𑁧𑁩. 𑀢𑁂𑀭𑀲𑀓𑀦𑀺𑀧𑀸𑀢𑁄

[𑁪𑁭𑁪] 𑁧. 𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀸𑀲𑀺 𑀫𑁂 𑀅𑀫𑁆𑀩𑀨𑀮𑀸𑀦𑀺 𑀧𑀼𑀩𑁆𑀩𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁄 𑀳𑀺 ‘‘𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀬𑁆𑀳𑀁 𑀲𑀫𑀡𑁄 𑀕𑁄𑀢𑀫𑁄 𑀦𑁂𑀯 𑀆𑀘𑀭𑀺𑀬𑁄 𑀦 𑀉𑀧𑀚𑁆𑀛𑀸𑀬𑁄’’𑀢𑀺 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀛𑀸𑀦𑀧𑀭𑀺𑀳𑀻𑀦𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑁄 𑀩𑀳𑀺𑀚𑁂𑀢𑀯𑀦𑁂 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀅𑀯𑀻𑀘𑀺𑀁 𑀧𑀸𑀯𑀺𑀲𑀺. 𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀧𑀼𑀭𑁄𑀳𑀺𑀢𑀓𑀼𑀮𑀁 𑀅𑀳𑀺𑀯𑀸𑀢𑀭𑁄𑀕𑁂𑀦 𑀯𑀺𑀦𑀲𑁆𑀲𑀺. 𑀏𑀓𑁄𑀯 𑀧𑀼𑀢𑁆𑀢𑁄 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑁄. 𑀲𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀘 𑀅𑀯𑀲𑁂𑀲𑀲𑀺𑀧𑁆𑀧𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 ‘‘𑀤𑁂𑀲𑀘𑀸𑀭𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀭𑀦𑁆𑀢𑁄 𑀏𑀓𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀧𑀸𑀧𑀼𑀡𑀺. 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀘𑀡𑁆𑀟𑀸𑀮𑀕𑀸𑀫𑀓𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀝𑀺𑀯𑀲𑀢𑀺, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀅𑀓𑀸𑀮𑁂 𑀨𑀮𑀁 𑀕𑀡𑁆𑀳𑀸𑀧𑀦𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀲𑁄 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀓𑀸𑀚𑀁 𑀆𑀤𑀸𑀬 𑀢𑀢𑁄 𑀕𑀸𑀫𑀸 𑀦𑀺𑀓𑁆𑀔𑀺𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀏𑀓𑀁 𑀅𑀫𑁆𑀩𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 𑀢𑀁 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀁 𑀏𑀓𑁂𑀦 𑀉𑀤𑀓𑀧𑀲𑀢𑁂𑀦 𑀧𑀳𑀭𑀢𑀺. 𑀭𑀼𑀓𑁆𑀔𑀢𑁄 𑀢𑀗𑁆𑀔𑀡𑀜𑁆𑀜𑁂𑀯 𑀧𑀼𑀭𑀸𑀡𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀦𑀯𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀺𑀢𑁆𑀯𑀸 𑀧𑀢𑀦𑁆𑀢𑀺, 𑀅𑀫𑁆𑀩𑀨𑀮𑀸𑀦𑀺 𑀉𑀝𑁆𑀞𑀸𑀬 𑀫𑀼𑀳𑀼𑀢𑁆𑀢𑁂𑀦𑁂𑀯 𑀧𑀘𑁆𑀘𑀺𑀢𑁆𑀯𑀸 𑀫𑀥𑀼𑀭𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀤𑀺𑀩𑁆𑀩𑀭𑀲𑀲𑀤𑀺𑀲𑀸𑀦𑀺 𑀳𑀼𑀢𑁆𑀯𑀸 𑀭𑀼𑀓𑁆𑀔𑀢𑁄 𑀧𑀢𑀦𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀢𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀓𑀸𑀚𑀁 𑀧𑀽𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑀺.

𑀲𑁄 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀫𑀳𑀸𑀲𑀢𑁆𑀢𑀁 𑀅𑀓𑀸𑀮𑁂 𑀅𑀫𑁆𑀩𑀧𑀓𑁆𑀓𑀸𑀦𑀺 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑁂𑀦 𑀢𑁂𑀳𑀺 𑀫𑀦𑁆𑀢𑀩𑀮𑁂𑀦 𑀉𑀧𑁆𑀧𑀦𑁆𑀦𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀇𑀫𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀅𑀦𑀕𑁆𑀖𑀫𑀦𑁆𑀢𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀫𑁆𑀩𑀸𑀦𑀺 𑀆𑀳𑀭𑀡𑀦𑀺𑀬𑀸𑀫𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀣𑀢𑁄 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀅𑀭𑀜𑁆𑀜𑀢𑁄 𑀅𑀦𑀸𑀕𑀢𑁂𑀬𑁂𑀯 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 ‘‘𑀓𑀼𑀳𑀺𑀁 𑀅𑀬𑁆𑀬𑁄, 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀭𑀜𑁆𑀜𑀁 𑀕𑀢𑁄’’𑀢𑀺 𑀯𑀼𑀢𑁆𑀢𑁂 𑀢𑀁 𑀆𑀕𑀢𑀁 𑀆𑀕𑀫𑀬𑀫𑀸𑀦𑁄𑀯 𑀞𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀢𑁄 𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀕𑁂𑀳𑁂 𑀞𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀅𑀬𑀁 𑀫𑀸𑀡𑀯𑁄 𑀫𑀦𑁆𑀢𑀢𑁆𑀣𑀸𑀬 𑀆𑀕𑀢𑁄, 𑀢𑀲𑁆𑀲 𑀳𑀢𑁆𑀣𑁂 𑀫𑀦𑁆𑀢𑁄 𑀦𑀲𑁆𑀲𑀢𑀺, 𑀅𑀲𑀧𑁆𑀧𑀼𑀭𑀺𑀲𑁄 𑀏𑀲𑁄’’𑀢𑀺. 𑀫𑀸𑀡𑀯𑁄𑀧𑀺 ‘‘𑀅𑀳𑀁 𑀇𑀫𑀁 𑀫𑀦𑁆𑀢𑀁 𑀆𑀘𑀭𑀺𑀬𑀲𑁆𑀲 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀤𑀸𑀭𑀽𑀦𑀺 𑀆𑀳𑀭𑀢𑀺, 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺, 𑀪𑀢𑁆𑀢𑀁 𑀧𑀘𑀢𑀺, 𑀤𑀦𑁆𑀢𑀓𑀝𑁆𑀞𑀫𑀼𑀔𑀥𑁄𑀯𑀦𑀸𑀤𑀻𑀦𑀺 𑀤𑁂𑀢𑀺, 𑀧𑀸𑀤𑀁 𑀥𑁄𑀯𑀢𑀺.

𑀏𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑁂𑀦 ‘‘𑀢𑀸𑀢 𑀫𑀸𑀡𑀯, 𑀫𑀜𑁆𑀘𑀧𑀸𑀤𑀸𑀦𑀁 𑀫𑁂 𑀉𑀧𑀥𑀸𑀦𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑀁 𑀅𑀧𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀊𑀭𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀧𑀭𑀪𑀸𑀕𑁂 𑀫𑀳𑀸𑀲𑀢𑁆𑀢𑀲𑁆𑀲 𑀪𑀭𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲𑀸 𑀧𑀲𑀽𑀢𑀺𑀓𑀸𑀮𑁂 𑀧𑀭𑀺𑀓𑀫𑁆𑀫𑀁 𑀲𑀩𑁆𑀩𑀫𑀓𑀸𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑀁 𑀆𑀳 ‘‘𑀲𑀸𑀫𑀺, 𑀅𑀬𑀁 𑀫𑀸𑀡𑀯𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀫𑀦𑁆𑀢𑀢𑁆𑀣𑀸𑀬 𑀅𑀫𑁆𑀳𑀸𑀓𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀢𑀺, 𑀏𑀢𑀲𑁆𑀲 𑀳𑀢𑁆𑀣𑁂 𑀫𑀦𑁆𑀢𑁄 𑀢𑀺𑀝𑁆𑀞𑀢𑀼 𑀯𑀸 𑀫𑀸 𑀯𑀸, 𑀤𑁂𑀣 𑀢𑀲𑁆𑀲 𑀫𑀦𑁆𑀢’’𑀦𑁆𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀫𑀦𑁆𑀢𑀁 𑀤𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀢𑀸𑀢, 𑀅𑀦𑀕𑁆𑀖𑁄𑀬𑀁 𑀫𑀦𑁆𑀢𑁄, 𑀢𑀯 𑀇𑀫𑀁 𑀦𑀺𑀲𑁆𑀲𑀸𑀬 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀭𑀜𑁆𑀜𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀦 𑀯𑀸 ‘𑀓𑁄 𑀢𑁂 𑀆𑀘𑀭𑀺𑀬𑁄’𑀢𑀺 𑀧𑀼𑀝𑁆𑀞𑀓𑀸𑀮𑁂 𑀫𑀸 𑀫𑀁 𑀦𑀺𑀕𑀽𑀳𑀺𑀢𑁆𑀣𑁄, 𑀲𑀘𑁂 𑀳𑀺 ‘𑀘𑀡𑁆𑀟𑀸𑀮𑀲𑁆𑀲 𑀫𑁂 𑀲𑀦𑁆𑀢𑀺𑀓𑀸 𑀫𑀦𑁆𑀢𑁄 𑀕𑀳𑀺𑀢𑁄’𑀢𑀺 𑀮𑀚𑁆𑀚𑀦𑁆𑀢𑁄 ‘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀫𑁂 𑀆𑀘𑀭𑀺𑀬𑁄’𑀢𑀺 𑀓𑀣𑁂𑀲𑁆𑀲𑀲𑀺, 𑀇𑀫𑀲𑁆𑀲 𑀫𑀦𑁆𑀢𑀲𑁆𑀲 𑀨𑀮𑀁 𑀦 𑀮𑀪𑀺𑀲𑁆𑀲𑀲𑀻’’𑀢𑀺. 𑀲𑁄 ‘‘𑀓𑀺𑀁 𑀓𑀸𑀭𑀡𑀸 𑀢𑀁 𑀦𑀺𑀕𑀽𑀳𑀺𑀲𑁆𑀲𑀸𑀫𑀺, 𑀓𑁂𑀦𑀘𑀺 𑀧𑀼𑀝𑁆𑀞𑀓𑀸𑀮𑁂 𑀢𑀼𑀫𑁆𑀳𑁂𑀬𑁂𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑁆𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀅𑀫𑁆𑀩𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀮𑀪𑀺.

𑀅𑀣𑁂𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀧𑀸𑀮𑁄 𑀢𑀲𑁆𑀲 𑀳𑀢𑁆𑀣𑀢𑁄 𑀅𑀫𑁆𑀩𑀁 𑀓𑀺𑀡𑀺𑀢𑁆𑀯𑀸 𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀓𑀼𑀢𑁄 𑀲𑀫𑁆𑀫, 𑀢𑀬𑀸 𑀏𑀯𑀭𑀽𑀧𑀁 𑀅𑀫𑁆𑀩𑀁 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁂𑀯, 𑀏𑀓𑁄 𑀫𑀸𑀡𑀯𑁄 𑀅𑀓𑀸𑀮𑀅𑀫𑁆𑀩𑀨𑀮𑀸𑀦𑀺 𑀆𑀦𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀢𑀺, 𑀢𑀢𑁄 𑀫𑁂 𑀕𑀳𑀺𑀢𑀦𑁆𑀢𑀺. 𑀢𑁂𑀦 𑀳𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀥𑁂𑀯 𑀅𑀫𑁆𑀩𑀸𑀦𑀺 𑀆𑀳𑀭𑀢𑀽’’𑀢𑀺 𑀦𑀁 𑀯𑀤𑁂𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀫𑀸𑀡𑀯𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀫𑁆𑀩𑀸𑀦𑀺 𑀭𑀸𑀚𑀓𑀼𑀮𑀁 𑀳𑀭𑀢𑀺. 𑀅𑀣 𑀭𑀜𑁆𑀜𑀸 ‘‘𑀉𑀧𑀝𑁆𑀞𑀳 𑀫’’𑀦𑁆𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄 𑀩𑀳𑀼𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀫𑀸𑀡𑀯, 𑀓𑀼𑀢𑁄 𑀅𑀓𑀸𑀮𑁂 𑀏𑀯𑀁 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀅𑀫𑁆𑀩𑀸𑀦𑀺 𑀮𑀪𑀲𑀺, 𑀓𑀺𑀁 𑀢𑁂 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀤𑁂𑀯𑁄 𑀯𑀸 𑀓𑁄𑀘𑀺 𑀤𑁂𑀢𑀺, 𑀉𑀤𑀸𑀳𑀼 𑀫𑀦𑁆𑀢𑀩𑀮𑀁 𑀏𑀢’’𑀦𑁆𑀢𑀺? ‘‘𑀦 𑀫𑁂 𑀫𑀳𑀸𑀭𑀸𑀚, 𑀓𑁄𑀘𑀺 𑀤𑁂𑀢𑀺, 𑀅𑀦𑀕𑁆𑀖𑁄 𑀧𑀦 𑀫𑁂 𑀫𑀦𑁆𑀢𑁄 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀩𑀮’’𑀦𑁆𑀢𑀺. ‘‘𑀢𑁂𑀦 𑀳𑀺 𑀫𑀬𑀫𑁆𑀧𑀺 𑀢𑁂 𑀏𑀓𑀤𑀺𑀯𑀲𑀁 𑀫𑀦𑁆𑀢𑀩𑀮𑀁 𑀤𑀝𑁆𑀞𑀼𑀓𑀸𑀫𑀸’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀢𑁂𑀦 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀤𑀲𑁆𑀲𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀅𑀫𑁆𑀩𑀭𑀼𑀓𑁆𑀔𑀁 𑀉𑀧𑀕𑀦𑁆𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀭𑀼𑀓𑁆𑀔𑀁 𑀉𑀤𑀓𑁂𑀦 𑀧𑀳𑀭𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀅𑀫𑁆𑀩𑀭𑀼𑀓𑁆𑀔𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀨𑀮𑀁 𑀕𑀳𑁂𑀢𑁆𑀯𑀸 𑀫𑀳𑀸𑀫𑁂𑀖𑁄 𑀯𑀺𑀬 𑀅𑀫𑁆𑀩𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺, 𑀘𑁂𑀮𑀼𑀓𑁆𑀔𑁂𑀧𑀸 𑀧𑀯𑀢𑁆𑀢𑀺𑀁𑀲𑀼.

