𑁧𑁫. 𑀯𑀻𑀲𑀢𑀺𑀦𑀺𑀧𑀸𑀢𑁄

[𑁪𑁯𑁭] 𑁧. 𑀫𑀸𑀢𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀤𑁂𑀦𑀁 𑀦𑀸𑀫 𑀯𑀁𑀲𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀚𑁂𑀢𑀯𑀦𑀢𑁄 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀉𑀤𑁂𑀦𑀲𑁆𑀲 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁 𑀤𑀺𑀯𑀸𑀯𑀺𑀳𑀸𑀭𑀸𑀬 𑀕𑀘𑁆𑀙𑀢𑀺. 𑀣𑁂𑀭𑁄 𑀓𑀺𑀭 𑀧𑀼𑀭𑀺𑀫𑀪𑀯𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀤𑀻𑀖𑀫𑀤𑁆𑀥𑀸𑀦𑀁 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀫𑀳𑀸𑀧𑀭𑀺𑀯𑀸𑀭𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺. 𑀲𑁄 𑀢𑁂𑀦 𑀧𑀼𑀩𑁆𑀩𑀸𑀘𑀺𑀡𑁆𑀡𑁂𑀦 𑀬𑁂𑀪𑀼𑀬𑁆𑀬𑁂𑀦 𑀢𑀢𑁆𑀣𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀫𑀺𑀁 𑀏𑀓𑀤𑀺𑀯𑀲𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀫𑀽𑀮𑁂 𑀦𑀺𑀲𑀺𑀦𑁆𑀦𑁂 𑀉𑀤𑁂𑀦𑁄 𑀲𑀢𑁆𑀢𑀸𑀳𑀁 𑀫𑀳𑀸𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 ‘‘𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀅𑀜𑁆𑀜𑀢𑀭𑀸𑀬 𑀇𑀢𑁆𑀣𑀺𑀬𑀸 𑀅𑀗𑁆𑀓𑁂 𑀦𑀺𑀧𑀦𑁆𑀦𑁄 𑀲𑀼𑀭𑀸𑀫𑀤𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀕𑀸𑀬𑀦𑁆𑀢𑀸 𑀦𑀺𑀲𑀺𑀦𑁆𑀦𑀺𑀢𑁆𑀣𑀺𑀬𑁄 𑀢𑀽𑀭𑀺𑀬𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀯𑀺𑀘𑀺𑀦𑀦𑁆𑀢𑀺𑀬𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 𑀢𑀸𑀲𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀇𑀢𑀭𑀸𑀧𑀺 𑀇𑀢𑁆𑀣𑀻 𑀅𑀗𑁆𑀓𑀁 𑀘𑀸𑀮𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁄𑀥𑁂𑀢𑁆𑀯𑀸 ‘‘𑀓𑀼𑀳𑀺𑀁 𑀢𑀸 𑀯𑀲𑀮𑀺𑀬𑁄 𑀕𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀓𑀁 𑀲𑀫𑀡𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸’’𑀢𑀺 𑀆𑀳. 𑀲𑁄 𑀓𑀼𑀤𑁆𑀥𑁄 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀳𑀦𑁆𑀤𑀸𑀳𑀁, 𑀢𑀁 𑀲𑀫𑀡𑀁 𑀢𑀫𑁆𑀩𑀓𑀺𑀧𑀺𑀮𑁆𑀮𑀓𑁂𑀳𑀺 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀓𑁄𑀥𑀯𑀲𑁂𑀦 𑀣𑁂𑀭𑀲𑁆𑀲 𑀲𑀭𑀻𑀭𑁂 𑀢𑀫𑁆𑀩𑀓𑀺𑀧𑀺𑀮𑁆𑀮𑀓𑀧𑀼𑀝𑀁 𑀪𑀺𑀦𑁆𑀤𑀸𑀧𑁂𑀲𑀺. 𑀣𑁂𑀭𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑀁 𑀤𑀢𑁆𑀯𑀸 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑁂𑀬𑁂𑀯 𑀑𑀢𑀭𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀣𑁂𑀭𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀪𑀸𑀭𑀤𑁆𑀯𑀸𑀚, 𑀉𑀤𑁂𑀦𑁄 𑀇𑀤𑀸𑀦𑁂𑀯 𑀧𑀩𑁆𑀩𑀚𑀺𑀢𑁂 𑀯𑀺𑀳𑁂𑀞𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀯𑀺𑀳𑁂𑀞𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀤𑀸 𑀫𑀳𑀸𑀲𑀢𑁆𑀢𑁄 𑀩𑀳𑀺𑀦𑀕𑀭𑁂 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀫𑀸𑀢𑀗𑁆𑀕𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 ‘‘𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀦𑀸𑀫 𑀏𑀓𑀫𑀸𑀲𑀤𑁆𑀯𑁂𑀫𑀸𑀲𑀯𑀸𑀭𑁂𑀦 𑀫𑀳𑀸𑀧𑀭𑀺𑀯𑀸𑀭𑀸 𑀉𑀬𑁆𑀬𑀸𑀦𑀁 𑀓𑀻𑀴𑀺𑀢𑀼𑀁 𑀕𑀘𑁆𑀙𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑁄 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀅𑀦𑁆𑀢𑀭𑀤𑁆𑀯𑀸𑀭𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀤𑀺𑀲𑁆𑀯𑀸 𑀏𑀓𑀫𑀦𑁆𑀢𑀁 𑀅𑀧𑀕𑀦𑁆𑀢𑁆𑀯𑀸 𑀅𑀮𑁆𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀸𑀡𑀺𑀬𑀸 𑀅𑀦𑁆𑀢𑀭𑁂𑀦 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀡𑁆𑀟𑀸𑀮𑁄 𑀅𑀬𑁆𑀬𑁂’’𑀢𑀺 𑀯𑀼𑀢𑁆𑀢𑁂 ‘‘𑀅𑀤𑀺𑀝𑁆𑀞𑀧𑀼𑀩𑁆𑀩𑀬𑀼𑀢𑁆𑀢𑀓𑀁 𑀯𑀢 𑀧𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑁄𑀤𑀓𑁂𑀦 𑀅𑀓𑁆𑀔𑀻𑀦𑀺 𑀥𑁄𑀯𑀺𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀺. 𑀢𑀸𑀬 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀚𑀦𑁄 ‘‘𑀅𑀭𑁂, 𑀤𑀼𑀝𑁆𑀞 𑀘𑀡𑁆𑀟𑀸𑀮, 𑀅𑀚𑁆𑀚 𑀢𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀅𑀫𑀽𑀮𑀓𑀁 𑀲𑀼𑀭𑀸𑀪𑀢𑁆𑀢𑀁 𑀦𑀝𑁆𑀞’’𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑁄 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀁 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀯𑀺𑀲𑀜𑁆𑀜𑀺𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀜𑁆𑀜𑁄 𑀘𑀺𑀦𑁆𑀢𑁂𑀲𑀺 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀧𑀭𑀺𑀚𑀦𑁄 𑀫𑀁 𑀦𑀺𑀤𑁆𑀤𑁄𑀲𑀁 𑀅𑀓𑀸𑀭𑀡𑁂𑀦 𑀧𑁄𑀣𑁂𑀲𑀺, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀮𑀪𑀺𑀢𑁆𑀯𑀸𑀯 𑀉𑀝𑁆𑀞𑀳𑀺𑀲𑁆𑀲𑀸𑀫𑀺, 𑀦𑁄 𑀅𑀮𑀪𑀺𑀢𑁆𑀯𑀸’’𑀢𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀺𑀢𑀼 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀺. 𑀲𑁄 ‘‘𑀓𑁂𑀦 𑀓𑀸𑀭𑀡𑁂𑀦 𑀦𑀺𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀺, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑁂 𑀅𑀢𑁆𑀣𑁄’’𑀢𑀺 𑀆𑀳. 𑀏𑀓𑁄 𑀤𑀺𑀯𑀲𑁄 𑀅𑀢𑀻𑀢𑁄, 𑀢𑀣𑀸 𑀤𑀼𑀢𑀺𑀬𑁄, 𑀢𑀢𑀺𑀬𑁄, 𑀘𑀢𑀼𑀢𑁆𑀣𑁄, 𑀧𑀜𑁆𑀘𑀫𑁄, 𑀙𑀝𑁆𑀞𑁄 𑀘. 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀦𑀸𑀫 𑀲𑀫𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀅𑀤𑀁𑀲𑀼.

𑀅𑀣 𑀦𑀁 𑀲𑀸 ‘‘𑀉𑀝𑁆𑀞𑁂𑀳𑀺, 𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀕𑁂𑀳𑀁 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀪𑀤𑁆𑀤𑁂, 𑀢𑀯 𑀧𑀭𑀺𑀚𑀦𑁂𑀦𑀫𑁆𑀳𑀺 𑀲𑀼𑀧𑁄𑀣𑀺𑀢𑁄 𑀤𑀼𑀩𑁆𑀩𑀮𑁄, 𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀸𑀳𑀻𑀢𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀦𑀕𑀭𑀯𑀸𑀲𑀻𑀦𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀓𑀁 𑀕𑀢𑀸. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀚𑀸𑀢𑀺𑀲𑀫𑁆𑀪𑁂𑀤𑀯𑀻𑀢𑀺𑀓𑁆𑀓𑀫𑀁 𑀅𑀓𑀢𑁆𑀯𑀸𑀯 𑀓𑀢𑀺𑀧𑀸𑀳𑀁 𑀕𑁂𑀳𑁂 𑀯𑀲𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀫𑁂𑀢𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸𑀯 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀦 𑀇𑀢𑀭𑀣𑀸’’𑀢𑀺. 𑀅𑀣 𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘𑀪𑀤𑁆𑀤𑁂, 𑀫𑀬𑀺 𑀅𑀭𑀜𑁆𑀜𑀢𑁄 𑀓𑀺𑀜𑁆𑀘𑀺 𑀅𑀦𑀸𑀳𑀭𑀦𑁆𑀢𑁂 𑀅𑀫𑁆𑀳𑀸𑀓𑀁 𑀚𑀻𑀯𑀺𑀓𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀬𑀸𑀯 𑀫𑀫𑀸𑀕𑀫𑀦𑀸 𑀫𑀸 𑀉𑀓𑁆𑀓𑀡𑁆𑀞𑀺, 𑀅𑀳𑀁 𑀅𑀭𑀜𑁆𑀜𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑁂𑀳𑀯𑀸𑀲𑀺𑀦𑁄𑀧𑀺 ‘‘𑀇𑀫𑀁 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑀸 𑀢𑀲𑁆𑀲𑀸𑀕𑀫𑀦𑀁 𑀲𑀼𑀢𑁆𑀯𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑀸𑀫𑀺, 𑀓𑀲𑁆𑀫𑀸 𑀫𑀁 𑀅𑀦𑀸𑀣𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺 𑀧𑀭𑀺𑀤𑁂𑀯𑀺. 𑀅𑀣 𑀦𑀁 ‘‘𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺, 𑀢𑀯 𑀧𑁄𑀭𑀸𑀡𑀓𑀬𑀲𑀢𑁄 𑀇𑀤𑀸𑀦𑀺 𑀫𑀳𑀦𑁆𑀢𑀢𑀭𑀁 𑀬𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀧𑀺𑀘 𑀔𑁄 𑀧𑀦 ‘𑀦 𑀫𑀬𑁆𑀳𑀁 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄 𑀲𑀸𑀫𑀺𑀓𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀫𑁂 𑀲𑀸𑀫𑀺𑀓𑁄’𑀢𑀺 𑀏𑀢𑁆𑀢𑀓𑀁 𑀧𑀭𑀺𑀲𑀫𑀚𑁆𑀛𑁂 𑀯𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’𑀢𑀺 𑀆𑀳. ‘‘𑀆𑀫, 𑀲𑀸𑀫𑀺, 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 ‘‘𑀇𑀤𑀸𑀦𑀺 𑀢𑁂 𑀲𑀸𑀫𑀺𑀓𑁄 𑀓𑀼𑀳𑀺𑀦𑁆𑀢𑀺 𑀧𑀼𑀝𑁆𑀞𑀸 ‘𑀩𑁆𑀭𑀳𑁆𑀫𑀮𑁄𑀓𑀁 𑀕𑀢𑁄’𑀢𑀺 𑀯𑀢𑁆𑀯𑀸 ‘𑀓𑀤𑀸 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀯𑀼𑀢𑁆𑀢𑁂 ‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀡𑁆𑀡𑀫𑀸𑀬𑀁 𑀘𑀦𑁆𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀦𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄.

𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀧𑀺 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀢𑀣𑀸 𑀓𑀣𑁂𑀲𑀺. 𑀫𑀳𑀸𑀚𑀦𑁄 ‘‘𑀅𑀳𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀫𑀸𑀦𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀦 𑀕𑀘𑁆𑀙𑀢𑀺, 𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀳𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀼𑀡𑁆𑀡𑀫𑀤𑀺𑀯𑀲𑁂 𑀘𑀦𑁆𑀤𑀲𑁆𑀲 𑀕𑀕𑀦𑀫𑀚𑁆𑀛𑁂 𑀞𑀺𑀢𑀓𑀸𑀮𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀲𑀓𑀮𑀁 𑀓𑀸𑀲𑀺𑀭𑀝𑁆𑀞𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀦𑀕𑀭𑀜𑁆𑀘 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀸 𑀉𑀧𑀭𑀽𑀧𑀭𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀫𑀳𑀸𑀚𑀦𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀘𑀡𑁆𑀟𑀸𑀮𑀕𑀸𑀫𑀓𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀪𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀕𑁂𑀳𑀁 𑀲𑀼𑀤𑁆𑀥𑀯𑀢𑁆𑀣𑁂𑀳𑀺 𑀙𑀸𑀤𑁂𑀢𑁆𑀯𑀸 𑀪𑀽𑀫𑀺𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀑𑀧𑀼𑀜𑁆𑀙𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀥𑀽𑀫𑀁 𑀤𑀢𑁆𑀯𑀸 𑀘𑁂𑀮𑀯𑀺𑀢𑀸𑀦𑀁 𑀧𑀲𑀸𑀭𑁂𑀢𑁆𑀯𑀸 𑀫𑀳𑀸𑀲𑀬𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀳𑀺 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀤𑁆𑀯𑀸𑀭𑁂 𑀭𑀚𑀢𑀧𑀝𑁆𑀝𑀯𑀡𑁆𑀡𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀥𑀚𑁂 𑀩𑀦𑁆𑀥𑀺𑀁𑀲𑀼. 𑀏𑀯𑀁 𑀅𑀮𑀗𑁆𑀓𑀢𑁂 𑀕𑁂𑀳𑁂 𑀫𑀳𑀸𑀲𑀢𑁆𑀢𑁄 𑀑𑀢𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀣𑁄𑀓𑀁 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀻𑀤𑀺.

𑀢𑀤𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀉𑀢𑀼𑀦𑀻 𑀳𑁄𑀢𑀺. 𑀅𑀣𑀲𑁆𑀲𑀸 𑀅𑀗𑁆𑀕𑀼𑀝𑁆𑀞𑀓𑁂𑀦 𑀦𑀸𑀪𑀺𑀁 𑀧𑀭𑀸𑀫𑀲𑀺, 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀕𑀩𑁆𑀪𑁄 𑀢𑁂 𑀧𑀢𑀺𑀝𑁆𑀞𑀺𑀢𑁄, 𑀢𑁆𑀯𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀲𑀺, 𑀢𑁆𑀯𑀫𑁆𑀧𑀺 𑀧𑀼𑀢𑁆𑀢𑁄𑀧𑀺 𑀢𑁂 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀣, 𑀢𑀯 𑀧𑀸𑀤𑀥𑁄𑀯𑀦𑀉𑀤𑀓𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 𑀅𑀪𑀺𑀲𑁂𑀓𑁄𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀦𑀳𑀸𑀦𑁄𑀤𑀓𑀁 𑀧𑀦 𑀢𑁂 𑀅𑀫𑀢𑁄𑀲𑀥𑀁 𑀪𑀯𑀺𑀲𑁆𑀲𑀢𑀺, 𑀬𑁂 𑀢𑀁 𑀲𑀻𑀲𑁂 𑀆𑀲𑀺𑀜𑁆𑀘𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀩𑁆𑀩𑀭𑁄𑀕𑁂𑀳𑀺 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀓𑀸𑀴𑀓𑀡𑁆𑀡𑀺𑀁 𑀧𑀭𑀺𑀯𑀚𑁆𑀚𑁂𑀲𑁆𑀲𑀦𑁆𑀢𑀺, 𑀢𑀯 𑀧𑀸𑀤𑀧𑀺𑀝𑁆𑀞𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀲𑀳𑀲𑁆𑀲𑀁 𑀤𑀲𑁆𑀲𑀦𑁆𑀢𑀺, 𑀲𑁄𑀢𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀲𑀢𑀁 𑀤𑀲𑁆𑀲𑀦𑁆𑀢𑀺, 𑀘𑀓𑁆𑀔𑀼𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀏𑀓𑀁 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀯𑀦𑁆𑀤𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀦𑀁 𑀑𑀯𑀤𑀺𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀯𑀺𑀲𑀺. 𑀩𑁆𑀭𑀳𑁆𑀫𑀪𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀞𑀺𑀢𑀓𑀸𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀸𑀢𑁄𑀯 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. ‘‘𑀫𑀳𑀸𑀩𑁆𑀭𑀳𑁆𑀫𑀪𑀭𑀺𑀬𑀸’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀚𑀦𑁄 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀲𑀺. 𑀧𑀸𑀤𑀧𑀺𑀝𑁆𑀞𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀮𑀪𑀦𑁆𑀢𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀤𑁂𑀦𑁆𑀢𑀺, 𑀲𑁄𑀢𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀮𑀪𑀦𑁆𑀢𑀸 𑀲𑀢𑀁 𑀤𑁂𑀦𑁆𑀢𑀺, 𑀘𑀓𑁆𑀔𑀼𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀮𑀪𑀦𑁆𑀢𑀸 𑀏𑀓𑀁 𑀓𑀳𑀸𑀧𑀡𑀁 𑀤𑁂𑀦𑁆𑀢𑀺. 𑀏𑀯𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀁 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑀁 𑀮𑀪𑀺𑀁𑀲𑀼.

