𑁮. 𑀯𑀭𑀼𑀡𑀯𑀕𑁆𑀕𑁄

[𑁭𑁧] 𑁧. 𑀯𑀭𑀼𑀡𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀅𑀜𑁆𑀜𑀫𑀜𑁆𑀜𑀲𑀳𑀸𑀬𑀓𑀸 𑀢𑀺𑀁𑀲𑀫𑀢𑁆𑀢𑀸 𑀓𑀼𑀮𑀧𑀼𑀢𑁆𑀢𑀸 𑀕𑀦𑁆𑀥𑀧𑀼𑀧𑁆𑀨𑀯𑀢𑁆𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 ‘‘𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀦𑀸𑀕𑀫𑀸𑀴𑀓𑀲𑀸𑀮𑀫𑀸𑀴𑀓𑀸𑀤𑀻𑀲𑀼 𑀣𑁄𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀭𑀺 𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑀸𑀬 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁂 𑀲𑀧𑀭𑀺𑀯𑀸𑀭𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀘𑀓𑁆𑀓𑀗𑁆𑀓𑀺𑀢𑀢𑀮𑁂𑀲𑀼 𑀨𑀼𑀮𑁆𑀮𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑁂𑀲𑀼 𑀧𑀸𑀤𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀁 𑀲𑀼𑀡𑀺𑀁𑀲𑀼.

𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 ‘‘𑀬𑀣𑀸 𑀬𑀣𑀸 𑀔𑁄 𑀫𑀬𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀧𑀩𑁆𑀩𑀚𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀲𑀪𑀸𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼, 𑀲𑀢𑁆𑀣𑀸 𑀢𑁂𑀲𑀁 𑀧𑀩𑁆𑀩𑀚𑁆𑀚𑀁 𑀅𑀤𑀸𑀲𑀺. 𑀢𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀭𑀸𑀥𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀜𑀢𑁆𑀯𑀸 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀻𑀯𑀭𑀸𑀦𑀺 𑀲𑀺𑀩𑁆𑀩𑁂𑀢𑁆𑀯𑀸 𑀭𑀚𑀺𑀢𑁆𑀯𑀸 ‘‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀫𑀬𑀁, 𑀪𑀦𑁆𑀢𑁂, 𑀪𑀯𑁂𑀲𑀼 𑀉𑀓𑁆𑀓𑀡𑁆𑀞𑀺𑀢𑀸 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀪𑀬𑀪𑀻𑀢𑀸, 𑀢𑁂𑀲𑀁 𑀦𑁄 𑀲𑀁𑀲𑀸𑀭𑀧𑀭𑀺𑀫𑁄𑀘𑀦𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀲𑀧𑁆𑀧𑀸𑀬𑀁 𑀯𑀺𑀘𑀺𑀦𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀑𑀮𑁄𑀓𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀁𑀲𑀼.

𑀅𑀣 𑀦𑁂𑀲𑀁 𑀅𑀩𑁆𑀪𑀦𑁆𑀢𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀦𑀸𑀫𑁂𑀦 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄 𑀭𑀲𑀕𑀺𑀤𑁆𑀥𑁄. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀦𑁂𑀯 𑀅𑀭𑀜𑁆𑀜𑁂 𑀯𑀲𑀺𑀢𑀼𑀁, 𑀦 𑀧𑀥𑀸𑀦𑀁 𑀧𑀤𑀳𑀺𑀢𑀼𑀁, 𑀦 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀬𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀓𑁄 𑀫𑁂 𑀕𑀫𑀦𑁂𑀦 𑀅𑀢𑁆𑀣𑁄, 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑁂𑀧𑀺 𑀔𑁄 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀢𑁂𑀫𑀸𑀲𑀁 𑀅𑀧𑁆𑀧𑀫𑀢𑁆𑀢𑀸 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀣𑀯𑀺𑀁 𑀉𑀦𑁆𑀦𑀸𑀤𑀬𑀫𑀸𑀦𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 ‘‘𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀧𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀤𑀺𑀲𑁆𑀯𑀸 𑀢𑀣𑀸𑀕𑀢𑀁 𑀤𑀝𑁆𑀞𑀼𑀓𑀸𑀫𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺. 𑀢𑁂 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁, 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀧𑀲𑀁𑀲𑀺. 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀢𑁆𑀣𑀸𑀭𑀁 𑀢𑁂𑀲𑀁 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀓𑀸𑀫𑁄 𑀚𑀸𑀢𑁄. 𑀢𑁂𑀧𑀺 𑀔𑁄 𑀪𑀺𑀓𑁆𑀔𑀽 ‘‘𑀫𑀬𑀁, 𑀪𑀦𑁆𑀢𑁂, 𑀢𑀫𑁂𑀯 𑀅𑀭𑀜𑁆𑀜𑀯𑀸𑀲𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀲𑀸𑀥𑀽’’𑀢𑀺 𑀅𑀦𑀼𑀚𑀸𑀦𑀺. 𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀅𑀕𑀫𑀁𑀲𑀼.

𑀅𑀣 𑀲𑁄 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀅𑀢𑀺𑀯𑁂𑀕𑁂𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀦𑀺𑀤𑁆𑀤𑀸𑀬𑀦𑁆𑀢𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺, 𑀊𑀭𑀼𑀝𑁆𑀞𑀺𑀓𑀁 𑀪𑀺𑀚𑁆𑀚𑀺, 𑀯𑁂𑀤𑀦𑀸 𑀫𑀳𑀦𑁆𑀢𑀸 𑀚𑀸𑀢𑀸. 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑀸𑀦𑀁 𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀺. 𑀅𑀣 𑀦𑁂 𑀉𑀧𑀝𑁆𑀞𑀸𑀦𑀯𑁂𑀮𑀸𑀬𑀁 𑀆𑀕𑀢𑁂 𑀲𑀢𑁆𑀣𑀸 𑀧𑀼𑀘𑁆𑀙𑀺 ‘‘𑀦𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, ‘𑀲𑁆𑀯𑁂 𑀕𑀫𑀺𑀲𑁆𑀲𑀸𑀫𑀸’𑀢𑀺 𑀳𑀺𑀬𑁆𑀬𑁄 𑀆𑀧𑀼𑀘𑁆𑀙𑀺𑀢𑁆𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀧𑀺𑀘 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀲𑀳𑀸𑀬𑀓𑁄 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀓𑀸𑀮𑁂 𑀅𑀢𑀺𑀯𑁂𑀕𑁂𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀺𑀤𑁆𑀤𑀸𑀪𑀺𑀪𑀽𑀢𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀢𑁄, 𑀊𑀭𑀼𑀝𑁆𑀞𑀺𑀲𑁆𑀲 𑀪𑀺𑀦𑁆𑀦𑀁, 𑀢𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀅𑀢𑁆𑀢𑀦𑁄 𑀳𑀻𑀦𑀯𑀻𑀭𑀺𑀬𑀪𑀸𑀯𑁂𑀦 𑀅𑀓𑀸𑀮𑁂 𑀅𑀢𑀺𑀯𑁂𑀕𑁂𑀦 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀕𑀫𑀦𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑁂𑀲 𑀢𑀼𑀫𑁆𑀳𑀸𑀓𑀁 𑀕𑀫𑀦𑀦𑁆𑀢𑀭𑀸𑀬𑀁 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀩𑁄𑀥𑀺𑀲𑀢𑁆𑀢𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀅𑀣𑀲𑁆𑀲 𑀢𑁂 𑀫𑀸𑀡𑀯𑀸 𑀏𑀓𑀤𑀺𑀯𑀲𑀁 𑀤𑀸𑀭𑀼𑀁 𑀆𑀳𑀭𑀡𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀤𑀸𑀭𑀽𑀦𑀺 𑀉𑀤𑁆𑀥𑀭𑀺𑀁𑀲𑀼. 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄 𑀓𑀼𑀲𑀻𑀢𑀫𑀸𑀡𑀯𑁄 𑀫𑀳𑀦𑁆𑀢𑀁 𑀯𑀭𑀼𑀡𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀲𑀼𑀓𑁆𑀔𑀭𑀼𑀓𑁆𑀔𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 ‘‘𑀫𑀼𑀳𑀼𑀢𑁆𑀢𑀁 𑀢𑀸𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀸𑀭𑀽𑀦𑀺 𑀧𑀸𑀢𑁂𑀢𑁆𑀯𑀸 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀢𑁆𑀢𑀭𑀺𑀲𑀸𑀝𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀓𑀸𑀓𑀘𑁆𑀙𑀫𑀸𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀇𑀢𑀭𑁂 𑀫𑀸𑀡𑀯𑀓𑀸 𑀤𑀸𑀭𑀼𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑀸 𑀢𑀁 𑀧𑀸𑀤𑁂𑀦 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀩𑁄𑀥𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀓𑀼𑀲𑀻𑀢𑀫𑀸𑀡𑀯𑁄 𑀉𑀝𑁆𑀞𑀸𑀬 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀅𑀯𑀺𑀕𑀢𑀦𑀺𑀤𑁆𑀤𑁄𑀯 𑀯𑀭𑀼𑀡𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀸𑀔𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀺𑀢𑁆𑀯𑀸 𑀪𑀜𑁆𑀚𑀦𑁆𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀺𑀢𑀓𑁄𑀝𑀺𑀬𑀸 𑀅𑀢𑁆𑀢𑀦𑁄 𑀅𑀓𑁆𑀔𑀺𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀢𑀁 𑀧𑀺𑀥𑀸𑀬 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀮𑁆𑀮𑀤𑀸𑀭𑀽𑀦𑀺 𑀪𑀜𑁆𑀚𑀺𑀢𑁆𑀯𑀸 𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀤𑀸𑀭𑀼𑀓𑀮𑀸𑀧𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀧𑀸𑀢𑀺𑀢𑀸𑀦𑀁 𑀤𑀸𑀭𑀽𑀦𑀁 𑀉𑀧𑀭𑀺 𑀧𑀸𑀢𑁂𑀲𑀺.

𑀢𑀁 𑀤𑀺𑀯𑀲𑀜𑁆𑀘 𑀚𑀦𑀧𑀤𑀕𑀸𑀫𑀓𑁂 𑀏𑀓𑀁 𑀓𑀼𑀮𑀁 ‘‘𑀲𑁆𑀯𑁂 𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀘𑀭𑀺𑀬𑀁 𑀦𑀺𑀫𑀦𑁆𑀢𑁂𑀲𑀺. 𑀆𑀘𑀭𑀺𑀬𑁄 𑀫𑀸𑀡𑀯𑀓𑁂 𑀆𑀳 ‘‘𑀢𑀸𑀢𑀸, 𑀲𑁆𑀯𑁂 𑀏𑀓𑀁 𑀕𑀸𑀫𑀓𑀁 𑀕𑀦𑁆𑀢𑀩𑁆𑀩𑀁, 𑀢𑀼𑀫𑁆𑀳𑁂 𑀧𑀦 𑀦𑀺𑀭𑀸𑀳𑀸𑀭𑀸 𑀦 𑀲𑀓𑁆𑀔𑀺𑀲𑁆𑀲𑀣 𑀕𑀦𑁆𑀢𑀼𑀁, 𑀧𑀸𑀢𑁄𑀯 𑀬𑀸𑀕𑀼𑀁 𑀧𑀘𑀸𑀧𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀓𑁄𑀝𑁆𑀞𑀸𑀲𑀜𑁆𑀘 𑀅𑀫𑁆𑀳𑀸𑀓𑀁 𑀧𑀢𑁆𑀢𑀓𑁄𑀝𑁆𑀞𑀸𑀲𑀜𑁆𑀘 𑀲𑀩𑁆𑀩𑀫𑀸𑀤𑀸𑀬 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀧𑀸𑀢𑁄𑀯 𑀬𑀸𑀕𑀼𑀧𑀘𑀦𑀢𑁆𑀣𑀸𑀬 𑀤𑀸𑀲𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 ‘‘𑀔𑀺𑀧𑁆𑀧𑀁 𑀦𑁄 𑀬𑀸𑀕𑀼𑀁 𑀧𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀲𑀸 𑀤𑀸𑀭𑀽𑀦𑀺 𑀕𑀡𑁆𑀳𑀦𑁆𑀢𑀻 𑀉𑀧𑀭𑀺 𑀞𑀺𑀢𑀸𑀦𑀺 𑀅𑀮𑁆𑀮𑀯𑀭𑀼𑀡𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀫𑀼𑀔𑀯𑀸𑀢𑀁 𑀤𑀤𑀫𑀸𑀦𑀸𑀧𑀺 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀽𑀭𑀺𑀬𑀁 𑀉𑀝𑁆𑀞𑀸𑀧𑁂𑀲𑀺. 𑀫𑀸𑀡𑀯𑀓𑀸 ‘‘𑀅𑀢𑀺𑀤𑀺𑀯𑀸 𑀚𑀸𑀢𑁄, 𑀇𑀤𑀸𑀦𑀺 𑀦 𑀲𑀓𑁆𑀓𑀸 𑀕𑀦𑁆𑀢𑀼’’𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀺𑀁𑀲𑀼. 𑀆𑀘𑀭𑀺𑀬𑁄 ‘‘𑀓𑀺𑀁, 𑀢𑀸𑀢𑀸, 𑀦 𑀕𑀢𑀢𑁆𑀣𑀸’’𑀢𑀺? ‘‘𑀆𑀫, 𑀆𑀘𑀭𑀺𑀬 𑀦 𑀕𑀢𑀫𑁆𑀳𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀅𑀲𑀼𑀓𑁄 𑀦𑀸𑀫 𑀓𑀼𑀲𑀻𑀢𑀫𑀸𑀡𑀯𑁄 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀤𑀸𑀭𑀽𑀦𑀫𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀯𑀭𑀼𑀡𑀭𑀼𑀓𑁆𑀔𑀫𑀽𑀮𑁂 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀘𑁆𑀙𑀸 𑀯𑁂𑀕𑁂𑀦 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀅𑀓𑁆𑀔𑀺𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀅𑀮𑁆𑀮𑀯𑀭𑀼𑀡𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀫𑁆𑀳𑁂𑀳𑀺 𑀆𑀦𑀻𑀢𑀤𑀸𑀭𑀽𑀦𑀁 𑀉𑀧𑀭𑀺 𑀧𑀓𑁆𑀔𑀺𑀧𑀺. 𑀬𑀸𑀕𑀼𑀧𑀸𑀘𑀺𑀓𑀸 𑀢𑀸𑀦𑀺 𑀲𑀼𑀓𑁆𑀔𑀤𑀸𑀭𑀼𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀉𑀚𑁆𑀚𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀫𑀺𑀦𑀸 𑀦𑁄 𑀓𑀸𑀭𑀡𑁂𑀦 𑀕𑀫𑀦𑀦𑁆𑀢𑀭𑀸𑀬𑁄 𑀚𑀸𑀢𑁄’’𑀢𑀺. 𑀆𑀘𑀭𑀺𑀬𑁄 𑀫𑀸𑀡𑀯𑁂𑀦 𑀓𑀢𑀓𑀫𑁆𑀫𑀁 𑀲𑀼𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮𑀸𑀦𑀁 𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑀸 𑀧𑀭𑀺𑀳𑀸𑀦𑀺 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋

𑁭𑁧. ‘‘𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀯𑀭𑀼𑀡𑀓𑀝𑁆𑀞𑀪𑀜𑁆𑀚𑁄𑀯, 𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀻𑀢𑀺 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 ‘‘𑀇𑀤𑀁 𑀧𑀼𑀩𑁆𑀩𑁂 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀧𑀘𑁆𑀙𑀸’’𑀢𑀺 𑀅𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺 𑀧𑀞𑀫𑀫𑁂𑀯 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺 𑀧𑀘𑁆𑀙𑀸 𑀓𑀭𑁄𑀢𑀺, 𑀅𑀬𑀁 𑀯𑀭𑀼𑀡𑀓𑀝𑁆𑀞𑀪𑀜𑁆𑀚𑁄 𑀅𑀫𑁆𑀳𑀸𑀓𑀁 𑀫𑀸𑀡𑀯𑀓𑁄 𑀯𑀺𑀬 𑀲𑁄 𑀩𑀸𑀮𑀧𑀼𑀕𑁆𑀕𑀮𑁄 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀺 𑀲𑁄𑀘𑀢𑀺 𑀧𑀭𑀺𑀤𑁂𑀯𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀇𑀫𑀁 𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀅𑀓𑁆𑀔𑀺𑀪𑁂𑀤𑀁 𑀧𑀢𑁆𑀢𑁄 𑀫𑀸𑀡𑀯𑁄 𑀊𑀭𑀼𑀪𑁂𑀤𑀁 𑀧𑀢𑁆𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑁂𑀲𑀫𑀸𑀡𑀯𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀭𑀼𑀡𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁭𑁨] 𑁨. 𑀲𑀻𑀮𑀯𑀦𑀸𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀢𑀜𑁆𑀜𑀼𑀲𑁆𑀲 𑀧𑁄𑀲𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀦 𑀚𑀸𑀦𑀸𑀢𑀻’’𑀢𑀺 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽, 𑀧𑀼𑀩𑁆𑀩𑁂𑀧𑀺 𑀅𑀓𑀢𑀜𑁆𑀜𑀽𑀬𑁂𑀯, 𑀦 𑀓𑀤𑀸𑀘𑀺 𑀫𑀬𑁆𑀳𑀁 𑀕𑀼𑀡𑀁 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄 𑀲𑀩𑁆𑀩𑀲𑁂𑀢𑁄 𑀅𑀳𑁄𑀲𑀺 𑀭𑀚𑀢𑀧𑀼𑀜𑁆𑀚𑀲𑀦𑁆𑀦𑀺𑀪𑁄, 𑀅𑀓𑁆𑀔𑀻𑀦𑀺 𑀧𑀦𑀲𑁆𑀲 𑀫𑀡𑀺𑀕𑀼𑀴𑀲𑀤𑀺𑀲𑀸𑀦𑀺, 𑀧𑀜𑁆𑀜𑀸𑀬𑀫𑀸𑀦𑀸𑀦𑀺 𑀧𑀜𑁆𑀘 𑀧𑀲𑀸𑀤𑀸𑀦𑀺 𑀅𑀳𑁂𑀲𑀼𑀁, 𑀫𑀼𑀔𑀁 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁, 𑀲𑁄𑀡𑁆𑀟𑀸 𑀭𑀢𑁆𑀢𑀲𑀼𑀯𑀡𑁆𑀡𑀩𑀺𑀦𑁆𑀤𑀼𑀧𑀝𑀺𑀫𑀡𑁆𑀟𑀺𑀢𑀁 𑀭𑀚𑀢𑀤𑀸𑀫𑀁 𑀯𑀺𑀬, 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀓𑀢𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀸 𑀯𑀺𑀬. 𑀏𑀯𑀫𑀲𑁆𑀲 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀅𑀮𑀗𑁆𑀓𑀢𑁄 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄 𑀅𑀳𑁄𑀲𑀺. 𑀅𑀣 𑀦𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀁 𑀲𑀓𑀮𑀳𑀺𑀫𑀯𑀦𑁆𑀢𑁂 𑀯𑀸𑀭𑀡𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀏𑀯𑀁 𑀲𑁄 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀭𑀡𑀧𑀭𑀺𑀯𑀸𑀭𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀲𑀫𑀸𑀦𑁄 𑀅𑀧𑀭𑀪𑀸𑀕𑁂 𑀕𑀡𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀕𑀡𑀫𑁆𑀳𑀸 𑀓𑀸𑀬𑀯𑀺𑀯𑁂𑀓𑀸𑀬 𑀏𑀓𑀓𑁄𑀯 𑀅𑀭𑀜𑁆𑀜𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀻𑀮𑀯𑀦𑁆𑀢𑀢𑀸𑀬 𑀘 𑀧𑀦𑀲𑁆𑀲 ‘‘𑀲𑀻𑀮𑀯𑀦𑀸𑀕𑀭𑀸𑀚𑀸’’ 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑁄 𑀯𑀦𑀘𑀭𑀓𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀚𑀻𑀯𑀪𑀡𑁆𑀟𑀓𑀁 𑀕𑀯𑁂𑀲𑀫𑀸𑀦𑁄 𑀤𑀺𑀲𑀸 𑀯𑀯𑀢𑁆𑀣𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀕𑁆𑀕𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀭𑀺𑀤𑁂𑀯𑀫𑀸𑀦𑁄 𑀯𑀺𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀢𑀁 𑀩𑀮𑀯𑀧𑀭𑀺𑀤𑁂𑀯𑀺𑀢𑀁 𑀲𑀼𑀢𑁆𑀯𑀸 ‘‘𑀇𑀫𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀓𑀸𑀭𑀼𑀜𑁆𑀜𑁂𑀦 𑀘𑁄𑀤𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀪𑀻𑀢𑁄 𑀧𑀮𑀸𑀬𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀲𑁄 𑀧𑀼𑀭𑀺𑀲𑁄 𑀩𑁄𑀥𑀺𑀲𑀢𑁆𑀢𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀦 𑀅𑀕𑀫𑀸𑀲𑀺, 𑀲𑁄 𑀧𑀼𑀦 𑀧𑀮𑀸𑀬𑀺𑀢𑁆𑀯𑀸 𑀢𑀲𑁆𑀲 𑀞𑀺𑀢𑀓𑀸𑀮𑁂 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀯𑀸𑀭𑀡𑁄 𑀫𑀫 𑀧𑀮𑀸𑀬𑀦𑀓𑀸𑀮𑁂 𑀢𑀺𑀝𑁆𑀞𑀢𑀺, 𑀞𑀺𑀢𑀓𑀸𑀮𑁂 𑀆𑀕𑀘𑁆𑀙𑀢𑀺, 𑀦𑀸𑀬𑀁 𑀫𑀬𑁆𑀳𑀁 𑀅𑀦𑀢𑁆𑀣𑀓𑀸𑀫𑁄, 𑀇𑀫𑀫𑁆𑀳𑀸 𑀧𑀦 𑀫𑀁 𑀤𑀼𑀓𑁆𑀔𑀸 𑀫𑀸𑀘𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀽𑀭𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀲𑁆𑀫𑀸 𑀪𑁄 𑀢𑁆𑀯𑀁 𑀧𑀼𑀭𑀺𑀲, 𑀧𑀭𑀺𑀤𑁂𑀯𑀫𑀸𑀦𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀤𑀺𑀲𑀸 𑀯𑀯𑀢𑁆𑀣𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀕𑁆𑀕𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀫𑀭𑀡𑀪𑀬𑁂𑀦𑀸’’𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀨𑀮𑀸𑀨𑀮𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 ‘‘𑀪𑁄, 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀅𑀳𑀁 𑀢𑀁 𑀫𑀦𑀼𑀲𑁆𑀲𑀧𑀣𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑀁 𑀧𑀸𑀬𑀸𑀲𑀺.

𑀅𑀣 𑀔𑁄 𑀲𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀼𑀭𑀺𑀲𑁄 ‘‘𑀲𑀘𑁂 𑀓𑁄𑀘𑀺 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀉𑀧𑀥𑀸𑀭𑁂𑀦𑁆𑀢𑁄𑀯 𑀕𑀘𑁆𑀙𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸 𑀦𑀻𑀳𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀕𑀸𑀫𑀺𑀫𑀳𑀸𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙, 𑀫𑀬𑁆𑀳𑀁 𑀧𑀦 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄𑀧𑀺 𑀅𑀧𑀼𑀘𑁆𑀙𑀺𑀢𑁄𑀧𑀺 𑀫𑀸 𑀓𑀲𑁆𑀲𑀘𑀺 𑀆𑀘𑀺𑀓𑁆𑀔𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀅𑀕𑀫𑀸𑀲𑀺. 𑀅𑀣 𑀲𑁄 𑀧𑀼𑀭𑀺𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀅𑀦𑀼𑀯𑀺𑀘𑀭𑀦𑁆𑀢𑁄 𑀤𑀦𑁆𑀢𑀓𑀸𑀭𑀯𑀻𑀣𑀺𑀁 𑀧𑀢𑁆𑀯𑀸 𑀤𑀦𑁆𑀢𑀓𑀸𑀭𑁂 𑀤𑀦𑁆𑀢𑀯𑀺𑀓𑀢𑀺𑀬𑁄 𑀓𑀼𑀭𑀼𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀧𑀦 𑀪𑁄, 𑀚𑀻𑀯𑀤𑀦𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺? ‘‘𑀪𑁄, 𑀓𑀺𑀁 𑀯𑀤𑁂𑀲𑀺, 𑀚𑀻𑀯𑀤𑀦𑁆𑀢𑁄 𑀦𑀸𑀫 𑀫𑀢𑀳𑀢𑁆𑀣𑀺𑀤𑀦𑁆𑀢𑀢𑁄 𑀫𑀳𑀕𑁆𑀖𑀢𑀭𑁄’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀯𑁄 𑀚𑀻𑀯𑀤𑀦𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 𑀔𑀭𑀓𑀓𑀘𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀲𑀸𑀫𑀺, 𑀤𑀼𑀕𑁆𑀕𑀢𑁄 𑀓𑀧𑀡𑁄 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀼𑀫𑁆𑀳𑁂 𑀤𑀦𑁆𑀢𑀔𑀡𑁆𑀟𑀁 𑀬𑀸𑀘𑀺𑀢𑁆𑀯𑀸 𑀲𑀘𑁂 𑀤𑀲𑁆𑀲𑀣, 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀢𑁂𑀦 𑀫𑀽𑀮𑁂𑀦 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄𑀢𑀺. ‘‘𑀳𑁄𑀢𑀼 𑀪𑁄, 𑀤𑀦𑁆𑀢𑀁 𑀢𑁂 𑀤𑀲𑁆𑀲𑀸𑀫𑀺, 𑀲𑀘𑁂 𑀤𑀦𑁆𑀢𑀓𑀧𑁆𑀧𑀦𑀢𑁆𑀣𑀸𑀬 𑀓𑀓𑀘𑀁 𑀅𑀢𑁆𑀣𑀻’’𑀢𑀺. ‘‘𑀓𑀓𑀘𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀺 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀤𑀦𑁆𑀢𑁂 𑀓𑀓𑀘𑁂𑀦 𑀓𑀦𑁆𑀢𑀺𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀧𑀸𑀤𑁂 𑀲𑀫𑀺𑀜𑁆𑀚𑀺𑀢𑁆𑀯𑀸 𑀕𑁄𑀦𑀺𑀲𑀺𑀦𑁆𑀦𑀓𑀁 𑀦𑀺𑀲𑀻𑀤𑀺. 𑀲𑁄 𑀤𑁆𑀯𑁂𑀧𑀺 𑀅𑀕𑁆𑀕𑀤𑀦𑁆𑀢𑁂 𑀙𑀺𑀦𑁆𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀤𑀦𑁆𑀢𑁂 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀦𑀸𑀳𑀁 ‘𑀏𑀢𑁂 𑀤𑀦𑁆𑀢𑀸 𑀫𑀬𑁆𑀳𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸’𑀢𑀺 𑀤𑀫𑁆𑀫𑀺, 𑀇𑀫𑁂𑀳𑀺 𑀧𑀦 𑀫𑁂 𑀤𑀦𑁆𑀢𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀲𑀩𑁆𑀩𑀥𑀫𑁆𑀫𑀧𑀝𑀺𑀯𑁂𑀥𑀦𑀲𑀫𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀤𑀦𑁆𑀢𑀸𑀯 𑀧𑀺𑀬𑀢𑀭𑀸, 𑀢𑀲𑁆𑀲 𑀫𑁂 𑀇𑀤𑀁 𑀤𑀦𑁆𑀢𑀤𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀳𑁄𑀢𑀽’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀭𑀸𑀥𑀦𑀁 𑀓𑀢𑁆𑀯𑀸 𑀤𑀦𑁆𑀢𑀬𑀼𑀕𑀮𑀁 𑀅𑀤𑀸𑀲𑀺.

𑀲𑁄 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁 𑀫𑀽𑀮𑁂 𑀔𑀻𑀡𑁂 𑀧𑀼𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀤𑀦𑁆𑀢𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀮𑀤𑁆𑀥𑀫𑀽𑀮𑀁 𑀫𑀬𑁆𑀳𑀁 𑀇𑀡𑀲𑁄𑀥𑀦𑀫𑀢𑁆𑀢𑀫𑁂𑀯 𑀚𑀸𑀢𑀁, 𑀅𑀯𑀲𑁂𑀲𑀤𑀦𑁆𑀢𑁂 𑀤𑁂𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀧𑁆𑀧𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀤𑀦𑁆𑀢𑁂 𑀅𑀤𑀸𑀲𑀺. 𑀲𑁄 𑀢𑁂𑀧𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀫𑀽𑀮𑀤𑀸𑀞𑀸 𑀫𑁂 𑀤𑁂𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀲𑀻𑀤𑀺. 𑀲𑁄 𑀧𑀸𑀧𑀧𑀼𑀭𑀺𑀲𑁄 𑀫𑀳𑀸𑀲𑀢𑁆𑀢𑀲𑁆𑀲 𑀭𑀚𑀢𑀤𑀸𑀫𑀲𑀤𑀺𑀲𑀁 𑀲𑁄𑀡𑁆𑀟𑀁 𑀫𑀤𑁆𑀤𑀫𑀸𑀦𑁄 𑀓𑁂𑀮𑀸𑀲𑀓𑀽𑀝𑀲𑀤𑀺𑀲𑀁 𑀓𑀼𑀫𑁆𑀪𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀪𑁄 𑀤𑀦𑁆𑀢𑀓𑁄𑀝𑀺𑀬𑁄 𑀧𑀡𑁆𑀳𑀺𑀬𑀸 𑀧𑀳𑀭𑀦𑁆𑀢𑁄 𑀫𑀁𑀲𑀁 𑀯𑀺𑀬𑀽𑀳𑀺𑀢𑁆𑀯𑀸 𑀓𑀼𑀫𑁆𑀪𑀁 𑀆𑀭𑀼𑀬𑁆𑀳 𑀔𑀭𑀓𑀓𑀘𑁂𑀦 𑀫𑀽𑀮𑀤𑀸𑀞𑀸 𑀓𑀧𑁆𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀦𑁆𑀢𑁂𑀬𑁂𑀯 𑀧𑀦 𑀢𑀲𑁆𑀫𑀺𑀁 𑀧𑀸𑀧𑀧𑀼𑀭𑀺𑀲𑁂 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀖𑀦𑀧𑀣𑀯𑀻 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀬𑁄 𑀫𑀳𑀸𑀪𑀸𑀭𑁂 𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀸𑀦𑀺 𑀕𑀽𑀣𑀫𑀼𑀢𑁆𑀢𑀸𑀤𑀻𑀦𑀺 𑀘 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀧𑀺 𑀢𑀲𑁆𑀲 𑀅𑀕𑀼𑀡𑀭𑀸𑀲𑀺𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀬 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀁 𑀅𑀤𑀸𑀲𑀺. 𑀢𑀸𑀯𑀤𑁂𑀯 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀢𑁄 𑀅𑀕𑁆𑀕𑀺𑀚𑀸𑀮𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀧𑀼𑀭𑀺𑀲𑀁 𑀓𑀼𑀮𑀲𑀦𑁆𑀢𑀓𑁂𑀦 𑀓𑀫𑁆𑀩𑀮𑁂𑀦 𑀧𑀸𑀭𑀼𑀧𑀦𑁆𑀢𑀻 𑀯𑀺𑀬 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺.

