𑁂𑀧𑀺 𑀅𑀓𑀢𑀜𑁆𑀜𑀽𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑁂 𑀏𑀓𑀲𑁆𑀫𑀺𑀁 𑀫𑀕𑀥𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑁂𑀯 𑀲𑁂𑀝𑁆𑀞𑀺 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀲𑀗𑁆𑀔𑀲𑁂𑀝𑁆𑀞𑀻𑀢𑀺 𑀦𑀸𑀫𑁂𑀦. 𑀩𑀸𑀭𑀸𑀡𑀲𑀺𑀬𑀁 𑀧𑀻𑀴𑀺𑀬𑀲𑁂𑀝𑁆𑀞𑀺 𑀦𑀸𑀫 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄𑀯 𑀅𑀳𑁄𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀩𑀸𑀭𑀸𑀡𑀲𑀺𑀬𑀁 𑀧𑀻𑀴𑀺𑀬𑀲𑁂𑀝𑁆𑀞𑀺𑀲𑁆𑀲 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀫𑀳𑀦𑁆𑀢𑀁 𑀪𑀬𑀁 𑀉𑀧𑁆𑀧𑀚𑁆𑀚𑀺, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀧𑀭𑀺𑀳𑀸𑀬𑀺. 𑀲𑁄 𑀤𑀮𑀺𑀤𑁆𑀤𑁄 𑀅𑀧𑁆𑀧𑀝𑀺𑀲𑀭𑀡𑁄 𑀳𑀼𑀢𑁆𑀯𑀸 𑀪𑀭𑀺𑀬𑀁 𑀆𑀤𑀸𑀬 𑀲𑀗𑁆𑀔𑀲𑁂𑀝𑁆𑀞𑀺𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀤𑀲𑀸𑀯 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀲𑀗𑁆𑀔𑀲𑁂𑀝𑁆𑀞𑀺𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀲𑀳𑀸𑀬𑁄 𑀫𑁂 𑀆𑀕𑀢𑁄’’𑀢𑀺 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀲𑀫𑁆𑀫, 𑀓𑁂𑀦𑀝𑁆𑀞𑁂𑀦 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀬𑀁 𑀫𑁂, 𑀲𑀫𑁆𑀫, 𑀉𑀧𑁆𑀧𑀦𑁆𑀦𑀁, 𑀲𑀩𑁆𑀩𑀁 𑀥𑀦𑀁 𑀧𑀭𑀺𑀓𑁆𑀔𑀻𑀡𑀁, 𑀉𑀧𑀢𑁆𑀣𑀫𑁆𑀪𑁄 𑀫𑁂 𑀳𑁄𑀳𑀻’’𑀢𑀺. ‘‘𑀲𑀸𑀥𑀼 𑀲𑀫𑁆𑀫, 𑀫𑀸 𑀪𑀸𑀬𑀻’’𑀢𑀺 𑀪𑀡𑁆𑀟𑀸𑀕𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀤𑀸𑀧𑁂𑀢𑁆𑀯𑀸 𑀲𑁂𑀲𑀫𑁆𑀧𑀺 𑀧𑀭𑀺𑀘𑁆𑀙𑀤𑀧𑀭𑀺𑀯𑀸𑀭𑀁 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀟𑁆𑀠𑀫𑁂𑀯 𑀅𑀤𑀸𑀲𑀺. 𑀲𑁄 𑀢𑀁 𑀯𑀺𑀪𑀯𑀁 𑀆𑀤𑀸𑀬 𑀧𑀼𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀅𑀧𑀭𑀪𑀸𑀕𑁂 𑀲𑀗𑁆𑀔𑀲𑁂𑀝𑁆𑀞𑀺𑀲𑁆𑀲𑀧𑀺 𑀢𑀸𑀤𑀺𑀲𑀫𑁂𑀯 𑀪𑀬𑀁 𑀉𑀧𑁆𑀧𑀚𑁆𑀚𑀺. 𑀲𑁄 𑀅𑀢𑁆𑀢𑀦𑁄 𑀧𑀝𑀺𑀲𑀭𑀡𑀁 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀳𑀸𑀬𑀲𑁆𑀲 𑀫𑁂 𑀫𑀳𑀸𑀉𑀧𑀓𑀸𑀭𑁄 𑀓𑀢𑁄, 𑀉𑀧𑀟𑁆𑀠𑀯𑀺𑀪𑀯𑁄 𑀤𑀺𑀦𑁆𑀦𑁄. 𑀦 𑀲𑁄 𑀫𑀁 𑀤𑀺𑀲𑁆𑀯𑀸 𑀧𑀭𑀺𑀘𑁆𑀘𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀭𑀺𑀬𑀁 𑀆𑀤𑀸𑀬 𑀧𑀤𑀲𑀸𑀯 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂, 𑀢𑀯 𑀫𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀫𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁, 𑀫𑀬𑀸 𑀧𑁂𑀲𑀺𑀢𑀬𑀸𑀦𑀫𑀸𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀘𑁆𑀙𑀸 𑀆𑀕𑀫𑀺𑀲𑁆𑀲𑀲𑀺. 𑀬𑀸𑀯 𑀬𑀸𑀦𑀁 𑀧𑁂𑀲𑁂𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀲𑀸𑀮𑀸𑀬 𑀞𑀧𑁂𑀢𑁆𑀯𑀸 𑀲𑀬𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀕𑀳𑀦𑀕𑀭𑀢𑁄 𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑁄 𑀲𑀗𑁆𑀔𑀲𑁂𑀝𑁆𑀞𑀺 𑀦𑀸𑀫 𑀆𑀕𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀲𑁄 ‘‘𑀆𑀕𑀘𑁆𑀙𑀢𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀦𑁂𑀯 𑀆𑀲𑀦𑀸 𑀯𑀼𑀝𑁆𑀞𑀸𑀲𑀺, 𑀦 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺, 𑀓𑁂𑀯𑀮𑀁 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀦𑀺𑀯𑀸𑀲𑁄 𑀢𑁂 𑀓𑀳𑀁 𑀕𑀳𑀺𑀢𑁄’’𑀢𑀺? ‘‘𑀦 𑀢𑀸𑀯 𑀦𑀺𑀯𑀸𑀲𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀲𑁂𑀝𑁆𑀞𑀺𑀖𑀭𑀡𑀺𑀫𑁆𑀧𑀺 𑀲𑀸𑀮𑀸𑀬 𑀞𑀧𑁂𑀢𑁆𑀯𑀸𑀯 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀇𑀥 𑀦𑀺𑀯𑀸𑀲𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀦𑀺𑀯𑀸𑀧𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀕𑀘𑁆𑀙𑀣, 𑀧𑀼𑀦 𑀅𑀫𑁆𑀳𑀸𑀓𑀁 𑀖𑀭𑀁 𑀫𑀸 𑀧𑀯𑀺𑀲𑀣𑀸’’𑀢𑀺 𑀯𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀩𑀳𑀮𑀧𑀮𑀸𑀧𑀢𑀼𑀫𑁆𑀩𑀁 𑀤𑁂𑀳𑀻’’𑀢𑀺 𑀤𑀸𑀲𑀁 𑀆𑀡𑀸𑀧𑁂𑀲𑀺. 𑀢𑀁 𑀤𑀺𑀯𑀲𑀁 𑀓𑀺𑀭 𑀲𑁄 𑀭𑀢𑁆𑀢𑀲𑀸𑀮𑀻𑀦𑀁 𑀲𑀓𑀝𑀲𑀳𑀲𑁆𑀲𑀫𑀢𑁆𑀢𑀁 𑀑𑀨𑀼𑀦𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀸𑀕𑀸𑀭𑀁 𑀧𑀽𑀭𑀸𑀧𑁂𑀲𑀺, 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀅𑀓𑀢𑀜𑁆𑀜𑀽 𑀫𑀳𑀸𑀘𑁄𑀭𑁄 𑀲𑀳𑀸𑀬𑀓𑀲𑁆𑀲 𑀢𑀼𑀫𑁆𑀩𑀫𑀢𑁆𑀢𑁂 𑀧𑀮𑀸𑀧𑁂 𑀤𑀸𑀧𑁂𑀲𑀺. 𑀤𑀸𑀲𑁄 𑀧𑀘𑁆𑀙𑀺𑀬𑀁 𑀏𑀓𑀁 𑀧𑀮𑀸𑀧𑀢𑀼𑀫𑁆𑀩𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀫𑀫 𑀲𑀦𑁆𑀢𑀺𑀓𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀧𑀮𑀸𑀧𑀢𑀼𑀫𑁆𑀩𑀁 𑀤𑀸𑀧𑁂𑀲𑀺, 𑀕𑀡𑁆𑀳𑀸𑀫𑀺 𑀦𑀼 𑀔𑁄, 𑀦 𑀕𑀡𑁆𑀳𑀸𑀫𑀻’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀢𑀸𑀯 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻 𑀓𑀢𑀯𑀺𑀦𑀸𑀲𑀓𑀪𑀸𑀯𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀪𑀺𑀦𑁆𑀤𑀺. 𑀲𑀘𑀸𑀳𑀁 𑀏𑀢𑁂𑀦 𑀤𑀺𑀦𑁆𑀦𑀁 𑀧𑀮𑀸𑀧𑀢𑀼𑀫𑁆𑀩𑀁 𑀮𑀸𑀫𑀓𑀢𑁆𑀢𑀸 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀅𑀳𑀫𑁆𑀧𑀺 𑀫𑀺𑀢𑁆𑀢𑀪𑀸𑀯𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺. 𑀅𑀦𑁆𑀥𑀩𑀸𑀮𑀸 𑀧𑀭𑀺𑀢𑁆𑀢𑀓𑀁 𑀮𑀤𑁆𑀥𑀁 𑀅𑀕𑁆𑀕𑀡𑁆𑀳𑀦𑁆𑀢𑀸 𑀫𑀺𑀢𑁆𑀢𑀪𑀸𑀯𑀁 𑀯𑀺𑀦𑀸𑀲𑁂𑀦𑁆𑀢𑀺, 𑀅𑀳𑀁 𑀧𑀦 𑀏𑀢𑁂𑀦 𑀤𑀺𑀦𑁆𑀦𑀁 𑀧𑀮𑀸𑀧𑀢𑀼𑀫𑁆𑀩𑀁 𑀕𑀳𑁂𑀢𑁆𑀯𑀸 𑀫𑀫 𑀯𑀲𑁂𑀦 𑀫𑀺𑀢𑁆𑀢𑀪𑀸𑀯𑀁 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀮𑀸𑀧𑀢𑀼𑀫𑁆𑀩𑀁 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀲𑀸𑀮𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀪𑀭𑀺𑀬𑀸 ‘‘𑀓𑀺𑀁 𑀢𑁂, 𑀅𑀬𑁆𑀬, 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀪𑀤𑁆𑀤𑁂 𑀅𑀫𑁆𑀳𑀸𑀓𑀁 𑀲𑀳𑀸𑀬𑁄 𑀧𑀻𑀴𑀺𑀬𑀲𑁂𑀝𑁆𑀞𑀺 𑀧𑀮𑀸𑀧𑀢𑀼𑀫𑁆𑀩𑀁 𑀤𑀢𑁆𑀯𑀸 𑀅𑀫𑁆𑀳𑁂 𑀅𑀚𑁆𑀚𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺. 𑀲𑀸 ‘‘𑀅𑀬𑁆𑀬, 𑀓𑀺𑀫𑀢𑁆𑀣𑀁 𑀅𑀕𑁆𑀕𑀳𑁂𑀲𑀺, 𑀓𑀺𑀁 𑀏𑀢𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 ‘‘𑀪𑀤𑁆𑀤𑁂, 𑀫𑀸 𑀭𑁄𑀤𑀺, 𑀅𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀪𑁂𑀤𑀦𑀪𑀬𑁂𑀦 𑀫𑀫 𑀯𑀲𑁂𑀦 𑀫𑀺𑀢𑁆𑀢𑀪𑀸𑀯𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀕𑀡𑁆𑀳𑀺𑀁, 𑀢𑁆𑀯𑀁 𑀓𑀺𑀁𑀓𑀸𑀭𑀡𑀸 𑀭𑁄𑀤𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁧. ‘‘𑀅𑀲𑀫𑁆𑀧𑀤𑀸𑀦𑁂𑀦𑀺𑀢𑀭𑀻𑀢𑀭𑀲𑁆𑀲, 𑀩𑀸𑀮𑀲𑁆𑀲 𑀫𑀺𑀢𑁆𑀢𑀸𑀦𑀺 𑀓𑀮𑀻𑀪𑀯𑀦𑁆𑀢𑀺;

𑀢𑀲𑁆𑀫𑀸 𑀳𑀭𑀸𑀫𑀺 𑀪𑀼𑀲𑀁 𑀅𑀟𑁆𑀠𑀫𑀸𑀦𑀁, 𑀫𑀸 𑀫𑁂 𑀫𑀺𑀢𑁆𑀢𑀺 𑀚𑀻𑀬𑀺𑀢𑁆𑀣 𑀲𑀲𑁆𑀲𑀢𑀸𑀬’’𑀦𑁆𑀢𑀺.

𑀢𑀢𑁆𑀣 𑀅𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀅𑀲𑀫𑁆𑀧𑀸𑀤𑀸𑀦𑁂𑀦. 𑀅𑀓𑀸𑀭𑀮𑁄𑀧𑁂 𑀲𑀦𑁆𑀥𑀺, 𑀅𑀕𑁆𑀕𑀳𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀻𑀢𑀭𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀮𑀸𑀫𑀓𑀸𑀮𑀸𑀫𑀓𑀲𑁆𑀲. 𑀩𑀸𑀮𑀲𑁆𑀲 𑀫𑀺𑀢𑁆𑀢𑀸𑀦𑀺 𑀓𑀮𑀻𑀪𑀯𑀦𑁆𑀢𑀻𑀢𑀺 𑀤𑀦𑁆𑀥𑀲𑁆𑀲 𑀅𑀧𑀜𑁆𑀜𑀲𑁆𑀲 𑀫𑀺𑀢𑁆𑀢𑀸𑀦𑀺 𑀓𑀮𑀻𑀦𑀺 𑀓𑀸𑀴𑀓𑀡𑁆𑀡𑀺𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺, 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀳𑀭𑀸𑀫𑀺 𑀪𑀼𑀲𑀁 𑀅𑀟𑁆𑀠𑀫𑀸𑀦𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀲𑀳𑀸𑀬𑁂𑀦 𑀤𑀺𑀦𑁆𑀦𑀁 𑀏𑀓𑀧𑀮𑀸𑀧𑀢𑀼𑀫𑁆𑀩𑀁 𑀳𑀭𑀸𑀫𑀺 𑀕𑀡𑁆𑀳𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀸𑀦’’𑀦𑁆𑀢𑀺 𑀳𑀺 𑀅𑀝𑁆𑀞𑀦𑁆𑀦𑀁 𑀦𑀸𑀴𑀻𑀦𑀁 𑀦𑀸𑀫𑀁, 𑀘𑀢𑀼𑀦𑁆𑀦𑀁 𑀅𑀟𑁆𑀠𑀫𑀸𑀦𑀁, 𑀘𑀢𑀲𑁆𑀲𑁄 𑀘 𑀦𑀸𑀴𑀺𑀬𑁄 𑀢𑀼𑀫𑁆𑀩𑁄 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀮𑀸𑀧𑀢𑀼𑀫𑁆𑀩’’𑀦𑁆𑀢𑀺. 𑀫𑀸 𑀫𑁂 𑀫𑀺𑀢𑁆𑀢𑀺 𑀚𑀻𑀬𑀺𑀢𑁆𑀣 𑀲𑀲𑁆𑀲𑀢𑀸𑀬𑀦𑁆𑀢𑀺 𑀫𑀫 𑀲𑀳𑀸𑀬𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀺 𑀫𑀸 𑀪𑀺𑀚𑁆𑀚𑀺𑀢𑁆𑀣, 𑀲𑀲𑁆𑀲𑀢𑀸𑀯 𑀅𑀬𑀁 𑀳𑁄𑀢𑀽𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁂𑀝𑁆𑀞𑀺𑀪𑀭𑀺𑀬𑀸 𑀭𑁄𑀤𑀢𑁂𑀯. 𑀢𑀲𑁆𑀫𑀺𑀁 𑀔𑀡𑁂 𑀲𑀗𑁆𑀔𑀲𑁂𑀝𑁆𑀞𑀺𑀦𑀸 𑀧𑀻𑀴𑀺𑀬𑀲𑁂𑀝𑁆𑀞𑀺𑀲𑁆𑀲 𑀤𑀺𑀦𑁆𑀦𑁄 𑀓𑀫𑁆𑀫𑀦𑁆𑀢𑀤𑀸𑀲𑁄 𑀲𑀸𑀮𑀸𑀤𑁆𑀯𑀸𑀭𑁂𑀦 𑀆𑀕𑀘𑁆𑀙𑀦𑁆𑀢𑁄 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀭𑁄𑀤𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀇𑀥𑀸𑀕𑀢𑀢𑁆𑀣, 𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺. 𑀲𑁂𑀝𑁆𑀞𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀓𑀫𑁆𑀫𑀦𑁆𑀢𑀤𑀸𑀲𑁄 ‘‘𑀳𑁄𑀢𑀼, 𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀉𑀪𑁄𑀧𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 ‘‘𑀲𑀸𑀫𑀺𑀓𑀸, 𑀯𑁄 𑀆𑀕𑀢𑀸’’𑀢𑀺 𑀲𑁂𑀲𑀤𑀸𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀩𑁆𑀩𑁂 𑀤𑀸𑀲𑁂 𑀕𑀳𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀉𑀧𑀭𑀯𑀁 𑀅𑀓𑀸𑀲𑀺. 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺, 𑀢𑁂 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁.

𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀪𑁄𑀧𑀺 𑀲𑁂𑀝𑁆𑀞𑀻 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀗𑁆𑀔𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀫𑀳𑀸𑀲𑁂𑀝𑁆𑀞𑀺 𑀧𑀻𑀴𑀺𑀬𑀲𑁂𑀝𑁆𑀞𑀺𑀲𑁆𑀲 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀫𑀫 𑀲𑀳𑀸𑀬𑀲𑁆𑀲 𑀫𑀁 𑀢𑀓𑁆𑀓𑁂𑀢𑁆𑀯𑀸 𑀭𑀸𑀚𑀕𑀳𑀁 𑀆𑀕𑀢𑀲𑁆𑀲 𑀦 𑀓𑁂𑀯𑀮𑀁 𑀥𑀦𑀁, 𑀲𑀩𑁆𑀩𑀁 𑀯𑀺𑀪𑀯𑀚𑀸𑀢𑀁 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀲𑀫𑀪𑀸𑀕𑁂 𑀅𑀤𑀸𑀲𑀺𑀦𑁆𑀢𑀺. 𑀭𑀸𑀚𑀸 ‘‘𑀲𑀘𑁆𑀘𑀫𑁂𑀢’’𑀦𑁆𑀢𑀺 𑀧𑀻𑀴𑀺𑀬𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑀬𑀸 𑀧𑀦𑀲𑁆𑀲 𑀢𑀜𑁆𑀜𑁂𑀯 𑀢𑀓𑁆𑀓𑁂𑀢𑁆𑀯𑀸 𑀆𑀕𑀢𑀲𑁆𑀲 𑀅𑀢𑁆𑀣𑀺 𑀓𑁄𑀘𑀺 𑀲𑀓𑁆𑀓𑀸𑀭𑁄 𑀯𑀸 𑀲𑀫𑁆𑀫𑀸𑀦𑁄 𑀯𑀸 𑀓𑀢𑁄’’𑀢𑀺. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀧𑀺 𑀧𑀦 𑀢𑁂 𑀏𑀢𑀲𑁆𑀲 𑀧𑀮𑀸𑀧𑀢𑀼𑀫𑁆𑀩𑀫𑀢𑁆𑀢𑀁 𑀤𑀼𑀲𑁆𑀲𑀦𑁆𑀢𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀤𑀸𑀧𑀺𑀢𑀁 𑀅𑀢𑁆𑀣𑀻𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀭𑀸𑀚𑀸 ‘‘𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀕𑀘𑁆𑀙𑀣, 𑀧𑀻𑀴𑀺𑀬𑀲𑁂𑀝𑁆𑀞𑀺𑀲𑁆𑀲 𑀖𑀭𑁂 𑀲𑀩𑁆𑀩𑀁 𑀯𑀺𑀪𑀯𑀁 𑀲𑀗𑁆𑀔𑀲𑁂𑀝𑁆𑀞𑀺𑀲𑁆𑀲 𑀤𑁂𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀧𑀭𑀲𑀦𑁆𑀢𑀓𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀫𑀬𑀸 𑀤𑀺𑀦𑁆𑀦𑀫𑀢𑁆𑀢𑀫𑁂𑀯 𑀧𑀦 𑀤𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀓𑀁 𑀤𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀤𑀺𑀦𑁆𑀦𑀯𑀺𑀪𑀯𑀁 𑀧𑀝𑀺𑀮𑀪𑀺𑀢𑁆𑀯𑀸 𑀤𑀸𑀲𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀫𑁂𑀯 𑀕𑀦𑁆𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀻𑀴𑀺𑀬𑀲𑁂𑀝𑁆𑀞𑀺 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀗𑁆𑀔𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀫𑁆𑀧𑀤𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁩𑁨] 𑁨. 𑀪𑀻𑀭𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀲𑀮𑀽𑀧𑀤𑁂𑀲𑁂 𑀥𑀺𑀢𑀺𑀬𑀸 𑀤𑀴𑁆𑀳𑀸𑀬 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀫𑀸𑀭𑀥𑀻𑀢𑀸𑀦𑀁 𑀧𑀮𑁄𑀪𑀦𑀲𑀼𑀢𑁆𑀢𑀦𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑀸 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀁 𑁋

‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀕𑀜𑁆𑀙𑀼𑀁, 𑀢𑀡𑁆𑀳𑀸 𑀘 𑀅𑀭𑀢𑀻 𑀭𑀕𑀸;

𑀢𑀸 𑀢𑀢𑁆𑀣 𑀧𑀦𑀼𑀤𑀻 𑀲𑀢𑁆𑀣𑀸, 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄’’𑀢𑀺. (𑀲𑀁. 𑀦𑀺. 𑁧.𑁧𑁬𑁧);

𑀏𑀯𑀁 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀢𑀲𑁆𑀲 𑀲𑀼𑀢𑁆𑀢𑀦𑁆𑀢𑀲𑁆𑀲 𑀓𑀣𑀺𑀢𑀓𑀸𑀮𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀸𑀭𑀥𑀻𑀢𑀭𑁄 𑀅𑀦𑁂𑀓𑀲𑀢𑀸𑀦𑀺𑀧𑀺 𑀤𑀺𑀩𑁆𑀩𑀭𑀽𑀧𑀸𑀦𑀺 𑀫𑀸𑀧𑁂𑀢𑁆𑀯𑀸 𑀧𑀮𑁄𑀪𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀺𑀬𑁄 𑀅𑀓𑁆𑀔𑀻𑀦𑀺𑀧𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦 𑀑𑀮𑁄𑀓𑁂𑀲𑀺, 𑀅𑀳𑁄 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀅𑀘𑁆𑀙𑀭𑀺𑀬’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀧𑀢𑁆𑀢𑀲𑁆𑀲 𑀫𑀸𑀭𑀥𑀻𑀢𑀸𑀦𑀁 𑀅𑀦𑁄𑀮𑁄𑀓𑀦𑀁 𑀦𑀸𑀫 𑀅𑀘𑁆𑀙𑀭𑀺𑀬𑀁, 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀩𑁄𑀥𑀺𑀜𑀸𑀡𑀁 𑀧𑀭𑀺𑀬𑁂𑀲𑀫𑀸𑀦𑁄 𑀲𑀓𑀺𑀮𑁂𑀲𑀓𑀸𑀮𑁂𑀧𑀺 𑀅𑀪𑀺𑀲𑀗𑁆𑀔𑀢𑀁 𑀤𑀺𑀩𑁆𑀩𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀕𑀦𑁆𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀸𑀧𑀼𑀡𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀪𑀸𑀢𑀺𑀓𑀲𑀢𑀲𑁆𑀲 𑀓𑀦𑀺𑀝𑁆𑀞𑁄 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀢𑀓𑁆𑀓𑀲𑀺𑀮𑀸𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀤𑀸 𑀧𑀦 𑀢𑀓𑁆𑀓𑀲𑀺𑀮𑀸𑀦𑀕𑀭𑀯𑀸𑀲𑀻𑀳𑀺 𑀩𑀳𑀺𑀦𑀕𑀭𑁂 𑀲𑀸𑀮𑀸𑀬𑀁 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀪𑀺𑀲𑁂𑀓𑁂 𑀓𑀢𑁂 𑀢𑀓𑁆𑀓𑀲𑀺𑀮𑀸𑀦𑀕𑀭𑀯𑀸𑀲𑀺𑀦𑁄 𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬, 𑀭𑀸𑀚𑀪𑀯𑀦𑀜𑁆𑀘 𑀇𑀦𑁆𑀤𑀪𑀯𑀦𑀁 𑀯𑀺𑀬 𑀅𑀮𑀗𑁆𑀓𑀭𑀺𑀁𑀲𑀼. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀪𑀯𑀦𑁂 𑀧𑀸𑀲𑀸𑀤𑁂 𑀫𑀳𑀸𑀢𑀮𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀭𑀢𑀦𑀯𑀭𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀬𑁆𑀳 𑀤𑁂𑀯𑀭𑀸𑀚𑀮𑀻𑀮𑀸𑀬 𑀦𑀺𑀲𑀻𑀤𑀺, 𑀅𑀫𑀘𑁆𑀘𑀸 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄 𑀘 𑀔𑀢𑁆𑀢𑀺𑀬𑀓𑀼𑀫𑀸𑀭𑀸 𑀘 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸 𑀲𑁄𑀴𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀓𑀼𑀲𑀮𑀸 𑀉𑀢𑁆𑀢𑀫𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀺 𑀧𑀬𑁄𑀚𑁂𑀲𑀼𑀁. 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀦 𑀭𑀸𑀚𑀪𑀯𑀦𑀁 𑀫𑁂𑀖𑀢𑁆𑀣𑀦𑀺𑀢𑀧𑀽𑀭𑀺𑀢𑀸 𑀫𑀳𑀸𑀲𑀫𑀼𑀤𑁆𑀤𑀓𑀼𑀘𑁆𑀙𑀺 𑀯𑀺𑀬 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀲𑀺𑀭𑀺𑀲𑁄𑀪𑀕𑁆𑀕𑀁 𑀑𑀮𑁄𑀓𑀬𑀫𑀸𑀦𑁄𑀯 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀢𑀸𑀲𑀁 𑀬𑀓𑁆𑀔𑀺𑀦𑀻𑀦𑀁 𑀅𑀪𑀺𑀲𑀗𑁆𑀔𑀢𑀁 𑀤𑀺𑀩𑁆𑀩𑀭𑀽𑀧𑀁 𑀑𑀮𑁄𑀓𑁂𑀲𑁆𑀲𑀁, 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄 𑀅𑀪𑀯𑀺𑀲𑁆𑀲𑀁, 𑀇𑀫𑀁 𑀲𑀺𑀭𑀺𑀲𑁄𑀪𑀕𑁆𑀕𑀁 𑀦 𑀑𑀮𑁄𑀓𑁂𑀲𑁆𑀲𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀦 𑀑𑀯𑀸𑀤𑁂 𑀞𑀺𑀢𑀪𑀸𑀯𑁂𑀦 𑀇𑀤𑀁 𑀫𑀬𑀸 𑀲𑀫𑁆𑀧𑀢𑁆𑀢’’𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁨. ‘‘𑀓𑀼𑀲𑀮𑀽𑀧𑀤𑁂𑀲𑁂 𑀥𑀺𑀢𑀺𑀬𑀸 𑀤𑀴𑁆𑀳𑀸𑀬 𑀘, 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀬𑀪𑀻𑀭𑀼𑀢𑀸𑀬 𑀘;

𑀦 𑀭𑀓𑁆𑀔𑀲𑀻𑀦𑀁 𑀯𑀲𑀫𑀸𑀕𑀫𑀺𑀫𑁆𑀳𑀲𑁂, 𑀲 𑀲𑁄𑀢𑁆𑀣𑀺𑀪𑀸𑀯𑁄 𑀫𑀳𑀢𑀸 𑀪𑀬𑁂𑀦 𑀫𑁂’’𑀢𑀺.

𑀢𑀢𑁆𑀣 𑀓𑀼𑀲𑀮𑀽𑀧𑀤𑁂𑀲𑁂𑀢𑀺 𑀓𑀼𑀲𑀮𑀸𑀦𑀁 𑀉𑀧𑀤𑁂𑀲𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑁂𑀢𑀺 𑀅𑀢𑁆𑀣𑁄. 𑀥𑀺𑀢𑀺𑀬𑀸 𑀤𑀴𑁆𑀳𑀸𑀬 𑀘𑀸𑀢𑀺 𑀤𑀴𑁆𑀳𑀸𑀬 𑀥𑀺𑀢𑀺𑀬𑀸 𑀘, 𑀣𑀺𑀭𑁂𑀦 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀦𑀺𑀭𑀦𑁆𑀢𑀭𑀯𑀻𑀭𑀺𑀬𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀬𑀪𑀻𑀭𑀼𑀢𑀸𑀬 𑀘𑀸𑀢𑀺 𑀪𑀬𑀪𑀻𑀭𑀼𑀢𑀸𑀬 𑀅𑀦𑀺𑀯𑀢𑁆𑀢𑀺𑀢𑀢𑀸𑀬 𑀘. 𑀢𑀢𑁆𑀣 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀫𑀢𑁆𑀢𑀁 𑀧𑀭𑀺𑀢𑁆𑀢𑀪𑀬𑀁. 𑀪𑀻𑀭𑀼𑀢𑀸𑀢𑀺 𑀲𑀭𑀻𑀭𑀓𑀫𑁆𑀧𑀦𑀧𑁆𑀧𑀢𑁆𑀢𑀁 𑀫𑀳𑀸𑀪𑀬𑀁. 𑀇𑀤𑀁 𑀉𑀪𑀬𑀫𑁆𑀧𑀺 𑀫𑀳𑀸𑀲𑀢𑁆𑀢𑀲𑁆𑀲 ‘‘𑀬𑀓𑁆𑀔𑀺𑀦𑀺𑀬𑁄 𑀦𑀸𑀫𑁂𑀢𑀸 𑀫𑀦𑀼𑀲𑁆𑀲𑀔𑀸𑀤𑀺𑀓𑀸’’𑀢𑀺 𑀪𑁂𑀭𑀯𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸𑀧𑀺 𑀦𑀸𑀳𑁄𑀲𑀺. 𑀢𑁂𑀦𑀸𑀳 ‘‘𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀬𑀪𑀻𑀭𑀼𑀢𑀸𑀬 𑀘𑀸’’𑀢𑀺. 𑀪𑀬𑀪𑀻𑀭𑀼𑀢𑀸𑀬 𑀅𑀪𑀸𑀯𑁂𑀦𑁂𑀯 𑀪𑁂𑀭𑀯𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸𑀧𑀺 𑀅𑀦𑀺𑀯𑀢𑁆𑀢𑀦𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀭𑀓𑁆𑀔𑀲𑀻𑀦𑀁 𑀯𑀲𑀫𑀸𑀕𑀫𑀺𑀫𑁆𑀳𑀲𑁂𑀢𑀺 𑀬𑀓𑁆𑀔𑀓𑀦𑁆𑀢𑀸𑀭𑁂 𑀢𑀸𑀲𑀁 𑀭𑀓𑁆𑀔𑀲𑀻𑀦𑀁 𑀯𑀲𑀁 𑀦 𑀅𑀕𑀫𑀺𑀫𑁆𑀳. 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀓𑀼𑀲𑀮𑀽𑀧𑀤𑁂𑀲𑁂 𑀥𑀺𑀢𑀺 𑀘 𑀤𑀴𑁆𑀳𑀸 𑀅𑀳𑁄𑀲𑀺, 𑀪𑀬𑀪𑀻𑀭𑀼𑀢𑀸𑀪𑀸𑀯𑁂𑀦 𑀘 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀸 𑀅𑀳𑀼𑀫𑁆𑀳𑀸, 𑀢𑀲𑁆𑀫𑀸 𑀭𑀓𑁆𑀔𑀲𑀻𑀦𑀁 𑀯𑀲𑀁 𑀦 𑀅𑀕𑀫𑀺𑀫𑁆𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲 𑀲𑁄𑀢𑁆𑀣𑀺𑀪𑀸𑀯𑁄 𑀫𑀳𑀢𑀸 𑀪𑀬𑁂𑀦 𑀫𑁂𑀢𑀺 𑀲𑁄 𑀫𑀬𑁆𑀳𑀁 𑀅𑀬𑀁 𑀅𑀚𑁆𑀚 𑀫𑀳𑀢𑀸 𑀪𑀬𑁂𑀦 𑀭𑀓𑁆𑀔𑀲𑀻𑀦𑀁 𑀲𑀦𑁆𑀢𑀺𑀓𑀸 𑀧𑀢𑁆𑀢𑀩𑁆𑀩𑁂𑀦 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑁂𑀦 𑀲𑁄𑀢𑁆𑀣𑀺𑀪𑀸𑀯𑁄 𑀔𑁂𑀫𑀪𑀸𑀯𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀪𑀸𑀯𑁄𑀬𑁂𑀯 𑀚𑀸𑀢𑁄𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀧𑁆𑀧𑀢𑁆𑀢𑀓𑀼𑀫𑀸𑀭𑁄 𑀅𑀳𑁄𑀲𑀺’’𑀦𑁆𑀢𑀺.

𑀪𑀻𑀭𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁩𑁩] 𑁩. 𑀖𑀢𑀸𑀲𑀦𑀚𑀸𑀢𑀓𑀯𑀡𑁆𑀡𑀦𑀸

𑀔𑁂𑀫𑀁 𑀬𑀳𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀜𑁆𑀙𑀺. 𑀢𑀲𑁆𑀲 𑀧𑀞𑀫𑀫𑀸𑀲𑁂𑀬𑁂𑀯 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀧𑀡𑁆𑀡𑀲𑀸𑀮𑀸 𑀛𑀸𑀬𑀺𑀢𑁆𑀣. 𑀲𑁄 𑀯𑀲𑀦𑀝𑁆𑀞𑀸𑀦𑀸𑀪𑀸𑀯𑁂𑀦 𑀓𑀺𑀮𑀫𑀦𑁆𑀢𑁄 𑀉𑀧𑀝𑁆𑀞𑀸𑀓𑀸𑀦𑀁 𑀆𑀘𑀺𑀓𑁆𑀔𑀺. 𑀢𑁂 ‘‘𑀳𑁄𑀢𑀼, 𑀪𑀦𑁆𑀢𑁂, 𑀧𑀡𑁆𑀡𑀲𑀸𑀮𑀁 𑀓𑀭𑀺𑀲𑁆𑀲𑀸𑀫, 𑀓𑀲𑀸𑀫 𑀢𑀸𑀯, 𑀯𑀧𑀸𑀫 𑀢𑀸𑀯𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀢𑁂𑀫𑀸𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀲𑁄 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀸𑀪𑀸𑀯𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀦𑀺𑀫𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂, 𑀪𑀺𑀓𑁆𑀔𑀼, 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁 𑀚𑀸𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀲𑀧𑁆𑀧𑀸𑀬𑀪𑀸𑀯𑀁 𑀓𑀣𑁂𑀲𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂 𑀔𑁄, 𑀪𑀺𑀓𑁆𑀔𑀼, 𑀢𑀺𑀭𑀘𑁆𑀙𑀸𑀦𑀸𑀧𑀺 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀜𑀢𑁆𑀯𑀸 𑀲𑀧𑁆𑀧𑀸𑀬𑀓𑀸𑀮𑁂 𑀯𑀲𑀺𑀢𑁆𑀯𑀸 𑀅𑀲𑀧𑁆𑀧𑀸𑀬𑀓𑀸𑀮𑁂 𑀯𑀲𑀦𑀝𑁆𑀞𑀸𑀦𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀅𑀕𑀫𑀁𑀲𑀼, 𑀢𑁆𑀯𑀁 𑀓𑀲𑁆𑀫𑀸 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀦 𑀅𑀜𑁆𑀜𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀲𑀓𑀼𑀡𑀭𑀸𑀚𑀸 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀚𑀸𑀢𑀲𑁆𑀲𑀭𑀢𑀻𑀭𑁂 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀁 𑀩𑀳𑀮𑀧𑀢𑁆𑀢𑀧𑀮𑀸𑀲𑀁 𑀫𑀳𑀸𑀭𑀼𑀓𑁆𑀔𑀁 𑀉𑀧𑀦𑀺𑀲𑁆𑀲𑀸𑀬 𑀲𑀧𑀭𑀺𑀯𑀸𑀭𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑀳𑀽 𑀲𑀓𑀼𑀡𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀉𑀤𑀓𑀫𑀢𑁆𑀣𑀓𑁂 𑀧𑀢𑁆𑀣𑀝𑀲𑀸𑀔𑀸𑀲𑀼 𑀯𑀲𑀦𑁆𑀢𑀸 𑀲𑀭𑀻𑀭𑀯𑀴𑀜𑁆𑀚𑀁 𑀉𑀤𑀓𑁂 𑀧𑀸𑀢𑁂𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀚𑀸𑀢𑀲𑁆𑀲𑀭𑁂 𑀘𑀡𑁆𑀟𑁄 𑀦𑀸𑀕𑀭𑀸𑀚𑀸 𑀯𑀲𑀢𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑁂 𑀲𑀓𑀼𑀡𑀸 𑀫𑀬𑁆𑀳𑀁 𑀦𑀺𑀯𑀸𑀲𑁂 𑀚𑀸𑀢𑀲𑁆𑀲𑀭𑁂 𑀲𑀭𑀻𑀭𑀯𑀴𑀜𑁆𑀚𑀁 𑀧𑀸𑀢𑁂𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀉𑀤𑀓𑀢𑁄 𑀅𑀕𑁆𑀕𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀭𑀼𑀓𑁆𑀔𑀁 𑀛𑀸𑀧𑁂𑀢𑁆𑀯𑀸 𑀏𑀢𑁂 𑀧𑀮𑀸𑀧𑁂𑀬𑁆𑀬’’𑀦𑁆𑀢𑀺. 𑀲𑁄 𑀓𑀼𑀤𑁆𑀥𑀫𑀸𑀦𑀲𑁄 𑀭𑀢𑁆𑀢𑀺𑀪𑀸𑀕𑁂 𑀲𑀩𑁆𑀩𑁂𑀲𑀁 𑀲𑀓𑀼𑀡𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀼𑀓𑁆𑀔𑀲𑀸𑀔𑀸𑀲𑀼 𑀦𑀺𑀧𑀦𑁆𑀦𑀓𑀸𑀮𑁂 𑀧𑀞𑀫𑀁 𑀢𑀸𑀯 𑀉𑀤𑁆𑀥𑀦𑀸𑀭𑁄𑀧𑀺𑀢𑀁 𑀯𑀺𑀬 𑀉𑀤𑀓𑀁 𑀧𑀓𑁆𑀓𑀼𑀥𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀯𑀸𑀭𑁂 𑀥𑀽𑀫𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀁 𑀚𑀸𑀮𑀁 𑀉𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀤𑀓𑀢𑁄 𑀚𑀸𑀮𑀁 𑀉𑀝𑁆𑀞𑀳𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀪𑁄, 𑀲𑀓𑀼𑀡𑀸, 𑀅𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁 𑀦𑀸𑀫 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀦𑁆𑀢𑀺, 𑀇𑀤𑀸𑀦𑀺 𑀧𑀦 𑀉𑀤𑀓𑀫𑁂𑀯 𑀆𑀤𑀺𑀢𑁆𑀢𑀁. 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀇𑀥 𑀯𑀲𑀺𑀢𑀼𑀁, 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁩. ‘‘𑀔𑁂𑀫𑀁 𑀬𑀳𑀺𑀁 𑀢𑀢𑁆𑀣 𑀅𑀭𑀻 𑀉𑀤𑀻𑀭𑀺𑀢𑁄, 𑀤𑀓𑀲𑁆𑀲 𑀫𑀚𑁆𑀛𑁂 𑀚𑀮𑀢𑁂 𑀖𑀢𑀸𑀲𑀦𑁄;

𑀦 𑀅𑀚𑁆𑀚 𑀯𑀸𑀲𑁄 𑀫𑀳𑀺𑀬𑀸 𑀫𑀳𑀻𑀭𑀼𑀳𑁂, 𑀤𑀺𑀲𑀸 𑀪𑀚𑀯𑁆𑀳𑁄 𑀲𑀭𑀡𑀸𑀚𑁆𑀚 𑀦𑁄𑀪𑀬’’𑀦𑁆𑀢𑀺.

𑀢𑀢𑁆𑀣 𑀔𑁂𑀫𑀁 𑀬𑀳𑀺𑀁 𑀢𑀢𑁆𑀣 𑀅𑀭𑀻 𑀉𑀤𑀻𑀭𑀺𑀢𑁄𑀢𑀺 𑀬𑀲𑁆𑀫𑀺𑀁 𑀉𑀤𑀓𑀧𑀺𑀝𑁆𑀞𑁂 𑀔𑁂𑀫𑀪𑀸𑀯𑁄 𑀦𑀺𑀩𑁆𑀪𑀬𑀪𑀸𑀯𑁄, 𑀢𑀲𑁆𑀫𑀺𑀁 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁄 𑀲𑀧𑀢𑁆𑀢𑁄 𑀉𑀝𑁆𑀞𑀺𑀢𑁄. 𑀤𑀓𑀲𑁆𑀲𑀸𑀢𑀺 𑀉𑀤𑀓𑀲𑁆𑀲. 𑀖𑀢𑀸𑀲𑀦𑁄𑀢𑀺 𑀅𑀕𑁆𑀕𑀺. 𑀲𑁄 𑀳𑀺 𑀖𑀢𑀁 𑀅𑀲𑁆𑀦𑀸𑀢𑀺, 𑀢𑀲𑁆𑀫𑀸 ‘‘𑀖𑀢𑀸𑀲𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀦 𑀅𑀚𑁆𑀚 𑀯𑀸𑀲𑁄𑀢𑀺 𑀅𑀚𑁆𑀚 𑀦𑁄 𑀯𑀸𑀲𑁄 𑀦𑀢𑁆𑀣𑀺. 𑀫𑀳𑀺𑀬𑀸 𑀫𑀳𑀻𑀭𑀼𑀳𑁂𑀢𑀺 𑀫𑀳𑀺𑀭𑀼𑀳𑁄 𑀯𑀼𑀘𑁆𑀘𑀢𑀺 𑀭𑀼𑀓𑁆𑀔𑁄, 𑀢𑀲𑁆𑀫𑀺𑀁 𑀇𑀫𑀺𑀲𑁆𑀲𑀸 𑀫𑀳𑀺𑀬𑀸 𑀚𑀸𑀢𑁂 𑀭𑀼𑀓𑁆𑀔𑁂𑀢𑀺 𑀅𑀢𑁆𑀣𑁄. 𑀤𑀺𑀲𑀸 𑀪𑀚𑀯𑁆𑀳𑁄𑀢𑀺 𑀤𑀺𑀲𑀸 𑀪𑀚𑀣 𑀕𑀘𑁆𑀙𑀣. 𑀲𑀭𑀡𑀸𑀚𑁆𑀚 𑀦𑁄 𑀪𑀬𑀦𑁆𑀢𑀺 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀭𑀡𑀢𑁄 𑀪𑀬𑀁 𑀚𑀸𑀢𑀁, 𑀧𑀝𑀺𑀲𑀭𑀡𑀝𑁆𑀞𑀸𑀦𑀢𑁄 𑀪𑀬𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂 𑀲𑀓𑀼𑀡𑁂 𑀆𑀤𑀸𑀬 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑀓𑀼𑀡𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀓𑀭𑀸 𑀲𑀓𑀼𑀡𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀲𑀓𑀼𑀡𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀖𑀢𑀸𑀲𑀦𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁩𑁪] 𑁪. 𑀛𑀸𑀦𑀲𑁄𑀥𑀦𑀚𑀸𑀢𑀓𑀯𑀡𑁆𑀡𑀦𑀸

𑀬𑁂 𑀲𑀜𑁆𑀜𑀺𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀅𑀢𑁆𑀢𑀦𑀸 𑀲𑀁𑀔𑀺𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀯𑀺𑀢𑁆𑀣𑀸𑀭𑀩𑁆𑀬𑀸𑀓𑀭𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀭𑀺𑀤𑀁 𑀅𑀢𑀻𑀢𑀯𑀢𑁆𑀣𑀼 𑁋 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀆𑀳…𑀧𑁂… 𑀢𑀸𑀧𑀲𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑀁 𑀦 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀆𑀪𑀲𑁆𑀲𑀭𑀢𑁄 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁪. ‘‘𑀬𑁂 𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸, 𑀬𑁂𑀧𑀺 𑀅𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸;

𑀏𑀢𑀁 𑀉𑀪𑀬𑀁 𑀯𑀺𑀯𑀚𑁆𑀚𑀬, 𑀢𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀗𑁆𑀕𑀡’’𑀦𑁆𑀢𑀺.

𑀢𑀢𑁆𑀣 𑀬𑁂 𑀲𑀜𑁆𑀜𑀺𑀦𑁄𑀢𑀺 𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀅𑀯𑀲𑁂𑀲𑁂 𑀲𑀘𑀺𑀢𑁆𑀢𑀓𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀢𑁂𑀧𑀺 𑀤𑀼𑀕𑁆𑀕𑀢𑀸𑀢𑀺 𑀢𑀲𑁆𑀲𑀸 𑀲𑀫𑀸𑀧𑀢𑁆𑀢𑀺𑀬𑀸 𑀅𑀮𑀸𑀪𑀢𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸 𑀦𑀸𑀫. 𑀬𑁂𑀧𑀺 𑀅𑀲𑀜𑁆𑀜𑀺𑀦𑁄𑀢𑀺 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑁂 𑀅𑀘𑀺𑀢𑁆𑀢𑀓𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀢𑁂𑀧𑀺 𑀤𑀼𑀕𑁆𑀕𑀢𑀸𑀢𑀺 𑀢𑁂𑀧𑀺 𑀇𑀫𑀺𑀲𑁆𑀲𑀸𑀬𑁂𑀯 𑀲𑀫𑀸𑀧𑀢𑁆𑀢𑀺𑀬𑀸 𑀅𑀮𑀸𑀪𑀢𑁄 𑀤𑀼𑀕𑁆𑀕𑀢𑀸𑀬𑁂𑀯 𑀦𑀸𑀫. 𑀏𑀢𑀁 𑀉𑀪𑀬𑀁 𑀯𑀺𑀯𑀚𑁆𑀚𑀬𑀸𑀢𑀺 𑀏𑀢𑀁 𑀉𑀪𑀬𑀫𑁆𑀧𑀺 𑀲𑀜𑁆𑀜𑀺𑀪𑀯𑀜𑁆𑀘 𑀅𑀲𑀜𑁆𑀜𑀺𑀪𑀯𑀜𑁆𑀘 𑀯𑀺𑀯𑀚𑁆𑀚𑀬 𑀧𑀚𑀳𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀁 𑀑𑀯𑀤𑀢𑀺. 𑀢𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀗𑁆𑀕𑀡𑀦𑁆𑀢𑀺 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀲𑀦𑁆𑀢𑀝𑁆𑀞𑁂𑀦 ‘‘𑀲𑀼𑀔’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀛𑀸𑀦𑀲𑀼𑀔𑀁 𑀅𑀦𑀗𑁆𑀕𑀡𑀁 𑀦𑀺𑀤𑁆𑀤𑁄𑀲𑀁 𑀩𑀮𑀯𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀪𑀸𑀯𑁂𑀦𑀧𑀺 𑀢𑀁 𑀅𑀦𑀗𑁆𑀕𑀡𑀁 𑀦𑀸𑀫 𑀚𑀸𑀢𑀁.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀢𑀤𑀸 𑀲𑁂𑀲𑀢𑀸𑀧𑀲𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑀤𑁆𑀤𑀳𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀛𑀸𑀦𑀲𑁄𑀥𑀦𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁩𑁫] 𑁫. 𑀘𑀦𑁆𑀤𑀸𑀪𑀚𑀸𑀢𑀓𑀯𑀡𑁆𑀡𑀦𑀸

𑀘𑀦𑁆𑀤𑀸𑀪𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀣𑁂𑀭𑀲𑁆𑀲𑁂𑀯 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪’’𑀦𑁆𑀢𑀺 𑀯𑀢𑁆𑀯𑀸 𑀆𑀪𑀲𑁆𑀲𑀭𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀧𑀲𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀦 𑀲𑀤𑁆𑀤𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀆𑀪𑀲𑁆𑀲𑀭𑀢𑁄 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁫. ‘‘𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪𑀜𑁆𑀘, 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀺;

𑀅𑀯𑀺𑀢𑀓𑁆𑀓𑁂𑀦 𑀛𑀸𑀦𑁂𑀦, 𑀳𑁄𑀢𑀺 𑀆𑀪𑀲𑁆𑀲𑀭𑀽𑀧𑀕𑁄’’𑀢𑀺.

