𑁭. 𑀇𑀢𑁆𑀣𑀺𑀯𑀕𑁆𑀕𑁄

[𑁬𑁧] 𑁧. 𑀅𑀲𑀸𑀢𑀫𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀉𑀫𑁆𑀫𑀸𑀤𑀦𑁆𑀢𑀺𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀁 𑀧𑀦 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀲𑀸𑀢𑀸 𑀅𑀲𑀢𑀺𑀬𑁄 𑀮𑀸𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸, 𑀢𑁆𑀯𑀁 𑀏𑀯𑀭𑀽𑀧𑀁 𑀮𑀸𑀫𑀺𑀓𑀁 𑀇𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀘 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀼𑀢𑁆𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀦𑀺𑀩𑁆𑀩𑀸𑀬𑀦𑁆𑀢𑀁 𑀞𑀧𑀬𑀺𑀁𑀲𑀼. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀁 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀆𑀳𑀁𑀲𑀼 ‘‘𑀧𑀼𑀢𑁆𑀢, 𑀫𑀬𑀁 𑀢𑀯 𑀚𑀸𑀢𑀤𑀺𑀯𑀲𑁂 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀞𑀧𑀬𑀺𑀫𑁆𑀳. 𑀲𑀘𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀢𑀼𑀓𑀸𑀫𑁄, 𑀢𑁆𑀯𑀁 𑀅𑀕𑁆𑀕𑀺𑀁 𑀆𑀤𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀳𑁄𑀳𑀺. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀢𑀼𑀓𑀸𑀫𑁄, 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀳𑀻’’𑀢𑀺. 𑀫𑀸𑀡𑀯𑁄 ‘‘𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀺 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑀼𑀁, 𑀓𑀼𑀝𑀼𑀫𑁆𑀩𑀫𑁂𑀯 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀆𑀘𑀭𑀺𑀬𑀪𑀸𑀕𑀁 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀸𑀲𑀺.

𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲 𑀅𑀦𑀢𑁆𑀣𑀺𑀓𑀸 𑀖𑀭𑀸𑀯𑀸𑀲𑁂𑀦, 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀸𑀧𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀣 𑀦𑀁 𑀫𑀸𑀢𑀸 𑀇𑀢𑁆𑀣𑀻𑀦𑀁 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑁂𑀲𑁂𑀢𑀼𑀓𑀸𑀫𑀸 ‘‘𑀲𑁄 𑀆𑀘𑀭𑀺𑀬𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀲𑀓𑁆𑀔𑀺𑀲𑁆𑀲𑀢𑀺 𑀫𑁂 𑀧𑀼𑀢𑁆𑀢𑀲𑁆𑀲 𑀇𑀢𑁆𑀣𑀻𑀦𑀁 𑀤𑁄𑀲𑀁 𑀓𑀣𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀉𑀕𑁆𑀕𑀳𑀺𑀢𑀁 𑀢𑁂, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺. ‘‘𑀆𑀫, 𑀅𑀫𑁆𑀫𑀸’’𑀢𑀺. ‘‘𑀅𑀲𑀸𑀢𑀫𑀦𑁆𑀢𑁄𑀧𑀺 𑀢𑁂 𑀉𑀕𑁆𑀕𑀳𑀺𑀢𑁄’’𑀢𑀺. ‘‘𑀦 𑀉𑀕𑁆𑀕𑀳𑀺𑀢𑁄, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢, 𑀬𑀤𑀺 𑀢𑁂 𑀅𑀲𑀸𑀢𑀫𑀦𑁆𑀢𑁄 𑀦 𑀉𑀕𑁆𑀕𑀳𑀺𑀢𑁄, 𑀓𑀺𑀁 𑀦𑀸𑀫 𑀢𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑀺𑀢𑀁, 𑀕𑀘𑁆𑀙, 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀼𑀦 𑀢𑀓𑁆𑀓𑀲𑀺𑀮𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑀲𑁆𑀲𑀧𑀺 𑀆𑀘𑀭𑀺𑀬𑀲𑁆𑀲 𑀫𑀸𑀢𑀸 𑀫𑀳𑀮𑁆𑀮𑀺𑀓𑀸 𑀯𑀻𑀲𑀢𑀺𑀯𑀲𑁆𑀲𑀲𑀢𑀺𑀓𑀸. 𑀲𑁄 𑀢𑀁 𑀲𑀳𑀢𑁆𑀣𑀸 𑀦𑁆𑀳𑀸𑀧𑁂𑀦𑁆𑀢𑁄 𑀪𑁄𑀚𑁂𑀦𑁆𑀢𑁄 𑀧𑀸𑀬𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀢𑀺. 𑀅𑀜𑁆𑀜𑁂 𑀫𑀦𑀼𑀲𑁆𑀲𑀸 𑀦𑀁 𑀢𑀣𑀸 𑀓𑀭𑁄𑀦𑁆𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀬𑀁𑀦𑀽𑀦𑀸𑀳𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑁂 𑀅𑀭𑀜𑁆𑀜𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀲𑀧𑁆𑀧𑀺𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀫𑀸𑀢𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀲𑁄𑀧𑀺 𑀔𑁄 𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀓𑀺𑀁 𑀦𑀼 𑀔𑁄, 𑀢𑀸𑀢, 𑀅𑀢𑀺𑀲𑀻𑀖𑀁 𑀆𑀕𑀢𑁄𑀲𑀻’’𑀢𑀺? ‘‘𑀦𑀦𑀼 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀅𑀲𑀸𑀢𑀫𑀦𑁆𑀢𑁄 𑀦𑀸𑀫 𑀦 𑀉𑀕𑁆𑀕𑀡𑁆𑀳𑀸𑀧𑀺𑀢𑁄’’𑀢𑀺? ‘‘𑀓𑁄 𑀧𑀦 𑀢𑁂 𑀅𑀲𑀸𑀢𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀺𑀢𑀩𑁆𑀩𑁂 𑀓𑀢𑁆𑀯𑀸 𑀓𑀣𑁂𑀲𑀻’’𑀢𑀺? ‘‘𑀫𑀬𑁆𑀳𑀁 𑀫𑀸𑀢𑀸 𑀆𑀘𑀭𑀺𑀬𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀲𑀸𑀢𑀫𑀦𑁆𑀢𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀇𑀫𑀲𑁆𑀲 𑀧𑀦 𑀫𑀸𑀢𑀸 𑀇𑀫𑀁 𑀇𑀢𑁆𑀣𑀺𑀤𑁄𑀲𑁂 𑀚𑀸𑀦𑀸𑀧𑁂𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 ‘‘𑀲𑀸𑀥𑀼, 𑀢𑀸𑀢, 𑀤𑀲𑁆𑀲𑀸𑀫𑀺 𑀢𑁂 𑀅𑀲𑀸𑀢𑀫𑀦𑁆𑀢𑁂, 𑀢𑁆𑀯𑀁 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀫𑀫 𑀞𑀸𑀦𑁂 𑀞𑀢𑁆𑀯𑀸 𑀫𑀫 𑀫𑀸𑀢𑀭𑀁 𑀲𑀳𑀢𑁆𑀣𑀸 𑀦𑁆𑀳𑀸𑀧𑁂𑀦𑁆𑀢𑁄 𑀪𑁄𑀚𑁂𑀦𑁆𑀢𑁄 𑀧𑀸𑀬𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀸𑀳𑀺, 𑀳𑀢𑁆𑀣𑀧𑀸𑀤𑀲𑀻𑀲𑀧𑀺𑀝𑁆𑀞𑀺𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀘𑀲𑁆𑀲𑀸 𑀓𑀭𑁄𑀦𑁆𑀢𑁄 ‘𑀅𑀬𑁆𑀬𑁂 𑀚𑀭𑀁 𑀧𑀢𑁆𑀢𑀓𑀸𑀮𑁂𑀧𑀺 𑀢𑀸𑀯 𑀢𑁂 𑀏𑀯𑀭𑀽𑀧𑀁 𑀲𑀭𑀻𑀭𑀁, 𑀤𑀳𑀭𑀓𑀸𑀮𑁂 𑀓𑀻𑀤𑀺𑀲𑀁 𑀅𑀳𑁄𑀲𑀻’𑀢𑀺 𑀳𑀢𑁆𑀣𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀺𑀓𑀭𑀡𑀓𑀸𑀮𑁂 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀯𑀡𑁆𑀡𑀁 𑀓𑀣𑁂𑀬𑁆𑀬𑀸𑀲𑀺. 𑀬𑀜𑁆𑀘 𑀢𑁂 𑀫𑀫 𑀫𑀸𑀢𑀸 𑀓𑀣𑁂𑀢𑀺, 𑀢𑀁 𑀅𑀮𑀚𑁆𑀚𑀦𑁆𑀢𑁄 𑀅𑀦𑀺𑀕𑀼𑀳𑀦𑁆𑀢𑁄 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀲𑀸𑀢𑀫𑀦𑁆𑀢𑁂 𑀮𑀘𑁆𑀙𑀲𑀺, 𑀅𑀓𑀭𑁄𑀦𑁆𑀢𑁄 𑀦 𑀮𑀘𑁆𑀙𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼 𑀆𑀘𑀭𑀺𑀬𑀸’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀓𑀸𑀲𑀺.

𑀅𑀣𑀲𑁆𑀲𑀸 𑀢𑀲𑁆𑀫𑀺𑀁 𑀫𑀸𑀡𑀯𑁂 𑀧𑀼𑀦𑀧𑁆𑀧𑀼𑀦𑀁 𑀯𑀡𑁆𑀡𑀬𑀫𑀸𑀦𑁂 ‘‘𑀅𑀬𑀁 𑀫𑀬𑀸 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑁆𑀥𑀸𑀬 𑀚𑀭𑀸𑀚𑀺𑀡𑁆𑀡𑀸𑀬 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀲𑀭𑀻𑀭𑀯𑀡𑁆𑀡𑀁 𑀓𑀣𑀬𑀫𑀸𑀦𑀁 𑀫𑀸𑀡𑀯𑀁 𑀆𑀳 ‘‘𑀫𑀬𑀸 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑀼𑀁 𑀇𑀘𑁆𑀙𑀲𑀻’’𑀢𑀺? ‘‘𑀅𑀬𑁆𑀬𑁂, 𑀅𑀳𑀁 𑀢𑀸𑀯 𑀇𑀘𑁆𑀙𑁂𑀬𑁆𑀬𑀁, 𑀆𑀘𑀭𑀺𑀬𑁄 𑀧𑀦 𑀕𑀭𑀼𑀓𑁄’’𑀢𑀺. ‘‘𑀲𑀘𑁂 𑀫𑀁 𑀇𑀘𑁆𑀙𑀲𑀺, 𑀧𑀼𑀢𑁆𑀢𑀁 𑀫𑁂 𑀫𑀸𑀭𑁂𑀳𑀻’’𑀢𑀺. ‘‘𑀅𑀳𑀁 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀏𑀢𑁆𑀢𑀓𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀺𑀮𑁂𑀲𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀆𑀘𑀭𑀺𑀬𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀲𑀘𑁂 𑀢𑁆𑀯𑀁 𑀫𑀁 𑀦 𑀧𑀭𑀺𑀘𑁆𑀘𑀚𑀲𑀺, 𑀅𑀳𑀫𑁂𑀯 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀲𑀸𑀢𑀸 𑀮𑀸𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸, 𑀢𑀣𑀸𑀭𑀽𑀧𑁂 𑀦𑀸𑀫 𑀯𑀬𑁂 𑀞𑀺𑀢𑀸 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀺𑀮𑁂𑀲𑀁 𑀅𑀦𑀼𑀯𑀢𑁆𑀢𑀫𑀸𑀦𑀸 𑀏𑀯𑀁 𑀉𑀧𑀓𑀸𑀭𑀓𑀁 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀓𑀸𑀫𑀸 𑀚𑀸𑀢𑀸. 𑀫𑀸𑀡𑀯𑁄 𑀲𑀩𑁆𑀩𑀁 𑀢𑀁 𑀓𑀣𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀲𑀼𑀝𑁆𑀞𑀼 𑀢𑁂, 𑀫𑀸𑀡𑀯, 𑀓𑀢𑀁 𑀫𑀬𑁆𑀳𑀁 𑀆𑀭𑁄𑀘𑁂𑀦𑁆𑀢𑁂𑀦𑀸’’𑀢𑀺 𑀯𑀢𑁆𑀯𑀸 𑀫𑀸𑀢𑀼 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚𑁂𑀯 𑀫𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀏𑀳𑀺, 𑀫𑀸𑀡𑀯, 𑀯𑀻𑀫𑀁𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀏𑀓𑀁 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀓𑀝𑁆𑀞𑀭𑀽𑀧𑀓𑀁 𑀓𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀬𑀦𑀝𑁆𑀞𑀸𑀦𑁂 𑀉𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑀚𑁆𑀚𑀼𑀓𑀁 𑀩𑀦𑁆𑀥𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀳 𑁋 ‘‘𑀢𑀸𑀢, 𑀨𑀭𑀲𑀼𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑀫 𑀫𑀸𑀢𑀼 𑀲𑀜𑁆𑀜𑀁 𑀤𑁂𑀳𑀻’’𑀢𑀺. 𑀫𑀸𑀡𑀯𑁄 𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬𑁂, 𑀆𑀘𑀭𑀺𑀬𑁄 𑀧𑀡𑁆𑀡𑀲𑀸𑀮𑀸𑀬𑀁 𑀅𑀢𑁆𑀢𑀦𑁄 𑀲𑀬𑀦𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑁄, 𑀭𑀚𑁆𑀚𑀼𑀲𑀜𑁆𑀜𑀸 𑀫𑁂 𑀩𑀤𑁆𑀥𑀸, 𑀇𑀫𑀁 𑀨𑀭𑀲𑀼𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀲𑀘𑁂 𑀲𑀓𑁆𑀓𑁄𑀲𑀺, 𑀫𑀸𑀭𑁂𑀳𑀺 𑀦’’𑀦𑁆𑀢𑀺 𑀆𑀳. ‘‘𑀢𑁆𑀯𑀁 𑀧𑀦 𑀫𑀁 𑀦 𑀧𑀭𑀺𑀘𑁆𑀘𑀚𑀺𑀲𑁆𑀲𑀲𑀻’’𑀢𑀺? ‘‘𑀓𑀺𑀁𑀓𑀸𑀭𑀡𑀸 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀻’’𑀢𑀺? 𑀲𑀸 𑀨𑀭𑀲𑀼𑀁 𑀆𑀤𑀸𑀬 𑀧𑀯𑁂𑀥𑀫𑀸𑀦𑀸 𑀉𑀝𑁆𑀞𑀸𑀬 𑀭𑀚𑁆𑀚𑀼𑀲𑀜𑁆𑀜𑀸𑀬 𑀕𑀦𑁆𑀢𑁆𑀯𑀸 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀅𑀬𑀁 𑀫𑁂 𑀧𑀼𑀢𑁆𑀢𑁄’’𑀢𑀺 𑀲𑀜𑁆𑀜𑀸𑀬 𑀓𑀝𑁆𑀞𑀭𑀽𑀧𑀓𑀲𑁆𑀲 𑀫𑀼𑀔𑀢𑁄 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀨𑀭𑀲𑀼𑀁 𑀆𑀤𑀸𑀬 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀻𑀯𑀸𑀬𑀫𑁂𑀯 𑀧𑀳𑀭𑀺𑀢𑁆𑀯𑀸 ‘‘𑀥’’𑀦𑁆𑀢𑀺 𑀲𑀤𑁆𑀤𑁂 𑀉𑀧𑁆𑀧𑀦𑁆𑀦𑁂 𑀭𑀼𑀓𑁆𑀔𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁂𑀦 ‘‘𑀓𑀺𑀁 𑀓𑀭𑁄𑀲𑀺, 𑀅𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀸 ‘‘𑀯𑀜𑁆𑀘𑀺𑀢𑀸𑀫𑁆𑀳𑀻’’𑀢𑀺 𑀢𑀢𑁆𑀣𑁂𑀯 𑀫𑀭𑀺𑀢𑁆𑀯𑀸 𑀧𑀢𑀺𑀢𑀸. 𑀅𑀢𑁆𑀢𑀦𑁄 𑀓𑀺𑀭 𑀧𑀡𑁆𑀡𑀲𑀸𑀮𑀸𑀬 𑀦𑀺𑀧𑀦𑁆𑀦𑀸𑀬𑀧𑀺 𑀢𑀗𑁆𑀔𑀡𑀜𑁆𑀜𑁂𑀯 𑀢𑀸𑀬 𑀫𑀭𑀺𑀢𑀩𑁆𑀩𑀫𑁂𑀯.

𑀲𑁄 𑀢𑀲𑁆𑀲𑀸 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀴𑀸𑀳𑀦𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀫𑀸𑀡𑀯𑀁 𑀆𑀤𑀸𑀬 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀸𑀢, 𑀧𑀸𑀝𑀺𑀬𑁂𑀓𑁆𑀓𑁄 𑀅𑀲𑀸𑀢𑀫𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑁆𑀣𑀺𑀬𑁄 𑀅𑀲𑀸𑀢𑀸 𑀦𑀸𑀫, 𑀢𑀯 𑀫𑀸𑀢𑀸 ‘𑀅𑀲𑀸𑀢𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀸’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀧𑁂𑀲𑀬𑀫𑀸𑀦𑀸 𑀇𑀢𑁆𑀣𑀻𑀦𑀁 𑀤𑁄𑀲𑀁 𑀚𑀸𑀦𑀦𑀢𑁆𑀣𑀁 𑀧𑁂𑀲𑁂𑀲𑀺. 𑀇𑀤𑀸𑀦𑀺 𑀧𑀦 𑀢𑁂 𑀧𑀘𑁆𑀘𑀓𑁆𑀔𑀫𑁂𑀯 𑀫𑀫 𑀫𑀸𑀢𑀼 𑀤𑁄𑀲𑁄 𑀤𑀺𑀝𑁆𑀞𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘𑀇𑀢𑁆𑀣𑀺𑀬𑁄 𑀦𑀸𑀫 𑀅𑀲𑀸𑀢𑀸 𑀮𑀸𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸’𑀢𑀺 𑀚𑀸𑀦𑁂𑀬𑁆𑀬𑀸𑀲𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀫𑀸𑀢𑀸 𑀧𑀼𑀘𑁆𑀙𑀺 ‘‘𑀢𑀸𑀢, 𑀉𑀕𑁆𑀕𑀳𑀺𑀢𑁄 𑀢𑁂 𑀅𑀲𑀸𑀢𑀫𑀦𑁆𑀢𑁄’’𑀢𑀺? ‘‘𑀆𑀫, 𑀅𑀫𑁆𑀫𑀸’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀺𑀁 𑀯𑀸 𑀧𑀭𑀺𑀘𑀭𑀺𑀲𑁆𑀲𑀲𑀺, 𑀅𑀕𑀸𑀭𑀫𑀚𑁆𑀛𑁂 𑀯𑀸 𑀯𑀲𑀺𑀲𑁆𑀲𑀲𑀻’’𑀢𑀺? 𑀫𑀸𑀡𑀯𑁄 ‘‘𑀫𑀬𑀸, 𑀅𑀫𑁆𑀫, 𑀧𑀘𑁆𑀘𑀓𑁆𑀔𑀢𑁄 𑀇𑀢𑁆𑀣𑀻𑀦𑀁 𑀤𑁄𑀲𑀸 𑀤𑀺𑀝𑁆𑀞𑀸, 𑀅𑀕𑀸𑀭𑁂𑀦 𑀫𑁂 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁧. ‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸;

𑀢𑀸 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬’’𑀦𑁆𑀢𑀺.

𑀢𑀢𑁆𑀣 𑀅𑀲𑀸𑀢𑀺 𑀅𑀲𑀢𑀺𑀬𑁄 𑀮𑀸𑀫𑀺𑀓𑀸. 𑀅𑀣 𑀯𑀸 𑀲𑀸𑀢𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀢𑀸𑀲𑀼 𑀦𑀢𑁆𑀣𑀺. 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀦𑀁 𑀅𑀲𑀸𑀢𑀫𑁂𑀯 𑀤𑁂𑀦𑁆𑀢𑀻𑀢𑀺𑀧𑀺 𑀅𑀲𑀸, 𑀤𑀼𑀓𑁆𑀔𑀸 𑀤𑀼𑀓𑁆𑀔𑀯𑀢𑁆𑀣𑀼𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀸𑀬 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑀩𑁆𑀩𑀁 𑁋

‘‘𑀫𑀸𑀬𑀸 𑀘𑁂𑀢𑀸 𑀫𑀭𑀻𑀘𑀻 𑀘, 𑀲𑁄𑀓𑁄 𑀭𑁄𑀕𑁄 𑀘𑀼𑀧𑀤𑁆𑀤𑀯𑁄;

𑀔𑀭𑀸 𑀘 𑀩𑀦𑁆𑀥𑀦𑀸 𑀘𑁂𑀢𑀸, 𑀫𑀘𑁆𑀘𑀼𑀧𑀸𑀲𑀸 𑀕𑀼𑀳𑀸𑀲𑀬𑀸;

𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄, 𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄’’𑀢𑀺. (𑀚𑀸. 𑁨.𑁨𑁧.𑁧𑁧𑁮);