𑀏𑀯𑀁 𑀢𑀲𑁆𑀲 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀧𑀣𑀯𑀺𑀁 𑀧𑀯𑀺𑀝𑁆𑀞𑀓𑀸𑀮𑁂 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀼𑀕𑁆𑀕𑀮𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀤𑀢𑁆𑀯𑀸𑀧𑀺 𑀢𑁄𑀲𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀯𑀦𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁨. ‘‘𑀅𑀓𑀢𑀜𑁆𑀜𑀼𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀯𑀺𑀯𑀭𑀤𑀲𑁆𑀲𑀺𑀦𑁄;

𑀲𑀩𑁆𑀩𑀁 𑀘𑁂 𑀧𑀣𑀯𑀺𑀁 𑀤𑀚𑁆𑀚𑀸, 𑀦𑁂𑀯 𑀦𑀁 𑀅𑀪𑀺𑀭𑀸𑀥𑀬𑁂’’𑀢𑀺.

𑀢𑀢𑁆𑀣 𑀅𑀓𑀢𑀜𑁆𑀜𑀼𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀓𑀢𑀕𑀼𑀡𑀁 𑀅𑀚𑀸𑀦𑀦𑁆𑀢𑀲𑁆𑀲. 𑀧𑁄𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲. 𑀯𑀺𑀯𑀭𑀤𑀲𑁆𑀲𑀺𑀦𑁄𑀢𑀺 𑀙𑀺𑀤𑁆𑀤𑀫𑁂𑀯 𑀑𑀓𑀸𑀲𑀫𑁂𑀯 𑀑𑀮𑁄𑀓𑁂𑀦𑁆𑀢𑀲𑁆𑀲. 𑀲𑀩𑁆𑀩𑀁 𑀘𑁂 𑀧𑀣𑀯𑀺𑀁 𑀤𑀚𑁆𑀚𑀸𑀢𑀺 𑀲𑀘𑁂𑀧𑀺 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀓𑀮𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁, 𑀇𑀫𑀁 𑀯𑀸 𑀧𑀦 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀣𑀯𑁄𑀚𑀁 𑀤𑀤𑁂𑀬𑁆𑀬. 𑀦𑁂𑀯 𑀦𑀁 𑀅𑀪𑀺𑀭𑀸𑀥𑀬𑁂𑀢𑀺 𑀏𑀯𑀁 𑀓𑀭𑁄𑀦𑁆𑀢𑁄𑀧𑀺 𑀏𑀯𑀭𑀽𑀧𑀁 𑀓𑀢𑀕𑀼𑀡𑀯𑀺𑀤𑁆𑀥𑀁𑀲𑀓𑀁 𑀓𑁄𑀘𑀺 𑀧𑀭𑀺𑀢𑁄𑀲𑁂𑀢𑀼𑀁 𑀯𑀸 𑀧𑀲𑀸𑀤𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀸 𑀤𑁂𑀯𑀢𑀸 𑀯𑀦𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀅𑀓𑀢𑀜𑁆𑀜𑀽, 𑀧𑀼𑀩𑁆𑀩𑁂𑀧𑀺 𑀅𑀓𑀢𑀜𑁆𑀜𑀽𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀼𑀕𑁆𑀕𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀻𑀮𑀯𑀦𑀸𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀯𑀦𑀸𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁭𑁩] 𑁩. 𑀲𑀘𑁆𑀘𑀁𑀓𑀺𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀫𑀺𑀜𑁆𑀳𑀺 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀲𑀢𑁆𑀣𑀼 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀯𑀥𑀸𑀬𑀬𑁂𑀯 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀅𑀕𑀼𑀡𑀁 𑀓𑀣𑁂𑀦𑁆𑀢𑁂 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀤𑀼𑀝𑁆𑀞𑀓𑀼𑀫𑀸𑀭𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀧𑀳𑀝𑀸𑀲𑀻𑀯𑀺𑀲𑀽𑀧𑀫𑁄, 𑀅𑀦𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀅𑀧𑀳𑀭𑀺𑀢𑁆𑀯𑀸 𑀯𑀸 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀦 𑀓𑀣𑁂𑀢𑀺. 𑀲𑁄 𑀅𑀦𑁆𑀢𑁄𑀚𑀦𑀲𑁆𑀲 𑀘 𑀩𑀳𑀺𑀚𑀦𑀲𑁆𑀲 𑀘 𑀅𑀓𑁆𑀔𑀺𑀫𑁆𑀳𑀺 𑀧𑀢𑀺𑀢𑀭𑀚𑀁 𑀯𑀺𑀬, 𑀔𑀸𑀤𑀺𑀢𑀼𑀁 𑀆𑀕𑀢𑀧𑀺𑀲𑀸𑀘𑁄 𑀯𑀺𑀬 𑀘 𑀅𑀫𑀦𑀸𑀧𑁄 𑀅𑀳𑁄𑀲𑀺 𑀉𑀩𑁆𑀩𑁂𑀚𑀦𑀻𑀬𑁄. 𑀲𑁄 𑀏𑀓𑀤𑀺𑀯𑀲𑀁 𑀦𑀤𑀻𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀤𑀻𑀢𑀻𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺, 𑀤𑀺𑀲𑀸 𑀅𑀦𑁆𑀥𑀓𑀸𑀭𑀸 𑀚𑀸𑀢𑀸. 𑀲𑁄 𑀤𑀸𑀲𑀧𑁂𑀲𑁆𑀲𑀚𑀦𑀁 𑀆𑀳 ‘‘𑀏𑀣 𑀪𑀡𑁂, 𑀫𑀁 𑀕𑀳𑁂𑀢𑁆𑀯𑀸 𑀦𑀤𑀻𑀫𑀚𑁆𑀛𑀁 𑀦𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀆𑀦𑁂𑀣𑀸’’𑀢𑀺. 𑀢𑁂 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀓𑀺𑀁 𑀦𑁄 𑀭𑀸𑀚𑀸 𑀓𑀭𑀺𑀲𑁆𑀲𑀢𑀺, 𑀇𑀫𑀁 𑀧𑀸𑀧𑀧𑀼𑀭𑀺𑀲𑀁 𑀏𑀢𑁆𑀣𑁂𑀯 𑀫𑀸𑀭𑁂𑀫𑀸’’𑀢𑀺 𑀫𑀦𑁆𑀢𑀬𑀺𑀢𑁆𑀯𑀸 ‘‘𑀏𑀢𑁆𑀣 𑀕𑀘𑁆𑀙 𑀓𑀸𑀴𑀓𑀡𑁆𑀡𑀻’’𑀢𑀺 𑀉𑀤𑀓𑁂 𑀦𑀁 𑀑𑀧𑀺𑀮𑀸𑀧𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀢𑀻𑀭𑁂 𑀅𑀝𑁆𑀞𑀁𑀲𑀼. ‘‘𑀓𑀳𑀁 𑀓𑀼𑀫𑀸𑀭𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀦 𑀫𑀬𑀁 𑀓𑀼𑀫𑀸𑀭𑀁 𑀧𑀲𑁆𑀲𑀸𑀫, 𑀫𑁂𑀖𑀁 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀭𑀢𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 ‘‘𑀓𑀳𑀁 𑀫𑁂 𑀧𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. 𑀦 𑀚𑀸𑀦𑀸𑀫 𑀤𑁂𑀯, 𑀫𑁂𑀖𑁂 𑀉𑀝𑁆𑀞𑀺𑀢𑁂 ‘‘𑀧𑀼𑀭𑀢𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀆𑀕𑀢𑀫𑁆𑀳𑀸𑀢𑀺. 𑀭𑀸𑀚𑀸 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀣𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀺𑀦𑀸𑀧𑁂𑀲𑀺, 𑀓𑁄𑀘𑀺 𑀓𑀼𑀫𑀸𑀭𑀁 𑀦𑀸𑀤𑁆𑀤𑀲.

𑀲𑁄𑀧𑀺 𑀔𑁄 𑀫𑁂𑀖𑀦𑁆𑀥𑀓𑀸𑀭𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑁄 𑀏𑀓𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀧𑀭𑀺𑀤𑁂𑀯𑀫𑀸𑀦𑁄 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀲𑁂𑀝𑁆𑀞𑀺 𑀦𑀤𑀻𑀢𑀻𑀭𑁂 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀤𑀳𑀺𑀢𑁆𑀯𑀸𑀯 𑀫𑀭𑀦𑁆𑀢𑁄 𑀥𑀦𑀢𑀡𑁆𑀳𑀸𑀬 𑀥𑀦𑀧𑀺𑀝𑁆𑀞𑁂 𑀲𑀧𑁆𑀧𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀧𑀭𑁄 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀢𑀺𑀁𑀲 𑀓𑁄𑀝𑀺𑀬𑁄 𑀦𑀺𑀤𑀳𑀺𑀢𑁆𑀯𑀸 𑀥𑀦𑀢𑀡𑁆𑀳𑀸𑀬 𑀢𑀢𑁆𑀣𑁂𑀯 𑀉𑀦𑁆𑀤𑀽𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀉𑀤𑀓𑀁 𑀧𑀸𑀯𑀺𑀲𑀺. 𑀢𑁂 𑀉𑀤𑀓𑀲𑁆𑀲 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑀸 𑀕𑀦𑁆𑀢𑁆𑀯𑀸 𑀢𑀁 𑀭𑀸𑀚𑀓𑀼𑀫𑀸𑀭𑁂𑀦 𑀅𑀪𑀺𑀦𑀺𑀲𑀺𑀦𑁆𑀦𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀧𑀢𑁆𑀯𑀸 𑀏𑀓𑁄 𑀏𑀓𑀁 𑀓𑁄𑀝𑀺𑀁, 𑀇𑀢𑀭𑁄 𑀇𑀢𑀭𑀁 𑀆𑀭𑀼𑀬𑁆𑀳 𑀔𑀦𑁆𑀥𑀧𑀺𑀝𑁆𑀞𑁂𑀬𑁂𑀯 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀲𑁆𑀲𑀸𑀬𑁂𑀯 𑀔𑁄 𑀧𑀦 𑀦𑀤𑀺𑀬𑀸 𑀢𑀻𑀭𑁂 𑀏𑀓𑁄 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀢𑁆𑀣𑁂𑀓𑁄 𑀲𑀼𑀯𑀧𑁄𑀢𑀓𑁄 𑀯𑀲𑀢𑀺. 𑀲𑁄𑀧𑀺 𑀭𑀼𑀓𑁆𑀔𑁄 𑀉𑀤𑀓𑁂𑀦 𑀥𑁄𑀢𑀫𑀽𑀮𑁄 𑀦𑀤𑀻𑀧𑀺𑀝𑁆𑀞𑁂 𑀧𑀢𑀺, 𑀲𑀼𑀯𑀧𑁄𑀢𑀓𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑁂𑀯 𑀔𑀦𑁆𑀥𑀲𑁆𑀲 𑀏𑀓𑀧𑀲𑁆𑀲𑁂 𑀦𑀺𑀮𑀻𑀬𑀺. 𑀏𑀯𑀁 𑀢𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑀢𑁄 𑀯𑀼𑀬𑁆𑀳𑀫𑀸𑀦𑀸 𑀕𑀘𑁆𑀙𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀸𑀲𑀺𑀭𑀝𑁆𑀞𑁂 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀤𑀻𑀦𑀺𑀯𑀢𑁆𑀢𑀦𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀲𑀢𑀺. 𑀲𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀘𑀗𑁆𑀓𑀫𑀫𑀸𑀦𑁄 𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀩𑀮𑀯𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀸𑀤𑀺𑀲𑁂 𑀦𑀸𑀫 𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁂 𑀢𑀸𑀧𑀲𑁂 𑀧𑀲𑁆𑀲𑀦𑁆𑀢𑁂 𑀏𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀭𑀡𑀁 𑀅𑀬𑀼𑀢𑁆𑀢𑀁, 𑀉𑀤𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 ‘‘𑀫𑀸 𑀪𑀸𑀬𑀺, 𑀫𑀸 𑀪𑀸𑀬𑀻’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀉𑀤𑀓𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀕𑀦𑁆𑀢𑁆𑀯𑀸 𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀏𑀓𑀸𑀬 𑀓𑁄𑀝𑀺𑀬𑀸 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀏𑀓𑀯𑁂𑀕𑁂𑀦 𑀢𑀻𑀭𑀁 𑀧𑀢𑁆𑀯𑀸 𑀓𑀼𑀫𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀻𑀭𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀧𑀺 𑀲𑀧𑁆𑀧𑀸𑀤𑀬𑁄 𑀤𑀺𑀲𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀦𑁂𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 ‘‘𑀇𑀫𑁂 𑀤𑀼𑀩𑁆𑀩𑀮𑀢𑀭𑀸’’𑀢𑀺 𑀧𑀞𑀫𑀁 𑀲𑀧𑁆𑀧𑀸𑀤𑀻𑀦𑀁 𑀲𑀭𑀻𑀭𑀁 𑀲𑁂𑀤𑁂𑀢𑁆𑀯𑀸 𑀧𑀘𑁆𑀙𑀸 𑀭𑀸𑀚𑀓𑀼𑀫𑀸𑀭𑀲𑁆𑀲 𑀲𑀭𑀻𑀭𑀁 𑀲𑁂𑀤𑁂𑀢𑁆𑀯𑀸 𑀢𑀫𑁆𑀧𑀺 𑀅𑀭𑁄𑀕𑀁 𑀓𑀢𑁆𑀯𑀸 𑀆𑀳𑀸𑀭𑀁 𑀤𑁂𑀦𑁆𑀢𑁄𑀧𑀺 𑀧𑀞𑀫𑀁 𑀲𑀧𑁆𑀧𑀸𑀤𑀻𑀦𑀁𑀬𑁂𑀯 𑀤𑀢𑁆𑀯𑀸 𑀧𑀘𑁆𑀙𑀸 𑀢𑀲𑁆𑀲 𑀨𑀮𑀸𑀨𑀮𑀸𑀦𑀺 𑀉𑀧𑀦𑀸𑀫𑁂𑀲𑀺. 𑀭𑀸𑀚𑀓𑀼𑀫𑀸𑀭𑁄 ‘‘𑀅𑀬𑀁 𑀓𑀽𑀝𑀢𑀸𑀧𑀲𑁄 𑀫𑀁 𑀭𑀸𑀚𑀓𑀼𑀫𑀸𑀭𑀁 𑀅𑀕𑀡𑁂𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀫𑁆𑀫𑀸𑀦𑀁 𑀓𑀭𑁄𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺.

𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀩𑁆𑀩𑁂𑀲𑀼𑀧𑀺 𑀢𑁂𑀲𑀼 𑀣𑀸𑀫𑀩𑀮𑀧𑁆𑀧𑀢𑁆𑀢𑁂𑀲𑀼 𑀦𑀤𑀺𑀬𑀸 𑀑𑀖𑁂 𑀧𑀘𑁆𑀙𑀺𑀦𑁆𑀦𑁂 𑀲𑀧𑁆𑀧𑁄 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀫𑀳𑀸𑀉𑀧𑀓𑀸𑀭𑁄 𑀓𑀢𑁄, 𑀦 𑀔𑁄 𑀧𑀦𑀸𑀳𑀁 𑀤𑀮𑀺𑀤𑁆𑀤𑁄, 𑀅𑀲𑀼𑀓𑀝𑁆𑀞𑀸𑀦𑁂 𑀫𑁂 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸, 𑀢𑀼𑀫𑁆𑀳𑀸𑀓𑀁 𑀥𑀦𑁂𑀦 𑀓𑀺𑀘𑁆𑀘𑁂 𑀲𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀥𑀦𑀁 𑀢𑀼𑀫𑁆𑀳𑀸𑀓𑀁 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀢𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 ‘𑀤𑀻𑀖𑀸’𑀢𑀺 𑀧𑀓𑁆𑀓𑁄𑀲𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀉𑀦𑁆𑀤𑀽𑀭𑁄𑀧𑀺 𑀢𑀣𑁂𑀯 𑀢𑀸𑀧𑀲𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 ‘𑀉𑀦𑁆𑀤𑀽𑀭𑀸’𑀢𑀺 𑀧𑀓𑁆𑀓𑁄𑀲𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀼𑀯𑀧𑁄𑀢𑀓𑁄 𑀧𑀦 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀥𑀦𑀁 𑀦𑀢𑁆𑀣𑀺, 𑀭𑀢𑁆𑀢𑀲𑀸𑀮𑀻𑀳𑀺 𑀧𑀦 𑀯𑁄 𑀅𑀢𑁆𑀣𑁂 𑀲𑀢𑀺 𑀅𑀲𑀼𑀓𑀁 𑀦𑀸𑀫 𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑀁, 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘𑀲𑀼𑀯𑀸’𑀢𑀺 𑀧𑀓𑁆𑀓𑁄𑀲𑁂𑀬𑁆𑀬𑀸𑀣, 𑀅𑀳𑀁 𑀜𑀸𑀢𑀓𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀅𑀦𑁂𑀓𑀲𑀓𑀝𑀧𑀽𑀭𑀫𑀢𑁆𑀢𑀸 𑀭𑀢𑁆𑀢𑀲𑀸𑀮𑀺𑀬𑁄 𑀆𑀳𑀭𑀸𑀧𑁂𑀢𑁆𑀯𑀸 𑀤𑀸𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀢𑀭𑁄 𑀧𑀦 𑀫𑀺𑀢𑁆𑀢𑀤𑀼𑀩𑁆𑀪𑀻 ‘‘𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀕𑀦𑁆𑀢𑀼𑀁 𑀅𑀬𑀼𑀢𑁆𑀢𑀁, 𑀏𑀯𑀁 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀆𑀕𑀘𑁆𑀙𑁂𑀬𑁆𑀬𑀸𑀣, 𑀅𑀳𑀁 𑀯𑁄 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀕𑀦𑁆𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦𑁂’’𑀢𑀺 𑀧𑀞𑀫𑀁 𑀲𑀧𑁆𑀧𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀤𑀻𑀖𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑀏𑀓𑀯𑀘𑀦𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄, 𑀢𑀸 𑀲𑀩𑁆𑀩𑀸𑀧𑀺 𑀦𑀻𑀳𑀭𑀺𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀯𑀫𑀢𑁆𑀣𑀼, 𑀉𑀧𑁆𑀧𑀦𑁆𑀦𑁂 𑀓𑀺𑀘𑁆𑀘𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀉𑀦𑁆𑀤𑀽𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀤𑁆𑀤𑀫𑀓𑀸𑀲𑀺. 𑀲𑁄𑀧𑀺 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀫𑁆𑀧𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀼𑀯𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀼𑀯𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀭𑀼𑀓𑁆𑀔𑀕𑁆𑀕𑀢𑁄 𑀑𑀢𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀫𑀬𑁆𑀳𑀁 𑀜𑀸𑀢𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀢𑁄 𑀢𑀼𑀫𑁆𑀳𑀸𑀓𑀁 𑀲𑀬𑀁𑀚𑀸𑀢𑀲𑀸𑀮𑀻 𑀆𑀳𑀭𑀸𑀧𑁂𑀫𑀻’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀢𑁆𑀣𑁂 𑀲𑀢𑀺 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀫𑁆𑀧𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀭𑀸𑀚𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 𑀭𑀸𑀚𑀸 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑁄 𑀓𑀽𑀝𑀢𑀸𑀧𑀲𑁄 𑀫𑀫 𑀲𑀦𑁆𑀢𑀺𑀓𑁂 𑀪𑀼𑀜𑁆𑀚𑀺𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑁄 𑀆𑀕𑀢𑁄, 𑀬𑀸𑀯 𑀧𑀭𑀺𑀲𑀫𑀚𑁆𑀛𑁂 𑀅𑀢𑁆𑀢𑀦𑁄 𑀫𑀬𑁆𑀳𑀁 𑀓𑀢𑀕𑀼𑀡𑀁 𑀦𑀧𑁆𑀧𑀓𑀸𑀲𑁂𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀺𑀲𑁂 𑀑𑀮𑁄𑀓𑁂𑀲𑀺. ‘‘𑀓𑀺𑀁 𑀓𑀭𑁄𑀫, 𑀤𑁂𑀯𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀏𑀲 𑀓𑀽𑀝𑀢𑀸𑀧𑀲𑁄 𑀫𑀁 𑀓𑀺𑀜𑁆𑀘𑀺 𑀬𑀸𑀘𑀺𑀢𑀼𑀓𑀸𑀫𑁄 𑀆𑀕𑀘𑁆𑀙𑀢𑀺 𑀫𑀜𑁆𑀜𑁂, 𑀏𑀢𑀲𑁆𑀲 𑀓𑀸𑀴𑀓𑀡𑁆𑀡𑀺𑀢𑀸𑀧𑀲𑀲𑁆𑀲 𑀫𑀁 𑀧𑀲𑁆𑀲𑀺𑀢𑀼𑀁 𑀅𑀤𑀢𑁆𑀯𑀸𑀯 𑀏𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀧𑀳𑀭𑀦𑁆𑀢𑀸 𑀦𑀕𑀭𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀆𑀖𑀸𑀢𑀦𑁂 𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀺𑀢𑁆𑀯𑀸 𑀲𑀭𑀻𑀭𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀺𑀭𑀧𑀭𑀸𑀥𑀁 𑀫𑀳𑀸𑀲𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀧𑀳𑀭𑀦𑁆𑀢𑀸 𑀆𑀖𑀸𑀢𑀦𑀁 𑀦𑁂𑀢𑀼𑀁 𑀆𑀭𑀪𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀳𑀝𑀧𑀳𑀝𑀝𑁆𑀞𑀸𑀦𑁂 ‘‘𑀅𑀫𑁆𑀫, 𑀢𑀸𑀢𑀸’’𑀢𑀺 𑀅𑀓𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁩. ‘‘𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀼, 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄, 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄’’𑀢𑀺.

𑀢𑀢𑁆𑀣 𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀽𑀢𑀺 𑀅𑀯𑀺𑀢𑀣𑀫𑁂𑀯 𑀓𑀺𑀭 𑀏𑀯𑀁 𑀯𑀤𑀦𑁆𑀢𑀺. 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥𑀸𑀢𑀺 𑀇𑀥𑁂𑀓𑀘𑁆𑀘𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑀸. 𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄𑀢𑀺 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀁 𑀲𑀼𑀓𑁆𑀔𑀤𑀸𑀭𑀼𑀁 𑀦𑀺𑀧𑁆𑀮𑀯𑀺𑀢𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀣𑀮𑁂 𑀞𑀧𑀺𑀢𑀁 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄. 𑀏𑀯𑀜𑁆𑀳𑀺 𑀯𑀤𑀫𑀸𑀦𑀸 𑀢𑁂 𑀧𑀼𑀭𑀺𑀲𑀸 𑀲𑀘𑁆𑀘𑀁 𑀓𑀺𑀭 𑀯𑀤𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀢𑀜𑁆𑀳𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀁 𑀧𑀘𑀦𑀢𑁆𑀣𑀸𑀬, 𑀲𑀻𑀢𑀸𑀢𑀼𑀭𑀸𑀦𑀁 𑀯𑀺𑀲𑀺𑀩𑁆𑀩𑀦𑀢𑁆𑀣𑀸𑀬, 𑀅𑀜𑁆𑀜𑁂𑀲𑀫𑁆𑀧𑀺 𑀘 𑀧𑀭𑀺𑀲𑁆𑀲𑀬𑀸𑀦𑀁 𑀳𑀭𑀡𑀢𑁆𑀣𑀸𑀬 𑀉𑀧𑀓𑀸𑀭𑀁 𑀳𑁄𑀢𑀺. 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄𑀢𑀺 𑀏𑀓𑀘𑁆𑀘𑁄 𑀧𑀦 𑀫𑀺𑀢𑁆𑀢𑀤𑀼𑀩𑁆𑀪𑀻 𑀅𑀓𑀢𑀜𑁆𑀜𑀽 𑀧𑀸𑀧𑀧𑀼𑀭𑀺𑀲𑁄 𑀑𑀖𑁂𑀦 𑀯𑀼𑀬𑁆𑀳𑀫𑀸𑀦𑁄 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀉𑀢𑁆𑀢𑀸𑀭𑀺𑀢𑁄 𑀦 𑀢𑁆𑀯𑁂𑀯 𑀲𑁂𑀬𑁆𑀬𑁄. 𑀢𑀣𑀸 𑀳𑀺 𑀅𑀳𑀁 𑀇𑀫𑀁 𑀧𑀸𑀧𑀧𑀼𑀭𑀺𑀲𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀇𑀫𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀆𑀳𑀭𑀺𑀦𑁆𑀢𑀺. 𑀏𑀯𑀁 𑀧𑀳𑀝𑀧𑀳𑀝𑀝𑁆𑀞𑀸𑀦𑁂 𑀇𑀫𑀁 𑀕𑀸𑀣𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀧𑀡𑁆𑀟𑀺𑀢𑀧𑀼𑀭𑀺𑀲𑀸, 𑀢𑁂 𑀆𑀳𑀁𑀲𑀼 ‘‘𑀓𑀺𑀁 𑀧𑀦, 𑀪𑁄 𑀧𑀩𑁆𑀩𑀚𑀺𑀢, 𑀢𑀬𑀸 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀅𑀢𑁆𑀣𑀺 𑀓𑁄𑀘𑀺 𑀕𑀼𑀡𑁄 𑀓𑀢𑁄’’𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀯𑀫𑀺𑀫𑀁 𑀫𑀳𑁄𑀖𑀢𑁄 𑀉𑀢𑁆𑀢𑀸𑀭𑁂𑀦𑁆𑀢𑁄 𑀅𑀳𑀫𑁂𑀯 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀅𑀓𑀸𑀲𑀺𑀁, ‘𑀦 𑀯𑀢 𑀫𑁂 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀓𑀢’𑀦𑁆𑀢𑀺 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀦𑀕𑀭𑀯𑀸𑀲𑀺𑀦𑁄 ‘‘𑀲𑁆𑀯𑀸𑀬𑀁 𑀫𑀺𑀢𑁆𑀢𑀤𑀼𑀩𑁆𑀪𑀻 𑀭𑀸𑀚𑀸 𑀏𑀯𑀁 𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑁄 𑀚𑀻𑀯𑀺𑀢𑀤𑀸𑀬𑀓𑀲𑁆𑀲 𑀕𑀼𑀡𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀯𑀼𑀟𑁆𑀠𑀺, 𑀕𑀡𑁆𑀳𑀣 𑀦’’𑀦𑁆𑀢𑀺 𑀓𑀼𑀧𑀺𑀢𑀸 𑀲𑀫𑀦𑁆𑀢𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀲𑀼𑀲𑀢𑁆𑀢𑀺𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀺𑀧𑁆𑀧𑀳𑀸𑀭𑁂𑀳𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀫𑁂𑀯 𑀦𑀁 𑀖𑀸𑀢𑁂𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀧𑀭𑀺𑀔𑀸𑀧𑀺𑀝𑁆𑀞𑁂 𑀙𑀟𑁆𑀟𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀲𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀲𑀧𑁆𑀧𑀸𑀤𑀬𑁄 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀧𑁆𑀧𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀤𑀻𑀖𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑀧𑁆𑀧𑁄 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀤𑀁 𑀢𑁂 𑀲𑀸𑀫𑀺 𑀥𑀦𑀁 𑀕𑀡𑁆𑀳𑀸’’𑀢𑀺 𑀆𑀳. 𑀭𑀸𑀚𑀸 𑀘𑀢𑁆𑀢𑀸𑀮𑀻𑀲𑀳𑀺𑀭𑀜𑁆𑀜𑀓𑁄𑀝𑀺𑀥𑀦𑀁 𑀅𑀫𑀘𑁆𑀘𑁂 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀉𑀦𑁆𑀤𑀽𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀉𑀦𑁆𑀤𑀽𑀭𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀺𑀁𑀲𑀓𑁄𑀝𑀺𑀥𑀦𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀭𑀸𑀚𑀸 𑀢𑀫𑁆𑀧𑀺 𑀅𑀫𑀘𑁆𑀘𑁂 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑀼𑀯𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀲𑀼𑀯𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀲𑀸𑀫𑀺, 𑀲𑀸𑀮𑀺𑀁 𑀆𑀳𑀭𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀮𑀻𑀳𑀺 𑀅𑀢𑁆𑀣𑁂 𑀲𑀢𑀺 𑀆𑀳𑀭𑀺𑀲𑁆𑀲𑀲𑀺, 𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀲𑀢𑁆𑀢𑀢𑀺𑀬𑀸 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀢𑁂 𑀢𑀬𑁄𑀧𑀺 𑀚𑀦𑁂 𑀕𑀸𑀳𑀸𑀧𑁂𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀯𑀭𑁂 𑀫𑀳𑀸𑀢𑀮𑀁 𑀆𑀭𑀼𑀬𑁆𑀳𑀁 𑀥𑀦𑀁 𑀲𑀗𑁆𑀕𑁄𑀧𑁂𑀢𑁆𑀯𑀸 𑀲𑀧𑁆𑀧𑀲𑁆𑀲 𑀯𑀲𑀦𑀢𑁆𑀣𑀸𑀬 𑀲𑀼𑀯𑀡𑁆𑀡𑀦𑀸𑀴𑀺𑀁, 𑀉𑀦𑁆𑀤𑀽𑀭𑀲𑁆𑀲 𑀨𑀮𑀺𑀓𑀕𑀼𑀳𑀁, 𑀲𑀼𑀯𑀲𑁆𑀲 𑀲𑀼𑀯𑀡𑁆𑀡𑀧𑀜𑁆𑀚𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀧𑁆𑀧𑀲𑁆𑀲 𑀘 𑀲𑀼𑀯𑀲𑁆𑀲 𑀘 𑀪𑁄𑀚𑀦𑀢𑁆𑀣𑀸𑀬 𑀤𑁂𑀯𑀲𑀺𑀓𑀁 𑀓𑀜𑁆𑀘𑀦𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂, 𑀉𑀦𑁆𑀤𑀽𑀭𑀲𑁆𑀲 𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑁂 𑀤𑀸𑀧𑁂𑀲𑀺, 𑀤𑀸𑀦𑀸𑀤𑀻𑀦𑀺 𑀘 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀏𑀯𑀁 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀬𑀸𑀯𑀚𑀻𑀯𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀺𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑁂 𑀬𑀣𑀸𑀓𑀫𑁆𑀫𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀝𑁆𑀞𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀧𑁆𑀧𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀉𑀦𑁆𑀤𑀽𑀭𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀲𑀼𑀯𑁄 𑀆𑀦𑀦𑁆𑀤𑁄, 𑀧𑀘𑁆𑀙𑀸 𑀭𑀚𑁆𑀚𑀧𑁆𑀧𑀢𑁆𑀢𑁄 𑀥𑀫𑁆𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀘𑁆𑀘𑀁𑀓𑀺𑀭𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁭𑁪] 𑁪. 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀲𑀸𑀥𑀽 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀤𑀓𑀓𑀮𑀳𑁂 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀫𑀳𑀸𑀯𑀺𑀦𑀸𑀲𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀜𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀭𑁄𑀳𑀺𑀡𑀻𑀦𑀤𑀺𑀬𑀸 𑀉𑀧𑀭𑀺 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀻𑀮𑀭𑀁𑀲𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀜𑀸𑀢𑀓𑁂 𑀲𑀁𑀯𑁂𑀚𑁂𑀢𑁆𑀯𑀸 𑀆𑀓𑀸𑀲𑀸 𑀑𑀭𑀼𑀬𑁆𑀳 𑀦𑀤𑀻𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀓𑀮𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀜𑀸𑀢𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚𑀸, 𑀢𑀼𑀫𑁆𑀳𑁂 𑀜𑀸𑀢𑀓𑀸, 𑀜𑀸𑀢𑀓𑁂𑀳𑀺 𑀦𑀸𑀫 𑀲𑀫𑀕𑁆𑀕𑁂𑀳𑀺 𑀲𑀫𑁆𑀫𑁄𑀤𑀫𑀸𑀦𑁂𑀳𑀺 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀜𑀸𑀢𑀓𑀸𑀦𑀜𑁆𑀳𑀺 𑀲𑀸𑀫𑀕𑁆𑀕𑀺𑀬𑀸 𑀲𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺, 𑀢𑀺𑀝𑁆𑀞𑀦𑁆𑀢𑀼 𑀢𑀸𑀯 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀘𑁂𑀢𑀦𑀸𑀦𑀁 𑀭𑀼𑀓𑁆𑀔𑀸𑀦𑀫𑁆𑀧𑀺 𑀲𑀸𑀫𑀕𑁆𑀕𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀫𑀳𑀸𑀯𑀸𑀢𑁄 𑀲𑀸𑀮𑀯𑀦𑀁 𑀧𑀳𑀭𑀺, 𑀢𑀲𑁆𑀲 𑀧𑀦 𑀲𑀸𑀮𑀯𑀦𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀕𑀘𑁆𑀙𑀕𑀼𑀫𑁆𑀩𑀮𑀢𑀸𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀏𑀓𑀭𑀼𑀓𑁆𑀔𑀫𑁆𑀧𑀺 𑀧𑀸𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀢𑁆𑀣𑀓𑀫𑀢𑁆𑀣𑀓𑁂𑀦𑁂𑀯 𑀅𑀕𑀫𑀸𑀲𑀺. 𑀏𑀓𑀁 𑀧𑀦 𑀅𑀗𑁆𑀕𑀡𑁂 𑀞𑀺𑀢𑀁 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀫𑁆𑀧𑀺 𑀫𑀳𑀸𑀭𑀼𑀓𑁆𑀔𑀁 𑀅𑀜𑁆𑀜𑁂𑀳𑀺 𑀭𑀼𑀓𑁆𑀔𑁂𑀳𑀺 𑀅𑀲𑀫𑁆𑀩𑀦𑁆𑀥𑀢𑁆𑀢𑀸 𑀉𑀫𑁆𑀫𑀽𑀮𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀼𑀫𑁆𑀳𑁂𑀳𑀺𑀧𑀺 𑀲𑀫𑀕𑁆𑀕𑁂𑀳𑀺 𑀲𑀫𑁆𑀫𑁄𑀤𑀫𑀸𑀦𑁂𑀳𑀺 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀘𑀯𑀺, 𑀲𑀓𑁆𑀓𑁄 𑀅𑀜𑁆𑀜𑀁 𑀯𑁂𑀲𑁆𑀲𑀯𑀡𑀁 𑀞𑀧𑁂𑀲𑀺. 𑀏𑀢𑀲𑁆𑀫𑀺𑀁 𑀯𑁂𑀲𑁆𑀲𑀯𑀡𑁂 𑀧𑀭𑀺𑀯𑀢𑁆𑀢𑁂 𑀧𑀘𑁆𑀙𑀸 𑀦𑀺𑀩𑁆𑀩𑀢𑁆𑀢𑀯𑁂𑀲𑁆𑀲𑀯𑀡𑁄 ‘‘𑀭𑀼𑀓𑁆𑀔𑀕𑀘𑁆𑀙𑀕𑀼𑀫𑁆𑀩𑀮𑀢𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀼𑀘𑁆𑀘𑀦𑀝𑁆𑀞𑀸𑀦𑁂 𑀯𑀺𑀫𑀸𑀦𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀲𑀸𑀮𑀯𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀜𑀸𑀢𑀓𑁂 𑀆𑀳 ‘‘𑀢𑀼𑀫𑁆𑀳𑁂 𑀯𑀺𑀫𑀸𑀦𑀸𑀦𑀺 𑀕𑀡𑁆𑀳𑀦𑁆𑀢𑀸 𑀅𑀗𑁆𑀕𑀡𑁂 𑀞𑀺𑀢𑀭𑀼𑀓𑁆𑀔𑁂𑀲𑀼 𑀫𑀸 𑀕𑀡𑁆𑀳𑀣, 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀮𑀯𑀦𑁂 𑀫𑀬𑀸 𑀕𑀳𑀺𑀢𑀯𑀺𑀫𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀯𑀺𑀫𑀸𑀦𑀸𑀦𑀺 𑀕𑀡𑁆𑀳𑀣𑀸’’𑀢𑀺. 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀓𑀭𑀸 𑀧𑀡𑁆𑀟𑀺𑀢𑀤𑁂𑀯𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀫𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀯𑀺𑀫𑀸𑀦𑀸𑀦𑀺 𑀕𑀡𑁆𑀳𑀺𑀁𑀲𑀼. 𑀅𑀧𑀡𑁆𑀟𑀺𑀢𑀸 𑀧𑀦 𑀤𑁂𑀯𑀢𑀸 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑁄 𑀅𑀭𑀜𑁆𑀜𑀯𑀺𑀫𑀸𑀦𑁂𑀳𑀺, 𑀫𑀬𑀁 𑀫𑀦𑀼𑀲𑁆𑀲𑀧𑀣𑁂 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀤𑁆𑀯𑀸𑀭𑁂𑀲𑀼 𑀯𑀺𑀫𑀸𑀦𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫. 𑀕𑀸𑀫𑀸𑀤𑀬𑁄 𑀳𑀺 𑀉𑀧𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑀸 𑀤𑁂𑀯𑀢𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀅𑀗𑁆𑀕𑀡𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀫𑀳𑀸𑀭𑀼𑀓𑁆𑀔𑁂𑀲𑀼 𑀯𑀺𑀫𑀸𑀦𑀸𑀦𑀺 𑀕𑀡𑁆𑀳𑀺𑀁𑀲𑀼.

𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀫𑀳𑀢𑀻 𑀯𑀸𑀢𑀯𑀼𑀝𑁆𑀞𑀺 𑀉𑀧𑁆𑀧𑀚𑁆𑀚𑀺. 𑀯𑀸𑀢𑀲𑁆𑀲 𑀅𑀢𑀺𑀩𑀮𑀯𑀢𑀸𑀬 𑀤𑀴𑁆𑀳𑀫𑀽𑀮𑀸 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑀸𑀧𑀺 𑀲𑀁𑀪𑀕𑁆𑀕𑀲𑀸𑀔𑀸𑀯𑀺𑀝𑀧𑀸 𑀲𑀫𑀽𑀮𑀸 𑀦𑀺𑀧𑀢𑀺𑀁𑀲𑀼. 𑀢𑀁 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀦𑁂𑀦 𑀞𑀺𑀢𑀁 𑀲𑀸𑀮𑀯𑀦𑀁 𑀧𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀳𑀭𑀦𑁆𑀢𑁄 𑀏𑀓𑀭𑀼𑀓𑁆𑀔𑀫𑁆𑀧𑀺 𑀧𑀸𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀪𑀕𑁆𑀕𑀯𑀺𑀫𑀸𑀦𑀸 𑀤𑁂𑀯𑀢𑀸 𑀦𑀺𑀧𑁆𑀧𑀝𑀺𑀲𑀭𑀡𑀸 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀲𑀸𑀮𑀯𑀦𑀤𑁂𑀯𑀢𑀸𑀦𑀁 𑀓𑀣𑀬𑀺𑀁𑀲𑀼. 𑀢𑀸 𑀢𑀸𑀲𑀁 𑀏𑀯𑀁 𑀆𑀕𑀢𑀪𑀸𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀘𑁆𑀘𑀬𑀝𑁆𑀞𑀸𑀦𑀁 𑀕𑀢𑀸 𑀦𑀸𑀫 𑀏𑀯𑀭𑀽𑀧𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁪. ‘‘𑀲𑀸𑀥𑀽 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻, 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸;

𑀯𑀸𑀢𑁄 𑀯𑀳𑀢𑀺 𑀏𑀓𑀝𑁆𑀞𑀁, 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺’’𑀦𑁆𑀢𑀺.

𑀢𑀢𑁆𑀣 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻𑀢𑀺 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀬 𑀢𑀢𑀼𑀢𑁆𑀢𑀭𑀺 𑀲𑀢𑀲𑀳𑀲𑁆𑀲𑀫𑁆𑀧𑀺 𑀲𑀫𑁆𑀩𑀳𑀼𑀮𑀸 𑀦𑀸𑀫, 𑀏𑀯𑀁 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀸 𑀜𑀸𑀢𑀓𑀸. 𑀲𑀸𑀥𑀽𑀢𑀺 𑀲𑁄𑀪𑀦𑀸 𑀧𑀲𑀢𑁆𑀣𑀸, 𑀧𑀭𑁂𑀳𑀺 𑀅𑀧𑁆𑀧𑀥𑀁𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸𑀢𑀺 𑀢𑀺𑀝𑁆𑀞𑀦𑁆𑀢𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀭𑀜𑁆𑀜𑁂 𑀚𑀸𑀢𑀭𑀼𑀓𑁆𑀔𑀸𑀧𑀺 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑁂𑀦 𑀞𑀺𑀢𑀸 𑀲𑀸𑀥𑀼𑀬𑁂𑀯. 𑀭𑀼𑀓𑁆𑀔𑀸𑀦𑀫𑁆𑀧𑀺 𑀳𑀺 𑀲𑀧𑀘𑁆𑀘𑀬𑀪𑀸𑀯𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀯𑀸𑀢𑁄 𑀯𑀳𑀢𑀺 𑀏𑀓𑀝𑁆𑀞𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁄 𑀯𑀸𑀢𑁄 𑀯𑀸𑀬𑀦𑁆𑀢𑁄 𑀅𑀗𑁆𑀕𑀡𑀝𑁆𑀞𑀸𑀦𑁂 𑀞𑀺𑀢𑀁 𑀏𑀓𑀝𑁆𑀞𑀁 𑀏𑀓𑀓𑀫𑁂𑀯 𑀞𑀺𑀢𑀁 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺𑀁 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀁 𑀫𑀳𑀸𑀭𑀼𑀓𑁆𑀔𑀫𑁆𑀧𑀺 𑀯𑀳𑀢𑀺, 𑀉𑀫𑁆𑀫𑀽𑀮𑁂𑀢𑁆𑀯𑀸 𑀧𑀸𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀆𑀬𑀼𑀓𑁆𑀔𑀬𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸𑀧𑀺 ‘‘𑀏𑀯𑀁, 𑀫𑀳𑀸𑀭𑀸𑀚𑀸, 𑀜𑀸𑀢𑀓𑀸𑀦𑀁 𑀢𑀸𑀯 𑀲𑀸𑀫𑀕𑁆𑀕𑀺𑀬𑁂𑀯 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀺𑀬𑀲𑀁𑀯𑀸𑀲𑀫𑁂𑀯 𑀯𑀲𑀣𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁂𑀯𑀢𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀧𑀡𑁆𑀟𑀺𑀢𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁭𑁫] 𑁫. 𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸

𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑀸 𑀯𑀲𑁆𑀲𑀸𑀧𑀺𑀢𑀯𑀲𑁆𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀓𑁄𑀲𑀮𑀭𑀝𑁆𑀞𑁂 𑀤𑁂𑀯𑁄 𑀦 𑀯𑀲𑁆𑀲𑀺, 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀲𑀭𑀸𑀦𑀺 𑀲𑀼𑀲𑁆𑀲𑀦𑁆𑀢𑀺. 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑁂 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀸𑀧𑀺 𑀉𑀤𑀓𑀁 𑀙𑀺𑀚𑁆𑀚𑀺. 𑀓𑀮𑀮𑀕𑀳𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀫𑀘𑁆𑀙𑀓𑀘𑁆𑀙𑀧𑁂 𑀓𑀸𑀓𑀓𑀼𑀮𑀮𑀸𑀤𑀬𑁄 𑀓𑀡𑀬𑀕𑁆𑀕𑀲𑀤𑀺𑀲𑁂𑀳𑀺 𑀢𑀼𑀡𑁆𑀟𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑁂 𑀔𑀸𑀤𑀦𑁆𑀢𑀺.

𑀲𑀢𑁆𑀣𑀸 𑀫𑀘𑁆𑀙𑀓𑀘𑁆𑀙𑀧𑀸𑀦𑀁 𑀢𑀁 𑀩𑁆𑀬𑀲𑀦𑀁 𑀤𑀺𑀲𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀉𑀲𑁆𑀲𑀸𑀳𑀺𑀢𑀳𑀤𑀬𑁄 ‘‘𑀅𑀚𑁆𑀚 𑀫𑀬𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀩𑀼𑀤𑁆𑀥𑀮𑀻𑀮𑀸𑀬 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀸𑀯𑀢𑁆𑀣𑀺𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁄 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀸 𑀲𑁄𑀧𑀸𑀦𑁂 𑀞𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 ‘‘𑀆𑀦𑀦𑁆𑀤, 𑀉𑀤𑀓𑀲𑀸𑀝𑀺𑀓𑀁 𑀆𑀳𑀭, 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀁 𑀉𑀤𑀓𑀁 𑀙𑀺𑀦𑁆𑀦𑀁, 𑀓𑀮𑀮𑀫𑀢𑁆𑀢𑀫𑁂𑀯 𑀅𑀯𑀲𑀺𑀝𑁆𑀞’’𑀦𑁆𑀢𑀺? ‘‘𑀆𑀦𑀦𑁆𑀤, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀫𑀳𑀦𑁆𑀢𑀁, 𑀆𑀳𑀭 𑀢𑁆𑀯𑀁 𑀉𑀤𑀓𑀲𑀸𑀝𑀺𑀓’’𑀦𑁆𑀢𑀺. 𑀣𑁂𑀭𑁄 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀢𑁆𑀣𑀸 𑀏𑀓𑁂𑀦𑀦𑁆𑀢𑁂𑀦 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑁂𑀦𑀦𑁆𑀢𑁂𑀦 𑀲𑀭𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀧𑀸𑀦𑁂 𑀅𑀝𑁆𑀞𑀸𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀭𑀸𑀚𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀲𑀢𑁆𑀣𑀸 ‘𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀥𑀼𑀭𑀲𑁄𑀧𑀸𑀦𑁂 𑀞𑀺𑀢𑁄, 𑀔𑀺𑀧𑁆𑀧𑀁 𑀲𑀓𑀮𑀓𑁄𑀲𑀮𑀭𑀝𑁆𑀞𑀁 𑀏𑀓𑀫𑁂𑀖𑀁 𑀓𑀢𑁆𑀯𑀸 𑀯𑀲𑁆𑀲𑀸𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀁 𑀯𑀮𑀸𑀳𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑁂𑀖𑀕𑀻𑀢𑀁 𑀕𑀸𑀬𑀦𑁆𑀢𑁄 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀅𑀪𑀺𑀫𑀼𑀔𑁄 𑀧𑀓𑁆𑀔𑀦𑁆𑀤𑀺. 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂 𑀔𑀮𑀫𑀡𑁆𑀟𑀮𑀫𑀢𑁆𑀢𑀁 𑀏𑀓𑀁 𑀫𑁂𑀖𑀧𑀝𑀮𑀁 𑀉𑀝𑁆𑀞𑀸𑀬 𑀲𑀢𑀧𑀝𑀮𑀁 𑀲𑀳𑀲𑁆𑀲𑀧𑀝𑀮𑀁 𑀳𑀼𑀢𑁆𑀯𑀸 𑀅𑀪𑀺𑀢𑁆𑀣𑀦𑀦𑁆𑀢𑀁 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀦𑁆𑀢𑀁 𑀅𑀥𑁄𑀫𑀼𑀔𑀁 𑀞𑀧𑀺𑀢𑀉𑀤𑀓𑀓𑀼𑀫𑁆𑀪𑀸𑀓𑀸𑀭𑁂𑀦 𑀯𑀲𑁆𑀲𑀫𑀸𑀦𑀁 𑀲𑀓𑀮𑀓𑁄𑀲𑀮𑀭𑀝𑁆𑀞𑀁 𑀫𑀳𑁄𑀖𑁂𑀦 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀺. 𑀤𑁂𑀯𑁄 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀯𑀲𑁆𑀲𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀁 𑀧𑀽𑀭𑁂𑀲𑀺, 𑀥𑀼𑀭𑀲𑁄𑀧𑀸𑀦𑀁 𑀆𑀳𑀘𑁆𑀘 𑀉𑀤𑀓𑀁 𑀅𑀝𑁆𑀞𑀸𑀲𑀺.

𑀲𑀢𑁆𑀣𑀸 𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀉𑀝𑁆𑀞𑀸𑀬 𑀫𑀡𑀺𑀲𑁄𑀧𑀸𑀦𑀨𑀮𑀓𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀤𑀲𑀩𑀮𑀲𑁆𑀲 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀢𑁆𑀢𑀺𑀁, 𑀯𑀺𑀯𑀺𑀥𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀦𑀸𑀦𑀸𑀚𑀮𑀸𑀲𑀬𑁂𑀲𑀼 𑀲𑀼𑀲𑁆𑀲𑀦𑁆𑀢𑁂𑀲𑀼 𑀫𑀘𑁆𑀙𑀓𑀘𑁆𑀙𑀧𑁂𑀲𑀼 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 ‘𑀫𑀳𑀸𑀚𑀦𑀁 𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’𑀢𑀺 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀬𑀸 𑀥𑀼𑀭𑀲𑁄𑀧𑀸𑀦𑁂 𑀞𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀲𑀓𑀮𑀓𑁄𑀲𑀮𑀭𑀝𑁆𑀞𑀁 𑀫𑀳𑁄𑀖𑁂𑀦 𑀑𑀧𑀺𑀮𑀸𑀧𑁂𑀦𑁆𑀢𑁄 𑀯𑀺𑀬 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄’’𑀢𑀺 𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀫𑀳𑀸𑀚𑀦𑁂 𑀓𑀺𑀮𑀫𑀦𑁆𑀢𑁂 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀺, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀘𑁆𑀙𑀭𑀸𑀚𑀓𑀸𑀮𑁂𑀧𑀺 𑀯𑀲𑁆𑀲𑀸𑀧𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀇𑀫𑀲𑁆𑀫𑀺𑀁𑀬𑁂𑀯 𑀓𑁄𑀲𑀮𑀭𑀝𑁆𑀞𑁂 𑀇𑀫𑀺𑀲𑁆𑀲𑀸 𑀲𑀸𑀯𑀢𑁆𑀣𑀺𑀬𑀸 𑀇𑀫𑀲𑁆𑀫𑀺𑀁𑀬𑁂𑀯 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀝𑁆𑀞𑀸𑀦𑁂 𑀏𑀓𑀸 𑀯𑀮𑁆𑀮𑀺𑀕𑀳𑀦𑀧𑀭𑀺𑀓𑁆𑀔𑀺𑀢𑁆𑀢𑀸 𑀓𑀦𑁆𑀤𑀭𑀸 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀘𑁆𑀙𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀘𑁆𑀙𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀧𑀝𑀺𑀯𑀲𑀢𑀺. 𑀬𑀣𑀸 𑀧𑀦 𑀇𑀤𑀸𑀦𑀺, 𑀏𑀯𑀫𑁂𑀯 𑀢𑀤𑀸𑀧𑀺 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀤𑁂𑀯𑁄 𑀦 𑀯𑀲𑁆𑀲𑀺, 𑀫𑀦𑀼𑀲𑁆𑀲𑀸𑀦𑀁 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀺𑀁𑀲𑀼, 𑀯𑀸𑀧𑀺𑀢𑀴𑀸𑀓𑀓𑀦𑁆𑀤𑀭𑀸𑀤𑀻𑀲𑀼 𑀉𑀤𑀓𑀁 𑀙𑀺𑀚𑁆𑀚𑀺, 𑀫𑀘𑁆𑀙𑀓𑀘𑁆𑀙𑀧𑀸 𑀓𑀮𑀮𑀕𑀳𑀦𑀁 𑀧𑀯𑀺𑀲𑀺𑀁𑀲𑀼. 𑀇𑀫𑀺𑀲𑁆𑀲𑀸𑀧𑀺 𑀓𑀦𑁆𑀤𑀭𑀸𑀬 𑀫𑀘𑁆𑀙𑀓𑀘𑁆𑀙𑀧𑀸 𑀓𑀮𑀮𑀕𑀳𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀬𑀺𑀁𑀲𑀼. 𑀓𑀸𑀓𑀸𑀤𑀬𑁄 𑀢𑀼𑀡𑁆𑀟𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀔𑀸𑀤𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀢𑀁 𑀩𑁆𑀬𑀲𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀢𑁂𑀲𑀁 𑀤𑀼𑀓𑁆𑀔𑀁 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀫𑁄𑀘𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀜𑀸𑀢𑀓𑁂 𑀫𑀭𑀡𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀓𑀸𑀴𑀯𑀡𑁆𑀡𑀁 𑀓𑀤𑁆𑀤𑀫𑀁 𑀤𑁆𑀯𑀺𑀥𑀸 𑀯𑀺𑀬𑀽𑀳𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀚𑀦𑀭𑀼𑀓𑁆𑀔𑀲𑀸𑀭𑀖𑀝𑀺𑀓𑀯𑀡𑁆𑀡𑁄 𑀫𑀳𑀸𑀫𑀘𑁆𑀙𑁄 𑀲𑀼𑀥𑁄𑀢𑀮𑁄𑀳𑀺𑀢𑀗𑁆𑀕𑀫𑀡𑀺𑀕𑀼𑀴𑀲𑀤𑀺𑀲𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀧𑀚𑁆𑀚𑀼𑀦𑁆𑀦𑀤𑁂𑀯𑀭𑀸𑀚𑀲𑁆𑀲 𑀲𑀤𑁆𑀤𑀁 𑀤𑀢𑁆𑀯𑀸 ‘‘𑀪𑁄 𑀧𑀚𑁆𑀚𑀼𑀦𑁆𑀦, 𑀅𑀳𑀁 𑀜𑀸𑀢𑀓𑁂 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀺𑀢𑁄, 𑀢𑁆𑀯𑀁 𑀫𑀬𑀺 𑀲𑀻𑀮𑀯𑀦𑁆𑀢𑁂 𑀓𑀺𑀮𑀫𑀦𑁆𑀢𑁂 𑀓𑀲𑁆𑀫𑀸 𑀤𑁂𑀯𑀁 𑀦 𑀯𑀲𑁆𑀲𑀸𑀧𑁂𑀲𑀺? 𑀫𑀬𑀸 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀔𑀸𑀤𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀡𑁆𑀟𑀼𑀮𑀧𑁆𑀧𑀫𑀸𑀡𑀫𑁆𑀧𑀺 𑀫𑀘𑁆𑀙𑀁 𑀆𑀤𑀺𑀁 𑀓𑀢𑁆𑀯𑀸 𑀔𑀸𑀤𑀺𑀢𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺, 𑀅𑀜𑁆𑀜𑁄𑀧𑀺 𑀫𑁂 𑀧𑀸𑀡𑁄 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑀺𑀢𑀧𑀼𑀩𑁆𑀩𑁄, 𑀇𑀫𑀺𑀦𑀸 𑀲𑀘𑁆𑀘𑁂𑀦 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀁 𑀫𑁂 𑀤𑀼𑀓𑁆𑀔𑀸 𑀫𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀭𑀺𑀘𑀸𑀭𑀓𑀘𑁂𑀝𑀓𑀁 𑀆𑀡𑀸𑀧𑁂𑀦𑁆𑀢𑁄 𑀯𑀺𑀬 𑀧𑀚𑁆𑀚𑀼𑀦𑁆𑀦𑀤𑁂𑀯𑀭𑀸𑀚𑀸𑀦𑀁 𑀆𑀮𑀧𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁫. ‘‘𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦, 𑀦𑀺𑀥𑀺𑀁 𑀓𑀸𑀓𑀲𑁆𑀲 𑀦𑀸𑀲𑀬;

𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺, 𑀫𑀜𑁆𑀘 𑀲𑁄𑀓𑀸 𑀧𑀫𑁄𑀘𑀬𑀸’’𑀢𑀺.