𑀅𑀣 𑀦𑀁 𑀦𑀕𑀭𑀁 𑀧𑀭𑀺𑀳𑀭𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀬𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁. 𑀫𑀡𑁆𑀟𑀧𑀲𑀦𑁆𑀢𑀺𑀓𑁂𑀬𑁂𑀯 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀁 𑀲𑀢𑁆𑀢𑀪𑀽𑀫𑀺𑀓𑀁 𑀧𑀸𑀲𑀸𑀤𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼, 𑀫𑀳𑀦𑁆𑀢𑀁 𑀦𑀯𑀓𑀫𑁆𑀫𑀁 𑀅𑀳𑁄𑀲𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀫𑀡𑁆𑀟𑀧𑁂𑀬𑁂𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀡𑁆𑀟𑀧𑁂 𑀚𑀸𑀢𑀢𑁆𑀢𑀸 ‘‘𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀧𑀸𑀲𑀸𑀤𑁄 𑀧𑀦 𑀤𑀲𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀢𑀲𑁆𑀫𑀺𑀁 𑀯𑀲𑀢𑀺, 𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄𑀧𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀢𑀺. 𑀢𑀲𑁆𑀲 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂𑀬𑁂𑀯 𑀚𑀫𑁆𑀩𑀼𑀤𑀻𑀧𑀢𑀮𑁂 𑀉𑀢𑁆𑀢𑀫𑀸𑀘𑀭𑀺𑀬𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂 𑀢𑀁 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺, 𑀦𑀺𑀩𑀤𑁆𑀥𑀁 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑁂𑀢𑀺.

𑀅𑀣𑁂𑀓𑀲𑁆𑀫𑀺𑀁 𑀫𑀳𑀸𑀫𑀳𑀤𑀺𑀯𑀲𑁂 𑀕𑁂𑀳𑁂 𑀩𑀳𑀼𑀁 𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑁂𑀲𑀼𑀁. 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀯𑀡𑁆𑀡𑁂𑀦 𑀦𑀯𑀲𑀧𑁆𑀧𑀺𑀦𑀸 𑀧𑀓𑁆𑀓𑀫𑀥𑀼𑀔𑀡𑁆𑀟𑀲𑀓𑁆𑀔𑀭𑀸𑀳𑀺 𑀘 𑀅𑀪𑀺𑀲𑀗𑁆𑀔𑀢𑀁 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀓𑀼𑀫𑀸𑀭𑁄𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀆𑀭𑀼𑀬𑁆𑀳 𑀳𑀢𑁆𑀣𑁂𑀦 𑀓𑀜𑁆𑀘𑀦𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀇𑀥 𑀲𑀧𑁆𑀧𑀺𑀁 𑀤𑁂𑀣, 𑀇𑀥 𑀫𑀥𑀼’’𑀦𑁆𑀢𑀺 𑀯𑀺𑀘𑀸𑀭𑁂𑀦𑁆𑀢𑁄 𑀘𑀭𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄 𑀳𑀺𑀫𑀯𑀦𑁆𑀢𑁂 𑀅𑀲𑁆𑀲𑀫𑀧𑀤𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸 𑀦𑀼 𑀔𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚𑁂𑀯 𑀕𑀦𑁆𑀢𑁆𑀯𑀸 𑀫𑀸𑀡𑀯𑀁 𑀤𑀫𑁂𑀢𑁆𑀯𑀸 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀢𑁆𑀣 𑀤𑀸𑀦𑀁 𑀤𑀸𑀧𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀓𑀸𑀲𑁂𑀦 𑀅𑀦𑁄𑀢𑀢𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀫𑀼𑀔𑀥𑁄𑀯𑀦𑀸𑀤𑀻𑀦𑀺 𑀓𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀞𑀺𑀢𑁄 𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀆𑀤𑀸𑀬 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀤𑀸𑀦𑀕𑁆𑀕𑁂𑀬𑁂𑀯 𑀑𑀢𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀫𑀡𑁆𑀟𑀩𑁆𑀬𑁄 𑀓𑀼𑀫𑀸𑀭𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀯𑀁𑀯𑀺𑀭𑀽𑀧𑁄 𑀲𑀗𑁆𑀓𑀸𑀭𑀬𑀓𑁆𑀔𑀲𑀤𑀺𑀲𑁄 𑀅𑀬𑀁 𑀧𑀩𑁆𑀩𑀚𑀺𑀢𑁄 𑀇𑀫𑀁 𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑁄 𑀓𑀼𑀢𑁄 𑀦𑀼 𑀔𑁄 𑀆𑀕𑀘𑁆𑀙𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺.

𑀢𑀢𑁆𑀣 𑀤𑀼𑀫𑁆𑀫𑀯𑀸𑀲𑀻𑀢𑀺 𑀅𑀦𑀜𑁆𑀚𑀺𑀢𑀅𑀫𑀡𑁆𑀟𑀺𑀢𑀖𑀝𑀺𑀢𑀲𑀗𑁆𑀖𑀸𑀝𑀺𑀓𑀧𑀺𑀮𑁄𑀢𑀺𑀓𑀯𑀲𑀦𑁄. 𑀑𑀢𑀮𑁆𑀮𑀓𑁄𑀢𑀺 𑀮𑀸𑀫𑀓𑁄 𑀑𑀮𑀫𑁆𑀩𑀯𑀺𑀮𑀫𑁆𑀩𑀦𑀦𑁆𑀢𑀓𑀥𑀭𑁄 𑀯𑀸. 𑀧𑀁𑀲𑀼𑀧𑀺𑀲𑀸𑀘𑀓𑁄𑀯𑀸𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀺𑀲𑀸𑀘𑀓𑁄 𑀯𑀺𑀬. 𑀲𑀗𑁆𑀓𑀸𑀭𑀘𑁄𑀴𑀦𑁆𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀮𑀤𑁆𑀥𑀧𑀺𑀮𑁄𑀢𑀺𑀓𑀁. 𑀧𑀝𑀺𑀫𑀼𑀜𑁆𑀘𑀸𑀢𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺 𑀢𑁆𑀯𑀁 𑀅𑀤𑀓𑁆𑀔𑀺𑀡𑁂𑀬𑁆𑀬𑁄 𑀇𑀫𑁂𑀲𑀁 𑀧𑀭𑀫𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀏𑀓𑁄 𑀳𑀼𑀢𑁆𑀯𑀸 𑀓𑀼𑀢𑁄 𑀆𑀕𑀢𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀼𑀤𑀼𑀘𑀺𑀢𑁆𑀢𑁂𑀦𑁂𑀯 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀅𑀦𑁆𑀦𑀁 𑀢𑀯𑁂𑀤𑀁 𑀧𑀓𑀢𑀁 𑀬𑀲𑀲𑁆𑀲𑀺, 𑀢𑀁 𑀔𑀚𑁆𑀚𑀭𑁂 𑀪𑀼𑀜𑁆𑀚𑀭𑁂 𑀧𑀺𑀬𑁆𑀬𑀭𑁂 𑀘;

𑀚𑀸𑀦𑀸𑀲𑀺 𑀫𑀁 𑀢𑁆𑀯𑀁 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀁, 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀁 𑀮𑀪𑀢𑀁 𑀲𑀧𑀸𑀓𑁄’’𑀢𑀺.

𑀢𑀢𑁆𑀣 𑀧𑀓𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀁. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦. 𑀢𑀁 𑀔𑀚𑁆𑀚𑀭𑁂𑀢𑀺 𑀢𑀁 𑀔𑀚𑁆𑀚𑀦𑁆𑀢𑀺 𑀘 𑀪𑀼𑀜𑁆𑀚𑀦𑁆𑀢𑀺 𑀘 𑀧𑀺𑀯𑀦𑁆𑀢𑀺 𑀘. 𑀓𑀺𑀁𑀓𑀸𑀭𑀡𑀸 𑀫𑀬𑁆𑀳𑀁 𑀓𑀼𑀚𑁆𑀛𑀲𑀺? 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀦𑁆𑀢𑀺 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀮𑀪𑀺𑀢𑀩𑁆𑀩𑀧𑀺𑀡𑁆𑀟𑀁, 𑀉𑀝𑁆𑀞𑀸𑀬 𑀞𑀺𑀢𑁂𑀳𑀺 𑀯𑀸 𑀤𑀻𑀬𑀫𑀸𑀦𑀁 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀮𑀪𑀺𑀢𑀩𑁆𑀩𑀧𑀺𑀡𑁆𑀟𑀁. 𑀮𑀪𑀢𑀁 𑀲𑀧𑀸𑀓𑁄𑀢𑀺 𑀲𑀧𑀸𑀓𑁄 𑀘𑀡𑁆𑀟𑀸𑀮𑁄𑀧𑀺 𑀮𑀪𑀢𑀼. 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀪𑀦𑁆𑀢𑀺, 𑀲𑀧𑀸𑀓𑀘𑀡𑁆𑀟𑀸𑀮𑀲𑁆𑀲 𑀧𑀦 𑀓𑁄 𑀤𑁂𑀢𑀺, 𑀤𑀼𑀮𑁆𑀮𑀪𑀧𑀺𑀡𑁆𑀟𑁄 𑀅𑀳𑀁, 𑀢𑀲𑁆𑀫𑀸 𑀫𑁂 𑀚𑀻𑀯𑀺𑀢𑀧𑀯𑀢𑁆𑀢𑀦𑀢𑁆𑀣𑀁 𑀪𑁄𑀚𑀦𑀁 𑀤𑀸𑀧𑁂𑀳𑀺, 𑀓𑀼𑀫𑀸𑀭𑀸𑀢𑀺.

𑀢𑀢𑁄 𑀫𑀡𑁆𑀟𑀩𑁆𑀬𑁄 𑀕𑀸𑀣𑀫𑀸𑀳 𑁋

𑁩. ‘‘𑀅𑀦𑁆𑀦𑀁 𑀫𑀫𑁂𑀤𑀁 𑀧𑀓𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀅𑀢𑁆𑀢𑀢𑁆𑀣𑀸𑀬 𑀲𑀤𑁆𑀤𑀳𑀢𑁄 𑀫𑀫𑁂𑀤𑀁;

𑀅𑀧𑁂𑀳𑀺 𑀏𑀢𑁆𑀢𑁄 𑀓𑀺𑀫𑀺𑀥𑀝𑁆𑀞𑀺𑀢𑁄𑀲𑀺, 𑀦 𑀫𑀸𑀤𑀺𑀲𑀸 𑀢𑀼𑀫𑁆𑀳𑀁 𑀤𑀤𑀦𑁆𑀢𑀺 𑀚𑀫𑁆𑀫𑀸’’𑀢𑀺.

𑀢𑀢𑁆𑀣 𑀅𑀢𑁆𑀢𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀯𑀟𑁆𑀠𑀺𑀅𑀢𑁆𑀣𑀸𑀬. 𑀅𑀧𑁂𑀳𑀺 𑀏𑀢𑁆𑀢𑁄𑀢𑀺 𑀇𑀫𑀫𑁆𑀳𑀸 𑀞𑀸𑀦𑀸 𑀅𑀧𑀕𑀘𑁆𑀙. 𑀦 𑀫𑀸𑀤𑀺𑀲𑀸𑀢𑀺 𑀫𑀸𑀤𑀺𑀲𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑁂𑀦𑁆𑀢𑀺, 𑀦 𑀢𑀼𑀬𑁆𑀳𑀁 𑀘𑀡𑁆𑀟𑀸𑀮𑀲𑁆𑀲, 𑀕𑀘𑁆𑀙, 𑀚𑀫𑁆𑀫𑀸𑀢𑀺.

𑀢𑀢𑁄 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋

𑁪. ‘‘𑀣𑀮𑁂 𑀘 𑀦𑀺𑀦𑁆𑀦𑁂 𑀘 𑀯𑀧𑀦𑁆𑀢𑀺 𑀩𑀻𑀚𑀁, 𑀅𑀦𑀽𑀧𑀔𑁂𑀢𑁆𑀢𑁂 𑀨𑀮𑀫𑀸𑀲𑀫𑀸𑀦𑀸;

𑀏𑀢𑀸𑀬 𑀲𑀤𑁆𑀥𑀸𑀬 𑀤𑀤𑀸𑀳𑀺 𑀤𑀸𑀦𑀁, 𑀅𑀧𑁆𑀧𑁂𑀯 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀼𑀫𑀸𑀭, 𑀲𑀲𑁆𑀲𑀨𑀮𑀁 𑀆𑀲𑀻𑀲𑀫𑀸𑀦𑀸 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀩𑀻𑀚𑀁 𑀯𑀧𑀦𑁆𑀢𑀺. 𑀢𑀢𑁆𑀣 𑀅𑀢𑀺𑀯𑀼𑀝𑁆𑀞𑀺𑀓𑀸𑀮𑁂 𑀣𑀮𑁂 𑀲𑀲𑁆𑀲𑀁 𑀲𑀫𑁆𑀧𑀚𑁆𑀚𑀢𑀺, 𑀦𑀺𑀦𑁆𑀦𑁂 𑀧𑀽𑀢𑀺𑀓𑀁 𑀳𑁄𑀢𑀺, 𑀅𑀦𑀽𑀧𑀔𑁂𑀢𑁆𑀢𑁂 𑀦𑀤𑀺𑀜𑁆𑀘 𑀢𑀴𑀸𑀓𑀜𑁆𑀘 𑀦𑀺𑀲𑁆𑀲𑀸𑀬 𑀓𑀢𑀁 𑀑𑀖𑁂𑀦 𑀯𑀼𑀬𑁆𑀳𑀢𑀺. 𑀫𑀦𑁆𑀤𑀯𑀼𑀝𑁆𑀞𑀺𑀓𑀸𑀮𑁂 𑀣𑀮𑁂 𑀔𑁂𑀢𑁆𑀢𑁂 𑀯𑀺𑀧𑀚𑁆𑀚𑀢𑀺, 𑀦𑀺𑀦𑁆𑀦𑁂 𑀣𑁄𑀓𑀁 𑀲𑀫𑁆𑀧𑀚𑁆𑀚𑀢𑀺, 𑀅𑀦𑀽𑀧𑀔𑁂𑀢𑁆𑀢𑁂 𑀲𑀫𑁆𑀧𑀚𑁆𑀚𑀢𑁂𑀯. 𑀲𑀫𑀯𑀼𑀝𑁆𑀞𑀺𑀓𑀸𑀮𑁂 𑀣𑀮𑁂 𑀔𑁂𑀢𑁆𑀢𑁂 𑀣𑁄𑀓𑀁 𑀲𑀫𑁆𑀧𑀚𑁆𑀚𑀢𑀺, 𑀇𑀢𑀭𑁂𑀲𑀼 𑀲𑀫𑁆𑀧𑀚𑁆𑀚𑀢𑁂𑀯. 𑀢𑀲𑁆𑀫𑀸 𑀬𑀣𑀸 𑀨𑀮𑀫𑀸𑀲𑀻𑀲𑀫𑀸𑀦𑀸 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀯𑀧𑀦𑁆𑀢𑀺, 𑀢𑀣𑀸 𑀢𑁆𑀯𑀫𑁆𑀧𑀺 𑀏𑀢𑀸𑀬 𑀨𑀮𑀲𑀤𑁆𑀥𑀸𑀬 𑀆𑀕𑀢𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀤𑀸𑀦𑀁 𑀤𑁂𑀳𑀺, 𑀅𑀧𑁆𑀧𑁂𑀯 𑀦𑀸𑀫 𑀏𑀯𑀁 𑀤𑀤𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑁂 𑀆𑀭𑀸𑀥𑁂𑀬𑁆𑀬𑀸𑀲𑀺 𑀮𑀪𑁂𑀬𑁆𑀬𑀸𑀲𑀻𑀢𑀺.

