𑁧𑁬. 𑀢𑀺𑀁𑀲𑀦𑀺𑀧𑀸𑀢𑁄

[𑁫𑁧𑁧] 𑁧. 𑀓𑀺𑀁𑀙𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀁𑀙𑀦𑁆𑀤𑁄 𑀓𑀺𑀫𑀥𑀺𑀧𑁆𑀧𑀸𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀩𑀳𑀽 𑀉𑀧𑀸𑀲𑀓𑁂 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀉𑀧𑁄𑀲𑀣𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀺𑀦𑁆𑀦𑁂 ‘‘𑀉𑀧𑁄𑀲𑀣𑀺𑀓𑀸𑀢𑁆𑀣 𑀉𑀧𑀸𑀲𑀓𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀯𑁄 𑀓𑀢𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁂𑀳𑀺, 𑀧𑁄𑀭𑀸𑀡𑀓𑀸 𑀉𑀧𑀟𑁆𑀠𑀽𑀧𑁄𑀲𑀣𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀫𑀳𑀦𑁆𑀢𑀁 𑀬𑀲𑀁 𑀧𑀝𑀺𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀲𑀤𑁆𑀥𑁄 𑀅𑀳𑁄𑀲𑀺 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁄. 𑀲𑁄 𑀲𑁂𑀲𑁂𑀧𑀺 𑀅𑀫𑀘𑁆𑀘𑀸𑀤𑀬𑁄 𑀤𑀸𑀦𑀸𑀤𑀻𑀲𑀼 𑀲𑀫𑀸𑀤𑀧𑁂𑀲𑀺. 𑀧𑀼𑀭𑁄𑀳𑀺𑀢𑁄 𑀧𑀦𑀲𑁆𑀲 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑁄 𑀮𑀜𑁆𑀚𑀔𑀸𑀤𑀓𑁄 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑁄 𑀅𑀳𑁄𑀲𑀺. 𑀭𑀸𑀚𑀸 𑀉𑀧𑁄𑀲𑀣𑀤𑀺𑀯𑀲𑁂 𑀅𑀫𑀘𑁆𑀘𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀉𑀧𑁄𑀲𑀣𑀺𑀓𑀸 𑀳𑁄𑀣𑀸’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄 𑀉𑀧𑁄𑀲𑀣𑀁 𑀦 𑀲𑀫𑀸𑀤𑀺𑀬𑀺. 𑀅𑀣 𑀦𑀁 𑀤𑀺𑀯𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀟𑁆𑀟𑀁 𑀓𑀢𑁆𑀯𑀸 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀭𑀸𑀚𑀸 ‘‘𑀢𑀼𑀫𑁆𑀳𑁂 𑀉𑀧𑁄𑀲𑀣𑀺𑀓𑀸’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀦𑁆𑀢𑁄 ‘‘𑀢𑁆𑀯𑀫𑁆𑀧𑀺 𑀆𑀘𑀭𑀺𑀬 𑀉𑀧𑁄𑀲𑀣𑀺𑀓𑁄’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀆𑀫𑀸’’𑀢𑀺 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺. 𑀅𑀣 𑀦𑀁 𑀏𑀓𑁄 𑀅𑀫𑀘𑁆𑀘𑁄 ‘‘𑀦𑀦𑀼 𑀢𑀼𑀫𑁆𑀳𑁂 𑀦 𑀉𑀧𑁄𑀲𑀣𑀺𑀓𑀸’’𑀢𑀺 𑀘𑁄𑀤𑁂𑀲𑀺. 𑀲𑁄 𑀆𑀳 𑁋 ‘‘𑀅𑀳𑀁 𑀯𑁂𑀮𑀸𑀬𑀫𑁂𑀯 𑀪𑀼𑀜𑁆𑀚𑀺𑀁, 𑀕𑁂𑀳𑀁 𑀧𑀦 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀲𑀸𑀬𑀁 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀭𑀢𑁆𑀢𑀺𑀁 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀉𑀧𑀟𑁆𑀠𑀽𑀧𑁄𑀲𑀣𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀺𑀦𑁆𑀦𑁂 𑀅𑀜𑁆𑀜𑀢𑀭𑀸 𑀲𑀻𑀮𑀯𑀢𑀻 𑀇𑀢𑁆𑀣𑀻 𑀅𑀟𑁆𑀟𑀁 𑀓𑀭𑁄𑀦𑁆𑀢𑀻 𑀖𑀭𑀁 𑀕𑀦𑁆𑀢𑀼𑀁 𑀅𑀮𑀪𑀫𑀸𑀦𑀸 ‘‘𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑀼𑀁 𑀆𑀭𑀪𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀧𑀓𑁆𑀓𑀸𑀦𑀁 𑀅𑀫𑁆𑀩𑀨𑀮𑀸𑀦𑀁 𑀅𑀫𑁆𑀩𑀧𑀺𑀡𑁆𑀟𑀺 𑀆𑀳𑀭𑀺𑀬𑀺𑀢𑁆𑀣. 𑀲𑁄 𑀢𑀲𑁆𑀲𑀸 𑀉𑀧𑁄𑀲𑀣𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀸𑀦𑀺 𑀔𑀸𑀤𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀳𑁄𑀳𑀻’’𑀢𑀺 𑀅𑀤𑀸𑀲𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀏𑀢𑁆𑀢𑀓𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀁.

𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀓𑁄𑀲𑀺𑀓𑀺𑀕𑀗𑁆𑀕𑀸𑀬 𑀢𑀻𑀭𑁂 𑀢𑀺𑀬𑁄𑀚𑀦𑀺𑀓𑁂 𑀅𑀫𑁆𑀩𑀯𑀦𑁂 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁂 𑀓𑀦𑀓𑀯𑀺𑀫𑀸𑀦𑁂 𑀅𑀮𑀗𑁆𑀓𑀢𑀲𑀺𑀭𑀺𑀲𑀬𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀦𑀺𑀩𑁆𑀩𑀢𑁆𑀢𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀉𑀢𑁆𑀢𑀫𑀭𑀽𑀧𑀥𑀭𑁄 𑀲𑁄𑀴𑀲𑀲𑀳𑀲𑁆𑀲𑀤𑁂𑀯𑀓𑀜𑁆𑀜𑀸𑀧𑀭𑀺𑀯𑀸𑀭𑁄. 𑀲𑁄 𑀭𑀢𑁆𑀢𑀺𑀜𑁆𑀜𑁂𑀯 𑀢𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑀺. 𑀯𑁂𑀫𑀸𑀦𑀺𑀓𑀧𑁂𑀢𑀪𑀸𑀯𑁂𑀦 𑀳𑀺𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀓𑁄 𑀯𑀺𑀧𑀸𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀅𑀫𑁆𑀩𑀯𑀦𑀁 𑀧𑀯𑀺𑀲𑀢𑀺, 𑀧𑀯𑀺𑀝𑁆𑀞𑀓𑁆𑀔𑀡𑁂𑀬𑁂𑀯𑀲𑁆𑀲 𑀤𑀺𑀩𑁆𑀩𑀢𑁆𑀢𑀪𑀸𑀯𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀲𑀻𑀢𑀺𑀳𑀢𑁆𑀣𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑁄 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀲𑀓𑀮𑀲𑀭𑀻𑀭𑀁 𑀛𑀸𑀬𑀢𑀺, 𑀲𑀼𑀧𑀼𑀧𑁆𑀨𑀺𑀢𑀓𑀺𑀁𑀲𑀼𑀓𑁄 𑀯𑀺𑀬 𑀳𑁄𑀢𑀺. 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀏𑀓𑁂𑀓𑀸𑀯 𑀅𑀗𑁆𑀕𑀼𑀮𑀺, 𑀢𑀢𑁆𑀣 𑀫𑀳𑀸𑀓𑀼𑀤𑁆𑀤𑀸𑀮𑀧𑁆𑀧𑀫𑀸𑀡𑀸 𑀦𑀔𑀸 𑀳𑁄𑀦𑁆𑀢𑀺. 𑀢𑁂𑀳𑀺 𑀦𑀔𑁂𑀳𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀁 𑀨𑀸𑀮𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀫𑀳𑀸𑀭𑀯𑀁 𑀭𑀯𑀦𑁆𑀢𑁄 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀢𑀁 𑀲𑀭𑀻𑀭𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀤𑀺𑀩𑁆𑀩𑀲𑀭𑀻𑀭𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀤𑀺𑀩𑁆𑀩𑀦𑀸𑀝𑀓𑀺𑀢𑁆𑀣𑀺𑀬𑁄 𑀦𑀸𑀦𑀸𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀭𑀫𑀡𑀻𑀬𑁂 𑀅𑀫𑁆𑀩𑀯𑀦𑁂 𑀤𑀺𑀩𑁆𑀩𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀢𑀺. 𑀇𑀢𑀺 𑀲𑁄 𑀉𑀧𑁄𑀲𑀣𑀺𑀓𑀸𑀬 𑀇𑀢𑁆𑀣𑀺𑀬𑀸 𑀅𑀫𑁆𑀩𑀨𑀮𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀺𑀬𑁄𑀚𑀦𑀺𑀓𑀁 𑀅𑀫𑁆𑀩𑀯𑀦𑀁 𑀧𑀝𑀺𑀮𑀪𑀢𑀺, 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀟𑁆𑀟𑀓𑀭𑀡𑀦𑀺𑀲𑁆𑀲𑀦𑁆𑀤𑁂𑀦 𑀧𑀦 𑀧𑀺𑀝𑁆𑀞𑀺𑀫𑀁𑀲𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀸𑀤𑀢𑀺, 𑀉𑀧𑀟𑁆𑀠𑀽𑀧𑁄𑀲𑀣𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀭𑀢𑁆𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑀺, 𑀲𑁄𑀴𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀼𑀢𑁄 𑀧𑀭𑀺𑀘𑀸𑀭𑁂𑀲𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀥𑁄𑀕𑀗𑁆𑀕𑀸𑀬 𑀭𑀫𑀡𑀻𑀬𑁂 𑀪𑀽𑀫𑀺𑀧𑀤𑁂𑀲𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀬𑀸𑀧𑁂𑀦𑁆𑀢𑁄 𑀯𑀺𑀳𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀫𑁆𑀳𑀸 𑀅𑀫𑁆𑀩𑀯𑀦𑀸 𑀫𑀳𑀸𑀖𑀝𑀧𑁆𑀧𑀫𑀸𑀡𑀁 𑀅𑀫𑁆𑀩𑀧𑀓𑁆𑀓𑀁 𑀕𑀗𑁆𑀕𑀸𑀬 𑀧𑀢𑀺𑀢𑁆𑀯𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀢𑀲𑁆𑀲 𑀢𑀸𑀧𑀲𑀲𑁆𑀲 𑀧𑀭𑀺𑀪𑁄𑀕𑀢𑀺𑀢𑁆𑀣𑀸𑀪𑀺𑀫𑀼𑀔𑀁 𑀅𑀕𑀫𑀸𑀲𑀺. 𑀲𑁄 𑀫𑀼𑀔𑀁 𑀥𑁄𑀯𑀦𑁆𑀢𑁄 𑀢𑀁 𑀫𑀚𑁆𑀛𑁂 𑀦𑀤𑀺𑀬𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀉𑀤𑀓𑀁 𑀢𑀭𑀦𑁆𑀢𑁄 𑀕𑀦𑁆𑀢𑁆𑀯𑀸 𑀆𑀤𑀸𑀬 𑀅𑀲𑁆𑀲𑀫𑀧𑀤𑀁 𑀆𑀳𑀭𑀺𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀞𑀧𑁂𑀢𑁆𑀯𑀸 𑀲𑀢𑁆𑀣𑀓𑁂𑀦 𑀨𑀸𑀮𑁂𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀓𑀤𑀮𑀺𑀧𑀡𑁆𑀡𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀸𑀯 𑀧𑀭𑀺𑀓𑁆𑀔𑀬𑀸 𑀔𑀸𑀤𑀺. 𑀢𑀲𑁆𑀫𑀺𑀁 𑀧𑀦 𑀔𑀻𑀡𑁂 𑀅𑀜𑁆𑀜𑀁 𑀨𑀮𑀸𑀨𑀮𑀁 𑀔𑀸𑀤𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 ‘‘𑀢𑀫𑁂𑀯 𑀅𑀫𑁆𑀩𑀧𑀓𑁆𑀓𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀤𑀺𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀫𑁆𑀩𑀁 𑀅𑀮𑀪𑀺𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀢𑀢𑁆𑀣 𑀦𑀺𑀭𑀸𑀳𑀸𑀭𑁄 𑀏𑀓𑀫𑁆𑀧𑀺 𑀤𑀺𑀯𑀲𑀁, 𑀤𑁆𑀯𑁂𑀧𑀺, 𑀢𑀻𑀡𑀺, 𑀘𑀢𑀼, 𑀧𑀜𑁆𑀘, 𑀙 𑀤𑀺𑀯𑀲𑀸𑀦𑀺 𑀯𑀸𑀢𑀸𑀢𑀧𑁂𑀦 𑀧𑀭𑀺𑀲𑀼𑀲𑁆𑀲𑀦𑁆𑀢𑁄 𑀅𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀤𑀻𑀤𑁂𑀯𑀢𑀸 𑀆𑀯𑀚𑁆𑀚𑀫𑀸𑀦𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀅𑀬𑀁 𑀢𑀸𑀧𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀕𑀗𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺, 𑀇𑀫𑀲𑁆𑀲 𑀅𑀫𑁆𑀩𑀧𑀓𑁆𑀓𑀁 𑀅𑀤𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀤𑀲𑁆𑀲𑀸𑀫𑀺 𑀢𑀲𑁆𑀲𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀬 𑀉𑀧𑀭𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀓𑀺𑀁𑀙𑀦𑁆𑀤𑁄 𑀓𑀺𑀫𑀥𑀺𑀧𑁆𑀧𑀸𑀬𑁄, 𑀏𑀓𑁄 𑀲𑀫𑁆𑀫𑀲𑀺 𑀖𑀫𑁆𑀫𑀦𑀺;

𑀓𑀺𑀁𑀧𑀢𑁆𑀣𑀬𑀸𑀦𑁄 𑀓𑀺𑀁 𑀏𑀲𑀁, 𑀓𑁂𑀦 𑀅𑀢𑁆𑀣𑁂𑀦 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀙𑀦𑁆𑀤𑁄𑀢𑀺 𑀅𑀚𑁆𑀛𑀸𑀲𑀬𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀘𑀺𑀢𑁆𑀢𑀁. 𑀲𑀫𑁆𑀫𑀲𑀻𑀢𑀺 𑀅𑀘𑁆𑀙𑀲𑀺. 𑀖𑀫𑁆𑀫𑀦𑀻𑀢𑀺 𑀕𑀺𑀫𑁆𑀳𑁂. 𑀏𑀲𑀦𑁆𑀢𑀺 𑀏𑀲𑀦𑁆𑀢𑁄. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑀺𑀢𑀢𑁆𑀢𑀸 𑀢𑀸𑀧𑀲𑀁 𑀆𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀓𑀺𑀁 𑀅𑀥𑀺𑀧𑁆𑀧𑀸𑀬𑁄 𑀓𑀺𑀁 𑀘𑀺𑀦𑁆𑀢𑁂𑀦𑁆𑀢𑁄 𑀓𑀺𑀁 𑀧𑀢𑁆𑀣𑁂𑀦𑁆𑀢𑁄 𑀓𑀺𑀁 𑀕𑀯𑁂𑀲𑀦𑁆𑀢𑁄 𑀓𑁂𑀦𑀢𑁆𑀣𑁂𑀦 𑀇𑀫𑀲𑁆𑀫𑀺𑀁 𑀕𑀗𑁆𑀕𑀸𑀢𑀻𑀭𑁂 𑀕𑀗𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀦𑀯 𑀕𑀸𑀣𑀸 𑀅𑀪𑀸𑀲𑀺 𑁋

𑁨. ‘‘𑀬𑀣𑀸 𑀫𑀳𑀸 𑀯𑀸𑀭𑀺𑀥𑀭𑁄, 𑀓𑀼𑀫𑁆𑀪𑁄 𑀲𑀼𑀧𑀭𑀺𑀡𑀸𑀳𑀯𑀸;

𑀢𑀣𑀽𑀧𑀫𑀁 𑀅𑀫𑁆𑀩𑀧𑀓𑁆𑀓𑀁, 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀁.

𑁩. ‘‘𑀢𑀁 𑀯𑀼𑀬𑁆𑀳𑀫𑀸𑀦𑀁 𑀲𑁄𑀢𑁂𑀦, 𑀤𑀺𑀲𑁆𑀯𑀸𑀦𑀸𑀫𑀮𑀫𑀚𑁆𑀛𑀺𑀫𑁂;

𑀧𑀸𑀡𑀻𑀪𑀺 𑀦𑀁 𑀕𑀳𑁂𑀢𑁆𑀯𑀸𑀦, 𑀅𑀕𑁆𑀬𑀸𑀬𑀢𑀦𑀫𑀸𑀳𑀭𑀺𑀁.

𑁪. ‘‘𑀢𑀢𑁄 𑀓𑀤𑀮𑀺𑀧𑀢𑁆𑀢𑁂𑀲𑀼, 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀁 𑀅𑀳𑀁;

𑀲𑀢𑁆𑀣𑁂𑀦 𑀦𑀁 𑀯𑀺𑀓𑀧𑁆𑀧𑁂𑀢𑁆𑀯𑀸, 𑀔𑀼𑀧𑁆𑀧𑀺𑀧𑀸𑀲𑀁 𑀅𑀳𑀸𑀲𑀺 𑀫𑁂.

𑁫. ‘‘𑀲𑁄𑀳𑀁 𑀅𑀧𑁂𑀢𑀤𑀭𑀣𑁄, 𑀩𑁆𑀬𑀦𑁆𑀢𑀻𑀪𑀽𑀢𑁄 𑀤𑀼𑀔𑀓𑁆𑀔𑀫𑁄;

𑀅𑀲𑁆𑀲𑀸𑀤𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀨𑀮𑁂𑀲𑁆𑀯𑀜𑁆𑀜𑁂𑀲𑀼 𑀓𑁂𑀲𑀼𑀘𑀺.

𑁬. ‘‘𑀲𑁄𑀲𑁂𑀢𑁆𑀯𑀸 𑀦𑀽𑀦 𑀫𑀭𑀡𑀁, 𑀢𑀁 𑀫𑀫𑀁 𑀆𑀯𑀳𑀺𑀲𑁆𑀲𑀢𑀺;

𑀅𑀫𑁆𑀩𑀁 𑀬𑀲𑁆𑀲 𑀨𑀮𑀁 𑀲𑀸𑀤𑀼, 𑀫𑀥𑀼𑀭𑀕𑁆𑀕𑀁 𑀫𑀦𑁄𑀭𑀫𑀁;

𑀬𑀫𑀼𑀤𑁆𑀥𑀭𑀺𑀁 𑀯𑀼𑀬𑁆𑀳𑀫𑀸𑀦𑀁, 𑀉𑀤𑀥𑀺𑀲𑁆𑀫𑀸 𑀫𑀳𑀡𑁆𑀡𑀯𑁂.

𑁭. ‘‘𑀅𑀓𑁆𑀔𑀸𑀢𑀁 𑀢𑁂 𑀫𑀬𑀸 𑀲𑀩𑁆𑀩𑀁, 𑀬𑀲𑁆𑀫𑀸 𑀉𑀧𑀯𑀲𑀸𑀫𑀳𑀁;

𑀭𑀫𑁆𑀫𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄𑀲𑁆𑀫𑀺, 𑀧𑀼𑀣𑀼𑀮𑁄𑀫𑀸𑀬𑀼𑀢𑀸 𑀧𑀼𑀣𑀼.

𑁮. ‘‘𑀢𑁆𑀯𑀜𑁆𑀘 𑀔𑁄 𑀫𑁂𑀯 𑀅𑀓𑁆𑀔𑀸𑀳𑀺, 𑀅𑀢𑁆𑀢𑀸𑀦𑀫𑀧𑀮𑀸𑀬𑀺𑀦𑀺;

𑀓𑀸 𑀯𑀸 𑀢𑁆𑀯𑀫𑀲𑀺 𑀓𑀮𑁆𑀬𑀸𑀡𑀺, 𑀓𑀺𑀲𑁆𑀲 𑀯𑀸 𑀢𑁆𑀯𑀁 𑀲𑀼𑀫𑀚𑁆𑀛𑀺𑀫𑁂.

𑁯. ‘‘𑀭𑀼𑀧𑁆𑀧𑀧𑀝𑁆𑀝𑀧𑀮𑀺𑀫𑀝𑁆𑀞𑀻𑀯, 𑀩𑁆𑀬𑀕𑁆𑀖𑀻𑀯 𑀕𑀺𑀭𑀺𑀲𑀸𑀦𑀼𑀚𑀸;

𑀬𑀸 𑀲𑀦𑁆𑀢𑀺 𑀦𑀸𑀭𑀺𑀬𑁄 𑀤𑁂𑀯𑁂𑀲𑀼, 𑀤𑁂𑀯𑀸𑀦𑀁 𑀧𑀭𑀺𑀘𑀸𑀭𑀺𑀓𑀸.

𑁧𑁦. ‘‘𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑀲𑁆𑀫𑀺𑀁, 𑀭𑀽𑀧𑁂𑀦𑀸𑀦𑁆𑀯𑀸𑀕𑀢𑀺𑀢𑁆𑀣𑀺𑀬𑁄;

𑀭𑀽𑀧𑁂𑀦 𑀢𑁂 𑀲𑀤𑀺𑀲𑀻 𑀦𑀢𑁆𑀣𑀺, 𑀤𑁂𑀯𑁂𑀲𑀼 𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂;

𑀧𑀼𑀝𑁆𑀞𑀸𑀲𑀺 𑀫𑁂 𑀘𑀸𑀭𑀼𑀧𑀼𑀩𑁆𑀩𑀗𑁆𑀕𑀺, 𑀩𑁆𑀭𑀽𑀳𑀺 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂’’𑀢𑀺.

𑀢𑀢𑁆𑀣 𑀯𑀸𑀭𑀺𑀥𑀭𑁄 𑀓𑀼𑀫𑁆𑀪𑁄𑀢𑀺 𑀉𑀤𑀓𑀖𑀝𑁄. 𑀲𑀼𑀧𑀭𑀺𑀡𑀸𑀳𑀯𑀸𑀢𑀺 𑀲𑀼𑀲𑀡𑁆𑀞𑀸𑀦𑁄. 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀦𑁆𑀢𑀺 𑀯𑀡𑁆𑀡𑀕𑀦𑁆𑀥𑀭𑀲𑁂𑀳𑀺 𑀉𑀢𑁆𑀢𑀫𑀁. 𑀤𑀺𑀲𑁆𑀯𑀸𑀦𑀸𑀢𑀺 𑀤𑀺𑀲𑁆𑀯𑀸. 𑀅𑀫𑀮𑀫𑀚𑁆𑀛𑀺𑀫𑁂𑀢𑀺 𑀦𑀺𑀫𑁆𑀫𑀮𑀫𑀚𑁆𑀛𑁂. 𑀤𑁂𑀯𑀢𑀁 𑀆𑀮𑀧𑀦𑁆𑀢𑁄 𑀏𑀯𑀫𑀸𑀳. 𑀧𑀸𑀡𑀻𑀪𑀻𑀢𑀺 𑀳𑀢𑁆𑀣𑁂𑀳𑀺. 𑀅𑀕𑁆𑀬𑀸𑀬𑀢𑀦𑀫𑀸𑀳𑀭𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀕𑁆𑀕𑀺𑀳𑀼𑀢𑀲𑀸𑀮𑀁 𑀆𑀳𑀭𑀺𑀁. 𑀯𑀺𑀓𑀧𑁆𑀧𑁂𑀢𑁆𑀯𑀸𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. ‘‘𑀯𑀺𑀓𑀦𑁆𑀢𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄. ‘‘𑀔𑀸𑀤𑀺’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀅𑀳𑀸𑀲𑀺 𑀫𑁂𑀢𑀺 𑀢𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑀫𑀢𑁆𑀢𑀫𑁂𑀯 𑀲𑀢𑁆𑀢 𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀨𑀭𑀺𑀢𑁆𑀯𑀸 𑀫𑀫 𑀔𑀼𑀤𑀜𑁆𑀘 𑀧𑀺𑀧𑀸𑀲𑀜𑁆𑀘 𑀳𑀭𑀺. 𑀅𑀧𑁂𑀢𑀤𑀭𑀣𑁄𑀢𑀺 𑀯𑀺𑀕𑀢𑀓𑀸𑀬𑀘𑀺𑀢𑁆𑀢𑀤𑀭𑀣𑁄. 𑀲𑀼𑀥𑀸𑀪𑁄𑀚𑀦𑀁 𑀪𑀼𑀢𑁆𑀢𑀲𑁆𑀲 𑀯𑀺𑀬 𑀳𑀺 𑀢𑀲𑁆𑀲 𑀲𑀩𑁆𑀩𑀤𑀭𑀣𑀁 𑀅𑀧𑀳𑀭𑀺. 𑀩𑁆𑀬𑀦𑁆𑀢𑀻𑀪𑀽𑀢𑁄𑀢𑀺 𑀢𑀲𑁆𑀲 𑀅𑀫𑁆𑀩𑀧𑀓𑁆𑀓𑀲𑁆𑀲 𑀯𑀺𑀕𑀢𑀦𑁆𑀢𑁄 𑀚𑀸𑀢𑁄, 𑀧𑀭𑀺𑀓𑁆𑀔𑀻𑀡𑀅𑀫𑁆𑀩𑀧𑀓𑁆𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀼𑀔𑀓𑁆𑀔𑀫𑁄𑀢𑀺 𑀤𑀼𑀓𑁆𑀔𑁂𑀦 𑀅𑀲𑀸𑀢𑁂𑀦 𑀓𑀸𑀬𑀓𑁆𑀔𑀫𑁂𑀦 𑀘𑁂𑀯 𑀘𑀺𑀢𑁆𑀢𑀓𑁆𑀔𑀫𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀅𑀜𑁆𑀜𑁂𑀲𑀼 𑀧𑀦 𑀓𑀤𑀮𑀺𑀧𑀦𑀲𑀸𑀤𑀻𑀲𑀼 𑀨𑀮𑁂𑀲𑀼 𑀧𑀭𑀺𑀢𑁆𑀢𑀓𑀫𑁆𑀧𑀺 𑀅𑀲𑁆𑀲𑀸𑀤𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀲𑀩𑁆𑀩𑀸𑀦𑀺 𑀫𑁂 𑀚𑀺𑀯𑁆𑀳𑀸𑀬 𑀞𑀧𑀺𑀢𑀫𑀢𑁆𑀢𑀸𑀦𑀺 𑀢𑀺𑀢𑁆𑀢𑀓𑀸𑀦𑁂𑀯 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀲𑁄𑀲𑁂𑀢𑁆𑀯𑀸𑀢𑀺 𑀦𑀺𑀭𑀸𑀳𑀸𑀭𑀢𑀸𑀬 𑀲𑁄𑀲𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸. 𑀢𑀁 𑀫𑀫𑀦𑁆𑀢𑀺 𑀢𑀁 𑀫𑀫. 𑀬𑀲𑁆𑀲𑀸𑀢𑀺 𑀬𑀁 𑀅𑀲𑁆𑀲, 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀨𑀮𑀁 𑀫𑀫 𑀲𑀸𑀤𑀼 𑀅𑀳𑁄𑀲𑀺, 𑀬𑀫𑀳𑀁 𑀕𑀫𑁆𑀪𑀻𑀭𑁂 𑀧𑀼𑀣𑀼𑀮𑀉𑀤𑀓𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀫𑀳𑀡𑁆𑀡𑀯𑁂 𑀯𑀼𑀬𑁆𑀳𑀫𑀸𑀦𑀁 𑀢𑀢𑁄 𑀉𑀤𑀥𑀺𑀲𑁆𑀫𑀸 𑀉𑀤𑁆𑀥𑀭𑀺𑀁, 𑀢𑀁 𑀅𑀫𑁆𑀩𑀁 𑀫𑀫 𑀫𑀭𑀡𑀁 𑀆𑀯𑀳𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀸𑀫𑀺, 𑀫𑀬𑁆𑀳𑀁 𑀢𑀁 𑀅𑀮𑀪𑀦𑁆𑀢𑀲𑁆𑀲 𑀚𑀻𑀯𑀺𑀢𑀁 𑀦𑀧𑁆𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺. 𑀉𑀧𑀯𑀲𑀸𑀫𑀻𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀉𑀧𑀕𑀢𑁄 𑀯𑀲𑀸𑀫𑀺. 𑀭𑀫𑁆𑀫𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄𑀲𑁆𑀫𑀻𑀢𑀺 𑀭𑀫𑀡𑀻𑀬𑀁 𑀦𑀤𑀺𑀁 𑀧𑀢𑀺 𑀅𑀳𑀁 𑀦𑀺𑀲𑀺𑀦𑁆𑀦𑁄. 𑀧𑀼𑀣𑀼𑀮𑁄𑀫𑀸𑀬𑀼𑀢𑀸 𑀧𑀼𑀣𑀽𑀢𑀺 𑀅𑀬𑀁 𑀦𑀤𑀻 𑀧𑀼𑀣𑀼𑀮𑁄𑀫𑁂𑀳𑀺 𑀫𑀘𑁆𑀙𑁂𑀳𑀺 𑀆𑀬𑀼𑀢𑀸 𑀧𑀼𑀣𑀼 𑀯𑀺𑀧𑀼𑀮𑀸, 𑀅𑀧𑀺 𑀦𑀸𑀫 𑀫𑁂 𑀇𑀢𑁄 𑀲𑁄𑀢𑁆𑀣𑀺 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀮𑀸𑀬𑀺𑀦𑀻𑀢𑀺 𑀅𑀧𑀮𑀸𑀬𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑁂 𑀞𑀺𑀢𑁂𑀢𑀺 𑀢𑀁 𑀤𑁂𑀯𑀢𑀁 𑀆𑀮𑀧𑀢𑀺. ‘‘𑀅𑀧𑀮𑀸𑀲𑀺𑀦𑀻’’𑀢𑀺𑀧𑀺 𑀧𑀸𑀞𑁄, 𑀧𑀮𑀸𑀲𑀭𑀳𑀺𑀢𑁂 𑀅𑀦𑀯𑀚𑁆𑀚𑀲𑀭𑀻𑀭𑁂𑀢𑀺 𑀅𑀢𑁆𑀣𑁄. 𑀓𑀺𑀲𑁆𑀲 𑀯𑀸𑀢𑀺 𑀓𑀺𑀲𑁆𑀲 𑀯𑀸 𑀓𑀸𑀭𑀡𑀸 𑀇𑀥𑀸𑀕𑀢𑀸𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀭𑀽𑀧𑀧𑀝𑁆𑀝𑀧𑀮𑀺𑀫𑀝𑁆𑀞𑀻𑀯𑀸𑀢𑀺 𑀲𑀼𑀝𑁆𑀞𑀼 𑀧𑀭𑀺𑀫𑀚𑁆𑀚𑀺𑀢𑀓𑀜𑁆𑀘𑀦𑀧𑀝𑁆𑀝𑀲𑀤𑀺𑀲𑀻. 𑀩𑁆𑀬𑀕𑁆𑀖𑀻𑀯𑀸𑀢𑀺 𑀮𑀻𑀮𑀸𑀯𑀺𑀮𑀸𑀲𑁂𑀦 𑀢𑀭𑀼𑀡𑀩𑁆𑀬𑀕𑁆𑀖𑀧𑁄𑀢𑀺𑀓𑀸 𑀯𑀺𑀬. 𑀤𑁂𑀯𑀸𑀦𑀦𑁆𑀢𑀺 𑀙𑀦𑁆𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁. 𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑀲𑁆𑀫𑀺𑀦𑁆𑀢𑀺 𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂. 𑀭𑀽𑀧𑁂𑀦𑀸𑀦𑁆𑀯𑀸𑀕𑀢𑀺𑀢𑁆𑀣𑀺𑀬𑁄𑀢𑀺 𑀭𑀽𑀧𑁂𑀦 𑀅𑀦𑁆𑀯𑀸𑀕𑀢𑀸 𑀇𑀢𑁆𑀣𑀺𑀬𑁄 𑀦𑀢𑁆𑀣𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀪𑀸𑀯𑀦𑀸𑀬 𑀏𑀯𑀫𑀸𑀳. 𑀢𑀯 𑀭𑀽𑀧𑀲𑀤𑀺𑀲𑀸𑀬 𑀦𑀸𑀫 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀳𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀫𑀽𑀮𑀕𑀦𑁆𑀥𑀸𑀤𑀺𑀦𑀺𑀲𑁆𑀲𑀺𑀢𑁂𑀲𑀼 𑀕𑀦𑁆𑀥𑀩𑁆𑀩𑁂𑀲𑀼 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘. 𑀘𑀸𑀭𑀼𑀧𑀼𑀩𑁆𑀩𑀗𑁆𑀕𑀻𑀢𑀺 𑀘𑀸𑀭𑀼𑀦𑀸 𑀧𑀼𑀩𑁆𑀩𑀗𑁆𑀕𑁂𑀦 𑀊𑀭𑀼𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂𑀢𑀺 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀜𑁆𑀘 𑀩𑀦𑁆𑀥𑀯𑁂 𑀘 𑀫𑀬𑁆𑀳𑀁 𑀅𑀓𑁆𑀔𑀸𑀳𑀻𑀢𑀺 𑀯𑀤𑀢𑀺.

𑀢𑀢𑁄 𑀤𑁂𑀯𑀥𑀻𑀢𑀸 𑀅𑀝𑁆𑀞 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧. ‘‘𑀬𑀁 𑀢𑁆𑀯𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄𑀲𑀺, 𑀭𑀫𑁆𑀫𑀁 𑀩𑁆𑀭𑀸𑀳𑁆𑀫𑀡 𑀓𑁄𑀲𑀺𑀓𑀺𑀁;

𑀲𑀸𑀳𑀁 𑀪𑀼𑀲𑀸𑀮𑀬𑀸𑀯𑀼𑀢𑁆𑀣𑀸, 𑀯𑀭𑀯𑀸𑀭𑀺𑀯𑀳𑁄𑀖𑀲𑀸.

𑁧𑁨. ‘‘𑀦𑀸𑀦𑀸𑀤𑀼𑀫𑀕𑀡𑀸𑀓𑀺𑀡𑁆𑀡𑀸, 𑀩𑀳𑀼𑀓𑀸 𑀕𑀺𑀭𑀺𑀓𑀦𑁆𑀤𑀭𑀸;

𑀫𑀫𑁂𑀯 𑀧𑀫𑀼𑀔𑀸 𑀳𑁄𑀦𑁆𑀢𑀺, 𑀅𑀪𑀺𑀲𑀦𑁆𑀤𑀦𑁆𑀢𑀺 𑀧𑀸𑀯𑀼𑀲𑁂.

𑁧𑁩. ‘‘𑀅𑀣𑁄 𑀩𑀳𑀽 𑀯𑀦𑀢𑁄𑀤𑀸, 𑀦𑀻𑀮𑀯𑀸𑀭𑀺𑀯𑀳𑀺𑀦𑁆𑀥𑀭𑀸;

𑀩𑀳𑀼𑀓𑀸 𑀦𑀸𑀕𑀯𑀺𑀢𑁆𑀢𑁄𑀤𑀸, 𑀅𑀪𑀺𑀲𑀦𑁆𑀤𑀦𑁆𑀢𑀺 𑀯𑀸𑀭𑀺𑀦𑀸.

𑁧𑁪. ‘‘𑀢𑀸 𑀅𑀫𑁆𑀩𑀚𑀫𑁆𑀩𑀼𑀮𑀩𑀼𑀚𑀸, 𑀦𑀻𑀧𑀸 𑀢𑀸𑀮𑀸 𑀘𑀼𑀤𑀼𑀫𑁆𑀩𑀭𑀸;

𑀩𑀳𑀽𑀦𑀺 𑀨𑀮𑀚𑀸𑀢𑀸𑀦𑀺, 𑀆𑀯𑀳𑀦𑁆𑀢𑀺 𑀅𑀪𑀺𑀡𑁆𑀳𑀲𑁄.

𑁧𑁫. ‘‘𑀬𑀁 𑀓𑀺𑀜𑁆𑀘𑀺 𑀉𑀪𑀢𑁄 𑀢𑀻𑀭𑁂, 𑀨𑀮𑀁 𑀧𑀢𑀢𑀺 𑀅𑀫𑁆𑀩𑀼𑀦𑀺;

𑀅𑀲𑀁𑀲𑀬𑀁 𑀢𑀁 𑀲𑁄𑀢𑀲𑁆𑀲, 𑀨𑀮𑀁 𑀳𑁄𑀢𑀺 𑀯𑀲𑀸𑀦𑀼𑀕𑀁.

𑁧𑁬. ‘‘𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀺, 𑀧𑀼𑀣𑀼𑀧𑀜𑁆𑀜 𑀲𑀼𑀡𑁄𑀳𑀺 𑀫𑁂;

𑀫𑀸 𑀭𑁄𑀘𑀬 𑀫𑀪𑀺𑀲𑀗𑁆𑀕𑀁, 𑀧𑀝𑀺𑀲𑁂𑀥 𑀚𑀦𑀸𑀥𑀺𑀧.

𑁧𑁭. ‘‘𑀦 𑀯𑀸𑀳𑀁 𑀯𑀟𑁆𑀠𑀯𑀁 𑀫𑀜𑁆𑀜𑁂, 𑀬𑀁 𑀢𑁆𑀯𑀁 𑀭𑀝𑁆𑀞𑀸𑀪𑀺𑀯𑀟𑁆𑀠𑀦;

𑀆𑀘𑁂𑀬𑁆𑀬𑀫𑀸𑀦𑁄 𑀭𑀸𑀚𑀺𑀲𑀺, 𑀫𑀭𑀡𑀁 𑀅𑀪𑀺𑀓𑀗𑁆𑀔𑀲𑀺.

𑁧𑁮. ‘‘𑀢𑀲𑁆𑀲 𑀚𑀸𑀦𑀦𑁆𑀢𑀺 𑀧𑀺𑀢𑀭𑁄, 𑀕𑀦𑁆𑀥𑀩𑁆𑀩𑀸 𑀘 𑀲𑀤𑁂𑀯𑀓𑀸;

𑀬𑁂 𑀘𑀸𑀧𑀺 𑀇𑀲𑀬𑁄 𑀮𑁄𑀓𑁂, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀅𑀲𑀁𑀲𑀬𑀁 𑀢𑁂𑀧𑀺 𑀚𑀸𑀦𑀦𑁆𑀢𑀺, 𑀧𑀝𑁆𑀞𑀪𑀽𑀢𑀸 𑀬𑀲𑀲𑁆𑀲𑀺𑀦𑁄’’𑀢𑀺.

𑀢𑀢𑁆𑀣 𑀓𑁄𑀲𑀺𑀓𑀺𑀦𑁆𑀢𑀺 𑀬𑀁 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀭𑀫𑁆𑀫𑀁 𑀓𑁄𑀲𑀺𑀓𑀺𑀁 𑀕𑀗𑁆𑀕𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄. 𑀪𑀼𑀲𑀸𑀮𑀬𑀸𑀯𑀼𑀢𑁆𑀣𑀸𑀢𑀺 𑀪𑀼𑀲𑁂 𑀘𑀡𑁆𑀟𑀲𑁄𑀢𑁂 𑀆𑀮𑀬𑁄 𑀬𑀲𑁆𑀲 𑀯𑀺𑀫𑀸𑀦𑀲𑁆𑀲, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑀸, 𑀕𑀗𑁆𑀕𑀝𑁆𑀞𑀓𑀯𑀺𑀫𑀸𑀦𑀯𑀸𑀲𑀺𑀦𑀻𑀢𑀺 𑀅𑀢𑁆𑀣𑁄. 𑀯𑀭𑀯𑀸𑀭𑀺𑀯𑀳𑁄𑀖𑀲𑀸𑀢𑀺 𑀯𑀭𑀯𑀸𑀭𑀺𑀯𑀳𑁂𑀦 𑀑𑀖𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀧𑀫𑀼𑀔𑀸𑀢𑀺 𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀕𑀺𑀭𑀺𑀓𑀦𑁆𑀤𑀭𑀸 𑀫𑀁 𑀧𑀫𑀼𑀔𑀁 𑀓𑀭𑁄𑀦𑁆𑀢𑀺, 𑀅𑀳𑀁 𑀢𑀸𑀲𑀁 𑀧𑀸𑀫𑁄𑀓𑁆𑀔𑀸 𑀳𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀲𑀦𑁆𑀤𑀦𑁆𑀢𑀻𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀓𑁄𑀲𑀺𑀓𑀺𑀕𑀗𑁆𑀕𑀁 𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀢𑁄𑀤𑀸𑀢𑀺 𑀦 𑀓𑁂𑀯𑀮𑀁 𑀓𑀦𑁆𑀤𑀭𑀸𑀯, 𑀅𑀣 𑀔𑁄 𑀩𑀳𑀽 𑀯𑀦𑀢𑁄𑀤𑀸 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀦𑀫𑁆𑀳𑀸 𑀉𑀤𑀓𑀸𑀦𑀺𑀧𑀺 𑀫𑀁 𑀩𑀳𑀽𑀦𑀺 𑀧𑀯𑀺𑀲𑀦𑁆𑀢𑀺. 𑀦𑀻𑀮𑀯𑀸𑀭𑀺𑀯𑀳𑀺𑀦𑁆𑀥𑀭𑀸𑀢𑀺 𑀫𑀡𑀺𑀯𑀡𑁆𑀡𑁂𑀦 𑀦𑀻𑀮𑀯𑀸𑀭𑀺𑀦𑀸 𑀬𑀼𑀢𑁆𑀢𑁂 𑀉𑀤𑀓𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀯𑀳𑁂 𑀥𑀸𑀭𑀬𑀦𑁆𑀢𑀺𑀬𑁄. 𑀦𑀸𑀕𑀯𑀺𑀢𑁆𑀢𑁄𑀤𑀸𑀢𑀺 𑀦𑀸𑀕𑀸𑀦𑀁 𑀯𑀺𑀢𑁆𑀢𑀺𑀓𑀸𑀭𑁂𑀦 𑀥𑀦𑀲𑀗𑁆𑀔𑀸𑀢𑁂𑀦 𑀯𑀸 𑀉𑀤𑀓𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀯𑀸𑀭𑀺𑀦𑀸𑀢𑀺 𑀏𑀯𑀭𑀽𑀧𑀸 𑀳𑀺 𑀩𑀳𑀽 𑀦𑀤𑀺𑀬𑁄 𑀫𑀁 𑀯𑀸𑀭𑀺𑀦𑀸𑀯 𑀅𑀪𑀺𑀲𑀦𑁆𑀤𑀦𑁆𑀢𑀺 𑀧𑀽𑀭𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀸𑀢𑀺 𑀢𑀸 𑀦𑀤𑀺𑀬𑁄. 𑀆𑀯𑀳𑀦𑁆𑀢𑀻𑀢𑀺 𑀏𑀢𑀸𑀦𑀺 𑀅𑀫𑁆𑀩𑀸𑀤𑀻𑀦𑀺 𑀆𑀓𑀟𑁆𑀠𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀳𑀺 𑀏𑀢𑀸𑀦𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺. 𑀅𑀣 𑀯𑀸 𑀢𑀸𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀆𑀯𑀳𑀦𑁆𑀢𑀻𑀢𑀺 𑀇𑀫𑀸𑀦𑀺 𑀅𑀫𑁆𑀩𑀸𑀤𑀻𑀦𑀺 𑀢𑀸 𑀦𑀤𑀺𑀬𑁄 𑀆𑀕𑀘𑁆𑀙𑀦𑁆𑀢𑀺, 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀏𑀯𑀁 𑀉𑀧𑀕𑀢𑀸𑀦𑀺 𑀧𑀦 𑀫𑀫 𑀲𑁄𑀢𑀁 𑀧𑀯𑀺𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀢𑀲𑁆𑀲𑀸𑀢𑀺 𑀬𑀁 𑀉𑀪𑀢𑁄 𑀢𑀻𑀭𑁂 𑀚𑀸𑀢𑀭𑀼𑀓𑁆𑀔𑁂𑀳𑀺 𑀨𑀮𑀁 𑀫𑀫 𑀅𑀫𑁆𑀩𑀼𑀦𑀺 𑀧𑀢𑀢𑀺, 𑀲𑀩𑁆𑀩𑀁 𑀢𑀁 𑀫𑀫 𑀲𑁄𑀢𑀲𑁆𑀲𑁂𑀯 𑀯𑀲𑀸𑀦𑀼𑀕𑀁 𑀳𑁄𑀢𑀺. 𑀦𑀢𑁆𑀣𑁂𑀢𑁆𑀣 𑀲𑀁𑀲𑀬𑁄𑀢𑀺 𑀏𑀯𑀁 𑀅𑀫𑁆𑀩𑀧𑀓𑁆𑀓𑀲𑁆𑀲 𑀦𑀤𑀻𑀲𑁄𑀢𑁂𑀦 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀲𑀺.

𑀫𑁂𑀥𑀸𑀯𑀺 𑀧𑀼𑀣𑀼𑀧𑀜𑁆𑀜𑀸𑀢𑀺 𑀉𑀪𑀬𑀁 𑀆𑀮𑀧𑀦𑀫𑁂𑀯. 𑀫𑀸 𑀭𑁄𑀘𑀬𑀸𑀢𑀺 𑀏𑀯𑀁 𑀢𑀡𑁆𑀳𑀸𑀪𑀺𑀲𑀗𑁆𑀕𑀁 𑀫𑀸 𑀭𑁄𑀘𑀬. 𑀧𑀝𑀺𑀲𑁂𑀥𑀸𑀢𑀺 𑀧𑀝𑀺𑀲𑁂𑀥𑁂𑀳𑀺 𑀦𑀦𑁆𑀢𑀺 𑀭𑀸𑀚𑀸𑀦𑀁 𑀑𑀯𑀤𑀢𑀺. 𑀯𑀟𑁆𑀠𑀯𑀦𑁆𑀢𑀺 𑀧𑀜𑁆𑀜𑀸𑀯𑀟𑁆𑀠𑀪𑀸𑀯𑀁 𑀧𑀡𑁆𑀟𑀺𑀢𑀪𑀸𑀯𑀁. 𑀭𑀝𑁆𑀞𑀸𑀪𑀺𑀯𑀟𑁆𑀠𑀦𑀸𑀢𑀺 𑀭𑀝𑁆𑀞𑀲𑁆𑀲 𑀅𑀪𑀺𑀯𑀟𑁆𑀠𑀦. 𑀆𑀘𑁂𑀬𑁆𑀬𑀫𑀸𑀦𑁄𑀢𑀺 𑀫𑀁𑀲𑀮𑁄𑀳𑀺𑀢𑁂𑀳𑀺 𑀆𑀘𑀺𑀬𑀦𑁆𑀢𑁄 𑀯𑀟𑁆𑀠𑀦𑁆𑀢𑁄, 𑀢𑀭𑀼𑀡𑁄𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀭𑀸𑀚𑀺𑀲𑀻𑀢𑀺 𑀢𑀁 𑀆𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑁆𑀯𑀁 𑀦𑀺𑀭𑀸𑀳𑀸𑀭𑀢𑀸𑀬 𑀲𑀼𑀲𑁆𑀲𑀫𑀸𑀦𑁄 𑀢𑀭𑀼𑀡𑁄𑀯 𑀲𑀫𑀸𑀦𑁄 𑀅𑀫𑁆𑀩𑀮𑁄𑀪𑁂𑀦 𑀫𑀭𑀡𑀁 𑀅𑀪𑀺𑀓𑀗𑁆𑀔𑀲𑀺, 𑀦 𑀯𑁂 𑀅𑀳𑀁 𑀢𑀯 𑀇𑀫𑀁 𑀧𑀡𑁆𑀟𑀺𑀢𑀪𑀸𑀯𑀁 𑀫𑀜𑁆𑀜𑀸𑀫𑀻𑀢𑀺.

𑀢𑀲𑁆𑀲𑀸𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀢𑀡𑁆𑀳𑀸𑀯𑀲𑀺𑀓𑀪𑀸𑀯𑀁 ‘‘𑀧𑀺𑀢𑀭𑁄’’𑀢𑀺 𑀲𑀗𑁆𑀔𑀁 𑀕𑀢𑀸 𑀩𑁆𑀭𑀳𑁆𑀫𑀸𑀦𑁄 𑀘 𑀲𑀤𑁆𑀥𑀺𑀁 𑀓𑀸𑀫𑀸𑀯𑀘𑀭𑀤𑁂𑀯𑁂𑀳𑀺 𑀕𑀦𑁆𑀥𑀩𑁆𑀩𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀇𑀲𑀬𑁄 𑀘 𑀅𑀲𑀁𑀲𑀬𑀁 𑀚𑀸𑀦𑀦𑁆𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀢𑁂 𑀇𑀤𑁆𑀥𑀺𑀫𑀦𑁆𑀢𑁄 𑀚𑀸𑀦𑁂𑀬𑁆𑀬𑀼𑀁, ‘‘𑀅𑀲𑀼𑀓𑁄 𑀳𑀺 𑀦𑀸𑀫 𑀢𑀡𑁆𑀳𑀸𑀯𑀲𑀺𑀓𑁄 𑀳𑁄𑀢𑀻’’𑀢𑀺. 𑀧𑀼𑀦 𑀢𑁂𑀲𑀁 𑀪𑀸𑀲𑀫𑀸𑀦𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀧𑀺 𑀢𑁂𑀲𑀁 𑀧𑀝𑁆𑀞𑀪𑀽𑀢𑀸 𑀬𑀲𑀲𑁆𑀲𑀺𑀦𑁄 𑀧𑀭𑀺𑀘𑀸𑀭𑀓𑀸, 𑀢𑁂𑀧𑀺 𑀚𑀸𑀦𑀦𑁆𑀢𑀺. 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀭𑀳𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀢𑀸𑀧𑀲𑀲𑁆𑀲 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀻 𑀏𑀯𑀫𑀸𑀳.

𑀢𑀢𑁄 𑀢𑀸𑀧𑀲𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁯. ‘‘𑀏𑀯𑀁 𑀯𑀺𑀤𑀺𑀢𑁆𑀯𑀸 𑀯𑀺𑀤𑀽 𑀲𑀩𑁆𑀩𑀥𑀫𑁆𑀫𑀁, 𑀯𑀺𑀤𑁆𑀥𑀁𑀲𑀦𑀁 𑀘𑀯𑀦𑀁 𑀚𑀻𑀯𑀺𑀢𑀲𑁆𑀲;

𑀦 𑀘𑀻𑀬𑀢𑀻 𑀢𑀲𑁆𑀲 𑀦𑀭𑀲𑁆𑀲 𑀧𑀸𑀧𑀁, 𑀲𑀘𑁂 𑀦 𑀘𑁂𑀢𑁂𑀢𑀺 𑀯𑀥𑀸𑀬 𑀢𑀲𑁆𑀲.

𑁨𑁦. ‘‘𑀇𑀲𑀺𑀧𑀽𑀕𑀲𑀫𑀜𑁆𑀜𑀸𑀢𑁂, 𑀏𑀯𑀁 𑀮𑁄𑀓𑁆𑀬𑀸 𑀯𑀺𑀤𑀺𑀢𑀸 𑀲𑀢𑀺;

𑀅𑀦𑀭𑀺𑀬𑀧𑀭𑀺𑀲𑀫𑁆𑀪𑀸𑀲𑁂, 𑀧𑀸𑀧𑀓𑀫𑁆𑀫𑀁 𑀚𑀺𑀕𑀻𑀲𑀲𑀺.

𑁨𑁧. ‘‘𑀲𑀘𑁂 𑀅𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀢𑀻𑀭𑁂 𑀢𑁂 𑀧𑀼𑀣𑀼𑀲𑀼𑀲𑁆𑀲𑁄𑀡𑀺;

𑀅𑀲𑀁𑀲𑀬𑀁 𑀢𑀁 𑀅𑀲𑀺𑀮𑁄𑀓𑁄, 𑀫𑀬𑀺 𑀧𑁂𑀢𑁂 𑀆𑀕𑀫𑀺𑀲𑁆𑀲𑀢𑀺.

𑁨𑁨. ‘‘𑀢𑀲𑁆𑀫𑀸 𑀳𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀭𑀓𑁆𑀔𑀲𑁆𑀲𑁂𑀯 𑀲𑀼𑀫𑀚𑁆𑀛𑀺𑀫𑁂;

𑀫𑀸 𑀢𑀁 𑀲𑀩𑁆𑀩𑁄 𑀚𑀦𑁄 𑀧𑀘𑁆𑀙𑀸, 𑀧𑀓𑀼𑀝𑁆𑀞𑀸𑀬𑀺 𑀫𑀬𑀺 𑀫𑀢𑁂’’𑀢𑀺.

𑀢𑀢𑁆𑀣 𑀏𑀯𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀣𑀸 𑀅𑀳𑀁 𑀲𑀻𑀮𑀜𑁆𑀘 𑀅𑀦𑀺𑀘𑁆𑀘𑀢𑀜𑁆𑀘 𑀚𑀸𑀦𑀸𑀫𑀺, 𑀏𑀯𑀁 𑀚𑀸𑀦𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀯𑀺𑀤𑀽𑀢𑀺 𑀯𑀺𑀤𑀼𑀦𑁄. 𑀲𑀩𑁆𑀩𑀥𑀫𑁆𑀫𑀦𑁆𑀢𑀺 𑀲𑀩𑁆𑀩𑀁 𑀲𑀼𑀘𑀭𑀺𑀢𑀥𑀫𑁆𑀫𑀁. 𑀢𑀺𑀯𑀺𑀥𑀜𑁆𑀳𑀺 𑀲𑀼𑀘𑀭𑀺𑀢𑀁 𑀇𑀥 𑀲𑀩𑁆𑀩𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀤𑁆𑀥𑀁𑀲𑀦𑀦𑁆𑀢𑀺 𑀪𑀗𑁆𑀕𑀁. 𑀘𑀯𑀦𑀦𑁆𑀢𑀺 𑀘𑀼𑀢𑀺𑀁. 𑀚𑀻𑀯𑀺𑀢𑀲𑁆𑀲𑀸𑀢𑀺 𑀆𑀬𑀼𑀦𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀲𑀩𑁆𑀩𑀁 𑀲𑀼𑀘𑀭𑀺𑀢𑀥𑀫𑁆𑀫𑀁 𑀚𑀻𑀯𑀺𑀢𑀲𑁆𑀲 𑀘 𑀅𑀦𑀺𑀘𑁆𑀘𑀢𑀁 𑀚𑀸𑀦𑀦𑁆𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀦𑀭𑀲𑁆𑀲 𑀧𑀸𑀧𑀁 𑀦 𑀘𑀻𑀬𑀢𑀺 𑀦 𑀯𑀟𑁆𑀠𑀢𑀺. 𑀲𑀘𑁂 𑀦 𑀘𑁂𑀢𑁂𑀢𑀺 𑀯𑀥𑀸𑀬 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀗𑁆𑀔𑀁 𑀕𑀢𑀲𑁆𑀲 𑀧𑀭𑀧𑀼𑀕𑁆𑀕𑀮𑀲𑁆𑀲 𑀯𑀥𑀸𑀬 𑀦 𑀘𑁂𑀢𑁂𑀢𑀺 𑀦 𑀧𑀓𑀧𑁆𑀧𑁂𑀢𑀺, 𑀦𑁂𑀯 𑀧𑀭𑀧𑀼𑀕𑁆𑀕𑀮𑀁 𑀯𑀥𑀸𑀬 𑀘𑁂𑀢𑁂𑀢𑀺, 𑀦𑀸𑀧𑀺 𑀧𑀭𑀲𑀦𑁆𑀢𑀓𑀁 𑀯𑀺𑀦𑀸𑀲𑁂𑀢𑀺, 𑀅𑀳𑀜𑁆𑀘 𑀓𑀲𑁆𑀲𑀘𑀺 𑀯𑀥𑀸𑀬 𑀅𑀘𑁂𑀢𑁂𑀢𑁆𑀯𑀸 𑀓𑁂𑀯𑀮𑀁 𑀅𑀫𑁆𑀩𑀧𑀓𑁆𑀓𑁂 𑀆𑀲𑀗𑁆𑀕𑀁 𑀓𑀢𑁆𑀯𑀸 𑀕𑀗𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄, 𑀢𑁆𑀯𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀫 𑀅𑀓𑀼𑀲𑀮𑀁 𑀧𑀲𑁆𑀲𑀲𑀻𑀢𑀺.

𑀇𑀲𑀺𑀧𑀽𑀕𑀲𑀫𑀜𑁆𑀜𑀸𑀢𑁂𑀢𑀺 𑀇𑀲𑀺𑀕𑀡𑁂𑀦 𑀲𑀼𑀝𑁆𑀞𑀼 𑀅𑀜𑁆𑀜𑀸𑀢𑁂 𑀇𑀲𑀻𑀦𑀁 𑀲𑀫𑁆𑀫𑀢𑁂. 𑀏𑀯𑀁 𑀮𑁄𑀓𑁆𑀬𑀸𑀢𑀺 𑀢𑁆𑀯𑀁 𑀦𑀸𑀫 𑀧𑀸𑀧𑀧𑀯𑀸𑀳𑀦𑁂𑀦 𑀮𑁄𑀓𑀲𑁆𑀲 𑀳𑀺𑀢𑀸𑀢𑀺 𑀏𑀯𑀁 𑀯𑀺𑀤𑀺𑀢𑀸. 𑀲𑀢𑀻𑀢𑀺 𑀲𑀢𑀺 𑀲𑁄𑀪𑀦𑁂 𑀉𑀢𑁆𑀢𑀫𑁂𑀢𑀺 𑀆𑀮𑀧𑀦𑀫𑁂𑀢𑀁. 𑀅𑀦𑀭𑀺𑀬𑀧𑀭𑀺𑀲𑀫𑁆𑀪𑀸𑀲𑁂𑀢𑀺 ‘‘𑀢𑀲𑁆𑀲 𑀚𑀸𑀦𑀦𑁆𑀢𑀺 𑀧𑀺𑀢𑀭𑁄’’𑀢𑀺𑀆𑀤𑀺𑀓𑀸𑀬 𑀅𑀲𑀼𑀦𑁆𑀤𑀭𑀸𑀬 𑀧𑀭𑀺𑀪𑀸𑀲𑀸𑀬 𑀲𑀫𑀦𑁆𑀦𑀸𑀕𑀢𑁂. 𑀚𑀺𑀕𑀻𑀲𑀲𑀻𑀢𑀺 𑀫𑀬𑀺 𑀧𑀸𑀧𑁂 𑀅𑀲𑀁𑀯𑀺𑀚𑁆𑀚𑀦𑁆𑀢𑁂𑀧𑀺 𑀫𑀁 𑀏𑀯𑀁 𑀧𑀭𑀺𑀪𑀸𑀲𑀦𑁆𑀢𑀻 𑀘 𑀧𑀭𑀫𑀭𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑀻 𑀘 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑀁 𑀕𑀯𑁂𑀲𑀲𑀺 𑀉𑀧𑁆𑀧𑀸𑀤𑁂𑀲𑀺. 𑀢𑀻𑀭𑁂 𑀢𑁂𑀢𑀺 𑀢𑀯 𑀕𑀗𑁆𑀕𑀸𑀢𑀻𑀭𑁂. 𑀧𑀼𑀣𑀼𑀲𑀼𑀲𑁆𑀲𑁄𑀡𑀻𑀢𑀺 𑀧𑀼𑀣𑀼𑀮𑀸𑀬 𑀲𑀼𑀦𑁆𑀤𑀭𑀸𑀬 𑀲𑁄𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁂. 𑀧𑁂𑀢𑁂𑀢𑀺 𑀅𑀫𑁆𑀩𑀧𑀓𑁆𑀓𑀁 𑀅𑀮𑀪𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀢𑁂, 𑀫𑀢𑁂𑀢𑀺 𑀅𑀢𑁆𑀣𑁄. 𑀧𑀓𑀼𑀝𑁆𑀞𑀸𑀬𑀻𑀢𑀺 𑀅𑀓𑁆𑀓𑁄𑀲𑀺 𑀕𑀭𑀳𑀺 𑀦𑀺𑀦𑁆𑀤𑀺. ‘‘𑀧𑀓𑁆𑀯𑀢𑁆𑀣𑀸𑀲𑀻’’𑀢𑀺𑀧𑀺 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀥𑀻𑀢𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩. ‘‘𑀅𑀜𑁆𑀜𑀸𑀢𑀫𑁂𑀢𑀁 𑀅𑀯𑀺𑀲𑀬𑁆𑀳𑀲𑀸𑀳𑀺, 𑀅𑀢𑁆𑀢𑀸𑀦𑀫𑀫𑁆𑀩𑀜𑁆𑀘 𑀤𑀤𑀸𑀫𑀺 𑀢𑁂 𑀢𑀁;

𑀬𑁄 𑀤𑀼𑀩𑁆𑀩𑀚𑁂 𑀓𑀸𑀫𑀕𑀼𑀡𑁂 𑀧𑀳𑀸𑀬, 𑀲𑀦𑁆𑀢𑀺𑀜𑁆𑀘 𑀥𑀫𑁆𑀫𑀜𑁆𑀘 𑀅𑀥𑀺𑀝𑁆𑀞𑀺𑀢𑁄𑀲𑀺.

𑁨𑁪. ‘‘𑀬𑁄 𑀳𑀺𑀢𑁆𑀯𑀸 𑀧𑀼𑀩𑁆𑀩𑀲𑀜𑁆𑀜𑁄𑀕𑀁, 𑀧𑀘𑁆𑀙𑀸𑀲𑀁𑀬𑁄𑀚𑀦𑁂 𑀞𑀺𑀢𑁄;

𑀅𑀥𑀫𑁆𑀫𑀜𑁆𑀘𑁂𑀯 𑀘𑀭𑀢𑀺, 𑀧𑀸𑀧𑀜𑁆𑀘𑀲𑁆𑀲 𑀧𑀯𑀟𑁆𑀠𑀢𑀺.

𑁨𑁫. ‘‘𑀏𑀳𑀺 𑀢𑀁 𑀧𑀸𑀧𑀬𑀺𑀲𑁆𑀲𑀸𑀫𑀺, 𑀓𑀸𑀫𑀁 𑀅𑀧𑁆𑀧𑁄𑀲𑁆𑀲𑀼𑀓𑁄 𑀪𑀯;

𑀉𑀧𑀦𑀬𑀸𑀫𑀺 𑀲𑀻𑀢𑀲𑁆𑀫𑀺𑀁, 𑀯𑀺𑀳𑀭𑀸𑀳𑀺 𑀅𑀦𑀼𑀲𑁆𑀲𑀼𑀓𑁄.

𑁨𑁬. ‘‘𑀢𑀁 𑀧𑀼𑀧𑁆𑀨𑀭𑀲𑀫𑀢𑁆𑀢𑁂𑀪𑀺, 𑀯𑀓𑁆𑀓𑀗𑁆𑀕𑁂𑀳𑀺 𑀅𑀭𑀺𑀦𑁆𑀤𑀫;

𑀓𑁄𑀜𑁆𑀘𑀸 𑀫𑀬𑀽𑀭𑀸 𑀤𑀺𑀯𑀺𑀬𑀸, 𑀓𑁄𑀮𑀝𑁆𑀞𑀺𑀫𑀥𑀼𑀲𑀸𑀴𑀺𑀓𑀸;

𑀓𑀽𑀚𑀺𑀢𑀸 𑀳𑀁𑀲𑀧𑀽𑀕𑁂𑀳𑀺, 𑀓𑁄𑀓𑀺𑀮𑁂𑀢𑁆𑀣 𑀧𑀩𑁄𑀥𑀭𑁂.

𑁨𑁭. ‘‘𑀅𑀫𑁆𑀩𑁂𑀢𑁆𑀣 𑀯𑀺𑀧𑁆𑀧𑀲𑀸𑀔𑀕𑁆𑀕𑀸, 𑀧𑀮𑀸𑀮𑀔𑀮𑀲𑀦𑁆𑀦𑀺𑀪𑀸;

𑀓𑁄𑀲𑀫𑁆𑀩𑀲𑀮𑀴𑀸 𑀦𑀻𑀧𑀸, 𑀧𑀓𑁆𑀓𑀢𑀸𑀮𑀯𑀺𑀮𑀫𑁆𑀩𑀺𑀦𑁄’’𑀢𑀺.

𑀢𑀢𑁆𑀣 𑀅𑀜𑁆𑀜𑀸𑀢𑀫𑁂𑀢𑀦𑁆𑀢𑀺 ‘‘𑀕𑀭𑀳𑀸 𑀢𑁂 𑀪𑀯𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑁄 𑀅𑀫𑁆𑀩𑀧𑀓𑁆𑀓𑀢𑁆𑀣𑀸𑀬 𑀯𑀤𑀲𑀻’’𑀢𑀺 𑀏𑀢𑀁 𑀓𑀸𑀭𑀡𑀁 𑀫𑀬𑀸 𑀅𑀜𑁆𑀜𑀸𑀢𑀁. 𑀅𑀯𑀺𑀲𑀬𑁆𑀳𑀲𑀸𑀳𑀻𑀢𑀺 𑀭𑀸𑀚𑀸𑀦𑁄 𑀦𑀸𑀫 𑀤𑀼𑀲𑁆𑀲𑀳𑀁 𑀲𑀳𑀦𑁆𑀢𑀺, 𑀢𑁂𑀦 𑀦𑀁 𑀆𑀮𑀧𑀦𑁆𑀢𑀻 𑀏𑀯𑀫𑀸𑀳. 𑀅𑀢𑁆𑀢𑀸𑀦𑀦𑁆𑀢𑀺 𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀅𑀫𑁆𑀩𑀯𑀦𑀁 𑀦𑀬𑀦𑁆𑀢𑀻 𑀅𑀢𑁆𑀢𑀸𑀦𑀜𑁆𑀘 𑀢𑁂 𑀤𑀤𑀸𑀫𑀺 𑀢𑀜𑁆𑀘 𑀅𑀫𑁆𑀩𑀁. 𑀓𑀸𑀫𑀕𑀼𑀡𑁂𑀢𑀺 𑀓𑀜𑁆𑀘𑀦𑀫𑀸𑀮𑀸𑀲𑁂𑀢𑀘𑁆𑀙𑀢𑁆𑀢𑀧𑀝𑀺𑀫𑀡𑁆𑀟𑀺𑀢𑁂 𑀯𑀢𑁆𑀣𑀼𑀓𑀸𑀫𑁂. 𑀲𑀦𑁆𑀢𑀺𑀜𑁆𑀘 𑀥𑀫𑁆𑀫𑀜𑁆𑀘𑀸𑀢𑀺 𑀤𑀼𑀲𑁆𑀲𑀻𑀮𑁆𑀬𑀯𑀽𑀧𑀲𑀫𑁂𑀦 𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀲𑀻𑀮𑀜𑁆𑀘𑁂𑀯 𑀲𑀼𑀘𑀭𑀺𑀢𑀥𑀫𑁆𑀫𑀜𑁆𑀘. 𑀅𑀥𑀺𑀝𑁆𑀞𑀺𑀢𑁄𑀲𑀻𑀢𑀺 𑀬𑁄 𑀢𑁆𑀯𑀁 𑀇𑀫𑁂 𑀕𑀼𑀡𑁂 𑀉𑀧𑀕𑀢𑁄, 𑀏𑀢𑁂𑀲𑀼 𑀯𑀸 𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑀲𑀜𑁆𑀜𑁄𑀕𑀦𑁆𑀢𑀺 𑀧𑀼𑀭𑀺𑀫𑀩𑀦𑁆𑀥𑀦𑀁. 𑀧𑀘𑁆𑀙𑀸𑀲𑀁𑀬𑁄𑀚𑀦𑁂𑀢𑀺 𑀧𑀘𑁆𑀙𑀺𑀫𑀩𑀦𑁆𑀥𑀦𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀪𑁄 𑀢𑀸𑀧𑀲 𑀬𑁄 𑀫𑀳𑀦𑁆𑀢𑀁 𑀭𑀚𑁆𑀚𑀲𑀺𑀭𑀺𑀯𑀺𑀪𑀯𑀁 𑀧𑀳𑀸𑀬 𑀅𑀫𑁆𑀩𑀧𑀓𑁆𑀓𑀫𑀢𑁆𑀢𑁂 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 𑀯𑀸𑀢𑀸𑀢𑀧𑀁 𑀅𑀕𑀡𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀲𑀼𑀲𑁆𑀲𑀫𑀸𑀦𑁄 𑀦𑀺𑀲𑀻𑀤𑀢𑀺, 𑀲𑁄 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑁆𑀯𑀸 𑀯𑁂𑀮𑀦𑁆𑀢𑁂 𑀲𑀁𑀲𑀻𑀤𑀦𑀧𑀼𑀕𑁆𑀕𑀮𑀲𑀤𑀺𑀲𑁄. 𑀬𑁄 𑀧𑀼𑀕𑁆𑀕𑀮𑁄 𑀭𑀲𑀢𑀡𑁆𑀳𑀸𑀯𑀲𑀺𑀓𑁄 𑀅𑀥𑀫𑁆𑀫𑀜𑁆𑀘𑁂𑀯 𑀘𑀭𑀢𑀺, 𑀭𑀲𑀢𑀡𑁆𑀳𑀸𑀯𑀲𑁂𑀦 𑀓𑀭𑀺𑀬𑀫𑀸𑀦𑀁 𑀧𑀸𑀧𑀜𑁆𑀘𑀲𑁆𑀲 𑀧𑀯𑀟𑁆𑀠𑀢𑀻𑀢𑀺. 𑀇𑀢𑀺 𑀲𑀸 𑀢𑀸𑀧𑀲𑀁 𑀕𑀭𑀳𑀦𑁆𑀢𑀻 𑀏𑀯𑀫𑀸𑀳.

𑀓𑀸𑀫𑀁 𑀅𑀧𑁆𑀧𑁄𑀲𑁆𑀲𑀼𑀓𑁄 𑀪𑀯𑀸𑀢𑀺 𑀏𑀓𑀁𑀲𑁂𑀦𑁂𑀯 𑀅𑀫𑁆𑀩𑀧𑀓𑁆𑀓𑁂 𑀦𑀺𑀭𑀸𑀮𑀬𑁄 𑀳𑁄𑀳𑀺. 𑀲𑀻𑀢𑀲𑁆𑀫𑀺𑀦𑁆𑀢𑀺 𑀲𑀻𑀢𑀮𑁂 𑀅𑀫𑁆𑀩𑀯𑀦𑁂. 𑀢𑀦𑁆𑀢𑀺 𑀏𑀯𑀁 𑀯𑀤𑀫𑀸𑀦𑀸𑀯 𑀤𑁂𑀯𑀢𑀸 𑀢𑀸𑀧𑀲𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀢𑀸 𑀢𑀺𑀬𑁄𑀚𑀦𑀺𑀓𑀁 𑀤𑀺𑀩𑁆𑀩𑀅𑀫𑁆𑀩𑀯𑀦𑀁 𑀤𑀺𑀲𑁆𑀯𑀸 𑀲𑀓𑀼𑀡𑀲𑀤𑁆𑀤𑀜𑁆𑀘 𑀲𑀼𑀢𑁆𑀯𑀸 𑀢𑀸𑀧𑀲𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑀻 ‘‘𑀢’’𑀦𑁆𑀢𑀺 𑀏𑀯𑀫𑀸𑀳. 𑀧𑀼𑀧𑁆𑀨𑀭𑀲𑀫𑀢𑁆𑀢𑁂𑀪𑀻𑀢𑀺 𑀧𑀼𑀧𑁆𑀨𑀭𑀲𑁂𑀦 𑀫𑀢𑁆𑀢𑁂𑀳𑀺. 𑀯𑀓𑁆𑀓𑀗𑁆𑀕𑁂𑀳𑀻𑀢𑀺 𑀯𑀗𑁆𑀓𑀕𑀻𑀯𑁂𑀳𑀺 𑀲𑀓𑀼𑀡𑁂𑀳𑀺 𑀅𑀪𑀺𑀦𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑁂 𑀲𑀓𑀼𑀡𑁂 𑀆𑀘𑀺𑀓𑁆𑀔𑀦𑁆𑀢𑀻 ‘‘𑀓𑁄𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀯𑀺𑀬𑀸𑀢𑀺 𑀤𑀺𑀩𑁆𑀬𑀸. 𑀓𑁄𑀮𑀝𑁆𑀞𑀺𑀫𑀥𑀼𑀲𑀸𑀴𑀺𑀓𑀸𑀢𑀺 𑀓𑁄𑀮𑀝𑁆𑀞𑀺𑀲𑀓𑀼𑀡𑀸 𑀘 𑀦𑀸𑀫 𑀲𑀼𑀯𑀡𑁆𑀡𑀲𑀸𑀴𑀺𑀓𑀸 𑀲𑀓𑀼𑀡𑀸 𑀘. 𑀏𑀢𑁂 𑀤𑀺𑀩𑁆𑀩𑀲𑀓𑀼𑀡𑀸 𑀏𑀢𑁆𑀣 𑀯𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀽𑀚𑀺𑀢𑀸 𑀳𑀁𑀲𑀧𑀽𑀕𑁂𑀳𑀻𑀢𑀺 𑀳𑀁𑀲𑀕𑀡𑁂𑀳𑀺 𑀉𑀧𑀓𑀽𑀚𑀺𑀢𑀸 𑀯𑀺𑀭𑀯𑀲𑀗𑁆𑀖𑀝𑁆𑀝𑀺𑀢𑀸. 𑀓𑁄𑀓𑀺𑀮𑁂𑀢𑁆𑀣 𑀧𑀩𑁄𑀥𑀭𑁂𑀢𑀺 𑀏𑀢𑁆𑀣 𑀅𑀫𑁆𑀩𑀯𑀦𑁂 𑀓𑁄𑀓𑀺𑀮𑀸 𑀯𑀲𑁆𑀲𑀦𑁆𑀢𑀺𑀬𑁄 𑀅𑀢𑁆𑀢𑀸𑀦𑀁 𑀧𑀩𑁄𑀥𑁂𑀦𑁆𑀢𑀺 𑀜𑀸𑀧𑁂𑀦𑁆𑀢𑀺. 𑀅𑀫𑁆𑀩𑁂𑀢𑁆𑀣𑀸𑀢𑀺 𑀅𑀫𑁆𑀩𑀸 𑀏𑀢𑁆𑀣. 𑀯𑀺𑀧𑁆𑀧𑀲𑀸𑀔𑀕𑁆𑀕𑀸𑀢𑀺 𑀨𑀮𑀪𑀸𑀭𑁂𑀦 𑀑𑀦𑀫𑀺𑀢𑀲𑀸𑀔𑀕𑁆𑀕𑀸. 𑀧𑀮𑀸𑀮𑀔𑀮𑀲𑀦𑁆𑀦𑀺𑀪𑀸𑀢𑀺 𑀧𑀼𑀧𑁆𑀨𑀲𑀦𑁆𑀦𑀺𑀘𑀬𑁂𑀦 𑀲𑀸𑀮𑀺𑀧𑀮𑀸𑀮𑀔𑀮𑀲𑀤𑀺𑀲𑀸. 𑀧𑀓𑁆𑀓𑀢𑀸𑀮𑀯𑀺𑀮𑀫𑁆𑀩𑀺𑀦𑁄𑀢𑀺 𑀧𑀓𑁆𑀓𑀢𑀸𑀮𑀨𑀮𑀯𑀺𑀮𑀫𑁆𑀩𑀺𑀦𑁄. 𑀏𑀯𑀭𑀽𑀧𑀸 𑀭𑀼𑀓𑁆𑀔𑀸 𑀘 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀫𑁆𑀩𑀯𑀦𑀁 𑀯𑀡𑁆𑀡𑁂𑀢𑀺.

𑀯𑀡𑁆𑀡𑀬𑀺𑀢𑁆𑀯𑀸 𑀘 𑀧𑀦 𑀢𑀸𑀧𑀲𑀁 𑀢𑀢𑁆𑀣 𑀑𑀢𑀸𑀭𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀅𑀫𑁆𑀩𑀸𑀦𑀺 𑀔𑀸𑀤𑀦𑁆𑀢𑁄 𑀅𑀢𑁆𑀢𑀦𑁄 𑀢𑀡𑁆𑀳𑀁 𑀧𑀽𑀭𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀸𑀧𑀲𑁄 𑀅𑀫𑁆𑀩𑀸𑀦𑀺 𑀔𑀸𑀤𑀺𑀢𑁆𑀯𑀸 𑀢𑀡𑁆𑀳𑀁 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀅𑀫𑁆𑀩𑀯𑀦𑁂 𑀯𑀺𑀘𑀭𑀦𑁆𑀢𑁄 𑀢𑀁 𑀧𑁂𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀁 𑀤𑀺𑀲𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀽𑀭𑀺𑀬𑁂 𑀧𑀦 𑀅𑀢𑁆𑀣𑀗𑁆𑀕𑀢𑁂 𑀢𑀁 𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀯𑀸𑀭𑀺𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀁 𑀤𑀺𑀲𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁮. ‘‘𑀫𑀸𑀮𑀻 𑀓𑀺𑀭𑀺𑀝𑀻 𑀓𑀸𑀬𑀽𑀭𑀻, 𑀅𑀗𑁆𑀕𑀤𑀻 𑀘𑀦𑁆𑀤𑀦𑀼𑀲𑁆𑀲𑀤𑁄;

𑀭𑀢𑁆𑀢𑀺𑀁 𑀢𑁆𑀯𑀁 𑀧𑀭𑀺𑀘𑀸𑀭𑁂𑀲𑀺, 𑀤𑀺𑀯𑀸 𑀯𑁂𑀤𑁂𑀲𑀺 𑀯𑁂𑀤𑀦𑀁.

𑁨𑁯. ‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀬𑀸 𑀢𑁂𑀫𑀸 𑀧𑀭𑀺𑀘𑀸𑀭𑀺𑀓𑀸;

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀲𑀺, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁩𑁦. ‘‘𑀓𑀺𑀁 𑀓𑀫𑁆𑀫𑀫𑀓𑀭𑀻 𑀧𑀼𑀩𑁆𑀩𑁂, 𑀧𑀸𑀧𑀁 𑀅𑀢𑁆𑀢𑀤𑀼𑀔𑀸𑀯𑀳𑀁;

𑀬𑀁 𑀓𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀔𑀸𑀤𑀲𑀻’’𑀢𑀺.

𑀢𑀢𑁆𑀣 𑀫𑀸𑀮𑀻𑀢𑀺 𑀤𑀺𑀩𑁆𑀩𑀫𑀸𑀮𑀸𑀥𑀭𑁄. 𑀓𑀺𑀭𑀺𑀝𑀻𑀢𑀺 𑀤𑀺𑀩𑁆𑀩𑀯𑁂𑀞𑀦𑀥𑀭𑁄. 𑀓𑀸𑀬𑀽𑀭𑀻𑀢𑀺 𑀤𑀺𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄. 𑀅𑀗𑁆𑀕𑀤𑀻𑀢𑀺 𑀤𑀺𑀩𑁆𑀩𑀗𑁆𑀕𑀤𑀲𑀫𑀦𑁆𑀦𑀸𑀕𑀢𑁄. 𑀘𑀦𑁆𑀤𑀦𑀼𑀲𑁆𑀲𑀤𑁄𑀢𑀺 𑀤𑀺𑀩𑁆𑀩𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑁄. 𑀧𑀭𑀺𑀘𑀸𑀭𑁂𑀲𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀺𑀩𑁆𑀩𑀯𑀺𑀲𑀬𑁂𑀲𑀼 𑀘𑀸𑀭𑁂𑀲𑀺. 𑀤𑀺𑀯𑀸𑀢𑀺 𑀤𑀺𑀯𑀸 𑀧𑀦 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀺. 𑀬𑀸 𑀢𑁂𑀫𑀸𑀢𑀺 𑀬𑀸 𑀢𑁂 𑀇𑀫𑀸. 𑀅𑀩𑁆𑀪𑀼𑀢𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀅𑀪𑀽𑀢𑀧𑀼𑀩𑁆𑀩𑁄. 𑀮𑁄𑀫𑀳𑀁𑀲𑀦𑁄𑀢𑀺 𑀬𑁂 𑀢𑀁 𑀧𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀪𑀯𑁂. 𑀅𑀢𑁆𑀢𑀤𑀼𑀔𑀸𑀯𑀳𑀦𑁆𑀢𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸𑀯𑀳𑀁. 𑀫𑀦𑀼𑀲𑁆𑀲𑁂𑀲𑀽𑀢𑀺 𑀬𑀁 𑀫𑀦𑀼𑀲𑁆𑀲𑀮𑁄𑀓𑁂 𑀓𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀔𑀸𑀤𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀧𑁂𑀢𑁄 𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀁 𑀦 𑀲𑀜𑁆𑀚𑀸𑀦𑀸𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺𑀁, 𑀇𑀤𑀁 𑀫𑁂 𑀭𑀢𑁆𑀢𑀺𑀁 𑀲𑀼𑀔𑀸𑀦𑀼𑀪𑀯𑀦𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀓𑀢𑀲𑁆𑀲 𑀉𑀧𑀟𑁆𑀠𑀽𑀧𑁄𑀲𑀣𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀮𑀤𑁆𑀥𑀁, 𑀤𑀺𑀯𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀧𑀦 𑀫𑀬𑀸 𑀧𑀓𑀢𑀲𑁆𑀲 𑀧𑀸𑀧𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁂𑀦. 𑀅𑀳𑀜𑁆𑀳𑀺 𑀢𑀼𑀫𑁆𑀳𑁂𑀳𑀺 𑀯𑀺𑀦𑀺𑀘𑁆𑀙𑀬𑁂 𑀞𑀧𑀺𑀢𑁄 𑀓𑀽𑀝𑀟𑁆𑀟𑀁 𑀓𑀭𑀺𑀢𑁆𑀯𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀤𑀺𑀯𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁩𑁧. ‘‘𑀅𑀚𑁆𑀛𑁂𑀦𑀸𑀦𑀺 𑀧𑀝𑀺𑀕𑁆𑀕𑀬𑁆𑀳, 𑀓𑀸𑀫𑁂𑀲𑀼 𑀕𑀥𑀺𑀢𑁄 𑀅𑀳𑀁;

𑀅𑀘𑀭𑀺𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀧𑀭𑁂𑀲𑀁 𑀅𑀳𑀺𑀢𑀸𑀬𑀳𑀁.

𑁩𑁨. ‘‘𑀬𑁄 𑀧𑀺𑀝𑁆𑀞𑀺𑀫𑀁𑀲𑀺𑀓𑁄 𑀳𑁄𑀢𑀺, 𑀏𑀯𑀁 𑀉𑀓𑁆𑀓𑀘𑁆𑀘 𑀔𑀸𑀤𑀢𑀺;

𑀬𑀣𑀸𑀳𑀁 𑀅𑀚𑁆𑀚 𑀔𑀸𑀤𑀸𑀫𑀺, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀅𑀚𑁆𑀛𑁂𑀦𑀸𑀦𑀻𑀢𑀺 𑀯𑁂𑀤𑁂. 𑀧𑀝𑀺𑀕𑁆𑀕𑀬𑁆𑀳𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀥𑀻𑀬𑀺𑀢𑁆𑀯𑀸. 𑀅𑀘𑀭𑀺𑀦𑁆𑀢𑀺 𑀧𑀝𑀺𑀧𑀚𑁆𑀚𑀺𑀁. 𑀅𑀳𑀺𑀢𑀸𑀬𑀳𑀦𑁆𑀢𑀺 𑀅𑀳𑀺𑀢𑀸𑀬 𑀅𑀢𑁆𑀣𑀦𑀸𑀲𑀦𑀸𑀬 𑀅𑀳𑀁. 𑀬𑁄 𑀧𑀺𑀝𑁆𑀞𑀺𑀫𑀁𑀲𑀺𑀓𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀧𑀭𑁂𑀲𑀁 𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀓𑁄 𑀧𑀺𑀲𑀼𑀡𑁄 𑀳𑁄𑀢𑀺. 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸.

𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀸𑀧𑀲𑀁 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀓𑀣𑀁 𑀇𑀥𑀸𑀕𑀢𑀸’’𑀢𑀺. 𑀢𑀸𑀧𑀲𑁄 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. ‘‘𑀇𑀤𑀸𑀦𑀺 𑀧𑀦, 𑀪𑀦𑁆𑀢𑁂, 𑀇𑀥𑁂𑀯 𑀯𑀲𑀺𑀲𑁆𑀲𑀣, 𑀕𑀫𑀺𑀲𑁆𑀲𑀣𑀸’’𑀢𑀺. ‘‘𑀦 𑀯𑀲𑀺𑀲𑁆𑀲𑀸𑀫𑀺, 𑀅𑀲𑁆𑀲𑀫𑀧𑀤𑀁𑀬𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀧𑁂𑀢𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀳𑀁 𑀯𑁄 𑀦𑀺𑀩𑀤𑁆𑀥𑀁 𑀅𑀫𑁆𑀩𑀧𑀓𑁆𑀓𑁂𑀦 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀲𑁆𑀲𑀫𑀧𑀤𑁂𑀬𑁂𑀯 𑀑𑀢𑀸𑀭𑁂𑀢𑁆𑀯𑀸 ‘‘𑀅𑀦𑀼𑀓𑁆𑀓𑀡𑁆𑀞𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀅𑀫𑁆𑀩𑀧𑀓𑁆𑀓𑁂𑀦 𑀉𑀧𑀝𑁆𑀞𑀳𑀺. 𑀢𑀸𑀧𑀲𑁄 𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀉𑀧𑀸𑀲𑀓𑀸𑀦𑀁 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄. 𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀺𑀁𑀙𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁫𑁧𑁨] 𑁨. 𑀓𑀼𑀫𑁆𑀪𑀚𑀸𑀢𑀓𑀯𑀡𑁆𑀡𑀦𑀸

𑀓𑁄 𑀧𑀸𑀢𑀼𑀭𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀸𑀬 𑀲𑀳𑀸𑀬𑀺𑀓𑀸 𑀲𑀼𑀭𑀸𑀧𑀻𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀲𑀼𑀭𑀸𑀙𑀡𑁂 𑀲𑀗𑁆𑀖𑀼𑀝𑁆𑀞𑁂 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀲𑀸𑀫𑀺𑀓𑀸𑀦𑀁 𑀙𑀡𑁂 𑀓𑀻𑀴𑀫𑀸𑀦𑀸𑀦𑀁 𑀢𑀺𑀓𑁆𑀔𑀲𑀼𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀙𑀡𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀧𑀺 𑀯𑀺𑀲𑀸𑀔𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀳𑀸𑀬𑀺𑀓𑁂 𑀙𑀡𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀅𑀬𑀁 𑀲𑀼𑀭𑀸𑀙𑀡𑁄, 𑀦 𑀅𑀳𑀁 𑀲𑀼𑀭𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀢𑀼𑀫𑁆𑀳𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑁂𑀣, 𑀫𑀬𑀁 𑀙𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀢𑀸𑀳𑀺 𑀧𑀭𑀺𑀯𑀼𑀢𑀸 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑀸 𑀧𑀦𑀺𑀢𑁆𑀣𑀺𑀬𑁄 𑀲𑀼𑀭𑀁 𑀧𑀺𑀯𑀫𑀸𑀦𑀸𑀯 𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸𑀯 𑀢𑀸𑀬 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀯𑀺𑀲𑀸𑀔𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀇𑀢𑀭𑀸𑀲𑀼 𑀏𑀓𑀘𑁆𑀘𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀬𑁂𑀯 𑀦𑀘𑁆𑀘𑀺𑀁𑀲𑀼, 𑀏𑀓𑀘𑁆𑀘𑀸 𑀕𑀸𑀬𑀺𑀁𑀲𑀼, 𑀏𑀓𑀘𑁆𑀘𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀸𑀦𑀺, 𑀏𑀓𑀘𑁆𑀘𑀸 𑀓𑀮𑀳𑀁 𑀅𑀓𑀁𑀲𑀼.

𑀲𑀢𑁆𑀣𑀸 𑀢𑀸𑀲𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀸𑀬 𑀪𑀫𑀼𑀓𑀮𑁄𑀫𑀢𑁄 𑀭𑀁𑀲𑀻 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀅𑀳𑁄𑀲𑀺. 𑀢𑀸 𑀪𑀻𑀢𑀸 𑀅𑀳𑁂𑀲𑀼𑀁 𑀫𑀭𑀡𑀪𑀬𑀢𑀚𑁆𑀚𑀺𑀢𑀸, 𑀢𑁂𑀦 𑀢𑀸𑀲𑀁 𑀲𑀼𑀭𑀸 𑀚𑀻𑀭𑀺. 𑀲𑀢𑁆𑀣𑀸 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑁂 𑀅𑀦𑁆𑀢𑀭𑀳𑀺𑀢𑁄 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀉𑀡𑁆𑀡𑀮𑁄𑀫𑀢𑁄 𑀭𑀁𑀲𑀻 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀘𑀦𑁆𑀤𑀲𑀽𑀭𑀺𑀬𑀲𑀳𑀲𑁆𑀲𑀼𑀕𑁆𑀕𑀫𑀦𑀁 𑀯𑀺𑀬 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀞𑀺𑀢𑁄𑀯 𑀢𑀸𑀲𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀸𑀬 𑁋

‘‘𑀓𑁄 𑀦𑀼 𑀳𑀸𑀲𑁄 𑀓𑀺𑀫𑀸𑀦𑀦𑁆𑀤𑁄, 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑁂 𑀲𑀢𑀺;

𑀅𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀸, 𑀧𑀤𑀻𑀧𑀁 𑀦 𑀕𑀯𑁂𑀲𑀣𑀸’’𑀢𑀺. (𑀥. 𑀧. 𑁧𑁪𑁬) 𑁋

𑀇𑀫𑀁 𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀢𑀸 𑀧𑀜𑁆𑀘𑀲𑀢𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀙𑀸𑀬𑀸𑀬 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀯𑀺𑀲𑀸𑀔𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀳𑀺𑀭𑁄𑀢𑁆𑀢𑀧𑁆𑀧𑀪𑁂𑀤𑀓𑀁 𑀲𑀼𑀭𑀸𑀧𑀸𑀦𑀁 𑀦𑀸𑀫 𑀓𑀤𑀸 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀲𑁆𑀲𑀸 𑀆𑀘𑀺𑀓𑁆𑀔𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀓𑀸𑀲𑀺𑀭𑀝𑁆𑀞𑀯𑀸𑀲𑀻 𑀲𑀼𑀭𑁄 𑀦𑀸𑀫 𑀯𑀦𑀘𑀭𑀓𑁄 𑀪𑀡𑁆𑀟𑀧𑀭𑀺𑀬𑁂𑀲𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀢𑀢𑁆𑀣𑁂𑀓𑁄 𑀭𑀼𑀓𑁆𑀔𑁄 𑀉𑀕𑁆𑀕𑀦𑁆𑀢𑁆𑀯𑀸 𑀧𑁄𑀭𑀺𑀲𑀫𑀢𑁆𑀢𑁂 𑀞𑀸𑀦𑁂 𑀢𑀺𑀥𑀸𑀓𑀧𑁆𑀧𑁄 𑀅𑀳𑁄𑀲𑀺. 𑀢𑀲𑁆𑀲 𑀢𑀺𑀡𑁆𑀡𑀁 𑀓𑀧𑁆𑀧𑀸𑀦𑀁 𑀅𑀦𑁆𑀢𑀭𑁂 𑀘𑀸𑀝𑀺𑀧𑁆𑀧𑀫𑀸𑀡𑁄 𑀆𑀯𑀸𑀝𑁄 𑀅𑀳𑁄𑀲𑀺. 𑀲𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀧𑀽𑀭𑀺𑀢𑁄, 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀳𑀭𑀻𑀢𑀓𑀻 𑀆𑀫𑀮𑀓𑀻 𑀫𑀭𑀺𑀘𑀕𑀘𑁆𑀙𑁄 𑀘 𑀅𑀳𑁄𑀲𑀺, 𑀢𑁂𑀲𑀁 𑀧𑀓𑁆𑀓𑀸𑀦𑀺 𑀨𑀮𑀸𑀦𑀺 𑀙𑀺𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀧𑀢𑀦𑁆𑀢𑀺. 𑀢𑀲𑁆𑀲𑀸𑀯𑀺𑀤𑀽𑀭𑁂 𑀲𑀬𑀁𑀚𑀸𑀢𑀲𑀸𑀮𑀺 𑀚𑀸𑀢𑁄, 𑀢𑀢𑁄 𑀲𑀼𑀯𑀓𑀸 𑀲𑀸𑀮𑀺𑀲𑀻𑀲𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀢𑁂𑀲𑀁 𑀔𑀸𑀤𑀫𑀸𑀦𑀸𑀦𑀁 𑀲𑀸𑀮𑀻𑀧𑀺 𑀢𑀡𑁆𑀟𑀼𑀮𑀸𑀧𑀺 𑀢𑀢𑁆𑀣 𑀧𑀢𑀦𑁆𑀢𑀺. 𑀇𑀢𑀺 𑀢𑀁 𑀉𑀤𑀓𑀁 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀧𑀘𑁆𑀘𑀫𑀸𑀦𑀁 𑀭𑀲𑀁 𑀮𑁄𑀳𑀺𑀢𑀯𑀡𑁆𑀡𑀁 𑀅𑀳𑁄𑀲𑀺. 𑀦𑀺𑀤𑀸𑀖𑀲𑀫𑀬𑁂 𑀧𑀺𑀧𑀸𑀲𑀺𑀢𑀸 𑀲𑀓𑀼𑀡𑀕𑀡𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀧𑀢𑀺𑀁𑀲𑀼, 𑀢𑀲𑁆𑀫𑀺𑀁 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀺𑀓𑀽𑀚𑀫𑀸𑀦𑀸 𑀧𑀓𑁆𑀓𑀫𑀦𑁆𑀢𑀺. 𑀭𑀼𑀓𑁆𑀔𑀲𑀼𑀦𑀔𑀫𑀓𑁆𑀓𑀝𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀦𑀘𑀭𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀇𑀤𑀁 𑀯𑀺𑀲𑀁 𑀪𑀯𑁂𑀬𑁆𑀬, 𑀇𑀫𑁂 𑀫𑀭𑁂𑀬𑁆𑀬𑀼𑀁, 𑀇𑀫𑁂 𑀧𑀦 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀦𑀬𑀺𑀤𑀁 𑀯𑀺𑀲’’𑀦𑁆𑀢𑀺 𑀲𑀬𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑁄 𑀳𑀼𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑁄 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀧𑀢𑀺𑀢𑁂 𑀢𑀺𑀢𑁆𑀢𑀺𑀭𑀓𑀼𑀓𑁆𑀓𑀼𑀝𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀅𑀗𑁆𑀕𑀸𑀭𑁂 𑀧𑀘𑀺𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀦𑀘𑁆𑀘𑀦𑁆𑀢𑁄 𑀏𑀓𑁂𑀦 𑀫𑀁𑀲𑀁 𑀔𑀸𑀤𑀦𑁆𑀢𑁄 𑀏𑀓𑀸𑀳𑀤𑁆𑀯𑀻𑀳𑀁 𑀢𑀢𑁆𑀣𑁂𑀯 𑀅𑀳𑁄𑀲𑀺.

𑀢𑀢𑁄 𑀧𑀦 𑀅𑀯𑀺𑀤𑀽𑀭𑁂 𑀏𑀓𑁄 𑀯𑀭𑀼𑀡𑁄 𑀦𑀸𑀫 𑀢𑀸𑀧𑀲𑁄 𑀯𑀲𑀢𑀺. 𑀯𑀦𑀘𑀭𑀓𑁄 𑀅𑀜𑁆𑀜𑀤𑀸𑀧𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀧𑀸𑀦𑀁 𑀢𑀸𑀧𑀲𑁂𑀦 𑀲𑀤𑁆𑀥𑀺𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀁 𑀯𑁂𑀴𑀼𑀦𑀸𑀴𑀺𑀓𑀁 𑀧𑀽𑀭𑁂𑀢𑁆𑀯𑀸 𑀧𑀓𑁆𑀓𑀫𑀁𑀲𑁂𑀦 𑀲𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀧𑀺𑀯𑀣𑀸’’𑀢𑀺 𑀯𑀢𑁆𑀯𑀸 𑀉𑀪𑁄𑀧𑀺 𑀫𑀁𑀲𑀁 𑀔𑀸𑀤𑀦𑁆𑀢𑀸 𑀧𑀺𑀯𑀺𑀁𑀲𑀼. 𑀇𑀢𑀺 𑀲𑀼𑀭𑁂𑀦 𑀘 𑀯𑀭𑀼𑀡𑁂𑀦 𑀘 𑀤𑀺𑀝𑁆𑀞𑀢𑁆𑀢𑀸 𑀢𑀲𑁆𑀲 𑀧𑀸𑀦𑀲𑁆𑀲 ‘‘𑀲𑀼𑀭𑀸’’𑀢𑀺 𑀘 ‘‘𑀯𑀭𑀼𑀡𑀸’’𑀢𑀺 𑀘 𑀦𑀸𑀫𑀁 𑀚𑀸𑀢𑀁. 𑀢𑁂 𑀉𑀪𑁄𑀧𑀺 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀯𑁂𑀴𑀼𑀦𑀸𑀴𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀸𑀚𑁂𑀦𑀸𑀤𑀸𑀬 𑀧𑀘𑁆𑀘𑀦𑁆𑀢𑀦𑀕𑀭𑀁 𑀕𑀦𑁆𑀢𑁆𑀯𑀸 ‘‘𑀧𑀸𑀦𑀓𑀸𑀭𑀓𑀸 𑀦𑀸𑀫 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀼𑀁. 𑀭𑀸𑀚𑀸 𑀦𑁂 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀢𑁂 𑀢𑀲𑁆𑀲 𑀧𑀸𑀦𑀁 𑀉𑀧𑀦𑁂𑀲𑀼𑀁. 𑀭𑀸𑀚𑀸 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀺𑀯𑀺𑀢𑁆𑀯𑀸 𑀫𑀚𑁆𑀚𑀺, 𑀢𑀲𑁆𑀲 𑀢𑀁 𑀏𑀓𑀸𑀳𑀤𑁆𑀯𑀻𑀳𑀫𑀢𑁆𑀢𑀫𑁂𑀯 𑀅𑀳𑁄𑀲𑀺. 𑀅𑀣 𑀦𑁂 ‘‘𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀼𑀳𑀺’’𑀦𑁆𑀢𑀺? ‘‘𑀳𑀺𑀫𑀯𑀦𑁆𑀢𑁂 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀆𑀦𑁂𑀣𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀏𑀓𑀤𑁆𑀯𑁂 𑀯𑀸𑀭𑁂 𑀆𑀦𑁂𑀢𑁆𑀯𑀸 ‘‘𑀦𑀺𑀩𑀤𑁆𑀥𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀪𑀸𑀭𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀢𑀘𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑀫𑁆𑀪𑀸𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑁂 𑀲𑀼𑀭𑀁 𑀓𑀭𑀺𑀁𑀲𑀼. 𑀦𑀸𑀕𑀭𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀧𑀫𑀸𑀤𑀁 𑀆𑀧𑀦𑁆𑀦𑀸 𑀤𑀼𑀕𑁆𑀕𑀢𑀸 𑀅𑀳𑁂𑀲𑀼𑀁, 𑀦𑀕𑀭𑀁 𑀲𑀼𑀜𑁆𑀜𑀁 𑀯𑀺𑀬 𑀅𑀳𑁄𑀲𑀺, 𑀢𑁂𑀦 𑀧𑀸𑀦𑀓𑀸𑀭𑀓𑀸 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 ‘‘𑀧𑀸𑀦𑀓𑀸𑀭𑀓𑀸 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀼𑀁. 𑀭𑀸𑀚𑀸 𑀦𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀅𑀤𑀸𑀲𑀺. 𑀢𑁂 𑀢𑀢𑁆𑀣𑀸𑀧𑀺 𑀲𑀼𑀭𑀁 𑀅𑀓𑀁𑀲𑀼, 𑀢𑀫𑁆𑀧𑀺 𑀦𑀕𑀭𑀁 𑀢𑀣𑁂𑀯 𑀯𑀺𑀦𑀲𑁆𑀲𑀺, 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀲𑀸𑀓𑁂𑀢𑀁, 𑀲𑀸𑀓𑁂𑀢𑀢𑁄 𑀲𑀸𑀯𑀢𑁆𑀣𑀺𑀁 𑀅𑀕𑀫𑀁𑀲𑀼.

𑀢𑀤𑀸 𑀲𑀸𑀯𑀢𑁆𑀣𑀺𑀬𑀁 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀢𑁂𑀲𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸 ‘‘𑀓𑁂𑀦 𑀯𑁄 𑀅𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀫𑁆𑀪𑀸𑀭𑀫𑀽𑀮𑁂𑀦 𑀘𑁂𑀯 𑀲𑀸𑀮𑀺𑀧𑀺𑀝𑁆𑀞𑁂𑀦 𑀘 𑀧𑀜𑁆𑀘𑀳𑀺 𑀘𑀸𑀝𑀺𑀲𑀢𑁂𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀤𑀸𑀧𑁂𑀲𑀺. 𑀢𑁂 𑀧𑀜𑁆𑀘𑀲𑀼 𑀘𑀸𑀝𑀺𑀲𑀢𑁂𑀲𑀼 𑀲𑀼𑀭𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀫𑀽𑀲𑀺𑀓𑀪𑀬𑁂𑀦 𑀘𑀸𑀝𑀺𑀭𑀓𑁆𑀔𑀡𑀢𑁆𑀣𑀸𑀬 𑀏𑀓𑁂𑀓𑀸𑀬 𑀘𑀸𑀝𑀺𑀬𑀸 𑀲𑀦𑁆𑀢𑀺𑀓𑁂 𑀏𑀓𑁂𑀓𑀁 𑀩𑀺𑀴𑀸𑀭𑀁 𑀩𑀦𑁆𑀥𑀺𑀁𑀲𑀼. 𑀢𑁂 𑀧𑀘𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀡𑀓𑀸𑀮𑁂 𑀘𑀸𑀝𑀺𑀓𑀼𑀘𑁆𑀙𑀻𑀲𑀼 𑀧𑀕𑁆𑀖𑀭𑀦𑁆𑀢𑀁 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀦𑀺𑀤𑁆𑀤𑀸𑀬𑀺𑀁𑀲𑀼. 𑀫𑀽𑀲𑀺𑀓𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀡𑁆𑀡𑀦𑀸𑀲𑀺𑀓𑀤𑀸𑀞𑀺𑀓𑀦𑀗𑁆𑀕𑀼𑀝𑁆𑀞𑁂 𑀔𑀸𑀤𑀺𑀢𑁆𑀯𑀸 𑀅𑀕𑀫𑀁𑀲𑀼. ‘‘𑀩𑀺𑀴𑀸𑀭𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀫𑀢𑀸’’𑀢𑀺 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀯𑀺𑀲𑀓𑀸𑀭𑀓𑀸 𑀏𑀢𑁂 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀸𑀧𑁂𑀲𑀺. 𑀢𑁂 ‘‘𑀲𑀼𑀭𑀁 𑀤𑁂𑀯, 𑀫𑀥𑀼𑀭𑀁 𑀤𑁂𑀯𑀸’’𑀢𑀺 𑀯𑀺𑀭𑀯𑀦𑁆𑀢𑀸𑀯 𑀫𑀭𑀺𑀁𑀲𑀼. 𑀭𑀸𑀚𑀸 𑀢𑁂 𑀫𑀸𑀭𑀸𑀧𑁂𑀢𑁆𑀯𑀸 ‘‘𑀘𑀸𑀝𑀺𑀬𑁄 𑀪𑀺𑀦𑁆𑀤𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀩𑀺𑀴𑀸𑀭𑀸𑀧𑀺 𑀲𑀼𑀭𑀸𑀬 𑀚𑀺𑀡𑁆𑀡𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀓𑀻𑀴𑀦𑁆𑀢𑀸 𑀯𑀺𑀘𑀭𑀺𑀁𑀲𑀼, 𑀢𑁂 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀘𑁂 𑀯𑀺𑀲𑀁 𑀅𑀲𑁆𑀲, 𑀏𑀢𑁂 𑀫𑀭𑁂𑀬𑁆𑀬𑀼𑀁, 𑀫𑀥𑀼𑀭𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀧𑀺𑀯𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀲𑀼𑀭𑀁 𑀧𑀸𑀢𑀼𑀁 𑀆𑀭𑀪𑀺.

𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀓𑁂 𑀦𑀼 𑀔𑁄 𑀫𑀸𑀢𑀼𑀧𑀝𑁆𑀞𑀸𑀦𑀸𑀤𑀻𑀲𑀼 𑀅𑀧𑁆𑀧𑀫𑀢𑁆𑀢𑀸 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀦𑁆𑀢𑀻’’𑀢𑀺 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀲𑀼𑀭𑀁 𑀧𑀸𑀢𑀼𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀲𑀼𑀭𑀁 𑀧𑀺𑀯𑀺𑀲𑁆𑀲𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀦𑀲𑁆𑀲𑀺𑀲𑁆𑀲𑀢𑀺. 𑀬𑀣𑀸 𑀦 𑀧𑀺𑀯𑀺𑀲𑁆𑀲𑀢𑀺, 𑀢𑀣𑀸 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀲𑀼𑀭𑀸𑀧𑀼𑀡𑁆𑀡𑀁 𑀓𑀼𑀫𑁆𑀪𑀁 𑀳𑀢𑁆𑀣𑀢𑀮𑁂 𑀞𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀇𑀫𑀁 𑀓𑀼𑀫𑁆𑀪𑀁 𑀓𑀺𑀡𑀸𑀣, 𑀇𑀫𑀁 𑀓𑀼𑀫𑁆𑀪𑀁 𑀓𑀺𑀡𑀸𑀣𑀸’’𑀢𑀺 𑀆𑀳. 𑀲𑀩𑁆𑀩𑀫𑀺𑀢𑁆𑀢𑀭𑀸𑀚𑀸 𑀢𑀁 𑀢𑀣𑀸 𑀯𑀤𑀦𑁆𑀢𑀁 𑀆𑀓𑀸𑀲𑁂 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀦𑀼 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀆𑀕𑀘𑁆𑀙𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩. ‘‘𑀓𑁄 𑀧𑀸𑀢𑀼𑀭𑀸𑀲𑀻 𑀢𑀺𑀤𑀺𑀯𑀸 𑀦𑀪𑀫𑁆𑀳𑀺, 𑀑𑀪𑀸𑀲𑀬𑀁 𑀲𑀁𑀯𑀭𑀺𑀁 𑀘𑀦𑁆𑀤𑀺𑀫𑀸𑀯;

𑀕𑀢𑁆𑀢𑁂𑀳𑀺 𑀢𑁂 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁩𑁪. ‘‘𑀲𑁄 𑀙𑀺𑀦𑁆𑀦𑀯𑀸𑀢𑀁 𑀓𑀫𑀲𑀻 𑀅𑀖𑀫𑁆𑀳𑀺, 𑀯𑁂𑀳𑀸𑀬𑀲𑀁 𑀕𑀘𑁆𑀙𑀲𑀺 𑀢𑀺𑀝𑁆𑀞𑀲𑀻 𑀘;

𑀇𑀤𑁆𑀥𑀻 𑀦𑀼 𑀢𑁂 𑀯𑀢𑁆𑀣𑀼𑀓𑀢𑀸 𑀲𑀼𑀪𑀸𑀯𑀺𑀢𑀸, 𑀅𑀦𑀤𑁆𑀥𑀕𑀽𑀦𑀁 𑀅𑀧𑀺 𑀤𑁂𑀯𑀢𑀸𑀦𑀁.

𑁩𑁫. ‘‘𑀯𑁂𑀳𑀸𑀬𑀲𑀁 𑀕𑀫𑁆𑀫𑀫𑀸𑀕𑀫𑁆𑀫 𑀢𑀺𑀝𑁆𑀞𑀲𑀺, 𑀓𑀼𑀫𑁆𑀪𑀁 𑀓𑀺𑀡𑀸𑀣𑀸𑀢𑀺 𑀬𑀫𑁂𑀢𑀫𑀢𑁆𑀣𑀁;

𑀓𑁄 𑀯𑀸 𑀢𑀼𑀯𑀁 𑀓𑀺𑀲𑁆𑀲 𑀯𑀸 𑀢𑀸𑀬 𑀓𑀼𑀫𑁆𑀪𑁄, 𑀅𑀓𑁆𑀔𑀸𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀏𑀢𑀫𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀓𑁄 𑀧𑀸𑀢𑀼𑀭𑀸𑀲𑀻𑀢𑀺 𑀓𑀼𑀢𑁄 𑀧𑀸𑀢𑀼𑀪𑀽𑀢𑁄𑀲𑀺, 𑀓𑀼𑀢𑁄 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀺𑀤𑀺𑀯𑀸 𑀦𑀪𑀫𑁆𑀳𑀻𑀢𑀺 𑀓𑀺𑀁 𑀢𑀸𑀯𑀢𑀺𑀁𑀲𑀪𑀯𑀦𑀸 𑀆𑀕𑀦𑁆𑀢𑁆𑀯𑀸 𑀇𑀥 𑀦𑀪𑀫𑁆𑀳𑀺 𑀆𑀓𑀸𑀲𑁂 𑀧𑀸𑀓𑀝𑁄 𑀚𑀸𑀢𑁄𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀁𑀯𑀭𑀺𑀦𑁆𑀢𑀺 𑀭𑀢𑁆𑀢𑀺𑀁. 𑀲𑀢𑁂𑀭𑀢𑀸𑀢𑀺 𑀏𑀯𑀁𑀦𑀸𑀫𑀺𑀓𑀸. 𑀲𑁄𑀢𑀺 𑀲𑁄 𑀢𑁆𑀯𑀁. 𑀙𑀺𑀦𑁆𑀦𑀯𑀸𑀢𑀦𑁆𑀢𑀺 𑀯𑀮𑀸𑀳𑀓𑁄𑀧𑀺 𑀢𑀸𑀯 𑀯𑀸𑀢𑁂𑀦 𑀓𑀫𑀢𑀺, 𑀢𑀲𑁆𑀲 𑀧𑀦 𑀲𑁄𑀧𑀺 𑀯𑀸𑀢𑁄 𑀦𑀢𑁆𑀣𑀺, 𑀢𑁂𑀦𑁂𑀯𑀫𑀸𑀳. 𑀓𑀫𑀲𑀻𑀢𑀺 𑀧𑀯𑀢𑁆𑀢𑁂𑀲𑀺. 𑀅𑀖𑀫𑁆𑀳𑀻𑀢𑀺 𑀅𑀧𑁆𑀧𑀝𑀺𑀖𑁂 𑀆𑀓𑀸𑀲𑁂. 𑀯𑀢𑁆𑀣𑀼𑀓𑀢𑀸𑀢𑀺 𑀯𑀢𑁆𑀣𑀼 𑀯𑀺𑀬 𑀧𑀢𑀺𑀝𑁆𑀞𑀸 𑀯𑀺𑀬 𑀓𑀢𑀸. 𑀅𑀦𑀤𑁆𑀥𑀕𑀽𑀦𑀁 𑀅𑀧𑀺 𑀤𑁂𑀯𑀢𑀸𑀦𑀦𑁆𑀢𑀺 𑀬𑀸 𑀧𑀤𑀲𑀸 𑀅𑀤𑁆𑀥𑀸𑀦𑀁 𑀅𑀕𑀫𑀦𑁂𑀦 𑀅𑀦𑀤𑁆𑀥𑀕𑀽𑀦𑀁 𑀤𑁂𑀯𑀢𑀸𑀦𑀁 𑀇𑀤𑁆𑀥𑀺, 𑀲𑀸 𑀅𑀧𑀺 𑀢𑀯 𑀲𑀼𑀪𑀸𑀯𑀺𑀢𑀸𑀢𑀺 𑀧𑀼𑀘𑁆𑀙𑀢𑀺. 𑀯𑁂𑀳𑀸𑀬𑀲𑀁 𑀕𑀫𑁆𑀫𑀫𑀸𑀕𑀫𑁆𑀫𑀸𑀢𑀺 𑀆𑀓𑀸𑀲𑁂 𑀧𑀯𑀢𑁆𑀢𑀁 𑀧𑀤𑀯𑀻𑀢𑀺𑀳𑀸𑀭𑀁 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬. ‘‘𑀢𑀺𑀝𑁆𑀞𑀲𑀻’’𑀢𑀺 𑀇𑀫𑀲𑁆𑀲 ‘‘𑀓𑁄 𑀯𑀸 𑀢𑀼𑀯’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄 𑀓𑁄 𑀯𑀸 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀬𑀫𑁂𑀢𑀫𑀢𑁆𑀣𑀦𑁆𑀢𑀺 𑀬𑀁 𑀏𑀢𑀁 𑀯𑀤𑀲𑀺. 𑀇𑀫𑀲𑁆𑀲 ‘‘𑀓𑀺𑀲𑁆𑀲 𑀯𑀸 𑀢𑀸𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀬𑀁 𑀏𑀢𑀁 𑀓𑀼𑀫𑁆𑀪𑀁 𑀓𑀺𑀡𑀸𑀣𑀸𑀢𑀺 𑀯𑀤𑀲𑀺, 𑀓𑀺𑀲𑁆𑀲 𑀯𑀸 𑀢𑁂 𑀅𑀬𑀁 𑀓𑀼𑀫𑁆𑀪𑁄𑀢𑀺 𑀅𑀢𑁆𑀣𑁄.

𑀢𑀢𑁄 𑀲𑀓𑁆𑀓𑁄 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀼𑀭𑀸𑀬 𑀤𑁄𑀲𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁩𑁬. ‘‘𑀦 𑀲𑀧𑁆𑀧𑀺𑀓𑀼𑀫𑁆𑀪𑁄 𑀦𑀧𑀺 𑀢𑁂𑀮𑀓𑀼𑀫𑁆𑀪𑁄, 𑀦 𑀨𑀸𑀡𑀺𑀢𑀲𑁆𑀲 𑀦 𑀫𑀥𑀼𑀲𑁆𑀲 𑀓𑀼𑀫𑁆𑀪𑁄;

𑀓𑀼𑀫𑁆𑀪𑀲𑁆𑀲 𑀯𑀚𑁆𑀚𑀸𑀦𑀺 𑀅𑀦𑀧𑁆𑀧𑀓𑀸𑀦𑀺, 𑀤𑁄𑀲𑁂 𑀩𑀳𑀽 𑀓𑀼𑀫𑁆𑀪𑀕𑀢𑁂 𑀲𑀼𑀡𑀸𑀣.

𑁩𑁭. ‘‘𑀕𑀴𑁂𑀬𑁆𑀬 𑀬𑀁 𑀧𑀺𑀢𑁆𑀯𑀸 𑀧𑀢𑁂 𑀧𑀧𑀸𑀢𑀁, 𑀲𑁄𑀩𑁆𑀪𑀁 𑀕𑀼𑀳𑀁 𑀘𑀦𑁆𑀤𑀦𑀺𑀬𑁄𑀴𑀺𑀕𑀮𑁆𑀮𑀁;

𑀩𑀳𑀼𑀫𑁆𑀧𑀺 𑀪𑀼𑀜𑁆𑀚𑁂𑀬𑁆𑀬 𑀅𑀪𑁄𑀚𑀦𑁂𑀬𑁆𑀬𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁩𑁮. ‘‘𑀬𑀁 𑀧𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀅𑀦𑁂𑀲𑀫𑀸𑀦𑁄, 𑀆𑀳𑀺𑀡𑁆𑀟𑀢𑀻 𑀕𑁄𑀭𑀺𑀯 𑀪𑀓𑁆𑀔𑀲𑀸𑀤𑀻;

𑀅𑀦𑀸𑀣𑀫𑀸𑀦𑁄 𑀉𑀧𑀕𑀸𑀬𑀢𑀺 𑀦𑀘𑁆𑀘𑀢𑀺 𑀘, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁩𑁯. ‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀅𑀘𑁂𑀮𑁄𑀯 𑀦𑀕𑁆𑀕𑁄, 𑀘𑀭𑁂𑀬𑁆𑀬 𑀕𑀸𑀫𑁂 𑀯𑀺𑀲𑀺𑀔𑀦𑁆𑀢𑀭𑀸𑀦𑀺;

𑀲𑀫𑁆𑀫𑀽𑀴𑁆𑀳𑀘𑀺𑀢𑁆𑀢𑁄 𑀅𑀢𑀺𑀯𑁂𑀮𑀲𑀸𑀬𑀻, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁦. ‘‘𑀬𑀁 𑀧𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀯𑁂𑀥𑀫𑀸𑀦𑁄, 𑀲𑀻𑀲𑀜𑁆𑀘 𑀩𑀸𑀳𑀼𑀜𑁆𑀘 𑀧𑀘𑀸𑀮𑀬𑀦𑁆𑀢𑁄;

𑀲𑁄 𑀦𑀘𑁆𑀘𑀢𑀻 𑀤𑀸𑀭𑀼𑀓𑀝𑀮𑁆𑀮𑀓𑁄𑀯, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁧. ‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀅𑀕𑁆𑀕𑀺𑀤𑀟𑁆𑀠𑀸 𑀲𑀬𑀦𑁆𑀢𑀺, 𑀅𑀣𑁄 𑀲𑀺𑀕𑀸𑀮𑁂𑀳𑀺𑀧𑀺 𑀔𑀸𑀤𑀺𑀢𑀸𑀲𑁂;

𑀩𑀦𑁆𑀥𑀁 𑀯𑀥𑀁 𑀪𑁄𑀕𑀚𑀸𑀦𑀺𑀜𑁆𑀘𑀼𑀧𑁂𑀦𑁆𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁨. ‘‘𑀬𑀁 𑀧𑀺𑀢𑁆𑀯𑀸 𑀪𑀸𑀲𑁂𑀬𑁆𑀬 𑀅𑀪𑀸𑀲𑀦𑁂𑀬𑁆𑀬𑀁, 𑀲𑀪𑀸𑀬𑀫𑀸𑀲𑀻𑀦𑁄 𑀅𑀧𑁂𑀢𑀯𑀢𑁆𑀣𑁄;

𑀲𑀫𑁆𑀫𑀓𑁆𑀔𑀺𑀢𑁄 𑀯𑀦𑁆𑀢𑀕𑀢𑁄 𑀩𑁆𑀬𑀲𑀦𑁆𑀦𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁩. ‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀉𑀓𑁆𑀓𑀝𑁆𑀞𑁄 𑀆𑀯𑀺𑀮𑀓𑁆𑀔𑁄, 𑀫𑀫𑁂𑀯 𑀲𑀩𑁆𑀩𑀧𑀣𑀯𑀻𑀢𑀺 𑀫𑀜𑁆𑀜𑁂;

𑀦 𑀫𑁂 𑀲𑀫𑁄 𑀘𑀸𑀢𑀼𑀭𑀦𑁆𑀢𑁄𑀧𑀺 𑀭𑀸𑀚𑀸, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁪. ‘‘𑀫𑀸𑀦𑀸𑀢𑀺𑀫𑀸𑀦𑀸 𑀓𑀮𑀳𑀸𑀦𑀺 𑀧𑁂𑀲𑀼𑀡𑀻, 𑀤𑀼𑀩𑁆𑀩𑀡𑁆𑀡𑀺𑀦𑀻 𑀦𑀕𑁆𑀕𑀬𑀺𑀦𑀻 𑀧𑀮𑀸𑀬𑀺𑀦𑀻;

𑀘𑁄𑀭𑀸𑀦 𑀥𑀼𑀢𑁆𑀢𑀸𑀦 𑀕𑀢𑀻 𑀦𑀺𑀓𑁂𑀢𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁫. ‘‘𑀇𑀤𑁆𑀥𑀸𑀦𑀺 𑀨𑀻𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀼, 𑀅𑀦𑁂𑀓𑀲𑀸𑀳𑀲𑁆𑀲𑀥𑀦𑀸𑀦𑀺 𑀮𑁄𑀓𑁂;

𑀉𑀘𑁆𑀙𑀺𑀦𑁆𑀦𑀤𑀸𑀬𑀚𑁆𑀚𑀓𑀢𑀸𑀦𑀺𑀫𑀸𑀬, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁬. ‘‘𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀔𑁂𑀢𑁆𑀢𑀁 𑀕𑀯𑀁 𑀬𑀢𑁆𑀣 𑀯𑀺𑀦𑀸𑀲𑀬𑀦𑁆𑀢𑀺;

𑀉𑀘𑁆𑀙𑁂𑀤𑀦𑀻 𑀯𑀺𑀢𑁆𑀢𑀕𑀢𑀁 𑀓𑀼𑀮𑀸𑀦𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁭. ‘‘𑀬𑀁 𑀯𑁂 𑀧𑀺𑀢𑁆𑀯𑀸 𑀤𑀺𑀢𑁆𑀢𑀭𑀽𑀧𑁄𑀯 𑀧𑁄𑀲𑁄, 𑀅𑀓𑁆𑀓𑁄𑀲𑀢𑀺 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘;

𑀲𑀲𑁆𑀲𑀼𑀫𑁆𑀧𑀺 𑀕𑀡𑁆𑀳𑁂𑀬𑁆𑀬 𑀅𑀣𑁄𑀧𑀺 𑀲𑀼𑀡𑁆𑀳𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁮. ‘‘𑀬𑀁 𑀯𑁂 𑀧𑀺𑀢𑁆𑀯𑀸 𑀤𑀺𑀢𑁆𑀢𑀭𑀽𑀧𑀸𑀯 𑀦𑀸𑀭𑀻, 𑀅𑀓𑁆𑀓𑁄𑀲𑀢𑀻 𑀲𑀲𑁆𑀲𑀼𑀭𑀁 𑀲𑀸𑀫𑀺𑀓𑀜𑁆𑀘;

𑀤𑀸𑀲𑀫𑁆𑀧𑀺 𑀕𑀡𑁆𑀳𑁂 𑀧𑀭𑀺𑀘𑀸𑀭𑀺𑀓𑀫𑁆𑀧𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁯. ‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸𑀦 𑀳𑀦𑁂𑀬𑁆𑀬 𑀧𑁄𑀲𑁄, 𑀥𑀫𑁆𑀫𑁂 𑀞𑀺𑀢𑀁 𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸;

𑀕𑀘𑁆𑀙𑁂 𑀅𑀧𑀸𑀬𑀫𑁆𑀧𑀺 𑀢𑀢𑁄𑀦𑀺𑀤𑀸𑀦𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁦. ‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀘𑁂𑀢𑀲𑀸 𑀘;

𑀦𑀺𑀭𑀬𑀁 𑀯𑀚𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁧. ‘‘𑀬𑀁 𑀬𑀸𑀘𑀫𑀸𑀦𑀸 𑀦 𑀮𑀪𑀦𑁆𑀢𑀺 𑀧𑀼𑀩𑁆𑀩𑁂, 𑀩𑀳𑀼𑀁 𑀳𑀺𑀭𑀜𑁆𑀜𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑀸;

𑀲𑁄 𑀢𑀁 𑀧𑀺𑀯𑀺𑀢𑁆𑀯𑀸 𑀅𑀮𑀺𑀓𑀁 𑀪𑀡𑀸𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁨. ‘‘𑀬𑀁 𑀯𑁂 𑀧𑀺𑀢𑁆𑀯𑀸 𑀧𑁂𑀲𑀦𑁂 𑀧𑁂𑀲𑀺𑀬𑀦𑁆𑀢𑁄, 𑀅𑀘𑁆𑀘𑀸𑀬𑀺𑀓𑁂 𑀓𑀭𑀡𑀻𑀬𑀫𑁆𑀳𑀺 𑀚𑀸𑀢𑁂;

𑀅𑀢𑁆𑀣𑀫𑁆𑀧𑀺 𑀲𑁄 𑀦𑀧𑁆𑀧𑀚𑀸𑀦𑀸𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.