𑁧𑁪. 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁄

[𑁪𑁮𑁪] 𑁧. 𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀕𑀺𑀳𑀻 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑁂 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀪𑀺𑀓𑁆𑀔𑀼, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀸 𑀳𑀼𑀢𑁆𑀯𑀸 𑀲𑀼𑀯𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀚𑀺𑀡𑁆𑀡𑁂 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑀸𑀯𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀸𑀚𑀕𑀳𑁂 𑀫𑀕𑀥𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀦𑀕𑀭𑀢𑁄 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀬 𑀲𑀸𑀮𑀺𑀤𑁆𑀤𑀺𑀬𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀬 𑀫𑀕𑀥𑀔𑁂𑀢𑁆𑀢𑀁 𑀅𑀢𑁆𑀣𑀺, 𑀢𑀢𑁆𑀣 𑀓𑁄𑀲𑀺𑀬𑀕𑁄𑀢𑁆𑀢𑁄 𑀦𑀸𑀫 𑀲𑀸𑀮𑀺𑀤𑁆𑀤𑀺𑀬𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀲𑀳𑀲𑁆𑀲𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀸𑀮𑀺𑀁 𑀯𑀧𑀸𑀧𑁂𑀲𑀺. 𑀉𑀝𑁆𑀞𑀺𑀢𑁂 𑀘 𑀧𑀦 𑀲𑀲𑁆𑀲𑁂 𑀯𑀢𑀺𑀁 𑀣𑀺𑀭𑀁 𑀓𑀸𑀭𑁂𑀢𑁆𑀯𑀸 𑀓𑀲𑁆𑀲𑀘𑀺 𑀧𑀡𑁆𑀡𑀸𑀲𑀓𑀭𑀻𑀲𑀫𑀢𑁆𑀢𑀁, 𑀓𑀲𑁆𑀲𑀘𑀺 𑀲𑀝𑁆𑀞𑀺𑀓𑀭𑀻𑀲𑀫𑀢𑁆𑀢𑀦𑁆𑀢𑀺 𑀏𑀯𑀁 𑀧𑀜𑁆𑀘𑀲𑀢𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀅𑀢𑁆𑀢𑀦𑁄 𑀧𑀼𑀭𑀺𑀲𑀸𑀦𑀁𑀬𑁂𑀯 𑀆𑀭𑀓𑁆𑀔𑀡𑀢𑁆𑀣𑀸𑀬 𑀤𑀢𑁆𑀯𑀸 𑀲𑁂𑀲𑀁 𑀧𑀜𑁆𑀘𑀲𑀢𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀢𑀓𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀢𑁆𑀣 𑀓𑀼𑀝𑀺𑀁 𑀓𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀲𑀢𑀺. 𑀔𑁂𑀢𑁆𑀢𑀲𑁆𑀲 𑀧𑀦 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀏𑀓𑀲𑁆𑀫𑀺𑀁 𑀲𑀸𑀦𑀼𑀧𑀩𑁆𑀩𑀢𑁂 𑀫𑀳𑀦𑁆𑀢𑀁 𑀲𑀺𑀫𑁆𑀩𑀮𑀺𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀅𑀦𑁂𑀓𑀸𑀦𑀺 𑀲𑀼𑀯𑀲𑀢𑀸𑀦𑀺 𑀯𑀲𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀲𑀼𑀯𑀲𑀗𑁆𑀖𑁂 𑀲𑀼𑀯𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀅𑀪𑀺𑀭𑀽𑀧𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀲𑀓𑀝𑀦𑀸𑀪𑀺𑀧𑀫𑀸𑀡𑀲𑀭𑀻𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀫𑀳𑀮𑁆𑀮𑀓𑀓𑀸𑀮𑁂 ‘‘𑀅𑀳𑀁 𑀇𑀤𑀸𑀦𑀺 𑀤𑀽𑀭𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀢𑁆𑀯𑀁 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀸’’𑀢𑀺 𑀕𑀡𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀕𑁄𑀘𑀭𑀢𑁆𑀣𑀸𑀬 𑀕𑀦𑁆𑀢𑀼𑀁 𑀦𑀸𑀤𑀸𑀲𑀺, 𑀲𑀼𑀯𑀕𑀡𑀁 𑀧𑀭𑀺𑀳𑀭𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀲𑀬𑀁𑀚𑀸𑀢𑀲𑀸𑀮𑀺𑀯𑀦𑁂 𑀬𑀸𑀯𑀤𑀢𑁆𑀣𑀁 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀦𑀁 𑀧𑀳𑁄𑀦𑀓𑀁 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺.

𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀲𑀼𑀯𑀸 𑀆𑀭𑁄𑀘𑁂𑀲𑀼𑀁 ‘‘𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀕𑀥𑀔𑁂𑀢𑁆𑀢𑁂 𑀲𑀸𑀮𑀺 𑀧𑀘𑁆𑀘𑀢𑀺, 𑀇𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀚𑀸𑀢’’𑀦𑁆𑀢𑀺? ‘‘𑀢𑁂𑀦 𑀳𑀺 𑀚𑀸𑀦𑀸𑀣𑀸’’𑀢𑀺 𑀤𑁆𑀯𑁂 𑀲𑀼𑀯𑁂 𑀧𑀳𑀺𑀡𑀺𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀫𑀕𑀥𑀔𑁂𑀢𑁆𑀢𑁂 𑀑𑀢𑀭𑀦𑁆𑀢𑀸 𑀢𑀲𑁆𑀲 𑀪𑀢𑀺𑀬𑀸 𑀭𑀓𑁆𑀔𑀡𑀧𑀼𑀭𑀺𑀲𑀲𑁆𑀲 𑀔𑁂𑀢𑁆𑀢𑁂 𑀑𑀢𑀭𑀺𑀢𑁆𑀯𑀸 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀏𑀓𑀁 𑀲𑀸𑀮𑀺𑀲𑀻𑀲𑀁 𑀆𑀤𑀸𑀬 𑀲𑀺𑀫𑁆𑀩𑀮𑀺𑀯𑀦𑀁 𑀕𑀦𑁆𑀢𑁆𑀯𑀸 𑀲𑀸𑀮𑀺𑀲𑀻𑀲𑀁 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀢𑀢𑁆𑀣 𑀏𑀯𑀭𑀽𑀧𑁄 𑀲𑀸𑀮𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 𑀧𑀼𑀦𑀤𑀺𑀯𑀲𑁂 𑀲𑀼𑀯𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀪𑀢𑀓𑀲𑁆𑀲 𑀔𑁂𑀢𑁆𑀢𑁂 𑀑𑀢𑀭𑀺. 𑀲𑁄 𑀧𑀦 𑀧𑀼𑀭𑀺𑀲𑁄 𑀲𑀼𑀯𑁂 𑀲𑀸𑀮𑀺𑀁 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀺𑀢𑁆𑀯𑀸 𑀯𑀸𑀭𑁂𑀦𑁆𑀢𑁄𑀧𑀺 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁂𑀲𑀸 𑀲𑀼𑀯𑀸 𑀬𑀸𑀯𑀤𑀢𑁆𑀣𑀁 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀢𑀼𑀘𑁆𑀙𑀫𑀼𑀔𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀼𑀯𑀭𑀸𑀚𑀸 𑀧𑀦 𑀩𑀳𑀽𑀦𑀺 𑀲𑀸𑀮𑀺𑀲𑀻𑀲𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀳𑀼𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀢𑀺. 𑀲𑀼𑀯𑀸 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣𑁂𑀯 𑀲𑀸𑀮𑀺𑀁 𑀔𑀸𑀤𑀺𑀁𑀲𑀼. 𑀅𑀣 𑀲𑁄 𑀧𑀼𑀭𑀺𑀲𑁄 ‘‘𑀲𑀘𑁂 𑀇𑀫𑁂 𑀅𑀜𑁆𑀜𑀁 𑀓𑀢𑀺𑀧𑀸𑀳𑀁 𑀏𑀯𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀓𑀺𑀜𑁆𑀘𑀺 𑀦 𑀪𑀯𑀺𑀲𑁆𑀲𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀺𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀇𑀡𑀁 𑀓𑀭𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀮𑀺𑀫𑀼𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀢𑀣𑀸𑀭𑀽𑀧𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀲𑀸𑀮𑀺𑀤𑁆𑀤𑀺𑀬𑀕𑀸𑀫𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀲𑁆𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁, 𑀪𑁄 𑀧𑀼𑀭𑀺𑀲, 𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀔𑁂𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧. ‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂.

𑁨. ‘‘𑀏𑀓𑁄 𑀘 𑀢𑀢𑁆𑀣 𑀲𑀓𑀼𑀡𑁄, 𑀬𑁄 𑀦𑁂𑀲𑀁 𑀲𑀩𑁆𑀩𑀲𑀼𑀦𑁆𑀤𑀭𑁄;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀯𑁂𑀓𑀮𑁆𑀮𑀁. 𑀲𑀸𑀮𑀺𑀓𑁂𑀤𑀸𑀭𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀁. 𑀲𑀩𑁆𑀩𑀲𑀼𑀦𑁆𑀤𑀭𑁄𑀢𑀺 𑀲𑀩𑁆𑀩𑁂𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀲𑀼𑀦𑁆𑀤𑀭𑁄 𑀭𑀢𑁆𑀢𑀢𑀼𑀡𑁆𑀟𑁄 𑀚𑀺𑀜𑁆𑀚𑀼𑀓𑀲𑀦𑁆𑀦𑀺𑀪𑀅𑀓𑁆𑀔𑀺 𑀭𑀢𑁆𑀢𑀧𑀸𑀤𑁄 𑀢𑀻𑀳𑀺 𑀭𑀢𑁆𑀢𑀭𑀸𑀚𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀻𑀯𑁄 𑀫𑀳𑀸𑀫𑀬𑀽𑀭𑀧𑀫𑀸𑀡𑁄 𑀲𑁄 𑀬𑀸𑀯𑀤𑀢𑁆𑀣𑀁 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀅𑀜𑁆𑀜𑀁 𑀢𑀼𑀡𑁆𑀟𑁂𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀯𑀭𑀸𑀚𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀸𑀲𑀁 𑀑𑀟𑁆𑀟𑁂𑀢𑀼𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. 𑀅𑀣 𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁩. ‘‘𑀑𑀟𑁆𑀟𑁂𑀦𑁆𑀢𑀼 𑀯𑀸𑀮𑀧𑀸𑀲𑀸𑀦𑀺, 𑀬𑀣𑀸 𑀩𑀚𑁆𑀛𑁂𑀣 𑀲𑁄 𑀤𑀺𑀚𑁄;

𑀚𑀻𑀯𑀜𑁆𑀘 𑀦𑀁 𑀕𑀳𑁂𑀢𑁆𑀯𑀸𑀦, 𑀆𑀦𑀬𑁂𑀳𑀺 𑀫𑀫𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀑𑀟𑁆𑀟𑁂𑀦𑁆𑀢𑀽𑀢𑀺 𑀑𑀟𑁆𑀟𑀬𑀦𑁆𑀢𑀼. 𑀯𑀸𑀮𑀧𑀸𑀲𑀸𑀦𑀻𑀢𑀺 𑀅𑀲𑁆𑀲𑀯𑀸𑀮𑀸𑀤𑀺𑀭𑀚𑁆𑀚𑀼𑀫𑀬𑀧𑀸𑀲𑀸𑀦𑀺. 𑀚𑀻𑀯𑀜𑁆𑀘 𑀦𑀦𑁆𑀢𑀺 𑀚𑀻𑀯𑀦𑁆𑀢𑀁 𑀏𑀯 𑀦𑀁. 𑀆𑀦𑀬𑁂𑀳𑀻𑀢𑀺 𑀆𑀦𑁂𑀳𑀺.

𑀢𑀁 𑀲𑀼𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑁄 𑀲𑀸𑀮𑀺𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀇𑀡𑀲𑁆𑀲 𑀅𑀓𑀢𑀪𑀸𑀯𑁂𑀦 𑀢𑀼𑀝𑁆𑀞𑁄 𑀕𑀦𑁆𑀢𑁆𑀯𑀸 𑀅𑀲𑁆𑀲𑀯𑀸𑀮𑁂 𑀯𑀝𑁆𑀝𑁂𑀢𑁆𑀯𑀸 ‘‘𑀅𑀚𑁆𑀚 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀑𑀢𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀯𑀭𑀜𑁆𑀜𑁄 𑀑𑀢𑀭𑀡𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀘𑀸𑀝𑀺𑀧𑀫𑀸𑀡𑀁 𑀧𑀜𑁆𑀚𑀭𑀁 𑀓𑀢𑁆𑀯𑀸 𑀧𑀸𑀲𑀜𑁆𑀘 𑀑𑀟𑁆𑀟𑁂𑀢𑁆𑀯𑀸 𑀲𑀼𑀯𑀸𑀦𑀁 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀓𑀼𑀝𑀺𑀬𑀁 𑀦𑀺𑀲𑀻𑀤𑀺. 𑀲𑀼𑀯𑀭𑀸𑀚𑀸𑀧𑀺 𑀲𑀼𑀯𑀕𑀡𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀅𑀮𑁄𑀮𑀼𑀧𑁆𑀧𑀘𑀸𑀭𑀢𑀸𑀬 𑀳𑀺𑀬𑁆𑀬𑁄 𑀔𑀸𑀤𑀺𑀢𑀝𑁆𑀞𑀸𑀦𑁂 𑀑𑀟𑁆𑀟𑀺𑀢𑀧𑀸𑀲𑁂 𑀧𑀸𑀤𑀁 𑀧𑀯𑁂𑀲𑀦𑁆𑀢𑁄𑀯 𑀑𑀢𑀭𑀺. 𑀲𑁄 𑀅𑀢𑁆𑀢𑀦𑁄 𑀩𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀇𑀤𑀸𑀦𑁂𑀯 𑀩𑀤𑁆𑀥𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸𑀫𑁂 𑀪𑀬𑀢𑀚𑁆𑀚𑀺𑀢𑀸 𑀕𑁄𑀘𑀭𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀏𑀢𑁂𑀲𑀁 𑀕𑁄𑀘𑀭𑀕𑁆𑀕𑀳𑀡𑀁, 𑀢𑀸𑀯 𑀅𑀥𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀲𑀁 𑀲𑀼𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀩𑀤𑁆𑀥𑀭𑀯𑀁 𑀭𑀯𑀺. 𑀅𑀣 𑀲𑀩𑁆𑀩𑁂 𑀢𑁂 𑀲𑀼𑀯𑀸 𑀧𑀮𑀸𑀬𑀺𑀁𑀲𑀼. 𑀲𑀼𑀯𑀭𑀸𑀚𑀸 ‘‘𑀏𑀢𑁆𑀢𑀓𑁂𑀲𑀼 𑀫𑁂 𑀜𑀸𑀢𑀓𑁂𑀲𑀼 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀏𑀓𑁄𑀧𑀺 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀁 𑀓𑀢’’𑀦𑁆𑀢𑀺 𑀯𑀺𑀮𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁪. ‘‘𑀏𑀢𑁂 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀏𑀓𑁄 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸’’𑀢𑀺.

𑀔𑁂𑀢𑁆𑀢𑀧𑀸𑀮𑁄 𑀲𑀼𑀯𑀭𑀸𑀚𑀲𑁆𑀲 𑀩𑀤𑁆𑀥𑀭𑀯𑀁 𑀲𑀼𑀯𑀸𑀦𑀜𑁆𑀘 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀓𑀼𑀝𑀺𑀬𑀸 𑀑𑀭𑀼𑀬𑁆𑀳 𑀧𑀸𑀲𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀯𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀬𑀲𑁆𑀲𑁂𑀯 𑀫𑁂 𑀧𑀸𑀲𑁄 𑀑𑀟𑁆𑀟𑀺𑀢𑁄, 𑀲𑁆𑀯𑁂𑀯 𑀩𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀲𑀼𑀯𑀭𑀸𑀚𑀸𑀦𑀁 𑀧𑀸𑀲𑀢𑁄 𑀫𑁄𑀘𑁂𑀢𑁆𑀯𑀸 𑀤𑁆𑀯𑁂 𑀧𑀸𑀤𑁂 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀤𑀴𑁆𑀳𑀁 𑀆𑀤𑀸𑀬 𑀲𑀸𑀮𑀺𑀤𑁆𑀤𑀺𑀬𑀕𑀸𑀫𑀁 𑀕𑀦𑁆𑀢𑁆𑀯𑀸 𑀲𑀼𑀯𑀭𑀸𑀚𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀩𑀮𑀯𑀲𑀺𑀦𑁂𑀳𑁂𑀦 𑀫𑀳𑀸𑀲𑀢𑁆𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫. ‘‘𑀉𑀤𑀭𑀁 𑀦𑀽𑀦 𑀅𑀜𑁆𑀜𑁂𑀲𑀁, 𑀲𑀼𑀯 𑀅𑀘𑁆𑀘𑁄𑀤𑀭𑀁 𑀢𑀯;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀲𑀺.

𑁬. ‘‘𑀓𑁄𑀝𑁆𑀞𑀁 𑀦𑀼 𑀢𑀢𑁆𑀣 𑀧𑀽𑀭𑁂𑀲𑀺, 𑀲𑀼𑀯 𑀯𑁂𑀭𑀁 𑀦𑀼 𑀢𑁂 𑀫𑀬𑀸;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀼𑀳𑀺𑀁 𑀲𑀸𑀮𑀺𑀁 𑀦𑀺𑀤𑀸𑀳𑀲𑀻’’𑀢𑀺.

𑀢𑀢𑁆𑀣 𑀉𑀤𑀭𑀁 𑀦𑀽𑀦𑀸𑀢𑀺 𑀅𑀜𑁆𑀜𑁂𑀲𑀁 𑀉𑀤𑀭𑀁 𑀉𑀤𑀭𑀫𑁂𑀯 𑀫𑀜𑁆𑀜𑁂, 𑀢𑀯 𑀉𑀤𑀭𑀁 𑀧𑀦 𑀅𑀢𑀺𑀉𑀤𑀭𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀺𑀫𑁆𑀩𑀮𑀺𑀯𑀦𑁂. 𑀧𑀽𑀭𑁂𑀲𑀻𑀢𑀺 𑀯𑀲𑁆𑀲𑀸𑀭𑀢𑁆𑀢𑀢𑁆𑀣𑀸𑀬 𑀧𑀽𑀭𑁂𑀲𑀺. 𑀦𑀺𑀤𑀸𑀳𑀲𑀻𑀢𑀺 𑀦𑀺𑀥𑀸𑀦𑀁 𑀓𑀢𑁆𑀯𑀸 𑀞𑀧𑁂𑀲𑀺, ‘‘𑀦𑀺𑀥𑀻𑀬𑀲𑀻’’𑀢𑀺𑀧𑀺 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀲𑀼𑀯𑀭𑀸𑀚𑀸 𑀫𑀥𑀼𑀭𑀸𑀬 𑀫𑀦𑀼𑀲𑁆𑀲𑀪𑀸𑀲𑀸𑀬 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭. ‘‘𑀦 𑀫𑁂 𑀯𑁂𑀭𑀁 𑀢𑀬𑀸 𑀲𑀤𑁆𑀥𑀺𑀁, 𑀓𑁄𑀝𑁆𑀞𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀇𑀡𑀁 𑀫𑀼𑀜𑁆𑀘𑀸𑀫𑀺𑀡𑀁 𑀤𑀫𑁆𑀫𑀺, 𑀲𑀫𑁆𑀧𑀢𑁆𑀢𑁄 𑀓𑁄𑀝𑀲𑀺𑀫𑁆𑀩𑀮𑀺𑀁;

𑀦𑀺𑀥𑀺𑀫𑁆𑀧𑀺 𑀢𑀢𑁆𑀣 𑀦𑀺𑀤𑀳𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬𑀸’’𑀢𑀺.

𑀢𑀢𑁆𑀣 𑀇𑀡𑀁 𑀫𑀼𑀜𑁆𑀘𑀸𑀫𑀺𑀡𑀁 𑀤𑀫𑁆𑀫𑀻𑀢𑀺 𑀢𑀯 𑀲𑀸𑀮𑀺𑀁 𑀳𑀭𑀺𑀢𑁆𑀯𑀸 𑀇𑀡𑀁 𑀫𑀼𑀜𑁆𑀘𑀸𑀫𑀺 𑀘𑁂𑀯 𑀤𑀫𑁆𑀫𑀺 𑀘𑀸𑀢𑀺 𑀯𑀤𑀢𑀺. 𑀦𑀺𑀥𑀺𑀫𑁆𑀧𑀻𑀢𑀺 𑀏𑀓𑀁 𑀢𑀢𑁆𑀣 𑀲𑀺𑀫𑁆𑀩𑀮𑀺𑀯𑀦𑁂 𑀅𑀦𑀼𑀕𑀸𑀫𑀺𑀓𑀦𑀺𑀥𑀺𑀫𑁆𑀧𑀺 𑀦𑀺𑀤𑀳𑀸𑀫𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀧𑀼𑀘𑁆𑀙𑀺 𑁋

𑁮. ‘‘𑀓𑀻𑀤𑀺𑀲𑀁 𑀢𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀓𑀻𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀳𑀺, 𑀅𑀣 𑀧𑀸𑀲𑀸 𑀧𑀫𑁄𑀓𑁆𑀔𑀲𑀻’’𑀢𑀺.

𑀢𑀢𑁆𑀣 𑀇𑀡𑀤𑀸𑀦𑀦𑁆𑀢𑀺 𑀇𑀡𑀲𑁆𑀲 𑀤𑀸𑀦𑀁. 𑀦𑀺𑀥𑀺𑀦𑀺𑀥𑀸𑀦𑀦𑁆𑀢𑀺 𑀦𑀺𑀥𑀺𑀦𑁄 𑀦𑀺𑀥𑀸𑀦𑀁.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁄 𑀲𑀼𑀯𑀭𑀸𑀚𑀸 𑀢𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁯. ‘‘𑀅𑀚𑀸𑀢𑀧𑀓𑁆𑀔𑀸 𑀢𑀭𑀼𑀡𑀸, 𑀧𑀼𑀢𑁆𑀢𑀓𑀸 𑀫𑀬𑁆𑀳 𑀓𑁄𑀲𑀺𑀬;

𑀢𑁂 𑀫𑀁 𑀪𑀢𑀸 𑀪𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀇𑀡𑀁 𑀤𑀤𑁂.

𑁧𑁦. ‘‘𑀫𑀸𑀢𑀸 𑀧𑀺𑀢𑀸 𑀘 𑀫𑁂 𑀯𑀼𑀤𑁆𑀥𑀸, 𑀚𑀺𑀡𑁆𑀡𑀓𑀸 𑀕𑀢𑀬𑁄𑀩𑁆𑀩𑀦𑀸;

𑀢𑁂𑀲𑀁 𑀢𑀼𑀡𑁆𑀟𑁂𑀦 𑀳𑀸𑀢𑀽𑀦, 𑀫𑀼𑀜𑁆𑀘𑁂 𑀧𑀼𑀩𑁆𑀩𑀓𑀢𑀁 𑀇𑀡𑀁.

𑁧𑁧. ‘‘𑀅𑀜𑁆𑀜𑁂𑀧𑀺 𑀢𑀢𑁆𑀣 𑀲𑀓𑀼𑀡𑀸, 𑀔𑀻𑀡𑀧𑀓𑁆𑀔𑀸 𑀲𑀼𑀤𑀼𑀩𑁆𑀩𑀮𑀸;

𑀢𑁂𑀲𑀁 𑀧𑀼𑀜𑁆𑀜𑀢𑁆𑀣𑀺𑀓𑁄 𑀤𑀫𑁆𑀫𑀺, 𑀢𑀁 𑀦𑀺𑀥𑀺𑀁 𑀆𑀳𑀼 𑀧𑀡𑁆𑀟𑀺𑀢𑀸.

𑁧𑁨. ‘‘𑀈𑀤𑀺𑀲𑀁 𑀫𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀈𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬𑀸’’𑀢𑀺.

𑀢𑀢𑁆𑀣 𑀳𑀸𑀢𑀽𑀦𑀸𑀢𑀺 𑀳𑀭𑀺𑀢𑁆𑀯𑀸. 𑀢𑀁 𑀦𑀺𑀥𑀺𑀦𑁆𑀢𑀺 𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀧𑀡𑁆𑀟𑀺𑀢𑀸 𑀅𑀦𑀼𑀕𑀸𑀫𑀺𑀓𑀦𑀺𑀥𑀺𑀁 𑀦𑀸𑀫 𑀓𑀣𑁂𑀦𑁆𑀢𑀺. 𑀦𑀺𑀥𑀺𑀦𑀺𑀥𑀸𑀦𑀦𑁆𑀢𑀺 𑀦𑀺𑀥𑀺𑀦𑁄 𑀦𑀺𑀥𑀸𑀦𑀁, ‘‘𑀦𑀺𑀥𑀸𑀦𑀦𑀺𑀥𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑁧𑁩. ‘‘𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀘𑁆𑀘𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀅𑀬𑀁 𑀥𑀫𑁆𑀫𑁄 𑀦 𑀯𑀺𑀚𑁆𑀚𑀢𑀺.

𑁧𑁪. ‘‘𑀪𑀼𑀜𑁆𑀚 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀧𑀼𑀦𑀸𑀧𑀺 𑀲𑀼𑀯 𑀧𑀲𑁆𑀲𑁂𑀫𑀼, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦’’𑀦𑁆𑀢𑀺.

𑀢𑀢𑁆𑀣 𑀪𑀼𑀜𑁆𑀚 𑀲𑀸𑀮𑀺𑀦𑁆𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀪𑀼𑀜𑁆𑀚𑀸𑀢𑀺 𑀓𑀭𑀻𑀲𑀲𑀳𑀲𑁆𑀲𑀫𑁆𑀧𑀺 𑀢𑀲𑁆𑀲𑁂𑀯 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀏𑀯𑀫𑀸𑀳. 𑀧𑀲𑁆𑀲𑁂𑀫𑀽𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀆𑀕𑀢𑀁 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸𑀢𑀺.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀁 𑀬𑀸𑀘𑀺𑀢𑁆𑀯𑀸 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀫𑀼𑀤𑀼𑀘𑀺𑀢𑁆𑀢𑁂𑀦 𑀑𑀮𑁄𑀓𑁂𑀦𑁆𑀢𑁄 𑀧𑀸𑀤𑀢𑁄 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀜𑁆𑀘𑀦𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀔𑀸𑀤𑀸𑀧𑁂𑀢𑁆𑀯𑀸 𑀲𑀓𑁆𑀔𑀭𑁄𑀤𑀓𑀁 𑀧𑀸𑀬𑁂𑀲𑀺. 𑀅𑀣𑀲𑁆𑀲 𑀲𑀼𑀯𑀭𑀸𑀚𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀆𑀳 𑁋

𑁧𑁫. ‘‘𑀪𑀼𑀢𑁆𑀢𑀜𑁆𑀘 𑀧𑀻𑀢𑀜𑁆𑀘 𑀢𑀯𑀲𑁆𑀲𑀫𑀫𑁆𑀳𑀺, 𑀭𑀢𑀻 𑀘 𑀦𑁄 𑀓𑁄𑀲𑀺𑀬 𑀢𑁂 𑀲𑀓𑀸𑀲𑁂;

𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁂𑀲𑀼 𑀤𑀤𑀸𑀳𑀺 𑀤𑀸𑀦𑀁, 𑀚𑀺𑀡𑁆𑀡𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀪𑀭𑀲𑁆𑀲𑀽’’𑀢𑀺.

𑀢𑀢𑁆𑀣 𑀢𑀯𑀲𑁆𑀲𑀫𑀫𑁆𑀳𑀻𑀢𑀺 𑀢𑀯 𑀦𑀺𑀯𑁂𑀲𑀦𑁂. 𑀭𑀢𑀻𑀢𑀺 𑀅𑀪𑀺𑀭𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑀼𑀝𑁆𑀞𑀫𑀸𑀦𑀲𑁄 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁬. ‘‘𑀮𑀓𑁆𑀔𑀻 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀬𑁄 𑀅𑀤𑁆𑀤𑀲𑀸𑀲𑀺𑀁 𑀧𑀯𑀭𑀁 𑀤𑀺𑀚𑀸𑀦𑀁;

𑀲𑀼𑀯𑀲𑁆𑀲 𑀲𑀼𑀢𑁆𑀯𑀸𑀦 𑀲𑀼𑀪𑀸𑀲𑀺𑀢𑀸𑀦𑀺, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀢𑀢𑁆𑀣 𑀮𑀓𑁆𑀔𑀻𑀢𑀺 𑀲𑀺𑀭𑀻𑀧𑀺 𑀧𑀼𑀜𑁆𑀜𑀫𑁆𑀧𑀺 𑀧𑀜𑁆𑀜𑀸𑀧𑀺.

𑀫𑀳𑀸𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀓𑀭𑀻𑀲𑀲𑀳𑀲𑁆𑀲𑀫𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀓𑀭𑀻𑀲𑀫𑁂𑀯 𑀕𑀡𑁆𑀳𑀺. 𑀩𑁆𑀭𑀸𑀳𑁆𑀫𑀡𑁄 𑀣𑀫𑁆𑀪𑁂 𑀦𑀺𑀔𑀦𑀺𑀢𑁆𑀯𑀸 𑀢𑀲𑁆𑀲 𑀔𑁂𑀢𑁆𑀢𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙 𑀲𑀸𑀫𑀺, 𑀅𑀲𑁆𑀲𑀼𑀫𑀼𑀔𑁂 𑀭𑁄𑀤𑀫𑀸𑀦𑁂 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀸𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀼𑀝𑁆𑀞𑀫𑀸𑀦𑀲𑁄 𑀲𑀸𑀮𑀺𑀲𑀻𑀲𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀭𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀉𑀝𑁆𑀞𑁂𑀣𑀸’’𑀢𑀺 𑀆𑀳. 𑀢𑁂 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀉𑀝𑁆𑀞𑀳𑀺𑀁𑀲𑀼, 𑀢𑀸𑀯𑀤𑁂𑀯 𑀲𑀼𑀯𑀕𑀡𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀣𑀁 𑀫𑀼𑀢𑁆𑀢𑁄𑀲𑀺, 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺. 𑀓𑁄𑀲𑀺𑀬𑁄𑀧𑀺 𑀲𑀼𑀯𑀭𑀜𑁆𑀜𑁄 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀳𑀸𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁭. ‘‘𑀲𑁄 𑀓𑁄𑀲𑀺𑀬𑁄 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘𑀪𑀺𑀲𑀗𑁆𑀔𑀭𑀺𑀢𑁆𑀯𑀸;

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀦𑁆𑀢𑀧𑁆𑀧𑀬𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀘𑀸’’𑀢𑀺.

𑀢𑀢𑁆𑀣 𑀲𑀦𑁆𑀢𑀧𑁆𑀧𑀬𑀻𑀢𑀺 𑀕𑀳𑀺𑀢𑀕𑀳𑀺𑀢𑀸𑀦𑀺 𑀪𑀸𑀚𑀦𑀸𑀦𑀺 𑀧𑀽𑀭𑁂𑀦𑁆𑀢𑁄 𑀲𑀦𑁆𑀢𑀧𑁆𑀧𑁂𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀫𑀸𑀢𑀸𑀧𑀺𑀢𑀽𑀦𑀁 𑀧𑁄𑀲𑀦𑀁 𑀦𑀸𑀫 𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀲𑀼𑀯𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀔𑁂𑀢𑁆𑀢𑀧𑀸𑀮𑁄 𑀙𑀦𑁆𑀦𑁄, 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄, 𑀲𑀼𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁮𑁫] 𑁨. 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀯𑀡𑁆𑀡𑀦𑀸

𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑁂 𑀭𑀸𑀳𑀼𑀮𑀫𑀸𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀇𑀤𑀁 𑀧𑀦 𑀚𑀸𑀢𑀓𑀁 𑀤𑀽𑀭𑁂𑀦𑀺𑀤𑀸𑀦𑀢𑁄 𑀧𑀝𑁆𑀞𑀸𑀬 𑀓𑀣𑁂𑀢𑀩𑁆𑀩𑀁. 𑀲𑀸 𑀧𑀦𑁂𑀲𑀸 𑀦𑀺𑀤𑀸𑀦𑀓𑀣𑀸 𑀬𑀸𑀯 𑀮𑀝𑁆𑀞𑀺𑀯𑀦𑁂 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑀻𑀳𑀦𑀸𑀤𑀸 𑀅𑀧𑀡𑁆𑀡𑀓𑀚𑀸𑀢𑀓𑁂 𑀓𑀣𑀺𑀢𑀸, 𑀢𑀢𑁄 𑀧𑀭𑀁 𑀬𑀸𑀯 𑀓𑀧𑀺𑀮𑀯𑀢𑁆𑀣𑀼𑀕𑀫𑀦𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑀭𑀪𑀢𑁆𑀢𑀲𑀫𑀬𑁂 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 ‘‘𑀭𑀸𑀳𑀼𑀮𑀫𑀸𑀢𑀼 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸 𑀕𑀼𑀡𑀁 𑀯𑀡𑁆𑀡𑁂𑀦𑁆𑀢𑁄 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀭𑀸𑀳𑀼𑀮𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀧𑀸𑀬𑀸𑀲𑀺. 𑀢𑀤𑀸 𑀢𑀲𑁆𑀲𑀸 𑀲𑀫𑁆𑀫𑀼𑀔𑀸 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀯𑀲𑀦𑁆𑀢𑀺 𑀢𑀸𑀲𑀼 𑀔𑀢𑁆𑀢𑀺𑀬𑀓𑀜𑁆𑀜𑀸𑀦𑀁𑀬𑁂𑀯 𑀦𑀯𑀼𑀢𑀺𑀅𑀥𑀺𑀓𑀲𑀳𑀲𑁆𑀲𑀁. 𑀲𑀸 𑀢𑀣𑀸𑀕𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀲𑀩𑁆𑀩𑀸 𑀓𑀸𑀲𑀸𑀯𑀸𑀦𑁂𑀯 𑀦𑀺𑀯𑀸𑀲𑁂𑀦𑁆𑀢𑀽’’𑀢𑀺 𑀢𑀸𑀲𑀁 𑀆𑀭𑁄𑀘𑀸𑀧𑁂𑀲𑀺. 𑀢𑀸 𑀢𑀣𑀸 𑀓𑀭𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀺𑀁𑀲𑀼, 𑀫𑀳𑀸𑀧𑀭𑀺𑀤𑁂𑀯𑀲𑀤𑁆𑀤𑁄 𑀅𑀳𑁄𑀲𑀺. 𑀭𑀸𑀳𑀼𑀮𑀫𑀸𑀢𑀸𑀧𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀕𑀢𑁂𑀦 𑀩𑀳𑀼𑀫𑀸𑀦𑁂𑀦 𑀲𑀕𑀸𑀭𑀯𑁂𑀦 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀆𑀭𑀪𑀺, ‘‘𑀪𑀦𑁆𑀢𑁂, 𑀫𑀫 𑀲𑀼𑀡𑁆𑀳𑀸 ‘𑀢𑀼𑀫𑁆𑀳𑁂𑀳𑀺 𑀓𑀸𑀲𑀸𑀯𑀸𑀦𑀺 𑀦𑀺𑀯𑀢𑁆𑀣𑀸𑀦𑀻’𑀢𑀺 𑀲𑀼𑀢𑁆𑀯𑀸 𑀓𑀸𑀲𑀸𑀯𑀸𑀦𑁂𑀯 𑀦𑀺𑀯𑀸𑀲𑁂𑀲𑀺, ‘𑀫𑀸𑀮𑀸𑀤𑀻𑀦𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀻’𑀢𑀺 𑀲𑀼𑀢𑁆𑀯𑀸 𑀫𑀸𑀮𑀸𑀤𑀻𑀦𑀺 𑀧𑀭𑀺𑀘𑁆𑀘𑀚𑀺, ‘𑀪𑀽𑀫𑀺𑀬𑀁 𑀲𑀬𑀢𑀻’𑀢𑀺 𑀲𑀼𑀢𑁆𑀯𑀸 𑀪𑀽𑀫𑀺𑀲𑀬𑀦𑀸𑀯 𑀚𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀯𑀺𑀥𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀳𑀺 𑀭𑀸𑀚𑀽𑀳𑀺 𑀧𑁂𑀲𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀦 𑀕𑀡𑁆𑀳𑀺, 𑀏𑀯𑀁 𑀢𑀼𑀫𑁆𑀳𑁂𑀲𑀼 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀏𑀲𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀲𑀢𑁆𑀣𑀸 ‘‘𑀅𑀦𑀘𑁆𑀙𑀭𑀺𑀬𑀁, 𑀫𑀳𑀸𑀭𑀸𑀚, 𑀬𑀁 𑀏𑀲𑀸 𑀇𑀤𑀸𑀦𑀺 𑀫𑀫 𑀧𑀘𑁆𑀙𑀺𑀫𑁂 𑀅𑀢𑁆𑀢𑀪𑀸𑀯𑁂 𑀫𑀬𑀺 𑀲𑀲𑀺𑀦𑁂𑀳𑀸 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀪𑀯𑁂𑀬𑁆𑀬. 𑀏𑀲𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀫𑀬𑀺 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀫𑀳𑀸𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀘𑀦𑁆𑀤𑀸 𑀦𑀸𑀫𑀲𑁆𑀲 𑀪𑀭𑀺𑀬𑀸. 𑀢𑁂 𑀉𑀪𑁄𑀧𑀺 𑀘𑀦𑁆𑀤𑀦𑀸𑀫𑀓𑁂 𑀭𑀚𑀢𑀧𑀩𑁆𑀩𑀢𑁂 𑀯𑀲𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑁆𑀯𑁂 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀏𑀓𑀓𑁄𑀯 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀲𑁄 𑀫𑀺𑀕𑀫𑀁𑀲𑀁 𑀔𑀸𑀤𑀦𑁆𑀢𑁄 𑀏𑀓𑀁 𑀔𑀼𑀤𑁆𑀤𑀓𑀦𑀤𑀺𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀉𑀤𑁆𑀥𑀁 𑀅𑀪𑀺𑀭𑀼𑀳𑀺. 𑀘𑀦𑁆𑀤𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀦𑁆𑀦𑀭𑀸 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀅𑀦𑁄𑀢𑀭𑀺𑀢𑁆𑀯𑀸 𑀧𑀩𑁆𑀩𑀢𑁂𑀬𑁂𑀯 𑀯𑀲𑀦𑁆𑀢𑀺, 𑀦𑀺𑀤𑀸𑀖𑀲𑀫𑀬𑁂 𑀑𑀢𑀭𑀦𑁆𑀢𑀺. 𑀢𑀤𑀸 𑀘 𑀲𑁄 𑀘𑀦𑁆𑀤𑀓𑀺𑀦𑁆𑀦𑀭𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀑𑀢𑀭𑀺𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀦𑁆𑀢𑁄 𑀧𑀼𑀧𑁆𑀨𑀭𑁂𑀡𑀼𑀁 𑀔𑀸𑀤𑀦𑁆𑀢𑁄 𑀧𑀼𑀧𑁆𑀨𑀧𑀝𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀸𑀭𑀼𑀧𑀦𑁆𑀢𑁄 𑀮𑀢𑀸𑀤𑁄𑀮𑀸𑀳𑀺 𑀓𑀻𑀴𑀦𑁆𑀢𑁄 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀦𑁆𑀢𑁄 𑀢𑀁 𑀔𑀼𑀤𑁆𑀤𑀓𑀦𑀤𑀺𑀁 𑀧𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀺𑀯𑀢𑁆𑀢𑀦𑀝𑁆𑀞𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀤𑀓𑁂 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀧𑀼𑀧𑁆𑀨𑀧𑀝𑁂 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀭𑀚𑀢𑀧𑀝𑁆𑀝𑀯𑀡𑁆𑀡𑀸𑀬 𑀯𑀸𑀮𑀼𑀓𑀸𑀬 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀏𑀓𑀁 𑀯𑁂𑀴𑀼 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀲𑀬𑀦𑁂 𑀦𑀺𑀲𑀻𑀤𑀺. 𑀢𑀢𑁄 𑀘𑀦𑁆𑀤𑀓𑀺𑀦𑁆𑀦𑀭𑁄 𑀯𑁂𑀴𑀼𑀁 𑀯𑀸𑀤𑁂𑀦𑁆𑀢𑁄 𑀫𑀥𑀼𑀭𑀲𑀤𑁆𑀤𑁂𑀦 𑀕𑀸𑀬𑀺. 𑀘𑀦𑁆𑀤𑀓𑀺𑀦𑁆𑀦𑀭𑀻 𑀫𑀼𑀤𑀼𑀳𑀢𑁆𑀣𑁂 𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑀸 𑀦𑀘𑁆𑀘𑀺 𑀘𑁂𑀯 𑀕𑀸𑀬𑀺 𑀘. 𑀲𑁄 𑀭𑀸𑀚𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀤𑀲𑀤𑁆𑀤𑀁 𑀅𑀲𑀸𑀯𑁂𑀦𑁆𑀢𑁄 𑀲𑀡𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀞𑀢𑁆𑀯𑀸 𑀢𑁂 𑀓𑀺𑀦𑁆𑀦𑀭𑁂 𑀤𑀺𑀲𑁆𑀯𑀸 𑀓𑀺𑀦𑁆𑀦𑀭𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀢𑀁 𑀓𑀺𑀦𑁆𑀦𑀭𑀁 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀇𑀫𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀞𑀢𑁆𑀯𑀸 𑀘𑀦𑁆𑀤𑀓𑀺𑀦𑁆𑀦𑀭𑀁 𑀯𑀺𑀚𑁆𑀛𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀧𑀭𑀺𑀤𑁂𑀯𑀫𑀸𑀦𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮. ‘‘𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀘𑀦𑁆𑀤𑁂 𑀮𑁄𑀳𑀺𑀢𑀫𑀤𑁆𑀤𑀦𑁂;

𑀅𑀚𑁆𑀚 𑀚𑀳𑀸𑀫𑀺 𑀚𑀻𑀯𑀺𑀢𑀁, 𑀧𑀸𑀡𑀸 𑀫𑁂 𑀘𑀦𑁆𑀤𑁂 𑀦𑀺𑀭𑀼𑀚𑁆𑀛𑀦𑁆𑀢𑀺.

𑁧𑁯. ‘‘𑀑𑀲𑀻𑀤𑀺 𑀫𑁂 𑀤𑀼𑀓𑁆𑀔𑀁 𑀳𑀤𑀬𑀁, 𑀫𑁂 𑀟𑀬𑁆𑀳𑀢𑁂 𑀦𑀺𑀢𑀫𑁆𑀫𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁦. ‘‘𑀢𑀺𑀡𑀫𑀺𑀯 𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀺, 𑀦𑀤𑀻 𑀅𑀧𑀭𑀺𑀧𑀼𑀡𑁆𑀡𑀸𑀯 𑀲𑀼𑀲𑁆𑀲𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁧. ‘‘𑀯𑀲𑁆𑀲𑀫𑀺𑀯 𑀲𑀭𑁂 𑀧𑀸𑀤𑁂, 𑀇𑀫𑀸𑀦𑀺 𑀅𑀲𑁆𑀲𑀽𑀦𑀺 𑀯𑀢𑁆𑀢𑀭𑁂 𑀫𑀬𑁆𑀳𑀁;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀻’’𑀢𑀺.

𑀢𑀢𑁆𑀣 𑀉𑀧𑀦𑀻𑀬𑀢𑀻𑀢𑀺 𑀲𑀦𑁆𑀢𑀢𑀺𑀯𑀺𑀘𑁆𑀙𑁂𑀤𑀁 𑀉𑀧𑀦𑀻𑀬𑀢𑀺. 𑀇𑀤𑀦𑁆𑀢𑀺 𑀚𑀻𑀯𑀺𑀢𑀁. 𑀧𑀸𑀡𑀸 𑀫𑁂𑀢𑀺 𑀪𑀤𑁆𑀤𑁂, 𑀘𑀦𑁆𑀤𑁂 𑀫𑀫 𑀚𑀻𑀯𑀺𑀢𑀧𑀸𑀡𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀑𑀲𑀻𑀤𑀺 𑀫𑁂𑀢𑀺 𑀚𑀻𑀯𑀺𑀢𑀁 𑀫𑁂 𑀑𑀲𑀻𑀤𑀢𑀺. 𑀦𑀺𑀢𑀫𑁆𑀫𑀸𑀫𑀻𑀢𑀺 𑀅𑀢𑀺𑀓𑀺𑀮𑀫𑀸𑀫𑀺. 𑀢𑀯 𑀘𑀦𑁆𑀤𑀺𑀬𑀸𑀢𑀺 𑀇𑀤𑀁 𑀫𑀫 𑀤𑀼𑀓𑁆𑀔𑀁, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺, 𑀅𑀣 𑀔𑁄 𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸 𑀲𑁄𑀓𑀳𑁂𑀢𑀼 𑀬𑀲𑁆𑀫𑀸 𑀢𑁆𑀯𑀁 𑀫𑀫 𑀯𑀺𑀬𑁄𑀕𑁂𑀦 𑀲𑁄𑀘𑀺𑀲𑁆𑀲𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀺𑀡𑀫𑀺𑀯 𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀻𑀢𑀺 𑀢𑀢𑁆𑀢𑀧𑀸𑀲𑀸𑀡𑁂 𑀔𑀺𑀢𑁆𑀢𑀢𑀺𑀡𑀫𑀺𑀯 𑀫𑀽𑀮𑀙𑀺𑀦𑁆𑀦𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀻𑀢𑀺 𑀯𑀤𑀢𑀺. 𑀲𑀭𑁂 𑀧𑀸𑀤𑁂𑀢𑀺 𑀬𑀣𑀸 𑀦𑀸𑀫 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺𑀢𑀯𑀲𑁆𑀲𑀁 𑀲𑀭𑀺𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀯𑀢𑁆𑀢𑀢𑀺.

𑀫𑀳𑀸𑀲𑀢𑁆𑀢𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀧𑀼𑀧𑁆𑀨𑀲𑀬𑀦𑁂 𑀦𑀺𑀧𑀦𑁆𑀦𑁄𑀯 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺. 𑀭𑀸𑀚𑀸 𑀧𑀢𑀺𑀝𑁆𑀞𑀺𑀢𑁄𑀯. 𑀇𑀢𑀭𑀸 𑀫𑀳𑀸𑀲𑀢𑁆𑀢𑁂 𑀧𑀭𑀺𑀤𑁂𑀯𑀦𑁆𑀢𑁂 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀯𑀺𑀤𑁆𑀥𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀯𑀺𑀲𑀜𑁆𑀜𑀁 𑀧𑀦 𑀦𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀺𑀬𑀲𑀸𑀫𑀺𑀓𑀲𑁆𑀲 𑀤𑀼𑀓𑁆𑀔’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 𑀧𑀳𑀸𑀭𑀫𑀼𑀔𑀢𑁄 𑀧𑀕𑁆𑀖𑀭𑀦𑁆𑀢𑀁 𑀮𑁄𑀳𑀺𑀢𑀁 𑀤𑀺𑀲𑁆𑀯𑀸 𑀧𑀺𑀬𑀲𑀸𑀫𑀺𑀓𑁂 𑀉𑀧𑁆𑀧𑀦𑁆𑀦𑀁 𑀩𑀮𑀯𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀭𑀸𑀚𑀸 ‘‘𑀓𑀺𑀦𑁆𑀦𑀭𑁄 𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀘𑀦𑁆𑀤𑀸 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀘𑁄𑀭𑁂𑀦 𑀧𑀺𑀬𑀲𑀸𑀫𑀺𑀓𑁄 𑀯𑀺𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀫𑁆𑀧𑀫𑀸𑀦𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀭𑀸𑀚𑀸𑀦𑀁 𑀧𑀭𑀺𑀪𑀸𑀲𑀦𑁆𑀢𑀻 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨. ‘‘𑀧𑀸𑀧𑁄 𑀔𑁄𑀲𑀺 𑀭𑀸𑀚𑀧𑀼𑀢𑁆𑀢, 𑀬𑁄 𑀫𑁂 𑀇𑀘𑁆𑀙𑀺𑀢𑀁 𑀧𑀢𑀺𑀁 𑀯𑀭𑀸𑀓𑀺𑀬𑀸;

𑀯𑀺𑀚𑁆𑀛𑀲𑀺 𑀯𑀦𑀫𑀽𑀮𑀲𑁆𑀫𑀺𑀁, 𑀲𑁄𑀬𑀁 𑀯𑀺𑀤𑁆𑀥𑁄 𑀙𑀫𑀸 𑀲𑁂𑀢𑀺.

𑁨𑁩. ‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁪. ‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁫. ‘‘𑀫𑀸 𑀘 𑀧𑀼𑀢𑁆𑀢𑀁 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀺.

𑁨𑁬. ‘‘𑀫𑀸 𑀘 𑀧𑀼𑀢𑁆𑀢𑀁 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀻’’𑀢𑀺.

𑀢𑀢𑁆𑀣 𑀯𑀭𑀸𑀓𑀺𑀬𑀸𑀢𑀺 𑀓𑀧𑀡𑀸𑀬. 𑀧𑀝𑀺𑀫𑀼𑀜𑁆𑀘𑀢𑀽𑀢𑀺 𑀧𑀝𑀺𑀮𑀪𑀢𑀼 𑀨𑀼𑀲𑀢𑀼 𑀧𑀸𑀧𑀼𑀡𑀸𑀢𑀼. 𑀫𑀬𑁆𑀳 𑀓𑀸𑀫𑀸 𑀳𑀻𑀢𑀺 𑀫𑀬𑁆𑀳𑀁 𑀓𑀸𑀫𑁂𑀦.

𑀭𑀸𑀚𑀸 𑀦𑀁 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑀁𑀬𑁂𑀯 𑀅𑀲𑁆𑀲𑀸𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁨𑁭. ‘‘𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑁄𑀤𑀺 𑀫𑀸 𑀲𑁄𑀧𑀺, 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀺;

𑀫𑀫 𑀢𑁆𑀯𑀁 𑀳𑁂𑀳𑀺𑀲𑀺 𑀪𑀭𑀺𑀬𑀸, 𑀭𑀸𑀚𑀓𑀼𑀮𑁂 𑀧𑀽𑀚𑀺𑀢𑀸 𑀦𑀸𑀭𑀻𑀪𑀻’’𑀢𑀺.

𑀢𑀢𑁆𑀣 𑀘𑀦𑁆𑀤𑁂𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑀓𑀸𑀮𑁂 𑀦𑀸𑀫𑀲𑁆𑀲 𑀲𑀼𑀢𑀢𑁆𑀢𑀸 𑀏𑀯𑀫𑀸𑀳. 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀻𑀢𑀺 𑀯𑀦𑀢𑀺𑀫𑀺𑀭𑀧𑀼𑀧𑁆𑀨𑀲𑀫𑀸𑀦𑀅𑀓𑁆𑀔𑀺. 𑀧𑀽𑀚𑀺𑀢𑀸 𑀦𑀸𑀭𑀻𑀪𑀻𑀢𑀺 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 𑀅𑀕𑁆𑀕𑀫𑀳𑁂𑀲𑀻 𑀳𑁂𑀲𑁆𑀲𑀲𑀺.

𑀘𑀦𑁆𑀤𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀁 𑀫𑀁 𑀯𑀤𑁂𑀲𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀻 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁨𑁮. ‘‘𑀅𑀧𑀺 𑀦𑀽𑀦𑀳𑀁 𑀫𑀭𑀺𑀲𑁆𑀲𑀁, 𑀦𑀸𑀳𑀁 𑀭𑀸𑀚𑀧𑀼𑀢𑁆𑀢 𑀢𑀯 𑀳𑁂𑀲𑁆𑀲𑀁;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀻’’𑀢𑀺.

𑀢𑀢𑁆𑀣 𑀅𑀧𑀺 𑀦𑀽𑀦𑀳𑀦𑁆𑀢𑀺 𑀅𑀧𑀺 𑀏𑀓𑀁𑀲𑁂𑀦𑁂𑀯 𑀅𑀳𑀁 𑀫𑀭𑀺𑀲𑁆𑀲𑀁.

𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑁄 𑀳𑀼𑀢𑁆𑀯𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁯. ‘‘𑀅𑀧𑀺 𑀪𑀻𑀭𑀼𑀓𑁂 𑀅𑀧𑀺 𑀚𑀻𑀯𑀺𑀢𑀼𑀓𑀸𑀫𑀺𑀓𑁂, 𑀓𑀺𑀫𑁆𑀧𑀼𑀭𑀺𑀲𑀺 𑀕𑀘𑁆𑀙 𑀳𑀺𑀫𑀯𑀦𑁆𑀢𑀁;

𑀢𑀸𑀮𑀻𑀲𑀢𑀕𑀭𑀪𑁄𑀚𑀦𑀸, 𑀅𑀜𑁆𑀜𑁂 𑀢𑀁 𑀫𑀺𑀕𑀸 𑀭𑀫𑀺𑀲𑁆𑀲𑀦𑁆𑀢𑀻’’𑀢𑀺.

𑀢𑀢𑁆𑀣 𑀅𑀧𑀺 𑀪𑀻𑀭𑀼𑀓𑁂𑀢𑀺 𑀪𑀻𑀭𑀼𑀚𑀸𑀢𑀺𑀓𑁂. 𑀢𑀸𑀮𑀻𑀲𑀢𑀕𑀭𑀪𑁄𑀚𑀦𑀸𑀢𑀺 𑀢𑁆𑀯𑀁 𑀢𑀸𑀮𑀻𑀲𑀧𑀢𑁆𑀢𑀢𑀕𑀭𑀧𑀢𑁆𑀢𑀪𑁄𑀚𑀦𑀸 𑀫𑀺𑀕𑀻, 𑀢𑀲𑁆𑀫𑀸 𑀅𑀜𑁆𑀜𑁂 𑀢𑀁 𑀫𑀺𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑀁 𑀭𑀸𑀚𑀓𑀼𑀮𑀸𑀭𑀳𑀸, 𑀕𑀘𑁆𑀙𑀸𑀢𑀺 𑀦𑀁 𑀅𑀯𑀘, 𑀯𑀢𑁆𑀯𑀸 𑀘 𑀧𑀦 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸 𑀢𑀲𑁆𑀲 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀑𑀭𑀼𑀬𑁆𑀳 𑀫𑀳𑀸𑀲𑀢𑁆𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑁄𑀧𑁂𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀻𑀲𑀫𑀲𑁆𑀲 𑀅𑀢𑁆𑀢𑀦𑁄 𑀊𑀭𑀽𑀲𑀼 𑀓𑀢𑁆𑀯𑀸 𑀩𑀮𑀯𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀫𑀸𑀦𑀸 𑀤𑁆𑀯𑀸𑀤𑀲 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦. ‘‘𑀢𑁂 𑀧𑀩𑁆𑀩𑀢𑀸 𑀢𑀸 𑀘 𑀓𑀦𑁆𑀤𑀭𑀸, 𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁧. ‘‘𑀢𑁂 𑀧𑀡𑁆𑀡𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁨. ‘‘𑀢𑁂 𑀧𑀼𑀧𑁆𑀨𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁩. ‘‘𑀅𑀘𑁆𑀙𑀸 𑀲𑀯𑀦𑁆𑀢𑀺 𑀕𑀺𑀭𑀺𑀯𑀦𑀦𑀤𑀺𑀬𑁄, 𑀓𑀼𑀲𑀼𑀫𑀸𑀪𑀺𑀓𑀺𑀡𑁆𑀡𑀲𑁄𑀢𑀸𑀬𑁄;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁪. ‘‘𑀦𑀻𑀮𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁫. ‘‘𑀧𑀻𑀢𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁬. ‘‘𑀢𑀫𑁆𑀩𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁭. ‘‘𑀢𑀼𑀗𑁆𑀕𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁮. ‘‘𑀲𑁂𑀢𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁯. ‘‘𑀘𑀺𑀢𑁆𑀭𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁪𑁦. ‘‘𑀬𑀓𑁆𑀔𑀕𑀡𑀲𑁂𑀯𑀺𑀢𑁂 𑀕𑀦𑁆𑀥𑀫𑀸𑀤𑀦𑁂, 𑀑𑀲𑀥𑁂𑀪𑀺 𑀲𑀜𑁆𑀙𑀦𑁆𑀦𑁂;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁪𑁧. ‘‘𑀓𑀺𑀫𑁆𑀧𑀼𑀭𑀺𑀲𑀲𑁂𑀯𑀺𑀢𑁂 𑀕𑀦𑁆𑀥𑀫𑀸𑀤𑀦𑁂, 𑀑𑀲𑀥𑁂𑀪𑀺 𑀲𑀜𑁆𑀙𑀦𑁆𑀦𑁂;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀢𑁂 𑀧𑀩𑁆𑀩𑀢𑀸𑀢𑀺 𑀬𑁂𑀲𑀼 𑀫𑀬𑀁 𑀏𑀓𑀢𑁄𑀯 𑀅𑀪𑀺𑀭𑀫𑀺𑀫𑁆𑀳, 𑀇𑀫𑁂 𑀢𑁂 𑀧𑀩𑁆𑀩𑀢𑀸 𑀢𑀸 𑀘 𑀓𑀦𑁆𑀤𑀭𑀸 𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 𑀢𑀣𑁂𑀯 𑀞𑀺𑀢𑀸. 𑀢𑁂𑀲𑀼 𑀅𑀳𑀁 𑀇𑀤𑀸𑀦𑀺 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀣𑀁 𑀓𑀲𑁆𑀲𑀁, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁂𑀲𑀼 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀲𑁄𑀪𑀁 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀧𑀡𑁆𑀡𑀲𑀦𑁆𑀣𑀢𑀸𑀢𑀺 𑀢𑀸𑀮𑀻𑀲𑀧𑀢𑁆𑀢𑀸𑀤𑀺𑀕𑀦𑁆𑀥𑀧𑀡𑁆𑀡𑀲𑀦𑁆𑀣𑀭𑀸. 𑀅𑀘𑁆𑀙𑀸𑀢𑀺 𑀯𑀺𑀧𑁆𑀧𑀲𑀦𑁆𑀦𑁄𑀤𑀓𑀸. 𑀦𑀻𑀮𑀸𑀦𑀻𑀢𑀺 𑀦𑀻𑀮𑀫𑀡𑀺𑀫𑀬𑀸𑀦𑀺. 𑀧𑀻𑀢𑀸𑀦𑀻𑀢𑀺 𑀲𑁄𑀯𑀡𑁆𑀡𑀫𑀬𑀸𑀦𑀺. 𑀢𑀫𑁆𑀩𑀸𑀦𑀻𑀢𑀺 𑀫𑀦𑁄𑀲𑀺𑀮𑀫𑀬𑀸𑀦𑀺. 𑀢𑀼𑀗𑁆𑀕𑀸𑀦𑀻𑀢𑀺 𑀉𑀘𑁆𑀘𑀸𑀦𑀺 𑀢𑀺𑀔𑀺𑀡𑀕𑁆𑀕𑀸𑀦𑀺. 𑀲𑁂𑀢𑀸𑀦𑀻𑀢𑀺 𑀭𑀚𑀢𑀫𑀬𑀸𑀦𑀺. 𑀘𑀺𑀢𑁆𑀭𑀸𑀦𑀻𑀢𑀺 𑀲𑀢𑁆𑀢𑀭𑀢𑀦𑀫𑀺𑀲𑁆𑀲𑀓𑀸𑀦𑀺. 𑀬𑀓𑁆𑀔𑀕𑀡𑀲𑁂𑀯𑀺𑀢𑁂𑀢𑀺 𑀪𑀼𑀫𑁆𑀫𑀤𑁂𑀯𑀢𑀸𑀳𑀺 𑀲𑁂𑀯𑀺𑀢𑁂.

𑀇𑀢𑀺 𑀲𑀸 𑀤𑁆𑀯𑀸𑀤𑀲𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀉𑀭𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀲𑀦𑁆𑀢𑀸𑀧𑀪𑀸𑀯𑀁 𑀜𑀢𑁆𑀯𑀸 ‘‘𑀘𑀦𑁆𑀤𑁄 𑀚𑀻𑀯𑀢𑀺𑀬𑁂𑀯, 𑀤𑁂𑀯𑀼𑀚𑁆𑀛𑀸𑀦𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀮𑁄𑀓𑀧𑀸𑀮𑀸 𑀦𑀸𑀫 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑀺𑀧𑁆𑀧𑀯𑀼𑀢𑁆𑀣𑀸, 𑀅𑀤𑀼 𑀫𑀢𑀸, 𑀢𑁂 𑀫𑁂 𑀧𑀺𑀬𑀲𑀸𑀫𑀺𑀓𑀁 𑀦 𑀭𑀓𑁆𑀔𑀦𑁆𑀢𑀻’’𑀢𑀺 𑀤𑁂𑀯𑀼𑀚𑁆𑀛𑀸𑀦𑀓𑀫𑁆𑀫𑀁 𑀅𑀓𑀸𑀲𑀺. 𑀢𑀲𑁆𑀲𑀸 𑀲𑁄𑀓𑀯𑁂𑀕𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀯𑁂𑀕𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀓𑀼𑀡𑁆𑀟𑀺𑀓𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀆𑀲𑀺𑀜𑁆𑀘𑀺. 𑀢𑀸𑀯𑀤𑁂𑀯 𑀯𑀺𑀲𑀁 𑀅𑀦𑁆𑀢𑀭𑀥𑀸𑀬𑀺, 𑀯𑀡𑁄 𑀭𑀼𑀳𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀤𑁆𑀥𑁄𑀢𑀺𑀧𑀺 𑀦 𑀧𑀜𑁆𑀜𑀸𑀬𑀺. 𑀫𑀳𑀸𑀲𑀢𑁆𑀢𑁄 𑀲𑀼𑀔𑀺𑀢𑁄 𑀉𑀝𑁆𑀞𑀸𑀲𑀺. 𑀘𑀦𑁆𑀤𑀸 𑀧𑀺𑀬𑀲𑀸𑀫𑀺𑀓𑀁 𑀅𑀭𑁄𑀕𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀲𑀓𑁆𑀓𑀲𑁆𑀲 𑀧𑀸𑀤𑁂 𑀯𑀦𑁆𑀤𑀦𑁆𑀢𑀻 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁪𑁨. ‘‘𑀯𑀦𑁆𑀤𑁂 𑀢𑁂 𑀅𑀬𑀺𑀭𑀩𑁆𑀭𑀳𑁆𑀫𑁂, 𑀬𑁄 𑀫𑁂 𑀇𑀘𑁆𑀙𑀺𑀢𑀁 𑀧𑀢𑀺𑀁 𑀯𑀭𑀸𑀓𑀺𑀬𑀸;

𑀅𑀫𑀢𑁂𑀦 𑀅𑀪𑀺𑀲𑀺𑀜𑁆𑀘𑀺, 𑀲𑀫𑀸𑀕𑀢𑀸𑀲𑁆𑀫𑀺 𑀧𑀺𑀬𑀢𑀫𑁂𑀦𑀸’’𑀢𑀺.

𑀢𑀢𑁆𑀣 𑀅𑀫𑀢𑁂𑀦𑀸𑀢𑀺 𑀉𑀤𑀓𑀁 ‘‘𑀅𑀫𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀫𑀸𑀳. 𑀧𑀺𑀬𑀢𑀫𑁂𑀦𑀸𑀢𑀺 𑀧𑀺𑀬𑀢𑀭𑁂𑀦, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀲𑀓𑁆𑀓𑁄 𑀢𑁂𑀲𑀁 𑀑𑀯𑀸𑀤𑀫𑀤𑀸𑀲𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀘𑀦𑁆𑀤𑀧𑀩𑁆𑀩𑀢𑀢𑁄 𑀑𑀭𑀼𑀬𑁆𑀳 𑀫𑀦𑀼𑀲𑁆𑀲𑀧𑀣𑀁 𑀫𑀸 𑀕𑀫𑀺𑀢𑁆𑀣, 𑀇𑀥𑁂𑀯 𑀯𑀲𑀣𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀘𑀦𑁆𑀤𑀸𑀧𑀺 ‘‘𑀓𑀺𑀁 𑀦𑁄 𑀲𑀸𑀫𑀺 𑀇𑀫𑀺𑀦𑀸 𑀧𑀭𑀺𑀧𑀦𑁆𑀣𑀝𑁆𑀞𑀸𑀦𑁂𑀦, 𑀏𑀳𑀺 𑀘𑀦𑁆𑀤𑀧𑀩𑁆𑀩𑀢𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁪𑁩. ‘‘𑀯𑀺𑀘𑀭𑀸𑀫 𑀤𑀸𑀦𑀺 𑀕𑀺𑀭𑀺𑀯𑀦𑀦𑀤𑀺𑀬𑁄, 𑀓𑀼𑀲𑀼𑀫𑀸𑀪𑀺𑀓𑀺𑀡𑁆𑀡𑀲𑁄𑀢𑀸𑀬𑁄;

𑀦𑀸𑀦𑀸𑀤𑀼𑀫𑀯𑀲𑀦𑀸𑀬𑁄, 𑀧𑀺𑀬𑀁𑀯𑀤𑀸 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲𑀸 𑀫𑀬𑀺 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀘𑀦𑁆𑀤𑀸 𑀭𑀸𑀳𑀼𑀮𑀫𑀸𑀢𑀸, 𑀘𑀦𑁆𑀤𑀓𑀺𑀦𑁆𑀦𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁮𑁬] 𑁩. 𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸

𑀉𑀓𑁆𑀓𑀸 𑀘𑀺𑀮𑀸𑀘𑀸 𑀩𑀦𑁆𑀥𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀺𑀢𑁆𑀢𑀩𑀦𑁆𑀥𑀓𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀧𑀭𑀺𑀚𑀺𑀡𑁆𑀡𑀲𑁆𑀲 𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀲𑀳𑀸𑀬𑀁 𑀧𑁂𑀲𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀓𑀼𑀮𑀥𑀻𑀢𑀭𑀁 𑀯𑀸𑀭𑀸𑀧𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀧𑀦𑀲𑁆𑀲 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑁄 𑀫𑀺𑀢𑁆𑀢𑁄 𑀯𑀸 𑀲𑀳𑀸𑀬𑁄 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀫𑀺𑀢𑁆𑀢𑁂 𑀢𑀸𑀯 𑀩𑀦𑁆𑀥𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀘𑀢𑀽𑀳𑀺 𑀤𑁄𑀯𑀸𑀭𑀺𑀓𑁂𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀦𑀕𑀭𑀕𑀼𑀢𑁆𑀢𑀺𑀓𑀕𑀡𑀓𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀦𑀸𑀧𑀺 𑀉𑀧𑀭𑀸𑀚𑁂𑀦𑀸𑀧𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀢𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀢𑀢𑁄 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑀧𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀭𑀸𑀚𑀸𑀧𑀺𑀲𑁆𑀲 𑀇𑀲𑁆𑀲𑀭𑀺𑀬𑀫𑀤𑀸𑀲𑀺. 𑀲𑁄 𑀫𑀺𑀢𑁆𑀢𑀩𑀦𑁆𑀥𑀓𑁄𑀬𑁂𑀯𑀸𑀢𑀺 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑀲𑁆𑀲 𑀭𑀸𑀚𑀸 𑀫𑀳𑀦𑁆𑀢𑀁 𑀕𑁂𑀳𑀁 𑀤𑀢𑁆𑀯𑀸 𑀆𑀯𑀸𑀳𑀫𑀗𑁆𑀕𑀮𑀁 𑀓𑀸𑀭𑁂𑀲𑀺. 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀳𑀸𑀚𑀦𑁄 𑀧𑀡𑁆𑀡𑀸𑀓𑀸𑀭𑁂 𑀧𑀳𑀺𑀡𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀭𑀜𑁆𑀜𑀸 𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀉𑀧𑀭𑀸𑀚𑀲𑁆𑀲, 𑀉𑀧𑀭𑀸𑀚𑁂𑀦 𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀲𑁂𑀦𑀸𑀧𑀢𑀺𑀲𑁆𑀲𑀸𑀢𑀺 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀲𑀢𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀢𑁆𑀣𑀸𑀭𑀸 𑀓𑀣𑀺𑀢𑀁 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀫𑀺𑀢𑁆𑀢𑀩𑀦𑁆𑀥𑀓𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲𑀸 𑀯𑀘𑀦𑀁 𑀓𑀢𑁆𑀯𑀸 𑀲𑀩𑁆𑀩𑁂𑀳𑀺 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀺, 𑀢𑀣𑀸𑀕𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀏𑀢𑀁 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀬𑀲𑀁 𑀲𑀫𑁆𑀧𑀢𑁆𑀢𑁄, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀧𑀦𑁂𑀲 𑀏𑀢𑀺𑀲𑁆𑀲𑀸 𑀯𑀘𑀦𑁂𑀦 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑁄𑀓𑀢𑁄 𑀫𑀼𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀘𑁆𑀘𑁂 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀬𑀢𑁆𑀣 𑀬𑀢𑁆𑀣 𑀩𑀳𑀼𑀁 𑀫𑀁𑀲𑀁 𑀮𑀪𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀫𑀺𑀕𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂 𑀧𑁄𑀲𑁂𑀦𑁆𑀢𑀺. 𑀢𑁂𑀲𑀁 𑀕𑀸𑀫𑀢𑁄 𑀅𑀯𑀺𑀤𑀽𑀭𑁂 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀢𑁆𑀣𑀺. 𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀏𑀓𑁄 𑀲𑁂𑀦𑀲𑀓𑀼𑀡𑁄, 𑀧𑀘𑁆𑀙𑀺𑀫𑀧𑀲𑁆𑀲𑁂 𑀏𑀓𑀸 𑀲𑁂𑀦𑀲𑀓𑀼𑀡𑀻, 𑀉𑀢𑁆𑀢𑀭𑀧𑀲𑁆𑀲𑁂 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀧𑀸𑀘𑀻𑀦𑀧𑀲𑁆𑀲𑁂 𑀉𑀓𑁆𑀓𑀼𑀲𑀲𑀓𑀼𑀡𑀭𑀸𑀚𑀸 𑀯𑀲𑀢𑀺. 𑀚𑀸𑀢𑀲𑁆𑀲𑀭𑀫𑀚𑁆𑀛𑁂 𑀧𑀦 𑀉𑀦𑁆𑀦𑀢𑀝𑁆𑀞𑀸𑀦𑁂 𑀓𑀘𑁆𑀙𑀧𑁄 𑀯𑀲𑀢𑀺. 𑀢𑀤𑀸 𑀲𑁂𑀦𑁄 𑀲𑁂𑀦𑀺𑀁 ‘‘𑀪𑀭𑀺𑀬𑀸 𑀫𑁂 𑀳𑁄𑀳𑀻’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀅𑀢𑁆𑀣𑀺 𑀧𑀦 𑀢𑁂 𑀓𑁄𑀘𑀺 𑀫𑀺𑀢𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀤𑁆𑀤𑁂’’𑀢𑀺. 𑀅𑀫𑁆𑀳𑀸𑀓𑀁 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀳𑀭𑀡𑀲𑀫𑀢𑁆𑀣𑀁 𑀫𑀺𑀢𑁆𑀢𑀁 𑀯𑀸 𑀲𑀳𑀸𑀬𑀁 𑀯𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀫𑀺𑀢𑁆𑀢𑁂 𑀢𑀸𑀯 𑀕𑀡𑁆𑀳𑀸𑀳𑀻𑀢𑀺. ‘‘𑀓𑁂𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀭𑁄𑀫𑀺 𑀪𑀤𑁆𑀤𑁂’’𑀢𑀺? 𑀧𑀸𑀘𑀻𑀦𑀧𑀲𑁆𑀲𑁂 𑀯𑀲𑀦𑁆𑀢𑁂𑀦 𑀉𑀓𑁆𑀓𑀼𑀲𑀭𑀸𑀚𑁂𑀦, 𑀉𑀢𑁆𑀢𑀭𑀧𑀲𑁆𑀲𑁂 𑀲𑀻𑀳𑁂𑀦, 𑀚𑀸𑀢𑀲𑁆𑀲𑀭𑀫𑀚𑁆𑀛𑁂 𑀓𑀘𑁆𑀙𑀧𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀭𑁄𑀳𑀻𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀤𑀸 𑀢𑁂 𑀉𑀪𑁄𑀧𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀲𑀭𑁂 𑀏𑀓𑀲𑁆𑀫𑀺𑀁 𑀤𑀻𑀧𑀓𑁂 𑀓𑀤𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺 𑀲𑀫𑀦𑁆𑀢𑀸 𑀉𑀤𑀓𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸 𑀧𑀝𑀺𑀯𑀲𑀺𑀁𑀲𑀼.

𑀢𑁂𑀲𑀁 𑀅𑀧𑀭𑀪𑀸𑀕𑁂 𑀤𑁆𑀯𑁂 𑀲𑀓𑀼𑀡𑀧𑁄𑀢𑀓𑀸 𑀚𑀸𑀬𑀺𑀁𑀲𑀼. 𑀢𑁂𑀲𑀁 𑀧𑀓𑁆𑀔𑁂𑀲𑀼 𑀅𑀲𑀜𑁆𑀚𑀸𑀢𑁂𑀲𑀼𑀬𑁂𑀯 𑀏𑀓𑀤𑀺𑀯𑀲𑀁 𑀢𑁂 𑀚𑀸𑀦𑀧𑀤𑀸 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀢𑀼𑀘𑁆𑀙𑀳𑀢𑁆𑀣𑁂𑀦 𑀖𑀭𑀁 𑀕𑀦𑁆𑀢𑀼𑀁, 𑀫𑀘𑁆𑀙𑁂 𑀯𑀸 𑀓𑀘𑁆𑀙𑀧𑁂 𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀢𑀁 𑀤𑀻𑀧𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀤𑀫𑁆𑀩𑀲𑁆𑀲 𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀓𑀲𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑀸 𑀢𑁂𑀲𑀁 𑀧𑀮𑀸𑀧𑀦𑀢𑁆𑀣𑀸𑀬 𑀅𑀭𑀡𑀺𑀁 𑀫𑀦𑁆𑀣𑁂𑀢𑁆𑀯𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀥𑀽𑀫𑀁 𑀓𑀭𑀺𑀁𑀲𑀼. 𑀥𑀼𑀫𑁄 𑀉𑀕𑁆𑀕𑀦𑁆𑀢𑁆𑀯𑀸 𑀲𑀓𑀼𑀡𑁂 𑀧𑀳𑀭𑀺, 𑀲𑀓𑀼𑀡𑀧𑁄𑀢𑀓𑀸 𑀯𑀺𑀭𑀯𑀺𑀁𑀲𑀼. 𑀚𑀸𑀦𑀧𑀤𑀸 𑀢𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀪𑁄, 𑀲𑀓𑀼𑀡𑀧𑁄𑀢𑀓𑀸𑀦𑀁 𑀲𑀽𑀬𑀢𑀺 𑀲𑀤𑁆𑀤𑁄, 𑀉𑀝𑁆𑀞𑁂𑀣 𑀉𑀓𑁆𑀓𑀸 𑀩𑀦𑁆𑀥𑀣, 𑀙𑀸𑀢𑀸 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀫, 𑀲𑀓𑀼𑀡𑀫𑀁𑀲𑀁 𑀔𑀸𑀤𑀺𑀢𑁆𑀯𑀸𑀯 𑀲𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀉𑀓𑁆𑀓𑀸 𑀩𑀦𑁆𑀥𑀺𑀁𑀲𑀼. 𑀲𑀓𑀼𑀡𑀺𑀓𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀧𑁄𑀢𑀓𑁂 𑀔𑀸𑀤𑀺𑀢𑀼𑀓𑀸𑀫𑀸, 𑀫𑀬𑀁 𑀏𑀯𑀭𑀽𑀧𑀲𑁆𑀲 𑀪𑀬𑀲𑁆𑀲 𑀳𑀭𑀡𑀢𑁆𑀣𑀸𑀬 𑀫𑀺𑀢𑁆𑀢𑁂 𑀕𑀡𑁆𑀳𑀺𑀫𑁆𑀳, 𑀲𑀸𑀫𑀺𑀓𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀲𑀸𑀫𑀺, 𑀧𑀼𑀢𑁆𑀢𑀸𑀦𑀁 𑀦𑁄 𑀉𑀧𑁆𑀧𑀦𑁆𑀦𑀪𑀬𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁪. ‘‘𑀉𑀓𑁆𑀓𑀸 𑀘𑀺𑀮𑀸𑀘𑀸 𑀩𑀦𑁆𑀥𑀦𑁆𑀢𑀺 𑀤𑀻𑀧𑁂, 𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺;

𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀯𑀤𑁂𑀳𑀺 𑀲𑁂𑀦𑀓, 𑀆𑀘𑀺𑀓𑁆𑀔 𑀜𑀸𑀢𑀺𑀩𑁆𑀬𑀲𑀦𑀁 𑀤𑀺𑀚𑀸𑀦’’𑀦𑁆𑀢𑀺.

𑀢𑀢𑁆𑀣 𑀘𑀺𑀮𑀸𑀘𑀸𑀢𑀺 𑀚𑀸𑀦𑀧𑀤𑀸. 𑀤𑀻𑀧𑁂𑀢𑀺 𑀤𑀻𑀧𑀓𑀫𑁆𑀳𑀺. 𑀧𑀚𑀸 𑀫𑀫𑀦𑁆𑀢𑀺 𑀫𑀫 𑀧𑀼𑀢𑁆𑀢𑀓𑁂. 𑀲𑁂𑀦𑀓𑀸𑀢𑀺 𑀲𑁂𑀦𑀓𑀲𑀓𑀼𑀡𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀜𑀸𑀢𑀺𑀩𑁆𑀬𑀲𑀦𑀦𑁆𑀢𑀺 𑀧𑀼𑀢𑁆𑀢𑀸𑀦𑀁 𑀩𑁆𑀬𑀲𑀦𑀁. 𑀤𑀺𑀚𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀁 𑀤𑀺𑀚𑀸𑀦𑀁 𑀇𑀤𑀁 𑀩𑁆𑀬𑀲𑀦𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀘𑀺𑀓𑁆𑀔𑀸𑀳𑀻𑀢𑀺 𑀯𑀤𑀢𑀺.

𑀲𑁄 𑀯𑁂𑀕𑁂𑀦 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀓𑀢𑁄𑀓𑀸𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀆𑀕𑀢𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁫. ‘‘𑀤𑀺𑀚𑁄 𑀤𑀺𑀚𑀸𑀦𑀁 𑀧𑀯𑀭𑁄𑀲𑀺 𑀧𑀓𑁆𑀔𑀺𑀫, 𑀉𑀓𑁆𑀓𑀼𑀲𑀭𑀸𑀚 𑀲𑀭𑀡𑀁 𑀢𑀁 𑀉𑀧𑁂𑀫;

𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺, 𑀮𑀼𑀤𑁆𑀤𑀸 𑀘𑀺𑀮𑀸𑀘𑀸 𑀪𑀯 𑀫𑁂 𑀲𑀼𑀔𑀸𑀬𑀸’’𑀢𑀺.

𑀢𑀢𑁆𑀣 𑀤𑀺𑀚𑁄𑀢𑀺 𑀢𑁆𑀯𑀁 𑀤𑀺𑀚𑁄 𑀘𑁂𑀯 𑀤𑀺𑀚𑀸𑀦𑀁 𑀧𑀯𑀭𑁄 𑀘.

𑀉𑀓𑁆𑀓𑀼𑀲𑀭𑀸𑀚𑀸 ‘‘𑀲𑁂𑀦𑀓 𑀫𑀸 𑀪𑀸𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁬. ‘‘𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀓𑀸𑀮𑁂 𑀅𑀓𑀸𑀮𑁂 𑀲𑀼𑀔𑀫𑁂𑀲𑀫𑀸𑀦𑀸;

𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀭𑁄𑀢𑀺 𑀓𑀺𑀘𑁆𑀘’’𑀦𑁆𑀢𑀺.

𑀢𑀢𑁆𑀣 𑀓𑀸𑀮𑁂 𑀅𑀓𑀸𑀮𑁂𑀢𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘. 𑀅𑀭𑀺𑀬𑁄𑀢𑀺 𑀇𑀥 𑀆𑀘𑀸𑀭𑀅𑀭𑀺𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀓𑀺𑀘𑁆𑀘𑀁 𑀓𑀭𑁄𑀢𑁂𑀯, 𑀓𑀺𑀫𑁂𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀯𑀤𑀢𑀺.

𑀅𑀣 𑀦𑀁 𑀧𑀼𑀘𑁆𑀙𑀺 ‘‘𑀓𑀺𑀁, 𑀲𑀫𑁆𑀫, 𑀭𑀼𑀓𑁆𑀔𑀁 𑀅𑀪𑀺𑀭𑀼𑀴𑁆𑀳𑀸 𑀘𑀺𑀮𑀸𑀘𑀸’’𑀢𑀺? 𑀦 𑀢𑀸𑀯 𑀅𑀪𑀺𑀭𑀼𑀴𑁆𑀳𑀸, 𑀉𑀓𑁆𑀓𑀸𑀬𑁂𑀯 𑀩𑀦𑁆𑀥𑀦𑁆𑀢𑀻𑀢𑀺. 𑀢𑁂𑀦 𑀳𑀺 𑀢𑁆𑀯𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀺𑀓𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀫𑀫𑀸𑀕𑀫𑀦𑀪𑀸𑀯𑀁 𑀆𑀘𑀺𑀓𑁆𑀔𑀸𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀉𑀓𑁆𑀓𑀼𑀲𑀭𑀸𑀚𑀸𑀧𑀺 𑀕𑀦𑁆𑀢𑁆𑀯𑀸 𑀓𑀤𑀫𑁆𑀩𑀲𑁆𑀲 𑀅𑀯𑀺𑀤𑀽𑀭𑁂 𑀘𑀺𑀮𑀸𑀘𑀸𑀦𑀁 𑀅𑀪𑀺𑀭𑀼𑀳𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀲𑁆𑀲 𑀘𑀺𑀮𑀸𑀘𑀲𑁆𑀲 𑀅𑀪𑀺𑀭𑀼𑀳𑀦𑀓𑀸𑀮𑁂 𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑀲𑁆𑀲 𑀅𑀯𑀺𑀤𑀽𑀭𑀁 𑀅𑀪𑀺𑀭𑀼𑀴𑁆𑀳𑁂 𑀲𑀭𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀓𑁆𑀔𑁂𑀳𑀺 𑀘 𑀫𑀼𑀔𑁂𑀦 𑀘 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀉𑀓𑁆𑀓𑀸𑀬 𑀉𑀧𑀭𑀺 𑀆𑀲𑀺𑀜𑁆𑀘𑀺, 𑀲𑀸 𑀦𑀺𑀩𑁆𑀩𑀸𑀬𑀺. 𑀘𑀺𑀮𑀸𑀘𑀸 ‘‘𑀇𑀫𑀜𑁆𑀘 𑀲𑁂𑀦𑀓𑀲𑀓𑀼𑀡𑀧𑁄𑀢𑀓𑁂 𑀘𑀲𑁆𑀲 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀭𑀺𑀢𑁆𑀯𑀸 𑀧𑀼𑀦 𑀉𑀓𑁆𑀓𑀁 𑀚𑀸𑀮𑀸𑀧𑁂𑀢𑁆𑀯𑀸 𑀅𑀪𑀺𑀭𑀼𑀳𑀺𑀁𑀲𑀼. 𑀧𑀼𑀦 𑀲𑁄 𑀉𑀓𑁆𑀓𑀁 𑀯𑀺𑀚𑁆𑀛𑀸𑀧𑁂𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀩𑀤𑁆𑀥𑀁 𑀩𑀤𑁆𑀥𑀁 𑀯𑀺𑀚𑁆𑀛𑀸𑀧𑁂𑀦𑁆𑀢𑀲𑁆𑀲𑁂𑀯𑀲𑁆𑀲 𑀅𑀟𑁆𑀠𑀭𑀢𑁆𑀢𑁄 𑀚𑀸𑀢𑁄. 𑀲𑁄 𑀅𑀢𑀺𑀯𑀺𑀬 𑀓𑀺𑀮𑀫𑀺, 𑀳𑁂𑀝𑁆𑀞𑀸𑀉𑀤𑀭𑁂 𑀓𑀺𑀮𑁄𑀫𑀓𑀁 𑀢𑀦𑀼𑀢𑀁 𑀕𑀢𑀁, 𑀅𑀓𑁆𑀔𑀻𑀦𑀺 𑀭𑀢𑁆𑀢𑀸𑀦𑀺 𑀚𑀸𑀢𑀸𑀦𑀺. 𑀢𑀁 𑀤𑀺𑀲𑁆𑀯𑀸 𑀲𑀓𑀼𑀡𑀻 𑀲𑀸𑀫𑀺𑀓𑀁 𑀆𑀳 𑁋 ‘‘𑀲𑀸𑀫𑀺, 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑁄 𑀉𑀓𑁆𑀓𑀼𑀲𑀭𑀸𑀚𑀸, 𑀏𑀢𑀲𑁆𑀲 𑀣𑁄𑀓𑀁 𑀯𑀺𑀲𑁆𑀲𑀫𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀓𑀘𑁆𑀙𑀧𑀭𑀸𑀚𑀲𑁆𑀲 𑀓𑀣𑁂𑀳𑀻’’𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀓𑁆𑀓𑀼𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