𑁧𑁭. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄

[𑁫𑁨𑁧] 𑁧. 𑀢𑁂𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸

𑀯𑁂𑀲𑁆𑀲𑀦𑁆𑀢𑀭𑀁 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀑𑀯𑀸𑀤𑀯𑀲𑁂𑀦 𑀓𑀣𑁂𑀲𑀺. 𑀢𑀜𑁆𑀳𑀺 𑀭𑀸𑀚𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀕𑀢𑀁 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀩𑁆𑀩𑀁, 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀭𑀸𑀚𑀬𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀻’’𑀢𑀺 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 (𑀅. 𑀦𑀺. 𑁪.𑁭𑁦) 𑀆𑀕𑀢𑀲𑀼𑀢𑁆𑀢𑀦𑀬𑁂𑀦 𑀑𑀯𑀤𑀺𑀢𑁆𑀯𑀸 𑀅𑀕𑀢𑀺𑀕𑀫𑀦𑁂 𑀅𑀕𑀢𑀺𑀅𑀕𑀫𑀦𑁂 𑀘 𑀆𑀤𑀻𑀦𑀯𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀓𑀣𑁂𑀢𑁆𑀯𑀸 ‘‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑁋

‘𑀫𑀘𑁆𑀘𑀼𑀦𑀸 𑀲𑀗𑁆𑀕𑀭𑁄 𑀦𑀢𑁆𑀣𑀺, 𑀮𑀜𑁆𑀚𑀕𑁆𑀕𑀸𑀳𑁄 𑀦 𑀯𑀺𑀚𑁆𑀚𑀢𑀺;

𑀬𑀼𑀤𑁆𑀥𑀁 𑀦𑀢𑁆𑀣𑀺 𑀚𑀬𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀡𑀸’.

𑀢𑁂𑀲𑀁 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀅𑀜𑁆𑀜𑀸 𑀧𑀢𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀁 𑀧𑀳𑀸𑀢𑀩𑁆𑀩𑀁, 𑀦 𑀬𑀲𑀁 𑀦𑀺𑀲𑁆𑀲𑀸𑀬 𑀧𑀫𑀸𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀧𑁆𑀧𑀫𑀢𑁆𑀢𑁂𑀦𑁂𑀯 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀩𑀼𑀤𑁆𑀥𑁂 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀽𑀭𑀬𑀫𑀸𑀦𑀸 𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀅𑀧𑀼𑀢𑁆𑀢𑀓𑁄 𑀅𑀳𑁄𑀲𑀺, 𑀧𑀢𑁆𑀣𑁂𑀦𑁆𑀢𑁄𑀧𑀺 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀦 𑀮𑀪𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀫𑀗𑁆𑀕𑀮𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀲𑀬𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑁄 𑀲𑀸𑀮𑀭𑀼𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀢𑀢𑁆𑀣 𑀲𑀓𑀼𑀡𑀓𑀼𑀮𑀸𑀯𑀓𑀁 𑀧𑀲𑁆𑀲𑀺, 𑀲𑀳 𑀤𑀲𑁆𑀲𑀦𑁂𑀦𑁂𑀯𑀲𑁆𑀲 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀏𑀓𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑁂 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀁 𑀯𑀸 𑀦𑀢𑁆𑀣𑀺𑀢𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣 𑀢𑀻𑀡𑀺 𑀅𑀡𑁆𑀟𑀓𑀸𑀦𑀺 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀢𑁂𑀦 𑀳𑀺 𑀏𑀢𑁂𑀲𑀁 𑀉𑀧𑀭𑀺 𑀦𑀸𑀲𑀯𑀸𑀢𑀁 𑀫𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀘𑀗𑁆𑀓𑁄𑀝𑀓𑁂 𑀓𑀧𑁆𑀧𑀸𑀲𑀧𑀺𑀘𑀼𑀁 𑀅𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀸𑀦𑀺 𑀅𑀡𑁆𑀟𑀓𑀸𑀦𑀺 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀑𑀢𑀭𑀸𑀳𑀻’’𑀢𑀺 𑀑𑀢𑀸𑀭𑀸𑀧𑁂𑀢𑁆𑀯𑀸 𑀘𑀗𑁆𑀓𑁄𑀝𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀢𑀭𑀲𑀓𑀼𑀡𑀡𑁆𑀟𑀓𑀸𑀦𑀺 𑀦𑀸𑀫𑁂𑀢𑀸𑀦𑀻’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀢𑁂 ‘‘𑀫𑀬𑀁 𑀦 𑀚𑀸𑀦𑀸𑀫, 𑀦𑁂𑀲𑀸𑀤𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀦𑁂𑀲𑀸𑀤𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀦𑁂𑀲𑀸𑀤𑀸, ‘‘𑀫𑀳𑀸𑀭𑀸𑀚, 𑀢𑁂𑀲𑀼 𑀏𑀓𑀁 𑀉𑀮𑀽𑀓𑀅𑀡𑁆𑀟𑀁, 𑀏𑀓𑀁 𑀲𑀸𑀮𑀺𑀓𑀸𑀅𑀡𑁆𑀟𑀁, 𑀏𑀓𑀁 𑀲𑀼𑀯𑀓𑀅𑀡𑁆𑀟’’𑀦𑁆𑀢𑀺 𑀓𑀣𑀬𑀺𑀁𑀲𑀼. 𑀓𑀺𑀁 𑀧𑀦 𑀏𑀓𑀲𑁆𑀫𑀺𑀁 𑀓𑀼𑀮𑀸𑀯𑀓𑁂 𑀢𑀺𑀡𑁆𑀡𑀁 𑀲𑀓𑀼𑀡𑀺𑀓𑀸𑀦𑀁 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀆𑀫, 𑀤𑁂𑀯, 𑀧𑀭𑀺𑀧𑀦𑁆𑀣𑁂 𑀅𑀲𑀢𑀺 𑀲𑀼𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀦 𑀦𑀲𑁆𑀲𑀦𑁆𑀢𑀻𑀢𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀇𑀫𑁂 𑀫𑀫 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀸𑀦𑀺 𑀢𑀻𑀡𑀺 𑀅𑀡𑁆𑀟𑀸𑀦𑀺 𑀢𑀬𑁄 𑀅𑀫𑀘𑁆𑀘𑁂 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀇𑀫𑁂 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀫𑀫𑀸𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀸𑀦𑀺 𑀲𑀸𑀥𑀼𑀓𑀁 𑀭𑀓𑁆𑀔𑀺𑀁𑀲𑀼.

𑀢𑁂𑀲𑀼 𑀧𑀞𑀫𑀁 𑀉𑀮𑀽𑀓𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀅𑀫𑀘𑁆𑀘𑁄 𑀏𑀓𑀁 𑀦𑁂𑀲𑀸𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀢𑁆𑀣𑀺𑀪𑀸𑀯𑀁 𑀯𑀸 𑀧𑀼𑀭𑀺𑀲𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀚𑀸𑀢𑁄’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀧𑀼𑀢𑁆𑀢𑀓𑀁 𑀫𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕, ‘𑀯𑁂𑀲𑁆𑀲𑀦𑁆𑀢𑀭𑁄’𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀸𑀮𑀺𑀓𑀸𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀲𑁄𑀧𑀺 𑀅𑀫𑀘𑁆𑀘𑁄 𑀢𑀁 𑀦𑁂𑀲𑀸𑀤𑁂𑀦 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 ‘‘𑀇𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀥𑀻𑀢𑀸 𑀢𑁂, 𑀤𑁂𑀯, 𑀚𑀸𑀢𑀸’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲𑀧𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀥𑀻𑀢𑀭𑀁 𑀫𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕, ‘𑀓𑀼𑀡𑁆𑀟𑀮𑀺𑀦𑀻’𑀢𑀺 𑀘𑀲𑁆𑀲𑀸 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀼𑀯𑀓𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀲𑁄𑀧𑀺 𑀅𑀫𑀘𑁆𑀘𑁄 𑀦𑁂𑀲𑀸𑀤𑁂𑀦 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀚𑀸𑀢𑁄’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲𑀧𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀗𑁆𑀕𑀮𑀁 𑀓𑀢𑁆𑀯𑀸 ‘𑀚𑀫𑁆𑀩𑀼𑀓𑁄’𑀢𑀺𑀲𑁆𑀲 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀢𑁂 𑀢𑀬𑁄𑀧𑀺 𑀲𑀓𑀼𑀡𑀸 𑀢𑀺𑀡𑁆𑀡𑀁 𑀅𑀫𑀘𑁆𑀘𑀸𑀦𑀁 𑀕𑁂𑀳𑁂𑀲𑀼 𑀭𑀸𑀚𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦𑁂𑀯 𑀯𑀟𑁆𑀠𑀦𑁆𑀢𑀺. 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑁄, 𑀫𑀫 𑀥𑀻𑀢𑀸’’𑀢𑀺 𑀯𑁄𑀳𑀭𑀢𑀺. 𑀅𑀣𑀲𑁆𑀲 𑀅𑀫𑀘𑁆𑀘𑀸 𑀅𑀜𑁆𑀜𑀫𑀜𑁆𑀜𑀁 𑀅𑀯𑀳𑀲𑀦𑁆𑀢𑀺 ‘‘𑀧𑀲𑁆𑀲𑀣, 𑀪𑁄, 𑀭𑀜𑁆𑀜𑁄 𑀓𑀺𑀭𑀺𑀬𑀁, 𑀢𑀺𑀭𑀘𑁆𑀙𑀸𑀦𑀕𑀢𑁂𑀧𑀺 ‘𑀧𑀼𑀢𑁆𑀢𑁄 𑀫𑁂, 𑀥𑀻𑀢𑀸 𑀫𑁂’𑀢𑀺 𑀯𑀤𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀅𑀫𑀘𑁆𑀘𑀸 𑀏𑀢𑁂𑀲𑀁 𑀫𑀫 𑀧𑀼𑀢𑁆𑀢𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦 𑀚𑀸𑀦𑀦𑁆𑀢𑀺, 𑀧𑀸𑀓𑀝𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑁂𑀓𑀁 𑀅𑀫𑀘𑁆𑀘𑀁 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀢𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀓𑀤𑀸 𑀓𑀺𑀭 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀽’’𑀢𑀺. 𑀲𑁄 𑀅𑀫𑀘𑁆𑀘𑁄 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 𑀅𑀢𑁆𑀢𑀦𑁄 𑀧𑀝𑀺𑀚𑀕𑁆𑀕𑀓𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀺𑀭 𑀧𑀺𑀢𑀸 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀇𑀥𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀤𑀸 𑀆𑀕𑀘𑁆𑀙𑀢𑀽’’𑀢𑀺 𑀧𑀼𑀘𑁆𑀙𑀺. 𑀅𑀫𑀘𑁆𑀘𑁄 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀯 𑀧𑀺𑀢𑀸 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 ‘‘𑀧𑀺𑀢𑀸 𑀫𑁂 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀯𑁂𑀲𑁆𑀲𑀦𑁆𑀢𑀭𑁄 𑀭𑀜𑁆𑀜𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺, 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀸𑀭𑀸𑀦𑀫𑁆𑀧𑀺 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀭𑀸𑀚𑀸 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑀲𑁆𑀲 𑀕𑁂𑀳𑁂 𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀓𑀁 𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀫𑀳𑀸𑀚𑀦𑀧𑀭𑀺𑀯𑀸𑀭𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑀁 𑀆𑀦𑁂𑀢𑀽’’𑀢𑀺 𑀅𑀫𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀅𑀫𑀘𑁆𑀘𑁄 𑀯𑁂𑀲𑁆𑀲𑀦𑁆𑀢𑀭𑀁 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀦𑁂𑀲𑀺. 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁄 𑀧𑀺𑀢𑀼 𑀅𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀢𑀭𑀸 𑀲𑀳 𑀓𑀻𑀴𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀫𑀳𑀸𑀚𑀦𑀫𑀚𑁆𑀛𑁂 𑀭𑀸𑀚𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀯𑁂𑀲𑁆𑀲𑀦𑁆𑀢𑀭𑀁 𑀢𑀁 𑀧𑀼𑀘𑁆𑀙𑀸𑀫𑀺, 𑀲𑀓𑀼𑀡 𑀪𑀤𑁆𑀤𑀫𑀢𑁆𑀣𑀼 𑀢𑁂;

𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁂𑀦, 𑀓𑀺𑀁 𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭’’𑀦𑁆𑀢𑀺.

𑀢𑀢𑁆𑀣 𑀲𑀓𑀼𑀡𑀸𑀢𑀺 𑀢𑀁 𑀆𑀮𑀧𑀢𑀺. 𑀓𑀺𑀁 𑀲𑀽𑀢𑀺 𑀓𑀢𑀭𑀁 𑀓𑀺𑀘𑁆𑀘𑀁 𑀓𑀢𑀁 𑀯𑀭𑀁 𑀉𑀢𑁆𑀢𑀫𑀁 𑀳𑁄𑀢𑀺, 𑀓𑀣𑁂𑀳𑀺 𑀫𑁂, 𑀢𑀸𑀢, 𑀲𑀓𑀮𑀁 𑀭𑀸𑀚𑀥𑀫𑁆𑀫𑀦𑁆𑀢𑀺 𑀏𑀯𑀁 𑀓𑀺𑀭 𑀢𑀁 𑀲𑁄 𑀧𑀼𑀘𑁆𑀙𑀺.

𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 𑀧𑀜𑁆𑀳𑀁 𑀅𑀓𑀣𑁂𑀢𑁆𑀯𑀸𑀯 𑀭𑀸𑀚𑀸𑀦𑀁 𑀢𑀸𑀯 𑀧𑀫𑀸𑀤𑁂𑀦 𑀘𑁄𑀤𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀘𑀺𑀭𑀲𑁆𑀲𑀁 𑀯𑀢 𑀫𑀁 𑀢𑀸𑀢𑁄, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;

𑀧𑀫𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑀁 𑀫𑀁, 𑀧𑀺𑀢𑀸 𑀧𑀼𑀢𑁆𑀢𑀁 𑀅𑀘𑁄𑀤𑀬𑀻’’𑀢𑀺.

𑀢𑀢𑁆𑀣 𑀢𑀸𑀢𑁄𑀢𑀺 𑀧𑀺𑀢𑀸. 𑀓𑀁𑀲𑁄𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁. 𑀩𑀸𑀭𑀸𑀡𑀲𑀺𑀕𑁆𑀕𑀳𑁄𑀢𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀩𑀸𑀭𑀸𑀡𑀲𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀦𑁆𑀢𑁄. 𑀧𑀫𑀢𑁆𑀢𑁄𑀢𑀺 𑀏𑀯𑀭𑀽𑀧𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀧𑀜𑁆𑀳𑀲𑁆𑀲 𑀅𑀧𑀼𑀘𑁆𑀙𑀦𑁂𑀦 𑀧𑀫𑀢𑁆𑀢𑁄. 𑀅𑀧𑁆𑀧𑀫𑀢𑁆𑀢𑀁 𑀫𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑀬𑁄𑀕𑁂𑀦 𑀫𑀁 𑀅𑀧𑁆𑀧𑀫𑀢𑁆𑀢𑀁. 𑀧𑀺𑀢𑀸𑀢𑀺 𑀧𑁄𑀲𑀓𑀧𑀺𑀢𑀸. 𑀅𑀘𑁄𑀤𑀬𑀻𑀢𑀺 𑀅𑀫𑀘𑁆𑀘𑁂𑀳𑀺 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀧𑀼𑀢𑁆𑀢𑁂 𑀓𑀢𑁆𑀯𑀸 𑀯𑁄𑀳𑀭𑀢𑀻’’𑀢𑀺 𑀅𑀯𑀳𑀲𑀺𑀬𑀫𑀸𑀦𑁄 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀘𑀺𑀭𑀲𑁆𑀲𑀁 𑀅𑀚𑁆𑀚 𑀘𑁄𑀤𑁂𑀲𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑀯𑀤𑀢𑀺.

