𑁨𑁧. 𑀅𑀲𑀻𑀢𑀺𑀦𑀺𑀧𑀸𑀢𑁄

[𑁫𑁩𑁩] 𑁧. 𑀘𑀽𑀴𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀫𑀼𑀔𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁂𑀦 𑀳𑀺 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀧𑀬𑁄𑀚𑀺𑀢𑁂𑀲𑀼 𑀥𑀦𑀼𑀕𑁆𑀕𑀳𑁂𑀲𑀼 𑀲𑀩𑁆𑀩𑀧𑀞𑀫𑀁 𑀧𑁂𑀲𑀺𑀢𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀦𑀸𑀳𑀁, 𑀪𑀦𑁆𑀢𑁂, 𑀲𑀓𑁆𑀓𑁄𑀫𑀺 𑀢𑀁 𑀪𑀕𑀯𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀫𑀳𑀺𑀤𑁆𑀥𑀺𑀓𑁄 𑀲𑁄 𑀪𑀕𑀯𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀯𑀼𑀢𑁆𑀢𑁂 𑀤𑁂𑀯𑀤𑀢𑁆𑀢𑁄 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀢𑁆𑀯𑀁 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺, 𑀅𑀳𑀫𑁂𑀯 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀲𑁆𑀲 𑀧𑀘𑁆𑀙𑀺𑀫𑀙𑀸𑀬𑀸𑀬 𑀘𑀗𑁆𑀓𑀫𑀦𑁆𑀢𑁂 𑀲𑀬𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀦𑁆𑀢𑀯𑁂𑀕𑁂𑀦 𑀫𑀳𑀢𑀺𑀁 𑀲𑀺𑀮𑀁 𑀧𑀯𑀺𑀚𑁆𑀛𑀺, ‘‘𑀇𑀫𑀸𑀬 𑀲𑀺𑀮𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀤𑀸 𑀤𑁆𑀯𑁂 𑀧𑀩𑁆𑀩𑀢𑀓𑀽𑀝𑀸 𑀲𑀫𑀸𑀕𑀦𑁆𑀢𑁆𑀯𑀸 𑀢𑀁 𑀲𑀺𑀮𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀢𑀢𑁄 𑀧𑀧𑀝𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀁 𑀧𑀳𑀭𑀺𑀢𑁆𑀯𑀸 𑀭𑀼𑀳𑀺𑀭𑀁 𑀉𑀧𑁆𑀧𑀸𑀤𑁂𑀲𑀺, 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼. 𑀚𑀻𑀯𑀓𑁄 𑀢𑀣𑀸𑀕𑀢𑀲𑁆𑀲 𑀧𑀸𑀤𑀁 𑀲𑀢𑁆𑀣𑀓𑁂𑀦 𑀨𑀸𑀮𑁂𑀢𑁆𑀯𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀯𑀫𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀁 𑀅𑀧𑀦𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀆𑀮𑀺𑀫𑁆𑀧𑀺𑀢𑁆𑀯𑀸 𑀦𑀺𑀭𑁄𑀕𑀫𑀓𑀸𑀲𑀺. 𑀲𑀢𑁆𑀣𑀸 𑀧𑀼𑀭𑀺𑀫𑀲𑀤𑀺𑀲𑀫𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀳𑀢𑀺𑀬𑀸 𑀩𑀼𑀤𑁆𑀥𑀮𑀻𑀮𑀸𑀬 𑀯𑀺𑀘𑀭𑀺.

𑀅𑀣 𑀦𑀁 𑀤𑀺𑀲𑁆𑀯𑀸 𑀤𑁂𑀯𑀤𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀓𑁄𑀘𑀺 𑀫𑀦𑀼𑀲𑁆𑀲𑀪𑀽𑀢𑁄 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀭𑀜𑁆𑀜𑁄 𑀔𑁄 𑀧𑀦 𑀦𑀸𑀴𑀸𑀕𑀺𑀭𑀺 𑀦𑀸𑀫 𑀳𑀢𑁆𑀣𑀻 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀦 𑀚𑀸𑀦𑀸𑀢𑀺, 𑀲𑁄 𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫, 𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀫𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁄𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀆𑀳. 𑀤𑁂𑀯𑀤𑀢𑁆𑀢𑁄𑀧𑀺 𑀦𑀁 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀳𑀢𑁆𑀣𑀻 𑀓𑀺𑀢𑁆𑀢𑀓𑀁 𑀲𑀼𑀭𑀁 𑀧𑀺𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀝𑁆𑀞 𑀖𑀝𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀲𑁆𑀯𑁂 𑀢𑁆𑀯𑀁 𑀢𑀁 𑀲𑁄𑀴𑀲 𑀖𑀝𑁂 𑀧𑀸𑀬𑁂𑀢𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀅𑀪𑀺𑀫𑀼𑀔𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀫𑀢𑁆𑀢𑀁 𑀓𑀢𑁆𑀯𑀸 𑀦𑀕𑀭𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀦𑀸𑀕𑀭𑀸 𑀧𑀸𑀢𑁄𑀯 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀫𑀸 𑀧𑀝𑀺𑀧𑀚𑁆𑀚𑀺𑀁𑀲𑀽’’𑀢𑀺. 𑀤𑁂𑀯𑀤𑀢𑁆𑀢𑁄𑀧𑀺 𑀭𑀸𑀚𑀦𑀺𑀯𑁂𑀲𑀦𑀸 𑀑𑀭𑀼𑀬𑁆𑀳 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀬𑀁 𑀪𑀡𑁂 𑀉𑀘𑁆𑀘𑀝𑁆𑀞𑀸𑀦𑀺𑀬𑀁 𑀦𑀻𑀘𑀝𑁆𑀞𑀸𑀦𑁂, 𑀦𑀻𑀘𑀝𑁆𑀞𑀸𑀦𑀺𑀬𑀁 𑀯𑀸 𑀉𑀘𑁆𑀘𑀝𑁆𑀞𑀸𑀦𑁂 𑀓𑀸𑀢𑀼𑀁 𑀲𑀫𑀢𑁆𑀣𑀸, 𑀲𑀘𑁂 𑀯𑁄 𑀬𑀲𑁂𑀦 𑀅𑀢𑁆𑀣𑁄, 𑀲𑁆𑀯𑁂 𑀧𑀸𑀢𑁄𑀯 𑀦𑀸𑀴𑀸𑀕𑀺𑀭𑀺𑀁 𑀢𑀺𑀔𑀺𑀡𑀲𑀼𑀭𑀸𑀬 𑀲𑁄𑀴𑀲 𑀖𑀝𑁂 𑀧𑀸𑀬𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀕𑀫𑀦𑀯𑁂𑀮𑀸𑀬 𑀢𑀼𑀢𑁆𑀢𑀢𑁄𑀫𑀭𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀓𑀼𑀚𑁆𑀛𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑀲𑀸 𑀧𑀯𑀢𑁆𑀢𑀺 𑀲𑀓𑀮𑀦𑀕𑀭𑁂 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀫𑀸𑀫𑀓𑀸 𑀉𑀧𑀸𑀲𑀓𑀸 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑁆𑀯𑁂 𑀢𑀼𑀫𑁆𑀳𑁂𑀳𑀺 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀢𑀺, 𑀲𑁆𑀯𑁂 𑀧𑀺𑀡𑁆𑀟𑀸𑀬 𑀅𑀧𑀯𑀺𑀲𑀺𑀢𑁆𑀯𑀸 𑀇𑀥𑁂𑀯 𑀳𑁄𑀣, 𑀫𑀬𑀁 𑀯𑀺𑀳𑀸𑀭𑁂𑀬𑁂𑀯 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸𑀧𑀺 ‘‘𑀲𑁆𑀯𑁂 𑀧𑀺𑀡𑁆𑀟𑀸𑀬 𑀦 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 ‘‘𑀅𑀳𑀁 𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀤𑀫𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀢𑁆𑀯𑀸𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀆𑀕𑀫𑀺𑀲𑁆𑀲𑀸𑀫𑀺, 𑀭𑀸𑀚𑀕𑀳𑀯𑀸𑀲𑀺𑀦𑁄𑀧𑀺 𑀩𑀳𑀽𑀦𑀺 𑀪𑀢𑁆𑀢𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂 𑀯𑀺𑀳𑀸𑀭𑁂𑀬𑁂𑀯 𑀪𑀢𑁆𑀢𑀕𑁆𑀕𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑁂𑀲𑀁 𑀅𑀥𑀺𑀯𑀸𑀲𑁂𑀲𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀪𑀢𑁆𑀢𑀪𑀸𑀚𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀯𑀺𑀳𑀸𑀭𑁂𑀬𑁂𑀯 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀧𑀞𑀫𑀬𑀸𑀫𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀲𑁆𑀲 𑀧𑀞𑀫𑀓𑁄𑀝𑁆𑀞𑀸𑀲𑁂 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀦𑀸𑀴𑀸𑀕𑀺𑀭𑀺𑀤𑀫𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀳𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀆𑀦𑀦𑁆𑀤, 𑀅𑀚𑁆𑀚 𑀭𑀸𑀚𑀕𑀳𑀧𑀭𑀺𑀯𑀢𑁆𑀢𑀓𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀫𑀬𑀸𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑀼𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀯𑁂𑀴𑀼𑀯𑀦𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀅𑀣 𑀳𑀢𑁆𑀣𑀺𑀫𑁂𑀡𑁆𑀟𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀫𑀳𑀦𑁆𑀢𑁄 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀫𑀦𑀼𑀲𑁆𑀲𑀸 ‘‘𑀅𑀚𑁆𑀚 𑀓𑀺𑀭 𑀩𑀼𑀤𑁆𑀥𑀦𑀸𑀕𑀲𑁆𑀲 𑀢𑀺𑀭𑀘𑁆𑀙𑀸𑀦𑀦𑀸𑀕𑁂𑀦 𑀲𑀗𑁆𑀕𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀽𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀦𑀸𑀴𑀸𑀕𑀺𑀭𑀺𑀤𑀫𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀲𑀸𑀤𑀳𑀫𑁆𑀫𑀺𑀬𑀕𑁂𑀳𑀘𑁆𑀙𑀤𑀦𑀸𑀤𑀻𑀦𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀲𑀤𑁆𑀥𑀸 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 ‘‘𑀅𑀬𑀁 𑀦𑀸𑀴𑀸𑀕𑀺𑀭𑀺 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀲𑁄 𑀅𑀚𑁆𑀚 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀅𑀚𑁆𑀚 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀲𑀸𑀤𑀸𑀤𑀻𑀲𑀼 𑀅𑀝𑁆𑀞𑀁𑀲𑀼.