𑀢𑀢𑁄 𑀫𑀡𑁆𑀟𑀩𑁆𑀬𑁄 𑀕𑀸𑀣𑀫𑀸𑀳 𑁋

𑁫. ‘‘𑀔𑁂𑀢𑁆𑀢𑀸𑀦𑀺 𑀫𑀬𑁆𑀳𑀁 𑀯𑀺𑀤𑀺𑀢𑀸𑀦𑀺 𑀮𑁄𑀓𑁂, 𑀬𑁂𑀲𑀸𑀳𑀁 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀫𑀺;

𑀬𑁂 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀸, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀻’’𑀢𑀺.

𑀢𑀢𑁆𑀣 𑀬𑁂𑀲𑀸𑀳𑀦𑁆𑀢𑀺 𑀬𑁂𑀲𑀼 𑀅𑀳𑀁. 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀸𑀢𑀺 𑀚𑀸𑀢𑀺𑀬𑀸 𑀘 𑀫𑀦𑁆𑀢𑁂𑀳𑀺 𑀘 𑀉𑀧𑀧𑀦𑁆𑀦𑀸.

𑀢𑀢𑁄 𑀫𑀳𑀸𑀲𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁬. ‘‘𑀚𑀸𑀢𑀺𑀫𑀤𑁄 𑀘 𑀅𑀢𑀺𑀫𑀸𑀦𑀺𑀢𑀸 𑀘, 𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂 𑀅𑀕𑀼𑀡𑀸 𑀬𑁂𑀲𑀼 𑀘 𑀲𑀦𑁆𑀢𑀺 𑀲𑀩𑁆𑀩𑁂, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀅𑀧𑁂𑀲𑀮𑀸𑀦𑀺.

𑁭. ‘‘𑀚𑀸𑀢𑀺𑀫𑀤𑁄 𑀘 𑀅𑀢𑀺𑀫𑀸𑀦𑀺𑀢𑀸 𑀘, 𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂 𑀅𑀕𑀼𑀡𑀸 𑀬𑁂𑀲𑀼 𑀦 𑀲𑀦𑁆𑀢𑀺 𑀲𑀩𑁆𑀩𑁂, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀻’’𑀢𑀺.

𑀢𑀢𑁆𑀣 𑀚𑀸𑀢𑀺𑀫𑀤𑁄𑀢𑀺 ‘‘𑀅𑀳𑀫𑀲𑁆𑀫𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀅𑀢𑀺𑀫𑀸𑀦𑀺𑀢𑀸 𑀘𑀸𑀢𑀺 ‘‘𑀅𑀜𑁆𑀜𑁄 𑀫𑀬𑀸 𑀲𑀤𑁆𑀥𑀺𑀁 𑀚𑀸𑀢𑀺𑀆𑀤𑀻𑀳𑀺 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑀫𑀸𑀦𑁄. 𑀮𑁄𑀪𑀸𑀤𑀬𑁄 𑀮𑀼𑀩𑁆𑀪𑀦𑀤𑀼𑀲𑁆𑀲𑀦𑀫𑀚𑁆𑀚𑀦𑀫𑀼𑀬𑁆𑀳𑀦𑀫𑀢𑁆𑀢𑀸𑀯. 𑀅𑀧𑁂𑀲𑀮𑀸𑀦𑀻𑀢𑀺 𑀏𑀯𑀭𑀽𑀧𑀸 𑀧𑀼𑀕𑁆𑀕𑀮𑀸 𑀆𑀲𑀻𑀯𑀺𑀲𑀪𑀭𑀺𑀢𑀸 𑀯𑀺𑀬 𑀯𑀫𑁆𑀫𑀺𑀓𑀸 𑀅𑀧𑁆𑀧𑀺𑀬𑀲𑀻𑀮𑀸 𑀳𑁄𑀦𑁆𑀢𑀺. 𑀏𑀯𑀭𑀽𑀧𑀸𑀦𑀁 𑀤𑀺𑀦𑁆𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀲𑁆𑀫𑀸 𑀫𑀸 𑀏𑀢𑁂𑀲𑀁 𑀲𑀼𑀧𑁂𑀲𑀮𑀔𑁂𑀢𑁆𑀢𑀪𑀸𑀯𑀁 𑀫𑀜𑁆𑀜𑀺𑀢𑁆𑀣. 𑀦 𑀳𑀺 𑀚𑀸𑀢𑀺𑀫𑀦𑁆𑀢𑀸 𑀲𑀕𑁆𑀕𑀤𑀸𑀬𑀓𑀸. 𑀬𑁂 𑀧𑀦 𑀚𑀸𑀢𑀺𑀫𑀸𑀦𑀸𑀤𑀺𑀭𑀳𑀺𑀢𑀸 𑀅𑀭𑀺𑀬𑀸, 𑀢𑀸𑀦𑀺 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀺, 𑀢𑁂𑀲𑀼 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀢𑁂 𑀲𑀕𑁆𑀕𑀤𑀸𑀬𑀓𑀸 𑀳𑁄𑀦𑁆𑀢𑀻𑀢𑀺.

𑀇𑀢𑀺 𑀲𑁄 𑀫𑀳𑀸𑀲𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀬𑀁 𑀅𑀢𑀺𑀯𑀺𑀬 𑀩𑀳𑀼𑀁 𑀯𑀺𑀧𑁆𑀧𑀮𑀧𑀢𑀺, 𑀓𑀼𑀳𑀺𑀁 𑀕𑀢𑀸 𑀇𑀫𑁂 𑀤𑁄𑀯𑀸𑀭𑀺𑀓𑀸, 𑀦𑀬𑀺𑀫𑀁 𑀘𑀡𑁆𑀟𑀸𑀮𑀁 𑀦𑀻𑀳𑀭𑀦𑁆𑀢𑀻’’𑀢𑀺 𑀕𑀸𑀣𑀫𑀸𑀳 𑁋

𑁮. ‘‘𑀓𑁆𑀯𑁂𑀢𑁆𑀣 𑀕𑀢𑀸 𑀉𑀧𑀚𑁄𑀢𑀺𑀬𑁄 𑀘, 𑀉𑀧𑀚𑁆𑀛𑀸𑀬𑁄 𑀅𑀣 𑀯𑀸 𑀕𑀡𑁆𑀟𑀓𑀼𑀘𑁆𑀙𑀺;

𑀇𑀫𑀲𑁆𑀲 𑀤𑀡𑁆𑀟𑀜𑁆𑀘 𑀯𑀥𑀜𑁆𑀘 𑀤𑀢𑁆𑀯𑀸, 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣 𑀚𑀫𑁆𑀫’’𑀦𑁆𑀢𑀺.

𑀢𑀢𑁆𑀣 𑀓𑁆𑀯𑁂𑀢𑁆𑀣 𑀕𑀢𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀞𑀧𑀺𑀢𑀸 𑀉𑀧𑀚𑁄𑀢𑀺𑀬𑁄 𑀘 𑀉𑀧𑀚𑁆𑀛𑀸𑀬𑁄 𑀘 𑀕𑀡𑁆𑀟𑀓𑀼𑀘𑁆𑀙𑀺 𑀘𑀸𑀢𑀺 𑀢𑀬𑁄 𑀤𑁄𑀯𑀸𑀭𑀺𑀓𑀸 𑀓𑀼𑀳𑀺𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑀢𑁂𑀧𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫 𑀤𑁂𑀯𑀸’’𑀢𑀺 𑀆𑀳𑀁𑀲𑀼. ‘‘𑀅𑀬𑀁 𑀯𑁄 𑀚𑀫𑁆𑀫𑁄 𑀘𑀡𑁆𑀟𑀸𑀮𑁄 𑀤𑀺𑀝𑁆𑀞𑁄’’𑀢𑀺? ‘‘𑀦 𑀧𑀲𑁆𑀲𑀸𑀫 𑀤𑁂𑀯, 𑀓𑀼𑀢𑁄𑀘𑀺 𑀆𑀕𑀢𑀪𑀸𑀯𑀁 𑀦 𑀚𑀸𑀦𑀸𑀫𑀸’’𑀢𑀺. ‘‘𑀓𑁄 𑀘𑁂𑀲 𑀫𑀸𑀬𑀸𑀓𑀸𑀭𑁄 𑀯𑀸 𑀯𑀺𑀚𑁆𑀚𑀸𑀥𑀭𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀓𑀺𑀁 𑀢𑀺𑀝𑁆𑀞𑀣𑀸’’𑀢𑀺. ‘‘𑀓𑀺𑀁 𑀓𑀭𑁄𑀫 𑀤𑁂𑀯𑀸’’𑀢𑀺? ‘‘𑀇𑀫𑀲𑁆𑀲 𑀫𑀼𑀔𑀫𑁂𑀯 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀦𑁆𑀢𑀸 𑀤𑀡𑁆𑀟𑀯𑁂𑀴𑀼𑀧𑁂𑀲𑀺𑀓𑀸𑀳𑀺 𑀧𑀺𑀝𑁆𑀞𑀺𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀦𑁆𑀢𑀸 𑀯𑀥𑀜𑁆𑀘 𑀤𑀢𑁆𑀯𑀸 𑀕𑀮𑁂 𑀕𑀳𑁂𑀢𑁆𑀯𑀸 𑀏𑀢𑀁 𑀚𑀫𑁆𑀫𑀁 𑀔𑀮𑀬𑀸𑀣, 𑀇𑀢𑁄 𑀦𑀻𑀳𑀭𑀣𑀸’’𑀢𑀺.

𑀫𑀳𑀸𑀲𑀢𑁆𑀢𑁄 𑀢𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀅𑀦𑀸𑀕𑀢𑁂𑀲𑁆𑀯𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀕𑀸𑀣𑀫𑀸𑀳 𑁋

𑁯. ‘‘𑀕𑀺𑀭𑀺𑀁 𑀦𑀔𑁂𑀦 𑀔𑀡𑀲𑀺, 𑀅𑀬𑁄 𑀤𑀦𑁆𑀢𑁂𑀳𑀺 𑀔𑀸𑀤𑀲𑀺;

𑀚𑀸𑀢𑀯𑁂𑀤𑀁 𑀧𑀤𑀳𑀲𑀺, 𑀬𑁄 𑀇𑀲𑀺𑀁 𑀧𑀭𑀺𑀪𑀸𑀲𑀲𑀻’’𑀢𑀺.

𑀢𑀢𑁆𑀣 𑀚𑀸𑀢𑀯𑁂𑀤𑀁 𑀧𑀤𑀳𑀲𑀻𑀢𑀺 𑀅𑀕𑁆𑀕𑀺𑀁 𑀕𑀺𑀮𑀺𑀢𑀼𑀁 𑀯𑀸𑀬𑀫𑀲𑀺.

𑀇𑀫𑀜𑁆𑀘 𑀧𑀦 𑀕𑀸𑀣𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀸𑀡𑀯𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁦. ‘‘𑀇𑀤𑀁 𑀯𑀢𑁆𑀯𑀸𑀦 𑀫𑀸𑀢𑀗𑁆𑀕𑁄, 𑀇𑀲𑀺 𑀲𑀘𑁆𑀘𑀧𑀭𑀓𑁆𑀓𑀫𑁄;

𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀧𑀓𑁆𑀓𑀸𑀫𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀤𑀺𑀓𑁆𑀔𑀢’’𑀦𑁆𑀢𑀺.

𑀢𑀢𑁆𑀣 𑀲𑀘𑁆𑀘𑀧𑀭𑀓𑁆𑀓𑀫𑁄𑀢𑀺 𑀲𑀪𑀸𑀯𑀧𑀭𑀓𑁆𑀓𑀫𑁄.

𑀲𑁄 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀏𑀓𑀸𑀬 𑀯𑀻𑀣𑀺𑀬𑀸 𑀑𑀢𑀭𑀺𑀢𑁆𑀯𑀸 ‘‘𑀧𑀤𑀯𑀴𑀜𑁆𑀚𑀁 𑀧𑀜𑁆𑀜𑀸𑀬𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀧𑀸𑀘𑀻𑀦𑀤𑁆𑀯𑀸𑀭𑀲𑀫𑀻𑀧𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀫𑀺𑀲𑁆𑀲𑀓𑀪𑀢𑁆𑀢𑀁 𑀲𑀁𑀓𑀟𑁆𑀠𑀺𑀢𑁆𑀯𑀸 𑀏𑀓𑀺𑀲𑁆𑀲𑀁 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀦𑀕𑀭𑀤𑁂𑀯𑀢𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀁 𑀯𑀺𑀳𑁂𑀞𑁂𑀢𑁆𑀯𑀸 𑀓𑀣𑁂𑀢𑀻’’𑀢𑀺 𑀅𑀲𑀳𑀫𑀸𑀦𑀸 𑀆𑀕𑀫𑀺𑀁𑀲𑀼. 𑀅𑀣𑀲𑁆𑀲 𑀚𑁂𑀝𑁆𑀞𑀓𑀬𑀓𑁆𑀔𑁄 𑀫𑀡𑁆𑀟𑀩𑁆𑀬𑀲𑁆𑀲 𑀕𑀻𑀯𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀲𑀺, 𑀲𑁂𑀲𑀤𑁂𑀯𑀢𑀸 𑀲𑁂𑀲𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀻𑀯𑀁 𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑀢𑀸𑀬 𑀧𑀦 ‘‘𑀢𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀦𑀁 𑀦 𑀫𑀸𑀭𑁂𑀦𑁆𑀢𑀺, 𑀓𑁂𑀯𑀮𑀁 𑀓𑀺𑀮𑀫𑁂𑀦𑁆𑀢𑀺𑀬𑁂𑀯. 𑀫𑀡𑁆𑀟𑀩𑁆𑀬𑀲𑁆𑀲 𑀲𑀻𑀲𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀺𑀝𑁆𑀞𑀺𑀧𑀲𑁆𑀲𑀸𑀪𑀺𑀫𑀼𑀔𑀁 𑀚𑀸𑀢𑀁, 𑀳𑀢𑁆𑀣𑀧𑀸𑀤𑀸 𑀉𑀚𑀼𑀓𑀸 𑀣𑀤𑁆𑀥𑀸𑀯 𑀅𑀝𑁆𑀞𑀁𑀲𑀼, 𑀅𑀓𑁆𑀔𑀻𑀦𑀺 𑀓𑀸𑀮𑀓𑀢𑀲𑁆𑀲𑁂𑀯 𑀧𑀭𑀺𑀯𑀢𑁆𑀢𑀺𑀁𑀲𑀼. 𑀲𑁄 𑀣𑀤𑁆𑀥𑀲𑀭𑀻𑀭𑁄𑀯 𑀦𑀺𑀧𑀚𑁆𑀚𑀺, 𑀲𑁂𑀲𑀩𑁆𑀭𑀸𑀳𑁆𑀫𑀡𑀸 𑀫𑀼𑀔𑁂𑀦 𑀔𑁂𑀴𑀁 𑀯𑀫𑀦𑁆𑀢𑀸 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀫𑀸𑀡𑀯𑀸 ‘‘𑀅𑀬𑁆𑀬𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀓𑀺𑀁 𑀚𑀸𑀢’’𑀦𑁆𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀆𑀭𑁄𑀘𑀬𑀺𑀁𑀲𑀼. 𑀲𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁧. ‘‘𑀆𑀯𑁂𑀮𑁆𑀮𑀺𑀢𑀁 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁, 𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁;

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲, 𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺.

𑀢𑀢𑁆𑀣 𑀆𑀯𑁂𑀮𑁆𑀮𑀺𑀢𑀦𑁆𑀢𑀺 𑀧𑀭𑀺𑀯𑀢𑁆𑀢𑀺𑀢𑀁.

𑀅𑀣𑀲𑁆𑀲𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀚𑀦𑁄 𑀆𑀭𑁄𑀘𑁂𑀢𑀼𑀁 𑀕𑀸𑀣𑀫𑀸𑀳 𑁋

𑁧𑁨. ‘‘𑀇𑀥𑀸𑀕𑀫𑀸 𑀲𑀫𑀡𑁄 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀲𑁄 𑀢𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺.

𑀲𑀸 𑀢𑀁 𑀲𑀼𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 ‘‘𑀅𑀜𑁆𑀜𑀲𑁆𑀲𑁂𑀢𑀁 𑀩𑀮𑀁 𑀦𑀢𑁆𑀣𑀺, 𑀦𑀺𑀲𑁆𑀲𑀁𑀲𑀬𑀁 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀫𑁆𑀧𑀦𑁆𑀦𑀫𑁂𑀢𑁆𑀢𑀸𑀪𑀸𑀯𑀦𑁄 𑀔𑁄 𑀧𑀦 𑀥𑀻𑀭𑁄 𑀦 𑀏𑀢𑁆𑀢𑀓𑀁 𑀚𑀦𑀁 𑀓𑀺𑀮𑀫𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀓𑀢𑀭𑀁 𑀦𑀼 𑀔𑁄 𑀤𑀺𑀲𑀁 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀧𑀼𑀘𑁆𑀙𑀦𑁆𑀢𑀻 𑀕𑀸𑀣𑀫𑀸𑀳 𑁋

𑁧𑁩. ‘‘𑀓𑀢𑀫𑀁 𑀤𑀺𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄, 𑀅𑀓𑁆𑀔𑀸𑀣 𑀫𑁂 𑀫𑀸𑀡𑀯𑀸 𑀏𑀢𑀫𑀢𑁆𑀣𑀁;

𑀕𑀦𑁆𑀢𑁆𑀯𑀸𑀦 𑀢𑀁 𑀧𑀝𑀺𑀓𑀭𑁂𑀫𑀼 𑀅𑀘𑁆𑀘𑀬𑀁, 𑀅𑀧𑁆𑀧𑁂𑀯 𑀦𑀁 𑀧𑀼𑀢𑁆𑀢 𑀮𑀪𑁂𑀫𑀼 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀕𑀦𑁆𑀢𑁆𑀯𑀸𑀦𑀸𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸. 𑀢𑀁 𑀧𑀝𑀺𑀓𑀭𑁂𑀫𑀼 𑀅𑀘𑁆𑀘𑀬𑀦𑁆𑀢𑀺 𑀢𑀁 𑀅𑀘𑁆𑀘𑀬𑀁 𑀧𑀝𑀺𑀓𑀭𑀺𑀲𑁆𑀲𑀸𑀫 𑀤𑁂𑀲𑁂𑀲𑁆𑀲𑀸𑀫, 𑀔𑀫𑀸𑀧𑁂𑀲𑁆𑀲𑀸𑀫 𑀦𑀦𑁆𑀢𑀺. 𑀧𑀼𑀢𑁆𑀢 𑀮𑀪𑁂𑀫𑀼 𑀚𑀻𑀯𑀺𑀢𑀦𑁆𑀢𑀺 𑀅𑀧𑁆𑀧𑁂𑀯 𑀦𑀸𑀫 𑀧𑀼𑀢𑁆𑀢𑀲𑁆𑀲 𑀚𑀻𑀯𑀺𑀢𑀁 𑀮𑀪𑁂𑀬𑁆𑀬𑀸𑀫.

𑀅𑀣𑀲𑁆𑀲𑀸 𑀢𑀢𑁆𑀣 𑀞𑀺𑀢𑀸 𑀫𑀸𑀡𑀯𑀸 𑀓𑀣𑁂𑀦𑁆𑀢𑀸 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁪. ‘‘𑀯𑁂𑀳𑀸𑀬𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄, 𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄;

𑀅𑀧𑀺 𑀘𑀸𑀧𑀺 𑀲𑁄 𑀧𑀼𑀭𑀺𑀫𑀤𑀺𑀲𑀁 𑀅𑀕𑀘𑁆𑀙𑀺, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑁄 𑀇𑀲𑀺 𑀲𑀸𑀥𑀼𑀭𑀽𑀧𑁄’’𑀢𑀺.

𑀢𑀢𑁆𑀣 𑀧𑀣𑀤𑁆𑀥𑀼𑀦𑁄𑀢𑀺 𑀆𑀓𑀸𑀲𑀧𑀣𑀲𑀗𑁆𑀔𑀸𑀢𑀲𑁆𑀲 𑀅𑀤𑁆𑀥𑀼𑀦𑁄 𑀫𑀚𑁆𑀛𑁂 𑀞𑀺𑀢𑁄 𑀧𑀦𑁆𑀦𑀭𑀲𑁂 𑀘𑀦𑁆𑀤𑁄 𑀯𑀺𑀬. 𑀅𑀧𑀺 𑀘𑀸𑀧𑀺 𑀲𑁄𑀢𑀺 𑀅𑀧𑀺𑀘 𑀔𑁄 𑀧𑀦 𑀲𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀢𑁄.

𑀲𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀫 𑀲𑀸𑀫𑀺𑀓𑀁 𑀉𑀧𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀓𑀮𑀲𑀲𑀼𑀯𑀡𑁆𑀡𑀲𑀭𑀓𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀢𑁂𑀦 𑀧𑀤𑀯𑀴𑀜𑁆𑀚𑀲𑁆𑀲 𑀅𑀥𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀢𑁂𑀦𑀸𑀦𑀼𑀲𑀸𑀭𑁂𑀦 𑀕𑀘𑁆𑀙𑀦𑁆𑀢𑀻 𑀢𑀲𑁆𑀫𑀺𑀁 𑀧𑀻𑀞𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀣𑁄𑀓𑀁 𑀑𑀤𑀦𑀁 𑀧𑀢𑁆𑀢𑁂 𑀞𑀧𑁂𑀲𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀼𑀯𑀡𑁆𑀡𑀓𑀮𑀲𑁂𑀦 𑀢𑀲𑁆𑀲 𑀉𑀤𑀓𑀁 𑀅𑀤𑀸𑀲𑀺. 𑀲𑁄 𑀢𑀢𑁆𑀣𑁂𑀯 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀅𑀣 𑀦𑀁 𑀲𑀸 ‘‘𑀓𑁂𑀦 𑀫𑁂 𑀧𑀼𑀢𑁆𑀢𑀲𑁆𑀲 𑀲𑁄 𑀯𑀺𑀧𑁆𑀧𑀓𑀸𑀭𑁄 𑀓𑀢𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀻 𑀕𑀸𑀣𑀫𑀸𑀳 𑁋

𑁧𑁫. ‘‘𑀆𑀯𑁂𑀮𑁆𑀮𑀺𑀢𑀁 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁, 𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁;

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲, 𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺.

𑀢𑀢𑁄 𑀧𑀭𑀸 𑀢𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁧𑁬. ‘‘𑀬𑀓𑁆𑀔𑀸 𑀳𑀯𑁂 𑀲𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀸, 𑀅𑀦𑁆𑀯𑀸𑀕𑀢𑀸 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀢𑁂 𑀤𑀼𑀝𑁆𑀞𑀘𑀺𑀢𑁆𑀢𑀁 𑀓𑀼𑀧𑀺𑀢𑀁 𑀯𑀺𑀤𑀺𑀢𑁆𑀯𑀸, 𑀬𑀓𑁆𑀔𑀸 𑀳𑀺 𑀢𑁂 𑀧𑀼𑀢𑁆𑀢𑀫𑀓𑀁𑀲𑀼 𑀏𑀯𑀁.

𑁧𑁭. ‘‘𑀬𑀓𑁆𑀔𑀸 𑀘 𑀫𑁂 𑀧𑀼𑀢𑁆𑀢𑀫𑀓𑀁𑀲𑀼 𑀏𑀯𑀁, 𑀢𑁆𑀯𑀜𑁆𑀜𑁂𑀯 𑀫𑁂 𑀫𑀸 𑀓𑀼𑀤𑁆𑀥𑁄 𑀩𑁆𑀭𑀳𑁆𑀫𑀘𑀸𑀭𑀺;

𑀢𑀼𑀫𑁆𑀳𑁂𑀯 𑀧𑀸𑀤𑁂 𑀲𑀭𑀡𑀁 𑀕𑀢𑀸𑀲𑁆𑀫𑀺, 𑀅𑀦𑁆𑀯𑀸𑀕𑀢𑀸 𑀧𑀼𑀢𑁆𑀢𑀲𑁄𑀓𑁂𑀦 𑀪𑀺𑀓𑁆𑀔𑀼.

𑁧𑁮. ‘‘𑀢𑀤𑁂𑀯 𑀳𑀺 𑀏𑀢𑀭𑀳𑀺 𑀘 𑀫𑀬𑁆𑀳𑀁, 𑀫𑀦𑁄𑀧𑀤𑁄𑀲𑁄 𑀦 𑀫𑀫𑀢𑁆𑀣𑀺 𑀓𑁄𑀘𑀺;

𑀧𑀼𑀢𑁆𑀢𑁄 𑀘 𑀢𑁂 𑀯𑁂𑀤𑀫𑀤𑁂𑀦 𑀫𑀢𑁆𑀢𑁄, 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂.

𑁧𑁯. ‘‘𑀅𑀤𑁆𑀥𑀸 𑀳𑀯𑁂 𑀪𑀺𑀓𑁆𑀔𑀼 𑀫𑀼𑀳𑀼𑀢𑁆𑀢𑀓𑁂𑀦, 𑀲𑀫𑁆𑀫𑀼𑀬𑁆𑀳𑀢𑁂𑀯 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸;

𑀏𑀓𑀸𑀧𑀭𑀸𑀥𑀁 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀻’’𑀢𑀺.

𑀢𑀢𑁆𑀣 𑀬𑀓𑁆𑀔𑀸𑀢𑀺 𑀦𑀕𑀭𑀧𑀭𑀺𑀕𑁆𑀕𑀸𑀳𑀓𑀬𑀓𑁆𑀔𑀸. 𑀅𑀦𑁆𑀯𑀸𑀕𑀢𑀸𑀢𑀺 𑀅𑀦𑀼 𑀆𑀕𑀢𑀸, 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸 𑀕𑀼𑀡𑀲𑀫𑁆𑀧𑀦𑁆𑀦𑀸𑀢𑀺 𑀏𑀯𑀁 𑀚𑀸𑀦𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑁂 𑀇𑀲𑀻𑀦𑀁 𑀕𑀼𑀡𑀁 𑀜𑀢𑁆𑀯𑀸 𑀢𑀯 𑀧𑀼𑀢𑁆𑀢𑀁 𑀤𑀼𑀝𑁆𑀞𑀘𑀺𑀢𑁆𑀢𑀁 𑀓𑀼𑀧𑀺𑀢𑀘𑀺𑀢𑁆𑀢𑀁 𑀯𑀺𑀤𑀺𑀢𑁆𑀯𑀸. 𑀢𑁆𑀯𑀜𑁆𑀜𑁂𑀯 𑀫𑁂𑀢𑀺 𑀲𑀘𑁂 𑀬𑀓𑁆𑀔𑀸 𑀓𑀼𑀧𑀺𑀢𑀸 𑀏𑀯𑀫𑀓𑀁𑀲𑀼, 𑀓𑀭𑁄𑀦𑁆𑀢𑀼, 𑀤𑁂𑀯𑀢𑀸 𑀦𑀸𑀫 𑀧𑀸𑀦𑀻𑀬𑀉𑀴𑀼𑀗𑁆𑀓𑀫𑀢𑁆𑀢𑁂𑀦 𑀲𑀦𑁆𑀢𑀧𑁆𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸𑀳𑀁 𑀢𑁂𑀲𑀁 𑀦 𑀪𑀸𑀬𑀸𑀫𑀺, 𑀓𑁂𑀯𑀮𑀁 𑀢𑁆𑀯𑀜𑁆𑀜𑁂𑀯 𑀫𑁂 𑀧𑀼𑀢𑁆𑀢𑀲𑁆𑀲 𑀫𑀸 𑀓𑀼𑀚𑁆𑀛𑀺. 𑀅𑀦𑁆𑀯𑀸𑀕𑀢𑀸𑀢𑀺 𑀆𑀕𑀢𑀸𑀲𑁆𑀫𑀺. 𑀪𑀺𑀓𑁆𑀔𑀽𑀢𑀺 𑀫𑀳𑀸𑀲𑀢𑁆𑀢𑀁 𑀆𑀮𑀧𑀦𑁆𑀢𑀻 𑀧𑀼𑀢𑁆𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀬𑀸𑀘𑀢𑀺. 𑀢𑀤𑁂𑀯 𑀳𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀢𑀤𑀸 𑀢𑀯 𑀧𑀼𑀢𑁆𑀢𑀲𑁆𑀲 𑀫𑀁 𑀅𑀓𑁆𑀓𑁄𑀲𑀦𑀓𑀸𑀮𑁂 𑀘 𑀫𑀬𑁆𑀳𑀁 𑀫𑀦𑁄𑀧𑀤𑁄𑀲𑁄 𑀦𑀢𑁆𑀣𑀺, 𑀏𑀢𑀭𑀳𑀺 𑀘 𑀢𑀬𑀺 𑀬𑀸𑀘𑀫𑀸𑀦𑀸𑀬𑀧𑀺 𑀫𑀫 𑀢𑀲𑁆𑀫𑀺𑀁 𑀫𑀦𑁄𑀧𑀤𑁄𑀲𑁄 𑀦𑀢𑁆𑀣𑀺𑀬𑁂𑀯. 𑀯𑁂𑀤𑀫𑀤𑁂𑀦𑀸𑀢𑀺 ‘‘𑀢𑀬𑁄 𑀯𑁂𑀤𑀸 𑀫𑁂 𑀉𑀕𑁆𑀕𑀳𑀺𑀢𑀸’’𑀢𑀺 𑀫𑀤𑁂𑀦. 𑀅𑀥𑀺𑀘𑁆𑀘𑀸𑀢𑀺 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀅𑀢𑁆𑀣𑀸𑀦𑀢𑁆𑀣𑀁 𑀦 𑀚𑀸𑀦𑀸𑀢𑀺. 𑀫𑀼𑀳𑀼𑀢𑁆𑀢𑀓𑁂𑀦𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀉𑀕𑁆𑀕𑀳𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀓𑁂𑀦𑁂𑀯.

𑀏𑀯𑀁 𑀢𑀸𑀬 𑀔𑀫𑀸𑀧𑀺𑀬𑀫𑀸𑀦𑁄 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀏𑀢𑁂𑀲𑀁 𑀬𑀓𑁆𑀔𑀸𑀦𑀁 𑀧𑀮𑀸𑀬𑀦𑀢𑁆𑀣𑀸𑀬 𑀅𑀫𑀢𑁄𑀲𑀥𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁨𑁦. ‘‘𑀇𑀤𑀜𑁆𑀘 𑀫𑀬𑁆𑀳𑀁 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀁, 𑀢𑀯 𑀫𑀡𑁆𑀟𑀩𑁆𑀬𑁄 𑀪𑀼𑀜𑁆𑀚𑀢𑀼 𑀅𑀧𑁆𑀧𑀧𑀜𑁆𑀜𑁄;

𑀬𑀓𑁆𑀔𑀸 𑀘 𑀢𑁂 𑀦𑀁 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼𑀁, 𑀧𑀼𑀢𑁆𑀢𑁄 𑀘 𑀢𑁂 𑀳𑁂𑀲𑁆𑀲𑀢𑀺 𑀲𑁄 𑀅𑀭𑁄𑀕𑁄’’𑀢𑀺.

𑀢𑀢𑁆𑀣 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀦𑁆𑀢𑀺 𑀉𑀘𑁆𑀙𑀺𑀝𑁆𑀞𑀓𑀧𑀺𑀡𑁆𑀟𑀁, ‘‘𑀉𑀘𑁆𑀙𑀺𑀝𑁆𑀞𑀧𑀺𑀡𑁆𑀟’’𑀦𑁆𑀢𑀺𑀧𑀺 𑀧𑀸𑀞𑁄.

𑀲𑀸 𑀫𑀳𑀸𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀤𑁂𑀣, 𑀲𑀸𑀫𑀺, 𑀅𑀫𑀢𑁄𑀲𑀥’’𑀦𑁆𑀢𑀺 𑀲𑀼𑀯𑀡𑁆𑀡𑀲𑀭𑀓𑀁 𑀉𑀧𑀦𑀸𑀫𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀉𑀘𑁆𑀙𑀺𑀝𑁆𑀞𑀓𑀓𑀜𑁆𑀚𑀺𑀓𑀁 𑀢𑀢𑁆𑀣 𑀆𑀲𑀺𑀜𑁆𑀘𑀺𑀢𑁆𑀯𑀸 ‘‘𑀧𑀞𑀫𑀜𑁆𑀜𑁂𑀯 𑀇𑀢𑁄 𑀉𑀧𑀟𑁆𑀠𑀁 𑀢𑀯 𑀧𑀼𑀢𑁆𑀢𑀲𑁆𑀲 𑀫𑀼𑀔𑁂 𑀑𑀲𑀺𑀜𑁆𑀘𑀺𑀢𑁆𑀯𑀸 𑀲𑁂𑀲𑀁 𑀘𑀸𑀝𑀺𑀬𑀁 𑀉𑀤𑀓𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀲𑁂𑀲𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀔𑁂 𑀑𑀲𑀺𑀜𑁆𑀘𑁂𑀳𑀺, 𑀲𑀩𑁆𑀩𑁂𑀧𑀺 𑀦𑀺𑀭𑁄𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄. 𑀲𑀸𑀧𑀺 𑀢𑀁 𑀲𑀭𑀓𑀁 𑀲𑀻𑀲𑁂𑀦𑀸𑀤𑀸𑀬 ‘‘𑀅𑀫𑀢𑁄𑀲𑀥𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀻 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀧𑀞𑀫𑀁 𑀧𑀼𑀢𑁆𑀢𑀲𑁆𑀲 𑀫𑀼𑀔𑁂 𑀓𑀜𑁆𑀚𑀺𑀓𑀁 𑀑𑀲𑀺𑀜𑁆𑀘𑀺, 𑀬𑀓𑁆𑀔𑁄 𑀧𑀮𑀸𑀬𑀺. 𑀇𑀢𑀭𑁄 𑀧𑀁𑀲𑀼𑀁 𑀧𑀼𑀜𑁆𑀙𑀦𑁆𑀢𑁄 𑀉𑀝𑁆𑀞𑀸𑀬 ‘‘𑀅𑀫𑁆𑀫 𑀓𑀺𑀫𑁂𑀢’’𑀦𑁆𑀢𑀺 𑀆𑀳. 𑀢𑀬𑀸 𑀓𑀢𑀁 𑀢𑁆𑀯𑀫𑁂𑀯 𑀚𑀸𑀦𑀺𑀲𑁆𑀲𑀲𑀺. 𑀏𑀳𑀺, 𑀢𑀸𑀢, 𑀢𑀯 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀢𑁂𑀲𑀁 𑀯𑀺𑀧𑁆𑀧𑀓𑀸𑀭𑀁 𑀧𑀲𑁆𑀲𑀸𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸 ‘‘𑀢𑀸𑀢 𑀫𑀡𑁆𑀟𑀩𑁆𑀬, 𑀢𑁆𑀯𑀁 𑀩𑀸𑀮𑁄 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀝𑁆𑀞𑀸𑀦𑀁 𑀦 𑀚𑀸𑀦𑀸𑀲𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫 𑀏𑀯𑀭𑀽𑀧𑀸 𑀦 𑀳𑁄𑀦𑁆𑀢𑀺, 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀲𑀤𑀺𑀲𑀸𑀯 𑀳𑁄𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀏𑀢𑁂𑀲𑀁 𑀤𑀼𑀲𑁆𑀲𑀻𑀮𑀸𑀦𑀁 𑀤𑀸𑀦𑀫𑀤𑀸𑀲𑀺, 𑀲𑀻𑀮𑀯𑀦𑁆𑀢𑀸𑀦𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀆𑀳 𑁋

𑁨𑁧. ‘‘𑀫𑀡𑁆𑀟𑀩𑁆𑀬 𑀩𑀸𑀮𑁄𑀲𑀺 𑀧𑀭𑀺𑀢𑁆𑀢𑀧𑀜𑁆𑀜𑁄, 𑀬𑁄 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸𑀦𑀫𑀓𑁄𑀯𑀺𑀤𑁄𑀲𑀺;

𑀫𑀳𑀓𑁆𑀓𑀲𑀸𑀯𑁂𑀲𑀼 𑀤𑀤𑀸𑀲𑀺 𑀤𑀸𑀦𑀁, 𑀓𑀺𑀮𑀺𑀝𑁆𑀞𑀓𑀫𑁆𑀫𑁂𑀲𑀼 𑀅𑀲𑀜𑁆𑀜𑀢𑁂𑀲𑀼.

𑁨𑁨. ‘‘𑀚𑀝𑀸 𑀘 𑀓𑁂𑀲𑀸 𑀅𑀚𑀺𑀦𑀸 𑀦𑀺𑀯𑀢𑁆𑀣𑀸, 𑀚𑀭𑀽𑀤𑀧𑀸𑀦𑀁𑀯 𑀫𑀼𑀔𑀁 𑀧𑀭𑀽𑀴𑁆𑀳𑀁;

𑀧𑀚𑀁 𑀇𑀫𑀁 𑀧𑀲𑁆𑀲𑀣 𑀤𑀼𑀫𑁆𑀫𑀭𑀽𑀧𑀁, 𑀦 𑀚𑀝𑀸𑀚𑀺𑀦𑀁 𑀢𑀸𑀬𑀢𑀺 𑀅𑀧𑁆𑀧𑀧𑀜𑁆𑀜𑀁.

𑁨𑁩. ‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀼 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀢𑀢𑁆𑀣 𑀫𑀳𑀓𑁆𑀓𑀲𑀸𑀯𑁂𑀲𑀽𑀢𑀺 𑀫𑀳𑀸𑀓𑀲𑀸𑀯𑁂𑀲𑀼 𑀫𑀳𑀦𑁆𑀢𑁂𑀳𑀺 𑀭𑀸𑀕𑀓𑀲𑀸𑀯𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁂𑀲𑀼. 𑀚𑀝𑀸 𑀘 𑀓𑁂𑀲𑀸𑀢𑀺 𑀢𑀸𑀢 𑀫𑀡𑁆𑀟𑀩𑁆𑀬, 𑀢𑀯 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀏𑀓𑀘𑁆𑀘𑀸𑀦𑀁 𑀓𑁂𑀲𑀸 𑀚𑀝𑀸 𑀓𑀢𑁆𑀯𑀸 𑀩𑀤𑁆𑀥𑀸. 𑀅𑀚𑀺𑀦𑀸 𑀦𑀺𑀯𑀢𑁆𑀣𑀸𑀢𑀺 𑀲𑀔𑀼𑀭𑀸𑀦𑀺 𑀅𑀚𑀺𑀦𑀘𑀫𑁆𑀫𑀸𑀦𑀺 𑀦𑀺𑀯𑀢𑁆𑀣𑀸. 𑀚𑀭𑀽𑀤𑀧𑀸𑀦𑀁 𑀯𑀸𑀢𑀺 𑀢𑀺𑀡𑀕𑀳𑀦𑁂𑀦 𑀚𑀺𑀡𑁆𑀡𑀓𑀽𑀧𑁄 𑀯𑀺𑀬 𑀫𑀼𑀔𑀁 𑀤𑀻𑀖𑀫𑀲𑁆𑀲𑀼𑀢𑀸𑀬 𑀧𑀭𑀽𑀴𑁆𑀳𑀁. 𑀧𑀚𑀁 𑀇𑀫𑀦𑁆𑀢𑀺 𑀇𑀫𑀁 𑀏𑀯𑀭𑀽𑀧𑀁 𑀅𑀦𑀜𑁆𑀚𑀺𑀢𑀸𑀫𑀡𑁆𑀟𑀺𑀢𑀮𑀽𑀔𑀯𑁂𑀲𑀁 𑀧𑀚𑀁 𑀧𑀲𑁆𑀲𑀣. 𑀦 𑀚𑀝𑀸𑀚𑀺𑀦𑀦𑁆𑀢𑀺 𑀏𑀢𑀁 𑀚𑀝𑀸𑀚𑀺𑀦𑀁 𑀇𑀫𑀁 𑀅𑀧𑁆𑀧𑀧𑀜𑁆𑀜𑀁 𑀧𑀚𑀁 𑀢𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀻𑀮𑀧𑀜𑁆𑀜𑀸𑀡𑀢𑀧𑁄𑀓𑀫𑁆𑀫𑀸𑀦𑁂𑀯 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀬𑁂𑀲𑀦𑁆𑀢𑀺 𑀬𑀲𑁆𑀫𑀸 𑀬𑁂𑀲𑀁 𑀏𑀢𑁂 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀲𑀪𑀸𑀯𑀸 𑀭𑀸𑀕𑀸𑀤𑀬𑁄 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀅𑀯𑀺𑀚𑁆𑀚𑀸 𑀯𑀺𑀭𑀸𑀚𑀺𑀢𑀸 𑀯𑀺𑀕𑀢𑀸, 𑀯𑀺𑀕𑀢𑀢𑁆𑀢𑀸𑀬𑁂𑀯 𑀘 𑀏𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀬𑁂 𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀼 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀢𑀲𑁆𑀫𑀸 𑀢𑁆𑀯𑀁, 𑀢𑀸𑀢, 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀅𑀤𑀢𑁆𑀯𑀸 𑀬𑁂 𑀮𑁄𑀓𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀜𑁆𑀘𑀸𑀪𑀺𑀜𑁆𑀜𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀲𑀦𑁆𑀢𑀺, 𑀢𑁂𑀲𑀁 𑀤𑀸𑀦𑀁 𑀤𑁂𑀳𑀺. 𑀏𑀳𑀺, 𑀢𑀸𑀢, 𑀢𑀯 𑀓𑀼𑀮𑀽𑀧𑀓𑁂 𑀅𑀫𑀢𑁄𑀲𑀥𑀁 𑀧𑀸𑀬𑁂𑀢𑁆𑀯𑀸 𑀅𑀭𑁄𑀕𑁂 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑀓𑀜𑁆𑀚𑀺𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀤𑀓𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀴𑀲𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀁 𑀫𑀼𑀔𑁂𑀲𑀼 𑀆𑀲𑀺𑀜𑁆𑀘𑀸𑀧𑁂𑀲𑀺.

𑀏𑀓𑁂𑀓𑁄 𑀧𑀁𑀲𑀼𑀁 𑀧𑀼𑀜𑁆𑀙𑀦𑁆𑀢𑁄𑀯 𑀉𑀝𑁆𑀞𑀳𑀺. 𑀅𑀣 𑀦𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀇𑀫𑁂𑀳𑀺 𑀘𑀡𑁆𑀟𑀸𑀮𑀼𑀘𑁆𑀙𑀺𑀝𑁆𑀞𑀓𑀁 𑀧𑀻𑀢’’𑀦𑁆𑀢𑀺 𑀅𑀩𑁆𑀭𑀸𑀳𑁆𑀫𑀡𑁂 𑀓𑀭𑀺𑀁𑀲𑀼. 𑀢𑁂 𑀮𑀚𑁆𑀚𑀺𑀢𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀚𑁆𑀛𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀚𑁆𑀛𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀯𑀲𑀺𑀁𑀲𑀼, 𑀫𑀡𑁆𑀟𑀩𑁆𑀬𑁄 𑀧𑀦 𑀢𑀢𑁆𑀣𑁂𑀯 𑀯𑀲𑀺. 𑀢𑀤𑀸 𑀯𑁂𑀢𑁆𑀢𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀢𑁆𑀢𑀯𑀢𑀻𑀦𑀤𑀻𑀢𑀻𑀭𑁂 𑀚𑀸𑀢𑀺𑀫𑀦𑁆𑀢𑁄 𑀦𑀸𑀫𑁂𑀓𑁄 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁄 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀫𑀸𑀦𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 ‘‘𑀏𑀢𑀲𑁆𑀲 𑀫𑀸𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀭𑀺𑀲𑁄𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 ‘‘𑀇𑀫𑀁 𑀤𑀦𑁆𑀢𑀓𑀝𑁆𑀞𑀁 𑀚𑀸𑀢𑀺𑀫𑀦𑁆𑀢𑀲𑁆𑀲 𑀚𑀝𑀸𑀲𑀼 𑀮𑀕𑁆𑀕𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀦𑀤𑀺𑀬𑀁 𑀧𑀸𑀢𑁂𑀲𑀺. 𑀢𑀁 𑀢𑀲𑁆𑀲 𑀉𑀤𑀓𑀁 𑀆𑀘𑀫𑀦𑁆𑀢𑀲𑁆𑀲 𑀚𑀝𑀸𑀲𑀼 𑀮𑀕𑁆𑀕𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀦𑀲𑁆𑀲 𑀯𑀲𑀮𑀸’’𑀢𑀺 𑀯𑀢𑁆𑀯𑀸 ‘‘𑀓𑀼𑀢𑁄 𑀅𑀬𑀁 𑀓𑀸𑀴𑀓𑀡𑁆𑀡𑀻 𑀆𑀕𑀢𑁄, 𑀉𑀧𑀥𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀤𑁆𑀥𑀁𑀲𑁄𑀢𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁𑀚𑀸𑀢𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀡𑁆𑀟𑀸𑀮𑁄𑀲𑁆𑀫𑀻’’𑀢𑀺. ‘‘𑀢𑀬𑀸 𑀦𑀤𑀺𑀬𑀸 𑀤𑀦𑁆𑀢𑀓𑀝𑁆𑀞𑀁 𑀧𑀸𑀢𑀺𑀢’’𑀦𑁆𑀢𑀺? ‘‘𑀆𑀫, 𑀫𑀬𑀸’’𑀢𑀺. ‘‘𑀦𑀲𑁆𑀲, 𑀯𑀲𑀮, 𑀘𑀡𑁆𑀟𑀸𑀮 𑀓𑀸𑀴𑀓𑀡𑁆𑀡𑀺 𑀫𑀸 𑀇𑀥 𑀯𑀲𑀺, 𑀳𑁂𑀝𑁆𑀞𑀸𑀲𑁄𑀢𑁂 𑀯𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀳𑁂𑀝𑁆𑀞𑀸𑀲𑁄𑀢𑁂 𑀯𑀲𑀦𑁆𑀢𑁂𑀦𑀧𑀺 𑀢𑁂𑀦 𑀧𑀸𑀢𑀺𑀢𑁂 𑀤𑀦𑁆𑀢𑀓𑀝𑁆𑀞𑁂 𑀧𑀝𑀺𑀲𑁄𑀢𑀁 𑀆𑀕𑀦𑁆𑀢𑁆𑀯𑀸 𑀚𑀝𑀸𑀲𑀼 𑀮𑀕𑁆𑀕𑀦𑁆𑀢𑁂 𑀲𑁄 ‘‘𑀦𑀲𑁆𑀲 𑀯𑀲𑀮, 𑀲𑀘𑁂 𑀇𑀥 𑀯𑀲𑀺𑀲𑁆𑀲𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀆𑀳.

𑀫𑀳𑀸𑀲𑀢𑁆𑀢𑁄 ‘‘𑀲𑀘𑀸𑀳𑀁 𑀏𑀢𑀲𑁆𑀲 𑀓𑀼𑀚𑁆𑀛𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀫𑁂 𑀅𑀭𑀓𑁆𑀔𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀉𑀧𑀸𑀬𑁂𑀦𑁂𑀯𑀲𑁆𑀲 𑀫𑀸𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀦𑀺𑀯𑀸𑀭𑁂𑀲𑀺. 𑀫𑀦𑀼𑀲𑁆𑀲𑀸 𑀉𑀩𑁆𑀩𑀸𑀴𑁆𑀳𑀸 𑀚𑀸𑀢𑀺𑀫𑀦𑁆𑀢𑀁 𑀢𑀸𑀧𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀆𑀳 𑁋 ‘‘𑀦 𑀫𑁂 𑀢𑀁 𑀓𑀫𑁆𑀫𑀁, 𑀦𑀤𑀻𑀢𑀻𑀭𑁂 𑀧𑀦𑁂𑀓𑁄 𑀘𑀡𑁆𑀟𑀸𑀮𑁄 𑀯𑀲𑀢𑀺, 𑀢𑀲𑁆𑀲𑁂𑀢𑀁 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀦𑀼𑀲𑁆𑀲𑀸 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑁄 𑀢𑀸𑀧𑀲𑁄 𑀫𑀁 𑀦𑀺𑀭𑀧𑀭𑀸𑀥𑀁 𑀅𑀪𑀺𑀲𑀧𑀺, 𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀔𑀫𑀸𑀧𑀦𑀢𑁆𑀣𑀸𑀬 𑀫𑀫 𑀧𑀸𑀤𑁂𑀲𑀼 𑀧𑀢𑀺𑀢𑁂 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀁 𑀓𑀟𑁆𑀠𑀦𑁆𑀢𑀸 𑀆𑀦𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀆𑀳𑀁𑀲𑀼 ‘‘𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀣 𑀪𑀦𑁆𑀢𑁂’’𑀢𑀺. ‘‘𑀦 𑀲𑀓𑁆𑀓𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀲𑀘𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺. ‘‘𑀅𑀣, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀸’’𑀢𑀺? 𑀲𑁄 ‘‘𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀢𑀸𑀧𑀲𑀲𑁆𑀲 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀢𑀸𑀧𑀲𑀁 𑀑𑀢𑀸𑀭𑁂𑀢𑁆𑀯𑀸 𑀉𑀤𑀓𑁂 𑀞𑀧𑁂𑀣𑀸’’𑀢𑀺 𑀞𑀧𑀸𑀧𑁂𑀢𑁆𑀯𑀸 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀧𑀳𑀝𑀫𑀢𑁆𑀢𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀪𑀺𑀚𑁆𑀚𑀺, 𑀢𑀸𑀧𑀲𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺.

𑀫𑀳𑀸𑀲𑀢𑁆𑀢𑁄 𑀢𑀁 𑀤𑀫𑁂𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀤𑀸𑀦𑀺 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀫𑀚𑁆𑀛𑀭𑀜𑁆𑀜𑁄 𑀲𑀦𑁆𑀢𑀺𑀓𑁂’’𑀢𑀺 𑀜𑀢𑁆𑀯𑀸 ‘‘𑀢𑁂 𑀤𑀫𑁂𑀲𑁆𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀦𑀕𑀭𑀲𑀸𑀫𑀦𑁆𑀢𑁂 𑀑𑀢𑀭𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀇𑀥 𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀯𑀲𑀦𑁆𑀢𑁄𑀧𑀺 𑀅𑀫𑁆𑀳𑁂 𑀅𑀧𑁆𑀧𑀢𑀺𑀝𑁆𑀞𑁂 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀸𑀬𑀸𑀓𑀸𑀭𑁄 𑀏𑀓𑁄 𑀯𑀺𑀚𑁆𑀚𑀸𑀥𑀭𑁄 𑀘𑁄𑀭𑁄 𑀆𑀕𑀢𑁄, 𑀕𑀡𑁆𑀳𑀸𑀧𑁂𑀣 𑀦’’𑀦𑁆𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀫𑀺𑀲𑁆𑀲𑀓𑀪𑀢𑁆𑀢𑀁 𑀆𑀤𑀸𑀬 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀁 𑀦𑀺𑀲𑁆𑀲𑀸𑀬 𑀧𑀻𑀞𑀺𑀓𑀸𑀬 𑀦𑀺𑀲𑀺𑀦𑁆𑀦𑁄 𑀪𑀼𑀜𑁆𑀚𑀢𑀺. 𑀅𑀣 𑀦𑀁 𑀅𑀜𑁆𑀜𑀯𑀺𑀳𑀺𑀢𑀓𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑀫𑁂𑀯 𑀭𑀜𑁆𑀜𑀸 𑀧𑀳𑀺𑀢𑀧𑀼𑀭𑀺𑀲𑀸 𑀅𑀲𑀺𑀦𑀸 𑀕𑀻𑀯𑀁 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀼𑀁. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀫𑀲𑁆𑀫𑀺𑀁 𑀓𑀺𑀭 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀓𑁄𑀡𑁆𑀟𑀤𑀫𑀓𑁄 𑀅𑀳𑁄𑀲𑀺. 𑀲𑁄 𑀢𑁂𑀦𑁂𑀯 𑀧𑀭𑀢𑀦𑁆𑀢𑀺𑀬𑀼𑀢𑁆𑀢𑀪𑀸𑀯𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀤𑁂𑀯𑀢𑀸 𑀓𑀼𑀚𑁆𑀛𑀺𑀢𑁆𑀯𑀸 𑀲𑀓𑀮𑀫𑁂𑀯 𑀫𑀚𑁆𑀛𑀭𑀝𑁆𑀞𑀁 𑀉𑀡𑁆𑀳𑀁 𑀓𑀼𑀓𑁆𑀓𑀼𑀴𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀭𑀝𑁆𑀞𑀁 𑀅𑀭𑀝𑁆𑀞𑀫𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀉𑀧𑀳𑀘𑁆𑀘 𑀫𑀦𑀁 𑀫𑀚𑁆𑀛𑁄, 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;

𑀲𑀧𑀸𑀭𑀺𑀲𑀚𑁆𑀚𑁄 𑀉𑀘𑁆𑀙𑀺𑀦𑁆𑀦𑁄, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀽’’𑀢𑀺. (𑀚𑀸. 𑁨.𑁧𑁯.𑁯𑁬);

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀉𑀤𑁂𑀦𑁄 𑀧𑀩𑁆𑀩𑀚𑀺𑀢𑁂 𑀯𑀺𑀳𑁂𑀞𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀡𑁆𑀟𑀩𑁆𑀬𑁄 𑀉𑀤𑁂𑀦𑁄 𑀅𑀳𑁄𑀲𑀺, 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀸𑀢𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁯𑁮] 𑁨. 𑀘𑀺𑀢𑁆𑀢𑀲𑀫𑁆𑀪𑀽𑀢𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀺𑀬𑀲𑀁𑀯𑀸𑀲𑁂 𑀤𑁆𑀯𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀅𑀜𑁆𑀜𑀫𑀜𑁆𑀜𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀸 𑀧𑀭𑀫𑀯𑀺𑀲𑁆𑀲𑀸𑀲𑀺𑀓𑀸 𑀅𑀳𑁂𑀲𑀼𑀁, 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀧𑀺 𑀏𑀓𑀢𑁄𑀯 𑀕𑀘𑁆𑀙𑀦𑁆𑀢𑀺, 𑀏𑀓𑀢𑁄𑀯 𑀆𑀕𑀘𑁆𑀙𑀦𑁆𑀢𑀺, 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀢𑁂𑀲𑀁𑀬𑁂𑀯 𑀯𑀺𑀲𑁆𑀲𑀸𑀲𑀁 𑀯𑀡𑁆𑀡𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀲𑁆𑀲𑀸𑀲𑀺𑀓𑀢𑁆𑀢𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀪𑀯𑀦𑁆𑀢𑀭𑀸𑀦𑀺 𑀕𑀘𑁆𑀙𑀦𑁆𑀢𑀸𑀧𑀺 𑀫𑀺𑀢𑁆𑀢𑀪𑀸𑀯𑀁 𑀦 𑀯𑀺𑀚𑀳𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀅𑀯𑀦𑁆𑀢𑀺𑀭𑀝𑁆𑀞𑁂 𑀉𑀚𑁆𑀚𑁂𑀦𑀺𑀬𑀁 𑀅𑀯𑀦𑁆𑀢𑀺𑀫𑀳𑀸𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀉𑀚𑁆𑀚𑁂𑀦𑀺𑀬𑀸 𑀩𑀳𑀺 𑀘𑀡𑁆𑀟𑀸𑀮𑀕𑀸𑀫𑀓𑁄 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺, 𑀅𑀧𑀭𑁄𑀧𑀺 𑀲𑀢𑁆𑀢𑁄 𑀢𑀲𑁆𑀲𑁂𑀯 𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀼 𑀏𑀓𑁄 𑀘𑀺𑀢𑁆𑀢𑁄 𑀦𑀸𑀫 𑀅𑀳𑁄𑀲𑀺, 𑀏𑀓𑁄 𑀲𑀫𑁆𑀪𑀽𑀢𑁄 𑀦𑀸𑀫. 𑀢𑁂 𑀉𑀪𑁄𑀧𑀺 𑀯𑀬𑀧𑁆𑀧𑀢𑁆𑀢𑀸 𑀘𑀡𑁆𑀟𑀸𑀮𑀯𑀁𑀲𑀥𑁄𑀯𑀦𑀁 𑀦𑀸𑀫 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀉𑀚𑁆𑀚𑁂𑀦𑀻𑀦𑀕𑀭𑀤𑁆𑀯𑀸𑀭𑁂 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀏𑀓𑁄 𑀉𑀢𑁆𑀢𑀭𑀤𑁆𑀯𑀸𑀭𑁂 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺, 𑀏𑀓𑁄 𑀧𑀸𑀘𑀻𑀦𑀤𑁆𑀯𑀸𑀭𑁂. 𑀢𑀲𑁆𑀫𑀺𑀜𑁆𑀘 𑀦𑀕𑀭𑁂 𑀤𑁆𑀯𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬𑁄 𑀅𑀳𑁂𑀲𑀼𑀁, 𑀏𑀓𑀸 𑀲𑁂𑀝𑁆𑀞𑀺𑀥𑀻𑀢𑀸, 𑀏𑀓𑀸 𑀧𑀼𑀭𑁄𑀳𑀺𑀢𑀥𑀻𑀢𑀸. 𑀢𑀸 𑀩𑀳𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀏𑀓𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦. 𑀢𑀸 𑀢𑁂 𑀘𑀡𑁆𑀟𑀸𑀮𑀧𑀼𑀢𑁆𑀢𑁂 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑁂 𑀏𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀡𑁆𑀟𑀸𑀮𑀧𑀼𑀢𑁆𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢 𑀧𑀲𑁆𑀲𑀺𑀫𑁆𑀳𑀸’’𑀢𑀺 𑀕𑀦𑁆𑀥𑁄𑀤𑀓𑁂𑀦 𑀅𑀓𑁆𑀔𑀻𑀦𑀺 𑀥𑁄𑀯𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀫𑀳𑀸𑀚𑀦𑁄 ‘‘𑀅𑀭𑁂 𑀤𑀼𑀝𑁆𑀞𑀘𑀡𑁆𑀟𑀸𑀮, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀫𑀬𑀁 𑀅𑀫𑀽𑀮𑀓𑀸𑀦𑀺 𑀲𑀼𑀭𑀸𑀪𑀢𑁆𑀢𑀸𑀤𑀻𑀦𑀺 𑀦 𑀮𑀪𑀺𑀫𑁆𑀳𑀸’’𑀢𑀺 𑀢𑁂 𑀉𑀪𑁄𑀧𑀺 𑀪𑀸𑀢𑀺𑀓𑁂 𑀧𑁄𑀣𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺.

𑀢𑁂 𑀧𑀝𑀺𑀮𑀤𑁆𑀥𑀲𑀜𑁆𑀜𑀸 𑀉𑀝𑁆𑀞𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀢𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 ‘‘𑀇𑀫𑀁 𑀅𑀫𑁆𑀳𑀸𑀓𑀁 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁, 𑀘𑀡𑁆𑀟𑀸𑀮𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀚𑀸𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀯𑀡𑁆𑀡𑁂𑀦 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀸 𑀳𑀼𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀲𑀼𑀁. 𑀚𑀫𑁆𑀩𑀼𑀤𑀻𑀧𑀢𑀮𑁂 ‘‘𑀤𑁆𑀯𑁂 𑀓𑀺𑀭 𑀘𑀡𑁆𑀟𑀸𑀮𑀸 𑀚𑀸𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀲𑀽𑀬𑀺𑀢𑁆𑀣. 𑀢𑁂𑀲𑀼 𑀘𑀺𑀢𑁆𑀢𑀧𑀡𑁆𑀟𑀺𑀢𑀲𑁆𑀲 𑀲𑀺𑀧𑁆𑀧𑀁 𑀦𑀺𑀝𑁆𑀞𑀺𑀢𑀁, 𑀲𑀫𑁆𑀪𑀽𑀢𑀲𑁆𑀲 𑀦 𑀢𑀸𑀯 𑀦𑀺𑀝𑁆𑀞𑀸𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀕𑀸𑀫𑀯𑀸𑀲𑀻 ‘‘𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀁 𑀦𑀺𑀫𑀦𑁆𑀢𑁂𑀲𑀺. 𑀢𑀫𑁂𑀯 𑀭𑀢𑁆𑀢𑀺𑀁 𑀤𑁂𑀯𑁄 𑀯𑀲𑁆𑀲𑀺𑀢𑁆𑀯𑀸 𑀫𑀕𑁆𑀕𑁂 𑀓𑀦𑁆𑀤𑀭𑀸𑀤𑀻𑀦𑀺 𑀧𑀽𑀭𑁂𑀲𑀺. 𑀆𑀘𑀭𑀺𑀬𑁄 𑀧𑀸𑀢𑁄𑀯 𑀘𑀺𑀢𑁆𑀢𑀧𑀡𑁆𑀟𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀅𑀳𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀢𑀼𑀫𑁆𑀳𑁂𑀳𑀺 𑀮𑀤𑁆𑀥𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀫𑁆𑀳𑁂𑀳𑀺 𑀮𑀤𑁆𑀥𑀁 𑀆𑀳𑀭𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀫𑀸𑀡𑀯𑀓𑁂 𑀕𑀳𑁂𑀢𑁆𑀯𑀸 𑀕𑀢𑁄. 𑀬𑀸𑀯 𑀫𑀸𑀡𑀯𑀸 𑀦𑁆𑀳𑀸𑀬𑀦𑁆𑀢𑀺 𑀘𑁂𑀯 𑀫𑀼𑀔𑀸𑀦𑀺 𑀘 𑀥𑁄𑀯𑀦𑁆𑀢𑀺, 𑀢𑀸𑀯 𑀫𑀦𑀼𑀲𑁆𑀲𑀸 𑀧𑀸𑀬𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀦𑀺𑀩𑁆𑀩𑀸𑀢𑀽𑀢𑀺 𑀞𑀧𑁂𑀲𑀼𑀁. 𑀫𑀸𑀡𑀯𑀸 𑀢𑀲𑁆𑀫𑀺𑀁 𑀅𑀦𑀺𑀩𑁆𑀩𑀼𑀢𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀧𑀸𑀢𑀺𑀬𑁄 𑀞𑀧𑁂𑀲𑀼𑀁. 𑀲𑀫𑁆𑀪𑀽𑀢𑁄 𑀮𑀼𑀤𑁆𑀥𑀥𑀸𑀢𑀼𑀓𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀲𑀻𑀢𑀮𑁄’’𑀢𑀺 𑀲𑀜𑁆𑀜𑀸𑀬 𑀧𑀸𑀬𑀸𑀲𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑁂 𑀞𑀧𑁂𑀲𑀺, 𑀲𑁄 𑀢𑀲𑁆𑀲 𑀆𑀤𑀺𑀢𑁆𑀢𑀅𑀬𑁄𑀕𑀼𑀴𑁄 𑀯𑀺𑀬 𑀫𑀼𑀔𑀁 𑀤𑀳𑀺. 𑀲𑁄 𑀓𑀫𑁆𑀧𑀫𑀸𑀦𑁄 𑀲𑀢𑀺𑀁 𑀅𑀦𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀘𑀺𑀢𑁆𑀢𑀧𑀡𑁆𑀟𑀺𑀢𑀁 𑀑𑀮𑁄𑀓𑁂𑀢𑁆𑀯𑀸 𑀘𑀡𑁆𑀟𑀸𑀮𑀪𑀸𑀲𑀸𑀬 𑀏𑀯 ‘‘𑀔𑀴𑀼 𑀔𑀴𑀽’’𑀢𑀺 𑀆𑀳. 𑀲𑁄𑀧𑀺 𑀢𑀣𑁂𑀯 𑀲𑀢𑀺𑀁 𑀅𑀦𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀘𑀡𑁆𑀟𑀸𑀮𑀪𑀸𑀲𑀸𑀬 𑀏𑀯 ‘‘𑀦𑀺𑀕𑁆𑀕𑀮 𑀦𑀺𑀕𑁆𑀕𑀮𑀸’’𑀢𑀺 𑀆𑀳. 𑀫𑀸𑀡𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀪𑀸𑀲𑀸 𑀦𑀸𑀫𑁂𑀲𑀸’’𑀢𑀺 𑀯𑀤𑀺𑀁𑀲𑀼. 𑀘𑀺𑀢𑁆𑀢𑀧𑀡𑁆𑀟𑀺𑀢𑁄 𑀫𑀗𑁆𑀕𑀮𑀁 𑀅𑀪𑀸𑀲𑀺. 𑀫𑀸𑀡𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀪𑀸𑀲𑀁 𑀲𑁄𑀥𑁂𑀦𑁆𑀢𑀸 ‘‘𑀘𑀡𑁆𑀟𑀸𑀮𑀪𑀸𑀲𑀸’’𑀢𑀺 𑀜𑀢𑁆𑀯𑀸 ‘‘𑀅𑀭𑁂 𑀤𑀼𑀝𑁆𑀞𑀘𑀡𑁆𑀟𑀸𑀮𑀸, 𑀏𑀢𑁆𑀢𑀓𑀁 𑀓𑀸𑀮𑀁 ‘𑀩𑁆𑀭𑀸𑀳𑁆𑀫𑀡𑀸𑀫𑁆𑀳𑀸’𑀢𑀺 𑀯𑀢𑁆𑀯𑀸 𑀯𑀜𑁆𑀘𑀬𑀺𑀢𑁆𑀣𑀸’’𑀢𑀺 𑀉𑀪𑁄𑀧𑀺 𑀢𑁂 𑀧𑁄𑀣𑀬𑀺𑀁𑀲𑀼. 𑀅𑀣𑁂𑀓𑁄 𑀲𑀧𑁆𑀧𑀼𑀭𑀺𑀲𑁄 ‘‘𑀅𑀧𑁂𑀣𑀸’’𑀢𑀺 𑀯𑀸𑀭𑁂𑀢𑁆𑀯𑀸 ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁 𑀚𑀸𑀢𑀺𑀬𑀸 𑀤𑁄𑀲𑁄, 𑀕𑀘𑁆𑀙𑀣 𑀓𑀢𑁆𑀣𑀘𑀺 𑀤𑁂𑀲𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀢𑁂 𑀉𑀪𑁄 𑀉𑀬𑁆𑀬𑁄𑀚𑁂𑀲𑀺. 𑀫𑀸𑀡𑀯𑀸 𑀢𑁂𑀲𑀁 𑀘𑀡𑁆𑀟𑀸𑀮𑀪𑀸𑀯𑀁 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀢𑁂𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀢𑀢𑁄 𑀘𑀯𑀺𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀫𑀺𑀕𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀢𑁄𑀯 𑀯𑀺𑀘𑀭𑀦𑁆𑀢𑀺, 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀻𑀲𑁂𑀦 𑀲𑀻𑀲𑀁, 𑀲𑀺𑀗𑁆𑀕𑁂𑀦 𑀲𑀺𑀗𑁆𑀕𑀁, 𑀢𑀼𑀡𑁆𑀟𑁂𑀦 𑀢𑀼𑀡𑁆𑀟𑀁 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸 𑀭𑁄𑀫𑀦𑁆𑀣𑀬𑀫𑀸𑀦𑁂 𑀞𑀺𑀢𑁂 𑀤𑀺𑀲𑁆𑀯𑀸 𑀏𑀓𑁄 𑀮𑀼𑀤𑁆𑀤𑀓𑁄 𑀲𑀢𑁆𑀢𑀺𑀁 𑀔𑀺𑀧𑀺𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀢𑀢𑁄 𑀘𑀯𑀺𑀢𑁆𑀯𑀸 𑀦𑀫𑁆𑀫𑀤𑀸𑀦𑀤𑀻𑀢𑀻𑀭𑁂 𑀉𑀓𑁆𑀓𑀼𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀭𑀸𑀧𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁂 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀻𑀲𑁂𑀦 𑀲𑀻𑀲𑀁, 𑀢𑀼𑀡𑁆𑀟𑁂𑀦 𑀢𑀼𑀡𑁆𑀟𑀁 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸 𑀞𑀺𑀢𑁂 𑀤𑀺𑀲𑁆𑀯𑀸 𑀏𑀓𑁄 𑀬𑀝𑁆𑀞𑀺𑀮𑀼𑀤𑁆𑀤𑀓𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀩𑀦𑁆𑀥𑀺𑀢𑁆𑀯𑀸 𑀯𑀥𑀺. 𑀢𑀢𑁄 𑀧𑀦 𑀘𑀯𑀺𑀢𑁆𑀯𑀸 𑀘𑀺𑀢𑁆𑀢𑀧𑀡𑁆𑀟𑀺𑀢𑁄 𑀓𑁄𑀲𑀫𑁆𑀩𑀺𑀬𑀁 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀫𑁆𑀪𑀽𑀢𑀧𑀡𑁆𑀟𑀺𑀢𑁄 𑀉𑀢𑁆𑀢𑀭𑀧𑀜𑁆𑀘𑀸𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀺𑀁𑀲𑀼. 𑀢𑁂𑀲𑀼 𑀲𑀫𑁆𑀪𑀽𑀢𑀧𑀡𑁆𑀟𑀺𑀢𑁄 𑀦𑀺𑀭𑀦𑁆𑀢𑀭𑀁 𑀲𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑀼𑀢𑁆𑀣𑀁 𑀘𑀡𑁆𑀟𑀸𑀮𑀚𑀸𑀢𑀺𑀫𑁂𑀯 𑀅𑀦𑀼𑀲𑁆𑀲𑀭𑀢𑀺, 𑀘𑀺𑀢𑁆𑀢𑀧𑀡𑁆𑀟𑀺𑀢𑁄 𑀧𑀝𑀺𑀧𑀸𑀝𑀺𑀬𑀸 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀺. 𑀲𑀫𑁆𑀪𑀽𑀢𑀧𑀡𑁆𑀟𑀺𑀢𑁄𑀧𑀺 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀙𑀢𑁆𑀢𑀫𑀗𑁆𑀕𑀮𑀤𑀺𑀯𑀲𑁂𑀬𑁂𑀯 𑀫𑀳𑀸𑀚𑀦𑀫𑀚𑁆𑀛𑁂 𑀫𑀗𑁆𑀕𑀮𑀕𑀻𑀢𑀁 𑀓𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀫𑀗𑁆𑀕𑀮𑀕𑀻𑀢’’𑀦𑁆𑀢𑀺 𑀑𑀭𑁄𑀥𑀸𑀧𑀺 𑀕𑀦𑁆𑀥𑀩𑁆𑀩𑀸𑀧𑀺 𑀢𑀫𑁂𑀯 𑀕𑀻𑀢𑀁 𑀕𑀸𑀬𑀦𑁆𑀢𑀺. 𑀅𑀦𑀼𑀓𑁆𑀓𑀫𑁂𑀦𑁂𑀯 ‘‘𑀭𑀜𑁆𑀜𑁄 𑀧𑀺𑀬𑀕𑀻𑀢’’𑀦𑁆𑀢𑀺 𑀲𑀩𑁆𑀩𑁂𑀧𑀺 𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀢𑀫𑁂𑀯 𑀕𑀸𑀬𑀦𑁆𑀢𑀺.

𑀘𑀺𑀢𑁆𑀢𑀧𑀡𑁆𑀟𑀺𑀢𑁄𑀧𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀦𑁆𑀢𑁄𑀬𑁂𑀯 ‘‘𑀓𑀺𑀁 𑀦𑀼 𑀔𑁄 𑀫𑀫 𑀪𑀸𑀢𑀺𑀓𑁂𑀦 𑀲𑀫𑁆𑀪𑀽𑀢𑁂𑀦 𑀙𑀢𑁆𑀢𑀁 𑀮𑀤𑁆𑀥𑀁, 𑀉𑀤𑀸𑀳𑀼 𑀦 𑀯𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀦𑀯𑀭𑀚𑁆𑀚𑀁 𑀢𑀸𑀯 𑀇𑀤𑀸𑀦𑀺 𑀕𑀦𑁆𑀢𑁆𑀯𑀸𑀧𑀺 𑀩𑁄𑀥𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀅𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀢𑀓𑀸𑀮𑁂 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀤𑀸𑀭𑀓𑁄 𑀢𑀁 𑀕𑀻𑀢𑀁 𑀕𑀸𑀬𑀦𑁆𑀢𑁄 𑀤𑀸𑀭𑀽𑀦𑀺 𑀉𑀤𑁆𑀥𑀭𑀢𑀺. 𑀘𑀺𑀢𑁆𑀢𑀧𑀡𑁆𑀟𑀺𑀢𑁄 𑀢𑀁 𑀧𑀓𑁆𑀓𑁄𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀢𑁆𑀯𑀁 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀇𑀫𑀫𑁂𑀯 𑀕𑀻𑀢𑀁 𑀕𑀸𑀬𑀲𑀺, 𑀓𑀺𑀁 𑀅𑀜𑁆𑀜𑀁 𑀦 𑀚𑀸𑀦𑀸𑀲𑀻’’𑀢𑀺. ‘‘𑀪𑀦𑁆𑀢𑁂, 𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀚𑀸𑀦𑀸𑀫𑀺, 𑀇𑀫𑀸𑀦𑀺 𑀧𑀦 𑀤𑁆𑀯𑁂 𑀭𑀜𑁆𑀜𑁄 𑀧𑀺𑀬𑀕𑀻𑀢𑀸𑀦𑀺, 𑀢𑀲𑁆𑀫𑀸 𑀇𑀫𑀸𑀦𑁂𑀯 𑀕𑀸𑀬𑀸𑀫𑀻’’𑀢𑀺. ‘‘𑀅𑀢𑁆𑀣𑀺 𑀧𑀦 𑀭𑀜𑁆𑀜𑁄 𑀕𑀻𑀢𑀲𑁆𑀲 𑀧𑀝𑀺𑀕𑀻𑀢𑀁 𑀕𑀸𑀬𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀢𑀼’’𑀦𑁆𑀢𑀺? ‘‘𑀚𑀸𑀦𑀦𑁆𑀢𑁄 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁 𑀭𑀜𑁆𑀜𑀸 𑀤𑁆𑀯𑀻𑀲𑀼 𑀕𑀻𑀢𑁂𑀲𑀼 𑀕𑀸𑀬𑀺𑀢𑁂𑀲𑀼 𑀇𑀤𑀁 𑀢𑀢𑀺𑀬𑀁 𑀓𑀢𑁆𑀯𑀸 𑀕𑀸𑀬𑀲𑁆𑀲𑀽’’𑀢𑀺 𑀕𑀻𑀢𑀁𑀤𑀢𑁆𑀯𑀸 ‘‘𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀕𑀸𑀬𑀺𑀲𑁆𑀲𑀲𑀺, 𑀭𑀸𑀚𑀸 𑀢𑁂 𑀧𑀲𑀻𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀲𑁄 𑀲𑀻𑀖𑀁 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀏𑀓𑁄 𑀓𑀺𑀭 𑀤𑀸𑀭𑀓𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀆𑀕𑀘𑁆𑀙𑀢𑀽’’𑀢𑀺 𑀯𑀼𑀢𑁆𑀢𑁂 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭, 𑀢𑀸𑀢, 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀆𑀫, 𑀤𑁂𑀯, 𑀲𑀩𑁆𑀩𑀁 𑀭𑀸𑀚𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑁂𑀣𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀭𑀸𑀚𑀸𑀦𑀁 𑀆𑀳 ‘‘𑀢𑀼𑀫𑁆𑀳𑁂 𑀢𑀸𑀯, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀕𑀻𑀢𑀁 𑀕𑀸𑀬𑀣, 𑀅𑀣𑀸𑀳𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁨𑁪. ‘‘𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀧𑀲𑁆𑀲𑀸𑀫𑀺 𑀲𑀫𑁆𑀪𑀽𑀢𑀁 𑀫𑀳𑀸𑀦𑀼𑀪𑀸𑀯𑀁, 𑀲𑀓𑀫𑁆𑀫𑀼𑀦𑀸 𑀧𑀼𑀜𑁆𑀜𑀨𑀮𑀽𑀧𑀧𑀦𑁆𑀦𑀁.

𑁨𑁫. ‘‘𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀓𑀘𑁆𑀘𑀺𑀦𑁆𑀦𑀼 𑀘𑀺𑀢𑁆𑀢𑀲𑁆𑀲𑀧𑀺 𑀏𑀯𑀫𑁂𑀯𑀁, 𑀇𑀤𑁆𑀥𑁄 𑀫𑀦𑁄 𑀢𑀲𑁆𑀲 𑀬𑀣𑀸𑀧𑀺 𑀫𑀬𑁆𑀳’’𑀦𑁆𑀢𑀺.

𑀢𑀢𑁆𑀣 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀻𑀢𑀺 𑀲𑀼𑀓𑀢𑀤𑀼𑀓𑁆𑀓𑀝𑁂𑀲𑀼 𑀓𑀫𑁆𑀫𑁂𑀲𑀼 𑀓𑀺𑀜𑁆𑀘𑀦 𑀏𑀓𑀓𑀫𑁆𑀫𑀫𑁆𑀧𑀺 𑀫𑁄𑀖𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀧𑁆𑀨𑀮𑀁 𑀦 𑀳𑁄𑀢𑀺, 𑀯𑀺𑀧𑀸𑀓𑀁 𑀤𑀢𑁆𑀯𑀸𑀯 𑀦𑀲𑁆𑀲𑀢𑀻𑀢𑀺 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀲𑀦𑁆𑀥𑀸𑀬𑀸𑀳. 𑀲𑀫𑁆𑀪𑀽𑀢𑀦𑁆𑀢𑀺 𑀅𑀢𑁆𑀢𑀸𑀦𑀁 𑀯𑀤𑀢𑀺, 𑀧𑀲𑁆𑀲𑀸𑀫𑀳𑀁 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀪𑀽𑀢𑀁 𑀲𑀓𑁂𑀦 𑀓𑀫𑁆𑀫𑁂𑀦 𑀧𑀼𑀜𑁆𑀜𑀨𑀮𑀽𑀧𑀧𑀦𑁆𑀦𑀁, 𑀲𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀧𑀼𑀜𑁆𑀜𑀨𑀮𑁂𑀦 𑀉𑀧𑀧𑀦𑁆𑀦𑀁 𑀢𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀘𑁆𑀘𑀺𑀦𑁆𑀦𑀼 𑀘𑀺𑀢𑁆𑀢𑀲𑁆𑀲𑀧𑀻𑀢𑀺 𑀫𑀬𑀜𑁆𑀳𑀺 𑀤𑁆𑀯𑁂𑀧𑀺 𑀚𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀦 𑀘𑀺𑀭𑀁 𑀲𑀻𑀮𑀁 𑀭𑀓𑁆𑀔𑀺𑀫𑁆𑀳, 𑀅𑀳𑀁 𑀢𑀸𑀯 𑀢𑀲𑁆𑀲 𑀨𑀮𑁂𑀦 𑀫𑀳𑀦𑁆𑀢𑀁 𑀬𑀲𑀁 𑀧𑀢𑁆𑀢𑁄, 𑀓𑀘𑁆𑀘𑀺 𑀦𑀼 𑀔𑁄 𑀫𑁂 𑀪𑀸𑀢𑀺𑀓𑀲𑁆𑀲 𑀘𑀺𑀢𑁆𑀢𑀲𑁆𑀲𑀧𑀺 𑀏𑀯𑀫𑁂𑀯 𑀫𑀦𑁄 𑀇𑀤𑁆𑀥𑁄 𑀲𑀫𑀺𑀤𑁆𑀥𑁄𑀢𑀺.

𑀢𑀲𑁆𑀲 𑀕𑀻𑀢𑀸𑀯𑀲𑀸𑀦𑁂 𑀤𑀸𑀭𑀓𑁄 𑀕𑀸𑀬𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀘𑀺𑀢𑁆𑀢𑀫𑁆𑀧𑀺 𑀚𑀸𑀦𑀸𑀳𑀺 𑀢𑀣𑁂𑀯 𑀤𑁂𑀯, 𑀇𑀤𑁆𑀥𑁄 𑀫𑀦𑁄 𑀢𑀲𑁆𑀲 𑀬𑀣𑀸𑀧𑀺 𑀢𑀼𑀬𑁆𑀳’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁨𑁭. ‘‘𑀪𑀯𑀁 𑀦𑀼 𑀘𑀺𑀢𑁆𑀢𑁄 𑀲𑀼𑀢𑀫𑀜𑁆𑀜𑀢𑁄 𑀢𑁂, 𑀉𑀤𑀸𑀳𑀼 𑀢𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀕𑀸𑀣𑀸 𑀲𑀼𑀕𑀻𑀢𑀸 𑀦 𑀫𑀫𑀢𑁆𑀣𑀺 𑀓𑀗𑁆𑀔𑀸, 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀁 𑀲𑀢𑀜𑁆𑀘𑀸’’𑀢𑀺.

𑀢𑀢𑁆𑀣 𑀲𑀼𑀢𑀫𑀜𑁆𑀜𑀢𑁄 𑀢𑁂𑀢𑀺 𑀅𑀳𑀁 𑀲𑀫𑁆𑀪𑀽𑀢𑀲𑁆𑀲 𑀪𑀸𑀢𑀸 𑀘𑀺𑀢𑁆𑀢𑁄 𑀦𑀸𑀫𑀸𑀢𑀺 𑀯𑀤𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑁂𑀯 𑀦𑀼 𑀢𑁂 𑀲𑀦𑁆𑀢𑀺𑀓𑀸 𑀲𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀘𑀺 𑀦𑀦𑁆𑀢𑀺 𑀉𑀤𑀸𑀳𑀼 𑀫𑀬𑀸 𑀲𑀫𑁆𑀪𑀽𑀢𑀲𑁆𑀲 𑀭𑀜𑁆𑀜𑁄 𑀪𑀸𑀢𑀸 𑀘𑀺𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀓𑁄𑀘𑀺 𑀢𑁂 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. 𑀲𑀼𑀕𑀻𑀢𑀸𑀢𑀺 𑀲𑀩𑁆𑀩𑀣𑀸𑀧𑀺 𑀅𑀬𑀁 𑀕𑀸𑀣𑀸 𑀲𑀼𑀕𑀻𑀢𑀸, 𑀦𑀢𑁆𑀣𑁂𑀢𑁆𑀣 𑀫𑀫 𑀓𑀗𑁆𑀔𑀸. 𑀕𑀸𑀫𑀯𑀭𑀁 𑀲𑀢𑀜𑁆𑀘𑀸𑀢𑀺 𑀕𑀸𑀫𑀯𑀭𑀸𑀦𑀁 𑀢𑁂 𑀲𑀢𑀁 𑀤𑀤𑀸𑀫𑀻𑀢𑀺 𑀯𑀤𑀢𑀺.

𑀢𑀢𑁄 𑀤𑀸𑀭𑀓𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁨𑁮. ‘‘𑀦 𑀘𑀸𑀳𑀁 𑀘𑀺𑀢𑁆𑀢𑁄 𑀲𑀼𑀢𑀫𑀜𑁆𑀜𑀢𑁄 𑀫𑁂, 𑀇𑀲𑀻 𑀘 𑀫𑁂 𑀏𑀢𑀫𑀢𑁆𑀣𑀁 𑀅𑀲𑀁𑀲𑀺;

𑀕𑀦𑁆𑀢𑁆𑀯𑀸𑀦 𑀭𑀜𑁆𑀜𑁄 𑀧𑀝𑀺𑀕𑀸𑀳𑀺 𑀕𑀸𑀣𑀁, 𑀅𑀧𑀺 𑀢𑁂 𑀯𑀭𑀁 𑀅𑀢𑁆𑀢𑀫𑀦𑁄 𑀤𑀤𑁂𑀬𑁆𑀬𑀸’’𑀢𑀺.

𑀢𑀢𑁆𑀣 𑀏𑀢𑀫𑀢𑁆𑀣𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑁂 𑀦𑀺𑀲𑀺𑀦𑁆𑀦𑁄 𑀏𑀓𑁄 𑀇𑀲𑀺 𑀫𑀬𑁆𑀳𑀁 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀲𑁄 𑀫𑀫 𑀪𑀸𑀢𑀸 𑀘𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀦𑀁 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁨𑁯. ‘‘𑀬𑁄𑀚𑁂𑀦𑁆𑀢𑀼 𑀯𑁂 𑀭𑀸𑀚𑀭𑀣𑁂, 𑀲𑀼𑀓𑀢𑁂 𑀘𑀺𑀢𑁆𑀢𑀲𑀺𑀩𑁆𑀩𑀦𑁂;

𑀓𑀘𑁆𑀙𑀁 𑀦𑀸𑀕𑀸𑀦𑀁 𑀩𑀦𑁆𑀥𑀣, 𑀕𑀻𑀯𑁂𑀬𑁆𑀬𑀁 𑀧𑀝𑀺𑀫𑀼𑀜𑁆𑀘𑀣.

𑁩𑁦. ‘‘𑀆𑀳𑀜𑁆𑀜𑀦𑁆𑀢𑀼 𑀪𑁂𑀭𑀺𑀫𑀼𑀤𑀺𑀗𑁆𑀕𑀲𑀗𑁆𑀔𑁂, 𑀲𑀻𑀖𑀸𑀦𑀺 𑀬𑀸𑀦𑀸𑀦𑀺 𑀘 𑀬𑁄𑀚𑀬𑀦𑁆𑀢𑀼;

𑀅𑀚𑁆𑀚𑁂𑀯𑀳𑀁 𑀅𑀲𑁆𑀲𑀫𑀁 𑀢𑀁 𑀕𑀫𑀺𑀲𑁆𑀲𑀁, 𑀬𑀢𑁆𑀣𑁂𑀯 𑀤𑀓𑁆𑀔𑀺𑀲𑁆𑀲𑀫𑀺𑀲𑀺𑀁 𑀦𑀺𑀲𑀺𑀦𑁆𑀦’’𑀦𑁆𑀢𑀺.

𑀢𑀢𑁆𑀣 𑀆𑀳𑀜𑁆𑀜𑀦𑁆𑀢𑀽𑀢𑀺 𑀆𑀳𑀦𑀦𑁆𑀢𑀼. 𑀅𑀲𑁆𑀲𑀫𑀁 𑀢𑀦𑁆𑀢𑀺 𑀢𑀁 𑀅𑀲𑁆𑀲𑀫𑀁.

𑀲𑁄 𑀏𑀯𑀁 𑀯𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀭𑀣𑀁 𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀧𑀡𑁆𑀟𑀺𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀼𑀝𑁆𑀞𑀫𑀸𑀦𑀲𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁧. ‘‘𑀲𑀼𑀮𑀤𑁆𑀥𑀮𑀸𑀪𑁄 𑀯𑀢 𑀫𑁂 𑀅𑀳𑁄𑀲𑀺, 𑀕𑀸𑀣𑀸 𑀲𑀼𑀕𑀻𑀢𑀸 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁆𑀯𑀸𑀳𑀁 𑀇𑀲𑀺𑀁 𑀲𑀻𑀮𑀯𑀢𑀽𑀧𑀧𑀦𑁆𑀦𑀁, 𑀤𑀺𑀲𑁆𑀯𑀸 𑀧𑀢𑀻𑀢𑁄 𑀲𑀼𑀫𑀦𑁄𑀳𑀫𑀲𑁆𑀫𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀼𑀮𑀤𑁆𑀥𑀮𑀸𑀪𑁄 𑀯𑀢 𑀫𑀬𑁆𑀳𑀁 𑀙𑀢𑁆𑀢𑀫𑀗𑁆𑀕𑀮𑀤𑀺𑀯𑀲𑁂 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀕𑀻𑀢𑀕𑀸𑀣𑀸 𑀲𑀼𑀕𑀻𑀢𑀸𑀯 𑀅𑀳𑁄𑀲𑀺, 𑀲𑁆𑀯𑀸𑀳𑀁 𑀅𑀚𑁆𑀚 𑀲𑀻𑀮𑀯𑀢𑀲𑀫𑁆𑀧𑀦𑁆𑀦𑀁 𑀇𑀲𑀺𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀚𑀸𑀢𑁄𑀢𑀺.

𑀲𑁄 𑀘𑀺𑀢𑁆𑀢𑀧𑀡𑁆𑀟𑀺𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 ‘‘𑀪𑀸𑀢𑀺𑀓𑀲𑁆𑀲 𑀫𑁂 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀣𑀸’’𑀢𑀺𑀆𑀤𑀻𑀦𑀺 𑀆𑀡𑀸𑀧𑁂𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁩𑁨. ‘‘𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄 𑀪𑀯𑀁;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯’’𑀦𑁆𑀢𑀺.

𑀢𑀢𑁆𑀣 𑀅𑀕𑁆𑀖𑁂𑀢𑀺 𑀅𑀢𑀺𑀣𑀺𑀦𑁄 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀫𑀺𑀁 𑀅𑀕𑁆𑀖𑁂 𑀪𑀯𑀦𑁆𑀢𑀁 𑀆𑀧𑀼𑀘𑁆𑀙𑀸𑀫. 𑀓𑀼𑀭𑀼𑀢𑀼 𑀦𑁄𑀢𑀺 𑀇𑀫𑀁 𑀦𑁄 𑀅𑀕𑁆𑀖𑀁 𑀪𑀯𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀼.

𑀏𑀯𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁩𑁩. ‘‘𑀭𑀫𑁆𑀫𑀜𑁆𑀘 𑀢𑁂 𑀆𑀯𑀲𑀣𑀁 𑀓𑀭𑁄𑀦𑁆𑀢𑀼, 𑀦𑀸𑀭𑀻𑀕𑀡𑁂𑀳𑀺 𑀧𑀭𑀺𑀘𑀸𑀭𑀬𑀲𑁆𑀲𑀼;

𑀓𑀭𑁄𑀳𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀉𑀪𑁄𑀧𑀺𑀫𑀁 𑀇𑀲𑁆𑀲𑀭𑀺𑀬𑀁 𑀓𑀭𑁄𑀫𑀸’’𑀢𑀺.

𑀢𑀢𑁆𑀣 𑀇𑀫𑀁 𑀇𑀲𑁆𑀲𑀭𑀺𑀬𑀦𑁆𑀢𑀺 𑀓𑀧𑀺𑀮𑀭𑀝𑁆𑀞𑁂 𑀉𑀢𑁆𑀢𑀭𑀧𑀜𑁆𑀘𑀸𑀮𑀦𑀕𑀭𑁂 𑀭𑀚𑁆𑀚𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑀸 𑀓𑀭𑁄𑀫 𑀅𑀦𑀼𑀪𑀯𑀸𑀫.

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀢𑁆𑀢𑀧𑀡𑁆𑀟𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁪. ‘‘𑀤𑀺𑀲𑁆𑀯𑀸 𑀨𑀮𑀁 𑀤𑀼𑀘𑁆𑀘𑀭𑀺𑀢𑀲𑁆𑀲 𑀭𑀸𑀚, 𑀅𑀢𑁆𑀣𑁄 𑀲𑀼𑀘𑀺𑀡𑁆𑀡𑀲𑁆𑀲 𑀫𑀳𑀸𑀯𑀺𑀧𑀸𑀓𑀁;

𑀅𑀢𑁆𑀢𑀸𑀦𑀫𑁂𑀯 𑀧𑀝𑀺𑀲𑀁𑀬𑀫𑀺𑀲𑁆𑀲𑀁, 𑀦 𑀧𑀢𑁆𑀣𑀬𑁂 𑀧𑀼𑀢𑁆𑀢 𑀧𑀲𑀼𑀁 𑀥𑀦𑀁 𑀯𑀸.

𑁩𑁫. ‘‘𑀤𑀲𑁂𑀯𑀺𑀫𑀸 𑀯𑀲𑁆𑀲𑀤𑀲𑀸, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑀁;

𑀅𑀧𑀢𑁆𑀢𑀜𑁆𑀜𑁂𑀯 𑀢𑀁 𑀑𑀥𑀺𑀁, 𑀦𑀴𑁄 𑀙𑀺𑀦𑁆𑀦𑁄𑀯 𑀲𑀼𑀲𑁆𑀲𑀢𑀺.

𑁩𑁬. ‘‘𑀢𑀢𑁆𑀣 𑀓𑀸 𑀦𑀦𑁆𑀤𑀺 𑀓𑀸 𑀔𑀺𑀟𑁆𑀟𑀸, 𑀓𑀸 𑀭𑀢𑀻 𑀓𑀸 𑀥𑀦𑁂𑀲𑀦𑀸;

𑀓𑀺𑀁 𑀫𑁂 𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺, 𑀭𑀸𑀚 𑀫𑀼𑀢𑁆𑀢𑁄𑀲𑁆𑀫𑀺 𑀩𑀦𑁆𑀥𑀦𑀸.

𑁩𑁭. ‘‘𑀲𑁄𑀳𑀁 𑀏𑀯𑀁 𑀧𑀚𑀸𑀦𑀸𑀫𑀺, 𑀫𑀘𑁆𑀘𑀼 𑀫𑁂 𑀦𑀧𑁆𑀧𑀫𑀚𑁆𑀚𑀢𑀺;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀓𑀸 𑀭𑀢𑀻 𑀓𑀸 𑀥𑀦𑁂𑀲𑀦𑀸.

𑁩𑁮. ‘‘𑀚𑀸𑀢𑀺 𑀦𑀭𑀸𑀦𑀁 𑀅𑀥𑀫𑀸 𑀚𑀦𑀺𑀦𑁆𑀤, 𑀘𑀡𑁆𑀟𑀸𑀮𑀬𑁄𑀦𑀺 𑀤𑁆𑀯𑀺𑀧𑀤𑀸𑀓𑀦𑀺𑀝𑁆𑀞𑀸;

𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀧𑀸𑀧𑀓𑁂𑀳𑀺, 𑀘𑀡𑁆𑀟𑀸𑀮𑀕𑀩𑁆𑀪𑁂 𑀅𑀯𑀲𑀺𑀫𑁆𑀳 𑀧𑀼𑀩𑁆𑀩𑁂.

𑁩𑁯. ‘‘𑀘𑀡𑁆𑀟𑀸𑀮𑀸𑀳𑀼𑀫𑁆𑀳 𑀅𑀯𑀦𑁆𑀢𑀻𑀲𑀼, 𑀫𑀺𑀕𑀸 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀉𑀓𑁆𑀓𑀼𑀲𑀸 𑀦𑀫𑁆𑀫𑀤𑀸𑀢𑀻𑀭𑁂, 𑀢𑁆𑀬𑀚𑁆𑀚 𑀩𑁆𑀭𑀸𑀳𑁆𑀫𑀡𑀔𑀢𑁆𑀢𑀺𑀬𑀸’’𑀢𑀺.

𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀲𑁆𑀲𑀸𑀢𑀺 𑀫𑀳𑀸𑀭𑀸𑀚, 𑀢𑁆𑀯𑀁 𑀲𑀼𑀘𑀭𑀺𑀢𑀲𑁆𑀲𑁂𑀯 𑀨𑀮𑀁 𑀚𑀸𑀦𑀸𑀲𑀺, 𑀅𑀳𑀁 𑀧𑀦 𑀤𑀼𑀘𑁆𑀘𑀭𑀺𑀢𑀲𑁆𑀲𑀧𑀺 𑀨𑀮𑀁 𑀧𑀲𑁆𑀲𑀸𑀫𑀺𑀬𑁂𑀯. 𑀫𑀬𑀜𑁆𑀳𑀺 𑀉𑀪𑁄 𑀤𑀼𑀘𑁆𑀘𑀭𑀺𑀢𑀲𑁆𑀲 𑀨𑀮𑁂𑀦 𑀇𑀢𑁄 𑀘𑀢𑀼𑀢𑁆𑀣𑁂 𑀅𑀢𑁆𑀢𑀪𑀸𑀯𑁂 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁆𑀣 𑀦 𑀘𑀺𑀭𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀲𑁆𑀲 𑀨𑀮𑁂𑀦 𑀢𑁆𑀯𑀁 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀳𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂, 𑀏𑀯𑀸𑀳𑀁 𑀤𑀼𑀘𑁆𑀘𑀭𑀺𑀢𑀲𑁆𑀲 𑀘 𑀨𑀮𑀁 𑀲𑀼𑀘𑀺𑀡𑁆𑀡𑀲𑁆𑀲 𑀘 𑀫𑀳𑀸𑀯𑀺𑀧𑀸𑀓𑀁 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀲𑀻𑀮𑀲𑀁𑀬𑀫𑁂𑀦 𑀧𑀝𑀺𑀲𑀁𑀬𑀫𑀺𑀲𑁆𑀲𑀁, 𑀧𑀼𑀢𑁆𑀢𑀁 𑀯𑀸 𑀧𑀲𑀼𑀁 𑀯𑀸 𑀥𑀦𑀁 𑀯𑀸 𑀦 𑀧𑀢𑁆𑀣𑁂𑀫𑀺.