𑀭𑀸𑀚𑀸 𑀅𑀫𑁆𑀩𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀫𑀸𑀡𑀯𑀓, 𑀏𑀯𑀭𑀽𑀧𑁄 𑀢𑁂 𑀅𑀘𑁆𑀙𑀭𑀺𑀬𑀫𑀦𑁆𑀢𑁄 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 ‘‘𑀲𑀘𑀸𑀳𑀁 ‘𑀘𑀡𑁆𑀟𑀸𑀮𑀲𑁆𑀲 𑀲𑀦𑁆𑀢𑀺𑀓𑁂’𑀢𑀺 𑀯𑀓𑁆𑀔𑀸𑀫𑀺, 𑀮𑀚𑁆𑀚𑀺𑀢𑀩𑁆𑀩𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀜𑁆𑀘 𑀕𑀭𑀳𑀺𑀲𑁆𑀲𑀦𑁆𑀢𑀺, 𑀫𑀦𑁆𑀢𑁄 𑀔𑁄 𑀧𑀦 𑀫𑁂 𑀧𑀕𑀼𑀡𑁄, 𑀇𑀤𑀸𑀦𑀺 𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑀁 𑀆𑀘𑀭𑀺𑀬𑀁 𑀅𑀧𑀤𑀺𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 ‘‘𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑁄 𑀫𑁂’’𑀢𑀺 𑀯𑀤𑀦𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀫𑀦𑁆𑀢𑁄 𑀅𑀦𑁆𑀢𑀭𑀥𑀸𑀬𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀁 𑀆𑀤𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 ‘‘𑀅𑀫𑁆𑀩𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀡𑀯, 𑀅𑀫𑁆𑀩𑀸𑀦𑀺 𑀆𑀳𑀭𑀸𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀅𑀫𑁆𑀩𑀁 𑀉𑀧𑀕𑀦𑁆𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 ‘‘𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀫𑀦𑁆𑀢𑁂 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀅𑀦𑁆𑀢𑀭𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀮𑀚𑁆𑀚𑀺𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀅𑀬𑀁 𑀧𑀼𑀩𑁆𑀩𑁂 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀅𑀫𑁆𑀩𑀸𑀦𑀺 𑀆𑀳𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑁂𑀢𑀺, 𑀖𑀦𑀫𑁂𑀖𑀯𑀲𑁆𑀲𑀁 𑀯𑀺𑀬 𑀅𑀫𑁆𑀩𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀺, 𑀇𑀤𑀸𑀦𑀺 𑀣𑀤𑁆𑀥𑁄 𑀯𑀺𑀬 𑀞𑀺𑀢𑁄, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀅𑀳𑀸𑀲𑀺 𑀫𑁂 𑀅𑀫𑁆𑀩𑀨𑀮𑀸𑀦𑀺 𑀧𑀼𑀩𑁆𑀩𑁂, 𑀅𑀡𑀽𑀦𑀺 𑀣𑀽𑀮𑀸𑀦𑀺 𑀘 𑀩𑁆𑀭𑀳𑁆𑀫𑀘𑀸𑀭𑀺;

𑀢𑁂𑀳𑁂𑀯 𑀫𑀦𑁆𑀢𑁂𑀳𑀺 𑀦 𑀤𑀸𑀦𑀺 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂’’𑀢𑀺.

𑀢𑀢𑁆𑀣 𑀅𑀳𑀸𑀲𑀻𑀢𑀺 𑀆𑀳𑀭𑀺. 𑀤𑀼𑀫𑀧𑁆𑀨𑀮𑀸𑀢𑀺 𑀭𑀼𑀓𑁆𑀔𑀨𑀮𑀸𑀦𑀺.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀲𑀘𑁂 ‘𑀅𑀚𑁆𑀚 𑀅𑀫𑁆𑀩𑀨𑀮𑀁 𑀦 𑀕𑀡𑁆𑀳𑀸𑀫𑀻’𑀢𑀺 𑀯𑀓𑁆𑀔𑀸𑀫𑀺, 𑀭𑀸𑀚𑀸 𑀫𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀫𑀼𑀲𑀸𑀯𑀸𑀤𑁂𑀦 𑀦𑀁 𑀯𑀜𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀦𑀓𑁆𑀔𑀢𑁆𑀢𑀬𑁄𑀕𑀁 𑀧𑀝𑀺𑀫𑀸𑀦𑀬𑀸𑀫𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀜𑁆𑀘 𑀫𑀦𑁆𑀢𑁂 𑀦 𑀧𑀲𑁆𑀲𑀁;

𑀦𑀓𑁆𑀔𑀢𑁆𑀢𑀬𑁄𑀕𑀜𑁆𑀘 𑀔𑀡𑀜𑁆𑀘 𑀮𑀤𑁆𑀥𑀸, 𑀅𑀤𑁆𑀥𑀸 𑀳𑀭𑀺𑀲𑁆𑀲𑀫𑁆𑀩𑀨𑀮𑀁 𑀧𑀳𑀽𑀢’’𑀦𑁆𑀢𑀺.

𑀢𑀢𑁆𑀣 𑀅𑀤𑁆𑀥𑀸𑀳𑀭𑀺𑀲𑁆𑀲𑀫𑁆𑀩𑀨𑀮𑀦𑁆𑀢𑀺 𑀅𑀤𑁆𑀥𑀸 𑀅𑀫𑁆𑀩𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀺.

𑀭𑀸𑀚𑀸 ‘‘𑀅𑀬𑀁 𑀅𑀜𑁆𑀜𑀤𑀸 𑀦𑀓𑁆𑀔𑀢𑁆𑀢𑀬𑁄𑀕𑀁 𑀦 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩. ‘‘𑀦𑀓𑁆𑀔𑀢𑁆𑀢𑀬𑁄𑀕𑀁 𑀦 𑀧𑀼𑀭𑁂 𑀅𑀪𑀸𑀡𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀁 𑀦 𑀧𑀼𑀭𑁂 𑀅𑀲𑀁𑀲𑀺;

𑀲𑀬𑀁 𑀳𑀭𑀻 𑀅𑀫𑁆𑀩𑀨𑀮𑀁 𑀧𑀳𑀽𑀢𑀁, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀭𑀲𑁂𑀦𑀼𑀧𑁂𑀢𑀁.

𑁪. ‘‘𑀫𑀦𑁆𑀢𑀸𑀪𑀺𑀚𑀧𑁆𑀧𑁂𑀦 𑀧𑀼𑀭𑁂 𑀳𑀺 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂;

𑀲𑁆𑀯𑀸𑀚𑁆𑀚 𑀦 𑀧𑀸𑀭𑁂𑀲𑀺 𑀚𑀧𑁆𑀧𑀫𑁆𑀧𑀺 𑀫𑀦𑁆𑀢𑀁, 𑀅𑀬𑀁 𑀲𑁄 𑀓𑁄 𑀦𑀸𑀫 𑀢𑀯𑀚𑁆𑀚 𑀥𑀫𑁆𑀫𑁄’’𑀢𑀺.

𑀢𑀢𑁆𑀣 𑀦 𑀧𑀸𑀭𑁂𑀲𑀻𑀢𑀺 𑀦 𑀲𑀓𑁆𑀓𑁄𑀲𑀺. 𑀚𑀧𑁆𑀧𑀫𑁆𑀧𑀻𑀢𑀺 𑀚𑀧𑁆𑀧𑀦𑁆𑀢𑁄𑀧𑀺 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀧𑀺. 𑀅𑀬𑀁 𑀲𑁄𑀢𑀺 𑀅𑀬𑀫𑁂𑀯 𑀲𑁄 𑀢𑀯 𑀲𑀪𑀸𑀯𑁄 𑀅𑀚𑁆𑀚 𑀓𑁄 𑀦𑀸𑀫 𑀚𑀸𑀢𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀦 𑀲𑀓𑁆𑀓𑀸 𑀭𑀸𑀚𑀸𑀦𑀁 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀼𑀁, 𑀲𑀘𑁂𑀧𑀺 𑀫𑁂 𑀲𑀪𑀸𑀯𑁂 𑀓𑀣𑀺𑀢𑁂 𑀆𑀡𑀁 𑀓𑀭𑁂𑀬𑁆𑀬, 𑀓𑀭𑁄𑀢𑀼, 𑀲𑀪𑀸𑀯𑀫𑁂𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫. ‘‘𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀫𑀫 𑀲𑀫𑁆𑀧𑀤𑀸𑀲𑀺, 𑀥𑀫𑁆𑀫𑁂𑀦 𑀫𑀦𑁆𑀢𑁂 𑀧𑀓𑀢𑀺𑀜𑁆𑀘 𑀲𑀁𑀲𑀺;

𑀫𑀸 𑀘𑀲𑁆𑀲𑀼 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁, 𑀕𑀼𑀬𑁆𑀳𑀺𑀢𑁆𑀣𑁄 𑀅𑀢𑁆𑀣𑀁 𑀯𑀺𑀚𑀳𑁂𑀬𑁆𑀬 𑀫𑀦𑁆𑀢𑁄.

𑁬. ‘‘𑀲𑁄𑀳𑀁 𑀚𑀦𑀺𑀦𑁆𑀤𑁂𑀦 𑀚𑀦𑀫𑁆𑀳𑀺 𑀧𑀼𑀝𑁆𑀞𑁄, 𑀫𑀓𑁆𑀔𑀸𑀪𑀺𑀪𑀽𑀢𑁄 𑀅𑀮𑀺𑀓𑀁 𑀅𑀪𑀸𑀡𑀺𑀁;

‘𑀫𑀦𑁆𑀢𑀸 𑀇𑀫𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑀸’𑀢𑀺 𑀫𑀺𑀘𑁆𑀙𑀸, 𑀧𑀳𑀻𑀦𑀫𑀦𑁆𑀢𑁄 𑀓𑀧𑀡𑁄 𑀭𑀼𑀤𑀸𑀫𑀻’’𑀢𑀺.

𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀲𑀫𑁂𑀦 𑀓𑀸𑀭𑀡𑁂𑀦 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀯 𑀅𑀤𑀸𑀲𑀺. 𑀧𑀓𑀢𑀺𑀜𑁆𑀘 𑀲𑀁𑀲𑀻𑀢𑀺 ‘‘𑀫𑀸 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁 𑀕𑀼𑀬𑁆𑀳𑀺𑀢𑁆𑀣𑁄, 𑀲𑀘𑁂 𑀕𑀽𑀳𑀲𑀺, 𑀫𑀦𑁆𑀢𑀸 𑀢𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀦𑀲𑁆𑀲𑀦𑀧𑀓𑀢𑀺𑀜𑁆𑀘 𑀫𑀬𑁆𑀳𑀁 𑀲𑀁𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀫𑀺𑀘𑁆𑀙𑀸𑀢𑀺 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀫𑀬𑀸 𑀇𑀫𑁂 𑀫𑀦𑁆𑀢𑀸 𑀕𑀳𑀺𑀢𑀸’’𑀢𑀺 𑀫𑀺𑀘𑁆𑀙𑀸𑀬 𑀅𑀪𑀡𑀺𑀁, 𑀢𑁂𑀦 𑀫𑁂 𑀢𑁂 𑀫𑀦𑁆𑀢𑀸 𑀦𑀝𑁆𑀞𑀸, 𑀲𑁆𑀯𑀸𑀳𑀁 𑀧𑀳𑀻𑀦𑀫𑀦𑁆𑀢𑁄 𑀇𑀤𑀸𑀦𑀺 𑀓𑀧𑀡𑁄 𑀭𑀼𑀤𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀧𑀸𑀧𑀥𑀫𑁆𑀫𑁄 𑀏𑀯𑀭𑀽𑀧𑀁 𑀭𑀢𑀦𑀫𑀦𑁆𑀢𑀁 𑀦 𑀑𑀮𑁄𑀓𑁂𑀲𑀺, 𑀏𑀯𑀭𑀽𑀧𑀲𑁆𑀫𑀺𑀜𑁆𑀳𑀺 𑀉𑀢𑁆𑀢𑀫𑀭𑀢𑀦𑀫𑀦𑁆𑀢𑁂 𑀮𑀤𑁆𑀥𑁂 𑀚𑀸𑀢𑀺 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀕𑀭𑀳𑀦𑁆𑀢𑁄 𑁋

𑁭. ‘‘𑀏𑀭𑀡𑁆𑀟𑀸 𑀧𑀼𑀘𑀺𑀫𑀦𑁆𑀤𑀸 𑀯𑀸, 𑀅𑀣 𑀯𑀸 𑀧𑀸𑀮𑀺𑀪𑀤𑁆𑀤𑀓𑀸;

𑀫𑀥𑀼𑀁 𑀫𑀥𑀼𑀢𑁆𑀣𑀺𑀓𑁄 𑀯𑀺𑀦𑁆𑀤𑁂, 𑀲𑁄 𑀳𑀺 𑀢𑀲𑁆𑀲 𑀤𑀼𑀫𑀼𑀢𑁆𑀢𑀫𑁄.

𑁮. ‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀬𑀫𑁆𑀳𑀸 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀲𑁄 𑀳𑀺 𑀢𑀲𑁆𑀲 𑀦𑀭𑀼𑀢𑁆𑀢𑀫𑁄.

𑁯. ‘‘𑀇𑀫𑀲𑁆𑀲 𑀤𑀡𑁆𑀟𑀜𑁆𑀘 𑀯𑀥𑀜𑁆𑀘 𑀤𑀢𑁆𑀯𑀸, 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣 𑀚𑀫𑁆𑀫𑀁;

𑀬𑁄 𑀉𑀢𑁆𑀢𑀫𑀢𑁆𑀣𑀁 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀫𑀸𑀦𑀸𑀢𑀺𑀫𑀸𑀦𑁂𑀦 𑀯𑀺𑀦𑀸𑀲𑀬𑀺𑀢𑁆𑀣𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀆𑀳.

𑀢𑀢𑁆𑀣 𑀫𑀥𑀼𑀢𑁆𑀣𑀺𑀓𑁄𑀢𑀺 𑀫𑀥𑀼𑀅𑀢𑁆𑀣𑀺𑀓𑁄 𑀧𑀼𑀭𑀺𑀲𑁄 𑀅𑀭𑀜𑁆𑀜𑁂 𑀫𑀥𑀼𑀁 𑀑𑀮𑁄𑀓𑁂𑀦𑁆𑀢𑁄 𑀏𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀬𑀢𑁄 𑀫𑀥𑀼𑀁 𑀮𑀪𑀢𑀺, 𑀲𑁄𑀯 𑀤𑀼𑀫𑁄 𑀢𑀲𑁆𑀲 𑀤𑀼𑀫𑀼𑀢𑁆𑀢𑀫𑁄 𑀦𑀸𑀫. 𑀢𑀣𑁂𑀯 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑀫𑁆𑀳𑀸 𑀧𑀼𑀭𑀺𑀲𑀸 𑀥𑀫𑁆𑀫𑀁 𑀓𑀸𑀭𑀡𑀁 𑀬𑀼𑀢𑁆𑀢𑀁 𑀅𑀢𑁆𑀣𑀁 𑀯𑀺𑀚𑀸𑀦𑁂𑀬𑁆𑀬, 𑀲𑁄𑀯 𑀢𑀲𑁆𑀲 𑀉𑀢𑁆𑀢𑀫𑁄 𑀦𑀭𑁄 𑀦𑀸𑀫. 𑀇𑀫𑀲𑁆𑀲 𑀤𑀡𑁆𑀟𑀜𑁆𑀘𑀸𑀢𑀺 𑀇𑀫𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀲𑀩𑁆𑀩𑀲𑁆𑀲𑀳𑀭𑀡𑀤𑀡𑁆𑀟𑀜𑁆𑀘 𑀯𑁂𑀴𑀼𑀧𑁂𑀲𑀺𑀓𑀸𑀤𑀻𑀳𑀺 𑀧𑀺𑀝𑁆𑀞𑀺𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀥𑀜𑁆𑀘 𑀤𑀢𑁆𑀯𑀸 𑀇𑀫𑀁 𑀚𑀫𑁆𑀫𑀁 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣, 𑀔𑀮𑀺𑀓𑀸𑀭𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀦𑀺𑀤𑁆𑀥𑀫𑀣 𑀦𑀺𑀓𑁆𑀓𑀟𑁆𑀠𑀣, 𑀓𑀺𑀁 𑀇𑀫𑀺𑀦𑀸 𑀇𑀥 𑀯𑀲𑀦𑁆𑀢𑁂𑀦𑀸𑀢𑀺.

𑀭𑀸𑀚𑀧𑀼𑀭𑀺𑀲𑀸 𑀢𑀣𑀸 𑀓𑀢𑁆𑀯𑀸 ‘‘𑀢𑀯𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑀸𑀥𑁂𑀢𑁆𑀯𑀸𑀯 𑀲𑀘𑁂 𑀧𑀼𑀦 𑀫𑀦𑁆𑀢𑁂 𑀮𑀪𑀺𑀲𑁆𑀲𑀲𑀺, 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀦𑁄 𑀘𑁂, 𑀇𑀫𑀁 𑀤𑀺𑀲𑀁 𑀫𑀸 𑀑𑀮𑁄𑀓𑁂𑀬𑁆𑀬𑀸𑀲𑀻’’𑀢𑀺 𑀢𑀁 𑀦𑀺𑀩𑁆𑀩𑀺𑀲𑀬𑀫𑀓𑀁𑀲𑀼. 𑀲𑁄 𑀅𑀦𑀸𑀣𑁄 𑀳𑀼𑀢𑁆𑀯𑀸 ‘‘𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀁 𑀦 𑀫𑁂 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑀸𑀥𑁂𑀢𑁆𑀯𑀸 𑀧𑀼𑀦 𑀫𑀦𑁆𑀢𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀭𑁄𑀤𑀦𑁆𑀢𑁄 𑀢𑀁 𑀕𑀸𑀫𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀪𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀧𑀲𑁆𑀲 𑀢𑀁 𑀧𑀸𑀧𑀥𑀫𑁆𑀫𑀁 𑀧𑀭𑀺𑀳𑀻𑀦𑀫𑀦𑁆𑀢𑀁 𑀧𑀼𑀦 𑀆𑀕𑀘𑁆𑀙𑀦𑁆𑀢’’𑀦𑁆𑀢𑀺 𑀆𑀳. 𑀲𑁄 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀆𑀘𑀭𑀺𑀬, 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀅𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀦𑁆𑀢𑁂 𑀬𑀸𑀘𑀦𑁆𑀢𑁄 𑁋

𑁧𑁦. ‘‘𑀬𑀣𑀸 𑀲𑀫𑀁 𑀫𑀜𑁆𑀜𑀫𑀸𑀦𑁄 𑀧𑀢𑁂𑀬𑁆𑀬, 𑀲𑁄𑀩𑁆𑀪𑀁 𑀕𑀼𑀳𑀁 𑀦𑀭𑀓𑀁 𑀧𑀽𑀢𑀺𑀧𑀸𑀤𑀁;

𑀭𑀚𑁆𑀚𑀽𑀢𑀺 𑀯𑀸 𑀅𑀓𑁆𑀓𑀫𑁂 𑀓𑀡𑁆𑀳𑀲𑀧𑁆𑀧𑀁, 𑀅𑀦𑁆𑀥𑁄 𑀬𑀣𑀸 𑀚𑁄𑀢𑀺𑀫𑀥𑀺𑀝𑁆𑀞𑀳𑁂𑀬𑁆𑀬;

𑀏𑀯𑀫𑁆𑀧𑀺 𑀫𑀁 𑀢𑀁 𑀔𑀮𑀺𑀢𑀁 𑀲𑀧𑀜𑁆𑀜, 𑀧𑀳𑀻𑀦𑀫𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀤𑀸𑀳𑀻’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀬𑀣𑀸 𑀲𑀫𑀦𑁆𑀢𑀺 𑀬𑀣𑀸 𑀧𑀼𑀭𑀺𑀲𑁄 𑀇𑀤𑀁 𑀲𑀫𑀁 𑀞𑀸𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀲𑁄𑀩𑁆𑀪𑀁 𑀯𑀸 𑀕𑀼𑀳𑀁 𑀯𑀸 𑀪𑀽𑀫𑀺𑀬𑀸 𑀨𑀮𑀺𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀦𑀭𑀓𑀁 𑀯𑀸 𑀧𑀽𑀢𑀺𑀧𑀸𑀤𑀁 𑀯𑀸 𑀧𑀢𑁂𑀬𑁆𑀬. 𑀧𑀽𑀢𑀺𑀧𑀸𑀤𑁄𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀭𑀼𑀓𑁆𑀔𑁂 𑀲𑀼𑀲𑁆𑀲𑀺𑀢𑁆𑀯𑀸 𑀫𑀢𑁂 𑀢𑀲𑁆𑀲 𑀫𑀽𑀮𑁂𑀲𑀼 𑀧𑀽𑀢𑀺𑀓𑁂𑀲𑀼 𑀚𑀸𑀢𑁂𑀲𑀼 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀆𑀯𑀸𑀝𑁄 𑀳𑁄𑀢𑀺, 𑀢𑀲𑁆𑀲 𑀦𑀸𑀫𑀁. 𑀚𑁄𑀢𑀺𑀫𑀥𑀺𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀕𑁆𑀕𑀺𑀁 𑀅𑀓𑁆𑀓𑀫𑁂𑀬𑁆𑀬. 𑀏𑀯𑀫𑁆𑀧𑀻𑀢𑀺 𑀏𑀯𑀁 𑀅𑀳𑀫𑁆𑀧𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑀸 𑀅𑀦𑁆𑀥𑁄 𑀢𑀼𑀫𑁆𑀳𑀸𑀓𑀁 𑀯𑀺𑀲𑁂𑀲𑀁 𑀅𑀚𑀸𑀦𑀦𑁆𑀢𑁄 𑀢𑀼𑀫𑁆𑀳𑁂𑀲𑀼 𑀔𑀮𑀺𑀢𑁄, 𑀢𑀁 𑀫𑀁 𑀔𑀮𑀺𑀢𑀁 𑀯𑀺𑀤𑀺𑀢𑁆𑀯𑀸 𑀲𑀧𑀜𑁆𑀜 𑀜𑀸𑀡𑀲𑀫𑁆𑀧𑀦𑁆𑀦 𑀧𑀳𑀻𑀦𑀫𑀦𑁆𑀢𑀲𑁆𑀲 𑀫𑀫 𑀧𑀼𑀦𑀧𑀺 𑀤𑁂𑀣𑀸𑀢𑀺.

𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀢𑀸𑀢, 𑀓𑀺𑀁 𑀓𑀣𑁂𑀲𑀺, 𑀅𑀦𑁆𑀥𑁄 𑀳𑀺 𑀲𑀜𑁆𑀜𑀸𑀬 𑀤𑀺𑀦𑁆𑀦𑀸𑀬 𑀲𑁄𑀩𑁆𑀪𑀸𑀤𑀻𑀦𑀺 𑀧𑀭𑀺𑀳𑀭𑀢𑀺, 𑀫𑀬𑀸 𑀧𑀞𑀫𑀫𑁂𑀯 𑀢𑀯 𑀓𑀣𑀺𑀢𑀁, 𑀇𑀤𑀸𑀦𑀺 𑀓𑀺𑀫𑀢𑁆𑀣𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑁋

𑁧𑁧. ‘‘𑀥𑀫𑁆𑀫𑁂𑀦 𑀫𑀦𑁆𑀢𑀁 𑀢𑀯 𑀲𑀫𑁆𑀧𑀤𑀸𑀲𑀺𑀁, 𑀢𑀼𑀯𑀫𑁆𑀧𑀺 𑀥𑀫𑁆𑀫𑁂𑀦 𑀧𑀝𑀺𑀕𑁆𑀕𑀳𑁂𑀲𑀺;

𑀧𑀓𑀢𑀺𑀫𑁆𑀧𑀺 𑀢𑁂 𑀅𑀢𑁆𑀢𑀫𑀦𑁄 𑀅𑀲𑀁𑀲𑀺𑀁, 𑀥𑀫𑁆𑀫𑁂 𑀞𑀺𑀢𑀁 𑀢𑀁 𑀦 𑀚𑀳𑁂𑀬𑁆𑀬 𑀫𑀦𑁆𑀢𑁄.

𑁧𑁨. ‘‘𑀬𑁄 𑀩𑀸𑀮-𑀫𑀦𑁆𑀢𑀁 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀬𑀁 𑀤𑀼𑀮𑁆𑀮𑀪𑀁 𑀅𑀚𑁆𑀚 𑀫𑀦𑀼𑀲𑁆𑀲𑀮𑁄𑀓𑁂;

𑀓𑀺𑀜𑁆𑀘𑀸𑀧𑀺 𑀮𑀤𑁆𑀥𑀸 𑀚𑀻𑀯𑀺𑀢𑀼𑀁 𑀅𑀧𑁆𑀧𑀧𑀜𑁆𑀜𑁄, 𑀯𑀺𑀦𑀸𑀲𑀬𑀻 𑀅𑀮𑀺𑀓𑀁 𑀪𑀸𑀲𑀫𑀸𑀦𑁄.

𑁧𑁩. ‘‘𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀅𑀓𑀢𑀜𑁆𑀜𑀼𑀦𑁄 𑀘, 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀅𑀲𑀜𑁆𑀜𑀢𑀲𑁆𑀲;

𑀫𑀦𑁆𑀢𑁂 𑀫𑀬𑀁 𑀢𑀸𑀤𑀺𑀲𑀓𑁂 𑀦 𑀤𑁂𑀫, 𑀓𑀼𑀢𑁄 𑀫𑀦𑁆𑀢𑀸 𑀕𑀘𑁆𑀙 𑀦 𑀫𑀬𑁆𑀳𑀁 𑀭𑀼𑀘𑁆𑀘𑀲𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀆𑀳.

𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀅𑀳𑀫𑁆𑀧𑀺 𑀢𑀯 𑀆𑀘𑀭𑀺𑀬𑀪𑀸𑀕𑀁 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑀫𑀦𑁆𑀢𑀁 𑀲𑀫𑁆𑀧𑀤𑀸𑀲𑀺𑀁, 𑀢𑁆𑀯𑀫𑁆𑀧𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀲𑀺. 𑀥𑀫𑁆𑀫𑁂 𑀞𑀺𑀢𑀦𑁆𑀢𑀺 𑀆𑀘𑀭𑀺𑀬𑀧𑀽𑀚𑀓𑀥𑀫𑁆𑀫𑁂 𑀞𑀺𑀢𑀁. 𑀢𑀸𑀤𑀺𑀲𑀓𑁂𑀢𑀺 𑀢𑀣𑀸𑀭𑀽𑀧𑁂 𑀅𑀓𑀸𑀮𑀨𑀮𑀕𑀡𑁆𑀳𑀸𑀧𑀓𑁂 𑀫𑀦𑁆𑀢𑁂 𑀦 𑀤𑁂𑀫, 𑀕𑀘𑁆𑀙 𑀦 𑀫𑁂 𑀭𑀼𑀘𑁆𑀘𑀲𑀻𑀢𑀺.

𑀲𑁄 𑀏𑀯𑀁 𑀆𑀘𑀭𑀺𑀬𑁂𑀦 𑀉𑀬𑁆𑀬𑁄𑀚𑀺𑀢𑁄 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀸𑀣𑀫𑀭𑀡𑀁 𑀫𑀭𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀓𑀢𑀜𑁆𑀜𑀽 𑀫𑀸𑀡𑀯𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁭𑁫] 𑁨. 𑀨𑀦𑁆𑀤𑀦𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀭𑁄𑀳𑀺𑀡𑀻𑀦𑀤𑀻𑀢𑀻𑀭𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀓𑀸𑀦𑀁 𑀓𑀮𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀜𑀸𑀢𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 𑁋 𑀫𑀳𑀸𑀭𑀸𑀚𑀸, 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀳𑀺𑀦𑀕𑀭𑁂 𑀯𑀟𑁆𑀠𑀓𑀺𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑀯𑀟𑁆𑀠𑀓𑀻 𑀅𑀭𑀜𑁆𑀜𑀢𑁄 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀭𑀣𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀨𑀦𑁆𑀤𑀦𑀭𑀼𑀓𑁆𑀔𑁄 𑀅𑀳𑁄𑀲𑀺. 𑀏𑀓𑁄 𑀓𑀸𑀴𑀲𑀻𑀳𑁄 𑀕𑁄𑀘𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀏𑀓𑁄 𑀲𑀼𑀓𑁆𑀔𑀤𑀡𑁆𑀟𑀓𑁄 𑀧𑀢𑀺𑀢𑁆𑀯𑀸 𑀔𑀦𑁆𑀥𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀣𑁄𑀓𑀁 𑀔𑀦𑁆𑀥𑁂𑀦 𑀭𑀼𑀚𑀦𑁆𑀢𑁂𑀦 𑀪𑀻𑀢𑀢𑀲𑀺𑀢𑁄 𑀉𑀝𑁆𑀞𑀸𑀬 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑁄 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀜𑁆𑀜𑁄 𑀫𑀁 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀫𑀁 𑀏𑀢𑁆𑀣 𑀦𑀺𑀧𑀚𑁆𑀚𑀦𑁆𑀢𑀁 𑀦 𑀲𑀳𑀢𑀺 𑀫𑀜𑁆𑀜𑁂, 𑀳𑁄𑀢𑀼 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀦𑁂 𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀭𑀼𑀓𑁆𑀔𑀁 𑀧𑀳𑀭𑀺𑀢𑁆𑀯𑀸 ‘‘𑀦𑁂𑀯 𑀢𑀯 𑀭𑀼𑀓𑁆𑀔𑀲𑁆𑀲 𑀧𑀢𑁆𑀢𑀁 𑀔𑀸𑀤𑀸𑀫𑀺, 𑀦 𑀲𑀸𑀔𑀁 𑀪𑀜𑁆𑀚𑀸𑀫𑀺, 𑀇𑀥 𑀅𑀜𑁆𑀜𑁂 𑀫𑀺𑀕𑁂 𑀯𑀲𑀦𑁆𑀢𑁂 𑀲𑀳𑀲𑀺, 𑀫𑀁 𑀦 𑀲𑀳𑀲𑀺, 𑀓𑁄 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀓𑀢𑀺𑀧𑀸𑀳𑀁 𑀆𑀕𑀫𑁂𑀳𑀺, 𑀲𑀫𑀽𑀮𑀁 𑀢𑁂 𑀭𑀼𑀓𑁆𑀔𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀤𑁂𑀯𑀢𑀁 𑀢𑀚𑁆𑀚𑁂𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀺. 𑀢𑀤𑀸 𑀲𑁄 𑀩𑁆𑀭𑀸𑀳𑁆𑀫𑀡𑀯𑀟𑁆𑀠𑀓𑀻 𑀤𑁆𑀯𑁂 𑀢𑀬𑁄 𑀫𑀦𑀼𑀲𑁆𑀲𑁂 𑀆𑀤𑀸𑀬 𑀭𑀣𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀬𑀸𑀦𑀓𑁂𑀦 𑀢𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀬𑀸𑀦𑀓𑀁 𑀞𑀧𑁂𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀭𑀼𑀓𑁆𑀔𑁂 𑀉𑀧𑀥𑀸𑀭𑁂𑀦𑁆𑀢𑁄 𑀨𑀦𑁆𑀤𑀦𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀓𑀸𑀴𑀲𑀻𑀳𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚, 𑀫𑀬𑀸 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀯𑀟𑁆𑀠𑀓𑀻 𑀘 𑀇𑀢𑁄 𑀘𑀺𑀢𑁄 𑀑𑀮𑁄𑀓𑁂𑀢𑁆𑀯𑀸 𑀨𑀦𑁆𑀤𑀦𑀲𑀫𑀻𑀧𑁂𑀦 𑀧𑀸𑀬𑀸𑀲𑀺. 𑀲𑁄 ‘‘𑀬𑀸𑀯 𑀏𑀲𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪. ‘‘𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄, 𑀯𑀦𑀫𑁄𑀕𑀬𑁆𑀳 𑀢𑀺𑀝𑁆𑀞𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀙𑁂𑀢𑀼𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀧𑀼𑀭𑀺𑀲𑁄𑀢𑀺 𑀢𑁆𑀯𑀁 𑀓𑀼𑀞𑀸𑀭𑀺𑀳𑀢𑁆𑀣𑁄 𑀏𑀓𑁄 𑀧𑀼𑀭𑀺𑀲𑁄 𑀇𑀫𑀁 𑀯𑀦𑀁 𑀑𑀕𑀬𑁆𑀳 𑀢𑀺𑀝𑁆𑀞𑀲𑀻𑀢𑀺.

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀫𑀺𑀕𑁄 𑀫𑀦𑀼𑀲𑁆𑀲𑀯𑀸𑀘𑀁 𑀪𑀸𑀲𑀦𑁆𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀲 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀭𑀼𑀁 𑀚𑀸𑀦𑀺𑀲𑁆𑀲𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫. ‘‘𑀇𑀲𑁆𑀲𑁄 𑀯𑀦𑀸𑀦𑀺 𑀘𑀭𑀲𑀺, 𑀲𑀫𑀸𑀦𑀺 𑀯𑀺𑀲𑀫𑀸𑀦𑀺 𑀘;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳’’𑀦𑁆𑀢𑀺.

𑀢𑀢𑁆𑀣 𑀇𑀲𑁆𑀲𑁄𑀢𑀺 𑀢𑁆𑀯𑀫𑁆𑀧𑀺 𑀏𑀓𑁄 𑀓𑀸𑀴𑀲𑀻𑀳𑁄 𑀯𑀦𑀸𑀦𑀺 𑀘𑀭𑀲𑀺, 𑀢𑁆𑀯𑀁 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀭𑀼𑀁 𑀚𑀸𑀦𑀺𑀲𑁆𑀲𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀸𑀴𑀲𑀻𑀳𑁄 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬. ‘‘𑀦𑁂𑀯 𑀲𑀸𑀮𑁄 𑀦 𑀔𑀤𑀺𑀭𑁄, 𑀦𑀸𑀲𑁆𑀲𑀓𑀡𑁆𑀡𑁄 𑀓𑀼𑀢𑁄 𑀥𑀯𑁄;

𑀭𑀼𑀓𑁆𑀔𑁄 𑀘 𑀨𑀦𑁆𑀤𑀦𑁄 𑀦𑀸𑀫, 𑀢𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳’’𑀦𑁆𑀢𑀺.

𑀲𑁄 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀲𑀼𑀤𑀺𑀯𑀲𑁂𑀦 𑀯𑀢𑀫𑁆𑀳𑀺 𑀅𑀚𑁆𑀚 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑁂 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀭𑀼𑀁 𑀆𑀘𑀺𑀓𑁆𑀔𑀢𑀺, 𑀅𑀳𑁄 𑀲𑀸𑀥𑀽’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁭. ‘‘𑀓𑀻𑀤𑀺𑀲𑀸𑀦𑀺𑀲𑁆𑀲 𑀧𑀢𑁆𑀢𑀸𑀦𑀺, 𑀔𑀦𑁆𑀥𑁄 𑀯𑀸 𑀧𑀦 𑀓𑀻𑀤𑀺𑀲𑁄;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀬𑀣𑀸 𑀚𑀸𑀦𑁂𑀫𑀼 𑀨𑀦𑁆𑀤𑀦’’𑀦𑁆𑀢𑀺.

𑀅𑀣𑀲𑁆𑀲 𑀲𑁄 𑀆𑀘𑀺𑀓𑁆𑀔𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮. ‘‘𑀬𑀲𑁆𑀲 𑀲𑀸𑀔𑀸 𑀧𑀮𑀫𑁆𑀩𑀦𑁆𑀢𑀺, 𑀦𑀫𑀦𑁆𑀢𑀺 𑀦 𑀘 𑀪𑀜𑁆𑀚𑀭𑁂;

𑀲𑁄 𑀭𑀼𑀓𑁆𑀔𑁄 𑀨𑀦𑁆𑀤𑀦𑁄 𑀦𑀸𑀫, 𑀬𑀲𑁆𑀲 𑀫𑀽𑀮𑁂 𑀅𑀳𑀁 𑀞𑀺𑀢𑁄.

𑁧𑁯. ‘‘𑀅𑀭𑀸𑀦𑀁 𑀘𑀓𑁆𑀓𑀦𑀸𑀪𑀻𑀦𑀁, 𑀈𑀲𑀸𑀦𑁂𑀫𑀺𑀭𑀣𑀲𑁆𑀲 𑀘;

𑀲𑀩𑁆𑀩𑀲𑁆𑀲 𑀢𑁂 𑀓𑀫𑁆𑀫𑀦𑀺𑀬𑁄, 𑀅𑀬𑀁 𑀳𑁂𑀲𑁆𑀲𑀢𑀺 𑀨𑀦𑁆𑀤𑀦𑁄’’𑀢𑀺.

𑀢𑀢𑁆𑀣 ‘‘𑀅𑀭𑀸𑀦’’𑀦𑁆𑀢𑀺 𑀇𑀤𑀁 𑀲𑁄 ‘‘𑀓𑀤𑀸𑀘𑁂𑀲 𑀇𑀫𑀁 𑀭𑀼𑀓𑁆𑀔𑀁 𑀦 𑀕𑀡𑁆𑀳𑁂𑀬𑁆𑀬, 𑀕𑀼𑀡𑀫𑁆𑀧𑀺𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀈𑀲𑀸𑀦𑁂𑀫𑀺𑀭𑀣𑀲𑁆𑀲 𑀘𑀸𑀢𑀺 𑀈𑀲𑀸𑀬 𑀘 𑀦𑁂𑀫𑀺𑀬𑀸 𑀘 𑀲𑁂𑀲𑀲𑁆𑀲 𑀘 𑀭𑀣𑀲𑁆𑀲 𑀲𑀩𑁆𑀩𑀲𑁆𑀲 𑀢𑁂 𑀏𑀲 𑀓𑀫𑁆𑀫𑀦𑀺𑀬𑁄 𑀓𑀫𑁆𑀫𑀓𑁆𑀔𑀫𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀲𑁄 𑀏𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀏𑀓𑀫𑀦𑁆𑀢𑁂 𑀯𑀺𑀘𑀭𑀺, 𑀯𑀟𑁆𑀠𑀓𑀻𑀧𑀺 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀭𑀼𑀓𑁆𑀔𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀏𑀢𑀲𑁆𑀲 𑀉𑀧𑀭𑀺 𑀦 𑀓𑀺𑀜𑁆𑀘𑀺 𑀧𑀸𑀢𑀺𑀢𑀁, 𑀅𑀬𑀁 𑀅𑀝𑁆𑀞𑀸𑀦𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀯𑀺𑀫𑀸𑀦𑀁 𑀦𑀸𑀲𑁂𑀢𑀺, 𑀅𑀳𑀜𑁆𑀘 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺, 𑀏𑀓𑁂𑀦𑀼𑀧𑀸𑀬𑁂𑀦 𑀇𑀫𑀜𑁆𑀘 𑀇𑀲𑁆𑀲𑀁 𑀯𑀺𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀯𑀦𑀓𑀫𑁆𑀫𑀺𑀓𑀧𑀼𑀭𑀺𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀪𑁄 𑀧𑀼𑀭𑀺𑀲 𑀫𑀦𑀸𑀧𑁄 𑀢𑁂 𑀭𑀼𑀓𑁆𑀔𑁄 𑀮𑀤𑁆𑀥𑁄, 𑀇𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀭𑀣𑀦𑁂𑀫𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀇𑀫𑀺𑀦𑀸 𑀭𑀼𑀓𑁆𑀔𑁂𑀦 𑀭𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑁂𑀦 𑀢𑁂 𑀅𑀓𑁆𑀔𑀸𑀢𑀦𑁆𑀢𑀺. ‘‘𑀏𑀓𑁂𑀦 𑀓𑀸𑀴𑀲𑀻𑀳𑁂𑀦𑀸’’𑀢𑀺. ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑁂𑀦 𑀅𑀓𑁆𑀔𑀸𑀢𑀁, 𑀇𑀫𑀺𑀦𑀸 𑀭𑀼𑀓𑁆𑀔𑁂𑀦 𑀭𑀣𑁄 𑀲𑀼𑀦𑁆𑀤𑀭𑁄 𑀪𑀯𑀺𑀲𑁆𑀲𑀢𑀺, 𑀓𑀸𑀴𑀲𑀻𑀳𑀲𑁆𑀲 𑀕𑀮𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂 𑀞𑀸𑀦𑁂 𑀅𑀬𑀧𑀝𑁆𑀝𑁂𑀦 𑀯𑀺𑀬 𑀦𑁂𑀫𑀺𑀫𑀡𑁆𑀟𑀮𑁂 𑀧𑀭𑀺𑀓𑁆𑀔𑀺𑀢𑁆𑀢𑁂 𑀦𑁂𑀫𑀺 𑀘 𑀣𑀺𑀭𑀸 𑀪𑀯𑀺𑀲𑁆𑀲𑀢𑀺, 𑀩𑀳𑀼𑀜𑁆𑀘 𑀥𑀦𑀁 𑀮𑀪𑀺𑀲𑁆𑀲𑀲𑀻’’𑀢𑀺. ‘‘𑀓𑀸𑀴𑀲𑀻𑀳𑀘𑀫𑁆𑀫𑀁 𑀓𑀼𑀢𑁄 𑀮𑀘𑁆𑀙𑀸𑀫𑀻’’𑀢𑀺? ‘‘𑀢𑁆𑀯𑀁 𑀩𑀸𑀮𑀓𑁄𑀲𑀺, 𑀅𑀬𑀁 𑀢𑀯 𑀭𑀼𑀓𑁆𑀔𑁄 𑀯𑀦𑁂 𑀞𑀺𑀢𑁄 𑀦 𑀧𑀮𑀸𑀬𑀢𑀺, 𑀢𑁆𑀯𑀁 𑀬𑁂𑀦 𑀢𑁂 𑀭𑀼𑀓𑁆𑀔𑁄 𑀅𑀓𑁆𑀔𑀸𑀢𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀲𑀸𑀫𑀺 𑀢𑀬𑀸 𑀤𑀲𑁆𑀲𑀺𑀢𑀭𑀼𑀓𑁆𑀔𑀁 𑀓𑀢𑀭𑀝𑁆𑀞𑀸𑀦𑁂 𑀙𑀺𑀦𑁆𑀤𑀸𑀫𑀻’𑀢𑀺 𑀯𑀜𑁆𑀘𑁂𑀢𑁆𑀯𑀸 𑀆𑀦𑁂𑀳𑀺, 𑀅𑀣 𑀦𑀁 𑀦𑀺𑀭𑀸𑀲𑀗𑁆𑀓𑀁 ‘𑀇𑀥 𑀘 𑀏𑀢𑁆𑀣 𑀘 𑀙𑀺𑀦𑁆𑀤𑀸’𑀢𑀺 𑀫𑀼𑀔𑀢𑀼𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀁 𑀢𑀺𑀔𑀺𑀡𑁂𑀦 𑀫𑀳𑀸𑀨𑀭𑀲𑀼𑀦𑀸 𑀓𑁄𑀝𑁆𑀝𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀘𑀫𑁆𑀫𑀁 𑀆𑀤𑀸𑀬 𑀯𑀭𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺 𑀯𑁂𑀭𑀁 𑀅𑀧𑁆𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁦. ‘‘𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀢𑀸𑀯𑀤𑁂 𑀅𑀚𑁆𑀛𑀪𑀸𑀲𑀣;

