𑁨. 𑀲𑀻𑀮𑀯𑀕𑁆𑀕𑁄

[𑁧𑁧] 𑁧. 𑀮𑀓𑁆𑀔𑀡𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑀲𑁆𑀲 𑀯𑀢𑁆𑀣𑀼 𑀬𑀸𑀯 𑀅𑀪𑀺𑀫𑀸𑀭𑀧𑁆𑀧𑀬𑁄𑀚𑀦𑀸 𑀔𑀡𑁆𑀟𑀳𑀸𑀮𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺, 𑀬𑀸𑀯 𑀥𑀦𑀧𑀸𑀮𑀓𑀯𑀺𑀲𑁆𑀲𑀚𑁆𑀚𑀦𑀸 𑀧𑀦 𑀘𑀽𑀴𑀳𑀁𑀲𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺, 𑀬𑀸𑀯 𑀧𑀣𑀯𑀺𑀧𑁆𑀧𑀯𑁂𑀲𑀦𑀸 𑀤𑁆𑀯𑀸𑀤𑀲𑀦𑀺𑀧𑀸𑀢𑁂 𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀤𑁂𑀯𑀤𑀢𑁆𑀢𑁄 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀺𑀢𑁆𑀯𑀸 𑀅𑀮𑀪𑀦𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀕𑀬𑀸𑀲𑀻𑀲𑁂 𑀯𑀺𑀳𑀭𑀢𑀺. 𑀅𑀣 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀅𑀕𑀫𑀸𑀲𑀺. 𑀢𑀁 𑀜𑀢𑁆𑀯𑀸 𑀲𑀢𑁆𑀣𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀫𑀦𑁆𑀢𑁂𑀲𑀺 ‘‘𑀲𑀸𑀭𑀺𑀧𑀼𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀦𑀺𑀲𑁆𑀲𑀺𑀢𑀓𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀤𑁂𑀯𑀤𑀢𑁆𑀢𑀲𑁆𑀲 𑀮𑀤𑁆𑀥𑀺𑀁 𑀭𑁄𑀘𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀕𑀢𑀸, 𑀇𑀤𑀸𑀦𑀺 𑀧𑀦 𑀢𑁂𑀲𑀁 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀢𑀁, 𑀢𑀼𑀫𑁆𑀳𑁂 𑀩𑀳𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀫𑀕𑁆𑀕𑀨𑀮𑁂𑀳𑀺 𑀧𑀩𑁄𑀥𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀕𑁆𑀕𑀨𑀮𑁂𑀳𑀺 𑀧𑀩𑁄𑀥𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀯𑁂𑀴𑀼𑀯𑀦𑀫𑁂𑀯 𑀆𑀕𑀫𑀁𑀲𑀼. 𑀆𑀕𑀦𑁆𑀢𑁆𑀯𑀸 𑀘 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀓𑀸𑀮𑁂 𑀪𑀺𑀓𑁆𑀔𑀽 𑀣𑁂𑀭𑀁 𑀧𑀲𑀁𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀦𑁆𑀢𑁄 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀤𑁂𑀯𑀤𑀢𑁆𑀢𑁄 𑀧𑀦 𑀧𑀭𑀺𑀳𑀻𑀦𑀧𑀭𑀺𑀯𑀸𑀭𑁄 𑀚𑀸𑀢𑁄’’𑀢𑀺. 𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀇𑀤𑀸𑀦𑁂𑀯 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀦𑁆𑀢𑁄 𑀲𑁄𑀪𑀢𑀺, 𑀧𑀼𑀩𑁆𑀩𑁂𑀧𑀺 𑀲𑁄𑀪𑀺𑀬𑁂𑀯. 𑀤𑁂𑀯𑀤𑀢𑁆𑀢𑁄𑀧𑀺 𑀦 𑀇𑀤𑀸𑀦𑁂𑀯 𑀕𑀡𑀢𑁄 𑀧𑀭𑀺𑀳𑀻𑀦𑁄, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀳𑀻𑀦𑁄𑀬𑁂𑀯𑀸𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼, 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑀦𑀕𑀭𑁂 𑀏𑀓𑁄 𑀫𑀕𑀥𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀺𑀕𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀢𑀲𑁆𑀲 𑀮𑀓𑁆𑀔𑀡𑁄 𑀘 𑀓𑀸𑀴𑁄 𑀘𑀸𑀢𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀅𑀢𑁆𑀢𑀦𑁄 𑀫𑀳𑀮𑁆𑀮𑀓𑀓𑀸𑀮𑁂 ‘‘𑀢𑀸𑀢𑀸, 𑀅𑀳𑀁 𑀇𑀤𑀸𑀦𑀺 𑀫𑀳𑀮𑁆𑀮𑀓𑁄, 𑀢𑀼𑀫𑁆𑀳𑁂 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀣𑀸’’𑀢𑀺 𑀧𑀜𑁆𑀘 𑀧𑀜𑁆𑀘 𑀫𑀺𑀕𑀲𑀢𑀸𑀦𑀺 𑀏𑀓𑁂𑀓𑀁 𑀧𑀼𑀢𑁆𑀢𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀤𑁆𑀯𑁂 𑀚𑀦𑀸 𑀫𑀺𑀕𑀕𑀡𑀁 𑀧𑀭𑀺𑀳𑀭𑀦𑁆𑀢𑀺. 𑀫𑀕𑀥𑀭𑀝𑁆𑀞𑀲𑁆𑀫𑀺𑀜𑁆𑀘 𑀲𑀲𑁆𑀲𑀧𑀸𑀓𑀲𑀫𑀬𑁂 𑀓𑀺𑀝𑁆𑀞𑀲𑀫𑁆𑀩𑀸𑀥𑁂 𑀅𑀭𑀜𑁆𑀜𑁂 𑀫𑀺𑀕𑀸𑀦𑀁 𑀧𑀭𑀺𑀧𑀦𑁆𑀣𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀲𑀲𑁆𑀲𑀔𑀸𑀤𑀓𑀸𑀦𑀁 𑀫𑀺𑀕𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀢𑀢𑁆𑀣 𑀢𑀢𑁆𑀣 𑀑𑀧𑀸𑀢𑀁 𑀔𑀡𑀦𑁆𑀢𑀺, 𑀲𑀽𑀮𑀸𑀦𑀺 𑀭𑁄𑀧𑁂𑀦𑁆𑀢𑀺, 𑀧𑀸𑀲𑀸𑀡𑀬𑀦𑁆𑀢𑀸𑀦𑀺 𑀲𑀚𑁆𑀚𑁂𑀦𑁆𑀢𑀺, 𑀓𑀽𑀝𑀧𑀸𑀲𑀸𑀤𑀬𑁄 𑀧𑀸𑀲𑁂 𑀑𑀟𑁆𑀟𑁂𑀦𑁆𑀢𑀺, 𑀩𑀳𑀽 𑀫𑀺𑀕𑀸 𑀯𑀺𑀦𑀸𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀝𑁆𑀞𑀲𑀫𑁆𑀩𑀸𑀥𑀲𑀫𑀬𑀁 𑀜𑀢𑁆𑀯𑀸 𑀤𑁆𑀯𑁂 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢𑀸, 𑀅𑀬𑀁 𑀓𑀺𑀝𑁆𑀞𑀲𑀫𑁆𑀩𑀸𑀥𑀲𑀫𑀬𑁄, 𑀩𑀳𑀽 𑀫𑀺𑀕𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀺, 𑀫𑀬𑀁 𑀫𑀳𑀮𑁆𑀮𑀓𑀸 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀫𑀺𑀕𑀕𑀡𑁂 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀲𑀲𑁆𑀲𑀸𑀦𑀁 𑀉𑀤𑁆𑀥𑀝𑀓𑀸𑀮𑁂 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂𑀲𑀁 𑀧𑀦 𑀕𑀫𑀦𑀫𑀕𑁆𑀕𑀁 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀺𑀕𑀸 𑀧𑀩𑁆𑀩𑀢𑀫𑀸𑀭𑁄𑀳𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀑𑀭𑁄𑀳𑀦𑁆𑀢𑀻’’𑀢𑀺. 𑀢𑁂 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀮𑀻𑀦𑀸 𑀩𑀳𑀽 𑀫𑀺𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺.

𑀓𑀸𑀴𑀫𑀺𑀕𑁄 𑀅𑀢𑁆𑀢𑀦𑁄 𑀤𑀦𑁆𑀥𑀢𑀸𑀬 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀕𑀦𑁆𑀢𑀩𑁆𑀩𑀁, 𑀇𑀫𑀸𑀬 𑀯𑁂𑀮𑀸𑀬 𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀫𑀺𑀕𑀕𑀡𑀁 𑀆𑀤𑀸𑀬 𑀧𑀼𑀩𑁆𑀩𑀡𑁆𑀳𑁂𑀧𑀺 𑀲𑀸𑀬𑀦𑁆𑀳𑁂𑀧𑀺 𑀧𑀤𑁄𑀲𑁂𑀧𑀺 𑀧𑀘𑁆𑀘𑀽𑀲𑁂𑀧𑀺 𑀕𑀸𑀫𑀤𑁆𑀯𑀸𑀭𑁂𑀦 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀧𑀓𑀢𑀺𑀬𑀸 𑀞𑀺𑀢𑀸 𑀘 𑀦𑀺𑀮𑀻𑀦𑀸 𑀘 𑀩𑀳𑀽 𑀫𑀺𑀕𑁂 𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺. 𑀏𑀯𑀁 𑀲𑁄 𑀅𑀢𑁆𑀢𑀦𑁄 𑀤𑀦𑁆𑀥𑀢𑀸𑀬 𑀩𑀳𑀽 𑀫𑀺𑀕𑁂 𑀯𑀺𑀦𑀸𑀲𑀁 𑀧𑀸𑀧𑁂𑀢𑁆𑀯𑀸 𑀅𑀧𑁆𑀧𑀓𑁂𑀳𑁂𑀯 𑀫𑀺𑀕𑁂𑀳𑀺 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀮𑀓𑁆𑀔𑀡𑀫𑀺𑀕𑁄 𑀧𑀦 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀉𑀧𑀸𑀬𑀓𑀼𑀲𑀮𑁄 ‘‘𑀇𑀫𑀸𑀬 𑀯𑁂𑀮𑀸𑀬 𑀕𑀦𑁆𑀢𑀩𑁆𑀩𑀁, 𑀇𑀫𑀸𑀬 𑀯𑁂𑀮𑀸𑀬 𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀚𑀸𑀦𑀸𑀢𑀺. 𑀲𑁄 𑀕𑀸𑀫𑀤𑁆𑀯𑀸𑀭𑁂𑀦𑀧𑀺 𑀦 𑀕𑀘𑁆𑀙𑀢𑀺, 𑀤𑀺𑀯𑀸𑀧𑀺 𑀦 𑀕𑀘𑁆𑀙𑀢𑀺, 𑀧𑀤𑁄𑀲𑁂𑀧𑀺 𑀦 𑀕𑀘𑁆𑀙𑀢𑀺, 𑀧𑀘𑁆𑀘𑀽𑀲𑁂𑀧𑀺 𑀦 𑀕𑀘𑁆𑀙𑀢𑀺, 𑀫𑀺𑀕𑀕𑀡𑀁 𑀆𑀤𑀸𑀬 𑀅𑀟𑁆𑀠𑀭𑀢𑁆𑀢𑀲𑀫𑀬𑁂𑀬𑁂𑀯 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀓𑀫𑁆𑀧𑀺 𑀫𑀺𑀕𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑁂 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀲𑀲𑁆𑀲𑁂𑀲𑀼 𑀉𑀤𑁆𑀥𑀝𑁂𑀲𑀼 𑀧𑀩𑁆𑀩𑀢𑀸 𑀑𑀢𑀭𑀺𑀁𑀲𑀼.

𑀓𑀸𑀴𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀯𑀲𑁂𑀲𑀫𑀺𑀕𑁂 𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑁄 𑀏𑀓𑀓𑁄𑀯 𑀆𑀕𑀫𑀺. 𑀮𑀓𑁆𑀔𑀡𑁄 𑀧𑀦 𑀏𑀓𑀫𑀺𑀕𑀫𑁆𑀧𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀧𑀜𑁆𑀘𑀳𑀺 𑀫𑀺𑀕𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀆𑀕𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑁂𑀧𑀺 𑀧𑀼𑀢𑁆𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀫𑀺𑀕𑀕𑀡𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋

𑁧𑁧. ‘‘𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄, 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑀁;

𑀮𑀓𑁆𑀔𑀡𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀜𑀸𑀢𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀅𑀣 𑀧𑀲𑁆𑀲𑀲𑀺𑀫𑀁 𑀓𑀸𑀴𑀁, 𑀲𑀼𑀯𑀺𑀳𑀻𑀦𑀁𑀯 𑀜𑀸𑀢𑀺𑀪𑀻’’𑀢𑀺.

𑀢𑀢𑁆𑀣 𑀲𑀻𑀮𑀯𑀢𑀦𑁆𑀢𑀺 𑀲𑀼𑀔𑀲𑀻𑀮𑀢𑀸𑀬 𑀲𑀻𑀮𑀯𑀦𑁆𑀢𑀸𑀦𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀸𑀦𑀁. 𑀅𑀢𑁆𑀣𑁄𑀢𑀺 𑀯𑀼𑀟𑁆𑀠𑀺. 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑀦𑁆𑀢𑀺 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀘 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀘 𑀏𑀢𑁂𑀲𑀁 𑀯𑀼𑀢𑁆𑀢𑀻𑀢𑀺 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑁄, 𑀢𑁂𑀲𑀁 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑀁. 𑀏𑀢𑁆𑀣 𑀘 𑀧𑀸𑀧𑀦𑀺𑀯𑀸𑀭𑀡𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀯𑀲𑁂𑀦 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀘, 𑀕𑁄𑀘𑀭𑀮𑀸𑀪𑀸𑀧𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀥𑀫𑁆𑀫𑀺𑀓𑀭𑀓𑁆𑀔𑀸𑀯𑀲𑁂𑀦 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀧𑀝𑀺𑀲𑀦𑁆𑀣𑀸𑀭𑁂𑀲𑀼 𑀞𑀺𑀢𑀸𑀦𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀯𑀼𑀟𑁆𑀠𑀺 𑀦𑀸𑀫 𑀳𑁄𑀢𑀻𑀢𑀺. 𑀇𑀤𑀸𑀦𑀺 𑀢𑀁 𑀯𑀼𑀟𑁆𑀠𑀺𑀁 𑀤𑀲𑁆𑀲𑁂𑀢𑀼𑀁 𑀧𑀼𑀢𑁆𑀢𑀫𑀸𑀢𑀭𑀁 𑀆𑀮𑀧𑀦𑁆𑀢𑁄 𑀯𑀺𑀬 ‘‘𑀮𑀓𑁆𑀔𑀡𑀁 𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀆𑀘𑀸𑀭𑀧𑀝𑀺𑀲𑀦𑁆𑀣𑀸𑀭𑀲𑀫𑁆𑀧𑀦𑁆𑀦𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀏𑀓𑀫𑀺𑀕𑀫𑁆𑀧𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑁂𑀦 𑀧𑀼𑀭𑀓𑁆𑀔𑀢𑀁 𑀧𑀭𑀺𑀯𑀸𑀭𑀺𑀢𑀁 𑀆𑀕𑀘𑁆𑀙𑀦𑁆𑀢𑀁 𑀧𑀲𑁆𑀲. 𑀢𑀸𑀬 𑀧𑀦 𑀆𑀘𑀸𑀭𑀧𑀝𑀺𑀲𑀦𑁆𑀣𑀸𑀭𑀲𑀫𑁆𑀧𑀤𑀸𑀬 𑀯𑀺𑀳𑀻𑀦𑀁 𑀤𑀦𑁆𑀥𑀧𑀜𑁆𑀜𑀁 𑀅𑀣 𑀧𑀲𑁆𑀲𑀲𑀺𑀫𑀁 𑀓𑀸𑀴𑀁 𑀏𑀓𑀫𑁆𑀧𑀺 𑀜𑀸𑀢𑀺𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀼𑀯𑀺𑀳𑀻𑀦𑀫𑁂𑀯 𑀜𑀸𑀢𑀻𑀳𑀺 𑀏𑀓𑀓𑀁 𑀆𑀕𑀘𑁆𑀙𑀦𑁆𑀢𑀦𑁆𑀢𑀺. 𑀏𑀯𑀁 𑀧𑀼𑀢𑁆𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀇𑀤𑀸𑀦𑁂𑀯 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀸𑀭𑀺𑀢𑁄 𑀲𑁄𑀪𑀢𑀺, 𑀧𑀼𑀩𑁆𑀩𑁂𑀧𑀺 𑀲𑁄𑀪𑀢𑀺𑀬𑁂𑀯. 𑀦 𑀘 𑀤𑁂𑀯𑀤𑀢𑁆𑀢𑁄 𑀏𑀢𑀭𑀳𑀺𑀬𑁂𑀯 𑀕𑀡𑀫𑁆𑀳𑀸 𑀧𑀭𑀺𑀳𑀻𑀦𑁄, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀳𑀻𑀦𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀴𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸𑀯, 𑀮𑀓𑁆𑀔𑀡𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀭𑀺𑀲𑀸 𑀧𑀦𑀲𑁆𑀲 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀸𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀮𑀓𑁆𑀔𑀡𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁨] 𑁨. 𑀦𑀺𑀕𑁆𑀭𑁄𑀥𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀫𑀸𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀭𑀸𑀚𑀕𑀳𑀦𑀕𑀭𑁂 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀅𑀳𑁄𑀲𑀺 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀸 𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀸 𑀧𑀘𑁆𑀙𑀺𑀫𑀪𑀯𑀺𑀓𑀸, 𑀅𑀦𑁆𑀢𑁄𑀖𑀝𑁂 𑀧𑀤𑀻𑀧𑁄 𑀯𑀺𑀬 𑀢𑀲𑁆𑀲𑀸 𑀳𑀤𑀬𑁂 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀚𑀮𑀢𑀺. 𑀲𑀸 𑀅𑀢𑁆𑀢𑀸𑀦𑀁 𑀚𑀸𑀦𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑁂 𑀅𑀦𑀪𑀺𑀭𑀢𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀆𑀳 𑁋 ‘‘𑀅𑀫𑁆𑀫𑀢𑀸𑀢𑀸, 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂 𑀘𑀺𑀢𑁆𑀢𑀁 𑀦𑀸𑀪𑀺𑀭𑀫𑀢𑀺, 𑀅𑀳𑀁 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀧𑀩𑁆𑀩𑀸𑀚𑁂𑀣 𑀫’’𑀦𑁆𑀢𑀺. 𑀅𑀫𑁆𑀫, 𑀓𑀺𑀁 𑀯𑀤𑁂𑀲𑀺, 𑀇𑀤𑀁 𑀓𑀼𑀮𑀁 𑀩𑀳𑀼𑀯𑀺𑀪𑀯𑀁, 𑀢𑁆𑀯𑀜𑁆𑀘 𑀅𑀫𑁆𑀳𑀸𑀓𑀁 𑀏𑀓𑀥𑀻𑀢𑀸, 𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼𑀦𑁆𑀢𑀺. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀘𑀺𑀦𑁆𑀢𑁂𑀲𑀺 ‘‘𑀳𑁄𑀢𑀼, 𑀧𑀢𑀺𑀓𑀼𑀮𑀁 𑀕𑀢𑀸 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀧𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑀺𑀤𑁂𑀯𑀢𑀸 𑀳𑀼𑀢𑁆𑀯𑀸 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺.

𑀅𑀣𑀲𑁆𑀲𑀸 𑀲𑀁𑀯𑀸𑀲𑀫𑀦𑁆𑀯𑀸𑀬 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀦 𑀅𑀜𑁆𑀜𑀸𑀲𑀺. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀖𑁄𑀲𑀬𑀺𑀁𑀲𑀼, 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀁𑀲𑀼, 𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀅𑀳𑁄𑀲𑀺. 𑀲𑀸 𑀧𑀦 𑀢𑀸𑀯 𑀉𑀴𑀸𑀭𑀸𑀬𑀧𑀺 𑀦𑀓𑁆𑀔𑀢𑁆𑀢𑀓𑀻𑀴𑀸𑀬 𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀦 𑀯𑀺𑀮𑀺𑀫𑁆𑀧𑀢𑀺 𑀦𑀸𑀮𑀗𑁆𑀓𑀭𑁄𑀢𑀺, 𑀧𑀓𑀢𑀺𑀯𑁂𑀲𑁂𑀦𑁂𑀯 𑀯𑀺𑀘𑀭𑀢𑀺.

𑀅𑀣 𑀦𑀁 𑀲𑀸𑀫𑀺𑀓𑁄 𑀆𑀳 𑁋 ‘‘𑀪𑀤𑁆𑀤𑁂, 𑀲𑀓𑀮𑀦𑀕𑀭𑀁 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑀁, 𑀢𑁆𑀯𑀁 𑀧𑀦 𑀲𑀭𑀻𑀭𑀁 𑀦𑀧𑁆𑀧𑀝𑀺𑀚𑀕𑁆𑀕𑀲𑀻’’𑀢𑀺. 𑀅𑀬𑁆𑀬𑀧𑀼𑀢𑁆𑀢, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑁂 𑀓𑀼𑀡𑀧𑁂𑀳𑀺 𑀧𑀽𑀭𑀺𑀢𑀁 𑀲𑀭𑀻𑀭𑀁, 𑀓𑀺𑀁 𑀇𑀫𑀺𑀦𑀸 𑀅𑀮𑀗𑁆𑀓𑀢𑁂𑀦, 𑀅𑀬𑀜𑁆𑀳𑀺 𑀓𑀸𑀬𑁄 𑀦𑁂𑀯 𑀤𑁂𑀯𑀦𑀺𑀫𑁆𑀫𑀺𑀢𑁄, 𑀦 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑁄, 𑀦 𑀲𑀼𑀯𑀡𑁆𑀡𑀫𑀬𑁄, 𑀦 𑀫𑀡𑀺𑀫𑀬𑁄, 𑀦 𑀳𑀭𑀺𑀘𑀦𑁆𑀤𑀦𑀫𑀬𑁄, 𑀦 𑀧𑀼𑀡𑁆𑀟𑀭𑀻𑀓𑀓𑀼𑀫𑀼𑀤𑀼𑀧𑁆𑀧𑀮𑀕𑀩𑁆𑀪𑀲𑀫𑁆𑀪𑀽𑀢𑁄, 𑀦 𑀅𑀫𑀢𑁄𑀲𑀥𑀧𑀽𑀭𑀺𑀢𑁄, 𑀅𑀣 𑀔𑁄 𑀓𑀼𑀡𑀧𑁂 𑀚𑀸𑀢𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄, 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄, 𑀓𑀝𑀲𑀺𑀯𑀟𑁆𑀠𑀦𑁄, 𑀢𑀡𑁆𑀳𑀽𑀧𑀸𑀤𑀺𑀦𑁆𑀦𑁄, 𑀲𑁄𑀓𑀸𑀦𑀁 𑀦𑀺𑀤𑀸𑀦𑀁, 𑀧𑀭𑀺𑀤𑁂𑀯𑀸𑀦𑀁 𑀯𑀢𑁆𑀣𑀼, 𑀲𑀩𑁆𑀩𑀭𑁄𑀕𑀸𑀦𑀁 𑀆𑀮𑀬𑁄, 𑀓𑀫𑁆𑀫𑀓𑀭𑀡𑀸𑀦𑀁 𑀧𑀝𑀺𑀕𑁆𑀕𑀳𑁄, 𑀅𑀦𑁆𑀢𑁄𑀧𑀽𑀢𑀺, 𑀩𑀳𑀺 𑀦𑀺𑀘𑁆𑀘𑀧𑀕𑁆𑀖𑀭𑀡𑁄, 𑀓𑀺𑀫𑀺𑀓𑀼𑀮𑀸𑀦𑀁 𑀆𑀯𑀸𑀲𑁄, 𑀲𑀺𑀯𑀣𑀺𑀓𑀧𑀬𑀸𑀢𑁄, 𑀫𑀭𑀡𑀧𑀭𑀺𑀬𑁄𑀲𑀸𑀦𑁄, 𑀲𑀩𑁆𑀩𑀮𑁄𑀓𑀲𑁆𑀲 𑀘𑀓𑁆𑀔𑀼𑀧𑀣𑁂 𑀯𑀢𑁆𑀢𑀫𑀸𑀦𑁄𑀧𑀺 𑁋

‘‘𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄, 𑀢𑀘𑀫𑀁𑀲𑀸𑀯𑀮𑁂𑀧𑀦𑁄;

𑀙𑀯𑀺𑀬𑀸 𑀓𑀸𑀬𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀬𑀣𑀸𑀪𑀽𑀢𑀁 𑀦 𑀤𑀺𑀲𑁆𑀲𑀢𑀺.

‘‘𑀅𑀦𑁆𑀢𑀧𑀽𑀭𑁄 𑀉𑀤𑀭𑀧𑀽𑀭𑁄, 𑀬𑀓𑀦𑀧𑁂𑀴𑀲𑁆𑀲 𑀯𑀢𑁆𑀣𑀺𑀦𑁄;

𑀳𑀤𑀬𑀲𑁆𑀲 𑀧𑀧𑁆𑀨𑀸𑀲𑀲𑁆𑀲, 𑀯𑀓𑁆𑀓𑀲𑁆𑀲 𑀧𑀺𑀳𑀓𑀲𑁆𑀲 𑀘.

‘‘𑀲𑀺𑀗𑁆𑀖𑀸𑀡𑀺𑀓𑀸𑀬 𑀔𑁂𑀴𑀲𑁆𑀲, 𑀲𑁂𑀤𑀲𑁆𑀲 𑀘 𑀫𑁂𑀤𑀲𑁆𑀲 𑀘;

𑀮𑁄𑀳𑀺𑀢𑀲𑁆𑀲 𑀮𑀲𑀺𑀓𑀸𑀬, 𑀧𑀺𑀢𑁆𑀢𑀲𑁆𑀲 𑀘 𑀯𑀲𑀸𑀬 𑀘.

‘‘𑀅𑀣𑀲𑁆𑀲 𑀦𑀯𑀳𑀺 𑀲𑁄𑀢𑁂𑀳𑀺, 𑀅𑀲𑀼𑀘𑀻 𑀲𑀯𑀢𑀺 𑀲𑀩𑁆𑀩𑀤𑀸;

𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄, 𑀓𑀡𑁆𑀡𑀫𑁆𑀳𑀸 𑀓𑀡𑁆𑀡𑀕𑀽𑀣𑀓𑁄.

‘‘𑀲𑀺𑀗𑁆𑀖𑀸𑀡𑀺𑀓𑀸 𑀘 𑀦𑀸𑀲𑀢𑁄, 𑀫𑀼𑀔𑁂𑀦 𑀯𑀫𑀢𑁂𑀓𑀤𑀸;

𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀯𑀫𑀢𑀺, 𑀓𑀸𑀬𑀫𑁆𑀳𑀸 𑀲𑁂𑀤𑀚𑀮𑁆𑀮𑀺𑀓𑀸.

‘‘𑀅𑀣𑀲𑁆𑀲 𑀲𑀼𑀲𑀺𑀭𑀁 𑀲𑀻𑀲𑀁, 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀽𑀭𑀺𑀢𑀁;

𑀲𑀼𑀪𑀢𑁄 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄, 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄. (𑀲𑀼. 𑀦𑀺. 𑁧𑁯𑁬-𑁨𑁦𑁧);

‘‘𑀅𑀦𑀦𑁆𑀢𑀸𑀤𑀻𑀦𑀯𑁄 𑀓𑀸𑀬𑁄, 𑀯𑀺𑀲𑀭𑀼𑀓𑁆𑀔𑀲𑀫𑀽𑀧𑀫𑁄;

𑀆𑀯𑀸𑀲𑁄 𑀲𑀩𑁆𑀩𑀭𑁄𑀕𑀸𑀦𑀁, 𑀧𑀼𑀜𑁆𑀚𑁄 𑀤𑀼𑀓𑁆𑀔𑀲𑁆𑀲 𑀓𑁂𑀯𑀮𑁄. (𑀅𑀧. 𑀣𑁂𑀭 𑁨.𑁫𑁪.𑁫𑁫);

‘‘𑀲𑀘𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀅𑀦𑁆𑀢𑁄 𑀩𑀸𑀳𑀺𑀭𑀓𑁄 𑀲𑀺𑀬𑀸;

𑀤𑀡𑁆𑀟𑀁 𑀦𑀽𑀦 𑀕𑀳𑁂𑀢𑁆𑀯𑀸𑀦, 𑀓𑀸𑀓𑁂 𑀲𑁄𑀡𑁂 𑀘 𑀯𑀸𑀭𑀬𑁂.

‘‘𑀤𑀼𑀕𑁆𑀕𑀦𑁆𑀥𑁄 𑀅𑀲𑀼𑀘𑀺 𑀓𑀸𑀬𑁄, 𑀓𑀼𑀡𑀧𑁄 𑀉𑀓𑁆𑀓𑀭𑀽𑀧𑀫𑁄;

𑀦𑀺𑀦𑁆𑀤𑀺𑀢𑁄 𑀘𑀓𑁆𑀔𑀼𑀪𑀽𑀢𑁂𑀳𑀺, 𑀓𑀸𑀬𑁄 𑀩𑀸𑀮𑀸𑀪𑀺𑀦𑀦𑁆𑀤𑀺𑀢𑁄.

‘‘𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄;

𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀢𑀺, 𑀅𑀲𑀼𑀘𑀻 𑀧𑀽𑀢𑀺𑀕𑀦𑁆𑀥𑀺𑀬𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁨);

𑀅𑀬𑁆𑀬𑀧𑀼𑀢𑁆𑀢, 𑀇𑀫𑀁 𑀓𑀸𑀬𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺? 𑀦𑀦𑀼 𑀇𑀫𑀲𑁆𑀲 𑀅𑀮𑀗𑁆𑀓𑀢𑀓𑀭𑀡𑀁 𑀕𑀽𑀣𑀧𑀼𑀡𑁆𑀡𑀖𑀝𑀲𑁆𑀲 𑀩𑀳𑀺 𑀘𑀺𑀢𑁆𑀢𑀓𑀫𑁆𑀫𑀓𑀭𑀡𑀁 𑀯𑀺𑀬 𑀳𑁄𑀢𑀻𑀢𑀺? 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀳 ‘‘𑀪𑀤𑁆𑀤𑁂, 𑀢𑁆𑀯𑀁 𑀇𑀫𑀲𑁆𑀲 𑀲𑀭𑀻𑀭𑀲𑁆𑀲 𑀇𑀫𑁂 𑀤𑁄𑀲𑁂 𑀧𑀲𑁆𑀲𑀫𑀸𑀦𑀸 𑀓𑀲𑁆𑀫𑀸 𑀦 𑀧𑀩𑁆𑀩𑀚𑀲𑀻’’𑀢𑀺? ‘‘𑀅𑀬𑁆𑀬𑀧𑀼𑀢𑁆𑀢, 𑀅𑀳𑀁 𑀧𑀩𑁆𑀩𑀚𑁆𑀚𑀁 𑀮𑀪𑀫𑀸𑀦𑀸 𑀅𑀚𑁆𑀚𑁂𑀯 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀲𑀸𑀥𑀼, 𑀅𑀳𑀁 𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑁄 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀧𑀩𑁆𑀩𑀚𑁆𑀚𑀁 𑀮𑀪𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺.

𑀅𑀣𑀲𑁆𑀲𑀸 𑀕𑀩𑁆𑀪𑁂 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑁂 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀻𑀦𑀁 𑀩𑀳𑀮𑀢𑁆𑀢𑀁 𑀉𑀤𑀭𑀧𑀝𑀮𑀲𑁆𑀲 𑀘 𑀫𑀳𑀦𑁆𑀢𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀅𑀬𑁆𑀬𑁂, 𑀢𑁆𑀯𑀁 𑀕𑀩𑁆𑀪𑀺𑀦𑀻 𑀯𑀺𑀬 𑀧𑀜𑁆𑀜𑀸𑀬𑀲𑀺, 𑀓𑀺𑀁 𑀏𑀢’’𑀦𑁆𑀢𑀺? 𑀅𑀬𑁆𑀬𑁂, ‘‘𑀇𑀤𑀁 𑀦𑀸𑀫 𑀓𑀸𑀭𑀡’’𑀦𑁆𑀢𑀺 𑀦 𑀚𑀸𑀦𑀸𑀫𑀺, 𑀲𑀻𑀮𑀁 𑀧𑀦 𑀫𑁂 𑀧𑀭𑀺𑀧𑀼𑀡𑁆𑀡𑀦𑁆𑀢𑀺. 𑀅𑀣 𑀦𑀁 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀅𑀬𑁆𑀬, 𑀅𑀬𑀁 𑀓𑀼𑀮𑀥𑀻𑀢𑀸 𑀓𑀺𑀘𑁆𑀙𑁂𑀦 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀮𑀪𑀺, 𑀇𑀤𑀸𑀦𑀺 𑀧𑀦𑀲𑁆𑀲𑀸 𑀕𑀩𑁆𑀪𑁄 𑀧𑀜𑁆𑀜𑀸𑀬𑀢𑀺, 𑀫𑀬𑀁 𑀇𑀫𑀲𑁆𑀲 𑀕𑀩𑁆𑀪𑀲𑁆𑀲 𑀕𑀺𑀳𑀺𑀓𑀸𑀮𑁂 𑀯𑀸 𑀧𑀩𑁆𑀩𑀚𑀺𑀢𑀓𑀸𑀮𑁂 𑀯𑀸 𑀮𑀤𑁆𑀥𑀪𑀸𑀯𑀁 𑀦 𑀚𑀸𑀦𑀸𑀫, 𑀓𑀺𑀁𑀤𑀸𑀦𑀺 𑀓𑀭𑁄𑀫𑀸’’𑀢𑀺? 𑀤𑁂𑀯𑀤𑀢𑁆𑀢𑁄 𑀅𑀢𑁆𑀢𑀦𑁄 𑀅𑀩𑀼𑀤𑁆𑀥𑀪𑀸𑀯𑁂𑀦 𑀘 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀦𑀜𑁆𑀘 𑀦𑀢𑁆𑀣𑀺𑀢𑀸𑀬 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑀸 𑀪𑀺𑀓𑁆𑀔𑀼𑀦𑀻 𑀓𑀼𑀘𑁆𑀙𑀺𑀦𑀸 𑀕𑀩𑁆𑀪𑀁 𑀧𑀭𑀺𑀳𑀭𑀢𑀺, 𑀤𑁂𑀯𑀤𑀢𑁆𑀢𑁄 𑀘 𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺𑀬𑁂𑀯𑀸𑀢𑀺 𑀫𑀬𑁆𑀳𑀁 𑀕𑀭𑀳𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀫𑀬𑀸 𑀇𑀫𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀅𑀯𑀻𑀫𑀁𑀲𑀺𑀢𑁆𑀯𑀸𑀯 𑀲𑁂𑀮𑀕𑀼𑀴𑀁 𑀧𑀯𑀝𑁆𑀝𑀬𑀫𑀸𑀦𑁄 𑀯𑀺𑀬 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 ‘‘𑀕𑀘𑁆𑀙𑀣, 𑀇𑀫𑀁 𑀉𑀧𑁆𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀢𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀉𑀧𑀲𑁆𑀲𑀬𑀁 𑀕𑀢𑀸.

𑀅𑀣 𑀲𑀸 𑀤𑀳𑀭𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀳 𑁋 ‘‘𑀅𑀬𑁆𑀬𑁂, 𑀦 𑀤𑁂𑀯𑀤𑀢𑁆𑀢𑀢𑁆𑀣𑁂𑀭𑁄 𑀩𑀼𑀤𑁆𑀥𑁄, 𑀦𑀸𑀧𑀺 𑀫𑀬𑁆𑀳𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸, 𑀮𑁄𑀓𑁂 𑀧𑀦 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀲𑀸 𑀘 𑀧𑀦 𑀫𑁂 𑀤𑀼𑀓𑁆𑀔𑁂𑀦 𑀮𑀤𑁆𑀥𑀸, 𑀫𑀸 𑀦𑀁 𑀅𑀦𑁆𑀢𑀭𑀥𑀸𑀧𑁂𑀣, 𑀏𑀣 𑀫𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀚𑁂𑀢𑀯𑀦𑀁 𑀕𑀘𑁆𑀙𑀣𑀸’’𑀢𑀺. 𑀢𑀸 𑀢𑀁 𑀆𑀤𑀸𑀬 𑀭𑀸𑀚𑀕𑀳𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀜𑁆𑀘𑀸𑀧𑀺 𑀕𑀺𑀳𑀺𑀓𑀸𑀮𑁂 𑀏𑀢𑀺𑀲𑁆𑀲𑀸 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 ‘𑀲𑀫𑀡𑁄 𑀕𑁄𑀢𑀫𑁄 𑀤𑁂𑀯𑀤𑀢𑁆𑀢𑁂𑀦 𑀚𑀳𑀺𑀢𑀁 𑀆𑀤𑀸𑀬 𑀘𑀭𑀢𑀻’𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀑𑀓𑀸𑀲𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀇𑀫𑀁 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀓𑁄𑀲𑀮𑀁 𑀫𑀳𑀸𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀯𑀺𑀲𑀸𑀔𑀁 𑀫𑀳𑀸𑀉𑀧𑀸𑀲𑀺𑀓𑀁 𑀅𑀜𑁆𑀜𑀸𑀦𑀺 𑀘 𑀅𑀪𑀺𑀜𑁆𑀜𑀸𑀢𑀸𑀦𑀺 𑀫𑀳𑀸𑀓𑀼𑀮𑀸𑀦𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀲𑀦𑁆𑀦𑀺𑀧𑀢𑀺𑀢𑀸𑀲𑀼 𑀉𑀧𑀸𑀮𑀺𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 ‘‘𑀕𑀘𑁆𑀙, 𑀢𑁆𑀯𑀁 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀇𑀫𑀺𑀲𑁆𑀲𑀸 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑀸 𑀓𑀫𑁆𑀫𑀁 𑀲𑁄𑀥𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀧𑀭𑀺𑀲𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀧𑀝𑀺𑀘𑁆𑀙𑀸𑀧𑁂𑀲𑀺 ‘‘𑀕𑀘𑁆𑀙 𑀯𑀺𑀲𑀸𑀔𑁂, ‘𑀅𑀬𑀁 𑀤𑀳𑀭𑀸 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀤𑀺𑀯𑀲𑁂 𑀧𑀩𑁆𑀩𑀚𑀺𑀢𑀸’𑀢𑀺 𑀢𑀣𑀢𑁄 𑀜𑀢𑁆𑀯𑀸 𑀇𑀫𑀲𑁆𑀲 𑀕𑀩𑁆𑀪𑀲𑁆𑀲 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀮𑀤𑁆𑀥𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺. 𑀉𑀧𑀸𑀲𑀺𑀓𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀧𑀸𑀤𑀦𑀸𑀪𑀺𑀉𑀤𑀭𑀧𑀭𑀺𑀬𑁄𑀲𑀸𑀦𑀸𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀫𑀸𑀲𑀤𑀺𑀯𑀲𑁂 𑀲𑀫𑀸𑀦𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑁂 𑀕𑀩𑁆𑀪𑀲𑁆𑀲 𑀮𑀤𑁆𑀥𑀪𑀸𑀯𑀁 𑀢𑀣𑀢𑁄 𑀜𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀤𑁆𑀥𑀁 𑀅𑀓𑀸𑀲𑀺. 𑀲𑀸 𑀲𑀼𑀤𑁆𑀥𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀢𑁆𑀣𑀸𑀭𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀉𑀧𑀲𑁆𑀲𑀬𑀫𑁂𑀯 𑀕𑀢𑀸. 𑀲𑀸 𑀕𑀩𑁆𑀪𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀤𑀼𑀫𑀼𑀢𑁆𑀢𑀭𑀧𑀸𑀤𑀫𑀽𑀮𑁂 𑀧𑀢𑁆𑀣𑀺𑀢𑀧𑀢𑁆𑀣𑀦𑀁 𑀫𑀳𑀸𑀦𑀼𑀪𑀸𑀯𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄 𑀤𑀸𑀭𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀤𑁂𑀯, 𑀤𑀳𑀭𑀪𑀺𑀓𑁆𑀔𑀼𑀦𑀻 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸, 𑀢𑀲𑁆𑀲𑁂𑀲𑁄 𑀲𑀤𑁆𑀤𑁄’’𑀢𑀺 𑀆𑀳𑀁𑀲𑀼. ‘‘𑀪𑀺𑀓𑁆𑀔𑀼𑀦𑀻𑀦𑀁, 𑀪𑀡𑁂, 𑀤𑀸𑀭𑀓𑀧𑀝𑀺𑀚𑀕𑁆𑀕𑀦𑀁 𑀦𑀸𑀫 𑀧𑀮𑀺𑀩𑁄𑀥𑁄, 𑀫𑀬𑀁 𑀦𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀸 𑀢𑀁 𑀤𑀸𑀭𑀓𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀤𑀸𑀧𑁂𑀢𑁆𑀯𑀸 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀸𑀧𑁂𑀲𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀓𑀲𑁆𑀲𑀧𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀦𑀁 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀺𑀢𑀢𑁆𑀢𑀸 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀥𑀫𑁆𑀫𑀓𑀣𑀺𑀓𑁂𑀲𑀼 𑀘𑀺𑀢𑁆𑀭𑀓𑀣𑀻 𑀅𑀳𑁄𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁭) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀲𑁄 𑀧𑀘𑁆𑀙𑀸 𑀯𑀫𑁆𑀫𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁪𑁯 𑀆𑀤𑀬𑁄) 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀫𑀸𑀢𑀸𑀧𑀺𑀲𑁆𑀲 𑀪𑀺𑀓𑁆𑀔𑀼𑀦𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀧𑀢𑁆𑀢𑀸. 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄 𑀩𑀼𑀤𑁆𑀥𑀲𑀸𑀲𑀦𑁂 𑀕𑀕𑀦𑀫𑀚𑁆𑀛𑁂 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀸𑀓𑀝𑁄 𑀚𑀸𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀢𑀣𑀸𑀕𑀢𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀤𑀺𑀯𑀲𑀪𑀸𑀕𑀁 𑀔𑁂𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀩𑀼𑀤𑁆𑀥𑀪𑀸𑀯𑁂𑀦 𑀘𑁂𑀯 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀻𑀦𑀜𑁆𑀘 𑀅𑀪𑀸𑀯𑁂𑀦 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀣𑁂𑀭𑀻 𑀘 𑀉𑀪𑁄 𑀦𑀸𑀲𑀺𑀢𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀥𑀫𑁆𑀫𑀭𑀸𑀚𑀢𑀸𑀬 𑀘𑁂𑀯 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀢𑁆𑀢𑀺𑀬𑀸 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀧𑀘𑁆𑀘𑀬𑁄 𑀚𑀸𑀢𑁄’’𑀢𑀺 𑀩𑀼𑀤𑁆𑀥𑀕𑀼𑀡𑁂 𑀯𑀡𑁆𑀡𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑁂𑀯 𑀕𑀼𑀡𑀓𑀣𑀸𑀬𑀸’’𑀢𑀺 𑀲𑀩𑁆𑀩𑀁 𑀆𑀭𑁄𑀘𑀬𑀺𑀁𑀲𑀼. 𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀇𑀫𑁂𑀲𑀁 𑀉𑀪𑀺𑀦𑁆𑀦𑀁 𑀧𑀘𑁆𑀘𑀬𑁄 𑀘 𑀧𑀢𑀺𑀝𑁆𑀞𑀸 𑀘 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀳𑁄𑀲𑀺𑀬𑁂𑀯𑀸𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼. 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺, 𑀅𑀓𑁆𑀔𑀻𑀦𑀺 𑀧𑀦𑀲𑁆𑀲 𑀫𑀡𑀺𑀕𑀼𑀴𑀲𑀤𑀺𑀲𑀸𑀦𑀺 𑀅𑀳𑁂𑀲𑀼𑀁, 𑀲𑀺𑀗𑁆𑀕𑀸𑀦𑀺 𑀭𑀚𑀢𑀯𑀡𑁆𑀡𑀸𑀦𑀺, 𑀫𑀼𑀔𑀁 𑀭𑀢𑁆𑀢𑀓𑀫𑁆𑀩𑀮𑀧𑀼𑀜𑁆𑀚𑀯𑀡𑁆𑀡𑀁, 𑀳𑀢𑁆𑀣𑀧𑀸𑀤𑀧𑀭𑀺𑀬𑀦𑁆𑀢𑀸 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬, 𑀯𑀸𑀮𑀥𑀺 𑀘𑀫𑀭𑀲𑁆𑀲 𑀯𑀺𑀬 𑀅𑀳𑁄𑀲𑀺, 𑀲𑀭𑀻𑀭𑀁 𑀧𑀦𑀲𑁆𑀲 𑀫𑀳𑀦𑁆𑀢𑀁 𑀅𑀲𑁆𑀲𑀧𑁄𑀢𑀓𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀲𑁄 𑀧𑀜𑁆𑀘𑀲𑀢𑀫𑀺𑀕𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀦𑀸𑀫𑁂𑀦 𑀦𑀺𑀕𑁆𑀭𑁄𑀥𑀫𑀺𑀕𑀭𑀸𑀚𑀸 𑀦𑀸𑀫. 𑀅𑀯𑀺𑀤𑀽𑀭𑁂 𑀧𑀦𑀲𑁆𑀲 𑀅𑀜𑁆𑀜𑁄𑀧𑀺 𑀧𑀜𑁆𑀘𑀲𑀢𑀫𑀺𑀕𑀧𑀭𑀺𑀯𑀸𑀭𑁄 𑀲𑀸𑀔𑀫𑀺𑀕𑁄 𑀦𑀸𑀫 𑀯𑀲𑀢𑀺, 𑀲𑁄𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀅𑀳𑁄𑀲𑀺.

𑀢𑁂𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀺𑀕𑀯𑀥𑀧𑁆𑀧𑀲𑀼𑀢𑁄 𑀳𑁄𑀢𑀺, 𑀯𑀺𑀦𑀸 𑀫𑀁𑀲𑁂𑀦 𑀦 𑀪𑀼𑀜𑁆𑀚𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀓𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀦𑁂𑀕𑀫𑀚𑀸𑀦𑀧𑀤𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀫𑀺𑀕𑀯𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀬𑀁 𑀭𑀸𑀚𑀸 𑀅𑀫𑁆𑀳𑀸𑀓𑀁 𑀓𑀫𑁆𑀫𑀘𑁆𑀙𑁂𑀤𑀁 𑀓𑀭𑁄𑀢𑀺, 𑀬𑀁𑀦𑀽𑀦 𑀫𑀬𑀁 𑀉𑀬𑁆𑀬𑀸𑀦𑁂 𑀫𑀺𑀕𑀸𑀦𑀁 𑀦𑀺𑀯𑀸𑀧𑀁 𑀯𑀧𑀺𑀢𑁆𑀯𑀸 𑀧𑀸𑀦𑀻𑀬𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀩𑀳𑀽 𑀫𑀺𑀕𑁂 𑀉𑀬𑁆𑀬𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀬𑁆𑀬𑀸𑀤𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂 𑀉𑀬𑁆𑀬𑀸𑀦𑁂 𑀫𑀺𑀕𑀸𑀦𑀁 𑀦𑀺𑀯𑀸𑀧𑀢𑀺𑀡𑀸𑀦𑀺 𑀭𑁄𑀧𑁂𑀢𑁆𑀯𑀸 𑀉𑀤𑀓𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀯𑀸𑀕𑀼𑀭𑀸𑀦𑀺 𑀆𑀤𑀸𑀬 𑀫𑀼𑀕𑁆𑀕𑀭𑀸𑀤𑀺𑀦𑀸𑀦𑀸𑀯𑀼𑀥𑀳𑀢𑁆𑀣𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀺𑀕𑁂 𑀧𑀭𑀺𑀬𑁂𑀲𑀫𑀸𑀦𑀸 ‘‘𑀫𑀚𑁆𑀛𑁂 𑀞𑀺𑀢𑁂 𑀫𑀺𑀕𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀬𑁄𑀚𑀦𑀫𑀢𑁆𑀢𑀁 𑀞𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀔𑀺𑀧𑀫𑀸𑀦𑀸 𑀦𑀺𑀕𑁆𑀭𑁄𑀥𑀫𑀺𑀕𑀲𑀸𑀔𑀫𑀺𑀕𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀅𑀣 𑀦𑀁 𑀫𑀺𑀕𑀕𑀡𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀕𑀼𑀫𑁆𑀩𑀸𑀤𑀬𑁄 𑀘 𑀪𑀽𑀫𑀺𑀜𑁆𑀘 𑀫𑀼𑀕𑁆𑀕𑀭𑁂𑀳𑀺 𑀧𑀳𑀭𑀦𑁆𑀢𑀸 𑀫𑀺𑀕𑀕𑀡𑀁 𑀕𑀳𑀦𑀝𑁆𑀞𑀸𑀦𑀢𑁄 𑀦𑀻𑀳𑀭𑀺𑀢𑁆𑀯𑀸 𑀅𑀲𑀺𑀲𑀢𑁆𑀢𑀺𑀥𑀦𑀼𑀆𑀤𑀻𑀦𑀺 𑀆𑀯𑀼𑀥𑀸𑀦𑀺 𑀉𑀕𑁆𑀕𑀺𑀭𑀺𑀢𑁆𑀯𑀸 𑀫𑀳𑀸𑀦𑀸𑀤𑀁 𑀦𑀤𑀦𑁆𑀢𑀸 𑀢𑀁 𑀫𑀺𑀕𑀕𑀡𑀁 𑀉𑀬𑁆𑀬𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀦𑀺𑀩𑀤𑁆𑀥𑀁 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑀸 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀸𑀲𑁂𑀣, 𑀅𑀫𑁆𑀳𑁂𑀳𑀺 𑀅𑀭𑀜𑁆𑀜𑀢𑁄 𑀫𑀺𑀕𑁂 𑀆𑀦𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑀁 𑀧𑀽𑀭𑀺𑀢𑀁, 𑀇𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀫𑀁𑀲𑀸𑀦𑀺 𑀔𑀸𑀤𑀣𑀸’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀺𑀕𑁂 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑁂 𑀲𑀼𑀯𑀡𑁆𑀡𑀫𑀺𑀕𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀪𑀬𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀓𑀤𑀸𑀘𑀺 𑀲𑀬𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀺𑀕𑀁 𑀯𑀺𑀚𑁆𑀛𑀺𑀢𑁆𑀯𑀸 𑀆𑀦𑁂𑀢𑀺, 𑀓𑀤𑀸𑀘𑀺𑀲𑁆𑀲 𑀪𑀢𑁆𑀢𑀓𑀸𑀭𑀓𑁄 𑀕𑀦𑁆𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀆𑀳𑀭𑀢𑀺. 𑀫𑀺𑀕𑀸 𑀥𑀦𑀼𑀁 𑀤𑀺𑀲𑁆𑀯𑀸𑀯 𑀫𑀭𑀡𑀪𑀬𑁂𑀦 𑀢𑀚𑁆𑀚𑀺𑀢𑀸 𑀧𑀮𑀸𑀬𑀦𑁆𑀢𑀺, 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀮𑀪𑀺𑀢𑁆𑀯𑀸 𑀓𑀺𑀮𑀫𑀦𑁆𑀢𑀺𑀧𑀺, 𑀕𑀺𑀮𑀸𑀦𑀸𑀧𑀺 𑀳𑁄𑀦𑁆𑀢𑀺, 𑀫𑀭𑀡𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺. 𑀫𑀺𑀕𑀕𑀡𑁄 𑀢𑀁 𑀧𑀯𑀢𑁆𑀢𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀲𑀸𑀔𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀲𑀫𑁆𑀫, 𑀩𑀳𑀽 𑀫𑀺𑀕𑀸 𑀦𑀲𑁆𑀲𑀦𑁆𑀢𑀺, 𑀏𑀓𑀁𑀲𑁂𑀦 𑀫𑀭𑀺𑀢𑀩𑁆𑀩𑁂 𑀲𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀓𑀡𑁆𑀟𑁂𑀦 𑀫𑀺𑀕𑁂 𑀯𑀺𑀚𑁆𑀛𑀦𑁆𑀢𑀼, 𑀥𑀫𑁆𑀫𑀕𑀡𑁆𑀟𑀺𑀓𑀝𑁆𑀞𑀸𑀦𑁂 𑀫𑀺𑀕𑀸𑀦𑀁 𑀯𑀸𑀭𑁄 𑀳𑁄𑀢𑀼. 𑀏𑀓𑀤𑀺𑀯𑀲𑀁 𑀫𑀫 𑀧𑀭𑀺𑀲𑀸𑀬 𑀯𑀸𑀭𑁄 𑀧𑀸𑀧𑀼𑀡𑀸𑀢𑀼, 𑀏𑀓𑀤𑀺𑀯𑀲𑀁 𑀢𑀯 𑀧𑀭𑀺𑀲𑀸𑀬, 𑀯𑀸𑀭𑀧𑁆𑀧𑀢𑁆𑀢𑁄 𑀫𑀺𑀕𑁄 𑀕𑀦𑁆𑀢𑁆𑀯𑀸 𑀥𑀫𑁆𑀫𑀕𑀡𑁆𑀟𑀺𑀓𑀸𑀬 𑀕𑀻𑀯𑀁 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀢𑀼, 𑀏𑀯𑀁 𑀲𑀦𑁆𑀢𑁂 𑀫𑀺𑀕𑀸 𑀓𑀺𑀮𑀦𑁆𑀢𑀸 𑀦 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄 𑀧𑀝𑁆𑀞𑀸𑀬 𑀯𑀸𑀭𑀧𑁆𑀧𑀢𑁆𑀢𑁄𑀯 𑀫𑀺𑀕𑁄 𑀕𑀦𑁆𑀢𑁆𑀯𑀸 𑀥𑀫𑁆𑀫𑀕𑀡𑁆𑀟𑀺𑀓𑀸𑀬 𑀕𑀻𑀯𑀁 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀪𑀢𑁆𑀢𑀓𑀸𑀭𑀓𑁄 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀧𑀦𑁆𑀦𑀓𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀸𑀔𑀫𑀺𑀕𑀲𑁆𑀲 𑀧𑀭𑀺𑀲𑀸𑀬 𑀏𑀓𑀺𑀲𑁆𑀲𑀸 𑀕𑀩𑁆𑀪𑀺𑀦𑀺𑀫𑀺𑀕𑀺𑀬𑀸 𑀯𑀸𑀭𑁄 𑀧𑀸𑀧𑀼𑀡𑀺. 𑀲𑀸 𑀲𑀸𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀸𑀫𑀺, 𑀅𑀳𑀁 𑀕𑀩𑁆𑀪𑀺𑀦𑀻, 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀤𑁆𑀯𑁂 𑀚𑀦𑀸 𑀯𑀸𑀭𑀁 𑀕𑀫𑀺𑀲𑁆𑀲𑀸𑀫, 𑀫𑀬𑁆𑀳𑀁 𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀦 𑀲𑀓𑁆𑀓𑀸 𑀢𑀯 𑀯𑀸𑀭𑀁 𑀅𑀜𑁆𑀜𑁂𑀲𑀁 𑀧𑀸𑀧𑁂𑀢𑀼𑀁, 𑀢𑁆𑀯𑀫𑁂𑀯 𑀢𑀼𑀬𑁆𑀳𑀁 𑀯𑀸𑀭𑀁 𑀚𑀸𑀦𑀺𑀲𑁆𑀲𑀲𑀺, 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀅𑀦𑀼𑀕𑁆𑀕𑀳𑀁 𑀅𑀮𑀪𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀳𑁄𑀢𑀼 𑀕𑀘𑁆𑀙 𑀢𑁆𑀯𑀁, 𑀅𑀳𑀁 𑀢𑁂 𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀲𑀬𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀕𑀡𑁆𑀟𑀺𑀓𑀸𑀬 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀪𑀢𑁆𑀢𑀓𑀸𑀭𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀮𑀤𑁆𑀥𑀸𑀪𑀬𑁄 𑀫𑀺𑀕𑀭𑀸𑀚𑀸 𑀥𑀫𑁆𑀫𑀕𑀡𑁆𑀟𑀺𑀓𑀸𑀬 𑀦𑀺𑀧𑀦𑁆𑀦𑁄, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺.

𑀭𑀸𑀚𑀸 𑀢𑀸𑀯𑀤𑁂𑀯 𑀭𑀣𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀆𑀳 ‘‘𑀲𑀫𑁆𑀫 𑀫𑀺𑀕𑀭𑀸𑀚, 𑀦𑀦𑀼 𑀫𑀬𑀸 𑀢𑀼𑀬𑁆𑀳𑀁 𑀅𑀪𑀬𑀁 𑀤𑀺𑀦𑁆𑀦𑀁, 𑀓𑀲𑁆𑀫𑀸 𑀢𑁆𑀯𑀁 𑀇𑀥 𑀦𑀺𑀧𑀦𑁆𑀦𑁄’’𑀢𑀺. 𑀫𑀳𑀸𑀭𑀸𑀚, 𑀕𑀩𑁆𑀪𑀺𑀦𑀻 𑀫𑀺𑀕𑀻 𑀆𑀕𑀦𑁆𑀢𑁆𑀯𑀸 ‘‘𑀫𑀫 𑀯𑀸𑀭𑀁 𑀅𑀜𑁆𑀜𑀲𑁆𑀲 𑀧𑀸𑀧𑁂𑀳𑀻’’𑀢𑀺 𑀆𑀳, 𑀦 𑀲𑀓𑁆𑀓𑀸 𑀔𑁄 𑀧𑀦 𑀫𑀬𑀸 𑀏𑀓𑀲𑁆𑀲 𑀫𑀭𑀡𑀤𑀼𑀓𑁆𑀔𑀁 𑀅𑀜𑁆𑀜𑀲𑁆𑀲 𑀉𑀧𑀭𑀺 𑀦𑀺𑀓𑁆𑀔𑀺𑀧𑀺𑀢𑀼𑀁, 𑀲𑁆𑀯𑀸𑀳𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀢𑀲𑁆𑀲𑀸 𑀤𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀓𑀁 𑀫𑀭𑀡𑀁 𑀕𑀳𑁂𑀢𑁆𑀯𑀸 𑀇𑀥 𑀦𑀺𑀧𑀦𑁆𑀦𑁄, 𑀫𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀆𑀲𑀗𑁆𑀓𑀺𑀢𑁆𑀣, 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀆𑀳 𑁋 ‘‘𑀲𑀸𑀫𑀺, 𑀲𑀼𑀯𑀡𑁆𑀡𑀯𑀡𑁆𑀡𑀫𑀺𑀕𑀭𑀸𑀚, 𑀫𑀬𑀸 𑀦 𑀢𑀸𑀤𑀺𑀲𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀫𑀦𑀼𑀲𑁆𑀲𑁂𑀲𑀼𑀧𑀺 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀦 𑀢𑁂 𑀧𑀲𑀦𑁆𑀦𑁄𑀲𑁆𑀫𑀺, 𑀉𑀝𑁆𑀞𑁂𑀳𑀺, 𑀢𑀼𑀬𑁆𑀳𑀜𑁆𑀘 𑀢𑀲𑁆𑀲𑀸 𑀘 𑀅𑀪𑀬𑀁 𑀤𑀫𑁆𑀫𑀻’’𑀢𑀺. ‘‘𑀤𑁆𑀯𑀻𑀳𑀺 𑀅𑀪𑀬𑁂 𑀮𑀤𑁆𑀥𑁂 𑀅𑀯𑀲𑁂𑀲𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀦𑀭𑀺𑀦𑁆𑀤𑀸’’𑀢𑀺? ‘‘𑀅𑀯𑀲𑁂𑀲𑀸𑀦𑀫𑁆𑀧𑀺 𑀅𑀪𑀬𑀁 𑀤𑀫𑁆𑀫𑀺, 𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀏𑀯𑀫𑁆𑀧𑀺 𑀉𑀬𑁆𑀬𑀸𑀦𑁂𑀬𑁂𑀯 𑀫𑀺𑀕𑀸 𑀅𑀪𑀬𑀁 𑀮𑀪𑀺𑀲𑁆𑀲𑀦𑁆𑀢𑀺, 𑀲𑁂𑀲𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀢𑁂𑀲𑀫𑁆𑀧𑀺 𑀅𑀪𑀬𑀁 𑀤𑀫𑁆𑀫𑀺, 𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀫𑀺𑀕𑀸 𑀢𑀸𑀯 𑀅𑀪𑀬𑀁 𑀮𑀪𑀦𑁆𑀢𑀼, 𑀲𑁂𑀲𑀸 𑀘𑀢𑀼𑀧𑁆𑀧𑀤𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀢𑁂𑀲𑀫𑁆𑀧𑀺 𑀅𑀪𑀬𑀁 𑀤𑀫𑁆𑀫𑀺, 𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀘𑀢𑀼𑀧𑁆𑀧𑀤𑀸 𑀢𑀸𑀯 𑀅𑀪𑀬𑀁 𑀮𑀪𑀦𑁆𑀢𑀼, 𑀤𑀺𑀚𑀕𑀡𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀢𑁂𑀲𑀫𑁆𑀧𑀺 𑀅𑀪𑀬𑀁 𑀤𑀫𑁆𑀫𑀺, 𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀤𑀺𑀚𑀕𑀡𑀸 𑀢𑀸𑀯 𑀅𑀪𑀬𑀁 𑀮𑀪𑀦𑁆𑀢𑀼, 𑀉𑀤𑀓𑁂 𑀯𑀲𑀦𑁆𑀢𑀸 𑀫𑀘𑁆𑀙𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀢𑁂𑀲𑀫𑁆𑀧𑀺 𑀅𑀪𑀬𑀁 𑀤𑀫𑁆𑀫𑀺, 𑀲𑀸𑀫𑀻’’𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀬𑀸𑀘𑀺𑀢𑁆𑀯𑀸 𑀉𑀝𑁆𑀞𑀸𑀬 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀥𑀫𑁆𑀫𑀁 𑀘𑀭, 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀼𑀢𑁆𑀢𑀥𑀻𑀢𑀸𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀲𑀫𑀁 𑀘𑀭𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀭𑀜𑁆𑀜𑁄 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀉𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀲𑀸𑀧𑀺 𑀔𑁄 𑀫𑀺𑀕𑀥𑁂𑀦𑀼 𑀧𑀼𑀧𑁆𑀨𑀓𑀡𑁆𑀡𑀺𑀓𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀓𑀻𑀴𑀫𑀸𑀦𑁄 𑀲𑀸𑀔𑀫𑀺𑀕𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀫𑀸𑀢𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀼𑀢𑁆𑀢, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀏𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙, 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀑𑀯𑀤𑀦𑁆𑀢𑀻 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨. ‘‘𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬𑀸𑀢𑀺 𑀢𑀸𑀢 𑀢𑁆𑀯𑀁 𑀯𑀸 𑀅𑀜𑁆𑀜𑁄 𑀯𑀸 𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑁄 𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬 𑀪𑀚𑁂𑀬𑁆𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂𑀢𑀺 𑀲𑀸𑀔𑀫𑀺𑀕𑀁 𑀧𑀦 𑀦 𑀉𑀧𑀲𑀁𑀯𑀲𑁂 𑀉𑀧𑀕𑀫𑁆𑀫 𑀦 𑀲𑀁𑀯𑀲𑁂𑀬𑁆𑀬, 𑀏𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀦 𑀓𑀧𑁆𑀧𑁂𑀬𑁆𑀬. 𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄𑀢𑀺 𑀦𑀺𑀕𑁆𑀭𑁄𑀥𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀫𑀭𑀡𑀫𑁆𑀧𑀺 𑀲𑁂𑀬𑁆𑀬𑁄 𑀯𑀭𑀁 𑀉𑀢𑁆𑀢𑀫𑀁. 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 𑀚𑀻𑀯𑀺𑀢𑀦𑁆𑀢𑀺 𑀬𑀁 𑀧𑀦 𑀲𑀸𑀔𑀲𑁆𑀲 𑀲𑀦𑁆𑀢𑀺𑀓𑁂 𑀚𑀻𑀯𑀺𑀢𑀁, 𑀢𑀁 𑀦𑁂𑀯 𑀲𑁂𑀬𑁆𑀬𑁄 𑀦 𑀯𑀭𑀁 𑀦 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀅𑀪𑀬𑀮𑀤𑁆𑀥𑀓𑀸 𑀫𑀺𑀕𑀸 𑀫𑀦𑀼𑀲𑁆𑀲𑀸𑀦𑀁 𑀲𑀲𑁆𑀲𑀸𑀦𑀺 𑀔𑀸𑀤𑀦𑁆𑀢𑀺, 𑀫𑀦𑀼𑀲𑁆𑀲𑀸 ‘‘𑀮𑀤𑁆𑀥𑀸𑀪𑀬𑀸 𑀇𑀫𑁂 𑀫𑀺𑀕𑀸’’𑀢𑀺 𑀫𑀺𑀕𑁂 𑀧𑀳𑀭𑀺𑀢𑀼𑀁 𑀯𑀸 𑀧𑀮𑀸𑀧𑁂𑀢𑀼𑀁 𑀯𑀸 𑀦 𑀯𑀺𑀲𑀳𑀦𑁆𑀢𑀺, 𑀢𑁂 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀫𑀬𑀸 𑀧𑀲𑀦𑁆𑀦𑁂𑀦 𑀦𑀺𑀕𑁆𑀭𑁄𑀥𑀫𑀺𑀕𑀭𑀸𑀚𑀲𑁆𑀲 𑀯𑀭𑁄 𑀤𑀺𑀦𑁆𑀦𑁄, 𑀅𑀳𑀁 𑀭𑀚𑁆𑀚𑀁 𑀚𑀳𑁂𑀬𑁆𑀬𑀁, 𑀦 𑀘 𑀢𑀁 𑀧𑀝𑀺𑀜𑁆𑀜𑀁 𑀪𑀺𑀦𑁆𑀤𑀸𑀫𑀺, 𑀕𑀘𑁆𑀙𑀣 𑀦 𑀓𑁄𑀘𑀺 𑀫𑀫 𑀯𑀺𑀚𑀺𑀢𑁂 𑀫𑀺𑀕𑁂 𑀧𑀳𑀭𑀺𑀢𑀼𑀁 𑀮𑀪𑀢𑀻’’𑀢𑀺 𑀆𑀳. 𑀦𑀺𑀕𑁆𑀭𑁄𑀥𑀫𑀺𑀕𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀫𑀺𑀕𑀕𑀡𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀧𑀭𑁂𑀲𑀁 𑀲𑀲𑁆𑀲𑀁 𑀔𑀸𑀤𑀺𑀢𑀼𑀁 𑀦 𑀮𑀪𑀺𑀲𑁆𑀲𑀣𑀸’’𑀢𑀺 𑀫𑀺𑀕𑁂 𑀑𑀯𑀤𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑀸𑀧𑁂𑀲𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀲𑀲𑁆𑀲𑀓𑀸𑀭𑀓𑀸 𑀫𑀦𑀼𑀲𑁆𑀲𑀸 𑀲𑀲𑁆𑀲𑀭𑀓𑁆𑀔𑀡𑀢𑁆𑀣𑀁 𑀯𑀢𑀺𑀁 𑀫𑀸 𑀓𑀭𑁄𑀦𑁆𑀢𑀼, 𑀔𑁂𑀢𑁆𑀢𑀁 𑀧𑀦 𑀆𑀯𑀺𑀚𑁆𑀛𑀺𑀢𑁆𑀯𑀸 𑀧𑀡𑁆𑀡𑀲𑀜𑁆𑀜𑀁 𑀩𑀦𑁆𑀥𑀦𑁆𑀢𑀽’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀭 𑀔𑁂𑀢𑁆𑀢𑁂𑀲𑀼 𑀧𑀡𑁆𑀡𑀩𑀦𑁆𑀥𑀦𑀲𑀜𑁆𑀜𑀸 𑀉𑀤𑀧𑀸𑀤𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀡𑁆𑀡𑀲𑀜𑁆𑀜𑀁 𑀅𑀢𑀺𑀓𑁆𑀓𑀫𑀦𑀫𑀺𑀕𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀓𑀺𑀭 𑀦𑁂𑀲𑀁 𑀩𑁄𑀥𑀺𑀲𑀢𑁆𑀢𑀢𑁄 𑀮𑀤𑁆𑀥𑀑𑀯𑀸𑀤𑁄. 𑀏𑀯𑀁 𑀫𑀺𑀕𑀕𑀡𑀁 𑀑𑀯𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀲𑀤𑁆𑀥𑀺𑀁 𑀫𑀺𑀕𑁂𑀳𑀺 𑀬𑀣𑀸𑀓𑀫𑁆𑀫𑀁 𑀕𑀢𑁄, 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑀸𑀳𑀁 𑀣𑁂𑀭𑀺𑀬𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀘 𑀅𑀯𑀲𑁆𑀲𑀬𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀲𑁆𑀲𑀬𑁄 𑀏𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀲𑀸𑀔𑀫𑀺𑀕𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸𑀯, 𑀫𑀺𑀕𑀥𑁂𑀦𑀼 𑀣𑁂𑀭𑀻 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀦𑀺𑀕𑁆𑀭𑁄𑀥𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀺𑀕𑁆𑀭𑁄𑀥𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁩] 𑁩. 𑀓𑀡𑁆𑀟𑀺𑀚𑀸𑀢𑀓𑀯𑀡𑁆𑀡𑀦𑀸

𑀥𑀺𑀭𑀢𑁆𑀣𑀼 𑀓𑀡𑁆𑀟𑀺𑀦𑀁 𑀲𑀮𑁆𑀮𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀅𑀝𑁆𑀞𑀓𑀦𑀺𑀧𑀸𑀢𑁂 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀪𑀕𑀯𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 ‘‘𑀪𑀺𑀓𑁆𑀔𑀼, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀯𑀻𑀢𑀘𑁆𑀘𑀺𑀢𑁂𑀲𑀼 𑀅𑀗𑁆𑀕𑀸𑀭𑁂𑀲𑀼 𑀧𑀓𑁆𑀓𑁄’’𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼, 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺. 𑀇𑀢𑁄 𑀧𑀭𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀬𑀸𑀘𑀦𑀁 𑀪𑀯𑀦𑁆𑀢𑀭𑀧𑀝𑀺𑀘𑁆𑀙𑀦𑁆𑀦𑀢𑀜𑁆𑀘 𑀅𑀯𑀢𑁆𑀯𑀸 ‘‘𑀅𑀢𑀻𑀢𑀁 𑀆𑀳𑀭𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀓𑁆𑀔𑀸𑀫, 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀬𑀸𑀘𑀦𑀜𑁆𑀘 𑀯𑀮𑀸𑀳𑀓𑀕𑀩𑁆𑀪𑀢𑁄 𑀘𑀦𑁆𑀤𑀦𑀻𑀳𑀭𑀡𑀽𑀧𑀫𑀸𑀬 𑀪𑀯𑀦𑁆𑀢𑀭𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀪𑀸𑀯𑁄 𑀘𑀸𑀢𑀺 𑀲𑀩𑁆𑀩𑀫𑁂𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀭𑀸𑀚𑀕𑀳𑁂 𑀫𑀕𑀥𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀫𑀕𑀥𑀯𑀸𑀲𑀺𑀓𑀸𑀦𑀁 𑀲𑀲𑁆𑀲𑀲𑀫𑀬𑁂 𑀫𑀺𑀕𑀸𑀦𑀁 𑀫𑀳𑀸𑀧𑀭𑀺𑀧𑀦𑁆𑀣𑁄 𑀳𑁄𑀢𑀺. 𑀢𑁂 𑀅𑀭𑀜𑁆𑀜𑁂 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀦𑁆𑀢𑀺. 𑀢𑀢𑁆𑀣 𑀏𑀓𑁄 𑀅𑀭𑀜𑁆𑀜𑀯𑀸𑀲𑀻 𑀧𑀩𑁆𑀩𑀢𑁂𑀬𑁆𑀬𑀫𑀺𑀕𑁄 𑀏𑀓𑀸𑀬 𑀕𑀸𑀫𑀦𑁆𑀢𑀯𑀸𑀲𑀺𑀦𑀺𑀬𑀸 𑀫𑀺𑀕𑀧𑁄𑀢𑀺𑀓𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀢𑁂𑀲𑀁 𑀫𑀺𑀕𑀸𑀦𑀁 𑀧𑀩𑁆𑀩𑀢𑀧𑀸𑀤𑀢𑁄 𑀑𑀭𑀼𑀬𑁆𑀳 𑀧𑀼𑀦 𑀕𑀸𑀫𑀦𑁆𑀢𑀁 𑀑𑀢𑀭𑀡𑀓𑀸𑀮𑁂 𑀫𑀺𑀕𑀧𑁄𑀢𑀺𑀓𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑁆𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀑𑀢𑀭𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀢𑁆𑀯𑀁 𑀔𑁄𑀲𑀺, 𑀅𑀬𑁆𑀬, 𑀧𑀩𑁆𑀩𑀢𑁂𑀬𑁆𑀬𑁄 𑀩𑀸𑀮𑀫𑀺𑀕𑁄, 𑀕𑀸𑀫𑀦𑁆𑀢𑁄 𑀘 𑀦𑀸𑀫 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀫𑀸 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀑𑀢𑀭𑀻’’𑀢𑀺. 𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑁆𑀢𑀸 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺. 𑀫𑀕𑀥𑀯𑀸𑀲𑀺𑀦𑁄 ‘‘𑀇𑀤𑀸𑀦𑀺 𑀫𑀺𑀕𑀸𑀦𑀁 𑀧𑀩𑁆𑀩𑀢𑀧𑀸𑀤𑀸 𑀑𑀢𑀭𑀡𑀓𑀸𑀮𑁄’’𑀢𑀺 𑀜𑀢𑁆𑀯𑀸 𑀫𑀕𑁆𑀕𑁂 𑀧𑀝𑀺𑀘𑁆𑀙𑀦𑁆𑀦𑀓𑁄𑀝𑁆𑀞𑀓𑁂𑀲𑀼 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀆𑀕𑀫𑀦𑀫𑀕𑁆𑀕𑁂 𑀏𑀓𑁄 𑀮𑀼𑀤𑁆𑀤𑀓𑁄 𑀧𑀝𑀺𑀘𑁆𑀙𑀦𑁆𑀦𑀓𑁄𑀝𑁆𑀞𑀓𑁂 𑀞𑀺𑀢𑁄 𑀳𑁄𑀢𑀺. 𑀫𑀺𑀕𑀧𑁄𑀢𑀺𑀓𑀸 𑀫𑀦𑀼𑀲𑁆𑀲𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀏𑀓𑁄 𑀮𑀼𑀤𑁆𑀤𑀓𑁄 𑀞𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀩𑀸𑀮𑀫𑀺𑀕𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀬𑀁 𑀧𑀘𑁆𑀙𑀢𑁄 𑀅𑀳𑁄𑀲𑀺. 𑀮𑀼𑀤𑁆𑀤𑀓𑁄 𑀏𑀓𑁂𑀦𑁂𑀯 𑀲𑀭𑀧𑁆𑀧𑀳𑀸𑀭𑁂𑀦 𑀫𑀺𑀕𑀁 𑀢𑀢𑁆𑀣𑁂𑀯 𑀧𑀸𑀢𑁂𑀢𑀺. 𑀫𑀺𑀕𑀧𑁄𑀢𑀺𑀓𑀸 𑀢𑀲𑁆𑀲 𑀯𑀺𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀯𑀸𑀢𑀕𑀢𑀺𑀬𑀸𑀯 𑀧𑀮𑀸𑀬𑀺. 𑀮𑀼𑀤𑁆𑀤𑀓𑁄 𑀓𑁄𑀝𑁆𑀞𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀕𑀁 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀯𑀻𑀢𑀘𑁆𑀘𑀺𑀢𑁂𑀲𑀼 𑀅𑀗𑁆𑀕𑀸𑀭𑁂𑀲𑀼 𑀫𑀥𑀼𑀭𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀅𑀯𑀲𑁂𑀲𑀁 𑀮𑁄𑀳𑀺𑀢𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑀺 𑀓𑀸𑀚𑁂𑀦𑀸𑀤𑀸𑀬 𑀤𑀸𑀭𑀓𑁂 𑀢𑁄𑀲𑁂𑀦𑁆𑀢𑁄 𑀖𑀭𑀁 𑀅𑀕𑀫𑀸𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀳𑁄𑀢𑀺. 𑀲𑁄 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀩𑀸𑀮𑀫𑀺𑀕𑀲𑁆𑀲 𑀫𑀭𑀡𑀁 𑀦𑁂𑀯 𑀫𑀸𑀢𑀭𑀁 𑀦𑀺𑀲𑁆𑀲𑀸𑀬, 𑀦 𑀧𑀺𑀢𑀭𑀁 𑀦𑀺𑀲𑁆𑀲𑀸𑀬, 𑀅𑀣 𑀔𑁄 𑀓𑀸𑀫𑀁 𑀦𑀺𑀲𑁆𑀲𑀸𑀬. 𑀓𑀸𑀫𑀦𑀺𑀫𑀺𑀢𑁆𑀢𑀜𑁆𑀳𑀺 𑀲𑀢𑁆𑀢𑀸 𑀲𑀼𑀕𑀢𑀺𑀬𑀁 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀁, 𑀤𑀼𑀕𑁆𑀕𑀢𑀺𑀬𑀜𑁆𑀘 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀭𑁂𑀲𑀁 𑀫𑀭𑀡𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀫𑁆𑀧𑀺 𑀦𑀸𑀫 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀕𑀭𑀳𑀺𑀢𑀫𑁂𑀯. 𑀬𑀁 𑀚𑀦𑀧𑀤𑀁 𑀫𑀸𑀢𑀼𑀕𑀸𑀫𑁄 𑀯𑀺𑀘𑀸𑀭𑁂𑀢𑀺 𑀅𑀦𑀼𑀲𑀸𑀲𑀢𑀺, 𑀲𑁄 𑀇𑀢𑁆𑀣𑀺𑀧𑀭𑀺𑀡𑀸𑀬𑀓𑁄 𑀚𑀦𑀧𑀤𑁄𑀧𑀺 𑀕𑀭𑀳𑀺𑀢𑁄𑀬𑁂𑀯. 𑀬𑁂 𑀲𑀢𑁆𑀢𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀧𑀺 𑀕𑀭𑀳𑀺𑀢𑀸𑀬𑁂𑀯𑀸’’𑀢𑀺 𑀏𑀓𑀸𑀬 𑀕𑀸𑀣𑀸𑀬 𑀢𑀻𑀡𑀺 𑀕𑀭𑀳𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑁆𑀯𑀸 𑀯𑀦𑀤𑁂𑀯𑀢𑀸𑀲𑀼 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸𑀲𑀼 𑀫𑀥𑀼𑀭𑁂𑀦 𑀲𑀭𑁂𑀦 𑀢𑀁 𑀯𑀦𑀲𑀡𑁆𑀟𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋

𑁧𑁩. ‘‘𑀥𑀺𑀭𑀢𑁆𑀣𑀼 𑀓𑀡𑁆𑀟𑀺𑀦𑀁 𑀲𑀮𑁆𑀮𑀁, 𑀧𑀼𑀭𑀺𑀲𑀁 𑀕𑀸𑀴𑁆𑀳𑀯𑁂𑀥𑀺𑀦𑀁;

𑀥𑀺𑀭𑀢𑁆𑀣𑀼 𑀢𑀁 𑀚𑀦𑀧𑀤𑀁, 𑀬𑀢𑁆𑀣𑀺𑀢𑁆𑀣𑀻 𑀧𑀭𑀺𑀡𑀸𑀬𑀺𑀓𑀸;

𑀢𑁂 𑀘𑀸𑀧𑀺 𑀥𑀺𑀓𑁆𑀓𑀺𑀢𑀸 𑀲𑀢𑁆𑀢𑀸, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀁 𑀕𑀢𑀸’’𑀢𑀺.

𑀢𑀢𑁆𑀣 𑀥𑀺𑀭𑀢𑁆𑀣𑀽𑀢𑀺 𑀕𑀭𑀳𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀲𑁆𑀯𑀸𑀬𑀫𑀺𑀥 𑀉𑀢𑁆𑀢𑀸𑀲𑀼𑀩𑁆𑀩𑁂𑀕𑀯𑀲𑁂𑀦 𑀕𑀭𑀳𑀡𑁂 𑀤𑀝𑁆𑀞𑀩𑁆𑀩𑁄. 𑀉𑀢𑁆𑀢𑀲𑀺𑀢𑀼𑀩𑁆𑀩𑀺𑀕𑁆𑀕𑁄 𑀳𑀺 𑀳𑁄𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀯𑀫𑀸𑀳. 𑀓𑀡𑁆𑀟𑀫𑀲𑁆𑀲 𑀅𑀢𑁆𑀣𑀻𑀢𑀺 𑀓𑀡𑁆𑀟𑀻, 𑀢𑀁 𑀓𑀡𑁆𑀟𑀺𑀦𑀁. 𑀢𑀁 𑀧𑀦 𑀓𑀡𑁆𑀟𑀁 𑀅𑀦𑀼𑀧𑀯𑀺𑀲𑀦𑀝𑁆𑀞𑁂𑀦 ‘‘𑀲𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀓𑀡𑁆𑀟𑀺𑀦𑀁 𑀲𑀮𑁆𑀮𑀦𑁆𑀢𑀺 𑀏𑀢𑁆𑀣 𑀲𑀮𑁆𑀮𑀓𑀡𑁆𑀟𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀮𑁆𑀮𑀁 𑀯𑀸 𑀅𑀲𑁆𑀲𑀢𑁆𑀣𑀻𑀢𑀺𑀧𑀺 𑀲𑀮𑁆𑀮𑁄, 𑀢𑀁 𑀲𑀮𑁆𑀮𑀁. 𑀫𑀳𑀦𑁆𑀢𑀁 𑀯𑀡𑀫𑀼𑀔𑀁 𑀓𑀢𑁆𑀯𑀸 𑀩𑀮𑀯𑀧𑁆𑀧𑀳𑀸𑀭𑀁 𑀤𑁂𑀦𑁆𑀢𑁄 𑀕𑀸𑀴𑁆𑀳𑀁 𑀯𑀺𑀚𑁆𑀛𑀢𑀻𑀢𑀺 𑀕𑀸𑀴𑁆𑀳𑀯𑁂𑀥𑀻, 𑀢𑀁 𑀕𑀸𑀴𑁆𑀳𑀯𑁂𑀥𑀺𑀦𑀁. 𑀦𑀸𑀦𑀧𑁆𑀧𑀓𑀸𑀭𑁂𑀦 𑀓𑀡𑁆𑀟𑁂𑀦, 𑀓𑀼𑀫𑀼𑀤𑀧𑀢𑁆𑀢𑀲𑀡𑁆𑀞𑀸𑀦𑀣𑀮𑁂𑀦 𑀉𑀚𑀼𑀓𑀕𑀫𑀦𑁂𑀦𑁂𑀯 𑀲𑀮𑁆𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀁 𑀕𑀸𑀴𑁆𑀳𑀯𑁂𑀥𑀺𑀦𑀁 𑀧𑀼𑀭𑀺𑀲𑀁 𑀥𑀺𑀭𑀢𑁆𑀣𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀧𑀭𑀺𑀡𑀸𑀬𑀺𑀓𑀸𑀢𑀺 𑀇𑀲𑁆𑀲𑀭𑀸 𑀲𑀁𑀯𑀺𑀥𑀸𑀬𑀺𑀓𑀸. 𑀥𑀺𑀓𑁆𑀓𑀺𑀢𑀸𑀢𑀺 𑀕𑀭𑀳𑀺𑀢𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀢𑁄 𑀧𑀭𑀁 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀬𑀁 𑀬𑀁 𑀅𑀦𑀼𑀢𑁆𑀢𑀸𑀦𑀁, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀏𑀯𑀁 𑀏𑀓𑀸𑀬 𑀕𑀸𑀣𑀸𑀬 𑀢𑀻𑀡𑀺 𑀕𑀭𑀳𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀯𑀦𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀇𑀢𑁄 𑀧𑀭𑀁 𑀧𑀦 ‘‘𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸’’𑀢𑀺 𑀇𑀤𑀁 𑀅𑀯𑀢𑁆𑀯𑀸 ‘‘𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀓𑁆𑀔𑀸𑀫, 𑀅𑀯𑀼𑀢𑁆𑀢𑀫𑁆𑀧𑀺 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀢𑀤𑀸 𑀧𑀩𑁆𑀩𑀢𑁂𑀬𑁆𑀬𑀫𑀺𑀕𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀫𑀺𑀕𑀧𑁄𑀢𑀺𑀓𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸, 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀓𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀡𑁆𑀟𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁪] 𑁪. 𑀯𑀸𑀢𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀭𑀺 𑀓𑀺𑀭 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀢𑀺𑀲𑁆𑀲𑀓𑀼𑀫𑀸𑀭𑁄 𑀦𑀸𑀫 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀏𑀓𑀤𑀺𑀯𑀲𑀁 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑁄 𑀲𑀢𑁆𑀢𑀸𑀳𑀁 𑀪𑀢𑁆𑀢𑀘𑁆𑀙𑁂𑀤𑀁 𑀓𑀢𑁆𑀯𑀸 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀯𑀺𑀬 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀢𑁆𑀣𑀸 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀯𑁂𑀴𑀼𑀯𑀦𑁂 𑀯𑀺𑀳𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀬𑀁 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺, ‘‘𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀅𑀳𑁄𑀲𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀕𑀳𑁂 𑀦𑀓𑁆𑀔𑀢𑁆𑀢𑀓𑀻𑀴𑀸𑀬 𑀯𑀢𑁆𑀢𑀫𑀸𑀦𑀸𑀬 𑀣𑁂𑀭𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀬𑀁 𑀢𑀲𑁆𑀲 𑀕𑀺𑀳𑀺𑀓𑀸𑀮𑁂 𑀅𑀳𑁄𑀲𑀺 𑀆𑀪𑀭𑀡𑀪𑀡𑁆𑀟𑀓𑀁, 𑀢𑀁 𑀭𑀢𑀦𑀘𑀗𑁆𑀓𑁄𑀝𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑁂 𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑀸𑀲𑀼 𑀦𑀓𑁆𑀔𑀢𑁆𑀢𑀓𑀻𑀴𑀸𑀲𑀼 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀇𑀫𑀺𑀦𑀸 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀢𑀺, 𑀢𑀁 𑀦𑁄 𑀏𑀓𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀲𑀸𑀯𑀢𑁆𑀣𑀺𑀦𑀕𑀭𑀁 𑀕𑀢𑁄, 𑀓𑀳𑀁 𑀦𑀼 𑀔𑁄 𑀲𑁄 𑀏𑀢𑀭𑀳𑀺 𑀦𑀺𑀲𑀺𑀦𑁆𑀦𑁄, 𑀓𑀳𑀁 𑀞𑀺𑀢𑁄’’𑀢𑀺 𑀯𑀢𑁆𑀯𑀸 𑀭𑁄𑀤𑀦𑁆𑀢𑀺.

𑀅𑀣𑁂𑀓𑀸 𑀯𑀡𑁆𑀡𑀤𑀸𑀲𑀻 𑀢𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀭𑁄𑀤𑀦𑁆𑀢𑀺𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀺𑀁 𑀧𑀦, 𑀅𑀬𑁆𑀬𑁂, 𑀭𑁄𑀤𑀲𑀻’’𑀢𑀺? ‘‘𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺’’. ‘‘𑀓𑀺𑀁 𑀧𑀦, 𑀅𑀬𑁆𑀬𑁂, 𑀅𑀬𑁆𑀬𑀧𑀼𑀢𑁆𑀢𑁄 𑀧𑀺𑀬𑀸𑀬𑀢𑀻’’𑀢𑀺? ‘‘𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘𑀸’’𑀢𑀺. ‘‘𑀲𑀘𑁂 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀫𑀬𑁆𑀳𑀁 𑀤𑁂𑀣, 𑀅𑀳𑀁 𑀯𑁄 𑀧𑀼𑀢𑁆𑀢𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀁 𑀉𑀬𑁆𑀬𑁄𑀚𑁂𑀲𑀺 ‘‘𑀕𑀘𑁆𑀙, 𑀅𑀢𑁆𑀢𑀦𑁄 𑀩𑀮𑁂𑀦 𑀫𑀫 𑀧𑀼𑀢𑁆𑀢𑀁 𑀆𑀦𑁂𑀳𑀻’’𑀢𑀺. 𑀲𑀸 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀺𑀦𑁆𑀦𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀯𑀻𑀣𑀺𑀬𑀁 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀓𑀼𑀮𑀸 𑀆𑀕𑀢𑁂 𑀫𑀦𑀼𑀲𑁆𑀲𑁂 𑀣𑁂𑀭𑀲𑁆𑀲 𑀅𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦𑁂𑀯 𑀧𑀭𑀺𑀯𑀼𑀢𑀸 𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀆𑀤𑀺𑀢𑁄𑀯 𑀉𑀴𑀼𑀗𑁆𑀓𑀬𑀸𑀕𑀼𑀜𑁆𑀘 𑀭𑀲𑀓𑀪𑀺𑀓𑁆𑀔𑀜𑁆𑀘 𑀤𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀤𑀤𑀫𑀸𑀦𑀸 𑀘 𑀅𑀢𑁆𑀢𑀦𑁄 𑀯𑀲𑀁 𑀉𑀧𑀕𑀢𑀪𑀸𑀯𑀁 𑀜𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 𑀦𑀺𑀧𑀚𑁆𑀚𑀺. 𑀣𑁂𑀭𑁄𑀧𑀺 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀲𑀧𑀤𑀸𑀦𑀁 𑀘𑀭𑀦𑁆𑀢𑁄 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀧𑀭𑀺𑀚𑀦𑁄 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀖𑀭𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀣𑁂𑀭𑁄 𑀦𑀺𑀲𑀻𑀤𑀺𑀢𑁆𑀯𑀸𑀯 ‘‘𑀓𑀳𑀁 𑀉𑀧𑀸𑀲𑀺𑀓𑀸’’𑀢𑀺 𑀧𑀼𑀘𑁆𑀙𑀺. ‘‘𑀕𑀺𑀮𑀸𑀦𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀇𑀘𑁆𑀙𑀢𑀻’’𑀢𑀺. 𑀲𑁄 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀅𑀢𑁆𑀢𑀦𑁄 𑀯𑀢𑀲𑀫𑀸𑀤𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲𑀸 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀧𑀸𑀯𑀺𑀲𑀺. 𑀲𑀸 𑀅𑀢𑁆𑀢𑀦𑁄 𑀆𑀕𑀢𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀢𑀁 𑀧𑀮𑁄𑀪𑁂𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀧𑁂𑀢𑁆𑀯𑀸 𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀭𑀸𑀚𑀕𑀳𑀫𑁂𑀯 𑀅𑀕𑀫𑀸𑀲𑀺. 𑀲𑀸 𑀧𑀯𑀢𑁆𑀢𑀺 𑀧𑀸𑀓𑀝𑀸 𑀚𑀸𑀢𑀸.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 ‘‘𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀓𑀺𑀭 𑀏𑀓𑀸 𑀯𑀡𑁆𑀡𑀤𑀸𑀲𑀻 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀕𑀢𑀸’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀉𑀧𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀆𑀳. 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀓𑀣𑀬𑀺𑀁𑀲𑀼. ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀏𑀲𑁄 𑀪𑀺𑀓𑁆𑀔𑀼 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 𑀢𑀲𑁆𑀲𑀸 𑀯𑀲𑀁 𑀕𑀢𑁄, 𑀧𑀼𑀩𑁆𑀩𑁂𑀧𑀺 𑀢𑀲𑁆𑀲𑀸 𑀯𑀲𑀁 𑀕𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀭𑀜𑁆𑀜𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀲𑀜𑁆𑀚𑀬𑁄 𑀦𑀸𑀫 𑀉𑀬𑁆𑀬𑀸𑀦𑀧𑀸𑀮𑁄 𑀅𑀳𑁄𑀲𑀺. 𑀅𑀣𑁂𑀓𑁄 𑀯𑀸𑀢𑀫𑀺𑀕𑁄 𑀢𑀁 𑀉𑀬𑁆𑀬𑀸𑀦𑀁 𑀆𑀕𑀦𑁆𑀢𑁆𑀯𑀸 𑀲𑀜𑁆𑀚𑀬𑀁 𑀤𑀺𑀲𑁆𑀯𑀸 𑀧𑀮𑀸𑀬𑀢𑀺, 𑀲𑀜𑁆𑀚𑀬𑁄𑀧𑀺 𑀦 𑀢𑀁 𑀢𑀚𑁆𑀚𑁂𑀢𑁆𑀯𑀸 𑀦𑀻𑀳𑀭𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀘𑀭𑀢𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀉𑀬𑁆𑀬𑀸𑀦𑁂 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀧𑀼𑀧𑁆𑀨𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀭𑀜𑁆𑀜𑁄 𑀅𑀪𑀺𑀳𑀭𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀲𑀫𑁆𑀫 𑀉𑀬𑁆𑀬𑀸𑀦𑀧𑀸𑀮, 𑀉𑀬𑁆𑀬𑀸𑀦𑁂 𑀓𑀺𑀜𑁆𑀘𑀺 𑀅𑀘𑁆𑀙𑀭𑀺𑀬𑀁 𑀧𑀲𑁆𑀲𑀲𑀻’’𑀢𑀺? ‘‘𑀤𑁂𑀯, 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀏𑀓𑁄 𑀧𑀦 𑀯𑀸𑀢𑀫𑀺𑀕𑁄 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀘𑀭𑀢𑀺, 𑀏𑀢𑀁 𑀧𑀲𑁆𑀲𑀸𑀫𑀻’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀢𑀺 𑀧𑀦 𑀢𑀁 𑀕𑀳𑁂𑀢𑀼’’𑀦𑁆𑀢𑀺. ‘‘𑀣𑁄𑀓𑀁 𑀫𑀥𑀼𑀁 𑀮𑀪𑀦𑁆𑀢𑁄 𑀅𑀦𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑀫𑁆𑀧𑀺 𑀦𑀁 𑀆𑀦𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀲𑁆𑀲 𑀫𑀥𑀼𑀁 𑀤𑀸𑀧𑁂𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀸𑀢𑀫𑀺𑀕𑀲𑁆𑀲 𑀘𑀭𑀡𑀝𑁆𑀞𑀸𑀦𑁂 𑀢𑀺𑀡𑀸𑀦𑀺 𑀫𑀥𑀼𑀦𑀸 𑀫𑀓𑁆𑀔𑁂𑀢𑁆𑀯𑀸 𑀦𑀺𑀮𑀻𑀬𑀺. 𑀫𑀺𑀕𑁄 𑀆𑀕𑀦𑁆𑀢𑁆𑀯𑀸 𑀫𑀥𑀼𑀫𑀓𑁆𑀔𑀺𑀢𑀸𑀦𑀺 𑀢𑀺𑀡𑀸𑀦𑀺 𑀔𑀸𑀤𑀺𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀫𑁂𑀯 𑀆𑀕𑀘𑁆𑀙𑀢𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀢𑀲𑁆𑀲 𑀫𑀥𑀼𑀫𑀓𑁆𑀔𑀺𑀢𑀢𑀺𑀡𑁂𑀲𑀼 𑀧𑀮𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀓𑀢𑀺𑀧𑀸𑀳𑀁 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀦𑁆𑀢𑁄 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀳𑀢𑁆𑀣𑁂 𑀞𑀺𑀢𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀆𑀭𑀪𑀺.

𑀲𑁄 𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀬𑀸𑀯 𑀭𑀸𑀚𑀦𑀺𑀯𑁂𑀲𑀦𑀸 𑀯𑀻𑀣𑀺𑀁 𑀓𑀺𑀮𑀜𑁆𑀚𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀳𑀺𑀁 𑀢𑀳𑀺𑀁 𑀲𑀸𑀔𑀸𑀪𑀗𑁆𑀕𑀁 𑀧𑀸𑀢𑁂𑀢𑁆𑀯𑀸 𑀫𑀥𑀼𑀮𑀸𑀩𑀼𑀓𑀁 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀢𑀺𑀡𑀓𑀮𑀸𑀧𑀁 𑀉𑀧𑀓𑀘𑁆𑀙𑀓𑁂 𑀞𑀧𑁂𑀢𑁆𑀯𑀸 𑀫𑀥𑀼𑀫𑀓𑁆𑀔𑀺𑀢𑀸𑀦𑀺 𑀢𑀺𑀡𑀸𑀦𑀺 𑀫𑀺𑀕𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀯𑀺𑀓𑀺𑀭𑀦𑁆𑀢𑁄 𑀅𑀦𑁆𑀢𑁄𑀭𑀸𑀚𑀦𑀺𑀯𑁂𑀲𑀦𑀁𑀬𑁂𑀯 𑀅𑀕𑀫𑀸𑀲𑀺. 𑀫𑀺𑀕𑁂 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀁𑀲𑀼. 𑀫𑀺𑀕𑁄 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑀗𑁆𑀕𑀡𑁂 𑀆𑀥𑀸𑀯𑀢𑀺 𑀧𑀭𑀺𑀥𑀸𑀯𑀢𑀺. 𑀭𑀸𑀚𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀢𑀁 𑀓𑀫𑁆𑀧𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀯𑀸𑀢𑀫𑀺𑀕𑁄 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀤𑀺𑀝𑁆𑀞𑀝𑁆𑀞𑀸𑀦𑀁 𑀲𑀢𑁆𑀢𑀸𑀳𑀁 𑀦 𑀕𑀘𑁆𑀙𑀢𑀺, 𑀢𑀚𑁆𑀚𑀺𑀢𑀝𑁆𑀞𑀸𑀦𑀁 𑀬𑀸𑀯𑀚𑀻𑀯𑀁 𑀦 𑀕𑀘𑁆𑀙𑀢𑀺, 𑀲𑁄 𑀏𑀯𑀭𑀽𑀧𑁄 𑀕𑀳𑀦𑀦𑀺𑀲𑁆𑀲𑀺𑀢𑁄 𑀯𑀸𑀢𑀫𑀺𑀕𑁄 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀇𑀤𑀸𑀦𑀺 𑀏𑀯𑀭𑀽𑀧𑀁 𑀞𑀸𑀦𑀁 𑀆𑀕𑀢𑁄, 𑀦𑀢𑁆𑀣𑀺 𑀯𑀢 𑀪𑁄 𑀮𑁄𑀓𑁂 𑀭𑀲𑀢𑀡𑁆𑀳𑀸𑀬 𑀧𑀸𑀧𑀢𑀭𑀁 𑀦𑀸𑀫𑀸’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀥𑀫𑁆𑀫𑀤𑁂𑀲𑀦𑀁 𑀧𑀝𑁆𑀞𑀧𑁂𑀲𑀺 𑁋

𑁧𑁪. ‘‘𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄, 𑀆𑀯𑀸𑀲𑁂𑀳𑀺𑀯 𑀲𑀦𑁆𑀣𑀯𑁂𑀳𑀺 𑀯𑀸;

𑀯𑀸𑀢𑀫𑀺𑀕𑀁 𑀕𑀳𑀦𑀦𑀺𑀲𑁆𑀲𑀺𑀢𑀁, 𑀯𑀲𑀫𑀸𑀦𑁂𑀲𑀺 𑀭𑀲𑁂𑀳𑀺 𑀲𑀜𑁆𑀚𑀬𑁄’’𑀢𑀺.

𑀢𑀢𑁆𑀣 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀭𑀲𑁂𑀳𑀻𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀫𑀥𑀼𑀭𑀫𑁆𑀩𑀺𑀮𑀸𑀤𑀻𑀳𑀺. 𑀧𑀸𑀧𑀺𑀬𑁄𑀢𑀺 𑀧𑀸𑀧𑀢𑀭𑁄. 𑀆𑀯𑀸𑀲𑁂𑀳𑀺𑀯 𑀲𑀦𑁆𑀣𑀯𑁂𑀳𑀺 𑀯𑀸𑀢𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀲𑀼 𑀳𑀺 𑀆𑀯𑀸𑀲𑁂𑀲𑀼𑀧𑀺 𑀫𑀺𑀢𑁆𑀢𑀲𑀦𑁆𑀣𑀯𑁂𑀲𑀼𑀧𑀺 𑀙𑀦𑁆𑀤𑀭𑀸𑀕𑁄 𑀧𑀸𑀧𑀓𑁄𑀯, 𑀢𑁂𑀳𑀺 𑀧𑀦 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂𑀳𑀺 𑀆𑀯𑀸𑀲𑁂𑀳𑀺 𑀯𑀸 𑀫𑀺𑀢𑁆𑀢𑀲𑀦𑁆𑀣𑀯𑁂𑀳𑀺 𑀯𑀸 𑀲𑀢𑀕𑀼𑀡𑁂𑀦 𑀘 𑀲𑀳𑀲𑁆𑀲𑀕𑀼𑀡𑁂𑀦 𑀘 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀘 𑀥𑀼𑀯𑀧𑀝𑀺𑀲𑁂𑀯𑀦𑀝𑁆𑀞𑁂𑀦 𑀆𑀳𑀸𑀭𑀁 𑀯𑀺𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀸𑀮𑀦𑀸𑀬 𑀅𑀪𑀸𑀯𑁂𑀦 𑀘 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀭𑀲𑀸𑀯 𑀧𑀸𑀧𑀢𑀭𑀸𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀦𑀼𑀲𑁆𑀲𑀯𑀸𑀕𑀢𑀁 𑀯𑀺𑀬 𑀇𑀫𑀫𑀢𑁆𑀣𑀁 𑀓𑀢𑁆𑀯𑀸 ‘‘𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄, 𑀆𑀯𑀸𑀲𑁂𑀳𑀺𑀯 𑀲𑀦𑁆𑀣𑀯𑁂𑀳𑀺 𑀯𑀸’’𑀢𑀺 𑀆𑀳. 𑀇𑀤𑀸𑀦𑀺 𑀢𑁂𑀲𑀁 𑀧𑀸𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀸𑀢𑀫𑀺𑀕’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀳𑀦𑀦𑀺𑀲𑁆𑀲𑀺𑀢𑀦𑁆𑀢𑀺 𑀕𑀳𑀦𑀝𑁆𑀞𑀸𑀦𑀦𑀺𑀲𑁆𑀲𑀺𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀲𑁆𑀲𑀣 𑀭𑀲𑀸𑀦𑀁 𑀧𑀸𑀧𑀺𑀬𑀪𑀸𑀯𑀁, 𑀇𑀤𑀁 𑀦𑀸𑀫 𑀅𑀭𑀜𑁆𑀜𑀸𑀬𑀢𑀦𑁂 𑀕𑀳𑀦𑀦𑀺𑀲𑁆𑀲𑀺𑀢𑀁 𑀯𑀸𑀢𑀫𑀺𑀕𑀁 𑀲𑀜𑁆𑀚𑀬𑁄 𑀉𑀬𑁆𑀬𑀸𑀦𑀧𑀸𑀮𑁄 𑀫𑀥𑀼𑀭𑀲𑁂𑀳𑀺 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀲𑀺, 𑀲𑀩𑁆𑀩𑀣𑀸𑀧𑀺 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂𑀳𑀺 𑀭𑀲𑁂𑀳𑀺 𑀦𑀸𑀫 𑀅𑀜𑁆𑀜𑀁 𑀧𑀸𑀧𑀢𑀭𑀁 𑀮𑀸𑀫𑀓𑀢𑀭𑀁 𑀦𑀢𑁆𑀣𑀻𑀢𑀺 𑀭𑀲𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀓𑀣𑁂𑀲𑀺. 𑀓𑀣𑁂𑀢𑁆𑀯𑀸 𑀘 𑀧𑀦 𑀢𑀁 𑀫𑀺𑀕𑀁 𑀅𑀭𑀜𑁆𑀜𑀫𑁂𑀯 𑀧𑁂𑀲𑁂𑀲𑀺.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸 𑀯𑀡𑁆𑀡𑀤𑀸𑀲𑀻 𑀇𑀤𑀸𑀦𑁂𑀯 𑀏𑀢𑀁 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. ‘‘𑀢𑀤𑀸 𑀲𑀜𑁆𑀚𑀬𑁄 𑀅𑀬𑀁 𑀯𑀡𑁆𑀡𑀤𑀸𑀲𑀻 𑀅𑀳𑁄𑀲𑀺, 𑀯𑀸𑀢𑀫𑀺𑀕𑁄 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑁄, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀢𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁫] 𑁫. 𑀔𑀭𑀸𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀝𑁆𑀞𑀓𑁆𑀔𑀼𑀭𑀁 𑀔𑀭𑀸𑀤𑀺𑀬𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄 𑀑𑀯𑀸𑀤𑀁 𑀦 𑀕𑀡𑁆𑀳𑀸𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄 𑀑𑀯𑀸𑀤𑀁 𑀦 𑀕𑀡𑁆𑀳𑀸𑀲𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀤𑀼𑀩𑁆𑀩𑀘𑀢𑀸𑀬 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀲𑁂𑀦 𑀩𑀤𑁆𑀥𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑁄 𑀳𑀼𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑀲𑁆𑀲 𑀪𑀕𑀺𑀦𑀺𑀫𑀺𑀕𑀻 𑀧𑀼𑀢𑁆𑀢𑀓𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀪𑀸𑀢𑀺𑀓, 𑀅𑀬𑀁 𑀢𑁂 𑀪𑀸𑀕𑀺𑀦𑁂𑀬𑁆𑀬𑁄, 𑀏𑀢𑀁 𑀫𑀺𑀕𑀫𑀸𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀳𑀻’’𑀢𑀺 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑁄 𑀢𑀁 𑀪𑀸𑀕𑀺𑀦𑁂𑀬𑁆𑀬𑀁 ‘‘𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀆𑀕𑀦𑁆𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀯𑀼𑀢𑁆𑀢𑀯𑁂𑀮𑀸𑀬 𑀦𑀸𑀕𑀘𑁆𑀙𑀢𑀺. 𑀬𑀣𑀸 𑀘 𑀏𑀓𑀤𑀺𑀯𑀲𑀁, 𑀏𑀯𑀁 𑀲𑀢𑁆𑀢 𑀤𑀺𑀯𑀲𑁂 𑀲𑀢𑁆𑀢𑁄𑀯𑀸𑀤𑁂 𑀅𑀢𑀺𑀓𑁆𑀓𑀦𑁆𑀢𑁄 𑀲𑁄 𑀫𑀺𑀕𑀫𑀸𑀬𑀁 𑀅𑀦𑀼𑀕𑁆𑀕𑀡𑁆𑀳𑀺𑀢𑁆𑀯𑀸𑀯 𑀯𑀺𑀘𑀭𑀦𑁆𑀢𑁄 𑀧𑀸𑀲𑁂 𑀩𑀚𑁆𑀛𑀺. 𑀫𑀸𑀢𑀸𑀧𑀺𑀲𑁆𑀲 𑀪𑀸𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀢𑁂, 𑀪𑀸𑀢𑀺𑀓, 𑀪𑀸𑀕𑀺𑀦𑁂𑀬𑁆𑀬𑁄 𑀫𑀺𑀕𑀫𑀸𑀬𑀁 𑀉𑀕𑁆𑀕𑀡𑁆𑀳𑀸𑀧𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 𑀘 ‘‘𑀢𑀲𑁆𑀲 𑀅𑀦𑁄𑀯𑀸𑀤𑀓𑀲𑁆𑀲 𑀫𑀸 𑀘𑀺𑀦𑁆𑀢𑀬𑀺, 𑀦 𑀢𑁂 𑀧𑀼𑀢𑁆𑀢𑁂𑀦 𑀫𑀺𑀕𑀫𑀸𑀬𑀸 𑀉𑀕𑁆𑀕𑀳𑀺𑀢𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺𑀧𑀺 𑀢𑀁 𑀅𑀦𑁄𑀯𑀤𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁫. ‘‘𑀅𑀝𑁆𑀞𑀓𑁆𑀔𑀼𑀭𑀁 𑀔𑀭𑀸𑀤𑀺𑀬𑁂, 𑀫𑀺𑀕𑀁 𑀯𑀗𑁆𑀓𑀸𑀢𑀺𑀯𑀗𑁆𑀓𑀺𑀦𑀁;

𑀲𑀢𑁆𑀢𑀳𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁, 𑀦 𑀦𑀁 𑀑𑀯𑀤𑀺𑀢𑀼𑀲𑁆𑀲𑀳𑁂’’𑀢𑀺.

𑀢𑀢𑁆𑀣 𑀅𑀝𑁆𑀞𑀓𑁆𑀔𑀼𑀭𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀅𑀝𑁆𑀞𑀓𑁆𑀔𑀼𑀭𑀁. 𑀔𑀭𑀸𑀤𑀺𑀬𑁂𑀢𑀺 𑀢𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀫𑀺𑀕𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀁. 𑀯𑀗𑁆𑀓𑀸𑀢𑀺𑀯𑀗𑁆𑀓𑀺𑀦𑀦𑁆𑀢𑀺 𑀫𑀽𑀮𑁂 𑀯𑀗𑁆𑀓𑀸𑀦𑀺, 𑀅𑀕𑁆𑀕𑁂 𑀅𑀢𑀺𑀯𑀗𑁆𑀓𑀸𑀦𑀻𑀢𑀺 𑀯𑀗𑁆𑀓𑀸𑀢𑀺𑀯𑀗𑁆𑀓𑀸𑀦𑀺, 𑀢𑀸𑀤𑀺𑀲𑀸𑀦𑀺 𑀲𑀺𑀗𑁆𑀕𑀸𑀦𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀗𑁆𑀓𑀸𑀢𑀺𑀯𑀗𑁆𑀓𑀻, 𑀢𑀁 𑀯𑀗𑁆𑀓𑀸𑀢𑀺𑀯𑀗𑁆𑀓𑀺𑀦𑀁. 𑀲𑀢𑁆𑀢𑀳𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀲𑀢𑁆𑀢𑀳𑀺 𑀑𑀯𑀸𑀤𑀓𑀸𑀮𑁂𑀳𑀺 𑀑𑀯𑀸𑀤𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀦 𑀦𑀁 𑀑𑀯𑀤𑀺𑀢𑀼𑀲𑁆𑀲𑀳𑁂𑀢𑀺 𑀏𑀢𑀁 𑀤𑀼𑀩𑁆𑀩𑀘𑀫𑀺𑀕𑀁 𑀅𑀳𑀁 𑀑𑀯𑀤𑀺𑀢𑀼𑀁 𑀦 𑀉𑀲𑁆𑀲𑀳𑀸𑀫𑀺, 𑀏𑀢𑀲𑁆𑀲 𑀫𑁂 𑀑𑀯𑀸𑀤𑀢𑁆𑀣𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀦𑀁 𑀤𑀼𑀩𑁆𑀩𑀘𑀫𑀺𑀕𑀁 𑀧𑀸𑀲𑁂 𑀩𑀤𑁆𑀥𑀁 𑀮𑀼𑀤𑁆𑀤𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸𑀧𑀺 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄, 𑀧𑀼𑀩𑁆𑀩𑁂𑀧𑀺 𑀤𑀼𑀩𑁆𑀩𑀘𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. ‘‘𑀢𑀤𑀸 𑀪𑀸𑀕𑀺𑀦𑁂𑀬𑁆𑀬𑁄 𑀫𑀺𑀕𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀪𑀕𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀑𑀯𑀸𑀤𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀔𑀭𑀸𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁬] 𑁬. 𑀢𑀺𑀧𑀮𑁆𑀮𑀢𑁆𑀣𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀬𑀁 𑀩𑀤𑀭𑀺𑀓𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀺𑀓𑁆𑀔𑀸𑀓𑀸𑀫𑀁 𑀭𑀸𑀳𑀼𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀲𑀢𑁆𑀣𑀭𑀺 𑀆𑀴𑀯𑀺𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁂 𑀩𑀳𑀽 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀯𑀺𑀳𑀸𑀭𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺, 𑀤𑀺𑀯𑀸 𑀥𑀫𑁆𑀫𑀲𑁆𑀲𑀯𑀦𑀁 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀧𑀦 𑀓𑀸𑀮𑁂 𑀉𑀧𑀸𑀲𑀺𑀓𑀸𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀦 𑀕𑀘𑁆𑀙𑀺𑀁𑀲𑀼, 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀸𑀲𑀓𑀸 𑀘 𑀅𑀳𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀚𑀸𑀢𑀁. 𑀥𑀫𑁆𑀫𑀲𑁆𑀲𑀯𑀦𑀧𑀭𑀺𑀬𑁄𑀲𑀸𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺. 𑀤𑀳𑀭𑀸 𑀲𑀸𑀫𑀡𑁂𑀭𑀸 𑀘 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀬𑀦𑁆𑀢𑀺. 𑀢𑁂𑀲𑀼 𑀦𑀺𑀤𑁆𑀤𑀁 𑀉𑀧𑀕𑀢𑁂𑀲𑀼 𑀏𑀓𑀘𑁆𑀘𑁂 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀸 𑀓𑀸𑀓𑀘𑁆𑀙𑀫𑀸𑀦𑀸 𑀤𑀦𑁆𑀢𑁂 𑀔𑀸𑀤𑀦𑁆𑀢𑀸 𑀦𑀺𑀧𑀚𑁆𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀫𑀼𑀳𑀼𑀢𑁆𑀢𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁪𑁯) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀅𑀕𑀫𑀸𑀲𑀺.

𑀢𑀢𑁆𑀣 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀭𑀸𑀳𑀼𑀮, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀇𑀤𑀸𑀦𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑀸𑀳𑀻’’𑀢𑀺. 𑀧𑀼𑀩𑁆𑀩𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑀺 𑀘 𑀕𑀸𑀭𑀯𑀁 𑀢𑀲𑁆𑀲 𑀘𑀸𑀬𑀲𑁆𑀫𑀢𑁄 𑀲𑀺𑀓𑁆𑀔𑀸𑀓𑀸𑀫𑀢𑀁 𑀧𑀝𑀺𑀘𑁆𑀘 𑀢𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀢𑀁 𑀅𑀢𑀺𑀯𑀺𑀬 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀔𑀼𑀤𑁆𑀤𑀓𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀲𑁆𑀲𑀻𑀲𑀓𑀓𑀭𑀡𑀢𑁆𑀣𑀸𑀬 𑀘𑀻𑀯𑀭𑀁 𑀤𑁂𑀦𑁆𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀲𑀺𑀓𑁆𑀔𑀸𑀧𑀤𑀪𑀬𑁂𑀦 𑀯𑀲𑀦𑀝𑁆𑀞𑀸𑀦𑀫𑁆𑀧𑀺 𑀦 𑀅𑀤𑀁𑀲𑀼. 𑀭𑀸𑀳𑀼𑀮𑀪𑀤𑁆𑀤𑁄𑀧𑀺 ‘‘𑀧𑀺𑀢𑀸 𑀫𑁂’’𑀢𑀺 𑀤𑀲𑀩𑀮𑀲𑁆𑀲 𑀯𑀸, ‘‘𑀉𑀧𑀚𑁆𑀛𑀸𑀬𑁄 𑀫𑁂’’𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀯𑀸, ‘‘𑀆𑀘𑀭𑀺𑀬𑁄 𑀫𑁂’’𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀯𑀸, ‘‘𑀘𑀽𑀴𑀧𑀺𑀢𑀸 𑀫𑁂’’𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀯𑀴𑀜𑁆𑀚𑀦𑀯𑀘𑁆𑀘𑀓𑀼𑀝𑀺𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀧𑀯𑀺𑀲𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀯𑀴𑀜𑁆𑀚𑀦𑀓𑀼𑀝𑀺𑀬𑀁 𑀤𑁆𑀯𑀸𑀭𑀁 𑀲𑀼𑀧𑀺𑀳𑀺𑀢𑀁 𑀳𑁄𑀢𑀺, 𑀕𑀦𑁆𑀥𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀺, 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀑𑀲𑀸𑀭𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀲𑀩𑁆𑀩𑀭𑀢𑁆𑀢𑀺𑀁 𑀤𑀻𑀧𑁄 𑀛𑀸𑀬𑀢𑀺. 𑀭𑀸𑀳𑀼𑀮𑀪𑀤𑁆𑀤𑁄 𑀧𑀦 𑀦 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀘𑁆𑀘 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄, 𑀪𑀺𑀓𑁆𑀔𑀽𑀳𑀺 𑀧𑀦 ‘‘𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑀸𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀑𑀯𑀸𑀤𑀕𑀸𑀭𑀯𑁂𑀦 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄. 𑀅𑀦𑁆𑀢𑀭𑀦𑁆𑀢𑀭𑀸 𑀳𑀺 𑀪𑀺𑀓𑁆𑀔𑀽 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀸𑀬 𑀫𑀼𑀝𑁆𑀞𑀺𑀲𑀫𑁆𑀫𑀚𑁆𑀚𑀦𑀺𑀁 𑀯𑀸 𑀓𑀘𑀯𑀭𑀙𑀟𑁆𑀟𑀦𑀓𑀁 𑀯𑀸 𑀩𑀳𑀺 𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀆𑀕𑀢𑁂 ‘‘𑀆𑀯𑀼𑀲𑁄, 𑀇𑀫𑀁 𑀓𑁂𑀦 𑀙𑀟𑁆𑀟𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀓𑁂𑀳𑀺𑀘𑀺 ‘‘𑀭𑀸𑀳𑀼𑀮𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀢𑁄’’𑀢𑀺 𑀯𑀼𑀢𑁆𑀢𑁂 𑀲𑁄 𑀆𑀬𑀲𑁆𑀫𑀸 ‘‘𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀚𑀸𑀦𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 𑀢𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 ‘‘𑀔𑀫𑀣 𑀫𑁂, 𑀪𑀦𑁆𑀢𑁂’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀫𑁂𑀲 𑀲𑀺𑀓𑁆𑀔𑀸𑀓𑀸𑀫𑁄.

𑀲𑁄 𑀢𑀁 𑀲𑀺𑀓𑁆𑀔𑀸𑀓𑀸𑀫𑀢𑀁𑀬𑁂𑀯 𑀧𑀝𑀺𑀘𑁆𑀘 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄. 𑀅𑀣 𑀲𑀢𑁆𑀣𑀸 𑀧𑀼𑀭𑁂𑀅𑀭𑀼𑀡𑀁𑀬𑁂𑀯 𑀯𑀘𑁆𑀘𑀓𑀼𑀝𑀺𑀤𑁆𑀯𑀸𑀭𑁂 𑀞𑀢𑁆𑀯𑀸 𑀉𑀓𑁆𑀓𑀸𑀲𑀺, 𑀲𑁄𑀧𑀸𑀬𑀲𑁆𑀫𑀸 𑀉𑀓𑁆𑀓𑀸𑀲𑀺. ‘‘𑀓𑁄 𑀏𑀲𑁄’’𑀢𑀺? ‘‘𑀅𑀳𑀁 𑀭𑀸𑀳𑀼𑀮𑁄’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀦𑁆𑀤𑀺. ‘‘𑀓𑀲𑁆𑀫𑀸 𑀢𑁆𑀯𑀁 𑀭𑀸𑀳𑀼𑀮 𑀇𑀥 𑀦𑀺𑀧𑀦𑁆𑀦𑁄𑀲𑀻’’𑀢𑀺? ‘‘𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄’’. ‘‘𑀧𑀼𑀩𑁆𑀩𑁂 𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀫𑀫 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺𑀪𑀬𑁂𑀦 𑀯𑀲𑀦𑀝𑁆𑀞𑀸𑀦𑀁 𑀦 𑀤𑁂𑀦𑁆𑀢𑀺, 𑀲𑁆𑀯𑀸𑀳𑀁 ‘𑀇𑀤𑀁 𑀅𑀜𑁆𑀜𑁂𑀲𑀁 𑀅𑀲𑀗𑁆𑀖𑀝𑁆𑀝𑀦𑀝𑁆𑀞𑀸𑀦’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀥 𑀦𑀺𑀧𑀦𑁆𑀦𑁄𑀲𑁆𑀫𑀻𑀢𑀺. 𑀅𑀣 𑀪𑀕𑀯𑀢𑁄 ‘‘𑀭𑀸𑀳𑀼𑀮𑀁 𑀢𑀸𑀯 𑀪𑀺𑀓𑁆𑀔𑀽 𑀏𑀯𑀁 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀅𑀜𑁆𑀜𑁂 𑀓𑀼𑀮𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺.

𑀅𑀣 𑀪𑀕𑀯𑀸 𑀧𑀸𑀢𑁄𑀯 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀼𑀘𑁆𑀙𑀺 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀚𑁆𑀚 𑀓𑀢𑁆𑀣𑀘𑀺 𑀭𑀸𑀳𑀼𑀮𑀲𑁆𑀲 𑀯𑀼𑀢𑁆𑀣𑀪𑀸𑀯’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀲𑀸𑀭𑀺𑀧𑀼𑀢𑁆𑀢, 𑀅𑀚𑁆𑀚 𑀭𑀸𑀳𑀼𑀮𑁄 𑀯𑀘𑁆𑀘𑀓𑀼𑀝𑀺𑀬𑀁 𑀯𑀲𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀼𑀫𑁆𑀳𑁂 𑀭𑀸𑀳𑀼𑀮𑀁 𑀏𑀯𑀁 𑀧𑀭𑀺𑀘𑁆𑀘𑀚𑀦𑁆𑀢𑀸 𑀅𑀜𑁆𑀜𑁂 𑀓𑀼𑀮𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀣? 𑀏𑀯𑀜𑁆𑀳𑀺 𑀲𑀦𑁆𑀢𑁂 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸 𑀦 𑀧𑀢𑀺𑀝𑁆𑀞𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑀸𑀧𑁂𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀜𑀢𑁆𑀯𑀸 𑀩𑀳𑀺 𑀯𑀸𑀲𑁂𑀣𑀸’’𑀢𑀺 𑀇𑀫𑀁 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀧𑀼𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀭𑀸𑀳𑀼𑀮𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀺 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀬𑀸𑀯 𑀲𑀺𑀓𑁆𑀔𑀸𑀓𑀸𑀫𑁄 𑀯𑀢𑀸𑀬𑀁 𑀭𑀸𑀳𑀼𑀮𑁄, ‘𑀢𑀯 𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑀸𑀳𑀻’𑀢𑀺 𑀯𑀼𑀢𑁆𑀢𑁄 𑀦𑀸𑀫 ‘𑀅𑀳𑀁 𑀤𑀲𑀩𑀮𑀲𑁆𑀲 𑀧𑀼𑀢𑁆𑀢𑁄, 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀲𑁆𑀫𑀸 𑀢𑀼𑀫𑁆𑀳𑁂𑀬𑁂𑀯 𑀦𑀺𑀓𑁆𑀔𑀫𑀣𑀸’𑀢𑀺 𑀏𑀓𑀁 𑀪𑀺𑀓𑁆𑀔𑀼𑀫𑁆𑀧𑀺 𑀅𑀧𑁆𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀯𑀘𑁆𑀘𑀓𑀼𑀝𑀺𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀻’’𑀢𑀺. 𑀏𑀯𑀁 𑀢𑁂𑀲𑀼 𑀓𑀣𑀬𑀫𑀸𑀦𑁂𑀲𑀼 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀭𑀸𑀳𑀼𑀮𑀲𑁆𑀲 𑀲𑀺𑀓𑁆𑀔𑀸𑀓𑀸𑀫𑀓𑀣𑀸𑀬, 𑀦 𑀅𑀜𑁆𑀜𑀸𑀬 𑀓𑀣𑀸𑀬𑀸’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀭𑀸𑀳𑀼𑀮𑁄 𑀇𑀤𑀸𑀦𑁂𑀯 𑀲𑀺𑀓𑁆𑀔𑀸𑀓𑀸𑀫𑁄, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀲𑀺𑀓𑁆𑀔𑀸𑀓𑀸𑀫𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀸𑀚𑀕𑀳𑁂 𑀏𑀓𑁄 𑀫𑀕𑀥𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑀁 𑀉𑀧𑀦𑁂𑀢𑁆𑀯𑀸 ‘‘𑀪𑀸𑀢𑀺𑀓, 𑀇𑀫𑀁 𑀢𑁂 𑀪𑀸𑀕𑀺𑀦𑁂𑀬𑁆𑀬𑀁 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀸𑀧𑁂𑀳𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢, 𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀆𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 𑀫𑀸𑀢𑀼𑀮𑁂𑀦 𑀯𑀼𑀢𑁆𑀢𑀯𑁂𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀸𑀲𑁂𑀦 𑀩𑀤𑁆𑀥𑁄 𑀩𑀤𑁆𑀥𑀭𑀯𑀁 𑀭𑀯𑀺, 𑀫𑀺𑀕𑀕𑀡𑁄 𑀧𑀮𑀸𑀬𑀺𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂 𑀧𑀸𑀲𑁂𑀦 𑀩𑀤𑁆𑀥𑁄’’𑀢𑀺 𑀢𑀲𑁆𑀲 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀺. 𑀲𑀸 𑀪𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀸𑀢𑀺𑀓, 𑀪𑀸𑀕𑀺𑀦𑁂𑀬𑁆𑀬𑁄 𑀢𑁂 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀸𑀧𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀢𑁆𑀯𑀁 𑀧𑀼𑀢𑁆𑀢𑀲𑁆𑀲 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀆𑀲𑀗𑁆𑀓𑀺, 𑀲𑀼𑀕𑁆𑀕𑀳𑀺𑀢𑀸 𑀢𑁂𑀦 𑀫𑀺𑀕𑀫𑀸𑀬𑀸, 𑀇𑀤𑀸𑀦𑀺 𑀢𑀁 𑀳𑀸𑀲𑀬𑀫𑀸𑀦𑁄 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁬. ‘‘𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣𑀫𑀦𑁂𑀓𑀫𑀸𑀬𑀁, 𑀅𑀝𑁆𑀞𑀓𑁆𑀔𑀼𑀭𑀁 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀺𑀁;

𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀲𑁆𑀲𑀲𑀦𑁆𑀢𑁄, 𑀙𑀳𑀺 𑀓𑀮𑀸𑀳𑀺𑀢𑀺𑀪𑁄𑀢𑀺 𑀪𑀸𑀕𑀺𑀦𑁂𑀬𑁆𑀬𑁄’’𑀢𑀺.

𑀢𑀢𑁆𑀣 𑀫𑀺𑀕𑀦𑁆𑀢𑀺 𑀪𑀸𑀕𑀺𑀦𑁂𑀬𑁆𑀬𑀫𑀺𑀕𑀁. 𑀢𑀺𑀧𑀮𑁆𑀮𑀢𑁆𑀣𑀦𑁆𑀢𑀺 𑀧𑀮𑁆𑀮𑀢𑁆𑀣𑀁 𑀯𑀼𑀘𑁆𑀘𑀢𑀺 𑀲𑀬𑀦𑀁, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀉𑀚𑀼𑀓𑀫𑁂𑀯 𑀘 𑀦𑀺𑀧𑀦𑁆𑀦𑀓𑀯𑀲𑁂𑀦𑀸𑀢𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀮𑁆𑀮𑀢𑁆𑀣𑀁 𑀅𑀲𑁆𑀲, 𑀢𑀻𑀡𑀺 𑀯𑀸 𑀧𑀮𑁆𑀮𑀢𑁆𑀣𑀸𑀦𑀺 𑀅𑀲𑁆𑀲𑀸𑀢𑀺 𑀢𑀺𑀧𑀮𑁆𑀮𑀢𑁆𑀣𑁄, 𑀢𑀁 𑀢𑀺𑀧𑀮𑁆𑀮𑀢𑁆𑀣𑀁. 𑀅𑀦𑁂𑀓𑀫𑀸𑀬𑀦𑁆𑀢𑀺 𑀩𑀳𑀼𑀫𑀸𑀬𑀁 𑀩𑀳𑀼𑀯𑀜𑁆𑀘𑀦𑀁. 𑀅𑀝𑁆𑀞𑀓𑁆𑀔𑀼𑀭𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀅𑀝𑁆𑀞𑀳𑀺 𑀔𑀼𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀺𑀦𑁆𑀢𑀺 𑀧𑀼𑀭𑀺𑀫𑀬𑀸𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀅𑀭𑀜𑁆𑀜𑀢𑁄 𑀆𑀕𑀫𑁆𑀫 𑀧𑀸𑀦𑀻𑀬𑀲𑁆𑀲 𑀧𑀺𑀯𑀦𑀢𑁄 𑀅𑀟𑁆𑀠𑀭𑀢𑁆𑀢𑁂 𑀆𑀧𑀁 𑀧𑀺𑀯𑀢𑀻𑀢𑀺 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀻. 𑀢𑀁 𑀅𑀟𑁆𑀠𑀭𑀢𑁆𑀢𑁂 𑀅𑀧𑀸𑀬𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀫 𑀪𑀸𑀕𑀺𑀦𑁂𑀬𑁆𑀬𑀁 𑀫𑀺𑀕𑀁 𑀅𑀳𑀁 𑀲𑀸𑀥𑀼𑀓𑀁 𑀫𑀺𑀕𑀫𑀸𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁. 𑀓𑀣𑀁? 𑀬𑀣𑀸 𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀲𑁆𑀲𑀲𑀦𑁆𑀢𑁄, 𑀙𑀳𑀺 𑀓𑀮𑀸𑀳𑀺𑀢𑀺𑀪𑁄𑀢𑀺 𑀪𑀸𑀕𑀺𑀦𑁂𑀬𑁆𑀬𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀳𑀜𑁆𑀳𑀺 𑀢𑀯 𑀧𑀼𑀢𑁆𑀢𑀁 𑀢𑀣𑀸 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁, 𑀬𑀣𑀸 𑀏𑀓𑀲𑁆𑀫𑀺𑀁 𑀉𑀧𑀭𑀺𑀫𑀦𑀸𑀲𑀺𑀓𑀸𑀲𑁄𑀢𑁂 𑀯𑀸𑀢𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀧𑀣𑀯𑀺𑀬𑀸 𑀅𑀮𑁆𑀮𑀻𑀦𑁂𑀦 𑀏𑀓𑁂𑀦 𑀳𑁂𑀝𑁆𑀞𑀺𑀫𑀲𑁄𑀢𑁂𑀦 𑀢𑀢𑁆𑀣𑁂𑀯 𑀙𑀫𑀸𑀬𑀁 𑀅𑀲𑁆𑀲𑀲𑀦𑁆𑀢𑁄 𑀙𑀳𑀺 𑀓𑀮𑀸𑀳𑀺 𑀮𑀼𑀤𑁆𑀤𑀓𑀁 𑀅𑀢𑀺𑀪𑁄𑀢𑀺, 𑀙𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀅𑀚𑁆𑀛𑁄𑀢𑁆𑀣𑀭𑀢𑀺 𑀯𑀜𑁆𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀫𑀸𑀳𑀺 𑀙𑀳𑀺? 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀸𑀬, 𑀔𑀼𑀭𑁂𑀳𑀺 𑀢𑀺𑀡𑀧𑀁𑀲𑀼𑀔𑀡𑀦𑁂𑀦, 𑀚𑀺𑀯𑁆𑀳𑀸𑀦𑀺𑀦𑁆𑀦𑀸𑀫𑀦𑁂𑀦 𑀉𑀤𑀭𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀓𑀭𑀡𑁂𑀦, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀯𑀺𑀲𑁆𑀲𑀚𑁆𑀚𑀦𑁂𑀦, 𑀯𑀸𑀢𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀦𑀸𑀢𑀺.

𑀅𑀧𑀭𑁄 𑀦𑀬𑁄 𑁋 𑀧𑀸𑀤𑁂𑀦 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸 𑀅𑀪𑀺𑀫𑀼𑀔𑀸𑀓𑀟𑁆𑀠𑀦𑁂𑀦, 𑀧𑀝𑀺𑀧𑀡𑀸𑀫𑀦𑁂𑀦, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀜𑁆𑀘𑀭𑀡𑁂𑀦, 𑀉𑀤𑀭𑀁 𑀉𑀤𑁆𑀥𑀁 𑀧𑀓𑁆𑀔𑀺𑀧𑀦𑁂𑀦, 𑀅𑀥𑁄 𑀅𑀯𑀓𑁆𑀔𑀺𑀧𑀦𑁂𑀦𑀸𑀢𑀺 𑀇𑀫𑀸𑀳𑀺 𑀙𑀳𑀺 𑀓𑀮𑀸𑀳𑀺 𑀬𑀣𑀸 𑀅𑀢𑀺𑀪𑁄𑀢𑀺, ‘‘𑀫𑀢𑁄 𑀅𑀬’’𑀦𑁆𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀜𑁆𑀘𑁂𑀢𑀺, 𑀏𑀯𑀁 𑀢𑀁 𑀫𑀺𑀕𑀫𑀸𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀦𑁆𑀢𑀺 𑀤𑀻𑀧𑁂𑀢𑀺.

𑀅𑀧𑀭𑁄 𑀦𑀬𑁄 𑁋 𑀢𑀣𑀸 𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁, 𑀬𑀣𑀸 𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀲𑁆𑀲𑀲𑀦𑁆𑀢𑁄 𑀙𑀳𑀺 𑀓𑀮𑀸𑀳𑀺𑀢𑀺 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑀤𑀲𑁆𑀲𑀺𑀢𑁂𑀳𑀺 𑀙𑀳𑀺 𑀓𑀸𑀭𑀡𑁂𑀳𑀺 𑀓𑀮𑀸𑀳𑀺𑀢𑀺 𑀓𑀮𑀸𑀬𑀺𑀲𑁆𑀲𑀢𑀺, 𑀮𑀼𑀤𑁆𑀤𑀁 𑀯𑀜𑁆𑀘𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀪𑁄𑀢𑀻𑀢𑀺 𑀪𑀕𑀺𑀦𑀺𑀁 𑀆𑀮𑀧𑀢𑀺. 𑀪𑀸𑀕𑀺𑀦𑁂𑀬𑁆𑀬𑁄𑀢𑀺 𑀏𑀯𑀁 𑀙𑀳𑀺 𑀓𑀸𑀭𑀡𑁂𑀳𑀺 𑀯𑀜𑁆𑀘𑀦𑀓𑀁 𑀪𑀸𑀕𑀺𑀦𑁂𑀬𑁆𑀬𑀁 𑀦𑀺𑀤𑁆𑀤𑀺𑀲𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀫𑀺𑀕𑀫𑀸𑀬𑀸𑀬 𑀲𑀸𑀥𑀼𑀓𑀁 𑀉𑀕𑁆𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀺𑀦𑀺𑀁 𑀲𑀫𑀲𑁆𑀲𑀸𑀲𑁂𑀢𑀺.

𑀲𑁄𑀧𑀺 𑀫𑀺𑀕𑀧𑁄𑀢𑀓𑁄 𑀧𑀸𑀲𑁂 𑀩𑀤𑁆𑀥𑁄 𑀅𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸𑀬𑁂𑀯 𑀪𑀽𑀫𑀺𑀬𑀁 𑀫𑀳𑀸𑀨𑀸𑀲𑀼𑀓𑀧𑀲𑁆𑀲𑁂𑀦 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀧𑀸𑀤𑀸𑀦𑀁 𑀆𑀲𑀦𑁆𑀦𑀝𑁆𑀞𑀸𑀦𑁂 𑀔𑀼𑀭𑁂𑀳𑁂𑀯 𑀧𑀳𑀭𑀺𑀢𑁆𑀯𑀸 𑀧𑀁𑀲𑀼𑀜𑁆𑀘 𑀢𑀺𑀡𑀸𑀦𑀺 𑀘 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀻𑀲𑀁 𑀧𑀸𑀢𑁂𑀢𑁆𑀯𑀸 𑀚𑀺𑀯𑁆𑀳𑀁 𑀦𑀺𑀦𑁆𑀦𑀸𑀫𑁂𑀢𑁆𑀯𑀸 𑀲𑀭𑀻𑀭𑀁 𑀔𑁂𑀴𑀓𑀺𑀮𑀺𑀦𑁆𑀦𑀁 𑀓𑀢𑁆𑀯𑀸 𑀯𑀸𑀢𑀕𑁆𑀕𑀳𑀡𑁂𑀦 𑀉𑀤𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀓𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸 𑀦𑀸𑀲𑀺𑀓𑀸𑀲𑁄𑀢𑁂𑀦 𑀯𑀸𑀢𑀁 𑀲𑀜𑁆𑀘𑀭𑀸𑀧𑁂𑀦𑁆𑀢𑁄 𑀉𑀧𑀭𑀺𑀫𑀦𑀸𑀲𑀺𑀓𑀸𑀲𑁄𑀢𑁂𑀦 𑀯𑀸𑀢𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀣𑀤𑁆𑀥𑀪𑀸𑀯𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀦𑀻𑀮𑀫𑀓𑁆𑀔𑀺𑀓𑀸𑀧𑀺 𑀦𑀁 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀸𑀓𑀸 𑀦𑀺𑀮𑀻𑀬𑀺𑀁𑀲𑀼. 𑀮𑀼𑀤𑁆𑀤𑁄 𑀆𑀕𑀦𑁆𑀢𑁆𑀯𑀸 𑀉𑀤𑀭𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 ‘‘𑀅𑀢𑀺𑀧𑀸𑀢𑁄𑀯 𑀩𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀧𑀽𑀢𑀺𑀓𑁄 𑀚𑀸𑀢𑁄’’𑀢𑀺 𑀢𑀲𑁆𑀲 𑀩𑀦𑁆𑀥𑀦𑀭𑀚𑁆𑀚𑀼𑀓𑀁 𑀫𑁄𑀘𑁂𑀢𑁆𑀯𑀸 ‘‘𑀏𑀢𑁆𑀣𑁂𑀯𑀤𑀸𑀦𑀺 𑀦𑀁 𑀉𑀓𑁆𑀓𑀦𑁆𑀢𑀺𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀲𑀸𑀔𑀸𑀧𑀮𑀸𑀲𑀁 𑀕𑀳𑁂𑀢𑀼𑀁 𑀆𑀭𑀤𑁆𑀥𑁄. 𑀫𑀺𑀕𑀧𑁄𑀢𑀓𑁄𑀧𑀺 𑀉𑀝𑁆𑀞𑀸𑀬 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀞𑀢𑁆𑀯𑀸 𑀓𑀸𑀬𑀁 𑀯𑀺𑀥𑀼𑀦𑀺𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀫𑀳𑀸𑀯𑀸𑀢𑁂𑀦 𑀙𑀺𑀦𑁆𑀦𑀯𑀮𑀸𑀳𑀓𑁄 𑀯𑀺𑀬 𑀯𑁂𑀕𑁂𑀦 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀭𑀸𑀳𑀼𑀮𑁄 𑀇𑀤𑀸𑀦𑁂𑀯 𑀲𑀺𑀓𑁆𑀔𑀸𑀓𑀸𑀫𑁄, 𑀧𑀼𑀩𑁆𑀩𑁂𑀧𑀺 𑀲𑀺𑀓𑁆𑀔𑀸𑀓𑀸𑀫𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀪𑀸𑀕𑀺𑀦𑁂𑀬𑁆𑀬𑀫𑀺𑀕𑀧𑁄𑀢𑀓𑁄 𑀭𑀸𑀳𑀼𑀮𑁄 𑀅𑀳𑁄𑀲𑀺, 𑀫𑀸𑀢𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀫𑀸𑀢𑀼𑀮𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀧𑀮𑁆𑀮𑀢𑁆𑀣𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁭] 𑁭. 𑀫𑀸𑀮𑀼𑀢𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀓𑁄𑀲𑀮𑀚𑀦𑀧𑀤𑁂 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑀦𑁆𑀢𑀺. 𑀏𑀓𑁄 𑀓𑀸𑀴𑀢𑁆𑀣𑁂𑀭𑁄 𑀦𑀸𑀫, 𑀏𑀓𑁄 𑀚𑀼𑀡𑁆𑀳𑀢𑁆𑀣𑁂𑀭𑁄 𑀦𑀸𑀫. 𑀅𑀣𑁂𑀓𑀤𑀺𑀯𑀲𑀁 𑀚𑀼𑀡𑁆𑀳𑁄 𑀓𑀸𑀴𑀁 𑀧𑀼𑀘𑁆𑀙𑀺 ‘‘𑀪𑀦𑁆𑀢𑁂 𑀓𑀸𑀴, 𑀲𑀻𑀢𑀁 𑀦𑀸𑀫 𑀓𑀲𑁆𑀫𑀺𑀁 𑀓𑀸𑀮𑁂 𑀳𑁄𑀢𑀻’’𑀢𑀺. 𑀲𑁄 ‘‘𑀓𑀸𑀴𑁂 𑀳𑁄𑀢𑀻’’𑀢𑀺 𑀆𑀳. 𑀅𑀣𑁂𑀓𑀤𑀺𑀯𑀲𑀁 𑀓𑀸𑀴𑁄 𑀚𑀼𑀡𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂 𑀚𑀼𑀡𑁆𑀳, 𑀲𑀻𑀢𑀁 𑀦𑀸𑀫 𑀓𑀲𑁆𑀫𑀺𑀁 𑀓𑀸𑀮𑁂 𑀳𑁄𑀢𑀻’’𑀢𑀺. 𑀲𑁄 ‘‘𑀚𑀼𑀡𑁆𑀳𑁂 𑀳𑁄𑀢𑀻’’𑀢𑀺 𑀆𑀳. 𑀢𑁂 𑀉𑀪𑁄𑀧𑀺 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀲𑀻𑀢𑀁 𑀦𑀸𑀫 𑀓𑀲𑁆𑀫𑀺𑀁 𑀓𑀸𑀮𑁂 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀼𑀩𑁆𑀩𑁂𑀧𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀲𑀺𑀁, 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀧𑀦 𑀦 𑀲𑀮𑁆𑀮𑀓𑁆𑀔𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀏𑀓𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀲𑀻𑀳𑁄 𑀘 𑀩𑁆𑀬𑀕𑁆𑀖𑁄 𑀘 𑀤𑁆𑀯𑁂 𑀲𑀳𑀸𑀬𑀸 𑀏𑀓𑀺𑀲𑁆𑀲𑀸𑀬𑁂𑀯 𑀕𑀼𑀳𑀸𑀬 𑀯𑀲𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀢𑀧𑀸𑀤𑁂 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑁂𑀲𑀁 𑀲𑀳𑀸𑀬𑀓𑀸𑀦𑀁 𑀲𑀻𑀢𑀁 𑀦𑀺𑀲𑁆𑀲𑀸𑀬 𑀯𑀺𑀯𑀸𑀤𑁄 𑀉𑀤𑀧𑀸𑀤𑀺. 𑀩𑁆𑀬𑀕𑁆𑀖𑁄 ‘‘𑀓𑀸𑀴𑁂𑀬𑁂𑀯 𑀲𑀻𑀢𑀁 𑀳𑁄𑀢𑀻’’𑀢𑀺 𑀆𑀳. 𑀲𑀻𑀳𑁄 ‘‘𑀚𑀼𑀡𑁆𑀳𑁂𑀬𑁂𑀯 𑀲𑀻𑀢𑀁 𑀳𑁄𑀢𑀻’’𑀢𑀺 𑀆𑀳. 𑀢𑁂 𑀉𑀪𑁄𑀧𑀺 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁭. ‘‘𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂, 𑀬𑀤𑀸 𑀯𑀸𑀬𑀢𑀺 𑀫𑀸𑀮𑀼𑀢𑁄;

𑀯𑀸𑀢𑀚𑀸𑀦𑀺 𑀳𑀺 𑀲𑀻𑀢𑀸𑀦𑀺, 𑀉𑀪𑁄𑀢𑁆𑀣𑀫𑀧𑀭𑀸𑀚𑀺𑀢𑀸’’𑀢𑀺.

𑀢𑀢𑁆𑀣 𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂𑀢𑀺 𑀓𑀸𑀴𑀧𑀓𑁆𑀔𑁂 𑀯𑀸 𑀚𑀼𑀡𑁆𑀳𑀧𑀓𑁆𑀔𑁂 𑀯𑀸. 𑀬𑀤𑀸 𑀯𑀸𑀬𑀢𑀺 𑀫𑀸𑀮𑀼𑀢𑁄𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁄 𑀯𑀸𑀢𑁄 𑀯𑀸𑀬𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀻𑀢𑀁 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀯𑀸𑀢𑀚𑀸𑀦𑀺 𑀳𑀺 𑀲𑀻𑀢𑀸𑀦𑀺, 𑀬𑀲𑁆𑀫𑀸 𑀯𑀸𑀢𑁂 𑀯𑀺𑀚𑁆𑀚𑀦𑁆𑀢𑁂𑀬𑁂𑀯 𑀲𑀻𑀢𑀸𑀦𑀺 𑀳𑁄𑀦𑁆𑀢𑀺, 𑀓𑀸𑀴𑀧𑀓𑁆𑀔𑁄 𑀯𑀸 𑀚𑀼𑀡𑁆𑀳𑀧𑀓𑁆𑀔𑁄 𑀯𑀸 𑀏𑀢𑁆𑀣 𑀅𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑁄𑀢𑁆𑀣𑀫𑀧𑀭𑀸𑀚𑀺𑀢𑀸𑀢𑀺 𑀉𑀪𑁄𑀧𑀺 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀧𑀜𑁆𑀳𑁂 𑀅𑀧𑀭𑀸𑀚𑀺𑀢𑀸𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀲𑀳𑀸𑀬𑀓𑁂 𑀲𑀜𑁆𑀜𑀸𑀧𑁂𑀲𑀺.

𑀲𑀢𑁆𑀣𑀸𑀧𑀺 ‘‘𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀅𑀬𑀁 𑀧𑀜𑁆𑀳𑁄 𑀓𑀣𑀺𑀢𑁄’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀤𑁆𑀯𑁂𑀧𑀺 𑀣𑁂𑀭𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀩𑁆𑀬𑀕𑁆𑀖𑁄 𑀓𑀸𑀴𑁄 𑀅𑀳𑁄𑀲𑀺, 𑀲𑀻𑀳𑁄 𑀚𑀼𑀡𑁆𑀳𑁄, 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀓𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀸𑀮𑀼𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁮] 𑁮. 𑀫𑀢𑀓𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀢𑀓𑀪𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀫𑀦𑀼𑀲𑁆𑀲𑀸 𑀩𑀳𑀽 𑀅𑀚𑁂𑀴𑀓𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀓𑀸𑀮𑀓𑀢𑁂 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀫𑀢𑀓𑀪𑀢𑁆𑀢𑀁 𑀦𑀸𑀫 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀢𑁂 𑀫𑀦𑀼𑀲𑁆𑀲𑁂 𑀢𑀣𑀸 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀩𑀳𑀽 𑀧𑀸𑀡𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀢𑀓𑀪𑀢𑁆𑀢𑀁 𑀦𑀸𑀫 𑀤𑁂𑀦𑁆𑀢𑀺. 𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀏𑀢𑁆𑀣 𑀯𑀼𑀟𑁆𑀠𑀻’’𑀢𑀺? 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, ‘𑀫𑀢𑀓𑀪𑀢𑁆𑀢𑀁 𑀤𑀲𑁆𑀲𑀸𑀫𑀸’𑀢𑀺 𑀓𑀢𑁂𑀧𑀺 𑀧𑀸𑀡𑀸𑀢𑀺𑀧𑀸𑀢𑁂 𑀓𑀸𑀘𑀺 𑀯𑀼𑀟𑁆𑀠𑀺 𑀦𑀸𑀫 𑀅𑀢𑁆𑀣𑀺, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀆𑀓𑀸𑀲𑁂 𑀦𑀺𑀲𑀚𑁆𑀚 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀢𑁆𑀣 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑁂 𑀏𑀢𑀁 𑀓𑀫𑁆𑀫𑀁 𑀚𑀳𑀸𑀧𑁂𑀲𑀼𑀁. 𑀇𑀤𑀸𑀦𑀺 𑀧𑀦 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀧𑀼𑀦 𑀧𑀸𑀢𑀼𑀪𑀽𑀢’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 ‘‘𑀫𑀢𑀓𑀪𑀢𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀏𑀴𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀳 𑁋 ‘‘𑀢𑀸𑀢𑀸, 𑀇𑀫𑀁 𑀏𑀴𑀓𑀁 𑀦𑀤𑀺𑀁 𑀦𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀓𑀡𑁆𑀞𑁂 𑀫𑀸𑀮𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀆𑀦𑁂𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀁 𑀆𑀤𑀸𑀬 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀞𑀧𑁂𑀲𑀼𑀁. 𑀲𑁄 𑀏𑀴𑀓𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀸 𑀦𑀸𑀫 𑀤𑀼𑀓𑁆𑀔𑀸 𑀅𑀚𑁆𑀚 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀫𑀢𑁆𑀢𑀺𑀓𑀸𑀖𑀝𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀫𑀳𑀸𑀳𑀲𑀺𑀢𑀁 𑀳𑀲𑀺𑀢𑁆𑀯𑀸 𑀧𑀼𑀦 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀁 𑀖𑀸𑀢𑁂𑀢𑁆𑀯𑀸 𑀫𑀬𑀸 𑀮𑀤𑁆𑀥𑀤𑀼𑀓𑁆𑀔𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑁄𑀤𑀺.

𑀅𑀣 𑀦𑀁 𑀢𑁂 𑀫𑀸𑀡𑀯𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀲𑀫𑁆𑀫 𑀏𑀴𑀓, 𑀢𑁆𑀯𑀁 𑀫𑀳𑀸𑀲𑀤𑁆𑀤𑁂𑀦 𑀳𑀲𑀺 𑀘𑁂𑀯 𑀭𑁄𑀤𑀺 𑀘, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀳𑀲𑀺, 𑀓𑁂𑀦 𑀓𑀸𑀭𑀡𑁂𑀦 𑀧𑀭𑁄𑀤𑀻’’𑀢𑀺? ‘‘𑀢𑀼𑀫𑁆𑀳𑁂 𑀫𑀁 𑀇𑀫𑀁 𑀓𑀸𑀭𑀡𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀼𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀇𑀤𑀁 𑀓𑀸𑀭𑀡𑀁 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀆𑀘𑀭𑀺𑀬𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀴𑀓𑀁 𑀧𑀼𑀘𑁆𑀙𑀺 ‘‘𑀓𑀲𑁆𑀫𑀸 𑀢𑁆𑀯𑀁 𑀏𑀴𑀓, 𑀳𑀲𑀺, 𑀓𑀲𑁆𑀫𑀸 𑀭𑁄𑀤𑀻’’𑀢𑀺? 𑀏𑀴𑀓𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑁂𑀲𑀺 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀩𑁆𑀩𑁂 𑀢𑀸𑀤𑀺𑀲𑁄𑀯 𑀫𑀦𑁆𑀢𑀚𑁆𑀛𑀸𑀬𑀓𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 ‘𑀫𑀢𑀓𑀪𑀢𑁆𑀢𑀁 𑀤𑀲𑁆𑀲𑀸𑀫𑀻’𑀢𑀺 𑀏𑀓𑀁 𑀏𑀴𑀓𑀁 𑀫𑀸𑀭𑁂𑀢𑁆𑀯𑀸 𑀫𑀢𑀓𑀪𑀢𑁆𑀢𑀁 𑀅𑀤𑀸𑀲𑀺𑀁, 𑀲𑁆𑀯𑀸𑀳𑀁 𑀏𑀓𑀲𑁆𑀲 𑀏𑀴𑀓𑀲𑁆𑀲 𑀖𑀸𑀢𑀺𑀢𑀢𑁆𑀢𑀸 𑀏𑀓𑁂𑀦𑀽𑀦𑁂𑀲𑀼 𑀧𑀜𑁆𑀘𑀲𑀼 𑀅𑀢𑁆𑀢𑀪𑀸𑀯𑀲𑀢𑁂𑀲𑀼 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀺𑀁, 𑀅𑀬𑀁 𑀫𑁂 𑀓𑁄𑀝𑀺𑀬𑀁 𑀞𑀺𑀢𑁄 𑀧𑀜𑁆𑀘𑀲𑀢𑀺𑀫𑁄 𑀅𑀢𑁆𑀢𑀪𑀸𑀯𑁄, 𑀲𑁆𑀯𑀸𑀳𑀁 ‘𑀅𑀚𑁆𑀚 𑀏𑀯𑀭𑀽𑀧𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀳𑀲𑀺𑀁. 𑀭𑁄𑀤𑀦𑁆𑀢𑁄 𑀧𑀦 ‘𑀅𑀳𑀁 𑀢𑀸𑀯 𑀏𑀓𑀁 𑀏𑀴𑀓𑀁 𑀫𑀸𑀭𑁂𑀢𑁆𑀯𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀲𑀻𑀲𑀘𑁆𑀙𑁂𑀤𑀤𑀼𑀓𑁆𑀔𑀁 𑀧𑀢𑁆𑀯𑀸 𑀅𑀚𑁆𑀚 𑀢𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀺, 𑀅𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀅𑀳𑀁 𑀯𑀺𑀬 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀲𑀻𑀲𑀘𑁆𑀙𑁂𑀤𑀤𑀼𑀓𑁆𑀔𑀁 𑀮𑀪𑀺𑀲𑁆𑀲𑀢𑀻’𑀢𑀺 𑀢𑀬𑀺 𑀓𑀸𑀭𑀼𑀜𑁆𑀜𑁂𑀦 𑀭𑁄𑀤𑀺’’𑀦𑁆𑀢𑀺. ‘‘𑀏𑀴𑀓, 𑀫𑀸 𑀪𑀸𑀬𑀺, 𑀦𑀸𑀳𑀁 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀯𑀤𑁂𑀲𑀺, 𑀢𑀬𑀺 𑀫𑀸𑀭𑁂𑀦𑁆𑀢𑁂𑀧𑀺 𑀅𑀫𑀸𑀭𑁂𑀦𑁆𑀢𑁂𑀧𑀺 𑀦 𑀲𑀓𑁆𑀓𑀸 𑀅𑀚𑁆𑀚 𑀫𑀬𑀸 𑀫𑀭𑀡𑀸 𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. ‘‘𑀏𑀴𑀓, 𑀫𑀸 𑀪𑀸𑀬𑀺, 𑀅𑀳𑀁 𑀢𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀢𑀬𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀫𑀢𑁆𑀢𑀓𑁄 𑀢𑀯 𑀆𑀭𑀓𑁆𑀔𑁄, 𑀫𑀬𑀸 𑀓𑀢𑀧𑀸𑀧𑀁 𑀧𑀦 𑀫𑀳𑀦𑁆𑀢𑀁 𑀩𑀮𑀯’’𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀏𑀴𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀇𑀫𑀁 𑀏𑀴𑀓𑀁 𑀓𑀲𑁆𑀲𑀘𑀺𑀧𑀺 𑀫𑀸𑀭𑁂𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀤𑀸𑀬 𑀏𑀴𑀓𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀘𑀭𑀺. 𑀏𑀴𑀓𑁄 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁄𑀯 𑀏𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀚𑀸𑀢𑀕𑀼𑀫𑁆𑀩𑁂 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀡𑁆𑀡𑀸𑀦𑀺 𑀔𑀸𑀤𑀺𑀢𑀼𑀁 𑀆𑀭𑀤𑁆𑀥𑁄. 𑀢𑀗𑁆𑀔𑀡𑀜𑁆𑀜𑁂𑀯 𑀢𑀲𑁆𑀫𑀺𑀁 𑀧𑀸𑀲𑀸𑀡𑀧𑀺𑀝𑁆𑀞𑁂 𑀅𑀲𑀦𑀺 𑀧𑀢𑀺, 𑀢𑀢𑁄 𑀏𑀓𑀸 𑀧𑀸𑀲𑀸𑀡𑀲𑀓𑀮𑀺𑀓𑀸 𑀙𑀺𑀚𑁆𑀚𑀺𑀢𑁆𑀯𑀸 𑀏𑀴𑀓𑀲𑁆𑀲 𑀧𑀲𑀸𑀭𑀺𑀢𑀕𑀻𑀯𑀸𑀬 𑀧𑀢𑀺𑀢𑁆𑀯𑀸 𑀲𑀻𑀲𑀁 𑀙𑀺𑀦𑁆𑀤𑀺, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑁂 𑀲𑀢𑁆𑀢𑀸 𑀏𑀯𑀁 𑀧𑀸𑀧𑀲𑁆𑀲 𑀨𑀮𑀁 𑀚𑀸𑀦𑀫𑀸𑀦𑀸 𑀅𑀧𑁆𑀧𑁂𑀯𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀁 𑀦 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁮. ‘‘𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄;

𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻’’𑀢𑀺.

𑀢𑀢𑁆𑀣 𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀇𑀫𑁂 𑀲𑀢𑁆𑀢𑀸 𑀏𑀯𑀁 𑀘𑁂 𑀚𑀸𑀦𑁂𑀬𑁆𑀬𑀼𑀁. 𑀓𑀣𑀁? 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄𑀢𑀺 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀺 𑀘 𑀚𑀸𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀲𑀗𑁆𑀔𑀸𑀢𑁄 𑀲𑀫𑁆𑀪𑀯𑁄 𑀘 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀧𑀺𑀬𑀯𑀺𑀧𑁆𑀧𑀬𑁄𑀕𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀻𑀦𑀁 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁆𑀢𑀸 ‘‘𑀤𑀼𑀓𑁆𑀔𑁄’’𑀢𑀺 𑀬𑀤𑀺 𑀚𑀸𑀦𑁂𑀬𑁆𑀬𑀼𑀁. 𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂𑀢𑀺 ‘‘𑀧𑀭𑀁 𑀯𑀥𑀦𑁆𑀢𑁄 𑀚𑀸𑀢𑀺𑀲𑀫𑁆𑀪𑀯𑁂 𑀯𑀥𑀁 𑀮𑀪𑀢𑀺, 𑀧𑀻𑀴𑁂𑀦𑁆𑀢𑁄 𑀧𑀻𑀴𑀁 𑀮𑀪𑀢𑀻’’𑀢𑀺 𑀚𑀸𑀢𑀺𑀲𑀫𑁆𑀪𑀯𑀲𑁆𑀲 𑀤𑀼𑀓𑁆𑀔𑀯𑀢𑁆𑀣𑀼𑀢𑀸𑀬 𑀤𑀼𑀓𑁆𑀔𑀪𑀸𑀯𑀁 𑀚𑀸𑀦𑀦𑁆𑀢𑁄 𑀓𑁄𑀘𑀺 𑀧𑀸𑀡𑁄 𑀅𑀜𑁆𑀜𑀁 𑀧𑀸𑀡𑀺𑀦𑀁 𑀦 𑀳𑀜𑁆𑀜𑁂, 𑀲𑀢𑁆𑀢𑁄 𑀲𑀢𑁆𑀢𑀁 𑀦 𑀳𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀁𑀓𑀸𑀭𑀡𑀸? 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻𑀢𑀺, 𑀬𑀲𑁆𑀫𑀸 𑀲𑀸𑀳𑀢𑁆𑀣𑀺𑀓𑀸𑀤𑀻𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀬𑁄𑀕𑁂𑀦 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀦𑁂𑀦 𑀧𑀸𑀡𑀖𑀸𑀢𑀻 𑀧𑀼𑀕𑁆𑀕𑀮𑁄 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀲𑁄𑀴𑀲𑀲𑀼 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀸𑀬 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀲𑀼𑀭𑀓𑀸𑀬𑁂𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁂𑀦 𑀲𑁄𑀓𑁂𑀦 𑀲𑁄𑀘𑀢𑀺. 𑀬𑀣𑀸 𑀯𑀸𑀬𑀁 𑀏𑀴𑀓𑁄 𑀫𑀭𑀡𑀪𑀬𑁂𑀦 𑀲𑁄𑀘𑀢𑀺, 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀲𑁄𑀘𑀢𑀻𑀢𑀺𑀧𑀺 𑀜𑀢𑁆𑀯𑀸 𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀓𑁄𑀘𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀦𑀸𑀫 𑀦 𑀓𑀭𑁂𑀬𑁆𑀬. 𑀫𑁄𑀳𑁂𑀦 𑀧𑀦 𑀫𑀽𑀴𑁆𑀳𑀸 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑀸 𑀇𑀫𑀁 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀺𑀭𑀬𑀪𑀬𑀪𑀻𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄, 𑀫𑀳𑀸𑀚𑀦𑁄𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀽𑀭𑁂𑀲𑀺. 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺’’𑀦𑁆𑀢𑀺.

𑀫𑀢𑀓𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁯] 𑁯. 𑀆𑀬𑀸𑀘𑀺𑀢𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀲𑀘𑁂 𑀫𑀼𑀘𑁆𑀘𑁂 𑀧𑁂𑀘𑁆𑀘 𑀫𑀼𑀘𑁆𑀘𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀢𑀸𑀦𑀁 𑀆𑀬𑀸𑀘𑀦𑀩𑀮𑀺𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀫𑀦𑀼𑀲𑁆𑀲𑀸 𑀯𑀡𑀺𑀚𑁆𑀚𑀸𑀬 𑀕𑀘𑁆𑀙𑀦𑁆𑀢𑀸 𑀧𑀸𑀡𑁂 𑀯𑀥𑀺𑀢𑁆𑀯𑀸 𑀤𑁂𑀯𑀢𑀸𑀦𑀁 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀫𑀬𑀁 𑀅𑀦𑀦𑁆𑀢𑀭𑀸𑀬𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀁 𑀧𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀦 𑀢𑀼𑀫𑁆𑀳𑀸𑀓𑀁 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀬𑀸𑀘𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣𑀸𑀦𑀦𑁆𑀢𑀭𑀸𑀬𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀁 𑀧𑀢𑁆𑀯𑀸 𑀆𑀕𑀢𑀸 ‘‘𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀇𑀤𑀁 𑀚𑀸𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀩𑀳𑀽 𑀧𑀸𑀡𑁂 𑀯𑀥𑀺𑀢𑁆𑀯𑀸 𑀆𑀬𑀸𑀘𑀦𑀢𑁄 𑀫𑀼𑀘𑁆𑀘𑀺𑀢𑀼𑀁 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀏𑀢𑁆𑀣 𑀅𑀢𑁆𑀣𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀓𑀼𑀝𑀼𑀫𑁆𑀩𑀺𑀓𑁄 𑀕𑀸𑀫𑀤𑁆𑀯𑀸𑀭𑁂 𑀞𑀺𑀢𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀦𑀦𑁆𑀢𑀭𑀸𑀬𑁂𑀦 𑀆𑀕𑀦𑁆𑀢𑁆𑀯𑀸 𑀩𑀳𑀽 𑀧𑀸𑀡𑁂 𑀯𑀥𑀺𑀢𑁆𑀯𑀸 ‘‘𑀆𑀬𑀸𑀘𑀦𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀫𑀽𑀮𑀁 𑀕𑀢𑁄. 𑀭𑀼𑀓𑁆𑀔𑀤𑁂𑀯𑀢𑀸 𑀔𑀦𑁆𑀥𑀯𑀺𑀝𑀧𑁂 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁯. ‘‘𑀲𑀘𑁂 𑀫𑀼𑀘𑁆𑀘𑁂 𑀧𑁂𑀘𑁆𑀘 𑀫𑀼𑀘𑁆𑀘𑁂, 𑀫𑀼𑀘𑁆𑀘𑀫𑀸𑀦𑁄 𑀳𑀺 𑀩𑀚𑁆𑀛𑀢𑀺;

𑀦 𑀳𑁂𑀯𑀁 𑀥𑀻𑀭𑀸 𑀫𑀼𑀘𑁆𑀘𑀦𑁆𑀢𑀺, 𑀫𑀼𑀢𑁆𑀢𑀺 𑀩𑀸𑀮𑀲𑁆𑀲 𑀩𑀦𑁆𑀥𑀦’’𑀦𑁆𑀢𑀺.

𑀢𑀢𑁆𑀣 𑀲𑀘𑁂 𑀫𑀼𑀘𑁆𑀘𑁂 𑀧𑁂𑀘𑁆𑀘 𑀫𑀼𑀘𑁆𑀘𑁂𑀢𑀺 𑀪𑁄 𑀧𑀼𑀭𑀺𑀲, 𑀢𑁆𑀯𑀁 𑀲𑀘𑁂 𑀫𑀼𑀘𑁆𑀘𑁂 𑀬𑀤𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑁄𑀲𑀺. 𑀧𑁂𑀘𑁆𑀘 𑀫𑀼𑀘𑁆𑀘𑁂𑀢𑀺 𑀬𑀣𑀸 𑀧𑀭𑀮𑁄𑀓𑁂 𑀦 𑀩𑀚𑁆𑀛𑀲𑀺, 𑀏𑀯𑀁 𑀫𑀼𑀘𑁆𑀘𑀸𑀳𑀺. 𑀫𑀼𑀘𑁆𑀘𑀫𑀸𑀦𑁄 𑀳𑀺 𑀩𑀚𑁆𑀛𑀢𑀻𑀢𑀺 𑀬𑀣𑀸 𑀧𑀦 𑀢𑁆𑀯𑀁 𑀧𑀸𑀡𑀁 𑀯𑀥𑀺𑀢𑁆𑀯𑀸 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀲𑀺, 𑀏𑀯𑀁 𑀫𑀼𑀘𑁆𑀘𑀫𑀸𑀦𑁄 𑀳𑀺 𑀧𑀸𑀧𑀓𑀫𑁆𑀫𑁂𑀦 𑀩𑀚𑁆𑀛𑀢𑀺. 𑀢𑀲𑁆𑀫𑀸 𑀦 𑀳𑁂𑀯𑀁 𑀥𑀻𑀭𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀬𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑀸, 𑀢𑁂 𑀏𑀯𑀁 𑀧𑀝𑀺𑀲𑁆𑀲𑀯𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀏𑀯𑀭𑀽𑀧𑀸 𑀳𑀺 𑀫𑀼𑀢𑁆𑀢𑀺 𑀩𑀸𑀮𑀲𑁆𑀲 𑀩𑀦𑁆𑀥𑀦𑀁, 𑀏𑀲𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀢𑁆𑀯𑀸 𑀫𑀼𑀢𑁆𑀢𑀺 𑀦𑀸𑀫 𑀩𑀸𑀮𑀲𑁆𑀲 𑀩𑀦𑁆𑀥𑀦𑀫𑁂𑀯 𑀳𑁄𑀢𑀻𑀢𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀏𑀯𑀭𑀽𑀧𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀸 𑀯𑀺𑀭𑀢𑀸 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀽𑀭𑀬𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺’’𑀦𑁆𑀢𑀺.

𑀆𑀬𑀸𑀘𑀺𑀢𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁦] 𑁧𑁦. 𑀦𑀴𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀦𑀴𑀓𑀧𑀸𑀦𑀕𑀸𑀫𑀁 𑀧𑀢𑁆𑀯𑀸 𑀦𑀴𑀓𑀧𑀸𑀦𑀧𑁄𑀓𑁆𑀔𑀭𑀡𑀺𑀬𑀁 𑀓𑁂𑀢𑀓𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑀴𑀤𑀡𑁆𑀟𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀪𑀺𑀓𑁆𑀔𑀽 𑀦𑀴𑀓𑀧𑀸𑀦𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀲𑀽𑀘𑀺𑀖𑀭𑀢𑁆𑀣𑀸𑀬 𑀲𑀸𑀫𑀡𑁂𑀭𑁂𑀳𑀺 𑀦𑀴𑀤𑀡𑁆𑀟𑀓𑁂 𑀕𑀸𑀳𑀸𑀧𑁂𑀢𑁆𑀯𑀸 𑀢𑁂 𑀲𑀩𑁆𑀩𑀢𑁆𑀣𑀓𑀫𑁂𑀯 𑀙𑀺𑀤𑁆𑀤𑁂 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀁 𑀲𑀽𑀘𑀺𑀖𑀭𑀢𑁆𑀣𑀸𑀬 𑀦𑀴𑀤𑀡𑁆𑀟𑀓𑁂 𑀕𑀡𑁆𑀳𑀸𑀧𑁂𑀫, 𑀢𑁂 𑀫𑀽𑀮𑀢𑁄 𑀬𑀸𑀯 𑀅𑀕𑁆𑀕𑀸 𑀲𑀩𑁆𑀩𑀢𑁆𑀣𑀓𑀫𑁂𑀯 𑀙𑀺𑀤𑁆𑀤𑀸, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀇𑀤𑀁, 𑀪𑀺𑀓𑁆𑀔𑀯𑁂, 𑀫𑀬𑁆𑀳𑀁 𑀧𑁄𑀭𑀸𑀡𑀓𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀧𑀼𑀩𑁆𑀩𑁂 𑀓𑀺𑀭 𑀲𑁄 𑀯𑀦𑀲𑀡𑁆𑀟𑁄 𑀅𑀭𑀜𑁆𑀜𑁄 𑀅𑀳𑁄𑀲𑀺. 𑀢𑀲𑁆𑀲𑀸𑀧𑀺 𑀧𑁄𑀓𑁆𑀔𑀭𑀡𑀺𑀬𑀸 𑀏𑀓𑁄 𑀤𑀓𑀭𑀓𑁆𑀔𑀲𑁄 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀔𑀸𑀤𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀭𑁄𑀳𑀺𑀢𑀫𑀺𑀕𑀧𑁄𑀢𑀓𑀧𑁆𑀧𑀫𑀸𑀡𑁄 𑀓𑀧𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀯𑀸𑀦𑀭𑀧𑀭𑀺𑀯𑀼𑀢𑁄 𑀬𑀽𑀣𑀁 𑀧𑀭𑀺𑀳𑀭𑀦𑁆𑀢𑁄 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀲𑀢𑀺. 𑀲𑁄 𑀯𑀸𑀦𑀭𑀕𑀡𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺 ‘‘𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀺𑀲𑀭𑀼𑀓𑁆𑀔𑀸𑀧𑀺 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀧𑁄𑀓𑁆𑀔𑀭𑀡𑀺𑀬𑁄𑀧𑀺 𑀳𑁄𑀦𑁆𑀢𑀺, 𑀢𑀼𑀫𑁆𑀳𑁂 𑀅𑀔𑀸𑀤𑀺𑀢𑀧𑀼𑀩𑁆𑀩𑀁 𑀨𑀮𑀸𑀨𑀮𑀁 𑀔𑀸𑀤𑀦𑁆𑀢𑀸 𑀯𑀸 𑀅𑀧𑀻𑀢𑀧𑀼𑀩𑁆𑀩𑀁 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀸 𑀯𑀸 𑀫𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀕𑀢𑀧𑀼𑀩𑁆𑀩𑀝𑁆𑀞𑀸𑀦𑀁 𑀕𑀢𑀸 𑀢𑀢𑁆𑀣 𑀩𑀳𑀼𑀤𑁂𑀯 𑀤𑀺𑀯𑀲𑀁 𑀘𑀭𑀺𑀢𑁆𑀯𑀸 𑀧𑀸𑀦𑀻𑀬𑀁 𑀕𑀯𑁂𑀲𑀫𑀸𑀦𑀸 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 𑀧𑀸𑀦𑀻𑀬𑀁 𑀅𑀧𑀺𑀯𑀺𑀢𑁆𑀯𑀸𑀯 𑀩𑁄𑀥𑀺𑀲𑀢𑁆𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀢𑀸𑀢𑀸, 𑀧𑀸𑀦𑀻𑀬𑀁 𑀦 𑀧𑀺𑀯𑀣𑀸’’𑀢𑀺 𑀆𑀳. ‘‘𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀑𑀮𑁄𑀓𑁂𑀫𑀸’’𑀢𑀺. ‘‘𑀲𑀼𑀝𑁆𑀞𑀼, 𑀢𑀸𑀢𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀧𑁄𑀓𑁆𑀔𑀭𑀡𑀺𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀧𑀤𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀑𑀢𑀺𑀡𑁆𑀡𑀫𑁂𑀯 𑀧𑀲𑁆𑀲𑀺, 𑀦 𑀉𑀢𑁆𑀢𑀺𑀡𑁆𑀡𑀁. 𑀲𑁄 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲𑀸 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸’’𑀢𑀺 𑀜𑀢𑁆𑀯𑀸 ‘‘𑀲𑀼𑀝𑁆𑀞𑀼 𑀯𑁄 𑀓𑀢𑀁, 𑀢𑀸𑀢𑀸, 𑀧𑀸𑀦𑀻𑀬𑀁 𑀅𑀧𑀺𑀯𑀦𑁆𑀢𑁂𑀳𑀺, 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸 𑀅𑀬’’𑀦𑁆𑀢𑀺 𑀆𑀳.

𑀤𑀓𑀭𑀓𑁆𑀔𑀲𑁄𑀧𑀺 𑀢𑁂𑀲𑀁 𑀅𑀦𑁄𑀢𑀭𑀡𑀪𑀸𑀯𑀁 𑀜𑀢𑁆𑀯𑀸 𑀦𑀻𑀮𑁄𑀤𑀭𑁄 𑀧𑀡𑁆𑀟𑀭𑀫𑀼𑀔𑁄 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑁄 𑀩𑀻𑀪𑀘𑁆𑀙𑀤𑀲𑁆𑀲𑀦𑁄 𑀳𑀼𑀢𑁆𑀯𑀸 𑀉𑀤𑀓𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑀸𑀢𑁆𑀣, 𑀑𑀢𑀭𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀘𑁆𑀙𑀺 ‘‘𑀢𑁆𑀯𑀁 𑀇𑀥 𑀦𑀺𑀩𑁆𑀩𑀢𑁆𑀢𑀤𑀓𑀭𑀓𑁆𑀔𑀲𑁄𑀲𑀻’’𑀢𑀺? ‘‘𑀆𑀫, 𑀅𑀳’’𑀦𑁆𑀢𑀺. ‘‘𑀢𑁆𑀯𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀺𑀡𑁆𑀡𑀓𑁂 𑀮𑀪𑀲𑀻’’𑀢𑀺? ‘‘𑀆𑀫, 𑀮𑀪𑀸𑀫𑀺, 𑀅𑀳𑀁 𑀇𑀥𑁄𑀢𑀺𑀡𑁆𑀡𑀁 𑀅𑀦𑁆𑀢𑀫𑀲𑁄 𑀲𑀓𑀼𑀡𑀺𑀓𑀁 𑀉𑀧𑀸𑀤𑀸𑀬 𑀦 𑀓𑀺𑀜𑁆𑀘𑀺 𑀫𑀼𑀜𑁆𑀘𑀸𑀫𑀺, 𑀢𑀼𑀫𑁆𑀳𑁂𑀧𑀺 𑀲𑀩𑁆𑀩𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀦 𑀫𑀬𑀁 𑀅𑀢𑁆𑀢𑀸𑀦𑀁 𑀢𑀼𑀬𑁆𑀳𑀁 𑀔𑀸𑀤𑀺𑀢𑀼𑀁 𑀤𑀲𑁆𑀲𑀸𑀫𑀸’’𑀢𑀺. ‘‘𑀧𑀸𑀦𑀻𑀬𑀁 𑀧𑀦 𑀧𑀺𑀯𑀺𑀲𑁆𑀲𑀣𑀸’’𑀢𑀺. ‘‘𑀆𑀫, 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫, 𑀦 𑀘 𑀢𑁂 𑀯𑀲𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀣 𑀓𑀣𑀁 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀣𑀸’’𑀢𑀺? 𑀓𑀺𑀁 𑀧𑀦 𑀢𑁆𑀯𑀁 𑀫𑀜𑁆𑀜𑀲𑀺 ‘‘𑀑𑀢𑀭𑀺𑀢𑁆𑀯𑀸 𑀧𑀺𑀯𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀫𑀬𑀜𑁆𑀳𑀺 𑀅𑀦𑁄𑀢𑀭𑀺𑀢𑁆𑀯𑀸 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺𑀧𑀺 𑀏𑀓𑀫𑁂𑀓𑀁 𑀦𑀴𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀮𑀦𑀸𑀴𑁂𑀦 𑀉𑀤𑀓𑀁 𑀧𑀺𑀯𑀦𑁆𑀢𑀸 𑀯𑀺𑀬 𑀢𑀯 𑀧𑁄𑀓𑁆𑀔𑀭𑀡𑀺𑀬𑀸 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫, 𑀏𑀯𑀁 𑀦𑁄 𑀢𑁆𑀯𑀁 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀧𑀼𑀭𑀺𑀫𑀧𑀤𑀤𑁆𑀯𑀬𑀁 𑀅𑀪𑀸𑀲𑀺 𑁋

𑁨𑁦. ‘‘𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦𑁄𑀢𑀭𑀺𑀢𑀁 𑀧𑀤’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀲𑁄 𑀓𑀧𑀺𑀭𑀸𑀚𑀸 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀏𑀓𑀫𑁆𑀧𑀺 𑀉𑀢𑁆𑀢𑀺𑀡𑁆𑀡𑀧𑀤𑀁 𑀦𑀸𑀤𑁆𑀤𑀲, 𑀑𑀢𑀭𑀺𑀢𑀁 𑀧𑀦 𑀑𑀢𑀺𑀡𑁆𑀡𑀧𑀤𑀫𑁂𑀯 𑀅𑀤𑁆𑀤𑀲. 𑀏𑀯𑀁 𑀤𑀺𑀲𑁆𑀯𑀸 𑀧𑀤𑀁 𑀅𑀦𑀼𑀢𑁆𑀢𑀺𑀡𑁆𑀡𑀁 𑀤𑀺𑀲𑁆𑀯𑀸𑀦 𑀑𑀢𑀭𑀺𑀢𑀁 𑀧𑀤𑀁 ‘‘𑀅𑀤𑁆𑀥𑀸𑀬𑀁 𑀧𑁄𑀓𑁆𑀔𑀭𑀡𑀻 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸’’𑀢𑀺 𑀜𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀲𑀧𑀭𑀺𑀲𑁄 𑀆𑀳 𑁋

‘‘𑀦𑀴𑁂𑀦 𑀯𑀸𑀭𑀺𑀁 𑀧𑀺𑀲𑁆𑀲𑀸𑀫𑀸’’𑀢𑀺;

𑀢𑀲𑁆𑀲𑀢𑁆𑀣𑁄 𑁋 𑀫𑀬𑀁 𑀢𑀯 𑀧𑁄𑀓𑁆𑀔𑀭𑀡𑀺𑀬𑀁 𑀦𑀴𑁂𑀦 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸𑀢𑀺. 𑀧𑀼𑀦 𑀫𑀳𑀸𑀲𑀢𑁆𑀢𑁄 𑀆𑀳 𑁋

‘‘𑀦𑁂𑀯 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻’’𑀢𑀺;

𑀏𑀯𑀁 𑀦𑀴𑁂𑀦 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀁 𑀲𑀧𑀭𑀺𑀲𑀫𑁆𑀧𑀺 𑀫𑀁 𑀢𑁆𑀯𑀁 𑀦𑁂𑀯 𑀯𑀥𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑀁 𑀦𑀴𑀤𑀡𑁆𑀟𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀫𑀼𑀔𑁂𑀦 𑀥𑀫𑀺, 𑀦𑀴𑁄 𑀅𑀦𑁆𑀢𑁄 𑀓𑀺𑀜𑁆𑀘𑀺 𑀕𑀡𑁆𑀞𑀺𑀁 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀢𑁆𑀣𑀓𑀫𑁂𑀯 𑀲𑀼𑀲𑀺𑀭𑁄 𑀅𑀳𑁄𑀲𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀺 𑀆𑀳𑀭𑀸𑀧𑁂𑀢𑁆𑀯𑀸 𑀫𑀼𑀔𑁂𑀦 𑀥𑀫𑀺𑀢𑁆𑀯𑀸 𑀅𑀤𑀸𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀲𑀓𑁆𑀓𑀸 𑀦𑀺𑀝𑁆𑀞𑀸𑀧𑁂𑀢𑀼𑀁, 𑀢𑀲𑁆𑀫𑀸 𑀏𑀯𑀁 𑀦 𑀕𑀳𑁂𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀇𑀫𑀁 𑀧𑁄𑀓𑁆𑀔𑀭𑀡𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀚𑀸𑀢𑀸 𑀲𑀩𑁆𑀩𑁂𑀧𑀺 𑀦𑀴𑀸 𑀏𑀓𑀘𑁆𑀙𑀺𑀤𑁆𑀤𑀸 𑀳𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀳𑀺𑀢𑀽𑀧𑀘𑀸𑀭𑀲𑁆𑀲 𑀫𑀳𑀦𑁆𑀢𑀢𑀸𑀬 𑀅𑀥𑀺𑀝𑁆𑀞𑀸𑀦𑀁 𑀲𑀫𑀺𑀚𑁆𑀛𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀧𑀺 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀝𑁆𑀞𑀺𑀢𑀦𑀴𑀸 𑀏𑀓𑀘𑁆𑀙𑀺𑀤𑁆𑀤𑀸 𑀚𑀸𑀢𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀓𑀧𑁆𑀧𑁂 𑀘𑀢𑁆𑀢𑀸𑀭𑀺 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀸𑀫. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀘𑀦𑁆𑀤𑁂 𑀲𑀲𑀮𑀓𑁆𑀔𑀡𑀁 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀞𑀲𑁆𑀲𑀢𑀺, 𑀯𑀝𑁆𑀝𑀓𑀚𑀸𑀢𑀓𑁂 𑀅𑀕𑁆𑀕𑀺𑀦𑁄 𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑀁 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀕𑁆𑀕𑀺 𑀦 𑀛𑀸𑀬𑀺𑀲𑁆𑀲𑀢𑀺, 𑀖𑀝𑀻𑀓𑀸𑀭𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀦𑁄𑀯𑀲𑁆𑀲𑀓𑀁 𑀞𑀲𑁆𑀲𑀢𑀺, 𑀇𑀫𑀁 𑀧𑁄𑀓𑁆𑀔𑀭𑀡𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀝𑁆𑀞𑀺𑀢𑀦𑀴𑀸 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀏𑀓𑀘𑁆𑀙𑀺𑀤𑁆𑀤𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀸𑀫.

𑀩𑁄𑀥𑀺𑀲𑀢𑁆𑀢𑁄 𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀏𑀓𑀁 𑀦𑀴𑀁 𑀆𑀤𑀸𑀬 𑀦𑀺𑀲𑀻𑀤𑀺. 𑀢𑁂𑀧𑀺 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀸 𑀏𑀓𑁂𑀓𑀁 𑀆𑀤𑀸𑀬 𑀧𑁄𑀓𑁆𑀔𑀭𑀡𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀴𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀦𑀓𑀸𑀮𑁂 𑀲𑀩𑁆𑀩𑁂 𑀢𑀻𑀭𑁂 𑀦𑀺𑀲𑀺𑀦𑁆𑀦𑀸𑀯 𑀧𑀺𑀯𑀺𑀁𑀲𑀼. 𑀏𑀯𑀁 𑀢𑁂𑀳𑀺 𑀧𑀸𑀦𑀻𑀬𑁂 𑀧𑀺𑀯𑀺𑀢𑁂 𑀤𑀓𑀭𑀓𑁆𑀔𑀲𑁄 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄 𑀲𑀓𑀦𑀺𑀯𑁂𑀲𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀧𑀦 ‘‘𑀇𑀫𑁂𑀲𑀁, 𑀪𑀺𑀓𑁆𑀔𑀯𑁂, 𑀦𑀴𑀸𑀦𑀁 𑀏𑀓𑀘𑁆𑀙𑀺𑀤𑁆𑀤𑀪𑀸𑀯𑁄 𑀦𑀸𑀫 𑀫𑀬𑁆𑀳𑀫𑁂𑀯𑁂𑀢𑀁 𑀧𑁄𑀭𑀸𑀡𑀓𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀓𑀭𑀓𑁆𑀔𑀲𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀉𑀧𑀸𑀬𑀓𑀼𑀲𑀮𑁄 𑀧𑀦 𑀓𑀧𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀴𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀲𑀻𑀮𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀺𑀕𑁆𑀭𑁄𑀥𑀁 𑀮𑀓𑁆𑀔𑀡𑀁 𑀓𑀡𑁆𑀟𑀺, 𑀯𑀸𑀢𑀫𑀺𑀕𑀁 𑀔𑀭𑀸𑀤𑀺𑀬𑀁;

𑀢𑀺𑀧𑀮𑁆𑀮𑀢𑁆𑀣𑀁 𑀫𑀸𑀮𑀼𑀢𑀜𑁆𑀘, 𑀫𑀢𑀪𑀢𑁆𑀢 𑀅𑀬𑀸𑀘𑀺𑀢𑀁;

𑀦𑀴𑀧𑀸𑀦𑀦𑁆𑀢𑀺 𑀢𑁂 𑀤𑀲𑀸𑀢𑀺.