𑁧𑁫. 𑀓𑀓𑀡𑁆𑀝𑀓𑀯𑀕𑁆𑀕𑁄

[𑁧𑁪𑁧] 𑁧. 𑀕𑁄𑀥𑀸𑀚𑀸𑀢𑀓𑀯𑀡𑁆𑀡𑀦𑀸

𑀦 𑀧𑀸𑀧𑀚𑀦𑀲𑀁𑀲𑁂𑀯𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀺𑀧𑀓𑁆𑀔𑀲𑁂𑀯𑀺𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑁂 𑀓𑀣𑀺𑀢𑀲𑀤𑀺𑀲𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑁄𑀥𑀸𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀦𑀤𑀻𑀢𑀻𑀭𑁂 𑀫𑀳𑀸𑀩𑀺𑀮𑁂 𑀅𑀦𑁂𑀓𑀕𑁄𑀥𑀸𑀲𑀢𑀧𑀭𑀺𑀯𑀸𑀭𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀕𑁄𑀥𑀸𑀧𑀺𑀮𑁆𑀮𑀓𑁄 𑀏𑀓𑁂𑀦 𑀓𑀓𑀡𑁆𑀝𑀓𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀯𑀺𑀳𑀭𑀦𑁆𑀢𑁄 ‘‘𑀓𑀓𑀡𑁆𑀝𑀓𑀁 𑀧𑀭𑀺𑀲𑁆𑀲𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀣𑀭𑀢𑀺. 𑀢𑀲𑁆𑀲 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀕𑁄𑀥𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀕𑁄𑀥𑀸𑀭𑀸𑀚𑀸 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀅𑀝𑁆𑀞𑀸𑀦𑁂 𑀯𑀺𑀲𑁆𑀲𑀸𑀲𑀁 𑀓𑀭𑁄𑀲𑀺, 𑀓𑀓𑀡𑁆𑀝𑀓𑀸 𑀦𑀸𑀫 𑀦𑀻𑀘𑀚𑀸𑀢𑀺𑀓𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦 𑀓𑀢𑁆𑀢𑀩𑁆𑀩𑁄. 𑀲𑀘𑁂 𑀢𑁆𑀯𑀁 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀭𑀺𑀲𑁆𑀲𑀲𑀺, 𑀢𑀁 𑀓𑀓𑀡𑁆𑀝𑀓𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑀫𑁆𑀧𑁂𑀢𑀁 𑀕𑁄𑀥𑀸𑀓𑀼𑀮𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀏𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀫𑀸 𑀅𑀓𑀸𑀲𑀻’’𑀢𑀺 𑀆𑀳. 𑀲𑁄 𑀓𑀭𑁄𑀢𑀺𑀬𑁂𑀯. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁄𑀧𑀺 𑀢𑀲𑁆𑀲 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀯𑀲𑁆𑀲𑀁 𑀅𑀫𑁆𑀳𑀸𑀓𑀁 𑀏𑀢𑀁 𑀓𑀓𑀡𑁆𑀝𑀓𑀁 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀧𑀮𑀸𑀬𑀦𑀫𑀕𑁆𑀕𑀁 𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀯𑀸𑀢𑀩𑀺𑀮𑀁 𑀓𑀸𑀭𑀸𑀧𑁂𑀲𑀺.

𑀧𑀼𑀢𑁆𑀢𑁄𑀧𑀺𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀲𑀭𑀻𑀭𑁄 𑀅𑀳𑁄𑀲𑀺, 𑀓𑀓𑀡𑁆𑀝𑀓𑁄 𑀧𑀦 𑀧𑀼𑀭𑀺𑀫𑀧𑁆𑀧𑀫𑀸𑀡𑁄𑀬𑁂𑀯. 𑀇𑀢𑀭𑁄 ‘‘𑀓𑀓𑀡𑁆𑀝𑀓𑀁 𑀧𑀭𑀺𑀲𑁆𑀲𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀅𑀯𑀢𑁆𑀣𑀭𑀢𑀺𑀬𑁂𑀯, 𑀓𑀓𑀡𑁆𑀝𑀓𑀲𑁆𑀲 𑀧𑀩𑁆𑀩𑀢𑀓𑀽𑀝𑁂𑀦 𑀅𑀯𑀢𑁆𑀣𑀭𑀡𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀲𑁄 𑀓𑀺𑀮𑀫𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀬𑀁 𑀅𑀜𑁆𑀜𑀸𑀦𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀫𑀁 𑀏𑀯𑀁 𑀧𑀭𑀺𑀲𑁆𑀲𑀚𑀺𑀲𑁆𑀲𑀢𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀺, 𑀏𑀓𑁂𑀦 𑀮𑀼𑀤𑁆𑀤𑀓𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀇𑀫𑀁 𑀕𑁄𑀥𑀸𑀓𑀼𑀮𑀁 𑀯𑀺𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀦𑀺𑀤𑀸𑀖𑀲𑀫𑀬𑁂 𑀫𑁂𑀖𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸 𑀉𑀝𑁆𑀞𑀳𑀺𑀁𑀲𑀼, 𑀢𑀢𑁄 𑀢𑀢𑁄 𑀕𑁄𑀥𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀓𑁆𑀔𑀺𑀓𑀸𑀬𑁄 𑀔𑀸𑀤𑀦𑁆𑀢𑀺. 𑀏𑀓𑁄 𑀕𑁄𑀥𑀸𑀮𑀼𑀤𑁆𑀤𑀓𑁄 𑀕𑁄𑀥𑀸𑀩𑀺𑀮𑀁 𑀪𑀺𑀦𑁆𑀤𑀦𑀢𑁆𑀣𑀸𑀬 𑀓𑀼𑀤𑁆𑀤𑀸𑀮𑀁 𑀕𑀳𑁂𑀢𑁆𑀯𑀸 𑀲𑀼𑀦𑀔𑁂𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀓𑀓𑀡𑁆𑀝𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀓𑀲𑁆𑀫𑀸 𑀅𑀭𑀜𑁆𑀜𑁂 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀕𑁄𑀥𑀸𑀦𑀁 𑀅𑀢𑁆𑀣𑀸𑀬𑀸’’𑀢𑀺 𑀆𑀳. ‘‘𑀅𑀳𑀁 𑀅𑀦𑁂𑀓𑀲𑀢𑀸𑀦𑀁 𑀕𑁄𑀥𑀸𑀦𑀁 𑀆𑀲𑀬𑀁 𑀚𑀸𑀦𑀸𑀫𑀺, 𑀅𑀕𑁆𑀕𑀺𑀜𑁆𑀘 𑀧𑀮𑀸𑀮𑀜𑁆𑀘 𑀆𑀤𑀸𑀬 𑀏𑀳𑀻’’𑀢𑀺 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀮𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀥𑀽𑀫𑀁 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀲𑀼𑀦𑀔𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀫𑀳𑀸𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 𑀦𑀺𑀓𑁆𑀔𑀦𑁆𑀢𑀸 𑀕𑁄𑀥𑀸 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀬𑀸𑀳𑀻’’𑀢𑀺 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀅𑀚𑁆𑀚 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀮𑀼𑀤𑁆𑀤𑀓𑁄𑀧𑀺 𑀧𑀮𑀸𑀮𑀥𑀽𑀫𑀁 𑀅𑀓𑀸𑀲𑀺, 𑀥𑀽𑀫𑁄 𑀩𑀺𑀮𑀁 𑀧𑀸𑀯𑀺𑀲𑀺, 𑀕𑁄𑀥𑀸 𑀥𑀽𑀫𑀦𑁆𑀥𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑀸. 𑀮𑀼𑀤𑁆𑀤𑀓𑁄 𑀦𑀺𑀓𑁆𑀔𑀦𑁆𑀢𑀁 𑀦𑀺𑀓𑁆𑀔𑀦𑁆𑀢𑀁 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀸 𑀲𑀼𑀦𑀔𑀸 𑀕𑀡𑁆𑀳𑀺𑀁𑀲𑀼. 𑀕𑁄𑀥𑀸𑀦𑀁 𑀫𑀳𑀸𑀯𑀺𑀦𑀸𑀲𑁄 𑀉𑀧𑁆𑀧𑀚𑁆𑀚𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀓𑀓𑀡𑁆𑀝𑀓𑀁 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀜𑀢𑁆𑀯𑀸 ‘‘𑀧𑀸𑀧𑀧𑀼𑀭𑀺𑀲𑀲𑀁𑀲𑀕𑁆𑀕𑁄 𑀦𑀸𑀫 𑀦 𑀓𑀢𑁆𑀢𑀩𑁆𑀩𑁄, 𑀧𑀸𑀧𑁂 𑀦𑀺𑀲𑁆𑀲𑀸𑀬 𑀳𑀺𑀢𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀏𑀓𑀲𑁆𑀲 𑀧𑀸𑀧𑀓𑀓𑀡𑁆𑀝𑀓𑀲𑁆𑀲 𑀯𑀲𑁂𑀦 𑀏𑀢𑁆𑀢𑀓𑀸𑀦𑀁 𑀕𑁄𑀥𑀸𑀦𑀁 𑀯𑀺𑀦𑀸𑀲𑁄 𑀚𑀸𑀢𑁄’’𑀢𑀺 𑀯𑀸𑀢𑀩𑀺𑀮𑁂𑀦 𑀧𑀮𑀸𑀬𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁧. ‘‘𑀦 𑀧𑀸𑀧𑀚𑀦𑀲𑀁𑀲𑁂𑀯𑀻, 𑀅𑀘𑁆𑀘𑀦𑁆𑀢𑀲𑀼𑀔𑀫𑁂𑀥𑀢𑀺;

𑀕𑁄𑀥𑀸𑀓𑀼𑀮𑀁 𑀓𑀓𑀡𑁆𑀝𑀸𑀯, 𑀓𑀮𑀺𑀁 𑀧𑀸𑀧𑁂𑀢𑀺 𑀅𑀢𑁆𑀢𑀸𑀦’’𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀸𑀧𑀚𑀦𑀲𑀁𑀲𑁂𑀯𑀻 𑀧𑀼𑀕𑁆𑀕𑀮𑁄 𑀅𑀘𑁆𑀘𑀦𑁆𑀢𑀲𑀼𑀔𑀁 𑀏𑀓𑀦𑁆𑀢𑀲𑀼𑀔𑀁 𑀦𑀺𑀭𑀦𑁆𑀢𑀭𑀲𑀼𑀔𑀁 𑀦𑀸𑀫 𑀦 𑀏𑀥𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀺. 𑀬𑀣𑀸 𑀓𑀺𑀁? 𑀕𑁄𑀥𑀸𑀓𑀼𑀮𑀁 𑀓𑀓𑀡𑁆𑀝𑀸𑀯. 𑀬𑀣𑀸 𑀓𑀓𑀡𑁆𑀝𑀓𑀢𑁄 𑀕𑁄𑀥𑀸𑀓𑀼𑀮𑀁 𑀲𑀼𑀔𑀁 𑀦 𑀮𑀪𑀢𑀺, 𑀏𑀯𑀁 𑀧𑀸𑀧𑀚𑀦𑀲𑀁𑀲𑁂𑀯𑀻 𑀧𑀼𑀕𑁆𑀕𑀮𑁄 𑀲𑀼𑀔𑀁 𑀦 𑀮𑀪𑀢𑀺. 𑀧𑀸𑀧𑀚𑀦𑀁 𑀧𑀦 𑀲𑁂𑀯𑀦𑁆𑀢𑁄 𑀏𑀓𑀦𑁆𑀢𑁂𑀦𑁂𑀯 𑀓𑀮𑀺𑀁 𑀧𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀓𑀮𑀺 𑀯𑀼𑀘𑁆𑀘𑀢𑀺 𑀯𑀺𑀦𑀸𑀲𑁄, 𑀏𑀓𑀦𑁆𑀢𑁂𑀦𑁂𑀯 𑀧𑀸𑀧𑀲𑁂𑀯𑀻 𑀅𑀢𑁆𑀢𑀸𑀦𑀜𑁆𑀘 𑀅𑀜𑁆𑀜𑁂 𑀘 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂 𑀯𑀺𑀦𑀸𑀲𑀁 𑀧𑀸𑀧𑁂𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀨𑀮𑀁 𑀧𑀸𑀧𑁂𑀬𑁆𑀬𑀸’’𑀢𑀺 𑀮𑀺𑀔𑀦𑁆𑀢𑀺. 𑀢𑀁 𑀩𑁆𑀬𑀜𑁆𑀚𑀦𑀁 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺, 𑀅𑀢𑁆𑀣𑁄𑀧𑀺𑀲𑁆𑀲 𑀦 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀓𑀡𑁆𑀝𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀅𑀦𑁄𑀯𑀸𑀤𑀓𑁄 𑀕𑁄𑀥𑀸𑀧𑀺𑀮𑁆𑀮𑀓𑁄 𑀯𑀺𑀧𑀓𑁆𑀔𑀲𑁂𑀯𑀻 𑀪𑀺𑀓𑁆𑀔𑀼, 𑀕𑁄𑀥𑀸𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑁄𑀥𑀸𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁪𑁨] 𑁨. 𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀏𑀢𑀜𑁆𑀳𑀺 𑀢𑁂 𑀤𑀼𑀭𑀸𑀚𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀦 𑀘 𑀫𑀁 𑀫𑀸𑀭𑁂𑀢𑀼𑀁 𑀅𑀲𑀓𑁆𑀔𑀺, 𑀲𑀬𑀫𑁂𑀯 𑀧𑀦 𑀓𑀺𑀮𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀺𑀗𑁆𑀕𑀸𑀮𑀭𑀸𑀚𑀸 𑀳𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑀕𑀡𑀧𑀭𑀺𑀯𑀼𑀢𑁄 𑀲𑀼𑀲𑀸𑀦𑀯𑀦𑁂 𑀯𑀺𑀳𑀸𑀲𑀺. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀉𑀲𑁆𑀲𑀯𑁄 𑀅𑀳𑁄𑀲𑀺, 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀲𑀼𑀭𑀁 𑀧𑀺𑀯𑀦𑁆𑀢𑀺, 𑀲𑀼𑀭𑀸𑀙𑀡𑁄𑀬𑁂𑀯 𑀓𑀺𑀭𑁂𑀲𑁄. 𑀅𑀣𑁂𑀢𑁆𑀣 𑀲𑀫𑁆𑀩𑀳𑀼𑀮𑀸 𑀥𑀼𑀢𑁆𑀢𑀸 𑀩𑀳𑀼𑀁 𑀲𑀼𑀭𑀜𑁆𑀘 𑀫𑀁𑀲𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀕𑀸𑀬𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀲𑀼𑀭𑀜𑁆𑀘 𑀧𑀺𑀯𑀦𑁆𑀢𑀺, 𑀫𑀁𑀲𑀜𑁆𑀘 𑀔𑀸𑀤𑀦𑁆𑀢𑀺. 𑀢𑁂𑀲𑀁 𑀧𑀞𑀫𑀬𑀸𑀫𑀸𑀯𑀲𑀸𑀦𑁂 𑀫𑀁𑀲𑀁 𑀔𑀻𑀬𑀺, 𑀲𑀼𑀭𑀸 𑀧𑀦 𑀩𑀳𑀼𑀓𑀸𑀯. 𑀅𑀣𑁂𑀓𑁄 𑀥𑀼𑀢𑁆𑀢𑁄 ‘‘𑀫𑀁𑀲𑀔𑀡𑁆𑀟𑀁 𑀤𑁂𑀳𑀻’’𑀢𑀺 𑀆𑀳. ‘‘𑀫𑀁𑀲𑀁 𑀔𑀻𑀡’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀫𑀬𑀺 𑀞𑀺𑀢𑁂 𑀫𑀁𑀲𑀓𑁆𑀔𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀆𑀫𑀓𑀲𑀼𑀲𑀸𑀦𑁂 𑀫𑀢𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑀢𑁆𑀣𑀸𑀬 𑀆𑀕𑀢𑁂 𑀲𑀺𑀗𑁆𑀕𑀸𑀮𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀦𑀺𑀤𑁆𑀥𑀫𑀦𑀫𑀕𑁆𑀕𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀫𑀢𑀓𑁄 𑀯𑀺𑀬 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀸𑀮𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀫𑀢𑀓𑁄’’𑀢𑀺 𑀜𑀢𑁆𑀯𑀸𑀧𑀺 ‘‘𑀲𑀼𑀝𑁆𑀞𑀼𑀢𑀭𑀁 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀅𑀥𑁄𑀯𑀸𑀢𑁂𑀦 𑀕𑀦𑁆𑀢𑁆𑀯𑀸 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀢𑀣𑀢𑁄𑀯𑀲𑁆𑀲 𑀅𑀫𑀢𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀮𑀚𑁆𑀚𑀸𑀧𑁂𑀢𑁆𑀯𑀸 𑀦𑀁 𑀉𑀬𑁆𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀫𑀼𑀕𑁆𑀕𑀭𑀓𑁄𑀝𑀺𑀬𑀁 𑀟𑀁𑀲𑀺𑀢𑁆𑀯𑀸 𑀆𑀓𑀟𑁆𑀠𑀺, 𑀥𑀼𑀢𑁆𑀢𑁄 𑀫𑀼𑀕𑁆𑀕𑀭𑀁 𑀦 𑀯𑀺𑀲𑁆𑀲𑀚𑀺, 𑀉𑀧𑀲𑀗𑁆𑀓𑀫𑀦𑁆𑀢𑀫𑁆𑀧𑀺 𑀦 𑀑𑀮𑁄𑀓𑁂𑀦𑁆𑀢𑁄 𑀦𑀁 𑀕𑀸𑀴𑁆𑀳𑀢𑀭𑀁 𑀅𑀕𑁆𑀕𑀳𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀲𑀘𑁂 𑀢𑁆𑀯𑀁 𑀫𑀢𑀓𑁄 𑀪𑀯𑁂𑀬𑁆𑀬𑀸𑀲𑀺, 𑀦 𑀫𑀬𑀺 𑀫𑀼𑀕𑁆𑀕𑀭𑀁 𑀆𑀓𑀟𑁆𑀠𑀦𑁆𑀢𑁂 𑀕𑀸𑀴𑁆𑀳𑀢𑀭𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀯 𑀫𑀢𑀓𑀪𑀸𑀯𑁄 𑀯𑀸 𑀅𑀫𑀢𑀓𑀪𑀸𑀯𑁄 𑀯𑀸 𑀤𑀼𑀚𑁆𑀚𑀸𑀦𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁨. ‘‘𑀏𑀢𑀜𑁆𑀳𑀺 𑀢𑁂 𑀤𑀼𑀭𑀸𑀚𑀸𑀦𑀁, 𑀬𑀁 𑀲𑁂𑀲𑀺 𑀫𑀢𑀲𑀸𑀬𑀺𑀓𑀁;