𑀮𑁄𑀓𑀺𑀢𑁆𑀣𑀺𑀬𑁄𑀢𑀺 𑀮𑁄𑀓𑁂 𑀇𑀢𑁆𑀣𑀺𑀬𑁄. 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀫𑁆𑀫, 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀯𑁂𑀮𑀸 𑀲𑀁𑀯𑀭𑁄 𑀫𑀭𑀺𑀬𑀸𑀤𑀸 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘𑀸𑀢𑀺 𑀯𑁂𑀮𑀸 𑀘 𑀏𑀢𑀸𑀲𑀁 𑀦𑀢𑁆𑀣𑀺, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀸𑀭𑀢𑁆𑀢𑀸 𑀅𑀮𑁆𑀮𑀻𑀦𑀸, 𑀢𑀣𑀸 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀯𑀸𑀘𑀸𑀧𑀸𑀕𑀩𑁆𑀪𑀺𑀬𑁂𑀦, 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦𑀸𑀢𑀺 𑀢𑀺𑀯𑀺𑀥𑁂𑀦 𑀧𑀸𑀕𑀩𑁆𑀪𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀕𑀩𑁆𑀪𑀸 𑀘𑁂𑀢𑀸. 𑀏𑀢𑀸𑀲𑀜𑁆𑀳𑀺 𑀅𑀩𑁆𑀪𑀦𑁆𑀢𑀭𑁂 𑀓𑀸𑀬𑀤𑁆𑀯𑀸𑀭𑀸𑀤𑀻𑀦𑀺 𑀧𑀢𑁆𑀯𑀸 𑀲𑀁𑀯𑀭𑁄 𑀦𑀸𑀫 𑀦𑀢𑁆𑀣𑀺, 𑀮𑁄𑀮𑀸 𑀓𑀸𑀓𑀧𑀝𑀺𑀪𑀸𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸𑀢𑀺 𑀅𑀫𑁆𑀫, 𑀬𑀣𑀸 𑀚𑀸𑀮𑀲𑀺𑀔𑀸𑀬 ‘‘𑀲𑀺𑀔𑀻’’𑀢𑀺 𑀲𑀗𑁆𑀔𑀁 𑀕𑀢𑁄 𑀅𑀕𑁆𑀕𑀺 𑀦𑀸𑀫 𑀕𑀽𑀣𑀕𑀢𑀸𑀤𑀺𑀪𑁂𑀤𑀁 𑀅𑀲𑀼𑀘𑀺𑀫𑁆𑀧𑀺, 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀺𑀪𑁂𑀤𑀁 𑀲𑀼𑀘𑀺𑀫𑁆𑀧𑀺, 𑀇𑀝𑁆𑀞𑀫𑁆𑀧𑀺 𑀅𑀦𑀺𑀝𑁆𑀞𑀫𑁆𑀧𑀺 𑀬𑀁 𑀬𑀤𑁂𑀯 𑀮𑀪𑀢𑀺, 𑀲𑀩𑁆𑀩𑀁 𑀖𑀲𑀢𑀺 𑀔𑀸𑀤𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩𑀖𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑁂𑀯 𑀢𑀸 𑀇𑀢𑁆𑀣𑀺𑀬𑁄𑀧𑀺 𑀳𑀢𑁆𑀣𑀺𑀫𑁂𑀡𑁆𑀟𑀕𑁄𑀫𑁂𑀡𑁆𑀟𑀸𑀤𑀬𑁄 𑀯𑀸 𑀳𑁄𑀦𑁆𑀢𑀼 𑀳𑀻𑀦𑀚𑀘𑁆𑀘𑀸 𑀳𑀻𑀦𑀓𑀫𑁆𑀫𑀦𑁆𑀢𑀸, 𑀔𑀢𑁆𑀢𑀺𑀬𑀸𑀤𑀬𑁄 𑀯𑀸 𑀳𑁄𑀦𑁆𑀢𑀼 𑀉𑀢𑁆𑀢𑀫𑀓𑀫𑁆𑀫𑀦𑁆𑀢𑀸, 𑀳𑀻𑀦𑀼𑀓𑁆𑀓𑀝𑁆𑀞𑀪𑀸𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀓𑀺𑀮𑁂𑀲𑀲𑀦𑁆𑀣𑀯𑁂 𑀉𑀧𑁆𑀧𑀦𑁆𑀦𑁂 𑀬𑀁 𑀬𑀁 𑀮𑀪𑀦𑁆𑀢𑀺, 𑀲𑀩𑁆𑀩𑀫𑁂𑀯 𑀲𑁂𑀯𑀦𑁆𑀢𑀻𑀢𑀺 𑀲𑀩𑁆𑀩𑀖𑀲𑀲𑀺𑀔𑀺𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸, 𑀢𑀣𑁂𑀯𑁂𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀸 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀢𑀸 𑀮𑀸𑀫𑀺𑀓𑀸 𑀤𑀼𑀓𑁆𑀔𑀯𑀢𑁆𑀣𑀼𑀪𑀽𑀢𑀸 𑀇𑀢𑁆𑀣𑀺𑀬𑁄 𑀳𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀦𑁆𑀢𑀺 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑁄 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸, 𑀢𑁂𑀲𑀼 𑀇𑀥 𑀓𑀸𑀬𑀯𑀺𑀯𑁂𑀓𑁄𑀧𑀺 𑀯𑀝𑁆𑀝𑀢𑀺 𑀘𑀺𑀢𑁆𑀢𑀯𑀺𑀯𑁂𑀓𑁄𑀧𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀳𑀁, 𑀅𑀫𑁆𑀫, 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀧𑀜𑁆𑀘𑀸𑀪𑀺𑀜𑁆𑀜𑀸 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀡𑀢𑁄 𑀓𑀸𑀬𑀁, 𑀓𑀺𑀮𑁂𑀲𑁂𑀳𑀺 𑀘 𑀘𑀺𑀢𑁆𑀢𑀁 𑀯𑀺𑀯𑁂𑀘𑁂𑀢𑁆𑀯𑀸 𑀇𑀫𑀁 𑀯𑀺𑀯𑁂𑀓𑀁 𑀩𑁆𑀭𑀽𑀳𑁂𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀸𑀫𑀺, 𑀅𑀮𑀁 𑀫𑁂 𑀅𑀕𑀸𑀭𑁂𑀦𑀸𑀢𑀺. 𑀏𑀯𑀁 𑀇𑀢𑁆𑀣𑀺𑀬𑁄 𑀕𑀭𑀳𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀯𑁂𑀓𑀁 𑀩𑁆𑀭𑀽𑀳𑁂𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸𑀧𑀺 ‘‘𑀏𑀯𑀁 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀲𑀸𑀢𑀸 𑀮𑀸𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸 𑀤𑀼𑀓𑁆𑀔𑀤𑀸𑀬𑀺𑀓𑀸’’𑀢𑀺 𑀇𑀢𑁆𑀣𑀻𑀦𑀁 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀸 𑀪𑀤𑁆𑀤𑀓𑀸𑀧𑀺𑀮𑀸𑀦𑀻, 𑀧𑀺𑀢𑀸 𑀫𑀳𑀸𑀓𑀲𑁆𑀲𑀧𑁄 𑀅𑀳𑁄𑀲𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀦𑀦𑁆𑀤𑁄, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀸𑀢𑀫𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁬𑁨] 𑁨. 𑀅𑀡𑁆𑀟𑀪𑀽𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀯𑀸𑀤𑁂𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀫𑁂𑀯𑀸𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀭𑀓𑁆𑀔𑀺𑀬𑀸, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀇𑀢𑁆𑀣𑀺𑀁 𑀕𑀩𑁆𑀪𑀢𑁄 𑀧𑀝𑁆𑀞𑀸𑀬 𑀭𑀓𑁆𑀔𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀼𑀭𑁄𑀳𑀺𑀢𑁂𑀦 𑀲𑀤𑁆𑀥𑀺𑀁 𑀚𑀽𑀢𑀁 𑀓𑀻𑀴𑀢𑀺. 𑀓𑀻𑀴𑀦𑁆𑀢𑁄 𑀧𑀦 𑁋

‘‘𑀲𑀩𑁆𑀩𑀸 𑀦𑀤𑀻 𑀯𑀗𑁆𑀓𑀕𑀢𑀻, 𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;

𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁, 𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂’’𑀢𑀺. (𑀚𑀸. 𑁨.𑁨𑁧.𑁩𑁦𑁮) 𑁋

𑀇𑀫𑀁 𑀚𑀽𑀢𑀕𑀻𑀢𑀁 𑀕𑀸𑀬𑀦𑁆𑀢𑁄 𑀭𑀚𑀢𑀨𑀮𑀓𑁂 𑀲𑀼𑀯𑀡𑁆𑀡𑀧𑀸𑀲𑀓𑁂 𑀔𑀺𑀧𑀢𑀺. 𑀏𑀯𑀁 𑀓𑀻𑀴𑀦𑁆𑀢𑁄 𑀧𑀦 𑀭𑀸𑀚𑀸 𑀦𑀺𑀘𑁆𑀘𑀁 𑀚𑀺𑀦𑀸𑀢𑀺, 𑀧𑀼𑀭𑁄𑀳𑀺𑀢𑁄 𑀧𑀭𑀸𑀚𑀻𑀬𑀢𑀺.

𑀲𑁄 𑀅𑀦𑀼𑀓𑁆𑀓𑀫𑁂𑀦 𑀖𑀭𑁂 𑀯𑀺𑀪𑀯𑁂 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑁂 𑀘𑀺𑀦𑁆𑀢𑁂𑀲𑀺 ‘‘𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑀁 𑀇𑀫𑀲𑁆𑀫𑀺𑀁 𑀖𑀭𑁂 𑀥𑀦𑀁 𑀔𑀻𑀬𑀺𑀲𑁆𑀲𑀢𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀼𑀭𑀺𑀲𑀦𑁆𑀢𑀭𑀁 𑀅𑀕𑀢𑀁 𑀏𑀓𑀁 𑀫𑀸𑀢𑀼𑀕𑀸𑀫𑀁 𑀖𑀭𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀜𑁆𑀜𑀁 𑀧𑀼𑀭𑀺𑀲𑀁 𑀤𑀺𑀝𑁆𑀞𑀧𑀼𑀩𑁆𑀩𑀁 𑀇𑀢𑁆𑀣𑀺𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀕𑀩𑁆𑀪𑀢𑁄 𑀧𑀝𑁆𑀞𑀸𑀬𑁂𑀓𑀁 𑀫𑀸𑀢𑀼𑀕𑀸𑀫𑀁 𑀭𑀓𑁆𑀔𑀺𑀢𑁆𑀯𑀸 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀯𑀲𑁂 𑀞𑀧𑁂𑀢𑁆𑀯𑀸 𑀏𑀓𑀧𑀼𑀭𑀺𑀲𑀺𑀓𑀁 𑀓𑀢𑁆𑀯𑀸 𑀕𑀸𑀴𑁆𑀳𑀁 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀭𑀸𑀚𑀓𑀼𑀮𑀢𑁄 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘 𑀅𑀗𑁆𑀕𑀯𑀺𑀚𑁆𑀚𑀸𑀬 𑀙𑁂𑀓𑁄 𑀳𑁄𑀢𑀺, 𑀅𑀣𑁂𑀓𑀁 𑀤𑀼𑀕𑁆𑀕𑀢𑀺𑀢𑁆𑀣𑀺𑀁 𑀕𑀩𑁆𑀪𑀺𑀦𑀺𑀁 𑀤𑀺𑀲𑁆𑀯𑀸 ‘‘𑀥𑀻𑀢𑀭𑀁 𑀯𑀺𑀚𑀸𑀬𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀖𑀭𑁂𑀬𑁂𑀯 𑀯𑀲𑀸𑀧𑁂𑀢𑁆𑀯𑀸 𑀯𑀺𑀚𑀸𑀢𑀓𑀸𑀮𑁂 𑀥𑀦𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀁 𑀓𑀼𑀫𑀸𑀭𑀺𑀓𑀁 𑀅𑀜𑁆𑀜𑁂𑀲𑀁 𑀧𑀼𑀭𑀺𑀲𑀸𑀦𑀁 𑀤𑀝𑁆𑀞𑀼𑀁 𑀅𑀤𑀢𑁆𑀯𑀸 𑀇𑀢𑁆𑀣𑀻𑀦𑀁𑀬𑁂𑀯 𑀳𑀢𑁆𑀣𑁂 𑀤𑀢𑁆𑀯𑀸 𑀧𑁄𑀲𑀸𑀧𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀞𑀧𑁂𑀲𑀺. 𑀬𑀸𑀯 𑀘𑁂𑀲𑀸 𑀯𑀟𑁆𑀠𑀢𑀺, 𑀢𑀸𑀯 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀚𑀽𑀢𑀁 𑀦 𑀓𑀻𑀴𑀺. 𑀢𑀁 𑀧𑀦 𑀯𑀲𑁂 𑀞𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀳𑀸𑀭𑀸𑀚, 𑀚𑀽𑀢𑀁 𑀓𑀻𑀴𑀸𑀫𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀼𑀭𑀺𑀫𑀦𑀺𑀬𑀸𑀫𑁂𑀦𑁂𑀯 𑀓𑀻𑀴𑀺. 𑀧𑀼𑀭𑁄𑀳𑀺𑀢𑁄 𑀭𑀜𑁆𑀜𑁄 𑀕𑀸𑀬𑀺𑀢𑁆𑀯𑀸 𑀧𑀸𑀲𑀓𑀁 𑀔𑀺𑀧𑀦𑀓𑀸𑀮𑁂 ‘‘𑀞𑀧𑁂𑀢𑁆𑀯𑀸 𑀫𑀫 𑀫𑀸𑀡𑀯𑀺𑀓’’𑀦𑁆𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀭𑁄𑀳𑀺𑀢𑁄 𑀚𑀺𑀦𑀸𑀢𑀺, 𑀭𑀸𑀚𑀸 𑀧𑀭𑀸𑀚𑀻𑀬𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀲𑁆𑀲 𑀖𑀭𑁂 𑀏𑀓𑀧𑀼𑀭𑀺𑀲𑀺𑀓𑀸𑀬 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀅𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀻𑀮𑀫𑀲𑁆𑀲𑀸 𑀪𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀥𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀼𑀭𑁄𑀳𑀺𑀢𑀲𑁆𑀲 𑀇𑀢𑁆𑀣𑀺𑀬𑀸 𑀲𑀻𑀮𑀁 𑀪𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀆𑀳. ‘‘𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺. 𑀅𑀣𑀲𑁆𑀲 𑀭𑀸𑀚𑀸 𑀥𑀦𑀁 𑀤𑀢𑁆𑀯𑀸 ‘‘𑀢𑁂𑀦 𑀳𑀺 𑀔𑀺𑀧𑁆𑀧𑀁 𑀦𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀢𑀁 𑀧𑀳𑀺𑀡𑀺. 𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀥𑀦𑀁 𑀆𑀤𑀸𑀬 𑀕𑀦𑁆𑀥𑀥𑀽𑀫𑀘𑀼𑀡𑁆𑀡𑀓𑀧𑁆𑀧𑀽𑀭𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀖𑀭𑀢𑁄 𑀅𑀯𑀺𑀤𑀽𑀭𑁂 𑀲𑀩𑁆𑀩𑀕𑀦𑁆𑀥𑀸𑀧𑀡𑀁 𑀧𑀲𑀸𑀭𑁂𑀲𑀺. 𑀧𑀼𑀭𑁄𑀳𑀺𑀢𑀲𑁆𑀲𑀧𑀺 𑀕𑁂𑀳𑀁 𑀲𑀢𑁆𑀢𑀪𑀽𑀫𑀓𑀁 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀇𑀢𑁆𑀣𑀻𑀦𑀁𑀬𑁂𑀯 𑀆𑀭𑀓𑁆𑀔𑀸. 𑀞𑀧𑁂𑀢𑁆𑀯𑀸 𑀧𑀦 𑀩𑁆𑀭𑀸𑀳𑁆𑀫𑀡𑀁 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀓𑀘𑀯𑀭𑀙𑀟𑁆𑀟𑀦𑀧𑀘𑁆𑀙𑀺𑀫𑁆𑀧𑀺 𑀲𑁄𑀥𑁂𑀢𑁆𑀯𑀸𑀬𑁂𑀯 𑀧𑀯𑁂𑀲𑁂𑀦𑁆𑀢𑀺. 𑀢𑀁 𑀫𑀸𑀡𑀯𑀺𑀓𑀁 𑀧𑀼𑀭𑁄𑀳𑀺𑀢𑁄𑀬𑁂𑀯 𑀤𑀝𑁆𑀞𑀼𑀁 𑀮𑀪𑀢𑀺. 𑀢𑀲𑁆𑀲𑀸 𑀘 𑀏𑀓𑀸 𑀧𑀭𑀺𑀘𑀸𑀭𑀺𑀓𑀸 𑀇𑀢𑁆𑀣𑀻 𑀅𑀢𑁆𑀣𑀺. 𑀅𑀣𑀲𑁆𑀲𑀸 𑀲𑀸 𑀧𑀭𑀺𑀘𑀸𑀭𑀺𑀓𑀸 𑀕𑀦𑁆𑀥𑀧𑀼𑀧𑁆𑀨𑀫𑀽𑀮𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻 𑀢𑀲𑁆𑀲 𑀥𑀼𑀢𑁆𑀢𑀲𑁆𑀲 𑀆𑀧𑀡𑀲𑀫𑀻𑀧𑁂𑀦 𑀕𑀘𑁆𑀙𑀢𑀺. 𑀲𑁄 ‘‘𑀅𑀬𑀁 𑀢𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸’’𑀢𑀺 𑀲𑀼𑀝𑁆𑀞𑀼 𑀜𑀢𑁆𑀯𑀸 𑀏𑀓𑀤𑀺𑀯𑀲𑀁 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀆𑀧𑀡𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀸𑀤𑀫𑀽𑀮𑁂 𑀧𑀢𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂 𑀕𑀸𑀴𑁆𑀳𑀁 𑀕𑀳𑁂𑀢𑁆𑀯𑀸 ‘‘𑀅𑀫𑁆𑀫, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀳𑀁 𑀕𑀢𑀸𑀲𑀻’’𑀢𑀺 𑀧𑀭𑀺𑀤𑁂𑀯𑀺, 𑀅𑀯𑀲𑁂𑀲𑀸𑀧𑀺 𑀧𑀬𑀼𑀢𑁆𑀢𑀓𑀥𑀼𑀢𑁆𑀢𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 ‘‘𑀳𑀢𑁆𑀣𑀧𑀸𑀤𑀫𑀼𑀔𑀲𑀡𑁆𑀞𑀸𑀦𑁂𑀳𑀺 𑀘 𑀆𑀓𑀧𑁆𑀧𑁂𑀦 𑀘 𑀫𑀸𑀢𑀸𑀧𑀼𑀢𑁆𑀢𑀸 𑀏𑀓𑀲𑀤𑀺𑀲𑀸𑀬𑁂𑀯𑀸’’𑀢𑀺 𑀆𑀳𑀁𑀲𑀼. 𑀲𑀸 𑀇𑀢𑁆𑀣𑀻 𑀢𑁂𑀲𑀼 𑀢𑁂𑀲𑀼 𑀓𑀣𑁂𑀦𑁆𑀢𑁂𑀲𑀼 𑀅𑀢𑁆𑀢𑀦𑁄 𑀅𑀲𑀤𑁆𑀤𑀳𑀺𑀢𑁆𑀯𑀸 ‘‘𑀅𑀬𑀁 𑀫𑁂 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁆𑀧𑀺 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀢𑁂 𑀉𑀪𑁄𑀧𑀺 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣 𑀲𑁄 𑀥𑀼𑀢𑁆𑀢𑁄 𑀆𑀳 ‘‘𑀅𑀫𑁆𑀫, 𑀓𑀳𑀁 𑀯𑀲𑀲𑀻’’𑀢𑀺? ‘‘𑀓𑀺𑀦𑁆𑀦𑀭𑀺𑀮𑀻𑀮𑀸𑀬 𑀯𑀲𑀫𑀸𑀦𑀸𑀬 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸𑀬 𑀧𑀼𑀭𑁄𑀳𑀺𑀢𑀲𑁆𑀲 𑀤𑀳𑀭𑀺𑀢𑁆𑀣𑀺𑀬𑀸 𑀉𑀧𑀝𑁆𑀞𑀸𑀦𑀁 𑀓𑀼𑀭𑀼𑀫𑀸𑀦𑀸 𑀯𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀇𑀤𑀸𑀦𑀺 𑀓𑀳𑀁 𑀬𑀸𑀲𑀺, 𑀅𑀫𑁆𑀫𑀸’’𑀢𑀺? ‘‘𑀢𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺. ‘‘𑀅𑀫𑁆𑀫, 𑀓𑀺𑀁 𑀢𑁂 𑀅𑀜𑁆𑀜𑀢𑁆𑀣 𑀕𑀢𑀸𑀬, 𑀇𑀢𑁄 𑀧𑀝𑁆𑀞𑀸𑀬 𑀫𑀫𑁂𑀯 𑀲𑀦𑁆𑀢𑀺𑀓𑀸 𑀳𑀭𑀸’’𑀢𑀺 𑀫𑀽𑀮𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀩𑀳𑀽𑀦𑀺 𑀢𑀫𑁆𑀩𑀽𑀮𑀢𑀓𑁆𑀓𑁄𑀮𑀓𑀸𑀤𑀻𑀦𑀺 𑀘𑁂𑀯 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀘 𑀅𑀤𑀸𑀲𑀺. 𑀫𑀸𑀡𑀯𑀺𑀓𑀸 𑀩𑀳𑀽𑀦𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀤𑀺𑀲𑁆𑀯𑀸 ‘‘𑀓𑀺𑀁, 𑀅𑀫𑁆𑀫, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑁄 𑀧𑀲𑀦𑁆𑀦𑁄’’𑀢𑀺 𑀆𑀳. ‘‘𑀓𑀲𑁆𑀫𑀸 𑀏𑀯𑀁 𑀯𑀤𑀲𑀻’’𑀢𑀺? ‘‘𑀇𑀫𑁂𑀲𑀁 𑀩𑀳𑀼𑀪𑀸𑀯𑀁 𑀤𑀺𑀲𑁆𑀯𑀸’’𑀢𑀺. 𑀦 𑀩𑁆𑀭𑀸𑀳𑁆𑀫𑀡𑁄 𑀩𑀳𑀼𑀫𑀽𑀮𑀁 𑀅𑀤𑀸𑀲𑀺, 𑀫𑀬𑀸 𑀧𑀦𑁂𑀢𑀁 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀸 𑀆𑀪𑀢𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀩𑁆𑀭𑀸𑀳𑁆𑀫𑀡𑁂𑀦 𑀤𑀺𑀦𑁆𑀦𑀫𑀽𑀮𑀁 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀳𑀭𑀢𑀺. 𑀥𑀼𑀢𑁆𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀕𑀺𑀮𑀸𑀦𑀸𑀮𑀬𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑀸 𑀢𑀲𑁆𑀲 𑀆𑀧𑀡𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 ‘‘𑀓𑀳𑀁 𑀫𑁂 𑀧𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀢𑁆𑀢𑀲𑁆𑀲 𑀢𑁂 𑀅𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺? 𑀲𑀸 𑀢𑀲𑁆𑀲 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑀻 ‘‘𑀓𑀺𑀁 𑀢𑁂, 𑀢𑀸𑀢, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. ‘‘𑀓𑀺𑀁 𑀦 𑀓𑀣𑁂𑀲𑀺 𑀧𑀼𑀢𑁆𑀢𑀸’’𑀢𑀺? ‘‘𑀅𑀫𑁆𑀫, 𑀫𑀭𑀦𑁆𑀢𑁂𑀦𑀸𑀧𑀺 𑀢𑀼𑀬𑁆𑀳𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺. ‘‘𑀢𑀸𑀢, 𑀫𑀬𑁆𑀳𑀁 𑀅𑀓𑀣𑁂𑀢𑁆𑀯𑀸 𑀓𑀲𑁆𑀲 𑀓𑀣𑁂𑀬𑁆𑀬𑀸𑀲𑀺, 𑀓𑀣𑁂𑀳𑀺, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀫𑀬𑁆𑀳𑀁 𑀅𑀜𑁆𑀜𑀁 𑀅𑀨𑀸𑀲𑀼𑀓𑀁 𑀦𑀢𑁆𑀣𑀺, 𑀢𑀲𑁆𑀲𑀸 𑀧𑀦 𑀫𑀸𑀡𑀯𑀺𑀓𑀸𑀬 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀲𑁆𑀫𑀺, 𑀢𑀁 𑀮𑀪𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀇𑀥𑁂𑀯 𑀫𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀫𑀬𑁆𑀳𑀁 𑀏𑀲 𑀪𑀸𑀭𑁄, 𑀫𑀸 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀘𑀺𑀦𑁆𑀢𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀩𑀳𑀽𑀦𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀫𑀸𑀡𑀯𑀺𑀓𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀫𑁂, 𑀅𑀫𑁆𑀫, 𑀫𑀫 𑀲𑀦𑁆𑀢𑀺𑀓𑀸 𑀢𑀯 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀚𑀸𑀢𑁄, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀲𑀘𑁂 𑀆𑀦𑁂𑀢𑀼𑀁 𑀲𑀓𑁆𑀓𑁄𑀣, 𑀫𑀬𑀸 𑀓𑀢𑁄𑀓𑀸𑀲𑁄𑀬𑁂𑀯𑀸’’𑀢𑀺.

𑀲𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀕𑁂𑀳𑀲𑁆𑀲 𑀓𑀡𑁆𑀡𑀓𑀡𑁆𑀡𑁂𑀳𑀺 𑀩𑀳𑀼𑀁 𑀓𑀘𑀯𑀭𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀆𑀭𑀓𑁆𑀔𑀺𑀢𑁆𑀣𑀺𑀬𑀸 𑀉𑀧𑀭𑀺 𑀙𑀟𑁆𑀟𑁂𑀲𑀺. 𑀲𑀸 𑀢𑁂𑀦 𑀅𑀝𑁆𑀝𑀻𑀬𑀫𑀸𑀦𑀸 𑀅𑀧𑁂𑀢𑀺. 𑀇𑀢𑀭𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀬𑀸 𑀬𑀸 𑀓𑀺𑀜𑁆𑀘𑀺 𑀓𑀣𑁂𑀢𑀺, 𑀢𑀲𑁆𑀲𑀸 𑀢𑀲𑁆𑀲𑀸 𑀉𑀧𑀭𑀺 𑀓𑀘𑀯𑀭𑀁 𑀙𑀟𑁆𑀟𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀸 𑀬𑀁 𑀬𑀁 𑀆𑀳𑀭𑀢𑀺 𑀯𑀸 𑀳𑀭𑀢𑀺 𑀯𑀸, 𑀢𑀁 𑀢𑀁 𑀦 𑀓𑀸𑀘𑀺 𑀲𑁄𑀥𑁂𑀢𑀼𑀁 𑀉𑀲𑁆𑀲𑀳𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸 𑀢𑀁 𑀥𑀼𑀢𑁆𑀢𑀁 𑀧𑀼𑀧𑁆𑀨𑀧𑀘𑁆𑀙𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀸𑀡𑀯𑀺𑀓𑀸𑀬 𑀲𑀦𑁆𑀢𑀺𑀓𑀁 𑀅𑀪𑀺𑀳𑀭𑀺. 𑀥𑀼𑀢𑁆𑀢𑁄 𑀫𑀸𑀡𑀯𑀺𑀓𑀸𑀬 𑀲𑀻𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀳𑀤𑁆𑀯𑀻𑀳𑀁 𑀧𑀸𑀲𑀸𑀤𑁂𑀬𑁂𑀯 𑀅𑀳𑁄𑀲𑀺. 𑀧𑀼𑀭𑁄𑀳𑀺𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀉𑀪𑁄 𑀅𑀪𑀺𑀭𑀫𑀦𑁆𑀢𑀺. 𑀢𑀲𑁆𑀫𑀺𑀁 𑀆𑀕𑀢𑁂 𑀥𑀼𑀢𑁆𑀢𑁄 𑀦𑀺𑀮𑀻𑀬𑀢𑀺.