𑀢𑀢𑁆𑀣 𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦𑀸𑀢𑀺 𑀧𑀚𑁆𑀚𑀼𑀦𑁆𑀦𑁄 𑀯𑀼𑀘𑁆𑀘𑀢𑀺 𑀫𑁂𑀖𑁄, 𑀅𑀬𑀁 𑀧𑀦 𑀫𑁂𑀖𑀯𑀲𑁂𑀦 𑀮𑀤𑁆𑀥𑀦𑀸𑀫𑀁 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀤𑁂𑀯𑁄 𑀦𑀸𑀫 𑀅𑀦𑀪𑀺𑀢𑁆𑀣𑀦𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀅𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀯𑀲𑁆𑀲𑀦𑁆𑀢𑁄𑀧𑀺 𑀦 𑀲𑁄𑀪𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀅𑀪𑀺𑀢𑁆𑀣𑀦𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀯𑀲𑁆𑀲𑀸𑀧𑁂𑀳𑀻𑀢𑀺. 𑀦𑀺𑀥𑀺𑀁 𑀓𑀸𑀓𑀲𑁆𑀲 𑀦𑀸𑀲𑀬𑀸𑀢𑀺 𑀓𑀸𑀓𑀸 𑀓𑀮𑀮𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁂 𑀫𑀘𑁆𑀙𑁂 𑀢𑀼𑀡𑁆𑀟𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀦𑁆𑀢𑁄𑀓𑀮𑀮𑁂 𑀫𑀘𑁆𑀙𑀸 ‘‘𑀦𑀺𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀓𑀸𑀓𑀲𑀗𑁆𑀖𑀲𑁆𑀲 𑀦𑀺𑀥𑀺𑀁 𑀤𑁂𑀯𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀉𑀤𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀸𑀲𑁂𑀳𑀻𑀢𑀺. 𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀻𑀢𑀺 𑀓𑀸𑀓𑀲𑀗𑁆𑀖𑁄 𑀇𑀫𑀺𑀲𑁆𑀲𑀸 𑀓𑀦𑁆𑀤𑀭𑀸𑀬 𑀉𑀤𑀓𑁂𑀦 𑀧𑀼𑀡𑁆𑀡𑀸𑀬 𑀫𑀘𑁆𑀙𑁂 𑀅𑀮𑀪𑀫𑀸𑀦𑁄 𑀲𑁄𑀘𑀺𑀲𑁆𑀲𑀢𑀺, 𑀢𑀁 𑀓𑀸𑀓𑀕𑀡𑀁 𑀢𑁆𑀯𑀁 𑀇𑀫𑀁 𑀓𑀦𑁆𑀤𑀭𑀁 𑀧𑀽𑀭𑁂𑀦𑁆𑀢𑁄 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺, 𑀲𑁄𑀓𑀲𑁆𑀲𑀢𑁆𑀣𑀸𑀬 𑀫𑀘𑁆𑀙𑀲𑁆𑀲 𑀅𑀲𑁆𑀲𑀸𑀲𑀢𑁆𑀣𑀸𑀬 𑀤𑁂𑀯𑀁 𑀯𑀲𑁆𑀲𑀸𑀧𑁂𑀳𑀺. 𑀬𑀣𑀸 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀁 𑀲𑁄𑀓𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄, 𑀫𑀜𑁆𑀘 𑀲𑁄𑀓𑀸 𑀧𑀫𑁄𑀘𑀬𑀸𑀢𑀺 𑀏𑀢𑁆𑀣 𑀘-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀫𑀜𑁆𑀘 𑀫𑀫 𑀜𑀸𑀢𑀓𑁂 𑀘 𑀲𑀩𑁆𑀩𑁂𑀯 𑀇𑀫𑀫𑁆𑀳𑀸 𑀫𑀭𑀡𑀲𑁄𑀓𑀸 𑀫𑁄𑀘𑁂𑀳𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀭𑀺𑀘𑀸𑀭𑀓𑀘𑁂𑀝𑀓𑀁 𑀆𑀡𑀸𑀧𑁂𑀦𑁆𑀢𑁄 𑀯𑀺𑀬 𑀧𑀚𑁆𑀚𑀼𑀦𑁆𑀦𑀁 𑀆𑀮𑀧𑀺𑀢𑁆𑀯𑀸 𑀲𑀓𑀮𑀓𑁄𑀲𑀮𑀭𑀝𑁆𑀞𑁂 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀫𑀭𑀡𑀤𑀼𑀓𑁆𑀔𑀸 𑀫𑁄𑀘𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀺, 𑀧𑀼𑀩𑁆𑀩𑁂 𑀫𑀘𑁆𑀙𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀯𑀲𑁆𑀲𑀸𑀧𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀘𑁆𑀙𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀧𑀚𑁆𑀚𑀼𑀦𑁆𑀦𑀤𑁂𑀯𑀭𑀸𑀚𑀸 𑀆𑀦𑀦𑁆𑀤𑁄, 𑀫𑀘𑁆𑀙𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁭𑁬] 𑁬. 𑀅𑀲𑀗𑁆𑀓𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀗𑁆𑀓𑀺𑀬𑁄𑀫𑁆𑀳𑀺 𑀕𑀸𑀫𑀫𑁆𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀯𑀢𑁆𑀣𑀺𑀯𑀸𑀲𑀺𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀏𑀓𑁂𑀦 𑀲𑀓𑀝𑀲𑀢𑁆𑀣𑀯𑀸𑀳𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀝𑁆𑀞𑀸𑀦𑁂 𑀲𑀓𑀝𑀸𑀦𑀺 𑀫𑁄𑀘𑁂𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀩𑀦𑁆𑀥𑁂 𑀓𑀢𑁂 𑀲𑀢𑁆𑀣𑀯𑀸𑀳𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀘𑀗𑁆𑀓𑀫𑀢𑀺. 𑀅𑀣𑀢𑁆𑀢𑀦𑁄 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀜𑁆𑀘𑀲𑀢𑀸 𑀘𑁄𑀭𑀸 ‘‘𑀔𑀦𑁆𑀥𑀸𑀯𑀸𑀭𑀁 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀥𑀦𑀼𑀫𑀼𑀕𑁆𑀕𑀭𑀸𑀤𑀺𑀳𑀢𑁆𑀣𑀸 𑀢𑀁 𑀞𑀸𑀦𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀉𑀧𑀸𑀲𑀓𑁄𑀧𑀺 𑀘𑀗𑁆𑀓𑀫𑀢𑀺𑀬𑁂𑀯. 𑀘𑁄𑀭𑀸 𑀦𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀏𑀲 𑀔𑀦𑁆𑀥𑀸𑀯𑀸𑀭𑀭𑀓𑁆𑀔𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀓𑀸𑀮𑁂 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀝𑁆𑀞𑀁𑀲𑀼. 𑀲𑁄𑀧𑀺 𑀉𑀧𑀸𑀲𑀓𑁄 𑀧𑀞𑀫𑀬𑀸𑀫𑁂𑀧𑀺 𑀫𑀚𑁆𑀛𑀺𑀫𑀬𑀸𑀫𑁂𑀧𑀺 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀘𑀗𑁆𑀓𑀫𑀦𑁆𑀢𑁄𑀬𑁂𑀯 𑀅𑀝𑁆𑀞𑀸𑀲𑀺. 𑀧𑀘𑁆𑀘𑀽𑀲𑀓𑀸𑀮𑁂 𑀚𑀸𑀢𑁂 𑀘𑁄𑀭𑀸 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀕𑀳𑀺𑀢𑁂 𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼.

𑀉𑀧𑀸𑀲𑀓𑁄𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀢𑁆𑀢𑀸𑀦𑀁 𑀭𑀓𑁆𑀔𑀫𑀸𑀦𑀸 𑀧𑀭𑀭𑀓𑁆𑀔𑀓𑀸 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀉𑀧𑀸𑀲𑀓, 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁄 𑀧𑀭𑀫𑁆𑀧𑀺 𑀭𑀓𑁆𑀔𑀢𑀺, 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀫𑁆𑀧𑀺 𑀭𑀓𑁆𑀔𑀢𑀻’’𑀢𑀺. 𑀲𑁄 ‘‘𑀬𑀸𑀯 𑀲𑀼𑀪𑀸𑀲𑀺𑀢𑀜𑁆𑀘𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸, 𑀅𑀳𑀁 𑀏𑀓𑁂𑀦 𑀲𑀢𑁆𑀣𑀯𑀸𑀳𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀭𑀼𑀓𑁆𑀔𑀫𑀽𑀮𑁂 𑀘𑀗𑁆𑀓𑀫𑀦𑁆𑀢𑁄 ‘𑀫𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀲𑀓𑀮𑀲𑀢𑁆𑀣𑀁 𑀭𑀓𑁆𑀔𑀺’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 ‘‘𑀉𑀧𑀸𑀲𑀓, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀸 𑀧𑀭𑀁 𑀭𑀓𑁆𑀔𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀁 𑀆𑀕𑀦𑁆𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀏𑀓𑁂𑀦 𑀲𑀢𑁆𑀣𑀯𑀸𑀳𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀝𑁆𑀞𑀸𑀦𑁂 𑀲𑀢𑁆𑀣𑁂 𑀦𑀺𑀯𑀺𑀝𑁆𑀞𑁂 𑀲𑀢𑁆𑀣𑀢𑁄 𑀅𑀯𑀺𑀤𑀽𑀭𑁂 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀘𑀗𑁆𑀓𑀫𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀧𑀜𑁆𑀘𑀲𑀢𑀸 𑀘𑁄𑀭𑀸 ‘‘𑀲𑀸𑀬𑀫𑀸𑀲𑀪𑀢𑁆𑀢𑀲𑁆𑀲 𑀪𑀼𑀢𑁆𑀢𑀓𑀸𑀮𑁂 𑀢𑀁 𑀲𑀓𑀝𑀲𑀢𑁆𑀣𑀁 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀢𑁂 𑀢𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀬𑀁 𑀅𑀫𑁆𑀳𑁂 𑀧𑀲𑁆𑀲𑀺𑀲𑁆𑀲𑀢𑀺, 𑀲𑀢𑁆𑀣𑀯𑀸𑀲𑀺𑀓𑀸𑀦𑀁 𑀆𑀭𑁄𑀘𑁂𑀲𑁆𑀲𑀢𑀺, 𑀏𑀢𑀲𑁆𑀲 𑀦𑀺𑀤𑁆𑀤𑀽𑀧𑀕𑀢𑀯𑁂𑀮𑀸𑀬 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣𑁂𑀯 𑀅𑀝𑁆𑀞𑀁𑀲𑀼. 𑀢𑀸𑀧𑀲𑁄 𑀲𑀓𑀮𑀫𑁆𑀧𑀺 𑀭𑀢𑁆𑀢𑀺𑀁 𑀘𑀗𑁆𑀓𑀫𑀺𑀬𑁂𑀯. 𑀘𑁄𑀭𑀸 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑁂 𑀫𑀼𑀕𑁆𑀕𑀭𑀧𑀸𑀲𑀸𑀡𑁂 𑀙𑀟𑁆𑀟𑁂𑀢𑁆𑀯𑀸 𑀲𑀓𑀝𑀲𑀢𑁆𑀣𑀯𑀸𑀲𑀻𑀦𑀁 𑀲𑀤𑁆𑀤𑀁 𑀤𑀢𑁆𑀯𑀸 ‘‘𑀪𑁄𑀦𑁆𑀢𑁄, 𑀲𑀢𑁆𑀣𑀯𑀸𑀲𑀺𑀦𑁄 𑀲𑀘𑁂 𑀏𑀲 𑀭𑀼𑀓𑁆𑀔𑀫𑀽𑀮𑁂 𑀘𑀗𑁆𑀓𑀫𑀦𑀓𑀢𑀸𑀧𑀲𑁄 𑀅𑀚𑁆𑀚 𑀦𑀸𑀪𑀯𑀺𑀲𑁆𑀲, 𑀲𑀩𑁆𑀩𑁂 𑀫𑀳𑀸𑀯𑀺𑀮𑁄𑀧𑀁 𑀧𑀢𑁆𑀢𑀸 𑀅𑀪𑀯𑀺𑀲𑁆𑀲𑀣, 𑀲𑁆𑀯𑁂 𑀢𑀸𑀧𑀲𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑁂 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀘𑁄𑀭𑁂𑀳𑀺 𑀙𑀟𑁆𑀟𑀺𑀢𑁂 𑀫𑀼𑀕𑁆𑀕𑀭𑀧𑀸𑀲𑀸𑀡𑀸𑀤𑀬𑁄 𑀤𑀺𑀲𑁆𑀯𑀸 𑀪𑀻𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀤𑀺𑀝𑁆𑀞𑀸 𑀯𑁄 𑀘𑁄𑀭𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫𑀸𑀯𑀼𑀲𑁄, 𑀤𑀺𑀝𑁆𑀞𑀸’’𑀢𑀺. ‘‘𑀪𑀦𑁆𑀢𑁂, 𑀏𑀢𑁆𑀢𑀓𑁂𑀯𑁄 𑀘𑁄𑀭𑁂 𑀤𑀺𑀲𑁆𑀯𑀸 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀦 𑀉𑀧𑁆𑀧𑀚𑁆𑀚𑀻’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀯𑀼𑀲𑁄 𑀘𑁄𑀭𑁂 𑀤𑀺𑀲𑁆𑀯𑀸 𑀪𑀬𑀁 𑀦𑀸𑀫 𑀲𑀥𑀦𑀲𑁆𑀲 𑀳𑁄𑀢𑀺, 𑀅𑀳𑀁 𑀧𑀦 𑀦𑀺𑀤𑁆𑀥𑀦𑁄, 𑀲𑁆𑀯𑀸𑀳𑀁 𑀓𑀺𑀁 𑀪𑀸𑀬𑀺𑀲𑁆𑀲𑀸𑀫𑀺. 𑀫𑀬𑁆𑀳𑀜𑁆𑀳𑀺 𑀕𑀸𑀫𑁂𑀧𑀺 𑀅𑀭𑀜𑁆𑀜𑁂𑀧𑀺 𑀯𑀲𑀦𑁆𑀢𑀲𑁆𑀲 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁬. ‘‘𑀅𑀲𑀗𑁆𑀓𑀺𑀬𑁄𑀫𑁆𑀳𑀺 𑀕𑀸𑀫𑀫𑁆𑀳𑀺, 𑀅𑀭𑀜𑁆𑀜𑁂 𑀦𑀢𑁆𑀣𑀺 𑀫𑁂 𑀪𑀬𑀁;

𑀉𑀚𑀼𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄, 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘𑀸’’𑀢𑀺.

𑀢𑀢𑁆𑀣 𑀅𑀲𑀗𑁆𑀓𑀺𑀬𑁄𑀫𑁆𑀳𑀺 𑀕𑀸𑀫𑀫𑁆𑀳𑀻𑀢𑀺 𑀲𑀗𑁆𑀓𑀸𑀬 𑀦𑀺𑀬𑀼𑀢𑁆𑀢𑁄 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀗𑁆𑀓𑀺𑀬𑁄, 𑀦 𑀲𑀗𑁆𑀓𑀺𑀬𑁄 𑀅𑀲𑀗𑁆𑀓𑀺𑀬𑁄. 𑀅𑀳𑀁 𑀕𑀸𑀫𑁂 𑀯𑀲𑀦𑁆𑀢𑁄𑀧𑀺 𑀲𑀗𑁆𑀓𑀸𑀬 𑀅𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀅𑀲𑀗𑁆𑀓𑀺𑀬𑁄 𑀦𑀺𑀩𑁆𑀪𑀬𑁄 𑀦𑀺𑀭𑀸𑀲𑀗𑁆𑀓𑁄𑀢𑀺 𑀤𑀻𑀧𑁂𑀢𑀺. 𑀅𑀭𑀜𑁆𑀜𑁂𑀢𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑀯𑀺𑀦𑀺𑀫𑀼𑀢𑁆𑀢𑁂 𑀞𑀸𑀦𑁂. 𑀉𑀚𑀼𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄, 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘𑀸𑀢𑀺 𑀅𑀳𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀳𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀳𑀺 𑀓𑀸𑀬𑀯𑀗𑁆𑀓𑀸𑀤𑀺𑀯𑀺𑀭𑀳𑀺𑀢𑀁 𑀉𑀚𑀼𑀁 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀁 𑀆𑀭𑀼𑀴𑁆𑀳𑁄𑀢𑀺 𑀯𑀤𑀢𑀺. 𑀅𑀣 𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑀸𑀬 𑀓𑀸𑀬𑀯𑀘𑀻𑀫𑀦𑁄𑀯𑀗𑁆𑀓𑀯𑀺𑀭𑀳𑀺𑀢𑀁 𑀉𑀚𑀼𑀁 𑀤𑁂𑀯𑀮𑁄𑀓𑀫𑀕𑁆𑀕𑀁 𑀆𑀭𑀼𑀴𑁆𑀳𑁄𑀫𑁆𑀳𑀻𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀉𑀚𑀼𑀁 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀫𑁆𑀧𑀺 𑀆𑀭𑀼𑀴𑁆𑀳𑁄𑀫𑁆𑀳𑀻𑀢𑀺𑀧𑀺 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀳𑀺 𑀏𑀓𑀦𑁆𑀢𑁂𑀦 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀢𑁆𑀢𑀸 𑀫𑁂𑀢𑁆𑀢𑀸𑀓𑀭𑀼𑀡𑀸𑀤𑀬𑁄 𑀉𑀚𑀼𑀫𑀕𑁆𑀕𑀸 𑀦𑀸𑀫.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀓𑁆𑀓𑀢𑁄 𑀧𑀽𑀚𑀺𑀢𑁄 𑀬𑀸𑀯𑀚𑀻𑀯𑀁 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀢𑁆𑀣𑀯𑀸𑀲𑀺𑀦𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀗𑁆𑀓𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁭𑁭] 𑁭. 𑀫𑀳𑀸𑀲𑀼𑀧𑀺𑀦𑀚𑀸𑀢𑀓𑀯𑀡𑁆𑀡𑀦𑀸

𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀓𑁄𑀲𑀮𑀫𑀳𑀸𑀭𑀸𑀚𑀸 𑀭𑀢𑁆𑀢𑀺𑀁 𑀦𑀺𑀤𑁆𑀤𑀽𑀧𑀕𑀢𑁄 𑀧𑀘𑁆𑀙𑀺𑀫𑀬𑀸𑀫𑁂 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 ‘‘𑀇𑀫𑁂𑀲𑀁 𑀲𑀼𑀧𑀺𑀦𑀸𑀦𑀁 𑀤𑀺𑀝𑁆𑀞𑀢𑁆𑀢𑀸 𑀓𑀺𑀁 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀓𑁄𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺.

𑀅𑀣 𑀦𑀁 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀧𑀼𑀭𑁄𑀳𑀺𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀼𑀔𑀁 𑀲𑀬𑀺𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀓𑀼𑀢𑁄 𑀫𑁂 𑀆𑀘𑀭𑀺𑀬𑀸 𑀲𑀼𑀔𑀁, 𑀅𑀚𑁆𑀚𑀸𑀳𑀁 𑀧𑀘𑁆𑀘𑀽𑀲𑀲𑀫𑀬𑁂 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀧𑀲𑁆𑀲𑀺𑀁, 𑀲𑁄𑀫𑁆𑀳𑀺 𑀢𑁂𑀲𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀬𑀧𑁆𑀧𑀢𑁆𑀢𑁄’’𑀢𑀺. ‘‘𑀯𑀤𑁂𑀣, 𑀫𑀳𑀸𑀭𑀸𑀚, 𑀲𑀼𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀲𑀼𑀧𑀺𑀦𑁂 𑀓𑀣𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀇𑀫𑁂𑀲𑀁 𑀤𑀺𑀝𑁆𑀞𑀓𑀸𑀭𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀳𑀢𑁆𑀣𑁂 𑀯𑀺𑀥𑀼𑀦𑀺𑀁𑀲𑀼. ‘‘𑀓𑀲𑁆𑀫𑀸 𑀳𑀢𑁆𑀣𑁂 𑀯𑀺𑀥𑀼𑀦𑀣𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀓𑀓𑁆𑀔𑀴𑀸, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀸’’𑀢𑀺. ‘‘𑀓𑀸 𑀢𑁂𑀲𑀁 𑀦𑀺𑀧𑁆𑀨𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀭𑀚𑁆𑀚𑀦𑁆𑀢𑀭𑀸𑀬𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀪𑁄𑀕𑀦𑁆𑀢𑀭𑀸𑀬𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁄’’𑀢𑀺. ‘‘𑀲𑀧𑁆𑀧𑀝𑀺𑀓𑀫𑁆𑀫𑀸, 𑀅𑀧𑁆𑀧𑀝𑀺𑀓𑀫𑁆𑀫𑀸’’𑀢𑀺? ‘‘𑀓𑀸𑀫𑀁 𑀏𑀢𑁂 𑀲𑀼𑀧𑀺𑀦𑀸 𑀅𑀢𑀺𑀨𑀭𑀼𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀫𑁆𑀫𑀸, 𑀫𑀬𑀁 𑀧𑀦 𑀢𑁂 𑀲𑀧𑁆𑀧𑀝𑀺𑀓𑀫𑁆𑀫𑁂 𑀓𑀭𑀺𑀲𑁆𑀲𑀸𑀫, 𑀏𑀢𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀲𑀺𑀓𑁆𑀔𑀺𑀢𑀪𑀸𑀯𑁄 𑀦𑀸𑀫 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀧𑀦 𑀓𑀢𑁆𑀯𑀸 𑀧𑀝𑀺𑀓𑁆𑀓𑀫𑀸𑀧𑁂𑀲𑁆𑀲𑀣𑀸’’𑀢𑀺? ‘‘𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀪𑀻𑀢𑀢𑀲𑀺𑀢𑁄 ‘‘𑀢𑁂𑀦 𑀳𑀺 𑀆𑀘𑀭𑀺𑀬𑀸 𑀫𑀫 𑀚𑀻𑀯𑀺𑀢𑀁 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂 𑀳𑁄𑀢𑀼, 𑀔𑀺𑀧𑁆𑀧𑀁 𑀫𑁂 𑀲𑁄𑀢𑁆𑀣𑀺𑀁 𑀓𑀭𑁄𑀣𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑀸 ‘‘𑀩𑀳𑀼𑀁 𑀥𑀦𑀁 𑀮𑀪𑀺𑀲𑁆𑀲𑀸𑀫, 𑀩𑀳𑀼𑀁 𑀔𑀚𑁆𑀚𑀪𑁄𑀚𑁆𑀚𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀭𑀸𑀚𑀸𑀦𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀦𑀕𑀭𑁂 𑀬𑀜𑁆𑀜𑀸𑀯𑀸𑀝𑀁 𑀓𑀢𑁆𑀯𑀸 𑀩𑀳𑀽 𑀘𑀢𑀼𑀧𑁆𑀧𑀤𑀕𑀡𑁂 𑀣𑀽𑀡𑀽𑀧𑀦𑀻𑀢𑁂 𑀓𑀢𑁆𑀯𑀸 𑀧𑀓𑁆𑀔𑀺𑀕𑀡𑁂 𑀲𑀫𑀸𑀳𑀭𑀺𑀢𑁆𑀯𑀸 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀺.

𑀅𑀣 𑀔𑁄 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀸 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀻’’𑀢𑀺? ‘‘𑀲𑀼𑀔𑀺𑀢𑀸, 𑀢𑁆𑀯𑀁 𑀪𑀤𑁆𑀤𑁂, 𑀅𑀫𑁆𑀳𑀸𑀓𑀁 𑀓𑀡𑁆𑀡𑀫𑀽𑀮𑁂 𑀆𑀲𑀻𑀯𑀺𑀲𑀁 𑀘𑀭𑀦𑁆𑀢𑀁 𑀦 𑀚𑀸𑀦𑀸𑀲𑀻’’𑀢𑀺. ‘‘𑀓𑀺𑀁 𑀏𑀢𑀁, 𑀫𑀳𑀸𑀭𑀸𑀚𑀸’’𑀢𑀺? 𑀫𑀬𑀸 𑀏𑀯𑀭𑀽𑀧𑀸 𑀤𑀼𑀲𑁆𑀲𑀼𑀧𑀺𑀦𑀸 𑀤𑀺𑀝𑁆𑀞𑀸, 𑀩𑁆𑀭𑀸𑀳𑁆𑀫𑀡𑀸 ‘‘𑀢𑀺𑀡𑁆𑀡𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁄 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀯𑀸 ‘‘‘𑀢𑁂𑀲𑀁 𑀧𑀝𑀺𑀖𑀸𑀢𑀸𑀬 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀸’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑁄 𑀲𑀼𑀧𑀺𑀦𑀧𑀝𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁄’’𑀢𑀺? ‘‘𑀓𑀢𑀭𑁄 𑀧𑀦𑁂𑀲, 𑀪𑀤𑁆𑀤𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑁄’’𑀢𑀺. ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀲𑀩𑁆𑀩𑀜𑁆𑀜𑀼𑀁 𑀯𑀺𑀲𑀼𑀤𑁆𑀥𑀁 𑀦𑀺𑀓𑁆𑀓𑀺𑀮𑁂𑀲𑀁 𑀫𑀳𑀸𑀩𑁆𑀭𑀸𑀳𑁆𑀫𑀡𑀁 𑀦 𑀚𑀸𑀦𑀸𑀲𑀺. 𑀲𑁄 𑀳𑀺 𑀪𑀕𑀯𑀸 𑀲𑀼𑀧𑀺𑀦𑀦𑁆𑀢𑀭𑀁 𑀚𑀸𑀦𑁂𑀬𑁆𑀬, 𑀕𑀘𑁆𑀙 𑀢𑁆𑀯𑀁 𑀧𑀼𑀘𑁆𑀙 𑀢𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀤𑁂𑀯𑀻’’𑀢𑀺 𑀭𑀸𑀚𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀲𑀢𑁆𑀣𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀧𑁆𑀧𑀕𑁄𑀯 𑀆𑀕𑀢𑁄𑀲𑀻’’𑀢𑀺 𑀆𑀳. 𑀅𑀳𑀁, 𑀪𑀦𑁆𑀢𑁂, 𑀧𑀘𑁆𑀘𑀽𑀲𑀲𑀫𑀬𑁂 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀪𑀻𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀭𑁄𑀘𑁂𑀲𑀺𑀁. 𑀩𑁆𑀭𑀸𑀳𑁆𑀫𑀡𑀸 ‘‘𑀓𑀓𑁆𑀔𑀴𑀸, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀸, 𑀏𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀸’’𑀢𑀺 𑀬𑀜𑁆𑀜𑀁 𑀲𑀚𑁆𑀚𑁂𑀦𑁆𑀢𑀺, 𑀩𑀳𑀽 𑀧𑀸𑀡𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸, 𑀢𑀼𑀫𑁆𑀳𑁂 𑀘 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀦𑀢𑁆𑀣𑀺 𑀲𑁄 𑀜𑁂𑀬𑁆𑀬𑀥𑀫𑁆𑀫𑁄, 𑀬𑁄 𑀯𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺. ‘‘𑀏𑀢𑁂𑀲𑀁 𑀫𑁂 𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀣 𑀪𑀕𑀯𑀸’’𑀢𑀺. ‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀲𑀤𑁂𑀯𑀓𑁂 𑀮𑁄𑀓𑁂 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀏𑀢𑁂𑀲𑀁 𑀲𑀼𑀧𑀺𑀦𑀸𑀦𑀁 𑀅𑀦𑁆𑀢𑀭𑀁 𑀯𑀸 𑀦𑀺𑀧𑁆𑀨𑀢𑁆𑀢𑀺𑀁 𑀯𑀸 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀢𑁂 𑀓𑀣𑁂𑀲𑁆𑀲𑀸𑀫𑀺, 𑀅𑀧𑀺𑀘 𑀔𑁄 𑀢𑁆𑀯𑀁 𑀤𑀺𑀝𑁆𑀞𑀤𑀺𑀝𑁆𑀞𑀦𑀺𑀬𑀸𑀫𑁂𑀦𑁂𑀯 𑀲𑀼𑀧𑀺𑀦𑁂 𑀓𑀣𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀤𑀺𑀝𑁆𑀞𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀦𑁆𑀢𑁄 𑁋

‘‘𑀉𑀲𑀪𑀸 𑀭𑀼𑀓𑁆𑀔𑀸 𑀕𑀸𑀯𑀺𑀬𑁄 𑀕𑀯𑀸 𑀘,

𑀅𑀲𑁆𑀲𑁄 𑀓𑀁𑀲𑁄 𑀲𑀺𑀗𑁆𑀕𑀸𑀮𑀻 𑀘 𑀓𑀼𑀫𑁆𑀪𑁄;

𑀧𑁄𑀓𑁆𑀔𑀭𑀡𑀻 𑀘 𑀅𑀧𑀸𑀓𑀘𑀦𑁆𑀤𑀦𑀁.

‘‘𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸 𑀧𑁆𑀮𑀯𑀦𑁆𑀢𑀺, 𑀫𑀡𑁆𑀟𑀽𑀓𑀺𑀬𑁄 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑁆𑀢𑀺;

𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀺, 𑀢𑀲𑀸 𑀯𑀓𑀸 𑀏𑀴𑀓𑀸𑀦𑀁 𑀪𑀬𑀸 𑀳𑀻’’𑀢𑀺. 𑁋

𑀇𑀫𑀁 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺.

(𑁧) 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀢𑀸𑀯 𑀲𑀼𑀧𑀺𑀦𑀁 𑀏𑀯𑀁 𑀅𑀤𑁆𑀤𑀲𑀁 𑁋 𑀘𑀢𑁆𑀢𑀸𑀭𑁄 𑀅𑀜𑁆𑀚𑀦𑀯𑀡𑁆𑀡𑀸 𑀓𑀸𑀴𑀉𑀲𑀪𑀸 ‘‘𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀭𑀸𑀚𑀗𑁆𑀕𑀡𑀁 𑀆𑀕𑀦𑁆𑀢𑁆𑀯𑀸 ‘‘𑀉𑀲𑀪𑀬𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 𑀬𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀦𑀤𑀺𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀅𑀬𑀼𑀚𑁆𑀛𑀺𑀢𑁆𑀯𑀸𑀯 𑀧𑀝𑀺𑀓𑁆𑀓𑀦𑁆𑀢𑀸. 𑀇𑀫𑀁 𑀧𑀞𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀲 𑀯𑀺𑀧𑀸𑀓𑁄 𑀦𑁂𑀯 𑀢𑀯, 𑀦 𑀫𑀫 𑀓𑀸𑀮𑁂 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀧𑀦 𑀅𑀥𑀫𑁆𑀫𑀺𑀓𑀸𑀦𑀁 𑀓𑀧𑀡𑀭𑀸𑀚𑀽𑀦𑀁 𑀅𑀥𑀫𑁆𑀫𑀺𑀓𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀁 𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑁂 𑀓𑀼𑀲𑀮𑁂 𑀑𑀲𑁆𑀲𑀦𑁆𑀦𑁂, 𑀅𑀓𑀼𑀲𑀮𑁂 𑀉𑀲𑁆𑀲𑀦𑁆𑀦𑁂, 𑀮𑁄𑀓𑀲𑁆𑀲 𑀧𑀭𑀺𑀳𑀸𑀬𑀦𑀓𑀸𑀮𑁂 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑁆𑀲𑀺𑀲𑁆𑀲𑀢𑀺, 𑀫𑁂𑀖𑀧𑀸𑀤𑀸 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀺𑀲𑁆𑀲𑀦𑁆𑀢𑀺, 𑀤𑀼𑀩𑁆𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀯𑀲𑁆𑀲𑀺𑀢𑀼𑀓𑀸𑀫𑀸 𑀯𑀺𑀬 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀫𑁂𑀖𑀸 𑀉𑀝𑁆𑀞𑀳𑀺𑀢𑁆𑀯𑀸 𑀇𑀢𑁆𑀣𑀺𑀓𑀸𑀳𑀺 𑀆𑀢𑀧𑁂 𑀧𑀢𑁆𑀣𑀝𑀸𑀦𑀁 𑀯𑀻𑀳𑀺𑀆𑀤𑀻𑀦𑀁 𑀢𑁂𑀫𑀦𑀪𑀬𑁂𑀦 𑀅𑀦𑁆𑀢𑁄𑀧𑀯𑁂𑀲𑀺𑀢𑀓𑀸𑀮𑁂 𑀧𑀼𑀭𑀺𑀲𑁂𑀲𑀼 𑀓𑀼𑀤𑁆𑀤𑀸𑀮𑀧𑀺𑀝𑀓𑀳𑀢𑁆𑀣𑁂𑀲𑀼 𑀆𑀴𑀺𑀩𑀦𑁆𑀥𑀦𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁂𑀲𑀼 𑀯𑀲𑁆𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀢𑁂 𑀉𑀲𑀪𑀸 𑀯𑀺𑀬 𑀅𑀬𑀼𑀚𑁆𑀛𑀺𑀢𑁆𑀯𑀸 𑀅𑀯𑀲𑁆𑀲𑀺𑀢𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀺. 𑀅𑀬𑀫𑁂𑀢𑀲𑁆𑀲 𑀯𑀺𑀧𑀸𑀓𑁄. 𑀢𑀼𑀬𑁆𑀳𑀁 𑀧𑀦 𑀢𑀧𑁆𑀧𑀘𑁆𑀘𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺, 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀤𑀺𑀝𑁆𑀞𑁄 𑀲𑀼𑀧𑀺𑀦𑁄 𑀏𑀲, 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀓𑀣𑀬𑀺𑀁𑀲𑀽’’𑀢𑀺 𑀏𑀯𑀁 𑀲𑀢𑁆𑀣𑀸 𑀲𑀼𑀧𑀺𑀦𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀆𑀳 ‘‘𑀤𑀼𑀢𑀺𑀬𑀁 𑀓𑀣𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

(𑁨) 𑀤𑀼𑀢𑀺𑀬𑀸𑀳𑀁, 𑀪𑀦𑁆𑀢𑁂, 𑀏𑀯𑀁 𑀅𑀤𑁆𑀤𑀲𑀁 𑁋 𑀔𑀼𑀤𑁆𑀤𑀓𑀸 𑀭𑀼𑀓𑁆𑀔𑀸 𑀘𑁂𑀯 𑀕𑀘𑁆𑀙𑀸 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺 𑀭𑀢𑀦𑀫𑀢𑁆𑀢𑀫𑁆𑀧𑀺 𑀅𑀦𑀼𑀕𑁆𑀕𑀦𑁆𑀢𑁆𑀯𑀸𑀯 𑀧𑀼𑀧𑁆𑀨𑀦𑁆𑀢𑀺 𑀘𑁂𑀯 𑀨𑀮𑀦𑁆𑀢𑀺 𑀘. 𑀇𑀫𑀁 𑀤𑀼𑀢𑀺𑀬𑀁 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀫𑀳𑀸𑀭𑀸𑀚, 𑀇𑀫𑀲𑁆𑀲𑀸𑀧𑀺 𑀯𑀺𑀧𑀸𑀓𑁄 𑀮𑁄𑀓𑀲𑁆𑀲 𑀧𑀭𑀺𑀳𑀸𑀬𑀦𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀸𑀬𑀼𑀓𑀓𑀸𑀮𑁂 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸 𑀢𑀺𑀩𑁆𑀩𑀭𑀸𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀲𑀫𑁆𑀧𑀢𑁆𑀢𑀯𑀬𑀸𑀯 𑀓𑀼𑀫𑀸𑀭𑀺𑀬𑁄 𑀧𑀼𑀭𑀺𑀲𑀦𑁆𑀢𑀭𑀁 𑀕𑀦𑁆𑀢𑁆𑀯𑀸 𑀉𑀢𑀼𑀦𑀺𑀬𑁄 𑀘𑁂𑀯 𑀕𑀩𑁆𑀪𑀺𑀦𑀺𑀬𑁄 𑀘 𑀳𑀼𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀔𑀼𑀤𑁆𑀤𑀓𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀁 𑀯𑀺𑀬 𑀳𑀺 𑀢𑀸𑀲𑀁 𑀉𑀢𑀼𑀦𑀺𑀪𑀸𑀯𑁄, 𑀨𑀮𑀁 𑀯𑀺𑀬 𑀘 𑀧𑀼𑀢𑁆𑀢𑀥𑀻𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀢𑀢𑀺𑀬𑀁 𑀓𑀣𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.

(𑁩) 𑀕𑀸𑀯𑀺𑀬𑁄, 𑀪𑀦𑁆𑀢𑁂, 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀓𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀅𑀤𑁆𑀤𑀲𑀁. 𑀅𑀬𑀁 𑀫𑁂 𑀢𑀢𑀺𑀬𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀯𑀺𑀧𑀸𑀓𑁄 𑀅𑀦𑀸𑀕𑀢𑁂 𑀏𑀯 𑀫𑀦𑀼𑀲𑁆𑀲𑀸𑀦𑀁 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀲𑁆𑀲 𑀦𑀝𑁆𑀞𑀓𑀸𑀮𑁂 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀲𑀼 𑀯𑀸 𑀲𑀲𑁆𑀲𑀼𑀲𑀲𑀼𑀭𑁂𑀲𑀼 𑀯𑀸 𑀮𑀚𑁆𑀚𑀁 𑀅𑀦𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀓𑀼𑀝𑀼𑀫𑁆𑀩𑀁 𑀲𑀁𑀯𑀺𑀤𑀳𑀦𑁆𑀢𑀸𑀯 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑀳𑀮𑁆𑀮𑀓𑀸𑀦𑀁 𑀤𑀸𑀢𑀼𑀓𑀸𑀫𑀸 𑀤𑀲𑁆𑀲𑀦𑁆𑀢𑀺, 𑀅𑀤𑀸𑀢𑀼𑀓𑀸𑀫𑀸 𑀦 𑀤𑀲𑁆𑀲𑀦𑁆𑀢𑀺. 𑀫𑀳𑀮𑁆𑀮𑀓𑀸 𑀅𑀦𑀸𑀣𑀸 𑀅𑀲𑀬𑀁𑀯𑀲𑀻 𑀤𑀸𑀭𑀓𑁂 𑀆𑀭𑀸𑀥𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀓𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀳𑀸𑀕𑀸𑀯𑀺𑀬𑁄 𑀯𑀺𑀬. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀘𑀢𑀼𑀢𑁆𑀣𑀁 𑀓𑀣𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.

(𑁪) 𑀥𑀼𑀭𑀯𑀸𑀳𑁂, 𑀪𑀦𑁆𑀢𑁂, 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑁂 𑀫𑀳𑀸𑀕𑁄𑀡𑁂𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑁂𑀢𑁆𑀯𑀸 𑀢𑀭𑀼𑀡𑁂 𑀕𑁄𑀤𑀫𑁆𑀫𑁂 𑀥𑀼𑀭𑁂 𑀬𑁄𑀚𑁂𑀦𑁆𑀢𑁂 𑀅𑀤𑁆𑀤𑀲𑀁. 𑀢𑁂 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀙𑀟𑁆𑀟𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀲𑀓𑀝𑀸𑀦𑀺 𑀦𑀧𑁆𑀧𑀯𑀝𑁆𑀝𑀺𑀁𑀲𑀼. 𑀅𑀬𑀁 𑀫𑁂 𑀘𑀢𑀼𑀢𑁆𑀣𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀯𑀺𑀧𑀸𑀓𑁄 𑀅𑀦𑀸𑀕𑀢𑁂 𑀏𑀯 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀓𑀸𑀮𑁂 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀅𑀥𑀫𑁆𑀫𑀺𑀓𑀓𑀧𑀡𑀭𑀸𑀚𑀸𑀦𑁄 𑀧𑀡𑁆𑀟𑀺𑀢𑀸𑀦𑀁 𑀧𑀯𑁂𑀡𑀺𑀓𑀼𑀲𑀮𑀸𑀦𑀁 𑀓𑀫𑁆𑀫𑀁 𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑀸𑀦𑀁 𑀫𑀳𑀸𑀫𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺. 𑀥𑀫𑁆𑀫𑀲𑀪𑀸𑀬𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀧𑀡𑁆𑀟𑀺𑀢𑁂 𑀯𑁄𑀳𑀸𑀭𑀓𑀼𑀲𑀮𑁂 𑀫𑀳𑀮𑁆𑀮𑀓𑁂 𑀅𑀫𑀘𑁆𑀘𑁂 𑀦 𑀞𑀧𑁂𑀲𑁆𑀲𑀦𑁆𑀢𑀺, 𑀢𑀩𑁆𑀩𑀺𑀧𑀭𑀻𑀢𑀸𑀦𑀁 𑀧𑀦 𑀢𑀭𑀼𑀡𑀢𑀭𑀼𑀡𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺, 𑀢𑀣𑀸𑀭𑀽𑀧𑁂 𑀏𑀯 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀭𑀸𑀚𑀓𑀫𑁆𑀫𑀸𑀦𑀺 𑀘𑁂𑀯 𑀬𑀼𑀢𑁆𑀢𑀸𑀬𑀼𑀢𑁆𑀢𑀜𑁆𑀘 𑀅𑀚𑀸𑀦𑀦𑁆𑀢𑀸 𑀦𑁂𑀯 𑀢𑀁 𑀬𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀦 𑀭𑀸𑀚𑀓𑀫𑁆𑀫𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁. 𑀢𑁂 𑀅𑀲𑀓𑁆𑀓𑁄𑀦𑁆𑀢𑀸 𑀓𑀫𑁆𑀫𑀥𑀼𑀭𑀁 𑀙𑀟𑁆𑀟𑁂𑀲𑁆𑀲𑀦𑁆𑀢𑀺, 𑀫𑀳𑀮𑁆𑀮𑀓𑀸𑀧𑀺 𑀧𑀡𑁆𑀟𑀺𑀢𑀸𑀫𑀘𑁆𑀘𑀸 𑀬𑀲𑀁 𑀅𑀮𑀪𑀦𑁆𑀢𑀸 𑀓𑀺𑀘𑁆𑀘𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁 𑀲𑀫𑀢𑁆𑀣𑀸𑀧𑀺 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺, 𑀫𑀬𑀁 𑀩𑀸𑀳𑀺𑀭𑀓𑀸 𑀚𑀸𑀢𑀸, 𑀅𑀩𑁆𑀪𑀦𑁆𑀢𑀭𑀺𑀓𑀸 𑀢𑀭𑀼𑀡𑀤𑀸𑀭𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀢𑁂𑀲𑀁 𑀭𑀸𑀚𑀽𑀦𑀁 𑀳𑀸𑀦𑀺𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀫𑀢𑁆𑀣𑀸𑀦𑀁 𑀯𑀘𑁆𑀙𑀤𑀫𑁆𑀫𑀸𑀦𑀁 𑀥𑀼𑀭𑁂 𑀬𑁄𑀚𑀺𑀢𑀓𑀸𑀮𑁄 𑀯𑀺𑀬, 𑀥𑀼𑀭𑀯𑀸𑀳𑀸𑀦𑀜𑁆𑀘 𑀫𑀳𑀸𑀕𑁄𑀡𑀸𑀦𑀁 𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀧𑀜𑁆𑀘𑀫𑀁 𑀓𑀣𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.

(𑁫) 𑀪𑀦𑁆𑀢𑁂, 𑀏𑀓𑀁 𑀉𑀪𑀢𑁄𑀫𑀼𑀔𑀁 𑀅𑀲𑁆𑀲𑀁 𑀅𑀤𑁆𑀤𑀲𑀁, 𑀢𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀬𑀯𑀲𑀁 𑀤𑁂𑀦𑁆𑀢𑀺, 𑀲𑁄 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺 𑀔𑀸𑀤𑀢𑀺. 𑀅𑀬𑀁 𑀫𑁂 𑀧𑀜𑁆𑀘𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀅𑀥𑀫𑁆𑀫𑀺𑀓𑀸 𑀩𑀸𑀮𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑁂 𑀮𑁄𑀮𑀫𑀦𑀼𑀲𑁆𑀲𑁂 𑀯𑀺𑀦𑀺𑀘𑁆𑀙𑀬𑁂 𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀧𑀸𑀧𑀧𑀼𑀜𑁆𑀜𑁂𑀲𑀼 𑀅𑀦𑀸𑀤𑀭𑀸 𑀩𑀸𑀮𑀸 𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀤𑁂𑀦𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀺 𑀅𑀲𑁆𑀲𑁄 𑀯𑀺𑀬 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺 𑀬𑀯𑀲𑀁. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀙𑀝𑁆𑀞𑀁 𑀓𑀣𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.

(𑁬) 𑀪𑀦𑁆𑀢𑁂, 𑀫𑀳𑀸𑀚𑀦𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 ‘‘𑀇𑀥 𑀧𑀲𑁆𑀲𑀸𑀯𑀁 𑀓𑀭𑁄𑀳𑀻’’𑀢𑀺 𑀏𑀓𑀲𑁆𑀲 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀉𑀧𑀦𑀸𑀫𑁂𑀲𑀺, 𑀢𑀁 𑀢𑀢𑁆𑀣 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀁 𑀅𑀤𑁆𑀤𑀲𑀁. 𑀅𑀬𑀁 𑀫𑁂 𑀙𑀝𑁆𑀞𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀯𑀺𑀧𑀸𑀓𑁄 𑀅𑀦𑀸𑀕𑀢𑁂𑀬𑁂𑀯 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀅𑀥𑀫𑁆𑀫𑀺𑀓𑀸 𑀯𑀺𑀚𑀸𑀢𑀺𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀲𑀗𑁆𑀓𑀸𑀬 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀤𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀳𑀸𑀓𑀼𑀮𑀸𑀦𑀺 𑀤𑀼𑀕𑁆𑀕𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀮𑀸𑀫𑀓𑀓𑀼𑀮𑀸𑀦𑀺 𑀇𑀲𑁆𑀲𑀭𑀸𑀦𑀺. 𑀢𑁂 𑀘 𑀓𑀼𑀮𑀻𑀦𑀧𑀼𑀭𑀺𑀲𑀸 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀇𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀓𑀼𑀮𑀻𑀦𑀸𑀦𑀁 𑀥𑀻𑀢𑀭𑁄 𑀤𑀲𑁆𑀲𑀦𑁆𑀢𑀺, 𑀇𑀢𑀺 𑀢𑀸𑀲𑀁 𑀓𑀼𑀮𑀥𑀻𑀢𑀸𑀦𑀁 𑀅𑀓𑀼𑀮𑀻𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀲𑁆𑀲𑀸𑀯𑀓𑀭𑀡𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀲𑀢𑁆𑀢𑀫𑀁 𑀓𑀣𑁂𑀳𑀻𑀢𑀺.

(𑁭) 𑀪𑀦𑁆𑀢𑁂, 𑀏𑀓𑁄 𑀧𑀼𑀭𑀺𑀲𑁄 𑀭𑀚𑁆𑀚𑀼𑀁 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀦𑀺𑀲𑀺𑀦𑁆𑀦𑀧𑀻𑀞𑀲𑁆𑀲 𑀳𑁂𑀝𑁆𑀞𑀸 𑀲𑀬𑀺𑀢𑀸 𑀏𑀓𑀸 𑀙𑀸𑀢𑀲𑀺𑀗𑁆𑀕𑀸𑀮𑀻 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀢𑀁 𑀔𑀸𑀤𑀢𑀺, 𑀏𑀯𑀸𑀳𑀁 𑀅𑀤𑁆𑀤𑀲𑀁. 𑀅𑀬𑀁 𑀫𑁂 𑀲𑀢𑁆𑀢𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀮𑁄𑀮𑀸 𑀲𑀼𑀭𑀸𑀮𑁄𑀮𑀸 𑀅𑀮𑀗𑁆𑀓𑀸𑀭𑀮𑁄𑀮𑀸 𑀯𑀺𑀲𑀺𑀔𑀸𑀮𑁄𑀮𑀸 𑀆𑀫𑀺𑀲𑀮𑁄𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀤𑀼𑀭𑀸𑀘𑀸𑀭𑀸, 𑀢𑀸 𑀲𑀸𑀫𑀺𑀓𑁂𑀳𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀲𑀫𑁆𑀪𑀢𑀁 𑀥𑀦𑀁 𑀚𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀼𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀫𑀸𑀦𑀸 𑀅𑀦𑁆𑀢𑁄𑀕𑁂𑀳𑁂 𑀅𑀘𑁆𑀘𑀸𑀬𑀺𑀓𑀫𑁆𑀧𑀺 𑀓𑀺𑀘𑁆𑀘𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀕𑁂𑀳𑁂 𑀧𑀭𑀺𑀓𑁆𑀔𑁂𑀧𑀲𑁆𑀲 𑀉𑀧𑀭𑀺𑀪𑀸𑀕𑁂𑀦𑀧𑀺 𑀙𑀺𑀤𑁆𑀤𑀝𑁆𑀞𑀸𑀦𑁂𑀳𑀺𑀧𑀺 𑀚𑀸𑀭𑁂 𑀉𑀧𑀥𑀸𑀭𑀬𑀫𑀸𑀦𑀸 𑀲𑁆𑀯𑁂 𑀯𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀩𑀻𑀚𑀫𑁆𑀧𑀺 𑀓𑁄𑀝𑁆𑀝𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀔𑀸𑀤𑀫𑀸𑀦𑀸 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺 𑀳𑁂𑀝𑁆𑀞𑀸𑀧𑀻𑀞𑀓𑁂 𑀦𑀺𑀧𑀦𑁆𑀦𑀙𑀸𑀢𑀲𑀺𑀗𑁆𑀕𑀸𑀮𑀻 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀢𑁆𑀢𑀭𑀚𑁆𑀚𑀼𑀁. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀅𑀝𑁆𑀞𑀫𑀁 𑀓𑀣𑁂𑀳𑀻𑀢𑀺.

(𑁮) 𑀪𑀦𑁆𑀢𑁂, 𑀭𑀸𑀚𑀤𑁆𑀯𑀸𑀭𑁂 𑀩𑀳𑀽𑀳𑀺 𑀢𑀼𑀘𑁆𑀙𑀓𑀼𑀫𑁆𑀪𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀧𑀺𑀢𑀁 𑀏𑀓𑀁 𑀫𑀳𑀦𑁆𑀢𑀁 𑀧𑀽𑀭𑀺𑀢𑀓𑀼𑀫𑁆𑀪𑀁 𑀅𑀤𑁆𑀤𑀲𑀁. 𑀘𑀢𑁆𑀢𑀸𑀭𑁄𑀧𑀺 𑀧𑀦 𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀘𑀢𑀽𑀳𑀺 𑀅𑀦𑀼𑀤𑀺𑀲𑀸𑀳𑀺 𑀘 𑀖𑀝𑁂𑀳𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑀫𑁂𑀯 𑀧𑀽𑀭𑁂𑀦𑁆𑀢𑀺, 𑀧𑀽𑀭𑀺𑀢𑀧𑀽𑀭𑀺𑀢𑀁 𑀉𑀤𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀺, 𑀢𑀼𑀘𑁆𑀙𑀓𑀼𑀫𑁆𑀪𑁂 𑀧𑀦 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀫𑁂 𑀅𑀝𑁆𑀞𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀮𑁄𑀓𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀪𑀯𑀺𑀲𑁆𑀲𑀢𑀺, 𑀭𑀸𑀚𑀸𑀦𑁄 𑀤𑀼𑀕𑁆𑀕𑀢𑀸 𑀓𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁄 𑀇𑀲𑁆𑀲𑀭𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯𑀁 𑀤𑀼𑀕𑁆𑀕𑀢𑀸 𑀲𑀩𑁆𑀩𑁂 𑀚𑀸𑀦𑀧𑀤𑁂 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀉𑀧𑀤𑁆𑀤𑀼𑀢𑀸 𑀫𑀦𑀼𑀲𑁆𑀲𑀸 𑀲𑀓𑁂 𑀓𑀫𑁆𑀫𑀦𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀭𑀸𑀚𑀽𑀦𑀜𑁆𑀜𑁂𑀯 𑀅𑀢𑁆𑀣𑀸𑀬 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀺 𑀯𑀧𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀮𑀸𑀬𑀦𑁆𑀢𑀸 𑀫𑀤𑁆𑀤𑀦𑁆𑀢𑀸 𑀧𑀯𑁂𑀲𑁂𑀦𑁆𑀢𑀸 𑀉𑀘𑁆𑀙𑀼𑀔𑁂𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀸 𑀬𑀦𑁆𑀢𑀸𑀦𑀺 𑀓𑀭𑁄𑀦𑁆𑀢𑀸 𑀬𑀦𑁆𑀢𑀸𑀦𑀺 𑀯𑀸𑀳𑁂𑀦𑁆𑀢𑀸 𑀨𑀸𑀡𑀺𑀢𑀸𑀤𑀻𑀦𑀺 𑀧𑀘𑀦𑁆𑀢𑀸 𑀧𑀼𑀧𑁆𑀨𑀸𑀭𑀸𑀫𑁂 𑀘 𑀨𑀮𑀸𑀭𑀸𑀫𑁂 𑀘 𑀓𑀭𑁄𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀸𑀦𑀺 𑀧𑀼𑀩𑁆𑀩𑀡𑁆𑀡𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀓𑁄𑀝𑁆𑀞𑀸𑀕𑀸𑀭𑀫𑁂𑀯 𑀧𑀽𑀭𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀢𑀼𑀘𑁆𑀙𑀓𑁄𑀝𑁆𑀞𑁂 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀘𑁆𑀙𑀓𑀼𑀫𑁆𑀪𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑁂 𑀧𑀽𑀭𑀡𑀲𑀤𑀺𑀲𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀦𑀯𑀫𑀁 𑀓𑀣𑁂𑀳𑀻𑀢𑀺.

(𑁯) 𑀪𑀦𑁆𑀢𑁂, 𑀏𑀓𑀁 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀕𑀫𑁆𑀪𑀻𑀭𑀁 𑀲𑀩𑁆𑀩𑀢𑁄 𑀢𑀺𑀢𑁆𑀣𑀁 𑀧𑁄𑀓𑁆𑀔𑀭𑀡𑀺𑀁 𑀅𑀤𑁆𑀤𑀲𑀁. 𑀲𑀫𑀦𑁆𑀢𑀢𑁄 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺. 𑀢𑀲𑁆𑀲𑀸 𑀫𑀚𑁆𑀛𑁂 𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀉𑀤𑀓𑀁 𑀆𑀯𑀺𑀮𑀁, 𑀢𑀻𑀭𑀧𑁆𑀧𑀤𑁂𑀲𑁂𑀲𑀼 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀅𑀓𑁆𑀓𑀫𑀝𑁆𑀞𑀸𑀦𑁂 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁. 𑀏𑀯𑀸𑀳𑀁 𑀅𑀤𑁆𑀤𑀲𑀁. 𑀅𑀬𑀁 𑀫𑁂 𑀦𑀯𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀦 𑀤𑀲𑁆𑀲𑀦𑁆𑀢𑀺, 𑀮𑀜𑁆𑀚𑀯𑀺𑀢𑁆𑀢𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀥𑀦𑀮𑁄𑀮𑀸, 𑀭𑀝𑁆𑀞𑀯𑀸𑀲𑀺𑀓𑁂𑀲𑀼 𑀦𑁂𑀲𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸 𑀦𑀸𑀫 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀓𑁆𑀔𑀴𑀸 𑀨𑀭𑀼𑀲𑀸 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀕𑀡𑁆𑀞𑀺𑀓𑀸 𑀯𑀺𑀬 𑀫𑀦𑀼𑀲𑁆𑀲𑁂 𑀧𑀻𑀴𑁂𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀩𑀮𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀥𑀦𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀩𑀮𑀺𑀧𑀻𑀴𑀺𑀢𑀸 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑀸𑀫𑀦𑀺𑀕𑀫𑀸𑀤𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺, 𑀫𑀚𑁆𑀛𑀺𑀫𑀚𑀦𑀧𑀤𑁄 𑀲𑀼𑀜𑁆𑀜𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑀦𑁆𑀢𑁄 𑀖𑀦𑀯𑀸𑀲𑁄 𑀲𑁂𑀬𑁆𑀬𑀣𑀸𑀧𑀺 𑀧𑁄𑀓𑁆𑀔𑀭𑀡𑀺𑀬𑀸 𑀫𑀚𑁆𑀛𑁂 𑀉𑀤𑀓𑀁 𑀆𑀯𑀺𑀮𑀁 𑀧𑀭𑀺𑀬𑀦𑁆𑀢𑁂 𑀯𑀺𑀧𑁆𑀧𑀲𑀦𑁆𑀦𑀁. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀤𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁦) 𑀪𑀦𑁆𑀢𑁂, 𑀏𑀓𑀺𑀲𑁆𑀲𑀸𑀬𑁂𑀯 𑀓𑀼𑀫𑁆𑀪𑀺𑀬𑀸 𑀧𑀘𑁆𑀘𑀫𑀸𑀦𑀁 𑀑𑀤𑀦𑀁 𑀅𑀧𑀸𑀓𑀁 𑀅𑀤𑁆𑀤𑀲𑀁 ‘‘𑀅𑀧𑀸𑀓’’𑀦𑁆𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀢𑀻𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀫𑀸𑀦𑀁, 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀅𑀢𑀺𑀓𑀺𑀮𑀺𑀦𑁆𑀦𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀉𑀢𑁆𑀢𑀡𑁆𑀟𑀼𑀮𑁄, 𑀏𑀓𑀲𑁆𑀫𑀺𑀁 𑀲𑀼𑀧𑀓𑁆𑀓𑁄𑀢𑀺. 𑀅𑀬𑀁 𑀫𑁂 𑀤𑀲𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀭𑀸𑀚𑀬𑀼𑀢𑁆𑀢𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀦𑁂𑀕𑀫𑀚𑀸𑀦𑀧𑀤𑀸𑀧𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸, 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸, 𑀭𑀼𑀓𑁆𑀔𑀤𑁂𑀯𑀢𑀸, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀢𑀺 𑀏𑀯𑀁 𑀤𑁂𑀯𑀢𑀸𑀧𑀺 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀜𑁆𑀘 𑀭𑀚𑁆𑀚𑁂 𑀯𑀸𑀢𑀸 𑀯𑀺𑀲𑀫𑀸 𑀔𑀭𑀸 𑀯𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂 𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑀸𑀦𑀺 𑀓𑀫𑁆𑀧𑁂𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀓𑀫𑁆𑀧𑀺𑀢𑁂𑀲𑀼 𑀤𑁂𑀯𑀢𑀸 𑀓𑀼𑀧𑀺𑀢𑀸 𑀤𑁂𑀯𑀁 𑀯𑀲𑁆𑀲𑀺𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺, 𑀯𑀲𑁆𑀲𑀫𑀸𑀦𑁄𑀧𑀺 𑀲𑀓𑀮𑀭𑀝𑁆𑀞𑁂 𑀏𑀓𑀧𑁆𑀧𑀳𑀸𑀭𑁂𑀦 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀯𑀲𑁆𑀲𑀫𑀸𑀦𑁄𑀧𑀺 𑀲𑀩𑁆𑀩𑀢𑁆𑀣 𑀓𑀲𑀺𑀓𑀫𑁆𑀫𑀲𑁆𑀲 𑀯𑀸 𑀯𑀧𑁆𑀧𑀓𑀫𑁆𑀫𑀲𑁆𑀲 𑀯𑀸 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀬𑀣𑀸 𑀘 𑀭𑀝𑁆𑀞𑁂, 𑀏𑀯𑀁 𑀚𑀦𑀧𑀤𑁂𑀧𑀺 𑀕𑀸𑀫𑁂𑀧𑀺 𑀏𑀓𑀢𑀴𑀸𑀓𑁂𑀧𑀺 𑀏𑀓𑀲𑀭𑁂𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀢𑀴𑀸𑀓𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀲𑁆𑀲𑀦𑁆𑀢𑁄 𑀳𑁂𑀝𑁆𑀞𑀸𑀪𑀸𑀕𑁂 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀳𑁂𑀝𑁆𑀞𑀸 𑀯𑀲𑁆𑀲𑀦𑁆𑀢𑁄 𑀉𑀧𑀭𑀺 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀏𑀓𑀲𑁆𑀫𑀺𑀁 𑀪𑀸𑀕𑁂 𑀲𑀲𑁆𑀲𑀁 𑀅𑀢𑀺𑀯𑀲𑁆𑀲𑁂𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀅𑀯𑀲𑁆𑀲𑀦𑁂𑀦 𑀫𑀺𑀮𑀸𑀬𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀲𑀫𑁆𑀫𑀸 𑀯𑀲𑁆𑀲𑀫𑀸𑀦𑁄 𑀲𑀫𑁆𑀧𑀸𑀤𑁂𑀲𑁆𑀲𑀢𑀺. 𑀏𑀯𑀁 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀯𑀼𑀢𑁆𑀢𑀲𑀲𑁆𑀲𑀸 𑀢𑀺𑀧𑁆𑀧𑀓𑀸𑀭𑀸 𑀪𑀯𑀺𑀲𑁆𑀲𑀦𑁆𑀢𑀺 𑀏𑀓𑀓𑀼𑀫𑁆𑀪𑀺𑀬𑀸 𑀑𑀤𑀦𑁄 𑀯𑀺𑀬. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀏𑀓𑀸𑀤𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁧) 𑀪𑀦𑁆𑀢𑁂, 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑁂 𑀅𑀤𑁆𑀤𑀲𑀁. 𑀅𑀬𑀁 𑀫𑁂 𑀏𑀓𑀸𑀤𑀲𑀫𑁄 𑀲𑀼𑀧𑀺𑀦𑁄, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂𑀬𑁂𑀯 𑀫𑀬𑁆𑀳𑀁 𑀲𑀸𑀲𑀦𑁂 𑀧𑀭𑀺𑀳𑀸𑀬𑀦𑁆𑀢𑁂 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀧𑀘𑁆𑀘𑀬𑀮𑁄𑀮𑀸 𑀅𑀮𑀚𑁆𑀚𑀻 𑀪𑀺𑀓𑁆𑀔𑀽 𑀩𑀳𑀽 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀫𑀬𑀸 𑀧𑀘𑁆𑀘𑀬𑀮𑁄𑀮𑀼𑀧𑁆𑀧𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑀤𑁂𑀲𑀦𑀁 𑀘𑀻𑀯𑀭𑀸𑀤𑀺𑀘𑀢𑀼𑀧𑀘𑁆𑀘𑀬𑀳𑁂𑀢𑀼 𑀧𑀭𑁂𑀲𑀁 𑀤𑁂𑀲𑁂𑀲𑁆𑀲𑀦𑁆𑀢𑀺, 𑀧𑀘𑁆𑀘𑀬𑁂𑀳𑀺 𑀫𑀼𑀘𑁆𑀙𑀺𑀢𑀸 𑀦𑀺𑀲𑁆𑀲𑀭𑀡𑀧𑀓𑁆𑀔𑁂 𑀞𑀺𑀢𑀸 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀓𑁂𑀯𑀮𑀁 ‘‘𑀧𑀤𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀫𑀥𑀼𑀭𑀲𑀤𑁆𑀤𑀜𑁆𑀘 𑀲𑀼𑀢𑁆𑀯𑀸 𑀫𑀳𑀕𑁆𑀖𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀤𑀲𑁆𑀲𑀦𑁆𑀢𑀺’’ 𑀇𑀘𑁆𑀘𑁂𑀯𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀅𑀧𑀭𑁂 𑀅𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀭𑀸𑀚𑀤𑁆𑀯𑀸𑀭𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀓𑀳𑀸𑀧𑀡𑀅𑀟𑁆𑀠𑀓𑀳𑀸𑀧𑀡𑀧𑀸𑀤𑀫𑀸𑀲𑀓𑀭𑀽𑀧𑀸𑀤𑀻𑀦𑀺𑀧𑀺 𑀦𑀺𑀲𑁆𑀲𑀸𑀬 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀇𑀢𑀺 𑀫𑀬𑀸 𑀦𑀺𑀩𑁆𑀩𑀸𑀦𑀕𑁆𑀖𑀦𑀓𑀁 𑀓𑀢𑁆𑀯𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀘𑁂𑀯 𑀓𑀳𑀸𑀧𑀡𑀟𑁆𑀠𑀓𑀳𑀸𑀧𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀘 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀤𑁂𑀲𑁂𑀦𑁆𑀢𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑀸 𑀯𑀺𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀤𑁆𑀯𑀸𑀤𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁨) 𑀪𑀦𑁆𑀢𑁂, 𑀢𑀼𑀘𑁆𑀙𑀮𑀸𑀩𑀽𑀦𑀺 𑀉𑀤𑀓𑁂 𑀲𑀻𑀤𑀦𑁆𑀢𑀸𑀦𑀺 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀧𑀺 𑀅𑀦𑀸𑀕𑀢𑁂 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀦𑁆𑀢𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀳𑀺 𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀤𑀲𑁆𑀲𑀦𑁆𑀢𑀺, 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑀭𑁂 𑀤𑀮𑀺𑀤𑁆𑀤𑀸. 𑀭𑀸𑀚𑀲𑀫𑁆𑀫𑀼𑀔𑁂𑀧𑀺 𑀭𑀸𑀚𑀤𑁆𑀯𑀸𑀭𑁂𑀧𑀺 𑀅𑀫𑀘𑁆𑀘𑀲𑀫𑁆𑀫𑀼𑀔𑁂𑀧𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀢𑀼𑀘𑁆𑀙𑀮𑀸𑀩𑀼𑀲𑀤𑀺𑀲𑀸𑀦𑀁 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀓𑀣𑀸 𑀑𑀲𑀻𑀤𑀺𑀢𑁆𑀯𑀸 𑀞𑀺𑀢𑀸 𑀯𑀺𑀬 𑀦𑀺𑀘𑁆𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀺. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂𑀲𑀼𑀧𑀺 𑀲𑀗𑁆𑀖𑀓𑀫𑁆𑀫𑀕𑀡𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀘𑁂𑀯 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀲𑀼 𑀘 𑀤𑀼𑀲𑁆𑀲𑀻𑀮𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀓𑀣𑀸 𑀦𑀺𑀬𑁆𑀬𑀸𑀦𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀦 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀢𑀼𑀘𑁆𑀙𑀮𑀸𑀩𑀼𑀲𑀻𑀤𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀢𑁂𑀭𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁩) 𑀪𑀦𑁆𑀢𑁂, 𑀫𑀳𑀦𑁆𑀢𑀫𑀳𑀦𑁆𑀢𑀸 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀸 𑀖𑀦𑀲𑀺𑀮𑀸 𑀦𑀸𑀯𑀸 𑀯𑀺𑀬 𑀉𑀤𑀓𑁂 𑀧𑁆𑀮𑀯𑀫𑀸𑀦𑀸 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀧𑀺 𑀢𑀸𑀤𑀺𑀲𑁂𑀬𑁂𑀯 𑀓𑀸𑀮𑁂 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀳𑀺 𑀅𑀥𑀫𑁆𑀫𑀺𑀓𑀭𑀸𑀚𑀸𑀦𑁄 𑀅𑀓𑀼𑀮𑀻𑀦𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺, 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀤𑀼𑀕𑁆𑀕𑀢𑀸. 𑀢𑁂𑀲𑀼 𑀦 𑀓𑁂𑀘𑀺 𑀕𑀸𑀭𑀯𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀇𑀢𑀭𑁂𑀲𑀼𑀬𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀭𑀸𑀚𑀲𑀫𑁆𑀫𑀼𑀔𑁂 𑀯𑀸 𑀅𑀫𑀘𑁆𑀘𑀲𑀫𑁆𑀫𑀼𑀔𑁂 𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀯𑀸 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸𑀦𑀁 𑀖𑀦𑀲𑀺𑀮𑀸𑀲𑀤𑀺𑀲𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀓𑀣𑀸 𑀦 𑀑𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀢𑁂𑀲𑀼 𑀓𑀣𑁂𑀦𑁆𑀢𑁂𑀲𑀼 ‘‘𑀓𑀺𑀁 𑀇𑀫𑁂 𑀓𑀣𑁂𑀦𑁆𑀢𑀻’’𑀢𑀺 𑀇𑀢𑀭𑁂 𑀧𑀭𑀺𑀳𑀸𑀲𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁂𑀲𑀼𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀞𑀸𑀦𑁂𑀲𑀼 𑀦𑁂𑀯 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀕𑀭𑀼𑀓𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀦𑀸𑀧𑀺 𑀢𑁂𑀲𑀁 𑀓𑀣𑀸 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀲𑀺𑀮𑀸𑀦𑀁 𑀧𑁆𑀮𑀯𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀘𑀼𑀤𑁆𑀤𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁪) 𑀪𑀦𑁆𑀢𑁂, 𑀔𑀼𑀤𑁆𑀤𑀓𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸 𑀫𑀡𑁆𑀟𑀽𑀓𑀺𑀬𑁄 𑀫𑀳𑀦𑁆𑀢𑀫𑀳𑀦𑁆𑀢𑁂 𑀓𑀡𑁆𑀳𑀲𑀧𑁆𑀧𑁂 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀮𑀦𑀸𑀴𑁂 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀺𑀮𑀦𑁆𑀢𑀺𑀬𑁄 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀧𑀺 𑀮𑁄𑀓𑁂 𑀧𑀭𑀺𑀳𑀸𑀬𑀦𑁆𑀢𑁂 𑀅𑀦𑀸𑀕𑀢𑁂 𑀏𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀳𑀺 𑀫𑀦𑀼𑀲𑁆𑀲𑀸 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑀸 𑀓𑀺𑀮𑁂𑀲𑀸𑀦𑀼𑀯𑀢𑁆𑀢𑀓𑀸 𑀳𑀼𑀢𑁆𑀯𑀸 𑀢𑀭𑀼𑀡𑀢𑀭𑀼𑀡𑀸𑀦𑀁 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀯𑀲𑁂 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀕𑁂𑀳𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄𑀧𑀺 𑀕𑁄𑀫𑀳𑀺𑀁𑀲𑀸𑀤𑀬𑁄𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁆𑀧𑀺 𑀲𑀩𑁆𑀩𑀁 𑀢𑀸𑀲𑀜𑁆𑀜𑁂𑀯 𑀆𑀬𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. ‘‘𑀅𑀲𑀼𑀓𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀸 𑀧𑀭𑀺𑀘𑁆𑀙𑀤𑀸𑀤𑀺𑀚𑀸𑀢𑀁 𑀯𑀸 𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀳𑁄𑀢𑀼, 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦, 𑀢𑁆𑀯𑀁 𑀫𑀬𑁆𑀳𑀁 𑀖𑀭𑁂 𑀲𑀦𑁆𑀢𑀁 𑀯𑀸 𑀅𑀲𑀦𑁆𑀢𑀁 𑀯𑀸 𑀚𑀸𑀦𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀼𑀔𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀤𑀸𑀲𑀘𑁂𑀝𑀓𑁂 𑀯𑀺𑀬 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸𑀦𑀁 𑀫𑀡𑁆𑀟𑀽𑀓𑀧𑁄𑀢𑀺𑀓𑀸𑀦𑀁 𑀆𑀲𑀻𑀯𑀺𑀲𑁂 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀧𑀦𑁆𑀦𑀭𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁫) 𑀪𑀦𑁆𑀢𑁂, 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀕𑀸𑀫𑀕𑁄𑀘𑀭𑀁 𑀓𑀸𑀓𑀁 𑀓𑀜𑁆𑀘𑀦𑀯𑀡𑁆𑀡𑀢𑀸𑀬 ‘‘𑀲𑀼𑀯𑀡𑁆𑀡𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂 𑀧𑀭𑀺𑀯𑀸𑀭𑁂𑀦𑁆𑀢𑁂 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀸𑀧𑀺 𑀅𑀦𑀸𑀕𑀢𑁂 𑀤𑀼𑀩𑁆𑀩𑀮𑀭𑀸𑀚𑀓𑀸𑀮𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑀲𑁆𑀫𑀺𑀜𑁆𑀳𑀺 𑀭𑀸𑀚𑀸𑀦𑁄 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀅𑀓𑀼𑀲𑀮𑀸 𑀬𑀼𑀤𑁆𑀥𑁂𑀲𑀼 𑀅𑀯𑀺𑀲𑀸𑀭𑀤𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀭𑀚𑁆𑀚𑀯𑀺𑀧𑀢𑁆𑀢𑀺𑀁 𑀆𑀲𑀗𑁆𑀓𑀫𑀸𑀦𑀸 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀫𑀽𑀮𑀺𑀓𑀦𑁆𑀳𑀸𑀧𑀓𑀓𑀧𑁆𑀧𑀓𑀸𑀤𑀻𑀦𑀁 𑀤𑀲𑁆𑀲𑀦𑁆𑀢𑀺, 𑀚𑀸𑀢𑀺𑀕𑁄𑀢𑁆𑀢𑀲𑀫𑁆𑀧𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸 𑀭𑀸𑀚𑀓𑀼𑀮𑁂 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀼𑀁 𑀅𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂 𑀚𑀸𑀢𑀺𑀕𑁄𑀢𑁆𑀢𑀳𑀻𑀦𑁂 𑀅𑀓𑀼𑀮𑀻𑀦𑁂 𑀉𑀧𑀝𑁆𑀞𑀳𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂𑀳𑀺 𑀓𑀸𑀓𑀲𑁆𑀲 𑀧𑀭𑀺𑀯𑀸𑀭𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺, 𑀲𑁄𑀴𑀲𑀫𑀁 𑀓𑀣𑁂𑀳𑀻𑀢𑀺.

(𑁧𑁬) 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀤𑀻𑀧𑀺𑀦𑁄 𑀏𑀴𑀓𑁂 𑀔𑀸𑀤𑀦𑁆𑀢𑀺, 𑀅𑀳𑀁 𑀧𑀦 𑀏𑀴𑀓𑁂 𑀤𑀻𑀧𑀺𑀦𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑀼𑀭𑀼𑀫𑀼𑀭𑀽𑀢𑀺 𑀔𑀸𑀤𑀦𑁆𑀢𑁂 𑀅𑀤𑁆𑀤𑀲𑀁. 𑀅𑀣𑀜𑁆𑀜𑁂 𑀢𑀲𑀸 𑀯𑀓𑀸 𑀏𑀴𑀓𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀢𑀲𑀺𑀢𑀸 𑀢𑀸𑀲𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀏𑀴𑀓𑀸𑀦𑀁 𑀪𑀬𑀸𑀧𑀮𑀸𑀬𑀺𑀢𑁆𑀯𑀸 𑀕𑀼𑀫𑁆𑀩𑀕𑀳𑀦𑀸𑀤𑀻𑀦𑀺 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀬𑀺𑀁𑀲𑀼, 𑀏𑀯𑀸𑀳𑀁 𑀅𑀤𑁆𑀤𑀲𑀁, 𑀇𑀫𑀲𑁆𑀲 𑀓𑁄 𑀯𑀺𑀧𑀸𑀓𑁄𑀢𑀺? 𑀇𑀫𑀲𑁆𑀲𑀧𑀺 𑀅𑀦𑀸𑀕𑀢𑁂 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀳𑀺 𑀅𑀓𑀼𑀮𑀻𑀦𑀸 𑀭𑀸𑀚𑀯𑀮𑁆𑀮𑀪𑀸 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀅𑀧𑀜𑁆𑀜𑀸𑀢𑀸 𑀤𑀼𑀕𑁆𑀕𑀢𑀸. 𑀢𑁂 𑀭𑀸𑀚𑀯𑀮𑁆𑀮𑀪𑀸 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀩𑀮𑀯𑀦𑁆𑀢𑁄 𑀳𑀼𑀢𑁆𑀯𑀸 𑀓𑀼𑀮𑀻𑀦𑀸𑀦𑀁 𑀧𑀯𑁂𑀡𑀺𑀆𑀕𑀢𑀸𑀦𑀺 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀸𑀦𑀺 𑀏𑀢𑀸𑀦𑀻’’𑀢𑀺 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀢𑁂𑀲𑀼 ‘‘𑀦 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓’’𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀯𑀤𑀦𑁆𑀢𑁂𑀲𑀼 𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀧𑀳𑀭𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀧𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀣, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀣, 𑀇𑀤𑀸𑀦𑀺 𑀯𑁄 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀸𑀤𑀻𑀦𑀺 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀲𑁆𑀲𑀦𑁆𑀢𑀺. 𑀢𑁂 𑀢𑁂𑀲𑀁 𑀪𑀬𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀺 𑀯𑀢𑁆𑀣𑀽𑀦𑀺 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯𑁂𑀢𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀪𑀻𑀢𑀸 𑀦𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀧𑀸𑀧𑀪𑀺𑀓𑁆𑀔𑀽𑀧𑀺 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀬𑀣𑀸𑀭𑀼𑀘𑀺 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺, 𑀢𑁂 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀝𑀺𑀲𑀭𑀡𑀁 𑀅𑀮𑀪𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂𑀲𑀼 𑀦𑀺𑀮𑀻𑀬𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀳𑀻𑀦𑀚𑀘𑁆𑀘𑁂𑀳𑀺 𑀘𑁂𑀯 𑀧𑀸𑀧𑀪𑀺𑀓𑁆𑀔𑀽𑀳𑀺 𑀘 𑀉𑀧𑀤𑁆𑀤𑀼𑀢𑀸𑀦𑀁 𑀚𑀸𑀢𑀺𑀫𑀦𑁆𑀢𑀓𑀼𑀮𑀧𑀼𑀢𑁆𑀢𑀸𑀦𑀜𑁆𑀘𑁂𑀯 𑀧𑁂𑀲𑀮𑀪𑀺𑀓𑁆𑀔𑀽𑀦𑀜𑁆𑀘 𑀏𑀴𑀓𑀸𑀦𑀁 𑀪𑀬𑁂𑀦 𑀢𑀲𑀯𑀓𑀸𑀦𑀁 𑀧𑀮𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀇𑀢𑁄𑀦𑀺𑀤𑀸𑀦𑀫𑁆𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀺. 𑀅𑀬𑀫𑁆𑀧𑀺 𑀳𑀺 𑀲𑀼𑀧𑀺𑀦𑁄 𑀅𑀦𑀸𑀕𑀢𑀁𑀬𑁂𑀯 𑀆𑀭𑀩𑁆𑀪 𑀤𑀺𑀝𑁆𑀞𑁄. 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀦 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀢𑀬𑀺 𑀲𑀺𑀦𑁂𑀳𑁂𑀦 𑀓𑀣𑀬𑀺𑀁𑀲𑀼, ‘‘𑀩𑀳𑀼𑀥𑀦𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀆𑀫𑀺𑀲𑀸𑀧𑁂𑀓𑁆𑀔𑀢𑀸𑀬 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀓𑀣𑀬𑀺𑀁𑀲𑀽𑀢𑀺.

𑀏𑀯𑀁 𑀲𑀢𑁆𑀣𑀸 𑀲𑁄𑀴𑀲𑀦𑁆𑀦𑀁 𑀫𑀳𑀸𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀏𑀢𑀭𑀳𑀺 𑀢𑁆𑀯𑀜𑁆𑀜𑁂𑀯 𑀇𑀫𑁂 𑀲𑀼𑀧𑀺𑀦𑁂 𑀅𑀤𑁆𑀤𑀲, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄𑀧𑀺 𑀅𑀤𑁆𑀤𑀲𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸𑀧𑀺 𑀦𑁂𑀲𑀁 𑀏𑀯𑀫𑁂𑀯 𑀇𑀫𑁂 𑀲𑀼𑀧𑀺𑀦𑁂 𑀕𑀳𑁂𑀢𑁆𑀯𑀸 𑀬𑀜𑁆𑀜𑀫𑀢𑁆𑀣𑀓𑁂 𑀔𑀺𑀧𑀺𑀁𑀲𑀼, 𑀢𑀢𑁄 𑀧𑀡𑁆𑀟𑀺𑀢𑁂𑀳𑀺 𑀤𑀺𑀦𑁆𑀦𑀦𑀬𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀧𑁄𑀭𑀸𑀡𑀓𑀸 𑀧𑀡𑁆𑀟𑀺𑀢𑀸𑀧𑀺 𑀦𑁂𑀲𑀁 𑀇𑀫𑁂 𑀲𑀼𑀧𑀺𑀦𑁂 𑀓𑀣𑁂𑀦𑁆𑀢𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀓𑀣𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘𑁂𑀯 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀇𑀫𑁂 𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑁂𑀯 𑀬𑀜𑁆𑀜𑀁 𑀬𑀚𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀢𑁂𑀲𑀼 𑀧𑀼𑀭𑁄𑀳𑀺𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀫𑀸𑀡𑀯𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀆𑀘𑀭𑀺𑀬𑀁 𑀆𑀳 𑁋 ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂𑀳𑀺 𑀫𑀬𑀁 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀸𑀧𑀺𑀢𑀸, 𑀦𑀦𑀼 𑀢𑁂𑀲𑀼 𑀏𑀓𑀁 𑀫𑀸𑀭𑁂𑀢𑁆𑀯𑀸 𑀏𑀓𑀲𑁆𑀲 𑀲𑁄𑀢𑁆𑀣𑀺𑀓𑀫𑁆𑀫𑀲𑁆𑀲 𑀓𑀸𑀭𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀸𑀢, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀫𑁆𑀳𑀸𑀓𑀁 𑀩𑀳𑀼𑀥𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑁆𑀯𑀁 𑀧𑀦 𑀭𑀜𑁆𑀜𑁄 𑀥𑀦𑀁 𑀭𑀓𑁆𑀔𑀺𑀢𑀼𑀓𑀸𑀫𑁄 𑀫𑀜𑁆𑀜𑁂𑀢𑀺. 𑀫𑀸𑀡𑀯𑁄 ‘‘𑀢𑁂𑀦 𑀳𑀺, 𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀓𑀫𑁆𑀫𑀁 𑀓𑀭𑁄𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀘𑀭𑀦𑁆𑀢𑁄 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺.

𑀢𑀁 𑀤𑀺𑀯𑀲𑀫𑁂𑀯 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀺 𑀫𑀦𑀼𑀲𑁆𑀲𑀧𑀣𑀁 𑀕𑀢𑁂 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀸 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀫𑀗𑁆𑀕𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺. 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀫𑀸𑀡𑀯, 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀭𑀸𑀚𑀸 𑀦𑀸𑀫 𑀥𑀫𑁆𑀫𑀺𑀓𑁄, 𑀅𑀧𑀺𑀘 𑀔𑁄 𑀢𑀁 𑀩𑁆𑀭𑀸𑀳𑁆𑀫𑀡𑀸 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑀸𑀧𑁂’’𑀦𑁆𑀢𑀺. 𑀭𑀸𑀚𑀸 𑀲𑁄𑀴𑀲 𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀭𑀤𑁆𑀥𑀸. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, ‘‘𑀅𑀬𑀁 𑀦𑀸𑀫 𑀇𑀫𑁂𑀲𑀁 𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀻’’𑀢𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀫𑀳𑀸𑀚𑀦𑀁 𑀪𑀬𑀸 𑀫𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀫𑀬𑀁 𑀔𑁄, 𑀫𑀸𑀡𑀯, 𑀭𑀸𑀚𑀸𑀦𑀁 𑀦 𑀚𑀸𑀦𑀸𑀫, 𑀭𑀸𑀚𑀸𑀧𑀺 𑀅𑀫𑁆𑀳𑁂 𑀦 𑀚𑀸𑀦𑀸𑀢𑀺. 𑀲𑀘𑁂 𑀧𑀦 𑀇𑀥𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬, 𑀓𑀣𑁂𑀬𑁆𑀬𑀸𑀫𑀲𑁆𑀲 𑀫𑀬𑀦𑁆𑀢𑀺. 𑀫𑀸𑀡𑀯𑁄 ‘‘𑀅𑀳𑀁, 𑀪𑀦𑁆𑀢𑁂, 𑀢𑀁 𑀆𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀫𑀸𑀕𑀫𑀦𑀁 𑀉𑀤𑀺𑀓𑁆𑀔𑀦𑁆𑀢𑀸 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀣𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀏𑀓𑁄 𑀆𑀓𑀸𑀲𑀘𑀸𑀭𑀺𑀓𑁄 𑀢𑀸𑀧𑀲𑁄 𑀢𑀼𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 ‘𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺 𑀢𑀼𑀫𑁆𑀳𑁂 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳.

𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀸𑀯𑀤𑁂𑀯 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 ‘‘𑀢𑀼𑀫𑁆𑀳𑁂 𑀓𑀺𑀭, 𑀪𑀦𑁆𑀢𑁂, 𑀫𑀬𑀸 𑀤𑀺𑀝𑁆𑀞𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀓𑀣𑁂𑀣𑀸’’𑀢𑀺. ‘‘𑀓𑀣𑁂𑀫𑀺, 𑀫𑀳𑀸𑀭𑀸𑀚, 𑀬𑀣𑀸𑀤𑀺𑀝𑁆𑀞𑁂 𑀢𑀸𑀯 𑀲𑀼𑀧𑀺𑀦𑁂 𑀫𑀁 𑀲𑀸𑀯𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑁋

𑁭𑁭. ‘‘𑀉𑀲𑀪𑀸 𑀭𑀼𑀓𑁆𑀔𑀸 𑀕𑀸𑀯𑀺𑀬𑁄 𑀕𑀯𑀸 𑀘,

𑀅𑀲𑁆𑀲𑁄 𑀓𑀁𑀲𑁄 𑀲𑀺𑀗𑁆𑀕𑀸𑀮𑀻 𑀘 𑀓𑀼𑀫𑁆𑀪𑁄;

𑀧𑁄𑀓𑁆𑀔𑀭𑀡𑀻 𑀘 𑀅𑀧𑀸𑀓𑀘𑀦𑁆𑀤𑀦𑀁.

‘‘𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸 𑀧𑁆𑀮𑀯𑀦𑁆𑀢𑀺, 𑀫𑀡𑁆𑀟𑀽𑀓𑀺𑀬𑁄 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑁆𑀢𑀺;

𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀺, 𑀢𑀲𑀸 𑀯𑀓𑀸 𑀏𑀴𑀓𑀸𑀦𑀁 𑀪𑀬𑀸 𑀳𑀻’’𑀢𑀺. 𑁋

𑀯𑀢𑁆𑀯𑀸 𑀧𑀲𑁂𑀦𑀤𑀺𑀭𑀜𑁆𑀜𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀼𑀧𑀺𑀦𑁂 𑀓𑀣𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑁂𑀲𑀁 𑀇𑀤𑀸𑀦𑀺 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀲𑀬𑀁 𑀇𑀤𑀁 𑀓𑀣𑁂𑀲𑀺 𑁋

‘‘𑀯𑀺𑀧𑀭𑀺𑀬𑀸𑀲𑁄 𑀯𑀢𑁆𑀢𑀢𑀺 𑀦𑀬𑀺𑀥 𑀫𑀢𑁆𑀣𑀻’’𑀢𑀺;

𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀅𑀬𑀁, 𑀫𑀳𑀸𑀭𑀸𑀚, 𑀇𑀫𑁂𑀲𑀁 𑀲𑀼𑀧𑀺𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺. 𑀬𑀁 𑀧𑀦𑁂𑀢𑀁 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀬𑀜𑁆𑀜𑀓𑀫𑁆𑀫𑀁 𑀯𑀢𑁆𑀢𑀢𑀺, 𑀢𑀁 𑀯𑀺𑀧𑀭𑀺𑀬𑀸𑀲𑁄 𑀯𑀢𑁆𑀢𑀢𑀺 𑀯𑀺𑀧𑀭𑀻𑀢𑀢𑁄 𑀯𑀢𑁆𑀢𑀢𑀺, 𑀯𑀺𑀧𑀮𑁆𑀮𑀸𑀲𑁂𑀦 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀇𑀫𑁂𑀲𑀜𑁆𑀳𑀺 𑀦𑀺𑀧𑁆𑀨𑀢𑁆𑀢𑀺 𑀦𑀸𑀫 𑀮𑁄𑀓𑀲𑁆𑀲 𑀯𑀺𑀧𑀭𑀺𑀯𑀢𑁆𑀢𑀦𑀓𑀸𑀮𑁂, 𑀅𑀓𑀸𑀭𑀡𑀲𑁆𑀲 𑀓𑀸𑀭𑀡𑀦𑁆𑀢𑀺 𑀕𑀳𑀡𑀓𑀸𑀮𑁂, 𑀓𑀸𑀭𑀡𑀲𑁆𑀲 𑀅𑀓𑀸𑀭𑀡𑀦𑁆𑀢𑀺 𑀙𑀟𑁆𑀟𑀦𑀓𑀸𑀮𑁂, 𑀅𑀪𑀽𑀢𑀲𑁆𑀲 𑀪𑀽𑀢𑀦𑁆𑀢𑀺 𑀕𑀳𑀡𑀓𑀸𑀮𑁂, 𑀪𑀽𑀢𑀲𑁆𑀲 𑀅𑀪𑀽𑀢𑀦𑁆𑀢𑀺 𑀚𑀳𑀦𑀓𑀸𑀮𑁂, 𑀅𑀮𑀚𑁆𑀚𑀻𑀦𑀁 𑀉𑀲𑁆𑀲𑀦𑁆𑀦𑀓𑀸𑀮𑁂, 𑀮𑀚𑁆𑀚𑀻𑀦𑀜𑁆𑀘 𑀧𑀭𑀺𑀳𑀻𑀦𑀓𑀸𑀮𑁂 𑀪𑀯𑀺𑀲𑁆𑀲𑀢𑀺. 𑀦𑀬𑀺𑀥 𑀫𑀢𑁆𑀣𑀻𑀢𑀺 𑀇𑀤𑀸𑀦𑀺 𑀧𑀦 𑀢𑀯 𑀯𑀸 𑀫𑀫 𑀯𑀸 𑀓𑀸𑀮𑁂 𑀇𑀥 𑀇𑀫𑀲𑁆𑀫𑀺𑀁 𑀧𑀼𑀭𑀺𑀲𑀬𑀼𑀕𑁂 𑀯𑀢𑁆𑀢𑀫𑀸𑀦𑁂 𑀏𑀢𑁂𑀲𑀁 𑀦𑀺𑀧𑁆𑀨𑀢𑁆𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀢𑁂𑀲𑀁 𑀧𑀝𑀺𑀖𑀸𑀢𑀸𑀬 𑀯𑀢𑁆𑀢𑀫𑀸𑀦𑀁 𑀬𑀜𑁆𑀜𑀓𑀫𑁆𑀫𑀁 𑀯𑀺𑀧𑀮𑁆𑀮𑀸𑀲𑁂𑀦 𑀯𑀢𑁆𑀢𑀢𑀺, 𑀅𑀮𑀁 𑀢𑁂𑀦. 𑀦𑀢𑁆𑀣𑀺 𑀢𑁂 𑀇𑀢𑁄𑀦𑀺𑀤𑀸𑀦𑀁 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸𑀢𑀺 𑀫𑀳𑀸𑀧𑀼𑀭𑀺𑀲𑁄 𑀭𑀸𑀚𑀸𑀦𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀩𑀦𑁆𑀥𑀦𑀸 𑀫𑁄𑀘𑁂𑀢𑁆𑀯𑀸 𑀧𑀼𑀦 𑀆𑀓𑀸𑀲𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀲𑀼𑀖𑀸𑀢𑀬𑀜𑁆𑀜𑀁 𑀫𑀸 𑀬𑀚𑀻’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸𑀧𑀺 𑀢𑀲𑁆𑀲 𑀑𑀯𑀸𑀤𑁂 𑀞𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀼𑀧𑀺𑀦𑀧𑀘𑁆𑀘𑀬𑀸 𑀢𑁂 𑀪𑀬𑀁 𑀦𑀢𑁆𑀣𑀺, 𑀳𑀭𑁂𑀢𑀁 𑀬𑀜𑁆𑀜’’𑀦𑁆𑀢𑀺 𑀬𑀜𑁆𑀜𑀁 𑀳𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀫𑀸𑀡𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀸 ‘‘𑀉𑀲𑀪𑀸’’𑀢𑀺𑀆𑀤𑀻𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀅𑀝𑁆𑀞𑀓𑀣𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀮𑀸𑀩𑀽𑀦𑀻’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀏𑀓𑀁 𑀕𑀸𑀣𑀁 𑀓𑀢𑁆𑀯𑀸 𑀏𑀓𑀓𑀦𑀺𑀧𑀸𑀢𑀧𑀸𑀴𑀺𑀁 𑀆𑀭𑁄𑀧𑁂𑀲𑀼𑀦𑁆𑀢𑀺.

𑀫𑀳𑀸𑀲𑀼𑀧𑀺𑀦𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁭𑁮] 𑁮. 𑀇𑀮𑁆𑀮𑀺𑀲𑀚𑀸𑀢𑀓𑀯𑀡𑁆𑀡𑀦𑀸

𑀉𑀪𑁄 𑀔𑀜𑁆𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀭𑀸𑀚𑀕𑀳𑀦𑀕𑀭𑀲𑁆𑀲 𑀓𑀺𑀭 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀁 𑀦𑀸𑀫 𑀦𑀺𑀕𑀫𑁄 𑀅𑀳𑁄𑀲𑀺, 𑀢𑀢𑁆𑀣𑁂𑀓𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀧𑀝𑀺𑀯𑀲𑀢𑀺. 𑀲𑁄 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀦𑁂𑀯 𑀧𑀭𑁂𑀲𑀁 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀢𑀺 𑀢𑀲𑁆𑀲 𑀢𑀁 𑀯𑀺𑀪𑀯𑀚𑀸𑀢𑀁 𑀦𑁂𑀯 𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺, 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀧𑁄𑀓𑁆𑀔𑀭𑀡𑀻 𑀯𑀺𑀬 𑀅𑀧𑀭𑀺𑀪𑁄𑀕𑀁 𑀢𑀺𑀝𑁆𑀞𑀢𑀺.

𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀓𑀮𑀮𑁄𑀓𑀥𑀸𑀢𑀼𑀬𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀯𑀲𑀦𑁆𑀢𑀲𑁆𑀲 𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀲𑀧𑀚𑀸𑀧𑀢𑀺𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀢𑀢𑁄 𑀧𑀼𑀭𑀺𑀫𑀤𑀺𑀯𑀲𑁂 𑀧𑀦 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 𑀭𑀸𑀚𑀽𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀙𑀸𑀢𑀚𑁆𑀛𑀢𑁆𑀢𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀓𑀼𑀫𑁆𑀫𑀸𑀲𑀧𑀽𑀭𑀁 𑀓𑀧𑀮𑁆𑀮𑀧𑀽𑀯𑀁 𑀔𑀸𑀤𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀺𑀧𑀸𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 ‘𑀓𑀧𑀮𑁆𑀮𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’𑀢𑀺 𑀯𑀓𑁆𑀔𑀸𑀫𑀺, 𑀩𑀳𑀽 𑀫𑀬𑀸 𑀲𑀤𑁆𑀥𑀺𑀁 𑀔𑀸𑀤𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀩𑀳𑀽𑀦𑀺 𑀢𑀡𑁆𑀟𑀼𑀮𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀦 𑀓𑀲𑁆𑀲𑀘𑀺 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀉𑀧𑁆𑀧𑀡𑁆𑀟𑀼𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀚𑀸𑀢𑁄. 𑀢𑀢𑁄 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑀁 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀏𑀯𑀁𑀕𑀢𑁄𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺.

𑀅𑀣 𑀦𑀁 𑀪𑀭𑀺𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀢𑁂 𑀲𑀸𑀫𑀺, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀫𑁂 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀢𑁂 𑀭𑀸𑀚𑀸 𑀓𑀼𑀧𑀺𑀢𑁄’’𑀢𑀺? ‘‘𑀭𑀸𑀚𑀸𑀧𑀺 𑀫𑁂 𑀦 𑀓𑀼𑀧𑁆𑀧𑀢𑀻’’𑀢𑀺. ‘‘𑀅𑀣 𑀓𑀺𑀁 𑀢𑁂 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀳𑀺 𑀯𑀸 𑀓𑀺𑀜𑁆𑀘𑀺 𑀅𑀫𑀦𑀸𑀧𑀁 𑀓𑀢𑀁 𑀅𑀢𑁆𑀣𑀻’’𑀢𑀺? ‘‘𑀏𑀯𑀭𑀽𑀧𑀫𑁆𑀧𑀺 𑀦𑀢𑁆𑀣𑀻’’𑀢𑀺. ‘‘𑀓𑀺𑀲𑁆𑀫𑀺𑀜𑁆𑀘𑀺 𑀧𑀦 𑀢𑁂 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄𑀯 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀪𑀭𑀺𑀬𑀸 ‘‘𑀓𑀣𑁂𑀳𑀺, 𑀲𑀸𑀫𑀺, 𑀓𑀺𑀲𑁆𑀫𑀺𑀁 𑀢𑁂 𑀢𑀡𑁆𑀳𑀸’’𑀢𑀺 𑀆𑀳. 𑀲𑁄 𑀯𑀘𑀦𑀁 𑀧𑀭𑀺𑀕𑀺𑀮𑀦𑁆𑀢𑁄 𑀯𑀺𑀬 ‘‘𑀅𑀢𑁆𑀣𑀺 𑀫𑁂 𑀏𑀓𑀸 𑀢𑀡𑁆𑀳𑀸’’𑀢𑀺 𑀆𑀳. ‘‘𑀓𑀺𑀁 𑀢𑀡𑁆𑀳𑀸, 𑀲𑀸𑀫𑀻’’𑀢𑀺? ‘‘𑀓𑀧𑀮𑁆𑀮𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺. ‘‘𑀅𑀣 𑀓𑀺𑀫𑀢𑁆𑀣𑀁 𑀦 𑀓𑀣𑁂𑀲𑀺, 𑀓𑀺𑀁 𑀢𑁆𑀯𑀁 𑀤𑀮𑀺𑀤𑁆𑀤𑁄, 𑀇𑀤𑀸𑀦𑀺 𑀲𑀓𑀮𑀲𑀓𑁆𑀓𑀸𑀭𑀦𑀺𑀕𑀫𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀓𑀧𑀮𑁆𑀮𑀧𑀽𑀯𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺? ‘‘𑀓𑀺𑀁 𑀢𑁂 𑀏𑀢𑁂𑀳𑀺, 𑀢𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀭𑀘𑁆𑀙𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀧𑀘𑀸𑀫𑀻’’𑀢𑀺. 𑀚𑀸𑀦𑀸𑀫𑀳𑀁 𑀢𑀯 𑀫𑀳𑀤𑁆𑀥𑀦𑀪𑀸𑀯𑀦𑁆𑀢𑀺. ‘‘𑀢𑁂𑀦 𑀳𑀺 𑀇𑀫𑀲𑁆𑀫𑀺𑀁 𑀕𑁂𑀳𑀫𑀢𑁆𑀢𑁂 𑀲𑀩𑁆𑀩𑁂𑀲𑀁 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀚𑁆𑀛𑀸𑀲𑀬𑀪𑀸𑀯’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁂 𑀧𑀼𑀢𑁆𑀢𑀤𑀸𑀭𑀫𑀢𑁆𑀢𑀲𑁆𑀲𑁂𑀯 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀏𑀢𑁂𑀳𑀻’’𑀢𑀺? ‘‘𑀢𑁂𑀦 𑀳𑀺 𑀢𑀼𑀬𑁆𑀳𑀜𑁆𑀘 𑀫𑀬𑁆𑀳𑀜𑁆𑀘 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀢𑁆𑀯𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀲𑁆𑀲𑁂𑀯 𑀢𑁂 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀘𑁆𑀘𑀫𑀸𑀦𑀁 𑀩𑀳𑀽 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀲𑀓𑀮𑀢𑀡𑁆𑀟𑀼𑀮𑁂 𑀞𑀧𑁂𑀢𑁆𑀯𑀸 𑀪𑀺𑀦𑁆𑀦𑀢𑀡𑁆𑀟𑀼𑀮𑁂 𑀘 𑀉𑀤𑁆𑀥𑀦𑀓𑀧𑀮𑁆𑀮𑀸𑀤𑀻𑀦𑀺 𑀘 𑀆𑀤𑀸𑀬 𑀣𑁄𑀓𑀁 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀜𑁆𑀘 𑀕𑀳𑁂𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑀁 𑀆𑀭𑀼𑀬𑁆𑀳 𑀧𑀘, 𑀢𑀢𑁆𑀣𑀸𑀳𑀁 𑀏𑀓𑀓𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀤𑀸𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀦𑁆𑀢𑁄 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀲𑀽𑀘𑀺𑀖𑀝𑀺𑀓𑀸𑀦𑀺 𑀤𑀢𑁆𑀯𑀸 𑀲𑀢𑁆𑀢𑀫𑀢𑀮𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣𑀧𑀺 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀉𑀤𑁆𑀥𑀦𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀓𑀧𑀮𑁆𑀮𑀓𑀁 𑀆𑀭𑁄𑀧𑁂𑀢𑁆𑀯𑀸 𑀧𑀽𑀯𑁂 𑀧𑀘𑀺𑀢𑀼𑀁 𑀆𑀭𑀪𑀺.

𑀅𑀣 𑀲𑀢𑁆𑀣𑀸 𑀧𑀸𑀢𑁄𑀯 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺, ‘‘𑀏𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀭𑀸𑀚𑀕𑀳𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀦𑀺𑀕𑀫𑁂 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺 ‘𑀓𑀧𑀮𑁆𑀮𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀪𑀬𑁂𑀦 𑀲𑀢𑁆𑀢𑀪𑀽𑀫𑀺𑀓𑁂 𑀧𑀸𑀲𑀸𑀤𑁂 𑀓𑀧𑀮𑁆𑀮𑀧𑀽𑀯𑁂 𑀧𑀘𑀸𑀧𑁂𑀢𑀺. 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀲𑁂𑀝𑁆𑀞𑀺𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑁂 𑀧𑀽𑀯𑁂 𑀘 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀚𑁂𑀢𑀯𑀦𑀁 𑀆𑀦𑁂𑀳𑀺. 𑀅𑀚𑁆𑀚𑀸𑀳𑀁 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀧𑀽𑀯𑁂𑀳𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀤𑁂𑀯 𑀇𑀤𑁆𑀥𑀺𑀩𑀮𑁂𑀦 𑀢𑀁 𑀦𑀺𑀕𑀫𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀻𑀳𑀧𑀜𑁆𑀚𑀭𑀤𑁆𑀯𑀸𑀭𑁂 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀆𑀓𑀸𑀲𑁂𑀬𑁂𑀯 𑀫𑀡𑀺𑀭𑀽𑀧𑀓𑀁 𑀯𑀺𑀬 𑀅𑀝𑁆𑀞𑀸𑀲𑀺.

𑀫𑀳𑀸𑀲𑁂𑀝𑁆𑀞𑀺𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀳𑀤𑀬𑀫𑀁𑀲𑀁 𑀓𑀫𑁆𑀧𑀺. 𑀲𑁄 ‘‘𑀅𑀳𑀁 𑀏𑀯𑀭𑀽𑀧𑀸𑀦𑀜𑁆𑀜𑁂𑀯 𑀪𑀬𑁂𑀦 𑀇𑀫𑀁 𑀞𑀸𑀦𑀁 𑀆𑀕𑀢𑁄, 𑀅𑀬𑀜𑁆𑀘 𑀆𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀤𑁆𑀯𑀸𑀭𑁂 𑀞𑀺𑀢𑁄’’𑀢𑀺 𑀕𑀳𑁂𑀢𑀩𑁆𑀩𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀤𑁄𑀲𑁂𑀦 𑀢𑀝𑀢𑀝𑀸𑀬𑀦𑁆𑀢𑁄 𑀏𑀯𑀫𑀸𑀳 ‘‘𑀲𑀫𑀡, 𑀆𑀓𑀸𑀲𑁂 𑀞𑀢𑁆𑀯𑀸 𑀢𑁆𑀯𑀁 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄𑀧𑀺 𑀦𑁂𑀯 𑀮𑀪𑀺𑀲𑁆𑀲𑀲𑀻’’𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺. 𑀲𑁂𑀝𑁆𑀞𑀺 ‘‘𑀘𑀗𑁆𑀓𑀫𑀦𑁆𑀢𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀫𑀸𑀦𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺𑀬𑁂𑀯𑀸’’𑀢𑀺 𑀆𑀳. 𑀣𑁂𑀭𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 ‘‘𑀦𑀺𑀲𑀺𑀦𑁆𑀦𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀉𑀫𑁆𑀫𑀸𑀭𑁂 𑀞𑀺𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀅𑀣 𑀣𑁂𑀭𑁄 𑀉𑀫𑁆𑀫𑀸𑀭𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 ‘‘𑀉𑀫𑁆𑀫𑀸𑀭𑁂 𑀞𑀺𑀢𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀥𑀽𑀫𑀸𑀬𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺𑀬𑁂𑀯𑀸’’𑀢𑀺 𑀆𑀳. 𑀣𑁂𑀭𑁄 𑀥𑀽𑀫𑀸𑀬𑀺, 𑀲𑀓𑀮𑀧𑀸𑀲𑀸𑀤𑁄 𑀏𑀓𑀥𑀽𑀫𑁄 𑀅𑀳𑁄𑀲𑀺, 𑀲𑁂𑀝𑁆𑀞𑀺𑀦𑁄 𑀅𑀓𑁆𑀔𑀻𑀦𑀁 𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀓𑀸𑀮𑁄 𑀯𑀺𑀬 𑀚𑀸𑀢𑁄. 𑀕𑁂𑀳𑀚𑁆𑀛𑀸𑀬𑀦𑀪𑀬𑁂𑀦 𑀧𑀦 𑀦𑀁 ‘‘𑀧𑀚𑁆𑀚𑀮𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀅𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀲𑀫𑀡𑁄 𑀲𑀼𑀝𑁆𑀞𑀼 𑀮𑀕𑁆𑀕𑁄, 𑀅𑀮𑀤𑁆𑀥𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀓𑀫𑀲𑁆𑀲 𑀧𑀽𑀯𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀏𑀓𑀁 𑀔𑀼𑀤𑁆𑀤𑀓𑀧𑀽𑀯𑀁 𑀧𑀘𑀺𑀢𑁆𑀯𑀸 𑀲𑀫𑀡𑀲𑁆𑀲 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀳𑀺 𑀦’’𑀦𑁆𑀢𑀺. 𑀲𑀸 𑀣𑁄𑀓𑀜𑁆𑀜𑁂𑀯 𑀧𑀺𑀝𑁆𑀞𑀁 𑀓𑀧𑀮𑁆𑀮𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺, 𑀫𑀳𑀸𑀧𑀽𑀯𑁄 𑀳𑀼𑀢𑁆𑀯𑀸 𑀲𑀓𑀮𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑁄 𑀅𑀝𑁆𑀞𑀸𑀲𑀺.

𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀩𑀳𑀼 𑀢𑀬𑀸 𑀧𑀺𑀝𑁆𑀞𑀁 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀤𑀩𑁆𑀩𑀺𑀓𑀡𑁆𑀡𑁂𑀦 𑀣𑁄𑀓𑀢𑀭𑀁 𑀧𑀺𑀝𑁆𑀞𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺, 𑀧𑀽𑀯𑁄 𑀧𑀼𑀭𑀺𑀫𑀧𑀽𑀯𑀢𑁄 𑀫𑀳𑀦𑁆𑀢𑀢𑀭𑁄 𑀚𑀸𑀢𑁄. 𑀏𑀯𑀁 𑀬𑀁 𑀬𑀁 𑀧𑀘𑀢𑀺, 𑀲𑁄 𑀲𑁄 𑀫𑀳𑀦𑁆𑀢𑀫𑀳𑀦𑁆𑀢𑁄𑀯 𑀳𑁄𑀢𑀺. 𑀲𑁄 𑀦𑀺𑀩𑁆𑀩𑀺𑀦𑁆𑀦𑁄 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂, 𑀇𑀫𑀲𑁆𑀲 𑀏𑀓𑀁 𑀧𑀽𑀯𑀁 𑀤𑁂𑀳𑀻’’𑀢𑀺. 𑀢𑀲𑁆𑀲𑀸 𑀧𑀘𑁆𑀙𑀺𑀢𑁄 𑀏𑀓𑀁 𑀧𑀽𑀯𑀁 𑀕𑀡𑁆𑀳𑀦𑁆𑀢𑀺𑀬𑀸 𑀲𑀩𑁆𑀩𑁂 𑀏𑀓𑀸𑀩𑀤𑁆𑀥𑀸 𑀅𑀮𑁆𑀮𑀻𑀬𑀺𑀁𑀲𑀼. 𑀲𑀸 𑀲𑁂𑀝𑁆𑀞𑀺𑀁 𑀆𑀳 ‘‘𑀲𑀸𑀫𑀺, 𑀲𑀩𑁆𑀩𑁂 𑀧𑀽𑀯𑀸 𑀏𑀓𑀢𑁄 𑀮𑀕𑁆𑀕𑀸, 𑀯𑀺𑀲𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀅𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀧𑀺 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀉𑀪𑁄 𑀚𑀦𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸𑀧𑀺 𑀯𑀺𑀬𑁄𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼𑀬𑁂𑀯. 𑀅𑀣𑀲𑁆𑀲 𑀧𑀽𑀯𑁂𑀳𑀺 𑀲𑀤𑁆𑀥𑀺𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀧𑀺𑀧𑀸𑀲𑀸 𑀘 𑀧𑀘𑁆𑀙𑀺𑀚𑁆𑀚𑀺. 𑀢𑀢𑁄 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂, 𑀦 𑀫𑁂 𑀧𑀽𑀯𑁂𑀳𑀺 𑀅𑀢𑁆𑀣𑁄, 𑀧𑀘𑁆𑀙𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑁂𑀳𑀻’’𑀢𑀺. 𑀲𑀸 𑀧𑀘𑁆𑀙𑀺𑀁 𑀆𑀤𑀸𑀬 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑁂 𑀧𑀽𑀯𑁂 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀉𑀪𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀓𑀣𑁂𑀲𑀺, ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 𑀤𑀸𑀦𑀸𑀤𑀻𑀦𑀁 𑀨𑀮𑀁 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀤𑀲𑁆𑀲𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑁂𑀝𑁆𑀞𑀺 ‘‘𑀪𑀦𑁆𑀢𑁂, 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀽𑀯𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀫𑀳𑀸𑀲𑁂𑀝𑁆𑀞𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀲𑁂𑀝𑁆𑀞𑀺𑀪𑀭𑀺𑀬𑀁 𑀧𑀽𑀯𑁂 𑀘 𑀔𑀻𑀭𑀸𑀤𑀻𑀦𑀺 𑀘 𑀕𑀡𑁆𑀳𑀸𑀧𑁂𑀣, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀓𑀳𑀁 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺? ‘‘𑀇𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂’’𑀢𑀺. ‘‘𑀪𑀦𑁆𑀢𑁂, 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺? ‘‘𑀫𑀳𑀸𑀲𑁂𑀝𑁆𑀞𑀺 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀅𑀳𑀁 𑀯𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀸𑀲𑀸𑀤𑁂 𑀲𑁄𑀧𑀸𑀦𑀲𑀻𑀲𑀁 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀲𑁄𑀧𑀸𑀦𑀧𑀭𑀺𑀬𑁄𑀲𑀸𑀦𑀁 𑀧𑀦 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀪𑀯𑀺𑀲𑁆𑀲𑀢𑀺, 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀭𑀡𑀓𑀸𑀮𑀫𑀢𑁆𑀢𑁂𑀦 𑀯𑁄 𑀚𑁂𑀢𑀯𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀣𑁂𑀭𑁄 𑀲𑁄𑀧𑀸𑀦𑀲𑀻𑀲𑀁 𑀢𑀢𑁆𑀣𑁂𑀯 𑀓𑀢𑁆𑀯𑀸 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑀁 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀢𑀣𑁂𑀯𑀸𑀳𑁄𑀲𑀺.

𑀇𑀢𑀺 𑀣𑁂𑀭𑁄 𑀲𑁂𑀝𑁆𑀞𑀺𑀜𑁆𑀘 𑀲𑁂𑀝𑁆𑀞𑀺𑀪𑀭𑀺𑀬𑀜𑁆𑀘 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀑𑀢𑀭𑀡𑀓𑀸𑀮𑀢𑁄 𑀔𑀺𑀧𑁆𑀧𑀢𑀭𑀁 𑀚𑁂𑀢𑀯𑀦𑀁 𑀲𑀫𑁆𑀧𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀪𑀢𑁆𑀢𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀫𑀳𑀸𑀲𑁂𑀝𑁆𑀞𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀅𑀤𑀸𑀲𑀺, 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀽𑀯𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀧𑀺 𑀢𑀣𑁂𑀯 𑀕𑀡𑁆𑀳𑀺𑀁𑀲𑀼. 𑀲𑁂𑀝𑁆𑀞𑀺 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀲𑀓𑁆𑀔𑀭𑀸𑀤𑀻𑀦𑀺 𑀤𑀤𑀫𑀸𑀦𑁄 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀫𑀳𑀸𑀲𑁂𑀝𑁆𑀞𑀺𑀧𑀺 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺, 𑀧𑀽𑀯𑀸𑀦𑀁 𑀧𑀭𑀺𑀬𑁄𑀲𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑀢𑀺, 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀜𑁆𑀘 𑀯𑀺𑀖𑀸𑀲𑀸𑀤𑀸𑀦𑀜𑁆𑀘 𑀤𑀺𑀦𑁆𑀦𑁂𑀧𑀺 𑀦 𑀧𑀭𑀺𑀬𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. ‘‘𑀪𑀦𑁆𑀢𑁂, 𑀧𑀽𑀯𑀸 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀦𑁆𑀢𑀻’’𑀢𑀺 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀙𑀟𑁆𑀟𑁂𑀣𑀸𑀢𑀺. 𑀅𑀣 𑀦𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀬𑀺𑀁𑀲𑀼. 𑀅𑀚𑁆𑀚𑀢𑀦𑀸𑀧𑀺 𑀢𑀁 𑀞𑀸𑀦𑀁 ‘‘𑀓𑀧𑀮𑁆𑀮𑀧𑀽𑀯𑀧𑀩𑁆𑀪𑀸𑀭𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀅𑀦𑀼𑀫𑁄𑀤𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀲𑁄𑀧𑀸𑀦𑀁 𑀆𑀭𑀼𑀬𑁆𑀳 𑀅𑀢𑁆𑀢𑀦𑁄 𑀧𑀸𑀲𑀸𑀤𑁂𑀬𑁂𑀯 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀯𑀺𑀓𑀺𑀭𑀺.

𑀧𑀼𑀦𑀤𑀺𑀯𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀫𑁆𑀫 𑀪𑀺𑀓𑁆𑀔𑀽𑀦𑀁 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁂 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁, 𑀅𑀦𑀼𑀧𑀳𑀘𑁆𑀘 𑀲𑀤𑁆𑀥𑀁 𑀅𑀦𑀼𑀧𑀳𑀘𑁆𑀘 𑀪𑁄𑀕𑁂 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺𑀁 𑀫𑀼𑀳𑀼𑀢𑁆𑀢𑁂𑀦𑁂𑀯 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀽𑀯𑁂 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀆𑀦𑁂𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀅𑀳𑁄 𑀫𑀳𑀸𑀦𑀼𑀪𑀸𑀯𑁄 𑀣𑁂𑀭𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀓𑀼𑀮𑀤𑀫𑀓𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀓𑀼𑀮𑁂 𑀅𑀯𑀺𑀳𑁂𑀞𑁂𑀢𑁆𑀯𑀸 𑀅𑀓𑀺𑀮𑀫𑁂𑀢𑁆𑀯𑀸 𑀧𑀼𑀧𑁆𑀨𑀢𑁄 𑀭𑁂𑀡𑀼𑀁 𑀕𑀡𑁆𑀳𑀦𑁆𑀢𑁂𑀦 𑀪𑀫𑀭𑁂𑀦 𑀯𑀺𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑁂 𑀚𑀸𑀦𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀧𑀲𑀁𑀲𑀦𑁆𑀢𑁄 𑁋

‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀁, 𑀯𑀡𑁆𑀡𑀕𑀦𑁆𑀥𑀫𑀳𑁂𑀞𑀬𑀁;

𑀧𑀮𑁂𑀢𑀺 𑀭𑀲𑀫𑀸𑀤𑀸𑀬, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂’’𑀢𑀺. (𑀥. 𑀧. 𑁪𑁯) 𑁋

𑀇𑀫𑀁 𑀥𑀫𑁆𑀫𑀧𑀤𑁂 𑀕𑀸𑀣𑀁 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀢𑀼𑀁 ‘‘𑀦 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 𑀤𑀫𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀢𑀁 𑀤𑀫𑁂𑀢𑁆𑀯𑀸 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁 𑀚𑀸𑀦𑀸𑀧𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀇𑀮𑁆𑀮𑀺𑀲𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀧𑀼𑀭𑀺𑀲𑀤𑁄𑀲𑀲𑀫𑀦𑁆𑀦𑀸𑀕𑀢𑁄 𑀔𑀜𑁆𑀚𑁄 𑀓𑀼𑀡𑀻 𑀯𑀺𑀲𑀫𑀓𑁆𑀔𑀺𑀫𑀡𑁆𑀟𑀮𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀫𑀘𑁆𑀙𑀭𑀻, 𑀦𑁂𑀯 𑀅𑀜𑁆𑀜𑁂𑀲𑀁 𑀤𑁂𑀢𑀺, 𑀦 𑀲𑀬𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀧𑁄𑀓𑁆𑀔𑀭𑀡𑀻 𑀯𑀺𑀬𑀲𑁆𑀲 𑀕𑁂𑀳𑀁 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀤𑀸𑀬𑀓𑀸 𑀤𑀸𑀦𑀧𑀢𑀺𑀦𑁄. 𑀲𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸𑀬𑁂𑀯 𑀓𑀼𑀮𑀯𑀁𑀲𑀁 𑀦𑀸𑀲𑁂𑀢𑁆𑀯𑀸 𑀤𑀸𑀦𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀧𑁄𑀣𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀥𑀦𑀫𑁂𑀯 𑀲𑀡𑁆𑀞𑀸𑀧𑁂𑀲𑀺.

𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀫𑀕𑁆𑀕𑀓𑀺𑀮𑀦𑁆𑀢𑀁 𑀚𑀸𑀦𑀧𑀤𑀫𑀦𑀼𑀲𑁆𑀲𑀁, 𑀏𑀓𑀁 𑀲𑀼𑀭𑀸𑀯𑀸𑀭𑀓𑀁, 𑀆𑀤𑀸𑀬 𑀧𑀻𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀫𑁆𑀩𑀺𑀮𑀲𑀼𑀭𑀸𑀬 𑀓𑁄𑀲𑀓𑀁 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀢𑀺𑀫𑀘𑁆𑀙𑀓𑁂𑀦 𑀉𑀢𑁆𑀢𑀭𑀺𑀪𑀗𑁆𑀕𑁂𑀦 𑀧𑀺𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀼𑀭𑀁 𑀧𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀲𑀼𑀭𑀁 𑀧𑀺𑀯𑀺𑀲𑁆𑀲𑀸𑀫𑀺, 𑀫𑀬𑀺 𑀧𑀺𑀯𑀦𑁆𑀢𑁂 𑀩𑀳𑀽 𑀧𑀺𑀯𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀥𑀦𑀧𑀭𑀺𑀓𑁆𑀔𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀳𑀢𑀓𑀧𑁆𑀧𑀸𑀲𑁄 𑀯𑀺𑀬 𑀧𑀡𑁆𑀟𑀼𑀲𑀭𑀻𑀭𑁄 𑀅𑀳𑁄𑀲𑀺 𑀥𑀫𑁆𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑀁 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀫𑁂𑀦𑀁 𑀪𑀭𑀺𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀢𑁂, 𑀲𑀸𑀫𑀺, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀢𑁂𑀦 𑀳𑀺 𑀏𑀓𑀲𑁆𑀲𑁂𑀯 𑀢𑁂 𑀧𑀳𑁄𑀦𑀓𑀁 𑀲𑀼𑀭𑀁 𑀓𑀭𑁄𑀫𑀻’’𑀢𑀺 𑀧𑀦 𑀯𑀼𑀢𑁆𑀢𑁂 ‘‘𑀕𑁂𑀳𑁂 𑀲𑀼𑀭𑀸𑀬 𑀓𑀸𑀭𑀺𑀬𑀫𑀸𑀦𑀸𑀬 𑀩𑀳𑀽 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀦𑁆𑀢𑀭𑀸𑀧𑀡𑀢𑁄 𑀆𑀳𑀭𑀸𑀧𑁂𑀢𑁆𑀯𑀸𑀧𑀺 𑀦 𑀲𑀓𑁆𑀓𑀸 𑀇𑀥 𑀦𑀺𑀲𑀺𑀦𑁆𑀦𑁂𑀦 𑀧𑀺𑀯𑀺𑀢𑀼’’𑀦𑁆𑀢𑀺 𑀫𑀸𑀲𑀓𑀫𑀢𑁆𑀢𑀁 𑀤𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀲𑀼𑀭𑀸𑀯𑀸𑀭𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀘𑁂𑀝𑀓𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑀕𑁆𑀕𑀲𑀫𑀻𑀧𑁂 𑀏𑀓𑀁 𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀭𑀸𑀯𑀸𑀭𑀓𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀘𑁂𑀝𑀓𑀁 𑀤𑀽𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑁄𑀲𑀓𑀁 𑀧𑀽𑀭𑁂𑀢𑁆𑀯𑀸 𑀲𑀼𑀭𑀁 𑀧𑀸𑀢𑀼𑀁 𑀆𑀭𑀪𑀺.

𑀧𑀺𑀢𑀸 𑀧𑀦𑀲𑁆𑀲 𑀤𑀸𑀦𑀸𑀤𑀻𑀦𑀁 𑀧𑀼𑀜𑁆𑀜𑀸𑀦𑀁 𑀓𑀢𑀢𑁆𑀢𑀸 𑀤𑁂𑀯𑀮𑁄𑀓𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 ‘‘𑀧𑀯𑀢𑁆𑀢𑀢𑀺 𑀦𑀼 𑀔𑁄 𑀫𑁂 𑀤𑀸𑀦𑀕𑁆𑀕𑀁, 𑀉𑀤𑀸𑀳𑀼 𑀦𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸, 𑀧𑀼𑀢𑁆𑀢𑀲𑁆𑀲 𑀓𑀼𑀮𑀯𑀁𑀲𑀁 𑀦𑀸𑀲𑁂𑀢𑁆𑀯𑀸 𑀤𑀸𑀦𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀫𑀘𑁆𑀙𑀭𑀺𑀬𑀪𑀸𑀯𑁂 𑀧𑀢𑀺𑀝𑁆𑀞𑀸𑀬 ‘‘𑀅𑀜𑁆𑀜𑁂𑀲𑀁 𑀤𑀸𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀬𑁂𑀦 𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀓𑀲𑁆𑀲𑁂𑀯 𑀲𑀼𑀭𑀁 𑀧𑀺𑀯𑀦𑀪𑀸𑀯𑀜𑁆𑀘 𑀤𑀺𑀲𑁆𑀯𑀸 ‘‘𑀕𑀘𑁆𑀙𑀸𑀫𑀺, 𑀦𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀤𑀫𑁂𑀢𑁆𑀯𑀸 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁 𑀚𑀸𑀦𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀸𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀁 𑀓𑀭𑁄𑀫𑀻’’𑀢𑀺 𑀫𑀦𑀼𑀲𑁆𑀲𑀧𑀣𑀁 𑀑𑀢𑀭𑀺𑀢𑁆𑀯𑀸 𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀦𑀸 𑀲𑀤𑀺𑀲𑀁 𑀔𑀜𑁆𑀚𑀁 𑀓𑀼𑀡𑀺𑀁 𑀯𑀺𑀲𑀫𑀘𑀓𑁆𑀔𑀼𑀫𑀡𑁆𑀟𑀮𑀁 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀧𑀯𑀺𑀲𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀓𑀺𑀁, 𑀫𑀳𑀸𑀲𑁂𑀝𑁆𑀞𑀺, 𑀅𑀯𑁂𑀮𑀸𑀬 𑀆𑀕𑀢𑁄𑀲𑀻’’𑀢𑀺 𑀆𑀳. ‘‘𑀆𑀫, 𑀆𑀕𑀢𑁄𑀫𑁆𑀳𑀺, 𑀤𑁂𑀯 𑀖𑀭𑁂 𑀫𑁂 𑀅𑀲𑀻𑀢𑀺𑀓𑁄𑀝𑀺𑀫𑀢𑁆𑀢𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀤𑁂𑀯𑁄 𑀆𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀡𑁆𑀟𑀸𑀕𑀸𑀭𑀁 𑀧𑀽𑀭𑀸𑀧𑁂𑀢𑀽’’𑀢𑀺. ‘‘𑀅𑀮𑀁 𑀫𑀳𑀸𑀲𑁂𑀝𑁆𑀞𑀺, 𑀢𑀯 𑀥𑀦𑀢𑁄 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀼𑀢𑀭𑀁 𑀥𑀦’’𑀦𑁆𑀢𑀺. ‘‘𑀲𑀘𑁂, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀬𑀣𑀸𑀭𑀼𑀘𑀺𑀬𑀸 𑀥𑀦𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀤𑀫𑁆𑀫𑀻’’𑀢𑀺. ‘‘𑀤𑁂𑀳𑀺, 𑀫𑀳𑀸𑀲𑁂𑀝𑁆𑀞𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺, 𑀲𑀩𑁆𑀩𑁂 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀸 𑀧𑀭𑀺𑀯𑀸𑀭𑁂𑀲𑀼𑀁, 𑀏𑀓𑁄𑀧𑀺 ‘‘𑀦𑀸𑀬𑀁, 𑀇𑀮𑁆𑀮𑀺𑀲𑁄’’𑀢𑀺 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺.

𑀲𑁄 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀉𑀫𑁆𑀫𑀸𑀭𑁂 𑀞𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀬𑁄 𑀅𑀜𑁆𑀜𑁄 𑀫𑀬𑀸 𑀲𑀫𑀸𑀦𑀭𑀽𑀧𑁄 𑀆𑀕𑀦𑁆𑀢𑁆𑀯𑀸 ‘𑀫𑀫𑁂𑀢𑀁 𑀕𑁂𑀳’𑀦𑁆𑀢𑀺 𑀧𑀯𑀺𑀲𑀺𑀢𑀼𑀁 𑀆𑀕𑀘𑁆𑀙𑀢𑀺, 𑀢𑀁 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀦𑀻𑀳𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀤𑀸𑀦𑀁 𑀤𑁂𑀫𑀸’’𑀢𑀺 𑀆𑀳. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀲𑁂𑀝𑁆𑀞𑀺𑀪𑀭𑀺𑀬𑀸 𑀘 𑀧𑀼𑀢𑁆𑀢𑀥𑀻𑀢𑀭𑁄 𑀘 𑀤𑀸𑀲𑀓𑀫𑁆𑀫𑀓𑀭𑀸 𑀘 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀤𑀸𑀦𑀁 𑀤𑀸𑀢𑀼𑀁 𑀘𑀺𑀢𑁆𑀢𑀫𑁂𑀯 𑀦𑀢𑁆𑀣𑀺, 𑀅𑀚𑁆𑀚 𑀧𑀦 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀫𑀼𑀤𑀼𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀢𑀼𑀓𑀸𑀫𑁄 𑀚𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼. 𑀅𑀣 𑀦𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 ‘‘𑀬𑀣𑀸𑀭𑀼𑀘𑀺𑀬𑀸 𑀤𑁂𑀣, 𑀲𑀸𑀫𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀪𑁂𑀭𑀺𑀯𑀸𑀤𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘‘𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀻𑀳𑀺 𑀅𑀢𑁆𑀣𑀺𑀓𑀸 𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀲𑁆𑀲 𑀖𑀭𑀁 𑀕𑀘𑁆𑀙𑀦𑁆𑀢𑀽’𑀦𑁆𑀢𑀺 𑀲𑀓𑀮𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀳𑀻’’𑀢𑀺. 𑀲𑀸 𑀘 𑀢𑀣𑀸 𑀓𑀸𑀭𑁂𑀲𑀺. 𑀫𑀳𑀸𑀚𑀦𑁄 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺. 𑀲𑀓𑁆𑀓𑁄 𑀲𑀢𑁆𑀢𑀭𑀢𑀦𑀧𑀽𑀭𑁂 𑀕𑀩𑁆𑀪𑁂 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀺, 𑀬𑀸𑀯𑀤𑀺𑀘𑁆𑀙𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳. 𑀫𑀳𑀸𑀚𑀦𑁄 𑀥𑀦𑀁 𑀦𑀻𑀳𑀭𑀺𑀢𑁆𑀯𑀸 𑀫𑀳𑀸𑀢𑀮𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀆𑀪𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀢𑀺.

𑀅𑀜𑁆𑀜𑀢𑀭𑁄 𑀚𑀦𑀧𑀤𑀫𑀦𑀼𑀲𑁆𑀲𑁄 𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀦𑁄 𑀕𑁄𑀡𑁂 𑀢𑀲𑁆𑀲𑁂𑀯 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀽𑀭𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀫𑀳𑀸𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀕𑀼𑀫𑁆𑀩𑀲𑁆𑀲 𑀅𑀯𑀺𑀤𑀽𑀭𑁂𑀦 𑀭𑀣𑀁 𑀧𑁂𑀲𑁂𑀦𑁆𑀢𑁄 ‘‘𑀯𑀲𑁆𑀲𑀲𑀢𑀁 𑀚𑀻𑀯, 𑀲𑀸𑀫𑀺, 𑀇𑀮𑁆𑀮𑀺𑀲𑀲𑁂𑀝𑁆𑀞𑀺, 𑀢𑀁 𑀦𑀺𑀲𑁆𑀲𑀸𑀬 𑀇𑀤𑀸𑀦𑀺 𑀫𑁂 𑀬𑀸𑀯𑀚𑀻𑀯𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀚𑀻𑀯𑀺𑀢𑀩𑁆𑀩𑀁 𑀚𑀸𑀢𑀁, 𑀢𑀯𑁂𑀯 𑀭𑀣𑁄, 𑀢𑀯𑁂𑀯 𑀕𑁄𑀡𑀸, 𑀢𑀯𑁂𑀯 𑀕𑁂𑀳𑁂 𑀲𑀢𑁆𑀢 𑀭𑀢𑀦𑀸𑀦𑀺, 𑀦𑁂𑀯 𑀫𑀸𑀢𑀭𑀸 𑀤𑀺𑀦𑁆𑀦𑀸𑀦𑀺, 𑀦 𑀧𑀺𑀢𑀭𑀸, 𑀢𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸𑀦𑀺, 𑀲𑀸𑀫𑀻’’𑀢𑀺 𑀲𑁂𑀝𑁆𑀞𑀺𑀦𑁄 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀫𑀫 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀫𑀫 𑀥𑀦𑀁 𑀭𑀜𑁆𑀜𑀸 𑀮𑁄𑀓𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀕𑀼𑀫𑁆𑀩𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀡𑁂 𑀘 𑀭𑀣𑀜𑁆𑀘 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀅𑀭𑁂, 𑀘𑁂𑀝𑀓, 𑀫𑀬𑁆𑀳𑀁 𑀕𑁄𑀡𑀸, 𑀫𑀬𑁆𑀳𑀁 𑀭𑀣𑁄’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀕𑁄𑀡𑁂 𑀦𑀸𑀲𑀸𑀭𑀚𑁆𑀚𑀼𑀬𑀁 𑀕𑀡𑁆𑀳𑀺, 𑀕𑀳𑀧𑀢𑀺𑀓𑁄 𑀭𑀣𑀸 𑀑𑀭𑀼𑀬𑁆𑀳 ‘‘𑀅𑀭𑁂, 𑀤𑀼𑀝𑁆𑀞𑀘𑁂𑀝𑀓, 𑀇𑀮𑁆𑀮𑀺𑀲𑀫𑀳𑀸𑀲𑁂𑀝𑁆𑀞𑀺 𑀲𑀓𑀮𑀦𑀕𑀭𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀢𑁆𑀯𑀁 𑀓𑀺𑀁 𑀅𑀳𑁄𑀲𑀻’’𑀢𑀺 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀲𑀦𑀺𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀔𑀦𑁆𑀥𑁂 𑀧𑀳𑀭𑀺𑀢𑁆𑀯𑀸 𑀭𑀣𑀁 𑀆𑀤𑀸𑀬 𑀅𑀕𑀫𑀸𑀲𑀺. 𑀲𑁄 𑀧𑀼𑀦 𑀓𑀫𑁆𑀧𑀫𑀸𑀦𑁄 𑀉𑀝𑁆𑀞𑀸𑀬 𑀧𑀁𑀲𑀼𑀁 𑀧𑀼𑀜𑁆𑀙𑀺𑀢𑁆𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀣𑀁 𑀕𑀡𑁆𑀳𑀺, 𑀕𑀳𑀧𑀢𑀺𑀓𑁄 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀑𑀡𑀸𑀫𑁂𑀢𑁆𑀯𑀸 𑀓𑀧𑁆𑀧𑀭𑀧𑀳𑀸𑀭𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀕𑀮𑁂 𑀕𑀳𑁂𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑀁 𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀏𑀢𑁆𑀢𑀸𑀯𑀢𑀸𑀲𑁆𑀲 𑀲𑀼𑀭𑀸𑀫𑀤𑁄 𑀙𑀺𑀚𑁆𑀚𑀺. 𑀲𑁄 𑀓𑀫𑁆𑀧𑀫𑀸𑀦𑁄 𑀯𑁂𑀕𑁂𑀦 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀥𑀦𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀫𑀳𑀸𑀚𑀦𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀓𑀺𑀁 𑀦𑀸𑀫𑁂𑀢𑀁, 𑀓𑀺𑀁 𑀭𑀸𑀚𑀸 𑀫𑀫 𑀥𑀦𑀁 𑀯𑀺𑀮𑀼𑀫𑁆𑀧𑀸𑀧𑁂𑀢𑀻’’𑀢𑀺 𑀢𑀁 𑀢𑀁 𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀕𑀳𑀺𑀢𑀕𑀳𑀺𑀢𑀸 𑀧𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂𑀬𑁂𑀯 𑀧𑀸𑀢𑁂𑀦𑁆𑀢𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀆𑀭𑀪𑀺. 𑀤𑁆𑀯𑀸𑀭𑀧𑀸𑀮𑀸 ‘‘𑀅𑀭𑁂, 𑀤𑀼𑀝𑁆𑀞𑀕𑀳𑀧𑀢𑀺, 𑀓𑀳𑀁 𑀧𑀯𑀺𑀲𑀲𑀻’’𑀢𑀺 𑀯𑀁𑀲𑀧𑁂𑀲𑀺𑀓𑀸𑀳𑀺 𑀧𑁄𑀣𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀁𑀲𑀼.

𑀲𑁄 ‘‘𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀭𑀸𑀚𑀸𑀦𑀁 𑀦𑀢𑁆𑀣𑀺 𑀫𑁂 𑀅𑀜𑁆𑀜𑁄 𑀓𑁄𑀘𑀺 𑀧𑀝𑀺𑀲𑀭𑀡𑁄’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀫𑀫 𑀕𑁂𑀳𑀁 𑀢𑀼𑀫𑁆𑀳𑁂 𑀯𑀺𑀮𑀼𑀫𑁆𑀧𑀸𑀧𑁂𑀣𑀸’’𑀢𑀺 𑀆𑀳. 𑀦𑀸𑀳𑀁 𑀲𑁂𑀝𑁆𑀞𑀺 𑀯𑀺𑀮𑀼𑀫𑁆𑀧𑀸𑀧𑁂𑀫𑀺, 𑀦𑀦𑀼 𑀢𑁆𑀯𑀫𑁂𑀯 𑀆𑀕𑀦𑁆𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀦 𑀕𑀡𑁆𑀳𑀣, 𑀅𑀳𑀁 𑀫𑀫 𑀥𑀦𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀻𑀢𑀺. 𑀦𑀸𑀳𑀁, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀸𑀫𑀺, 𑀓𑀺𑀁 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀫𑀘𑁆𑀙𑀭𑀺𑀬𑀪𑀸𑀯𑀁 𑀦 𑀚𑀸𑀦𑀸𑀣, 𑀅𑀳𑀁 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀦 𑀓𑀲𑁆𑀲𑀘𑀺 𑀤𑁂𑀫𑀺. 𑀬𑁄 𑀤𑀸𑀦𑀁 𑀤𑁂𑀢𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀻𑀫𑀁𑀲𑀣, 𑀤𑁂𑀯𑀸𑀢𑀺. 𑀭𑀸𑀚𑀸 𑀲𑀓𑁆𑀓𑀁 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀯𑀺𑀲𑁂𑀲𑀁 𑀦𑁂𑀯 𑀭𑀸𑀚𑀸 𑀚𑀸𑀦𑀸𑀢𑀺, 𑀦 𑀅𑀫𑀘𑁆𑀘𑀸. 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 ‘‘𑀓𑀺𑀁, 𑀤𑁂𑀯, 𑀅𑀬𑀁 𑀲𑁂𑀝𑁆𑀞𑀺, 𑀅𑀳𑀁 𑀲𑁂𑀝𑁆𑀞𑀻’’𑀢𑀺 𑀆𑀳. ‘‘𑀫𑀬𑀁 𑀦 𑀲𑀜𑁆𑀚𑀸𑀦𑀸𑀫, 𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀲𑀜𑁆𑀚𑀸𑀦𑀦𑀓𑁄’’𑀢𑀺? ‘‘𑀪𑀭𑀺𑀬𑀸 𑀫𑁂, 𑀤𑁂𑀯𑀸’’𑀢𑀺. 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀢𑀭𑁄 𑀢𑁂 𑀲𑀸𑀫𑀺𑀓𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘‘𑀅𑀬’’𑀦𑁆𑀢𑀺 𑀲𑀓𑁆𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀧𑀼𑀢𑁆𑀢𑀥𑀻𑀢𑀭𑁄 𑀤𑀸𑀲𑀓𑀫𑁆𑀫𑀓𑀭𑁂 𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼, 𑀲𑀩𑁆𑀩𑁂𑀧𑀺 𑀲𑀓𑁆𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀢𑀺𑀝𑁆𑀞𑀦𑁆𑀢𑀺.

𑀧𑀼𑀦 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀻𑀲𑁂 𑀧𑀺𑀴𑀓𑀸 𑀅𑀢𑁆𑀣𑀺, 𑀓𑁂𑀲𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀸, 𑀢𑀁 𑀔𑁄 𑀧𑀦 𑀓𑀧𑁆𑀧𑀓𑁄 𑀏𑀯 𑀚𑀸𑀦𑀸𑀢𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀓𑀧𑁆𑀧𑀓𑁄 𑀫𑀁, 𑀤𑁂𑀯, 𑀲𑀜𑁆𑀚𑀸𑀦𑀸𑀢𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀣𑀸’’𑀢𑀺 𑀆𑀳. 𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀓𑀧𑁆𑀧𑀓𑁄 𑀅𑀳𑁄𑀲𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀮𑁆𑀮𑀺𑀲𑀲𑁂𑀝𑁆𑀞𑀺𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀻𑀲𑀁 𑀑𑀮𑁄𑀓𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀲𑀁 𑀑𑀮𑁄𑀓𑁂𑀳𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀲𑀻𑀲𑁂 𑀧𑀺𑀴𑀓𑀁 𑀫𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀲𑀁 𑀑𑀮𑁄𑀓𑁂𑀦𑁆𑀢𑁄 𑀧𑀺𑀴𑀓𑀸 𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀲𑁂 𑀧𑀺𑀴𑀓𑀸 𑀅𑀢𑁆𑀣𑁂𑀯, 𑀦𑀸𑀳𑀁 𑀏𑀢𑁂𑀲𑀼 𑀏𑀓𑀲𑁆𑀲𑀸𑀧𑀺 𑀇𑀮𑁆𑀮𑀺𑀲𑀪𑀸𑀯𑀁 𑀲𑀜𑁆𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁮. ‘‘𑀉𑀪𑁄 𑀔𑀜𑁆𑀚𑀸 𑀉𑀪𑁄 𑀓𑀼𑀡𑀻, 𑀉𑀪𑁄 𑀯𑀺𑀲𑀫𑀘𑀓𑁆𑀔𑀼𑀓𑀸;

𑀉𑀪𑀺𑀦𑁆𑀦𑀁 𑀧𑀺𑀴𑀓𑀸 𑀚𑀸𑀢𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀇𑀮𑁆𑀮𑀺𑀲’’𑀦𑁆𑀢𑀺.

𑀢𑀢𑁆𑀣 𑀉𑀪𑁄𑀢𑀺 𑀤𑁆𑀯𑁂𑀧𑀺 𑀚𑀦𑀸. 𑀔𑀜𑁆𑀚𑀸𑀢𑀺 𑀓𑀼𑀡𑁆𑀞𑀧𑀸𑀤𑀸. 𑀓𑀼𑀡𑀻𑀢𑀺 𑀓𑀼𑀡𑁆𑀞𑀳𑀢𑁆𑀣𑀸. 𑀯𑀺𑀲𑀫𑀘𑀓𑁆𑀔𑀼𑀓𑀸𑀢𑀺 𑀯𑀺𑀲𑀫𑀓𑁆𑀔𑀺𑀫𑀡𑁆𑀟𑀮𑀸 𑀓𑁂𑀓𑀭𑀸. 𑀧𑀺𑀴𑀓𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀲𑀻𑀲𑀧𑀤𑁂𑀲𑁂 𑀏𑀓𑀲𑀡𑁆𑀞𑀸𑀦𑀸𑀯 𑀧𑀺𑀴𑀓𑀸 𑀚𑀸𑀢𑀸. 𑀦𑀸𑀳𑀁 𑀧𑀲𑁆𑀲𑀸𑀫𑀻𑀢𑀺 𑀅𑀳𑀁 ‘‘𑀇𑀫𑁂𑀲𑀼 𑀅𑀬𑀁 𑀦𑀸𑀫 𑀇𑀮𑁆𑀮𑀺𑀲𑁄’’𑀢𑀺 𑀦 𑀧𑀲𑁆𑀲𑀸𑀫𑀺, 𑀏𑀓𑀲𑁆𑀲𑀸𑀧𑀺 𑀇𑀮𑁆𑀮𑀺𑀲𑀪𑀸𑀯𑀁 𑀦 𑀚𑀸𑀦𑀸𑀫𑀻𑀢𑀺 𑀅𑀯𑁄𑀘.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀓𑀫𑁆𑀧𑀫𑀸𑀦𑁄 𑀥𑀦𑀲𑁄𑀓𑁂𑀦 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀧𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀇𑀮𑁆𑀮𑀺𑀲𑁄, 𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑀓𑁆𑀓𑀮𑀻𑀮𑀸𑀬 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀇𑀮𑁆𑀮𑀺𑀲𑀲𑁆𑀲 𑀫𑀼𑀔𑀁 𑀧𑀼𑀜𑁆𑀙𑀺𑀢𑁆𑀯𑀸 𑀉𑀤𑀓𑁂𑀦 𑀲𑀺𑀜𑁆𑀘𑀺𑀁𑀲𑀼, 𑀲𑁄 𑀉𑀝𑁆𑀞𑀸𑀬 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀓𑁆𑀓𑁄 𑀆𑀳 ‘‘𑀇𑀮𑁆𑀮𑀺𑀲, 𑀇𑀤𑀁 𑀥𑀦𑀁 𑀫𑀫 𑀲𑀦𑁆𑀢𑀓𑀁, 𑀦 𑀢𑀯. 𑀅𑀳𑀜𑁆𑀳𑀺 𑀢𑁂 𑀧𑀺𑀢𑀸, 𑀢𑁆𑀯𑀁 𑀫𑀫 𑀧𑀼𑀢𑁆𑀢𑁄. 𑀅𑀳𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀓𑁆𑀓𑀢𑁆𑀢𑀁 𑀧𑀢𑁆𑀢𑁄, 𑀢𑁆𑀯𑀁 𑀧𑀦 𑀫𑁂 𑀯𑀁𑀲𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀦𑀲𑀻𑀮𑁄 𑀳𑀼𑀢𑁆𑀯𑀸 𑀫𑀘𑁆𑀙𑀭𑀺𑀬𑁂 𑀧𑀢𑀺𑀝𑁆𑀞𑀸𑀬 𑀤𑀸𑀦𑀲𑀸𑀮𑀸𑀬𑁄 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀥𑀦𑀫𑁂𑀯 𑀲𑀡𑁆𑀞𑀸𑀧𑁂𑀲𑀺. 𑀢𑀁 𑀦𑁂𑀯 𑀢𑁆𑀯𑀁 𑀧𑀭𑀺𑀪𑀼𑀜𑁆𑀚𑀲𑀺, 𑀦 𑀅𑀜𑁆𑀜𑁂𑀲𑀁 𑀤𑁂𑀲𑀺, 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀲𑀘𑁂 𑀫𑁂 𑀤𑀸𑀦𑀲𑀸𑀮𑀸 𑀧𑀸𑀓𑀢𑀺𑀓𑀸 𑀓𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀲𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀤𑀲𑁆𑀲𑀲𑀺, 𑀲𑀩𑁆𑀩𑀁 𑀢𑁂 𑀥𑀦𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀇𑀫𑀺𑀦𑀸 𑀇𑀦𑁆𑀤𑀯𑀚𑀺𑀭𑁂𑀦 𑀢𑁂 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀇𑀮𑁆𑀮𑀺𑀲𑀲𑁂𑀝𑁆𑀞𑀺 𑀫𑀭𑀡𑀪𑀬𑁂𑀦 𑀲𑀦𑁆𑀢𑀚𑁆𑀚𑀺𑀢𑁄 ‘‘𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄𑀯 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀁 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀇𑀮𑁆𑀮𑀺𑀲𑁄𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺𑀁 𑀤𑀫𑁂𑀢𑀺, 𑀧𑀼𑀩𑁆𑀩𑁂𑀧𑁂𑀲 𑀇𑀫𑀺𑀦𑀸 𑀤𑀫𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀮𑁆𑀮𑀺𑀲𑁄 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 𑀅𑀳𑁄𑀲𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀓𑀧𑁆𑀧𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀇𑀮𑁆𑀮𑀺𑀲𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁭𑁯] 𑁯. 𑀔𑀭𑀲𑁆𑀲𑀭𑀚𑀸𑀢𑀓𑀯𑀡𑁆𑀡𑀦𑀸

𑀬𑀢𑁄 𑀯𑀺𑀮𑀼𑀢𑁆𑀢𑀸 𑀘 𑀳𑀢𑀸 𑀘 𑀕𑀸𑀯𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀏𑀓𑁄 𑀅𑀫𑀘𑁆𑀘𑁄 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑁂 𑀭𑀸𑀚𑀩𑀮𑀺𑀁 𑀮𑀪𑀺𑀢𑁆𑀯𑀸 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀫𑀦𑀼𑀲𑁆𑀲𑁂 𑀆𑀤𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀕𑀸𑀫𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀉𑀧𑀟𑁆𑀠𑀁 𑀫𑀬𑁆𑀳𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀕𑁂𑀯 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀘𑁄𑀭𑁂𑀲𑀼 𑀆𑀕𑀦𑁆𑀢𑁆𑀯𑀸 𑀕𑀸𑀯𑀺𑀬𑁄 𑀖𑀸𑀢𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀸𑀫𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀕𑀢𑁂𑀲𑀼 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀢𑀺. 𑀢𑀲𑁆𑀲 𑀦 𑀘𑀺𑀭𑀲𑁆𑀲𑁂𑀯 𑀢𑀁 𑀓𑀫𑁆𑀫𑀁 𑀧𑀸𑀓𑀝𑀁 𑀚𑀸𑀢𑀁. 𑀫𑀦𑀼𑀲𑁆𑀲𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀤𑁄𑀲𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀕𑀸𑀫𑀪𑁄𑀚𑀓𑀁 𑀧𑁂𑀲𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀦, 𑀫𑀳𑀸𑀭𑀸𑀚, 𑀇𑀤𑀸𑀦𑁂𑀯 𑀏𑀲 𑀏𑀯𑀁𑀲𑀻𑀮𑁄, 𑀧𑀼𑀩𑁆𑀩𑁂𑀧𑀺 𑀏𑀯𑀁𑀲𑀻𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀧𑀘𑁆𑀘𑀦𑁆𑀢𑀕𑀸𑀫𑀁 𑀅𑀤𑀸𑀲𑀺. 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀯𑀡𑀺𑀚𑁆𑀚𑀸𑀬 𑀧𑀘𑁆𑀘𑀦𑁆𑀢𑁂 𑀯𑀺𑀘𑀭𑀦𑁆𑀢𑁄 𑀢𑀲𑁆𑀫𑀺𑀁 𑀕𑀸𑀫𑀓𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀢𑀲𑁆𑀫𑀺𑀁 𑀕𑀸𑀫𑀪𑁄𑀚𑀓𑁂 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀚𑀦𑀧𑀭𑀺𑀯𑀸𑀭𑁂𑀦 𑀪𑁂𑀭𑀺𑀬𑀸 𑀯𑀚𑁆𑀚𑀫𑀸𑀦𑀸𑀬 𑀆𑀕𑀘𑁆𑀙𑀦𑁆𑀢𑁂 ‘‘𑀅𑀬𑀁 𑀤𑀼𑀝𑁆𑀞𑀕𑀸𑀫𑀪𑁄𑀚𑀓𑁄 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀕𑀸𑀫𑀁 𑀯𑀺𑀮𑀼𑀫𑁆𑀧𑀸𑀧𑁂𑀢𑁆𑀯𑀸 𑀘𑁄𑀭𑁂𑀲𑀼 𑀧𑀮𑀸𑀬𑀺𑀢𑁆𑀯𑀸 𑀅𑀝𑀯𑀺𑀁 𑀧𑀯𑀺𑀝𑁆𑀞𑁂𑀲𑀼 𑀇𑀤𑀸𑀦𑀺 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀪𑁂𑀭𑀺𑀬𑀸 𑀯𑀚𑁆𑀚𑀫𑀸𑀦𑀸𑀬 𑀆𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁯. ‘‘𑀬𑀢𑁄 𑀯𑀺𑀮𑀼𑀢𑁆𑀢𑀸 𑀘 𑀳𑀢𑀸 𑀘 𑀕𑀸𑀯𑁄, 𑀤𑀟𑁆𑀠𑀸𑀦𑀺 𑀕𑁂𑀳𑀸𑀦𑀺 𑀚𑀦𑁄 𑀘 𑀦𑀻𑀢𑁄;

𑀅𑀣𑀸𑀕𑀫𑀸 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁄, 𑀔𑀭𑀲𑁆𑀲𑀭𑀁 𑀟𑀺𑀡𑁆𑀟𑀺𑀫𑀁 𑀯𑀸𑀤𑀬𑀦𑁆𑀢𑁄’’𑀢𑀺.

𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸. 𑀯𑀺𑀮𑀼𑀢𑁆𑀢𑀸 𑀘 𑀳𑀢𑀸 𑀘𑀸𑀢𑀺 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀘 𑀦𑀻𑀢𑀸, 𑀫𑀁𑀲𑀁 𑀔𑀸𑀤𑀦𑀢𑁆𑀣𑀸𑀬 𑀘 𑀳𑀢𑀸. 𑀕𑀸𑀯𑁄𑀢𑀺 𑀕𑁄𑀭𑀽𑀧𑀸𑀦𑀺. 𑀤𑀟𑁆𑀠𑀸𑀦𑀻𑀢𑀺 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀛𑀸𑀧𑀺𑀢𑀸𑀦𑀺. 𑀚𑀦𑁄 𑀘 𑀦𑀻𑀢𑁄𑀢𑀺 𑀓𑀭𑀫𑀭𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀦𑀻𑀢𑁄. 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁄𑀢𑀺 𑀳𑀢𑀧𑀼𑀢𑁆𑀢𑀸𑀬 𑀧𑀼𑀢𑁆𑀢𑁄, 𑀦𑀺𑀮𑁆𑀮𑀚𑁆𑀚𑁄𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑀳𑀺𑀭𑁄𑀢𑁆𑀢𑀧𑁆𑀧𑀲𑁆𑀲 𑀳𑀺 𑀫𑀸𑀢𑀸 𑀦𑀸𑀫 𑀦𑀢𑁆𑀣𑀺, 𑀇𑀢𑀺 𑀲𑁄 𑀢𑀲𑁆𑀲𑀸 𑀚𑀻𑀯𑀦𑁆𑀢𑁄𑀧𑀺 𑀳𑀢𑀧𑀼𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀳𑀢𑀧𑀼𑀢𑁆𑀢𑀸𑀬 𑀧𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀔𑀭𑀲𑁆𑀲𑀭𑀦𑁆𑀢𑀺 𑀣𑀤𑁆𑀥𑀲𑀤𑁆𑀤𑀁. 𑀟𑀺𑀡𑁆𑀟𑀺𑀫𑀦𑁆𑀢𑀺 𑀧𑀝𑀳𑀪𑁂𑀭𑀺𑀁.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀢𑀁 𑀧𑀭𑀺𑀪𑀸𑀲𑀺. 𑀦 𑀘𑀺𑀭𑁂𑀦𑁂𑀯 𑀘 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀧𑀸𑀓𑀝𑀁 𑀚𑀸𑀢𑀁, 𑀅𑀣𑀲𑁆𑀲 𑀭𑀸𑀚𑀸 𑀤𑁄𑀲𑀸𑀦𑀼𑀭𑀽𑀧𑀁 𑀦𑀺𑀕𑁆𑀕𑀳𑀁 𑀅𑀓𑀸𑀲𑀺.