𑁪. 𑀓𑀼𑀮𑀸𑀯𑀓𑀯𑀕𑁆𑀕𑁄

[𑁩𑁧] 𑁧. 𑀓𑀼𑀮𑀸𑀯𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀮𑀸𑀯𑀓𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀻𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀢𑁄 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸 𑀤𑀳𑀭𑀪𑀺𑀓𑁆𑀔𑀽 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀨𑀸𑀲𑀼𑀓𑀝𑁆𑀞𑀸𑀦𑁂 𑀬𑀣𑀸𑀚𑁆𑀛𑀸𑀲𑀬𑀁 𑀯𑀲𑀺𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀦 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑀸 𑀧𑀸𑀬𑀺𑀁𑀲𑀼. 𑀏𑀓𑀲𑁆𑀲 𑀳𑀢𑁆𑀣𑁂 𑀧𑀭𑀺𑀲𑁆𑀲𑀸𑀯𑀦𑀁 𑀅𑀢𑁆𑀣𑀺, 𑀏𑀓𑀲𑁆𑀲 𑀦𑀢𑁆𑀣𑀺. 𑀤𑁆𑀯𑁂𑀧𑀺 𑀏𑀓𑀢𑁄 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀯𑀺𑀯𑀸𑀤𑀁 𑀅𑀓𑀁𑀲𑀼. 𑀧𑀭𑀺𑀲𑁆𑀲𑀸𑀯𑀦𑀲𑀸𑀫𑀺𑀓𑁄 𑀇𑀢𑀭𑀲𑁆𑀲 𑀧𑀭𑀺𑀲𑁆𑀲𑀸𑀯𑀦𑀁 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀺, 𑀇𑀢𑀭𑁄 𑀧𑀦 𑀧𑀭𑀺𑀲𑁆𑀲𑀸𑀯𑀦𑀁 𑀅𑀮𑀪𑀺𑀢𑁆𑀯𑀸 𑀧𑀺𑀧𑀸𑀲𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺. 𑀢𑁂 𑀉𑀪𑁄𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀫𑀬𑀁 𑀓𑁄𑀲𑀮𑀚𑀦𑀧𑀤𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀯𑀲𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸’’𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄 𑀲𑀫𑀕𑁆𑀕𑀸 𑀆𑀕𑀢𑀢𑁆𑀣𑀸’’𑀢𑀺? 𑀅𑀧𑀭𑀺𑀲𑁆𑀲𑀸𑀯𑀦𑀓𑁄 𑀆𑀳 ‘‘𑀅𑀬𑀁, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀯𑀸𑀤𑀁 𑀓𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀦𑀁 𑀦𑀸𑀤𑀸𑀲𑀻’’𑀢𑀺. 𑀇𑀢𑀭𑁄𑀧𑀺 𑀆𑀳 ‘‘𑀅𑀬𑀁, 𑀪𑀦𑁆𑀢𑁂, 𑀅𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸𑀯 𑀚𑀸𑀦𑀁 𑀲𑀧𑀸𑀡𑀓𑀁 𑀉𑀤𑀓𑀁 𑀧𑀺𑀯𑀻’’𑀢𑀺. ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀧𑀸𑀡𑀓𑀁 𑀉𑀤𑀓𑀁 𑀧𑀺𑀯𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀧𑀭𑀺𑀲𑁆𑀲𑀸𑀯𑀺𑀢𑀁 𑀉𑀤𑀓𑀁 𑀧𑀺𑀯𑀺𑀦𑁆𑀢𑀺. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀤𑁂𑀯𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸 𑀬𑀼𑀤𑁆𑀥𑀧𑀭𑀸𑀚𑀺𑀢𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀧𑀮𑀸𑀬𑀦𑁆𑀢𑀸 ‘𑀇𑀲𑁆𑀲𑀭𑀺𑀬𑀁 𑀦𑀺𑀲𑁆𑀲𑀸𑀬 𑀧𑀸𑀡𑀯𑀥𑀁 𑀦 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀢𑀸𑀯 𑀫𑀳𑀦𑁆𑀢𑀁 𑀬𑀲𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀼𑀧𑀡𑁆𑀡𑀧𑁄𑀢𑀓𑀸𑀦𑀁 𑀚𑀻𑀯𑀺𑀢𑀁 𑀤𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑁂 𑀏𑀓𑁄 𑀫𑀸𑀕𑀥𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀬𑀣𑀸 𑀏𑀢𑀭𑀳𑀺 𑀲𑀓𑁆𑀓𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀯𑀁 𑀢𑀲𑁆𑀫𑀺𑀁𑀬𑁂𑀯 𑀫𑀘𑀮𑀕𑀸𑀫𑀓𑁂 𑀫𑀳𑀸𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀫𑀖𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 ‘‘𑀫𑀖𑀫𑀸𑀡𑀯𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀫𑀸𑀦𑀚𑀸𑀢𑀺𑀓𑀓𑀼𑀮𑀢𑁄 𑀤𑀸𑀭𑀺𑀓𑀁 𑀆𑀦𑀬𑀺𑀁𑀲𑀼. 𑀲𑁄 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀫𑀸𑀦𑁄 𑀤𑀸𑀦𑀧𑀢𑀺 𑀅𑀳𑁄𑀲𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺. 𑀢𑀲𑁆𑀫𑀺𑀜𑁆𑀘 𑀕𑀸𑀫𑁂 𑀢𑁂𑀢𑁆𑀢𑀺𑀁𑀲𑁂𑀯 𑀓𑀼𑀮𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀧𑀺 𑀢𑁂𑀢𑁆𑀢𑀺𑀁𑀲 𑀓𑀼𑀮𑀸 𑀫𑀦𑀼𑀲𑁆𑀲𑀸 𑀏𑀓𑀤𑀺𑀯𑀲𑀁 𑀕𑀸𑀫𑀫𑀚𑁆𑀛𑁂 𑀞𑀢𑁆𑀯𑀸 𑀕𑀸𑀫𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀞𑀺𑀢𑀝𑁆𑀞𑀸𑀦𑁂 𑀧𑀸𑀤𑁂𑀳𑀺 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀅𑀣𑀜𑁆𑀜𑁄 𑀏𑀓𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑀁 𑀞𑀸𑀦𑀁 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀢𑀢𑁆𑀭𑀸𑀧𑀺 𑀅𑀜𑁆𑀜𑁄 𑀞𑀺𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀞𑀺𑀢𑀝𑁆𑀞𑀸𑀦𑀁 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀡𑁆𑀟𑀧𑀁 𑀓𑀸𑀭𑁂𑀲𑀺, 𑀫𑀡𑁆𑀟𑀧𑀫𑁆𑀧𑀺 𑀅𑀧𑀦𑁂𑀢𑁆𑀯𑀸 𑀲𑀸𑀮𑀁 𑀓𑀸𑀭𑁂𑀲𑀺, 𑀢𑀢𑁆𑀣 𑀨𑀮𑀓𑀸𑀲𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀧𑀸𑀦𑀻𑀬𑀘𑀸𑀝𑀺𑀁 𑀞𑀧𑁂𑀲𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀢𑁂𑀧𑀺 𑀢𑁂𑀢𑁆𑀢𑀺𑀁𑀲𑀚𑀦𑀸 𑀩𑁄𑀥𑀺𑀲𑀢𑁆𑀢𑁂𑀦 𑀲𑀫𑀸𑀦𑀘𑁆𑀙𑀦𑁆𑀤𑀸 𑀅𑀳𑁂𑀲𑀼𑀁. 𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺. 𑀢𑁂𑀧𑀺 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀯𑀸𑀲𑀺𑀨𑀭𑀲𑀼𑀫𑀼𑀲𑀮𑀳𑀢𑁆𑀣𑀸 𑀘𑀢𑀼𑀫𑀳𑀸𑀧𑀣𑀸𑀤𑀻𑀲𑀼 𑀫𑀼𑀲𑀮𑁂𑀦 𑀧𑀸𑀲𑀸𑀡𑁂 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀯𑀝𑁆𑀝𑁂𑀦𑁆𑀢𑀺, 𑀬𑀸𑀦𑀸𑀦𑀁 𑀅𑀓𑁆𑀔𑀧𑀝𑀺𑀖𑀸𑀢𑀭𑀼𑀓𑁆𑀔𑁂 𑀳𑀭𑀦𑁆𑀢𑀺, 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀦𑁆𑀢𑀺, 𑀲𑁂𑀢𑀼𑀁 𑀅𑀢𑁆𑀣𑀭𑀦𑁆𑀢𑀺, 𑀧𑁄𑀓𑁆𑀔𑀭𑀡𑀺𑀬𑁄 𑀔𑀡𑀦𑁆𑀢𑀺, 𑀲𑀸𑀮𑀁 𑀓𑀭𑁄𑀦𑁆𑀢𑀺, 𑀤𑀸𑀦𑀸𑀦𑀺 𑀤𑁂𑀦𑁆𑀢𑀺, 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑀺. 𑀏𑀯𑀁 𑀬𑁂𑀪𑀼𑀬𑁆𑀬𑁂𑀦 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼.

𑀅𑀣 𑀦𑁂𑀲𑀁 𑀕𑀸𑀫𑀪𑁄𑀚𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀧𑀼𑀩𑁆𑀩𑁂 𑀏𑀢𑁂𑀲𑀼 𑀲𑀼𑀭𑀁 𑀧𑀺𑀯𑀦𑁆𑀢𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼 𑀘𑀸𑀝𑀺𑀓𑀳𑀸𑀧𑀡𑀸𑀤𑀺𑀯𑀲𑁂𑀦 𑀘𑁂𑀯 𑀤𑀡𑁆𑀟𑀩𑀮𑀺𑀯𑀲𑁂𑀦 𑀘 𑀥𑀦𑀁 𑀮𑀪𑀸𑀫𑀺, 𑀇𑀤𑀸𑀦𑀺 𑀧𑀦 𑀫𑀖𑁄 𑀫𑀸𑀡𑀯𑁄 𑀲𑀻𑀮𑀁 𑀭𑀓𑁆𑀔𑀸𑀧𑁂𑀢𑀺, 𑀢𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀸𑀢𑀼𑀁 𑀦 𑀤𑁂𑀢𑀺, 𑀇𑀤𑀸𑀦𑀺 𑀧𑀦 𑀢𑁂 𑀧𑀜𑁆𑀘 𑀲𑀻𑀮𑀸𑀦𑀺 𑀦 𑀭𑀓𑁆𑀔𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀤𑁆𑀥𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀩𑀳𑀽 𑀘𑁄𑀭𑀸 𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙, 𑀢𑁂 𑀆𑀦𑁂𑀳𑀻’’𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 ‘‘𑀆𑀦𑀻𑀢𑀸, 𑀤𑁂𑀯, 𑀘𑁄𑀭𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑁂𑀲𑀁 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 ‘‘𑀳𑀢𑁆𑀣𑀺𑀦𑀸 𑀦𑁂 𑀫𑀤𑁆𑀤𑀸𑀧𑁂𑀣𑀸’’𑀢𑀺 𑀆𑀳. 𑀢𑀢𑁄 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀗𑁆𑀕𑀡𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀁 𑀆𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺 ‘‘𑀢𑀼𑀫𑁆𑀳𑁂 𑀲𑀻𑀮𑀸𑀦𑀺 𑀆𑀯𑀚𑁆𑀚𑁂𑀣, 𑀧𑁂𑀲𑀼𑀜𑁆𑀜𑀓𑀸𑀭𑀓𑁂 𑀘 𑀭𑀜𑁆𑀜𑁂 𑀘 𑀳𑀢𑁆𑀣𑀺𑀫𑁆𑀳𑀺 𑀘 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀘 𑀏𑀓𑀲𑀤𑀺𑀲𑀫𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣 𑀦𑁂𑀲𑀁 𑀫𑀤𑁆𑀤𑀦𑀢𑁆𑀣𑀸𑀬 𑀳𑀢𑁆𑀣𑀺𑀁 𑀉𑀧𑀦𑁂𑀲𑀼𑀁. 𑀲𑁄 𑀉𑀧𑀦𑀻𑀬𑀫𑀸𑀦𑁄𑀧𑀺 𑀦 𑀉𑀧𑀕𑀘𑁆𑀙𑀢𑀺, 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀢𑁆𑀯𑀸 𑀧𑀮𑀸𑀬𑀢𑀺. 𑀅𑀜𑁆𑀜𑀁 𑀅𑀜𑁆𑀜𑀁 𑀳𑀢𑁆𑀣𑀺𑀁 𑀆𑀦𑀬𑀺𑀁𑀲𑀼, 𑀢𑁂𑀧𑀺 𑀢𑀣𑁂𑀯 𑀧𑀮𑀸𑀬𑀺𑀁𑀲𑀼.

𑀭𑀸𑀚𑀸 ‘‘𑀏𑀢𑁂𑀲𑀁 𑀳𑀢𑁆𑀣𑁂 𑀓𑀺𑀜𑁆𑀘𑀺 𑀑𑀲𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀯𑀺𑀘𑀺𑀦𑀦𑁆𑀢𑀸 𑀅𑀤𑀺𑀲𑁆𑀯𑀸 ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀓𑀺𑀜𑁆𑀘𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀲𑁆𑀲𑀦𑁆𑀢𑀺, 𑀧𑀼𑀘𑁆𑀙𑀣 𑀦𑁂 ‘‘𑀅𑀢𑁆𑀣𑀺 𑀯𑁄 𑀧𑀭𑀺𑀯𑀢𑁆𑀢𑀦𑀫𑀦𑁆𑀢𑁄’’𑀢𑀺? 𑀭𑀸𑀚𑀧𑀼𑀭𑀺𑀲𑀸 𑀧𑀼𑀘𑁆𑀙𑀺𑀁𑀲𑀼, 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀢𑁆𑀣𑀻’’𑀢𑀺 𑀆𑀳. 𑀭𑀸𑀚𑀧𑀼𑀭𑀺𑀲𑀸 ‘‘𑀅𑀢𑁆𑀣𑀺 𑀓𑀺𑀭, 𑀤𑁂𑀯𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼, 𑀭𑀸𑀚𑀸 𑀲𑀩𑁆𑀩𑁂𑀧𑀺 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀫𑀦𑁆𑀢𑀁 𑀓𑀣𑁂𑀣𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀅𑀯𑁄𑀘 ‘‘𑀤𑁂𑀯, 𑀅𑀜𑁆𑀜𑁄 𑀅𑀫𑁆𑀳𑀸𑀓𑀁 𑀫𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀫𑁆𑀳𑁂 𑀧𑀦 𑀢𑁂𑀢𑁆𑀢𑀺𑀁𑀲𑀫𑀢𑁆𑀢𑀸 𑀚𑀦𑀸 𑀧𑀸𑀡𑀁 𑀦 𑀳𑀦𑀸𑀫, 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀸𑀫, 𑀫𑀺𑀘𑁆𑀙𑀸𑀘𑀸𑀭𑀁 𑀦 𑀘𑀭𑀸𑀫, 𑀫𑀼𑀲𑀸𑀯𑀸𑀤𑀁 𑀦 𑀪𑀡𑀸𑀫, 𑀫𑀚𑁆𑀚𑀁 𑀦 𑀧𑀺𑀯𑀸𑀫, 𑀫𑁂𑀢𑁆𑀢𑀁 𑀪𑀸𑀯𑁂𑀫, 𑀤𑀸𑀦𑀁 𑀤𑁂𑀫, 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀫, 𑀧𑁄𑀓𑁆𑀔𑀭𑀡𑀺𑀬𑁄 𑀔𑀡𑀸𑀫, 𑀲𑀸𑀮𑀁 𑀓𑀭𑁄𑀫, 𑀅𑀬𑀁 𑀅𑀫𑁆𑀳𑀸𑀓𑀁 𑀫𑀦𑁆𑀢𑁄 𑀘 𑀧𑀭𑀺𑀢𑁆𑀢𑀜𑁆𑀘 𑀯𑀼𑀟𑁆𑀠𑀺 𑀘𑀸’’𑀢𑀺. 𑀭𑀸𑀚𑀸 𑀢𑁂𑀲𑀁 𑀧𑀲𑀦𑁆𑀦𑁄 𑀧𑁂𑀲𑀼𑀜𑁆𑀜𑀓𑀸𑀭𑀓𑀲𑁆𑀲 𑀲𑀩𑁆𑀩𑀁 𑀕𑁂𑀳𑀯𑀺𑀪𑀯𑀁 𑀢𑀜𑁆𑀘 𑀢𑁂𑀲𑀁𑀬𑁂𑀯 𑀤𑀸𑀲𑀁 𑀓𑀢𑁆𑀯𑀸 𑀅𑀤𑀸𑀲𑀺, 𑀢𑀁 𑀳𑀢𑁆𑀣𑀺𑀜𑁆𑀘 𑀕𑀸𑀫𑀜𑁆𑀘 𑀢𑁂𑀲𑀁𑀬𑁂𑀯 𑀅𑀤𑀸𑀲𑀺.

𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸𑀭𑀼𑀘𑀺𑀬𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 ‘‘𑀘𑀢𑀼𑀫𑀳𑀸𑀧𑀣𑁂 𑀫𑀳𑀦𑁆𑀢𑀁 𑀲𑀸𑀮𑀁 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀸𑀮𑀁 𑀧𑀝𑁆𑀞𑀧𑁂𑀲𑀼𑀁. 𑀫𑀸𑀢𑀼𑀕𑀸𑀫𑁂𑀲𑀼 𑀧𑀦 𑀯𑀺𑀕𑀢𑀘𑁆𑀙𑀦𑁆𑀤𑀢𑀸𑀬 𑀢𑀲𑁆𑀲𑀸 𑀲𑀸𑀮𑀸𑀬 𑀫𑀸𑀢𑀼𑀕𑀸𑀫𑀸𑀦𑀁 𑀧𑀢𑁆𑀢𑀺𑀁 𑀦𑀸𑀤𑀁𑀲𑀼. 𑀢𑁂𑀦 𑀘 𑀲𑀫𑀬𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑁂𑀳𑁂 𑀲𑀼𑀥𑀫𑁆𑀫𑀸, 𑀘𑀺𑀢𑁆𑀢𑀸, 𑀦𑀦𑁆𑀤𑀸, 𑀲𑀼𑀚𑀸𑀢𑀺 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀳𑁄𑀦𑁆𑀢𑀺. 𑀢𑀸𑀲𑀼 𑀲𑀼𑀥𑀫𑁆𑀫𑀸 𑀯𑀟𑁆𑀠𑀓𑀺𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀪𑀸𑀢𑀺𑀓, 𑀇𑀫𑀺𑀲𑁆𑀲𑀸 𑀲𑀸𑀮𑀸𑀬 𑀫𑀁 𑀚𑁂𑀝𑁆𑀞𑀺𑀓𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀮𑀜𑁆𑀚𑀁 𑀅𑀤𑀸𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀞𑀫𑀫𑁂𑀯 𑀓𑀡𑁆𑀡𑀺𑀓𑀸𑀭𑀼𑀓𑁆𑀔𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀓𑀡𑁆𑀡𑀺𑀓𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀢𑁆𑀣𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀲𑀸𑀮𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀡𑁆𑀡𑀺𑀓𑀸𑀭𑁄𑀧𑀦𑀓𑀸𑀮𑁂 ‘‘𑀅𑀳𑁄, 𑀅𑀬𑁆𑀬𑀸, 𑀏𑀓𑀁 𑀦 𑀲𑀭𑀺𑀫𑁆𑀳𑀸’’𑀢𑀺 𑀆𑀳. ‘‘𑀓𑀺𑀁 𑀦𑀸𑀫, 𑀪𑁄’’𑀢𑀺. ‘‘𑀓𑀡𑁆𑀡𑀺𑀓𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀳𑁄𑀢𑀼 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀇𑀤𑀸𑀦𑀺 𑀙𑀺𑀦𑁆𑀦𑀭𑀼𑀓𑁆𑀔𑁂𑀦 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀧𑀼𑀩𑁆𑀩𑁂𑀬𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑀺𑀢𑀓𑀡𑁆𑀡𑀺𑀓𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀲𑀘𑁂 𑀓𑀲𑁆𑀲𑀘𑀺 𑀕𑁂𑀳𑁂 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀓𑁆𑀓𑀸𑀬𑀺𑀓𑀓𑀡𑁆𑀡𑀺𑀓𑀸 𑀅𑀢𑁆𑀣𑀺, 𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸’’𑀢𑀺. 𑀢𑁂 𑀧𑀭𑀺𑀬𑁂𑀲𑀦𑁆𑀢𑀸 𑀲𑀼𑀥𑀫𑁆𑀫𑀸𑀬 𑀕𑁂𑀳𑁂 𑀤𑀺𑀲𑁆𑀯𑀸 𑀫𑀽𑀮𑁂𑀦 𑀦 𑀮𑀪𑀺𑀁𑀲𑀼. ‘‘𑀲𑀘𑁂 𑀫𑀁 𑀲𑀸𑀮𑀸𑀬 𑀧𑀢𑁆𑀢𑀺𑀓𑀁 𑀓𑀭𑁄𑀣, 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀫𑀬𑀁 𑀫𑀸𑀢𑀼𑀕𑀸𑀫𑀸𑀦𑀁 𑀧𑀢𑁆𑀢𑀺𑀁 𑀤𑀫𑁆𑀳𑀸’’𑀢𑀺 𑀆𑀳𑀁𑀲𑀼.

𑀅𑀣 𑀦𑁂 𑀯𑀟𑁆𑀠𑀓𑀻 𑀆𑀳 ‘‘𑀅𑀬𑁆𑀬𑀸, 𑀢𑀼𑀫𑁆𑀳𑁂 𑀓𑀺𑀁 𑀓𑀣𑁂𑀣, 𑀞𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀅𑀜𑁆𑀜𑀁 𑀫𑀸𑀢𑀼𑀕𑀸𑀫𑀭𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀕𑀡𑁆𑀳𑀣 𑀓𑀡𑁆𑀡𑀺𑀓𑀁, 𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀺𑀝𑁆𑀞𑀁 𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀓𑀡𑁆𑀡𑀺𑀓𑀁 𑀕𑀳𑁂𑀢𑁆𑀯𑀸 𑀲𑀸𑀮𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀆𑀲𑀦𑀨𑀮𑀓𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀧𑀸𑀦𑀻𑀬𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀁 𑀦𑀺𑀩𑀦𑁆𑀥𑀺𑀁𑀲𑀼. 𑀲𑀸𑀮𑀁 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀅𑀦𑁆𑀢𑁄𑀧𑀸𑀓𑀸𑀭𑁂 𑀯𑀸𑀮𑀼𑀓𑀁 𑀆𑀓𑀺𑀭𑀺𑀢𑁆𑀯𑀸 𑀩𑀳𑀺𑀧𑀸𑀓𑀸𑀭𑁂 𑀢𑀸𑀮𑀧𑀦𑁆𑀢𑀺𑀬𑁄 𑀭𑁄𑀧𑁂𑀲𑀼𑀁. 𑀘𑀺𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀉𑀬𑁆𑀬𑀸𑀦𑀁 𑀓𑀸𑀭𑁂𑀲𑀺, ‘‘𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑁄 𑀅𑀲𑀼𑀓𑁄 𑀦𑀸𑀫 𑀢𑀲𑁆𑀫𑀺𑀁 𑀦𑀢𑁆𑀣𑀻’’𑀢𑀺 𑀦𑀸𑀳𑁄𑀲𑀺. 𑀦𑀦𑁆𑀤𑀸𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑁄𑀓𑁆𑀔𑀭𑀡𑀺𑀁 𑀓𑀸𑀭𑁂𑀲𑀺 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀁 𑀭𑀫𑀡𑀻𑀬𑀁. 𑀲𑀼𑀚𑀸 𑀦 𑀓𑀺𑀜𑁆𑀘𑀺 𑀅𑀓𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼 𑀉𑀧𑀝𑁆𑀞𑀸𑀦𑀁 𑀧𑀺𑀢𑀼 𑀉𑀧𑀝𑁆𑀞𑀸𑀦𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀁 𑀲𑀘𑁆𑀘𑀯𑀸𑀘𑀁 𑀅𑀨𑀭𑀼𑀲𑀯𑀸𑀘𑀁 𑀅𑀧𑀺𑀲𑀼𑀡𑀯𑀸𑀘𑀁 𑀫𑀘𑁆𑀙𑁂𑀭𑀯𑀺𑀦𑀬𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑁋

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁫𑁭) 𑁋

𑀏𑀯𑀁 𑀧𑀲𑀁𑀲𑀺𑀬𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀧𑀺𑀲𑁆𑀲 𑀲𑀳𑀸𑀬𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀲𑀼𑀭𑀸 𑀧𑀝𑀺𑀯𑀲𑀦𑁆𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀓𑀺𑀁 𑀦𑁄 𑀲𑀸𑀥𑀸𑀭𑀡𑁂𑀦 𑀭𑀚𑁆𑀚𑁂𑀦𑀸’’𑀢𑀺 𑀅𑀲𑀼𑀭𑁂 𑀤𑀺𑀩𑁆𑀩𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀫𑀢𑁆𑀢𑁂 𑀲𑀫𑀸𑀦𑁂 𑀧𑀸𑀤𑁂𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑀧𑀸𑀤𑁂 𑀔𑀺𑀧𑀸𑀧𑁂𑀲𑀺. 𑀢𑁂 𑀅𑀲𑀼𑀭𑀪𑀯𑀦𑀫𑁂𑀯 𑀲𑀫𑁆𑀧𑀸𑀧𑀼𑀡𑀺𑀁𑀲𑀼.

𑀅𑀲𑀼𑀭𑀪𑀯𑀦𑀁 𑀦𑀸𑀫 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀧𑁆𑀧𑀫𑀸𑀡𑀫𑁂𑀯, 𑀢𑀢𑁆𑀣 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀯𑀺𑀬 𑀘𑀺𑀢𑁆𑀢𑀧𑀸𑀝𑀮𑀺 𑀦𑀸𑀫 𑀓𑀧𑁆𑀧𑀝𑁆𑀞𑀺𑀬𑀭𑀼𑀓𑁆𑀔𑁄 𑀳𑁄𑀢𑀺. 𑀢𑁂 𑀘𑀺𑀢𑁆𑀢𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀺𑀢𑀸𑀬 𑀚𑀸𑀦𑀦𑁆𑀢𑀺 ‘‘𑀦𑀸𑀬𑀁 𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑁄, 𑀤𑁂𑀯𑀮𑁄𑀓𑀲𑁆𑀫𑀺𑀜𑁆𑀳𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀼𑀧𑁆𑀨𑀢𑀻’’𑀢𑀺. 𑀅𑀣 𑀢𑁂 ‘‘𑀚𑀭𑀲𑀓𑁆𑀓𑁄 𑀅𑀫𑁆𑀳𑁂 𑀫𑀢𑁆𑀢𑁂 𑀓𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀔𑀺𑀧𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑁂𑀯𑀦𑀕𑀭𑀁 𑀕𑀡𑁆𑀳𑀺, 𑀢𑁂 𑀫𑀬𑀁 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑁂𑀯𑀦𑀕𑀭𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀓𑀺𑀧𑀺𑀮𑁆𑀮𑀺𑀓𑀸 𑀯𑀺𑀬 𑀣𑀫𑁆𑀪𑀁 𑀲𑀺𑀦𑁂𑀭𑀼𑀁 𑀅𑀦𑀼𑀲𑀜𑁆𑀘𑀭𑀫𑀸𑀦𑀸 𑀉𑀝𑁆𑀞𑀳𑀺𑀁𑀲𑀼. 𑀲𑀓𑁆𑀓𑁄 ‘‘𑀅𑀲𑀼𑀭𑀸 𑀓𑀺𑀭 𑀉𑀝𑁆𑀞𑀺𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀬𑁂𑀯 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀫𑀸𑀦𑁄 𑀢𑁂𑀳𑀺 𑀧𑀭𑀸𑀚𑀺𑀢𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁂𑀦 𑀯𑁂𑀚𑀬𑀦𑁆𑀢𑀭𑀣𑁂𑀦 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀲𑁆𑀲 𑀫𑀢𑁆𑀣𑀓𑁂𑀦 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀭𑀣𑁄 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑁄 𑀲𑀺𑀫𑁆𑀩𑀮𑀺𑀯𑀦𑀁 𑀧𑀓𑁆𑀔𑀦𑁆𑀢𑁄, 𑀢𑀲𑁆𑀲 𑀕𑀫𑀦𑀫𑀕𑁆𑀕𑁂 𑀲𑀺𑀫𑁆𑀩𑀮𑀺𑀯𑀦𑀁 𑀦𑀴𑀯𑀦𑀁 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀧𑀢𑀢𑀺. 𑀲𑀼𑀧𑀡𑁆𑀡𑀧𑁄𑀢𑀓𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀧𑀭𑀺𑀧𑀢𑀦𑁆𑀢𑀸 𑀫𑀳𑀸𑀯𑀺𑀭𑀯𑀁 𑀭𑀯𑀺𑀁𑀲𑀼. 𑀲𑀓𑁆𑀓𑁄 𑀫𑀸𑀢𑀮𑀺𑀁 𑀧𑀼𑀘𑁆𑀙𑀺 ‘‘𑀲𑀫𑁆𑀫 𑀫𑀸𑀢𑀮𑀺, 𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲, 𑀅𑀢𑀺𑀓𑀸𑀭𑀼𑀜𑁆𑀜𑀭𑀯𑁄 𑀯𑀢𑁆𑀢𑀢𑀻’’𑀢𑀺? ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀣𑀯𑁂𑀕𑁂𑀦 𑀯𑀺𑀘𑀼𑀡𑁆𑀡𑀺𑀢𑁂 𑀲𑀺𑀫𑁆𑀩𑀮𑀺𑀯𑀦𑁂 𑀧𑀢𑀦𑁆𑀢𑁂 𑀲𑀼𑀧𑀡𑁆𑀡𑀧𑁄𑀢𑀓𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀏𑀓𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀻’’𑀢𑀺.

𑀫𑀳𑀸𑀲𑀢𑁆𑀢𑁄 ‘‘𑀲𑀫𑁆𑀫 𑀫𑀸𑀢𑀮𑀺, 𑀫𑀸 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀏𑀢𑁂 𑀓𑀺𑀮𑀫𑀦𑁆𑀢𑀼, 𑀦 𑀫𑀬𑀁 𑀇𑀲𑁆𑀲𑀭𑀺𑀬𑀁 𑀦𑀺𑀲𑁆𑀲𑀸𑀬 𑀧𑀸𑀡𑀯𑀥𑀓𑀫𑁆𑀫𑀁 𑀓𑀭𑁄𑀫, 𑀏𑀢𑁂𑀲𑀁 𑀧𑀦 𑀅𑀢𑁆𑀣𑀸𑀬 𑀫𑀬𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀲𑀼𑀭𑀸𑀦𑀁 𑀤𑀲𑁆𑀲𑀸𑀫, 𑀦𑀺𑀯𑀢𑁆𑀢𑀬𑁂𑀢𑀁 𑀭𑀣’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁧. ‘‘𑀓𑀼𑀮𑀸𑀯𑀓𑀸 𑀫𑀸𑀢𑀮𑀺 𑀲𑀺𑀫𑁆𑀩𑀮𑀺𑀲𑁆𑀫𑀺𑀁, 𑀈𑀲𑀸𑀫𑀼𑀔𑁂𑀦 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀓𑀸𑀫𑀁 𑀘𑀚𑀸𑀫 𑀅𑀲𑀼𑀭𑁂𑀲𑀼 𑀧𑀸𑀡𑀁, 𑀫𑀸𑀫𑁂 𑀤𑀺𑀚𑀸 𑀯𑀺𑀓𑀼𑀮𑀸𑀯𑀸 𑀅𑀳𑁂𑀲𑀼’’𑀦𑁆𑀢𑀺.

𑀢𑀢𑁆𑀣 𑀓𑀼𑀮𑀸𑀯𑀓𑀸𑀢𑀺 𑀲𑀼𑀧𑀡𑁆𑀡𑀧𑁄𑀢𑀓𑀸. 𑀫𑀸𑀢𑀮𑀻𑀢𑀺 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺. 𑀲𑀺𑀫𑁆𑀩𑀮𑀺𑀲𑁆𑀫𑀺𑀦𑁆𑀢𑀺 𑀧𑀲𑁆𑀲 𑀏𑀢𑁂 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁂 𑀑𑀮𑀫𑁆𑀩𑀦𑁆𑀢𑀸 𑀞𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀈𑀲𑀸𑀫𑀼𑀔𑁂𑀦 𑀧𑀭𑀺𑀯𑀚𑁆𑀚𑀬𑀲𑁆𑀲𑀽𑀢𑀺 𑀏𑀢𑁂 𑀏𑀢𑀲𑁆𑀲 𑀭𑀣𑀲𑁆𑀲 𑀈𑀲𑀸𑀫𑀼𑀔𑁂𑀦 𑀬𑀣𑀸 𑀦 𑀳𑀜𑁆𑀜𑀦𑁆𑀢𑀺, 𑀏𑀯𑀁 𑀢𑁂 𑀧𑀭𑀺𑀯𑀚𑁆𑀚𑀬𑀲𑁆𑀲𑀼. 𑀓𑀸𑀫𑀁 𑀘𑀚𑀸𑀫 𑀅𑀲𑀼𑀭𑁂𑀲𑀼 𑀧𑀸𑀡𑀦𑁆𑀢𑀺 𑀬𑀤𑀺 𑀅𑀫𑁆𑀳𑁂𑀲𑀼 𑀅𑀲𑀼𑀭𑀸𑀦𑀁 𑀧𑀸𑀡𑀁 𑀘𑀚𑀦𑁆𑀢𑁂𑀲𑀼 𑀏𑀢𑁂𑀲𑀁 𑀲𑁄𑀢𑁆𑀣𑀺 𑀳𑁄𑀢𑀺, 𑀓𑀸𑀫𑀁 𑀘𑀚𑀸𑀫 𑀏𑀓𑀁𑀲𑁂𑀦𑁂𑀯 𑀫𑀬𑀁 𑀅𑀲𑀼𑀭𑁂𑀲𑀼 𑀅𑀫𑁆𑀳𑀸𑀓𑀁 𑀧𑀸𑀡𑀁 𑀘𑀚𑀸𑀫. 𑀫𑀸𑀫𑁂 𑀤𑀺𑀚𑀸 𑀯𑀺𑀓𑀼𑀮𑀸𑀯𑀸 𑀅𑀳𑁂𑀲𑀼𑀦𑁆𑀢𑀺 𑀇𑀫𑁂 𑀧𑀦 𑀤𑀺𑀚𑀸 𑀇𑀫𑁂 𑀕𑀭𑀼𑀴𑀧𑁄𑀢𑀓𑀸 𑀯𑀺𑀤𑁆𑀥𑀲𑁆𑀢𑀯𑀺𑀘𑀼𑀡𑁆𑀡𑀺𑀢𑀓𑀼𑀮𑀸𑀯𑀓𑀢𑀸𑀬 𑀯𑀺𑀓𑀼𑀮𑀸𑀯𑀸 𑀫𑀸 𑀅𑀳𑁂𑀲𑀼𑀁, 𑀫𑀸 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀁 𑀏𑀢𑁂𑀲𑀁 𑀉𑀧𑀭𑀺 𑀔𑀺𑀧, 𑀦𑀺𑀯𑀢𑁆𑀢𑀬 𑀦𑀺𑀯𑀢𑁆𑀢𑀬 𑀭𑀣𑀦𑁆𑀢𑀺. 𑀫𑀸𑀢𑀮𑀺𑀲𑀗𑁆𑀕𑀸𑀳𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀅𑀓𑀸𑀲𑀺. 𑀅𑀲𑀼𑀭𑀸 𑀧𑀦 𑀢𑀁 𑀦𑀺𑀯𑀢𑁆𑀢𑀬𑀫𑀸𑀦𑀫𑁂𑀯 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀅𑀜𑁆𑀜𑁂𑀳𑀺𑀧𑀺 𑀘𑀓𑁆𑀓𑀯𑀸𑀴𑁂𑀳𑀺 𑀲𑀓𑁆𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀩𑀮𑀁 𑀮𑀪𑀺𑀢𑁆𑀯𑀸 𑀭𑀣𑁄 𑀦𑀺𑀯𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀭𑀡𑀪𑀬𑀪𑀻𑀢𑀸 𑀧𑀮𑀸𑀬𑀺𑀢𑁆𑀯𑀸 𑀅𑀲𑀼𑀭𑀪𑀯𑀦𑀫𑁂𑀯 𑀧𑀯𑀺𑀲𑀺𑀁𑀲𑀼.

𑀲𑀓𑁆𑀓𑁄𑀧𑀺 𑀤𑁂𑀯𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀕𑀡𑁂𑀦 𑀧𑀭𑀺𑀯𑀼𑀢𑁄 𑀦𑀕𑀭𑀫𑀚𑁆𑀛𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁄 𑀉𑀝𑁆𑀞𑀳𑀺. 𑀯𑀺𑀚𑀬𑀦𑁆𑀢𑁂 𑀉𑀝𑁆𑀞𑀺𑀢𑀢𑁆𑀢𑀸 ‘‘𑀯𑁂𑀚𑀬𑀦𑁆𑀢𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀲𑀓𑁆𑀓𑁄 𑀧𑀼𑀦 𑀅𑀲𑀼𑀭𑀸𑀦𑀁 𑀅𑀦𑀸𑀕𑀫𑀦𑀢𑁆𑀣𑀸𑀬 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀦𑁆𑀢𑀭𑀸 𑀤𑁆𑀯𑀺𑀦𑁆𑀦𑀁 𑀅𑀬𑀼𑀚𑁆𑀛𑀧𑀼𑀭𑀸𑀦𑀁, 𑀧𑀜𑁆𑀘𑀯𑀺𑀥𑀸 𑀞𑀧𑀺𑀢𑀸 𑀅𑀪𑀺𑀭𑀓𑁆𑀔𑀸;

𑀉𑀭𑀕𑀓𑀭𑁄𑀝𑀺𑀧𑀬𑀲𑁆𑀲 𑀘 𑀳𑀸𑀭𑀻, 𑀫𑀤𑀦𑀬𑀼𑀢𑀸 𑀘𑀢𑀼𑀭𑁄 𑀘 𑀫𑀳𑀦𑁆𑀢𑀸’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁭);

𑀤𑁆𑀯𑁂 𑀦𑀕𑀭𑀸𑀦𑀺𑀧𑀺 𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺 𑀤𑁂𑀯𑀦𑀕𑀭𑀜𑁆𑀘 𑀅𑀲𑀼𑀭𑀦𑀕𑀭𑀜𑁆𑀘. 𑀬𑀤𑀸 𑀳𑀺 𑀅𑀲𑀼𑀭𑀸 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀤𑁂𑀯𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀳𑀺𑀢𑁂 𑀅𑀲𑀼𑀭𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀤𑀸 𑀤𑁂𑀯𑀸 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀅𑀲𑀼𑀭𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀅𑀲𑀼𑀭𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀳𑀺𑀢𑁂 𑀲𑀓𑁆𑀓𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀦𑁆𑀢𑀭𑀸 𑀏𑀢𑁂𑀲𑀼 𑀉𑀭𑀕𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀓𑁆𑀓𑁂𑀦 𑀆𑀭𑀓𑁆𑀔𑀸 𑀞𑀧𑀺𑀢𑀸. 𑀢𑀢𑁆𑀣 𑀉𑀭𑀕-𑀲𑀤𑁆𑀤𑁂𑀦 𑀦𑀸𑀕𑀸 𑀕𑀳𑀺𑀢𑀸. 𑀢𑁂 𑀉𑀤𑀓𑁂 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀦𑁂𑀭𑀼𑀲𑁆𑀲 𑀧𑀞𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀓𑀭𑁄𑀝𑀺-𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸 𑀕𑀳𑀺𑀢𑀸. 𑀢𑁂𑀲𑀁 𑀓𑀺𑀭 𑀓𑀭𑁄𑀝𑀺 𑀦𑀸𑀫 𑀧𑀸𑀦𑀪𑁄𑀚𑀦𑀁, 𑀢𑁂𑀦 𑀢𑀁 𑀦𑀸𑀫𑀁 𑀮𑀪𑀺𑀁𑀲𑀼, 𑀤𑀼𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀧𑀬𑀲𑁆𑀲𑀳𑀸𑀭𑀺-𑀲𑀤𑁆𑀤𑁂𑀦 𑀓𑀼𑀫𑁆𑀪𑀡𑁆𑀟𑀸 𑀕𑀳𑀺𑀢𑀸. 𑀤𑀸𑀦𑀯𑀭𑀓𑁆𑀔𑀲𑀸 𑀓𑀺𑀭𑁂𑀢𑁂, 𑀢𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀫𑀤𑀦𑀬𑀼𑀢-𑀲𑀤𑁆𑀤𑁂𑀦 𑀬𑀓𑁆𑀔𑀸 𑀕𑀳𑀺𑀢𑀸. 𑀯𑀺𑀲𑀫𑀘𑀸𑀭𑀺𑀦𑁄 𑀓𑀺𑀭 𑀢𑁂 𑀬𑀼𑀤𑁆𑀥𑀲𑁄𑀡𑁆𑀟𑀸, 𑀘𑀢𑀼𑀢𑁆𑀣𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀘𑀢𑀼𑀭𑁄 𑀘 𑀫𑀳𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀼𑀢𑁆𑀢𑀸, 𑀧𑀜𑁆𑀘𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀢𑀲𑁆𑀫𑀸 𑀬𑀤𑀺 𑀅𑀲𑀼𑀭𑀸 𑀓𑀼𑀧𑀺𑀢𑀸 𑀆𑀯𑀺𑀮𑀘𑀺𑀢𑁆𑀢𑀸 𑀤𑁂𑀯𑀧𑀼𑀭𑀁 𑀉𑀧𑀬𑀦𑁆𑀢𑀺, 𑀧𑀜𑁆𑀘𑀯𑀺𑀥𑁂𑀲𑀼 𑀬𑀁 𑀕𑀺𑀭𑀺𑀦𑁄 𑀧𑀞𑀫𑀁 𑀧𑀭𑀺𑀪𑀡𑁆𑀟𑀁, 𑀢𑀁 𑀉𑀭𑀕𑀸 𑀧𑀭𑀺𑀩𑀸𑀳𑀺𑀬 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼 𑀲𑁂𑀲𑀸.

𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑀓𑁆𑀓𑁂 𑀤𑁂𑀯𑀸𑀦𑀫𑀺𑀦𑁆𑀤𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂 𑀲𑀼𑀥𑀫𑁆𑀫𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀓𑀡𑁆𑀡𑀺𑀓𑀸𑀬 𑀤𑀺𑀦𑁆𑀦𑀦𑀺𑀲𑁆𑀲𑀦𑁆𑀤𑁂𑀦 𑀘𑀲𑁆𑀲𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸 𑀲𑀼𑀥𑀫𑁆𑀫𑀸 𑀦𑀸𑀫 𑀤𑁂𑀯𑀲𑀪𑀸 𑀉𑀤𑀧𑀸𑀤𑀺, 𑀬𑀢𑁆𑀣 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀓𑀜𑁆𑀘𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀘𑀺𑀢𑁆𑀢𑀸𑀧𑀺 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀬𑁆𑀬𑀸𑀦𑀲𑁆𑀲 𑀓𑀭𑀡𑀦𑀺𑀲𑁆𑀲𑀦𑁆𑀤𑁂𑀦 𑀘𑀲𑁆𑀲𑀸 𑀘𑀺𑀢𑁆𑀢𑀮𑀢𑀸𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀉𑀤𑀧𑀸𑀤𑀺. 𑀦𑀦𑁆𑀤𑀸𑀧𑀺 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀧𑁄𑀓𑁆𑀔𑀭𑀡𑀺𑀬𑀸 𑀦𑀺𑀲𑁆𑀲𑀦𑁆𑀤𑁂𑀦 𑀘𑀲𑁆𑀲𑀸 𑀦𑀦𑁆𑀤𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀉𑀤𑀧𑀸𑀤𑀺.

𑀲𑀼𑀚𑀸 𑀧𑀦 𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀓𑀢𑀢𑁆𑀢𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑁂 𑀓𑀦𑁆𑀤𑀭𑀸𑀬 𑀩𑀓𑀲𑀓𑀼𑀡𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀲𑀓𑁆𑀓𑁄 ‘‘𑀲𑀼𑀚𑀸 𑀦 𑀧𑀜𑁆𑀜𑀸𑀬𑀢𑀺, 𑀓𑀢𑁆𑀣 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀆𑀤𑀸𑀬 𑀤𑁂𑀯𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀭𑀫𑀡𑀻𑀬𑀁 𑀤𑁂𑀯𑀦𑀕𑀭𑀁 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪𑀁 𑀘𑀺𑀢𑁆𑀢𑀮𑀢𑀸𑀯𑀦𑀁 𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑀸 𑀓𑀼𑀲𑀮𑀁 𑀓𑀢𑁆𑀯𑀸 𑀫𑀬𑁆𑀳𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀢𑁆𑀯𑀁 𑀧𑀦 𑀓𑀼𑀲𑀮𑀁 𑀅𑀓𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸, 𑀇𑀢𑁄 𑀧𑀝𑁆𑀞𑀸𑀬 𑀲𑀻𑀮𑀁 𑀭𑀓𑁆𑀔𑀸𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀮𑀁 𑀭𑀓𑁆𑀔𑀢𑀺. 𑀲𑀓𑁆𑀓𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 ‘‘𑀲𑀓𑁆𑀓𑀸 𑀦𑀼 𑀔𑁄 𑀲𑀻𑀮𑀁 𑀭𑀓𑁆𑀔𑀺𑀢𑀼’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀫𑀘𑁆𑀙𑀭𑀽𑀧𑁂𑀦 𑀉𑀢𑁆𑀢𑀸𑀦𑁄 𑀳𑀼𑀢𑁆𑀯𑀸 𑀧𑀼𑀭𑀢𑁄 𑀦𑀺𑀧𑀚𑁆𑀚𑀺, 𑀲𑀸 ‘‘𑀫𑀢𑀫𑀘𑁆𑀙𑀓𑁄’’𑀢𑀺 𑀲𑀜𑁆𑀜𑀸𑀬 𑀲𑀻𑀲𑁂 𑀅𑀕𑁆𑀕𑀳𑁂𑀲𑀺, 𑀫𑀘𑁆𑀙𑁄 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀲𑀺, 𑀅𑀣 𑀦𑀁 ‘‘𑀚𑀻𑀯𑀢𑀺 𑀫𑀜𑁆𑀜𑁂’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀓𑁆𑀓𑁄 ‘‘𑀲𑀸𑀥𑀼 𑀲𑀸𑀥𑀼, 𑀲𑀓𑁆𑀔𑀺𑀲𑁆𑀲𑀲𑀺 𑀲𑀻𑀮𑀁 𑀭𑀓𑁆𑀔𑀺𑀢𑀼’’𑀦𑁆𑀢𑀺 𑀅𑀕𑀫𑀸𑀲𑀺. 𑀲𑀸 𑀢𑀢𑁄 𑀘𑀼𑀢𑀸 𑀩𑀸𑀭𑀸𑀡𑀲𑀺𑀬𑀁 𑀓𑀼𑀫𑁆𑀪𑀓𑀸𑀭𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀓𑁆𑀓𑁄 ‘‘𑀓𑀳𑀁 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀲𑀼𑀯𑀡𑁆𑀡𑀏𑀴𑀸𑀮𑀼𑀓𑀸𑀦𑀁 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀕𑀸𑀫𑀲𑁆𑀲 𑀫𑀳𑀮𑁆𑀮𑀓𑀯𑁂𑀲𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀏𑀴𑀸𑀮𑀼𑀓𑀸𑀦𑀺 𑀕𑀡𑁆𑀳𑀣, 𑀏𑀴𑀸𑀮𑀼𑀓𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀳𑀺, 𑀢𑀸𑀢𑀸’’𑀢𑀺 𑀆𑀳𑀁𑀲𑀼. ‘‘𑀅𑀳𑀁 𑀲𑀻𑀮𑀭𑀓𑁆𑀔𑀓𑀸𑀦𑀁 𑀤𑀫𑁆𑀫𑀺, 𑀢𑀼𑀫𑁆𑀳𑁂 𑀲𑀻𑀮𑀁 𑀭𑀓𑁆𑀔𑀣𑀸’’𑀢𑀺? ‘‘𑀫𑀬𑀁 𑀲𑀻𑀮𑀁 𑀦𑀸𑀫 𑀦 𑀚𑀸𑀦𑀸𑀫, 𑀫𑀽𑀮𑁂𑀦 𑀤𑁂𑀳𑀻’’𑀢𑀺. ‘‘𑀦 𑀫𑀬𑁆𑀳𑀁 𑀫𑀽𑀮𑁂𑀦 𑀅𑀢𑁆𑀣𑁄, 𑀲𑀻𑀮𑀭𑀓𑁆𑀔𑀓𑀸𑀦𑀜𑁆𑀜𑁂𑀯𑀸𑀳𑀁 𑀤𑀫𑁆𑀫𑀻’’𑀢𑀺. 𑀫𑀦𑀼𑀲𑁆𑀲𑀸 ‘‘𑀓𑁄 𑀘𑀸𑀬𑀁 𑀏𑀴𑀸𑀮𑀼𑀓𑁄’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀲𑀼𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀆𑀦𑀻𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀁 ‘‘𑀤𑁂𑀳𑀺, 𑀢𑀸𑀢𑀸’’𑀢𑀺 𑀆𑀳. ‘‘𑀲𑀻𑀮𑀁 𑀭𑀓𑁆𑀔𑀲𑀺, 𑀅𑀫𑁆𑀫𑀸’’𑀢𑀺? ‘‘𑀆𑀫, 𑀭𑀓𑁆𑀔𑀸𑀫𑀻’’𑀢𑀺. ‘‘𑀇𑀤𑀁 𑀫𑀬𑀸 𑀢𑀼𑀬𑁆𑀳𑀫𑁂𑀯 𑀅𑀢𑁆𑀣𑀸𑀬 𑀆𑀪𑀢’’𑀦𑁆𑀢𑀺 𑀲𑀤𑁆𑀥𑀺𑀁 𑀬𑀸𑀦𑀓𑁂𑀦 𑀕𑁂𑀳𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸𑀧𑀺 𑀬𑀸𑀯𑀚𑀻𑀯𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀯𑁂𑀧𑀘𑀺𑀢𑁆𑀢𑀺𑀲𑁆𑀲 𑀅𑀲𑀼𑀭𑀺𑀦𑁆𑀤𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀻𑀮𑀸𑀦𑀺𑀲𑀁𑀲𑁂𑀦 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 ‘‘𑀫𑀬𑁆𑀳𑀁 𑀥𑀻𑀢𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀢𑀁 𑀲𑀸𑀫𑀺𑀓𑀁 𑀕𑀡𑁆𑀳𑀢𑀽’’𑀢𑀺 𑀅𑀲𑀼𑀭𑁂 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀲𑀓𑁆𑀓𑁄 ‘‘𑀓𑀳𑀁 𑀦𑀼 𑀔𑁄 𑀲𑀸 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀼𑀚𑀸 𑀘𑀺𑀢𑁆𑀢𑀭𑀼𑀘𑀺𑀢𑀁 𑀲𑀸𑀫𑀺𑀓𑀁 𑀕𑀡𑁆𑀳𑀦𑁆𑀢𑀻 𑀫𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀅𑀲𑀼𑀭𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺. 𑀲𑀼𑀚𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀆𑀦𑁂𑀢𑁆𑀯𑀸 ‘‘𑀘𑀺𑀢𑁆𑀢𑀭𑀼𑀘𑀺𑀢𑀁 𑀲𑀸𑀫𑀺𑀓𑀁 𑀕𑀡𑁆𑀳𑀸’’𑀢𑀺 𑀆𑀳𑀁𑀲𑀼. 𑀲𑀸 𑀑𑀮𑁄𑀓𑁂𑀦𑁆𑀢𑀻 𑀲𑀓𑁆𑀓𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑁂𑀧𑀺 𑀲𑀺𑀦𑁂𑀳𑀯𑀲𑁂𑀦 𑀉𑀧𑁆𑀧𑀦𑁆𑀦𑀧𑁂𑀫𑁂𑀦 𑀫𑀳𑁄𑀖𑁂𑀦 𑀯𑀺𑀬 𑀅𑀚𑁆𑀛𑁄𑀢𑁆𑀣𑀝𑀳𑀤𑀬𑀸 𑀳𑀼𑀢𑁆𑀯𑀸 ‘‘𑀅𑀬𑀁 𑀫𑁂 𑀲𑀸𑀫𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀧𑀼𑀧𑁆𑀨𑀤𑀸𑀫𑀁 𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀅𑀲𑀼𑀭𑀸 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀁 𑀅𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀮𑀪𑀢𑀺, 𑀅𑀬𑀫𑁂𑀯𑀲𑁆𑀲𑀸 𑀥𑀻𑀢𑀼 𑀧𑀺𑀢𑀸𑀫𑀳𑀢𑁄 𑀫𑀳𑀮𑁆𑀮𑀓𑁄 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀮𑀚𑁆𑀚𑀫𑀸𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀢𑀁 𑀤𑁂𑀯𑀦𑀕𑀭𑀁 𑀆𑀦𑁂𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀸𑀦𑀁 𑀦𑀸𑀝𑀺𑀓𑀸𑀓𑁄𑀝𑀻𑀦𑀁 𑀚𑁂𑀝𑁆𑀞𑀺𑀓𑀁 𑀓𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀤𑁂𑀯𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀦𑁆𑀢𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀁 𑀦 𑀓𑀭𑀺𑀁𑀲𑀼, 𑀢𑁆𑀯𑀁 𑀦𑀸𑀫 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑀭𑀺𑀲𑁆𑀲𑀸𑀯𑀺𑀢𑀁 𑀲𑀧𑀸𑀡𑀓𑀁 𑀉𑀤𑀓𑀁 𑀧𑀺𑀯𑀺𑀲𑁆𑀲𑀲𑀻’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀕𑀭𑀳𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀮𑀺𑀲𑀗𑁆𑀕𑀸𑀳𑀓𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀮𑀸𑀯𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁨] 𑁨. 𑀦𑀘𑁆𑀘𑀚𑀸𑀢𑀓𑀯𑀡𑁆𑀡𑀦𑀸

𑀭𑀼𑀤𑀁 𑀫𑀦𑀼𑀜𑁆𑀜𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀩𑀳𑀼𑀪𑀡𑁆𑀟𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀤𑁂𑀯𑀥𑀫𑁆𑀫𑀚𑀸𑀢𑀓𑁂 (𑀚𑀸. 𑁧.𑁧.𑁬) 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁𑀓𑀸𑀭𑀡𑀸 𑀢𑁆𑀯𑀁 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄 𑀚𑀸𑀢𑁄𑀲𑀻’’𑀢𑀺? 𑀲𑁄 𑀏𑀢𑁆𑀢𑀓𑀁 𑀲𑀼𑀢𑁆𑀯𑀸𑀯 𑀓𑀼𑀤𑁆𑀥𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀙𑀟𑁆𑀟𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀤𑀸𑀦𑀺 𑀦𑀻𑀳𑀸𑀭𑁂𑀦 𑀯𑀺𑀘𑀭𑀸𑀫𑀻’’𑀢𑀺 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀕𑁆𑀕𑁄 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 ‘‘𑀥𑀻 𑀥𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 ‘‘𑀲𑀢𑁆𑀣𑀼 𑀦𑀸𑀫 𑀧𑀼𑀭𑀢𑁄 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀕𑀼𑀡𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺. 𑀪𑀦𑁆𑀢𑁂, ‘‘𑀲𑁄 𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀧𑀼𑀭𑀢𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀦𑀕𑁆𑀕𑁄 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀚𑀺𑀕𑀼𑀘𑁆𑀙𑀺𑀬𑀫𑀸𑀦𑁄 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀲𑀸𑀲𑀦𑀸 𑀧𑀭𑀺𑀳𑀻𑀦𑁄’’𑀢𑀺 𑀢𑀲𑁆𑀲 𑀅𑀕𑀼𑀡𑀓𑀣𑀸𑀬 𑀦𑀺𑀲𑀺𑀦𑁆𑀦𑀸𑀫𑁆𑀳𑀸𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀪𑀺𑀓𑁆𑀔𑀼 𑀳𑀺𑀭𑁄𑀢𑁆𑀢𑀧𑁆𑀧𑀸𑀪𑀸𑀯𑁂𑀦 𑀭𑀢𑀦𑀲𑀸𑀲𑀦𑀸 𑀧𑀭𑀺𑀳𑀻𑀦𑁄, 𑀧𑀼𑀩𑁆𑀩𑁂 𑀇𑀢𑁆𑀣𑀺𑀭𑀢𑀦𑀧𑀝𑀺𑀮𑀸𑀪𑀢𑁄𑀧𑀺 𑀧𑀭𑀺𑀳𑀻𑀦𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀧𑀞𑀫𑀓𑀧𑁆𑀧𑁂 𑀘𑀢𑀼𑀧𑁆𑀧𑀤𑀸 𑀲𑀻𑀳𑀁 𑀭𑀸𑀚𑀸𑀦𑀁 𑀅𑀓𑀁𑀲𑀼, 𑀫𑀘𑁆𑀙𑀸 𑀆𑀦𑀦𑁆𑀤𑀫𑀘𑁆𑀙𑀁, 𑀲𑀓𑀼𑀡𑀸 𑀲𑀼𑀯𑀡𑁆𑀡𑀳𑀁𑀲𑀁. 𑀢𑀲𑁆𑀲 𑀧𑀦 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀲𑁆𑀲 𑀥𑀻𑀢𑀸 𑀳𑀁𑀲𑀧𑁄𑀢𑀺𑀓𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀯𑀭𑀁 𑀅𑀤𑀸𑀲𑀺, 𑀲𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀢𑀁 𑀲𑀸𑀫𑀺𑀓𑀁 𑀯𑀸𑀭𑁂𑀲𑀺. 𑀳𑀁𑀲𑀭𑀸𑀚𑀸 𑀢𑀲𑁆𑀲𑀸 𑀯𑀭𑀁 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀲𑀩𑁆𑀩𑁂 𑀲𑀓𑀼𑀡𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑀺, 𑀦𑀸𑀦𑀧𑁆𑀧𑀓𑀸𑀭𑀸 𑀳𑀁𑀲𑀫𑁄𑀭𑀸𑀤𑀬𑁄 𑀲𑀓𑀼𑀡𑀕𑀡𑀸 𑀲𑀫𑀸𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀳𑀦𑁆𑀢𑁂 𑀧𑀸𑀲𑀸𑀡𑀢𑀮𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀳𑀁𑀲𑀭𑀸𑀚𑀸 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀢𑀁 𑀲𑀸𑀫𑀺𑀓𑀁 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀽’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑀸 𑀲𑀓𑀼𑀡𑀲𑀗𑁆𑀖𑀁 𑀑𑀮𑁄𑀓𑁂𑀦𑁆𑀢𑀻 𑀫𑀡𑀺𑀯𑀡𑁆𑀡𑀕𑀻𑀯𑀁 𑀘𑀺𑀢𑁆𑀭𑀧𑁂𑀔𑀼𑀡𑀁 𑀫𑁄𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀲𑀸𑀫𑀺𑀓𑁄 𑀳𑁄𑀢𑀽’’𑀢𑀺 𑀆𑀭𑁄𑀘𑁂𑀲𑀺. 𑀲𑀓𑀼𑀡𑀲𑀗𑁆𑀖𑀸 𑀫𑁄𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 ‘‘𑀲𑀫𑁆𑀫 𑀫𑁄𑀭, 𑀅𑀬𑀁 𑀭𑀸𑀚𑀥𑀻𑀢𑀸 𑀏𑀢𑁆𑀢𑀓𑀸𑀦𑀁 𑀲𑀓𑀼𑀡𑀸𑀦𑀁 𑀫𑀚𑁆𑀛𑁂 𑀲𑀸𑀫𑀺𑀓𑀁 𑀭𑁄𑀘𑁂𑀦𑁆𑀢𑀻 𑀢𑀬𑀺 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺. 𑀫𑁄𑀭𑁄 ‘‘𑀅𑀚𑁆𑀚𑀸𑀧𑀺 𑀢𑀸𑀯 𑀫𑁂 𑀩𑀮𑀁 𑀦 𑀧𑀲𑁆𑀲𑀢𑀻’’𑀢𑀺 𑀅𑀢𑀺𑀢𑀼𑀝𑁆𑀞𑀺𑀬𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀸𑀯 𑀫𑀳𑀢𑁄 𑀲𑀓𑀼𑀡𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀦𑀘𑁆𑀘𑀺𑀢𑀼𑀁 𑀆𑀭𑀪𑀺, 𑀦𑀘𑁆𑀘𑀦𑁆𑀢𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀅𑀳𑁄𑀲𑀺.

𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀸 𑀮𑀚𑁆𑀚𑀺𑀢𑁄 ‘‘𑀇𑀫𑀲𑁆𑀲 𑀦𑁂𑀯 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀅𑀢𑁆𑀣𑀺, 𑀦 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁, 𑀦𑀸𑀲𑁆𑀲 𑀪𑀺𑀦𑁆𑀦𑀳𑀺𑀭𑁄𑀢𑁆𑀢𑀧𑁆𑀧𑀲𑁆𑀲 𑀫𑀫 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀓𑀼𑀡𑀲𑀗𑁆𑀖𑀫𑀚𑁆𑀛𑁂 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨. ‘‘𑀭𑀼𑀤𑀁 𑀫𑀦𑀼𑀜𑁆𑀜𑀁 𑀭𑀼𑀘𑀺𑀭𑀸 𑀘 𑀧𑀺𑀝𑁆𑀞𑀺, 𑀯𑁂𑀴𑀼𑀭𑀺𑀬𑀯𑀡𑁆𑀡𑀽𑀧𑀦𑀺𑀪𑀸 𑀘 𑀕𑀻𑀯𑀸;

𑀩𑁆𑀬𑀸𑀫𑀫𑀢𑁆𑀢𑀸𑀦𑀺 𑀘 𑀧𑁂𑀔𑀼𑀡𑀸𑀦𑀺, 𑀦𑀘𑁆𑀘𑁂𑀦 𑀢𑁂 𑀥𑀻𑀢𑀭𑀁 𑀦𑁄 𑀤𑀤𑀸𑀫𑀻’’𑀢𑀺.

𑀢𑀢𑁆𑀣 𑀭𑀼𑀤𑀁 𑀫𑀦𑀼𑀜𑁆𑀜𑀦𑁆𑀢𑀺 𑀢-𑀓𑀸𑀭𑀲𑁆𑀲 𑀤-𑀓𑀸𑀭𑁄 𑀓𑀢𑁄, 𑀭𑀼𑀢𑀁 𑀫𑀦𑀸𑀧𑀁, 𑀯𑀲𑁆𑀲𑀺𑀢𑀲𑀤𑁆𑀤𑁄 𑀫𑀥𑀼𑀭𑁄𑀢𑀺 𑀅𑀢𑁆𑀣𑁄. 𑀭𑀼𑀘𑀺𑀭𑀸 𑀘 𑀧𑀺𑀝𑁆𑀞𑀻𑀢𑀺 𑀧𑀺𑀝𑁆𑀞𑀺𑀧𑀺 𑀢𑁂 𑀘𑀺𑀢𑁆𑀭𑀸 𑀘𑁂𑀯 𑀲𑁄𑀪𑀦𑀸 𑀘. 𑀯𑁂𑀴𑀼𑀭𑀺𑀬𑀯𑀡𑁆𑀡𑀽𑀧𑀦𑀺𑀪𑀸𑀢𑀺 𑀯𑁂𑀴𑀼𑀭𑀺𑀬𑀫𑀡𑀺𑀯𑀡𑁆𑀡𑀲𑀤𑀺𑀲𑀸. 𑀩𑁆𑀬𑀸𑀫𑀫𑀢𑁆𑀢𑀸𑀦𑀻𑀢𑀺 𑀏𑀓𑀩𑁆𑀬𑀸𑀫𑀧𑁆𑀧𑀫𑀸𑀡𑀸𑀦𑀺. 𑀧𑁂𑀔𑀼𑀡𑀸𑀦𑀻𑀢𑀺 𑀧𑀺𑀜𑁆𑀙𑀸𑀦𑀺. 𑀦𑀘𑁆𑀘𑁂𑀦 𑀢𑁂 𑀥𑀻𑀢𑀭𑀁 𑀦𑁄 𑀤𑀤𑀸𑀫𑀻𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀘𑁆𑀘𑀺𑀢𑀪𑀸𑀯𑁂𑀦𑁂𑀯 𑀢𑁂 𑀏𑀯𑀭𑀽𑀧𑀲𑁆𑀲 𑀦𑀺𑀮𑁆𑀮𑀚𑁆𑀚𑀲𑁆𑀲 𑀥𑀻𑀢𑀭𑀁 𑀦𑁄 𑀤𑀤𑀸𑀫𑀻𑀢𑀺 𑀯𑀢𑁆𑀯𑀸 𑀳𑀁𑀲𑀭𑀸𑀚𑀸 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀲𑀫𑀚𑁆𑀛𑁂 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀳𑀁𑀲𑀧𑁄𑀢𑀓𑀲𑁆𑀲 𑀥𑀻𑀢𑀭𑀁 𑀅𑀤𑀸𑀲𑀺. 𑀫𑁄𑀭𑁄 𑀳𑀁𑀲𑀧𑁄𑀢𑀺𑀓𑀁 𑀅𑀮𑀪𑀺𑀢𑁆𑀯𑀸 𑀮𑀚𑁆𑀚𑀺𑀢𑁆𑀯𑀸 𑀢𑀢𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀧𑀮𑀸𑀬𑀺. 𑀳𑀁𑀲𑀭𑀸𑀚𑀸𑀧𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀏𑀲 𑀳𑀺𑀭𑁄𑀢𑁆𑀢𑀧𑁆𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀢𑀦𑀲𑀸𑀲𑀦𑀸 𑀧𑀭𑀺𑀳𑀻𑀦𑁄, 𑀧𑀼𑀩𑁆𑀩𑁂𑀧𑀺 𑀇𑀢𑁆𑀣𑀺𑀭𑀢𑀦𑀧𑀝𑀺𑀮𑀸𑀪𑀢𑁄 𑀧𑀭𑀺𑀳𑀻𑀦𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑁄𑀭𑁄 𑀩𑀳𑀼𑀪𑀡𑁆𑀟𑀺𑀓𑁄 𑀅𑀳𑁄𑀲𑀺, 𑀳𑀁𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀘𑁆𑀘𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁩] 𑁩. 𑀲𑀫𑁆𑀫𑁄𑀤𑀫𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀲𑀫𑁆𑀫𑁄𑀤𑀫𑀸𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀧𑀺𑀮𑀯𑀢𑁆𑀣𑀼𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀘𑀼𑀫𑁆𑀩𑀝𑀓𑀓𑀮𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀜𑀸𑀢𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚𑀸 𑀜𑀸𑀢𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀕𑁆𑀕𑀳𑁄 𑀦𑀸𑀫 𑀦 𑀬𑀼𑀢𑁆𑀢𑁄, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀳𑀺 𑀧𑀼𑀩𑁆𑀩𑁂 𑀲𑀫𑀕𑁆𑀕𑀓𑀸𑀮𑁂 𑀧𑀘𑁆𑀘𑀸𑀫𑀺𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀲𑁄𑀢𑁆𑀣𑀺𑀁 𑀧𑀢𑁆𑀢𑀸 𑀬𑀤𑀸 𑀯𑀺𑀯𑀸𑀤𑀫𑀸𑀧𑀦𑁆𑀦𑀸, 𑀢𑀤𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀜𑀸𑀢𑀺𑀭𑀸𑀚𑀓𑀼𑀮𑁂𑀳𑀺 𑀆𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀯𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁂𑀓𑀯𑀝𑁆𑀝𑀓𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀢𑀤𑀸 𑀏𑀓𑁄 𑀯𑀝𑁆𑀝𑀓𑀮𑀼𑀤𑁆𑀤𑀓𑁄 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀝𑁆𑀝𑀓𑀯𑀲𑁆𑀲𑀺𑀢𑀁 𑀓𑀢𑁆𑀯𑀸 𑀢𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀚𑀸𑀮𑀁 𑀔𑀺𑀧𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑁂𑀲𑀼 𑀫𑀤𑁆𑀤𑀦𑁆𑀢𑁄 𑀲𑀩𑁆𑀩𑁂 𑀏𑀓𑀢𑁄 𑀓𑀢𑁆𑀯𑀸 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀢𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀢𑁂𑀦 𑀫𑀽𑀮𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀯𑀝𑁆𑀝𑀓𑁂 𑀆𑀳 𑁋 ‘‘𑀅𑀬𑀁 𑀲𑀸𑀓𑀼𑀡𑀺𑀓𑁄 𑀅𑀫𑁆𑀳𑀸𑀓𑀁 𑀜𑀸𑀢𑀓𑁂 𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀅𑀳𑀁 𑀏𑀓𑀁 𑀉𑀧𑀸𑀬𑀁 𑀚𑀸𑀦𑀸𑀫𑀺, 𑀏𑀦𑁂𑀲 𑀅𑀫𑁆𑀳𑁂 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀏𑀢𑁂𑀦 𑀢𑀼𑀫𑁆𑀳𑀸𑀓𑀁 𑀉𑀧𑀭𑀺 𑀚𑀸𑀮𑁂 𑀔𑀺𑀢𑁆𑀢𑀫𑀢𑁆𑀢𑁂 𑀏𑀓𑁂𑀓𑁄 𑀏𑀓𑁂𑀓𑀲𑁆𑀫𑀺𑀁 𑀚𑀸𑀮𑀓𑁆𑀔𑀺𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀚𑀸𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀡𑁆𑀝𑀓𑀕𑀼𑀫𑁆𑀩𑁂 𑀧𑀓𑁆𑀔𑀺𑀧𑀣, 𑀏𑀯𑀁 𑀲𑀦𑁆𑀢𑁂 𑀳𑁂𑀝𑁆𑀞𑀸 𑀢𑁂𑀦 𑀢𑁂𑀦 𑀞𑀸𑀦𑁂𑀦 𑀧𑀮𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀁𑀲𑀼. 𑀤𑀼𑀢𑀺𑀬𑀤𑀺𑀯𑀲𑁂 𑀉𑀧𑀭𑀺 𑀚𑀸𑀮𑁂 𑀔𑀺𑀢𑁆𑀢𑁂 𑀢𑁂 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀸𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀡𑁆𑀝𑀓𑀕𑀼𑀫𑁆𑀩𑁂 𑀔𑀺𑀧𑀺𑀢𑁆𑀯𑀸 𑀲𑀬𑀁 𑀳𑁂𑀝𑁆𑀞𑀸𑀪𑀸𑀕𑁂𑀦 𑀢𑀢𑁄 𑀢𑀢𑁄 𑀧𑀮𑀸𑀬𑀺𑀁𑀲𑀼. 𑀲𑀸𑀓𑀼𑀡𑀺𑀓𑀲𑁆𑀲 𑀕𑀼𑀫𑁆𑀩𑀢𑁄 𑀚𑀸𑀮𑀁 𑀫𑁄𑀘𑁂𑀦𑁆𑀢𑀲𑁆𑀲𑁂𑀯 𑀯𑀺𑀓𑀸𑀮𑁄 𑀚𑀸𑀢𑁄, 𑀲𑁄 𑀢𑀼𑀘𑁆𑀙𑀳𑀢𑁆𑀣𑁄𑀯 𑀅𑀕𑀫𑀸𑀲𑀺.

𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀧𑀺 𑀯𑀝𑁆𑀝𑀓𑀸 𑀢𑀣𑁂𑀯 𑀓𑀭𑁄𑀦𑁆𑀢𑀺. 𑀲𑁄𑀧𑀺 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀚𑀸𑀮𑀫𑁂𑀯 𑀫𑁄𑀘𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀢𑀼𑀘𑁆𑀙𑀳𑀢𑁆𑀣𑁄𑀯 𑀕𑁂𑀳𑀁 𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑁆𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀼𑀘𑁆𑀙𑀳𑀢𑁆𑀣𑁄 𑀆𑀕𑀘𑁆𑀙𑀲𑀺, 𑀅𑀜𑁆𑀜𑀫𑁆𑀧𑀺 𑀢𑁂 𑀩𑀳𑀺 𑀧𑁄𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺 𑀆𑀳. 𑀲𑀸𑀓𑀼𑀡𑀺𑀓𑁄 ‘‘𑀪𑀤𑁆𑀤𑁂, 𑀫𑀫 𑀅𑀜𑁆𑀜𑀁 𑀧𑁄𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀅𑀧𑀺𑀘 𑀔𑁄 𑀧𑀦 𑀢𑁂 𑀯𑀝𑁆𑀝𑀓𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺, 𑀫𑀬𑀸 𑀔𑀺𑀢𑁆𑀢𑀫𑀢𑁆𑀢𑁂 𑀚𑀸𑀮𑀁 𑀆𑀤𑀸𑀬 𑀓𑀡𑁆𑀝𑀓𑀕𑀼𑀫𑁆𑀩𑁂 𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀦 𑀔𑁄 𑀧𑀦𑁂𑀢𑁂 𑀲𑀩𑁆𑀩𑀓𑀸𑀮𑀫𑁂𑀯 𑀲𑀫𑁆𑀫𑁄𑀤𑀫𑀸𑀦𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀺, 𑀬𑀤𑀸 𑀢𑁂 𑀯𑀺𑀯𑀸𑀤𑀫𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀢𑁂 𑀲𑀩𑁆𑀩𑁂𑀯 𑀆𑀤𑀸𑀬 𑀢𑀯 𑀫𑀼𑀔𑀁 𑀳𑀸𑀲𑀬𑀫𑀸𑀦𑁄 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀪𑀭𑀺𑀬𑀸𑀬 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁩. ‘‘𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲’’𑀦𑁆𑀢𑀺.

𑀢𑀢𑁆𑀣 𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀯𑀝𑁆𑀝𑀓𑀸 𑀦𑀸𑀦𑀸𑀮𑀤𑁆𑀥𑀺𑀓𑀸 𑀦𑀸𑀦𑀸𑀕𑀸𑀳𑀸 𑀳𑀼𑀢𑁆𑀯𑀸 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀓𑀮𑀳𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑁂𑀧𑀺 𑀢𑁂 𑀫𑀫 𑀯𑀲𑀁 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀅𑀣𑀸𑀳𑀁 𑀢𑁂 𑀕𑀳𑁂𑀢𑁆𑀯𑀸 𑀢𑀯 𑀫𑀼𑀔𑀁 𑀳𑀸𑀲𑁂𑀦𑁆𑀢𑁄 𑀆𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀭𑀺𑀬𑀁 𑀲𑀫𑀲𑁆𑀲𑀸𑀲𑁂𑀲𑀺.

𑀓𑀢𑀺𑀧𑀸𑀳𑀲𑁆𑀲𑁂𑀯 𑀧𑀦 𑀅𑀘𑁆𑀘𑀬𑁂𑀦 𑀏𑀓𑁄 𑀯𑀝𑁆𑀝𑀓𑁄 𑀕𑁄𑀘𑀭𑀪𑀽𑀫𑀺𑀁 𑀑𑀢𑀭𑀦𑁆𑀢𑁄 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀲𑀻𑀲𑀁 𑀅𑀓𑁆𑀓𑀫𑀺, 𑀇𑀢𑀭𑁄 ‘‘𑀓𑁄 𑀫𑀁 𑀲𑀻𑀲𑁂 𑀅𑀓𑁆𑀓𑀫𑀻’’𑀢𑀺 𑀓𑀼𑀚𑁆𑀛𑀺𑀁. ‘‘𑀅𑀳𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀓𑁆𑀓𑀫𑀺𑀁, 𑀫𑀸 𑀓𑀼𑀚𑁆𑀛𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀓𑀼𑀚𑁆𑀛𑀺𑀬𑁂𑀯. 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀸 ‘‘𑀢𑁆𑀯𑀫𑁂𑀯 𑀫𑀜𑁆𑀜𑁂 𑀚𑀸𑀮𑀁 𑀉𑀓𑁆𑀔𑀺𑀧𑀲𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀯𑀺𑀯𑀤𑀦𑁆𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀯𑀺𑀯𑀸𑀤𑀓𑁂 𑀲𑁄𑀢𑁆𑀣𑀺𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀇𑀤𑀸𑀦𑁂𑀯 𑀢𑁂 𑀚𑀸𑀮𑀁 𑀦 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀫𑀳𑀦𑁆𑀢𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀲𑀸𑀓𑀼𑀡𑀺𑀓𑁄 𑀑𑀓𑀸𑀲𑀁 𑀮𑀪𑀺𑀲𑁆𑀲𑀢𑀺, 𑀫𑀬𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀲𑀓𑁆𑀓𑀸 𑀯𑀲𑀺𑀢𑀼’’𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀅𑀜𑁆𑀜𑀢𑁆𑀣 𑀕𑀢𑁄. 𑀲𑀸𑀓𑀼𑀡𑀺𑀓𑁄𑀧𑀺 𑀔𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀯𑀝𑁆𑀝𑀓𑀯𑀲𑁆𑀲𑀺𑀢𑀁 𑀯𑀲𑁆𑀲𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀉𑀧𑀭𑀺 𑀚𑀸𑀮𑀁 𑀔𑀺𑀧𑀺. 𑀅𑀣𑁂𑀓𑁄 𑀯𑀝𑁆𑀝𑀓𑁄 ‘‘𑀢𑀼𑀬𑁆𑀳𑀁 𑀓𑀺𑀭 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀮𑁄𑀫𑀸𑀦𑀺 𑀧𑀢𑀺𑀢𑀸𑀦𑀺, 𑀇𑀤𑀸𑀦𑀺 𑀉𑀓𑁆𑀔𑀺𑀧𑀸’’𑀢𑀺 𑀆𑀳. 𑀅𑀧𑀭𑁄 ‘‘𑀢𑀼𑀬𑁆𑀳𑀁 𑀓𑀺𑀭 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲𑁂𑀯 𑀤𑁆𑀯𑀻𑀲𑀼 𑀧𑀓𑁆𑀔𑁂𑀲𑀼 𑀧𑀢𑁆𑀢𑀸𑀦𑀺 𑀧𑀢𑀺𑀢𑀸𑀦𑀺, 𑀇𑀤𑀸𑀦𑀺 𑀉𑀓𑁆𑀔𑀺𑀧𑀸’’𑀢𑀺 𑀆𑀳. 𑀇𑀢𑀺 𑀢𑁂𑀲𑀁 ‘‘𑀢𑁆𑀯𑀁 𑀉𑀓𑁆𑀔𑀺𑀧, 𑀢𑁆𑀯𑀁 𑀉𑀓𑁆𑀔𑀺𑀧𑀸’’𑀢𑀺 𑀯𑀤𑀦𑁆𑀢𑀸𑀦𑀜𑁆𑀜𑁂𑀯 𑀲𑀸𑀓𑀼𑀡𑀺𑀓𑁄 𑀚𑀸𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑁂𑀯 𑀢𑁂 𑀏𑀓𑀢𑁄 𑀓𑀢𑁆𑀯𑀸 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀪𑀭𑀺𑀬𑀁 𑀳𑀸𑀲𑀬𑀫𑀸𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 ‘‘𑀏𑀯𑀁 𑀫𑀳𑀸𑀭𑀸𑀚𑀸 𑀜𑀸𑀢𑀓𑀸𑀦𑀁 𑀓𑀮𑀳𑁄 𑀦𑀸𑀫 𑀦 𑀬𑀼𑀢𑁆𑀢𑁄, 𑀓𑀮𑀳𑁄 𑀯𑀺𑀦𑀸𑀲𑀫𑀽𑀮𑀫𑁂𑀯 𑀳𑁄𑀢𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀧𑀡𑁆𑀟𑀺𑀢𑀯𑀝𑁆𑀝𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀯𑀝𑁆𑀝𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑁆𑀫𑁄𑀤𑀫𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁪] 𑁪. 𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸

𑀦 𑀫𑀁 𑀲𑀻𑀢𑀁 𑀦 𑀫𑀁 𑀉𑀡𑁆𑀳𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. ‘‘𑀓𑁂𑀦𑀸𑀲𑀺 𑀉𑀓𑁆𑀓𑀡𑁆𑀞𑀸𑀧𑀺𑀢𑁄’’𑀢𑀺? ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀫𑁂, 𑀪𑀦𑁆𑀢𑁂 𑀫𑀥𑀼𑀭𑀳𑀢𑁆𑀣𑀭𑀲𑀸, 𑀢𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀏𑀲𑀸 𑀇𑀢𑁆𑀣𑀻 𑀢𑀯 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀫𑀭𑀡𑀁 𑀧𑀸𑀧𑀼𑀡𑀦𑁆𑀢𑁄 𑀫𑀁 𑀆𑀕𑀫𑁆𑀫 𑀫𑀭𑀡𑀸 𑀫𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀢𑀤𑀸 𑀓𑁂𑀯𑀝𑁆𑀝𑀸 𑀦𑀤𑀺𑀬𑀁 𑀚𑀸𑀮𑀁 𑀔𑀺𑀧𑀺𑀁𑀲𑀼. 𑀅𑀣𑁂𑀓𑁄 𑀫𑀳𑀸𑀫𑀘𑁆𑀙𑁄 𑀭𑀢𑀺𑀯𑀲𑁂𑀦 𑀅𑀢𑁆𑀢𑀦𑁄 𑀫𑀘𑁆𑀙𑀺𑀬𑀸 𑀲𑀤𑁆𑀥𑀺𑀁 𑀓𑀻𑀴𑀫𑀸𑀦𑁄 𑀆𑀕𑀘𑁆𑀙𑀢𑀺. 𑀢𑀲𑁆𑀲 𑀲𑀸 𑀫𑀘𑁆𑀙𑀻 𑀧𑀼𑀭𑀢𑁄 𑀕𑀘𑁆𑀙𑀫𑀸𑀦𑀸 𑀚𑀸𑀮𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀚𑀸𑀮𑀁 𑀧𑀭𑀺𑀳𑀭𑀫𑀸𑀦𑀸 𑀕𑀢𑀸. 𑀲𑁄 𑀧𑀦 𑀓𑀸𑀫𑀕𑀺𑀤𑁆𑀥𑁄 𑀮𑁄𑀮𑀫𑀘𑁆𑀙𑁄 𑀚𑀸𑀮𑀓𑀼𑀘𑁆𑀙𑀺𑀫𑁂𑀯 𑀧𑀯𑀺𑀝𑁆𑀞𑁄. 𑀓𑁂𑀯𑀝𑁆𑀝𑀸 𑀢𑀲𑁆𑀲 𑀚𑀸𑀮𑀁 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀚𑀸𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀘𑁆𑀙𑀁 𑀕𑀳𑁂𑀢𑁆𑀯𑀸 𑀅𑀫𑀸𑀭𑁂𑀢𑁆𑀯𑀸𑀯 𑀯𑀸𑀮𑀺𑀓𑀸𑀧𑀺𑀝𑁆𑀞𑁂 𑀔𑀺𑀧𑀺𑀢𑁆𑀯𑀸 ‘‘𑀇𑀫𑀁 𑀅𑀗𑁆𑀕𑀸𑀭𑁂𑀲𑀼 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀅𑀗𑁆𑀕𑀸𑀭𑁂 𑀓𑀭𑁄𑀦𑁆𑀢𑀺, 𑀲𑀽𑀮𑀁 𑀢𑀘𑁆𑀙𑁂𑀦𑁆𑀢𑀺. 𑀫𑀘𑁆𑀙𑁄 ‘‘𑀏𑀢𑀁 𑀅𑀗𑁆𑀕𑀸𑀭𑀢𑀸𑀧𑀦𑀁 𑀯𑀸 𑀲𑀽𑀮𑀯𑀺𑀚𑁆𑀛𑀦𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀤𑀼𑀓𑁆𑀔𑀁 𑀦 𑀫𑀁 𑀓𑀺𑀮𑀫𑁂𑀢𑀺, 𑀬𑀁 𑀧𑀦𑁂𑀲𑀸 𑀫𑀘𑁆𑀙𑀻 ‘𑀅𑀜𑁆𑀜𑀁 𑀲𑁄 𑀦𑀽𑀦 𑀭𑀢𑀺𑀬𑀸 𑀕𑀢𑁄’𑀢𑀺 𑀫𑀬𑀺 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀢𑀺, 𑀢𑀫𑁂𑀯 𑀫𑀁 𑀩𑀸𑀥𑀢𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁪. ‘‘𑀦 𑀫𑀁 𑀲𑀻𑀢𑀁 𑀦 𑀫𑀁 𑀉𑀡𑁆𑀳𑀁, 𑀦 𑀫𑀁 𑀚𑀸𑀮𑀲𑁆𑀫𑀺 𑀩𑀸𑀥𑀦𑀁;

𑀬𑀜𑁆𑀘 𑀫𑀁 𑀫𑀜𑁆𑀜𑀢𑁂 𑀫𑀘𑁆𑀙𑀻, 𑀅𑀜𑁆𑀜𑀁 𑀲𑁄 𑀭𑀢𑀺𑀬𑀸 𑀕𑀢𑁄’’𑀢𑀺.

𑀢𑀢𑁆𑀣 𑀦 𑀫𑀁 𑀲𑀻𑀢𑀁 𑀦 𑀫𑀁 𑀉𑀡𑁆𑀳𑀦𑁆𑀢𑀺 𑀫𑀘𑁆𑀙𑀸𑀦𑀁 𑀉𑀤𑀓𑀸 𑀦𑀻𑀳𑀝𑀓𑀸𑀮𑁂 𑀲𑀻𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀺𑀕𑀢𑁂 𑀉𑀡𑁆𑀳𑀁 𑀳𑁄𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀦 𑀫𑀁 𑀲𑀻𑀢𑀁 𑀦 𑀫𑀁 𑀉𑀡𑁆𑀳𑀁 𑀩𑀸𑀥𑀢𑀻’’𑀢𑀺 𑀧𑀭𑀺𑀤𑁂𑀯𑀢𑀺. 𑀬𑀫𑁆𑀧𑀺 𑀅𑀗𑁆𑀕𑀸𑀭𑁂𑀲𑀼 𑀧𑀘𑁆𑀘𑀦𑀫𑀽𑀮𑀓𑀁 𑀤𑀼𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀦 𑀫𑀁 𑀉𑀡𑁆𑀳’’𑀦𑁆𑀢𑀺 𑀧𑀭𑀺𑀤𑁂𑀯𑀢𑁂𑀯. 𑀦 𑀫𑀁 𑀚𑀸𑀮𑀲𑁆𑀫𑀺 𑀩𑀸𑀥𑀦𑀦𑁆𑀢𑀺 𑀬𑀫𑁆𑀧𑀺 𑀫𑁂 𑀚𑀸𑀮𑀲𑁆𑀫𑀺𑀁 𑀩𑀸𑀥𑀦𑀁 𑀅𑀳𑁄𑀲𑀺, 𑀢𑀫𑁆𑀧𑀺 𑀫𑀁 𑀦 𑀩𑀸𑀥𑁂𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. ‘‘𑀬𑀜𑁆𑀘 𑀫’’𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀲𑀸 𑀫𑀘𑁆𑀙𑀻 𑀫𑀫 𑀚𑀸𑀮𑁂 𑀧𑀢𑀺𑀢𑀲𑁆𑀲 𑀇𑀫𑁂𑀳𑀺 𑀓𑁂𑀯𑀝𑁆𑀝𑁂𑀳𑀺 𑀕𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀻 𑀫𑀁 𑀅𑀧𑀲𑁆𑀲𑀫𑀸𑀦𑀸 ‘‘𑀲𑁄 𑀫𑀘𑁆𑀙𑁄 𑀇𑀤𑀸𑀦𑀺 𑀅𑀜𑁆𑀜𑀁 𑀫𑀘𑁆𑀙𑀺𑀁 𑀓𑀸𑀫𑀭𑀢𑀺𑀬𑀸 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑀺, 𑀢𑀁 𑀢𑀲𑁆𑀲𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸𑀬 𑀘𑀺𑀦𑁆𑀢𑀦𑀁 𑀫𑀁 𑀩𑀸𑀥𑀢𑀻𑀢𑀺 𑀯𑀸𑀮𑀺𑀓𑀸𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑁄 𑀧𑀭𑀺𑀤𑁂𑀯𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀧𑀼𑀭𑁄𑀳𑀺𑀢𑁄 𑀤𑀸𑀲𑀧𑀭𑀺𑀯𑀼𑀢𑁄 𑀦𑁆𑀳𑀸𑀦𑀢𑁆𑀣𑀸𑀬 𑀦𑀤𑀻𑀢𑀻𑀭𑀁 𑀆𑀕𑀢𑁄. 𑀲𑁄 𑀧𑀦 𑀲𑀩𑁆𑀩𑀭𑀼𑀢𑀜𑁆𑀜𑀽 𑀳𑁄𑀢𑀺. 𑀢𑁂𑀦𑀲𑁆𑀲 𑀫𑀘𑁆𑀙𑀧𑀭𑀺𑀤𑁂𑀯𑀦𑀁 𑀲𑀼𑀢𑁆𑀯𑀸 𑀏𑀢𑀤𑀳𑁄𑀲𑀺 ‘‘𑀅𑀬𑀁 𑀫𑀘𑁆𑀙𑁄 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀤𑁂𑀯𑀢𑀺, 𑀏𑀯𑀁 𑀆𑀢𑀼𑀭𑀘𑀺𑀢𑁆𑀢𑁄 𑀔𑁄 𑀧𑀦𑁂𑀲 𑀫𑀻𑀬𑀫𑀸𑀦𑁄 𑀦𑀺𑀭𑀬𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀅𑀳𑀫𑀲𑁆𑀲 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑁂𑀯𑀝𑁆𑀝𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀪𑁄 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀏𑀓𑀤𑀺𑀯𑀲𑀫𑁆𑀧𑀺 𑀩𑁆𑀬𑀜𑁆𑀚𑀦𑀢𑁆𑀣𑀸𑀬 𑀫𑀘𑁆𑀙𑀁 𑀦 𑀤𑁂𑀣𑀸’’𑀢𑀺 𑀆𑀳. 𑀓𑁂𑀯𑀝𑁆𑀝𑀸 ‘‘𑀓𑀺𑀁 𑀯𑀤𑁂𑀣, 𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀭𑀼𑀘𑁆𑀘𑀦𑀓𑀫𑀘𑁆𑀙𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳𑀁𑀲𑀼. ‘‘𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀇𑀫𑀜𑁆𑀜𑁂𑀯 𑀤𑁂𑀣𑀸’’𑀢𑀺. ‘‘𑀕𑀡𑁆𑀳𑀣 𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀫𑁆𑀪𑁄 𑀫𑀘𑁆𑀙, 𑀲𑀘𑁂 𑀢𑀸𑀳𑀁 𑀅𑀚𑁆𑀚 𑀦 𑀧𑀲𑁆𑀲𑁂𑀬𑁆𑀬𑀁, 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑁂𑀬𑁆𑀬𑀸𑀲𑀺, 𑀇𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀓𑀺𑀮𑁂𑀲𑀯𑀲𑀺𑀓𑁄 𑀅𑀳𑁄𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀉𑀤𑀓𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀘𑁆𑀙𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀫𑀘𑁆𑀙𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁫] 𑁫. 𑀯𑀝𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀦𑁆𑀢𑀺 𑀧𑀓𑁆𑀔𑀸 𑀅𑀧𑀢𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀤𑀸𑀯𑀕𑁆𑀕𑀺𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀕𑀥𑀕𑀸𑀫𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀼𑀕𑀡𑀧𑀭𑀺𑀯𑀼𑀢𑁄 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀟𑀸𑀳𑁄 𑀉𑀝𑁆𑀞𑀳𑀺, 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀩𑀳𑀽 𑀪𑀺𑀓𑁆𑀔𑀽 𑀤𑀺𑀲𑁆𑀲𑀦𑁆𑀢𑀺, 𑀲𑁄𑀧𑀺 𑀔𑁄 𑀅𑀕𑁆𑀕𑀺 𑀏𑀓𑀥𑀽𑀫𑁄 𑀏𑀓𑀚𑀸𑀮𑁄 𑀳𑀼𑀢𑁆𑀯𑀸 𑀅𑀯𑀢𑁆𑀣𑀭𑀫𑀸𑀦𑁄 𑀆𑀕𑀘𑁆𑀙𑀢𑁂𑀯. 𑀢𑀢𑁆𑀣𑁂𑀓𑁂 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀫𑀭𑀡𑀪𑀬𑀪𑀻𑀢𑀸 ‘‘𑀧𑀝𑀕𑁆𑀕𑀺𑀁 𑀤𑀲𑁆𑀲𑀸𑀫, 𑀢𑁂𑀦 𑀤𑀟𑁆𑀠𑀝𑁆𑀞𑀸𑀦𑀁 𑀇𑀢𑀭𑁄 𑀅𑀕𑁆𑀕𑀺 𑀦 𑀑𑀢𑁆𑀣𑀭𑀺𑀲𑁆𑀲𑀢𑀻’’𑀢𑀺 𑀅𑀭𑀡𑀺𑀲𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑀺. 𑀅𑀧𑀭𑁂 𑀆𑀳𑀁𑀲𑀼 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀓𑀺𑀁 𑀦𑀸𑀫 𑀓𑀭𑁄𑀣, 𑀕𑀕𑀦𑀫𑀚𑁆𑀛𑁂 𑀞𑀺𑀢𑀁 𑀘𑀦𑁆𑀤𑀫𑀡𑁆𑀟𑀮𑀁, 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀉𑀕𑁆𑀕𑀘𑁆𑀙𑀦𑁆𑀢𑀁 𑀲𑀳𑀲𑁆𑀲𑀭𑀁𑀲𑀺𑀧𑀝𑀺𑀫𑀡𑁆𑀟𑀺𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀁, 𑀯𑁂𑀮𑀸𑀬 𑀢𑀻𑀭𑁂 𑀞𑀺𑀢𑀸 𑀲𑀫𑀼𑀤𑁆𑀤𑀁, 𑀲𑀺𑀦𑁂𑀭𑀼𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀲𑀺𑀦𑁂𑀭𑀼𑀁 𑀅𑀧𑀲𑁆𑀲𑀦𑁆𑀢𑀸 𑀯𑀺𑀬 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 ‘𑀧𑀝𑀕𑁆𑀕𑀺𑀁 𑀤𑁂𑀫𑀸’𑀢𑀺 𑀯𑀤𑀣, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀦 𑀚𑀸𑀦𑀸𑀣, 𑀏𑀣 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀕𑀘𑁆𑀙𑀦𑁆𑀢𑀸 𑀲𑀩𑁆𑀩𑁂𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀅𑀝𑁆𑀞𑀸𑀲𑀺. 𑀤𑀸𑀯𑀕𑁆𑀕𑀺 𑀅𑀪𑀺𑀪𑀯𑀦𑁆𑀢𑁄 𑀯𑀺𑀬 𑀯𑀺𑀭𑀯𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀢𑀲𑁆𑀲 𑀧𑀤𑁂𑀲𑀲𑁆𑀲 𑀲𑀫𑀦𑁆𑀢𑀸 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑀝𑁆𑀞𑀸𑀦𑀁 𑀧𑀢𑁆𑀢𑁄 𑀉𑀤𑀓𑁂 𑀑𑀧𑀺𑀮𑀸𑀧𑀺𑀢𑀢𑀺𑀡𑀼𑀓𑁆𑀓𑀸 𑀯𑀺𑀬 𑀦𑀺𑀩𑁆𑀩𑀸𑀬𑀺, 𑀯𑀺𑀦𑀺𑀩𑁆𑀩𑁂𑀥𑀢𑁄 𑀤𑁆𑀯𑀢𑁆𑀢𑀺𑀁𑀲𑀓𑀭𑀻𑀲𑀫𑀢𑁆𑀢𑀝𑁆𑀞𑀸𑀦𑀁 𑀅𑀯𑀢𑁆𑀣𑀭𑀺𑀢𑀼𑀁 𑀦𑀸𑀲𑀓𑁆𑀔𑀺.

𑀪𑀺𑀓𑁆𑀔𑀽 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀆𑀭𑀪𑀺𑀁𑀲𑀼 𑁋 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀕𑀼𑀡𑀸 𑀦𑀸𑀫, 𑀅𑀬𑀜𑁆𑀳𑀺 𑀦𑀸𑀫 𑀅𑀘𑁂𑀢𑀦𑁄 𑀅𑀕𑁆𑀕𑀺 𑀩𑀼𑀤𑁆𑀥𑀸𑀦𑀁 𑀞𑀺𑀢𑀝𑁆𑀞𑀸𑀦𑀁 𑀅𑀯𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀉𑀤𑀓𑁂 𑀢𑀺𑀡𑀼𑀓𑁆𑀓𑀸 𑀯𑀺𑀬 𑀦𑀺𑀩𑁆𑀩𑀸𑀬𑀢𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄 𑀦𑀸𑀫𑀸’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑀁 𑀏𑀢𑀭𑀳𑀺 𑀫𑀬𑁆𑀳𑀁 𑀩𑀮𑀁, 𑀬𑀁 𑀇𑀫𑀁 𑀪𑀽𑀫𑀺𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀏𑀲 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀢𑀺. 𑀇𑀤𑀁 𑀧𑀦 𑀫𑀬𑁆𑀳𑀁 𑀧𑁄𑀭𑀸𑀡𑀓𑀲𑀘𑁆𑀘𑀩𑀮𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀤𑁂𑀲𑁂 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀕𑁆𑀕𑀺 𑀦 𑀚𑀮𑀺𑀲𑁆𑀲𑀢𑀺, 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀫𑁂𑀢’’𑀦𑁆𑀢𑀺 𑀆𑀳. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀼 𑀦𑀺𑀲𑀻𑀤𑀦𑀢𑁆𑀣𑀸𑀬 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀲𑀺, 𑀦𑀺𑀲𑀻𑀤𑀺 𑀲𑀢𑁆𑀣𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀲𑀢𑁆𑀣𑀸 ‘‘𑀇𑀤𑀁 𑀢𑀸𑀯, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀸𑀓𑀝𑀁, 𑀅𑀢𑀻𑀢𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀢𑀁 𑀦𑁄 𑀧𑀸𑀓𑀝𑀁 𑀓𑀭𑁄𑀣𑀸’’𑀢𑀺 𑀪𑀺𑀓𑁆𑀔𑀽𑀳𑀺 𑀆𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀩𑁄𑀥𑀺𑀲𑀢𑁆𑀢𑁄 𑀯𑀝𑁆𑀝𑀓𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀚𑀸𑀢𑁄 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀫𑀳𑀸𑀕𑁂𑀡𑁆𑀟𑀼𑀓𑀧𑁆𑀧𑀫𑀸𑀡𑁄 𑀯𑀝𑁆𑀝𑀓𑀧𑁄𑀢𑀓𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑀸𑀯𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀢𑀲𑁆𑀲 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀆𑀓𑀸𑀲𑁂 𑀕𑀫𑀦𑀩𑀮𑀁 𑀯𑀸 𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀕𑀫𑀦𑀩𑀮𑀁 𑀯𑀸 𑀦𑀢𑁆𑀣𑀺. 𑀢𑀜𑁆𑀘 𑀧𑀤𑁂𑀲𑀁 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀤𑀸𑀯𑀕𑁆𑀕𑀺 𑀕𑀡𑁆𑀳𑀸𑀢𑀺, 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀲𑀫𑀬𑁂 𑀫𑀳𑀸𑀭𑀯𑀁 𑀭𑀯𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀕𑀡𑁆𑀳𑀺, 𑀲𑀓𑀼𑀡𑀲𑀗𑁆𑀖𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀮𑀸𑀯𑀓𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑀸 𑀯𑀺𑀭𑀯𑀦𑁆𑀢𑀸 𑀧𑀮𑀸𑀬𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀫𑀸𑀢𑀸𑀧𑀺𑀢𑀭𑁄 𑀫𑀭𑀡𑀪𑀬𑀪𑀻𑀢𑀸 𑀩𑁄𑀥𑀺𑀲𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀓𑀼𑀮𑀸𑀯𑀓𑁂 𑀦𑀺𑀧𑀦𑁆𑀦𑀓𑁄𑀯 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀯𑀢𑁆𑀣𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀫𑀬𑁆𑀳𑀁 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀫𑀦𑀩𑀮𑀁 𑀪𑀯𑁂𑀬𑁆𑀬, 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑁂𑀬𑁆𑀬𑀁. 𑀲𑀘𑁂 𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑀦𑀩𑀮𑀁 𑀪𑀯𑁂𑀬𑁆𑀬, 𑀧𑀤𑀯𑀸𑀭𑁂𑀦 𑀅𑀜𑁆𑀜𑀢𑁆𑀣 𑀕𑀘𑁆𑀙𑁂𑀬𑁆𑀬𑀁. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀔𑁄 𑀫𑁂 𑀫𑀭𑀡𑀪𑀬𑀪𑀻𑀢𑀸 𑀫𑀁 𑀏𑀓𑀓𑀁 𑀧𑀳𑀸𑀬 𑀅𑀢𑁆𑀢𑀸𑀦𑀁 𑀧𑀭𑀺𑀢𑁆𑀢𑀸𑀬𑀦𑁆𑀢𑀸 𑀧𑀮𑀸𑀢𑀸. 𑀇𑀤𑀸𑀦𑀺 𑀫𑁂 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀅𑀢𑀸𑀡𑁄𑀫𑁆𑀳𑀺 𑀅𑀲𑀭𑀡𑁄, 𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀕𑀼𑀡𑁄 𑀦𑀸𑀫 𑀅𑀢𑁆𑀣𑀺, 𑀲𑀘𑁆𑀘𑀕𑀼𑀡𑁄 𑀦𑀸𑀫 𑀅𑀢𑁆𑀣𑀺, 𑀅𑀢𑀻𑀢𑁂 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸 𑀲𑀘𑁆𑀘𑀸𑀦𑀼𑀤𑁆𑀤𑀬𑀓𑀸𑀭𑀼𑀜𑁆𑀜𑀔𑀦𑁆𑀢𑀺𑀲𑀫𑀦𑁆𑀦𑀸𑀕𑀢𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀫𑁂𑀢𑁆𑀢𑀸𑀪𑀸𑀯𑀦𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀦𑀸𑀫 𑀅𑀢𑁆𑀣𑀺, 𑀢𑁂𑀳𑀺 𑀘 𑀧𑀝𑀺𑀯𑀺𑀤𑁆𑀥𑀸 𑀥𑀫𑁆𑀫𑀕𑀼𑀡𑀸 𑀦𑀸𑀫 𑀅𑀢𑁆𑀣𑀺, 𑀫𑀬𑀺 𑀘𑀸𑀧𑀺 𑀏𑀓𑀁 𑀲𑀘𑁆𑀘𑀁 𑀅𑀢𑁆𑀣𑀺, 𑀲𑀁𑀯𑀺𑀚𑁆𑀚𑀫𑀸𑀦𑁄 𑀏𑀓𑁄 𑀲𑀪𑀸𑀯𑀥𑀫𑁆𑀫𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀘𑁂𑀯 𑀢𑁂𑀳𑀺 𑀧𑀝𑀺𑀯𑀺𑀤𑁆𑀥𑀕𑀼𑀡𑁂 𑀘 𑀆𑀯𑀚𑁆𑀚𑁂𑀢𑁆𑀯𑀸 𑀫𑀬𑀺 𑀯𑀺𑀚𑁆𑀚𑀫𑀸𑀦𑀁 𑀲𑀘𑁆𑀘𑀲𑀪𑀸𑀯𑀥𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀅𑀢𑁆𑀢𑀦𑁄 𑀘𑁂𑀯 𑀲𑁂𑀲𑀲𑀓𑀼𑀡𑀸𑀦𑀜𑁆𑀘 𑀲𑁄𑀢𑁆𑀣𑀺𑀪𑀸𑀯𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀢𑁆𑀣𑀺 𑀮𑁄𑀓𑁂 𑀲𑀻𑀮𑀕𑀼𑀡𑁄, 𑀲𑀘𑁆𑀘𑀁 𑀲𑁄𑀘𑁂𑀬𑁆𑀬𑀦𑀼𑀤𑁆𑀤𑀬𑀸;

𑀢𑁂𑀦 𑀲𑀘𑁆𑀘𑁂𑀦 𑀓𑀸𑀳𑀸𑀫𑀺, 𑀲𑀘𑁆𑀘𑀓𑀺𑀭𑀺𑀬𑀫𑀦𑀼𑀢𑁆𑀢𑀭𑀁.

‘‘𑀆𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀩𑀮𑀁, 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀓𑁂 𑀚𑀺𑀦𑁂;

𑀲𑀘𑁆𑀘𑀩𑀮𑀫𑀯𑀲𑁆𑀲𑀸𑀬, 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀳’’𑀦𑁆𑀢𑀺. (𑀘𑀭𑀺𑀬𑀸. 𑁩.𑁭𑁯-𑁮𑁦);

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀲𑀘𑁆𑀘𑀲𑀪𑀸𑀯𑀁 𑀆𑀭𑀩𑁆𑀪 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁫. ‘‘𑀲𑀦𑁆𑀢𑀺 𑀧𑀓𑁆𑀔𑀸 𑀅𑀧𑀢𑀦𑀸, 𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸;

𑀫𑀸𑀢𑀸𑀧𑀺𑀢𑀸 𑀘 𑀦𑀺𑀓𑁆𑀔𑀦𑁆𑀢𑀸, 𑀚𑀸𑀢𑀯𑁂𑀤 𑀧𑀝𑀺𑀓𑁆𑀓𑀫𑀸’’𑀢𑀺.

𑀢𑀢𑁆𑀣 𑀲𑀦𑁆𑀢𑀺 𑀧𑀓𑁆𑀔𑀸 𑀅𑀧𑀢𑀦𑀸𑀢𑀺 𑀫𑀬𑁆𑀳𑀁 𑀧𑀓𑁆𑀔𑀸 𑀦𑀸𑀫 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀦𑁄 𑀘 𑀔𑁄 𑀲𑀓𑁆𑀓𑀸 𑀏𑀢𑁂𑀳𑀺 𑀉𑀧𑁆𑀧𑀢𑀺𑀢𑀼𑀁 𑀆𑀓𑀸𑀲𑁂𑀦 𑀕𑀦𑁆𑀢𑀼𑀦𑁆𑀢𑀺 𑀅𑀧𑀢𑀦𑀸. 𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸𑀢𑀺 𑀧𑀸𑀤𑀸𑀧𑀺 𑀫𑁂 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀯𑀜𑁆𑀘𑀺𑀢𑀼𑀁 𑀧𑀤𑀯𑀸𑀭𑀕𑀫𑀦𑁂𑀦 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀜𑁆𑀘𑀦𑀸. 𑀫𑀸𑀢𑀸𑀧𑀺𑀢𑀸 𑀘 𑀦𑀺𑀓𑁆𑀔𑀦𑁆𑀢𑀸𑀢𑀺 𑀬𑁂 𑀘 𑀫𑀁 𑀅𑀜𑁆𑀜𑀢𑁆𑀣 𑀦𑁂𑀬𑁆𑀬𑀼𑀁, 𑀢𑁂𑀧𑀺 𑀫𑀭𑀡𑀪𑀬𑁂𑀦 𑀫𑀸𑀢𑀸𑀧𑀺𑀢𑀭𑁄 𑀦𑀺𑀓𑁆𑀔𑀦𑁆𑀢𑀸. 𑀚𑀸𑀢𑀯𑁂𑀤𑀸𑀢𑀺 𑀅𑀕𑁆𑀕𑀺𑀁 𑀆𑀮𑀧𑀢𑀺. 𑀲𑁄 𑀳𑀺 𑀚𑀸𑀢𑁄𑀯 𑀯𑁂𑀤𑀬𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀓𑁆𑀓𑀫𑀸𑀢𑀺 𑀧𑀝𑀺𑀕𑀘𑁆𑀙 𑀦𑀺𑀯𑀢𑁆𑀢𑀸𑀢𑀺 𑀚𑀸𑀢𑀯𑁂𑀤𑀁 𑀆𑀡𑀸𑀧𑁂𑀢𑀺.

𑀇𑀢𑀺 𑀫𑀳𑀸𑀲𑀢𑁆𑀢𑁄 ‘‘𑀲𑀘𑁂 𑀫𑀬𑁆𑀳𑀁 𑀧𑀓𑁆𑀔𑀸𑀦𑀁 𑀅𑀢𑁆𑀣𑀺𑀪𑀸𑀯𑁄, 𑀢𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀆𑀓𑀸𑀲𑁂 𑀅𑀧𑀢𑀦𑀪𑀸𑀯𑁄, 𑀧𑀸𑀤𑀸𑀦𑀁 𑀅𑀢𑁆𑀣𑀺𑀪𑀸𑀯𑁄, 𑀢𑁂 𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀯𑀜𑁆𑀘𑀦𑀪𑀸𑀯𑁄, 𑀫𑀸𑀢𑀸𑀧𑀺𑀢𑀽𑀦𑀁 𑀫𑀁 𑀓𑀼𑀮𑀸𑀯𑀓𑁂𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀪𑀸𑀯𑁄 𑀘 𑀲𑀘𑁆𑀘𑁄 𑀲𑀪𑀸𑀯𑀪𑀽𑀢𑁄𑀬𑁂𑀯, 𑀚𑀸𑀢𑀯𑁂𑀤, 𑀏𑀢𑁂𑀦 𑀲𑀘𑁆𑀘𑁂𑀦 𑀢𑁆𑀯𑀁 𑀇𑀢𑁄 𑀧𑀝𑀺𑀓𑁆𑀓𑀫𑀸’’𑀢𑀺 𑀓𑀼𑀮𑀸𑀯𑀓𑁂 𑀦𑀺𑀧𑀦𑁆𑀦𑀓𑁄𑀯 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀢𑀲𑁆𑀲 𑀲𑀳 𑀲𑀘𑁆𑀘𑀓𑀺𑀭𑀺𑀬𑀸𑀬 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑁂 𑀞𑀸𑀦𑁂 𑀚𑀸𑀢𑀯𑁂𑀤𑁄 𑀧𑀝𑀺𑀓𑁆𑀓𑀫𑀺. 𑀧𑀝𑀺𑀓𑁆𑀓𑀫𑀦𑁆𑀢𑁄 𑀘 𑀦 𑀛𑀸𑀬𑀫𑀸𑀦𑁄𑀯 𑀅𑀜𑁆𑀜𑀁 𑀕𑀢𑁄, 𑀉𑀤𑀓𑁂 𑀧𑀦 𑀑𑀧𑀺𑀮𑀸𑀧𑀺𑀢𑀸 𑀉𑀓𑁆𑀓𑀸 𑀯𑀺𑀬 𑀢𑀢𑁆𑀣𑁂𑀯 𑀦𑀺𑀩𑁆𑀩𑀸𑀬𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀳 𑀲𑀘𑁆𑀘𑁂 𑀓𑀢𑁂 𑀫𑀬𑁆𑀳𑀁, 𑀫𑀳𑀸𑀧𑀚𑁆𑀚𑀮𑀺𑀢𑁄 𑀲𑀺𑀔𑀻;

𑀯𑀚𑁆𑀚𑁂𑀲𑀺 𑀲𑁄𑀴𑀲 𑀓𑀭𑀻𑀲𑀸𑀦𑀺, 𑀉𑀤𑀓𑀁 𑀧𑀢𑁆𑀯𑀸 𑀬𑀣𑀸 𑀲𑀺𑀔𑀻’’𑀢𑀺. (𑀘𑀭𑀺𑀬𑀸. 𑁩.𑁮𑁨);

𑀢𑀁 𑀧𑀦 𑀞𑀸𑀦𑀁 𑀲𑀓𑀮𑁂𑀧𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀅𑀕𑁆𑀕𑀺𑀦𑀸 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀫 𑀚𑀸𑀢𑀁. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀯𑀦𑀲𑁆𑀲 𑀅𑀕𑁆𑀕𑀺𑀦𑀸 𑀅𑀦𑀚𑁆𑀛𑁄𑀢𑁆𑀣𑀭𑀡𑀁 𑀏𑀢𑀭𑀳𑀺 𑀫𑀬𑁆𑀳𑀁 𑀩𑀮𑀁, 𑀧𑁄𑀭𑀸𑀡𑀁 𑀧𑀦𑁂𑀢𑀁 𑀯𑀝𑁆𑀝𑀧𑁄𑀢𑀓𑀓𑀸𑀮𑁂 𑀫𑀬𑁆𑀳𑀫𑁂𑀯 𑀲𑀘𑁆𑀘𑀩𑀮’’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀏𑀢𑀭𑀳𑀺 𑀫𑀸𑀢𑀸𑀧𑀺𑀢𑀭𑁄𑀯 𑀅𑀳𑁂𑀲𑀼𑀁, 𑀯𑀝𑁆𑀝𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀝𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁬] 𑁬. 𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀦𑀺𑀲𑁆𑀲𑀺𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀟𑁆𑀠𑀧𑀡𑁆𑀡𑀲𑀸𑀮𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀢𑁄 𑀦𑀺𑀓𑁆𑀔𑀫𑁆𑀫 𑀓𑁄𑀲𑀮𑁂𑀲𑀼 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀲𑁂𑀦𑀸𑀲𑀦𑁂 𑀯𑀲𑀢𑀺. 𑀅𑀣𑀲𑁆𑀲 𑀧𑀞𑀫𑀫𑀸𑀲𑁂𑀬𑁂𑀯 𑀧𑀡𑁆𑀡𑀲𑀸𑀮𑀸 𑀟𑀬𑁆𑀳𑀺𑀢𑁆𑀣. 𑀲𑁄 ‘‘𑀧𑀡𑁆𑀡𑀲𑀸𑀮𑀸 𑀫𑁂 𑀤𑀟𑁆𑀠𑀸, 𑀤𑀼𑀓𑁆𑀔𑀁 𑀯𑀲𑀸𑀫𑀻’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺. 𑀫𑀦𑀼𑀲𑁆𑀲𑀸 ‘‘𑀇𑀤𑀸𑀦𑀺 𑀦𑁄 𑀔𑁂𑀢𑁆𑀢𑀁 𑀧𑀭𑀺𑀲𑀼𑀓𑁆𑀔𑀁, 𑀓𑁂𑀤𑀸𑀭𑁂 𑀧𑀸𑀬𑁂𑀢𑁆𑀯𑀸 𑀓𑀭𑀺𑀲𑁆𑀲𑀸𑀫’’, 𑀢𑀲𑁆𑀫𑀺𑀁 𑀧𑀸𑀬𑀺𑀢𑁂 ‘‘𑀩𑀻𑀚𑀁 𑀯𑀧𑀺𑀢𑁆𑀯𑀸’’, 𑀩𑀻𑀚𑁂 𑀯𑀼𑀢𑁆𑀢𑁂 ‘‘𑀯𑀢𑀺𑀁 𑀓𑀢𑁆𑀯𑀸’’, 𑀯𑀢𑀺𑀬𑀸 𑀓𑀢𑀸𑀬 ‘‘𑀦𑀺𑀤𑁆𑀤𑀸𑀬𑀺𑀢𑁆𑀯𑀸, 𑀮𑀸𑀬𑀺𑀢𑁆𑀯𑀸, 𑀫𑀤𑁆𑀤𑀺𑀢𑁆𑀯𑀸’’𑀢𑀺 𑀏𑀯𑀁 𑀢𑀁 𑀢𑀁 𑀓𑀫𑁆𑀫𑀁 𑀅𑀧𑀤𑀺𑀲𑀦𑁆𑀢𑀸𑀬𑁂𑀯 𑀢𑁂𑀫𑀸𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀢𑁂𑀫𑀸𑀲𑀁 𑀅𑀚𑁆𑀛𑁄𑀓𑀸𑀲𑁂 𑀤𑀼𑀓𑁆𑀔𑀁 𑀯𑀲𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀯𑀸𑀭𑁂𑀢𑁆𑀯𑀸 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀪𑀺𑀓𑁆𑀔𑀼 𑀲𑀼𑀔𑁂𑀦 𑀯𑀲𑁆𑀲𑀁𑀯𑀼𑀢𑁆𑀣𑁄𑀲𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀢𑁂 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀲𑁆𑀲 𑀫𑁂 𑀅𑀪𑀸𑀯𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀦 𑀧𑀢𑁆𑀢’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂 𑀪𑀺𑀓𑁆𑀔𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀺𑀁𑀲𑀼, 𑀢𑁆𑀯𑀁 𑀓𑀲𑁆𑀫𑀸 𑀦 𑀅𑀜𑁆𑀜𑀸𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀓𑀼𑀡𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀁 𑀫𑀳𑀸𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀲𑀼 𑀅𑀜𑁆𑀜𑀫𑀜𑁆𑀜𑀁 𑀖𑀁𑀲𑀦𑁆𑀢𑀻𑀲𑀼 𑀘𑀼𑀡𑁆𑀡𑀁 𑀧𑀢𑀢𑀺, 𑀥𑀽𑀫𑁄 𑀉𑀝𑁆𑀞𑀸𑀢𑀺. 𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸 𑀤𑁆𑀯𑁂 𑀲𑀸𑀔𑀸 𑀏𑀯𑀁 𑀖𑀁𑀲𑀫𑀸𑀦𑀸 𑀅𑀕𑁆𑀕𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺, 𑀲𑁄 𑀧𑀢𑀺𑀢𑁆𑀯𑀸 𑀧𑀼𑀭𑀸𑀡𑀧𑀡𑁆𑀡𑀸𑀦𑀺 𑀕𑀡𑁆𑀳𑀺𑀲𑁆𑀲𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀇𑀫𑀫𑁆𑀧𑀺 𑀭𑀼𑀓𑁆𑀔𑀁 𑀛𑀸𑀧𑁂𑀲𑁆𑀲𑀢𑀺, 𑀦 𑀲𑀓𑁆𑀓𑀸 𑀇𑀥 𑀅𑀫𑁆𑀳𑁂𑀳𑀺 𑀯𑀲𑀺𑀢𑀼𑀁, 𑀇𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀓𑀼𑀡𑀲𑀗𑁆𑀖𑀲𑁆𑀲 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬. ‘‘𑀬𑀁 𑀦𑀺𑀲𑁆𑀲𑀺𑀢𑀸 𑀚𑀕𑀢𑀺𑀭𑀼𑀳𑀁 𑀯𑀺𑀳𑀗𑁆𑀕𑀫𑀸, 𑀲𑁆𑀯𑀸𑀬𑀁 𑀅𑀕𑁆𑀕𑀺𑀁 𑀧𑀫𑀼𑀜𑁆𑀘𑀢𑀺;

𑀤𑀺𑀲𑀸 𑀪𑀚𑀣 𑀯𑀓𑁆𑀓𑀗𑁆𑀕𑀸, 𑀚𑀸𑀢𑀁 𑀲𑀭𑀡𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀚𑀕𑀢𑀺𑀭𑀼𑀳𑀦𑁆𑀢𑀺 𑀚𑀕𑀢𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀢𑁆𑀣 𑀚𑀸𑀢𑀢𑁆𑀢𑀸 𑀭𑀼𑀓𑁆𑀔𑁄 ‘‘𑀚𑀕𑀢𑀺𑀭𑀼𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀳𑀗𑁆𑀕𑀫𑀸𑀢𑀺 𑀯𑀺𑀳𑀁 𑀯𑀼𑀘𑁆𑀘𑀢𑀺 𑀆𑀓𑀸𑀲𑀁, 𑀢𑀢𑁆𑀣 𑀕𑀫𑀦𑀢𑁄 𑀧𑀓𑁆𑀔𑀻 ‘‘𑀯𑀺𑀳𑀗𑁆𑀕𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑀺𑀲𑀸 𑀪𑀚𑀣𑀸𑀢𑀺 𑀇𑀫𑀁 𑀭𑀼𑀓𑁆𑀔𑀁 𑀫𑀼𑀜𑁆𑀘𑀺𑀢𑁆𑀯𑀸 𑀇𑀢𑁄 𑀧𑀮𑀸𑀬𑀦𑁆𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀪𑀚𑀣. 𑀯𑀓𑁆𑀓𑀗𑁆𑀕𑀸𑀢𑀺 𑀲𑀓𑀼𑀡𑁂 𑀆𑀮𑀧𑀢𑀺. 𑀢𑁂 𑀳𑀺 𑀉𑀢𑁆𑀢𑀫𑀗𑁆𑀕𑀁 𑀕𑀮𑀁 𑀓𑀤𑀸𑀘𑀺 𑀓𑀤𑀸𑀘𑀺 𑀯𑀗𑁆𑀓𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀓𑁆𑀓𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀗𑁆𑀓𑀸 𑀯𑀸 𑀢𑁂𑀲𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀓𑁆𑀔𑀸 𑀚𑀸𑀢𑀸𑀢𑀺 𑀯𑀓𑁆𑀓𑀗𑁆𑀕𑀸. 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀦𑁆𑀢𑀺 𑀅𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑀭𑀼𑀓𑁆𑀔𑀢𑁄𑀬𑁂𑀯 𑀪𑀬𑀁 𑀦𑀺𑀩𑁆𑀩𑀢𑁆𑀢𑀁, 𑀏𑀣 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀓𑀭𑀸 𑀧𑀡𑁆𑀟𑀺𑀢𑀲𑀓𑀼𑀡𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑀸. 𑀬𑁂 𑀧𑀦 𑀅𑀧𑀡𑁆𑀟𑀺𑀢𑀸, 𑀢𑁂 ‘‘𑀏𑀯𑀫𑁂𑀯 𑀏𑀲 𑀩𑀺𑀦𑁆𑀤𑀼𑀫𑀢𑁆𑀢𑁂 𑀉𑀤𑀓𑁂 𑀓𑀼𑀫𑁆𑀪𑀻𑀮𑁂 𑀧𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺𑀁𑀲𑀼. 𑀢𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀩𑁄𑀥𑀺𑀲𑀢𑁆𑀢𑁂𑀦 𑀘𑀺𑀦𑁆𑀢𑀺𑀢𑀸𑀓𑀸𑀭𑁂𑀦𑁂𑀯 𑀅𑀕𑁆𑀕𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀅𑀕𑁆𑀕𑀳𑁂𑀲𑀺. 𑀥𑀽𑀫𑁂𑀲𑀼 𑀘 𑀚𑀸𑀮𑀸𑀲𑀼 𑀘 𑀉𑀝𑁆𑀞𑀺𑀢𑀸𑀲𑀼 𑀥𑀽𑀫𑀦𑁆𑀥𑀸 𑀲𑀓𑀼𑀡𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀕𑁆𑀕𑀺𑀫𑁆𑀳𑀺 𑀧𑀢𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼.

𑀲𑀢𑁆𑀣𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀭𑀼𑀓𑁆𑀔𑀕𑁆𑀕𑁂 𑀯𑀲𑀦𑁆𑀢𑀸 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀦 𑀅𑀜𑁆𑀜𑀸𑀲𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀲𑀢𑁆𑀣𑀸𑀧𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀓𑀭𑀸 𑀲𑀓𑀼𑀡𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀧𑀡𑁆𑀟𑀺𑀢𑀲𑀓𑀼𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁭] 𑁭. 𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸

𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑁂𑀦𑀸𑀲𑀦𑀧𑀝𑀺𑀩𑀸𑀳𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀳𑀺 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀤𑀽𑀢𑁂 𑀧𑁂𑀲𑀺𑀢𑁂 𑀲𑀢𑁆𑀣𑀸 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑁆𑀫 𑀯𑁂𑀲𑀸𑀮𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 ‘‘𑀲𑀸𑀯𑀢𑁆𑀣𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀦 𑀘 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀣𑁂𑀭𑀸𑀦𑀁 𑀲𑁂𑀦𑀸𑀲𑀦𑁂𑀲𑀼 𑀅𑀕𑁆𑀕𑀳𑀺𑀢𑁂𑀲𑁆𑀯𑁂𑀯 ‘‘𑀇𑀤𑀁 𑀲𑁂𑀦𑀸𑀲𑀦𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀲𑁆𑀲, 𑀇𑀤𑀁 𑀆𑀘𑀭𑀺𑀬𑀲𑁆𑀲, 𑀇𑀤𑀁 𑀅𑀫𑁆𑀳𑀸𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑁂𑀦𑀸𑀲𑀦𑀸𑀦𑀺 𑀧𑀮𑀺𑀩𑀼𑀦𑁆𑀥𑁂𑀦𑁆𑀢𑀺. 𑀧𑀘𑁆𑀙𑀸 𑀆𑀕𑀢𑀸 𑀣𑁂𑀭𑀸 𑀲𑁂𑀦𑀸𑀲𑀦𑀸𑀦𑀺 𑀦 𑀮𑀪𑀦𑁆𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀸 𑀣𑁂𑀭𑀲𑁆𑀲 𑀲𑁂𑀦𑀸𑀲𑀦𑀁 𑀧𑀭𑀺𑀬𑁂𑀲𑀦𑁆𑀢𑀸 𑀦 𑀮𑀪𑀺𑀁𑀲𑀼. 𑀣𑁂𑀭𑁄 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑁄 𑀲𑀢𑁆𑀣𑀼 𑀲𑁂𑀦𑀸𑀲𑀦𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀚𑁆𑀚𑀸𑀬 𑀘 𑀘𑀗𑁆𑀓𑀫𑁂𑀦 𑀘 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀓𑁆𑀓𑀸𑀲𑀺, 𑀣𑁂𑀭𑁄𑀧𑀺 𑀉𑀓𑁆𑀓𑀸𑀲𑀺. ‘‘𑀓𑁄 𑀏𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺. ‘‘𑀲𑀸𑀭𑀺𑀧𑀼𑀢𑁆𑀢, 𑀇𑀫𑀸𑀬 𑀯𑁂𑀮𑀸𑀬 𑀇𑀥 𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺’’. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀸𑀯 𑀫𑀬𑀺 𑀚𑀻𑀯𑀦𑁆𑀢𑁂𑀬𑁂𑀯 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑀢𑀺𑀲𑁆𑀲𑀸 𑀯𑀺𑀳𑀭𑀦𑁆𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺.

𑀲𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀦𑁆𑀢𑀻’’𑀢𑀺. ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺? 𑀢𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁 𑀅𑀭𑀳𑀢𑀻’’𑀢𑀺? 𑀏𑀓𑀘𑁆𑀘𑁂 ‘‘𑀔𑀢𑁆𑀢𑀺𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀆𑀳𑀁𑀲𑀼, 𑀏𑀓𑀘𑁆𑀘𑁂 ‘‘𑀩𑁆𑀭𑀸𑀳𑁆𑀫𑀡𑀓𑀼𑀮𑀸, 𑀕𑀳𑀧𑀢𑀺𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺, 𑀅𑀧𑀭𑁂 ‘‘𑀯𑀺𑀦𑀬𑀥𑀭𑁄, 𑀥𑀫𑁆𑀫𑀓𑀣𑀺𑀓𑁄, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀤𑀼𑀢𑀺𑀬𑀲𑁆𑀲, 𑀢𑀢𑀺𑀬𑀲𑁆𑀲, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺. 𑀅𑀧𑀭𑁂 ‘‘𑀲𑁄𑀢𑀸𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻, 𑀅𑀭𑀳𑀸, 𑀢𑁂𑀯𑀺𑀚𑁆𑀚𑁄, 𑀙𑀴𑀪𑀺𑀜𑁆𑀜𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀅𑀕𑁆𑀕𑀸𑀲𑀦𑀸𑀤𑀺𑀭𑀳𑀸𑀦𑀁 𑀓𑀣𑀺𑀢𑀓𑀸𑀮𑁂 𑀲𑀢𑁆𑀣𑀸 𑀆𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀫𑀬𑁆𑀳𑀁 𑀲𑀸𑀲𑀦𑁂 𑀅𑀕𑁆𑀕𑀸𑀲𑀦𑀸𑀤𑀻𑀦𑀺 𑀧𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀧𑀫𑀸𑀡𑀁, 𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀦 𑀕𑀳𑀧𑀢𑀺𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀦 𑀯𑀺𑀦𑀬𑀥𑀭𑁄, 𑀦 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀦 𑀆𑀪𑀺𑀥𑀫𑁆𑀫𑀺𑀓𑁄, 𑀦 𑀧𑀞𑀫𑀚𑁆𑀛𑀸𑀦𑀸𑀤𑀺𑀮𑀸𑀪𑀺𑀦𑁄, 𑀦 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀫𑀸𑀡𑀁, 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑁄 𑀮𑀤𑁆𑀥𑀩𑁆𑀩𑁄. 𑀇𑀤𑀫𑁂𑀢𑁆𑀣 𑀧𑀫𑀸𑀡𑀁. 𑀢𑀲𑁆𑀫𑀸 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀏𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑁄. 𑀇𑀤𑀸𑀦𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀫𑀬𑁆𑀳𑀁 𑀅𑀕𑁆𑀕𑀲𑀸𑀯𑀓𑁄 𑀅𑀦𑀼𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀓𑁄 𑀫𑀫𑀸𑀦𑀦𑁆𑀢𑀭𑀁 𑀲𑁂𑀦𑀸𑀲𑀦𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺, 𑀲𑁄 𑀇𑀫𑀁 𑀭𑀢𑁆𑀢𑀺𑀁 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑁂 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀼𑀫𑁆𑀳𑁂 𑀇𑀤𑀸𑀦𑁂𑀯 𑀏𑀯𑀁 𑀅𑀕𑀸𑀭𑀯𑀸 𑀅𑀧𑀢𑀺𑀲𑁆𑀲𑀸, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀅𑀣 𑀦𑁂𑀲𑀁 𑀑𑀯𑀸𑀤𑀤𑀸𑀦𑀢𑁆𑀣𑀸𑀬 ‘‘𑀧𑀼𑀩𑁆𑀩𑁂, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 ‘𑀦 𑀔𑁄 𑀧𑀦𑁂𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑁂𑀬𑁆𑀬𑀸𑀫, 𑀅𑀫𑁆𑀳𑁂𑀲𑀼 𑀫𑀳𑀮𑁆𑀮𑀓𑀢𑀭𑀁 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀲𑀸𑀥𑀼𑀓𑀁 𑀯𑀻𑀫𑀁𑀲𑀺𑀢𑁆𑀯𑀸 ‘𑀅𑀬𑀁 𑀦𑁄 𑀫𑀳𑀮𑁆𑀮𑀓𑁄’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀤𑁂𑀯𑀧𑀣𑀁 𑀧𑀽𑀭𑀬𑀫𑀸𑀦𑀸 𑀕𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀏𑀓𑀁 𑀫𑀳𑀸𑀦𑀺𑀕𑁆𑀭𑁄𑀥𑀁 𑀉𑀧𑀦𑀺𑀲𑁆𑀲𑀸𑀬 𑀢𑀬𑁄 𑀲𑀳𑀸𑀬𑀸 𑀯𑀺𑀳𑀭𑀺𑀁𑀲𑀼 𑁋 𑀢𑀺𑀢𑁆𑀢𑀺𑀭𑁄, 𑀫𑀓𑁆𑀓𑀝𑁄, 𑀳𑀢𑁆𑀣𑀻𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 ‘‘𑀦 𑀬𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀏𑀯𑀁 𑀯𑀺𑀳𑀭𑀺𑀢𑀼𑀁, 𑀬𑀁𑀦𑀽𑀦 𑀫𑀬𑀁 𑀬𑁄 𑀦𑁄 𑀫𑀳𑀮𑁆𑀮𑀓𑀢𑀭𑁄, 𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀯𑀺𑀳𑀭𑁂𑀬𑁆𑀬𑀸𑀫𑀸’’𑀢𑀺. ‘‘𑀓𑁄 𑀧𑀦 𑀦𑁄 𑀫𑀳𑀮𑁆𑀮𑀓𑀢𑀭𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸 𑀏𑀓𑀤𑀺𑀯𑀲𑀁 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀢𑀬𑁄𑀧𑀺 𑀚𑀦𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀺𑀢𑁆𑀢𑀺𑀭𑁄 𑀘 𑀫𑀓𑁆𑀓𑀝𑁄 𑀘 𑀳𑀢𑁆𑀣𑀺𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀲𑀫𑁆𑀫 𑀳𑀢𑁆𑀣𑀺, 𑀢𑁆𑀯𑀁 𑀇𑀫𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀓𑀻𑀯𑀧𑁆𑀧𑀫𑀸𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀲𑀻’’𑀢𑀺? 𑀲𑁄 𑀆𑀳 ‘‘𑀲𑀫𑁆𑀫𑀸, 𑀅𑀳𑀁 𑀢𑀭𑀼𑀡𑀧𑁄𑀢𑀓𑀓𑀸𑀮𑁂 𑀇𑀫𑀁 𑀦𑀺𑀕𑁆𑀭𑁄𑀥𑀕𑀘𑁆𑀙𑀁 𑀅𑀦𑁆𑀢𑀭𑀲𑀢𑁆𑀣𑀻𑀲𑀼 𑀓𑀢𑁆𑀯𑀸 𑀕𑀘𑁆𑀙𑀸𑀫𑀺, 𑀅𑀯𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀓𑀸𑀮𑁂 𑀘 𑀧𑀦 𑀫𑁂 𑀏𑀢𑀲𑁆𑀲 𑀅𑀕𑁆𑀕𑀲𑀸𑀔𑀸 𑀦𑀸𑀪𑀺𑀁 𑀖𑀝𑁆𑀝𑁂𑀢𑀺, 𑀏𑀯𑀸𑀳𑀁 𑀇𑀫𑀁 𑀕𑀘𑁆𑀙𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀫𑀻’’𑀢𑀺 𑀧𑀼𑀦 𑀉𑀪𑁄𑀧𑀺 𑀚𑀦𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀓𑁆𑀓𑀝𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀆𑀳 ‘‘𑀅𑀳𑀁 𑀲𑀫𑁆𑀫𑀸 𑀫𑀓𑁆𑀓𑀝𑀘𑁆𑀙𑀸𑀧𑀓𑁄 𑀲𑀫𑀸𑀦𑁄 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀕𑀻𑀯𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀇𑀫𑀲𑁆𑀲 𑀦𑀺𑀕𑁆𑀭𑁄𑀥𑀧𑁄𑀢𑀓𑀲𑁆𑀲 𑀅𑀕𑁆𑀕𑀗𑁆𑀓𑀼𑀭𑁂 𑀔𑀸𑀤𑀸𑀫𑀺, 𑀏𑀯𑀸𑀳𑀁 𑀇𑀫𑀁 𑀔𑀼𑀤𑁆𑀤𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀫𑀻’’𑀢𑀺. 𑀅𑀣 𑀇𑀢𑀭𑁂 𑀉𑀪𑁄𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀺𑀢𑁆𑀢𑀺𑀭𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀆𑀳 ‘‘𑀲𑀫𑁆𑀫𑀸, 𑀧𑀼𑀩𑁆𑀩𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀳𑁄𑀲𑀺, 𑀅𑀳𑀁 𑀢𑀲𑁆𑀲 𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀘𑁆𑀘𑀁 𑀧𑀸𑀢𑁂𑀲𑀺𑀁, 𑀢𑀢𑁄 𑀏𑀲 𑀭𑀼𑀓𑁆𑀔𑁄 𑀚𑀸𑀢𑁄, 𑀏𑀯𑀸𑀳𑀁 𑀇𑀫𑀁 𑀅𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀫𑀺, 𑀢𑀲𑁆𑀫𑀸 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑀢𑀭𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀫𑀓𑁆𑀓𑀝𑁄 𑀘 𑀳𑀢𑁆𑀣𑀻 𑀘 𑀢𑀺𑀢𑁆𑀢𑀺𑀭𑀧𑀡𑁆𑀟𑀺𑀢𑀁 𑀆𑀳𑀁𑀲𑀼 ‘‘𑀲𑀫𑁆𑀫, 𑀢𑁆𑀯𑀁 𑀅𑀫𑁆𑀳𑁂𑀳𑀺 𑀫𑀳𑀮𑁆𑀮𑀓𑀢𑀭𑁄, 𑀇𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀢𑀯 𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀦𑀺 𑀘𑁂𑀯 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫, 𑀑𑀯𑀸𑀤𑁂 𑀘 𑀢𑁂 𑀞𑀲𑁆𑀲𑀸𑀫, 𑀢𑁆𑀯𑀁 𑀧𑀦 𑀇𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀺𑀢𑁆𑀢𑀺𑀭𑁄 𑀢𑁂𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺, 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀲𑀬𑀫𑁆𑀧𑀺 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺. 𑀢𑁂 𑀢𑀬𑁄𑀧𑀺 𑀚𑀦𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑀼𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀫𑀸𑀤𑀸𑀦𑀁 𑀢𑀺𑀢𑁆𑀢𑀺𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀅𑀳𑁄𑀲𑀺.

𑀢𑁂 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀯𑀺𑀳𑀭𑀺𑀁𑀲𑀼, 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑀢𑀺𑀲𑁆𑀲𑀸 𑀯𑀺𑀳𑀭𑀣. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀬𑀣𑀸𑀯𑀼𑀟𑁆𑀠𑀁 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁, 𑀦 𑀇𑀢𑁄 𑀧𑀝𑁆𑀞𑀸𑀬 𑀘 𑀦𑀯𑀓𑀢𑀭𑁂𑀦 𑀯𑀼𑀟𑁆𑀠𑀢𑀭𑁄 𑀲𑁂𑀦𑀸𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑁄, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁭. ‘‘𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻’’𑀢𑀺.

𑀢𑀢𑁆𑀣 𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀻𑀢𑀺 𑀚𑀸𑀢𑀺𑀯𑀼𑀟𑁆𑀠𑁄, 𑀯𑀬𑁄𑀯𑀼𑀟𑁆𑀠𑁄, 𑀕𑀼𑀡𑀯𑀼𑀟𑁆𑀠𑁄𑀢𑀺 𑀢𑀬𑁄 𑀯𑀼𑀟𑁆𑀠𑀸. 𑀢𑁂𑀲𑀼 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀚𑀸𑀢𑀺𑀯𑀼𑀟𑁆𑀠𑁄 𑀦𑀸𑀫, 𑀯𑀬𑁂 𑀞𑀺𑀢𑁄 𑀯𑀬𑁄𑀯𑀼𑀟𑁆𑀠𑁄 𑀦𑀸𑀫, 𑀕𑀼𑀡𑀲𑀫𑁆𑀧𑀦𑁆𑀦𑁄 𑀕𑀼𑀡𑀯𑀼𑀟𑁆𑀠𑁄 𑀦𑀸𑀫. 𑀢𑁂𑀲𑀼 𑀕𑀼𑀡𑀲𑀫𑁆𑀧𑀦𑁆𑀦𑁄 𑀯𑀬𑁄𑀯𑀼𑀟𑁆𑀠𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀯𑀼𑀟𑁆𑀠𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀧𑀘𑀸𑀬𑀦𑁆𑀢𑀻𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑁂𑀦 𑀧𑀽𑀚𑁂𑀦𑁆𑀢𑀺. 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 𑀓𑀼𑀲𑀮𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀸𑀭𑀳𑀸. 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻𑀢𑀺 𑀲𑀫𑁆𑀧𑀭𑁂𑀢𑀩𑁆𑀩𑁂 𑀇𑀫𑀁 𑀮𑁄𑀓𑀁 𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑁂 𑀧𑀭𑀮𑁄𑀓𑁂𑀧𑀺 𑀢𑁂𑀲𑀁 𑀲𑀼𑀕𑀢𑀺𑀬𑁂𑀯 𑀳𑁄𑀢𑀻𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀔𑀢𑁆𑀢𑀺𑀬𑀸 𑀯𑀸 𑀳𑁄𑀦𑁆𑀢𑀼 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑁂𑀲𑁆𑀲𑀸 𑀯𑀸 𑀲𑀼𑀤𑁆𑀤𑀸 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀯𑀸, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀫𑁆𑀫𑁂 𑀙𑁂𑀓𑀸 𑀓𑀼𑀲𑀮𑀸 𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀸𑀭𑀓𑀸𑀢𑀺 𑀧𑀲𑀁𑀲𑀁 𑀯𑀡𑁆𑀡𑀦𑀁 𑀣𑁄𑀫𑀦𑀁 𑀮𑀪𑀦𑁆𑀢𑀺, 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺.

𑀏𑀯𑀁 𑀲𑀢𑁆𑀣𑀸 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀫𑁆𑀫𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀳𑀢𑁆𑀣𑀺𑀦𑀸𑀕𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀳𑁄𑀲𑀺, 𑀫𑀓𑁆𑀓𑀝𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀺𑀢𑁆𑀢𑀺𑀭𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁮] 𑁮. 𑀩𑀓𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀘𑁆𑀘𑀦𑁆𑀢𑀁 𑀦𑀺𑀓𑀢𑀺𑀧𑁆𑀧𑀜𑁆𑀜𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀻𑀯𑀭𑀯𑀟𑁆𑀠𑀓𑀁 𑀪𑀺𑀓𑁆𑀔𑀼 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀚𑁂𑀢𑀯𑀦𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀁𑀓𑀺𑀜𑁆𑀘𑀺 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀁 𑀙𑁂𑀤𑀦𑀖𑀝𑁆𑀝𑀦𑀯𑀺𑀘𑀸𑀭𑀡𑀲𑀺𑀩𑁆𑀩𑀦𑀸𑀤𑀺𑀓𑀁 𑀓𑀫𑁆𑀫𑀁, 𑀢𑀢𑁆𑀣 𑀲𑀼𑀓𑀼𑀲𑀮𑁄. 𑀲𑁄 𑀢𑀸𑀬 𑀓𑀼𑀲𑀮𑀢𑀸𑀬 𑀘𑀻𑀯𑀭𑀁 𑀯𑀟𑁆𑀠𑁂𑀢𑀺, 𑀢𑀲𑁆𑀫𑀸 ‘‘𑀘𑀻𑀯𑀭𑀯𑀟𑁆𑀠𑀓𑁄’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀓𑀺𑀁 𑀧𑀦𑁂𑀲 𑀓𑀭𑁄𑀢𑀻𑀢𑀺? 𑀚𑀺𑀡𑁆𑀡𑀧𑀺𑀮𑁄𑀢𑀺𑀓𑀸𑀲𑀼 𑀳𑀢𑁆𑀣𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀨𑀲𑁆𑀲𑀺𑀓𑀁 𑀫𑀦𑀸𑀧𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀭𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀺𑀝𑁆𑀞𑁄𑀤𑀓𑁂𑀦 𑀭𑀚𑀺𑀢𑁆𑀯𑀸 𑀲𑀗𑁆𑀔𑁂𑀦 𑀖𑀁𑀲𑀺𑀢𑁆𑀯𑀸 𑀉𑀚𑁆𑀚𑀮𑀁 𑀫𑀦𑀼𑀜𑁆𑀜𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑀺. 𑀘𑀻𑀯𑀭𑀓𑀫𑁆𑀫𑀁 𑀓𑀸𑀢𑀼𑀁 𑀅𑀚𑀸𑀦𑀦𑁆𑀢𑀸 𑀪𑀺𑀓𑁆𑀔𑀽 𑀅𑀳𑀢𑁂 𑀲𑀸𑀝𑀓𑁂 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀫𑀬𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀦 𑀚𑀸𑀦𑀸𑀫, 𑀘𑀻𑀯𑀭𑀁 𑀦𑁄 𑀓𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 ‘‘𑀘𑀻𑀯𑀭𑀁 𑀆𑀯𑀼𑀲𑁄 𑀓𑀭𑀺𑀬𑀫𑀸𑀦𑀁 𑀘𑀺𑀭𑁂𑀦 𑀦𑀺𑀝𑁆𑀞𑀸𑀢𑀺, 𑀫𑀬𑀸 𑀓𑀢𑀘𑀻𑀯𑀭𑀫𑁂𑀯 𑀅𑀢𑁆𑀣𑀺, 𑀇𑀫𑁂 𑀲𑀸𑀝𑀓𑁂 𑀞𑀧𑁂𑀢𑁆𑀯𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑁂 𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀫𑁂𑀯 𑀤𑀺𑀲𑁆𑀯𑀸 𑀅𑀦𑁆𑀢𑀭𑀁 𑀅𑀚𑀸𑀦𑀦𑁆𑀢𑀸 ‘‘𑀣𑀺𑀭’’𑀦𑁆𑀢𑀺 𑀲𑀜𑁆𑀜𑀸𑀬 𑀅𑀳𑀢𑀲𑀸𑀝𑀓𑁂 𑀘𑀻𑀯𑀭𑀯𑀟𑁆𑀠𑀓𑀲𑁆𑀲 𑀤𑀢𑁆𑀯𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀁 𑀢𑁂𑀳𑀺 𑀣𑁄𑀓𑀁 𑀓𑀺𑀮𑀺𑀝𑁆𑀞𑀓𑀸𑀮𑁂 𑀉𑀡𑁆𑀳𑁄𑀤𑀓𑁂𑀦 𑀥𑁄𑀯𑀺𑀬𑀫𑀸𑀦𑀁 𑀅𑀢𑁆𑀢𑀦𑁄 𑀧𑀓𑀢𑀺𑀁 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀢𑀢𑁆𑀣 𑀚𑀺𑀡𑁆𑀡𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀏𑀯𑀁 𑀆𑀕𑀢𑀸𑀕𑀢𑁂 𑀧𑀺𑀮𑁄𑀢𑀺𑀓𑀸𑀳𑀺 𑀯𑀜𑁆𑀘𑁂𑀦𑁆𑀢𑁄 𑀲𑁄 𑀪𑀺𑀓𑁆𑀔𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄 𑀚𑀸𑀢𑁄.

𑀬𑀣𑀸 𑀘𑁂𑀲 𑀚𑁂𑀢𑀯𑀦𑁂, 𑀢𑀣𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂𑀧𑀺 𑀏𑀓𑁄 𑀘𑀻𑀯𑀭𑀯𑀟𑁆𑀠𑀓𑁄 𑀮𑁄𑀓𑀁 𑀯𑀜𑁆𑀘𑁂𑀢𑀺. 𑀢𑀲𑁆𑀲 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 ‘‘𑀪𑀦𑁆𑀢𑁂, 𑀚𑁂𑀢𑀯𑀦𑁂 𑀓𑀺𑀭 𑀏𑀓𑁄 𑀘𑀻𑀯𑀭𑀯𑀟𑁆𑀠𑀓𑁄 𑀏𑀯𑀁 𑀮𑁄𑀓𑀁 𑀯𑀜𑁆𑀘𑁂𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀳𑀦𑁆𑀤𑀸𑀳𑀁, 𑀢𑀁 𑀦𑀕𑀭𑀯𑀸𑀲𑀺𑀓𑀁 𑀯𑀜𑁆𑀘𑁂𑀫𑀻’’𑀢𑀺 𑀧𑀺𑀮𑁄𑀢𑀺𑀓𑀘𑀻𑀯𑀭𑀁 𑀅𑀢𑀺𑀫𑀦𑀸𑀧𑀁 𑀓𑀢𑁆𑀯𑀸 𑀲𑀼𑀭𑀢𑁆𑀢𑀁 𑀭𑀚𑀺𑀢𑁆𑀯𑀸 𑀢𑀁 𑀧𑀸𑀭𑀼𑀧𑀺𑀢𑁆𑀯𑀸 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀇𑀢𑀭𑁄 𑀢𑀁 𑀤𑀺𑀲𑁆𑀯𑀸𑀯 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀘𑀻𑀯𑀭𑀁 𑀢𑀼𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀪𑀦𑁆𑀢𑁂, 𑀇𑀫𑀁 𑀘𑀻𑀯𑀭𑀁 𑀫𑀬𑁆𑀳𑀁 𑀤𑁂𑀣, 𑀢𑀼𑀫𑁆𑀳𑁂 𑀅𑀜𑁆𑀜𑀁 𑀮𑀪𑀺𑀲𑁆𑀲𑀣𑀸’’𑀢𑀺? ‘‘𑀆𑀯𑀼𑀲𑁄, 𑀫𑀬𑀁 𑀕𑀸𑀫𑀯𑀸𑀲𑀺𑀓𑀸 𑀤𑀼𑀮𑁆𑀮𑀪𑀧𑀘𑁆𑀘𑀬𑀸, 𑀇𑀫𑀸𑀳𑀁 𑀢𑀼𑀬𑁆𑀳𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀓𑀺𑀁 𑀧𑀸𑀭𑀼𑀧𑀺𑀲𑁆𑀲𑀸𑀫𑀻’’𑀢𑀺? ‘‘𑀪𑀦𑁆𑀢𑁂, 𑀫𑀫 𑀲𑀦𑁆𑀢𑀺𑀓𑁂 𑀅𑀳𑀢𑀲𑀸𑀝𑀓𑀸 𑀅𑀢𑁆𑀣𑀺, 𑀢𑁂 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀓𑀭𑁄𑀣𑀸’’𑀢𑀺. ‘‘𑀆𑀯𑀼𑀲𑁄, 𑀫𑀬𑀸 𑀏𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀤𑀲𑁆𑀲𑀺𑀢𑀁, 𑀢𑀬𑀺 𑀧𑀦 𑀏𑀯𑀁 𑀯𑀤𑀦𑁆𑀢𑁂 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀁, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀢𑀲𑁆𑀲 𑀧𑀺𑀮𑁄𑀢𑀺𑀓𑀘𑀻𑀯𑀭𑀁 𑀤𑀢𑁆𑀯𑀸 𑀅𑀳𑀢𑀲𑀸𑀝𑀓𑁂 𑀆𑀤𑀸𑀬 𑀢𑀁 𑀯𑀜𑁆𑀘𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀚𑁂𑀢𑀯𑀦𑀯𑀸𑀲𑀺𑀓𑁄𑀧𑀺 𑀢𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀉𑀡𑁆𑀳𑁄𑀤𑀓𑁂𑀦 𑀥𑁄𑀯𑀦𑁆𑀢𑁄 𑀚𑀺𑀡𑁆𑀡𑀧𑀺𑀮𑁄𑀢𑀺𑀓𑀪𑀸𑀯𑀁 𑀤𑀺𑀲𑁆𑀯𑀸 𑀮𑀚𑁆𑀚𑀺𑀢𑁄 ‘‘𑀕𑀸𑀫𑀯𑀸𑀲𑀺𑀘𑀻𑀯𑀭𑀯𑀟𑁆𑀠𑀓𑁂𑀦 𑀓𑀺𑀭 𑀚𑁂𑀢𑀯𑀦𑀯𑀸𑀲𑀺𑀓𑁄 𑀯𑀜𑁆𑀘𑀺𑀢𑁄’’𑀢𑀺 𑀢𑀲𑁆𑀲 𑀯𑀜𑁆𑀘𑀺𑀢𑀪𑀸𑀯𑁄 𑀲𑀗𑁆𑀖𑀫𑀚𑁆𑀛𑁂 𑀧𑀸𑀓𑀝𑁄 𑀚𑀸𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀢𑀁 𑀓𑀣𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀚𑁂𑀢𑀯𑀦𑀯𑀸𑀲𑀻 𑀘𑀻𑀯𑀭𑀯𑀟𑁆𑀠𑀓𑁄 𑀇𑀤𑀸𑀦𑁂𑀯 𑀅𑀜𑁆𑀜𑁂 𑀯𑀜𑁆𑀘𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀯𑀜𑁆𑀘𑁂𑀲𑀺𑀬𑁂𑀯. 𑀦 𑀕𑀸𑀫𑀯𑀸𑀲𑀺𑀓𑁂𑀦𑀸𑀧𑀺 𑀇𑀤𑀸𑀦𑁂𑀯 𑀏𑀲 𑀚𑁂𑀢𑀯𑀦𑀯𑀸𑀲𑀻 𑀘𑀻𑀯𑀭𑀯𑀟𑁆𑀠𑀓𑁄 𑀯𑀜𑁆𑀘𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀯𑀜𑁆𑀘𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀁 𑀧𑀤𑀼𑀫𑀲𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑁂 𑀯𑀭𑀡𑀭𑀼𑀓𑁆𑀔𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀸𑀢𑀺𑀫𑀳𑀦𑁆𑀢𑁂 𑀲𑀭𑁂 𑀦𑀺𑀤𑀸𑀖𑀲𑀫𑀬𑁂 𑀉𑀤𑀓𑀁 𑀫𑀦𑁆𑀤𑀁 𑀅𑀳𑁄𑀲𑀺, 𑀩𑀳𑀽 𑀘𑁂𑀢𑁆𑀣 𑀫𑀘𑁆𑀙𑀸 𑀳𑁄𑀦𑁆𑀢𑀺. 𑀅𑀣𑁂𑀓𑁄 𑀩𑀓𑁄 𑀢𑁂 𑀫𑀘𑁆𑀙𑁂 𑀤𑀺𑀲𑁆𑀯𑀸 ‘‘𑀏𑀓𑁂𑀦 𑀉𑀧𑀸𑀬𑁂𑀦 𑀇𑀫𑁂 𑀫𑀘𑁆𑀙𑁂 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀉𑀤𑀓𑀧𑀭𑀺𑀬𑀦𑁆𑀢𑁂 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀫𑀘𑁆𑀙𑀸 𑀤𑀺𑀲𑁆𑀯𑀸 ‘‘𑀓𑀺𑀁, 𑀅𑀬𑁆𑀬, 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀢𑀼𑀫𑁆𑀳𑀸𑀓𑀁 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀻’’𑀢𑀺. ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀘𑀺𑀦𑁆𑀢𑁂𑀲𑀺, 𑀅𑀬𑁆𑀬𑀸’’𑀢𑀺? ‘‘‘𑀇𑀫𑀲𑁆𑀫𑀺𑀁 𑀲𑀭𑁂 𑀉𑀤𑀓𑀁 𑀧𑀭𑀺𑀢𑁆𑀢𑀁, 𑀕𑁄𑀘𑀭𑁄 𑀫𑀦𑁆𑀤𑁄, 𑀦𑀺𑀤𑀸𑀖𑁄 𑀘 𑀫𑀳𑀦𑁆𑀢𑁄, 𑀇𑀤𑀸𑀦𑀺𑀫𑁂 𑀫𑀘𑁆𑀙𑀸 𑀓𑀺𑀁 𑀦𑀸𑀫 𑀓𑀭𑀺𑀲𑁆𑀲𑀦𑁆𑀢𑀻’𑀢𑀺 𑀢𑀼𑀫𑁆𑀳𑀸𑀓𑀁 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀻’’𑀢𑀺. ‘‘𑀅𑀣 𑀓𑀺𑀁 𑀓𑀭𑁄𑀫, 𑀅𑀬𑁆𑀬𑀸’’𑀢𑀺? ‘‘𑀢𑀼𑀫𑁆𑀳𑁂 𑀲𑀘𑁂 𑀫𑀬𑁆𑀳𑀁 𑀯𑀘𑀦𑀁 𑀓𑀭𑁂𑀬𑁆𑀬𑀸𑀣, 𑀅𑀳𑀁 𑀯𑁄 𑀏𑀓𑁂𑀓𑀁 𑀫𑀼𑀔𑀢𑀼𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸 𑀏𑀓𑀁 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀫𑀳𑀸𑀲𑀭𑀁 𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. ‘‘𑀅𑀬𑁆𑀬, 𑀧𑀞𑀫𑀓𑀧𑁆𑀧𑀺𑀓𑀢𑁄 𑀧𑀝𑁆𑀞𑀸𑀬 𑀫𑀘𑁆𑀙𑀸𑀦𑀁 𑀘𑀺𑀦𑁆𑀢𑀦𑀓𑀩𑀓𑁄 𑀦𑀸𑀫 𑀦𑀢𑁆𑀣𑀺, 𑀢𑁆𑀯𑀁 𑀅𑀫𑁆𑀳𑁂𑀲𑀼 𑀏𑀓𑁂𑀓𑀁 𑀔𑀸𑀤𑀺𑀢𑀼𑀓𑀸𑀫𑁄𑀲𑀻’’𑀢𑀺. ‘‘𑀦𑀸𑀳𑀁 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀲𑀤𑁆𑀤𑀳𑀦𑁆𑀢𑁂 𑀔𑀸𑀤𑀺𑀲𑁆𑀲𑀸𑀫𑀺’’. ‘‘𑀲𑀘𑁂 𑀧𑀦 𑀲𑀭𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀫𑀬𑁆𑀳𑀁 𑀦 𑀲𑀤𑁆𑀤𑀳𑀣, 𑀏𑀓𑀁 𑀫𑀘𑁆𑀙𑀁 𑀫𑀬𑀸 𑀲𑀤𑁆𑀥𑀺𑀁 𑀲𑀭𑀁 𑀧𑀲𑁆𑀲𑀺𑀢𑀼𑀁 𑀧𑁂𑀲𑁂𑀣𑀸’’𑀢𑀺. 𑀫𑀘𑁆𑀙𑀸 𑀢𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀅𑀬𑀁 𑀚𑀮𑁂𑀧𑀺 𑀣𑀮𑁂𑀧𑀺 𑀲𑀫𑀢𑁆𑀣𑁄’’𑀢𑀺 𑀏𑀓𑀁 𑀓𑀸𑀴𑀫𑀳𑀸𑀫𑀘𑁆𑀙𑀁 𑀅𑀤𑀁𑀲𑀼 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀦𑁂𑀢𑁆𑀯𑀸 𑀲𑀭𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀁 𑀲𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀢𑁂𑀲𑀁 𑀫𑀘𑁆𑀙𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑁂𑀲𑀁 𑀫𑀘𑁆𑀙𑀸𑀦𑀁 𑀲𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀲𑀺. 𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 ‘‘𑀲𑀸𑀥𑀼, 𑀅𑀬𑁆𑀬, 𑀅𑀫𑁆𑀳𑁂 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺 𑀆𑀳𑀁𑀲𑀼.

𑀩𑀓𑁄 𑀧𑀞𑀫𑀁 𑀢𑀁 𑀓𑀸𑀴𑀫𑀳𑀸𑀫𑀘𑁆𑀙𑀫𑁂𑀯 𑀕𑀳𑁂𑀢𑁆𑀯𑀸 𑀲𑀭𑀢𑀻𑀭𑀁 𑀦𑁂𑀢𑁆𑀯𑀸 𑀲𑀭𑀁 𑀤𑀲𑁆𑀲𑁂𑀢𑁆𑀯𑀸 𑀲𑀭𑀢𑀻𑀭𑁂 𑀚𑀸𑀢𑁂 𑀯𑀭𑀡𑀭𑀼𑀓𑁆𑀔𑁂 𑀦𑀺𑀮𑀻𑀬𑀺𑀢𑁆𑀯𑀸 𑀢𑀁 𑀯𑀺𑀝𑀧𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀼𑀡𑁆𑀟𑁂𑀦 𑀯𑀺𑀚𑁆𑀛𑀦𑁆𑀢𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀓𑀡𑁆𑀝𑀓𑁂 𑀭𑀼𑀓𑁆𑀔𑀫𑀽𑀮𑁂 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 ‘‘𑀯𑀺𑀲𑁆𑀲𑀝𑁆𑀞𑁄, 𑀫𑁂 𑀲𑁄 𑀫𑀘𑁆𑀙𑁄, 𑀅𑀜𑁆𑀜𑁄 𑀆𑀕𑀘𑁆𑀙𑀢𑀽’’𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀏𑀓𑁂𑀓𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀫𑀘𑁆𑀙𑁂 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀆𑀕𑀢𑁄 𑀏𑀓𑀁 𑀫𑀘𑁆𑀙𑀫𑁆𑀧𑀺 𑀦𑀸𑀤𑁆𑀤𑀲. 𑀏𑀓𑁄 𑀧𑀦𑁂𑀢𑁆𑀣 𑀓𑀓𑁆𑀓𑀝𑀓𑁄 𑀅𑀯𑀲𑀺𑀝𑁆𑀞𑁄. 𑀩𑀓𑁄 𑀢𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀪𑁄, 𑀓𑀓𑁆𑀓𑀝𑀓, 𑀫𑀬𑀸 𑀲𑀩𑁆𑀩𑁂𑀢𑁂 𑀫𑀘𑁆𑀙𑀸 𑀦𑁂𑀢𑁆𑀯𑀸 𑀧𑀤𑀼𑀫𑀲𑀜𑁆𑀙𑀦𑁆𑀦𑁂 𑀫𑀳𑀸𑀲𑀭𑁂 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀏𑀳𑀺 𑀢𑀫𑁆𑀧𑀺 𑀦𑁂𑀲𑁆𑀲𑀸𑀫𑀻’’𑀢𑀺. ‘‘𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀓𑀣𑀁 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺? ‘‘𑀟𑀁𑀲𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁆𑀯𑀁 𑀏𑀯𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀫𑀁 𑀧𑀸𑀢𑁂𑀲𑁆𑀲𑀲𑀺, 𑀦𑀸𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀸 𑀪𑀸𑀬𑀺, 𑀅𑀳𑀁 𑀢𑀁 𑀲𑀼𑀕𑁆𑀕𑀳𑀺𑀢𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀓𑀓𑁆𑀓𑀝𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀲 𑀫𑀘𑁆𑀙𑁂 𑀦𑁂𑀢𑁆𑀯𑀸 𑀲𑀭𑁂 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀘𑁂 𑀧𑀦 𑀫𑀁 𑀲𑀭𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀕𑀻𑀯𑀫𑀲𑁆𑀲 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀦𑀁 𑀏𑀯𑀫𑀸𑀳 ‘‘𑀲𑀫𑁆𑀫 𑀩𑀓, 𑀦 𑀔𑁄 𑀢𑁆𑀯𑀁 𑀲𑀼𑀕𑁆𑀕𑀳𑀺𑀢𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀅𑀫𑁆𑀳𑀸𑀓𑀁 𑀧𑀦 𑀕𑀳𑀡𑀁 𑀲𑀼𑀕𑁆𑀕𑀳𑀡𑀁, 𑀲𑀘𑀸𑀳𑀁 𑀅𑀴𑁂𑀳𑀺 𑀢𑀯 𑀕𑀻𑀯𑀁 𑀕𑀳𑁂𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀢𑀯 𑀕𑀻𑀯𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀢𑀬𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 ‘‘𑀯𑀜𑁆𑀘𑁂𑀢𑀼𑀓𑀸𑀫𑁄 𑀏𑀲 𑀫’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀓𑀓𑁆𑀓𑀝𑀓𑁄 𑀅𑀢𑁆𑀢𑀦𑁄 𑀅𑀴𑁂𑀳𑀺 𑀓𑀫𑁆𑀫𑀸𑀭𑀲𑀡𑁆𑀟𑀸𑀲𑁂𑀦 𑀯𑀺𑀬 𑀢𑀲𑁆𑀲 𑀕𑀻𑀯𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 ‘‘𑀇𑀤𑀸𑀦𑀺 𑀕𑀘𑁆𑀙𑀸’’𑀢𑀺 𑀆𑀳. 𑀲𑁄 𑀢𑀁 𑀦𑁂𑀢𑁆𑀯𑀸 𑀲𑀭𑀁 𑀤𑀲𑁆𑀲𑁂𑀢𑁆𑀯𑀸 𑀯𑀭𑀡𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀓𑀓𑁆𑀓𑀝𑀓𑁄 𑀆𑀳 ‘‘𑀫𑀸𑀢𑀼𑀮, 𑀅𑀬𑀁 𑀲𑀭𑁄 𑀏𑀢𑁆𑀢𑁄, 𑀢𑁆𑀯𑀁 𑀧𑀦 𑀇𑀢𑁄 𑀓𑀺𑀁 𑀦𑁂𑀲𑀻’’𑀢𑀺? 𑀩𑀓𑁄 ‘‘𑀦 𑀢𑁂 𑀫𑀸𑀢𑀼𑀮𑁄 𑀅𑀳𑀁, 𑀦 𑀪𑀕𑀺𑀦𑀺𑀧𑀼𑀢𑁆𑀢𑁄𑀲𑀺 𑀯𑀢 𑀫𑁂 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 ‘𑀏𑀲 𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀫𑀬𑁆𑀳𑀁 𑀤𑀸𑀲𑁄’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺 𑀫𑀜𑁆𑀜𑁂, 𑀧𑀲𑁆𑀲𑁂𑀢𑀁 𑀯𑀭𑀡𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀓𑀡𑁆𑀝𑀓𑀭𑀸𑀲𑀺𑀁, 𑀬𑀣𑀸 𑀫𑁂 𑀢𑁂 𑀲𑀩𑁆𑀩𑁂 𑀫𑀘𑁆𑀙𑀸 𑀔𑀸𑀤𑀺𑀢𑀸, 𑀢𑀫𑁆𑀧𑀺 𑀢𑀣𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀓𑀓𑁆𑀓𑀝𑀓𑁄 ‘‘𑀏𑀢𑁂 𑀫𑀘𑁆𑀙𑀸 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀢𑀬𑀸 𑀔𑀸𑀤𑀺𑀢𑀸, 𑀅𑀳𑀁 𑀧𑀦 𑀢𑁂 𑀫𑀁 𑀔𑀸𑀤𑀺𑀢𑀼𑀁 𑀦 𑀤𑀲𑁆𑀲𑀸𑀫𑀺, 𑀢𑀜𑁆𑀜𑁂𑀯 𑀧𑀦 𑀯𑀺𑀦𑀸𑀲𑀁 𑀧𑀸𑀧𑁂𑀲𑁆𑀲𑀸𑀫𑀺. 𑀢𑁆𑀯𑀜𑁆𑀳𑀺 𑀩𑀸𑀮𑀢𑀸𑀬 𑀫𑀬𑀸 𑀯𑀜𑁆𑀘𑀺𑀢𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀫𑀭𑀦𑁆𑀢𑀸 𑀉𑀪𑁄𑀧𑀺 𑀫𑀭𑀺𑀲𑁆𑀲𑀸𑀫, 𑀅𑀳𑀁 𑀢𑁂 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀓𑀫𑁆𑀫𑀸𑀭𑀲𑀡𑁆𑀟𑀸𑀲𑁂𑀦 𑀯𑀺𑀬 𑀅𑀴𑁂𑀳𑀺 𑀢𑀲𑁆𑀲 𑀕𑀻𑀯𑀁 𑀦𑀺𑀧𑁆𑀧𑀻𑀴𑁂𑀲𑀺. 𑀲𑁄 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀓𑁆𑀔𑀻𑀳𑀺 𑀅𑀲𑁆𑀲𑀼𑀦𑀸 𑀧𑀕𑁆𑀖𑀭𑀦𑁆𑀢𑁂𑀦 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 ‘‘𑀲𑀸𑀫𑀺, 𑀅𑀳𑀁 𑀢𑀁 𑀦 𑀔𑀸𑀤𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. ‘‘𑀬𑀤𑀺 𑀏𑀯𑀁 𑀑𑀢𑀭𑀺𑀢𑁆𑀯𑀸 𑀫𑀁 𑀲𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀭𑀫𑁂𑀯 𑀑𑀢𑀭𑀺𑀢𑁆𑀯𑀸 𑀓𑀓𑁆𑀓𑀝𑀓𑀁 𑀲𑀭𑀧𑀭𑀺𑀬𑀦𑁆𑀢𑁂 𑀧𑀗𑁆𑀓𑀧𑀺𑀝𑁆𑀞𑁂 𑀞𑀧𑁂𑀲𑀺, 𑀓𑀓𑁆𑀓𑀝𑀓𑁄 𑀓𑀢𑁆𑀢𑀭𑀺𑀓𑀸𑀬 𑀓𑀼𑀫𑀼𑀤𑀦𑀸𑀴𑀁 𑀓𑀧𑁆𑀧𑁂𑀦𑁆𑀢𑁄 𑀯𑀺𑀬 𑀢𑀲𑁆𑀲 𑀕𑀻𑀯𑀁 𑀓𑀧𑁆𑀧𑁂𑀢𑁆𑀯𑀸 𑀉𑀤𑀓𑀁 𑀧𑀸𑀯𑀺𑀲𑀺.

𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀯𑀭𑀡𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀦𑀁 𑀉𑀦𑁆𑀦𑀸𑀤𑀬𑀫𑀸𑀦𑀸 𑀫𑀥𑀼𑀭𑀲𑁆𑀲𑀭𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮. ‘‘𑀦𑀸𑀘𑁆𑀘𑀦𑁆𑀢𑀁 𑀦𑀺𑀓𑀢𑀺𑀧𑁆𑀧𑀜𑁆𑀜𑁄, 𑀦𑀺𑀓𑀢𑁆𑀬𑀸 𑀲𑀼𑀔𑀫𑁂𑀥𑀢𑀺;

𑀆𑀭𑀸𑀥𑁂𑀢𑀺 𑀦𑀺𑀓𑀢𑀺𑀧𑁆𑀧𑀜𑁆𑀜𑁄, 𑀩𑀓𑁄 𑀓𑀓𑁆𑀓𑀝𑀓𑀸𑀫𑀺𑀯𑀸’’𑀢𑀺.

𑀢𑀢𑁆𑀣 𑀦𑀸𑀘𑁆𑀘𑀦𑁆𑀢𑀁 𑀦𑀺𑀓𑀢𑀺𑀧𑁆𑀧𑀜𑁆𑀜𑁄, 𑀦𑀺𑀓𑀢𑁆𑀬𑀸 𑀲𑀼𑀔𑀫𑁂𑀥𑀢𑀻𑀢𑀺 𑀦𑀺𑀓𑀢𑀺 𑀯𑀼𑀘𑁆𑀘𑀢𑀺 𑀯𑀜𑁆𑀘𑀦𑀸, 𑀦𑀺𑀓𑀢𑀺𑀧𑁆𑀧𑀜𑁆𑀜𑁄 𑀯𑀜𑁆𑀘𑀦𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀸𑀬 𑀦𑀺𑀓𑀢𑁆𑀬𑀸 𑀦𑀺𑀓𑀢𑀺𑀬𑀸 𑀯𑀜𑁆𑀘𑀦𑀸𑀬 𑀦 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀺, 𑀦𑀺𑀘𑁆𑀘𑀓𑀸𑀮𑁂 𑀲𑀼𑀔𑀲𑁆𑀫𑀺𑀁𑀬𑁂𑀯 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀓𑀁𑀲𑁂𑀦 𑀧𑀦 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀭𑀸𑀥𑁂𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀦𑀺𑀓𑀢𑀺𑀧𑁆𑀧𑀜𑁆𑀜𑁄𑀢𑀺 𑀓𑁂𑀭𑀸𑀝𑀺𑀓𑀪𑀸𑀯𑀁 𑀲𑀺𑀓𑁆𑀔𑀺𑀢𑀧𑀜𑁆𑀜𑁄 𑀧𑀸𑀧𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀧𑀸𑀧𑀲𑁆𑀲 𑀨𑀮𑀁 𑀆𑀭𑀸𑀥𑁂𑀢𑀺 𑀧𑀝𑀺𑀮𑀪𑀢𑀺 𑀯𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁? 𑀩𑀓𑁄 𑀓𑀓𑁆𑀓𑀝𑀓𑀸𑀫𑀺𑀯, 𑀬𑀣𑀸 𑀩𑀓𑁄 𑀓𑀓𑁆𑀓𑀝𑀓𑀸 𑀕𑀻𑀯𑀘𑁆𑀙𑁂𑀤𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀧𑀸𑀧𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀸 𑀓𑀢𑀧𑀸𑀧𑀢𑁄 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀪𑀬𑀁 𑀆𑀭𑀸𑀥𑁂𑀢𑀺 𑀧𑀝𑀺𑀮𑀪𑀢𑀻𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀯𑀦𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀕𑀸𑀫𑀯𑀸𑀲𑀺𑀘𑀻𑀯𑀭𑀯𑀟𑁆𑀠𑀓𑁂𑀦𑁂𑀲 𑀯𑀜𑁆𑀘𑀺𑀢𑁄, 𑀅𑀢𑀻𑀢𑁂𑀧𑀺 𑀯𑀜𑁆𑀘𑀺𑀢𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁄 𑀩𑀓𑁄 𑀚𑁂𑀢𑀯𑀦𑀯𑀸𑀲𑀻 𑀘𑀻𑀯𑀭𑀯𑀟𑁆𑀠𑀓𑁄 𑀅𑀳𑁄𑀲𑀺, 𑀓𑀓𑁆𑀓𑀝𑀓𑁄 𑀕𑀸𑀫𑀯𑀸𑀲𑀻 𑀘𑀻𑀯𑀭𑀯𑀟𑁆𑀠𑀓𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀓𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁯] 𑁯. 𑀦𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀫𑀜𑁆𑀜𑁂 𑀲𑁄𑀯𑀡𑁆𑀡𑀬𑁄 𑀭𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀼𑀩𑁆𑀩𑀘𑁄 𑀅𑀳𑁄𑀲𑀺 𑀯𑀘𑀦𑀓𑁆𑀔𑀫𑁄, 𑀣𑁂𑀭𑀲𑁆𑀲 𑀫𑀳𑀦𑁆𑀢𑁂𑀦𑀼𑀲𑁆𑀲𑀸𑀳𑁂𑀦 𑀉𑀧𑀓𑀸𑀭𑀁 𑀓𑀭𑁄𑀢𑀺. 𑀅𑀣𑁂𑀓𑀁 𑀲𑀫𑀬𑀁 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀕𑀢𑀓𑀸𑀮𑁂 𑀫𑀸𑀦𑀢𑁆𑀣𑀤𑁆𑀥𑁄 𑀳𑀼𑀢𑁆𑀯𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀦 𑀓𑀭𑁄𑀢𑀺 ‘‘𑀆𑀯𑀼𑀲𑁄, 𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀣𑁂𑀭𑀲𑁆𑀲 𑀧𑀝𑀺𑀧𑀓𑁆𑀔𑁄 𑀳𑁄𑀢𑀺. 𑀣𑁂𑀭𑁄 𑀢𑀲𑁆𑀲 𑀆𑀲𑀬𑀁 𑀦 𑀚𑀸𑀦𑀸𑀢𑀺. 𑀲𑁄 𑀢𑀢𑁆𑀣 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀚𑁂𑀢𑀯𑀦𑀁 𑀆𑀕𑀢𑁄. 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀲𑁆𑀲 𑀚𑁂𑀢𑀯𑀦𑀯𑀺𑀳𑀸𑀭𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀢𑀸𑀤𑀺𑀲𑁄𑀯 𑀚𑀸𑀢𑁄. 𑀣𑁂𑀭𑁄 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀏𑀓𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀢𑁂𑀦 𑀓𑀻𑀢𑀤𑀸𑀲𑁄 𑀯𑀺𑀬 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀫𑀸𑀦𑀢𑁆𑀣𑀤𑁆𑀥𑁄 𑀳𑀼𑀢𑁆𑀯𑀸 ‘𑀇𑀤𑀁 𑀦𑀸𑀫 𑀓𑀭𑁄𑀳𑀻’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀧𑀓𑁆𑀔𑁄 𑀳𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦𑀸𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀏𑀯𑀁𑀲𑀻𑀮𑁄, 𑀧𑀼𑀩𑁆𑀩𑁂𑀧𑁂𑀲 𑀏𑀓𑀁 𑀞𑀸𑀦𑀁 𑀕𑀢𑁄 𑀲𑀢𑁂𑀦 𑀓𑀻𑀢𑀤𑀸𑀲𑁄 𑀯𑀺𑀬 𑀳𑁄𑀢𑀺. 𑀏𑀓𑀁 𑀞𑀸𑀦𑀁 𑀕𑀢𑁄 𑀧𑀝𑀺𑀧𑀓𑁆𑀔𑁄 𑀧𑀝𑀺𑀲𑀢𑁆𑀢𑀼 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲𑁂𑀓𑁄 𑀲𑀳𑀸𑀬𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀲𑀬𑀁 𑀫𑀳𑀮𑁆𑀮𑀓𑁄, 𑀪𑀭𑀺𑀬𑀸 𑀧𑀦𑀲𑁆𑀲 𑀢𑀭𑀼𑀡𑀻. 𑀲𑀸 𑀢𑀁 𑀦𑀺𑀲𑁆𑀲𑀸𑀬 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀇𑀢𑁆𑀣𑀻 𑀢𑀭𑀼𑀡𑀢𑁆𑀢𑀸 𑀫𑀫𑀘𑁆𑀘𑀬𑁂𑀦 𑀓𑀜𑁆𑀘𑀺𑀤𑁂𑀯 𑀧𑀼𑀭𑀺𑀲𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀥𑀦𑀁 𑀯𑀺𑀦𑀸𑀲𑁂𑀬𑁆𑀬, 𑀧𑀼𑀢𑁆𑀢𑀲𑁆𑀲 𑀫𑁂 𑀦 𑀤𑀤𑁂𑀬𑁆𑀬, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀥𑀦𑀁 𑀧𑀣𑀯𑀺𑀕𑀢𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀖𑀭𑁂 𑀦𑀦𑁆𑀤𑀁 𑀦𑀸𑀫 𑀤𑀸𑀲𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀢𑀁 𑀥𑀦𑀁 𑀦𑀺𑀤𑀳𑀺𑀢𑁆𑀯𑀸 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀸𑀢, 𑀦𑀦𑁆𑀤, 𑀇𑀫𑀁 𑀥𑀦𑀁 𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, 𑀫𑀸 𑀘 𑀦𑀁 𑀧𑀭𑀺𑀘𑁆𑀘𑀚𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺.

𑀧𑀼𑀢𑁆𑀢𑁄𑀧𑀺𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀯𑀬𑀧𑁆𑀧𑀢𑁆𑀢𑁄 𑀚𑀸𑀢𑁄. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀢𑀯 𑀧𑀺𑀢𑀸 𑀦𑀦𑁆𑀤𑀁 𑀤𑀸𑀲𑀁 𑀕𑀳𑁂𑀢𑁆𑀯𑀸 𑀥𑀦𑀁 𑀦𑀺𑀥𑁂𑀲𑀺, 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀳𑀻’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀦𑁆𑀤𑀁 𑀆𑀳 𑁋 ‘‘𑀫𑀸𑀢𑀼𑀮, 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀫𑀬𑁆𑀳𑀁 𑀧𑀺𑀢𑀭𑀸 𑀥𑀦𑀁 𑀦𑀺𑀤𑀳𑀺𑀢’’𑀦𑁆𑀢𑀺. ‘‘𑀆𑀫, 𑀲𑀸𑀫𑀻’’𑀢𑀺. ‘‘𑀓𑀼𑀳𑀺𑀁 𑀢𑀁 𑀦𑀺𑀤𑀳𑀺𑀢’’𑀦𑁆𑀢𑀺. ‘‘𑀅𑀭𑀜𑁆𑀜𑁂, 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 𑀆𑀤𑀸𑀬 𑀦𑀺𑀥𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀫𑀸𑀢𑀼𑀮, 𑀥𑀦’’𑀦𑁆𑀢𑀺 𑀆𑀳. 𑀦𑀦𑁆𑀤𑁄 𑀆𑀭𑀼𑀬𑁆𑀳 𑀥𑀦𑀫𑀢𑁆𑀣𑀓𑁂 𑀞𑀢𑁆𑀯𑀸 𑀥𑀦𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀭𑁂 𑀤𑀸𑀲𑀺𑀧𑀼𑀢𑁆𑀢 𑀘𑁂𑀝𑀓, 𑀓𑀼𑀢𑁄 𑀢𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀥𑀦’’𑀦𑁆𑀢𑀺 𑀓𑀼𑀫𑀸𑀭𑀁 𑀅𑀓𑁆𑀓𑁄𑀲𑀢𑀺. 𑀓𑀼𑀫𑀸𑀭𑁄 𑀢𑀲𑁆𑀲 𑀨𑀭𑀼𑀲𑀯𑀘𑀦𑀁 𑀲𑀼𑀢𑁆𑀯𑀸 𑀅𑀲𑀼𑀡𑀦𑁆𑀢𑁄 𑀯𑀺𑀬 ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀕𑀫𑀸𑀲𑀺, 𑀦𑀦𑁆𑀤𑁄 𑀢𑀣𑁂𑀯 𑀅𑀓𑁆𑀓𑁄𑀲𑀢𑀺. 𑀓𑀼𑀫𑀸𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀨𑀭𑀼𑀲𑀯𑀘𑀦𑀁 𑀅𑀯𑀢𑁆𑀯𑀸𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀅𑀬𑀁 𑀤𑀸𑀲𑁄 𑀇𑀢𑁄 𑀧𑀝𑁆𑀞𑀸𑀬 ‘𑀥𑀦𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀕𑀘𑁆𑀙𑀢𑀺, 𑀕𑀦𑁆𑀢𑁆𑀯𑀸 𑀧𑀦 𑀫𑀁 𑀅𑀓𑁆𑀓𑁄𑀲𑀢𑀺, 𑀢𑀢𑁆𑀣 𑀓𑀸𑀭𑀡𑀁 𑀦 𑀚𑀸𑀦𑀸𑀫𑀺, 𑀅𑀢𑁆𑀣𑀺 𑀔𑁄 𑀧𑀦 𑀫𑁂 𑀧𑀺𑀢𑀼 𑀲𑀳𑀸𑀬𑁄 𑀓𑀼𑀝𑀼𑀫𑁆𑀩𑀺𑀓𑁄, 𑀢𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀢𑀸𑀢, 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀬𑀲𑁆𑀫𑀺𑀁 𑀢𑁂, 𑀢𑀸𑀢, 𑀞𑀸𑀦𑁂 𑀞𑀺𑀢𑁄 𑀦𑀦𑁆𑀤𑁄 𑀅𑀓𑁆𑀓𑁄𑀲𑀢𑀺, 𑀢𑀢𑁆𑀣𑁂𑀯 𑀢𑁂 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁, 𑀢𑀲𑁆𑀫𑀸 𑀬𑀤𑀸 𑀢𑁂 𑀦𑀦𑁆𑀤𑁄 𑀅𑀓𑁆𑀓𑁄𑀲𑀢𑀺, 𑀢𑀤𑀸 𑀦𑀁 ‘𑀏𑀳𑀺 𑀭𑁂 𑀤𑀸𑀲, 𑀓𑀺𑀁 𑀅𑀓𑁆𑀓𑁄𑀲𑀲𑀻’𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀦𑀻𑀳𑀭𑀺𑀢𑁆𑀯𑀸 𑀤𑀸𑀲𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀥𑀦𑀁 𑀆𑀳𑀭𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯. ‘‘𑀫𑀜𑁆𑀜𑁂 𑀲𑁄𑀯𑀡𑁆𑀡𑀬𑁄 𑀭𑀸𑀲𑀺, 𑀲𑁄𑀯𑀡𑁆𑀡𑀫𑀸𑀮𑀸 𑀘 𑀦𑀦𑁆𑀤𑀓𑁄;

𑀬𑀢𑁆𑀣 𑀤𑀸𑀲𑁄 𑀆𑀫𑀚𑀸𑀢𑁄, 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀕𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀫𑀜𑁆𑀜𑁂𑀢𑀺 𑀏𑀯𑀁 𑀅𑀳𑀁 𑀚𑀸𑀦𑀸𑀫𑀺. 𑀲𑁄𑀯𑀡𑁆𑀡𑀬𑁄𑀢𑀺 𑀲𑀼𑀦𑁆𑀤𑀭𑁄 𑀯𑀡𑁆𑀡𑁄 𑀏𑀢𑁂𑀲𑀦𑁆𑀢𑀺 𑀲𑁄𑀯𑀡𑁆𑀡𑀸𑀦𑀺. 𑀓𑀸𑀦𑀺 𑀢𑀸𑀦𑀺? 𑀭𑀚𑀢𑀫𑀡𑀺𑀓𑀜𑁆𑀘𑀦𑀧𑀯𑀸𑀴𑀸𑀤𑀻𑀦𑀺 𑀭𑀢𑀦𑀸𑀦𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀲𑀩𑁆𑀩𑀸𑀦𑁂𑀢𑀸𑀦𑀺 ‘‘𑀲𑀼𑀯𑀡𑁆𑀡𑀸𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀢𑁂𑀲𑀁 𑀭𑀸𑀲𑀺 𑀲𑁄𑀯𑀡𑁆𑀡𑀬𑁄 𑀭𑀸𑀲𑀺. 𑀲𑁄𑀯𑀡𑁆𑀡𑀫𑀸𑀮𑀸 𑀘𑀸𑀢𑀺 𑀢𑀼𑀬𑁆𑀳𑀁 𑀧𑀺𑀢𑀼𑀲𑀦𑁆𑀢𑀓𑀸 𑀲𑀼𑀯𑀡𑁆𑀡𑀫𑀸𑀮𑀸 𑀘 𑀏𑀢𑁆𑀣𑁂𑀯𑀸𑀢𑀺 𑀫𑀜𑁆𑀜𑀸𑀫𑀺. 𑀦𑀦𑁆𑀤𑀓𑁄 𑀬𑀢𑁆𑀣 𑀤𑀸𑀲𑁄𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄 𑀦𑀦𑁆𑀤𑀓𑁄 𑀤𑀸𑀲𑁄. 𑀆𑀫𑀚𑀸𑀢𑁄𑀢𑀺 ‘‘𑀆𑀫, 𑀅𑀳𑀁 𑀯𑁄 𑀤𑀸𑀲𑀻’’𑀢𑀺 𑀏𑀯𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑀸𑀬 𑀆𑀫𑀤𑀸𑀲𑀺𑀲𑀗𑁆𑀔𑀸𑀢𑀸𑀬 𑀤𑀸𑀲𑀺𑀬𑀸 𑀧𑀼𑀢𑁆𑀢𑁄. 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀕𑀚𑁆𑀚𑀢𑀻𑀢𑀺 ‘‘𑀲𑁄 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀨𑀭𑀼𑀲𑀯𑀘𑀦𑀸𑀦𑀺 𑀯𑀤𑀢𑀺, 𑀢𑀢𑁆𑀣𑁂𑀯 𑀢𑁂 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁, 𑀏𑀯𑀁 𑀅𑀳𑀁 𑀢𑀁 𑀫𑀜𑁆𑀜𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀓𑀼𑀫𑀸𑀭𑀲𑁆𑀲 𑀥𑀦𑀕𑁆𑀕𑀳𑀡𑀽𑀧𑀸𑀬𑀁 𑀆𑀘𑀺𑀓𑁆𑀔𑀺.

𑀓𑀼𑀫𑀸𑀭𑁄 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀦𑁆𑀤𑀁 𑀆𑀤𑀸𑀬 𑀦𑀺𑀥𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀁 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑁂𑀲 𑀏𑀯𑀁𑀲𑀻𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀦𑀦𑁆𑀤𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀓𑀼𑀝𑀼𑀫𑁆𑀩𑀺𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁦] 𑁧𑁦. 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀫𑀁 𑀧𑀢𑀸𑀫𑀺 𑀦𑀺𑀭𑀬𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀳𑀺 𑀯𑀺𑀳𑀸𑀭𑀫𑁂𑀯 𑀆𑀭𑀩𑁆𑀪 𑀘𑀢𑀼𑀧𑀜𑁆𑀜𑀸𑀲𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀺𑀓𑀺𑀭𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀅𑀜𑁆𑀜𑀢𑁆𑀣 𑀭𑀢𑀦𑀲𑀜𑁆𑀜𑀫𑁂𑀯 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀲𑀺𑀓𑀁 𑀢𑀻𑀡𑀺 𑀫𑀳𑀸𑀉𑀧𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀧𑀸𑀢𑁄𑀯 𑀏𑀓𑀯𑀸𑀭𑀁 𑀕𑀘𑁆𑀙𑀢𑀺, 𑀓𑀢𑀧𑀸𑀢𑀭𑀸𑀲𑁄 𑀏𑀓𑀯𑀸𑀭𑀁, 𑀲𑀸𑀬𑀦𑁆𑀳𑁂 𑀏𑀓𑀯𑀸𑀭𑀁. 𑀅𑀜𑁆𑀜𑀸𑀦𑀺𑀧𑀺 𑀅𑀦𑁆𑀢𑀭𑀦𑁆𑀢𑀭𑀼𑀧𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺𑀬𑁂𑀯. 𑀕𑀘𑁆𑀙𑀦𑁆𑀢𑁄 𑀘 ‘‘𑀓𑀺𑀁 𑀦𑀼 𑀔𑁄 𑀆𑀤𑀸𑀬 𑀆𑀕𑀢𑁄𑀢𑀺 𑀲𑀸𑀫𑀡𑁂𑀭𑀸 𑀯𑀸 𑀤𑀳𑀭𑀸 𑀯𑀸 𑀳𑀢𑁆𑀣𑀫𑁆𑀧𑀺 𑀫𑁂 𑀑𑀮𑁄𑀓𑁂𑀬𑁆𑀬𑀼’’𑀦𑁆𑀢𑀺 𑀢𑀼𑀘𑁆𑀙𑀳𑀢𑁆𑀣𑁄 𑀦𑀸𑀫 𑀦 𑀕𑀢𑀧𑀼𑀩𑁆𑀩𑁄. 𑀧𑀸𑀢𑁄𑀯 𑀕𑀘𑁆𑀙𑀦𑁆𑀢𑁄 𑀬𑀸𑀕𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀢𑀧𑀸𑀢𑀭𑀸𑀲𑁄 𑀲𑀧𑁆𑀧𑀺𑀦𑀯𑀦𑀻𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺𑀧𑀺, 𑀲𑀸𑀬𑀦𑁆𑀳𑀲𑀫𑀬𑁂 𑀕𑀦𑁆𑀥𑀫𑀸𑀮𑀸𑀯𑀢𑁆𑀣𑀸𑀤𑀺𑀳𑀢𑁆𑀣𑁄𑀢𑀺. 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀘𑁆𑀘𑀚𑀦𑁆𑀢𑀲𑁆𑀲 𑀧𑀦𑀲𑁆𑀲 𑀧𑀭𑀺𑀘𑁆𑀘𑀸𑀕𑁂 𑀧𑀫𑀸𑀡𑀁 𑀦𑀢𑁆𑀣𑀺.

𑀩𑀳𑀽 𑀯𑁄𑀳𑀸𑀭𑀽𑀧𑀚𑀻𑀯𑀺𑀦𑁄𑀧𑀺𑀲𑁆𑀲 𑀳𑀢𑁆𑀣𑀢𑁄 𑀧𑀡𑁆𑀡𑁂 𑀆𑀭𑁄𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀁 𑀇𑀡𑀁 𑀕𑀡𑁆𑀳𑀺𑀁𑀲𑀼, 𑀢𑁂 𑀫𑀳𑀸𑀲𑁂𑀝𑁆𑀞𑀺 𑀦 𑀆𑀳𑀭𑀸𑀧𑁂𑀢𑀺. 𑀅𑀜𑁆𑀜𑀸 𑀧𑀦𑀲𑁆𑀲 𑀓𑀼𑀮𑀲𑀦𑁆𑀢𑀓𑀸 𑀅𑀝𑁆𑀞𑀸𑀭𑀲 𑀓𑁄𑀝𑀺𑀬𑁄 𑀦𑀤𑀻𑀢𑀻𑀭𑁂 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸 𑀅𑀘𑀺𑀭𑀯𑀢𑁄𑀤𑀓𑁂𑀦 𑀦𑀤𑀻𑀓𑀽𑀮𑁂 𑀪𑀺𑀦𑁆𑀦𑁂 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀸, 𑀢𑀸 𑀬𑀣𑀸𑀧𑀺𑀳𑀺𑀢𑀮𑀜𑁆𑀙𑀺 𑀢𑀸𑀯 𑀮𑁄𑀳𑀘𑀸𑀝𑀺𑀬𑁄 𑀅𑀡𑁆𑀟𑀯𑀓𑀼𑀘𑁆𑀙𑀺𑀬𑀁 𑀧𑀯𑀝𑁆𑀝𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀕𑁂𑀳𑁂 𑀧𑀦𑀲𑁆𑀲 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀦𑀺𑀩𑀤𑁆𑀥𑀫𑁂𑀯 𑀳𑁄𑀢𑀺. 𑀲𑁂𑀝𑁆𑀞𑀺𑀦𑁄 𑀳𑀺 𑀕𑁂𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑀼𑀫𑀳𑀸𑀧𑀣𑁂 𑀔𑀢𑀧𑁄𑀓𑁆𑀔𑀭𑀡𑀺𑀲𑀤𑀺𑀲𑀁, 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀁. 𑀢𑁂𑀦𑀲𑁆𑀲 𑀖𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀕𑀘𑁆𑀙𑀢𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀧𑀺 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀲𑁂𑀲𑀪𑀺𑀓𑁆𑀔𑀽𑀦𑀁 𑀧𑀦 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀧𑀫𑀸𑀡𑀁 𑀦𑀢𑁆𑀣𑀺. 𑀢𑀁 𑀧𑀦 𑀖𑀭𑀁 𑀲𑀢𑁆𑀢𑀪𑀽𑀫𑀓𑀁 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀝𑀺𑀫𑀡𑁆𑀟𑀺𑀢𑀁, 𑀢𑀲𑁆𑀲 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀏𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀤𑁂𑀯𑀢𑀸 𑀯𑀲𑀢𑀺, 𑀲𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂 𑀅𑀢𑁆𑀢𑀦𑁄 𑀯𑀺𑀫𑀸𑀦𑁂 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀢𑀺𑀝𑁆𑀞𑀢𑀺. 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼𑀧𑀺 𑀅𑀯𑀲𑁂𑀲𑀢𑁆𑀣𑁂𑀭𑁂𑀲𑀼𑀧𑀺 𑀧𑀯𑀺𑀲𑀦𑁆𑀢𑁂𑀲𑀼 𑀘 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀘 𑀢𑀣𑁂𑀯 𑀓𑀭𑁄𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀫𑀡𑁂 𑀕𑁄𑀢𑀫𑁂 𑀘 𑀲𑀸𑀯𑀓𑁂𑀲𑀼 𑀘𑀲𑁆𑀲 𑀇𑀫𑀁 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂𑀲𑀼 𑀫𑀬𑁆𑀳𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀘𑁆𑀘𑀓𑀸𑀮𑀁 𑀑𑀢𑀭𑀺𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺. 𑀬𑀣𑀸 𑀇𑀫𑁂 𑀏𑀢𑀁 𑀖𑀭𑀁 𑀦 𑀧𑀯𑀺𑀲𑀦𑁆𑀢𑀺, 𑀢𑀣𑀸 𑀫𑀬𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀬𑀦𑀽𑀧𑀕𑀢𑀲𑁆𑀲𑁂𑀯 𑀫𑀳𑀸𑀓𑀫𑁆𑀫𑀦𑁆𑀢𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑁄 𑀏𑀢𑁆𑀣𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸’’𑀢𑀺 𑀆𑀳. ‘‘𑀓𑀲𑁆𑀫𑀸 𑀆𑀕𑀢𑀸𑀲𑀻’’𑀢𑀺? ‘‘𑀓𑀺𑀁 𑀢𑀼𑀫𑁆𑀳𑁂 𑀲𑁂𑀝𑁆𑀞𑀺𑀲𑁆𑀲 𑀓𑀺𑀭𑀺𑀬𑀁 𑀦 𑀧𑀲𑁆𑀲𑀣, 𑀅𑀢𑁆𑀢𑀦𑁄 𑀧𑀘𑁆𑀙𑀺𑀫𑀓𑀸𑀮𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀥𑀦𑀁 𑀦𑀻𑀳𑀭𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁𑀬𑁂𑀯 𑀧𑀽𑀚𑁂𑀢𑀺, 𑀦𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀦 𑀓𑀫𑁆𑀫𑀦𑁆𑀢𑁂 𑀧𑀝𑁆𑀞𑀧𑁂𑀢𑀺, 𑀢𑀼𑀫𑁆𑀳𑁂 𑀲𑁂𑀝𑁆𑀞𑀺𑀁 𑀢𑀣𑀸 𑀑𑀯𑀤𑀣, 𑀬𑀣𑀸 𑀅𑀢𑁆𑀢𑀦𑁄 𑀓𑀫𑁆𑀫𑀦𑁆𑀢𑀁 𑀓𑀭𑁄𑀢𑀺. 𑀬𑀣𑀸 𑀘 𑀲𑀫𑀡𑁄 𑀕𑁄𑀢𑀫𑁄 𑀲𑀲𑀸𑀯𑀓𑁄 𑀇𑀫𑀁 𑀖𑀭𑀁 𑀦 𑀧𑀯𑀺𑀲𑀢𑀺, 𑀢𑀣𑀸 𑀓𑀭𑁄𑀣𑀸’’𑀢𑀺. 𑀅𑀣 𑀦𑀁 𑀲𑁄 𑀆𑀳 ‘‘𑀩𑀸𑀮𑀤𑁂𑀯𑀢𑁂, 𑀲𑁂𑀝𑁆𑀞𑀺 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑁄 𑀲𑀘𑁂 𑀫𑀁 𑀘𑀽𑀴𑀸𑀬𑀁 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀲𑁆𑀲𑀢𑀺, 𑀦𑁂𑀯𑀸𑀳𑀁 𑀓𑀺𑀜𑁆𑀘𑀺 𑀓𑀣𑁂𑀲𑁆𑀲𑀸𑀫𑀺, 𑀕𑀘𑁆𑀙 𑀢𑁆𑀯𑀁’’𑀦𑁆𑀢𑀺. 𑀲𑀸 𑀧𑀼𑀦𑁂𑀓𑀤𑀺𑀯𑀲𑀁 𑀲𑁂𑀝𑁆𑀞𑀺𑀦𑁄 𑀚𑁂𑀝𑁆𑀞𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀑𑀯𑀤𑀺, 𑀲𑁄𑀧𑀺 𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀚𑁆𑀚𑁂𑀲𑀺. 𑀲𑁂𑀝𑁆𑀞𑀺𑀦𑀸 𑀧𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁𑀬𑁂𑀯 𑀦 𑀲𑀓𑁆𑀓𑁄𑀢𑀺.

𑀲𑁂𑀝𑁆𑀞𑀺𑀦𑁄𑀧𑀺 𑀦𑀺𑀭𑀦𑁆𑀢𑀭𑀁 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀯𑁄𑀳𑀸𑀭𑁂 𑀅𑀓𑀭𑁄𑀦𑁆𑀢𑀲𑁆𑀲 𑀆𑀬𑁂 𑀫𑀦𑁆𑀤𑀻𑀪𑀽𑀢𑁂 𑀥𑀦𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀤𑀸𑀮𑀺𑀤𑁆𑀤𑀺𑀬𑀧𑁆𑀧𑀢𑁆𑀢𑀲𑁆𑀲 𑀧𑀭𑀺𑀪𑁄𑀕𑀲𑀸𑀝𑀓𑀲𑀬𑀦𑀪𑁄𑀚𑀦𑀸𑀦𑀺𑀧𑀺 𑀧𑀼𑀭𑀸𑀡𑀲𑀤𑀺𑀲𑀸𑀦𑀺 𑀦 𑀪𑀯𑀺𑀁𑀲𑀼. 𑀏𑀯𑀁𑀪𑀽𑀢𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀧𑀡𑀻𑀢𑀁 𑀧𑀦 𑀓𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸 ‘‘𑀤𑀻𑀬𑀢𑀺 𑀧𑀦 𑀢𑁂, 𑀕𑀳𑀧𑀢𑀺, 𑀓𑀼𑀮𑁂 𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀤𑀻𑀬𑀢𑀺, 𑀪𑀦𑁆𑀢𑁂, 𑀢𑀜𑁆𑀘 𑀔𑁄 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀕𑀳𑀧𑀢𑀺, ‘𑀮𑀽𑀔𑀁 𑀤𑀸𑀦𑀁 𑀤𑁂𑀫𑀻’𑀢𑀺 𑀫𑀸 𑀘𑀺𑀢𑁆𑀢𑀁 𑀲𑀗𑁆𑀓𑁄𑀘𑀬𑀺𑀢𑁆𑀣. 𑀘𑀺𑀢𑁆𑀢𑀲𑁆𑀫𑀺𑀜𑁆𑀳𑀺 𑀧𑀡𑀻𑀢𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀮𑀽𑀔𑀁 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀯𑀺𑀧𑀸𑀓𑀫𑀳𑀦𑁆𑀢𑀢𑁆𑀢𑀸’’𑀢𑀺 𑀆𑀳. 𑀘𑀺𑀢𑁆𑀢𑀜𑁆𑀳𑀺 𑀧𑀡𑀻𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀤𑀸𑀦𑀁 𑀮𑀽𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀘𑁂𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸;

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀩𑀼𑀤𑁆𑀥𑁂, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑁂. (𑀯𑀺. 𑀯. 𑁮𑁦𑁪);

‘‘𑀦 𑀓𑀺𑀭𑀢𑁆𑀣𑀺 𑀅𑀦𑁄𑀫𑀤𑀲𑁆𑀲𑀺𑀲𑀼, 𑀧𑀸𑀭𑀺𑀘𑀭𑀺𑀬𑀸 𑀩𑀼𑀤𑁆𑀥𑁂𑀲𑀼 𑀅𑀧𑁆𑀧𑀓𑀸;

𑀲𑀼𑀓𑁆𑀔𑀸𑀬 𑀅𑀮𑁄𑀡𑀺𑀓𑀸𑀬 𑀘, 𑀧𑀲𑁆𑀲 𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸’’𑀢𑀺.

𑀅𑀧𑀭𑀫𑁆𑀧𑀺 𑀦𑀁 𑀆𑀳 ‘‘𑀕𑀳𑀧𑀢𑀺, 𑀢𑁆𑀯𑀁 𑀢𑀸𑀯 𑀮𑀽𑀔𑀁 𑀤𑀸𑀦𑀁 𑀤𑀤𑀫𑀸𑀦𑁄 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀤𑁂𑀲𑀺, 𑀅𑀳𑀁 𑀯𑁂𑀮𑀸𑀫𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀲𑀢𑁆𑀢 𑀭𑀢𑀦𑀸𑀦𑀺 𑀤𑀤𑀫𑀸𑀦𑁄 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀏𑀓𑁄𑀖𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀺𑀬 𑀘 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀫𑀸𑀦𑁄 𑀢𑀺𑀲𑀭𑀡𑀕𑀢𑀁 𑀯𑀸 𑀧𑀜𑁆𑀘𑀲𑀻𑀮𑀭𑀓𑁆𑀔𑀦𑀓𑀁 𑀯𑀸 𑀓𑀜𑁆𑀘𑀺 𑀦𑀸𑀮𑀢𑁆𑀣𑀁, 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀸 𑀦𑀸𑀫 𑀏𑀯𑀁 𑀤𑀼𑀮𑁆𑀮𑀪𑀸. 𑀢𑀲𑁆𑀫𑀸 ‘𑀮𑀽𑀔𑀁 𑀫𑁂 𑀤𑀸𑀦’𑀦𑁆𑀢𑀺 𑀫𑀸 𑀘𑀺𑀢𑁆𑀢𑀁 𑀲𑀗𑁆𑀓𑁄𑀘𑀬𑀺𑀢𑁆𑀣𑀸’’𑀢𑀺 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀯𑁂𑀮𑀸𑀫𑀲𑀼𑀢𑁆𑀢𑀁 (𑀅. 𑀦𑀺. 𑁯.𑁨𑁦) 𑀓𑀣𑁂𑀲𑀺.

𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀇𑀲𑁆𑀲𑀭𑀓𑀸𑀮𑁂 𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀇𑀤𑀸𑀦𑀸𑀬𑀁 𑀤𑀼𑀕𑁆𑀕𑀢𑀢𑁆𑀢𑀸 𑀫𑀫 𑀯𑀘𑀦𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. ‘‘𑀅𑀳𑀁 𑀫𑀳𑀸𑀲𑁂𑀝𑁆𑀞𑀺 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸, 𑀤𑁂𑀯𑀢𑀸’’𑀢𑀺. ‘‘𑀓𑀺𑀫𑀢𑁆𑀣𑀫𑀸𑀕𑀢𑀸𑀲𑀻’’𑀢𑀺? ‘‘𑀢𑀼𑀬𑁆𑀳𑀁 𑀑𑀯𑀸𑀤𑀁 𑀓𑀣𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀓𑀣𑁂𑀳𑀻’’𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀢𑁆𑀯𑀁 𑀧𑀘𑁆𑀙𑀺𑀫𑀓𑀸𑀮𑀁 𑀦 𑀘𑀺𑀦𑁆𑀢𑁂𑀲𑀺, 𑀧𑀼𑀢𑁆𑀢𑀥𑀻𑀢𑀭𑁄 𑀦 𑀑𑀮𑁄𑀓𑁂𑀲𑀺, 𑀲𑀫𑀡𑀲𑁆𑀲 𑀢𑁂 𑀕𑁄𑀢𑀫𑀲𑁆𑀲 𑀲𑀸𑀲𑀦𑁂 𑀩𑀳𑀼𑀁 𑀥𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀁, 𑀲𑁄 𑀢𑁆𑀯𑀁 𑀅𑀢𑀺𑀯𑁂𑀮𑀁 𑀥𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀯𑀸 𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀸𑀦𑀁 𑀅𑀓𑀭𑀡𑁂𑀦 𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀲𑁆𑀲𑀸𑀬 𑀤𑀼𑀕𑁆𑀕𑀢𑁄 𑀚𑀸𑀢𑁄, 𑀏𑀯𑀁𑀪𑀽𑀢𑁄𑀧𑀺 𑀲𑀫𑀡𑀁 𑀕𑁄𑀢𑀫𑀁 𑀦 𑀫𑀼𑀜𑁆𑀘𑀲𑀺, 𑀅𑀚𑁆𑀚𑀧𑀺 𑀢𑁂 𑀲𑀫𑀡𑀸 𑀖𑀭𑀁 𑀧𑀯𑀺𑀲𑀦𑁆𑀢𑀺𑀬𑁂𑀯. 𑀬𑀁 𑀢𑀸𑀯 𑀢𑁂𑀳𑀺 𑀦𑀻𑀢𑀁, 𑀢𑀁 𑀦 𑀲𑀓𑁆𑀓𑀸 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁, 𑀕𑀳𑀺𑀢𑀁 𑀕𑀳𑀺𑀢𑀫𑁂𑀯 𑀳𑁄𑀢𑀼, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀬𑀜𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀫𑀸 𑀕𑀫𑀺𑀢𑁆𑀣, 𑀲𑀸𑀯𑀓𑀸𑀦𑀜𑁆𑀘𑀲𑁆𑀲 𑀇𑀫𑀁 𑀖𑀭𑀁 𑀧𑀯𑀺𑀲𑀺𑀢𑀼𑀁 𑀫𑀸 𑀅𑀤𑀸𑀲𑀺, 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀅𑀦𑁄𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑁄𑀳𑀸𑀭𑁂 𑀘 𑀯𑀡𑀺𑀚𑁆𑀚𑀜𑁆𑀘 𑀓𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀳𑀻’’𑀢𑀺. 𑀅𑀣 𑀦𑀁 𑀲𑁄 𑀏𑀯𑀫𑀸𑀳 ‘‘𑀅𑀬𑀁 𑀢𑀬𑀸 𑀫𑀬𑁆𑀳𑀁 𑀤𑀸𑀢𑀩𑁆𑀩𑀑𑀯𑀸𑀤𑁄’’𑀢𑀺. ‘‘𑀆𑀫, 𑀅𑀬𑁆𑀬𑀸’’𑀢𑀺. 𑀢𑀸𑀤𑀺𑀲𑀸𑀦𑀁 𑀤𑁂𑀯𑀢𑀸𑀦𑀁 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀲𑀢𑀲𑀳𑀲𑁆𑀲𑁂𑀦𑀧𑀺 𑀅𑀓𑀫𑁆𑀧𑀦𑀻𑀬𑁄 𑀅𑀳𑀁 𑀤𑀲𑀩𑀮𑁂𑀦 𑀓𑀢𑁄. 𑀫𑀫 𑀳𑀺 𑀲𑀤𑁆𑀥𑀸 𑀲𑀺𑀦𑁂𑀭𑀼 𑀯𑀺𑀬 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀫𑀬𑀸 𑀦𑀺𑀬𑁆𑀬𑀸𑀦𑀺𑀓𑁂 𑀭𑀢𑀦𑀲𑀸𑀲𑀦𑁂 𑀥𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀅𑀬𑀼𑀢𑁆𑀢𑀁 𑀢𑁂 𑀓𑀣𑀺𑀢𑀁, 𑀩𑀼𑀤𑁆𑀥𑀲𑀸𑀲𑀦𑁂 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀏𑀯𑀭𑀽𑀧𑀸𑀬 𑀅𑀦𑀸𑀘𑀸𑀭𑀸𑀬 𑀤𑀼𑀲𑁆𑀲𑀻𑀮𑀸𑀬 𑀓𑀸𑀴𑀓𑀡𑁆𑀡𑀺𑀬𑀸 𑀲𑀤𑁆𑀥𑀺𑀁 𑀢𑀬𑀸 𑀫𑀫 𑀏𑀓𑀕𑁂𑀳𑁂 𑀯𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀻𑀖𑀁 𑀫𑀫 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀢𑀺.

𑀲𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀸𑀭𑀓𑁂 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀧𑀦 𑀅𑀜𑁆𑀜𑀢𑁆𑀣 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 ‘‘𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀕𑀭𑀧𑀭𑀺𑀕𑁆𑀕𑀸𑀳𑀓𑀤𑁂𑀯𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑁂𑀦𑀝𑁆𑀞𑁂𑀦 𑀆𑀕𑀢𑀸𑀲𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁 𑀲𑀸𑀫𑀺, 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀓𑀣𑁂𑀲𑀺𑀁, 𑀲𑁄 𑀫𑀁 𑀓𑀼𑀚𑁆𑀛𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀓𑀟𑁆𑀠𑀺, 𑀫𑀁 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀫𑁂 𑀤𑁂𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑀬𑀸 𑀲𑁂𑀝𑁆𑀞𑀺 𑀯𑀼𑀢𑁆𑀢𑁄’’𑀢𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀲𑀗𑁆𑀖𑀼𑀧𑀝𑁆𑀞𑀸𑀦𑀁 𑀫𑀸 𑀓𑀭𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀖𑀭𑀧𑁆𑀧𑀯𑁂𑀲𑀦𑀁 𑀫𑀸 𑀅𑀤𑀸𑀲𑀻’’𑀢𑀺 ‘‘𑀏𑀯𑀁 𑀫𑁂 𑀯𑀼𑀢𑁆𑀢𑁄, 𑀲𑀸𑀫𑀻’’𑀢𑀺. 𑀅𑀬𑀼𑀢𑁆𑀢𑀁 𑀢𑀬𑀸 𑀯𑀼𑀢𑁆𑀢𑀁, 𑀲𑀸𑀲𑀦𑁂 𑀧𑀳𑀸𑀭𑁄 𑀤𑀺𑀦𑁆𑀦𑁄, ‘‘𑀅𑀳𑀁 𑀢𑀁 𑀆𑀤𑀸𑀬 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀦 𑀉𑀲𑁆𑀲𑀳𑀸𑀫𑀻’’𑀢𑀺. 𑀲𑀸 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀲𑀗𑁆𑀕𑀳𑀁 𑀅𑀮𑀪𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀢𑁂𑀳𑀺𑀧𑀺 𑀢𑀣𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀅𑀳𑀁, 𑀤𑁂𑀯, 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 𑀤𑀸𑀭𑀓𑁂 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀦𑀸𑀣𑀸 𑀯𑀺𑀘𑀭𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀲𑀺𑀭𑀺𑀬𑀸 𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑀁 𑀤𑀸𑀧𑁂𑀣𑀸’’𑀢𑀺 𑀲𑀼𑀝𑁆𑀞𑀼𑀢𑀭𑀁 𑀬𑀸𑀘𑀺. 𑀲𑁄𑀧𑀺 𑀦𑀁 𑀆𑀳 ‘‘𑀢𑀬𑀸 𑀅𑀬𑀼𑀢𑁆𑀢𑀁 𑀓𑀢𑀁, 𑀚𑀺𑀦𑀲𑀸𑀲𑀦𑁂 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀅𑀳𑀫𑁆𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀓𑀁 𑀧𑀦 𑀢𑁂 𑀲𑁂𑀝𑁆𑀞𑀺𑀲𑁆𑀲 𑀔𑀫𑀦𑀽𑀧𑀸𑀬𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀓𑀣𑁂𑀳𑀻’’𑀢𑀺. 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑁂𑀳𑀺 𑀧𑀡𑁆𑀡𑁂 𑀆𑀭𑁄𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀁 𑀕𑀳𑀺𑀢𑀁 𑀅𑀢𑁆𑀣𑀺, 𑀢𑁆𑀯𑀁 𑀢𑀲𑁆𑀲 𑀆𑀬𑀼𑀢𑁆𑀢𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀢𑀸𑀦𑀺 𑀧𑀡𑁆𑀡𑀸𑀦𑀺 𑀆𑀤𑀸𑀬 𑀓𑀢𑀺𑀧𑀬𑁂𑀳𑀺 𑀬𑀓𑁆𑀔𑀢𑀭𑀼𑀡𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀡𑁆𑀡𑀁, 𑀏𑀓𑁂𑀦 𑀮𑁂𑀔𑀦𑀺𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀕𑁂𑀳𑀫𑀚𑁆𑀛𑁂 𑀞𑀺𑀢𑀸 𑀅𑀢𑁆𑀢𑀦𑁄 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀢𑁂 𑀉𑀢𑁆𑀢𑀸𑀲𑁂𑀢𑁆𑀯𑀸 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀇𑀡𑀧𑀡𑁆𑀡𑀁, 𑀅𑀫𑁆𑀳𑀸𑀓𑀁 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀓𑀸𑀮𑁂 𑀢𑀼𑀫𑁆𑀳𑁂 𑀦 𑀓𑀺𑀜𑁆𑀘𑀺 𑀆𑀳, 𑀇𑀤𑀸𑀦𑀺 𑀤𑀼𑀕𑁆𑀕𑀢𑁄 𑀚𑀸𑀢𑁄, 𑀢𑀼𑀫𑁆𑀳𑁂𑀳𑀺 𑀕𑀳𑀺𑀢𑀓𑀳𑀸𑀧𑀡𑀸𑀦𑀺 𑀤𑁂𑀣𑀸’’𑀢𑀺 𑀅𑀢𑁆𑀢𑀦𑁄 𑀬𑀓𑁆𑀔𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀅𑀝𑁆𑀞𑀸𑀭𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀲𑀸𑀥𑁂𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀢𑀼𑀘𑁆𑀙𑀓𑁄𑀝𑁆𑀞𑀓𑁂 𑀧𑀽𑀭𑁂𑀢𑁆𑀯𑀸 𑀅𑀜𑁆𑀜𑀁 𑀅𑀘𑀺𑀭𑀯𑀢𑀺𑀦𑀤𑀻𑀢𑀻𑀭𑁂 𑀦𑀺𑀤𑀳𑀺𑀢𑀁 𑀥𑀦𑀁 𑀦𑀤𑀻𑀓𑀽𑀮𑁂 𑀪𑀺𑀦𑁆𑀦𑁂 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀆𑀳𑀭𑀺𑀢𑁆𑀯𑀸 𑀢𑀼𑀘𑁆𑀙𑀓𑁄𑀝𑁆𑀞𑀓𑁂 𑀧𑀽𑀭𑁂𑀢𑁆𑀯𑀸, 𑀅𑀜𑁆𑀜𑀫𑁆𑀧𑀺 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀅𑀲𑁆𑀲𑀸𑀫𑀺𑀓𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀫𑀢𑁆𑀢𑀫𑁂𑀯 𑀥𑀦𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀢𑀼𑀘𑁆𑀙𑀓𑁄𑀝𑁆𑀞𑀓𑁂 𑀧𑀽𑀭𑁂𑀳𑀺, 𑀇𑀫𑀸𑀳𑀺 𑀘𑀢𑀼𑀧𑀜𑁆𑀜𑀸𑀲𑀓𑁄𑀝𑀻𑀳𑀺 𑀇𑀫𑀁 𑀢𑀼𑀘𑁆𑀙𑀓𑁄𑀝𑁆𑀞𑀓𑀧𑀽𑀭𑀓𑀁 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀳𑀻𑀢𑀺.

𑀲𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀁 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀓𑁄𑀝𑁆𑀞𑀓𑁂 𑀧𑀽𑀭𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀲𑁂𑀝𑁆𑀞𑀺𑀲𑁆𑀲 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀢𑁂 𑀫𑀳𑀸𑀲𑁂𑀝𑁆𑀞𑀺 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸 𑀅𑀦𑁆𑀥𑀩𑀸𑀮𑀤𑁂𑀯𑀢𑀸, 𑀫𑀬𑀸 𑀫𑀳𑀸𑀫𑁄𑀳𑀫𑀽𑀴𑁆𑀳𑀸𑀬 𑀩𑀼𑀤𑁆𑀥𑀕𑀼𑀡𑁂 𑀅𑀚𑀸𑀦𑀺𑀢𑁆𑀯𑀸 𑀧𑀼𑀭𑀺𑀫𑁂𑀲𑀼 𑀤𑀺𑀯𑀲𑁂𑀲𑀼 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑀺𑀢𑀁 𑀅𑀢𑁆𑀣𑀺, 𑀢𑀁 𑀫𑁂 𑀤𑁄𑀲𑀁 𑀔𑀫𑀣. 𑀲𑀓𑁆𑀓𑀲𑁆𑀲 𑀳𑀺 𑀫𑁂 𑀤𑁂𑀯𑀭𑀸𑀚𑀲𑁆𑀲 𑀯𑀘𑀦𑁂𑀦 𑀢𑀼𑀫𑁆𑀳𑀸𑀓𑀁 𑀇𑀡𑀁 𑀲𑁄𑀥𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀓𑁄𑀝𑀺𑀬𑁄, 𑀲𑀫𑀼𑀤𑁆𑀤𑀁 𑀕𑀢𑀸 𑀅𑀝𑁆𑀞𑀸𑀭𑀲 𑀓𑁄𑀝𑀺𑀬𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀲𑁆𑀲𑀸𑀫𑀺𑀓𑀥𑀦𑀲𑁆𑀲 𑀅𑀝𑁆𑀞𑀸𑀭𑀲 𑀓𑁄𑀝𑀺𑀬𑁄𑀢𑀺 𑀘𑀢𑀼𑀧𑀡𑁆𑀡𑀸𑀲 𑀓𑁄𑀝𑀺𑀬𑁄 𑀆𑀳𑀭𑀺𑀢𑁆𑀯𑀸 𑀢𑀼𑀘𑁆𑀙𑀓𑁄𑀝𑁆𑀞𑀓𑀧𑀽𑀭𑀡𑁂𑀦 𑀤𑀡𑁆𑀟𑀓𑀫𑁆𑀫𑀁 𑀓𑀢𑀁, 𑀚𑁂𑀢𑀯𑀦𑀯𑀺𑀳𑀸𑀭𑀁 𑀆𑀭𑀩𑁆𑀪 𑀧𑀭𑀺𑀓𑁆𑀔𑀬𑀁 𑀕𑀢𑀥𑀦𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 𑀓𑀺𑀮𑀫𑀸𑀫𑀺, 𑀫𑀬𑀸 𑀅𑀜𑁆𑀜𑀸𑀡𑀢𑀸𑀬 𑀓𑀣𑀺𑀢𑀁 𑀫𑀦𑀲𑀺 𑀅𑀓𑀢𑁆𑀯𑀸 𑀔𑀫𑀣 𑀫𑀳𑀸𑀲𑁂𑀝𑁆𑀞𑀻’’𑀢𑀺 𑀆𑀳.

𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀤𑁂𑀯𑀢𑀸 ‘𑀤𑀡𑁆𑀟𑀓𑀫𑁆𑀫𑀜𑁆𑀘 𑀫𑁂 𑀓𑀢’𑀦𑁆𑀢𑀺 𑀯𑀤𑀢𑀺, 𑀅𑀢𑁆𑀢𑀦𑁄 𑀘 𑀤𑁄𑀲𑀁 𑀧𑀝𑀺𑀚𑀸𑀦𑀸𑀢𑀺, 𑀲𑀢𑁆𑀣𑀸 𑀇𑀫𑀁 𑀯𑀺𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀚𑀸𑀦𑀸𑀧𑁂𑀲𑁆𑀲𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀆𑀳 ‘‘𑀅𑀫𑁆𑀫, 𑀤𑁂𑀯𑀢𑁂, 𑀲𑀘𑁂𑀲𑀺 𑀫𑀁 𑀔𑀫𑀸𑀧𑁂𑀢𑀼𑀓𑀸𑀫𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀫𑀁 𑀔𑀫𑀸𑀧𑁂𑀳𑀻’’𑀢𑀺. 𑀲𑀸𑀥𑀼 𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, ‘‘𑀲𑀢𑁆𑀣𑀼 𑀧𑀦 𑀫𑀁 𑀲𑀦𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀸𑀢𑁄𑀯 𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀲𑀩𑁆𑀩𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀥, 𑀕𑀳𑀧𑀢𑀺, 𑀧𑀸𑀧𑀧𑀼𑀕𑁆𑀕𑀮𑁄𑀧𑀺 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺, 𑀢𑀸𑀯 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀺. 𑀬𑀤𑀸 𑀧𑀦𑀲𑁆𑀲 𑀧𑀸𑀧𑀁 𑀧𑀘𑁆𑀘𑀢𑀺, 𑀢𑀤𑀸 𑀧𑀸𑀧𑀫𑁂𑀯 𑀧𑀲𑁆𑀲𑀢𑀺. 𑀪𑀤𑁆𑀭𑀧𑀼𑀕𑁆𑀕𑀮𑁄𑀧𑀺 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀺, 𑀢𑀸𑀯 𑀧𑀸𑀧𑀸𑀦𑀺 𑀧𑀲𑁆𑀲𑀢𑀺. 𑀬𑀤𑀸 𑀧𑀦𑀲𑁆𑀲 𑀪𑀤𑁆𑀭𑀁 𑀧𑀘𑁆𑀘𑀢𑀺, 𑀢𑀤𑀸 𑀪𑀤𑁆𑀭𑀫𑁂𑀯 𑀧𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀥𑀫𑁆𑀫𑀧𑀤𑁂 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀧𑀸𑀧𑁄𑀧𑀺 𑀧𑀲𑁆𑀲𑀢𑀻 𑀪𑀤𑁆𑀭𑀁, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀻 𑀧𑀸𑀧𑀁, 𑀅𑀣 𑀧𑀸𑀧𑁄 𑀧𑀸𑀧𑀸𑀦𑀺 𑀧𑀲𑁆𑀲𑀢𑀺.

‘‘𑀪𑀤𑁆𑀭𑁄𑀧𑀺 𑀧𑀲𑁆𑀲𑀢𑀻 𑀧𑀸𑀧𑀁, 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀻 𑀪𑀤𑁆𑀭𑀁, 𑀅𑀣 𑀪𑀤𑁆𑀭𑁄 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺. (𑀥. 𑀧. 𑁧𑁧𑁯-𑁧𑁨𑁦);

𑀇𑀫𑀸𑀲𑀜𑁆𑀘 𑀧𑀦 𑀕𑀸𑀣𑀸𑀦𑀁 𑀧𑀭𑀺𑀬𑁄𑀲𑀸𑀦𑁂 𑀲𑀸 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀘𑀓𑁆𑀓𑀗𑁆𑀓𑀺𑀢𑁂𑀲𑀼 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀫𑀬𑀸, 𑀪𑀦𑁆𑀢𑁂, 𑀭𑀸𑀕𑀭𑀢𑁆𑀢𑀸𑀬 𑀤𑁄𑀲𑀧𑀤𑀼𑀝𑁆𑀞𑀸𑀬 𑀫𑁄𑀳𑀫𑀽𑀴𑁆𑀳𑀸𑀬 𑀅𑀯𑀺𑀚𑁆𑀚𑀦𑁆𑀥𑀸𑀬 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀅𑀚𑀸𑀦𑀦𑁆𑀢𑀺𑀬𑀸 𑀧𑀸𑀧𑀓𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀫𑁆𑀧𑀺 𑀔𑀫𑀸𑀧𑁂𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑀢𑁆𑀣𑀼 𑀧𑀼𑀭𑀢𑁄 𑀅𑀢𑁆𑀢𑀦𑁄 𑀕𑀼𑀡𑀁 𑀓𑀣𑁂𑀲𑀺 ‘‘𑀪𑀦𑁆𑀢𑁂, 𑀅𑀬𑀁 𑀤𑁂𑀯𑀢𑀸 ‘𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀻𑀦𑀺 𑀫𑀸 𑀓𑀭𑁄𑀳𑀻’𑀢𑀺 𑀯𑀸𑀭𑀬𑀫𑀸𑀦𑀸𑀧𑀺 𑀫𑀁 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, ‘𑀤𑀸𑀦𑀁 𑀦 𑀤𑀸𑀢𑀩𑁆𑀩’𑀦𑁆𑀢𑀺 𑀇𑀫𑀸𑀬 𑀯𑀸𑀭𑀺𑀬𑀫𑀸𑀦𑁄𑀧𑀳𑀁 𑀤𑀸𑀦𑀁 𑀅𑀤𑀸𑀲𑀺𑀫𑁂𑀯, 𑀦𑀽𑀦 𑀏𑀲, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀼𑀡𑁄’’𑀢𑀺. 𑀲𑀢𑁆𑀣𑀸 ‘‘𑀢𑁆𑀯𑀁 𑀔𑁄𑀲𑀺 𑀕𑀳𑀧𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀅𑀘𑀮𑀲𑀤𑁆𑀥𑁄 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁄, 𑀢𑀼𑀬𑁆𑀳𑀁 𑀇𑀫𑀸𑀬 𑀅𑀧𑁆𑀧𑁂𑀲𑀓𑁆𑀔𑀤𑁂𑀯𑀢𑀸𑀬 𑀯𑀸𑀭𑁂𑀦𑁆𑀢𑀺𑀬𑀸 𑀅𑀯𑀸𑀭𑀺𑀢𑀪𑀸𑀯𑁄 𑀦 𑀅𑀘𑁆𑀙𑀭𑀺𑀬𑁄. 𑀬𑀁 𑀧𑀦 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀅𑀧𑀭𑀺𑀧𑀓𑁆𑀓𑀜𑀸𑀡𑁂 𑀞𑀺𑀢𑀸 𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁂𑀦 𑀫𑀸𑀭𑁂𑀦 𑀆𑀓𑀸𑀲𑁂 𑀞𑀢𑁆𑀯𑀸 ‘𑀲𑀘𑁂 𑀤𑀸𑀦𑀁 𑀤𑀲𑁆𑀲𑀲𑀺, 𑀇𑀫𑀲𑁆𑀫𑀺𑀁 𑀦𑀺𑀭𑀬𑁂 𑀧𑀘𑁆𑀘𑀺𑀲𑁆𑀲𑀲𑀻’𑀢𑀺 𑀅𑀲𑀻𑀢𑀺𑀳𑀢𑁆𑀣𑀕𑀫𑁆𑀪𑀻𑀭𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀤𑀲𑁆𑀲𑁂𑀢𑁆𑀯𑀸 ‘𑀫𑀸 𑀤𑀸𑀦𑀁 𑀅𑀤𑀸𑀲𑀻’𑀢𑀺 𑀯𑀸𑀭𑀺𑀢𑀸𑀧𑀺 𑀧𑀤𑀼𑀫𑀓𑀡𑁆𑀡𑀺𑀓𑀸𑀫𑀚𑁆𑀛𑁂 𑀞𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼, 𑀇𑀤𑀁 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀲𑀼𑀔𑀽𑀧𑀓𑀭𑀡𑁂𑀳𑀺 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀲𑀁𑀯𑀟𑁆𑀠𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂𑀬𑁂𑀯 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀲𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀢𑁆𑀯𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀘𑀢𑀲𑁆𑀲𑁄 𑀤𑀸𑀦𑀲𑀸𑀮𑀸𑀬𑁄, 𑀫𑀚𑁆𑀛𑁂 𑀦𑀕𑀭𑀲𑁆𑀲 𑀏𑀓𑀁, 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀏𑀓𑀦𑁆𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀧𑀸𑀢𑀭𑀸𑀲𑀯𑁂𑀮𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑁂 𑀫𑀦𑀼𑀜𑁆𑀜𑀪𑁄𑀚𑀦𑁂 𑀉𑀧𑀦𑀻𑀬𑀫𑀸𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀥𑁄𑀯𑀦𑀁 𑀓𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀞𑀺𑀢𑁄 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀇𑀤𑁆𑀥𑀺𑀫𑀬𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀆𑀤𑀸𑀬 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀢𑁆𑀢𑁂 𑀉𑀧𑀦𑀻𑀢𑀫𑀢𑁆𑀢𑁂 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸𑀯 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀓𑀸𑀭𑀓𑀁 𑀑𑀮𑁄𑀓𑁂𑀲𑀺. ‘‘𑀓𑀺𑀁 𑀓𑀭𑁄𑀫𑀺, 𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀬𑁆𑀬𑀲𑁆𑀲 𑀧𑀢𑁆𑀢𑀁 𑀆𑀳𑀭𑀣𑀸’’𑀢𑀺 𑀆𑀳. 𑀢𑀗𑁆𑀔𑀡𑀜𑁆𑀜𑁂𑀯 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀺𑀓𑀫𑁆𑀧𑀫𑀸𑀦𑁄 𑀉𑀝𑁆𑀞𑀸𑀬 ‘‘𑀅𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀳𑀸𑀭𑀁 𑀮𑀪𑀺, 𑀅𑀚𑁆𑀚 𑀅𑀮𑀪𑀫𑀸𑀦𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀇𑀫𑀜𑁆𑀘 𑀯𑀺𑀦𑀸𑀲𑁂𑀲𑁆𑀲𑀸𑀫𑀺, 𑀲𑁂𑀝𑁆𑀞𑀺𑀦𑁄 𑀘 𑀤𑀸𑀦𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀢𑁆𑀣𑀼𑀫𑁆𑀳𑀺 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀦𑀺𑀫𑁆𑀫𑀺𑀦𑀺. 𑀲𑀸 𑀔𑀤𑀺𑀭𑀗𑁆𑀕𑀸𑀭𑀧𑀼𑀡𑁆𑀡𑀸 𑀲𑀫𑁆𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀯𑀺𑀬 𑀔𑀸𑀬𑀺𑀢𑁆𑀣. 𑀢𑀁 𑀧𑀦 𑀫𑀸𑀧𑁂𑀢𑁆𑀯𑀸 𑀲𑀬𑀁 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀧𑀢𑁆𑀢𑀸𑀳𑀭𑀡𑀢𑁆𑀣𑀸𑀬 𑀕𑀘𑁆𑀙𑀫𑀸𑀦𑁄 𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀪𑀬𑀧𑁆𑀧𑀢𑁆𑀢𑁄 𑀦𑀺𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁, 𑀢𑀸𑀢, 𑀦𑀺𑀯𑀢𑁆𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀬𑀁 𑀲𑀸𑀫𑀺 𑀅𑀦𑁆𑀢𑀭𑀯𑀢𑁆𑀣𑀼𑀫𑁆𑀳𑀺 𑀫𑀳𑀢𑀻 𑀅𑀗𑁆𑀕𑀸𑀭𑀓𑀸𑀲𑀼 𑀲𑀫𑁆𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸𑀢𑀺. 𑀅𑀣𑀜𑁆𑀜𑁄 𑀅𑀣𑀜𑁆𑀜𑁄𑀢𑀺 𑀏𑀯𑀁 𑀆𑀕𑀢𑀸𑀕𑀢𑀸 𑀲𑀩𑁆𑀩𑁂𑀧𑀺 𑀪𑀬𑀧𑁆𑀧𑀢𑁆𑀢𑀸 𑀯𑁂𑀕𑁂𑀦 𑀧𑀮𑀸𑀬𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀚𑁆𑀚 𑀫𑀬𑁆𑀳𑀁 𑀤𑀸𑀦𑀦𑁆𑀢𑀭𑀸𑀬𑀁 𑀓𑀸𑀢𑀼𑀓𑀸𑀫𑁄 𑀯𑀲𑀯𑀢𑁆𑀢𑀻 𑀫𑀸𑀭𑁄 𑀉𑀬𑁆𑀬𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀔𑁄 𑀧𑀦 𑀚𑀸𑀦𑀸𑀢𑀺 𑀫𑀸𑀭𑀲𑀢𑁂𑀦 𑀫𑀸𑀭𑀲𑀳𑀲𑁆𑀲𑁂𑀦𑀧𑀺 𑀫𑀬𑁆𑀳𑀁 𑀅𑀓𑀫𑁆𑀧𑀺𑀬𑀪𑀸𑀯𑀁, 𑀅𑀚𑁆𑀚 𑀤𑀸𑀦𑀺 𑀫𑀬𑁆𑀳𑀁 𑀯𑀸 𑀫𑀸𑀭𑀲𑁆𑀲 𑀯𑀸 𑀩𑀮𑀫𑀳𑀦𑁆𑀢𑀢𑀁, 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀬𑀣𑀸𑀲𑀚𑁆𑀚𑀺𑀢𑀫𑁂𑀯 𑀪𑀢𑁆𑀢𑀧𑀸𑀢𑀺𑀁 𑀲𑀬𑀁 𑀆𑀤𑀸𑀬 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫 𑀅𑀗𑁆𑀕𑀸𑀭𑀓𑀸𑀲𑀼𑀢𑀝𑁂 𑀞𑀢𑁆𑀯𑀸 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀫𑀸𑀭𑀁 𑀤𑀺𑀲𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀆𑀳. ‘‘𑀅𑀳𑀁, 𑀫𑀸𑀭𑁄’’𑀢𑀺. ‘‘𑀅𑀬𑀁 𑀅𑀗𑁆𑀕𑀸𑀭𑀓𑀸𑀲𑀼 𑀢𑀬𑀸 𑀦𑀺𑀫𑁆𑀫𑀺𑀢𑀸’’𑀢𑀺? ‘‘𑀆𑀫, 𑀫𑀬𑀸’’𑀢𑀺. ‘‘𑀓𑀺𑀫𑀢𑁆𑀣𑀸𑀬𑀸’’𑀢𑀺. ‘‘𑀢𑀯 𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀸𑀬 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘 𑀚𑀻𑀯𑀺𑀢𑀦𑀸𑀲𑀦𑀢𑁆𑀣𑀸𑀬𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑁂𑀯 𑀢𑁂 𑀅𑀳𑀁 𑀅𑀢𑁆𑀢𑀦𑁄 𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀁, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀤𑀲𑁆𑀲𑀸𑀫𑀺, 𑀅𑀚𑁆𑀚 𑀤𑀸𑀦𑀺 𑀫𑀬𑁆𑀳𑀁 𑀯𑀸 𑀢𑀼𑀬𑁆𑀳𑀁 𑀯𑀸 𑀩𑀮𑀫𑀳𑀦𑁆𑀢𑀢𑀁, 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀗𑁆𑀕𑀸𑀭𑀓𑀸𑀲𑀼𑀢𑀝𑁂 𑀞𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥 𑀅𑀳𑀁 𑀇𑀫𑀺𑀲𑁆𑀲𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀅𑀥𑁄𑀲𑀻𑀲𑁄 𑀧𑀢𑀫𑀸𑀦𑁄𑀧𑀺 𑀦 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀫𑀬𑀸 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦. ‘‘𑀓𑀸𑀫𑀁 𑀧𑀢𑀸𑀫𑀺 𑀦𑀺𑀭𑀬𑀁, 𑀉𑀤𑁆𑀥𑀁𑀧𑀸𑀤𑁄 𑀅𑀯𑀁𑀲𑀺𑀭𑁄;

𑀦𑀸𑀦𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀳𑀦𑁆𑀤 𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀳𑀸’’𑀢𑀺.

𑀢𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀦𑁆𑀢𑁂, 𑀧𑀘𑁆𑀘𑁂𑀓𑀯𑀭𑀩𑀼𑀤𑁆𑀥 𑀲𑀘𑁂𑀧𑀳𑀁 𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑁄 𑀏𑀓𑀁𑀲𑁂𑀦𑁂𑀯 𑀇𑀫𑀁 𑀦𑀺𑀭𑀬𑀁 𑀉𑀤𑁆𑀥𑀁𑀧𑀸𑀤𑁄 𑀅𑀯𑀁𑀲𑀺𑀭𑁄 𑀳𑀼𑀢𑁆𑀯𑀸 𑀧𑀢𑀸𑀫𑀺, 𑀢𑀣𑀸𑀧𑀺 𑀬𑀤𑀺𑀤𑀁 𑀅𑀤𑀸𑀦𑀜𑁆𑀘 𑀅𑀲𑀻𑀮𑀜𑁆𑀘 𑀅𑀭𑀺𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀢𑁆𑀢𑀸 𑀅𑀦𑀭𑀺𑀬𑁂𑀳𑀺 𑀘 𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀦𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺, ‘‘𑀦 𑀢𑀁 𑀅𑀦𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀳𑀦𑁆𑀤 𑀇𑀫𑀁 𑀫𑀬𑀸 𑀤𑀻𑀬𑀫𑀸𑀦𑀁 𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀳 𑀧𑀝𑀺𑀕𑁆𑀕𑀡𑁆𑀳𑀸𑀳𑀻’’𑀢𑀺. 𑀏𑀢𑁆𑀣 𑀘 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄.

𑀏𑀯𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀴𑁆𑀳𑀲𑀫𑀸𑀤𑀸𑀦𑁂𑀦 𑀪𑀢𑁆𑀢𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀫𑀢𑁆𑀣𑀓𑁂𑀦 𑀧𑀓𑁆𑀔𑀦𑁆𑀢𑁄, 𑀢𑀸𑀯𑀤𑁂𑀯 𑀅𑀲𑀻𑀢𑀺𑀳𑀢𑁆𑀣𑀕𑀫𑁆𑀪𑀻𑀭𑀸𑀬 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀢𑀮𑀢𑁄 𑀉𑀧𑀭𑀽𑀧𑀭𑀺𑀚𑀸𑀢𑀁 𑀲𑀢𑀧𑀢𑁆𑀢𑀧𑀼𑀧𑁆𑀨𑀺𑀢𑀁 𑀏𑀓𑀁 𑀫𑀳𑀸𑀧𑀤𑀼𑀫𑀁 𑀉𑀕𑁆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑁂 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄 𑀫𑀳𑀸𑀢𑀼𑀫𑁆𑀩𑀫𑀢𑁆𑀢𑀸 𑀭𑁂𑀡𑀼 𑀉𑀕𑁆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀲𑀼𑀯𑀡𑁆𑀡𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀫𑀺𑀯 𑀅𑀓𑀸𑀲𑀺. 𑀲𑁄 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀞𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀆𑀓𑀸𑀲𑁂 𑀔𑀺𑀧𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀯𑀮𑀸𑀳𑀓𑀧𑀦𑁆𑀢𑀺𑀁 𑀫𑀤𑁆𑀤𑀫𑀸𑀦𑁄 𑀯𑀺𑀬 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄. 𑀫𑀸𑀭𑁄𑀧𑀺 𑀧𑀭𑀸𑀚𑀺𑀢𑁄 𑀤𑁄𑀫𑀦𑀲𑁆𑀲𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀞𑀺𑀢𑀓𑁄𑀯 𑀫𑀳𑀸𑀚𑀦𑀲𑁆𑀲 𑀤𑀸𑀦𑀲𑀻𑀮𑀲𑀁𑀯𑀡𑁆𑀡𑀦𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑁂𑀦 𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦𑀬𑀺𑀤𑀁, 𑀕𑀳𑀧𑀢𑀺, 𑀅𑀘𑁆𑀙𑀭𑀺𑀬𑀁, 𑀬𑀁 𑀢𑁆𑀯𑀁 𑀏𑀯𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀏𑀢𑀭𑀳𑀺 𑀤𑁂𑀯𑀢𑀸𑀬 𑀦 𑀓𑀫𑁆𑀧𑀺𑀢𑁄, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑁂𑀳𑀺 𑀓𑀢𑀫𑁂𑀯 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀫𑀸𑀭𑀁 𑀧𑀭𑀸𑀚𑁂𑀢𑁆𑀯𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀞𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑀤𑀸𑀬𑀓𑁄 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.