𑁧𑁧. 𑀏𑀓𑀸𑀤𑀲𑀓𑀦𑀺𑀧𑀸𑀢𑁄

[𑁪𑁫𑁫] 𑁧. 𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀢𑀲𑁆𑀲 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀲𑀢𑁆𑀣𑀸 𑀧𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸 𑀪𑀺𑀓𑁆𑀔𑀯𑁂, 𑀏𑀢𑀁 𑀪𑀺𑀓𑁆𑀔𑀼𑀁 𑀉𑀚𑁆𑀛𑀸𑀬𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀫𑀸𑀢𑀭𑀸 𑀯𑀺𑀬𑀼𑀢𑁆𑀢𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀲𑀼𑀲𑁆𑀲𑀫𑀸𑀦𑀸 𑀭𑀸𑀚𑀸𑀭𑀳𑀁 𑀪𑁄𑀚𑀦𑀁 𑀮𑀪𑀺𑀢𑁆𑀯𑀸𑀧𑀺 ‘𑀫𑀸𑀢𑀭𑀸 𑀯𑀺𑀦𑀸 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺 𑀫𑀸𑀢𑀭𑀁 𑀤𑀺𑀲𑁆𑀯𑀸𑀯 𑀕𑁄𑀘𑀭𑀁 𑀕𑀡𑁆𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀫𑀸𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑁄 𑀅𑀳𑁄𑀲𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀅𑀲𑀻𑀢𑀺𑀳𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀸𑀭𑁄. 𑀲𑁄 𑀚𑀭𑀸𑀚𑀺𑀡𑁆𑀡𑀁 𑀫𑀸𑀢𑀭𑀁 𑀧𑁄𑀲𑁂𑀲𑀺, 𑀫𑀸𑀢𑀸 𑀧𑀦𑀲𑁆𑀲 𑀅𑀦𑁆𑀥𑀸. 𑀲𑁄 𑀫𑀥𑀼𑀭𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀳𑀢𑁆𑀣𑀻𑀦𑀁 𑀤𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀳𑀢𑁆𑀣𑀻 𑀢𑀲𑁆𑀲𑀸 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀔𑀸𑀤𑀦𑁆𑀢𑀺. 𑀲𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀬𑀽𑀣𑀁 𑀙𑀟𑁆𑀟𑁂𑀢𑁆𑀯𑀸 𑀫𑀸𑀢𑀭𑀫𑁂𑀯 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀅𑀜𑁆𑀜𑁂𑀲𑀁 𑀳𑀢𑁆𑀣𑀻𑀦𑀁 𑀅𑀚𑀸𑀦𑀦𑁆𑀢𑀸𑀦𑀁 𑀫𑀸𑀢𑀭𑀁 𑀕𑀳𑁂𑀢𑁆𑀯𑀸 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀦𑀴𑀺𑀦𑀺𑀁 𑀉𑀧𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀧𑀩𑁆𑀩𑀢𑀕𑀼𑀳𑀸𑀬𑀁 𑀫𑀸𑀢𑀭𑀁 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑀺. 𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀯𑀦𑀘𑀭𑀓𑁄 𑀫𑀕𑁆𑀕𑀫𑀽𑀴𑁆𑀳𑁄 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀦𑀸𑀣𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀏𑀲 𑀫𑀬𑀺 𑀞𑀺𑀢𑁂 𑀇𑀥 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀬𑁂𑀦 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀦𑀢𑁆𑀣𑀺 𑀢𑁂 𑀫𑀁 𑀦𑀺𑀲𑁆𑀲𑀸𑀬 𑀪𑀬𑀁, 𑀫𑀸 𑀧𑀮𑀸𑀬𑀺, 𑀓𑀲𑁆𑀫𑀸 𑀢𑁆𑀯𑀁 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀫𑀺, 𑀅𑀳𑀁 𑀫𑀕𑁆𑀕𑀫𑀽𑀴𑁆𑀳𑁄, 𑀅𑀚𑁆𑀚 𑀫𑁂 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀪𑁄 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀅𑀳𑀁 𑀢𑀁 𑀫𑀦𑀼𑀲𑁆𑀲𑀧𑀣𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀻𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀧𑀸𑀧𑁄 ‘‘𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀲𑀜𑁆𑀜𑀁 𑀧𑀩𑁆𑀩𑀢𑀲𑀜𑁆𑀜𑀁 𑀓𑀭𑁄𑀦𑁆𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 ‘‘𑀲𑀘𑁂 𑀓𑁂𑀦𑀘𑀺 𑀓𑀢𑁆𑀣𑀘𑀺 𑀑𑀧𑀯𑀬𑁆𑀳𑀁 𑀓𑀸𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀳𑀢𑁆𑀣𑀻 𑀤𑀺𑀝𑁆𑀞𑁄 𑀅𑀢𑁆𑀣𑀺, 𑀲𑁄 𑀆𑀘𑀺𑀓𑁆𑀔𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀲𑁄 𑀧𑀼𑀭𑀺𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀬𑀸, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀑𑀧𑀯𑀬𑁆𑀳𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀲𑀩𑁆𑀩𑀲𑁂𑀢𑁄 𑀲𑀻𑀮𑀯𑀸 𑀳𑀢𑁆𑀣𑀺𑀭𑀸𑀚𑀸 𑀤𑀺𑀝𑁆𑀞𑁄, 𑀅𑀳𑀁 𑀫𑀕𑁆𑀕𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀫𑀬𑀸 𑀲𑀤𑁆𑀥𑀺𑀁 𑀳𑀢𑁆𑀣𑀸𑀘𑀭𑀺𑀬𑁂 𑀧𑁂𑀲𑁂𑀢𑁆𑀯𑀸 𑀢𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 ‘‘𑀇𑀫𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀇𑀫𑀺𑀦𑀸 𑀯𑀼𑀢𑁆𑀢𑀁 𑀳𑀢𑁆𑀣𑀺𑀦𑀸𑀕𑀁 𑀆𑀦𑁂𑀣𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀳𑀢𑁆𑀣𑀸𑀘𑀭𑀺𑀬𑀁 𑀧𑁂𑀲𑁂𑀲𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀦𑀴𑀺𑀦𑀺𑀁 𑀧𑀯𑀺𑀲𑀺𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁 𑀧𑀲𑁆𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀢𑁆𑀣𑀸𑀘𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀬𑀁 𑀦 𑀅𑀜𑁆𑀜𑀢𑁄 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀸 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀔𑁄 𑀧𑀦 𑀫𑀳𑀸𑀩𑀮𑁄 𑀳𑀢𑁆𑀣𑀺𑀲𑀳𑀲𑁆𑀲𑀫𑁆𑀧𑀺 𑀯𑀺𑀤𑁆𑀥𑀁𑀲𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀫𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀲𑀭𑀝𑁆𑀞𑀓𑀁 𑀲𑁂𑀦𑀸𑀯𑀸𑀳𑀦𑀁 𑀦𑀸𑀲𑁂𑀢𑀼𑀁, 𑀲𑀘𑁂 𑀧𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀫𑁂 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀚𑁆𑀚 𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑀺𑀬𑀫𑀸𑀦𑁄𑀧𑀺 𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀬 𑀲𑀻𑀲𑀁 𑀦𑀸𑀫𑁂𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀅𑀝𑁆𑀞𑀸𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀧𑀤𑀼𑀫𑀲𑀭𑀁 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀳𑀺 𑀧𑀼𑀢𑁆𑀢𑀸’’𑀢𑀺 𑀭𑀚𑀢𑀤𑀸𑀫𑀲𑀤𑀺𑀲𑀸𑀬 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀧𑀦 𑀧𑀼𑀢𑁆𑀢𑁂 𑀅𑀦𑀸𑀕𑀘𑁆𑀙𑀦𑁆𑀢𑁂 ‘‘𑀧𑀼𑀢𑁆𑀢𑁄 𑀫𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀦𑀻𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀢𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦 𑀅𑀬𑀁 𑀯𑀦𑀲𑀡𑁆𑀟𑁄 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧. ‘‘𑀢𑀲𑁆𑀲 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦, 𑀯𑀺𑀭𑀽𑀴𑁆𑀳𑁄 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘;

𑀓𑀼𑀭𑀼𑀯𑀺𑀦𑁆𑀤𑀓𑀭𑀯𑀻𑀭𑀸 𑀪𑀺𑀲𑀲𑀸𑀫𑀸 𑀘, 𑀦𑀺𑀯𑀸𑀢𑁂 𑀧𑀼𑀧𑁆𑀨𑀺𑀢𑀸 𑀘 𑀓𑀡𑀺𑀓𑀸𑀭𑀸.

𑁨. ‘‘𑀓𑁄𑀘𑀺𑀤𑁂𑀯 𑀲𑀼𑀯𑀡𑁆𑀡𑀓𑀸𑀬𑀼𑀭𑀸, 𑀦𑀸𑀕𑀭𑀸𑀚𑀁 𑀪𑀭𑀦𑁆𑀢𑀺 𑀧𑀺𑀡𑁆𑀟𑁂𑀦;

𑀬𑀢𑁆𑀣 𑀭𑀸𑀚𑀸 𑀭𑀸𑀚𑀓𑀼𑀫𑀸𑀭𑁄 𑀯𑀸, 𑀓𑀯𑀘𑀫𑀪𑀺𑀳𑁂𑀲𑁆𑀲𑀢𑀺 𑀅𑀙𑀫𑁆𑀪𑀺𑀢𑁄’’𑀢𑀺.