𑀢𑀢𑁆𑀣 𑀘𑀦𑁆𑀤𑀸𑀪𑀦𑁆𑀢𑀺 𑀑𑀤𑀸𑀢𑀓𑀲𑀺𑀡𑀁 𑀤𑀲𑁆𑀲𑁂𑀢𑀺. 𑀲𑀽𑀭𑀺𑀬𑀸𑀪𑀦𑁆𑀢𑀺 𑀧𑀻𑀢𑀓𑀲𑀺𑀡𑀁. 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀇𑀥 𑀲𑀢𑁆𑀢𑀮𑁄𑀓𑁂 𑀇𑀤𑀁 𑀓𑀲𑀺𑀡𑀤𑁆𑀯𑀬𑀁 𑀧𑀜𑁆𑀜𑀸𑀬 𑀕𑀸𑀥𑀢𑀺, 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀼𑀧𑀯𑀺𑀲𑀢𑀺, 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀳𑀢𑀺. 𑀅𑀣 𑀯𑀸 𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪𑀜𑁆𑀘, 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀻𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁 𑀘𑀦𑁆𑀤𑀸𑀪𑀸 𑀘 𑀲𑀽𑀭𑀺𑀬𑀸𑀪𑀸 𑀘 𑀧𑀢𑁆𑀣𑀝𑀸, 𑀢𑀢𑁆𑀣𑀓𑁂 𑀞𑀸𑀦𑁂 𑀧𑀝𑀺𑀪𑀸𑀕𑀓𑀲𑀺𑀡𑀁 𑀯𑀟𑁆𑀠𑁂𑀢𑁆𑀯𑀸 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀉𑀪𑀬𑀫𑁆𑀧𑁂𑀢𑀁 𑀆𑀪𑀁 𑀧𑀜𑁆𑀜𑀸𑀬 𑀕𑀸𑀥𑀢𑀺 𑀦𑀸𑀫. 𑀢𑀲𑁆𑀫𑀸 𑀅𑀬𑀫𑁆𑀧𑁂𑀢𑁆𑀣 𑀅𑀢𑁆𑀣𑁄𑀬𑁂𑀯. 𑀅𑀯𑀺𑀢𑀓𑁆𑀓𑁂𑀦 𑀛𑀸𑀦𑁂𑀦, 𑀳𑁄𑀢𑀺 𑀆𑀪𑀲𑁆𑀲𑀭𑀽𑀧𑀕𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀣𑀸 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑁂𑀦 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀸𑀧𑀲𑁂 𑀩𑁄𑀥𑁂𑀢𑁆𑀯𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀦𑁆𑀤𑀸𑀪𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁩𑁬] 𑁬. 𑀲𑀼𑀯𑀡𑁆𑀡𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀮𑀤𑁆𑀥𑀁 𑀢𑁂𑀦 𑀢𑀼𑀝𑁆𑀞𑀩𑁆𑀩𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀮𑀲𑀼𑀡𑁂𑀦 𑀧𑀯𑀸𑀭𑁂𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑀁 𑀆𑀡𑀸𑀧𑁂𑀲𑀺 ‘‘𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑁄 𑀆𑀕𑀘𑁆𑀙𑀦𑁆𑀢𑀺, 𑀏𑀓𑁂𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑁆𑀯𑁂 𑀢𑀬𑁄 𑀪𑀡𑁆𑀟𑀺𑀓𑁂 𑀤𑁂𑀳𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲 𑀕𑁂𑀳𑀫𑁆𑀧𑀺 𑀔𑁂𑀢𑁆𑀢𑀫𑁆𑀧𑀺 𑀮𑀲𑀼𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀢𑀲𑁆𑀲 𑀕𑁂𑀳𑁂 𑀮𑀲𑀼𑀡𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀧𑀭𑀺𑀯𑀸𑀭𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀮𑀲𑀼𑀡𑁂𑀦𑀸𑀯𑀼𑀲𑁄 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 ‘‘𑀦𑀢𑁆𑀣𑀬𑁆𑀬𑁂, 𑀬𑀣𑀸𑀪𑀢𑀁 𑀮𑀲𑀼𑀡𑀁 𑀧𑀭𑀺𑀓𑁆𑀔𑀻𑀡𑀁, 𑀔𑁂𑀢𑁆𑀢𑀁 𑀕𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑀸 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀮𑀲𑀼𑀡𑀁 𑀆𑀳𑀭𑀸𑀧𑁂𑀲𑀺. 𑀔𑁂𑀢𑁆𑀢𑀧𑀸𑀮𑁄 𑀉𑀚𑁆𑀛𑀸𑀬𑀺 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀮𑀲𑀼𑀡𑀁 𑀳𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺? 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸, 𑀢𑀸𑀧𑀺, 𑀢𑀸𑀲𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽𑀧𑀺, 𑀉𑀚𑁆𑀛𑀸𑀬𑀺𑀁𑀲𑀼. 𑀉𑀚𑁆𑀛𑀸𑀬𑀺𑀢𑁆𑀯𑀸 𑀘 𑀧𑀦 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀦𑀺𑀁 𑀕𑀭𑀳𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀫𑀳𑀺𑀘𑁆𑀙𑁄 𑀧𑀼𑀕𑁆𑀕𑀮𑁄 𑀦𑀸𑀫 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺 𑀅𑀫𑀦𑀸𑀧𑁄, 𑀅𑀧𑁆𑀧𑀲𑀦𑁆𑀦𑁂 𑀧𑀲𑀸𑀤𑁂𑀢𑀼𑀁, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀸𑀤𑀁 𑀚𑀦𑁂𑀢𑀼𑀁, 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀯𑀸 𑀧𑀦 𑀮𑀸𑀪𑀁 𑀣𑀺𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑁆𑀧𑀺𑀘𑁆𑀙𑁄 𑀧𑀦 𑀧𑀼𑀕𑁆𑀕𑀮𑁄 𑀅𑀧𑁆𑀧𑀲𑀦𑁆𑀦𑁂 𑀧𑀲𑀸𑀤𑁂𑀢𑀼𑀁, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀸𑀤𑀁 𑀚𑀦𑁂𑀢𑀼𑀁, 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀯𑀸 𑀧𑀦 𑀮𑀸𑀪𑀁 𑀣𑀺𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀇𑀤𑀸𑀦𑁂𑀯 𑀫𑀳𑀺𑀘𑁆𑀙𑀸, 𑀧𑀼𑀩𑁆𑀩𑁂𑀧𑀺 𑀫𑀳𑀺𑀘𑁆𑀙𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀲𑀫𑀸𑀦𑀚𑀸𑀢𑀺𑀓𑀸 𑀓𑀼𑀮𑀸 𑀧𑀚𑀸𑀧𑀢𑀺𑀁 𑀆𑀳𑀭𑀺𑀁𑀲𑀼. 𑀢𑀲𑁆𑀲𑀸 𑀦𑀦𑁆𑀤𑀸 𑀦𑀦𑁆𑀤𑀸𑀯𑀢𑀻 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀢𑀺 𑀢𑀺𑀲𑁆𑀲𑁄 𑀥𑀻𑀢𑀭𑁄 𑀅𑀳𑁂𑀲𑀼𑀁. 𑀢𑀸𑀲𑀼 𑀧𑀢𑀺𑀓𑀼𑀮𑀁 𑀅𑀕𑀢𑀸𑀲𑀼𑀬𑁂𑀯 𑀩𑁄𑀥𑀺𑀲𑀢𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀚𑀸𑀢𑀺𑀲𑁆𑀲𑀭𑀜𑀸𑀡𑀜𑁆𑀘𑀲𑁆𑀲 𑀉𑀧𑁆𑀧𑀚𑁆𑀚𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀲𑀼𑀯𑀡𑁆𑀡𑀲𑀜𑁆𑀙𑀦𑁆𑀦𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀦𑀼 𑀔𑁄 𑀘𑀯𑀺𑀢𑁆𑀯𑀸 𑀅𑀳𑀁 𑀇𑀥𑀽𑀧𑀧𑀦𑁆𑀦𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀮𑁄𑀓𑀢𑁄’’𑀢𑀺 𑀜𑀢𑁆𑀯𑀸 𑀧𑀼𑀦 ‘‘𑀓𑀣𑀁 𑀦𑀼 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀻 𑀘 𑀥𑀻𑀢𑀭𑁄 𑀘 𑀚𑀻𑀯𑀦𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀭𑁂𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀚𑀻𑀯𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀭𑀻𑀭𑁂 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀓𑁄𑀝𑁆𑀝𑀦𑀖𑀝𑁆𑀝𑀦𑀔𑀫𑀸𑀦𑀺, 𑀇𑀢𑁄 𑀢𑀸𑀲𑀁 𑀏𑀓𑁂𑀓𑀁 𑀧𑀢𑁆𑀢𑀁 𑀤𑀲𑁆𑀲𑀸𑀫𑀺, 𑀢𑁂𑀦 𑀫𑁂 𑀧𑀚𑀸𑀧𑀢𑀺 𑀘 𑀥𑀻𑀢𑀭𑁄 𑀘 𑀲𑀼𑀔𑀁 𑀚𑀻𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀯𑀁𑀲𑀓𑁄𑀝𑀺𑀬𑀁 𑀦𑀺𑀮𑀻𑀬𑀺, 𑀩𑁆𑀭𑀸𑀳𑁆𑀫𑀡𑀻 𑀘 𑀥𑀻𑀢𑀭𑁄 𑀘 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀺𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀁 𑀆𑀕𑀢𑁄. 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀧𑀭𑁂𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀤𑀼𑀓𑁆𑀔𑀚𑀻𑀯𑀺𑀓𑀸𑀬 𑀚𑀻𑀯𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀁 𑀯𑁄 𑀏𑀓𑁂𑀓𑀁 𑀧𑀢𑁆𑀢𑀁 𑀤𑀲𑁆𑀲𑀸𑀫𑀺, 𑀢𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀣𑀸’’𑀢𑀺 𑀏𑀓𑀁 𑀧𑀢𑁆𑀢𑀁 𑀤𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁄 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀆𑀕𑀦𑁆𑀢𑁆𑀯𑀸 𑀏𑀓𑁂𑀓𑀁 𑀧𑀢𑁆𑀢𑀁 𑀤𑁂𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀘 𑀥𑀻𑀢𑀭𑁄 𑀘 𑀅𑀟𑁆𑀠𑀸 𑀲𑀼𑀔𑀺𑀢𑀸 𑀅𑀳𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀥𑀻𑀢𑀭𑁄 𑀆𑀫𑀦𑁆𑀢𑁂𑀲𑀺 ‘‘𑀅𑀫𑁆𑀫𑀸, 𑀢𑀺𑀭𑀘𑁆𑀙𑀸𑀦𑀸𑀦𑀁 𑀦𑀸𑀫 𑀘𑀺𑀢𑁆𑀢𑀁 𑀤𑀼𑀚𑁆𑀚𑀸𑀦𑀁. 𑀓𑀤𑀸𑀘𑀺 𑀯𑁄 𑀧𑀺𑀢𑀸 𑀇𑀥 𑀦𑀸𑀕𑀘𑁆𑀙𑁂𑀬𑁆𑀬, 𑀇𑀤𑀸𑀦𑀺𑀲𑁆𑀲 𑀆𑀕𑀢𑀓𑀸𑀮𑁂 𑀲𑀩𑁆𑀩𑀸𑀦𑀺 𑀧𑀢𑁆𑀢𑀸𑀦𑀺𑀧𑀺 𑀮𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺. 𑀢𑀸 ‘‘𑀏𑀯𑀁 𑀦𑁄 𑀧𑀺𑀢𑀸 𑀓𑀺𑀮𑀫𑀺𑀲𑁆𑀲𑀢𑀻’’𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀻 𑀧𑀦 𑀫𑀳𑀺𑀘𑁆𑀙𑀢𑀸𑀬 𑀧𑀼𑀦 𑀏𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀲𑁆𑀲 𑀆𑀕𑀢𑀓𑀸𑀮𑁂 ‘‘𑀏𑀳𑀺 𑀢𑀸𑀯, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀢𑁆𑀢𑀸𑀦𑀺 𑀮𑀼𑀜𑁆𑀘𑀺. 𑀢𑀸𑀦𑀺 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀼𑀘𑀺𑀁 𑀯𑀺𑀦𑀸 𑀩𑀮𑀓𑁆𑀓𑀸𑀭𑁂𑀦 𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑀸𑀦𑀺 𑀩𑀓𑀧𑀢𑁆𑀢𑀲𑀤𑀺𑀲𑀸𑀦𑀺 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑀸 𑀫𑀳𑀸𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑁄𑀲𑁂𑀲𑀺. 𑀢𑀲𑁆𑀲 𑀧𑀼𑀦 𑀉𑀝𑁆𑀞𑀳𑀦𑁆𑀢𑀸𑀦𑀺 𑀧𑀢𑁆𑀢𑀸𑀦𑀺 𑀲𑁂𑀢𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀲𑁄 𑀲𑀜𑁆𑀚𑀸𑀢𑀧𑀢𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀦 𑀧𑀼𑀦 𑀆𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀇𑀤𑀸𑀦𑁂𑀯 𑀫𑀳𑀺𑀘𑁆𑀙𑀸, 𑀧𑀼𑀩𑁆𑀩𑁂𑀧𑀺 𑀫𑀳𑀺𑀘𑁆𑀙𑀸𑀬𑁂𑀯, 𑀫𑀳𑀺𑀘𑁆𑀙𑀢𑀸𑀬 𑀘 𑀧𑀦 𑀲𑀼𑀯𑀡𑁆𑀡𑀫𑁆𑀳𑀸 𑀧𑀭𑀺𑀳𑀻𑀦𑀸. 𑀇𑀤𑀸𑀦𑀺 𑀧𑀦 𑀅𑀢𑁆𑀢𑀦𑁄 𑀫𑀳𑀺𑀘𑁆𑀙𑀢𑀸𑀬 𑀏𑀯 𑀮𑀲𑀼𑀡𑀫𑁆𑀳𑀸𑀧𑀺 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀮𑀲𑀼𑀡𑀁 𑀔𑀸𑀤𑀺𑀢𑀼𑀁 𑀦 𑀮𑀪𑀺𑀲𑁆𑀲𑀢𑀺. 𑀬𑀣𑀸 𑀘 𑀣𑀼𑀮𑁆𑀮𑀦𑀦𑁆𑀤𑀸, 𑀏𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀲𑁂𑀲𑀪𑀺𑀓𑁆𑀔𑀼𑀦𑀺𑀬𑁄𑀧𑀺. 𑀢𑀲𑁆𑀫𑀸 𑀩𑀳𑀼𑀁 𑀮𑀪𑀺𑀢𑁆𑀯𑀸𑀧𑀺 𑀧𑀫𑀸𑀡𑀫𑁂𑀯 𑀚𑀸𑀦𑀺𑀢𑀩𑁆𑀩𑀁, 𑀅𑀧𑁆𑀧𑀁 𑀮𑀪𑀺𑀢𑁆𑀯𑀸 𑀧𑀦 𑀬𑀣𑀸𑀮𑀤𑁆𑀥𑁂𑀦𑁂𑀯 𑀲𑀦𑁆𑀢𑁄𑀲𑁄 𑀓𑀸𑀢𑀩𑁆𑀩𑁄, 𑀉𑀢𑁆𑀢𑀭𑀺 𑀦 𑀧𑀢𑁆𑀣𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁬. ‘‘𑀬𑀁 𑀮𑀤𑁆𑀥𑀁 𑀢𑁂𑀦 𑀢𑀼𑀝𑁆𑀞𑀩𑁆𑀩𑀁, 𑀅𑀢𑀺𑀮𑁄𑀪𑁄 𑀳𑀺 𑀧𑀸𑀧𑀓𑁄;

𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸𑀦, 𑀲𑀼𑀯𑀡𑁆𑀡𑀸 𑀧𑀭𑀺𑀳𑀸𑀬𑀣𑀸’’𑀢𑀺.