𑀫𑀬𑁆𑀳𑀫𑁆𑀧𑀺 𑀯𑀘𑀦𑀁 𑀅𑀢𑁆𑀣𑀺, 𑀪𑀸𑀭𑀤𑁆𑀯𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁧. ‘‘𑀇𑀲𑁆𑀲𑀲𑁆𑀲 𑀉𑀧𑀓𑁆𑀔𑀦𑁆𑀥𑀫𑁆𑀳𑀸, 𑀉𑀓𑁆𑀓𑀘𑁆𑀘 𑀘𑀢𑀼𑀭𑀗𑁆𑀕𑀼𑀮𑀁;

𑀢𑁂𑀦 𑀦𑁂𑀫𑀺𑀁 𑀧𑀲𑀸𑀭𑁂𑀲𑀺, 𑀏𑀯𑀁 𑀤𑀴𑁆𑀳𑀢𑀭𑀁 𑀲𑀺𑀬𑀸.

𑁨𑁨. ‘‘𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀯𑁂𑀭𑀁 𑀅𑀧𑁆𑀧𑁂𑀲𑀺 𑀢𑀸𑀯𑀤𑁂;

𑀚𑀸𑀢𑀸𑀦𑀜𑁆𑀘 𑀅𑀚𑀸𑀢𑀸𑀦𑀁, 𑀇𑀲𑁆𑀲𑀸𑀦𑀁 𑀤𑀼𑀓𑁆𑀔𑀫𑀸𑀯𑀳𑀻’’𑀢𑀺.

𑀢𑀢𑁆𑀣 𑀪𑀸𑀭𑀤𑁆𑀯𑀸𑀚𑀸𑀢𑀺 𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀉𑀧𑀓𑁆𑀔𑀦𑁆𑀥𑀫𑁆𑀳𑀸𑀢𑀺 𑀔𑀦𑁆𑀥𑀢𑁄. 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸.

𑀯𑀟𑁆𑀠𑀓𑀻 𑀭𑀼𑀓𑁆𑀔𑀤𑁂𑀯𑀢𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀅𑀚𑁆𑀚 𑀫𑀬𑁆𑀳𑀁 𑀫𑀗𑁆𑀕𑀮𑀤𑀺𑀯𑀲𑁄’’𑀢𑀺 𑀓𑀸𑀴𑀲𑀻𑀳𑀁 𑀖𑀸𑀢𑁂𑀢𑁆𑀯𑀸 𑀭𑀼𑀓𑁆𑀔𑀁 𑀙𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁨𑁩. ‘‘𑀇𑀘𑁆𑀘𑁂𑀯𑀁 𑀨𑀦𑁆𑀤𑀦𑁄 𑀇𑀲𑁆𑀲𑀁, 𑀇𑀲𑁆𑀲𑁄 𑀘 𑀧𑀦 𑀨𑀦𑁆𑀤𑀦𑀁;

𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑁂𑀦, 𑀅𑀜𑁆𑀜𑀫𑀜𑁆𑀜𑀫𑀖𑀸𑀢𑀬𑀼𑀁.

𑁨𑁪. ‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑀸𑀦𑀁, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀺, 𑀬𑀣𑀸 𑀢𑁂 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁫. ‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀫𑁆𑀫𑁄𑀤𑀣 𑀫𑀸 𑀯𑀺𑀯𑀤𑀣, 𑀫𑀸 𑀳𑁄𑀣 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁬. ‘‘𑀲𑀸𑀫𑀕𑁆𑀕𑀺𑀫𑁂𑀯 𑀲𑀺𑀓𑁆𑀔𑁂𑀣, 𑀩𑀼𑀤𑁆𑀥𑁂𑀳𑁂𑀢𑀁 𑀧𑀲𑀁𑀲𑀺𑀢𑀁;

𑀲𑀸𑀫𑀕𑁆𑀕𑀺𑀭𑀢𑁄 𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺.

𑀢𑀢𑁆𑀣 𑀅𑀖𑀸𑀢𑀬𑀼𑀦𑁆𑀢𑀺 𑀖𑀸𑀢𑀸𑀧𑁂𑀲𑀼𑀁. 𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀻𑀢𑀺 𑀫𑀳𑀸𑀭𑀸𑀚𑀸 𑀬𑀢𑁆𑀣 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀺𑀯𑀸𑀤𑁄 𑀳𑁄𑀢𑀺, 𑀢𑀢𑁆𑀣 𑀬𑀣𑀸 𑀦𑀸𑀫 𑀫𑀬𑀽𑀭𑀸 𑀦𑀘𑁆𑀘𑀦𑁆𑀢𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀭𑀳𑀲𑁆𑀲𑀗𑁆𑀕𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀫𑀦𑀼𑀲𑁆𑀲𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀭𑀦𑁆𑀥𑀁 𑀧𑀓𑀸𑀲𑁂𑀦𑁆𑀢𑀸 𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀺 𑀦𑀸𑀫. 𑀬𑀣𑀸 𑀢𑁂 𑀇𑀲𑁆𑀲𑀨𑀦𑁆𑀤𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀭𑀦𑁆𑀥𑀁 𑀧𑀓𑀸𑀲𑁂𑀦𑁆𑀢𑀸 𑀦𑀘𑁆𑀘𑀺𑀁𑀲𑀼 𑀦𑀸𑀫. 𑀢𑀁 𑀯𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀼𑀫𑁆𑀳𑁂 𑀯𑀤𑀸𑀫𑀺. 𑀪𑀤𑁆𑀤𑀁 𑀯𑁄𑀢𑀺 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼. 𑀬𑀸𑀯𑀦𑁆𑀢𑁂𑀢𑁆𑀣𑀸𑀢𑀺 𑀬𑀸𑀯𑀦𑁆𑀢𑁄 𑀏𑀢𑁆𑀣 𑀇𑀲𑁆𑀲𑀨𑀦𑁆𑀤𑀦𑀲𑀤𑀺𑀲𑀸 𑀫𑀸 𑀅𑀳𑀼𑀯𑀢𑁆𑀣. 𑀲𑀸𑀫𑀕𑁆𑀕𑀺𑀫𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀲𑀫𑀕𑁆𑀕𑀪𑀸𑀯𑀫𑁂𑀯 𑀢𑀼𑀫𑁆𑀳𑁂 𑀲𑀺𑀓𑁆𑀔𑀣, 𑀇𑀤𑀁 𑀧𑀜𑁆𑀜𑀸𑀯𑀼𑀤𑁆𑀥𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀲𑀁𑀲𑀺𑀢𑀁. 𑀥𑀫𑁆𑀫𑀝𑁆𑀞𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑁂 𑀞𑀺𑀢𑁄. 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻𑀢𑀺 𑀬𑁄𑀕𑁂𑀳𑀺 𑀔𑁂𑀫𑀸 𑀦𑀺𑀩𑁆𑀩𑀸𑀦𑀸 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑁂𑀦 𑀤𑁂𑀲𑀦𑀸𑀓𑀽𑀝𑀁 𑀕𑀡𑁆𑀳𑀺. 𑀲𑀓𑁆𑀬𑀭𑀸𑀚𑀸𑀦𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀫𑀕𑁆𑀕𑀸 𑀚𑀸𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀢𑀁 𑀓𑀸𑀭𑀡𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀯𑀼𑀢𑁆𑀣𑀤𑁂𑀯𑀢𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀨𑀦𑁆𑀤𑀦𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁭𑁬] 𑁩. 𑀚𑀯𑀦𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀇𑀥𑁂𑀯 𑀳𑀁𑀲 𑀦𑀺𑀧𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀥𑀦𑀼𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 (𑀲𑀁. 𑀦𑀺. 𑁨.𑁨𑁨𑁮) 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑀸 𑀳𑀺 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸 𑀲𑀼𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀼, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ‘𑀅𑀳𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀴𑁆𑀳𑀥𑀫𑁆𑀫𑀸𑀦𑀁 𑀥𑀦𑀼𑀕𑁆𑀕𑀳𑀸𑀦𑀁 𑀲𑀼𑀲𑀺𑀓𑁆𑀔𑀺𑀢𑀸𑀦𑀁 𑀓𑀢𑀳𑀢𑁆𑀣𑀸𑀦𑀁 𑀓𑀢𑀽𑀧𑀸𑀲𑀦𑀸𑀦𑀁 𑀘𑀢𑀼𑀤𑁆𑀤𑀺𑀲𑀸 𑀓𑀡𑁆𑀟𑁂 𑀔𑀺𑀢𑁆𑀢𑁂 𑀅𑀧𑀢𑀺𑀝𑁆𑀞𑀺𑀢𑁂 𑀧𑀣𑀯𑀺𑀬𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, ‘𑀚𑀯𑀦𑁄 𑀧𑀼𑀭𑀺𑀲𑁄 𑀧𑀭𑀫𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑁄’𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺? ‘‘𑀏𑀯𑀁 𑀪𑀦𑁆𑀢𑁂’’𑀢𑀺. 𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑁄. 𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀬𑀣𑀸 𑀘 𑀬𑀸 𑀤𑁂𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑁋

𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀓𑀣𑀺𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑁂 𑀇𑀢𑁆𑀢𑀭𑁂 𑀤𑀼𑀩𑁆𑀩𑀮𑁂 𑀓𑀢𑁆𑀯𑀸 𑀧𑀭𑀺𑀤𑀻𑀧𑁂𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀅𑀢𑀺𑀯𑀺𑀬 𑀲𑀦𑁆𑀢𑀸𑀲𑀁 𑀧𑀸𑀧𑁂𑀲𑀺, 𑀅𑀳𑁄 𑀩𑀼𑀤𑁆𑀥𑀩𑀮𑀁 𑀦𑀸𑀫𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀇𑀢𑁆𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀫𑀬𑀸 𑀳𑀺 𑀧𑀼𑀩𑁆𑀩𑁂 𑀅𑀳𑁂𑀢𑀼𑀓𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀧𑀺 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀇𑀢𑁆𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑀭𑀸𑀚𑀧𑀭𑀺𑀲𑀁 𑀲𑀁𑀯𑁂𑀚𑁂𑀢𑁆𑀯𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀚𑀯𑀦𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀘𑀺𑀢𑁆𑀢𑀓𑀽𑀝𑁂 𑀧𑀝𑀺𑀯𑀲𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀚𑀫𑁆𑀩𑀼𑀤𑀻𑀧𑀢𑀮𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀲𑀧𑀭𑀺𑀯𑀸𑀭𑁄 𑀲𑀬𑀁𑀚𑀸𑀢𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀆𑀓𑀸𑀲𑁂 𑀲𑀼𑀯𑀡𑁆𑀡𑀓𑀺𑀮𑀜𑁆𑀚𑀁 𑀧𑀢𑁆𑀣𑀭𑀦𑁆𑀢𑁄 𑀯𑀺𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀩𑀸𑀭𑀸𑀡𑀲𑀺𑀦𑀕𑀭𑀲𑁆𑀲 𑀫𑀢𑁆𑀣𑀓𑁂𑀦 𑀫𑀦𑁆𑀤𑀫𑀦𑁆𑀤𑀸𑀬 𑀯𑀺𑀮𑀸𑀲𑀕𑀢𑀺𑀬𑀸 𑀘𑀺𑀢𑁆𑀢𑀓𑀽𑀝𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸𑀧𑀺 𑀫𑀸𑀤𑀺𑀲𑁂𑀦 𑀭𑀜𑁆𑀜𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀫𑀘𑁆𑀘𑀸𑀦𑀁 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀳𑀁𑀲𑁂 𑀧𑀼𑀘𑁆𑀙𑀺 ‘‘𑀭𑀸𑀚𑀸, 𑀫𑀫 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺? ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀭𑀜𑁆𑀜𑁄 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑁄 𑀳𑁄𑀢𑀽’’𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁 𑀕𑀢𑀓𑀸𑀮𑁂 𑀅𑀦𑁄𑀢𑀢𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀏𑀓𑁂𑀦 𑀧𑀓𑁆𑀔𑁂𑀦 𑀉𑀤𑀓𑀁, 𑀏𑀓𑁂𑀦 𑀘𑀦𑁆𑀤𑀦𑀘𑀼𑀡𑁆𑀡𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀢𑁂𑀦 𑀉𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀘𑀦𑁆𑀤𑀦𑀘𑀼𑀡𑁆𑀡𑁂𑀦 𑀑𑀓𑀺𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑁄 𑀘𑀺𑀢𑁆𑀢𑀓𑀽𑀝𑀁 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀳𑀸𑀬𑁄 𑀫𑁂 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀺, 𑀲𑀳𑀸𑀬𑁄 𑀫𑁂 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀘𑁆𑀙𑀢𑀺.

𑀢𑀤𑀸 𑀫𑀳𑀸𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑀸 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 ‘‘𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀫𑀬𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺. ‘‘𑀢𑀸𑀢𑀸, 𑀲𑀽𑀭𑀺𑀬𑀚𑀯𑁄 𑀦𑀸𑀫 𑀲𑀻𑀖𑁄, 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣, 𑀅𑀦𑁆𑀢𑀭𑀸𑀯 𑀯𑀺𑀦𑀲𑁆𑀲𑀺𑀲𑁆𑀲𑀣, 𑀫𑀸 𑀕𑀫𑀺𑀢𑁆𑀣𑀸’’𑀢𑀺. 𑀢𑁂 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀁𑀲𑀼, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑁂 𑀬𑀸𑀯𑀢𑀢𑀺𑀬𑀁 𑀯𑀸𑀭𑁂𑀲𑀺𑀬𑁂𑀯. 𑀢𑁂 𑀫𑀸𑀦𑀣𑀤𑁆𑀥𑀸 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀦𑁆𑀢𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 ‘‘𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺 𑀲𑀽𑀭𑀺𑀬𑁂 𑀅𑀦𑀼𑀕𑁆𑀕𑀢𑁂𑀬𑁂𑀯 𑀕𑀦𑁆𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑁂 𑀅𑀤𑀺𑀲𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀢𑁂 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀅𑀦𑁆𑀢𑀭𑀸𑀯 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀚𑀻𑀯𑀺𑀢𑀁 𑀢𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀉𑀕𑁆𑀕𑀢𑁂 𑀲𑀽𑀭𑀺𑀬𑀫𑀡𑁆𑀟𑀮𑁂 𑀳𑀁𑀲𑀧𑁄𑀢𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀧𑀓𑁆𑀔𑀦𑁆𑀤𑀺𑀁𑀲𑀼, 𑀫𑀳𑀸𑀲𑀢𑁆𑀢𑁄𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀓𑁆𑀔𑀦𑁆𑀤𑀺. 𑀓𑀦𑀺𑀝𑁆𑀞𑀪𑀸𑀢𑀺𑀓𑁄 𑀬𑀸𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑀸 𑀚𑀯𑀺𑀢𑁆𑀯𑀸 𑀓𑀺𑀮𑀫𑀺, 𑀧𑀓𑁆𑀔𑀲𑀦𑁆𑀥𑀻𑀲𑀼 𑀅𑀕𑁆𑀕𑀺𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀸𑀢𑀺𑀓, 𑀦 𑀲𑀓𑁆𑀓𑁄𑀫𑀻’’𑀢𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺, 𑀚𑀻𑀯𑀺𑀢𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀧𑀜𑁆𑀚𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀁 𑀦𑁂𑀢𑁆𑀯𑀸 𑀳𑀁𑀲𑀸𑀦𑀁 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀧𑀼𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀽𑀭𑀺𑀬𑀁 𑀧𑀢𑁆𑀯𑀸 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀧𑀸𑀬𑀸𑀲𑀺. 𑀲𑁄𑀧𑀺 𑀬𑀸𑀯 𑀉𑀧𑀓𑀝𑁆𑀞𑀫𑀚𑁆𑀛𑀦𑁆𑀳𑀺𑀓𑀸 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑁆𑀯𑀸 𑀓𑀺𑀮𑀫𑀺, 𑀧𑀓𑁆𑀔𑀲𑀦𑁆𑀥𑀻𑀲𑀼 𑀅𑀕𑁆𑀕𑀺𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀸𑀢𑀺𑀓, 𑀦 𑀲𑀓𑁆𑀓𑁄𑀫𑀻’’𑀢𑀺. 𑀢𑀫𑁆𑀧𑀺 𑀫𑀳𑀸𑀲𑀢𑁆𑀢𑁄 𑀢𑀣𑁂𑀯 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀔𑀧𑀜𑁆𑀚𑀭𑁂𑀦𑀸𑀤𑀸𑀬 𑀘𑀺𑀢𑁆𑀢𑀓𑀽𑀝𑀫𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀧𑀸𑀧𑀼𑀡𑀺.

𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀫𑀫 𑀅𑀚𑁆𑀚 𑀲𑀭𑀻𑀭𑀩𑀮𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀏𑀓𑀯𑁂𑀕𑁂𑀦 𑀲𑀽𑀭𑀺𑀬𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑀸𑀮𑁂𑀦 𑀧𑀼𑀭𑀢𑁄, 𑀓𑀸𑀮𑁂𑀦 𑀧𑀘𑁆𑀙𑀢𑁄 𑀚𑀯𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀦𑀁 𑀦𑀸𑀫 𑀦𑀺𑀭𑀢𑁆𑀣𑀓𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀪𑀽𑀢𑀁, 𑀓𑀺𑀁 𑀫𑁂 𑀇𑀫𑀺𑀦𑀸, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀓𑀲𑁆𑀲 𑀭𑀜𑁆𑀜𑁄 𑀅𑀢𑁆𑀣𑀬𑀼𑀢𑁆𑀢𑀁 𑀥𑀫𑁆𑀫𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀽𑀭𑀺𑀬𑁂 𑀦𑀪𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀅𑀦𑁆𑀢𑀦𑁆𑀢𑁂𑀦 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀯𑁂𑀕𑀁 𑀧𑀭𑀺𑀳𑀸𑀧𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀦𑁆𑀢𑀦𑁆𑀢𑁂𑀦 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀓𑀮𑀦𑀕𑀭𑀁 𑀳𑀁𑀲𑀘𑁆𑀙𑀦𑁆𑀦𑀁 𑀯𑀺𑀬 𑀅𑀳𑁄𑀲𑀺, 𑀙𑀺𑀤𑁆𑀤𑀁 𑀦𑀸𑀫 𑀦 𑀧𑀜𑁆𑀜𑀸𑀬𑀺, 𑀅𑀦𑀼𑀓𑁆𑀓𑀫𑁂𑀦 𑀯𑁂𑀕𑁂 𑀧𑀭𑀺𑀳𑀸𑀬𑀦𑁆𑀢𑁂 𑀆𑀓𑀸𑀲𑁂 𑀙𑀺𑀤𑁆𑀤𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀯𑁂𑀕𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀆𑀕𑀢𑁄 𑀫𑁂 𑀲𑀳𑀸𑀬𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬 𑀓𑀜𑁆𑀘𑀦𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀲𑀫𑁆𑀫, 𑀧𑀯𑀺𑀲, 𑀇𑀥 𑀦𑀺𑀲𑀻𑀤𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁭. ‘‘𑀇𑀥𑁂𑀯 𑀳𑀁𑀲 𑀦𑀺𑀧𑀢, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬𑀸’’𑀢𑀺.

𑀢𑀢𑁆𑀣 ‘‘𑀇𑀥𑀸’’𑀢𑀺 𑀓𑀜𑁆𑀘𑀦𑀧𑀻𑀞𑀁 𑀲𑀦𑁆𑀥𑀸𑀬𑀸𑀳. 𑀦𑀺𑀧𑀢𑀸𑀢𑀺 𑀦𑀺𑀲𑀻𑀤. 𑀇𑀲𑁆𑀲𑀭𑁄𑀲𑀻𑀢𑀺 𑀢𑁆𑀯𑀁 𑀇𑀫𑀲𑁆𑀲 𑀞𑀸𑀦𑀲𑁆𑀲 𑀇𑀲𑁆𑀲𑀭𑁄 𑀲𑀸𑀫𑀺 𑀳𑀼𑀢𑁆𑀯𑀸 𑀆𑀕𑀢𑁄𑀲𑀻𑀢𑀺 𑀯𑀤𑀢𑀺. 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬𑀸𑀢𑀺 𑀬𑀁 𑀇𑀫𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀅𑀢𑁆𑀣𑀺, 𑀢𑀁 𑀅𑀧𑀭𑀺𑀲𑀗𑁆𑀓𑀦𑁆𑀢𑁄 𑀅𑀫𑁆𑀳𑀸𑀓𑀁 𑀓𑀣𑁂𑀳𑀻𑀢𑀺.

𑀫𑀳𑀸𑀲𑀢𑁆𑀢𑁄 𑀓𑀜𑁆𑀘𑀦𑀧𑀻𑀞𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀲𑀢𑀧𑀸𑀓𑀲𑀳𑀲𑁆𑀲𑀧𑀸𑀓𑁂𑀳𑀺 𑀢𑁂𑀮𑁂𑀳𑀺 𑀢𑀲𑁆𑀲 𑀧𑀓𑁆𑀔𑀦𑁆𑀢𑀭𑀸𑀦𑀺 𑀫𑀓𑁆𑀔𑁂𑀢𑁆𑀯𑀸 𑀓𑀜𑁆𑀘𑀦𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀘 𑀫𑀥𑀼𑀭𑁄𑀤𑀓𑀜𑁆𑀘 𑀲𑀓𑁆𑀔𑀭𑁄𑀤𑀓𑀜𑁆𑀘 𑀤𑀸𑀧𑁂𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀏𑀓𑀓𑁄𑀯 𑀆𑀕𑀢𑁄𑀲𑀺, 𑀓𑀼𑀳𑀺𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 ‘‘𑀲𑀫𑁆𑀫, 𑀫𑀫𑀧𑀺 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀯𑁂𑀕𑀁 𑀤𑀲𑁆𑀲𑁂𑀳𑀻’’𑀢𑀺. 𑀫𑀳𑀸𑀭𑀸𑀚, 𑀦 𑀲𑀓𑁆𑀓𑀸 𑀲𑁄 𑀯𑁂𑀕𑁄 𑀤𑀲𑁆𑀲𑁂𑀢𑀼𑀦𑁆𑀢𑀺. 𑀢𑁂𑀦 𑀳𑀺 𑀫𑁂 𑀲𑀭𑀺𑀓𑁆𑀔𑀓𑀫𑀢𑁆𑀢𑀁 𑀤𑀲𑁆𑀲𑁂𑀳𑀻𑀢𑀺. 𑀲𑀸𑀥𑀼, 𑀫𑀳𑀸𑀭𑀸𑀚, 𑀲𑀭𑀺𑀓𑁆𑀔𑀓𑀫𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀅𑀓𑁆𑀔𑀡𑀯𑁂𑀥𑀻 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺. 𑀭𑀸𑀚𑀸 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀕𑀳𑁂𑀢𑁆𑀯𑀸 𑀦𑀺𑀯𑁂𑀲𑀦𑀸 𑀑𑀭𑀼𑀬𑁆𑀳 𑀭𑀸𑀚𑀗𑁆𑀕𑀡𑁂 𑀲𑀺𑀮𑀸𑀣𑀫𑁆𑀪𑀁 𑀦𑀺𑀔𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀻𑀯𑀸𑀬𑀁 𑀖𑀡𑁆𑀝𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑁂 𑀞𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑀸 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀔𑀺𑀧𑀦𑁆𑀢𑀼, 𑀢𑀸𑀦𑀺 𑀅𑀳𑀁 𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀸𑀦𑁂𑀯 𑀆𑀳𑀭𑀺𑀢𑁆𑀯𑀸 𑀏𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀸𑀢𑁂𑀲𑁆𑀲𑀸𑀫𑀺. 𑀫𑀫 𑀓𑀡𑁆𑀟𑀕𑀳𑀡𑀢𑁆𑀣𑀸𑀬 𑀕𑀢𑀪𑀸𑀯𑀁 𑀖𑀡𑁆𑀝𑀲𑀤𑁆𑀤𑀲𑀜𑁆𑀜𑀸𑀬 𑀚𑀸𑀦𑁂𑀬𑁆𑀬𑀸𑀲𑀺, 𑀫𑀁 𑀧𑀦 𑀦 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀔𑀺𑀢𑁆𑀢𑀓𑀡𑁆𑀟𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀸𑀢𑁂𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀢𑁂, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀯𑁂𑀕𑁄’’𑀢𑀺 𑀯𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀬𑀁 𑀯𑁂𑀕𑁄 𑀫𑀬𑁆𑀳𑀁 𑀦𑁂𑀯 𑀉𑀢𑁆𑀢𑀫𑁄, 𑀫𑀚𑁆𑀛𑀺𑀫𑁄, 𑀧𑀭𑀺𑀢𑁆𑀢𑁄 𑀮𑀸𑀫𑀓𑀯𑁂𑀕𑁄 𑀏𑀲, 𑀏𑀯𑀁 𑀲𑀻𑀖𑁄, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀯𑁂𑀕𑁄’’𑀢𑀺 𑀆𑀳.

𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀲𑀫𑁆𑀫, 𑀅𑀢𑁆𑀣𑀺 𑀧𑀦 𑀢𑀼𑀫𑁆𑀳𑀸𑀓𑀁 𑀯𑁂𑀕𑀢𑁄 𑀅𑀜𑁆𑀜𑁄 𑀲𑀻𑀖𑀢𑀭𑁄 𑀯𑁂𑀕𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀉𑀢𑁆𑀢𑀫𑀯𑁂𑀕𑀢𑁄𑀧𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸 𑀲𑀻𑀖𑀢𑀭𑀁 𑀔𑀻𑀬𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺, 𑀔𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀔𑀡𑀺𑀓𑀦𑀺𑀭𑁄𑀥𑀯𑀲𑁂𑀦 𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺, 𑀢𑀢𑁄 𑀦𑀸𑀫𑀥𑀫𑁆𑀫𑀸𑀦𑀁. 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺, 𑀫𑀳𑀸𑀚𑀦𑁄 𑀉𑀢𑁆𑀭𑀸𑀲𑀁 𑀧𑀢𑁆𑀢𑁄 𑀅𑀳𑁄𑀲𑀺. 𑀭𑀜𑁆𑀜𑁄 𑀫𑀼𑀔𑀁 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀲𑀢𑀺𑀁 𑀮𑀪𑀸𑀧𑁂𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀳𑀺, 𑀥𑀫𑁆𑀫𑀁 𑀘𑀭𑀸𑀳𑀺, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀤𑁂𑀯𑀸’’𑀢𑀺 𑀑𑀯𑀤𑀺. 𑀅𑀣 𑀭𑀸𑀚𑀸 ‘‘𑀲𑀸𑀫𑀺, 𑀫𑀬𑀁 𑀢𑀼𑀫𑁆𑀳𑀸𑀤𑀺𑀲𑁂𑀦 𑀜𑀸𑀡𑀩𑀮𑀲𑀫𑁆𑀧𑀦𑁆𑀦𑁂𑀦 𑀆𑀘𑀭𑀺𑀬𑁂𑀦 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀘𑀺𑀢𑁆𑀢𑀓𑀽𑀝𑀁 𑀅𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀫𑀬𑁆𑀳𑀁 𑀑𑀯𑀸𑀤𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀬𑀸𑀘𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁮. ‘‘𑀲𑀯𑀦𑁂𑀦 𑀏𑀓𑀲𑁆𑀲 𑀧𑀺𑀬𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀧𑀦𑁂𑀓𑀲𑁆𑀲 𑀯𑀺𑀬𑁂𑀢𑀺 𑀙𑀦𑁆𑀤𑁄;

𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀧𑀺𑀬𑀸 𑀪𑀯𑀦𑁆𑀢𑀺, 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 𑀤𑀲𑁆𑀲𑀦𑁂𑀦.