𑀳𑀢𑁆𑀣𑀻𑀧𑀺 𑀪𑀕𑀯𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀢𑀸𑀲𑁂𑀦𑁆𑀢𑁄 𑀕𑁂𑀳𑀸𑀦𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀲𑀓𑀝𑀸𑀦𑀺 𑀲𑀁𑀘𑀼𑀡𑁆𑀡𑁂𑀦𑁆𑀢𑁄 𑀲𑁄𑀡𑁆𑀟𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁄 𑀧𑀩𑁆𑀩𑀢𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀸𑀪𑀺𑀥𑀸𑀯𑀺. 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀦𑀸𑀴𑀸𑀕𑀺𑀭𑀺 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀇𑀫𑀁 𑀭𑀘𑁆𑀙𑀁 𑀧𑀝𑀺𑀧𑀦𑁆𑀦𑁄, 𑀦 𑀔𑁄 𑀧𑀦𑀸𑀬𑀁 𑀩𑀼𑀤𑁆𑀥𑀸𑀤𑀺𑀕𑀼𑀡𑀁 𑀚𑀸𑀦𑀸𑀢𑀺, 𑀧𑀝𑀺𑀓𑁆𑀓𑀫𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀧𑀝𑀺𑀓𑁆𑀓𑀫𑀢𑀼 𑀲𑀼𑀕𑀢𑁄’’𑀢𑀺. 𑀫𑀸, 𑀪𑀺𑀓𑁆𑀔𑀯𑁂, 𑀪𑀸𑀬𑀺𑀢𑁆𑀣, 𑀧𑀝𑀺𑀩𑀮𑁄 𑀅𑀳𑀁 𑀦𑀸𑀴𑀸𑀕𑀺𑀭𑀺𑀁 𑀤𑀫𑁂𑀢𑀼𑀦𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀬𑀸𑀘𑀺 𑁋 ‘‘𑀪𑀦𑁆𑀢𑁂, 𑀧𑀺𑀢𑀼 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀸𑀫 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀪𑀸𑀭𑁄, 𑀅𑀳𑀫𑁂𑀯 𑀢𑀁 𑀤𑀫𑁂𑀫𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀅𑀜𑁆𑀜𑀁, 𑀲𑀸𑀯𑀓𑀩𑀮𑀁 𑀅𑀜𑁆𑀜𑀁, 𑀢𑀺𑀝𑁆𑀞 𑀢𑁆𑀯’’𑀦𑁆𑀢𑀺 𑀧𑀝𑀺𑀩𑀸𑀳𑀺. 𑀏𑀯𑀁 𑀬𑁂𑀪𑀼𑀬𑁆𑀬𑁂𑀦 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀲𑀩𑁆𑀩𑁂𑀧𑀺 𑀧𑀝𑀺𑀩𑀸𑀳𑀺. 𑀅𑀣 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀭𑀺 𑀩𑀮𑀯𑀲𑀺𑀦𑁂𑀳𑁂𑀦 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀬𑀁 𑀳𑀢𑁆𑀣𑀻 𑀧𑀞𑀫𑀁 𑀫𑀁 𑀫𑀸𑀭𑁂𑀢𑀽’’𑀢𑀺 𑀢𑀣𑀸𑀕𑀢𑀲𑁆𑀲𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀧𑁂𑀳𑀺, 𑀆𑀦𑀦𑁆𑀤, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀅𑀬𑀁 𑀳𑀢𑁆𑀣𑀻 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀲𑀤𑀺𑀲𑁄 𑀧𑀞𑀫𑀁 𑀫𑀁 𑀫𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀽’’𑀢𑀺 𑀣𑁂𑀭𑁄 𑀅𑀯𑀘. 𑀬𑀸𑀯𑀢𑀢𑀺𑀬𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀣𑁂𑀯 𑀅𑀝𑁆𑀞𑀸𑀲𑀺 𑀦 𑀧𑀝𑀺𑀓𑁆𑀓𑀫𑀺. 𑀅𑀣 𑀦𑀁 𑀪𑀕𑀯𑀸 𑀇𑀤𑁆𑀥𑀺𑀩𑀮𑁂𑀦 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀞𑀧𑁂𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀏𑀓𑀸 𑀇𑀢𑁆𑀣𑀻 𑀦𑀸𑀴𑀸𑀕𑀺𑀭𑀺𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑀸 𑀧𑀮𑀸𑀬𑀫𑀸𑀦𑀸 𑀅𑀗𑁆𑀓𑁂𑀦 𑀕𑀳𑀺𑀢𑀁 𑀤𑀸𑀭𑀓𑀁 𑀳𑀢𑁆𑀣𑀺𑀦𑁄 𑀘 𑀢𑀣𑀸𑀕𑀢𑀲𑁆𑀲 𑀘 𑀅𑀦𑁆𑀢𑀭𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀳𑀢𑁆𑀣𑀻 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑀸𑀭𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀤𑀸 𑀤𑀸𑀭𑀓𑁄 𑀫𑀳𑀸𑀭𑀯𑀁 𑀭𑀯𑀺. 𑀲𑀢𑁆𑀣𑀸 𑀦𑀸𑀴𑀸𑀕𑀺𑀭𑀺𑀁 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀸𑀬 𑀨𑀭𑀺𑀢𑁆𑀯𑀸 𑀲𑀼𑀫𑀥𑀼𑀭𑀁 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀦𑀸𑀴𑀸𑀕𑀺𑀭𑀺 𑀢𑀁 𑀲𑁄𑀴𑀲 𑀲𑀼𑀭𑀸𑀖𑀝𑁂 𑀧𑀸𑀬𑁂𑀢𑁆𑀯𑀸 𑀫𑀢𑁆𑀢𑀁 𑀓𑀭𑁄𑀦𑁆𑀢𑀸 𑀦 ‘𑀅𑀜𑁆𑀜𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 𑀓𑀭𑀺𑀁𑀲𑀼, ‘𑀫𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 𑀧𑀦 𑀓𑀭𑀺𑀁𑀲𑀼, 𑀫𑀸 𑀅𑀓𑀸𑀭𑀡𑁂𑀦 𑀚𑀗𑁆𑀖𑀸𑀬𑁄 𑀓𑀺𑀮𑀫𑁂𑀦𑁆𑀢𑁄 𑀯𑀺𑀘𑀭𑀺, 𑀇𑀢𑁄 𑀏𑀳𑀻’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀪𑀕𑀯𑀢𑁄 𑀭𑀽𑀧𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀩𑀼𑀤𑁆𑀥𑀢𑁂𑀚𑁂𑀦 𑀧𑀘𑁆𑀙𑀺𑀦𑁆𑀦𑀲𑀼𑀭𑀸𑀫𑀤𑁄 𑀲𑁄𑀡𑁆𑀟𑀁 𑀑𑀮𑀫𑁆𑀩𑁂𑀦𑁆𑀢𑁄 𑀓𑀡𑁆𑀡𑁂 𑀘𑀸𑀮𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀦𑀸𑀴𑀸𑀕𑀺𑀭𑀺, 𑀢𑁆𑀯𑀁 𑀢𑀺𑀭𑀘𑁆𑀙𑀸𑀦𑀳𑀢𑁆𑀣𑀻, 𑀅𑀳𑀁 𑀩𑀼𑀤𑁆𑀥𑀯𑀸𑀭𑀡𑁄, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀪𑀯, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀸’’𑀢𑀺 𑀯𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀓𑀼𑀫𑁆𑀪𑁂 𑀧𑀭𑀸𑀫𑀲𑀺𑀢𑁆𑀯𑀸 𑁋

‘‘𑀫𑀸 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄, 𑀤𑀼𑀓𑁆𑀔𑁄 𑀳𑀺 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄;

𑀦 𑀳𑀺 𑀦𑀸𑀕𑀳𑀢𑀲𑁆𑀲 𑀓𑀼𑀜𑁆𑀚𑀭, 𑀲𑀼𑀕𑀢𑀺 𑀳𑁄𑀢𑀺 𑀇𑀢𑁄 𑀧𑀭𑀁 𑀬𑀢𑁄.

‘‘𑀫𑀸 𑀘 𑀫𑀤𑁄 𑀫𑀸 𑀘 𑀧𑀫𑀸𑀤𑁄, 𑀦 𑀳𑀺 𑀧𑀫𑀢𑁆𑀢𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑁂;

𑀢𑁆𑀯𑀜𑁆𑀜𑁂𑀯 𑀢𑀣𑀸 𑀓𑀭𑀺𑀲𑁆𑀲𑀲𑀺, 𑀬𑁂𑀦 𑀢𑁆𑀯𑀁 𑀲𑀼𑀕𑀢𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺. (𑀘𑀽𑀴𑀯. 𑁩𑁪𑁨) 𑁋

𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺. 𑀲𑀘𑁂 𑀓𑀺𑀭 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀪𑀯𑀺𑀲𑁆𑀲𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀥𑀺𑀕𑀫𑀺𑀲𑁆𑀲𑀸. 𑀫𑀦𑀼𑀲𑁆𑀲𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀉𑀦𑁆𑀦𑀤𑀺𑀁𑀲𑀼 𑀅𑀧𑁆𑀨𑁄𑀝𑀺𑀁𑀲𑀼, 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 𑀦𑀸𑀦𑀸𑀪𑀭𑀡𑀸𑀦𑀺 𑀔𑀺𑀧𑀺𑀁𑀲𑀼, 𑀢𑀸𑀦𑀺 𑀳𑀢𑁆𑀣𑀺𑀲𑁆𑀲 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑀬𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀦𑀸𑀴𑀸𑀕𑀺𑀭𑀺 𑀥𑀦𑀧𑀸𑀮𑀓𑁄 𑀦𑀸𑀫 𑀚𑀸𑀢𑁄. 𑀢𑀲𑁆𑀫𑀺𑀁 𑀔𑁄 𑀧𑀦 𑀥𑀦𑀧𑀸𑀮𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀁 𑀧𑀺𑀯𑀺𑀁𑀲𑀼. 𑀲𑀢𑁆𑀣𑀸 𑀥𑀦𑀧𑀸𑀮𑀓𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀤𑁂 𑀧𑀁𑀲𑀽𑀦𑀺 𑀕𑀳𑁂𑀢𑁆𑀯𑀸 𑀉𑀧𑀭𑀺 𑀫𑀼𑀤𑁆𑀥𑀦𑀺 𑀆𑀓𑀺𑀭𑀺𑀢𑁆𑀯𑀸 𑀧𑀝𑀺𑀓𑀼𑀝𑀺𑀢𑁄𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀤𑀲𑁆𑀲𑀦𑀽𑀧𑀘𑀸𑀭𑁂 𑀞𑀺𑀢𑁄 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀧𑀸𑀯𑀺𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀦𑁆𑀢𑀲𑀼𑀤𑀦𑁆𑀢𑁄 𑀳𑀼𑀢𑁆𑀯𑀸 𑀦 𑀓𑀜𑁆𑀘𑀺 𑀯𑀺𑀳𑁂𑀞𑁂𑀢𑀺. 𑀲𑀢𑁆𑀣𑀸 𑀦𑀺𑀧𑁆𑀨𑀦𑁆𑀦𑀫𑀦𑁄𑀭𑀣𑁄 ‘‘𑀬𑁂𑀳𑀺 𑀬𑀁 𑀥𑀦𑀁 𑀔𑀺𑀢𑁆𑀢𑀁, 𑀢𑁂𑀲𑀜𑁆𑀜𑁂𑀯 𑀢𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 ‘‘𑀅𑀚𑁆𑀚 𑀫𑀬𑀸 𑀫𑀳𑀦𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑀁, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀅𑀧𑁆𑀧𑀝𑀺𑀭𑀽𑀧’’𑀦𑁆𑀢𑀺 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀬𑀧𑁆𑀧𑀢𑁆𑀢𑁄 𑀯𑀺𑀬 𑀔𑀢𑁆𑀢𑀺𑀬𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀕𑀢𑁄. 𑀦𑀕𑀭𑀯𑀸𑀲𑀺𑀦𑁄 𑀩𑀳𑀼𑀁 𑀅𑀦𑁆𑀦𑀧𑀸𑀦𑀔𑀸𑀤𑀦𑀻𑀬𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼.

𑀢𑀁 𑀤𑀺𑀯𑀲𑀁 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀁 𑀧𑀽𑀭𑁂𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀢𑀣𑀸𑀕𑀢𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀦𑁆𑀢𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀦𑀸𑀴𑀸𑀕𑀺𑀭𑀺𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀩𑀸𑀳𑀺𑀬𑀫𑀸𑀦𑁄𑀧𑀺 𑀦𑀸𑀧𑀕𑀢𑁄, 𑀅𑀳𑁄 𑀤𑀼𑀓𑁆𑀓𑀭𑀓𑀸𑀭𑀓𑁄, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺. 𑀲𑀢𑁆𑀣𑀸 ‘‘𑀆𑀦𑀦𑁆𑀤𑀲𑁆𑀲 𑀕𑀼𑀡𑀓𑀣𑀸 𑀧𑀯𑀢𑁆𑀢𑀢𑀺, 𑀕𑀦𑁆𑀢𑀩𑁆𑀩𑀁 𑀫𑀬𑀸 𑀏𑀢𑁆𑀣𑀸’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀫𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀳𑀺𑀁𑀲𑀓𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀲𑀸𑀕𑀮𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀦𑁂𑀲𑀸𑀤𑀕𑀸𑀫𑀓𑁂 𑀅𑀜𑁆𑀜𑀢𑀭𑁄 𑀦𑁂𑀲𑀸𑀤𑁄 𑀧𑀸𑀲𑁂𑀳𑀺 𑀲𑀓𑀼𑀡𑁂 𑀩𑀦𑁆𑀥𑀺𑀢𑁆𑀯𑀸 𑀦𑀕𑀭𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀦𑀕𑀭𑀢𑁄 𑀘 𑀅𑀯𑀺𑀤𑀽𑀭𑁂 𑀆𑀯𑀝𑁆𑀝𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑁄 𑀫𑀸𑀦𑀼𑀲𑀺𑀬𑁄 𑀦𑀸𑀫 𑀧𑀤𑀼𑀫𑀲𑀭𑁄 𑀅𑀳𑁄𑀲𑀺 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑁄. 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑁄 𑀲𑀓𑀼𑀡𑀲𑀗𑁆𑀖𑁄 𑀑𑀢𑀭𑀺. 𑀲𑁄 𑀦𑁂𑀲𑀸𑀤𑁄 𑀢𑀢𑁆𑀣 𑀅𑀦𑀺𑀬𑀸𑀫𑁂𑀦 𑀧𑀸𑀲𑁂 𑀑𑀟𑁆𑀟𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸 𑀙𑀦𑁆𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀕𑀼𑀳𑀸𑀬𑀁 𑀯𑀲𑀢𑀺, 𑀲𑀼𑀫𑀼𑀔𑁄 𑀦𑀸𑀫𑀲𑁆𑀲 𑀲𑁂𑀦𑀸𑀧𑀢𑀺 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀢𑁄 𑀳𑀁𑀲𑀬𑀽𑀣𑀸 𑀓𑀢𑀺𑀧𑀬𑀸 𑀲𑀼𑀯𑀡𑁆𑀡𑀳𑀁𑀲𑀸 𑀫𑀸𑀦𑀼𑀲𑀺𑀬𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀧𑀳𑀽𑀢𑀕𑁄𑀘𑀭𑁂 𑀢𑀲𑁆𑀫𑀺𑀁 𑀬𑀣𑀸𑀲𑀼𑀔𑀁 𑀯𑀺𑀘𑀭𑀺𑀢𑁆𑀯𑀸 𑀲𑀼𑀳𑀺𑀢𑀸 𑀘𑀺𑀢𑁆𑀢𑀓𑀽𑀝𑀁 𑀆𑀕𑀦𑁆𑀢𑁆𑀯𑀸 𑀥𑀢𑀭𑀝𑁆𑀞𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀧𑀣𑁂 𑀫𑀸𑀦𑀼𑀲𑀺𑀬𑁄 𑀦𑀸𑀫 𑀧𑀤𑀼𑀫𑀲𑀭𑁄 𑀲𑀫𑁆𑀧𑀦𑁆𑀦𑀕𑁄𑀘𑀭𑁄, 𑀢𑀢𑁆𑀣 𑀕𑁄𑀘𑀭𑀁 𑀕𑀡𑁆𑀳𑀺𑀢𑀼𑀁 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀫𑀦𑀼𑀲𑁆𑀲𑀧𑀣𑁄 𑀦𑀸𑀫 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀫𑀸 𑀯𑁄 𑀭𑀼𑀘𑁆𑀘𑀺𑀢𑁆𑀣𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀘𑁂 𑀢𑀼𑀫𑁆𑀳𑀸𑀓𑀁 𑀭𑀼𑀘𑁆𑀘𑀢𑀺, 𑀕𑀘𑁆𑀙𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑁄 𑀢𑀁 𑀲𑀭𑀁 𑀅𑀕𑀫𑀸𑀲𑀺. 𑀲𑁄 𑀆𑀓𑀸𑀲𑀸 𑀑𑀢𑀭𑀦𑁆𑀢𑁄 𑀧𑀸𑀤𑀁 𑀧𑀸𑀲𑁂 𑀧𑀯𑁂𑀲𑁂𑀦𑁆𑀢𑁄𑀬𑁂𑀯 𑀑𑀢𑀭𑀺. 𑀅𑀣𑀲𑁆𑀲 𑀧𑀸𑀲𑁄 𑀧𑀸𑀤𑀁 𑀅𑀬𑀧𑀝𑁆𑀝𑀓𑁂𑀦 𑀓𑀟𑁆𑀠𑀦𑁆𑀢𑁄 𑀯𑀺𑀬 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀅𑀣𑀲𑁆𑀲 ‘‘𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀞𑀫𑀯𑀸𑀭𑁂 𑀘𑀫𑁆𑀫𑀁 𑀙𑀺𑀚𑁆𑀚𑀺, 𑀤𑀼𑀢𑀺𑀬𑀯𑀸𑀭𑁂 𑀫𑀁𑀲𑀁 𑀙𑀺𑀚𑁆𑀚𑀺, 𑀢𑀢𑀺𑀬𑀯𑀸𑀭𑁂 𑀦𑁆𑀳𑀸𑀭𑀼 𑀙𑀺𑀚𑁆𑀚𑀺, 𑀧𑀸𑀲𑁄 𑀅𑀝𑁆𑀞𑀺𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺, 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀩𑀤𑁆𑀥𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸 𑀫𑁂 𑀉𑀢𑁆𑀭𑀲𑁆𑀢𑀸 𑀳𑀼𑀢𑁆𑀯𑀸 𑀕𑁄𑀘𑀭𑀁 𑀅𑀕𑁆𑀕𑀡𑁆𑀳𑀺𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸𑀯 𑀧𑀮𑀸𑀬𑀦𑁆𑀢𑀸 𑀤𑀼𑀩𑁆𑀩𑀮𑀢𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀜𑀸𑀢𑀻𑀦𑀁 𑀬𑀸𑀯𑀤𑀢𑁆𑀣𑀁 𑀘𑀭𑀺𑀢𑁆𑀯𑀸 𑀳𑀁𑀲𑀸𑀦𑀁 𑀓𑀻𑀴𑀦𑀓𑀸𑀮𑁂 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀳𑀁𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀸𑀪𑀺𑀫𑀼𑀔𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀲𑀼𑀫𑀼𑀔𑁄 𑀳𑀁𑀲𑀲𑁂𑀦𑀸𑀧𑀢𑀺 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀤𑀁 𑀪𑀬𑀁 𑀫𑀳𑀸𑀭𑀸𑀚𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀚𑀸𑀦𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀳𑀁𑀲𑀕𑀡𑀲𑁆𑀲 𑀅𑀦𑁆𑀢𑀭𑁂 𑀫𑀳𑀸𑀲𑀢𑁆𑀢𑀁 𑀅𑀤𑀺𑀲𑁆𑀯𑀸 𑀫𑀚𑁆𑀛𑀺𑀫𑀳𑀁𑀲𑀕𑀡𑀁 𑀯𑀺𑀘𑀺𑀦𑀺, 𑀢𑀢𑁆𑀣𑀧𑀺 𑀅𑀤𑀺𑀲𑁆𑀯𑀸 𑀧𑀘𑁆𑀙𑀺𑀫𑀳𑀁𑀲𑀕𑀡𑀁 𑀯𑀺𑀘𑀺𑀦𑀺, 𑀢𑀢𑁆𑀣𑀧𑀺 𑀅𑀤𑀺𑀲𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀢𑀲𑁆𑀲𑁂𑀯𑁂𑀤𑀁 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀧𑀸𑀲𑁂 𑀩𑀤𑁆𑀥𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀤𑀼𑀓𑁆𑀔𑀸𑀢𑀼𑀭𑀁 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀼𑀫𑁆𑀳𑁂 𑀧𑀸𑀲𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄𑀯 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀯𑀻𑀫𑀁𑀲𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀲𑀼𑀫𑀼𑀔 𑀅𑀦𑀼𑀧𑀘𑀺𑀦𑀦𑁆𑀢𑀸, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸 𑀓𑀗𑁆𑀔𑀺, 𑀦𑀢𑁆𑀣𑀺 𑀩𑀤𑁆𑀥𑁂 𑀲𑀳𑀸𑀬𑀢𑀸’’𑀢𑀺.

𑀢𑀢𑁆𑀣 𑀅𑀦𑀼𑀧𑀘𑀺𑀦𑀦𑁆𑀢𑀸𑀢𑀺 𑀲𑀺𑀦𑁂𑀳𑁂𑀦 𑀆𑀮𑀬𑀯𑀲𑁂𑀦 𑀅𑀦𑁄𑀮𑁄𑀓𑁂𑀦𑁆𑀢𑀸. 𑀧𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁂 𑀙𑀦𑁆𑀦𑀯𑀼𑀢𑀺 𑀳𑀁𑀲𑀲𑀳𑀲𑁆𑀲𑀸 𑀜𑀸𑀢𑀺𑀯𑀺𑀳𑀗𑁆𑀕𑀫𑀸 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀫𑁆𑀧𑀺 𑀕𑀘𑁆𑀙, 𑀫𑀸 𑀇𑀥 𑀯𑀸𑀲𑀁 𑀆𑀓𑀗𑁆𑀔𑀺, 𑀏𑀯𑀜𑁆𑀳𑀺 𑀧𑀸𑀲𑁂𑀦 𑀩𑀤𑁆𑀥𑁂 𑀫𑀬𑀺 𑀲𑀳𑀸𑀬𑀢𑀸 𑀦𑀸𑀫 𑀦𑀢𑁆𑀣𑀺, 𑀦 𑀳𑀺 𑀢𑁂 𑀅𑀳𑀁 𑀇𑀤𑀸𑀦𑀺 𑀓𑀺𑀜𑁆𑀘𑀺 𑀲𑀳𑀸𑀬𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀓𑀺𑀁 𑀢𑁂 𑀫𑀬𑀸 𑀦𑀺𑀭𑀽𑀧𑀓𑀸𑀭𑁂𑀦, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀕𑀘𑁆𑀙𑁂𑀯𑀸𑀢𑀺 𑀯𑀤𑀢𑀺.

𑀇𑀢𑁄 𑀧𑀭𑀁 𑁋

𑁨. ‘‘𑀕𑀘𑁆𑀙𑁂 𑀯𑀸𑀳𑀁 𑀦 𑀯𑀸 𑀕𑀘𑁆𑀙𑁂, 𑀦 𑀢𑁂𑀦 𑀅𑀫𑀭𑁄 𑀲𑀺𑀬𑀁;

𑀲𑀼𑀔𑀺𑀢𑀁 𑀢𑀁 𑀉𑀧𑀸𑀲𑀺𑀢𑁆𑀯𑀸, 𑀤𑀼𑀓𑁆𑀔𑀺𑀢𑀁 𑀢𑀁 𑀓𑀣𑀁 𑀚𑀳𑁂.

𑁩. ‘‘𑀫𑀭𑀡𑀁 𑀯𑀸 𑀢𑀬𑀸 𑀲𑀤𑁆𑀥𑀺𑀁, 𑀚𑀻𑀯𑀺𑀢𑀁 𑀯𑀸 𑀢𑀬𑀸 𑀯𑀺𑀦𑀸;

𑀢𑀤𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀢𑀬𑀸 𑀯𑀺𑀦𑀸.

𑁪. ‘‘𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀬𑀁 𑀢𑀁 𑀏𑀯𑀁 𑀕𑀢𑀁 𑀚𑀳𑁂;

𑀬𑀸 𑀕𑀢𑀺 𑀢𑀼𑀬𑁆𑀳𑀁 𑀲𑀸 𑀫𑀬𑁆𑀳𑀁, 𑀭𑀼𑀘𑁆𑀘𑀢𑁂 𑀯𑀺𑀳𑀕𑀸𑀥𑀺𑀧.

𑁫. ‘‘𑀓𑀸 𑀦𑀼 𑀧𑀸𑀲𑁂𑀦 𑀩𑀤𑁆𑀥𑀲𑁆𑀲, 𑀕𑀢𑀺 𑀅𑀜𑁆𑀜𑀸 𑀫𑀳𑀸𑀦𑀲𑀸;

𑀲𑀸 𑀓𑀣𑀁 𑀘𑁂𑀢𑀬𑀸𑀦𑀲𑁆𑀲, 𑀫𑀼𑀢𑁆𑀢𑀲𑁆𑀲 𑀢𑀯 𑀭𑀼𑀘𑁆𑀘𑀢𑀺.

𑁬. ‘‘𑀓𑀁 𑀯𑀸 𑀢𑁆𑀯𑀁 𑀧𑀲𑁆𑀲𑀲𑁂 𑀅𑀢𑁆𑀣𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀧𑀓𑁆𑀔𑀺𑀫;

𑀜𑀸𑀢𑀻𑀦𑀁 𑀯𑀸𑀯𑀲𑀺𑀝𑁆𑀞𑀸𑀦𑀁, 𑀉𑀪𑀺𑀦𑁆𑀦𑀁 𑀚𑀻𑀯𑀺𑀢𑀓𑁆𑀔𑀬𑁂.

𑁭. ‘‘𑀬𑀁 𑀦 𑀓𑀜𑁆𑀘𑀦𑀤𑁂𑀧𑀺𑀜𑁆𑀙, 𑀅𑀦𑁆𑀥𑁂𑀦 𑀢𑀫𑀲𑀸 𑀕𑀢𑀁;

𑀢𑀸𑀤𑀺𑀲𑁂 𑀲𑀜𑁆𑀘𑀚𑀁 𑀧𑀸𑀡𑀁, 𑀓𑀫𑀢𑁆𑀣𑀫𑀪𑀺𑀚𑁄𑀢𑀬𑁂.

𑁮. ‘‘𑀓𑀣𑀁 𑀦𑀼 𑀧𑀢𑀢𑀁 𑀲𑁂𑀝𑁆𑀞, 𑀥𑀫𑁆𑀫𑁂 𑀅𑀢𑁆𑀣𑀁 𑀦 𑀩𑀼𑀚𑁆𑀛𑀲𑀺;

𑀥𑀫𑁆𑀫𑁄 𑀅𑀧𑀘𑀺𑀢𑁄 𑀲𑀦𑁆𑀢𑁄, 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 𑀧𑀸𑀡𑀺𑀦𑀁.

𑁯. ‘‘𑀲𑁄𑀳𑀁 𑀥𑀫𑁆𑀫𑀁 𑀅𑀧𑁂𑀓𑁆𑀔𑀸𑀦𑁄, 𑀥𑀫𑁆𑀫𑀸 𑀘𑀢𑁆𑀣𑀁 𑀲𑀫𑀼𑀝𑁆𑀞𑀺𑀢𑀁;

𑀪𑀢𑁆𑀢𑀺𑀜𑁆𑀘 𑀢𑀬𑀺 𑀲𑀫𑁆𑀧𑀲𑁆𑀲𑀁, 𑀦𑀸𑀯𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁.

𑁧𑁦. ‘‘𑀅𑀤𑁆𑀥𑀸 𑀏𑀲𑁄 𑀲𑀢𑀁 𑀥𑀫𑁆𑀫𑁄, 𑀬𑁄 𑀫𑀺𑀢𑁆𑀢𑁄 𑀫𑀺𑀢𑁆𑀢𑀫𑀸𑀧𑀤𑁂.

𑀦 𑀘𑀚𑁂 𑀚𑀻𑀯𑀺𑀢𑀲𑁆𑀲𑀸𑀧𑀺, 𑀳𑁂𑀢𑀼𑀥𑀫𑁆𑀫𑀫𑀦𑀼𑀲𑁆𑀲𑀭𑀁.

𑁧𑁧. ‘‘𑀲𑁆𑀯𑀸𑀬𑀁 𑀥𑀫𑁆𑀫𑁄 𑀘 𑀢𑁂 𑀘𑀺𑀡𑁆𑀡𑁄, 𑀪𑀢𑁆𑀢𑀺 𑀘 𑀯𑀺𑀤𑀺𑀢𑀸 𑀫𑀬𑀺;

𑀓𑀸𑀫𑀁 𑀓𑀭𑀲𑁆𑀲𑀼 𑀫𑀬𑁆𑀳𑁂𑀢𑀁, 𑀕𑀘𑁆𑀙𑁂𑀯𑀸𑀦𑀼𑀫𑀢𑁄 𑀫𑀬𑀸.

𑁧𑁨. ‘‘𑀅𑀧𑀺 𑀢𑁆𑀯𑁂𑀯𑀁 𑀕𑀢𑁂 𑀓𑀸𑀮𑁂, 𑀬𑀁 𑀔𑀡𑁆𑀟𑀁 𑀜𑀸𑀢𑀺𑀦𑀁 𑀫𑀬𑀸;

𑀢𑀬𑀸 𑀢𑀁 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀁, 𑀅𑀲𑁆𑀲 𑀧𑀭𑀫𑀲𑀁𑀯𑀼𑀢𑀁.

𑁧𑁩. ‘‘𑀇𑀘𑁆𑀘𑁂𑀯𑀁 𑀫𑀦𑁆𑀢𑀬𑀦𑁆𑀢𑀸𑀦𑀁, 𑀅𑀭𑀺𑀬𑀸𑀦𑀁 𑀅𑀭𑀺𑀬𑀯𑀼𑀢𑁆𑀢𑀺𑀦𑀁;

𑀧𑀘𑁆𑀘𑀤𑀺𑀲𑁆𑀲𑀣 𑀦𑁂𑀲𑀸𑀤𑁄, 𑀆𑀢𑀼𑀭𑀸𑀦𑀫𑀺𑀯𑀦𑁆𑀢𑀓𑁄.

𑁧𑁪. ‘‘𑀢𑁂 𑀲𑀢𑁆𑀢𑀼𑀫𑀪𑀺𑀲𑀜𑁆𑀘𑀺𑀓𑁆𑀔, 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸 𑀤𑀺𑀚𑀸;

𑀢𑀼𑀡𑁆𑀳𑀻𑀫𑀸𑀲𑀺𑀢𑁆𑀣 𑀉𑀪𑀬𑁄, 𑀦 𑀲𑀜𑁆𑀘𑀮𑁂𑀲𑀼𑀫𑀸𑀲𑀦𑀸.

𑁧𑁫. ‘‘𑀥𑀢𑀭𑀝𑁆𑀞𑁂 𑀘 𑀤𑀺𑀲𑁆𑀯𑀸𑀦, 𑀲𑀫𑀼𑀟𑁆𑀟𑁂𑀦𑁆𑀢𑁂 𑀢𑀢𑁄 𑀢𑀢𑁄;

𑀅𑀪𑀺𑀓𑁆𑀔𑀫𑀣 𑀯𑁂𑀕𑁂𑀦, 𑀤𑀺𑀚𑀲𑀢𑁆𑀢𑀼 𑀤𑀺𑀚𑀸𑀥𑀺𑀧𑁂.

𑁧𑁬. ‘‘𑀲𑁄 𑀘 𑀯𑁂𑀕𑁂𑀦𑀪𑀺𑀓𑁆𑀓𑀫𑁆𑀫, 𑀆𑀲𑀚𑁆𑀚 𑀧𑀭𑀫𑁂 𑀤𑀺𑀚𑁂;

𑀧𑀘𑁆𑀘𑀓𑀫𑀺𑀢𑁆𑀣 𑀦𑁂𑀲𑀸𑀤𑁄, 𑀩𑀤𑁆𑀥𑀸 𑀇𑀢𑀺 𑀯𑀺𑀘𑀺𑀦𑁆𑀢𑀬𑀁.

𑁧𑁭. ‘‘𑀏𑀓𑀁𑀯 𑀩𑀤𑁆𑀥𑀫𑀸𑀲𑀻𑀦𑀁, 𑀅𑀩𑀤𑁆𑀥𑀜𑁆𑀘 𑀧𑀼𑀦𑀸𑀧𑀭𑀁;

𑀆𑀲𑀚𑁆𑀚 𑀩𑀤𑁆𑀥𑀫𑀸𑀲𑀻𑀦𑀁, 𑀧𑁂𑀓𑁆𑀔𑀫𑀸𑀦𑀫𑀤𑀻𑀦𑀯𑀁.

𑁧𑁮. ‘‘𑀢𑀢𑁄 𑀲𑁄 𑀯𑀺𑀫𑀢𑁄𑀬𑁂𑀯, 𑀧𑀡𑁆𑀟𑀭𑁂 𑀅𑀚𑁆𑀛𑀪𑀸𑀲𑀣;

𑀧𑀯𑀟𑁆𑀠𑀓𑀸𑀬𑁂 𑀆𑀲𑀻𑀦𑁂, 𑀤𑀺𑀚𑀲𑀗𑁆𑀖𑀕𑀡𑀸𑀥𑀺𑀧𑁂.

𑁧𑁯. ‘‘𑀬𑀁 𑀦𑀼 𑀧𑀸𑀲𑁂𑀦 𑀫𑀳𑀢𑀸, 𑀩𑀤𑁆𑀥𑁄 𑀦 𑀓𑀼𑀭𑀼𑀢𑁂 𑀤𑀺𑀲𑀁;

𑀅𑀣 𑀓𑀲𑁆𑀫𑀸 𑀅𑀩𑀤𑁆𑀥𑁄 𑀢𑁆𑀯𑀁, 𑀩𑀮𑀻 𑀧𑀓𑁆𑀔𑀺 𑀦 𑀕𑀘𑁆𑀙𑀲𑀺.

𑁨𑁦. ‘‘𑀓𑀺𑀁 𑀦𑀼 𑀢𑁆𑀬𑀸𑀬𑀁 𑀤𑀺𑀚𑁄 𑀳𑁄𑀢𑀺, 𑀫𑀼𑀢𑁆𑀢𑁄 𑀩𑀤𑁆𑀥𑀁 𑀉𑀧𑀸𑀲𑀲𑀺;

𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀏𑀓𑁄 𑀅𑀯𑀳𑀻𑀬𑀲𑀺.

𑁨𑁧. ‘‘𑀭𑀸𑀚𑀸 𑀫𑁂 𑀲𑁄 𑀤𑀺𑀚𑀸𑀫𑀺𑀢𑁆𑀢, 𑀲𑀔𑀸 𑀧𑀸𑀡𑀲𑀫𑁄 𑀘 𑀫𑁂;

𑀦𑁂𑀯 𑀦𑀁 𑀯𑀺𑀚𑀳𑀺𑀲𑁆𑀲𑀸𑀫𑀺, 𑀬𑀸𑀯 𑀓𑀸𑀮𑀲𑁆𑀲 𑀧𑀭𑀺𑀬𑀸𑀬𑀁.

𑁨𑁨. ‘‘𑀓𑀣𑀁 𑀧𑀦𑀸𑀬𑀁 𑀯𑀺𑀳𑀗𑁆𑀕𑁄, 𑀦𑀸𑀤𑁆𑀤𑀲 𑀧𑀸𑀲𑀫𑁄𑀟𑁆𑀟𑀺𑀢𑀁;

𑀧𑀤𑀜𑁆𑀳𑁂𑀢𑀁 𑀫𑀳𑀦𑁆𑀢𑀸𑀦𑀁, 𑀩𑁄𑀤𑁆𑀥𑀼𑀫𑀭𑀳𑀦𑁆𑀢𑀺 𑀆𑀧𑀤𑀁.

𑁨𑁩. ‘‘𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀺.

𑁨𑁪. ‘‘𑀅𑀧𑀺 𑀢𑁆𑀯𑁂𑀯 𑀫𑀳𑀸𑀧𑀜𑁆𑀜, 𑀧𑀸𑀲𑀸 𑀩𑀳𑀼𑀯𑀺𑀥𑀸 𑀢𑀢𑀸;

𑀕𑀼𑀬𑁆𑀳𑀫𑀸𑀲𑀚𑁆𑀚 𑀩𑀚𑁆𑀛𑀦𑁆𑀢𑀺, 𑀅𑀣𑁂𑀯𑀁 𑀚𑀻𑀯𑀺𑀢𑀓𑁆𑀔𑀬𑁂’’𑀢𑀺. 𑁋

𑀇𑀫𑀸𑀲𑀁 𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑁄 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀕𑀘𑁆𑀙𑁂 𑀯𑀸𑀢𑀺, 𑀫𑀳𑀸𑀭𑀸𑀚, 𑀅𑀳𑀁 𑀇𑀢𑁄 𑀕𑀘𑁆𑀙𑁂𑀬𑁆𑀬𑀁 𑀯𑀸 𑀦 𑀯𑀸, 𑀦𑀸𑀳𑀁 𑀢𑁂𑀦 𑀕𑀫𑀦𑁂𑀦 𑀯𑀸 𑀅𑀕𑀫𑀦𑁂𑀦 𑀯𑀸 𑀅𑀫𑀭𑁄 𑀲𑀺𑀬𑀁, 𑀅𑀳𑀜𑁆𑀳𑀺 𑀇𑀢𑁄 𑀕𑀢𑁄𑀧𑀺 𑀅𑀕𑀢𑁄𑀧𑀺 𑀫𑀭𑀡𑀢𑁄 𑀅𑀫𑀼𑀢𑁆𑀢𑁄𑀯, 𑀇𑀢𑁄 𑀧𑀼𑀩𑁆𑀩𑁂 𑀧𑀦 𑀲𑀼𑀔𑀺𑀢𑀁 𑀢𑀁 𑀉𑀧𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑁆𑀔𑀺𑀢𑀁 𑀢𑀁 𑀓𑀣𑀁 𑀚𑀳𑁂𑀬𑁆𑀬𑀦𑁆𑀢𑀺 𑀯𑀤𑀢𑀺. 𑀫𑀭𑀡𑀁 𑀯𑀸𑀢𑀺 𑀫𑀫 𑀅𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀢𑀬𑀸 𑀲𑀤𑁆𑀥𑀺𑀁 𑀫𑀭𑀡𑀁 𑀪𑀯𑁂𑀬𑁆𑀬, 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀢𑀬𑀸 𑀯𑀺𑀦𑀸 𑀚𑀻𑀯𑀺𑀢𑀁. 𑀢𑁂𑀲𑀼 𑀤𑁆𑀯𑀻𑀲𑀼 𑀬𑀁 𑀢𑀬𑀸 𑀲𑀤𑁆𑀥𑀺𑀁 𑀫𑀭𑀡𑀁, 𑀢𑀤𑁂𑀯 𑀫𑁂 𑀯𑀭𑀁, 𑀬𑀁 𑀢𑀬𑀸 𑀯𑀺𑀦𑀸 𑀚𑀻𑀯𑁂𑀬𑁆𑀬𑀁, 𑀦 𑀫𑁂 𑀢𑀁 𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀭𑀼𑀘𑁆𑀘𑀢𑁂𑀢𑀺 𑀬𑀸 𑀢𑀯 𑀕𑀢𑀺 𑀦𑀺𑀧𑁆𑀨𑀢𑁆𑀢𑀺, 𑀲𑀸𑀯 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺. 𑀲𑀸 𑀓𑀣𑀦𑁆𑀢𑀺 𑀲𑀫𑁆𑀫 𑀲𑀼𑀫𑀼𑀔 𑀫𑀫 𑀢𑀸𑀯 𑀤𑀴𑁆𑀳𑁂𑀦 𑀯𑀸𑀮𑀧𑀸𑀲𑁂𑀦 𑀩𑀤𑁆𑀥𑀲𑁆𑀲 𑀧𑀭𑀳𑀢𑁆𑀣𑀁 𑀕𑀢𑀲𑁆𑀲 𑀲𑀸 𑀕𑀢𑀺 𑀭𑀼𑀘𑁆𑀘𑀢𑀼, 𑀢𑀯 𑀧𑀦 𑀘𑁂𑀢𑀬𑀸𑀦𑀲𑁆𑀲 𑀲𑀘𑁂𑀢𑀦𑀲𑁆𑀲 𑀧𑀜𑁆𑀜𑀯𑀢𑁄 𑀫𑀼𑀢𑁆𑀢𑀲𑁆𑀲 𑀓𑀣𑀁 𑀭𑀼𑀘𑁆𑀘𑀢𑀺.

𑀧𑀓𑁆𑀔𑀺𑀫𑀸𑀢𑀺 𑀧𑀓𑁆𑀔𑀲𑀫𑁆𑀧𑀦𑁆𑀦. 𑀉𑀪𑀺𑀦𑁆𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀚𑀻𑀯𑀺𑀢𑀓𑁆𑀔𑀬𑁂 𑀲𑀢𑀺 𑀢𑁆𑀯𑀁 𑀫𑀫 𑀯𑀸 𑀢𑀯 𑀯𑀸 𑀅𑀯𑀲𑀺𑀝𑁆𑀞𑀜𑀸𑀢𑀻𑀦𑀁 𑀯𑀸 𑀓𑀁 𑀅𑀢𑁆𑀣𑀁 𑀧𑀲𑁆𑀲𑀲𑀺. 𑀬𑀁 𑀦𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀉𑀧𑀫𑀸𑀦𑁂. 𑀓𑀜𑁆𑀘𑀦𑀤𑁂𑀧𑀺𑀜𑁆𑀙𑀸𑀢𑀺 𑀓𑀜𑁆𑀘𑀦𑀤𑁆𑀯𑁂𑀧𑀺𑀜𑁆𑀙, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀓𑀜𑁆𑀘𑀦𑀲𑀤𑀺𑀲𑀉𑀪𑀬𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀢𑀫𑀲𑀸𑀢𑀺 𑀢𑀫𑀲𑀺. 𑀕𑀢𑀦𑁆𑀢𑀺 𑀓𑀢𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀼𑀭𑀺𑀫𑀲𑁆𑀲 𑀦-𑀓𑀸𑀭𑀲𑁆𑀲 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, ‘‘𑀦 𑀓𑀢’’𑀦𑁆𑀢𑀺 𑀓𑀢𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀬𑀺 𑀧𑀸𑀡𑀁 𑀘𑀚𑀦𑁆𑀢𑁂𑀧𑀺 𑀅𑀘𑀚𑀦𑁆𑀢𑁂𑀧𑀺 𑀫𑀫 𑀚𑀻𑀯𑀺𑀢𑀲𑁆𑀲 𑀅𑀪𑀸𑀯𑀸 𑀬𑀁 𑀢𑀯 𑀧𑀸𑀡𑀲𑀜𑁆𑀘𑀚𑀦𑀁, 𑀢𑀁 𑀅𑀦𑁆𑀥𑁂𑀦 𑀢𑀫𑀲𑀺 𑀓𑀢𑀁 𑀯𑀺𑀬 𑀓𑀺𑀜𑁆𑀘𑀺𑀤𑁂𑀯 𑀭𑀽𑀧𑀓𑀫𑁆𑀫𑀁 𑀅𑀧𑀘𑁆𑀘𑀓𑁆𑀔𑀕𑀼𑀡𑀁, 𑀢𑀸𑀤𑀺𑀲𑁂 𑀢𑀯 𑀅𑀧𑀘𑁆𑀘𑀓𑁆𑀔𑀕𑀼𑀡𑁂 𑀧𑀸𑀡𑀲𑀜𑁆𑀘𑀚𑀦𑁂 𑀢𑁆𑀯𑀁 𑀧𑀸𑀡𑀁 𑀲𑀜𑁆𑀘𑀚𑀦𑁆𑀢𑁄 𑀓𑀫𑀢𑁆𑀣𑀁 𑀚𑁄𑀢𑁂𑀬𑁆𑀬𑀸𑀲𑀻𑀢𑀺.

𑀥𑀫𑁆𑀫𑁄 𑀅𑀧𑀘𑀺𑀢𑁄 𑀲𑀦𑁆𑀢𑁄𑀢𑀺 𑀥𑀫𑁆𑀫𑁄 𑀧𑀽𑀚𑀺𑀢𑁄 𑀫𑀸𑀦𑀺𑀢𑁄 𑀲𑀫𑀸𑀦𑁄. 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀧𑁂𑀓𑁆𑀔𑀸𑀦𑁄𑀢𑀺 𑀅𑀧𑁂𑀓𑁆𑀔𑀦𑁆𑀢𑁄. 𑀥𑀫𑁆𑀫𑀸 𑀘𑀢𑁆𑀣𑀦𑁆𑀢𑀺 𑀥𑀫𑁆𑀫𑀢𑁄 𑀘 𑀅𑀢𑁆𑀣𑀁 𑀲𑀫𑀼𑀝𑁆𑀞𑀺𑀢𑀁 𑀧𑀲𑁆𑀲𑀦𑁆𑀢𑁄. 𑀪𑀢𑁆𑀢𑀺𑀦𑁆𑀢𑀺 𑀲𑀺𑀦𑁂𑀳𑀁. 𑀲𑀢𑀁 𑀥𑀫𑁆𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀪𑀸𑀯𑁄. 𑀬𑁄 𑀫𑀺𑀢𑁆𑀢𑁄𑀢𑀺 𑀬𑁄 𑀫𑀺𑀢𑁆𑀢𑁄 𑀆𑀧𑀤𑀸𑀲𑀼 𑀫𑀺𑀢𑁆𑀢𑀁 𑀦 𑀘𑀚𑁂, 𑀢𑀲𑁆𑀲 𑀅𑀘𑀚𑀦𑁆𑀢𑀲𑁆𑀲 𑀫𑀺𑀢𑁆𑀢𑀲𑁆𑀲 𑀏𑀲 𑀲𑀪𑀸𑀯𑁄 𑀦𑀸𑀫 𑀅𑀤𑁆𑀥𑀸 𑀲𑀢𑀁 𑀥𑀫𑁆𑀫𑁄. 𑀯𑀺𑀤𑀺𑀢𑀸𑀢𑀺 𑀧𑀸𑀓𑀝𑀸 𑀚𑀸𑀢𑀸. 𑀓𑀸𑀫𑀁 𑀓𑀭𑀲𑁆𑀲𑀽𑀢𑀺 𑀏𑀢𑀁 𑀫𑀫 𑀓𑀸𑀫𑀁 𑀫𑀬𑀸 𑀇𑀘𑁆𑀙𑀺𑀢𑀁 𑀫𑀫 𑀯𑀘𑀦𑀁 𑀓𑀭𑀲𑁆𑀲𑀼. 𑀅𑀧𑀺 𑀢𑁆𑀯𑁂𑀯𑀁 𑀕𑀢𑁂 𑀓𑀸𑀮𑁂𑀢𑀺 𑀅𑀧𑀺 𑀢𑀼 𑀏𑀯𑀁 𑀕𑀢𑁂 𑀓𑀸𑀮𑁂 𑀫𑀬𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀲𑁂𑀦 𑀩𑀤𑁆𑀥𑁂. 𑀧𑀭𑀫𑀲𑀁𑀯𑀼𑀢𑀦𑁆𑀢𑀺 𑀧𑀭𑀫𑀧𑀭𑀺𑀧𑀼𑀡𑁆𑀡𑀁.

𑀇𑀘𑁆𑀘𑁂𑀯𑀁 𑀫𑀦𑁆𑀢𑀬𑀦𑁆𑀢𑀸𑀦𑀦𑁆𑀢𑀺 ‘‘𑀕𑀘𑁆𑀙, 𑀦 𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀓𑀣𑁂𑀦𑁆𑀢𑀸𑀦𑀁 𑀅𑀭𑀺𑀬𑀸𑀦𑀦𑁆𑀢𑀺 𑀆𑀘𑀸𑀭𑀅𑀭𑀺𑀬𑀸𑀦𑀁. 𑀧𑀘𑁆𑀘𑀤𑀺𑀲𑁆𑀲𑀣𑀸𑀢𑀺 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀫𑀼𑀕𑁆𑀕𑀭𑀁 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑁄 𑀅𑀤𑀺𑀲𑁆𑀲𑀣. 𑀆𑀢𑀼𑀭𑀸𑀦𑀦𑁆𑀢𑀺 𑀕𑀺𑀮𑀸𑀦𑀸𑀦𑀁 𑀫𑀘𑁆𑀘𑀼 𑀯𑀺𑀬. 𑀅𑀪𑀺𑀲𑀜𑁆𑀘𑀺𑀓𑁆𑀔𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑁂 𑀉𑀪𑁄𑀧𑀺 𑀲𑀢𑁆𑀢𑀼𑀁 𑀆𑀬𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸. 𑀳𑀺𑀢𑀸𑀢𑀺 𑀤𑀻𑀖𑀭𑀢𑁆𑀢𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀸 𑀫𑀼𑀤𑀼𑀘𑀺𑀢𑁆𑀢𑀸. 𑀦 𑀲𑀜𑁆𑀘𑀮𑁂𑀲𑀼𑀫𑀸𑀲𑀦𑀸𑀢𑀺 𑀆𑀲𑀦𑀢𑁄 𑀦 𑀘𑀮𑀺𑀁𑀲𑀼, 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀅𑀳𑁂𑀲𑀼𑀁. 𑀲𑀼𑀫𑀼𑀔𑁄 𑀧𑀦 ‘‘𑀅𑀬𑀁 𑀦𑁂𑀲𑀸𑀤𑁄 𑀆𑀕𑀦𑁆𑀢𑁆𑀯𑀸 𑀧𑀳𑀭𑀦𑁆𑀢𑁄 𑀫𑀁 𑀧𑀞𑀫𑀁 𑀧𑀳𑀭𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀧𑀘𑁆𑀙𑀢𑁄 𑀓𑀢𑁆𑀯𑀸 𑀦𑀺𑀲𑀻𑀤𑀺.

𑀥𑀢𑀭𑀝𑁆𑀞𑁂𑀢𑀺 𑀳𑀁𑀲𑁂. 𑀲𑀫𑀼𑀟𑁆𑀟𑁂𑀦𑁆𑀢𑁂𑀢𑀺 𑀫𑀭𑀡𑀪𑀬𑁂𑀦 𑀇𑀢𑁄 𑀘𑀺𑀢𑁄 𑀘 𑀉𑀧𑁆𑀧𑀢𑀦𑁆𑀢𑁂 𑀤𑀺𑀲𑁆𑀯𑀸. 𑀆𑀲𑀚𑁆𑀚𑀸𑀢𑀺 𑀇𑀢𑀭𑁂 𑀤𑁆𑀯𑁂 𑀚𑀦𑁂 𑀉𑀧𑀕𑀦𑁆𑀢𑁆𑀯𑀸. 𑀧𑀘𑁆𑀘𑀓𑀫𑀺𑀢𑁆𑀣𑀸𑀢𑀺 ‘‘𑀩𑀤𑁆𑀥𑀸, 𑀦 𑀩𑀤𑁆𑀥𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀧𑀥𑀸𑀭𑁂𑀦𑁆𑀢𑁄 𑀅𑀓𑀫𑀺𑀢𑁆𑀣, 𑀯𑁂𑀕𑀁 𑀳𑀸𑀧𑁂𑀢𑁆𑀯𑀸 𑀲𑀡𑀺𑀓𑀁 𑀅𑀕𑀫𑀸𑀲𑀺. 𑀆𑀲𑀚𑁆𑀚 𑀩𑀤𑁆𑀥𑀫𑀸𑀲𑀻𑀦𑀦𑁆𑀢𑀺 𑀩𑀤𑁆𑀥𑀁 𑀫𑀳𑀸𑀲𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀼𑀫𑀼𑀔𑀁. 𑀅𑀤𑀻𑀦𑀯𑀦𑁆𑀢𑀺𑀆𑀤𑀻𑀦𑀯𑀫𑁂𑀯 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑀁 𑀤𑀺𑀲𑁆𑀯𑀸. 𑀯𑀺𑀫𑀢𑁄𑀢𑀺 𑀓𑀺𑀁 𑀦𑀼 𑀔𑁄 𑀅𑀩𑀤𑁆𑀥𑁄 𑀩𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄, 𑀓𑀸𑀭𑀡𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀯𑀺𑀫𑀢𑀺𑀚𑀸𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀭𑁂𑀢𑀺 𑀳𑀁𑀲𑁂, 𑀅𑀣 𑀯𑀸 𑀧𑀭𑀺𑀲𑀼𑀤𑁆𑀥𑁂 𑀦𑀺𑀫𑁆𑀫𑀮𑁂, 𑀲𑀫𑁆𑀧𑀳𑀝𑁆𑀞𑀓𑀜𑁆𑀘𑀦𑀯𑀡𑁆𑀡𑁂𑀢𑀺 𑀅𑀢𑁆𑀣𑁄. 𑀧𑀯𑀟𑁆𑀠𑀓𑀸𑀬𑁂𑀢𑀺 𑀯𑀟𑁆𑀠𑀺𑀢𑀓𑀸𑀬𑁂 𑀫𑀳𑀸𑀲𑀭𑀻𑀭𑁂. 𑀬𑀁 𑀦𑀽𑀢𑀺 𑀬𑀁 𑀢𑀸𑀯 𑀏𑀲𑁄 𑀫𑀳𑀸𑀧𑀸𑀲𑁂𑀦 𑀩𑀤𑁆𑀥𑁄. 𑀦 𑀓𑀼𑀭𑀼𑀢𑁂 𑀤𑀺𑀲𑀦𑁆𑀢𑀺 𑀧𑀮𑀸𑀬𑀦𑀢𑁆𑀣𑀸𑀬 𑀏𑀓𑀁 𑀤𑀺𑀲𑀁 𑀦 𑀪𑀚𑀢𑀺, 𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀮𑀻𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺. 𑀧𑀓𑁆𑀔𑀻𑀢𑀺 𑀢𑀁 𑀆𑀮𑀧𑀢𑀺. 𑀑𑀳𑀸𑀬𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀬𑀦𑁆𑀢𑀻𑀢𑀺 𑀲𑁂𑀲𑀲𑀓𑀼𑀡𑀸 𑀕𑀘𑁆𑀙𑀦𑁆𑀢𑀺. 𑀅𑀯𑀳𑀻𑀬𑀲𑀻𑀢𑀺 𑀑𑀳𑀻𑀬𑀲𑀺.

𑀤𑀺𑀚𑀸𑀫𑀺𑀢𑁆𑀢𑀸𑀢𑀺 𑀤𑀺𑀚𑀸𑀦𑀁 𑀅𑀫𑀺𑀢𑁆𑀢. 𑀬𑀸𑀯 𑀓𑀸𑀮𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀺 𑀬𑀸𑀯 𑀫𑀭𑀡𑀲𑁆𑀲 𑀯𑀸𑀭𑁄 𑀆𑀕𑀘𑁆𑀙𑀢𑀺. 𑀓𑀣𑀁 𑀧𑀦𑀸𑀬𑀦𑁆𑀢𑀺 𑀢𑁆𑀯𑀁 𑀭𑀸𑀚𑀸 𑀫𑁂 𑀲𑁄𑀢𑀺 𑀯𑀤𑀲𑀺, 𑀭𑀸𑀚𑀸𑀦𑁄 𑀘 𑀦𑀸𑀫 𑀧𑀡𑁆𑀟𑀺𑀢𑀸 𑀳𑁄𑀦𑁆𑀢𑀺, 𑀇𑀢𑀺𑀧𑀺 𑀧𑀡𑁆𑀟𑀺𑀢𑁄 𑀲𑀫𑀸𑀦𑁄 𑀓𑁂𑀦 𑀓𑀸𑀭𑀡𑁂𑀦 𑀑𑀟𑁆𑀟𑀺𑀢𑀁 𑀧𑀸𑀲𑀁 𑀦 𑀅𑀤𑁆𑀤𑀲. 𑀧𑀤𑀁 𑀳𑁂𑀢𑀦𑁆𑀢𑀺 𑀬𑀲𑀫𑀳𑀢𑁆𑀢𑀁 𑀯𑀸 𑀜𑀸𑀡𑀫𑀳𑀢𑁆𑀢𑀁 𑀯𑀸 𑀧𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀆𑀧𑀤𑀩𑀼𑀚𑁆𑀛𑀦𑀁 𑀦𑀸𑀫 𑀧𑀤𑀁 𑀓𑀸𑀭𑀡𑀁, 𑀢𑀲𑁆𑀫𑀸 𑀢𑁂 𑀆𑀧𑀤𑀁 𑀩𑁄𑀤𑁆𑀥𑀼𑀫𑀭𑀳𑀦𑁆𑀢𑀺. 𑀧𑀭𑀸𑀪𑀯𑁄𑀢𑀺 𑀅𑀯𑀟𑁆𑀠𑀺. 𑀆𑀲𑀚𑁆𑀚𑀸𑀧𑀻𑀢𑀺 𑀉𑀧𑀕𑀦𑁆𑀢𑁆𑀯𑀸𑀧𑀺 𑀦 𑀩𑀼𑀚𑁆𑀛𑀢𑀺. 𑀢𑀢𑀸𑀢𑀺 𑀯𑀺𑀢𑀢𑀸 𑀑𑀟𑁆𑀟𑀺𑀢𑀸. 𑀕𑀼𑀬𑁆𑀳𑀫𑀸𑀲𑀚𑁆𑀚𑀸𑀢𑀺 𑀢𑁂𑀲𑀼 𑀧𑀸𑀲𑁂𑀲𑀼 𑀬𑁄 𑀕𑀼𑀴𑁆𑀳𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀸𑀲𑁄, 𑀢𑀁 𑀆𑀲𑀚𑁆𑀚 𑀩𑀚𑁆𑀛𑀦𑁆𑀢𑀺. 𑀅𑀣𑁂𑀯𑀦𑁆𑀢𑀺 𑀅𑀣 𑀏𑀯𑀁 𑀚𑀻𑀯𑀺𑀢𑀓𑁆𑀔𑀬𑁂 𑀩𑀚𑁆𑀛𑀦𑁆𑀢𑁂𑀯𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀦𑀁 𑀲𑁄 𑀓𑀣𑀸𑀲𑀮𑁆𑀮𑀸𑀧𑁂𑀦 𑀫𑀼𑀤𑀼𑀳𑀤𑀬𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀚𑀻𑀯𑀺𑀢𑀁 𑀬𑀸𑀘𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁨𑁫. ‘‘𑀅𑀧𑀺 𑀦𑀸𑀬𑀁 𑀢𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀲𑁆𑀲 𑀲𑀼𑀔𑀼𑀤𑁆𑀭𑀬𑁄;

𑀅𑀧𑀺 𑀦𑁄 𑀅𑀦𑀼𑀫𑀜𑁆𑀜𑀸𑀲𑀺, 𑀅𑀧𑀺 𑀦𑁄 𑀚𑀻𑀯𑀺𑀢𑀁 𑀤𑀤𑁂’’𑀢𑀺.

𑀢𑀢𑁆𑀣 𑀅𑀧𑀺 𑀦𑀸𑀬𑀦𑁆𑀢𑀺 𑀅𑀧𑀺 𑀦𑀼 𑀅𑀬𑀁. 𑀲𑀼𑀔𑀼𑀤𑁆𑀭𑀬𑁄𑀢𑀺 𑀲𑀼𑀔𑀨𑀮𑁄. 𑀅𑀧𑀺 𑀦𑁄 𑀅𑀦𑀼𑀫𑀜𑁆𑀜𑀸𑀲𑀻𑀢𑀺 𑀘𑀺𑀢𑁆𑀢𑀓𑀽𑀝𑀁 𑀕𑀦𑁆𑀢𑁆𑀯𑀸 𑀜𑀸𑀢𑀓𑁂 𑀧𑀲𑁆𑀲𑀺𑀢𑀼𑀁 𑀢𑁆𑀯𑀁 𑀅𑀧𑀺 𑀦𑁄 𑀅𑀦𑀼𑀚𑀸𑀦𑁂𑀬𑁆𑀬𑀸𑀲𑀺. 𑀅𑀧𑀺 𑀦𑁄 𑀚𑀻𑀯𑀺𑀢𑀁 𑀤𑀤𑁂𑀢𑀺 𑀅𑀧𑀺 𑀦𑁄 𑀇𑀫𑀸𑀬 𑀓𑀣𑀸𑀬 𑀉𑀧𑁆𑀧𑀦𑁆𑀦𑀯𑀺𑀲𑁆𑀲𑀸𑀲𑁄 𑀦 𑀫𑀸𑀭𑁂𑀬𑁆𑀬𑀸𑀲𑀻𑀢𑀺.

𑀲𑁄 𑀢𑀲𑁆𑀲 𑀫𑀥𑀼𑀭𑀓𑀣𑀸𑀬 𑀩𑀚𑁆𑀛𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁨𑁬. ‘‘𑀦 𑀘𑁂𑀯 𑀫𑁂 𑀢𑁆𑀯𑀁 𑀩𑀤𑁆𑀥𑁄𑀲𑀺, 𑀦𑀧𑀺 𑀇𑀘𑁆𑀙𑀸𑀫𑀺 𑀢𑁂 𑀯𑀥𑀁;

𑀓𑀸𑀫𑀁 𑀔𑀺𑀧𑁆𑀧𑀫𑀺𑀢𑁄 𑀕𑀦𑁆𑀢𑁆𑀯𑀸, 𑀚𑀻𑀯 𑀢𑁆𑀯𑀁 𑀅𑀦𑀺𑀖𑁄 𑀘𑀺𑀭’’𑀦𑁆𑀢𑀺.

𑀢𑀢𑁄 𑀲𑀼𑀫𑀼𑀔𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭. ‘‘𑀦𑁂𑀯𑀸𑀳𑀫𑁂𑀢𑀫𑀺𑀘𑁆𑀙𑀸𑀫𑀺, 𑀅𑀜𑁆𑀜𑀢𑁆𑀭𑁂𑀢𑀲𑁆𑀲 𑀚𑀻𑀯𑀺𑀢𑀸;

𑀲𑀘𑁂 𑀏𑀓𑁂𑀦 𑀢𑀼𑀝𑁆𑀞𑁄𑀲𑀺, 𑀫𑀼𑀜𑁆𑀘𑁂𑀢𑀁 𑀫𑀜𑁆𑀘 𑀪𑀓𑁆𑀔𑀬.

𑁨𑁮. ‘‘𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀢𑀼𑀮𑁆𑀬𑀸𑀲𑁆𑀫𑀸 𑀯𑀬𑀲𑀸 𑀉𑀪𑁄;

𑀦 𑀢𑁂 𑀮𑀸𑀪𑁂𑀦 𑀚𑀻𑀯𑀢𑁆𑀣𑀺, 𑀏𑀢𑁂𑀦 𑀦𑀺𑀫𑀺𑀦𑀸 𑀢𑀼𑀯𑀁.

𑁨𑁯. ‘‘𑀢𑀤𑀺𑀗𑁆𑀖 𑀲𑀫𑀧𑁂𑀓𑁆𑀔𑀲𑁆𑀲𑀼, 𑀳𑁄𑀢𑀼 𑀕𑀺𑀤𑁆𑀥𑀺 𑀢𑀯𑀫𑁆𑀳𑀲𑀼;

𑀫𑀁 𑀧𑀼𑀩𑁆𑀩𑁂 𑀩𑀦𑁆𑀥 𑀧𑀸𑀲𑁂𑀦, 𑀧𑀘𑁆𑀙𑀸 𑀫𑀼𑀜𑁆𑀘 𑀤𑀺𑀚𑀸𑀥𑀺𑀧𑀁.

𑁩𑁦. ‘‘𑀢𑀸𑀯𑀤𑁂𑀯 𑀘 𑀢𑁂 𑀮𑀸𑀪𑁄, 𑀓𑀢𑀸𑀲𑁆𑀲 𑀬𑀸𑀘𑀦𑀸𑀬 𑀘;

𑀫𑀺𑀢𑁆𑀢𑀺 𑀘 𑀥𑀢𑀭𑀝𑁆𑀞𑁂𑀳𑀺, 𑀬𑀸𑀯𑀚𑀻𑀯𑀸𑀬 𑀢𑁂 𑀲𑀺𑀬𑀸’’𑀢𑀺.

𑀢𑀢𑁆𑀣 𑀏𑀢𑀦𑁆𑀢𑀺 𑀬𑀁 𑀅𑀜𑁆𑀜𑀢𑁆𑀭 𑀏𑀢𑀲𑁆𑀲 𑀚𑀻𑀯𑀺𑀢𑀸 𑀫𑀫 𑀚𑀻𑀯𑀺𑀢𑀁, 𑀏𑀢𑀁 𑀅𑀳𑀁 𑀦𑁂𑀯 𑀇𑀘𑁆𑀙𑀸𑀫𑀺. 𑀢𑀼𑀮𑁆𑀬𑀸𑀲𑁆𑀫𑀸𑀢𑀺 𑀲𑀫𑀸𑀦𑀸 𑀳𑁄𑀫. 𑀦𑀺𑀫𑀺𑀦𑀸 𑀢𑀼𑀯𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀳𑀺 𑀢𑁆𑀯𑀁. 𑀢𑀯𑀫𑁆𑀳𑀲𑀽𑀢𑀺 𑀢𑀯 𑀅𑀫𑁆𑀳𑁂𑀲𑀼 𑀕𑀺𑀤𑁆𑀥𑀺 𑀳𑁄𑀢𑀼, 𑀓𑀺𑀁 𑀢𑁂 𑀏𑀢𑁂𑀦, 𑀫𑀬𑀺 𑀮𑁄𑀪𑀁 𑀉𑀧𑁆𑀧𑀸𑀤𑁂𑀳𑀻𑀢𑀺 𑀯𑀤𑀢𑀺. 𑀢𑀸𑀯𑀤𑁂𑀯𑀸𑀢𑀺 𑀢𑀢𑁆𑀢𑀓𑁄𑀬𑁂𑀯. 𑀬𑀸𑀘𑀦𑀸𑀬 𑀘𑀸𑀢𑀺 𑀬𑀸 𑀫𑀫 𑀬𑀸𑀘𑀦𑀸, 𑀲𑀸𑀯 𑀓𑀢𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑁄 𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀢𑁂𑀮𑁂 𑀧𑀓𑁆𑀔𑀺𑀢𑁆𑀢𑀓𑀧𑁆𑀧𑀸𑀲𑀧𑀺𑀘𑀼 𑀯𑀺𑀬 𑀫𑀼𑀤𑀼𑀕𑀢𑀳𑀤𑀬𑁄 𑀫𑀳𑀸𑀲𑀢𑁆𑀢𑀁 𑀢𑀲𑁆𑀲 𑀤𑀸𑀬𑀁 𑀓𑀢𑁆𑀯𑀸 𑀤𑀤𑀦𑁆𑀢𑁄 𑀆𑀳 𑁋

𑁩𑁧. ‘‘𑀧𑀲𑁆𑀲𑀦𑁆𑀢𑀼 𑀦𑁄 𑀫𑀳𑀸𑀲𑀗𑁆𑀖𑀸, 𑀢𑀬𑀸 𑀫𑀼𑀢𑁆𑀢𑀁 𑀇𑀢𑁄 𑀕𑀢𑀁;

𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀪𑀘𑁆𑀘𑀸 𑀘, 𑀧𑀼𑀢𑁆𑀢𑀤𑀸𑀭𑀸 𑀘 𑀩𑀦𑁆𑀥𑀯𑀸.

𑁩𑁨. ‘‘𑀦 𑀘 𑀢𑁂 𑀢𑀸𑀤𑀺𑀲𑀸 𑀫𑀺𑀢𑁆𑀢𑀸, 𑀩𑀳𑀽𑀦𑀁 𑀇𑀥 𑀯𑀺𑀚𑁆𑀚𑀢𑀺;

𑀬𑀣𑀸 𑀢𑁆𑀯𑀁 𑀥𑀢𑀭𑀝𑁆𑀞𑀲𑁆𑀲, 𑀧𑀸𑀡𑀲𑀸𑀥𑀸𑀭𑀡𑁄 𑀲𑀔𑀸.

𑁩𑁩. ‘‘𑀲𑁄 𑀢𑁂 𑀲𑀳𑀸𑀬𑀁 𑀫𑀼𑀜𑁆𑀘𑀸𑀫𑀺, 𑀳𑁄𑀢𑀼 𑀭𑀸𑀚𑀸 𑀢𑀯𑀸𑀦𑀼𑀕𑁄;

𑀓𑀸𑀫𑀁 𑀔𑀺𑀧𑁆𑀧𑀫𑀺𑀢𑁄 𑀕𑀦𑁆𑀢𑁆𑀯𑀸, 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀣𑀸’’𑀢𑀺.

𑀢𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀬𑀸 𑀫𑀼𑀢𑁆𑀢𑀦𑁆𑀢𑀺 𑀇𑀫𑀜𑁆𑀳𑀺 𑀢𑁆𑀯𑀜𑁆𑀜𑁂𑀯 𑀫𑀼𑀜𑁆𑀘𑀲𑀺 𑀦𑀸𑀫, 𑀢𑀲𑁆𑀫𑀸 𑀇𑀫𑀁 𑀢𑀬𑀸 𑀫𑀼𑀢𑁆𑀢𑀁 𑀇𑀢𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀁 𑀕𑀢𑀁 𑀫𑀳𑀦𑁆𑀢𑀸 𑀜𑀸𑀢𑀺𑀲𑀗𑁆𑀖𑀸 𑀏𑀢𑁂 𑀘 𑀫𑀺𑀢𑁆𑀢𑀸𑀤𑀬𑁄 𑀧𑀲𑁆𑀲𑀦𑁆𑀢𑀼. 𑀏𑀢𑁆𑀣 𑀘 𑀩𑀦𑁆𑀥𑀯𑀸𑀢𑀺 𑀏𑀓𑀮𑁄𑀳𑀺𑀢𑀲𑀫𑁆𑀩𑀦𑁆𑀥𑀸. 𑀯𑀺𑀚𑁆𑀚𑀢𑀻𑀢𑀺 𑀯𑀺𑀚𑁆𑀚𑀦𑁆𑀢𑀺. 𑀧𑀸𑀡𑀲𑀸𑀥𑀸𑀭𑀡𑁄𑀢𑀺 𑀲𑀸𑀥𑀸𑀭𑀡𑀧𑀸𑀡𑁄 𑀅𑀯𑀺𑀪𑀢𑁆𑀢𑀚𑀻𑀯𑀺𑀓𑁄, 𑀬𑀣𑀸 𑀢𑁆𑀯𑀁 𑀏𑀢𑀲𑁆𑀲 𑀲𑀔𑀸, 𑀏𑀢𑀸𑀤𑀺𑀲𑀸 𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀫𑀺𑀢𑁆𑀢𑀸 𑀦𑀸𑀫 𑀦 𑀯𑀺𑀚𑁆𑀚𑀦𑁆𑀢𑀺. 𑀢𑀯𑀸𑀦𑀼𑀕𑁄𑀢𑀺 𑀏𑀢𑀁 𑀤𑀼𑀓𑁆𑀔𑀺𑀢𑀁 𑀆𑀤𑀸𑀬 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀢𑀯 𑀅𑀬𑀁 𑀅𑀦𑀼𑀕𑁄 𑀳𑁄𑀢𑀽𑀢𑀺.

𑀏𑀯𑀁 𑀯𑀢𑁆𑀯𑀸 𑀧𑀦 𑀦𑁂𑀲𑀸𑀤𑀧𑀼𑀢𑁆𑀢𑁄 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀭𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀲𑀭𑀢𑀻𑀭𑁂 𑀢𑀭𑀼𑀡𑀤𑀩𑁆𑀩𑀢𑀺𑀡𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀩𑀦𑁆𑀥𑀦𑀧𑀸𑀲𑀁 𑀫𑀼𑀤𑀼𑀘𑀺𑀢𑁆𑀢𑁂𑀦 𑀲𑀡𑀺𑀓𑀁 𑀫𑁄𑀘𑁂𑀢𑁆𑀯𑀸 𑀤𑀽𑀭𑁂 𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑁂 𑀩𑀮𑀯𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀉𑀤𑀓𑀁 𑀆𑀤𑀸𑀬 𑀮𑁄𑀳𑀺𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀺. 𑀢𑀲𑁆𑀲 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑁂 𑀲𑀺𑀭𑀸 𑀲𑀺𑀭𑀸𑀳𑀺, 𑀫𑀁𑀲𑀁 𑀫𑀁𑀲𑁂𑀦, 𑀘𑀫𑁆𑀫𑀁 𑀘𑀫𑁆𑀫𑁂𑀦 𑀖𑀝𑀺𑀢𑀁, 𑀢𑀸𑀯𑀤𑁂𑀯 𑀧𑀸𑀤𑁄 𑀲𑀁𑀭𑀼𑀴𑁆𑀳𑁄 𑀲𑀜𑁆𑀚𑀸𑀢𑀙𑀯𑀺𑀲𑀜𑁆𑀚𑀸𑀢𑀮𑁄𑀫𑁄 𑀅𑀳𑁄𑀲𑀺 𑀅𑀩𑀤𑁆𑀥𑀧𑀸𑀤𑁂𑀦 𑀦𑀺𑀩𑁆𑀩𑀺𑀲𑁂𑀲𑁄. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀔𑀺𑀢𑁄 𑀧𑀓𑀢𑀺𑀪𑀸𑀯𑁂𑀦𑁂𑀯 𑀦𑀺𑀲𑀻𑀤𑀺. 𑀅𑀣 𑀲𑀼𑀫𑀼𑀔𑁄 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀢𑁆𑀢𑀲𑁆𑀲 𑀲𑀼𑀔𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀦𑁂𑀲𑀸𑀤𑀲𑁆𑀲 𑀣𑀼𑀢𑀺𑀫𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁩𑁪. ‘‘𑀲𑁄 𑀧𑀢𑀻𑀢𑁄 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑁄;

𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑁄, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡𑀁.

𑁩𑁫. ‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀤𑀺𑀚𑀸𑀥𑀺𑀧’’𑀦𑁆𑀢𑀺.

𑀢𑀢𑁆𑀣 𑀯𑀓𑁆𑀓𑀗𑁆𑀕𑁄𑀢𑀺 𑀯𑀗𑁆𑀓𑀕𑀻𑀯𑁄.

𑀏𑀯𑀁 𑀮𑀼𑀤𑁆𑀤𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀲𑀼𑀫𑀼𑀔𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀫𑀳𑀸𑀉𑀧𑀓𑀸𑀭𑁄 𑀓𑀢𑁄, 𑀅𑀬𑀜𑁆𑀳𑀺 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀓𑀻𑀴𑀸𑀳𑀁𑀲𑁂 𑀦𑁄 𑀓𑀢𑁆𑀯𑀸 𑀇𑀲𑁆𑀲𑀭𑀸𑀦𑀁 𑀤𑁂𑀦𑁆𑀢𑁄 𑀩𑀳𑀼𑀁 𑀥𑀦𑀁 𑀮𑀪𑁂𑀬𑁆𑀬, 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀫𑀽𑀮𑀫𑁆𑀧𑀺 𑀮𑀪𑁂𑀣, 𑀅𑀢𑁆𑀢𑀦𑁄 𑀧𑀦 𑀚𑀻𑀯𑀺𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀅𑀓𑀭𑀺, 𑀇𑀫𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀲𑀼𑀔𑀚𑀻𑀯𑀺𑀢𑀁 𑀓𑀭𑁄𑀫𑀸’’𑀢𑀺. 𑀫𑀳𑀸𑀲𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀼𑀫𑀼𑀔𑁄 𑀅𑀢𑁆𑀢𑀦𑁄 𑀪𑀸𑀲𑀸𑀬 𑀫𑀳𑀸𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑀪𑀸𑀲𑀸𑀬 𑀮𑀼𑀤𑁆𑀤𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀓𑀺𑀫𑀢𑁆𑀣𑀁 𑀧𑀸𑀲𑁂 𑀑𑀟𑁆𑀟𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀦𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑁂 𑀆𑀤𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺, 𑀩𑀳𑀼𑀁 𑀢𑁂 𑀥𑀦𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀳 𑁋

𑁩𑁬. ‘‘𑀏𑀳𑀺 𑀢𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀬𑀣𑀸 𑀢𑁆𑀯𑀫𑀧𑀺 𑀮𑀘𑁆𑀙𑀲𑁂;

𑀮𑀸𑀪𑀁 𑀢𑀯𑀸𑀬𑀁 𑀥𑀢𑀭𑀝𑁆𑀞𑁄, 𑀧𑀸𑀧𑀁 𑀓𑀺𑀜𑁆𑀘𑀺 𑀦 𑀤𑀓𑁆𑀔𑀢𑀺.

𑁩𑁭. ‘‘𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸, 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄;

𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.

𑁩𑁮. ‘‘𑀥𑀢𑀭𑀝𑁆𑀞𑀸 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;

𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄.

𑁩𑁯. ‘‘𑀅𑀲𑀁𑀲𑀬𑀁 𑀇𑀫𑀁 𑀤𑀺𑀲𑁆𑀯𑀸, 𑀳𑀁𑀲𑀭𑀸𑀚𑀁 𑀦𑀭𑀸𑀥𑀺𑀧𑁄.

𑀧𑀢𑀻𑀢𑁄 𑀲𑀼𑀫𑀦𑁄 𑀯𑀺𑀢𑁆𑀢𑁄, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦’’𑀦𑁆𑀢𑀺.

𑀢𑀢𑁆𑀣 𑀅𑀦𑀼𑀲𑀺𑀓𑁆𑀔𑀸𑀫𑀻𑀢𑀺 𑀅𑀦𑀼𑀲𑀸𑀲𑀸𑀫𑀺. 𑀧𑀸𑀧𑀦𑁆𑀢𑀺 𑀮𑀸𑀫𑀓𑀁. 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄𑀢𑀺 𑀅𑀫𑁆𑀳𑁂 𑀉𑀪𑁄𑀧𑀺 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺. 𑀅𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀜𑁆𑀜𑀸𑀧𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀢𑁆𑀢𑀦𑁄 𑀫𑀺𑀢𑁆𑀢𑀥𑀫𑁆𑀫𑀲𑁆𑀲 𑀆𑀯𑀺𑀪𑀸𑀯𑀦𑀢𑁆𑀣𑀁, 𑀮𑀼𑀤𑁆𑀤𑀲𑁆𑀲 𑀥𑀦𑀮𑀸𑀪𑀢𑁆𑀣𑀁, 𑀭𑀜𑁆𑀜𑁄 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀜𑁆𑀘𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀏𑀯𑀫𑀸𑀳. 𑀥𑀢𑀭𑀝𑁆𑀞𑀸𑀢𑀺 𑀦𑁂𑀢𑁆𑀯𑀸 𑀘 𑀧𑀦 𑀭𑀜𑁆𑀜𑁄 𑀏𑀯𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, ‘‘𑀫𑀳𑀸𑀭𑀸𑀚, 𑀇𑀫𑁂 𑀥𑀢𑀭𑀝𑁆𑀞𑀓𑀼𑀮𑁂 𑀚𑀸𑀢𑀸 𑀤𑁆𑀯𑁂 𑀳𑀁𑀲𑀸𑀥𑀺𑀧𑀢𑀺𑀦𑁄, 𑀏𑀢𑁂𑀲𑀼 𑀅𑀬𑀁 𑀭𑀸𑀚𑀸, 𑀇𑀢𑀭𑁄 𑀲𑁂𑀦𑀸𑀧𑀢𑀻’’𑀢𑀺. 𑀇𑀢𑀺 𑀦𑀁 𑀲𑀺𑀓𑁆𑀔𑀸𑀧𑁂𑀲𑀺. ‘‘𑀧𑀢𑀻𑀢𑁄’’𑀢𑀺𑀆𑀤𑀻𑀦𑀺 𑀢𑀻𑀡𑀺𑀧𑀺 𑀢𑀼𑀝𑁆𑀞𑀸𑀓𑀸𑀭𑀯𑁂𑀯𑀘𑀦𑀸𑀦𑁂𑀯.

𑀏𑀯𑀁 𑀯𑀼𑀢𑁆𑀢𑁂 𑀮𑀼𑀤𑁆𑀤𑁄, ‘‘𑀲𑀸𑀫𑀺, 𑀫𑀸 𑀯𑁄 𑀭𑀸𑀚𑀤𑀲𑁆𑀲𑀦𑀁 𑀭𑀼𑀘𑁆𑀘𑀺, 𑀭𑀸𑀚𑀸𑀦𑁄 𑀦𑀸𑀫 𑀘𑀮𑀘𑀺𑀢𑁆𑀢𑀸, 𑀓𑀻𑀴𑀸𑀳𑀁𑀲𑁂 𑀯𑀸 𑀯𑁄 𑀓𑀭𑁂𑀬𑁆𑀬𑀼𑀁 𑀫𑀸𑀭𑀸𑀧𑁂𑀬𑁆𑀬𑀼𑀁 𑀯𑀸’’𑀢𑀺 𑀯𑀢𑁆𑀯𑀸, ‘‘𑀲𑀫𑁆𑀫, 𑀫𑀸 𑀪𑀸𑀬𑀺, 𑀅𑀳𑀁 𑀢𑀸𑀤𑀺𑀲𑀁 𑀓𑀓𑁆𑀔𑀴𑀁 𑀮𑀼𑀤𑁆𑀤𑀁 𑀮𑁄𑀳𑀺𑀢𑀧𑀸𑀡𑀺𑀁 𑀥𑀫𑁆𑀫𑀓𑀣𑀸𑀬 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀫𑀫 𑀧𑀸𑀤𑁂𑀲𑀼 𑀧𑀸𑀢𑁂𑀲𑀺𑀁, 𑀭𑀸𑀚𑀸𑀦𑁄 𑀦𑀸𑀫 𑀧𑀼𑀜𑁆𑀜𑀯𑀦𑁆𑀢𑁄 𑀧𑀜𑁆𑀜𑀯𑀦𑁆𑀢𑁄 𑀘 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀽 𑀘, 𑀔𑀺𑀧𑁆𑀧𑀁 𑀅𑀫𑁆𑀳𑁂 𑀭𑀜𑁆𑀜𑁄 𑀤𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀣, 𑀅𑀳𑀁 𑀅𑀯𑀲𑁆𑀲𑀁 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀦𑁂𑀫𑀻’’𑀢𑀺 𑀯𑀢𑁆𑀯𑀸 𑀉𑀪𑁄𑀧𑀺 𑀓𑀸𑀚𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀬𑀣𑀸𑀪𑀽𑀢𑀁 𑀆𑀭𑁄𑀘𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁪𑁦. ‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀓𑀫𑁆𑀫𑀼𑀦𑀸 𑀉𑀧𑀧𑀸𑀤𑀬𑀺;

𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀳𑀁𑀲𑁂 𑀅𑀤𑀲𑁆𑀲𑀬𑀺;

𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.

𑁪𑁧. ‘‘𑀥𑀢𑀭𑀝𑁆𑀞𑀸 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;

𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄;

𑁪𑁨. ‘‘𑀓𑀣𑀁 𑀧𑀦𑀺𑀫𑁂 𑀯𑀺𑀳𑀗𑁆𑀕𑀸, 𑀢𑀯 𑀳𑀢𑁆𑀣𑀢𑁆𑀢𑀫𑀸𑀕𑀢𑀸;

𑀓𑀣𑀁 𑀮𑀼𑀤𑁆𑀤𑁄 𑀫𑀳𑀦𑁆𑀢𑀸𑀦𑀁, 𑀇𑀲𑁆𑀲𑀭𑁂 𑀇𑀥 𑀅𑀚𑁆𑀛𑀕𑀸.

𑁪𑁩. ‘‘𑀯𑀺𑀳𑀺𑀢𑀸 𑀲𑀦𑁆𑀢𑀺𑀫𑁂 𑀧𑀸𑀲𑀸, 𑀧𑀮𑁆𑀮𑀮𑁂𑀲𑀼 𑀚𑀦𑀸𑀥𑀺𑀧;

𑀬𑀁 𑀬𑀤𑀸𑀬𑀢𑀦𑀁 𑀫𑀜𑁆𑀜𑁂, 𑀤𑀺𑀚𑀸𑀦𑀁 𑀧𑀸𑀡𑀭𑁄𑀥𑀦𑀁.

𑁪𑁪. ‘‘𑀢𑀸𑀤𑀺𑀲𑀁 𑀧𑀸𑀲𑀫𑀸𑀲𑀚𑁆𑀚, 𑀳𑀁𑀲𑀭𑀸𑀚𑀸 𑀅𑀩𑀚𑁆𑀛𑀣;

𑀢𑀁 𑀅𑀩𑀤𑁆𑀥𑁄 𑀉𑀧𑀸𑀲𑀺𑀦𑁄, 𑀫𑀫𑀸𑀬𑀁 𑀅𑀚𑁆𑀛𑀪𑀸𑀲𑀣.

𑁪𑁫. ‘‘𑀲𑀼𑀤𑀼𑀓𑁆𑀓𑀭𑀁 𑀅𑀦𑀭𑀺𑀬𑁂𑀪𑀺, 𑀤𑀳𑀢𑁂 𑀪𑀸𑀯𑀫𑀼𑀢𑁆𑀢𑀫𑀁;

𑀪𑀢𑁆𑀢𑀼𑀭𑀢𑁆𑀣𑁂 𑀧𑀭𑀓𑁆𑀓𑀦𑁆𑀢𑁄, 𑀥𑀫𑁆𑀫𑀬𑀼𑀢𑁆𑀢𑁄 𑀯𑀺𑀳𑀗𑁆𑀕𑀫𑁄.

𑁪𑁬. ‘‘𑀅𑀢𑁆𑀢𑀦𑀸𑀬𑀁 𑀘𑀚𑀺𑀢𑁆𑀯𑀸𑀦, 𑀚𑀻𑀯𑀺𑀢𑀁 𑀚𑀻𑀯𑀺𑀢𑀸𑀭𑀳𑁄;

𑀅𑀦𑀼𑀢𑁆𑀣𑀼𑀦𑀦𑁆𑀢𑁄 𑀆𑀲𑀻𑀦𑁄, 𑀪𑀢𑁆𑀢𑀼 𑀬𑀸𑀘𑀺𑀢𑁆𑀣 𑀚𑀻𑀯𑀺𑀢𑀁.

𑁪𑁭. ‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀲𑀸𑀤𑀫𑀳𑀫𑀚𑁆𑀛𑀕𑀸;

𑀢𑀢𑁄 𑀦𑀁 𑀧𑀸𑀫𑀼𑀘𑀺𑀁 𑀧𑀸𑀲𑀸, 𑀅𑀦𑀼𑀜𑁆𑀜𑀸𑀲𑀺𑀁 𑀲𑀼𑀔𑁂𑀦 𑀘.

𑁪𑁮. ‘‘𑀲𑁄 𑀧𑀢𑀻𑀢𑁄 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑁄;

𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑁄, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡𑀁.

𑁪𑁯. ‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀤𑀺𑀚𑀸𑀥𑀺𑀧𑀁.

𑁫𑁦. ‘‘𑀏𑀳𑀺 𑀢𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀬𑀣𑀸 𑀢𑁆𑀯𑀫𑀧𑀺 𑀮𑀘𑁆𑀙𑀲𑁂;

𑀮𑀸𑀪𑀁 𑀢𑀯𑀸𑀬𑀁 𑀥𑀢𑀭𑀝𑁆𑀞𑁄, 𑀧𑀸𑀧𑀁 𑀓𑀺𑀜𑁆𑀘𑀺 𑀦 𑀤𑀓𑁆𑀔𑀢𑀺.

𑁫𑁧. ‘‘𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸, 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄;

𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.

𑁫𑁨. ‘‘𑀥𑀢𑀭𑀝𑁆𑀞𑀸 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;

𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄.

𑁫𑁩. ‘‘𑀅𑀲𑀁𑀲𑀬𑀁 𑀇𑀫𑀁 𑀤𑀺𑀲𑁆𑀯𑀸, 𑀳𑀁𑀲𑀭𑀸𑀚𑀁 𑀦𑀭𑀸𑀥𑀺𑀧𑁄;

𑀧𑀢𑀻𑀢𑁄 𑀲𑀼𑀫𑀦𑁄 𑀯𑀺𑀢𑁆𑀢𑁄, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦𑀁.

𑁫𑁪. ‘‘𑀏𑀯𑀫𑁂𑀢𑀲𑁆𑀲 𑀯𑀘𑀦𑀸, 𑀆𑀦𑀻𑀢𑀸𑀫𑁂 𑀉𑀪𑁄 𑀫𑀬𑀸;

𑀏𑀢𑁆𑀣𑁂𑀯 𑀳𑀺 𑀇𑀫𑁂 𑀆𑀲𑀼𑀁, 𑀉𑀪𑁄 𑀅𑀦𑀼𑀫𑀢𑀸 𑀫𑀬𑀸.

𑁫𑁫. ‘‘𑀲𑁄𑀬𑀁 𑀏𑀯𑀁 𑀕𑀢𑁄 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀫𑀸𑀤𑀺𑀲𑀲𑁆𑀲 𑀳𑀺 𑀮𑀼𑀤𑁆𑀤𑀲𑁆𑀲, 𑀚𑀦𑀬𑁂𑀬𑁆𑀬𑀸𑀣 𑀫𑀤𑁆𑀤𑀯𑀁.

𑁫𑁬. ‘‘𑀉𑀧𑀸𑀬𑀦𑀜𑁆𑀘 𑀢𑁂 𑀤𑁂𑀯, 𑀦𑀸𑀜𑁆𑀜𑀁 𑀧𑀲𑁆𑀲𑀸𑀫𑀺 𑀏𑀤𑀺𑀲𑀁;