𑁧𑁨. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

[𑁪𑁬𑁪] 𑁧. 𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑁧-𑁧𑁨. 𑀮𑀼𑀤𑁆𑀥𑀸𑀦𑀁 𑀮𑀳𑀼𑀘𑀺𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀚𑀸𑀢𑀓𑀁 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺;

𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁬𑁫] 𑁨. 𑀪𑀤𑁆𑀤𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀓𑀸 𑀢𑁆𑀯𑀁 𑀲𑀼𑀤𑁆𑀥𑁂𑀳𑀺 𑀯𑀢𑁆𑀣𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀩𑀤𑁆𑀥𑀪𑁄𑀚𑀦𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀯𑀺𑀲𑀸𑀔𑀸𑀬 𑀘 𑀓𑁄𑀲𑀮𑀭𑀜𑁆𑀜𑁄 𑀘. 𑀢𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀤𑀻𑀬𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀦𑁂𑀢𑁆𑀣 𑀓𑁄𑀘𑀺 𑀯𑀺𑀲𑁆𑀲𑀸𑀲𑀺𑀓𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀭𑀸𑀚𑀦𑀺𑀯𑁂𑀲𑀦𑁂 𑀦 𑀪𑀼𑀜𑁆𑀚𑀦𑁆𑀢𑀺, 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀸 𑀯𑀺𑀲𑀸𑀔𑀸𑀬 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀧𑀡𑁆𑀡𑀸𑀓𑀸𑀭𑀁 𑀆𑀳𑀝𑀁 ‘‘𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺 𑀪𑀢𑁆𑀢𑀕𑁆𑀕𑀁 𑀧𑁂𑀲𑁂𑀢𑁆𑀯𑀸 ‘‘𑀪𑀢𑁆𑀢𑀕𑁆𑀕𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀳𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀕𑁂𑀳𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀪𑁄𑀚𑀦𑀁 𑀦𑀸𑀫 𑀓𑀺𑀁 𑀧𑀭𑀫’’𑀦𑁆𑀢𑀺 𑀧𑀼𑀘𑁆𑀙𑀺. 𑀯𑀺𑀲𑁆𑀲𑀸𑀲𑀧𑀭𑀫𑀁 𑀫𑀳𑀸𑀭𑀸𑀚, 𑀓𑀜𑁆𑀚𑀺𑀓𑀫𑀢𑁆𑀢𑀓𑀫𑁆𑀧𑀺 𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀁 𑀫𑀥𑀼𑀭𑀁 𑀳𑁄𑀢𑀻𑀢𑀺. 𑀪𑀦𑁆𑀢𑁂, 𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀸𑀲𑁄 𑀳𑁄𑀢𑀻𑀢𑀺? ‘‘𑀜𑀸𑀢𑀻𑀳𑀺 𑀯𑀸 𑀲𑁂𑀓𑁆𑀔𑀓𑀼𑀮𑁂𑀳𑀺 𑀯𑀸, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀏𑀓𑀁 𑀲𑀓𑁆𑀬𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀜𑀸𑀢𑀓𑁂 𑀯𑀺𑀬 𑀯𑀺𑀲𑁆𑀲𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀁 𑀤𑀽𑀢𑀁 𑀧𑁂𑀲𑁂𑀲𑀺 ‘‘𑀥𑀻𑀢𑀭𑀁 𑀫𑁂 𑀤𑁂𑀣, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀜𑀸𑀢𑀺𑀪𑀸𑀯𑀁 𑀇𑀘𑁆𑀙𑀸𑀫𑀻’’𑀢𑀺.

𑀲𑀸𑀓𑀺𑀬𑀸 𑀤𑀽𑀢𑀯𑀘𑀦𑀁 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 ‘‘𑀫𑀬𑀁 𑀓𑁄𑀲𑀮𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀯𑀲𑀸𑀫, 𑀲𑀘𑁂 𑀤𑀸𑀭𑀺𑀓𑀁 𑀦 𑀤𑀲𑁆𑀲𑀸𑀫, 𑀫𑀳𑀦𑁆𑀢𑀁 𑀯𑁂𑀭𑀁 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀤𑀲𑁆𑀲𑀸𑀫, 𑀓𑀼𑀮𑀯𑀁𑀲𑁄 𑀦𑁄 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺. 𑀅𑀣 𑀦𑁂 𑀫𑀳𑀸𑀦𑀸𑀫𑁄 𑀆𑀳 𑁋 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀫 𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀦𑀸𑀫 𑀦𑀸𑀕𑀫𑀼𑀡𑁆𑀟𑀸𑀬 𑀦𑀸𑀫 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀧𑀺𑀢𑀼 𑀯𑀁𑀲𑁂𑀦 𑀔𑀢𑁆𑀢𑀺𑀬𑀚𑀸𑀢𑀺𑀓𑀸, 𑀢𑀫𑀲𑁆𑀲 ‘𑀔𑀢𑁆𑀢𑀺𑀬𑀓𑀜𑁆𑀜𑀸’𑀢𑀺 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺. 𑀲𑀸𑀓𑀺𑀬𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀽𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀸𑀥𑀼, 𑀤𑀸𑀭𑀺𑀓𑀁 𑀤𑀲𑁆𑀲𑀸𑀫, 𑀇𑀤𑀸𑀦𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳𑀁𑀲𑀼. 𑀤𑀽𑀢𑀸 𑀘𑀺𑀦𑁆𑀢𑁂𑀲𑀼𑀁 ‘‘𑀇𑀫𑁂 𑀲𑀸𑀓𑀺𑀬𑀸 𑀦𑀸𑀫 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀺𑀦𑁄, ‘𑀲𑀤𑀺𑀲𑀻 𑀦𑁄’𑀢𑀺 𑀯𑀢𑁆𑀯𑀸 𑀅𑀲𑀤𑀺𑀲𑀺𑀫𑁆𑀧𑀺 𑀤𑀤𑁂𑀬𑁆𑀬𑀼𑀁, 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀫𑀸𑀦𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀫𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀬𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀲𑀸𑀓𑀺𑀬𑀸 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀫𑀳𑀸𑀦𑀸𑀫𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀫 𑀪𑁄𑀚𑀦𑀓𑀸𑀮𑁂 𑀯𑀸𑀲𑀪𑀔𑀢𑁆𑀢𑀺𑀬𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀫𑀬𑀸 𑀏𑀓𑀲𑁆𑀫𑀺𑀁 𑀓𑀩𑀴𑁂 𑀕𑀳𑀺𑀢𑀫𑀢𑁆𑀢𑁂 ‘𑀤𑁂𑀯, 𑀅𑀲𑀼𑀓𑀭𑀸𑀚𑀸 𑀧𑀡𑁆𑀡𑀁 𑀧𑀳𑀺𑀡𑀺, 𑀇𑀫𑀁 𑀢𑀸𑀯 𑀲𑀸𑀲𑀦𑀁 𑀲𑀼𑀡𑀸𑀣𑀸’𑀢𑀺 𑀧𑀡𑁆𑀡𑀁 𑀤𑀲𑁆𑀲𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀪𑀼𑀜𑁆𑀚𑀫𑀸𑀦𑁂 𑀓𑀼𑀫𑀸𑀭𑀺𑀓𑀁 𑀅𑀮𑀗𑁆𑀓𑀭𑀺𑀁𑀲𑀼.

𑀫𑀳𑀸𑀦𑀸𑀫𑁄 ‘‘𑀥𑀻𑀢𑀭𑀁 𑀫𑁂 𑀆𑀦𑁂𑀣, 𑀫𑀬𑀸 𑀲𑀤𑁆𑀥𑀺𑀁 𑀪𑀼𑀜𑁆𑀚𑀢𑀽’’𑀢𑀺 𑀆𑀳. 𑀅𑀣 𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀣𑁄𑀓𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀲𑀸 ‘‘𑀧𑀺𑀢𑀭𑀸 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀧𑀸𑀢𑀺𑀬𑀁 𑀳𑀢𑁆𑀣𑀁 𑀑𑀢𑀸𑀭𑁂𑀲𑀺. 𑀫𑀳𑀸𑀦𑀸𑀫𑁄𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀞𑀧𑁂𑀲𑀺. 𑀤𑀼𑀢𑀺𑀬𑀧𑀺𑀡𑁆𑀟𑀸𑀬 𑀳𑀢𑁆𑀣𑁂 𑀧𑀲𑀸𑀭𑀺𑀢𑁂 ‘‘𑀤𑁂𑀯, 𑀅𑀲𑀼𑀓𑀭𑀜𑁆𑀜𑀸 𑀧𑀡𑁆𑀡𑀁 𑀧𑀳𑀺𑀢𑀁, 𑀇𑀫𑀁 𑀢𑀸𑀯 𑀲𑀸𑀲𑀦𑀁 𑀲𑀼𑀡𑀸𑀣𑀸’’𑀢𑀺 𑀧𑀡𑁆𑀡𑀁 𑀉𑀧𑀦𑀸𑀫𑁂𑀲𑀼𑀁. 𑀫𑀳𑀸𑀦𑀸𑀫𑁄 ‘‘𑀅𑀫𑁆𑀫, 𑀢𑁆𑀯𑀁 𑀪𑀼𑀜𑁆𑀚𑀸𑀳𑀻’’𑀢𑀺 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀸𑀢𑀺𑀬𑀸𑀬𑁂𑀯 𑀓𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀧𑀡𑁆𑀡𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀢𑀁 𑀲𑀸𑀲𑀦𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲𑁂𑀯 𑀇𑀢𑀭𑀸 𑀪𑀼𑀜𑁆𑀚𑀺. 𑀲𑁄 𑀢𑀲𑁆𑀲𑀸 𑀪𑀼𑀢𑁆𑀢𑀓𑀸𑀮𑁂 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑀽𑀢𑀸 ‘‘𑀦𑀺𑀘𑁆𑀙𑀬𑁂𑀦𑁂𑀲𑀸 𑀏𑀢𑀲𑁆𑀲 𑀥𑀻𑀢𑀸’’𑀢𑀺 𑀦𑀺𑀝𑁆𑀞𑀫𑀓𑀁𑀲𑀼, 𑀦 𑀢𑀁 𑀅𑀦𑁆𑀢𑀭𑀁 𑀚𑀸𑀦𑀺𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀫𑀳𑀸𑀦𑀸𑀫𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀥𑀻𑀢𑀭𑀁 𑀧𑁂𑀲𑁂𑀲𑀺. 𑀤𑀽𑀢𑀸𑀧𑀺 𑀦𑀁 𑀲𑀸𑀯𑀢𑁆𑀣𑀺𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀫𑀳𑀸𑀦𑀸𑀫𑀲𑁆𑀲 𑀥𑀻𑀢𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀓𑀮𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀁 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀅𑀪𑀺𑀲𑀺𑀜𑁆𑀘𑀸𑀧𑁂𑀲𑀺. 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸.

𑀅𑀣𑀲𑁆𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀫𑀤𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀬𑁆𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 ‘‘𑀲𑀓𑁆𑀬𑀭𑀸𑀚𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀓𑀺𑀫𑀲𑁆𑀲 𑀦𑀸𑀫𑀁 𑀓𑀭𑁄𑀫𑀸’’𑀢𑀺. 𑀢𑀁 𑀧𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄 𑀅𑀫𑀘𑁆𑀘𑁄 𑀣𑁄𑀓𑀁 𑀩𑀥𑀺𑀭𑀥𑀸𑀢𑀼𑀓𑁄, 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀬𑁆𑀬𑀓𑀲𑁆𑀲𑀸𑀭𑁄𑀘𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀅𑀯𑀺𑀚𑀸𑀬𑀺𑀢𑁆𑀯𑀸𑀧𑀺 𑀲𑀩𑁆𑀩𑀁 𑀚𑀦𑀁 𑀅𑀪𑀺𑀪𑀯𑀢𑀺, 𑀇𑀤𑀸𑀦𑀺 𑀧𑀦 𑀅𑀢𑀺𑀯𑀺𑀬 𑀭𑀜𑁆𑀜𑁄 𑀯𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑁄 𑀩𑀥𑀺𑀭𑀅𑀫𑀘𑁆𑀘𑁄 ‘‘𑀯𑀮𑁆𑀮𑀪𑀸’’𑀢𑀺 𑀯𑀘𑀦𑀁 𑀤𑀼𑀲𑁆𑀲𑀼𑀢𑀁 𑀲𑀼𑀢𑁆𑀯𑀸 ‘‘𑀯𑀺𑀝𑀝𑀽𑀪𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀓𑀺𑀭 ‘𑀯𑀺𑀝𑀝𑀽𑀪𑁄’𑀢𑀺 𑀦𑀸𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀧𑁄𑀭𑀸𑀡𑀓𑀁 𑀦𑁄 𑀓𑀼𑀮𑀤𑀢𑁆𑀢𑀺𑀓𑀁 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀺𑀝𑀝𑀽𑀪𑁄’’𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀼𑀫𑀸𑀭𑁄 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀜𑁆𑀜𑁂𑀲𑀁 𑀓𑀼𑀫𑀸𑀭𑀸𑀦𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀳𑀢𑁆𑀣𑀺𑀭𑀽𑀧𑀓𑀅𑀲𑁆𑀲𑀭𑀽𑀧𑀓𑀸𑀤𑀻𑀦𑀺 𑀆𑀳𑀭𑀺𑀬𑀫𑀸𑀦𑀸𑀦𑀺 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀅𑀜𑁆𑀜𑁂𑀲𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀧𑀡𑁆𑀡𑀸𑀓𑀸𑀭𑁄 𑀆𑀳𑀭𑀺𑀬𑀢𑀺, 𑀫𑀬𑁆𑀳𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀲𑀺, 𑀓𑀺𑀁 𑀢𑁆𑀯𑀁 𑀦𑀺𑀫𑁆𑀫𑀸𑀢𑀸 𑀦𑀺𑀧𑁆𑀧𑀺𑀢𑀸𑀲𑀻’’𑀢𑀺? 𑀅𑀣 𑀦𑀁 𑀲𑀸 ‘‘𑀢𑀸𑀢, 𑀲𑀓𑁆𑀬𑀭𑀸𑀚𑀸𑀦𑁄 𑀫𑀸𑀢𑀸𑀫𑀳𑀸 𑀤𑀽𑀭𑁂 𑀧𑀦 𑀯𑀲𑀦𑁆𑀢𑀺, 𑀢𑁂𑀦 𑀢𑁂 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀯𑀜𑁆𑀘𑁂𑀲𑀺.

𑀧𑀼𑀦 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 ‘‘𑀅𑀫𑁆𑀫, 𑀫𑀸𑀢𑀸𑀫𑀳𑀓𑀼𑀮𑀁 𑀧𑀲𑁆𑀲𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 ‘‘𑀅𑀮𑀁 𑀢𑀸𑀢, 𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀸𑀭𑀺𑀬𑀫𑀸𑀦𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀳𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀭𑁂𑀢𑀭𑀁 𑀧𑀡𑁆𑀡𑀁 𑀧𑁂𑀲𑁂𑀲𑀺 ‘‘𑀅𑀳𑀁 𑀇𑀥 𑀲𑀼𑀔𑀁 𑀯𑀲𑀸𑀫𑀺, 𑀲𑀸𑀫𑀺𑀦𑁄 𑀓𑀺𑀜𑁆𑀘𑀺 𑀅𑀦𑁆𑀢𑀭𑀁 𑀫𑀸 𑀤𑀲𑁆𑀲𑀬𑀺𑀁𑀲𑀽’’𑀢𑀺. 𑀲𑀸𑀓𑀺𑀬𑀸 𑀯𑀺𑀝𑀝𑀽𑀪𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀯𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀢𑀲𑁆𑀲 𑀤𑀳𑀭𑀤𑀳𑀭𑁂 𑀓𑀼𑀫𑀸𑀭𑀓𑁂 𑀚𑀦𑀧𑀤𑀁 𑀧𑀳𑀺𑀡𑀺𑀁𑀲𑀼. 𑀓𑀼𑀫𑀸𑀭𑁂 𑀓𑀧𑀺𑀮𑀯𑀢𑁆𑀣𑀼𑀁 𑀲𑀫𑁆𑀧𑀢𑁆𑀢𑁂 𑀲𑀸𑀓𑀺𑀬𑀸 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀓𑀼𑀫𑀸𑀭𑁄 𑀲𑀦𑁆𑀣𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 ‘‘𑀅𑀬𑀁 𑀢𑁂, 𑀢𑀸𑀢, 𑀫𑀸𑀢𑀸𑀫𑀳𑁄, 𑀅𑀬𑀁 𑀫𑀸𑀢𑀼𑀮𑁄’’𑀢𑀺 𑀯𑀤𑀺𑀁𑀲𑀼 𑀲𑁄 𑀲𑀩𑁆𑀩𑁂 𑀯𑀦𑁆𑀤𑀫𑀸𑀦𑁄 𑀯𑀺𑀘𑀭𑀺. 𑀲𑁄 𑀬𑀸𑀯𑀧𑀺𑀝𑁆𑀞𑀺𑀬𑀸 𑀭𑀼𑀚𑀦𑀧𑁆𑀧𑀫𑀸𑀡𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑁆𑀧𑀺 𑀅𑀢𑁆𑀢𑀸𑀦𑀁 𑀯𑀦𑁆𑀤𑀫𑀸𑀦𑀁 𑀅𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀁 𑀯𑀦𑁆𑀤𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀲𑀸𑀓𑀺𑀬𑀸 ‘‘𑀢𑀸𑀢, 𑀢𑀯 𑀓𑀦𑀺𑀝𑁆𑀞𑀓𑀼𑀫𑀸𑀭𑀸 𑀚𑀦𑀧𑀤𑀁 𑀕𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑁄 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀅𑀣𑁂𑀓𑀸 𑀤𑀸𑀲𑀻 𑀲𑀦𑁆𑀣𑀸𑀕𑀸𑀭𑁂 𑀢𑁂𑀦 𑀦𑀺𑀲𑀺𑀦𑁆𑀦𑀨𑀮𑀓𑀁 ‘‘𑀇𑀤𑀁 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀤𑀸𑀲𑀺𑀬𑀸 𑀧𑀼𑀢𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀨𑀮𑀓’’𑀦𑁆𑀢𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀔𑀻𑀭𑁄𑀤𑀓𑁂𑀦 𑀥𑁄𑀯𑀺. 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀆𑀯𑀼𑀥𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑁄 𑀢𑀁 𑀕𑀡𑁆𑀳𑀦𑁆𑀢𑁄 𑀯𑀺𑀝𑀝𑀽𑀪𑀓𑀼𑀫𑀸𑀭𑀲𑁆𑀲 𑀅𑀓𑁆𑀓𑁄𑀲𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀅𑀦𑁆𑀢𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀚𑀸𑀢𑀸’’𑀢𑀺 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀩𑀮𑀓𑀸𑀬𑀲𑁆𑀲 𑀓𑀣𑁂𑀲𑀺. ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀓𑀺𑀭 𑀤𑀸𑀲𑀺𑀬𑀸 𑀥𑀻𑀢𑀸’’𑀢𑀺 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀓𑀼𑀫𑀸𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀏𑀢𑁂 𑀢𑀸𑀯 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀔𑀻𑀭𑁄𑀤𑀓𑁂𑀦 𑀥𑁄𑀯𑀦𑁆𑀢𑀼, 𑀅𑀳𑀁 𑀧𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 𑀏𑀢𑁂𑀲𑀁 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀁 𑀕𑀢𑁂 𑀅𑀫𑀘𑁆𑀘𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀩𑁆𑀩𑁂 𑀫𑀬𑁆𑀳𑀁 𑀤𑀸𑀲𑀺𑀥𑀻𑀢𑀭𑀁 𑀅𑀤𑀁𑀲𑀽’’𑀢𑀺 𑀲𑀸𑀓𑀺𑀬𑀸𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀘 𑀧𑀼𑀢𑁆𑀢𑀲𑁆𑀲 𑀘 𑀤𑀺𑀦𑁆𑀦𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀧𑀭𑀺𑀳𑀸𑀭𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀢𑁆𑀣𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀜𑀸𑀢𑀓𑁂𑀳𑀺 𑀤𑀸𑀲𑀺𑀥𑀻𑀢𑀸 𑀫𑀬𑁆𑀳𑀁 𑀤𑀺𑀦𑁆𑀦𑀸, 𑀢𑁂𑀦𑀲𑁆𑀲𑀸 𑀅𑀳𑀁 𑀲𑀧𑀼𑀢𑁆𑀢𑀸𑀬 𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀧𑀭𑀺𑀳𑀸𑀭𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀬𑀼𑀢𑁆𑀢𑀁, 𑀫𑀳𑀸𑀭𑀸𑀚, 𑀲𑀸𑀓𑀺𑀬𑁂𑀳𑀺 𑀓𑀢𑀁, 𑀤𑀤𑀦𑁆𑀢𑁂𑀳𑀺 𑀦𑀸𑀫 𑀲𑀫𑀸𑀦𑀚𑀸𑀢𑀺𑀓𑀸 𑀤𑀸𑀢𑀩𑁆𑀩𑀸 𑀅𑀲𑁆𑀲. 𑀢𑀁 𑀧𑀦 𑀫𑀳𑀸𑀭𑀸𑀚, 𑀯𑀤𑀸𑀫𑀺 𑀯𑀸𑀲𑀪𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀭𑀸𑀚𑀥𑀻𑀢𑀸 𑀔𑀢𑁆𑀢𑀺𑀬𑀲𑁆𑀲 𑀭𑀜𑁆𑀜𑁄 𑀕𑁂𑀳𑁂 𑀅𑀪𑀺𑀲𑁂𑀓𑀁 𑀮𑀪𑀺, 𑀯𑀺𑀝𑀝𑀽𑀪𑁄𑀧𑀺 𑀔𑀢𑁆𑀢𑀺𑀬𑀭𑀸𑀚𑀸𑀦𑀫𑁂𑀯 𑀧𑀝𑀺𑀘𑁆𑀘 𑀚𑀸𑀢𑁄, 𑀫𑀸𑀢𑀼𑀕𑁄𑀢𑁆𑀢𑀁 𑀦𑀸𑀫 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀤𑀮𑀺𑀤𑁆𑀤𑀺𑀢𑁆𑀣𑀺𑀬𑀸 𑀓𑀝𑁆𑀞𑀳𑀸𑀭𑀺𑀓𑀸𑀬𑀧𑀺 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀅𑀤𑀁𑀲𑀼, 𑀢𑀲𑁆𑀲𑀸 𑀘 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀓𑀼𑀫𑀸𑀭𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀭𑀚𑁆𑀚𑀁 𑀓𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄’’𑀢𑀺 𑀓𑀝𑁆𑀞𑀯𑀸𑀳𑀦𑀚𑀸𑀢𑀓𑀁 (𑀚𑀸. 𑁧.𑁧.𑁭) 𑀓𑀣𑁂𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀓𑀺𑀭 𑀧𑀫𑀸𑀡’’𑀦𑁆𑀢𑀺 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀧𑀓𑀢𑀺𑀧𑀭𑀺𑀳𑀸𑀭𑀫𑁂𑀯 𑀤𑀸𑀧𑁂𑀲𑀺.