𑀢𑀢𑁆𑀣 𑀢𑀼𑀝𑁆𑀞𑀩𑁆𑀩𑀦𑁆𑀢𑀺 𑀢𑀼𑀲𑁆𑀲𑀺𑀢𑀩𑁆𑀩𑀁.

𑀇𑀤𑀁 𑀧𑀦 𑀯𑀢𑁆𑀯𑀸 𑀲𑀢𑁆𑀣𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀕𑀭𑀳𑀺𑀢𑁆𑀯𑀸 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀮𑀲𑀼𑀡𑀁 𑀔𑀸𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁭𑁯𑁪) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑀻 𑀅𑀬𑀁 𑀣𑀼𑀮𑁆𑀮𑀦𑀦𑁆𑀤𑀸 𑀅𑀳𑁄𑀲𑀺, 𑀢𑀺𑀲𑁆𑀲𑁄 𑀥𑀻𑀢𑀭𑁄 𑀇𑀤𑀸𑀦𑀺 𑀢𑀺𑀲𑁆𑀲𑁄𑀬𑁂𑀯 𑀪𑀕𑀺𑀦𑀺𑀬𑁄, 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀯𑀡𑁆𑀡𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁩𑁭] 𑁭. 𑀩𑀩𑁆𑀩𑀼𑀚𑀸𑀢𑀓𑀯𑀡𑁆𑀡𑀦𑀸

𑀬𑀢𑁆𑀣𑁂𑀓𑁄 𑀮𑀪𑀢𑁂 𑀩𑀩𑁆𑀩𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀡𑀫𑀸𑀢𑀼𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁨𑁩𑁦 𑀆𑀤𑀬𑁄) 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀓𑀸𑀡𑀫𑀸𑀢𑀸 𑀦𑀸𑀫 𑀥𑀻𑀢𑀼𑀯𑀲𑁂𑀦 𑀧𑀸𑀓𑀝𑀦𑀸𑀫𑀸 𑀉𑀧𑀸𑀲𑀺𑀓𑀸 𑀅𑀳𑁄𑀲𑀺 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸. 𑀲𑀸 𑀥𑀻𑀢𑀭𑀁 𑀓𑀸𑀡𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀤𑀸𑀲𑀺. 𑀓𑀸𑀡𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀫𑀸𑀢𑀼 𑀖𑀭𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀤𑀽𑀢𑀁 𑀧𑀸𑀳𑁂𑀲𑀺 ‘‘𑀆𑀕𑀘𑁆𑀙𑀢𑀼 𑀓𑀸𑀡𑀸, 𑀇𑀘𑁆𑀙𑀸𑀫𑀺 𑀓𑀸𑀡𑀸𑀬 𑀆𑀕𑀫𑀦’’𑀦𑁆𑀢𑀺. 𑀓𑀸𑀡𑀸 𑀤𑀽𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀫, 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀁 𑀆𑀧𑀼𑀘𑁆𑀙𑀺. 𑀓𑀸𑀡𑀫𑀸𑀢𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀯𑀲𑀺𑀢𑁆𑀯𑀸 𑀓𑀣𑀁 𑀢𑀼𑀘𑁆𑀙𑀳𑀢𑁆𑀣𑀸𑀯 𑀕𑀫𑀺𑀲𑁆𑀲𑀲𑀻’’𑀢𑀺 𑀧𑀽𑀯𑀁 𑀧𑀘𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀏𑀓𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺, 𑀉𑀧𑀸𑀲𑀺𑀓𑀸 𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀢𑀧𑀽𑀭𑀁 𑀧𑀽𑀯𑀁 𑀤𑀸𑀧𑁂𑀲𑀺. 𑀲𑁄 𑀪𑀺𑀓𑁆𑀔𑀼 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀆𑀘𑀺𑀓𑁆𑀔𑀺, 𑀢𑀲𑁆𑀲𑀧𑀺 𑀢𑀣𑁂𑀯 𑀤𑀸𑀧𑁂𑀲𑀺. 𑀲𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀆𑀘𑀺𑀓𑁆𑀔𑀺, 𑀢𑀲𑁆𑀲𑀧𑀺 𑀢𑀣𑁂𑀯𑀸𑀢𑀺 𑀏𑀯𑀁 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑀤𑀸𑀧𑁂𑀲𑀺. 𑀬𑀣𑀸𑀧𑀝𑀺𑀬𑀢𑁆𑀢𑀁 𑀧𑀽𑀯𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺, 𑀓𑀸𑀡𑀸𑀬 𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 𑀤𑀼𑀢𑀺𑀬𑀫𑁆𑀧𑀺, 𑀢𑀢𑀺𑀬𑀫𑁆𑀧𑀺 𑀤𑀽𑀢𑀁 𑀧𑀸𑀳𑁂𑀲𑀺. 𑀢𑀢𑀺𑀬𑀁 𑀧𑀸𑀳𑁂𑀦𑁆𑀢𑁄 𑀘 ‘‘𑀲𑀘𑁂 𑀓𑀸𑀡𑀸 𑀦𑀸𑀕𑀘𑁆𑀙𑀺𑀲𑁆𑀲𑀢𑀺, 𑀅𑀳𑀁 𑀅𑀜𑁆𑀜𑀁 𑀧𑀚𑀸𑀧𑀢𑀺𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀳𑁂𑀲𑀺. 𑀢𑀬𑁄𑀧𑀺 𑀯𑀸𑀭𑁂 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀺, 𑀓𑀸𑀡𑀸𑀬 𑀲𑀸𑀫𑀺𑀓𑁄 𑀅𑀜𑁆𑀜𑀁 𑀧𑀚𑀸𑀧𑀢𑀺𑀁 𑀆𑀦𑁂𑀲𑀺. 𑀓𑀸𑀡𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺.

𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀸𑀡𑀫𑀸𑀢𑀸𑀬 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀡𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀓𑀺𑀲𑁆𑀲𑀸𑀬𑀁 𑀓𑀸𑀡𑀸 𑀭𑁄𑀤𑀢𑀻’’𑀢𑀺? ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀘 𑀲𑀼𑀢𑁆𑀯𑀸 𑀓𑀸𑀡𑀫𑀸𑀢𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀢𑀬𑁄 𑀯𑀸𑀭𑁂 𑀬𑀣𑀸𑀧𑀝𑀺𑀬𑀢𑁆𑀢𑀧𑀽𑀯𑀁 𑀕𑀳𑁂𑀢𑁆𑀯𑀸 𑀓𑀸𑀡𑀸𑀬 𑀕𑀫𑀦𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀘𑀢𑀽𑀳𑀺 𑀦𑀸𑀫 𑀪𑀺𑀓𑁆𑀔𑀽𑀳𑀺 𑀢𑀬𑁄 𑀯𑀸𑀭𑁂 𑀓𑀸𑀡𑀫𑀸𑀢𑀸𑀬 𑀧𑀓𑁆𑀓𑀧𑀽𑀯𑀁 𑀔𑀸𑀤𑀺𑀢𑁆𑀯𑀸 𑀓𑀸𑀡𑀸𑀬 𑀕𑀫𑀦𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀲𑀸𑀫𑀺𑀓𑁂𑀦 𑀧𑀭𑀺𑀘𑁆𑀘𑀢𑁆𑀢𑀁 𑀥𑀻𑀢𑀭𑀁 𑀦𑀺𑀲𑁆𑀲𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀓𑀸𑀡𑀫𑀸𑀢𑀸𑀬 𑀲𑀦𑁆𑀢𑀓𑀁 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀼𑀁, 𑀧𑀼𑀩𑁆𑀩𑁂𑀧𑀺 𑀉𑀧𑁆𑀧𑀸𑀤𑁂𑀲𑀼𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀲𑀸𑀡𑀓𑁄𑀝𑁆𑀝𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄 𑀅𑀳𑁄𑀲𑀺. 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀏𑀓𑁄 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺, 𑀢𑀲𑁆𑀲 𑀦𑀺𑀥𑀸𑀦𑀕𑀢𑀸𑀬𑁂𑀯 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀪𑀭𑀺𑀬𑀸 𑀓𑀸𑀮𑀁 𑀓𑀢𑁆𑀯𑀸 𑀥𑀦𑀲𑀺𑀦𑁂𑀳𑁂𑀦 𑀕𑀦𑁆𑀢𑁆𑀯𑀸 𑀥𑀦𑀧𑀺𑀝𑁆𑀞𑀺𑀬𑀁 𑀫𑀽𑀲𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀫𑁆𑀧𑀺 𑀢𑀁 𑀓𑀼𑀮𑀁 𑀅𑀩𑁆𑀪𑀢𑁆𑀣𑀁 𑀅𑀕𑀫𑀸𑀲𑀺, 𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀺. 𑀲𑁄 𑀕𑀸𑀫𑁄𑀧𑀺 𑀙𑀟𑁆𑀟𑀺𑀢𑁄 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀅𑀕𑀫𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑁂 𑀧𑀸𑀲𑀸𑀡𑁂 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑀺. 𑀅𑀣 𑀲𑀸 𑀫𑀽𑀲𑀺𑀓𑀸 𑀕𑁄𑀘𑀭𑀸𑀬 𑀘𑀭𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀦𑁆𑀢𑀻 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀥𑀦𑀁 𑀩𑀳𑀼 𑀦𑀺𑀓𑁆𑀓𑀸𑀭𑀡𑁂𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀇𑀤𑀁 𑀥𑀦𑀁 𑀤𑀢𑁆𑀯𑀸 𑀫𑀁𑀲𑀁 𑀯𑀺𑀓𑁆𑀓𑀺𑀡𑀸𑀧𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀓𑀳𑀸𑀧𑀡𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀧𑀺𑀬𑀯𑀸𑀘𑀸𑀬 𑀲𑀫𑀸𑀮𑀧𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄, 𑀅𑀫𑁆𑀫, 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀲𑀻’’𑀢𑀺 𑀆𑀳. 𑀢𑀸𑀢, 𑀇𑀫𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚, 𑀫𑀬𑁆𑀳𑀫𑁆𑀧𑀺 𑀫𑀁𑀲𑀁 𑀆𑀳𑀭𑀸𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀳𑀸𑀧𑀡𑀁 𑀆𑀤𑀸𑀬 𑀖𑀭𑀁 𑀕𑀦𑁆𑀢𑁆𑀯𑀸 𑀏𑀓𑁂𑀦 𑀫𑀸𑀲𑀓𑁂𑀦 𑀫𑀁𑀲𑀁 𑀓𑀺𑀡𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲𑀸 𑀅𑀤𑀸𑀲𑀺. 𑀲𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀣𑀸𑀭𑀼𑀘𑀺𑀬𑀸 𑀔𑀸𑀤𑀺. 𑀢𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀳𑀸𑀧𑀡𑀁 𑀤𑁂𑀢𑀺, 𑀲𑁄𑀧𑀺𑀲𑁆𑀲𑀸 𑀫𑀁𑀲𑀁 𑀆𑀳𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀁 𑀫𑀽𑀲𑀺𑀓𑀁 𑀩𑀺𑀴𑀸𑀭𑁄 𑀅𑀕𑁆𑀕𑀳𑁂𑀲𑀺. 𑀅𑀣 𑀦𑀁 𑀲𑀸 𑀏𑀯𑀫𑀸𑀳 ‘‘𑀫𑀸, 𑀲𑀫𑁆𑀫, 𑀫𑀁 𑀫𑀸𑀭𑁂𑀲𑀻’’𑀢𑀺. 𑀓𑀺𑀁𑀓𑀸𑀭𑀡𑀸 𑀦 𑀫𑀸𑀭𑁂𑀲𑁆𑀲𑀸𑀫𑀺? 𑀅𑀳𑀜𑁆𑀳𑀺 𑀙𑀸𑀢𑁄 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄, 𑀦 𑀲𑀓𑁆𑀓𑀸 𑀫𑀬𑀸 𑀦 𑀫𑀸𑀭𑁂𑀢𑀼𑀦𑁆𑀢𑀺. 𑀓𑀺𑀁 𑀧𑀦 𑀏𑀓𑀤𑀺𑀯𑀲𑀫𑁂𑀯 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄𑀲𑀺, 𑀉𑀤𑀸𑀳𑀼 𑀦𑀺𑀘𑁆𑀘𑀓𑀸𑀮𑀦𑁆𑀢𑀺? ‘‘𑀮𑀪𑀫𑀸𑀦𑁄 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺. ‘‘𑀬𑀤𑀺 𑀏𑀯𑀁 𑀅𑀳𑀁 𑀢𑁂 𑀦𑀺𑀘𑁆𑀘𑀓𑀸𑀮𑀁 𑀫𑀁𑀲𑀁 𑀤𑀲𑁆𑀲𑀸𑀫𑀺, 𑀯𑀺𑀲𑁆𑀲𑀚𑁆𑀚𑁂𑀳𑀺 𑀫’’𑀦𑁆𑀢𑀺. 𑀅𑀣 𑀦𑀁 𑀩𑀺𑀴𑀸𑀭𑁄 ‘‘𑀢𑁂𑀦 𑀳𑀺 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀅𑀢𑁆𑀢𑀦𑁄 𑀆𑀪𑀢𑀁 𑀫𑀁𑀲𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑀁 𑀩𑀺𑀴𑀸𑀭𑀲𑁆𑀲 𑀤𑁂𑀢𑀺, 𑀏𑀓𑀁 𑀲𑀬𑀁 𑀔𑀸𑀤𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀅𑀜𑁆𑀜𑁄𑀧𑀺 𑀩𑀺𑀴𑀸𑀭𑁄 𑀅𑀕𑁆𑀕𑀳𑁂𑀲𑀺, 𑀢𑀫𑁆𑀧𑀺 𑀢𑀣𑁂𑀯 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀧𑀼𑀦 𑀅𑀜𑁆𑀜𑁄 𑀅𑀕𑁆𑀕𑀳𑁂𑀲𑀺, 𑀢𑀫𑁆𑀧𑀺 𑀢𑀣𑁂𑀯 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑁄𑀘𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀧𑀼𑀦 𑀅𑀜𑁆𑀜𑁄 𑀅𑀕𑁆𑀕𑀳𑁂𑀲𑀺, 𑀢𑀫𑁆𑀧𑀺 𑀢𑀣𑁂𑀯 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑁄𑀘𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀲𑀸 𑀧𑀜𑁆𑀘𑀫𑀁 𑀓𑁄𑀝𑁆𑀞𑀸𑀲𑀁 𑀔𑀸𑀤𑀫𑀸𑀦𑀸 𑀅𑀧𑁆𑀧𑀸𑀳𑀸𑀭𑀢𑀸𑀬 𑀓𑀺𑀮𑀦𑁆𑀢𑀸 𑀓𑀺𑀲𑀸 𑀅𑀳𑁄𑀲𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀫, 𑀓𑀲𑁆𑀫𑀸 𑀫𑀺𑀮𑀸𑀢𑀸𑀲𑀻’’𑀢𑀺 𑀯𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁆𑀯𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀲𑁆𑀫𑀸 𑀫𑀬𑁆𑀳𑀁 𑀦𑀸𑀘𑀺𑀓𑁆𑀔𑀺, 𑀅𑀳𑀫𑁂𑀢𑁆𑀣 𑀓𑀸𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀼𑀤𑁆𑀥𑀨𑀮𑀺𑀓𑀧𑀸𑀲𑀸𑀡𑁂𑀦 𑀕𑀼𑀳𑀁 𑀓𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀅𑀫𑁆𑀫, 𑀢𑁆𑀯𑀁 𑀇𑀫𑀁 𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀲𑀦𑁆𑀢𑀚𑁆𑀚𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑀸 𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑁂𑀓𑁄 𑀩𑀺𑀴𑀸𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀳𑀺, 𑀅𑀚𑁆𑀚 𑀫𑁂 𑀫𑀁𑀲’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀫𑀽𑀲𑀺𑀓𑀸 ‘‘𑀅𑀭𑁂, 𑀤𑀼𑀝𑁆𑀞𑀩𑀺𑀴𑀸𑀭, 𑀓𑀺𑀁 𑀢𑁂 𑀅𑀳𑀁 𑀫𑀁𑀲𑀳𑀸𑀭𑀺𑀓𑀸, 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀫𑀁𑀲𑀁 𑀔𑀸𑀤𑀸’’𑀢𑀺 𑀢𑀚𑁆𑀚𑁂𑀲𑀺. 𑀩𑀺𑀴𑀸𑀭𑁄 𑀨𑀮𑀺𑀓𑀕𑀼𑀳𑀸𑀬 𑀦𑀺𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀓𑁄𑀥𑀯𑀲𑁂𑀦 𑀫𑀽𑀲𑀺𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀳𑀲𑀸𑀯 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀳𑀤𑀬𑁂𑀦 𑀨𑀮𑀺𑀓𑀕𑀼𑀳𑀸𑀬𑀁 𑀧𑀳𑀭𑀺. 𑀢𑀸𑀯𑀤𑁂𑀯𑀲𑁆𑀲 𑀳𑀤𑀬𑀁 𑀪𑀺𑀚𑁆𑀚𑀺, 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀚𑀸𑀢𑀸𑀦𑀺. 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀏𑀓𑀫𑀦𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀧𑀢𑀺. 𑀏𑀢𑁂𑀦𑀽𑀧𑀸𑀬𑁂𑀦 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀽𑀲𑀺𑀓𑀸 𑀦𑀺𑀩𑁆𑀪𑀬𑀸 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑁂𑀯𑀲𑀺𑀓𑀁 𑀤𑁆𑀯𑁂 𑀢𑀬𑁄 𑀓𑀳𑀸𑀧𑀡𑁂 𑀤𑁂𑀢𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀫𑁆𑀧𑀺 𑀥𑀦𑀁 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀢𑁂 𑀉𑀪𑁄𑀧𑀺 𑀬𑀸𑀯𑀚𑀻𑀯𑀁 𑀫𑁂𑀢𑁆𑀢𑀺𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁭. ‘‘𑀬𑀢𑁆𑀣𑁂𑀓𑁄 𑀮𑀪𑀢𑁂 𑀩𑀩𑁆𑀩𑀼, 𑀤𑀼𑀢𑀺𑀬𑁄 𑀢𑀢𑁆𑀣 𑀚𑀸𑀬𑀢𑀺;

𑀢𑀢𑀺𑀬𑁄 𑀘 𑀘𑀢𑀼𑀢𑁆𑀣𑁄 𑀘, 𑀇𑀤𑀁 𑀢𑁂 𑀩𑀩𑁆𑀩𑀼𑀓𑀸 𑀩𑀺𑀮’’𑀦𑁆𑀢𑀺.

𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀩𑀩𑁆𑀩𑀽𑀢𑀺 𑀩𑀺𑀴𑀸𑀭𑁄. 𑀤𑀼𑀢𑀺𑀬𑁄 𑀢𑀢𑁆𑀣 𑀚𑀸𑀬𑀢𑀻𑀢𑀺 𑀬𑀢𑁆𑀣 𑀏𑀓𑁄 𑀫𑀽𑀲𑀺𑀓𑀁 𑀯𑀸 𑀫𑀁𑀲𑀁 𑀯𑀸 𑀮𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀩𑀺𑀴𑀸𑀭𑁄 𑀚𑀸𑀬𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀢𑀢𑀺𑀬𑁄 𑀘 𑀘𑀢𑀼𑀢𑁆𑀣𑁄 𑀘. 𑀏𑀯𑀁 𑀢𑁂 𑀢𑀤𑀸 𑀘𑀢𑁆𑀢𑀸𑀭𑁄 𑀩𑀺𑀴𑀸𑀭𑀸 𑀅𑀳𑁂𑀲𑀼𑀁. 𑀳𑀼𑀢𑁆𑀯𑀸 𑀘 𑀧𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀁𑀲𑀁 𑀔𑀸𑀤𑀦𑁆𑀢𑀸 𑀢𑁂 𑀩𑀩𑁆𑀩𑀼𑀓𑀸 𑀇𑀤𑀁 𑀨𑀮𑀺𑀓𑀫𑀬𑀁 𑀩𑀺𑀮𑀁 𑀉𑀭𑁂𑀦 𑀧𑀳𑀭𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸𑀢𑀺.

𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀘𑀢𑁆𑀢𑀸𑀭𑁄 𑀩𑀺𑀴𑀸𑀭𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀫𑀽𑀲𑀺𑀓𑀸 𑀓𑀸𑀡𑀫𑀸𑀢𑀸, 𑀧𑀸𑀲𑀸𑀡𑀓𑁄𑀝𑁆𑀝𑀓𑀫𑀡𑀺𑀓𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀩𑁆𑀩𑀼𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁩𑁮] 𑁮. 𑀕𑁄𑀥𑀸𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀲𑀤𑀺𑀲𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑁄𑀥𑀸𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀤𑀸 𑀏𑀓𑁄 𑀧𑀜𑁆𑀘𑀸𑀪𑀺𑀜𑁆𑀜𑁄 𑀉𑀕𑁆𑀕𑀢𑀧𑁄 𑀢𑀸𑀧𑀲𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀢𑀺, 𑀕𑀸𑀫𑀯𑀸𑀲𑀺𑀦𑁄 𑀢𑀸𑀧𑀲𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀯𑀲𑀢𑀺, 𑀯𑀲𑀦𑁆𑀢𑁄 𑀘 𑀧𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀢𑀸𑀧𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀅𑀢𑁆𑀣𑀽𑀧𑀲𑀁𑀳𑀺𑀢𑀜𑁆𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀅𑀧𑀭𑀪𑀸𑀕𑁂 𑀢𑀸𑀧𑀲𑁄 𑀕𑀸𑀫𑀯𑀸𑀲𑀺𑀦𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀓𑁆𑀓𑀫𑀦𑁆𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀲𑀻𑀮𑀯𑀢𑀲𑀫𑁆𑀧𑀦𑁆𑀦𑁂 𑀢𑀸𑀧𑀲𑁂 𑀅𑀜𑁆𑀜𑁄 𑀓𑀽𑀝𑀢𑀸𑀧𑀲𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀫𑁆𑀧𑀺 𑀲𑀻𑀮𑀯𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀦𑀺𑀤𑀸𑀖𑀲𑀫𑀬𑁂 𑀅𑀓𑀸𑀮𑀫𑁂𑀖𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑁂𑀳𑀺 𑀫𑀓𑁆𑀔𑀺𑀓𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀢𑀸𑀲𑀁 𑀔𑀸𑀤𑀦𑀢𑁆𑀣𑀁 𑀕𑁄𑀥𑀸 𑀆𑀳𑀺𑀡𑁆𑀟𑀺𑀁𑀲𑀼. 𑀕𑀸𑀫𑀯𑀸𑀲𑀺𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀓𑁆𑀔𑀺𑀓𑀸𑀔𑀸𑀤𑀓𑀸 𑀕𑁄𑀥𑀸 𑀕𑀳𑁂𑀢𑁆𑀯𑀸 𑀲𑀺𑀦𑀺𑀤𑁆𑀥𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀁 𑀅𑀫𑁆𑀩𑀺𑀮𑀸𑀦𑀫𑁆𑀩𑀺𑀮𑀁 𑀕𑁄𑀥𑀸𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀸𑀧𑀲𑀲𑁆𑀲 𑀅𑀤𑀁𑀲𑀼. 𑀢𑀸𑀧𑀲𑁄 𑀕𑁄𑀥𑀸𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 ‘‘𑀇𑀤𑀁 𑀫𑀁𑀲𑀁 𑀅𑀢𑀺𑀫𑀥𑀼𑀭𑀁, 𑀓𑀺𑀲𑁆𑀲 𑀫𑀁𑀲𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑁄𑀥𑀸𑀫𑀁𑀲’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀫𑀫 𑀲𑀦𑁆𑀢𑀺𑀓𑀁 𑀫𑀳𑀸𑀕𑁄𑀥𑀸 𑀆𑀕𑀘𑁆𑀙𑀢𑀺, 𑀢𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀪𑀸𑀚𑀦𑀜𑁆𑀘 𑀲𑀧𑁆𑀧𑀺𑀮𑁄𑀡𑀸𑀤𑀻𑀦𑀺 𑀘 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀫𑀼𑀕𑁆𑀕𑀭𑀫𑀸𑀤𑀸𑀬 𑀓𑀸𑀲𑀸𑀯𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀤𑁆𑀯𑀸𑀭𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑁄 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑁂 ‘‘𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑁄𑀯 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀦𑀸𑀬𑀁 𑀢𑀸𑀧𑀲𑁄 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀦𑀺𑀲𑀻𑀤𑀦𑀸𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑁄, 𑀅𑀚𑁆𑀚𑁂𑀲 𑀫𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀤𑀼𑀝𑁆𑀞𑀺𑀦𑁆𑀤𑁆𑀭𑀺𑀬𑁄 𑀳𑀼𑀢𑁆𑀯𑀸 𑀑𑀮𑁄𑀓𑁂𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀢𑀸𑀧𑀲𑀲𑁆𑀲 𑀳𑁂𑀝𑁆𑀞𑀸𑀯𑀸𑀢𑁂 𑀞𑀢𑁆𑀯𑀸 𑀕𑁄𑀥𑀸𑀫𑀁𑀲𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀽𑀝𑀢𑀸𑀧𑀲𑁂𑀦 𑀅𑀚𑁆𑀚 𑀕𑁄𑀥𑀸𑀫𑀁𑀲𑀁 𑀔𑀸𑀤𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀢𑁂𑀦𑁂𑀲 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀅𑀚𑁆𑀚 𑀫𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑀁 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀦𑀼𑀧𑀕𑀦𑁆𑀢𑁆𑀯𑀸𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀘𑀭𑀢𑀺.

𑀢𑀸𑀧𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀺𑀦𑀸 ‘𑀅𑀬𑀁 𑀫𑀁 𑀧𑀳𑀭𑀺𑀢𑀼𑀓𑀸𑀫𑁄’𑀢𑀺 𑀜𑀸𑀢𑀁 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀦𑀸𑀕𑀘𑁆𑀙𑀢𑀺, 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺𑀲𑁆𑀲 𑀓𑀼𑀢𑁄 𑀫𑀼𑀢𑁆𑀢𑀻’’𑀢𑀺 𑀫𑀼𑀕𑁆𑀕𑀭𑀁 𑀦𑀻𑀳𑀭𑀺𑀢𑁆𑀯𑀸 𑀔𑀺𑀧𑀺. 𑀲𑁄 𑀢𑀲𑁆𑀲 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀫𑁂𑀯 𑀆𑀲𑀸𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀯𑁂𑀕𑁂𑀦 𑀯𑀫𑁆𑀫𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀙𑀺𑀤𑁆𑀤𑁂𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀫𑁆𑀪𑁄 𑀓𑀽𑀝𑀚𑀝𑀺𑀮, 𑀅𑀳𑀁 𑀢𑀯 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 ‘𑀲𑀻𑀮𑀯𑀸’𑀢𑀺 𑀲𑀜𑁆𑀜𑀸𑀬 𑀉𑀧𑀲𑀗𑁆𑀓𑀫𑀺𑀁, 𑀇𑀤𑀸𑀦𑀺 𑀧𑀦 𑀢𑁂 𑀫𑀬𑀸 𑀓𑀽𑀝𑀪𑀸𑀯𑁄 𑀜𑀸𑀢𑁄, 𑀢𑀸𑀤𑀺𑀲𑀲𑁆𑀲 𑀫𑀳𑀸𑀘𑁄𑀭𑀲𑁆𑀲 𑀓𑀺𑀁 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑁂𑀦𑀸’’𑀢𑀺 𑀯𑀢𑁆𑀯𑀸 𑀢𑀁 𑀕𑀭𑀳𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁮. ‘‘𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻’’𑀢𑀺.