𑀬𑀲𑁆𑀲 𑀢𑁂 𑀓𑀟𑁆𑀠𑀫𑀸𑀦𑀲𑁆𑀲, 𑀳𑀢𑁆𑀣𑀸 𑀤𑀡𑁆𑀟𑁄 𑀦 𑀫𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀏𑀢𑀜𑁆𑀳𑀺 𑀢𑁂 𑀤𑀼𑀭𑀸𑀚𑀸𑀦𑀦𑁆𑀢𑀺 𑀏𑀢𑀁 𑀓𑀸𑀭𑀡𑀁 𑀢𑀯 𑀤𑀼𑀯𑀺𑀜𑁆𑀜𑁂𑀬𑁆𑀬𑀁. 𑀬𑀁 𑀲𑁂𑀲𑀺 𑀫𑀢𑀲𑀸𑀬𑀺𑀓𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀫𑀢𑀲𑀸𑀬𑀺𑀓𑀁 𑀲𑁂𑀲𑀺, 𑀫𑀢𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀲𑀬𑀲𑀺. 𑀬𑀲𑁆𑀲 𑀢𑁂 𑀓𑀟𑁆𑀠𑀫𑀸𑀦𑀲𑁆𑀲𑀸𑀢𑀺 𑀬𑀲𑁆𑀲 𑀢𑀯 𑀤𑀡𑁆𑀟𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀟𑁆𑀠𑀺𑀬𑀫𑀸𑀦𑀲𑁆𑀲 𑀳𑀢𑁆𑀣𑀢𑁄 𑀤𑀡𑁆𑀟𑁄 𑀦 𑀫𑀼𑀘𑁆𑀘𑀢𑀺, 𑀲𑁄 𑀢𑁆𑀯𑀁 𑀢𑀣𑀢𑁄 𑀫𑀢𑀓𑁄 𑀦𑀸𑀫 𑀦 𑀳𑁄𑀲𑀻𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀥𑀼𑀢𑁆𑀢𑁄 ‘‘𑀅𑀬𑀁 𑀫𑀫 𑀅𑀫𑀢𑀓𑀪𑀸𑀯𑀁 𑀚𑀸𑀦𑀸𑀢𑀻’’𑀢𑀺 𑀉𑀝𑁆𑀞𑀸𑀬 𑀤𑀡𑁆𑀟𑀁 𑀔𑀺𑀧𑀺, 𑀤𑀡𑁆𑀟𑁄 𑀯𑀺𑀭𑀚𑁆𑀛𑀺. 𑀥𑀼𑀢𑁆𑀢𑁄 ‘‘𑀕𑀘𑁆𑀙, 𑀯𑀺𑀭𑀤𑁆𑀥𑁄 𑀤𑀸𑀦𑀺𑀲𑀺 𑀫𑀬𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀫𑀁 𑀯𑀺𑀭𑀚𑁆𑀛𑀦𑁆𑀢𑁄𑀧𑀺 𑀢𑁆𑀯𑀁 𑀅𑀝𑁆𑀞 𑀫𑀳𑀸𑀦𑀺𑀭𑀬𑁂 𑀲𑁄𑀴𑀲 𑀘 𑀉𑀲𑁆𑀲𑀤𑀦𑀺𑀭𑀬𑁂 𑀅𑀯𑀺𑀭𑀤𑁆𑀥𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀥𑀼𑀢𑁆𑀢𑁄 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀲𑀼𑀲𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑀺𑀔𑀸𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀦𑀕𑀭𑀁 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀥𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀺𑀗𑁆𑀕𑀸𑀮𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁪𑁩] 𑁩. 𑀯𑀺𑀭𑁄𑀘𑀚𑀸𑀢𑀓𑀯𑀡𑁆𑀡𑀦𑀸

𑀮𑀲𑀻 𑀘 𑀢𑁂 𑀦𑀺𑀧𑁆𑀨𑀮𑀺𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀕𑀬𑀸𑀲𑀻𑀲𑁂 𑀲𑀼𑀕𑀢𑀸𑀮𑀬𑀲𑁆𑀲 𑀤𑀲𑁆𑀲𑀺𑀢𑀪𑀸𑀯𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁄 𑀳𑀺 𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀮𑀸𑀪𑀲𑀓𑁆𑀓𑀸𑀭𑀧𑀭𑀺𑀳𑀻𑀦𑁄 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀺𑀢𑁆𑀯𑀸 𑀅𑀮𑀪𑀫𑀸𑀦𑁄 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂 𑀥𑀫𑁆𑀫𑀯𑀺𑀦𑀬𑀫𑁆𑀳𑀺 𑀅𑀓𑁄𑀯𑀺𑀤𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑀻𑀫𑀸𑀬𑀁 𑀆𑀯𑁂𑀡𑀺𑀓𑀁 𑀲𑀗𑁆𑀖𑀓𑀫𑁆𑀫𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀁 𑀜𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀧𑁂𑀲𑁂𑀲𑀺. 𑀢𑁂 𑀤𑀺𑀲𑁆𑀯𑀸 𑀤𑁂𑀯𑀤𑀢𑁆𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀭𑀢𑁆𑀢𑀺𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 ‘‘𑀩𑀼𑀤𑁆𑀥𑀮𑀻𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀕𑀢𑀸𑀮𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻𑀓𑀣𑀸, 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀤𑁆𑀤𑀁 𑀉𑀧𑀕𑀢𑁄. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀕𑁆𑀕𑀨𑀮𑁂𑀳𑀺 𑀧𑀩𑁄𑀥𑁂𑀢𑁆𑀯𑀸 𑀲𑀩𑁆𑀩𑁂 𑀆𑀤𑀸𑀬 𑀯𑁂𑀴𑀼𑀯𑀦𑀫𑁂𑀯 𑀧𑀘𑁆𑀘𑀸𑀕𑀫𑀺𑀁𑀲𑀼.

𑀓𑁄𑀓𑀸𑀮𑀺𑀓𑁄 𑀯𑀺𑀳𑀸𑀭𑀁 𑀢𑀼𑀘𑁆𑀙𑀁 𑀤𑀺𑀲𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀧𑀭𑀺𑀲𑀁 𑀢𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀯𑀺𑀳𑀸𑀭𑀁 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀕𑀢𑀸, 𑀢𑁆𑀯𑀁 𑀧𑀦 𑀦𑀺𑀤𑁆𑀤𑀸𑀬𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀫𑀲𑁆𑀲 𑀅𑀧𑀦𑁂𑀢𑁆𑀯𑀸 𑀪𑀺𑀢𑁆𑀢𑀺𑀬𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀨𑀼𑀲𑀦𑁆𑀢𑁄 𑀯𑀺𑀬 𑀧𑀡𑁆𑀳𑀺𑀬𑀸 𑀦𑀁 𑀳𑀤𑀬𑁂 𑀧𑀳𑀭𑀺. 𑀢𑀸𑀯𑀤𑁂𑀯𑀲𑁆𑀲 𑀫𑀼𑀔𑀢𑁄 𑀮𑁄𑀳𑀺𑀢𑀁 𑀉𑀕𑁆𑀕𑀜𑁆𑀙𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀕𑀺𑀮𑀸𑀦𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀼𑀫𑁆𑀳𑀸𑀓𑀁 𑀕𑀢𑀓𑀸𑀮𑁂 𑀤𑁂𑀯𑀤𑀢𑁆𑀢𑁄 𑀓𑀺𑀁 𑀅𑀓𑀸𑀲𑀻’’𑀢𑀺? 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀅𑀫𑁆𑀳𑁂 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑀮𑀻𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀕𑀢𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀢𑀺. 𑀲𑀢𑁆𑀣𑀸 ‘‘𑀦 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀫 𑀅𑀦𑀼𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑁂𑀲𑀭𑀲𑀻𑀳𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀓𑀜𑁆𑀘𑀦𑀕𑀼𑀳𑀸𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀓𑀜𑁆𑀘𑀦𑀕𑀼𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑁄 𑀫𑀳𑀸𑀫𑀳𑀺𑀁𑀲𑀁 𑀯𑀥𑀺𑀢𑁆𑀯𑀸 𑀯𑀭𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀏𑀓𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀫𑀡𑀺𑀯𑀡𑁆𑀡𑀲𑁆𑀲 𑀉𑀤𑀓𑀲𑁆𑀲 𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀕𑀼𑀳𑀁 𑀲𑀦𑁆𑀥𑀸𑀬 𑀧𑀸𑀬𑀸𑀲𑀺. 𑀅𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀕𑁄𑀘𑀭𑀧𑁆𑀧𑀲𑀼𑀢𑁄 𑀲𑀳𑀲𑀸𑀯 𑀲𑀻𑀳𑀁 𑀤𑀺𑀲𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀻𑀳𑀲𑁆𑀲 𑀧𑀼𑀭𑀢𑁄 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. ‘‘𑀓𑀺𑀁, 𑀚𑀫𑁆𑀩𑀼𑀓𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁 𑀢𑁂, 𑀲𑀸𑀫𑀺, 𑀧𑀸𑀤𑁂 𑀉𑀧𑀝𑁆𑀞𑀸𑀢𑀼𑀓𑀸𑀫𑁄’’𑀢𑀺 𑀆𑀳. 𑀲𑀻𑀳𑁄 ‘‘𑀲𑀸𑀥𑀼 𑀏𑀳𑀺, 𑀫𑀁 𑀉𑀧𑀝𑁆𑀞𑀳, 𑀯𑀭𑀫𑀁𑀲𑀸𑀦𑀺 𑀢𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀺𑀗𑁆𑀕𑀸𑀮𑀁 𑀆𑀤𑀸𑀬 𑀓𑀜𑁆𑀘𑀦𑀕𑀼𑀳𑀁 𑀅𑀕𑀫𑀸𑀲𑀺. 𑀲𑀺𑀗𑁆𑀕𑀸𑀮𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀳𑀯𑀺𑀖𑀸𑀲𑀁 𑀔𑀸𑀤𑀢𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑁂𑀯 𑀣𑀽𑀮𑀲𑀭𑀻𑀭𑁄 𑀅𑀳𑁄𑀲𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀕𑀼𑀳𑀸𑀬 𑀦𑀺𑀧𑀦𑁆𑀦𑀓𑁄𑀯 𑀲𑀻𑀳𑁄 𑀆𑀳 ‘‘𑀕𑀘𑁆𑀙 𑀚𑀫𑁆𑀩𑀼𑀓, 𑀧𑀩𑁆𑀩𑀢𑀲𑀺𑀔𑀭𑁂 𑀞𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀲𑀜𑁆𑀘𑀭𑀦𑁆𑀢𑁂𑀲𑀼 𑀳𑀢𑁆𑀣𑀺𑀅𑀲𑁆𑀲𑀫𑀳𑀺𑀁𑀲𑀸𑀤𑀻𑀲𑀼 𑀬𑀲𑁆𑀲 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄𑀲𑀺, 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘𑀅𑀲𑀼𑀓𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀫𑀁 𑀯𑀦𑁆𑀤𑀺𑀢𑁆𑀯𑀸 ‘𑀯𑀺𑀭𑁄𑀘, 𑀲𑀸𑀫𑀻’𑀢𑀺 𑀯𑀤𑀸𑀳𑀺, 𑀅𑀳𑀁 𑀢𑀁 𑀯𑀥𑀺𑀢𑁆𑀯𑀸 𑀫𑀥𑀼𑀭𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀢𑀼𑀬𑁆𑀳𑀫𑁆𑀧𑀺 𑀤𑀲𑁆𑀲𑀸𑀫𑀻’’𑀢𑀺. 𑀲𑀺𑀗𑁆𑀕𑀸𑀮𑁄 𑀧𑀩𑁆𑀩𑀢𑀲𑀺𑀔𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀫𑀺𑀕𑁂 𑀑𑀮𑁄𑀓𑁂𑀢𑁆𑀯𑀸 𑀬𑀲𑁆𑀲𑁂𑀯 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀜𑁆𑀘𑀦𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑀫𑁂𑀯 𑀲𑀻𑀳𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀯𑀺𑀭𑁄𑀘, 𑀲𑀸𑀫𑀻’’𑀢𑀺 𑀯𑀤𑀢𑀺. 𑀲𑀻𑀳𑁄 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀘𑁂𑀧𑀺 𑀫𑀢𑁆𑀢𑀯𑀭𑀯𑀸𑀭𑀡𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑀭𑀫𑀁𑀲𑀁 𑀔𑀸𑀤𑀢𑀺, 𑀲𑀺𑀗𑁆𑀕𑀸𑀮𑀲𑁆𑀲𑀧𑀺 𑀤𑁂𑀢𑀺. 𑀲𑀺𑀗𑁆𑀕𑀸𑀮𑁄 𑀓𑀼𑀘𑁆𑀙𑀺𑀧𑀽𑀭𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀲𑁄 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀫𑀸𑀦𑀁 𑀯𑀟𑁆𑀠𑁂𑀲𑀺 ‘‘𑀅𑀳𑀫𑁆𑀧𑀺 𑀘𑀢𑀼𑀧𑁆𑀧𑀤𑁄𑀯, 𑀓𑀺𑀁𑀓𑀸𑀭𑀡𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑁂𑀳𑀺 𑀧𑁄𑀲𑀺𑀬𑀫𑀸𑀦𑁄 𑀯𑀺𑀳𑀭𑀸𑀫𑀺, 𑀇𑀢𑁄 𑀧𑀝𑁆𑀞𑀸𑀬 𑀅𑀳𑀫𑁆𑀧𑀺 𑀳𑀢𑁆𑀣𑀺𑀆𑀤𑀬𑁄 𑀳𑀦𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀲𑀻𑀳𑁄𑀧𑀺 𑀫𑀺𑀕𑀭𑀸𑀚𑀸 ‘𑀯𑀺𑀭𑁄𑀘, 𑀲𑀸𑀫𑀻’𑀢𑀺 𑀯𑀼𑀢𑁆𑀢𑀫𑁂𑀯 𑀧𑀤𑀁 𑀦𑀺𑀲𑁆𑀲𑀸𑀬 𑀯𑀭𑀯𑀸𑀭𑀡𑁂 𑀯𑀥𑁂𑀢𑀺, 𑀅𑀳𑀫𑁆𑀧𑀺 𑀲𑀻𑀳𑁂𑀦 ‘𑀯𑀺𑀭𑁄𑀘, 𑀚𑀫𑁆𑀩𑀼𑀓𑀸’𑀢𑀺 𑀫𑀁 𑀯𑀤𑀸𑀧𑁂𑀢𑁆𑀯𑀸 𑀏𑀓𑀁 𑀯𑀭𑀯𑀸𑀭𑀡𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺.

𑀲𑁄 𑀲𑀻𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀲𑀸𑀫𑀺, 𑀫𑀬𑀸 𑀤𑀻𑀖𑀭𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 𑀯𑀥𑀺𑀢𑀯𑀭𑀯𑀸𑀭𑀡𑀸𑀦𑀁 𑀫𑀁𑀲𑀁 𑀔𑀸𑀤𑀺𑀢𑀁, 𑀅𑀳𑀫𑁆𑀧𑀺 𑀏𑀓𑀁 𑀯𑀭𑀯𑀸𑀭𑀡𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀦𑀺𑀧𑀦𑁆𑀦𑀝𑁆𑀞𑀸𑀦𑁂 𑀓𑀜𑁆𑀘𑀦𑀕𑀼𑀳𑀸𑀬𑀁 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀧𑀩𑁆𑀩𑀢𑀧𑀸𑀤𑁂 𑀯𑀺𑀘𑀭𑀦𑁆𑀢𑀁 𑀯𑀭𑀯𑀸𑀭𑀡𑀁 𑀑𑀮𑁄𑀓𑁂𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘𑀯𑀺𑀭𑁄𑀘, 𑀚𑀫𑁆𑀩𑀼𑀓𑀸’𑀢𑀺 𑀯𑀤𑁂𑀣, 𑀏𑀢𑁆𑀢𑀓𑀫𑀢𑁆𑀢𑀲𑁆𑀫𑀺𑀁 𑀫𑀘𑁆𑀙𑁂𑀭𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺. 𑀅𑀣 𑀦𑀁 𑀲𑀻𑀳𑁄 𑀆𑀳 ‘‘𑀦, 𑀢𑁆𑀯𑀁 𑀚𑀫𑁆𑀩𑀼𑀓, 𑀯𑀸𑀭𑀡𑁂 𑀯𑀥𑀺𑀢𑀼𑀁 𑀲𑀫𑀢𑁆𑀣𑁂 𑀲𑀻𑀳𑀓𑀼𑀮𑁂 𑀉𑀧𑁆𑀧𑀦𑁆𑀦𑁄, 𑀯𑀸𑀭𑀡𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀦𑀲𑀫𑀢𑁆𑀣𑁄 𑀲𑀺𑀗𑁆𑀕𑀸𑀮𑁄 𑀦𑀸𑀫 𑀮𑁄𑀓𑁂 𑀦𑀢𑁆𑀣𑀺, 𑀫𑀸 𑀢𑁂 𑀏𑀢𑀁 𑀭𑀼𑀘𑁆𑀘𑀺, 𑀫𑀬𑀸 𑀯𑀥𑀺𑀢𑀯𑀭𑀯𑀸𑀭𑀡𑀸𑀦𑀜𑁆𑀜𑁂𑀯 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀯𑀲𑀸’’𑀢𑀺. 𑀲𑁄 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀯𑀺𑀭𑀫𑀺𑀢𑀼𑀁 𑀦 𑀇𑀘𑁆𑀙𑀺, 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀲𑀻𑀳𑁄 𑀢𑀁 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀢𑁂𑀦 𑀳𑀺 𑀫𑀫 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀸’’𑀢𑀺 𑀚𑀫𑁆𑀩𑀼𑀓𑀁 𑀓𑀜𑁆𑀘𑀦𑀕𑀼𑀳𑀸𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀬𑀁 𑀧𑀩𑁆𑀩𑀢𑀧𑀸𑀤𑁂 𑀫𑀢𑁆𑀢𑀯𑀭𑀯𑀸𑀭𑀡𑀁 𑀑𑀮𑁄𑀓𑁂𑀢𑁆𑀯𑀸 𑀕𑀼𑀳𑀸𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀯𑀺𑀭𑁄𑀘, 𑀚𑀫𑁆𑀩𑀼𑀓𑀸’’𑀢𑀺 𑀆𑀳. 𑀲𑀺𑀗𑁆𑀕𑀸𑀮𑁄 𑀓𑀜𑁆𑀘𑀦𑀕𑀼𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀲𑁆𑀲𑀺𑀢𑁆𑀯𑀸 ‘‘𑀫𑀢𑁆𑀢𑀯𑀭𑀯𑀸𑀭𑀡𑀲𑁆𑀲 𑀓𑀼𑀫𑁆𑀪𑁂 𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀢𑀺. 𑀯𑀸𑀭𑀡𑁄 𑀤𑀓𑁆𑀔𑀺𑀡𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀲𑀻𑀲𑀁 𑀅𑀓𑁆𑀓𑀫𑀺, 𑀲𑀻𑀲𑀝𑁆𑀞𑀻𑀦𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀲𑀭𑀻𑀭𑀁 𑀯𑀸𑀭𑀡𑁄 𑀧𑀸𑀤𑁂𑀦 𑀲𑀗𑁆𑀖𑀭𑀺𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀉𑀧𑀭𑀺 𑀮𑀡𑁆𑀟𑀁 𑀧𑀸𑀢𑁂𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑁄 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀯𑀺𑀭𑁄𑀘, 𑀚𑀫𑁆𑀩𑀼𑀓𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁩. ‘‘𑀮𑀲𑀻 𑀘 𑀢𑁂 𑀦𑀺𑀧𑁆𑀨𑀮𑀺𑀢𑀸, 𑀫𑀢𑁆𑀣𑀓𑁄 𑀘 𑀧𑀤𑀸𑀮𑀺𑀢𑁄;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀅𑀚𑁆𑀚 𑀔𑁄 𑀢𑁆𑀯𑀁 𑀯𑀺𑀭𑁄𑀘𑀲𑀻’’𑀢𑀺.

