𑁬. 𑀆𑀲𑀻𑀲𑀯𑀕𑁆𑀕𑁄

[𑁫𑁧] 𑁧. 𑀫𑀳𑀸𑀲𑀻𑀮𑀯𑀚𑀸𑀢𑀓𑀯𑀡𑁆𑀡𑀦𑀸

𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀢𑁆𑀯𑀁 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀭𑀚𑁆𑀚𑀸 𑀧𑀭𑀺𑀳𑀸𑀬𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑁂 𑀞𑀢𑁆𑀯𑀸𑀯 𑀦𑀝𑁆𑀞𑀫𑁆𑀧𑀺 𑀬𑀲𑀁 𑀧𑀼𑀦 𑀉𑀧𑁆𑀧𑀸𑀤𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀲𑀻𑀮𑀯𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄𑀯 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 𑀫𑀳𑀸𑀲𑀻𑀮𑀯𑀭𑀸𑀚𑀸 𑀦𑀸𑀫 𑀅𑀳𑁄𑀲𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸. 𑀲𑁄 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑀲𑁆𑀲𑁄, 𑀫𑀚𑁆𑀛𑁂 𑀏𑀓𑀁, 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀏𑀓𑀦𑁆𑀢𑀺 𑀦𑀺𑀘𑁆𑀘𑀁 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀦𑀁 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀧𑀼𑀢𑁆𑀢𑀁 𑀧𑀭𑀺𑀢𑁄𑀲𑀬𑀫𑀸𑀦𑁄 𑀯𑀺𑀬 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀢𑁄𑀲𑀬𑀫𑀸𑀦𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀢𑀲𑁆𑀲𑁂𑀓𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀩𑁆𑀪𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀢𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀁, 𑀦 𑀢𑁆𑀯𑀁 𑀫𑀫 𑀯𑀺𑀚𑀺𑀢𑁂 𑀯𑀲𑀺𑀢𑀼𑀁 𑀅𑀭𑀳𑀲𑀺, 𑀅𑀢𑁆𑀢𑀦𑁄 𑀥𑀦𑀜𑁆𑀘 𑀧𑀼𑀢𑁆𑀢𑀤𑀸𑀭𑁂 𑀘 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀬𑀸𑀳𑀻’’𑀢𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀲𑀺𑀭𑀝𑁆𑀞𑀁 𑀅𑀢𑀺𑀓𑁆𑀓𑀫𑁆𑀫 𑀓𑁄𑀲𑀮𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑁄𑀲𑀮𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀭𑀜𑁆𑀜𑁄 𑀅𑀩𑁆𑀪𑀦𑁆𑀢𑀭𑀺𑀓𑁄 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄.

𑀲𑁄 𑀏𑀓𑀤𑀺𑀯𑀲𑀁 𑀓𑁄𑀲𑀮𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀦𑀺𑀫𑁆𑀫𑀓𑁆𑀔𑀺𑀓𑀫𑀥𑀼𑀧𑀝𑀮𑀲𑀤𑀺𑀲𑀁, 𑀭𑀸𑀚𑀸 𑀅𑀢𑀺𑀫𑀼𑀤𑀼𑀓𑁄, 𑀅𑀧𑁆𑀧𑁂𑀦𑁂𑀯 𑀩𑀮𑀯𑀸𑀳𑀦𑁂𑀦 𑀲𑀓𑁆𑀓𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀢𑀼’’𑀦𑁆𑀢𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸, 𑀅𑀬𑀜𑁆𑀘 ‘𑀅𑀧𑁆𑀧𑁂𑀦𑁂𑀯 𑀩𑀮𑀯𑀸𑀳𑀦𑁂𑀦 𑀲𑀓𑁆𑀓𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀢𑀼’𑀦𑁆𑀢𑀺 𑀆𑀳, 𑀓𑀺𑀁 𑀦𑀼 𑀔𑁄 𑀧𑀦 𑀧𑀬𑀼𑀢𑁆𑀢𑀓𑀘𑁄𑀭𑁄 𑀲𑀺𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀬𑀼𑀢𑁆𑀢𑀓𑁄𑀲𑀺 𑀫𑀜𑁆𑀜𑁂’’𑀢𑀺 𑀆𑀳. ‘‘𑀦𑀸𑀳𑀁, 𑀤𑁂𑀯, 𑀧𑀬𑀼𑀢𑁆𑀢𑀓𑁄, 𑀲𑀘𑁆𑀘𑀫𑁂𑀯 𑀯𑀤𑀸𑀫𑀺. 𑀲𑀘𑁂 𑀫𑁂 𑀦 𑀲𑀤𑁆𑀤𑀳𑀣, 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑀁 𑀳𑀦𑀸𑀧𑁂𑀣, 𑀢𑁂 𑀫𑀦𑀼𑀲𑁆𑀲𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀦𑀻𑀢𑁂 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀅𑀬𑀁 𑀅𑀢𑀺𑀯𑀺𑀬 𑀲𑀽𑀭𑁄 𑀳𑀼𑀢𑁆𑀯𑀸 𑀯𑀤𑀢𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯𑀸’’𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑀁 𑀳𑀦𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀢𑁂 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 ‘‘𑀢𑀸𑀢𑀸, 𑀓𑀲𑁆𑀫𑀸 𑀕𑀸𑀫𑀁 𑀳𑀦𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 ‘‘𑀅𑀣 𑀓𑀲𑁆𑀫𑀸 𑀫𑀫 𑀲𑀦𑁆𑀢𑀺𑀓𑀁 𑀦𑀸𑀕𑀫𑀺𑀢𑁆𑀣, 𑀇𑀢𑁄𑀤𑀸𑀦𑀺 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀢𑁂𑀲𑀁 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑁄 𑀏𑀢𑁆𑀢𑀓𑁂𑀦𑀸𑀧𑀺 𑀕𑀦𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀧𑀼𑀦 𑀫𑀚𑁆𑀛𑁂𑀚𑀦𑀧𑀤𑀁 𑀳𑀦𑀸𑀧𑁂𑀲𑀺. 𑀢𑁂𑀧𑀺 𑀘𑁄𑀭𑁂 𑀭𑀸𑀚𑀸 𑀢𑀣𑁂𑀯 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀏𑀢𑁆𑀢𑀓𑁂𑀦𑀸𑀧𑀺 𑀅𑀕𑀦𑁆𑀢𑁆𑀯𑀸 𑀧𑀼𑀦 𑀧𑁂𑀲𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀯𑀺𑀮𑀼𑀫𑁆𑀧𑀸𑀧𑁂𑀲𑀺, 𑀭𑀸𑀚𑀸 𑀢𑁂𑀲𑀫𑁆𑀧𑀺 𑀘𑁄𑀭𑀸𑀦𑀁 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺𑀬𑁂𑀯. 𑀢𑀤𑀸 𑀓𑁄𑀲𑀮𑀭𑀸𑀚𑀸 ‘‘𑀅𑀢𑀺𑀯𑀺𑀬 𑀥𑀫𑁆𑀫𑀺𑀓𑁄 𑀭𑀸𑀚𑀸’’𑀢𑀺 𑀜𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀩𑀮𑀯𑀸𑀳𑀦𑀁 𑀆𑀤𑀸𑀬 𑀦𑀺𑀬𑁆𑀬𑀸𑀲𑀺.

𑀢𑀤𑀸 𑀧𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀢𑁆𑀢𑀯𑀸𑀭𑀡𑁂𑀧𑀺 𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑁂 𑀅𑀦𑀺𑀯𑀢𑁆𑀢𑀦𑀥𑀫𑁆𑀫𑀸 𑀅𑀲𑀦𑀺𑀬𑀸𑀧𑀺 𑀲𑀻𑀲𑁂 𑀧𑀢𑀦𑁆𑀢𑀺𑀬𑀸 𑀅𑀲𑀦𑁆𑀢𑀲𑀦𑀲𑀪𑀸𑀯𑀸 𑀲𑀻𑀮𑀯𑀫𑀳𑀸𑀭𑀸𑀚𑀲𑁆𑀲 𑀭𑀼𑀘𑀺𑀬𑀸 𑀲𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑀸 𑀲𑀳𑀲𑁆𑀲𑀫𑀢𑁆𑀢𑀸 𑀅𑀪𑁂𑀚𑁆𑀚𑀯𑀭𑀲𑀽𑀭𑀸 𑀫𑀳𑀸𑀬𑁄𑀥𑀸 𑀳𑁄𑀦𑁆𑀢𑀺. 𑀢𑁂 ‘‘𑀓𑁄𑀲𑀮𑀭𑀸𑀚𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀓𑁄𑀲𑀮𑀭𑀸𑀚𑀸 𑀓𑀺𑀭 ‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀆𑀕𑀘𑁆𑀙𑀢𑀺, 𑀕𑀘𑁆𑀙𑀸𑀫, 𑀦𑀁 𑀅𑀫𑁆𑀳𑀸𑀓𑀁 𑀭𑀚𑁆𑀚𑀲𑀻𑀫𑀁 𑀅𑀦𑁄𑀓𑁆𑀓𑀦𑁆𑀢𑀫𑁂𑀯 𑀧𑁄𑀣𑁂𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 ‘‘𑀢𑀸𑀢𑀸, 𑀫𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑁂𑀲𑀁 𑀓𑀺𑀮𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀭𑀚𑁆𑀚𑀢𑁆𑀣𑀺𑀓𑁄 𑀭𑀚𑁆𑀚𑀁 𑀕𑀡𑁆𑀳𑀸𑀢𑀼, 𑀫𑀸𑀕𑀫𑀺𑀢𑁆𑀣𑀸’’𑀢𑀺 𑀦𑀺𑀯𑀸𑀭𑁂𑀲𑀺. 𑀓𑁄𑀲𑀮𑀭𑀸𑀚𑀸 𑀭𑀚𑁆𑀚𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀦𑀧𑀤𑀫𑀚𑁆𑀛𑀁 𑀧𑀸𑀯𑀺𑀲𑀺. 𑀅𑀫𑀘𑁆𑀘𑀸 𑀧𑀼𑀦𑀧𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀯𑀤𑀺𑀁𑀲𑀼, 𑀭𑀸𑀚𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀯𑀸𑀭𑁂𑀲𑀺. 𑀓𑁄𑀲𑀮𑀭𑀸𑀚𑀸 𑀩𑀳𑀺𑀦𑀕𑀭𑁂 𑀞𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀲𑀻𑀮𑀯𑀫𑀳𑀸𑀭𑀸𑀚𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀦𑀢𑁆𑀣𑀺 𑀫𑀬𑀸 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁, 𑀭𑀚𑁆𑀚𑀁 𑀕𑀡𑁆𑀳𑀸𑀢𑀽’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀧𑀼𑀦𑀧𑀺 𑀅𑀫𑀘𑁆𑀘𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀦 𑀫𑀬𑀁 𑀓𑁄𑀲𑀮𑀭𑀜𑁆𑀜𑁄 𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀤𑁂𑀫, 𑀩𑀳𑀺𑀦𑀕𑀭𑁂𑀬𑁂𑀯 𑀦𑀁 𑀧𑁄𑀣𑁂𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺 𑀆𑀳𑀁𑀲𑀼, 𑀭𑀸𑀚𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀫𑀳𑀸𑀢𑀮𑁂 𑀧𑀮𑁆𑀮𑀗𑁆𑀓𑀫𑀚𑁆𑀛𑁂 𑀦𑀺𑀲𑀻𑀤𑀺.

𑀓𑁄𑀲𑀮𑀭𑀸𑀚𑀸 𑀫𑀳𑀦𑁆𑀢𑁂𑀦 𑀩𑀮𑀯𑀸𑀳𑀦𑁂𑀦 𑀩𑀸𑀭𑀸𑀡𑀲𑀺𑀁 𑀧𑀸𑀯𑀺𑀲𑀺. 𑀲𑁄 𑀏𑀓𑀫𑁆𑀧𑀺 𑀧𑀝𑀺𑀲𑀢𑁆𑀢𑀼𑀁 𑀅𑀧𑀲𑁆𑀲𑀦𑁆𑀢𑁄 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀅𑀧𑀸𑀭𑀼𑀢𑀤𑁆𑀯𑀸𑀭𑁂 𑀦𑀺𑀯𑁂𑀲𑀦𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀳𑀸𑀢𑀮𑀁 𑀆𑀭𑀼𑀬𑁆𑀳 𑀦𑀺𑀲𑀺𑀦𑁆𑀦𑀁 𑀦𑀺𑀭𑀸𑀧𑀭𑀸𑀥𑀁 𑀲𑀻𑀮𑀯𑀫𑀳𑀸𑀭𑀸𑀚𑀸𑀦𑀁 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀇𑀫𑀁 𑀭𑀸𑀚𑀸𑀦𑀁 𑀲𑀤𑁆𑀥𑀺𑀁 𑀅𑀫𑀘𑁆𑀘𑁂𑀳𑀺 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑁂 𑀆𑀯𑀸𑀝𑁂 𑀔𑀦𑀺𑀢𑁆𑀯𑀸 𑀬𑀣𑀸 𑀏𑀓𑁄𑀧𑀺 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀔𑀦𑀣, 𑀭𑀢𑁆𑀢𑀺𑀁 𑀲𑀺𑀗𑁆𑀕𑀸𑀮𑀸 𑀆𑀕𑀦𑁆𑀢𑁆𑀯𑀸 𑀏𑀢𑁂𑀲𑀁 𑀓𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀘𑁄𑀭𑀭𑀜𑁆𑀜𑁄 𑀆𑀡𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀲𑀤𑁆𑀥𑀺𑀁 𑀅𑀫𑀘𑁆𑀘𑁂𑀳𑀺 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀲𑀻𑀮𑀯𑀫𑀳𑀸𑀭𑀸𑀚𑀸 𑀘𑁄𑀭𑀭𑀜𑁆𑀜𑁄 𑀆𑀖𑀸𑀢𑀫𑀢𑁆𑀢𑀫𑁆𑀧𑀺 𑀦𑀸𑀓𑀸𑀲𑀺. 𑀢𑁂𑀲𑀼𑀧𑀺 𑀅𑀫𑀘𑁆𑀘𑁂𑀲𑀼 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸 𑀦𑀻𑀬𑀫𑀸𑀦𑁂𑀲𑀼 𑀏𑀓𑁄𑀧𑀺 𑀭𑀜𑁆𑀜𑁄 𑀯𑀘𑀦𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀏𑀯𑀁 𑀲𑀼𑀯𑀺𑀦𑀻𑀢𑀸 𑀓𑀺𑀭𑀲𑁆𑀲 𑀧𑀭𑀺𑀲𑀸. 𑀅𑀣 𑀢𑁂 𑀭𑀸𑀚𑀧𑀼𑀭𑀺𑀲𑀸 𑀲𑀸𑀫𑀘𑁆𑀘𑀁 𑀲𑀻𑀮𑀯𑀫𑀳𑀸𑀭𑀸𑀚𑀸𑀦𑀁 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑁂 𑀆𑀯𑀸𑀝𑁂 𑀔𑀦𑀺𑀢𑁆𑀯𑀸 𑀲𑀻𑀮𑀯𑀫𑀳𑀸𑀭𑀸𑀚𑀸𑀦𑀁 𑀫𑀚𑁆𑀛𑁂, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑁂𑀲𑀅𑀫𑀘𑁆𑀘𑁂𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀆𑀯𑀸𑀝𑁂𑀲𑀼 𑀑𑀢𑀸𑀭𑁂𑀢𑁆𑀯𑀸 𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀖𑀦𑀁 𑀆𑀓𑁄𑀝𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀢𑀤𑀸 𑀲𑀻𑀮𑀯𑀫𑀳𑀸𑀭𑀸𑀚𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀘𑁄𑀭𑀭𑀜𑁆𑀜𑁄 𑀉𑀧𑀭𑀺 𑀓𑁄𑀧𑀁 𑀅𑀓𑀢𑁆𑀯𑀸 𑀫𑁂𑀢𑁆𑀢𑀁 𑀏𑀯 𑀪𑀸𑀯𑁂𑀣, 𑀢𑀸𑀢𑀸’’𑀢𑀺 𑀑𑀯𑀤𑀺.