𑁨𑁯. ‘‘𑀲𑀯𑀦𑁂𑀦 𑀧𑀺𑀬𑁄 𑀫𑁂𑀲𑀺, 𑀪𑀺𑀬𑁆𑀬𑁄 𑀘𑀸𑀕𑀫𑁆𑀫 𑀤𑀲𑁆𑀲𑀦𑀁;

𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀫𑁂, 𑀯𑀲 𑀳𑀁𑀲 𑀫𑀫𑀦𑁆𑀢𑀺𑀓𑁂’’𑀢𑀺.

𑀢𑀸𑀲𑀁 𑀅𑀢𑁆𑀣𑁄 𑁋 𑀲𑀫𑁆𑀫 𑀳𑀁𑀲𑀭𑀸𑀚 𑀲𑀯𑀦𑁂𑀦 𑀏𑀓𑀲𑁆𑀲 𑀏𑀓𑀘𑁆𑀘𑁂 𑀧𑀺𑀬𑀸 𑀳𑁄𑀦𑁆𑀢𑀺, ‘‘𑀏𑀯𑀁 𑀕𑀼𑀡𑁄 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀲𑀯𑀦𑁂𑀦 𑀧𑀺𑀬𑀸𑀬𑀢𑀺, 𑀏𑀓𑀲𑁆𑀲 𑀧𑀦 𑀏𑀓𑀘𑁆𑀘𑁂 𑀤𑀺𑀲𑁆𑀯𑀸𑀯 𑀙𑀦𑁆𑀤𑁄 𑀯𑀺𑀕𑀘𑁆𑀙𑀢𑀺, 𑀧𑁂𑀫𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀔𑀸𑀤𑀺𑀢𑀼𑀁 𑀆𑀕𑀢𑀸 𑀬𑀓𑁆𑀔𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀏𑀓𑀲𑁆𑀲 𑀏𑀓𑀘𑁆𑀘𑁂 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘𑀸𑀢𑀺 𑀉𑀪𑀬𑀣𑀸𑀧𑀺 𑀧𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺. 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 𑀤𑀲𑁆𑀲𑀦𑁂𑀦𑀸𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁 𑀫𑀁 𑀧𑀺𑀬𑀸𑀬𑀲𑀺, 𑀫𑀬𑁆𑀳𑀁 𑀧𑀦 𑀢𑁆𑀯𑀁 𑀲𑀯𑀦𑁂𑀦 𑀧𑀺𑀬𑁄𑀯, 𑀤𑀲𑁆𑀲𑀦𑀁 𑀧𑀦𑀸𑀕𑀫𑁆𑀫 𑀅𑀢𑀺𑀧𑀺𑀬𑁄𑀯. 𑀏𑀯𑀁 𑀫𑀫 𑀧𑀺𑀬𑀤𑀲𑁆𑀲𑀦𑁄 𑀲𑀫𑀸𑀦𑁄 𑀘𑀺𑀢𑁆𑀢𑀓𑀽𑀝𑀁 𑀅𑀕𑀦𑁆𑀢𑁆𑀯𑀸 𑀇𑀥 𑀫𑀫 𑀲𑀦𑁆𑀢𑀺𑀓𑁂 𑀯𑀲𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁩𑁦. ‘‘𑀯𑀲𑁂𑀬𑁆𑀬𑀸𑀫 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀫𑀢𑁆𑀢𑁄 𑀘 𑀏𑀓𑀤𑀸 𑀯𑀚𑁆𑀚𑁂, 𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’𑀢𑀺.

𑀢𑀢𑁆𑀣 𑀫𑀢𑁆𑀢𑁄 𑀘 𑀏𑀓𑀤𑀸𑀢𑀺 𑀫𑀳𑀸𑀭𑀸𑀚, 𑀫𑀬𑀁 𑀢𑀯 𑀖𑀭𑁂 𑀦𑀺𑀘𑁆𑀘𑀁 𑀧𑀽𑀚𑀺𑀢𑀸 𑀯𑀲𑁂𑀬𑁆𑀬𑀸𑀫, 𑀢𑁆𑀯𑀁 𑀧𑀦 𑀓𑀤𑀸𑀘𑀺 𑀲𑀼𑀭𑀸𑀫𑀤𑀫𑀢𑁆𑀢𑁄 𑀫𑀁𑀲𑀔𑀸𑀤𑀦𑀢𑁆𑀣𑀁 ‘‘𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’𑀢𑀺 𑀯𑀤𑁂𑀬𑁆𑀬𑀸𑀲𑀺, 𑀅𑀣 𑀏𑀯𑀁 𑀢𑀯 𑀅𑀦𑀼𑀚𑀻𑀯𑀺𑀦𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀧𑀘𑁂𑀬𑁆𑀬𑀼𑀁, 𑀢𑀤𑀸𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 𑀭𑀸𑀚𑀸 ‘‘𑀢𑁂𑀦 𑀳𑀺 𑀫𑀚𑁆𑀚𑀫𑁂𑀯 𑀦 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀤𑀸𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁧. ‘‘𑀥𑀺𑀭𑀢𑁆𑀣𑀼 𑀢𑀁 𑀫𑀚𑁆𑀚𑀧𑀸𑀦𑀁, 𑀬𑀁 𑀫𑁂 𑀧𑀺𑀬𑀢𑀭𑀁 𑀢𑀬𑀸;

𑀦 𑀘𑀸𑀧𑀺 𑀫𑀚𑁆𑀚𑀁 𑀧𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀯𑀘𑁆𑀙𑀲𑀻 𑀖𑀭𑁂’’𑀢𑀺.

𑀢𑀢𑁄 𑀧𑀭𑀁 𑀩𑁄𑀥𑀺𑀲𑀢𑁆𑀢𑁄 𑀙 𑀕𑀸𑀣𑀸 𑀆𑀳 𑁋

𑁩𑁨. ‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁩𑁩. ‘‘𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁩𑁪. ‘‘𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀲𑁄;

𑀲𑀦𑁆𑀢𑀺𑀓𑁂𑀧𑀺 𑀳𑀺 𑀲𑁄 𑀤𑀽𑀭𑁂, 𑀬𑀲𑁆𑀫𑀺𑀁 𑀦𑀸𑀯𑀺𑀲𑀢𑁂 𑀫𑀦𑁄.

𑁩𑁫. ‘‘𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀤𑀼𑀝𑁆𑀞𑀘𑀺𑀢𑁆𑀢𑁄.

𑁩𑁬. ‘‘𑀲𑀁𑀯𑀲𑀦𑁆𑀢𑀸 𑀯𑀺𑀯𑀲𑀦𑁆𑀢𑀺, 𑀬𑁂 𑀤𑀺𑀲𑀸 𑀢𑁂 𑀭𑀣𑁂𑀲𑀪;

𑀆𑀭𑀸 𑀲𑀦𑁆𑀢𑁄 𑀲𑀁𑀯𑀲𑀦𑁆𑀢𑀺, 𑀫𑀦𑀲𑀸 𑀭𑀝𑁆𑀞𑀯𑀟𑁆𑀠𑀦.

𑁩𑁭. ‘‘𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸’’𑀢𑀺.

𑀢𑀢𑁆𑀣 𑀯𑀲𑁆𑀲𑀺𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀉𑀚𑀼𑀳𑀤𑀬𑀸, 𑀢𑁂𑀦 𑀢𑁂𑀲𑀁 𑀯𑀲𑁆𑀲𑀺𑀢𑀁 𑀲𑀼𑀯𑀺𑀚𑀸𑀦𑀁, 𑀫𑀦𑀼𑀲𑁆𑀲𑀸 𑀧𑀦 𑀓𑀓𑁆𑀔𑀴𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀤𑀼𑀩𑁆𑀩𑀺𑀚𑀸𑀦𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀧𑀼𑀩𑁆𑀩𑁂𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀧𑀞𑀫𑀫𑁂𑀯 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀢𑁆𑀯𑀁 𑀫𑀬𑁆𑀳𑀁 𑀜𑀸𑀢𑀓𑁄 𑀫𑀺𑀢𑁆𑀢𑁄 𑀧𑀸𑀡𑀲𑀫𑁄 𑀲𑀔𑀸’’𑀢𑀺 𑀅𑀧𑀺 𑀏𑀯𑀁 𑀫𑀜𑁆𑀜𑀢𑀺, 𑀲𑁆𑀯𑁂𑀯 𑀧𑀘𑁆𑀙𑀸 𑀤𑀺𑀲𑁄 𑀯𑁂𑀭𑀻 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀤𑀼𑀩𑁆𑀩𑀺𑀚𑀸𑀦𑀁 𑀦𑀸𑀫 𑀫𑀦𑀼𑀲𑁆𑀲𑀳𑀤𑀬𑀦𑁆𑀢𑀺. 𑀦𑀺𑀯𑀺𑀲𑀢𑀻𑀢𑀺 𑀫𑀳𑀸𑀭𑀸𑀚, 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑁂𑀫𑀯𑀲𑁂𑀦 𑀫𑀦𑁄 𑀦𑀺𑀯𑀺𑀲𑀢𑀺, 𑀲𑁄 𑀤𑀽𑀭𑁂 𑀯𑀲𑀦𑁆𑀢𑁄𑀧𑀺 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀯𑀲𑀢𑀺𑀬𑁂𑀯 𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀧𑀼𑀕𑁆𑀕𑀮𑁂 𑀫𑀦𑁄 𑀦 𑀦𑀺𑀯𑀺𑀲𑀢𑀺 𑀅𑀧𑁂𑀢𑀺, 𑀲𑁄 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄𑀧𑀺 𑀤𑀽𑀭𑁂𑀬𑁂𑀯.

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀻𑀢𑀺 𑀫𑀳𑀸𑀭𑀸𑀚, 𑀬𑁄 𑀲𑀳𑀸𑀬𑁄 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑁄 𑀘𑀺𑀢𑁆𑀢𑁂𑀦 𑀅𑀮𑁆𑀮𑀻𑀦𑀢𑁆𑀢𑀸 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀯𑀲𑀦𑁆𑀢𑁄𑀧𑀺 𑀅𑀦𑁆𑀢𑁄𑀬𑁂𑀯 𑀳𑁄𑀢𑀺. 𑀬𑁄 𑀧𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀲𑁄 𑀘𑀺𑀢𑁆𑀢𑁂𑀦 𑀅𑀦𑀮𑁆𑀮𑀻𑀦𑀢𑁆𑀢𑀸 𑀅𑀦𑁆𑀢𑁄 𑀯𑀲𑀦𑁆𑀢𑁄𑀧𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀦𑀸𑀫. 𑀬𑁂 𑀤𑀺𑀲𑀸 𑀢𑁂𑀢𑀺 𑀬𑁂 𑀯𑁂𑀭𑀺𑀦𑁄 𑀧𑀘𑁆𑀘𑀢𑁆𑀣𑀺𑀓𑀸, 𑀢𑁂 𑀏𑀓𑀢𑁄 𑀯𑀲𑀦𑁆𑀢𑀸𑀧𑀺 𑀤𑀽𑀭𑁂 𑀯𑀲𑀦𑁆𑀢𑀺𑀬𑁂𑀯 𑀦𑀸𑀫. 𑀲𑀦𑁆𑀢𑁄 𑀧𑀦 𑀧𑀡𑁆𑀟𑀺𑀢𑀸 𑀆𑀭𑀸 𑀞𑀺𑀢𑀸𑀧𑀺 𑀫𑁂𑀢𑁆𑀢𑀸𑀪𑀸𑀯𑀺𑀢𑁂𑀦 𑀫𑀦𑀲𑀸 𑀆𑀯𑀚𑁆𑀚𑁂𑀦𑁆𑀢𑀸 𑀲𑀁𑀯𑀲𑀦𑁆𑀢𑀺𑀬𑁂𑀯. 𑀧𑀼𑀭𑀸 𑀢𑁂 𑀳𑁄𑀫𑀸𑀢𑀺 𑀬𑀸𑀯 𑀢𑀯 𑀅𑀧𑁆𑀧𑀺𑀬𑀸 𑀦 𑀳𑁄𑀫, 𑀢𑀸𑀯𑀤𑁂𑀯 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀸𑀫𑀸𑀢𑀺 𑀯𑀤𑀢𑀺.

𑀅𑀣 𑀦𑀁 𑀭𑀸𑀚𑀸 𑀆𑀳 𑁋

𑁩𑁮. ‘‘𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;

𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁, 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;

𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬’’𑀦𑁆𑀢𑀺.

𑀢𑀢𑁆𑀣 𑀏𑀯𑀁 𑀘𑁂𑀢𑀺 𑀲𑀘𑁂 𑀳𑀁𑀲𑀭𑀸𑀚, 𑀏𑀯𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀬𑀸𑀘𑀫𑀸𑀦𑀸𑀦𑀁 𑀅𑀫𑁆𑀳𑀸𑀓𑀁 𑀇𑀫𑀁 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺, 𑀢𑀯 𑀧𑀭𑀺𑀘𑀸𑀭𑀓𑀸𑀦𑀁 𑀲𑀫𑀸𑀦𑀸𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀅𑀣 𑀦𑀁 𑀏𑀯𑀁 𑀬𑀸𑀘𑀸𑀫. 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬𑀦𑁆𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀇𑀥 𑀆𑀕𑀫𑀦𑀸𑀬 𑀯𑀸𑀭𑀁 𑀓𑀭𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁩𑁯. ‘‘𑀏𑀯𑀁 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;

𑀢𑀼𑀬𑁆𑀳𑀁 𑀘𑀸𑀧𑀺 𑀫𑀳𑀸𑀭𑀸𑀚, 𑀫𑀬𑁆𑀳𑀜𑁆𑀘 𑀭𑀝𑁆𑀞𑀯𑀟𑁆𑀠𑀦;

𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫𑀼, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂’’𑀢𑀺.

𑀢𑀢𑁆𑀣 𑀏𑀯𑀁 𑀘𑁂 𑀦𑁄𑀢𑀺 𑀫𑀳𑀸𑀭𑀸𑀚, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀲𑀘𑁂 𑀅𑀫𑁆𑀳𑀸𑀓𑀫𑁆𑀧𑀺 𑀏𑀯𑀁 𑀯𑀺𑀳𑀭𑀦𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀅𑀧𑀺𑀘 𑀢𑁆𑀯𑀁 𑀫𑀬𑀸 𑀤𑀺𑀦𑁆𑀦𑀁 𑀑𑀯𑀸𑀤𑀫𑁂𑀯 𑀫𑀫 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀏𑀯𑀁 𑀇𑀢𑁆𑀢𑀭𑀚𑀻𑀯𑀺𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀯𑀜𑁆𑀳𑀺 𑀫𑁂 𑀑𑀯𑀸𑀤𑀁 𑀓𑀭𑁄𑀦𑁆𑀢𑁄 𑀫𑀁 𑀧𑀲𑁆𑀲𑀺𑀲𑁆𑀲𑀢𑀺𑀬𑁂𑀯𑀸𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀧𑀺 𑀫𑀬𑀸 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀚𑁆𑀛𑀺𑀫𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑁂𑀲𑀳𑀁𑀲𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀚𑀯𑀦𑀳𑀁𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀯𑀦𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁭𑁭] 𑁪. 𑀘𑀽𑀴𑀦𑀸𑀭𑀤𑀚𑀸𑀢𑀓𑀯𑀡𑁆𑀡𑀦𑀸

𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀺𑀭𑁂𑀓𑀲𑁆𑀲 𑀓𑀼𑀮𑀲𑁆𑀲 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀥𑀻𑀢𑀸 𑀅𑀳𑁄𑀲𑀺 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀦 𑀘 𑀦𑀁 𑀓𑁄𑀘𑀺 𑀯𑀸𑀭𑁂𑀲𑀺. 𑀅𑀣𑀲𑁆𑀲𑀸 𑀫𑀸𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀫 𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀸, 𑀦 𑀘 𑀦𑀁 𑀓𑁄𑀘𑀺 𑀯𑀸𑀭𑁂𑀢𑀺, 𑀆𑀫𑀺𑀲𑁂𑀦 𑀫𑀘𑁆𑀙𑀁 𑀯𑀺𑀬 𑀏𑀢𑀸𑀬 𑀏𑀓𑀁 𑀲𑀸𑀓𑀺𑀬𑀪𑀺𑀓𑁆𑀔𑀼𑀁 𑀧𑀮𑁄𑀪𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀤𑀸 𑀘 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀺𑀓𑁆𑀔𑀸𑀓𑀸𑀫𑀢𑀁 𑀧𑀳𑀸𑀬 𑀆𑀮𑀲𑀺𑀬𑁄 𑀲𑀭𑀻𑀭𑀫𑀡𑁆𑀟𑀦𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀸𑀲𑀺. 𑀫𑀳𑀸𑀉𑀧𑀸𑀲𑀺𑀓𑀸 𑀕𑁂𑀳𑁂 𑀬𑀸𑀕𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑀁 𑀉𑀧𑀥𑀸𑀭𑁂𑀦𑁆𑀢𑀻 𑀢𑁂𑀧𑀺𑀝𑀓𑀆𑀪𑀺𑀥𑀫𑁆𑀫𑀺𑀓𑀯𑀺𑀦𑀬𑀥𑀭𑀸𑀦𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀓𑀜𑁆𑀘𑀺 𑀕𑀬𑁆𑀳𑀼𑀧𑀕𑀁 𑀅𑀤𑀺𑀲𑁆𑀯𑀸 𑀢𑁂𑀲𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑀲𑀤𑀺𑀲𑀸𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀅𑀦𑁆𑀢𑀭𑁂 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸𑀯 𑀏𑀓𑀁 𑀬𑀸𑀯 𑀩𑀳𑀺 𑀅𑀧𑀗𑁆𑀕𑀸 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀢𑁆𑀯𑀸 𑀓𑁂𑀲𑁂 𑀑𑀲𑀡𑁆𑀳𑁂𑀢𑁆𑀯𑀸 𑀤𑀼𑀓𑀽𑀮𑀦𑁆𑀢𑀭𑀯𑀸𑀲𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀖𑀝𑀺𑀢𑀫𑀝𑁆𑀞𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀡𑁆𑀡𑀧𑀢𑁆𑀢𑀁 𑀆𑀤𑀸𑀬 𑀫𑀦𑁄𑀭𑀫𑀁 𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑀁 𑀯𑀺𑀲𑁆𑀲𑀝𑁆𑀞𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀣, 𑀪𑀦𑁆𑀢𑁂’’𑀢𑀺 𑀖𑀭𑀁 𑀆𑀦𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀆𑀤𑀻𑀳𑀺 𑀧𑀭𑀺𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀢𑀁 𑀪𑀺𑀓𑁆𑀔𑀼𑀁 ‘‘𑀪𑀦𑁆𑀢𑁂, 𑀇𑀢𑁄 𑀧𑀝𑁆𑀞𑀸𑀬 𑀇𑀥𑁂𑀯𑀸𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀅𑀧𑀭𑀪𑀸𑀕𑁂 𑀯𑀺𑀲𑁆𑀲𑀸𑀲𑀺𑀓𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀉𑀧𑀸𑀲𑀺𑀓𑀸 𑀢𑀲𑁆𑀲 𑀲𑀯𑀦𑀧𑀣𑁂 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀉𑀧𑀪𑁄𑀕𑀧𑀭𑀺𑀪𑁄𑀕𑀫𑀢𑁆𑀢𑀸 𑀅𑀢𑁆𑀣𑀺, 𑀢𑀣𑀸𑀭𑀽𑀧𑁄 𑀧𑀦 𑀫𑁂 𑀧𑀼𑀢𑁆𑀢𑁄 𑀯𑀸 𑀚𑀸𑀫𑀸𑀢𑀸 𑀯𑀸 𑀕𑁂𑀳𑀁 𑀯𑀺𑀘𑀸𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀦𑀼 𑀔𑁄 𑀓𑀣𑁂𑀢𑀻’’𑀢𑀺 𑀣𑁄𑀓𑀁 𑀳𑀤𑀬𑁂 𑀯𑀺𑀤𑁆𑀥𑁄 𑀯𑀺𑀬 𑀅𑀳𑁄𑀲𑀺. 𑀲𑀸 𑀥𑀻𑀢𑀭𑀁 𑀆𑀳 ‘‘𑀇𑀫𑀁 𑀧𑀮𑁄𑀪𑁂𑀢𑁆𑀯𑀸 𑀢𑀯 𑀯𑀲𑁂 𑀯𑀢𑁆𑀢𑀸𑀧𑁂𑀳𑀻’’𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀇𑀢𑁆𑀣𑀺𑀓𑀼𑀢𑁆𑀢𑀯𑀺𑀮𑀸𑀲𑁂𑀳𑀺 𑀢𑀁 𑀧𑀮𑁄𑀪𑁂𑀲𑀺. 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀢𑀺 𑀦 𑀘 𑀣𑀽𑀮𑀲𑀭𑀻𑀭𑀸 𑀤𑀝𑁆𑀞𑀩𑁆𑀩𑀸, 𑀣𑀽𑀮𑀸 𑀯𑀸 𑀳𑁄𑀢𑀼 𑀓𑀺𑀲𑀸 𑀯𑀸, 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁂𑀦 𑀧𑀦 𑀣𑀽𑀮𑀢𑀸𑀬 ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀤𑀳𑀭𑁄 𑀓𑀺𑀮𑁂𑀲𑀯𑀲𑀺𑀓𑁄 𑀳𑀼𑀢𑁆𑀯𑀸 ‘‘𑀦 𑀤𑀸𑀦𑀸𑀳𑀁 𑀩𑀼𑀤𑁆𑀥𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀫𑀺𑀲𑁆𑀲𑀸𑀫𑀺, 𑀢𑀢𑁆𑀭 𑀫𑁂 𑀯𑀢𑁆𑀣𑀸𑀦𑀺 𑀧𑁂𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀻’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀳. 𑀢𑁂 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀬, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀧𑀼𑀩𑁆𑀩𑁂𑀧𑁂𑀲𑀸 𑀢𑀯 𑀅𑀭𑀜𑁆𑀜𑁂 𑀯𑀲𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀫𑀳𑀦𑁆𑀢𑀁 𑀅𑀦𑀢𑁆𑀣𑀫𑀓𑀸𑀲𑀺, 𑀧𑀼𑀦 𑀢𑁆𑀯𑀁 𑀏𑀢𑀫𑁂𑀯 𑀦𑀺𑀲𑁆𑀲𑀸𑀬 𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀫𑀳𑀸𑀪𑁄𑀕𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀲𑀺, 𑀅𑀣𑀲𑁆𑀲 𑀪𑀭𑀺𑀬𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀲𑁄 ‘‘𑀬𑀣𑁂𑀯 𑀫𑁂 𑀧𑀺𑀬𑀪𑀭𑀺𑀬𑀸𑀬, 𑀏𑀯𑀁 𑀫𑀬𑀺𑀧𑀺 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀧𑀼𑀢𑁆𑀢𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀅𑀭𑀜𑁆𑀜𑁂 𑀯𑀺𑀳𑀸𑀲𑀺. 𑀢𑀤𑀸 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀘𑁄𑀭𑀸 𑀚𑀦𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀓𑀭𑀫𑀭𑁂 𑀕𑀳𑁂𑀢𑁆𑀯𑀸 𑀪𑀡𑁆𑀟𑀺𑀓𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀦𑁆𑀢𑀁 𑀧𑀸𑀧𑀬𑀺𑀁𑀲𑀼. 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑀸 𑀅𑀪𑀺𑀭𑀽𑀧𑀸 𑀓𑀼𑀫𑀸𑀭𑀺𑀓𑀸 𑀓𑁂𑀭𑀸𑀝𑀺𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀅𑀫𑁆𑀳𑁂 𑀕𑀳𑁂𑀢𑁆𑀯𑀸 𑀤𑀸𑀲𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀏𑀓𑁂𑀦 𑀉𑀧𑀸𑀬𑁂𑀦 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 ‘‘𑀲𑀸𑀫𑀺, 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑀸𑀫𑁆𑀳𑀺, 𑀣𑁄𑀓𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀣𑀸’’𑀢𑀺 𑀯𑀢𑁆𑀯𑀸 𑀘𑁄𑀭𑁂 𑀯𑀜𑁆𑀘𑁂𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀢𑁆𑀢𑀁 𑀅𑀲𑁆𑀲𑀫𑁂 𑀞𑀧𑁂𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑀓𑀸𑀮𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀁 𑀅𑀲𑁆𑀲𑀫𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀁 𑀢𑀸𑀧𑀲𑀓𑀼𑀫𑀸𑀭𑀁 𑀓𑀸𑀫𑀭𑀢𑀺𑀬𑀸 𑀧𑀮𑁄𑀪𑁂𑀢𑁆𑀯𑀸 𑀲𑀻𑀮𑀫𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀢𑁂 𑀅𑀭𑀜𑁆𑀜𑀯𑀸𑀲𑁂𑀦, 𑀏𑀳𑀺 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫, 𑀢𑀢𑁆𑀭 𑀳𑀺 𑀭𑀽𑀧𑀸𑀤𑀬𑁄 𑀓𑀸𑀫𑀕𑀼𑀡𑀸 𑀲𑀼𑀮𑀪𑀸’’𑀢𑀺 𑀆𑀳. 𑀲𑁄𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀧𑀺𑀢𑀸 𑀢𑀸𑀯 𑀫𑁂 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀆𑀳𑀭𑀺𑀢𑀼𑀁 𑀕𑀢𑁄, 𑀢𑀁 𑀤𑀺𑀲𑁆𑀯𑀸 𑀉𑀪𑁄𑀧𑀺 𑀏𑀓𑀢𑁄𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀭𑀼𑀡𑀤𑀸𑀭𑀓𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀺, 𑀧𑀺𑀢𑀭𑀸 𑀧𑀦𑀲𑁆𑀲 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀆𑀕𑀦𑁆𑀢𑁆𑀯𑀸 ‘𑀇𑀥 𑀓𑀺𑀁 𑀓𑀭𑁄𑀲𑀻’𑀢𑀺 𑀫𑀁 𑀧𑁄𑀣𑁂𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑁂𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 ‘‘𑀅𑀳𑀁 𑀧𑀼𑀭𑀢𑁄 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀘𑁆𑀙𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀲𑀜𑁆𑀜𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀲𑁆𑀲𑀸 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁄 𑀬𑀣𑀸 𑀧𑀼𑀭𑁂 𑀓𑀺𑀜𑁆𑀘𑀺 𑀯𑀢𑁆𑀢𑀁 𑀅𑀓𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀦𑁆𑀢𑁄𑀧𑀡𑁆𑀡𑀲𑀸𑀮𑀸𑀬 𑀧𑀚𑁆𑀛𑀸𑀬𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄 𑀨𑀮𑀸𑀨𑀮𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀧𑀤𑀯𑀮𑀜𑁆𑀚𑁄, ‘‘𑀧𑀼𑀢𑁆𑀢𑀲𑁆𑀲 𑀫𑀫 𑀲𑀻𑀮𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀸𑀨𑀮𑀁 𑀑𑀢𑀸𑀭𑁂𑀢𑁆𑀯𑀸 𑀧𑀼𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