𑀢𑀢𑁆𑀣 𑀮𑀲𑀻𑀢𑀺 𑀫𑀢𑁆𑀣𑀮𑀼𑀗𑁆𑀕𑀁. 𑀦𑀺𑀧𑁆𑀨𑀮𑀺𑀢𑀸𑀢𑀺 𑀦𑀺𑀓𑁆𑀔𑀦𑁆𑀢𑀸. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀭𑁄𑀘𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁪𑁪] 𑁪. 𑀦𑀗𑁆𑀕𑀼𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀚𑀻𑀯𑀓𑀸𑀦𑀁 𑀫𑀺𑀘𑁆𑀙𑀸𑀢𑀧𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀆𑀚𑀻𑀯𑀓𑀸 𑀚𑁂𑀢𑀯𑀦𑀧𑀺𑀝𑁆𑀞𑀺𑀬𑀁 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀢𑀧𑀁 𑀘𑀭𑀦𑁆𑀢𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀢𑁂𑀲𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀯𑀕𑁆𑀕𑀼𑀮𑀺𑀯𑀢𑀓𑀡𑁆𑀝𑀓𑀸𑀧𑀲𑁆𑀲𑀬𑀧𑀜𑁆𑀘𑀸𑀢𑀧𑀢𑀧𑀦𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀢𑀧𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑀁 𑀫𑀺𑀘𑁆𑀙𑀸𑀢𑀧𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀯𑀸 𑀯𑀼𑀟𑁆𑀠𑀺 𑀯𑀸’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀫𑀺𑀘𑁆𑀙𑀸𑀢𑀧𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀯𑀸 𑀯𑀼𑀟𑁆𑀠𑀺 𑀯𑀸 𑀅𑀢𑁆𑀣𑀺, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 ‘𑀏𑀯𑀭𑀽𑀧𑀁 𑀢𑀧𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀯𑀸 𑀯𑀼𑀟𑁆𑀠𑀺 𑀯𑀸 𑀪𑀯𑀺𑀲𑁆𑀲𑀢𑀻’𑀢𑀺 𑀲𑀜𑁆𑀜𑀸𑀬 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀕𑁆𑀕𑀺𑀚𑀼𑀳𑀦𑀸𑀤𑀺𑀯𑀲𑁂𑀦 𑀓𑀺𑀜𑁆𑀘𑀺 𑀯𑀼𑀟𑁆𑀠𑀺𑀁 𑀅𑀧𑀲𑁆𑀲𑀦𑁆𑀢𑀸 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀫𑀸𑀢𑀸𑀧𑀺𑀢𑀭𑁄 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀅𑀣 𑀦𑀁 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀏𑀢𑀤𑀯𑁄𑀘𑀼𑀁 ‘‘𑀫𑀬𑀁 𑀢𑁂, 𑀧𑀼𑀢𑁆𑀢, 𑀚𑀸𑀢𑀤𑀺𑀯𑀲𑁂 𑀅𑀕𑁆𑀕𑀺𑀁 𑀕𑀡𑁆𑀳𑀺𑀫𑁆𑀳. 𑀲𑀘𑁂𑀲𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀢𑀼𑀓𑀸𑀫𑁄, 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳. 𑀅𑀣 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄, 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀳𑁄𑀳𑀻’’𑀢𑀺. 𑀲𑁄 ‘‘𑀦 𑀫𑀬𑁆𑀳𑀁 𑀅𑀕𑀸𑀭𑁂𑀦 𑀅𑀢𑁆𑀣𑁄’’𑀢𑀺 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑁄 𑀅𑀭𑀜𑁆𑀜𑁂 𑀯𑀺𑀳𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑀕𑀸𑀫𑀓𑁂 𑀕𑁄𑀤𑀓𑁆𑀔𑀺𑀡𑀁 𑀮𑀪𑀺𑀢𑁆𑀯𑀸 𑀢𑀁 𑀕𑁄𑀡𑀁 𑀅𑀲𑁆𑀲𑀫𑀧𑀤𑀁 𑀦𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀕𑁆𑀕𑀺𑀪𑀕𑀯𑀦𑁆𑀢𑀁 𑀕𑁄𑀫𑀁𑀲𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀥 𑀮𑁄𑀡𑀁 𑀦𑀢𑁆𑀣𑀺, 𑀅𑀕𑁆𑀕𑀺𑀪𑀕𑀯𑀸 𑀅𑀮𑁄𑀡𑀁 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀕𑀸𑀫𑀢𑁄 𑀮𑁄𑀡𑀁 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀪𑀕𑀯𑀦𑁆𑀢𑀁 𑀲𑀮𑁄𑀡𑀓𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀢𑀢𑁆𑀣𑁂𑀯 𑀩𑀦𑁆𑀥𑀺𑀢𑁆𑀯𑀸 𑀮𑁄𑀡𑀢𑁆𑀣𑀸𑀬 𑀕𑀸𑀫𑀓𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀕𑀢𑁂 𑀲𑀫𑁆𑀩𑀳𑀼𑀮𑀸 𑀮𑀼𑀤𑁆𑀤𑀓𑀸 𑀢𑀁 𑀞𑀸𑀦𑀁 𑀆𑀕𑀢𑀸. 𑀕𑁄𑀡𑀁 𑀤𑀺𑀲𑁆𑀯𑀸 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀜𑁆𑀘 𑀚𑀗𑁆𑀖𑀜𑁆𑀘 𑀘𑀫𑁆𑀫𑀜𑁆𑀘 𑀢𑀢𑁆𑀣𑁂𑀯 𑀙𑀟𑁆𑀟𑁂𑀢𑁆𑀯𑀸 𑀅𑀯𑀲𑁂𑀲𑀫𑀁𑀲𑀁 𑀆𑀤𑀸𑀬 𑀅𑀕𑀫𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀸𑀤𑀺𑀫𑀢𑁆𑀢𑀫𑁂𑀯 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀕𑁆𑀕𑀺𑀪𑀕𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀁 𑀧𑀦 𑀓𑀤𑀸 𑀭𑀓𑁆𑀔𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀕𑁆𑀕𑀺𑀧𑀭𑀺𑀘𑀭𑀡𑁂𑀦 𑀦𑀺𑀭𑀢𑁆𑀣𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦𑀢𑁆𑀣𑀺 𑀇𑀢𑁄𑀦𑀺𑀤𑀸𑀦𑀁 𑀓𑀼𑀲𑀮𑀁 𑀯𑀸 𑀯𑀼𑀟𑁆𑀠𑀺 𑀯𑀸’’𑀢𑀺. 𑀲𑁄 𑀅𑀕𑁆𑀕𑀺𑀧𑀭𑀺𑀘𑀭𑀺𑀬𑀸𑀬 𑀯𑀺𑀕𑀢𑀘𑁆𑀙𑀦𑁆𑀤𑁄 ‘‘𑀳𑀫𑁆𑀪𑁄 𑀅𑀕𑁆𑀕𑀺𑀪𑀕𑀯𑀸, 𑀢𑁆𑀯𑀁 𑀅𑀢𑁆𑀢𑀦𑁄𑀧𑀺 𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀁 𑀓𑀤𑀸 𑀭𑀓𑁆𑀔𑀺𑀲𑁆𑀲𑀲𑀺, 𑀫𑀁𑀲𑀁 𑀦𑀢𑁆𑀣𑀺, 𑀏𑀢𑁆𑀢𑀓𑁂𑀦𑀧𑀺 𑀢𑀼𑀲𑁆𑀲𑀸𑀳𑀻’’𑀢𑀺 𑀦𑀗𑁆𑀕𑀼𑀝𑁆𑀞𑀸𑀤𑀻𑀦𑀺 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁪. ‘‘𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤, 𑀬𑀁 𑀢𑀁 𑀯𑀸𑀮𑀥𑀺𑀦𑀸𑀪𑀺𑀧𑀽𑀚𑀬𑀸𑀫;

𑀫𑀁𑀲𑀸𑀭𑀳𑀲𑁆𑀲 𑀦𑀢𑁆𑀣𑀚𑁆𑀚 𑀫𑀁𑀲𑀁, 𑀦𑀗𑁆𑀕𑀼𑀝𑁆𑀞𑀫𑁆𑀧𑀺 𑀪𑀯𑀁 𑀧𑀝𑀺𑀕𑁆𑀕𑀳𑀸𑀢𑀽’’𑀢𑀺.

𑀢𑀢𑁆𑀣 𑀩𑀳𑀼𑀫𑁆𑀧𑁂𑀢𑀦𑁆𑀢𑀺 𑀏𑀢𑁆𑀢𑀓𑀫𑁆𑀧𑀺 𑀩𑀳𑀼𑀁. 𑀅𑀲𑀩𑁆𑀪𑀻𑀢𑀺 𑀅𑀲𑀧𑁆𑀧𑀼𑀭𑀺𑀲 𑀅𑀲𑀸𑀥𑀼𑀚𑀸𑀢𑀺𑀓. 𑀚𑀸𑀢𑀯𑁂𑀤𑀸𑀢𑀺 𑀅𑀕𑁆𑀕𑀺𑀁 𑀆𑀮𑀧𑀢𑀺. 𑀅𑀕𑁆𑀕𑀺 𑀳𑀺 𑀚𑀸𑀢𑀫𑀢𑁆𑀢𑁄𑀯 𑀯𑁂𑀤𑀺𑀬𑀢𑀺 𑀧𑀜𑁆𑀜𑀸𑀬𑀢𑀺 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀢𑀁 𑀯𑀸𑀮𑀥𑀺𑀦𑀸𑀪𑀺𑀧𑀽𑀚𑀬𑀸𑀫𑀸𑀢𑀺 𑀬𑀁 𑀅𑀚𑁆𑀚 𑀫𑀬𑀁 𑀅𑀢𑁆𑀢𑀦𑁄𑀧𑀺 𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀼𑀁 𑀅𑀲𑀫𑀢𑁆𑀣𑀁 𑀪𑀕𑀯𑀦𑁆𑀢𑀁 𑀯𑀸𑀮𑀥𑀺𑀦𑀸 𑀅𑀪𑀺𑀧𑀽𑀚𑀬𑀸𑀫, 𑀏𑀢𑀫𑁆𑀧𑀺 𑀢𑀯 𑀩𑀳𑀼𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀁𑀲𑀸𑀭𑀳𑀲𑁆𑀲𑀸𑀢𑀺 𑀫𑀁𑀲𑀁 𑀅𑀭𑀳𑀲𑁆𑀲 𑀢𑀼𑀬𑁆𑀳𑀁 𑀦𑀢𑁆𑀣𑀺 𑀅𑀚𑁆𑀚 𑀫𑀁𑀲𑀁. 𑀦𑀗𑁆𑀕𑀼𑀝𑁆𑀞𑀫𑁆𑀧𑀺 𑀪𑀯𑀁 𑀧𑀝𑀺𑀕𑁆𑀕𑀳𑀸𑀢𑀽𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀯𑀁 𑀇𑀫𑀁 𑀲𑀚𑀗𑁆𑀖𑀘𑀫𑁆𑀫𑀁 𑀦𑀗𑁆𑀕𑀼𑀝𑁆𑀞𑀫𑁆𑀧𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺.

𑀏𑀯𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀦𑀺𑀩𑁆𑀩𑀼𑀢𑀕𑁆𑀕𑀺𑀢𑀸𑀧𑀲𑁄 𑀅𑀳𑀫𑁂𑀯 𑀢𑁂𑀦 𑀲𑀫𑀬𑁂𑀦𑀸’’𑀢𑀺.

𑀦𑀗𑁆𑀕𑀼𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁪𑁫] 𑁫. 𑀭𑀸𑀥𑀚𑀸𑀢𑀓𑀯𑀡𑁆𑀡𑀦𑀸

𑀦 𑀢𑁆𑀯𑀁 𑀭𑀸𑀥 𑀯𑀺𑀚𑀸𑀦𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀭𑀓𑁆𑀔𑀺𑀬𑁄, 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁆𑀯𑀫𑁆𑀧𑀺 𑀧𑀼𑀩𑁆𑀩𑁂 𑀏𑀢𑀁 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑁄𑀧𑀺 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 𑀓𑀣𑀁 𑀭𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀓𑀸𑀲𑀺𑀭𑀝𑁆𑀞𑁂 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀩𑁄𑀥𑀺𑀲𑀢𑁆𑀢𑀜𑁆𑀘 𑀓𑀦𑀺𑀝𑁆𑀞𑀪𑀸𑀢𑀭𑀜𑁆𑀘𑀲𑁆𑀲 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑀺. 𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 ‘‘𑀧𑁄𑀝𑁆𑀞𑀧𑀸𑀤𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀇𑀢𑀭𑀲𑁆𑀲 ‘‘𑀭𑀸𑀥𑁄’’𑀢𑀺. 𑀢𑀲𑁆𑀲 𑀧𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸 𑀅𑀦𑀸𑀘𑀸𑀭𑀸 𑀳𑁄𑀢𑀺 𑀤𑀼𑀲𑁆𑀲𑀻𑀮𑀸. 𑀲𑁄 𑀯𑁄𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀉𑀪𑁄𑀧𑀺 𑀪𑀸𑀢𑀭𑁄 𑀆𑀳 𑁋 ‘‘𑀢𑀸𑀢𑀸, 𑀲𑀘𑁂 𑀯𑁄 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀯𑀸𑀭𑁂𑀬𑁆𑀬𑀸𑀣 𑀦’’𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀳 ‘‘𑀲𑀸𑀥𑀼, 𑀢𑀸𑀢, 𑀯𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀯𑀸𑀭𑁂𑀬𑁆𑀬𑀸𑀫, 𑀅𑀲𑀓𑁆𑀓𑁄𑀦𑁆𑀢𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀁 𑀲𑀼𑀓𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀯𑁄𑀳𑀸𑀭𑀢𑁆𑀣𑀸𑀬 𑀕𑀢𑁄.

𑀢𑀲𑁆𑀲 𑀧𑀦 𑀕𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑀻 𑀅𑀢𑀺𑀘𑀭𑀺𑀢𑀼𑀁 𑀆𑀭𑀤𑁆𑀥𑀸, 𑀧𑀯𑀺𑀲𑀦𑁆𑀢𑀸𑀦𑀜𑁆𑀘 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀅𑀦𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀲𑀸 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀭𑀸𑀥𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀪𑀸𑀢𑀺𑀓, 𑀅𑀫𑁆𑀳𑀸𑀓𑀁 𑀧𑀺𑀢𑀸 ‘𑀲𑀘𑁂 𑀯𑁄 𑀫𑀸𑀢𑀸 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀯𑀸𑀭𑁂𑀬𑁆𑀬𑀸𑀣𑀸’𑀢𑀺 𑀯𑀢𑁆𑀯𑀸 𑀕𑀢𑁄, 𑀇𑀤𑀸𑀦𑀺 𑀘𑁂𑀲𑀸 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀯𑀸𑀭𑁂𑀫 𑀦’’𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀸𑀢, 𑀢𑁆𑀯𑀁 𑀅𑀢𑁆𑀢𑀦𑁄 𑀅𑀩𑁆𑀬𑀢𑁆𑀢𑀢𑀸𑀬 𑀩𑀸𑀮𑀪𑀸𑀯𑁂𑀦 𑀏𑀯𑀁 𑀯𑀤𑁂𑀲𑀺, 𑀫𑀸𑀢𑀼𑀕𑀸𑀫𑀁 𑀦𑀸𑀫 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀦 𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁫. ‘‘𑀦 𑀢𑁆𑀯𑀁 𑀭𑀸𑀥 𑀯𑀺𑀚𑀸𑀦𑀸𑀲𑀺, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂;

𑀅𑀩𑁆𑀬𑀬𑀢𑀁 𑀯𑀺𑀮𑀧𑀲𑀺, 𑀯𑀺𑀭𑀢𑁆𑀢𑀸 𑀓𑁄𑀲𑀺𑀬𑀸𑀬𑀦𑁂’’𑀢𑀺.

𑀢𑀢𑁆𑀣 𑀦 𑀢𑁆𑀯𑀁 𑀭𑀸𑀥 𑀯𑀺𑀚𑀸𑀦𑀸𑀲𑀺, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂𑀢𑀺 𑀢𑀸𑀢 𑀭𑀸𑀥, 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂 𑀧𑀞𑀫𑀬𑀸𑀫𑁂𑀬𑁂𑀯 𑀏𑀢𑁆𑀢𑀓𑀸 𑀚𑀦𑀸 𑀆𑀕𑀢𑀸, 𑀇𑀤𑀸𑀦𑀺 𑀓𑁄 𑀚𑀸𑀦𑀸𑀢𑀺, 𑀓𑀺𑀢𑁆𑀢𑀓𑀸𑀧𑀺 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀅𑀩𑁆𑀬𑀬𑀢𑀁 𑀯𑀺𑀮𑀧𑀲𑀻𑀢𑀺 𑀢𑁆𑀯𑀁 𑀅𑀩𑁆𑀬𑀢𑁆𑀢𑀯𑀺𑀮𑀸𑀧𑀁 𑀯𑀺𑀮𑀧𑀲𑀺. 𑀯𑀺𑀭𑀢𑁆𑀢𑀸 𑀓𑁄𑀲𑀺𑀬𑀸𑀬𑀦𑁂𑀢𑀺 𑀫𑀸𑀢𑀸 𑀦𑁄 𑀓𑁄𑀲𑀺𑀬𑀸𑀬𑀦𑀻 𑀩𑁆𑀭𑀸𑀳𑁆𑀫𑀡𑀻 𑀯𑀺𑀭𑀢𑁆𑀢𑀸 𑀅𑀫𑁆𑀳𑀸𑀓𑀁 𑀧𑀺𑀢𑀭𑀺 𑀦𑀺𑀧𑁆𑀧𑁂𑀫𑀸 𑀚𑀸𑀢𑀸. 𑀲𑀘𑀲𑁆𑀲𑀸 𑀢𑀲𑁆𑀫𑀺𑀁 𑀲𑀺𑀦𑁂𑀳𑁄 𑀯𑀸 𑀧𑁂𑀫𑀁 𑀯𑀸 𑀪𑀯𑁂𑀬𑁆𑀬, 𑀦 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀓𑀭𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀧𑀓𑀸𑀲𑁂𑀲𑀺.

𑀏𑀯𑀁 𑀧𑀓𑀸𑀲𑁂𑀢𑁆𑀯𑀸 𑀘 𑀧𑀦 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀤𑁆𑀥𑀺𑀁 𑀭𑀸𑀥𑀲𑁆𑀲 𑀯𑀢𑁆𑀢𑀼𑀁 𑀦 𑀅𑀤𑀸𑀲𑀺. 𑀲𑀸𑀧𑀺 𑀬𑀸𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀸𑀕𑀫𑀦𑀸 𑀬𑀣𑀸𑀭𑀼𑀘𑀺𑀬𑀸 𑀯𑀺𑀘𑀭𑀺. 𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀧𑁄𑀝𑁆𑀞𑀧𑀸𑀤𑀁 𑀧𑀼𑀘𑁆𑀙𑀺 𑁋 ‘‘𑀢𑀸𑀢, 𑀓𑀻𑀤𑀺𑀲𑀻 𑀯𑁄 𑀫𑀸𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀩𑁆𑀩𑀁 𑀬𑀣𑀸𑀪𑀽𑀢𑀁 𑀓𑀣𑁂𑀢𑁆𑀯𑀸 ‘‘𑀓𑀺𑀁 𑀢𑁂, 𑀢𑀸𑀢, 𑀏𑀯𑀭𑀽𑀧𑀸𑀬 𑀤𑀼𑀲𑁆𑀲𑀻𑀮𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀢𑀸𑀢, 𑀅𑀫𑁆𑀳𑁂𑀳𑀺 𑀫𑀸𑀢𑀼𑀬𑀸 𑀤𑁄𑀲𑀲𑁆𑀲 𑀓𑀣𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑀓𑁆𑀓𑀸 𑀇𑀥 𑀯𑀲𑀺𑀢𑀼’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀲𑀤𑁆𑀥𑀺𑀁 𑀭𑀸𑀥𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀏𑀢𑁂𑀬𑁂𑀯 𑀤𑁆𑀯𑁂 𑀚𑀦𑀸 𑀅𑀳𑁂𑀲𑀼𑀁, 𑀭𑀸𑀥𑁄 𑀆𑀦𑀦𑁆𑀤𑁄, 𑀧𑁄𑀝𑁆𑀞𑀧𑀸𑀤𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀸𑀥𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁪𑁬] 𑁬. 𑀲𑀫𑀼𑀤𑁆𑀤𑀓𑀸𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 𑀦𑀼 𑀳𑀦𑀼𑀓𑀸 𑀲𑀦𑁆𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀫𑀳𑀮𑁆𑀮𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀸 𑀅𑀟𑁆𑀠𑀸 𑀫𑀳𑀤𑁆𑀥𑀦𑀸 𑀅𑀜𑁆𑀜𑀫𑀜𑁆𑀜𑀲𑀳𑀸𑀬𑀓𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀫𑀬𑀁 𑀫𑀳𑀮𑁆𑀮𑀓𑀸, 𑀓𑀺𑀁 𑀦𑁄 𑀖𑀭𑀸𑀯𑀸𑀲𑁂𑀦, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀭𑀫𑀡𑀻𑀬𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀤𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀲𑀗𑁆𑀖𑀁 𑀧𑀳𑀸𑀬 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦 𑀧𑀩𑁆𑀩𑀚𑁆𑀚𑀸𑀦𑀼𑀭𑀽𑀧𑀁 𑀲𑀫𑀡𑀥𑀫𑁆𑀫𑀁 𑀦 𑀓𑀭𑀺𑀁𑀲𑀼, 𑀫𑀳𑀮𑁆𑀮𑀓𑀪𑀸𑀯𑁂𑀦 𑀥𑀫𑁆𑀫𑀫𑁆𑀧𑀺 𑀦 𑀧𑀭𑀺𑀬𑀸𑀧𑀼𑀡𑀺𑀁𑀲𑀼, 𑀕𑀺𑀳𑀺𑀓𑀸𑀮𑁂 𑀯𑀺𑀬 𑀧𑀩𑁆𑀩𑀚𑀺𑀢𑀓𑀸𑀮𑁂𑀧𑀺 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀏𑀓𑀢𑁄𑀯 𑀯𑀲𑀺𑀁𑀲𑀼. 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀧𑀺 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀲𑁆𑀲𑁂𑀯 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀢𑁂𑀲𑀼 𑀏𑀓𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀲𑀩𑁆𑀩𑁂𑀲𑀫𑁆𑀧𑀺 𑀫𑀳𑀮𑁆𑀮𑀓𑀢𑁆𑀣𑁂𑀭𑀸𑀦𑀁 𑀉𑀧𑀓𑀸𑀭𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑁂𑀲𑀸𑀧𑀺 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀲𑀸𑀧𑀺 𑀢𑁂𑀲𑀁 𑀬𑀣𑀸𑀲𑀦𑁆𑀦𑀺𑀳𑀺𑀢𑀁 𑀲𑀽𑀧𑀩𑁆𑀬𑀜𑁆𑀚𑀦𑀁 𑀤𑁂𑀢𑀺. 𑀲𑀸 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀫𑀓𑀸𑀲𑀺. 𑀅𑀣 𑀢𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀕𑀻𑀯𑀸𑀲𑀼 𑀕𑀳𑁂𑀢𑁆𑀯𑀸 ‘‘𑀫𑀥𑀼𑀭𑀳𑀢𑁆𑀣𑀭𑀲𑀸 𑀉𑀧𑀸𑀲𑀺𑀓𑀸 𑀓𑀸𑀮𑀓𑀢𑀸’’𑀢𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀭𑁄𑀤𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀓𑀲𑁆𑀫𑀸 𑀭𑁄𑀤𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂 ‘‘𑀅𑀫𑁆𑀳𑀸𑀓𑀁 𑀲𑀳𑀸𑀬𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀫𑀥𑀼𑀭𑀳𑀢𑁆𑀣𑀭𑀲𑀸 𑀓𑀸𑀮𑀓𑀢𑀸 𑀅𑀫𑁆𑀳𑀸𑀓𑀁 𑀅𑀢𑀺𑀯𑀺𑀬 𑀉𑀧𑀓𑀸𑀭𑀸, ‘𑀇𑀤𑀸𑀦𑀺 𑀓𑀼𑀢𑁄 𑀢𑀣𑀸𑀭𑀽𑀧𑀺𑀁 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀭𑁄𑀤𑀺𑀫𑁆𑀳𑀸’’𑀢𑀺 𑀆𑀳𑀁𑀲𑀼.

𑀢𑁂𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀅𑀜𑁆𑀜𑀫𑀜𑁆𑀜𑀁 𑀕𑀻𑀯𑀸𑀲𑀼 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀭𑁄𑀤𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀢𑁂 𑀢𑀲𑁆𑀲𑀸 𑀓𑀸𑀮𑀓𑀺𑀭𑀺𑀬𑀸𑀬 𑀭𑁄𑀤𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀧𑀼𑀩𑁆𑀩𑁂𑀧𑁂𑀢𑁂 𑀇𑀫𑀁 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀫𑀼𑀤𑁆𑀤𑁂 𑀫𑀢𑀁 𑀦𑀺𑀲𑁆𑀲𑀸𑀬 ‘𑀲𑀫𑀼𑀤𑁆𑀤𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀏𑀢𑀁 𑀦𑀻𑀳𑀭𑀺𑀲𑁆𑀲𑀸𑀫𑀸’𑀢𑀺 𑀯𑀸𑀬𑀫𑀦𑁆𑀢𑀸 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀫𑀼𑀤𑁆𑀤𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑁄 𑀓𑀸𑀓𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀓𑀸𑀓𑀺𑀁 𑀆𑀤𑀸𑀬 𑀕𑁄𑀘𑀭𑀁 𑀧𑀭𑀺𑀬𑁂𑀲𑀫𑀸𑀦𑁄 𑀲𑀫𑀼𑀤𑁆𑀤𑀢𑀻𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀦𑀼𑀲𑁆𑀲𑀸 𑀲𑀫𑀼𑀤𑁆𑀤𑀢𑀻𑀭𑁂 𑀔𑀻𑀭𑀧𑀸𑀬𑀸𑀲𑀫𑀘𑁆𑀙𑀫𑀁𑀲𑀲𑀼𑀭𑀸𑀤𑀻𑀳𑀺 𑀦𑀸𑀕𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀲𑁄 𑀓𑀸𑀓𑁄 𑀩𑀮𑀺𑀓𑀫𑁆𑀫𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀔𑀻𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀤𑁆𑀥𑀺𑀁 𑀓𑀸𑀓𑀺𑀬𑀸 𑀔𑀻𑀭𑀧𑀸𑀬𑀸𑀲𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀩𑀳𑀼𑀁 𑀲𑀼𑀭𑀁 𑀧𑀺𑀯𑀺. 𑀢𑁂 𑀉𑀪𑁄𑀧𑀺 𑀲𑀼𑀭𑀸𑀫𑀤𑀫𑀢𑁆𑀢𑀸 ‘‘𑀲𑀫𑀼𑀤𑁆𑀤𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀯𑁂𑀮𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀆𑀭𑀪𑀺𑀁𑀲𑀼 𑀅𑀣𑁂𑀓𑀸 𑀊𑀫𑀺 𑀆𑀕𑀦𑁆𑀢𑁆𑀯𑀸 𑀓𑀸𑀓𑀺𑀁 𑀕𑀳𑁂𑀢𑁆𑀯𑀸 𑀲𑀫𑀼𑀤𑁆𑀤𑀁 𑀧𑀯𑁂𑀲𑁂𑀲𑀺. 𑀢𑀫𑁂𑀓𑁄 𑀫𑀘𑁆𑀙𑁄 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺. 𑀓𑀸𑀓𑁄 ‘‘𑀪𑀭𑀺𑀬𑀸 𑀫𑁂 𑀫𑀢𑀸’’𑀢𑀺 𑀭𑁄𑀤𑀺 𑀧𑀭𑀺𑀤𑁂𑀯𑀺. 𑀅𑀣𑀲𑁆𑀲 𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀳𑀽 𑀓𑀸𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀲𑀳𑀸𑀬𑀺𑀓𑀸 𑀯𑁄 𑀯𑁂𑀮𑀦𑁆𑀢𑁂 𑀦𑁆𑀳𑀸𑀬𑀫𑀸𑀦𑀸 𑀊𑀫𑀺𑀬𑀸 𑀳𑀝𑀸’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀭𑀯𑀁 𑀭𑀯𑀦𑁆𑀢𑀸 𑀭𑁄𑀤𑀺𑀁𑀲𑀼. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 ‘‘𑀇𑀤𑀁 𑀲𑀫𑀼𑀤𑁆𑀤𑀉𑀤𑀓𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀓𑀺𑀁 𑀧𑀳𑁄𑀲𑀺, 𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀲𑀫𑀼𑀤𑁆𑀤𑀁 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀲𑀳𑀸𑀬𑀺𑀓𑀁 𑀦𑀻𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀫𑀼𑀔𑀁 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀉𑀤𑀓𑀁 𑀩𑀳𑀺 𑀙𑀟𑁆𑀟𑁂𑀦𑁆𑀢𑀺, 𑀮𑁄𑀡𑀽𑀤𑀓𑁂𑀦 𑀘 𑀕𑀮𑁂 𑀲𑀼𑀲𑁆𑀲𑀫𑀸𑀦𑁂 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀣𑀮𑀁 𑀕𑀦𑁆𑀢𑁆𑀯𑀸 𑀯𑀺𑀲𑁆𑀲𑀫𑀦𑁆𑀢𑀺.

𑀢𑁂 𑀳𑀦𑀽𑀲𑀼 𑀓𑀺𑀮𑀦𑁆𑀢𑁂𑀲𑀼 𑀫𑀼𑀔𑁂𑀲𑀼 𑀲𑀼𑀓𑁆𑀔𑀦𑁆𑀢𑁂𑀲𑀼 𑀅𑀓𑁆𑀔𑀻𑀲𑀼 𑀭𑀢𑁆𑀢𑁂𑀲𑀼 𑀤𑀻𑀦𑀸 𑀓𑀺𑀮𑀦𑁆𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀪𑁄, 𑀫𑀬𑀁 𑀲𑀫𑀼𑀤𑁆𑀤𑀉𑀤𑀓𑀁 𑀕𑀳𑁂𑀢𑁆𑀯𑀸 𑀩𑀳𑀺 𑀧𑀸𑀢𑁂𑀫, 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀼𑀦 𑀉𑀤𑀓𑁂𑀦 𑀧𑀽𑀭𑀢𑀺, 𑀲𑀫𑀼𑀤𑁆𑀤𑀁 𑀢𑀼𑀘𑁆𑀙𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁪𑁬. ‘‘𑀅𑀧𑀺 𑀦𑀼 𑀳𑀦𑀼𑀓𑀸 𑀲𑀦𑁆𑀢𑀸, 𑀫𑀼𑀔𑀜𑁆𑀘 𑀧𑀭𑀺𑀲𑀼𑀲𑁆𑀲𑀢𑀺;

𑀑𑀭𑀫𑀸𑀫 𑀦 𑀧𑀸𑀭𑁂𑀫, 𑀧𑀽𑀭𑀢𑁂𑀯 𑀫𑀳𑁄𑀤𑀥𑀻’’𑀢𑀺.

𑀢𑀢𑁆𑀣 𑀅𑀧𑀺 𑀦𑀼 𑀳𑀦𑀼𑀓𑀸 𑀲𑀦𑁆𑀢𑀸𑀢𑀺 𑀅𑀧𑀺 𑀦𑁄 𑀳𑀦𑀼𑀓𑀸 𑀲𑀦𑁆𑀢𑀸, 𑀅𑀧𑀺 𑀅𑀫𑁆𑀳𑀸𑀓𑀁 𑀳𑀦𑀼𑀓𑀸 𑀓𑀺𑀮𑀦𑁆𑀢𑀸. 𑀑𑀭𑀫𑀸𑀫 𑀦 𑀧𑀸𑀭𑁂𑀫𑀸𑀢𑀺 𑀫𑀬𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑀁 𑀆𑀓𑀟𑁆𑀠𑀸𑀫 𑀑𑀲𑀸𑀭𑁂𑀫, 𑀢𑀼𑀘𑁆𑀙𑀁 𑀧𑀦 𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫. 𑀅𑀬𑀜𑁆𑀳𑀺 𑀧𑀽𑀭𑀢𑁂𑀯 𑀫𑀳𑁄𑀤𑀥𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀓𑀸𑀓𑀸 ‘‘𑀢𑀲𑁆𑀲𑀸 𑀓𑀸𑀓𑀺𑀬𑀸 𑀏𑀯𑀭𑀽𑀧𑀁 𑀦𑀸𑀫 𑀢𑀼𑀡𑁆𑀟𑀁 𑀅𑀳𑁄𑀲𑀺, 𑀏𑀯𑀭𑀽𑀧𑀸𑀦𑀺 𑀯𑀝𑁆𑀝𑀓𑁆𑀔𑀻𑀦𑀺, 𑀏𑀯𑀭𑀽𑀧𑀁 𑀙𑀯𑀺𑀲𑀡𑁆𑀞𑀸𑀦𑀁, 𑀏𑀯𑀭𑀽𑀧𑁄 𑀫𑀥𑀼𑀭𑀲𑀤𑁆𑀤𑁄. 𑀲𑀸 𑀦𑁄 𑀇𑀫𑀁 𑀘𑁄𑀭𑀲𑀫𑀼𑀤𑁆𑀤𑀁 𑀦𑀺𑀲𑁆𑀲𑀸𑀬 𑀦𑀝𑁆𑀞𑀸’’𑀢𑀺 𑀩𑀳𑀼𑀁 𑀯𑀺𑀧𑁆𑀧𑀮𑀧𑀺𑀁𑀲𑀼. 𑀢𑁂 𑀏𑀯𑀁 𑀯𑀺𑀧𑁆𑀧𑀮𑀧𑀫𑀸𑀦𑁂 𑀲𑀫𑀼𑀤𑁆𑀤𑀤𑁂𑀯𑀢𑀸 𑀪𑁂𑀭𑀯𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑀸𑀧𑁂𑀲𑀺, 𑀏𑀯𑀁 𑀢𑁂𑀲𑀁 𑀲𑁄𑀢𑁆𑀣𑀺 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀓𑀻 𑀅𑀬𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀓𑀸𑀓𑁄 𑀫𑀳𑀮𑁆𑀮𑀓𑀢𑁆𑀣𑁂𑀭𑁄, 𑀲𑁂𑀲𑀓𑀸𑀓𑀸 𑀲𑁂𑀲𑀫𑀳𑀮𑁆𑀮𑀓𑀢𑁆𑀣𑁂𑀭𑀸, 𑀲𑀫𑀼𑀤𑁆𑀤𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀼𑀤𑁆𑀤𑀓𑀸𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁪𑁭] 𑁭. 𑀧𑀼𑀧𑁆𑀨𑀭𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦𑀬𑀺𑀤𑀁 𑀤𑀼𑀓𑁆𑀔𑀁 𑀅𑀤𑀼𑀁 𑀤𑀼𑀓𑁆𑀔𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀕𑀯𑀢𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀘 𑀧𑀼𑀝𑁆𑀞𑁄 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀫𑀥𑀼𑀭𑀳𑀢𑁆𑀣𑀭𑀲𑀸, 𑀪𑀦𑁆𑀢𑁂, 𑀲𑀸 𑀇𑀢𑁆𑀣𑀻, 𑀦 𑀲𑀓𑁆𑀓𑁄𑀫𑀺 𑀢𑀁 𑀯𑀺𑀦𑀸 𑀯𑀲𑀺𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀏𑀲𑀸 𑀢𑁂 𑀪𑀺𑀓𑁆𑀔𑀼 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑁄 𑀏𑀢𑀜𑁆𑀜𑁂𑀯 𑀧𑀢𑁆𑀣𑀬𑀫𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀤𑀸𑀦𑀺 𑀦𑀁 𑀓𑀲𑁆𑀫𑀸 𑀧𑀼𑀦 𑀧𑀢𑁆𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀅𑀳𑁄𑀲𑀺. 𑀅𑀣 𑀩𑀸𑀭𑀸𑀡𑀲𑀺𑀬𑀁 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑀙𑀡𑁄 𑀲𑀫𑁆𑀧𑀢𑁆𑀢𑁄 𑀳𑁄𑀢𑀺, 𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀭𑀺𑀁𑀲𑀼. 𑀲𑀩𑁆𑀩𑁄 𑀚𑀦𑁄 𑀔𑀡𑀓𑀻𑀴𑀸𑀦𑀺𑀲𑁆𑀲𑀺𑀢𑁄 𑀅𑀳𑁄𑀲𑀺. 𑀏𑀓𑀲𑁆𑀲 𑀧𑀦 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀲𑁆𑀲 𑀏𑀓𑀫𑁂𑀯 𑀖𑀦𑀲𑀸𑀝𑀓𑀬𑀼𑀕𑀁 𑀅𑀳𑁄𑀲𑀺. 𑀲𑁄 𑀢𑀁 𑀲𑀼𑀥𑁄𑀢𑀁 𑀥𑁄𑀯𑀸𑀧𑁂𑀢𑁆𑀯𑀸 𑀑𑀪𑀜𑁆𑀚𑀸𑀧𑁂𑀢𑁆𑀯𑀸 𑀲𑀢𑀯𑀮𑀺𑀓𑀁 𑀲𑀳𑀲𑁆𑀲𑀯𑀮𑀺𑀓𑀁 𑀓𑀸𑀭𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀦𑀁 𑀪𑀭𑀺𑀬𑀸 𑀏𑀯𑀫𑀸𑀳 ‘‘𑀇𑀘𑁆𑀙𑀸𑀫𑀳𑀁, 𑀲𑀸𑀫𑀺, 𑀏𑀓𑀁 𑀓𑀼𑀲𑀼𑀫𑁆𑀪𑀭𑀢𑁆𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀢𑀯 𑀓𑀡𑁆𑀞𑁂 𑀮𑀕𑁆𑀕𑀸 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑀁 𑀘𑀭𑀺𑀢𑀼’’𑀦𑁆𑀢𑀺. ‘‘𑀪𑀤𑁆𑀤𑁂, 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀤𑀮𑀺𑀤𑁆𑀤𑀸𑀦𑀁 𑀓𑀼𑀲𑀼𑀫𑁆𑀪𑀁, 𑀲𑀼𑀤𑁆𑀥𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀻𑀴𑀸𑀳𑀻’’𑀢𑀺? ‘‘𑀓𑀼𑀲𑀼𑀫𑁆𑀪𑀭𑀢𑁆𑀢𑀁 𑀅𑀮𑀪𑀫𑀸𑀦𑀸 𑀙𑀡𑀓𑀻𑀴𑀁 𑀦 𑀓𑀻𑀴𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀜𑁆𑀜𑀁 𑀇𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀓𑀻𑀴𑀲𑁆𑀲𑀽’’𑀢𑀺. ‘‘𑀪𑀤𑁆𑀤𑁂, 𑀓𑀺𑀁 𑀫𑀁 𑀧𑀻𑀴𑁂𑀲𑀺, 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀓𑀼𑀲𑀼𑀫𑁆𑀪’’𑀦𑁆𑀢𑀺? ‘‘𑀲𑀸𑀫𑀺, 𑀧𑀼𑀭𑀺𑀲𑀲𑁆𑀲 𑀇𑀘𑁆𑀙𑀸𑀬 𑀲𑀢𑀺 𑀓𑀺𑀁 𑀦𑀸𑀫 𑀦𑀢𑁆𑀣𑀺, 𑀦𑀦𑀼 𑀭𑀜𑁆𑀜𑁄 𑀓𑀼𑀲𑀼𑀫𑁆𑀪𑀯𑀢𑁆𑀣𑀼𑀲𑁆𑀫𑀺𑀁 𑀩𑀳𑀼 𑀓𑀼𑀲𑀼𑀫𑁆𑀪’’𑀦𑁆𑀢𑀺. ‘‘𑀪𑀤𑁆𑀤𑁂, 𑀢𑀁 𑀞𑀸𑀦𑀁 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀧𑁄𑀓𑁆𑀔𑀭𑀡𑀺𑀲𑀤𑀺𑀲𑀁, 𑀩𑀮𑀯𑀸𑀭𑀓𑁆𑀔𑀸, 𑀦 𑀲𑀓𑁆𑀓𑀸 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀫𑀸 𑀢𑁂 𑀏𑀢𑀁 𑀭𑀼𑀘𑁆𑀘𑀺, 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀲𑁆𑀲𑀽’’𑀢𑀺. ‘‘𑀲𑀸𑀫𑀺, 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀼𑀭𑀺𑀲𑀲𑁆𑀲 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀇𑀢𑀺 𑀲𑁄 𑀢𑀸𑀬 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀺𑀬𑀸 𑀓𑀺𑀮𑁂𑀲𑀯𑀲𑁂𑀦 𑀢𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 ‘‘𑀳𑁄𑀢𑀼 𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀓𑀼𑀲𑀼𑀫𑁆𑀪𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀯𑀢𑀺𑀁 𑀫𑀤𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀁 𑀧𑀸𑀯𑀺𑀲𑀺. 𑀆𑀭𑀓𑁆𑀔𑀫𑀦𑀼𑀲𑁆𑀲𑀸 𑀯𑀢𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀘𑁄𑀭𑁄 𑀘𑁄𑀭𑁄’’𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀕𑀘𑁆𑀙𑀣, 𑀦𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀚𑁆𑀛𑀪𑁂𑀭𑀺𑀬𑀸 𑀯𑀚𑁆𑀚𑀫𑀸𑀦𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀸𑀧𑁂𑀢𑁆𑀯𑀸 𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀼𑀁. 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀓𑀸𑀓𑀸 𑀲𑀻𑀲𑁂 𑀦𑀺𑀮𑀻𑀬𑀺𑀢𑁆𑀯𑀸 𑀓𑀡𑀬𑀕𑁆𑀕𑀲𑀤𑀺𑀲𑁂𑀳𑀺 𑀢𑀼𑀡𑁆𑀳𑁂𑀳𑀺 𑀅𑀓𑁆𑀔𑀻𑀦𑀺 𑀯𑀺𑀚𑁆𑀛𑀦𑁆𑀢𑀺.

𑀲𑁄 𑀢𑀣𑀸𑀭𑀽𑀧𑀫𑁆𑀧𑀺 𑀤𑀼𑀓𑁆𑀔𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀢𑀫𑁂𑀯 𑀇𑀢𑁆𑀣𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀢𑀸𑀬 𑀦𑀸𑀫𑀫𑁆𑀳𑀺 𑀖𑀦𑀧𑀼𑀧𑁆𑀨𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸𑀬 𑀓𑀡𑁆𑀞𑁂 𑀆𑀲𑀢𑁆𑀢𑀩𑀸𑀳𑀼𑀬𑀼𑀕𑀴𑀸𑀬 𑀲𑀤𑁆𑀥𑀺𑀁 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑀢𑁄 𑀧𑀭𑀺𑀳𑀻𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁭. ‘‘𑀦𑀬𑀺𑀤𑀁 𑀤𑀼𑀓𑁆𑀔𑀁 𑀅𑀤𑀼𑀁 𑀤𑀼𑀓𑁆𑀔𑀁, 𑀬𑀁 𑀫𑀁 𑀢𑀼𑀤𑀢𑀺 𑀯𑀸𑀬𑀲𑁄;

𑀬𑀁 𑀲𑀸𑀫𑀸 𑀧𑀼𑀧𑁆𑀨𑀭𑀢𑁆𑀢𑁂𑀦, 𑀓𑀢𑁆𑀢𑀺𑀓𑀁 𑀦𑀸𑀦𑀼𑀪𑁄𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀦𑀬𑀺𑀤𑀁 𑀤𑀼𑀓𑁆𑀔𑀁 𑀅𑀤𑀼𑀁 𑀤𑀼𑀓𑁆𑀔𑀁, 𑀬𑀁 𑀫𑀁 𑀢𑀼𑀤𑀢𑀺 𑀯𑀸𑀬𑀲𑁄𑀢𑀺 𑀬𑀜𑁆𑀘 𑀇𑀤𑀁 𑀲𑀽𑀮𑁂 𑀮𑀕𑁆𑀕𑀦𑀧𑀘𑁆𑀘𑀬𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁, 𑀬𑀜𑁆𑀘 𑀮𑁄𑀳𑀫𑀬𑁂𑀳𑀺 𑀯𑀺𑀬 𑀢𑀼𑀡𑁆𑀟𑁂𑀳𑀺 𑀯𑀸𑀬𑀲𑁄 𑀢𑀼𑀤𑀢𑀺, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀫𑀬𑁆𑀳𑀁 𑀦 𑀤𑀼𑀓𑁆𑀔𑀁, 𑀅𑀤𑀼𑀁 𑀤𑀼𑀓𑁆𑀔𑀁 𑀏𑀢𑀁𑀬𑁂𑀯 𑀧𑀦 𑀫𑁂 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀓𑀢𑀭𑀁? 𑀬𑀁 𑀲𑀸𑀫𑀸 𑀧𑀼𑀧𑁆𑀨𑀭𑀢𑁆𑀢𑁂𑀦, 𑀓𑀢𑁆𑀢𑀺𑀓𑀁 𑀦𑀸𑀦𑀼𑀪𑁄𑀲𑁆𑀲𑀢𑀻𑀢𑀺, 𑀬𑀁 𑀲𑀸 𑀧𑀺𑀬𑀗𑁆𑀕𑀼𑀲𑀸𑀫𑀸 𑀫𑀫 𑀪𑀭𑀺𑀬𑀸 𑀏𑀓𑀁 𑀓𑀼𑀲𑀼𑀫𑁆𑀪𑀭𑀢𑁆𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀯𑀁 𑀖𑀦𑀧𑀼𑀧𑁆𑀨𑀭𑀢𑁆𑀢𑁂𑀦 𑀯𑀢𑁆𑀣𑀬𑀼𑀕𑁂𑀦 𑀅𑀘𑁆𑀙𑀦𑁆𑀦𑀸 𑀫𑀫 𑀓𑀡𑁆𑀞𑁂 𑀕𑀳𑁂𑀢𑁆𑀯𑀸 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑀁 𑀦𑀸𑀦𑀼𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀫𑀬𑁆𑀳𑀁 𑀤𑀼𑀓𑁆𑀔𑀁, 𑀏𑀢𑀤𑁂𑀯 𑀳𑀺 𑀫𑀁 𑀩𑀸𑀥𑀢𑀻𑀢𑀺? 𑀲𑁄 𑀏𑀯𑀁 𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀯𑀺𑀧𑁆𑀧𑀮𑀧𑀦𑁆𑀢𑁄𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸𑀯 𑀇𑀤𑀸𑀦𑀺 𑀚𑀬𑀫𑁆𑀧𑀢𑀺𑀓𑀸, 𑀢𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀞𑀺𑀢𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀧𑁆𑀨𑀭𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁪𑁮] 𑁮. 𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀳𑀁 𑀧𑀼𑀦𑀁 𑀦 𑀘 𑀧𑀼𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀲𑀢𑀫𑀢𑁆𑀢𑀸 𑀲𑀳𑀸𑀬𑀓𑀸 𑀫𑀳𑀸𑀯𑀺𑀪𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀚𑁂𑀢𑀯𑀦𑁂 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 𑀯𑀺𑀳𑀭𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀢𑁂𑀲𑀁 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑁄 𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀺. 𑀢𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀅𑀢𑁆𑀢𑀦𑀸 𑀚𑀳𑀺𑀢𑀓𑀺𑀮𑁂𑀲𑁂 𑀧𑀼𑀦 𑀕𑀡𑁆𑀳𑀺𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀅𑀟𑁆𑀠𑀭𑀢𑁆𑀢𑀲𑀫𑀦𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀤𑀡𑁆𑀟𑀤𑀻𑀧𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀢𑀭𑀸𑀬 𑀦𑀼 𑀔𑁄 𑀭𑀢𑀺𑀬𑀸 𑀚𑁂𑀢𑀯𑀦𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀩𑁆𑀪𑀦𑁆𑀢𑀭𑁂 𑀓𑀸𑀫𑀭𑀸𑀕𑀲𑀗𑁆𑀓𑀧𑁆𑀧𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑀢𑁆𑀣𑀸 𑀘 𑀦𑀸𑀫 𑀏𑀓𑀧𑀼𑀢𑁆𑀢𑀺𑀓𑀸 𑀇𑀢𑁆𑀣𑀻 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀺𑀬, 𑀏𑀓𑀘𑀓𑁆𑀔𑀼𑀓𑁄 𑀧𑀼𑀭𑀺𑀲𑁄 𑀘𑀓𑁆𑀔𑀼𑀁 𑀯𑀺𑀬 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀭𑀓𑁆𑀔𑀢𑀺. 𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀢𑁂𑀲𑀁 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀢𑁂𑀲𑀁 𑀓𑀺𑀮𑁂𑀲𑁂 𑀢𑀢𑁄 𑀧𑀭𑀁 𑀯𑀟𑁆𑀠𑀺𑀢𑀼𑀁 𑀅𑀤𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀅𑀦𑁆𑀢𑁄𑀦𑀕𑀭𑁂𑀬𑁂𑀯 𑀘𑁄𑀭𑀸𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁄 𑀯𑀺𑀬 𑀯𑀢𑁆𑀢𑀢𑀺, 𑀇𑀤𑀸𑀦𑁂𑀯 𑀢𑁂𑀲𑀁 𑀥𑀫𑁆𑀫𑀤𑁂𑀲𑀦𑀁 𑀓𑀢𑁆𑀯𑀸 𑀢𑁂 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 ‘‘𑀆𑀦𑀦𑁆𑀤𑀸’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺. 𑀣𑁂𑀭𑁄 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀆𑀦𑀦𑁆𑀤, 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 𑀯𑀺𑀳𑀭𑀦𑁆𑀢𑀺, 𑀲𑀩𑁆𑀩𑁂𑀯 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀲𑀘𑀸𑀳𑀁 𑀢𑁂𑀬𑁂𑀯 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀲𑁆𑀲𑀸𑀫𑀺. ‘𑀲𑀢𑁆𑀣𑀸𑀭𑀸 𑀦𑁄 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑁄 𑀜𑀸𑀢𑁄’𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 𑀥𑀫𑁆𑀫𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 ‘‘𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀆𑀳𑀺𑀡𑁆𑀟𑀺𑀢𑁆𑀯𑀸 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀲𑀺.

𑀲𑀢𑁆𑀣𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀲𑀺𑀮𑀸𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀫𑀸𑀦𑁄 𑀲𑀺𑀦𑁂𑀭𑀼 𑀯𑀺𑀬 𑀧𑀜𑁆𑀜𑀢𑁆𑀢𑁂 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺 𑀆𑀯𑁂𑀴𑀸𑀯𑁂𑀴𑀸 𑀬𑀫𑀓𑀬𑀫𑀓𑀸 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀢𑀸𑀧𑀺 𑀭𑀲𑁆𑀫𑀺𑀬𑁄 𑀧𑀸𑀢𑀺𑀫𑀢𑁆𑀢𑀸 𑀙𑀢𑁆𑀢𑀫𑀢𑁆𑀢𑀸 𑀓𑀽𑀝𑀸𑀕𑀸𑀭𑀓𑀼𑀘𑁆𑀙𑀺𑀫𑀢𑁆𑀢𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀕𑀕𑀦𑀢𑀮𑁂 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀲𑀜𑁆𑀘𑀭𑀺𑀁𑀲𑀼, 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀔𑁄𑀪𑁂𑀢𑁆𑀯𑀸 𑀩𑀸𑀮𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀭𑀼𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀓𑀸𑀫𑀯𑀺𑀢𑀓𑁆𑀓𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀦𑁆𑀢𑀺 𑀇𑀫𑁂 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁆𑀢𑁄 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑁄 𑀳𑀺 ‘𑀧𑀭𑀺𑀢𑁆𑀢𑀓𑁄’𑀢𑀺 𑀅𑀯𑀫𑀜𑁆𑀜𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀺𑀮𑁂𑀲𑁄 𑀦𑀸𑀫 𑀧𑀘𑁆𑀘𑀸𑀫𑀺𑀢𑁆𑀢𑀲𑀤𑀺𑀲𑁄. 𑀧𑀘𑁆𑀘𑀸𑀫𑀺𑀢𑁆𑀢𑁄 𑀘 𑀔𑀼𑀤𑁆𑀤𑀓𑁄 𑀦𑀸𑀫 𑀦𑀢𑁆𑀣𑀺, 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀯𑀺𑀦𑀸𑀲𑀫𑁂𑀯 𑀧𑀸𑀧𑁂𑀢𑀺, 𑀏𑀯𑀫𑁂𑀯 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀟𑁆𑀠𑀺𑀢𑀼𑀁 𑀮𑀪𑀦𑁆𑀢𑁄 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀢𑀺. 𑀓𑀺𑀮𑁂𑀲𑁄 𑀦𑀸𑀫𑁂𑀲 𑀳𑀮𑀸𑀳𑀮𑀯𑀺𑀲𑀽𑀧𑀫𑁄 𑀉𑀧𑁆𑀧𑀸𑀝𑀺𑀢𑀘𑁆𑀙𑀯𑀺𑀕𑀡𑁆𑀟𑀲𑀤𑀺𑀲𑁄 𑀆𑀲𑀻𑀯𑀺𑀲𑀧𑀝𑀺𑀪𑀸𑀕𑁄 𑀅𑀲𑀦𑀺𑀅𑀕𑁆𑀕𑀺𑀲𑀤𑀺𑀲𑁄 𑀅𑀮𑁆𑀮𑀻𑀬𑀺𑀢𑀼𑀁 𑀦 𑀬𑀼𑀢𑁆𑀢𑁄 𑀆𑀲𑀗𑁆𑀓𑀺𑀢𑀩𑁆𑀩𑁄. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀓𑁆𑀔𑀡𑁂𑀬𑁂𑀯 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀪𑀸𑀯𑀦𑀸𑀩𑀮𑁂𑀦 𑀬𑀣𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀳𑀤𑀬𑁂 𑀅𑀝𑁆𑀞𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑀸 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀯𑀝𑁆𑀝𑀢𑀺, 𑀏𑀯𑀁 𑀧𑀚𑀳𑀺𑀢𑀩𑁆𑀩𑁄. 𑀧𑁄𑀭𑀸𑀡𑀓𑀧𑀡𑁆𑀟𑀺 𑀢𑀸𑀧𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀮𑁂𑀲𑀁 𑀕𑀭𑀳𑀺𑀢𑁆𑀯𑀸 𑀬𑀣𑀸 𑀧𑀼𑀦 𑀅𑀩𑁆𑀪𑀦𑁆𑀢𑀭𑁂 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀦𑀺𑀕𑁆𑀕𑀡𑁆𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀸𑀮𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀦𑀤𑀻𑀢𑀻𑀭𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑁄 𑀚𑀭𑀳𑀢𑁆𑀣𑀻 𑀕𑀗𑁆𑀕𑀸𑀢𑀻𑀭𑁂 𑀓𑀸𑀮𑀫𑀓𑀸𑀲𑀺. 𑀲𑀺𑀗𑁆𑀕𑀸𑀮𑁄 𑀕𑁄𑀘𑀭𑀧𑁆𑀧𑀲𑀼𑀢𑁄 𑀢𑀁 𑀫𑀢𑀳𑀢𑁆𑀣𑀺𑀲𑀭𑀻𑀭𑀁 𑀤𑀺𑀲𑁆𑀯𑀸 ‘‘𑀫𑀳𑀸 𑀫𑁂 𑀕𑁄𑀘𑀭𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀦𑁆𑀢𑁆𑀯𑀸 𑀢𑀁 𑀲𑁄𑀡𑁆𑀟𑁂 𑀟𑀁𑀲𑀺, 𑀦𑀗𑁆𑀕𑀮𑀻𑀲𑀸𑀬 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀦𑀢𑁆𑀣𑁂𑀢𑁆𑀣 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀤𑀦𑁆𑀢𑁂𑀲𑀼 𑀟𑀁𑀲𑀺, 𑀣𑀫𑁆𑀪𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀓𑀡𑁆𑀡𑁂 𑀟𑀁𑀲𑀺, 𑀲𑀼𑀧𑁆𑀧𑀓𑁄𑀝𑀺𑀬𑀁 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀉𑀤𑀭𑁂 𑀟𑀁𑀲𑀺, 𑀓𑀼𑀲𑀽𑀮𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀧𑀸𑀤𑁂 𑀟𑀁𑀲𑀺, 𑀉𑀤𑀼𑀓𑁆𑀔𑀮𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀦𑀗𑁆𑀕𑀼𑀝𑁆𑀞𑁂 𑀟𑀁𑀲𑀺, 𑀫𑀼𑀲𑀮𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀏𑀢𑁆𑀣𑀸𑀧𑀺 𑀦𑀢𑁆𑀣𑀺 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀲𑀩𑁆𑀩𑀢𑁆𑀣 𑀅𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑁄 𑀯𑀘𑁆𑀘𑀫𑀕𑁆𑀕𑁂 𑀟𑀁𑀲𑀺, 𑀫𑀼𑀤𑀼𑀧𑀽𑀯𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀮𑀤𑁆𑀥𑀁 𑀤𑀸𑀦𑀺 𑀫𑁂 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀫𑀼𑀤𑀼 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀝𑁆𑀞𑀸𑀦’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀔𑀸𑀤𑀦𑁆𑀢𑁄 𑀅𑀦𑁆𑀢𑁄𑀓𑀼𑀘𑁆𑀙𑀺𑀁 𑀧𑀯𑀺𑀲𑀺𑀢𑁆𑀯𑀸 𑀯𑀓𑁆𑀓𑀳𑀤𑀬𑀸𑀤𑀻𑀦𑀺 𑀔𑀸𑀤𑀺𑀢𑁆𑀯𑀸 𑀧𑀺𑀧𑀸𑀲𑀺𑀢𑀓𑀸𑀮𑁂 𑀮𑁄𑀳𑀺𑀢𑀁 𑀧𑀺𑀯𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑀓𑀸𑀮𑁂 𑀉𑀤𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀳𑀢𑁆𑀣𑀺𑀲𑀭𑀻𑀭𑀁 𑀫𑀬𑁆𑀳𑀁 𑀦𑀺𑀯𑀸𑀲𑀲𑀼𑀔𑀢𑀸𑀬 𑀕𑁂𑀳𑀲𑀤𑀺𑀲𑀁, 𑀔𑀸𑀤𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀧𑀳𑀽𑀢𑀫𑀁𑀲𑀁, 𑀓𑀺𑀁 𑀤𑀸𑀦𑀺 𑀫𑁂 𑀅𑀜𑁆𑀜𑀢𑁆𑀣 𑀓𑀫𑁆𑀫’’𑀦𑁆𑀢𑀺 𑀲𑁄 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀓𑀼𑀘𑁆𑀙𑀺𑀬𑀁𑀬𑁂𑀯 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀯𑀲𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀦𑀺𑀤𑀸𑀖𑁂 𑀯𑀸𑀢𑀲𑀫𑁆𑀨𑀲𑁆𑀲𑁂𑀦 𑀘𑁂𑀯 𑀲𑀽𑀭𑀺𑀬𑀭𑀲𑁆𑀫𑀺𑀲𑀦𑁆𑀢𑀸𑀧𑁂𑀦 𑀘 𑀢𑀁 𑀓𑀼𑀡𑀧𑀁 𑀲𑀼𑀲𑁆𑀲𑀺𑀢𑁆𑀯𑀸 𑀯𑀮𑀺𑀬𑁄 𑀕𑀡𑁆𑀳𑀺, 𑀲𑀺𑀗𑁆𑀕𑀸𑀮𑀲𑁆𑀲 𑀧𑀯𑀺𑀝𑁆𑀞𑀤𑁆𑀯𑀸𑀭𑀁 𑀧𑀺𑀳𑀺𑀢𑀁, 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀲𑀺𑀗𑁆𑀕𑀸𑀮𑀲𑁆𑀲 𑀮𑁄𑀓𑀦𑁆𑀢𑀭𑀺𑀓𑀦𑀺𑀯𑀸𑀲𑁄 𑀯𑀺𑀬 𑀚𑀸𑀢𑁄. 𑀓𑀼𑀡𑀧𑁂 𑀲𑀼𑀲𑁆𑀲𑀦𑁆𑀢𑁂 𑀫𑀁𑀲𑀫𑁆𑀧𑀺 𑀲𑀼𑀲𑁆𑀲𑀺, 𑀮𑁄𑀳𑀺𑀢𑀫𑁆𑀧𑀺 𑀧𑀘𑁆𑀙𑀺𑀚𑁆𑀚𑀺. 𑀲𑁄 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑁄 𑀪𑀬𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀲𑀦𑁆𑀥𑀸𑀯𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀧𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁 𑀧𑀭𑀺𑀬𑁂𑀲𑀫𑀸𑀦𑁄 𑀯𑀺𑀘𑀭𑀢𑀺. 𑀏𑀯𑀁 𑀢𑀲𑁆𑀫𑀺𑀁 𑀉𑀓𑁆𑀔𑀮𑀺𑀬𑀁 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀧𑀘𑁆𑀘𑀫𑀸𑀦𑁂 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺. 𑀅𑀣 𑀦𑀁 𑀓𑀼𑀡𑀧𑀁 𑀢𑁂𑀫𑁂𑀢𑁆𑀯𑀸 𑀉𑀝𑁆𑀞𑀸𑀬 𑀧𑀓𑀢𑀺𑀲𑀡𑁆𑀞𑀸𑀦𑁂𑀦 𑀅𑀝𑁆𑀞𑀸𑀲𑀺. 𑀯𑀘𑁆𑀘𑀫𑀕𑁆𑀕𑁄 𑀯𑀺𑀯𑀝𑁄 𑀳𑀼𑀢𑁆𑀯𑀸 𑀢𑀸𑀭𑀓𑀸 𑀯𑀺𑀬 𑀧𑀜𑁆𑀜𑀸𑀬𑀺. 𑀲𑀺𑀗𑁆𑀕𑀸𑀮𑁄 𑀢𑀁 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀬𑀸𑀯 𑀳𑀢𑁆𑀣𑀺𑀲𑀻𑀲𑀸 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑀁 𑀲𑀻𑀲𑁂𑀦 𑀧𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀲𑀜𑁆𑀙𑀦𑁆𑀦𑀲𑀭𑀻𑀭𑀢𑁆𑀢𑀸 𑀲𑀩𑁆𑀩𑀮𑁄𑀫𑀸𑀦𑀺 𑀯𑀘𑁆𑀘𑀫𑀕𑁆𑀕𑁂 𑀅𑀮𑁆𑀮𑀻𑀬𑀺𑀁𑀲𑀼. 𑀲𑁄 𑀢𑀸𑀮𑀓𑁆𑀔𑀦𑁆𑀥𑀲𑀤𑀺𑀲𑁂𑀦 𑀦𑀺𑀮𑁆𑀮𑁄𑀫𑁂𑀦 𑀲𑀭𑀻𑀭𑁂𑀦 𑀉𑀩𑁆𑀩𑀺𑀕𑁆𑀕𑀘𑀺𑀢𑁆𑀢𑁄 𑀫𑀼𑀳𑀼𑀢𑁆𑀢𑀁 𑀥𑀸𑀯𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀤𑀼𑀓𑁆𑀔𑀁 𑀫𑀬𑁆𑀳𑀁 𑀦 𑀅𑀜𑁆𑀜𑁂𑀦 𑀓𑀢𑀁, 𑀮𑁄𑀪𑀳𑁂𑀢𑀼 𑀧𑀦 𑀮𑁄𑀪𑀓𑀸𑀭𑀡𑀸 𑀮𑁄𑀪𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀏𑀢𑀁 𑀓𑀢𑀁, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀦 𑀮𑁄𑀪𑀯𑀲𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀧𑀼𑀦 𑀳𑀢𑁆𑀣𑀺𑀲𑀭𑀻𑀭𑀁 𑀦𑀸𑀫 𑀦 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀁𑀯𑀺𑀕𑁆𑀕𑀳𑀤𑀬𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁮. ‘‘𑀦𑀸𑀳𑀁 𑀧𑀼𑀦𑀁 𑀦 𑀘 𑀧𑀼𑀦𑀁, 𑀦 𑀘𑀸𑀧𑀺 𑀅𑀧𑀼𑀦𑀧𑁆𑀧𑀼𑀦𑀁;

𑀳𑀢𑁆𑀣𑀺𑀩𑁄𑀦𑁆𑀤𑀺𑀁 𑀧𑀯𑁂𑀓𑁆𑀔𑀸𑀫𑀺, 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄’’𑀢𑀺.

𑀢𑀢𑁆𑀣 𑀦 𑀘𑀸𑀧𑀺 𑀅𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀅𑀬𑀁 𑀧𑀦𑁂𑀢𑀺𑀲𑁆𑀲𑀸 𑀲𑀓𑀮𑀸𑀬𑀧𑀺 𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀇𑀢𑁄 𑀧𑀼𑀦, 𑀢𑀢𑁄 𑀘 𑀧𑀼𑀦𑀸𑀢𑀺 𑀯𑀼𑀢𑁆𑀢𑀯𑀸𑀭𑀢𑁄 𑀧𑀼𑀦 𑀢𑀢𑁄𑀧𑀺 𑀘 𑀧𑀼𑀦𑀧𑁆𑀧𑀼𑀦𑀁 𑀯𑀸𑀭𑀡𑀲𑀭𑀻𑀭𑀲𑀗𑁆𑀔𑀸𑀢𑀁 𑀳𑀢𑁆𑀣𑀺𑀩𑁄𑀦𑁆𑀤𑀺𑀁 𑀦 𑀧𑀯𑁂𑀓𑁆𑀔𑀸𑀫𑀺. 𑀓𑀺𑀁𑀓𑀸𑀭𑀡𑀸? 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄, 𑀢𑀣𑀸 𑀳𑀺 𑀅𑀳𑀁 𑀇𑀫𑀲𑁆𑀫𑀺𑀜𑁆𑀜𑁂𑀯 𑀧𑀯𑁂𑀲𑀦𑁂 𑀪𑀬𑀢𑀚𑁆𑀚𑀺𑀢𑁄 𑀫𑀭𑀡𑀪𑀬𑁂𑀦 𑀲𑀦𑁆𑀢𑀸𑀲𑀁 𑀲𑀁𑀯𑁂𑀕𑀁 𑀆𑀧𑀸𑀤𑀺𑀢𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀢𑁄𑀯 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀳𑀢𑁆𑀣𑀺𑀲𑀭𑀻𑀭𑀁 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀦 𑀮𑁄𑀪𑀯𑀲𑀺𑀓𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀦𑀸𑀫 𑀯𑀟𑁆𑀠𑀺𑀢𑀼𑀁 𑀅𑀤𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀅𑀯𑀲𑁂𑀲𑁂𑀲𑀼 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄 𑀅𑀳𑁂𑀲𑀼𑀁. 𑀢𑀤𑀸 𑀲𑀺𑀗𑁆𑀕𑀸𑀮𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁪𑁯] 𑁯. 𑀏𑀓𑀧𑀡𑁆𑀡𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀧𑀡𑁆𑀡𑁄 𑀅𑀬𑀁 𑀭𑀼𑀓𑁆𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀯𑁂𑀲𑀸𑀮𑀺𑀓𑀁 𑀤𑀼𑀝𑁆𑀞𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀯𑁂𑀲𑀸𑀮𑀺𑀦𑀕𑀭𑀁 𑀕𑀸𑀯𑀼𑀢𑀕𑀸𑀯𑀼𑀢𑀦𑁆𑀢𑀭𑁂 𑀢𑀻𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁. 𑀢𑀢𑁆𑀣 𑀦𑀺𑀘𑁆𑀘𑀓𑀸𑀮𑀁 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀯𑀲𑀦𑁆𑀢𑀸𑀦𑀜𑁆𑀜𑁂𑀯 𑀭𑀸𑀚𑀽𑀦𑀁 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀳𑁄𑀦𑁆𑀢𑀺, 𑀢𑀢𑁆𑀢𑀓𑀸𑀬𑁂𑀯 𑀉𑀧𑀭𑀸𑀚𑀸𑀦𑁄, 𑀢𑀢𑁆𑀢𑀓𑀸 𑀲𑁂𑀦𑀸𑀧𑀢𑀺𑀦𑁄, 𑀢𑀢𑁆𑀢𑀓𑀸 𑀪𑀡𑁆𑀟𑀸𑀕𑀸𑀭𑀺𑀓𑀸. 𑀢𑁂𑀲𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀤𑀼𑀝𑁆𑀞𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺 𑀓𑁄𑀥𑀦𑁄 𑀘𑀡𑁆𑀟𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀤𑀡𑁆𑀟𑁂𑀦 𑀖𑀝𑁆𑀝𑀺𑀢𑀆𑀲𑀻𑀯𑀺𑀲𑁄 𑀯𑀺𑀬 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑁄 𑀓𑁄𑀥𑁂𑀦. 𑀢𑀲𑁆𑀲 𑀧𑀼𑀭𑀢𑁄 𑀤𑁆𑀯𑁂 𑀢𑀻𑀡𑀺 𑀯𑀘𑀦𑀸𑀦𑀺 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑀁 𑀦𑁂𑀯 𑀫𑀸𑀢𑀸𑀧𑀺𑀢𑀭𑁄, 𑀦 𑀜𑀸𑀢𑀬𑁄, 𑀦 𑀫𑀺𑀢𑁆𑀢𑀲𑀼𑀳𑀚𑁆𑀚𑀸 𑀲𑀺𑀓𑁆𑀔𑀸𑀧𑁂𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀓𑀼𑀫𑀸𑀭𑁄 𑀅𑀢𑀺𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀇𑀫𑀁 𑀯𑀺𑀦𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳𑀁𑀲𑀼 ‘‘𑀪𑀦𑁆𑀢𑁂, 𑀅𑀬𑀁 𑀓𑀼𑀫𑀸𑀭𑁄 𑀘𑀡𑁆𑀟𑁄 𑀨𑀭𑀼𑀲𑁄 𑀓𑁄𑀥𑁂𑀦 𑀧𑀚𑁆𑀚𑀮𑀢𑀺, 𑀇𑀫𑀲𑁆𑀲 𑀑𑀯𑀸𑀤𑀁 𑀤𑁂𑀣𑀸’’𑀢𑀺.

𑀲𑀢𑁆𑀣𑀸 𑀢𑀁 𑀓𑀼𑀫𑀸𑀭𑀁 𑀑𑀯𑀤𑀺 𑁋 ‘‘𑀓𑀼𑀫𑀸𑀭, 𑀇𑀫𑁂𑀲𑀼 𑀦𑀸𑀫 𑀲𑀢𑁆𑀢𑁂𑀲𑀼 𑀘𑀡𑁆𑀟𑁂𑀦 𑀨𑀭𑀼𑀲𑁂𑀦 𑀲𑀸𑀳𑀲𑀺𑀓𑁂𑀦 𑀯𑀺𑀳𑁂𑀞𑀓𑀚𑀸𑀢𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀨𑀭𑀼𑀲𑀯𑀸𑀘𑁄 𑀘 𑀦𑀸𑀫 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀧𑀺𑀢𑀼𑀦𑁄𑀧𑀺 𑀧𑀼𑀢𑁆𑀢𑀤𑀸𑀭𑀲𑁆𑀲𑀧𑀺 𑀪𑀸𑀢𑀺𑀪𑀕𑀺𑀦𑀻𑀦𑀫𑁆𑀧𑀺 𑀧𑀚𑀸𑀧𑀢𑀺𑀬𑀸𑀧𑀺 𑀫𑀺𑀢𑁆𑀢𑀩𑀦𑁆𑀥𑀯𑀸𑀦𑀫𑁆𑀧𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺 𑀅𑀫𑀦𑀸𑀧𑁄, 𑀟𑀁𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑁄 𑀲𑀧𑁆𑀧𑁄 𑀯𑀺𑀬, 𑀅𑀝𑀯𑀺𑀬𑀁 𑀉𑀝𑁆𑀞𑀺𑀢𑀘𑁄𑀭𑁄 𑀯𑀺𑀬, 𑀔𑀸𑀤𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑁄 𑀬𑀓𑁆𑀔𑁄 𑀯𑀺𑀬 𑀘 𑀉𑀩𑁆𑀩𑁂𑀚𑀦𑀻𑀬𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑀺. 𑀤𑀺𑀝𑁆𑀞𑁂𑀬𑁂𑀯 𑀘 𑀥𑀫𑁆𑀫𑁂 𑀓𑁄𑀥𑀦𑁄 𑀧𑀼𑀕𑁆𑀕𑀮𑁄 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄𑀧𑀺 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀺, 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀫𑁆𑀧𑀺𑀲𑁆𑀲 𑀫𑀼𑀔𑀁 𑀚𑀸𑀮𑀸𑀪𑀺𑀳𑀢𑀧𑀤𑀼𑀫𑀁 𑀯𑀺𑀬 𑀫𑀮𑀕𑁆𑀕𑀳𑀺𑀢𑀓𑀜𑁆𑀘𑀦𑀸𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀘 𑀯𑀺𑀭𑀽𑀧𑀁 𑀳𑁄𑀢𑀺 𑀤𑀼𑀤𑁆𑀤𑀲𑀺𑀓𑀁. 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀳𑀺 𑀲𑀢𑁆𑀢𑀸 𑀲𑀢𑁆𑀣𑀁 𑀆𑀤𑀸𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀳𑀭𑀦𑁆𑀢𑀺, 𑀯𑀺𑀲𑀁 𑀔𑀸𑀤𑀦𑁆𑀢𑀺, 𑀭𑀚𑁆𑀚𑀼𑀬𑀸 𑀉𑀩𑁆𑀩𑀦𑁆𑀥𑀦𑁆𑀢𑀺, 𑀧𑀧𑀸𑀢𑀸 𑀧𑀧𑀢𑀦𑁆𑀢𑀺. 𑀏𑀯𑀁 𑀓𑁄𑀥𑀯𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀳𑁂𑀞𑀓𑀚𑀸𑀢𑀺𑀓𑀸𑀧𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀭𑀳𑀁 𑀧𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀦 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑀺𑀢𑁆𑀯𑀸 𑀯𑀺𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑁄𑀕𑀩𑀳𑀼𑀮𑀸𑀯 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄𑀢𑀺𑀆𑀤𑀻𑀲𑀼 𑀘 𑀭𑁄𑀕𑁂𑀲𑀼 𑀏𑀓𑀢𑁄 𑀉𑀝𑁆𑀞𑀸𑀬 𑀏𑀓𑀲𑁆𑀫𑀺𑀁 𑀧𑀢𑀦𑁆𑀢𑀺, 𑀭𑁄𑀕𑁂𑀦 𑀅𑀧𑀭𑀺𑀫𑀼𑀢𑁆𑀢𑀸𑀯 𑀳𑀼𑀢𑁆𑀯𑀸 𑀦𑀺𑀘𑁆𑀘𑀁 𑀤𑀼𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀳𑀺𑀢𑀘𑀺𑀢𑁆𑀢𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀦𑀺𑀭𑀬𑀸𑀤𑀺𑀪𑀬𑁂𑀳𑀺 𑀦 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺. 𑀲𑁄 𑀓𑀼𑀫𑀸𑀭𑁄 𑀲𑀢𑁆𑀣𑀼 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀏𑀓𑁄𑀯𑀸𑀤𑁂𑀦𑁂𑀯 𑀦𑀺𑀳𑀢𑀫𑀸𑀦𑁄 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄 𑀫𑀼𑀤𑀼𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀅𑀜𑁆𑀜𑀁 𑀅𑀓𑁆𑀓𑁄𑀲𑀦𑁆𑀢𑀫𑁆𑀧𑀺 𑀧𑀳𑀭𑀦𑁆𑀢𑀫𑁆𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀦 𑀑𑀮𑁄𑀓𑁂𑀲𑀺, 𑀉𑀤𑁆𑀥𑀝𑀤𑀸𑀞𑁄 𑀯𑀺𑀬 𑀲𑀧𑁆𑀧𑁄, 𑀅𑀴𑀘𑁆𑀙𑀺𑀦𑁆𑀦𑁄 𑀯𑀺𑀬 𑀓𑀓𑁆𑀓𑀝𑀓𑁄, 𑀙𑀺𑀦𑁆𑀦𑀯𑀺𑀲𑀸𑀡𑁄 𑀯𑀺𑀬 𑀘 𑀉𑀲𑀪𑁄 𑀅𑀳𑁄𑀲𑀺.

𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑀼𑀝𑁆𑀞𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀁 𑀲𑀼𑀘𑀺𑀭𑀫𑁆𑀧𑀺 𑀑𑀯𑀤𑀺𑀢𑁆𑀯𑀸 𑀦𑁂𑀯 𑀫𑀸𑀢𑀸𑀧𑀺𑀢𑀭𑁄, 𑀦 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄 𑀤𑀫𑁂𑀢𑀼𑀁 𑀲𑀓𑁆𑀔𑀺𑀁𑀲𑀼, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀢𑀁 𑀏𑀓𑁄𑀯𑀸𑀤𑁂𑀦𑁂𑀯 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀫𑀢𑁆𑀢𑀯𑀭𑀯𑀸𑀭𑀡𑀁 𑀯𑀺𑀬 𑀲𑀫𑀼𑀕𑁆𑀕𑀳𑀺𑀢𑀸𑀦𑁂𑀜𑁆𑀚𑀓𑀸𑀭𑀡𑀁 𑀅𑀓𑀸𑀲𑀺. 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁 𑁋 ‘𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀉𑀢𑁆𑀢𑀭𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸. 𑀅𑀲𑁆𑀲𑀤𑀫𑀓𑁂𑀦…𑀧𑁂… 𑀕𑁄𑀤𑀫𑀓𑁂𑀦…𑀧𑁂… 𑀤𑀓𑁆𑀔𑀺𑀡𑀁 𑀯𑀸. 𑀢𑀣𑀸𑀕𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀭𑀺𑀲𑀤𑀫𑁆𑀫𑁄 𑀲𑀸𑀭𑀺𑀢𑁄 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺, 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺. 𑀅𑀬𑀫𑁂𑀓𑀸 𑀤𑀺𑀲𑀸…𑀧𑁂… 𑀲𑁄 𑀯𑀼𑀘𑁆𑀘𑀢𑀺 ‘𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’𑀢𑀺 (𑀫. 𑀦𑀺. 𑁩.𑁩𑁧𑁨). 𑀦 𑀳𑀺, 𑀆𑀯𑀼𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻 𑀦𑀸𑀫 𑀅𑀢𑁆𑀣𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀫𑀬𑀸 𑀏𑀓𑁄𑀯𑀸𑀤𑁂𑀦𑁂𑀯 𑀤𑀫𑀺𑀢𑁄, 𑀧𑀼𑀩𑁆𑀩𑁂𑀧𑀸𑀳𑀁 𑀇𑀫𑀁 𑀏𑀓𑁄𑀯𑀸𑀤𑁂𑀦𑁂𑀯 𑀤𑀫𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀢𑀬𑁄 𑀯𑁂𑀤𑁂 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀮𑀁 𑀖𑀭𑀸𑀯𑀸𑀲𑀁 𑀯𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀢𑀸𑀧𑀲𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂𑀦 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀅𑀬𑀁 𑀢𑀸𑀧𑀲𑁄 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀬𑀼𑀕𑀫𑀢𑁆𑀢𑀤𑀲𑁄, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑁂𑀦 𑀆𑀕𑀘𑁆𑀙𑀢𑀺. 𑀲𑀘𑁂 𑀲𑀦𑁆𑀢𑀥𑀫𑁆𑀫𑁄 𑀦𑀸𑀫𑁂𑀓𑁄 𑀅𑀢𑁆𑀣𑀺, 𑀇𑀫𑀲𑁆𑀲 𑀢𑁂𑀦𑀩𑁆𑀪𑀦𑁆𑀢𑀭𑁂 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀅𑀫𑀘𑁆𑀘𑀁 𑀑𑀮𑁄𑀓𑁂𑀲𑀺. 𑀲𑁄 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀆𑀳. 𑀏𑀢𑀁 ‘‘𑀢𑀸𑀧𑀲𑀁 𑀆𑀦𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀢𑁄 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 ‘‘𑀓𑀺𑀁, 𑀫𑀳𑀸𑀧𑀼𑀜𑁆𑀜𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀫𑀬𑀁 𑀭𑀸𑀚𑀓𑀼𑀮𑀽𑀧𑀓𑀸, 𑀳𑁂𑀫𑀯𑀦𑁆𑀢𑀺𑀓𑀸 𑀦𑀸𑀫𑀫𑁆𑀳𑀸’’𑀢𑀺 𑀆𑀳. 𑀅𑀫𑀘𑁆𑀘𑁄 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀜𑁆𑀜𑁄 𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑁄 𑀦𑀢𑁆𑀣𑀺, 𑀆𑀦𑁂𑀳𑀺 𑀦’’𑀦𑁆𑀢𑀺 𑀆𑀳. 𑀅𑀫𑀘𑁆𑀘𑁄 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀓𑀜𑁆𑀘𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀢𑁆𑀢𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀯𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀳𑁂𑀫𑀯𑀦𑁆𑀢𑀺𑀓𑀸 𑀫𑀬𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀇𑀤𑀸𑀦𑀺 𑀓𑀳𑀁 𑀕𑀘𑁆𑀙𑀣𑀸’’𑀢𑀺? ‘‘𑀯𑀲𑁆𑀲𑀸𑀭𑀢𑁆𑀢𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀉𑀧𑀥𑀸𑀭𑁂𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀜𑁆𑀜𑁂𑀯 𑀉𑀬𑁆𑀬𑀸𑀦𑁂 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀧𑀺 𑀓𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑁂 𑀯𑀲𑀢𑀺. 𑀭𑀸𑀚𑀸𑀧𑀺𑀲𑁆𑀲 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺.

𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀤𑀼𑀝𑁆𑀞𑀓𑀼𑀫𑀸𑀭𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺 𑀘𑀡𑁆𑀟𑁄 𑀨𑀭𑀼𑀲𑁄, 𑀦𑁂𑀯 𑀦𑀁 𑀭𑀸𑀚𑀸 𑀤𑀫𑁂𑀢𑀼𑀁 𑀅𑀲𑀓𑁆𑀔𑀺, 𑀦 𑀲𑁂𑀲𑀜𑀸𑀢𑀓𑀸. 𑀅𑀫𑀘𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀲𑀸𑀫𑀺, 𑀫𑀸 𑀏𑀯𑀁 𑀓𑀭𑀺, 𑀏𑀯𑀁 𑀓𑀸𑀢𑀼𑀁 𑀦 𑀮𑀩𑁆𑀪𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀓𑀣𑁂𑀦𑁆𑀢𑀸𑀧𑀺 𑀓𑀣𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀞𑀧𑁂𑀢𑁆𑀯𑀸 𑀫𑀫 𑀅𑀬𑁆𑀬𑀁 𑀳𑀺𑀫𑀯𑀦𑁆𑀢𑀢𑀸𑀧𑀲𑀁 𑀅𑀜𑁆𑀜𑁄 𑀇𑀫𑀁 𑀓𑀼𑀫𑀸𑀭𑀁 𑀤𑀫𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀲𑁄𑀬𑁂𑀯 𑀦𑀁 𑀤𑀫𑁂𑀲𑁆𑀲𑀢𑀻’’𑀢𑀺. 𑀲𑁄 𑀓𑀼𑀫𑀸𑀭𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀬𑀁 𑀓𑀼𑀫𑀸𑀭𑁄 𑀘𑀡𑁆𑀟𑁄 𑀨𑀭𑀼𑀲𑁄, 𑀫𑀬𑀁 𑀇𑀫𑀁 𑀤𑀫𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀢𑀼𑀫𑁆𑀳𑁂 𑀦𑀁 𑀏𑀓𑁂𑀦 𑀉𑀧𑀸𑀬𑁂𑀦 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺 𑀓𑀼𑀫𑀸𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑁄 𑀏𑀓𑀢𑁄 𑀏𑀓𑁂𑀦, 𑀏𑀓𑀢𑁄 𑀏𑀓𑁂𑀦𑀸𑀢𑀺 𑀤𑁆𑀯𑀻𑀳𑀺𑀬𑁂𑀯 𑀧𑀢𑁆𑀢𑁂𑀳𑀺 𑀏𑀓𑀁 𑀦𑀺𑀫𑁆𑀩𑀧𑁄𑀢𑀓𑀁 𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀆𑀳 𑁋 ‘‘𑀓𑀼𑀫𑀸𑀭, 𑀏𑀢𑀲𑁆𑀲 𑀢𑀸𑀯 𑀭𑀼𑀓𑁆𑀔𑀧𑁄𑀢𑀓𑀲𑁆𑀲 𑀧𑀡𑁆𑀡𑀁 𑀔𑀸𑀤𑀺𑀢𑁆𑀯𑀸 𑀭𑀲𑀁 𑀚𑀸𑀦𑀸𑀳𑀻’’𑀢𑀺? 𑀲𑁄 𑀢𑀲𑁆𑀲 𑀏𑀓𑀁 𑀧𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀭𑀲𑀁 𑀜𑀢𑁆𑀯𑀸 ‘‘𑀥𑀻’’𑀢𑀺 𑀲𑀳 𑀔𑁂𑀴𑁂𑀦 𑀪𑀽𑀫𑀺𑀬𑀁 𑀦𑀼𑀝𑁆𑀞𑀸𑀪𑀺. ‘‘𑀓𑀺𑀁 𑀏𑀢𑀁, 𑀓𑀼𑀫𑀸𑀭𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀇𑀤𑀸𑀦𑁂𑀯𑁂𑀲 𑀭𑀼𑀓𑁆𑀔𑁄 𑀳𑀮𑀸𑀳𑀮𑀯𑀺𑀲𑀽𑀧𑀫𑁄, 𑀯𑀟𑁆𑀠𑀦𑁆𑀢𑁄 𑀧𑀦 𑀩𑀳𑀽 𑀫𑀦𑀼𑀲𑁆𑀲𑁂 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀢𑀁 𑀦𑀺𑀫𑁆𑀩𑀧𑁄𑀢𑀓𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀧𑀭𑀺𑀫𑀤𑁆𑀤𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁯. ‘‘𑀏𑀓𑀧𑀡𑁆𑀡𑁄 𑀅𑀬𑀁 𑀭𑀼𑀓𑁆𑀔𑁄, 𑀦 𑀪𑀽𑀫𑁆𑀬𑀸 𑀘𑀢𑀼𑀭𑀗𑁆𑀕𑀼𑀮𑁄;

𑀨𑀮𑁂𑀦 𑀯𑀺𑀲𑀓𑀧𑁆𑀧𑁂𑀦, 𑀫𑀳𑀸𑀬𑀁 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀏𑀓𑀧𑀡𑁆𑀡𑁄𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀧𑀡𑁆𑀡𑁄. 𑀦 𑀪𑀽𑀫𑁆𑀬𑀸 𑀘𑀢𑀼𑀭𑀗𑁆𑀕𑀼𑀮𑁄𑀢𑀺 𑀪𑀽𑀫𑀺𑀢𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦 𑀯𑀟𑁆𑀠𑀺𑀢𑁄. 𑀨𑀮𑁂𑀦𑀸𑀢𑀺 𑀨𑀮𑀭𑀲𑁂𑀦. 𑀯𑀺𑀲𑀓𑀧𑁆𑀧𑁂𑀦𑀸𑀢𑀺 𑀳𑀮𑀸𑀳𑀮𑀯𑀺𑀲𑀲𑀤𑀺𑀲𑁂𑀦. 𑀏𑀯𑀁 𑀔𑀼𑀤𑁆𑀤𑀓𑁄𑀧𑀺 𑀲𑀫𑀸𑀦𑁄 𑀏𑀯𑀭𑀽𑀧𑁂𑀦 𑀢𑀺𑀢𑁆𑀢𑀓𑁂𑀦 𑀧𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀬𑀁 𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺 𑀬𑀤𑀸 𑀧𑀦𑀸𑀬𑀁 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀳𑀸 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀓𑀺𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀫𑀦𑀼𑀲𑁆𑀲𑀫𑀸𑀭𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀲𑀺𑀦𑁆𑀢𑀺 𑀆𑀳.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀏𑀢𑀤𑀯𑁄𑀘 ‘‘𑀓𑀼𑀫𑀸𑀭, 𑀢𑁆𑀯𑀁 𑀇𑀫𑀁 𑀦𑀺𑀫𑁆𑀩𑀧𑁄𑀢𑀓𑀁 ‘𑀇𑀤𑀸𑀦𑁂𑀯 𑀏𑀯𑀁𑀢𑀺𑀢𑁆𑀢𑀓𑁄, 𑀫𑀳𑀮𑁆𑀮𑀓𑀓𑀸𑀮𑁂 𑀓𑀺𑀁 𑀪𑀯𑀺𑀲𑁆𑀲𑀢𑀺, 𑀓𑀼𑀢𑁄 𑀇𑀫𑀁 𑀦𑀺𑀲𑁆𑀲𑀸𑀬 𑀯𑀼𑀟𑁆𑀠𑀻’𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀲𑀺? 𑀬𑀣𑀸 𑀢𑁆𑀯𑀁 𑀏𑀢𑀲𑁆𑀫𑀺𑀁 𑀧𑀝𑀺𑀧𑀚𑁆𑀚𑀺, 𑀏𑀯𑀫𑁂𑀯 𑀢𑀯 𑀭𑀝𑁆𑀞𑀯𑀸𑀲𑀺𑀦𑁄𑀧𑀺 ‘𑀅𑀬𑀁 𑀓𑀼𑀫𑀸𑀭𑁄 𑀤𑀳𑀭𑀓𑀸𑀮𑁂𑀬𑁂𑀯 𑀏𑀯𑀁 𑀘𑀡𑁆𑀟𑁄 𑀨𑀭𑀼𑀲𑁄, 𑀫𑀳𑀮𑁆𑀮𑀓𑀓𑀸𑀮𑁂 𑀭𑀚𑁆𑀚𑀁 𑀧𑀢𑁆𑀯𑀸 𑀓𑀺𑀁 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀯𑀼𑀟𑁆𑀠𑀻’𑀢𑀺 𑀢𑀯 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀅𑀤𑀢𑁆𑀯𑀸 𑀦𑀺𑀫𑁆𑀩𑀧𑁄𑀢𑀓𑀁 𑀯𑀺𑀬 𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀫𑁆𑀩𑀭𑀼𑀓𑁆𑀔𑀧𑀝𑀺𑀪𑀸𑀕𑀢𑀁 𑀳𑀺𑀢𑁆𑀯𑀸 𑀇𑀢𑁄 𑀧𑀝𑁆𑀞𑀸𑀬 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀳𑁄𑀳𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀳𑀢𑀫𑀸𑀦𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀤𑀼𑀝𑁆𑀞𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑁄 𑀫𑀬𑀸 𑀤𑀫𑀺𑀢𑁄, 𑀧𑀼𑀩𑁆𑀩𑁂𑀧𑀸𑀳𑀁 𑀏𑀢𑀁 𑀤𑀫𑁂𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀝𑁆𑀞𑀓𑀼𑀫𑀸𑀭𑁄 𑀅𑀬𑀁 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀑𑀯𑀸𑀤𑀤𑀸𑀬𑀓𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀏𑀓𑀧𑀡𑁆𑀡𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁫𑁦] 𑁧𑁦. 𑀲𑀜𑁆𑀚𑀻𑀯𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀦𑁆𑀢𑀁 𑀬𑁄 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀭𑀜𑁆𑀜𑁄 𑀅𑀲𑀦𑁆𑀢𑀧𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀧𑀝𑀺𑀓𑀡𑁆𑀝𑀓𑀪𑀽𑀢𑁂 𑀤𑀼𑀲𑁆𑀲𑀻𑀮𑁂 𑀧𑀸𑀧𑀥𑀫𑁆𑀫𑁂 𑀤𑁂𑀯𑀤𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀅𑀲𑀦𑁆𑀢𑀁 𑀅𑀲𑀧𑁆𑀧𑀼𑀭𑀺𑀲𑀁 𑀧𑀕𑁆𑀕𑀬𑁆𑀳 ‘‘𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀬𑀸𑀲𑀻𑀲𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲𑁂𑀯 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀭𑀁 𑀥𑀫𑁆𑀫𑀭𑀸𑀚𑀸𑀦𑀁 𑀲𑁄𑀢𑀸𑀧𑀦𑁆𑀦𑀁 𑀅𑀭𑀺𑀬𑀲𑀸𑀯𑀓𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄. 𑀲𑁄 𑀳𑀺 ‘‘𑀤𑁂𑀯𑀤𑀢𑁆𑀢𑁄 𑀧𑀣𑀯𑀺𑀬𑀁 𑀧𑀯𑀺𑀝𑁆𑀞𑁄’’𑀢𑀺 𑀲𑀼𑀢𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀫𑀫𑁆𑀧𑀺 𑀧𑀣𑀯𑀻 𑀕𑀺𑀮𑁂𑀬𑁆𑀬𑀸’’𑀢𑀺 𑀪𑀻𑀢𑀢𑀲𑀺𑀢𑁄 𑀭𑀚𑁆𑀚𑀲𑀼𑀔𑀁 𑀦 𑀮𑀪𑀢𑀺, 𑀲𑀬𑀦𑁂 𑀅𑀲𑁆𑀲𑀸𑀤𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀢𑀺𑀩𑁆𑀩𑀓𑀸𑀭𑀡𑀸𑀪𑀺𑀢𑀼𑀦𑁆𑀦𑁄 𑀳𑀢𑁆𑀣𑀺𑀧𑁄𑀢𑁄 𑀯𑀺𑀬 𑀓𑀫𑁆𑀧𑀫𑀸𑀦𑁄 𑀯𑀺𑀘𑀭𑀢𑀺. 𑀲𑁄 𑀧𑀣𑀯𑀺𑀁 𑀨𑀮𑀫𑀸𑀦𑀁 𑀯𑀺𑀬, 𑀅𑀯𑀻𑀘𑀺𑀚𑀸𑀮𑀁 𑀦𑀺𑀓𑁆𑀔𑀫𑀦𑁆𑀢𑀺𑀁 𑀯𑀺𑀬, 𑀧𑀣𑀯𑀺𑀬𑀸 𑀅𑀢𑁆𑀢𑀸𑀦𑀁 𑀕𑀺𑀮𑀺𑀬𑀫𑀸𑀦𑀁 𑀯𑀺𑀬, 𑀆𑀤𑀺𑀢𑁆𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀬𑀲𑀽𑀮𑁂𑀳𑀺 𑀓𑁄𑀝𑀺𑀬𑀫𑀸𑀦𑀁 𑀯𑀺𑀬 𑀘 𑀲𑀫𑀦𑀼𑀧𑀲𑁆𑀲𑀺. 𑀢𑁂𑀦𑀲𑁆𑀲 𑀧𑀳𑀝𑀓𑀼𑀓𑁆𑀓𑀼𑀝𑀲𑁆𑀲𑁂𑀯 𑀫𑀼𑀳𑀼𑀢𑁆𑀢𑀫𑁆𑀧𑀺 𑀓𑀫𑁆𑀧𑀫𑀸𑀦𑀲𑁆𑀲 𑀅𑀯𑀢𑁆𑀣𑀸𑀦𑀁 𑀦𑀸𑀫 𑀦𑀸𑀳𑁄𑀲𑀺. 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑀼𑀓𑀸𑀫𑁄 𑀔𑀫𑀸𑀧𑁂𑀢𑀼𑀓𑀸𑀫𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀅𑀢𑁆𑀢𑀦𑁄 𑀧𑀦 𑀅𑀧𑀭𑀸𑀥𑀫𑀳𑀦𑁆𑀢𑀢𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀣𑀲𑁆𑀲 𑀭𑀸𑀚𑀕𑀳𑀦𑀕𑀭𑁂 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀤𑁂𑀯𑀦𑀕𑀭𑀁 𑀯𑀺𑀬 𑀦𑀕𑀭𑁂 𑀅𑀮𑀗𑁆𑀓𑀢𑁂 𑀫𑀳𑀸𑀢𑀮𑁂 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑀲𑁆𑀲 𑀓𑀜𑁆𑀘𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 ‘‘𑀚𑀻𑀯𑀓𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀫𑀬𑀸 𑀉𑀚𑀼𑀓𑀫𑁂𑀯 𑀯𑀢𑁆𑀢𑀼𑀁 ‘𑀅𑀳𑀁, 𑀲𑀫𑁆𑀫 𑀚𑀻𑀯𑀓, 𑀲𑀬𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀳𑀺 𑀫𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀳𑀻’𑀢𑀺, 𑀧𑀭𑀺𑀬𑀸𑀬𑁂𑀦 𑀧𑀦 𑀭𑀢𑁆𑀢𑀺𑀲𑀫𑁆𑀧𑀤𑀁 𑀯𑀡𑁆𑀡𑁂𑀢𑁆𑀯𑀸 ‘𑀓𑀁 𑀦𑀼 𑀔𑁆𑀯𑀚𑁆𑀚 𑀫𑀬𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀫, 𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑀁 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’𑀢𑀺 𑀯𑀓𑁆𑀔𑀸𑀫𑀺, 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸𑀦𑀁 𑀯𑀡𑁆𑀡𑀁 𑀓𑀣𑁂𑀲𑁆𑀲𑀦𑁆𑀢𑀺, 𑀚𑀻𑀯𑀓𑁄𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑁆𑀲𑀢𑀺. 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀭𑀢𑁆𑀢𑀺𑀁 𑀯𑀡𑁆𑀡𑁂𑀲𑀺 ‘‘𑀮𑀓𑁆𑀔𑀜𑁆𑀜𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀅𑀪𑀺𑀭𑀽𑀧𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀤𑀲𑁆𑀲𑀦𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀧𑀸𑀲𑀸𑀤𑀺𑀓𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀭𑀫𑀡𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀓𑀁 𑀦𑀼 𑀔𑁆𑀯𑀚𑁆𑀚 𑀫𑀬𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀫, 𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑀁 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁫𑁦).