𑀅𑀣 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 ‘‘𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀲𑀺𑀗𑁆𑀕𑀸𑀮𑀸 𑀆𑀕𑀫𑀺𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀭𑀸𑀚𑀸 𑀘 𑀅𑀫𑀘𑁆𑀘𑀸 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀤𑁆𑀤𑀫𑀓𑀁𑀲𑀼, 𑀲𑀺𑀗𑁆𑀕𑀸𑀮𑀸 𑀪𑀻𑀢𑀸 𑀧𑀮𑀸𑀬𑀺𑀁𑀲𑀼. 𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸 𑀧𑀘𑁆𑀙𑀢𑁄 𑀓𑀲𑁆𑀲𑀘𑀺 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀇𑀢𑀭𑁂𑀧𑀺 𑀢𑀣𑁂𑀯 𑀲𑀤𑁆𑀤𑀫𑀓𑀁𑀲𑀼. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀑𑀮𑁄𑀓𑁂𑀦𑁆𑀢𑀸 𑀢𑁂𑀲𑀼 𑀏𑀓𑀲𑁆𑀲𑀧𑀺 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀯𑀚𑁆𑀛𑀧𑁆𑀧𑀢𑁆𑀢𑀸 𑀏𑀢𑁂 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀽𑀭𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀢𑁂𑀲𑀼 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 𑀦 𑀧𑀮𑀸𑀬𑀺𑀁𑀲𑀼. 𑀚𑁂𑀝𑁆𑀞𑀓𑀲𑀺𑀗𑁆𑀕𑀸𑀮𑁄 𑀭𑀸𑀚𑀸𑀦𑀁 𑀉𑀧𑀕𑀜𑁆𑀙𑀺, 𑀲𑁂𑀲𑀸 𑀲𑀺𑀗𑁆𑀕𑀸𑀮𑀸 𑀲𑁂𑀲𑀸𑀦𑀁 𑀅𑀫𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀉𑀧𑀸𑀬𑀓𑀼𑀲𑀮𑁄 𑀭𑀸𑀚𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀟𑀁𑀲𑀺𑀢𑀼𑀁 𑀑𑀓𑀸𑀲𑀁 𑀤𑁂𑀦𑁆𑀢𑁄 𑀯𑀺𑀬 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀕𑀻𑀯𑀸𑀬 𑀟𑀁𑀲𑀫𑀸𑀦𑀁 𑀳𑀦𑀼𑀓𑀝𑁆𑀞𑀺𑀓𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀬𑀦𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀬 𑀕𑀸𑀴𑁆𑀳𑀁 𑀕𑀡𑁆𑀳𑀺, 𑀦𑀸𑀕𑀩𑀮𑁂𑀦 𑀭𑀜𑁆𑀜𑀸 𑀳𑀦𑀼𑀓𑀝𑁆𑀞𑀺𑀓𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀕𑀻𑀯𑀸𑀬 𑀕𑀸𑀴𑁆𑀳𑀁 𑀕𑀳𑀺𑀢𑀲𑀺𑀗𑁆𑀕𑀸𑀮𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀅𑀯𑀲𑁂𑀲𑀸 𑀲𑀺𑀗𑁆𑀕𑀸𑀮𑀸 𑀢𑀲𑁆𑀲 𑀢𑀁 𑀅𑀝𑁆𑀝𑀲𑁆𑀲𑀭𑀁 𑀲𑀼𑀢𑁆𑀯𑀸 ‘‘𑀏𑀓𑁂𑀦 𑀧𑀼𑀭𑀺𑀲𑁂𑀦 𑀲𑀼𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀫𑀘𑁆𑀘𑁂 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀲𑀩𑁆𑀩𑁂 𑀧𑀮𑀸𑀬𑀺𑀁𑀲𑀼. 𑀭𑀜𑁆𑀜𑁄 𑀳𑀦𑀼𑀓𑀝𑁆𑀞𑀺𑀓𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀕𑀳𑀺𑀢𑀲𑀺𑀗𑁆𑀕𑀸𑀮𑁂 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁂 𑀧𑀁𑀲𑀼 𑀲𑀺𑀣𑀺𑀮𑀸 𑀅𑀳𑁄𑀲𑀺. 𑀲𑁄𑀧𑀺 𑀲𑀺𑀗𑁆𑀕𑀸𑀮𑁄 𑀫𑀭𑀡𑀪𑀬𑀪𑀻𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀭𑀜𑁆𑀜𑁄 𑀉𑀧𑀭𑀺𑀪𑀸𑀕𑁂 𑀧𑀁𑀲𑀼𑀁 𑀅𑀧𑀩𑁆𑀬𑀽𑀳𑀺, 𑀭𑀸𑀚𑀸 𑀧𑀁𑀲𑀼𑀦𑁄 𑀲𑀺𑀣𑀺𑀮𑀪𑀸𑀯𑀁 𑀜𑀢𑁆𑀯𑀸 𑀲𑀺𑀗𑁆𑀕𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁄 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀯𑀸𑀝𑀫𑀼𑀔𑀯𑀝𑁆𑀝𑀺𑀬𑀁 𑀑𑀮𑀼𑀩𑁆𑀪 𑀯𑀸𑀢𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁄 𑀅𑀫𑀘𑁆𑀘𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀲𑀩𑁆𑀩𑁂 𑀉𑀤𑁆𑀥𑀭𑀺𑀢𑁆𑀯𑀸 𑀅𑀫𑀘𑁆𑀘𑀧𑀭𑀺𑀯𑀼𑀢𑁄 𑀆𑀫𑀓𑀲𑀼𑀲𑀸𑀦𑁂 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀼𑀲𑁆𑀲𑀸 𑀏𑀓𑀁 𑀫𑀢𑀫𑀦𑀼𑀲𑁆𑀲𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑁂𑀦𑁆𑀢𑀸 𑀤𑁆𑀯𑀺𑀦𑁆𑀦𑀁 𑀬𑀓𑁆𑀔𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸𑀬 𑀙𑀟𑁆𑀟𑁂𑀲𑀼𑀁. 𑀢𑁂 𑀬𑀓𑁆𑀔𑀸 𑀢𑀁 𑀫𑀢𑀫𑀦𑀼𑀲𑁆𑀲𑀁 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀦 𑀫𑀬𑀁 𑀇𑀫𑀁 𑀪𑀸𑀚𑁂𑀢𑀼𑀁 𑀲𑀓𑁆𑀓𑁄𑀫, 𑀅𑀬𑀁 𑀲𑀻𑀮𑀯𑀭𑀸𑀚𑀸 𑀥𑀫𑁆𑀫𑀺𑀓𑁄, 𑀏𑀲 𑀦𑁄 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀢𑀺, 𑀏𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀢𑀁 𑀫𑀢𑀫𑀦𑀼𑀲𑁆𑀲𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀇𑀫𑀁 𑀫𑀢𑀓𑀁 𑀪𑀸𑀚𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳𑀁𑀲𑀼. ‘‘𑀪𑁄 𑀬𑀓𑁆𑀔𑀸, 𑀅𑀳𑀁 𑀇𑀫𑀁 𑀢𑀼𑀫𑁆𑀳𑀸𑀓𑀁 𑀪𑀸𑀚𑁂𑀢𑁆𑀯𑀸 𑀤𑀤𑁂𑀬𑁆𑀬𑀁, 𑀅𑀧𑀭𑀺𑀲𑀼𑀤𑁆𑀥𑁄 𑀧𑀦𑀫𑁆𑀳𑀺, 𑀦𑁆𑀳𑀸𑀬𑀺𑀲𑁆𑀲𑀸𑀫𑀺 𑀢𑀸𑀯𑀸’’𑀢𑀺. 𑀬𑀓𑁆𑀔𑀸 𑀘𑁄𑀭𑀭𑀜𑁆𑀜𑁄 𑀞𑀧𑀺𑀢𑀁 𑀯𑀸𑀲𑀺𑀢𑀉𑀤𑀓𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀦𑁆𑀳𑀸𑀦𑀢𑁆𑀣𑀸𑀬 𑀅𑀤𑀁𑀲𑀼. 𑀦𑁆𑀳𑀢𑁆𑀯𑀸 𑀞𑀺𑀢𑀲𑁆𑀲 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑁂 𑀘𑁄𑀭𑀭𑀜𑁆𑀜𑁄 𑀲𑀸𑀝𑀓𑁂 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼, 𑀢𑁂 𑀦𑀺𑀯𑀸𑀲𑁂𑀢𑁆𑀯𑀸 𑀞𑀺𑀢𑀲𑁆𑀲 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀲𑀫𑀼𑀕𑁆𑀕𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼, 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀞𑀺𑀢𑀲𑁆𑀲 𑀲𑀼𑀯𑀡𑁆𑀡𑀲𑀫𑀼𑀕𑁆𑀕𑁂 𑀫𑀡𑀺𑀢𑀸𑀮𑀯𑀡𑁆𑀝𑁂𑀲𑀼 𑀞𑀧𑀺𑀢𑀸𑀦𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀞𑀺𑀢𑀓𑀸𑀮𑁂 ‘‘𑀅𑀜𑁆𑀜𑀁 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀸 𑀅𑀢𑁆𑀢𑀦𑁄 𑀙𑀸𑀢𑀓𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀢𑁂 𑀕𑀦𑁆𑀢𑁆𑀯𑀸 𑀘𑁄𑀭𑀭𑀜𑁆𑀜𑁄 𑀲𑀫𑁆𑀧𑀸𑀤𑀺𑀢𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼, 𑀭𑀸𑀚𑀸 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑁄 𑀲𑀼𑀫𑀡𑁆𑀟𑀺𑀢𑀧𑁆𑀧𑀲𑀸𑀥𑀺𑀢𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺. 𑀬𑀓𑁆𑀔𑀸 𑀘𑁄𑀭𑀭𑀜𑁆𑀜𑁄 𑀞𑀧𑀺𑀢𑀁 𑀯𑀸𑀲𑀺𑀢𑀧𑀸𑀦𑀻𑀬𑀁 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑁂𑀦𑁂𑀯 𑀲𑀼𑀯𑀡𑁆𑀡𑀲𑀭𑀓𑁂𑀦𑀧𑀺 𑀲𑀤𑁆𑀥𑀺𑀁 𑀆𑀳𑀭𑀺𑀁𑀲𑀼. 𑀅𑀣𑀲𑁆𑀲 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀞𑀺𑀢𑀓𑀸𑀮𑁂 𑀘𑁄𑀭𑀭𑀜𑁆𑀜𑁄 𑀲𑀫𑁆𑀧𑀸𑀤𑀺𑀢𑀁 𑀧𑀜𑁆𑀘𑀲𑀼𑀕𑀦𑁆𑀥𑀺𑀓𑀲𑀼𑀧𑀭𑀺𑀪𑀸𑀯𑀺𑀢𑀁 𑀢𑀫𑁆𑀩𑀽𑀮𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀢𑀁 𑀔𑀸𑀤𑀺𑀢𑁆𑀯𑀸 𑀞𑀺𑀢𑀓𑀸𑀮𑁂 ‘‘𑀅𑀜𑁆𑀜𑀁 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀕𑀦𑁆𑀢𑁆𑀯𑀸 𑀘𑁄𑀭𑀭𑀜𑁆𑀜𑁄 𑀉𑀲𑁆𑀲𑀻𑀲𑀓𑁂 𑀦𑀺𑀓𑁆𑀔𑀺𑀢𑁆𑀢𑀁 𑀫𑀗𑁆𑀕𑀮𑀔𑀕𑁆𑀕𑀁 𑀆𑀳𑀭𑀣𑀸𑀢𑀺. 𑀢𑀫𑁆𑀧𑀺 𑀕𑀦𑁆𑀢𑁆𑀯𑀸 𑀆𑀳𑀭𑀺𑀁𑀲𑀼. 𑀭𑀸𑀚𑀸 𑀢𑀁 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀢𑀁 𑀫𑀢𑀫𑀦𑀼𑀲𑁆𑀲𑀁 𑀉𑀚𑀼𑀓𑀁 𑀞𑀧𑀸𑀧𑁂𑀢𑁆𑀯𑀸 𑀫𑀢𑁆𑀣𑀓𑀫𑀚𑁆𑀛𑁂 𑀅𑀲𑀺𑀦𑀸 𑀧𑀳𑀭𑀺𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀬𑀓𑁆𑀔𑀸𑀦𑀁 𑀲𑀫𑀯𑀺𑀪𑀢𑁆𑀢𑀫𑁂𑀯 𑀯𑀺𑀪𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀤𑀢𑁆𑀯𑀸 𑀘 𑀧𑀦 𑀔𑀕𑁆𑀕𑀁 𑀥𑁄𑀯𑀺𑀢𑁆𑀯𑀸 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀢𑁂 𑀬𑀓𑁆𑀔𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀲𑀼𑀳𑀺𑀢𑀸 𑀳𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 ‘‘𑀅𑀜𑁆𑀜𑀁 𑀢𑁂, 𑀫𑀳𑀸𑀭𑀸𑀚, 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀁 𑀘𑁄𑀭𑀭𑀜𑁆𑀜𑁄 𑀲𑀺𑀭𑀺𑀕𑀩𑁆𑀪𑁂 𑀑𑀢𑀸𑀭𑁂𑀣, 𑀇𑀫𑁂 𑀘 𑀅𑀫𑀘𑁆𑀘𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀣𑀸𑀢𑀺. 𑀢𑁂 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀺𑀁 𑀲𑀫𑀬𑁂 𑀘𑁄𑀭𑀭𑀸𑀚𑀸 𑀅𑀮𑀗𑁆𑀓𑀢𑀲𑀺𑀭𑀺𑀕𑀩𑁆𑀪𑁂 𑀲𑀺𑀭𑀺𑀲𑀬𑀦𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀺. 𑀭𑀸𑀚𑀸 𑀢𑀲𑁆𑀲 𑀧𑀫𑀢𑁆𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀔𑀕𑁆𑀕𑀢𑀮𑁂𑀦 𑀉𑀤𑀭𑀁 𑀧𑀳𑀭𑀺. 𑀲𑁄 𑀪𑀻𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀤𑀻𑀧𑀸𑀮𑁄𑀓𑁂𑀦 𑀲𑀻𑀮𑀯𑀫𑀳𑀸𑀭𑀸𑀚𑀸𑀦𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀬𑀦𑀸 𑀉𑀝𑁆𑀞𑀸𑀬 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑁄 𑀭𑀸𑀚𑀸𑀦𑀁 𑀆𑀳 ‘‘𑀫𑀳𑀸𑀭𑀸𑀚, 𑀏𑀯𑀭𑀽𑀧𑀸𑀬 𑀭𑀢𑁆𑀢𑀺𑀬𑀸 𑀕𑀳𑀺𑀢𑀸𑀭𑀓𑁆𑀔𑁂 𑀧𑀺𑀳𑀺𑀢𑀤𑁆𑀯𑀸𑀭𑁂 𑀪𑀯𑀦𑁂 𑀆𑀭𑀓𑁆𑀔𑀫𑀦𑀼𑀲𑁆𑀲𑁂𑀳𑀺 𑀦𑀺𑀭𑁄𑀓𑀸𑀲𑁂 𑀞𑀸𑀦𑁂 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀓𑀣𑀁 𑀦𑀸𑀫 𑀢𑁆𑀯𑀁 𑀇𑀫𑀁 𑀲𑀬𑀦𑀧𑀺𑀝𑁆𑀞𑀁 𑀆𑀕𑀢𑁄𑀲𑀻’’𑀢𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀆𑀕𑀫𑀦𑀸𑀓𑀸𑀭𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀘𑁄𑀭𑀭𑀸𑀚𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 ‘‘𑀫𑀳𑀸𑀭𑀸𑀚, 𑀅𑀳𑀁 𑀫𑀦𑀼𑀲𑁆𑀲𑀪𑀽𑀢𑁄𑀧𑀺 𑀲𑀫𑀸𑀦𑁄 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀦 𑀚𑀸𑀦𑀸𑀫𑀺, 𑀧𑀭𑁂𑀲𑀁 𑀮𑁄𑀳𑀺𑀢𑀫𑀁𑀲𑀔𑀸𑀤𑀓𑁂𑀳𑀺 𑀧𑀦 𑀓𑀓𑁆𑀔𑀴𑁂𑀳𑀺 𑀨𑀭𑀼𑀲𑁂𑀳𑀺 𑀬𑀓𑁆𑀔𑁂𑀳𑀺 𑀢𑀯 𑀕𑀼𑀡𑀸 𑀜𑀸𑀢𑀸, 𑀦 𑀤𑀸𑀦𑀸𑀳𑀁, 𑀦𑀭𑀺𑀦𑁆𑀤, 𑀏𑀯𑀭𑀽𑀧𑁂 𑀲𑀻𑀮𑀲𑀫𑁆𑀧𑀦𑁆𑀦𑁂 𑀢𑀬𑀺 𑀤𑀼𑀩𑁆𑀪𑀺𑀲𑁆𑀲𑀸𑀫𑀻’’𑀢𑀺 𑀔𑀕𑁆𑀕𑀁 𑀆𑀤𑀸𑀬 𑀲𑀧𑀣𑀁 𑀓𑀢𑁆𑀯𑀸 𑀭𑀸𑀚𑀸𑀦𑀁 𑀔𑀫𑀸𑀧𑁂𑀢𑁆𑀯𑀸 𑀫𑀳𑀸𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀔𑀼𑀤𑁆𑀤𑀓𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀉𑀝𑁆𑀞𑀺𑀢𑁂 𑀲𑀽𑀭𑀺𑀬𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀲𑁂𑀦𑀺𑀬𑁄 𑀘 𑀅𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀘 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀆𑀓𑀸𑀲𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀲𑀻𑀮𑀯𑀭𑀜𑁆𑀜𑁄 𑀕𑀼𑀡𑁂 𑀓𑀣𑁂𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀧𑀼𑀦 𑀭𑀸𑀚𑀸𑀦𑀁 𑀔𑀫𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀉𑀧𑁆𑀧𑀦𑁆𑀦𑁄 𑀘𑁄𑀭𑀽𑀧𑀤𑁆𑀤𑀯𑁄 𑀫𑀬𑁆𑀳𑀁 𑀪𑀸𑀭𑁄, 𑀫𑀬𑀸 𑀕𑀳𑀺𑀢𑀸𑀭𑀓𑁆𑀔𑀸 𑀢𑀼𑀫𑁆𑀳𑁂 𑀭𑀚𑁆𑀚𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑁂𑀲𑀼𑀜𑁆𑀜𑀓𑀸𑀭𑀓𑀲𑁆𑀲 𑀆𑀡𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀯𑀸𑀳𑀦𑀁 𑀆𑀤𑀸𑀬 𑀲𑀓𑀭𑀝𑁆𑀞𑀫𑁂𑀯 𑀕𑀢𑁄.

𑀲𑀻𑀮𑀯𑀭𑀸𑀚𑀸𑀧𑀺 𑀔𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀭𑀪𑀧𑀸𑀤𑀓𑁂 𑀓𑀜𑁆𑀘𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀜𑁆𑀘 𑀏𑀯𑀭𑀽𑀧𑀸 𑀲𑀫𑁆𑀧𑀢𑁆𑀢𑀺 𑀅𑀫𑀘𑁆𑀘𑀲𑀳𑀲𑁆𑀲𑀲𑁆𑀲 𑀘 𑀚𑀻𑀯𑀺𑀢𑀧𑀝𑀺𑀮𑀸𑀪𑁄 𑀫𑀬𑀺 𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑁂 𑀦 𑀓𑀺𑀜𑁆𑀘𑀺 𑀅𑀪𑀯𑀺𑀲𑁆𑀲, 𑀯𑀻𑀭𑀺𑀬𑀩𑀮𑁂𑀦 𑀧𑀦𑀸𑀳𑀁 𑀦𑀝𑁆𑀞𑀜𑁆𑀘 𑀇𑀫𑀁 𑀬𑀲𑀁 𑀧𑀝𑀺𑀮𑀪𑀺𑀁, 𑀅𑀫𑀘𑁆𑀘𑀲𑀳𑀲𑁆𑀲𑀲𑁆𑀲 𑀘 𑀚𑀻𑀯𑀺𑀢𑀤𑀸𑀦𑀁 𑀅𑀤𑀸𑀲𑀺𑀁, 𑀆𑀲𑀘𑁆𑀙𑁂𑀤𑀁 𑀯𑀢 𑀅𑀓𑀢𑁆𑀯𑀸 𑀯𑀻𑀭𑀺𑀬𑀫𑁂𑀯 𑀓𑀢𑁆𑀢𑀩𑁆𑀩𑀁. 𑀓𑀢𑀯𑀻𑀭𑀺𑀬𑀲𑁆𑀲 𑀳𑀺 𑀨𑀮𑀁 𑀦𑀸𑀫 𑀏𑀯𑀁 𑀲𑀫𑀺𑀚𑁆𑀛𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁧. ‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀽’’𑀢𑀺.

𑀢𑀢𑁆𑀣 𑀆𑀲𑀻𑀲𑁂𑀣𑁂𑀯𑀸𑀢𑀺 ‘‘𑀏𑀯𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑁄 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑀩𑀮𑁂𑀦 𑀆𑀲𑀁 𑀓𑀭𑁄𑀣𑁂𑀯. 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀢𑁄 𑀉𑀧𑀸𑀬𑀓𑀼𑀲𑀮𑁄 𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 ‘‘𑀅𑀳𑀁 𑀇𑀫𑀲𑁆𑀲 𑀯𑀻𑀭𑀺𑀬𑀲𑁆𑀲 𑀨𑀮𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀦 𑀉𑀓𑁆𑀓𑀡𑁆𑀞𑁂𑀬𑁆𑀬, 𑀆𑀲𑀘𑁆𑀙𑁂𑀤𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀳𑀁 𑀅𑀚𑁆𑀚 𑀅𑀢𑁆𑀢𑀸𑀦𑀁 𑀧𑀲𑁆𑀲𑀸𑀫𑀺. 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀽𑀢𑀺 𑀅𑀳𑀜𑁆𑀳𑀺 𑀆𑀯𑀸𑀝𑁂 𑀦𑀺𑀔𑀸𑀢𑁄 𑀢𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀺𑀁, 𑀲𑁄 𑀅𑀳𑀁 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀲𑁆𑀲𑀸𑀫𑀺. 𑀬𑀣𑁂𑀯𑀸𑀳𑀁 𑀧𑀼𑀩𑁆𑀩𑁂 𑀇𑀘𑁆𑀙𑀺𑀁, 𑀢𑀣𑁂𑀯 𑀫𑁂 𑀅𑀢𑁆𑀢𑀸 𑀚𑀸𑀢𑁄𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑁄 𑀯𑀢 𑀪𑁄 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀯𑀻𑀭𑀺𑀬𑀨𑀮𑀁 𑀦𑀸𑀫 𑀲𑀫𑀺𑀚𑁆𑀛𑀢𑀻’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀤𑀼𑀝𑁆𑀞𑀸𑀫𑀘𑁆𑀘𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀅𑀫𑀘𑁆𑀘𑀲𑀳𑀲𑁆𑀲𑀁 𑀩𑀼𑀤𑁆𑀥𑀧𑀭𑀺𑀲𑀸, 𑀲𑀻𑀮𑀯𑀫𑀳𑀸𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀲𑀻𑀮𑀯𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁫𑁨] 𑁨. 𑀘𑀽𑀴𑀚𑀦𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀫𑁂𑀯𑀸𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀫𑀳𑀸𑀚𑀦𑀓𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁨𑁩 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀚𑀦𑀓𑀭𑀸𑀚𑀸 𑀧𑀦 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁨. ‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢’’𑀦𑁆𑀢𑀺.

𑀢𑀢𑁆𑀣 𑀯𑀸𑀬𑀫𑁂𑀣𑁂𑀯𑀸𑀢𑀺 𑀯𑀸𑀬𑀸𑀫𑀁 𑀓𑀭𑁄𑀣𑁂𑀯. 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀦𑁆𑀢𑀺 𑀉𑀤𑀓𑀢𑁄 𑀣𑀮𑀫𑀼𑀢𑁆𑀢𑀺𑀡𑁆𑀡𑀁 𑀣𑀮𑁂 𑀧𑀢𑀺𑀝𑁆𑀞𑀺𑀢𑀁 𑀅𑀢𑁆𑀢𑀸𑀦𑀁 𑀧𑀲𑁆𑀲𑀸𑀫𑀻𑀢𑀺. 𑀇𑀥𑀸𑀧𑀺 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀚𑀦𑀓𑀭𑀸𑀚𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀅𑀳𑁄𑀲𑀻𑀢𑀺.

𑀘𑀽𑀴𑀚𑀦𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁫𑁩] 𑁩. 𑀧𑀼𑀡𑁆𑀡𑀧𑀸𑀢𑀺𑀚𑀸𑀢𑀓𑀯𑀡𑁆𑀡𑀦𑀸

𑀢𑀣𑁂𑀯 𑀧𑀼𑀡𑁆𑀡𑀸 𑀧𑀸𑀢𑀺𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀯𑀸𑀭𑀼𑀡𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀁 𑀲𑀫𑀬𑀁 𑀲𑀸𑀯𑀢𑁆𑀣𑀺𑀬𑀁 𑀲𑀼𑀭𑀸𑀥𑀼𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀼𑀭𑀸𑀫𑀽𑀮𑀁 𑀦𑁄 𑀔𑀻𑀡𑀁, 𑀓𑀳𑀁 𑀦𑀼 𑀔𑁄 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀅𑀣𑁂𑀓𑁄 𑀓𑀓𑁆𑀔𑀴𑀥𑀼𑀢𑁆𑀢𑁄 𑀆𑀳 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺. ‘‘𑀓𑀢𑀭𑁄 𑀉𑀧𑀸𑀬𑁄 𑀦𑀸𑀫𑀸’’𑀢𑀺? ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀫𑀝𑁆𑀞𑀲𑀸𑀝𑀓𑀦𑀺𑀯𑀢𑁆𑀣𑁄 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀫𑀬𑀁 𑀲𑀼𑀭𑀸𑀧𑀸𑀢𑀺𑀬𑀁 𑀯𑀺𑀲𑀜𑁆𑀜𑀻𑀓𑀭𑀡𑀁 𑀪𑁂𑀲𑀚𑁆𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀧𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀕𑀫𑀦𑀓𑀸𑀮𑁂 ‘𑀇𑀢𑁄 𑀏𑀳𑀺 𑀫𑀳𑀸𑀲𑁂𑀝𑁆𑀞𑀻’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀁 𑀲𑀼𑀭𑀁 𑀧𑀸𑀬𑁂𑀢𑁆𑀯𑀸 𑀯𑀺𑀲𑀜𑁆𑀜𑀻𑀪𑀽𑀢𑀲𑁆𑀲 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸 𑀘 𑀲𑀸𑀝𑀓𑁂 𑀘 𑀕𑀳𑁂𑀢𑁆𑀯𑀸 𑀲𑀼𑀭𑀸𑀫𑀽𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀆𑀕𑀫𑀦𑀓𑀸𑀮𑁂 𑀧𑀝𑀺𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀇𑀢𑁄 𑀢𑀸𑀯 𑀆𑀕𑀘𑁆𑀙𑀣, 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀅𑀢𑀺𑀫𑀦𑀸𑀧𑀸 𑀲𑀼𑀭𑀸, 𑀣𑁄𑀓𑀁 𑀧𑀺𑀯𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀯𑀤𑀺𑀁𑀲𑀼. 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀓𑀺𑀁 𑀲𑀼𑀭𑀁 𑀧𑀺𑀯𑀺𑀲𑁆𑀲𑀢𑀺, 𑀅𑀦𑀢𑁆𑀣𑀺𑀓𑁄 𑀲𑀫𑀸𑀦𑁄𑀧𑀺 𑀧𑀦 ‘‘𑀇𑀫𑁂 𑀥𑀼𑀢𑁆𑀢𑁂 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀆𑀧𑀸𑀦𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀺𑀭𑀺𑀬𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀲𑀼𑀭𑀸 𑀇𑀫𑁂𑀳𑀺 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀬𑁄𑀚𑀺𑀢𑀸’’𑀢𑀺 𑀜𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀇𑀫𑁂 𑀇𑀢𑁄 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀳𑀭𑁂 𑀤𑀼𑀝𑁆𑀞𑀥𑀼𑀢𑁆𑀢𑀸, 𑀢𑀼𑀫𑁆𑀳𑁂 ‘𑀲𑀼𑀭𑀸𑀧𑀸𑀢𑀺𑀬𑀁 𑀪𑁂𑀲𑀚𑁆𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑀸𑀕𑀢𑁂 𑀧𑀸𑀬𑁂𑀢𑁆𑀯𑀸 𑀯𑀺𑀲𑀜𑁆𑀜𑀻 𑀓𑀢𑁆𑀯𑀸 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’𑀢𑀺 𑀆𑀧𑀸𑀦𑀫𑀡𑁆𑀟𑀮𑀁 𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀓𑁂𑀯𑀮𑀁 𑀇𑀫𑀁 𑀲𑀼𑀭𑀁 𑀯𑀡𑁆𑀡𑁂𑀣, 𑀏𑀓𑁄𑀧𑀺 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀯𑀺𑀢𑀼𑀁 𑀦 𑀉𑀲𑁆𑀲𑀳𑀢𑀺. 𑀲𑀘𑁂 𑀅𑀬𑀁 𑀅𑀬𑁄𑀚𑀺𑀢𑀸 𑀅𑀲𑁆𑀲, 𑀇𑀫𑀁 𑀢𑀼𑀫𑁆𑀳𑁂𑀯 𑀧𑀺𑀯𑁂𑀬𑁆𑀬𑀸𑀣𑀸’’𑀢𑀺 𑀢𑁂 𑀥𑀼𑀢𑁆𑀢𑁂 𑀢𑀚𑁆𑀚𑁂𑀢𑁆𑀯𑀸 𑀢𑀢𑁄 𑀧𑀮𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀥𑀼𑀢𑁆𑀢𑁂𑀳𑀺 𑀓𑀢𑀓𑀸𑀭𑀡𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀇𑀤𑀸𑀦𑀺 𑀢𑀸𑀯 𑀕𑀳𑀧𑀢𑀺 𑀢𑁂 𑀥𑀼𑀢𑁆𑀢𑀸 𑀢𑀁 𑀯𑀜𑁆𑀘𑁂𑀢𑀼𑀓𑀸𑀫𑀸 𑀚𑀸𑀢𑀸, 𑀧𑀼𑀩𑁆𑀩𑁂 𑀧𑀦 𑀧𑀡𑁆𑀟𑀺𑀢𑁂𑀧𑀺 𑀯𑀜𑁆𑀘𑁂𑀢𑀼𑀓𑀸𑀫𑀸 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀤𑀸𑀧𑁂𑀢𑁂 𑀥𑀼𑀢𑁆𑀢𑀸 𑀏𑀯𑀫𑁂𑀯 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 𑀲𑀼𑀭𑀁 𑀬𑁄𑀚𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀆𑀕𑀫𑀦𑀓𑀸𑀮𑁂 𑀧𑀝𑀺𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀯𑀫𑁂𑀯 𑀓𑀣𑀬𑀺𑀁𑀲𑀼. 𑀲𑁂𑀝𑁆𑀞𑀺 𑀅𑀦𑀢𑁆𑀣𑀺𑀓𑁄𑀧𑀺 𑀳𑀼𑀢𑁆𑀯𑀸 𑀢𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀺𑀭𑀺𑀬𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀦𑀸𑀫𑁂𑀢𑁂 𑀓𑀸𑀢𑀼𑀓𑀸𑀫𑀸, 𑀧𑀮𑀸𑀧𑁂𑀲𑁆𑀲𑀸𑀫𑀺 𑀦𑁂 𑀇𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀪𑁄𑀦𑁆𑀢𑁄, 𑀥𑀼𑀢𑁆𑀢𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑀼𑀁 𑀦𑀸𑀫 𑀅𑀬𑀼𑀢𑁆𑀢𑀁, 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑁄 𑀚𑀸𑀦𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀇𑀥𑁂𑀯 𑀦𑀺𑀲𑀻𑀤𑀣𑀸’’𑀢𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀜𑁆𑀙𑀺. 𑀥𑀼𑀢𑁆𑀢𑀸 ‘‘𑀇𑀢𑁄 𑀏𑀣, 𑀲𑀸𑀫𑀻’’𑀢𑀺. 𑀲𑁄𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑁂𑀲𑀚𑁆𑀚𑁂𑀦 𑀲𑀁𑀬𑁄𑀚𑀺𑀢𑀸 𑀲𑀼𑀭𑀸𑀧𑀸𑀢𑀺𑀬𑁄 𑀑𑀮𑁄𑀓𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀪𑁄𑀦𑁆𑀢𑁄 𑀥𑀼𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀓𑀺𑀭𑀺𑀬𑀸 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺, 𑀢𑀼𑀫𑁆𑀳𑀸𑀓𑀁 𑀲𑀼𑀭𑀸𑀧𑀸𑀢𑀺𑀬𑁄 𑀬𑀣𑀸𑀧𑀽𑀭𑀺𑀢𑀸𑀯 𑀞𑀺𑀢𑀸, 𑀢𑀼𑀫𑁆𑀳𑁂 𑀓𑁂𑀯𑀮𑀁 𑀲𑀼𑀭𑀁 𑀯𑀡𑁆𑀡𑁂𑀣, 𑀦 𑀧𑀦 𑀧𑀺𑀯𑀣. 𑀲𑀘𑀸𑀬𑀁 𑀫𑀦𑀸𑀧𑀸 𑀅𑀲𑁆𑀲, 𑀢𑀼𑀫𑁆𑀳𑁂𑀧𑀺 𑀧𑀺𑀯𑁂𑀬𑁆𑀬𑀸𑀣, 𑀇𑀫𑀸𑀬 𑀧𑀦 𑀯𑀺𑀲𑀲𑀁𑀬𑀼𑀢𑁆𑀢𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑁂𑀲𑀁 𑀫𑀦𑁄𑀭𑀣𑀁 𑀪𑀺𑀦𑁆𑀤𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁩. ‘‘𑀢𑀣𑁂𑀯 𑀧𑀼𑀡𑁆𑀡𑀸 𑀧𑀸𑀢𑀺𑀬𑁄, 𑀅𑀜𑁆𑀜𑀸𑀬𑀁 𑀯𑀢𑁆𑀢𑀢𑁂 𑀓𑀣𑀸;

𑀆𑀓𑀸𑀭𑀡𑁂𑀦 𑀚𑀸𑀦𑀸𑀫𑀺, 𑀦 𑀘𑀸𑀬𑀁 𑀪𑀤𑁆𑀤𑀺𑀓𑀸 𑀲𑀼𑀭𑀸’’𑀢𑀺.

𑀢𑀢𑁆𑀣 𑀢𑀣𑁂𑀯𑀸𑀢𑀺 𑀬𑀣𑀸 𑀫𑀬𑀸 𑀕𑀫𑀦𑀓𑀸𑀮𑁂 𑀤𑀺𑀝𑁆𑀞𑀸, 𑀇𑀤𑀸𑀦𑀺𑀧𑀺 𑀇𑀫𑀸 𑀲𑀼𑀭𑀸𑀧𑀸𑀢𑀺𑀬𑁄 𑀢𑀣𑁂𑀯 𑀧𑀼𑀡𑁆𑀡𑀸. 𑀅𑀜𑁆𑀜𑀸𑀬𑀁 𑀯𑀢𑁆𑀢𑀢𑁂 𑀓𑀣𑀸𑀢𑀺 𑀬𑀸 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀲𑀼𑀭𑀸𑀯𑀡𑁆𑀡𑀦𑀓𑀣𑀸 𑀯𑀢𑁆𑀢𑀢𑀺, 𑀲𑀸 𑀅𑀜𑁆𑀜𑀸𑀯 𑀅𑀪𑀽𑀢𑀸 𑀅𑀢𑀘𑁆𑀙𑀸. 𑀬𑀤𑀺 𑀳𑀺 𑀏𑀲𑀸 𑀲𑀼𑀭𑀸 𑀫𑀦𑀸𑀧𑀸 𑀅𑀲𑁆𑀲, 𑀢𑀼𑀫𑁆𑀳𑁂𑀧𑀺 𑀧𑀺𑀯𑁂𑀬𑁆𑀬𑀸𑀣, 𑀉𑀧𑀟𑁆𑀠𑀧𑀸𑀢𑀺𑀬𑁄 𑀅𑀯𑀲𑀺𑀲𑁆𑀲𑁂𑀬𑁆𑀬𑀼𑀁. 𑀢𑀼𑀫𑁆𑀳𑀸𑀓𑀁 𑀧𑀦 𑀏𑀓𑁂𑀦𑀸𑀧𑀺 𑀲𑀼𑀭𑀸 𑀦 𑀧𑀻𑀢𑀸. 𑀆𑀓𑀸𑀭𑀡𑁂𑀦 𑀚𑀸𑀦𑀸𑀫𑀻𑀢𑀺 𑀢𑀲𑁆𑀫𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀫𑀺. 𑀦 𑀘𑀸𑀬𑀁 𑀪𑀤𑁆𑀤𑀺𑀓𑀸 𑀲𑀼𑀭𑀸𑀢𑀺 ‘‘𑀦𑁂𑀯𑀸𑀬𑀁 𑀪𑀤𑁆𑀤𑀺𑀓𑀸 𑀲𑀼𑀭𑀸, 𑀯𑀺𑀲𑀲𑀁𑀬𑁄𑀚𑀺𑀢𑀸𑀬 𑀏𑀢𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀥𑀼𑀢𑁆𑀢𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀬𑀣𑀸 𑀦 𑀧𑀼𑀦 𑀏𑀯𑀭𑀽𑀧𑀁 𑀓𑀭𑁄𑀦𑁆𑀢𑀺, 𑀢𑀣𑀸 𑀢𑁂 𑀢𑀚𑁆𑀚𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀥𑀼𑀢𑁆𑀢𑀸 𑀏𑀢𑀭𑀳𑀺 𑀥𑀼𑀢𑁆𑀢𑀸, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀡𑁆𑀡𑀧𑀸𑀢𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁫𑁪] 𑁪. 𑀓𑀺𑀁𑀨𑀮𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀬𑀁 𑀭𑀼𑀓𑁆𑀔𑁄 𑀤𑀼𑀭𑀸𑀭𑀼𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀨𑀮𑀓𑀼𑀲𑀮𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀝𑀼𑀫𑁆𑀩𑀺𑀓𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀭𑀸𑀫𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀆𑀡𑀸𑀧𑁂𑀲𑀺 ‘‘𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑁂 𑀯𑀺𑀘𑀭𑀺𑀢𑁆𑀯𑀸 𑀅𑀬𑁆𑀬𑀸𑀦𑀁 𑀅𑀫𑁆𑀩𑀸𑀤𑀻𑀦𑀺 𑀦𑀸𑀦𑀸𑀨𑀮𑀸𑀦𑀺 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀗𑁆𑀖𑀫𑀸𑀤𑀸𑀬 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑁄 𑀭𑀼𑀓𑁆𑀔𑀁 𑀉𑀮𑁆𑀮𑁄𑀓𑁂𑀢𑁆𑀯𑀸𑀯 ‘‘𑀏𑀢𑀁 𑀨𑀮𑀁 𑀆𑀫𑀁, 𑀏𑀢𑀁 𑀦 𑀲𑀼𑀧𑀓𑁆𑀓𑀁, 𑀏𑀢𑀁 𑀲𑀼𑀧𑀓𑁆𑀓’’𑀦𑁆𑀢𑀺 𑀚𑀸𑀦𑀸𑀢𑀺. 𑀬𑀁 𑀲𑁄 𑀯𑀤𑀢𑀺, 𑀢𑀁 𑀢𑀣𑁂𑀯 𑀳𑁄𑀢𑀺. 𑀪𑀺𑀓𑁆𑀔𑀽 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀪𑀦𑁆𑀢𑁂, 𑀅𑀬𑀁 𑀉𑀬𑁆𑀬𑀸𑀦𑀧𑀸𑀮𑁄 𑀨𑀮𑀓𑀼𑀲𑀮𑁄 𑀪𑀽𑀫𑀺𑀬𑀁 𑀞𑀺𑀢𑁄𑀯 𑀭𑀼𑀓𑁆𑀔𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 ‘𑀏𑀢𑀁 𑀨𑀮𑀁 𑀆𑀫𑀁, 𑀏𑀢𑀁 𑀦 𑀲𑀼𑀧𑀓𑁆𑀓𑀁, 𑀏𑀢𑀁 𑀲𑀼𑀧𑀓𑁆𑀓’𑀦𑁆𑀢𑀺 𑀚𑀸𑀦𑀸𑀢𑀺. 𑀬𑀁 𑀲𑁄 𑀯𑀤𑀢𑀺, 𑀢𑀁 𑀢𑀣𑁂𑀯 𑀳𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀫𑁂𑀯 𑀉𑀬𑁆𑀬𑀸𑀦𑀧𑀸𑀮𑁄 𑀨𑀮𑀓𑀼𑀲𑀮𑁄, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸𑀧𑀺 𑀨𑀮𑀓𑀼𑀲𑀮𑀸𑀬𑁂𑀯 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀣𑀯𑀸𑀳𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀺𑀁 𑀧𑀢𑁆𑀯𑀸 𑀅𑀝𑀯𑀺𑀫𑀼𑀔𑁂 𑀞𑀢𑁆𑀯𑀸 𑀲𑀩𑁆𑀩𑁂 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀅𑀝𑀯𑀺𑀬𑀸 𑀯𑀺𑀲𑀭𑀼𑀓𑁆𑀔𑀸 𑀦𑀸𑀫 𑀳𑁄𑀦𑁆𑀢𑀺, 𑀯𑀺𑀲𑀧𑀢𑁆𑀢𑀸𑀦𑀺, 𑀯𑀺𑀲𑀧𑀼𑀧𑁆𑀨𑀸𑀦𑀺, 𑀯𑀺𑀲𑀨𑀮𑀸𑀦𑀺, 𑀯𑀺𑀲𑀫𑀥𑀽𑀦𑀺 𑀳𑁄𑀦𑁆𑀢𑀺𑀬𑁂𑀯, 𑀧𑀼𑀩𑁆𑀩𑁂 𑀢𑀼𑀫𑁆𑀳𑁂𑀳𑀺 𑀅𑀧𑀭𑀺𑀪𑀼𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀧𑀮𑁆𑀮𑀯𑀁 𑀯𑀸 𑀫𑀁 𑀅𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀸 𑀔𑀸𑀤𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀝𑀯𑀺𑀁 𑀑𑀢𑀭𑀺𑀁𑀲𑀼. 𑀅𑀝𑀯𑀺𑀫𑀼𑀔𑁂 𑀘 𑀏𑀓𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀓𑀺𑀁𑀨𑀮𑀭𑀼𑀓𑁆𑀔𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲 𑀔𑀦𑁆𑀥𑀲𑀸𑀔𑀸𑀧𑀮𑀸𑀲𑀧𑀼𑀧𑁆𑀨𑀨𑀮𑀸𑀦𑀺 𑀲𑀩𑁆𑀩𑀸𑀦𑀺 𑀅𑀫𑁆𑀩𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀓𑁂𑀯𑀮𑀁 𑀯𑀡𑁆𑀡𑀲𑀡𑁆𑀞𑀸𑀦𑀢𑁄𑀯, 𑀕𑀦𑁆𑀥𑀭𑀲𑁂𑀳𑀺𑀧𑀺𑀲𑁆𑀲 𑀆𑀫𑀧𑀓𑁆𑀓𑀸𑀦𑀺 𑀨𑀮𑀸𑀦𑀺 𑀅𑀫𑁆𑀩𑀨𑀮𑀲𑀤𑀺𑀲𑀸𑀦𑁂𑀯, 𑀔𑀸𑀤𑀺𑀢𑀸𑀦𑀺 𑀧𑀦 𑀳𑀮𑀸𑀳𑀮𑀯𑀺𑀲𑀁 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸 𑀏𑀓𑀘𑁆𑀘𑁂 𑀮𑁄𑀮𑀧𑀼𑀭𑀺𑀲𑀸 ‘‘𑀅𑀫𑁆𑀩𑀼𑀭𑀼𑀓𑁆𑀔𑁄 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀨𑀮𑀸𑀦𑀺 𑀔𑀸𑀤𑀺𑀁𑀲𑀼, 𑀏𑀓𑀘𑁆𑀘𑁂 ‘‘𑀲𑀢𑁆𑀣𑀯𑀸𑀳𑀁 𑀧𑀼𑀘𑁆𑀙𑀺𑀢𑁆𑀯𑀸𑀯 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂 𑀲𑀢𑁆𑀣𑀯𑀸𑀳𑁂 𑀆𑀕𑀢𑁂 ‘‘𑀅𑀬𑁆𑀬, 𑀇𑀫𑀸𑀦𑀺 𑀅𑀫𑁆𑀩𑀨𑀮𑀸𑀦𑀺 𑀔𑀸𑀤𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀸𑀬𑀁 𑀅𑀫𑁆𑀩𑀭𑀼𑀓𑁆𑀔𑁄’’𑀢𑀺 𑀜𑀢𑁆𑀯𑀸 ‘‘𑀓𑀺𑀁 𑀨𑀮𑀭𑀼𑀓𑁆𑀔𑁄 𑀦𑀸𑀫𑁂𑀲, 𑀦𑀸𑀬𑀁 𑀅𑀫𑁆𑀩𑀭𑀼𑀓𑁆𑀔𑁄, 𑀫𑀸 𑀔𑀸𑀤𑀺𑀢𑁆𑀣𑀸’’𑀢𑀺 𑀯𑀸𑀭𑁂𑀢𑁆𑀯𑀸 𑀬𑁂 𑀔𑀸𑀤𑀺𑀁𑀲𑀼. 𑀢𑁂𑀧𑀺 𑀯𑀫𑀸𑀧𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀁 𑀧𑀸𑀬𑁂𑀢𑁆𑀯𑀸 𑀦𑀺𑀭𑁄𑀕𑁂 𑀅𑀓𑀸𑀲𑀺.

𑀧𑀼𑀩𑁆𑀩𑁂 𑀧𑀦 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀫𑀦𑀼𑀲𑁆𑀲𑀸 𑀦𑀺𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 ‘‘𑀅𑀫𑁆𑀩𑀨𑀮𑀸𑀦𑀻’’𑀢𑀺 𑀲𑀜𑁆𑀜𑀸𑀬 𑀇𑀫𑀸𑀦𑀺 𑀯𑀺𑀲𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀧𑀼𑀦𑀤𑀺𑀯𑀲𑁂 𑀕𑀸𑀫𑀯𑀸𑀲𑀺𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀢𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀧𑀸𑀤𑁂 𑀕𑀡𑁆𑀳𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀲𑀓𑀝𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀲𑀩𑁆𑀩𑀁 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀁 𑀤𑀺𑀯𑀲𑀫𑁆𑀧𑀺 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂𑀬𑁂𑀯 ‘‘𑀫𑀬𑁆𑀳𑀁 𑀩𑀮𑀺𑀩𑀤𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀲𑀓𑀝𑀁, 𑀫𑀬𑁆𑀳𑀁 𑀪𑀡𑁆𑀟’’𑀦𑁆𑀢𑀺 𑀯𑁂𑀕𑁂𑀦 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀦𑀺𑀭𑁄𑀕𑁂 𑀤𑀺𑀲𑁆𑀯𑀸 ‘‘𑀓𑀣𑀁 𑀢𑀼𑀫𑁆𑀳𑁂 𑀇𑀫𑀁 𑀭𑀼𑀓𑁆𑀔𑀁 ‘𑀦𑀸𑀬𑀁 𑀅𑀫𑁆𑀩𑀭𑀼𑀓𑁆𑀔𑁄’𑀢𑀺 𑀚𑀸𑀦𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂 ‘‘𑀫𑀬𑀁 𑀦 𑀚𑀸𑀦𑀸𑀫, 𑀲𑀢𑁆𑀣𑀯𑀸𑀳𑀚𑁂𑀝𑁆𑀞𑀓𑁄 𑀦𑁄 𑀚𑀸𑀦𑀸𑀢𑀻’’𑀢𑀺 𑀆𑀳𑀁𑀲𑀼. 𑀫𑀦𑀼𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀧𑀡𑁆𑀟𑀺𑀢, 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀢𑁆𑀯𑀁 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀦𑀫𑁆𑀩𑀭𑀼𑀓𑁆𑀔𑀪𑀸𑀯𑀁 𑀅𑀜𑁆𑀜𑀸𑀲𑀻’’𑀢𑀺? 𑀲𑁄 ‘‘𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀜𑁆𑀜𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁪. ‘‘𑀦𑀸𑀬𑀁 𑀭𑀼𑀓𑁆𑀔𑁄 𑀤𑀼𑀭𑀸𑀭𑀼𑀳𑁄, 𑀦𑀧𑀺 𑀕𑀸𑀫𑀢𑁄 𑀆𑀭𑀓𑀸;

𑀆𑀓𑀸𑀭𑀡𑁂𑀦 𑀚𑀸𑀦𑀸𑀫𑀺, 𑀦𑀸𑀬𑀁 𑀲𑀸𑀤𑀼𑀨𑀮𑁄 𑀤𑀼𑀫𑁄’’𑀢𑀺.

𑀢𑀢𑁆𑀣 𑀦𑀸𑀬𑀁 𑀭𑀼𑀓𑁆𑀔𑁄 𑀤𑀼𑀭𑀸𑀭𑀼𑀳𑁄𑀢𑀺 𑀅𑀬𑀁 𑀯𑀺𑀲𑀭𑀼𑀓𑁆𑀔𑁄 𑀦 𑀤𑀼𑀓𑁆𑀔𑀸𑀭𑀼𑀳𑁄, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀦𑀺𑀲𑁆𑀲𑁂𑀡𑀻 𑀯𑀺𑀬 𑀲𑀼𑀔𑁂𑀦𑀸𑀭𑁄𑀳𑀺𑀢𑀼𑀁 𑀲𑀓𑁆𑀓𑀸𑀢𑀺 𑀯𑀤𑀢𑀺. 𑀦𑀧𑀺 𑀕𑀸𑀫𑀢𑁄 𑀆𑀭𑀓𑀸𑀢𑀺 𑀕𑀸𑀫𑀢𑁄 𑀤𑀽𑀭𑁂 𑀞𑀺𑀢𑁄𑀧𑀺 𑀦 𑀳𑁄𑀢𑀺, 𑀕𑀸𑀫𑀤𑁆𑀯𑀸𑀭𑁂 𑀞𑀺𑀢𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀆𑀓𑀸𑀭𑀡𑁂𑀦 𑀚𑀸𑀦𑀸𑀫𑀻𑀢𑀺 𑀇𑀫𑀺𑀦𑀸 𑀤𑀼𑀯𑀺𑀥𑁂𑀦 𑀓𑀸𑀭𑀡𑁂𑀦𑀸𑀳𑀁 𑀇𑀫𑀁 𑀭𑀼𑀓𑁆𑀔𑀁 𑀚𑀸𑀦𑀸𑀫𑀺. 𑀓𑀺𑀦𑁆𑀢𑀺? 𑀦𑀸𑀬𑀁 𑀲𑀸𑀤𑀼𑀨𑀮𑁄 𑀤𑀼𑀫𑁄𑀢𑀺. 𑀲𑀘𑁂 𑀳𑀺 𑀅𑀬𑀁 𑀫𑀥𑀼𑀭𑀨𑀮𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀪𑀯𑀺𑀲𑁆𑀲, 𑀏𑀯𑀁 𑀲𑀼𑀔𑀸𑀭𑀼𑀴𑁆𑀳𑁂 𑀅𑀯𑀺𑀤𑀽𑀭𑁂 𑀞𑀺𑀢𑁂 𑀏𑀢𑀲𑁆𑀫𑀺𑀁 𑀏𑀓𑀫𑁆𑀧𑀺 𑀨𑀮𑀁 𑀦 𑀢𑀺𑀝𑁆𑀞𑁂𑀬𑁆𑀬, 𑀨𑀮𑀔𑀸𑀤𑀓𑀫𑀦𑀼𑀲𑁆𑀲𑁂𑀳𑀺 𑀦𑀺𑀘𑁆𑀘𑀁 𑀧𑀭𑀺𑀯𑀼𑀢𑁄𑀯 𑀅𑀲𑁆𑀲. 𑀏𑀯𑀁 𑀅𑀳𑀁 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀇𑀫𑀲𑁆𑀲 𑀯𑀺𑀲𑀭𑀼𑀓𑁆𑀔𑀪𑀸𑀯𑀁 𑀅𑀜𑁆𑀜𑀸𑀲𑀺𑀦𑁆𑀢𑀺 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑁄𑀢𑁆𑀣𑀺𑀕𑀫𑀦𑀁 𑀕𑀢𑁄.

𑀲𑀢𑁆𑀣𑀸𑀧𑀺 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸𑀧𑀺 𑀨𑀮𑀓𑀼𑀲𑀮𑀸 𑀅𑀳𑁂𑀲𑀼’’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀲𑀢𑁆𑀣𑀯𑀸𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀺𑀁𑀨𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁫𑁫] 𑁫. 𑀧𑀜𑁆𑀘𑀸𑀯𑀼𑀥𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀅𑀮𑀻𑀦𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀝𑁆𑀞𑀲𑀢𑁂 𑀩𑁆𑀭𑀸𑀳𑁆𑀫𑀡𑁂 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀮𑀓𑁆𑀔𑀡𑀸𑀦𑀺 𑀧𑀼𑀘𑁆𑀙𑀺𑀁𑀲𑀼. 𑀮𑀓𑁆𑀔𑀡𑀓𑀼𑀲𑀮𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑁄, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑁄 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀜𑁆𑀘𑀸𑀯𑀼𑀥𑀓𑀫𑁆𑀫𑁂 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄 𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀧𑀼𑀭𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 ‘‘𑀧𑀜𑁆𑀘𑀸𑀯𑀼𑀥𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀅𑀣 𑀦𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑁂 𑀞𑀺𑀢𑀁 𑀭𑀸𑀚𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀆𑀳. ‘‘𑀓𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀸𑀫𑀺, 𑀤𑁂𑀯𑀸’’𑀢𑀺? ‘‘𑀕𑀘𑁆𑀙, 𑀢𑀸𑀢, 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀦𑀕𑀭𑁂 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳, 𑀇𑀤𑀜𑁆𑀘𑀲𑁆𑀲 𑀆𑀘𑀭𑀺𑀬𑀪𑀸𑀕𑀁 𑀤𑀚𑁆𑀚𑁂𑀬𑁆𑀬𑀸𑀲𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀆𑀘𑀭𑀺𑀬𑁂𑀦 𑀤𑀺𑀦𑁆𑀦𑀁 𑀧𑀜𑁆𑀘𑀸𑀯𑀼𑀥𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀩𑀸𑀭𑀸𑀡𑀲𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀺𑀮𑁂𑀲𑀮𑁄𑀫𑀬𑀓𑁆𑀔𑁂𑀦 𑀦𑀸𑀫 𑀅𑀥𑀺𑀝𑁆𑀞𑀺𑀢𑀁 𑀏𑀓𑀁 𑀅𑀝𑀯𑀺𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀅𑀝𑀯𑀺𑀫𑀼𑀔𑁂 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀪𑁄 𑀫𑀸𑀡𑀯, 𑀫𑀸 𑀇𑀫𑀁 𑀅𑀝𑀯𑀺𑀁 𑀧𑀯𑀺𑀲, 𑀲𑀺𑀮𑁂𑀲𑀮𑁄𑀫𑀬𑀓𑁆𑀔𑁄 𑀦𑀸𑀫𑁂𑀢𑁆𑀣 𑀅𑀢𑁆𑀣𑀺, 𑀲𑁄 𑀤𑀺𑀝𑁆𑀞𑀤𑀺𑀝𑁆𑀞𑁂 𑀫𑀦𑀼𑀲𑁆𑀲𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀻’’𑀢𑀺 𑀯𑀸𑀭𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀦𑁆𑀢𑁄 𑀅𑀲𑀫𑁆𑀪𑀻𑀢𑀓𑁂𑀲𑀭𑀲𑀻𑀳𑁄 𑀯𑀺𑀬 𑀅𑀝𑀯𑀺𑀁 𑀧𑀸𑀯𑀺𑀲𑀺𑀬𑁂𑀯. 𑀢𑀲𑁆𑀫𑀺𑀁 𑀅𑀝𑀯𑀺𑀫𑀚𑁆𑀛𑀁 𑀲𑀫𑁆𑀧𑀢𑁆𑀢𑁂 𑀲𑁄 𑀬𑀓𑁆𑀔𑁄 𑀢𑀸𑀮𑀫𑀢𑁆𑀢𑁄 𑀳𑀼𑀢𑁆𑀯𑀸 𑀓𑀽𑀝𑀸𑀕𑀸𑀭𑀫𑀢𑁆𑀢𑀁 𑀲𑀻𑀲𑀁 𑀧𑀢𑁆𑀢𑀧𑁆𑀧𑀫𑀸𑀡𑀸𑀦𑀺 𑀅𑀓𑁆𑀔𑀻𑀦𑀺, 𑀤𑀓𑀮𑀺𑀫𑀓𑀼𑀴𑀫𑀢𑁆𑀢𑀸 𑀤𑁆𑀯𑁂 𑀤𑀸𑀞𑀸 𑀘 𑀫𑀸𑀧𑁂𑀢𑁆𑀯𑀸 𑀲𑁂𑀢𑀫𑀼𑀔𑁄 𑀓𑀩𑀭𑀓𑀼𑀘𑁆𑀙𑀺 𑀦𑀻𑀮𑀳𑀢𑁆𑀣𑀧𑀸𑀤𑁄 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀳𑀁 𑀬𑀸𑀲𑀺, 𑀢𑀺𑀝𑁆𑀞 𑀪𑀓𑁆𑀔𑁄𑀲𑀺 𑀫𑁂’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀬𑀓𑁆𑀔, 𑀅𑀳𑀁 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀢𑁆𑀯𑀸 𑀇𑀥 𑀧𑀯𑀺𑀝𑁆𑀞𑁄, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀫𑀁 𑀉𑀧𑀕𑀘𑁆𑀙𑁂𑀬𑁆𑀬𑀸𑀲𑀺. 𑀯𑀺𑀲𑀧𑀻𑀢𑁂𑀦 𑀳𑀺 𑀲𑀭𑁂𑀦 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀏𑀢𑁆𑀣𑁂𑀯 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀳𑀮𑀸𑀳𑀮𑀯𑀺𑀲𑀧𑀻𑀢𑀁 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀼𑀜𑁆𑀘𑀺, 𑀲𑁄 𑀬𑀓𑁆𑀔𑀲𑁆𑀲 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀢𑀢𑁄 𑀅𑀜𑁆𑀜𑀁, 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀧𑀜𑁆𑀜𑀸𑀲 𑀲𑀭𑁂 𑀫𑀼𑀜𑁆𑀘𑀺, 𑀲𑀩𑁆𑀩𑁂 𑀢𑀲𑁆𑀲 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺𑀁𑀲𑀼. 𑀬𑀓𑁆𑀔𑁄 𑀲𑀩𑁆𑀩𑁂𑀧𑀺 𑀢𑁂 𑀲𑀭𑁂 𑀨𑁄𑀝𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀫𑀽𑀮𑁂𑀬𑁂𑀯 𑀧𑀸𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀼𑀦𑀧𑀺 𑀢𑀁 𑀢𑀚𑁆𑀚𑁂𑀢𑁆𑀯𑀸 𑀔𑀕𑁆𑀕𑀁 𑀓𑀟𑁆𑀠𑀺𑀢𑁆𑀯𑀸 𑀧𑀳𑀭𑀺, 𑀢𑁂𑀢𑁆𑀢𑀺𑀁𑀲𑀗𑁆𑀕𑀼𑀮𑀸𑀬𑀢𑁄 𑀔𑀕𑁆𑀕𑁄 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀅𑀣 𑀦𑀁 𑀓𑀡𑀬𑁂𑀦 𑀧𑀳𑀭𑀺, 𑀲𑁄𑀧𑀺 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀢𑀲𑁆𑀲 𑀅𑀮𑁆𑀮𑀻𑀦𑀪𑀸𑀯𑀁 𑀜𑀢𑁆𑀯𑀸 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺, 𑀲𑁄𑀧𑀺 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀢𑀲𑁆𑀲 𑀅𑀮𑁆𑀮𑀻𑀦𑀪𑀸𑀯𑀁 𑀜𑀢𑁆𑀯𑀸 𑀓𑀼𑀦𑁆𑀢𑁂𑀦 𑀧𑀳𑀭𑀺, 𑀲𑁄𑀧𑀺 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀢𑀲𑁆𑀲 𑀅𑀮𑁆𑀮𑀻𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀪𑁄 𑀬𑀓𑁆𑀔𑀦, 𑀢𑁂 𑀅𑀳𑀁 ‘𑀧𑀜𑁆𑀘𑀸𑀯𑀼𑀥𑀓𑀼𑀫𑀸𑀭𑁄 𑀦𑀸𑀫𑀸’𑀢𑀺 𑀲𑀼𑀢𑀧𑀼𑀩𑁆𑀩𑁄, 𑀅𑀳𑀁 𑀢𑀬𑀸 𑀅𑀥𑀺𑀝𑁆𑀞𑀺𑀢𑀁 𑀅𑀝𑀯𑀺𑀁 𑀧𑀯𑀺𑀲𑀦𑁆𑀢𑁄 𑀦 𑀥𑀦𑀼𑀆𑀤𑀻𑀦𑀺 𑀢𑀓𑁆𑀓𑁂𑀢𑁆𑀯𑀸 𑀧𑀯𑀺𑀝𑁆𑀞𑁄, 𑀅𑀢𑁆𑀢𑀸𑀦𑀁𑀬𑁂𑀯 𑀧𑀦 𑀢𑀓𑁆𑀓𑁂𑀢𑁆𑀯𑀸 𑀧𑀯𑀺𑀝𑁆𑀞𑁄, 𑀅𑀚𑁆𑀚 𑀢𑀁 𑀧𑁄𑀣𑁂𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀦𑁆𑀦𑀸𑀤𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀬𑀓𑁆𑀔𑀁 𑀧𑀳𑀭𑀺, 𑀳𑀢𑁆𑀣𑁄 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀯𑀸𑀫𑀳𑀢𑁆𑀣𑁂𑀦 𑀧𑀳𑀭𑀺, 𑀲𑁄𑀧𑀺 𑀅𑀮𑁆𑀮𑀻𑀬𑀺. 𑀤𑀓𑁆𑀔𑀺𑀡𑀧𑀸𑀤𑁂𑀦 𑀧𑀳𑀭𑀺, 𑀲𑁄𑀧𑀺 𑀅𑀮𑁆𑀮𑀻𑀬𑀺. 𑀯𑀸𑀫𑀧𑀸𑀤𑁂𑀦 𑀧𑀳𑀭𑀺, 𑀲𑁄𑀧𑀺 𑀅𑀮𑁆𑀮𑀻𑀬𑀺. ‘‘𑀲𑀻𑀲𑁂𑀦 𑀢𑀁 𑀧𑁄𑀣𑁂𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀲𑁂𑀦 𑀧𑀳𑀭𑀺, 𑀢𑀫𑁆𑀧𑀺 𑀮𑁄𑀫𑁂𑀲𑀼𑀬𑁂𑀯 𑀅𑀮𑁆𑀮𑀻𑀬𑀺. 𑀲𑁄 𑀧𑀜𑁆𑀘𑁄𑀟𑁆𑀟𑀺𑀢𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀩𑀤𑁆𑀥𑁄 𑀑𑀮𑀫𑁆𑀩𑀦𑁆𑀢𑁄𑀧𑀺 𑀦𑀺𑀩𑁆𑀪𑀬𑁄 𑀦𑀺𑀲𑁆𑀲𑀸𑀭𑀚𑁆𑀚𑁄𑀯 𑀅𑀳𑁄𑀲𑀺.

𑀬𑀓𑁆𑀔𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀓𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄, 𑀦 𑀧𑀼𑀭𑀺𑀲𑀫𑀢𑁆𑀢𑁄𑀯, 𑀫𑀸𑀤𑀺𑀲𑁂𑀦 𑀦𑀸𑀫𑀲𑁆𑀲 𑀬𑀓𑁆𑀔𑁂𑀦 𑀕𑀳𑀺𑀢𑀲𑁆𑀲 𑀲𑀦𑁆𑀢𑀸𑀲𑀫𑀢𑁆𑀢𑀫𑁆𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀫𑀬𑀸 𑀇𑀫𑀁 𑀫𑀕𑁆𑀕𑀁 𑀳𑀦𑀦𑁆𑀢𑁂𑀦 𑀏𑀓𑁄𑀧𑀺 𑀏𑀯𑀭𑀽𑀧𑁄 𑀧𑀼𑀭𑀺𑀲𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑀲𑁆𑀫𑀸 𑀦𑀼 𑀔𑁄 𑀏𑀲 𑀦 𑀪𑀸𑀬𑀢𑀻’’𑀢𑀺. 𑀲𑁄 𑀢𑀁 𑀔𑀸𑀤𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 ‘‘𑀓𑀲𑁆𑀫𑀸 𑀦𑀼 𑀔𑁄, 𑀢𑁆𑀯𑀁 𑀫𑀸𑀡𑀯, 𑀫𑀭𑀡𑀪𑀬𑀁 𑀦 𑀪𑀸𑀬𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁𑀓𑀸𑀭𑀡𑀸, 𑀬𑀓𑁆𑀔, 𑀪𑀸𑀬𑀺𑀲𑁆𑀲𑀸𑀫𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀅𑀢𑁆𑀢𑀪𑀸𑀯𑁂 𑀏𑀓𑀁 𑀫𑀭𑀡𑀁 𑀦𑀺𑀬𑀢𑀫𑁂𑀯, 𑀅𑀧𑀺𑀘 𑀫𑀬𑁆𑀳𑀁 𑀓𑀼𑀘𑁆𑀙𑀺𑀫𑁆𑀳𑀺 𑀯𑀚𑀺𑀭𑀸𑀯𑀼𑀥𑀁 𑀅𑀢𑁆𑀣𑀺. 𑀲𑀘𑁂 𑀫𑀁 𑀔𑀸𑀤𑀺𑀲𑁆𑀲𑀲𑀺, 𑀢𑀁 𑀆𑀯𑀼𑀥𑀁 𑀚𑀻𑀭𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀢𑀁 𑀢𑁂 𑀅𑀦𑁆𑀢𑀸𑀦𑀺 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺. 𑀇𑀢𑀺 𑀉𑀪𑁄𑀧𑀺 𑀦𑀲𑁆𑀲𑀺𑀲𑁆𑀲𑀸𑀫, 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀳𑀁 𑀦 𑀪𑀸𑀬𑀸𑀫𑀻’’𑀢𑀺. 𑀇𑀤𑀁 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀜𑀸𑀡𑀸𑀯𑀼𑀥𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀬𑀓𑁆𑀔𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀫𑀸𑀡𑀯𑁄 𑀲𑀘𑁆𑀘𑀫𑁂𑀯 𑀪𑀡𑀢𑀺, 𑀇𑀫𑀲𑁆𑀲 𑀧𑀼𑀭𑀺𑀲𑀲𑀻𑀳𑀲𑁆𑀲 𑀲𑀭𑀻𑀭𑀢𑁄 𑀫𑀼𑀕𑁆𑀕𑀩𑀻𑀚𑀫𑀢𑁆𑀢𑀫𑁆𑀧𑀺 𑀫𑀁𑀲𑀔𑀡𑁆𑀟𑀁 𑀫𑀬𑁆𑀳𑀁 𑀓𑀼𑀘𑁆𑀙𑀺 𑀚𑀻𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀩𑁄𑀥𑀺𑀲𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀫𑀸𑀡𑀯, 𑀧𑀼𑀭𑀺𑀲𑀲𑀻𑀳𑁄 𑀢𑁆𑀯𑀁, 𑀦 𑀢𑁂 𑀅𑀳𑀁 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀚𑁆𑀚 𑀭𑀸𑀳𑀼𑀫𑀼𑀔𑀸 𑀫𑀼𑀢𑁆𑀢𑀘𑀦𑁆𑀤𑁄 𑀯𑀺𑀬 𑀫𑀫 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀜𑀸𑀢𑀺𑀲𑀼𑀳𑀚𑁆𑀚𑀫𑀡𑁆𑀟𑀮𑀁 𑀢𑁄𑀲𑁂𑀦𑁆𑀢𑁄 𑀬𑀸𑀳𑀻’’𑀢𑀺 𑀆𑀳.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋 ‘‘𑀬𑀓𑁆𑀔, 𑀅𑀳𑀁 𑀢𑀸𑀯 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀧𑀦 𑀧𑀼𑀩𑁆𑀩𑁂𑀧𑀺 𑀅𑀓𑀼𑀲𑀮𑀁 𑀓𑀢𑁆𑀯𑀸 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀧𑀭𑀭𑀼𑀳𑀺𑀭𑀫𑀁𑀲𑀪𑀓𑁆𑀔𑁄 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀲𑀘𑁂 𑀇𑀥𑀸𑀧𑀺 𑀞𑀢𑁆𑀯𑀸 𑀅𑀓𑀼𑀲𑀮𑀫𑁂𑀯 𑀓𑀭𑀺𑀲𑁆𑀲𑀲𑀺, 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀫𑁂𑀯 𑀕𑀫𑀺𑀲𑁆𑀲𑀲𑀺, 𑀫𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀦 𑀲𑀓𑁆𑀓𑀸 𑀢𑀬𑀸 𑀅𑀓𑀼𑀲𑀮𑀁 𑀓𑀸𑀢𑀼𑀁, 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀦𑀸𑀫 𑀦𑀺𑀭𑀬𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀲𑀼𑀭𑀓𑀸𑀬𑁂 𑀘 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀦𑁆𑀦𑀁 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀁 𑀆𑀤𑀻𑀦𑀯𑀁, 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀆𑀦𑀺𑀲𑀁𑀲𑀜𑁆𑀘 𑀓𑀣𑁂𑀢𑁆𑀯𑀸 𑀦𑀸𑀦𑀸𑀓𑀸𑀭𑀡𑁂𑀳𑀺 𑀬𑀓𑁆𑀔𑀁 𑀢𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀦𑀁 𑀅𑀝𑀯𑀺𑀬𑀸 𑀩𑀮𑀺𑀧𑀝𑀺𑀕𑁆𑀕𑀸𑀳𑀓𑀁 𑀤𑁂𑀯𑀢𑀁 𑀓𑀢𑁆𑀯𑀸 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀅𑀝𑀯𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀝𑀯𑀺𑀫𑀼𑀔𑁂 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀤𑀺𑀲𑁆𑀯𑀸 𑀅𑀧𑀭𑀪𑀸𑀕𑁂 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁫. ‘‘𑀬𑁄 𑀅𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀅𑀮𑀻𑀦𑀫𑀦𑀲𑁄 𑀦𑀭𑁄;

𑀪𑀸𑀯𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀬𑁄 𑀧𑀼𑀭𑀺𑀲𑁄 𑀅𑀮𑀻𑀦𑁂𑀦 𑀅𑀲𑀁𑀓𑀼𑀝𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀓𑀢𑀺𑀬𑀸𑀧𑀺 𑀅𑀮𑀻𑀦𑀫𑀦𑁄 𑀅𑀮𑀻𑀦𑀚𑁆𑀛𑀸𑀲𑀬𑁄𑀯 𑀳𑀼𑀢𑁆𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁 𑀲𑀢𑁆𑀢𑀢𑀺𑀁 𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑀁 𑀥𑀫𑁆𑀫𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀺, 𑀯𑀺𑀲𑀸𑀮𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸, 𑀲𑁄 𑀏𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀪𑀸𑀯𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀏𑀓𑀲𑀁𑀬𑁄𑀚𑀦𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀓𑀭𑀲𑁆𑀲 𑀘𑀢𑀼𑀢𑁆𑀣𑀫𑀕𑁆𑀕𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬𑀸𑀢𑀺.

𑀏𑀯𑀁 𑀲𑀢𑁆𑀣𑀸 𑀅𑀭𑀳𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀫𑀢𑁆𑀣𑀓𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀬𑀓𑁆𑀔𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀅𑀳𑁄𑀲𑀺, 𑀧𑀜𑁆𑀘𑀸𑀯𑀼𑀥𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀜𑁆𑀘𑀸𑀯𑀼𑀥𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁫𑁬] 𑁬. 𑀓𑀜𑁆𑀘𑀦𑀓𑁆𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀧𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀭𑀢𑀦𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀣𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 ‘‘𑀆𑀯𑀼𑀲𑁄, 𑀏𑀓𑀯𑀺𑀥𑁂𑀦 𑀲𑀻𑀮𑀁 𑀦𑀸𑀫, 𑀤𑀼𑀯𑀺𑀥𑁂𑀦, 𑀢𑀺𑀯𑀺𑀥𑁂𑀦, 𑀘𑀢𑀼𑀩𑁆𑀩𑀺𑀥𑁂𑀦, 𑀧𑀜𑁆𑀘𑀯𑀺𑀥𑁂𑀦, 𑀙𑀩𑁆𑀩𑀺𑀥𑁂𑀦, 𑀲𑀢𑁆𑀢𑀯𑀺𑀥𑁂𑀦, 𑀅𑀝𑁆𑀞𑀯𑀺𑀥𑁂𑀦, 𑀦𑀯𑀯𑀺𑀥𑁂𑀦, 𑀤𑀲𑀯𑀺𑀥𑁂𑀦, 𑀩𑀳𑀼𑀯𑀺𑀥𑁂𑀦 𑀲𑀻𑀮𑀁 𑀦𑀸𑀫. 𑀇𑀤𑀁 𑀘𑀽𑀴𑀲𑀻𑀮𑀁 𑀦𑀸𑀫, 𑀇𑀤𑀁 𑀫𑀚𑁆𑀛𑀺𑀫𑀲𑀻𑀮𑀁 𑀦𑀸𑀫, 𑀇𑀤𑀁 𑀫𑀳𑀸𑀲𑀻𑀮𑀁 𑀦𑀸𑀫. 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀦𑀸𑀫, 𑀇𑀤𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀦𑀸𑀫, 𑀇𑀤𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀦𑀸𑀫, 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀻𑀮𑀁 𑀦𑀸𑀫𑀸’’𑀢𑀺 𑀲𑀻𑀮𑀁 𑀆𑀘𑀺𑀓𑁆𑀔𑀦𑁆𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀲𑀻𑀮𑀁 𑀦𑀸𑀫 𑀅𑀢𑀺𑀩𑀳𑀼, 𑀅𑀳𑀁 𑀏𑀢𑁆𑀢𑀓𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀘 𑀦𑀸𑀫 𑀧𑀩𑁆𑀩𑀚𑁆𑀚𑀸𑀬 𑀓𑁄 𑀅𑀢𑁆𑀣𑁄, 𑀅𑀳𑀁 𑀕𑀺𑀳𑀻 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀺, 𑀧𑀼𑀢𑁆𑀢𑀤𑀸𑀭𑀜𑁆𑀘 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀳𑀁 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀘 𑀦𑀸𑀫 𑀧𑀩𑁆𑀩𑀚𑁆𑀚𑀸𑀬 𑀓𑁄 𑀅𑀢𑁆𑀣𑁄, 𑀅𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳.

𑀅𑀣 𑀦𑀁 𑀆𑀳𑀁𑀲𑀼 ‘‘𑀆𑀯𑀼𑀲𑁄 𑀏𑀯𑀁 𑀲𑀦𑁆𑀢𑁂 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸𑀯 𑀬𑀸𑀳𑀻’’𑀢𑀺 𑀢𑁂 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑀪𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀺𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀆𑀕𑀢𑀢𑁆𑀣𑀸’’𑀢𑀺 𑀆𑀳. 𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 ‘‘𑀅𑀳𑀁 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑀺, 𑀅𑀣 𑀦𑀁 𑀫𑀬𑀁 𑀕𑀳𑁂𑀢𑁆𑀯𑀸 𑀆𑀕𑀢𑀫𑁆𑀳𑀸𑀢𑀺. ‘‘𑀓𑀲𑁆𑀫𑀸 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀳𑀼𑀁 𑀲𑀻𑀮𑀁 𑀆𑀘𑀺𑀓𑁆𑀔𑀣. 𑀬𑀢𑁆𑀢𑀓𑀁 𑀏𑀲 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀫𑁂𑀯 𑀭𑀓𑁆𑀔𑀺𑀲𑁆𑀲𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀏𑀢𑀁 𑀫𑀸 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣, 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼, 𑀓𑀺𑀁 𑀢𑁂 𑀩𑀳𑀼𑀦𑀸 𑀲𑀻𑀮𑁂𑀦, 𑀢𑀻𑀡𑀺𑀬𑁂𑀯 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀭𑀓𑁆𑀔𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀓𑀸𑀬𑀤𑁆𑀯𑀸𑀭𑀁 𑀯𑀘𑀻𑀤𑁆𑀯𑀸𑀭𑀁 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀢𑀻𑀡𑀺 𑀤𑁆𑀯𑀸𑀭𑀸𑀦𑀺 𑀭𑀓𑁆𑀔, 𑀫𑀸 𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀭𑀺, 𑀫𑀸 𑀯𑀸𑀘𑀸𑀬, 𑀫𑀸 𑀫𑀦𑀲𑀸. ‘‘𑀕𑀘𑁆𑀙 𑀫𑀸 𑀳𑀻𑀦𑀸𑀬𑀸𑀯𑀢𑁆𑀢𑀺, 𑀇𑀫𑀸𑀦𑀺 𑀢𑀻𑀡𑀺𑀬𑁂𑀯 𑀲𑀻𑀮𑀸𑀦𑀺 𑀭𑀓𑁆𑀔𑀸’’𑀢𑀺. 𑀏𑀢𑁆𑀢𑀸𑀯𑀢𑀸 𑀲𑁄 𑀪𑀺𑀓𑁆𑀔𑀼 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀭𑀓𑁆𑀔𑀺𑀲𑁆𑀲𑀸𑀫𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀻𑀮𑀸𑀦𑀻’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺. 𑀲𑁄 𑀢𑀸𑀦𑀺 𑀢𑀻𑀡𑀺 𑀲𑀻𑀮𑀸𑀦𑀺 𑀧𑀽𑀭𑁂𑀦𑁆𑀢𑁄𑀯 𑀅𑀜𑁆𑀜𑀸𑀲𑀺 ‘‘𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀫𑀬𑁆𑀳𑀁 𑀆𑀘𑀺𑀓𑁆𑀔𑀺𑀢𑀁 𑀲𑀻𑀮𑀫𑁆𑀧𑀺 𑀏𑀢𑁆𑀢𑀓𑀫𑁂𑀯, 𑀢𑁂 𑀧𑀦 𑀅𑀢𑁆𑀢𑀦𑁄 𑀅𑀩𑀼𑀤𑁆𑀥𑀪𑀸𑀯𑁂𑀦 𑀫𑀁 𑀩𑀼𑀚𑁆𑀛𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀅𑀦𑀼𑀢𑁆𑀢𑀭𑀥𑀫𑁆𑀫𑀭𑀸𑀚𑀢𑀸𑀬 𑀏𑀢𑁆𑀢𑀓𑀁 𑀲𑀻𑀮𑀁 𑀢𑀻𑀲𑀼𑀬𑁂𑀯 𑀤𑁆𑀯𑀸𑀭𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀁 𑀕𑀡𑁆𑀳𑀸𑀧𑁂𑀲𑀺, 𑀅𑀯𑀲𑁆𑀲𑀬𑁄 𑀯𑀢 𑀫𑁂 𑀲𑀢𑁆𑀣𑀸 𑀚𑀸𑀢𑁄’’𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀢𑀁 𑀓𑀺𑀭 𑀪𑀺𑀓𑁆𑀔𑀼𑀁 ‘𑀩𑀳𑀼𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’𑀢𑀺 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀁 𑀲𑀩𑁆𑀩𑀸𑀦𑀺 𑀲𑀻𑀮𑀸𑀦𑀺 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑁆𑀣𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀩𑀮𑀁 𑀦𑀸𑀫 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀩𑀼𑀤𑁆𑀥𑀕𑀼𑀡𑁂 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀅𑀢𑀺𑀕𑀭𑀼𑀓𑁄𑀧𑀺 𑀪𑀸𑀭𑁄 𑀓𑁄𑀝𑁆𑀞𑀸𑀲𑀯𑀲𑁂𑀦 𑀪𑀸𑀚𑁂𑀢𑁆𑀯𑀸 𑀤𑀺𑀦𑁆𑀦𑁄 𑀮𑀳𑀼𑀓𑁄 𑀯𑀺𑀬 𑀳𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀫𑀳𑀦𑁆𑀢𑀁 𑀓𑀜𑁆𑀘𑀦𑀓𑁆𑀔𑀦𑁆𑀥𑀁 𑀮𑀪𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑀫𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀓𑀲𑁆𑀲𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀙𑀟𑁆𑀟𑀺𑀢𑀕𑀸𑀫𑀓𑁂 𑀔𑁂𑀢𑁆𑀢𑁂 𑀓𑀲𑀺𑀁 𑀓𑀲𑀢𑀺. 𑀧𑀼𑀩𑁆𑀩𑁂 𑀘 𑀢𑀲𑁆𑀫𑀺𑀁 𑀕𑀸𑀫𑁂 𑀏𑀓𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑁂𑀝𑁆𑀞𑀺 𑀊𑀭𑀼𑀫𑀢𑁆𑀢𑀧𑀭𑀺𑀡𑀸𑀳𑀁 𑀘𑀢𑀼𑀳𑀢𑁆𑀣𑀸𑀬𑀸𑀫𑀁 𑀓𑀜𑁆𑀘𑀦𑀓𑁆𑀔𑀦𑁆𑀥𑀁 𑀦𑀺𑀤𑀳𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀗𑁆𑀕𑀮𑀁 𑀮𑀕𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 ‘‘𑀫𑀽𑀮𑀲𑀦𑁆𑀢𑀸𑀦𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀁𑀲𑀼𑀁 𑀯𑀺𑀬𑀽𑀳𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀁𑀲𑀼𑀦𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑀺𑀯𑀲𑀁 𑀓𑀲𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀜𑁆𑀘𑀦𑀓𑁆𑀔𑀦𑁆𑀥𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀓𑀼𑀘𑁆𑀙𑀺𑀪𑀭𑀡𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀺, 𑀏𑀢𑁆𑀢𑀓𑁂𑀦 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀢𑀲𑁆𑀲𑁂𑀯𑀁 𑀯𑀺𑀪𑀢𑁆𑀢𑀓𑀸𑀮𑁂 𑀲𑁄 𑀓𑀜𑁆𑀘𑀦𑀓𑁆𑀔𑀦𑁆𑀥𑁄 𑀲𑀮𑁆𑀮𑀳𑀼𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀇𑀢𑀺 𑀪𑀕𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁬. ‘‘𑀬𑁄 𑀧𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀳𑀝𑁆𑀞𑀫𑀦𑀲𑁄 𑀦𑀭𑁄;

𑀪𑀸𑀯𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀣 𑀧𑀳𑀝𑁆𑀞𑁂𑀦𑀸𑀢𑀺 𑀯𑀺𑀦𑀻𑀯𑀭𑀡𑁂𑀦. 𑀧𑀳𑀝𑁆𑀞𑀫𑀦𑀲𑁄𑀢𑀺 𑀢𑀸𑀬 𑀏𑀯 𑀯𑀺𑀦𑀻𑀯𑀭𑀡𑀢𑀸𑀬 𑀧𑀳𑀝𑁆𑀞𑀫𑀸𑀦𑀲𑁄, 𑀲𑀼𑀯𑀡𑁆𑀡𑀁 𑀯𑀺𑀬 𑀧𑀳𑀁𑀲𑀺𑀢𑁆𑀯𑀸 𑀲𑀫𑀼𑀚𑁆𑀚𑁄𑀢𑀺𑀢𑀲𑀧𑁆𑀧𑀪𑀸𑀲𑀘𑀺𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀢𑁆𑀣𑀸 𑀅𑀭𑀳𑀢𑁆𑀢𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀜𑁆𑀘𑀦𑀓𑁆𑀔𑀦𑁆𑀥𑀮𑀤𑁆𑀥𑀧𑀼𑀭𑀺𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀜𑁆𑀘𑀦𑀓𑁆𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁫𑁭] 𑁭. 𑀯𑀸𑀦𑀭𑀺𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀢𑀸𑀲𑀫𑀢𑁆𑀢𑀫𑁆𑀧𑀺 𑀧𑀦 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀅𑀲𑁆𑀲𑀧𑁄𑀢𑀓𑀧𑁆𑀧𑀫𑀸𑀡𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀏𑀓𑀘𑀭𑁄 𑀳𑀼𑀢𑁆𑀯𑀸 𑀦𑀤𑀻𑀢𑀻𑀭𑁂 𑀯𑀺𑀳𑀭𑀢𑀺. 𑀢𑀲𑁆𑀲𑀸 𑀧𑀦 𑀦𑀤𑀺𑀬𑀸 𑀯𑁂𑀫𑀚𑁆𑀛𑁂 𑀏𑀓𑁄 𑀤𑀻𑀧𑀓𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀫𑁆𑀩𑀧𑀦𑀲𑀸𑀤𑀻𑀳𑀺 𑀨𑀮𑀭𑀼𑀓𑁆𑀔𑁂𑀳𑀺 𑀲𑀫𑁆𑀧𑀦𑁆𑀦𑁄. 𑀩𑁄𑀥𑀺𑀲𑀢𑁆𑀢𑁄 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀤𑀻𑀧𑀓𑀲𑁆𑀲 𑀑𑀭𑀢𑁄 𑀦𑀤𑀻𑀫𑀚𑁆𑀛𑁂 𑀏𑀓𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀦𑀺𑀧𑀢𑀢𑀺, 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀧𑀢𑀢𑀺. 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀲𑀸𑀬𑀁 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂𑀧𑀺 𑀢𑀣𑁂𑀯 𑀓𑀭𑁄𑀢𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀢𑀺.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀏𑀓𑁄 𑀓𑀼𑀫𑁆𑀪𑀻𑀮𑁄 𑀲𑀧𑀚𑀸𑀧𑀢𑀺𑀓𑁄 𑀢𑀲𑁆𑀲𑀸 𑀦𑀤𑀺𑀬𑀸 𑀯𑀲𑀢𑀺. 𑀢𑀲𑁆𑀲 𑀪𑀭𑀺𑀬𑀸 𑀩𑁄𑀥𑀺𑀲𑀢𑁆𑀢𑀁 𑀅𑀧𑀭𑀸𑀧𑀭𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀼𑀫𑁆𑀪𑀻𑀮𑀁 𑀆𑀳 𑁋 ‘‘𑀫𑀬𑁆𑀳𑀁 𑀔𑁄, 𑀅𑀬𑁆𑀬, 𑀇𑀫𑀲𑁆𑀲 𑀯𑀸𑀦𑀭𑀺𑀦𑁆𑀤𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀓𑀼𑀫𑁆𑀪𑀻𑀮𑁄 ‘‘𑀲𑀸𑀥𑀼, 𑀪𑀤𑁆𑀤𑁂, 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀚𑁆𑀚 𑀢𑀁 𑀲𑀸𑀬𑀁 𑀤𑀻𑀧𑀓𑀢𑁄 𑀆𑀕𑀘𑁆𑀙𑀦𑁆𑀢𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀧𑀚𑁆𑀚𑀺.