𑀭𑀜𑁆𑀜𑁄 𑀧𑀦 𑀩𑀦𑁆𑀥𑀼𑀮𑁄 𑀦𑀸𑀫 𑀲𑁂𑀦𑀸𑀧𑀢𑀺 𑀫𑀮𑁆𑀮𑀺𑀓𑀁 𑀦𑀸𑀫 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀯𑀜𑁆𑀛𑀁 ‘‘𑀢𑀯 𑀓𑀼𑀮𑀖𑀭𑀫𑁂𑀯 𑀕𑀘𑁆𑀙𑀸𑀳𑀻’’𑀢𑀺 𑀓𑀼𑀲𑀺𑀦𑀸𑀭𑀫𑁂𑀯 𑀧𑁂𑀲𑁂𑀲𑀺. 𑀲𑀸 ‘‘𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀸𑀫𑀺𑀓𑁄 𑀫𑁂, 𑀪𑀦𑁆𑀢𑁂, 𑀓𑀼𑀮𑀖𑀭𑀁 𑀧𑁂𑀲𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀓𑀲𑁆𑀫𑀸’’𑀢𑀺 𑀯𑀼𑀢𑁆𑀢𑀸 ‘‘𑀯𑀜𑁆𑀛𑀸 𑀅𑀧𑀼𑀢𑁆𑀢𑀺𑀓𑀸, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀬𑀤𑀺 𑀏𑀯𑀁 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀺𑀯𑀢𑁆𑀢𑀸𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀼𑀝𑁆𑀞𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑁂𑀲𑀦𑀫𑁂𑀯 𑀧𑀼𑀦 𑀅𑀕𑀫𑀸𑀲𑀺. ‘‘𑀓𑀲𑁆𑀫𑀸 𑀦𑀺𑀯𑀢𑁆𑀢𑀲𑀻’’𑀢𑀺 𑀧𑀼𑀝𑁆𑀞𑀸 ‘‘𑀤𑀲𑀩𑀮𑁂𑀦 𑀦𑀺𑀯𑀢𑁆𑀢𑀺𑀢𑀸𑀫𑁆𑀳𑀻’’𑀢𑀺 𑀆𑀳. 𑀲𑁂𑀦𑀸𑀧𑀢𑀺 ‘‘𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺 𑀢𑀣𑀸𑀕𑀢𑁂𑀦 𑀓𑀸𑀭𑀡’’𑀦𑁆𑀢𑀺 𑀆𑀳. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀤𑁄𑀳𑀴𑀸 ‘‘𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀤𑁄𑀳𑀴𑁄’’𑀢𑀺? ‘‘𑀯𑁂𑀲𑀸𑀮𑀺𑀬𑀸 𑀦𑀕𑀭𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑀁 𑀅𑀪𑀺𑀲𑁂𑀓𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑀸𑀫𑁆𑀳𑀺, 𑀲𑀸𑀫𑀻’’𑀢𑀺. 𑀲𑁂𑀦𑀸𑀧𑀢𑀺 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀲𑀳𑀲𑁆𑀲𑀣𑀸𑀫𑀥𑀦𑀼𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀁 𑀧𑀸𑀚𑁂𑀦𑁆𑀢𑁄 𑀯𑁂𑀲𑀸𑀮𑀺𑀁 𑀧𑀸𑀯𑀺𑀲𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀓𑁄𑀲𑀮𑀭𑀜𑁆𑀜𑁄 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀺𑀁 𑀏𑀓𑀸𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀫𑀳𑀸𑀮𑀺 𑀦𑀸𑀫 𑀮𑀺𑀘𑁆𑀙𑀯𑀻 𑀅𑀦𑁆𑀥𑁄 𑀮𑀺𑀘𑁆𑀙𑀯𑀻𑀦𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀦𑁆𑀢𑁄 𑀤𑁆𑀯𑀸𑀭𑀲𑀫𑀻𑀧𑁂 𑀯𑀲𑀢𑀺. 𑀲𑁄 𑀭𑀣𑀲𑁆𑀲 𑀉𑀫𑁆𑀫𑀸𑀭𑁂 𑀧𑀝𑀺𑀖𑀝𑁆𑀝𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀩𑀦𑁆𑀥𑀼𑀮𑀫𑀮𑁆𑀮𑀲𑁆𑀲 𑀭𑀣𑀧𑀢𑀦𑀲𑀤𑁆𑀤𑁄 𑀏𑀲𑁄, 𑀅𑀚𑁆𑀚 𑀮𑀺𑀘𑁆𑀙𑀯𑀻𑀦𑀁 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀳. 𑀧𑁄𑀓𑁆𑀔𑀭𑀡𑀺𑀬𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀆𑀭𑀓𑁆𑀔𑀸 𑀩𑀮𑀯𑀸, 𑀉𑀧𑀭𑀺 𑀮𑁄𑀳𑀚𑀸𑀮𑀁 𑀧𑀢𑁆𑀣𑀝𑀁, 𑀲𑀓𑀼𑀡𑀸𑀦𑀫𑁆𑀧𑀺 𑀑𑀓𑀸𑀲𑁄 𑀦𑀢𑁆𑀣𑀺. 𑀲𑁂𑀦𑀸𑀧𑀢𑀺 𑀧𑀦 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀆𑀭𑀓𑁆𑀔𑀓𑁂 𑀔𑀕𑁆𑀕𑁂𑀦 𑀧𑀳𑀭𑀦𑁆𑀢𑁄 𑀧𑀮𑀸𑀧𑁂𑀢𑁆𑀯𑀸 𑀮𑁄𑀳𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀧𑁄𑀓𑁆𑀔𑀭𑀡𑀺𑀬𑀁 𑀪𑀭𑀺𑀬𑀁 𑀑𑀢𑀸𑀭𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀧𑀸𑀬𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑁆𑀳𑀢𑁆𑀯𑀸 𑀫𑀮𑁆𑀮𑀺𑀓𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀸𑀬𑀸𑀲𑀺. 𑀆𑀭𑀓𑁆𑀔𑀓𑀸 𑀕𑀦𑁆𑀢𑁆𑀯𑀸 𑀮𑀺𑀘𑁆𑀙𑀯𑀻𑀦𑀁 𑀆𑀭𑁄𑀘𑁂𑀲𑀼𑀁. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 ‘‘𑀩𑀦𑁆𑀥𑀼𑀮𑀫𑀮𑁆𑀮𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀫𑀳𑀸𑀮𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀮𑀺 ‘‘𑀫𑀸 𑀕𑀫𑀺𑀢𑁆𑀣, 𑀲𑁄 𑀳𑀺 𑀯𑁄 𑀲𑀩𑁆𑀩𑁂 𑀖𑀸𑀢𑀬𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑁂𑀧𑀺 ‘‘𑀫𑀬𑀁 𑀕𑀫𑀺𑀲𑁆𑀲𑀸𑀫𑀬𑁂𑀯𑀸’’𑀢𑀺 𑀯𑀤𑀺𑀁𑀲𑀼. 𑀢𑁂𑀦 𑀳𑀺 𑀘𑀓𑁆𑀓𑀲𑁆𑀲 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀧𑀼𑀭𑀢𑁄 𑀅𑀲𑀦𑀺𑀲𑀤𑁆𑀤𑀁 𑀯𑀺𑀬 𑀲𑀼𑀡𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀢𑀼𑀫𑁆𑀳𑀸𑀓𑀁 𑀭𑀣𑀥𑀼𑀭𑁂𑀲𑀼 𑀙𑀺𑀤𑁆𑀤𑀁 𑀧𑀲𑁆𑀲𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀧𑀼𑀭𑀢𑁄 𑀫𑀸𑀕𑀫𑀺𑀢𑁆𑀣𑀸𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯.

𑀫𑀮𑁆𑀮𑀺𑀓𑀸 𑀤𑀺𑀲𑁆𑀯𑀸 ‘‘𑀭𑀣𑀸, 𑀲𑀸𑀫𑀺, 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀏𑀓𑀲𑁆𑀲 𑀭𑀣𑀲𑁆𑀲 𑀯𑀺𑀬 𑀧𑀜𑁆𑀜𑀸𑀬𑀦𑀓𑀸𑀮𑁂 𑀫𑀫 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺. 𑀲𑀸 𑀬𑀤𑀸 𑀲𑀩𑁆𑀩𑁂 𑀏𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀢𑀤𑀸 ‘‘𑀏𑀓𑀫𑁂𑀯 𑀲𑀸𑀫𑀺 𑀭𑀣𑀲𑀻𑀲𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀩𑀦𑁆𑀥𑀼𑀮𑁄 ‘‘𑀢𑁂𑀦 𑀳𑀺 𑀇𑀫𑀸 𑀭𑀲𑁆𑀫𑀺𑀬𑁄 𑀕𑀡𑁆𑀳𑀸𑀳𑀻’’𑀢𑀺 𑀢𑀲𑁆𑀲𑀸 𑀭𑀲𑁆𑀫𑀺𑀬𑁄 𑀤𑀢𑁆𑀯𑀸 𑀭𑀣𑁂 𑀞𑀺𑀢𑁄𑀯 𑀥𑀦𑀼𑀁 𑀆𑀭𑁄𑀧𑁂𑀢𑀺, 𑀭𑀣𑀘𑀓𑁆𑀓𑀁 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀸𑀯𑀺𑀲𑀺, 𑀮𑀺𑀘𑁆𑀙𑀯𑀺𑀦𑁄 𑀢𑀁 𑀞𑀸𑀦𑀁 𑀤𑀺𑀲𑁆𑀯𑀸𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼. 𑀇𑀢𑀭𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀚𑀺𑀬𑀁 𑀧𑁄𑀣𑁂𑀲𑀺, 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑁂 𑀢𑀢𑁄𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼, 𑀅𑀦𑀼𑀩𑀦𑁆𑀥𑀦𑁆𑀢𑀸 𑀕𑀘𑁆𑀙𑀦𑁆𑀢𑁂𑀯. 𑀩𑀦𑁆𑀥𑀼𑀮𑁄 𑀭𑀣𑁂 𑀞𑀺𑀢𑀓𑁄𑀯 𑀏𑀓𑀁 𑀲𑀭𑀁 𑀔𑀺𑀧𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀭𑀣𑀲𑀢𑀸𑀦𑀁 𑀭𑀣𑀲𑀻𑀲𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀜𑁆𑀘 𑀭𑀸𑀚𑀲𑀢𑀸𑀦𑀺 𑀧𑀭𑀺𑀓𑀭𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀢𑁂 𑀅𑀢𑁆𑀢𑀦𑁄 𑀯𑀺𑀤𑁆𑀥𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀢𑀺𑀝𑁆𑀞 𑀭𑁂, 𑀢𑀺𑀝𑁆𑀞 𑀭𑁂’’𑀢𑀺 𑀯𑀤𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯. 𑀩𑀦𑁆𑀥𑀼𑀮𑁄 𑀭𑀣𑀁 𑀞𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀢𑀓𑀸, 𑀫𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀬𑀼𑀤𑁆𑀥𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀢𑁂 ‘‘𑀫𑀢𑀓𑀸 𑀦𑀸𑀫 𑀅𑀫𑁆𑀳𑀸𑀤𑀺𑀲𑀸 𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀯𑀤𑀺𑀁𑀲𑀼. ‘‘𑀢𑁂𑀦 𑀳𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀧𑀭𑀺𑀓𑀭𑀁 𑀫𑁄𑀘𑁂𑀣𑀸’’𑀢𑀺. 𑀢𑁂 𑀫𑁄𑀘𑀬𑀺𑀁𑀲𑀼. 𑀲𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀫𑀭𑀺𑀢𑁆𑀯𑀸 𑀧𑀢𑀺𑀢𑁄. 𑀅𑀣 𑀦𑁂 ‘‘𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀏𑀯𑀭𑀽𑀧𑀸, 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀲𑀁𑀯𑀺𑀥𑀸𑀢𑀩𑁆𑀩𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀦𑁆𑀦𑀸𑀳𑀁 𑀫𑁄𑀘𑁂𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀩𑁆𑀩𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸.

𑀩𑀦𑁆𑀥𑀼𑀮𑁄𑀧𑀺 𑀫𑀮𑁆𑀮𑀺𑀓𑀁 𑀲𑀸𑀯𑀢𑁆𑀣𑀺𑀁 𑀆𑀦𑁂𑀲𑀺. 𑀲𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀬𑀫𑀓𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀲𑀩𑁆𑀩𑁂𑀧𑀺 𑀲𑀽𑀭𑀸 𑀣𑀸𑀫𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀲𑀩𑁆𑀩𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀓𑁂𑀓𑀲𑁆𑀲𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀘𑁆𑀙𑀦𑁆𑀢𑁂𑀳𑀺 𑀢𑁂𑀳𑁂𑀯 𑀭𑀸𑀚𑀗𑁆𑀕𑀡𑀁 𑀧𑀭𑀺𑀧𑀽𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀦𑀺𑀘𑁆𑀙𑀬𑁂 𑀓𑀽𑀝𑀟𑁆𑀟𑀧𑀭𑀸𑀚𑀺𑀢𑀸 𑀫𑀦𑀼𑀲𑁆𑀲𑀸 𑀩𑀦𑁆𑀥𑀼𑀮𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀭𑀯𑀁 𑀯𑀺𑀭𑀯𑀦𑁆𑀢𑀸 𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀸𑀦𑀁 𑀓𑀽𑀝𑀟𑁆𑀟𑀓𑀸𑀭𑀡𑀁 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄𑀧𑀺 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀟𑁆𑀟𑀁 𑀢𑀻𑀭𑁂𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁, 𑀅𑀲𑁆𑀲𑀸𑀫𑀺𑀓𑀫𑁂𑀯 𑀅𑀲𑁆𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀭𑀸𑀚𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀫𑀘𑁆𑀘𑁂 𑀳𑀸𑀭𑁂𑀢𑁆𑀯𑀸 𑀩𑀦𑁆𑀥𑀼𑀮𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀦𑀺. 𑀢𑀢𑁄 𑀧𑁄𑀭𑀸𑀡𑀓𑀯𑀺𑀦𑀺𑀘𑁆𑀙𑀬𑀺𑀓𑀸 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀅𑀧𑁆𑀧𑀮𑀸𑀪𑀸 𑀳𑀼𑀢𑁆𑀯𑀸 ‘‘𑀩𑀦𑁆𑀥𑀼𑀮𑁄 𑀭𑀚𑁆𑀚𑀁 𑀧𑀢𑁆𑀣𑁂𑀢𑀻’’𑀢𑀺 𑀭𑀸𑀚𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀇𑀫𑀲𑁆𑀫𑀺𑀁 𑀇𑀥𑁂𑀯 𑀖𑀸𑀢𑀺𑀬𑀫𑀸𑀦𑁂 𑀕𑀭𑀳𑀸 𑀫𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀬𑀼𑀢𑁆𑀢𑀧𑀼𑀭𑀺𑀲𑁂𑀳𑀺 𑀧𑀘𑁆𑀘𑀦𑁆𑀢𑀁 𑀧𑀳𑀭𑀸𑀧𑁂𑀢𑁆𑀯𑀸 𑀢𑁂 𑀧𑀮𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀓𑀸𑀮𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑀦𑁆𑀥𑀼𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀘𑁆𑀘𑀦𑁆𑀢𑁄 𑀓𑀺𑀭 𑀓𑀼𑀧𑀺𑀢𑁄, 𑀢𑀯 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀘𑁄𑀭𑁂 𑀕𑀡𑁆𑀳𑀸𑀳𑀻’’𑀢𑀺 𑀧𑀳𑀺𑀡𑀺𑀢𑁆𑀯𑀸 ‘‘𑀏𑀢𑁆𑀣𑁂𑀯𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀲𑀫𑀢𑁆𑀣𑁂 𑀫𑀳𑀸𑀬𑁄𑀥𑁂 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀦𑁆𑀢𑁂𑀬𑁂𑀯 ‘‘𑀲𑁂𑀦𑀸𑀧𑀢𑀺 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸𑀯 𑀧𑀬𑀼𑀢𑁆𑀢𑀓𑀘𑁄𑀭𑀸 𑀧𑀮𑀸𑀬𑀺𑀁𑀲𑀼. 𑀲𑁄 𑀢𑀁 𑀧𑀤𑁂𑀲𑀁 𑀆𑀯𑀸𑀲𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀅𑀣𑀲𑁆𑀲 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀢𑁂 𑀬𑁄𑀥𑀸 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀼. 𑀢𑀁 𑀤𑀺𑀯𑀲𑀁 𑀫𑀮𑁆𑀮𑀺𑀓𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 ‘‘𑀲𑀸𑀫𑀺𑀓𑀲𑁆𑀲 𑀢𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀽’’𑀢𑀺 𑀧𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀡𑁆𑀡𑀁 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁂𑀯 𑀧𑀭𑀺𑀯𑀺𑀲𑀺. 𑀅𑀣𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀧𑁆𑀧𑀺𑀘𑀸𑀝𑀺𑀁 𑀆𑀳𑀭𑀦𑁆𑀢𑀺𑀬𑁄 𑀣𑁂𑀭𑀸𑀦𑀁 𑀧𑀼𑀭𑀢𑁄 𑀘𑀸𑀝𑀺𑀁 𑀪𑀺𑀦𑁆𑀤𑀺𑀁𑀲𑀼. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀉𑀧𑀸𑀲𑀺𑀓𑁂, 𑀪𑁂𑀤𑀦𑀥𑀫𑁆𑀫𑀁 𑀪𑀺𑀦𑁆𑀦𑀁, 𑀦 𑀘𑀺𑀦𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑀸 𑀉𑀘𑁆𑀙𑀗𑁆𑀕𑀢𑁄 𑀧𑀡𑁆𑀡𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀤𑁆𑀯𑀢𑁆𑀢𑀺𑀁𑀲𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀢𑀼 𑀲𑀻𑀲𑀁 𑀙𑀺𑀦𑁆𑀦𑀦𑁆𑀢𑀺 𑀫𑁂 𑀇𑀫𑀁 𑀧𑀡𑁆𑀡𑀁 𑀆𑀳𑀭𑀺𑀁𑀲𑀼, 𑀅𑀳𑀁 𑀇𑀤𑀁 𑀲𑀼𑀢𑁆𑀯𑀸𑀧𑀺 𑀦 𑀘𑀺𑀦𑁆𑀢𑁂𑀫𑀺, 𑀲𑀧𑁆𑀧𑀺𑀘𑀸𑀝𑀺𑀬𑀸 𑀪𑀺𑀦𑁆𑀦𑀸𑀬 𑀓𑀺𑀁 𑀘𑀺𑀦𑁆𑀢𑁂𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢’’𑀦𑁆𑀢𑀺𑀆𑀤𑀻𑀦𑀺 (𑀲𑀼. 𑀦𑀺. 𑁫𑁭𑁯) 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀧𑀺 𑀤𑁆𑀯𑀢𑁆𑀢𑀺𑀁𑀲 𑀲𑀼𑀡𑀺𑀲𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀓𑀫𑁆𑀫𑀨𑀮𑀁 𑀮𑀪𑀺𑀁𑀲𑀼, 𑀢𑀼𑀫𑁆𑀳𑁂 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀭𑀜𑁆𑀜𑁄 𑀉𑀧𑀭𑀺 𑀫𑀦𑁄𑀧𑀤𑁄𑀲𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀑𑀯𑀤𑀺.

𑀭𑀜𑁆𑀜𑁄 𑀘𑀭𑀧𑀼𑀭𑀺𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀦𑀺𑀤𑁆𑀤𑁄𑀲𑀪𑀸𑀯𑀁 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀢𑀲𑁆𑀲𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀮𑁆𑀮𑀺𑀓𑀜𑁆𑀘 𑀲𑀼𑀡𑀺𑀲𑀸𑀬𑁄 𑀘𑀲𑁆𑀲𑀸 𑀔𑀫𑀸𑀧𑁂𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀯𑀭𑀁 𑀅𑀤𑀸𑀲𑀺. 𑀲𑀸 ‘‘𑀕𑀳𑀺𑀢𑁄 𑀫𑁂 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀫𑀢𑀓𑀪𑀢𑁆𑀢𑀁 𑀤𑀢𑁆𑀯𑀸 𑀦𑁆𑀳𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑁂 𑀯𑀭𑁄 𑀤𑀺𑀦𑁆𑀦𑁄, 𑀫𑀬𑁆𑀳𑀜𑁆𑀘 𑀅𑀜𑁆𑀜𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑁂 𑀲𑀼𑀡𑀺𑀲𑀸𑀦𑀁 𑀫𑀫 𑀘 𑀓𑀼𑀮𑀖𑀭𑀕𑀫𑀦𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀤𑁆𑀯𑀢𑁆𑀢𑀺𑀁𑀲𑀸𑀬 𑀲𑀼𑀡𑀺𑀲𑀸𑀦𑀁 𑀲𑀓𑀓𑀼𑀮𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀓𑀼𑀲𑀺𑀦𑀸𑀭𑀦𑀕𑀭𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀦𑀸𑀫 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀧𑀦 ‘‘𑀫𑀸𑀢𑀼𑀮𑁄 𑀫𑁂 𑀇𑀫𑀺𑀦𑀸 𑀫𑀸𑀭𑀺𑀢𑁄’’𑀢𑀺 𑀭𑀜𑁆𑀜𑁄 𑀑𑀢𑀸𑀭𑀁 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀭𑀸𑀚𑀸𑀧𑀺 𑀦𑀺𑀧𑁆𑀧𑀭𑀸𑀥𑀲𑁆𑀲 𑀩𑀦𑁆𑀥𑀼𑀮𑀲𑁆𑀲 𑀫𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀭𑀚𑁆𑀚𑀲𑀼𑀔𑀁 𑀦𑀸𑀦𑀼𑀪𑁄𑀢𑀺.

𑀢𑀤𑀸 𑀲𑀢𑁆𑀣𑀸 𑀲𑀸𑀓𑀺𑀬𑀸𑀦𑀁 𑀯𑁂𑀴𑀼𑀁 𑀦𑀸𑀫 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑀸𑀫𑀢𑁄 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀤𑀢𑁆𑀯𑀸 𑀏𑀓𑀓𑁄𑀯 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀁 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 (𑀫. 𑀦𑀺. 𑁨.𑁩𑁬𑁪 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀤𑀻𑀖𑀓𑀸𑀭𑀸𑀬𑀦𑁄 𑀢𑀸𑀦𑀺 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀝𑀝𑀽𑀪𑀁 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀏𑀓𑀁 𑀅𑀲𑁆𑀲𑀁 𑀏𑀓𑀜𑁆𑀘 𑀉𑀧𑀝𑁆𑀞𑀸𑀦𑀓𑀸𑀭𑀺𑀓𑀁 𑀫𑀸𑀢𑀼𑀕𑀸𑀫𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀲𑁂𑀦𑀁 𑀅𑀤𑀺𑀲𑁆𑀯𑀸 𑀢𑀁 𑀫𑀸𑀢𑀼𑀕𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀪𑀸𑀕𑀺𑀦𑁂𑀬𑁆𑀬𑀁 𑀅𑀚𑀸𑀢𑀲𑀢𑁆𑀢𑀼𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀯𑀺𑀝𑀝𑀽𑀪𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 𑀯𑀺𑀓𑀸𑀮𑁂 𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀦𑀕𑀭𑀁 𑀧𑀯𑀺𑀲𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀏𑀓𑀺𑀲𑁆𑀲𑀸𑀬 𑀲𑀸𑀮𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸𑀢𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 ‘‘𑀤𑁂𑀯 𑀓𑁄𑀲𑀮𑀦𑀭𑀺𑀦𑁆𑀤, 𑀇𑀤𑀸𑀦𑀺 𑀅𑀦𑀸𑀣𑁄𑀲𑀺 𑀚𑀸𑀢𑁄’’𑀢𑀺 𑀯𑀺𑀮𑀧𑀦𑁆𑀢𑀺𑀬𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀫𑀸𑀢𑀼𑀮𑀲𑁆𑀲 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀲𑀺.

𑀯𑀺𑀝𑀝𑀽𑀪𑁄𑀧𑀺 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀢𑀁 𑀯𑁂𑀭𑀁 𑀲𑀭𑀺𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀲𑀸𑀓𑀺𑀬𑁂 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀯𑀺𑀦𑀸𑀲𑀁 𑀤𑀺𑀲𑁆𑀯𑀸 ‘‘𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑁂 𑀏𑀓𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀢𑁄 𑀅𑀯𑀺𑀤𑀽𑀭𑁂 𑀯𑀺𑀝𑀝𑀽𑀪𑀲𑁆𑀲 𑀭𑀚𑁆𑀚𑀲𑀻𑀫𑀸𑀬 𑀅𑀦𑁆𑀢𑁄 𑀲𑀦𑁆𑀤𑀘𑁆𑀙𑀸𑀬𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀯𑀺𑀝𑀝𑀽𑀪𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁𑀓𑀸𑀭𑀡𑀸 𑀏𑀯𑀭𑀽𑀧𑀸𑀬 𑀉𑀡𑁆𑀳𑀯𑁂𑀮𑀸𑀬 𑀇𑀫𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀣, 𑀏𑀢𑀲𑁆𑀫𑀺𑀁 𑀲𑀦𑁆𑀤𑀘𑁆𑀙𑀸𑀬𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀜𑀸𑀢𑀓𑀸𑀦𑀁 𑀙𑀸𑀬𑀸 𑀦𑀸𑀫 𑀲𑀻𑀢𑀮𑀸’’𑀢𑀺 𑀯𑀼𑀢𑁆𑀢𑁂 ‘‘𑀜𑀸𑀢𑀓𑀸𑀦𑀁 𑀭𑀓𑁆𑀔𑀡𑀢𑁆𑀣𑀸𑀬 𑀲𑀢𑁆𑀣𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀲𑀢𑁆𑀣𑀸𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀕𑀢𑁄.

𑀭𑀸𑀚𑀸 𑀲𑀸𑀓𑀺𑀬𑀸𑀦𑀁 𑀤𑁄𑀲𑀁 𑀲𑀭𑀺𑀢𑁆𑀯𑀸 𑀤𑀼𑀢𑀺𑀬𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 𑀢𑀲𑁆𑀫𑀺𑀁 𑀦𑀺𑀓𑁆𑀔𑀦𑁆𑀢𑁂 𑀲𑀢𑁆𑀣𑀸 𑀲𑀸𑀓𑀺𑀬𑀸𑀦𑀁 𑀧𑀼𑀩𑁆𑀩𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀢𑁂𑀲𑀁 𑀦𑀤𑀺𑀬𑀁 𑀯𑀺𑀲𑀧𑀓𑁆𑀔𑀺𑀧𑀦𑀧𑀸𑀧𑀓𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀩𑀸𑀳𑀺𑀭𑀪𑀸𑀯𑀁 𑀜𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀦 𑀅𑀕𑀫𑀸𑀲𑀺. 𑀯𑀺𑀝𑀝𑀽𑀪𑀭𑀸𑀚𑀸 𑀔𑀻𑀭𑀧𑀸𑀬𑀓𑁂 𑀤𑀸𑀭𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀲𑀸𑀓𑀺𑀬𑁂 𑀖𑀸𑀢𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑁂𑀦 𑀦𑀺𑀲𑀺𑀦𑁆𑀦𑀨𑀮𑀓𑀁 𑀥𑁄𑀯𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺. 𑀲𑀢𑁆𑀣𑀭𑀺 𑀢𑀢𑀺𑀬𑀯𑀸𑀭𑁂 𑀕𑀫𑀦𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑀪𑀢𑁆𑀢𑀓𑀺𑀘𑁆𑀘𑁂 𑀕𑀦𑁆𑀥𑀓𑀼𑀝𑀺𑀬𑀁 𑀧𑀯𑀺𑀲𑀦𑁆𑀢𑁂 𑀤𑀺𑀲𑀸𑀳𑀺 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀜𑀸𑀢𑀓𑁂 𑀫𑀭𑀡𑀪𑀬𑀸 𑀫𑁄𑀘𑁂𑀲𑀺, 𑀏𑀯𑀁 𑀜𑀸𑀢𑀓𑀸𑀦𑀁 𑀅𑀢𑁆𑀣𑀘𑀭𑁄 𑀲𑀢𑁆𑀣𑀸’’𑀢𑀺 𑀪𑀕𑀯𑀢𑁄 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑀣𑀸𑀕𑀢𑁄 𑀜𑀸𑀢𑀓𑀸𑀦𑀁 𑀅𑀢𑁆𑀣𑀁 𑀘𑀭𑀢𑀺, 𑀧𑀼𑀩𑁆𑀩𑁂𑀧𑀺 𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀸𑀚𑀸𑀦𑁄 𑀩𑀳𑀼𑀣𑀫𑁆𑀪𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀲𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀽𑀳𑀺 𑀣𑀫𑁆𑀪𑁂𑀳𑀺 𑀧𑀸𑀲𑀸𑀤𑀓𑀭𑀡𑀁 𑀦𑀸𑀫 𑀅𑀦𑀘𑁆𑀙𑀭𑀺𑀬𑀁, 𑀬𑀁𑀦𑀽𑀦𑀸𑀳𑀁 𑀏𑀓𑀣𑀫𑁆𑀪𑀓𑀁 𑀧𑀸𑀲𑀸𑀤𑀁 𑀓𑀸𑀭𑁂𑀬𑁆𑀬𑀁, 𑀏𑀯𑀁 𑀲𑀩𑁆𑀩𑀭𑀸𑀚𑀽𑀦𑀁 𑀅𑀕𑁆𑀕𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀟𑁆𑀠𑀓𑀻 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀏𑀓𑀣𑀫𑁆𑀪𑀓𑀁 𑀧𑀸𑀲𑀸𑀤𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀚𑀽 𑀫𑀳𑀦𑁆𑀢𑁂 𑀏𑀓𑀣𑀫𑁆𑀪𑀓𑀧𑀸𑀲𑀸𑀤𑀸𑀭𑀳𑁂 𑀩𑀳𑀽 𑀭𑀼𑀓𑁆𑀔𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀭𑀼𑀓𑁆𑀔𑀸 𑀲𑀦𑁆𑀢𑀺, 𑀫𑀕𑁆𑀕𑁄 𑀧𑀦 𑀯𑀺𑀲𑀫𑁄, 𑀦 𑀲𑀓𑁆𑀓𑀸 𑀑𑀢𑀸𑀭𑁂𑀢𑀼𑀁, 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀭𑀸𑀚𑀸 ‘‘𑀓𑁂𑀦𑀘𑀺 𑀉𑀧𑀸𑀬𑁂𑀦 𑀲𑀡𑀺𑀓𑀁 𑀑𑀢𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀤𑁂𑀯, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀦 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀫 𑀉𑀬𑁆𑀬𑀸𑀦𑁂 𑀏𑀓𑀁 𑀭𑀼𑀓𑁆𑀔𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀯𑀟𑁆𑀠𑀓𑀻 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑀼𑀚𑀸𑀢𑀁 𑀉𑀚𑀼𑀓𑀁 𑀕𑀸𑀫𑀦𑀺𑀕𑀫𑀧𑀽𑀚𑀺𑀢𑀁 𑀭𑀸𑀚𑀓𑀼𑀮𑀢𑁄𑀧𑀺 𑀮𑀤𑁆𑀥𑀩𑀮𑀺𑀓𑀫𑁆𑀫𑀁 𑀫𑀗𑁆𑀕𑀮𑀲𑀸𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀉𑀬𑁆𑀬𑀸𑀦𑁂 𑀭𑀼𑀓𑁆𑀔𑁄 𑀦𑀸𑀫 𑀫𑀫 𑀧𑀝𑀺𑀩𑀤𑁆𑀥𑁄, 𑀕𑀘𑁆𑀙𑀣 𑀪𑁄 𑀢𑀁 𑀙𑀺𑀦𑁆𑀤𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀢𑁆𑀯𑀸 𑀲𑀼𑀢𑁆𑀢𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀧𑁆𑀨𑀓𑀡𑁆𑀡𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀸𑀫, 𑀭𑀸𑀚𑀸 𑀙𑀺𑀦𑁆𑀤𑀸𑀧𑁂𑀢𑀺, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀼, 𑀅𑀫𑁆𑀳𑀸𑀓𑀁 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀲𑀸𑀯𑁂𑀲𑀼𑀁.

𑀅𑀣 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀇𑀫𑁂 𑀯𑀟𑁆𑀠𑀓𑀻 𑀇𑀫𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀯𑀺𑀫𑀸𑀦𑀁 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀯𑀺𑀫𑀸𑀦𑀧𑀭𑀺𑀬𑀦𑁆𑀢𑀺𑀓𑀫𑁂𑀯 𑀔𑁄 𑀧𑀦 𑀫𑀬𑁆𑀳𑀁 𑀚𑀻𑀯𑀺𑀢𑀁, 𑀇𑀫𑀜𑁆𑀘 𑀭𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀢𑀭𑀼𑀡𑀲𑀸𑀮𑀭𑀼𑀓𑁆𑀔𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀦𑀁 𑀫𑀫 𑀜𑀸𑀢𑀺𑀤𑁂𑀯𑀢𑀸𑀦𑀫𑁆𑀧𑀺 𑀩𑀳𑀽𑀦𑀺 𑀯𑀺𑀫𑀸𑀦𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀯𑀺𑀫𑀸𑀦𑀧𑀭𑀺𑀬𑀦𑁆𑀢𑀺𑀓𑀫𑁂𑀯 𑀫𑀫 𑀜𑀸𑀢𑀻𑀦𑀁 𑀤𑁂𑀯𑀢𑀸𑀦𑀫𑁆𑀧𑀺 𑀚𑀻𑀯𑀺𑀢𑀁, 𑀦 𑀔𑁄 𑀧𑀦 𑀫𑀁 𑀢𑀣𑀸 𑀅𑀢𑁆𑀢𑀦𑁄 𑀯𑀺𑀦𑀸𑀲𑁄 𑀩𑀸𑀥𑀢𑀺, 𑀬𑀣𑀸 𑀜𑀸𑀢𑀻𑀦𑀁, 𑀢𑀲𑁆𑀫𑀸 𑀦𑁂𑀲𑀁 𑀫𑀬𑀸 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀭𑀜𑁆𑀜𑁄 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑀮𑀕𑀩𑁆𑀪𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀉𑀲𑁆𑀲𑀺𑀲𑀓𑀧𑀲𑁆𑀲𑁂 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩. ‘‘𑀓𑀸 𑀢𑁆𑀯𑀁 𑀲𑀼𑀤𑁆𑀥𑁂𑀳𑀺 𑀯𑀢𑁆𑀣𑁂𑀳𑀺, 𑀅𑀖𑁂 𑀯𑁂𑀳𑀸𑀬𑀲𑀁 𑀞𑀺𑀢𑀸;

𑀓𑁂𑀦 𑀢𑁆𑀬𑀸𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀺, 𑀓𑀼𑀢𑁄 𑀢𑀁 𑀪𑀬𑀫𑀸𑀕𑀢’’𑀦𑁆𑀢𑀺.

𑀢𑀢𑁆𑀣 𑀓𑀸 𑀢𑁆𑀯𑀦𑁆𑀢𑀺 𑀦𑀸𑀕𑀬𑀓𑁆𑀔𑀲𑀼𑀧𑀡𑁆𑀡𑀲𑀓𑁆𑀓𑀸𑀤𑀻𑀲𑀼 𑀓𑀸 𑀦𑀸𑀫 𑀢𑁆𑀯𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀯𑀢𑁆𑀣𑁂𑀳𑀻𑀢𑀺 𑀯𑀘𑀦𑀫𑀢𑁆𑀢𑀫𑁂𑀯𑁂𑀢𑀁, 𑀲𑀩𑁆𑀩𑁂𑀧𑀺 𑀧𑀦 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀅𑀖𑁂𑀢𑀺 𑀅𑀧𑁆𑀧𑀝𑀺𑀖𑁂 𑀆𑀓𑀸𑀲𑁂. 𑀯𑁂𑀳𑀸𑀬𑀲𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑁂𑀦 𑀢𑁆𑀬𑀸𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀯 𑀅𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀺. 𑀓𑀼𑀢𑁄𑀢𑀺 𑀜𑀸𑀢𑀺𑀯𑀺𑀬𑁄𑀕𑀥𑀦𑀯𑀺𑀦𑀸𑀲𑀸𑀤𑀻𑀦𑀁 𑀓𑀺𑀁 𑀦𑀺𑀲𑁆𑀲𑀸𑀬 𑀢𑀁 𑀪𑀬𑀫𑀸𑀕𑀢𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀢𑀢𑁄 𑀤𑁂𑀯𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪. ‘‘𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀪𑀤𑁆𑀤𑀲𑀸𑀮𑁄𑀢𑀺 𑀫𑀁 𑀯𑀺𑀤𑀽;

𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀺𑀝𑁆𑀞𑀢𑁄 𑀧𑀽𑀚𑀺𑀢𑀲𑁆𑀲 𑀫𑁂.

𑁧𑁫. ‘‘𑀓𑀸𑀭𑀬𑀦𑁆𑀢𑀸 𑀦𑀕𑀭𑀸𑀦𑀺, 𑀅𑀕𑀸𑀭𑁂 𑀘 𑀤𑀺𑀲𑀫𑁆𑀧𑀢𑀺;

𑀯𑀺𑀯𑀺𑀥𑁂 𑀘𑀸𑀧𑀺 𑀧𑀸𑀲𑀸𑀤𑁂, 𑀦 𑀫𑀁 𑀢𑁂 𑀅𑀘𑁆𑀘𑀫𑀜𑁆𑀜𑀺𑀲𑀼𑀁;

𑀬𑀣𑁂𑀯 𑀫𑀁 𑀢𑁂 𑀧𑀽𑀚𑁂𑀲𑀼𑀁, 𑀢𑀣𑁂𑀯 𑀢𑁆𑀯𑀫𑁆𑀧𑀺 𑀧𑀽𑀚𑀬𑀸’’𑀢𑀺.

𑀢𑀢𑁆𑀣 𑀢𑀺𑀝𑁆𑀞𑀢𑁄𑀢𑀺 𑀲𑀓𑀮𑀩𑀸𑀭𑀸𑀡𑀲𑀺𑀦𑀕𑀭𑁂𑀳𑀺 𑀘𑁂𑀯 𑀕𑀸𑀫𑀦𑀺𑀕𑀫𑁂𑀳𑀺 𑀘 𑀢𑀬𑀸 𑀘 𑀧𑀽𑀚𑀺𑀢𑀲𑁆𑀲 𑀦𑀺𑀘𑁆𑀘𑀁 𑀩𑀮𑀺𑀓𑀫𑁆𑀫𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀮𑀪𑀦𑁆𑀢𑀲𑁆𑀲 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑀺𑀝𑁆𑀞𑀦𑁆𑀢𑀲𑁆𑀲 𑀏𑀢𑁆𑀢𑀓𑁄 𑀓𑀸𑀮𑁄 𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀕𑀭𑀸𑀦𑀻𑀢𑀺 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀓𑀫𑁆𑀫𑀸𑀦𑀺. 𑀅𑀕𑀸𑀭𑁂𑀘𑀸𑀢𑀺 𑀪𑀽𑀫𑀺𑀕𑁂𑀳𑀸𑀦𑀺. 𑀤𑀺𑀲𑀫𑁆𑀧𑀢𑀻𑀢𑀺 𑀤𑀺𑀲𑀸𑀦𑀁 𑀧𑀢𑀺, 𑀫𑀳𑀸𑀭𑀸𑀚. 𑀦 𑀫𑀁 𑀢𑁂𑀢𑀺 𑀢𑁂 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀫𑀁 𑀦𑀸𑀢𑀺𑀫𑀜𑁆𑀜𑀺𑀲𑀼𑀁 𑀦𑀸𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀺𑀳𑁂𑀞𑀬𑀺𑀁𑀲𑀼, 𑀫𑀫 𑀦𑀺𑀯𑀸𑀲𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀭𑀺𑀁𑀲𑀼, 𑀫𑀬𑁆𑀳𑀁 𑀧𑀦 𑀲𑀓𑁆𑀓𑀸𑀭𑀫𑁂𑀯 𑀓𑀭𑀺𑀁𑀲𑀽𑀢𑀺 𑀅𑀯𑀘. 𑀬𑀣𑁂𑀯𑀸𑀢𑀺 𑀢𑀲𑁆𑀫𑀸 𑀬𑀣𑁂𑀯 𑀢𑁂 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀫𑀁 𑀧𑀽𑀚𑀬𑀺𑀁𑀲𑀼, 𑀏𑀓𑁄𑀧𑀺 𑀇𑀫𑀁 𑀭𑀼𑀓𑁆𑀔𑀁 𑀦 𑀙𑀺𑀦𑁆𑀤𑀸𑀧𑁂𑀲𑀺, 𑀢𑁆𑀯𑀜𑁆𑀘𑀸𑀧𑀺 𑀫𑀁 𑀢𑀣𑁂𑀯 𑀧𑀽𑀚𑀬, 𑀫𑀸 𑀫𑁂 𑀭𑀼𑀓𑁆𑀔𑀁 𑀙𑁂𑀤𑀬𑀻𑀢𑀺.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬. ‘‘𑀢𑀁 𑀇𑀯𑀸𑀳𑀁 𑀦 𑀧𑀲𑁆𑀲𑀸𑀫𑀺, 𑀣𑀽𑀮𑀁 𑀓𑀸𑀬𑁂𑀦 𑀢𑁂 𑀤𑀼𑀫𑀁;

𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀅𑀪𑀺𑀭𑀽𑀧𑁄𑀲𑀺 𑀚𑀸𑀢𑀺𑀬𑀸.