𑀢𑀢𑁆𑀣 𑀯𑀺𑀭𑀽𑀴𑁆𑀳𑀸𑀢𑀺 𑀯𑀟𑁆𑀠𑀺𑀢𑀸 𑀦𑀸𑀫, 𑀦𑀢𑁆𑀣𑁂𑀢𑁆𑀣 𑀲𑀁𑀲𑀬𑁄𑀢𑀺 𑀅𑀲𑀁𑀲𑀬𑀯𑀲𑁂𑀦𑁂𑀯𑀫𑀸𑀳. 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘𑀸𑀢𑀺 𑀇𑀦𑁆𑀤𑀲𑀸𑀮𑀭𑀼𑀓𑁆𑀔𑀸 𑀘 𑀓𑀼𑀝𑀚𑀭𑀼𑀓𑁆𑀔𑀸 𑀘. 𑀓𑀼𑀭𑀼𑀯𑀺𑀦𑁆𑀤𑀓𑀭𑀯𑀻𑀭𑀸 𑀪𑀺𑀲𑀲𑀸𑀫𑀸 𑀘𑀸𑀢𑀺 𑀓𑀼𑀭𑀼𑀯𑀺𑀦𑁆𑀤𑀭𑀼𑀓𑁆𑀔𑀸 𑀘 𑀓𑀭𑀯𑀻𑀭𑀦𑀸𑀫𑀓𑀸𑀦𑀺 𑀫𑀳𑀸𑀢𑀺𑀡𑀸𑀦𑀺 𑀘 𑀪𑀺𑀲𑀸𑀦𑀺 𑀘 𑀲𑀸𑀫𑀸𑀓𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁂 𑀘 𑀲𑀩𑁆𑀩𑁂 𑀇𑀤𑀸𑀦𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀦𑀺𑀯𑀸𑀢𑁂𑀢𑀺 𑀧𑀩𑁆𑀩𑀢𑀧𑀸𑀤𑁂. 𑀧𑀼𑀧𑁆𑀨𑀺𑀢𑀸𑀢𑀺 𑀫𑀫 𑀧𑀼𑀢𑁆𑀢𑁂𑀦 𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀅𑀔𑀸𑀤𑀺𑀬𑀫𑀸𑀦𑀸 𑀓𑀡𑀺𑀓𑀸𑀭𑀸𑀧𑀺 𑀧𑀼𑀧𑁆𑀨𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀘𑀺𑀤𑁂𑀯𑀸𑀢𑀺 𑀓𑀢𑁆𑀣𑀘𑀺𑀤𑁂𑀯 𑀕𑀸𑀫𑁂 𑀯𑀸 𑀦𑀕𑀭𑁂 𑀯𑀸. 𑀲𑀼𑀯𑀡𑁆𑀡𑀓𑀸𑀬𑀼𑀭𑀸𑀢𑀺 𑀲𑀼𑀯𑀡𑁆𑀡𑀸𑀪𑀭𑀡𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸. 𑀪𑀭𑀦𑁆𑀢𑀺 𑀧𑀺𑀡𑁆𑀟𑁂𑀦𑀸𑀢𑀺 𑀅𑀚𑁆𑀚 𑀫𑀸𑀢𑀼𑀧𑁄𑀲𑀓𑀁 𑀦𑀸𑀕𑀭𑀸𑀚𑀁 𑀭𑀸𑀚𑀸𑀭𑀳𑀲𑁆𑀲 𑀪𑁄𑀚𑀦𑀲𑁆𑀲 𑀲𑀼𑀯𑀟𑁆𑀠𑀺𑀢𑁂𑀦 𑀧𑀺𑀡𑁆𑀟𑁂𑀦 𑀧𑁄𑀲𑁂𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀸𑀕𑀭𑀸𑀚𑁂 𑀭𑀸𑀚𑀸 𑀦𑀺𑀲𑀻𑀤𑀺𑀢𑁆𑀯𑀸. 𑀓𑀯𑀘𑀫𑀪𑀺𑀳𑁂𑀲𑁆𑀲𑀢𑀻𑀢𑀺 𑀲𑀗𑁆𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀓𑀯𑀘𑀁 𑀅𑀪𑀺𑀳𑀦𑀺𑀲𑁆𑀲𑀢𑀺 𑀪𑀺𑀦𑁆𑀤𑀺𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀢𑁆𑀣 𑀫𑀫 𑀧𑀼𑀢𑁆𑀢𑁂 𑀦𑀺𑀲𑀺𑀦𑁆𑀦𑁄 𑀭𑀸𑀚𑀸 𑀯𑀸 𑀭𑀸𑀚𑀓𑀼𑀫𑀸𑀭𑁄 𑀯𑀸 𑀅𑀙𑀫𑁆𑀪𑀺𑀢𑁄 𑀳𑀼𑀢𑁆𑀯𑀸 𑀲𑀧𑀢𑁆𑀢𑀸𑀦𑀁 𑀓𑀯𑀘𑀁 𑀳𑀦𑀺𑀲𑁆𑀲𑀢𑀺, 𑀢𑀁 𑀫𑁂 𑀧𑀼𑀢𑁆𑀢𑀁 𑀦𑀸𑀕𑀭𑀸𑀚𑀸𑀦𑀁 𑀲𑀼𑀯𑀡𑁆𑀡𑀸𑀪𑀭𑀡𑀸 𑀅𑀚𑁆𑀚 𑀧𑀺𑀡𑁆𑀟𑁂𑀦 𑀪𑀭𑀦𑁆𑀢𑀻’’𑀢𑀺.

𑀳𑀢𑁆𑀣𑀸𑀘𑀭𑀺𑀬𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀩𑁄𑀥𑀺𑀲𑀢𑁆𑀢𑀁 𑀓𑀢𑀕𑀦𑁆𑀥𑀧𑀭𑀺𑀪𑀡𑁆𑀟𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀳𑀢𑁆𑀣𑀺𑀲𑀸𑀮𑀁 𑀦𑁂𑀢𑁆𑀯𑀸 𑀯𑀺𑀘𑀺𑀢𑁆𑀭𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀧𑁂𑀲𑀺. 𑀲𑁄 ‘‘𑀫𑀸𑀢𑀭𑀁 𑀯𑀺𑀦𑀸 𑀕𑁄𑀘𑀭𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀡𑁆𑀟𑀁 𑀦 𑀕𑀡𑁆𑀳𑀺. 𑀅𑀣 𑀦𑀁 𑀬𑀸𑀘𑀦𑁆𑀢𑁄 𑀭𑀸𑀚𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩. ‘‘𑀕𑀡𑁆𑀳𑀸𑀳𑀺 𑀦𑀸𑀕 𑀓𑀩𑀴𑀁, 𑀫𑀸 𑀦𑀸𑀕 𑀓𑀺𑀲𑀓𑁄 𑀪𑀯;

𑀩𑀳𑀽𑀦𑀺 𑀭𑀸𑀚𑀓𑀺𑀘𑁆𑀘𑀸𑀦𑀺, 𑀢𑀸𑀦𑀺 𑀦𑀸𑀕 𑀓𑀭𑀺𑀲𑁆𑀲𑀲𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪. ‘‘𑀲𑀸 𑀦𑀽𑀦𑀲𑀸 𑀓𑀧𑀡𑀺𑀓𑀸, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀢𑀢𑁆𑀣 𑀲𑀸 𑀦𑀽𑀦𑀲𑀸𑀢𑀺 𑀫𑀳𑀸𑀭𑀸𑀚, 𑀦𑀽𑀦 𑀲𑀸 𑀏𑀲𑀸. 𑀓𑀧𑀡𑀺𑀓𑀸𑀢𑀺 𑀧𑀼𑀢𑁆𑀢𑀯𑀺𑀬𑁄𑀕𑁂𑀦 𑀓𑀧𑀡𑀸. 𑀔𑀸𑀡𑀼𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀁 𑀭𑀼𑀓𑁆𑀔𑀓𑀮𑀺𑀗𑁆𑀕𑀭𑀁. 𑀖𑀝𑁆𑀝𑁂𑀢𑀻𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀤𑁂𑀦 𑀧𑁄𑀣𑁂𑀦𑁆𑀢𑀻 𑀦𑀽𑀦 𑀧𑀸𑀤𑁂𑀦 𑀳𑀦𑀢𑀺. 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻𑀢𑀺 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀸𑀪𑀺𑀫𑀼𑀔𑀻, 𑀧𑀩𑁆𑀩𑀢𑀧𑀸𑀤𑁂 𑀧𑀭𑀺𑀧𑁆𑀨𑀦𑁆𑀤𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀭𑀸𑀚𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁫. ‘‘𑀓𑀸 𑀦𑀼 𑀢𑁂 𑀲𑀸 𑀫𑀳𑀸𑀦𑀸𑀕, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁬. ‘‘𑀫𑀸𑀢𑀸 𑀫𑁂 𑀲𑀸 𑀫𑀳𑀸𑀭𑀸𑀚, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀭𑀸𑀚𑀸 𑀙𑀝𑁆𑀞𑀕𑀸𑀣𑀸𑀬 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀫𑀼𑀜𑁆𑀘𑀸𑀧𑁂𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭. ‘‘𑀫𑀼𑀜𑁆𑀘𑀣𑁂𑀢𑀁 𑀫𑀳𑀸𑀦𑀸𑀕𑀁, 𑀬𑁄𑀬𑀁 𑀪𑀭𑀢𑀺 𑀫𑀸𑀢𑀭𑀁;

𑀲𑀫𑁂𑀢𑀼 𑀫𑀸𑀢𑀭𑀸 𑀦𑀸𑀕𑁄, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀻’’𑀢𑀺.

𑀢𑀢𑁆𑀣 𑀬𑁄𑀬𑀁 𑀪𑀭𑀢𑀻𑀢𑀺 𑀅𑀬𑀁 𑀦𑀸𑀕𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀅𑀦𑁆𑀥𑀁 𑀫𑀸𑀢𑀭𑀁 𑀧𑁄𑀲𑁂𑀫𑀺, 𑀫𑀬𑀸 𑀯𑀺𑀦𑀸 𑀫𑀬𑁆𑀳𑀁 𑀫𑀸𑀢𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀸𑀬 𑀯𑀺𑀦𑀸 𑀫𑀬𑁆𑀳𑀁 𑀇𑀲𑁆𑀲𑀭𑀺𑀬𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀚𑁆𑀚 𑀫𑁂 𑀫𑀸𑀢𑀼 𑀕𑁄𑀘𑀭𑀁 𑀅𑀮𑀪𑀦𑁆𑀢𑀺𑀬𑀸 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺 𑀯𑀤𑀢𑀺, 𑀢𑀲𑁆𑀫𑀸 𑀬𑁄 𑀅𑀬𑀁 𑀫𑀸𑀢𑀭𑀁 𑀪𑀭𑀢𑀺, 𑀏𑀢𑀁 𑀫𑀳𑀸𑀦𑀸𑀕𑀁 𑀔𑀺𑀧𑁆𑀧𑀁 𑀫𑀼𑀜𑁆𑀘𑀣. 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀻𑀢𑀺 𑀲𑀤𑁆𑀥𑀺𑀁 𑀏𑀲 𑀫𑀸𑀢𑀭𑀸 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀽𑀢𑀺.

𑀅𑀝𑁆𑀞𑀫𑀦𑀯𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁮. ‘‘𑀫𑀼𑀢𑁆𑀢𑁄 𑀘 𑀩𑀦𑁆𑀥𑀦𑀸 𑀦𑀸𑀕𑁄, 𑀫𑀼𑀢𑁆𑀢𑀫𑀸𑀤𑀸𑀬 𑀓𑀼𑀜𑁆𑀚𑀭𑁄;

𑀫𑀼𑀳𑀼𑀢𑁆𑀢𑀁 𑀅𑀲𑁆𑀲𑀸𑀲𑀬𑀺𑀢𑁆𑀯𑀸, 𑀅𑀕𑀫𑀸 𑀬𑁂𑀦 𑀧𑀩𑁆𑀩𑀢𑁄.

𑁯. ‘‘𑀢𑀢𑁄 𑀲𑁄 𑀦𑀴𑀺𑀦𑀺𑀁 𑀕𑀦𑁆𑀢𑁆𑀯𑀸, 𑀲𑀻𑀢𑀁 𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀲𑁄𑀡𑁆𑀟𑀸𑀬𑀽𑀤𑀓𑀫𑀸𑀳𑀢𑁆𑀯𑀸, 𑀫𑀸𑀢𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺.

𑀲𑁄 𑀓𑀺𑀭 𑀦𑀸𑀕𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑀭𑀸𑀚𑀥𑀫𑁆𑀫𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀳𑀸𑀚𑀦𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀤𑀳𑁂𑀯 𑀢𑀁 𑀧𑀤𑀼𑀫𑀲𑀭𑀁 𑀧𑀢𑁆𑀯𑀸 ‘‘𑀫𑀫 𑀫𑀸𑀢𑀭𑀁 𑀕𑁄𑀘𑀭𑀁 𑀕𑀸𑀳𑀸𑀧𑁂𑀢𑁆𑀯𑀸𑀯 𑀲𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀪𑀺𑀲𑀫𑀼𑀴𑀸𑀮𑀁 𑀆𑀤𑀸𑀬 𑀲𑁄𑀡𑁆𑀟𑀧𑀽𑀭𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀕𑀼𑀳𑀸𑀮𑁂𑀡𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀼𑀳𑀸𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀸𑀬 𑀫𑀸𑀢𑀼𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀫𑀸𑀢𑀼 𑀲𑀭𑀻𑀭𑀲𑁆𑀲 𑀨𑀲𑁆𑀲𑀧𑀝𑀺𑀮𑀸𑀪𑀢𑁆𑀣𑀁 𑀉𑀧𑀭𑀺 𑀉𑀤𑀓𑀁 𑀲𑀺𑀜𑁆𑀘𑀺, 𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺 ‘‘𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀁 𑀅𑀓𑁆𑀓𑁄𑀲𑀦𑁆𑀢𑀻 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁦. ‘‘𑀓𑁄𑀬𑀁 𑀅𑀦𑀭𑀺𑀬𑁄 𑀤𑁂𑀯𑁄, 𑀅𑀓𑀸𑀮𑁂𑀦𑀧𑀺 𑀯𑀲𑁆𑀲𑀢𑀺;

𑀕𑀢𑁄 𑀫𑁂 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀬𑁄 𑀫𑀬𑁆𑀳𑀁 𑀧𑀭𑀺𑀘𑀸𑀭𑀓𑁄’’𑀢𑀺.

𑀢𑀢𑁆𑀣 𑀅𑀢𑁆𑀭𑀚𑁄𑀢𑀺 𑀅𑀢𑁆𑀢𑀢𑁄 𑀚𑀸𑀢𑁄.

𑀅𑀣 𑀦𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀓𑀸𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁧. ‘‘𑀉𑀝𑁆𑀞𑁂𑀳𑀺 𑀅𑀫𑁆𑀫 𑀓𑀺𑀁 𑀲𑁂𑀲𑀺, 𑀆𑀕𑀢𑁄 𑀢𑁆𑀬𑀸𑀳𑀫𑀢𑁆𑀭𑀚𑁄;

𑀫𑀼𑀢𑁆𑀢𑁄𑀫𑁆𑀳𑀺 𑀓𑀸𑀲𑀺𑀭𑀸𑀚𑁂𑀦, 𑀯𑁂𑀤𑁂𑀳𑁂𑀦 𑀬𑀲𑀲𑁆𑀲𑀺𑀦𑀸’’𑀢𑀺.

𑀢𑀢𑁆𑀣 𑀆𑀕𑀢𑁄 𑀢𑁆𑀬𑀸𑀳𑀦𑁆𑀢𑀺 𑀆𑀕𑀢𑁄 𑀢𑁂 𑀅𑀳𑀁. 𑀯𑁂𑀤𑁂𑀳𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑁂𑀦. 𑀬𑀲𑀲𑁆𑀲𑀺𑀦𑀸𑀢𑀺 𑀫𑀳𑀸𑀧𑀭𑀺𑀯𑀸𑀭𑁂𑀦 𑀢𑁂𑀦 𑀭𑀜𑁆𑀜𑀸 𑀫𑀗𑁆𑀕𑀮𑀳𑀢𑁆𑀣𑀺𑀪𑀸𑀯𑀸𑀬 𑀕𑀳𑀺𑀢𑁄𑀧𑀺 𑀅𑀳𑀁 𑀫𑀼𑀢𑁆𑀢𑁄, 𑀇𑀤𑀸𑀦𑀺 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀉𑀝𑁆𑀞𑁂𑀳𑀺 𑀕𑁄𑀘𑀭𑀁 𑀕𑀡𑁆𑀳𑀸𑀳𑀻𑀢𑀺.

𑀲𑀸 𑀢𑀼𑀝𑁆𑀞𑀫𑀸𑀦𑀲𑀸 𑀭𑀜𑁆𑀜𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀻 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁨. ‘‘𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀬𑁄 𑀫𑁂 𑀧𑀼𑀢𑁆𑀢𑀁 𑀧𑀫𑁄𑀘𑁂𑀲𑀺, 𑀲𑀤𑀸 𑀯𑀼𑀤𑁆𑀥𑀸𑀧𑀘𑀸𑀬𑀺𑀓’’𑀦𑁆𑀢𑀺.

𑀢𑀤𑀸 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀦𑀴𑀺𑀦𑀺𑀬𑀸 𑀅𑀯𑀺𑀤𑀽𑀭𑁂 𑀕𑀸𑀫𑀁 𑀫𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀸𑀢𑀼 𑀘𑀲𑁆𑀲 𑀦𑀺𑀩𑀤𑁆𑀥𑀁 𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀢𑀲𑁆𑀲𑀸 𑀲𑀭𑀻𑀭𑀧𑀭𑀺𑀳𑀸𑀭𑀁 𑀓𑀢𑁆𑀯𑀸 𑀓𑀸𑀭𑀡𑁆𑀟𑀓𑀅𑀲𑁆𑀲𑀫𑀧𑀤𑀁 𑀦𑀸𑀫 𑀕𑀢𑁄. 𑀢𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀯𑀲𑀺𑀁𑀲𑀼, 𑀢𑀁 𑀯𑀢𑁆𑀢𑀁 𑀢𑁂𑀲𑀁 𑀅𑀤𑀸𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀸𑀦𑀭𑀽𑀧𑀁 𑀲𑀺𑀮𑀸𑀧𑀝𑀺𑀫𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀳𑀢𑁆𑀣𑀺𑀫𑀳𑀁 𑀦𑀸𑀫 𑀓𑀭𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀸𑀧𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁄, 𑀳𑀢𑁆𑀣𑀸𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀢𑀸 𑀳𑀢𑁆𑀣𑀺𑀦𑀻 𑀫𑀳𑀸𑀫𑀸𑀬𑀸, 𑀫𑀸𑀢𑀼𑀧𑁄𑀲𑀓𑀦𑀸𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁫𑁬] 𑁨. 𑀚𑀼𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀡𑁄𑀳𑀺 𑀫𑀬𑁆𑀳𑀁 𑀯𑀘𑀦𑀁 𑀚𑀦𑀺𑀦𑁆𑀤𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀮𑀤𑁆𑀥𑀯𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀪𑀕𑀯𑀢𑁄 𑀅𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀣𑁂𑀭𑁄 𑀦𑀸𑀕𑀲𑀫𑀸𑀮𑁄, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀡𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄, 𑀏𑀓𑀤𑀸 𑀦𑀦𑁆𑀤𑁄, 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀫𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. ‘‘𑀪𑀦𑁆𑀢𑁂, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀉𑀝𑁆𑀞𑀺𑀢𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀣𑀦𑀸 𑀫𑀢𑁆𑀣𑀓𑀁 𑀧𑀢𑁆𑀢𑀸, 𑀅𑀮’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀪𑀺𑀓𑁆𑀔𑀽 𑀆𑀦𑀦𑁆𑀤𑀢𑁆𑀣𑁂𑀭𑀁 ‘‘𑀢𑁆𑀯𑀁 𑀆𑀯𑀼𑀲𑁄, 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀲𑀘𑁂 𑀫𑁂 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑀦𑀁 𑀦 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀧𑀦 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀁 𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀅𑀳𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑀁 𑀧𑀭𑀺𑀲𑀁 𑀆𑀕𑀢𑀓𑁆𑀔𑀡𑁂𑀬𑁂𑀯 𑀤𑀲𑁆𑀲𑁂𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀔𑀡𑁂𑀬𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀘𑁂 𑀬𑀁 𑀪𑀕𑀯𑀸 𑀫𑀫 𑀧𑀭𑀫𑁆𑀫𑀼𑀔𑀸 𑀥𑀫𑁆𑀫𑀁 𑀓𑀣𑁂𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀘𑀢𑀲𑁆𑀲𑁄 𑀘 𑀆𑀬𑀸𑀘𑀦𑀸𑀢𑀺 𑀅𑀝𑁆𑀞 𑀯𑀭𑁂 𑀬𑀸𑀘𑀺, 𑀪𑀕𑀯𑀸𑀧𑀺𑀲𑁆𑀲 𑀅𑀤𑀸𑀲𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀲𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀦𑀁 𑀧𑀢𑁆𑀯𑀸 𑀆𑀕𑀫𑀲𑀫𑁆𑀧𑀤𑀸, 𑀅𑀥𑀺𑀕𑀫𑀲𑀫𑁆𑀧𑀤𑀸, 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀤𑀸, 𑀅𑀢𑁆𑀢𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀲𑀫𑁆𑀧𑀤𑀸, 𑀢𑀺𑀢𑁆𑀣𑀯𑀸𑀲𑀲𑀫𑁆𑀧𑀤𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸, 𑀩𑀼𑀤𑁆𑀥𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸𑀢𑀺 𑀇𑀫𑀸𑀳𑀺 𑀲𑀢𑁆𑀢𑀳𑀺 𑀲𑀫𑁆𑀧𑀤𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞𑀯𑀭𑀤𑀸𑀬𑀚𑁆𑀚𑀁 𑀮𑀪𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀜𑁆𑀜𑀸𑀢𑁄 𑀕𑀕𑀦𑀫𑀚𑁆𑀛𑁂 𑀘𑀦𑁆𑀤𑁄 𑀯𑀺𑀬 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀯𑀭𑀤𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀆𑀦𑀦𑁆𑀤𑀁 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀲𑀺𑀁, 𑀧𑀼𑀩𑁆𑀩𑁂𑀧𑀸𑀳𑀁 𑀬𑀁 𑀬𑀁 𑀏𑀲 𑀬𑀸𑀘𑀺, 𑀢𑀁 𑀢𑀁 𑀅𑀤𑀸𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑁂 𑀆𑀘𑀭𑀺𑀬𑀲𑁆𑀲 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀩𑀸𑀳𑀼𑀦𑀸 𑀧𑀳𑀭𑀺𑀢𑁆𑀯𑀸 𑀢𑀲𑁆𑀲 𑀪𑀢𑁆𑀢𑀧𑀸𑀢𑀺𑀁 𑀪𑀺𑀦𑁆𑀤𑀺𑀁, 𑀩𑁆𑀭𑀸𑀳𑁆𑀫𑀡𑁄 𑀧𑀢𑀺𑀢𑁆𑀯𑀸 𑀯𑀺𑀭𑀯𑀺. 𑀓𑀼𑀫𑀸𑀭𑁄 𑀓𑀸𑀭𑀼𑀜𑁆𑀜𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀬𑀸, 𑀢𑀸𑀢, 𑀫𑀫 𑀪𑀺𑀓𑁆𑀔𑀸𑀪𑀸𑀚𑀦𑀁 𑀪𑀺𑀦𑁆𑀦𑀁, 𑀪𑀢𑁆𑀢𑀫𑀽𑀮𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀩𑁆𑀭𑀸𑀳𑁆𑀫𑀡, 𑀦 𑀤𑀸𑀦𑀸𑀳𑀁 𑀢𑀯 𑀪𑀢𑁆𑀢𑀫𑀽𑀮𑀁 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀅𑀳𑀁 𑀔𑁄 𑀧𑀦 𑀓𑀸𑀲𑀺𑀓𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫, 𑀫𑀬𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀆𑀕𑀦𑁆𑀢𑁆𑀯𑀸 𑀫𑀁 𑀥𑀦𑀁 𑀬𑀸𑀘𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀧𑀺𑀢𑀸 ‘‘𑀚𑀻𑀯𑀦𑁆𑀢𑁂𑀦 𑀫𑁂 𑀧𑀼𑀢𑁆𑀢𑁄 𑀤𑀺𑀝𑁆𑀞𑁄, 𑀭𑀸𑀚𑀪𑀽𑀢𑀫𑁆𑀧𑀺 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀲𑁄 𑀚𑀼𑀡𑁆𑀳𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀫 𑀪𑀢𑁆𑀢𑀫𑀽𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀮𑀗𑁆𑀓𑀢𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀫𑁂𑀯 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀞𑀺𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀚𑀬𑀸𑀧𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀅𑀢𑀺𑀓𑁆𑀓𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦 𑀅𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩. ‘‘𑀲𑀼𑀡𑁄𑀳𑀺 𑀫𑀬𑁆𑀳𑀁 𑀯𑀘𑀦𑀁 𑀚𑀦𑀺𑀦𑁆𑀤, 𑀅𑀢𑁆𑀣𑁂𑀦 𑀚𑀼𑀡𑁆𑀳𑀫𑁆𑀳𑀺 𑀇𑀥𑀸𑀦𑀼𑀧𑀢𑁆𑀢𑁄;

𑀦 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀢𑀺𑀝𑁆𑀞𑀫𑀸𑀦𑁂, 𑀕𑀦𑁆𑀢𑀩𑁆𑀩𑀫𑀸𑀳𑀼 𑀤𑁆𑀯𑀺𑀧𑀤𑀺𑀦𑁆𑀤 𑀲𑁂𑀝𑁆𑀞𑀸’’𑀢𑀺.

𑀢𑀢𑁆𑀣 𑀚𑀼𑀡𑁆𑀳𑀫𑁆𑀳𑀻𑀢𑀺 𑀫𑀳𑀸𑀭𑀸𑀚, 𑀢𑀬𑀺 𑀚𑀼𑀡𑁆𑀳𑀫𑁆𑀳𑀺 𑀅𑀳𑀁 𑀏𑀓𑁂𑀦 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑁆𑀧𑀢𑁆𑀢𑁄, 𑀦 𑀦𑀺𑀓𑁆𑀓𑀸𑀭𑀡𑀸 𑀇𑀥𑀸𑀕𑀢𑁄𑀫𑁆𑀳𑀻𑀢𑀺 𑀤𑀻𑀧𑁂𑀢𑀺. 𑀅𑀤𑁆𑀥𑀺𑀓𑁂𑀢𑀺 𑀅𑀤𑁆𑀥𑀸𑀦𑀁 𑀆𑀕𑀢𑁂. 𑀕𑀦𑁆𑀢𑀩𑁆𑀩𑀦𑁆𑀢𑀺 𑀢𑀁 𑀅𑀤𑁆𑀥𑀺𑀓𑀁 𑀅𑀤𑁆𑀥𑀸𑀦𑀫𑀸𑀕𑀢𑀁 𑀬𑀸𑀘𑀫𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀡𑁆𑀟𑀺𑀢𑀸 𑀦 𑀆𑀳𑀼 𑀦 𑀓𑀣𑁂𑀦𑁆𑀢𑀻𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀢𑁆𑀣𑀺𑀁 𑀯𑀚𑀺𑀭𑀗𑁆𑀓𑀼𑀲𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪. ‘‘𑀲𑀼𑀡𑁄𑀫𑀺 𑀢𑀺𑀝𑁆𑀞𑀸𑀫𑀺 𑀯𑀤𑁂𑀳𑀺 𑀩𑁆𑀭𑀳𑁆𑀫𑁂, 𑀬𑁂𑀦𑀸𑀲𑀺 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑀢𑁆𑀢𑁄;

𑀓𑀁 𑀯𑀸 𑀢𑁆𑀯𑀫𑀢𑁆𑀣𑀁 𑀫𑀬𑀺 𑀧𑀢𑁆𑀣𑀬𑀸𑀦𑁄, 𑀇𑀥𑀸𑀕𑀫𑁄 𑀩𑁆𑀭𑀳𑁆𑀫𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺.

𑀢𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀢𑀢𑁄 𑀧𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀭𑀜𑁆𑀜𑁄 𑀘 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀲𑁂𑀲𑀕𑀸𑀣𑀸 𑀓𑀣𑀺𑀢𑀸 𑁋

𑁧𑁫. ‘‘𑀤𑀤𑀸𑀳𑀺 𑀫𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀫𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀳𑀺.

𑁧𑁬. ‘‘𑀢𑀧𑁄 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑁄, 𑀫𑀦𑁆𑀢𑀸 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀘𑀺𑀢𑁆𑀢𑀭𑀽𑀧𑀸;

𑀬𑀓𑁆𑀔𑀸 𑀦𑀼 𑀢𑁂 𑀅𑀲𑁆𑀲𑀯𑀸 𑀲𑀦𑁆𑀢𑀺 𑀓𑁂𑀘𑀺, 𑀅𑀢𑁆𑀣𑀁 𑀯𑀸 𑀫𑁂 𑀅𑀪𑀺𑀚𑀸𑀦𑀸𑀲𑀺 𑀓𑀢𑁆𑀢𑀁.

𑁧𑁭. ‘‘𑀦 𑀫𑁂 𑀢𑀧𑁄 𑀅𑀢𑁆𑀣𑀺 𑀦 𑀘𑀸𑀧𑀺 𑀫𑀦𑁆𑀢𑀸, 𑀬𑀓𑁆𑀔𑀸𑀧𑀺 𑀫𑁂 𑀅𑀲𑁆𑀲𑀯𑀸 𑀦𑀢𑁆𑀣𑀺 𑀓𑁂𑀘𑀺;

𑀅𑀢𑁆𑀣𑀫𑁆𑀧𑀺 𑀢𑁂 𑀦𑀸𑀪𑀺𑀚𑀸𑀦𑀸𑀫𑀺 𑀓𑀢𑁆𑀢𑀁, 𑀧𑀼𑀩𑁆𑀩𑁂 𑀘 𑀔𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺.

𑁧𑁮. ‘‘𑀧𑀞𑀫𑀁 𑀇𑀤𑀁 𑀤𑀲𑁆𑀲𑀦𑀁 𑀚𑀸𑀦𑀢𑁄 𑀫𑁂, 𑀦 𑀢𑀸𑀪𑀺𑀚𑀸𑀦𑀸𑀫𑀺 𑀇𑀢𑁄 𑀧𑀼𑀭𑀢𑁆𑀣𑀸;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀓𑀤𑀸 𑀓𑀼𑀳𑀺𑀁 𑀯𑀸 𑀅𑀳𑀼 𑀲𑀗𑁆𑀕𑀫𑁄 𑀦𑁄.

𑁧𑁯. ‘‘𑀕𑀦𑁆𑀥𑀸𑀭𑀭𑀸𑀚𑀲𑁆𑀲 𑀧𑀼𑀭𑀫𑁆𑀳𑀺 𑀭𑀫𑁆𑀫𑁂, 𑀅𑀯𑀲𑀺𑀫𑁆𑀳𑀲𑁂 𑀢𑀓𑁆𑀓𑀲𑀻𑀮𑀸𑀬𑀁 𑀤𑁂𑀯;

𑀢𑀢𑁆𑀣𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬𑀁, 𑀅𑀁𑀲𑁂𑀦 𑀅𑀁𑀲𑀁 𑀲𑀫𑀖𑀝𑁆𑀝𑀬𑀺𑀫𑁆𑀳.

𑁨𑁦. ‘‘𑀢𑁂 𑀢𑀢𑁆𑀣 𑀞𑀢𑁆𑀯𑀸𑀦 𑀉𑀪𑁄 𑀚𑀦𑀺𑀦𑁆𑀤, 𑀲𑀸𑀭𑀸𑀡𑀺𑀬𑀁 𑀯𑀻𑀢𑀺𑀲𑀸𑀭𑀬𑀺𑀫𑁆𑀳 𑀢𑀢𑁆𑀣;

𑀲𑀸𑀬𑁂𑀯 𑀦𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺, 𑀢𑀢𑁄 𑀦 𑀧𑀘𑁆𑀙𑀸 𑀦 𑀧𑀼𑀭𑁂 𑀅𑀳𑁄𑀲𑀺.

𑁨𑁧. ‘‘𑀬𑀤𑀸 𑀓𑀤𑀸𑀘𑀺 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂, 𑀲𑀫𑀸𑀕𑀫𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀦 𑀧𑀡𑁆𑀟𑀺𑀢𑀸 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺.

𑁨𑁨. ‘‘𑀩𑀸𑀮𑀸𑀯 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺;

𑀩𑀳𑀼𑀫𑁆𑀧𑀺 𑀩𑀸𑀮𑁂𑀲𑀼 𑀓𑀢𑀁 𑀯𑀺𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀩𑀸𑀮𑀸 𑀅𑀓𑀢𑀜𑁆𑀜𑀼𑀭𑀽𑀧𑀸.

𑁨𑁩. ‘‘𑀥𑀻𑀭𑀸 𑀘 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀦 𑀦𑀸𑀲𑀬𑀦𑁆𑀢𑀺;

𑀅𑀧𑁆𑀧𑀫𑁆𑀧𑀺 𑀥𑀻𑀭𑁂𑀲𑀼 𑀓𑀢𑀁 𑀦 𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀥𑀻𑀭𑀸 𑀲𑀼𑀓𑀢𑀜𑁆𑀜𑀼𑀭𑀽𑀧𑀸.

𑁨𑁪. ‘‘𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀢𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀫𑀺.

𑁨𑁫. ‘‘𑀏𑀯𑀁 𑀲𑀢𑀁 𑀳𑁄𑀢𑀺 𑀲𑀫𑁂𑀘𑁆𑀘 𑀭𑀸𑀚, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀆𑀧𑀽𑀭𑀢𑀻 𑀓𑀸𑀲𑀺𑀧𑀢𑀻 𑀢𑀣𑀸𑀳𑀁, 𑀢𑀬𑀸𑀧𑀺 𑀫𑁂 𑀲𑀗𑁆𑀕𑀫𑁄 𑀅𑀚𑁆𑀚 𑀮𑀤𑁆𑀥𑁄’’𑀢𑀺.

𑀢𑀢𑁆𑀣 𑀲𑀸𑀤𑀺𑀲𑀻𑀢𑀺 𑀭𑀽𑀧𑀯𑀡𑁆𑀡𑀚𑀸𑀢𑀺𑀓𑀼𑀮𑀧𑀤𑁂𑀲𑁂𑀦 𑀫𑀬𑀸 𑀲𑀸𑀤𑀺𑀲𑀻 𑀏𑀓𑀲𑀤𑀺𑀲𑀸 𑀤𑁆𑀯𑁂 𑀫𑀳𑀸𑀬𑀲𑀸 𑀪𑀭𑀺𑀬𑀸 𑀘 𑀫𑁂 𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀪𑀺𑀁𑀲𑀭𑀽𑀧𑁄𑀢𑀺 𑀓𑀺𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀩𑀮𑀯𑀭𑀽𑀧𑀲𑀻𑀮𑀸𑀘𑀸𑀭𑀕𑀼𑀡𑀲𑀗𑁆𑀔𑀸𑀢𑀁 𑀢𑀧𑁄𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀦𑁆𑀢𑀸 𑀦𑀼 𑀢𑁂𑀢𑀺 𑀉𑀤𑀸𑀳𑀼 𑀯𑀺𑀘𑀺𑀢𑁆𑀭𑀭𑀽𑀧𑀸 𑀲𑀩𑁆𑀩𑀢𑁆𑀣𑀲𑀸𑀥𑀓𑀸 𑀫𑀦𑁆𑀢𑀸 𑀢𑁂 𑀅𑀢𑁆𑀣𑀺. 𑀅𑀲𑁆𑀲𑀯𑀸𑀢𑀺 𑀯𑀘𑀦𑀓𑀸𑀭𑀓𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀓𑀸 𑀬𑀓𑁆𑀔𑀸 𑀯𑀸 𑀢𑁂 𑀓𑁂𑀘𑀺 𑀲𑀦𑁆𑀢𑀺. 𑀓𑀢𑁆𑀢𑀦𑁆𑀢𑀺 𑀓𑀢𑀁, 𑀉𑀤𑀸𑀳𑀼 𑀢𑀬𑀸 𑀓𑀢𑀁 𑀓𑀺𑀜𑁆𑀘𑀺 𑀫𑀫 𑀅𑀢𑁆𑀣𑀁 𑀅𑀪𑀺𑀚𑀸𑀦𑀸𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀗𑁆𑀕𑀢𑀺𑀫𑀢𑁆𑀢𑀦𑁆𑀢𑀺 𑀲𑀫𑀸𑀕𑀫𑀫𑀢𑁆𑀢𑀁 𑀢𑀬𑀸 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀫𑀫 𑀆𑀲𑀻𑀢𑀺 𑀯𑀤𑀢𑀺. 𑀚𑀸𑀦𑀢𑁄 𑀫𑁂𑀢𑀺 𑀚𑀸𑀦𑀦𑁆𑀢𑀲𑁆𑀲 𑀫𑀫 𑀇𑀤𑀁 𑀧𑀞𑀫𑀁 𑀢𑀯 𑀤𑀲𑁆𑀲𑀦𑀁. 𑀦 𑀢𑀸𑀪𑀺𑀚𑀸𑀦𑀸𑀫𑀻𑀢𑀺 𑀦 𑀢𑀁 𑀅𑀪𑀺𑀚𑀸𑀦𑀸𑀫𑀺. 𑀢𑀺𑀫𑀻𑀲𑀺𑀓𑀸𑀬𑀦𑁆𑀢𑀺 𑀩𑀳𑀮𑀢𑀺𑀫𑀺𑀭𑀸𑀬𑀁 𑀭𑀢𑁆𑀢𑀺𑀬𑀁. 𑀢𑁂 𑀢𑀢𑁆𑀣 𑀞𑀢𑁆𑀯𑀸𑀦𑀸𑀢𑀺 𑀢𑁂 𑀫𑀬𑀁 𑀢𑀲𑁆𑀫𑀺𑀁 𑀅𑀁𑀲𑁂𑀦 𑀅𑀁𑀲𑀁 𑀖𑀝𑁆𑀝𑀺𑀢𑀝𑁆𑀞𑀸𑀦𑁂 𑀞𑀢𑁆𑀯𑀸 𑀯𑀻𑀢𑀺𑀲𑀸𑀭𑀬𑀺𑀫𑁆𑀳 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀣𑀁 𑀯𑀻𑀢𑀺𑀲𑀸𑀭𑀬𑀺𑀫𑁆𑀳, 𑀅𑀳𑀁 ‘‘𑀪𑀺𑀓𑁆𑀔𑀸𑀪𑀸𑀚𑀦𑀁 𑀫𑁂 𑀢𑀬𑀸 𑀪𑀺𑀦𑁆𑀦𑀁, 𑀪𑀢𑁆𑀢𑀫𑀽𑀮𑀁 𑀫𑁂 𑀤𑁂𑀳𑀻’’𑀢𑀺 𑀅𑀯𑀘𑀁, 𑀢𑁆𑀯𑀁 ‘‘𑀇𑀤𑀸𑀦𑀸𑀳𑀁 𑀢𑀯 𑀪𑀢𑁆𑀢𑀫𑀽𑀮𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀳𑀁 𑀔𑁄 𑀧𑀦 𑀓𑀸𑀲𑀺𑀓𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫, 𑀫𑀬𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀆𑀕𑀦𑁆𑀢𑁆𑀯𑀸 𑀫𑀁 𑀥𑀦𑀁 𑀬𑀸𑀘𑁂𑀬𑁆𑀬𑀸𑀲𑀻’’𑀢𑀺 𑀅𑀯𑀘𑀸𑀢𑀺 𑀇𑀫𑀁 𑀲𑀸𑀭𑀡𑀻𑀬𑀓𑀣𑀁 𑀓𑀭𑀺𑀫𑁆𑀳𑀸𑀢𑀺 𑀆𑀳. 𑀲𑀸𑀬𑁂𑀯 𑀦𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀻𑀢𑀺 𑀤𑁂𑀯, 𑀅𑀫𑁆𑀳𑀸𑀓𑀁 𑀲𑀸𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺, 𑀏𑀓𑀫𑀼𑀳𑀼𑀢𑁆𑀢𑀺𑀓𑀫𑀳𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁄𑀢𑀺 𑀢𑀢𑁄 𑀧𑀦 𑀢𑀁𑀫𑀼𑀳𑀼𑀢𑁆𑀢𑀺𑀓𑀫𑀺𑀢𑁆𑀢𑀥𑀫𑁆𑀫𑀢𑁄 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸 𑀓𑀤𑀸𑀘𑀺 𑀅𑀫𑁆𑀳𑀸𑀓𑀁 𑀲𑀗𑁆𑀕𑀢𑀺 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑀸.

𑀦 𑀧𑀡𑁆𑀟𑀺𑀢𑀸𑀢𑀺 𑀩𑁆𑀭𑀸𑀳𑁆𑀫𑀡 𑀧𑀡𑁆𑀟𑀺𑀢𑀸 𑀦𑀸𑀫 𑀢𑀁𑀫𑀼𑀳𑀼𑀢𑁆𑀢𑀺𑀓𑀁 𑀲𑀗𑁆𑀕𑀢𑀺𑀁 𑀯𑀸 𑀘𑀺𑀭𑀓𑀸𑀮𑀲𑀦𑁆𑀣𑀯𑀸𑀦𑀺 𑀯𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀓𑀢𑀕𑀼𑀡𑀁 𑀯𑀸 𑀦 𑀦𑀸𑀲𑁂𑀦𑁆𑀢𑀺. 𑀩𑀳𑀼𑀫𑁆𑀧𑀻𑀢𑀺 𑀩𑀳𑀼𑀓𑀫𑁆𑀧𑀺. 𑀅𑀓𑀢𑀜𑁆𑀜𑀼𑀭𑀽𑀧𑀸𑀢𑀺 𑀬𑀲𑁆𑀫𑀸 𑀩𑀸𑀮𑀸 𑀅𑀓𑀢𑀜𑁆𑀜𑀼𑀲𑀪𑀸𑀯𑀸, 𑀢𑀲𑁆𑀫𑀸 𑀢𑁂𑀲𑀼 𑀩𑀳𑀼𑀫𑁆𑀧𑀺 𑀓𑀢𑀁 𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀓𑀢𑀜𑁆𑀜𑀼𑀭𑀽𑀧𑀸𑀢𑀺 𑀲𑀼𑀝𑁆𑀞𑀼 𑀓𑀢𑀜𑁆𑀜𑀼𑀲𑀪𑀸𑀯𑀸. 𑀏𑀢𑁆𑀣𑀸𑀧𑀺 𑀢𑀢𑁆𑀣𑀸𑀧𑀺 𑀢𑀣𑀸 𑀳𑀻𑀢𑀺 𑀳𑀺-𑀓𑀸𑀭𑁄 𑀓𑀸𑀭𑀡𑀢𑁆𑀣𑁄. 𑀤𑀤𑀸𑀫𑀺 𑀢𑁂𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 𑀬𑀸𑀘𑀺𑀢𑀬𑀸𑀘𑀺𑀢𑀁 𑀤𑀤𑀦𑁆𑀢𑁄 𑀏𑀯𑀫𑀸𑀳. 𑀏𑀯𑀁 𑀲𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀯𑀤𑀢𑀺, 𑀲𑀢𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀏𑀓𑀯𑀸𑀭𑀫𑁆𑀧𑀺 𑀲𑀫𑁂𑀘𑁆𑀘 𑀲𑀗𑁆𑀕𑀢𑀺 𑀦𑀸𑀫 𑀏𑀯𑀁 𑀳𑁄𑀢𑀺. 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯𑀸𑀢𑀺 𑀏𑀢𑁆𑀣 𑀭-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀸𑀭𑀓𑀸𑀦𑀦𑁆𑀢𑀺 𑀢𑀸𑀭𑀓𑀕𑀡𑀫𑀚𑁆𑀛𑁂. 𑀓𑀸𑀲𑀺𑀧𑀢𑀻𑀢𑀺 𑀭𑀸𑀚𑀸𑀦𑀫𑀸𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀤𑁂𑀯, 𑀓𑀸𑀲𑀺𑀭𑀝𑁆𑀞𑀸𑀥𑀺𑀧𑀢𑀺 𑀬𑀣𑀸 𑀘𑀦𑁆𑀤𑁄 𑀢𑀸𑀭𑀓𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄 𑀢𑀸𑀭𑀓𑀕𑀡𑀧𑀭𑀺𑀯𑀼𑀢𑁄 𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀼𑀡𑁆𑀡𑀫𑀸 𑀆𑀧𑀽𑀭𑀢𑀺, 𑀢𑀣𑀸 𑀅𑀳𑀫𑁆𑀧𑀺 𑀅𑀚𑁆𑀚 𑀢𑀬𑀸 𑀤𑀺𑀦𑁆𑀦𑁂𑀳𑀺 𑀕𑀸𑀫𑀯𑀭𑀸𑀤𑀻𑀳𑀺 𑀆𑀧𑀽𑀭𑀸𑀫𑀻’’𑀢𑀺. 𑀢𑀬𑀸𑀧𑀺 𑀫𑁂𑀢𑀺 𑀫𑀬𑀸 𑀧𑀼𑀩𑁆𑀩𑁂 𑀢𑀬𑀸 𑀲𑀤𑁆𑀥𑀺𑀁 𑀮𑀤𑁆𑀥𑁄𑀧𑀺 𑀲𑀗𑁆𑀕𑀫𑁄 𑀅𑀮𑀤𑁆𑀥𑁄𑀯, 𑀅𑀚𑁆𑀚 𑀧𑀦 𑀫𑀫 𑀫𑀦𑁄𑀭𑀣𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀫𑀬𑀸 𑀢𑀬𑀸 𑀲𑀳 𑀲𑀗𑁆𑀕𑀫𑁄 𑀮𑀤𑁆𑀥𑁄 𑀦𑀸𑀫𑀸𑀢𑀺 𑀦𑀺𑀧𑁆𑀨𑀦𑁆𑀦𑀁 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀨𑀮𑀦𑁆𑀢𑀺 𑀯𑀤𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀆𑀦𑀦𑁆𑀤𑀁 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀲𑀺𑀁 𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀼𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁫𑁭] 𑁩. 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁄𑀓𑀭𑁄 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀣𑀯𑀺𑀧𑀯𑁂𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀇𑀤𑀸𑀦𑁂𑀯𑁂𑀲, 𑀪𑀺𑀓𑁆𑀔𑀯𑁂, 𑀫𑀫 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄, 𑀧𑀼𑀩𑁆𑀩𑁂𑀧𑀺 𑀥𑀫𑁆𑀫𑀘𑀓𑁆𑀓𑁂 𑀧𑀳𑀸𑀭𑀁 𑀤𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀧𑀭𑀸𑀬𑀡𑁄 𑀚𑀸𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀥𑀫𑁆𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀤𑁂𑀯𑀤𑀢𑁆𑀢𑁄 𑀅𑀥𑀫𑁆𑀫𑁄 𑀦𑀸𑀫. 𑀢𑁂𑀲𑀼 𑀥𑀫𑁆𑀫𑁄 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀤𑀺𑀩𑁆𑀩𑀭𑀣𑀯𑀭𑀫𑀪𑀺𑀭𑀼𑀬𑁆𑀳 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀺𑀭𑀫𑀺𑀢𑁆𑀯𑀸 𑀫𑀸𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁 𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀜𑁆𑀘 𑀧𑀽𑀭𑁂𑀣, 𑀏𑀯𑀁 𑀲𑀕𑁆𑀕𑀧𑀭𑀸𑀬𑀡𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀲𑁆𑀲𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀅𑀥𑀫𑁆𑀫𑁄 𑀧𑀦 𑀤𑁂𑀯𑀧𑀼𑀢𑁆𑀢𑁄 ‘‘𑀧𑀸𑀡𑀁 𑀳𑀦𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀁 𑀯𑀸𑀫𑀁 𑀓𑀭𑁄𑀢𑀺. 𑀅𑀣 𑀢𑁂𑀲𑀁 𑀆𑀓𑀸𑀲𑁂 𑀭𑀣𑀸 𑀲𑀫𑁆𑀫𑀼𑀔𑀸 𑀅𑀳𑁂𑀲𑀼𑀁. 𑀅𑀣 𑀦𑁂𑀲𑀁 𑀧𑀭𑀺𑀲𑀸 ‘‘𑀢𑀼𑀫𑁆𑀳𑁂 𑀓𑀲𑁆𑀲, 𑀢𑀼𑀫𑁆𑀳𑁂 𑀓𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀬𑀁 𑀥𑀫𑁆𑀫𑀲𑁆𑀲, 𑀫𑀬𑀁 𑀅𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀤𑁆𑀯𑀺𑀥𑀸 𑀚𑀸𑀢𑀸. 𑀥𑀫𑁆𑀫𑁄𑀧𑀺 𑀅𑀥𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀅𑀥𑀫𑁆𑀫𑁄, 𑀅𑀳𑀁 𑀥𑀫𑁆𑀫𑁄, 𑀫𑀕𑁆𑀕𑁄 𑀫𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀢𑀯 𑀭𑀣𑀁 𑀑𑀓𑁆𑀓𑀸𑀫𑁂𑀢𑁆𑀯𑀸 𑀫𑀬𑁆𑀳𑀁 𑀫𑀕𑁆𑀕𑀁 𑀤𑁂𑀳𑀻’’𑀢𑀺 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀬𑀲𑁄𑀓𑀭𑁄 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀺, 𑀲𑀤𑀸𑀢𑁆𑀣𑀼𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀕𑁆𑀕𑀸𑀭𑀳𑁄 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀥𑀫𑁆𑀫𑁄 𑀅𑀳𑀁 𑀤𑁂𑀳𑀺 𑀅𑀥𑀫𑁆𑀫 𑀫𑀕𑁆𑀕’’𑀦𑁆𑀢𑀺.

𑀢𑀢𑁆𑀣 𑀬𑀲𑁄𑀓𑀭𑁄𑀢𑀺 𑀅𑀳𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀬𑀲𑀤𑀸𑀬𑀓𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑀸𑀢𑁆𑀣𑀼𑀢𑁄𑀢𑀺 𑀲𑀤𑀸 𑀣𑀼𑀢𑁄 𑀦𑀺𑀘𑁆𑀘𑀧𑀲𑀢𑁆𑀣𑁄. 𑀢𑀢𑁄 𑀧𑀭𑀸 𑁋

𑁨𑁭. ‘‘𑀅𑀥𑀫𑁆𑀫𑀬𑀸𑀦𑀁 𑀤𑀴𑁆𑀳𑀫𑀸𑀭𑀼𑀳𑀺𑀢𑁆𑀯𑀸, 𑀅𑀲𑀦𑁆𑀢𑀲𑀦𑁆𑀢𑁄 𑀩𑀮𑀯𑀸𑀳𑀫𑀲𑁆𑀫𑀺;

𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀁, 𑀫𑀕𑁆𑀕𑀁 𑀅𑀳𑀁 𑀥𑀫𑁆𑀫 𑀅𑀤𑀺𑀦𑁆𑀦𑀧𑀼𑀩𑁆𑀩𑀁.

𑁨𑁮. ‘‘𑀥𑀫𑁆𑀫𑁄 𑀳𑀯𑁂 𑀧𑀸𑀢𑀼𑀭𑀳𑁄𑀲𑀺 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀅𑀥𑀫𑁆𑀫𑁄 𑀉𑀤𑀧𑀸𑀤𑀺 𑀮𑁄𑀓𑁂;

𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀲𑀦𑀦𑁆𑀢𑀦𑁄 𑀘, 𑀉𑀬𑁆𑀬𑀸𑀳𑀺 𑀚𑁂𑀝𑁆𑀞𑀲𑁆𑀲 𑀓𑀦𑀺𑀝𑁆𑀞 𑀫𑀕𑁆𑀕𑀸.

𑁨𑁯. ‘‘𑀦 𑀬𑀸𑀘𑀦𑀸𑀬 𑀦𑀧𑀺 𑀧𑀸𑀢𑀺𑀭𑀽𑀧𑀸, 𑀦 𑀅𑀭𑀳𑀢𑀸 𑀢𑁂𑀳𑀁 𑀤𑀤𑁂𑀬𑁆𑀬𑀁 𑀫𑀕𑁆𑀕𑀁;

𑀬𑀼𑀤𑁆𑀥𑀜𑁆𑀘 𑀦𑁄 𑀳𑁄𑀢𑀼 𑀉𑀪𑀺𑀦𑁆𑀦𑀫𑀚𑁆𑀚, 𑀬𑀼𑀤𑁆𑀥𑀫𑁆𑀳𑀺 𑀬𑁄 𑀚𑁂𑀲𑁆𑀲𑀢𑀺 𑀢𑀲𑁆𑀲 𑀫𑀕𑁆𑀕𑁄.

𑁩𑁦. ‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀲𑀝𑁄𑀳𑀫𑀲𑁆𑀫𑀺, 𑀫𑀳𑀩𑁆𑀩𑀮𑁄 𑀅𑀫𑀺𑀢𑀬𑀲𑁄 𑀅𑀢𑀼𑀮𑁆𑀬𑁄;

𑀕𑀼𑀡𑁂𑀳𑀺 𑀲𑀩𑁆𑀩𑁂𑀳𑀺 𑀉𑀧𑁂𑀢𑀭𑀽𑀧𑁄, 𑀥𑀫𑁆𑀫𑁄 𑀅𑀥𑀫𑁆𑀫 𑀢𑁆𑀯𑀁 𑀓𑀣𑀁 𑀯𑀺𑀚𑁂𑀲𑁆𑀲𑀲𑀺.

𑁩𑁧. ‘‘𑀮𑁄𑀳𑁂𑀦 𑀯𑁂 𑀳𑀜𑁆𑀜𑀢𑀺 𑀚𑀸𑀢𑀭𑀽𑀧𑀁, 𑀦 𑀚𑀸𑀢𑀭𑀽𑀧𑁂𑀦 𑀳𑀦𑀦𑁆𑀢𑀺 𑀮𑁄𑀳𑀁;

𑀲𑀘𑁂 𑀅𑀥𑀫𑁆𑀫𑁄 𑀳𑀜𑁆𑀙𑀢𑀺 𑀥𑀫𑁆𑀫𑀫𑀚𑁆𑀚, 𑀅𑀬𑁄 𑀲𑀼𑀯𑀡𑁆𑀡𑀁 𑀯𑀺𑀬 𑀤𑀲𑁆𑀲𑀦𑁂𑀬𑁆𑀬𑀁.

𑁩𑁨. ‘‘𑀲𑀘𑁂 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫, 𑀦 𑀢𑀼𑀬𑁆𑀳 𑀯𑀼𑀟𑁆𑀠𑀸 𑀘 𑀕𑀭𑀽 𑀘 𑀅𑀢𑁆𑀣𑀺;

𑀫𑀕𑁆𑀕𑀜𑁆𑀘 𑀢𑁂 𑀤𑀫𑁆𑀫𑀺 𑀧𑀺𑀬𑀸𑀧𑁆𑀧𑀺𑀬𑁂𑀦, 𑀯𑀸𑀘𑀸𑀤𑀼𑀭𑀼𑀢𑁆𑀢𑀸𑀦𑀺𑀧𑀺 𑀢𑁂 𑀔𑀫𑀸𑀫𑀻’’𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀢𑁂𑀲𑀜𑁆𑀜𑁂𑀯 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀓𑀣𑀺𑀢𑀸.

𑀢𑀢𑁆𑀣 𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀦𑁆𑀢𑀺 𑀲𑁄𑀫𑁆𑀳𑀺 𑀅𑀳𑀁 𑀅𑀥𑀫𑁆𑀫𑁄 𑀅𑀥𑀫𑁆𑀫𑀬𑀸𑀦𑀁 𑀭𑀣𑀁 𑀆𑀭𑀼𑀴𑁆𑀳𑁄 𑀅𑀪𑀻𑀢𑁄 𑀩𑀮𑀯𑀸. 𑀓𑀺𑀁𑀓𑀸𑀭𑀡𑀸 𑀅𑀚𑁆𑀚 𑀪𑁄 𑀥𑀫𑁆𑀫, 𑀓𑀲𑁆𑀲𑀘𑀺 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀫𑀕𑁆𑀕𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄 𑀘 𑀧𑀼𑀩𑁆𑀩𑁂 𑀧𑀸𑀢𑀼𑀭𑀳𑁄𑀲𑀺, 𑀧𑀘𑁆𑀙𑀸 𑀅𑀥𑀫𑁆𑀫𑁄. 𑀚𑁂𑀝𑁆𑀞𑁄 𑀘𑀸𑀢𑀺 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁂𑀦 𑀅𑀳𑀁 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀧𑁄𑀭𑀸𑀡𑀓𑁄 𑀘, 𑀢𑁆𑀯𑀁 𑀧𑀦 𑀓𑀦𑀺𑀝𑁆𑀞𑁄, 𑀢𑀲𑁆𑀫𑀸 𑀫𑀕𑁆𑀕𑀸 𑀉𑀬𑁆𑀬𑀸𑀳𑀻𑀢𑀺 𑀯𑀤𑀢𑀺. 𑀦𑀧𑀺 𑀧𑀸𑀢𑀺𑀭𑀽𑀧𑀸𑀢𑀺 𑀅𑀳𑀜𑁆𑀳𑀺 𑀢𑁂 𑀦𑁂𑀯 𑀬𑀸𑀘𑀦𑀸𑀬 𑀦 𑀧𑀢𑀺𑀭𑀽𑀧𑀯𑀘𑀦𑁂𑀦 𑀫𑀕𑁆𑀕𑀸𑀭𑀳𑀢𑀸𑀬 𑀫𑀕𑁆𑀕𑀁 𑀤𑀤𑁂𑀬𑁆𑀬𑀁. 𑀅𑀦𑀼𑀯𑀺𑀲𑀝𑁄𑀢𑀺 𑀅𑀳𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀢𑁆𑀢𑀦𑁄 𑀕𑀼𑀡𑁂𑀦 𑀧𑀢𑁆𑀣𑀝𑁄 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀮𑁄𑀳𑁂𑀦𑀸𑀢𑀺 𑀅𑀬𑀫𑀼𑀝𑁆𑀞𑀺𑀓𑁂𑀦. 𑀳𑀜𑁆𑀙𑀢𑀻𑀢𑀺 𑀳𑀦𑀺𑀲𑁆𑀲𑀢𑀺. 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫𑀸𑀢𑀺 𑀲𑀘𑁂 𑀢𑁆𑀯𑀁 𑀬𑀼𑀤𑁆𑀥𑀩𑀮𑁄𑀲𑀺 𑀅𑀥𑀫𑁆𑀫. 𑀯𑀼𑀟𑁆𑀠𑀸 𑀘 𑀕𑀭𑀽 𑀘𑀸𑀢𑀺 𑀬𑀤𑀺 𑀢𑀼𑀬𑁆𑀳𑀁 ‘‘𑀇𑀫𑁂 𑀯𑀼𑀟𑁆𑀠𑀸, 𑀇𑀫𑁂 𑀕𑀭𑀽 𑀧𑀡𑁆𑀟𑀺𑀢𑀸’’𑀢𑀺 𑀏𑀯𑀁 𑀦𑀢𑁆𑀣𑀺. 𑀧𑀺𑀬𑀸𑀧𑁆𑀧𑀺𑀬𑁂𑀦𑀸𑀢𑀺 𑀧𑀺𑀬𑁂𑀦𑀸𑀧𑀺 𑀅𑀧𑁆𑀧𑀺𑀬𑁂𑀦𑀸𑀧𑀺 𑀤𑀤𑀦𑁆𑀢𑁄 𑀧𑀺𑀬𑁂𑀦 𑀯𑀺𑀬 𑀢𑁂 𑀫𑀕𑁆𑀕𑀁 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀩𑁄𑀥𑀺𑀲𑀢𑁆𑀢𑁂𑀦 𑀧𑀦 𑀇𑀫𑀸𑀬 𑀕𑀸𑀣𑀸𑀬 𑀓𑀣𑀺𑀢𑀓𑁆𑀔𑀡𑁂𑀬𑁂𑀯 𑀅𑀥𑀫𑁆𑀫𑁄 𑀭𑀣𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀁𑀲𑀺𑀭𑁄 𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩. ‘‘𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀘𑀦𑀁 𑀅𑀥𑀫𑁆𑀫𑁄, 𑀅𑀯𑀁𑀲𑀺𑀭𑁄 𑀧𑀢𑀺𑀢𑁄 𑀉𑀤𑁆𑀥𑀧𑀸𑀤𑁄;

𑀬𑀼𑀤𑁆𑀥𑀢𑁆𑀣𑀺𑀓𑁄 𑀘𑁂 𑀦 𑀮𑀪𑀸𑀫𑀺 𑀬𑀼𑀤𑁆𑀥𑀁, 𑀏𑀢𑁆𑀢𑀸𑀯𑀢𑀸 𑀳𑁄𑀢𑀺 𑀳𑀢𑁄 𑀅𑀥𑀫𑁆𑀫𑁄.

𑁩𑁪. ‘‘𑀔𑀦𑁆𑀢𑀻𑀩𑀮𑁄 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸, 𑀳𑀦𑁆𑀢𑁆𑀯𑀸 𑀅𑀥𑀫𑁆𑀫𑀁 𑀦𑀺𑀳𑀦𑀺𑀢𑁆𑀯 𑀪𑀽𑀫𑁆𑀬𑀸;

𑀧𑀸𑀬𑀸𑀲𑀺 𑀯𑀺𑀢𑁆𑀢𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀁, 𑀫𑀕𑁆𑀕𑁂𑀦𑁂𑀯 𑀅𑀢𑀺𑀩𑀮𑁄 𑀲𑀘𑁆𑀘𑀦𑀺𑀓𑁆𑀓𑀫𑁄.

𑁩𑁫. ‘‘𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀅𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺 𑀢𑁂;

𑀬𑀣𑀸 𑀅𑀥𑀫𑁆𑀫𑁄 𑀧𑀢𑀺𑀢𑁄 𑀅𑀯𑀁𑀲𑀺𑀭𑁄.

𑁩𑁬. ‘‘𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀲𑀼𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑁂;

𑀬𑀣𑀸𑀧𑀺 𑀥𑀫𑁆𑀫𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦’’𑀦𑁆𑀢𑀺.