𑀩𑁄𑀥𑀺𑀲𑀢𑁆𑀢𑁄 𑀤𑀺𑀯𑀲𑀁 𑀘𑀭𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀤𑀻𑀧𑀓𑁂 𑀞𑀺𑀢𑁄𑀯 𑀧𑀸𑀲𑀸𑀡𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀬𑀁 𑀧𑀸𑀲𑀸𑀡𑁄 𑀇𑀤𑀸𑀦𑀺 𑀉𑀘𑁆𑀘𑀢𑀭𑁄 𑀔𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲 𑀓𑀺𑀭 𑀉𑀤𑀓𑀧𑁆𑀧𑀫𑀸𑀡𑀜𑁆𑀘 𑀧𑀸𑀲𑀸𑀡𑀧𑁆𑀧𑀫𑀸𑀡𑀜𑁆𑀘 𑀲𑀼𑀯𑀯𑀢𑁆𑀣𑀸𑀧𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀚𑁆𑀚 𑀇𑀫𑀺𑀲𑁆𑀲𑀸 𑀦𑀤𑀺𑀬𑀸 𑀉𑀤𑀓𑀁 𑀦𑁂𑀯 𑀳𑀸𑀬𑀢𑀺, 𑀦 𑀘 𑀯𑀟𑁆𑀠𑀢𑀺, 𑀅𑀣 𑀘 𑀧𑀦𑀸𑀬𑀁 𑀧𑀸𑀲𑀸𑀡𑁄 𑀫𑀳𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀏𑀢𑁆𑀣 𑀫𑀬𑁆𑀳𑀁 𑀕𑀳𑀡𑀢𑁆𑀣𑀸𑀬 𑀓𑀼𑀫𑁆𑀪𑀻𑀮𑁄 𑀦𑀺𑀧𑀦𑁆𑀦𑁄’’𑀢𑀺. 𑀲𑁄 ‘‘𑀯𑀻𑀫𑀁𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀧𑀸𑀲𑀸𑀡𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀪𑁄 𑀧𑀸𑀲𑀸𑀡𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀯𑀘𑀦𑀁 𑀅𑀮𑀪𑀦𑁆𑀢𑁄 𑀬𑀸𑀯𑀢𑀢𑀺𑀬𑀁 ‘‘𑀪𑁄 𑀧𑀸𑀲𑀸𑀡𑀸’’𑀢𑀺 𑀆𑀳. 𑀧𑀸𑀲𑀸𑀡𑁄 𑀓𑀺𑀁 𑀧𑀝𑀺𑀯𑀘𑀦𑀁 𑀤𑀲𑁆𑀲𑀢𑀺. 𑀧𑀼𑀦𑀧𑀺 𑀯𑀸𑀦𑀭𑁄 ‘‘𑀓𑀺𑀁 𑀪𑁄 𑀧𑀸𑀲𑀸𑀡, 𑀅𑀚𑁆𑀚 𑀫𑀬𑁆𑀳𑀁 𑀧𑀝𑀺𑀯𑀘𑀦𑀁 𑀦 𑀤𑁂𑀲𑀻’’𑀢𑀺 𑀆𑀳. 𑀓𑀼𑀫𑁆𑀪𑀻𑀮𑁄 ‘‘𑀅𑀤𑁆𑀥𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀅𑀬𑀁 𑀧𑀸𑀲𑀸𑀡𑁄 𑀯𑀸𑀦𑀭𑀺𑀦𑁆𑀤𑀲𑁆𑀲 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺, 𑀤𑀲𑁆𑀲𑀸𑀫𑀺 𑀤𑀸𑀦𑀺𑀲𑁆𑀲 𑀧𑀝𑀺𑀯𑀘𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁, 𑀪𑁄 𑀯𑀸𑀦𑀭𑀺𑀦𑁆𑀤𑀸’’𑀢𑀺 𑀆𑀳. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀓𑀼𑀫𑁆𑀪𑀻𑀮𑁄’’𑀢𑀺. ‘‘𑀓𑀺𑀫𑀢𑁆𑀣𑀁 𑀏𑀢𑁆𑀣 𑀦𑀺𑀧𑀦𑁆𑀦𑁄𑀲𑀻’’𑀢𑀺? ‘‘𑀢𑀯 𑀳𑀤𑀬𑀫𑀁𑀲𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀜𑁆𑀜𑁄 𑀫𑁂 𑀕𑀫𑀦𑀫𑀕𑁆𑀕𑁄 𑀦𑀢𑁆𑀣𑀺, 𑀅𑀚𑁆𑀚 𑀫𑀬𑀸 𑀏𑀲 𑀓𑀼𑀫𑁆𑀪𑀻𑀮𑁄 𑀯𑀜𑁆𑀘𑁂𑀢𑀩𑁆𑀩𑁄’’𑀢𑀺. 𑀅𑀣 𑀦𑀁 𑀏𑀯𑀫𑀸𑀳 ‘‘𑀲𑀫𑁆𑀫 𑀓𑀼𑀫𑁆𑀪𑀻𑀮, 𑀅𑀳𑀁 𑀅𑀢𑁆𑀢𑀸𑀦𑀁 𑀢𑀼𑀬𑁆𑀳𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀫𑀁 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀕𑀡𑁆𑀳𑀸𑀳𑀻’’𑀢𑀺. 𑀓𑀼𑀫𑁆𑀪𑀻𑀮𑀸𑀦𑀜𑁆𑀳𑀺 𑀫𑀼𑀔𑁂 𑀯𑀺𑀯𑀝𑁂 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑀦𑁆𑀢𑀺. 𑀲𑁄 𑀢𑀁 𑀓𑀸𑀭𑀡𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺, 𑀅𑀣𑀲𑁆𑀲 𑀅𑀓𑁆𑀔𑀻𑀦𑀺 𑀧𑀺𑀣𑀻𑀬𑀺𑀁𑀲𑀼. 𑀲𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀣𑀸𑀪𑀸𑀯𑀁 𑀜𑀢𑁆𑀯𑀸 𑀤𑀻𑀧𑀓𑀸 𑀉𑀧𑁆𑀧𑀢𑀺𑀢𑁄 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀻𑀮𑀲𑁆𑀲 𑀫𑀢𑁆𑀣𑀓𑁂 𑀅𑀓𑁆𑀓𑀫𑀺𑀢𑁆𑀯𑀸 𑀢𑀢𑁄 𑀉𑀧𑁆𑀧𑀢𑀺𑀢𑁄 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑁄 𑀧𑀭𑀢𑀻𑀭𑁂 𑀅𑀝𑁆𑀞𑀸𑀲𑀺.

𑀓𑀼𑀫𑁆𑀪𑀻𑀮𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀯𑀸𑀦𑀭𑀺𑀦𑁆𑀤𑁂𑀦 𑀅𑀢𑀺𑀅𑀘𑁆𑀙𑁂𑀭𑀓𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑁄 𑀯𑀸𑀦𑀭𑀺𑀦𑁆𑀤, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀧𑀘𑁆𑀘𑀸𑀫𑀺𑀢𑁆𑀢𑁂 𑀅𑀥𑀺𑀪𑀯𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀢𑀼𑀬𑁆𑀳𑀁 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁭. ‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺.

𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲. 𑀏𑀢𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀓𑁆𑀔𑀢𑁄 𑀦𑀺𑀤𑁆𑀤𑀺𑀲𑀢𑀺. 𑀘𑀢𑀼𑀭𑁄 𑀥𑀫𑁆𑀫𑀸𑀢𑀺 𑀘𑀢𑁆𑀢𑀸𑀭𑁄 𑀕𑀼𑀡𑀸. 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁, ‘‘𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀅𑀓𑀢𑁆𑀯𑀸 𑀆𑀕𑀢𑁄𑀬𑁂𑀯𑀸𑀢𑀺 𑀏𑀢𑀁 𑀢𑁂 𑀯𑀘𑀻𑀲𑀘𑁆𑀘𑀁. 𑀥𑀫𑁆𑀫𑁄𑀢𑀺 𑀯𑀺𑀘𑀸𑀭𑀡𑀧𑀜𑁆𑀜𑀸, ‘‘𑀏𑀯𑀁 𑀓𑀢𑁂 𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀲𑀸 𑀢𑁂 𑀯𑀺𑀘𑀸𑀭𑀡𑀧𑀜𑁆𑀜𑀸 𑀅𑀢𑁆𑀣𑀺. 𑀥𑀺𑀢𑀻𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀺, 𑀏𑀢𑀫𑁆𑀧𑀺 𑀢𑁂 𑀅𑀢𑁆𑀣𑀺. 𑀘𑀸𑀕𑁄𑀢𑀺 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀢𑁆𑀯𑀁 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄. 𑀬𑀁 𑀧𑀦𑀸𑀳𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀫𑀬𑁆𑀳𑀫𑁂𑀯𑁂𑀲 𑀤𑁄𑀲𑁄. 𑀤𑀺𑀝𑁆𑀞𑀦𑁆𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑀁. 𑀲𑁄 𑀅𑀢𑀺𑀯𑀢𑁆𑀢𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸 𑀢𑀯, 𑀏𑀯𑀁 𑀏𑀢𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀢𑁆𑀣𑀺, 𑀲𑁄 𑀬𑀣𑀸 𑀫𑀁 𑀅𑀚𑁆𑀚 𑀢𑁆𑀯𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀣𑁂𑀯 𑀅𑀢𑁆𑀢𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀢𑀺 𑀅𑀪𑀺𑀪𑀯𑀢𑀻𑀢𑀺. 𑀏𑀯𑀁 𑀓𑀼𑀫𑁆𑀪𑀻𑀮𑁄 𑀩𑁄𑀥𑀺𑀲𑀢𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀝𑁆𑀞𑀸𑀦𑀁 𑀕𑀢𑁄.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀼𑀫𑁆𑀪𑀻𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀪𑀭𑀺𑀬𑀸𑀲𑁆𑀲 𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀯𑀸𑀦𑀭𑀺𑀦𑁆𑀤𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀦𑀭𑀺𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁫𑁮] 𑁮. 𑀢𑀬𑁄𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀲 𑀏𑀢𑁂 𑀢𑀬𑁄 𑀥𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀫𑁂𑀯𑀸𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀤𑁂𑀯𑀤𑀢𑁆𑀢𑁄 𑀯𑀸𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀬𑀽𑀣𑀁 𑀧𑀭𑀺𑀳𑀭𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀚𑀸𑀢𑀸𑀦𑀁 𑀯𑀸𑀦𑀭𑀧𑁄𑀢𑀓𑀸𑀦𑀁 ‘‘𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀇𑀫𑁂 𑀬𑀽𑀣𑀁 𑀧𑀭𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺 𑀪𑀬𑁂𑀦 𑀤𑀦𑁆𑀢𑁂𑀳𑀺 𑀟𑀁𑀲𑀺𑀢𑁆𑀯𑀸 𑀢𑁂𑀲𑀁 𑀩𑀻𑀚𑀸𑀦𑀺 𑀉𑀧𑁆𑀧𑀸𑀝𑁂𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀜𑁆𑀜𑁂𑀯 𑀧𑀝𑀺𑀘𑁆𑀘 𑀏𑀓𑀺𑀲𑁆𑀲𑀸 𑀯𑀸𑀦𑀭𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣 𑀲𑀸 𑀯𑀸𑀦𑀭𑀻 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀕𑀩𑁆𑀪𑀁 𑀅𑀦𑀼𑀭𑀓𑁆𑀔𑀫𑀸𑀦𑀸 𑀅𑀜𑁆𑀜𑀁 𑀧𑀩𑁆𑀩𑀢𑀧𑀸𑀤𑀁 𑀅𑀕𑀫𑀸𑀲𑀺. 𑀲𑀸 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀩𑁄𑀥𑀺𑀲𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀫𑀬𑁆𑀳𑀁 𑀧𑀺𑀢𑀸 𑀓𑀳’’𑀦𑁆𑀢𑀺? ‘‘𑀢𑀸𑀢, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀩𑁆𑀩𑀢𑀧𑀸𑀤𑁂 𑀬𑀽𑀣𑀁 𑀧𑀭𑀺𑀳𑀭𑀦𑁆𑀢𑁄 𑀯𑀲𑀢𑀻’’𑀢𑀺. ‘‘𑀅𑀫𑁆𑀫, 𑀢𑀲𑁆𑀲 𑀫𑀁 𑀲𑀦𑁆𑀢𑀺𑀓𑀁 𑀦𑁂𑀳𑀻’’𑀢𑀺. ‘‘𑀢𑀸𑀢, 𑀦 𑀲𑀓𑁆𑀓𑀸 𑀢𑀬𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁. 𑀧𑀺𑀢𑀸 𑀳𑀺 𑀢𑁂 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀚𑀸𑀢𑀸𑀦𑀁 𑀯𑀸𑀦𑀭𑀧𑁄𑀢𑀓𑀸𑀦𑀁 𑀬𑀽𑀣𑀧𑀭𑀺𑀳𑀭𑀡𑀪𑀬𑁂𑀦 𑀤𑀦𑁆𑀢𑁂𑀳𑀺 𑀟𑀁𑀲𑀺𑀢𑁆𑀯𑀸 𑀩𑀻𑀚𑀸𑀦𑀺 𑀉𑀧𑁆𑀧𑀸𑀝𑁂𑀢𑀻’’𑀢𑀺. ‘‘𑀅𑀫𑁆𑀫, 𑀦𑁂𑀳𑀺 𑀫𑀁 𑀢𑀢𑁆𑀣, 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀧𑀼𑀢𑁆𑀢𑀁 𑀆𑀤𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀲𑁄 𑀯𑀸𑀦𑀭𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸𑀯 ‘‘𑀅𑀬𑀁 𑀯𑀟𑁆𑀠𑀦𑁆𑀢𑁄 𑀫𑀬𑁆𑀳𑀁 𑀬𑀽𑀣𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀫𑀸𑀭𑁂𑀢𑀩𑁆𑀩𑁄’’𑀢𑀺 ‘‘𑀏𑀢𑀁 𑀆𑀮𑀺𑀗𑁆𑀕𑀦𑁆𑀢𑁄 𑀯𑀺𑀬 𑀕𑀸𑀴𑁆𑀳𑀁 𑀧𑀻𑀴𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀏𑀳𑀺, 𑀢𑀸𑀢, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀳𑀁 𑀕𑀢𑁄𑀲𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀺𑀗𑁆𑀕𑀦𑁆𑀢𑁄 𑀯𑀺𑀬 𑀦𑀺𑀧𑁆𑀧𑀻𑀴𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄, 𑀲𑁄𑀧𑀺 𑀦𑀁 𑀦𑀺𑀧𑁆𑀧𑀻𑀴𑁂𑀲𑀺, 𑀅𑀣𑀲𑁆𑀲 𑀅𑀝𑁆𑀞𑀻𑀦𑀺 𑀪𑀺𑀚𑁆𑀚𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀯𑀟𑁆𑀠𑀦𑁆𑀢𑁄 𑀫𑀁 𑀫𑀸𑀭𑁂𑀲𑁆𑀲𑀢𑀺, 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀧𑀼𑀭𑁂𑀢𑀭𑀜𑁆𑀜𑁂𑀯 𑀫𑀸𑀭𑁂𑀬𑁆𑀬’’𑀦𑁆𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀯𑀺𑀤𑀽𑀭𑁂 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁄 𑀲𑀭𑁄 𑀅𑀢𑁆𑀣𑀺, 𑀢𑀢𑁆𑀣 𑀦𑀁 𑀭𑀓𑁆𑀔𑀲𑁂𑀦 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀏𑀯𑀫𑀸𑀳 ‘‘𑀢𑀸𑀢, 𑀅𑀳𑀁 𑀫𑀳𑀮𑁆𑀮𑀓𑁄, 𑀇𑀫𑀁 𑀬𑀽𑀣𑀁 𑀢𑀼𑀬𑁆𑀳𑀁 𑀦𑀺𑀬𑁆𑀬𑀸𑀤𑁂𑀫𑀺, 𑀅𑀚𑁆𑀚𑁂𑀯 𑀢𑀁 𑀭𑀸𑀚𑀸𑀦𑀁 𑀓𑀭𑁄𑀫𑀺, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀲𑀭𑁄 𑀅𑀢𑁆𑀣𑀺, 𑀢𑀢𑁆𑀣 𑀤𑁆𑀯𑁂 𑀓𑀼𑀫𑀼𑀤𑀺𑀦𑀺𑀬𑁄, 𑀢𑀺𑀲𑁆𑀲𑁄 𑀉𑀧𑁆𑀧𑀮𑀺𑀦𑀺𑀬𑁄, 𑀧𑀜𑁆𑀘 𑀧𑀤𑀼𑀫𑀺𑀦𑀺𑀬𑁄 𑀘 𑀧𑀼𑀧𑁆𑀨𑀦𑁆𑀢𑀺, 𑀕𑀘𑁆𑀙, 𑀢𑀢𑁄 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸’’𑀢𑀺. 𑀲𑁄 ‘‘𑀲𑀸𑀥𑀼, 𑀢𑀸𑀢, 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀳𑀲𑀸 𑀅𑀦𑁄𑀢𑀭𑀺𑀢𑁆𑀯𑀸 𑀲𑀫𑀦𑁆𑀢𑀸 𑀧𑀤𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀑𑀢𑀺𑀡𑁆𑀡𑀧𑀤𑀜𑁆𑀜𑁂𑀯 𑀅𑀤𑁆𑀤𑀲, 𑀦 𑀉𑀢𑁆𑀢𑀺𑀡𑁆𑀡𑀧𑀤𑀁. 𑀲𑁄 ‘‘𑀇𑀫𑀺𑀦𑀸 𑀲𑀭𑁂𑀦 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀫𑀬𑁆𑀳𑀁 𑀧𑀺𑀢𑀸 𑀅𑀢𑁆𑀢𑀦𑀸 𑀫𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀓𑁆𑀔𑀲𑁂𑀦 𑀫𑀁 𑀔𑀸𑀤𑀸𑀧𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀇𑀫𑀜𑁆𑀘 𑀲𑀭𑀁 𑀦 𑀑𑀢𑀭𑀺𑀲𑁆𑀲𑀸𑀫𑀺, 𑀧𑀼𑀧𑁆𑀨𑀸𑀦𑀺 𑀘 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀼𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑁂𑀕𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀭𑀢𑁄 𑀕𑀘𑁆𑀙𑀦𑁆𑀢𑁄 𑀦𑀺𑀭𑀼𑀤𑀓𑁂 𑀑𑀓𑀸𑀲𑁂 𑀞𑀺𑀢𑀸𑀦𑁂𑀯 𑀤𑁆𑀯𑁂 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀢𑀻𑀭𑁂 𑀧𑀢𑀺. 𑀧𑀭𑀢𑀻𑀭𑀢𑁄𑀧𑀺 𑀑𑀭𑀺𑀫𑀢𑀻𑀭𑀁 𑀆𑀕𑀘𑁆𑀙𑀦𑁆𑀢𑁄 𑀢𑁂𑀦𑁂𑀯𑀼𑀧𑀸𑀬𑁂𑀦 𑀤𑁆𑀯𑁂 𑀕𑀡𑁆𑀳𑀺. 𑀏𑀯𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄 𑀧𑀼𑀧𑁆𑀨𑀸𑀦𑀺 𑀘 𑀕𑀡𑁆𑀳𑀺, 𑀭𑀓𑁆𑀔𑀲𑀲𑁆𑀲 𑀘 𑀆𑀡𑀝𑁆𑀞𑀸𑀦𑀁 𑀦 𑀑𑀢𑀭𑀺.

𑀅𑀣𑀲𑁆𑀲 ‘‘𑀇𑀢𑁄 𑀉𑀢𑁆𑀢𑀭𑀺 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲 𑀲𑁄 𑀭𑀓𑁆𑀔𑀲𑁄 ‘‘𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀭𑀽𑀧𑁄 𑀧𑀜𑁆𑀜𑀯𑀸 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀧𑀼𑀧𑁆𑀨𑀸𑀦𑀺 𑀘 𑀦𑀸𑀫 𑀬𑀸𑀯𑀤𑀺𑀘𑁆𑀙𑀓𑀁 𑀕𑀳𑀺𑀢𑀸𑀦𑀺, 𑀫𑀬𑁆𑀳𑀜𑁆𑀘 𑀆𑀡𑀝𑁆𑀞𑀸𑀦𑀁 𑀦 𑀑𑀢𑀭𑀻’’𑀢𑀺 𑀉𑀤𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀦𑁆𑀢𑁄 𑀉𑀤𑀓𑀢𑁄 𑀉𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀯𑀸𑀦𑀭𑀺𑀦𑁆𑀤, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑀲𑁆𑀲 𑀢𑀬𑁄 𑀥𑀫𑁆𑀫𑀸 𑀅𑀢𑁆𑀣𑀺, 𑀲𑁄 𑀧𑀘𑁆𑀘𑀸𑀫𑀺𑀢𑁆𑀢𑀁 𑀅𑀪𑀺𑀪𑀯𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀢𑀯 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁮. ‘‘𑀬𑀲𑁆𑀲 𑀏𑀢𑁂 𑀢𑀬𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀤𑀓𑁆𑀔𑀺𑀬𑀁 𑀲𑀽𑀭𑀺𑀬𑀁 𑀧𑀜𑁆𑀜𑀸, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺.

𑀢𑀢𑁆𑀣 𑀤𑀓𑁆𑀔𑀺𑀬𑀦𑁆𑀢𑀺 𑀤𑀓𑁆𑀔𑀪𑀸𑀯𑁄, 𑀲𑀫𑁆𑀧𑀢𑁆𑀢𑀪𑀬𑀁 𑀯𑀺𑀥𑀫𑀺𑀢𑀼𑀁 𑀚𑀸𑀦𑀦𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀉𑀢𑁆𑀢𑀫𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀽𑀭𑀺𑀬𑀦𑁆𑀢𑀺 𑀲𑀽𑀭𑀪𑀸𑀯𑁄, 𑀦𑀺𑀩𑁆𑀪𑀬𑀪𑀸𑀯𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀜𑁆𑀜𑀸𑀢𑀺 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀸𑀬 𑀉𑀧𑀸𑀬𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁.

𑀏𑀯𑀁 𑀲𑁄 𑀤𑀓𑀭𑀓𑁆𑀔𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀓𑀺𑀫𑀢𑁆𑀣𑀁 𑀳𑀭𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀺𑀢𑀸 𑀫𑀁 𑀭𑀸𑀚𑀸𑀦𑀁 𑀓𑀸𑀢𑀼𑀓𑀸𑀫𑁄, 𑀢𑁂𑀦 𑀓𑀸𑀭𑀡𑁂𑀦 𑀳𑀭𑀸𑀫𑀻’’𑀢𑀺. ‘‘𑀦 𑀲𑀓𑁆𑀓𑀸 𑀢𑀸𑀤𑀺𑀲𑁂𑀦 𑀉𑀢𑁆𑀢𑀫𑀧𑀼𑀭𑀺𑀲𑁂𑀦 𑀧𑀼𑀧𑁆𑀨𑀸𑀦𑀺 𑀯𑀳𑀺𑀢𑀼𑀁 𑀅𑀳𑀁 𑀯𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀤𑀽𑀭𑀢𑁄𑀯 𑀢𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀇𑀫𑀁 ‘𑀭𑀓𑁆𑀔𑀲𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀧𑀳𑀺𑀡𑀺𑀁, 𑀲𑁄 𑀤𑀸𑀦𑁂𑀲 𑀭𑀓𑁆𑀔𑀲𑀁 𑀧𑀼𑀧𑁆𑀨𑀸𑀦𑀺 𑀕𑀸𑀳𑀸𑀧𑁂𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀇𑀤𑀸𑀦𑀺𑀫𑁆𑀳𑀺 𑀦𑀝𑁆𑀞𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀲𑀢𑁆𑀢𑀥𑀸 𑀳𑀤𑀬𑀨𑀸𑀮𑀦𑀁 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄. 𑀲𑁂𑀲𑀯𑀸𑀦𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀸𑀚𑀸𑀦𑀁 𑀅𑀓𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀬𑀽𑀣𑀧𑀢𑀺 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀬𑀽𑀣𑀧𑀢𑀺𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀬𑁄𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁫𑁯] 𑁯. 𑀪𑁂𑀭𑀺𑀯𑀸𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀥𑀫𑁂 𑀥𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀪𑁂𑀭𑀺𑀯𑀸𑀤𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀕𑀸𑀫𑀓𑁂 𑀯𑀲𑀢𑀺. 𑀲𑁄 ‘‘𑀩𑀸𑀭𑀸𑀡𑀲𑀺𑀬𑀁 𑀦𑀓𑁆𑀔𑀢𑁆𑀢𑀁 𑀖𑀼𑀝𑁆𑀞’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀲𑀫𑀚𑁆𑀚𑀫𑀡𑁆𑀟𑀮𑁂 𑀪𑁂𑀭𑀺𑀁 𑀯𑀸𑀤𑁂𑀢𑁆𑀯𑀸 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀢𑁆𑀢𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑁂𑀭𑀺𑀁 𑀯𑀸𑀤𑁂𑀢𑁆𑀯𑀸 𑀩𑀳𑀼𑀥𑀦𑀁 𑀮𑀪𑀺. 𑀲𑁄 𑀢𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀘𑁄𑀭𑀸𑀝𑀯𑀺𑀁 𑀧𑀢𑁆𑀯𑀸 𑀧𑀼𑀢𑁆𑀢𑀁 𑀦𑀺𑀭𑀦𑁆𑀢𑀭𑀁 𑀪𑁂𑀭𑀺𑀁 𑀯𑀸𑀤𑁂𑀦𑁆𑀢𑀁 𑀯𑀸𑀭𑁂𑀲𑀺 ‘‘𑀢𑀸𑀢, 𑀦𑀺𑀭𑀦𑁆𑀢𑀭𑀁 𑀅𑀯𑀸𑀤𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀇𑀲𑁆𑀲𑀭𑀲𑁆𑀲 𑀪𑁂𑀭𑀺𑀁 𑀯𑀺𑀬 𑀅𑀦𑁆𑀢𑀭𑀦𑁆𑀢𑀭𑀸 𑀯𑀸𑀤𑁂𑀳𑀻’’𑀢𑀺 𑀲𑁄 𑀧𑀺𑀢𑀭𑀸 𑀯𑀸𑀭𑀺𑀬𑀫𑀸𑀦𑁄𑀧𑀺 ‘‘𑀪𑁂𑀭𑀺𑀲𑀤𑁆𑀤𑁂𑀦𑁂𑀯 𑀘𑁄𑀭𑁂 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀭𑀦𑁆𑀢𑀭𑀫𑁂𑀯 𑀯𑀸𑀤𑁂𑀲𑀺. 𑀘𑁄𑀭𑀸 𑀧𑀞𑀫𑀜𑁆𑀜𑁂𑀯 𑀪𑁂𑀭𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀲𑁆𑀲𑀭𑀪𑁂𑀭𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀅𑀢𑀺 𑀯𑀺𑀬 𑀏𑀓𑀸𑀩𑀤𑁆𑀥𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀦𑀸𑀬𑀁 𑀇𑀲𑁆𑀲𑀭𑀪𑁂𑀭𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑀸 𑀤𑁆𑀯𑁂𑀬𑁂𑀯 𑀚𑀦𑁂 𑀤𑀺𑀲𑁆𑀯𑀸 𑀧𑁄𑀣𑁂𑀢𑁆𑀯𑀸 𑀯𑀺𑀮𑀼𑀫𑁆𑀧𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀘𑁆𑀙𑁂𑀦 𑀯𑀢 𑀦𑁄 𑀮𑀤𑁆𑀥𑀁 𑀥𑀦𑀁 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀯𑀸𑀤𑁂𑀦𑁆𑀢𑁄 𑀦𑀸𑀲𑁂𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁯. ‘‘𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂, 𑀅𑀢𑀺𑀥𑀦𑁆𑀢𑀜𑁆𑀳𑀺 𑀧𑀸𑀧𑀓𑀁;

𑀥𑀦𑁆𑀢𑁂𑀦 𑀳𑀺 𑀲𑀢𑀁 𑀮𑀤𑁆𑀥𑀁, 𑀅𑀢𑀺𑀥𑀦𑁆𑀢𑁂𑀦 𑀦𑀸𑀲𑀺𑀢’’𑀦𑁆𑀢𑀺.

𑀢𑀢𑁆𑀣 𑀥𑀫𑁂 𑀥𑀫𑁂𑀢𑀺 𑀥𑀫𑁂𑀬𑁆𑀬 𑀦𑁄 𑀦 𑀥𑀫𑁂𑀬𑁆𑀬, 𑀪𑁂𑀭𑀺𑀁 𑀯𑀸𑀤𑁂𑀬𑁆𑀬 𑀦𑁄 𑀦 𑀯𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀢𑀺𑀥𑀫𑁂𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀦 𑀦𑀺𑀭𑀦𑁆𑀢𑀭𑀫𑁂𑀯 𑀓𑀢𑁆𑀯𑀸 𑀦 𑀯𑀸𑀤𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀅𑀢𑀺𑀥𑀦𑁆𑀢𑀜𑁆𑀳𑀺 𑀧𑀸𑀧𑀓𑀁, 𑀦𑀺𑀭𑀦𑁆𑀢𑀭𑀁 𑀪𑁂𑀭𑀺𑀯𑀸𑀤𑀦𑀁 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀚𑀸𑀢𑀁. 𑀥𑀦𑁆𑀢𑁂𑀦 𑀳𑀺 𑀲𑀢𑀁 𑀮𑀤𑁆𑀥𑀦𑁆𑀢𑀺 𑀦𑀕𑀭𑁂 𑀥𑀫𑀦𑁆𑀢𑁂𑀦 𑀪𑁂𑀭𑀺𑀯𑀸𑀤𑀦𑁂𑀦 𑀓𑀳𑀸𑀧𑀡𑀲𑀢𑀁 𑀮𑀤𑁆𑀥𑀁. 𑀅𑀢𑀺𑀥𑀦𑁆𑀢𑁂𑀦 𑀦𑀸𑀲𑀺𑀢𑀦𑁆𑀢𑀺 𑀇𑀤𑀸𑀦𑀺 𑀧𑀦 𑀫𑁂 𑀧𑀼𑀢𑁆𑀢𑁂𑀦 𑀯𑀘𑀦𑀁 𑀅𑀓𑀢𑁆𑀯𑀸 𑀬𑀤𑀺𑀤𑀁 𑀅𑀝𑀯𑀺𑀬𑀁 𑀅𑀢𑀺𑀥𑀦𑁆𑀢𑀁, 𑀢𑁂𑀦 𑀅𑀢𑀺𑀥𑀦𑁆𑀢𑁂𑀦 𑀲𑀩𑁆𑀩𑀁 𑀦𑀸𑀲𑀺𑀢𑀦𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀼𑀢𑁆𑀢𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀪𑁂𑀭𑀺𑀯𑀸𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁬𑁦] 𑁧𑁦. 𑀲𑀗𑁆𑀔𑀥𑀫𑀚𑀸𑀢𑀓𑀯𑀡𑁆𑀡𑀦𑀸

𑀥𑀫𑁂 𑀥𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀼𑀩𑁆𑀩𑀘𑀫𑁂𑀯𑀸𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀗𑁆𑀔𑀥𑀫𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀦𑀓𑁆𑀔𑀢𑁆𑀢𑁂 𑀖𑀼𑀝𑁆𑀞𑁂 𑀧𑀺𑀢𑀭𑀁 𑀆𑀤𑀸𑀬 𑀲𑀗𑁆𑀔𑀥𑀫𑀦𑀓𑀫𑁆𑀫𑁂𑀦 𑀥𑀦𑀁 𑀮𑀪𑀺𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀘𑁄𑀭𑀸𑀝𑀯𑀺𑀬𑀁 𑀧𑀺𑀢𑀭𑀁 𑀦𑀺𑀭𑀦𑁆𑀢𑀭𑀁 𑀲𑀗𑁆𑀔𑀁 𑀥𑀫𑀦𑁆𑀢𑀁 𑀯𑀸𑀭𑁂𑀲𑀺. 𑀲𑁄 ‘‘𑀲𑀗𑁆𑀔𑀲𑀤𑁆𑀤𑁂𑀦 𑀘𑁄𑀭𑁂 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀦𑁆𑀢𑀭𑀫𑁂𑀯 𑀥𑀫𑀺, 𑀘𑁄𑀭𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀯𑀺𑀮𑀼𑀫𑁆𑀧𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀕𑀸𑀣𑀁 𑀅𑀪𑀸𑀲𑀺 𑁋

𑁬𑁦. ‘‘𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂, 𑀅𑀢𑀺𑀥𑀦𑁆𑀢𑀜𑁆𑀳𑀺 𑀧𑀸𑀧𑀓𑀁;

𑀥𑀦𑁆𑀢𑁂𑀦𑀸𑀥𑀺𑀕𑀢𑀸 𑀪𑁄𑀕𑀸, 𑀢𑁂 𑀢𑀸𑀢𑁄 𑀯𑀺𑀥𑀫𑀻 𑀥𑀫’’𑀦𑁆𑀢𑀺.

𑀢𑀢𑁆𑀣 𑀢𑁂 𑀢𑀸𑀢𑁄 𑀯𑀺𑀥𑀫𑀻 𑀥𑀫𑀦𑁆𑀢𑀺 𑀢𑁂 𑀲𑀗𑁆𑀔𑀁 𑀥𑀫𑀺𑀢𑁆𑀯𑀸 𑀮𑀤𑁆𑀥𑀪𑁄𑀕𑁂 𑀫𑀫 𑀧𑀺𑀢𑀸 𑀧𑀼𑀦𑀧𑁆𑀧𑀼𑀦𑀁 𑀥𑀫𑀦𑁆𑀢𑁄 𑀯𑀺𑀥𑀫𑀺 𑀯𑀺𑀤𑁆𑀥𑀁𑀲𑁂𑀲𑀺 𑀯𑀺𑀦𑀸𑀲𑁂𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀺𑀢𑀸 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀗𑁆𑀔𑀥𑀫𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀆𑀲𑀻𑀲𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀳𑀸𑀲𑀻𑀮𑀯𑀚𑀦𑀓𑀁, 𑀧𑀼𑀡𑁆𑀡𑀧𑀸𑀢𑀺 𑀘 𑀓𑀺𑀁𑀨𑀮𑀁;

𑀧𑀜𑁆𑀘𑀸𑀯𑀼𑀥𑀓𑀜𑁆𑀘𑀦𑀓𑁆𑀔𑀦𑁆𑀥𑀁, 𑀯𑀸𑀦𑀭𑀺𑀦𑁆𑀤𑀁 𑀢𑀬𑁄𑀥𑀫𑁆𑀫𑀁;

𑀪𑁂𑀭𑀺𑀯𑀸𑀤𑀲𑀗𑁆𑀔𑀥𑀫𑀦𑁆𑀢𑀺.