𑁧𑁭. ‘‘𑀧𑀸𑀲𑀸𑀤𑀁 𑀓𑀸𑀭𑀬𑀺𑀲𑁆𑀲𑀸𑀫𑀺, 𑀏𑀓𑀢𑁆𑀣𑀫𑁆𑀪𑀁 𑀫𑀦𑁄𑀭𑀫𑀁;

𑀢𑀢𑁆𑀣 𑀢𑀁 𑀉𑀧𑀦𑁂𑀲𑁆𑀲𑀸𑀫𑀺, 𑀘𑀺𑀭𑀁 𑀢𑁂 𑀬𑀓𑁆𑀔 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀧𑀫𑀸𑀡𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀯 𑀧𑀫𑀸𑀡𑁂𑀦 𑀢𑀁 𑀯𑀺𑀬 𑀣𑀽𑀮𑀁 𑀫𑀳𑀦𑁆𑀢𑀁 𑀅𑀜𑁆𑀜𑀁 𑀤𑀼𑀫𑀁 𑀦 𑀧𑀲𑁆𑀲𑀸𑀫𑀺, 𑀢𑁆𑀯𑀜𑁆𑀜𑁂𑀯 𑀧𑀦 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀲𑀼𑀚𑀸𑀢𑀲𑀗𑁆𑀔𑀸𑀢𑀸𑀬 𑀲𑀫𑀲𑀡𑁆𑀞𑀸𑀦𑀉𑀚𑀼𑀪𑀸𑀯𑀧𑁆𑀧𑀓𑀸𑀭𑀸𑀬 𑀚𑀸𑀢𑀺𑀬𑀸 𑀘 𑀅𑀪𑀺𑀭𑀽𑀧𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀏𑀓𑀣𑀫𑁆𑀪𑀧𑀸𑀲𑀸𑀤𑀸𑀭𑀳𑁄𑀢𑀺. 𑀧𑀸𑀲𑀸𑀤𑀦𑁆𑀢𑀺 𑀢𑀲𑁆𑀫𑀸 𑀢𑀁 𑀙𑁂𑀤𑀸𑀧𑁂𑀢𑁆𑀯𑀸 𑀅𑀳𑀁 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑁂𑀯. 𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀧𑀦𑀸𑀳𑀁 𑀲𑀫𑁆𑀫 𑀤𑁂𑀯𑀭𑀸𑀚, 𑀢𑀢𑁆𑀣 𑀧𑀸𑀲𑀸𑀤𑁂 𑀉𑀧𑀦𑁂𑀲𑁆𑀲𑀸𑀫𑀺, 𑀲𑁄 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑁄 𑀅𑀕𑁆𑀕𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀮𑀪𑀦𑁆𑀢𑁄 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄 𑀲𑀼𑀔𑀁 𑀚𑀻𑀯𑀺𑀲𑁆𑀲𑀲𑀺, 𑀦𑀺𑀯𑀸𑀲𑀝𑁆𑀞𑀸𑀦𑀸𑀪𑀸𑀯𑁂𑀦 𑀫𑁂 𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀸 𑀘𑀺𑀦𑁆𑀢𑀬𑀺, 𑀘𑀺𑀭𑀁 𑀢𑁂 𑀬𑀓𑁆𑀔 𑀚𑀻𑀯𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮. ‘‘𑀏𑀯𑀁 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺, 𑀲𑀭𑀻𑀭𑁂𑀦 𑀯𑀺𑀦𑀸𑀪𑀸𑀯𑁄;

𑀧𑀼𑀣𑀼𑀲𑁄 𑀫𑀁 𑀯𑀺𑀓𑀦𑁆𑀢𑀺𑀢𑁆𑀯𑀸, 𑀔𑀡𑁆𑀟𑀲𑁄 𑀅𑀯𑀓𑀦𑁆𑀢𑀣.

𑁧𑁯. ‘‘𑀅𑀕𑁆𑀕𑁂 𑀘 𑀙𑁂𑀢𑁆𑀯𑀸 𑀫𑀚𑁆𑀛𑁂 𑀘, 𑀧𑀘𑁆𑀙𑀸 𑀫𑀽𑀮𑀫𑁆𑀳𑀺 𑀙𑀺𑀦𑁆𑀤𑀣;

𑀏𑀯𑀁 𑀫𑁂 𑀙𑀺𑀚𑁆𑀚𑀫𑀸𑀦𑀲𑁆𑀲, 𑀦 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸’’𑀢𑀺.

𑀢𑀢𑁆𑀣 𑀏𑀯𑀁 𑀘𑀺𑀢𑁆𑀢𑀁 𑀉𑀤𑀧𑀸𑀤𑀻𑀢𑀺 𑀬𑀤𑀺 𑀏𑀯𑀁 𑀘𑀺𑀢𑁆𑀢𑀁 𑀢𑀯 𑀉𑀧𑁆𑀧𑀦𑁆𑀦𑀁. 𑀲𑀭𑀻𑀭𑁂𑀦 𑀯𑀺𑀦𑀸𑀪𑀸𑀯𑁄𑀢𑀺 𑀬𑀤𑀺 𑀢𑁂 𑀫𑀫 𑀲𑀭𑀻𑀭𑁂𑀦 𑀪𑀤𑁆𑀤𑀲𑀸𑀮𑀭𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀫𑀫 𑀯𑀺𑀦𑀸𑀪𑀸𑀯𑁄 𑀧𑀢𑁆𑀣𑀺𑀢𑁄. 𑀧𑀼𑀣𑀼𑀲𑁄𑀢𑀺 𑀩𑀳𑀼𑀥𑀸. 𑀯𑀺𑀓𑀦𑁆𑀢𑀺𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀔𑀡𑁆𑀟𑀲𑁄𑀢𑀺 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀅𑀯𑀓𑀦𑁆𑀢𑀣. 𑀅𑀕𑁆𑀕𑁂 𑀘𑀸𑀢𑀺 𑀅𑀯𑀓𑀦𑁆𑀢𑀦𑁆𑀢𑀸 𑀧𑀦 𑀧𑀞𑀫𑀁 𑀅𑀕𑁆𑀕𑁂, 𑀢𑀢𑁄 𑀫𑀚𑁆𑀛𑁂 𑀙𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀫𑀽𑀮𑁂 𑀙𑀺𑀦𑁆𑀤𑀣. 𑀏𑀯𑀜𑁆𑀳𑀺 𑀫𑁂 𑀙𑀺𑀚𑁆𑀚𑀫𑀸𑀦𑀲𑁆𑀲 𑀦 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸, 𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀪𑀯𑁂𑀬𑁆𑀬𑀸𑀢𑀺 𑀬𑀸𑀘𑀢𑀺.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦. ‘‘𑀳𑀢𑁆𑀣𑀧𑀸𑀤𑀁 𑀬𑀣𑀸 𑀙𑀺𑀦𑁆𑀤𑁂, 𑀓𑀡𑁆𑀡𑀦𑀸𑀲𑀜𑁆𑀘 𑀚𑀻𑀯𑀢𑁄;

𑀢𑀢𑁄 𑀧𑀘𑁆𑀙𑀸 𑀲𑀺𑀭𑁄 𑀙𑀺𑀦𑁆𑀤𑁂, 𑀢𑀁 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸.

𑁨𑁧. ‘‘𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀙𑀺𑀦𑁆𑀦𑀁, 𑀪𑀤𑁆𑀤𑀲𑀸𑀮 𑀯𑀦𑀧𑁆𑀧𑀢𑀺;

𑀓𑀺𑀁𑀳𑁂𑀢𑀼 𑀓𑀺𑀁 𑀉𑀧𑀸𑀤𑀸𑀬, 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀳𑀢𑁆𑀣𑀧𑀸𑀤𑀦𑁆𑀢𑀺 𑀳𑀢𑁆𑀣𑁂 𑀘 𑀧𑀸𑀤𑁂 𑀘. 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀙𑀺𑀚𑁆𑀚𑀦𑁆𑀢𑀲𑁆𑀲 𑀘𑁄𑀭𑀲𑁆𑀲 𑀢𑀁 𑀫𑀭𑀡𑀁 𑀤𑀼𑀓𑁆𑀔𑀁 𑀲𑀺𑀬𑀸. 𑀲𑀼𑀔𑀁 𑀦𑀽𑀢𑀺 𑀲𑀫𑁆𑀫 𑀪𑀤𑁆𑀤𑀲𑀸𑀮, 𑀯𑀚𑁆𑀛𑀧𑁆𑀧𑀢𑁆𑀢𑀸 𑀘𑁄𑀭𑀸 𑀲𑀼𑀔𑁂𑀦 𑀫𑀭𑀺𑀢𑀼𑀓𑀸𑀫𑀸 𑀲𑀻𑀲𑀘𑁆𑀙𑁂𑀤𑀁 𑀬𑀸𑀘𑀦𑁆𑀢𑀺, 𑀦 𑀔𑀡𑁆𑀟𑀲𑁄 𑀙𑁂𑀤𑀦𑀁, 𑀢𑁆𑀯𑀁 𑀧𑀦 𑀏𑀯𑀁 𑀬𑀸𑀘𑀲𑀺, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺 ‘‘𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀙𑀺𑀦𑁆𑀦’’𑀦𑁆𑀢𑀺. 𑀓𑀺𑀁𑀳𑁂𑀢𑀽𑀢𑀺 𑀔𑀡𑁆𑀟𑀲𑁄 𑀙𑀺𑀦𑁆𑀦𑀁 𑀦𑀸𑀫 𑀦 𑀲𑀼𑀔𑀁, 𑀓𑀸𑀭𑀡𑁂𑀦 𑀧𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑀅𑀣𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀪𑀤𑁆𑀤𑀲𑀸𑀮𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨. ‘‘𑀬𑀜𑁆𑀘 𑀳𑁂𑀢𑀼𑀫𑀼𑀧𑀸𑀤𑀸𑀬, 𑀳𑁂𑀢𑀼𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁;

𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀸𑀫𑀺, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁩. ‘‘𑀜𑀸𑀢𑀻 𑀫𑁂 𑀲𑀼𑀔𑀲𑀁𑀯𑀤𑁆𑀥𑀸, 𑀫𑀫 𑀧𑀲𑁆𑀲𑁂 𑀦𑀺𑀯𑀸𑀢𑀚𑀸;

𑀢𑁂𑀧𑀺𑀳𑀁 𑀉𑀧𑀳𑀺𑀁𑀲𑁂𑀬𑁆𑀬, 𑀧𑀭𑁂𑀲𑀁 𑀅𑀲𑀼𑀔𑁄𑀘𑀺𑀢’’𑀦𑁆𑀢𑀺.

𑀢𑀢𑁆𑀣 𑀳𑁂𑀢𑀼𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀬𑀁 𑀳𑁂𑀢𑀼𑀲𑀪𑀸𑀯𑀬𑀼𑀢𑁆𑀢𑀫𑁂𑀯, 𑀦 𑀳𑁂𑀢𑀼𑀧𑀢𑀺𑀭𑀽𑀧𑀓𑀁, 𑀳𑁂𑀢𑀼𑀁 𑀉𑀧𑀸𑀤𑀸𑀬 𑀆𑀭𑀩𑁆𑀪 𑀲𑀦𑁆𑀥𑀸𑀬𑀸𑀳𑀁 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀸𑀫𑀺, 𑀢𑀁 𑀑𑀳𑀺𑀢𑀲𑁄𑀢𑁄 𑀲𑀼𑀡𑁄𑀳𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀻 𑀫𑁂𑀢𑀺 𑀫𑀫 𑀪𑀤𑁆𑀤𑀲𑀸𑀮𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀲𑀼𑀔𑀲𑀁𑀯𑀤𑁆𑀥𑀸 𑀫𑀫 𑀧𑀲𑁆𑀲𑁂 𑀢𑀭𑀼𑀡𑀲𑀸𑀮𑀭𑀼𑀓𑁆𑀔𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀫𑀬𑀸 𑀓𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀢𑁆𑀢𑀸 𑀦𑀺𑀯𑀸𑀢𑀚𑀸 𑀫𑀫 𑀜𑀸𑀢𑀓𑀸 𑀤𑁂𑀯𑀲𑀗𑁆𑀖𑀸 𑀅𑀢𑁆𑀣𑀺, 𑀢𑁂 𑀅𑀳𑀁 𑀯𑀺𑀲𑀸𑀮𑀲𑀸𑀔𑀯𑀺𑀝𑀧𑁄 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀢𑀦𑁆𑀢𑁄 𑀉𑀧𑀳𑀺𑀁𑀲𑁂𑀬𑁆𑀬𑀁, 𑀲𑀁𑀪𑀕𑁆𑀕𑀯𑀺𑀫𑀸𑀦𑁂 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀭𑁂𑀲𑀁 𑀅𑀲𑀼𑀔𑁄𑀘𑀺𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀫𑀬𑀸 𑀢𑁂𑀲𑀁 𑀧𑀭𑁂𑀲𑀁 𑀜𑀸𑀢𑀺𑀤𑁂𑀯𑀲𑀗𑁆𑀖𑀸𑀦𑀁 𑀅𑀲𑀼𑀔𑀁 𑀤𑀼𑀓𑁆𑀔𑀁 𑀑𑀘𑀺𑀢𑀁 𑀯𑀟𑁆𑀠𑀺𑀢𑀁, 𑀦 𑀘𑀸𑀳𑀁 𑀢𑁂𑀲𑀁 𑀤𑀼𑀓𑁆𑀔𑀓𑀸𑀫𑁄, 𑀢𑀲𑁆𑀫𑀸 𑀪𑀤𑁆𑀤𑀲𑀸𑀮𑀁 𑀔𑀡𑁆𑀟𑀲𑁄 𑀔𑀡𑁆𑀟𑀲𑁄 𑀙𑀺𑀦𑁆𑀤𑀸𑀧𑁂𑀫𑀻𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀥𑀫𑁆𑀫𑀺𑀓𑁄 𑀯𑀢𑀸𑀬𑀁, 𑀤𑁂𑀯𑀧𑀼𑀢𑁆𑀢𑁄, 𑀅𑀢𑁆𑀢𑀦𑁄 𑀯𑀺𑀫𑀸𑀦𑀯𑀺𑀦𑀸𑀲𑀢𑁄𑀧𑀺 𑀜𑀸𑀢𑀻𑀦𑀁 𑀯𑀺𑀫𑀸𑀦𑀯𑀺𑀦𑀸𑀲𑀁 𑀦 𑀇𑀘𑁆𑀙𑀢𑀺, 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀁 𑀘𑀭𑀢𑀺, 𑀅𑀪𑀬𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁨𑁪. ‘‘𑀘𑁂𑀢𑁂𑀬𑁆𑀬𑀭𑀽𑀧𑀁 𑀘𑁂𑀢𑁂𑀲𑀺, 𑀪𑀤𑁆𑀤𑀲𑀸𑀮 𑀯𑀦𑀧𑁆𑀧𑀢𑀺;

𑀳𑀺𑀢𑀓𑀸𑀫𑁄𑀲𑀺 𑀜𑀸𑀢𑀻𑀦𑀁, 𑀅𑀪𑀬𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂’’𑀢𑀺.

𑀢𑀢𑁆𑀣 𑀘𑁂𑀢𑁂𑀬𑁆𑀬𑀭𑀽𑀧𑀁 𑀘𑁂𑀢𑁂𑀲𑀻𑀢𑀺 𑀜𑀸𑀢𑀻𑀲𑀼 𑀫𑀼𑀤𑀼𑀘𑀺𑀢𑁆𑀢𑀢𑀸𑀬 𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀦𑁆𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀘𑀺𑀦𑁆𑀢𑁂𑀲𑀺. 𑀙𑁂𑀤𑁂𑀬𑁆𑀬𑀭𑀽𑀧𑀁 𑀙𑁂𑀤𑁂𑀲𑀻𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀦𑁆𑀢𑁄 𑀙𑁂𑀤𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀙𑁂𑀤𑁂𑀲𑀻𑀢𑀺. 𑀅𑀪𑀬𑀦𑁆𑀢𑀺 𑀏𑀢𑀲𑁆𑀫𑀺𑀁 𑀢𑁂 𑀲𑀫𑁆𑀫, 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀅𑀪𑀬𑀁 𑀤𑀤𑀸𑀫𑀺, 𑀦 𑀫𑁂 𑀧𑀸𑀲𑀸𑀤𑁂𑀦𑀢𑁆𑀣𑁄, 𑀦𑀸𑀳𑀁 𑀢𑀁 𑀙𑁂𑀤𑀸𑀧𑁂𑀲𑁆𑀲𑀸𑀫𑀺, 𑀕𑀘𑁆𑀙 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀓𑁆𑀓𑀢𑀕𑀭𑀼𑀓𑀢𑁄 𑀲𑀼𑀔𑀁 𑀚𑀻𑀯𑀸𑀢𑀺 𑀆𑀳.

𑀤𑁂𑀯𑀭𑀸𑀚𑀸 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀅𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀭𑀼𑀡𑀲𑀸𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀪𑀤𑁆𑀤𑀲𑀸𑀮𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀪𑀤𑁆𑀤𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁬𑁬] 𑁩. 𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀓𑀲𑀦𑁆𑀢𑀺 𑀯𑀧𑀦𑁆𑀢𑀺 𑀢𑁂 𑀚𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀭𑀬𑁂 𑀧𑀢𑀺𑀢𑀪𑀸𑀯𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀅𑀕𑁆𑀕𑀲𑀸𑀯𑀓𑁂𑀲𑀼 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀡𑁆𑀳𑀮𑁄𑀳𑀺𑀢𑁂 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑁂 𑀩𑀮𑀯𑀯𑁂𑀤𑀦𑀸𑀧𑀻𑀴𑀺𑀢𑁄 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀅𑀳𑀫𑁂𑀯 𑀦𑀯 𑀫𑀸𑀲𑁂 𑀢𑀣𑀸𑀕𑀢𑀲𑁆𑀲 𑀅𑀦𑀢𑁆𑀣𑀁 𑀘𑀺𑀦𑁆𑀢𑁂𑀲𑀺𑀁, 𑀲𑀢𑁆𑀣𑀼 𑀧𑀦 𑀫𑀬𑀺 𑀧𑀸𑀧𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀦𑀫𑁆𑀧𑀺 𑀫𑀬𑀺 𑀆𑀖𑀸𑀢𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀸 𑀓𑀢𑀓𑀫𑁆𑀫𑁂𑀦 𑀅𑀳𑀫𑁂𑀯 𑀇𑀤𑀸𑀦𑀺 𑀅𑀦𑀸𑀣𑁄 𑀚𑀸𑀢𑁄, 𑀲𑀢𑁆𑀣𑀸𑀭𑀸𑀧𑀺𑀫𑁆𑀳𑀺 𑀯𑀺𑀲𑁆𑀲𑀝𑁆𑀞𑁄 𑀫𑀳𑀸𑀣𑁂𑀭𑁂𑀳𑀺𑀧𑀺 𑀜𑀸𑀢𑀺𑀲𑁂𑀝𑁆𑀞𑁂𑀦 𑀭𑀸𑀳𑀼𑀮𑀢𑁆𑀣𑁂𑀭𑁂𑀦𑀧𑀺 𑀲𑀓𑁆𑀬𑀭𑀸𑀚𑀓𑀼𑀮𑁂𑀳𑀺𑀧𑀺, 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀜𑁆𑀘𑀓𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀁 𑀭𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑁄𑀲𑀮𑀭𑀝𑁆𑀞𑀁 𑀲𑀫𑁆𑀧𑀸𑀧𑀼𑀡𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 ‘‘𑀤𑁂𑀯𑀤𑀢𑁆𑀢𑁄 𑀓𑀺𑀭, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀔𑀫𑀸𑀧𑁂𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺. ‘‘𑀆𑀦𑀦𑁆𑀤, 𑀤𑁂𑀯𑀤𑀢𑁆𑀢𑁄 𑀫𑀫 𑀤𑀲𑁆𑀲𑀦𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺.

𑀅𑀣 𑀢𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀧𑀼𑀦 𑀣𑁂𑀭𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸𑀧𑀺 𑀢𑀣𑁂𑀯 𑀅𑀯𑀘. 𑀢𑀲𑁆𑀲 𑀚𑁂𑀢𑀯𑀦𑁂 𑀧𑁄𑀓𑁆𑀔𑀭𑀡𑀺𑀬𑀸 𑀲𑀫𑀻𑀧𑀁 𑀆𑀕𑀢𑀲𑁆𑀲 𑀧𑀸𑀧𑀁 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺, 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀦𑁆𑀳𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀫𑀜𑁆𑀘𑀓𑀢𑁄 𑀫𑀁 𑀆𑀯𑀼𑀲𑁄 𑀑𑀢𑀸𑀭𑁂𑀣, 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀲 𑀑𑀢𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀫𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀤𑁂 𑀅𑀮𑀤𑁆𑀥𑁂𑀬𑁂𑀯 𑀫𑀳𑀸𑀧𑀣𑀯𑀻 𑀯𑀺𑀯𑀭𑀫𑀤𑀸𑀲𑀺. 𑀢𑀸𑀯𑀤𑁂𑀯 𑀢𑀁 𑀅𑀯𑀻𑀘𑀺𑀢𑁄 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀸𑀬 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺. 𑀲𑁄 ‘‘𑀧𑀸𑀧𑀓𑀫𑁆𑀫𑀁 𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑁋

‘‘𑀇𑀫𑁂𑀳𑀺 𑀅𑀝𑁆𑀞𑀻𑀳𑀺 𑀢𑀫𑀕𑁆𑀕𑀧𑀼𑀕𑁆𑀕𑀮𑀁, 𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺𑀁;

𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀧𑀸𑀡𑁂𑀳𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀻’’𑀢𑀺. (𑀫𑀺. 𑀧. 𑁪.𑁧.𑁩) 𑁋

𑀇𑀫𑀸𑀬 𑀕𑀸𑀣𑀸𑀬 𑀲𑀭𑀡𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀅𑀯𑀻𑀘𑀺𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦 𑀧𑀜𑁆𑀘 𑀉𑀧𑀝𑁆𑀞𑀸𑀓𑀓𑀼𑀮𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺𑀧𑀺 𑀢𑀧𑁆𑀧𑀓𑁆𑀔𑀺𑀓𑀸𑀦𑀺 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀏𑀯𑀁 𑀲𑁄 𑀢𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀕𑀡𑁆𑀳𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀧𑀸𑀧𑁄 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀝𑁆𑀞𑀸𑀦𑁂 𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀅𑀦𑀸𑀕𑀢𑀪𑀬𑀫𑀦𑁄𑀮𑁄𑀓𑁂𑀢𑁆𑀯𑀸 𑀧𑀜𑁆𑀘𑀳𑀺 𑀓𑀼𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀅𑀯𑀻𑀘𑀺𑀧𑀭𑀸𑀬𑀡𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀸𑀕𑀢𑀪𑀬𑀁 𑀦 𑀑𑀮𑁄𑀓𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀕𑀺𑀤𑁆𑀥𑁂𑀦 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀓𑀼𑀮𑀲𑀳𑀲𑁆𑀲𑀦𑀺𑀯𑀸𑀲𑁄 𑀫𑀳𑀸𑀯𑀟𑁆𑀠𑀓𑀻𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀣 𑀯𑀟𑁆𑀠𑀓𑀻 ‘‘𑀢𑀼𑀫𑁆𑀳𑀸𑀓𑀁 𑀫𑀜𑁆𑀘𑀁 𑀓𑀭𑀺𑀲𑁆𑀲𑀸𑀫, 𑀧𑀻𑀞𑀁 𑀓𑀭𑀺𑀲𑁆𑀲𑀸𑀫, 𑀕𑁂𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀩𑀳𑀼𑀁 𑀇𑀡𑀁 𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀺𑀝𑁆𑀞𑀤𑀺𑀝𑁆𑀞𑁂 𑀯𑀟𑁆𑀠𑀓𑀻 𑀘𑁄𑀤𑁂𑀦𑁆𑀢𑀺 𑀧𑀮𑀺𑀩𑀼𑀤𑁆𑀥𑀦𑁆𑀢𑀺. 𑀢𑁂 𑀇𑀡𑀸𑀬𑀺𑀓𑁂𑀳𑀺 𑀉𑀧𑀤𑁆𑀤𑀼𑀢𑀸 𑀲𑀼𑀔𑀁 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀢𑀺𑀁 𑀦𑀸𑀯𑀁 𑀩𑀦𑁆𑀥𑀺𑀢𑁆𑀯𑀸 𑀦𑀤𑀺𑀁 𑀑𑀢𑀸𑀭𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀕𑀸𑀫𑀢𑁄 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀕𑀸𑀫𑀁 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀫𑀸𑀤𑀸𑀬 𑀦𑀸𑀯𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀆𑀭𑀼𑀬𑁆𑀳 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀯𑀺𑀘𑀭𑀦𑁆𑀢𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀏𑀓𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀤𑀻𑀧𑀓𑁂 𑀲𑀬𑀁𑀚𑀸𑀢𑀲𑀸𑀮𑀺𑀉𑀘𑁆𑀙𑀼𑀓𑀤𑀮𑀺𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀺 𑀯𑀺𑀯𑀺𑀥𑀨𑀮𑀸𑀦𑀺 𑀅𑀢𑁆𑀣𑀺, 𑀅𑀜𑁆𑀜𑀢𑀭𑁄 𑀧𑀪𑀺𑀦𑁆𑀦𑀦𑀸𑀯𑁄 𑀧𑀼𑀭𑀺𑀲𑁄 𑀧𑀞𑀫𑀢𑀭𑀁 𑀢𑀁 𑀤𑀻𑀧𑀓𑀁 𑀧𑀢𑁆𑀯𑀸 𑀲𑀸𑀮𑀺𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄 𑀉𑀘𑁆𑀙𑀼𑀆𑀤𑀻𑀦𑀺 𑀔𑀸𑀤𑀫𑀸𑀦𑁄 𑀣𑀽𑀮𑀲𑀭𑀻𑀭𑁄 𑀦𑀕𑁆𑀕𑁄 𑀧𑀭𑀽𑀴𑁆𑀳𑀓𑁂𑀲𑀫𑀲𑁆𑀲𑀼 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀧𑀝𑀺𑀯𑀲𑀢𑀺.

𑀯𑀟𑁆𑀠𑀓𑀻 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀲𑀘𑁂 𑀅𑀬𑀁 𑀤𑀻𑀧𑀓𑁄 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑁂𑀧𑀺 𑀅𑀫𑁆𑀳𑁂 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀢𑀸𑀯 𑀦’’𑀦𑁆𑀢𑀺. 𑀅𑀣 𑀲𑀢𑁆𑀢𑀝𑁆𑀞 𑀧𑀼𑀭𑀺𑀲𑀸 𑀲𑀽𑀭𑀸 𑀩𑀮𑀯𑀦𑁆𑀢𑁄 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑀸 𑀳𑀼𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀤𑀻𑀧𑀓𑀁 𑀧𑀭𑀺𑀕𑁆𑀕𑀡𑁆𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀧𑀼𑀭𑀺𑀲𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀉𑀘𑁆𑀙𑀼𑀭𑀲𑀁 𑀧𑀺𑀯𑀺𑀢𑁆𑀯𑀸 𑀲𑀼𑀔𑀧𑁆𑀧𑀢𑁆𑀢𑁄 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀭𑀚𑀢𑀧𑀝𑁆𑀝𑀲𑀤𑀺𑀲𑁂 𑀯𑀸𑀮𑀼𑀓𑀢𑀮𑁂 𑀲𑀻𑀢𑀘𑁆𑀙𑀸𑀬𑀸𑀬 𑀉𑀢𑁆𑀢𑀸𑀦𑀓𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀓𑀲𑀦𑁆𑀢𑀸 𑀯𑀧𑀦𑁆𑀢𑀸 𑀏𑀯𑀭𑀽𑀧𑀁 𑀲𑀼𑀔𑀁 𑀦 𑀮𑀪𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑀢𑁄 𑀫𑀬𑁆𑀳𑀁 𑀅𑀬𑀫𑁂𑀯 𑀤𑀻𑀧𑀓𑁄 𑀯𑀭’’𑀦𑁆𑀢𑀺 𑀕𑀸𑀬𑀫𑀸𑀦𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀅𑀣 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑁄 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫. ‘‘𑀓𑀲𑀦𑁆𑀢𑀺 𑀯𑀧𑀦𑁆𑀢𑀺 𑀢𑁂 𑀚𑀦𑀸, 𑀫𑀦𑀼𑀚𑀸 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄;

𑀦𑀬𑀺𑀫𑀲𑁆𑀲 𑀤𑀻𑀧𑀓𑀲𑁆𑀲 𑀪𑀸𑀕𑀺𑀦𑁄, 𑀚𑀫𑁆𑀩𑀼𑀤𑀻𑀧𑀸 𑀇𑀤𑀫𑁂𑀯 𑀦𑁄 𑀯𑀭’’𑀦𑁆𑀢𑀺.

𑀢𑀢𑁆𑀣 𑀢𑁂 𑀚𑀦𑀸𑀢𑀺 𑀢𑁂 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀚𑀦𑀸. 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄𑀢𑀺 𑀦𑀸𑀦𑀸𑀓𑀫𑁆𑀫𑀸𑀦𑀁 𑀨𑀮𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸.

𑀅𑀣 𑀢𑁂 𑀤𑀻𑀧𑀓𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀼𑀭𑀺𑀲𑀸 𑀢𑀲𑁆𑀲 𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀦𑀼𑀲𑁆𑀲𑀲𑀤𑁆𑀤𑁄 𑀯𑀺𑀬 𑀲𑀼𑀬𑁆𑀬𑀢𑀺, 𑀚𑀸𑀦𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀻𑀢𑀢𑀲𑀺𑀢𑀸 𑀲𑀭𑁂 𑀲𑀦𑁆𑀦𑀳𑀺𑀁𑀲𑀼. 𑀲𑁄𑀧𑀺 𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀥𑀪𑀬𑁂𑀦 ‘‘𑀦𑀸𑀳𑀁, 𑀲𑀸𑀫𑀺, 𑀬𑀓𑁆𑀔𑁄, 𑀧𑀼𑀭𑀺𑀲𑁄𑀫𑁆𑀳𑀺, 𑀚𑀻𑀯𑀺𑀢𑀁 𑀫𑁂 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑁄 ‘‘𑀧𑀼𑀭𑀺𑀲𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦𑀕𑁆𑀕𑀸 𑀦 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀲𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀢𑀢𑁆𑀣 𑀆𑀕𑀢𑀦𑀺𑀬𑀸𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄𑀧𑀺 𑀲𑀩𑁆𑀩𑀁 𑀢𑁂𑀲𑀁 𑀓𑀣𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀇𑀥𑀸𑀕𑀢𑀸, 𑀅𑀬𑀁 𑀉𑀢𑁆𑀢𑀫𑀤𑀻𑀧𑁄, 𑀦 𑀏𑀢𑁆𑀣 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀺, 𑀲𑀬𑀁𑀚𑀸𑀢𑀲𑀸𑀮𑀻𑀦𑀜𑁆𑀘𑁂𑀯 𑀉𑀘𑁆𑀙𑀼𑀆𑀤𑀻𑀦𑀜𑁆𑀘𑁂𑀢𑁆𑀣 𑀅𑀦𑁆𑀢𑁄 𑀦𑀢𑁆𑀣𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀦𑁆𑀢𑀸 𑀯𑀲𑀣𑀸’’𑀢𑀺 𑀆𑀳. 𑀇𑀥 𑀧𑀦 𑀯𑀲𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀅𑀜𑁆𑀜𑁄 𑀧𑀭𑀺𑀧𑀦𑁆𑀣𑁄 𑀦𑀢𑁆𑀣𑀺, 𑀅𑀜𑁆𑀜𑀁 𑀪𑀬𑀁 𑀏𑀢𑁆𑀣 𑀦𑀢𑁆𑀣𑀺, 𑀅𑀬𑀁 𑀧𑀦 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁄, 𑀅𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀤𑀺𑀲𑁆𑀯𑀸 𑀓𑀼𑀚𑁆𑀛𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀁 𑀓𑀭𑁄𑀦𑁆𑀢𑀸 𑀯𑀸𑀮𑀼𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀯𑀸𑀮𑀼𑀓𑀸𑀬 𑀧𑀝𑀺𑀘𑁆𑀙𑀸𑀤𑁂𑀬𑁆𑀬𑀸𑀣, 𑀏𑀢𑁆𑀢𑀓𑀁 𑀇𑀥 𑀪𑀬𑀁, 𑀅𑀜𑁆𑀜𑀁 𑀦𑀢𑁆𑀣𑀺, 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑀸 𑀪𑀯𑁂𑀬𑁆𑀬𑀸𑀣𑀸𑀢𑀺. 𑀢𑁂 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀓𑀼𑀮𑀲𑀳𑀲𑁆𑀲𑁂 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀓𑀼𑀮𑀲𑀢𑀸𑀦𑀁 𑀚𑁂𑀝𑁆𑀞𑀓𑀸 𑀤𑁆𑀯𑁂 𑀯𑀟𑁆𑀠𑀓𑀻 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁄 𑀩𑀸𑀮𑁄 𑀅𑀳𑁄𑀲𑀺 𑀭𑀲𑀕𑀺𑀤𑁆𑀥𑁄, 𑀏𑀓𑁄 𑀧𑀡𑁆𑀟𑀺𑀢𑁄 𑀭𑀲𑁂𑀲𑀼 𑀅𑀦𑀮𑁆𑀮𑀻𑀦𑁄.

𑀅𑀧𑀭𑀪𑀸𑀕𑁂 𑀲𑀩𑁆𑀩𑁂𑀧𑀺 𑀢𑁂 𑀢𑀢𑁆𑀣 𑀲𑀼𑀔𑀁 𑀯𑀲𑀦𑁆𑀢𑀸 𑀣𑀽𑀮𑀲𑀭𑀻𑀭𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀘𑀺𑀭𑀁 𑀧𑀻𑀢𑀸 𑀦𑁄 𑀲𑀼𑀭𑀸, 𑀉𑀘𑁆𑀙𑀼𑀭𑀲𑁂𑀦 𑀫𑁂𑀭𑀬𑀁 𑀓𑀢𑁆𑀯𑀸 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀫𑁂𑀭𑀬𑀁 𑀓𑀸𑀭𑁂𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀫𑀤𑀯𑀲𑁂𑀦 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀓𑀻𑀴𑀦𑁆𑀢𑀸 𑀧𑀫𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑀻𑀧𑀓𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁 𑀓𑀭𑀺𑀁𑀲𑀼. 𑀤𑁂𑀯𑀢𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀓𑀻𑀴𑀸𑀫𑀡𑁆𑀟𑀮𑀁 𑀧𑀝𑀺𑀓𑀽𑀮𑀁 𑀓𑀭𑁄𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀫𑀳𑀸𑀲𑀫𑀼𑀤𑁆𑀤𑀁 𑀉𑀢𑁆𑀢𑀭𑀸𑀧𑁂𑀢𑁆𑀯𑀸 𑀤𑀻𑀧𑀓𑀥𑁄𑀯𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀓𑀸𑀴𑀧𑀓𑁆𑀔𑁄, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀫𑀸𑀕𑀫𑁄 𑀘 𑀪𑀺𑀦𑁆𑀦𑁄, 𑀇𑀢𑁄 𑀤𑀸𑀦𑀺 𑀧𑀦𑁆𑀦𑀭𑀲𑀫𑁂 𑀤𑀺𑀯𑀲𑁂 𑀧𑀼𑀡𑁆𑀡𑀫𑀻𑀉𑀧𑁄𑀲𑀣𑀤𑀺𑀯𑀲𑁂 𑀘𑀦𑁆𑀤𑀲𑁆𑀲𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀫𑀼𑀤𑁆𑀤𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑁂𑀧𑀺𑀫𑁂 𑀖𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀤𑀺𑀯𑀲𑀁 𑀞𑀧𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄 𑀥𑀫𑁆𑀫𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀫𑀸 𑀇𑀫𑁂 𑀫𑀫 𑀧𑀲𑁆𑀲𑀦𑁆𑀢𑀲𑁆𑀲 𑀦𑀲𑁆𑀲𑀺𑀁𑀲𑀽’’𑀢𑀺 𑀅𑀦𑀼𑀓𑀫𑁆𑀧𑀸𑀬 𑀢𑁂𑀲𑀼 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀖𑀭𑀤𑁆𑀯𑀸𑀭𑁂 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑀓𑀮𑀤𑀻𑀧𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀅𑀫𑁆𑀪𑁄 𑀯𑀟𑁆𑀠𑀓𑀻, 𑀤𑁂𑀯𑀢𑀸 𑀢𑀼𑀫𑁆𑀳𑀸𑀓𑀁 𑀓𑀼𑀤𑁆𑀥𑀸. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀸 𑀯𑀲𑀺𑀢𑁆𑀣, 𑀇𑀢𑁄 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀳𑀺 𑀤𑁂𑀯𑀢𑀸 𑀲𑀫𑀼𑀤𑁆𑀤𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑁂𑀯 𑀢𑀼𑀫𑁆𑀳𑁂 𑀖𑀸𑀢𑁂𑀲𑁆𑀲𑀦𑁆𑀢𑀺, 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀣𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀢𑀺𑀧𑀜𑁆𑀘𑀭𑀢𑁆𑀢𑀽𑀧𑀕𑀢𑀫𑁆𑀳𑀺 𑀘𑀦𑁆𑀤𑁂, 𑀯𑁂𑀕𑁄 𑀫𑀳𑀸 𑀳𑁂𑀳𑀺𑀢𑀺 𑀲𑀸𑀕𑀭𑀲𑁆𑀲;

𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁, 𑀫𑀸 𑀯𑁄 𑀯𑀥𑀻 𑀕𑀘𑁆𑀙𑀣 𑀮𑁂𑀡𑀫𑀜𑁆𑀜’’𑀦𑁆𑀢𑀺.

𑀢𑀢𑁆𑀣 𑀉𑀧𑁆𑀮𑀯𑀺𑀲𑁆𑀲𑀦𑁆𑀢𑀺 𑀇𑀫𑀁 𑀤𑀻𑀧𑀓𑀁 𑀉𑀧𑁆𑀮𑀯𑀦𑁆𑀢𑁄 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀅𑀪𑀺𑀪𑀯𑀺𑀲𑁆𑀲𑀢𑀺. 𑀫𑀸 𑀯𑁄 𑀯𑀥𑀻𑀢𑀺 𑀲𑁄 𑀲𑀸𑀕𑀭𑀯𑁂𑀕𑁄 𑀢𑀼𑀫𑁆𑀳𑁂 𑀫𑀸 𑀯𑀥𑀺.

𑀇𑀢𑀺 𑀲𑁄 𑀢𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀞𑀸𑀦𑀫𑁂𑀯 𑀕𑀢𑁄. 𑀢𑀲𑁆𑀫𑀺𑀁 𑀕𑀢𑁂 𑀅𑀧𑀭𑁄 𑀲𑀸𑀳𑀲𑀺𑀓𑁄 𑀓𑀓𑁆𑀔𑀴𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀇𑀫𑁂 𑀇𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑁂𑀬𑁆𑀬𑀼𑀁, 𑀅𑀳𑀁 𑀦𑁂𑀲𑀁 𑀕𑀫𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑁂𑀧𑀺𑀫𑁂 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑀓𑀮𑀤𑀻𑀧𑀁 𑀏𑀓𑁄𑀪𑀸𑀲𑀁 𑀓𑀭𑁄𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 𑀇𑀥𑀸𑀕𑀢𑁄, 𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀕𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀯𑁄 𑀓𑀺𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀇𑀫𑀁 𑀦𑀸𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀢𑀼𑀫𑁆𑀳𑀸𑀓𑀁 𑀇𑀥 𑀦𑀺𑀯𑀸𑀲𑀁 𑀦 𑀇𑀘𑁆𑀙𑀢𑀺, 𑀤𑁄𑀲𑁂𑀦 𑀓𑀣𑁂𑀢𑀺, 𑀢𑀼𑀫𑁆𑀳𑁂 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭. ‘‘𑀦 𑀚𑀸𑀢𑀼𑀬𑀁 𑀲𑀸𑀕𑀭𑀯𑀸𑀭𑀺𑀯𑁂𑀕𑁄, 𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁;

𑀢𑀁 𑀫𑁂 𑀦𑀺𑀫𑀺𑀢𑁆𑀢𑁂𑀳𑀺 𑀩𑀳𑀽𑀳𑀺 𑀤𑀺𑀝𑁆𑀞𑀁, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄.

𑁨𑁮. ‘‘𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀧𑀢𑁆𑀢𑀢𑁆𑀣 𑀆𑀯𑀸𑀲𑀫𑀺𑀫𑀁 𑀉𑀴𑀸𑀭𑀁;

𑀦 𑀯𑁄 𑀪𑀬𑀁 𑀧𑀝𑀺𑀧𑀲𑁆𑀲𑀸𑀫𑀺 𑀓𑀺𑀜𑁆𑀘𑀺, 𑀆𑀧𑀼𑀢𑁆𑀢𑀧𑀼𑀢𑁆𑀢𑁂𑀳𑀺 𑀧𑀫𑁄𑀤𑀣𑀯𑁆𑀳𑁄’’𑀢𑀺.

𑀢𑀢𑁆𑀣 𑀦 𑀚𑀸𑀢𑀼𑀬𑀦𑁆𑀢𑀺 𑀦 𑀚𑀸𑀢𑀼 𑀅𑀬𑀁. 𑀫𑀸 𑀪𑁂𑀣𑀸𑀢𑀺 𑀫𑀸 𑀪𑀸𑀬𑀺𑀢𑁆𑀣. 𑀫𑁄𑀤𑀣𑀯𑁆𑀳𑁄𑀢𑀺 𑀧𑀫𑁄𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀣. 𑀆𑀧𑀼𑀢𑁆𑀢𑀧𑀼𑀢𑁆𑀢𑁂𑀳𑀻𑀢𑀺 𑀬𑀸𑀯 𑀧𑀼𑀢𑁆𑀢𑀸𑀦𑀫𑁆𑀧𑀺 𑀧𑀼𑀢𑁆𑀢𑁂𑀳𑀺 𑀧𑀫𑁄𑀤𑀣, 𑀦𑀢𑁆𑀣𑀺 𑀯𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀪𑀬𑀦𑁆𑀢𑀺.

𑀏𑀯𑀁 𑀲𑁄 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀧𑀓𑁆𑀓𑀦𑁆𑀢𑀓𑀸𑀮𑁂 𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄 𑀩𑀸𑀮𑀯𑀟𑁆𑀠𑀓𑀻 ‘‘𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄, 𑀯𑀘𑀦’’𑀦𑁆𑀢𑀺 𑀲𑁂𑀲𑀯𑀟𑁆𑀠𑀓𑀻 𑀆𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁨𑁯. ‘‘𑀬𑁄 𑀤𑁂𑀯𑁄𑀬𑀁 𑀤𑀓𑁆𑀔𑀺𑀡𑀸𑀬𑀁 𑀤𑀺𑀲𑀸𑀬𑀁, 𑀔𑁂𑀫𑀦𑁆𑀢𑀺 𑀧𑀓𑁆𑀓𑁄𑀲𑀢𑀺 𑀢𑀲𑁆𑀲 𑀲𑀘𑁆𑀘𑀁;

𑀦 𑀉𑀢𑁆𑀢𑀭𑁄 𑀯𑁂𑀤𑀺 𑀪𑀬𑀸𑀪𑀬𑀲𑁆𑀲, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄’’𑀢𑀺.

𑀢𑀢𑁆𑀣 𑀤𑀓𑁆𑀔𑀺𑀡𑀸𑀬𑀦𑁆𑀢𑀺 𑀤𑀓𑁆𑀔𑀺𑀡𑀸𑀬, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀭𑀲𑀕𑀺𑀤𑁆𑀥𑀸 𑀧𑀜𑁆𑀘𑀲𑀢𑀸 𑀯𑀟𑁆𑀠𑀓𑀻 𑀢𑀲𑁆𑀲 𑀩𑀸𑀮𑀲𑁆𑀲 𑀯𑀘𑀦𑀁 𑀆𑀤𑀺𑀬𑀺𑀁𑀲𑀼. 𑀇𑀢𑀭𑁄 𑀧𑀦 𑀧𑀡𑁆𑀟𑀺𑀢𑀯𑀟𑁆𑀠𑀓𑀻 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄 𑀢𑁂 𑀯𑀟𑁆𑀠𑀓𑀻 𑀆𑀫𑀦𑁆𑀢𑁂𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦. ‘‘𑀬𑀣𑀸 𑀇𑀫𑁂 𑀯𑀺𑀧𑁆𑀧𑀯𑀤𑀦𑁆𑀢𑀺 𑀬𑀓𑁆𑀔𑀸, 𑀏𑀓𑁄 𑀪𑀬𑀁 𑀲𑀁𑀲𑀢𑀺 𑀔𑁂𑀫𑀫𑁂𑀓𑁄;

𑀢𑀤𑀺𑀗𑁆𑀖 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀡𑀸𑀣, 𑀔𑀺𑀧𑁆𑀧𑀁 𑀮𑀳𑀼𑀁 𑀫𑀸 𑀯𑀺𑀦𑀲𑁆𑀲𑀺𑀫𑁆𑀳 𑀲𑀩𑁆𑀩𑁂.