𑀏𑀯𑀁 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀘𑁄𑀤𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀭𑀸𑀚𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀆𑀳 𑁋

𑁩. ‘‘𑀧𑀞𑀫𑁂𑀦𑁂𑀯 𑀯𑀺𑀢𑀣𑀁, 𑀓𑁄𑀥𑀁 𑀳𑀸𑀲𑀁 𑀦𑀺𑀯𑀸𑀭𑀬𑁂;

𑀢𑀢𑁄 𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬, 𑀢𑀁 𑀯𑀢𑀁 𑀆𑀳𑀼 𑀔𑀢𑁆𑀢𑀺𑀬.

𑁪. ‘‘𑀬𑀁 𑀢𑁆𑀯𑀁 𑀢𑀸𑀢 𑀢𑀧𑁄𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀓𑀢𑀫𑀲𑀁𑀲𑀬𑀁;

𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀬𑀁 𑀓𑀬𑀺𑀭𑀸, 𑀦 𑀢𑀁 𑀓𑀬𑀺𑀭𑀸 𑀢𑀢𑁄 𑀧𑀼𑀦.

𑁫. ‘‘𑀔𑀢𑁆𑀢𑀺𑀬𑀲𑁆𑀲 𑀧𑀫𑀢𑁆𑀢𑀲𑁆𑀲, 𑀭𑀝𑁆𑀞𑀲𑁆𑀫𑀺𑀁 𑀭𑀝𑁆𑀞𑀯𑀟𑁆𑀠𑀦;

𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀢𑀁 𑀯𑀼𑀘𑁆𑀘𑀢𑁂 𑀅𑀖𑀁.

𑁬. ‘‘𑀲𑀺𑀭𑀻 𑀢𑀸𑀢 𑀅𑀮𑀓𑁆𑀔𑀻 𑀘, 𑀧𑀼𑀘𑁆𑀙𑀺𑀢𑀸 𑀏𑀢𑀤𑀩𑁆𑀭𑀯𑀼𑀁;

𑀉𑀝𑁆𑀞𑀸𑀦𑀯𑀻𑀭𑀺𑀬𑁂 𑀧𑁄𑀲𑁂, 𑀭𑀫𑀸𑀳𑀁 𑀅𑀦𑀼𑀲𑀽𑀬𑀓𑁂.

𑁭. ‘‘𑀉𑀲𑀽𑀬𑀓𑁂 𑀤𑀼𑀳𑀤𑀬𑁂, 𑀧𑀼𑀭𑀺𑀲𑁂 𑀓𑀫𑁆𑀫𑀤𑀼𑀲𑁆𑀲𑀓𑁂;

𑀓𑀸𑀴𑀓𑀡𑁆𑀡𑀻 𑀫𑀳𑀸𑀭𑀸𑀚, 𑀭𑀫𑀢𑀺 𑀘𑀓𑁆𑀓𑀪𑀜𑁆𑀚𑀦𑀻.

𑁮. ‘‘𑀲𑁄 𑀢𑁆𑀯𑀁 𑀲𑀩𑁆𑀩𑁂 𑀲𑀼𑀳𑀤𑀬𑁄, 𑀲𑀩𑁆𑀩𑁂𑀲𑀁 𑀭𑀓𑁆𑀔𑀺𑀢𑁄 𑀪𑀯;

𑀅𑀮𑀓𑁆𑀔𑀺𑀁 𑀦𑀼𑀤 𑀫𑀳𑀸𑀭𑀸𑀚, 𑀮𑀓𑁆𑀔𑁆𑀬𑀸 𑀪𑀯 𑀦𑀺𑀯𑁂𑀲𑀦𑀁.

𑁯. ‘‘𑀲 𑀮𑀓𑁆𑀔𑀻𑀥𑀺𑀢𑀺𑀲𑀫𑁆𑀧𑀦𑁆𑀦𑁄, 𑀧𑀼𑀭𑀺𑀲𑁄 𑀳𑀺 𑀫𑀳𑀕𑁆𑀕𑀢𑁄;

𑀅𑀫𑀺𑀢𑁆𑀢𑀸𑀦𑀁 𑀓𑀸𑀲𑀺𑀧𑀢𑀺, 𑀫𑀽𑀮𑀁 𑀅𑀕𑁆𑀕𑀜𑁆𑀘 𑀙𑀺𑀦𑁆𑀤𑀢𑀺.

𑁧𑁦. ‘‘𑀲𑀓𑁆𑀓𑁄𑀧𑀺 𑀳𑀺 𑀪𑀽𑀢𑀧𑀢𑀺, 𑀉𑀝𑁆𑀞𑀸𑀦𑁂 𑀦𑀧𑁆𑀧𑀫𑀚𑁆𑀚𑀢𑀺;

𑀲 𑀓𑀮𑁆𑀬𑀸𑀡𑁂 𑀥𑀺𑀢𑀺𑀁 𑀓𑀢𑁆𑀯𑀸, 𑀉𑀝𑁆𑀞𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄.

𑁧𑁧. ‘‘𑀕𑀦𑁆𑀥𑀩𑁆𑀩𑀸 𑀧𑀺𑀢𑀭𑁄 𑀤𑁂𑀯𑀸, 𑀲𑀸𑀚𑀻𑀯𑀸 𑀳𑁄𑀦𑁆𑀢𑀺 𑀢𑀸𑀤𑀺𑀦𑁄;

𑀉𑀝𑁆𑀞𑀸𑀳𑀢𑁄 𑀅𑀧𑁆𑀧𑀫𑀚𑁆𑀚𑀢𑁄, 𑀅𑀦𑀼𑀢𑀺𑀝𑁆𑀞𑀦𑁆𑀢𑀺 𑀤𑁂𑀯𑀢𑀸.

𑁧𑁨. ‘‘𑀲𑁄 𑀅𑀧𑁆𑀧𑀫𑀢𑁆𑀢𑁄 𑀅𑀓𑁆𑀓𑀼𑀤𑁆𑀥𑁄, 𑀢𑀸𑀢 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬;

𑀯𑀸𑀬𑀫𑀲𑁆𑀲𑀼 𑀘 𑀓𑀺𑀘𑁆𑀘𑁂𑀲𑀼, 𑀦𑀸𑀮𑀲𑁄 𑀯𑀺𑀦𑁆𑀤𑀢𑁂 𑀲𑀼𑀔𑀁.

𑁧𑁩. ‘‘𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸, 𑀏𑀲𑀸𑀯 𑀅𑀦𑀼𑀲𑀸𑀲𑀦𑀻;

𑀅𑀮𑀁 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀁 𑀤𑀼𑀔𑀸𑀬 𑀘𑀸’’𑀢𑀺.

𑀢𑀢𑁆𑀣 𑀧𑀞𑀫𑁂𑀦𑁂𑀯 𑀯𑀺𑀢𑀣𑀦𑁆𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀆𑀤𑀺𑀢𑁄𑀯 𑀫𑀼𑀲𑀸𑀯𑀸𑀤𑀁 𑀦𑀺𑀯𑀸𑀭𑀬𑁂. 𑀫𑀼𑀲𑀸𑀯𑀸𑀤𑀺𑀦𑁄 𑀳𑀺 𑀭𑀜𑁆𑀜𑁄 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀳𑁄𑀢𑀺, 𑀧𑀣𑀯𑀺𑀬𑀸 𑀑𑀚𑀸 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀢𑁄 𑀲𑀢𑁆𑀢𑀭𑀢𑀦𑀫𑀢𑁆𑀢𑀁 𑀳𑁂𑀝𑁆𑀞𑀸 𑀪𑀲𑁆𑀲𑀢𑀺, 𑀢𑀢𑁄 𑀆𑀳𑀸𑀭𑁂 𑀯𑀸 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀯𑀸 𑀑𑀲𑀥𑁂𑀲𑀼 𑀑𑀚𑀸 𑀦 𑀳𑁄𑀢𑀺. 𑀦𑀺𑀭𑁄𑀚𑀸𑀳𑀸𑀭𑀪𑁄𑀚𑀦𑀸 𑀫𑀦𑀼𑀲𑁆𑀲𑀸 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺, 𑀭𑀝𑁆𑀞𑁂 𑀣𑀮𑀚𑀮𑀧𑀣𑁂𑀲𑀼 𑀆𑀬𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀭𑀸𑀚𑀸𑀦𑁄 𑀤𑀼𑀕𑁆𑀕𑀢𑀸 𑀳𑁄𑀦𑁆𑀢𑀺. 𑀢𑁂 𑀲𑁂𑀯𑀓𑁂 𑀲𑀗𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀲𑀗𑁆𑀕𑀳𑀺𑀢𑀸 𑀲𑁂𑀯𑀓𑀸 𑀭𑀸𑀚𑀸𑀦𑀁 𑀕𑀭𑀼𑀘𑀺𑀢𑁆𑀢𑁂𑀦 𑀦 𑀑𑀮𑁄𑀓𑁂𑀦𑁆𑀢𑀺. 𑀏𑀯𑀁, 𑀢𑀸𑀢, 𑀫𑀼𑀲𑀸𑀯𑀸𑀤𑁄 𑀦𑀸𑀫𑁂𑀲 𑀦𑀺𑀭𑁄𑀚𑁄, 𑀦 𑀲𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀓𑀸𑀢𑀩𑁆𑀩𑁄, 𑀲𑀘𑁆𑀘𑀁 𑀧𑀦 𑀲𑀸𑀤𑀼𑀢𑀭𑀁 𑀭𑀲𑀸𑀦𑀦𑁆𑀢𑀺 𑀢𑀤𑁂𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀕𑀼𑀡𑀧𑀭𑀺𑀥𑀁𑀲𑀓𑁄 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁄, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀅𑀯𑀻𑀘𑀺𑀧𑀭𑀸𑀬𑀡𑀁 𑀓𑀭𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀥𑀫𑁆𑀫𑁄 𑀳𑀯𑁂 𑀳𑀢𑁄 𑀳𑀦𑁆𑀢𑀻’’𑀢𑀺 𑀘𑁂𑀢𑀺𑀬𑀚𑀸𑀢𑀓𑀁 (𑀚𑀸. 𑁧.𑁮.𑁪𑁫 𑀆𑀤𑀬𑁄) 𑀓𑀣𑁂𑀢𑀩𑁆𑀩𑀁.

𑀓𑁄𑀥𑀦𑁆𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀧𑀞𑀫𑀫𑁂𑀯 𑀓𑀼𑀚𑁆𑀛𑀦𑀮𑀓𑁆𑀔𑀡𑀁 𑀓𑁄𑀥𑀫𑁆𑀧𑀺 𑀦𑀺𑀯𑀸𑀭𑁂𑀬𑁆𑀬. 𑀢𑀸𑀢, 𑀅𑀜𑁆𑀜𑁂𑀲𑀜𑁆𑀳𑀺 𑀓𑁄𑀥𑁄 𑀔𑀺𑀧𑁆𑀧𑀁 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀺, 𑀭𑀸𑀚𑀽𑀦𑀁 𑀧𑀸𑀧𑀼𑀡𑀸𑀢𑀺. 𑀭𑀸𑀚𑀸𑀦𑁄 𑀦𑀸𑀫 𑀯𑀸𑀘𑀸𑀯𑀼𑀥𑀸 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑁂𑀦𑀸𑀧𑀺 𑀧𑀭𑀁 𑀯𑀺𑀦𑀸𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀭𑀜𑁆𑀜𑀸 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀭𑁂𑀓𑀢𑀭𑀁 𑀦𑀺𑀓𑁆𑀓𑁄𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀲𑀫𑁆𑀧𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀸𑀢, 𑀅𑀢𑀺𑀓𑁄𑀥𑀦𑁄 𑀦𑀸𑀫 𑀭𑀸𑀚𑀸 𑀉𑀧𑁆𑀧𑀦𑁆𑀦𑀁 𑀬𑀲𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓- (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀸𑀦𑀺 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀓𑀣𑁂𑀢𑀩𑁆𑀩𑀸𑀦𑀺. 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀲𑁆𑀫𑀺𑀜𑁆𑀳𑀺 𑀫𑀳𑀸𑀧𑀢𑀸𑀧𑀦𑁄 𑀦𑀸𑀫 𑀭𑀸𑀚𑀸 𑀧𑀼𑀢𑁆𑀢𑀁 𑀖𑀸𑀢𑁂𑀢𑁆𑀯𑀸 𑀧𑀼𑀢𑁆𑀢𑀲𑁄𑀓𑁂𑀦 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀫𑀢𑀸𑀬 𑀤𑁂𑀯𑀺𑀬𑀸 𑀲𑀬𑀫𑁆𑀧𑀺 𑀤𑁂𑀯𑀺𑀁 𑀅𑀦𑀼𑀲𑁄𑀘𑀦𑁆𑀢𑁄 𑀳𑀤𑀬𑁂𑀦 𑀨𑀮𑀺𑀢𑁂𑀦𑁂𑀯 𑀫𑀭𑀺. 𑀅𑀣 𑀢𑁂 𑀢𑀬𑁄𑀧𑀺 𑀏𑀓𑀆𑀴𑀸𑀳𑀦𑁂𑀯 𑀛𑀸𑀧𑁂𑀲𑀼𑀁. 𑀢𑀲𑁆𑀫𑀸 𑀭𑀜𑁆𑀜𑀸 𑀧𑀞𑀫𑀫𑁂𑀯 𑀫𑀼𑀲𑀸𑀯𑀸𑀤𑀁 𑀯𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀓𑁄𑀥𑁄 𑀯𑀚𑁆𑀚𑁂𑀢𑀩𑁆𑀩𑁄.

𑀳𑀸𑀲𑀦𑁆𑀢𑀺 𑀳𑀲𑁆𑀲𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀉𑀧𑁆𑀧𑀺𑀮𑀸𑀯𑀺𑀢𑀘𑀺𑀢𑁆𑀢𑀢𑀸𑀬 𑀓𑁂𑀴𑀺𑀲𑀻𑀮𑀢𑀁 𑀧𑀭𑀺𑀳𑀸𑀲𑀁 𑀦𑀺𑀯𑀸𑀭𑁂𑀬𑁆𑀬. 𑀢𑀸𑀢, 𑀭𑀜𑁆𑀜𑀸 𑀦𑀸𑀫 𑀓𑁂𑀴𑀺𑀲𑀻𑀮𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀅𑀧𑀭𑀧𑀢𑁆𑀢𑀺𑀬𑁂𑀦 𑀳𑀼𑀢𑁆𑀯𑀸 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑁂𑀯 𑀓𑀸𑀢𑀩𑁆𑀩𑀸𑀦𑀺. 𑀉𑀧𑁆𑀧𑀺𑀮𑀸𑀯𑀺𑀢𑀘𑀺𑀢𑁆𑀢𑁄 𑀳𑀺 𑀭𑀸𑀚𑀸 𑀅𑀢𑀼𑀮𑁂𑀢𑁆𑀯𑀸 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀮𑀤𑁆𑀥𑀁 𑀬𑀲𑀁 𑀯𑀺𑀦𑀸𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀭𑀪𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀧𑀼𑀭𑁄𑀳𑀺𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀤𑀡𑁆𑀟𑀓𑀺𑀭𑀜𑁆𑀜𑁄 𑀓𑀺𑀲𑀯𑀘𑁆𑀙𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀉𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀘 𑀫𑀸𑀢𑀗𑁆𑀕𑀚𑀸𑀢𑀓𑁂 (𑀚𑀸. 𑁧.𑁧𑁫.𑁧 𑀆𑀤𑀬𑁄) 𑀫𑀚𑁆𑀛𑀭𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀫𑀸𑀢𑀗𑁆𑀕𑀢𑀸𑀧𑀲𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀉𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀘 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑁂 (𑀚𑀸. 𑁧.𑁧𑁦.𑁧𑁬𑁫 𑀆𑀤𑀬𑁄) 𑀤𑀲𑀪𑀸𑀢𑀺𑀓𑀭𑀸𑀚𑀤𑀸𑀭𑀓𑀸𑀦𑀁 𑀫𑁄𑀳𑀫𑀽𑀴𑁆𑀳𑀸𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀓𑀡𑁆𑀳𑀤𑀻𑀧𑀸𑀬𑀦𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀯𑀸𑀲𑀼𑀤𑁂𑀯𑀓𑀼𑀮𑀲𑁆𑀲 𑀦𑀸𑀲𑀺𑀢𑀪𑀸𑀯𑁄 𑀘 𑀓𑀣𑁂𑀢𑀩𑁆𑀩𑁄.

𑀢𑀢𑁄 𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬𑀸𑀢𑀺 𑀏𑀯𑀁, 𑀢𑀸𑀢, 𑀧𑀞𑀫𑀁 𑀫𑀼𑀲𑀸𑀯𑀸𑀤𑀁 𑀤𑀼𑀢𑀺𑀬𑀁 𑀓𑁄𑀥𑀁 𑀢𑀢𑀺𑀬𑀁 𑀅𑀥𑀫𑁆𑀫𑀳𑀸𑀲𑀁 𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀧𑀘𑁆𑀙𑀸 𑀭𑀸𑀚𑀸 𑀭𑀝𑁆𑀞𑀯𑀸𑀲𑀻𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬. 𑀢𑀁 𑀯𑀢𑀁 𑀆𑀳𑀼 𑀔𑀢𑁆𑀢𑀺𑀬𑀸𑀢𑀺, 𑀔𑀢𑁆𑀢𑀺𑀬𑀫𑀳𑀸𑀭𑀸𑀚, 𑀬𑀁 𑀫𑀬𑀸 𑀯𑀼𑀢𑁆𑀢𑀁, 𑀏𑀢𑀁 𑀭𑀜𑁆𑀜𑁄 𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼.

𑀦 𑀢𑀁 𑀓𑀬𑀺𑀭𑀸𑀢𑀺 𑀬𑀁 𑀢𑀬𑀸 𑀭𑀸𑀕𑀸𑀤𑀺𑀯𑀲𑁂𑀦 𑀧𑀘𑁆𑀙𑀸 𑀢𑀸𑀧𑀓𑀭𑀁 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀢𑁄 𑀧𑀼𑀦 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀦 𑀓𑀬𑀺𑀭𑀸, 𑀫𑀸 𑀓𑀭𑁂𑀬𑁆𑀬𑀸𑀲𑀺, 𑀢𑀸𑀢𑀸𑀢𑀺. 𑀯𑀼𑀘𑁆𑀘𑀢𑁂𑀢𑀺 𑀢𑀁 𑀭𑀜𑁆𑀜𑁄 𑀅𑀖𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼. 𑀲𑀺𑀭𑀻𑀢𑀺 𑀇𑀤𑀁 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁄 𑀧𑀼𑀩𑁆𑀩𑁂 𑀩𑀸𑀭𑀸𑀡𑀲𑀺𑀬𑀁 𑀧𑀯𑀢𑁆𑀢𑀺𑀢𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀅𑀩𑁆𑀭𑀯𑀼𑀦𑁆𑀢𑀺 𑀲𑀼𑀘𑀺𑀧𑀭𑀺𑀯𑀸𑀭𑀲𑁂𑀝𑁆𑀞𑀺𑀦𑀸 𑀧𑀼𑀘𑁆𑀙𑀺𑀢𑀸 𑀓𑀣𑀬𑀺𑀁𑀲𑀼. 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀢𑀺 𑀬𑁄 𑀧𑁄𑀲𑁄 𑀉𑀝𑁆𑀞𑀸𑀦𑁂 𑀯𑀻𑀭𑀺𑀬𑁂 𑀘 𑀧𑀢𑀺𑀝𑁆𑀞𑀺𑀢𑁄, 𑀦 𑀘 𑀧𑀭𑁂𑀲𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀲𑀽𑀬𑀢𑀺, 𑀢𑀲𑁆𑀫𑀺𑀁 𑀅𑀳𑀁 𑀅𑀪𑀺𑀭𑀫𑀸𑀫𑀻𑀢𑀺 𑀆𑀳. 𑀏𑀯𑀁 𑀢𑀸𑀯 𑀢𑀸𑀢 𑀲𑀺𑀭𑀻 𑀓𑀣𑁂𑀲𑀺. 𑀉𑀲𑀽𑀬𑀓𑁂𑀢𑀺 𑀅𑀮𑀓𑁆𑀔𑀻 𑀧𑀦, 𑀢𑀸𑀢, 𑀧𑀼𑀘𑁆𑀙𑀺𑀢𑀸 𑀅𑀳𑀁 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀓𑁂 𑀤𑀼𑀳𑀤𑀬𑁂 𑀤𑀼𑀘𑀺𑀢𑁆𑀢𑁂 𑀓𑀮𑁆𑀬𑀸𑀡𑀓𑀫𑁆𑀫𑀤𑀽𑀲𑀓𑁂 𑀬𑁄 𑀓𑀮𑁆𑀬𑀸𑀡𑀓𑀫𑁆𑀫𑀁 𑀤𑀼𑀲𑁆𑀲𑀦𑁆𑀢𑁄 𑀅𑀧𑁆𑀧𑀺𑀬𑀸𑀬𑀦𑁆𑀢𑁄 𑀅𑀝𑁆𑀝𑀻𑀬𑀦𑁆𑀢𑁄 𑀦 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀅𑀪𑀺𑀭𑀫𑀸𑀫𑀻𑀢𑀺 𑀆𑀳. 𑀏𑀯𑀁 𑀲𑀸 𑀓𑀸𑀴𑀓𑀡𑁆𑀡𑀻, 𑀫𑀳𑀸𑀭𑀸𑀚, 𑀭𑀫𑀢𑀺 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀦𑁄 𑀓𑀼𑀲𑀮𑀘𑀓𑁆𑀓𑀲𑁆𑀲 𑀪𑀜𑁆𑀚𑀦𑀻.

𑀲𑀼𑀳𑀤𑀬𑁄𑀢𑀺 𑀲𑀼𑀦𑁆𑀤𑀭𑀘𑀺𑀢𑁆𑀢𑁄 𑀳𑀺𑀢𑀘𑀺𑀢𑁆𑀢𑀓𑁄. 𑀦𑀼𑀤𑀸𑀢𑀺 𑀦𑀻𑀳𑀭. 𑀦𑀺𑀯𑁂𑀲𑀦𑀦𑁆𑀢𑀺 𑀮𑀓𑁆𑀔𑀺𑀬𑀸 𑀧𑀦 𑀦𑀺𑀯𑁂𑀲𑀦𑀁 𑀪𑀯 𑀧𑀢𑀺𑀝𑁆𑀞𑀸 𑀳𑁄𑀳𑀺. 𑀲 𑀮𑀓𑁆𑀔𑀻𑀥𑀺𑀢𑀺𑀲𑀫𑁆𑀧𑀦𑁆𑀦𑁄𑀢𑀺, 𑀫𑀳𑀸𑀭𑀸𑀚, 𑀓𑀸𑀲𑀺𑀧𑀢𑀺 𑀲𑁄 𑀧𑀼𑀭𑀺𑀲𑁄 𑀧𑀜𑁆𑀜𑀸𑀬 𑀘𑁂𑀯 𑀯𑀻𑀭𑀺𑀬𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀫𑀳𑀕𑁆𑀕𑀢𑁄𑀢𑀺 𑀫𑀳𑀚𑁆𑀛𑀸𑀲𑀬𑁄 𑀘𑁄𑀭𑀸𑀦𑀁 𑀧𑀘𑁆𑀘𑀬𑀪𑀽𑀢𑁂 𑀕𑀡𑁆𑀳𑀦𑁆𑀢𑁄 𑀅𑀫𑀺𑀢𑁆𑀢𑀸𑀦𑀁 𑀫𑀽𑀮𑀁 𑀘𑁄𑀭𑁂 𑀕𑀡𑁆𑀳𑀦𑁆𑀢𑁄 𑀅𑀫𑀺𑀢𑁆𑀢𑀸𑀦𑀁 𑀅𑀕𑁆𑀕𑀁 𑀙𑀺𑀦𑁆𑀤𑀢𑀻𑀢𑀺 𑀯𑀤𑀢𑀺. 𑀲𑀓𑁆𑀓𑁄𑀢𑀺 𑀇𑀦𑁆𑀤𑁄. 𑀪𑀽𑀢𑀧𑀢𑀻𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀉𑀝𑁆𑀞𑀸𑀦𑁂𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑁂. 𑀦𑀧𑁆𑀧𑀫𑀚𑁆𑀚𑀢𑀻𑀢𑀺 𑀦 𑀧𑀫𑀚𑁆𑀚𑀢𑀺, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀲 𑀓𑀮𑁆𑀬𑀸𑀡𑁂𑀢𑀺 𑀲𑁄 𑀤𑁂𑀯𑀭𑀸𑀚𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑁂 𑀫𑀦𑀁 𑀓𑀭𑁄𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀅𑀓𑀢𑁆𑀯𑀸 𑀓𑀮𑁆𑀬𑀸𑀡𑁂 𑀧𑀼𑀜𑁆𑀜𑀓𑀫𑁆𑀫𑀲𑁆𑀫𑀺𑀜𑁆𑀜𑁂𑀯 𑀥𑀺𑀢𑀺𑀁 𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀉𑀝𑁆𑀞𑀸𑀦𑁂 𑀫𑀦𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀦 𑀓𑀮𑁆𑀬𑀸𑀡𑀓𑀫𑁆𑀫𑁂 𑀯𑀻𑀭𑀺𑀬𑀓𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀭𑀪𑀗𑁆𑀕𑀚𑀸𑀢𑀓𑁂 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀓𑀧𑀺𑀝𑁆𑀞𑀸𑀭𑀸𑀫𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀲𑁆𑀲 𑀲𑀼𑀢𑀪𑀸𑀯𑁄, 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁨.𑁬𑁧 𑀆𑀤𑀬𑁄) 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀚𑀦𑀁 𑀢𑀸𑀲𑁂𑀢𑁆𑀯𑀸 𑀑𑀲𑀓𑁆𑀓𑀦𑁆𑀢𑀲𑁆𑀲 𑀲𑀸𑀲𑀦𑀲𑁆𑀲 𑀧𑀯𑀢𑁆𑀢𑀺𑀢𑀪𑀸𑀯𑁄 𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀕𑀦𑁆𑀥𑀩𑁆𑀩𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑁂𑀝𑁆𑀞𑀸 𑀘𑀢𑀼𑀬𑁄𑀦𑀺𑀓𑀸 𑀤𑁂𑀯𑀸, 𑀘𑀢𑀼𑀬𑁄𑀦𑀺𑀓𑀢𑁆𑀢𑀸𑀬𑁂𑀯 𑀓𑀺𑀭 𑀢𑁂 𑀕𑀦𑁆𑀥𑀩𑁆𑀩𑀸 𑀦𑀸𑀫 𑀚𑀸𑀢𑀸. 𑀧𑀺𑀢𑀭𑁄𑀢𑀺 𑀩𑁆𑀭𑀳𑁆𑀫𑀸𑀦𑁄. 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀯𑀲𑁂𑀦 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑀸𑀤𑀺𑀦𑁄𑀢𑀺 𑀢𑀣𑀸𑀯𑀺𑀥𑀲𑁆𑀲 𑀓𑀼𑀲𑀮𑀸𑀪𑀺𑀭𑀢𑀲𑁆𑀲 𑀭𑀜𑁆𑀜𑁄. 𑀲𑀸𑀚𑀻𑀯𑀸 𑀳𑁄𑀦𑁆𑀢𑀻𑀢𑀺 𑀲𑀫𑀸𑀦𑀚𑀻𑀯𑀺𑀓𑀸 𑀉𑀧𑀚𑀻𑀯𑀺𑀢𑀩𑁆𑀩𑀸. 𑀢𑀸𑀤𑀺𑀲𑀸 𑀳𑀺 𑀭𑀸𑀚𑀸𑀦𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀤𑁂𑀯𑀢𑀸𑀦𑀁 𑀧𑀢𑁆𑀢𑀺𑀁 𑀤𑁂𑀦𑁆𑀢𑀺, 𑀢𑀸 𑀢𑀁 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀺𑀩𑁆𑀩𑀬𑀲𑁂𑀦 𑀯𑀟𑁆𑀠𑀦𑁆𑀢𑀺. 𑀅𑀦𑀼𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀸𑀤𑀺𑀲𑀲𑁆𑀲 𑀭𑀜𑁆𑀜𑁄 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀤𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀦𑀼𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀁 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑁄𑀢𑀺 𑀲𑁄 𑀢𑁆𑀯𑀁. 𑀯𑀸𑀬𑀫𑀲𑁆𑀲𑀽𑀢𑀺 𑀢𑀸𑀦𑀺 𑀭𑀝𑁆𑀞𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀢𑀼𑀮𑀦𑀯𑀲𑁂𑀦 𑀢𑀻𑀭𑀡𑀯𑀲𑁂𑀦 𑀧𑀘𑁆𑀘𑀓𑁆𑀔𑀓𑀫𑁆𑀫𑀯𑀲𑁂𑀦 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀯𑀻𑀭𑀺𑀬𑀁 𑀓𑀭𑀲𑁆𑀲𑀼. 𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸𑀢𑀺, 𑀢𑀸𑀢, 𑀬𑀁 𑀫𑀁 𑀢𑁆𑀯𑀁 𑀓𑀺𑀁𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭𑀦𑁆𑀢𑀺 𑀧𑀼𑀘𑁆𑀙𑀺, 𑀢𑀢𑁆𑀣 𑀢𑀯 𑀧𑀜𑁆𑀳𑁂𑀬𑁂𑀯 𑀏𑀢𑁂 𑀫𑀬𑀸 ‘‘𑀧𑀞𑀫𑁂𑀦𑁂𑀯 𑀯𑀺𑀢𑀣’’𑀦𑁆𑀢𑀺𑀆𑀤𑀬𑁄 𑀯𑀼𑀢𑁆𑀢𑀸, 𑀏𑀢𑁂 𑀯𑀢𑁆𑀢𑀧𑀤𑀸 𑀯𑀢𑁆𑀢𑀓𑁄𑀝𑁆𑀞𑀸𑀲𑀸, 𑀏𑀯𑀁 𑀢𑀢𑁆𑀣 𑀯𑀢𑁆𑀢𑀲𑁆𑀲𑀼. 𑀏𑀲𑀸𑀢𑀺 𑀬𑀸 𑀢𑁂 𑀫𑀬𑀸 𑀓𑀣𑀺𑀢𑀸, 𑀏𑀲𑀸𑀯 𑀢𑀯 𑀅𑀦𑀼𑀲𑀸𑀲𑀦𑀻. 𑀅𑀮𑀦𑁆𑀢𑀺 𑀏𑀯𑀁 𑀯𑀢𑁆𑀢𑀫𑀸𑀦𑁄 𑀳𑀺 𑀭𑀸𑀚𑀸 𑀅𑀢𑁆𑀢𑀦𑁄 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀓𑁆𑀔𑀸𑀬 𑀅𑀮𑀁 𑀧𑀭𑀺𑀬𑀢𑁆𑀢𑁄 𑀲𑀫𑀢𑁆𑀣𑁄𑀢𑀺.

𑀏𑀯𑀁 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁂𑀦 𑀏𑀓𑀸𑀬 𑀕𑀸𑀣𑀸𑀬 𑀭𑀜𑁆𑀜𑁄 𑀧𑀫𑀸𑀤𑀁 𑀘𑁄𑀤𑁂𑀢𑁆𑀯𑀸 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑁂 𑀓𑀣𑀺𑀢𑁂 ‘‘𑀩𑀼𑀤𑁆𑀥𑀮𑀻𑀴𑀸𑀬 𑀧𑀜𑁆𑀳𑁄 𑀓𑀣𑀺𑀢𑁄’’𑀢𑀺 𑀫𑀳𑀸𑀚𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀲𑀸𑀥𑀼𑀓𑀸𑀭𑀲𑀢𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄𑀦𑁆𑀢𑁄! 𑀅𑀫𑀘𑁆𑀘𑀸 𑀫𑀫 𑀧𑀼𑀢𑁆𑀢𑁂𑀦 𑀯𑁂𑀲𑁆𑀲𑀦𑁆𑀢𑀭𑁂𑀦 𑀏𑀯𑀁 𑀓𑀣𑁂𑀦𑁆𑀢𑁂𑀦 𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀢’’𑀦𑁆𑀢𑀺. 𑀫𑀳𑀸𑀲𑁂𑀦𑀕𑀼𑀢𑁆𑀢𑁂𑀦, 𑀤𑁂𑀯𑀸𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀫𑀳𑀸𑀲𑁂𑀦𑀕𑀼𑀢𑁆𑀢𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑁂𑀲𑁆𑀲𑀦𑁆𑀢𑀭𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑁂𑀦𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑁄 𑀧𑀺𑀢𑀼 𑀓𑀫𑁆𑀫𑀁 𑀅𑀓𑀸𑀲𑀻𑀢𑀺.

𑀯𑁂𑀲𑁆𑀲𑀦𑁆𑀢𑀭𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.

𑀧𑀼𑀦 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀼𑀡𑁆𑀟𑀮𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀫𑀡𑁆𑀟𑀧𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀼𑀡𑁆𑀟𑀮𑀺𑀦𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀺𑀦𑁆𑀦𑀁 𑀭𑀸𑀚𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁪. ‘‘𑀲𑀓𑁆𑀔𑀺𑀲𑀺 𑀢𑁆𑀯𑀁 𑀓𑀼𑀡𑁆𑀟𑀮𑀺𑀦𑀺, 𑀫𑀜𑁆𑀜𑀲𑀺 𑀔𑀢𑁆𑀢𑀩𑀦𑁆𑀥𑀼𑀦𑀺;

𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁂𑀦, 𑀓𑀺𑀁 𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭’’𑀦𑁆𑀢𑀺.

𑀢𑀢𑁆𑀣 𑀲𑀓𑁆𑀔𑀺𑀲𑀻𑀢𑀺 𑀫𑀬𑀸 𑀧𑀼𑀝𑁆𑀞𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀼𑀡𑁆𑀟𑀮𑀺𑀦𑀻𑀢𑀺 𑀢𑀲𑁆𑀲𑀸 𑀲𑀮𑀺𑀗𑁆𑀕𑀢𑁄 𑀆𑀕𑀢𑀦𑀸𑀫𑁂𑀦𑀸𑀮𑀧𑀢𑀺. 𑀢𑀲𑁆𑀲𑀸 𑀓𑀺𑀭 𑀤𑁆𑀯𑀻𑀲𑀼 𑀓𑀡𑁆𑀡𑀧𑀺𑀝𑁆𑀞𑁂𑀲𑀼 𑀓𑀼𑀡𑁆𑀟𑀮𑀲𑀡𑁆𑀞𑀸𑀦𑀸 𑀤𑁆𑀯𑁂 𑀮𑁂𑀔𑀸 𑀅𑀳𑁂𑀲𑀼𑀁, 𑀢𑁂𑀦𑀲𑁆𑀲𑀸 ‘‘𑀓𑀼𑀡𑁆𑀟𑀮𑀺𑀦𑀻’’𑀢𑀺 𑀦𑀸𑀫𑀁 𑀓𑀸𑀭𑁂𑀲𑀺. 𑀫𑀜𑁆𑀜𑀲𑀻𑀢𑀺 𑀚𑀸𑀦𑀺𑀲𑁆𑀲𑀲𑀺 𑀫𑀬𑀸 𑀧𑀼𑀝𑁆𑀞𑀧𑀜𑁆𑀳𑀲𑁆𑀲 𑀅𑀢𑁆𑀣𑀦𑁆𑀢𑀺. 𑀔𑀢𑁆𑀢𑀩𑀦𑁆𑀥𑀼𑀦𑀻𑀢𑀺 𑀔𑀢𑁆𑀢𑀲𑁆𑀲 𑀫𑀳𑀸𑀲𑁂𑀦𑀕𑀼𑀢𑁆𑀢𑀲𑁆𑀲 𑀪𑀕𑀺𑀦𑀺𑀪𑀸𑀯𑁂𑀦 𑀦𑀁 𑀏𑀯𑀁 𑀆𑀮𑀧𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑀁 𑀏𑀯𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑀫𑁂𑀯 𑀧𑀼𑀘𑁆𑀙𑀢𑀻𑀢𑀺? 𑀇𑀢𑁆𑀣𑀺𑀪𑀸𑀯𑁂𑀦. 𑀇𑀢𑁆𑀣𑀺𑀬𑁄 𑀳𑀺 𑀧𑀭𑀺𑀢𑁆𑀢𑀧𑀜𑁆𑀜𑀸, 𑀢𑀲𑁆𑀫𑀸 ‘‘𑀲𑀘𑁂 𑀲𑀓𑁆𑀓𑁄𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀦𑁄 𑀘𑁂, 𑀦 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀫𑀁𑀲𑀦𑀯𑀲𑁂𑀦 𑀏𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀜𑁆𑀜𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺.

𑀲𑀸 𑀏𑀯𑀁 𑀭𑀜𑁆𑀜𑀸 𑀭𑀸𑀚𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑁂, ‘‘𑀢𑀸𑀢, 𑀢𑁆𑀯𑀁 𑀫𑀁 ‘𑀇𑀢𑁆𑀣𑀺𑀓𑀸 𑀦𑀸𑀫 𑀓𑀺𑀁 𑀓𑀣𑁂𑀲𑁆𑀲𑀢𑀻’𑀢𑀺 𑀯𑀻𑀫𑀁𑀲𑀲𑀺 𑀫𑀜𑁆𑀜𑁂, 𑀲𑀓𑀮𑀁 𑀢𑁂 𑀭𑀸𑀚𑀥𑀫𑁆𑀫𑀁 𑀤𑁆𑀯𑀻𑀲𑀼𑀬𑁂𑀯 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀳 𑁋

𑁧𑁫. ‘‘𑀤𑁆𑀯𑁂𑀯 𑀢𑀸𑀢 𑀧𑀤𑀓𑀸𑀦𑀺, 𑀬𑀢𑁆𑀣 𑀲𑀩𑁆𑀩𑀁 𑀧𑀢𑀺𑀝𑁆𑀞𑀺𑀢𑀁;

𑀅𑀮𑀤𑁆𑀥𑀲𑁆𑀲 𑀘 𑀬𑁄 𑀮𑀸𑀪𑁄, 𑀮𑀤𑁆𑀥𑀲𑁆𑀲 𑀘𑀸𑀦𑀼𑀭𑀓𑁆𑀔𑀡𑀸.

𑁧𑁬. ‘‘𑀅𑀫𑀘𑁆𑀘𑁂 𑀢𑀸𑀢 𑀚𑀸𑀦𑀸𑀳𑀺, 𑀥𑀻𑀭𑁂 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁂;

𑀅𑀦𑀓𑁆𑀔𑀸𑀓𑀺𑀢𑀯𑁂 𑀢𑀸𑀢, 𑀅𑀲𑁄𑀡𑁆𑀟𑁂 𑀅𑀯𑀺𑀦𑀸𑀲𑀓𑁂.

𑁧𑁭. ‘‘𑀬𑁄 𑀘 𑀢𑀁 𑀢𑀸𑀢 𑀭𑀓𑁆𑀔𑁂𑀬𑁆𑀬, 𑀥𑀦𑀁 𑀬𑀜𑁆𑀘𑁂𑀯 𑀢𑁂 𑀲𑀺𑀬𑀸;

𑀲𑀽𑀢𑁄𑀯 𑀭𑀣𑀁 𑀲𑀗𑁆𑀕𑀡𑁆𑀳𑁂, 𑀲𑁄 𑀢𑁂 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂.

𑁧𑁮. ‘‘𑀲𑀼𑀲𑀗𑁆𑀕𑀳𑀺𑀢𑀦𑁆𑀢𑀚𑀦𑁄, 𑀲𑀬𑀁 𑀯𑀺𑀢𑁆𑀢𑀁 𑀅𑀯𑁂𑀓𑁆𑀔𑀺𑀬;

𑀦𑀺𑀥𑀺𑀜𑁆𑀘 𑀇𑀡𑀤𑀸𑀦𑀜𑁆𑀘, 𑀦 𑀓𑀭𑁂 𑀧𑀭𑀧𑀢𑁆𑀢𑀺𑀬𑀸.

𑁧𑁯. ‘‘𑀲𑀬𑀁 𑀆𑀬𑀁 𑀯𑀬𑀁 𑀚𑀜𑁆𑀜𑀸, 𑀲𑀬𑀁 𑀚𑀜𑁆𑀜𑀸 𑀓𑀢𑀸𑀓𑀢𑀁;

𑀦𑀺𑀕𑁆𑀕𑀡𑁆𑀳𑁂 𑀦𑀺𑀕𑁆𑀕𑀳𑀸𑀭𑀳𑀁, 𑀧𑀕𑁆𑀕𑀡𑁆𑀳𑁂 𑀧𑀕𑁆𑀕𑀳𑀸𑀭𑀳𑀁.

𑁨𑁦. ‘‘𑀲𑀬𑀁 𑀚𑀸𑀦𑀧𑀤𑀁 𑀅𑀢𑁆𑀣𑀁, 𑀅𑀦𑀼𑀲𑀸𑀲 𑀭𑀣𑁂𑀲𑀪;

𑀫𑀸 𑀢𑁂 𑀅𑀥𑀫𑁆𑀫𑀺𑀓𑀸 𑀬𑀼𑀢𑁆𑀢𑀸, 𑀥𑀦𑀁 𑀭𑀝𑁆𑀞𑀜𑁆𑀘 𑀦𑀸𑀲𑀬𑀼𑀁.

𑁨𑁧. ‘‘𑀫𑀸 𑀘 𑀯𑁂𑀕𑁂𑀦 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀲𑀺 𑀓𑀸𑀭𑀬𑁂𑀲𑀺 𑀯𑀸;

𑀯𑁂𑀕𑀲𑀸 𑀳𑀺 𑀓𑀢𑀁 𑀓𑀫𑁆𑀫𑀁, 𑀫𑀦𑁆𑀤𑁄 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁨𑁨. ‘‘𑀫𑀸 𑀢𑁂 𑀅𑀥𑀺𑀲𑀭𑁂 𑀫𑀼𑀜𑁆𑀘, 𑀲𑀼𑀩𑀸𑀴𑁆𑀳𑀫𑀥𑀺𑀓𑁄𑀧𑀺𑀢𑀁;

𑀓𑁄𑀥𑀲𑀸 𑀳𑀺 𑀩𑀳𑀽 𑀨𑀻𑀢𑀸, 𑀓𑀼𑀮𑀸 𑀅𑀓𑀼𑀮𑀢𑀁 𑀕𑀢𑀸.

𑁨𑁩. ‘‘‘𑀫𑀸 𑀢𑀸𑀢 𑀇𑀲𑁆𑀲𑀭𑁄𑀫𑁆𑀳𑀻’𑀢𑀺, 𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀺;

𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦𑀜𑁆𑀘, 𑀫𑀸 𑀢𑁂 𑀆𑀲𑀺 𑀤𑀼𑀔𑀼𑀤𑁆𑀭𑀬𑁄.

𑁨𑁪. ‘‘𑀅𑀧𑁂𑀢𑀮𑁄𑀫𑀳𑀁𑀲𑀲𑁆𑀲, 𑀭𑀜𑁆𑀜𑁄 𑀓𑀸𑀫𑀸𑀦𑀼𑀲𑀸𑀭𑀺𑀦𑁄;

𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀢𑀁 𑀯𑀼𑀘𑁆𑀘𑀢𑁂 𑀅𑀖𑀁.

𑁨𑁫. ‘‘𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸, 𑀏𑀲𑀸𑀯 𑀅𑀦𑀼𑀲𑀸𑀲𑀦𑀻;

𑀤𑀓𑁆𑀔𑀲𑁆𑀲𑀼𑀤𑀸𑀦𑀺 𑀧𑀼𑀜𑁆𑀜𑀓𑀭𑁄, 𑀅𑀲𑁄𑀡𑁆𑀟𑁄 𑀅𑀯𑀺𑀦𑀸𑀲𑀓𑁄;

𑀲𑀻𑀮𑀯𑀸𑀲𑁆𑀲𑀼 𑀫𑀳𑀸𑀭𑀸𑀚, 𑀤𑀼𑀲𑁆𑀲𑀻𑀮𑁄 𑀯𑀺𑀦𑀺𑀧𑀸𑀢𑀺𑀓𑁄’’𑀢𑀺.

𑀢𑀢𑁆𑀣 𑀧𑀤𑀓𑀸𑀦𑀻𑀢𑀺 𑀓𑀸𑀭𑀡𑀧𑀤𑀸𑀦𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀲𑀩𑁆𑀩𑀁 𑀅𑀢𑁆𑀣𑀚𑀸𑀢𑀁 𑀳𑀺𑀢𑀲𑀼𑀔𑀁 𑀧𑀢𑀺𑀝𑁆𑀞𑀺𑀢𑀁. 𑀅𑀮𑀤𑁆𑀥𑀲𑁆𑀲𑀸𑀢𑀺 𑀬𑁄 𑀘 𑀧𑀼𑀩𑁆𑀩𑁂 𑀅𑀮𑀤𑁆𑀥𑀲𑁆𑀲 𑀮𑀸𑀪𑀲𑁆𑀲 𑀮𑀸𑀪𑁄, 𑀬𑀸 𑀘 𑀮𑀤𑁆𑀥𑀲𑁆𑀲 𑀅𑀦𑀼𑀭𑀓𑁆𑀔𑀡𑀸. 𑀢𑀸𑀢, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀳𑀺 𑀮𑀸𑀪𑀲𑁆𑀲 𑀉𑀧𑁆𑀧𑀸𑀤𑀦𑀁 𑀦𑀸𑀫 𑀦 𑀪𑀸𑀭𑁄, 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦 𑀅𑀦𑀼𑀭𑀓𑁆𑀔𑀡𑀫𑁂𑀯 𑀪𑀸𑀭𑁄. 𑀏𑀓𑀘𑁆𑀘𑁄 𑀳𑀺 𑀬𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀧𑀺 𑀬𑀲𑁂 𑀧𑀫𑀢𑁆𑀢𑁄 𑀧𑀫𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀳𑀸𑀘𑁄𑀭𑁄 𑀳𑀼𑀢𑁆𑀯𑀸 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑁄 𑀘𑀭𑀢𑀺. 𑀅𑀣 𑀦𑀁 𑀭𑀸𑀚𑀸𑀦𑁄 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺. 𑀅𑀣 𑀯𑀸 𑀉𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀲𑀼 𑀓𑀸𑀫𑀕𑀼𑀡𑁂𑀲𑀼 𑀧𑀫𑀢𑁆𑀢𑁄 𑀅𑀬𑁄𑀦𑀺𑀲𑁄 𑀥𑀦𑀁 𑀦𑀸𑀲𑁂𑀦𑁆𑀢𑁄 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑁂 𑀔𑀻𑀡𑁂 𑀓𑀧𑀡𑁄 𑀳𑀼𑀢𑁆𑀯𑀸 𑀘𑀻𑀭𑀓𑀯𑀲𑀦𑁄 𑀓𑀧𑀸𑀮𑀫𑀸𑀤𑀸𑀬 𑀘𑀭𑀢𑀺. 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀕𑀦𑁆𑀣𑀥𑀼𑀭𑀸𑀤𑀺𑀯𑀲𑁂𑀦 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀫𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀅𑀧𑀭𑁄 𑀧𑀞𑀫𑀛𑀸𑀦𑀸𑀤𑀻𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀫𑀼𑀝𑁆𑀞𑀲𑁆𑀲𑀢𑀺𑀢𑀸𑀬 𑀢𑀣𑀸𑀭𑀽𑀧𑁂 𑀆𑀭𑀫𑁆𑀫𑀡𑁂 𑀩𑀚𑁆𑀛𑀺𑀢𑁆𑀯𑀸 𑀛𑀸𑀦𑀸 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀬𑀲𑀲𑁆𑀲 𑀯𑀸 𑀛𑀸𑀦𑀸𑀤𑀺𑀮𑀸𑀪𑀲𑁆𑀲 𑀯𑀸 𑀭𑀓𑁆𑀔𑀡𑀫𑁂𑀯 𑀤𑀼𑀓𑁆𑀓𑀭𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑀧𑀦 𑀤𑁂𑀯𑀤𑀢𑁆𑀢𑀲𑁆𑀲 𑀯𑀢𑁆𑀣𑀼 𑀘, 𑀫𑀼𑀤𑀼𑀮𑀓𑁆𑀔𑀡- (𑀚𑀸. 𑁧.𑁧.𑁬𑁬) 𑀮𑁄𑀫𑀲𑀓𑀲𑁆𑀲𑀧- (𑀚𑀸. 𑁧.𑁯.𑁬𑁦 𑀆𑀤𑀬𑁄) 𑀳𑀭𑀺𑀢𑀘𑀚𑀸𑀢𑀓- (𑀚𑀸. 𑁧.𑁯.𑁪𑁦 𑀆𑀤𑀬𑁄) 𑀲𑀗𑁆𑀓𑀧𑁆𑀧𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁧.𑁩.𑁧 𑀆𑀤𑀬𑁄) 𑀘 𑀓𑀣𑁂𑀢𑀩𑁆𑀩𑀸𑀦𑀺. 𑀏𑀓𑁄 𑀧𑀦 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑁆𑀧𑀫𑀸𑀤𑁂 𑀞𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑁄 𑀬𑀲𑁄 𑀲𑀼𑀓𑁆𑀓𑀧𑀓𑁆𑀔𑁂 𑀘𑀦𑁆𑀤𑁄 𑀯𑀺𑀬 𑀯𑀟𑁆𑀠𑀢𑀺, 𑀢𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀧𑁆𑀧𑀫𑀢𑁆𑀢𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀯 𑀉𑀧𑁆𑀧𑀦𑁆𑀦𑀁 𑀬𑀲𑀁 𑀅𑀦𑀼𑀭𑀓𑁆𑀔𑀸𑀳𑀻𑀢𑀺.

𑀚𑀸𑀦𑀸𑀳𑀻𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀸𑀤𑀻𑀦𑀁 𑀓𑀭𑀡𑀢𑁆𑀣𑀁 𑀉𑀧𑀥𑀸𑀭𑁂𑀳𑀺. 𑀅𑀦𑀓𑁆𑀔𑀸𑀓𑀺𑀢𑀯𑁂𑀢𑀺 𑀅𑀦𑀓𑁆𑀔𑁂 𑀅𑀓𑀺𑀢𑀯𑁂 𑀅𑀚𑀼𑀢𑀓𑀭𑁂 𑀘𑁂𑀯 𑀅𑀓𑁂𑀭𑀸𑀝𑀺𑀓𑁂 𑀘. 𑀅𑀲𑁄𑀡𑁆𑀟𑁂𑀢𑀺 𑀧𑀽𑀯𑀲𑀼𑀭𑀸𑀕𑀦𑁆𑀥𑀫𑀸𑀮𑀸𑀲𑁄𑀡𑁆𑀟𑀪𑀸𑀯𑀭𑀳𑀺𑀢𑁂. 𑀅𑀯𑀺𑀦𑀸𑀲𑀓𑁂𑀢𑀺 𑀢𑀯 𑀲𑀦𑁆𑀢𑀓𑀸𑀦𑀁 𑀥𑀦𑀥𑀜𑁆𑀜𑀸𑀤𑀻𑀦𑀁 𑀅𑀯𑀺𑀦𑀸𑀲𑀓𑁂. 𑀬𑁄𑀢𑀺 𑀬𑁄 𑀅𑀫𑀘𑁆𑀘𑁄. 𑀬𑀜𑁆𑀘𑁂𑀯𑀸𑀢𑀺 𑀬𑀜𑁆𑀘 𑀢𑁂 𑀖𑀭𑁂 𑀥𑀦𑀁 𑀲𑀺𑀬𑀸, 𑀢𑀁 𑀭𑀓𑁆𑀔𑁂𑀬𑁆𑀬. 𑀲𑀽𑀢𑁄𑀯𑀸𑀢𑀺 𑀭𑀣𑀲𑀸𑀭𑀣𑀺 𑀯𑀺𑀬. 𑀬𑀣𑀸 𑀲𑀸𑀭𑀣𑀺 𑀯𑀺𑀲𑀫𑀫𑀕𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀅𑀲𑁆𑀲𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀭𑀣𑀁 𑀲𑀗𑁆𑀕𑀡𑁆𑀳𑁂𑀬𑁆𑀬, 𑀏𑀯𑀁 𑀬𑁄 𑀲𑀳 𑀪𑁄𑀕𑁂𑀳𑀺 𑀢𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀢𑁂 𑀅𑀫𑀘𑁆𑀘𑁄 𑀦𑀸𑀫 𑀢𑀸𑀤𑀺𑀲𑀁 𑀲𑀗𑁆𑀕𑀳𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀸𑀤𑀺𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂.

𑀲𑀼𑀲𑀗𑁆𑀕𑀳𑀺𑀢𑀦𑁆𑀢𑀚𑀦𑁄𑀢𑀺, 𑀢𑀸𑀢, 𑀬𑀲𑁆𑀲 𑀳𑀺 𑀭𑀜𑁆𑀜𑁄 𑀅𑀢𑁆𑀢𑀦𑁄 𑀅𑀦𑁆𑀢𑁄𑀚𑀦𑁄 𑀅𑀢𑁆𑀢𑀦𑁄 𑀯𑀮𑀜𑁆𑀚𑀦𑀓𑀧𑀭𑀺𑀚𑀦𑁄 𑀘 𑀤𑀸𑀦𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀸𑀤𑀻𑀦𑀺 𑀢𑁂𑀲𑀁 𑀅𑀲𑀗𑁆𑀕𑀳𑀺𑀢𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 𑀦𑀲𑁆𑀲𑀦𑁆𑀢𑀺, 𑀅𑀦𑁆𑀢𑁄𑀚𑀦𑀸 𑀩𑀳𑀺 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀲𑀼𑀝𑁆𑀞𑀼𑀲𑀗𑁆𑀕𑀳𑀺𑀢𑀅𑀦𑁆𑀢𑁄𑀚𑀦𑁄 𑀳𑀼𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀫𑁂 𑀯𑀺𑀢𑁆𑀢’’𑀦𑁆𑀢𑀺 𑀲𑀬𑀁 𑀅𑀢𑁆𑀢𑀦𑁄 𑀥𑀦𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀦𑀺𑀥𑀺𑀁 𑀦𑀺𑀥𑁂𑀫, 𑀅𑀲𑀼𑀓𑀲𑁆𑀲 𑀇𑀡𑀁 𑀤𑁂𑀫𑀸’’𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀦 𑀓𑀭𑁂 𑀧𑀭𑀧𑀢𑁆𑀢𑀺𑀬𑀸, 𑀧𑀭𑀧𑀢𑁆𑀢𑀺𑀬𑀸𑀧𑀺 𑀢𑁆𑀯𑀁 𑀫𑀸 𑀓𑀭𑀺, 𑀲𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀫𑁂𑀯 𑀓𑀭𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺.

𑀆𑀬𑀁 𑀯𑀬𑀦𑁆𑀢𑀺 𑀢𑀢𑁄 𑀉𑀧𑁆𑀧𑀚𑁆𑀚𑀦𑀓𑀁 𑀆𑀬𑀜𑁆𑀘 𑀢𑁂𑀲𑀁 𑀢𑁂𑀲𑀁 𑀤𑀸𑀢𑀩𑁆𑀩𑀁 𑀯𑀬𑀜𑁆𑀘 𑀲𑀬𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀻𑀢𑀺. 𑀓𑀢𑀸𑀓𑀢𑀦𑁆𑀢𑀺 𑀲𑀗𑁆𑀕𑀸𑀫𑁂 𑀯𑀸 𑀦𑀯𑀓𑀫𑁆𑀫𑁂 𑀯𑀸 𑀅𑀜𑁆𑀜𑁂𑀲𑀼 𑀯𑀸 𑀓𑀺𑀘𑁆𑀘𑁂𑀲𑀼 ‘‘𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀫𑀬𑁆𑀳𑀁 𑀓𑀢𑀁, 𑀇𑀫𑀺𑀦𑀸 𑀦 𑀓𑀢’’𑀦𑁆𑀢𑀺 𑀏𑀢𑀫𑁆𑀧𑀺 𑀲𑀬𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀺, 𑀫𑀸 𑀧𑀭𑀧𑀢𑁆𑀢𑀺𑀬𑁄 𑀳𑁄𑀳𑀺. 𑀦𑀺𑀕𑁆𑀕𑀡𑁆𑀳𑁂𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀸𑀭𑀓𑀁 𑀦𑀺𑀕𑁆𑀕𑀳𑀸𑀭𑀳𑀁 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑁄𑀭𑀸𑀡𑀓𑀭𑀸𑀚𑀽𑀳𑀺 𑀞𑀧𑀺𑀢𑀤𑀡𑁆𑀟𑀁 𑀑𑀮𑁄𑀓𑁂𑀢𑁆𑀯𑀸 𑀤𑁄𑀲𑀸𑀦𑀼𑀭𑀽𑀧𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀧𑀕𑁆𑀕𑀡𑁆𑀳𑁂𑀢𑀺 𑀬𑁄 𑀧𑀦 𑀧𑀕𑁆𑀕𑀳𑀸𑀭𑀳𑁄 𑀳𑁄𑀢𑀺, 𑀅𑀪𑀺𑀦𑁆𑀦𑀲𑁆𑀲 𑀯𑀸 𑀧𑀭𑀩𑀮𑀲𑁆𑀲 𑀪𑁂𑀤𑁂𑀢𑀸, 𑀪𑀺𑀦𑁆𑀦𑀲𑁆𑀲 𑀯𑀸 𑀲𑀓𑀩𑀮𑀲𑁆𑀲 𑀆𑀭𑀸𑀥𑀓𑁄, 𑀅𑀮𑀤𑁆𑀥𑀲𑁆𑀲 𑀯𑀸 𑀭𑀚𑁆𑀚𑀲𑁆𑀲 𑀆𑀳𑀭𑀓𑁄, 𑀮𑀤𑁆𑀥𑀲𑁆𑀲 𑀯𑀸 𑀣𑀸𑀯𑀭𑀓𑀸𑀭𑀓𑁄, 𑀬𑁂𑀦 𑀯𑀸 𑀧𑀦 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀏𑀯𑀭𑀽𑀧𑀁 𑀧𑀕𑁆𑀕𑀳𑀸𑀭𑀳𑀁 𑀧𑀕𑁆𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁂𑀬𑁆𑀬. 𑀏𑀯𑀁 𑀳𑀺𑀲𑁆𑀲 𑀓𑀺𑀘𑁆𑀘𑁂𑀲𑀼 𑀅𑀜𑁆𑀜𑁂𑀧𑀺 𑀉𑀭𑀁 𑀤𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀦𑁆𑀢𑀺.

𑀚𑀸𑀦𑀧𑀤𑀦𑁆𑀢𑀺 𑀚𑀦𑀧𑀤𑀯𑀸𑀲𑀻𑀦𑀁 𑀅𑀢𑁆𑀣𑀁 𑀲𑀬𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑁂𑀯 𑀅𑀦𑀼𑀲𑀸𑀲. 𑀅𑀥𑀫𑁆𑀫𑀺𑀓𑀸 𑀬𑀼𑀢𑁆𑀢𑀸𑀢𑀺 𑀅𑀥𑀫𑁆𑀫𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸 𑀆𑀬𑀼𑀢𑁆𑀢𑀓𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀪𑀺𑀦𑁆𑀤𑀦𑁆𑀢𑀸 𑀢𑀯 𑀥𑀦𑀜𑁆𑀘 𑀭𑀝𑁆𑀞𑀜𑁆𑀘 𑀫𑀸 𑀦𑀸𑀲𑀬𑀼𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀅𑀦𑀼𑀲𑀸𑀲. 𑀯𑁂𑀕𑁂𑀦𑀸𑀢𑀺 𑀲𑀳𑀲𑀸 𑀅𑀢𑀼𑀮𑁂𑀢𑁆𑀯𑀸 𑀅𑀢𑀻𑀭𑁂𑀢𑁆𑀯𑀸. 𑀯𑁂𑀕𑀲𑀸𑀢𑀺 𑀅𑀢𑀼𑀮𑁂𑀢𑁆𑀯𑀸 𑀅𑀢𑀻𑀭𑁂𑀢𑁆𑀯𑀸 𑀙𑀦𑁆𑀤𑀸𑀤𑀺𑀯𑀲𑁂𑀦 𑀲𑀳𑀲𑀸 𑀓𑀢𑀁 𑀓𑀫𑁆𑀫𑀜𑁆𑀳𑀺 𑀦 𑀲𑀸𑀥𑀼 𑀦 𑀲𑀼𑀦𑁆𑀤𑀭𑀁. 𑀓𑀺𑀁𑀓𑀸𑀭𑀡𑀸? 𑀢𑀸𑀤𑀺𑀲𑀜𑁆𑀳𑀺 𑀓𑀢𑁆𑀯𑀸 𑀫𑀦𑁆𑀤𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀇𑀥 𑀮𑁄𑀓𑁂 𑀅𑀧𑀸𑀬𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀧𑀭𑀮𑁄𑀓𑁂 𑀘 𑀅𑀦𑀼𑀢𑀧𑁆𑀧𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 ‘‘𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸, 𑀪𑀭𑀼𑀭𑀸𑀚𑀸𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀪𑀭𑀼𑀚𑀸𑀢𑀓𑁂𑀦 (𑀚𑀸. 𑁧.𑁨.𑁧𑁨𑁫-𑁧𑁨𑁬) 𑀤𑀻𑀧𑁂𑀢𑀩𑁆𑀩𑁄.

𑀫𑀸 𑀢𑁂 𑀅𑀥𑀺𑀲𑀭𑁂 𑀫𑀼𑀜𑁆𑀘, 𑀲𑀼𑀩𑀸𑀴𑁆𑀳𑀫𑀥𑀺𑀓𑁄𑀧𑀺𑀢𑀦𑁆𑀢𑀺, 𑀢𑀸𑀢, 𑀢𑀯 𑀳𑀤𑀬𑀁 𑀓𑀼𑀲𑀮𑀁 𑀅𑀥𑀺𑀲𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑁂 𑀧𑀭𑁂𑀲𑀁 𑀅𑀓𑀼𑀲𑀮𑀓𑀫𑁆𑀫𑁂 𑀲𑀼𑀝𑁆𑀞𑀼 𑀩𑀸𑀴𑁆𑀳𑀁 𑀅𑀥𑀺𑀓𑁄𑀧𑀺𑀢𑀁 𑀓𑀼𑀚𑁆𑀛𑀸𑀧𑀺𑀢𑀁 𑀳𑀼𑀢𑁆𑀯𑀸 𑀫𑀸 𑀫𑀼𑀜𑁆𑀘, 𑀫𑀸 𑀧𑀢𑀺𑀝𑁆𑀞𑀸𑀬𑀢𑀽𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀬𑀤𑀸 𑀢𑁂 𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑀲𑁆𑀲 𑀇𑀫𑀺𑀦𑀸 𑀧𑀼𑀭𑀺𑀲𑁄 𑀯𑀸 𑀳𑀢𑁄 𑀲𑀦𑁆𑀥𑀺 𑀯𑀸 𑀙𑀺𑀦𑁆𑀦𑁄𑀢𑀺 𑀘𑁄𑀭𑀁 𑀤𑀲𑁆𑀲𑁂𑀦𑁆𑀢𑀺, 𑀢𑀤𑀸 𑀢𑁂 𑀧𑀭𑁂𑀲𑀁 𑀯𑀘𑀦𑁂𑀳𑀺 𑀲𑀼𑀝𑁆𑀞𑀼 𑀓𑁄𑀧𑀺𑀢𑀫𑁆𑀧𑀺 𑀳𑀤𑀬𑀁 𑀓𑁄𑀥𑀯𑀲𑁂𑀦 𑀫𑀸 𑀫𑀼𑀜𑁆𑀘, 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀫𑀸 𑀤𑀡𑁆𑀟𑀁 𑀧𑀡𑁂𑀳𑀺. 𑀓𑀺𑀁𑀓𑀸𑀭𑀡𑀸? 𑀅𑀘𑁄𑀭𑀫𑁆𑀧𑀺 𑀳𑀺 ‘‘𑀘𑁄𑀭𑁄’’𑀢𑀺 𑀕𑀳𑁂𑀢𑁆𑀯𑀸 𑀆𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀓𑀼𑀚𑁆𑀛𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀢𑀲𑁆𑀲 𑀘𑁄𑀭𑀪𑀸𑀯𑀁 𑀜𑀢𑁆𑀯𑀸 𑀧𑀯𑁂𑀡𑀺𑀬𑀸 𑀞𑀧𑀺𑀢𑀤𑀡𑁆𑀟𑀯𑀲𑁂𑀦 𑀓𑀢𑁆𑀢𑀩𑁆𑀩𑀁 𑀓𑀭𑁄𑀳𑀺. 𑀭𑀜𑁆𑀜𑀸 𑀳𑀺 𑀉𑀧𑁆𑀧𑀦𑁆𑀦𑁂𑀧𑀺 𑀓𑁄𑀥𑁂 𑀳𑀤𑀬𑀁 𑀲𑀻𑀢𑀮𑀁 𑀅𑀓𑀢𑁆𑀯𑀸 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑀤𑀸 𑀧𑀦𑀲𑁆𑀲 𑀳𑀤𑀬𑀁 𑀦𑀺𑀩𑁆𑀩𑀼𑀢𑀁 𑀳𑁄𑀢𑀺 𑀫𑀼𑀤𑀼𑀓𑀁, 𑀢𑀤𑀸 𑀯𑀺𑀦𑀺𑀘𑁆𑀙𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀨𑀭𑀼𑀲𑁂 𑀳𑀺 𑀘𑀺𑀢𑁆𑀢𑁂 𑀧𑀓𑁆𑀓𑀼𑀣𑀺𑀢𑁂 𑀉𑀤𑀓𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀓𑀸𑀭𑀡𑀁 𑀦 𑀧𑀜𑁆𑀜𑀸𑀬𑀢𑀺. 𑀓𑁄𑀥𑀲𑀸 𑀳𑀻𑀢𑀺, 𑀢𑀸𑀢, 𑀓𑁄𑀥𑁂𑀦 𑀳𑀺 𑀩𑀳𑀽𑀦𑀺 𑀨𑀻𑀢𑀸𑀦𑀺 𑀭𑀸𑀚𑀓𑀼𑀮𑀸𑀦𑀺 𑀅𑀓𑀼𑀮𑀪𑀸𑀯𑀁 𑀕𑀢𑀸𑀦𑀺 𑀫𑀳𑀸𑀯𑀺𑀦𑀸𑀲𑀫𑁂𑀯 𑀧𑀢𑁆𑀢𑀸𑀦𑀻𑀢𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓- (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀦𑀸𑀴𑀺𑀓𑁂𑀭𑀭𑀸𑀚𑀯𑀢𑁆𑀣𑀼𑀲𑀳𑀲𑁆𑀲𑀩𑀸𑀳𑀼𑀅𑀚𑁆𑀚𑀼𑀦𑀯𑀢𑁆𑀣𑀼𑀆𑀤𑀻𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀫𑀸, 𑀢𑀸𑀢, 𑀇𑀲𑁆𑀲𑀭𑁄𑀫𑁆𑀳𑀻𑀢𑀺, 𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀻𑀢𑀺, 𑀢𑀸𑀢, ‘‘𑀅𑀳𑀁 𑀧𑀣𑀯𑀺𑀲𑁆𑀲𑀭𑁄’’𑀢𑀺 𑀫𑀸 𑀫𑀳𑀸𑀚𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀺 𑀫𑀸 𑀑𑀢𑀸𑀭𑀬𑀺, 𑀬𑀣𑀸 𑀢𑀁 𑀅𑀦𑀢𑁆𑀣𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀫𑀸 𑀏𑀯𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀫𑀸 𑀢𑁂 𑀆𑀲𑀻𑀢𑀺, 𑀢𑀸𑀢, 𑀢𑀯 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀯𑀸 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀓𑀸𑀦𑀁 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀤𑀼𑀔𑀼𑀤𑁆𑀭𑀬𑁄 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀫𑀸 𑀆𑀲𑀺. 𑀬𑀣𑀸 𑀳𑀺 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀯 𑀭𑀝𑁆𑀞𑀯𑀸𑀲𑀻𑀦𑀁 𑀢𑀁 𑀤𑀼𑀓𑁆𑀔𑀁 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄.

𑀅𑀧𑁂𑀢𑀮𑁄𑀫𑀳𑀁𑀲𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑁂𑀳𑀺 𑀦𑀺𑀩𑁆𑀪𑀬𑀲𑁆𑀲. 𑀇𑀫𑀺𑀦𑀸 𑀇𑀫𑀁 𑀤𑀲𑁆𑀲𑁂𑀢𑀺 𑁋 𑀢𑀸𑀢, 𑀬𑁄 𑀭𑀸𑀚𑀸 𑀓𑀺𑀲𑁆𑀫𑀺𑀜𑁆𑀘𑀺 𑀆𑀲𑀗𑁆𑀓𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀫𑀫𑁂𑀯 𑀅𑀦𑀼𑀲𑁆𑀲𑀭𑀢𑀺, 𑀙𑀦𑁆𑀤𑀯𑀲𑁂𑀦 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀓𑀭𑁄𑀢𑀺, 𑀯𑀺𑀲𑁆𑀲𑀝𑁆𑀞𑀬𑀝𑁆𑀞𑀺 𑀯𑀺𑀬 𑀅𑀦𑁆𑀥𑁄 𑀦𑀺𑀭𑀗𑁆𑀓𑀼𑀲𑁄 𑀯𑀺𑀬 𑀘 𑀘𑀡𑁆𑀟𑀳𑀢𑁆𑀣𑀻 𑀳𑁄𑀢𑀺, 𑀢𑀲𑁆𑀲 𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀢𑀁 𑀪𑁄𑀕𑀩𑁆𑀬𑀲𑀦𑀁 𑀅𑀖𑀁 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀤𑀓𑁆𑀔𑀲𑁆𑀲𑀼𑀤𑀸𑀦𑀻𑀢𑀺, 𑀢𑀸𑀢, 𑀢𑁆𑀯𑀁 𑀇𑀫𑀁 𑀅𑀦𑀼𑀲𑀸𑀲𑀦𑀺𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀤𑀓𑁆𑀔𑁄 𑀅𑀦𑀮𑀲𑁄 𑀧𑀼𑀜𑁆𑀜𑀸𑀦𑀁 𑀓𑀭𑀡𑁂𑀦 𑀧𑀼𑀜𑁆𑀜𑀓𑀭𑁄 𑀲𑀼𑀭𑀸𑀤𑀺𑀧𑀭𑀺𑀳𑀭𑀡𑁂𑀦. 𑀅𑀲𑁄𑀡𑁆𑀟𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑀺𑀦𑀸𑀲𑀦𑁂𑀦 𑀅𑀯𑀺𑀦𑀸𑀲𑀓𑁄 𑀪𑀯𑁂𑀬𑁆𑀬𑀸𑀲𑀻𑀢𑀺. 𑀲𑀻𑀮𑀯𑀸𑀲𑁆𑀲𑀽𑀢𑀺 𑀲𑀻𑀮𑀯𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀪𑀯, 𑀤𑀲𑀲𑀼 𑀭𑀸𑀚𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀭𑀚𑁆𑀚𑀁 𑀓𑀸𑀭𑁂𑀳𑀺. 𑀤𑀼𑀲𑁆𑀲𑀻𑀮𑁄 𑀯𑀺𑀦𑀺𑀧𑀸𑀢𑀺𑀓𑁄𑀢𑀺 𑀤𑀼𑀲𑁆𑀲𑀻𑀮𑁄 𑀳𑀺, 𑀫𑀳𑀸𑀭𑀸𑀚, 𑀅𑀢𑁆𑀢𑀸𑀦𑀁 𑀦𑀺𑀭𑀬𑁂 𑀯𑀺𑀦𑀺𑀧𑀸𑀢𑁂𑀦𑁆𑀢𑁄 𑀯𑀺𑀦𑀺𑀧𑀸𑀢𑀺𑀓𑁄 𑀦𑀸𑀫 𑀳𑁄𑀢𑀻𑀢𑀺.

𑀏𑀯𑀁 𑀓𑀼𑀡𑁆𑀟𑀮𑀺𑀦𑀻𑀧𑀺 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄𑀦𑁆𑀢𑁄! 𑀅𑀫𑀘𑁆𑀘𑀸 𑀫𑀫 𑀥𑀻𑀢𑀸𑀬 𑀓𑀼𑀡𑁆𑀟𑀮𑀺𑀦𑀺𑀬𑀸 𑀏𑀯𑀁 𑀓𑀣𑀬𑀫𑀸𑀦𑀸𑀬 𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀢’’𑀦𑁆𑀢𑀺. 𑀪𑀡𑁆𑀟𑀸𑀕𑀸𑀭𑀺𑀓𑁂𑀦, 𑀤𑁂𑀯𑀸𑀢𑀺. ‘‘𑀢𑁂𑀦 𑀳𑀺𑀲𑁆𑀲𑀸 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀓𑀼𑀡𑁆𑀟𑀮𑀺𑀦𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀺𑀢𑀼 𑀓𑀫𑁆𑀫𑀁 𑀅𑀓𑀸𑀲𑀻𑀢𑀺.

𑀓𑀼𑀡𑁆𑀟𑀮𑀺𑀦𑀺𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.

𑀧𑀼𑀦 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀚𑀫𑁆𑀩𑀼𑀓𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀘𑀸𑀕𑀢𑁄 𑀢𑀢𑁆𑀣𑁂𑀯 𑀫𑀡𑁆𑀟𑀧𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀅𑀫𑀘𑁆𑀘𑁄 𑀚𑀫𑁆𑀩𑀼𑀓𑀧𑀡𑁆𑀟𑀺𑀢𑀁 𑀓𑀜𑁆𑀘𑀦𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀻𑀞𑀁 𑀲𑀻𑀲𑁂𑀦𑀸𑀤𑀸𑀬 𑀆𑀕𑀘𑁆𑀙𑀺. 𑀧𑀡𑁆𑀟𑀺𑀢𑁄 𑀧𑀺𑀢𑀼 𑀅𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀓𑀜𑁆𑀘𑀦𑀧𑀻𑀞𑁂𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁨𑁬. ‘‘𑀅𑀧𑀼𑀘𑁆𑀙𑀺𑀫𑁆𑀳 𑀓𑁄𑀲𑀺𑀬𑀕𑁄𑀢𑁆𑀢𑀁, 𑀓𑀼𑀡𑁆𑀟𑀮𑀺𑀦𑀺𑀁 𑀢𑀣𑁂𑀯 𑀘;

𑀢𑁆𑀯𑀁 𑀤𑀸𑀦𑀺 𑀯𑀤𑁂𑀳𑀺 𑀚𑀫𑁆𑀩𑀼𑀓, 𑀩𑀮𑀸𑀦𑀁 𑀩𑀮𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀸𑀢, 𑀚𑀫𑁆𑀩𑀼𑀓, 𑀅𑀳𑀁 𑀢𑀯 𑀪𑀸𑀢𑀭𑀁 𑀓𑁄𑀲𑀺𑀬𑀕𑁄𑀢𑁆𑀢𑀁 𑀯𑁂𑀲𑁆𑀲𑀦𑁆𑀢𑀭𑀁 𑀪𑀕𑀺𑀦𑀺𑀜𑁆𑀘 𑀢𑁂 𑀓𑀼𑀡𑁆𑀟𑀮𑀺𑀦𑀺𑀁 𑀭𑀸𑀚𑀥𑀫𑁆𑀫𑀁 𑀅𑀧𑀼𑀘𑁆𑀙𑀺𑀁, 𑀢𑁂 𑀅𑀢𑁆𑀢𑀦𑁄 𑀩𑀮𑁂𑀦 𑀓𑀣𑁂𑀲𑀼𑀁, 𑀬𑀣𑀸 𑀧𑀦 𑀢𑁂 𑀧𑀼𑀘𑁆𑀙𑀺𑀁, 𑀢𑀣𑁂𑀯 𑀇𑀤𑀸𑀦𑀺, 𑀧𑀼𑀢𑁆𑀢 𑀚𑀫𑁆𑀩𑀼𑀓, 𑀢𑀁 𑀧𑀼𑀘𑁆𑀙𑀸𑀫𑀺, 𑀢𑁆𑀯𑀁 𑀫𑁂 𑀭𑀸𑀚𑀥𑀫𑁆𑀫𑀜𑁆𑀘 𑀩𑀮𑀸𑀦𑀁 𑀉𑀢𑁆𑀢𑀫𑀁 𑀩𑀮𑀜𑁆𑀘 𑀓𑀣𑁂𑀳𑀻𑀢𑀺.

𑀏𑀯𑀁 𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀅𑀜𑁆𑀜𑁂𑀲𑀁 𑀧𑀼𑀘𑁆𑀙𑀺𑀢𑀦𑀺𑀬𑀸𑀫𑁂𑀦 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀧𑀡𑁆𑀟𑀺𑀢𑁄 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀑𑀳𑀺𑀢𑀲𑁄𑀢𑁄 𑀲𑀼𑀡𑀸𑀳𑀺, 𑀲𑀩𑁆𑀩𑀁 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀧𑀲𑀸𑀭𑀺𑀢𑀳𑀢𑁆𑀣𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺 𑁋

𑁨𑁭. ‘‘𑀩𑀮𑀁 𑀧𑀜𑁆𑀘𑀯𑀺𑀥𑀁 𑀮𑁄𑀓𑁂, 𑀧𑀼𑀭𑀺𑀲𑀲𑁆𑀫𑀺𑀁 𑀫𑀳𑀕𑁆𑀕𑀢𑁂;

𑀢𑀢𑁆𑀣 𑀩𑀸𑀳𑀼𑀩𑀮𑀁 𑀦𑀸𑀫, 𑀘𑀭𑀺𑀫𑀁 𑀯𑀼𑀘𑁆𑀘𑀢𑁂 𑀩𑀮𑀁.

𑁨𑁮. ‘‘𑀪𑁄𑀕𑀩𑀮𑀜𑁆𑀘 𑀤𑀻𑀖𑀸𑀯𑀼, 𑀤𑀼𑀢𑀺𑀬𑀁 𑀯𑀼𑀘𑁆𑀘𑀢𑁂 𑀩𑀮𑀁;

𑀅𑀫𑀘𑁆𑀘𑀩𑀮𑀜𑁆𑀘 𑀤𑀻𑀖𑀸𑀯𑀼, 𑀢𑀢𑀺𑀬𑀁 𑀯𑀼𑀘𑁆𑀘𑀢𑁂 𑀩𑀮𑀁.

𑁨𑁯. ‘‘𑀅𑀪𑀺𑀚𑀘𑁆𑀘𑀩𑀮𑀜𑁆𑀘𑁂𑀯, 𑀢𑀁 𑀘𑀢𑀼𑀢𑁆𑀣𑀁 𑀅𑀲𑀁𑀲𑀬𑀁;

𑀬𑀸𑀦𑀺 𑀘𑁂𑀢𑀸𑀦𑀺 𑀲𑀩𑁆𑀩𑀸𑀦𑀺, 𑀅𑀥𑀺𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄.

𑁩𑁦. ‘‘𑀢𑀁 𑀩𑀮𑀸𑀦𑀁 𑀩𑀮𑀁 𑀲𑁂𑀝𑁆𑀞𑀁, 𑀅𑀕𑁆𑀕𑀁 𑀧𑀜𑁆𑀜𑀸𑀩𑀮𑀁 𑀩𑀮𑀁;

𑀧𑀜𑁆𑀜𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀅𑀢𑁆𑀣𑀁 𑀯𑀺𑀦𑁆𑀤𑀢𑀺 𑀧𑀡𑁆𑀟𑀺𑀢𑁄.

𑁩𑁧. ‘‘𑀅𑀧𑀺 𑀘𑁂 𑀮𑀪𑀢𑀺 𑀫𑀦𑁆𑀤𑁄, 𑀨𑀻𑀢𑀁 𑀥𑀭𑀡𑀺𑀫𑀼𑀢𑁆𑀢𑀫𑀁;

𑀅𑀓𑀸𑀫𑀲𑁆𑀲 𑀧𑀲𑀬𑁆𑀳𑀁 𑀯𑀸, 𑀅𑀜𑁆𑀜𑁄 𑀢𑀁 𑀧𑀝𑀺𑀧𑀚𑁆𑀚𑀢𑀺.

𑁩𑁨. ‘‘𑀅𑀪𑀺𑀚𑀸𑀢𑁄𑀧𑀺 𑀘𑁂 𑀳𑁄𑀢𑀺, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;

𑀤𑀼𑀧𑁆𑀧𑀜𑁆𑀜𑁄 𑀳𑀺 𑀓𑀸𑀲𑀺𑀧𑀢𑀺, 𑀲𑀩𑁆𑀩𑁂𑀦𑀧𑀺 𑀦 𑀚𑀻𑀯𑀢𑀺.

𑁩𑁩. ‘‘𑀧𑀜𑁆𑀜𑀸𑀯 𑀲𑀼𑀢𑀁 𑀯𑀺𑀦𑀺𑀘𑁆𑀙𑀺𑀦𑀻, 𑀧𑀜𑁆𑀜𑀸 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀟𑁆𑀠𑀦𑀻;

𑀧𑀜𑁆𑀜𑀸𑀲𑀳𑀺𑀢𑁄 𑀦𑀭𑁄 𑀇𑀥, 𑀅𑀧𑀺 𑀤𑀼𑀓𑁆𑀔𑁂 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀺.

𑁩𑁪. ‘‘𑀧𑀜𑁆𑀜𑀜𑁆𑀘 𑀔𑁄 𑀅𑀲𑀼𑀲𑁆𑀲𑀽𑀲𑀁, 𑀦 𑀓𑁄𑀘𑀺 𑀅𑀥𑀺𑀕𑀘𑁆𑀙𑀢𑀺;

𑀩𑀳𑀼𑀲𑁆𑀲𑀼𑀢𑀁 𑀅𑀦𑀸𑀕𑀫𑁆𑀫, 𑀥𑀫𑁆𑀫𑀝𑁆𑀞𑀁 𑀅𑀯𑀺𑀦𑀺𑀩𑁆𑀪𑀼𑀚𑀁.

𑁩𑁫. ‘‘𑀬𑁄 𑀘 𑀥𑀫𑁆𑀫𑀯𑀺𑀪𑀗𑁆𑀕𑀜𑁆𑀜𑀽, 𑀓𑀸𑀮𑀼𑀝𑁆𑀞𑀸𑀬𑀻 𑀅𑀢𑀦𑁆𑀤𑀺𑀢𑁄;

𑀅𑀦𑀼𑀝𑁆𑀞𑀳𑀢𑀺 𑀓𑀸𑀮𑁂𑀦, 𑀓𑀫𑁆𑀫𑀨𑀮𑀁 𑀢𑀲𑁆𑀲𑀺𑀚𑁆𑀛𑀢𑀺.

𑁩𑁬. ‘‘𑀅𑀦𑀸𑀬𑀢𑀦𑀲𑀻𑀮𑀲𑁆𑀲, 𑀅𑀦𑀸𑀬𑀢𑀦𑀲𑁂𑀯𑀺𑀦𑁄;

𑀦 𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺.

𑁩𑁭. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀧𑀬𑀼𑀢𑁆𑀢𑀲𑁆𑀲, 𑀢𑀣𑀸𑀬𑀢𑀦𑀲𑁂𑀯𑀺𑀦𑁄;

𑀅𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺.

𑁩𑁮. ‘‘𑀬𑁄𑀕𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀁, 𑀲𑀫𑁆𑀪𑀢𑀲𑁆𑀲𑀸𑀦𑀼𑀭𑀓𑁆𑀔𑀡𑀁;

𑀢𑀸𑀦𑀺 𑀢𑁆𑀯𑀁 𑀢𑀸𑀢 𑀲𑁂𑀯𑀲𑁆𑀲𑀼, 𑀫𑀸 𑀅𑀓𑀫𑁆𑀫𑀸𑀬 𑀭𑀦𑁆𑀥𑀬𑀺;

𑀅𑀓𑀫𑁆𑀫𑀼𑀦𑀸 𑀳𑀺 𑀤𑀼𑀫𑁆𑀫𑁂𑀥𑁄, 𑀦𑀴𑀸𑀕𑀸𑀭𑀁𑀯 𑀲𑀻𑀤𑀢𑀻’’𑀢𑀺.

𑀢𑀢𑁆𑀣 𑀫𑀳𑀕𑁆𑀕𑀢𑁂𑀢𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀫𑀳𑀚𑁆𑀛𑀸𑀲𑀬𑁂 𑀧𑀼𑀭𑀺𑀲𑁂 𑀧𑀜𑁆𑀘𑀯𑀺𑀥𑀁 𑀩𑀮𑀁 𑀳𑁄𑀢𑀺. 𑀩𑀸𑀳𑀼𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀘𑀭𑀺𑀫𑀦𑁆𑀢𑀺 𑀢𑀁 𑀅𑀢𑀺𑀫𑀳𑀦𑁆𑀢𑀫𑁆𑀧𑀺 𑀲𑀫𑀸𑀦𑀁 𑀮𑀸𑀫𑀓𑀫𑁂𑀯. 𑀓𑀺𑀁𑀓𑀸𑀭𑀡𑀸? 𑀅𑀦𑁆𑀥𑀩𑀸𑀮𑀪𑀸𑀯𑁂𑀦. 𑀲𑀘𑁂 𑀳𑀺 𑀓𑀸𑀬𑀩𑀮𑀁 𑀫𑀳𑀦𑁆𑀢𑀁 𑀦𑀸𑀫 𑀪𑀯𑁂𑀬𑁆𑀬, 𑀯𑀸𑀭𑀡𑀩𑀮𑀢𑁄 𑀮𑀝𑀼𑀓𑀺𑀓𑀸𑀬 𑀩𑀮𑀁 𑀔𑀼𑀤𑁆𑀤𑀓𑀁 𑀪𑀯𑁂𑀬𑁆𑀬, 𑀯𑀸𑀭𑀡𑀩𑀮𑀁 𑀧𑀦 𑀅𑀦𑁆𑀥𑀩𑀸𑀮𑀪𑀸𑀯𑁂𑀦 𑀫𑀭𑀡𑀲𑁆𑀲 𑀧𑀘𑁆𑀘𑀬𑀁 𑀚𑀸𑀢𑀁, 𑀮𑀝𑀼𑀓𑀺𑀓𑀸 𑀅𑀢𑁆𑀢𑀦𑁄 𑀜𑀸𑀡𑀓𑀼𑀲𑀮𑀢𑀸𑀬 𑀯𑀸𑀭𑀡𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀦 𑀳𑁂𑀯 𑀲𑀩𑁆𑀩𑀢𑁆𑀣 𑀩𑀮𑁂𑀦 𑀓𑀺𑀘𑁆𑀘𑀁, 𑀩𑀮𑀜𑁆𑀳𑀺 𑀩𑀸𑀮𑀲𑁆𑀲 𑀯𑀥𑀸𑀬 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 (𑀚𑀸. 𑁧.𑁫.𑁪𑁨) 𑀆𑀳𑀭𑀺𑀢𑀩𑁆𑀩𑀁.

𑀪𑁄𑀕𑀩𑀮𑀦𑁆𑀢𑀺 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀲𑀩𑁆𑀩𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀉𑀧𑀪𑁄𑀕𑀚𑀸𑀢𑀁 𑀪𑁄𑀕𑀩𑀮𑀁 𑀦𑀸𑀫, 𑀢𑀁 𑀓𑀸𑀬𑀩𑀮𑀢𑁄 𑀫𑀳𑀦𑁆𑀢𑀢𑀭𑀁. 𑀅𑀫𑀘𑁆𑀘𑀩𑀮𑀦𑁆𑀢𑀺 𑀅𑀪𑁂𑀚𑁆𑀚𑀫𑀦𑁆𑀢𑀲𑁆𑀲 𑀲𑀽𑀭𑀲𑁆𑀲 𑀲𑀼𑀳𑀤𑀬𑀲𑁆𑀲 𑀅𑀫𑀘𑁆𑀘𑀫𑀡𑁆𑀟𑀮𑀲𑁆𑀲 𑀅𑀢𑁆𑀣𑀺𑀢𑀸, 𑀢𑀁 𑀩𑀮𑀁 𑀲𑀗𑁆𑀕𑀸𑀫𑀲𑀽𑀭𑀢𑀸𑀬 𑀧𑀼𑀭𑀺𑀫𑁂𑀳𑀺 𑀩𑀮𑁂𑀳𑀺 𑀫𑀳𑀦𑁆𑀢𑀢𑀭𑀁. 𑀅𑀪𑀺𑀚𑀘𑁆𑀘𑀩𑀮𑀦𑁆𑀢𑀺 𑀢𑀻𑀡𑀺 𑀓𑀼𑀮𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀯𑀲𑁂𑀦 𑀚𑀸𑀢𑀺𑀲𑀫𑁆𑀧𑀢𑁆𑀢𑀺, 𑀢𑀁 𑀇𑀢𑀭𑁂𑀳𑀺 𑀩𑀮𑁂𑀳𑀺 𑀫𑀳𑀦𑁆𑀢𑀢𑀭𑀁. 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀏𑀯 𑀳𑀺 𑀲𑀼𑀚𑁆𑀛𑀦𑁆𑀢𑀺, 𑀦 𑀇𑀢𑀭𑁂𑀢𑀺. 𑀬𑀸𑀦𑀺 𑀘𑁂𑀢𑀸𑀦𑀻𑀢𑀺 𑀬𑀸𑀦𑀺 𑀘 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀩𑀮𑀸𑀦𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀥𑀺𑀕𑀡𑁆𑀳𑀸𑀢𑀺 𑀅𑀪𑀺𑀪𑀯𑀢𑀺, 𑀢𑀁 𑀲𑀩𑁆𑀩𑀩𑀮𑀸𑀦𑀁 𑀧𑀜𑁆𑀜𑀸𑀩𑀮𑀁 𑀲𑁂𑀝𑁆𑀞𑀦𑁆𑀢𑀺 𑀘 𑀅𑀕𑁆𑀕𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀁𑀓𑀸𑀭𑀡𑀸? 𑀢𑁂𑀦 𑀳𑀺 𑀩𑀮𑁂𑀦 𑀉𑀧𑀢𑁆𑀣𑀤𑁆𑀥𑁄 𑀧𑀡𑁆𑀟𑀺𑀢𑁄 𑀅𑀢𑁆𑀣𑀁 𑀯𑀺𑀦𑁆𑀤𑀢𑀺, 𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀸𑀢𑀺. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 ‘‘𑀧𑀼𑀡𑁆𑀡𑀁 𑀦𑀤𑀺𑀁 𑀬𑁂𑀦 𑀘 𑀧𑁂𑀬𑁆𑀬𑀫𑀸𑀳𑀽’’𑀢𑀺 𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀜𑁆𑀘 (𑀚𑀸. 𑁧.𑁨.𑁧𑁨𑁭 𑀆𑀤𑀬𑁄) 𑀲𑀺𑀭𑀻𑀓𑀸𑀴𑀓𑀡𑁆𑀡𑀺𑀧𑀜𑁆𑀳𑀁 𑀧𑀜𑁆𑀘𑀧𑀡𑁆𑀟𑀺𑀢𑀧𑀜𑁆𑀳𑀜𑁆𑀘 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓- (𑀚𑀸. 𑁧.𑁭.𑁪𑁬 𑀆𑀤𑀬𑁄) 𑀲𑀫𑁆𑀪𑀯𑀚𑀸𑀢𑀓- (𑀚𑀸. 𑁧.𑁧𑁬.𑁧𑁩𑁮 𑀆𑀤𑀬𑁄) 𑀲𑀭𑀪𑀗𑁆𑀕𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀘 𑀓𑀣𑁂𑀢𑀩𑁆𑀩𑀸𑀦𑀺.

𑀫𑀦𑁆𑀤𑁄𑀢𑀺 𑀫𑀦𑁆𑀤𑀧𑀜𑁆𑀜𑁄 𑀩𑀸𑀮𑁄. 𑀨𑀻𑀢𑀦𑁆𑀢𑀺, 𑀢𑀸𑀢, 𑀫𑀦𑁆𑀤𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀢𑁆𑀢𑀭𑀢𑀦𑀧𑀼𑀡𑁆𑀡𑀁 𑀘𑁂𑀧𑀺 𑀉𑀢𑁆𑀢𑀫𑀁 𑀥𑀭𑀡𑀺𑀁 𑀮𑀪𑀢𑀺, 𑀢𑀲𑁆𑀲 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀧𑀲𑀬𑁆𑀳𑀓𑀸𑀭𑀁 𑀯𑀸 𑀧𑀦 𑀓𑀢𑁆𑀯𑀸 𑀅𑀜𑁆𑀜𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀢𑀁 𑀧𑀝𑀺𑀧𑀚𑁆𑀚𑀢𑀺. 𑀫𑀦𑁆𑀤𑁄 𑀳𑀺 𑀮𑀤𑁆𑀥𑀁 𑀬𑀲𑀁 𑀭𑀓𑁆𑀔𑀺𑀢𑀼𑀁 𑀓𑀼𑀮𑀲𑀦𑁆𑀢𑀓𑀁 𑀯𑀸 𑀧𑀦 𑀧𑀯𑁂𑀡𑀺𑀆𑀕𑀢𑀫𑁆𑀧𑀺 𑀭𑀚𑁆𑀚𑀁 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 ‘‘𑀅𑀤𑁆𑀥𑀸 𑀧𑀸𑀤𑀜𑁆𑀚𑀮𑀻 𑀲𑀩𑁆𑀩𑁂, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀢𑀻’’𑀢𑀺 𑀧𑀸𑀤𑀜𑁆𑀚𑀮𑀻𑀚𑀸𑀢𑀓𑀁 (𑀚𑀸. 𑁧.𑁨.𑁧𑁯𑁪-𑁧𑁯𑁫) 𑀓𑀣𑁂𑀢𑀩𑁆𑀩𑀁. 𑀮𑀤𑁆𑀥𑀸𑀦𑀸𑀢𑀺 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸𑀧𑀺. 𑀲𑀩𑁆𑀩𑁂𑀦𑀧𑀻𑀢𑀺 𑀢𑁂𑀦 𑀲𑀓𑀮𑁂𑀦𑀧𑀺 𑀭𑀚𑁆𑀚𑁂𑀦 𑀦 𑀚𑀻𑀯𑀢𑀺, 𑀅𑀦𑀼𑀧𑀸𑀬𑀓𑀼𑀲𑀮𑀢𑀸𑀬 𑀤𑀼𑀕𑁆𑀕𑀢𑁄𑀯 𑀳𑁄𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀅𑀧𑀡𑁆𑀟𑀺𑀢𑀲𑁆𑀲 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀜𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀜𑁆𑀜𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑀦𑁆𑀢𑀺 𑀲𑀼𑀢𑀧𑀭𑀺𑀬𑀢𑁆𑀢𑀺. 𑀢𑀜𑁆𑀳𑀺 𑀧𑀜𑁆𑀜𑀸𑀯 𑀯𑀺𑀦𑀺𑀘𑁆𑀙𑀺𑀦𑀢𑀺. 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀟𑁆𑀠𑀦𑀻𑀢𑀺 𑀓𑀺𑀢𑁆𑀢𑀺𑀖𑁄𑀲𑀲𑁆𑀲 𑀘 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀘 𑀯𑀟𑁆𑀠𑀦𑀻. 𑀤𑀼𑀓𑁆𑀔𑁂 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀻𑀢𑀺 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀉𑀧𑀸𑀬𑀓𑀼𑀲𑀮𑀢𑀸𑀬 𑀲𑀼𑀔𑀁 𑀧𑀝𑀺𑀮𑀪𑀢𑀺. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑁋

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯’’. (𑀚𑀸. 𑁧.𑁧.𑁫𑁭);

𑀅𑀮𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘𑀸’’𑀢𑀺. (𑀚𑀸. 𑁧.𑁨.𑁧𑁧𑁫) 𑁋

𑀆𑀤𑀻𑀦𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

𑀅𑀲𑀼𑀲𑁆𑀲𑀽𑀲𑀦𑁆𑀢𑀺 𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁂 𑀅𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀅𑀲𑁆𑀲𑀼𑀡𑀦𑁆𑀢𑁄. 𑀥𑀫𑁆𑀫𑀝𑁆𑀞𑀦𑁆𑀢𑀺 𑀲𑀪𑀸𑀯𑀓𑀸𑀭𑀡𑁂 𑀞𑀺𑀢𑀁 𑀩𑀳𑀼𑀲𑁆𑀲𑀼𑀢𑀁 𑀅𑀦𑀸𑀕𑀫𑁆𑀫 𑀢𑀁 𑀅𑀲𑀤𑁆𑀤𑀳𑀦𑁆𑀢𑁄. 𑀅𑀯𑀺𑀦𑀺𑀩𑁆𑀪𑀼𑀚𑀦𑁆𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀅𑀦𑁄𑀕𑀸𑀳𑀦𑁆𑀢𑁄 𑀅𑀢𑀻𑀭𑁂𑀦𑁆𑀢𑁄 𑀦 𑀓𑁄𑀘𑀺 𑀧𑀜𑁆𑀜𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀸𑀢𑀸𑀢𑀺.

𑀥𑀫𑁆𑀫𑀯𑀺𑀪𑀗𑁆𑀕𑀜𑁆𑀜𑀽𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀺𑀪𑀗𑁆𑀕𑀓𑀼𑀲𑀮𑁄. 𑀓𑀸𑀮𑀼𑀝𑁆𑀞𑀸𑀬𑀻𑀢𑀺 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀯𑀻𑀭𑀺𑀬𑀲𑁆𑀲 𑀓𑀸𑀭𑀓𑁄. 𑀅𑀦𑀼𑀝𑁆𑀞𑀳𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀁 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀨𑀮𑀁 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀅𑀦𑀸𑀬𑀢𑀦𑀲𑀻𑀮𑀲𑁆𑀲𑀸𑀢𑀺 𑀅𑀦𑀸𑀬𑀢𑀦𑀁 𑀯𑀼𑀘𑁆𑀘𑀢𑀺 𑀮𑀸𑀪𑀬𑀲𑀲𑀼𑀔𑀸𑀦𑀁 𑀅𑀦𑀸𑀓𑀭𑁄 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀁, 𑀢𑀁𑀲𑀻𑀮𑀲𑁆𑀲 𑀢𑁂𑀦 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀦𑀸𑀬𑀢𑀦𑀪𑀽𑀢𑀫𑁂𑀯 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲, 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀓𑀸𑀮𑁂 𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀏𑀯𑀭𑀽𑀧𑀲𑁆𑀲, 𑀢𑀸𑀢, 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀸𑀦𑀁 𑀅𑀢𑁆𑀣𑁄 𑀲𑀫𑁆𑀫𑀸 𑀦 𑀯𑀺𑀧𑀘𑁆𑀘𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀻𑀡𑀺 𑀓𑀼𑀮𑀕𑁆𑀕𑀸𑀦𑀺 𑀘 𑀙 𑀓𑀸𑀫𑀲𑀕𑁆𑀕𑀸𑀦𑀺 𑀘 𑀦 𑀉𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀢𑀦𑁄 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀦𑀺𑀘𑁆𑀘𑀪𑀸𑀯𑀦𑀸𑀤𑀺𑀯𑀲𑁂𑀦 𑀧𑀬𑀼𑀢𑁆𑀢𑀲𑁆𑀲. 𑀢𑀣𑀸𑀬𑀢𑀦𑀲𑁂𑀯𑀺𑀦𑁄𑀢𑀺 𑀢𑀣𑁂𑀯 𑀲𑀻𑀮𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀫𑀸𑀦𑀲𑁆𑀲. 𑀯𑀺𑀧𑀘𑁆𑀘𑀢𑀻𑀢𑀺 𑀲𑀫𑁆𑀧𑀚𑁆𑀚𑀢𑀺 𑀫𑀳𑀦𑁆𑀢𑀁 𑀬𑀲𑀁 𑀤𑁂𑀢𑀺.

𑀬𑁄𑀕𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀦𑁆𑀢𑀺 𑀬𑁄𑀕𑁂 𑀬𑀼𑀜𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀓𑀸𑀭𑀡𑁂 𑀧𑀬𑁄𑀕𑀓𑁄𑀝𑁆𑀞𑀸𑀲𑀪𑀽𑀢𑀁 𑀧𑀜𑁆𑀜𑀁. 𑀲𑀫𑁆𑀪𑀢𑀲𑁆𑀲𑀸𑀢𑀺 𑀭𑀸𑀲𑀺𑀓𑀢𑀲𑁆𑀲 𑀥𑀦𑀲𑁆𑀲 𑀅𑀦𑀼𑀭𑀓𑁆𑀔𑀡𑀁. 𑀢𑀸𑀦𑀺 𑀢𑁆𑀯𑀦𑁆𑀢𑀺 𑀏𑀢𑀸𑀦𑀺 𑀘 𑀤𑁆𑀯𑁂 𑀧𑀼𑀭𑀺𑀫𑀸𑀦𑀺 𑀘 𑀫𑀬𑀸 𑀯𑀼𑀢𑁆𑀢𑀓𑀸𑀭𑀡𑀸𑀦𑀺 𑀲𑀩𑁆𑀩𑀸𑀦𑀺, 𑀢𑀸𑀢, 𑀢𑁆𑀯𑀁 𑀲𑁂𑀯𑀲𑁆𑀲𑀼, 𑀫𑀬𑀸 𑀯𑀼𑀢𑁆𑀢𑀁 𑀑𑀯𑀸𑀤𑀁 𑀳𑀤𑀬𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 𑀥𑀦𑀁 𑀭𑀓𑁆𑀔. 𑀫𑀸 𑀅𑀓𑀫𑁆𑀫𑀸𑀬 𑀭𑀦𑁆𑀥𑀬𑀻𑀢𑀺 𑀅𑀬𑀼𑀢𑁆𑀢𑁂𑀦 𑀅𑀓𑀸𑀭𑀡𑁂𑀦 𑀫𑀸 𑀭𑀦𑁆𑀥𑀬𑀺, 𑀢𑀁 𑀥𑀦𑀁 𑀫𑀸 𑀛𑀸𑀧𑀬𑀺 𑀫𑀸 𑀦𑀸𑀲𑀬𑀺. 𑀓𑀺𑀁𑀓𑀸𑀭𑀡𑀸? 𑀅𑀓𑀫𑁆𑀫𑀼𑀦𑀸 𑀳𑀻𑀢𑀺 𑀅𑀬𑀼𑀢𑁆𑀢𑀓𑀫𑁆𑀫𑀓𑀭𑀡𑁂𑀦 𑀤𑀼𑀫𑁆𑀫𑁂𑀥𑁄 𑀧𑀼𑀕𑁆𑀕𑀮𑁄 𑀲𑀓𑀁 𑀥𑀦𑀁 𑀦𑀸𑀲𑁂𑀢𑁆𑀯𑀸 𑀧𑀘𑁆𑀙𑀸 𑀤𑀼𑀕𑁆𑀕𑀢𑁄. 𑀦𑀴𑀸𑀕𑀸𑀭𑀁𑀯 𑀲𑀻𑀤𑀢𑀻𑀢𑀺 𑀬𑀣𑀸 𑀦𑀴𑀸𑀕𑀸𑀭𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀚𑀻𑀭𑀫𑀸𑀦𑀁 𑀅𑀧𑁆𑀧𑀢𑀺𑀝𑁆𑀞𑀁 𑀧𑀢𑀢𑀺, 𑀏𑀯𑀁 𑀅𑀓𑀸𑀭𑀡𑁂𑀦 𑀥𑀦𑀁 𑀦𑀸𑀲𑁂𑀢𑁆𑀯𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀏𑀯𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑁄 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀧𑀜𑁆𑀘 𑀩𑀮𑀸𑀦𑀺 𑀯𑀡𑁆𑀡𑁂𑀢𑁆𑀯𑀸 𑀧𑀜𑁆𑀜𑀸𑀩𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀤𑀲𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑁄 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀆𑀳 𑁋

𑁩𑁯. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀔𑀢𑁆𑀢𑀺𑀬;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁦. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀔𑀢𑁆𑀢𑀺𑀬;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁧. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀔𑀢𑁆𑀢𑀺𑀬;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁨. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁩. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁪. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀭𑀝𑁆𑀞𑁂 𑀚𑀦𑀧𑀤𑁂𑀲𑀼 𑀘;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁫. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁬. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀕𑀧𑀓𑁆𑀔𑀻𑀲𑀼 𑀔𑀢𑁆𑀢𑀺𑀬;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁭. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀥𑀫𑁆𑀫𑁄 𑀘𑀺𑀡𑁆𑀡𑁄 𑀲𑀼𑀔𑀸𑀯𑀳𑁄;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁪𑁮. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸;

𑀲𑀼𑀘𑀺𑀡𑁆𑀡𑁂𑀦 𑀤𑀺𑀯𑀁 𑀧𑀢𑁆𑀢𑀸, 𑀫𑀸 𑀥𑀫𑁆𑀫𑀁 𑀭𑀸𑀚 𑀧𑀸𑀫𑀤𑁄’’𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀇𑀥 𑀥𑀫𑁆𑀫𑀦𑁆𑀢𑀺 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁. 𑀢𑀁 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑀫𑀸𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑀭𑀻𑀭𑀓𑀺𑀘𑁆𑀘𑀧𑀭𑀺𑀳𑀭𑀡𑀁 𑀓𑀭𑁄𑀦𑁆𑀢𑁄𑀯 𑀧𑀽𑀭𑁂𑀳𑀻𑀢𑀺 𑀯𑀤𑀢𑀺. 𑀧𑀼𑀢𑁆𑀢𑀤𑀸𑀭𑁂𑀲𑀽𑀢𑀺 𑀧𑀼𑀢𑁆𑀢𑀥𑀻𑀢𑀭𑁄 𑀢𑀸𑀯 𑀧𑀸𑀧𑀸 𑀦𑀺𑀯𑀸𑀭𑁂𑀢𑁆𑀯𑀸 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀢𑀺𑀭𑀽𑀧𑀓𑀼𑀮𑀯𑀁𑀲𑁂𑀦 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀦𑁆𑀢𑁄 𑀲𑀫𑀬𑁂 𑀥𑀦𑀁 𑀤𑁂𑀦𑁆𑀢𑁄 𑀧𑀼𑀢𑁆𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫, 𑀪𑀭𑀺𑀬𑀁 𑀲𑀫𑁆𑀫𑀸𑀦𑁂𑀦𑁆𑀢𑁄 𑀅𑀦𑀯𑀫𑀸𑀦𑁂𑀦𑁆𑀢𑁄 𑀅𑀦𑀢𑀺𑀘𑀭𑀦𑁆𑀢𑁄 𑀇𑀲𑁆𑀲𑀭𑀺𑀬𑀁 𑀯𑁄𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀮𑀗𑁆𑀓𑀸𑀭𑀁 𑀅𑀦𑀼𑀧𑁆𑀧𑀤𑁂𑀦𑁆𑀢𑁄 𑀤𑀸𑀭𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀽𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 𑀅𑀯𑀺𑀲𑀁𑀯𑀸𑀤𑁂𑀦𑁆𑀢𑁄 𑀏𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀯𑀸𑀳𑀦𑀸𑀦𑀁 𑀩𑀮𑀓𑀸𑀬𑀲𑁆𑀲 𑀘 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑁂𑀦𑁆𑀢𑁄 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀫𑀳𑀮𑁆𑀮𑀓𑀓𑀸𑀮𑁂 𑀓𑀫𑁆𑀫𑁂𑀲𑀼 𑀅𑀬𑁄𑀚𑁂𑀦𑁆𑀢𑁄 𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫.