𑁨𑁦. 𑀲𑀢𑁆𑀢𑀢𑀺𑀦𑀺𑀧𑀸𑀢𑁄

[𑁫𑁩𑁧] 𑁧. 𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸

𑀇𑀤𑀁 𑀢𑁂 𑀭𑀝𑁆𑀞𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀑𑀮𑁄𑀓𑁂𑀢𑁆𑀯𑀸 𑀓𑀺𑀮𑁂𑀲𑀸𑀪𑀺𑀪𑀽𑀢𑁄 𑀅𑀦𑀪𑀺𑀭𑀢𑁄 𑀯𑀺𑀳𑀸𑀲𑀺 𑀤𑀻𑀖𑀓𑁂𑀲𑀦𑀔𑁄 𑀓𑀺𑀮𑀺𑀝𑁆𑀞𑀘𑀻𑀯𑀭𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀻𑀲𑀦𑁆𑀣𑀢𑀕𑀢𑁆𑀢𑁄. 𑀬𑀣𑀸 𑀳𑀺 𑀤𑁂𑀯𑀮𑁄𑀓𑀸 𑀘𑀯𑀦𑀥𑀫𑁆𑀫𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀲𑀭𑀻𑀭𑁂 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀉𑀪𑁄𑀳𑀺 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦𑀸𑀪𑀺𑀭𑀫𑀢𑀺, 𑀏𑀯𑀫𑁂𑀯 𑀲𑀸𑀲𑀦𑀸 𑀘𑀯𑀦𑀥𑀫𑁆𑀫𑀸𑀦𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀤𑁆𑀥𑀸𑀧𑀼𑀧𑁆𑀨𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀲𑀻𑀮𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀲𑀭𑀻𑀭𑁂 𑀫𑀗𑁆𑀓𑀼𑀢𑀸𑀬 𑀘𑁂𑀯 𑀅𑀬𑀲𑀯𑀲𑁂𑀦 𑀘 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀓𑀺𑀮𑁂𑀲𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀦𑀸𑀪𑀺𑀭𑀫𑀦𑁆𑀢𑀺. 𑀢𑀲𑁆𑀲𑀧𑀺 𑀢𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀣 𑀦𑀁 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀫𑀸, 𑀪𑀺𑀓𑁆𑀔𑀼, 𑀓𑀺𑀮𑁂𑀲𑀯𑀲𑀺𑀓𑁄 𑀳𑁄𑀳𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫𑁂𑀲 𑀧𑀸𑀧𑁄, 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀁 𑀯𑀺𑀦𑁄𑀤𑁂𑀳𑀺, 𑀲𑀸𑀲𑀦𑁂 𑀅𑀪𑀺𑀭𑀫, 𑀫𑀸𑀢𑀼𑀕𑀸𑀫𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀳𑀺 𑀢𑁂𑀚𑀯𑀦𑁆𑀢𑁄𑀧𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀦𑀺𑀢𑁆𑀢𑁂𑀚𑀸 𑀳𑀼𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀮𑁆𑀮𑀭𑀝𑁆𑀞𑁂 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀬𑀁 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 𑀲𑀻𑀮𑀯𑀢𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺, 𑀲𑀸 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀮𑀪𑀺. 𑀅𑀣𑀲𑁆𑀲 𑀦𑀸𑀕𑀭𑀸 𑀘𑁂𑀯 𑀭𑀝𑁆𑀞𑀯𑀸𑀲𑀺𑀦𑁄 𑀘 𑀭𑀸𑀚𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀭𑀝𑁆𑀞𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀭𑀝𑁆𑀞𑀁 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 ‘‘𑀫𑀬𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀥𑀫𑁆𑀫𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀓𑀲𑁆𑀫𑀸 𑀉𑀧𑀓𑁆𑀓𑁄𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀤𑁂𑀯, 𑀅𑀥𑀫𑁆𑀫𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑀺𑀘 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀧𑀦 𑀯𑁄 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀜𑁆𑀜𑁄 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀭𑀝𑁆𑀞𑀁 𑀦𑀸𑀲𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀲𑀫𑀢𑁆𑀣𑀁 𑀧𑀼𑀢𑁆𑀢𑀁 𑀧𑀢𑁆𑀣𑁂𑀣𑀸’’𑀢𑀺. ‘‘𑀧𑀼𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁄 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀧𑀞𑀫𑀁 𑀢𑀸𑀯 𑀏𑀓𑀁 𑀲𑀢𑁆𑀢𑀸𑀳𑀁 𑀘𑀼𑀮𑁆𑀮𑀦𑀸𑀝𑀓𑀁 𑀥𑀫𑁆𑀫𑀦𑀸𑀝𑀓𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣, 𑀲𑀘𑁂 𑀲𑀸 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀲𑀸𑀥𑀼, 𑀦𑁄 𑀘𑁂, 𑀅𑀣 𑀫𑀚𑁆𑀛𑀺𑀫𑀦𑀸𑀝𑀓𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀢𑀢𑁄 𑀚𑁂𑀝𑁆𑀞𑀦𑀸𑀝𑀓𑀁, 𑀅𑀯𑀲𑁆𑀲𑀁 𑀏𑀢𑁆𑀢𑀓𑀸𑀲𑀼 𑀇𑀢𑁆𑀣𑀻𑀲𑀼 𑀏𑀓𑀸 𑀧𑀼𑀜𑁆𑀜𑀯𑀢𑀻 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 𑀢𑁂𑀲𑀁 𑀯𑀘𑀦𑁂𑀦 𑀢𑀣𑀸 𑀓𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑁂 𑀬𑀣𑀸𑀲𑀼𑀔𑀁 𑀅𑀪𑀺𑀭𑀫𑀺𑀢𑁆𑀯𑀸 𑀆𑀕𑀢𑀸𑀕𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀘𑁆𑀘𑀺 𑀯𑁄 𑀧𑀼𑀢𑁆𑀢𑁄 𑀮𑀤𑁆𑀥𑁄’’𑀢𑀺? 𑀲𑀩𑁆𑀩𑀸 ‘‘𑀦 𑀮𑀪𑀸𑀫, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀦 𑀫𑁂 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀦𑀸𑀕𑀭𑀸 𑀧𑀼𑀦 𑀢𑀣𑁂𑀯 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀉𑀧𑀓𑁆𑀓𑁄𑀲𑀣, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀘𑀦𑁂𑀦 𑀦𑀸𑀝𑀓𑀸𑀦𑀺 𑀯𑀺𑀲𑁆𑀲𑀝𑁆𑀞𑀸𑀦𑀺, 𑀏𑀓𑀸𑀧𑀺 𑀧𑀼𑀢𑁆𑀢𑀁 𑀦 𑀮𑀪𑀢𑀺, 𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. ‘‘𑀤𑁂𑀯, 𑀏𑀢𑀸 𑀤𑀼𑀲𑁆𑀲𑀻𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦𑀺𑀧𑁆𑀧𑀼𑀜𑁆𑀜𑀸, 𑀦𑀢𑁆𑀣𑀺 𑀏𑀢𑀸𑀲𑀁 𑀧𑀼𑀢𑁆𑀢𑀮𑀸𑀪𑀸𑀬 𑀧𑀼𑀜𑁆𑀜𑀁, 𑀢𑀼𑀫𑁆𑀳𑁂 𑀏𑀢𑀸𑀲𑀼 𑀧𑀼𑀢𑁆𑀢𑀁 𑀅𑀮𑀪𑀦𑁆𑀢𑀻𑀲𑀼𑀧𑀺 𑀫𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀣, 𑀅𑀕𑁆𑀕𑀫𑀳𑁂𑀲𑀻 𑀯𑁄 𑀲𑀻𑀮𑀯𑀢𑀻 𑀤𑁂𑀯𑀻 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀢𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺.

𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀇𑀢𑁄 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀸 𑀲𑀻𑀮𑀯𑀢𑀺𑀁 𑀤𑁂𑀯𑀺𑀁 𑀥𑀫𑁆𑀫𑀦𑀸𑀝𑀓𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀧𑀼𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑁂𑀯𑀺𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀲𑁆𑀲𑀸 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑁂𑀯𑀺𑀬𑀸 𑀧𑀼𑀢𑁆𑀢𑀧𑀢𑁆𑀣𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀢𑀺𑀲𑁆𑀲𑀸 𑀫𑀬𑀸 𑀧𑀼𑀢𑁆𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀤𑁂𑀯𑀮𑁄𑀓𑁂 𑀏𑀢𑀺𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀢𑁆𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀅𑀤𑁆𑀤𑀲. 𑀲𑁄 𑀓𑀺𑀭 𑀢𑀤𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀆𑀬𑀼𑀁 𑀔𑁂𑀧𑁂𑀢𑁆𑀯𑀸 𑀉𑀧𑀭𑀺𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀯𑀺𑀫𑀸𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀫𑀸𑀭𑀺𑀲, 𑀢𑀬𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀑𑀓𑁆𑀓𑀸𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀁 ‘‘𑀢𑁆𑀯𑀫𑁆𑀧𑀺 𑀏𑀢𑀺𑀲𑁆𑀲𑀸 𑀏𑀯 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀫𑀸 𑀔𑁄 𑀧𑀦𑀲𑁆𑀲𑀸 𑀓𑁄𑀘𑀺 𑀲𑀻𑀮𑀁 𑀪𑀺𑀦𑁆𑀤𑀢𑀽’’𑀢𑀺 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀸𑀲𑀺.

𑀫𑀳𑀸𑀚𑀦𑁄𑀧𑀺 𑀦𑁆𑀳𑀸𑀢𑁄 𑀅𑀮𑀗𑁆𑀓𑀢𑁄 ‘‘𑀅𑀳𑀁 𑀤𑁂𑀯𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀤𑁂𑀯𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀓𑁆𑀓𑀜𑁆𑀘 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀧𑀭𑀺𑀳𑀸𑀲𑀫𑀓𑀸𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀫𑀁 𑀢𑀼𑀫𑁆𑀳𑁂 𑀕𑀭𑀳𑀣, 𑀲𑀘𑁂𑀧𑀺 𑀫𑁂 𑀲𑀭𑀻𑀭𑀁 𑀚𑀺𑀡𑁆𑀡𑀁, 𑀭𑀸𑀕𑁄 𑀧𑀦 𑀦 𑀚𑀻𑀭𑀢𑀺, 𑀲𑀘𑁂 𑀲𑀻𑀮𑀯𑀢𑀺𑀁 𑀮𑀪𑀺𑀲𑁆𑀲𑀸𑀫𑀺, 𑀆𑀤𑀸𑀬 𑀦𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀲𑀁 𑀧𑀼𑀭𑀢𑁄𑀯 𑀅𑀝𑁆𑀞𑀸𑀲𑀺. 𑀅𑀜𑁆𑀜𑁄 𑀓𑁄𑀘𑀺 𑀢𑀲𑁆𑀲 𑀢𑁂𑀚𑁂𑀦 𑀧𑀼𑀭𑀢𑁄 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀦𑁆𑀢𑀺𑀜𑁆𑀜𑁂𑀯 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸 𑀕𑀭𑀳𑀺𑀁𑀲𑀼 ‘‘𑀧𑀲𑁆𑀲𑀣, 𑀪𑁄, 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀏𑀯𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀤𑁂𑀯𑀺𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀬𑀼𑀢𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺. 𑀤𑁂𑀯𑀻𑀧𑀺 ‘‘𑀫𑀳𑀮𑁆𑀮𑀓𑁄 𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀦 𑀅𑀝𑁆𑀝𑀻𑀬𑀢𑀺 𑀦 𑀳𑀭𑀸𑀬𑀢𑀺. 𑀭𑀸𑀚𑀸𑀧𑀺 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.

𑀲𑀓𑁆𑀓𑁄 𑀢𑀁 𑀆𑀤𑀸𑀬 𑀦𑀕𑀭𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀲𑀫𑀻𑀧𑁂 𑀏𑀓𑀁 𑀖𑀭𑀁 𑀫𑀸𑀧𑁂𑀲𑀺 𑀯𑀺𑀯𑀝𑀤𑁆𑀯𑀸𑀭𑀁 𑀧𑀜𑁆𑀜𑀢𑁆𑀢𑀓𑀝𑁆𑀞𑀢𑁆𑀣𑀭𑀺𑀓𑀁. 𑀅𑀣 𑀦𑀁 𑀲𑀸 ‘‘𑀇𑀤𑀁 𑀢𑁂 𑀦𑀺𑀯𑁂𑀲𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀆𑀫, 𑀪𑀤𑁆𑀤𑁂, 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀏𑀓𑁄, 𑀇𑀤𑀸𑀦𑀺𑀫𑁆𑀳𑀸 𑀫𑀬𑀁 𑀤𑁆𑀯𑁂 𑀚𑀦𑀸, 𑀅𑀳𑀁 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀫𑀺𑀲𑁆𑀲𑀸 𑀓𑀝𑁆𑀞𑀢𑁆𑀣𑀭𑀺𑀓𑀸𑀬 𑀦𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀫𑀼𑀤𑀼𑀦𑀸 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑁆𑀢𑁄 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑀁 𑀨𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀸 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑀨𑀭𑀡𑁂𑀦 𑀲𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣 𑀦𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀅𑀮𑀗𑁆𑀓𑀢𑀯𑀺𑀫𑀸𑀦𑁂 𑀤𑀺𑀩𑁆𑀩𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀫𑀦𑀼𑀲𑁆𑀲𑁄, 𑀲𑀓𑁆𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀲𑀓𑁆𑀓𑁄𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀤𑀺𑀩𑁆𑀩𑀦𑀸𑀝𑀓𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀺. 𑀲𑀸 𑀲𑀬𑀦𑀸 𑀉𑀝𑁆𑀞𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀓𑁆𑀓𑁄 ‘‘𑀯𑀭𑀁 𑀢𑁂, 𑀤𑁂𑀯𑀺, 𑀤𑀤𑀸𑀫𑀺, 𑀕𑀡𑁆𑀳𑀸𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺, 𑀤𑁂𑀯, 𑀏𑀓𑀁 𑀧𑀼𑀢𑁆𑀢𑀁 𑀫𑁂 𑀤𑁂𑀳𑀻’’𑀢𑀺. ‘‘𑀤𑁂𑀯𑀺, 𑀢𑀺𑀝𑁆𑀞𑀢𑀼 𑀏𑀓𑁄 𑀧𑀼𑀢𑁆𑀢𑁄, 𑀅𑀳𑀁 𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀤𑀲𑁆𑀲𑀸𑀫𑀺. 𑀢𑁂𑀲𑀼 𑀧𑀦 𑀏𑀓𑁄 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺 𑀯𑀺𑀭𑀽𑀧𑀯𑀸, 𑀏𑀓𑁄 𑀭𑀽𑀧𑀯𑀸 𑀦 𑀧𑀜𑁆𑀜𑀯𑀸. 𑀢𑁂𑀲𑀼 𑀓𑀢𑀭𑀁 𑀧𑀞𑀫𑀁 𑀇𑀘𑁆𑀙𑀲𑀻’’𑀢𑀺? ‘‘𑀧𑀜𑁆𑀜𑀯𑀦𑁆𑀢𑀁, 𑀤𑁂𑀯𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀓𑀼𑀲𑀢𑀺𑀡𑀁 𑀤𑀺𑀩𑁆𑀩𑀯𑀢𑁆𑀣𑀁 𑀤𑀺𑀩𑁆𑀩𑀘𑀦𑁆𑀤𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀓𑁄𑀓𑀦𑀼𑀤𑀜𑁆𑀘 𑀦𑀸𑀫 𑀯𑀻𑀡𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀬𑀦𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀏𑀓𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀗𑁆𑀕𑀼𑀝𑁆𑀞𑀓𑁂𑀦 𑀢𑀲𑁆𑀲𑀸 𑀦𑀸𑀪𑀺𑀁 𑀧𑀭𑀸𑀫𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀓𑁆𑀓𑁄𑀧𑀺 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀧𑀡𑁆𑀟𑀺𑀢𑀸 𑀤𑁂𑀯𑀻 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀺.

𑀅𑀣 𑀦𑀁 𑀧𑀩𑀼𑀤𑁆𑀥𑁄 𑀭𑀸𑀚𑀸 𑀤𑀺𑀲𑁆𑀯𑀸, ‘‘𑀤𑁂𑀯𑀺, 𑀓𑁂𑀦 𑀦𑀻𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀓𑁆𑀓𑁂𑀦, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀧𑀘𑁆𑀘𑀓𑁆𑀔𑀢𑁄 𑀏𑀓𑀁 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀁 𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲𑀁, 𑀓𑀲𑁆𑀫𑀸 𑀫𑀁 𑀯𑀜𑁆𑀘𑁂𑀲𑀻’’𑀢𑀺? ‘‘𑀲𑀤𑁆𑀤𑀳𑀣, 𑀤𑁂𑀯, 𑀲𑀓𑁆𑀓𑁄 𑀫𑀁 𑀕𑀳𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀲𑀻’’𑀢𑀺. ‘‘𑀦 𑀲𑀤𑁆𑀤𑀳𑀸𑀫𑀺, 𑀤𑁂𑀯𑀻’’𑀢𑀺. 𑀅𑀣𑀲𑁆𑀲 𑀲𑀸 𑀲𑀓𑁆𑀓𑀤𑀢𑁆𑀢𑀺𑀬𑀁 𑀓𑀼𑀲𑀢𑀺𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀤𑁆𑀤𑀳𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀓𑀼𑀲𑀢𑀺𑀡𑀁 𑀦𑀸𑀫 𑀬𑀢𑁄 𑀓𑀼𑀢𑁄𑀘𑀺 𑀮𑀩𑁆𑀪𑀢𑀻’’𑀢𑀺 𑀦 𑀲𑀤𑁆𑀤𑀳𑀺. 𑀅𑀣𑀲𑁆𑀲 𑀲𑀸 𑀤𑀺𑀩𑁆𑀩𑀯𑀢𑁆𑀣𑀸𑀤𑀻𑀦𑀺 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀸𑀦𑀺 𑀤𑀺𑀲𑁆𑀯𑀸 𑀲𑀤𑁆𑀤𑀳𑀺𑀢𑁆𑀯𑀸, ‘‘𑀪𑀤𑁆𑀤𑁂, 𑀲𑀓𑁆𑀓𑁄 𑀢𑀸𑀯 𑀢𑀁 𑀦𑁂𑀢𑀼, 𑀧𑀼𑀢𑁆𑀢𑁄 𑀧𑀦 𑀢𑁂 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. ‘‘𑀮𑀤𑁆𑀥𑁄 𑀫𑀳𑀸𑀭𑀸𑀚, 𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺. 𑀲𑁄 𑀢𑀼𑀝𑁆𑀞𑁄 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 𑀅𑀜𑁆𑀜𑀁 𑀦𑀸𑀫𑀁 𑀅𑀓𑀢𑁆𑀯𑀸 𑀓𑀼𑀲𑀢𑀺𑀡𑀦𑀸𑀫𑀫𑁂𑀯 𑀅𑀓𑀁𑀲𑀼. 𑀓𑀼𑀲𑀓𑀼𑀫𑀸𑀭𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀇𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀤𑀲𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀚𑀬𑀫𑁆𑀧𑀢𑀻’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀯𑀟𑁆𑀠𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀜𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄𑀯 𑀧𑀜𑁆𑀜𑀸𑀬 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺.

𑀅𑀣𑀲𑁆𑀲 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀭𑀸𑀚𑀸 𑀭𑀚𑁆𑀚𑀁 𑀤𑀸𑀢𑀼𑀓𑀸𑀫𑁄 𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀭𑀚𑁆𑀚𑀁 𑀤𑀢𑁆𑀯𑀸 𑀦𑀸𑀝𑀓𑀸𑀦𑀺 𑀉𑀧𑀝𑁆𑀞𑀧𑁂𑀲𑁆𑀲𑀸𑀫, 𑀫𑀬𑀁 𑀚𑀻𑀯𑀦𑁆𑀢𑀸𑀬𑁂𑀯 𑀦𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀔𑁄 𑀧𑀦 𑀬𑀲𑁆𑀲 𑀭𑀜𑁆𑀜𑁄 𑀥𑀻𑀢𑀭𑀁 𑀇𑀘𑁆𑀙𑀢𑀺, 𑀢𑀫𑀲𑁆𑀲 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫, 𑀘𑀺𑀢𑁆𑀢𑀫𑀲𑁆𑀲 𑀚𑀸𑀦𑀸𑀳𑀺, 𑀓𑀢𑀭𑀁 𑀭𑀸𑀚𑀥𑀻𑀢𑀭𑀁 𑀭𑁄𑀘𑁂𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀓𑀼𑀫𑀸𑀭𑀲𑁆𑀲 𑀇𑀫𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀘𑀺𑀢𑁆𑀢𑀁 𑀚𑀸𑀦𑀸𑀳𑀻’’𑀢𑀺 𑀏𑀓𑀁 𑀧𑀭𑀺𑀘𑀸𑀭𑀺𑀓𑀁 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀦 𑀭𑀽𑀧𑀯𑀸, 𑀭𑀽𑀧𑀲𑀫𑁆𑀧𑀦𑁆𑀦𑀸 𑀭𑀸𑀚𑀥𑀻𑀢𑀸 𑀆𑀦𑀻𑀢𑀸𑀧𑀺 𑀫𑀁 𑀤𑀺𑀲𑁆𑀯𑀸 ‘𑀓𑀺𑀁 𑀫𑁂 𑀇𑀫𑀺𑀦𑀸 𑀯𑀺𑀭𑀽𑀧𑁂𑀦𑀸’𑀢𑀺 𑀧𑀮𑀸𑀬𑀺𑀲𑁆𑀲𑀢𑀺 𑀇𑀢𑀺 𑀦𑁄 𑀮𑀚𑁆𑀚𑀺𑀢𑀩𑁆𑀩𑀓𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀥𑀭𑀫𑀸𑀦𑁂 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀫𑀬𑁆𑀳𑀁 𑀦𑁂𑀯 𑀭𑀚𑁆𑀚𑁂𑀦𑀢𑁆𑀣𑁄, 𑀦 𑀦𑀸𑀝𑀓𑁂𑀳𑀺, 𑀅𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀣𑀁 𑀤𑁂𑀯𑀺𑀬𑀸 𑀆𑀭𑁄𑀘𑁂𑀲𑀺, 𑀤𑁂𑀯𑀻𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀧𑀝𑀺𑀩𑀸𑀳𑀢𑀺𑀬𑁂𑀯. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀏𑀓𑀦𑁆𑀢𑁂𑀦 𑀧𑀝𑀺𑀧𑀓𑁆𑀔𑀪𑀸𑀯𑁄 𑀦𑀸𑀫 𑀦 𑀬𑀼𑀢𑁆𑀢𑁄, 𑀏𑀓𑀁 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀲𑁄 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀩𑀳𑀼𑀁 𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 ‘‘𑀏𑀓𑀁 𑀇𑀢𑁆𑀣𑀺𑀭𑀽𑀧𑀓𑀁 𑀓𑀭𑁄𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀅𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀲𑀬𑀫𑁆𑀧𑀺 𑀇𑀢𑁆𑀣𑀺𑀭𑀽𑀧𑀓𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀲𑀫𑀺𑀚𑁆𑀛𑀢𑀺. 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀚𑀺𑀯𑁆𑀳𑀸𑀬 𑀅𑀯𑀡𑁆𑀡𑀦𑀻𑀬𑀲𑁄𑀪𑀁 𑀅𑀳𑁄𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀔𑁄𑀫𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑁂 𑀞𑀧𑀸𑀧𑁂𑀲𑀺. 𑀲𑁄 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁂𑀦 𑀆𑀪𑀢𑀭𑀽𑀧𑀓𑀁 𑀤𑀺𑀲𑁆𑀯𑀸 𑀢𑀁 𑀕𑀭𑀳𑀺𑀢𑁆𑀯𑀸 ‘‘𑀕𑀘𑁆𑀙 𑀅𑀫𑁆𑀳𑀸𑀓𑀁 𑀲𑀺𑀭𑀺𑀕𑀩𑁆𑀪𑁂 𑀞𑀧𑀺𑀢𑀭𑀽𑀧𑀓𑀁 𑀆𑀳𑀭𑀸’’𑀢𑀺 𑀆𑀳. 𑀲𑁄 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑀼𑀁 𑀏𑀓𑀸 𑀤𑁂𑀯𑀘𑁆𑀙𑀭𑀸, 𑀆𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀤𑁂𑀯, 𑀲𑀺𑀭𑀺𑀕𑀩𑁆𑀪𑁂 𑀅𑀬𑁆𑀬𑀸 𑀏𑀓𑀺𑀓𑀸𑀯 𑀞𑀺𑀢𑀸, 𑀉𑀧𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀕𑀘𑁆𑀙, 𑀲𑀼𑀯𑀡𑁆𑀡𑀭𑀽𑀧𑀓𑀁 𑀏𑀢𑀁, 𑀆𑀳𑀭𑀸’’𑀢𑀺 𑀧𑀼𑀦 𑀧𑁂𑀲𑀺𑀢𑁄 𑀆𑀳𑀭𑀺. 𑀓𑀼𑀫𑀸𑀭𑁄 𑀓𑀫𑁆𑀫𑀸𑀭𑁂𑀦 𑀓𑀢𑀁 𑀭𑀽𑀧𑀓𑀁 𑀲𑀼𑀯𑀡𑁆𑀡𑀕𑀩𑁆𑀪𑁂 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀣𑁂 𑀞𑀧𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀮𑀪𑀦𑁆𑀢𑁄 𑀕𑀡𑁆𑀳𑀸𑀫𑀻’’𑀢𑀺 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺.

𑀲𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀳𑀸𑀧𑀼𑀜𑁆𑀜𑁄 𑀲𑀓𑁆𑀓𑀤𑀢𑁆𑀢𑀺𑀬𑁄 𑀅𑀦𑀼𑀘𑁆𑀙𑀯𑀺𑀓𑀁 𑀓𑀼𑀫𑀸𑀭𑀺𑀓𑀁 𑀮𑀪𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀮𑀪𑀦𑁆𑀢𑀸 𑀕𑀡𑁆𑀳𑀺𑀲𑁆𑀲𑀣, 𑀇𑀫𑀁 𑀭𑀽𑀧𑀓𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀞𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀘𑀭𑀦𑁆𑀢𑀸 𑀬𑀲𑁆𑀲 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀥𑀻𑀢𑀭𑀁 𑀧𑀲𑁆𑀲𑀣, 𑀢𑀲𑁆𑀲𑁂𑀢𑀁 𑀤𑀢𑁆𑀯𑀸 ‘𑀑𑀓𑁆𑀓𑀸𑀓𑀭𑀸𑀚𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀯𑀸𑀳𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀁 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀬𑀁 𑀭𑀸𑀚𑀥𑀸𑀦𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀚𑀦𑀲𑁆𑀲 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀢𑀁 𑀭𑀽𑀧𑀓𑀁 𑀯𑀢𑁆𑀣𑀧𑀼𑀧𑁆𑀨𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀺𑀯𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀢𑀺𑀢𑁆𑀣𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀅𑀫𑀘𑁆𑀘𑀸 𑀲𑀬𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀓𑀣𑀸𑀲𑀯𑀦𑀢𑁆𑀣𑀁 𑀏𑀓𑀫𑀦𑁆𑀢𑁂 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀸𑀚𑀦𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀭𑀽𑀧𑀓’’𑀦𑁆𑀢𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 ‘‘𑀅𑀬𑀁 𑀫𑀦𑀼𑀲𑁆𑀲𑀺𑀢𑁆𑀣𑀻 𑀲𑀫𑀸𑀦𑀸𑀧𑀺 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀞𑀺𑀢𑀸, 𑀓𑀼𑀢𑁄 𑀯𑀸 𑀆𑀕𑀢𑀸, 𑀅𑀫𑁆𑀳𑀸𑀓𑀁 𑀦𑀕𑀭𑁂 𑀏𑀯𑀭𑀽𑀧𑀸 𑀦𑀢𑁆𑀣𑀻’’𑀢𑀺 𑀯𑀡𑁆𑀡𑁂𑀦𑁆𑀢𑁄 𑀧𑀓𑁆𑀓𑀫𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 ‘‘𑀲𑀘𑁂 𑀇𑀥 𑀏𑀯𑀭𑀽𑀧𑀸 𑀤𑀸𑀭𑀺𑀓𑀸 𑀪𑀯𑁂𑀬𑁆𑀬, ‘𑀅𑀲𑀼𑀓𑀸 𑀭𑀸𑀚𑀥𑀻𑀢𑀸 𑀯𑀺𑀬 𑀅𑀲𑀼𑀓𑀸 𑀅𑀫𑀘𑁆𑀘𑀥𑀻𑀢𑀸 𑀯𑀺𑀬𑀸’𑀢𑀺 𑀯𑀤𑁂𑀬𑁆𑀬𑀼𑀁, 𑀅𑀤𑁆𑀥𑀸 𑀇𑀥 𑀏𑀯𑀭𑀽𑀧𑀸 𑀦𑀢𑁆𑀣𑀻’’𑀢𑀺 𑀢𑀁 𑀆𑀤𑀸𑀬 𑀅𑀜𑁆𑀜𑀁 𑀦𑀕𑀭𑀁 𑀕𑀘𑁆𑀙𑀦𑁆𑀢𑀺.

𑀢𑁂 𑀏𑀯𑀁 𑀯𑀺𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀫𑀤𑁆𑀤𑀭𑀜𑁆𑀜𑁄 𑀅𑀝𑁆𑀞 𑀥𑀻𑀢𑀭𑁄 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸, 𑀢𑀸𑀲𑀁 𑀲𑀩𑁆𑀩𑀚𑁂𑀝𑁆𑀞𑀺𑀓𑀸 𑀧𑀪𑀸𑀯𑀢𑀻 𑀦𑀸𑀫. 𑀢𑀲𑁆𑀲𑀸 𑀲𑀭𑀻𑀭𑀢𑁄 𑀩𑀸𑀮𑀲𑀽𑀭𑀺𑀬𑀲𑁆𑀲 𑀧𑀪𑀸 𑀯𑀺𑀬 𑀧𑀪𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀅𑀦𑁆𑀥𑀓𑀸𑀭𑁂𑀧𑀺 𑀘𑀢𑀼𑀳𑀢𑁆𑀣𑁂 𑀅𑀦𑁆𑀢𑁄𑀕𑀩𑁆𑀪𑁂 𑀧𑀤𑀻𑀧𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀩𑁆𑀩𑁄 𑀕𑀩𑁆𑀪𑁄 𑀏𑀓𑁄𑀪𑀸𑀲𑁄𑀯 𑀳𑁄𑀢𑀺. 𑀥𑀸𑀢𑀻 𑀧𑀦𑀲𑁆𑀲𑀸 𑀔𑀼𑀚𑁆𑀚𑀸, 𑀲𑀸 𑀧𑀪𑀸𑀯𑀢𑀺𑀁 𑀪𑁄𑀚𑁂𑀢𑁆𑀯𑀸 𑀢𑀲𑁆𑀲𑀸 𑀲𑀻𑀲𑀦𑁆𑀳𑀸𑀧𑀦𑀢𑁆𑀣𑀁 𑀅𑀝𑁆𑀞𑀳𑀺 𑀯𑀡𑁆𑀡𑀤𑀸𑀲𑀻𑀳𑀺 𑀅𑀝𑁆𑀞 𑀖𑀝𑁂 𑀕𑀸𑀳𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀤𑀓𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀻 𑀢𑀺𑀢𑁆𑀣𑀫𑀕𑁆𑀕𑁂 𑀞𑀺𑀢𑀁 𑀢𑀁 𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀧𑀪𑀸𑀯𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀅𑀬𑀁 𑀤𑀼𑀩𑁆𑀩𑀺𑀦𑀻𑀢𑀸 ‘𑀲𑀻𑀲𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀅𑀫𑁆𑀳𑁂 𑀉𑀤𑀓𑀢𑁆𑀣𑀸𑀬 𑀧𑁂𑀲𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀢𑀺𑀢𑁆𑀣𑀫𑀕𑁆𑀕𑁂 𑀞𑀺𑀢𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀭𑁂 𑀓𑀼𑀮𑀮𑀚𑁆𑀚𑀸𑀧𑀦𑀺𑀓𑁂 𑀅𑀫𑁆𑀳𑁂𑀳𑀺 𑀧𑀼𑀭𑀺𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀓𑀲𑁆𑀫𑀸 𑀇𑀥 𑀞𑀺𑀢𑀸𑀲𑀺, 𑀲𑀘𑁂 𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀦𑀸𑀲𑁂𑀲𑁆𑀲𑀢𑀺 𑀦𑁄’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂𑀦 𑀕𑀡𑁆𑀟𑀧𑀲𑁆𑀲𑁂 𑀧𑀳𑀭𑀺, 𑀳𑀢𑁆𑀣𑀢𑀮𑀁 𑀪𑀺𑀚𑁆𑀚𑀫𑀸𑀦𑀁 𑀯𑀺𑀬 𑀚𑀸𑀢𑀁. 𑀢𑀢𑁄 ‘‘𑀲𑀼𑀯𑀡𑁆𑀡𑀭𑀽𑀧𑀓’’𑀦𑁆𑀢𑀺 𑀜𑀢𑁆𑀯𑀸 𑀳𑀲𑀫𑀸𑀦𑀸 𑀢𑀸𑀲𑀁 𑀯𑀡𑁆𑀡𑀤𑀸𑀲𑀻𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀻 ‘‘𑀧𑀲𑁆𑀲𑀣𑁂𑀢𑀁 𑀫𑁂 𑀓𑀫𑁆𑀫𑀁, 𑀫𑀫 𑀥𑀻𑀢𑀸𑀢𑀺𑀲𑀜𑁆𑀜𑀸𑀬 𑀧𑀳𑀸𑀭𑀁 𑀅𑀤𑀸𑀲𑀺𑀁, 𑀅𑀬𑀁 𑀫𑀫 𑀥𑀻𑀢𑀼 𑀲𑀦𑁆𑀢𑀺𑀓𑁂 𑀓𑀺𑀫𑀕𑁆𑀖𑀢𑀺, 𑀓𑁂𑀯𑀮𑀁 𑀫𑁂 𑀳𑀢𑁆𑀣𑁄 𑀤𑀼𑀓𑁆𑀔𑀸𑀧𑀺𑀢𑁄’’𑀢𑀺 𑀆𑀳.

𑀅𑀣 𑀦𑀁 𑀭𑀸𑀚𑀤𑀽𑀢𑀸 𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 ‘𑀫𑀫 𑀥𑀻𑀢𑀸 𑀇𑀢𑁄 𑀅𑀪𑀺𑀭𑀽𑀧𑀢𑀭𑀸’𑀢𑀺 𑀯𑀤𑀦𑁆𑀢𑀻 𑀓𑀁 𑀦𑀸𑀫 𑀓𑀣𑁂𑀲𑀻’’𑀢𑀺 𑀆𑀳𑀁𑀲𑀼. ‘‘𑀫𑀤𑁆𑀤𑀭𑀜𑁆𑀜𑁄 𑀥𑀻𑀢𑀭𑀁 𑀧𑀪𑀸𑀯𑀢𑀺𑀁, 𑀇𑀤𑀁 𑀭𑀽𑀧𑀓𑀁 𑀢𑀲𑁆𑀲𑀸 𑀲𑁄𑀴𑀲𑀺𑀫𑁆𑀧𑀺 𑀓𑀮𑀁 𑀦 𑀅𑀕𑁆𑀖𑀢𑀻’’𑀢𑀺. 𑀢𑁂 𑀢𑀼𑀝𑁆𑀞𑀫𑀸𑀦𑀲𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀑𑀓𑁆𑀓𑀸𑀓𑀭𑀜𑁆𑀜𑁄 𑀤𑀽𑀢𑀸 𑀤𑁆𑀯𑀸𑀭𑁂 𑀞𑀺𑀢𑀸’’𑀢𑀺 𑀧𑀝𑀺𑀳𑀸𑀭𑁂𑀲𑀼𑀁. 𑀭𑀸𑀚𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀞𑀺𑀢𑀓𑁄𑀯 ‘‘𑀧𑀓𑁆𑀓𑁄𑀲𑀣𑀸’’𑀢𑀺 𑀆𑀳. 𑀢𑁂 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀢𑀼𑀫𑁆𑀳𑀸𑀓𑀁 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀸 ‘‘𑀓𑀺𑀫𑀢𑁆𑀣𑀁 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀝𑁆𑀞𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀲𑀻𑀳𑀲𑁆𑀲𑀭𑁄 𑀧𑀼𑀢𑁆𑀢𑁄 𑀓𑀼𑀲𑀓𑀼𑀫𑀸𑀭𑁄 𑀦𑀸𑀫, 𑀭𑀸𑀚𑀸 𑀢𑀲𑁆𑀲 𑀭𑀚𑁆𑀚𑀁 𑀤𑀸𑀢𑀼𑀓𑀸𑀫𑁄 𑀅𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀥𑀻𑀢𑀸 𑀧𑀪𑀸𑀯𑀢𑀻, 𑀢𑀁 𑀢𑀲𑁆𑀲 𑀤𑁂𑀣, 𑀇𑀫𑀜𑁆𑀘 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀕𑀡𑁆𑀳𑀣𑀸’’𑀢𑀺 𑀢𑀁 𑀭𑀽𑀧𑀓𑀁 𑀢𑀲𑁆𑀲 𑀅𑀤𑀁𑀲𑀼. 𑀲𑁄𑀧𑀺 ‘‘𑀏𑀯𑀭𑀽𑀧𑁂𑀦 𑀫𑀳𑀸𑀭𑀸𑀚𑁂𑀦 𑀲𑀤𑁆𑀥𑀺𑀁 𑀯𑀺𑀯𑀸𑀳𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀦𑀁 𑀤𑀽𑀢𑀸 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀳𑀺 𑀦 𑀲𑀓𑁆𑀓𑀸 𑀧𑀧𑀜𑁆𑀘𑀁 𑀓𑀸𑀢𑀼𑀁, 𑀓𑀼𑀫𑀸𑀭𑀺𑀓𑀸𑀬 𑀮𑀤𑁆𑀥𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫, 𑀅𑀣 𑀦𑀁 𑀲𑁄 𑀆𑀕𑀦𑁆𑀢𑁆𑀯𑀸 𑀆𑀤𑀸𑀬 𑀕𑀫𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀘 𑀤𑁂𑀯𑀺𑀬𑀸 𑀘 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀓𑀼𑀲𑀸𑀯𑀢𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀕𑀮𑀦𑀕𑀭𑀁 𑀧𑀸𑀧𑀼𑀡𑀺. 𑀫𑀤𑁆𑀤𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑀁 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀫𑀓𑀸𑀲𑀺.

𑀲𑀻𑀮𑀯𑀢𑀻 𑀤𑁂𑀯𑀻 𑀧𑀡𑁆𑀟𑀺𑀢𑀢𑁆𑀢𑀸 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 𑀫𑀤𑁆𑀤𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀲𑀼𑀡𑀺𑀲𑀁 𑀤𑀝𑁆𑀞𑀼𑀓𑀸𑀫𑀸𑀫𑁆𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀧𑀪𑀸𑀯𑀢𑀻 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀆𑀕𑀦𑁆𑀢𑁆𑀯𑀸 𑀲𑀲𑁆𑀲𑀼𑀁 𑀯𑀦𑁆𑀤𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀅𑀪𑀺𑀭𑀽𑀧𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀯𑀺𑀭𑀽𑀧𑁄. 𑀲𑀘𑁂 𑀏𑀲𑀸 𑀢𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀏𑀓𑀸𑀳𑀫𑁆𑀧𑀺 𑀅𑀯𑀲𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀢𑀺, 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀫𑀤𑁆𑀤𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀲𑀼𑀡𑀺𑀲𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸, 𑀅𑀧𑀺𑀘 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀓𑀼𑀮𑀧𑀯𑁂𑀡𑀺𑀬𑀸 𑀆𑀕𑀢𑀁 𑀘𑀸𑀭𑀺𑀢𑁆𑀢𑀁 𑀅𑀢𑁆𑀣𑀺, 𑀲𑀘𑁂 𑀅𑀬𑀁 𑀢𑀲𑁆𑀫𑀺𑀁 𑀘𑀸𑀭𑀺𑀢𑁆𑀢𑁂 𑀯𑀢𑁆𑀢𑀺𑀲𑁆𑀲𑀢𑀺, 𑀦𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. ‘‘𑀓𑀺𑀁 𑀧𑀦 𑀯𑁄 𑀘𑀸𑀭𑀺𑀢𑁆𑀢’’𑀦𑁆𑀢𑀺. ‘‘𑀅𑀫𑁆𑀳𑀸𑀓𑀁 𑀯𑀁𑀲𑁂 𑀬𑀸𑀯 𑀏𑀓𑀲𑁆𑀲 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀸𑀯 𑀤𑀺𑀯𑀸 𑀲𑀸𑀫𑀺𑀓𑀁 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀏𑀲𑀸 𑀢𑀣𑀸 𑀓𑀭𑀺𑀲𑁆𑀲𑀢𑀺, 𑀦𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀭𑀸𑀚𑀸 ‘‘𑀓𑀺𑀁, 𑀅𑀫𑁆𑀫, 𑀲𑀓𑁆𑀔𑀺𑀲𑁆𑀲𑀲𑀺 𑀏𑀯𑀁 𑀯𑀢𑁆𑀢𑀺𑀢𑀼’’𑀦𑁆𑀢𑀺 𑀥𑀻𑀢𑀭𑀁 𑀧𑀼𑀘𑁆𑀙𑀺. 𑀲𑀸 ‘‘𑀆𑀫 𑀢𑀸𑀢𑀸’’𑀢𑀺 𑀆𑀳. 𑀢𑀢𑁄 𑀑𑀓𑁆𑀓𑀸𑀓𑀭𑀸𑀚𑀸 𑀫𑀤𑁆𑀤𑀭𑀜𑁆𑀜𑁄 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀫𑀤𑁆𑀤𑀭𑀸𑀚𑀸𑀧𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺.

𑀑𑀓𑁆𑀓𑀸𑀓𑁄 𑀓𑀼𑀲𑀸𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀫𑁄𑀘𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀤𑀢𑁆𑀯𑀸 𑀧𑀪𑀸𑀯𑀢𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀸𑀭𑁂𑀢𑁆𑀯𑀸 𑀦𑀕𑀭𑁂 ‘‘𑀓𑀼𑀲𑀭𑀸𑀚𑀲𑁆𑀲 𑀆𑀡𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀸𑀚𑀸𑀦𑁄 𑀬𑁂𑀲𑀁 𑀥𑀻𑀢𑀭𑁄 𑀅𑀢𑁆𑀣𑀺, 𑀢𑁂 𑀓𑀼𑀲𑀭𑀜𑁆𑀜𑁄 𑀥𑀻𑀢𑀭𑁄 𑀧𑀳𑀺𑀡𑀺𑀁𑀲𑀼. 𑀬𑁂𑀲𑀁 𑀧𑀼𑀢𑁆𑀢𑀸 𑀅𑀢𑁆𑀣𑀺, 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀆𑀓𑀗𑁆𑀔𑀦𑁆𑀢𑀸 𑀧𑀼𑀢𑁆𑀢𑁂 𑀉𑀧𑀝𑁆𑀞𑀸𑀓𑁂 𑀓𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀸𑀝𑀓𑀧𑀭𑀺𑀯𑀸𑀭𑁄 𑀫𑀳𑀸 𑀅𑀳𑁄𑀲𑀺, 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀪𑀸𑀯𑀢𑀺𑀁 𑀤𑀺𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀲𑀸𑀧𑀺 𑀢𑀁 𑀤𑀺𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀉𑀪𑀺𑀦𑁆𑀦𑀁 𑀭𑀢𑁆𑀢𑀺𑀤𑀲𑁆𑀲𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀪𑀸𑀯𑀢𑀺𑀬𑀸 𑀲𑀭𑀻𑀭𑀧𑁆𑀧𑀪𑀸𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀺𑀭𑀺𑀕𑀩𑁆𑀪𑀢𑁄 𑀭𑀢𑁆𑀢𑀺𑀁𑀬𑁂𑀯 𑀦𑀺𑀓𑁆𑀔𑀫𑀢𑀺.

𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀪𑀸𑀯𑀢𑀺𑀁 𑀤𑀺𑀯𑀸 𑀤𑀝𑁆𑀞𑀼𑀓𑀸𑀫𑁄 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀺. 𑀲𑀸 ‘‘𑀫𑀸 𑀢𑁂 𑀢𑀸𑀢, 𑀭𑀼𑀘𑁆𑀘𑀺, 𑀬𑀸𑀯 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀲𑀺, 𑀢𑀸𑀯 𑀆𑀕𑀫𑁂𑀳𑀻’’𑀢𑀺, 𑀧𑀝𑀺𑀓𑁆𑀔𑀺𑀧𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀢𑁂𑀦 𑀳𑀺 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀫𑁂𑀡𑁆𑀟𑀯𑁂𑀲𑁂𑀦 𑀢𑀺𑀝𑁆𑀞, 𑀅𑀳𑀁 𑀢𑀁 𑀢𑀢𑁆𑀣 𑀆𑀦𑁂𑀲𑁆𑀲𑀸𑀫𑀺, 𑀅𑀣 𑀦𑀁 𑀅𑀓𑁆𑀔𑀻𑀦𑀺 𑀧𑀽𑀭𑁂𑀢𑁆𑀯𑀸 𑀑𑀮𑁄𑀓𑁂𑀬𑁆𑀬𑀸𑀲𑀺, 𑀫𑀸 𑀘 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀳𑀢𑁆𑀣𑀺𑀲𑀸𑀮𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀪𑀸𑀯𑀢𑀺𑀁 ‘‘𑀏𑀳𑀺 𑀲𑀸𑀫𑀺𑀓𑀲𑁆𑀲 𑀳𑀢𑁆𑀣𑀺𑀦𑁄 𑀧𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀅𑀬𑀁 𑀳𑀢𑁆𑀣𑀻 𑀅𑀲𑀼𑀓𑁄 𑀦𑀸𑀫, 𑀅𑀬𑀁 𑀳𑀢𑁆𑀣𑀻 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀢𑀲𑁆𑀲𑀸 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀢𑀁 𑀭𑀸𑀚𑀸 𑀫𑀸𑀢𑀼 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑀯𑁂𑀲𑁂𑀦 𑀳𑀢𑁆𑀣𑀺𑀙𑀓𑀡𑀧𑀺𑀡𑁆𑀟𑁂𑀦 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺. 𑀲𑀸 𑀓𑀼𑀤𑁆𑀥𑀸 ‘‘𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀢𑁂 𑀳𑀢𑁆𑀣𑀁 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀤𑁂𑀯𑀺𑀁 𑀉𑀚𑁆𑀛𑀸𑀧𑁂𑀲𑀺. 𑀭𑀸𑀚𑀫𑀸𑀢𑀸 ‘‘𑀫𑀸 𑀅𑀫𑁆𑀫 𑀓𑀼𑀚𑁆𑀛𑀻’’𑀢𑀺 𑀲𑀼𑀡𑀺𑀲𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺. 𑀧𑀼𑀦𑀧𑀺 𑀭𑀸𑀚𑀸 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀲𑁆𑀲𑀲𑀸𑀮𑀸𑀬 𑀅𑀲𑁆𑀲𑀕𑁄𑀧𑀓𑀯𑁂𑀲𑁂𑀦 𑀢𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀅𑀲𑁆𑀲𑀙𑀓𑀡𑀧𑀺𑀡𑁆𑀟𑁂𑀦 𑀧𑀳𑀭𑀺. 𑀢𑀤𑀸𑀧𑀺 𑀢𑀁 𑀓𑀼𑀤𑁆𑀥𑀁 𑀲𑀲𑁆𑀲𑀼 𑀲𑀜𑁆𑀜𑀸𑀧𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑁂 𑀧𑀪𑀸𑀯𑀢𑀻 𑀫𑀳𑀸𑀲𑀢𑁆𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀲𑁆𑀲𑀼𑀬𑀸 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀮𑀁 𑀫𑀸 𑀢𑁂 𑀭𑀼𑀘𑁆𑀘𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀢𑁂𑀦 𑀳𑀺 𑀲𑁆𑀯𑁂 𑀫𑀫 𑀧𑀼𑀢𑁆𑀢𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑀺𑀲𑁆𑀲𑀢𑀺, 𑀢𑁆𑀯𑀁 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀧𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀚𑀬𑀫𑁆𑀧𑀢𑀺𑀓𑀼𑀫𑀸𑀭𑀁 𑀭𑀸𑀚𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑀸𑀧𑁂𑀲𑀺. 𑀲𑀸 𑀧𑀪𑀸𑀯𑀢𑀺𑀁 𑀆𑀤𑀸𑀬 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸 ‘‘𑀧𑀲𑁆𑀲 𑀢𑀯 𑀲𑀸𑀫𑀺𑀓𑀲𑁆𑀲 𑀲𑀺𑀭𑀺𑀲𑁄𑀪𑀕𑁆𑀕’’𑀦𑁆𑀢𑀺 𑀆𑀳. 𑀲𑀸 ‘‘𑀅𑀦𑀼𑀘𑁆𑀙𑀯𑀺𑀓𑁄 𑀫𑁂 𑀲𑀸𑀫𑀺𑀓𑁄 𑀮𑀤𑁆𑀥𑁄’’𑀢𑀺 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀧𑀦 𑀫𑀳𑀸𑀲𑀢𑁆𑀢𑁄 𑀳𑀢𑁆𑀣𑀺𑀫𑁂𑀡𑁆𑀟𑀯𑁂𑀲𑁂𑀦 𑀚𑀬𑀫𑁆𑀧𑀢𑀺𑀲𑁆𑀲 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑁂𑀦 𑀧𑀪𑀸𑀯𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀭𑀼𑀘𑀺𑀬𑀸 𑀓𑁂𑀴𑀺𑀁 𑀤𑀲𑁆𑀲𑁂𑀲𑀺. 𑀳𑀢𑁆𑀣𑀺𑀫𑁆𑀳𑀺 𑀅𑀢𑀺𑀓𑁆𑀓𑀦𑁆𑀢𑁂 𑀭𑀸𑀚𑀫𑀸𑀢𑀸 𑀧𑀪𑀸𑀯𑀢𑀺𑀁 𑀧𑀼𑀘𑁆𑀙𑀺 𑁋 ‘‘𑀤𑀺𑀝𑁆𑀞𑁄 𑀢𑁂, 𑀅𑀫𑁆𑀫, 𑀲𑀸𑀫𑀺𑀓𑁄’’𑀢𑀺. ‘‘𑀆𑀫 𑀅𑀬𑁆𑀬𑁂, 𑀧𑀘𑁆𑀙𑀺𑀫𑀸𑀲𑀦𑁂 𑀧𑀦𑀲𑁆𑀲 𑀦𑀺𑀲𑀺𑀦𑁆𑀦𑁄 𑀳𑀢𑁆𑀣𑀺𑀫𑁂𑀡𑁆𑀟𑁄 𑀅𑀢𑀺𑀯𑀺𑀬 𑀤𑀼𑀩𑁆𑀩𑀺𑀦𑀻𑀢𑁄, 𑀫𑀬𑁆𑀳𑀁 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀦𑀺 𑀤𑀲𑁆𑀲𑁂𑀲𑀺, 𑀓𑀲𑁆𑀫𑀸 𑀏𑀯𑀭𑀽𑀧𑀁 𑀅𑀮𑀓𑁆𑀔𑀺𑀓𑀁 𑀭𑀜𑁆𑀜𑁄 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀼𑀁, 𑀦𑀻𑀳𑀭𑀸𑀧𑁂𑀳𑀺 𑀦’’𑀦𑁆𑀢𑀺? ‘‘𑀅𑀫𑁆𑀫, 𑀭𑀜𑁆𑀜𑁄 𑀧𑀘𑁆𑀙𑀺𑀫𑀸𑀲𑀦𑁂 𑀭𑀓𑁆𑀔𑀸 𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀳𑀢𑁆𑀣𑀺𑀫𑁂𑀡𑁆𑀟𑁄 𑀅𑀢𑀺𑀯𑀺𑀬 𑀦𑀺𑀩𑁆𑀪𑀬𑁄, 𑀭𑀸𑀚𑀸𑀦𑀁 ‘𑀭𑀸𑀚𑀸’𑀢𑀺𑀧𑀺 𑀦 𑀫𑀜𑁆𑀜𑀢𑀺, 𑀓𑀺𑀁 𑀦𑀼 𑀔𑁄 𑀏𑀲𑁄𑀯 𑀓𑀼𑀲𑀭𑀸𑀚𑀸, 𑀅𑀤𑁆𑀥𑀸 𑀳𑀺 𑀏𑀲𑁄 𑀅𑀢𑀺𑀯𑀺𑀬 𑀯𑀺𑀭𑀽𑀧𑁄 𑀏𑀯 𑀪𑀯𑀺𑀲𑁆𑀲𑀢𑀺, 𑀢𑁂𑀦𑁂𑀯 𑀫𑀁 𑀦 𑀤𑀲𑁆𑀲𑁂𑀦𑁆𑀢𑀻’’𑀢𑀺. 𑀲𑀸 𑀔𑀼𑀚𑁆𑀚𑀁 𑀓𑀡𑁆𑀡𑀫𑀽𑀮𑁂 𑀆𑀳 𑁋 ‘‘𑀅𑀫𑁆𑀫, 𑀕𑀘𑁆𑀙 𑀢𑀸𑀯 𑀚𑀸𑀦𑀸𑀳𑀺, 𑀓𑀺𑀁 𑀧𑀼𑀭𑀺𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑀓𑁄 𑀭𑀸𑀚𑀸, 𑀉𑀤𑀸𑀳𑀼 𑀧𑀘𑁆𑀙𑀺𑀫𑀸𑀲𑀦𑁂’’𑀢𑀺? ‘‘𑀓𑀣𑀁 𑀧𑀦𑀸𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀳𑀺 𑀲𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀞𑀫𑀢𑀭𑀁 𑀳𑀢𑁆𑀣𑀺𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀲𑁆𑀲𑀢𑀺, 𑀇𑀫𑀸𑀬 𑀲𑀜𑁆𑀜𑀸𑀬 𑀚𑀸𑀦𑀸𑀳𑀻’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀺𑀢𑀸 𑀧𑀞𑀫𑀁 𑀫𑀳𑀸𑀲𑀢𑁆𑀢𑀁 𑀑𑀢𑀭𑀦𑁆𑀢𑀁 𑀅𑀤𑁆𑀤𑀲, 𑀧𑀘𑁆𑀙𑀸 𑀚𑀬𑀫𑁆𑀧𑀢𑀺𑀓𑀼𑀫𑀸𑀭𑀁. 𑀫𑀳𑀸𑀲𑀢𑁆𑀢𑁄𑀧𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀏𑀲𑀸 𑀆𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀅𑀦𑁆𑀢𑀭𑀁 𑀧𑀪𑀸𑀯𑀢𑀺𑀬𑀸 𑀫𑀸 𑀓𑀣𑁂𑀳𑀻’’𑀢𑀺 𑀤𑀴𑁆𑀳𑀁 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 ‘‘𑀧𑀼𑀭𑀺𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀞𑀫𑀁 𑀑𑀢𑀭𑀻’’𑀢𑀺 𑀆𑀳. 𑀧𑀪𑀸𑀯𑀢𑀻 𑀢𑀲𑁆𑀲𑀸 𑀯𑀘𑀦𑀁 𑀲𑀤𑁆𑀤𑀳𑀺.

𑀫𑀳𑀸𑀲𑀢𑁆𑀢𑁄𑀧𑀺 𑀧𑀼𑀦 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀸𑀢𑀭𑀁 𑀬𑀸𑀘𑀺. 𑀲𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀢𑁂𑀦 𑀳𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀉𑀬𑁆𑀬𑀸𑀦𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀦 𑀲𑀻𑀲𑀁 𑀙𑀸𑀤𑁂𑀢𑁆𑀯𑀸 𑀧𑀼𑀧𑁆𑀨𑀺𑀢𑀧𑀤𑀼𑀫𑁂𑀦 𑀫𑀼𑀔𑀁 𑀆𑀯𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀸𑀢𑀸𑀧𑀺𑀲𑁆𑀲 𑀧𑀪𑀸𑀯𑀢𑀺𑀁 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 ‘‘𑀇𑀫𑁂 𑀭𑀼𑀓𑁆𑀔𑁂 𑀧𑀲𑁆𑀲, 𑀲𑀓𑀼𑀡𑁂 𑀧𑀲𑁆𑀲, 𑀫𑀺𑀕𑁂 𑀧𑀲𑁆𑀲𑀸’’𑀢𑀺 𑀧𑀮𑁄𑀪𑀬𑀫𑀸𑀦𑀸 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀧𑀸𑀬𑀸𑀲𑀺. 𑀲𑀸 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀧𑀭𑀺𑀘𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀓𑀻𑀴𑀦𑁆𑀢𑀻 𑀢𑀁 𑀧𑀤𑀼𑀫𑀁 𑀤𑀺𑀲𑁆𑀯𑀸 𑀯𑀺𑀘𑀺𑀦𑀺𑀢𑀼𑀓𑀸𑀫𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 ‘‘𑀅𑀳𑀁 𑀓𑀼𑀲𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂 𑀕𑀡𑁆𑀳𑀺. 𑀲𑀸 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸 ‘‘𑀬𑀓𑁆𑀔𑁄 𑀫𑀁 𑀕𑀡𑁆𑀳𑀻’’𑀢𑀺 𑀯𑀺𑀭𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀺𑀲𑀜𑁆𑀜𑀺𑀢𑀁 𑀧𑀢𑁆𑀢𑀸. 𑀅𑀣𑀲𑁆𑀲𑀸 𑀭𑀸𑀚𑀸 𑀳𑀢𑁆𑀣𑀁 𑀫𑀼𑀜𑁆𑀘𑀺. 𑀲𑀸 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀓𑀼𑀲𑀭𑀸𑀚𑀸 𑀓𑀺𑀭 𑀫𑀁 𑀳𑀢𑁆𑀣𑁂 𑀕𑀡𑁆𑀳𑀺, 𑀇𑀫𑀺𑀦𑀸𑀯𑀸𑀳𑀁 𑀳𑀢𑁆𑀣𑀺𑀲𑀸𑀮𑀸𑀬 𑀳𑀢𑁆𑀣𑀺𑀙𑀓𑀡𑀧𑀺𑀡𑁆𑀟𑁂𑀦, 𑀅𑀲𑁆𑀲𑀲𑀸𑀮𑀸𑀬 𑀅𑀲𑁆𑀲𑀙𑀓𑀡𑀧𑀺𑀡𑁆𑀟𑁂𑀦 𑀧𑀳𑀝𑀸, 𑀅𑀬𑀫𑁂𑀯 𑀫𑀁 𑀳𑀢𑁆𑀣𑀺𑀲𑁆𑀲 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑀺, 𑀓𑀺𑀁 𑀫𑁂 𑀏𑀯𑀭𑀽𑀧𑁂𑀦 𑀤𑀼𑀫𑁆𑀫𑀼𑀔𑁂𑀦 𑀧𑀢𑀺𑀦𑀸, 𑀇𑀫𑀁 𑀚𑀳𑀺𑀢𑁆𑀯𑀸 𑀅𑀳𑀁 𑀚𑀻𑀯𑀦𑁆𑀢𑀻 𑀅𑀜𑁆𑀜𑀁 𑀧𑀢𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁂 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀫 𑀬𑀸𑀦𑀯𑀸𑀳𑀦𑀁 𑀲𑀚𑁆𑀚𑀁 𑀓𑀭𑁄𑀣, 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀁. 𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀕𑀦𑁆𑀢𑀼𑀁 𑀦 𑀮𑀪𑀺𑀲𑁆𑀲𑀢𑀺, 𑀳𑀤𑀬𑀫𑀲𑁆𑀲𑀸 𑀨𑀮𑀺𑀲𑁆𑀲𑀢𑀺, 𑀕𑀘𑁆𑀙𑀢𑀼 𑀧𑀼𑀦 𑀢𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀣𑀲𑁆𑀲𑀸 𑀕𑀫𑀦𑀁 𑀅𑀦𑀼𑀚𑀸𑀦𑀺. 𑀲𑀸 𑀧𑀺𑀢𑀼𑀦𑀕𑀭𑀫𑁂𑀯 𑀅𑀕𑀫𑀸𑀲𑀺.

𑀫𑀳𑀸𑀲𑀢𑁆𑀢𑁄𑀧𑀺 𑀉𑀬𑁆𑀬𑀸𑀦𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀩𑁄𑀥𑀺𑀲𑀢𑁆𑀢𑀜𑁆𑀳𑀺 𑀲𑀸 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀦 𑀇𑀘𑁆𑀙𑀺, 𑀲𑁄𑀧𑀺 𑀧𑀼𑀩𑁆𑀩𑀓𑀫𑁆𑀫𑀯𑀲𑁂𑀦𑁂𑀯 𑀯𑀺𑀭𑀽𑀧𑁄 𑀅𑀳𑁄𑀲𑀺. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀤𑁆𑀯𑀸𑀭𑀕𑀸𑀫𑁂 𑀉𑀧𑀭𑀺𑀫𑀯𑀻𑀣𑀺𑀬𑀸 𑀘 𑀳𑁂𑀝𑁆𑀞𑀺𑀫𑀯𑀻𑀣𑀺𑀬𑀸 𑀘 𑀤𑁆𑀯𑁂 𑀓𑀼𑀮𑀸𑀦𑀺 𑀯𑀲𑀺𑀁𑀲𑀼. 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀏𑀓𑀲𑁆𑀲 𑀏𑀓𑀸𑀯 𑀥𑀻𑀢𑀸 𑀅𑀳𑁄𑀲𑀺. 𑀤𑁆𑀯𑀻𑀲𑀼 𑀧𑀼𑀢𑁆𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑁄 𑀓𑀦𑀺𑀝𑁆𑀞𑁄. 𑀢𑀁 𑀓𑀼𑀫𑀸𑀭𑀺𑀓𑀁 𑀚𑁂𑀝𑁆𑀞𑀓𑀲𑁆𑀲 𑀅𑀤𑀁𑀲𑀼. 𑀓𑀦𑀺𑀝𑁆𑀞𑁄 𑀅𑀤𑀸𑀭𑀪𑀭𑀡𑁄 𑀪𑀸𑀢𑀼 𑀲𑀦𑁆𑀢𑀺𑀓𑁂𑀬𑁂𑀯 𑀯𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀖𑀭𑁂 𑀅𑀢𑀺𑀭𑀲𑀓𑀧𑀽𑀯𑁂 𑀧𑀘𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀁 𑀕𑀢𑁄 𑀳𑁄𑀢𑀺. 𑀢𑀲𑁆𑀲 𑀧𑀽𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀺𑀓𑁆𑀔𑀸𑀬 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀸𑀢𑀼𑀚𑀸𑀬𑀸 ‘‘𑀘𑀽𑀴𑀧𑀢𑀺𑀦𑁄 𑀅𑀜𑁆𑀜𑀁 𑀧𑀽𑀯𑀁 𑀧𑀘𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺. 𑀲𑁄𑀧𑀺 𑀢𑀁 𑀔𑀡𑀜𑁆𑀜𑁂𑀯 𑀅𑀭𑀜𑁆𑀜𑀢𑁄 𑀆𑀕𑀘𑁆𑀙𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀲𑀸𑀫𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀢𑀯 𑀓𑁄𑀝𑁆𑀞𑀸𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑁄’’𑀢𑀺. 𑀲𑁄 ‘‘𑀢𑀯 𑀓𑁄𑀝𑁆𑀞𑀸𑀲𑀁 𑀔𑀸𑀤𑀺𑀢𑁆𑀯𑀸 𑀫𑀫 𑀓𑁄𑀝𑁆𑀞𑀸𑀲𑀁 𑀤𑁂𑀲𑀺, 𑀅𑀳𑀁 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀢𑁆𑀢𑀢𑁄 𑀧𑀽𑀯𑀁 𑀕𑀡𑁆𑀳𑀺. 𑀲𑀸 𑀫𑀸𑀢𑀼 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀯𑀯𑀺𑀮𑀻𑀦𑀁 𑀘𑀫𑁆𑀧𑀓𑀧𑀼𑀧𑁆𑀨𑀯𑀡𑁆𑀡𑀁 𑀲𑀧𑁆𑀧𑀺𑀁 𑀆𑀳𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀲𑀺, 𑀢𑀁 𑀑𑀪𑀸𑀲𑀁 𑀫𑀼𑀜𑁆𑀘𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺 𑁋 ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀤𑀸𑀦𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀲𑀭𑀻𑀭𑀁 𑀑𑀪𑀸𑀲𑀚𑀸𑀢𑀁 𑀳𑁄𑀢𑀼, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀘 𑀪𑀯𑁂𑀬𑁆𑀬𑀁, 𑀇𑀫𑀺𑀦𑀸 𑀘 𑀫𑁂 𑀅𑀲𑀧𑁆𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀸𑀲𑁄 𑀫𑀸 𑀅𑀳𑁄𑀲𑀻’’𑀢𑀺. 𑀇𑀢𑀺 𑀲𑀸 𑀇𑀫𑀺𑀲𑁆𑀲𑀸 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀯𑀲𑁂𑀦 𑀢𑀁 𑀦 𑀇𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀧𑀽𑀯 𑀢𑀲𑁆𑀫𑀺𑀁 𑀲𑀧𑁆𑀧𑀺𑀧𑀢𑁆𑀢𑁂 𑀑𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺 𑁋 ‘‘𑀪𑀦𑁆𑀢𑁂, 𑀇𑀫𑀁 𑀬𑁄𑀚𑀦𑀲𑀢𑁂 𑀯𑀲𑀦𑁆𑀢𑀺𑀫𑁆𑀧𑀺 𑀆𑀦𑁂𑀢𑁆𑀯𑀸 𑀫𑀫 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀢𑀢𑁆𑀣 𑀬𑀁 𑀲𑁄 𑀓𑀼𑀤𑁆𑀥𑁄 𑀕𑀦𑁆𑀢𑁆𑀯𑀸 𑀧𑀽𑀯𑀁 𑀕𑀡𑁆𑀳𑀺, 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀲𑁆𑀲 𑀯𑀲𑁂𑀦 𑀯𑀺𑀭𑀽𑀧𑁄 𑀅𑀳𑁄𑀲𑀺, 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀲𑀸 𑀘 𑀢𑀁 𑀦 𑀇𑀘𑁆𑀙𑀻𑀢𑀺.

𑀲𑁄 𑀧𑀪𑀸𑀯𑀢𑀺𑀬𑀸 𑀕𑀢𑀸𑀬 𑀲𑁄𑀓𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀦𑀸𑀦𑀸𑀓𑀸𑀭𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑀸𑀧𑀺 𑀦𑀁 𑀲𑁂𑀲𑀺𑀢𑁆𑀣𑀺𑀬𑁄 𑀑𑀮𑁄𑀓𑀸𑀧𑁂𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺𑀁𑀲𑀼,, 𑀧𑀪𑀸𑀯𑀢𑀺𑀭𑀳𑀺𑀢𑀫𑀲𑁆𑀲 𑀲𑀓𑀮𑀫𑁆𑀧𑀺 𑀦𑀺𑀯𑁂𑀲𑀦𑀁 𑀢𑀼𑀘𑁆𑀙𑀁 𑀯𑀺𑀬 𑀔𑀸𑀬𑀺. 𑀲𑁄 ‘‘𑀇𑀤𑀸𑀦𑀺 𑀲𑀸𑀕𑀮𑀦𑀕𑀭𑀁 𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀽𑀲𑀲𑀫𑀬𑁂 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀫𑁆𑀫, 𑀅𑀳𑀁 𑀧𑀪𑀸𑀯𑀢𑀺𑀁 𑀆𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀣𑀸’’𑀢𑀺 𑀯𑀤𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀇𑀤𑀁 𑀢𑁂 𑀭𑀝𑁆𑀞𑀁 𑀲𑀥𑀦𑀁 𑀲𑀬𑁄𑀕𑁆𑀕𑀁, 𑀲𑀓𑀸𑀬𑀼𑀭𑀁 𑀲𑀩𑁆𑀩𑀓𑀸𑀫𑀽𑀧𑀧𑀦𑁆𑀦𑀁;

𑀇𑀤𑀁 𑀢𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲 𑀅𑀫𑁆𑀫, 𑀕𑀘𑁆𑀙𑀸𑀫𑀳𑀁 𑀬𑀢𑁆𑀣 𑀧𑀺𑀬𑀸 𑀧𑀪𑀸𑀯𑀢𑀻’’𑀢𑀺.

𑀢𑀢𑁆𑀣 𑀲𑀬𑁄𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀬𑁄𑀕𑁆𑀕𑀸𑀤𑀺𑀲𑀳𑀺𑀢𑀁. 𑀲𑀓𑀸𑀬𑀼𑀭𑀦𑁆𑀢𑀺 𑀲𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀁. 𑀅𑀦𑀼𑀲𑀸𑀲, 𑀅𑀫𑁆𑀫𑀸𑀢𑀺 𑀲𑁄 𑀓𑀺𑀭 𑀧𑀼𑀭𑀺𑀲𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀧𑀼𑀦 𑀕𑀡𑁆𑀳𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀦𑁆𑀢𑀺 𑀧𑀺𑀢𑀼 𑀯𑀸 𑀪𑀸𑀢𑀼 𑀯𑀸 𑀅𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀫𑀸𑀢𑀼 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀏𑀯𑀫𑀸𑀳.

𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢, 𑀅𑀧𑁆𑀧𑀫𑀢𑁆𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀧𑀭𑀺𑀲𑀼𑀤𑁆𑀥𑀳𑀤𑀬𑁄’’𑀢𑀺 𑀯𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀲𑀼𑀯𑀡𑁆𑀡𑀓𑀭𑁄𑀝𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀇𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀼𑀜𑁆𑀚𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀁 𑀆𑀤𑀸𑀬 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 ‘‘𑀚𑀻𑀯𑀦𑁆𑀢𑁄 𑀧𑀼𑀦 𑀢𑀼𑀫𑁆𑀳𑁂 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀘𑀸𑀯𑀼𑀥𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀪𑀢𑁆𑀢𑀓𑀭𑁄𑀝𑀺𑀬𑀸 𑀲𑀤𑁆𑀥𑀺𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀧𑀲𑀺𑀩𑁆𑀩𑀓𑁂 𑀓𑀢𑁆𑀯𑀸 𑀓𑁄𑀓𑀦𑀼𑀤𑀜𑁆𑀘 𑀯𑀻𑀡𑀁 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀫𑀳𑀩𑁆𑀩𑀮𑁄 𑀫𑀳𑀸𑀣𑀸𑀫𑁄 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀤𑀺𑀯𑀲𑀪𑀸𑀕𑁂𑀦 𑀧𑀼𑀦 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀏𑀓𑀸𑀳𑁂𑀦𑁂𑀯 𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀔𑁂𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑁆𑀳𑀢𑁆𑀯𑀸 𑀲𑀸𑀕𑀮𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀧𑀯𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀢𑀲𑁆𑀲 𑀢𑁂𑀚𑁂𑀦 𑀧𑀪𑀸𑀯𑀢𑀻 𑀲𑀬𑀦𑀧𑀺𑀝𑁆𑀞𑁂 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑀁 𑀓𑀺𑀮𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀸𑀧𑁂𑀢𑁆𑀯𑀸 𑀲𑀬𑀦𑀁 𑀤𑀸𑀧𑁂𑀲𑀺. 𑀲𑁄 𑀓𑀺𑀮𑀦𑁆𑀢𑀓𑀸𑀬𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀅𑀣 𑀲𑀸 𑀢𑀲𑁆𑀫𑀺𑀁 𑀦𑀺𑀤𑁆𑀤𑀫𑀼𑀧𑀕𑀢𑁂 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀩𑁄𑀥𑁂𑀢𑁆𑀯𑀸 𑀪𑀢𑁆𑀢𑀁 𑀪𑁄𑀚𑁂𑀲𑀺. 𑀲𑁄 𑀢𑀼𑀝𑁆𑀞𑁄 𑀢𑀲𑁆𑀲𑀸 𑀲𑀤𑁆𑀥𑀺𑀁 𑀪𑀢𑁆𑀢𑀓𑀭𑁄𑀝𑀺𑀬𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀅𑀤𑀸𑀲𑀺. 𑀲𑁄 𑀧𑀜𑁆𑀘𑀸𑀯𑀼𑀥𑀁 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 ‘‘𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀫𑁂 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀯𑀻𑀡𑀁 𑀆𑀤𑀸𑀬 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀇𑀥 𑀯𑀲𑀺𑀢𑀼𑀁 𑀤𑁂𑀣, 𑀕𑀦𑁆𑀥𑀩𑁆𑀩𑀁 𑀯𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑁂𑀳𑀺 𑀅𑀦𑀼𑀜𑁆𑀜𑀸𑀢𑁄 𑀏𑀓𑀫𑀦𑁆𑀢𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀉𑀝𑁆𑀞𑀸𑀬 𑀯𑀻𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀲𑀸𑀕𑀮𑀦𑀕𑀭𑀯𑀸𑀲𑀺𑀦𑁄 𑀇𑀫𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀽’’𑀢𑀺 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀕𑀸𑀬𑀺. 𑀧𑀪𑀸𑀯𑀢𑀻 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀅𑀬𑀁 𑀦 𑀅𑀜𑁆𑀜𑀲𑁆𑀲 𑀯𑀻𑀡𑀸𑀲𑀤𑁆𑀤𑁄, 𑀦𑀺𑀲𑁆𑀲𑀁𑀲𑀬𑀁 𑀓𑀼𑀲𑀭𑀸𑀚𑀸 𑀫𑀫𑀢𑁆𑀣𑀸𑀬 𑀆𑀕𑀢𑁄’’𑀢𑀺 𑀅𑀜𑁆𑀜𑀸𑀲𑀺. 𑀫𑀤𑁆𑀤𑀭𑀸𑀚𑀸𑀧𑀺 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀢𑀺𑀯𑀺𑀬 𑀫𑀥𑀼𑀭𑀁 𑀯𑀸𑀤𑁂𑀢𑀺, 𑀲𑁆𑀯𑁂 𑀏𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀫 𑀕𑀦𑁆𑀥𑀩𑁆𑀩𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀲𑀓𑁆𑀓𑀸 𑀇𑀥 𑀯𑀲𑀫𑀸𑀦𑁂𑀦 𑀧𑀪𑀸𑀯𑀢𑀻 𑀤𑀝𑁆𑀞𑀼𑀁, 𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀬𑀁 𑀪𑀼𑀢𑁆𑀢𑀕𑁂𑀳𑁂𑀬𑁂𑀯 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀡𑀁 𑀞𑀧𑁂𑀢𑁆𑀯𑀸 𑀭𑀸𑀚𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀖𑀭𑀁 𑀫𑀢𑁆𑀢𑀺𑀓𑀸𑀬 𑀧𑀽𑀭𑁂𑀢𑁆𑀯𑀸 ‘‘𑀪𑀸𑀚𑀦𑀸𑀦𑀺 𑀓𑀭𑁄𑀫𑀺 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀯𑀸, ‘‘𑀆𑀫, 𑀓𑀸𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀁 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀘𑀓𑁆𑀓𑁂 𑀞𑀧𑁂𑀢𑁆𑀯𑀸 𑀘𑀓𑁆𑀓𑀁 𑀆𑀯𑀺𑀜𑁆𑀙𑀺, 𑀲𑀓𑀺𑀁 𑀆𑀯𑀺𑀤𑁆𑀥𑀫𑁂𑀯 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸𑀢𑀺𑀓𑁆𑀓𑀫𑀸 𑀪𑀫𑀺𑀬𑁂𑀯. 𑀲𑁄 𑀦𑀸𑀦𑀸𑀯𑀡𑁆𑀡𑀸𑀦𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀸𑀦𑀺 𑀪𑀸𑀚𑀦𑀸𑀦𑀺 𑀓𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀪𑀸𑀚𑀦𑀁 𑀓𑀭𑁄𑀦𑁆𑀢𑁄 𑀦𑀸𑀦𑀸𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀲𑀫𑀺𑀚𑁆𑀛𑀢𑀺, ‘‘𑀢𑀸𑀦𑀺 𑀭𑀽𑀧𑀸𑀦𑀺 𑀧𑀪𑀸𑀯𑀢𑀻𑀬𑁂𑀯 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑁄 𑀲𑀩𑁆𑀩𑀪𑀸𑀚𑀦𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀕𑁂𑀳𑀁 𑀧𑀽𑀭𑁂𑀲𑀺. 𑀓𑀼𑀫𑁆𑀪𑀓𑀸𑀭𑁄 𑀦𑀸𑀦𑀸𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀸, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀢𑀬𑀸 𑀓𑀢𑀸𑀦𑀺 𑀚𑀸𑀦𑀸𑀫𑀺, 𑀓𑀣𑁂𑀳𑀺, 𑀓𑁂𑀦 𑀓𑀢𑀸𑀦𑀻’’𑀢𑀺? ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀫𑁂 𑀤𑁂𑀯𑀸’’𑀢𑀺. ‘‘𑀦 𑀢𑁂 𑀲𑁄 𑀅𑀦𑁆𑀢𑁂𑀯𑀸𑀲𑀻, 𑀆𑀘𑀭𑀺𑀬𑁄 𑀢𑁂 𑀲𑁄, 𑀢𑁆𑀯𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔, 𑀇𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀫𑀫 𑀥𑀻𑀢𑀸𑀦𑀁 𑀪𑀸𑀚𑀦𑀸𑀦𑀺 𑀓𑀭𑁄𑀢𑀼, 𑀇𑀫𑀜𑁆𑀘𑀲𑁆𑀲 𑀲𑀳𑀲𑁆𑀲𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 ‘‘𑀦𑀸𑀦𑀸𑀯𑀡𑁆𑀡𑀸𑀦𑀺 𑀇𑀫𑀸𑀦𑀺 𑀔𑀼𑀤𑁆𑀤𑀓𑀪𑀸𑀚𑀦𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳.

𑀲𑁄 𑀢𑀸𑀦𑀺 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀇𑀫𑀸𑀦𑀺 𑀯𑁄 𑀓𑀻𑀴𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀪𑀸𑀚𑀦𑀸𑀦𑀻’’𑀢𑀺 𑀆𑀳. 𑀢𑀸 𑀲𑀩𑁆𑀩𑀸 𑀆𑀕𑀫𑀺𑀁𑀲𑀼. 𑀓𑀼𑀫𑁆𑀪𑀓𑀸𑀭𑁄 𑀫𑀳𑀸𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀪𑀸𑀚𑀦𑀫𑁂𑀯 𑀢𑀲𑁆𑀲𑀸 𑀅𑀤𑀸𑀲𑀺. 𑀲𑀸 𑀘 𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀘 𑀔𑀼𑀚𑁆𑀚𑀸𑀬 𑀘 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀇𑀤𑀁 𑀦 𑀅𑀜𑁆𑀜𑁂𑀦 𑀓𑀢𑀁, 𑀓𑀼𑀲𑀭𑀸𑀚𑁂𑀦𑁂𑀯 𑀓𑀢’’𑀦𑁆𑀢𑀺 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀇𑀘𑁆𑀙𑀦𑁆𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀅𑀣𑀲𑁆𑀲𑀸 𑀪𑀕𑀺𑀦𑀺𑀬𑁄 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀔𑀼𑀤𑁆𑀤𑀓𑀪𑀸𑀚𑀦𑀁 𑀓𑀼𑀲𑀭𑀜𑁆𑀜𑀸 𑀓𑀢𑀦𑁆𑀢𑀺 𑀫𑀜𑁆𑀜𑀲𑀺, 𑀇𑀤𑀁 𑀢𑁂𑀦 𑀦 𑀓𑀢𑀁, 𑀓𑀼𑀫𑁆𑀪𑀓𑀸𑀭𑁂𑀦𑁂𑀯 𑀓𑀢𑀁, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀅𑀯𑀳𑀲𑀺𑀁𑀲𑀼. 𑀲𑀸 𑀢𑁂𑀦 𑀓𑀢𑀪𑀸𑀯𑀁 𑀢𑀲𑁆𑀲 𑀘 𑀆𑀕𑀢𑀪𑀸𑀯𑀁 𑀢𑀸𑀲𑀁 𑀦 𑀓𑀣𑁂𑀲𑀺. 𑀓𑀼𑀫𑁆𑀪𑀓𑀸𑀭𑁄 𑀲𑀳𑀲𑁆𑀲𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 ‘‘𑀢𑀸𑀢, 𑀭𑀸𑀚𑀸 𑀢𑁂 𑀢𑀼𑀝𑁆𑀞𑁄, 𑀇𑀢𑁄 𑀓𑀺𑀭 𑀧𑀝𑁆𑀞𑀸𑀬 𑀭𑀸𑀚𑀥𑀻𑀢𑀸𑀦𑀁 𑀪𑀸𑀚𑀦𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀅𑀳𑀁 𑀢𑀸𑀲𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀲𑁄 ‘‘𑀇𑀥𑀸𑀧𑀺 𑀯𑀲𑀦𑁆𑀢𑁂𑀦 𑀦 𑀲𑀓𑁆𑀓𑀸 𑀧𑀪𑀸𑀯𑀢𑀻 𑀤𑀝𑁆𑀞𑀼’’𑀦𑁆𑀢𑀺 𑀢𑀁 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀓𑀲𑁆𑀲 𑀦𑀴𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀢𑀸𑀮𑀯𑀡𑁆𑀝𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀆𑀧𑀸𑀦𑀪𑀽𑀫𑀺𑀜𑁆𑀘 𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀧𑀪𑀸𑀯𑀢𑀺𑀜𑁆𑀘𑀸𑀢𑀺 𑀦𑀸𑀦𑀸𑀭𑀽𑀧𑀸𑀦𑀺 𑀤𑀲𑁆𑀲𑁂𑀲𑀺. 𑀦𑀴𑀓𑀸𑀭𑁄 𑀢𑀜𑁆𑀘 𑀅𑀜𑁆𑀜𑀜𑁆𑀘 𑀢𑁂𑀦 𑀓𑀢𑀪𑀡𑁆𑀟𑀓𑀁 𑀆𑀤𑀸𑀬 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀫𑀸𑀦𑀺 𑀦𑀴𑀓𑀸𑀭𑀪𑀡𑁆𑀟𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄𑀧𑀺 𑀩𑁄𑀥𑀺𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀁 𑀢𑀸𑀮𑀯𑀡𑁆𑀝𑀁 𑀢𑀲𑁆𑀲𑀸𑀬𑁂𑀯 𑀅𑀤𑀸𑀲𑀺. 𑀢𑀢𑁆𑀭𑀧𑀺 𑀭𑀽𑀧𑀸𑀦𑀺 𑀅𑀜𑁆𑀜𑁄 𑀚𑀦𑁄 𑀦 𑀧𑀲𑁆𑀲𑀢𑀺, 𑀧𑀪𑀸𑀯𑀢𑀻 𑀧𑀦 𑀤𑀺𑀲𑁆𑀯𑀸 𑀓𑀼𑀲𑀭𑀜𑁆𑀜𑀸 𑀓𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀕𑀡𑁆𑀳𑀺𑀢𑀼𑀓𑀸𑀫𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀓𑀼𑀤𑁆𑀥𑀸 𑀪𑀽𑀫𑀺𑀬𑀁 𑀔𑀺𑀧𑀺. 𑀅𑀣 𑀦𑀁 𑀲𑁂𑀲𑀸 𑀅𑀯𑀳𑀲𑀺𑀁𑀲𑀼. 𑀦𑀴𑀓𑀸𑀭𑁄 𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.

𑀲𑁄 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁 𑀅𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀸𑀚𑀫𑀸𑀮𑀸𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀸𑀦𑀸𑀯𑀺𑀥𑀁 𑀫𑀸𑀮𑀸𑀯𑀺𑀓𑀢𑀺𑀁 𑀕𑀦𑁆𑀣𑀺𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀦𑀸𑀦𑀸𑀭𑀽𑀧𑀯𑀺𑀘𑀺𑀢𑁆𑀭𑀁 𑀏𑀓𑀁 𑀘𑀼𑀫𑁆𑀩𑀝𑀓𑀁 𑀅𑀓𑀸𑀲𑀺. 𑀫𑀸𑀮𑀸𑀓𑀸𑀭𑁄 𑀢𑀁 𑀲𑀩𑁆𑀩𑀁 𑀆𑀤𑀸𑀬 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀕𑀦𑁆𑀣𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀸, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀢𑀬𑀸 𑀕𑀦𑁆𑀣𑀺𑀢𑀸𑀦𑀺 𑀚𑀸𑀦𑀸𑀫𑀺, 𑀓𑀣𑁂𑀳𑀺, 𑀓𑁂𑀦 𑀕𑀦𑁆𑀣𑀺𑀢𑀸𑀦𑀻’’𑀢𑀺? ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀫𑁂, 𑀤𑁂𑀯𑀸’’𑀢𑀺. ‘‘𑀦 𑀲𑁄 𑀅𑀦𑁆𑀢𑁂𑀯𑀸𑀲𑀻, 𑀆𑀘𑀭𑀺𑀬𑁄 𑀢𑁂 𑀲𑁄, 𑀢𑁆𑀯𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔, 𑀇𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀫𑀫 𑀥𑀻𑀢𑀸𑀦𑀁 𑀧𑀼𑀧𑁆𑀨𑀸𑀦𑀺 𑀕𑀦𑁆𑀣𑀢𑀼, 𑀇𑀫𑀜𑁆𑀘𑀲𑁆𑀲 𑀲𑀳𑀲𑁆𑀲𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄𑀧𑀺 𑀩𑁄𑀥𑀺𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀁 𑀘𑀼𑀫𑁆𑀩𑀝𑀓𑀁 𑀢𑀲𑁆𑀲𑀸𑀬𑁂𑀯 𑀅𑀤𑀸𑀲𑀺. 𑀲𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀘 𑀭𑀜𑁆𑀜𑁄 𑀘 𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀦𑀸𑀦𑀸𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺. 𑀲𑁂𑀲𑀸 𑀪𑀕𑀺𑀦𑀺𑀬𑁄 𑀢𑀁 𑀢𑀣𑁂𑀯 𑀅𑀯𑀳𑀲𑀺𑀁𑀲𑀼. 𑀫𑀸𑀮𑀸𑀓𑀸𑀭𑁄𑀧𑀺 𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.

𑀲𑁄 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁 𑀅𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀽𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀘𑁆𑀙𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀽𑀤𑁄 𑀭𑀜𑁆𑀜𑁄 𑀪𑁄𑀚𑀦𑀯𑀺𑀓𑀢𑀺𑀁 𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀘𑀺𑀢𑀼𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀝𑁆𑀞𑀺𑀫𑀁𑀲𑀁 𑀅𑀤𑀸𑀲𑀺. 𑀲𑁄 𑀢𑀁 𑀢𑀣𑀸 𑀲𑀫𑁆𑀧𑀸𑀤𑁂𑀲𑀺, 𑀬𑀣𑀸𑀲𑁆𑀲 𑀕𑀦𑁆𑀥𑁄 𑀲𑀓𑀮𑀦𑀕𑀭𑀁 𑀅𑀯𑀢𑁆𑀣𑀭𑀺. 𑀭𑀸𑀚𑀸 𑀢𑀁 𑀖𑀸𑀬𑀺𑀢𑁆𑀯𑀸 ‘‘𑀓𑀺𑀁 𑀢𑁂 𑀫𑀳𑀸𑀦𑀲𑁂 𑀅𑀜𑁆𑀜𑀫𑁆𑀧𑀺 𑀫𑀁𑀲𑀁 𑀧𑀘𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺, 𑀤𑁂𑀯, 𑀅𑀧𑀺𑀘 𑀔𑁄 𑀧𑀦 𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀅𑀝𑁆𑀞𑀺𑀫𑀁𑀲𑀁 𑀧𑀘𑀦𑀢𑁆𑀣𑀸𑀬 𑀤𑀺𑀦𑁆𑀦𑀁, 𑀢𑀲𑁆𑀲𑁂𑀯 𑀲𑁄 𑀕𑀦𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 𑀆𑀳𑀭𑀸𑀧𑁂𑀢𑁆𑀯𑀸 𑀢𑀢𑁄 𑀣𑁄𑀓𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀲𑀺, 𑀢𑀸𑀯𑀤𑁂𑀯 𑀲𑀢𑁆𑀢 𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀔𑁄𑀪𑁂𑀦𑁆𑀢𑀁 𑀨𑀭𑀺. 𑀭𑀸𑀚𑀸 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀯 𑀅𑀦𑁆𑀢𑁂𑀯𑀸𑀲𑀺𑀦𑀸 𑀫𑀫 𑀘 𑀥𑀻𑀢𑀸𑀦𑀜𑁆𑀘 𑀫𑁂 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀢𑁆𑀯𑀁 𑀫𑀬𑁆𑀳𑀁 𑀆𑀳𑀭, 𑀲𑁄 𑀫𑁂 𑀥𑀻𑀢𑀸𑀦𑀁 𑀳𑀭𑀢𑀽’’𑀢𑀺 𑀆𑀳. 𑀲𑀽𑀤𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀇𑀤𑀸𑀦𑀺 𑀧𑀦𑀸𑀳𑀁 𑀧𑀪𑀸𑀯𑀢𑀺𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑁄 𑀢𑀁 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀪𑀢𑁆𑀢𑀪𑀸𑀚𑀦𑀸𑀦𑀺 𑀧𑁂𑀲𑁂𑀢𑁆𑀯𑀸 𑀭𑀸𑀚𑀥𑀻𑀢𑀸𑀦𑀁 𑀪𑀢𑁆𑀢𑀓𑀸𑀚𑀁 𑀲𑀬𑀁 𑀕𑀳𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀯𑀲𑀦𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀲𑀸 𑀢𑀁 𑀪𑀢𑁆𑀢𑀓𑀸𑀚𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀤𑀸𑀲𑀓𑀫𑁆𑀫𑀓𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺. 𑀲𑀘𑁂 𑀧𑀦𑀸𑀳𑀁 𑀓𑀢𑀺𑀧𑀸𑀳𑀁 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀸𑀫𑀺, ‘𑀇𑀤𑀸𑀦𑀺 𑀫𑀁 𑀏𑀲𑀸 𑀭𑁄𑀘𑀢𑀻’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀇𑀥𑁂𑀯 𑀯𑀲𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀢𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀇𑀥 𑀯𑀲𑀺𑀢𑀼𑀁 𑀅𑀤𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀤𑁆𑀯𑀸𑀭𑀁 𑀅𑀟𑁆𑀠𑀯𑀺𑀯𑀝𑀁 𑀓𑀢𑁆𑀯𑀸 𑀏𑀓𑀁 𑀳𑀢𑁆𑀣𑀁 𑀓𑀯𑀸𑀝𑁂 𑀮𑀕𑁆𑀕𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀕𑁆𑀕𑀴𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀅𑀦𑀼𑀚𑁆𑀚𑀼𑀪𑀽𑀢𑁂𑀦 𑀳𑀭𑀁 𑀫𑀳𑀦𑁆𑀢𑀁, 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀦𑀺𑀲𑀻𑀣𑀓𑀸𑀮𑁂;

𑀧𑀝𑀺𑀕𑀘𑁆𑀙 𑀢𑁆𑀯𑀁 𑀔𑀺𑀧𑁆𑀧𑀁 𑀓𑀼𑀲𑀸𑀯𑀢𑀺𑀁 𑀓𑀼𑀲, 𑀦𑀺𑀘𑁆𑀙𑀸𑀫𑀺 𑀤𑀼𑀩𑁆𑀩𑀡𑁆𑀡𑀫𑀳𑀁 𑀯𑀲𑀦𑁆𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀢𑁆𑀯𑀁 𑀪𑀢𑁆𑀢𑀓𑀸𑀭𑀓𑁄 𑀳𑀼𑀢𑁆𑀯𑀸 𑀉𑀚𑀼𑀓𑁂𑀦 𑀘𑀺𑀢𑁆𑀢𑁂𑀦 𑀬𑁄𑀧𑀺 𑀢𑁂 𑀲𑀻𑀲𑀁 𑀪𑀺𑀦𑁆𑀤𑁂𑀬𑁆𑀬, 𑀢𑀲𑁆𑀲𑀧𑁂𑀢𑀁 𑀓𑀫𑁆𑀫𑀁 𑀦 𑀓𑀭𑁄𑀲𑀺, 𑀅𑀦𑀼𑀚𑀼𑀪𑀽𑀢𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀫𑀫𑀢𑁆𑀣𑀸𑀬 𑀏𑀢𑀁 𑀫𑀳𑀦𑁆𑀢𑀁 𑀓𑀸𑀚𑀁 𑀳𑀭𑀦𑁆𑀢𑁄 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀦𑀺𑀲𑀻𑀣𑀓𑀸𑀮𑁂 𑀘 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀲𑀺, 𑀓𑀺𑀁 𑀢𑁂 𑀢𑁂𑀦 𑀅𑀦𑀼𑀪𑀽𑀢𑁂𑀦 𑀤𑀼𑀓𑁆𑀔𑁂𑀦, 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀓𑀼𑀲𑀸𑀯𑀢𑀺𑀫𑁂𑀯 𑀧𑀝𑀺𑀕𑀘𑁆𑀙, 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀤𑀺𑀲𑀺𑀁 𑀅𑀢𑀺𑀭𑀲𑀓𑀧𑀽𑀯𑀲𑀡𑁆𑀞𑀸𑀦𑀫𑀼𑀔𑀺𑀁 𑀬𑀓𑁆𑀔𑀺𑀦𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀻𑀢𑀺. 𑀦𑀺𑀘𑁆𑀙𑀸𑀫𑀺 𑀤𑀼𑀩𑁆𑀩𑀡𑁆𑀡𑀫𑀳𑀁 𑀯𑀲𑀦𑁆𑀢𑀦𑁆𑀢𑀺 𑀅𑀳𑀁 𑀧𑀦 𑀢𑀁 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁 𑀇𑀥 𑀯𑀲𑀦𑁆𑀢𑀁 𑀦 𑀇𑀘𑁆𑀙𑀸𑀫𑀻𑀢𑀺.

𑀲𑁄 ‘‘𑀧𑀪𑀸𑀯𑀢𑀺𑀬𑀸 𑀫𑁂 𑀲𑀦𑁆𑀢𑀺𑀓𑀸 𑀓𑀣𑀸 𑀮𑀤𑁆𑀥𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩. ‘‘𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀺 𑀇𑀢𑁄 𑀓𑀼𑀲𑀸𑀯𑀢𑀺𑀁, 𑀧𑀪𑀸𑀯𑀢𑀻 𑀯𑀡𑁆𑀡𑀧𑀮𑁄𑀪𑀺𑀢𑁄 𑀢𑀯;

𑀭𑀫𑀸𑀫𑀺 𑀫𑀤𑁆𑀤𑀲𑁆𑀲 𑀦𑀺𑀓𑁂𑀢𑀭𑀫𑁆𑀫𑁂, 𑀳𑀺𑀢𑁆𑀯𑀸𑀦 𑀭𑀝𑁆𑀞𑀁 𑀢𑀯 𑀤𑀲𑁆𑀲𑀦𑁂 𑀭𑀢𑁄.

𑁪. ‘‘𑀧𑀪𑀸𑀯𑀢𑀻 𑀯𑀡𑁆𑀡𑀧𑀮𑁄𑀪𑀺𑀢𑁄 𑀢𑀯, 𑀲𑀫𑁆𑀫𑀽𑀴𑁆𑀳𑀭𑀽𑀧𑁄 𑀯𑀺𑀘𑀭𑀸𑀫𑀺 𑀫𑁂𑀤𑀺𑀦𑀺𑀁;

𑀤𑀺𑀲𑀁 𑀦 𑀚𑀸𑀦𑀸𑀫𑀺 𑀓𑀼𑀢𑁄𑀫𑁆𑀳𑀺 𑀆𑀕𑀢𑁄, 𑀢𑀬𑀫𑁆𑀳𑀺 𑀫𑀢𑁆𑀢𑁄 𑀫𑀺𑀕𑀫𑀦𑁆𑀤𑀮𑁄𑀘𑀦𑁂.

𑁫. ‘‘𑀲𑀼𑀯𑀡𑁆𑀡𑀘𑀻𑀭𑀯𑀲𑀦𑁂, 𑀚𑀸𑀢𑀭𑀽𑀧𑀲𑀼𑀫𑁂𑀔𑀮𑁂;

𑀲𑀼𑀲𑁆𑀲𑁄𑀡𑀺 𑀢𑀯 𑀓𑀸𑀫𑀸 𑀳𑀺, 𑀦𑀸𑀳𑀁 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄’’𑀢𑀺.

𑀢𑀢𑁆𑀣 𑀭𑀫𑀸𑀫𑀻𑀢𑀺 𑀅𑀪𑀺𑀭𑀫𑀸𑀫𑀺 𑀦 𑀉𑀓𑁆𑀓𑀡𑁆𑀞𑀸𑀫𑀺. 𑀲𑀫𑁆𑀫𑀽𑀴𑁆𑀳𑀭𑀽𑀧𑁄𑀢𑀺 𑀓𑀺𑀮𑁂𑀲𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸. 𑀢𑀬𑀫𑁆𑀳𑀺 𑀫𑀢𑁆𑀢𑁄𑀢𑀺 𑀢𑀬𑀺 𑀫𑀢𑁆𑀢𑁄𑀫𑁆𑀳𑀺, 𑀢𑀬𑀸 𑀯𑀸 𑀫𑀢𑁆𑀢𑁄𑀫𑁆𑀳𑀺. 𑀲𑀼𑀯𑀡𑁆𑀡𑀘𑀻𑀭𑀯𑀲𑀦𑁂𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀯𑀢𑁆𑀣𑀯𑀲𑀦𑁂. 𑀦𑀸𑀳𑀁 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄𑀢𑀺 𑀦 𑀅𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄.

𑀏𑀯𑀁 𑀯𑀼𑀢𑁆𑀢𑁂 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑀁 ‘𑀯𑀺𑀧𑁆𑀧𑀝𑀺𑀲𑀸𑀭𑀻 𑀪𑀯𑀺𑀲𑁆𑀲𑀢𑀻’𑀢𑀺 𑀧𑀭𑀺𑀪𑀸𑀲𑀸𑀫𑀺, 𑀅𑀬𑀁 𑀧𑀦 𑀭𑀚𑁆𑀚𑀺𑀢𑁆𑀯𑀸𑀯 𑀓𑀣𑁂𑀢𑀺, 𑀲𑀘𑁂 𑀔𑁄 𑀧𑀦 𑀫𑀁 ‘𑀅𑀳𑀁 𑀓𑀼𑀲𑀭𑀸𑀚𑀸’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂 𑀕𑀡𑁆𑀳𑁂𑀬𑁆𑀬, 𑀓𑁄 𑀢𑀁 𑀦𑀺𑀯𑀸𑀭𑁂𑀬𑁆𑀬, 𑀓𑁄𑀘𑀺 𑀦𑁄 𑀇𑀫𑀁 𑀓𑀣𑀁 𑀲𑀼𑀡𑁂𑀬𑁆𑀬𑀸’’𑀢𑀺 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀲𑀽𑀘𑀺𑀁 𑀤𑀢𑁆𑀯𑀸 𑀅𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀪𑀢𑁆𑀢𑀓𑀸𑀚𑀁 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑁄 𑀪𑁄𑀚𑁂𑀲𑀺. 𑀧𑀪𑀸𑀯𑀢𑀻 ‘‘𑀕𑀘𑁆𑀙 𑀓𑀼𑀲𑀭𑀸𑀚𑁂𑀦 𑀧𑀓𑁆𑀓𑀪𑀢𑁆𑀢𑀁 𑀆𑀳𑀭𑀸’’𑀢𑀺 𑀔𑀼𑀚𑁆𑀚𑀁 𑀧𑁂𑀲𑁂𑀲𑀺. 𑀲𑀸 𑀆𑀳𑀭𑀺𑀢𑁆𑀯𑀸 ‘‘𑀪𑀼𑀜𑁆𑀚𑀸𑀳𑀻’’𑀢𑀺 𑀆𑀳. 𑀦𑀸𑀳𑀁 𑀢𑁂𑀦 𑀧𑀓𑁆𑀓𑀪𑀢𑁆𑀢𑀁 𑀪𑀼𑀜𑁆𑀚𑀸𑀫𑀺, 𑀢𑁆𑀯𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀦𑀺𑀯𑀸𑀧𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀆𑀳𑀭, 𑀓𑀼𑀲𑀭𑀜𑁆𑀜𑁄 𑀆𑀕𑀢𑀪𑀸𑀯𑀜𑁆𑀘 𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑀻𑀢𑀺. 𑀔𑀼𑀚𑁆𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀓𑁄𑀝𑁆𑀞𑀸𑀲𑀁 𑀆𑀳𑀭𑀺𑀢𑁆𑀯𑀸 𑀲𑀬𑀁 𑀪𑀼𑀜𑁆𑀚𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲𑀸 𑀉𑀧𑀦𑁂𑀢𑀺. 𑀓𑀼𑀲𑀭𑀸𑀚𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀲𑁆𑀲𑀺𑀢𑀼𑀁 𑀅𑀮𑀪𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀧𑀪𑀸𑀯𑀢𑀺𑀬𑀸 𑀫𑀬𑀺 𑀲𑀺𑀦𑁂𑀳𑁄, 𑀉𑀤𑀸𑀳𑀼 𑀦𑀢𑁆𑀣𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀧𑀦 𑀭𑀸𑀚𑀥𑀻𑀢𑀭𑁄 𑀪𑁄𑀚𑁂𑀢𑁆𑀯𑀸 𑀪𑀢𑁆𑀢𑀓𑀸𑀚𑀁 𑀆𑀤𑀸𑀬 𑀦𑀺𑀓𑁆𑀔𑀦𑁆𑀢𑁄 𑀢𑀲𑁆𑀲𑀸 𑀕𑀩𑁆𑀪𑀤𑁆𑀯𑀸𑀭𑁂 𑀧𑀸𑀲𑀸𑀤𑀢𑀮𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀪𑀸𑀚𑀦𑀸𑀦𑀺 𑀖𑀝𑁆𑀝𑁂𑀢𑁆𑀯𑀸 𑀦𑀺𑀢𑁆𑀣𑀼𑀦𑀺𑀢𑁆𑀯𑀸 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀯𑀺𑀬 𑀅𑀯𑀓𑀼𑀚𑁆𑀚𑁄 𑀧𑀢𑀺. 𑀲𑀸 𑀢𑀲𑁆𑀲 𑀦𑀺𑀢𑁆𑀣𑀼𑀦𑀺𑀢𑀲𑀤𑁆𑀤𑁂𑀦 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀪𑀢𑁆𑀢𑀓𑀸𑀚𑁂𑀦 𑀑𑀢𑁆𑀣𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀫𑀁 𑀦𑀺𑀲𑁆𑀲𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀲𑀼𑀔𑀼𑀫𑀸𑀮𑀢𑀸𑀬 𑀪𑀢𑁆𑀢𑀓𑀸𑀚𑁂𑀦 𑀅𑀯𑀢𑁆𑀣𑀢𑁄 𑀧𑀢𑀢𑀺, 𑀚𑀻𑀯𑀢𑀺 𑀦𑀼 𑀔𑁄, 𑀦𑁄 𑀯𑀸’’𑀢𑀺. 𑀲𑀸 𑀕𑀩𑁆𑀪𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀦𑀸𑀲𑀯𑀸𑀢𑀁 𑀉𑀧𑀥𑀸𑀭𑁂𑀢𑀼𑀁 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀲𑁄 𑀫𑀼𑀔𑀧𑀽𑀭𑀁 𑀔𑁂𑀴𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀲𑀭𑀻𑀭𑁂 𑀧𑀸𑀢𑁂𑀲𑀺. 𑀲𑀸 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀅𑀟𑁆𑀠𑀯𑀺𑀯𑀝𑀁 𑀣𑀓𑁂𑀢𑁆𑀯𑀸 𑀞𑀺𑀢𑀸 𑀕𑀸𑀣𑀫𑀸𑀳 𑁋

𑁬. ‘‘𑀅𑀩𑁆𑀪𑀽𑀢𑀺 𑀢𑀲𑁆𑀲 𑀪𑁄 𑀳𑁄𑀢𑀺, 𑀬𑁄 𑀅𑀦𑀺𑀘𑁆𑀙𑀦𑁆𑀢𑀫𑀺𑀘𑁆𑀙𑀢𑀺;

𑀅𑀓𑀸𑀫𑀁 𑀭𑀸𑀚 𑀓𑀸𑀫𑁂𑀲𑀺, 𑀅𑀓𑀦𑁆𑀢𑀁 𑀓𑀦𑁆𑀢𑀼𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀅𑀩𑁆𑀪𑀽𑀢𑀻𑀢𑀺 𑀅𑀪𑀽𑀢𑀺, 𑀅𑀯𑀼𑀟𑁆𑀠𑀻𑀢𑀺 𑀅𑀢𑁆𑀣𑁄.

𑀲𑁄 𑀧𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀅𑀓𑁆𑀓𑁄𑀲𑀺𑀬𑀫𑀸𑀦𑁄𑀧𑀺 𑀧𑀭𑀺𑀪𑀸𑀲𑀺𑀬𑀫𑀸𑀦𑁄𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁭. ‘‘𑀅𑀓𑀸𑀫𑀁 𑀯𑀸 𑀲𑀓𑀸𑀫𑀁 𑀯𑀸, 𑀬𑁄 𑀦𑀭𑁄 𑀮𑀪𑀢𑁂 𑀧𑀺𑀬𑀁;

𑀮𑀸𑀪𑀫𑁂𑀢𑁆𑀣 𑀧𑀲𑀁𑀲𑀸𑀫, 𑀅𑀮𑀸𑀪𑁄 𑀢𑀢𑁆𑀣 𑀧𑀸𑀧𑀓𑁄’’𑀢𑀺.

𑀲𑀸𑀧𑀺 𑀢𑀲𑁆𑀫𑀺𑀁 𑀏𑀯𑀁 𑀓𑀣𑁂𑀦𑁆𑀢𑁂𑀧𑀺 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀣𑀤𑁆𑀥𑀢𑀭𑀯𑀘𑀦𑀁 𑀯𑀢𑁆𑀯𑀸 𑀧𑀮𑀸𑀧𑁂𑀢𑀼𑀓𑀸𑀫𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁮. ‘‘𑀧𑀸𑀲𑀸𑀡𑀲𑀸𑀭𑀁 𑀔𑀡𑀲𑀺, 𑀓𑀡𑀺𑀓𑀸𑀭𑀲𑁆𑀲 𑀤𑀸𑀭𑀼𑀦𑀸;

𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑁂𑀲𑀺, 𑀬𑁄 𑀅𑀦𑀺𑀘𑁆𑀙𑀦𑁆𑀢𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀓𑀡𑀺𑀓𑀸𑀭𑀲𑁆𑀲 𑀤𑀸𑀭𑀼𑀦𑀸𑀢𑀺 𑀓𑀡𑀺𑀓𑀸𑀭𑀓𑀝𑁆𑀞𑁂𑀦. 𑀩𑀸𑀥𑁂𑀲𑀻𑀢𑀺 𑀩𑀦𑁆𑀥𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

𑁯. ‘‘𑀧𑀸𑀲𑀸𑀡𑁄 𑀦𑀽𑀦 𑀢𑁂 𑀳𑀤𑀬𑁂, 𑀑𑀳𑀺𑀢𑁄 𑀫𑀼𑀤𑀼𑀮𑀓𑁆𑀔𑀡𑁂;

𑀬𑁄 𑀢𑁂 𑀲𑀸𑀢𑀁 𑀦 𑀯𑀺𑀦𑁆𑀤𑀸𑀫𑀺, 𑀢𑀺𑀭𑁄𑀚𑀦𑀧𑀤𑀸𑀕𑀢𑁄.

𑁧𑁦. ‘‘𑀬𑀤𑀸 𑀫𑀁 𑀪𑀓𑀼𑀝𑀺𑀁 𑀓𑀢𑁆𑀯𑀸, 𑀭𑀸𑀚𑀧𑀼𑀢𑁆𑀢𑀻 𑀉𑀤𑀺𑀓𑁆𑀔𑀢𑀺;

𑀆𑀴𑀸𑀭𑀺𑀓𑁄 𑀢𑀤𑀸 𑀳𑁄𑀫𑀺, 𑀭𑀜𑁆𑀜𑁄 𑀫𑀤𑁆𑀤𑀲𑁆𑀲𑀦𑁆𑀢𑁂𑀧𑀼𑀭𑁂.

𑁧𑁧. ‘‘𑀬𑀤𑀸 𑀉𑀫𑁆𑀳𑀬𑀫𑀸𑀦𑀸 𑀫𑀁, 𑀭𑀸𑀚𑀧𑀼𑀢𑁆𑀢𑀻 𑀉𑀤𑀺𑀓𑁆𑀔𑀢𑀺;

𑀦𑀸𑀴𑀸𑀭𑀺𑀓𑁄 𑀢𑀤𑀸 𑀳𑁄𑀫𑀺, 𑀭𑀸𑀚𑀸 𑀳𑁄𑀫𑀺 𑀢𑀤𑀸 𑀓𑀼𑀲𑁄’’𑀢𑀺.

𑀢𑀢𑁆𑀣 𑀫𑀼𑀤𑀼𑀮𑀓𑁆𑀔𑀡𑁂𑀢𑀺 𑀫𑀼𑀤𑀼𑀦𑀸 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀬𑁄𑀢𑀺 𑀬𑁄 𑀅𑀳𑀁 𑀢𑀺𑀭𑁄𑀭𑀝𑁆𑀞𑀸 𑀆𑀕𑀢𑁄 𑀢𑀯 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀲𑀸𑀢𑀁 𑀦 𑀮𑀪𑀸𑀫𑀺, 𑀲𑁄 𑀏𑀯𑀁 𑀫𑀜𑁆𑀜𑀸𑀫𑀺, 𑀫𑀬𑀺 𑀲𑀺𑀦𑁂𑀳𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀸𑀬 𑀦𑀽𑀦 𑀢𑀯 𑀳𑀤𑀬𑁂 𑀧𑀸𑀲𑀸𑀡𑁄 𑀞𑀧𑀺𑀢𑁄. 𑀪𑀓𑀼𑀝𑀺𑀁 𑀓𑀢𑁆𑀯𑀸𑀢𑀺 𑀓𑁄𑀥𑀯𑀲𑁂𑀦 𑀯𑀮𑀺𑀯𑀺𑀲𑀫𑀁 𑀦𑀮𑀸𑀝𑀁 𑀓𑀢𑁆𑀯𑀸. 𑀆𑀴𑀸𑀭𑀺𑀓𑁄𑀢𑀺 𑀪𑀢𑁆𑀢𑀓𑀸𑀭𑀓𑁄. 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀁 𑀫𑀤𑁆𑀤𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀪𑀢𑁆𑀢𑀓𑀸𑀭𑀓𑀤𑀸𑀲𑁄 𑀯𑀺𑀬 𑀳𑁄𑀫𑀻𑀢𑀺 𑀯𑀤𑀢𑀺. 𑀉𑀫𑁆𑀳𑀬𑀫𑀸𑀦𑀸𑀢𑀺 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀫𑀸𑀦𑀸. 𑀭𑀸𑀚𑀸 𑀳𑁄𑀫𑀻𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀁 𑀓𑀼𑀲𑀸𑀯𑀢𑀻𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀭𑀸𑀚𑀸 𑀯𑀺𑀬 𑀳𑁄𑀫𑀺, 𑀓𑀲𑁆𑀫𑀸𑀲𑀺 𑀏𑀯𑀁 𑀨𑀭𑀼𑀲𑀸, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀏𑀯𑀭𑀽𑀧𑀁 𑀓𑀭𑀺, 𑀪𑀤𑁆𑀤𑁂𑀢𑀺.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀢𑀺𑀯𑀺𑀬 𑀅𑀮𑁆𑀮𑀻𑀬𑀺𑀢𑁆𑀯𑀸 𑀓𑀣𑁂𑀢𑀺, 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀉𑀧𑀸𑀬𑁂𑀦 𑀦𑀁 𑀇𑀢𑁄 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀸𑀣𑀫𑀸𑀳 𑁋

𑁧𑁨. ‘‘𑀲𑀘𑁂 𑀳𑀺 𑀯𑀘𑀦𑀁 𑀲𑀘𑁆𑀘𑀁, 𑀦𑁂𑀫𑀺𑀢𑁆𑀢𑀸𑀦𑀁 𑀪𑀯𑀺𑀲𑁆𑀲𑀢𑀺;

𑀦𑁂𑀯 𑀫𑁂 𑀢𑁆𑀯𑀁 𑀧𑀢𑀻 𑀅𑀲𑁆𑀲, 𑀓𑀸𑀫𑀁 𑀙𑀺𑀦𑁆𑀤𑀦𑁆𑀢𑀼 𑀲𑀢𑁆𑀢𑀥𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀫𑀬𑀸 ‘‘𑀅𑀬𑀁 𑀓𑀼𑀲𑀭𑀸𑀚𑀸 𑀫𑀬𑁆𑀳𑀁 𑀧𑀢𑀺 𑀪𑀯𑀺𑀲𑁆𑀲𑀢𑀺, 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑀳𑀽 𑀦𑀺𑀫𑀺𑀢𑁆𑀢𑀧𑀸𑀞𑀓𑀸 𑀧𑀼𑀘𑁆𑀙𑀺𑀢𑀸, 𑀢𑁂 ‘‘𑀓𑀸𑀫𑀁 𑀓𑀺𑀭 𑀫𑀁 𑀲𑀢𑁆𑀢𑀥𑀸 𑀙𑀺𑀦𑁆𑀤𑀦𑁆𑀢𑀼, 𑀦𑁂𑀯 𑀫𑁂 𑀢𑁆𑀯𑀁 𑀧𑀢𑀺 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀤𑀺𑀁𑀲𑀽𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀁 𑀧𑀝𑀺𑀩𑀸𑀳𑀦𑁆𑀢𑁄 ‘‘𑀪𑀤𑁆𑀤𑁂, 𑀫𑀬𑀸𑀧𑀺 𑀅𑀢𑁆𑀢𑀦𑁄 𑀭𑀝𑁆𑀞𑁂 𑀦𑁂𑀫𑀺𑀢𑁆𑀢𑀓𑀸 𑀧𑀼𑀘𑁆𑀙𑀺𑀢𑀸, 𑀢𑁂 ‘𑀅𑀜𑁆𑀜𑀢𑁆𑀭 𑀲𑀻𑀳𑀲𑁆𑀲𑀭𑀓𑀼𑀲𑀭𑀸𑀚𑀢𑁄 𑀢𑀯 𑀧𑀢𑀺 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀻’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼, 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑀦𑀺𑀫𑀺𑀢𑁆𑀢𑁂𑀦 𑀏𑀯𑀫𑁂𑀯 𑀓𑀣𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁩. ‘‘𑀲𑀘𑁂 𑀳𑀺 𑀯𑀘𑀦𑀁 𑀲𑀘𑁆𑀘𑀁, 𑀅𑀜𑁆𑀜𑁂𑀲𑀁 𑀬𑀤𑀺 𑀯𑀸 𑀫𑀫;

𑀦𑁂𑀯 𑀢𑀼𑀬𑁆𑀳𑀁 𑀧𑀢𑀻 𑀅𑀢𑁆𑀣𑀺, 𑀅𑀜𑁆𑀜𑁄 𑀲𑀻𑀳𑀲𑁆𑀲𑀭𑀸 𑀓𑀼𑀲𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀳𑀺 𑀅𑀜𑁆𑀜𑁂𑀲𑀁 𑀦𑁂𑀫𑀺𑀢𑁆𑀢𑀸𑀦𑀁 𑀯𑀘𑀦𑀁 𑀲𑀘𑁆𑀘𑀁, 𑀬𑀤𑀺 𑀯𑀸 𑀫𑀫 𑀯𑀘𑀦𑀁 𑀲𑀘𑁆𑀘𑀁, 𑀢𑀯 𑀅𑀜𑁆𑀜𑁄 𑀧𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀇𑀫𑀁 𑀮𑀚𑁆𑀚𑀸𑀧𑁂𑀢𑀼𑀁 𑀯𑀸 𑀧𑀮𑀸𑀧𑁂𑀢𑀼𑀁 𑀯𑀸, 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀲𑀺. 𑀲𑁄𑀧𑀺 𑀓𑀸𑀚𑀁 𑀕𑀳𑁂𑀢𑁆𑀯𑀸 𑀑𑀢𑀭𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀪𑀢𑁆𑀢𑀓𑀸𑀭𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑀺𑀯𑀺𑀬 𑀓𑀺𑀮𑀫𑀢𑀺, 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀤𑀸𑀭𑀽𑀦𑀺 𑀨𑀸𑀮𑁂𑀢𑀺, 𑀪𑀸𑀚𑀦𑀸𑀦𑀺 𑀥𑁄𑀯𑀢𑀺, 𑀓𑀸𑀚𑁂𑀦 𑀉𑀤𑀓𑀁 𑀆𑀳𑀭𑀢𑀺, 𑀲𑀬𑀦𑁆𑀢𑁄 𑀅𑀫𑁆𑀩𑀡𑀧𑀺𑀝𑁆𑀞𑁂 𑀲𑀬𑀢𑀺, 𑀧𑀸𑀢𑁄 𑀯𑀼𑀝𑁆𑀞𑀸𑀬 𑀬𑀸𑀕𑀼𑀆𑀤𑀻𑀦𑀺 𑀧𑀘𑀢𑀺 𑀳𑀭𑀢𑀺 𑀪𑁄𑀚𑁂𑀢𑀺, 𑀦𑀦𑁆𑀤𑀺𑀭𑀸𑀕𑀁 𑀦𑀺𑀲𑁆𑀲𑀸𑀬 𑀅𑀢𑀺𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀢𑁆𑀢𑀕𑁂𑀳𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀺𑀁 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀺. 𑀲𑀸 𑀧𑀪𑀸𑀯𑀢𑀺𑀬𑀸 𑀪𑀬𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀢𑀼𑀭𑀺𑀢𑀢𑀼𑀭𑀺𑀢𑀸 𑀯𑀺𑀬 𑀕𑀘𑁆𑀙𑀢𑀺. 𑀅𑀣 𑀦𑀁 𑀯𑁂𑀕𑁂𑀦 𑀉𑀧𑀕𑀦𑁆𑀢𑁆𑀯𑀸 ‘‘𑀔𑀼𑀚𑁆𑀚𑁂’’𑀢𑀺 𑀆𑀳.

𑀲𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀸 ‘‘𑀓𑁄 𑀏𑀲𑁄’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀤𑁆𑀤𑀁 𑀦 𑀲𑀼𑀡𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 ‘‘𑀔𑀼𑀚𑁆𑀚𑁂 𑀢𑁆𑀯𑀫𑁆𑀧𑀺 𑀲𑀸𑀫𑀺𑀦𑀻𑀧𑀺 𑀢𑁂 𑀉𑀪𑁄𑀧𑀺 𑀅𑀢𑀺𑀯𑀺𑀬 𑀣𑀤𑁆𑀥𑀸, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀆𑀭𑁄𑀕𑁆𑀬𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀧𑀦 𑀓𑀺𑀁 𑀤𑀲𑁆𑀲𑀣, 𑀢𑀺𑀝𑁆𑀞𑀢𑀼 𑀢𑀸𑀯𑁂𑀢𑀁, 𑀅𑀧𑀺 𑀫𑁂 𑀧𑀪𑀸𑀯𑀢𑀺𑀁 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀦𑀁 ‘‘𑀲𑀘𑁂 𑀫𑁂 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀔𑀼𑀚𑁆𑀚𑀪𑀸𑀯𑀁 𑀢𑁂 𑀉𑀚𑀼𑀓𑀁 𑀓𑀢𑁆𑀯𑀸 𑀕𑀻𑀯𑁂𑀬𑁆𑀬𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀮𑁄𑀪𑁂𑀦𑁆𑀢𑁄 𑀧𑀜𑁆𑀘 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

𑁧𑁪. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;

𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀑𑀮𑁄𑀓𑁂𑀬𑁆𑀬 𑀧𑀪𑀸𑀯𑀢𑀻.

𑁧𑁫. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;

𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀆𑀮𑀧𑁂𑀬𑁆𑀬 𑀧𑀪𑀸𑀯𑀢𑀻.

𑁧𑁬. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;

𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀉𑀫𑁆𑀳𑀸𑀬𑁂𑀬𑁆𑀬 𑀧𑀪𑀸𑀯𑀢𑀻.

𑁧𑁭. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;

𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀧𑀫𑁆𑀳𑀸𑀬𑁂𑀬𑁆𑀬 𑀧𑀪𑀸𑀯𑀢𑀻.

𑁧𑁮. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;

𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀧𑀸𑀡𑀻𑀳𑀺 𑀉𑀧𑀲𑀫𑁆𑀨𑀼𑀲𑁂’’𑀢𑀺.

𑀢𑀢𑁆𑀣 𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂𑀢𑀺 𑀢𑀯 𑀕𑀻𑀯𑁂𑀬𑁆𑀬𑀁 𑀲𑀩𑁆𑀩𑀲𑀼𑀯𑀡𑁆𑀡𑀫𑀬𑀫𑁂𑀯 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺𑀧𑀺 𑀧𑀸𑀞𑁄, 𑀢𑀯 𑀕𑀻𑀯𑀸𑀬 𑀦𑁂𑀓𑁆𑀔𑀫𑀬𑀁 𑀧𑀺𑀴𑀦𑁆𑀥𑀦𑀁 𑀧𑀺𑀴𑀦𑁆𑀥𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀑𑀮𑁄𑀓𑁂𑀬𑁆𑀬𑀸𑀢𑀺 𑀲𑀘𑁂 𑀢𑀯 𑀯𑀘𑀦𑁂𑀦 𑀫𑀁 𑀧𑀪𑀸𑀯𑀢𑀻 𑀑𑀮𑁄𑀓𑁂𑀬𑁆𑀬, 𑀲𑀘𑁂 𑀫𑀁 𑀢𑀸𑀬 𑀑𑀮𑁄𑀓𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. ‘‘𑀆𑀮𑀧𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀉𑀫𑁆𑀳𑀸𑀬𑁂𑀬𑁆𑀬𑀸𑀢𑀺 𑀫𑀦𑁆𑀤𑀳𑀲𑀺𑀢𑀯𑀲𑁂𑀦 𑀧𑀭𑀺𑀳𑀸𑀲𑁂𑀬𑁆𑀬. 𑀧𑀫𑁆𑀳𑀸𑀬𑁂𑀬𑁆𑀬𑀸𑀢𑀺 𑀫𑀳𑀸𑀳𑀲𑀺𑀢𑀯𑀲𑁂𑀦 𑀧𑀭𑀺𑀳𑀸𑀲𑁂𑀬𑁆𑀬.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀤𑁂𑀯, 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀦𑀁 𑀢𑀼𑀫𑁆𑀳𑀸𑀓𑀁 𑀯𑀲𑁂 𑀓𑀭𑀺𑀲𑁆𑀲𑀸𑀫𑀺, 𑀧𑀲𑁆𑀲𑀣 𑀫𑁂 𑀧𑀭𑀓𑁆𑀓𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀯𑀲𑀦𑀕𑀩𑁆𑀪𑀁 𑀲𑁄𑀥𑁂𑀦𑁆𑀢𑀻 𑀯𑀺𑀬 𑀧𑀳𑀭𑀡𑀬𑁄𑀕𑁆𑀕𑀁 𑀮𑁂𑀟𑁆𑀟𑀼𑀔𑀡𑁆𑀟𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀧𑀸𑀤𑀼𑀓𑀸𑀧𑀺 𑀦𑀻𑀳𑀭𑀺𑀢𑁆𑀯𑀸 𑀲𑀓𑀮𑀕𑀩𑁆𑀪𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑁂 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀉𑀘𑁆𑀘𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀏𑀓𑀁 𑀦𑀻𑀘𑀧𑀻𑀞𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 ‘‘𑀏𑀳𑀺, 𑀅𑀫𑁆𑀫, 𑀲𑀻𑀲𑁂 𑀢𑁂 𑀊𑀓𑀸 𑀯𑀺𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀢𑀢𑁆𑀣 𑀧𑀻𑀞𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀊𑀭𑀼𑀅𑀦𑁆𑀢𑀭𑁂 𑀢𑀲𑁆𑀲𑀸 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀣𑁄𑀓𑀁 𑀓𑀡𑁆𑀟𑀼𑀬𑀺𑀢𑁆𑀯𑀸 ‘‘𑀅𑀳𑁄 𑀇𑀫𑀺𑀲𑁆𑀲𑀸 𑀲𑀻𑀲𑁂 𑀩𑀳𑀽 𑀊𑀓𑀸’’𑀢𑀺 𑀲𑀓𑀲𑀻𑀲𑀢𑁄 𑀊𑀓𑀸 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀧𑀲𑁆𑀲 𑀓𑀺𑀢𑁆𑀢𑀓𑀸 𑀢𑁂 𑀲𑀻𑀲𑁂 𑀊𑀓𑀸’’𑀢𑀺 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀻 𑀕𑀸𑀣𑀫𑀸𑀳 𑁋

𑁧𑁯. ‘‘𑀦 𑀳𑀺 𑀦𑀽𑀦𑀸𑀬𑀁 𑀭𑀸𑀚𑀧𑀼𑀢𑁆𑀢𑀻, 𑀓𑀼𑀲𑁂 𑀲𑀸𑀢𑀫𑁆𑀧𑀺 𑀯𑀺𑀦𑁆𑀤𑀢𑀺;

𑀆𑀴𑀸𑀭𑀺𑀓𑁂 𑀪𑀢𑁂 𑀧𑁄𑀲𑁂, 𑀯𑁂𑀢𑀦𑁂𑀦 𑀅𑀦𑀢𑁆𑀣𑀺𑀓𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀏𑀓𑀁𑀲𑁂𑀦 𑀅𑀬𑀁 𑀭𑀸𑀚𑀧𑀼𑀢𑁆𑀢𑀻 𑀧𑀼𑀩𑁆𑀩𑁂 𑀓𑀼𑀲𑀸𑀯𑀢𑀻𑀦𑀕𑀭𑁂 𑀓𑀼𑀲𑀦𑀭𑀺𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑀯𑀲𑁂𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀸𑀢𑀁 𑀦 𑀯𑀺𑀦𑁆𑀤𑀢𑀺 𑀦 𑀮𑀪𑀢𑀺, 𑀢𑀫𑁆𑀩𑀽𑀮𑀫𑀢𑁆𑀢𑀫𑁆𑀧𑀺 𑀏𑀢𑁂𑀦 𑀏𑀢𑀺𑀲𑁆𑀲𑀸 𑀤𑀺𑀦𑁆𑀦𑀧𑀼𑀩𑁆𑀩𑀁 𑀦 𑀪𑀯𑀺𑀲𑁆𑀲𑀢𑀺. 𑀓𑀺𑀁𑀓𑀸𑀭𑀡𑀸? 𑀇𑀢𑁆𑀣𑀺𑀬𑁄 𑀦𑀸𑀫 𑀏𑀓𑀤𑀺𑀯𑀲𑀫𑁆𑀧𑀺 𑀅𑀗𑁆𑀓𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑀸𑀫𑀺𑀓𑀫𑁆𑀳𑀺 𑀳𑀤𑀬𑀁 𑀪𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀧𑀦 𑀆𑀴𑀸𑀭𑀺𑀓𑁂 𑀪𑀢𑁂 𑀧𑁄𑀲𑁂 𑀆𑀴𑀸𑀭𑀺𑀓𑀢𑁆𑀢𑀜𑁆𑀘 𑀪𑀢𑀓𑀢𑁆𑀢𑀜𑁆𑀘 𑀉𑀧𑀕𑀢𑁂 𑀏𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀫𑀽𑀮𑁂𑀦𑀧𑀺 𑀅𑀦𑀢𑁆𑀣𑀺𑀓𑁂 𑀓𑁂𑀯𑀮𑀁 𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀭𑀚𑁆𑀚𑀁 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀲𑀘𑁂𑀧𑀺 𑀢𑁂, 𑀅𑀫𑁆𑀫, 𑀢𑀲𑁆𑀫𑀺𑀁 𑀲𑀺𑀦𑁂𑀳𑁄 𑀦𑀢𑁆𑀣𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀫𑀁 𑀦𑀺𑀲𑁆𑀲𑀸𑀬 𑀓𑀺𑀮𑀫𑀢𑀻𑀢𑀺 𑀢𑀲𑁆𑀲 𑀓𑀺𑀜𑁆𑀘𑀺𑀤𑁂𑀯 𑀤𑀸𑀢𑀼𑀁 𑀅𑀭𑀳𑀲𑀻𑀢𑀺.

𑀲𑀸 𑀢𑀁 𑀲𑀼𑀢𑁆𑀯𑀸 𑀔𑀼𑀚𑁆𑀚𑀸𑀬 𑀓𑀼𑀚𑁆𑀛𑀺. 𑀅𑀣 𑀦𑀁 𑀔𑀼𑀚𑁆𑀚𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 𑀔𑀺𑀧𑀺𑀢𑁆𑀯𑀸 𑀲𑀬𑀁 𑀩𑀳𑀺 𑀳𑀼𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀫𑁆𑀳𑀺 𑀑𑀮𑀫𑁆𑀩𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀧𑀪𑀸𑀯𑀢𑀻 𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑁆𑀯𑀸𑀭𑀫𑀽𑀮𑁂 𑀞𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁦. ‘‘𑀦 𑀳𑀺 𑀦𑀽𑀦𑀸𑀬𑀁 𑀲𑀸 𑀔𑀼𑀚𑁆𑀚𑀸, 𑀮𑀪𑀢𑀺 𑀚𑀺𑀯𑁆𑀳𑀸𑀬 𑀙𑁂𑀤𑀦𑀁;

𑀲𑀼𑀦𑀺𑀲𑀺𑀢𑁂𑀦 𑀲𑀢𑁆𑀣𑁂𑀦, 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡’’𑀦𑁆𑀢𑀺.

𑀢𑀢𑁆𑀣 𑀲𑀼𑀦𑀺𑀲𑀺𑀢𑁂𑀦𑀸𑀢𑀺 𑀲𑀼𑀝𑁆𑀞𑀼 𑀦𑀺𑀲𑀺𑀢𑁂𑀦 𑀢𑀺𑀔𑀺𑀡𑀲𑀢𑁆𑀣𑁂𑀦. 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀏𑀯𑀁 𑀅𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀦𑁆𑀢𑀻.

𑀅𑀣 𑀔𑀼𑀚𑁆𑀚𑀸 𑀆𑀯𑀺𑀜𑁆𑀘𑀦𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸𑀯 ‘‘𑀦𑀺𑀧𑁆𑀧𑀜𑁆𑀜𑁂 𑀤𑀼𑀩𑁆𑀩𑀺𑀦𑀻𑀢𑁂 𑀢𑀯 𑀭𑀽𑀧𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀫𑀬𑀁 𑀢𑀯 𑀭𑀽𑀧𑀁 𑀔𑀸𑀤𑀺𑀢𑁆𑀯𑀸 𑀬𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀭𑀲𑀳𑀺 𑀕𑀸𑀣𑀸𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑀻 𑀔𑀼𑀚𑁆𑀚𑀸𑀕𑀚𑁆𑀚𑀺𑀢𑀁 𑀦𑀸𑀫 𑀕𑀚𑁆𑀚𑀺 𑁋

𑁨𑁧. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀳𑀸𑀬𑀲𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁨. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀳𑀤𑁆𑀥𑀦𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁩. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀳𑀩𑁆𑀩𑀮𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁪. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀳𑀸𑀭𑀝𑁆𑀞𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁫. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀳𑀸𑀭𑀸𑀚𑀸𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁬. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀲𑀻𑀳𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁭. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁮. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁨𑁯. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁩𑁦. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀫𑀥𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁩𑁧. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀲𑀢𑀲𑀺𑀧𑁆𑀧𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁩𑁨. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀔𑀢𑁆𑀢𑀺𑀬𑁄𑀢𑀺𑀧𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.

𑁩𑁩. ‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;

𑀓𑀼𑀲𑀭𑀸𑀚𑀸𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬’’𑀦𑁆𑀢𑀺.

𑀢𑀢𑁆𑀣 𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦, 𑀧𑀪𑀸𑀯𑀢𑀻𑀢𑀺 𑀅𑀭𑁂 𑀧𑀪𑀸𑀯𑀢𑀺, 𑀫𑀸 𑀢𑁆𑀯𑀁 𑀏𑀢𑀁 𑀓𑀼𑀲𑀦𑀭𑀺𑀦𑁆𑀤𑀁 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀧𑀫𑀺𑀦𑀺, 𑀏𑀯𑀁 𑀧𑀫𑀸𑀡𑀁 𑀕𑀡𑁆𑀳𑀺. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀲𑁄𑀢𑀺 𑀏𑀯𑀁 𑀳𑀤𑀬𑁂 𑀓𑀢𑁆𑀯𑀸𑀦 𑀭𑀼𑀘𑀺𑀭𑁂 𑀧𑀺𑀬𑀤𑀲𑁆𑀲𑀦𑁂 𑀓𑀭𑀲𑁆𑀲𑀼 𑀢𑀲𑁆𑀲 𑀧𑀺𑀬𑀁. 𑀆𑀦𑀼𑀪𑀸𑀯𑁄𑀬𑁂𑀯 𑀳𑀺𑀲𑁆𑀲 𑀭𑀽𑀧𑀦𑁆𑀢𑀺 𑀯𑀤𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀺 𑀘 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀫𑀳𑀤𑁆𑀥𑀦𑁄𑀢𑀺 𑀫𑀳𑀸𑀪𑁄𑀕𑁄. 𑀫𑀳𑀩𑁆𑀩𑀮𑁄𑀢𑀺 𑀫𑀳𑀸𑀣𑀸𑀫𑁄. 𑀫𑀳𑀸𑀭𑀝𑁆𑀞𑁄𑀢𑀺 𑀯𑀺𑀧𑀼𑀮𑀭𑀝𑁆𑀞𑁄. 𑀫𑀳𑀸𑀭𑀸𑀚𑀸𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸. 𑀲𑀻𑀳𑀲𑁆𑀲𑀭𑁄𑀢𑀺 𑀲𑀻𑀳𑀲𑀤𑁆𑀤𑀲𑀫𑀸𑀦𑀲𑀤𑁆𑀤𑁄. 𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀮𑀻𑀮𑀸𑀬𑀼𑀢𑁆𑀢𑀲𑁆𑀲𑀭𑁄. 𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀖𑀦𑀲𑁆𑀲𑀭𑁄. 𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀲𑀼𑀦𑁆𑀤𑀭𑀲𑁆𑀲𑀭𑁄. 𑀫𑀥𑀼𑀲𑁆𑀲𑀭𑁄𑀢𑀺 𑀫𑀥𑀼𑀭𑀬𑀼𑀢𑁆𑀢𑀲𑁆𑀲𑀭𑁄. 𑀲𑀢𑀲𑀺𑀧𑁆𑀧𑁄𑀢𑀺 𑀧𑀭𑁂𑀲𑀁 𑀲𑀦𑁆𑀢𑀺𑀓𑁂 𑀅𑀲𑀺𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀦𑀺𑀧𑁆𑀨𑀦𑁆𑀦𑀅𑀦𑁂𑀓𑀲𑀢𑀲𑀺𑀧𑁆𑀧𑁄. 𑀔𑀢𑁆𑀢𑀺𑀬𑁄𑀢𑀺 𑀑𑀓𑁆𑀓𑀸𑀓𑀧𑀯𑁂𑀡𑀺𑀬𑀁 𑀚𑀸𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑁄. 𑀓𑀼𑀲𑀭𑀸𑀚𑀸𑀢𑀺 𑀲𑀓𑁆𑀓𑀤𑀢𑁆𑀢𑀺𑀬𑀓𑀼𑀲𑀢𑀺𑀡𑀲𑀫𑀸𑀦𑀦𑀸𑀫𑁄 𑀭𑀸𑀚𑀸. 𑀏𑀯𑀭𑀽𑀧𑁄 𑀳𑀺 𑀅𑀜𑁆𑀜𑁄 𑀭𑀸𑀚𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀚𑀸𑀦𑀺𑀢𑁆𑀯𑀸 𑀏𑀢𑀲𑁆𑀲 𑀧𑀺𑀬𑀁 𑀓𑀭𑁄𑀳𑀻𑀢𑀺 𑀔𑀼𑀚𑁆𑀚𑀸 𑀏𑀢𑁆𑀢𑀓𑀸𑀳𑀺 𑀕𑀸𑀣𑀸𑀳𑀺 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.

𑀧𑀪𑀸𑀯𑀢𑀻 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀔𑀼𑀚𑁆𑀚𑁂 𑀅𑀢𑀺𑀯𑀺𑀬 𑀕𑀚𑁆𑀚𑀲𑀺, 𑀳𑀢𑁆𑀣𑁂𑀦 𑀧𑀸𑀧𑀼𑀡𑀦𑁆𑀢𑀻 𑀲𑀲𑀸𑀫𑀺𑀓𑀪𑀸𑀯𑀁 𑀢𑁂 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀔𑀼𑀚𑁆𑀚𑀁 𑀢𑀚𑁆𑀚𑁂𑀲𑀺. 𑀲𑀸𑀧𑀺 𑀢𑀁 ‘‘𑀅𑀳𑀁 𑀢𑀁 𑀭𑀓𑁆𑀔𑀫𑀸𑀦𑀸 𑀧𑀺𑀢𑀼𑀦𑁄 𑀢𑁂 𑀓𑀼𑀲𑀭𑀸𑀚𑀲𑁆𑀲 𑀆𑀕𑀢𑀪𑀸𑀯𑀁 𑀦𑀸𑀭𑁄𑀘𑁂𑀲𑀺𑀁, 𑀳𑁄𑀢𑀼, 𑀅𑀚𑁆𑀚 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀪𑀸𑀬𑀸𑀧𑁂𑀲𑀺. 𑀲𑀸𑀧𑀺 ‘‘𑀓𑁄𑀘𑀺𑀤𑁂𑀯 𑀲𑀼𑀡𑁂𑀬𑁆𑀬𑀸’’𑀢𑀺 𑀔𑀼𑀚𑁆𑀚𑀁 𑀲𑀜𑁆𑀜𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀧𑀲𑁆𑀲𑀺𑀢𑀼𑀁 𑀅𑀮𑀪𑀦𑁆𑀢𑁄 𑀲𑀢𑁆𑀢 𑀫𑀸𑀲𑁂 𑀤𑀼𑀩𑁆𑀪𑁄𑀚𑀦𑁂𑀦 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀓𑀺𑀮𑀫𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁄 𑀫𑁂 𑀏𑀢𑀸𑀬 𑀅𑀢𑁆𑀣𑁄, 𑀲𑀢𑁆𑀢 𑀫𑀸𑀲𑁂 𑀯𑀲𑀦𑁆𑀢𑁄 𑀏𑀢𑀁 𑀧𑀲𑁆𑀲𑀺𑀢𑀼𑀫𑁆𑀧𑀺 𑀦 𑀮𑀪𑀸𑀫𑀺, 𑀅𑀢𑀺𑀯𑀺𑀬 𑀓𑀓𑁆𑀔𑀴𑀸 𑀲𑀸𑀳𑀲𑀺𑀓𑀸, 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀲𑁆𑀲 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀭𑀸𑀚𑀸 𑀲𑀢𑁆𑀢 𑀫𑀸𑀲𑁂 𑀧𑀪𑀸𑀯𑀢𑀺𑀁 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀺, 𑀮𑀪𑀦𑀸𑀓𑀸𑀭𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀤𑁆𑀤𑀭𑀜𑁆𑀜𑁄 𑀤𑀽𑀢𑁂 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀤𑀽𑀢𑀁 𑀧𑀸𑀳𑁂𑀦𑁆𑀢𑁄 ‘‘𑀧𑀪𑀸𑀯𑀢𑀻, 𑀓𑀼𑀲𑀭𑀸𑀚𑀁 𑀙𑀟𑁆𑀟𑁂𑀢𑁆𑀯𑀸 𑀆𑀕𑀢𑀸, 𑀆𑀕𑀘𑁆𑀙𑀦𑁆𑀢𑀼 𑀧𑀪𑀸𑀯𑀢𑀺𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀓𑁂𑀓𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀸𑀲𑀦𑀁 𑀧𑀳𑀺𑀡𑀺. 𑀢𑁂 𑀫𑀳𑀸𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀕𑀢𑀓𑀸𑀭𑀡𑀁 𑀦 𑀚𑀸𑀦𑀦𑁆𑀢𑀺. 𑀢𑁂 ‘‘𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄, 𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀓𑀁 𑀓𑀺𑀭 𑀥𑀻𑀢𑀭𑀁 𑀲𑀢𑁆𑀢𑀦𑁆𑀦𑀁 𑀤𑀲𑁆𑀲𑀢𑀺, 𑀧𑀲𑁆𑀲𑀣𑀲𑁆𑀲 𑀅𑀦𑀸𑀘𑀸𑀭𑀁, 𑀉𑀧𑁆𑀧𑀡𑁆𑀟𑁂𑀢𑀺 𑀦𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀪𑀸𑀯𑀢𑀺𑀁 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀲𑀸𑀲𑀦𑀸𑀦𑀺 𑀧𑀳𑀺𑀡𑀺𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀫𑀤𑁆𑀤𑀭𑀸𑀚𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀅𑀫𑀘𑁆𑀘𑀸 ‘‘𑀤𑁂𑀯, 𑀲𑀢𑁆𑀢𑀧𑀺 𑀭𑀸𑀚𑀸𑀦𑁄 𑀧𑀪𑀸𑀯𑀢𑀺𑀁 𑀦𑀺𑀲𑁆𑀲𑀸𑀬 𑀆𑀕𑀢𑀸, ‘𑀲𑀘𑁂 𑀦 𑀤𑀲𑁆𑀲𑀢𑀺, 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’𑀢𑀺 𑀯𑀤𑀦𑁆𑀢𑀺, 𑀧𑀸𑀓𑀸𑀭𑁂 𑀅𑀪𑀺𑀦𑁆𑀦𑁂𑀬𑁂𑀯 𑀢𑁂𑀲𑀁 𑀧𑀪𑀸𑀯𑀢𑀺𑀁 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳𑀁𑀲𑀼 𑁋

𑁩𑁪. ‘‘𑀏𑀢𑁂 𑀦𑀸𑀕𑀸 𑀉𑀧𑀢𑁆𑀣𑀤𑁆𑀥𑀸, 𑀲𑀩𑁆𑀩𑁂 𑀢𑀺𑀝𑁆𑀞𑀦𑁆𑀢𑀺 𑀯𑀫𑁆𑀫𑀺𑀢𑀸;

𑀧𑀼𑀭𑀸 𑀫𑀤𑁆𑀤𑀦𑁆𑀢𑀺 𑀧𑀸𑀓𑀸𑀭𑀁, 𑀆𑀦𑁂𑀦𑁆𑀢𑁂𑀢𑀁 𑀧𑀪𑀸𑀯𑀢𑀺’’𑀦𑁆𑀢𑀺.

𑀢𑀢𑁆𑀣 𑀉𑀧𑀢𑁆𑀣𑀤𑁆𑀥𑀸𑀢𑀺 𑀅𑀢𑀺𑀣𑀤𑁆𑀥𑀸 𑀤𑀧𑁆𑀧𑀺𑀢𑀸. 𑀆𑀦𑁂𑀦𑁆𑀢𑁂𑀢𑀁 𑀧𑀪𑀸𑀯𑀢𑀺𑀦𑁆𑀢𑀺 𑀆𑀦𑁂𑀦𑁆𑀢𑀼 𑀏𑀢𑀁 𑀧𑀪𑀸𑀯𑀢𑀺𑀦𑁆𑀢𑀺 𑀲𑀸𑀲𑀦𑀸𑀦𑀺 𑀧𑀳𑀺𑀡𑀺𑀁𑀲𑀼. 𑀢𑀲𑁆𑀫𑀸 𑀬𑀸𑀯 𑀏𑀢𑁂 𑀦𑀸𑀕𑀸 𑀧𑀸𑀓𑀸𑀭𑀁 𑀦 𑀫𑀤𑁆𑀤𑀦𑁆𑀢𑀺, 𑀢𑀸𑀯 𑀦𑁂𑀲𑀁 𑀧𑀪𑀸𑀯𑀢𑀺𑀁 𑀧𑁂𑀲𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀲𑀘𑀸𑀳𑀁 𑀏𑀓𑀲𑁆𑀲 𑀧𑀪𑀸𑀯𑀢𑀺𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀲𑁂𑀲𑀸 𑀬𑀼𑀤𑁆𑀥𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀦 𑀲𑀓𑁆𑀓𑀸 𑀏𑀓𑀲𑁆𑀲 𑀤𑀸𑀢𑀼𑀁, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸𑀦𑀁 ‘𑀯𑀺𑀭𑀽𑀧𑁄’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀆𑀕𑀢𑀸 𑀆𑀕𑀫𑀦𑀲𑁆𑀲 𑀨𑀮𑀁 𑀮𑀪𑀢𑀼, 𑀯𑀥𑀺𑀢𑁆𑀯𑀸𑀦 𑀦𑀁 𑀲𑀢𑁆𑀢 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁩𑁫. ‘‘𑀲𑀢𑁆𑀢 𑀩𑀺𑀮𑁂 𑀓𑀭𑀺𑀢𑁆𑀯𑀸𑀦, 𑀅𑀳𑀫𑁂𑀢𑀁 𑀧𑀪𑀸𑀯𑀢𑀺𑀁;

𑀔𑀢𑁆𑀢𑀺𑀬𑀸𑀦𑀁 𑀧𑀤𑀲𑁆𑀲𑀸𑀫𑀺, 𑀬𑁂 𑀫𑀁 𑀳𑀦𑁆𑀢𑀼𑀁 𑀇𑀥𑀸𑀕𑀢𑀸’’𑀢𑀺.

𑀢𑀲𑁆𑀲 𑀲𑀸 𑀓𑀣𑀸 𑀲𑀓𑀮𑀦𑀺𑀯𑁂𑀲𑀦𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀧𑀭𑀺𑀘𑀸𑀭𑀺𑀓𑀸 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀢𑀁 𑀲𑀢𑁆𑀢 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀧𑁂𑀲𑁂𑀲𑁆𑀲𑀢𑀻’’𑀢𑀺 𑀧𑀪𑀸𑀯𑀢𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀫𑀭𑀡𑀪𑀬𑀪𑀻𑀢𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀪𑀕𑀺𑀦𑀻𑀳𑀺 𑀧𑀭𑀺𑀯𑀼𑀢𑀸 𑀫𑀸𑀢𑀼 𑀲𑀺𑀭𑀺𑀕𑀩𑁆𑀪𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁩𑁬. ‘‘𑀅𑀯𑀼𑀝𑁆𑀞𑀳𑀺 𑀭𑀸𑀚𑀧𑀼𑀢𑁆𑀢𑀻, 𑀲𑀸𑀫𑀸 𑀓𑁄𑀲𑁂𑀬𑁆𑀬𑀯𑀸𑀲𑀺𑀦𑀻;

𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸’’𑀢𑀺.

𑀢𑀢𑁆𑀣 𑀲𑀸𑀫𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀸. 𑀓𑁄𑀲𑁂𑀬𑁆𑀬𑀯𑀸𑀲𑀺𑀦𑀻𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀓𑁄𑀲𑁂𑀬𑁆𑀬𑀦𑀺𑀯𑀲𑀦𑀸.

𑀲𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀳 𑁋

𑁩𑁭. ‘‘𑀢𑀁 𑀦𑀽𑀦 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀁 𑀫𑀼𑀔𑀁, 𑀆𑀤𑀸𑀲𑀤𑀦𑁆𑀢𑀸𑀣𑀭𑀼𑀧𑀘𑁆𑀘𑀯𑁂𑀓𑁆𑀔𑀺𑀢𑀁;

𑀲𑀼𑀪𑀁 𑀲𑀼𑀦𑁂𑀢𑁆𑀢𑀁 𑀯𑀺𑀭𑀚𑀁 𑀅𑀦𑀗𑁆𑀕𑀡𑀁, 𑀙𑀼𑀤𑁆𑀥𑀁 𑀯𑀦𑁂 𑀞𑀲𑁆𑀲𑀢𑀺 𑀔𑀢𑁆𑀢𑀺𑀬𑁂𑀳𑀺.

𑁩𑁮. ‘‘𑀢𑁂 𑀦𑀽𑀦 𑀫𑁂 𑀅𑀲𑀺𑀢𑁂 𑀯𑁂𑀮𑁆𑀮𑀺𑀢𑀕𑁆𑀕𑁂, 𑀓𑁂𑀲𑁂 𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑁂;

𑀲𑀫𑀸𑀓𑀼𑀮𑁂 𑀲𑀻𑀯𑀣𑀺𑀓𑀸𑀬 𑀫𑀚𑁆𑀛𑁂, 𑀧𑀸𑀤𑁂𑀳𑀺 𑀕𑀺𑀚𑁆𑀛𑀸 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺.

𑁩𑁯. ‘‘𑀢𑀸 𑀦𑀽𑀦 𑀫𑁂 𑀢𑀫𑁆𑀩𑀦𑀔𑀸 𑀲𑀼𑀮𑁄𑀫𑀸, 𑀩𑀸𑀳𑀸 𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸;

𑀙𑀺𑀦𑁆𑀦𑀸 𑀯𑀦𑁂 𑀉𑀚𑁆𑀛𑀺𑀢𑀸 𑀔𑀢𑁆𑀢𑀺𑀬𑁂𑀳𑀺, 𑀕𑀬𑁆𑀳 𑀥𑀗𑁆𑀓𑁄 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁.

𑁪𑁦. ‘‘𑀢𑁂 𑀦𑀽𑀦 𑀢𑀸𑀮𑀽𑀧𑀦𑀺𑀪𑁂 𑀅𑀮𑀫𑁆𑀩𑁂, 𑀦𑀺𑀲𑁂𑀯𑀺𑀢𑁂 𑀓𑀸𑀲𑀺𑀓𑀘𑀦𑁆𑀤𑀦𑁂𑀦;

𑀣𑀦𑁂𑀲𑀼 𑀫𑁂 𑀮𑀫𑁆𑀩𑀺𑀲𑁆𑀲𑀢𑀺 𑀲𑀺𑀗𑁆𑀕𑀸𑀮𑁄, 𑀫𑀸𑀢𑀽𑀯 𑀧𑀼𑀢𑁆𑀢𑁄 𑀢𑀭𑀼𑀡𑁄 𑀢𑀦𑀽𑀚𑁄.

𑁪𑁧. ‘‘𑀢𑀁 𑀦𑀽𑀦 𑀲𑁄𑀡𑀺𑀁 𑀧𑀼𑀣𑀼𑀮𑀁 𑀲𑀼𑀓𑁄𑀝𑁆𑀝𑀺𑀢𑀁, 𑀦𑀺𑀲𑁂𑀯𑀺𑀢𑀁 𑀓𑀜𑁆𑀘𑀦𑀫𑁂𑀔𑀮𑀸𑀳𑀺;

𑀙𑀺𑀦𑁆𑀦𑀁 𑀯𑀦𑁂 𑀔𑀢𑁆𑀢𑀺𑀬𑁂𑀳𑀻 𑀅𑀯𑀢𑁆𑀣𑀁, 𑀲𑀺𑀗𑁆𑀕𑀸𑀮𑀲𑀗𑁆𑀖𑀸 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺.

𑁪𑁨. ‘‘𑀲𑁄𑀡𑀸 𑀥𑀗𑁆𑀓𑀸 𑀲𑀺𑀗𑁆𑀕𑀸𑀮𑀸 𑀘, 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀤𑀸𑀞𑀺𑀦𑁄;

𑀅𑀚𑀭𑀸 𑀦𑀽𑀦 𑀳𑁂𑀲𑁆𑀲𑀦𑁆𑀢𑀺, 𑀪𑀓𑁆𑀔𑀬𑀺𑀢𑁆𑀯𑀸 𑀧𑀪𑀸𑀯𑀢𑀺𑀁.

𑁪𑁩. ‘‘𑀲𑀘𑁂 𑀫𑀁𑀲𑀸𑀦𑀺 𑀳𑀭𑀺𑀁𑀲𑀼, 𑀔𑀢𑁆𑀢𑀺𑀬𑀸 𑀤𑀽𑀭𑀕𑀸𑀫𑀺𑀦𑁄;

𑀅𑀝𑁆𑀞𑀻𑀦𑀺 𑀅𑀫𑁆𑀫 𑀬𑀸𑀘𑀺𑀢𑁆𑀯𑀸, 𑀅𑀦𑀼𑀧𑀣𑁂 𑀤𑀳𑀸𑀣 𑀦𑀁.

𑁪𑁪. ‘‘𑀔𑁂𑀢𑁆𑀢𑀸𑀦𑀺 𑀅𑀫𑁆𑀫 𑀓𑀸𑀭𑁂𑀢𑁆𑀯𑀸, 𑀓𑀡𑀺𑀓𑀸𑀭𑁂𑀢𑁆𑀣 𑀭𑁄𑀧𑀬;

𑀬𑀤𑀸 𑀢𑁂 𑀧𑀼𑀧𑁆𑀨𑀺𑀢𑀸 𑀅𑀲𑁆𑀲𑀼, 𑀳𑁂𑀫𑀦𑁆𑀢𑀸𑀦𑀁 𑀳𑀺𑀫𑀘𑁆𑀘𑀬𑁂;

𑀲𑀭𑁂𑀬𑁆𑀬𑀸𑀣 𑀫𑀫𑀁 𑀅𑀫𑁆𑀫, 𑀏𑀯𑀁𑀯𑀡𑁆𑀡𑀸 𑀧𑀪𑀸𑀯𑀢𑀻’’𑀢𑀺.

𑀢𑀢𑁆𑀣 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀦𑁆𑀢𑀺𑀮 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀦𑁆𑀢𑀺 𑀲𑀸𑀲𑀧𑀓𑀓𑁆𑀓𑀮𑁄𑀡𑀓𑀓𑁆𑀓𑀫𑀢𑁆𑀢𑀺𑀓𑀓𑀓𑁆𑀓𑀢𑀺𑀮𑀓𑀓𑁆𑀓𑀳𑀮𑀺𑀤𑁆𑀤𑀺𑀓𑀓𑁆𑀓𑀫𑀼𑀔𑀘𑀼𑀡𑁆𑀡𑀓𑁂𑀳𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀓𑁆𑀓𑁂𑀳𑀺 𑀉𑀧𑀦𑀺𑀲𑁂𑀯𑀺𑀢𑀁. 𑀆𑀤𑀸𑀲𑀤𑀦𑁆𑀢𑀸𑀣𑀭𑀼𑀧𑀘𑁆𑀘𑀯𑁂𑀓𑁆𑀔𑀺𑀢𑀦𑁆𑀢𑀺 𑀤𑀦𑁆𑀢𑀫𑀬𑀣𑀭𑀼𑀫𑁆𑀳𑀺 𑀆𑀤𑀸𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀁 𑀢𑀢𑁆𑀣 𑀑𑀮𑁄𑀓𑁂𑀢𑁆𑀯𑀸 𑀫𑀡𑁆𑀟𑀺𑀢𑀁. 𑀲𑀼𑀪𑀦𑁆𑀢𑀺 𑀲𑀼𑀪𑀫𑀼𑀔𑀁. 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀚𑀁 𑀦𑀺𑀫𑁆𑀫𑀮𑀁. 𑀅𑀦𑀗𑁆𑀕𑀡𑀦𑁆𑀢𑀺 𑀕𑀡𑁆𑀟𑀧𑀺𑀴𑀓𑀸𑀤𑀺𑀤𑁄𑀲𑀭𑀳𑀺𑀢𑀁. 𑀙𑀼𑀤𑁆𑀥𑀦𑁆𑀢𑀺 𑀅𑀫𑁆𑀫 𑀏𑀯𑀭𑀽𑀧𑀁 𑀫𑀫 𑀫𑀼𑀔𑀁 𑀅𑀤𑁆𑀥𑀸 𑀇𑀤𑀸𑀦𑀺 𑀔𑀢𑁆𑀢𑀺𑀬𑁂𑀳𑀺 𑀙𑀟𑁆𑀟𑀺𑀢𑀁 𑀯𑀦𑁂 𑀅𑀭𑀜𑁆𑀜𑁂 𑀞𑀲𑁆𑀲𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀅𑀲𑀺𑀢𑁂𑀢𑀺 𑀓𑀸𑀴𑀓𑁂. 𑀯𑁂𑀮𑁆𑀮𑀺𑀢𑀕𑁆𑀕𑁂𑀢𑀺 𑀉𑀦𑁆𑀦𑀢𑀕𑁆𑀕𑁂. 𑀲𑀻𑀯𑀣𑀺𑀓𑀸𑀬𑀸𑀢𑀺 𑀲𑀼𑀲𑀸𑀦𑀫𑁆𑀳𑀺. 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀭𑀽𑀧𑁂 𑀫𑀫 𑀓𑁂𑀲𑁂 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀓𑀸 𑀕𑀺𑀚𑁆𑀛𑀸 𑀧𑀸𑀤𑁂𑀳𑀺 𑀧𑀳𑀭𑀺𑀢𑁆𑀯𑀸 𑀦𑀽𑀦 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺. 𑀕𑀬𑁆𑀳 𑀥𑀗𑁆𑀓𑁄 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀦𑁆𑀢𑀺 𑀅𑀫𑁆𑀫 𑀫𑀫 𑀏𑀯𑀭𑀽𑀧𑀁 𑀩𑀸𑀳𑀁 𑀦𑀽𑀦 𑀥𑀗𑁆𑀓𑁄 𑀕𑀳𑁂𑀢𑁆𑀯𑀸 𑀮𑀼𑀜𑁆𑀚𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀬𑁂𑀦𑀓𑀸𑀫𑀁 𑀕𑀘𑁆𑀙𑀺𑀲𑁆𑀲𑀢𑀺.

𑀢𑀸𑀮𑀽𑀧𑀦𑀺𑀪𑁂𑀢𑀺 𑀲𑀼𑀯𑀡𑁆𑀡𑀢𑀸𑀮𑀨𑀮𑀲𑀤𑀺𑀲𑁂. 𑀓𑀸𑀲𑀺𑀓𑀘𑀦𑁆𑀤𑀦𑁂𑀦𑀸𑀢𑀺 𑀲𑀼𑀔𑀼𑀫𑀘𑀦𑁆𑀤𑀦𑁂𑀦 𑀦𑀺𑀲𑁂𑀯𑀺𑀢𑁂. 𑀣𑀦𑁂𑀲𑀼 𑀫𑁂𑀢𑀺 𑀅𑀫𑁆𑀫 𑀫𑀫 𑀲𑀼𑀲𑀸𑀦𑁂 𑀧𑀢𑀺𑀢𑀸𑀬 𑀏𑀯𑀭𑀽𑀧𑁂 𑀣𑀦𑁂 𑀤𑀺𑀲𑁆𑀯𑀸 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑁂𑀲𑀼 𑀫𑁂 𑀣𑀦𑁂𑀲𑀼 𑀅𑀢𑁆𑀢𑀦𑁄 𑀢𑀦𑀼𑀚𑁄 𑀫𑀸𑀢𑀼 𑀢𑀭𑀼𑀡𑀧𑀼𑀢𑁆𑀢𑁄 𑀯𑀺𑀬 𑀦𑀽𑀦 𑀲𑀺𑀗𑁆𑀕𑀸𑀮𑁄 𑀮𑀫𑁆𑀩𑀺𑀲𑁆𑀲𑀢𑀺. 𑀲𑁄𑀡𑀺𑀦𑁆𑀢𑀺 𑀓𑀝𑀺𑀁. 𑀲𑀼𑀓𑁄𑀝𑁆𑀝𑀺𑀢𑀦𑁆𑀢𑀺 𑀕𑁄𑀳𑀦𑀼𑀓𑁂𑀦 𑀧𑀳𑀭𑀺𑀢𑁆𑀯𑀸 𑀲𑀼𑀯𑀟𑁆𑀠𑀺𑀢𑀁. 𑀅𑀯𑀢𑁆𑀣𑀦𑁆𑀢𑀺 𑀙𑀟𑁆𑀟𑀺𑀢𑀁. 𑀪𑀓𑁆𑀔𑀬𑀺𑀢𑁆𑀯𑀸𑀢𑀺 𑀅𑀫𑁆𑀫 𑀏𑀢𑁂 𑀏𑀢𑁆𑀢𑀓𑀸 𑀦𑀽𑀦 𑀫𑀫 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀲𑀘𑁂 𑀫𑀁𑀲𑀸𑀦𑀺 𑀳𑀭𑀺𑀁𑀲𑀽𑀢𑀺 𑀅𑀫𑁆𑀫 𑀲𑀘𑁂 𑀢𑁂 𑀔𑀢𑁆𑀢𑀺𑀬𑀸 𑀫𑀬𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀫𑀫 𑀫𑀁𑀲𑀸𑀦𑀺 𑀳𑀭𑁂𑀬𑁆𑀬𑀼𑀁, 𑀅𑀣 𑀢𑀼𑀫𑁆𑀳𑁂 𑀅𑀝𑁆𑀞𑀻𑀦𑀺 𑀬𑀸𑀘𑀺𑀢𑁆𑀯𑀸 𑀅𑀦𑀼𑀧𑀣𑁂 𑀤𑀳𑀸𑀣𑀦𑀁, 𑀚𑀗𑁆𑀖𑀫𑀕𑁆𑀕𑀫𑀳𑀸𑀫𑀕𑁆𑀕𑀸𑀦𑀁 𑀅𑀦𑁆𑀢𑀭𑁂 𑀤𑀳𑁂𑀬𑁆𑀬𑀸𑀣𑀸𑀢𑀺 𑀯𑀤𑀢𑀺. 𑀔𑁂𑀢𑁆𑀢𑀸𑀦𑀻𑀢𑀺 𑀅𑀫𑁆𑀫 𑀫𑀫 𑀛𑀸𑀧𑀺𑀢𑀝𑁆𑀞𑀸𑀦𑁂 𑀫𑀸𑀮𑀸𑀤𑀺𑀯𑀢𑁆𑀣𑀽𑀦𑀺 𑀓𑀸𑀭𑁂𑀢𑁆𑀯𑀸 𑀏𑀢𑁆𑀣 𑀏𑀢𑁂𑀲𑀼 𑀔𑁂𑀢𑁆𑀢𑁂𑀲𑀼 𑀓𑀡𑀺𑀓𑀸𑀭𑀭𑀼𑀓𑁆𑀔𑁂 𑀭𑁄𑀧𑀬. 𑀳𑀺𑀫𑀘𑁆𑀘𑀬𑁂𑀢𑀺 𑀳𑀺𑀫𑀧𑀸𑀢𑀸𑀢𑀺𑀓𑁆𑀓𑀫𑁂 𑀨𑀕𑁆𑀕𑀼𑀡𑀫𑀸𑀲𑁂. 𑀲𑀭𑁂𑀬𑁆𑀬𑀸𑀣𑀸𑀢𑀺 𑀢𑁂𑀲𑀁 𑀧𑀼𑀧𑁆𑀨𑀸𑀦𑀁 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀁 𑀧𑀽𑀭𑁂𑀢𑁆𑀯𑀸 𑀊𑀭𑀽𑀲𑀼 𑀞𑀧𑁂𑀢𑁆𑀯𑀸 𑀫𑀫 𑀥𑀻𑀢𑀸 𑀧𑀪𑀸𑀯𑀢𑀻 𑀏𑀯𑀁𑀯𑀡𑁆𑀡𑀸𑀢𑀺 𑀲𑀭𑁂𑀬𑁆𑀬𑀸𑀣.