𑁩𑁧. ‘‘𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀓𑀭𑁄𑀫 𑀦𑀸𑀯𑀁, 𑀤𑁄𑀡𑀺𑀁 𑀤𑀴𑁆𑀳𑀁 𑀲𑀩𑁆𑀩𑀬𑀦𑁆𑀢𑀽𑀧𑀧𑀦𑁆𑀦𑀁;

𑀲𑀘𑁂 𑀅𑀬𑀁 𑀤𑀓𑁆𑀔𑀺𑀡𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀉𑀢𑁆𑀢𑀭𑁄𑀬𑀁;

𑀲𑀸 𑀘𑁂𑀯 𑀦𑁄 𑀳𑁂𑀳𑀺𑀢𑀺 𑀆𑀧𑀤𑀢𑁆𑀣𑀸, 𑀇𑀫𑀜𑁆𑀘 𑀤𑀻𑀧𑀁 𑀦 𑀧𑀭𑀺𑀘𑁆𑀘𑀚𑁂𑀫.

𑁩𑁨. ‘‘𑀲𑀘𑁂 𑀘 𑀔𑁄 𑀉𑀢𑁆𑀢𑀭𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀤𑀓𑁆𑀔𑀺𑀡𑁄𑀬𑀁;

𑀢𑀫𑁂𑀯 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀲𑀩𑁆𑀩𑁂, 𑀏𑀯𑀁 𑀫𑀬𑀁 𑀲𑁄𑀢𑁆𑀣𑀺 𑀢𑀭𑁂𑀫𑀼 𑀧𑀸𑀭𑀁.

𑁩𑁩. ‘‘𑀦 𑀯𑁂 𑀲𑀼𑀕𑀡𑁆𑀳𑀁 𑀧𑀞𑀫𑁂𑀦 𑀲𑁂𑀝𑁆𑀞𑀁, 𑀓𑀦𑀺𑀝𑁆𑀞𑀫𑀸𑀧𑀸𑀣𑀕𑀢𑀁 𑀕𑀳𑁂𑀢𑁆𑀯𑀸;

𑀬𑁄 𑀘𑀻𑀥 𑀢𑀘𑁆𑀙𑀁 𑀧𑀯𑀺𑀘𑁂𑀬𑁆𑀬 𑀕𑀡𑁆𑀳𑀢𑀺, 𑀲 𑀯𑁂 𑀦𑀭𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.

𑀢𑀢𑁆𑀣 𑀯𑀺𑀧𑁆𑀧𑀯𑀤𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀁 𑀯𑀤𑀦𑁆𑀢𑀺. 𑀮𑀳𑀼𑀦𑁆𑀢𑀺 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑀤𑀻𑀧𑀦𑀁. 𑀤𑁄𑀡𑀺𑀦𑁆𑀢𑀺 𑀕𑀫𑁆𑀪𑀻𑀭𑀁 𑀫𑀳𑀸𑀦𑀸𑀯𑀁. 𑀲𑀩𑁆𑀩𑀬𑀦𑁆𑀢𑀽𑀧𑀧𑀦𑁆𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀨𑀺𑀬𑀸𑀭𑀺𑀢𑁆𑀢𑀸𑀤𑀻𑀳𑀺 𑀬𑀦𑁆𑀢𑁂𑀳𑀺 𑀉𑀧𑀧𑀦𑁆𑀦𑀁. 𑀲𑀸 𑀘𑁂𑀯 𑀦𑁄 𑀳𑁂𑀳𑀺𑀢𑀺 𑀆𑀧𑀤𑀢𑁆𑀣𑀸𑀢𑀺 𑀲𑀸 𑀘 𑀦𑁄 𑀦𑀸𑀯𑀸 𑀧𑀘𑁆𑀙𑀸𑀧𑀺 𑀉𑀧𑁆𑀧𑀦𑁆𑀦𑀸𑀬 𑀆𑀧𑀤𑀸𑀬 𑀅𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀜𑁆𑀘 𑀤𑀻𑀧𑀁 𑀦 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫. 𑀢𑀭𑁂𑀫𑀽𑀢𑀺 𑀢𑀭𑀺𑀲𑁆𑀲𑀸𑀫. 𑀦 𑀯𑁂 𑀲𑀼𑀕𑀡𑁆𑀳𑀦𑁆𑀢𑀺 𑀦 𑀯𑁂 𑀲𑀼𑀔𑁂𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀲𑁂𑀝𑁆𑀞𑀦𑁆𑀢𑀺 𑀉𑀢𑁆𑀢𑀫𑀁 𑀢𑀣𑀁 𑀲𑀘𑁆𑀘𑀁. 𑀓𑀦𑀺𑀝𑁆𑀞𑀦𑁆𑀢𑀺 𑀧𑀞𑀫𑀯𑀘𑀦𑀁 𑀉𑀧𑀸𑀤𑀸𑀬 𑀧𑀘𑁆𑀙𑀺𑀫𑀯𑀘𑀦𑀁 𑀓𑀦𑀺𑀝𑁆𑀞𑀁 𑀦𑀸𑀫. 𑀇𑀥𑀸𑀧𑀺 ‘‘𑀦 𑀯𑁂 𑀲𑀼𑀕𑀡𑁆𑀳’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀪𑁄 𑀯𑀟𑁆𑀠𑀓𑀻, 𑀬𑁂𑀦 𑀓𑁂𑀦𑀘𑀺 𑀧𑀞𑀫𑁂𑀦 𑀯𑀼𑀢𑁆𑀢𑀯𑀘𑀦𑀁 ‘‘𑀇𑀤𑀫𑁂𑀯 𑀲𑁂𑀝𑁆𑀞𑀁 𑀢𑀣𑀁 𑀲𑀘𑁆𑀘’’𑀦𑁆𑀢𑀺 𑀲𑀼𑀔𑀁 𑀦 𑀕𑀡𑁆𑀳𑀺𑀢𑀩𑁆𑀩𑀫𑁂𑀯, 𑀬𑀣𑀸 𑀘 𑀢𑀁, 𑀏𑀯𑀁 𑀓𑀦𑀺𑀝𑁆𑀞𑀁 𑀕𑀘𑁆𑀙𑀸 𑀯𑀼𑀢𑁆𑀢𑀯𑀘𑀦𑀫𑁆𑀧𑀺 ‘‘𑀇𑀤𑀫𑁂𑀯 𑀢𑀣𑀁 𑀲𑀘𑁆𑀘’’𑀦𑁆𑀢𑀺 𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀬𑀁 𑀧𑀦 𑀲𑁄𑀢𑀯𑀺𑀲𑀬𑀁 𑀆𑀧𑀸𑀣𑀕𑀢𑀁 𑀳𑁄𑀢𑀺, 𑀢𑀁 𑀆𑀧𑀸𑀣𑀕𑀢𑀁 𑀕𑀳𑁂𑀢𑁆𑀯𑀸 𑀬𑁄 𑀇𑀥 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀼𑀭𑀺𑀫𑀯𑀘𑀦𑀜𑁆𑀘 𑀧𑀘𑁆𑀙𑀺𑀫𑀯𑀘𑀦𑀜𑁆𑀘 𑀧𑀯𑀺𑀘𑁂𑀬𑁆𑀬 𑀯𑀺𑀘𑀺𑀦𑀺𑀢𑁆𑀯𑀸 𑀢𑀻𑀭𑁂𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀢𑀘𑁆𑀙𑀁 𑀕𑀡𑁆𑀳𑀸𑀢𑀺, 𑀬𑀁 𑀢𑀣𑀁 𑀲𑀘𑁆𑀘𑀁 𑀲𑀪𑀸𑀯𑀪𑀽𑀢𑀁, 𑀢𑀤𑁂𑀯 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲 𑀯𑁂 𑀦𑀭𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦𑀦𑁆𑀢𑀺 𑀲𑁄 𑀉𑀢𑁆𑀢𑀫𑀁 𑀞𑀸𑀦𑀁 𑀉𑀧𑁂𑀢𑀺 𑀅𑀥𑀺𑀕𑀘𑁆𑀙𑀢𑀺 𑀯𑀺𑀦𑁆𑀤𑀢𑀺 𑀮𑀪𑀢𑀻𑀢𑀺.

𑀲𑁄 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀪𑁄, 𑀫𑀬𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑁂𑀯𑀢𑀸𑀦𑀁 𑀯𑀘𑀦𑀁 𑀓𑀭𑀺𑀲𑁆𑀲𑀸𑀫, 𑀦𑀸𑀯𑀁 𑀢𑀸𑀯 𑀲𑀚𑁆𑀚𑁂𑀬𑁆𑀬𑀸𑀫. 𑀲𑀘𑁂 𑀧𑀞𑀫𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀸𑀫, 𑀅𑀣 𑀇𑀢𑀭𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀪𑀯𑀺𑀲𑁆𑀲𑀢𑀺, 𑀦𑀸𑀯𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀩𑀸𑀮𑀯𑀟𑁆𑀠𑀓𑀻 ‘‘𑀅𑀫𑁆𑀪𑁄, 𑀢𑁆𑀯𑀁 𑀉𑀤𑀓𑀧𑀸𑀢𑀺𑀬𑀁 𑀲𑀼𑀲𑀼𑀫𑀸𑀭𑀁 𑀧𑀲𑁆𑀲𑀲𑀺, 𑀅𑀢𑀻𑀯 𑀤𑀻𑀖𑀁 𑀧𑀲𑁆𑀲𑀲𑀺, 𑀧𑀞𑀫𑀤𑁂𑀯𑀧𑀼𑀢𑁆𑀢𑁄 𑀅𑀫𑁆𑀳𑁂𑀲𑀼 𑀤𑁄𑀲𑀯𑀲𑁂𑀦 𑀓𑀣𑁂𑀲𑀺, 𑀧𑀘𑁆𑀙𑀺𑀫𑁄 𑀲𑀺𑀦𑁂𑀳𑁂𑀦𑁂𑀯, 𑀇𑀫𑀁 𑀏𑀯𑀭𑀽𑀧𑀁 𑀯𑀭𑀤𑀻𑀧𑀁 𑀧𑀳𑀸𑀬 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫, 𑀲𑀘𑁂 𑀧𑀦 𑀢𑁆𑀯𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀯 𑀧𑀭𑀺𑀲𑀁 𑀕𑀡𑁆𑀳𑀺𑀢𑁆𑀯𑀸 𑀦𑀸𑀯𑀁 𑀓𑀭𑁄𑀳𑀺, 𑀅𑀫𑁆𑀳𑀸𑀓𑀁 𑀦𑀸𑀯𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀆𑀳. 𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀦𑀸𑀯𑀁 𑀲𑀚𑁆𑀚𑁂𑀢𑁆𑀯𑀸 𑀦𑀸𑀯𑀸𑀬 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀧𑀭𑀺𑀲𑁄 𑀦𑀸𑀯𑀸𑀬 𑀅𑀝𑁆𑀞𑀸𑀲𑀺.

𑀢𑀢𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀘𑀦𑁆𑀤𑀲𑁆𑀲 𑀉𑀕𑁆𑀕𑀫𑀦𑀯𑁂𑀮𑀸𑀬 𑀲𑀫𑀼𑀤𑁆𑀤𑀢𑁄 𑀊𑀫𑀺 𑀉𑀢𑁆𑀢𑀭𑀺𑀢𑁆𑀯𑀸 𑀚𑀸𑀡𑀼𑀓𑀧𑀫𑀸𑀡𑀸 𑀳𑀼𑀢𑁆𑀯𑀸 𑀤𑀻𑀧𑀓𑀁 𑀥𑁄𑀯𑀺𑀢𑁆𑀯𑀸 𑀕𑀢𑀸. 𑀧𑀡𑁆𑀟𑀺𑀢𑁄 𑀲𑀫𑀼𑀤𑁆𑀤𑀲𑁆𑀲 𑀉𑀢𑁆𑀢𑀭𑀡𑀪𑀸𑀯𑀁 𑀜𑀢𑁆𑀯𑀸 𑀦𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀩𑀸𑀮𑀯𑀟𑁆𑀠𑀓𑀺𑀧𑀓𑁆𑀔𑀺𑀓𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 ‘‘𑀲𑀫𑀼𑀤𑁆𑀤𑀢𑁄 𑀊𑀫𑀺 𑀤𑀻𑀧𑀥𑁄𑀯𑀦𑀢𑁆𑀣𑀸𑀬 𑀆𑀕𑀢𑀸, 𑀏𑀢𑁆𑀢𑀓𑀫𑁂𑀯 𑀏𑀢’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀝𑀺𑀧𑀸𑀝𑀺𑀬𑀸 𑀓𑀝𑀺𑀧𑁆𑀧𑀫𑀸𑀡𑀸 𑀧𑀼𑀭𑀺𑀲𑀧𑁆𑀧𑀫𑀸𑀡𑀸 𑀢𑀸𑀮𑀧𑁆𑀧𑀫𑀸𑀡𑀸 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀸 𑀲𑀸𑀕𑀭𑀊𑀫𑀺 𑀤𑀻𑀧𑀓𑀫𑁆𑀧𑀺 𑀯𑀼𑀬𑁆𑀳𑀫𑀸𑀦𑀸 𑀆𑀕𑀜𑁆𑀙𑀺. 𑀧𑀡𑁆𑀟𑀺𑀢𑁄 𑀉𑀧𑀸𑀬𑀓𑀼𑀲𑀮𑀢𑀸𑀬 𑀭𑀲𑁂 𑀅𑀮𑀕𑁆𑀕𑁄 𑀲𑁄𑀢𑁆𑀣𑀺𑀦𑀸 𑀕𑀢𑁄, 𑀩𑀸𑀮𑀯𑀟𑁆𑀠𑀓𑀻 𑀭𑀲𑀕𑀺𑀤𑁆𑀥𑁂𑀦 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀳𑀺 𑀓𑀼𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀦𑀸𑀲𑀁 𑀧𑀢𑁆𑀢𑁄.

𑀇𑀢𑁄 𑀧𑀭𑀸 𑀲𑀸𑀦𑀼𑀲𑀸𑀲𑀦𑀻 𑀢𑀫𑀢𑁆𑀣𑀁 𑀤𑀻𑀧𑀬𑀫𑀸𑀦𑀸 𑀢𑀺𑀲𑁆𑀲𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁩𑁪. ‘‘𑀬𑀣𑀸𑀧𑀺 𑀢𑁂 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂, 𑀲𑀓𑀫𑁆𑀫𑀼𑀦𑀸 𑀲𑁄𑀢𑁆𑀣𑀺 𑀯𑀳𑀺𑀁𑀲𑀼 𑀯𑀸𑀡𑀺𑀚𑀸;

𑀅𑀦𑀸𑀕𑀢𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀬𑀸𑀦, 𑀅𑀧𑁆𑀧𑀫𑁆𑀧𑀺 𑀦𑀸𑀘𑁆𑀘𑁂𑀢𑀺 𑀲 𑀪𑀽𑀭𑀺𑀧𑀜𑁆𑀜𑁄.

𑁩𑁫. ‘‘𑀩𑀸𑀮𑀸 𑀘 𑀫𑁄𑀳𑁂𑀦 𑀭𑀲𑀸𑀦𑀼𑀕𑀺𑀤𑁆𑀥𑀸, 𑀅𑀦𑀸𑀕𑀢𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀢𑁆𑀣𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀻𑀤𑀦𑁆𑀢𑀺 𑀅𑀢𑁆𑀣𑀚𑀸𑀢𑁂, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸.

𑁩𑁬. ‘‘𑀅𑀦𑀸𑀕𑀢𑀁 𑀧𑀝𑀺𑀓𑀬𑀺𑀭𑀸𑀣 𑀓𑀺𑀘𑁆𑀘𑀁, ‘𑀫𑀸 𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀲𑀺’;

𑀢𑀁 𑀢𑀸𑀤𑀺𑀲𑀁 𑀧𑀝𑀺𑀓𑀢𑀓𑀺𑀘𑁆𑀘𑀓𑀸𑀭𑀺𑀁, 𑀦 𑀢𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀢𑀻’’𑀢𑀺.

𑀢𑀢𑁆𑀣 𑀲𑀓𑀫𑁆𑀫𑀼𑀦𑀸𑀢𑀺 𑀅𑀦𑀸𑀕𑀢𑀪𑀬𑀁 𑀤𑀺𑀲𑁆𑀯𑀸 𑀧𑀼𑀭𑁂𑀢𑀭𑀁 𑀓𑀢𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦. 𑀲𑁄𑀢𑁆𑀣𑀺 𑀯𑀳𑀺𑀁𑀲𑀽𑀢𑀺 𑀔𑁂𑀫𑁂𑀦 𑀕𑀫𑀺𑀁𑀲𑀼. 𑀯𑀸𑀡𑀺𑀚𑀸𑀢𑀺 𑀲𑀫𑀼𑀤𑁆𑀤𑁂 𑀯𑀺𑀘𑀭𑀡𑀪𑀸𑀯𑁂𑀦 𑀯𑀟𑁆𑀠𑀓𑀻 𑀯𑀼𑀢𑁆𑀢𑀸. 𑀧𑀝𑀺𑀯𑀺𑀚𑁆𑀛𑀺𑀬𑀸𑀦𑀸𑀢𑀺 𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀢𑀭𑀁 𑀓𑀢𑁆𑀢𑀩𑁆𑀩𑀁 𑀅𑀦𑀸𑀕𑀢𑀁 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀇𑀥𑀮𑁄𑀓𑁂 𑀪𑀽𑀭𑀺𑀧𑀜𑁆𑀜𑁄 𑀓𑀼𑀮𑀧𑀼𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀦 𑀅𑀘𑁆𑀘𑁂𑀢𑀺 𑀦𑀸𑀢𑀺𑀯𑀢𑁆𑀢𑀢𑀺, 𑀦 𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀢𑁆𑀣𑀦𑁆𑀢𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀢𑁆𑀣𑀁, 𑀧𑀞𑀫𑀫𑁂𑀯 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺 𑀬𑀤𑀸 𑀢𑀁 𑀅𑀦𑀸𑀕𑀢𑀁 𑀅𑀢𑁆𑀣𑀚𑀸𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀻𑀤𑀦𑁆𑀢𑀺, 𑀅𑀢𑁆𑀣𑁂 𑀚𑀸𑀢𑁂 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀦 𑀮𑀪𑀦𑁆𑀢𑀺, 𑀲𑀫𑀼𑀤𑁆𑀤𑁂 𑀢𑁂 𑀩𑀸𑀮𑀯𑀟𑁆𑀠𑀓𑀻 𑀫𑀦𑀼𑀲𑁆𑀲𑀸 𑀯𑀺𑀬 𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀺.

𑀅𑀦𑀸𑀕𑀢𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀅𑀦𑀸𑀕𑀢𑀁 𑀧𑀞𑀫𑀢𑀭𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀧𑀝𑀺𑀓𑀬𑀺𑀭𑀸𑀣, 𑀧𑀼𑀭𑁂𑀢𑀭𑀫𑁂𑀯 𑀓𑀭𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀫𑀸 𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀲𑀺, 𑀧𑀼𑀭𑁂 𑀓𑀢𑁆𑀢𑀩𑁆𑀩𑀜𑁆𑀳𑀺 𑀧𑀼𑀭𑁂 𑀅𑀓𑀬𑀺𑀭𑀫𑀸𑀦𑀁 𑀧𑀘𑁆𑀙𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀮𑁂 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑁂𑀦 𑀩𑁆𑀬𑀥𑁂𑀢𑀺, 𑀢𑀁 𑀫𑀁 𑀫𑀸 𑀩𑁆𑀬𑀥𑁂𑀲𑀻𑀢𑀺 𑀧𑀞𑀫𑀫𑁂𑀯 𑀦𑀁 𑀧𑀡𑁆𑀟𑀺𑀢𑁄 𑀓𑀭𑁂𑀬𑁆𑀬. 𑀢𑀁 𑀢𑀸𑀤𑀺𑀲𑀦𑁆𑀢𑀺 𑀬𑀣𑀸 𑀧𑀡𑁆𑀟𑀺𑀢𑀁 𑀧𑀼𑀭𑀺𑀲𑀁. 𑀧𑀝𑀺𑀓𑀢𑀓𑀺𑀘𑁆𑀘𑀓𑀸𑀭𑀺𑀦𑁆𑀢𑀺 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀸𑀭𑀺𑀦𑀁. 𑀢𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂𑀢𑀺 𑀅𑀦𑀸𑀕𑀢𑀁 𑀓𑀺𑀘𑁆𑀘𑀁 𑀓𑀬𑀺𑀭𑀫𑀸𑀦𑀁 𑀧𑀘𑁆𑀙𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀮𑁂 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀓𑀸𑀮𑁂 𑀢𑀸𑀤𑀺𑀲𑀁 𑀧𑀼𑀭𑀺𑀫𑀁 𑀦 𑀩𑁆𑀬𑀥𑁂𑀢𑀺 𑀦 𑀩𑀸𑀥𑀢𑀺. 𑀓𑀲𑁆𑀫𑀸? 𑀧𑀼𑀭𑁂𑀬𑁂𑀯 𑀓𑀢𑀢𑁆𑀢𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁂 𑀮𑀕𑁆𑀕𑁄 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀧𑀭𑀺𑀲𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀮𑀯𑀟𑁆𑀠𑀓𑀻 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀤𑀓𑁆𑀔𑀺𑀡𑀤𑀺𑀲𑀸𑀬 𑀞𑀺𑀢𑁄 𑀅𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑁄 𑀓𑁄𑀓𑀸𑀮𑀺𑀓𑁄, 𑀉𑀢𑁆𑀢𑀭𑀤𑀺𑀲𑀸𑀬 𑀞𑀺𑀢𑁄 𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀡𑁆𑀟𑀺𑀢𑀯𑀟𑁆𑀠𑀓𑀻 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁬𑁭] 𑁪. 𑀓𑀸𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀅𑀘𑀺𑀭𑀯𑀢𑀻𑀢𑀻𑀭𑁂 𑀔𑁂𑀢𑁆𑀢𑀓𑀭𑀡𑀢𑁆𑀣𑀸𑀬 𑀅𑀭𑀜𑁆𑀜𑀁 𑀓𑁄𑀝𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 ‘‘𑀔𑁂𑀢𑁆𑀢𑀝𑁆𑀞𑀸𑀦𑀁 𑀓𑁄𑀝𑀸𑀧𑁂𑀫𑀺 𑀪𑁄, 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀙𑀺𑀦𑁆𑀦𑀭𑀼𑀓𑁆𑀔𑁂 𑀳𑀸𑀭𑁂𑀢𑁆𑀯𑀸 𑀔𑁂𑀢𑁆𑀢𑀲𑁆𑀲 𑀲𑁄𑀥𑀦𑀓𑀸𑀮𑁂 𑀓𑀲𑀦𑀓𑀸𑀮𑁂 𑀓𑁂𑀤𑀸𑀭𑀩𑀦𑁆𑀥𑀦𑀓𑀸𑀮𑁂 𑀯𑀧𑀦𑀓𑀸𑀮𑁂𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀯𑀧𑀦𑀤𑀺𑀯𑀲𑁂 𑀧𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀚𑁆𑀚, 𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀯𑀧𑁆𑀧𑀫𑀗𑁆𑀕𑀮𑀁, 𑀅𑀳𑀁 𑀇𑀫𑀲𑁆𑀫𑀺𑀁 𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀲𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀲𑁆𑀲𑀁 𑀑𑀮𑁄𑀓𑁂𑀫𑀺 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀪𑀺𑀡𑁆𑀳𑀁 𑀆𑀕𑀘𑁆𑀙𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀪𑀢𑁆𑀢𑁂𑀦 𑀅𑀢𑁆𑀣𑀺𑀓𑁄, 𑀤𑀲𑁆𑀲𑀸𑀫𑀳𑀁 𑀢𑀲𑁆𑀲 𑀪𑀢𑁆𑀢’’𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀢𑀤𑀺𑀯𑀲𑁂 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀅𑀕𑀫𑀸𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑀺𑀯𑀺𑀬 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀧𑀭𑀺𑀡𑀢𑁂 𑀲𑀲𑁆𑀲𑁂 ‘‘𑀲𑁆𑀯𑁂 𑀔𑁂𑀢𑁆𑀢𑀁 𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁂 𑀩𑁆𑀭𑀸𑀳𑁆𑀫𑀡𑁂 𑀅𑀘𑀺𑀭𑀯𑀢𑀺𑀬𑀸 𑀉𑀧𑀭𑀺 𑀲𑀩𑁆𑀩𑀭𑀢𑁆𑀢𑀺𑀁 𑀓𑀭𑀓𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀳𑁄𑀖𑁄 𑀆𑀕𑀦𑁆𑀢𑁆𑀯𑀸 𑀏𑀓𑀦𑀸𑀴𑀺𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀲𑁆𑀲𑀁 𑀲𑀫𑀼𑀤𑁆𑀤𑀁 𑀧𑀯𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀑𑀖𑀫𑁆𑀳𑀺 𑀧𑀢𑀺𑀢𑁂 𑀲𑀲𑁆𑀲𑀯𑀺𑀦𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀳𑁄𑀲𑀺, 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑁄 𑀳𑀢𑁆𑀣𑁂𑀦 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀭𑁄𑀤𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑁄𑀓𑀸𑀪𑀺𑀪𑀽𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑁂𑀲𑁂𑀢𑁆𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀧𑀝𑀺𑀲𑀦𑁆𑀣𑀸𑀭𑀢𑁆𑀣𑀸𑀬 𑀫𑁂 𑀲𑀳𑀸𑀬𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺. 𑀲𑀢𑁆𑀣𑀸 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀲𑁆𑀫𑀸 𑀢𑁆𑀯𑀁 𑀤𑀼𑀫𑁆𑀫𑀦𑁄𑀲𑀺, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀪𑁄 𑀕𑁄𑀢𑀫, 𑀅𑀘𑀺𑀭𑀯𑀢𑀻𑀢𑀻𑀭𑁂 𑀫𑀬𑀸 𑀭𑀼𑀓𑁆𑀔𑀘𑁆𑀙𑁂𑀤𑀦𑀢𑁄 𑀧𑀝𑁆𑀞𑀸𑀬 𑀓𑀢𑀁 𑀓𑀫𑁆𑀫𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀅𑀳𑀁 ‘‘𑀇𑀫𑀲𑁆𑀫𑀺𑀁 𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀢𑀼𑀫𑁆𑀳𑀸𑀓𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀺𑀘𑀭𑀸𑀫𑀺, 𑀇𑀤𑀸𑀦𑀺 𑀫𑁂 𑀲𑀩𑁆𑀩𑀁 𑀢𑀁 𑀲𑀲𑁆𑀲𑀁 𑀫𑀳𑁄𑀖𑁄 𑀲𑀫𑀼𑀤𑁆𑀤𑀫𑁂𑀯 𑀧𑀯𑁂𑀲𑁂𑀲𑀺, 𑀓𑀺𑀜𑁆𑀘𑀺 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀲𑀓𑀝𑀲𑀢𑀫𑀢𑁆𑀢𑀁 𑀥𑀜𑁆𑀜𑀁 𑀯𑀺𑀦𑀝𑁆𑀞𑀁, 𑀢𑁂𑀦 𑀫𑁂 𑀫𑀳𑀸𑀲𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺. ‘‘𑀓𑀺𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀲𑁄𑀘𑀦𑁆𑀢𑀲𑁆𑀲 𑀦𑀝𑁆𑀞𑀁 𑀧𑀼𑀦𑀸𑀕𑀘𑁆𑀙𑀢𑀻’’𑀢𑀺. ‘‘𑀦𑁄 𑀳𑁂𑀢𑀁 𑀪𑁄 𑀕𑁄𑀢𑀫𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄𑀘𑀲𑀺, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀥𑀦𑀥𑀜𑁆𑀜𑀁 𑀦𑀸𑀫 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀦𑀲𑁆𑀲𑀦𑀓𑀸𑀮𑁂 𑀦𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀲𑀗𑁆𑀔𑀸𑀭𑀕𑀢𑀁 𑀅𑀦𑀲𑁆𑀲𑀦𑀥𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀫𑀸 𑀘𑀺𑀦𑁆𑀢𑀬𑀻’’𑀢𑀺. 𑀇𑀢𑀺 𑀦𑀁 𑀲𑀢𑁆𑀣𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀢𑀲𑁆𑀲 𑀲𑀧𑁆𑀧𑀸𑀬𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀓𑀸𑀫𑀲𑀼𑀢𑁆𑀢𑀁 (𑀲𑀼. 𑀦𑀺. 𑁭𑁭𑁨 𑀆𑀤𑀬𑁄) 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀲𑁄𑀘𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀢𑀁 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. ‘‘𑀲𑀢𑁆𑀣𑀸 𑀅𑀲𑀼𑀓𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀁 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺 𑀲𑀓𑀮𑀦𑀕𑀭𑀁 𑀅𑀜𑁆𑀜𑀸𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑀲𑀩𑀮𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑁄 𑀳𑀼𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀢𑀲𑁆𑀲 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀁 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀏𑀢𑀁 𑀦𑀺𑀲𑁆𑀲𑁄𑀓𑀫𑀓𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀚𑁂𑀝𑁆𑀞𑀓𑀲𑁆𑀲 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺, 𑀓𑀦𑀺𑀝𑁆𑀞𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁. 𑀅𑀧𑀭𑀪𑀸𑀕𑁂 𑀩𑁆𑀭𑀳𑁆𑀫𑀤𑀢𑁆𑀢𑁂 𑀓𑀸𑀮𑀓𑀢𑁂 𑀅𑀫𑀘𑁆𑀘𑀸 𑀚𑁂𑀝𑁆𑀞𑀓𑀲𑁆𑀲 𑀅𑀪𑀺𑀲𑁂𑀓𑀁 𑀧𑀝𑁆𑀞𑀧𑁂𑀲𑀼𑀁. 𑀲𑁄 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄, 𑀓𑀦𑀺𑀝𑁆𑀞𑀲𑁆𑀲 𑀫𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀅𑀪𑀺𑀲𑁂𑀓𑁂 𑀓𑀢𑁂 ‘‘𑀦 𑀫𑁂 𑀇𑀲𑁆𑀲𑀭𑀺𑀬𑁂𑀦𑀢𑁆𑀣𑁄’’𑀢𑀺 𑀉𑀧𑀭𑀚𑁆𑀚𑀸𑀤𑀻𑀦𑀺𑀧𑀺 𑀦 𑀇𑀘𑁆𑀙𑀺. ‘‘𑀢𑁂𑀦 𑀳𑀺 𑀲𑀸𑀤𑀽𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀦 𑀫𑁂 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀦𑀺𑀲𑁆𑀲𑀸𑀬 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀲𑀺. 𑀢𑁂 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀪𑀸𑀯𑀁 𑀜𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦𑀸𑀤𑀁𑀲𑀼, 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦𑁂𑀯 𑀢𑀁 𑀧𑀭𑀺𑀳𑀭𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀭𑀸𑀚𑀓𑀫𑁆𑀫𑀺𑀓𑀸 𑀔𑁂𑀢𑁆𑀢𑀧𑁆𑀧𑀫𑀸𑀡𑀕𑁆𑀕𑀳𑀡𑀢𑁆𑀣𑀸𑀬 𑀢𑀁 𑀕𑀸𑀫𑀁 𑀅𑀕𑀫𑀁𑀲𑀼. 𑀲𑁂𑀝𑁆𑀞𑀺 𑀭𑀸𑀚𑀓𑀼𑀫𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀸𑀫𑀺, 𑀫𑀬𑀁 𑀢𑀼𑀫𑁆𑀳𑁂 𑀧𑁄𑀲𑁂𑀫, 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀧𑀡𑁆𑀡𑀁 𑀧𑁂𑀲𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀩𑀮𑀺𑀁 𑀳𑀸𑀭𑁂𑀣𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀅𑀲𑀼𑀓𑀲𑁂𑀝𑁆𑀞𑀺𑀓𑀼𑀮𑀁 𑀦𑀸𑀫 𑀉𑀧𑀦𑀺𑀲𑁆𑀲𑀸𑀬 𑀯𑀲𑀸𑀫𑀺, 𑀫𑀁 𑀦𑀺𑀲𑁆𑀲𑀸𑀬 𑀏𑀢𑁂𑀲𑀁 𑀩𑀮𑀺𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀣𑀸 𑀓𑀸𑀭𑁂𑀲𑀺.

𑀅𑀣 𑀦𑀁 𑀲𑀓𑀮𑀕𑀸𑀫𑀯𑀸𑀲𑀺𑀦𑁄𑀧𑀺 𑀚𑀦𑀧𑀤𑀯𑀸𑀲𑀺𑀦𑁄𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀬𑀁 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀩𑀮𑀺𑀁 𑀤𑀲𑁆𑀲𑀸𑀫, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀼𑀗𑁆𑀓𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀧𑀡𑁆𑀡𑀁 𑀧𑁂𑀲𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀢𑀲𑁆𑀲𑁂𑀯 𑀩𑀮𑀺𑀁 𑀅𑀤𑀁𑀲𑀼. 𑀅𑀣𑀲𑁆𑀲 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑁄𑀲𑀺, 𑀢𑁂𑀦 𑀲𑀤𑁆𑀥𑀺𑀜𑁆𑀜𑁂𑀯𑀲𑁆𑀲 𑀢𑀡𑁆𑀳𑀸𑀧𑀺 𑀫𑀳𑀢𑀻 𑀚𑀸𑀢𑀸. 𑀲𑁄 𑀅𑀧𑀭𑀪𑀸𑀕𑁂𑀧𑀺 𑀲𑀩𑁆𑀩𑀁 𑀚𑀦𑀧𑀤𑀁 𑀬𑀸𑀘𑀺, 𑀉𑀧𑀟𑁆𑀠𑀭𑀚𑁆𑀚𑀁 𑀬𑀸𑀘𑀺, 𑀓𑀦𑀺𑀝𑁆𑀞𑁄𑀧𑀺 𑀢𑀲𑁆𑀲 𑀅𑀤𑀸𑀲𑀺𑀬𑁂𑀯. 𑀲𑁄 𑀢𑀡𑁆𑀳𑀸𑀬 𑀯𑀟𑁆𑀠𑀫𑀸𑀦𑀸𑀬 𑀉𑀧𑀟𑁆𑀠𑀭𑀚𑁆𑀚𑁂𑀦𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀚𑀦𑀧𑀤𑀧𑀭𑀺𑀯𑀼𑀢𑁄 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀞𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀫𑁂 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀓𑀦𑀺𑀝𑁆𑀞𑀲𑁆𑀲 𑀧𑀡𑁆𑀡𑀁 𑀧𑀳𑀺𑀡𑀺. 𑀓𑀦𑀺𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀸𑀮𑁄 𑀧𑀼𑀩𑁆𑀩𑁂 𑀭𑀚𑁆𑀚𑀫𑁆𑀧𑀺 𑀉𑀧𑀭𑀚𑁆𑀚𑀸𑀤𑀻𑀦𑀺𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 ‘𑀬𑀼𑀤𑁆𑀥𑁂𑀦 𑀕𑀡𑁆𑀳𑀸𑀫𑀻’𑀢𑀺 𑀯𑀤𑀢𑀺, 𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀬𑀼𑀤𑁆𑀥𑁂𑀦 𑀫𑀸𑀭𑁂𑀲𑁆𑀲𑀸𑀫𑀺, 𑀕𑀭𑀳𑀸 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀭𑀚𑁆𑀚𑁂𑀦𑀸’’𑀢𑀺. 𑀅𑀣𑀲𑁆𑀲 ‘‘𑀅𑀮𑀁 𑀬𑀼𑀤𑁆𑀥𑁂𑀦, 𑀭𑀚𑁆𑀚𑀁 𑀕𑀡𑁆𑀳𑀢𑀽’’𑀢𑀺 𑀧𑁂𑀲𑁂𑀲𑀺. 𑀲𑁄 𑀭𑀚𑁆𑀚𑀁 𑀕𑀡𑁆𑀳𑀺𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀉𑀧𑀭𑀚𑁆𑀚𑀁 𑀤𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑀼𑀢𑁆𑀯𑀸 𑀏𑀓𑁂𑀦 𑀭𑀚𑁆𑀚𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀤𑁆𑀯𑁂 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀧𑀢𑁆𑀣𑁂𑀢𑁆𑀯𑀸 𑀢𑀡𑁆𑀳𑀸𑀬 𑀓𑁄𑀝𑀺𑀁 𑀦𑀸𑀤𑁆𑀤𑀲.

𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀓𑁂 𑀦𑀼 𑀔𑁄 𑀮𑁄𑀓𑁂 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁂 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀓𑁂 𑀢𑀡𑁆𑀳𑀸𑀯𑀲𑀺𑀓𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀢𑀡𑁆𑀳𑀸𑀯𑀲𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀩𑀸𑀮𑁄 𑀩𑀸𑀭𑀸𑀡𑀲𑀺𑀭𑀚𑁆𑀚𑁂𑀦𑀧𑀺 𑀦 𑀢𑀼𑀲𑁆𑀲𑀢𑀺, 𑀅𑀳𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀸𑀡𑀯𑀓𑀯𑁂𑀲𑁂𑀦 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀏𑀓𑁄 𑀉𑀧𑀸𑀬𑀓𑀼𑀲𑀮𑁄 𑀫𑀸𑀡𑀯𑁄 𑀤𑁆𑀯𑀸𑀭𑁂 𑀞𑀺𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀧𑀯𑀺𑀲𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀚𑀬𑀸𑀧𑁂𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀆𑀳. 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀢𑀸𑀯𑀤𑁂𑀯 𑀫𑀦𑀼𑀲𑁆𑀲𑀸 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀅𑀣 𑀦𑀁 𑀫𑀸𑀡𑀯𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀨𑀻𑀢𑀸𑀦𑀺 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸𑀦𑀺 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑀸𑀦𑀺 𑀢𑀻𑀡𑀺 𑀦𑀕𑀭𑀸𑀦𑀺 𑀧𑀲𑁆𑀲𑀸𑀫𑀺, 𑀅𑀳𑀁 𑀢𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀲𑀻𑀖𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 ‘‘𑀓𑁄 𑀯𑀸 𑀢𑁆𑀯𑀁, 𑀓𑀼𑀢𑁄 𑀯𑀸 𑀆𑀕𑀢𑁄, 𑀓𑀺𑀁 𑀯𑀸 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀦 𑀧𑀼𑀘𑁆𑀙𑀺. 𑀲𑁄𑀧𑀺 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀭𑀸𑀚𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀓𑁄 𑀫𑀸𑀡𑀯𑁄 ‘𑀅𑀫𑁆𑀳𑀸𑀓𑀁 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’𑀢𑀺 𑀆𑀳, 𑀢𑀁 𑀧𑀓𑁆𑀓𑁄𑀲𑀣, 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀩𑀮𑀓𑀸𑀬𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀣, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀓𑁆𑀓𑀸𑀭𑁄 𑀯𑀸 𑀓𑀢𑁄, 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑀸 𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦𑁂𑀯 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺𑀁, 𑀦 𑀦𑀺𑀯𑀸𑀲𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀁, 𑀕𑀘𑁆𑀙𑀣 𑀦𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀉𑀧𑀥𑀸𑀭𑁂𑀦𑁆𑀢𑀸 𑀦𑀁 𑀅𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚, 𑀲𑀓𑀮𑀦𑀕𑀭𑁂 𑀫𑀸𑀡𑀯𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑁄𑀫𑀦𑀲𑁆𑀲𑀚𑀸𑀢𑁄 ‘‘𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀦𑀝𑁆𑀞𑀁, 𑀫𑀳𑀦𑁆𑀢𑁂𑀦𑀫𑁆𑀳𑀺 𑀬𑀲𑁂𑀦 𑀧𑀭𑀺𑀳𑀻𑀦𑁄, ‘𑀦𑁂𑀯 𑀫𑁂 𑀧𑀭𑀺𑀩𑁆𑀩𑀬𑀁 𑀅𑀤𑀸𑀲𑀺, 𑀦 𑀘 𑀧𑀼𑀘𑁆𑀙𑀺 𑀦𑀺𑀯𑀸𑀲𑀝𑁆𑀞𑀸𑀦’𑀦𑁆𑀢𑀺 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀯𑀸 𑀫𑀸𑀡𑀯𑁄 𑀅𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀢𑀡𑁆𑀳𑀸𑀯𑀲𑀺𑀓𑀲𑁆𑀲 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑀭𑀻𑀭𑁂 𑀧𑀭𑀺𑀟𑀬𑁆𑀳𑀦𑁆𑀢𑁂 𑀉𑀤𑀭𑀁 𑀔𑁄𑀪𑁂𑀢𑁆𑀯𑀸 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀉𑀤𑀧𑀸𑀤𑀺. 𑀏𑀓𑀁 𑀪𑀸𑀚𑀦𑀁 𑀧𑀯𑀺𑀲𑀢𑀺, 𑀏𑀓𑀁 𑀦𑀺𑀓𑁆𑀔𑀫𑀢𑀺, 𑀯𑁂𑀚𑁆𑀚𑀸 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀭𑀸𑀚𑀸 𑀓𑀺𑀮𑀫𑀢𑀺. 𑀅𑀣𑀲𑁆𑀲 𑀩𑁆𑀬𑀸𑀥𑀺𑀢𑀪𑀸𑀯𑁄 𑀲𑀓𑀮𑀦𑀕𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀲𑀺𑀮𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑁂 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀢𑀁 𑀭𑀜𑁆𑀜𑁄 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀏𑀓𑁄 𑀓𑀺𑀭 𑀢𑀭𑀼𑀡𑀫𑀸𑀡𑀯𑁄 𑀢𑀼𑀫𑁆𑀳𑁂 𑀢𑀺𑀓𑀺𑀘𑁆𑀙𑀺𑀢𑀼𑀁 𑀆𑀕𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 ‘‘𑀫𑀳𑀦𑁆𑀢𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀯𑁂𑀚𑁆𑀚𑀸𑀧𑀺 𑀫𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀺𑀁 𑀢𑀭𑀼𑀡𑀫𑀸𑀡𑀯𑁄 𑀲𑀓𑁆𑀔𑀺𑀲𑁆𑀲𑀢𑀺, 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣 𑀦’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀫𑀬𑁆𑀳𑀁 𑀯𑁂𑀚𑁆𑀚𑀓𑀫𑁆𑀫𑁂𑀦 𑀯𑁂𑀢𑀦𑀁 𑀦𑀢𑁆𑀣𑀺, 𑀅𑀳𑀁 𑀢𑀺𑀓𑀺𑀘𑁆𑀙𑀸𑀫𑀺, 𑀓𑁂𑀯𑀮𑀁 𑀪𑁂𑀲𑀚𑁆𑀚𑀫𑀽𑀮𑀫𑀢𑁆𑀢𑀁 𑀤𑁂𑀢𑀽’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀫𑀸𑀡𑀯𑁄 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀢𑁂 𑀢𑀺𑀓𑀺𑀘𑁆𑀙𑀸𑀫𑀺, 𑀅𑀧𑀺𑀘 𑀔𑁄 𑀧𑀦 𑀫𑁂 𑀭𑁄𑀕𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀸𑀳𑀻’’𑀢𑀺 𑀆𑀳. 𑀭𑀸𑀚𑀸 𑀳𑀭𑀸𑀬𑀫𑀸𑀦𑁄 ‘‘𑀓𑀺𑀁 𑀢𑁂 𑀲𑀫𑀼𑀝𑁆𑀞𑀸𑀦𑁂𑀦, 𑀪𑁂𑀲𑀚𑁆𑀚𑀁 𑀏𑀯 𑀓𑀭𑁄𑀳𑀻’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀯𑁂𑀚𑁆𑀚𑀸 𑀦𑀸𑀫 ‘‘𑀅𑀬𑀁 𑀩𑁆𑀬𑀸𑀥𑀺 𑀇𑀫𑀁 𑀦𑀺𑀲𑁆𑀲𑀸𑀬 𑀲𑀫𑀼𑀝𑁆𑀞𑀺𑀢𑁄’’𑀢𑀺 𑀜𑀢𑁆𑀯𑀸 𑀅𑀦𑀼𑀘𑁆𑀙𑀯𑀺𑀓𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀻𑀢𑀺. 𑀭𑀸𑀚𑀸 ‘‘𑀲𑀸𑀥𑀼 𑀢𑀸𑀢𑀸’’𑀢𑀺 𑀲𑀫𑀼𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 ‘‘𑀏𑀓𑁂𑀦 𑀫𑀸𑀡𑀯𑁂𑀦 𑀆𑀕𑀦𑁆𑀢𑁆𑀯𑀸 𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀓𑀣𑁂𑀢𑁆𑀯𑀸 ‘‘𑀇𑀢𑀺 𑀫𑁂 𑀢𑀸𑀢, 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀩𑁆𑀬𑀸𑀥𑀺 𑀉𑀧𑁆𑀧𑀦𑁆𑀦𑁄, 𑀲𑀘𑁂 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑁄𑀲𑀺, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺 𑀆𑀳. 𑀓𑀺𑀁 𑀧𑀦 𑀫𑀳𑀸𑀭𑀸𑀚, 𑀲𑁄𑀘𑀦𑀸𑀬 𑀢𑀸𑀦𑀺 𑀦𑀕𑀭𑀸𑀦𑀺 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺? ‘‘𑀦 𑀲𑀓𑁆𑀓𑀸 𑀢𑀸𑀢𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄𑀘𑀲𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀫𑁂𑀯 𑀳𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀳𑀸𑀬 𑀕𑀫𑀦𑀻𑀬𑀁, 𑀘𑀢𑀽𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸𑀧𑀺 𑀢𑁆𑀯𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀘𑀢𑀲𑁆𑀲𑁄 𑀪𑀢𑁆𑀢𑀧𑀸𑀢𑀺𑀬𑁄 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀦 𑀘𑀢𑀽𑀲𑀼 𑀲𑀬𑀦𑁂𑀲𑀼 𑀲𑀬𑀺𑀲𑁆𑀲𑀲𑀺, 𑀦 𑀘𑀢𑁆𑀢𑀸𑀭𑀺 𑀯𑀢𑁆𑀣𑀬𑀼𑀕𑀸𑀦𑀺 𑀅𑀘𑁆𑀙𑀸𑀤𑁂𑀲𑁆𑀲𑀲𑀺, 𑀢𑀡𑁆𑀳𑀸𑀯𑀲𑀺𑀓𑁂𑀦 𑀦𑀸𑀫 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀬𑀜𑁆𑀳𑀺 𑀢𑀡𑁆𑀳𑀸 𑀦𑀸𑀫 𑀯𑀟𑁆𑀠𑀫𑀸𑀦𑀸 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀘𑁆𑀘𑀺𑀢𑀼𑀁 𑀦 𑀤𑁂𑀢𑀻𑀢𑀺.

𑀇𑀢𑀺 𑀦𑀁 𑀫𑀳𑀸𑀲𑀢𑁆𑀢𑁄 𑀑𑀯𑀤𑀺𑀢𑁆𑀯𑀸 𑀅𑀣𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁭. ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑁩𑁮. ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀢𑀢𑁄 𑀦𑀁 𑀅𑀧𑀭𑀁 𑀓𑀸𑀫𑁂, 𑀖𑀫𑁆𑀫𑁂 𑀢𑀡𑁆𑀳𑀁𑀯 𑀯𑀺𑀦𑁆𑀤𑀢𑀺.

𑁩𑁯. ‘‘𑀕𑀯𑀁𑀯 𑀲𑀺𑀗𑁆𑀕𑀺𑀦𑁄 𑀲𑀺𑀗𑁆𑀕𑀁, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺;

𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀺𑀧𑀸𑀲𑀸 𑀘, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺.

𑁪𑁦. ‘‘𑀧𑀣𑀩𑁆𑀬𑀸 𑀲𑀸𑀮𑀺𑀬𑀯𑀓𑀁, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀤𑀢𑁆𑀯𑀸 𑀘 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂.

𑁪𑁧. ‘‘𑀭𑀸𑀚𑀸 𑀧𑀲𑀬𑁆𑀳 𑀧𑀣𑀯𑀺𑀁 𑀯𑀺𑀚𑀺𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

𑁪𑁨. ‘‘𑀬𑀸𑀯 𑀅𑀦𑀼𑀲𑁆𑀲𑀭𑀁 𑀓𑀸𑀫𑁂, 𑀫𑀦𑀲𑀸 𑀢𑀺𑀢𑁆𑀢𑀺 𑀦𑀸𑀚𑁆𑀛𑀕𑀸;

𑀢𑀢𑁄 𑀦𑀺𑀯𑀢𑁆𑀢𑀸 𑀧𑀝𑀺𑀓𑁆𑀓𑀫𑁆𑀫 𑀤𑀺𑀲𑁆𑀯𑀸, 𑀢𑁂 𑀯𑁂 𑀲𑀼𑀢𑀺𑀢𑁆𑀢𑀸 𑀬𑁂 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸.

𑁪𑁩. ‘‘𑀧𑀜𑁆𑀜𑀸𑀬 𑀢𑀺𑀢𑁆𑀢𑀺𑀦𑀁 𑀲𑁂𑀝𑁆𑀞𑀁, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺;

𑀧𑀜𑁆𑀜𑀸𑀬 𑀢𑀺𑀢𑁆𑀢𑀁 𑀧𑀼𑀭𑀺𑀲𑀁, 𑀢𑀡𑁆𑀳𑀸 𑀦 𑀓𑀼𑀭𑀼𑀢𑁂 𑀯𑀲𑀁.

𑁪𑁪. ‘‘𑀅𑀧𑀘𑀺𑀦𑁂𑀣𑁂𑀯 𑀓𑀸𑀫𑀸𑀦𑀁, 𑀅𑀧𑁆𑀧𑀺𑀘𑁆𑀙𑀲𑁆𑀲 𑀅𑀮𑁄𑀮𑀼𑀧𑁄;

𑀲𑀫𑀼𑀤𑁆𑀤𑀫𑀢𑁆𑀢𑁄 𑀧𑀼𑀭𑀺𑀲𑁄, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺.

𑁪𑁫. ‘‘𑀭𑀣𑀓𑀸𑀭𑁄𑀯 𑀘𑀫𑁆𑀫𑀲𑁆𑀲, 𑀧𑀭𑀺𑀓𑀦𑁆𑀢𑀁 𑀉𑀧𑀸𑀳𑀦𑀁;

𑀬𑀁 𑀬𑀁 𑀘𑀚𑀢𑀺 𑀓𑀸𑀫𑀸𑀦𑀁, 𑀢𑀁 𑀢𑀁 𑀲𑀫𑁆𑀧𑀚𑁆𑀚𑀢𑁂 𑀲𑀼𑀔𑀁;

𑀲𑀩𑁆𑀩𑀜𑁆𑀘𑁂 𑀲𑀼𑀔𑀫𑀺𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑁂’’𑀢𑀺.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀫𑁆𑀧𑀺 𑀓𑀺𑀮𑁂𑀲𑀓𑀸𑀫𑀫𑁆𑀧𑀺. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀧𑀢𑁆𑀣𑀬𑀫𑀸𑀦𑀲𑁆𑀲. 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀻𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀓𑀸𑀫𑀺𑀢𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺 𑀘𑁂, 𑀦𑀺𑀧𑁆𑀨𑀚𑁆𑀚𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀢𑀢𑁄 𑀦𑀁 𑀅𑀧𑀭𑀁 𑀓𑀸𑀫𑁂𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀭𑀦𑁆𑀢𑀺 𑀧𑀭𑀪𑀸𑀕𑀤𑀻𑀧𑀦𑀁. 𑀓𑀸𑀫𑁂𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲 𑀢𑀁 𑀓𑀸𑀫𑀺𑀢𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺, 𑀢𑀲𑁆𑀫𑀺𑀁 𑀲𑀫𑀺𑀤𑁆𑀥𑁂 𑀢𑀢𑁄 𑀧𑀭𑀁 𑀲𑁄 𑀧𑀼𑀕𑁆𑀕𑀮𑁄 𑀓𑀸𑀫𑀬𑀫𑀸𑀦𑁄 𑀬𑀣𑀸 𑀦𑀸𑀫 𑀖𑀫𑁆𑀫𑁂 𑀕𑀺𑀫𑁆𑀳𑀓𑀸𑀮𑁂 𑀯𑀸𑀢𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀢𑀡𑁆𑀳𑀁 𑀯𑀺𑀦𑁆𑀤𑀢𑀺, 𑀧𑀸𑀦𑀻𑀬𑀧𑀺𑀧𑀸𑀲𑀁 𑀧𑀝𑀺𑀮𑀪𑀢𑀺, 𑀏𑀯𑀁 𑀪𑀺𑀬𑁆𑀬𑁄 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀢𑁂 𑀓𑀸𑀫𑁂 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀭𑀽𑀧𑀢𑀡𑁆𑀳𑀸𑀤𑀺𑀓𑀸 𑀢𑀡𑁆𑀳𑀸 𑀘𑀲𑁆𑀲 𑀯𑀟𑁆𑀠𑀢𑀺𑀬𑁂𑀯𑀸𑀢𑀺. 𑀕𑀯𑀁𑀯𑀸𑀢𑀺 𑀕𑁄𑀭𑀽𑀧𑀲𑁆𑀲 𑀯𑀺𑀬. 𑀲𑀺𑀗𑁆𑀕𑀺𑀦𑁄𑀢𑀺 𑀫𑀢𑁆𑀣𑀓𑀁 𑀧𑀤𑀸𑀮𑁂𑀢𑁆𑀯𑀸 𑀉𑀝𑁆𑀞𑀺𑀢𑀲𑀺𑀗𑁆𑀕𑀲𑁆𑀲. 𑀫𑀦𑁆𑀤𑀲𑁆𑀲𑀸𑀢𑀺 𑀫𑀦𑁆𑀤𑀧𑀜𑁆𑀜𑀲𑁆𑀲. 𑀩𑀸𑀮𑀲𑁆𑀲𑀸𑀢𑀺 𑀩𑀸𑀮𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀘𑁆𑀙𑀓𑀲𑁆𑀲 𑀯𑀟𑁆𑀠𑀦𑁆𑀢𑀲𑁆𑀲 𑀲𑀭𑀻𑀭𑁂𑀦𑁂𑀯 𑀲𑀤𑁆𑀥𑀺𑀁 𑀲𑀺𑀗𑁆𑀕𑀁 𑀯𑀟𑁆𑀠𑀢𑀺, 𑀏𑀯𑀁 𑀅𑀦𑁆𑀥𑀩𑀸𑀮𑀲𑁆𑀲𑀧𑀺 𑀅𑀧𑁆𑀧𑀢𑁆𑀢𑀓𑀸𑀫𑀢𑀡𑁆𑀳𑀸 𑀘 𑀧𑀢𑁆𑀢𑀓𑀸𑀫𑀧𑀺𑀧𑀸𑀲𑀸 𑀘 𑀅𑀧𑀭𑀸𑀧𑀭𑀁 𑀯𑀟𑁆𑀠𑀢𑀻𑀢𑀺.

𑀲𑀸𑀮𑀺𑀬𑀯𑀓𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀬𑀯𑀔𑁂𑀢𑁆𑀢𑀁. 𑀏𑀢𑁂𑀦 𑀲𑀸𑀮𑀺𑀬𑀯𑀸𑀤𑀺𑀓𑀁 𑀲𑀩𑁆𑀩𑀁 𑀥𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑀧𑀤𑁂𑀦 𑀲𑀩𑁆𑀩𑀁 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀧𑀤𑁂𑀦 𑀯𑀸 𑀲𑀩𑁆𑀩𑀁 𑀅𑀯𑀺𑀜𑁆𑀜𑀸𑀡𑀓𑀁, 𑀇𑀢𑀭𑁂𑀦 𑀲𑀯𑀺𑀜𑁆𑀜𑀸𑀡𑀓𑀁. 𑀤𑀢𑁆𑀯𑀸 𑀘𑀸𑀢𑀺 𑀤𑀢𑁆𑀯𑀸𑀧𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀺𑀝𑁆𑀞𑀦𑁆𑀢𑀼 𑀢𑀻𑀡𑀺 𑀭𑀚𑁆𑀚𑀸𑀦𑀺, 𑀲𑀘𑁂 𑀲𑁄 𑀫𑀸𑀡𑀯𑁄 𑀅𑀜𑁆𑀜𑀁 𑀯𑀸 𑀲𑀓𑀮𑀫𑁆𑀧𑀺 𑀧𑀣𑀯𑀺𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀭𑀢𑀦𑀧𑀽𑀭𑀁 𑀓𑀲𑁆𑀲𑀘𑀺 𑀤𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀇𑀤𑀫𑁆𑀧𑀺 𑀏𑀢𑁆𑀢𑀓𑀁 𑀯𑀢𑁆𑀣𑀼 𑀏𑀓𑀲𑁆𑀲𑁂𑀯 𑀅𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀤𑀼𑀧𑁆𑀧𑀽𑀭𑀸 𑀏𑀲𑀸 𑀢𑀡𑁆𑀳𑀸 𑀦𑀸𑀫. 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀧𑀼𑀭𑀺𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀅𑀳𑀼𑀢𑁆𑀯𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑁄 𑀘𑀭𑁂𑀬𑁆𑀬.

𑀑𑀭𑀦𑁆𑀢𑀺 𑀑𑀭𑀺𑀫𑀓𑁄𑀝𑁆𑀞𑀸𑀲𑀁 𑀧𑀢𑁆𑀯𑀸 𑀢𑁂𑀦 𑀅𑀢𑀺𑀢𑁆𑀢𑀭𑀽𑀧𑁄 𑀧𑀼𑀦 𑀲𑀫𑀼𑀤𑁆𑀤𑀧𑀸𑀭𑀫𑁆𑀧𑀺 𑀧𑀢𑁆𑀣𑀬𑁂𑀣. 𑀏𑀯𑀁 𑀢𑀡𑁆𑀳𑀸𑀯𑀲𑀺𑀓𑀲𑀢𑁆𑀢𑀸 𑀦𑀸𑀫 𑀤𑀼𑀧𑁆𑀧𑀽𑀭𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀯𑀸𑀢𑀺 𑀅𑀦𑀺𑀬𑀸𑀫𑀺𑀢𑀧𑀭𑀺𑀘𑁆𑀙𑁂𑀤𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀦𑀸𑀚𑁆𑀛𑀕𑀸𑀢𑀺 𑀦 𑀯𑀺𑀦𑁆𑀤𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀧𑀭𑀺𑀬𑀦𑁆𑀢𑁂𑀧𑀺 𑀓𑀸𑀫𑁂 𑀫𑀦𑀲𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀯𑀺𑀦𑁆𑀤𑀢𑀺, 𑀧𑀢𑁆𑀢𑀼𑀓𑀸𑀫𑁄𑀯 𑀳𑁄𑀢𑀺, 𑀏𑀯𑀁 𑀓𑀸𑀫𑁂𑀲𑀼 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸 𑀯𑀟𑁆𑀠𑀢𑁂𑀯. 𑀢𑀢𑁄 𑀦𑀺𑀯𑀢𑁆𑀢𑀸𑀢𑀺 𑀢𑀢𑁄 𑀧𑀦 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀢𑁄 𑀘𑀺𑀢𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀸𑀬𑁂𑀦 𑀧𑀝𑀺𑀓𑁆𑀓𑀫𑁆𑀫 𑀜𑀸𑀡𑁂𑀦 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀬𑁂 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸, 𑀢𑁂 𑀢𑀺𑀢𑁆𑀢𑀸 𑀦𑀸𑀫.

𑀧𑀜𑁆𑀜𑀸𑀬 𑀢𑀺𑀢𑁆𑀢𑀺𑀦𑀁 𑀲𑁂𑀝𑁆𑀞𑀦𑁆𑀢𑀺 𑀧𑀜𑁆𑀜𑀸𑀬 𑀢𑀺𑀢𑁆𑀢𑀻𑀦𑀁 𑀅𑀬𑀁 𑀧𑀭𑀺𑀧𑀼𑀡𑁆𑀡𑀲𑁂𑀝𑁆𑀞𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀻𑀢𑀺 ‘‘𑀦 𑀳𑀻’’𑀢𑀺𑀧𑀺 𑀧𑀸𑀞𑁄. 𑀬𑀲𑁆𑀫𑀸 𑀧𑀜𑁆𑀜𑀸𑀬 𑀢𑀺𑀢𑁆𑀢𑁄 𑀧𑀼𑀭𑀺𑀲𑁄 𑀓𑀸𑀫𑁂𑀳𑀺 𑀦 𑀧𑀭𑀺𑀟𑀬𑁆𑀳𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑀼𑀭𑀼𑀢𑁂 𑀯𑀲𑀦𑁆𑀢𑀺 𑀢𑀸𑀤𑀺𑀲𑀜𑁆𑀳𑀺 𑀧𑀼𑀭𑀺𑀲𑀁 𑀢𑀡𑁆𑀳𑀸 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁆𑀯𑁂𑀯 𑀧𑀦 𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀲𑀭𑀪𑀗𑁆𑀕𑀫𑀸𑀡𑀯𑁄 𑀯𑀺𑀬 𑀘 𑀅𑀟𑁆𑀠𑀫𑀸𑀲𑀓𑀭𑀸𑀚𑀸 𑀯𑀺𑀬 𑀘 𑀢𑀡𑁆𑀳𑀸𑀯𑀲𑁂 𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀘𑀺𑀦𑁂𑀣𑁂𑀯𑀸𑀢𑀺 𑀯𑀺𑀤𑁆𑀥𑀁𑀲𑁂𑀣𑁂𑀯. 𑀲𑀫𑀼𑀤𑁆𑀤𑀫𑀢𑁆𑀢𑁄𑀢𑀺 𑀫𑀳𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀼𑀤𑁆𑀤𑀧𑁆𑀧𑀫𑀸𑀡𑁄. 𑀲𑁄 𑀫𑀳𑀦𑁆𑀢𑁂𑀦 𑀅𑀕𑁆𑀕𑀺𑀦𑀸𑀧𑀺 𑀲𑀫𑀼𑀤𑁆𑀤𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀳𑀺 𑀦 𑀢𑀧𑁆𑀧𑀢𑀺 𑀦 𑀟𑀬𑁆𑀳𑀢𑀺.

𑀭𑀣𑀓𑀸𑀭𑁄𑀢𑀺 𑀘𑀫𑁆𑀫𑀓𑀸𑀭𑁄. 𑀧𑀭𑀺𑀓𑀦𑁆𑀢𑀦𑁆𑀢𑀺 𑀧𑀭𑀺𑀓𑀦𑁆𑀢𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀘𑀫𑁆𑀫𑀓𑀸𑀭𑁄 𑀉𑀧𑀸𑀳𑀦𑀁 𑀧𑀭𑀺𑀓𑀦𑁆𑀢𑀦𑁆𑀢𑁄 𑀬𑀁 𑀬𑀁 𑀘𑀫𑁆𑀫𑀲𑁆𑀲 𑀅𑀕𑀬𑁆𑀳𑀽𑀧𑀕𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀢𑀁 𑀘𑀚𑀺𑀢𑁆𑀯𑀸 𑀉𑀧𑀸𑀳𑀦𑀁 𑀓𑀢𑁆𑀯𑀸 𑀉𑀧𑀸𑀳𑀦𑀫𑀽𑀮𑀁 𑀮𑀪𑀺𑀢𑁆𑀯𑀸 𑀲𑀼𑀔𑀺𑀢𑁄 𑀳𑁄𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀘𑀫𑁆𑀫𑀓𑀸𑀭𑀲𑀢𑁆𑀣𑀲𑀤𑀺𑀲𑀸𑀬 𑀧𑀜𑁆𑀜𑀸𑀬 𑀓𑀦𑁆𑀢𑀦𑁆𑀢𑁄 𑀬𑀁 𑀬𑀁 𑀑𑀥𑀺𑀁 𑀓𑀸𑀫𑀸𑀦𑀁 𑀘𑀚𑀢𑀺, 𑀢𑁂𑀦 𑀢𑁂𑀦𑀲𑁆𑀲 𑀓𑀸𑀫𑁄𑀥𑀺𑀦𑀸 𑀭𑀳𑀺𑀢𑀁 𑀢𑀁 𑀢𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀜𑁆𑀘 𑀲𑀼𑀔𑀁 𑀲𑀫𑁆𑀧𑀚𑁆𑀚𑀢𑀺 𑀯𑀺𑀕𑀢𑀤𑀭𑀣𑀁, 𑀲𑀘𑁂 𑀧𑀦 𑀲𑀩𑁆𑀩𑀫𑁆𑀧𑀺 𑀓𑀸𑀬𑀓𑀫𑁆𑀫𑀸𑀤𑀺𑀲𑀼𑀔𑀁 𑀯𑀺𑀕𑀢𑀧𑀭𑀺𑀴𑀸𑀳𑀫𑁂𑀯 𑀇𑀘𑁆𑀙𑁂𑀬𑁆𑀬, 𑀓𑀲𑀺𑀡𑀁 𑀪𑀸𑀯𑁂𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑁂𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀇𑀫𑀁 𑀕𑀸𑀣𑀁 𑀓𑀣𑁂𑀦𑁆𑀢𑀲𑁆𑀲 𑀭𑀜𑁆𑀜𑁄 𑀲𑁂𑀢𑀘𑁆𑀙𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀑𑀤𑀸𑀢𑀓𑀲𑀺𑀡𑀚𑁆𑀛𑀸𑀦𑀁 𑀉𑀤𑀧𑀸𑀤𑀺, 𑀭𑀸𑀚𑀸𑀧𑀺 𑀅𑀭𑁄𑀕𑁄 𑀅𑀳𑁄𑀲𑀺. 𑀲𑁄 𑀢𑀼𑀝𑁆𑀞𑁄 𑀲𑀬𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀯𑁂𑀚𑁆𑀚𑀸 𑀫𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀧𑀡𑁆𑀟𑀺𑀢𑀫𑀸𑀡𑀯𑁄 𑀧𑀦 𑀅𑀢𑁆𑀢𑀦𑁄 𑀜𑀸𑀡𑁄𑀲𑀥𑁂𑀦 𑀫𑀁 𑀦𑀺𑀭𑁄𑀕𑀁 𑀅𑀓𑀸𑀲𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁪𑁬. ‘‘𑀅𑀝𑁆𑀞 𑀢𑁂 𑀪𑀸𑀲𑀺𑀢𑀸 𑀕𑀸𑀣𑀸, 𑀲𑀩𑁆𑀩𑀸 𑀳𑁄𑀦𑁆𑀢𑀺 𑀲𑀳𑀲𑁆𑀲𑀺𑀬𑀸;