𑁧𑁮. 𑀧𑀡𑁆𑀡𑀸𑀲𑀦𑀺𑀧𑀸𑀢𑁄

[𑁫𑁨𑁬] 𑁧. 𑀦𑀺𑀴𑀺𑀦𑀺𑀓𑀸𑀚𑀸𑀢𑀓𑀯𑀡𑁆𑀡𑀦𑀸

𑀉𑀤𑁆𑀤𑀬𑁆𑀳𑀢𑁂 𑀚𑀦𑀧𑀤𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀩 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 𑀢𑀁 𑀪𑀺𑀓𑁆𑀔𑀼𑀁 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀏𑀲𑀸 𑀔𑁄, 𑀪𑀺𑀓𑁆𑀔𑀼, 𑀇𑀤𑀸𑀦𑁂𑀯 𑀢𑀯 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀛𑀸𑀦𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀺𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀮𑀫𑁆𑀩𑀼𑀲𑀸𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀧𑀝𑀺𑀘𑁆𑀘 𑀏𑀓𑀸 𑀫𑀺𑀕𑀻 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀇𑀲𑀺𑀲𑀺𑀗𑁆𑀕𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀅𑀣 𑀦𑀁 𑀧𑀺𑀢𑀸 𑀯𑀬𑀧𑁆𑀧𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀦𑀘𑀺𑀭𑀲𑁆𑀲𑁂𑀯 𑀛𑀸𑀦𑀸𑀪𑀺𑀜𑁆𑀜𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀓𑀻𑀴𑀺, 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀉𑀧𑀸𑀬𑁂𑀦𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀲𑀓𑀮𑀓𑀸𑀲𑀺𑀭𑀝𑁆𑀞𑁂 𑀯𑀼𑀝𑁆𑀞𑀺𑀁 𑀦𑀺𑀯𑀸𑀭𑁂𑀲𑀺, 𑀭𑀝𑁆𑀞𑀁 𑀅𑀕𑁆𑀕𑀺𑀤𑀟𑁆𑀠𑀁 𑀯𑀺𑀬 𑀅𑀳𑁄𑀲𑀺. 𑀲𑀲𑁆𑀲𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀤𑀼𑀩𑁆𑀪𑀺𑀓𑁆𑀔𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀅𑀣 𑀦𑁂 𑀭𑀸𑀚𑀸 𑀯𑀸𑀢𑀧𑀸𑀦𑁂 𑀞𑀺𑀢𑁄 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀤𑁂𑀯𑀲𑁆𑀲 𑀅𑀯𑀲𑁆𑀲𑀦𑁆𑀢𑀢𑁆𑀢𑀸 𑀲𑀓𑀮𑀭𑀝𑁆𑀞𑀁 𑀉𑀤𑁆𑀤𑀬𑁆𑀳𑀢𑀺, 𑀫𑀦𑀼𑀲𑁆𑀲𑀸 𑀤𑀼𑀓𑁆𑀔𑀺𑀢𑀸, 𑀤𑁂𑀯𑀁 𑀯𑀲𑁆𑀲𑀸𑀧𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄𑀧𑀺 𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁆𑀓𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀢𑀲𑁆𑀲 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀯𑁂𑀳𑀸𑀲𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸𑀕𑀢𑁄𑀲𑀻’’𑀢𑀺? ‘‘𑀯𑀲𑁆𑀲𑀢𑀺 𑀢𑁂, 𑀫𑀳𑀸𑀭𑀸𑀚, 𑀭𑀝𑁆𑀞𑁂 𑀤𑁂𑀯𑁄’’𑀢𑀺? ‘‘𑀦 𑀯𑀲𑁆𑀲𑀢𑀻’’𑀢𑀺. ‘‘𑀚𑀸𑀦𑀸𑀲𑀺 𑀧𑀦𑀲𑁆𑀲 𑀅𑀯𑀲𑁆𑀲𑀦𑀓𑀸𑀭𑀡’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀲𑀓𑁆𑀓𑀸’’𑀢𑀺. ‘‘𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀇𑀲𑀺𑀲𑀺𑀗𑁆𑀕𑁄 𑀦𑀸𑀫 𑀢𑀸𑀧𑀲𑁄 𑀧𑀝𑀺𑀯𑀲𑀢𑀺 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄. 𑀲𑁄 𑀦𑀺𑀩𑀤𑁆𑀥𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀆𑀓𑀸𑀲𑀁 𑀑𑀮𑁄𑀓𑁂𑀲𑀺, 𑀢𑀲𑁆𑀫𑀸 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺. ‘‘𑀇𑀤𑀸𑀦𑀺 𑀧𑀦𑁂𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀢𑀲𑁆𑀲 𑀢𑀧𑁂 𑀪𑀺𑀦𑁆𑀦𑁂 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺. ‘‘𑀓𑁄 𑀧𑀦𑀲𑁆𑀲 𑀢𑀧𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺? ‘‘𑀥𑀻𑀢𑀸 𑀢𑁂, 𑀫𑀳𑀸𑀭𑀸𑀚, 𑀦𑀺𑀴𑀺𑀦𑀺𑀓𑀸 𑀲𑀫𑀢𑁆𑀣𑀸, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸 𑀢𑀸𑀧𑀲𑀲𑁆𑀲 𑀢𑀧𑀁 𑀪𑀺𑀦𑁆𑀤𑀸𑀳𑀻’𑀢𑀺 𑀧𑁂𑀲𑁂𑀳𑀻’’𑀢𑀺. 𑀏𑀯𑀁 𑀲𑁄 𑀭𑀸𑀚𑀸𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀉𑀤𑁆𑀤𑀬𑁆𑀳𑀢𑁂 𑀚𑀦𑀧𑀤𑁄, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀺;

𑀏𑀳𑀺 𑀦𑀺𑀴𑀺𑀦𑀺𑀓𑁂 𑀕𑀘𑁆𑀙, 𑀢𑀁 𑀫𑁂 𑀩𑁆𑀭𑀸𑀳𑁆𑀫𑀡𑀫𑀸𑀦𑀬𑀸’’𑀢𑀺.

𑀢𑀢𑁆𑀣 𑀢𑀁 𑀫𑁂𑀢𑀺 𑀢𑀁 𑀫𑀫 𑀅𑀦𑀢𑁆𑀣𑀓𑀸𑀭𑀺𑀁 𑀩𑁆𑀭𑀸𑀳𑁆𑀫𑀡𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀳𑀺, 𑀓𑀺𑀮𑁂𑀲𑀭𑀢𑀺𑀯𑀲𑁂𑀦𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀸𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀦𑀸𑀳𑀁 𑀤𑀼𑀓𑁆𑀔𑀓𑁆𑀔𑀫𑀸 𑀭𑀸𑀚, 𑀦𑀸𑀳𑀁 𑀅𑀤𑁆𑀥𑀸𑀦𑀓𑁄𑀯𑀺𑀤𑀸;

𑀓𑀣𑀁 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀯𑀦𑀁 𑀓𑀼𑀜𑁆𑀚𑀭𑀲𑁂𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀤𑀼𑀓𑁆𑀔𑀓𑁆𑀔𑀫𑀸𑀢𑀺 𑀅𑀳𑀁, 𑀫𑀳𑀸𑀭𑀸𑀚, 𑀤𑀼𑀓𑁆𑀔𑀲𑁆𑀲 𑀔𑀫𑀸 𑀦 𑀳𑁄𑀫𑀺, 𑀅𑀤𑁆𑀥𑀸𑀦𑀫𑁆𑀧𑀺 𑀦 𑀚𑀸𑀦𑀸𑀫𑀺, 𑀲𑀸𑀳𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀻𑀢𑀺.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

𑁩. ‘‘𑀨𑀻𑀢𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸, 𑀳𑀢𑁆𑀣𑀺𑀦𑀸 𑀘 𑀭𑀣𑁂𑀦 𑀘;

𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦, 𑀏𑀯𑀁 𑀕𑀘𑁆𑀙 𑀦𑀺𑀴𑀺𑀦𑀺𑀓𑁂.

𑁪. ‘‘𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀧𑀢𑁆𑀢𑀻, 𑀕𑀘𑁆𑀙𑁂𑀯𑀸𑀤𑀸𑀬 𑀔𑀢𑁆𑀢𑀺𑀬𑁂;

𑀢𑀯𑁂𑀯 𑀯𑀡𑁆𑀡𑀭𑀽𑀧𑁂𑀦, 𑀯𑀲𑀁 𑀢𑀫𑀸𑀦𑀬𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦𑀸𑀢𑀺, 𑀅𑀫𑁆𑀫, 𑀦𑀺𑀴𑀺𑀦𑀺𑀓𑁂 𑀦 𑀢𑁆𑀯𑀁 𑀧𑀤𑀲𑀸 𑀕𑀫𑀺𑀲𑁆𑀲𑀲𑀺, 𑀨𑀻𑀢𑀁 𑀧𑀦 𑀲𑀼𑀪𑀺𑀓𑁆𑀔𑀁 𑀔𑁂𑀫𑀁 𑀅𑀢𑁆𑀢𑀦𑁄 𑀚𑀦𑀧𑀤𑀁 𑀳𑀢𑁆𑀣𑀺𑀯𑀸𑀳𑀦𑁂𑀳𑀺 𑀘 𑀭𑀣𑀯𑀸𑀳𑀦𑁂𑀳𑀺 𑀘 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀫𑁆𑀧𑀺 𑀅𑀚𑁆𑀛𑁄𑀓𑀸𑀲𑁂 𑀧𑀝𑀺𑀘𑁆𑀙𑀦𑁆𑀦𑁂𑀦 𑀯𑀬𑁆𑀳𑀸𑀤𑀺𑀦𑀸 𑀉𑀤𑀓𑀝𑁆𑀞𑀸𑀦𑁂 𑀦𑀸𑀯𑀸𑀲𑀗𑁆𑀔𑀸𑀢𑁂𑀦 𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦 𑀕𑀘𑁆𑀙. 𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀏𑀯𑀁 𑀅𑀓𑀺𑀮𑀫𑀫𑀸𑀦𑀸 𑀕𑀦𑁆𑀢𑁆𑀯𑀸 𑀢𑀯 𑀯𑀡𑁆𑀡𑁂𑀦 𑀘𑁂𑀯 𑀭𑀽𑀧𑀲𑀫𑁆𑀧𑀤𑀸𑀬 𑀘 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑀬𑀺𑀲𑁆𑀲𑀲𑀻𑀢𑀺.

𑀏𑀯𑀁 𑀲𑁄 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀅𑀓𑀣𑁂𑀢𑀩𑁆𑀩𑀫𑁆𑀧𑀺 𑀭𑀝𑁆𑀞𑀧𑀭𑀺𑀧𑀸𑀮𑀦𑀁 𑀦𑀺𑀲𑁆𑀲𑀸𑀬 𑀓𑀣𑁂𑀲𑀺. 𑀲𑀸𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣𑀲𑁆𑀲𑀸 𑀲𑀩𑁆𑀩𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑁄𑀚𑁂𑀲𑀺. 𑀅𑀫𑀘𑁆𑀘𑀸 𑀢𑀁 𑀆𑀤𑀸𑀬 𑀧𑀘𑁆𑀘𑀦𑁆𑀢𑀁 𑀧𑀢𑁆𑀯𑀸 𑀢𑀢𑁆𑀣 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀯𑀦𑀘𑀭𑀓𑁂𑀦 𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀲𑁆𑀲 𑀅𑀲𑁆𑀲𑀫𑀧𑀤𑀲𑁆𑀲 𑀲𑀫𑀻𑀧𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀁 𑀅𑀲𑁆𑀲𑀫𑀧𑀤𑁂 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀲𑀬𑀁 𑀨𑀮𑀸𑀨𑀮𑀢𑁆𑀣𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀯𑀦𑀘𑀭𑀓𑁄 𑀲𑀬𑀁 𑀅𑀲𑁆𑀲𑀫𑀁 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀦 𑀤𑀲𑁆𑀲𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀦𑀺𑀴𑀺𑀦𑀺𑀓𑀸𑀬 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫. ‘‘𑀓𑀤𑀮𑀻𑀥𑀚𑀧𑀜𑁆𑀜𑀸𑀡𑁄, 𑀆𑀪𑀼𑀚𑀻𑀧𑀭𑀺𑀯𑀸𑀭𑀺𑀢𑁄;

𑀏𑀲𑁄 𑀧𑀤𑀺𑀲𑁆𑀲𑀢𑀺 𑀭𑀫𑁆𑀫𑁄, 𑀇𑀲𑀺𑀲𑀺𑀗𑁆𑀕𑀲𑁆𑀲 𑀅𑀲𑁆𑀲𑀫𑁄.

𑁬. ‘‘𑀏𑀲𑁄 𑀅𑀕𑁆𑀕𑀺𑀲𑁆𑀲 𑀲𑀗𑁆𑀔𑀸𑀢𑁄, 𑀏𑀲𑁄 𑀥𑀽𑀫𑁄 𑀧𑀤𑀺𑀲𑁆𑀲𑀢𑀺;

𑀫𑀜𑁆𑀜𑁂 𑀦𑁄 𑀅𑀕𑁆𑀕𑀺𑀁 𑀳𑀸𑀧𑁂𑀢𑀺, 𑀇𑀲𑀺𑀲𑀺𑀗𑁆𑀕𑁄 𑀫𑀳𑀺𑀤𑁆𑀥𑀺𑀓𑁄’’𑀢𑀺.

𑀢𑀢𑁆𑀣 𑀓𑀤𑀮𑀻𑀲𑀗𑁆𑀔𑀸𑀢𑀸 𑀥𑀚𑀸 𑀧𑀜𑁆𑀜𑀸𑀡𑀁 𑀅𑀲𑁆𑀲𑀸𑀢𑀺 𑀓𑀤𑀮𑀻𑀥𑀚𑀧𑀜𑁆𑀜𑀸𑀡𑁄. 𑀆𑀪𑀼𑀚𑀻𑀧𑀭𑀺𑀯𑀸𑀭𑀺𑀢𑁄𑀢𑀺 𑀪𑀼𑀚𑀧𑀢𑁆𑀢𑀯𑀦𑀧𑀭𑀺𑀓𑁆𑀔𑀺𑀢𑁆𑀢𑁄. 𑀲𑀗𑁆𑀔𑀸𑀢𑁄𑀢𑀺 𑀏𑀲𑁄 𑀅𑀕𑁆𑀕𑀺 𑀅𑀲𑁆𑀲 𑀇𑀲𑀺𑀲𑀺𑀗𑁆𑀕𑀲𑁆𑀲 𑀛𑀸𑀦𑁂𑀦 𑀲𑀗𑁆𑀔𑀸𑀢𑁄 𑀧𑀘𑁆𑀘𑀓𑁆𑀔𑀕𑀢𑁄 𑀚𑀮𑀢𑀺. 𑀫𑀜𑁆𑀜𑁂 𑀦𑁄 𑀅𑀕𑁆𑀕𑀺𑀦𑁆𑀢𑀺 𑀅𑀕𑁆𑀕𑀺𑀁 𑀦𑁄 𑀳𑀸𑀧𑁂𑀢𑀺 𑀚𑀼𑀳𑀢𑀺 𑀧𑀭𑀺𑀘𑀭𑀢𑀻𑀢𑀺 𑀫𑀜𑁆𑀜𑀸𑀫𑀺.

𑀅𑀫𑀘𑁆𑀘𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀯𑁂𑀮𑀸𑀬 𑀅𑀲𑁆𑀲𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀇𑀲𑀺𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀘𑀻𑀭𑀓𑁂𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀦𑁆𑀢𑀼𑀩𑀤𑁆𑀥𑀁 𑀘𑀺𑀢𑁆𑀢𑀕𑁂𑀡𑁆𑀟𑀼𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀩𑀳𑀺 𑀭𑀓𑁆𑀔𑀦𑁆𑀢𑀸 𑀅𑀝𑁆𑀞𑀁𑀲𑀼. 𑀲𑀸 𑀢𑁂𑀦 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀦𑁆𑀢𑀻 𑀘𑀗𑁆𑀓𑀫𑀓𑁄𑀝𑀺𑀬𑀁 𑀑𑀢𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀇𑀲𑀺𑀲𑀺𑀗𑁆𑀕𑁄 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑁄 𑀉𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸𑀧𑀺𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀓𑀻𑀴𑀺𑀬𑁂𑀯. 𑀲𑀢𑁆𑀣𑀸 𑀢𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺 𑀘 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁭. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀁;

𑀇𑀲𑀺𑀲𑀺𑀗𑁆𑀕𑁄 𑀧𑀸𑀯𑀺𑀲𑀺 𑀪𑀻𑀢𑁄, 𑀅𑀲𑁆𑀲𑀫𑀁 𑀧𑀡𑁆𑀡𑀙𑀸𑀤𑀦𑀁.

𑁮. ‘‘𑀅𑀲𑁆𑀲𑀫𑀲𑁆𑀲 𑀘 𑀲𑀸 𑀤𑁆𑀯𑀸𑀭𑁂, 𑀕𑁂𑀡𑁆𑀟𑀼𑀓𑁂𑀦𑀲𑁆𑀲 𑀓𑀻𑀴𑀢𑀺;

𑀯𑀺𑀤𑀁𑀲𑀬𑀦𑁆𑀢𑀻 𑀅𑀗𑁆𑀕𑀸𑀦𑀺, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀢𑀸𑀦𑀺 𑀘.

𑁯. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀓𑀻𑀴𑀦𑁆𑀢𑀺𑀁, 𑀧𑀡𑁆𑀡𑀲𑀸𑀮𑀕𑀢𑁄 𑀚𑀝𑀻;

𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀻’’𑀢𑀺.

𑀢𑀢𑁆𑀣 𑀕𑁂𑀡𑁆𑀟𑀼𑀓𑁂𑀦𑀲𑁆𑀲𑀸𑀢𑀺 𑀅𑀲𑁆𑀲 𑀇𑀲𑀺𑀲𑀺𑀗𑁆𑀕𑀲𑁆𑀲 𑀅𑀲𑁆𑀲𑀫𑀤𑁆𑀯𑀸𑀭𑁂 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀢𑀺. 𑀯𑀺𑀤𑀁𑀲𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀻. 𑀕𑀼𑀬𑁆𑀳𑀁 𑀧𑀓𑀸𑀲𑀺𑀢𑀸𑀦𑀺 𑀘𑀸𑀢𑀺 𑀕𑀼𑀬𑁆𑀳𑀜𑁆𑀘 𑀭𑀳𑀲𑁆𑀲𑀗𑁆𑀕𑀁 𑀧𑀓𑀸𑀲𑀺𑀢𑀸𑀦𑀺 𑀘 𑀧𑀸𑀓𑀝𑀸𑀦𑀺 𑀫𑀼𑀔𑀳𑀢𑁆𑀣𑀸𑀤𑀻𑀦𑀺. 𑀅𑀩𑁆𑀭𑀯𑀻𑀢𑀺 𑀲𑁄 𑀓𑀺𑀭 𑀧𑀡𑁆𑀡𑀲𑀸𑀮𑀸𑀬 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀬𑀁 𑀬𑀓𑁆𑀔𑁄 𑀪𑀯𑁂𑀬𑁆𑀬, 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀫𑀁 𑀫𑀼𑀭𑀼𑀫𑀼𑀭𑀸𑀧𑁂𑀢𑁆𑀯𑀸 𑀔𑀸𑀤𑁂𑀬𑁆𑀬, 𑀦𑀸𑀬𑀁 𑀬𑀓𑁆𑀔𑁄, 𑀢𑀸𑀧𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁦. ‘‘𑀅𑀫𑁆𑀪𑁄 𑀓𑁄 𑀦𑀸𑀫 𑀲𑁄 𑀭𑀼𑀓𑁆𑀔𑁄, 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀁;

𑀤𑀽𑀭𑁂𑀧𑀺 𑀔𑀺𑀢𑁆𑀢𑀁 𑀧𑀘𑁆𑀘𑁂𑀢𑀺, 𑀦 𑀢𑀁 𑀑𑀳𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀦𑁆𑀢𑀺 𑀬𑀲𑁆𑀲 𑀢𑀯 𑀭𑀼𑀓𑁆𑀔𑀲𑁆𑀲 𑀏𑀯𑀁𑀕𑀢𑀺𑀓𑀁 𑀫𑀦𑁄𑀭𑀫𑀁 𑀨𑀮𑀁. 𑀓𑁄 𑀦𑀸𑀫 𑀲𑁄 𑀭𑀼𑀓𑁆𑀔𑁄𑀢𑀺 𑀘𑀺𑀢𑁆𑀭𑀕𑁂𑀡𑁆𑀟𑀼𑀓𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 ‘‘𑀭𑀼𑀓𑁆𑀔𑀨𑀮𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀁 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲 𑀲𑀸 𑀭𑀼𑀓𑁆𑀔𑀁 𑀆𑀘𑀺𑀓𑁆𑀔𑀦𑁆𑀢𑀻 𑀕𑀸𑀣𑀫𑀸𑀳 𑁋

𑁧𑁧. ‘‘𑀅𑀲𑁆𑀲𑀫𑀲𑁆𑀲 𑀫𑀫 𑀩𑁆𑀭𑀳𑁆𑀫𑁂, 𑀲𑀫𑀻𑀧𑁂 𑀕𑀦𑁆𑀥𑀫𑀸𑀤𑀦𑁂;

𑀩𑀳𑀯𑁄 𑀢𑀸𑀤𑀺𑀲𑀸 𑀭𑀼𑀓𑁆𑀔𑀸, 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀁;

𑀤𑀽𑀭𑁂𑀧𑀺 𑀔𑀺𑀢𑁆𑀢𑀁 𑀧𑀘𑁆𑀘𑁂𑀢𑀺, 𑀦 𑀫𑀁 𑀑𑀳𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀲𑀫𑀻𑀧𑁂 𑀕𑀦𑁆𑀥𑀫𑀸𑀤𑀦𑁂𑀢𑀺 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀫𑀫 𑀅𑀲𑁆𑀲𑀫𑀲𑁆𑀲 𑀲𑀫𑀻𑀧𑁂. 𑀬𑀲𑁆𑀲 𑀢𑁂𑀯𑀁𑀕𑀢𑀦𑁆𑀢𑀺 𑀬𑀲𑁆𑀲 𑀏𑀯𑀁𑀕𑀢𑀁, 𑀢-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀓𑀭𑁄𑀢𑀺.

𑀇𑀢𑀺 𑀲𑀸 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺. 𑀇𑀢𑀭𑁄𑀧𑀺 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀢𑀸𑀧𑀲𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁨. ‘‘𑀏𑀢𑀽 𑀪𑀯𑀁 𑀅𑀲𑁆𑀲𑀫𑀺𑀫𑀁 𑀅𑀤𑁂𑀢𑀼, 𑀧𑀚𑁆𑀚𑀜𑁆𑀘 𑀪𑀓𑁆𑀔𑀜𑁆𑀘 𑀧𑀝𑀺𑀘𑁆𑀙 𑀤𑀫𑁆𑀫𑀺;

𑀇𑀤𑀫𑀸𑀲𑀦𑀁 𑀅𑀢𑁆𑀭 𑀪𑀯𑀁 𑀦𑀺𑀲𑀻𑀤𑀢𑀼, 𑀇𑀢𑁄 𑀪𑀯𑀁 𑀫𑀽𑀮𑀨𑀮𑀸𑀦𑀺 𑀪𑀼𑀜𑁆𑀚𑀢𑀽’’𑀢𑀺.

𑀢𑀢𑁆𑀣 𑀅𑀲𑁆𑀲𑀫𑀺𑀫𑀦𑁆𑀢𑀺 𑀅𑀲𑁆𑀲𑀫𑀁 𑀇𑀫𑀁 𑀪𑀯𑀁 𑀧𑀯𑀺𑀲𑀢𑀼. 𑀅𑀤𑁂𑀢𑀽𑀢𑀺 𑀬𑀣𑀸𑀲𑀦𑁆𑀦𑀺𑀳𑀺𑀢𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀼. 𑀧𑀚𑁆𑀚𑀦𑁆𑀢𑀺 𑀧𑀸𑀤𑀩𑁆𑀪𑀜𑁆𑀚𑀦𑀁. 𑀪𑀓𑁆𑀔𑀦𑁆𑀢𑀺 𑀫𑀥𑀼𑀭𑀨𑀮𑀸𑀨𑀮𑀁. 𑀧𑀝𑀺𑀘𑁆𑀙𑀸𑀢𑀺 𑀧𑀝𑀺𑀕𑁆𑀕𑀡𑁆𑀳. 𑀇𑀤𑀫𑀸𑀲𑀦𑀦𑁆𑀢𑀺 𑀧𑀯𑀺𑀝𑁆𑀞𑀓𑀸𑀮𑁂 𑀏𑀯𑀫𑀸𑀳.

𑀢𑀲𑁆𑀲𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑁂 𑀦𑀺𑀲𑀻𑀤𑀦𑁆𑀢𑀺𑀬𑀸 𑀲𑀼𑀯𑀡𑁆𑀡𑀘𑀻𑀭𑀓𑁂 𑀤𑁆𑀯𑀺𑀥𑀸 𑀕𑀢𑁂 𑀲𑀭𑀻𑀭𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀅𑀳𑁄𑀲𑀺. 𑀢𑀸𑀧𑀲𑁄 𑀫𑀸𑀢𑀼𑀕𑀸𑀫𑀲𑀭𑀻𑀭𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀯𑀡𑁆𑀡𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀏𑀯𑀫𑀸𑀳 𑁋

𑁧𑁩. ‘‘𑀓𑀺𑀁 𑀢𑁂 𑀇𑀤𑀁 𑀊𑀭𑀽𑀦𑀫𑀦𑁆𑀢𑀭𑀲𑁆𑀫𑀺𑀁, 𑀲𑀼𑀧𑀺𑀘𑁆𑀙𑀺𑀢𑀁 𑀓𑀡𑁆𑀳𑀭𑀺𑀯𑀧𑁆𑀧𑀓𑀸𑀲𑀢𑀺;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀓𑁄𑀲𑁂 𑀦𑀼 𑀢𑁂 𑀉𑀢𑁆𑀢𑀫𑀗𑁆𑀕𑀁 𑀧𑀯𑀺𑀝𑁆𑀞’’𑀦𑁆𑀢𑀺.

𑀢𑀢𑁆𑀣 𑀲𑀼𑀧𑀺𑀘𑁆𑀙𑀺𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀊𑀭𑀽𑀦𑀁 𑀲𑀫𑀸𑀕𑀫𑀓𑀸𑀮𑁂 𑀲𑀼𑀨𑀼𑀲𑀺𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀡𑁆𑀞𑀸𑀦𑀁. 𑀲𑀼𑀪𑀮𑀓𑁆𑀔𑀡𑁂𑀦 𑀳𑀺 𑀅𑀲𑀫𑀦𑁆𑀦𑀸𑀕𑀢𑀸𑀬 𑀢𑀁 𑀞𑀸𑀦𑀁 𑀆𑀯𑀸𑀝𑀥𑀸𑀢𑀼𑀓𑀁 𑀳𑁄𑀢𑀺, 𑀲𑀫𑀦𑁆𑀦𑀸𑀕𑀢𑀸𑀬 𑀅𑀩𑁆𑀪𑀼𑀦𑁆𑀦𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀡𑁆𑀞𑀸𑀦𑀁. 𑀓𑀡𑁆𑀳𑀭𑀺𑀯𑀧𑁆𑀧𑀓𑀸𑀲𑀢𑀻𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀸𑀴𑀓𑀁 𑀯𑀺𑀬 𑀔𑀸𑀬𑀢𑀺. 𑀓𑁄𑀲𑁂 𑀦𑀼 𑀢𑁂 𑀉𑀢𑁆𑀢𑀫𑀗𑁆𑀕𑀁 𑀧𑀯𑀺𑀝𑁆𑀞𑀦𑁆𑀢𑀺 𑀢𑀯 𑀉𑀢𑁆𑀢𑀫𑀗𑁆𑀕𑀁 𑀮𑀺𑀗𑁆𑀕𑀲𑀡𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀢𑀁 𑀢𑀯 𑀲𑀭𑀻𑀭𑀲𑀗𑁆𑀔𑀸𑀢𑁂 𑀓𑁄𑀲𑁂 𑀧𑀯𑀺𑀝𑁆𑀞𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀅𑀣 𑀦𑀁 𑀲𑀸 𑀯𑀜𑁆𑀘𑀬𑀦𑁆𑀢𑀻 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁪. ‘‘𑀅𑀳𑀁 𑀯𑀦𑁂 𑀫𑀽𑀮𑀨𑀮𑁂𑀲𑀦𑀁 𑀘𑀭𑀁, 𑀆𑀲𑀸𑀤𑀬𑀺𑀁 𑀅𑀘𑁆𑀙𑀁 𑀲𑀼𑀖𑁄𑀭𑀭𑀽𑀧𑀁;

𑀲𑁄 𑀫𑀁 𑀧𑀢𑀺𑀢𑁆𑀯𑀸 𑀲𑀳𑀲𑀸𑀚𑁆𑀛𑀧𑀢𑁆𑀢𑁄, 𑀧𑀦𑀼𑀚𑁆𑀚 𑀫𑀁 𑀅𑀩𑁆𑀩𑀳𑀺 𑀉𑀢𑁆𑀢𑀫𑀗𑁆𑀕𑀁.

𑁧𑁫. ‘‘𑀲𑁆𑀯𑀸𑀬𑀁 𑀯𑀡𑁄 𑀔𑀚𑁆𑀚𑀢𑀺 𑀓𑀡𑁆𑀟𑀼𑀯𑀸𑀬𑀢𑀺, 𑀲𑀩𑁆𑀩𑀜𑁆𑀘 𑀓𑀸𑀮𑀁 𑀦 𑀮𑀪𑀸𑀫𑀺 𑀲𑀸𑀢𑀁;

𑀧𑀳𑁄 𑀪𑀯𑀁 𑀓𑀡𑁆𑀟𑀼𑀫𑀺𑀫𑀁 𑀯𑀺𑀦𑁂𑀢𑀼𑀁, 𑀓𑀼𑀭𑀼𑀢𑀁 𑀪𑀯𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀆𑀲𑀸𑀤𑀬𑀺𑀦𑁆𑀢𑀺 𑀖𑀝𑁆𑀝𑁂𑀲𑀺𑀁, 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀮𑁂𑀟𑁆𑀟𑀼𑀦𑀸 𑀧𑀳𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀺𑀢𑁆𑀯𑀸𑀢𑀺 𑀉𑀧𑀥𑀸𑀯𑀺𑀢𑁆𑀯𑀸. 𑀲𑀳𑀲𑀸𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀫𑀫𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑁄. 𑀧𑀦𑀼𑀚𑁆𑀚𑀸𑀢𑀺 𑀅𑀣 𑀫𑀁 𑀧𑁄𑀢𑁂𑀢𑁆𑀯𑀸. 𑀅𑀩𑁆𑀩𑀳𑀻𑀢𑀺 𑀫𑀼𑀔𑁂𑀦 𑀫𑀫 𑀉𑀢𑁆𑀢𑀫𑀗𑁆𑀕𑀁 𑀮𑀼𑀜𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀡𑁄 𑀚𑀸𑀢𑁄. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀢𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀯𑀡𑁄 𑀔𑀚𑁆𑀚𑀢𑀺 𑀘𑁂𑀯 𑀓𑀡𑁆𑀟𑀼𑀯𑀜𑁆𑀘 𑀓𑀭𑁄𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀲𑀸𑀳𑀁 𑀲𑀩𑁆𑀩𑀓𑀸𑀮𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀦 𑀮𑀪𑀸𑀫𑀺. 𑀧𑀳𑁄𑀢𑀺 𑀧𑀳𑀼 𑀲𑀫𑀢𑁆𑀣𑁄. 𑀩𑁆𑀭𑀸𑀳𑁆𑀫𑀡𑀢𑁆𑀣𑀦𑁆𑀢𑀺 𑀪𑀯𑀁 𑀫𑀬𑀸 𑀬𑀸𑀘𑀺𑀢𑁄 𑀇𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀣𑀁 𑀓𑀭𑁄𑀢𑀼, 𑀇𑀤𑀁 𑀫𑁂 𑀤𑀼𑀓𑁆𑀔𑀁 𑀳𑀭𑀸𑀳𑀻𑀢𑀺 𑀯𑀤𑀢𑀺.

𑀲𑁄 𑀢𑀲𑁆𑀲𑀸 𑀫𑀼𑀲𑀸𑀯𑀸𑀤𑀁 ‘‘𑀲𑀪𑀸𑀯𑁄’’𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀲𑀘𑁂 𑀢𑁂 𑀏𑀯𑀁 𑀲𑀼𑀔𑀁 𑀳𑁄𑀢𑀺, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀤𑁂𑀲𑀁 𑀑𑀮𑁄𑀓𑁂𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁬. ‘‘𑀕𑀫𑁆𑀪𑀻𑀭𑀭𑀽𑀧𑁄 𑀢𑁂 𑀯𑀡𑁄 𑀲𑀮𑁄𑀳𑀺𑀢𑁄, 𑀅𑀧𑀽𑀢𑀺𑀓𑁄 𑀯𑀡𑀕𑀦𑁆𑀥𑁄 𑀫𑀳𑀸 𑀘;

𑀓𑀭𑁄𑀫𑀺 𑀢𑁂 𑀓𑀺𑀜𑁆𑀘𑀺 𑀓𑀲𑀸𑀬𑀬𑁄𑀕𑀁, 𑀬𑀣𑀸 𑀪𑀯𑀁 𑀧𑀭𑀫𑀲𑀼𑀔𑀻 𑀪𑀯𑁂𑀬𑁆𑀬𑀸’’𑀢𑀺.

𑀢𑀢𑁆𑀣 𑀲𑀮𑁄𑀳𑀺𑀢𑁄𑀢𑀺 𑀭𑀢𑁆𑀢𑁄𑀪𑀸𑀲𑁄. 𑀅𑀧𑀽𑀢𑀺𑀓𑁄𑀢𑀺 𑀧𑀽𑀢𑀺𑀫𑀁𑀲𑀭𑀳𑀺𑀢𑁄. 𑀯𑀡𑀕𑀦𑁆𑀥𑁄𑀢𑀺 𑀣𑁄𑀓𑀁 𑀤𑀼𑀕𑁆𑀕𑀦𑁆𑀥𑁄. 𑀓𑀲𑀸𑀬𑀬𑁄𑀕𑀦𑁆𑀢𑀺 𑀅𑀳𑀁 𑀓𑁂𑀘𑀺 𑀭𑀼𑀓𑁆𑀔𑀓𑀲𑀸𑀬𑁂 𑀕𑀳𑁂𑀢𑁆𑀯𑀸 𑀢𑀯 𑀏𑀓𑀁 𑀓𑀲𑀸𑀬𑀬𑁄𑀕𑀁 𑀓𑀭𑁄𑀫𑀻𑀢𑀺.

𑀢𑀢𑁄 𑀦𑀺𑀴𑀺𑀦𑀺𑀓𑀸 𑀕𑀸𑀣𑀫𑀸𑀳

𑁧𑁭. ‘‘𑀦 𑀫𑀦𑁆𑀢𑀬𑁄𑀕𑀸 𑀦 𑀓𑀲𑀸𑀬𑀬𑁄𑀕𑀸, 𑀦 𑀑𑀲𑀥𑀸 𑀩𑁆𑀭𑀳𑁆𑀫𑀘𑀸𑀭𑀺 𑀓𑀫𑀦𑁆𑀢𑀺;

𑀬𑀁 𑀢𑁂 𑀫𑀼𑀤𑀼 𑀢𑁂𑀦 𑀯𑀺𑀦𑁂𑀳𑀺 𑀓𑀡𑁆𑀟𑀼𑀁, 𑀬𑀣𑀸 𑀅𑀳𑀁 𑀧𑀭𑀫𑀲𑀼𑀔𑀻 𑀪𑀯𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀓𑀫𑀦𑁆𑀢𑀻𑀢𑀺, 𑀪𑁄 𑀩𑁆𑀭𑀳𑁆𑀫𑀘𑀸𑀭𑀺, 𑀇𑀫𑀲𑁆𑀫𑀺𑀁 𑀫𑀫 𑀯𑀡𑁂 𑀦𑁂𑀯 𑀫𑀦𑁆𑀢𑀬𑁄𑀕𑀸, 𑀦 𑀓𑀲𑀸𑀬𑀬𑁄𑀕𑀸, 𑀦 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀑𑀲𑀥𑀸𑀦𑀺 𑀓𑀫𑀦𑁆𑀢𑀺, 𑀅𑀦𑁂𑀓𑀯𑀸𑀭𑀁 𑀓𑀢𑁂𑀳𑀺𑀧𑀺 𑀢𑁂𑀳𑀺 𑀏𑀢𑀲𑁆𑀲 𑀨𑀸𑀲𑀼𑀓𑀪𑀸𑀯𑁄 𑀦 𑀪𑀽𑀢𑀧𑀼𑀩𑁆𑀩𑁄. 𑀬𑀁 𑀧𑀦 𑀢𑁂 𑀏𑀢𑀁 𑀫𑀼𑀤𑀼 𑀅𑀗𑁆𑀕𑀚𑀸𑀢𑀁, 𑀢𑁂𑀦 𑀖𑀝𑁆𑀝𑀺𑀬𑀫𑀸𑀦𑀲𑁆𑀲𑁂𑀯 𑀢𑀲𑁆𑀲 𑀓𑀡𑁆𑀟𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀦 𑀯𑀺𑀦𑁂𑀳𑀺 𑀓𑀡𑁆𑀟𑀼𑀦𑁆𑀢𑀺.

𑀲𑁄 ‘‘𑀲𑀘𑁆𑀘𑀁 𑀏𑀲𑁄 𑀪𑀡𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑁂𑀣𑀼𑀦𑀲𑀁𑀲𑀕𑁆𑀕𑁂𑀦 𑀲𑀻𑀮𑀁 𑀪𑀺𑀚𑁆𑀚𑀢𑀺, 𑀛𑀸𑀦𑀁 𑀅𑀦𑁆𑀢𑀭𑀥𑀸𑀬𑀢𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀘 𑀅𑀚𑀸𑀦𑀦𑀪𑀸𑀯𑁂𑀦 ‘‘𑀪𑁂𑀲𑀚𑁆𑀚’’𑀦𑁆𑀢𑀺 𑀯𑀤𑀦𑁆𑀢𑀺𑀬𑀸 𑀢𑀸𑀬 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺. 𑀢𑀸𑀯𑀤𑁂𑀯𑀲𑁆𑀲 𑀲𑀻𑀮𑀁 𑀪𑀺𑀚𑁆𑀚𑀺, 𑀛𑀸𑀦𑀁 𑀧𑀭𑀺𑀳𑀸𑀬𑀺. 𑀲𑁄 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀲𑀁𑀲𑀕𑁆𑀕𑀁 𑀓𑀢𑁆𑀯𑀸 𑀓𑀺𑀮𑀦𑁆𑀢𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀁 𑀑𑀭𑀼𑀬𑁆𑀳 𑀦𑁆𑀳𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀦𑀧𑀺 𑀢𑀁 ‘‘𑀢𑀸𑀧𑀲𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁮. ‘‘𑀇𑀢𑁄 𑀦𑀼 𑀪𑁄𑀢𑁄 𑀓𑀢𑀫𑁂𑀦 𑀅𑀲𑁆𑀲𑀫𑁄, 𑀓𑀘𑁆𑀘𑀺 𑀪𑀯𑀁 𑀅𑀪𑀺𑀭𑀫𑀲𑀺 𑀅𑀭𑀜𑁆𑀜𑁂;

𑀓𑀘𑁆𑀘𑀺 𑀦𑀼 𑀢𑁂 𑀫𑀽𑀮𑀨𑀮𑀁 𑀧𑀳𑀽𑀢𑀁, 𑀓𑀘𑁆𑀘𑀺 𑀪𑀯𑀦𑁆𑀢𑀁 𑀦 𑀯𑀺𑀳𑀺𑀁𑀲𑀦𑁆𑀢𑀺 𑀯𑀸𑀴𑀸’’𑀢𑀺.

𑀢𑀢𑁆𑀣 𑀓𑀢𑀫𑁂𑀦𑀸𑀢𑀺 𑀇𑀢𑁄 𑀓𑀢𑀫𑁂𑀦 𑀤𑀺𑀲𑀸𑀪𑀸𑀕𑁂𑀦 𑀪𑁄𑀢𑁄 𑀅𑀲𑁆𑀲𑀫𑁄. 𑀪𑀯𑀦𑁆𑀢𑀺 𑀆𑀮𑀧𑀦𑀫𑁂𑀢𑀁.

𑀢𑀢𑁄 𑀦𑀺𑀴𑀺𑀦𑀺𑀓𑀸 𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

𑁧𑁯. ‘‘𑀇𑀢𑁄 𑀉𑀚𑀼𑀁 𑀉𑀢𑁆𑀢𑀭𑀸𑀬𑀁 𑀤𑀺𑀲𑀸𑀬𑀁, 𑀔𑁂𑀫𑀸 𑀦𑀤𑀻 𑀳𑀺𑀫𑀯𑀢𑀸 𑀧𑀪𑀸𑀯𑀻;

𑀢𑀲𑁆𑀲𑀸 𑀢𑀻𑀭𑁂 𑀅𑀲𑁆𑀲𑀫𑁄 𑀫𑀬𑁆𑀳 𑀭𑀫𑁆𑀫𑁄, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.

𑁨𑁦. ‘‘𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸;

𑀲𑀫𑀦𑁆𑀢𑀢𑁄 𑀓𑀺𑀫𑁆𑀧𑀼𑀭𑀺𑀲𑀸𑀪𑀺𑀕𑀻𑀢𑀁, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.

𑁨𑁧. ‘‘𑀢𑀸𑀮𑀸 𑀘 𑀫𑀽𑀮𑀸 𑀘 𑀨𑀮𑀸 𑀘 𑀫𑁂𑀢𑁆𑀣, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀉𑀧𑁂𑀢𑀭𑀽𑀧𑀁;

𑀢𑀁 𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.

𑁨𑁨. ‘‘𑀨𑀮𑀸 𑀘 𑀫𑀽𑀮𑀸 𑀘 𑀧𑀳𑀽𑀢𑀫𑁂𑀢𑁆𑀣, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀭𑀲𑁂𑀦𑀼𑀧𑁂𑀢𑀸;

𑀆𑀬𑀦𑁆𑀢𑀺 𑀘 𑀮𑀼𑀤𑁆𑀤𑀓𑀸 𑀢𑀁 𑀧𑀤𑁂𑀲𑀁, 𑀫𑀸 𑀫𑁂 𑀢𑀢𑁄 𑀫𑀽𑀮𑀨𑀮𑀁 𑀅𑀳𑀸𑀲𑀼’’𑀦𑁆𑀢𑀺.

𑀢𑀢𑁆𑀣 𑀉𑀢𑁆𑀢𑀭𑀸𑀬𑀦𑁆𑀢𑀺 𑀉𑀢𑁆𑀢𑀭𑀸𑀬. 𑀔𑁂𑀫𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀦𑀤𑀻. 𑀳𑀺𑀫𑀯𑀢𑀸 𑀧𑀪𑀸𑀯𑀻𑀢𑀺 𑀳𑀺𑀫𑀯𑀦𑁆𑀢𑀢𑁄 𑀧𑀯𑀢𑁆𑀢𑀢𑀺. 𑀅𑀳𑁄𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀤𑁆𑀤𑀸𑀮𑀓𑀸𑀢𑀺 𑀯𑀸𑀢𑀖𑀸𑀢𑀓𑀸. 𑀓𑀺𑀫𑁆𑀧𑀼𑀭𑀺𑀲𑀸𑀪𑀺𑀕𑀻𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀥𑀼𑀭𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑁂𑀳𑀺 𑀓𑀺𑀫𑁆𑀧𑀼𑀭𑀺𑀲𑁂𑀳𑀺 𑀅𑀪𑀺𑀕𑀻𑀢𑀁. 𑀢𑀸𑀮𑀸 𑀘 𑀫𑀽𑀮𑀸 𑀘 𑀨𑀮𑀸 𑀘 𑀫𑁂𑀢𑁆𑀣𑀸𑀢𑀺 𑀏𑀢𑁆𑀣 𑀫𑀫 𑀅𑀲𑁆𑀲𑀫𑁂 𑀧𑀸𑀲𑀸𑀤𑀺𑀓𑀸 𑀢𑀸𑀮𑀭𑀼𑀓𑁆𑀔𑀸 𑀘 𑀢𑁂𑀲𑀜𑁆𑀜𑁂𑀯 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀸 𑀓𑀦𑁆𑀤𑀲𑀗𑁆𑀔𑀸𑀢𑀸 𑀫𑀽𑀮𑀸 𑀘 𑀨𑀮𑀸 𑀘. 𑀧𑀳𑀽𑀢𑀫𑁂𑀢𑁆𑀣𑀸𑀢𑀺 𑀦𑀸𑀦𑀸𑀭𑀼𑀓𑁆𑀔𑀨𑀮𑀸 𑀘 𑀭𑀼𑀓𑁆𑀔𑀯𑀮𑁆𑀮𑀺𑀫𑀽𑀮𑀸 𑀘 𑀧𑀳𑀽𑀢𑀸 𑀏𑀢𑁆𑀣. 𑀫𑀸 𑀫𑁂 𑀢𑀢𑁄𑀢𑀺 𑀢𑀁 𑀫𑀫 𑀅𑀲𑁆𑀲𑀫𑀧𑀤𑀁 𑀲𑀫𑁆𑀩𑀳𑀼𑀮𑀸 𑀮𑀼𑀤𑁆𑀤𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀫𑀬𑀸 𑀘𑁂𑀢𑁆𑀣 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀁 𑀩𑀳𑀼 𑀫𑀥𑀼𑀭𑀲𑀫𑀽𑀮𑀨𑀮𑀸𑀨𑀮𑀁 𑀅𑀢𑁆𑀣𑀺, 𑀢𑁂 𑀫𑀬𑀺 𑀘𑀺𑀭𑀸𑀬𑀦𑁆𑀢𑁂 𑀫𑀽𑀮𑀨𑀮𑀸𑀨𑀮𑀁 𑀳𑀭𑁂𑀬𑁆𑀬𑀼𑀁. 𑀢𑁂 𑀢𑀢𑁄 𑀫𑀫 𑀫𑀽𑀮𑀨𑀮𑀸𑀨𑀮𑀁 𑀫𑀸 𑀳𑀭𑀺𑀁𑀲𑀼, 𑀢𑀲𑁆𑀫𑀸 𑀲𑀘𑁂𑀧𑀺 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑀼𑀓𑀸𑀫𑁄, 𑀏𑀳𑀺, 𑀦𑁄 𑀘𑁂, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀳.

𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀬𑀸𑀯 𑀧𑀺𑀢𑀼 𑀆𑀕𑀫𑀦𑀸 𑀅𑀥𑀺𑀯𑀸𑀲𑀸𑀧𑁂𑀢𑀼𑀁 𑀕𑀸𑀣𑀫𑀸𑀳 𑁋

𑁨𑁩. ‘‘𑀧𑀺𑀢𑀸 𑀫𑀫𑀁 𑀫𑀽𑀮𑀨𑀮𑁂𑀲𑀦𑀁 𑀕𑀢𑁄, 𑀇𑀤𑀸𑀦𑀺 𑀆𑀕𑀘𑁆𑀙𑀢𑀺 𑀲𑀸𑀬𑀓𑀸𑀮𑁂;

𑀉𑀪𑁄𑀯 𑀕𑀘𑁆𑀙𑀸𑀫𑀲𑁂 𑀅𑀲𑁆𑀲𑀫𑀁 𑀢𑀁, 𑀬𑀸𑀯 𑀧𑀺𑀢𑀸 𑀫𑀽𑀮𑀨𑀮𑀢𑁄 𑀏𑀢𑀽’’𑀢𑀺.

𑀢𑀢𑁆𑀣 𑀉𑀪𑁄𑀯 𑀕𑀘𑁆𑀙𑀸𑀫𑀲𑁂𑀢𑀺 𑀫𑀫 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 𑀉𑀪𑁄𑀯 𑀕𑀫𑀺𑀲𑁆𑀲𑀸𑀫.

𑀢𑀢𑁄 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀸𑀯 𑀅𑀭𑀜𑁆𑀜𑁂𑀯 𑀯𑀟𑁆𑀠𑀺𑀢𑀪𑀸𑀯𑁂𑀦 𑀫𑀫 𑀇𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀧𑀺𑀢𑀸 𑀧𑀦𑀲𑁆𑀲 𑀫𑀁 𑀤𑀺𑀲𑁆𑀯𑀸𑀯 𑀚𑀸𑀦𑀺𑀢𑁆𑀯𑀸 ‘𑀢𑁆𑀯𑀁 𑀇𑀥 𑀓𑀺𑀁 𑀓𑀭𑁄𑀲𑀻’𑀢𑀺 𑀓𑀸𑀚𑀓𑁄𑀝𑀺𑀬𑀸 𑀧𑀳𑀭𑀺𑀢𑁆𑀯𑀸 𑀲𑀻𑀲𑀫𑁆𑀧𑀺 𑀫𑁂 𑀪𑀺𑀦𑁆𑀤𑁂𑀬𑁆𑀬, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀫𑀦𑀓𑀫𑁆𑀫𑀫𑁆𑀧𑀺 𑀫𑁂 𑀦𑀺𑀝𑁆𑀞𑀺𑀢’’𑀦𑁆𑀢𑀺. 𑀲𑀸 𑀢𑀲𑁆𑀲 𑀆𑀕𑀫𑀦𑀽𑀧𑀸𑀬𑀁 𑀆𑀘𑀺𑀓𑁆𑀔𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁪. ‘‘𑀅𑀜𑁆𑀜𑁂 𑀩𑀳𑀽 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸, 𑀭𑀸𑀚𑀻𑀲𑀬𑁄 𑀅𑀦𑀼𑀫𑀕𑁆𑀕𑁂 𑀯𑀲𑀦𑁆𑀢𑀺;

𑀢𑁂𑀬𑁂𑀯 𑀧𑀼𑀘𑁆𑀙𑁂𑀲𑀺 𑀫𑀫𑀲𑁆𑀲𑀫𑀁 𑀢𑀁, 𑀢𑁂 𑀢𑀁 𑀦𑀬𑀺𑀲𑁆𑀲𑀦𑁆𑀢𑀺 𑀫𑀫𑀁 𑀲𑀓𑀸𑀲𑁂’’𑀢𑀺.

𑀢𑀢𑁆𑀣 𑀭𑀸𑀚𑀻𑀲𑀬𑁄𑀢𑀺, 𑀲𑀫𑁆𑀫, 𑀫𑀬𑀸 𑀦 𑀲𑀓𑁆𑀓𑀸 𑀘𑀺𑀭𑀸𑀬𑀺𑀢𑀼𑀁, 𑀅𑀜𑁆𑀜𑁂 𑀧𑀦 𑀲𑀸𑀥𑀼𑀲𑀪𑀸𑀯𑀸 𑀭𑀸𑀚𑀺𑀲𑀬𑁄 𑀘 𑀩𑁆𑀭𑀸𑀳𑁆𑀫𑀡𑀺𑀲𑀬𑁄 𑀘 𑀅𑀦𑀼𑀫𑀕𑁆𑀕𑁂 𑀫𑀫 𑀅𑀲𑁆𑀲𑀫𑀫𑀕𑁆𑀕𑀧𑀲𑁆𑀲𑁂 𑀯𑀲𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀢𑁂 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀢𑁂 𑀢𑀁 𑀫𑀫 𑀲𑀦𑁆𑀢𑀺𑀓𑀁 𑀦𑀬𑀺𑀲𑁆𑀲𑀦𑁆𑀢𑀻𑀢𑀺.

𑀏𑀯𑀁 𑀲𑀸 𑀅𑀢𑁆𑀢𑀦𑁄 𑀧𑀮𑀸𑀬𑀦𑀽𑀧𑀸𑀬𑀁 𑀓𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀑𑀮𑁄𑀓𑁂𑀦𑁆𑀢𑀫𑁂𑀯 ‘‘𑀢𑁆𑀯𑀁 𑀦𑀺𑀯𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑁂𑀦𑁂𑀯 𑀅𑀫𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀢𑀼𑀲𑁆𑀲𑀺𑀢𑁆𑀯𑀸 𑀲𑀓𑀮𑀭𑀝𑁆𑀞𑁂 𑀤𑁂𑀯𑀁 𑀯𑀲𑁆𑀲𑀸𑀧𑁂𑀲𑀺, 𑀢𑀢𑁄 𑀲𑀼𑀪𑀺𑀓𑁆𑀔𑀁 𑀚𑀦𑀧𑀤𑀁 𑀅𑀳𑁄𑀲𑀺. 𑀇𑀲𑀺𑀲𑀺𑀗𑁆𑀕𑀢𑀸𑀧𑀲𑀲𑁆𑀲𑀧𑀺 𑀢𑀸𑀬 𑀧𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀏𑀯 𑀓𑀸𑀬𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀓𑀫𑁆𑀧𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀓𑀘𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑁄𑀘𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀦𑀼 𑀔𑁄 𑀕𑀢𑁄’’𑀢𑀺 𑀓𑀸𑀚𑀁 𑀑𑀢𑀸𑀭𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁫. ‘‘𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀦 𑀢𑁂 𑀉𑀤𑀓𑀫𑀸𑀪𑀢𑀁;

𑀅𑀕𑁆𑀕𑀻𑀧𑀺 𑀢𑁂 𑀦 𑀳𑀸𑀧𑀺𑀢𑁄, 𑀓𑀺𑀁 𑀦𑀼 𑀫𑀦𑁆𑀤𑁄𑀯 𑀛𑀸𑀬𑀲𑀺.

𑁨𑁬. ‘‘𑀪𑀺𑀦𑁆𑀦𑀸𑀦𑀺 𑀓𑀝𑁆𑀞𑀸𑀦𑀺 𑀳𑀼𑀢𑁄 𑀘 𑀅𑀕𑁆𑀕𑀺, 𑀢𑀧𑀦𑀻𑀧𑀺 𑀢𑁂 𑀲𑀫𑀺𑀢𑀸 𑀩𑁆𑀭𑀳𑁆𑀫𑀘𑀸𑀭𑀻;

𑀧𑀻𑀞𑀜𑁆𑀘 𑀫𑀬𑁆𑀳𑀁 𑀉𑀤𑀓𑀜𑁆𑀘 𑀳𑁄𑀢𑀺, 𑀭𑀫𑀲𑀺 𑀢𑀼𑀯𑀁 𑀩𑁆𑀭𑀳𑁆𑀫𑀪𑀽𑀢𑁄 𑀧𑀼𑀭𑀢𑁆𑀣𑀸.

𑁨𑁭. ‘‘𑀅𑀪𑀺𑀦𑁆𑀦𑀓𑀝𑁆𑀞𑁄𑀲𑀺 𑀅𑀦𑀸𑀪𑀢𑁄𑀤𑀓𑁄, 𑀅𑀳𑀸𑀧𑀺𑀢𑀕𑁆𑀕𑀻𑀲𑀺 𑀅𑀲𑀺𑀤𑁆𑀥𑀪𑁄𑀚𑀦𑁄;

𑀦 𑀫𑁂 𑀢𑀼𑀯𑀁 𑀆𑀮𑀧𑀲𑀻 𑀫𑀫𑀚𑁆𑀚, 𑀦𑀝𑁆𑀞𑀁 𑀦𑀼 𑀓𑀺𑀁 𑀘𑁂𑀢𑀲𑀺𑀓𑀜𑁆𑀘 𑀤𑀼𑀓𑁆𑀔’’𑀦𑁆𑀢𑀺.

𑀢𑀢𑁆𑀣 𑀪𑀺𑀦𑁆𑀦𑀸𑀦𑀻𑀢𑀺 𑀅𑀭𑀜𑁆𑀜𑀢𑁄 𑀉𑀤𑁆𑀥𑀝𑀸𑀦𑀺. 𑀦 𑀳𑀸𑀧𑀺𑀢𑁄𑀢𑀺 𑀦 𑀚𑀮𑀺𑀢𑁄. 𑀪𑀺𑀦𑁆𑀦𑀸𑀦𑀻𑀢𑀺 𑀧𑀼𑀩𑁆𑀩𑁂 𑀢𑀬𑀸 𑀫𑀫𑀸𑀕𑀫𑀦𑀯𑁂𑀮𑀸𑀬 𑀓𑀝𑁆𑀞𑀸𑀦𑀺 𑀉𑀤𑁆𑀥𑀝𑀸𑀦𑁂𑀯 𑀳𑁄𑀦𑁆𑀢𑀺. 𑀳𑀼𑀢𑁄 𑀘 𑀅𑀕𑁆𑀕𑀻𑀢𑀺 𑀅𑀕𑁆𑀕𑀺 𑀘 𑀳𑀼𑀢𑁄 𑀳𑁄𑀢𑀺. 𑀢𑀧𑀦𑀻𑀢𑀺 𑀯𑀺𑀲𑀺𑀩𑁆𑀩𑀦𑀅𑀕𑁆𑀕𑀺𑀲𑀗𑁆𑀔𑀸𑀢𑀸 𑀢𑀧𑀦𑀻𑀧𑀺 𑀢𑁂 𑀲𑀫𑀺𑀢𑀸𑀯 𑀲𑀬𑀫𑁂𑀯 𑀲𑀁𑀯𑀺𑀤𑀳𑀺𑀢𑀸𑀯 𑀳𑁄𑀢𑀺. 𑀧𑀻𑀞𑀦𑁆𑀢𑀺 𑀫𑀫 𑀆𑀲𑀦𑀢𑁆𑀣𑀸𑀬 𑀧𑀻𑀞𑀜𑁆𑀘 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀉𑀤𑀓𑀜𑁆𑀘𑀸𑀢𑀺 𑀧𑀸𑀤𑀥𑁄𑀯𑀦𑀉𑀤𑀓𑀫𑁆𑀧𑀺 𑀉𑀧𑀝𑁆𑀞𑀸𑀧𑀺𑀢𑀫𑁂𑀯 𑀳𑁄𑀢𑀺. 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀢𑀼𑀯𑀫𑁆𑀧𑀺 𑀇𑀢𑁄 𑀧𑀼𑀭𑀢𑁆𑀣𑀸 𑀲𑁂𑀝𑁆𑀞𑀪𑀽𑀢𑁄 𑀇𑀫𑀲𑁆𑀫𑀺𑀁 𑀅𑀲𑁆𑀲𑀫𑁂 𑀅𑀪𑀺𑀭𑀫𑀲𑀺. 𑀅𑀪𑀺𑀦𑁆𑀦𑀓𑀝𑁆𑀞𑁄𑀲𑀻𑀢𑀺 𑀲𑁄 𑀤𑀸𑀦𑀺 𑀅𑀚𑁆𑀚 𑀅𑀦𑀼𑀤𑁆𑀥𑀝𑀓𑀝𑁆𑀞𑁄𑀲𑀺. 𑀅𑀲𑀺𑀤𑁆𑀥𑀪𑁄𑀚𑀦𑁄𑀢𑀺 𑀦 𑀢𑁂 𑀓𑀺𑀜𑁆𑀘𑀺 𑀅𑀫𑁆𑀳𑀸𑀓𑀁 𑀓𑀦𑁆𑀤𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑁂𑀤𑀺𑀢𑀁. 𑀫𑀫𑀚𑁆𑀚𑀸𑀢𑀺, 𑀫𑀫 𑀧𑀼𑀢𑁆𑀢, 𑀅𑀚𑁆𑀚 𑀦 𑀫𑁂 𑀢𑁆𑀯𑀁 𑀆𑀮𑀧𑀲𑀺. 𑀦𑀝𑁆𑀞𑀁 𑀦𑀼 𑀓𑀺𑀦𑁆𑀢𑀺 𑀓𑀺𑀁 𑀦𑀼 𑀢𑁂 𑀦𑀝𑁆𑀞𑀁 𑀯𑀸, 𑀓𑀺𑀁 𑀘𑁂𑀢𑀲𑀺𑀓𑀁 𑀯𑀸 𑀤𑀼𑀓𑁆𑀔𑀁, 𑀅𑀓𑁆𑀔𑀸𑀳𑀺 𑀫𑁂 𑀦𑀺𑀧𑀦𑁆𑀦𑀓𑀸𑀭𑀡𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀲𑁄 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀆𑀳 𑁋

𑁨𑁮. ‘‘𑀇𑀥𑀸𑀕𑀫𑀸 𑀚𑀝𑀺𑀮𑁄 𑀩𑁆𑀭𑀳𑁆𑀫𑀘𑀸𑀭𑀻, 𑀲𑀼𑀤𑀲𑁆𑀲𑀦𑁂𑀬𑁆𑀬𑁄 𑀲𑀼𑀢𑀦𑀽 𑀯𑀺𑀦𑁂𑀢𑀺;

𑀦𑁂𑀯𑀸𑀢𑀺𑀤𑀻𑀖𑁄 𑀦 𑀧𑀦𑀸𑀢𑀺𑀭𑀲𑁆𑀲𑁄, 𑀲𑀼𑀓𑀡𑁆𑀳𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑁄𑀢𑁄.

𑁨𑁯. ‘‘𑀅𑀫𑀲𑁆𑀲𑀼𑀚𑀸𑀢𑁄 𑀅𑀧𑀼𑀭𑀸𑀡𑀯𑀡𑁆𑀡𑀻, 𑀆𑀥𑀸𑀭𑀭𑀽𑀧𑀜𑁆𑀘 𑀧𑀦𑀲𑁆𑀲 𑀓𑀡𑁆𑀞𑁂;

𑀤𑁆𑀯𑁂 𑀬𑀫𑀸 𑀕𑀡𑁆𑀟𑀸 𑀉𑀭𑁂 𑀲𑀼𑀚𑀸𑀢𑀸, 𑀲𑀼𑀯𑀡𑁆𑀡𑀢𑀺𑀦𑁆𑀤𑀼𑀓𑀦𑀺𑀪𑀸 𑀧𑀪𑀲𑁆𑀲𑀭𑀸.

𑁩𑁦. ‘‘𑀫𑀼𑀔𑀜𑁆𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀁, 𑀓𑀡𑁆𑀡𑁂𑀲𑀼 𑀮𑀫𑁆𑀩𑀦𑁆𑀢𑀺 𑀘 𑀓𑀼𑀜𑁆𑀘𑀺𑀢𑀕𑁆𑀕𑀸;

𑀢𑁂 𑀚𑁄𑀢𑀭𑁂 𑀘𑀭𑀢𑁄 𑀫𑀸𑀡𑀯𑀲𑁆𑀲, 𑀲𑀼𑀢𑁆𑀢𑀜𑁆𑀘 𑀬𑀁 𑀲𑀁𑀬𑀫𑀦𑀁 𑀚𑀝𑀸𑀦𑀁.

𑁩𑁧. ‘‘𑀅𑀜𑁆𑀜𑀸 𑀘 𑀢𑀲𑁆𑀲 𑀲𑀁𑀬𑀫𑀸𑀦𑀺 𑀘𑀢𑀲𑁆𑀲𑁄, 𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀺𑀓𑀸 𑀘 𑀲𑁂𑀢𑀸;

𑀢𑀸 𑀧𑀺𑀁𑀲𑀭𑁂 𑀘𑀭𑀢𑁄 𑀫𑀸𑀡𑀯𑀲𑁆𑀲, 𑀢𑀺𑀭𑀺𑀝𑀺𑀲𑀗𑁆𑀖𑀸𑀭𑀺𑀯 𑀧𑀸𑀯𑀼𑀲𑀫𑁆𑀳𑀺.

𑁩𑁨. ‘‘𑀦 𑀫𑀺𑀔𑀮𑀁 𑀫𑀼𑀜𑁆𑀚𑀫𑀬𑀁 𑀥𑀸𑀭𑁂𑀢𑀺, 𑀦 𑀲𑀦𑁆𑀣𑀭𑁂 𑀦𑁄 𑀧𑀦 𑀧𑀩𑁆𑀩𑀚𑀲𑁆𑀲;

𑀢𑀸 𑀚𑁄𑀢𑀭𑁂 𑀚𑀖𑀦𑀦𑁆𑀢𑀭𑁂 𑀯𑀺𑀮𑀕𑁆𑀕𑀸, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁩𑁩. ‘‘𑀅𑀔𑀻𑀮𑀓𑀸𑀦𑀺 𑀘 𑀅𑀯𑀡𑁆𑀝𑀓𑀸𑀦𑀺, 𑀳𑁂𑀝𑁆𑀞𑀸 𑀦𑀪𑁆𑀬𑀸 𑀓𑀝𑀺𑀲𑀫𑁄𑀳𑀺𑀢𑀸𑀦𑀺;

𑀅𑀖𑀝𑁆𑀝𑀺𑀢𑀸 𑀦𑀺𑀘𑁆𑀘𑀓𑀻𑀴𑀁 𑀓𑀭𑁄𑀦𑁆𑀢𑀺, 𑀳𑀁 𑀢𑀸𑀢 𑀓𑀺𑀁𑀭𑀼𑀓𑁆𑀔𑀨𑀮𑀸𑀦𑀺 𑀢𑀸𑀦𑀺.

𑁩𑁪. ‘‘𑀚𑀝𑀸 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀸, 𑀧𑀭𑁄𑀲𑀢𑀁 𑀯𑁂𑀮𑁆𑀮𑀺𑀢𑀕𑁆𑀕𑀸 𑀲𑀼𑀕𑀦𑁆𑀥𑀸;

𑀤𑁆𑀯𑁂𑀥𑀸 𑀲𑀺𑀭𑁄 𑀲𑀸𑀥𑀼 𑀯𑀺𑀪𑀢𑁆𑀢𑀭𑀽𑀧𑁄, 𑀅𑀳𑁄 𑀦𑀼 𑀔𑁄 𑀫𑀬𑁆𑀳 𑀢𑀣𑀸 𑀚𑀝𑀸𑀲𑁆𑀲𑀼.

𑁩𑁫. ‘‘𑀬𑀤𑀸 𑀘 𑀲𑁄 𑀧𑀓𑀺𑀭𑀢𑀺 𑀢𑀸 𑀚𑀝𑀸𑀬𑁄, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀉𑀧𑁂𑀢𑀭𑀽𑀧𑀸;

𑀦𑀻𑀮𑀼𑀧𑁆𑀧𑀮𑀁 𑀯𑀸𑀢𑀲𑀫𑁂𑀭𑀺𑀢𑀁𑀯, 𑀢𑀣𑁂𑀯 𑀲𑀁𑀯𑀸𑀢𑀺 𑀧𑀦𑀲𑁆𑀲𑀫𑁄 𑀅𑀬𑀁.

𑁩𑁬. ‘‘𑀧𑀗𑁆𑀓𑁄 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑁄, 𑀦𑁂𑀢𑀸𑀤𑀺𑀲𑁄 𑀬𑀸𑀤𑀺𑀲𑁄 𑀫𑀬𑁆𑀳𑀁 𑀓𑀸𑀬𑁂;

𑀲𑁄 𑀯𑀸𑀬𑀢𑀺 𑀏𑀭𑀺𑀢𑁄 𑀫𑀸𑀮𑀼𑀢𑁂𑀦, 𑀯𑀦𑀁 𑀬𑀣𑀸 𑀅𑀕𑁆𑀕𑀕𑀺𑀫𑁆𑀳𑁂 𑀲𑀼𑀨𑀼𑀮𑁆𑀮𑀁.

𑁩𑁭. ‘‘𑀦𑀺𑀳𑀦𑁆𑀢𑀺 𑀲𑁄 𑀭𑀼𑀓𑁆𑀔𑀨𑀮𑀁 𑀧𑀣𑀩𑁆𑀬𑀸, 𑀲𑀼𑀘𑀺𑀢𑁆𑀢𑀭𑀽𑀧𑀁 𑀭𑀼𑀘𑀺𑀭𑀁 𑀤𑀲𑁆𑀲𑀦𑁂𑀬𑁆𑀬𑀁;

𑀔𑀺𑀢𑁆𑀢𑀜𑁆𑀘 𑀢𑀲𑁆𑀲 𑀧𑀼𑀦𑀭𑁂𑀳𑀺 𑀳𑀢𑁆𑀣𑀁, 𑀳𑀁 𑀢𑀸𑀢 𑀓𑀺𑀁𑀭𑀼𑀓𑁆𑀔𑀨𑀮𑀁 𑀦𑀼 𑀔𑁄 𑀢𑀁.

𑁩𑁮. ‘‘𑀤𑀦𑁆𑀢𑀸 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀸, 𑀲𑀼𑀤𑁆𑀥𑀸 𑀲𑀫𑀸 𑀲𑀗𑁆𑀔𑀯𑀭𑀽𑀧𑀧𑀦𑁆𑀦𑀸;

𑀫𑀦𑁄 𑀧𑀲𑀸𑀤𑁂𑀦𑁆𑀢𑀺 𑀯𑀺𑀯𑀭𑀺𑀬𑀫𑀸𑀦𑀸, 𑀦 𑀳𑀺 𑀦𑀽𑀦 𑀲𑁄 𑀲𑀸𑀓𑀫𑀔𑀸𑀤𑀺 𑀢𑁂𑀳𑀺.

𑁩𑁯. ‘‘𑀅𑀓𑀓𑁆𑀓𑀲𑀁 𑀅𑀕𑁆𑀕𑀴𑀺𑀢𑀁 𑀫𑀼𑀳𑀼𑀁 𑀫𑀼𑀤𑀼𑀁, 𑀉𑀚𑀼𑀁 𑀅𑀦𑀼𑀤𑁆𑀥𑀢𑀁 𑀅𑀘𑀧𑀮𑀫𑀲𑁆𑀲 𑀪𑀸𑀲𑀺𑀢𑀁;

𑀭𑀼𑀤𑀁 𑀫𑀦𑀼𑀜𑁆𑀜𑀁 𑀓𑀭𑀯𑀻𑀓𑀲𑀼𑀲𑁆𑀲𑀭𑀁, 𑀳𑀤𑀬𑀗𑁆𑀕𑀫𑀁 𑀭𑀜𑁆𑀚𑀬𑀢𑁂𑀯 𑀫𑁂 𑀫𑀦𑁄.

𑁪𑁦. ‘‘𑀩𑀺𑀦𑁆𑀤𑀼𑀲𑁆𑀲𑀭𑁄 𑀦𑀸𑀢𑀺𑀯𑀺𑀲𑀝𑁆𑀞𑀯𑀸𑀓𑁆𑀬𑁄, 𑀦 𑀦𑀽𑀦 𑀲𑀚𑁆𑀛𑀸𑀬𑀫𑀢𑀺𑀧𑁆𑀧𑀬𑀼𑀢𑁆𑀢𑁄;

𑀇𑀘𑁆𑀙𑀸𑀫𑀺 𑀪𑁄 𑀢𑀁 𑀧𑀼𑀦𑀤𑁂𑀯 𑀤𑀝𑁆𑀞𑀼𑀁, 𑀫𑀺𑀢𑁆𑀢𑁄 𑀳𑀺 𑀫𑁂 𑀫𑀸𑀡𑀯𑁄𑀳𑀼 𑀧𑀼𑀭𑀢𑁆𑀣𑀸.

𑁪𑁧. ‘‘𑀲𑀼𑀲𑀦𑁆𑀥𑀺 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀺𑀫𑀁 𑀯𑀡𑀁, 𑀧𑀼𑀣𑀽 𑀲𑀼𑀚𑀸𑀢𑀁 𑀔𑀭𑀧𑀢𑁆𑀢𑀲𑀦𑁆𑀦𑀺𑀪𑀁;

𑀢𑁂𑀦𑁂𑀯 𑀫𑀁 𑀉𑀢𑁆𑀢𑀭𑀺𑀬𑀸𑀦 𑀫𑀸𑀡𑀯𑁄, 𑀯𑀺𑀯𑀭𑀺𑀢𑀁 𑀊𑀭𑀼𑀁 𑀚𑀖𑀦𑁂𑀦 𑀧𑀺𑀴𑀬𑀺.

𑁪𑁨. ‘‘𑀢𑀧𑀦𑁆𑀢𑀺 𑀆𑀪𑀦𑁆𑀢𑀺 𑀯𑀺𑀭𑁄𑀘𑀭𑁂 𑀘, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂;

𑀩𑀸𑀳𑀸 𑀫𑀼𑀤𑀽 𑀅𑀜𑁆𑀚𑀦𑀮𑁄𑀫𑀲𑀸𑀤𑀺𑀲𑀸, 𑀯𑀺𑀘𑀺𑀢𑁆𑀭𑀯𑀝𑁆𑀝𑀗𑁆𑀕𑀼𑀮𑀺𑀓𑀸𑀲𑁆𑀲 𑀲𑁄𑀪𑀭𑁂.

𑁪𑁩. ‘‘𑀅𑀓𑀓𑁆𑀓𑀲𑀗𑁆𑀕𑁄 𑀦 𑀘 𑀤𑀻𑀖𑀮𑁄𑀫𑁄, 𑀦𑀔𑀸𑀲𑁆𑀲 𑀤𑀻𑀖𑀸 𑀅𑀧𑀺 𑀮𑁄𑀳𑀺𑀢𑀕𑁆𑀕𑀸;

𑀫𑀼𑀤𑀽𑀳𑀺 𑀩𑀸𑀳𑀸𑀳𑀺 𑀧𑀮𑀺𑀲𑁆𑀲𑀚𑀦𑁆𑀢𑁄, 𑀓𑀮𑁆𑀬𑀸𑀡𑀭𑀽𑀧𑁄 𑀭𑀫𑀬𑀁 𑀉𑀧𑀝𑁆𑀞𑀳𑀺.

𑁪𑁪. ‘‘𑀤𑀼𑀫𑀲𑁆𑀲 𑀢𑀽𑀮𑀽𑀧𑀦𑀺𑀪𑀸 𑀧𑀪𑀲𑁆𑀲𑀭𑀸, 𑀲𑀼𑀯𑀡𑁆𑀡𑀓𑀫𑁆𑀩𑀼𑀢𑀮𑀯𑀝𑁆𑀝𑀲𑀼𑀘𑁆𑀙𑀯𑀺;

𑀳𑀢𑁆𑀣𑀸 𑀫𑀼𑀤𑀽 𑀢𑁂𑀳𑀺 𑀫𑀁 𑀲𑀫𑁆𑀨𑀼𑀲𑀺𑀢𑁆𑀯𑀸, 𑀇𑀢𑁄 𑀕𑀢𑁄 𑀢𑁂𑀦 𑀫𑀁 𑀤𑀳𑀦𑁆𑀢𑀺 𑀢𑀸𑀢.

𑁪𑁫. ‘‘𑀦 𑀦𑀽𑀦 𑀲𑁄 𑀔𑀸𑀭𑀺𑀯𑀺𑀥𑀁 𑀅𑀳𑀸𑀲𑀺, 𑀦 𑀦𑀽𑀦 𑀲𑁄 𑀓𑀝𑁆𑀞𑀸𑀦𑀺 𑀲𑀬𑀁 𑀅𑀪𑀜𑁆𑀚𑀺;

𑀦 𑀦𑀽𑀦 𑀲𑁄 𑀳𑀦𑁆𑀢𑀺 𑀤𑀼𑀫𑁂 𑀓𑀼𑀞𑀸𑀭𑀺𑀬𑀸, 𑀦 𑀳𑀺𑀲𑁆𑀲 𑀳𑀢𑁆𑀣𑁂𑀲𑀼 𑀔𑀺𑀮𑀸𑀦𑀺 𑀅𑀢𑁆𑀣𑀺.

𑁪𑁬. ‘‘𑀅𑀘𑁆𑀙𑁄 𑀘 𑀔𑁄 𑀢𑀲𑁆𑀲 𑀯𑀡𑀁 𑀅𑀓𑀸𑀲𑀺, 𑀲𑁄 𑀫𑀁𑀩𑁆𑀭𑀯𑀺 ‘𑀲𑀼𑀔𑀺𑀢𑀁 𑀫𑀁 𑀓𑀭𑁄𑀳𑀺’;

𑀢𑀸𑀳𑀁 𑀓𑀭𑀺𑀁 𑀢𑁂𑀦 𑀫𑀫𑀸𑀲𑀺 𑀲𑁄𑀔𑁆𑀬𑀁, 𑀲𑁄 𑀘𑀩𑁆𑀭𑀯𑀺 ‘𑀲𑀼𑀔𑀺𑀢𑁄𑀲𑁆𑀫𑀻’𑀢𑀺 𑀩𑁆𑀭𑀳𑁆𑀫𑁂.

𑁪𑁭. ‘‘𑀅𑀬𑀜𑁆𑀘 𑀢𑁂 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸, 𑀯𑀺𑀓𑀺𑀡𑁆𑀡𑀭𑀽𑀧𑀸𑀯 𑀫𑀬𑀸 𑀘 𑀢𑁂𑀦 𑀘;

𑀓𑀺𑀮𑀦𑁆𑀢𑀭𑀽𑀧𑀸 𑀉𑀤𑀓𑁂 𑀭𑀫𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀧𑀡𑁆𑀡𑀓𑀼𑀝𑀺𑀁 𑀯𑀚𑀸𑀫.

𑁪𑁮. ‘‘𑀦 𑀫𑀚𑁆𑀚 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺 𑀢𑀸𑀢, 𑀦 𑀅𑀕𑁆𑀕𑀺𑀳𑀼𑀢𑁆𑀢𑀁 𑀦𑀧𑀺 𑀬𑀜𑁆𑀜𑀢𑀦𑁆𑀢𑀁;

𑀦 𑀘𑀸𑀧𑀺 𑀢𑁂 𑀫𑀽𑀮𑀨𑀮𑀸𑀦𑀺 𑀪𑀼𑀜𑁆𑀚𑁂, 𑀬𑀸𑀯 𑀦 𑀧𑀲𑁆𑀲𑀸𑀫𑀺 𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀁.

𑁪𑁯. ‘‘𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀢𑀼𑀯𑀫𑁆𑀧𑀺 𑀢𑀸𑀢, 𑀬𑀲𑁆𑀲𑀁 𑀤𑀺𑀲𑀁 𑀯𑀲𑀢𑁂 𑀩𑁆𑀭𑀳𑁆𑀫𑀘𑀸𑀭𑀻;

𑀢𑀁 𑀫𑀁 𑀤𑀺𑀲𑀁 𑀧𑀸𑀧𑀬 𑀢𑀸𑀢 𑀔𑀺𑀧𑁆𑀧𑀁, 𑀫𑀸 𑀢𑁂 𑀅𑀳𑀁 𑀅𑀫𑀭𑀺𑀫𑀲𑁆𑀲𑀫𑀫𑁆𑀳𑀺.

𑁫𑁦. ‘‘𑀯𑀺𑀘𑀺𑀢𑁆𑀭𑀨𑀼𑀮𑁆𑀮𑀜𑁆𑀳𑀺 𑀯𑀦𑀁 𑀲𑀼𑀢𑀁 𑀫𑀬𑀸, 𑀤𑀺𑀚𑀸𑀪𑀺𑀖𑀼𑀝𑁆𑀞𑀁 𑀤𑀺𑀚𑀲𑀗𑁆𑀖𑀲𑁂𑀯𑀺𑀢𑀁;

𑀢𑀁 𑀫𑀁 𑀯𑀦𑀁 𑀧𑀸𑀧𑀬 𑀢𑀸𑀢 𑀔𑀺𑀧𑁆𑀧𑀁, 𑀧𑀼𑀭𑀸 𑀢𑁂 𑀧𑀸𑀡𑀁 𑀯𑀺𑀚𑀳𑀸𑀫𑀺 𑀅𑀲𑁆𑀲𑀫𑁂’’𑀢𑀺.

𑀢𑀢𑁆𑀣 𑀇𑀥𑀸𑀕𑀫𑀸𑀢𑀺, 𑀢𑀸𑀢, 𑀇𑀫𑀁 𑀅𑀲𑁆𑀲𑀫𑀧𑀤𑀁 𑀆𑀕𑀢𑁄. 𑀲𑀼𑀤𑀲𑁆𑀲𑀦𑁂𑀬𑁆𑀬𑁄𑀢𑀺 𑀲𑀼𑀝𑁆𑀞𑀼 𑀤𑀲𑁆𑀲𑀦𑁂𑀬𑁆𑀬𑁄. 𑀲𑀼𑀢𑀦𑀽𑀢𑀺 𑀲𑀼𑀝𑁆𑀞𑀼 𑀢𑀦𑀼𑀓𑁄 𑀦𑀸𑀢𑀺𑀓𑀺𑀲𑁄 𑀦𑀸𑀢𑀺𑀣𑀽𑀮𑁄. 𑀯𑀺𑀦𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀅𑀲𑁆𑀲𑀫𑀧𑀤𑀁 𑀏𑀓𑁄𑀪𑀸𑀲𑀁 𑀯𑀺𑀬 𑀯𑀺𑀦𑁂𑀢𑀺 𑀧𑀽𑀭𑁂𑀢𑀺. 𑀲𑀼𑀓𑀡𑁆𑀳𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑁄𑀢𑁄𑀢𑀺, 𑀢𑀸𑀢, 𑀢𑀲𑁆𑀲 𑀪𑁄𑀢𑁄 𑀲𑀼𑀓𑀡𑁆𑀳𑁂𑀳𑀺 𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑀫𑀭𑀯𑀡𑁆𑀡𑁂𑀳𑀺 𑀓𑁂𑀲𑁂𑀳𑀺 𑀲𑀼𑀓𑀡𑁆𑀳𑀲𑀻𑀲𑀁 𑀲𑀼𑀫𑀚𑁆𑀚𑀺𑀢𑀫𑀡𑀺𑀫𑀬𑀁 𑀯𑀺𑀬 𑀔𑀸𑀬𑀢𑀺. 𑀅𑀫𑀲𑁆𑀲𑀽𑀚𑀸𑀢𑁄𑀢𑀺 𑀦 𑀢𑀸𑀯𑀲𑁆𑀲 𑀫𑀲𑁆𑀲𑀼 𑀚𑀸𑀬𑀢𑀺, 𑀢𑀭𑀼𑀡𑁄𑀬𑁂𑀯. 𑀅𑀧𑀼𑀭𑀸𑀡𑀯𑀡𑁆𑀡𑀻𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄. 𑀆𑀥𑀸𑀭𑀭𑀽𑀧𑀜𑁆𑀘 𑀧𑀦𑀲𑁆𑀲 𑀓𑀡𑁆𑀞𑁂𑀢𑀺 𑀓𑀡𑁆𑀞𑁂 𑀘 𑀧𑀦𑀲𑁆𑀲 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀸𑀪𑀸𑀚𑀦𑀝𑁆𑀞𑀧𑀦𑀁 𑀧𑀢𑁆𑀢𑀸𑀥𑀸𑀭𑀲𑀤𑀺𑀲𑀁 𑀧𑀺𑀴𑀦𑁆𑀥𑀦𑀁 𑀅𑀢𑁆𑀣𑀻𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀕𑀡𑁆𑀟𑀸𑀢𑀺 𑀣𑀦𑁂 𑀲𑀦𑁆𑀥𑀸𑀬𑀸𑀳. 𑀉𑀭𑁂 𑀲𑀼𑀚𑀸𑀢𑀸𑀢𑀺 𑀉𑀭𑀫𑁆𑀳𑀺 𑀲𑀼𑀚𑀸𑀢𑀸. ‘‘𑀉𑀭𑀢𑁄’’𑀢𑀺𑀧𑀺 𑀧𑀸𑀞𑁄. 𑀧𑀪𑀲𑁆𑀲𑀭𑀸𑀢𑀺 𑀧𑀪𑀸𑀲𑀫𑁆𑀧𑀦𑁆𑀦𑀸. ‘‘𑀧𑀪𑀸𑀲𑀭𑁂’’𑀢𑀺𑀧𑀺 𑀧𑀸𑀞𑁄, 𑀑𑀪𑀸𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀅𑀢𑀺𑀯𑀺𑀬 𑀤𑀲𑁆𑀲𑀦𑀻𑀬𑀁. 𑀓𑀼𑀜𑁆𑀘𑀺𑀢𑀕𑁆𑀕𑀸𑀢𑀺 𑀲𑀻𑀳𑀓𑀼𑀡𑁆𑀟𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀼𑀢𑁆𑀢𑀜𑁆𑀘𑀸𑀢𑀺 𑀬𑀁 𑀢𑀲𑁆𑀲 𑀚𑀝𑀸𑀩𑀦𑁆𑀥𑀦𑀲𑀼𑀢𑁆𑀢𑀁, 𑀢𑀫𑁆𑀧𑀺 𑀚𑁄𑀢𑀢𑀺 𑀧𑀪𑀁 𑀫𑀼𑀜𑁆𑀘𑀢𑀺. ‘‘𑀲𑀁𑀬𑀫𑀸𑀦𑀺 𑀘𑀢𑀲𑁆𑀲𑁄’’𑀢𑀺 𑀇𑀫𑀺𑀦𑀸 𑀫𑀡𑀺𑀲𑀼𑀯𑀡𑁆𑀡𑀧𑀯𑀸𑀴𑀭𑀚𑀢𑀫𑀬𑀸𑀦𑀺 𑀘𑀢𑁆𑀢𑀸𑀭𑀺 𑀧𑀺𑀴𑀦𑁆𑀥𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀢𑀸 𑀧𑀺𑀁𑀲𑀭𑁂𑀢𑀺 𑀢𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺 𑀧𑀸𑀯𑀼𑀲𑀫𑁆𑀳𑀺 𑀧𑀯𑀼𑀝𑁆𑀞𑁂 𑀤𑁂𑀯𑁂 𑀢𑀺𑀭𑀺𑀝𑀺𑀲𑀗𑁆𑀖𑀸 𑀯𑀺𑀬 𑀯𑀺𑀭𑀯𑀦𑁆𑀢𑀺. 𑀫𑀺𑀔𑀮𑀦𑁆𑀢𑀺 𑀫𑁂𑀔𑀮𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀦𑀺𑀯𑀢𑁆𑀣𑀓𑀜𑁆𑀘𑀦𑀘𑀻𑀭𑀓𑀁 𑀲𑀦𑁆𑀥𑀸𑀬𑀸𑀳. 𑀦 𑀲𑀦𑁆𑀣𑀭𑁂𑀢𑀺 𑀦 𑀯𑀸𑀓𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀬𑀣𑀸 𑀫𑀬𑀁 𑀢𑀺𑀡𑀫𑀬𑀁 𑀯𑀸 𑀯𑀸𑀓𑀫𑀬𑀁 𑀯𑀸 𑀘𑀻𑀭𑀓𑀁 𑀥𑀸𑀭𑁂𑀫, 𑀦 𑀢𑀣𑀸 𑀲𑁄, 𑀲𑁄 𑀧𑀦 𑀲𑀼𑀯𑀡𑁆𑀡𑀘𑀻𑀭𑀓𑀁 𑀥𑀸𑀭𑁂𑀢𑀻𑀢𑀺. 𑀅𑀔𑀻𑀮𑀓𑀸𑀦𑀻𑀢𑀺 𑀅𑀢𑀘𑀸𑀦𑀺 𑀦𑀺𑀧𑁆𑀧𑀡𑁆𑀡𑀸𑀦𑀺. 𑀓𑀝𑀺𑀲𑀫𑁄𑀳𑀺𑀢𑀸𑀦𑀻𑀢𑀺 𑀓𑀝𑀺𑀬𑀁 𑀩𑀤𑁆𑀥𑀸𑀦𑀺. 𑀦𑀺𑀘𑁆𑀘𑀓𑀻𑀴𑀁 𑀓𑀭𑁄𑀦𑁆𑀢𑀻𑀢𑀺 𑀅𑀖𑀝𑁆𑀝𑀺𑀢𑀸𑀦𑀺𑀧𑀺 𑀦𑀺𑀘𑁆𑀘𑀓𑀸𑀮𑀁 𑀓𑀻𑀴𑀸𑀬𑀦𑁆𑀢𑀺. 𑀳𑀁, 𑀢𑀸𑀢𑀸𑀢𑀺 𑀳𑀫𑁆𑀪𑁄, 𑀢𑀸𑀢. 𑀓𑀺𑀁 𑀭𑀼𑀓𑁆𑀔𑀨𑀮𑀸𑀦𑀺 𑀢𑀸𑀦𑀻𑀢𑀺 𑀢𑀸𑀦𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀼𑀢𑁆𑀢𑀸𑀭𑀼𑀴𑁆𑀳𑀸𑀦𑀺 𑀓𑀝𑀺𑀬𑀁 𑀩𑀤𑁆𑀥𑀸𑀦𑀺 𑀓𑀢𑀭𑀭𑀼𑀓𑁆𑀔𑀨𑀮𑀸𑀦𑀺 𑀦𑀸𑀫𑀸𑀢𑀺 𑀫𑀡𑀺𑀲𑀗𑁆𑀖𑀸𑀝𑀺𑀁 𑀲𑀦𑁆𑀥𑀸𑀬𑀸𑀳.

𑀚𑀝𑀸𑀢𑀺 𑀚𑀝𑀸𑀫𑀡𑁆𑀟𑀮𑀸𑀓𑀸𑀭𑁂𑀦 𑀩𑀤𑁆𑀥𑀭𑀢𑀦𑀫𑀺𑀲𑁆𑀲𑀓𑀓𑁂𑀲𑀯𑀝𑁆𑀝𑀺𑀬𑁄 𑀲𑀦𑁆𑀥𑀸𑀬𑀸𑀳. 𑀯𑁂𑀮𑁆𑀮𑀺𑀢𑀕𑁆𑀕𑀸𑀢𑀺 𑀓𑀼𑀜𑁆𑀘𑀺𑀢𑀕𑁆𑀕𑀸. 𑀤𑁆𑀯𑁂𑀥𑀸𑀲𑀺𑀭𑁄𑀢𑀺 𑀢𑀲𑁆𑀲 𑀲𑀻𑀲𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀩𑀤𑁆𑀥𑀸𑀦𑀁 𑀚𑀝𑀸𑀦𑀁 𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀭𑀽𑀧𑀁. 𑀢𑀣𑀸𑀢𑀺 𑀬𑀣𑀸 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀚𑀝𑀸, 𑀢𑀣𑀸 𑀢𑀼𑀫𑁆𑀳𑁂𑀳𑀺 𑀫𑀫 𑀦 𑀩𑀤𑁆𑀥𑀸, 𑀅𑀳𑁄 𑀯𑀢 𑀫𑀫𑀧𑀺 𑀢𑀣𑀸 𑀅𑀲𑁆𑀲𑀽𑀢𑀺 𑀧𑀢𑁆𑀣𑁂𑀦𑁆𑀢𑁄 𑀆𑀳. 𑀉𑀧𑁂𑀢𑀭𑀽𑀧𑀸𑀢𑀺 𑀉𑀧𑁂𑀢𑀲𑀪𑀸𑀯𑀸. 𑀯𑀸𑀢𑀲𑀫𑁂𑀭𑀺𑀢𑀁𑀯𑀸𑀢𑀺 𑀬𑀣𑀸 𑀦𑀸𑀫 𑀦𑀻𑀮𑀼𑀧𑁆𑀧𑀮𑀁 𑀯𑀸𑀢𑁂𑀦 𑀲𑀫𑀻𑀭𑀺𑀢𑀁, 𑀢𑀣𑁂𑀯 𑀅𑀬𑀁 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀲𑁆𑀲𑀫𑁄 𑀲𑀁𑀯𑀸𑀢𑀺. 𑀦𑁂𑀢𑀸𑀤𑀺𑀲𑁄𑀢𑀺, 𑀢𑀸𑀢, 𑀬𑀸𑀤𑀺𑀲𑁄 𑀫𑀫 𑀓𑀸𑀬𑁂 𑀧𑀗𑁆𑀓𑁄, 𑀦𑁂𑀢𑀸𑀤𑀺𑀲𑁄 𑀢𑀲𑁆𑀲 𑀲𑀭𑀻𑀭𑁂. 𑀲𑁄 𑀳𑀺 𑀤𑀲𑁆𑀲𑀦𑀻𑀬𑁄 𑀘𑁂𑀯 𑀲𑀼𑀕𑀦𑁆𑀥𑁄 𑀘. 𑀅𑀕𑁆𑀕𑀕𑀺𑀫𑁆𑀳𑁂𑀢𑀺 𑀯𑀲𑀦𑁆𑀢𑀲𑀫𑀬𑁂.

𑀦𑀺𑀳𑀦𑁆𑀢𑀻𑀢𑀺 𑀧𑀳𑀭𑀢𑀺. 𑀓𑀺𑀁 𑀭𑀼𑀓𑁆𑀔𑀨𑀮𑀁 𑀦𑀼 𑀔𑁄 𑀢𑀦𑁆𑀢𑀺 𑀓𑀢𑀭𑀭𑀼𑀓𑁆𑀔𑀲𑁆𑀲 𑀦𑀼 𑀔𑁄 𑀢𑀁 𑀨𑀮𑀁. 𑀲𑀗𑁆𑀔𑀯𑀭𑀽𑀧𑀧𑀦𑁆𑀦𑀸𑀢𑀺 𑀲𑀼𑀥𑁄𑀢𑀲𑀗𑁆𑀔𑀧𑀝𑀺𑀪𑀸𑀕𑀸. 𑀦 𑀳𑀺 𑀦𑀽𑀦 𑀲𑁄 𑀲𑀸𑀓𑀫𑀔𑀸𑀤𑀺 𑀢𑁂𑀳𑀻𑀢𑀺 𑀦 𑀦𑀽𑀦 𑀲𑁄 𑀫𑀸𑀡𑀯𑁄 𑀫𑀬𑀁 𑀯𑀺𑀬 𑀢𑁂𑀳𑀺 𑀤𑀦𑁆𑀢𑁂𑀳𑀺 𑀭𑀼𑀓𑁆𑀔𑀧𑀡𑁆𑀡𑀸𑀦𑀺 𑀘𑁂𑀯 𑀫𑀽𑀮𑀨𑀮𑀸𑀨𑀮𑀸𑀦𑀺 𑀘 𑀔𑀸𑀤𑀺. 𑀅𑀫𑁆𑀳𑀸𑀓𑀜𑁆𑀳𑀺 𑀢𑀸𑀦𑀺 𑀔𑀸𑀤𑀦𑁆𑀢𑀸𑀦𑀁 𑀲𑀩𑀮𑀸 𑀧𑀡𑁆𑀡𑀯𑀡𑁆𑀡𑀸 𑀤𑀦𑁆𑀢𑀸𑀢𑀺 𑀤𑀻𑀧𑁂𑀢𑀺.

𑀅𑀓𑀓𑁆𑀓𑀲𑀦𑁆𑀢𑀺, 𑀢𑀸𑀢, 𑀢𑀲𑁆𑀲 𑀪𑀸𑀲𑀺𑀢𑀁 𑀅𑀨𑀭𑀼𑀲𑀁 𑀅𑀕𑀴𑀺𑀢𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑀲𑁆𑀲𑀸𑀧𑀺 𑀫𑀥𑀼𑀭𑀢𑀸𑀬 𑀫𑀼𑀳𑀼𑀁 𑀫𑀼𑀤𑀼𑀁, 𑀅𑀧𑀫𑀼𑀲𑁆𑀲𑀢𑀸𑀬 𑀉𑀚𑀼𑀁, 𑀅𑀯𑀺𑀓𑁆𑀔𑀺𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀝𑀁, 𑀧𑀢𑀺𑀝𑁆𑀞𑀺𑀢𑀢𑀸𑀬 𑀅𑀘𑀧𑀮𑀁. 𑀭𑀼𑀤𑀦𑁆𑀢𑀺 𑀪𑀸𑀲𑀫𑀸𑀦𑀲𑁆𑀲 𑀲𑀭𑀲𑀗𑁆𑀔𑀸𑀢𑀁 𑀭𑀼𑀤𑀫𑁆𑀧𑀺 𑀫𑀦𑁄𑀳𑀭𑀁 𑀓𑀭𑀯𑀻𑀓𑀲𑁆𑀲 𑀯𑀺𑀬 𑀲𑀼𑀲𑁆𑀲𑀭𑀁 𑀲𑀼𑀫𑀥𑀼𑀭𑀁. 𑀭𑀜𑁆𑀚𑀬𑀢𑁂𑀯𑀸𑀢𑀺 𑀫𑀫 𑀫𑀦𑁄 𑀭𑀜𑁆𑀚𑀢𑀺𑀬𑁂𑀯. 𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀧𑀺𑀡𑁆𑀟𑀺𑀢𑀲𑁆𑀲𑀭𑁄. 𑀫𑀸𑀡𑀯𑁄𑀳𑀽𑀢𑀺 𑀲𑁄 𑀳𑀺 𑀫𑀸𑀡𑀯𑁄 𑀧𑀼𑀭𑀢𑁆𑀣𑀸 𑀫𑀫 𑀫𑀺𑀢𑁆𑀢𑁄 𑀅𑀳𑀼.

𑀲𑀼𑀲𑀦𑁆𑀥𑀺 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀺𑀫𑀁 𑀯𑀡𑀦𑁆𑀢𑀺 𑀢𑀸𑀢 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀊𑀭𑀽𑀦𑀁 𑀅𑀦𑁆𑀢𑀭𑁂 𑀏𑀓𑀁 𑀯𑀡𑀁 𑀅𑀢𑁆𑀣𑀺, 𑀢𑀁 𑀲𑀼𑀲𑀦𑁆𑀥𑀺 𑀲𑀼𑀨𑀼𑀲𑀺𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀤𑀺𑀲𑀁, 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀁 𑀲𑀫𑀦𑁆𑀢𑀢𑁄 𑀫𑀝𑁆𑀞𑀁. 𑀧𑀼𑀣𑀽𑀢𑀺 𑀫𑀳𑀦𑁆𑀢𑀁. 𑀲𑀼𑀚𑀸𑀢𑀦𑁆𑀢𑀺 𑀲𑀼𑀲𑀡𑁆𑀞𑀺𑀢𑀁. 𑀔𑀭𑀧𑀢𑁆𑀢𑀲𑀦𑁆𑀦𑀺𑀪𑀦𑁆𑀢𑀺 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀫𑀓𑀼𑀴𑀲𑀦𑁆𑀦𑀺𑀪𑀁. 𑀉𑀢𑁆𑀢𑀭𑀺𑀬𑀸𑀦𑀸𑀢𑀺 𑀉𑀢𑁆𑀢𑀭𑀺𑀢𑁆𑀯𑀸 𑀅𑀯𑀢𑁆𑀣𑀭𑀺𑀢𑁆𑀯𑀸. 𑀧𑀺𑀴𑀬𑀻𑀢𑀺 𑀧𑀻𑀴𑁂𑀲𑀺. 𑀢𑀧𑀦𑁆𑀢𑀻𑀢𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀭𑀻𑀭𑀢𑁄 𑀦𑀺𑀘𑁆𑀙𑀭𑀦𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀭𑀁𑀲𑀺𑀬𑁄 𑀚𑀮𑀦𑁆𑀢𑀺 𑀑𑀪𑀸𑀲𑀦𑁆𑀢𑀺 𑀯𑀺𑀭𑁄𑀘𑀦𑁆𑀢𑀺 𑀘. 𑀩𑀸𑀳𑀸𑀢𑀺 𑀩𑀸𑀳𑀸𑀧𑀺𑀲𑁆𑀲 𑀫𑀼𑀤𑀽. 𑀅𑀜𑁆𑀚𑀦𑀮𑁄𑀫𑀲𑀸𑀤𑀺𑀲𑀸𑀢𑀺 𑀅𑀜𑁆𑀚𑀦𑀲𑀤𑀺𑀲𑁂𑀳𑀺 𑀮𑁄𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀘𑀺𑀢𑁆𑀭𑀯𑀝𑁆𑀝𑀗𑁆𑀕𑀼𑀮𑀺𑀓𑀸𑀲𑁆𑀲 𑀲𑁄𑀪𑀭𑁂𑀢𑀺 𑀳𑀢𑁆𑀣𑀸𑀧𑀺𑀲𑁆𑀲 𑀯𑀭𑀮𑀓𑁆𑀔𑀡𑀯𑀺𑀘𑀺𑀢𑁆𑀭𑀸𑀳𑀺 𑀧𑀯𑀸𑀮𑀗𑁆𑀓𑀼𑀭𑀲𑀤𑀺𑀲𑀸𑀳𑀺 𑀯𑀝𑁆𑀝𑀗𑁆𑀕𑀼𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑁄𑀪𑀦𑁆𑀢𑀺.

𑀅𑀓𑀓𑁆𑀓𑀲𑀗𑁆𑀕𑁄𑀢𑀺 𑀓𑀘𑁆𑀙𑀼𑀧𑀻𑀴𑀓𑀸𑀤𑀺𑀭𑀳𑀺𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑁄. 𑀭𑀫𑀬𑀁 𑀉𑀧𑀝𑁆𑀞𑀳𑀻𑀢𑀺 𑀫𑀁 𑀭𑀫𑀬𑀦𑁆𑀢𑁄 𑀉𑀧𑀝𑁆𑀞𑀳𑀺 𑀧𑀭𑀺𑀘𑀭𑀺. 𑀢𑀽𑀮𑀽𑀧𑀦𑀺𑀪𑀸𑀢𑀺 𑀫𑀼𑀤𑀼𑀪𑀸𑀯𑀲𑁆𑀲 𑀉𑀧𑀫𑀸. 𑀲𑀼𑀯𑀡𑁆𑀡𑀓𑀫𑁆𑀩𑀼𑀢𑀮𑀯𑀝𑁆𑀝𑀲𑀼𑀘𑁆𑀙𑀯𑀻𑀢𑀺 𑀲𑀼𑀯𑀡𑁆𑀡𑀫𑀬𑀁 𑀆𑀤𑀸𑀲𑀢𑀮𑀁 𑀯𑀺𑀬 𑀯𑀝𑁆𑀝𑀸 𑀘 𑀲𑀼𑀘𑁆𑀙𑀯𑀺 𑀘, 𑀧𑀭𑀺𑀫𑀡𑁆𑀟𑀮𑀢𑀮𑀸 𑀘𑁂𑀯 𑀲𑀼𑀦𑁆𑀤𑀭𑀘𑁆𑀙𑀯𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀨𑀼𑀲𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀨𑀼𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑀁 𑀫𑀫 𑀲𑀭𑀻𑀭𑁂 𑀨𑀭𑀸𑀧𑁂𑀢𑁆𑀯𑀸. 𑀇𑀢𑁄 𑀕𑀢𑁄𑀢𑀺 𑀫𑀫 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀇𑀢𑁄 𑀕𑀢𑁄. 𑀢𑁂𑀦 𑀫𑀁 𑀤𑀳𑀦𑁆𑀢𑀻𑀢𑀺 𑀢𑁂𑀦 𑀢𑀲𑁆𑀲 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀇𑀤𑀸𑀦𑀺 𑀫𑀁 𑀤𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀲𑀭𑀻𑀭𑁂 𑀟𑀸𑀳𑁄 𑀉𑀝𑁆𑀞𑀺𑀢𑁄, 𑀢𑁂𑀦𑀫𑁆𑀳𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀦𑀺𑀧𑀦𑁆𑀦𑁄𑀢𑀺.

𑀦 𑀦𑀽𑀦 𑀲𑁄 𑀔𑀸𑀭𑀺𑀯𑀺𑀥𑀦𑁆𑀢𑀺, 𑀢𑀸𑀢, 𑀦𑀽𑀦 𑀲𑁄 𑀫𑀸𑀡𑀯𑁄 𑀦 𑀔𑀸𑀭𑀺𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀺. 𑀔𑀺𑀮𑀸𑀦𑀻𑀢𑀺 𑀓𑀺𑀮𑀸𑀦𑀺, ‘‘𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑁄𑀔𑁆𑀬𑀦𑁆𑀢𑀺 𑀲𑀼𑀔𑀁. 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸 𑀯𑀺𑀓𑀺𑀡𑁆𑀡𑀭𑀽𑀧𑀸𑀯𑀸𑀢𑀺, 𑀢𑀸𑀢, 𑀅𑀬𑀁 𑀢𑀯 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸 𑀅𑀚𑁆𑀚 𑀫𑀬𑀸 𑀘 𑀢𑁂𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀭𑀸𑀫𑀲𑀦𑀸𑀮𑀺𑀗𑁆𑀕𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑁂𑀳𑀺 𑀯𑀺𑀓𑀺𑀡𑁆𑀡𑀸 𑀯𑀺𑀬 𑀆𑀓𑀼𑀮𑀩𑁆𑀬𑀸𑀓𑀼𑀮𑀸 𑀚𑀸𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀧𑀡𑁆𑀡𑀓𑀼𑀝𑀺𑀁 𑀯𑀚𑀸𑀫𑀸𑀢𑀺, 𑀢𑀸𑀢, 𑀅𑀳𑀜𑁆𑀘 𑀲𑁄 𑀘 𑀅𑀪𑀺𑀭𑀫𑀺𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀭𑀫𑀺𑀢𑁆𑀯𑀸 𑀯𑀺𑀕𑀢𑀤𑀭𑀣𑀸 𑀧𑀼𑀦𑀧𑁆𑀧𑀼𑀦𑀁 𑀇𑀫𑀫𑁂𑀯 𑀓𑀼𑀝𑀺𑀁 𑀧𑀯𑀺𑀲𑀸𑀫𑀸𑀢𑀺 𑀯𑀤𑀢𑀺.

𑀦 𑀫𑀚𑁆𑀚 𑀫𑀦𑁆𑀢𑀸𑀢𑀺 𑀅𑀚𑁆𑀚 𑀫𑀫 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺 𑀦 𑀭𑀼𑀘𑁆𑀘𑀦𑁆𑀢𑀺. 𑀦 𑀅𑀕𑁆𑀕𑀺𑀳𑀼𑀢𑁆𑀢𑀁 𑀦𑀧𑀺 𑀬𑀜𑁆𑀜𑀢𑀦𑁆𑀢𑀦𑁆𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀆𑀭𑀸𑀥𑀦𑀢𑁆𑀣𑀸𑀬 𑀓𑀢𑁆𑀢𑀩𑁆𑀩𑀳𑁄𑀫𑀯𑀺𑀥𑀽𑀧𑀦𑀸𑀤𑀺𑀬𑀜𑁆𑀜𑀓𑀺𑀭𑀺𑀬𑀸𑀧𑀺 𑀫𑁂 𑀦 𑀧𑀝𑀺𑀪𑀸𑀢𑀺 𑀦 𑀉𑀧𑀝𑁆𑀞𑀸𑀢𑀺 𑀦 𑀭𑀼𑀘𑁆𑀘𑀢𑀺. 𑀦 𑀘𑀸𑀧𑀺 𑀢𑁂𑀢𑀺 𑀢𑀬𑀸 𑀆𑀪𑀢𑀫𑀽𑀮𑀨𑀮𑀸𑀨𑀮𑀸𑀦𑀺𑀧𑀺 𑀦 𑀪𑀼𑀜𑁆𑀚𑀸𑀫𑀺. 𑀬𑀲𑁆𑀲𑀁 𑀤𑀺𑀲𑀦𑁆𑀢𑀺 𑀬𑀲𑁆𑀲𑀁 𑀤𑀺𑀲𑀸𑀬𑀁. 𑀯𑀦𑀦𑁆𑀢𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀅𑀲𑁆𑀲𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀯𑀦𑀦𑁆𑀢𑀺.

𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲 𑀢𑀁 𑀯𑀺𑀮𑀸𑀧𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀏𑀓𑀸𑀬 𑀇𑀢𑁆𑀣𑀺𑀬𑀸 𑀇𑀫𑀲𑁆𑀲 𑀲𑀻𑀮𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀑𑀯𑀤𑀦𑁆𑀢𑁄 𑀙 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

𑁫𑁧. ‘‘𑀇𑀫𑀲𑁆𑀫𑀸𑀳𑀁 𑀚𑁄𑀢𑀺𑀭𑀲𑁂 𑀯𑀦𑀫𑁆𑀳𑀺, 𑀕𑀦𑁆𑀥𑀩𑁆𑀩𑀤𑁂𑀯𑀘𑁆𑀙𑀭𑀲𑀗𑁆𑀖𑀲𑁂𑀯𑀺𑀢𑁂;