𑀅𑀣 𑀦𑀁 𑀲𑀸 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 ‘‘𑀲𑀸𑀫𑀺, 𑀇𑀤𑀸𑀦𑀺 𑀢𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀧𑀳𑀭𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄’’𑀢𑀺. 𑀲𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀥𑀼𑀢𑁆𑀢𑀁 𑀦𑀺𑀮𑀻𑀬𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀆𑀕𑀢𑁂 𑀏𑀯𑀫𑀸𑀳 ‘‘𑀅𑀳𑀁, 𑀅𑀬𑁆𑀬, 𑀢𑀼𑀫𑁆𑀳𑁂𑀲𑀼 𑀯𑀻𑀡𑀁 𑀯𑀸𑀤𑁂𑀦𑁆𑀢𑁂𑀲𑀼 𑀦𑀘𑁆𑀘𑀺𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀤𑁆𑀤𑁂, 𑀦𑀘𑁆𑀘𑀲𑁆𑀲𑀽’’𑀢𑀺 𑀯𑀻𑀡𑀁 𑀯𑀸𑀤𑁂𑀲𑀺. ‘‘𑀢𑀼𑀫𑁆𑀳𑁂𑀲𑀼 𑀑𑀮𑁄𑀓𑁂𑀦𑁆𑀢𑁂𑀲𑀼 𑀮𑀚𑁆𑀚𑀸𑀫𑀺, 𑀫𑀼𑀔𑀁 𑀧𑀦 𑀯𑁄 𑀲𑀸𑀝𑀓𑁂𑀦 𑀩𑀦𑁆𑀥𑀺𑀢𑁆𑀯𑀸 𑀦𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀮𑀚𑁆𑀚𑀲𑀺, 𑀏𑀯𑀁 𑀓𑀭𑁄𑀳𑀻’’𑀢𑀺. 𑀫𑀸𑀡𑀯𑀺𑀓𑀸 𑀖𑀦𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀧𑀺𑀤𑀳𑀫𑀸𑀦𑀸 𑀫𑀼𑀔𑀁 𑀩𑀦𑁆𑀥𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀼𑀔𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀲𑀺. 𑀲𑀸 𑀫𑀼𑀳𑀼𑀢𑁆𑀢𑀁 𑀦𑀘𑁆𑀘𑀺𑀢𑁆𑀯𑀸 ‘‘𑀅𑀬𑁆𑀬, 𑀅𑀳𑀁 𑀢𑁂 𑀏𑀓𑀯𑀸𑀭𑀁 𑀲𑀻𑀲𑁂 𑀧𑀳𑀭𑀺𑀢𑀼𑀓𑀸𑀫𑀸’’𑀢𑀺 𑀆𑀳. 𑀇𑀢𑁆𑀣𑀺𑀮𑁄𑀮𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 ‘‘𑀧𑀳𑀭𑀸𑀳𑀻’’𑀢𑀺 𑀆𑀳, 𑀫𑀸𑀡𑀯𑀺𑀓𑀸 𑀥𑀼𑀢𑁆𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀲𑀡𑀺𑀓𑀁 𑀆𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 𑀲𑀻𑀲𑁂 𑀓𑀧𑁆𑀧𑀭𑁂𑀦 𑀧𑀳𑀭𑀺, 𑀅𑀓𑁆𑀔𑀻𑀦𑀺 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀅𑀳𑁂𑀲𑀼𑀁, 𑀲𑀻𑀲𑁂 𑀕𑀡𑁆𑀟𑁄 𑀉𑀝𑁆𑀞𑀳𑀺. 𑀲𑁄 𑀯𑁂𑀤𑀦𑀸𑀝𑁆𑀝𑁄 𑀳𑀼𑀢𑁆𑀯𑀸 ‘‘𑀆𑀳𑀭 𑀢𑁂 𑀳𑀢𑁆𑀣’’𑀦𑁆𑀢𑀺 𑀆𑀳. 𑀫𑀸𑀡𑀯𑀺𑀓𑀸 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀳𑀢𑁆𑀣𑁄 𑀫𑀼𑀤𑀼𑀓𑁄, 𑀧𑀳𑀸𑀭𑁄 𑀧𑀦 𑀣𑀤𑁆𑀥𑁄’’𑀢𑀺 𑀆𑀳. 𑀥𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀁 𑀧𑀳𑀭𑀺𑀢𑁆𑀯𑀸 𑀦𑀺𑀮𑀻𑀬𑀺. 𑀫𑀸𑀡𑀯𑀺𑀓𑀸 𑀢𑀲𑁆𑀫𑀺𑀁 𑀦𑀺𑀮𑀻𑀦𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀼𑀔𑀢𑁄 𑀲𑀸𑀝𑀓𑀁 𑀫𑁄𑀘𑁂𑀢𑁆𑀯𑀸 𑀢𑁂𑀮𑀁 𑀆𑀤𑀸𑀬 𑀲𑀻𑀲𑀁 𑀧𑀭𑀺𑀲𑀫𑁆𑀩𑀸𑀳𑀺. 𑀩𑁆𑀭𑀸𑀳𑁆𑀫𑀡𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀧𑀼𑀦 𑀲𑀸 𑀇𑀢𑁆𑀣𑀻 𑀥𑀼𑀢𑁆𑀢𑀁 𑀧𑀘𑁆𑀙𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀦𑀻𑀳𑀭𑀺.

𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀳 ‘‘𑀚𑀽𑀢𑀁 𑀓𑀻𑀴𑀸𑀫 𑀩𑁆𑀭𑀸𑀳𑁆𑀫𑀡𑀸’’𑀢𑀺? ‘‘𑀲𑀸𑀥𑀼, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀚𑀽𑀢𑀫𑀡𑁆𑀟𑀮𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀚𑀽𑀢𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀧𑀸𑀲𑀓𑁂 𑀔𑀺𑀧𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀸𑀡𑀯𑀺𑀓𑀸𑀬 𑀢𑀧𑀲𑁆𑀲 𑀪𑀺𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀫𑀫 𑀫𑀸𑀡𑀯𑀺𑀓’’𑀦𑁆𑀢𑀺 𑀆𑀳. 𑀏𑀯𑀁 𑀯𑀤𑀦𑁆𑀢𑁄𑀧𑀺 𑀧𑀭𑀸𑀚𑀺𑀢𑁄𑀬𑁂𑀯. 𑀭𑀸𑀚𑀸 𑀚𑀺𑀦𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀯𑀤𑁂𑀲𑀺, 𑀫𑀸𑀡𑀯𑀺𑀓𑀸𑀬 𑀢𑁂 𑀢𑀧𑁄 𑀪𑀺𑀦𑁆𑀦𑁄, 𑀢𑁆𑀯𑀁 ‘𑀫𑀸𑀢𑀼𑀕𑀸𑀫𑀁 𑀕𑀩𑁆𑀪𑀢𑁄 𑀧𑀝𑁆𑀞𑀸𑀬 𑀭𑀓𑁆𑀔𑀦𑁆𑀢𑁄 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀓𑀭𑁄𑀦𑁆𑀢𑁄 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀫𑀜𑁆𑀜𑀲𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀓𑀼𑀘𑁆𑀙𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀦𑁆𑀢𑁂𑀦𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀓𑀧𑀼𑀭𑀺𑀲𑀺𑀓𑀸 𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀢𑀯 𑀫𑀸𑀡𑀯𑀺𑀓𑀸 ‘𑀦𑀘𑁆𑀘𑀺𑀢𑀼𑀓𑀸𑀫𑀸𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀦𑁆𑀢𑀲𑁆𑀲 𑀢𑀯 𑀲𑀸𑀝𑀓𑁂𑀦 𑀫𑀼𑀔𑀁 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀸𑀭𑀁 𑀢𑀯 𑀲𑀻𑀲𑁂 𑀓𑀧𑁆𑀧𑀭𑁂𑀦 𑀧𑀳𑀭𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺, 𑀇𑀤𑀸𑀦𑀺 𑀓𑀺𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁨. ‘‘𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀯𑀸𑀤𑁂𑀲𑀺, 𑀯𑀻𑀡𑀁 𑀲𑀫𑀼𑀔𑀯𑁂𑀞𑀺𑀢𑁄;

𑀅𑀡𑁆𑀟𑀪𑀽𑀢𑀸𑀪𑀢𑀸 𑀪𑀭𑀺𑀬𑀸, 𑀢𑀸𑀲𑀼 𑀓𑁄 𑀚𑀸𑀢𑀼 𑀯𑀺𑀲𑁆𑀲𑀲𑁂’’𑀢𑀺.

𑀢𑀢𑁆𑀣 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀯𑀸𑀤𑁂𑀲𑀺, 𑀯𑀻𑀡𑀁 𑀲𑀫𑀼𑀔𑀯𑁂𑀞𑀺𑀢𑁄𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀩𑁆𑀭𑀸𑀳𑁆𑀫𑀡𑁄 𑀖𑀦𑀲𑀸𑀝𑀓𑁂𑀦 𑀲𑀳 𑀫𑀼𑀔𑁂𑀦 𑀯𑁂𑀞𑀺𑀢𑁄 𑀳𑀼𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀲𑀺, 𑀢𑀁 𑀓𑀸𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀲𑀸 𑀯𑀜𑁆𑀘𑁂𑀢𑀼𑀓𑀸𑀫𑀸 𑀏𑀯𑀫𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀢𑀁 𑀇𑀢𑁆𑀣𑀺𑀁 𑀩𑀳𑀼𑀫𑀸𑀬𑀸𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀫𑀁 𑀏𑀲𑀸 𑀮𑀚𑁆𑀚𑀢𑀻’’𑀢𑀺 𑀏𑀯𑀁𑀲𑀜𑁆𑀜𑀻 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀅𑀜𑁆𑀜𑀸𑀡𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀭𑀸𑀚𑀸 𑀏𑀯𑀫𑀸𑀳, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀅𑀡𑁆𑀟𑀪𑀽𑀢𑀸𑀪𑀢𑀸 𑀪𑀭𑀺𑀬𑀸𑀢𑀺 𑀅𑀡𑁆𑀟𑀁 𑀯𑀼𑀘𑁆𑀘𑀢𑀺 𑀩𑀻𑀚𑀁, 𑀩𑀻𑀚𑀪𑀽𑀢𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑀓𑀸𑀮𑁂𑀬𑁂𑀯 𑀆𑀪𑀢𑀸 𑀆𑀦𑀻𑀢𑀸, 𑀪𑀢𑀸𑀢𑀺 𑀯𑀸 𑀧𑀼𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀸 𑀲𑀸? 𑀪𑀭𑀺𑀬𑀸 𑀧𑀚𑀸𑀧𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸. 𑀲𑀸 𑀳𑀺 𑀪𑀢𑁆𑀢𑀯𑀢𑁆𑀣𑀸𑀤𑀻𑀳𑀺 𑀪𑀭𑀺𑀢𑀩𑁆𑀩𑀢𑀸𑀬, 𑀪𑀺𑀦𑁆𑀦𑀲𑀁𑀯𑀭𑀢𑀸𑀬, 𑀮𑁄𑀓𑀥𑀫𑁆𑀫𑁂𑀳𑀺 𑀪𑀭𑀺𑀢𑀢𑀸𑀬 𑀯𑀸 ‘‘𑀪𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀓𑁄 𑀚𑀸𑀢𑀼 𑀯𑀺𑀲𑁆𑀲𑀲𑁂𑀢𑀺 𑀚𑀸𑀢𑀽𑀢𑀺 𑀏𑀓𑀁𑀲𑀸𑀥𑀺𑀯𑀘𑀦𑀁, 𑀢𑀸𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀧𑀝𑁆𑀞𑀸𑀬 𑀭𑀓𑁆𑀔𑀺𑀬𑀫𑀸𑀦𑀸𑀲𑀼𑀧𑀺 𑀏𑀯𑀁 𑀯𑀺𑀧𑁆𑀧𑀓𑀸𑀭𑀁 𑀆𑀧𑀚𑁆𑀚𑀦𑁆𑀢𑀻𑀲𑀼 𑀪𑀭𑀺𑀬𑀸𑀲𑀼 𑀓𑁄 𑀦𑀸𑀫 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀏𑀓𑀁𑀲𑁂𑀦 𑀯𑀺𑀲𑁆𑀲𑀲𑁂, ‘‘𑀦𑀺𑀩𑁆𑀩𑀺𑀓𑀸𑀭𑀸 𑀏𑀲𑀸 𑀫𑀬𑀻’’𑀢𑀺 𑀓𑁄 𑀲𑀤𑁆𑀤𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀲𑀤𑁆𑀥𑀫𑁆𑀫𑀯𑀲𑁂𑀦 𑀳𑀺 𑀆𑀫𑀦𑁆𑀢𑀓𑁂𑀲𑀼 𑀦𑀺𑀫𑀦𑁆𑀢𑀓𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀦𑁆𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀡𑀯𑀺𑀓𑀁 𑀆𑀳 𑁋 ‘‘𑀢𑀬𑀸 𑀓𑀺𑀭 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺? ‘‘𑀅𑀬𑁆𑀬, 𑀓𑁄 𑀏𑀯𑀫𑀸𑀳, 𑀦 𑀓𑀭𑁄𑀫𑀺, ‘𑀅𑀳𑀫𑁂𑀯 𑀧𑀳𑀭𑀺𑀁, 𑀦 𑀅𑀜𑁆𑀜𑁄 𑀓𑁄𑀘𑀺’. 𑀲𑀘𑁂 𑀦 𑀲𑀤𑁆𑀤𑀳𑀣, 𑀅𑀳𑀁 ‘𑀢𑀼𑀫𑁆𑀳𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀲𑀫𑁆𑀨𑀲𑁆𑀲𑀁 𑀦 𑀚𑀸𑀦𑀸𑀫𑀻’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑁆𑀯𑀸 𑀢𑀼𑀫𑁆𑀳𑁂 𑀲𑀤𑁆𑀤𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀫𑀳𑀦𑁆𑀢𑀁 𑀤𑀸𑀭𑀼𑀭𑀸𑀲𑀺𑀁 𑀓𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁂 𑀅𑀢𑁆𑀢𑀦𑁄 𑀲𑀤𑁆𑀤𑀳𑀲𑀺, 𑀅𑀕𑁆𑀕𑀺𑀁 𑀧𑀯𑀺𑀲𑀸𑀳𑀻’’𑀢𑀺 𑀆𑀳.

𑀫𑀸𑀡𑀯𑀺𑀓𑀸 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀁 𑀧𑀞𑀫𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀺 ‘‘𑀅𑀫𑁆𑀫, 𑀢𑀯 𑀧𑀼𑀢𑁆𑀢𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀫 𑀅𑀕𑁆𑀕𑀺𑀁 𑀧𑀯𑀺𑀲𑀦𑀓𑀸𑀮𑁂 𑀳𑀢𑁆𑀣𑀕𑁆𑀕𑀳𑀡𑀁 𑀓𑀸𑀢𑀼𑀁 𑀯𑀤𑁂𑀳𑀻’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀯𑀘. 𑀥𑀼𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀅𑀝𑁆𑀞𑀸𑀲𑀺. 𑀲𑀸 𑀫𑀸𑀡𑀯𑀺𑀓𑀸 𑀩𑁆𑀭𑀸𑀳𑁆𑀫𑀡𑀁 𑀯𑀜𑁆𑀘𑁂𑀢𑀼𑀓𑀸𑀫𑀸 𑀫𑀳𑀸𑀚𑀦𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀲𑀫𑁆𑀨𑀲𑁆𑀲𑀁 𑀦𑀸𑀫 𑀦 𑀚𑀸𑀦𑀸𑀫𑀺, 𑀇𑀫𑀺𑀦𑀸 𑀲𑀘𑁆𑀘𑁂𑀦 𑀅𑀬𑀁 𑀅𑀕𑁆𑀕𑀺 𑀫𑀸 𑀫𑀁 𑀛𑀸𑀧𑁂𑀲𑀻’’𑀢𑀺 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑀼𑀁 𑀆𑀭𑀤𑁆𑀥𑀸. 𑀢𑀲𑁆𑀫𑀺𑀁 𑀔𑀡𑁂 𑀥𑀼𑀢𑁆𑀢𑁄 ‘‘𑀧𑀲𑁆𑀲𑀣 𑀪𑁄 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀁, 𑀏𑀯𑀭𑀽𑀧𑀁 𑀫𑀸𑀢𑀼𑀕𑀸𑀫𑀁 𑀅𑀕𑁆𑀕𑀺𑀁 𑀧𑀯𑁂𑀲𑀸𑀧𑁂𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀡𑀯𑀺𑀓𑀁 𑀳𑀢𑁆𑀣𑁂 𑀕𑀡𑁆𑀳𑀺. 𑀲𑀸 𑀳𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑀁 𑀆𑀳 𑁋 ‘‘𑀅𑀬𑁆𑀬, 𑀫𑀫 𑀲𑀘𑁆𑀘𑀓𑀺𑀭𑀺𑀬𑀸 𑀪𑀺𑀦𑁆𑀦𑀸, 𑀦 𑀲𑀓𑁆𑀓𑀸 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑀼’’𑀦𑁆𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀅𑀚𑁆𑀚 𑀫𑀬𑀸 𑀏𑀯𑀭𑀽𑀧𑀸 𑀲𑀘𑁆𑀘𑀓𑀺𑀭𑀺𑀬𑀸 𑀓𑀢𑀸 ‘𑀞𑀧𑁂𑀢𑁆𑀯𑀸 𑀫𑀫 𑀲𑀸𑀫𑀺𑀓𑀁 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀲𑀫𑁆𑀨𑀲𑁆𑀲𑀁 𑀦 𑀚𑀸𑀦𑀸𑀫𑀻’𑀢𑀺, 𑀇𑀤𑀸𑀦𑀺 𑀘𑀫𑁆𑀳𑀺 𑀇𑀫𑀺𑀦𑀸 𑀧𑀼𑀭𑀺𑀲𑁂𑀦 𑀳𑀢𑁆𑀣𑁂 𑀕𑀳𑀺𑀢𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀯𑀜𑁆𑀘𑀺𑀢𑁄 𑀅𑀳𑀁 𑀇𑀫𑀸𑀬𑀸’’𑀢𑀺 𑀜𑀢𑁆𑀯𑀸 𑀢𑀁 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺. 𑀏𑀯𑀁 𑀅𑀲𑀤𑁆𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀓𑀺𑀭𑁂𑀢𑀸 𑀇𑀢𑁆𑀣𑀺𑀬𑁄 𑀢𑀸𑀯 𑀫𑀳𑀦𑁆𑀢𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀯𑀜𑁆𑀘𑁂𑀢𑀼𑀁 ‘‘𑀦𑀸𑀳𑀁 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀤𑀺𑀯𑀲𑀫𑁆𑀧𑀺 𑀲𑀧𑀣𑀁 𑀓𑀼𑀭𑀼𑀫𑀸𑀦𑀸 𑀦𑀸𑀦𑀸𑀘𑀺𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀘𑁄𑀭𑀻𑀦𑀁 𑀩𑀳𑀼𑀩𑀼𑀤𑁆𑀥𑀻𑀦𑀁, 𑀬𑀸𑀲𑀼 𑀲𑀘𑁆𑀘𑀁 𑀲𑀼𑀤𑀼𑀮𑁆𑀮𑀪𑀁;

𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢𑀁. (𑀚𑀸. 𑁨.𑁨𑁧.𑁩𑁪𑁭);

‘‘𑀫𑀼𑀲𑀸 𑀢𑀸𑀲𑀁 𑀬𑀣𑀸 𑀲𑀘𑁆𑀘𑀁, 𑀲𑀘𑁆𑀘𑀁 𑀢𑀸𑀲𑀁 𑀬𑀣𑀸 𑀫𑀼𑀲𑀸;

𑀕𑀸𑀯𑁄 𑀩𑀳𑀺 𑀢𑀺𑀡𑀲𑁆𑀲𑁂𑀯, 𑀑𑀫𑀲𑀦𑁆𑀢𑀺 𑀯𑀭𑀁 𑀯𑀭𑀁.

‘‘𑀘𑁄𑀭𑀺𑀬𑁄 𑀓𑀣𑀺𑀦𑀸 𑀳𑁂𑀢𑀸, 𑀯𑀸𑀴𑀸 𑀘 𑀮𑀧𑀲𑀓𑁆𑀔𑀭𑀸;

𑀦 𑀢𑀸 𑀓𑀺𑀜𑁆𑀘𑀺 𑀦 𑀚𑀸𑀦𑀦𑁆𑀢𑀺, 𑀬𑀁 𑀫𑀦𑀼𑀲𑁆𑀲𑁂𑀲𑀼 𑀯𑀜𑁆𑀘𑀦’’𑀦𑁆𑀢𑀺. (𑀚𑀸. 𑁨.𑁨𑁧.𑁩𑁩𑁨, 𑁩𑁩𑁪);

𑀲𑀢𑁆𑀣𑀸 ‘‘𑀏𑀯𑀁 𑀅𑀭𑀓𑁆𑀔𑀺𑀬𑁄 𑀫𑀸𑀢𑀼𑀕𑀸𑀫𑁄’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀡𑁆𑀟𑀪𑀽𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁬𑁩] 𑁩. 𑀢𑀓𑁆𑀓𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀜𑁆𑀜𑁂𑀯𑀸𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁆𑀣𑀺𑀬𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀸, 𑀓𑀲𑁆𑀫𑀸 𑀢𑀸 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀘𑁂𑀯 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀤𑀼𑀝𑁆𑀞𑀓𑀼𑀫𑀸𑀭𑀻 𑀦𑀸𑀫 𑀘𑀡𑁆𑀟𑀸 𑀅𑀳𑁄𑀲𑀺 𑀨𑀭𑀼𑀲𑀸, 𑀤𑀸𑀲𑀓𑀫𑁆𑀫𑀓𑀭𑁂 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀧𑀳𑀭𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀧𑀭𑀺𑀯𑀸𑀭𑀫𑀦𑀼𑀲𑁆𑀲𑀸 𑀕𑀳𑁂𑀢𑁆𑀯𑀸 ‘‘𑀕𑀗𑁆𑀕𑀸𑀬 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀅𑀕𑀫𑀁𑀲𑀼. 𑀢𑁂𑀲𑀁 𑀓𑀻𑀴𑀦𑁆𑀢𑀸𑀦𑀜𑁆𑀜𑁂𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸 𑀚𑀸𑀢𑀸, 𑀫𑁂𑀖𑁄 𑀉𑀝𑁆𑀞𑀳𑀺, 𑀫𑀦𑀼𑀲𑁆𑀲𑀸 𑀫𑁂𑀖𑀁 𑀤𑀺𑀲𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑁂𑀕𑁂𑀦 𑀧𑀮𑀸𑀬𑀺𑀁𑀲𑀼. 𑀲𑁂𑀝𑁆𑀞𑀺𑀥𑀻𑀢𑀸𑀬𑀧𑀺 𑀤𑀸𑀲𑀓𑀫𑁆𑀫𑀓𑀭𑀸 ‘‘𑀅𑀚𑁆𑀚 𑀅𑀫𑁆𑀳𑁂𑀳𑀺 𑀏𑀢𑀺𑀲𑁆𑀲𑀸 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀁 𑀅𑀦𑁆𑀢𑁄𑀉𑀤𑀓𑀲𑁆𑀫𑀺𑀁𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀉𑀢𑁆𑀢𑀭𑀺𑀁𑀲𑀼. 𑀤𑁂𑀯𑁄 𑀧𑀸𑀯𑀲𑁆𑀲𑀺, 𑀲𑀽𑀭𑀺𑀬𑁄𑀧𑀺 𑀅𑀢𑁆𑀣𑀗𑁆𑀕𑀢𑁄, 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄. 𑀢𑁂 𑀢𑀸𑀬 𑀯𑀺𑀦𑀸𑀯 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀕𑀗𑁆𑀕𑀸𑀢𑁄 𑀢𑀸𑀯 𑀉𑀢𑁆𑀢𑀺𑀡𑁆𑀡𑀸, 𑀅𑀣 𑀦𑀁 𑀦 𑀚𑀸𑀦𑀸𑀫 𑀓𑀳𑀁 𑀕𑀢𑀸’’𑀢𑀺. 𑀜𑀸𑀢𑀓𑀸 𑀯𑀺𑀘𑀺𑀦𑀺𑀢𑁆𑀯𑀸𑀧𑀺 𑀦 𑀧𑀲𑁆𑀲𑀺𑀁𑀲𑀼.

𑀲𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀻 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀡𑁆𑀡𑀲𑀸𑀮𑀸𑀲𑀫𑀻𑀧𑀁 𑀧𑀸𑀧𑀼𑀡𑀺. 𑀲𑁄 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑁄 𑀏𑀲𑁄, 𑀧𑀭𑀺𑀢𑁆𑀢𑀸𑀡𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀡𑀼𑀓𑁆𑀓𑀁 𑀆𑀤𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀸 𑀪𑀸𑀬𑀻’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑁄 𑀦𑀤𑀺𑀁 𑀢𑀭𑀫𑀸𑀦𑁄 𑀕𑀦𑁆𑀢𑁆𑀯𑀸 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑀻𑀢𑁂 𑀯𑀺𑀕𑀢𑁂 𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀉𑀧𑀦𑀸𑀫𑁂𑀲𑀺. 𑀢𑀸𑀦𑀺 𑀔𑀸𑀤𑀺𑀢𑁆𑀯𑀸 𑀞𑀺𑀢𑀁 ‘‘𑀓𑀢𑁆𑀣 𑀯𑀸𑀲𑀺𑀓𑀸𑀲𑀺, 𑀓𑀣𑀜𑁆𑀘 𑀕𑀗𑁆𑀕𑀸𑀬 𑀧𑀢𑀺𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 ‘‘𑀢𑁆𑀯𑀁 𑀇𑀥𑁂𑀯 𑀯𑀲𑀸’’𑀢𑀺 𑀧𑀡𑁆𑀡𑀲𑀸𑀮𑀸𑀬 𑀯𑀲𑀸𑀧𑁂𑀦𑁆𑀢𑁄 𑀤𑁆𑀯𑀻𑀳𑀢𑀻𑀳𑀁 𑀲𑀬𑀁 𑀅𑀩𑁆𑀪𑁄𑀓𑀸𑀲𑁂 𑀯𑀲𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀕𑀘𑁆𑀙𑀸’’𑀢𑀺 𑀆𑀳. 𑀲𑀸 ‘‘𑀇𑀫𑀁 𑀢𑀸𑀧𑀲𑀁 𑀲𑀻𑀮𑀪𑁂𑀤𑀁 𑀧𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦 𑀕𑀘𑁆𑀙𑀢𑀺. 𑀅𑀣 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀺𑀮𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀲𑀻𑀮𑀪𑁂𑀤𑀁 𑀓𑀢𑁆𑀯𑀸 𑀛𑀸𑀦𑀁 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂𑀬𑁂𑀯 𑀯𑀲𑀢𑀺. 𑀅𑀣 𑀦𑀁 𑀲𑀸 𑀆𑀳 ‘‘𑀅𑀬𑁆𑀬, 𑀓𑀺𑀁 𑀦𑁄 𑀅𑀭𑀜𑁆𑀜𑀯𑀸𑀲𑁂𑀦, 𑀫𑀦𑀼𑀲𑁆𑀲𑀧𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺? 𑀲𑁄 𑀢𑀁 𑀆𑀤𑀸𑀬 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀢𑀓𑁆𑀓𑀪𑀢𑀺𑀬𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀢𑀁 𑀧𑁄𑀲𑁂𑀢𑀺. 𑀢𑀲𑁆𑀲 𑀢𑀓𑁆𑀓𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀢𑀻𑀢𑀺 ‘‘𑀢𑀓𑁆𑀓𑀧𑀡𑁆𑀟𑀺𑀢𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀕𑀸𑀫𑀯𑀸𑀲𑀺𑀦𑁄 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀼𑀬𑀼𑀢𑁆𑀢𑀤𑀼𑀬𑀼𑀢𑁆𑀢𑀓𑀁 𑀆𑀘𑀺𑀓𑁆𑀔𑀦𑁆𑀢𑁄 𑀏𑀢𑁆𑀣 𑀯𑀲𑀸’’𑀢𑀺 𑀕𑀸𑀫𑀤𑁆𑀯𑀸𑀭𑁂 𑀓𑀼𑀝𑀺𑀬𑀁 𑀯𑀸𑀲𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀘𑁄𑀭𑀸 𑀧𑀩𑁆𑀩𑀢𑀸 𑀑𑀭𑀼𑀬𑁆𑀳 𑀧𑀘𑁆𑀘𑀦𑁆𑀢𑀁 𑀧𑀳𑀭𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀢𑀁 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀕𑀸𑀫𑀯𑀸𑀲𑀺𑀓𑁂𑀳𑀺𑀬𑁂𑀯 𑀪𑀡𑁆𑀟𑀺𑀓𑀸 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀢𑀫𑁆𑀧𑀺 𑀲𑁂𑀝𑁆𑀞𑀺𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑁂𑀲𑀚𑀦𑁂 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀘𑁄𑀭𑀚𑁂𑀝𑁆𑀞𑀓𑁄 𑀧𑀦 𑀢𑀲𑁆𑀲𑀸 𑀭𑀽𑀧𑁂 𑀩𑀚𑁆𑀛𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀢𑁆𑀣𑀦𑁆𑀦𑀸𑀫𑀸 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀘𑁄𑀭𑀚𑁂𑀝𑁆𑀞𑀓𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸 𑀓𑀢𑀸’’𑀢𑀺 𑀘 𑀲𑀼𑀢𑁆𑀯𑀸𑀧𑀺 ‘‘𑀦 𑀲𑀸 𑀢𑀢𑁆𑀣 𑀫𑀬𑀸 𑀯𑀺𑀦𑀸 𑀯𑀲𑀺𑀲𑁆𑀲𑀢𑀺, 𑀧𑀮𑀸𑀬𑀺𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲𑀸 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀢𑀢𑁆𑀣𑁂𑀯 𑀯𑀲𑀺.

𑀲𑁂𑀝𑁆𑀞𑀺𑀥𑀻𑀢𑀸𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀥 𑀲𑀼𑀔𑀁 𑀯𑀲𑀸𑀫𑀺, 𑀓𑀤𑀸𑀘𑀺 𑀫𑀁 𑀢𑀓𑁆𑀓𑀧𑀡𑁆𑀟𑀺𑀢𑁄 𑀓𑀺𑀜𑁆𑀘𑀺𑀤𑁂𑀯 𑀦𑀺𑀲𑁆𑀲𑀸𑀬 𑀆𑀕𑀦𑁆𑀢𑁆𑀯𑀸 𑀇𑀢𑁄 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬, 𑀅𑀣 𑀏𑀢𑀲𑁆𑀫𑀸 𑀲𑀼𑀔𑀸 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀺, 𑀬𑀦𑁆𑀦𑀽𑀦𑀸𑀳𑀁 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀯𑀺𑀬 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀖𑀸𑀢𑀸𑀧𑁂𑀬𑁆𑀬’’𑀦𑁆𑀢𑀺. 𑀲𑀸 𑀏𑀓𑀁 𑀫𑀦𑀼𑀲𑁆𑀲𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀅𑀳𑀁 𑀇𑀥 𑀤𑀼𑀓𑁆𑀔𑀁 𑀚𑀻𑀯𑀸𑀫𑀺, 𑀢𑀓𑁆𑀓𑀧𑀡𑁆𑀟𑀺𑀢𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀆𑀤𑀸𑀬 𑀕𑀘𑁆𑀙𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑁆𑀬, 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀕𑀘𑁆𑀙𑀺𑀲𑁆𑀲𑀸𑀫, 𑀘𑁄𑀭𑀚𑁂𑀝𑁆𑀞𑀓𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀪𑁄𑀧𑀺 𑀅𑀫𑁆𑀳𑁂 𑀖𑀸𑀢𑁂𑀲𑁆𑀲𑀢𑀺, 𑀭𑀢𑁆𑀢𑀺𑀪𑀸𑀕𑁂 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀆𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀓𑁄𑀝𑁆𑀞𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀸𑀬𑀁 𑀘𑁄𑀭𑀚𑁂𑀝𑁆𑀞𑀓𑀲𑁆𑀲 𑀆𑀕𑀦𑁆𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀓𑀸𑀮𑁂 ‘‘𑀲𑀸𑀫𑀺, 𑀲𑀘𑁂 𑀇𑀫𑀸𑀬 𑀯𑁂𑀮𑀸𑀬 𑀢𑀯 𑀲𑀢𑁆𑀢𑀼𑀁 𑀧𑀲𑁆𑀲𑁂𑀬𑁆𑀬𑀸𑀲𑀺, 𑀓𑀺𑀦𑁆𑀢𑀺 𑀦𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀆𑀳. ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀻𑀢𑀺’’. ‘‘𑀓𑀺𑀁 𑀧𑀦 𑀲𑁄 𑀤𑀽𑀭𑁂, 𑀦𑀦𑀼 𑀓𑁄𑀝𑁆𑀞𑀓𑁂 𑀦𑀺𑀲𑀺𑀦𑁆𑀦𑁄’’𑀢𑀺? 𑀘𑁄𑀭𑀚𑁂𑀝𑁆𑀞𑀓𑁄 𑀉𑀓𑁆𑀓𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀕𑀳𑁂𑀢𑁆𑀯𑀸 𑀕𑁂𑀳𑀫𑀚𑁆𑀛𑁂 𑀧𑀸𑀢𑁂𑀢𑁆𑀯𑀸 𑀓𑀧𑁆𑀧𑀭𑀸𑀤𑀻𑀳𑀺 𑀬𑀣𑀸𑀭𑀼𑀘𑀺𑀁 𑀧𑁄𑀣𑁂𑀲𑀺. 𑀲𑁄 𑀧𑁄𑀣𑀺𑀬𑀫𑀸𑀦𑁄𑀧𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 ‘‘𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘, 𑀧𑀺𑀲𑀼𑀡𑀸 𑀫𑀺𑀢𑁆𑀢𑀪𑁂𑀤𑀺𑀓𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀤𑀢𑀺. 𑀘𑁄𑀭𑁄 𑀢𑀁 𑀧𑁄𑀣𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀺. 𑀧𑀩𑀼𑀤𑁆𑀥𑁄 𑀚𑀺𑀡𑁆𑀡𑀸𑀬 𑀲𑀼𑀭𑀸𑀬 𑀧𑀼𑀦 𑀢𑀁 𑀧𑁄𑀣𑁂𑀢𑀼𑀁 𑀆𑀭𑀪𑀺, 𑀲𑁄𑀧𑀺 𑀢𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀤𑀢𑀺.

𑀘𑁄𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀯𑀁 𑀧𑁄𑀣𑀺𑀬𑀫𑀸𑀦𑁄𑀧𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀤𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀲𑁆𑀲𑀸 𑀲𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀪𑁄 𑀢𑁆𑀯𑀁 𑀏𑀯𑀁 𑀧𑁄𑀣𑀺𑀬𑀫𑀸𑀦𑁄𑀧𑀺 𑀓𑀲𑁆𑀫𑀸 𑀏𑀢𑀸𑀦𑁂𑀯 𑀧𑀤𑀸𑀦𑀺 𑀯𑀤𑀲𑀻’’𑀢𑀺? 𑀢𑀓𑁆𑀓𑀧𑀡𑁆𑀟𑀺𑀢𑁄 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀢𑀁 𑀓𑀸𑀭𑀡𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑁂𑀲𑀺. ‘‘𑀅𑀳𑀁 𑀧𑀼𑀩𑁆𑀩𑁂 𑀅𑀭𑀜𑁆𑀜𑀯𑀸𑀲𑀺𑀓𑁄 𑀏𑀓𑁄 𑀢𑀸𑀧𑀲𑁄 𑀛𑀸𑀦𑀮𑀸𑀪𑀻, 𑀲𑁆𑀯𑀸𑀳𑀁 𑀏𑀢𑀁 𑀕𑀗𑁆𑀕𑀸𑀬 𑀯𑀼𑀬𑁆𑀳𑀫𑀸𑀦𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀁. 𑀅𑀣 𑀫𑀁 𑀏𑀲𑀸 𑀧𑀮𑁄𑀪𑁂𑀢𑁆𑀯𑀸 𑀛𑀸𑀦𑀸 𑀧𑀭𑀺𑀳𑀸𑀧𑁂𑀲𑀺, 𑀲𑁆𑀯𑀸𑀳𑀁 𑀅𑀭𑀜𑁆𑀜𑀁 𑀧𑀳𑀸𑀬 𑀏𑀢𑀁 𑀧𑁄𑀲𑁂𑀦𑁆𑀢𑁄 𑀧𑀘𑁆𑀘𑀦𑁆𑀢𑀕𑀸𑀫𑀓𑁂 𑀯𑀲𑀸𑀫𑀺, 𑀅𑀣𑁂𑀲𑀸 𑀘𑁄𑀭𑁂𑀳𑀺 𑀇𑀥𑀸𑀦𑀻𑀢𑀸 ‘𑀅𑀳𑀁 𑀤𑀼𑀓𑁆𑀔𑀁 𑀯𑀲𑀸𑀫𑀺, 𑀆𑀕𑀦𑁆𑀢𑁆𑀯𑀸 𑀫𑀁 𑀦𑁂𑀢𑀽’𑀢𑀺 𑀫𑀬𑁆𑀳𑀁 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀯 𑀳𑀢𑁆𑀣𑁂 𑀧𑀸𑀢𑁂𑀲𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀳𑀁 𑀏𑀯𑀁 𑀓𑀣𑁂𑀫𑀻’’𑀢𑀺. 𑀘𑁄𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀬𑀸 𑀏𑀲𑀸 𑀏𑀯𑀭𑀽𑀧𑁂 𑀕𑀼𑀡𑀲𑀫𑁆𑀧𑀦𑁆𑀦𑁂 𑀉𑀧𑀓𑀸𑀭𑀓𑁂 𑀏𑀯𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀺, 𑀲𑀸 𑀫𑀬𑁆𑀳𑀁 𑀓𑀢𑀭𑀁 𑀦𑀸𑀫 𑀉𑀧𑀤𑁆𑀤𑀯𑀁 𑀦 𑀓𑀭𑁂𑀬𑁆𑀬, 𑀫𑀸𑀭𑁂𑀢𑀩𑁆𑀩𑀸 𑀏𑀲𑀸’’𑀢𑀺 𑀲𑁄 𑀢𑀓𑁆𑀓𑀧𑀡𑁆𑀟𑀺𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀢𑀁 𑀧𑀩𑁄𑀥𑁂𑀢𑁆𑀯𑀸 𑀔𑀕𑁆𑀕𑀁 𑀆𑀤𑀸𑀬 𑀦𑀺𑀓𑁆𑀔𑀫𑁆𑀫 ‘‘𑀏𑀢𑀁 𑀧𑀼𑀭𑀺𑀲𑀁 𑀕𑀸𑀫𑀤𑁆𑀯𑀸𑀭𑁂 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀏𑀢𑀁 𑀳𑀢𑁆𑀣𑁂 𑀕𑀡𑁆𑀳𑀸’’𑀢𑀺 𑀢𑀁 𑀢𑀸𑀬 𑀳𑀢𑁆𑀣𑁂 𑀕𑀸𑀳𑀸𑀧𑁂𑀢𑁆𑀯𑀸 𑀔𑀕𑁆𑀕𑀁 𑀆𑀤𑀸𑀬 𑀢𑀓𑁆𑀓𑀧𑀡𑁆𑀟𑀺𑀢𑀁 𑀧𑀳𑀭𑀦𑁆𑀢𑁄 𑀯𑀺𑀬 𑀢𑀁 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀲𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀢𑀓𑁆𑀓𑀧𑀡𑁆𑀟𑀺𑀢𑀁 𑀓𑀢𑀺𑀧𑀸𑀳𑀁 𑀧𑀡𑀻𑀢𑁂𑀦 𑀪𑁄𑀚𑀦𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀇𑀤𑀸𑀦𑀺 𑀓𑀳𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀓𑁆𑀓𑀧𑀡𑁆𑀟𑀺𑀢𑁄 ‘‘𑀖𑀭𑀸𑀯𑀸𑀲𑁂𑀦 𑀫𑁂 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀜𑁆𑀜𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀢𑀁 𑀅𑀭𑀜𑁆𑀜𑀸𑀬𑀢𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀸𑀦𑀺 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁩. ‘‘𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘, 𑀧𑀺𑀲𑀼𑀡𑀸 𑀫𑀺𑀢𑁆𑀢𑀪𑁂𑀤𑀺𑀓𑀸;

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭 𑀪𑀺𑀓𑁆𑀔𑀼, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀳𑀺𑀲𑀻’’𑀢𑀺.

𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀓𑁄𑀥𑀦𑀸, 𑀉𑀧𑁆𑀧𑀦𑁆𑀦𑀁 𑀓𑁄𑀥𑀁 𑀦𑀺𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀓𑀢𑀜𑁆𑀜𑀽 𑀘, 𑀅𑀢𑀺𑀫𑀳𑀦𑁆𑀢𑀫𑁆𑀧𑀺 𑀉𑀧𑀓𑀸𑀭𑀁 𑀦 𑀚𑀸𑀦𑀦𑁆𑀢𑀺. 𑀧𑀺𑀲𑀼𑀡𑀸 𑀘, 𑀧𑀺𑀬𑀲𑀼𑀜𑁆𑀜𑀪𑀸𑀯𑀓𑀭𑀡𑀫𑁂𑀯 𑀓𑀣𑀁 𑀓𑀣𑁂𑀦𑁆𑀢𑀺. 𑀫𑀺𑀢𑁆𑀢𑀪𑁂𑀤𑀺𑀓𑀸, 𑀫𑀺𑀢𑁆𑀢𑁂 𑀪𑀺𑀦𑁆𑀤𑀦𑁆𑀢𑀺, 𑀫𑀺𑀢𑁆𑀢𑀪𑁂𑀤𑀦𑀓𑀣𑀁 𑀓𑀣𑀦𑀲𑀻𑀮𑀸𑀬𑁂𑀯, 𑀏𑀯𑀭𑀽𑀧𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀏𑀢𑀸. 𑀓𑀺𑀁 𑀢𑁂 𑀏𑀢𑀸𑀳𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭 𑀪𑀺𑀓𑁆𑀔𑀼, 𑀅𑀬𑀜𑁆𑀳𑀺 𑀫𑁂𑀣𑀼𑀦𑀯𑀺𑀭𑀢𑀺 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫, 𑀢𑀁 𑀘𑀭. 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀳𑀺𑀲𑀻𑀢𑀺 𑀲𑁄 𑀢𑁆𑀯𑀁 𑀏𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑁄 𑀛𑀸𑀦𑀲𑀼𑀔𑀁 𑀫𑀕𑁆𑀕𑀲𑀼𑀔𑀁 𑀨𑀮𑀲𑀼𑀔𑀜𑁆𑀘 𑀦 𑀯𑀺𑀳𑀸𑀳𑀺𑀲𑀺, 𑀏𑀢𑀁 𑀲𑀼𑀔𑀁 𑀦 𑀯𑀺𑀚𑀳𑀺𑀲𑁆𑀲𑀢𑀺, 𑀏𑀢𑀲𑁆𑀫𑀸 𑀲𑀼𑀔𑀸 𑀦 𑀧𑀭𑀺𑀳𑀸𑀬𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. ‘‘𑀦 𑀧𑀭𑀺𑀳𑀸𑀳𑀺𑀲𑀻’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀘𑁄𑀭𑀚𑁂𑀝𑁆𑀞𑀓𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀓𑁆𑀓𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀓𑁆𑀓𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁬𑁪] 𑁪. 𑀤𑀼𑀭𑀸𑀚𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀫𑀸𑀲𑀼 𑀦𑀦𑁆𑀤𑀺 𑀇𑀘𑁆𑀙𑀢𑀺 𑀫𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀉𑀧𑀸𑀲𑀓𑁄 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄, 𑀪𑀭𑀺𑀬𑀸 𑀧𑀦𑀲𑁆𑀲 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀬𑀁 𑀤𑀺𑀯𑀲𑀁 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑀺, 𑀢𑀁 𑀤𑀺𑀯𑀲𑀁 𑀲𑀢𑀓𑀻𑀢𑀤𑀸𑀲𑀻 𑀯𑀺𑀬 𑀳𑁄𑀢𑀺, 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀧𑀦 𑀅𑀓𑀢𑀤𑀺𑀯𑀲𑁂 𑀲𑀸𑀫𑀺𑀦𑀻 𑀯𑀺𑀬 𑀳𑁄𑀢𑀺 𑀘𑀡𑁆𑀟𑀸 𑀨𑀭𑀼𑀲𑀸. 𑀲𑁄 𑀢𑀲𑁆𑀲𑀸 𑀪𑀸𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀢𑀸𑀬 𑀉𑀩𑁆𑀩𑀸𑀴𑁆𑀳𑁄 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀉𑀧𑀸𑀲𑀓, 𑀲𑀢𑁆𑀢𑀝𑁆𑀞 𑀤𑀺𑀯𑀲𑁂 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀁 𑀦𑀸𑀕𑀘𑁆𑀙𑀲𑀻’’𑀢𑀺. 𑀖𑀭𑀡𑀻 𑀫𑁂, 𑀪𑀦𑁆𑀢𑁂, 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀲𑀢𑀓𑀻𑀢𑀤𑀸𑀲𑀻 𑀯𑀺𑀬 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀲𑀸𑀫𑀺𑀦𑀻 𑀯𑀺𑀬 𑀘𑀡𑁆𑀟𑀸 𑀨𑀭𑀼𑀲𑀸. 𑀅𑀳𑀁 𑀢𑀲𑁆𑀲𑀸 𑀪𑀸𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑁆𑀯𑀸𑀳𑀁 𑀢𑀸𑀬 𑀉𑀩𑁆𑀩𑀸𑀴𑁆𑀳𑁄 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀁 𑀦𑀸𑀕𑀘𑁆𑀙𑀸𑀫𑀻𑀢𑀺. 𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀉𑀧𑀸𑀲𑀓, ‘𑀫𑀸𑀢𑀼𑀕𑀸𑀫𑀲𑁆𑀲 𑀪𑀸𑀯𑁄 𑀦𑀸𑀫 𑀤𑀼𑀚𑁆𑀚𑀸𑀦𑁄’𑀢𑀺 𑀧𑀼𑀩𑁆𑀩𑁂𑀧𑀺 𑀢𑁂 𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼, 𑀢𑁆𑀯𑀁 𑀧𑀦 𑀢𑀁 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀢𑀺. 𑀅𑀣𑁂𑀓𑁄 𑀢𑀺𑀭𑁄𑀭𑀝𑁆𑀞𑀯𑀸𑀲𑀺𑀓𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀪𑀭𑀺𑀬𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀩𑀸𑀭𑀸𑀡𑀲𑀺𑀦𑀕𑀭𑁂 𑀯𑀲𑀦𑁆𑀢𑁄 𑀤𑁆𑀯𑁂 𑀢𑀺𑀲𑁆𑀲𑁄 𑀯𑁂𑀮𑀸𑀬𑁄 𑀆𑀘𑀭𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀲𑀸 𑀧𑀦𑀲𑁆𑀲 𑀪𑀭𑀺𑀬𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀫𑀺𑀘𑁆𑀙𑀸𑀘𑀸𑀭𑀁 𑀘𑀺𑀡𑁆𑀡𑀤𑀺𑀯𑀲𑁂 𑀤𑀸𑀲𑀻 𑀯𑀺𑀬 𑀳𑁄𑀢𑀺, 𑀅𑀘𑀺𑀡𑁆𑀡𑀤𑀺𑀯𑀲𑁂 𑀲𑀸𑀫𑀺𑀦𑀻 𑀯𑀺𑀬 𑀳𑁄𑀢𑀺 𑀘𑀡𑁆𑀟𑀸 𑀨𑀭𑀼𑀲𑀸. 𑀲𑁄 𑀢𑀲𑁆𑀲𑀸 𑀪𑀸𑀯𑀁 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀸𑀬 𑀉𑀩𑁆𑀩𑀸𑀴𑁆𑀳𑁄 𑀆𑀓𑀼𑀮𑀘𑀺𑀢𑁆𑀢𑁄 𑀆𑀘𑀭𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀅𑀣 𑀦𑀁 𑀲𑀢𑁆𑀢𑀝𑁆𑀞 𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀢𑀁 ‘‘𑀓𑀺𑀁, 𑀫𑀸𑀡𑀯, 𑀦 𑀧𑀜𑁆𑀜𑀸𑀬𑀲𑀻’’𑀢𑀺 𑀆𑀘𑀭𑀺𑀬𑁄 𑀧𑀼𑀘𑁆𑀙𑀺. 𑀲𑁄 ‘‘𑀪𑀭𑀺𑀬𑀸 𑀫𑀁, 𑀆𑀘𑀭𑀺𑀬, 𑀏𑀓𑀤𑀺𑀯𑀲𑀁 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀺, 𑀤𑀸𑀲𑀻 𑀯𑀺𑀬 𑀦𑀺𑀳𑀢𑀫𑀸𑀦𑀸 𑀳𑁄𑀢𑀺. 𑀏𑀓𑀤𑀺𑀯𑀲𑀁 𑀲𑀸𑀫𑀺𑀦𑀻 𑀯𑀺𑀬 𑀣𑀤𑁆𑀥𑀸 𑀘𑀡𑁆𑀟𑀸 𑀨𑀭𑀼𑀲𑀸, 𑀅𑀳𑀁 𑀢𑀲𑁆𑀲𑀸 𑀪𑀸𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀢𑀸𑀬 𑀉𑀩𑁆𑀩𑀸𑀴𑁆𑀳𑁄 𑀆𑀓𑀼𑀮𑀘𑀺𑀢𑁆𑀢𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀦𑀸𑀕𑀢𑁄𑀫𑁆𑀳𑀻’’𑀢𑀺. 𑀆𑀘𑀭𑀺𑀬𑁄 ‘‘𑀏𑀯𑀫𑁂𑀢𑀁, 𑀫𑀸𑀡𑀯, 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀦𑀸𑀘𑀸𑀭𑀁 𑀘𑀺𑀡𑁆𑀡𑀤𑀺𑀯𑀲𑁂 𑀲𑀸𑀫𑀺𑀓𑀁 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀤𑀸𑀲𑀻 𑀯𑀺𑀬 𑀦𑀺𑀳𑀢𑀫𑀸𑀦𑀸 𑀳𑁄𑀦𑁆𑀢𑀺. 𑀅𑀦𑀸𑀘𑀺𑀡𑁆𑀡𑀤𑀺𑀯𑀲𑁂 𑀧𑀦 𑀫𑀸𑀦𑀢𑁆𑀣𑀤𑁆𑀥𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑀁 𑀦 𑀕𑀡𑁂𑀦𑁆𑀢𑀺. 𑀏𑀯𑀁 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀅𑀦𑀸𑀘𑀸𑀭𑀸 𑀤𑀼𑀲𑁆𑀲𑀻𑀮𑀸, 𑀢𑀸𑀲𑀁 𑀪𑀸𑀯𑁄 𑀦𑀸𑀫 𑀤𑀼𑀚𑁆𑀚𑀸𑀦𑁄, 𑀢𑀸𑀲𑀼 𑀇𑀘𑁆𑀙𑀦𑁆𑀢𑀻𑀲𑀼𑀧𑀺 𑀅𑀦𑀺𑀘𑁆𑀙𑀦𑁆𑀢𑀻𑀲𑀼𑀧𑀺 𑀫𑀚𑁆𑀛𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑀯𑀲𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁪. ‘‘𑀫𑀸 𑀲𑀼 𑀦𑀦𑁆𑀤𑀺 𑀇𑀘𑁆𑀙𑀢𑀺 𑀫𑀁, 𑀫𑀸 𑀲𑀼 𑀲𑁄𑀘𑀺 𑀦 𑀫𑀺𑀘𑁆𑀙𑀢𑀺;

𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢’’𑀦𑁆𑀢𑀺.

𑀢𑀢𑁆𑀣 𑀫𑀸 𑀲𑀼 𑀦𑀦𑁆𑀤𑀺 𑀇𑀘𑁆𑀙𑀢𑀺 𑀫𑀦𑁆𑀢𑀺 𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, ‘‘𑀅𑀬𑀁 𑀇𑀢𑁆𑀣𑀻 𑀫𑀁 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀺, 𑀫𑀬𑀺 𑀲𑀺𑀦𑁂𑀳𑀁 𑀓𑀭𑁄𑀢𑀻’’𑀢𑀺 𑀫𑀸 𑀢𑀼𑀲𑁆𑀲𑀺. 𑀫𑀸 𑀲𑀼 𑀲𑁄𑀘𑀺 𑀦 𑀫𑀺𑀘𑁆𑀙𑀢𑀻𑀢𑀺 ‘‘𑀅𑀬𑀁 𑀫𑀁 𑀦 𑀇𑀘𑁆𑀙𑀢𑀻’’𑀢𑀺𑀧𑀺 𑀫𑀸 𑀲𑁄𑀘𑀺, 𑀢𑀲𑁆𑀲𑀸 𑀇𑀘𑁆𑀙𑀫𑀸𑀦𑀸𑀬 𑀦𑀦𑁆𑀤𑀺𑀁, 𑀦 𑀇𑀘𑁆𑀙𑀫𑀸𑀦𑀸𑀬 𑀘 𑀲𑁄𑀓𑀁 𑀅𑀓𑀢𑁆𑀯𑀸 𑀫𑀚𑁆𑀛𑀢𑁆𑀢𑁄𑀯 𑀳𑁄𑀳𑀻𑀢𑀺 𑀤𑀻𑀧𑁂𑀢𑀺. 𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄𑀢𑀺 𑀇𑀢𑁆𑀣𑀻𑀦𑀁 𑀪𑀸𑀯𑁄 𑀦𑀸𑀫 𑀇𑀢𑁆𑀣𑀺𑀫𑀸𑀬𑀸𑀬 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀼𑀭𑀸𑀚𑀸𑀦𑁄. 𑀬𑀣𑀸 𑀓𑀺𑀁? 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢𑀦𑁆𑀢𑀺 𑀬𑀣𑀸 𑀫𑀘𑁆𑀙𑀲𑁆𑀲 𑀕𑀫𑀦𑀁 𑀉𑀤𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀼𑀚𑁆𑀚𑀸𑀦𑀁, 𑀢𑁂𑀦𑁂𑀯 𑀲𑁄 𑀓𑁂𑀯𑀝𑁆𑀝𑁂 𑀆𑀕𑀢𑁂 𑀉𑀤𑀓𑁂𑀦 𑀕𑀫𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀮𑀸𑀬𑀢𑀺, 𑀅𑀢𑁆𑀢𑀸𑀦𑀁 𑀕𑀡𑁆𑀳𑀺𑀢𑀼𑀁 𑀦 𑀤𑁂𑀢𑀺, 𑀏𑀯𑀫𑁂𑀯 𑀇𑀢𑁆𑀣𑀺𑀬𑁄 𑀫𑀳𑀦𑁆𑀢𑀫𑁆𑀧𑀺 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀫𑀬𑀁 𑀏𑀯𑀭𑀽𑀧𑀁 𑀦 𑀓𑀭𑁄𑀫𑀸’’𑀢𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀇𑀢𑁆𑀣𑀺𑀫𑀸𑀬𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀫𑀺𑀓𑁂 𑀯𑀜𑁆𑀘𑁂𑀦𑁆𑀢𑀺. 𑀏𑀯𑀁 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀧𑀸𑀧𑀥𑀫𑁆𑀫𑀸 𑀤𑀼𑀭𑀸𑀚𑀸𑀦𑀸, 𑀢𑀸𑀲𑀼 𑀫𑀚𑁆𑀛𑀢𑁆𑀢𑁄𑀬𑁂𑀯 𑀲𑀼𑀔𑀺𑀢𑁄 𑀳𑁄𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀢𑀲𑁆𑀲𑀸 𑀉𑀧𑀭𑀺 𑀫𑀚𑁆𑀛𑀢𑁆𑀢𑁄𑀯 𑀅𑀳𑁄𑀲𑀺. 𑀲𑀸𑀧𑀺𑀲𑁆𑀲 𑀪𑀭𑀺𑀬𑀸 ‘‘𑀆𑀘𑀭𑀺𑀬𑁂𑀦 𑀓𑀺𑀭 𑀫𑁂 𑀤𑀼𑀲𑁆𑀲𑀻𑀮𑀪𑀸𑀯𑁄 𑀜𑀸𑀢𑁄’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀦 𑀅𑀦𑀸𑀘𑀸𑀭𑀁 𑀘𑀭𑀺. 𑀲𑀸𑀧𑀺 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀇𑀢𑁆𑀣𑀻 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀺𑀭 𑀫𑀬𑁆𑀳𑀁 𑀤𑀼𑀭𑀸𑀘𑀸𑀭𑀪𑀸𑀯𑁄 𑀜𑀸𑀢𑁄’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀧𑀸𑀧𑀓𑀫𑁆𑀫𑀁 𑀦𑀸𑀫 𑀦 𑀅𑀓𑀸𑀲𑀺.

𑀲𑀢𑁆𑀣𑀸𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸𑀬𑁂𑀯 𑀇𑀤𑀸𑀦𑀺 𑀚𑀬𑀫𑁆𑀧𑀢𑀺𑀓𑀸, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀭𑀸𑀚𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁬𑁫] 𑁫. 𑀅𑀦𑀪𑀺𑀭𑀢𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀣𑀸𑀭𑀽𑀧𑀁𑀬𑁂𑀯 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀲𑀸 𑀤𑀼𑀲𑁆𑀲𑀻𑀮𑀪𑀸𑀯𑀁 𑀜𑀢𑁆𑀯𑀸 𑀪𑀡𑁆𑀟𑀺𑀢𑁄 𑀘𑀺𑀢𑁆𑀢𑀩𑁆𑀬𑀸𑀓𑀼𑀮𑀢𑀸𑀬 𑀲𑀢𑁆𑀢𑀝𑁆𑀞 𑀤𑀺𑀯𑀲𑁂 𑀉𑀧𑀝𑁆𑀞𑀸𑀦𑀁 𑀦𑀸𑀕𑀫𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀓𑀲𑁆𑀫𑀸 𑀲𑀢𑁆𑀢𑀝𑁆𑀞 𑀤𑀺𑀯𑀲𑀸𑀦𑀺 𑀦𑀸𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀭𑀺𑀬𑀸 𑀫𑁂, 𑀪𑀦𑁆𑀢𑁂, 𑀤𑀼𑀲𑁆𑀲𑀻𑀮𑀸, 𑀢𑀲𑁆𑀲𑀸 𑀉𑀧𑀭𑀺 𑀩𑁆𑀬𑀸𑀓𑀼𑀮𑀘𑀺𑀢𑁆𑀢𑀢𑀸𑀬 𑀦𑀸𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀉𑀧𑀸𑀲𑀓, 𑀇𑀢𑁆𑀣𑀻𑀲𑀼 ‘𑀅𑀦𑀸𑀘𑀸𑀭𑀸 𑀏𑀢𑀸’𑀢𑀺 𑀓𑁄𑀧𑀁 𑀅𑀓𑀢𑁆𑀯𑀸 𑀫𑀚𑁆𑀛𑀢𑁆𑀢𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀩𑁆𑀩𑁂𑀧𑀺 𑀢𑁂 𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼, 𑀢𑁆𑀯𑀁 𑀧𑀦 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀢𑀁 𑀓𑀸𑀭𑀡𑀁 𑀦 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀪𑀭𑀺𑀬𑀸𑀬 𑀤𑁄𑀲𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀼𑀮𑀘𑀺𑀢𑁆𑀢𑀢𑀸𑀬 𑀓𑀢𑀺𑀧𑀸𑀳𑀁 𑀅𑀦𑀸𑀕𑀦𑁆𑀢𑁆𑀯𑀸 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑁂𑀦 𑀧𑀼𑀘𑁆𑀙𑀺𑀢𑁄 𑀢𑀁 𑀓𑀸𑀭𑀡𑀁 𑀦𑀺𑀯𑁂𑀤𑁂𑀲𑀺. 𑀅𑀣𑀲𑁆𑀲 𑀆𑀘𑀭𑀺𑀬𑁄 ‘‘𑀢𑀸𑀢, 𑀇𑀢𑁆𑀣𑀺𑀬𑁄 𑀦𑀸𑀫 𑀲𑀩𑁆𑀩𑀲𑀸𑀥𑀸𑀭𑀡𑀸, 𑀢𑀸𑀲𑀼 ‘𑀤𑀼𑀲𑁆𑀲𑀻𑀮𑀸 𑀏𑀢𑀸’𑀢𑀺 𑀧𑀡𑁆𑀟𑀺𑀢𑀸 𑀓𑁄𑀧𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀑𑀯𑀸𑀤𑀯𑀲𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁫. ‘‘𑀬𑀣𑀸 𑀦𑀤𑀻 𑀘 𑀧𑀦𑁆𑀢𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀢𑁆𑀣 𑀬𑀣𑀸 𑀦𑀤𑀻𑀢𑀺 𑀬𑀣𑀸 𑀅𑀦𑁂𑀓𑀢𑀺𑀢𑁆𑀣𑀸 𑀦𑀤𑀻 𑀦𑁆𑀳𑀸𑀦𑀢𑁆𑀣𑀸𑀬 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀘𑀡𑁆𑀟𑀸𑀮𑀸𑀤𑀻𑀦𑀫𑁆𑀧𑀺 𑀔𑀢𑁆𑀢𑀺𑀬𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀸, 𑀦 𑀢𑀢𑁆𑀣 𑀓𑁄𑀘𑀺 𑀦𑁆𑀳𑀸𑀬𑀺𑀢𑀼𑀁 𑀦 𑀮𑀪𑀢𑀺 𑀦𑀸𑀫. ‘‘𑀧𑀦𑁆𑀣𑁄’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸 𑀫𑀳𑀸𑀫𑀕𑁆𑀕𑁄𑀧𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁄, 𑀦 𑀓𑁄𑀘𑀺 𑀢𑁂𑀦 𑀕𑀦𑁆𑀢𑀼𑀁 𑀦 𑀮𑀪𑀢𑀺. 𑀧𑀸𑀦𑀸𑀕𑀸𑀭𑀫𑁆𑀧𑀺 𑀲𑀼𑀭𑀸𑀕𑁂𑀳𑀁 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀁, 𑀬𑁄 𑀬𑁄 𑀧𑀸𑀢𑀼𑀓𑀸𑀫𑁄, 𑀲𑀩𑁆𑀩𑁄 𑀢𑀢𑁆𑀣 𑀧𑀯𑀺𑀲𑀢𑁂𑀯. 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑀸𑀲𑀢𑁆𑀣𑀸𑀬 𑀓𑀢𑀸 𑀲𑀪𑀸𑀧𑀺 𑀲𑀸𑀥𑀸𑀭𑀡𑀸, 𑀦 𑀢𑀢𑁆𑀣 𑀓𑁄𑀘𑀺 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀢𑀺. 𑀫𑀳𑀸𑀫𑀕𑁆𑀕𑁂 𑀧𑀸𑀦𑀻𑀬𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀓𑀢𑀸 𑀧𑀧𑀸𑀧𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀸, 𑀦 𑀢𑀢𑁆𑀣 𑀓𑁄𑀘𑀺 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀁 𑀦 𑀮𑀪𑀢𑀺. 𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫𑀸𑀢𑀺 𑀏𑀯𑀫𑁂𑀯 𑀢𑀸𑀢 𑀫𑀸𑀡𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀢𑁆𑀣𑀺𑀬𑁄𑀧𑀺 𑀲𑀩𑁆𑀩𑀲𑀸𑀥𑀸𑀭𑀡𑀸𑀯, 𑀢𑁂𑀦𑁂𑀯 𑀘 𑀲𑀸𑀥𑀸𑀭𑀡𑀝𑁆𑀞𑁂𑀦 𑀦𑀤𑀻𑀧𑀦𑁆𑀣𑀧𑀸𑀦𑀸𑀕𑀸𑀭𑀲𑀪𑀸𑀧𑀧𑀸𑀲𑀤𑀺𑀲𑀸. 𑀢𑀲𑁆𑀫𑀸 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀏𑀢𑀸𑀲𑀁 𑀇𑀢𑁆𑀣𑀻𑀦𑀁 ‘‘𑀮𑀸𑀫𑀺𑀓𑀸 𑀏𑀢𑀸 𑀅𑀦𑀸𑀘𑀸𑀭𑀸 𑀤𑀼𑀲𑁆𑀲𑀻𑀮𑀸 𑀲𑀩𑁆𑀩𑀲𑀸𑀥𑀸𑀭𑀡𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀡𑁆𑀟𑀺𑀢𑀸 𑀙𑁂𑀓𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀦 𑀓𑀼𑀚𑁆𑀛𑀦𑁆𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺, 𑀲𑁄 𑀢𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀫𑀚𑁆𑀛𑀢𑁆𑀢𑁄 𑀅𑀳𑁄𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 ‘‘𑀆𑀘𑀭𑀺𑀬𑁂𑀦 𑀓𑀺𑀭𑀫𑁆𑀳𑀺 𑀜𑀸𑀢𑀸’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀧𑀸𑀧𑀓𑀫𑁆𑀫𑀁 𑀦 𑀅𑀓𑀸𑀲𑀺. 𑀢𑀲𑁆𑀲𑀧𑀺 𑀉𑀧𑀸𑀲𑀓𑀲𑁆𑀲 𑀪𑀭𑀺𑀬𑀸 ‘‘𑀲𑀢𑁆𑀣𑀸𑀭𑀸 𑀓𑀺𑀭𑀫𑁆𑀳𑀺 𑀜𑀸𑀢𑀸’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀧𑀸𑀧𑀓𑀫𑁆𑀫𑀁 𑀦 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸𑀯 𑀏𑀢𑀭𑀳𑀺 𑀚𑀬𑀫𑁆𑀧𑀢𑀺𑀓𑀸, 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀦𑀪𑀺𑀭𑀢𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁬𑁬] 𑁬. 𑀫𑀼𑀤𑀼𑀮𑀓𑁆𑀔𑀡𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀸 𑀇𑀘𑁆𑀙𑀸 𑀧𑀼𑀭𑁂 𑀆𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀁𑀓𑀺𑀮𑁂𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀭𑀢𑀦𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀝𑀺𑀧𑀦𑁆𑀦𑀓𑁄 𑀬𑁄𑀕𑀸𑀯𑀘𑀭𑁄 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀲𑀼𑀪𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑁄 𑀘𑀮𑀺, 𑀯𑀸𑀲𑀺𑀬𑀸 𑀆𑀓𑁄𑀝𑀺𑀢𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀮𑁂𑀲𑀯𑀲𑀺𑀓𑁄 𑀳𑀼𑀢𑁆𑀯𑀸 𑀦𑁂𑀯 𑀓𑀸𑀬𑀲𑁆𑀲𑀸𑀤𑀁 𑀦 𑀘𑀺𑀢𑁆𑀢𑀲𑁆𑀲𑀸𑀤𑀁 𑀮𑀪𑀢𑀺, 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑁄 𑀲𑀸𑀲𑀦𑁂 𑀅𑀦𑀪𑀺𑀭𑀢𑁄 𑀧𑀭𑀽𑀴𑁆𑀳𑀓𑁂𑀲𑀮𑁄𑀫𑀦𑀔𑁄 𑀓𑀺𑀮𑀺𑀝𑁆𑀞𑀘𑀻𑀯𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 ‘‘𑀓𑀺𑀁 𑀦𑀼 𑀔𑁄 𑀢𑁂, 𑀆𑀯𑀼𑀲𑁄, 𑀦 𑀬𑀣𑀸 𑀧𑁄𑀭𑀸𑀡𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀅𑀦𑀪𑀺𑀭𑀢𑁄𑀲𑁆𑀫𑀺, 𑀆𑀯𑀼𑀲𑁄𑀢𑀺.