𑀢𑀢𑁆𑀣 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥𑀸𑀢𑀺 𑀅𑀫𑁆𑀪𑁄 𑀤𑀼𑀫𑁆𑀫𑁂𑀥, 𑀦𑀺𑀧𑁆𑀧𑀜𑁆𑀜 𑀏𑀢𑀸 𑀧𑀩𑁆𑀩𑀚𑀺𑀢𑁂𑀦 𑀥𑀸𑀭𑁂𑀢𑀩𑁆𑀩𑀸 𑀚𑀝𑀸, 𑀧𑀩𑁆𑀩𑀚𑁆𑀚𑀸𑀕𑀼𑀡𑀭𑀳𑀺𑀢𑀲𑁆𑀲 𑀓𑀺𑀁 𑀢𑁂 𑀢𑀸𑀳𑀺 𑀚𑀝𑀸𑀳𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸𑀢𑀺 𑀅𑀚𑀺𑀦𑀲𑀸𑀝𑀺𑀬𑀸 𑀅𑀦𑀼𑀘𑁆𑀙𑀯𑀺𑀓𑀲𑁆𑀲 𑀲𑀁𑀯𑀭𑀲𑁆𑀲 𑀅𑀪𑀸𑀯𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸. 𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀦𑁆𑀢𑀺 𑀢𑀯 𑀅𑀩𑁆𑀪𑀦𑁆𑀢𑀭𑀁 𑀳𑀤𑀬𑀁 𑀭𑀸𑀕𑀤𑁄𑀲𑀫𑁄𑀳𑀕𑀳𑀦𑁂𑀦 𑀕𑀳𑀦𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻𑀢𑀺 𑀲𑁄 𑀢𑁆𑀯𑀁 𑀅𑀩𑁆𑀪𑀦𑁆𑀢𑀭𑁂 𑀕𑀳𑀦𑁂 𑀦𑁆𑀳𑀸𑀦𑀸𑀤𑀻𑀳𑀺 𑀘𑁂𑀯 𑀮𑀺𑀗𑁆𑀕𑀕𑀳𑀦𑁂𑀦 𑀘 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀺, 𑀢𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀓𑀜𑁆𑀚𑀺𑀓𑀧𑀽𑀭𑀺𑀢𑀮𑀸𑀩𑀼 𑀯𑀺𑀬 𑀯𑀺𑀲𑀧𑀽𑀭𑀺𑀢𑀘𑀸𑀝𑀺 𑀯𑀺𑀬 𑀆𑀲𑀻𑀯𑀺𑀲𑀧𑀽𑀭𑀺𑀢𑀯𑀫𑁆𑀫𑀺𑀓𑁄 𑀯𑀺𑀬 𑀕𑀽𑀣𑀧𑀽𑀭𑀺𑀢𑀘𑀺𑀢𑁆𑀢𑀖𑀝𑁄 𑀯𑀺𑀬 𑀘 𑀩𑀳𑀺𑀫𑀝𑁆𑀞𑁄𑀯 𑀳𑁄𑀲𑀺, 𑀓𑀺𑀁 𑀢𑀬𑀸 𑀘𑁄𑀭𑁂𑀦 𑀇𑀥 𑀯𑀲𑀦𑁆𑀢𑁂𑀦, 𑀲𑀻𑀖𑀁 𑀇𑀢𑁄 𑀧𑀮𑀸𑀬𑀸𑀳𑀺, 𑀦𑁄 𑀘𑁂 𑀧𑀮𑀸𑀬𑀲𑀺, 𑀕𑀸𑀫𑀯𑀸𑀲𑀻𑀦𑀁 𑀢𑁂 𑀆𑀘𑀺𑀓𑁆𑀔𑀺𑀢𑁆𑀯𑀸 𑀦𑀺𑀕𑁆𑀕𑀳𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀓𑀽𑀝𑀢𑀸𑀧𑀲𑀁 𑀢𑀚𑁆𑀚𑁂𑀢𑁆𑀯𑀸 𑀯𑀫𑁆𑀫𑀺𑀓𑀫𑁂𑀯 𑀧𑀸𑀯𑀺𑀲𑀺, 𑀓𑀽𑀝𑀢𑀸𑀧𑀲𑁄𑀧𑀺 𑀢𑀢𑁄 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀢𑀸𑀧𑀲𑁄 𑀅𑀬𑀁 𑀓𑀼𑀳𑀓𑁄 𑀅𑀳𑁄𑀲𑀺, 𑀧𑀼𑀭𑀺𑀫𑁄 𑀲𑀻𑀮𑀯𑀦𑁆𑀢𑀢𑀸𑀧𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀕𑁄𑀥𑀸𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑁄𑀥𑀸𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁩𑁯] 𑁯. 𑀉𑀪𑀢𑁄𑀪𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑁆𑀔𑀻 𑀪𑀺𑀦𑁆𑀦𑀸 𑀧𑀝𑁄 𑀦𑀝𑁆𑀞𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀙𑀯𑀸𑀮𑀸𑀢𑀁 𑀉𑀪𑀢𑁄𑀧𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀕𑀢𑀁 𑀦𑁂𑀯𑀸𑀭𑀜𑁆𑀜𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺, 𑀦 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺, 𑀏𑀯𑀫𑁂𑀯 𑀤𑁂𑀯𑀤𑀢𑁆𑀢𑁄 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀪𑀢𑁄 𑀪𑀝𑁆𑀞𑁄 𑀉𑀪𑀢𑁄 𑀧𑀭𑀺𑀩𑀸𑀳𑀺𑀭𑁄 𑀚𑀸𑀢𑁄, 𑀕𑀺𑀳𑀺𑀧𑀭𑀺𑀪𑁄𑀕𑀸 𑀘 𑀧𑀭𑀺𑀳𑀻𑀦𑁄, 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀦 𑀧𑀭𑀺𑀧𑀽𑀭𑁂𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀉𑀪𑀢𑁄 𑀪𑀝𑁆𑀞𑁄 𑀳𑁄𑀢𑀺, 𑀅𑀢𑀻𑀢𑁂𑀧𑀺 𑀉𑀪𑀢𑁄 𑀪𑀝𑁆𑀞𑁄 𑀅𑀳𑁄𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀩𑀸𑀴𑀺𑀲𑀺𑀓𑀸 𑀯𑀲𑀦𑁆𑀢𑀺. 𑀅𑀣𑁂𑀓𑁄 𑀩𑀸𑀴𑀺𑀲𑀺𑀓𑁄 𑀩𑀴𑀺𑀲𑀁 𑀆𑀤𑀸𑀬 𑀤𑀳𑀭𑁂𑀦 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀬𑀲𑁆𑀫𑀺𑀁 𑀲𑁄𑀩𑁆𑀪𑁂 𑀧𑀓𑀢𑀺𑀬𑀸𑀧𑀺 𑀩𑀸𑀴𑀺𑀲𑀺𑀓𑀸 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑀴𑀺𑀲𑀁 𑀔𑀺𑀧𑀺. 𑀩𑀴𑀺𑀲𑁄 𑀉𑀤𑀓𑀧𑀝𑀺𑀘𑁆𑀙𑀦𑁆𑀦𑁂 𑀏𑀓𑀲𑁆𑀫𑀺𑀁 𑀔𑀸𑀡𑀼𑀓𑁂 𑀮𑀕𑁆𑀕𑀺. 𑀩𑀸𑀴𑀺𑀲𑀺𑀓𑁄 𑀢𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀴𑀺𑀲𑁄 𑀫𑀳𑀸𑀫𑀘𑁆𑀙𑁂 𑀮𑀕𑁆𑀕𑁄 𑀪𑀯𑀺𑀲𑁆𑀲𑀢𑀺, 𑀧𑀼𑀢𑁆𑀢𑀓𑀁 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑁂𑀳𑀺 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀸𑀭𑀸𑀧𑁂𑀫𑀺, 𑀏𑀯𑀁 𑀇𑀢𑁄 𑀦 𑀓𑁄𑀘𑀺 𑀓𑁄𑀝𑁆𑀞𑀸𑀲𑀁 𑀧𑀘𑁆𑀘𑀸𑀲𑀻𑀲𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀼𑀢𑁆𑀢𑀁 𑀆𑀳 ‘‘𑀕𑀘𑁆𑀙, 𑀢𑀸𑀢, 𑀅𑀫𑁆𑀳𑁂𑀳𑀺 𑀫𑀳𑀸𑀫𑀘𑁆𑀙𑀲𑁆𑀲 𑀮𑀤𑁆𑀥𑀪𑀸𑀯𑀁 𑀫𑀸𑀢𑀼 𑀆𑀘𑀺𑀓𑁆𑀔𑀸𑀳𑀺, ‘𑀧𑀝𑀺𑀯𑀺𑀲𑁆𑀲𑀓𑁂𑀳𑀺 𑀓𑀺𑀭 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀳𑀻’𑀢𑀺 𑀯𑀤𑁂𑀳𑀻’’𑀢𑀺. 𑀲𑁄 𑀧𑀼𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀩𑀴𑀺𑀲𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀚𑁆𑀚𑀼𑀘𑁆𑀙𑁂𑀤𑀦𑀪𑀬𑁂𑀦 𑀉𑀢𑁆𑀢𑀭𑀺𑀲𑀸𑀝𑀓𑀁 𑀣𑀮𑁂 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑀮𑁄𑀪𑁂𑀦 𑀫𑀘𑁆𑀙𑀁 𑀉𑀧𑀥𑀸𑀭𑁂𑀦𑁆𑀢𑁄 𑀔𑀸𑀡𑀼𑀓𑁂𑀳𑀺 𑀧𑀳𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀺. 𑀣𑀮𑁂 𑀞𑀧𑀺𑀢𑀲𑀸𑀝𑀓𑀁𑀧𑀺𑀲𑁆𑀲 𑀘𑁄𑀭𑁄 𑀳𑀭𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀳𑀢𑁆𑀣𑁂𑀦 𑀅𑀓𑁆𑀔𑀻𑀦𑀺 𑀉𑀧𑁆𑀧𑀻𑀴𑀬𑀫𑀸𑀦𑁄 𑀕𑀳𑁂𑀢𑁆𑀯𑀸 𑀉𑀤𑀓𑀸 𑀉𑀢𑁆𑀢𑀭𑀺𑀢𑁆𑀯𑀸 𑀓𑀫𑁆𑀧𑀫𑀸𑀦𑁄 𑀲𑀸𑀝𑀓𑀁 𑀧𑀭𑀺𑀬𑁂𑀲𑀢𑀺.

𑀲𑀸𑀧𑀺𑀲𑁆𑀲 𑀪𑀭𑀺𑀬𑀸 ‘‘𑀓𑀮𑀳𑀁 𑀓𑀢𑁆𑀯𑀸 𑀓𑀲𑁆𑀲𑀘𑀺 𑀅𑀧𑀘𑁆𑀘𑀸𑀲𑀻𑀲𑀦𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀓𑀡𑁆𑀡𑁂 𑀢𑀸𑀮𑀧𑀡𑁆𑀡𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀏𑀓𑀁 𑀅𑀓𑁆𑀔𑀺𑀁 𑀉𑀓𑁆𑀔𑀮𑀺𑀫𑀲𑀺𑀬𑀸 𑀅𑀜𑁆𑀚𑁂𑀢𑁆𑀯𑀸 𑀓𑀼𑀓𑁆𑀓𑀼𑀭𑀁 𑀅𑀗𑁆𑀓𑁂𑀦𑀸𑀤𑀸𑀬 𑀧𑀝𑀺𑀯𑀺𑀲𑁆𑀲𑀓𑀖𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀏𑀓𑀸 𑀲𑀳𑀸𑀬𑀺𑀓𑀸 𑀏𑀯𑀫𑀸𑀳 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀢𑁂 𑀓𑀡𑁆𑀡𑁂 𑀢𑀸𑀮𑀧𑀡𑁆𑀡𑀁 𑀧𑀺𑀴𑀦𑁆𑀥𑀺𑀢𑀁, 𑀏𑀓𑀁 𑀅𑀓𑁆𑀔𑀺 𑀅𑀜𑁆𑀚𑀺𑀢𑀁, 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀓𑀼𑀓𑁆𑀓𑀼𑀭𑀁 𑀅𑀗𑁆𑀓𑁂𑀦𑀸𑀤𑀸𑀬 𑀖𑀭𑀢𑁄 𑀖𑀭𑀁 𑀕𑀘𑁆𑀙𑀲𑀺, 𑀓𑀺𑀁 𑀉𑀫𑁆𑀫𑀢𑁆𑀢𑀺𑀓𑀸𑀲𑀺 𑀚𑀸𑀢𑀸’’𑀢𑀺. ‘‘𑀦𑀸𑀳𑀁 𑀉𑀫𑁆𑀫𑀢𑁆𑀢𑀺𑀓𑀸, 𑀢𑁆𑀯𑀁 𑀧𑀦 𑀫𑀁 𑀅𑀓𑀸𑀭𑀡𑁂𑀦 𑀅𑀓𑁆𑀓𑁄𑀲𑀲𑀺 𑀧𑀭𑀺𑀪𑀸𑀲𑀲𑀺, 𑀇𑀤𑀸𑀦𑀺 𑀢𑀁 𑀕𑀸𑀫𑀪𑁄𑀚𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀡𑁆𑀟𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀓𑀮𑀳𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀕𑀸𑀫𑀪𑁄𑀚𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀓𑀮𑀳𑁂 𑀯𑀺𑀲𑁄𑀥𑀺𑀬𑀫𑀸𑀦𑁂 𑀢𑀲𑁆𑀲𑀸𑀬𑁂𑀯 𑀫𑀢𑁆𑀣𑀓𑁂 𑀤𑀡𑁆𑀟𑁄 𑀧𑀢𑀺. 𑀅𑀣 𑀦𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀤𑀡𑁆𑀟𑀁 𑀤𑁂𑀳𑀻’’𑀢𑀺 𑀧𑁄𑀣𑁂𑀢𑀼𑀁 𑀆𑀭𑀪𑀺𑀁𑀲𑀼.

𑀭𑀼𑀓𑁆𑀔𑀤𑁂𑀯𑀢𑀸 𑀕𑀸𑀫𑁂 𑀢𑀲𑁆𑀲𑀸 𑀇𑀫𑀁 𑀧𑀯𑀢𑁆𑀢𑀺𑀁, 𑀅𑀭𑀜𑁆𑀜𑁂 𑀘𑀲𑁆𑀲𑀸 𑀧𑀢𑀺𑀦𑁄 𑀢𑀁 𑀩𑁆𑀬𑀲𑀦𑀁 𑀤𑀺𑀲𑁆𑀯𑀸 𑀔𑀦𑁆𑀥𑀦𑁆𑀢𑀭𑁂 𑀞𑀺𑀢𑀸 ‘‘𑀪𑁄 𑀧𑀼𑀭𑀺𑀲, 𑀢𑀼𑀬𑁆𑀳𑀁 𑀉𑀤𑀓𑁂𑀧𑀺 𑀓𑀫𑁆𑀫𑀦𑁆𑀢𑁄 𑀧𑀤𑀼𑀝𑁆𑀞𑁄 𑀣𑀮𑁂𑀧𑀺, 𑀉𑀪𑀢𑁄𑀪𑀝𑁆𑀞𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁯. ‘‘𑀅𑀓𑁆𑀔𑀻 𑀪𑀺𑀦𑁆𑀦𑀸 𑀧𑀝𑁄 𑀦𑀝𑁆𑀞𑁄, 𑀲𑀔𑀺𑀕𑁂𑀳𑁂 𑀘 𑀪𑀡𑁆𑀟𑀦𑀁;

𑀉𑀪𑀢𑁄 𑀧𑀤𑀼𑀝𑁆𑀞𑀸 𑀓𑀫𑁆𑀫𑀦𑁆𑀢𑀸, 𑀉𑀤𑀓𑀫𑁆𑀳𑀺 𑀣𑀮𑀫𑁆𑀳𑀺 𑀘𑀸’’𑀢𑀺.

𑀢𑀢𑁆𑀣 𑀲𑀔𑀺𑀕𑁂𑀳𑁂 𑀘 𑀪𑀡𑁆𑀟𑀦𑀦𑁆𑀢𑀺 𑀲𑀔𑀻 𑀦𑀸𑀫 𑀲𑀳𑀸𑀬𑀺𑀓𑀸, 𑀢𑀲𑁆𑀲𑀸 𑀘 𑀕𑁂𑀳𑁂 𑀢𑀯 𑀪𑀭𑀺𑀬𑀸𑀬 𑀪𑀡𑁆𑀟𑀦𑀁 𑀓𑀢𑀁, 𑀪𑀡𑁆𑀟𑀦𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀤𑀡𑁆𑀟𑀁 𑀤𑀸𑀧𑀺𑀬𑀢𑀺. 𑀉𑀪𑀢𑁄 𑀧𑀤𑀼𑀝𑁆𑀞𑀸 𑀓𑀫𑁆𑀫𑀦𑁆𑀢𑀸𑀢𑀺 𑀏𑀯𑀁 𑀢𑀯 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀓𑀫𑁆𑀫𑀦𑁆𑀢𑀸 𑀧𑀤𑀼𑀝𑁆𑀞𑀸𑀬𑁂𑀯 𑀪𑀺𑀦𑁆𑀦𑀸𑀬𑁂𑀯. 𑀓𑀢𑀭𑁂𑀲𑀼 𑀤𑁆𑀯𑀻𑀲𑀼? 𑀉𑀤𑀓𑀫𑁆𑀳𑀺 𑀣𑀮𑀫𑁆𑀳𑀺 𑀘𑀸𑀢𑀺, 𑀅𑀓𑁆𑀔𑀺𑀪𑁂𑀤𑁂𑀦 𑀧𑀝𑀦𑀸𑀲𑁂𑀦 𑀘 𑀉𑀤𑀓𑁂 𑀓𑀫𑁆𑀫𑀦𑁆𑀢𑀸 𑀧𑀤𑀼𑀝𑁆𑀞𑀸, 𑀲𑀔𑀺𑀕𑁂𑀳𑁂 𑀪𑀡𑁆𑀟𑀦𑁂𑀦 𑀣𑀮𑁂 𑀓𑀫𑁆𑀫𑀦𑁆𑀢𑀸 𑀧𑀤𑀼𑀝𑁆𑀞𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀩𑀸𑀴𑀺𑀲𑀺𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀪𑀢𑁄𑀪𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁪𑁦] 𑁧𑁦. 𑀓𑀸𑀓𑀚𑀸𑀢𑀓𑀯𑀡𑁆𑀡𑀦𑀸

𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀪𑀤𑁆𑀤𑀲𑀸𑀮𑀚𑀸𑀢𑀓𑁂 (𑀚𑀸. 𑁧.𑁧𑁨.𑁧𑁩 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑀳𑀺𑀦𑀕𑀭𑁂 𑀦𑀤𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀯𑀭𑀯𑀢𑁆𑀣𑀦𑀺𑀯𑀢𑁆𑀣𑁄 𑀦𑀕𑀭𑀁 𑀧𑀸𑀯𑀺𑀲𑀺. 𑀦𑀕𑀭𑀤𑁆𑀯𑀸𑀭𑀢𑁄𑀭𑀡𑁂 𑀤𑁆𑀯𑁂 𑀓𑀸𑀓𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀏𑀓𑀁 𑀆𑀳 𑁋 ‘‘𑀲𑀫𑁆𑀫, 𑀅𑀳𑀁 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀢𑁆𑀣𑀓𑁂 𑀲𑀭𑀻𑀭𑀯𑀴𑀜𑁆𑀚𑀁 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺. 𑀇𑀢𑀭𑁄 ‘‘𑀫𑀸 𑀢𑁂 𑀏𑀢𑀁 𑀭𑀼𑀘𑁆𑀘𑀺, 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀇𑀲𑁆𑀲𑀭𑁄, 𑀇𑀲𑁆𑀲𑀭𑀚𑀦𑁂𑀦 𑀘 𑀲𑀤𑁆𑀥𑀺𑀁 𑀯𑁂𑀭𑀁 𑀦𑀸𑀫 𑀧𑀸𑀧𑀓𑀁. 𑀅𑀬𑀜𑁆𑀳𑀺 𑀓𑀼𑀤𑁆𑀥𑁄 𑀲𑀩𑁆𑀩𑁂𑀧𑀺 𑀓𑀸𑀓𑁂 𑀯𑀺𑀦𑀸𑀲𑁂𑀬𑁆𑀬𑀸’’𑀢𑀺. ‘‘𑀦 𑀲𑀓𑁆𑀓𑀸 𑀫𑀬𑀸 𑀦 𑀓𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀇𑀢𑀭𑁄 𑀓𑀸𑀓𑁄 𑀧𑀮𑀸𑀬𑀺. 𑀲𑁄 𑀢𑁄𑀭𑀡𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀲𑀫𑁆𑀧𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 𑀑𑀮𑀫𑁆𑀩𑀓𑀁 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀢𑀲𑁆𑀲 𑀫𑀢𑁆𑀣𑀓𑁂 𑀯𑀘𑁆𑀘𑀁 𑀧𑀸𑀢𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀓𑀼𑀚𑁆𑀛𑀺𑀢𑁆𑀯𑀸 𑀓𑀸𑀓𑁂𑀲𑀼 𑀯𑁂𑀭𑀁 𑀩𑀦𑁆𑀥𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑀸 𑀪𑀢𑀺𑀬𑀸 𑀯𑀻𑀳𑀺𑀓𑁄𑀝𑁆𑀝𑀺𑀓𑀤𑀸𑀲𑀻 𑀯𑀻𑀳𑀺𑀁 𑀕𑁂𑀳𑀤𑁆𑀯𑀸𑀭𑁂 𑀆𑀢𑀧𑁂 𑀧𑀢𑁆𑀣𑀭𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑀻 𑀦𑀺𑀲𑀺𑀦𑁆𑀦𑀸𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀲𑁆𑀲𑀸 𑀧𑀫𑀸𑀤𑀁 𑀜𑀢𑁆𑀯𑀸 𑀏𑀓𑁄 𑀤𑀻𑀖𑀮𑁄𑀫𑀓𑁄 𑀏𑀴𑀓𑁄 𑀆𑀕𑀦𑁆𑀢𑁆𑀯𑀸 𑀯𑀻𑀳𑀺𑀁 𑀔𑀸𑀤𑀺, 𑀲𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀮𑀸𑀧𑁂𑀲𑀺. 𑀏𑀴𑀓𑁄 𑀤𑀼𑀢𑀺𑀬𑀫𑁆𑀧𑀺, 𑀢𑀢𑀺𑀬𑀫𑁆𑀧𑀺 𑀢𑀲𑁆𑀲𑀸 𑀢𑀣𑁂𑀯 𑀦𑀺𑀤𑁆𑀤𑀸𑀬𑀦𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀯𑀻𑀳𑀺𑀁 𑀔𑀸𑀤𑀺. 𑀲𑀸𑀧𑀺 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀮𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀼𑀦𑀧𑁆𑀧𑀼𑀦𑀁 𑀔𑀸𑀤𑀦𑁆𑀢𑁄 𑀉𑀧𑀟𑁆𑀠𑀯𑀻𑀳𑀺𑀁 𑀔𑀸𑀤𑀺𑀲𑁆𑀲𑀢𑀺, 𑀩𑀳𑀼 𑀫𑁂 𑀙𑁂𑀤𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺𑀲𑁆𑀲 𑀧𑀼𑀦 𑀅𑀦𑀸𑀕𑀫𑀦𑀓𑀸𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀅𑀮𑀸𑀢𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀫𑀸𑀦𑀸 𑀯𑀺𑀬 𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀳𑀺𑀔𑀸𑀤𑀦𑀢𑁆𑀣𑀸𑀬 𑀏𑀴𑀓𑁂 𑀲𑀫𑁆𑀧𑀢𑁆𑀢𑁂 𑀉𑀝𑁆𑀞𑀸𑀬 𑀅𑀮𑀸𑀢𑁂𑀦 𑀏𑀴𑀓𑀁 𑀧𑀳𑀭𑀺, 𑀮𑁄𑀫𑀸𑀦𑀺 𑀅𑀕𑁆𑀕𑀺𑀁 𑀕𑀡𑁆𑀳𑀺𑀁𑀲𑀼. 𑀲𑁄 𑀲𑀭𑀻𑀭𑁂 𑀛𑀸𑀬𑀦𑁆𑀢𑁂 ‘‘𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀸𑀬 𑀲𑀫𑀻𑀧𑁂 𑀏𑀓𑀺𑀲𑁆𑀲𑀸 𑀢𑀺𑀡𑀓𑀼𑀝𑀺𑀬𑀸 𑀲𑀭𑀻𑀭𑀁 𑀖𑀁𑀲𑀺, 𑀲𑀸 𑀧𑀚𑁆𑀚𑀮𑀺. 𑀢𑀢𑁄 𑀉𑀝𑁆𑀞𑀺𑀢𑀸 𑀚𑀸𑀮𑀸 𑀳𑀢𑁆𑀣𑀺𑀲𑀸𑀮𑀁 𑀕𑀡𑁆𑀳𑀺. 𑀳𑀢𑁆𑀣𑀺𑀲𑀸𑀮𑀸𑀲𑀼 𑀛𑀸𑀬𑀦𑁆𑀢𑀻𑀲𑀼 𑀳𑀢𑁆𑀣𑀺𑀧𑀺𑀝𑁆𑀞𑀸𑀦𑀺 𑀛𑀸𑀬𑀺𑀁𑀲𑀼, 𑀩𑀳𑀽 𑀳𑀢𑁆𑀣𑀻 𑀯𑀡𑀺𑀢𑀲𑀭𑀻𑀭𑀸 𑀅𑀳𑁂𑀲𑀼𑀁. 𑀯𑁂𑀚𑁆𑀚𑀸 𑀳𑀢𑁆𑀣𑀻 𑀅𑀭𑁄𑀕𑁂 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀼𑀭𑁄𑀳𑀺𑀢𑀁 𑀆𑀳 ‘‘𑀆𑀘𑀭𑀺𑀬, 𑀳𑀢𑁆𑀣𑀺𑀯𑁂𑀚𑁆𑀚𑀸 𑀳𑀢𑁆𑀣𑀻 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀧𑀺 𑀓𑀺𑀜𑁆𑀘𑀺 𑀪𑁂𑀲𑀚𑁆𑀚𑀁 𑀚𑀸𑀦𑀸𑀲𑀻’’𑀢𑀺. ‘‘𑀚𑀸𑀦𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀓𑀸𑀓𑀯𑀲𑀸, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 ‘‘𑀢𑁂𑀦 𑀳𑀺 𑀓𑀸𑀓𑁂 𑀫𑀸𑀭𑁂𑀢𑁆𑀯𑀸 𑀯𑀲𑀁 𑀆𑀳𑀭𑀣𑀸’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀓𑀸𑀓𑁂 𑀫𑀸𑀭𑁂𑀢𑁆𑀯𑀸 𑀯𑀲𑀁 𑀅𑀮𑀪𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀓𑀸𑀓𑀸𑀦𑀁 𑀫𑀳𑀸𑀪𑀬𑀁 𑀉𑀧𑁆𑀧𑀚𑁆𑀚𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑀸𑀓𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀳𑀸𑀲𑀼𑀲𑀸𑀦𑁂 𑀯𑀲𑀢𑀺. 𑀅𑀣𑁂𑀓𑁄 𑀓𑀸𑀓𑁄 𑀕𑀦𑁆𑀢𑁆𑀯𑀸 𑀓𑀸𑀓𑀸𑀦𑀁 𑀉𑀧𑁆𑀧𑀦𑁆𑀦𑀪𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀫𑀬𑁆𑀳𑀁 𑀜𑀸𑀢𑀓𑀸𑀦𑀁 𑀉𑀧𑁆𑀧𑀦𑁆𑀦𑀪𑀬𑀁 𑀳𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀳𑀭𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀢𑁆𑀯𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀏𑀓𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀺𑀯𑀝𑀫𑀳𑀸𑀯𑀸𑀢𑀧𑀸𑀦𑁂𑀦 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀆𑀲𑀦𑀲𑁆𑀲 𑀳𑁂𑀝𑁆𑀞𑀸 𑀧𑀸𑀯𑀺𑀲𑀺. 𑀅𑀣 𑀦𑀁 𑀏𑀓𑁄 𑀫𑀦𑀼𑀲𑁆𑀲𑁄 𑀕𑀳𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀭𑀸𑀚𑀸 ‘‘𑀲𑀭𑀡𑀁 𑀧𑀯𑀺𑀝𑁆𑀞𑁄, 𑀫𑀸 𑀕𑀡𑁆𑀳𑀻’’𑀢𑀺 𑀯𑀸𑀭𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀳𑁂𑀝𑁆𑀞𑀸𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀬𑀁 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀲𑀩𑁆𑀩𑀁 𑀦𑀺𑀲𑀫𑁆𑀫 𑀉𑀧𑀥𑀸𑀭𑁂𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀜𑁆𑀘 𑀓𑀬𑀺𑀭𑀫𑀸𑀦𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀤𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀇𑀢𑀭𑀁. 𑀲𑀘𑁂 𑀳𑀺 𑀭𑀸𑀚𑀸𑀦𑁄 𑀬𑀁 𑀓𑀬𑀺𑀭𑀫𑀸𑀦𑀁 𑀦 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀁 𑀓𑀭𑁄𑀦𑁆𑀢𑀺, 𑀫𑀳𑀸𑀚𑀦𑀲𑁆𑀲 𑀫𑀭𑀡𑀪𑀬𑀧𑀭𑀺𑀬𑁄𑀲𑀸𑀦𑀁 𑀫𑀳𑀸𑀪𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀼𑀭𑁄𑀳𑀺𑀢𑁄 𑀯𑁂𑀭𑀯𑀲𑀺𑀓𑁄 𑀳𑀼𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺, 𑀓𑀸𑀓𑀸𑀦𑀁 𑀯𑀲𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀜𑁆𑀘𑀦𑀪𑀤𑁆𑀤𑀧𑀻𑀞𑀁 𑀤𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀧𑀓𑁆𑀔𑀦𑁆𑀢𑀭𑀸𑀦𑀺 𑀲𑀢𑀧𑀸𑀓𑀲𑀳𑀲𑁆𑀲𑀧𑀸𑀓𑀢𑁂𑀮𑁂𑀳𑀺 𑀫𑀓𑁆𑀔𑀸𑀧𑁂𑀢𑁆𑀯𑀸 𑀓𑀜𑁆𑀘𑀦𑀢𑀝𑁆𑀝𑀓𑁂 𑀭𑀸𑀚𑀸𑀭𑀳𑀁 𑀲𑀼𑀪𑁄𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀬𑁂𑀢𑁆𑀯𑀸 𑀲𑀼𑀳𑀺𑀢𑀁 𑀯𑀺𑀕𑀢𑀤𑀭𑀣𑀁 𑀫𑀳𑀸𑀲𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀡𑁆𑀟𑀺𑀢, 𑀢𑁆𑀯𑀁 ‘𑀓𑀸𑀓𑀸𑀦𑀁 𑀯𑀲𑀸 𑀦𑀸𑀫 𑀦𑀢𑁆𑀣𑀻’𑀢𑀺 𑀯𑀤𑁂𑀲𑀺, 𑀓𑁂𑀦 𑀓𑀸𑀭𑀡𑁂𑀦 𑀦𑁂𑀲𑀁 𑀯𑀲𑀸 𑀦 𑀳𑁄𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸’’𑀢𑀺 𑀲𑀓𑀮𑀦𑀺𑀯𑁂𑀲𑀦𑀁 𑀏𑀓𑀭𑀯𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁦. ‘‘𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀸, 𑀲𑀩𑁆𑀩𑀮𑁄𑀓𑀯𑀺𑀳𑁂𑀲𑀓𑀸;

𑀢𑀲𑁆𑀫𑀸 𑀦𑁂𑀲𑀁 𑀯𑀲𑀸 𑀦𑀢𑁆𑀣𑀺, 𑀓𑀸𑀓𑀸𑀦𑀫𑁆𑀳𑀸𑀓 𑀜𑀸𑀢𑀺𑀦’’𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀓𑀸𑀓𑀸 𑀦𑀸𑀫 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀫𑀸𑀦𑀲𑀸 𑀪𑀬𑀧𑁆𑀧𑀢𑁆𑀢𑀸𑀯 𑀯𑀺𑀳𑀭𑀦𑁆𑀢𑀺, 𑀲𑀩𑁆𑀩𑀮𑁄𑀓𑀲𑁆𑀲 𑀘 𑀯𑀺𑀳𑁂𑀲𑀓𑀸, 𑀔𑀢𑁆𑀢𑀺𑀬𑀸𑀤𑀬𑁄 𑀫𑀦𑀼𑀲𑁆𑀲𑁂𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑁂𑀧𑀺 𑀓𑀼𑀫𑀸𑀭𑀓𑀼𑀫𑀸𑀭𑀺𑀓𑀸𑀤𑀬𑁄𑀧𑀺 𑀯𑀺𑀳𑁂𑀞𑁂𑀦𑁆𑀢𑀸 𑀓𑀺𑀮𑀫𑁂𑀦𑁆𑀢𑀸𑀯 𑀯𑀺𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑁂𑀲𑀁 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀁 𑀓𑀸𑀓𑀸𑀦𑀁 𑀯𑀲𑀸 𑀦𑀸𑀫 𑀦𑀢𑁆𑀣𑀺. 𑀅𑀢𑀻𑀢𑁂𑀧𑀺 𑀦 𑀪𑀽𑀢𑀧𑀼𑀩𑁆𑀩𑀸, 𑀅𑀦𑀸𑀕𑀢𑁂𑀧𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀅𑀦𑀺𑀲𑀫𑁆𑀫 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀓𑀫𑁆𑀫𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀭𑀸𑀚𑀸𑀦𑀁 𑀩𑁄𑀥𑁂𑀲𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂𑀦 𑀧𑀽𑀚𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀚𑁆𑀚𑀁 𑀭𑀜𑁆𑀜𑁄𑀬𑁂𑀯 𑀧𑀝𑀺𑀤𑀢𑁆𑀯𑀸 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀬𑀸𑀘𑀺. 𑀭𑀸𑀚𑀸 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸 𑀓𑀸𑀓𑀸𑀦𑀁 𑀦𑀺𑀩𑀤𑁆𑀥𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀡𑁆𑀟𑀼𑀮𑀫𑁆𑀩𑀡𑀲𑁆𑀲 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀳𑀺 𑀑𑀫𑀤𑁆𑀤𑀺𑀢𑁆𑀯𑀸 𑀓𑀸𑀓𑀸𑀦𑀁 𑀤𑀻𑀬𑀢𑀺, 𑀫𑀳𑀸𑀲𑀢𑁆𑀢𑀲𑁆𑀲 𑀧𑀦 𑀭𑀸𑀚𑀪𑁄𑀚𑀦𑀫𑁂𑀯 𑀤𑀻𑀬𑀺𑀢𑁆𑀣.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀸𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀲𑀫𑁆𑀧𑀤𑀸𑀦𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀲𑀫𑁆𑀧𑀤𑀸𑀦𑀪𑀻𑀭𑀼𑀓𑀁, 𑀖𑀢𑀸𑀲𑀦𑀛𑀸𑀦𑀲𑁄𑀥𑀁;

𑀘𑀦𑁆𑀤𑀸𑀪𑀁 𑀲𑀼𑀯𑀡𑁆𑀡𑀳𑀁𑀲𑀁, 𑀩𑀩𑁆𑀩𑀼𑀕𑁄𑀥𑀼𑀪𑀢𑁄𑀪𑀝𑁆𑀞𑀁;

𑀓𑀸𑀓𑀭𑀸𑀚𑀸𑀢𑀺 𑀢𑁂 𑀤𑀲𑀸𑀢𑀺.