𑀅𑀣𑁂𑀓𑁄 𑀅𑀫𑀘𑁆𑀘𑁄 𑀧𑀽𑀭𑀡𑀓𑀲𑁆𑀲𑀧𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀏𑀓𑁄 𑀫𑀓𑁆𑀔𑀮𑀺𑀕𑁄𑀲𑀸𑀮𑀲𑁆𑀲, 𑀏𑀓𑁄 𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀲𑁆𑀲, 𑀏𑀓𑁄 𑀧𑀓𑀼𑀥𑀓𑀘𑁆𑀘𑀸𑀬𑀦𑀲𑁆𑀲, 𑀏𑀓𑁄 𑀲𑀜𑁆𑀘𑀬𑀲𑁆𑀲 𑀩𑁂𑀮𑀝𑁆𑀞𑀧𑀼𑀢𑁆𑀢𑀲𑁆𑀲, 𑀏𑀓𑁄 𑀦𑀸𑀝𑀧𑀼𑀢𑁆𑀢𑀦𑀺𑀕𑀡𑁆𑀞𑀲𑁆𑀲𑀸𑀢𑀺. 𑀭𑀸𑀚𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀳𑀺 𑀚𑀻𑀯𑀓𑀲𑁆𑀲𑁂𑀯 𑀫𑀳𑀸𑀅𑀫𑀘𑁆𑀘𑀲𑁆𑀲 𑀓𑀣𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀚𑀻𑀯𑀓𑁄𑀧𑀺 ‘‘𑀭𑀜𑁆𑀜𑀸 𑀫𑀁 𑀆𑀭𑀩𑁆𑀪 𑀓𑀣𑀺𑀢𑁂𑀬𑁂𑀯 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀺𑀤𑀽𑀭𑁂 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 ‘‘𑀢𑁆𑀯𑀁 𑀧𑀦, 𑀲𑀫𑁆𑀫 𑀚𑀻𑀯𑀓, 𑀓𑀺𑀁 𑀢𑀼𑀡𑁆𑀳𑀻’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀚𑀻𑀯𑀓𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 ‘‘𑀏𑀲𑁄, 𑀤𑁂𑀯, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀢𑀺 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀦𑀯 𑀅𑀭𑀳𑀸𑀤𑀺𑀕𑀼𑀡𑁂 𑀯𑀢𑁆𑀯𑀸 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀤𑀺𑀪𑁂𑀤𑀁 𑀪𑀕𑀯𑀢𑁄 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀢𑀁 𑀪𑀕𑀯𑀦𑁆𑀢𑀁 𑀤𑁂𑀯𑁄 𑀧𑀬𑀺𑀭𑀼𑀧𑀸𑀲𑀢𑀼, 𑀥𑀫𑁆𑀫𑀁 𑀲𑀼𑀡𑀸𑀢𑀼, 𑀧𑀜𑁆𑀳𑀁 𑀧𑀼𑀘𑁆𑀙𑀢𑀽’’𑀢𑀺 𑀆𑀳.

𑀭𑀸𑀚𑀸 𑀲𑀫𑁆𑀧𑀼𑀡𑁆𑀡𑀫𑀦𑁄𑀭𑀣𑁄 𑀳𑀼𑀢𑁆𑀯𑀸 ‘‘𑀢𑁂𑀦 𑀳𑀺, 𑀲𑀫𑁆𑀫 𑀚𑀻𑀯𑀓, 𑀳𑀢𑁆𑀣𑀺𑀬𑀸𑀦𑀸𑀦𑀺 𑀓𑀧𑁆𑀧𑀸𑀧𑁂𑀳𑀻’’𑀢𑀺 𑀬𑀸𑀦𑀸𑀦𑀺 𑀓𑀧𑁆𑀧𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀚𑀻𑀯𑀓𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀫𑀡𑁆𑀟𑀮𑀫𑀸𑀴𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 𑀲𑀦𑁆𑀢𑀯𑀻𑀘𑀺𑀫𑀚𑁆𑀛𑁂 𑀫𑀳𑀸𑀦𑀸𑀯𑀁 𑀯𑀺𑀬 𑀦𑀺𑀘𑁆𑀘𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀇𑀢𑁄 𑀘𑀺𑀢𑁄 𑀘 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 ‘‘𑀏𑀯𑀭𑀽𑀧𑀸 𑀦𑀸𑀫 𑀫𑁂 𑀧𑀭𑀺𑀲𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀇𑀭𑀺𑀬𑀸𑀧𑀣𑁂𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀣𑀼𑀢𑀺𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀲𑀸𑀫𑀜𑁆𑀜𑀨𑀮𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀤𑁆𑀯𑀻𑀳𑀺 𑀪𑀸𑀡𑀯𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀁 (𑀤𑀻. 𑀦𑀺. 𑁧.𑁧𑁫𑁦 𑀆𑀤𑀬𑁄) 𑀓𑀣𑁂𑀲𑀺. 𑀲𑁄 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀫𑀦𑁄 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀢𑁆𑀣𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀔𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸, 𑀉𑀧𑀳𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀇𑀲𑁆𑀲𑀭𑀺𑀬𑀲𑁆𑀲 𑀓𑀸𑀭𑀡𑀸 𑀧𑀺𑀢𑀭𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑁆𑀲𑀣, 𑀇𑀫𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀣. 𑀤𑁂𑀯𑀤𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸 𑀧𑀭𑀺𑀳𑀻𑀦𑁄’’𑀢𑀺 𑀆𑀳.

𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀚𑀸𑀢𑀲𑀢𑁆𑀢𑀼 𑀓𑀺𑀭 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀤𑀼𑀲𑁆𑀲𑀻𑀮𑀁 𑀧𑀸𑀧𑀥𑀫𑁆𑀫𑀁 𑀤𑁂𑀯𑀤𑀢𑁆𑀢𑀁 𑀦𑀺𑀲𑁆𑀲𑀸𑀬 𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸 𑀧𑀭𑀺𑀳𑀻𑀦𑁄, 𑀤𑁂𑀯𑀤𑀢𑁆𑀢𑁂𑀦 𑀦𑀸𑀲𑀺𑀢𑁄 𑀭𑀸𑀚𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀲𑀢𑁆𑀢𑀼 𑀇𑀤𑀸𑀦𑁂𑀯 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑁂𑀲 𑀅𑀲𑀦𑁆𑀢𑀧𑀕𑁆𑀕𑀳𑁂𑀦𑁂𑀯 𑀅𑀢𑁆𑀢𑀸𑀦𑀁 𑀦𑀸𑀲𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀯𑀸𑀘𑁂𑀲𑀺. 𑀢𑁂𑀲𑀼 𑀫𑀸𑀡𑀯𑁂𑀲𑀼 𑀏𑀓𑁄 𑀲𑀜𑁆𑀚𑀻𑀯𑁄 𑀦𑀸𑀫 𑀫𑀸𑀡𑀯𑁄 𑀅𑀢𑁆𑀣𑀺, 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀫𑀢𑀓𑀼𑀝𑁆𑀞𑀸𑀧𑀦𑀓𑀫𑀦𑁆𑀢𑀁 𑀅𑀤𑀸𑀲𑀺. 𑀲𑁄 𑀉𑀝𑁆𑀞𑀸𑀧𑀦𑀓𑀫𑀦𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑀫𑀦𑁆𑀢𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸𑀯 𑀏𑀓𑀤𑀺𑀯𑀲𑀁 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀤𑀸𑀭𑀼𑀅𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀢𑀩𑁆𑀬𑀕𑁆𑀖𑀁 𑀤𑀺𑀲𑁆𑀯𑀸 𑀫𑀸𑀡𑀯𑁂 𑀆𑀳 ‘‘𑀪𑁄, 𑀇𑀫𑀁 𑀫𑀢𑀩𑁆𑀬𑀕𑁆𑀖𑀁 𑀉𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀫𑀸𑀡𑀯𑀸 ‘‘𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳𑀁𑀲𑀼. ‘‘𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀯𑁄 𑀢𑀁 𑀉𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂, 𑀫𑀸𑀡𑀯, 𑀲𑀓𑁆𑀓𑁄𑀲𑀺, 𑀉𑀝𑁆𑀞𑀸𑀧𑁂𑀳𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂 𑀫𑀸𑀡𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀁𑀲𑀼. 𑀲𑀜𑁆𑀚𑀻𑀯𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀢𑀩𑁆𑀬𑀕𑁆𑀖𑀁 𑀲𑀓𑁆𑀔𑀭𑀸𑀳𑀺 𑀧𑀳𑀭𑀺, 𑀩𑁆𑀬𑀕𑁆𑀖𑁄 𑀉𑀝𑁆𑀞𑀸𑀬 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀲𑀜𑁆𑀚𑀻𑀯𑀁 𑀕𑀮𑀦𑀸𑀴𑀺𑀬𑀁 𑀟𑀁𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺, 𑀲𑀜𑁆𑀚𑀻𑀯𑁄𑀧𑀺 𑀢𑀢𑁆𑀣𑁂𑀯 𑀧𑀢𑀺. 𑀉𑀪𑁄𑀧𑀺 𑀏𑀓𑀝𑁆𑀞𑀸𑀦𑁂𑀬𑁂𑀯 𑀫𑀢𑀸 𑀦𑀺𑀧𑀚𑁆𑀚𑀺𑀁𑀲𑀼.

𑀫𑀸𑀡𑀯𑀸 𑀤𑀸𑀭𑀽𑀦𑀺 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀆𑀘𑀭𑀺𑀬𑁄 𑀫𑀸𑀡𑀯𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢𑀸, 𑀅𑀲𑀦𑁆𑀢𑀧𑀕𑁆𑀕𑀳𑀓𑀸𑀭𑀸 𑀦𑀸𑀫 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁦. ‘‘𑀅𑀲𑀦𑁆𑀢𑀁 𑀬𑁄 𑀧𑀕𑁆𑀕𑀡𑁆𑀳𑀸𑀢𑀺, 𑀅𑀲𑀦𑁆𑀢𑀁 𑀘𑀽𑀧𑀲𑁂𑀯𑀢𑀺;

𑀢𑀫𑁂𑀯 𑀖𑀸𑀲𑀁 𑀓𑀼𑀭𑀼𑀢𑁂, 𑀩𑁆𑀬𑀕𑁆𑀖𑁄 𑀲𑀜𑁆𑀚𑀻𑀯𑀺𑀓𑁄 𑀬𑀣𑀸’’𑀢𑀺.

𑀢𑀢𑁆𑀣 𑀅𑀲𑀦𑁆𑀢𑀦𑁆𑀢𑀺 𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀤𑀼𑀲𑁆𑀲𑀻𑀮𑀁 𑀧𑀸𑀧𑀥𑀫𑁆𑀫𑀁. 𑀬𑁄 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀏𑀯𑀭𑀽𑀧𑀁 𑀤𑀼𑀲𑁆𑀲𑀻𑀮𑀁 𑀧𑀩𑁆𑀩𑀚𑀺𑀢𑀁 𑀯𑀸 𑀘𑀻𑀯𑀭𑀸𑀤𑀺𑀲𑀫𑁆𑀧𑀤𑀸𑀦𑁂𑀦, 𑀕𑀳𑀝𑁆𑀞𑀁 𑀯𑀸 𑀉𑀧𑀭𑀚𑁆𑀚𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀺𑀲𑀫𑁆𑀧𑀤𑀸𑀦𑁂𑀦 𑀧𑀕𑁆𑀕𑀡𑁆𑀳𑀸𑀢𑀺, 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑀁 𑀘𑀽𑀧𑀲𑁂𑀯𑀢𑀻𑀢𑀺 𑀬𑁄 𑀘 𑀏𑀯𑀭𑀽𑀧𑀁 𑀅𑀲𑀦𑁆𑀢𑀁 𑀤𑀼𑀲𑁆𑀲𑀻𑀮𑀁 𑀉𑀧𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀫𑁂𑀯 𑀖𑀸𑀲𑀁 𑀓𑀼𑀭𑀼𑀢𑁂𑀢𑀺 𑀢𑀫𑁂𑀯 𑀅𑀲𑀦𑁆𑀢𑀧𑀕𑁆𑀕𑀡𑁆𑀳𑀓𑀁 𑀲𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀧𑀼𑀕𑁆𑀕𑀮𑁄 𑀖𑀲𑀢𑀺 𑀲𑀁𑀔𑀸𑀤𑀢𑀺 𑀯𑀺𑀦𑀸𑀲𑀁 𑀧𑀸𑀧𑁂𑀢𑀺. 𑀓𑀣𑀁? 𑀩𑁆𑀬𑀕𑁆𑀖𑁄 𑀲𑀜𑁆𑀚𑀻𑀯𑀺𑀓𑁄 𑀬𑀣𑀸𑀢𑀺, 𑀬𑀣𑀸 𑀲𑀜𑁆𑀚𑀻𑀯𑁂𑀦 𑀫𑀸𑀡𑀯𑁂𑀦 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀢𑀩𑁆𑀬𑀕𑁆𑀖𑁄 𑀲𑀜𑁆𑀚𑀻𑀯𑀺𑀓𑁄 𑀚𑀻𑀯𑀺𑀢𑀲𑀫𑁆𑀧𑀤𑀸𑀦𑁂𑀦 𑀲𑀫𑁆𑀧𑀕𑁆𑀕𑀳𑀺𑀢𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀤𑀸𑀬𑀓𑀁 𑀲𑀜𑁆𑀚𑀻𑀯𑀫𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀢𑁂𑀲𑀺, 𑀏𑀯𑀁 𑀅𑀜𑁆𑀜𑁄𑀧𑀺 𑀬𑁄 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀭𑁄𑀢𑀺, 𑀲𑁄 𑀤𑀼𑀲𑁆𑀲𑀻𑀮𑁄 𑀢𑀁 𑀅𑀢𑁆𑀢𑀦𑁄 𑀲𑀫𑁆𑀧𑀕𑁆𑀕𑀸𑀳𑀓𑀫𑁂𑀯 𑀯𑀺𑀦𑀸𑀲𑁂𑀢𑀺. 𑀏𑀯𑀁 𑀅𑀲𑀦𑁆𑀢𑀲𑀫𑁆𑀧𑀕𑁆𑀕𑀸𑀳𑀓𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀫𑀸𑀡𑀯𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀢𑀩𑁆𑀬𑀕𑁆𑀖𑀼𑀝𑁆𑀞𑀸𑀧𑀦𑀓𑁄 𑀫𑀸𑀡𑀯𑁄 𑀅𑀚𑀸𑀢𑀲𑀢𑁆𑀢𑀼 𑀅𑀳𑁄𑀲𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀜𑁆𑀚𑀻𑀯𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀓𑀡𑁆𑀝𑀓𑀯𑀕𑁆𑀕𑁄 𑀧𑀦𑁆𑀦𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑁄𑀥𑀲𑀺𑀗𑁆𑀕𑀸𑀮𑀯𑀺𑀭𑁄𑀘𑀁, 𑀦𑀗𑁆𑀕𑀼𑀝𑁆𑀞𑀭𑀸𑀥𑀓𑀸𑀓𑀜𑁆𑀘;

𑀧𑀼𑀧𑁆𑀨𑀭𑀢𑁆𑀢𑀜𑁆𑀘 𑀲𑀺𑀗𑁆𑀕𑀸𑀮𑀁, 𑀏𑀓𑀧𑀡𑁆𑀡𑀜𑁆𑀘 𑀲𑀜𑁆𑀚𑀻𑀯𑀁.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀅𑀧𑀡𑁆𑀡𑀓𑁄 𑀲𑀻𑀮𑀯𑀕𑁆𑀕𑁄, 𑀓𑀼𑀭𑀼𑀗𑁆𑀕𑁄 𑀘 𑀓𑀼𑀮𑀸𑀯𑀓𑁄;

𑀅𑀢𑁆𑀣𑀓𑀸𑀫𑁄 𑀘 𑀆𑀲𑀻𑀲𑁄, 𑀇𑀢𑁆𑀣𑀻𑀯𑀭𑀼𑀡𑀧𑀸𑀬𑀺𑀫𑁆𑀳𑀸.

𑀮𑀺𑀢𑁆𑀢𑁄 𑀧𑀭𑁄𑀲𑀢𑀁 𑀳𑀁𑀘𑀺, 𑀓𑀼𑀲𑀦𑀸𑀴𑀸 𑀲𑀫𑁆𑀧𑀤𑀸𑀦𑁄;

𑀓𑀓𑀡𑁆𑀝𑀓𑁄 𑀧𑀦𑁆𑀦𑀭𑀲, 𑀲𑀢𑀧𑀡𑁆𑀡𑀸𑀲 𑀚𑀸𑀢𑀓𑀸𑀢𑀺.

𑀏𑀓𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄).