𑁧. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧. 𑀅𑀧𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸

𑀇𑀫𑀁 𑀢𑀸𑀯 𑀅𑀧𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 𑀓𑀣𑁂𑀲𑀺. 𑀓𑀁 𑀧𑀦 𑀆𑀭𑀩𑁆𑀪 𑀅𑀬𑀁 𑀓𑀣𑀸 𑀲𑀫𑀼𑀝𑁆𑀞𑀺𑀢𑀸𑀢𑀺? 𑀲𑁂𑀝𑁆𑀞𑀺𑀲𑁆𑀲 𑀲𑀳𑀸𑀬𑀓𑁂 𑀧𑀜𑁆𑀘𑀲𑀢𑁂 𑀢𑀺𑀢𑁆𑀣𑀺𑀬𑀲𑀸𑀯𑀓𑁂. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀲𑀳𑀸𑀬𑀓𑁂 𑀧𑀜𑁆𑀘𑀲𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑁂 𑀆𑀤𑀸𑀬 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘𑁂𑀯 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀯𑀢𑁆𑀣𑀘𑁆𑀙𑀸𑀤𑀦𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀯𑀢𑁆𑀣𑀸𑀦𑀺 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀙 𑀦𑀺𑀲𑀚𑁆𑀚𑀸𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁, 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀩𑁆𑀭𑀳𑁆𑀫𑀓𑀸𑀬𑀁, 𑀆𑀯𑁂𑀴𑀸𑀯𑁂𑀴𑀸 𑀬𑀫𑀓𑀬𑀫𑀓𑀸 𑀳𑀼𑀢𑁆𑀯𑀸 𑀦𑀺𑀘𑁆𑀙𑀭𑀦𑁆𑀢𑀺𑀬𑁄 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀘 𑀑𑀮𑁄𑀓𑀬𑀫𑀸𑀦𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀫𑀻𑀧𑁂𑀬𑁂𑀯 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀫𑀦𑁄𑀲𑀺𑀮𑀸𑀢𑀮𑁂 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀢𑀭𑀼𑀡𑀲𑀻𑀳𑁄 𑀯𑀺𑀬 𑀕𑀚𑁆𑀚𑀦𑁆𑀢𑁄 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀘 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀘 𑀭𑀢𑀦𑀤𑀸𑀫𑀁 𑀕𑀦𑁆𑀣𑁂𑀦𑁆𑀢𑁄 𑀯𑀺𑀬 𑀘 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀲𑀯𑀦𑀻𑀬𑁂𑀦 𑀓𑀫𑀦𑀻𑀬𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀉𑀝𑁆𑀞𑀸𑀬 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀭𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀅𑀕𑀫𑀁𑀲𑀼. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀤𑁆𑀥𑀺𑀁 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺, 𑀤𑀸𑀦𑀁 𑀤𑁂𑀦𑁆𑀢𑀺, 𑀲𑀻𑀮𑀁 𑀭𑀓𑁆𑀔𑀦𑁆𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀺.

𑀅𑀣 𑀪𑀕𑀯𑀸 𑀲𑀸𑀯𑀢𑁆𑀣𑀺𑀢𑁄 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀕𑀢𑀓𑀸𑀮𑁂 𑀢𑀁 𑀲𑀭𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀭𑀡𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀫𑀽𑀮𑀝𑁆𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀺𑀢𑀸. 𑀪𑀕𑀯𑀸𑀧𑀺 𑀲𑀢𑁆𑀢𑀝𑁆𑀞 𑀫𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦 𑀚𑁂𑀢𑀯𑀦𑀫𑁂𑀯 𑀅𑀕𑀫𑀸𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀧𑀼𑀦𑀧𑀺 𑀢𑁂 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂𑀲𑀁 𑀢𑀣𑀸𑀕𑀢𑁂 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁂 𑀕𑀳𑀺𑀢𑀲𑀭𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀭𑀡𑀫𑁂𑀯 𑀕𑀳𑁂𑀢𑁆𑀯𑀸 𑀫𑀽𑀮𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

𑀪𑀕𑀯𑀸 𑀅𑀧𑀭𑀺𑀫𑀺𑀢𑀓𑀧𑁆𑀧𑀓𑁄𑀝𑀺𑀬𑁄 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀺𑀢𑀯𑀘𑀻𑀲𑀼𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀤𑀺𑀩𑁆𑀩𑀕𑀦𑁆𑀥𑀕𑀦𑁆𑀥𑀺𑀢𑀁 𑀦𑀸𑀦𑀸𑀕𑀦𑁆𑀥𑀧𑀽𑀭𑀺𑀢𑀁 𑀭𑀢𑀦𑀓𑀭𑀡𑁆𑀟𑀓𑀁 𑀯𑀺𑀯𑀭𑀦𑁆𑀢𑁄 𑀯𑀺𑀬 𑀫𑀼𑀔𑀧𑀤𑀼𑀫𑀁 𑀯𑀺𑀯𑀭𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀉𑀧𑀸𑀲𑀓𑀸 𑀢𑀻𑀡𑀺 𑀲𑀭𑀡𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀭𑀡𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀅𑀣 𑀢𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀳𑀺 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀸 ‘‘𑀉𑀧𑀸𑀲𑀓𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀉𑀧𑀭𑀺 𑀪𑀯𑀕𑁆𑀕𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀅𑀥𑀺𑀓𑀢𑀭𑁄’’𑀢𑀺. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 (𑀲𑀁. 𑀦𑀺. 𑁫.𑁧𑁩𑁯; 𑀅. 𑀦𑀺. 𑁪.𑁩𑁪), 𑀬𑀁 𑀓𑀺𑀜𑁆𑀘𑀺 𑀯𑀺𑀢𑁆𑀢𑀁 𑀇𑀥 𑀯𑀸 𑀳𑀼𑀭𑀁 𑀯𑀸…𑀧𑁂… (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀅𑀕𑁆𑀕𑀢𑁄 𑀯𑁂 𑀧𑀲𑀦𑁆𑀦𑀸𑀦’’𑀦𑁆𑀢𑀺𑀆𑀤𑀻𑀳𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑀼𑀢𑁆𑀢𑁂𑀳𑀺 𑀧𑀓𑀸𑀲𑀺𑀢𑁂 𑀭𑀢𑀦𑀢𑁆𑀢𑀬𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 ‘‘𑀏𑀯𑀁 𑀉𑀢𑁆𑀢𑀫𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀕𑀢𑀸 𑀉𑀧𑀸𑀲𑀓𑀸 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀓𑀸 𑀦𑀸𑀫 𑀦𑀢𑁆𑀣𑀺, 𑀅𑀧𑀸𑀬𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀦 𑀫𑀼𑀘𑁆𑀘𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀲𑀭𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀭𑀡𑀁 𑀕𑀘𑁆𑀙𑀦𑁆𑀢𑁂𑀳𑀺 𑀅𑀬𑀼𑀢𑁆𑀢𑀁 𑀓𑀢’’𑀦𑁆𑀢𑀺 𑀆𑀳.

𑀏𑀢𑁆𑀣 𑀘 𑀢𑀻𑀡𑀺 𑀭𑀢𑀦𑀸𑀦𑀺 𑀫𑁄𑀓𑁆𑀔𑀯𑀲𑁂𑀦 𑀉𑀢𑁆𑀢𑀫𑀯𑀲𑁂𑀦 𑀲𑀭𑀡𑀕𑀢𑀸𑀦𑀁 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀪𑀸𑀯𑀤𑀻𑀧𑀦𑀢𑁆𑀣𑀁 𑀇𑀫𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

‘‘𑀬𑁂 𑀓𑁂𑀘𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺.

‘‘𑀬𑁂 𑀓𑁂𑀘𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺.

‘‘𑀩𑀳𑀼𑀁 𑀯𑁂 𑀲𑀭𑀡𑀁 𑀬𑀦𑁆𑀢𑀺, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘;

𑀆𑀭𑀸𑀫𑀭𑀼𑀓𑁆𑀔𑀘𑁂𑀢𑁆𑀬𑀸𑀦𑀺, 𑀫𑀦𑀼𑀲𑁆𑀲𑀸 𑀪𑀬𑀢𑀚𑁆𑀚𑀺𑀢𑀸.

‘‘𑀦𑁂𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀦𑁂𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀦𑁂𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀜𑁆𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

‘‘𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁧𑁮𑁮-𑁧𑁯𑁨);

𑀦 𑀓𑁂𑀯𑀮𑀜𑁆𑀘 𑀦𑁂𑀲𑀁 𑀲𑀢𑁆𑀣𑀸 𑀏𑀢𑁆𑀢𑀓𑀁𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀅𑀧𑀺𑀘 𑀔𑁄 ‘‘𑀉𑀧𑀸𑀲𑀓𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀤𑁂𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀤𑁂𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀤𑁂𑀢𑀺, 𑀲𑀓𑀤𑀸𑀕𑀸𑀫𑀺𑀨𑀮𑀁 𑀤𑁂𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀤𑁂𑀢𑀺, 𑀅𑀦𑀸𑀕𑀸𑀫𑀺𑀨𑀮𑀁 𑀤𑁂𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀤𑁂𑀢𑀺, 𑀅𑀭𑀳𑀢𑁆𑀢𑀨𑀮𑀁 𑀤𑁂𑀢𑀻’’𑀢𑀺𑀏𑀯𑀫𑀸𑀤𑀻𑀳𑀺𑀧𑀺 𑀦𑀬𑁂𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀲𑀭𑀡𑀁 𑀪𑀺𑀦𑁆𑀤𑀦𑁆𑀢𑁂𑀳𑀺 𑀅𑀬𑀼𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀆𑀳. 𑀏𑀢𑁆𑀣 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀧𑁆𑀧𑀤𑀸𑀦𑀁 ‘‘𑀏𑀓𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑁄 𑀏𑀓𑀥𑀫𑁆𑀫𑁄? 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻’’𑀢𑀺𑀏𑀯𑀫𑀸𑀤𑀻𑀳𑀺 (𑀅. 𑀦𑀺. 𑁧.𑁨𑁯𑁬) 𑀲𑀼𑀢𑁆𑀢𑁂𑀳𑀺 𑀤𑀻𑀧𑁂𑀢𑀩𑁆𑀩𑀁.

𑀏𑀯𑀁 𑀪𑀕𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀉𑀧𑀸𑀲𑀓𑁂 𑀑𑀯𑀤𑀺𑀢𑁆𑀯𑀸 ‘‘𑀉𑀧𑀸𑀲𑀓𑀸 𑀧𑀼𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑀸 𑀅𑀲𑀭𑀡𑀁 ‘𑀲𑀭𑀡’𑀦𑁆𑀢𑀺 𑀢𑀓𑁆𑀓𑀕𑁆𑀕𑀸𑀳𑁂𑀦 𑀯𑀺𑀭𑀤𑁆𑀥𑀕𑁆𑀕𑀸𑀳𑁂𑀦 𑀕𑀳𑁂𑀢𑁆𑀯𑀸 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀓𑀦𑁆𑀢𑀸𑀭𑁂 𑀬𑀓𑁆𑀔𑀪𑀓𑁆𑀔𑀸 𑀳𑀼𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸, 𑀅𑀧𑀡𑁆𑀡𑀓𑀕𑁆𑀕𑀸𑀳𑀁 𑀧𑀦 𑀏𑀓𑀁𑀲𑀺𑀓𑀕𑁆𑀕𑀸𑀳𑀁 𑀅𑀯𑀺𑀭𑀤𑁆𑀥𑀕𑁆𑀕𑀸𑀳𑀁 𑀕𑀳𑀺𑀢𑀫𑀦𑀼𑀲𑁆𑀲𑀸 𑀢𑀲𑁆𑀫𑀺𑀁𑀬𑁂𑀯 𑀓𑀦𑁆𑀢𑀸𑀭𑁂 𑀲𑁄𑀢𑁆𑀣𑀺𑀪𑀸𑀯𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀢𑀸𑀯 𑀇𑀫𑁂𑀲𑀁 𑀉𑀧𑀸𑀲𑀓𑀸𑀦𑀁 𑀉𑀢𑁆𑀢𑀫𑀲𑀭𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀓𑁆𑀓𑀕𑁆𑀕𑀳𑀡𑀁 𑀅𑀫𑁆𑀳𑀸𑀓𑀁 𑀧𑀸𑀓𑀝𑀁, 𑀧𑀼𑀩𑁆𑀩𑁂 𑀧𑀦 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀓𑀦𑁆𑀢𑀸𑀭𑁂 𑀢𑀓𑁆𑀓𑀺𑀓𑀸𑀦𑀁 𑀯𑀺𑀦𑀸𑀲𑁄, 𑀅𑀧𑀡𑁆𑀡𑀓𑀕𑁆𑀕𑀸𑀳𑀁 𑀕𑀳𑀺𑀢𑀫𑀦𑀼𑀲𑁆𑀲𑀸𑀦𑀜𑁆𑀘 𑀲𑁄𑀢𑁆𑀣𑀺𑀪𑀸𑀯𑁄 𑀅𑀫𑁆𑀳𑀸𑀓𑀁 𑀧𑀝𑀺𑀘𑁆𑀙𑀦𑁆𑀦𑁄, 𑀢𑀼𑀫𑁆𑀳𑀸𑀓𑀫𑁂𑀯 𑀧𑀸𑀓𑀝𑁄, 𑀲𑀸𑀥𑀼 𑀯𑀢 𑀦𑁄 𑀪𑀕𑀯𑀸 𑀆𑀓𑀸𑀲𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀇𑀫𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀓𑀭𑁄𑀢𑀽’’𑀢𑀺. 𑀅𑀣 𑀪𑀕𑀯𑀸 ‘‘𑀫𑀬𑀸 𑀔𑁄, 𑀕𑀳𑀧𑀢𑀺, 𑀅𑀧𑀭𑀺𑀫𑀺𑀢𑀓𑀸𑀮𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀮𑁄𑀓𑀲𑁆𑀲 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀁, 𑀲𑀻𑀳𑀯𑀲𑀸𑀬 𑀲𑀼𑀯𑀡𑁆𑀡𑀦𑀸𑀴𑀺𑀁 𑀧𑀽𑀭𑁂𑀦𑁆𑀢𑁄 𑀯𑀺𑀬 𑀲𑀓𑁆𑀓𑀘𑁆𑀘𑀁 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀲𑀼𑀡𑁄𑀳𑀻’’𑀢𑀺 𑀲𑁂𑀝𑁆𑀞𑀺𑀦𑁄 𑀲𑀢𑀼𑀧𑁆𑀧𑀸𑀤𑀁 𑀚𑀦𑁂𑀢𑁆𑀯𑀸 𑀳𑀺𑀫𑀕𑀩𑁆𑀪𑀁 𑀧𑀤𑀸𑀮𑁂𑀢𑁆𑀯𑀸 𑀧𑀼𑀡𑁆𑀡𑀘𑀦𑁆𑀤𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀣𑀯𑀸𑀳𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀓𑀤𑀸𑀘𑀺 𑀧𑀼𑀩𑁆𑀩𑀦𑁆𑀢𑀢𑁄 𑀅𑀧𑀭𑀦𑁆𑀢𑀁 𑀕𑀘𑁆𑀙𑀢𑀺, 𑀓𑀤𑀸𑀘𑀺 𑀅𑀧𑀭𑀦𑁆𑀢𑀢𑁄 𑀧𑀼𑀩𑁆𑀩𑀦𑁆𑀢𑀁. 𑀩𑀸𑀭𑀸𑀡𑀲𑀺𑀬𑀁𑀬𑁂𑀯 𑀅𑀜𑁆𑀜𑁄𑀧𑀺 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀅𑀢𑁆𑀣𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀼𑀧𑀸𑀬𑀓𑀼𑀲𑀮𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀫𑀳𑀕𑁆𑀖𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀕𑀫𑀦𑀲𑀚𑁆𑀚𑀸𑀦𑀺 𑀓𑀢𑁆𑀯𑀸 𑀞𑀧𑁂𑀲𑀺. 𑀲𑁄𑀧𑀺 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀢𑀣𑁂𑀯 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀕𑀫𑀦𑀲𑀚𑁆𑀚𑀸𑀦𑀺 𑀓𑀢𑁆𑀯𑀸 𑀞𑀧𑁂𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀬𑀁 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀕𑀫𑀺𑀲𑁆𑀲𑀢𑀺, 𑀲𑀓𑀝𑀲𑀳𑀲𑁆𑀲𑁂 𑀏𑀓𑀢𑁄 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂 𑀫𑀕𑁆𑀕𑁄𑀧𑀺 𑀦𑀧𑁆𑀧𑀳𑁄𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀤𑀸𑀭𑀼𑀤𑀓𑀸𑀤𑀻𑀦𑀺𑀧𑀺, 𑀩𑀮𑀺𑀩𑀤𑁆𑀤𑀸𑀦𑀁 𑀢𑀺𑀡𑀸𑀦𑀺𑀧𑀺 𑀤𑀼𑀮𑁆𑀮𑀪𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀢𑁂𑀦 𑀯𑀸 𑀫𑀬𑀸 𑀯𑀸 𑀧𑀼𑀭𑀢𑁄 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀤𑁆𑀯𑀻𑀳𑀺𑀧𑀺 𑀅𑀫𑁆𑀳𑁂𑀳𑀺 𑀏𑀓𑀢𑁄 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀓𑀺𑀁 𑀢𑁆𑀯𑀁 𑀧𑀼𑀭𑀢𑁄 𑀕𑀫𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀧𑀘𑁆𑀙𑀢𑁄’’𑀢𑀺 𑀆𑀳. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂 𑀩𑀳𑀽 𑀆𑀦𑀺𑀲𑀁𑀲𑀸, 𑀫𑀕𑁆𑀕𑁂𑀦 𑀅𑀪𑀺𑀦𑁆𑀦𑁂𑀦𑁂𑀯 𑀕𑀫𑀺𑀲𑁆𑀲𑀸𑀫𑀺, 𑀕𑁄𑀡𑀸 𑀅𑀦𑀸𑀫𑀝𑁆𑀞𑀢𑀺𑀡𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀅𑀦𑀸𑀫𑀝𑁆𑀞𑀁 𑀲𑀽𑀧𑁂𑀬𑁆𑀬𑀧𑀡𑁆𑀡𑀁 𑀪𑀯𑀺𑀲𑁆𑀲𑀢𑀺, 𑀧𑀲𑀦𑁆𑀦𑀁 𑀉𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀭𑀼𑀘𑀺𑀁 𑀅𑀕𑁆𑀖𑀁 𑀞𑀧𑁂𑀢𑁆𑀯𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀅𑀳𑀁, 𑀲𑀫𑁆𑀫, 𑀧𑀼𑀭𑀢𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀘𑁆𑀙𑀢𑁄 𑀕𑀫𑀦𑁂 𑀩𑀳𑀽 𑀆𑀦𑀺𑀲𑀁𑀲𑁂 𑀅𑀤𑁆𑀤𑀲. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 𑁋 ‘‘𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸 𑀫𑀕𑁆𑀕𑁂 𑀯𑀺𑀲𑀫𑀝𑁆𑀞𑀸𑀦𑀁 𑀲𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂𑀳𑀺 𑀕𑀢𑀫𑀕𑁆𑀕𑁂𑀦 𑀕𑀫𑀺𑀲𑁆𑀲𑀸𑀫𑀺, 𑀧𑀼𑀭𑀢𑁄 𑀕𑀢𑁂𑀳𑀺 𑀩𑀮𑀺𑀩𑀤𑁆𑀤𑁂𑀳𑀺 𑀧𑀭𑀺𑀡𑀢𑀣𑀤𑁆𑀥𑀢𑀺𑀡𑁂 𑀔𑀸𑀤𑀺𑀢𑁂 𑀫𑀫 𑀕𑁄𑀡𑀸 𑀧𑀼𑀦 𑀉𑀝𑁆𑀞𑀺𑀢𑀸𑀦𑀺 𑀫𑀥𑀼𑀭𑀢𑀺𑀡𑀸𑀦𑀺 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀕𑀳𑀺𑀢𑀧𑀡𑁆𑀡𑀝𑁆𑀞𑀸𑀦𑀢𑁄 𑀉𑀝𑁆𑀞𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀲𑀽𑀧𑁂𑀬𑁆𑀬𑀧𑀡𑁆𑀡𑀁 𑀫𑀥𑀼𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀦𑀼𑀤𑀓𑁂 𑀞𑀸𑀦𑁂 𑀆𑀯𑀸𑀝𑀁 𑀔𑀦𑀺𑀢𑁆𑀯𑀸 𑀏𑀢𑁂 𑀉𑀤𑀓𑀁 𑀉𑀧𑁆𑀧𑀸𑀤𑁂𑀲𑁆𑀲𑀦𑁆𑀢𑀺, 𑀢𑁂𑀳𑀺 𑀓𑀢𑁂𑀲𑀼 𑀆𑀯𑀸𑀝𑁂𑀲𑀼 𑀫𑀬𑀁 𑀉𑀤𑀓𑀁 𑀧𑀺𑀯𑀺𑀲𑁆𑀲𑀸𑀫, 𑀅𑀕𑁆𑀖𑀝𑁆𑀞𑀧𑀦𑀁 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀲𑀤𑀺𑀲𑀁, 𑀅𑀳𑀁 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀏𑀢𑁂𑀳𑀺 𑀞𑀧𑀺𑀢𑀕𑁆𑀖𑁂𑀦 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀲𑁄 𑀏𑀢𑁆𑀢𑀓𑁂 𑀆𑀦𑀺𑀲𑀁𑀲𑁂 𑀤𑀺𑀲𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀧𑀼𑀭𑀢𑁄 𑀕𑀘𑁆𑀙𑀸𑀳𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀲𑀫𑁆𑀫𑀸’’𑀢𑀺 𑀩𑀸𑀮𑀲𑀢𑁆𑀣𑀯𑀸𑀳𑁄 𑀲𑀓𑀝𑀸𑀦𑀺 𑀬𑁄𑀚𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀫𑀦𑀼𑀲𑁆𑀲𑀸𑀯𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀦𑁆𑀢𑀸𑀭𑀫𑀼𑀔𑀁 𑀧𑀸𑀧𑀼𑀡𑀺.

𑀓𑀦𑁆𑀢𑀸𑀭𑀁 𑀦𑀸𑀫 𑁋 𑀘𑁄𑀭𑀓𑀦𑁆𑀢𑀸𑀭𑀁, 𑀯𑀸𑀴𑀓𑀦𑁆𑀢𑀸𑀭𑀁, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁, 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑀁, 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑀦𑁆𑀢𑀺 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 𑀘𑁄𑀭𑁂𑀳𑀺 𑀅𑀥𑀺𑀝𑁆𑀞𑀺𑀢𑀫𑀕𑁆𑀕𑁄 𑀘𑁄𑀭𑀓𑀦𑁆𑀢𑀸𑀭𑀁 𑀦𑀸𑀫. 𑀲𑀻𑀳𑀸𑀤𑀻𑀳𑀺 𑀅𑀥𑀺𑀝𑁆𑀞𑀺𑀢𑀫𑀕𑁆𑀕𑁄 𑀯𑀸𑀴𑀓𑀦𑁆𑀢𑀸𑀭𑀁 𑀦𑀸𑀫. 𑀬𑀢𑁆𑀣 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀧𑀸𑀢𑀼𑀁 𑀯𑀸 𑀉𑀤𑀓𑀁 𑀦𑀢𑁆𑀣𑀺, 𑀇𑀤𑀁 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀦𑀸𑀫. 𑀅𑀫𑀦𑀼𑀲𑁆𑀲𑀸𑀥𑀺𑀝𑁆𑀞𑀺𑀢𑀁 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑀁 𑀦𑀸𑀫. 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀯𑀺𑀭𑀳𑀺𑀢𑀁 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀓𑀦𑁆𑀢𑀸𑀭𑁂 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀜𑁆𑀘𑁂𑀯 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑀜𑁆𑀘. 𑀢𑀲𑁆𑀫𑀸 𑀲𑁄 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀲𑀓𑀝𑁂𑀲𑀼 𑀫𑀳𑀦𑁆𑀢𑀫𑀳𑀦𑁆𑀢𑀸 𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺.

𑀅𑀣𑀲𑁆𑀲 𑀓𑀦𑁆𑀢𑀸𑀭𑀫𑀚𑁆𑀛𑀁 𑀕𑀢𑀓𑀸𑀮𑁂 𑀓𑀦𑁆𑀢𑀸𑀭𑁂 𑀅𑀥𑀺𑀯𑀢𑁆𑀣𑀬𑀓𑁆𑀔𑁄 ‘‘𑀇𑀫𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀕𑀳𑀺𑀢𑀁 𑀉𑀤𑀓𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀤𑀼𑀩𑁆𑀩𑀮𑁂 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀦𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀲𑁂𑀢𑀢𑀭𑀼𑀡𑀩𑀮𑀺𑀩𑀤𑁆𑀤𑀬𑀼𑀢𑁆𑀢𑀁 𑀫𑀦𑁄𑀭𑀫𑀁 𑀬𑀸𑀦𑀓𑀁 𑀫𑀸𑀧𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀨𑀮𑀓𑀸𑀯𑀼𑀥𑀳𑀢𑁆𑀣𑁂𑀳𑀺 𑀤𑀲𑀳𑀺 𑀤𑁆𑀯𑀸𑀤𑀲𑀳𑀺 𑀅𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀉𑀧𑁆𑀧𑀮𑀓𑀼𑀫𑀼𑀤𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀅𑀮𑁆𑀮𑀓𑁄𑀲𑁄 𑀅𑀮𑁆𑀮𑀯𑀢𑁆𑀣𑁄 𑀇𑀲𑁆𑀲𑀭𑀧𑀼𑀭𑀺𑀲𑁄 𑀯𑀺𑀬 𑀢𑀲𑁆𑀫𑀺𑀁 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀤𑁆𑀤𑀫𑀫𑀓𑁆𑀔𑀺𑀢𑁂𑀳𑀺 𑀘𑀓𑁆𑀓𑁂𑀳𑀺 𑀧𑀝𑀺𑀧𑀣𑀁 𑀅𑀕𑀫𑀸𑀲𑀺. 𑀧𑀭𑀺𑀯𑀸𑀭𑀅𑀫𑀦𑀼𑀲𑁆𑀲𑀸𑀧𑀺𑀲𑁆𑀲 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀕𑀘𑁆𑀙𑀦𑁆𑀢𑀸 𑀅𑀮𑁆𑀮𑀓𑁂𑀲𑀸 𑀅𑀮𑁆𑀮𑀯𑀢𑁆𑀣𑀸 𑀉𑀧𑁆𑀧𑀮𑀓𑀼𑀫𑀼𑀤𑀫𑀸𑀮𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀓𑀮𑀸𑀧𑁂 𑀕𑀳𑁂𑀢𑁆𑀯𑀸 𑀪𑀺𑀲𑀫𑀼𑀴𑀸𑀮𑀸𑀦𑀺 𑀔𑀸𑀤𑀦𑁆𑀢𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀘𑁂𑀯 𑀓𑀮𑀮𑁂𑀳𑀺 𑀘 𑀧𑀕𑁆𑀖𑀭𑀦𑁆𑀢𑁂𑀳𑀺 𑀅𑀕𑀫𑀁𑀲𑀼. 𑀲𑀢𑁆𑀣𑀯𑀸𑀳𑀸 𑀘 𑀦𑀸𑀫 𑀬𑀤𑀸 𑀥𑀼𑀭𑀯𑀸𑀢𑁄 𑀯𑀸𑀬𑀢𑀺, 𑀢𑀤𑀸 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀧𑀭𑀺𑀯𑀼𑀢𑀸 𑀭𑀚𑀁 𑀧𑀭𑀺𑀳𑀭𑀦𑁆𑀢𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀺. 𑀬𑀤𑀸 𑀧𑀘𑁆𑀙𑀢𑁄 𑀯𑀸𑀢𑁄 𑀯𑀸𑀬𑀢𑀺, 𑀢𑀤𑀸 𑀢𑁂𑀦𑁂𑀯 𑀦𑀬𑁂𑀦 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀧𑀦 𑀥𑀼𑀭𑀯𑀸𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑁄 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀼𑀭𑀢𑁄 𑀅𑀕𑀫𑀸𑀲𑀺.

𑀬𑀓𑁆𑀔𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀬𑀸𑀦𑀓𑀁 𑀫𑀕𑁆𑀕𑀸 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺. 𑀲𑀢𑁆𑀣𑀯𑀸𑀳𑁄𑀧𑀺 𑀅𑀢𑁆𑀢𑀦𑁄 𑀬𑀸𑀦𑀓𑀁 𑀫𑀕𑁆𑀕𑀸 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 𑀲𑀓𑀝𑀸𑀦𑀁 𑀕𑀫𑀦𑁄𑀓𑀸𑀲𑀁 𑀤𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀺𑀢𑁄 𑀢𑀁 𑀬𑀓𑁆𑀔𑀁 𑀅𑀯𑁄𑀘 ‘‘𑀪𑁄, 𑀅𑀫𑁆𑀳𑁂 𑀢𑀸𑀯 𑀩𑀸𑀭𑀸𑀡𑀲𑀺𑀢𑁄 𑀆𑀕𑀘𑁆𑀙𑀸𑀫. 𑀢𑀼𑀫𑁆𑀳𑁂 𑀧𑀦 𑀉𑀧𑁆𑀧𑀮𑀓𑀼𑀫𑀼𑀤𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀳𑀢𑁆𑀣𑀸 𑀪𑀺𑀲𑀫𑀼𑀴𑀸𑀮𑀸𑀦𑀺 𑀔𑀸𑀤𑀦𑁆𑀢𑀸 𑀓𑀤𑁆𑀤𑀫𑀫𑀓𑁆𑀔𑀺𑀢𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑀺 𑀆𑀕𑀘𑁆𑀙𑀣. 𑀓𑀺𑀁 𑀦𑀼 𑀔𑁄 𑀢𑀼𑀫𑁆𑀳𑁂𑀳𑀺 𑀆𑀕𑀢𑀫𑀕𑁆𑀕𑁂 𑀤𑁂𑀯𑁄 𑀯𑀲𑁆𑀲𑀢𑀺, 𑀉𑀧𑁆𑀧𑀮𑀸𑀤𑀺𑀲𑀜𑁆𑀙𑀦𑁆𑀦𑀸𑀦𑀺 𑀯𑀸 𑀲𑀭𑀸𑀦𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀬𑀓𑁆𑀔𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀫𑁆𑀫, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺. 𑀏𑀲𑀸 𑀦𑀻𑀮𑀯𑀦𑀭𑀸𑀚𑀺 𑀧𑀜𑁆𑀜𑀸𑀬𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀓𑀮𑀁 𑀅𑀭𑀜𑁆𑀜𑀁 𑀏𑀓𑁄𑀤𑀓𑀁, 𑀦𑀺𑀩𑀤𑁆𑀥𑀁 𑀤𑁂𑀯𑁄 𑀯𑀲𑁆𑀲𑀢𑀺, 𑀓𑀦𑁆𑀤𑀭𑀸 𑀧𑀽𑀭𑀸, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀤𑀼𑀫𑀸𑀤𑀺𑀲𑀜𑁆𑀙𑀦𑁆𑀦𑀸𑀦𑀺 𑀲𑀭𑀸𑀦𑀺 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀕𑀘𑁆𑀙𑀦𑁆𑀢𑁂𑀲𑀼 𑀲𑀓𑀝𑁂𑀲𑀼 ‘‘𑀇𑀫𑀸𑀦𑀺 𑀲𑀓𑀝𑀸𑀦𑀺 𑀆𑀤𑀸𑀬 𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀲𑀼𑀓𑀚𑀦𑀧𑀤𑀁 𑀦𑀸𑀫𑀸’’𑀢𑀺. ‘‘𑀇𑀫𑀲𑁆𑀫𑀺𑀁 𑀘𑀺𑀫𑀲𑁆𑀫𑀺𑀜𑁆𑀘 𑀲𑀓𑀝𑁂 𑀓𑀺𑀁 𑀦𑀸𑀫 𑀪𑀡𑁆𑀟’’𑀦𑁆𑀢𑀺? ‘‘𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘𑀸’’𑀢𑀺. ‘‘𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀲𑀓𑀝𑀁 𑀅𑀢𑀺𑀯𑀺𑀬 𑀕𑀭𑀼𑀓𑀁 𑀳𑀼𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀏𑀢𑀲𑁆𑀫𑀺𑀁 𑀓𑀺𑀁 𑀪𑀡𑁆𑀟’’𑀦𑁆𑀢𑀺? ‘‘𑀉𑀤𑀓𑀁 𑀏𑀢𑁆𑀣𑀸’’𑀢𑀺. ‘‘𑀧𑀭𑀢𑁄 𑀢𑀸𑀯 𑀉𑀤𑀓𑀁 𑀆𑀦𑁂𑀦𑁆𑀢𑁂𑀳𑀺 𑀯𑁄 𑀫𑀦𑀸𑀧𑀁 𑀓𑀢𑀁, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀤𑀓𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀼𑀭𑀢𑁄 𑀩𑀳𑀼 𑀉𑀤𑀓𑀁, 𑀘𑀸𑀝𑀺𑀬𑁄 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀲𑀼𑀔𑁂𑀦 𑀕𑀘𑁆𑀙𑀣𑀸’’𑀢𑀺 𑀆𑀳. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀅𑀫𑁆𑀳𑀸𑀓𑀁 𑀧𑀧𑀜𑁆𑀘𑁄 𑀳𑁄𑀢𑀻’’𑀢𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀅𑀤𑀲𑁆𑀲𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀬𑀓𑁆𑀔𑀦𑀕𑀭𑀫𑁂𑀯 𑀅𑀕𑀫𑀸𑀲𑀺.

𑀲𑁄𑀧𑀺 𑀩𑀸𑀮𑀲𑀢𑁆𑀣𑀯𑀸𑀳𑁄 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀬𑀓𑁆𑀔𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀘𑀸𑀝𑀺𑀬𑁄 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀧𑀲𑀢𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀲𑀓𑀝𑀸𑀦𑀺 𑀧𑀸𑀚𑀸𑀧𑁂𑀲𑀺, 𑀧𑀼𑀭𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀉𑀤𑀓𑀁 𑀦𑀸𑀳𑁄𑀲𑀺, 𑀫𑀦𑀼𑀲𑁆𑀲𑀸 𑀧𑀸𑀦𑀻𑀬𑀁 𑀅𑀮𑀪𑀦𑁆𑀢𑀸 𑀓𑀺𑀮𑀫𑀺𑀁𑀲𑀼. 𑀢𑁂 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀕𑀦𑁆𑀢𑁆𑀯𑀸 𑀲𑀓𑀝𑀸𑀦𑀺 𑀫𑁄𑀘𑁂𑀢𑁆𑀯𑀸 𑀧𑀭𑀺𑀯𑀝𑁆𑀝𑀓𑁂𑀦 𑀞𑀧𑁂𑀢𑁆𑀯𑀸 𑀕𑁄𑀡𑁂 𑀘𑀓𑁆𑀓𑁂𑀲𑀼 𑀩𑀦𑁆𑀥𑀺𑀁𑀲𑀼. 𑀦𑁂𑀯 𑀕𑁄𑀡𑀸𑀦𑀁 𑀉𑀤𑀓𑀁 𑀅𑀳𑁄𑀲𑀺, 𑀦 𑀫𑀦𑀼𑀲𑁆𑀲𑀸𑀦𑀁 𑀬𑀸𑀕𑀼𑀪𑀢𑁆𑀢𑀁 𑀯𑀸. 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀬𑀺𑀁𑀲𑀼. 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀬𑀓𑁆𑀔𑀸 𑀬𑀓𑁆𑀔𑀦𑀕𑀭𑀢𑁄 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀧𑀺 𑀕𑁄𑀡𑁂 𑀘 𑀫𑀦𑀼𑀲𑁆𑀲𑁂 𑀘 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀻𑀦𑀺 𑀅𑀯𑀲𑁂𑀲𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀏𑀯𑀫𑁂𑀓𑀁 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂𑀧𑀺 𑀢𑁂 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼, 𑀳𑀢𑁆𑀣𑀝𑁆𑀞𑀺𑀓𑀸𑀤𑀻𑀦𑀺 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑀣𑀸𑀧𑀽𑀭𑀺𑀢𑀸𑀦𑁂𑀯 𑀅𑀝𑁆𑀞𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑀢𑁄 𑀫𑀸𑀲𑀟𑁆𑀠𑀫𑀸𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀓𑀦𑁆𑀢𑀸𑀭𑀫𑀼𑀔𑀁 𑀧𑀸𑀧𑀼𑀡𑀺. 𑀲𑁄 𑀢𑀢𑁆𑀣 𑀉𑀤𑀓𑀘𑀸𑀝𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀳𑀼𑀁 𑀉𑀤𑀓𑀁 𑀆𑀤𑀸𑀬 𑀔𑀦𑁆𑀥𑀸𑀯𑀸𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀢𑀼𑀫𑁆𑀳𑁂 𑀫𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀧𑀲𑀢𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀫𑀸 𑀯𑀴𑀜𑁆𑀚𑀬𑀺𑀢𑁆𑀣, 𑀓𑀦𑁆𑀢𑀸𑀭𑁂 𑀯𑀺𑀲𑀭𑀼𑀓𑁆𑀔𑀸 𑀦𑀸𑀫 𑀳𑁄𑀦𑁆𑀢𑀺, 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀢𑀼𑀫𑁆𑀳𑁂𑀳𑀺 𑀧𑀼𑀭𑁂 𑀅𑀔𑀸𑀤𑀺𑀢𑀧𑀼𑀩𑁆𑀩𑀁 𑀫𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀫𑀸 𑀔𑀸𑀤𑀺𑀢𑁆𑀣𑀸’’𑀢𑀺. 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀓𑀦𑁆𑀢𑀸𑀭𑀫𑀚𑁆𑀛𑀁 𑀲𑀫𑁆𑀧𑀢𑁆𑀢𑁂 𑀲𑁄 𑀬𑀓𑁆𑀔𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀧𑀣𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸𑀯 𑀅𑀜𑁆𑀜𑀸𑀲𑀺 ‘‘𑀇𑀫𑀲𑁆𑀫𑀺𑀁 𑀓𑀦𑁆𑀢𑀸𑀭𑁂 𑀉𑀤𑀓𑀁 𑀦𑀢𑁆𑀣𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑁄 𑀦𑀸𑀫𑁂𑀲, 𑀅𑀬𑀜𑁆𑀘 𑀦𑀺𑀩𑁆𑀪𑀬𑁄 𑀭𑀢𑁆𑀢𑀦𑁂𑀢𑁆𑀢𑁄, 𑀙𑀸𑀬𑀸𑀧𑀺𑀲𑁆𑀲 𑀦 𑀧𑀜𑁆𑀜𑀸𑀬𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀇𑀫𑀺𑀦𑀸 𑀧𑀼𑀭𑀢𑁄 𑀕𑀢𑁄 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀲𑀩𑁆𑀩𑀁 𑀉𑀤𑀓𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀓𑀺𑀮𑀫𑁂𑀢𑁆𑀯𑀸 𑀲𑀧𑀭𑀺𑀲𑁄 𑀔𑀸𑀤𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀦 𑀧𑀡𑁆𑀟𑀺𑀢𑀪𑀸𑀯𑀁 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂’’𑀢𑀺. 𑀢𑀢𑁄 𑀦𑀁 𑀆𑀳 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀫𑀬𑀁 𑀯𑀸𑀡𑀺𑀚𑀸 𑀦𑀸𑀫 𑀅𑀜𑁆𑀜𑀁 𑀉𑀤𑀓𑀁 𑀅𑀤𑀺𑀲𑁆𑀯𑀸 𑀕𑀳𑀺𑀢𑀉𑀤𑀓𑀁 𑀦 𑀙𑀟𑁆𑀟𑁂𑀫, 𑀤𑀺𑀝𑁆𑀞𑀝𑁆𑀞𑀸𑀦𑁂 𑀧𑀦 𑀙𑀟𑁆𑀟𑁂𑀢𑁆𑀯𑀸 𑀲𑀓𑀝𑀸𑀦𑀺 𑀲𑀮𑁆𑀮𑀳𑀼𑀓𑀸𑀦𑀺 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀬𑀓𑁆𑀔𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀤𑀲𑁆𑀲𑀦𑀁 𑀉𑀧𑀕𑀫𑁆𑀫 𑀅𑀢𑁆𑀢𑀦𑁄 𑀬𑀓𑁆𑀔𑀦𑀕𑀭𑀫𑁂𑀯 𑀕𑀢𑁄.

𑀬𑀓𑁆𑀔𑁂 𑀧𑀦 𑀕𑀢𑁂 𑀫𑀦𑀼𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳𑀁𑀲𑀼 ‘‘𑀅𑀬𑁆𑀬, 𑀏𑀢𑁂 𑀫𑀦𑀼𑀲𑁆𑀲𑀸 ‘𑀏𑀲𑀸 𑀦𑀻𑀮𑀯𑀦𑀭𑀸𑀚𑀺 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀤𑁂𑀯𑁄 𑀯𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀉𑀧𑁆𑀧𑀮𑀓𑀼𑀫𑀼𑀤𑀫𑀸𑀮𑀸𑀥𑀸𑀭𑀺𑀦𑁄 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀓𑀮𑀸𑀧𑁂 𑀆𑀤𑀸𑀬 𑀪𑀺𑀲𑀫𑀼𑀴𑀸𑀮𑀸𑀦𑀺 𑀔𑀸𑀤𑀦𑁆𑀢𑀸 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑀺 𑀆𑀕𑀢𑀸, 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀲𑀮𑁆𑀮𑀳𑀼𑀓𑁂𑀳𑀺 𑀲𑀓𑀝𑁂𑀳𑀺 𑀔𑀺𑀧𑁆𑀧𑀁 𑀕𑀘𑁆𑀙𑀸𑀫𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀓𑀝𑀸𑀦𑀺 𑀞𑀧𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 ‘𑀇𑀫𑀲𑁆𑀫𑀺𑀁 𑀓𑀦𑁆𑀢𑀸𑀭𑁂 𑀲𑀭𑁄 𑀯𑀸 𑀧𑁄𑀓𑁆𑀔𑀭𑀡𑀻 𑀯𑀸 𑀅𑀢𑁆𑀣𑀻’𑀢𑀺 𑀓𑀲𑁆𑀲𑀘𑀺 𑀲𑀼𑀢𑀧𑀼𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦, 𑀅𑀬𑁆𑀬, 𑀲𑀼𑀢𑀧𑀼𑀩𑁆𑀩’’𑀦𑁆𑀢𑀺. 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑁄 𑀦𑀸𑀫 𑀏𑀲𑁄, 𑀇𑀤𑀸𑀦𑀺 𑀏𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 ‘‘𑀏𑀢𑀸𑀬 𑀦𑀻𑀮𑀯𑀦𑀭𑀸𑀚𑀺𑀬𑀸 𑀧𑀼𑀭𑀢𑁄 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺, ‘‘𑀯𑀼𑀝𑁆𑀞𑀺𑀯𑀸𑀢𑁄 𑀦𑀸𑀫 𑀓𑀺𑀢𑁆𑀢𑀓𑀁 𑀞𑀸𑀦𑀁 𑀯𑀸𑀬𑀢𑀻’’𑀢𑀺? ‘‘𑀬𑁄𑀚𑀦𑀫𑀢𑁆𑀢𑀁, 𑀅𑀬𑁆𑀬𑀸’’𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄 𑀏𑀓𑀲𑁆𑀲𑀸𑀧𑀺 𑀲𑀭𑀻𑀭𑀁 𑀯𑀼𑀝𑁆𑀞𑀺𑀯𑀸𑀢𑁄 𑀧𑀳𑀭𑀢𑀻’’𑀢𑀺? ‘‘𑀦𑀢𑁆𑀣𑀺 𑀅𑀬𑁆𑀬𑀸’’𑀢𑀺. ‘‘𑀫𑁂𑀖𑀲𑀻𑀲𑀁 𑀦𑀸𑀫 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀢𑀺𑀬𑁄𑀚𑀦𑀫𑀢𑁆𑀢𑁂 𑀅𑀬𑁆𑀬𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀯𑁄 𑀓𑁂𑀦𑀘𑀺 𑀏𑀓𑀫𑁆𑀧𑀺 𑀫𑁂𑀖𑀲𑀻𑀲𑀁 𑀤𑀺𑀝𑁆𑀞’’𑀦𑁆𑀢𑀺? ‘‘𑀦𑀢𑁆𑀣𑀺, 𑀅𑀬𑁆𑀬𑀸’’𑀢𑀺. ‘‘𑀯𑀺𑀚𑁆𑀚𑀼𑀮𑀢𑀸 𑀦𑀸𑀫 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀘𑀢𑀼𑀧𑁆𑀧𑀜𑁆𑀘𑀬𑁄𑀚𑀦𑀫𑀢𑁆𑀢𑁂, 𑀅𑀬𑁆𑀬𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀯𑁄 𑀓𑁂𑀦𑀘𑀺 𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁄 𑀤𑀺𑀝𑁆𑀞𑁄’’𑀢𑀺? ‘‘𑀦𑀢𑁆𑀣𑀺, 𑀅𑀬𑁆𑀬𑀸’’𑀢𑀺. ‘‘𑀫𑁂𑀖𑀲𑀤𑁆𑀤𑁄 𑀦𑀸𑀫 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀲𑀼𑀬𑁆𑀬𑀢𑀻’’𑀢𑀺? ‘‘𑀏𑀓𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑁂, 𑀅𑀬𑁆𑀬𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀯𑁄 𑀓𑁂𑀦𑀘𑀺 𑀫𑁂𑀖𑀲𑀤𑁆𑀤𑁄 𑀲𑀼𑀢𑁄’’𑀢𑀺? ‘‘𑀦𑀢𑁆𑀣𑀺, 𑀅𑀬𑁆𑀬𑀸’’𑀢𑀺. ‘‘𑀦 𑀏𑀢𑁂 𑀫𑀦𑀼𑀲𑁆𑀲𑀸, 𑀬𑀓𑁆𑀔𑀸 𑀏𑀢𑁂, 𑀅𑀫𑁆𑀳𑁂 𑀉𑀤𑀓𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀤𑀼𑀩𑁆𑀩𑀮𑁂 𑀓𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀧𑀼𑀭𑀢𑁄 𑀕𑀢𑁄 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀦 𑀉𑀧𑀸𑀬𑀓𑀼𑀲𑀮𑁄. 𑀅𑀤𑁆𑀥𑀸 𑀲𑁄 𑀏𑀢𑁂𑀳𑀺 𑀉𑀤𑀓𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀓𑀺𑀮𑀫𑁂𑀢𑁆𑀯𑀸 𑀔𑀸𑀤𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑀣𑀸𑀧𑀽𑀭𑀺𑀢𑀸𑀦𑁂𑀯 𑀞𑀺𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀚𑁆𑀚 𑀫𑀬𑀁 𑀢𑀸𑀦𑀺 𑀧𑀲𑁆𑀲𑀺𑀲𑁆𑀲𑀸𑀫, 𑀧𑀲𑀢𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀅𑀙𑀟𑁆𑀟𑁂𑀢𑁆𑀯𑀸 𑀲𑀻𑀖𑀲𑀻𑀖𑀁 𑀧𑀸𑀚𑁂𑀣𑀸’’𑀢𑀺 𑀧𑀸𑀚𑀸𑀧𑁂𑀲𑀺.

𑀲𑁄 𑀕𑀘𑁆𑀙𑀦𑁆𑀢𑁄 𑀬𑀣𑀸𑀧𑀽𑀭𑀺𑀢𑀸𑀦𑁂𑀯 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑁄𑀡𑀫𑀦𑀼𑀲𑁆𑀲𑀸𑀦𑀜𑁆𑀘 𑀳𑀢𑁆𑀣𑀝𑁆𑀞𑀺𑀓𑀸𑀤𑀻𑀦𑀺 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀤𑀺𑀲𑁆𑀯𑀸 𑀲𑀓𑀝𑀸𑀦𑀺 𑀫𑁄𑀘𑀸𑀧𑁂𑀢𑁆𑀯𑀸 𑀲𑀓𑀝𑀧𑀭𑀺𑀯𑀝𑁆𑀝𑀓𑁂𑀦 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀫𑀦𑀼𑀲𑁆𑀲𑁂 𑀘 𑀕𑁄𑀡𑁂 𑀘 𑀲𑀸𑀬𑀫𑀸𑀲𑀪𑀢𑁆𑀢𑀁 𑀪𑁄𑀚𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀫𑀚𑁆𑀛𑁂 𑀕𑁄𑀡𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀬𑀁 𑀩𑀮𑀦𑀸𑀬𑀓𑁄 𑀳𑀼𑀢𑁆𑀯𑀸 𑀔𑀕𑁆𑀕𑀳𑀢𑁆𑀣𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀞𑀺𑀢𑀓𑁄𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀧𑀦 𑀧𑀸𑀢𑁄𑀯 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑁄𑀡𑁂 𑀪𑁄𑀚𑁂𑀢𑁆𑀯𑀸 𑀤𑀼𑀩𑁆𑀩𑀮𑀲𑀓𑀝𑀸𑀦𑀺 𑀙𑀟𑁆𑀟𑀸𑀧𑁂𑀢𑁆𑀯𑀸 𑀣𑀺𑀭𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀅𑀧𑁆𑀧𑀕𑁆𑀖𑀁 𑀪𑀡𑁆𑀟𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀫𑀳𑀕𑁆𑀖𑀁 𑀪𑀡𑁆𑀟𑀁 𑀆𑀭𑁄𑀧𑀸𑀧𑁂𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀕𑀼𑀡𑀢𑀺𑀕𑀼𑀡𑁂𑀦 𑀫𑀽𑀮𑁂𑀦 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀲𑀁 𑀆𑀤𑀸𑀬 𑀧𑀼𑀦 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 ‘‘𑀏𑀯𑀁, 𑀕𑀳𑀧𑀢𑀺, 𑀧𑀼𑀩𑁆𑀩𑁂 𑀢𑀓𑁆𑀓𑀕𑁆𑀕𑀸𑀳𑀕𑀸𑀳𑀺𑀦𑁄 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸, 𑀅𑀧𑀡𑁆𑀡𑀓𑀕𑁆𑀕𑀸𑀳𑀕𑀸𑀳𑀺𑀦𑁄 𑀧𑀦 𑀅𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀓𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀖𑀝𑁂𑀢𑁆𑀯𑀸 𑀇𑀫𑀺𑀲𑁆𑀲𑀸 𑀅𑀧𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀸𑀬 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀅𑀧𑀡𑁆𑀡𑀓𑀁 𑀞𑀸𑀦𑀫𑁂𑀓𑁂, 𑀤𑀼𑀢𑀺𑀬𑀁 𑀆𑀳𑀼 𑀢𑀓𑁆𑀓𑀺𑀓𑀸;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓’’𑀦𑁆𑀢𑀺.

𑀢𑀢𑁆𑀣 𑀅𑀧𑀡𑁆𑀡𑀓𑀦𑁆𑀢𑀺 𑀏𑀓𑀁𑀲𑀺𑀓𑀁 𑀅𑀯𑀺𑀭𑀤𑁆𑀥𑀁 𑀦𑀺𑀬𑁆𑀬𑀸𑀦𑀺𑀓𑀁. 𑀞𑀸𑀦𑀦𑁆𑀢𑀺 𑀓𑀸𑀭𑀡𑀁. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀁 𑀢𑀺𑀝𑁆𑀞𑀢𑀺 𑀦𑀸𑀫, 𑀢𑀲𑁆𑀫𑀸 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, ‘‘𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁮𑁦𑁯) 𑀘𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 ‘‘𑀅𑀧𑀡𑁆𑀡𑀓𑀁 𑀞𑀸𑀦’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 ‘‘𑀬𑀁 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀧𑀦𑁆𑀦𑀁 𑀏𑀓𑀁𑀲𑀺𑀓𑀓𑀸𑀭𑀡𑀁 𑀅𑀯𑀺𑀭𑀤𑁆𑀥𑀓𑀸𑀭𑀡𑀁 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁, 𑀢𑀁 𑀇𑀤’’𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀧𑀪𑁂𑀤𑀢𑁄 𑀧𑀦 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺, 𑀧𑀜𑁆𑀘 𑀲𑀻𑀮𑀸𑀦𑀺, 𑀤𑀲 𑀲𑀻𑀮𑀸𑀦𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺, 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁; 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀛𑀸𑀦𑀁, 𑀯𑀺𑀧𑀲𑁆𑀲𑀦𑀸, 𑀅𑀪𑀺𑀜𑁆𑀜𑀸, 𑀲𑀫𑀸𑀧𑀢𑁆𑀢𑀺, 𑀅𑀭𑀺𑀬𑀫𑀕𑁆𑀕𑁄, 𑀅𑀭𑀺𑀬𑀨𑀮𑀁, 𑀲𑀩𑁆𑀩𑀫𑁆𑀧𑁂𑀢𑀁 𑀅𑀧𑀡𑁆𑀡𑀓𑀝𑁆𑀞𑀸𑀦𑀁 𑀅𑀧𑀡𑁆𑀡𑀓𑀧𑀝𑀺𑀧𑀤𑀸, 𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀸𑀢𑀺 𑀅𑀢𑁆𑀣𑁄.

𑀬𑀲𑁆𑀫𑀸 𑀘 𑀧𑀦 𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀸𑀬 𑀏𑀢𑀁 𑀦𑀸𑀫𑀁, 𑀢𑀲𑁆𑀫𑀸𑀬𑁂𑀯 𑀪𑀕𑀯𑀸 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀸𑀳 𑁋

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺, 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁩.𑁧𑁬).

𑀇𑀫𑀲𑁆𑀫𑀺𑀜𑁆𑀘𑀸𑀧𑀺 𑀲𑀼𑀢𑁆𑀢𑁂 𑀢𑀬𑁄𑀯 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀅𑀬𑀁 𑀧𑀦 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀬𑀸𑀯 𑀅𑀭𑀳𑀢𑁆𑀢𑀨𑀮𑀁 𑀮𑀩𑁆𑀪𑀢𑁂𑀯. 𑀢𑀢𑁆𑀣 𑀅𑀭𑀳𑀢𑁆𑀢𑀨𑀮𑀫𑁆𑀧𑀺, 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀲𑁆𑀲 𑀘𑁂𑀯, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀘, 𑀧𑀝𑀺𑀧𑀤𑀸𑀬𑁂𑀯 𑀦𑀸𑀫 𑀳𑁄𑀢𑀺.

𑀏𑀓𑁂𑀢𑀺 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀅𑀲𑀼𑀓𑀸 𑀦𑀸𑀫𑀸’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀇𑀤𑀁 𑀧𑀦 𑀲𑀧𑀭𑀺𑀲𑀁 𑀩𑁄𑀥𑀺𑀲𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀁 𑀆𑀳𑀼 𑀢𑀓𑁆𑀓𑀺𑀓𑀸𑀢𑀺 𑀤𑀼𑀢𑀺𑀬𑀦𑁆𑀢𑀺 𑀧𑀞𑀫𑀢𑁄 𑀅𑀧𑀡𑁆𑀡𑀓𑀝𑁆𑀞𑀸𑀦𑀢𑁄 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀢𑁄 𑀤𑀼𑀢𑀺𑀬𑀁 𑀢𑀓𑁆𑀓𑀕𑁆𑀕𑀸𑀳𑀓𑀸𑀭𑀡𑀁 𑀅𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁. 𑀆𑀳𑀼 𑀢𑀓𑁆𑀓𑀺𑀓𑀸𑀢𑀺 𑀏𑀢𑁆𑀣 𑀧𑀦 𑀲𑀤𑁆𑀥𑀺𑀁 𑀧𑀼𑀭𑀺𑀫𑀧𑀤𑁂𑀦 𑀅𑀬𑀁 𑀬𑁄𑀚𑀦𑀸 𑁋 𑀅𑀧𑀡𑁆𑀡𑀓𑀝𑁆𑀞𑀸𑀦𑀁 𑀏𑀓𑀁𑀲𑀺𑀓𑀓𑀸𑀭𑀡𑀁 𑀅𑀯𑀺𑀭𑀤𑁆𑀥𑀓𑀸𑀭𑀡𑀁 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁 𑀏𑀓𑁂 𑀩𑁄𑀥𑀺𑀲𑀢𑁆𑀢𑀧𑁆𑀧𑀫𑀼𑀔𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀁𑀲𑀼. 𑀬𑁂 𑀧𑀦 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀧𑁆𑀧𑀫𑀼𑀔𑀸 𑀢𑀓𑁆𑀓𑀺𑀓𑀸 𑀆𑀳𑀼, 𑀢𑁂 𑀤𑀼𑀢𑀺𑀬𑀁 𑀲𑀸𑀧𑀭𑀸𑀥𑀁 𑀅𑀦𑁂𑀓𑀁𑀲𑀺𑀓𑀝𑁆𑀞𑀸𑀦𑀁 𑀯𑀺𑀭𑀤𑁆𑀥𑀓𑀸𑀭𑀡𑀁 𑀅𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁 𑀅𑀕𑁆𑀕𑀳𑁂𑀲𑀼𑀁. 𑀢𑁂𑀲𑀼 𑀬𑁂 𑀅𑀧𑀡𑁆𑀡𑀓𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀲𑀼𑀓𑁆𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀬𑁂 𑀤𑀼𑀢𑀺𑀬𑀁 ‘‘𑀧𑀼𑀭𑀢𑁄 𑀪𑀯𑀺𑀢𑀩𑁆𑀩𑀁 𑀉𑀤𑀓𑁂𑀦𑀸’’𑀢𑀺 𑀢𑀓𑁆𑀓𑀕𑁆𑀕𑀸𑀳𑀲𑀗𑁆𑀔𑀸𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁 𑀅𑀕𑁆𑀕𑀳𑁂𑀲𑀼𑀁. 𑀢𑁂 𑀓𑀡𑁆𑀳𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸.

𑀢𑀢𑁆𑀣 𑀲𑀼𑀓𑁆𑀓𑀧𑀝𑀺𑀧𑀤𑀸 𑀅𑀧𑀭𑀺𑀳𑀸𑀦𑀺𑀧𑀝𑀺𑀧𑀤𑀸, 𑀓𑀡𑁆𑀳𑀧𑀝𑀺𑀧𑀤𑀸 𑀧𑀭𑀺𑀳𑀸𑀦𑀺𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀬𑁂 𑀲𑀼𑀓𑁆𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸, 𑀢𑁂 𑀅𑀧𑀭𑀺𑀳𑀻𑀦𑀸 𑀲𑁄𑀢𑁆𑀣𑀺𑀪𑀸𑀯𑀁 𑀧𑀢𑁆𑀢𑀸. 𑀬𑁂 𑀧𑀦 𑀓𑀡𑁆𑀳𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸, 𑀢𑁂 𑀧𑀭𑀺𑀳𑀻𑀦𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀸𑀢𑀺 𑀇𑀫𑀫𑀢𑁆𑀣𑀁 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀯𑀢𑁆𑀯𑀸 𑀉𑀢𑁆𑀢𑀭𑀺 𑀇𑀤𑀫𑀸𑀳 ‘‘𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓’’𑀦𑁆𑀢𑀺.

𑀢𑀢𑁆𑀣 𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻𑀢𑀺 ‘‘𑀫𑁂𑀥𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀯𑀺𑀧𑀼𑀮𑀸𑀬 𑀯𑀺𑀲𑀼𑀤𑁆𑀥𑀸𑀬 𑀉𑀢𑁆𑀢𑀫𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀧𑀼𑀢𑁆𑀢𑁄 𑀏𑀢𑀁 𑀅𑀧𑀡𑁆𑀡𑀓𑁂 𑀘𑁂𑀯 𑀲𑀧𑀡𑁆𑀡𑀓𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀅𑀢𑀓𑁆𑀓𑀕𑁆𑀕𑀸𑀳𑀢𑀓𑁆𑀓𑀕𑁆𑀕𑀸𑀳𑀲𑀗𑁆𑀔𑀸𑀢𑁂𑀲𑀼 𑀞𑀸𑀦𑁂𑀲𑀼 𑀕𑀼𑀡𑀤𑁄𑀲𑀁 𑀯𑀼𑀤𑁆𑀥𑀺𑀳𑀸𑀦𑀺𑀁 𑀅𑀢𑁆𑀣𑀸𑀦𑀢𑁆𑀣𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓𑀦𑁆𑀢𑀺 𑀬𑀁 𑀅𑀧𑀡𑁆𑀡𑀓𑀁 𑀏𑀓𑀁𑀲𑀺𑀓𑀁 𑀲𑀼𑀓𑁆𑀓𑀧𑀝𑀺𑀧𑀤𑀸𑀅𑀧𑀭𑀺𑀳𑀸𑀦𑀺𑀬𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁, 𑀢𑀤𑁂𑀯 𑀕𑀡𑁆𑀳𑁂𑀬𑁆𑀬. 𑀓𑀲𑁆𑀫𑀸? 𑀏𑀓𑀁𑀲𑀺𑀓𑀸𑀤𑀺𑀪𑀸𑀯𑀢𑁄𑀬𑁂𑀯. 𑀇𑀢𑀭𑀁 𑀧𑀦 𑀦 𑀕𑀡𑁆𑀳𑁂𑀬𑁆𑀬. 𑀓𑀲𑁆𑀫𑀸? 𑀅𑀦𑁂𑀓𑀁𑀲𑀺𑀓𑀸𑀤𑀺𑀪𑀸𑀯𑀢𑁄𑀬𑁂𑀯. 𑀅𑀬𑀜𑁆𑀳𑀺 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀦𑀸𑀫 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀧𑀝𑀺𑀧𑀤𑀸. 𑀲𑀩𑁆𑀩𑀩𑀼𑀤𑁆𑀥𑀸 𑀳𑀺 𑀅𑀧𑀡𑁆𑀡𑀓𑀧𑀝𑀺𑀧𑀤𑀸𑀬𑀫𑁂𑀯 𑀞𑀢𑁆𑀯𑀸 𑀤𑀴𑁆𑀳𑁂𑀦 𑀯𑀻𑀭𑀺𑀬𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀫𑀽𑀮𑁂 𑀩𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀩𑀼𑀤𑁆𑀥𑀧𑀼𑀢𑁆𑀢𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀢𑁂𑀲𑀁 𑀉𑀧𑀸𑀲𑀓𑀸𑀦𑀁 𑀢𑀺𑀲𑁆𑀲𑁄 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑁄 𑀘 𑀙 𑀓𑀸𑀫𑀲𑀕𑁆𑀕𑁂 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀘 𑀤𑀢𑁆𑀯𑀸𑀧𑀺 𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀤𑀸𑀬𑀺𑀓𑀸 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀦𑀸𑀫, 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀜𑁆𑀘𑀲𑀼 𑀘 𑀦𑀻𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀤𑀸𑀬𑀺𑀓𑀸 𑀲𑀧𑀡𑁆𑀡𑀓𑀧𑀝𑀺𑀧𑀤𑀸 𑀦𑀸𑀫𑀸𑀢𑀺 𑀇𑀫𑀁 𑀅𑀧𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀧𑀓𑀸𑀲𑁂𑀲𑀺. 𑀘𑀢𑀼𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀧𑀜𑁆𑀘𑀲𑀢𑀸 𑀉𑀧𑀸𑀲𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑁋 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀺𑀲𑀸 𑀤𑁂𑀯𑀤𑀢𑁆𑀢𑀧𑀭𑀺𑀲𑀸𑀯, 𑀧𑀡𑁆𑀟𑀺𑀢𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀧𑀡𑁆𑀟𑀺𑀢𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀧𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

𑁨. 𑀯𑀡𑁆𑀡𑀼𑀧𑀣𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀺𑀮𑀸𑀲𑀼𑀦𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀓𑀣𑁂𑀲𑀺. 𑀓𑀁 𑀧𑀦 𑀆𑀭𑀩𑁆𑀪𑀸𑀢𑀺? 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁. 𑀢𑀣𑀸𑀕𑀢𑁂 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀏𑀓𑁄 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀤𑁆𑀯𑁂 𑀫𑀸𑀢𑀺𑀓𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀲𑀺𑀓𑁆𑀔𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀢𑁂𑀫𑀸𑀲𑀁 𑀯𑀸𑀬𑀫𑀦𑁆𑀢𑁄𑀧𑀺 𑀑𑀪𑀸𑀲𑀫𑀢𑁆𑀢𑀁 𑀯𑀸 𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀯𑀸 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀢𑁆𑀣𑀸𑀭𑀸 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀓𑀣𑀺𑀢𑀸, 𑀢𑁂𑀲𑀼 𑀫𑀬𑀸 𑀧𑀤𑀧𑀭𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀦𑀢𑁆𑀣𑀺 𑀫𑀜𑁆𑀜𑁂 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺 𑀅𑀭𑀜𑁆𑀜𑀯𑀸𑀲𑁂𑀦, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀩𑀼𑀤𑁆𑀥𑀲𑀭𑀻𑀭𑀁 𑀑𑀮𑁄𑀓𑁂𑀦𑁆𑀢𑁄 𑀫𑀥𑀼𑀭𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦 𑀚𑁂𑀢𑀯𑀦𑀫𑁂𑀯 𑀧𑀘𑁆𑀘𑀸𑀕𑀫𑀸𑀲𑀺. 𑀅𑀣 𑀦𑀁 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑁆𑀯𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀕𑀢𑁄, 𑀇𑀤𑀸𑀦𑀺 𑀧𑀦 𑀆𑀕𑀦𑁆𑀢𑁆𑀯𑀸 𑀲𑀗𑁆𑀕𑀡𑀺𑀓𑀸𑀬 𑀅𑀪𑀺𑀭𑀫𑀫𑀸𑀦𑁄 𑀘𑀭𑀲𑀺, 𑀓𑀺𑀁 𑀦𑀼 𑀔𑁄 𑀢𑁂 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀚𑀸𑀢𑁄𑀲𑀻’’𑀢𑀺? 𑀆𑀯𑀼𑀲𑁄, 𑀅𑀳𑀁 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀮𑀪𑀺𑀢𑁆𑀯𑀸 ‘‘𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀦 𑀫𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀆𑀕𑀢𑁄𑀫𑁆𑀳𑀻𑀢𑀺. ‘‘𑀅𑀓𑀸𑀭𑀡𑀁 𑀢𑁂, 𑀆𑀯𑀼𑀲𑁄, 𑀓𑀢𑀁 𑀤𑀴𑁆𑀳𑀯𑀻𑀭𑀺𑀬𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀦𑁆𑀢𑁂𑀦, 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀁, 𑀏𑀳𑀺 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑁂𑀫𑀸’’𑀢𑀺 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀢𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳 ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀏𑀢𑀁 𑀪𑀺𑀓𑁆𑀔𑀼𑀁 𑀅𑀦𑀺𑀘𑁆𑀙𑀫𑀸𑀦𑀁 𑀆𑀤𑀸𑀬 𑀆𑀕𑀢𑀸, 𑀓𑀺𑀁 𑀓𑀢𑀁 𑀇𑀫𑀺𑀦𑀸’’𑀢𑀺? ‘‘𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀆𑀕𑀢𑁄’’𑀢𑀺 𑀆𑀳𑀁𑀲𑀼. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀪𑀺𑀓𑁆𑀔𑀼 𑀯𑀻𑀭𑀺𑀬𑀁 𑀑𑀲𑁆𑀲𑀝𑁆𑀞’’𑀦𑁆𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 ‘𑀅𑀧𑁆𑀧𑀺𑀘𑁆𑀙𑁄’𑀢𑀺 𑀯𑀸 ‘𑀲𑀦𑁆𑀢𑀼𑀝𑁆𑀞𑁄’𑀢𑀺 𑀯𑀸 ‘𑀧𑀯𑀺𑀯𑀺𑀢𑁆𑀢𑁄’𑀢𑀺 𑀯𑀸 ‘𑀆𑀭𑀤𑁆𑀥𑀯𑀻𑀭𑀺𑀬𑁄’𑀢𑀺 𑀯𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 ‘𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀽’𑀢𑀺 𑀚𑀸𑀦𑀸𑀧𑁂𑀲𑀺. 𑀦𑀦𑀼 𑀢𑁆𑀯𑀁 𑀧𑀼𑀩𑁆𑀩𑁂 𑀯𑀻𑀭𑀺𑀬𑀯𑀸 𑀅𑀳𑁄𑀲𑀺, 𑀢𑀬𑀸 𑀏𑀓𑁂𑀦 𑀓𑀢𑀁 𑀯𑀻𑀭𑀺𑀬𑀁 𑀦𑀺𑀲𑁆𑀲𑀸𑀬 𑀫𑀭𑀼𑀓𑀦𑁆𑀢𑀸𑀭𑁂 𑀧𑀜𑁆𑀘𑀲𑀼 𑀲𑀓𑀝𑀲𑀢𑁂𑀲𑀼 𑀫𑀦𑀼𑀲𑁆𑀲𑀸 𑀘 𑀕𑁄𑀡𑀸 𑀘 𑀧𑀸𑀦𑀻𑀬𑀁 𑀮𑀪𑀺𑀢𑁆𑀯𑀸 𑀲𑀼𑀔𑀺𑀢𑀸 𑀚𑀸𑀢𑀸, 𑀇𑀤𑀸𑀦𑀺 𑀓𑀲𑁆𑀫𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀲𑀻’’𑀢𑀺. 𑀲𑁄 𑀪𑀺𑀓𑁆𑀔𑀼 𑀏𑀢𑁆𑀢𑀓𑁂𑀦 𑀯𑀘𑀦𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀅𑀳𑁄𑀲𑀺.

𑀢𑀁 𑀧𑀦 𑀓𑀣𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀯𑀻𑀭𑀺𑀬𑀲𑁆𑀲 𑀑𑀲𑁆𑀲𑀝𑁆𑀞𑀪𑀸𑀯𑁄 𑀅𑀫𑁆𑀳𑀸𑀓𑀁 𑀧𑀸𑀓𑀝𑁄, 𑀧𑀼𑀩𑁆𑀩𑁂 𑀧𑀦𑀲𑁆𑀲 𑀏𑀓𑀲𑁆𑀲 𑀯𑀻𑀭𑀺𑀬𑀁 𑀦𑀺𑀲𑁆𑀲𑀸𑀬 𑀫𑀭𑀼𑀓𑀦𑁆𑀢𑀸𑀭𑁂 𑀕𑁄𑀡𑀫𑀦𑀼𑀲𑁆𑀲𑀸𑀦𑀁 𑀧𑀸𑀦𑀻𑀬𑀁 𑀮𑀪𑀺𑀢𑁆𑀯𑀸 𑀲𑀼𑀔𑀺𑀢𑀪𑀸𑀯𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀢𑀼𑀫𑁆𑀳𑀸𑀓𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀧𑀸𑀓𑀝𑁄, 𑀅𑀫𑁆𑀳𑀸𑀓𑀫𑁆𑀧𑁂𑀢𑀁 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀢𑀼𑀧𑁆𑀧𑀸𑀤𑀁 𑀚𑀦𑁂𑀢𑁆𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀧𑀸𑀓𑀝𑀫𑀓𑀸𑀲𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀣𑀯𑀸𑀳𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀏𑀓𑀤𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀫𑀭𑀼𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀓𑀦𑁆𑀢𑀸𑀭𑁂 𑀲𑀼𑀔𑀼𑀫𑀯𑀸𑀮𑀼𑀓𑀸 𑀫𑀼𑀝𑁆𑀞𑀺𑀦𑀸 𑀕𑀳𑀺𑀢𑀸 𑀳𑀢𑁆𑀣𑁂 𑀦 𑀢𑀺𑀝𑁆𑀞𑀢𑀺, 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀗𑁆𑀕𑀸𑀭𑀭𑀸𑀲𑀺 𑀯𑀺𑀬 𑀉𑀡𑁆𑀳𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀅𑀓𑁆𑀓𑀫𑀺𑀢𑀼𑀁. 𑀢𑀲𑁆𑀫𑀸 𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀸 𑀤𑀸𑀭𑀼𑀤𑀓𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀓𑀝𑁂𑀳𑀺 𑀆𑀤𑀸𑀬 𑀭𑀢𑁆𑀢𑀺𑀫𑁂𑀯 𑀕𑀦𑁆𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀓𑀝𑀸𑀦𑀺 𑀧𑀭𑀺𑀯𑀝𑁆𑀝𑀁 𑀓𑀢𑁆𑀯𑀸 𑀫𑀢𑁆𑀣𑀓𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀆𑀳𑀸𑀭𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑀸 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀸 𑀲𑀻𑀢𑀮𑀸𑀬 𑀚𑀸𑀢𑀸𑀬 𑀲𑀓𑀝𑀸𑀦𑀺 𑀬𑁄𑀚𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑀫𑀼𑀤𑁆𑀤𑀕𑀫𑀦𑀲𑀤𑀺𑀲𑀫𑁂𑀯 𑀕𑀫𑀦𑀁 𑀳𑁄𑀢𑀺. 𑀣𑀮𑀦𑀺𑀬𑀸𑀫𑀓𑁄 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑁄 𑀢𑀸𑀭𑀓𑀲𑀜𑁆𑀜𑀸 𑀲𑀢𑁆𑀣𑀁 𑀢𑀸𑀭𑁂𑀢𑀺.

𑀲𑁄𑀧𑀺 𑀲𑀢𑁆𑀣𑀯𑀸𑀳𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀢𑀁 𑀓𑀦𑁆𑀢𑀸𑀭𑀁 𑀕𑀘𑁆𑀙𑀦𑁆𑀢𑁄 𑀏𑀓𑀽𑀦𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 ‘‘𑀇𑀤𑀸𑀦𑀺 𑀏𑀓𑀭𑀢𑁆𑀢𑁂𑀦𑁂𑀯 𑀫𑀭𑀼𑀓𑀦𑁆𑀢𑀸𑀭𑀸 𑀦𑀺𑀓𑁆𑀔𑀫𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀩𑁆𑀩𑀁 𑀤𑀸𑀭𑀼𑀤𑀓𑀁 𑀔𑁂𑀧𑁂𑀢𑁆𑀯𑀸 𑀲𑀓𑀝𑀸𑀦𑀺 𑀬𑁄𑀚𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀦𑀺𑀬𑀸𑀫𑀓𑁄 𑀧𑀦 𑀧𑀼𑀭𑀺𑀫𑀲𑀓𑀝𑁂 𑀆𑀲𑀦𑀁 𑀧𑀢𑁆𑀣𑀭𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀢𑀸𑀭𑀓𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀇𑀢𑁄 𑀧𑀸𑀚𑁂𑀣, 𑀇𑀢𑁄 𑀧𑀸𑀚𑁂𑀣𑀸’’𑀢𑀺 𑀯𑀤𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀲𑁄 𑀤𑀻𑀖𑀫𑀤𑁆𑀥𑀸𑀦𑀁 𑀅𑀦𑀺𑀤𑁆𑀤𑀸𑀬𑀦𑀪𑀸𑀯𑁂𑀦 𑀓𑀺𑀮𑀦𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺, 𑀕𑁄𑀡𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀫𑁂𑀯 𑀕𑀡𑁆𑀳𑀦𑁆𑀢𑁂 𑀦 𑀅𑀜𑁆𑀜𑀸𑀲𑀺. 𑀕𑁄𑀡𑀸 𑀲𑀩𑁆𑀩𑀭𑀢𑁆𑀢𑀺𑀁 𑀅𑀕𑀫𑀁𑀲𑀼. 𑀦𑀺𑀬𑀸𑀫𑀓𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀧𑀩𑀼𑀤𑁆𑀥𑁄 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀓𑀝𑀸𑀦𑀺 𑀦𑀺𑀯𑀢𑁆𑀢𑁂𑀣 𑀦𑀺𑀯𑀢𑁆𑀢𑁂𑀣𑀸’’𑀢𑀺 𑀆𑀳. 𑀲𑀓𑀝𑀸𑀦𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀁 𑀓𑀭𑁄𑀦𑁆𑀢𑀸𑀦𑀜𑁆𑀜𑁂𑀯 𑀅𑀭𑀼𑀡𑁄 𑀉𑀕𑁆𑀕𑀢𑁄. 𑀫𑀦𑀼𑀲𑁆𑀲𑀸 ‘‘𑀳𑀺𑀬𑁆𑀬𑁄 𑀅𑀫𑁆𑀳𑀸𑀓𑀁 𑀦𑀺𑀯𑀺𑀝𑁆𑀞𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀫𑁂𑀯𑁂𑀢𑀁, 𑀤𑀸𑀭𑀼𑀤𑀓𑀫𑁆𑀧𑀺 𑀦𑁄 𑀔𑀻𑀡𑀁, 𑀇𑀤𑀸𑀦𑀺 𑀦𑀝𑁆𑀞𑀫𑁆𑀳𑀸’’𑀢𑀺 𑀲𑀓𑀝𑀸𑀦𑀺 𑀫𑁄𑀘𑁂𑀢𑁆𑀯𑀸 𑀧𑀭𑀺𑀯𑀝𑁆𑀝𑀓𑁂𑀦 𑀞𑀧𑁂𑀢𑁆𑀯𑀸 𑀫𑀢𑁆𑀣𑀓𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀅𑀦𑀼𑀲𑁄𑀘𑀦𑁆𑀢𑀸 𑀦𑀺𑀧𑀚𑁆𑀚𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑀺 𑀯𑀻𑀭𑀺𑀬𑀁 𑀑𑀲𑁆𑀲𑀚𑀦𑁆𑀢𑁂 𑀲𑀩𑁆𑀩𑁂 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀸𑀢𑁄 𑀲𑀻𑀢𑀮𑀯𑁂𑀮𑀸𑀬𑀫𑁂𑀯 𑀆𑀳𑀺𑀡𑁆𑀟𑀦𑁆𑀢𑁄 𑀏𑀓𑀁 𑀤𑀩𑁆𑀩𑀢𑀺𑀡𑀕𑀘𑁆𑀙𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀦𑀺 𑀢𑀺𑀡𑀸𑀦𑀺 𑀳𑁂𑀝𑁆𑀞𑀸 𑀉𑀤𑀓𑀲𑀺𑀦𑁂𑀳𑁂𑀦 𑀉𑀝𑁆𑀞𑀺𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀤𑁆𑀤𑀸𑀮𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀔𑀡𑀸𑀧𑁂𑀲𑀺, 𑀢𑁂 𑀲𑀝𑁆𑀞𑀺𑀳𑀢𑁆𑀣𑀝𑁆𑀞𑀸𑀦𑀁 𑀔𑀡𑀺𑀁𑀲𑀼. 𑀏𑀢𑁆𑀢𑀓𑀁 𑀞𑀸𑀦𑀁 𑀔𑀡𑀺𑀢𑁆𑀯𑀸 𑀧𑀳𑀭𑀦𑁆𑀢𑀸𑀦𑀁 𑀓𑀼𑀤𑁆𑀤𑀸𑀮𑁄 𑀳𑁂𑀝𑁆𑀞𑀸𑀧𑀸𑀲𑀸𑀡𑁂 𑀧𑀝𑀺𑀳𑀜𑁆𑀜𑀺, 𑀧𑀳𑀝𑀫𑀢𑁆𑀢𑁂 𑀲𑀩𑁆𑀩𑁂 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀇𑀫𑀲𑁆𑀲 𑀧𑀸𑀲𑀸𑀡𑀲𑁆𑀲 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀑𑀢𑀭𑀺𑀢𑁆𑀯𑀸 𑀧𑀸𑀲𑀸𑀡𑁂 𑀞𑀺𑀢𑁄 𑀑𑀡𑀫𑀺𑀢𑁆𑀯𑀸 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀲𑀤𑁆𑀤𑀁 𑀆𑀯𑀚𑁆𑀚𑁂𑀦𑁆𑀢𑁄 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀧𑀯𑀢𑁆𑀢𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀘𑀽𑀴𑀼𑀧𑀝𑁆𑀞𑀸𑀓𑀁 𑀆𑀳 𑁋 ‘‘𑀢𑀸𑀢, 𑀢𑀬𑀸 𑀯𑀻𑀭𑀺𑀬𑁂 𑀑𑀲𑁆𑀲𑀝𑁆𑀞𑁂 𑀲𑀩𑁆𑀩𑁂 𑀯𑀺𑀦𑀲𑁆𑀲𑀺𑀲𑁆𑀲𑀸𑀫, 𑀢𑁆𑀯𑀁 𑀯𑀻𑀭𑀺𑀬𑀁 𑀅𑀦𑁄𑀲𑁆𑀲𑀚𑀦𑁆𑀢𑁄 𑀇𑀫𑀁 𑀅𑀬𑀓𑀽𑀝𑀁 𑀕𑀳𑁂𑀢𑁆𑀯𑀸 𑀆𑀯𑀸𑀝𑀁 𑀑𑀢𑀭𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀧𑀸𑀲𑀸𑀡𑁂 𑀧𑀳𑀸𑀭𑀁 𑀤𑁂𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑁂𑀲𑀼 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀞𑀺𑀢𑁂𑀲𑀼𑀧𑀺 𑀯𑀻𑀭𑀺𑀬𑀁 𑀅𑀦𑁄𑀲𑁆𑀲𑀚𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀧𑀸𑀲𑀸𑀡𑁂 𑀧𑀳𑀸𑀭𑀁 𑀅𑀤𑀸𑀲𑀺. 𑀧𑀸𑀲𑀸𑀡𑁄 𑀫𑀚𑁆𑀛𑁂 𑀪𑀺𑀚𑁆𑀚𑀺𑀢𑁆𑀯𑀸 𑀳𑁂𑀝𑁆𑀞𑀸 𑀧𑀢𑀺𑀢𑁆𑀯𑀸 𑀲𑁄𑀢𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀉𑀤𑀓𑀯𑀝𑁆𑀝𑀺 𑀉𑀕𑁆𑀕𑀜𑁆𑀙𑀺. 𑀲𑀩𑁆𑀩𑁂 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀦𑁆𑀳𑀸𑀬𑀺𑀁𑀲𑀼, 𑀅𑀢𑀺𑀭𑁂𑀓𑀸𑀦𑀺 𑀅𑀓𑁆𑀔𑀬𑀼𑀕𑀸𑀤𑀻𑀦𑀺 𑀨𑀸𑀮𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀕𑁄𑀡𑁂 𑀘 𑀪𑁄𑀚𑁂𑀢𑁆𑀯𑀸 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀉𑀤𑀓𑀸𑀯𑀸𑀝𑀲𑀫𑀻𑀧𑁂 𑀥𑀚𑀁 𑀩𑀦𑁆𑀥𑀺𑀢𑁆𑀯𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀢𑁂 𑀢𑀢𑁆𑀣 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀤𑀺𑀕𑀼𑀡𑀁 𑀢𑀺𑀕𑀼𑀡𑀁 𑀘𑀢𑀼𑀕𑁆𑀕𑀼𑀡𑀁 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀢𑁂 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀫𑁂𑀯 𑀕𑀢𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀯 𑀇𑀫𑀁 𑀕𑀸𑀣𑀁 𑀓𑀣𑁂𑀲𑀺 𑁋

𑁨. ‘‘𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀼𑀧𑀣𑁂 𑀔𑀡𑀦𑁆𑀢𑀸, 𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼𑀁;

𑀏𑀯𑀁 𑀫𑀼𑀦𑀻 𑀯𑀻𑀭𑀺𑀬𑀩𑀮𑀽𑀧𑀧𑀦𑁆𑀦𑁄, 𑀅𑀓𑀺𑀮𑀸𑀲𑀼 𑀯𑀺𑀦𑁆𑀤𑁂 𑀳𑀤𑀬𑀲𑁆𑀲 𑀲𑀦𑁆𑀢𑀺’’𑀦𑁆𑀢𑀺.

𑀢𑀢𑁆𑀣 𑀅𑀓𑀺𑀮𑀸𑀲𑀼𑀦𑁄𑀢𑀺 𑀦𑀺𑀓𑁆𑀓𑁄𑀲𑀚𑁆𑀚𑀸 𑀆𑀭𑀤𑁆𑀥𑀯𑀻𑀭𑀺𑀬𑀸. 𑀯𑀡𑁆𑀡𑀼𑀧𑀣𑁂𑀢𑀺 𑀯𑀡𑁆𑀡𑀼 𑀯𑀼𑀘𑁆𑀘𑀢𑀺 𑀯𑀸𑀮𑀼𑀓𑀸, 𑀯𑀸𑀮𑀼𑀓𑀸𑀫𑀕𑁆𑀕𑁂𑀢𑀺 𑀅𑀢𑁆𑀣𑁄. 𑀔𑀡𑀦𑁆𑀢𑀸𑀢𑀺 𑀪𑀽𑀫𑀺𑀁 𑀔𑀡𑀫𑀸𑀦𑀸. 𑀉𑀤𑀗𑁆𑀕𑀡𑁂𑀢𑀺 𑀏𑀢𑁆𑀣 𑀉𑀤𑀸𑀢𑀺 𑀦𑀺𑀧𑀸𑀢𑁄, 𑀅𑀗𑁆𑀕𑀡𑁂𑀢𑀺 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂, 𑀅𑀦𑀸𑀯𑀸𑀝𑁂 𑀪𑀽𑀫𑀺𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀡𑁆𑀡𑀼𑀧𑀣𑁂. 𑀧𑀧𑀁 𑀅𑀯𑀺𑀦𑁆𑀤𑀼𑀦𑁆𑀢𑀺 𑀉𑀤𑀓𑀁 𑀧𑀝𑀺𑀮𑀪𑀺𑀁𑀲𑀼. 𑀉𑀤𑀓𑀜𑁆𑀳𑀺 𑀧𑀧𑀻𑀬𑀦𑀪𑀸𑀯𑁂𑀦 ‘‘𑀧𑀧𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀯𑀤𑁆𑀥𑀁 𑀯𑀸 𑀆𑀧𑀁 𑀧𑀧𑀁, 𑀫𑀳𑁄𑀤𑀓𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀦𑁆𑀢𑀺 𑀑𑀧𑀫𑁆𑀫𑀧𑀝𑀺𑀧𑀸𑀤𑀦𑀁. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀼𑀕𑁆𑀕𑀮𑁄 ‘‘𑀫𑀼𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦𑁂𑀲 𑀅𑀕𑀸𑀭𑀺𑀬𑀫𑀼𑀦𑀺, 𑀅𑀦𑀕𑀸𑀭𑀺𑀬𑀫𑀼𑀦𑀺, 𑀲𑁂𑀓𑁆𑀔𑀫𑀼𑀦𑀺, 𑀅𑀲𑁂𑀓𑁆𑀔𑀫𑀼𑀦𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀼𑀦𑀺, 𑀫𑀼𑀦𑀺𑀫𑀼𑀦𑀻𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀅𑀕𑀸𑀭𑀺𑀬𑀫𑀼𑀦𑀻𑀢𑀺 𑀕𑀺𑀳𑀻 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀅𑀦𑀕𑀸𑀭𑀺𑀬𑀫𑀼𑀦𑀻𑀢𑀺 𑀢𑀣𑀸𑀭𑀽𑀧𑁄𑀯 𑀧𑀩𑁆𑀩𑀚𑀺𑀢𑁄. 𑀲𑁂𑀓𑁆𑀔𑀫𑀼𑀦𑀻𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀲𑁂𑀓𑁆𑀔𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀼𑀦𑀻𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄. 𑀫𑀼𑀦𑀺𑀫𑀼𑀦𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀫𑁄𑀦𑁂𑀬𑁆𑀬𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 ‘‘𑀫𑀼𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀻𑀭𑀺𑀬𑀩𑀮𑀽𑀧𑀧𑀦𑁆𑀦𑁄𑀢𑀺 𑀯𑀻𑀭𑀺𑀬𑁂𑀦 𑀘𑁂𑀯 𑀓𑀸𑀬𑀩𑀮𑀜𑀸𑀡𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀅𑀓𑀺𑀮𑀸𑀲𑀽𑀢𑀺 𑀦𑀺𑀓𑁆𑀓𑁄𑀲𑀚𑁆𑀚𑁄 𑁋

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼;

𑀉𑀧𑀲𑀼𑀲𑁆𑀲𑀢𑀼 𑀦𑀺𑀲𑁆𑀲𑁂𑀲𑀁, 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀦𑀮𑀲𑁄. 𑀯𑀺𑀦𑁆𑀤𑁂 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺 𑀘𑀺𑀢𑁆𑀢𑀲𑁆𑀲𑀧𑀺 𑀳𑀤𑀬𑀭𑀽𑀧𑀲𑁆𑀲𑀧𑀺 𑀲𑀻𑀢𑀮𑀪𑀸𑀯𑀓𑀭𑀡𑁂𑀦 ‘‘𑀲𑀦𑁆𑀢𑀺’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀛𑀸𑀦𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀅𑀭𑀺𑀬𑀥𑀫𑁆𑀫𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀢𑀸 𑀳𑀺 𑁋

‘‘𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀻𑀢𑁄 𑀯𑀺𑀳𑀭𑀢𑀺 𑀯𑁄𑀓𑀺𑀡𑁆𑀡𑁄 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀳𑀦𑁆𑀢𑀜𑁆𑀘 𑀲𑀤𑀢𑁆𑀣𑀁 𑀧𑀭𑀺𑀳𑀸𑀧𑁂𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀔𑀁 𑀯𑀺𑀳𑀭𑀢𑀺 𑀧𑀯𑀺𑀯𑀺𑀢𑁆𑀢𑁄 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀳𑀦𑁆𑀢𑀜𑁆𑀘 𑀲𑀤𑀢𑁆𑀣𑀁 𑀧𑀭𑀺𑀧𑀽𑀭𑁂𑀢𑀺, 𑀦, 𑀪𑀺𑀓𑁆𑀔𑀯𑁂, 𑀳𑀻𑀦𑁂𑀦 𑀅𑀕𑁆𑀕𑀲𑁆𑀲 𑀧𑀢𑁆𑀢𑀺 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁨) 𑁋

𑀏𑀯𑀁 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑁂𑀳𑀺 𑀓𑀼𑀲𑀻𑀢𑀲𑁆𑀲 𑀤𑀼𑀓𑁆𑀔𑀯𑀺𑀳𑀸𑀭𑁄, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘 𑀲𑀼𑀔𑀯𑀺𑀳𑀸𑀭𑁄 𑀲𑀁𑀯𑀡𑁆𑀡𑀺𑀢𑁄. 𑀇𑀥𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀺𑀧𑀲𑁆𑀲𑀓𑀲𑁆𑀲 𑀯𑀻𑀭𑀺𑀬𑀩𑀮𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀢𑀫𑁂𑀯 𑀲𑀼𑀔𑀯𑀺𑀳𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀫𑀼𑀦𑀻 𑀯𑀻𑀭𑀺𑀬𑀩𑀮𑀽𑀧𑀧𑀦𑁆𑀦𑁄, 𑀅𑀓𑀺𑀮𑀸𑀲𑀼 𑀯𑀺𑀦𑁆𑀤𑁂 𑀳𑀤𑀬𑀲𑁆𑀲 𑀲𑀦𑁆𑀢𑀺’’𑀦𑁆𑀢𑀺 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀢𑁂 𑀯𑀸𑀡𑀺𑀚𑀸 𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀼𑀧𑀣𑁂 𑀔𑀡𑀦𑁆𑀢𑀸 𑀉𑀤𑀓𑀁 𑀮𑀪𑀺𑀁𑀲𑀼, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀲𑀸𑀲𑀦𑁂 𑀅𑀓𑀺𑀮𑀸𑀲𑀼 𑀳𑀼𑀢𑁆𑀯𑀸 𑀯𑀸𑀬𑀫𑀫𑀸𑀦𑁄 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀇𑀫𑀁 𑀛𑀸𑀦𑀸𑀤𑀺𑀪𑁂𑀤𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁 𑀮𑀪𑀢𑀺. 𑀲𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀉𑀤𑀓𑀫𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀏𑀯𑀭𑀽𑀧𑁂 𑀫𑀕𑁆𑀕𑀨𑀮𑀤𑀸𑀬𑀓𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀓𑀲𑁆𑀫𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀲𑀻𑀢𑀺 𑀏𑀯𑀁 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀲𑀢𑁆𑀣𑀸𑀧𑀺 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀯𑀻𑀭𑀺𑀬𑀁 𑀅𑀦𑁄𑀲𑁆𑀲𑀚𑀺𑀢𑁆𑀯𑀸 𑀧𑀸𑀲𑀸𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀉𑀤𑀓𑀤𑀸𑀬𑀓𑁄 𑀘𑀽𑀴𑀼𑀧𑀝𑁆𑀞𑀸𑀓𑁄 𑀅𑀬𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀅𑀯𑀲𑁂𑀲𑀧𑀭𑀺𑀲𑀸 𑀇𑀤𑀸𑀦𑀺 𑀩𑀼𑀤𑁆𑀥𑀧𑀭𑀺𑀲𑀸 𑀚𑀸𑀢𑀸, 𑀲𑀢𑁆𑀣𑀯𑀸𑀳𑀚𑁂𑀝𑁆𑀞𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀯𑀡𑁆𑀡𑀼𑀧𑀣𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

𑁩. 𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀇𑀥 𑀘𑁂 𑀦𑀁 𑀯𑀺𑀭𑀸𑀥𑁂𑀲𑀻𑀢𑀺 𑀇𑀫𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀫𑁂𑀯 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀺𑀓𑁆𑀔𑀽𑀳𑀺 𑀆𑀦𑀻𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀆𑀳 𑁋 ‘‘𑀢𑁆𑀯𑀁 𑀪𑀺𑀓𑁆𑀔𑀼, 𑀏𑀯𑀭𑀽𑀧𑁂 𑀫𑀕𑁆𑀕𑀨𑀮𑀤𑀸𑀬𑀓𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀦𑁆𑀢𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀓𑀜𑁆𑀘𑀦𑀧𑀸𑀢𑀺𑀬𑀸 𑀧𑀭𑀺𑀳𑀻𑀦𑁄 𑀲𑁂𑀭𑀺𑀯𑀯𑀸𑀡𑀺𑀚𑁄 𑀯𑀺𑀬 𑀘𑀺𑀭𑀁 𑀲𑁄𑀘𑀺𑀲𑁆𑀲𑀲𑀻’’𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼, 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀧𑀸𑀓𑀝𑀫𑀓𑀸𑀲𑀺.

𑀅𑀢𑀻𑀢𑁂 𑀇𑀢𑁄 𑀧𑀜𑁆𑀘𑀫𑁂 𑀓𑀧𑁆𑀧𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀭𑀺𑀯𑀭𑀝𑁆𑀞𑁂 𑀓𑀘𑁆𑀙𑀧𑀼𑀝𑀯𑀸𑀡𑀺𑀚𑁄 𑀅𑀳𑁄𑀲𑀺. 𑀲𑁄 𑀲𑁂𑀭𑀺𑀯𑀦𑀸𑀫𑀓𑁂𑀦 𑀏𑀓𑁂𑀦 𑀮𑁄𑀮𑀓𑀘𑁆𑀙𑀧𑀼𑀝𑀯𑀸𑀡𑀺𑀚𑁂𑀦 𑀲𑀤𑁆𑀥𑀺𑀁 𑀯𑁄𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀦𑀻𑀮𑀯𑀸𑀳𑀁 𑀦𑀸𑀫 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀭𑀺𑀝𑁆𑀞𑀧𑀼𑀭𑀁 𑀦𑀸𑀫 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀦𑀕𑀭𑀯𑀻𑀣𑀺𑀬𑁄 𑀪𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀯𑀻𑀣𑀺𑀬𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀯𑀺𑀘𑀭𑀺. 𑀇𑀢𑀭𑁄𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀯𑀻𑀣𑀺𑀁 𑀕𑀡𑁆𑀳𑀺. 𑀢𑀲𑁆𑀫𑀺𑀜𑁆𑀘 𑀦𑀕𑀭𑁂 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀧𑀭𑀺𑀚𑀺𑀡𑁆𑀡𑀁 𑀅𑀳𑁄𑀲𑀺, 𑀲𑀩𑁆𑀩𑁂 𑀧𑀼𑀢𑁆𑀢𑀪𑀸𑀢𑀺𑀓𑀸 𑀘 𑀥𑀦𑀜𑁆𑀘 𑀧𑀭𑀺𑀓𑁆𑀔𑀬𑀁 𑀅𑀕𑀫𑀁𑀲𑀼, 𑀏𑀓𑀸 𑀤𑀸𑀭𑀺𑀓𑀸 𑀅𑀬𑁆𑀬𑀺𑀓𑀸𑀬 𑀲𑀤𑁆𑀥𑀺𑀁 𑀅𑀯𑀲𑁂𑀲𑀸 𑀅𑀳𑁄𑀲𑀺, 𑀢𑀸 𑀤𑁆𑀯𑁂𑀧𑀺 𑀧𑀭𑁂𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀺. 𑀕𑁂𑀳𑁂 𑀧𑀦 𑀢𑀸𑀲𑀁 𑀫𑀳𑀸𑀲𑁂𑀝𑁆𑀞𑀺𑀦𑀸 𑀧𑀭𑀺𑀪𑀼𑀢𑁆𑀢𑀧𑀼𑀩𑁆𑀩𑀸 𑀲𑀼𑀯𑀡𑁆𑀡𑀧𑀸𑀢𑀺 𑀪𑀸𑀚𑀦𑀦𑁆𑀢𑀭𑁂 𑀦𑀺𑀓𑁆𑀔𑀺𑀢𑁆𑀢𑀸 𑀤𑀻𑀖𑀭𑀢𑁆𑀢𑀁 𑀅𑀯𑀮𑀜𑁆𑀚𑀺𑀬𑀫𑀸𑀦𑀸 𑀫𑀮𑀕𑁆𑀕𑀳𑀺𑀢𑀸 𑀅𑀳𑁄𑀲𑀺, 𑀢𑀸 𑀢𑀲𑁆𑀲𑀸 𑀲𑀼𑀯𑀡𑁆𑀡𑀧𑀸𑀢𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀲𑁄 𑀮𑁄𑀮𑀯𑀸𑀡𑀺𑀚𑁄 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑀡𑀺𑀓𑁂 𑀕𑀡𑁆𑀳𑀣, 𑀫𑀡𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀺𑀘𑀭𑀦𑁆𑀢𑁄 𑀢𑀁 𑀖𑀭𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀲𑀸 𑀓𑀼𑀫𑀸𑀭𑀺𑀓𑀸 𑀢𑀁 𑀤𑀺𑀲𑁆𑀯𑀸 𑀅𑀬𑁆𑀬𑀺𑀓𑀁 𑀆𑀳 ‘‘𑀅𑀫𑁆𑀫 𑀫𑀬𑁆𑀳𑀁 𑀏𑀓𑀁 𑀧𑀺𑀴𑀦𑁆𑀥𑀦𑀁 𑀕𑀡𑁆𑀳𑀸’’𑀢𑀺. 𑀅𑀫𑁆𑀫 𑀫𑀬𑀁 𑀤𑀼𑀕𑁆𑀕𑀢𑀸, 𑀓𑀺𑀁 𑀤𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸𑀢𑀺. 𑀅𑀬𑀁 𑀦𑁄 𑀧𑀸𑀢𑀺 𑀅𑀢𑁆𑀣𑀺, 𑀦𑁄 𑀘 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑀸, 𑀇𑀫𑀁 𑀤𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲𑀸 𑀯𑀸𑀡𑀺𑀚𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀁 𑀧𑀸𑀢𑀺𑀁 𑀤𑀢𑁆𑀯𑀸 ‘‘𑀅𑀬𑁆𑀬, 𑀇𑀫𑀁 𑀕𑀳𑁂𑀢𑁆𑀯𑀸 𑀢𑀯 𑀪𑀕𑀺𑀦𑀺𑀬𑀸 𑀓𑀺𑀜𑁆𑀘𑀺𑀤𑁂𑀯 𑀤𑁂𑀳𑀻’’𑀢𑀺 𑀆𑀳. 𑀯𑀸𑀡𑀺𑀚𑁄 𑀧𑀸𑀢𑀺𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀯 ‘‘𑀲𑀼𑀯𑀡𑁆𑀡𑀧𑀸𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀸𑀢𑀺𑀧𑀺𑀝𑁆𑀞𑀺𑀬𑀁 𑀲𑀽𑀘𑀺𑀬𑀸 𑀮𑁂𑀔𑀁 𑀓𑀟𑁆𑀠𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀸𑀲𑀁 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸𑀯 𑀇𑀫𑀁 𑀧𑀸𑀢𑀺𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 ‘‘𑀅𑀬𑀁 𑀓𑀺𑀁 𑀅𑀕𑁆𑀖𑀢𑀺, 𑀅𑀟𑁆𑀠𑀫𑀸𑀲𑀓𑁄𑀧𑀺𑀲𑁆𑀲𑀸 𑀫𑀽𑀮𑀁 𑀦 𑀳𑁄𑀢𑀻’’𑀢𑀺 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀏𑀓𑁂𑀦 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀯𑀻𑀣𑀺𑀁 𑀇𑀢𑀭𑁄 𑀧𑀯𑀺𑀲𑀺𑀢𑀼𑀁 𑀮𑀪𑀢𑀻𑀢𑀺 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀯𑀻𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀫𑀡𑀺𑀓𑁂 𑀕𑀡𑁆𑀳𑀣, 𑀫𑀡𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀺𑀘𑀭𑀦𑁆𑀢𑁄 𑀢𑀫𑁂𑀯 𑀖𑀭𑀤𑁆𑀯𑀸𑀭𑀁 𑀧𑀸𑀧𑀼𑀡𑀺.

𑀧𑀼𑀦 𑀲𑀸 𑀓𑀼𑀫𑀸𑀭𑀺𑀓𑀸 𑀢𑀣𑁂𑀯 𑀅𑀬𑁆𑀬𑀺𑀓𑀁 𑀆𑀳. 𑀅𑀣 𑀦𑀁 𑀅𑀬𑁆𑀬𑀺𑀓𑀸 ‘‘𑀅𑀫𑁆𑀫, 𑀧𑀞𑀫𑀁 𑀆𑀕𑀢𑀯𑀸𑀡𑀺𑀚𑁄 𑀧𑀸𑀢𑀺𑀁 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀕𑀢𑁄, 𑀇𑀤𑀸𑀦𑀺 𑀓𑀺𑀁 𑀤𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀫𑁆𑀫, 𑀲𑁄 𑀯𑀸𑀡𑀺𑀚𑁄 𑀨𑀭𑀼𑀲𑀯𑀸𑀘𑁄, 𑀅𑀬𑀁 𑀧𑀦 𑀧𑀺𑀬𑀤𑀲𑁆𑀲𑀦𑁄 𑀫𑀼𑀤𑀼𑀲𑀮𑁆𑀮𑀸𑀧𑁄, 𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀕𑀡𑁆𑀳𑁂𑀬𑁆𑀬𑀸𑀢𑀺. 𑀅𑀫𑁆𑀫, 𑀢𑁂𑀦 𑀳𑀺 𑀧𑀓𑁆𑀓𑁄𑀲𑀸𑀳𑀻𑀢𑀺. 𑀲𑀸 𑀢𑀁 𑀧𑀓𑁆𑀓𑁄𑀲𑀺. 𑀅𑀣𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀢𑀁 𑀧𑀸𑀢𑀺𑀁 𑀅𑀤𑀁𑀲𑀼. 𑀲𑁄 𑀢𑀲𑁆𑀲𑀸 𑀲𑀼𑀯𑀡𑁆𑀡𑀧𑀸𑀢𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀫𑁆𑀫, 𑀅𑀬𑀁 𑀧𑀸𑀢𑀺 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀪𑀡𑁆𑀟𑀁 𑀫𑀬𑁆𑀳𑀁 𑀳𑀢𑁆𑀣𑁂 𑀦𑀢𑁆𑀣𑀻’’𑀢𑀺 𑀆𑀳. 𑀅𑀬𑁆𑀬, 𑀧𑀞𑀫𑀁 𑀆𑀕𑀢𑀯𑀸𑀡𑀺𑀚𑁄 ‘‘𑀅𑀬𑀁 𑀅𑀟𑁆𑀠𑀫𑀸𑀲𑀓𑀫𑁆𑀧𑀺 𑀦 𑀅𑀕𑁆𑀖𑀢𑀻’’𑀢𑀺 𑀯𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀕𑀢𑁄, 𑀅𑀬𑀁 𑀧𑀦 𑀢𑀯 𑀧𑀼𑀜𑁆𑀜𑁂𑀦 𑀲𑀼𑀯𑀡𑁆𑀡𑀧𑀸𑀢𑀺 𑀚𑀸𑀢𑀸 𑀪𑀯𑀺𑀲𑁆𑀲𑀢𑀺, 𑀫𑀬𑀁 𑀇𑀫𑀁 𑀢𑀼𑀬𑁆𑀳𑀁 𑀤𑁂𑀫, 𑀓𑀺𑀜𑁆𑀘𑀺𑀤𑁂𑀯 𑀦𑁄 𑀤𑀢𑁆𑀯𑀸 𑀇𑀫𑀁 𑀕𑀳𑁂𑀢𑁆𑀯𑀸 𑀬𑀸𑀳𑀻𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀳𑀢𑁆𑀣𑀕𑀢𑀸𑀦𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀧𑀜𑁆𑀘𑀲𑀢𑀕𑁆𑀖𑀦𑀓𑀜𑁆𑀘 𑀪𑀡𑁆𑀟𑀁 𑀲𑀩𑁆𑀩𑀁 𑀤𑀢𑁆𑀯𑀸 ‘‘𑀫𑀬𑁆𑀳𑀁 𑀇𑀫𑀁 𑀢𑀼𑀮𑀜𑁆𑀘 𑀧𑀲𑀺𑀩𑁆𑀩𑀓𑀜𑁆𑀘 𑀅𑀝𑁆𑀞 𑀘 𑀓𑀳𑀸𑀧𑀡𑁂 𑀤𑁂𑀣𑀸’’𑀢𑀺 𑀏𑀢𑁆𑀢𑀓𑀁 𑀬𑀸𑀘𑀺𑀢𑁆𑀯𑀸 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀲𑁄 𑀲𑀻𑀖𑀫𑁂𑀯 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀸𑀯𑀺𑀓𑀲𑁆𑀲 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺.

𑀢𑀢𑁄 𑀮𑁄𑀮𑀯𑀸𑀡𑀺𑀚𑁄𑀧𑀺 𑀧𑀼𑀦 𑀢𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀆𑀳𑀭𑀣 𑀢𑀁 𑀧𑀸𑀢𑀺𑀁, 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺𑀤𑁂𑀯 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀢𑁆𑀯𑀁 𑀅𑀫𑁆𑀳𑀸𑀓𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀅𑀟𑁆𑀠𑀫𑀸𑀲𑀕𑁆𑀖𑀦𑀺𑀓𑀫𑁆𑀧𑀺 𑀦 𑀅𑀓𑀸𑀲𑀺, 𑀢𑀼𑀬𑁆𑀳𑀁 𑀧𑀦 𑀲𑀸𑀫𑀺𑀓𑀲𑀤𑀺𑀲𑁄 𑀏𑀓𑁄 𑀥𑀫𑁆𑀫𑀺𑀓𑁄 𑀯𑀸𑀡𑀺𑀚𑁄 𑀅𑀫𑁆𑀳𑀸𑀓𑀁 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀢𑁄’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸𑀯 ‘‘𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀭𑀺𑀳𑀻𑀦𑁄𑀫𑁆𑀳𑀺, 𑀫𑀳𑀸𑀚𑀸𑀦𑀺𑀓𑀭𑁄 𑀯𑀢 𑀫𑁂 𑀅𑀬’’𑀦𑁆𑀢𑀺 𑀲𑀜𑁆𑀚𑀸𑀢𑀩𑀮𑀯𑀲𑁄𑀓𑁄 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑁂 𑀓𑀳𑀸𑀧𑀡𑁂 𑀘𑁂𑀯 𑀪𑀡𑁆𑀟𑀺𑀓𑀜𑁆𑀘 𑀖𑀭𑀤𑁆𑀯𑀸𑀭𑁂𑀬𑁂𑀯 𑀯𑀺𑀓𑀺𑀭𑀺𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀳𑀸𑀬 𑀢𑀼𑀮𑀸𑀤𑀡𑁆𑀟𑀁 𑀫𑀼𑀕𑁆𑀕𑀭𑀁 𑀓𑀢𑁆𑀯𑀸 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀦𑀼𑀧𑀤𑀁 𑀧𑀓𑁆𑀓𑀦𑁆𑀢𑁄 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄, 𑀦𑀸𑀯𑀺𑀓, 𑀦𑀸𑀯𑀁 𑀦𑀺𑀯𑀢𑁆𑀢𑁂𑀳𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀢𑀸𑀢, 𑀫𑀸 𑀦𑀺𑀯𑀢𑁆𑀢𑀬𑀻’’𑀢𑀺 𑀧𑀝𑀺𑀲𑁂𑀥𑁂𑀲𑀺. 𑀇𑀢𑀭𑀲𑁆𑀲𑀧𑀺 𑀩𑁄𑀥𑀺𑀲𑀢𑁆𑀢𑀁 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀩𑀮𑀯𑀲𑁄𑀓𑁄 𑀉𑀤𑀧𑀸𑀤𑀺, 𑀳𑀤𑀬𑀁 𑀉𑀡𑁆𑀳𑀁 𑀅𑀳𑁄𑀲𑀺, 𑀫𑀼𑀔𑀢𑁄 𑀮𑁄𑀳𑀺𑀢𑀁 𑀉𑀕𑁆𑀕𑀜𑁆𑀙𑀺, 𑀯𑀸𑀧𑀺𑀓𑀤𑁆𑀤𑀫𑁄 𑀯𑀺𑀬 𑀳𑀤𑀬𑀁 𑀨𑀮𑀺. 𑀲𑁄 𑀩𑁄𑀥𑀺𑀲𑀢𑁆𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀇𑀤𑀁 𑀧𑀞𑀫𑀁 𑀤𑁂𑀯𑀤𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑁂 𑀆𑀖𑀸𑀢𑀩𑀦𑁆𑀥𑀦𑀁. 𑀩𑁄𑀥𑀺𑀲𑀢𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀯 𑀇𑀫𑀁 𑀕𑀸𑀣𑀁 𑀓𑀣𑁂𑀲𑀺 𑁋

𑁩. ‘‘𑀇𑀥 𑀘𑁂 𑀦𑀁 𑀯𑀺𑀭𑀸𑀥𑁂𑀲𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁;

𑀘𑀺𑀭𑀁 𑀢𑁆𑀯𑀁 𑀅𑀦𑀼𑀢𑀧𑁆𑀧𑁂𑀲𑀺, 𑀲𑁂𑀭𑀺𑀯𑀸𑀬𑀁𑀯 𑀯𑀸𑀡𑀺𑀚𑁄’’𑀢𑀺.

𑀢𑀢𑁆𑀣 𑀇𑀥 𑀘𑁂 𑀦𑀁 𑀯𑀺𑀭𑀸𑀥𑁂𑀲𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀏𑀢𑀁 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀸𑀲𑀗𑁆𑀔𑀸𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀯𑀺𑀭𑀸𑀥𑁂𑀲𑀺. 𑀬𑀤𑀺 𑀯𑀺𑀭𑀸𑀥𑁂𑀲𑀺, 𑀯𑀻𑀭𑀺𑀬𑀁 𑀑𑀲𑁆𑀲𑀚𑀦𑁆𑀢𑁄 𑀦𑀸𑀥𑀺𑀕𑀘𑁆𑀙𑀲𑀺 𑀦 𑀧𑀝𑀺𑀮𑀪𑀲𑀻𑀢𑀺 𑀅𑀢𑁆𑀣𑁄. 𑀘𑀺𑀭𑀁 𑀢𑁆𑀯𑀁 𑀅𑀦𑀼𑀢𑀧𑁆𑀧𑁂𑀲𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀅𑀦𑀼𑀢𑀧𑁂𑀲𑁆𑀲𑀲𑀺, 𑀅𑀣 𑀯𑀸 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀢𑀸𑀬 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀺𑀭𑀸𑀥𑀺𑀢𑀢𑁆𑀢𑀸 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁄 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀤𑀼𑀓𑁆𑀔𑀸𑀦𑀺 𑀅𑀦𑀼𑀪𑀯𑀦𑁆𑀢𑁄 𑀅𑀦𑀼𑀢𑀧𑁆𑀧𑀺𑀲𑁆𑀲𑀲𑀺 𑀓𑀺𑀮𑀫𑀺𑀲𑁆𑀲𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀓𑀣𑀁? 𑀲𑁂𑀭𑀺𑀯𑀸𑀬𑀁𑀯 𑀯𑀸𑀡𑀺𑀚𑁄𑀢𑀺 ‘‘𑀲𑁂𑀭𑀺𑀯𑀸’’𑀢𑀺 𑀏𑀯𑀁𑀦𑀸𑀫𑀓𑁄 𑀅𑀬𑀁 𑀯𑀸𑀡𑀺𑀚𑁄 𑀬𑀣𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀼𑀩𑁆𑀩𑁂 𑀲𑁂𑀭𑀺𑀯𑀦𑀸𑀫𑀓𑁄 𑀯𑀸𑀡𑀺𑀚𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲𑀸 𑀕𑀳𑀡𑀢𑁆𑀣𑀸𑀬 𑀯𑀻𑀭𑀺𑀬𑀁 𑀅𑀓𑀢𑁆𑀯𑀸 𑀢𑀢𑁄 𑀧𑀭𑀺𑀳𑀻𑀦𑁄 𑀅𑀦𑀼𑀢𑀧𑁆𑀧𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀝𑀺𑀬𑀢𑁆𑀢𑀲𑀼𑀯𑀡𑁆𑀡𑀧𑀸𑀢𑀺𑀲𑀤𑀺𑀲𑀁 𑀅𑀭𑀺𑀬𑀫𑀕𑁆𑀕𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀢𑀸𑀬 𑀅𑀦𑀥𑀺𑀕𑀘𑁆𑀙𑀦𑁆𑀢𑁄 𑀢𑀢𑁄 𑀧𑀭𑀺𑀳𑀻𑀦𑁄 𑀤𑀻𑀖𑀭𑀢𑁆𑀢𑀁 𑀅𑀦𑀼𑀢𑀧𑁆𑀧𑀺𑀲𑁆𑀲𑀲𑀺. 𑀲𑀘𑁂 𑀧𑀦 𑀯𑀻𑀭𑀺𑀬𑀁 𑀦 𑀑𑀲𑁆𑀲𑀚𑀺𑀲𑁆𑀲𑀲𑀺, 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀲𑀼𑀯𑀡𑁆𑀡𑀧𑀸𑀢𑀺𑀁 𑀯𑀺𑀬 𑀫𑀫 𑀲𑀸𑀲𑀦𑁂 𑀦𑀯𑀯𑀺𑀥𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀮𑀪𑀺𑀲𑁆𑀲𑀲𑀻𑀢𑀺.

𑀏𑀯𑀫𑀲𑁆𑀲 𑀲𑀢𑁆𑀣𑀸 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀲𑀢𑁆𑀣𑀸𑀧𑀺 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑁋 ‘‘𑀢𑀤𑀸 𑀩𑀸𑀮𑀯𑀸𑀡𑀺𑀚𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

𑁪. 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀓𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀣 𑀘𑀽𑀴𑀧𑀦𑁆𑀣𑀓𑀲𑁆𑀲 𑀢𑀸𑀯 𑀦𑀺𑀩𑁆𑀩𑀢𑁆𑀢𑀺 𑀓𑀣𑁂𑀢𑀩𑁆𑀩𑀸. 𑀭𑀸𑀚𑀕𑀳𑁂 𑀓𑀺𑀭 𑀥𑀦𑀲𑁂𑀝𑁆𑀞𑀺𑀓𑀼𑀮𑀲𑁆𑀲 𑀥𑀻𑀢𑀸 𑀅𑀢𑁆𑀢𑀦𑁄 𑀤𑀸𑀲𑁂𑀦𑁂𑀯 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 ‘‘𑀅𑀜𑁆𑀜𑁂𑀧𑀺 𑀫𑁂 𑀇𑀫𑀁 𑀓𑀫𑁆𑀫𑀁 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀪𑀻𑀢𑀸 𑀏𑀯𑀫𑀸𑀳 ‘‘𑀅𑀫𑁆𑀳𑁂𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸, 𑀲𑀘𑁂 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀇𑀫𑀁 𑀤𑁄𑀲𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀅𑀜𑁆𑀜𑁂𑀳𑀺 𑀅𑀚𑀸𑀦𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀉𑀪𑁄𑀧𑀺 𑀅𑀕𑀫𑀁𑀲𑀼.

𑀢𑁂𑀲𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀕𑀩𑁆𑀪𑀧𑀭𑀺𑀧𑀸𑀓𑀁 𑀆𑀕𑀫𑁆𑀫 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺 ‘‘𑀕𑀩𑁆𑀪𑁄 𑀫𑁂 𑀧𑀭𑀺𑀧𑀸𑀓𑀁 𑀕𑀢𑁄, 𑀜𑀸𑀢𑀺𑀩𑀦𑁆𑀥𑀼𑀯𑀺𑀭𑀳𑀺𑀢𑁂 𑀞𑀸𑀦𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀦𑀸𑀫 𑀉𑀪𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀫𑁂𑀯, 𑀓𑀼𑀮𑀕𑁂𑀳𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀲𑀘𑀸𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀸𑀮𑁄 𑀅𑀢𑁆𑀢𑀦𑁄 𑀤𑁄𑀲𑀫𑀳𑀦𑁆𑀢𑀢𑀸𑀬 𑀕𑀦𑁆𑀢𑀼𑀁 𑀦 𑀉𑀲𑁆𑀲𑀳𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀏𑀓𑀦𑁆𑀢𑀳𑀺𑀢𑀸, 𑀅𑀬𑀁 𑀕𑀘𑁆𑀙𑀢𑀼 𑀯𑀸 𑀫𑀸 𑀯𑀸, 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀢𑀲𑁆𑀫𑀺𑀁 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑁂 𑀕𑁂𑀳𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀕𑀢𑀪𑀸𑀯𑀁 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀻𑀦𑀁 𑀆𑀭𑁄𑀘𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀣 𑀲𑁄 𑀧𑀼𑀭𑀺𑀲𑁄 𑀖𑀭𑀁 𑀆𑀕𑀢𑁄 𑀢𑀁 𑀅𑀤𑀺𑀲𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀼𑀮𑀖𑀭𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲𑀸𑀧𑀺 𑀢𑀢𑁆𑀣𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑁄 ‘‘𑀓𑀺𑀁 𑀇𑀤𑀁 𑀪𑀤𑁆𑀤𑁂’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀏𑀓𑁄 𑀧𑀼𑀢𑁆𑀢𑁄 𑀚𑀸𑀢𑁄’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀓𑀼𑀮𑀖𑀭𑀁 𑀕𑀘𑁆𑀙𑁂𑀬𑁆𑀬𑀸𑀫, 𑀢𑀁 𑀓𑀫𑁆𑀫𑀁 𑀅𑀦𑁆𑀢𑀭𑀸𑀯 𑀦𑀺𑀧𑁆𑀨𑀦𑁆𑀦𑀁, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀦𑀺𑀯𑀢𑁆𑀢𑀸𑀫𑀸’’𑀢𑀺 𑀤𑁆𑀯𑁂𑀧𑀺 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑀲𑁆𑀲 𑀘 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 ‘‘𑀧𑀦𑁆𑀣𑀓𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀧𑀭𑁄𑀧𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀲𑀸𑀧𑀺 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀞𑀫𑀚𑀸𑀢𑀲𑁆𑀲 ‘‘𑀫𑀳𑀸𑀧𑀦𑁆𑀣𑀓𑁄’’𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 ‘‘𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀆𑀕𑀢𑀸.

𑀢𑁂𑀲𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀅𑀬𑀁 𑀫𑀳𑀸𑀧𑀦𑁆𑀣𑀓𑀤𑀸𑀭𑀓𑁄 𑀅𑀜𑁆𑀜𑁂 𑀤𑀸𑀭𑀓𑁂 ‘‘𑀘𑀽𑀴𑀧𑀺𑀢𑀸 𑀫𑀳𑀸𑀧𑀺𑀢𑀸’’𑀢𑀺, ‘‘𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’’𑀢𑀺 𑀘 𑀯𑀤𑀦𑁆𑀢𑁂 𑀲𑀼𑀢𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀅𑀜𑁆𑀜𑁂 𑀤𑀸𑀭𑀓𑀸 ‘𑀘𑀽𑀴𑀧𑀺𑀢𑀸 𑀫𑀳𑀸𑀧𑀺𑀢𑀸’𑀢𑀺𑀧𑀺 𑀯𑀤𑀦𑁆𑀢𑀺, ‘𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’𑀢𑀺𑀧𑀺 𑀯𑀤𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀦𑀢𑁆𑀣𑀻’’𑀢𑀺. ‘‘𑀆𑀫, 𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀏𑀢𑁆𑀣 𑀜𑀸𑀢𑀓𑀸 𑀦𑀢𑁆𑀣𑀺, 𑀭𑀸𑀚𑀕𑀳𑀦𑀕𑀭𑁂 𑀧𑀦 𑀯𑁄 𑀥𑀦𑀲𑁂𑀝𑁆𑀞𑀺 𑀦𑀸𑀫 𑀅𑀬𑁆𑀬𑀓𑁄, 𑀢𑀢𑁆𑀣 𑀢𑀼𑀫𑁆𑀳𑀸𑀓𑀁 𑀩𑀳𑀽 𑀜𑀸𑀢𑀓𑀸’’𑀢𑀺. ‘‘𑀓𑀲𑁆𑀫𑀸 𑀢𑀢𑁆𑀣 𑀦 𑀕𑀘𑁆𑀙𑀣, 𑀅𑀫𑁆𑀫𑀸’’𑀢𑀺? 𑀲𑀸 𑀅𑀢𑁆𑀢𑀦𑁄 𑀅𑀕𑀫𑀦𑀓𑀸𑀭𑀡𑀁 𑀧𑀼𑀢𑁆𑀢𑀲𑁆𑀲 𑀅𑀓𑀣𑁂𑀢𑁆𑀯𑀸 𑀧𑀼𑀢𑁆𑀢𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀲𑀼 𑀲𑀸𑀫𑀺𑀓𑀁 𑀆𑀳 𑁋 ‘‘𑀇𑀫𑁂 𑀤𑀸𑀭𑀓𑀸 𑀫𑀁 𑀅𑀢𑀺𑀯𑀺𑀬 𑀓𑀺𑀮𑀫𑁂𑀦𑁆𑀢𑀺, 𑀓𑀺𑀁 𑀦𑁄 𑀫𑀸𑀢𑀸𑀧𑀺𑀢𑀭𑁄 𑀤𑀺𑀲𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀏𑀳𑀺 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺. ‘‘𑀅𑀳𑀁 𑀲𑀫𑁆𑀫𑀼𑀔𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀁 𑀧𑀦 𑀢𑀢𑁆𑀣 𑀦𑀬𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀅𑀬𑁆𑀬, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀫𑁂𑀯 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀤𑀸𑀭𑀓𑁂 𑀆𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀦𑀺𑀯𑀸𑀲𑀁 𑀓𑀢𑁆𑀯𑀸 𑀤𑀸𑀭𑀓𑀫𑀸𑀢𑀸 𑀤𑁆𑀯𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀆𑀕𑀢𑀪𑀸𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑀸𑀧𑁂𑀲𑀺.

𑀢𑁂 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀸𑀦𑀁 𑀦 𑀧𑀼𑀢𑁆𑀢𑁄 𑀦 𑀥𑀻𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑁂 𑀅𑀫𑁆𑀳𑀸𑀓𑀁 𑀫𑀳𑀸𑀧𑀭𑀸𑀥𑀺𑀓𑀸, 𑀦 𑀲𑀓𑁆𑀓𑀸 𑀢𑁂𑀳𑀺 𑀅𑀫𑁆𑀳𑀸𑀓𑀁 𑀘𑀓𑁆𑀔𑀼𑀧𑀣𑁂 𑀞𑀸𑀢𑀼𑀁, 𑀏𑀢𑁆𑀢𑀓𑀁 𑀧𑀦 𑀥𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑀸 𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀻𑀯𑀦𑁆𑀢𑀼, 𑀤𑀸𑀭𑀓𑁂 𑀧𑀦 𑀇𑀥 𑀧𑁂𑀲𑁂𑀦𑁆𑀢𑀽’’𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀧𑁂𑀲𑀺𑀢𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀤𑀸𑀭𑀓𑁂 𑀆𑀕𑀢𑀤𑀽𑀢𑀸𑀦𑀁𑀬𑁂𑀯 𑀳𑀢𑁆𑀣𑁂 𑀤𑀢𑁆𑀯𑀸 𑀧𑁂𑀲𑁂𑀲𑀺, 𑀤𑀸𑀭𑀓𑀸 𑀅𑀬𑁆𑀬𑀓𑀓𑀼𑀮𑁂 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀘𑀽𑀴𑀧𑀦𑁆𑀣𑀓𑁄 𑀅𑀢𑀺𑀤𑀳𑀭𑁄, 𑀫𑀳𑀸𑀧𑀦𑁆𑀣𑀓𑁄 𑀧𑀦 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀦𑀺𑀘𑁆𑀘𑀁 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺. 𑀲𑁄 𑀅𑀬𑁆𑀬𑀓𑀁 𑀆𑀳 ‘‘𑀲𑀘𑁂 𑀢𑀼𑀫𑁆𑀳𑁂 𑀲𑀫𑁆𑀧𑀝𑀺𑀘𑁆𑀙𑀣, 𑀅𑀳𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀫𑀬𑁆𑀳𑀁 𑀲𑀓𑀮𑀮𑁄𑀓𑀲𑁆𑀲𑀧𑀺 𑀧𑀩𑁆𑀩𑀚𑁆𑀚𑀸𑀢𑁄 𑀢𑀯𑁂𑀯 𑀧𑀩𑁆𑀩𑀚𑁆𑀚𑀸 𑀪𑀤𑁆𑀤𑀺𑀓𑀸, 𑀲𑀘𑁂 𑀲𑀓𑁆𑀓𑁄𑀲𑀺, 𑀧𑀩𑁆𑀩𑀚 𑀢𑀸𑀢𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀲𑀢𑁆𑀣𑀸 ‘‘𑀓𑀺𑀁 𑀫𑀳𑀸𑀲𑁂𑀝𑁆𑀞𑀺 𑀤𑀸𑀭𑀓𑁄 𑀢𑁂 𑀮𑀤𑁆𑀥𑁄’’𑀢𑀺. ‘‘𑀆𑀫, 𑀪𑀦𑁆𑀢𑁂 𑀅𑀬𑀁 𑀤𑀸𑀭𑀓𑁄 𑀫𑀬𑁆𑀳𑀁 𑀦𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀸𑀫𑀻𑀢𑀺 𑀯𑀤𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 ‘‘𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺. 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑁄 𑀛𑀸𑀦𑀲𑀼𑀔𑁂𑀦, 𑀫𑀕𑁆𑀕𑀲𑀼𑀔𑁂𑀦, 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀓𑁆𑀓𑀸 𑀦𑀼 𑀔𑁄 𑀇𑀫𑀁 𑀲𑀼𑀔𑀁 𑀘𑀽𑀴𑀧𑀦𑁆𑀣𑀓𑀲𑁆𑀲 𑀤𑀸𑀢𑀼’’𑀦𑁆𑀢𑀺. 𑀢𑀢𑁄 𑀅𑀬𑁆𑀬𑀓𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀲𑁂𑀝𑁆𑀞𑀺 𑀲𑀘𑁂 𑀢𑀼𑀫𑁆𑀳𑁂 𑀲𑀫𑁆𑀧𑀝𑀺𑀘𑁆𑀙𑀣, 𑀅𑀳𑀁 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀬𑁆𑀬’’𑀦𑁆𑀢𑀺 𑀆𑀳. ‘‘𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 𑀘𑀽𑀴𑀧𑀦𑁆𑀣𑀓𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀘𑀽𑀴𑀧𑀦𑁆𑀣𑀓𑀲𑀸𑀫𑀡𑁂𑀭𑁄 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀅𑀳𑁄𑀲𑀺.

‘‘𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁, 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁, 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩; 𑀅. 𑀦𑀺. 𑁫.𑁧𑁯𑁫) 𑁋

𑀇𑀫𑀁 𑀏𑀓𑀕𑀸𑀣𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀜𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀦𑁆𑀥𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀕𑁆𑀕𑀳𑀡𑀓𑀸𑀮𑁂 𑀧𑀭𑀺𑀳𑀸𑀲𑀓𑁂𑀴𑀺𑀁 𑀅𑀓𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀧𑀭𑀺𑀳𑀸𑀲𑁂𑀦 𑀮𑀚𑁆𑀚𑀺𑀢𑁄 𑀦𑁂𑀯 𑀉𑀤𑁆𑀤𑁂𑀲𑀁 𑀕𑀡𑁆𑀳𑀺, 𑀦 𑀲𑀚𑁆𑀛𑀸𑀬𑀫𑀓𑀸𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀅𑀬𑀁 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀚𑀸𑀢𑁄, 𑀕𑀳𑀺𑀢𑀕𑀳𑀺𑀢𑀁 𑀧𑀤𑀁 𑀉𑀧𑀭𑀽𑀧𑀭𑀺 𑀧𑀤𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀲𑁆𑀲𑀢𑀺. 𑀢𑀲𑁆𑀲 𑀇𑀫𑀫𑁂𑀯 𑀕𑀸𑀣𑀁 𑀕𑀳𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸.

𑀅𑀣 𑀦𑀁 𑀫𑀳𑀸𑀧𑀦𑁆𑀣𑀓𑁄 𑀆𑀳 ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀫𑁆𑀧𑀺 𑀕𑀸𑀣𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀦 𑀢𑁆𑀯𑀁 𑀓𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀲𑀺, 𑀦𑀺𑀓𑁆𑀔𑀫 𑀇𑀢𑁄’’𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺. 𑀘𑀽𑀴𑀧𑀦𑁆𑀣𑀓𑁄 𑀩𑀼𑀤𑁆𑀥𑀲𑀸𑀲𑀦𑁂 𑀲𑀺𑀦𑁂𑀳𑁂𑀦 𑀕𑀺𑀳𑀺𑀪𑀸𑀯𑀁 𑀦 𑀧𑀢𑁆𑀣𑁂𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀫𑀳𑀸𑀧𑀦𑁆𑀣𑀓𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀅𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀦𑁆𑀣𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀢𑁆𑀢𑀓𑀸, 𑀪𑀦𑁆𑀢𑁂, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺. ‘‘𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺. ‘‘𑀲𑁆𑀯𑁂, 𑀪𑀦𑁆𑀢𑁂, 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀅𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. ‘‘𑀉𑀧𑀸𑀲𑀓, 𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀦𑁆𑀥𑁄 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺 𑀣𑁂𑀭𑁄 𑀆𑀳. 𑀢𑀁 𑀲𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀣𑁂𑀭𑁄 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀫𑀁 𑀩𑀸𑀳𑀺𑀭𑀁 𑀓𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀫𑀬𑁆𑀳𑀁 𑀪𑀸𑀢𑀺𑀓𑀲𑁆𑀲 𑀫𑀬𑀺 𑀘𑀺𑀢𑁆𑀢𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀇𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀲𑀸𑀲𑀦𑁂𑀦, 𑀕𑀺𑀳𑀻 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺.

𑀲𑁄 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 ‘‘𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀬𑀸𑀲𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀘𑀗𑁆𑀓𑀫𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀘𑀽𑀴𑀧𑀦𑁆𑀣𑀓𑁄 𑀖𑀭𑀁 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀳𑀁 𑀧𑀦, 𑀢𑁆𑀯𑀁 𑀘𑀽𑀴𑀧𑀦𑁆𑀣𑀓, 𑀇𑀫𑀸𑀬 𑀯𑁂𑀮𑀸𑀬 𑀕𑀘𑁆𑀙𑀲𑀻’’𑀢𑀺 𑀆𑀳. 𑀪𑀸𑀢𑀸 𑀫𑀁, 𑀪𑀦𑁆𑀢𑁂, 𑀦𑀺𑀓𑁆𑀓𑀟𑁆𑀠𑀢𑀺, 𑀢𑁂𑀦𑀸𑀳𑀁 𑀯𑀺𑀩𑁆𑀪𑀫𑀺𑀢𑀼𑀁 𑀕𑀘𑁆𑀙𑀸𑀫𑀻𑀢𑀺. 𑀘𑀽𑀴𑀧𑀦𑁆𑀣𑀓, 𑀢𑀯 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀫𑀫 𑀲𑀦𑁆𑀢𑀓𑀸, 𑀪𑀸𑀢𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑁄 𑀓𑀲𑁆𑀫𑀸 𑀫𑀫 𑀲𑀦𑁆𑀢𑀺𑀓𑀁 𑀦𑀸𑀕𑀜𑁆𑀙𑀺? 𑀏𑀳𑀺 𑀓𑀺𑀁 𑀢𑁂 𑀕𑀺𑀳𑀺𑀪𑀸𑀯𑁂𑀦, 𑀫𑀫 𑀲𑀦𑁆𑀢𑀺𑀓𑁂 𑀪𑀯𑀺𑀲𑁆𑀲𑀲𑀻’’𑀢𑀺 𑀪𑀕𑀯𑀸 𑀘𑀽𑀴𑀧𑀦𑁆𑀣𑀓𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀇𑀫𑀁 𑀧𑀺𑀮𑁄𑀢𑀺𑀓𑀁 ‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀇𑀥𑁂𑀯 𑀳𑁄𑀳𑀻’’𑀢𑀺 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀢𑀁 𑀧𑀭𑀺𑀲𑀼𑀤𑁆𑀥𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀁 𑀤𑀢𑁆𑀯𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀻𑀯𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺.

𑀘𑀽𑀴𑀧𑀦𑁆𑀣𑀓𑁄𑀧𑀺 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀁 ‘‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺, 𑀢𑀲𑁆𑀲 𑀢𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀁 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑀺𑀝𑁆𑀞𑀁 𑀅𑀳𑁄𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀁, 𑀇𑀫𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀫𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀏𑀯𑀁 𑀓𑀺𑀮𑀺𑀝𑁆𑀞𑀁 𑀚𑀸𑀢𑀁, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀲𑀢𑁆𑀣𑀸 ‘‘𑀘𑀽𑀴𑀧𑀦𑁆𑀣𑀓𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀁 𑀆𑀭𑀼𑀴𑁆𑀳’’𑀦𑁆𑀢𑀺 𑀜𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀏𑀢𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀫𑁂𑀯 𑀲𑀁𑀓𑀺𑀮𑀺𑀝𑁆𑀞𑀁 𑀭𑀚𑁄𑀭𑀜𑁆𑀚𑀺𑀢𑀁 𑀚𑀸𑀢𑀦𑁆𑀢𑀺 𑀫𑀸 𑀲𑀜𑁆𑀜𑀁 𑀓𑀭𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦 𑀢𑁂 𑀭𑀸𑀕𑀭𑀚𑀸𑀤𑀬𑁄 𑀅𑀢𑁆𑀣𑀺, 𑀢𑁂 𑀳𑀭𑀸𑀳𑀻’’𑀢𑀺 𑀯𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. (𑀫𑀳𑀸𑀦𑀺. 𑁨𑁦𑁯; 𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭𑁪);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀽𑀴𑀧𑀦𑁆𑀣𑀓𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯𑀲𑁆𑀲 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀆𑀕𑀫𑀁𑀲𑀼. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀦𑀮𑀸𑀝𑀢𑁄 𑀲𑁂𑀤𑁂 𑀫𑀼𑀘𑁆𑀘𑀦𑁆𑀢𑁂 𑀧𑀭𑀺𑀲𑀼𑀤𑁆𑀥𑁂𑀦 𑀲𑀸𑀝𑀓𑁂𑀦 𑀦𑀮𑀸𑀝𑀦𑁆𑀢𑀁 𑀧𑀼𑀜𑁆𑀙𑀺, 𑀲𑀸𑀝𑀓𑁄 𑀓𑀺𑀮𑀺𑀝𑁆𑀞𑁄 𑀅𑀳𑁄𑀲𑀺. 𑀲𑁄 ‘‘𑀇𑀫𑀁 𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑁄 𑀧𑀭𑀺𑀲𑀼𑀤𑁆𑀥𑁄 𑀲𑀸𑀝𑀓𑁄 𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑁂𑀦 𑀓𑀸𑀭𑀡𑁂𑀦𑀲𑁆𑀲 𑀭𑀚𑁄𑀳𑀭𑀡𑀫𑁂𑀯 𑀧𑀘𑁆𑀘𑀬𑁄 𑀚𑀸𑀢𑁄.

𑀚𑀻𑀯𑀓𑁄𑀧𑀺 𑀔𑁄 𑀓𑁄𑀫𑀸𑀭𑀪𑀘𑁆𑀘𑁄 𑀤𑀲𑀩𑀮𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 ‘‘𑀦𑀦𑀼, 𑀚𑀻𑀯𑀓, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀣𑀻’’𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀫𑀳𑀸𑀧𑀦𑁆𑀣𑀓𑁄 ‘‘𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀦𑀢𑁆𑀣𑀺 𑀪𑀺𑀓𑁆𑀔𑀽’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀢𑁆𑀣𑀺 𑀚𑀻𑀯𑀓𑀸’’𑀢𑀺 𑀆𑀳. 𑀚𑀻𑀯𑀓𑁄 ‘‘𑀢𑁂𑀦 𑀳𑀺, 𑀪𑀡𑁂, 𑀕𑀘𑁆𑀙, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀽𑀴𑀧𑀦𑁆𑀣𑀓𑁄 ‘‘𑀫𑀬𑁆𑀳𑀁 𑀪𑀸𑀢𑀺𑀓𑁄 ‘𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’𑀢𑀺 𑀪𑀡𑀢𑀺, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑀲𑁆𑀲 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀦𑀁𑀬𑁂𑀯 𑀧𑀽𑀭𑁂𑀲𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀭𑀚𑀦𑀓𑀫𑁆𑀫𑀁, 𑀏𑀓𑀘𑁆𑀘𑁂 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀫𑀸𑀧𑁂𑀲𑀺. 𑀲𑁄 𑀧𑀼𑀭𑀺𑀲𑁄 𑀯𑀺𑀳𑀸𑀭𑁂 𑀩𑀳𑀽 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀅𑀬𑁆𑀬, 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀚𑀻𑀯𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀣𑁂𑀭𑁄𑀧𑀺 𑀔𑁄 𑀢𑀢𑁆𑀣𑁂𑀯 𑁋

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸’’𑀢𑀺. (𑀣𑁂𑀭𑀕𑀸. 𑁫𑁬𑁩);

𑀅𑀣 𑀲𑀢𑁆𑀣𑀸 𑀢𑀁 𑀧𑀼𑀭𑀺𑀲𑀁 𑀆𑀳 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀲𑀢𑁆𑀣𑀸 𑀘𑀽𑀴𑀧𑀦𑁆𑀣𑀓𑀁 𑀦𑀸𑀫 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀤𑁂𑀳𑀻’’𑀢𑀺. 𑀢𑁂𑀦 𑀕𑀦𑁆𑀢𑁆𑀯𑀸 𑀢𑀣𑀸𑀯𑀼𑀢𑁆𑀢𑁂 ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄, 𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀫𑀼𑀔𑀲𑀳𑀲𑁆𑀲𑀁 𑀉𑀝𑁆𑀞𑀳𑀺. 𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀓𑀺𑀭 𑀢𑁂, 𑀪𑀦𑁆𑀢𑁂, 𑀘𑀽𑀴𑀧𑀦𑁆𑀣𑀓𑀸𑀬𑁂𑀯 𑀦𑀸𑀫𑀸’’𑀢𑀺 𑀆𑀳. 𑀢𑁂𑀦 𑀳𑀺 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀬𑁄 𑀧𑀞𑀫𑀁 ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀯𑀤𑀢𑀺, 𑀢𑀁 𑀳𑀢𑁆𑀣𑁂 𑀕𑀡𑁆𑀳, 𑀅𑀯𑀲𑁂𑀲𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀦𑁆𑀢𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺, 𑀢𑀸𑀯𑀤𑁂𑀯 𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀣𑁂𑀭𑁄 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀚𑀻𑀯𑀓𑀁 𑀆𑀫𑀦𑁆𑀢𑁂𑀲𑀺 ‘‘𑀚𑀻𑀯𑀓, 𑀘𑀽𑀴𑀧𑀦𑁆𑀣𑀓𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳, 𑀅𑀬𑀁 𑀢𑁂 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀚𑀻𑀯𑀓𑁄 𑀢𑀣𑀸 𑀅𑀓𑀸𑀲𑀺. 𑀣𑁂𑀭𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀢𑀭𑀼𑀡𑀲𑀻𑀳𑁄 𑀯𑀺𑀬 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀁𑀔𑁄𑀪𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀉𑀝𑁆𑀞𑀸𑀬𑀸𑀲𑀦𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀉𑀧𑀕𑀢𑁄. 𑀅𑀣 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀇𑀢𑁄 𑀘𑀺𑀢𑁄 𑀘 𑀲𑀫𑁄𑀲𑀭𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀯𑀺𑀬 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀆𑀭𑀪𑀺𑀁𑀲𑀼 ‘‘𑀆𑀯𑀼𑀲𑁄, 𑀫𑀳𑀸𑀧𑀦𑁆𑀣𑀓𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀚𑀸𑀦𑀦𑁆𑀢𑁄 ‘𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀕𑀸𑀣𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀦𑁆𑀥𑁄 𑀅𑀬’𑀦𑁆𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀥𑀫𑁆𑀫𑀭𑀸𑀚𑀢𑀸𑀬 𑀏𑀓𑀲𑁆𑀫𑀺𑀁𑀬𑁂𑀯𑀲𑁆𑀲 𑀅𑀦𑁆𑀢𑀭𑀪𑀢𑁆𑀢𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯 𑀆𑀕𑀢𑀸𑀦𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺.

𑀅𑀣 𑀪𑀕𑀯𑀸 𑀥𑀫𑁆𑀫𑀲𑀪𑀸𑀬𑀁 𑀇𑀫𑀁 𑀓𑀣𑀸𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑀼𑀤𑁆𑀥𑀲𑁂𑀬𑁆𑀬𑀸𑀬 𑀉𑀝𑁆𑀞𑀸𑀬 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀁 𑀯𑀺𑀬 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀫𑀢𑁆𑀢𑀯𑀸𑀭𑀡𑁄 𑀯𑀺𑀬 𑀲𑀻𑀳𑀯𑀺𑀓𑁆𑀓𑀦𑁆𑀢𑀯𑀺𑀮𑀸𑀲𑁂𑀦 𑀯𑀺𑀚𑀫𑁆𑀪𑀫𑀸𑀦𑁄 𑀲𑀻𑀳𑁄 𑀯𑀺𑀬 𑀅𑀦𑀦𑁆𑀢𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀁 𑀅𑀪𑀺𑀭𑀼𑀬𑁆𑀳 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀑𑀪𑀸𑀲𑀬𑀫𑀸𑀦𑁄 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀆𑀲𑀦𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀦 𑀆𑀕𑀢𑀫𑀢𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀲𑀢𑁆𑀣𑀸 𑀫𑀼𑀤𑀼𑀓𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀧𑀭𑀺𑀲𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀏𑀓𑀲𑁆𑀲𑀧𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁄 𑀯𑀸 𑀔𑀺𑀧𑀺𑀢𑀲𑀤𑁆𑀤𑁄 𑀯𑀸 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺𑀫𑁂 𑀩𑀼𑀤𑁆𑀥𑀕𑀸𑀭𑀯𑁂𑀦 𑀲𑀕𑀸𑀭𑀯𑀸 𑀩𑀼𑀤𑁆𑀥𑀢𑁂𑀚𑁂𑀦 𑀢𑀚𑁆𑀚𑀺𑀢𑀸 𑀫𑀬𑀺 𑀆𑀬𑀼𑀓𑀧𑁆𑀧𑀫𑁆𑀧𑀺 𑀅𑀓𑀣𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀧𑀞𑀫𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦 𑀓𑀣𑁂𑀲𑁆𑀲𑀦𑁆𑀢𑀺, 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀯𑀢𑁆𑀢𑀁 𑀦𑀸𑀫 𑀫𑀬𑀸𑀯 𑀚𑀸𑀦𑀺𑀢𑀩𑁆𑀩𑀁, 𑀅𑀳𑀫𑁂𑀯 𑀧𑀞𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀥𑀼𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺 𑀆𑀳. 𑀪𑀦𑁆𑀢𑁂, 𑀦 𑀫𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀸 𑀅𑀜𑁆𑀜𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀫, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀧𑀦 𑀕𑀼𑀡𑁂 𑀯𑀡𑁆𑀡𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸𑀫𑁆𑀳 ‘‘𑀆𑀯𑀼𑀲𑁄 𑀫𑀳𑀸𑀧𑀦𑁆𑀣𑀓𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀚𑀸𑀦𑀦𑁆𑀢𑁄 ‘𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀦𑁆𑀥𑁄 𑀅𑀬’𑀦𑁆𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀦𑀼𑀢𑁆𑀢𑀭𑀥𑀫𑁆𑀫𑀭𑀸𑀚𑀢𑀸𑀬 𑀏𑀓𑀲𑁆𑀫𑀺𑀁𑀬𑁂𑀯𑀲𑁆𑀲 𑀅𑀦𑁆𑀢𑀭𑀪𑀢𑁆𑀢𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁄 𑀫𑀁 𑀦𑀺𑀲𑁆𑀲𑀸𑀬 𑀇𑀤𑀸𑀦𑀺 𑀢𑀸𑀯 𑀥𑀫𑁆𑀫𑁂𑀲𑀼 𑀥𑀫𑁆𑀫𑀫𑀳𑀦𑁆𑀢𑀢𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂 𑀧𑀦 𑀫𑀁 𑀦𑀺𑀲𑁆𑀲𑀸𑀬 𑀪𑁄𑀕𑁂𑀲𑀼𑀧𑀺 𑀪𑁄𑀕𑀫𑀳𑀦𑁆𑀢𑀢𑀁 𑀧𑀸𑀧𑀼𑀡𑀻’’𑀢𑀺 𑀆𑀳. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼. 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀘𑀽𑀴𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺, 𑀲𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀚𑀸𑀦𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀫𑀢𑀫𑀽𑀲𑀺𑀓𑀁 𑀤𑀺𑀲𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀦𑀓𑁆𑀔𑀢𑁆𑀢𑀁 𑀲𑀫𑀸𑀦𑁂𑀢𑁆𑀯𑀸 𑀇𑀤𑀫𑀸𑀳 ‘‘𑀲𑀓𑁆𑀓𑀸 𑀘𑀓𑁆𑀔𑀼𑀫𑀢𑀸 𑀓𑀼𑀮𑀧𑀼𑀢𑁆𑀢𑁂𑀦 𑀇𑀫𑀁 𑀉𑀦𑁆𑀤𑀽𑀭𑀁 𑀕𑀳𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀪𑀭𑀡𑀜𑁆𑀘 𑀓𑀸𑀢𑀼𑀁 𑀓𑀫𑁆𑀫𑀦𑁆𑀢𑁂 𑀘 𑀧𑀬𑁄𑀚𑁂𑀢𑀼’’𑀦𑁆𑀢𑀺? 𑀅𑀜𑁆𑀜𑀢𑀭𑁄 𑀤𑀼𑀕𑁆𑀕𑀢𑀓𑀼𑀮𑀧𑀼𑀢𑁆𑀢𑁄 𑀢𑀁 𑀲𑁂𑀝𑁆𑀞𑀺𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀸𑀬𑀁 𑀅𑀚𑀸𑀦𑀺𑀢𑁆𑀯𑀸 𑀓𑀣𑁂𑀲𑁆𑀲𑀢𑀻’’𑀢𑀺 𑀢𑀁 𑀫𑀽𑀲𑀺𑀓𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀆𑀧𑀡𑁂 𑀩𑀺𑀴𑀸𑀮𑀲𑁆𑀲𑀢𑁆𑀣𑀸𑀬 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀓𑀸𑀓𑀡𑀺𑀓𑀁 𑀮𑀪𑀺𑀢𑁆𑀯𑀸 𑀢𑀸𑀬 𑀓𑀸𑀓𑀡𑀺𑀓𑀸𑀬 𑀨𑀸𑀡𑀺𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀖𑀝𑁂𑀦 𑀧𑀸𑀦𑀻𑀬𑀁 𑀕𑀡𑁆𑀳𑀺. 𑀲𑁄 𑀅𑀭𑀜𑁆𑀜𑀢𑁄 𑀆𑀕𑀘𑁆𑀙𑀦𑁆𑀢𑁂 𑀫𑀸𑀮𑀸𑀓𑀸𑀭𑁂 𑀤𑀺𑀲𑁆𑀯𑀸 𑀣𑁄𑀓𑀁 𑀣𑁄𑀓𑀁 𑀨𑀸𑀡𑀺𑀢𑀔𑀡𑁆𑀟𑀁 𑀤𑀢𑁆𑀯𑀸 𑀉𑀴𑀼𑀗𑁆𑀓𑁂𑀦 𑀧𑀸𑀦𑀻𑀬𑀁 𑀅𑀤𑀸𑀲𑀺, 𑀢𑁂 𑀘𑀲𑁆𑀲 𑀏𑀓𑁂𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀅𑀤𑀁𑀲𑀼. 𑀲𑁄 𑀢𑁂𑀦 𑀧𑀼𑀧𑁆𑀨𑀫𑀽𑀮𑁂𑀦 𑀧𑀼𑀦𑀤𑀺𑀯𑀲𑁂𑀧𑀺 𑀨𑀸𑀡𑀺𑀢𑀜𑁆𑀘 𑀧𑀸𑀦𑀻𑀬𑀖𑀝𑀜𑁆𑀘 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀸𑀭𑀸𑀫𑀫𑁂𑀯 𑀕𑀢𑁄. 𑀢𑀲𑁆𑀲 𑀢𑀁 𑀤𑀺𑀯𑀲𑀁 𑀫𑀸𑀮𑀸𑀓𑀸𑀭𑀸 𑀅𑀟𑁆𑀠𑁄𑀘𑀺𑀢𑀓𑁂 𑀧𑀼𑀧𑁆𑀨𑀕𑀘𑁆𑀙𑁂 𑀤𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀝𑁆𑀞 𑀓𑀳𑀸𑀧𑀡𑁂 𑀮𑀪𑀺.

𑀧𑀼𑀦 𑀏𑀓𑀲𑁆𑀫𑀺𑀁 𑀯𑀸𑀢𑀯𑀼𑀝𑁆𑀞𑀺𑀤𑀺𑀯𑀲𑁂 𑀭𑀸𑀚𑀼𑀬𑁆𑀬𑀸𑀦𑁂 𑀩𑀳𑀽 𑀲𑀼𑀓𑁆𑀔𑀤𑀡𑁆𑀟𑀓𑀸 𑀘 𑀲𑀸𑀔𑀸 𑀘 𑀧𑀮𑀸𑀲𑀜𑁆𑀘 𑀯𑀸𑀢𑁂𑀦 𑀧𑀸𑀢𑀺𑀢𑀁 𑀳𑁄𑀢𑀺, 𑀉𑀬𑁆𑀬𑀸𑀦𑀧𑀸𑀮𑁄 𑀙𑀟𑁆𑀟𑁂𑀢𑀼𑀁 𑀉𑀧𑀸𑀬𑀁 𑀦 𑀧𑀲𑁆𑀲𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀲𑀘𑁂 𑀇𑀫𑀸𑀦𑀺 𑀤𑀸𑀭𑀼𑀧𑀡𑁆𑀡𑀸𑀦𑀺 𑀫𑀬𑁆𑀳𑀁 𑀤𑀲𑁆𑀲𑀲𑀺, 𑀅𑀳𑀁 𑀢𑁂 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀦𑀻𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀧𑀸𑀮𑀁 𑀆𑀳, 𑀲𑁄 ‘‘𑀕𑀡𑁆𑀳 𑀅𑀬𑁆𑀬𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀤𑀸𑀭𑀓𑀸𑀦𑀁 𑀓𑀻𑀴𑀦𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀨𑀸𑀡𑀺𑀢𑀁 𑀤𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀲𑀩𑁆𑀩𑀸𑀦𑀺 𑀤𑀸𑀭𑀼𑀧𑀡𑁆𑀡𑀸𑀦𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀭𑀸𑀲𑀺𑀁 𑀓𑀸𑀭𑁂𑀲𑀺. 𑀢𑀤𑀸 𑀭𑀸𑀚𑀓𑀼𑀫𑁆𑀪𑀓𑀸𑀭𑁄 𑀭𑀸𑀚𑀓𑀼𑀮𑁂 𑀪𑀸𑀚𑀦𑀸𑀦𑀁 𑀧𑀘𑀦𑀢𑁆𑀣𑀸𑀬 𑀤𑀸𑀭𑀽𑀦𑀺 𑀧𑀭𑀺𑀬𑁂𑀲𑀫𑀸𑀦𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀢𑀸𑀦𑀺 𑀤𑀺𑀲𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀺. 𑀢𑀁 𑀤𑀺𑀯𑀲𑀁 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀤𑀸𑀭𑀼𑀯𑀺𑀓𑁆𑀓𑀬𑁂𑀦 𑀲𑁄𑀴𑀲 𑀓𑀳𑀸𑀧𑀡𑁂 𑀘𑀸𑀝𑀺𑀆𑀤𑀻𑀦𑀺 𑀘 𑀧𑀜𑁆𑀘 𑀪𑀸𑀚𑀦𑀸𑀦𑀺 𑀮𑀪𑀺.

𑀲𑁄 𑀘𑀢𑀼𑀯𑀻𑀲𑀢𑀺𑀬𑀸 𑀓𑀳𑀸𑀧𑀡𑁂𑀲𑀼 𑀚𑀸𑀢𑁂𑀲𑀼 ‘‘𑀅𑀢𑁆𑀣𑀺 𑀅𑀬𑀁 𑀉𑀧𑀸𑀬𑁄 𑀫𑀬𑁆𑀳’’𑀦𑁆𑀢𑀺 𑀦𑀕𑀭𑀤𑁆𑀯𑀸𑀭𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀏𑀓𑀁 𑀧𑀸𑀦𑀻𑀬𑀘𑀸𑀝𑀺𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑁂 𑀢𑀺𑀡𑀳𑀸𑀭𑀓𑁂 𑀧𑀸𑀦𑀻𑀬𑁂𑀦 𑀉𑀧𑀝𑁆𑀞𑀳𑀺. 𑀢𑁂 𑀆𑀳𑀁𑀲𑀼 ‘‘𑀲𑀫𑁆𑀫, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄, 𑀓𑀺𑀁 𑀢𑁂 𑀓𑀭𑁄𑀫𑀸’’𑀢𑀺? 𑀲𑁄 ‘‘𑀫𑀬𑁆𑀳𑀁 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀓𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀣𑀮𑀧𑀣𑀓𑀫𑁆𑀫𑀺𑀓𑁂𑀦 𑀘 𑀚𑀮𑀧𑀣𑀓𑀫𑁆𑀫𑀺𑀓𑁂𑀦 𑀘 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑀁 𑀅𑀓𑀸𑀲𑀺. 𑀢𑀲𑁆𑀲 𑀣𑀮𑀧𑀣𑀓𑀫𑁆𑀫𑀺𑀓𑁄 ‘‘𑀲𑁆𑀯𑁂 𑀇𑀫𑀁 𑀦𑀕𑀭𑀁 𑀅𑀲𑁆𑀲𑀯𑀸𑀡𑀺𑀚𑀓𑁄 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀘𑀺𑀓𑁆𑀔𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀺𑀡𑀳𑀸𑀭𑀓𑁂 𑀆𑀳 ‘‘𑀅𑀚𑁆𑀚 𑀫𑀬𑁆𑀳𑀁 𑀏𑀓𑁂𑀓𑀁 𑀢𑀺𑀡𑀓𑀮𑀸𑀧𑀁 𑀤𑁂𑀣, 𑀫𑀬𑀸 𑀘 𑀢𑀺𑀡𑁂 𑀅𑀯𑀺𑀓𑁆𑀓𑀺𑀡𑀺𑀢𑁂 𑀅𑀢𑁆𑀢𑀦𑁄 𑀢𑀺𑀡𑀁 𑀫𑀸 𑀯𑀺𑀓𑁆𑀓𑀺𑀡𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀜𑁆𑀘 𑀢𑀺𑀡𑀓𑀮𑀸𑀧𑀲𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀖𑀭𑁂 𑀧𑀸𑀧𑀬𑀺𑀁𑀲𑀼. 𑀅𑀲𑁆𑀲𑀯𑀸𑀡𑀺𑀚𑁄 𑀲𑀓𑀮𑀦𑀕𑀭𑁂 𑀅𑀲𑁆𑀲𑀸𑀦𑀁 𑀕𑁄𑀘𑀭𑀁 𑀅𑀮𑀪𑀺𑀢𑁆𑀯𑀸 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀢𑀺𑀡𑀁 𑀕𑀡𑁆𑀳𑀺.

𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑀲𑁆𑀲 𑀚𑀮𑀧𑀣𑀓𑀫𑁆𑀫𑀺𑀓𑁄 𑀲𑀳𑀸𑀬𑀓𑁄 𑀆𑀭𑁄𑀘𑁂𑀲𑀺 ‘‘𑀧𑀝𑁆𑀝𑀦𑀫𑁆𑀳𑀺 𑀫𑀳𑀸𑀦𑀸𑀯𑀸 𑀆𑀕𑀢𑀸’’𑀢𑀺. 𑀲𑁄 ‘‘𑀅𑀢𑁆𑀣𑀺 𑀅𑀬𑀁 𑀉𑀧𑀸𑀬𑁄’’𑀢𑀺 𑀅𑀝𑁆𑀞𑀳𑀺 𑀓𑀳𑀸𑀧𑀡𑁂𑀳𑀺 𑀲𑀩𑁆𑀩𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀁 𑀢𑀸𑀯𑀓𑀸𑀮𑀺𑀓𑀁 𑀭𑀣𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀸𑀯𑀸𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁 𑀦𑀸𑀯𑀺𑀓𑀲𑁆𑀲 𑀲𑀘𑁆𑀘𑀓𑀸𑀭𑀁 𑀤𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 ‘‘𑀩𑀸𑀳𑀺𑀭𑀢𑁄 𑀯𑀸𑀡𑀺𑀚𑁂𑀲𑀼 𑀆𑀕𑀢𑁂𑀲𑀼 𑀢𑀢𑀺𑀬𑁂𑀦 𑀧𑀝𑀺𑀳𑀸𑀭𑁂𑀦 𑀫𑀁 𑀆𑀭𑁄𑀘𑁂𑀣𑀸’’𑀢𑀺. ‘‘𑀦𑀸𑀯𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀲𑀢𑀫𑀢𑁆𑀢𑀸 𑀯𑀸𑀡𑀺𑀚𑀸 ‘‘𑀪𑀡𑁆𑀟𑀁 𑀕𑀡𑁆𑀳𑀸𑀫𑀸’’𑀢𑀺 𑀆𑀕𑀫𑀺𑀁𑀲𑀼. 𑀪𑀡𑁆𑀟𑀁 𑀢𑀼𑀫𑁆𑀳𑁂 𑀦 𑀮𑀪𑀺𑀲𑁆𑀲𑀣, 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀫𑀳𑀸𑀯𑀸𑀡𑀺𑀚𑁂𑀦 𑀲𑀘𑁆𑀘𑀓𑀸𑀭𑁄 𑀤𑀺𑀦𑁆𑀦𑁄𑀢𑀺. 𑀢𑁂 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸. 𑀧𑀸𑀤𑀫𑀽𑀮𑀺𑀓𑀧𑀼𑀭𑀺𑀲𑀸 𑀧𑀼𑀭𑀺𑀫𑀲𑀜𑁆𑀜𑀸𑀯𑀲𑁂𑀦 𑀢𑀢𑀺𑀬𑁂𑀦 𑀧𑀝𑀺𑀳𑀸𑀭𑁂𑀦 𑀢𑁂𑀲𑀁 𑀆𑀕𑀢𑀪𑀸𑀯𑀁 𑀆𑀭𑁄𑀘𑁂𑀲𑀼𑀁. 𑀢𑁂 𑀲𑀢𑀫𑀢𑁆𑀢𑀸 𑀯𑀸𑀡𑀺𑀚𑀸 𑀏𑀓𑁂𑀓𑀁 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀦𑀸𑀯𑀸𑀬 𑀧𑀢𑁆𑀢𑀺𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀏𑀓𑁂𑀓𑀁 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀪𑀡𑁆𑀟𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑀓𑀁𑀲𑀼.

𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀢𑀜𑁆𑀜𑀼𑀦𑀸 𑀫𑁂 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀓𑀁 𑀲𑀢𑀲𑀳𑀲𑁆𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀘𑀽𑀴𑀲𑁂𑀝𑁆𑀞𑀺𑀲𑁆𑀲 𑀲𑀫𑀻𑀧𑀁 𑀕𑀢𑁄. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀓𑀺𑀁 𑀢𑁂, 𑀢𑀸𑀢, 𑀓𑀢𑁆𑀯𑀸 𑀇𑀤𑀁 𑀥𑀦𑀁 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑀉𑀧𑀸𑀬𑁂 𑀞𑀢𑁆𑀯𑀸 𑀘𑀢𑀼𑀫𑀸𑀲𑀫𑁆𑀪𑀦𑁆𑀢𑀭𑁂𑀬𑁂𑀯 𑀮𑀤𑁆𑀥’’𑀦𑁆𑀢𑀺 𑀫𑀢𑀫𑀽𑀲𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀢𑁆𑀣𑀼𑀁 𑀓𑀣𑁂𑀲𑀺. 𑀘𑀽𑀴𑀲𑁂𑀝𑁆𑀞𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀏𑀯𑀭𑀽𑀧𑀁 𑀤𑀸𑀭𑀓𑀁 𑀫𑀫 𑀲𑀦𑁆𑀢𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀬𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀢𑁆𑀯𑀸 𑀲𑀓𑀮𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀲𑁄 𑀲𑁂𑀝𑁆𑀞𑀺𑀦𑁄 𑀅𑀘𑁆𑀘𑀬𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀣𑀸𑀓𑀫𑁆𑀫𑀁 𑀅𑀕𑀫𑀸𑀲𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀯 𑀇𑀫𑀁 𑀕𑀸𑀣𑀁 𑀓𑀣𑁂𑀲𑀺 𑁋

𑁪. ‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺.

𑀢𑀢𑁆𑀣 𑀅𑀧𑁆𑀧𑀓𑁂𑀦𑀧𑀻𑀢𑀺 𑀣𑁄𑀓𑁂𑀦𑀧𑀺 𑀧𑀭𑀺𑀢𑁆𑀢𑀓𑁂𑀦𑀧𑀺. 𑀫𑁂𑀥𑀸𑀯𑀻𑀢𑀺 𑀧𑀜𑁆𑀜𑀯𑀸. 𑀧𑀸𑀪𑀢𑁂𑀦𑀸𑀢𑀺 𑀪𑀡𑁆𑀟𑀫𑀽𑀮𑁂𑀦. 𑀯𑀺𑀘𑀓𑁆𑀔𑀡𑁄𑀢𑀺 𑀯𑁄𑀳𑀸𑀭𑀓𑀼𑀲𑀮𑁄. 𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀦𑁆𑀢𑀺 𑀫𑀳𑀦𑁆𑀢𑀁 𑀥𑀦𑀜𑁆𑀘 𑀬𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀲𑀡𑁆𑀞𑀸𑀧𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀓𑀺𑀁? 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁, 𑀬𑀣𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀅𑀦𑀼𑀓𑁆𑀓𑀫𑁂𑀦 𑀕𑁄𑀫𑀬𑀘𑀼𑀡𑁆𑀡𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑀯𑀸𑀢𑁂𑀦 𑀥𑀫𑀦𑁆𑀢𑁄 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀟𑁆𑀠𑁂𑀢𑀺 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀣𑁄𑀓𑀫𑁆𑀧𑀺 𑀧𑀸𑀪𑀢𑀁 𑀮𑀪𑀺𑀢𑁆𑀯𑀸 𑀦𑀸𑀦𑀸𑀉𑀧𑀸𑀬𑁂𑀳𑀺 𑀧𑀬𑁄𑀚𑁂𑀢𑁆𑀯𑀸 𑀥𑀦𑀜𑁆𑀘 𑀬𑀲𑀜𑁆𑀘 𑀯𑀟𑁆𑀠𑁂𑀢𑀺, 𑀯𑀟𑁆𑀠𑁂𑀢𑁆𑀯𑀸 𑀘 𑀧𑀦 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀸𑀬 𑀏𑀯 𑀯𑀸 𑀧𑀦 𑀥𑀦𑀬𑀲𑀫𑀳𑀦𑁆𑀢𑀢𑀸𑀬 𑀅𑀢𑁆𑀢𑀸𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀅𑀪𑀺𑀜𑁆𑀜𑀸𑀢𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀪𑀕𑀯𑀸 ‘‘𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁄 𑀫𑀁 𑀦𑀺𑀲𑁆𑀲𑀸𑀬 𑀇𑀤𑀸𑀦𑀺 𑀥𑀫𑁆𑀫𑁂𑀲𑀼 𑀥𑀫𑁆𑀫𑀫𑀳𑀦𑁆𑀢𑀢𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂 𑀧𑀦 𑀪𑁄𑀕𑁂𑀲𑀼𑀧𑀺 𑀪𑁄𑀕𑀫𑀳𑀦𑁆𑀢𑀢𑀁 𑀧𑀸𑀧𑀼𑀡𑀻’’𑀢𑀺 𑀏𑀯𑀁 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀘𑀽𑀴𑀧𑀦𑁆𑀣𑀓𑁄 𑀅𑀳𑁄𑀲𑀺, 𑀘𑀽𑀴𑀓𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

𑁫. 𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀲𑀗𑁆𑀖𑀲𑁆𑀲 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀸𑀢𑁄𑀯 𑀲𑀮𑀸𑀓𑀪𑀢𑁆𑀢𑀸𑀦𑀺 𑀉𑀤𑁆𑀤𑀺𑀲𑀫𑀸𑀦𑁂 𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀓𑀤𑀸𑀘𑀺 𑀯𑀭𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀓𑀤𑀸𑀘𑀺 𑀮𑀸𑀫𑀓𑀪𑀢𑁆𑀢𑀁. 𑀲𑁄 𑀮𑀸𑀫𑀓𑀪𑀢𑁆𑀢𑀲𑁆𑀲 𑀧𑀢𑁆𑀢𑀤𑀺𑀯𑀲𑁂 𑀲𑀮𑀸𑀓𑀕𑁆𑀕𑀁 𑀆𑀓𑀼𑀮𑀁 𑀓𑀭𑁄𑀢𑀺, ‘‘𑀓𑀺𑀁 𑀤𑀩𑁆𑀩𑁄𑀯 𑀲𑀮𑀸𑀓𑀁 𑀤𑀸𑀢𑀼𑀁 𑀚𑀸𑀦𑀸𑀢𑀺, 𑀅𑀫𑁆𑀳𑁂 𑀦 𑀚𑀸𑀦𑀸𑀫𑀸’’𑀢𑀺 𑀯𑀤𑀢𑀺. 𑀢𑀲𑁆𑀫𑀺𑀁 𑀲𑀮𑀸𑀓𑀕𑁆𑀕𑀁 𑀆𑀓𑀼𑀮𑀁 𑀓𑀭𑁄𑀦𑁆𑀢𑁂 ‘‘𑀳𑀦𑁆𑀤 𑀤𑀸𑀦𑀺 𑀢𑁆𑀯𑀫𑁂𑀯 𑀲𑀮𑀸𑀓𑀁 𑀤𑁂𑀳𑀻’’𑀢𑀺 𑀲𑀮𑀸𑀓𑀧𑀘𑁆𑀙𑀺𑀁 𑀅𑀤𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀲𑀗𑁆𑀖𑀲𑁆𑀲 𑀲𑀮𑀸𑀓𑀁 𑀅𑀤𑀸𑀲𑀺. 𑀤𑁂𑀦𑁆𑀢𑁄 𑀘 𑀧𑀦 ‘‘𑀇𑀤𑀁 𑀯𑀭𑀪𑀢𑁆𑀢’’𑀦𑁆𑀢𑀺 𑀯𑀸 ‘‘𑀮𑀸𑀫𑀓𑀪𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀲𑀼𑀓𑀯𑀲𑁆𑀲𑀕𑁆𑀕𑁂 𑀯𑀭𑀪𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀲𑀼𑀓𑀯𑀲𑁆𑀲𑀕𑁆𑀕𑁂 𑀮𑀸𑀫𑀓𑀪𑀢𑁆𑀢’’𑀦𑁆𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀞𑀺𑀢𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 ‘‘𑀅𑀲𑀼𑀓𑀯𑀲𑁆𑀲𑀕𑁆𑀕𑁂 𑀞𑀺𑀢𑀺𑀓𑀸’’𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺. 𑀪𑀺𑀓𑁆𑀔𑀽𑀦𑀁 𑀞𑀺𑀢𑀯𑁂𑀮𑀸𑀬 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀬𑀁 𑀞𑀺𑀢𑀺𑀓𑀸 𑀞𑀺𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀬’’𑀦𑁆𑀢𑀺 𑀪𑀽𑀫𑀺𑀬𑀁 𑀯𑀸 𑀪𑀺𑀢𑁆𑀢𑀺𑀬𑀁 𑀯𑀸 𑀮𑁂𑀔𑀁 𑀓𑀟𑁆𑀠𑀢𑀺. 𑀧𑀼𑀦𑀤𑀺𑀯𑀲𑁂 𑀲𑀮𑀸𑀓𑀕𑁆𑀕𑁂 𑀪𑀺𑀓𑁆𑀔𑀽 𑀫𑀦𑁆𑀤𑀢𑀭𑀸 𑀯𑀸 𑀳𑁄𑀦𑁆𑀢𑀺 𑀩𑀳𑀼𑀢𑀭𑀸 𑀯𑀸, 𑀢𑁂𑀲𑀼 𑀫𑀦𑁆𑀤𑀢𑀭𑁂𑀲𑀼 𑀮𑁂𑀔𑀸 𑀳𑁂𑀝𑁆𑀞𑀸 𑀳𑁄𑀢𑀺, 𑀩𑀳𑀼𑀢𑀭𑁂𑀲𑀼 𑀉𑀧𑀭𑀺. 𑀲𑁄 𑀞𑀺𑀢𑀺𑀓𑀁 𑀅𑀚𑀸𑀦𑀦𑁆𑀢𑁄 𑀮𑁂𑀔𑀸𑀲𑀜𑁆𑀜𑀸𑀬 𑀲𑀮𑀸𑀓𑀁 𑀤𑁂𑀢𑀺.

𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀉𑀤𑀸𑀬𑀺, 𑀮𑁂𑀔𑀸 𑀦𑀸𑀫 𑀳𑁂𑀝𑁆𑀞𑀸 𑀯𑀸 𑀳𑁄𑀢𑀺 𑀉𑀧𑀭𑀺 𑀯𑀸, 𑀯𑀭𑀪𑀢𑁆𑀢𑀁 𑀧𑀦 𑀅𑀲𑀼𑀓𑀯𑀲𑁆𑀲𑀕𑁆𑀕𑁂 𑀞𑀺𑀢𑀁, 𑀮𑀸𑀫𑀓𑀪𑀢𑁆𑀢𑀁 𑀅𑀲𑀼𑀓𑀯𑀲𑁆𑀲𑀕𑁆𑀕𑁂’’𑀢𑀺 𑀆𑀳𑀁𑀲𑀼. 𑀲𑁄 𑀪𑀺𑀓𑁆𑀔𑀽 𑀧𑀝𑀺𑀧𑁆𑀨𑀭𑀦𑁆𑀢𑁄 ‘‘𑀬𑀤𑀺 𑀏𑀯𑀁 𑀅𑀬𑀁 𑀮𑁂𑀔𑀸 𑀓𑀲𑁆𑀫𑀸 𑀏𑀯𑀁 𑀞𑀺𑀢𑀸, 𑀓𑀺𑀁 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀤𑁆𑀤𑀳𑀸𑀫𑀺, 𑀇𑀫𑀺𑀲𑁆𑀲𑀸 𑀮𑁂𑀔𑀸𑀬 𑀲𑀤𑁆𑀤𑀳𑀸𑀫𑀻’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀤𑀳𑀭𑀸 𑀘 𑀲𑀸𑀫𑀡𑁂𑀭𑀸 𑀘 ‘‘𑀆𑀯𑀼𑀲𑁄 𑀮𑀸𑀮𑀼𑀤𑀸𑀬𑀺 𑀢𑀬𑀺 𑀲𑀮𑀸𑀓𑀁 𑀤𑁂𑀦𑁆𑀢𑁂 𑀪𑀺𑀓𑁆𑀔𑀽 𑀮𑀸𑀪𑁂𑀦 𑀧𑀭𑀺𑀳𑀸𑀬𑀦𑁆𑀢𑀺, 𑀦 𑀢𑁆𑀯𑀁 𑀤𑀸𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀕𑀘𑁆𑀙 𑀇𑀢𑁄’’𑀢𑀺 𑀲𑀮𑀸𑀓𑀕𑁆𑀕𑀢𑁄 𑀦𑀺𑀓𑁆𑀓𑀟𑁆𑀠𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀮𑀸𑀓𑀕𑁆𑀕𑁂 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀆𑀦𑀦𑁆𑀤, 𑀲𑀮𑀸𑀓𑀕𑁆𑀕𑁂 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁, 𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲𑁄’’𑀢𑀺. 𑀣𑁂𑀭𑁄 𑀢𑀣𑀸𑀕𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀆𑀦𑀦𑁆𑀤, 𑀦 𑀇𑀤𑀸𑀦𑁂𑀯 𑀮𑀸𑀮𑀼𑀤𑀸𑀬𑀺 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀧𑀭𑁂𑀲𑀁 𑀮𑀸𑀪𑀳𑀸𑀦𑀺𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺. 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀖𑀸𑀧𑀦𑀺𑀓𑁄 𑀅𑀳𑁄𑀲𑀺. 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀺 𑀘𑁂𑀯 𑀫𑀡𑀺𑀲𑀼𑀯𑀡𑁆𑀡𑀸𑀤𑀻𑀦𑀺 𑀘 𑀅𑀕𑁆𑀖𑀸𑀧𑁂𑀲𑀺, 𑀅𑀕𑁆𑀖𑀸𑀧𑁂𑀢𑁆𑀯𑀸 𑀪𑀡𑁆𑀟𑀲𑀸𑀫𑀺𑀓𑀸𑀦𑀁 𑀪𑀡𑁆𑀟𑀸𑀦𑀼𑀭𑀽𑀧𑀫𑁂𑀯 𑀫𑀽𑀮𑀁 𑀤𑀸𑀧𑁂𑀲𑀺. 𑀭𑀸𑀚𑀸 𑀧𑀦 𑀮𑀼𑀤𑁆𑀥𑁄 𑀳𑁄𑀢𑀺, 𑀲𑁄 𑀮𑁄𑀪𑀧𑀓𑀢𑀺𑀢𑀸𑀬 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀕𑁆𑀖𑀸𑀧𑀦𑀺𑀓𑁄 𑀏𑀯𑀁 𑀅𑀕𑁆𑀖𑀸𑀧𑁂𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀫𑀫 𑀕𑁂𑀳𑁂 𑀥𑀦𑀁 𑀧𑀭𑀺𑀓𑁆𑀔𑀬𑀁 𑀕𑀫𑁂𑀲𑁆𑀲𑀢𑀺, 𑀅𑀜𑁆𑀜𑀁 𑀅𑀕𑁆𑀖𑀸𑀧𑀦𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀕𑀸𑀫𑀺𑀓𑀫𑀦𑀼𑀲𑁆𑀲𑀁 𑀮𑁄𑀮𑀩𑀸𑀮𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀏𑀲 𑀫𑀬𑁆𑀳𑀁 𑀅𑀕𑁆𑀖𑀸𑀧𑀦𑀺𑀓𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀲𑀺, 𑀪𑀡𑁂, 𑀅𑀫𑁆𑀳𑀸𑀓𑀁 𑀅𑀕𑁆𑀖𑀸𑀧𑀦𑀺𑀓𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀆𑀳. 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯𑀸𑀢𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀥𑀦𑀭𑀓𑁆𑀔𑀡𑀢𑁆𑀣𑀸𑀬 𑀢𑀁 𑀩𑀸𑀮𑀁 𑀅𑀕𑁆𑀖𑀸𑀧𑀦𑀺𑀓𑀓𑀫𑁆𑀫𑁂 𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀩𑀸𑀮𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀺 𑀅𑀕𑁆𑀖𑀸𑀧𑁂𑀦𑁆𑀢𑁄 𑀅𑀕𑁆𑀖𑀁 𑀳𑀸𑀧𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀬𑀸 𑀓𑀣𑁂𑀢𑀺. 𑀢𑀲𑁆𑀲 𑀞𑀸𑀦𑀦𑁆𑀢𑀭𑁂 𑀞𑀺𑀢𑀢𑁆𑀢𑀸 𑀬𑀁 𑀲𑁄 𑀓𑀣𑁂𑀢𑀺, 𑀢𑀫𑁂𑀯 𑀫𑀽𑀮𑀁 𑀳𑁄𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀉𑀢𑁆𑀢𑀭𑀸𑀧𑀣𑀢𑁄 𑀏𑀓𑁄 𑀅𑀲𑁆𑀲𑀯𑀸𑀡𑀺𑀚𑁄 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀆𑀦𑁂𑀲𑀺. 𑀭𑀸𑀚𑀸 𑀢𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀲𑁆𑀲𑁂 𑀅𑀕𑁆𑀖𑀸𑀧𑁂𑀲𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀅𑀲𑁆𑀲𑀲𑀢𑀸𑀦𑀁 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀓𑀁 𑀅𑀕𑁆𑀖𑀫𑀓𑀸𑀲𑀺. 𑀓𑀢𑁆𑀯𑀸 𑀘 𑀧𑀦 ‘‘𑀅𑀲𑁆𑀲𑀯𑀸𑀡𑀺𑀚𑀲𑁆𑀲 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀓𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀲𑁆𑀲𑁂 𑀅𑀲𑁆𑀲𑀲𑀸𑀮𑀸𑀬𑀁 𑀲𑀡𑁆𑀞𑀸𑀧𑁂𑀲𑀺. 𑀅𑀲𑁆𑀲𑀯𑀸𑀡𑀺𑀚𑁄 𑀧𑁄𑀭𑀸𑀡𑀅𑀕𑁆𑀖𑀸𑀧𑀦𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀳 ‘‘𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑀜𑁆𑀚𑀁 𑀤𑀢𑁆𑀯𑀸 𑀏𑀯𑀁 𑀧𑀼𑀘𑁆𑀙𑀣 ‘𑀅𑀫𑁆𑀳𑀸𑀓𑀁 𑀢𑀸𑀯 𑀅𑀲𑁆𑀲𑀸 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀓𑀁 𑀅𑀕𑁆𑀖𑀦𑁆𑀢𑀻𑀢𑀺 𑀜𑀸𑀢𑀫𑁂𑀢𑀁, 𑀢𑀼𑀫𑁆𑀳𑁂 𑀧𑀦 𑀦𑀺𑀲𑁆𑀲𑀸𑀬 𑀢𑀡𑁆𑀟𑀼𑀮𑀦𑀸𑀴𑀺𑀬𑀸 𑀅𑀕𑁆𑀖𑀁 𑀚𑀸𑀦𑀺𑀢𑀼𑀓𑀸𑀫𑀫𑁆𑀳𑀸, 𑀲𑀓𑁆𑀔𑀺𑀲𑁆𑀲𑀣 𑀦𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀲𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸 𑀇𑀤𑀁 𑀦𑀸𑀫 𑀅𑀕𑁆𑀖𑀢𑀻𑀢𑀺 𑀯𑀢𑁆𑀢𑀼’𑀦𑁆𑀢𑀺, 𑀲𑀘𑁂 𑀲𑀓𑁆𑀓𑁄𑀫𑀻𑀢𑀺 𑀯𑀤𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣, 𑀅𑀳𑀫𑁆𑀧𑀺 𑀢𑀢𑁆𑀣 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀲𑁆𑀲𑀯𑀸𑀡𑀺𑀚𑁄 ‘‘𑀲𑀸𑀥𑀽’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀕𑁆𑀖𑀸𑀧𑀦𑀺𑀓𑀲𑁆𑀲 𑀮𑀜𑁆𑀚𑀁 𑀤𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑁄 𑀮𑀜𑁆𑀚𑀁 𑀮𑀪𑀺𑀢𑁆𑀯𑀸𑀯 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺 𑀢𑀡𑁆𑀟𑀼𑀮𑀦𑀸𑀴𑀺𑀁 𑀅𑀕𑁆𑀖𑀸𑀧𑁂𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫 𑀭𑀸𑀚𑀓𑀼𑀮’’𑀦𑁆𑀢𑀺 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀜𑁆𑀜𑁂𑀧𑀺 𑀩𑀳𑀽 𑀅𑀫𑀘𑁆𑀘𑀸 𑀅𑀕𑀫𑀺𑀁𑀲𑀼. 𑀅𑀲𑁆𑀲𑀯𑀸𑀡𑀺𑀚𑁄 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀤𑁂𑀯, 𑀧𑀜𑁆𑀘𑀦𑁆𑀦𑀁 𑀅𑀲𑁆𑀲𑀲𑀢𑀸𑀦𑀁 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀁 𑀅𑀕𑁆𑀖𑀦𑀓𑀪𑀸𑀯𑀁 𑀚𑀸𑀦𑀸𑀫, 𑀲𑀸 𑀧𑀦 𑀢𑀡𑁆𑀟𑀼𑀮𑀦𑀸𑀴𑀺 𑀓𑀺𑀁 𑀅𑀕𑁆𑀖𑀢𑀻𑀢𑀺 𑀅𑀕𑁆𑀖𑀸𑀧𑀦𑀺𑀓𑀁 𑀧𑀼𑀘𑁆𑀙𑀣 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀫𑁆𑀪𑁄 𑀅𑀕𑁆𑀖𑀸𑀧𑀦𑀺𑀓, 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀓𑀺𑀁 𑀅𑀕𑁆𑀖𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑀡𑁆𑀟𑀼𑀮𑀦𑀸𑀴𑀺𑀁, 𑀤𑁂𑀯𑀸𑀢𑀺. ‘‘𑀳𑁄𑀢𑀼, 𑀪𑀡𑁂, 𑀅𑀲𑁆𑀲𑀸 𑀢𑀸𑀯 𑀢𑀡𑁆𑀟𑀼𑀮𑀦𑀸𑀴𑀺𑀁 𑀅𑀕𑁆𑀖𑀦𑁆𑀢𑀼. 𑀲𑀸 𑀧𑀦 𑀓𑀺𑀁 𑀅𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀩𑀸𑀮𑀧𑀼𑀭𑀺𑀲𑁄 ‘‘𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀁 𑀅𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸’’𑀢𑀺 𑀆𑀳. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀭𑀸𑀚𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀁 𑀅𑀲𑁆𑀲𑀸𑀦𑀁 𑀅𑀕𑁆𑀖𑀫𑀓𑀸𑀲𑀺. 𑀧𑀼𑀦 𑀯𑀸𑀡𑀺𑀚𑀲𑁆𑀲 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀬 𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀁 𑀅𑀕𑁆𑀖𑀫𑀓𑀸𑀲𑀺. 𑀢𑀤𑀸 𑀧𑀦 𑀩𑀸𑀭𑀸𑀡𑀲𑀺𑀬𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀳𑁄𑀢𑀺. 𑀇𑀤𑀫𑀲𑁆𑀲 𑀅𑀦𑁆𑀢𑀭𑀁, 𑀩𑀸𑀳𑀺𑀭𑀁 𑀧𑀦 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀝𑁆𑀞𑀁. 𑀇𑀢𑀺 𑀲𑁄 𑀩𑀸𑀮𑁄 𑀏𑀯𑀁 𑀫𑀳𑀦𑁆𑀢𑀁 𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀁 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀬 𑀅𑀕𑁆𑀖𑀫𑀓𑀸𑀲𑀺.

𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀫𑀸𑀦𑀸 ‘‘𑀫𑀬𑀁 𑀧𑀼𑀩𑁆𑀩𑁂 𑀧𑀣𑀯𑀺𑀜𑁆𑀘 𑀭𑀚𑁆𑀚𑀜𑁆𑀘 𑀅𑀦𑀕𑁆𑀖𑀦𑁆𑀢𑀺 𑀲𑀜𑁆𑀜𑀺𑀦𑁄 𑀅𑀳𑀼𑀫𑁆𑀳, 𑀏𑀯𑀁 𑀫𑀳𑀦𑁆𑀢𑀁 𑀓𑀺𑀭 𑀲𑀭𑀸𑀚𑀓𑀁 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀢𑀡𑁆𑀟𑀼𑀮𑀦𑀸𑀴𑀺𑀫𑀢𑁆𑀢𑀁 𑀅𑀕𑁆𑀖𑀢𑀺, 𑀅𑀳𑁄 𑀅𑀕𑁆𑀖𑀸𑀧𑀦𑀺𑀓𑀲𑁆𑀲 𑀜𑀸𑀡𑀲𑀫𑁆𑀧𑀤𑀸. 𑀓𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀬𑀁 𑀅𑀕𑁆𑀖𑀸𑀧𑀦𑀺𑀓𑁄 𑀯𑀺𑀳𑀸𑀲𑀺, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀏𑀯 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀧𑀭𑀺𑀳𑀸𑀲𑀁 𑀅𑀓𑀁𑀲𑀼 𑁋

𑁫. ‘‘𑀓𑀺𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀬𑀁, 𑀅𑀲𑁆𑀲𑀸𑀦 𑀫𑀽𑀮𑀸𑀬 𑀯𑀤𑁂𑀳𑀺 𑀭𑀸𑀚;

𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀁, 𑀅𑀬𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸’’𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀸 𑀮𑀚𑁆𑀚𑀺𑀢𑁄 𑀢𑀁 𑀩𑀸𑀮𑀁 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀅𑀕𑁆𑀖𑀸𑀧𑀦𑀺𑀓𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀕𑀸𑀫𑀺𑀓𑀩𑀸𑀮𑀅𑀕𑁆𑀖𑀸𑀧𑀦𑀺𑀓𑁄 𑀮𑀸𑀮𑀼𑀤𑀸𑀬𑀻 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀅𑀕𑁆𑀖𑀸𑀧𑀦𑀺𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

𑁬. 𑀤𑁂𑀯𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸𑀢𑀺 𑀇𑀤𑀁 𑀪𑀕𑀯𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑀳𑀼𑀪𑀡𑁆𑀟𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀺𑀭𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀪𑀭𑀺𑀬𑀸𑀬 𑀓𑀸𑀮𑀓𑀢𑀸𑀬 𑀧𑀩𑁆𑀩𑀚𑀺. 𑀲𑁄 𑀧𑀩𑁆𑀩𑀚𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀜𑁆𑀘 𑀅𑀕𑁆𑀕𑀺𑀲𑀸𑀮𑀜𑁆𑀘 𑀪𑀡𑁆𑀟𑀕𑀩𑁆𑀪𑀜𑁆𑀘 𑀓𑀸𑀭𑁂𑀢𑁆𑀯𑀸 𑀪𑀡𑁆𑀟𑀕𑀩𑁆𑀪𑀁 𑀲𑀧𑁆𑀧𑀺𑀢𑀡𑁆𑀟𑀼𑀮𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀤𑀸𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀁 𑀆𑀳𑀸𑀭𑀁 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀘 𑀅𑀳𑁄𑀲𑀺, 𑀭𑀢𑁆𑀢𑀺𑀁 𑀅𑀜𑁆𑀜𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀳𑁄𑀢𑀺, 𑀤𑀺𑀯𑀸 𑀅𑀜𑁆𑀜𑀁. 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀲𑀢𑀺. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀘𑀻𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀧𑀭𑀺𑀯𑁂𑀡𑁂 𑀧𑀢𑁆𑀣𑀭𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀦𑁆𑀢𑀲𑁆𑀲 𑀲𑀫𑁆𑀩𑀳𑀼𑀮𑀸 𑀚𑀸𑀦𑀧𑀤𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀘𑀻𑀯𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀺𑀫𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀫𑀬𑁆𑀳𑀁, 𑀆𑀯𑀼𑀲𑁄’’𑀢𑀺 𑀆𑀳. ‘‘𑀆𑀯𑀼𑀲𑁄, 𑀇𑀤𑀫𑁆𑀧𑀺 𑀘𑀻𑀯𑀭𑀁, 𑀇𑀤𑀫𑁆𑀧𑀺 𑀦𑀺𑀯𑀸𑀲𑀦𑀁, 𑀇𑀤𑀫𑁆𑀧𑀺 𑀧𑀘𑁆𑀘𑀢𑁆𑀣𑀭𑀡𑀁, 𑀲𑀩𑁆𑀩𑀁 𑀢𑀼𑀬𑁆𑀳𑀫𑁂𑀯𑀸’’𑀢𑀺? ‘‘𑀆𑀫 𑀫𑀬𑁆𑀳𑀫𑁂𑀯𑀸’’𑀢𑀺. ‘‘𑀆𑀯𑀼𑀲𑁄 𑀪𑀕𑀯𑀢𑀸 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀢𑁆𑀯𑀁 𑀏𑀯𑀁 𑀅𑀧𑁆𑀧𑀺𑀘𑁆𑀙𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀁 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀚𑀸𑀢𑁄, 𑀏𑀳𑀺 𑀢𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑁆𑀲𑀸𑀫𑀸’’𑀢𑀺 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀤𑀺𑀲𑁆𑀯𑀸𑀯 ‘‘𑀓𑀺𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀙𑀫𑀸𑀦𑀓𑀁𑀬𑁂𑀯 𑀪𑀺𑀓𑁆𑀔𑀼𑀁 𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄 𑀩𑀳𑀼𑀧𑀭𑀺𑀓𑁆𑀔𑀸𑀭𑁄’’𑀢𑀺. ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. ‘‘𑀓𑀲𑁆𑀫𑀸 𑀧𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄 𑀚𑀸𑀢𑁄’’? ‘‘𑀦𑀦𑀼 𑀅𑀳𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀢𑀸𑀬 𑀧𑀯𑀺𑀯𑁂𑀓𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀁 𑀯𑀤𑀸𑀫𑀻’’𑀢𑀺. 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀼𑀧𑀺𑀢𑁄 ‘‘𑀇𑀫𑀺𑀦𑀸 𑀤𑀸𑀦𑀺 𑀦𑀻𑀳𑀸𑀭𑁂𑀦 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀭𑀼𑀧𑀦𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀲𑀢𑁆𑀣𑀸 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑁄 ‘‘𑀦𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀳𑀺𑀭𑁄𑀢𑁆𑀢𑀧𑁆𑀧𑀕𑀯𑁂𑀲𑀓𑁄 𑀤𑀓𑀭𑀓𑁆𑀔𑀲𑀓𑀸𑀮𑁂𑀧𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀕𑀯𑁂𑀲𑀫𑀸𑀦𑁄 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀯𑀺𑀳𑀸𑀲𑀺, 𑀅𑀣 𑀓𑀲𑁆𑀫𑀸 𑀇𑀤𑀸𑀦𑀺 𑀏𑀯𑀁 𑀕𑀭𑀼𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀸𑀭𑀼𑀧𑀦𑀁 𑀙𑀟𑁆𑀟𑁂𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀞𑀺𑀢𑁄𑀲𑀻’’𑀢𑀺? 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼, 𑀪𑀕𑀯𑀸 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀅𑀓𑀸𑀲𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀫𑀳𑀺𑀲𑀸𑀲𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀭𑀜𑁆𑀜𑁄 𑀅𑀜𑁆𑀜𑁄𑀧𑀺 𑀧𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀲 ‘‘𑀘𑀦𑁆𑀤𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀧𑀦 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺, 𑀭𑀸𑀚𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸, 𑀲𑀸𑀧𑀺 𑀲𑀁𑀯𑀸𑀲𑀫𑀦𑁆𑀯𑀸𑀬 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀲𑀽𑀭𑀺𑀬𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 ‘‘𑀪𑀤𑁆𑀤𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀯𑀭𑀁 𑀤𑀫𑁆𑀫𑀻’’𑀢𑀺 𑀆𑀳. 𑀤𑁂𑀯𑀻, 𑀯𑀭𑀁 𑀇𑀘𑁆𑀙𑀺𑀢𑀓𑀸𑀮𑁂 𑀕𑀳𑁂𑀢𑀩𑁆𑀩𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀲𑀸 𑀧𑀼𑀢𑁆𑀢𑁂 𑀯𑀬𑀧𑁆𑀧𑀢𑁆𑀢𑁂 𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯𑁂𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑁂 𑀯𑀭𑁄 𑀤𑀺𑀦𑁆𑀦𑁄, 𑀧𑀼𑀢𑁆𑀢𑀲𑁆𑀲 𑀫𑁂 𑀭𑀚𑁆𑀚𑀁 𑀤𑁂𑀳𑀻’’𑀢𑀺. 𑀭𑀸𑀚𑀸 ‘‘𑀫𑀬𑁆𑀳𑀁 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀚𑀮𑀫𑀸𑀦𑀸 𑀯𑀺𑀘𑀭𑀦𑁆𑀢𑀺, 𑀦 𑀲𑀓𑁆𑀓𑀸 𑀢𑀯 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑀸𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀫𑀸𑀦𑀫𑁂𑀯 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀼𑀢𑁆𑀢𑀸𑀦𑀁 𑀧𑀸𑀧𑀓𑀫𑁆𑀧𑀺 𑀘𑀺𑀦𑁆𑀢𑁂𑀬𑁆𑀬𑀸’’𑀢𑀺 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢𑀸, 𑀅𑀳𑀁 𑀲𑀽𑀭𑀺𑀬𑀓𑀼𑀫𑀸𑀭𑀲𑁆𑀲 𑀚𑀸𑀢𑀓𑀸𑀮𑁂 𑀯𑀭𑀁 𑀅𑀤𑀸𑀲𑀺𑀁. 𑀇𑀤𑀸𑀦𑀺𑀲𑁆𑀲 𑀫𑀸𑀢𑀸 𑀭𑀚𑁆𑀚𑀁 𑀬𑀸𑀘𑀢𑀺, 𑀅𑀳𑀁 𑀢𑀲𑁆𑀲 𑀦 𑀤𑀸𑀢𑀼𑀓𑀸𑀫𑁄, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀧𑀸𑀧𑁄, 𑀢𑀼𑀫𑁆𑀳𑀸𑀓𑀁 𑀧𑀸𑀧𑀓𑀫𑁆𑀧𑀺 𑀘𑀺𑀦𑁆𑀢𑁂𑀬𑁆𑀬, 𑀢𑀼𑀫𑁆𑀳𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀫 𑀅𑀘𑁆𑀘𑀬𑁂𑀦 𑀓𑀼𑀮𑀲𑀦𑁆𑀢𑀓𑁂 𑀦𑀕𑀭𑁂 𑀭𑀚𑁆𑀚𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀦𑁆𑀢𑁂 𑀭𑀸𑀚𑀗𑁆𑀕𑀡𑁂 𑀓𑀻𑀴𑀫𑀸𑀦𑁄 𑀲𑀽𑀭𑀺𑀬𑀓𑀼𑀫𑀸𑀭𑁄 𑀤𑀺𑀲𑁆𑀯𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀪𑀸𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀦𑀺𑀓𑁆𑀔𑀫𑀺. 𑀢𑁂 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀭𑀺𑀬𑀓𑀼𑀫𑀸𑀭𑀁 𑀆𑀫𑀦𑁆𑀢𑁂𑀲𑀺 ‘‘𑀢𑀸𑀢 𑀲𑀽𑀭𑀺𑀬𑀓𑀼𑀫𑀸𑀭, 𑀏𑀢𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀤𑀼𑀫𑀺𑀦𑀺𑀧𑀡𑁆𑀡𑁂𑀳𑀺 𑀅𑀫𑁆𑀳𑀸𑀓𑀫𑁆𑀧𑀺 𑀧𑀸𑀦𑀻𑀬𑀁 𑀆𑀦𑁂𑀳𑀻’’𑀢𑀺. 𑀢𑀁 𑀧𑀦 𑀲𑀭𑀁 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑀸 𑀏𑀓𑁂𑀦 𑀤𑀓𑀭𑀓𑁆𑀔𑀲𑁂𑀦 𑀮𑀤𑁆𑀥𑀁 𑀳𑁄𑀢𑀺, 𑀯𑁂𑀲𑁆𑀲𑀯𑀡𑁄 𑀘 𑀢𑀁 𑀆𑀳 𑁋 ‘‘𑀞𑀧𑁂𑀢𑁆𑀯𑀸 𑀤𑁂𑀯𑀥𑀫𑁆𑀫𑀚𑀸𑀦𑀦𑀓𑁂 𑀬𑁂 𑀅𑀜𑁆𑀜𑁂 𑀇𑀫𑀁 𑀲𑀭𑀁 𑀑𑀢𑀭𑀦𑁆𑀢𑀺, 𑀢𑁂 𑀔𑀸𑀤𑀺𑀢𑀼𑀁 𑀮𑀪𑀲𑀺. 𑀅𑀦𑁄𑀢𑀺𑀡𑁆𑀡𑁂 𑀦 𑀮𑀪𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀭𑀓𑁆𑀔𑀲𑁄 𑀬𑁂 𑀢𑀁 𑀲𑀭𑀁 𑀑𑀢𑀭𑀦𑁆𑀢𑀺, 𑀢𑁂 𑀤𑁂𑀯𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑁆𑀯𑀸 𑀬𑁂 𑀦 𑀚𑀸𑀦𑀦𑁆𑀢𑀺, 𑀢𑁂 𑀔𑀸𑀤𑀢𑀺. 𑀅𑀣 𑀔𑁄 𑀲𑀽𑀭𑀺𑀬𑀓𑀼𑀫𑀸𑀭𑁄 𑀢𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀅𑀯𑀻𑀫𑀁𑀲𑀺𑀢𑁆𑀯𑀸𑀯 𑀑𑀢𑀭𑀺. 𑀅𑀣 𑀦𑀁 𑀲𑁄 𑀭𑀓𑁆𑀔𑀲𑁄 𑀕𑀳𑁂𑀢𑁆𑀯𑀸 ‘‘𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀤𑁂𑀯𑀥𑀫𑁆𑀫𑀸 𑀦𑀸𑀫 𑀘𑀦𑁆𑀤𑀺𑀫𑀲𑀽𑀭𑀺𑀬𑀸’’𑀢𑀺 𑀆𑀳. 𑀅𑀣 𑀦𑀁 ‘‘𑀢𑁆𑀯𑀁 𑀤𑁂𑀯𑀥𑀫𑁆𑀫𑁂 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀉𑀤𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀅𑀢𑀺𑀘𑀺𑀭𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀘𑀦𑁆𑀤𑀓𑀼𑀫𑀸𑀭𑀁 𑀧𑁂𑀲𑁂𑀲𑀺. 𑀭𑀓𑁆𑀔𑀲𑁄 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 ‘‘𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫 𑀚𑀸𑀦𑀸𑀫𑀺, 𑀤𑁂𑀯𑀥𑀫𑁆𑀫𑀸 𑀦𑀸𑀫 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺. 𑀭𑀓𑁆𑀔𑀲𑁄 ‘‘𑀦 𑀢𑁆𑀯𑀁 𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀻’’𑀢𑀺 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀫𑁆𑀧𑀺 𑀘𑀺𑀭𑀸𑀬𑀦𑁆𑀢𑁂 ‘‘𑀏𑀓𑁂𑀦 𑀅𑀦𑁆𑀢𑀭𑀸𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀬𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀑𑀢𑀭𑀡𑀧𑀤𑀯𑀴𑀜𑁆𑀚𑀁 𑀤𑀺𑀲𑁆𑀯𑀸 ‘‘𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁂𑀦 𑀇𑀫𑀺𑀦𑀸 𑀲𑀭𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀓𑀭𑀓𑁆𑀔𑀲𑁄 𑀩𑁄𑀥𑀺𑀲𑀢𑁆𑀢𑀁 𑀉𑀤𑀓𑀁 𑀅𑀦𑁄𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑀓𑀫𑁆𑀫𑀺𑀓𑀧𑀼𑀭𑀺𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀪𑁄, 𑀧𑀼𑀭𑀺𑀲, 𑀢𑁆𑀯𑀁 𑀫𑀕𑁆𑀕𑀓𑀺𑀮𑀦𑁆𑀢𑁄 𑀓𑀲𑁆𑀫𑀸 𑀇𑀫𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀪𑀺𑀲𑀫𑀼𑀴𑀸𑀮𑀁 𑀔𑀸𑀤𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦 𑀕𑀘𑁆𑀙𑀲𑀻’’𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀲𑁄 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀬𑀸 𑀫𑁂 𑀪𑀸𑀢𑀺𑀓𑀸 𑀕𑀳𑀺𑀢𑀸’’𑀢𑀺 𑀆𑀳. ‘‘𑀆𑀫, 𑀕𑀳𑀺𑀢𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀳𑀁 𑀇𑀫𑀁 𑀲𑀭𑀁 𑀑𑀢𑀺𑀡𑁆𑀡𑀓𑁂 𑀮𑀪𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀲𑀩𑁆𑀩𑁂𑀯 𑀮𑀪𑀲𑀻’’𑀢𑀺? ‘‘𑀬𑁂 𑀤𑁂𑀯𑀥𑀫𑁆𑀫𑁂 𑀚𑀸𑀦𑀦𑁆𑀢𑀺, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀮𑀪𑀸𑀫𑀻’’𑀢𑀺. ‘‘𑀅𑀢𑁆𑀣𑀺 𑀧𑀦 𑀢𑁂 𑀤𑁂𑀯𑀥𑀫𑁆𑀫𑁂𑀳𑀺 𑀅𑀢𑁆𑀣𑁄’’𑀢𑀺? ‘‘𑀆𑀫, 𑀅𑀢𑁆𑀣𑀻’’𑀢𑀺. ‘‘𑀬𑀤𑀺 𑀏𑀯𑀁 𑀅𑀳𑀁 𑀢𑁂 𑀤𑁂𑀯𑀥𑀫𑁆𑀫𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀓𑀣𑁂𑀳𑀺, 𑀅𑀳𑀁 𑀤𑁂𑀯𑀥𑀫𑁆𑀫𑁂 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀳 ‘‘𑀅𑀳𑀁 𑀤𑁂𑀯𑀥𑀫𑁆𑀫𑁂 𑀓𑀣𑁂𑀬𑁆𑀬𑀁, 𑀓𑀺𑀮𑀺𑀝𑁆𑀞𑀕𑀢𑁆𑀢𑁄 𑀧𑀦𑀫𑁆𑀳𑀻’’𑀢𑀺. 𑀬𑀓𑁆𑀔𑁄 𑀩𑁄𑀥𑀺𑀲𑀢𑁆𑀢𑀁 𑀦𑁆𑀳𑀸𑀧𑁂𑀢𑁆𑀯𑀸 𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀬𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑀓𑁆𑀔𑀁 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀑𑀳𑀺𑀢𑀲𑁄𑀢𑁄 𑀲𑀓𑁆𑀓𑀘𑁆𑀘𑀁 𑀤𑁂𑀯𑀥𑀫𑁆𑀫𑁂 𑀲𑀼𑀡𑀸𑀳𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳 𑁋

𑁬. ‘‘𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸, 𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸;

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺.

𑀢𑀢𑁆𑀣 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸𑀢𑀺 𑀳𑀺𑀭𑀺𑀬𑀸 𑀘 𑀑𑀢𑁆𑀢𑀧𑁆𑀧𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸. 𑀢𑁂𑀲𑀼 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀺𑀬𑀢𑀻𑀢𑀺 𑀳𑀺𑀭𑀻, 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀳𑀺𑀭𑀻, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀓𑀣𑀁? ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀦 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀁, 𑀳𑀻𑀦𑀚𑀘𑁆𑀘𑀸𑀦𑀁 𑀓𑁂𑀯𑀝𑁆𑀝𑀸𑀤𑀻𑀦𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀢𑀸𑀯 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀤𑀳𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀯𑀬𑁂 𑀞𑀺𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀤𑀼𑀩𑁆𑀩𑀮𑀚𑀸𑀢𑀺𑀓𑀸𑀦𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀲𑀽𑀭𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀅𑀦𑁆𑀥𑀩𑀸𑀮𑀸𑀦𑀁 𑀓𑀫𑁆𑀫𑀁, 𑀦 𑀧𑀡𑁆𑀟𑀺𑀢𑀸𑀦𑀁, 𑀫𑀸𑀤𑀺𑀲𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀳𑀺𑀭𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀳𑀺𑀭𑀻 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀳𑁄𑀢𑀺.

𑀓𑀣𑀁 𑀑𑀢𑁆𑀢𑀧𑁆𑀧𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀦𑀸𑀫? ‘‘𑀲𑀘𑁂 𑀢𑁆𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺, 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀕𑀭𑀳𑀧𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀲𑀺.

‘‘𑀕𑀭𑀳𑀺𑀲𑁆𑀲𑀦𑁆𑀢𑀺 𑀢𑀁 𑀯𑀺𑀜𑁆𑀜𑀽, 𑀅𑀲𑀼𑀘𑀺𑀁 𑀦𑀸𑀕𑀭𑀺𑀓𑁄 𑀬𑀣𑀸;

𑀯𑀚𑁆𑀚𑀺𑀢𑁄 𑀲𑀻𑀮𑀯𑀦𑁆𑀢𑁂𑀳𑀺, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺. (𑀥. 𑀲. 𑀅𑀝𑁆𑀞. 𑁧 𑀩𑀮𑀭𑀸𑀲𑀺𑀯𑀡𑁆𑀡𑀦𑀸) 𑁋

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀳𑀺 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀺𑀢𑁂𑀦 𑀑𑀢𑁆𑀢𑀧𑁆𑀧𑁂𑀦 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀑𑀢𑁆𑀢𑀧𑁆𑀧𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀺.

𑀓𑀣𑀁 𑀳𑀺𑀭𑀻 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀦𑀸𑀫? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 ‘‘𑀫𑀸𑀤𑀺𑀲𑀲𑁆𑀲 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀥𑀼𑀢𑀗𑁆𑀕𑀥𑀭𑀲𑁆𑀲 𑀦 𑀬𑀼𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀯𑀁 𑀳𑀺𑀭𑀻 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺. 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺. 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁩.𑁪𑁦).