𑀅𑀣 𑀦𑀁 𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀙𑀫𑀸𑀦𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀦𑀪𑀺𑀭𑀢𑁄’’𑀢𑀺? ‘‘𑀲𑀘𑁆𑀘𑀁 𑀪𑀺𑀓𑁆𑀔𑀽’’𑀢𑀺. ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. ‘‘𑀓𑁄 𑀢𑀁 𑀉𑀓𑁆𑀓𑀡𑁆𑀞𑀸𑀧𑁂𑀲𑀻’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀲𑀺𑀁, 𑀅𑀣 𑀫𑁂 𑀓𑀺𑀮𑁂𑀲𑁄 𑀘𑀮𑀺, 𑀢𑁂𑀦𑀫𑁆𑀳𑀺 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀦𑀘𑁆𑀙𑀭𑀺𑀬𑀫𑁂𑀢𑀁 𑀪𑀺𑀓𑁆𑀔𑀼, 𑀬𑀁 𑀢𑁆𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀲𑀼𑀪𑀯𑀲𑁂𑀦 𑀑𑀮𑁄𑀓𑁂𑀦𑁆𑀢𑁄 𑀓𑀺𑀮𑁂𑀲𑁂𑀳𑀺 𑀓𑀫𑁆𑀧𑀺𑀢𑁄, 𑀧𑀼𑀩𑁆𑀩𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀛𑀸𑀦𑀩𑀮𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀕𑀕𑀦𑀢𑀮𑀘𑀭𑀸 𑀩𑁄𑀥𑀺𑀲𑀢𑁆𑀢𑀸𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀑𑀮𑁄𑀓𑀬𑀫𑀸𑀦𑀸 𑀛𑀸𑀦𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀓𑀺𑀮𑁂𑀲𑁂𑀳𑀺 𑀓𑀫𑁆𑀧𑀺𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁𑀲𑀼. 𑀦 𑀳𑀺 𑀲𑀺𑀦𑁂𑀭𑀼𑀉𑀧𑁆𑀧𑀸𑀝𑀦𑀓𑀯𑀸𑀢𑁄 𑀳𑀢𑁆𑀣𑀺𑀫𑀢𑁆𑀢𑀁 𑀫𑀼𑀡𑁆𑀟𑀧𑀩𑁆𑀩𑀢𑀁, 𑀫𑀳𑀸𑀚𑀫𑁆𑀩𑀼𑀉𑀫𑁆𑀫𑀽𑀮𑀓𑀯𑀸𑀢𑁄 𑀙𑀺𑀦𑁆𑀦𑀢𑀝𑁂 𑀯𑀺𑀭𑀽𑀴𑁆𑀳𑀕𑀘𑁆𑀙𑀓𑀁, 𑀫𑀳𑀸𑀲𑀫𑀼𑀤𑁆𑀤𑀁 𑀯𑀸 𑀧𑀦 𑀲𑁄𑀲𑀦𑀓𑀯𑀸𑀢𑁄 𑀔𑀼𑀤𑁆𑀤𑀓𑀢𑀴𑀸𑀓𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀡𑁂𑀢𑀺, 𑀏𑀯𑀁 𑀉𑀢𑁆𑀢𑀫𑀩𑀼𑀤𑁆𑀥𑀻𑀦𑀁 𑀦𑀸𑀫 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀜𑁆𑀜𑀸𑀡𑀪𑀸𑀯𑀓𑀭𑀸 𑀓𑀺𑀮𑁂𑀲𑀸 𑀢𑀬𑀺 𑀓𑀺𑀁 𑀮𑀚𑁆𑀚𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀤𑁆𑀥𑀸𑀧𑀺 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀫𑀬𑀲𑀲𑀫𑀗𑁆𑀕𑀺𑀦𑁄𑀧𑀺 𑀆𑀬𑀲𑀓𑁆𑀬𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀲 𑀫𑀳𑀸𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀘 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀭𑀢𑁆𑀢𑀯𑀸𑀓𑀫𑀬𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀅𑀚𑀺𑀦𑀘𑀫𑁆𑀫𑀁 𑀏𑀓𑀲𑁆𑀫𑀺𑀁 𑀅𑀁𑀲𑁂 𑀓𑀢𑁆𑀯𑀸 𑀚𑀝𑀸𑀫𑀡𑁆𑀟𑀮𑀁 𑀩𑀦𑁆𑀥𑀺𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀫𑀸𑀤𑀸𑀬 𑀩𑀸𑀭𑀸𑀡𑀲𑀺𑀬𑀁 𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑁄 𑀭𑀜𑁆𑀜𑁄 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀓𑀢𑀸𑀦𑀼𑀫𑁄𑀤𑀦𑀁 𑀉𑀬𑁆𑀬𑀸𑀦𑁂 𑀯𑀲𑀦𑀢𑁆𑀣𑀸𑀬 𑀬𑀸𑀘𑀺. 𑀲𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀸𑀚𑀕𑁂𑀳𑁂 𑀪𑀼𑀜𑁆𑀚𑀺𑀢𑁆𑀯𑀸 𑀭𑀸𑀚𑀓𑀼𑀮𑀁 𑀑𑀯𑀤𑀫𑀸𑀦𑁄 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀓𑀼𑀧𑀺𑀢𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑁄 𑀫𑀼𑀤𑀼𑀮𑀓𑁆𑀔𑀡𑀁 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀁 ‘‘𑀅𑀧𑁆𑀧𑀫𑀢𑁆𑀢𑀸 𑀅𑀬𑁆𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀭𑀼𑀘𑁆𑀘𑀦𑀯𑁂𑀮𑀸𑀬 𑀭𑀸𑀚𑀕𑁂𑀳𑀁 𑀕𑀘𑁆𑀙𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀼𑀤𑀼𑀮𑀓𑁆𑀔𑀡𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀳𑀸𑀭𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑁋 ‘‘𑀅𑀚𑁆𑀚 𑀅𑀬𑁆𑀬𑁄 𑀘𑀺𑀭𑀸𑀬𑀢𑀻’’𑀢𑀺 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀫𑀳𑀸𑀢𑀮𑁂 𑀘𑀽𑀴𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀆𑀓𑀸𑀲𑁂𑀦𑁂𑀯 𑀭𑀸𑀚𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀫𑀼𑀤𑀼𑀮𑀓𑁆𑀔𑀡𑀸 𑀯𑀸𑀓𑀘𑀻𑀭𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀅𑀬𑁆𑀬𑁄, 𑀆𑀕𑀢𑁄’’𑀢𑀺 𑀯𑁂𑀕𑁂𑀦 𑀉𑀝𑁆𑀞𑀳𑀺, 𑀢𑀲𑁆𑀲𑀸 𑀯𑁂𑀕𑁂𑀦 𑀉𑀝𑁆𑀞𑀳𑀦𑁆𑀢𑀺𑀬𑀸 𑀫𑀝𑁆𑀞𑀲𑀸𑀝𑀓𑁄 𑀪𑀲𑁆𑀲𑀺. 𑀢𑀸𑀧𑀲𑁄𑀧𑀺 𑀲𑀻𑀳𑀧𑀜𑁆𑀚𑀭𑁂𑀦 𑀧𑀯𑀺𑀲𑀦𑁆𑀢𑁄 𑀤𑁂𑀯𑀺𑀬𑀸 𑀯𑀺𑀲𑀪𑀸𑀕𑀭𑀽𑀧𑀸𑀭𑀫𑁆𑀫𑀡𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀪𑀯𑀲𑁂𑀦 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑁄 𑀘𑀮𑀺, 𑀯𑀸𑀲𑀺𑀬𑀸 𑀧𑀳𑀝𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀅𑀳𑁄𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀛𑀸𑀦𑀁 𑀅𑀦𑁆𑀢𑀭𑀥𑀸𑀬𑀺, 𑀙𑀺𑀦𑁆𑀦𑀧𑀓𑁆𑀔𑁄 𑀓𑀸𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀞𑀺𑀢𑀓𑁄𑀯 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀓𑀺𑀮𑁂𑀲𑀓𑀫𑁆𑀧𑀺𑀢𑁄 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀓𑀢𑁆𑀣𑀭𑀡𑀲𑀬𑀦𑀲𑁆𑀲 𑀳𑁂𑀝𑁆𑀞𑀸 𑀆𑀳𑀸𑀭𑀁 𑀞𑀧𑁂𑀢𑁆𑀯𑀸 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑁂𑀦 𑀩𑀤𑁆𑀥𑁄 𑀓𑀺𑀮𑁂𑀲𑀕𑁆𑀕𑀺𑀦𑀸 𑀟𑀬𑁆𑀳𑀫𑀸𑀦𑁄 𑀦𑀺𑀭𑀸𑀳𑀸𑀭𑀢𑀸𑀬 𑀲𑀼𑀲𑁆𑀲𑀫𑀸𑀦𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀨𑀮𑀓𑀢𑁆𑀣𑀭𑀡𑁂 𑀦𑀺𑀧𑀚𑁆𑀚𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀺𑀯𑁂𑀲𑀦𑀁 𑀅𑀕𑀦𑁆𑀢𑁆𑀯𑀸𑀯 ‘‘𑀅𑀬𑁆𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 ‘‘𑀏𑀓𑀁 𑀅𑀨𑀸𑀲𑀼𑀓𑀁 𑀚𑀸𑀢𑀁 𑀫𑀜𑁆𑀜𑁂’’𑀢𑀺 𑀧𑀡𑁆𑀡𑀲𑀸𑀮𑀁 𑀲𑁄𑀥𑀸𑀧𑁂𑀢𑁆𑀯𑀸 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀓𑀺𑀁, 𑀅𑀬𑁆𑀬, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚 𑀅𑀜𑁆𑀜𑀁 𑀫𑁂 𑀅𑀨𑀸𑀲𑀼𑀓𑀁 𑀦𑀢𑁆𑀣𑀺, 𑀓𑀺𑀮𑁂𑀲𑀯𑀲𑁂𑀦 𑀧𑀦𑀫𑁆𑀳𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀚𑀸𑀢𑁄’’𑀢𑀺. ‘‘𑀓𑀳𑀁 𑀧𑀝𑀺𑀩𑀤𑁆𑀥𑀁 𑀢𑁂, 𑀅𑀬𑁆𑀬, 𑀘𑀺𑀢𑁆𑀢’’𑀦𑁆𑀢𑀺? ‘‘𑀫𑀼𑀤𑀼𑀮𑀓𑁆𑀔𑀡𑀸𑀬, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼 𑀅𑀬𑁆𑀬, 𑀅𑀳𑀁 𑀫𑀼𑀤𑀼𑀮𑀓𑁆𑀔𑀡𑀁 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀢𑀸𑀧𑀲𑀁 𑀆𑀤𑀸𑀬 𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁂𑀯𑀺𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸 𑀢𑀸𑀧𑀲𑀲𑁆𑀲 𑀅𑀤𑀸𑀲𑀺. 𑀤𑀤𑀫𑀸𑀦𑁄𑀬𑁂𑀯 𑀘 𑀫𑀼𑀤𑀼𑀮𑀓𑁆𑀔𑀡𑀸𑀬 𑀲𑀜𑁆𑀜𑀫𑀤𑀸𑀲𑀺 ‘‘𑀢𑀬𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀅𑀬𑁆𑀬𑀁 𑀭𑀓𑁆𑀔𑀺𑀢𑀼𑀁 𑀯𑀸𑀬𑀫𑀺𑀢𑀩𑁆𑀩’’𑀦𑁆𑀢𑀺. ‘‘𑀲𑀸𑀥𑀼, 𑀤𑁂𑀯, 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀢𑀸𑀧𑀲𑁄 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀭𑀺.

𑀅𑀣 𑀦𑀁 𑀫𑀳𑀸𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 ‘‘𑀅𑀬𑁆𑀬, 𑀅𑀫𑁆𑀳𑀸𑀓𑀁 𑀏𑀓𑀁 𑀕𑁂𑀳𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀕𑀘𑁆𑀙, 𑀭𑀸𑀚𑀸𑀦𑀁 𑀕𑁂𑀳𑀁 𑀬𑀸𑀘𑀸𑀳𑀻’’𑀢𑀺 𑀆𑀳. 𑀢𑀸𑀧𑀲𑁄 𑀕𑀦𑁆𑀢𑁆𑀯𑀸 𑀕𑁂𑀳𑀁 𑀬𑀸𑀘𑀺. 𑀭𑀸𑀚𑀸 𑀫𑀦𑀼𑀲𑁆𑀲𑀸𑀦𑀁 𑀯𑀘𑁆𑀘𑀓𑀼𑀝𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀏𑀓𑀁 𑀙𑀟𑁆𑀟𑀺𑀢𑀕𑁂𑀳𑀁 𑀤𑀸𑀧𑁂𑀲𑀺. 𑀲𑁄 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺, 𑀲𑀸 𑀧𑀯𑀺𑀲𑀺𑀢𑀼𑀁 𑀦 𑀇𑀘𑁆𑀙𑀢𑀺. ‘‘𑀓𑀺𑀁𑀓𑀸𑀭𑀡𑀸 𑀦 𑀧𑀯𑀺𑀲𑀲𑀻’’𑀢𑀺? ‘‘𑀅𑀲𑀼𑀘𑀺𑀪𑀸𑀯𑁂𑀦𑀸’’𑀢𑀺. 𑀇𑀤𑀸𑀦𑀺 ‘‘𑀓𑀺𑀁 𑀓𑀭𑁄𑀫𑀻’’𑀢𑀺. ‘‘𑀧𑀝𑀺𑀚𑀕𑁆𑀕𑀸𑀳𑀺 𑀦’’𑀦𑁆𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 ‘‘𑀕𑀘𑁆𑀙, 𑀓𑀼𑀤𑁆𑀤𑀸𑀮𑀁 𑀆𑀳𑀭, 𑀧𑀘𑁆𑀙𑀺𑀁 𑀆𑀳𑀭𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀅𑀲𑀼𑀘𑀺𑀜𑁆𑀘 𑀲𑀗𑁆𑀓𑀸𑀭𑀜𑁆𑀘 𑀙𑀟𑁆𑀟𑀸𑀧𑁂𑀢𑁆𑀯𑀸 𑀕𑀸𑀫𑀬𑀁 𑀆𑀳𑀭𑀸𑀧𑁂𑀢𑁆𑀯𑀸 𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀧𑀼𑀦𑀧𑀺 ‘‘𑀕𑀘𑁆𑀙, 𑀫𑀜𑁆𑀘𑀁 𑀆𑀳𑀭, 𑀧𑀻𑀞𑀁 𑀆𑀳𑀭, 𑀅𑀢𑁆𑀣𑀭𑀡𑀁 𑀆𑀳𑀭, 𑀘𑀸𑀝𑀺𑀁 𑀆𑀳𑀭, 𑀖𑀝𑀁 𑀆𑀳𑀭𑀸’’𑀢𑀺 𑀏𑀓𑀫𑁂𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀼𑀦 𑀉𑀤𑀓𑀸𑀳𑀭𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀆𑀡𑀸𑀧𑁂𑀲𑀺. 𑀲𑁄 𑀖𑀝𑀁 𑀆𑀤𑀸𑀬 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀘𑀸𑀝𑀺𑀁 𑀧𑀽𑀭𑁂𑀢𑁆𑀯𑀸 𑀦𑁆𑀳𑀸𑀦𑁄𑀤𑀓𑀁 𑀲𑀚𑁆𑀚𑁂𑀢𑁆𑀯𑀸 𑀲𑀬𑀦𑀁 𑀅𑀢𑁆𑀣𑀭𑀺. 𑀅𑀣 𑀦𑀁 𑀲𑀬𑀦𑁂 𑀏𑀓𑀢𑁄 𑀦𑀺𑀲𑀺𑀦𑁆𑀦𑀁 𑀤𑀸𑀞𑀺𑀓𑀸𑀲𑀼 𑀕𑀳𑁂𑀢𑁆𑀯𑀸 ‘‘𑀢𑀯 𑀲𑀫𑀡𑀪𑀸𑀯𑀁 𑀯𑀸 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀲𑀻’’𑀢𑀺 𑀑𑀡𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀺. 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀢𑀺𑀁 𑀧𑀝𑀺𑀮𑀪𑀺, 𑀏𑀢𑁆𑀢𑀓𑀁 𑀧𑀦 𑀓𑀸𑀮𑀁 𑀅𑀜𑁆𑀜𑀸𑀡𑀻 𑀅𑀳𑁄𑀲𑀺. 𑀏𑀯𑀁 𑀅𑀜𑁆𑀜𑀸𑀡𑀓𑀭𑀡𑀸 𑀓𑀺𑀮𑁂𑀲𑀸 𑀦𑀸𑀫. ‘‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨𑁨𑁧) 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁.

𑀲𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀢𑀡𑁆𑀳𑀸 𑀯𑀟𑁆𑀠𑀫𑀸𑀦𑀸 𑀫𑀫 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀫𑀬𑀸 𑀇𑀫𑀁 𑀭𑀜𑁆𑀜𑁄 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀁 𑀆𑀤𑀸𑀬 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑀯 𑀤𑁂𑀯𑀺𑀬𑀸 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀫𑁂 𑀇𑀫𑀁 𑀦𑀺𑀲𑁆𑀲𑀸𑀬 𑀢𑀡𑁆𑀳𑀸 𑀯𑀟𑁆𑀠𑀺𑀢𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁬. ‘‘𑀏𑀓𑀸 𑀇𑀘𑁆𑀙𑀸 𑀧𑀼𑀭𑁂 𑀆𑀲𑀺, 𑀅𑀮𑀤𑁆𑀥𑀸 𑀫𑀼𑀤𑀼𑀮𑀓𑁆𑀔𑀡𑀁;

𑀬𑀢𑁄 𑀮𑀤𑁆𑀥𑀸 𑀅𑀴𑀸𑀭𑀓𑁆𑀔𑀻, 𑀇𑀘𑁆𑀙𑀸 𑀇𑀘𑁆𑀙𑀁 𑀯𑀺𑀚𑀸𑀬𑀣𑀸’’𑀢𑀺.

𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀇𑀫𑀁 𑀢𑀯 𑀤𑁂𑀯𑀺𑀁 𑀫𑀼𑀤𑀼𑀮𑀓𑁆𑀔𑀡𑀁 𑀅𑀮𑀪𑀺𑀢𑁆𑀯𑀸 𑀧𑀼𑀭𑁂 ‘‘𑀅𑀳𑁄 𑀯𑀢𑀸𑀳𑀁 𑀏𑀢𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀏𑀓𑀸 𑀇𑀘𑁆𑀙𑀸 𑀆𑀲𑀺, 𑀏𑀓𑀸𑀯 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀺. 𑀬𑀢𑁄 𑀧𑀦 𑀫𑁂 𑀅𑀬𑀁 𑀅𑀴𑀸𑀭𑀓𑁆𑀔𑀻 𑀯𑀺𑀲𑀸𑀮𑀦𑁂𑀢𑁆𑀢𑀸 𑀲𑁄𑀪𑀦𑀮𑁄𑀘𑀦𑀸 𑀮𑀤𑁆𑀥𑀸, 𑀅𑀣 𑀫𑁂 𑀲𑀸 𑀧𑀼𑀭𑀺𑀫𑀺𑀓𑀸 𑀇𑀘𑁆𑀙𑀸 𑀕𑁂𑀳𑀢𑀡𑁆𑀳𑀁 𑀉𑀧𑀓𑀭𑀡𑀢𑀡𑁆𑀳𑀁 𑀉𑀧𑀪𑁄𑀕𑀢𑀡𑁆𑀳𑀦𑁆𑀢𑀺 𑀉𑀧𑀭𑀽𑀧𑀭𑀺 𑀅𑀜𑁆𑀜𑀁 𑀦𑀸𑀦𑀧𑁆𑀧𑀓𑀸𑀭𑀁 𑀇𑀘𑁆𑀙𑀁 𑀯𑀺𑀚𑀸𑀬𑀣 𑀚𑀦𑁂𑀲𑀺 𑀉𑀧𑁆𑀧𑀸𑀤𑁂𑀲𑀺. 𑀲𑀸 𑀔𑁄 𑀧𑀦 𑀫𑁂 𑀏𑀯𑀁 𑀯𑀟𑁆𑀠𑀫𑀸𑀦𑀸 𑀇𑀘𑁆𑀙𑀸 𑀅𑀧𑀸𑀬𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀅𑀮𑀁 𑀫𑁂 𑀇𑀫𑀸𑀬, 𑀢𑁆𑀯𑀜𑁆𑀜𑁂𑀯 𑀢𑀯 𑀪𑀭𑀺𑀬𑀁 𑀕𑀡𑁆𑀳, 𑀅𑀳𑀁 𑀧𑀦 𑀳𑀺𑀫𑀯𑀦𑁆𑀢𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀢𑀸𑀯𑀤𑁂𑀯 𑀦𑀝𑁆𑀞𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑀧𑀣𑀁 𑀦𑀸𑀫 𑀦𑀸𑀕𑀫𑀸𑀲𑀺, 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀧𑀦 𑀪𑀸𑀯𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀫𑀼𑀤𑀼𑀮𑀓𑁆𑀔𑀡𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀇𑀲𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀼𑀤𑀼𑀮𑀓𑁆𑀔𑀡𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁬𑁭] 𑁭. 𑀉𑀘𑁆𑀙𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸

𑀉𑀘𑁆𑀙𑀗𑁆𑀕𑁂 𑀤𑁂𑀯 𑀫𑁂 𑀧𑀼𑀢𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀚𑀸𑀦𑀧𑀤𑀺𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀓𑁄𑀲𑀮𑀭𑀝𑁆𑀞𑁂 𑀢𑀬𑁄 𑀚𑀦𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀝𑀯𑀺𑀫𑀼𑀔𑁂 𑀓𑀲𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑁆𑀢𑁄𑀅𑀝𑀯𑀺𑀬𑀁 𑀘𑁄𑀭𑀸 𑀫𑀦𑀼𑀲𑁆𑀲𑁂 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑁂 𑀘𑁄𑀭𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑀸 𑀢𑀁 𑀞𑀸𑀦𑀁 𑀆𑀕𑀫𑁆𑀫 ‘‘𑀢𑀼𑀫𑁆𑀳𑁂 𑀅𑀝𑀯𑀺𑀬𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀇𑀤𑀸𑀦𑀺 𑀓𑀲𑁆𑀲𑀓𑀸 𑀯𑀺𑀬 𑀳𑁄𑀣𑀸’’𑀢𑀺 ‘‘𑀢𑁂 𑀘𑁄𑀭𑀸 𑀇𑀫𑁂’’𑀢𑀺 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀅𑀤𑀁𑀲𑀼. 𑀅𑀣𑁂𑀓𑀸 𑀇𑀢𑁆𑀣𑀻 𑀆𑀕𑀦𑁆𑀢𑁆𑀯𑀸 ‘‘𑀅𑀘𑁆𑀙𑀸𑀤𑀦𑀁 𑀫𑁂 𑀤𑁂𑀣, 𑀅𑀘𑁆𑀙𑀸𑀤𑀦𑀁 𑀫𑁂 𑀤𑁂𑀣𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀻 𑀧𑀼𑀦𑀧𑁆𑀧𑀼𑀦𑀁 𑀭𑀸𑀚𑀦𑀺𑀯𑁂𑀲𑀦𑀁 𑀧𑀭𑀺𑀬𑀸𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀣, 𑀤𑁂𑀣 𑀇𑀫𑀺𑀲𑁆𑀲𑀸 𑀅𑀘𑁆𑀙𑀸𑀤𑀦’’𑀦𑁆𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀅𑀤𑀁𑀲𑀼. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀳𑀁 𑀏𑀢𑀁 𑀅𑀘𑁆𑀙𑀸𑀤𑀦𑀁 𑀬𑀸𑀘𑀸𑀫𑀺, 𑀲𑀸𑀫𑀺𑀓𑀘𑁆𑀙𑀸𑀤𑀦𑀁 𑀬𑀸𑀘𑀸𑀫𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼 ‘‘𑀦 𑀓𑀺𑀭𑁂𑀲𑀸 𑀇𑀤𑀁 𑀅𑀘𑁆𑀙𑀸𑀤𑀦𑀁 𑀓𑀣𑁂𑀢𑀺, 𑀲𑀸𑀫𑀺𑀓𑀘𑁆𑀙𑀸𑀤𑀦𑀁 𑀓𑀣𑁂𑀢𑀻’’𑀢𑀺. 𑀅𑀣 𑀦𑀁 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀲𑀸𑀫𑀺𑀓𑀘𑁆𑀙𑀸𑀤𑀦𑀁 𑀬𑀸𑀘𑀲𑀻’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀤𑁂𑀯, 𑀇𑀢𑁆𑀣𑀺𑀬𑀸 𑀳𑀺 𑀲𑀸𑀫𑀺𑀓𑁄 𑀅𑀘𑁆𑀙𑀸𑀤𑀦𑀁 𑀦𑀸𑀫, 𑀲𑀸𑀫𑀺𑀓𑁂 𑀳𑀺 𑀅𑀲𑀢𑀺 𑀲𑀳𑀲𑁆𑀲𑀫𑀽𑀮𑀫𑁆𑀧𑀺 𑀲𑀸𑀝𑀓𑀁 𑀦𑀺𑀯𑀢𑁆𑀣𑀸 𑀇𑀢𑁆𑀣𑀻 𑀦𑀕𑁆𑀕𑀸𑀬𑁂𑀯 𑀦𑀸𑀫. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑁋

‘‘𑀦𑀕𑁆𑀕𑀸 𑀦𑀤𑀻 𑀅𑀦𑀽𑀤𑀓𑀸, 𑀦𑀕𑁆𑀕𑀁 𑀭𑀝𑁆𑀞𑀁 𑀅𑀭𑀸𑀚𑀓𑀁;

𑀇𑀢𑁆𑀣𑀻𑀧𑀺 𑀯𑀺𑀥𑀯𑀸 𑀦𑀕𑁆𑀕𑀸, 𑀬𑀲𑁆𑀲𑀸𑀧𑀺 𑀤𑀲 𑀪𑀸𑀢𑀭𑁄’’𑀢𑀺. (𑀚𑀸. 𑁨.𑁨𑁨.𑁧𑁮𑁪𑁦) 𑁋

𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑀩𑁆𑀩𑀁.

𑀭𑀸𑀚𑀸 𑀢𑀲𑁆𑀲𑀸 𑀧𑀲𑀦𑁆𑀦𑁄 ‘‘𑀇𑀫𑁂 𑀢𑁂 𑀢𑀬𑁄 𑀚𑀦𑀸 𑀓𑁂 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀏𑀓𑁄 𑀫𑁂, 𑀤𑁂𑀯, 𑀲𑀸𑀫𑀺𑀓𑁄, 𑀏𑀓𑁄 𑀪𑀸𑀢𑀸, 𑀏𑀓𑁄 𑀧𑀼𑀢𑁆𑀢𑁄’’𑀢𑀺. 𑀭𑀸𑀚𑀸 ‘‘𑀅𑀳𑀁 𑀢𑁂 𑀢𑀼𑀝𑁆𑀞𑁄, 𑀇𑀫𑁂𑀲𑀼 𑀢𑀻𑀲𑀼 𑀏𑀓𑀁 𑀤𑁂𑀫𑀺, 𑀓𑀢𑀭𑀁 𑀇𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀸 𑀆𑀳 ‘‘𑀅𑀳𑀁, 𑀤𑁂𑀯, 𑀚𑀻𑀯𑀫𑀸𑀦𑀸 𑀏𑀓𑀁 𑀲𑀸𑀫𑀺𑀓𑀁 𑀮𑀪𑀺𑀲𑁆𑀲𑀸𑀫𑀺, 𑀧𑀼𑀢𑁆𑀢𑀫𑁆𑀧𑀺 𑀮𑀪𑀺𑀲𑁆𑀲𑀸𑀫𑀺𑀬𑁂𑀯, 𑀫𑀸𑀢𑀸𑀧𑀺𑀢𑀽𑀦𑀁 𑀧𑀦 𑀫𑁂 𑀫𑀢𑀢𑁆𑀢𑀸 𑀪𑀸𑀢𑀸𑀯 𑀤𑀼𑀮𑁆𑀮𑀪𑁄, 𑀪𑀸𑀢𑀭𑀁 𑀫𑁂 𑀤𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀢𑀬𑁄𑀧𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀏𑀯𑀁 𑀢𑀁 𑀏𑀓𑀺𑀓𑀁 𑀦𑀺𑀲𑁆𑀲𑀸𑀬 𑀢𑁂 𑀢𑀬𑁄 𑀚𑀦𑀸 𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀸. 𑀢𑀁 𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀚𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 ‘‘𑀆𑀯𑀼𑀲𑁄, 𑀏𑀓𑀁 𑀇𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀢𑀬𑁄 𑀚𑀦𑀸 𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀸’’𑀢𑀺 𑀢𑀲𑁆𑀲𑀸 𑀕𑀼𑀡𑀓𑀣𑀸𑀬 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲𑀸 𑀇𑀢𑁆𑀣𑀻 𑀇𑀤𑀸𑀦𑁂𑀯 𑀢𑁂 𑀢𑀬𑁄 𑀚𑀦𑁂 𑀤𑀼𑀓𑁆𑀔𑀸 𑀫𑁄𑀘𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀫𑁄𑀘𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀬𑁄 𑀚𑀦𑀸 𑀅𑀝𑀯𑀺𑀫𑀼𑀔𑁂 𑀓𑀲𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀤𑀸 𑀧𑀦 𑀭𑀜𑁆𑀜𑀸 ‘‘𑀢𑀻𑀲𑀼 𑀚𑀦𑁂𑀲𑀼 𑀓𑀁 𑀇𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑁂 𑀲𑀸 𑀆𑀳 𑁋 ‘‘𑀢𑀬𑁄𑀧𑀺 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀣, 𑀤𑁂𑀯𑀸’’𑀢𑀺? ‘‘𑀆𑀫, 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀲𑀘𑁂 𑀢𑀬𑁄 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀣, 𑀪𑀸𑀢𑀭𑀁 𑀫𑁂 𑀤𑁂𑀣𑀸’’𑀢𑀺. ‘‘𑀧𑀼𑀢𑁆𑀢𑀁 𑀯𑀸 𑀲𑀸𑀫𑀺𑀓𑀁 𑀯𑀸 𑀕𑀡𑁆𑀳, 𑀓𑀺𑀁 𑀢𑁂 𑀪𑀸𑀢𑀭𑀸’’𑀢𑀺 𑀘 𑀯𑀼𑀢𑁆𑀢𑀸 ‘‘𑀏𑀢𑁂 𑀦𑀸𑀫 𑀤𑁂𑀯 𑀲𑀼𑀮𑀪𑀸, 𑀪𑀸𑀢𑀸 𑀧𑀦 𑀤𑀼𑀮𑁆𑀮𑀪𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁭. ‘‘𑀉𑀘𑁆𑀙𑀗𑁆𑀕𑁂 𑀤𑁂𑀯 𑀫𑁂 𑀧𑀼𑀢𑁆𑀢𑁄, 𑀧𑀣𑁂 𑀥𑀸𑀯𑀦𑁆𑀢𑀺𑀬𑀸 𑀧𑀢𑀺;

𑀢𑀜𑁆𑀘 𑀤𑁂𑀲𑀁 𑀦 𑀧𑀲𑁆𑀲𑀸𑀫𑀺, 𑀬𑀢𑁄 𑀲𑁄𑀤𑀭𑀺𑀬𑀫𑀸𑀦𑀬𑁂’’𑀢𑀺.

𑀢𑀢𑁆𑀣 𑀉𑀘𑁆𑀙𑀗𑁆𑀕𑁂, 𑀤𑁂𑀯, 𑀫𑁂 𑀧𑀼𑀢𑁆𑀢𑁄𑀢𑀺 𑀤𑁂𑀯, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀉𑀘𑁆𑀙𑀗𑁆𑀕𑁂𑀬𑁂𑀯. 𑀬𑀣𑀸 𑀳𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀟𑀸𑀓𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺𑀬𑀸 𑀉𑀘𑁆𑀙𑀗𑁆𑀕𑁂 𑀟𑀸𑀓𑀁 𑀦𑀸𑀫 𑀲𑀼𑀮𑀪𑀁 𑀳𑁄𑀢𑀺, 𑀏𑀯𑀁 𑀇𑀢𑁆𑀣𑀺𑀬𑀸 𑀧𑀼𑀢𑁆𑀢𑁄𑀧𑀺 𑀲𑀼𑀮𑀪𑁄 𑀉𑀘𑁆𑀙𑀗𑁆𑀕𑁂 𑀟𑀸𑀓𑀲𑀤𑀺𑀲𑁄𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀘𑁆𑀙𑀗𑁆𑀕𑁂, 𑀤𑁂𑀯, 𑀫𑁂 𑀧𑀼𑀢𑁆𑀢𑁄’’𑀢𑀺. 𑀧𑀣𑁂 𑀥𑀸𑀯𑀦𑁆𑀢𑀺𑀬𑀸 𑀧𑀢𑀻𑀢𑀺 𑀫𑀕𑁆𑀕𑀁 𑀆𑀭𑀼𑀬𑁆𑀳 𑀏𑀓𑀺𑀓𑀸𑀬 𑀕𑀘𑁆𑀙𑀫𑀸𑀦𑀸𑀬𑀧𑀺 𑀳𑀺 𑀇𑀢𑁆𑀣𑀺𑀬𑀸 𑀧𑀢𑀺 𑀦𑀸𑀫 𑀲𑀼𑀮𑀪𑁄, 𑀤𑀺𑀝𑁆𑀞𑀤𑀺𑀝𑁆𑀞𑁄𑀬𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀣𑁂 𑀥𑀸𑀯𑀦𑁆𑀢𑀺𑀬𑀸 𑀧𑀢𑀻’’𑀢𑀺. 𑀢𑀜𑁆𑀘 𑀤𑁂𑀲𑀁 𑀦 𑀧𑀲𑁆𑀲𑀸𑀫𑀺, 𑀬𑀢𑁄 𑀲𑁄𑀤𑀭𑀺𑀬𑀫𑀸𑀦𑀬𑁂𑀢𑀺 𑀬𑀲𑁆𑀫𑀸 𑀧𑀦 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀤𑀸𑀦𑀺 𑀢𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑀁 𑀅𑀜𑁆𑀜𑀁 𑀤𑁂𑀲𑀁 𑀦 𑀧𑀲𑁆𑀲𑀸𑀫𑀺. 𑀬𑀢𑁄 𑀅𑀳𑀁 𑀲𑀫𑀸𑀦𑁂 𑀉𑀤𑀭𑁂 𑀚𑀸𑀢𑀢𑁆𑀢𑀸 𑀲𑀉𑀤𑀭𑀺𑀬𑀲𑀗𑁆𑀔𑀸𑀢𑀁 𑀪𑀸𑀢𑀭𑀁 𑀆𑀦𑁂𑀬𑁆𑀬𑀁, 𑀢𑀲𑁆𑀫𑀸 𑀪𑀸𑀢𑀭𑀁𑀬𑁂𑀯 𑀫𑁂 𑀤𑁂𑀣𑀸𑀢𑀺.

𑀭𑀸𑀚𑀸 ‘‘𑀲𑀘𑁆𑀘𑀁 𑀏𑀲𑀸 𑀯𑀤𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀬𑁄𑀧𑀺 𑀚𑀦𑁂 𑀩𑀦𑁆𑀥𑀦𑀸𑀕𑀸𑀭𑀢𑁄 𑀆𑀦𑁂𑀢𑁆𑀯𑀸 𑀅𑀤𑀸𑀲𑀺, 𑀲𑀸 𑀢𑀬𑁄𑀧𑀺 𑀢𑁂 𑀕𑀳𑁂𑀢𑁆𑀯𑀸 𑀕𑀢𑀸.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲𑀸 𑀇𑀫𑁂 𑀢𑀬𑁄 𑀚𑀦𑁂 𑀤𑀼𑀓𑁆𑀔𑀢𑁄 𑀫𑁄𑀘𑁂𑀲𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀅𑀢𑀻𑀢𑁂 𑀘𑀢𑁆𑀢𑀸𑀭𑁄𑀯 𑀏𑀢𑀭𑀳𑀺 𑀘𑀢𑁆𑀢𑀸𑀭𑁄, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀘𑁆𑀙𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁬𑁮] 𑁮. 𑀲𑀸𑀓𑁂𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀓𑁂𑀢𑀁 𑀦𑀺𑀲𑁆𑀲𑀸𑀬 𑀅𑀜𑁆𑀚𑀦𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑁄 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀲𑁆𑀲 𑀲𑀸𑀓𑁂𑀢𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑀓𑀸𑀮𑁂 𑀏𑀓𑁄 𑀲𑀸𑀓𑁂𑀢𑀦𑀕𑀭𑀯𑀸𑀲𑀻 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀦𑀕𑀭𑀢𑁄 𑀩𑀳𑀺 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀤𑁆𑀯𑀸𑀭𑁂 𑀤𑀲𑀩𑀮𑀁 𑀤𑀺𑀲𑁆𑀯𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀕𑀸𑀴𑁆𑀳𑀁 𑀕𑀳𑁂𑀢𑁆𑀯𑀸 ‘‘𑀢𑀸𑀢, 𑀦𑀦𑀼 𑀦𑀸𑀫 𑀧𑀼𑀢𑁆𑀢𑁂𑀳𑀺 𑀚𑀺𑀡𑁆𑀡𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸, 𑀓𑀲𑁆𑀫𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑀸𑀓𑀁 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀲𑀺? 𑀫𑀬𑀸 𑀢𑀸𑀯 𑀤𑀺𑀝𑁆𑀞𑁄𑀲𑀺, 𑀫𑀸𑀢𑀭𑀁 𑀧𑀦 𑀧𑀲𑁆𑀲𑀺𑀢𑀼𑀁 𑀏𑀳𑀻’’𑀢𑀺 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀩𑁆𑀭𑀸𑀳𑁆𑀫𑀡𑀻𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀢𑀸𑀢, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀳𑀁 𑀕𑀢𑁄𑀲𑀺, 𑀦𑀦𑀼 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀫𑀳𑀮𑁆𑀮𑀓𑀓𑀸𑀮𑁂 𑀉𑀧𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀧𑀭𑀺𑀤𑁂𑀯𑀺. 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 ‘‘𑀏𑀣, 𑀪𑀸𑀢𑀭𑀁 𑀯𑀦𑁆𑀤𑀣𑀸’’𑀢𑀺 𑀯𑀦𑁆𑀤𑀸𑀧𑁂𑀲𑀺. 𑀉𑀪𑁄 𑀢𑀼𑀝𑁆𑀞𑀫𑀸𑀦𑀲𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀚𑀭𑀸𑀲𑀼𑀢𑁆𑀢𑀁 (𑀲𑀼. 𑀦𑀺. 𑁮𑁧𑁦 𑀆𑀤𑀬𑁄) 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀜𑁆𑀚𑀦𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀩𑁆𑀭𑀸𑀳𑁆𑀫𑀡𑁄 ‘𑀢𑀣𑀸𑀕𑀢𑀲𑁆𑀲 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄, 𑀫𑀸𑀢𑀸 𑀫𑀳𑀸𑀫𑀸𑀬𑀸’𑀢𑀺 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄𑀯 𑀲𑀤𑁆𑀥𑀺𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀣𑀸𑀕𑀢𑀁 ‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄’𑀢𑀺 𑀯𑀤𑀢𑀺, 𑀲𑀢𑁆𑀣𑀸𑀧𑀺 𑀅𑀥𑀺𑀯𑀸𑀲𑁂𑀢𑀺. 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀉𑀪𑁄𑀧𑀺 𑀢𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑁂𑀯 ‘𑀧𑀼𑀢𑁆𑀢𑁄’𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀪𑀺𑀓𑁆𑀔𑀯𑁂, 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑀻𑀢𑁂 𑀦𑀺𑀭𑀦𑁆𑀢𑀭𑀁 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀬𑁆𑀳𑀁 𑀧𑀺𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀧𑀺𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀧𑀺𑀢𑀸. 𑀏𑀲𑀸𑀧𑀺 𑀩𑁆𑀭𑀸𑀳𑁆𑀫𑀡𑀻 𑀦𑀺𑀭𑀦𑁆𑀢𑀭𑀫𑁂𑀯 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀫𑀸𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀫𑀸𑀢𑀸. 𑀏𑀯𑀸𑀳𑀁 𑀤𑀺𑀬𑀟𑁆𑀠𑀚𑀸𑀢𑀺𑀲𑀳𑀲𑁆𑀲𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀲𑀁𑀯𑀟𑁆𑀠𑁄, 𑀤𑀺𑀬𑀟𑁆𑀠𑀚𑀸𑀢𑀺𑀲𑀳𑀲𑁆𑀲𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀳𑀢𑁆𑀣𑁂 𑀲𑀁𑀯𑀟𑁆𑀠𑁄𑀢𑀺 𑀢𑀻𑀡𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁮. ‘‘𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀢𑀺;

𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑁂 𑀧𑁄𑀲𑁂, 𑀓𑀸𑀫𑀁 𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀲𑁂’’𑀢𑀺.

𑀢𑀢𑁆𑀣 𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀻𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀢𑀺. 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀢𑀻𑀢𑀺 𑀬𑀲𑁆𑀫𑀺𑀁 𑀤𑀺𑀝𑁆𑀞𑀫𑀢𑁆𑀢𑁂 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀫𑀼𑀤𑀼𑀓𑀁 𑀳𑁄𑀢𑀺. 𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑁂 𑀧𑁄𑀲𑁂𑀢𑀺 𑀧𑀓𑀢𑀺𑀬𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀤𑀺𑀝𑁆𑀞𑀧𑀼𑀩𑁆𑀩𑁂𑀧𑀺 𑀧𑀼𑀕𑁆𑀕𑀮𑁂. 𑀓𑀸𑀫𑀁 𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀲𑁂𑀢𑀺 𑀅𑀦𑀼𑀪𑀽𑀢𑀧𑀼𑀩𑁆𑀩𑀲𑀺𑀦𑁂𑀳𑁂𑀦𑁂𑀯 𑀢𑀲𑁆𑀫𑀺𑀫𑁆𑀧𑀺 𑀧𑀼𑀕𑁆𑀕𑀮𑁂 𑀏𑀓𑀁𑀲𑁂𑀦 𑀯𑀺𑀲𑁆𑀲𑀲𑁂, 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀏𑀢𑁂 𑀏𑀯 𑀅𑀳𑁂𑀲𑀼𑀁, 𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀓𑁂𑀢𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁬𑁯] 𑁯. 𑀯𑀺𑀲𑀯𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀥𑀺𑀭𑀢𑁆𑀣𑀼 𑀢𑀁 𑀯𑀺𑀲𑀁 𑀯𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀣𑁂𑀭𑀲𑁆𑀲 𑀓𑀺𑀭 𑀧𑀺𑀝𑁆𑀞𑀔𑀚𑁆𑀚𑀓𑀔𑀸𑀤𑀦𑀓𑀸𑀮𑁂 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀩𑀳𑀼𑀁 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀕𑀳𑀺𑀢𑀸𑀯𑀲𑁂𑀲𑀁 𑀩𑀳𑀼 𑀅𑀢𑀺𑀭𑀺𑀢𑁆𑀢𑀁 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 ‘‘𑀪𑀦𑁆𑀢𑁂, 𑀅𑀦𑁆𑀢𑁄𑀕𑀸𑀫𑀕𑀢𑀸𑀦𑀫𑁆𑀧𑀺 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀤𑀳𑀭𑁄 𑀅𑀦𑁆𑀢𑁄𑀕𑀸𑀫𑁂 𑀳𑁄𑀢𑀺, 𑀢𑀲𑁆𑀲 𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀅𑀦𑀸𑀕𑀘𑁆𑀙𑀦𑁆𑀢𑁂 ‘‘𑀅𑀢𑀺𑀤𑀺𑀯𑀸 𑀳𑁄𑀢𑀻’’𑀢𑀺 𑀣𑁂𑀭𑀲𑁆𑀲 𑀅𑀤𑀁𑀲𑀼. 𑀣𑁂𑀭𑁂𑀦 𑀢𑀲𑁆𑀫𑀺𑀁 𑀧𑀭𑀺𑀪𑀼𑀢𑁆𑀢𑁂 𑀤𑀳𑀭𑁄 𑀅𑀕𑀫𑀸𑀲𑀺. 𑀅𑀣 𑀦𑀁 𑀣𑁂𑀭𑁄 ‘‘𑀫𑀬𑀁, 𑀆𑀯𑀼𑀲𑁄, 𑀢𑀼𑀬𑁆𑀳𑀁 𑀞𑀧𑀺𑀢𑀔𑀸𑀤𑀦𑀻𑀬𑀁 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀆𑀳. 𑀲𑁄 ‘‘𑀫𑀥𑀼𑀭𑀁 𑀦𑀸𑀫, 𑀪𑀦𑁆𑀢𑁂, 𑀓𑀲𑁆𑀲 𑀅𑀧𑁆𑀧𑀺𑀬’’𑀦𑁆𑀢𑀺 𑀆𑀳. 𑀫𑀳𑀸𑀣𑁂𑀭𑀲𑁆𑀲 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀇𑀢𑁄 𑀧𑀝𑁆𑀞𑀸𑀬 ‘‘𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦𑀸𑀫 𑀦 𑀔𑀸𑀤𑀺𑀢𑀧𑀼𑀩𑁆𑀩𑀁. 𑀢𑀲𑁆𑀲 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀅𑀔𑀸𑀤𑀦𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀪𑀺𑀓𑁆𑀔𑀽 𑀢𑀁 𑀓𑀣𑀁 𑀓𑀣𑁂𑀦𑁆𑀢𑀸 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑀯𑀸𑀭𑀁 𑀚𑀳𑀺𑀢𑀓𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀦𑁆𑀢𑁄𑀧𑀺 𑀧𑀼𑀦 𑀦 𑀕𑀡𑁆𑀳𑀸𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀯𑀺𑀲𑀯𑁂𑀚𑁆𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀲𑀧𑁆𑀧𑁄 𑀟𑀁𑀲𑀺, 𑀢𑀲𑁆𑀲 𑀜𑀸𑀢𑀓𑀸 𑀧𑀫𑀸𑀤𑀁 𑀅𑀓𑀢𑁆𑀯𑀸 𑀔𑀺𑀧𑁆𑀧𑀁 𑀯𑁂𑀚𑁆𑀚𑀁 𑀆𑀦𑀬𑀺𑀁𑀲𑀼. 𑀯𑁂𑀚𑁆𑀚𑁄 𑀆𑀳 ‘‘𑀓𑀺𑀁 𑀢𑀸𑀯 𑀑𑀲𑀥𑁂𑀦, 𑀧𑀭𑀺𑀪𑀸𑀯𑁂𑀢𑁆𑀯𑀸 𑀯𑀺𑀲𑀁 𑀳𑀭𑀸𑀫𑀺, 𑀤𑀝𑁆𑀞𑀲𑀧𑁆𑀧𑀁 𑀆𑀯𑀸𑀳𑁂𑀢𑁆𑀯𑀸 𑀤𑀝𑁆𑀞𑀝𑁆𑀞𑀸𑀦𑀢𑁄 𑀢𑁂𑀦𑁂𑀯 𑀯𑀺𑀲𑀁 𑀆𑀓𑀟𑁆𑀠𑀸𑀧𑁂𑀫𑀻’’𑀢𑀺. ‘‘𑀲𑀧𑁆𑀧𑀁 𑀆𑀯𑀸𑀳𑁂𑀢𑁆𑀯𑀸 𑀯𑀺𑀲𑀁 𑀆𑀓𑀟𑁆𑀠𑀸𑀧𑁂𑀳𑀻’’𑀢𑀺. 𑀲𑁄 𑀲𑀧𑁆𑀧𑀁 𑀆𑀯𑀸𑀳𑁂𑀢𑁆𑀯𑀸 ‘‘𑀢𑀬𑀸 𑀅𑀬𑀁 𑀤𑀝𑁆𑀞𑁄’’𑀢𑀺 𑀆𑀳. ‘‘𑀆𑀫, 𑀫𑀬𑀸’’𑀢𑀺. ‘‘𑀢𑀬𑀸 𑀤𑀝𑁆𑀞𑀝𑁆𑀞𑀸𑀦𑀢𑁄 𑀢𑁆𑀯𑀜𑁆𑀜𑁂𑀯 𑀫𑀼𑀔𑁂𑀦 𑀯𑀺𑀲𑀁 𑀆𑀓𑀟𑁆𑀠𑀸𑀳𑀻’’𑀢𑀺. ‘‘𑀫𑀬𑀸 𑀏𑀓𑀯𑀸𑀭𑀁 𑀚𑀳𑀺𑀢𑀓𑀁 𑀧𑀼𑀦 𑀦 𑀕𑀳𑀺𑀢𑀧𑀼𑀩𑁆𑀩𑀁, 𑀦𑀸𑀳𑀁 𑀫𑀬𑀸 𑀚𑀳𑀺𑀢𑀯𑀺𑀲𑀁 𑀆𑀓𑀟𑁆𑀠𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀤𑀸𑀭𑀽𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀆𑀳 ‘‘𑀲𑀘𑁂 𑀅𑀢𑁆𑀢𑀦𑁄 𑀯𑀺𑀲𑀁 𑀦𑀸𑀓𑀟𑁆𑀠𑀲𑀺, 𑀇𑀫𑀁 𑀅𑀕𑁆𑀕𑀺𑀁 𑀧𑀯𑀺𑀲𑀸’’𑀢𑀺. 𑀲𑀧𑁆𑀧𑁄 ‘‘𑀅𑀧𑀺 𑀅𑀕𑁆𑀕𑀺𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀦𑁂𑀯𑀢𑁆𑀢𑀦𑀸 𑀏𑀓𑀯𑀸𑀭𑀁 𑀚𑀳𑀺𑀢𑀯𑀺𑀲𑀁 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁯. ‘‘𑀥𑀺𑀭𑀢𑁆𑀣𑀼 𑀢𑀁 𑀯𑀺𑀲𑀁 𑀯𑀦𑁆𑀢𑀁, 𑀬𑀫𑀳𑀁 𑀚𑀻𑀯𑀺𑀢𑀓𑀸𑀭𑀡𑀸;

𑀯𑀦𑁆𑀢𑀁 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀺, 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀯𑀭’’𑀦𑁆𑀢𑀺.

𑀢𑀢𑁆𑀣 𑀥𑀺𑀭𑀢𑁆𑀣𑀽𑀢𑀺 𑀕𑀭𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀁 𑀯𑀺𑀲𑀦𑁆𑀢𑀺 𑀬𑀫𑀳𑀁 𑀚𑀻𑀯𑀺𑀢𑀓𑀸𑀭𑀡𑀸 𑀯𑀦𑁆𑀢𑀁 𑀯𑀺𑀲𑀁 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀺, 𑀢𑀁 𑀯𑀦𑁆𑀢𑀁 𑀯𑀺𑀲𑀁 𑀥𑀺𑀭𑀢𑁆𑀣𑀼. 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀯𑀭𑀦𑁆𑀢𑀺 𑀢𑀲𑁆𑀲 𑀯𑀺𑀲𑀲𑁆𑀲 𑀅𑀧𑀘𑁆𑀘𑀸𑀳𑀭𑀡𑀓𑀸𑀭𑀡𑀸 𑀬𑀁 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀭𑀡𑀁, 𑀢𑀁 𑀫𑀫 𑀚𑀻𑀯𑀺𑀢𑀢𑁄 𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑀼𑀁 𑀧𑀸𑀬𑀸𑀲𑀺. 𑀅𑀣 𑀦𑀁 𑀯𑁂𑀚𑁆𑀚𑁄 𑀦𑀺𑀯𑀸𑀭𑁂𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀑𑀲𑀥𑁂𑀳𑀺 𑀘 𑀫𑀦𑁆𑀢𑁂𑀳𑀺 𑀘 𑀦𑀺𑀩𑁆𑀩𑀺𑀲𑀁 𑀅𑀭𑁄𑀕𑀁 𑀓𑀢𑁆𑀯𑀸 𑀲𑀧𑁆𑀧𑀲𑁆𑀲 𑀲𑀻𑀮𑀸𑀦𑀺 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀓𑀜𑁆𑀘𑀺 𑀯𑀺𑀳𑁂𑀞𑁂𑀲𑀻’’𑀢𑀺 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑀯𑀸𑀭𑀁 𑀚𑀳𑀺𑀢𑀓𑀁 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑁄 𑀧𑀼𑀦 𑀕𑀡𑁆𑀳𑀸𑀢𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀲𑀧𑁆𑀧𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀯𑁂𑀚𑁆𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀲𑀯𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁭𑁦] 𑁧𑁦. 𑀓𑀼𑀤𑁆𑀤𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀦 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑀳𑀢𑁆𑀣𑀲𑀸𑀭𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀏𑀓𑁄 𑀓𑀼𑀮𑀤𑀸𑀭𑀓𑁄. 𑀅𑀣𑁂𑀓𑀤𑀺𑀯𑀲𑀁 𑀓𑀲𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀧𑀢𑁆𑀢𑀢𑁄 𑀲𑀺𑀦𑀺𑀤𑁆𑀥𑀁 𑀫𑀥𑀼𑀭𑀁 𑀧𑀡𑀻𑀢𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀳𑀢𑁆𑀣𑁂𑀦 𑀦𑀸𑀦𑀸𑀓𑀫𑁆𑀫𑀸𑀦𑀺 𑀓𑀼𑀭𑀼𑀫𑀸𑀦𑀸𑀧𑀺 𑀏𑀯𑀭𑀽𑀧𑀁 𑀫𑀥𑀼𑀭𑀸𑀳𑀸𑀭𑀁 𑀦 𑀮𑀪𑀸𑀫, 𑀫𑀬𑀸𑀧𑀺 𑀲𑀫𑀡𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀫𑀸𑀲𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀺𑀮𑁂𑀲𑀯𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀪𑀢𑁆𑀢𑁂𑀦 𑀓𑀺𑀮𑀫𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺. 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀙 𑀯𑀸𑀭𑁂 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀢𑀢𑁄 𑀲𑀢𑁆𑀢𑀫𑁂 𑀪𑀺𑀓𑁆𑀔𑀼𑀪𑀸𑀯𑁂 𑀲𑀢𑁆𑀢𑀧𑁆𑀧𑀓𑀭𑀡𑀺𑀓𑁄 𑀳𑀼𑀢𑁆𑀯𑀸 𑀩𑀳𑀽 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀘𑀺𑀢𑁆𑀢𑀳𑀢𑁆𑀣, 𑀧𑀼𑀩𑁆𑀩𑁂 𑀯𑀺𑀬 𑀢𑁂 𑀏𑀢𑀭𑀳𑀺 𑀓𑀺𑀮𑁂𑀲𑀸 𑀦 𑀯𑀟𑁆𑀠𑀦𑁆𑀢𑀻’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑀺𑀁𑀲𑀼. ‘‘𑀆𑀯𑀼𑀲𑁄, 𑀅𑀪𑀩𑁆𑀩𑁄 𑀤𑀸𑀦𑀺 𑀅𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀕𑀺𑀳𑀺𑀪𑀸𑀯𑀸𑀬𑀸’’𑀢𑀺.

𑀏𑀯𑀁 𑀢𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀸 𑀉𑀤𑀧𑀸𑀤𑀺 ‘‘𑀆𑀯𑀼𑀲𑁄, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺 𑀆𑀬𑀲𑁆𑀫𑀸 𑀘𑀺𑀢𑁆𑀢𑀳𑀢𑁆𑀣𑀲𑀸𑀭𑀺𑀧𑀼𑀢𑁆𑀢𑁄 𑀙𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀩𑁆𑀩𑀚𑀺𑀢𑁄, 𑀅𑀳𑁄 𑀫𑀳𑀸𑀤𑁄𑀲𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑀘𑀺𑀢𑁆𑀢𑀁 𑀦𑀸𑀫 𑀮𑀳𑀼𑀓𑀁 𑀤𑀼𑀦𑁆𑀦𑀺𑀕𑁆𑀕𑀳𑀁, 𑀆𑀭𑀫𑁆𑀫𑀡𑀯𑀲𑁂𑀦 𑀕𑀦𑁆𑀢𑁆𑀯𑀸 𑀅𑀮𑁆𑀮𑀻𑀬𑀢𑀺, 𑀏𑀓𑀯𑀸𑀭𑀁 𑀅𑀮𑁆𑀮𑀻𑀦𑀁 𑀦 𑀲𑀓𑁆𑀓𑀸 𑀳𑁄𑀢𑀺 𑀔𑀺𑀧𑁆𑀧𑀁 𑀫𑁄𑀘𑁂𑀢𑀼𑀁, 𑀏𑀯𑀭𑀽𑀧𑀲𑁆𑀲 𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼. 𑀤𑀦𑁆𑀢𑀫𑁂𑀯 𑀳𑀺 𑀢𑀁 𑀲𑀼𑀔𑀁 𑀆𑀯𑀳𑀢𑀺.

‘‘𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄;

𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳𑀁’’. (𑀥. 𑀧. 𑁩𑁫);

𑀢𑀲𑁆𑀲 𑀧𑀦 𑀤𑀼𑀦𑁆𑀦𑀺𑀕𑁆𑀕𑀳𑀢𑀸𑀬 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀏𑀓𑀁 𑀓𑀼𑀤𑁆𑀤𑀸𑀮𑀓𑀁 𑀦𑀺𑀲𑁆𑀲𑀸𑀬 𑀢𑀁 𑀚𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀮𑁄𑀪𑀯𑀲𑁂𑀦 𑀙𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀧𑀩𑁆𑀩𑀚𑀺𑀢𑀪𑀸𑀯𑁂 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀡𑁆𑀡𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺, ‘‘𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀓𑀼𑀤𑁆𑀤𑀸𑀮𑀓𑁂𑀦 𑀪𑀽𑀫𑀺𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀟𑀸𑀓𑀜𑁆𑀘𑁂𑀯 𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀏𑀴𑀸𑀮𑀼𑀓𑀸𑀤𑀻𑀦𑀺 𑀘 𑀯𑀧𑀺𑀢𑁆𑀯𑀸 𑀢𑀸𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑁄 𑀓𑀧𑀡𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀜𑁆𑀳𑀺𑀲𑁆𑀲 𑀏𑀓𑀁 𑀓𑀼𑀤𑁆𑀤𑀸𑀮𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀓𑀼𑀤𑁆𑀤𑀸𑀮𑀓𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀁 𑀓𑀼𑀤𑁆𑀤𑀸𑀮𑀓𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀮𑁄𑀪𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀼𑀡𑁆𑀞𑀓𑀼𑀤𑁆𑀤𑀸𑀮𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀩𑁆𑀩𑀚𑀺. 𑀏𑀯𑀁 𑀤𑀼𑀢𑀺𑀬𑀫𑁆𑀧𑀺, 𑀢𑀢𑀺𑀬𑀫𑁆𑀧𑀻𑀢𑀺 𑀙 𑀯𑀸𑀭𑁂 𑀢𑀁 𑀓𑀼𑀤𑁆𑀤𑀸𑀮𑀓𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀘𑁂𑀯 𑀉𑀧𑁆𑀧𑀩𑁆𑀩𑀚𑀺𑀢𑁄 𑀘.

𑀲𑀢𑁆𑀢𑀫𑁂 𑀧𑀦 𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀫𑀁 𑀓𑀼𑀡𑁆𑀞𑀓𑀼𑀤𑁆𑀤𑀸𑀮𑀓𑀁 𑀦𑀺𑀲𑁆𑀲𑀸𑀬 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀩𑁆𑀩𑀚𑀺𑀢𑁄, 𑀇𑀤𑀸𑀦𑀺 𑀦𑀁 𑀫𑀳𑀸𑀦𑀤𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 ‘‘𑀲𑀘𑀲𑁆𑀲 𑀧𑀢𑀺𑀢𑀝𑁆𑀞𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀧𑀼𑀦𑀸𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀓𑀸𑀫𑀢𑀸 𑀪𑀯𑁂𑀬𑁆𑀬𑀸’’𑀢𑀺 𑀢𑀁 𑀓𑀼𑀤𑁆𑀤𑀸𑀮𑀓𑀁 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀲𑀻𑀲𑀲𑁆𑀲 𑀉𑀧𑀭𑀺𑀪𑀸𑀕𑁂 𑀢𑀺𑀓𑁆𑀔𑀢𑁆𑀢𑀼𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀦𑀤𑀻𑀫𑀚𑁆𑀛𑁂 𑀔𑀺𑀧𑀺𑀢𑁆𑀯𑀸 ‘‘𑀚𑀺𑀢𑀁 𑀫𑁂 𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄 𑀦𑀤𑀺𑀬𑀸 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂𑀦 𑀕𑀘𑁆𑀙𑀫𑀸𑀦𑁄 𑀢𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 ‘𑀚𑀺𑀢𑀁 𑀫𑁂 𑀚𑀺𑀢𑀁 𑀫𑁂’𑀢𑀺 𑀯𑀤𑀢𑀺, 𑀓𑁄 𑀦𑀼 𑀔𑁄 𑀏𑀢𑁂𑀦 𑀚𑀺𑀢𑁄, 𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀅𑀳𑀁 𑀢𑀸𑀯 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀇𑀤𑀸𑀦𑀺 𑀚𑀬𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀸𑀫𑀺, 𑀢𑀬𑀸 𑀧𑀦 𑀓𑁄 𑀚𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀢𑀬𑀸 𑀲𑀗𑁆𑀕𑀸𑀫𑀲𑀢𑀫𑁆𑀧𑀺 𑀲𑀗𑁆𑀕𑀸𑀫𑀲𑀳𑀲𑁆𑀲𑀫𑁆𑀧𑀺 𑀲𑀗𑁆𑀕𑀸𑀫𑀲𑀢𑀲𑀳𑀲𑁆𑀲𑀫𑁆𑀧𑀺 𑀚𑀺𑀦𑀦𑁆𑀢𑁂𑀦 𑀤𑀼𑀚𑁆𑀚𑀺𑀢𑀫𑁂𑀯 𑀓𑀺𑀮𑁂𑀲𑀸𑀦𑀁 𑀅𑀚𑀺𑀢𑀢𑁆𑀢𑀸. 𑀅𑀳𑀁 𑀧𑀦 𑀫𑀫 𑀅𑀩𑁆𑀪𑀦𑁆𑀢𑀭𑁂 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀓𑀺𑀮𑁂𑀲𑁂 𑀚𑀺𑀦𑀺’’𑀦𑁆𑀢𑀺 𑀓𑀣𑁂𑀦𑁆𑀢𑁄𑀬𑁂𑀯 𑀫𑀳𑀸𑀦𑀤𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀧𑁄𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀸𑀦𑀼𑀪𑀸𑀯𑁄 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁦. ‘‘𑀦 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀅𑀯𑀚𑀻𑀬𑀢𑀺;

𑀢𑀁 𑀔𑁄 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀦𑀸𑀯𑀚𑀻𑀬𑀢𑀻’’𑀢𑀺.

𑀢𑀢𑁆𑀣 𑀦 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀅𑀯𑀚𑀻𑀬𑀢𑀻𑀢𑀺 𑀬𑀁 𑀧𑀘𑁆𑀘𑀸𑀫𑀺𑀢𑁆𑀢𑁂 𑀧𑀭𑀸𑀚𑀺𑀦𑀺𑀢𑁆𑀯𑀸 𑀭𑀝𑁆𑀞𑀁 𑀚𑀺𑀢𑀁 𑀧𑀝𑀺𑀮𑀤𑁆𑀥𑀁 𑀧𑀼𑀦𑀧𑀺 𑀢𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀅𑀯𑀚𑀻𑀬𑀢𑀺, 𑀢𑀁 𑀚𑀺𑀢𑀁 𑀲𑀸𑀥𑀼𑀚𑀺𑀢𑀁 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀧𑀼𑀦 𑀅𑀯𑀚𑀻𑀬𑀦𑀢𑁄. 𑀅𑀧𑀭𑁄 𑀦𑀬𑁄 𑁋 𑀚𑀺𑀢𑀁 𑀯𑀼𑀘𑁆𑀘𑀢𑀺 𑀚𑀬𑁄. 𑀬𑁄 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀅𑀥𑀺𑀕𑀢𑁄 𑀚𑀬𑁄 𑀧𑀼𑀦 𑀢𑁂𑀲𑀼 𑀚𑀺𑀦𑀦𑁆𑀢𑁂𑀲𑀼, 𑀧𑀭𑀸𑀚𑀬𑁄 𑀳𑁄𑀢𑀺, 𑀲𑁄 𑀦 𑀲𑀸𑀥𑀼 𑀦 𑀲𑁄𑀪𑀦𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀼𑀦 𑀧𑀭𑀸𑀚𑀬𑁄𑀯 𑀳𑁄𑀢𑀺. 𑀢𑀁 𑀔𑁄 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀦𑀸𑀯𑀚𑀻𑀬𑀢𑀻𑀢𑀺 𑀬𑀁 𑀔𑁄 𑀧𑀦 𑀧𑀘𑁆𑀘𑀸𑀫𑀺𑀢𑁆𑀢𑁂 𑀦𑀺𑀫𑁆𑀫𑀣𑁂𑀢𑁆𑀯𑀸 𑀚𑀺𑀢𑀁 𑀧𑀼𑀦 𑀢𑁂𑀳𑀺 𑀦𑀸𑀯𑀚𑀻𑀬𑀢𑀺, 𑀬𑁄 𑀯𑀸 𑀏𑀓𑀯𑀸𑀭𑀁 𑀮𑀤𑁆𑀥𑁄 𑀚𑀬𑁄 𑀦 𑀧𑀼𑀦 𑀧𑀭𑀸𑀚𑀬𑁄 𑀳𑁄𑀢𑀺, 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁 𑀲𑁄𑀪𑀦𑀁, 𑀲𑁄 𑀚𑀬𑁄 𑀲𑀸𑀥𑀼 𑀲𑁄𑀪𑀦𑁄 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? 𑀧𑀼𑀦 𑀦𑀸𑀯𑀚𑀻𑀬𑀦𑀢𑁄. 𑀢𑀲𑁆𑀫𑀸, 𑀢𑁆𑀯𑀁 𑀫𑀳𑀸𑀭𑀸𑀚, 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀗𑁆𑀕𑀸𑀫𑀲𑀻𑀲𑀁 𑀚𑀺𑀦𑀺𑀢𑁆𑀯𑀸𑀧𑀺 𑀲𑀗𑁆𑀕𑀸𑀫𑀬𑁄𑀥𑁄 𑀦𑀸𑀫 𑀦 𑀳𑁄𑀲𑀺. 𑀓𑀺𑀁𑀓𑀸𑀭𑀡𑀸? 𑀅𑀢𑁆𑀢𑀦𑁄 𑀓𑀺𑀮𑁂𑀲𑀸𑀦𑀁 𑀅𑀚𑀺𑀢𑀢𑁆𑀢𑀸. 𑀬𑁄 𑀧𑀦 𑀏𑀓𑀯𑀸𑀭𑀫𑁆𑀧𑀺 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑁂 𑀚𑀺𑀦𑀸𑀢𑀺, 𑀅𑀬𑀁 𑀉𑀢𑁆𑀢𑀫𑁄 𑀲𑀗𑁆𑀕𑀸𑀫𑀲𑀻𑀲𑀬𑁄𑀥𑁄𑀢𑀺 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑀓𑁄𑀯 𑀩𑀼𑀤𑁆𑀥𑀮𑀻𑀮𑀸𑀬 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀉𑀢𑁆𑀢𑀫𑀲𑀗𑁆𑀕𑀸𑀫𑀬𑁄𑀥𑀪𑀸𑀯𑁄 𑀧𑀦𑁂𑀢𑁆𑀣 𑁋

‘‘𑀬𑁄 𑀲𑀳𑀲𑁆𑀲𑀁 𑀲𑀳𑀲𑁆𑀲𑁂𑀦, 𑀲𑀗𑁆𑀕𑀸𑀫𑁂 𑀫𑀸𑀦𑀼𑀲𑁂 𑀚𑀺𑀦𑁂;

𑀏𑀓𑀜𑁆𑀘 𑀚𑁂𑀬𑁆𑀬𑀫𑀢𑁆𑀢𑀸𑀦𑀁, 𑀲 𑀯𑁂 𑀲𑀗𑁆𑀕𑀸𑀫𑀚𑀼𑀢𑁆𑀢𑀫𑁄’’𑀢𑀺. (𑀥. 𑀧. 𑁧𑁦𑁩) 𑁋

𑀇𑀤𑀁 𑀲𑀼𑀢𑁆𑀢𑀁 𑀲𑀸𑀥𑀓𑀁.

𑀭𑀜𑁆𑀜𑁄 𑀧𑀦 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑁂𑀯 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺. 𑀭𑀸𑀚𑀩𑀮𑀲𑁆𑀲𑀧𑀺 𑀢𑀣𑁂𑀯 𑀓𑀺𑀮𑁂𑀲𑀸 𑀧𑀳𑀻𑀬𑀺𑀁𑀲𑀼. 𑀭𑀸𑀚𑀸 ‘‘𑀇𑀤𑀸𑀦𑀺 𑀢𑀼𑀫𑁆𑀳𑁂 𑀓𑀳𑀁 𑀕𑀫𑀺𑀲𑁆𑀲𑀣𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺. ‘‘𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺, 𑀩𑀮𑀓𑀸𑀬𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑀩𑁆𑀩𑀸 𑀲𑁂𑀦𑀺𑀬𑁄𑀢𑀺 𑀲𑀩𑁆𑀩𑁄𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑁄 𑀫𑀳𑀸𑀚𑀦𑀓𑀸𑀬𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁𑀬𑁂𑀯 𑀦𑀺𑀓𑁆𑀔𑀫𑀺. 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄𑀧𑀺 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀭𑀸𑀚𑀸 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦 𑀦𑀺𑀓𑁆𑀔𑀦𑁆𑀢𑁄, 𑀫𑀬𑀁 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀧𑀭𑀺𑀲𑀸 𑀅𑀳𑁄𑀲𑀺. 𑀢𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 ‘‘𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀤𑀺𑀲𑁆𑀯𑀸 ‘‘𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀺, 𑀯𑀲𑀦𑀝𑁆𑀞𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀯𑀲𑀦𑀝𑁆𑀞𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑁆𑀯𑀁 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀤𑀻𑀖𑀢𑁄 𑀢𑀺𑀁𑀲𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑀢𑁄 𑀧𑀦𑁆𑀦𑀭𑀲𑀬𑁄𑀚𑀦𑀁 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀳𑀢𑁆𑀣𑀺𑀧𑀸𑀮𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀤𑀜𑁆𑀘 𑀳𑀺 𑀢𑀜𑁆𑀘 𑀏𑀓𑀧𑀭𑀺𑀘𑁆𑀙𑁂𑀤𑀫𑁂𑀯. 𑀯𑀺𑀲𑁆𑀲𑀓𑀫𑁆𑀫𑁄𑀧𑀺 𑀅𑀲𑁆𑀲𑀫𑀧𑀤𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀤𑀼𑀲𑁆𑀲𑀤𑁆𑀤𑁂 𑀫𑀺𑀕𑁂 𑀘 𑀲𑀓𑀼𑀡𑁂 𑀘 𑀅𑀫𑀦𑀼𑀲𑁆𑀲𑁂 𑀘 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀏𑀓𑀧𑀤𑀺𑀓𑀫𑀕𑁆𑀕𑀁 𑀫𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄𑀧𑀺 𑀢𑀁 𑀧𑀭𑀺𑀲𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑀤𑀢𑁆𑀢𑀺𑀬𑀁 𑀅𑀲𑁆𑀲𑀫𑀧𑀤𑀁 𑀕𑀦𑁆𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀧𑀞𑀫𑀁 𑀅𑀢𑁆𑀢𑀦𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀙𑀸 𑀧𑀭𑀺𑀲𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀪𑀸𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀢𑁆𑀢 𑀭𑀸𑀚𑀸𑀦𑁄 𑀲𑀢𑁆𑀢 𑀭𑀚𑁆𑀚𑀸𑀦𑀺 𑀙𑀟𑁆𑀟𑀬𑀺𑀁𑀲𑀼. 𑀢𑀺𑀁𑀲𑀬𑁄𑀚𑀦𑀁 𑀅𑀲𑁆𑀲𑀫𑀧𑀤𑀁 𑀧𑀽𑀭𑀺. 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄 𑀲𑁂𑀲𑀓𑀲𑀺𑀡𑁂𑀲𑀼𑀧𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀧𑀭𑀺𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑀩𑁆𑀩𑁂 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁. 𑀬𑁂 𑀧𑀦 𑀢𑁂𑀲𑀁 𑀧𑀸𑀭𑀺𑀘𑀭𑀺𑀬𑀁 𑀅𑀓𑀁𑀲𑀼, 𑀢𑁂 𑀤𑁂𑀯𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀓𑀺𑀮𑁂𑀲𑀯𑀲𑁂𑀦 𑀅𑀮𑁆𑀮𑀻𑀦𑀁 𑀤𑀼𑀫𑁆𑀫𑁄𑀘𑀬𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑀸 𑀮𑁄𑀪𑀥𑀫𑁆𑀫𑀸 𑀤𑀼𑀧𑁆𑀧𑀚𑀳𑀸, 𑀏𑀯𑀭𑀽𑀧𑁂𑀧𑀺 𑀧𑀡𑁆𑀟𑀺𑀢𑁂 𑀅𑀜𑁆𑀜𑀸𑀡𑁂 𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀤𑁆𑀤𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀇𑀢𑁆𑀣𑀺𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀲𑀸𑀢𑀫𑀦𑁆𑀢𑀡𑁆𑀟𑀪𑀽𑀢𑀁, 𑀢𑀓𑁆𑀓𑀧𑀡𑁆𑀟𑀺 𑀤𑀼𑀭𑀸𑀚𑀸𑀦𑀁;

𑀅𑀦𑀪𑀺𑀭𑀢𑀺 𑀫𑀼𑀤𑀼𑀮𑀓𑁆𑀔𑀡𑀁, 𑀉𑀘𑁆𑀙𑀗𑁆𑀕𑀫𑁆𑀧𑀺 𑀘 𑀲𑀸𑀓𑁂𑀢𑀁;

𑀯𑀺𑀲𑀯𑀦𑁆𑀢𑀁 𑀓𑀼𑀤𑁆𑀤𑀸𑀮𑀓𑀦𑁆𑀢𑀺.