𑁩. 𑀓𑀼𑀭𑀼𑀗𑁆𑀕𑀯𑀕𑁆𑀕𑁄

[𑁨𑁧] 𑁧. 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀜𑀸𑀢𑀫𑁂𑀢𑀁 𑀓𑀼𑀭𑀼𑀗𑁆𑀕𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀖𑀸𑀢𑀦𑀢𑁆𑀣𑀸𑀬 𑀥𑀦𑀼𑀕𑁆𑀕𑀳𑁂 𑀧𑀬𑁄𑀚𑁂𑀲𑀺, 𑀲𑀺𑀮𑀁 𑀧𑀯𑀺𑀚𑁆𑀛𑀺, 𑀥𑀦𑀧𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀩𑁆𑀩𑀣𑀸𑀧𑀺 𑀤𑀲𑀩𑀮𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀢𑀼𑀫𑁆𑀳𑀸𑀓𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻𑀢𑀺 𑀢𑀲𑁆𑀲 𑀅𑀕𑀼𑀡𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸𑀫𑁆𑀳𑀸𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀫 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀫𑀫 𑀯𑀥𑀸𑀬 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀦 𑀘 𑀧𑀦 𑀫𑀁 𑀯𑀥𑀺𑀢𑀼𑀁 𑀅𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀭𑀼𑀗𑁆𑀕𑀫𑀺𑀕𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀯𑀲𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀨𑀮𑀲𑀫𑁆𑀧𑀦𑁆𑀦𑁂 𑀲𑁂𑀧𑀡𑁆𑀡𑀺𑀭𑀼𑀓𑁆𑀔𑁂 𑀲𑁂𑀧𑀡𑁆𑀡𑀺𑀨𑀮𑀸𑀦𑀺 𑀔𑀸𑀤𑀢𑀺. 𑀅𑀣𑁂𑀓𑁄 𑀕𑀸𑀫𑀯𑀸𑀲𑀻 𑀅𑀝𑁆𑀝𑀓𑀮𑀼𑀤𑁆𑀤𑀓𑁄 𑀨𑀮𑀭𑀼𑀓𑁆𑀔𑀫𑀽𑀮𑁂𑀲𑀼 𑀫𑀺𑀕𑀸𑀦𑀁 𑀧𑀤𑀸𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 𑀉𑀧𑀭𑀺𑀭𑀼𑀓𑁆𑀔𑁂 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀨𑀮𑀸𑀦𑀺 𑀔𑀸𑀤𑀺𑀢𑀼𑀁 𑀆𑀕𑀢𑀸𑀕𑀢𑁂 𑀫𑀺𑀕𑁂 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑁂𑀲𑀁 𑀫𑀁𑀲𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀤𑀯𑀴𑀜𑁆𑀚𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀲𑁂𑀧𑀡𑁆𑀡𑀺𑀭𑀼𑀓𑁆𑀔𑁂 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀢𑀺𑀁 𑀆𑀤𑀸𑀬 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀆𑀭𑀼𑀳𑀺𑀢𑁆𑀯𑀸 𑀅𑀝𑁆𑀝𑀓𑁂 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀸𑀢𑁄𑀯 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑁂𑀧𑀡𑁆𑀡𑀺𑀨𑀮𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀫𑁆𑀫 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀲𑀳𑀲𑀸𑀯 𑀅𑀧𑀯𑀺𑀲𑀺𑀢𑁆𑀯𑀸 ‘‘𑀓𑀤𑀸𑀘𑀺 𑀅𑀝𑁆𑀝𑀓𑀮𑀼𑀤𑁆𑀤𑀓𑀸 𑀭𑀼𑀓𑁆𑀔𑁂𑀲𑀼 𑀅𑀝𑁆𑀝𑀓𑀁 𑀩𑀦𑁆𑀥𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀯𑀭𑀽𑀧𑁄 𑀉𑀧𑀤𑁆𑀤𑀯𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀩𑀸𑀳𑀺𑀭𑀢𑁄𑀯 𑀅𑀝𑁆𑀞𑀸𑀲𑀺.

𑀮𑀼𑀤𑁆𑀤𑀓𑁄𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀅𑀝𑁆𑀝𑀓𑁂 𑀦𑀺𑀲𑀺𑀦𑁆𑀦𑁄𑀯 𑀲𑁂𑀧𑀡𑁆𑀡𑀺𑀨𑀮𑀸𑀦𑀺 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀧𑀸𑀢𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀸𑀦𑀺 𑀨𑀮𑀸𑀦𑀺 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀧𑀼𑀭𑀢𑁄 𑀧𑀢𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀉𑀧𑀭𑀺 𑀮𑀼𑀤𑁆𑀤𑀓𑁄’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀮𑀼𑀤𑁆𑀤𑀓𑀁 𑀤𑀺𑀲𑁆𑀯𑀸 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀅𑀫𑁆𑀪𑁄, 𑀭𑀼𑀓𑁆𑀔-𑀧𑀼𑀩𑁆𑀩𑁂 𑀢𑁆𑀯𑀁 𑀑𑀮𑀫𑁆𑀩𑀓𑀁 𑀘𑀸𑀭𑁂𑀦𑁆𑀢𑁄 𑀯𑀺𑀬 𑀉𑀚𑀼𑀓𑀫𑁂𑀯 𑀨𑀮𑀸𑀦𑀺 𑀧𑀸𑀢𑁂𑀲𑀺, 𑀅𑀚𑁆𑀚 𑀧𑀦 𑀢𑁂 𑀭𑀼𑀓𑁆𑀔𑀥𑀫𑁆𑀫𑁄 𑀧𑀭𑀺𑀘𑁆𑀘𑀢𑁆𑀢𑁄, 𑀏𑀯𑀁 𑀢𑀬𑀸 𑀭𑀼𑀓𑁆𑀔𑀥𑀫𑁆𑀫𑁂 𑀧𑀭𑀺𑀘𑁆𑀘𑀢𑁆𑀢𑁂 𑀅𑀳𑀫𑁆𑀧𑀺 𑀅𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑁆𑀳𑀁 𑀆𑀳𑀸𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧. ‘‘𑀜𑀸𑀢𑀫𑁂𑀢𑀁 𑀓𑀼𑀭𑀼𑀗𑁆𑀕𑀲𑁆𑀲, 𑀬𑀁 𑀢𑁆𑀯𑀁 𑀲𑁂𑀧𑀡𑁆𑀡𑀺 𑀲𑁂𑀬𑁆𑀬𑀲𑀺;

𑀅𑀜𑁆𑀜𑀁 𑀲𑁂𑀧𑀡𑁆𑀡𑀺 𑀕𑀘𑁆𑀙𑀸𑀫𑀺, 𑀦 𑀫𑁂 𑀢𑁂 𑀭𑀼𑀘𑁆𑀘𑀢𑁂 𑀨𑀮’’𑀦𑁆𑀢𑀺.

𑀢𑀢𑁆𑀣 𑀜𑀸𑀢𑀦𑁆𑀢𑀺 𑀧𑀸𑀓𑀝𑀁 𑀚𑀸𑀢𑀁. 𑀏𑀢𑀦𑁆𑀢𑀺 𑀇𑀤𑀁. 𑀓𑀼𑀭𑀼𑀗𑁆𑀕𑀲𑁆𑀲𑀸𑀢𑀺 𑀓𑀼𑀭𑀼𑀗𑁆𑀕𑀫𑀺𑀕𑀲𑁆𑀲. 𑀬𑀁 𑀢𑁆𑀯𑀁 𑀲𑁂𑀧𑀡𑁆𑀡𑀺 𑀲𑁂𑀬𑁆𑀬𑀲𑀻𑀢𑀺 𑀬𑀁 𑀢𑁆𑀯𑀁 𑀅𑀫𑁆𑀪𑁄 𑀲𑁂𑀧𑀡𑁆𑀡𑀺𑀭𑀼𑀓𑁆𑀔 𑀧𑀼𑀭𑀢𑁄 𑀨𑀮𑀸𑀦𑀺 𑀧𑀸𑀢𑀬𑀫𑀸𑀦𑁄 𑀲𑁂𑀬𑁆𑀬𑀲𑀺 𑀯𑀺𑀲𑁂𑀬𑁆𑀬𑀲𑀺 𑀯𑀺𑀲𑀺𑀡𑁆𑀡𑀨𑀮𑁄 𑀳𑁄𑀲𑀺, 𑀢𑀁 𑀲𑀩𑁆𑀩𑀁 𑀓𑀼𑀭𑀼𑀗𑁆𑀕𑀫𑀺𑀕𑀲𑁆𑀲 𑀧𑀸𑀓𑀝𑀁 𑀚𑀸𑀢𑀁. 𑀦 𑀫𑁂 𑀢𑁂 𑀭𑀼𑀘𑁆𑀘𑀢𑁂 𑀨𑀮𑀦𑁆𑀢𑀺 𑀏𑀯𑀁 𑀨𑀮𑀁 𑀤𑀤𑀫𑀸𑀦𑀸𑀬 𑀦 𑀫𑁂 𑀢𑀯 𑀨𑀮𑀁 𑀭𑀼𑀘𑁆𑀘𑀢𑀺, 𑀢𑀺𑀝𑁆𑀞 𑀢𑁆𑀯𑀁, 𑀅𑀳𑀁 𑀅𑀜𑁆𑀜𑀢𑁆𑀣 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀅𑀕𑀫𑀸𑀲𑀺.

𑀅𑀣𑀲𑁆𑀲 𑀮𑀼𑀤𑁆𑀤𑀓𑁄 𑀅𑀝𑁆𑀝𑀓𑁂 𑀦𑀺𑀲𑀺𑀦𑁆𑀦𑁄𑀯 𑀲𑀢𑁆𑀢𑀺𑀁 𑀔𑀺𑀧𑀺𑀢𑁆𑀯𑀸 ‘‘𑀕𑀘𑁆𑀙, 𑀯𑀺𑀭𑀤𑁆𑀥𑁄 𑀤𑀸𑀦𑀺𑀫𑁆𑀳𑀺 𑀢’’𑀦𑁆𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 𑀆𑀳 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀇𑀤𑀸𑀦𑀻𑀲𑀺 𑀓𑀺𑀜𑁆𑀘𑀸𑀧𑀺 𑀫𑀁 𑀯𑀺𑀭𑀤𑁆𑀥𑁄, 𑀅𑀝𑁆𑀞 𑀧𑀦 𑀫𑀳𑀸𑀦𑀺𑀭𑀬𑁂 𑀲𑁄𑀴𑀲𑀉𑀲𑁆𑀲𑀤𑀦𑀺𑀭𑀬𑁂 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀻𑀦𑀺 𑀘 𑀓𑀫𑁆𑀫𑀓𑀸𑀭𑀡𑀸𑀦𑀺 𑀅𑀯𑀺𑀭𑀤𑁆𑀥𑁄𑀬𑁂𑀯𑀸𑀲𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀁 𑀕𑀢𑁄, 𑀮𑀼𑀤𑁆𑀤𑁄𑀧𑀺 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀁 𑀕𑀢𑁄.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀫 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀦 𑀘 𑀧𑀦 𑀫𑀁 𑀯𑀥𑀺𑀢𑀼𑀁 𑀅𑀲𑀓𑁆𑀔𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀝𑁆𑀝𑀓𑀮𑀼𑀤𑁆𑀤𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀼𑀭𑀼𑀗𑁆𑀕𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁨] 𑁨. 𑀓𑀼𑀓𑁆𑀓𑀼𑀭𑀚𑀸𑀢𑀓𑀯𑀡𑁆𑀡𑀦𑀸

𑀬𑁂 𑀓𑀼𑀓𑁆𑀓𑀼𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀪𑀤𑁆𑀤𑀲𑀸𑀮𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀧𑀦 𑀯𑀢𑁆𑀣𑀼𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀓𑁆𑀓𑀼𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁂𑀓𑀲𑀢𑀓𑀼𑀓𑁆𑀓𑀼𑀭𑀧𑀭𑀺𑀯𑀼𑀢𑁄 𑀫𑀳𑀸𑀲𑀼𑀲𑀸𑀦𑁂 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀲𑁂𑀢𑀲𑀺𑀦𑁆𑀥𑀯𑀬𑀼𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀭𑀣𑀁 𑀆𑀭𑀼𑀬𑁆𑀳 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀲𑀪𑀸𑀕𑀁 𑀓𑀻𑀴𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀢𑀁 𑀭𑀣𑀯𑀭𑀢𑁆𑀢𑀁 𑀬𑀣𑀸𑀦𑀤𑁆𑀥𑀫𑁂𑀯 𑀭𑀸𑀚𑀗𑁆𑀕𑀡𑁂 𑀞𑀧𑀬𑀺𑀁𑀲𑀼, 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀺𑀦𑁆𑀢𑁄. 𑀉𑀧𑀭𑀺𑀧𑀸𑀲𑀸𑀤𑀢𑁄 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑀸 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀘𑀫𑁆𑀫𑀜𑁆𑀘 𑀦𑀤𑁆𑀥𑀺𑀜𑁆𑀘 𑀔𑀸𑀤𑀺𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 ‘‘𑀤𑁂𑀯, 𑀦𑀺𑀤𑁆𑀥𑀫𑀦𑀫𑀼𑀔𑁂𑀦 𑀲𑀼𑀦𑀔𑀸 𑀧𑀯𑀺𑀲𑀺𑀢𑁆𑀯𑀸 𑀭𑀣𑀲𑁆𑀲 𑀘𑀫𑁆𑀫𑀜𑁆𑀘 𑀦𑀤𑁆𑀥𑀺𑀜𑁆𑀘 𑀔𑀸𑀤𑀺𑀁𑀲𑀽’’𑀢𑀺. 𑀭𑀸𑀚𑀸 𑀲𑀼𑀦𑀔𑀸𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀲𑀼𑀦𑀔𑁂 𑀖𑀸𑀢𑁂𑀣𑀸’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀦𑀔𑀸𑀦𑀁 𑀫𑀳𑀸𑀩𑁆𑀬𑀲𑀦𑀁 𑀉𑀤𑀧𑀸𑀤𑀺. 𑀢𑁂 𑀤𑀺𑀝𑁆𑀞𑀺𑀤𑀺𑀝𑁆𑀞𑀝𑁆𑀞𑀸𑀦𑁂 𑀖𑀸𑀢𑀺𑀬𑀫𑀸𑀦𑀸 𑀧𑀮𑀸𑀬𑀺𑀢𑁆𑀯𑀸 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ‘𑀢𑀼𑀫𑁆𑀳𑁂 𑀩𑀳𑀽 𑀲𑀦𑁆𑀦𑀺𑀧𑀢𑀺𑀢𑀸, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀅𑀦𑁆𑀢𑁂𑀧𑀼𑀭𑁂 𑀓𑀺𑀭 𑀭𑀣𑀲𑁆𑀲 𑀘𑀫𑁆𑀫𑀜𑁆𑀘 𑀦𑀤𑁆𑀥𑀺 𑀘 𑀲𑀼𑀦𑀔𑁂𑀳𑀺 𑀔𑀸𑀤𑀺𑀢𑀸’𑀢𑀺 𑀓𑀼𑀤𑁆𑀥𑁄 𑀭𑀸𑀚𑀸 𑀲𑀼𑀦𑀔𑀯𑀥𑀁 𑀆𑀡𑀸𑀧𑁂𑀲𑀺, 𑀩𑀳𑀽 𑀲𑀼𑀦𑀔𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀫𑀳𑀸𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀆𑀳𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀆𑀭𑀓𑁆𑀔𑀝𑁆𑀞𑀸𑀦𑁂 𑀩𑀳𑀺 𑀲𑀼𑀦𑀔𑀸𑀦𑀁 𑀑𑀓𑀸𑀲𑁄 𑀦𑀢𑁆𑀣𑀺, 𑀅𑀦𑁆𑀢𑁄𑀭𑀸𑀚𑀦𑀺𑀯𑁂𑀲𑀦𑁂 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑀸𑀦𑀫𑁂𑀯 𑀢𑀁 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺. 𑀇𑀤𑀸𑀦𑀺 𑀧𑀦 𑀘𑁄𑀭𑀸𑀦𑀁 𑀓𑀺𑀜𑁆𑀘𑀺 𑀪𑀬𑀁 𑀦𑀢𑁆𑀣𑀺, 𑀅𑀘𑁄𑀭𑀸 𑀫𑀭𑀡𑀁 𑀮𑀪𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀘𑁄𑀭𑁂 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺. 𑀲𑁄 𑀜𑀸𑀢𑀓𑁂 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀅𑀳𑀁 𑀯𑁄 𑀅𑀪𑀬𑀁 𑀆𑀳𑀭𑀺𑀲𑁆𑀲𑀸𑀫𑀺, 𑀬𑀸𑀯 𑀭𑀸𑀚𑀸𑀦𑀁 𑀧𑀲𑁆𑀲𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀢𑁆𑀯𑀸 𑀫𑁂𑀢𑁆𑀢𑀸𑀪𑀸𑀯𑀦𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 ‘‘𑀫𑀬𑁆𑀳𑀁 𑀉𑀧𑀭𑀺 𑀮𑁂𑀟𑁆𑀟𑀼𑀁 𑀯𑀸 𑀫𑀼𑀕𑁆𑀕𑀭𑀁 𑀯𑀸 𑀫𑀸 𑀓𑁄𑀘𑀺 𑀔𑀺𑀧𑀺𑀢𑀼𑀁 𑀉𑀲𑁆𑀲𑀳𑀻’’𑀢𑀺 𑀅𑀥𑀺𑀝𑁆𑀞𑀸𑀬 𑀏𑀓𑀓𑁄𑀯 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀏𑀓𑀲𑀢𑁆𑀢𑁄𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀭𑀸𑀚𑀸𑀧𑀺 𑀲𑀼𑀦𑀔𑀯𑀥𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀭𑀜𑁆𑀜𑁄 𑀆𑀲𑀦𑀲𑁆𑀲 𑀳𑁂𑀝𑁆𑀞𑀸 𑀧𑀸𑀯𑀺𑀲𑀺. 𑀅𑀣 𑀦𑀁 𑀭𑀸𑀚𑀧𑀼𑀭𑀺𑀲𑀸 𑀦𑀻𑀳𑀭𑀺𑀢𑀼𑀁 𑀆𑀭𑀤𑁆𑀥𑀸, 𑀭𑀸𑀚𑀸 𑀧𑀦 𑀯𑀸𑀭𑁂𑀲𑀺.

𑀲𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀳𑁂𑀝𑁆𑀞𑀸𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑁂 𑀓𑀼𑀓𑁆𑀓𑀼𑀭𑁂 𑀫𑀸𑀭𑀸𑀧𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀸𑀭𑀸𑀧𑁂𑀫𑀳’’𑀦𑁆𑀢𑀺. ‘‘𑀓𑁄 𑀦𑁂𑀲𑀁 𑀅𑀧𑀭𑀸𑀥𑁄 𑀦𑀭𑀺𑀦𑁆𑀤𑀸’’𑀢𑀺? ‘‘𑀭𑀣𑀲𑁆𑀲 𑀫𑁂 𑀧𑀭𑀺𑀯𑀸𑀭𑀘𑀫𑁆𑀫𑀜𑁆𑀘 𑀦𑀤𑁆𑀥𑀺𑀜𑁆𑀘 𑀔𑀸𑀤𑀺𑀁𑀲𑀽’’𑀢𑀺. ‘‘𑀬𑁂 𑀔𑀸𑀤𑀺𑀁𑀲𑀼, 𑀢𑁂 𑀚𑀸𑀦𑀸𑀣𑀸’’𑀢𑀺? ‘‘𑀦 𑀚𑀸𑀦𑀸𑀫𑀸’’𑀢𑀺. ‘‘‘𑀇𑀫𑁂 𑀦𑀸𑀫 𑀘𑀫𑁆𑀫𑀔𑀸𑀤𑀓𑀘𑁄𑀭𑀸’𑀢𑀺 𑀢𑀣𑀢𑁄 𑀅𑀚𑀸𑀦𑀺𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀫𑀸𑀭𑀸𑀧𑀦𑀁 𑀦 𑀬𑀼𑀢𑁆𑀢𑀁, 𑀤𑁂𑀯𑀸’’𑀢𑀺. ‘‘𑀭𑀣𑀘𑀫𑁆𑀫𑀲𑁆𑀲 𑀓𑀼𑀓𑁆𑀓𑀼𑀭𑁂𑀳𑀺 𑀔𑀸𑀤𑀺𑀢𑀢𑁆𑀢𑀸 ‘𑀤𑀺𑀝𑁆𑀞𑀤𑀺𑀝𑁆𑀞𑁂 𑀲𑀩𑁆𑀩𑁂𑀯 𑀫𑀸𑀭𑁂𑀣𑀸’𑀢𑀺 𑀲𑀼𑀦𑀔𑀯𑀥𑀁 𑀆𑀡𑀸𑀧𑁂𑀲𑀺’’𑀦𑁆𑀢𑀺. ‘‘𑀓𑀺𑀁 𑀧𑀦 𑀯𑁄 𑀫𑀦𑀼𑀲𑁆𑀲𑀸 𑀲𑀩𑁆𑀩𑁂𑀯 𑀓𑀼𑀓𑁆𑀓𑀼𑀭𑁂 𑀫𑀸𑀭𑁂𑀦𑁆𑀢𑀺, 𑀉𑀤𑀸𑀳𑀼 𑀫𑀭𑀡𑀁 𑀅𑀮𑀪𑀦𑁆𑀢𑀸𑀧𑀺 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀖𑀭𑁂 𑀓𑁄𑀮𑁂𑀬𑁆𑀬𑀓𑀸 𑀫𑀭𑀡𑀁 𑀦 𑀮𑀪𑀦𑁆𑀢𑀻’’𑀢𑀺. 𑀫𑀳𑀸𑀭𑀸𑀚 𑀇𑀤𑀸𑀦𑁂𑀯 𑀢𑀼𑀫𑁆𑀳𑁂 ‘‘𑀭𑀣𑀘𑀫𑁆𑀫𑀲𑁆𑀲 𑀓𑀼𑀓𑁆𑀓𑀼𑀭𑁂𑀳𑀺 𑀔𑀸𑀤𑀺𑀢𑀢𑁆𑀢𑀸 ‘𑀤𑀺𑀝𑁆𑀞𑀤𑀺𑀝𑁆𑀞𑁂 𑀲𑀩𑁆𑀩𑁂𑀯 𑀫𑀸𑀭𑁂𑀣𑀸’𑀢𑀺 𑀲𑀼𑀦𑀔𑀯𑀥𑀁 𑀆𑀡𑀸𑀧𑁂𑀲𑀺’’𑀦𑁆𑀢𑀺 𑀅𑀯𑁄𑀘𑀼𑀢𑁆𑀣, 𑀇𑀤𑀸𑀦𑀺 𑀧𑀦 ‘‘𑀅𑀫𑁆𑀳𑀸𑀓𑀁 𑀖𑀭𑁂 𑀓𑁄𑀮𑁂𑀬𑁆𑀬𑀓𑀸 𑀫𑀭𑀡𑀁 𑀦 𑀮𑀪𑀦𑁆𑀢𑀻’’𑀢𑀺 𑀯𑀤𑁂𑀣. ‘‘𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀢𑀺𑀕𑀫𑀦𑀁 𑀕𑀘𑁆𑀙𑀣, 𑀅𑀕𑀢𑀺𑀕𑀫𑀦𑀜𑁆𑀘 𑀦𑀸𑀫 𑀦 𑀬𑀼𑀢𑁆𑀢𑀁, 𑀦 𑀘 𑀭𑀸𑀚𑀥𑀫𑁆𑀫𑁄, 𑀭𑀜𑁆𑀜𑀸 𑀦𑀸𑀫 𑀓𑀸𑀭𑀡𑀕𑀯𑁂𑀲𑀓𑁂𑀦 𑀢𑀼𑀮𑀸𑀲𑀤𑀺𑀲𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀸𑀦𑀺 𑀘 𑀓𑁄𑀮𑁂𑀬𑁆𑀬𑀓𑀸 𑀫𑀭𑀡𑀁 𑀦 𑀮𑀪𑀦𑁆𑀢𑀺, 𑀤𑀼𑀩𑁆𑀩𑀮𑀲𑀼𑀦𑀔𑀸𑀯 𑀮𑀪𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀦𑀸𑀬𑀁 𑀲𑀩𑁆𑀩𑀲𑀼𑀦𑀔𑀖𑀘𑁆𑀘𑀸, 𑀤𑀼𑀩𑁆𑀩𑀮𑀖𑀸𑀢𑀺𑀓𑀸 𑀦𑀸𑀫𑁂𑀲𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀬𑀁 𑀢𑀼𑀫𑁆𑀳𑁂 𑀓𑀭𑁄𑀣, 𑀦𑀸𑀬𑀁 𑀥𑀫𑁆𑀫𑁄’’𑀢𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨. ‘‘𑀬𑁂 𑀓𑀼𑀓𑁆𑀓𑀼𑀭𑀸 𑀭𑀸𑀚𑀓𑀼𑀮𑀫𑁆𑀳𑀺 𑀯𑀤𑁆𑀥𑀸, 𑀓𑁄𑀮𑁂𑀬𑁆𑀬𑀓𑀸 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀸;

𑀢𑁂𑀫𑁂 𑀦 𑀯𑀚𑁆𑀛𑀸 𑀫𑀬𑀫𑀲𑁆𑀫 𑀯𑀚𑁆𑀛𑀸, 𑀦𑀸𑀬𑀁 𑀲𑀖𑀘𑁆𑀘𑀸 𑀤𑀼𑀩𑁆𑀩𑀮𑀖𑀸𑀢𑀺𑀓𑀸𑀬’’𑀦𑁆𑀢𑀺.

𑀢𑀢𑁆𑀣 𑀬𑁂 𑀓𑀼𑀓𑁆𑀓𑀼𑀭𑀸𑀢𑀺 𑀬𑁂 𑀲𑀼𑀦𑀔𑀸. 𑀬𑀣𑀸 𑀳𑀺 𑀥𑀸𑀭𑀼𑀡𑁆𑀳𑁄𑀧𑀺 𑀧𑀲𑁆𑀲𑀸𑀯𑁄 ‘‘𑀧𑀽𑀢𑀺𑀫𑀼𑀢𑁆𑀢’’𑀦𑁆𑀢𑀺, 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 ‘‘𑀚𑀭𑀲𑀺𑀗𑁆𑀕𑀸𑀮𑁄’’𑀢𑀺, 𑀓𑁄𑀫𑀮𑀸𑀧𑀺 𑀕𑀮𑁄𑀘𑀺𑀮𑀢𑀸 ‘‘𑀧𑀽𑀢𑀺𑀮𑀢𑀸’’𑀢𑀺, 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 ‘‘𑀧𑀽𑀢𑀺𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯𑀁 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀼𑀦𑀔𑁄 ‘‘𑀓𑀼𑀓𑁆𑀓𑀼𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀫𑀳𑀮𑁆𑀮𑀓𑀸 𑀓𑀸𑀬𑀩𑀮𑀽𑀧𑀧𑀦𑁆𑀦𑀸𑀧𑀺 𑀢𑁂 ‘‘𑀓𑀼𑀓𑁆𑀓𑀼𑀭𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀯𑀤𑁆𑀥𑀸𑀢𑀺 𑀯𑀟𑁆𑀠𑀺𑀢𑀸. 𑀓𑁄𑀮𑁂𑀬𑁆𑀬𑀓𑀸𑀢𑀺 𑀭𑀸𑀚𑀓𑀼𑀮𑁂 𑀚𑀸𑀢𑀸 𑀲𑀫𑁆𑀪𑀽𑀢𑀸 𑀲𑀁𑀯𑀟𑁆𑀠𑀸. 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀘𑁂𑀯 𑀓𑀸𑀬𑀩𑀮𑁂𑀦 𑀘 𑀲𑀫𑁆𑀧𑀦𑁆𑀦𑀸. 𑀢𑁂𑀫𑁂 𑀦 𑀯𑀚𑁆𑀛𑀸𑀢𑀺 𑀢𑁂 𑀇𑀫𑁂 𑀲𑀲𑁆𑀲𑀸𑀫𑀺𑀓𑀸 𑀲𑀸𑀭𑀓𑁆𑀔𑀸 𑀦 𑀯𑀚𑁆𑀛𑀸. 𑀫𑀬𑀫𑀲𑁆𑀫 𑀯𑀚𑁆𑀛𑀸𑀢𑀺 𑀅𑀲𑁆𑀲𑀸𑀫𑀺𑀓𑀸 𑀅𑀦𑀸𑀭𑀓𑁆𑀔𑀸 𑀫𑀬𑀁 𑀯𑀚𑁆𑀛𑀸 𑀦𑀸𑀫 𑀚𑀸𑀢𑀸. 𑀦𑀸𑀬𑀁 𑀲𑀖𑀘𑁆𑀘𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀅𑀬𑀁 𑀅𑀯𑀺𑀲𑁂𑀲𑁂𑀦 𑀲𑀖𑀘𑁆𑀘𑀸 𑀦𑀸𑀫 𑀦 𑀳𑁄𑀢𑀺. 𑀤𑀼𑀩𑁆𑀩𑀮𑀖𑀸𑀢𑀺𑀓𑀸𑀬𑀦𑁆𑀢𑀺 𑀅𑀬𑀁 𑀧𑀦 𑀤𑀼𑀩𑁆𑀩𑀮𑀸𑀦𑀁𑀬𑁂𑀯 𑀖𑀸𑀢𑀦𑀢𑁄 𑀤𑀼𑀩𑁆𑀩𑀮𑀖𑀸𑀢𑀺𑀓𑀸 𑀦𑀸𑀫 𑀳𑁄𑀢𑀺. 𑀭𑀸𑀚𑀽𑀳𑀺 𑀦𑀸𑀫 𑀘𑁄𑀭𑀸 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸, 𑀦𑁄 𑀅𑀘𑁄𑀭𑀸. 𑀇𑀥 𑀧𑀦 𑀘𑁄𑀭𑀸𑀦𑀁 𑀓𑀺𑀜𑁆𑀘𑀺 𑀪𑀬𑀁 𑀦𑀢𑁆𑀣𑀺, 𑀅𑀘𑁄𑀭𑀸 𑀫𑀭𑀡𑀁 𑀮𑀪𑀦𑁆𑀢𑀺. 𑀅𑀳𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀬𑀼𑀢𑁆𑀢𑀁 𑀯𑀢𑁆𑀢𑀢𑀺, 𑀅𑀳𑁄 𑀅𑀥𑀫𑁆𑀫𑁄 𑀯𑀢𑁆𑀢𑀢𑀻𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀭𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀚𑀸𑀦𑀸𑀲𑀺 𑀢𑁆𑀯𑀁, 𑀧𑀡𑁆𑀟𑀺𑀢, 𑀅𑀲𑀼𑀓𑁂𑀳𑀺 𑀦𑀸𑀫 𑀭𑀣𑀘𑀫𑁆𑀫𑀁 𑀔𑀸𑀤𑀺𑀢’’𑀦𑁆𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. ‘‘𑀓𑁂𑀳𑀺 𑀔𑀸𑀤𑀺𑀢’’𑀦𑁆𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀯𑀲𑀦𑀓𑁂𑀳𑀺 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑁂𑀳𑀻’’𑀢𑀺. ‘‘𑀓𑀣𑀁 𑀢𑁂𑀳𑀺 𑀔𑀸𑀤𑀺𑀢𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺? ‘‘𑀅𑀳𑀁 𑀢𑁂𑀳𑀺 𑀔𑀸𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀲𑀸𑀫𑀻’’𑀢𑀺. ‘‘𑀤𑀲𑁆𑀲𑁂𑀳𑀺 𑀧𑀡𑁆𑀟𑀺𑀢𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀖𑀭𑁂 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑁂 𑀆𑀳𑀭𑀸𑀧𑁂𑀢𑁆𑀯𑀸 𑀣𑁄𑀓𑀁 𑀢𑀓𑁆𑀓𑀜𑁆𑀘 𑀤𑀩𑁆𑀩𑀢𑀺𑀡𑀸𑀦𑀺 𑀘 𑀆𑀳𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀇𑀫𑀸𑀦𑀺 𑀢𑀺𑀡𑀸𑀦𑀺 𑀢𑀓𑁆𑀓𑁂𑀦 𑀫𑀤𑁆𑀤𑀸𑀧𑁂𑀢𑁆𑀯𑀸 𑀏𑀢𑁂 𑀲𑀼𑀦𑀔𑁂 𑀧𑀸𑀬𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀓𑀢𑁆𑀯𑀸 𑀧𑀸𑀬𑀸𑀧𑁂𑀲𑀺, 𑀧𑀻𑀢𑀸 𑀧𑀻𑀢𑀸 𑀲𑀼𑀦𑀔𑀸 𑀲𑀤𑁆𑀥𑀺𑀁 𑀘𑀫𑁆𑀫𑁂𑀳𑀺 𑀯𑀫𑀺𑀁𑀲𑀼. 𑀭𑀸𑀚𑀸 ‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀩𑁆𑀬𑀸𑀓𑀭𑀡𑀁 𑀯𑀺𑀬𑀸’’𑀢𑀺 𑀢𑀼𑀝𑁆𑀞𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀥𑀫𑁆𑀫𑀁 𑀘𑀭, 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀔𑀢𑁆𑀢𑀺𑀬𑀸’’𑀢𑀺𑀆𑀤𑀻𑀳𑀺 (𑀚𑀸. 𑁨.𑁧𑁭.𑁩𑁯) 𑀢𑁂𑀲𑀓𑀼𑀡𑀚𑀸𑀢𑀓𑁂 𑀆𑀕𑀢𑀸𑀳𑀺 𑀤𑀲𑀳𑀺 𑀥𑀫𑁆𑀫𑀘𑀭𑀺𑀬𑀕𑀸𑀣𑀸𑀳𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀭𑀜𑁆𑀜𑁄𑀯 𑀧𑀝𑀺𑀅𑀤𑀸𑀲𑀺.

𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑀼𑀦𑀔𑀸𑀦𑀁 𑀅𑀢𑁆𑀢𑀦𑁄 𑀪𑁄𑀚𑀦𑀲𑀤𑀺𑀲𑀫𑁂𑀯 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀺𑀢𑁄 𑀬𑀸𑀯𑀢𑀸𑀬𑀼𑀓𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀓𑀼𑀓𑁆𑀓𑀼𑀭𑁄𑀯𑀸𑀤𑁄 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀜𑀸𑀢𑀓𑀸𑀦𑀁 𑀅𑀢𑁆𑀣𑀁 𑀘𑀭𑀢𑀺, 𑀧𑀼𑀩𑁆𑀩𑁂𑀧𑀺 𑀘𑀭𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀯𑀲𑁂𑀲𑀸 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀓𑀼𑀓𑁆𑀓𑀼𑀭𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀓𑁆𑀓𑀼𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁩] 𑁩. 𑀪𑁄𑀚𑀸𑀚𑀸𑀦𑀻𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 𑀧𑀲𑁆𑀲𑁂𑀦 𑀲𑁂𑀫𑀸𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀦𑀸𑀬𑀢𑀦𑁂𑀧𑀺 𑀯𑀻𑀭𑀺𑀬𑀁 𑀅𑀓𑀁𑀲𑀼, 𑀧𑀳𑀸𑀭𑀁 𑀮𑀤𑁆𑀥𑀸𑀧𑀺 𑀦𑁂𑀯 𑀑𑀲𑁆𑀲𑀚𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀲𑀫𑁆𑀧𑀦𑁆𑀦𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀗𑁆𑀕𑀮𑀲𑁆𑀲𑁄 𑀅𑀳𑁄𑀲𑀺. 𑀲𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀁𑀬𑁂𑀯 𑀦𑀸𑀦𑀕𑁆𑀕𑀭𑀲𑀲𑀫𑁆𑀧𑀦𑁆𑀦𑀁 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀘𑀸𑀢𑀼𑀚𑁆𑀚𑀸𑀢𑀺𑀓𑀕𑀦𑁆𑀥𑀽𑀧𑀮𑀺𑀢𑁆𑀢𑀸𑀬𑀫𑁂𑀯 𑀪𑀽𑀫𑀺𑀬𑀁 𑀢𑀺𑀝𑁆𑀞𑀢𑀺, 𑀢𑀁 𑀞𑀸𑀦𑀁 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀧𑀭𑀺𑀓𑁆𑀔𑀺𑀢𑁆𑀢𑀁 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀘𑁂𑀮𑀯𑀺𑀢𑀸𑀦𑀁 𑀲𑀫𑁄𑀲𑀭𑀺𑀢𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀁 𑀅𑀯𑀺𑀚𑀳𑀺𑀢𑀕𑀦𑁆𑀥𑀢𑁂𑀮𑀧𑀤𑀻𑀧𑀁 𑀳𑁄𑀢𑀺. 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀧𑀦 𑀅𑀧𑀢𑁆𑀣𑁂𑀦𑁆𑀢𑀸 𑀭𑀸𑀚𑀸𑀦𑁄 𑀦𑀸𑀫 𑀦𑀢𑁆𑀣𑀺. 𑀏𑀓𑀁 𑀲𑀫𑀬𑀁 𑀲𑀢𑁆𑀢 𑀭𑀸𑀚𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀭𑀚𑁆𑀚𑀁 𑀯𑀸 𑀤𑁂𑀢𑀼, 𑀬𑀼𑀤𑁆𑀥𑀁 𑀯𑀸’’𑀢𑀺 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀼𑀁. 𑀭𑀸𑀚𑀸 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀢𑀸𑀯 𑀆𑀤𑀺𑀢𑁄𑀯 𑀬𑀼𑀤𑁆𑀥𑀸𑀬 𑀦 𑀕𑀦𑁆𑀢𑀩𑁆𑀩𑀁, 𑀅𑀲𑀼𑀓𑀁 𑀦𑀸𑀫 𑀅𑀲𑁆𑀲𑀸𑀭𑁄𑀳𑀁 𑀧𑁂𑀲𑁂𑀢𑁆𑀯𑀸 𑀬𑀼𑀤𑁆𑀥𑀁 𑀓𑀸𑀭𑁂𑀣, 𑀢𑀲𑁆𑀫𑀺𑀁 𑀅𑀲𑀓𑁆𑀓𑁄𑀦𑁆𑀢𑁂 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀲𑀺, 𑀢𑀸𑀢, 𑀲𑀢𑁆𑀢𑀳𑀺 𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀓𑀸𑀢𑀼’’𑀦𑁆𑀢𑀺 𑀆𑀳. ‘‘𑀤𑁂𑀯, 𑀲𑀘𑁂 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑀁 𑀮𑀪𑀸𑀫𑀺, 𑀢𑀺𑀝𑁆𑀞𑀦𑁆𑀢𑀼 𑀲𑀢𑁆𑀢 𑀭𑀸𑀚𑀸𑀦𑁄, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀳𑀺𑀧𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑁄 𑀯𑀸 𑀳𑁄𑀢𑀼 𑀅𑀜𑁆𑀜𑁄 𑀯𑀸, 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀳𑁂𑀢𑁆𑀯𑀸 𑀬𑀼𑀤𑁆𑀥𑀁 𑀓𑀭𑁄𑀳𑀻’’𑀢𑀺.

𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀼𑀯𑀫𑁆𑀫𑀺𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀲𑀩𑁆𑀩𑀲𑀦𑁆𑀦𑀸𑀳𑀲𑀦𑁆𑀦𑀤𑁆𑀥𑁄 𑀔𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀲𑀺𑀦𑁆𑀥𑀯𑀧𑀺𑀝𑁆𑀞𑀺𑀯𑀭𑀕𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀘𑀭𑀫𑀸𑀦𑁄 𑀧𑀞𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀁 𑀭𑀸𑀚𑀸𑀦𑀁 𑀚𑀻𑀯𑀕𑁆𑀕𑀸𑀳𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀦𑀕𑀭𑁂 𑀩𑀮𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀤𑀼𑀢𑀺𑀬𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸 𑀢𑀢𑀺𑀬𑀦𑁆𑀢𑀺 𑀏𑀯𑀁 𑀧𑀜𑁆𑀘 𑀭𑀸𑀚𑀸𑀦𑁄 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀙𑀝𑁆𑀞𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀙𑀝𑁆𑀞𑀲𑁆𑀲 𑀭𑀜𑁆𑀜𑁄 𑀕𑀳𑀺𑀢𑀓𑀸𑀮𑁂 𑀪𑁄𑀚𑀸𑀚𑀸𑀦𑀻𑀬𑁄 𑀧𑀳𑀸𑀭𑀁 𑀮𑀪𑀢𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺, 𑀯𑁂𑀤𑀦𑀸 𑀩𑀮𑀯𑀢𑀺𑀬𑁄 𑀯𑀢𑁆𑀢𑀦𑁆𑀢𑀺. 𑀅𑀲𑁆𑀲𑀸𑀭𑁄𑀳𑁄 𑀢𑀲𑁆𑀲 𑀧𑀳𑀝𑀪𑀸𑀯𑀁 𑀜𑀢𑁆𑀯𑀸 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑀁 𑀭𑀸𑀚𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀦𑁆𑀦𑀸𑀳𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀅𑀜𑁆𑀜𑀁 𑀅𑀲𑁆𑀲𑀁 𑀲𑀦𑁆𑀦𑀬𑁆𑀳𑀺𑀢𑀼𑀁 𑀆𑀭𑀤𑁆𑀥𑁄. 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀨𑀸𑀲𑀼𑀓𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀯 𑀅𑀓𑁆𑀔𑀻𑀦𑀺 𑀉𑀫𑁆𑀫𑀺𑀮𑁂𑀢𑁆𑀯𑀸 𑀅𑀲𑁆𑀲𑀸𑀭𑁄𑀳𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀜𑁆𑀜𑀁 𑀅𑀲𑁆𑀲𑀁 𑀲𑀦𑁆𑀦𑀬𑁆𑀳𑀢𑀺, 𑀅𑀬𑀜𑁆𑀘 𑀅𑀲𑁆𑀲𑁄 𑀲𑀢𑁆𑀢𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀭𑀸𑀚𑀸𑀦𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀫𑀬𑀸 𑀓𑀢𑀓𑀫𑁆𑀫𑀜𑁆𑀘 𑀦𑀲𑁆𑀲𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀲𑀫𑁄 𑀅𑀲𑁆𑀲𑀸𑀭𑁄𑀳𑁄𑀧𑀺 𑀦𑀲𑁆𑀲𑀺𑀲𑁆𑀲𑀢𑀺, 𑀭𑀸𑀚𑀸𑀧𑀺 𑀧𑀭𑀳𑀢𑁆𑀣𑀁 𑀕𑀫𑀺𑀲𑁆𑀲𑀢𑀺, 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀅𑀲𑁆𑀲𑁄 𑀲𑀢𑁆𑀢𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀭𑀸𑀚𑀸𑀦𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀦𑀺𑀧𑀦𑁆𑀦𑀓𑁄𑀯 𑀅𑀲𑁆𑀲𑀸𑀭𑁄𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫 𑀅𑀲𑁆𑀲𑀸𑀭𑁄𑀳, 𑀲𑀢𑁆𑀢𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀭𑀸𑀚𑀸𑀦𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀅𑀲𑁆𑀲𑁄 𑀦𑀸𑀫 𑀦𑀢𑁆𑀣𑀺, 𑀦𑀸𑀳𑀁 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀸𑀲𑁂𑀲𑁆𑀲𑀸𑀫𑀺, 𑀫𑀫𑀜𑁆𑀜𑁂𑀯 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑀦𑁆𑀦𑀬𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁩. ‘‘𑀅𑀧𑀺 𑀧𑀲𑁆𑀲𑁂𑀦 𑀲𑁂𑀫𑀸𑀦𑁄, 𑀲𑀮𑁆𑀮𑁂𑀪𑀺 𑀲𑀮𑁆𑀮𑀮𑀻𑀓𑀢𑁄;

𑀲𑁂𑀬𑁆𑀬𑁄𑀯 𑀯𑀴𑀯𑀸 𑀪𑁄𑀚𑁆𑀛𑁄, 𑀬𑀼𑀜𑁆𑀚 𑀫𑀜𑁆𑀜𑁂𑀯 𑀲𑀸𑀭𑀣𑀻’’𑀢𑀺.

𑀢𑀢𑁆𑀣 𑀅𑀧𑀺 𑀧𑀲𑁆𑀲𑁂𑀦 𑀲𑁂𑀫𑀸𑀦𑁄𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀫𑀸𑀦𑀓𑁄𑀧𑀺. 𑀲𑀮𑁆𑀮𑁂𑀪𑀺 𑀲𑀮𑁆𑀮𑀮𑀻𑀓𑀢𑁄𑀢𑀺 𑀲𑀮𑁆𑀮𑁂𑀳𑀺 𑀯𑀺𑀤𑁆𑀥𑁄𑀧𑀺 𑀲𑀫𑀸𑀦𑁄. 𑀲𑁂𑀬𑁆𑀬𑁄𑀯 𑀯𑀴𑀯𑀸 𑀪𑁄𑀚𑁆𑀛𑁄𑀢𑀺 𑀯𑀴𑀯𑀸𑀢𑀺 𑀲𑀺𑀦𑁆𑀥𑀯𑀓𑀼𑀮𑁂𑀲𑀼 𑀅𑀚𑀸𑀢𑁄 𑀔𑀮𑀼𑀗𑁆𑀓𑀲𑁆𑀲𑁄. 𑀪𑁄𑀚𑁆𑀛𑁄𑀢𑀺 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑁄. 𑀇𑀢𑀺 𑀏𑀢𑀲𑁆𑀫𑀸 𑀯𑀴𑀯𑀸 𑀲𑀮𑁆𑀮𑁂𑀳𑀺 𑀯𑀺𑀤𑁆𑀥𑁄𑀧𑀺 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑁄𑀯 𑀲𑁂𑀬𑁆𑀬𑁄 𑀯𑀭𑁄 𑀉𑀢𑁆𑀢𑀫𑁄. 𑀬𑀼𑀜𑁆𑀚 𑀫𑀜𑁆𑀜𑁂𑀯 𑀲𑀸𑀭𑀣𑀻𑀢𑀺 𑀬𑀲𑁆𑀫𑀸 𑀏𑀯 𑀕𑀢𑁄𑀧𑀺 𑀅𑀳𑀫𑁂𑀯 𑀲𑁂𑀬𑁆𑀬𑁄, 𑀢𑀲𑁆𑀫𑀸 𑀫𑀫𑀜𑁆𑀜𑁂𑀯 𑀬𑁄𑀚𑁂𑀳𑀺, 𑀫𑀁 𑀯𑀫𑁆𑀫𑁂𑀳𑀻𑀢𑀺 𑀯𑀤𑀢𑀺.

𑀅𑀲𑁆𑀲𑀸𑀭𑁄𑀳𑁄 𑀩𑁄𑀥𑀺𑀲𑀢𑁆𑀢𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀡𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀲𑀦𑁆𑀦𑀤𑁆𑀥𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀭𑀸𑀚𑀸𑀦𑀁 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀭𑀸𑀚𑀩𑀮𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺, 𑀩𑁄𑀥𑀺𑀲𑀢𑁆𑀢𑀫𑁆𑀧𑀺 𑀭𑀸𑀚𑀤𑁆𑀯𑀸𑀭𑀁 𑀆𑀦𑀬𑀺𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀦𑀺𑀓𑁆𑀔𑀫𑀺. 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀲𑀢𑁆𑀢 𑀭𑀸𑀚𑀸𑀦𑁄 𑀫𑀸 𑀖𑀸𑀢𑀬𑀺𑀢𑁆𑀣, 𑀲𑀧𑀣𑀁 𑀓𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣, 𑀫𑀬𑁆𑀳𑀜𑁆𑀘 𑀅𑀲𑁆𑀲𑀸𑀭𑁄𑀳𑀲𑁆𑀲 𑀘 𑀤𑀸𑀢𑀩𑁆𑀩𑀁 𑀬𑀲𑀁 𑀅𑀲𑁆𑀲𑀸𑀭𑁄𑀳𑀲𑁆𑀲𑁂𑀯 𑀤𑁂𑀣, 𑀲𑀢𑁆𑀢 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀬𑁄𑀥𑀁 𑀦𑀸𑀫 𑀦𑀸𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀼𑀫𑁆𑀳𑁂𑀧𑀺 𑀤𑀸𑀦𑀁 𑀤𑁂𑀣, 𑀲𑀻𑀮𑀁 𑀭𑀓𑁆𑀔𑀣, 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀣𑀸’’𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀭𑀜𑁆𑀜𑁄 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀦𑀸𑀳𑀁 𑀫𑁄𑀘𑀬𑀺𑀁𑀲𑀼, 𑀲𑁄 𑀲𑀦𑁆𑀦𑀸𑀳𑁂 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀦𑀺𑀭𑀼𑀚𑁆𑀛𑀺. 𑀭𑀸𑀚𑀸 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀅𑀲𑁆𑀲𑀸𑀭𑁄𑀳𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀲𑀢𑁆𑀢 𑀭𑀸𑀚𑀸𑀦𑁄 𑀧𑀼𑀦 𑀅𑀢𑁆𑀢𑀦𑁆𑀦𑁄 𑀅𑀤𑀼𑀩𑁆𑀪𑀸𑀬 𑀲𑀧𑀣𑀁 𑀓𑀸𑀭𑁂𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀸𑀦𑀺 𑀧𑁂𑀲𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀦𑀸𑀬𑀢𑀦𑁂𑀧𑀺 𑀯𑀻𑀭𑀺𑀬𑀁 𑀅𑀓𑀁𑀲𑀼, 𑀏𑀯𑀭𑀽𑀧𑀁 𑀧𑀳𑀸𑀭𑀁 𑀮𑀤𑁆𑀥𑀸𑀧𑀺 𑀦 𑀑𑀲𑁆𑀲𑀚𑀺𑀁𑀲𑀼, 𑀢𑁆𑀯𑀁 𑀧𑀦 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀫𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀲𑀻’’𑀢𑀺 𑀯𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀲𑁆𑀲𑀸𑀭𑁄𑀳𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀪𑁄𑀚𑀸𑀚𑀸𑀦𑀻𑀬𑀲𑀺𑀦𑁆𑀥𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀪𑁄𑀚𑀸𑀚𑀸𑀦𑀻𑀬𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁪] 𑁪. 𑀆𑀚𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸

𑀬𑀤𑀸 𑀬𑀤𑀸𑀢𑀺 𑀇𑀤𑀫𑁆𑀧𑀺 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀫𑁂𑀯 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀧𑀦 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀦𑀸𑀬𑀢𑀦𑁂𑀧𑀺 𑀮𑀤𑁆𑀥𑀧𑁆𑀧𑀳𑀸𑀭𑀸𑀧𑀺 𑀳𑀼𑀢𑁆𑀯𑀸 𑀯𑀻𑀭𑀺𑀬𑀁 𑀅𑀓𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀢 𑀭𑀸𑀚𑀸𑀦𑁄 𑀦𑀕𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀣𑁂𑀓𑁄 𑀭𑀣𑀺𑀓𑀬𑁄𑀥𑁄 𑀤𑁆𑀯𑁂 𑀪𑀸𑀢𑀺𑀓𑀲𑀺𑀦𑁆𑀥𑀯𑁂 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀙 𑀩𑀮𑀓𑁄𑀝𑁆𑀞𑀓𑁂 𑀪𑀺𑀦𑁆𑀤𑀺𑀢𑁆𑀯𑀸 𑀙 𑀭𑀸𑀚𑀸𑀦𑁄 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀚𑁂𑀝𑁆𑀞𑀓𑀅𑀲𑁆𑀲𑁄 𑀧𑀳𑀸𑀭𑀁 𑀮𑀪𑀺. 𑀭𑀣𑀺𑀓𑁄 𑀭𑀣𑀁 𑀧𑁂𑀲𑁂𑀦𑁆𑀢𑁄 𑀭𑀸𑀚𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑀁 𑀭𑀣𑀸 𑀫𑁄𑀘𑁂𑀢𑁆𑀯𑀸 𑀲𑀦𑁆𑀦𑀸𑀳𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀏𑀓𑁂𑀦𑁂𑀯 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀲𑁆𑀲𑀁 𑀲𑀦𑁆𑀦𑀬𑁆𑀳𑀺𑀢𑀼𑀁 𑀆𑀭𑀤𑁆𑀥𑁄. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀭𑀣𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀧𑀦𑁆𑀦𑀓𑁄𑀯 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁪. ‘‘𑀬𑀤𑀸 𑀬𑀤𑀸 𑀬𑀢𑁆𑀣 𑀬𑀤𑀸, 𑀬𑀢𑁆𑀣 𑀬𑀢𑁆𑀣 𑀬𑀤𑀸 𑀬𑀤𑀸;

𑀆𑀚𑀜𑁆𑀜𑁄 𑀓𑀼𑀭𑀼𑀢𑁂 𑀯𑁂𑀕𑀁, 𑀳𑀸𑀬𑀦𑁆𑀢𑀺 𑀢𑀢𑁆𑀣 𑀯𑀸𑀴𑀯𑀸’’𑀢𑀺.

𑀢𑀢𑁆𑀣 𑀬𑀤𑀸 𑀬𑀤𑀸𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀸𑀮𑁂. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀫𑀕𑁆𑀕𑁂 𑀯𑀸 𑀲𑀗𑁆𑀕𑀸𑀫𑀲𑀻𑀲𑁂 𑀯𑀸. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀔𑀡𑁂. 𑀬𑀢𑁆𑀣 𑀬𑀢𑁆𑀣𑀸𑀢𑀺 𑀲𑀢𑁆𑀢𑀦𑁆𑀦𑀁 𑀩𑀮𑀓𑁄𑀝𑁆𑀞𑀓𑀸𑀦𑀁 𑀯𑀲𑁂𑀦 𑀩𑀳𑀽𑀲𑀼 𑀬𑀼𑀤𑁆𑀥𑀫𑀡𑁆𑀟𑀮𑁂𑀲𑀼. 𑀬𑀤𑀸 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀧𑀳𑀸𑀭𑀁 𑀮𑀤𑁆𑀥𑀓𑀸𑀮𑁂 𑀯𑀸 𑀅𑀮𑀤𑁆𑀥𑀓𑀸𑀮𑁂 𑀯𑀸. 𑀆𑀚𑀜𑁆𑀜𑁄 𑀓𑀼𑀭𑀼𑀢𑁂 𑀯𑁂𑀕𑀦𑁆𑀢𑀺 𑀲𑀸𑀭𑀣𑀺𑀲𑁆𑀲 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀸𑀭𑀡𑀁 𑀆𑀚𑀸𑀦𑀦𑀲𑀪𑀸𑀯𑁄 𑀆𑀚𑀜𑁆𑀜𑁄 𑀯𑀭𑀲𑀺𑀦𑁆𑀥𑀯𑁄 𑀯𑁂𑀕𑀁 𑀓𑀭𑁄𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀳𑀸𑀬𑀦𑁆𑀢𑀺 𑀢𑀢𑁆𑀣 𑀯𑀸𑀴𑀯𑀸𑀢𑀺 𑀢𑀲𑁆𑀫𑀺𑀁 𑀯𑁂𑀕𑁂 𑀓𑀭𑀺𑀬𑀫𑀸𑀦𑁂 𑀇𑀢𑀭𑁂 𑀯𑀴𑀯𑀲𑀗𑁆𑀔𑀸𑀢𑀸 𑀔𑀴𑀼𑀗𑁆𑀓𑀲𑁆𑀲𑀸 𑀳𑀸𑀬𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀭𑀣𑁂 𑀫𑀁𑀬𑁂𑀯 𑀬𑁄𑀚𑁂𑀳𑀻𑀢𑀺 𑀆𑀳.

𑀲𑀸𑀭𑀣𑀺 𑀩𑁄𑀥𑀺𑀲𑀢𑁆𑀢𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑀫𑀁 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑀁 𑀭𑀸𑀚𑀸𑀦𑀁 𑀆𑀤𑀸𑀬 𑀭𑀣𑀁 𑀧𑁂𑀲𑁂𑀦𑁆𑀢𑁄 𑀭𑀸𑀚𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀲𑀺𑀦𑁆𑀥𑀯𑀁 𑀫𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀦𑀺𑀭𑀼𑀚𑁆𑀛𑀺. 𑀭𑀸𑀚𑀸 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀲𑀸𑀭𑀣𑀺𑀲𑁆𑀲 𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀅𑀲𑁆𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺.

𑀆𑀚𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁫] 𑁫. 𑀢𑀺𑀢𑁆𑀣𑀚𑀸𑀢𑀓𑀯𑀡𑁆𑀡𑀦𑀸

𑀅𑀜𑁆𑀜𑀫𑀜𑁆𑀜𑁂𑀳𑀺 𑀢𑀺𑀢𑁆𑀣𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀏𑀓𑀁 𑀲𑀼𑀯𑀡𑁆𑀡𑀓𑀸𑀭𑀧𑀼𑀩𑁆𑀩𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀆𑀲𑀬𑀸𑀦𑀼𑀲𑀬𑀜𑀸𑀡𑀜𑁆𑀳𑀺 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑁄𑀢𑀺, 𑀦 𑀅𑀜𑁆𑀜𑁂𑀲𑀁. 𑀢𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀆𑀲𑀬𑀸𑀦𑀼𑀲𑀬𑀜𑀸𑀡𑀲𑁆𑀲 𑀦𑀢𑁆𑀣𑀺𑀢𑀸𑀬 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀆𑀲𑀬𑀸𑀦𑀼𑀲𑀬𑀁 𑀅𑀚𑀸𑀦𑀦𑁆𑀢𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀓𑀣𑁂𑀲𑀺, 𑀢𑀲𑁆𑀲 𑀢𑀁 𑀦 𑀲𑀧𑁆𑀧𑀸𑀬𑀫𑀳𑁄𑀲𑀺. 𑀓𑀲𑁆𑀫𑀸? 𑀲𑁄 𑀓𑀺𑀭 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀲𑀼𑀯𑀡𑁆𑀡𑀓𑀸𑀭𑀕𑁂𑀳𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀅𑀣𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀲𑀼𑀤𑁆𑀥𑀲𑀼𑀯𑀡𑁆𑀡𑀤𑀲𑁆𑀲𑀦𑀯𑀲𑁂𑀦 𑀧𑀭𑀺𑀘𑀺𑀢𑀢𑁆𑀢𑀸 𑀅𑀲𑀼𑀪𑀁 𑀦 𑀲𑀧𑁆𑀧𑀸𑀬𑀫𑀳𑁄𑀲𑀺. 𑀲𑁄 𑀢𑀢𑁆𑀣 𑀦𑀺𑀫𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀔𑁂𑀧𑁂𑀲𑀺.

𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀅𑀭𑀳𑀢𑁆𑀢𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀤𑁆𑀥𑀸 𑀅𑀬𑀁 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑁄𑀯 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺𑀁, 𑀅𑀬𑀁 𑀧𑀦 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀦𑀺𑀫𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀲𑀺, 𑀲𑁆𑀯𑀸𑀳𑀁 ‘𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀏𑀲𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀤𑀸𑀬 𑀆𑀕𑀢𑁄’’𑀢𑀺. ‘‘𑀲𑀸𑀭𑀺𑀧𑀼𑀢𑁆𑀢, 𑀓𑀢𑀭𑀁 𑀧𑀦 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺? ‘‘𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀪𑀕𑀯𑀸’’𑀢𑀺. ‘‘𑀲𑀸𑀭𑀺𑀧𑀼𑀢𑁆𑀢, 𑀦𑀢𑁆𑀣𑀺 𑀢𑀯 𑀲𑀦𑁆𑀢𑀸𑀦𑁂 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀕𑀘𑁆𑀙, 𑀢𑁆𑀯𑀁 𑀲𑀸𑀬𑀦𑁆𑀳𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀢𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀏𑀯𑀁 𑀲𑀢𑁆𑀣𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀫𑀦𑀸𑀧𑀁 𑀘𑀻𑀯𑀭𑀜𑁆𑀘 𑀦𑀺𑀯𑀸𑀲𑀦𑀜𑁆𑀘 𑀤𑀸𑀧𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀸𑀧𑁂𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀤𑀺𑀯𑀲𑀪𑀸𑀕𑀁 𑀔𑁂𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀫𑁆𑀩𑀯𑀦𑁂 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀫𑀳𑀦𑁆𑀢𑀁 𑀧𑀤𑀼𑀫𑀺𑀦𑀺𑀕𑀘𑁆𑀙𑀁, 𑀢𑀢𑁆𑀭𑀸𑀧𑀺 𑀘 𑀫𑀳𑀦𑁆𑀢𑀁 𑀏𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀫𑀸𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀇𑀫𑀁 𑀧𑀼𑀧𑁆𑀨𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀸’’𑀢𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀲𑁄 𑀪𑀺𑀓𑁆𑀔𑀼 𑀢𑀁 𑀧𑀼𑀧𑁆𑀨𑀁 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀢𑀺. 𑀪𑀕𑀯𑀸 𑀢𑀁 𑀧𑀼𑀧𑁆𑀨𑀁 𑀚𑀭𑀁 𑀧𑀸𑀧𑁂𑀲𑀺, 𑀢𑀁 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀚𑀭𑀁 𑀧𑀢𑁆𑀯𑀸 𑀯𑀺𑀯𑀡𑁆𑀡𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀸𑀦𑀺 𑀧𑀢𑀦𑁆𑀢𑀸𑀦𑀺 𑀫𑀼𑀳𑀼𑀢𑁆𑀢𑁂𑀦 𑀲𑀩𑁆𑀩𑀸𑀦𑀺 𑀧𑀢𑀺𑀁𑀲𑀼. 𑀢𑀢𑁄 𑀓𑀺𑀜𑁆𑀚𑀓𑁆𑀔𑀁 𑀧𑀢𑀺, 𑀓𑀡𑁆𑀡𑀺𑀓𑀸𑀯 𑀅𑀯𑀲𑀺𑀲𑁆𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑀁 𑀧𑀲𑁆𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀧𑀤𑀼𑀫𑀧𑀼𑀧𑁆𑀨𑀁 𑀇𑀤𑀸𑀦𑁂𑀯 𑀅𑀪𑀺𑀭𑀽𑀧𑀁 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑀁, 𑀅𑀣𑀲𑁆𑀲 𑀯𑀡𑁆𑀡𑁄 𑀧𑀭𑀺𑀡𑀢𑁄, 𑀧𑀢𑁆𑀢𑀸𑀦𑀺 𑀘 𑀓𑀺𑀜𑁆𑀘𑀓𑁆𑀔𑀜𑁆𑀘 𑀧𑀢𑀺𑀢𑀁, 𑀓𑀡𑁆𑀡𑀺𑀓𑀸𑀫𑀢𑁆𑀢𑀫𑁂𑀯 𑀅𑀯𑀲𑀺𑀝𑁆𑀞𑀁, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀧𑀤𑀼𑀫𑀲𑁆𑀲 𑀚𑀭𑀸 𑀧𑀢𑁆𑀢𑀸, 𑀫𑀬𑁆𑀳𑀁 𑀲𑀭𑀻𑀭𑀲𑁆𑀲 𑀓𑀺𑀁 𑀦 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀢𑁆𑀣𑀸 ‘‘𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀁 𑀆𑀭𑀼𑀴𑁆𑀳’’𑀦𑁆𑀢𑀺 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀉𑀘𑁆𑀙𑀺𑀦𑁆𑀤 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺. (𑀥. 𑀧. 𑁨𑁮𑁫);

𑀲𑁄 𑀪𑀺𑀓𑁆𑀔𑀼 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀫𑀼𑀢𑁆𑀢𑁄 𑀯𑀢𑀫𑁆𑀳𑀺 𑀲𑀩𑁆𑀩𑀪𑀯𑁂𑀳𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀲𑁄 𑀯𑀼𑀢𑁆𑀣𑀯𑀸𑀲𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀲𑁄, 𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀯𑀺𑀲𑀼𑀤𑁆𑀥𑀲𑀻𑀮𑁄 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑁄, 𑀘𑀦𑁆𑀤𑁄 𑀬𑀣𑀸 𑀭𑀸𑀳𑀼𑀫𑀼𑀔𑀸 𑀧𑀫𑀼𑀢𑁆𑀢𑁄.

‘‘𑀲𑀫𑁄𑀢𑀢𑀁 𑀫𑁄𑀳𑀫𑀳𑀦𑁆𑀥𑀓𑀸𑀭𑀁, 𑀯𑀺𑀦𑁄𑀤𑀬𑀺𑀁 𑀲𑀩𑁆𑀩𑀫𑀮𑀁 𑀅𑀲𑁂𑀲𑀁;

𑀆𑀮𑁄𑀓𑀧𑀚𑁆𑀚𑁄𑀢𑀓𑀭𑁄 𑀧𑀪𑀗𑁆𑀓𑀭𑁄, 𑀲𑀳𑀲𑁆𑀲𑀭𑀁𑀲𑀻 𑀯𑀺𑀬 𑀪𑀸𑀡𑀼𑀫𑀸 𑀦𑀪𑁂’’𑀢𑀺. 𑁋

𑀆𑀤𑀻𑀳𑀺 𑀕𑀸𑀣𑀸𑀳𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀉𑀤𑀸𑀦𑁂𑀢𑁆𑀯𑀸 𑀘 𑀧𑀦 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺. 𑀣𑁂𑀭𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀬𑀁 𑀧𑀯𑀢𑁆𑀢𑀺 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑀸 𑀚𑀸𑀢𑀸. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀯𑀡𑁆𑀡𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀆𑀲𑀬𑀸𑀦𑀼𑀲𑀬𑀜𑀸𑀡𑀲𑁆𑀲 𑀅𑀪𑀸𑀯𑁂𑀦 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀆𑀲𑀬𑀁 𑀦 𑀚𑀸𑀦𑀸𑀢𑀺, 𑀲𑀢𑁆𑀣𑀸 𑀧𑀦 𑀜𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀢𑀲𑁆𑀲 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀫𑀳𑀸𑀦𑀼𑀪𑀸𑀯𑀸’’𑀢𑀺.

𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. ‘‘𑀦 𑀪𑀕𑀯𑀸 𑀅𑀜𑁆𑀜𑀸𑀬 𑀓𑀣𑀸𑀬, 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀧𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀆𑀲𑀬𑀸𑀦𑀼𑀲𑀬𑀜𑀸𑀡𑀓𑀣𑀸𑀬𑀸’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑀁 𑀅𑀘𑁆𑀙𑀭𑀺𑀬𑀁, 𑀲𑁆𑀯𑀸𑀳𑀁 𑀏𑀢𑀭𑀳𑀺 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀆𑀲𑀬𑀁 𑀚𑀸𑀦𑀸𑀫𑀺, 𑀧𑀼𑀩𑁆𑀩𑁂𑀧𑀸𑀳𑀁 𑀢𑀲𑁆𑀲 𑀆𑀲𑀬𑀁 𑀚𑀸𑀦𑀸𑀫𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀅𑀦𑀼𑀲𑀸𑀲𑀢𑀺. 𑀢𑀤𑀸 𑀭𑀜𑁆𑀜𑁄 𑀫𑀗𑁆𑀕𑀮𑀅𑀲𑁆𑀲𑀦𑁆𑀳𑀸𑀦𑀢𑀺𑀢𑁆𑀣𑁂 𑀅𑀜𑁆𑀜𑀢𑀭𑀁 𑀯𑀴𑀯𑀁 𑀔𑀴𑀼𑀗𑁆𑀓𑀲𑁆𑀲𑀁 𑀦𑁆𑀳𑀸𑀧𑁂𑀲𑀼𑀁. 𑀫𑀗𑁆𑀕𑀮𑀲𑁆𑀲𑁄 𑀯𑀴𑀯𑁂𑀦 𑀦𑁆𑀳𑀸𑀦𑀢𑀺𑀢𑁆𑀣𑀁 𑀑𑀢𑀸𑀭𑀺𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀲𑁆𑀲𑀕𑁄𑀧𑀓𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ‘‘𑀤𑁂𑀯, 𑀫𑀗𑁆𑀕𑀮𑀲𑁆𑀲𑁄 𑀢𑀺𑀢𑁆𑀣𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀻’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀧𑀡𑁆𑀟𑀺𑀢, 𑀚𑀸𑀦𑀸𑀳𑀺 𑀓𑁂𑀦 𑀓𑀸𑀭𑀡𑁂𑀦 𑀅𑀲𑁆𑀲𑁄 𑀢𑀺𑀢𑁆𑀣𑀁 𑀑𑀢𑀸𑀭𑀺𑀬𑀫𑀸𑀦𑁄 𑀦 𑀑𑀢𑀭𑀢𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀁 𑀑𑀮𑁄𑀓𑁂𑀢𑁆𑀯𑀸 𑀦𑀺𑀭𑁄𑀕𑀪𑀸𑀯𑀫𑀲𑁆𑀲 𑀜𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀬𑀁 𑀇𑀫𑀁 𑀢𑀺𑀢𑁆𑀣𑀁 𑀦 𑀑𑀢𑀭𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀞𑀫𑀢𑀭𑀁 𑀏𑀢𑁆𑀣 𑀅𑀜𑁆𑀜𑁄 𑀦𑁆𑀳𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦𑁂𑀲 𑀚𑀺𑀕𑀼𑀘𑁆𑀙𑀫𑀸𑀦𑁄 𑀢𑀺𑀢𑁆𑀣𑀁 𑀦 𑀑𑀢𑀭𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀲𑁆𑀲𑀕𑁄𑀧𑀓𑁂 𑀧𑀼𑀘𑁆𑀙𑀺 ‘‘𑀅𑀫𑁆𑀪𑁄, 𑀇𑀫𑀲𑁆𑀫𑀺𑀁 𑀢𑀺𑀢𑁆𑀣𑁂 𑀓𑀁 𑀧𑀞𑀫𑀁 𑀦𑁆𑀳𑀸𑀧𑀬𑀺𑀢𑁆𑀣𑀸’’𑀢𑀺? ‘‘𑀅𑀜𑁆𑀜𑀢𑀭𑀁 𑀯𑀴𑀯𑀲𑁆𑀲𑀁, 𑀲𑀸𑀫𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀏𑀲 𑀅𑀢𑁆𑀢𑀦𑁄 𑀲𑀺𑀦𑁆𑀥𑀯𑀢𑀸𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 𑀏𑀢𑁆𑀣 𑀦𑁆𑀳𑀸𑀬𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀇𑀫𑀁 𑀅𑀜𑁆𑀜𑀢𑀺𑀢𑁆𑀣𑁂 𑀦𑁆𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀲𑁆𑀲 𑀆𑀲𑀬𑀁 𑀜𑀢𑁆𑀯𑀸 ‘‘𑀪𑁄 𑀅𑀲𑁆𑀲𑀕𑁄𑀧𑀓, 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀺𑀪𑀺𑀲𑀗𑁆𑀔𑀢𑀧𑀸𑀬𑀸𑀲𑀫𑁆𑀧𑀺 𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀢𑀺𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀅𑀲𑁆𑀲𑁄 𑀩𑀳𑀽 𑀯𑀸𑀭𑁂 𑀇𑀥 𑀢𑀺𑀢𑁆𑀣𑁂 𑀦𑁆𑀳𑀸𑀢𑁄, 𑀅𑀜𑁆𑀜𑀫𑁆𑀧𑀺 𑀢𑀸𑀯 𑀦𑀁 𑀢𑀺𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀦𑁆𑀳𑀸𑀧𑁂𑀣 𑀘 𑀧𑀸𑀬𑁂𑀣 𑀘𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫. ‘‘𑀅𑀜𑁆𑀜𑀫𑀜𑁆𑀜𑁂𑀳𑀺 𑀢𑀺𑀢𑁆𑀣𑁂𑀳𑀺, 𑀅𑀲𑁆𑀲𑀁 𑀧𑀸𑀬𑁂𑀳𑀺 𑀲𑀸𑀭𑀣𑀺;

𑀅𑀘𑁆𑀘𑀸𑀲𑀦𑀲𑁆𑀲 𑀧𑀼𑀭𑀺𑀲𑁄, 𑀧𑀸𑀬𑀸𑀲𑀲𑁆𑀲𑀧𑀺 𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑁂𑀳𑀻𑀢𑀺 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀳𑀺. 𑀧𑀸𑀬𑁂𑀳𑀻𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀦𑁆𑀳𑀸𑀧𑁂𑀳𑀺 𑀘 𑀧𑀸𑀬𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀸𑀲𑀦𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀢𑀺𑀅𑀲𑀦𑁂𑀦 𑀅𑀢𑀺𑀪𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀸𑀬𑀸𑀲𑀲𑁆𑀲𑀧𑀺 𑀢𑀧𑁆𑀧𑀢𑀻𑀢𑀺 𑀲𑀧𑁆𑀧𑀺𑀆𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑁂𑀦 𑀫𑀥𑀼𑀭𑀧𑀸𑀬𑀸𑀲𑁂𑀦 𑀢𑀧𑁆𑀧𑀢𑀺 𑀢𑀺𑀢𑁆𑀢𑁄 𑀳𑁄𑀢𑀺, 𑀥𑀸𑀢𑁄 𑀲𑀼𑀳𑀺𑀢𑁄 𑀦 𑀧𑀼𑀦 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀁 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀅𑀲𑁆𑀲𑁄 𑀇𑀫𑀲𑁆𑀫𑀺𑀁 𑀢𑀺𑀢𑁆𑀣𑁂 𑀦𑀺𑀩𑀤𑁆𑀥𑀁 𑀦𑁆𑀳𑀸𑀦𑁂𑀦 𑀧𑀭𑀺𑀬𑀢𑁆𑀢𑀺𑀁 𑀆𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀢𑁆𑀣 𑀦𑀁 𑀦𑁆𑀳𑀸𑀧𑁂𑀣𑀸𑀢𑀺.

𑀢𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀲𑁆𑀲𑀁 𑀅𑀜𑁆𑀜𑀢𑀺𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀧𑀸𑀬𑀺𑀁𑀲𑀼 𑀘𑁂𑀯 𑀦𑁆𑀳𑀸𑀧𑀬𑀺𑀁𑀲𑀼 𑀘. 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀲𑁆𑀲 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀦𑁆𑀳𑀸𑀦𑀓𑀸𑀮𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀭𑀸𑀚𑀸 ‘‘𑀓𑀺𑀁, 𑀢𑀸𑀢, 𑀅𑀲𑁆𑀲𑁄 𑀦𑁆𑀳𑀸𑀢𑁄 𑀘 𑀧𑀻𑀢𑁄 𑀘𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀧𑀞𑀫𑀁 𑀓𑀺𑀁 𑀓𑀸𑀭𑀡𑀸 𑀦 𑀇𑀘𑁆𑀙𑀢𑀻’’𑀢𑀺? ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 ‘‘𑀏𑀯𑀭𑀽𑀧𑀲𑁆𑀲 𑀢𑀺𑀭𑀘𑁆𑀙𑀸𑀦𑀲𑁆𑀲𑀸𑀧𑀺 𑀦𑀸𑀫 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀳𑁄 𑀧𑀡𑁆𑀟𑀺𑀢𑁄’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀣𑀸𑀓𑀫𑁆𑀫𑀫𑁂𑀯 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀳𑀁 𑀏𑀢𑀲𑁆𑀲 𑀇𑀤𑀸𑀦𑁂𑀯 𑀆𑀲𑀬𑀁 𑀚𑀸𑀦𑀸𑀫𑀺, 𑀧𑀼𑀩𑁆𑀩𑁂𑀧𑀺 𑀚𑀸𑀦𑀸𑀫𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀗𑁆𑀕𑀮𑀅𑀲𑁆𑀲𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀢𑁆𑀣𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁬] 𑁬. 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀯𑀡𑁆𑀡𑀦𑀸

𑀧𑀼𑀭𑀸𑀡𑀘𑁄𑀭𑀸𑀦 𑀯𑀘𑁄 𑀦𑀺𑀲𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑀁 𑀧𑀲𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀧𑁆𑀨𑀸𑀤𑁂𑀲𑀺. 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑀲𑁆𑀲 𑀕𑀬𑀸𑀲𑀻𑀲𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀳𑀺 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀲𑁆𑀲 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀅𑀪𑀺𑀳𑀭𑀺. 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀲𑁆𑀲𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑁄 𑀫𑀳𑀦𑁆𑀢𑁄 𑀚𑀸𑀢𑁄, 𑀤𑁂𑀯𑀤𑀢𑁆𑀢𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂𑀬𑁂𑀯 𑀳𑁄𑀢𑀺. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑀯𑀸𑀲𑀺𑀓𑀸 𑀤𑁆𑀯𑁂 𑀲𑀳𑀸𑀬𑀸. 𑀢𑁂𑀲𑀼 𑀏𑀓𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁄, 𑀏𑀓𑁄 𑀤𑁂𑀯𑀤𑀢𑁆𑀢𑀲𑁆𑀲. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂𑀧𑀺 𑀧𑀲𑁆𑀲𑀦𑁆𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸𑀧𑀺 𑀧𑀲𑁆𑀲𑀦𑁆𑀢𑀺𑀬𑁂𑀯.

𑀅𑀣𑁂𑀓𑀤𑀺𑀯𑀲𑀁 𑀤𑁂𑀯𑀤𑀢𑁆𑀢𑀲𑁆𑀲 𑀦𑀺𑀲𑁆𑀲𑀺𑀢𑀓𑁄 𑀇𑀢𑀭𑀁 𑀆𑀳 𑁋 ‘‘𑀆𑀯𑀼𑀲𑁄, 𑀓𑀺𑀁 𑀢𑁆𑀯𑀁 𑀤𑁂𑀯𑀲𑀺𑀓𑀁 𑀲𑁂𑀤𑁂𑀳𑀺 𑀫𑀼𑀘𑁆𑀘𑀫𑀸𑀦𑁂𑀳𑀺 𑀧𑀺𑀡𑁆𑀟𑀸𑀬 𑀘𑀭𑀲𑀺, 𑀤𑁂𑀯𑀤𑀢𑁆𑀢𑁄 𑀕𑀬𑀸𑀲𑀻𑀲𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀦𑀸𑀦𑀕𑁆𑀕𑀭𑀲𑁂𑀳𑀺 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀏𑀯𑀭𑀽𑀧𑁄 𑀉𑀧𑀸𑀬𑁄 𑀦𑀢𑁆𑀣𑀺, 𑀓𑀺𑀁 𑀢𑁆𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀺, 𑀓𑀺𑀁 𑀢𑁂 𑀧𑀸𑀢𑁄𑀯 𑀕𑀬𑀸𑀲𑀻𑀲𑀁 𑀆𑀕𑀦𑁆𑀢𑁆𑀯𑀸 𑀲𑀉𑀢𑁆𑀢𑀭𑀺𑀪𑀗𑁆𑀕𑀁 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀯𑀺𑀥𑀁 𑀔𑀚𑁆𑀚𑀓𑀁 𑀔𑀸𑀤𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀳𑀺 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀯𑁂𑀴𑀼𑀯𑀦𑀁 𑀆𑀕𑀘𑁆𑀙𑀢𑀺. 𑀲𑁄 𑀲𑀩𑁆𑀩𑀓𑀸𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀧𑀝𑁆𑀞𑀧𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀢𑀻’’𑀢𑀺 𑀦 𑀘𑀺𑀭𑀲𑁆𑀲𑁂𑀯 𑀧𑀸𑀓𑀝𑁄 𑀚𑀸𑀢𑁄. 𑀅𑀣 𑀦𑀁 𑀲𑀳𑀸𑀬𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀝𑁆𑀞𑀧𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀲𑀻’’𑀢𑀺. ‘‘𑀓𑁄 𑀏𑀯𑀫𑀸𑀳𑀸’’𑀢𑀺? ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘𑀸’’𑀢𑀺. ‘‘𑀲𑀘𑁆𑀘𑀁 𑀅𑀳𑀁 𑀆𑀯𑀼𑀲𑁄 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀸𑀫𑀺, 𑀦 𑀧𑀦 𑀫𑁂 𑀤𑁂𑀯𑀤𑀢𑁆𑀢𑁄 𑀪𑀢𑁆𑀢𑀁 𑀤𑁂𑀢𑀺, 𑀅𑀜𑁆𑀜𑁂 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀻’’𑀢𑀺. ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀩𑀼𑀤𑁆𑀥𑀸𑀦𑀁 𑀧𑀝𑀺𑀓𑀡𑁆𑀝𑀓𑁄 𑀤𑀼𑀲𑁆𑀲𑀻𑀮𑁄 𑀅𑀚𑀸𑀢𑀲𑀢𑁆𑀢𑀼𑀁 𑀧𑀲𑀸𑀤𑁂𑀢𑁆𑀯𑀸 𑀅𑀥𑀫𑁆𑀫𑁂𑀦 𑀅𑀢𑁆𑀢𑀦𑁄 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀲𑀺, 𑀢𑁆𑀯𑀁 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀺, 𑀏𑀳𑀺 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀲𑁆𑀲𑀸𑀫𑀸’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀥𑀫𑁆𑀫𑀲𑀪𑀁 𑀆𑀕𑀫𑀺𑀁𑀲𑀼.

𑀲𑀢𑁆𑀣𑀸 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀏𑀢𑀁 𑀪𑀺𑀓𑁆𑀔𑀼𑀁 𑀅𑀦𑀺𑀘𑁆𑀙𑀦𑁆𑀢𑀜𑁆𑀜𑁂𑀯 𑀆𑀤𑀸𑀬 𑀆𑀕𑀢𑀢𑁆𑀣𑀸’’𑀢𑀺? ‘‘𑀆𑀫 𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀻’’𑀢𑀺. ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑁂𑀯𑀤𑀢𑁆𑀢𑀲𑁆𑀲 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀻’’𑀢𑀺? ‘‘𑀦 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀤𑁂𑀢𑀺, 𑀅𑀜𑁆𑀜𑁂 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀫𑀳𑀁 𑀪𑀼𑀜𑁆𑀚𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀫𑀸 𑀪𑀺𑀓𑁆𑀔𑀼 𑀏𑀢𑁆𑀣 𑀧𑀭𑀺𑀳𑀸𑀭𑀁 𑀓𑀭𑀺, 𑀤𑁂𑀯𑀤𑀢𑁆𑀢𑁄 𑀅𑀦𑀸𑀘𑀸𑀭𑁄 𑀤𑀼𑀲𑁆𑀲𑀻𑀮𑁄, 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁 𑀇𑀥 𑀧𑀩𑁆𑀩𑀚𑀺𑀢𑁆𑀯𑀸 𑀫𑀫 𑀲𑀸𑀲𑀦𑀁 𑀪𑀚𑀦𑁆𑀢𑁄𑀬𑁂𑀯 𑀤𑁂𑀯𑀤𑀢𑁆𑀢𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀲𑀺, 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀪𑀚𑀦𑀲𑀻𑀮𑀓𑁄𑀯 𑀢𑁆𑀯𑀁 𑀤𑀺𑀝𑁆𑀞𑀤𑀺𑀝𑁆𑀞𑁂𑀬𑁂𑀯 𑀪𑀚𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀢𑀤𑀸 𑀭𑀜𑁆𑀜𑁄 𑀫𑀳𑀺𑀴𑀸𑀫𑀼𑀔𑁄 𑀦𑀸𑀫 𑀫𑀗𑁆𑀕𑀮𑀳𑀢𑁆𑀣𑀻 𑀅𑀳𑁄𑀲𑀺 𑀲𑀻𑀮𑀯𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑁄, 𑀦 𑀓𑀜𑁆𑀘𑀺 𑀯𑀺𑀳𑁂𑀞𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲 𑀲𑀸𑀮𑀸𑀬 𑀲𑀫𑀻𑀧𑁂 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀸 𑀘𑁄𑀭𑀫𑀦𑁆𑀢𑀁 𑀫𑀦𑁆𑀢𑀬𑀺𑀁𑀲𑀼 ‘‘𑀏𑀯𑀁 𑀉𑀫𑁆𑀫𑀗𑁆𑀕𑁄 𑀪𑀺𑀦𑁆𑀤𑀺𑀢𑀩𑁆𑀩𑁄, 𑀏𑀯𑀁 𑀲𑀦𑁆𑀥𑀺𑀘𑁆𑀙𑁂𑀤𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁, 𑀉𑀫𑁆𑀫𑀗𑁆𑀕𑀜𑁆𑀘 𑀲𑀦𑁆𑀥𑀺𑀘𑁆𑀙𑁂𑀤𑀜𑁆𑀘 𑀫𑀕𑁆𑀕𑀲𑀤𑀺𑀲𑀁 𑀢𑀺𑀢𑁆𑀣𑀲𑀤𑀺𑀲𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀪𑀡𑁆𑀟𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀳𑀭𑀦𑁆𑀢𑁂𑀦 𑀫𑀸𑀭𑁂𑀢𑁆𑀯𑀸𑀯 𑀳𑀭𑀺𑀢𑀩𑁆𑀩𑀁, 𑀏𑀯𑀁 𑀉𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀘𑁄𑀭𑁂𑀦 𑀘 𑀦𑀸𑀫 𑀲𑀻𑀮𑀸𑀘𑀸𑀭𑀬𑀼𑀢𑁆𑀢𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀓𑀓𑁆𑀔𑀴𑁂𑀦 𑀨𑀭𑀼𑀲𑁂𑀦 𑀲𑀸𑀳𑀲𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀫𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀼𑀦𑀤𑀺𑀯𑀲𑁂𑀧𑀺 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀩𑀳𑀽 𑀤𑀺𑀯𑀲𑁂 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁂 𑀫𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀇𑀤𑀸𑀦𑀺 𑀫𑀬𑀸 𑀓𑀓𑁆𑀔𑀴𑁂𑀦 𑀨𑀭𑀼𑀲𑁂𑀦 𑀲𑀸𑀳𑀲𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑀣𑀸𑀭𑀽𑀧𑁄𑀯 𑀅𑀳𑁄𑀲𑀺. 𑀧𑀸𑀢𑁄𑀯 𑀆𑀕𑀢𑀁 𑀳𑀢𑁆𑀣𑀺𑀕𑁄𑀧𑀓𑀁 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑁄𑀣𑁂𑀢𑁆𑀯𑀸 𑀫𑀸𑀭𑁂𑀲𑀺. 𑀅𑀧𑀭𑀫𑁆𑀧𑀺 𑀢𑀣𑀸 𑀅𑀧𑀭𑀫𑁆𑀧𑀺 𑀢𑀣𑀸𑀢𑀺 𑀆𑀕𑀢𑀸𑀕𑀢𑀁 𑀫𑀸𑀭𑁂𑀢𑀺𑀬𑁂𑀯.

‘‘𑀫𑀳𑀺𑀴𑀸𑀫𑀼𑀔𑁄 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄 𑀤𑀺𑀝𑁆𑀞𑀤𑀺𑀝𑁆𑀞𑁂 𑀫𑀸𑀭𑁂𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀳𑀺𑀡𑀺 ‘‘𑀕𑀘𑁆𑀙 𑀧𑀡𑁆𑀟𑀺𑀢, 𑀚𑀸𑀦𑀸𑀳𑀺 𑀓𑁂𑀦 𑀓𑀸𑀭𑀡𑁂𑀦 𑀲𑁄 𑀤𑀼𑀝𑁆𑀞𑁄 𑀚𑀸𑀢𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑁂 𑀅𑀭𑁄𑀕𑀪𑀸𑀯𑀁 𑀜𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀏𑀲 𑀤𑀼𑀝𑁆𑀞𑁄 𑀚𑀸𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀤𑁆𑀥𑀸 𑀅𑀯𑀺𑀤𑀽𑀭𑁂 𑀓𑁂𑀲𑀜𑁆𑀘𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘𑀫𑀁 𑀏𑀢𑁂 𑀲𑀺𑀓𑁆𑀔𑀸𑀧𑁂𑀦𑁆𑀢𑀻’𑀢𑀺 𑀲𑀜𑁆𑀜𑀸𑀬 𑀤𑀼𑀝𑁆𑀞𑁄 𑀚𑀸𑀢𑁄’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑁂 𑀧𑀼𑀘𑁆𑀙𑀺 ‘‘𑀅𑀢𑁆𑀣𑀺 𑀦𑀼 𑀔𑁄 𑀳𑀢𑁆𑀣𑀺𑀲𑀸𑀮𑀸𑀬 𑀲𑀫𑀻𑀧𑁂 𑀭𑀢𑁆𑀢𑀺𑀪𑀸𑀕𑁂 𑀓𑁂𑀳𑀺𑀘𑀺 𑀓𑀺𑀜𑁆𑀘𑀺 𑀓𑀣𑀺𑀢𑀧𑀼𑀩𑁆𑀩’’𑀦𑁆𑀢𑀺? ‘‘𑀆𑀫, 𑀲𑀸𑀫𑀺, 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 𑀓𑀣𑀬𑀺𑀁𑀲𑀽’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ‘‘𑀤𑁂𑀯, 𑀅𑀜𑁆𑀜𑁄 𑀳𑀢𑁆𑀣𑀺𑀲𑁆𑀲 𑀲𑀭𑀻𑀭𑁂 𑀯𑀺𑀓𑀸𑀭𑁄 𑀦𑀢𑁆𑀣𑀺, 𑀘𑁄𑀭𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀤𑀼𑀝𑁆𑀞𑁄 𑀚𑀸𑀢𑁄’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀻𑀮𑀯𑀦𑁆𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀳𑀢𑁆𑀣𑀺𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀻𑀮𑀸𑀘𑀸𑀭𑀓𑀣𑀁 𑀓𑀣𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀏𑀯𑀁 𑀓𑀸𑀭𑁂𑀳𑀺, 𑀢𑀸𑀢𑀸’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀢𑁆𑀯𑀸 𑀲𑀻𑀮𑀯𑀦𑁆𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀳𑀢𑁆𑀣𑀺𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀲𑀻𑀮𑀓𑀣𑀁 𑀓𑀣𑁂𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀢𑁂 𑀳𑀢𑁆𑀣𑀺𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀸 ‘‘𑀦 𑀓𑁄𑀘𑀺 𑀧𑀭𑀸𑀫𑀲𑀺𑀢𑀩𑁆𑀩𑁄 𑀦 𑀫𑀸𑀭𑁂𑀢𑀩𑁆𑀩𑁄, 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀬𑀼𑀢𑁆𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀻𑀮𑀓𑀣𑀁 𑀓𑀣𑀬𑀺𑀁𑀲𑀼. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀫𑀁 𑀇𑀫𑁂 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀲𑀻𑀮𑀯𑀦𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀻𑀮𑀯𑀸 𑀅𑀳𑁄𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀓𑀺𑀁, 𑀢𑀸𑀢, 𑀲𑀻𑀮𑀯𑀸 𑀚𑀸𑀢𑁄’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀏𑀯𑀭𑀽𑀧𑁄 𑀤𑀼𑀝𑁆𑀞𑀳𑀢𑁆𑀣𑀻 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀧𑁄𑀭𑀸𑀡𑀓𑀥𑀫𑁆𑀫𑁂𑀬𑁂𑀯 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀧𑀼𑀭𑀸𑀡𑀘𑁄𑀭𑀸𑀦 𑀯𑀘𑁄 𑀦𑀺𑀲𑀫𑁆𑀫, 𑀫𑀳𑀺𑀴𑀸𑀫𑀼𑀔𑁄 𑀧𑁄𑀣𑀬𑀫𑀦𑁆𑀯𑀘𑀸𑀭𑀻;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀘𑁄 𑀦𑀺𑀲𑀫𑁆𑀫, 𑀕𑀚𑀼𑀢𑁆𑀢𑀫𑁄 𑀲𑀩𑁆𑀩𑀕𑀼𑀡𑁂𑀲𑀼 𑀅𑀝𑁆𑀞𑀸’’𑀢𑀺.

𑀢𑀢𑁆𑀣 𑀧𑀼𑀭𑀸𑀡𑀘𑁄𑀭𑀸𑀦𑀦𑁆𑀢𑀺 𑀧𑁄𑀭𑀸𑀡𑀘𑁄𑀭𑀸𑀦𑀁. 𑀦𑀺𑀲𑀫𑁆𑀫𑀸𑀢𑀺 𑀲𑀼𑀢𑁆𑀯𑀸, 𑀧𑀞𑀫𑀁 𑀘𑁄𑀭𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀺𑀴𑀸𑀫𑀼𑀔𑁄𑀢𑀺 𑀳𑀢𑁆𑀣𑀺𑀦𑀺𑀫𑀼𑀔𑁂𑀦 𑀲𑀤𑀺𑀲𑀫𑀼𑀔𑁄. 𑀬𑀣𑀸 𑀫𑀳𑀺𑀴𑀸 𑀧𑀼𑀭𑀢𑁄 𑀑𑀮𑁄𑀓𑀺𑀬𑀫𑀸𑀦𑀸 𑀲𑁄𑀪𑀢𑀺, 𑀦 𑀧𑀘𑁆𑀙𑀢𑁄, 𑀢𑀣𑀸 𑀲𑁄𑀧𑀺 𑀧𑀼𑀭𑀢𑁄 𑀑𑀮𑁄𑀓𑀺𑀬𑀫𑀸𑀦𑁄 𑀲𑁄𑀪𑀢𑀺. 𑀢𑀲𑁆𑀫𑀸 ‘‘𑀫𑀳𑀺𑀴𑀸𑀫𑀼𑀔𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀧𑁄𑀣𑀬𑀫𑀦𑁆𑀯𑀘𑀸𑀭𑀻𑀢𑀺 𑀧𑁄𑀣𑀬𑀦𑁆𑀢𑁄 𑀫𑀸𑀭𑁂𑀦𑁆𑀢𑁄 𑀅𑀦𑀼𑀘𑀸𑀭𑀻. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀼𑀲𑀜𑁆𑀜𑀢𑀸𑀦𑀦𑁆𑀢𑀺 𑀲𑀼𑀝𑁆𑀞𑀼 𑀲𑀜𑁆𑀜𑀢𑀸𑀦𑀁 𑀲𑀻𑀮𑀯𑀦𑁆𑀢𑀸𑀦𑀁. 𑀕𑀚𑀼𑀢𑁆𑀢𑀫𑁄𑀢𑀺 𑀉𑀢𑁆𑀢𑀫𑀕𑀚𑁄 𑀫𑀗𑁆𑀕𑀮𑀳𑀢𑁆𑀣𑀻. 𑀲𑀩𑁆𑀩𑀕𑀼𑀡𑁂𑀲𑀼 𑀅𑀝𑁆𑀞𑀸𑀢𑀺 𑀲𑀩𑁆𑀩𑁂𑀲𑀼 𑀧𑁄𑀭𑀸𑀡𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄. 𑀭𑀸𑀚𑀸 ‘‘𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀧𑀺 𑀆𑀲𑀬𑀁 𑀚𑀸𑀦𑀸𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀲𑀤𑁆𑀥𑀺𑀁 𑀩𑁄𑀥𑀺𑀲𑀢𑁆𑀢𑁂𑀦 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀺𑀝𑁆𑀞𑀤𑀺𑀝𑁆𑀞𑁂𑀬𑁂𑀯 𑀪𑀚𑀺, 𑀘𑁄𑀭𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘𑁄𑀭𑁂 𑀪𑀚𑀺, 𑀥𑀫𑁆𑀫𑀺𑀓𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑀺𑀓𑁂 𑀪𑀚𑀻’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀺𑀴𑀸𑀫𑀼𑀔𑁄 𑀯𑀺𑀧𑀓𑁆𑀔𑀲𑁂𑀯𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁭] 𑁭. 𑀅𑀪𑀺𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀮𑀁 𑀓𑀩𑀴𑀁 𑀧𑀤𑀸𑀢𑀯𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀸𑀲𑀓𑀜𑁆𑀘 𑀫𑀳𑀮𑁆𑀮𑀓𑀢𑁆𑀣𑁂𑀭𑀜𑁆𑀘 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸. 𑀢𑁂𑀲𑀼 𑀏𑀓𑁄 𑀧𑀩𑁆𑀩𑀚𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀇𑀢𑀭𑀲𑁆𑀲 𑀖𑀭𑀁 𑀕𑀘𑁆𑀙𑀢𑀺. 𑀲𑁄 𑀢𑀲𑁆𑀲 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀆𑀮𑀸𑀧𑀲𑀮𑁆𑀮𑀸𑀧𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺, 𑀇𑀢𑀭𑁄𑀧𑀺 𑀦𑀁 𑀬𑀸𑀯 𑀦𑀕𑀭𑀤𑁆𑀯𑀸𑀭𑀸 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀲𑁄 𑀢𑁂𑀲𑀁 𑀯𑀺𑀲𑁆𑀲𑀸𑀲𑁄 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀢𑁂𑀲𑀁 𑀯𑀺𑀲𑁆𑀲𑀸𑀲𑀓𑀣𑀁 𑀓𑀣𑁂𑀦𑁆𑀢𑀸 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺, 𑀢𑁂 ‘‘𑀇𑀫𑀸𑀬 𑀦𑀸𑀫, 𑀪𑀦𑁆𑀢𑁂’’𑀢𑀺 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀇𑀫𑁂 𑀯𑀺𑀲𑁆𑀲𑀸𑀲𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀯𑀺𑀲𑁆𑀲𑀸𑀲𑀺𑀓𑀸𑀬𑁂𑀯 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀢𑀤𑀸 𑀏𑀓𑁄 𑀓𑀼𑀓𑁆𑀓𑀼𑀭𑁄 𑀫𑀗𑁆𑀕𑀮𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀲𑁆𑀲 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀧𑀢𑀺𑀢𑀸𑀦𑀺 𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀔𑀸𑀤𑀢𑀺. 𑀲𑁄 𑀢𑁂𑀦𑁂𑀯 𑀪𑁄𑀚𑀦𑁂𑀦 𑀲𑀁𑀯𑀤𑁆𑀥𑀫𑀸𑀦𑁄 𑀫𑀗𑁆𑀕𑀮𑀳𑀢𑁆𑀣𑀺𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄 𑀳𑀢𑁆𑀣𑀺𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀪𑀼𑀜𑁆𑀚𑀢𑀺, 𑀉𑀪𑁄𑀧𑀺 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑁄 𑀳𑀢𑁆𑀣𑀻 𑀦𑀁 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀅𑀧𑀭𑀸𑀧𑀭𑀁 𑀓𑀭𑁄𑀦𑁆𑀢𑁄 𑀓𑀻𑀴𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀕𑀸𑀫𑀺𑀓𑀫𑀦𑀼𑀲𑁆𑀲𑁄 𑀳𑀢𑁆𑀣𑀺𑀕𑁄𑀧𑀓𑀲𑁆𑀲 𑀫𑀽𑀮𑀁 𑀤𑀢𑁆𑀯𑀸 𑀢𑀁 𑀓𑀼𑀓𑁆𑀓𑀼𑀭𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀳𑀢𑁆𑀣𑀻 𑀓𑀼𑀓𑁆𑀓𑀼𑀭𑀁 𑀅𑀧𑀲𑁆𑀲𑀦𑁆𑀢𑁄 𑀦𑁂𑀯 𑀔𑀸𑀤𑀢𑀺 𑀦 𑀧𑀺𑀯𑀢𑀺 𑀦 𑀦𑁆𑀳𑀸𑀬𑀢𑀺. 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀳𑀺𑀡𑀺 ‘‘𑀕𑀘𑁆𑀙 𑀧𑀡𑁆𑀟𑀺𑀢, 𑀚𑀸𑀦𑀸𑀳𑀺 𑀓𑀺𑀁𑀓𑀸𑀭𑀡𑀸 𑀳𑀢𑁆𑀣𑀻 𑀏𑀯𑀁 𑀓𑀭𑁄𑀢𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀲𑁆𑀲 𑀤𑀼𑀫𑁆𑀫𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀲𑁆𑀲 𑀲𑀭𑀻𑀭𑁂 𑀭𑁄𑀕𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑁂𑀦𑀘𑀺 𑀧𑀦𑀲𑁆𑀲 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀏𑀲 𑀫𑀜𑁆𑀜𑁂 𑀲𑁄𑀓𑀸𑀪𑀺𑀪𑀽𑀢𑁄’’𑀢𑀺 𑀳𑀢𑁆𑀣𑀺𑀕𑁄𑀧𑀓𑁂 𑀧𑀼𑀘𑁆𑀙𑀺 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀲 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄’’𑀢𑀺? ‘‘𑀆𑀫, 𑀅𑀢𑁆𑀣𑀺 𑀲𑀸𑀫𑀺 𑀏𑀓𑁂𑀦 𑀲𑀼𑀦𑀔𑁂𑀦 𑀲𑀤𑁆𑀥𑀺𑀁 𑀩𑀮𑀯𑀸 𑀫𑁂𑀢𑁆𑀢𑀻’’𑀢𑀺. ‘‘𑀓𑀳𑀁 𑀲𑁄 𑀏𑀢𑀭𑀳𑀻’’𑀢𑀺? ‘‘𑀏𑀓𑁂𑀦 𑀫𑀦𑀼𑀲𑁆𑀲𑁂𑀦 𑀦𑀻𑀢𑁄’’𑀢𑀺. ‘‘𑀚𑀸𑀦𑀸𑀣 𑀧𑀦𑀲𑁆𑀲 𑀦𑀺𑀯𑀸𑀲𑀦𑀝𑁆𑀞𑀸𑀦’’𑀦𑁆𑀢𑀺? ‘‘𑀦 𑀚𑀸𑀦𑀸𑀫, 𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀦𑀢𑁆𑀣𑀺, 𑀤𑁂𑀯, 𑀳𑀢𑁆𑀣𑀺𑀲𑁆𑀲 𑀓𑁄𑀘𑀺 𑀆𑀩𑀸𑀥𑁄, 𑀏𑀓𑁂𑀦 𑀧𑀦𑀲𑁆𑀲 𑀲𑀼𑀦𑀔𑁂𑀦 𑀲𑀤𑁆𑀥𑀺𑀁 𑀩𑀮𑀯𑀯𑀺𑀲𑁆𑀲𑀸𑀲𑁄, 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀪𑀼𑀜𑁆𑀚𑀢𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁭. ‘‘𑀦𑀸𑀮𑀁 𑀓𑀩𑀴𑀁 𑀧𑀤𑀸𑀢𑀯𑁂, 𑀦 𑀘 𑀧𑀺𑀡𑁆𑀟𑀁 𑀦 𑀓𑀼𑀲𑁂 𑀦 𑀖𑀁𑀲𑀺𑀢𑀼𑀁;

𑀫𑀜𑁆𑀜𑀸𑀫𑀺 𑀅𑀪𑀺𑀡𑁆𑀳𑀤𑀲𑁆𑀲𑀦𑀸, 𑀦𑀸𑀕𑁄 𑀲𑁆𑀦𑁂𑀳𑀫𑀓𑀸𑀲𑀺 𑀓𑀼𑀓𑁆𑀓𑀼𑀭𑁂’’𑀢𑀺.

𑀢𑀢𑁆𑀣 𑀦𑀸𑀮𑀦𑁆𑀢𑀺 𑀦 𑀲𑀫𑀢𑁆𑀣𑁄. 𑀓𑀩𑀴𑀦𑁆𑀢𑀺 𑀪𑁄𑀚𑀦𑀓𑀸𑀮𑁂 𑀧𑀞𑀫𑀫𑁂𑀯 𑀤𑀺𑀦𑁆𑀦𑀁 𑀓𑀝𑀼𑀓𑀓𑀩𑀴𑀁. 𑀧𑀤𑀸𑀢𑀯𑁂𑀢𑀺 𑀧𑀆𑀤𑀸𑀢𑀯𑁂, 𑀲𑀦𑁆𑀥𑀺𑀯𑀲𑁂𑀦 𑀆𑀓𑀸𑀭𑀮𑁄𑀧𑁄 𑀯𑁂𑀤𑀺𑀢𑀩𑁆𑀩𑁄, 𑀕𑀳𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀦 𑀘 𑀧𑀺𑀡𑁆𑀟𑀦𑁆𑀢𑀺 𑀯𑀟𑁆𑀠𑁂𑀢𑁆𑀯𑀸 𑀤𑀻𑀬𑀫𑀸𑀦𑀁 𑀪𑀢𑁆𑀢𑀧𑀺𑀡𑁆𑀟𑀫𑁆𑀧𑀺 𑀦𑀸𑀮𑀁 𑀕𑀳𑁂𑀢𑀼𑀁. 𑀦 𑀓𑀼𑀲𑁂𑀢𑀺 𑀔𑀸𑀤𑀦𑀢𑁆𑀣𑀸𑀬 𑀤𑀺𑀦𑁆𑀦𑀸𑀦𑀺 𑀢𑀺𑀡𑀸𑀦𑀺𑀧𑀺 𑀦𑀸𑀮𑀁 𑀕𑀳𑁂𑀢𑀼𑀁. 𑀦 𑀖𑀁𑀲𑀺𑀢𑀼𑀦𑁆𑀢𑀺 𑀦𑁆𑀳𑀸𑀧𑀺𑀬𑀫𑀸𑀦𑁄 𑀲𑀭𑀻𑀭𑀫𑁆𑀧𑀺 𑀖𑀁𑀲𑀺𑀢𑀼𑀁 𑀦𑀸𑀮𑀁. 𑀏𑀯𑀁 𑀬𑀁 𑀬𑀁 𑀲𑁄 𑀳𑀢𑁆𑀣𑀻 𑀓𑀸𑀢𑀼𑀁 𑀦 𑀲𑀫𑀢𑁆𑀣𑁄, 𑀢𑀁 𑀢𑀁 𑀲𑀩𑁆𑀩𑀁 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀢𑀲𑁆𑀲 𑀅𑀲𑀫𑀢𑁆𑀣𑀪𑀸𑀯𑁂 𑀅𑀢𑁆𑀢𑀦𑀸 𑀲𑀮𑁆𑀮𑀓𑁆𑀔𑀺𑀢𑀓𑀸𑀭𑀡𑀁 𑀆𑀭𑁄𑀘𑁂𑀦𑁆𑀢𑁄 ‘‘𑀫𑀜𑁆𑀜𑀸𑀫𑀻’’𑀢𑀺𑀆𑀤𑀺𑀫𑀸𑀳.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩𑀁 𑀧𑀡𑁆𑀟𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘‘𑀅𑀫𑁆𑀳𑀸𑀓𑀁 𑀓𑀺𑀭 𑀫𑀗𑁆𑀕𑀮𑀳𑀢𑁆𑀣𑀺𑀲𑁆𑀲 𑀲𑀳𑀸𑀬𑀁 𑀲𑀼𑀦𑀔𑀁 𑀏𑀓𑁄 𑀫𑀦𑀼𑀲𑁆𑀲𑁄 𑀕𑀳𑁂𑀢𑁆𑀯𑀸 𑀕𑀢𑁄, 𑀬𑀲𑁆𑀲 𑀖𑀭𑁂 𑀢𑀁 𑀲𑀼𑀦𑀔𑀁 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀅𑀬𑀁 𑀦𑀸𑀫 𑀤𑀡𑁆𑀟𑁄’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀣 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀼𑀦𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀼𑀦𑀔𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀲𑁆𑀲 𑀲𑀦𑁆𑀢𑀺𑀓𑀫𑁂𑀯 𑀅𑀕𑀫𑀸𑀲𑀺. 𑀳𑀢𑁆𑀣𑀻 𑀢𑀁 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀓𑀼𑀫𑁆𑀪𑁂 𑀞𑀧𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀓𑀼𑀫𑁆𑀪𑀸 𑀑𑀢𑀸𑀭𑁂𑀢𑁆𑀯𑀸 𑀢𑁂𑀦 𑀪𑀼𑀢𑁆𑀢𑁂 𑀧𑀘𑁆𑀙𑀸 𑀅𑀢𑁆𑀢𑀦𑀸𑀧𑀺 𑀪𑀼𑀜𑁆𑀚𑀺. ‘‘𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀆𑀲𑀬𑀁 𑀚𑀸𑀦𑀸𑀢𑀻’’𑀢𑀺 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑁂 𑀇𑀤𑀸𑀦𑁂𑀯 𑀯𑀺𑀲𑁆𑀲𑀸𑀲𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀯𑀺𑀲𑁆𑀲𑀸𑀲𑀺𑀓𑀸𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀣𑀸𑀬 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀇𑀤𑀁 𑀘𑀢𑀼𑀲𑀘𑁆𑀘𑀓𑀣𑀸𑀬 𑀯𑀺𑀦𑀺𑀯𑀝𑁆𑀝𑀦𑀁 𑀦𑀸𑀫 𑀲𑀩𑁆𑀩𑀚𑀸𑀢𑀓𑁂𑀲𑀼𑀧𑀺 𑀅𑀢𑁆𑀣𑀺𑀬𑁂𑀯. 𑀫𑀬𑀁 𑀧𑀦 𑀬𑀢𑁆𑀣𑀲𑁆𑀲 𑀆𑀦𑀺𑀲𑀁𑀲𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀢𑀤𑀸 𑀲𑀼𑀦𑀔𑁄 𑀉𑀧𑀸𑀲𑀓𑁄 𑀅𑀳𑁄𑀲𑀺, 𑀳𑀢𑁆𑀣𑀻 𑀫𑀳𑀮𑁆𑀮𑀓𑀢𑁆𑀣𑁂𑀭𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀫𑀘𑁆𑀘𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀅𑀪𑀺𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁮] 𑁮. 𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀑𑀫𑀲𑀯𑀸𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀙𑀩𑁆𑀩𑀕𑁆𑀕𑀺𑀬𑀸 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀔𑀼𑀁𑀲𑁂𑀦𑁆𑀢𑀺 𑀯𑀫𑁆𑀪𑁂𑀦𑁆𑀢𑀺 𑀑𑀯𑀺𑀚𑁆𑀛𑀦𑁆𑀢𑀺, 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀙𑀩𑁆𑀩𑀕𑁆𑀕𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀪𑀺𑀓𑁆𑀔𑀯𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀕𑀭𑀳𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀅𑀫𑀦𑀸𑀧𑀸, 𑀧𑀼𑀩𑁆𑀩𑁂𑀧𑀺 𑀏𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀅𑀢𑁆𑀢𑀸𑀦𑀁 𑀨𑀭𑀼𑀲𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀁 𑀲𑀳𑀲𑁆𑀲𑀁 𑀧𑀭𑀸𑀚𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀕𑀦𑁆𑀥𑀸𑀭𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀕𑁄𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀦𑀁 𑀢𑀭𑀼𑀡𑀯𑀘𑁆𑀙𑀓𑀓𑀸𑀮𑁂𑀬𑁂𑀯 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀕𑁄𑀤𑀓𑁆𑀔𑀺𑀡𑀸𑀤𑀸𑀬𑀓𑀸𑀦𑀁 𑀲𑀦𑁆𑀢𑀺𑀓𑀸 𑀮𑀪𑀺𑀢𑁆𑀯𑀸 ‘‘𑀦𑀦𑁆𑀤𑀺𑀯𑀺𑀲𑀸𑀮𑁄’’𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑀢𑁆𑀯𑀸 𑀧𑁄𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀫𑀺𑀦𑀸 𑀩𑁆𑀭𑀸𑀳𑁆𑀫𑀡𑁂𑀦 𑀓𑀺𑀘𑁆𑀙𑁂𑀦 𑀧𑀝𑀺𑀚𑀕𑁆𑀕𑀺𑀢𑁄, 𑀫𑀬𑀸 𑀘 𑀲𑀤𑁆𑀥𑀺𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑁄 𑀲𑀫𑀥𑀼𑀭𑁄 𑀕𑁄𑀡𑁄 𑀦𑀸𑀫 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀲𑀸𑀯𑀦𑀺𑀬𑀁 𑀤𑀤𑁂𑀬𑁆𑀬’’𑀦𑁆𑀢𑀺 𑀲𑁄 𑀏𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑀁 𑀆𑀳 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀏𑀓𑀁 𑀕𑁄𑀯𑀺𑀢𑁆𑀢𑀓𑀲𑁂𑀝𑁆𑀞𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀫𑀬𑁆𑀳𑀁 𑀩𑀮𑀺𑀩𑀤𑁆𑀤𑁄 𑀅𑀢𑀺𑀩𑀤𑁆𑀥𑀁 𑀲𑀓𑀝𑀲𑀢𑀁 𑀧𑀯𑀝𑁆𑀝𑁂𑀢𑀻’𑀢𑀺 𑀯𑀢𑁆𑀯𑀸 𑀲𑀳𑀲𑁆𑀲𑁂𑀦 𑀅𑀩𑁆𑀪𑀼𑀢𑀁 𑀓𑀭𑁄𑀳𑀻’’𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀲𑁆𑀲 𑀕𑁄𑀡𑁄 𑀣𑀸𑀫𑀲𑀫𑁆𑀧𑀦𑁆𑀦𑁄’’𑀢𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀅𑀲𑀼𑀓𑀲𑁆𑀲 𑀘 𑀅𑀲𑀼𑀓𑀲𑁆𑀲 𑀘𑀸’’𑀢𑀺 𑀯𑀢𑁆𑀯𑀸 ‘‘𑀲𑀓𑀮𑀦𑀕𑀭𑁂 𑀧𑀦 𑀅𑀫𑁆𑀳𑀸𑀓𑀁 𑀕𑁄𑀡𑁂𑀳𑀺 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀬𑁆𑀳𑀁 𑀏𑀓𑁄 𑀕𑁄𑀡𑁄 𑀅𑀢𑀺𑀩𑀤𑁆𑀥𑀁 𑀲𑀓𑀝𑀲𑀢𑀁 𑀧𑀯𑀝𑁆𑀝𑁂𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀆𑀳. 𑀲𑁂𑀝𑁆𑀞𑀺 𑀕𑀳𑀧𑀢𑀺 ‘‘𑀓𑀼𑀢𑁄 𑀏𑀯𑀭𑀽𑀧𑁄 𑀕𑁄𑀡𑁄’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀬𑁆𑀳𑀁 𑀕𑁂𑀳𑁂 𑀅𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺 𑀅𑀩𑁆𑀪𑀼𑀢𑀁 𑀓𑀭𑁄𑀳𑀻’’𑀢𑀺. ‘‘𑀲𑀸𑀥𑀼 𑀓𑀭𑁄𑀫𑀻’’𑀢𑀺 𑀲𑀳𑀲𑁆𑀲𑁂𑀦 𑀅𑀩𑁆𑀪𑀼𑀢𑀁 𑀅𑀓𑀸𑀲𑀺.

𑀲𑁄 𑀲𑀓𑀝𑀲𑀢𑀁 𑀯𑀸𑀮𑀼𑀓𑀸𑀲𑀓𑁆𑀔𑀭𑀧𑀸𑀲𑀸𑀡𑀸𑀦𑀁𑀬𑁂𑀯 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀦𑀺 𑀅𑀓𑁆𑀔𑀩𑀦𑁆𑀥𑀦𑀬𑁄𑀢𑁆𑀢𑁂𑀦 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀦𑀦𑁆𑀤𑀺𑀯𑀺𑀲𑀸𑀮𑀁 𑀦𑁆𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀓𑀢𑁆𑀯𑀸 𑀓𑀡𑁆𑀞𑁂 𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀼𑀭𑀺𑀫𑀲𑀓𑀝𑀥𑀼𑀭𑁂 𑀏𑀓𑀓𑀫𑁂𑀯 𑀬𑁄𑀚𑁂𑀢𑁆𑀯𑀸 𑀲𑀬𑀁 𑀥𑀼𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀢𑁄𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀕𑀘𑁆𑀙 𑀓𑀽𑀝, 𑀯𑀳𑀲𑁆𑀲𑀼 𑀓𑀽𑀝𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀫𑀁 𑀅𑀓𑀽𑀝𑀁 𑀓𑀽𑀝𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻’’𑀢𑀺 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀣𑀫𑁆𑀪𑁂 𑀯𑀺𑀬 𑀦𑀺𑀘𑁆𑀘𑀮𑁂 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁂𑀝𑁆𑀞𑀺 𑀢𑀗𑁆𑀔𑀡𑀜𑁆𑀜𑁂𑀯 𑀩𑁆𑀭𑀸𑀳𑁆𑀫𑀡𑀁 𑀲𑀳𑀲𑁆𑀲𑀁 𑀆𑀳𑀭𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀳𑀲𑁆𑀲𑀧𑀭𑀸𑀚𑀺𑀢𑁄 𑀕𑁄𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀲𑁄𑀓𑀸𑀪𑀺𑀪𑀽𑀢𑁄 𑀦𑀺𑀧𑀚𑁆𑀚𑀺. 𑀦𑀦𑁆𑀤𑀺𑀯𑀺𑀲𑀸𑀮𑁄 𑀘𑀭𑀺𑀢𑁆𑀯𑀸 𑀆𑀕𑀢𑁄 𑀩𑁆𑀭𑀸𑀳𑁆𑀫𑀡𑀁 𑀲𑁄𑀓𑀸𑀪𑀺𑀪𑀽𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀦𑀺𑀤𑁆𑀤𑀸𑀬𑀲𑀻’’𑀢𑀺 𑀆𑀳. ‘‘𑀓𑀼𑀢𑁄 𑀫𑁂, 𑀦𑀺𑀤𑁆𑀤𑀸, 𑀲𑀳𑀲𑁆𑀲𑀧𑀭𑀸𑀚𑀺𑀢𑀲𑁆𑀲𑀸𑀢𑀺, 𑀩𑁆𑀭𑀸𑀳𑁆𑀫𑀡, 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀯 𑀕𑁂𑀳𑁂 𑀯𑀲𑀦𑁆𑀢𑁂𑀦 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀪𑀸𑀚𑀦𑀁 𑀯𑀸 𑀪𑀺𑀦𑁆𑀤𑀺𑀢𑀧𑀼𑀩𑁆𑀩𑀁, 𑀓𑁄𑀘𑀺 𑀯𑀸 𑀫𑀤𑁆𑀤𑀺𑀢𑀧𑀼𑀩𑁆𑀩𑁄, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀓𑀢𑀧𑀼𑀩𑁆𑀩𑁄’’𑀢𑀺? ‘‘𑀦𑀢𑁆𑀣𑀺 𑀢𑀸𑀢𑀸’’𑀢𑀺. 𑀅𑀣 𑀢𑁆𑀯𑀁 𑀫𑀁 𑀓𑀲𑁆𑀫𑀸 𑀓𑀽𑀝𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀲𑀺, 𑀢𑀯𑁂𑀯𑁂𑀲𑁄 𑀤𑁄𑀲𑁄, 𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀕𑀘𑁆𑀙, 𑀢𑁂𑀦 𑀲𑀤𑁆𑀥𑀺𑀁 𑀤𑁆𑀯𑀻𑀳𑀺 𑀲𑀳𑀲𑁆𑀲𑁂𑀳𑀺 𑀅𑀩𑁆𑀪𑀼𑀢𑀁 𑀓𑀭𑁄𑀳𑀺, 𑀓𑁂𑀯𑀮𑀁 𑀫𑀁 𑀅𑀓𑀽𑀝𑀁 𑀓𑀽𑀝𑀯𑀸𑀤𑁂𑀦 𑀫𑀸 𑀲𑀫𑀼𑀤𑀸𑀘𑀭𑀲𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀤𑁆𑀯𑀻𑀳𑀺 𑀲𑀳𑀲𑁆𑀲𑁂𑀳𑀺 𑀅𑀩𑁆𑀪𑀼𑀢𑀁 𑀓𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀓𑀝𑀲𑀢𑀁 𑀅𑀢𑀺𑀩𑀦𑁆𑀥𑀺𑀢𑁆𑀯𑀸 𑀦𑀦𑁆𑀤𑀺𑀯𑀺𑀲𑀸𑀮𑀁 𑀫𑀡𑁆𑀟𑁂𑀢𑁆𑀯𑀸 𑀧𑀼𑀭𑀺𑀫𑀲𑀓𑀝𑀥𑀼𑀭𑁂 𑀬𑁄𑀚𑁂𑀲𑀺. 𑀓𑀣𑀁 𑀬𑁄𑀚𑁂𑀲𑀻𑀢𑀺? 𑀬𑀼𑀕𑀁 𑀥𑀼𑀭𑁂 𑀦𑀺𑀘𑁆𑀘𑀮𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀸𑀬 𑀓𑁄𑀝𑀺𑀬𑀸 𑀦𑀦𑁆𑀤𑀺𑀯𑀺𑀲𑀸𑀮𑀁 𑀬𑁄𑀚𑁂𑀢𑁆𑀯𑀸 𑀏𑀓𑀁 𑀓𑁄𑀝𑀺𑀁 𑀥𑀼𑀭𑀬𑁄𑀢𑁆𑀢𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀬𑀼𑀕𑀓𑁄𑀝𑀺𑀜𑁆𑀘 𑀅𑀓𑁆𑀔𑀧𑀸𑀤𑀜𑁆𑀘 𑀦𑀺𑀲𑁆𑀲𑀸𑀬 𑀫𑀼𑀡𑁆𑀟𑀭𑀼𑀓𑁆𑀔𑀤𑀡𑁆𑀟𑀓𑀁 𑀤𑀢𑁆𑀯𑀸 𑀢𑁂𑀦 𑀬𑁄𑀢𑁆𑀢𑁂𑀦 𑀦𑀺𑀘𑁆𑀘𑀮𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀲𑀺. 𑀏𑀯𑀜𑁆𑀳𑀺 𑀓𑀢𑁂 𑀬𑀼𑀕𑀁 𑀏𑀢𑁆𑀢𑁄 𑀯𑀸 𑀇𑀢𑁄 𑀯𑀸 𑀦 𑀕𑀘𑁆𑀙𑀢𑀺, 𑀲𑀓𑁆𑀓𑀸 𑀳𑁄𑀢𑀺 𑀏𑀓𑁂𑀦𑁂𑀯 𑀕𑁄𑀡𑁂𑀦 𑀆𑀓𑀟𑁆𑀠𑀺𑀢𑀼𑀁. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀥𑀼𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀦𑁆𑀤𑀺𑀯𑀺𑀲𑀸𑀮𑀲𑁆𑀲 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 ‘‘𑀕𑀘𑁆𑀙 𑀪𑀤𑁆𑀭, 𑀯𑀳𑀲𑁆𑀲𑀼, 𑀪𑀦𑁆𑀤𑁆𑀭𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀅𑀢𑀺𑀩𑀤𑁆𑀥𑀁 𑀲𑀓𑀝𑀲𑀢𑀁 𑀏𑀓𑀯𑁂𑀕𑁂𑀦𑁂𑀯 𑀆𑀓𑀟𑁆𑀠𑀺𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀁 𑀲𑀓𑀝𑀁 𑀧𑀼𑀭𑀢𑁄 𑀞𑀺𑀢𑀲𑁆𑀲 𑀲𑀓𑀝𑀲𑁆𑀲 𑀞𑀸𑀦𑁂 𑀞𑀧𑁂𑀲𑀺. 𑀕𑁄𑀯𑀺𑀢𑁆𑀢𑀓𑀲𑁂𑀝𑁆𑀞𑀺 𑀧𑀭𑀸𑀚𑀺𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀅𑀤𑀁𑀲𑀼, 𑀲𑀩𑁆𑀩𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀅𑀳𑁄𑀲𑀺. 𑀏𑀯𑀁 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀦𑀺𑀲𑁆𑀲𑀸𑀬 𑀩𑀳𑀼𑀁 𑀥𑀦𑀁 𑀮𑀪𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀨𑀭𑀼𑀲𑀯𑀘𑀦𑀁 𑀦𑀸𑀫 𑀓𑀲𑁆𑀲𑀘𑀺 𑀫𑀦𑀸𑀧’’𑀦𑁆𑀢𑀺 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮. ‘‘𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀽’’𑀢𑀺.

𑀢𑀢𑁆𑀣 𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬𑀸𑀢𑀺 𑀧𑀭𑁂𑀦 𑀲𑀤𑁆𑀥𑀺𑀁 𑀪𑀸𑀲𑀫𑀸𑀦𑁄 𑀘𑀢𑀼𑀤𑁄𑀲𑀯𑀺𑀭𑀳𑀺𑀢𑀁 𑀫𑀥𑀼𑀭𑀁 𑀫𑀦𑀸𑀧𑀁 𑀲𑀡𑁆𑀳𑀁 𑀫𑀼𑀤𑀼𑀓𑀁 𑀧𑀺𑀬𑀯𑀘𑀦𑀫𑁂𑀯 𑀪𑀸𑀲𑁂𑀬𑁆𑀬. 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀻𑀢𑀺 𑀦𑀦𑁆𑀤𑀺𑀯𑀺𑀲𑀸𑀮𑁄 𑀩𑀮𑀺𑀩𑀤𑁆𑀤𑁄 𑀅𑀫𑀦𑀸𑀧𑀁 𑀪𑀸𑀲𑀫𑀸𑀦𑀲𑁆𑀲 𑀪𑀸𑀭𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀧𑀘𑁆𑀙𑀸 𑀫𑀦𑀸𑀧𑀁 𑀧𑀺𑀬𑀯𑀘𑀦𑀁 𑀪𑀸𑀲𑀫𑀸𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑀭𑀼𑀁 𑀪𑀸𑀭𑀁 𑀉𑀤𑁆𑀥𑀭𑀺, 𑀉𑀤𑁆𑀥𑀭𑀺𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀧𑀯𑀝𑁆𑀝𑁂𑀲𑀻𑀢𑀺 𑀅𑀢𑁆𑀣𑁄, 𑀤-𑀓𑀸𑀭𑁄 𑀧𑀦𑁂𑀢𑁆𑀣 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀧𑀤𑀲𑀦𑁆𑀥𑀺𑀓𑀭𑁄.

𑀇𑀢𑀺 𑀲𑀢𑁆𑀣𑀸 ‘‘𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀦𑀦𑁆𑀤𑀺𑀯𑀺𑀲𑀸𑀮𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁯] 𑁯. 𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀲𑀤𑁆𑀥𑀺𑀁 𑀤𑁂𑀯𑁄𑀭𑁄𑀳𑀡𑁂𑀦 𑀢𑁂𑀭𑀲𑀓𑀦𑀺𑀧𑀸𑀢𑁂 𑀲𑀭𑀪𑀫𑀺𑀕𑀚𑀸𑀢𑀓𑁂 (𑀚𑀸. 𑁧.𑁧𑁩.𑁧𑁩𑁪 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀚𑁂𑀢𑀯𑀦𑀁 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀦𑀸𑀫 𑀅𑀲𑀫𑀥𑀼𑀭𑁄, 𑀢𑀣𑀸𑀕𑀢𑁂𑀦 𑀯𑀼𑀴𑁆𑀳𑀥𑀼𑀭𑀁 𑀅𑀜𑁆𑀜𑁄 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀙 𑀲𑀢𑁆𑀣𑀸𑀭𑁄 ‘𑀫𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫, 𑀫𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀢𑁆𑀯𑀸 𑀏𑀓𑀫𑁆𑀧𑀺 𑀧𑀸𑀝𑀺𑀳𑀸𑀭𑀺𑀬𑀁 𑀦 𑀅𑀓𑀁𑀲𑀼, 𑀅𑀳𑁄 𑀲𑀢𑁆𑀣𑀸 𑀅𑀲𑀫𑀥𑀼𑀭𑁄’’𑀢𑀺 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁, 𑀪𑀦𑁆𑀢𑁂, 𑀦 𑀅𑀜𑁆𑀜𑀸𑀬 𑀓𑀣𑀸𑀬, 𑀏𑀯𑀭𑀽𑀧𑀸𑀬 𑀦𑀸𑀫 𑀢𑀼𑀫𑁆𑀳𑀸𑀓𑀫𑁂𑀯 𑀕𑀼𑀡𑀓𑀣𑀸𑀬𑀸’’𑀢𑀺. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀫𑀬𑀸 𑀯𑀼𑀴𑁆𑀳𑀥𑀼𑀭𑀁 𑀓𑁄 𑀯𑀳𑀺𑀲𑁆𑀲𑀢𑀺, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀅𑀳𑀁 𑀅𑀢𑁆𑀢𑀦𑀸 𑀲𑀫𑀥𑀼𑀭𑀁 𑀓𑀜𑁆𑀘𑀺 𑀦𑀸𑀮𑀢𑁆𑀣’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑁄𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣 𑀦𑀁 𑀲𑀸𑀫𑀺𑀓𑀸 𑀢𑀭𑀼𑀡𑀯𑀘𑁆𑀙𑀓𑀓𑀸𑀮𑁂𑀬𑁂𑀯 𑀏𑀓𑀺𑀲𑁆𑀲𑀸 𑀫𑀳𑀮𑁆𑀮𑀺𑀓𑀸𑀬 𑀖𑀭𑁂 𑀯𑀲𑀺𑀢𑁆𑀯𑀸 𑀢𑀲𑁆𑀲𑀸 𑀦𑀺𑀯𑀸𑀲𑀯𑁂𑀢𑀦𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀤𑀁𑀲𑀼. 𑀲𑀸 𑀢𑀁 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀫𑀸𑀦𑀸 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀟𑁆𑀠𑁂𑀲𑀺. 𑀲𑁄 ‘‘𑀅𑀬𑁆𑀬𑀺𑀓𑀸𑀓𑀸𑀴𑀓𑁄’’ 𑀢𑁆𑀯𑁂𑀯 𑀦𑀸𑀫𑀁 𑀧𑀜𑁆𑀜𑀸𑀬𑀺𑀢𑁆𑀣. 𑀯𑀬𑀧𑁆𑀧𑀢𑁆𑀢𑁄 𑀘 𑀅𑀜𑁆𑀚𑀦𑀯𑀡𑁆𑀡𑁄 𑀳𑀼𑀢𑁆𑀯𑀸 𑀕𑀸𑀫𑀕𑁄𑀡𑁂𑀳𑀺 𑀲𑀤𑁆𑀥𑀺𑀁 𑀘𑀭𑀢𑀺, 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀕𑀸𑀫𑀤𑀸𑀭𑀓𑀸 𑀲𑀺𑀗𑁆𑀕𑁂𑀲𑀼𑀧𑀺 𑀓𑀡𑁆𑀡𑁂𑀲𑀼𑀧𑀺 𑀕𑀮𑁂𑀧𑀺 𑀕𑀳𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀺, 𑀦𑀗𑁆𑀕𑀼𑀝𑁆𑀞𑁂𑀧𑀺 𑀕𑀳𑁂𑀢𑁆𑀯𑀸 𑀓𑀻𑀴𑀦𑁆𑀢𑀺, 𑀧𑀺𑀝𑁆𑀞𑀺𑀬𑀫𑁆𑀧𑀺 𑀦𑀺𑀲𑀻𑀤𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀫𑀸𑀢𑀸 𑀤𑀼𑀕𑁆𑀕𑀢𑀸, 𑀫𑀁 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑁂𑀦 𑀧𑁄𑀲𑁂𑀲𑀺, 𑀬𑀁𑀦𑀽𑀦𑀸𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀇𑀫𑀁 𑀤𑀼𑀕𑁆𑀕𑀢𑀪𑀸𑀯𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀪𑀢𑀺𑀁 𑀉𑀧𑀥𑀸𑀭𑁂𑀦𑁆𑀢𑁄 𑀘𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑀺𑀲𑀫𑀢𑀺𑀢𑁆𑀣𑀁 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀲 𑀕𑁄𑀡𑀸 𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀜𑁆𑀘𑀲𑀼 𑀲𑀓𑀝𑀲𑀢𑁂𑀲𑀼 𑀕𑁄𑀡𑀸 𑀬𑀼𑀕𑀧𑀭𑀫𑁆𑀧𑀭𑀸𑀬 𑀬𑁄𑀚𑀺𑀢𑀸 𑀏𑀓𑀫𑁆𑀧𑀺 𑀲𑀓𑀝𑀁 𑀉𑀢𑁆𑀢𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀕𑀸𑀫𑀕𑁄𑀡𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀲𑀫𑀻𑀧𑁂 𑀘𑀭𑀢𑀺. 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄𑀧𑀺 𑀕𑁄𑀲𑀼𑀢𑁆𑀢𑀯𑀺𑀢𑁆𑀢𑀓𑁄, 𑀲𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀕𑀼𑀦𑁆𑀦𑀁 𑀅𑀦𑁆𑀢𑀭𑁂 𑀇𑀫𑀸𑀦𑀺 𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀉𑀲𑀪𑀸𑀚𑀸𑀦𑀻𑀬𑁄’’𑀢𑀺 𑀉𑀧𑀥𑀸𑀭𑀬𑀫𑀸𑀦𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀆𑀚𑀸𑀦𑀻𑀬𑁄 𑀲𑀓𑁆𑀔𑀺𑀲𑁆𑀲𑀢𑀺 𑀫𑀬𑁆𑀳𑀁 𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀢𑀼𑀁, 𑀓𑁄 𑀦𑀼 𑀔𑁄 𑀅𑀲𑁆𑀲 𑀲𑀸𑀫𑀺𑀓𑁄’’𑀢𑀺 𑀕𑁄𑀧𑀸𑀮𑀓𑁂 𑀧𑀼𑀘𑁆𑀙𑀺 ‘‘𑀓𑁄 𑀦𑀼 𑀔𑁄 𑀪𑁄 𑀇𑀫𑀲𑁆𑀲 𑀲𑀸𑀫𑀺𑀓𑁄, 𑀅𑀳𑀁 𑀇𑀫𑀁 𑀲𑀓𑀝𑁂 𑀬𑁄𑀚𑁂𑀢𑁆𑀯𑀸 𑀲𑀓𑀝𑁂𑀲𑀼 𑀉𑀢𑁆𑀢𑀸𑀭𑀺𑀢𑁂𑀲𑀼 𑀯𑁂𑀢𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀢𑁂 𑀆𑀳𑀁𑀲𑀼 ‘‘𑀕𑀳𑁂𑀢𑁆𑀯𑀸 𑀦𑀁 𑀬𑁄𑀚𑁂𑀣, 𑀦𑀢𑁆𑀣𑀺 𑀇𑀫𑀲𑁆𑀲 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀸𑀫𑀺𑀓𑁄’’𑀢𑀺. 𑀲𑁄 𑀦𑀁 𑀦𑀸𑀲𑀸𑀬 𑀭𑀚𑁆𑀚𑀼𑀓𑁂𑀦 𑀩𑀦𑁆𑀥𑀺𑀢𑁆𑀯𑀸 𑀆𑀓𑀟𑁆𑀠𑁂𑀦𑁆𑀢𑁄 𑀘𑀸𑀮𑁂𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 ‘‘𑀪𑀢𑀺𑀬𑀸 𑀓𑀣𑀺𑀢𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀕𑀫𑀸𑀲𑀺. 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 ‘‘𑀲𑀸𑀫𑀺, 𑀢𑀬𑀸 𑀧𑀜𑁆𑀘𑀲𑀼 𑀲𑀓𑀝𑀲𑀢𑁂𑀲𑀼 𑀉𑀢𑁆𑀢𑀸𑀭𑀺𑀢𑁂𑀲𑀼 𑀏𑀓𑁂𑀓𑀲𑁆𑀲 𑀲𑀓𑀝𑀲𑁆𑀲 𑀤𑁆𑀯𑁂 𑀤𑁆𑀯𑁂 𑀓𑀳𑀸𑀧𑀡𑁂 𑀪𑀢𑀺𑀁 𑀓𑀢𑁆𑀯𑀸 𑀲𑀳𑀲𑁆𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀬𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀦𑀁 𑀧𑀼𑀭𑀺𑀲𑀸 𑀧𑀼𑀭𑀺𑀫𑀲𑀓𑀝𑁂𑀲𑀼 𑀬𑁄𑀚𑁂𑀲𑀼𑀁. 𑀅𑀣 𑀦𑀁 𑀏𑀓𑀯𑁂𑀕𑁂𑀦𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀲𑀺.

𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀏𑀓𑁂𑀓𑀲𑁆𑀲 𑀲𑀓𑀝𑀲𑁆𑀲 𑀏𑀓𑁂𑀓𑀁 𑀓𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀺 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀢𑀲𑁆𑀲 𑀕𑀮𑁂 𑀩𑀦𑁆𑀥𑀺. 𑀲𑁄 ‘‘𑀅𑀬𑀁 𑀫𑀬𑁆𑀳𑀁 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀪𑀢𑀺𑀁 𑀦 𑀤𑁂𑀢𑀺, 𑀦 𑀤𑀸𑀦𑀺𑀲𑁆𑀲 𑀕𑀦𑁆𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀩𑁆𑀩𑀧𑀼𑀭𑀺𑀫𑀲𑀓𑀝𑀲𑁆𑀲 𑀧𑀼𑀭𑀢𑁄 𑀫𑀕𑁆𑀕𑀁 𑀦𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀧𑀦𑁂𑀢𑀼𑀁 𑀯𑀸𑀬𑀫𑀦𑁆𑀢𑀸𑀧𑀺 𑀦𑀁 𑀅𑀧𑀦𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 ‘‘𑀚𑀸𑀦𑀸𑀢𑀺 𑀫𑀜𑁆𑀜𑁂 𑀏𑀲 𑀅𑀢𑁆𑀢𑀦𑁄 𑀪𑀢𑀺𑀬𑀸 𑀊𑀦𑀪𑀸𑀯’’𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀲𑀓𑀝𑁂 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀬𑀁 𑀢𑁂 𑀲𑀓𑀝𑀼𑀢𑁆𑀢𑀭𑀡𑀪𑀢𑀻’’𑀢𑀺 𑀕𑀻𑀯𑀸𑀬𑀁 𑀮𑀕𑁆𑀕𑁂𑀲𑀺. 𑀲𑁄 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀆𑀤𑀸𑀬 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀕𑀸𑀫𑀤𑀸𑀭𑀓𑀸 ‘‘𑀓𑀺𑀁 𑀦𑀸𑀫𑁂𑀢𑀁 𑀅𑀬𑁆𑀬𑀺𑀓𑀸𑀓𑀸𑀴𑀓𑀲𑁆𑀲 𑀕𑀮𑁂’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀤𑀽𑀭𑀢𑁄𑀯 𑀧𑀮𑀸𑀧𑁂𑀦𑁆𑀢𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀧𑀜𑁆𑀘𑀦𑁆𑀦𑀁 𑀧𑀦 𑀲𑀓𑀝𑀲𑀢𑀸𑀦𑀁 𑀉𑀢𑁆𑀢𑀸𑀭𑀺𑀢𑀢𑁆𑀢𑀸 𑀭𑀢𑁆𑀢𑁂𑀳𑀺 𑀅𑀓𑁆𑀔𑀻𑀳𑀺 𑀓𑀺𑀮𑀦𑁆𑀢𑀭𑀽𑀧𑁄 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀬𑁆𑀬𑀺𑀓𑀸 𑀢𑀲𑁆𑀲 𑀕𑀻𑀯𑀸𑀬 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀅𑀬𑀁 𑀢𑁂 𑀓𑀳𑀁 𑀮𑀤𑁆𑀥𑀸’’𑀢𑀺 𑀕𑁄𑀧𑀸𑀮𑀓𑀤𑀸𑀭𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀢𑀸𑀢, 𑀓𑀺𑀁 𑀅𑀳𑀁 𑀢𑀬𑀸 𑀮𑀤𑁆𑀥𑀪𑀢𑀺𑀬𑀸 𑀚𑀻𑀯𑀺𑀢𑀼𑀓𑀸𑀫𑀸, 𑀓𑀺𑀁𑀓𑀸𑀭𑀡𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀬𑁂𑀢𑁆𑀯𑀸 𑀲𑀧𑁆𑀧𑀸𑀬𑀁 𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀤𑁆𑀥𑀺𑀁 𑀩𑁄𑀥𑀺𑀲𑀢𑁆𑀢𑁂𑀦 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀅𑀲𑀫𑀥𑀼𑀭𑁄, 𑀧𑀼𑀩𑁆𑀩𑁂𑀧𑀺 𑀅𑀲𑀫𑀥𑀼𑀭𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯. ‘‘𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀁, 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻;

𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀺, 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭’’𑀦𑁆𑀢𑀺.

𑀢𑀢𑁆𑀣 𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀦𑁆𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀥𑀼𑀭𑀁 𑀕𑀭𑀼 𑀪𑀸𑀭𑀺𑀬𑀁 𑀳𑁄𑀢𑀺, 𑀅𑀜𑁆𑀜𑁂 𑀩𑀮𑀺𑀩𑀤𑁆𑀤𑀸 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻𑀢𑀺 𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀢𑀦𑀻, 𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁, 𑀬𑀲𑁆𑀫𑀺𑀁 𑀞𑀸𑀦𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑀫𑀳𑀦𑁆𑀢𑀢𑀸𑀬 𑀯𑀸 𑀯𑀺𑀲𑀫𑀘𑁆𑀙𑀺𑀦𑁆𑀦𑀢𑀝𑀪𑀸𑀯𑁂𑀦 𑀯𑀸 𑀫𑀕𑁆𑀕𑁄 𑀕𑀫𑁆𑀪𑀻𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀤𑀸 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀸 𑀥𑀼𑀭𑀜𑁆𑀘 𑀕𑀭𑀼 𑀳𑁄𑀢𑀺 𑀫𑀕𑁆𑀕𑁄 𑀘 𑀕𑀫𑁆𑀪𑀻𑀭𑁄, 𑀢𑀤𑀸 𑀅𑀜𑁆𑀜𑁂 𑀩𑀮𑀺𑀩𑀤𑁆𑀤𑁂 𑀅𑀧𑀦𑁂𑀢𑁆𑀯𑀸 𑀓𑀡𑁆𑀳𑀫𑁂𑀯 𑀬𑁄𑀚𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯, 𑀲𑁄 𑀢𑀁 𑀥𑀼𑀭𑀁 𑀯𑀳𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀪𑀕𑀯𑀸 ‘‘𑀢𑀤𑀸, 𑀪𑀺𑀓𑁆𑀔𑀯𑁂, 𑀓𑀡𑁆𑀳𑁄𑀯 𑀢𑀁 𑀥𑀼𑀭𑀁 𑀯𑀳𑀢𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀮𑁆𑀮𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀅𑀬𑁆𑀬𑀺𑀓𑀸𑀓𑀸𑀴𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁦] 𑁧𑁦. 𑀫𑀼𑀦𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀢𑁂𑀭𑀲𑀓𑀦𑀺𑀧𑀸𑀢𑁂 𑀘𑀽𑀴𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 (𑀚𑀸. 𑁧.𑁧𑁩.𑁪𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀺𑀲𑁆𑀲𑀸𑀬𑀸’’𑀢𑀺? ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀏𑀲𑀸 𑀢𑀯 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀇𑀫𑀺𑀲𑁆𑀲𑀸 𑀯𑀺𑀯𑀸𑀳𑀤𑀺𑀯𑀲𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀉𑀢𑁆𑀢𑀭𑀺𑀪𑀗𑁆𑀕𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀕𑁄𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺 ‘‘𑀫𑀳𑀸𑀮𑁄𑀳𑀺𑀢𑁄’’𑀢𑀺 𑀦𑀸𑀫𑁂𑀦, 𑀓𑀦𑀺𑀝𑁆𑀞𑀪𑀸𑀢𑀸𑀧𑀺𑀲𑁆𑀲 𑀘𑀽𑀴𑀮𑁄𑀳𑀺𑀢𑁄 𑀦𑀸𑀫 𑀅𑀳𑁄𑀲𑀺. 𑀢𑁂𑀬𑁂𑀯 𑀤𑁆𑀯𑁂 𑀪𑀸𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀓𑀼𑀮𑁂 𑀓𑀫𑁆𑀫𑀥𑀼𑀭𑀁 𑀯𑀢𑁆𑀢𑀢𑀺. 𑀢𑀲𑁆𑀫𑀺𑀁 𑀧𑀦 𑀓𑀼𑀮𑁂 𑀏𑀓𑀸 𑀓𑀼𑀫𑀸𑀭𑀺𑀓𑀸 𑀅𑀢𑁆𑀣𑀺, 𑀢𑀁 𑀏𑀓𑁄 𑀦𑀕𑀭𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀸𑀭𑁂𑀲𑀺. 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀓𑀼𑀫𑀸𑀭𑀺𑀓𑀸𑀬 𑀯𑀺𑀯𑀸𑀳𑀓𑀸𑀮𑁂 𑀆𑀕𑀢𑀸𑀦𑀁 𑀧𑀸𑀳𑀼𑀦𑀓𑀸𑀦𑀁 𑀉𑀢𑁆𑀢𑀭𑀺𑀪𑀗𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸 𑀫𑀼𑀦𑀺𑀓𑀁 𑀦𑀸𑀫 𑀲𑀽𑀓𑀭𑀁 𑀧𑁄𑀲𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀘𑀽𑀴𑀮𑁄𑀳𑀺𑀢𑁄 𑀪𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀇𑀫𑀲𑁆𑀫𑀺𑀁 𑀓𑀼𑀮𑁂 𑀓𑀫𑁆𑀫𑀥𑀼𑀭𑀁 𑀯𑀢𑁆𑀢𑀫𑀸𑀦𑀁 𑀅𑀫𑁆𑀳𑁂 𑀤𑁆𑀯𑁂 𑀪𑀸𑀢𑀺𑀓𑁂 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀺, 𑀇𑀫𑁂 𑀧𑀦 𑀅𑀫𑁆𑀳𑀸𑀓𑀁 𑀢𑀺𑀡𑀧𑀮𑀸𑀮𑀸𑀤𑀻𑀦𑁂𑀯 𑀤𑁂𑀦𑁆𑀢𑀺, 𑀲𑀽𑀓𑀭𑀁 𑀬𑀸𑀕𑀼𑀪𑀢𑁆𑀢𑁂𑀦 𑀧𑁄𑀲𑁂𑀦𑁆𑀢𑀺, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀏𑀲 𑀏𑀢𑀁 𑀮𑀪𑀢𑀻’’𑀢𑀺. 𑀅𑀣𑀲𑁆𑀲 𑀪𑀸𑀢𑀸 ‘‘𑀢𑀸𑀢 𑀘𑀽𑀴𑀮𑁄𑀳𑀺𑀢, 𑀫𑀸 𑀢𑁆𑀯𑀁 𑀏𑀢𑀲𑁆𑀲 𑀪𑁄𑀚𑀦𑀁 𑀧𑀺𑀳𑀬𑀺, 𑀅𑀬𑀁 𑀲𑀽𑀓𑀭𑁄 𑀫𑀭𑀡𑀪𑀢𑁆𑀢𑀁 𑀪𑀼𑀜𑁆𑀚𑀢𑀺. 𑀏𑀢𑀺𑀲𑁆𑀲𑀸 𑀳𑀺 𑀓𑀼𑀫𑀸𑀭𑀺𑀓𑀸𑀬 𑀯𑀺𑀯𑀸𑀳𑀓𑀸𑀮𑁂 𑀆𑀕𑀢𑀸𑀦𑀁 𑀧𑀸𑀳𑀼𑀦𑀓𑀸𑀦𑀁 𑀉𑀢𑁆𑀢𑀭𑀺𑀪𑀗𑁆𑀕𑁄 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑁂 𑀏𑀢𑀁 𑀲𑀽𑀓𑀭𑀁 𑀧𑁄𑀲𑁂𑀦𑁆𑀢𑀺, 𑀇𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑁂 𑀫𑀦𑀼𑀲𑁆𑀲𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀅𑀣 𑀦𑀁 𑀲𑀽𑀓𑀭𑀁 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑁂𑀦𑁆𑀢𑀸 𑀳𑁂𑀝𑁆𑀞𑀸𑀫𑀜𑁆𑀘𑀢𑁄 𑀦𑀻𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀧𑀸𑀳𑀼𑀦𑀓𑀸𑀦𑀁 𑀲𑀽𑀧𑀩𑁆𑀬𑀜𑁆𑀚𑀦𑀁 𑀓𑀭𑀺𑀬𑀫𑀸𑀦𑀁 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦. ‘‘𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀺, 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡’’𑀦𑁆𑀢𑀺.

𑀢𑀢𑁆𑀣 𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀻𑀢𑀺 𑀫𑀼𑀦𑀺𑀓𑀲𑁆𑀲 𑀪𑁄𑀚𑀦𑁂 𑀧𑀺𑀳𑀁 𑀫𑀸 𑀉𑀧𑁆𑀧𑀸𑀤𑀬𑀺, ‘‘𑀏𑀲 𑀫𑀼𑀦𑀺𑀓𑁄 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀢𑀻’’𑀢𑀺 𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀺, ‘‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀁 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀫𑀸 𑀫𑀼𑀦𑀺𑀓𑀪𑀸𑀯𑀁 𑀧𑀢𑁆𑀣𑀬𑀺. 𑀅𑀬𑀜𑁆𑀳𑀺 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺. 𑀆𑀢𑀼𑀭𑀦𑁆𑀦𑀸𑀦𑀻𑀢𑀺 𑀫𑀭𑀡𑀪𑁄𑀚𑀦𑀸𑀦𑀺. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤𑀸𑀢𑀺 𑀢𑀲𑁆𑀲 𑀪𑁄𑀚𑀦𑁂 𑀦𑀺𑀭𑀼𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀪𑀼𑀲𑀁 𑀔𑀸𑀤. 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡𑀦𑁆𑀢𑀺 𑀏𑀢𑀁 𑀤𑀻𑀖𑀸𑀬𑀼𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀢𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀢𑁂 𑀫𑀦𑀼𑀲𑁆𑀲𑀸 𑀆𑀕𑀫𑀺𑀁𑀲𑀼, 𑀫𑀼𑀦𑀺𑀓𑀁 𑀖𑀸𑀢𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀧𑀘𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀘𑀽𑀴𑀮𑁄𑀳𑀺𑀢𑀁 𑀆𑀳 ‘‘𑀤𑀺𑀝𑁆𑀞𑁄 𑀢𑁂, 𑀢𑀸𑀢, 𑀫𑀼𑀦𑀺𑀓𑁄’’𑀢𑀺. 𑀤𑀺𑀝𑁆𑀞𑀁 𑀫𑁂, 𑀪𑀸𑀢𑀺𑀓, 𑀫𑀼𑀦𑀺𑀓𑀲𑁆𑀲 𑀪𑁄𑀚𑀦𑀨𑀮𑀁, 𑀏𑀢𑀲𑁆𑀲 𑀪𑁄𑀚𑀦𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀅𑀫𑁆𑀳𑀸𑀓𑀁 𑀢𑀺𑀡𑀧𑀮𑀸𑀮𑀪𑀼𑀲𑀫𑀢𑁆𑀢𑀫𑁂𑀯 𑀉𑀢𑁆𑀢𑀫𑀜𑁆𑀘 𑀅𑀦𑀯𑀚𑁆𑀚𑀜𑁆𑀘 𑀤𑀻𑀖𑀸𑀬𑀼𑀮𑀓𑁆𑀔𑀡𑀜𑁆𑀘𑀸𑀢𑀺.

𑀲𑀢𑁆𑀣𑀸 ‘‘𑀏𑀯𑀁 𑀔𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂𑀧𑀺 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀉𑀢𑁆𑀢𑀭𑀺𑀪𑀗𑁆𑀕𑀪𑀸𑀯𑀁 𑀕𑀢𑁄’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀼𑀦𑀺𑀓𑀲𑀽𑀓𑀭𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸 𑀏𑀲𑀸 𑀏𑀯, 𑀘𑀽𑀴𑀮𑁄𑀳𑀺𑀢𑁄 𑀆𑀦𑀦𑁆𑀤𑁄, 𑀫𑀳𑀸𑀮𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀼𑀦𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀼𑀭𑀼𑀗𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀭𑀼𑀗𑁆𑀕𑀁 𑀓𑀼𑀓𑁆𑀓𑀼𑀭𑀜𑁆𑀘𑁂𑀯, 𑀪𑁄𑀚𑀸𑀚𑀸𑀦𑀻𑀬𑀜𑁆𑀘 𑀆𑀚𑀜𑁆𑀜𑀁;

𑀢𑀺𑀢𑁆𑀣𑀁 𑀫𑀳𑀺𑀴𑀸𑀫𑀼𑀔𑀸𑀪𑀺𑀡𑁆𑀳𑀁, 𑀦𑀦𑁆𑀤𑀺𑀓𑀡𑁆𑀳𑀜𑁆𑀘 𑀫𑀼𑀦𑀺𑀓𑀦𑁆𑀢𑀺.