𑁫. 𑀅𑀢𑁆𑀣𑀓𑀸𑀫𑀯𑀕𑁆𑀕𑁄

[𑁪𑁧] 𑁧. 𑀮𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀅𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄 𑀧𑀦𑁂𑀲 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫𑀸𑀢𑀺? 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀅𑀢𑁆𑀢𑀦𑁄 𑀓𑀼𑀮𑀦𑀸𑀲𑀓𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑀓𑁄 𑀅𑀮𑀸𑀪𑀻 𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀢𑀸 𑀘𑀯𑀺𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀓𑀼𑀮𑀲𑀳𑀲𑁆𑀲𑀯𑀸𑀲𑁂 𑀓𑁂𑀯𑀝𑁆𑀝𑀕𑀸𑀫𑁂 𑀏𑀓𑀺𑀲𑁆𑀲𑀸 𑀓𑁂𑀯𑀝𑁆𑀝𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀢𑀁 𑀓𑀼𑀮𑀲𑀳𑀲𑁆𑀲𑀁 𑀚𑀸𑀮𑀳𑀢𑁆𑀣𑀁 𑀦𑀤𑀺𑀬𑀜𑁆𑀘 𑀢𑀴𑀸𑀓𑀸𑀤𑀻𑀲𑀼 𑀘 𑀫𑀘𑁆𑀙𑁂 𑀧𑀭𑀺𑀬𑁂𑀲𑀦𑁆𑀢𑀁 𑀏𑀓𑀁 𑀔𑀼𑀤𑁆𑀤𑀓𑀫𑀘𑁆𑀙𑀫𑁆𑀧𑀺 𑀦𑀸𑀮𑀢𑁆𑀣. 𑀢𑀢𑁄 𑀧𑀝𑁆𑀞𑀸𑀬 𑀘 𑀢𑁂 𑀓𑁂𑀯𑀝𑁆𑀝𑀸 𑀧𑀭𑀺𑀳𑀸𑀬𑀦𑁆𑀢𑀺𑀬𑁂𑀯. 𑀢𑀲𑁆𑀫𑀺𑀜𑁆𑀳𑀺 𑀓𑀼𑀘𑁆𑀙𑀺𑀕𑀢𑁂𑀬𑁂𑀯 𑀦𑁂𑀲𑀁 𑀕𑀸𑀫𑁄 𑀲𑀢𑁆𑀢 𑀯𑀸𑀭𑁂 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑀢𑁆𑀢 𑀯𑀸𑀭𑁂 𑀭𑀜𑁆𑀜𑀸 𑀤𑀡𑁆𑀟𑀺𑀢𑁄. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀤𑀼𑀕𑁆𑀕𑀢𑀸 𑀚𑀸𑀢𑀸. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀧𑀼𑀩𑁆𑀩𑁂 𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑀁 𑀦𑀢𑁆𑀣𑀺, 𑀇𑀤𑀸𑀦𑀺 𑀧𑀦 𑀧𑀭𑀺𑀳𑀸𑀬𑀸𑀫, 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀏𑀓𑀸𑀬 𑀓𑀸𑀴𑀓𑀡𑁆𑀡𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀤𑁆𑀯𑁂 𑀪𑀸𑀕𑀸 𑀳𑁄𑀫𑀸’’𑀢𑀺 𑀧𑀜𑁆𑀘 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀏𑀓𑀢𑁄 𑀅𑀳𑁂𑀲𑀼𑀁. 𑀢𑀢𑁄 𑀬𑀢𑁆𑀣 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀲𑁄𑀯 𑀓𑁄𑀝𑁆𑀞𑀸𑀲𑁄 𑀧𑀭𑀺𑀳𑀸𑀬𑀢𑀺, 𑀇𑀢𑀭𑁄 𑀯𑀟𑁆𑀠𑀢𑀺. 𑀢𑁂 𑀢𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀤𑁆𑀯𑀺𑀥𑀸, 𑀢𑀫𑁆𑀧𑀺 𑀤𑁆𑀯𑀺𑀥𑀸𑀢𑀺 𑀏𑀯𑀁 𑀬𑀸𑀯 𑀢𑀫𑁂𑀯 𑀓𑀼𑀮𑀁 𑀏𑀓𑀁 𑀅𑀳𑁄𑀲𑀺, 𑀢𑀸𑀯 𑀯𑀺𑀪𑀚𑀺𑀢𑁆𑀯𑀸 𑀢𑁂𑀲𑀁 𑀓𑀸𑀴𑀓𑀡𑁆𑀡𑀺𑀪𑀸𑀯𑀁 𑀜𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀁𑀲𑀼.

𑀅𑀣𑀲𑁆𑀲 𑀫𑀸𑀢𑀸 𑀓𑀺𑀘𑁆𑀙𑁂𑀦 𑀚𑀻𑀯𑀫𑀸𑀦𑀸 𑀧𑀭𑀺𑀧𑀓𑁆𑀓𑁂 𑀕𑀩𑁆𑀪𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀺𑀚𑀸𑀬𑀺. 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑀁 𑀦 𑀲𑀓𑁆𑀓𑀸 𑀦𑀸𑀲𑁂𑀢𑀼𑀁, 𑀅𑀦𑁆𑀢𑁄𑀖𑀝𑁂 𑀧𑀤𑀻𑀧𑁄 𑀯𑀺𑀬 𑀢𑀲𑁆𑀲 𑀳𑀤𑀬𑁂 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀚𑀮𑀢𑀺. 𑀲𑀸 𑀢𑀁 𑀤𑀸𑀭𑀓𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀏𑀓𑀫𑀲𑁆𑀲 𑀓𑀧𑀸𑀮𑀓𑀁 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀧𑀼𑀢𑁆𑀢, 𑀏𑀢𑀁 𑀖𑀭𑀁 𑀧𑀯𑀺𑀲𑀸’’𑀢𑀺 𑀧𑁂𑀲𑁂𑀢𑁆𑀯𑀸 𑀧𑀮𑀸𑀢𑀸. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀏𑀓𑀓𑁄𑀯 𑀳𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀬𑀢𑀺, 𑀦 𑀦𑁆𑀳𑀸𑀬𑀢𑀺, 𑀦 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀢𑀺, 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀓𑀺𑀘𑁆𑀙𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀲𑀢𑁆𑀢𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑁂𑀳𑀤𑁆𑀯𑀸𑀭𑁂 𑀉𑀓𑁆𑀔𑀮𑀺𑀥𑁄𑀯𑀦𑀲𑁆𑀲 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀓𑀸𑀓𑁄 𑀯𑀺𑀬 𑀏𑀓𑁂𑀓𑀁 𑀪𑀢𑁆𑀢𑀲𑀺𑀢𑁆𑀣𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀔𑀸𑀤𑀢𑀺.

𑀅𑀣 𑀦𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀢𑁆𑀢𑁄 𑀅𑀢𑀺𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄, 𑀓𑀢𑀭𑀕𑀸𑀫𑀯𑀸𑀲𑀺𑀓𑁄 𑀦𑀼 𑀔𑁄’’𑀢𑀺 𑀢𑀲𑁆𑀫𑀺𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀏𑀳𑀺, 𑀭𑁂’’𑀢𑀺 𑀆𑀳. 𑀲𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑁄 ‘‘𑀓𑀢𑀭𑀕𑀸𑀫𑀯𑀸𑀲𑀺𑀓𑁄𑀲𑀺, 𑀓𑀳𑀁 𑀯𑀸 𑀢𑁂 𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀪𑀦𑁆𑀢𑁂, 𑀦𑀺𑀧𑁆𑀧𑀘𑁆𑀘𑀬𑁄, 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀭𑁄 𑀫𑀁 𑀦𑀺𑀲𑁆𑀲𑀸𑀬 ‘𑀓𑀺𑀮𑀦𑁆𑀢𑀫𑁆𑀳𑀸’𑀢𑀺 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸’’𑀢𑀺. ‘‘𑀅𑀧𑀺 𑀧𑀦 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺. ‘‘𑀪𑀦𑁆𑀢𑁂, 𑀅𑀳𑀁 𑀢𑀸𑀯 𑀧𑀩𑁆𑀩𑀚𑁂𑀬𑁆𑀬𑀁, 𑀫𑀸𑀤𑀺𑀲𑀁 𑀧𑀦 𑀓𑀧𑀡𑀁 𑀓𑁄 𑀧𑀩𑁆𑀩𑀸𑀚𑁂𑀲𑁆𑀲𑀲𑀻’’𑀢𑀺? ‘‘𑀅𑀳𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀣𑁂𑀭𑁄 𑀢𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀦𑁆𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂 ‘‘𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣 𑀅𑀧𑁆𑀧𑀧𑀼𑀜𑁆𑀜𑁄 𑀅𑀧𑁆𑀧𑀮𑀸𑀪𑁄. 𑀢𑁂𑀦 𑀓𑀺𑀭 𑀅𑀲𑀤𑀺𑀲𑀤𑀸𑀦𑁂𑀧𑀺 𑀓𑀼𑀘𑁆𑀙𑀺𑀧𑀽𑀭𑁄 𑀦 𑀮𑀤𑁆𑀥𑀧𑀼𑀩𑁆𑀩𑁄, 𑀚𑀻𑀯𑀺𑀢𑀖𑀝𑀦𑀫𑀢𑁆𑀢𑀫𑁂𑀯 𑀮𑀪𑀢𑀺. 𑀢𑀲𑁆𑀲 𑀳𑀺 𑀧𑀢𑁆𑀢𑁂 𑀏𑀓𑀲𑁆𑀫𑀺𑀁𑀬𑁂𑀯 𑀬𑀸𑀕𑀼𑀉𑀴𑀼𑀗𑁆𑀓𑁂 𑀤𑀺𑀦𑁆𑀦𑁂 𑀧𑀢𑁆𑀢𑁄 𑀲𑀫𑀢𑀺𑀢𑁆𑀢𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺. 𑀅𑀣 𑀫𑀦𑀼𑀲𑁆𑀲𑀸 ‘‘𑀇𑀫𑀲𑁆𑀲 𑀧𑀢𑁆𑀢𑁄 𑀧𑀽𑀭𑁄’’𑀢𑀺 𑀳𑁂𑀝𑁆𑀞𑀸 𑀬𑀸𑀕𑀼𑀁 𑀤𑁂𑀦𑁆𑀢𑀺. 𑀢𑀲𑁆𑀲 𑀧𑀢𑁆𑀢𑁂 𑀬𑀸𑀕𑀼𑀁 𑀤𑀸𑀦𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀪𑀸𑀚𑀦𑁂 𑀬𑀸𑀕𑀼 𑀅𑀦𑁆𑀢𑀭𑀥𑀸𑀬𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀔𑀚𑁆𑀚𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀧𑀺 𑀅𑀧𑁆𑀧𑀮𑀸𑀪𑁄𑀯 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀦𑀼𑀧𑀼𑀩𑁆𑀩𑁂𑀦 𑀆𑀬𑀼𑀲𑀗𑁆𑀔𑀸𑀭𑁂𑀲𑀼 𑀧𑀭𑀺𑀳𑀻𑀦𑁂𑀲𑀼 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁄 𑀲𑀫𑁆𑀧𑀸𑀧𑀼𑀡𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀚𑁆𑀚 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀚𑁆𑀚 𑀫𑀬𑀸 𑀏𑀢𑀲𑁆𑀲 𑀬𑀸𑀯𑀤𑀢𑁆𑀣𑀁 𑀆𑀳𑀸𑀭𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀣𑁂𑀭𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀸𑀯 𑀩𑀳𑀼𑀫𑀦𑀼𑀲𑁆𑀲𑀸𑀬 𑀲𑀸𑀯𑀢𑁆𑀣𑀺𑀬𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀯𑀦𑁆𑀤𑀦𑀫𑀢𑁆𑀢𑀫𑁆𑀧𑀺 𑀦𑀸𑀮𑀢𑁆𑀣. 𑀅𑀣 𑀦𑀁 𑀣𑁂𑀭𑁄 ‘‘𑀕𑀘𑁆𑀙𑀸𑀯𑀼𑀲𑁄, 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀸’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀕𑀢𑁄. 𑀢𑀁 𑀆𑀕𑀢𑀫𑁂𑀯 𑀫𑀦𑀼𑀲𑁆𑀲𑀸 ‘‘𑀅𑀬𑁆𑀬𑁄, 𑀆𑀕𑀢𑁄’’𑀢𑀺 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀣𑁂𑀭𑁄𑀧𑀺 ‘‘𑀇𑀫𑀁 𑀮𑁄𑀲𑀓𑀲𑁆𑀲 𑀤𑁂𑀣𑀸’’𑀢𑀺 𑀮𑀤𑁆𑀥𑀸𑀳𑀸𑀭𑀁 𑀧𑁂𑀲𑁂𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀕𑀢𑀸 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀅𑀲𑀭𑀺𑀢𑁆𑀯𑀸 𑀲𑀬𑀫𑁂𑀯 𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀣𑁂𑀭𑀲𑁆𑀲 𑀉𑀝𑁆𑀞𑀸𑀬 𑀯𑀺𑀳𑀸𑀭𑀁 𑀕𑀫𑀦𑀓𑀸𑀮𑁂 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺, 𑀣𑁂𑀭𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀓𑁄𑀯 ‘‘𑀮𑀤𑁆𑀥𑀁 𑀢𑁂, 𑀆𑀯𑀼𑀲𑁄, 𑀪𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀮𑀪𑀺𑀲𑁆𑀲𑀸𑀫 𑀦𑁄, 𑀪𑀦𑁆𑀢𑁂𑀢𑀺. 𑀣𑁂𑀭𑁄 𑀲𑀁𑀯𑁂𑀕𑀧𑀢𑁆𑀢𑁄 𑀓𑀸𑀮𑀁 𑀑𑀮𑁄𑀓𑁂𑀲𑀺, 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀣𑁂𑀭𑁄 ‘‘𑀳𑁄𑀢𑀸𑀯𑀼𑀲𑁄, 𑀇𑀥𑁂𑀯 𑀦𑀺𑀲𑀻𑀤𑀸’’𑀢𑀺 𑀮𑁄𑀲𑀓𑀢𑁆𑀣𑁂𑀭𑀁 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀪𑀢𑁆𑀢𑀲𑁆𑀲 𑀅𑀓𑀸𑀮𑁄’’𑀢𑀺 𑀧𑀢𑁆𑀢𑀧𑀽𑀭𑀁 𑀘𑀢𑀼𑀫𑀥𑀼𑀭𑀁 𑀤𑀸𑀧𑁂𑀲𑀺. 𑀣𑁂𑀭𑁄 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 ‘‘𑀏𑀳𑀸𑀯𑀼𑀲𑁄, 𑀢𑀺𑀲𑁆𑀲 𑀇𑀫𑀁 𑀘𑀢𑀼𑀫𑀥𑀼𑀭𑀁 𑀪𑀼𑀜𑁆𑀚𑀸’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀣𑁂𑀭𑁂 𑀕𑀸𑀭𑀯𑁂𑀦 𑀮𑀚𑁆𑀚𑀦𑁆𑀢𑁄 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀣 𑀦𑀁 𑀣𑁂𑀭𑁄 ‘‘𑀏𑀳𑀸𑀯𑀼𑀲𑁄 𑀢𑀺𑀲𑁆𑀲, 𑀅𑀳𑀁 𑀇𑀫𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀯 𑀞𑀲𑁆𑀲𑀸𑀫𑀺, 𑀢𑁆𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚. 𑀲𑀘𑁂 𑀅𑀳𑀁 𑀧𑀢𑁆𑀢𑀁 𑀳𑀢𑁆𑀣𑀢𑁄 𑀫𑀼𑀜𑁆𑀘𑁂𑀬𑁆𑀬𑀁, 𑀓𑀺𑀜𑁆𑀘𑀺 𑀦 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀅𑀣𑀸𑀬𑀲𑁆𑀫𑀸 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀕𑁆𑀕𑀲𑀸𑀯𑀓𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑁆𑀳𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂 𑀘𑀢𑀼𑀫𑀥𑀼𑀭𑀁 𑀧𑀭𑀺𑀪𑀼𑀜𑁆𑀚𑀺. 𑀢𑀁 𑀣𑁂𑀭𑀲𑁆𑀲 𑀅𑀭𑀺𑀬𑀺𑀤𑁆𑀥𑀺𑀩𑀮𑁂𑀦 𑀧𑀭𑀺𑀓𑁆𑀔𑀬𑀁 𑀦 𑀅𑀕𑀫𑀸𑀲𑀺. 𑀢𑀤𑀸 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀬𑀸𑀯𑀤𑀢𑁆𑀣𑀁 𑀉𑀤𑀭𑀧𑀽𑀭𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺, 𑀢𑀁 𑀤𑀺𑀯𑀲𑀁𑀬𑁂𑀯 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀲𑀺, 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀭𑀺𑀁𑀲𑀼.

𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀅𑀳𑁄 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀧𑁆𑀧𑀧𑀼𑀜𑁆𑀜𑁄 𑀅𑀧𑁆𑀧𑀮𑀸𑀪𑀻, 𑀏𑀯𑀭𑀽𑀧𑁂𑀦 𑀦𑀸𑀫 𑀅𑀧𑁆𑀧𑀧𑀼𑀜𑁆𑀜𑁂𑀦 𑀅𑀧𑁆𑀧𑀮𑀸𑀪𑀺𑀦𑀸 𑀓𑀣𑀁 𑀅𑀭𑀺𑀬𑀥𑀫𑁆𑀫𑁄 𑀮𑀤𑁆𑀥𑁄’’𑀢𑀺 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀇𑀫𑀸𑀬 𑀦𑀸𑀫, 𑀪𑀦𑁆𑀢𑁂’’𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀏𑀲𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀅𑀮𑀸𑀪𑀺𑀪𑀸𑀯𑀜𑁆𑀘 𑀅𑀭𑀺𑀬𑀥𑀫𑁆𑀫𑀮𑀸𑀪𑀺𑀪𑀸𑀯𑀜𑁆𑀘 𑀅𑀢𑁆𑀢𑀦𑀸𑀯 𑀅𑀓𑀸𑀲𑀺. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀧𑀭𑁂𑀲𑀁 𑀮𑀸𑀪𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀅𑀧𑁆𑀧𑀮𑀸𑀪𑀻 𑀚𑀸𑀢𑁄, ‘‘𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑀸𑀬 𑀬𑀼𑀢𑁆𑀢𑀪𑀸𑀯𑀲𑁆𑀲 𑀩𑀮𑁂𑀦 𑀅𑀭𑀺𑀬𑀥𑀫𑁆𑀫𑀮𑀸𑀪𑀻 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀏𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀦𑀺𑀲𑁆𑀲𑀸𑀬 𑀕𑀸𑀫𑀓𑀸𑀯𑀸𑀲𑁂 𑀯𑀲𑀢𑀺 𑀧𑀓𑀢𑀢𑁆𑀢𑁄 𑀲𑀻𑀮𑀯𑀸 𑀯𑀺𑀧𑀲𑁆𑀲𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄. 𑀅𑀣𑁂𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀲𑀫𑀯𑀢𑁆𑀢𑀯𑀸𑀲𑀁 𑀯𑀲𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀝𑁆𑀞𑀸𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀯𑀲𑀦𑀕𑀸𑀫𑀁 𑀲𑀫𑁆𑀧𑀢𑁆𑀢𑁄. 𑀓𑀼𑀝𑀼𑀫𑁆𑀩𑀺𑀓𑁄 𑀣𑁂𑀭𑀲𑁆𑀲 𑀇𑀭𑀺𑀬𑀸𑀧𑀣𑁂𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀢𑁆𑀯𑀸 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀥𑀼𑀭𑀯𑀺𑀳𑀸𑀭𑀫𑁂𑀯 𑀕𑀘𑁆𑀙𑀣, 𑀫𑀬𑀁 𑀲𑀸𑀬𑀦𑁆𑀳𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀣𑁂𑀭𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑁂𑀯𑀸𑀲𑀺𑀓𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑁄𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀮𑀤𑁆𑀥𑁄 𑀢𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀸𑀳𑀸𑀭𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀮𑀤𑁆𑀥𑁄’’𑀢𑀺. ‘‘𑀓𑀳𑀁 𑀮𑀤𑁆𑀥𑁄’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀥𑀼𑀭𑀕𑀸𑀫𑁂 𑀓𑀼𑀝𑀼𑀫𑁆𑀩𑀺𑀓𑀖𑀭𑁂’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀲𑁄𑀧𑀺 𑀓𑀼𑀝𑀼𑀫𑁆𑀩𑀺𑀓𑁄 𑀲𑀸𑀬𑀦𑁆𑀳𑁂 𑀕𑀦𑁆𑀥𑀫𑀸𑀮𑀜𑁆𑀘𑁂𑀯 𑀧𑀤𑀻𑀧𑁂𑀬𑁆𑀬𑀜𑁆𑀘 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑁂𑀯𑀸𑀲𑀺𑀓𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀏𑀓𑁄 𑀆𑀕𑀦𑁆𑀢𑀼𑀓𑀢𑁆𑀣𑁂𑀭𑁄 𑀅𑀢𑁆𑀣𑀺, 𑀆𑀕𑀢𑁄 𑀦𑀼 𑀔𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀆𑀕𑀢𑁄’’𑀢𑀺. ‘‘𑀇𑀤𑀸𑀦𑀺 𑀓𑀳’’𑀦𑁆𑀢𑀺. ‘‘𑀅𑀲𑀼𑀓𑀲𑁂𑀦𑀸𑀲𑀦𑁂 𑀦𑀸𑀫𑀸’’𑀢𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀻𑀢𑀮𑀯𑁂𑀮𑀸𑀬 𑀘𑁂𑀢𑀺𑀬𑀜𑁆𑀘 𑀩𑁄𑀥𑀺𑀜𑁆𑀘 𑀧𑀽𑀚𑁂𑀢𑁆𑀯𑀸 𑀤𑀻𑀧𑁂 𑀚𑀸𑀮𑁂𑀢𑁆𑀯𑀸 𑀉𑀪𑁄𑀧𑀺 𑀚𑀦𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑀢𑁄. 𑀦𑁂𑀯𑀸𑀲𑀺𑀓𑀢𑁆𑀣𑁂𑀭𑁄𑀧𑀺 𑀔𑁄 ‘‘𑀅𑀬𑀁 𑀓𑀼𑀝𑀼𑀫𑁆𑀩𑀺𑀓𑁄 𑀧𑀭𑀺𑀪𑀺𑀦𑁆𑀦𑁄, 𑀲𑀘𑀸𑀬𑀁 𑀪𑀺𑀓𑁆𑀔𑀼 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀢𑀺, 𑀦 𑀫𑀁 𑀏𑀲 𑀓𑀺𑀲𑁆𑀫𑀺𑀜𑁆𑀘𑀺 𑀕𑀡𑀬𑀺𑀲𑁆𑀲𑀢𑀻’’𑀢𑀺 𑀣𑁂𑀭𑁂 𑀅𑀦𑀢𑁆𑀢𑀫𑀦𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀢𑀲𑁆𑀲 𑀅𑀯𑀲𑀦𑀸𑀓𑀸𑀭𑁄 𑀫𑀬𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂𑀦 𑀉𑀧𑀝𑁆𑀞𑀸𑀦𑀯𑁂𑀮𑀸𑀬 𑀆𑀕𑀢𑁂𑀦 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺. 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀚𑀸𑀦𑀺𑀢𑁆𑀯𑀸 ‘‘𑀅𑀬𑀁 𑀣𑁂𑀭𑁄 𑀫𑀫 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀧𑀮𑀺𑀩𑀼𑀤𑁆𑀥𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺.

𑀦𑁂𑀯𑀸𑀲𑀺𑀓𑁄𑀧𑀺 𑀧𑀼𑀦𑀤𑀺𑀯𑀲𑁂 𑀦𑀔𑀧𑀺𑀝𑁆𑀞𑁂𑀦 𑀕𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀦𑀔𑁂𑀦 𑀤𑁆𑀯𑀸𑀭𑀁 𑀆𑀓𑁄𑀝𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑁄 𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀆𑀕𑀦𑁆𑀢𑀼𑀓𑀢𑁆𑀣𑁂𑀭𑁄 𑀓𑀳𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀦𑀸𑀳𑀁 𑀢𑀯 𑀓𑀼𑀮𑀽𑀧𑀓𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀫𑀺, 𑀕𑀡𑁆𑀟𑀺𑀁 𑀧𑀳𑀭𑀦𑁆𑀢𑁄𑀧𑀺 𑀤𑁆𑀯𑀸𑀭𑀁 𑀆𑀓𑁄𑀝𑁂𑀦𑁆𑀢𑁄𑀧𑀺 𑀧𑀩𑁄𑀥𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀳𑀺𑀬𑁆𑀬𑁄 𑀢𑀯 𑀕𑁂𑀳𑁂 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀤𑀸𑀦𑀺 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀧𑀲𑀻𑀤𑀫𑀸𑀦𑁄 𑀏𑀯𑀭𑀽𑀧𑁂𑀲𑀼𑀬𑁂𑀯 𑀞𑀸𑀦𑁂𑀲𑀼 𑀧𑀲𑀻𑀤𑀲𑀻’’𑀢𑀺 𑀆𑀳 𑁋 ‘‘𑀔𑀻𑀡𑀸𑀲𑀯𑀢𑁆𑀣𑁂𑀭𑁄𑀧𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 𑀦𑁂𑀯𑀸𑀲𑀺𑀓𑀢𑁆𑀣𑁂𑀭𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀪𑀺𑀲𑀗𑁆𑀔𑀢𑀁 𑀧𑀸𑀬𑀸𑀲𑀁 𑀧𑀸𑀬𑁂𑀢𑁆𑀯𑀸 𑀧𑀢𑁆𑀢𑀁 𑀕𑀦𑁆𑀥𑀘𑀼𑀡𑁆𑀡𑁂𑀳𑀺 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀼𑀦 𑀧𑀽𑀭𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀲𑁄 𑀣𑁂𑀭𑁄 𑀫𑀕𑁆𑀕𑀓𑀺𑀮𑀦𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀫𑀲𑁆𑀲 𑀳𑀭𑀣𑀸’’𑀢𑀺 𑀅𑀤𑀸𑀲𑀺. 𑀇𑀢𑀭𑁄 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀧𑀸𑀬𑀸𑀲𑀁 𑀧𑀺𑀯𑀺𑀲𑁆𑀲𑀢𑀺, 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑁄𑀧𑀺 𑀦 𑀕𑀫𑀺𑀲𑁆𑀲𑀢𑀺. 𑀲𑀘𑁂 𑀧𑀦𑀸𑀳𑀁 𑀇𑀫𑀁 𑀧𑀸𑀬𑀸𑀲𑀁 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀸𑀫𑀺, 𑀧𑀸𑀓𑀝𑀁 𑀫𑁂 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀉𑀤𑀓𑁂 𑀑𑀧𑀺𑀮𑀸𑀧𑁂𑀲𑁆𑀲𑀸𑀫𑀺, 𑀉𑀤𑀓𑀧𑀺𑀝𑁆𑀞𑁂 𑀲𑀧𑁆𑀧𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀲𑀘𑁂 𑀪𑀽𑀫𑀺𑀬𑀁 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀓𑀸𑀓𑀲𑀦𑁆𑀦𑀺𑀧𑀸𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀓𑀢𑁆𑀣 𑀦𑀼 𑀔𑁄 𑀇𑀫𑀁 𑀙𑀟𑁆𑀟𑁂𑀬𑁆𑀬’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀏𑀓𑀁 𑀛𑀸𑀫𑀓𑁆𑀔𑁂𑀢𑁆𑀢𑀁 𑀤𑀺𑀲𑁆𑀯𑀸 𑀅𑀗𑁆𑀕𑀸𑀭𑁂 𑀯𑀺𑀬𑀽𑀳𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀅𑀗𑁆𑀕𑀸𑀭𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀤𑁆𑀥𑀸 𑀲𑁄 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀫𑀫 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀳𑁄 𑀫𑀬𑀸 𑀉𑀤𑀭𑀳𑁂𑀢𑀼 𑀅𑀬𑀼𑀢𑁆𑀢𑀁 𑀓𑀢’’𑀦𑁆𑀢𑀺 𑀢𑀸𑀯𑀤𑁂𑀯𑀲𑁆𑀲 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀢𑀢𑁄 𑀧𑀝𑁆𑀞𑀸𑀬𑁂𑀯 𑀘 𑀫𑀦𑀼𑀲𑁆𑀲𑀧𑁂𑀢𑁄 𑀳𑀼𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘𑀚𑀸𑀢𑀺𑀲𑀢𑁂𑀲𑀼 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀫𑁆𑀧𑀺 𑀉𑀤𑀭𑀧𑀽𑀭𑀁 𑀆𑀳𑀸𑀭𑀁 𑀦 𑀮𑀪𑀺. 𑀏𑀓𑀤𑀺𑀯𑀲𑀁 𑀧𑀦 𑀕𑀩𑁆𑀪𑀫𑀮𑀁 𑀉𑀤𑀭𑀧𑀽𑀭𑀁 𑀮𑀪𑀺. 𑀧𑀼𑀦 𑀧𑀜𑁆𑀘𑀚𑀸𑀢𑀺𑀲𑀢𑁂𑀲𑀼 𑀲𑀼𑀦𑀔𑁄 𑀅𑀳𑁄𑀲𑀺. 𑀢𑀤𑀸𑀧𑀺 𑀏𑀓𑀤𑀺𑀯𑀲𑀁 𑀪𑀢𑁆𑀢𑀯𑀫𑀦𑀁 𑀉𑀤𑀭𑀧𑀽𑀭𑀁 𑀮𑀪𑀺, 𑀲𑁂𑀲𑀓𑀸𑀮𑁂 𑀧𑀦 𑀢𑁂𑀦 𑀉𑀤𑀭𑀧𑀽𑀭𑁄 𑀆𑀳𑀸𑀭𑁄 𑀦𑀸𑀫 𑀦 𑀮𑀤𑁆𑀥𑀧𑀼𑀩𑁆𑀩𑁄. 𑀲𑀼𑀦𑀔𑀬𑁄𑀦𑀺𑀢𑁄 𑀧𑀦 𑀘𑀯𑀺𑀢𑁆𑀯𑀸 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀼𑀮𑀁 𑀧𑀭𑀫𑀤𑀼𑀕𑁆𑀕𑀢𑀫𑁂𑀯 𑀚𑀸𑀢𑀁, 𑀚𑀸𑀢𑀺𑀢𑁄 𑀉𑀤𑁆𑀥𑀁 𑀉𑀤𑀓𑀓𑀜𑁆𑀚𑀺𑀓𑀸𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺. 𑀢𑀲𑁆𑀲 𑀧𑀦 ‘‘𑀫𑀺𑀢𑁆𑀢𑀯𑀺𑀦𑁆𑀤𑀓𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀙𑀸𑀢𑀓𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀕𑀘𑁆𑀙 𑀓𑀸𑀴𑀓𑀡𑁆𑀡𑀻’’𑀢𑀺 𑀢𑀁 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀺𑀁𑀲𑀼. 𑀲𑁄 𑀅𑀧𑀝𑀺𑀲𑀭𑀡𑁄 𑀯𑀺𑀘𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀯𑀸𑀘𑁂𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀤𑀼𑀕𑁆𑀕𑀢𑀸𑀦𑀁 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀬𑀫𑁆𑀧𑀺 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺. 𑀲𑁄 𑀨𑀭𑀼𑀲𑁄 𑀅𑀦𑁄𑀯𑀸𑀤𑀓𑁆𑀔𑀫𑁄 𑀢𑀁 𑀢𑀁 𑀧𑀳𑀭𑀦𑁆𑀢𑁄 𑀯𑀺𑀘𑀭𑀢𑀺, 𑀩𑁄𑀥𑀺𑀲𑀢𑁆𑀢𑁂𑀦 𑀑𑀯𑀤𑀺𑀬𑀫𑀸𑀦𑁄𑀧𑀺 𑀑𑀯𑀸𑀤𑀁 𑀦 𑀕𑀡𑁆𑀳𑀸𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀆𑀬𑁄𑀧𑀺𑀲𑁆𑀲 𑀫𑀦𑁆𑀤𑁄 𑀚𑀸𑀢𑁄.

𑀅𑀣 𑀲𑁄 𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀑𑀯𑀸𑀤𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀆𑀳𑀺𑀡𑁆𑀟𑀦𑁆𑀢𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀢𑀺. 𑀲𑁄 𑀢𑀢𑁆𑀣 𑀏𑀓𑀸𑀬 𑀤𑀼𑀕𑁆𑀕𑀢𑀺𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑀁 𑀦𑀺𑀲𑁆𑀲𑀸𑀬 𑀤𑁆𑀯𑁂 𑀤𑀸𑀭𑀓𑁂 𑀯𑀺𑀚𑀸𑀬𑀺. 𑀕𑀸𑀫𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁 𑀲𑀼𑀲𑀸𑀲𑀦𑀁 𑀤𑀼𑀲𑁆𑀲𑀸𑀲𑀦𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲 𑀪𑀢𑀺𑀁 𑀤𑀢𑁆𑀯𑀸 𑀢𑀁 𑀕𑀸𑀫𑀤𑁆𑀯𑀸𑀭𑁂 𑀓𑀼𑀝𑀺𑀓𑀸𑀬 𑀯𑀲𑀸𑀧𑁂𑀲𑀼𑀁. 𑀢𑀁 𑀧𑀦 𑀫𑀺𑀢𑁆𑀢𑀯𑀺𑀦𑁆𑀤𑀓𑀁 𑀦𑀺𑀲𑁆𑀲𑀸𑀬 𑀢𑁂 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀭𑀸𑀚𑀤𑀡𑁆𑀟𑀁 𑀅𑀕𑀫𑀁𑀲𑀼, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀦𑁂𑀲𑀁 𑀕𑁂𑀳𑀸𑀦𑀺 𑀛𑀸𑀬𑀺𑀁𑀲𑀼, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀢𑀴𑀸𑀓𑀁 𑀪𑀺𑀚𑁆𑀚𑀺. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀅𑀫𑁆𑀳𑀸𑀓𑀁 𑀧𑀼𑀩𑁆𑀩𑁂 𑀇𑀫𑀲𑁆𑀲 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲 𑀅𑀦𑀸𑀕𑀫𑀦𑀓𑀸𑀮𑁂 𑀏𑀯𑀭𑀽𑀧𑀁 𑀦𑀢𑁆𑀣𑀺, 𑀇𑀤𑀸𑀦𑀺 𑀧𑀦𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀸𑀫𑀸’’𑀢𑀺 𑀢𑀁 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀺𑀁𑀲𑀼.

𑀲𑁄 𑀅𑀢𑁆𑀢𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀁 𑀅𑀝𑀯𑀺𑀁 𑀧𑀸𑀯𑀺𑀲𑀺. 𑀢𑀢𑁆𑀣𑀲𑁆𑀲 𑀅𑀫𑀦𑀼𑀲𑁆𑀲𑀸 𑀤𑀸𑀭𑀓𑁂 𑀘 𑀪𑀭𑀺𑀬𑀜𑁆𑀘 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼. 𑀲𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀳𑀺𑀡𑁆𑀟𑀦𑁆𑀢𑁄 𑀏𑀓𑀁 𑀕𑀫𑁆𑀪𑀻𑀭𑀁 𑀦𑀸𑀫 𑀧𑀝𑁆𑀝𑀦𑀕𑀸𑀫𑀁 𑀦𑀸𑀯𑀸𑀯𑀺𑀲𑁆𑀲𑀚𑁆𑀚𑀦𑀤𑀺𑀯𑀲𑁂𑀬𑁂𑀯 𑀧𑀢𑁆𑀯𑀸 𑀓𑀫𑁆𑀫𑀓𑀸𑀭𑀓𑁄 𑀳𑀼𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀦𑀸𑀯𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀲𑀢𑁆𑀢𑀸𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀼𑀤𑁆𑀤𑀫𑀚𑁆𑀛𑁂 𑀆𑀓𑁄𑀝𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀅𑀝𑁆𑀞𑀸𑀲𑀺. 𑀢𑁂 𑀓𑀸𑀴𑀓𑀡𑁆𑀡𑀺𑀲𑀮𑀸𑀓𑀁 𑀘𑀸𑀭𑁂𑀲𑀼𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲𑁂𑀯 𑀧𑀸𑀧𑀼𑀡𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲𑁂𑀓𑀁 𑀯𑁂𑀴𑀼𑀓𑀮𑀸𑀧𑀁 𑀤𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀔𑀺𑀧𑀺𑀁𑀲𑀼, 𑀢𑀲𑁆𑀫𑀺𑀁 𑀔𑀺𑀢𑁆𑀢𑀫𑀢𑁆𑀢𑁂 𑀦𑀸𑀯𑀸 𑀅𑀕𑀫𑀸𑀲𑀺. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀯𑁂𑀴𑀼𑀓𑀮𑀸𑀧𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀕𑀘𑁆𑀙𑀦𑁆𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀭𑀓𑁆𑀔𑀺𑀢𑀲𑀻𑀮𑀲𑁆𑀲 𑀨𑀮𑁂𑀦 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀏𑀓𑀲𑁆𑀫𑀺𑀁 𑀨𑀮𑀺𑀓𑀯𑀺𑀫𑀸𑀦𑁂 𑀘𑀢𑀲𑁆𑀲𑁄 𑀤𑁂𑀯𑀥𑀻𑀢𑀭𑁄 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀲𑀁 𑀲𑀦𑁆𑀢𑀺𑀓𑁂 𑀲𑀼𑀔𑀁 𑀅𑀦𑀼𑀪𑀯𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀲𑀺. 𑀢𑀸 𑀧𑀦 𑀯𑀺𑀫𑀸𑀦𑀧𑁂𑀢𑀺𑀬𑁄 𑀲𑀢𑁆𑀢𑀸𑀳𑀁 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀲𑀢𑁆𑀢𑀸𑀳𑀁 𑀤𑀼𑀓𑁆𑀔𑀁. 𑀲𑀢𑁆𑀢𑀸𑀳𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼𑀁 𑀕𑀘𑁆𑀙𑀫𑀸𑀦𑀸 ‘‘𑀬𑀸𑀯 𑀫𑀬𑀁 𑀆𑀕𑀘𑁆𑀙𑀸𑀫, 𑀢𑀸𑀯 𑀇𑀥𑁂𑀯 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀕𑀫𑀁𑀲𑀼.

𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀸𑀲𑀁 𑀕𑀢𑀓𑀸𑀮𑁂 𑀯𑁂𑀴𑀼𑀓𑀮𑀸𑀧𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀭𑀚𑀢𑀯𑀺𑀫𑀸𑀦𑁂 𑀅𑀝𑁆𑀞 𑀤𑁂𑀯𑀥𑀻𑀢𑀭𑁄 𑀮𑀪𑀺. 𑀢𑀢𑁄𑀧𑀺 𑀧𑀭𑀁 𑀕𑀘𑁆𑀙𑀦𑁆𑀢𑁄 𑀫𑀡𑀺𑀯𑀺𑀫𑀸𑀦𑁂 𑀲𑁄𑀴𑀲, 𑀓𑀦𑀓𑀯𑀺𑀫𑀸𑀦𑁂 𑀤𑁆𑀯𑀢𑁆𑀢𑀺𑀁𑀲 𑀤𑁂𑀯𑀥𑀻𑀢𑀭𑁄 𑀮𑀪𑀺. 𑀢𑀸𑀲𑀫𑁆𑀧𑀺 𑀯𑀘𑀦𑀁 𑀅𑀓𑀢𑁆𑀯𑀸 𑀧𑀭𑀢𑁄 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀤𑀻𑀧𑀓𑁂 𑀏𑀓𑀁 𑀬𑀓𑁆𑀔𑀦𑀕𑀭𑀁 𑀅𑀤𑁆𑀤𑀲. 𑀢𑀢𑁆𑀣𑁂𑀓𑀸 𑀬𑀓𑁆𑀔𑀺𑀦𑀻 𑀅𑀚𑀭𑀽𑀧𑁂𑀦 𑀯𑀺𑀘𑀭𑀢𑀺. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀲𑁆𑀲𑀸 𑀬𑀓𑁆𑀔𑀺𑀦𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀚𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺, 𑀲𑀸 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀺. 𑀲𑁄 𑀢𑀸𑀬 𑀔𑀺𑀢𑁆𑀢𑁄 𑀲𑀫𑀼𑀤𑁆𑀤𑀫𑀢𑁆𑀣𑀓𑁂𑀦 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀧𑀭𑀺𑀔𑀸𑀧𑀺𑀝𑁆𑀞𑁂 𑀏𑀓𑀲𑁆𑀫𑀺𑀁 𑀓𑀡𑁆𑀝𑀓𑀕𑀼𑀫𑁆𑀩𑀫𑀢𑁆𑀣𑀓𑁂 𑀧𑀢𑀺𑀢𑁆𑀯𑀸 𑀧𑀯𑀝𑁆𑀝𑀫𑀸𑀦𑁄 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀢𑀲𑁆𑀫𑀺𑀁 𑀧𑀭𑀺𑀔𑀸𑀧𑀺𑀝𑁆𑀞𑁂 𑀭𑀜𑁆𑀜𑁄 𑀅𑀚𑀺𑀓𑀸 𑀘𑀭𑀫𑀸𑀦𑀸 𑀘𑁄𑀭𑀸 𑀳𑀭𑀦𑁆𑀢𑀺. 𑀅𑀚𑀺𑀓𑀕𑁄𑀧𑀓𑀸 ‘‘𑀘𑁄𑀭𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀫𑀦𑁆𑀢𑀁 𑀦𑀺𑀮𑀻𑀦𑀸 𑀅𑀝𑁆𑀞𑀁𑀲𑀼. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀧𑀯𑀝𑁆𑀝𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀺𑀢𑁄 𑀢𑀸 𑀅𑀚𑀺𑀓𑀸 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀲𑀫𑀼𑀤𑁆𑀤𑁂 𑀏𑀓𑀲𑁆𑀫𑀺𑀁 𑀤𑀻𑀧𑀓𑁂 𑀅𑀚𑀺𑀓𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀢𑀸𑀬 𑀔𑀺𑀢𑁆𑀢𑁄 𑀇𑀥 𑀧𑀢𑀺𑀢𑁄. 𑀲𑀘𑁂 𑀇𑀤𑀸𑀦𑀺 𑀏𑀓𑀁 𑀅𑀚𑀺𑀓𑀁 𑀧𑀸𑀤𑁂 𑀕𑀳𑁂𑀲𑁆𑀲𑀸𑀫𑀺, 𑀲𑀸 𑀫𑀁 𑀧𑀭𑀢𑁄 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀯𑀺𑀫𑀸𑀦𑀤𑁂𑀯𑀢𑀸𑀦𑀁 𑀲𑀦𑁆𑀢𑀺𑀓𑁂 𑀔𑀺𑀧𑀺𑀲𑁆𑀲𑀢𑀻’’𑀢𑀺. 𑀲𑁄 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀚𑀺𑀓𑀁 𑀧𑀸𑀤𑁂 𑀕𑀡𑁆𑀳𑀺, 𑀲𑀸 𑀕𑀳𑀺𑀢𑀫𑀢𑁆𑀢𑀸 𑀯𑀺𑀭𑀯𑀺. 𑀅𑀚𑀺𑀓𑀕𑁄𑀧𑀓𑀸 𑀇𑀢𑁄 𑀘𑀺𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀭𑀸𑀚𑀓𑀼𑀮𑁂 𑀅𑀚𑀺𑀓𑀔𑀸𑀤𑀓𑁄 𑀏𑀲 𑀘𑁄𑀭𑁄’’𑀢𑀺 𑀢𑀁 𑀓𑁄𑀝𑁆𑀝𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀦𑁆𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀲𑀢𑀫𑀸𑀡𑀯𑀓𑀧𑀭𑀺𑀯𑀼𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀦𑁆𑀳𑀸𑀬𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀫𑀺𑀢𑁆𑀢𑀯𑀺𑀦𑁆𑀤𑀓𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀆𑀳 𑁋 ‘‘𑀢𑀸𑀢𑀸, 𑀅𑀬𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀓𑀲𑁆𑀫𑀸 𑀦𑀁 𑀕𑀡𑁆𑀳𑀣𑀸’’𑀢𑀺? ‘‘𑀅𑀚𑀺𑀓𑀘𑁄𑀭𑀓𑁄, 𑀅𑀬𑁆𑀬, 𑀏𑀓𑀁 𑀅𑀚𑀺𑀓𑀁 𑀧𑀸𑀤𑁂 𑀕𑀡𑁆𑀳𑀺, 𑀢𑀲𑁆𑀫𑀸 𑀕𑀳𑀺𑀢𑁄’’𑀢𑀺. ‘‘𑀢𑁂𑀦 𑀳𑁂𑀢𑀁 𑀅𑀫𑁆𑀳𑀸𑀓𑀁 𑀤𑀸𑀲𑀁 𑀓𑀢𑁆𑀯𑀸 𑀤𑁂𑀣, 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀢𑀻’’𑀢𑀺. 𑀢𑁂, ‘‘𑀲𑀸𑀥𑀼 𑀅𑀬𑁆𑀬𑀸’’𑀢𑀺 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀺𑀢𑁆𑀢𑀯𑀺𑀦𑁆𑀤𑀓, 𑀢𑁆𑀯𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀳𑀁 𑀯𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀢𑁆𑀣𑀓𑀸𑀫𑀸𑀦𑀁 𑀯𑀘𑀦𑀁 𑀅𑀓𑀭𑁄𑀦𑁆𑀢𑁄 𑀏𑀯𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧. ‘‘𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀅𑀚𑀺𑀬𑀸 𑀧𑀸𑀤𑀫𑁄𑀮𑀫𑁆𑀩, 𑀫𑀺𑀢𑁆𑀢𑀓𑁄 𑀯𑀺𑀬 𑀲𑁄𑀘𑀢𑀻’’𑀢𑀺.

𑀢𑀢𑁆𑀣 𑀅𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀯𑀼𑀟𑁆𑀠𑀺𑀁 𑀇𑀘𑁆𑀙𑀦𑁆𑀢𑀲𑁆𑀲. 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄𑀢𑀺 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀫𑀸𑀦𑀲𑁆𑀲. 𑀑𑀯𑀚𑁆𑀚𑀫𑀸𑀦𑁄𑀢𑀺 𑀫𑀼𑀤𑀼𑀓𑁂𑀦 𑀳𑀺𑀢𑀘𑀺𑀢𑁆𑀢𑁂𑀦 𑀑𑀯𑀤𑀺𑀬𑀫𑀸𑀦𑁄. 𑀦 𑀓𑀭𑁄𑀢𑀺 𑀲𑀸𑀲𑀦𑀦𑁆𑀢𑀺 𑀅𑀦𑀼𑀲𑀺𑀝𑁆𑀞𑀁 𑀦 𑀓𑀭𑁄𑀢𑀺, 𑀤𑀼𑀩𑁆𑀩𑀘𑁄 𑀅𑀦𑁄𑀯𑀸𑀤𑀓𑁄 𑀳𑁄𑀢𑀺. 𑀫𑀺𑀢𑁆𑀢𑀓𑁄 𑀯𑀺𑀬 𑀲𑁄𑀘𑀢𑀻𑀢𑀺 𑀬𑀣𑀸𑀬𑀁 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀅𑀚𑀺𑀓𑀸𑀬 𑀧𑀸𑀤𑀁 𑀕𑀳𑁂𑀢𑁆𑀯𑀸 𑀲𑁄𑀘𑀢𑀺 𑀓𑀺𑀮𑀫𑀢𑀺, 𑀏𑀯𑀁 𑀦𑀺𑀘𑁆𑀘𑀓𑀸𑀮𑀁 𑀲𑁄𑀘𑀢𑀻𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀏𑀯𑀁 𑀢𑁂𑀦 𑀣𑁂𑀭𑁂𑀦 𑀏𑀢𑁆𑀢𑀓𑁂 𑀅𑀤𑁆𑀥𑀸𑀦𑁂 𑀢𑀻𑀲𑀼𑀬𑁂𑀯 𑀅𑀢𑁆𑀢𑀪𑀸𑀯𑁂𑀲𑀼 𑀓𑀼𑀘𑁆𑀙𑀺𑀧𑀽𑀭𑁄 𑀮𑀤𑁆𑀥𑀧𑀼𑀩𑁆𑀩𑁄. 𑀬𑀓𑁆𑀔𑁂𑀦 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀕𑀩𑁆𑀪𑀫𑀮𑀁 𑀮𑀤𑁆𑀥𑀁, 𑀲𑀼𑀦𑀔𑁂𑀦 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑀢𑁆𑀢𑀯𑀫𑀦𑀁, 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲𑀸𑀦𑀼𑀪𑀸𑀯𑁂𑀦 𑀘𑀢𑀼𑀫𑀥𑀼𑀭𑀁 𑀮𑀤𑁆𑀥𑀁. 𑀏𑀯𑀁 𑀧𑀭𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑀓𑀭𑀡𑀁 𑀦𑀸𑀫 𑀫𑀳𑀸𑀤𑁄𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀲𑁄𑀧𑀺 𑀆𑀘𑀭𑀺𑀬𑁄 𑀫𑀺𑀢𑁆𑀢𑀯𑀺𑀦𑁆𑀤𑀓𑁄𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑁄 𑀅𑀧𑁆𑀧𑀮𑀸𑀪𑀺𑀪𑀸𑀯𑀜𑁆𑀘 𑀅𑀭𑀺𑀬𑀥𑀫𑁆𑀫𑀮𑀸𑀪𑀺𑀪𑀸𑀯𑀜𑁆𑀘 𑀲𑀬𑀫𑁂𑀯 𑀏𑀲 𑀅𑀓𑀸𑀲𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀮𑁄𑀲𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀮𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁨] 𑁨. 𑀓𑀧𑁄𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀅𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀮𑁄𑀮𑀪𑀸𑀯𑁄 𑀦𑀯𑀓𑀦𑀺𑀧𑀸𑀢𑁂 𑀓𑀸𑀓𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀢𑀁 𑀪𑀺𑀓𑁆𑀔𑀽 ‘‘𑀅𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀮𑁄𑀮𑁄’’𑀢𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀮𑁄𑀮𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀮𑁄𑀮𑁄 𑀮𑁄𑀮𑀓𑀸𑀭𑀡𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀧𑀡𑁆𑀟𑀺𑀢𑀸𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀧𑀭𑀺𑀳𑀻𑀦𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀧𑀼𑀜𑁆𑀜𑀓𑀸𑀫𑀢𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀓𑀼𑀡𑀸𑀦𑀁 𑀲𑀼𑀔𑀯𑀲𑀦𑀢𑁆𑀣𑀸𑀬 𑀣𑀼𑀲𑀧𑀘𑁆𑀙𑀺𑀬𑁄 𑀑𑀮𑀫𑁆𑀩𑁂𑀦𑁆𑀢𑀺. 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄𑀧𑀺 𑀪𑀢𑁆𑀢𑀓𑀸𑀭𑀓𑁄 𑀅𑀢𑁆𑀢𑀦𑁄 𑀫𑀳𑀸𑀦𑀲𑁂 𑀏𑀓𑀁 𑀣𑀼𑀲𑀧𑀘𑁆𑀙𑀺𑀁 𑀑𑀮𑀫𑁆𑀩𑁂𑀢𑁆𑀯𑀸 𑀞𑀧𑁂𑀲𑀺, 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑁂 𑀘𑀭𑀺𑀢𑁆𑀯𑀸 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁄 𑀓𑀸𑀮𑀁 𑀔𑁂𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀓𑀸𑀓𑁄 𑀫𑀳𑀸𑀦𑀲𑀫𑀢𑁆𑀣𑀓𑁂𑀦 𑀕𑀘𑁆𑀙𑀦𑁆𑀢𑁄 𑀅𑀫𑁆𑀩𑀺𑀮𑀸𑀦𑀫𑁆𑀩𑀺𑀮𑀫𑀘𑁆𑀙𑀫𑀁𑀲𑀸𑀦𑀁 𑀥𑀽𑀧𑀦𑀯𑀸𑀲𑀁 𑀖𑀸𑀬𑀺𑀢𑁆𑀯𑀸 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀇𑀫𑀁 𑀫𑀘𑁆𑀙𑀫𑀁𑀲𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀸𑀬𑀁 𑀩𑁄𑀥𑀺𑀲𑀢𑁆𑀢𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀦𑀲𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀧𑀸𑀭𑀸𑀯𑀢𑀁 𑀦𑀺𑀲𑁆𑀲𑀸𑀬 𑀫𑀘𑁆𑀙𑀫𑀁𑀲𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀢𑁆𑀣𑀸𑀬 𑀕𑀫𑀦𑀓𑀸𑀮𑁂 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀕𑀫𑀸𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀲𑁆𑀫𑀸 𑀢𑁆𑀯𑀁, 𑀲𑀫𑁆𑀫, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀘𑀭𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀳𑀁 𑀓𑀺𑀭𑀺𑀬𑀸 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀫𑁆𑀫, 𑀢𑀼𑀫𑁆𑀳𑁂 𑀅𑀜𑁆𑀜𑀕𑁄𑀘𑀭𑀸, 𑀫𑀬𑀁 𑀅𑀜𑁆𑀜𑀕𑁄𑀘𑀭𑀸, 𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀤𑀼𑀓𑁆𑀓𑀭’’𑀦𑁆𑀢𑀺. ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀕𑁄𑀘𑀭𑀕𑁆𑀕𑀳𑀡𑀓𑀸𑀮𑁂 𑀅𑀳𑀫𑁆𑀧𑀺 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀓𑁂𑀯𑀮𑀁 𑀢𑁂 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀓𑀸𑀓𑀁 𑀑𑀯𑀤𑀺𑀢𑁆𑀯𑀸 𑀕𑁄𑀘𑀭𑀁 𑀘𑀭𑀦𑁆𑀢𑁄 𑀢𑀺𑀡𑀩𑀻𑀚𑀸𑀤𑀻𑀦𑀺 𑀔𑀸𑀤𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀕𑁄𑀘𑀭𑀕𑁆𑀕𑀳𑀡𑀓𑀸𑀮𑁂 𑀓𑀸𑀓𑁄 𑀕𑀦𑁆𑀢𑁆𑀯𑀸 𑀕𑁄𑀫𑀬𑀧𑀺𑀡𑁆𑀟𑀁 𑀅𑀧𑀦𑁂𑀢𑁆𑀯𑀸 𑀧𑀸𑀡𑀓𑁂 𑀔𑀸𑀤𑀺𑀢𑁆𑀯𑀸 𑀉𑀤𑀭𑀁 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀢𑀼𑀫𑁆𑀳𑁂 𑀅𑀢𑀺𑀯𑁂𑀮𑀁 𑀘𑀭𑀣, 𑀅𑀢𑀺𑀩𑀳𑀼𑀪𑀓𑁆𑀔𑁂𑀦 𑀦𑀸𑀫 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀸𑀬𑀁 𑀆𑀕𑀘𑁆𑀙𑀦𑁆𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀫𑀳𑀸𑀦𑀲𑀁 𑀧𑀸𑀯𑀺𑀲𑀺. 𑀪𑀢𑁆𑀢𑀓𑀸𑀭𑀓𑁄 ‘‘𑀅𑀫𑁆𑀳𑀸𑀓𑀁 𑀓𑀧𑁄𑀢𑁄 𑀅𑀜𑁆𑀜𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀸𑀓𑀲𑁆𑀲𑀧𑀺 𑀧𑀘𑁆𑀙𑀺𑀁 𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀚𑀦𑀸 𑀯𑀲𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑁂𑀝𑁆𑀞𑀺𑀲𑁆𑀲 𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀆𑀳𑀭𑀺𑀁𑀲𑀼. 𑀢𑀁 𑀆𑀤𑀸𑀬 𑀪𑀢𑁆𑀢𑀓𑀸𑀭𑀓𑁄 𑀫𑀳𑀸𑀦𑀲𑁂 𑀢𑀢𑁆𑀣 𑀢𑀢𑁆𑀣 𑀑𑀮𑀫𑁆𑀩𑁂𑀲𑀺. 𑀓𑀸𑀓𑁄 𑀢𑀁 𑀤𑀺𑀲𑁆𑀯𑀸 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑁆𑀯𑁂 𑀕𑁄𑀘𑀭𑀪𑀽𑀫𑀺𑀁 𑀅𑀕𑀦𑁆𑀢𑁆𑀯𑀸 𑀫𑀬𑀸 𑀇𑀤𑀫𑁂𑀯 𑀔𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀭𑀢𑁆𑀢𑀺𑀁 𑀦𑀺𑀢𑁆𑀣𑀼𑀦𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀸𑀬 𑀕𑀘𑁆𑀙𑀦𑁆𑀢𑁄 ‘‘𑀏𑀳𑀺, 𑀲𑀫𑁆𑀫, 𑀓𑀸𑀓𑀸’’𑀢𑀺 𑀆𑀳. ‘‘𑀲𑀸𑀫𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀫𑀬𑁆𑀳𑀁 𑀓𑀼𑀘𑁆𑀙𑀺𑀭𑁄𑀕𑁄 𑀅𑀢𑁆𑀣𑀻’’𑀢𑀺. ‘‘𑀲𑀫𑁆𑀫, 𑀓𑀸𑀓𑀸𑀦𑀁 𑀓𑀼𑀘𑁆𑀙𑀺𑀭𑁄𑀕𑁄 𑀦𑀸𑀫 𑀦 𑀓𑀤𑀸𑀘𑀺 𑀪𑀽𑀢𑀧𑀼𑀩𑁆𑀩𑁄, 𑀭𑀢𑁆𑀢𑀺𑀁 𑀢𑀻𑀲𑀼 𑀬𑀸𑀫𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀬𑀸𑀫𑁂 𑀫𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀺, 𑀤𑀻𑀧𑀯𑀝𑁆𑀝𑀺𑀁 𑀕𑀺𑀮𑀺𑀢𑀓𑀸𑀮𑁂 𑀧𑀦 𑀦𑁂𑀲𑀁 𑀫𑀼𑀳𑀼𑀢𑁆𑀢𑀁 𑀢𑀺𑀢𑁆𑀢𑀺 𑀳𑁄𑀢𑀺, 𑀢𑁆𑀯𑀁 𑀇𑀫𑀁 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀲𑀺, 𑀏𑀳𑀺 𑀫𑀦𑀼𑀲𑁆𑀲𑀧𑀭𑀺𑀪𑁄𑀕𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀤𑀼𑀧𑁆𑀧𑀭𑀺𑀪𑀼𑀜𑁆𑀚𑀺𑀬𑁄, 𑀫𑀸 𑀏𑀯𑀭𑀽𑀧𑀁 𑀅𑀓𑀸𑀲𑀺, 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀕𑁄𑀘𑀭𑀸𑀬 𑀕𑀘𑁆𑀙𑀸𑀳𑀻’’𑀢𑀺. ‘‘𑀦 𑀲𑀓𑁆𑀓𑁄𑀫𑀺, 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀲𑀓𑁂𑀦 𑀓𑀫𑁆𑀫𑁂𑀦, 𑀮𑁄𑀪𑀯𑀲𑀁 𑀅𑀕𑀦𑁆𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀸𑀬 𑀕𑀢𑁄.

𑀪𑀢𑁆𑀢𑀓𑀸𑀭𑀓𑁄 𑀦𑀸𑀦𑀧𑁆𑀧𑀓𑀸𑀭𑀁 𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀲𑀼𑀫𑀦𑀺𑀓𑁆𑀔𑀫𑀦𑀢𑁆𑀣𑀁 𑀪𑀸𑀚𑀦𑀸𑀦𑀺 𑀣𑁄𑀓𑀁 𑀯𑀺𑀯𑀭𑀺𑀢𑁆𑀯𑀸 𑀭𑀲𑀧𑀭𑀺𑀲𑁆𑀲𑀸𑀯𑀦𑀓𑀭𑁄𑀝𑀺𑀁 𑀪𑀸𑀚𑀦𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁂𑀤𑀁 𑀧𑀼𑀜𑁆𑀙𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀸𑀓𑁄 𑀧𑀘𑁆𑀙𑀺𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀢𑁆𑀢𑀕𑁂𑀳𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁𑀤𑀸𑀦𑀺 𑀫𑀬𑁆𑀳𑀁 𑀫𑀦𑁄𑀭𑀣𑀁 𑀧𑀽𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀁 𑀓𑀸𑀮𑁄, 𑀓𑀺𑀁 𑀦𑀼 𑀔𑁄 𑀫𑀳𑀸𑀫𑀁𑀲𑀁 𑀔𑀸𑀤𑀸𑀫𑀺, 𑀉𑀤𑀸𑀳𑀼 𑀘𑀼𑀡𑁆𑀡𑀺𑀓𑀫𑀁𑀲’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀘𑀼𑀡𑁆𑀡𑀺𑀓𑀫𑀁𑀲𑁂𑀦 𑀦𑀸𑀫 𑀔𑀺𑀧𑁆𑀧𑀁 𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀫𑀳𑀦𑁆𑀢𑀁 𑀫𑀁𑀲𑀔𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀧𑀘𑁆𑀙𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀫𑀸𑀦𑁄 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀙𑀺𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀭𑀲𑀓𑀭𑁄𑀝𑀺𑀬𑀁 𑀦𑀺𑀮𑀻𑀬𑀺. 𑀲𑀸 ‘‘𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀪𑀢𑁆𑀢𑀓𑀸𑀭𑀓𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀯𑀺𑀝𑁆𑀞𑁄 𑀓𑀸𑀓𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀤𑀼𑀝𑁆𑀞𑀓𑀸𑀓𑁄 𑀫𑀳𑀸𑀲𑁂𑀝𑁆𑀞𑀺𑀦𑁄 𑀧𑀓𑁆𑀓𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄, 𑀅𑀳𑀁 𑀔𑁄 𑀧𑀦 𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀚𑀻𑀯𑀸𑀫𑀺, 𑀦 𑀇𑀫𑀁 𑀩𑀸𑀮𑀁, 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀓𑀸𑀓𑀁 𑀕𑀳𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑁂 𑀧𑀢𑁆𑀢𑀸𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀅𑀮𑁆𑀮𑀲𑀺𑀗𑁆𑀕𑀻𑀯𑁂𑀭𑀮𑁄𑀡𑀚𑀻𑀭𑀓𑀸𑀤𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀅𑀫𑁆𑀩𑀺𑀮𑀢𑀓𑁆𑀓𑁂𑀦 𑀆𑀮𑁄𑀴𑁂𑀢𑁆𑀯𑀸 𑀢𑁂𑀦𑀲𑁆𑀲 𑀲𑀓𑀮𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀢𑀁 𑀓𑀸𑀓𑀁 𑀧𑀘𑁆𑀙𑀺𑀬𑀁 𑀔𑀺𑀧𑀺. 𑀲𑁄 𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀪𑀺𑀪𑀽𑀢𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀩𑁆𑀬𑀲𑀦𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀮𑁄𑀮𑀓𑀸𑀓, 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀢𑀯 𑀮𑁄𑀪𑀁 𑀦𑀺𑀲𑁆𑀲𑀸𑀬 𑀫𑀳𑀸𑀤𑀼𑀓𑁆𑀔𑀁 𑀧𑀢𑁆𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁨. ‘‘𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀓𑀧𑁄𑀢𑀓𑀲𑁆𑀲 𑀯𑀘𑀦𑀁 𑀅𑀓𑀢𑁆𑀯𑀸, 𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑁄𑀯 𑀲𑁂𑀢𑀻’’𑀢𑀺.

𑀢𑀢𑁆𑀣 𑀓𑀧𑁄𑀢𑀓𑀲𑁆𑀲 𑀯𑀘𑀦𑀁 𑀅𑀓𑀢𑁆𑀯𑀸𑀢𑀺 𑀧𑀸𑀭𑀸𑀯𑀢𑀲𑁆𑀲 𑀳𑀺𑀢𑀸𑀦𑀼𑀲𑀸𑀲𑀦𑀯𑀘𑀦𑀁 𑀅𑀓𑀢𑁆𑀯𑀸. 𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑁄𑀯 𑀲𑁂𑀢𑀻𑀢𑀺 𑀅𑀫𑀺𑀢𑁆𑀢𑀸𑀦𑀁 𑀅𑀦𑀢𑁆𑀣𑀓𑀸𑀭𑀓𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑀧𑀼𑀕𑁆𑀕𑀮𑀸𑀦𑀁 𑀳𑀢𑁆𑀣𑀢𑁆𑀣𑀁 𑀳𑀢𑁆𑀣𑀧𑀣𑀁 𑀕𑀢𑁄 𑀅𑀬𑀁 𑀓𑀸𑀓𑁄 𑀯𑀺𑀬 𑀲𑁄 𑀧𑀼𑀕𑁆𑀕𑀮𑁄 𑀫𑀳𑀦𑁆𑀢𑀁 𑀩𑁆𑀬𑀲𑀦𑀁 𑀧𑀢𑁆𑀯𑀸 𑀅𑀦𑀼𑀲𑁄𑀘𑀫𑀸𑀦𑁄 𑀲𑁂𑀢𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀬𑀸 𑀘 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀲𑀓𑁆𑀓𑀸 𑀯𑀲𑀺𑀢𑀼’’𑀦𑁆𑀢𑀺 𑀅𑀜𑁆𑀜𑀢𑁆𑀣 𑀕𑀢𑁄. 𑀓𑀸𑀓𑁄𑀧𑀺 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄. 𑀅𑀣 𑀦𑀁 𑀪𑀢𑁆𑀢𑀓𑀸𑀭𑀓𑁄 𑀲𑀤𑁆𑀥𑀺𑀁 𑀧𑀘𑁆𑀙𑀺𑀬𑀸 𑀕𑀳𑁂𑀢𑁆𑀯𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑁂𑀲𑀺.

𑀲𑀢𑁆𑀣𑀸𑀧𑀺 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀮𑁄𑀮𑁄, 𑀧𑀼𑀩𑁆𑀩𑁂𑀧𑀺 𑀮𑁄𑀮𑁄𑀬𑁂𑀯, 𑀢𑀜𑁆𑀘 𑀧𑀦 𑀢𑁂 𑀮𑁄𑀮𑁆𑀬𑀁 𑀦𑀺𑀲𑁆𑀲𑀸𑀬 𑀧𑀡𑁆𑀟𑀺𑀢𑀸𑀧𑀺 𑀲𑀓𑀸𑀯𑀸𑀲𑀸 𑀧𑀭𑀺𑀳𑀻𑀦𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀸𑀭𑀸𑀯𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀧𑁄𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁩] 𑁩. 𑀯𑁂𑀴𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀅𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀕𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯, 𑀤𑀼𑀩𑁆𑀩𑀘𑀢𑁆𑀢𑀸𑀬𑁂𑀯 𑀘 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀲𑀧𑁆𑀧𑀫𑀼𑀔𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘𑀸𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀅𑀧𑀭𑀪𑀸𑀕𑁂 𑀫𑀳𑀸𑀧𑀭𑀺𑀯𑀸𑀭𑁄 𑀧𑀜𑁆𑀘𑀳𑀺 𑀢𑀸𑀧𑀲𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀕𑀡𑀲𑁆𑀲 𑀲𑀢𑁆𑀣𑀸 𑀳𑀼𑀢𑁆𑀯𑀸 𑀯𑀺𑀳𑀸𑀲𑀺. 𑀅𑀣𑁂𑀓𑁄 𑀆𑀲𑀺𑀯𑀺𑀲𑀧𑁄𑀢𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀭𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀢𑀸𑀧𑀲𑀲𑁆𑀲 𑀅𑀲𑁆𑀲𑀫𑀧𑀤𑀁 𑀧𑀢𑁆𑀢𑁄. 𑀢𑀸𑀧𑀲𑁄 𑀢𑀲𑁆𑀫𑀺𑀁 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀏𑀓𑀲𑁆𑀫𑀺𑀁 𑀯𑁂𑀴𑀼𑀧𑀩𑁆𑀩𑁂 𑀲𑀬𑀸𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀢𑀲𑁆𑀲 𑀯𑁂𑀴𑀼𑀧𑀩𑁆𑀩𑁂 𑀲𑀬𑀦𑀢𑁄 ‘‘𑀯𑁂𑀴𑀼𑀓𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀝𑀺𑀚𑀕𑁆𑀕𑀦𑀢𑁄 𑀢𑀸𑀧𑀲𑀲𑁆𑀲 ‘‘𑀯𑁂𑀴𑀼𑀓𑀧𑀺𑀢𑀸’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀓𑁄 𑀓𑀺𑀭 𑀢𑀸𑀧𑀲𑁄 𑀆𑀲𑀺𑀯𑀺𑀲𑀁 𑀧𑀝𑀺𑀚𑀕𑁆𑀕𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀆𑀲𑀺𑀯𑀺𑀲𑀁 𑀧𑀝𑀺𑀚𑀕𑁆𑀕𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀲𑀺𑀯𑀺𑀲𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀸 𑀏𑀯𑀁 𑀚𑀕𑁆𑀕𑀸𑀳𑀻’’𑀢𑀺 𑀆𑀳. ‘‘𑀲𑁄 𑀫𑁂 𑀆𑀘𑀭𑀺𑀬 𑀧𑀼𑀢𑁆𑀢𑁄, 𑀦𑀸𑀳𑀁 𑀢𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀏𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. 𑀢𑀸𑀧𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀦 𑀕𑀡𑁆𑀳𑀺, 𑀆𑀲𑀺𑀯𑀺𑀲𑀫𑁆𑀧𑀺 𑀚𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑁂𑀯 𑀲𑀩𑁆𑀩𑁂 𑀢𑀸𑀧𑀲𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀨𑀮𑀸𑀨𑀮𑀲𑁆𑀲 𑀲𑀼𑀮𑀪𑀪𑀸𑀯𑀁 𑀤𑀺𑀲𑁆𑀯𑀸 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀢𑀢𑁆𑀣𑁂𑀯 𑀯𑀲𑀺𑀁𑀲𑀼, 𑀯𑁂𑀴𑀼𑀓𑀧𑀺𑀢𑀸𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀆𑀲𑀺𑀯𑀺𑀲𑀁 𑀯𑁂𑀴𑀼𑀧𑀩𑁆𑀩𑁂𑀬𑁂𑀯 𑀲𑀬𑀸𑀧𑁂𑀢𑁆𑀯𑀸 𑀧𑀺𑀤𑀳𑀺𑀢𑁆𑀯𑀸 𑀕𑀢𑁄. 𑀲𑁄 𑀧𑀼𑀦 𑀢𑀸𑀧𑀲𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀯𑁂𑀴𑀼𑀓𑀲𑁆𑀲 𑀕𑁄𑀘𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑁂𑀴𑀼𑀧𑀩𑁆𑀩𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 ‘‘𑀏𑀳𑀺, 𑀧𑀼𑀢𑁆𑀢𑀓, 𑀙𑀸𑀢𑀓𑁄𑀲𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀆𑀲𑀺𑀯𑀺𑀲𑁄 𑀤𑁆𑀯𑀻𑀳𑀢𑀻𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀓𑀼𑀚𑁆𑀛𑀺𑀢𑁆𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁 𑀟𑀁𑀲𑀺𑀢𑁆𑀯𑀸 𑀢𑀸𑀧𑀲𑀁 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀸𑀧𑀲𑀸 𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀇𑀲𑀺𑀕𑀡𑀲𑁆𑀲 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀲𑀻𑀦𑀁 𑀑𑀯𑀸𑀤𑀯𑀲𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁩. ‘‘𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀯𑁂𑀴𑀼𑀓𑀲𑁆𑀲 𑀬𑀣𑀸 𑀧𑀺𑀢𑀸’’𑀢𑀺.

𑀢𑀢𑁆𑀣 𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀻𑀢𑀺 𑀬𑁄 𑀳𑀺 𑀇𑀲𑀻𑀦𑀁 𑀑𑀯𑀸𑀤𑀁 𑀦 𑀕𑀡𑁆𑀳𑀸𑀢𑀺, 𑀲𑁄 𑀬𑀣𑀸 𑀏𑀲 𑀢𑀸𑀧𑀲𑁄 𑀆𑀲𑀺𑀯𑀺𑀲𑀫𑀼𑀔𑁂 𑀧𑀽𑀢𑀺𑀪𑀸𑀯𑀁 𑀧𑀢𑁆𑀯𑀸 𑀦𑀺𑀳𑀢𑁄 𑀲𑁂𑀢𑀺, 𑀏𑀯𑀁 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀯𑀸 𑀦𑀺𑀳𑀢𑁄 𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀕𑀡𑀁 𑀑𑀯𑀤𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀲𑀢𑁆𑀣𑀸 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯, 𑀤𑀼𑀩𑁆𑀩𑀘𑀪𑀸𑀯𑁂𑀦𑁂𑀯 𑀘 𑀆𑀲𑀺𑀯𑀺𑀲𑀫𑀼𑀔𑁂 𑀧𑀽𑀢𑀺𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑁂𑀴𑀼𑀓𑀧𑀺𑀢𑀸 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑁂𑀴𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁪] 𑁪. 𑀫𑀓𑀲𑀚𑀸𑀢𑀓𑀯𑀡𑁆𑀡𑀦𑀸

𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀩𑀸𑀮𑀕𑀸𑀫𑀺𑀓𑀫𑀦𑀼𑀲𑁆𑀲𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀣𑀸𑀕𑀢𑁄 𑀓𑀺𑀭 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀲𑀸𑀯𑀢𑁆𑀣𑀺𑀢𑁄 𑀫𑀕𑀥𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀜𑁆𑀜𑀢𑀭𑀁 𑀕𑀸𑀫𑀓𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁄 𑀘 𑀕𑀸𑀫𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀦𑁆𑀥𑀩𑀸𑀮𑀫𑀦𑀼𑀲𑁆𑀲𑁂𑀳𑀺𑀬𑁂𑀯 𑀉𑀲𑁆𑀲𑀦𑁆𑀦𑁄. 𑀢𑀢𑁆𑀣𑁂𑀓𑀤𑀺𑀯𑀲𑀁 𑀢𑁂 𑀅𑀦𑁆𑀥𑀩𑀸𑀮𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀪𑁄, 𑀅𑀫𑁆𑀳𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀫𑀓𑀲𑀸 𑀔𑀸𑀤𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀅𑀫𑁆𑀳𑀸𑀓𑀁 𑀓𑀫𑁆𑀫𑀘𑁆𑀙𑁂𑀤𑁄 𑀳𑁄𑀢𑀺, 𑀲𑀩𑁆𑀩𑁂𑀯 𑀥𑀦𑀽𑀦𑀺 𑀘𑁂𑀯 𑀆𑀯𑀼𑀥𑀸𑀦𑀺 𑀘 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑀓𑀲𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀫𑀓𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀘 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 ‘‘𑀫𑀓𑀲𑁂 𑀯𑀺𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑁆𑀛𑀺𑀢𑁆𑀯𑀸 𑀘 𑀧𑀳𑀭𑀺𑀢𑁆𑀯𑀸 𑀘 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀘 𑀕𑀸𑀫𑀫𑀚𑁆𑀛𑁂 𑀘 𑀕𑀸𑀫𑀤𑁆𑀯𑀸𑀭𑁂 𑀘 𑀦𑀺𑀧𑀚𑁆𑀚𑀺𑀁𑀲𑀼.

𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀯𑀲𑁂𑀲𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀢𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀢𑁂 𑀉𑀧𑀸𑀲𑀓𑁂 𑀧𑀼𑀘𑁆𑀙𑀺 ‘‘𑀩𑀳𑀽 𑀇𑀫𑁂 𑀕𑀺𑀮𑀸𑀦𑀸 𑀫𑀦𑀼𑀲𑁆𑀲𑀸, 𑀓𑀺𑀁 𑀏𑀢𑁂𑀳𑀺 𑀓𑀢’’𑀦𑁆𑀢𑀺? ‘‘𑀪𑀦𑁆𑀢𑁂, 𑀏𑀢𑁂 𑀫𑀦𑀼𑀲𑁆𑀲𑀸 ‘𑀫𑀓𑀲𑀬𑀼𑀤𑁆𑀥𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑁆𑀛𑀺𑀢𑁆𑀯𑀸 𑀲𑀬𑀁 𑀕𑀺𑀮𑀸𑀦𑀸 𑀚𑀸𑀢𑀸’’𑀢𑀺. 𑀲𑀢𑁆𑀣𑀸 ‘‘𑀦 𑀇𑀤𑀸𑀦𑁂𑀯 𑀅𑀦𑁆𑀥𑀩𑀸𑀮𑀫𑀦𑀼𑀲𑁆𑀲𑀸 ‘𑀫𑀓𑀲𑁂 𑀧𑀳𑀭𑀺𑀲𑁆𑀲𑀸𑀫𑀸’𑀢𑀺 𑀅𑀢𑁆𑀢𑀸𑀦𑀁 𑀧𑀳𑀭𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 ‘𑀫𑀓𑀲𑀁 𑀧𑀳𑀭𑀺𑀲𑁆𑀲𑀸𑀫𑀸’𑀢𑀺 𑀧𑀭𑀁 𑀧𑀳𑀭𑀡𑀓𑀫𑀦𑀼𑀲𑁆𑀲𑀸 𑀅𑀳𑁂𑀲𑀼𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀯𑀡𑀺𑀚𑁆𑀚𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀢𑀤𑀸 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀕𑀸𑀫𑁂 𑀩𑀳𑀽 𑀯𑀟𑁆𑀠𑀓𑀻 𑀯𑀲𑀦𑁆𑀢𑀺. 𑀢𑀢𑁆𑀣𑁂𑀓𑁄 𑀔𑀮𑀺𑀢𑀯𑀟𑁆𑀠𑀓𑀻 𑀭𑀼𑀓𑁆𑀔𑀁 𑀢𑀘𑁆𑀙𑀢𑀺, 𑀅𑀣𑀲𑁆𑀲 𑀏𑀓𑁄 𑀫𑀓𑀲𑁄 𑀢𑀫𑁆𑀩𑀮𑁄𑀳𑀣𑀸𑀮𑀓𑀧𑀺𑀝𑁆𑀞𑀺𑀲𑀤𑀺𑀲𑁂 𑀲𑀻𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀺𑀬𑀸 𑀧𑀳𑀭𑀦𑁆𑀢𑁄 𑀯𑀺𑀬 𑀲𑀻𑀲𑀁 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀺𑀚𑁆𑀛𑀺. 𑀲𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀁 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀫𑀬𑁆𑀳𑀁 𑀲𑀻𑀲𑀁 𑀫𑀓𑀲𑁄 𑀲𑀢𑁆𑀢𑀺𑀬𑀸 𑀧𑀳𑀭𑀦𑁆𑀢𑁄 𑀯𑀺𑀬 𑀯𑀺𑀚𑁆𑀛𑀢𑀺, 𑀯𑀸𑀭𑁂𑀳𑀺 𑀦’’𑀦𑁆𑀢𑀺. ‘‘𑀢𑀸𑀢, 𑀅𑀥𑀺𑀯𑀸𑀲𑁂𑀳𑀺, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀧𑀭𑀺𑀬𑁂𑀲𑀫𑀸𑀦𑁄 𑀢𑀁 𑀕𑀸𑀫𑀁 𑀧𑀢𑁆𑀯𑀸 𑀢𑀲𑁆𑀲𑀸 𑀯𑀟𑁆𑀠𑀓𑀺𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀲𑁄 𑀯𑀟𑁆𑀠𑀓𑀻 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀇𑀫𑀁 𑀫𑀓𑀲𑀁 𑀯𑀸𑀭𑁂𑀳𑀻’’𑀢𑀺. 𑀲𑁄 ‘‘𑀯𑀸𑀭𑁂𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀢𑀺𑀔𑀺𑀡𑀁 𑀫𑀳𑀸𑀨𑀭𑀲𑀼𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀢𑀼 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀫𑀓𑀲𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀼 𑀫𑀢𑁆𑀣𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺, 𑀯𑀟𑁆𑀠𑀓𑀻 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀤𑀺𑀲𑁆𑀯𑀸 ‘‘𑀧𑀘𑁆𑀘𑀸𑀫𑀺𑀢𑁆𑀢𑁄𑀧𑀺 𑀧𑀡𑁆𑀟𑀺𑀢𑁄𑀯 𑀲𑁂𑀬𑁆𑀬𑁄. 𑀲𑁄 𑀳𑀺 𑀤𑀡𑁆𑀟𑀪𑀬𑁂𑀦𑀧𑀺 𑀫𑀦𑀼𑀲𑁆𑀲𑁂 𑀦 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁪. ‘‘𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑀢𑀺𑀬𑀸 𑀉𑀧𑁂𑀢𑁄, 𑀦 𑀢𑁆𑀯𑁂𑀯 𑀫𑀺𑀢𑁆𑀢𑁄 𑀫𑀢𑀺𑀯𑀺𑀧𑁆𑀧𑀳𑀻𑀦𑁄;

‘𑀫𑀓𑀲𑀁 𑀯𑀥𑀺𑀲𑁆𑀲’𑀦𑁆𑀢𑀺 𑀳𑀺 𑀏𑀴𑀫𑀽𑀕𑁄, 𑀧𑀼𑀢𑁆𑀢𑁄 𑀧𑀺𑀢𑀼 𑀅𑀩𑁆𑀪𑀺𑀤𑀸 𑀉𑀢𑁆𑀢𑀫𑀗𑁆𑀕’’𑀦𑁆𑀢𑀺.

𑀢𑀢𑁆𑀣 𑀲𑁂𑀬𑁆𑀬𑁄𑀢𑀺 𑀧𑀯𑀭𑁄 𑀉𑀢𑁆𑀢𑀫𑁄. 𑀫𑀢𑀺𑀬𑀸 𑀉𑀧𑁂𑀢𑁄𑀢𑀺 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀏𑀴𑀫𑀽𑀕𑁄𑀢𑀺 𑀮𑀸𑀮𑀸𑀫𑀼𑀔𑁄 𑀩𑀸𑀮𑁄. 𑀧𑀼𑀢𑁆𑀢𑁄 𑀧𑀺𑀢𑀼 𑀅𑀩𑁆𑀪𑀺𑀤𑀸 𑀉𑀢𑁆𑀢𑀫𑀗𑁆𑀕𑀦𑁆𑀢𑀺 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀧𑀼𑀢𑁆𑀢𑁄𑀧𑀺 𑀳𑀼𑀢𑁆𑀯𑀸 𑀧𑀺𑀢𑀼 𑀉𑀢𑁆𑀢𑀫𑀗𑁆𑀕𑀁 𑀫𑀢𑁆𑀣𑀓𑀁 ‘‘𑀫𑀓𑀲𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺. 𑀢𑀲𑁆𑀫𑀸 𑀩𑀸𑀮𑀫𑀺𑀢𑁆𑀢𑀢𑁄 𑀧𑀡𑁆𑀟𑀺𑀢𑀅𑀫𑀺𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀉𑀝𑁆𑀞𑀸𑀬 𑀬𑀣𑀸𑀓𑀫𑁆𑀫𑀁 𑀕𑀢𑁄. 𑀯𑀟𑁆𑀠𑀓𑀺𑀲𑁆𑀲𑀧𑀺 𑀜𑀸𑀢𑀓𑀸 𑀲𑀭𑀻𑀭𑀓𑀺𑀘𑁆𑀘𑀁 𑀅𑀓𑀁𑀲𑀼.

𑀲𑀢𑁆𑀣𑀸 ‘‘𑀏𑀯𑀁 𑀉𑀧𑀸𑀲𑀓𑀸 𑀧𑀼𑀩𑁆𑀩𑁂𑀧𑀺 ‘𑀫𑀓𑀲𑀁 𑀧𑀳𑀭𑀺𑀲𑁆𑀲𑀸𑀫𑀸’𑀢𑀺 𑀧𑀭𑀁 𑀧𑀳𑀭𑀡𑀓𑀫𑀦𑀼𑀲𑁆𑀲𑀸 𑀅𑀳𑁂𑀲𑀼𑀁𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀕𑀸𑀣𑀁 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀓𑀲𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁫] 𑁫. 𑀭𑁄𑀳𑀺𑀡𑀺𑀚𑀸𑀢𑀓𑀯𑀡𑁆𑀡𑀦𑀸

𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄𑀢𑀺𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀦𑁄 𑀤𑀸𑀲𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀏𑀓𑀸 𑀭𑁄𑀳𑀺𑀡𑀻 𑀦𑀸𑀫 𑀤𑀸𑀲𑀻 𑀅𑀳𑁄𑀲𑀺. 𑀢𑀲𑁆𑀲𑀸 𑀯𑀻𑀳𑀺𑀧𑀳𑀭𑀡𑀝𑁆𑀞𑀸𑀦𑁂 𑀆𑀕𑀦𑁆𑀢𑁆𑀯𑀸 𑀫𑀳𑀮𑁆𑀮𑀺𑀓𑀸 𑀫𑀸𑀢𑀸 𑀦𑀺𑀧𑀚𑁆𑀚𑀺, 𑀢𑀁 𑀫𑀓𑁆𑀔𑀺𑀓𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀽𑀘𑀺𑀬𑀸𑀯𑀺𑀚𑁆𑀛𑀫𑀸𑀦𑀸 𑀯𑀺𑀬 𑀔𑀸𑀤𑀦𑁆𑀢𑀺. 𑀲𑀸 𑀥𑀻𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀫𑀓𑁆𑀔𑀺𑀓𑀸 𑀫𑀁 𑀔𑀸𑀤𑀦𑁆𑀢𑀺, 𑀏𑀢𑀸 𑀯𑀸𑀭𑁂𑀳𑀻’’𑀢𑀺. 𑀲𑀸 ‘‘𑀯𑀸𑀭𑁂𑀲𑁆𑀲𑀸𑀫𑀺, 𑀅𑀫𑁆𑀫𑀸’’𑀢𑀺 𑀫𑀼𑀲𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀫𑀸𑀢𑀼 𑀲𑀭𑀻𑀭𑁂 𑀫𑀓𑁆𑀔𑀺𑀓𑀸 𑀫𑀸𑀭𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀁 𑀫𑀼𑀲𑀮𑁂𑀦 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀢𑀁 𑀤𑀺𑀲𑁆𑀯𑀸 ‘‘𑀫𑀸𑀢𑀸 𑀫𑁂 𑀫𑀢𑀸’’𑀢𑀺 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀢𑀁 𑀧𑀯𑀢𑁆𑀢𑀺𑀁 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁂𑀝𑁆𑀞𑀺 𑀢𑀲𑁆𑀲𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀏𑀲𑀸 ‘𑀫𑀸𑀢𑀼 𑀲𑀭𑀻𑀭𑁂 𑀫𑀓𑁆𑀔𑀺𑀓𑀸 𑀫𑀸𑀭𑁂𑀲𑁆𑀲𑀸𑀫𑀻’𑀢𑀺 𑀇𑀤𑀸𑀦𑁂𑀯 𑀫𑀼𑀲𑀮𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀢𑀭𑀁 𑀫𑀸𑀭𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀫𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀢𑀼𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀸𑀧𑀼𑀡𑀺. 𑀢𑀲𑁆𑀲𑀸𑀧𑀺 𑀭𑁄𑀳𑀺𑀡𑀻𑀬𑁂𑀯 𑀦𑀸𑀫 𑀤𑀸𑀲𑀻 𑀅𑀳𑁄𑀲𑀺. 𑀲𑀸𑀧𑀺 𑀅𑀢𑁆𑀢𑀦𑁄 𑀯𑀻𑀳𑀺𑀧𑀳𑀭𑀡𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀦𑀺𑀧𑀦𑁆𑀦𑀁 𑀫𑀸𑀢𑀭𑀁 ‘‘𑀫𑀓𑁆𑀔𑀺𑀓𑀸 𑀫𑁂, 𑀅𑀫𑁆𑀫, 𑀯𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀏𑀯𑀫𑁂𑀯 𑀫𑀼𑀲𑀮𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀢𑀭𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀫𑀺𑀢𑁆𑀢𑁄𑀧𑀺 𑀳𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀡𑁆𑀟𑀺𑀢𑁄𑀯 𑀲𑁂𑀬𑁆𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁫. ‘‘𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑁂𑀥𑀸𑀯𑀻, 𑀬𑀜𑁆𑀘𑁂 𑀩𑀸𑀮𑀸𑀦𑀼𑀓𑀫𑁆𑀧𑀓𑁄;

𑀧𑀲𑁆𑀲 𑀭𑁄𑀳𑀺𑀡𑀺𑀓𑀁 𑀚𑀫𑁆𑀫𑀺𑀁, 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸𑀦 𑀲𑁄𑀘𑀢𑀻’’𑀢𑀺.

𑀢𑀢𑁆𑀣 𑀫𑁂𑀥𑀸𑀯𑀻𑀢𑀺 𑀧𑀡𑁆𑀟𑀺𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻. 𑀬𑀜𑁆𑀘𑁂 𑀩𑀸𑀮𑀸𑀦𑀼𑀓𑀫𑁆𑀧𑀓𑁄𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄, 𑀘𑁂𑀢𑀺 𑀦𑀸𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀬𑁄 𑀦𑀸𑀫 𑀩𑀸𑀮𑁄 𑀅𑀦𑀼𑀓𑀫𑁆𑀧𑀓𑁄, 𑀢𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀧𑀡𑁆𑀟𑀺𑀢𑁄 𑀅𑀫𑀺𑀢𑁆𑀢𑁄 𑀳𑁄𑀦𑁆𑀢𑁄𑀧𑀺 𑀲𑁂𑀬𑁆𑀬𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀦𑁆𑀢𑀺 𑀧𑀝𑀺𑀲𑁂𑀥𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀦𑁄 𑀘𑁂 𑀩𑀸𑀮𑀸𑀦𑀼𑀓𑀫𑁆𑀧𑀓𑁄𑀢𑀺 𑀅𑀢𑁆𑀣𑁄. 𑀚𑀫𑁆𑀫𑀺𑀦𑁆𑀢𑀺 𑀮𑀸𑀫𑀺𑀓𑀁 𑀤𑀦𑁆𑀥𑀁. 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸𑀦 𑀲𑁄𑀘𑀢𑀻𑀢𑀺 ‘‘𑀫𑀓𑁆𑀔𑀺𑀓𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸 𑀇𑀤𑀸𑀦𑀺 𑀅𑀬𑀁 𑀩𑀸𑀮𑀸 𑀲𑀬𑀫𑁂𑀯 𑀭𑁄𑀤𑀢𑀺 𑀧𑀭𑀺𑀤𑁂𑀯𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀫𑀺𑀢𑁆𑀢𑁄𑀧𑀺 𑀧𑀡𑁆𑀟𑀺𑀢𑁄 𑀲𑁂𑀬𑁆𑀬𑁄𑀢𑀺 𑀩𑁄𑀥𑀺𑀲𑀢𑁆𑀢𑁄 𑀧𑀡𑁆𑀟𑀺𑀢𑀁 𑀧𑀲𑀁𑀲𑀦𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀏𑀲𑀸 𑀇𑀤𑀸𑀦𑁂𑀯 ‘𑀫𑀓𑁆𑀔𑀺𑀓𑀸 𑀫𑀸𑀭𑁂𑀲𑁆𑀲𑀸𑀫𑀻’𑀢𑀺 𑀫𑀸𑀢𑀭𑀁 𑀖𑀸𑀢𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀖𑀸𑀢𑁂𑀲𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀸𑀬𑁂𑀯 𑀫𑀸𑀢𑀸 𑀅𑀳𑁄𑀲𑀺, 𑀥𑀻𑀢𑀸𑀬𑁂𑀯 𑀥𑀻𑀢𑀸, 𑀫𑀳𑀸𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑁄𑀳𑀺𑀡𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁬] 𑁬. 𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑁄𑀲𑀮𑀕𑀸𑀫𑀓𑁂 𑀯𑀺𑀳𑀭𑀦𑁆𑀢𑁄 𑀉𑀬𑁆𑀬𑀸𑀦𑀤𑀽𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀸 𑀓𑀺𑀭 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀜𑁆𑀜𑀢𑀭𑀁 𑀕𑀸𑀫𑀓𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀢𑁆𑀣𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀢𑀣𑀸𑀕𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 ‘‘𑀪𑀦𑁆𑀢𑁂, 𑀬𑀣𑀸𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀯𑀺𑀘𑀭𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀽 𑀉𑀝𑁆𑀞𑀸𑀬 𑀉𑀬𑁆𑀬𑀸𑀦𑀧𑀸𑀮𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑀸 𑀏𑀓𑀁 𑀅𑀗𑁆𑀕𑀡𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀉𑀧𑀸𑀲𑀓, 𑀇𑀫𑀁 𑀉𑀬𑁆𑀬𑀸𑀦𑀁 𑀅𑀜𑁆𑀜𑀢𑁆𑀣 𑀲𑀦𑁆𑀤𑀘𑁆𑀙𑀸𑀬𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦 𑀓𑁄𑀘𑀺 𑀭𑀼𑀓𑁆𑀔𑁄 𑀯𑀸 𑀕𑀘𑁆𑀙𑁄 𑀯𑀸 𑀅𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀪𑀦𑁆𑀢𑁂, 𑀇𑀫𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀭𑁄𑀧𑀦𑀓𑀸𑀮𑁂 𑀏𑀓𑁄 𑀕𑀸𑀫𑀤𑀸𑀭𑀓𑁄 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑀼𑀓𑁆𑀔𑀧𑁄𑀢𑀓𑁂 𑀉𑀫𑁆𑀫𑀽𑀮𑀁 𑀓𑀢𑁆𑀯𑀸 𑀫𑀽𑀮𑀧𑁆𑀧𑀫𑀸𑀡𑁂𑀦 𑀉𑀤𑀓𑀁 𑀲𑀺𑀜𑁆𑀘𑀺. 𑀢𑁂 𑀭𑀼𑀓𑁆𑀔𑀧𑁄𑀢𑀓𑀸 𑀫𑀺𑀮𑀸𑀬𑀺𑀢𑁆𑀯𑀸 𑀫𑀢𑀸. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀤𑀁 𑀞𑀸𑀦𑀁 𑀅𑀗𑁆𑀕𑀡𑀁 𑀚𑀸𑀢’’𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀕𑀸𑀫𑀤𑀸𑀭𑀓𑁄 𑀇𑀤𑀸𑀦𑁂𑀯 𑀆𑀭𑀸𑀫𑀤𑀽𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀆𑀭𑀸𑀫𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀦𑀓𑁆𑀔𑀢𑁆𑀢𑀁 𑀖𑁄𑀲𑀬𑀺𑀁𑀲𑀼. 𑀦𑀓𑁆𑀔𑀢𑁆𑀢𑀪𑁂𑀭𑀺𑀲𑀤𑁆𑀤𑀲𑀯𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑀓𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑀤𑀸 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀩𑀳𑀽 𑀫𑀓𑁆𑀓𑀝𑀸 𑀯𑀲𑀦𑁆𑀢𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀘𑀺𑀦𑁆𑀢𑁂𑀲𑀺 ‘‘𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀖𑀼𑀝𑁆𑀞𑀁, 𑀇𑀫𑁂 𑀯𑀸𑀦𑀭𑁂 ‘𑀉𑀤𑀓𑀁 𑀲𑀺𑀜𑁆𑀘𑀣𑀸’𑀢𑀺 𑀯𑀢𑁆𑀯𑀸 𑀅𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀝𑁆𑀞𑀓𑀯𑀸𑀦𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫 𑀯𑀸𑀦𑀭𑀚𑁂𑀝𑁆𑀞𑀓, 𑀇𑀫𑀁 𑀉𑀬𑁆𑀬𑀸𑀦𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀩𑀳𑀽𑀧𑀓𑀸𑀭𑀁, 𑀢𑀼𑀫𑁆𑀳𑁂 𑀏𑀢𑁆𑀣 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀦𑀺 𑀔𑀸𑀤𑀣, 𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀖𑀼𑀝𑁆𑀞𑀁, 𑀅𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀺. 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀭𑀼𑀓𑁆𑀔𑀧𑁄𑀢𑀓𑁂𑀲𑀼 𑀉𑀤𑀓𑀁 𑀲𑀺𑀜𑁆𑀘𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀥𑀼, 𑀲𑀺𑀜𑁆𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀉𑀤𑀓𑀲𑀺𑀜𑁆𑀘𑀦𑀢𑁆𑀣𑀸𑀬 𑀢𑁂𑀲𑀁 𑀘𑀫𑁆𑀫𑀓𑀼𑀝𑁂 𑀘 𑀤𑀸𑀭𑀼𑀓𑀼𑀝𑁂 𑀘 𑀤𑀢𑁆𑀯𑀸 𑀕𑀢𑁄. 𑀯𑀸𑀦𑀭𑀸 𑀘𑀫𑁆𑀫𑀓𑀼𑀝𑁂 𑀘𑁂𑀯 𑀤𑀸𑀭𑀼𑀓𑀼𑀝𑁂 𑀘 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀧𑁄𑀢𑀓𑁂𑀲𑀼 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑀺. 𑀅𑀣 𑀦𑁂 𑀯𑀸𑀦𑀭𑀚𑁂𑀝𑁆𑀞𑀓𑁄 𑀏𑀯𑀫𑀸𑀳 ‘‘𑀪𑁄𑀦𑁆𑀢𑁄 𑀯𑀸𑀦𑀭𑀸, 𑀉𑀤𑀓𑀁 𑀦𑀸𑀫 𑀭𑀓𑁆𑀔𑀺𑀢𑀩𑁆𑀩𑀁, 𑀢𑀼𑀫𑁆𑀳𑁂 𑀭𑀼𑀓𑁆𑀔𑀧𑁄𑀢𑀓𑁂𑀲𑀼 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑀸 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀽𑀮𑀁 𑀑𑀮𑁄𑀓𑁂𑀢𑁆𑀯𑀸 𑀕𑀫𑁆𑀪𑀻𑀭𑀕𑀢𑁂𑀲𑀼 𑀫𑀽𑀮𑁂𑀲𑀼 𑀩𑀳𑀼𑀁 𑀉𑀤𑀓𑀁 𑀲𑀺𑀜𑁆𑀘𑀣, 𑀅𑀕𑀫𑁆𑀪𑀻𑀭𑀕𑀢𑁂𑀲𑀼 𑀅𑀧𑁆𑀧𑀁, 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀉𑀤𑀓𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀭𑀸𑀚𑀼𑀬𑁆𑀬𑀸𑀦𑁂 𑀢𑁂 𑀯𑀸𑀦𑀭𑁂 𑀢𑀣𑀸 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳 ‘‘𑀪𑁄𑀦𑁆𑀢𑁄 𑀯𑀸𑀦𑀭𑀸, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀭𑀼𑀓𑁆𑀔𑀧𑁄𑀢𑀓𑁂 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀽𑀮𑀧𑁆𑀧𑀫𑀸𑀡𑁂𑀦 𑀉𑀤𑀓𑀁 𑀲𑀺𑀜𑁆𑀘𑀣𑀸’’𑀢𑀺? 𑀢𑁂 ‘‘𑀏𑀯𑀁 𑀦𑁄 𑀯𑀸𑀦𑀭𑀚𑁂𑀝𑁆𑀞𑀓𑁄 𑀑𑀯𑀤𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀯𑀢 𑀪𑁄 𑀩𑀸𑀮𑀸 𑀅𑀧𑀡𑁆𑀟𑀺𑀢𑀸, ‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀅𑀦𑀢𑁆𑀣𑀫𑁂𑀯 𑀓𑀭𑁄𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁬. ‘‘𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀲𑀼𑀔𑀸𑀯𑀳𑀸;

𑀳𑀸𑀧𑁂𑀢𑀺 𑀅𑀢𑁆𑀣𑀁 𑀤𑀼𑀫𑁆𑀫𑁂𑀥𑁄, 𑀓𑀧𑀺 𑀆𑀭𑀸𑀫𑀺𑀓𑁄 𑀬𑀣𑀸’’𑀢𑀺.

𑀢𑀢𑁆𑀣 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀦𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀅𑀦𑀢𑁆𑀣𑁂 𑀅𑀦𑀸𑀬𑀢𑀦𑁂 𑀓𑀼𑀲𑀮𑁂𑀦, 𑀅𑀢𑁆𑀣𑁂 𑀆𑀬𑀢𑀦𑁂 𑀓𑀸𑀭𑀡𑁂 𑀅𑀓𑀼𑀲𑀮𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀘𑀭𑀺𑀬𑀸𑀢𑀺 𑀯𑀼𑀟𑁆𑀠𑀺𑀓𑀺𑀭𑀺𑀬𑀸. 𑀲𑀼𑀔𑀸𑀯𑀳𑀸𑀢𑀺 𑀏𑀯𑀭𑀽𑀧𑁂𑀦 𑀅𑀦𑀢𑁆𑀣𑀓𑀼𑀲𑀮𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀘𑀭𑀺𑀬𑀸 𑀦 𑀲𑀼𑀔𑀸𑀯𑀳𑀸, 𑀦 𑀲𑀓𑁆𑀓𑀸 𑀆𑀯𑀳𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁𑀓𑀸𑀭𑀡𑀸? 𑀏𑀓𑀦𑁆𑀢𑁂𑀦𑁂𑀯 𑀳𑀺 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀤𑀼𑀫𑁆𑀫𑁂𑀥𑁄𑀢𑀺, 𑀩𑀸𑀮𑀧𑀼𑀕𑁆𑀕𑀮𑁄 ‘‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀣𑀁 𑀳𑀸𑀧𑁂𑀢𑁆𑀯𑀸 𑀅𑀦𑀢𑁆𑀣𑀫𑁂𑀯 𑀓𑀭𑁄𑀢𑀺. 𑀓𑀧𑀺 𑀆𑀭𑀸𑀫𑀺𑀓𑁄 𑀬𑀣𑀸𑀢𑀺 𑀬𑀣𑀸 𑀆𑀭𑀸𑀫𑁂 𑀦𑀺𑀬𑀼𑀢𑁆𑀢𑁄 𑀆𑀭𑀸𑀫𑀭𑀓𑁆𑀔𑀦𑀓𑁄 𑀫𑀓𑁆𑀓𑀝𑁄 ‘‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀢𑁆𑀣𑀫𑁂𑀯 𑀓𑀭𑁄𑀢𑀺, 𑀏𑀯𑀁 𑀬𑁄 𑀓𑁄𑀘𑀺 𑀅𑀦𑀢𑁆𑀣𑀓𑀼𑀲𑀮𑁄, 𑀢𑁂𑀦 𑀦 𑀲𑀓𑁆𑀓𑀸 𑀅𑀢𑁆𑀣𑀘𑀭𑀺𑀬𑀁 𑀆𑀯𑀳𑀺𑀢𑀼𑀁, 𑀲𑁄 𑀏𑀓𑀁𑀲𑁂𑀦 𑀅𑀢𑁆𑀣𑀁 𑀳𑀸𑀧𑁂𑀢𑀺𑀬𑁂𑀯𑀸𑀢𑀺. 𑀏𑀯𑀁 𑀲𑁄 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀯𑀸𑀦𑀭𑀚𑁂𑀝𑁆𑀞𑀓𑀁 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀕𑀸𑀫𑀤𑀸𑀭𑀓𑁄 𑀇𑀤𑀸𑀦𑁂𑀯 𑀆𑀭𑀸𑀫𑀤𑀽𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀆𑀭𑀸𑀫𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀸𑀦𑀭𑀚𑁂𑀝𑁆𑀞𑀓𑁄 𑀆𑀭𑀸𑀫𑀤𑀽𑀲𑀓𑀕𑀸𑀫𑀤𑀸𑀭𑀓𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁭] 𑁭. 𑀯𑀸𑀭𑀼𑀡𑀺𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀸𑀭𑀼𑀡𑀺𑀤𑀽𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀲𑀳𑀸𑀬𑁄 𑀏𑀓𑁄 𑀯𑀸𑀭𑀼𑀡𑀺𑀯𑀸𑀡𑀺𑀚𑁄 𑀢𑀺𑀔𑀺𑀡𑀁 𑀯𑀸𑀭𑀼𑀡𑀺𑀁 𑀬𑁄𑀚𑁂𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 ‘‘𑀢𑀸𑀢, 𑀢𑁆𑀯𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀯𑀸𑀭𑀼𑀡𑀺𑀁 𑀤𑁂𑀳𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀦𑁆𑀳𑀸𑀬𑀺𑀢𑀼𑀁 𑀅𑀕𑀫𑀸𑀲𑀺. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀳𑀸𑀚𑀦𑀲𑁆𑀲 𑀯𑀸𑀭𑀼𑀡𑀺𑀁 𑀤𑁂𑀦𑁆𑀢𑁄 𑀫𑀦𑀼𑀲𑁆𑀲𑁂 𑀅𑀦𑁆𑀢𑀭𑀦𑁆𑀢𑀭𑀸 𑀮𑁄𑀡𑀲𑀓𑁆𑀔𑀭𑀸 𑀆𑀳𑀭𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀼𑀭𑀸 𑀅𑀮𑁄𑀡𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀮𑁄𑀡𑀫𑁂𑀢𑁆𑀣 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀭𑀸𑀘𑀸𑀝𑀺𑀬𑀁 𑀦𑀸𑀴𑀺𑀫𑀢𑁆𑀢𑀁 𑀮𑁄𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀲𑀼𑀭𑀁 𑀅𑀤𑀸𑀲𑀺. 𑀢𑁂 𑀫𑀼𑀔𑀁 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 ‘‘𑀓𑀺𑀁 𑀢𑁂 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀢𑀼𑀫𑁆𑀳𑁂 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀮𑁄𑀡𑀁 𑀆𑀳𑀭𑀸𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 𑀮𑁄𑀡𑁂𑀦 𑀬𑁄𑀚𑁂𑀲𑀺’’𑀦𑁆𑀢𑀺. ‘‘𑀏𑀯𑀭𑀽𑀧𑀁 𑀦𑀸𑀫 𑀫𑀦𑀸𑀧𑀁 𑀯𑀸𑀭𑀼𑀡𑀺𑀁 𑀦𑀸𑀲𑁂𑀲𑀺 𑀩𑀸𑀮𑀸’’𑀢𑀺 𑀢𑀁 𑀕𑀭𑀳𑀺𑀢𑁆𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀓𑁆𑀓𑀦𑁆𑀢𑀸. 𑀯𑀸𑀭𑀼𑀡𑀺𑀯𑀸𑀡𑀺𑀚𑁄 𑀆𑀕𑀦𑁆𑀢𑁆𑀯𑀸 𑀏𑀓𑀫𑁆𑀧𑀺 𑀅𑀤𑀺𑀲𑁆𑀯𑀸 ‘‘𑀯𑀸𑀭𑀼𑀡𑀺𑀧𑀸𑀬𑀓𑀸 𑀓𑀳𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺, 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀩𑀸𑀮, 𑀏𑀯𑀭𑀽𑀧𑀸 𑀦𑀸𑀫 𑀢𑁂 𑀲𑀼𑀭𑀸 𑀦𑀸𑀲𑀺𑀢𑀸’’𑀢𑀺 𑀕𑀭𑀳𑀺𑀢𑁆𑀯𑀸 𑀇𑀫𑀁 𑀓𑀸𑀭𑀡𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀅𑀢𑁆𑀣𑀺𑀤𑀸𑀦𑀺 𑀫𑁂 𑀇𑀤𑀁 𑀓𑀣𑀸𑀧𑀸𑀪𑀢’’𑀦𑁆𑀢𑀺 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀏𑀲, 𑀕𑀳𑀧𑀢𑀺, 𑀇𑀤𑀸𑀦𑁂𑀯 𑀯𑀸𑀭𑀼𑀡𑀺𑀤𑀽𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀯𑀸𑀭𑀼𑀡𑀺𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑁄 𑀯𑀸𑀭𑀼𑀡𑀺𑀯𑀸𑀡𑀺𑀚𑁄 𑀚𑀻𑀯𑀢𑀺. 𑀲𑁄 𑀢𑀺𑀔𑀺𑀡𑀁 𑀲𑀼𑀭𑀁 𑀬𑁄𑀚𑁂𑀢𑁆𑀯𑀸 ‘‘𑀇𑀫𑀁 𑀯𑀺𑀓𑁆𑀓𑀺𑀡𑀸𑀳𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀁 𑀯𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀕𑀢𑁄. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑀲𑁆𑀫𑀺𑀁 𑀕𑀢𑀫𑀢𑁆𑀢𑁂𑀬𑁂𑀯 𑀲𑀼𑀭𑀸𑀬 𑀮𑁄𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀼𑀭𑀁 𑀯𑀺𑀦𑀸𑀲𑁂𑀲𑀺. 𑀅𑀣𑀲𑁆𑀲 𑀆𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺 ‘‘𑀅𑀦𑀢𑁆𑀣𑀓𑀼𑀲𑀮𑀸 𑀦𑀸𑀫 𑀩𑀸𑀮𑀸 ‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀅𑀦𑀢𑁆𑀣𑀫𑁂𑀯 𑀓𑀭𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁭. ‘‘𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀲𑀼𑀔𑀸𑀯𑀳𑀸;

𑀳𑀸𑀧𑁂𑀢𑀺 𑀅𑀢𑁆𑀣𑀁 𑀤𑀼𑀫𑁆𑀫𑁂𑀥𑁄, 𑀓𑁄𑀡𑁆𑀟𑀜𑁆𑀜𑁄 𑀯𑀸𑀭𑀼𑀡𑀺𑀁 𑀬𑀣𑀸’’𑀢𑀺.

𑀢𑀢𑁆𑀣 𑀓𑁄𑀡𑁆𑀟𑀜𑁆𑀜𑁄 𑀯𑀸𑀭𑀼𑀡𑀺𑀁 𑀬𑀣𑀸𑀢𑀺 𑀬𑀣𑀸 𑀅𑀬𑀁 𑀓𑁄𑀡𑁆𑀟𑀜𑁆𑀜𑀦𑀸𑀫𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 ‘‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀮𑁄𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀭𑀼𑀡𑀺𑀁 𑀳𑀸𑀧𑁂𑀲𑀺 𑀧𑀭𑀺𑀳𑀸𑀧𑁂𑀲𑀺 𑀯𑀺𑀦𑀸𑀲𑁂𑀲𑀺, 𑀏𑀯𑀁 𑀲𑀩𑁆𑀩𑁄𑀧𑀺 𑀅𑀦𑀢𑁆𑀣𑀓𑀼𑀲𑀮𑁄 𑀅𑀢𑁆𑀣𑀁 𑀳𑀸𑀧𑁂𑀢𑀻𑀢𑀺 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀸𑀧𑀺 ‘‘𑀦 𑀏𑀲 𑀕𑀳𑀧𑀢𑀺 𑀇𑀤𑀸𑀦𑁂𑀯 𑀯𑀸𑀭𑀼𑀡𑀺𑀤𑀽𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀯𑀸𑀭𑀼𑀡𑀺𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀸𑀭𑀼𑀡𑀺𑀤𑀽𑀲𑀓𑁄 𑀇𑀤𑀸𑀦𑀺𑀧𑀺 𑀯𑀸𑀭𑀼𑀡𑀺𑀤𑀽𑀲𑀓𑁄𑀯 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀭𑀼𑀡𑀺𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁮] 𑁮. 𑀯𑁂𑀤𑀩𑁆𑀩𑀚𑀸𑀢𑀓𑀯𑀡𑁆𑀡𑀦𑀸

𑀅𑀦𑀼𑀧𑀸𑀬𑁂𑀦 𑀬𑁄 𑀅𑀢𑁆𑀣𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀢𑀺𑀡𑁆𑀳𑁂𑀦 𑀅𑀲𑀺𑀦𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀙𑀺𑀦𑁆𑀦𑁄 𑀳𑀼𑀢𑁆𑀯𑀸 𑀫𑀕𑁆𑀕𑁂 𑀦𑀺𑀧𑀢𑀺𑀢𑁆𑀣, 𑀢𑀜𑁆𑀘 𑀏𑀓𑀓𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀲𑀲𑀳𑀲𑁆𑀲𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀤𑀩𑁆𑀩𑀁 𑀦𑀸𑀫 𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀲𑁄 𑀓𑀺𑀭 𑀫𑀦𑁆𑀢𑁄 𑀅𑀦𑀕𑁆𑀖𑁄 𑀫𑀳𑀸𑀭𑀳𑁄, 𑀦𑀓𑁆𑀔𑀢𑁆𑀢𑀬𑁄𑀕𑁂 𑀮𑀤𑁆𑀥𑁂 𑀢𑀁 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂 𑀉𑀮𑁆𑀮𑁄𑀓𑀺𑀢𑁂 𑀆𑀓𑀸𑀲𑀢𑁄 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀩𑁄𑀥𑀺𑀲𑀢𑁆𑀢𑀁 𑀆𑀤𑀸𑀬 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀢𑁆𑀢𑀦𑁄 𑀕𑀸𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑁂𑀢𑀭𑀝𑁆𑀞𑀁 𑀅𑀕𑀫𑀸𑀲𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀝𑁆𑀞𑀸𑀦𑁂 𑀧𑀜𑁆𑀘𑀲𑀢𑀸 𑀧𑁂𑀲𑀦𑀓𑀘𑁄𑀭𑀸 𑀦𑀸𑀫 𑀧𑀦𑁆𑀣𑀖𑀸𑀢𑀁 𑀓𑀭𑁄𑀦𑁆𑀢𑀺. 𑀢𑁂 𑀩𑁄𑀥𑀺𑀲𑀢𑁆𑀢𑀜𑁆𑀘 𑀯𑁂𑀤𑀩𑁆𑀩𑀩𑁆𑀭𑀸𑀳𑁆𑀫𑀡𑀜𑁆𑀘 𑀕𑀡𑁆𑀳𑀺𑀁𑀲𑀼. 𑀓𑀲𑁆𑀫𑀸 𑀧𑀦𑁂𑀢𑁂 ‘‘𑀧𑁂𑀲𑀦𑀓𑀘𑁄𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺? 𑀢𑁂 𑀓𑀺𑀭 𑀤𑁆𑀯𑁂 𑀚𑀦𑁂 𑀕𑀳𑁂𑀢𑁆𑀯𑀸 𑀏𑀓𑀁 𑀥𑀦𑀸𑀳𑀭𑀡𑀢𑁆𑀣𑀸𑀬 𑀧𑁂𑀲𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑁂𑀲𑀦𑀓𑀘𑁄𑀭𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀧𑀺 𑀘 𑀧𑀺𑀢𑀸𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀧𑀺𑀢𑀭𑀁 ‘‘𑀢𑁆𑀯𑀁 𑀅𑀫𑁆𑀳𑀸𑀓𑀁 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀸𑀳𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀫𑀸𑀢𑀼𑀥𑀻𑀢𑀭𑁄 𑀕𑀳𑁂𑀢𑁆𑀯𑀸 𑀫𑀸𑀢𑀭𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀚𑁂𑀝𑁆𑀞𑀓𑀦𑀺𑀝𑁆𑀞𑁂 𑀕𑀳𑁂𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀢𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀯𑁂𑀤𑀩𑁆𑀩𑀩𑁆𑀭𑀸𑀳𑁆𑀫𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁.

𑀩𑁄𑀥𑀺𑀲𑀢𑁆𑀢𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 𑀆𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀅𑀧𑀺𑀘 𑀔𑁄 𑀧𑀦 𑀫𑀫 𑀯𑀘𑀦𑀁 𑀓𑀭𑁄𑀣, 𑀅𑀚𑁆𑀚 𑀥𑀦𑀯𑀲𑁆𑀲𑀸𑀧𑀦𑀓𑀦𑀓𑁆𑀔𑀢𑁆𑀢𑀬𑁄𑀕𑁄 𑀪𑀯𑀺𑀲𑁆𑀲𑀢𑀺, 𑀫𑀸 𑀔𑁄 𑀢𑀼𑀫𑁆𑀳𑁂 𑀤𑀼𑀓𑁆𑀔𑀁 𑀅𑀲𑀳𑀦𑁆𑀢𑀸 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀥𑀦𑀁 𑀯𑀲𑁆𑀲𑀸𑀧𑀬𑀺𑀢𑁆𑀣. 𑀲𑀘𑁂 𑀯𑀲𑁆𑀲𑀸𑀧𑁂𑀲𑁆𑀲𑀣, 𑀢𑀼𑀫𑁆𑀳𑁂 𑀘 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀣, 𑀇𑀫𑁂 𑀘 𑀧𑀜𑁆𑀘𑀲𑀢𑀸 𑀘𑁄𑀭𑀸’’𑀢𑀺 𑀏𑀯𑀁 𑀆𑀘𑀭𑀺𑀬𑀁 𑀑𑀯𑀤𑀺𑀢𑁆𑀯𑀸 𑀥𑀦𑀢𑁆𑀣𑀸𑀬 𑀅𑀕𑀫𑀸𑀲𑀺. 𑀘𑁄𑀭𑀸𑀧𑀺 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀩𑁆𑀭𑀸𑀳𑁆𑀫𑀡𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀉𑀝𑁆𑀞𑀳𑀺. 𑀩𑁆𑀭𑀸𑀳𑁆𑀫𑀡𑁄 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀥𑀦𑀯𑀲𑁆𑀲𑀸𑀧𑀦𑀓𑀦𑀓𑁆𑀔𑀢𑁆𑀢𑀬𑁄𑀕𑁄 𑀮𑀤𑁆𑀥𑁄, 𑀓𑀺𑀁 𑀫𑁂 𑀤𑀼𑀓𑁆𑀔𑁂𑀦 𑀅𑀦𑀼𑀪𑀽𑀢𑁂𑀦, 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀘𑁄𑀭𑀸𑀦𑀁 𑀥𑀦𑀁 𑀤𑀢𑁆𑀯𑀸 𑀬𑀣𑀸𑀲𑀼𑀔𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑁄𑀭𑁂 𑀆𑀫𑀦𑁆𑀢𑁂𑀲𑀺 ‘‘𑀪𑁄𑀦𑁆𑀢𑁄 𑀘𑁄𑀭𑀸, 𑀢𑀼𑀫𑁆𑀳𑁂 𑀫𑀁 𑀓𑀺𑀫𑀢𑁆𑀣𑀸𑀬 𑀕𑀡𑁆𑀳𑀣𑀸’’𑀢𑀺? ‘‘𑀥𑀦𑀢𑁆𑀣𑀸𑀬, 𑀅𑀬𑁆𑀬𑀸’’𑀢𑀺. ‘‘𑀲𑀘𑁂 𑀯𑁄, 𑀥𑀦𑁂𑀦 𑀅𑀢𑁆𑀣𑁄, 𑀔𑀺𑀧𑁆𑀧𑀁 𑀫𑀁 𑀩𑀦𑁆𑀥𑀦𑀸 𑀫𑁄𑀘𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀳𑀢𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀮𑀦𑁆𑀥𑀸𑀧𑁂𑀢𑁆𑀯𑀸 𑀞𑀧𑁂𑀣𑀸’’𑀢𑀺. ‘‘𑀘𑁄𑀭𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼’’.

𑀩𑁆𑀭𑀸𑀳𑁆𑀫𑀡𑁄 𑀦𑀓𑁆𑀔𑀢𑁆𑀢𑀬𑁄𑀕𑀁 𑀜𑀢𑁆𑀯𑀸 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀲𑀺, 𑀢𑀸𑀯𑀤𑁂𑀯 𑀆𑀓𑀸𑀲𑀢𑁄 𑀭𑀢𑀦𑀸𑀦𑀺 𑀧𑀢𑀺𑀁𑀲𑀼. 𑀘𑁄𑀭𑀸 𑀢𑀁 𑀥𑀦𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀲𑀼 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀧𑀸𑀬𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑁂𑀲𑀁 𑀧𑀘𑁆𑀙𑀢𑁄𑀯 𑀅𑀕𑀫𑀸𑀲𑀺. 𑀅𑀣 𑀢𑁂 𑀘𑁄𑀭𑁂 𑀅𑀜𑁆𑀜𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀕𑀡𑁆𑀳𑀺𑀁𑀲𑀼. ‘‘𑀓𑀺𑀫𑀢𑁆𑀣𑀁 𑀅𑀫𑁆𑀳𑁂 𑀕𑀡𑁆𑀳𑀣𑀸’’𑀢𑀺 𑀘 𑀯𑀼𑀢𑁆𑀢𑀸 ‘‘𑀥𑀦𑀢𑁆𑀣𑀸𑀬𑀸’’𑀢𑀺 𑀆𑀳𑀁𑀲𑀼. ‘‘𑀬𑀤𑀺 𑀯𑁄 𑀥𑀦𑁂𑀦 𑀅𑀢𑁆𑀣𑁄, 𑀏𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑀡𑁆𑀳𑀣, 𑀏𑀲𑁄 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀥𑀦𑀁 𑀯𑀲𑁆𑀲𑀸𑀧𑁂𑀲𑀺, 𑀅𑀫𑁆𑀳𑀸𑀓𑀫𑁆𑀧𑁂𑀢𑀁 𑀏𑀢𑁂𑀦𑁂𑀯 𑀤𑀺𑀦𑁆𑀦’’𑀦𑁆𑀢𑀺. 𑀘𑁄𑀭𑀸 𑀘𑁄𑀭𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀫𑁆𑀧𑀺 𑀥𑀦𑀁 𑀤𑁂𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀕𑀡𑁆𑀳𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀥𑀦𑀁 𑀤𑀤𑁂𑀬𑁆𑀬𑀁, 𑀥𑀦𑀯𑀲𑁆𑀲𑀸𑀧𑀦𑀓𑀦𑀓𑁆𑀔𑀢𑁆𑀢𑀬𑁄𑀕𑁄 𑀧𑀦 𑀇𑀢𑁄 𑀲𑀁𑀯𑀘𑁆𑀙𑀭𑀫𑀢𑁆𑀣𑀓𑁂 𑀪𑀯𑀺𑀲𑁆𑀲𑀢𑀺. 𑀬𑀤𑀺 𑀯𑁄 𑀥𑀦𑁂𑀦𑀢𑁆𑀣𑁄, 𑀅𑀥𑀺𑀯𑀸𑀲𑁂𑀣, 𑀢𑀤𑀸 𑀥𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀘𑁄𑀭𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀫𑁆𑀪𑁄, 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁂𑀲𑀁 𑀇𑀤𑀸𑀦𑁂𑀯 𑀥𑀦𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀅𑀫𑁆𑀳𑁂 𑀅𑀜𑁆𑀜𑀁 𑀲𑀁𑀯𑀘𑁆𑀙𑀭𑀁 𑀅𑀥𑀺𑀯𑀸𑀲𑀸𑀧𑁂𑀲𑀻’’𑀢𑀺 𑀢𑀺𑀡𑁆𑀳𑁂𑀦 𑀅𑀲𑀺𑀦𑀸 𑀩𑁆𑀭𑀸𑀳𑁆𑀫𑀡𑀁 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑁂 𑀙𑀟𑁆𑀟𑁂𑀢𑁆𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀢𑁂𑀳𑀺 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀫𑀸𑀭𑁂𑀢𑁆𑀯𑀸 𑀥𑀦𑀁 𑀆𑀤𑀸𑀬 𑀧𑀼𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀺𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀧𑀼𑀭𑀺𑀲𑀲𑀢𑀸𑀦𑀺 𑀖𑀸𑀢𑁂𑀢𑁆𑀯𑀸 𑀏𑀢𑁂𑀦 𑀉𑀧𑀸𑀬𑁂𑀦 𑀬𑀸𑀯 𑀤𑁆𑀯𑁂 𑀚𑀦𑀸 𑀅𑀯𑀲𑀺𑀝𑁆𑀞𑀸 𑀅𑀳𑁂𑀲𑀼𑀁, 𑀢𑀸𑀯 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑀬𑀺𑀁𑀲𑀼. 𑀏𑀯𑀁 𑀢𑀁 𑀧𑀼𑀭𑀺𑀲𑀲𑀳𑀲𑁆𑀲𑀁 𑀯𑀺𑀦𑀸𑀲𑀁 𑀧𑀢𑁆𑀢𑀁.

𑀢𑁂 𑀧𑀦 𑀤𑁆𑀯𑁂 𑀚𑀦𑀸 𑀉𑀧𑀸𑀬𑁂𑀦 𑀢𑀁 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀲𑀫𑀻𑀧𑁂 𑀕𑀳𑀦𑀝𑁆𑀞𑀸𑀦𑁂 𑀥𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀏𑀓𑁄 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺, 𑀏𑀓𑁄 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀸𑀧𑁂𑀢𑀼𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀮𑁄𑀪𑁄 𑀘 𑀦𑀸𑀫𑁂𑀲 𑀯𑀺𑀦𑀸𑀲𑀫𑀽𑀮𑀫𑁂𑀯𑀸𑀢𑀺 𑀥𑀦𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀢𑀲𑁆𑀫𑀺𑀁 𑀆𑀕𑀢𑁂 𑀇𑀤𑀁 𑀥𑀦𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀢𑀁 𑀆𑀕𑀢𑀫𑀢𑁆𑀢𑀫𑁂𑀯 𑀔𑀕𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀖𑀸𑀢𑁂𑀬𑁆𑀬’’𑀦𑁆𑀢𑀺. 𑀲𑁄 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀇𑀢𑀭𑁄𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀢𑀁 𑀥𑀦𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀪𑀢𑁆𑀢𑁂 𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀪𑁄𑀚𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀥𑀦𑀁 𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺. 𑀲𑁄 𑀦𑀺𑀝𑁆𑀞𑀺𑀢𑁂 𑀪𑀢𑁆𑀢𑁂 𑀲𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑁂 𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀆𑀤𑀸𑀬 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑀁 𑀪𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑀫𑀢𑁆𑀢𑀫𑁂𑀯 𑀇𑀢𑀭𑁄 𑀔𑀕𑁆𑀕𑁂𑀦 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀢𑀜𑁆𑀘 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀫𑁆𑀧𑀺 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀏𑀯𑀜𑁆𑀘 𑀢𑀁 𑀥𑀦𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂𑀯 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 𑀥𑀦𑀁 𑀆𑀤𑀸𑀬 𑀆𑀕𑀢𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀆𑀘𑀭𑀺𑀬𑀁 𑀅𑀤𑀺𑀲𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀁 𑀧𑀦 𑀥𑀦𑀁 𑀤𑀺𑀲𑁆𑀯𑀸 ‘‘𑀆𑀘𑀭𑀺𑀬𑁂𑀦 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀥𑀦𑀁 𑀯𑀲𑁆𑀲𑀸𑀧𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑁂𑀳𑀺 𑀯𑀺𑀦𑀸𑀲𑀁 𑀧𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀫𑀕𑁆𑀕𑁂𑀦 𑀧𑀸𑀬𑀸𑀲𑀺. 𑀕𑀘𑁆𑀙𑀦𑁆𑀢𑁄 𑀆𑀘𑀭𑀺𑀬𑀁 𑀫𑀳𑀸𑀫𑀕𑁆𑀕𑁂 𑀤𑁆𑀯𑀺𑀥𑀸 𑀙𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀫𑀢𑁄’’𑀢𑀺 𑀤𑀸𑀭𑀽𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀘𑀺𑀢𑀓𑀁 𑀓𑀢𑁆𑀯𑀸 𑀆𑀘𑀭𑀺𑀬𑀁 𑀛𑀸𑀧𑁂𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁂 𑀧𑀜𑁆𑀘𑀲𑀢𑁂, 𑀧𑀼𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀲𑀢𑁂𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀯𑀲𑀸𑀦𑁂 𑀤𑁆𑀯𑁂 𑀚𑀦𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀁 𑀤𑁆𑀯𑀻𑀳𑀺 𑀊𑀦𑀁 𑀧𑀼𑀭𑀺𑀲𑀲𑀳𑀲𑁆𑀲𑀁 𑀯𑀺𑀦𑀸𑀲𑀁 𑀧𑀢𑁆𑀢𑀁, 𑀅𑀜𑁆𑀜𑁂𑀳𑀺 𑀤𑁆𑀯𑀻𑀳𑀺 𑀘𑁄𑀭𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀧𑀺 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀓𑀳𑀁 𑀦𑀼 𑀔𑁄 𑀢𑁂 𑀕𑀢𑀸’’𑀢𑀺 𑀕𑀘𑁆𑀙𑀦𑁆𑀢𑁄 𑀢𑁂𑀲𑀁 𑀥𑀦𑀁 𑀆𑀤𑀸𑀬 𑀕𑀳𑀦𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀫𑀕𑁆𑀕𑀁 𑀤𑀺𑀲𑁆𑀯𑀸 𑀕𑀘𑁆𑀙𑀦𑁆𑀢𑁄 𑀪𑀡𑁆𑀟𑀺𑀓𑀩𑀤𑁆𑀥𑀲𑁆𑀲 𑀥𑀦𑀲𑁆𑀲 𑀭𑀸𑀲𑀺𑀁 𑀤𑀺𑀲𑁆𑀯𑀸 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀫𑀢𑀁 𑀅𑀤𑁆𑀤𑀲. 𑀢𑀢𑁄 ‘‘𑀇𑀤𑀁 𑀦𑀸𑀫 𑀢𑁂𑀳𑀺 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀁 𑀜𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄’’𑀢𑀺 𑀯𑀺𑀘𑀺𑀦𑀦𑁆𑀢𑁄 𑀢𑀫𑁆𑀧𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀧𑀯𑀺𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀤𑀼𑀩𑁆𑀩𑀘𑀪𑀸𑀯𑁂𑀦 𑀅𑀢𑁆𑀢𑀦𑀸𑀧𑀺 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀅𑀧𑀭𑀫𑁆𑀧𑀺 𑀢𑁂𑀦 𑀧𑀼𑀭𑀺𑀲𑀲𑀳𑀲𑁆𑀲𑀁 𑀯𑀺𑀦𑀸𑀲𑀺𑀢𑀁, 𑀅𑀦𑀼𑀧𑀸𑀬𑁂𑀦 𑀯𑀢 𑀅𑀓𑀸𑀭𑀡𑁂𑀦 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀁 𑀧𑀢𑁆𑀣𑀬𑀫𑀸𑀦𑀸 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀯𑀺𑀬 𑀫𑀳𑀸𑀯𑀺𑀦𑀸𑀲𑀫𑁂𑀯 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁮. ‘‘𑀅𑀦𑀼𑀧𑀸𑀬𑁂𑀦 𑀬𑁄 𑀅𑀢𑁆𑀣𑀁, 𑀇𑀘𑁆𑀙𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺;

𑀘𑁂𑀢𑀸 𑀳𑀦𑀺𑀁𑀲𑀼 𑀯𑁂𑀤𑀩𑁆𑀩𑀁, 𑀲𑀩𑁆𑀩𑁂 𑀢𑁂 𑀩𑁆𑀬𑀲𑀦𑀫𑀚𑁆𑀛𑀕𑀽’’𑀢𑀺.

𑀢𑀢𑁆𑀣 𑀲𑁄 𑀯𑀺𑀳𑀜𑁆𑀜𑀢𑀻𑀢𑀺 𑀲𑁄 𑀅𑀦𑀼𑀧𑀸𑀬𑁂𑀦 ‘‘𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀼𑀟𑁆𑀠𑀺𑀁 𑀲𑀼𑀔𑀁 𑀇𑀘𑁆𑀙𑀸𑀫𑀻’’𑀢𑀺 𑀅𑀓𑀸𑀮𑁂 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀯𑀺𑀳𑀜𑁆𑀜𑀢𑀺 𑀓𑀺𑀮𑀫𑀢𑀺 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀘𑁂𑀢𑀸𑀢𑀺 𑀘𑁂𑀢𑀭𑀝𑁆𑀞𑀯𑀸𑀲𑀺𑀦𑁄 𑀘𑁄𑀭𑀸. 𑀳𑀦𑀺𑀁𑀲𑀼 𑀯𑁂𑀤𑀩𑁆𑀩𑀦𑁆𑀢𑀺 𑀯𑁂𑀤𑀩𑁆𑀩𑀫𑀦𑁆𑀢𑀯𑀲𑁂𑀦 ‘‘𑀯𑁂𑀤𑀩𑁆𑀩𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀩𑁆𑀭𑀸𑀳𑁆𑀫𑀡𑀁 𑀳𑀦𑀺𑀁𑀲𑀼. 𑀲𑀩𑁆𑀩𑁂 𑀢𑁂 𑀩𑁆𑀬𑀲𑀦𑀫𑀚𑁆𑀛𑀕𑀽𑀢𑀺 𑀢𑁂𑀧𑀺 𑀘 𑀅𑀦𑀯𑀲𑁂𑀲𑀸 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑀬𑀫𑀸𑀦𑀸 𑀩𑁆𑀬𑀲𑀦𑀁 𑀅𑀥𑀺𑀕𑀘𑁆𑀙𑀺𑀁𑀲𑀼 𑀧𑀝𑀺𑀮𑀪𑀺𑀁𑀲𑀽𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀬𑀣𑀸 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀦𑀼𑀧𑀸𑀬𑁂𑀦 𑀅𑀝𑁆𑀞𑀸𑀦𑁂 𑀧𑀭𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀥𑀦𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀯𑀺𑀦𑀸𑀲𑀧𑀘𑁆𑀘𑀬𑁄 𑀚𑀸𑀢𑁄, 𑀏𑀯𑀫𑁂𑀯 𑀬𑁄 𑀅𑀜𑁆𑀜𑁄𑀧𑀺 𑀅𑀦𑀼𑀧𑀸𑀬𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀇𑀘𑁆𑀙𑀦𑁆𑀢𑁄 𑀯𑀸𑀬𑀸𑀫𑀁 𑀓𑀭𑀺𑀲𑁆𑀲𑀢𑀺, 𑀲𑀩𑁆𑀩𑁄 𑀲𑁄 𑀅𑀢𑁆𑀢𑀦𑀸 𑀘 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀧𑀭𑁂𑀲𑀜𑁆𑀘 𑀯𑀺𑀦𑀸𑀲𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀦𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀤𑁂𑀯𑀢𑀸𑀲𑀼 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸𑀲𑀼 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀁 𑀥𑀦𑀁 𑀉𑀧𑀸𑀬𑁂𑀦 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀳𑀭𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀣𑀁 𑀧𑀽𑀭𑀬𑀫𑀸𑀦𑁄 𑀅𑀕𑀫𑀸𑀲𑀺.

𑀲𑀢𑁆𑀣𑀸𑀧𑀺 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀯, 𑀤𑀼𑀩𑁆𑀩𑀘𑀢𑁆𑀢𑀸 𑀧𑀦 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑁂𑀤𑀩𑁆𑀩𑀩𑁆𑀭𑀸𑀳𑁆𑀫𑀡𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑁂𑀤𑀩𑁆𑀩𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁯] 𑁯. 𑀦𑀓𑁆𑀔𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦𑀓𑁆𑀔𑀢𑁆𑀢𑀁 𑀧𑀢𑀺𑀫𑀸𑀦𑁂𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀆𑀚𑀻𑀯𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀁 𑀓𑀼𑀮𑀥𑀻𑀢𑀭𑀁 𑀚𑀦𑀧𑀤𑁂 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀸𑀭𑁂𑀢𑁆𑀯𑀸 ‘‘𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀁 𑀆𑀚𑀻𑀯𑀓𑀁 𑀧𑀼𑀘𑁆𑀙𑀺 ‘‘𑀪𑀦𑁆𑀢𑁂, 𑀅𑀚𑁆𑀚 𑀫𑀬𑀁 𑀏𑀓𑀁 𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫, 𑀲𑁄𑀪𑀦𑀁 𑀦𑀼 𑀔𑁄 𑀦𑀓𑁆𑀔𑀢𑁆𑀢’’𑀦𑁆𑀢𑀺. 𑀲𑁄 ‘‘𑀅𑀬𑀁 𑀫𑀁 𑀧𑀞𑀫𑀁 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀧𑀼𑀘𑁆𑀙𑀢𑀺, 𑀳𑁄𑀢𑀼, 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀚𑁆𑀚 𑀅𑀲𑁄𑀪𑀦𑀁 𑀦𑀓𑁆𑀔𑀢𑁆𑀢𑀁, 𑀫𑀸 𑀅𑀚𑁆𑀚 𑀫𑀗𑁆𑀕𑀮𑀁 𑀓𑀭𑀺𑀢𑁆𑀣, 𑀲𑀘𑁂 𑀓𑀭𑀺𑀲𑁆𑀲𑀣, 𑀫𑀳𑀸𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀓𑀼𑀮𑁂 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀦 𑀕𑀘𑁆𑀙𑀺𑀁𑀲𑀼. 𑀦𑀕𑀭𑀯𑀸𑀲𑀺𑀦𑁄 𑀲𑀩𑁆𑀩𑀁 𑀫𑀗𑁆𑀕𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀢𑁂𑀲𑀁 𑀅𑀦𑀸𑀕𑀫𑀦𑀁 𑀤𑀺𑀲𑁆𑀯𑀸 ‘‘𑀢𑁂𑀳𑀺 𑀅𑀚𑁆𑀚 𑀤𑀺𑀯𑀲𑁄 𑀞𑀧𑀺𑀢𑁄, 𑀦𑁄 𑀘 𑀔𑁄 𑀆𑀕𑀢𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀩𑀳𑀼 𑀯𑀬𑀓𑀫𑁆𑀫𑀁 𑀓𑀢𑀁, 𑀓𑀺𑀁 𑀦𑁄 𑀢𑁂𑀳𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀭𑀁 𑀅𑀜𑁆𑀜𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀬𑀣𑀸𑀓𑀢𑁂𑀦𑁂𑀯 𑀫𑀗𑁆𑀕𑀮𑁂𑀦 𑀥𑀻𑀢𑀭𑀁 𑀅𑀜𑁆𑀜𑀲𑁆𑀲 𑀓𑀼𑀮𑀲𑁆𑀲 𑀅𑀤𑀁𑀲𑀼.

𑀇𑀢𑀭𑁂 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀣 𑀦𑁄 𑀤𑀸𑀭𑀺𑀓’’𑀦𑁆𑀢𑀺 𑀆𑀳𑀁𑀲𑀼. 𑀅𑀣 𑀦𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 ‘‘𑀚𑀦𑀧𑀤𑀯𑀸𑀲𑀺𑀦𑁄 𑀦𑀸𑀫 𑀢𑀼𑀫𑁆𑀳𑁂 𑀕𑀳𑀧𑀢𑀺𑀓𑀸 𑀧𑀸𑀧𑀫𑀦𑀼𑀲𑁆𑀲𑀸 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀯𑀜𑁆𑀜𑀸𑀬 𑀦 𑀆𑀕𑀢𑀸, 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀕𑀘𑁆𑀙𑀣, 𑀅𑀫𑁆𑀳𑁂𑀳𑀺 𑀅𑀜𑁆𑀜𑁂𑀲𑀁 𑀤𑀸𑀭𑀺𑀓𑀸 𑀤𑀺𑀦𑁆𑀦𑀸’’𑀢𑀺 𑀧𑀭𑀺𑀪𑀸𑀲𑀺𑀁𑀲𑀼. 𑀢𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀢𑁆𑀯𑀸 𑀤𑀸𑀭𑀺𑀓𑀁 𑀅𑀮𑀪𑀺𑀢𑁆𑀯𑀸 𑀬𑀣𑀸𑀕𑀢𑀫𑀕𑁆𑀕𑁂𑀦𑁂𑀯 𑀕𑀢𑀸. 𑀢𑁂𑀦𑀧𑀺 𑀆𑀚𑀻𑀯𑀓𑁂𑀦 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀫𑀗𑁆𑀕𑀮𑀦𑁆𑀢𑀭𑀸𑀬𑀲𑁆𑀲 𑀓𑀢𑀪𑀸𑀯𑁄 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑁄 𑀚𑀸𑀢𑁄. 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 ‘‘𑀆𑀯𑀼𑀲𑁄, 𑀆𑀚𑀻𑀯𑀓𑁂𑀦 𑀓𑀼𑀮𑀲𑁆𑀲 𑀫𑀗𑁆𑀕𑀮𑀦𑁆𑀢𑀭𑀸𑀬𑁄 𑀓𑀢𑁄’’𑀢𑀺 𑀓𑀣𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀓𑀣𑀬𑀺𑀁𑀲𑀼. ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀆𑀚𑀻𑀯𑀓𑁄 𑀢𑀲𑁆𑀲 𑀓𑀼𑀮𑀲𑁆𑀲 𑀫𑀗𑁆𑀕𑀮𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀏𑀲 𑀢𑁂𑀲𑀁 𑀓𑀼𑀚𑁆𑀛𑀺𑀢𑁆𑀯𑀸 𑀫𑀗𑁆𑀕𑀮𑀦𑁆𑀢𑀭𑀸𑀬𑀁 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀦𑀕𑀭𑀯𑀸𑀲𑀺𑀦𑁄 𑀚𑀦𑀧𑀤𑀯𑀸𑀲𑀻𑀦𑀁 𑀥𑀻𑀢𑀭𑀁 𑀯𑀸𑀭𑁂𑀢𑁆𑀯𑀸 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀁 𑀆𑀚𑀻𑀯𑀓𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀪𑀦𑁆𑀢𑁂, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀏𑀓𑀸 𑀫𑀗𑁆𑀕𑀮𑀓𑀺𑀭𑀺𑀬𑀸, 𑀲𑁄𑀪𑀦𑀁 𑀦𑀼 𑀔𑁄 𑀦𑀓𑁆𑀔𑀢𑁆𑀢’’𑀦𑁆𑀢𑀺. 𑀲𑁄 ‘‘𑀇𑀫𑁂 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀫𑀁 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀚𑁆𑀚 𑀦𑁂𑀲𑀁 𑀫𑀗𑁆𑀕𑀮𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚 𑀅𑀲𑁄𑀪𑀦𑀁 𑀦𑀓𑁆𑀔𑀢𑁆𑀢𑀁, 𑀲𑀘𑁂 𑀓𑀭𑁄𑀣, 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀣𑀸’’𑀢𑀺 𑀆𑀳. 𑀢𑁂 𑀢𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 𑀦 𑀕𑀫𑀺𑀁𑀲𑀼. 𑀚𑀦𑀧𑀤𑀯𑀸𑀲𑀺𑀦𑁄 𑀢𑁂𑀲𑀁 𑀅𑀦𑀸𑀕𑀫𑀦𑀁 𑀜𑀢𑁆𑀯𑀸 ‘‘𑀢𑁂 𑀅𑀚𑁆𑀚 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸𑀧𑀺 𑀦 𑀆𑀕𑀢𑀸, 𑀓𑀺𑀁 𑀦𑁄 𑀢𑁂𑀳𑀺, 𑀅𑀜𑁆𑀜𑁂𑀲𑀁 𑀥𑀻𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀅𑀜𑁆𑀜𑁂𑀲𑀁 𑀥𑀻𑀢𑀭𑀁 𑀅𑀤𑀁𑀲𑀼. 𑀦𑀕𑀭𑀯𑀸𑀲𑀺𑀦𑁄 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀤𑀸𑀭𑀺𑀓𑀁 𑀬𑀸𑀘𑀺𑀁𑀲𑀼. 𑀚𑀦𑀧𑀤𑀯𑀸𑀲𑀺𑀦𑁄 ‘‘𑀢𑀼𑀫𑁆𑀳𑁂 𑀦𑀕𑀭𑀯𑀸𑀲𑀺𑀦𑁄 𑀦𑀸𑀫 𑀙𑀺𑀦𑁆𑀦𑀳𑀺𑀭𑀺𑀓𑀸 𑀕𑀳𑀧𑀢𑀺𑀓𑀸, 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀤𑀸𑀭𑀺𑀓𑀁 𑀦 𑀕𑀡𑁆𑀳𑀺𑀢𑁆𑀣, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀅𑀦𑀸𑀕𑀫𑀦𑀪𑀸𑀯𑁂𑀦 𑀅𑀜𑁆𑀜𑁂𑀲𑀁 𑀅𑀤𑀫𑁆𑀳𑀸’’𑀢𑀺. 𑀫𑀬𑀁 𑀆𑀚𑀻𑀯𑀓𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 ‘‘‘𑀦𑀓𑁆𑀔𑀢𑁆𑀢𑀁 𑀦 𑀲𑁄𑀪𑀦’𑀦𑁆𑀢𑀺 𑀦𑀸𑀕𑀢𑀸, 𑀤𑁂𑀣 𑀦𑁄 𑀤𑀸𑀭𑀺𑀓’’𑀦𑁆𑀢𑀺. ‘‘𑀅𑀫𑁆𑀳𑁂𑀳𑀺 𑀢𑀼𑀫𑁆𑀳𑀸𑀓𑀁 𑀅𑀦𑀸𑀕𑀫𑀦𑀪𑀸𑀯𑁂𑀦 𑀅𑀜𑁆𑀜𑁂𑀲𑀁 𑀤𑀺𑀦𑁆𑀦𑀸, 𑀇𑀤𑀸𑀦𑀺 𑀤𑀺𑀦𑁆𑀦𑀤𑀸𑀭𑀺𑀓𑀁 𑀓𑀣𑀁 𑀧𑀼𑀦 𑀆𑀦𑁂𑀲𑁆𑀲𑀸𑀫𑀸’’𑀢𑀺.

𑀏𑀯𑀁 𑀢𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑁄 𑀦𑀕𑀭𑀯𑀸𑀲𑀻 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀏𑀓𑁂𑀦 𑀓𑀫𑁆𑀫𑁂𑀦 𑀚𑀦𑀧𑀤𑀁 𑀕𑀢𑁄 𑀢𑁂𑀲𑀁 𑀦𑀕𑀭𑀯𑀸𑀲𑀻𑀦𑀁 ‘‘𑀫𑀬𑀁 𑀆𑀚𑀻𑀯𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀲𑁆𑀲 𑀅𑀲𑁄𑀪𑀦𑀪𑀸𑀯𑁂𑀦 𑀦𑀸𑀕𑀢𑀸’’𑀢𑀺 𑀓𑀣𑁂𑀦𑁆𑀢𑀸𑀦𑀁 𑀲𑀼𑀢𑁆𑀯𑀸 ‘‘𑀦𑀓𑁆𑀔𑀢𑁆𑀢𑁂𑀦 𑀓𑁄 𑀅𑀢𑁆𑀣𑁄, 𑀦𑀦𑀼 𑀤𑀸𑀭𑀺𑀓𑀸𑀬 𑀮𑀤𑁆𑀥𑀪𑀸𑀯𑁄𑀯 𑀦𑀓𑁆𑀔𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁯. ‘‘𑀦𑀓𑁆𑀔𑀢𑁆𑀢𑀁 𑀧𑀢𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸;

𑀅𑀢𑁆𑀣𑁄 𑀅𑀢𑁆𑀣𑀲𑁆𑀲 𑀦𑀓𑁆𑀔𑀢𑁆𑀢𑀁, 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸’’𑀢𑀺.

𑀢𑀢𑁆𑀣 𑀧𑀢𑀺𑀫𑀸𑀦𑁂𑀦𑁆𑀢𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀁, ‘‘𑀇𑀤𑀸𑀦𑀺 𑀦𑀓𑁆𑀔𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀦𑀓𑁆𑀔𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀕𑀫𑀬𑀫𑀸𑀦𑀁. 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸𑀢𑀺 𑀏𑀢𑀁 𑀦𑀕𑀭𑀯𑀸𑀲𑀺𑀓𑀁 𑀩𑀸𑀮𑀁 𑀤𑀸𑀭𑀺𑀓𑀸𑀧𑀝𑀺𑀮𑀸𑀪𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀅𑀢𑁆𑀣𑁄 𑀅𑀢𑁆𑀣𑀲𑁆𑀲 𑀦𑀓𑁆𑀔𑀢𑁆𑀢𑀦𑁆𑀢𑀺 𑀬𑀁 𑀅𑀢𑁆𑀣𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀢𑀺, 𑀲𑁄 𑀧𑀝𑀺𑀮𑀤𑁆𑀥𑁄 𑀅𑀢𑁆𑀣𑁄𑀯 𑀅𑀢𑁆𑀣𑀲𑁆𑀲 𑀦𑀓𑁆𑀔𑀢𑁆𑀢𑀁 𑀦𑀸𑀫. 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸𑀢𑀺 𑀇𑀢𑀭𑁂 𑀧𑀦 𑀆𑀓𑀸𑀲𑁂 𑀢𑀸𑀭𑀓𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀓𑀢𑀭𑀁 𑀅𑀢𑁆𑀣𑀁 𑀲𑀸𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀓𑀮𑀳𑀁 𑀓𑀢𑁆𑀯𑀸 𑀤𑀸𑀭𑀺𑀓𑀁 𑀅𑀮𑀪𑀺𑀢𑁆𑀯𑀸𑀯 𑀅𑀕𑀫𑀁𑀲𑀼.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀆𑀚𑀻𑀯𑀓𑁄 𑀇𑀤𑀸𑀦𑁂𑀯 𑀓𑀼𑀮𑀲𑁆𑀲 𑀫𑀗𑁆𑀕𑀮𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀆𑀚𑀻𑀯𑀓𑁄 𑀏𑀢𑀭𑀳𑀺 𑀆𑀚𑀻𑀯𑀓𑁄𑀯 𑀅𑀳𑁄𑀲𑀺, 𑀢𑀸𑀦𑀺𑀧𑀺 𑀓𑀼𑀮𑀸𑀦𑀺 𑀏𑀢𑀭𑀳𑀺 𑀓𑀼𑀮𑀸𑀦𑀺𑀬𑁂𑀯, 𑀕𑀸𑀣𑀁 𑀯𑀢𑁆𑀯𑀸 𑀞𑀺𑀢𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀓𑁆𑀔𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁫𑁦] 𑁧𑁦. 𑀤𑀼𑀫𑁆𑀫𑁂𑀥𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀫𑁆𑀫𑁂𑀥𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀓𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁨.𑁬𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀺𑀚𑁆𑀚𑀝𑁆𑀞𑀸𑀦𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺, 𑀅𑀣𑀲𑁆𑀲 𑀧𑀺𑀢𑀸 𑀑𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑀸 𑀳𑁄𑀦𑁆𑀢𑀺, 𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑀺, 𑀩𑀳𑀽 𑀅𑀚𑁂𑀴𑀓𑀓𑀼𑀓𑁆𑀓𑀼𑀝𑀪𑀽𑀓𑀭𑀸𑀤𑀬𑁄 𑀯𑀥𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀧𑀼𑀧𑁆𑀨𑀕𑀦𑁆𑀥𑁂𑀳𑀺 𑀘𑁂𑀯 𑀫𑀁𑀲𑀮𑁄𑀳𑀺𑀢𑁂𑀳𑀺 𑀘 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀲𑀢𑁆𑀢𑀸 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑀸, 𑀩𑀳𑀼𑀁 𑀧𑀸𑀡𑀯𑀥𑀁 𑀓𑀭𑁄𑀦𑁆𑀢𑀺, 𑀫𑀳𑀸𑀚𑀦𑁄 𑀬𑁂𑀪𑀼𑀬𑁆𑀬𑁂𑀦 𑀅𑀥𑀫𑁆𑀫𑀲𑁆𑀫𑀺𑀁𑀬𑁂𑀯 𑀦𑀺𑀯𑀺𑀝𑁆𑀞𑁄, 𑀅𑀳𑀁 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀏𑀓𑀫𑁆𑀧𑀺 𑀅𑀓𑀺𑀮𑀫𑁂𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀧𑀸𑀡𑀯𑀥𑀁 𑀓𑀸𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁄 𑀅𑀤𑁆𑀤𑀲 𑀏𑀓𑀲𑁆𑀫𑀺𑀁 𑀫𑀳𑀦𑁆𑀢𑁂 𑀯𑀝𑀭𑀼𑀓𑁆𑀔𑁂 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀢𑀺𑀢𑀁, 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀧𑀼𑀢𑁆𑀢𑀥𑀻𑀢𑀼𑀬𑀲𑀥𑀦𑀸𑀤𑀻𑀲𑀼 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀧𑀢𑁆𑀣𑁂𑀦𑁆𑀢𑀁. 𑀲𑁄 𑀢𑀁 𑀤𑀺𑀲𑁆𑀯𑀸 𑀭𑀣𑀸 𑀑𑀭𑀼𑀬𑁆𑀳 𑀢𑀁 𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀉𑀤𑀓𑁂𑀦 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀭𑀼𑀓𑁆𑀔𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀤𑁂𑀯𑀢𑀁 𑀦𑀫𑀲𑁆𑀲𑀺𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀅𑀦𑁆𑀢𑀭𑀦𑁆𑀢𑀭𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑁄 𑀯𑀺𑀬 𑀧𑀽𑀚𑀁 𑀓𑀭𑁄𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀘𑀢𑀲𑁆𑀲𑁄 𑀅𑀕𑀢𑀺𑀬𑁄 𑀯𑀚𑁆𑀚𑁂𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄𑀫𑁆𑀳𑀺. 𑀬𑀁 𑀧𑀦𑀸𑀳𑀁 𑀧𑀼𑀩𑁆𑀩𑁂 𑀏𑀓𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀁, 𑀇𑀤𑀸𑀦𑀺 𑀢𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀫𑀘𑁆𑀘𑁂 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄 𑀘 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀫𑀦𑁆𑀢𑁂𑀲𑀺 ‘‘𑀚𑀸𑀦𑀸𑀣 𑀪𑁄 𑀫𑀬𑀸 𑀓𑁂𑀦 𑀓𑀸𑀭𑀡𑁂𑀦 𑀭𑀚𑁆𑀚𑀁 𑀧𑀢𑁆𑀢’’𑀦𑁆𑀢𑀺? ‘‘𑀦 𑀚𑀸𑀦𑀸𑀫, 𑀤𑁂𑀯𑀸’’𑀢𑀺. ‘‘𑀅𑀧𑀺 𑀯𑁄𑀳𑀁 𑀅𑀲𑀼𑀓𑀁 𑀦𑀸𑀫 𑀯𑀝𑀭𑀼𑀓𑁆𑀔𑀁 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. ‘‘𑀆𑀫, 𑀤𑁂𑀯𑀸’’𑀢𑀺. 𑀢𑀤𑀸𑀳𑀁 𑀧𑀢𑁆𑀣𑀦𑀁 𑀅𑀓𑀸𑀲𑀺𑀁 ‘‘𑀲𑀘𑁂 𑀭𑀚𑁆𑀚𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀲𑁆𑀲𑀸 𑀫𑁂 𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑁂𑀦 𑀇𑀤𑀁 𑀭𑀚𑁆𑀚𑀁 𑀮𑀤𑁆𑀥𑀁, 𑀇𑀤𑀸𑀦𑀺𑀲𑁆𑀲𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀔𑀺𑀧𑁆𑀧𑀁 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑁂𑀣𑀸’’𑀢𑀺. ‘‘𑀓𑀺𑀁 𑀓𑀺𑀁 𑀕𑀡𑁆𑀳𑀸𑀫, 𑀤𑁂𑀯𑀸’’𑀢𑀺? 𑀪𑁄 𑀅𑀳𑀁 𑀤𑁂𑀯𑀢𑀸𑀬 𑀆𑀬𑀸𑀘𑀫𑀸𑀦𑁄 ‘‘𑀬𑁂 𑀫𑀬𑁆𑀳𑀁 𑀭𑀚𑁆𑀚𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀜𑁆𑀘 𑀤𑀼𑀲𑁆𑀲𑀻𑀮𑀓𑀫𑁆𑀫𑀸𑀦𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀢𑁂 𑀖𑀸𑀢𑁂𑀢𑁆𑀯𑀸 𑀅𑀦𑁆𑀢𑀯𑀝𑁆𑀝𑀺𑀫𑀁𑀲𑀮𑁄𑀳𑀺𑀢𑀸𑀤𑀻𑀳𑀺 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀬𑀸𑀘𑀺𑀁. 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀏𑀯𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀉𑀧𑀭𑀸𑀚𑀓𑀸𑀮𑁂𑀬𑁂𑀯 𑀏𑀯𑀁 𑀆𑀬𑀸𑀘𑀺 ‘𑀲𑀘𑀸𑀳𑀁 𑀭𑀚𑁆𑀚𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀬𑁂 𑀫𑁂 𑀭𑀚𑁆𑀚𑁂 𑀤𑀼𑀲𑁆𑀲𑀻𑀮𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀖𑀸𑀢𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺, 𑀲𑁄 𑀇𑀤𑀸𑀦𑀺 𑀧𑀜𑁆𑀘𑀯𑀺𑀥𑀁 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀤𑀲𑀯𑀺𑀥𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀁 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀲𑀳𑀲𑁆𑀲𑀁 𑀖𑀸𑀢𑁂𑀢𑁆𑀯𑀸 𑀢𑁂𑀲𑀁 𑀳𑀤𑀬𑀫𑀁𑀲𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑁄, 𑀏𑀯𑀁 𑀦𑀕𑀭𑀯𑀸𑀲𑀺𑀦𑁄 𑀚𑀸𑀦𑀦𑁆𑀢𑀽’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀬𑁂𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀤𑀼𑀲𑁆𑀲𑀻𑀮𑀓𑀫𑁆𑀫𑁂 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀲𑀳𑀲𑁆𑀲𑀁 𑀖𑀸𑀢𑁂𑀢𑁆𑀯𑀸 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀆𑀬𑀸𑀘𑀦𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁦. ‘‘𑀤𑀼𑀫𑁆𑀫𑁂𑀥𑀸𑀦𑀁 𑀲𑀳𑀲𑁆𑀲𑁂𑀦, 𑀬𑀜𑁆𑀜𑁄 𑀫𑁂 𑀉𑀧𑀬𑀸𑀘𑀺𑀢𑁄;

𑀇𑀤𑀸𑀦𑀺 𑀔𑁄𑀳𑀁 𑀬𑀚𑀺𑀲𑁆𑀲𑀸𑀫𑀺, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄’’𑀢𑀺.

𑀢𑀢𑁆𑀣 𑀤𑀼𑀫𑁆𑀫𑁂𑀥𑀸𑀦𑀁 𑀲𑀳𑀲𑁆𑀲𑁂𑀦𑀸𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀚𑀸𑀦𑀦𑀪𑀸𑀯𑁂𑀦, 𑀤𑀲𑀲𑀼 𑀯𑀸 𑀧𑀦 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑀪𑀸𑀯𑁂𑀦 𑀤𑀼𑀝𑁆𑀞𑀸 𑀫𑁂𑀥𑀸 𑀏𑀢𑁂𑀲𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀢𑁂𑀲𑀁 𑀤𑀼𑀫𑁆𑀫𑁂𑀥𑀸𑀦𑀁 𑀦𑀺𑀧𑁆𑀧𑀜𑁆𑀜𑀸𑀦𑀁 𑀩𑀸𑀮𑀧𑀼𑀕𑁆𑀕𑀮𑀸𑀦𑀁 𑀕𑀡𑀺𑀢𑁆𑀯𑀸 𑀕𑀳𑀺𑀢𑁂𑀦 𑀲𑀳𑀲𑁆𑀲𑁂𑀦. 𑀬𑀜𑁆𑀜𑁄 𑀫𑁂 𑀉𑀧𑀬𑀸𑀘𑀺𑀢𑁄𑀢𑀺 𑀫𑀬𑀸 𑀤𑁂𑀯𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀏𑀯𑀁 𑀬𑀚𑀺𑀲𑁆𑀲𑀸𑀫𑀻’’𑀢𑀺 𑀬𑀜𑁆𑀜𑁄 𑀬𑀸𑀘𑀺𑀢𑁄. 𑀇𑀤𑀸𑀦𑀺 𑀔𑁄𑀳𑀁 𑀬𑀚𑀺𑀲𑁆𑀲𑀸𑀫𑀻𑀢𑀺 𑀲𑁄 𑀅𑀳𑀁 𑀇𑀫𑀺𑀦𑀸 𑀆𑀬𑀸𑀘𑀦𑁂𑀦 𑀭𑀚𑁆𑀚𑀲𑁆𑀲 𑀧𑀝𑀺𑀮𑀤𑁆𑀥𑀢𑁆𑀢𑀸 𑀇𑀤𑀸𑀦𑀺 𑀬𑀚𑀺𑀲𑁆𑀲𑀸𑀫𑀺. 𑀓𑀺𑀁𑀓𑀸𑀭𑀡𑀸? 𑀇𑀤𑀸𑀦𑀺 𑀳𑀺 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄, 𑀢𑀲𑁆𑀫𑀸 𑀇𑀤𑀸𑀦𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺.

𑀅𑀫𑀘𑁆𑀘𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀪𑁂𑀭𑀺𑀬𑀸 𑀆𑀡𑀁 𑀲𑀼𑀢𑁆𑀯𑀸 𑀏𑀓𑀫𑁆𑀧𑀺 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀲𑀫𑀸𑀤𑀸𑀬 𑀞𑀺𑀢𑁄 𑀏𑀓𑀧𑀼𑀭𑀺𑀲𑁄𑀧𑀺 𑀦𑀸𑀳𑁄𑀲𑀺. 𑀇𑀢𑀺 𑀬𑀸𑀯 𑀩𑁄𑀥𑀺𑀲𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀸𑀯 𑀏𑀓𑀧𑀼𑀕𑁆𑀕𑀮𑁄𑀧𑀺 𑀧𑀜𑁆𑀘𑀲𑀼 𑀤𑀲𑀲𑀼 𑀯𑀸 𑀤𑀼𑀲𑁆𑀲𑀻𑀮𑀓𑀫𑁆𑀫𑁂𑀲𑀼 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀅𑀓𑀺𑀮𑀫𑁂𑀦𑁆𑀢𑁄 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀲𑀻𑀮𑀁 𑀭𑀓𑁆𑀔𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀤𑁂𑀯𑀦𑀕𑀭𑀁 𑀧𑀽𑀭𑁂𑀦𑁆𑀢𑁄 𑀅𑀕𑀫𑀸𑀲𑀺.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀮𑁄𑀓𑀲𑁆𑀲 𑀅𑀢𑁆𑀣𑀁 𑀘𑀭𑀢𑀺, 𑀧𑀼𑀩𑁆𑀩𑁂𑀧𑀺 𑀘𑀭𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀫𑁆𑀫𑁂𑀥𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀢𑁆𑀣𑀓𑀸𑀫𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀮𑁄𑀲𑀓𑀢𑀺𑀲𑁆𑀲𑀓𑀧𑁄𑀢, 𑀯𑁂𑀴𑀼𑀓𑀁 𑀫𑀓𑀲𑀫𑁆𑀧𑀺 𑀘;

𑀭𑁄𑀳𑀺𑀡𑀻 𑀆𑀭𑀸𑀫𑀤𑀽𑀲𑀁, 𑀯𑀸𑀭𑀼𑀡𑀻𑀤𑀽𑀲𑀯𑁂𑀤𑀩𑁆𑀩𑀁;

𑀦𑀓𑁆𑀔𑀢𑁆𑀢𑀁 𑀤𑀼𑀫𑁆𑀫𑁂𑀥𑀁 𑀤𑀲𑀸𑀢𑀺.

𑀧𑀞𑀫𑁄 𑀧𑀡𑁆𑀡𑀸𑀲𑀓𑁄.