𑀢𑀢𑁆𑀣 𑀬𑀼𑀤𑁆𑀥𑀢𑁆𑀣𑀺𑀓𑁄 𑀘𑁂𑀢𑀺 𑀅𑀬𑀁 𑀢𑀲𑁆𑀲 𑀯𑀺𑀮𑀸𑀧𑁄, 𑀲𑁄 𑀓𑀺𑀭𑁂𑀯𑀁 𑀯𑀺𑀮𑀧𑀦𑁆𑀢𑁄𑀬𑁂𑀯 𑀧𑀢𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀪𑀺𑀓𑁆𑀔𑀯𑁂, 𑀬𑀸𑀯𑀢𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄, 𑀢𑀸𑀯𑀢𑀸 𑀅𑀥𑀫𑁆𑀫𑁄 𑀳𑀢𑁄 𑀦𑀸𑀫 𑀳𑁄𑀢𑀺. 𑀔𑀦𑁆𑀢𑀻𑀩𑀮𑁄𑀢𑀺 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀥𑀫𑁆𑀫𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀻𑀩𑀮𑁄 𑀢𑀁 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀳𑀦𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀯𑀺𑀢𑁆𑀢𑀚𑀸𑀢𑀢𑀸𑀬 𑀯𑀺𑀢𑁆𑀢𑁄 𑀅𑀢𑁆𑀢𑀦𑁄 𑀭𑀣𑀁 𑀆𑀭𑀼𑀬𑁆𑀳 𑀫𑀕𑁆𑀕𑁂𑀦𑁂𑀯 𑀲𑀘𑁆𑀘𑀦𑀺𑀓𑁆𑀓𑀫𑁄 𑀢𑀣𑀧𑀭𑀓𑁆𑀓𑀫𑁄 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀧𑀸𑀬𑀸𑀲𑀺. 𑀅𑀲𑀫𑁆𑀫𑀸𑀦𑀺𑀢𑀸𑀢𑀺 𑀅𑀲𑀓𑁆𑀓𑀢𑀸. 𑀲𑀭𑀻𑀭𑀤𑁂𑀳𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑁄𑀓𑁂 𑀲𑀭𑀻𑀭𑀲𑀗𑁆𑀔𑀸𑀢𑀁 𑀤𑁂𑀳𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀦𑀺𑀭𑀬𑀁 𑀯𑀚𑀦𑁆𑀢𑀻𑀢𑀺 𑀬𑀲𑁆𑀲 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀏𑀢𑁂 𑀲𑀓𑁆𑀓𑀸𑀭𑀸𑀭𑀳𑀸 𑀕𑁂𑀳𑁂 𑀅𑀲𑀓𑁆𑀓𑀢𑀸, 𑀢𑀣𑀸𑀭𑀽𑀧𑀸 𑀬𑀣𑀸 𑀅𑀥𑀫𑁆𑀫𑁄 𑀧𑀢𑀺𑀢𑁄 𑀅𑀯𑀁𑀲𑀺𑀭𑁄, 𑀏𑀯𑀁 𑀅𑀯𑀁𑀲𑀺𑀭𑀸 𑀦𑀺𑀭𑀬𑀁 𑀯𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻𑀢𑀺 𑀬𑀲𑁆𑀲 𑀧𑀦𑁂𑀢𑁂 𑀲𑀓𑁆𑀓𑀢𑀸, 𑀢𑀸𑀤𑀺𑀲𑀸 𑀧𑀡𑁆𑀟𑀺𑀢𑀸 𑀬𑀣𑀸𑀧𑀺 𑀥𑀫𑁆𑀫𑁄 𑀲𑀦𑁆𑀤𑀦𑀁 𑀅𑀪𑀺𑀭𑀼𑀬𑁆𑀳 𑀤𑁂𑀯𑀮𑁄𑀓𑀁 𑀕𑀢𑁄, 𑀏𑀯𑀁 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻𑀢𑀺.

𑀲𑀢𑁆𑀣𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀥𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸, 𑀥𑀫𑁆𑀫𑁄 𑀧𑀦 𑀅𑀳𑀫𑁂𑀯, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸𑀬𑁂𑀯𑀸’’𑀢𑀺.

𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁫𑁮] 𑁪. 𑀉𑀤𑀬𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀸 𑀦𑀺𑀲𑀺𑀦𑁆𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀓𑀼𑀲𑀚𑀸𑀢𑀓𑁂 (𑀚𑀸. 𑁨.𑁨𑁦.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑀲𑁆𑀫𑀸 𑀓𑀺𑀮𑁂𑀲𑀯𑀲𑁂𑀦 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀺? 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀫𑀺𑀤𑁆𑀥𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀲𑀼𑀭𑀼𑀦𑁆𑀥𑀦𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀏𑀓𑀕𑀩𑁆𑀪𑁂 𑀯𑀲𑀦𑁆𑀢𑀸𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀪𑀯𑀲𑁂𑀦 𑀦 𑀑𑀮𑁄𑀓𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀲𑀼𑀭𑀼𑀦𑁆𑀥𑀦𑀦𑀕𑀭𑁂 𑀓𑀸𑀲𑀺𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀦𑁂𑀯 𑀧𑀼𑀢𑁆𑀢𑁄, 𑀦 𑀥𑀻𑀢𑀸 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀤𑁂𑀯𑀺𑀬𑁄 ‘‘𑀧𑀼𑀢𑁆𑀢𑁂 𑀧𑀢𑁆𑀣𑁂𑀣𑀸’’𑀢𑀺 𑀆𑀳. 𑀅𑀕𑁆𑀕𑀫𑀳𑁂𑀲𑀻𑀧𑀺 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀫𑀳𑀸𑀚𑀦𑀲𑁆𑀲 𑀳𑀤𑀬𑀁 𑀯𑀟𑁆𑀠𑁂𑀢𑁆𑀯𑀸 𑀚𑀸𑀢𑀪𑀸𑀯𑁂𑀦 ‘‘𑀉𑀤𑀬𑀪𑀤𑁆𑀤𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀓𑀼𑀫𑀸𑀭𑀲𑁆𑀲 𑀧𑀤𑀲𑀸 𑀘𑀭𑀡𑀓𑀸𑀮𑁂 𑀅𑀜𑁆𑀜𑁄𑀧𑀺 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀅𑀜𑁆𑀜𑀢𑀭𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀓𑀼𑀫𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀸𑀧𑀺 ‘‘𑀉𑀤𑀬𑀪𑀤𑁆𑀤𑀸’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀓𑀼𑀫𑀸𑀭𑁄 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺, 𑀚𑀸𑀢𑀩𑁆𑀭𑀳𑁆𑀫𑀘𑀸𑀭𑀻 𑀧𑀦 𑀅𑀳𑁄𑀲𑀺, 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀦 𑀢𑀲𑁆𑀲 𑀓𑀺𑀮𑁂𑀲𑁂𑀲𑀼 𑀘𑀺𑀢𑁆𑀢𑀁 𑀅𑀮𑁆𑀮𑀻𑀬𑀺. 𑀭𑀸𑀚𑀸 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑀼𑀓𑀸𑀫𑁄 ‘‘𑀓𑀼𑀫𑀸𑀭𑀲𑁆𑀲 𑀇𑀤𑀸𑀦𑀺 𑀭𑀚𑁆𑀚𑀲𑀼𑀔𑀲𑁂𑀯𑀦𑀓𑀸𑀮𑁄, 𑀦𑀸𑀝𑀓𑀸𑀧𑀺𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄, 𑀓𑀺𑀮𑁂𑀲𑁂𑀲𑀼 𑀫𑁂 𑀘𑀺𑀢𑁆𑀢𑀁 𑀦 𑀅𑀮𑁆𑀮𑀻𑀬𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀭𑀢𑁆𑀢𑀚𑀫𑁆𑀩𑀼𑀦𑀤𑀫𑀬𑀁 𑀇𑀢𑁆𑀣𑀺𑀭𑀽𑀧𑀁 𑀓𑀸𑀭𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀇𑀢𑁆𑀣𑀺𑀁 𑀮𑀪𑀫𑀸𑀦𑁄 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑁂𑀲𑁂𑀲𑀺. 𑀢𑁂 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀭𑀺𑀳𑀸𑀭𑀸𑀧𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀢𑁆𑀣𑀺𑀁 𑀅𑀮𑀪𑀦𑁆𑀢𑀸 𑀉𑀤𑀬𑀪𑀤𑁆𑀤𑀁 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀲𑀼𑀁. 𑀲𑀸 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑁂𑀲𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀜𑁆𑀜𑁂𑀯 𑀯𑁂𑀫𑀸𑀢𑀺𑀓𑀁 𑀪𑀕𑀺𑀦𑀺𑀁 𑀉𑀤𑀬𑀪𑀤𑁆𑀤𑀓𑀼𑀫𑀸𑀭𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀢𑁂 𑀧𑀦 𑀤𑁆𑀯𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀫𑁂𑀯 𑀯𑀲𑀺𑀁𑀲𑀼.

𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀉𑀪𑁄 𑀏𑀓𑀕𑀩𑁆𑀪𑁂 𑀯𑀲𑀫𑀸𑀦𑀸𑀧𑀺 𑀮𑁄𑀪𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀑𑀮𑁄𑀓𑁂𑀲𑀼𑀁, 𑀅𑀧𑀺𑀘 𑀔𑁄 𑀧𑀦 ‘‘𑀬𑁄 𑀅𑀫𑁆𑀳𑁂𑀲𑀼 𑀧𑀞𑀫𑀢𑀭𑀁 𑀓𑀸𑀮𑀁 𑀓𑀭𑁄𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’𑀢𑀺 𑀆𑀭𑁄𑀘𑁂𑀢𑀽’’𑀢𑀺 𑀲𑀗𑁆𑀕𑀭𑀫𑀓𑀁𑀲𑀼. 𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀲𑁂𑀓𑀢𑁄 𑀲𑀢𑁆𑀢𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀓𑀸𑀮𑀫𑀓𑀸𑀲𑀺. 𑀅𑀜𑁆𑀜𑁄 𑀭𑀸𑀚𑀸 𑀦𑀸𑀳𑁄𑀲𑀺, 𑀉𑀤𑀬𑀪𑀤𑁆𑀤𑀸𑀬𑀬𑁂𑀯 𑀆𑀡𑀸 𑀧𑀯𑀢𑁆𑀢𑀺. 𑀅𑀫𑀘𑁆𑀘𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀘𑀼𑀢𑀺𑀓𑁆𑀔𑀡𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀢𑁆𑀢𑀁 𑀧𑀢𑁆𑀯𑀸 𑀬𑀲𑀫𑀳𑀦𑁆𑀢𑀢𑀸𑀬 𑀲𑀢𑁆𑀢𑀸𑀳𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀺 𑀲𑁄 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀉𑀤𑀬𑀪𑀤𑁆𑀤𑀁 𑀭𑀸𑀚𑀥𑀻𑀢𑀭𑀁 𑀥𑀦𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀗𑁆𑀕𑀭𑀁 𑀫𑁄𑀘𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀤𑀸 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁄 𑀳𑁄𑀢𑀺. 𑀭𑀸𑀚𑀥𑀻𑀢𑀸𑀧𑀺 𑀢𑀁 𑀤𑀺𑀯𑀲𑀁 𑀭𑀢𑁆𑀢𑀺𑀪𑀸𑀕𑁂 𑀧𑀺𑀳𑀺𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀞𑀧𑀺𑀢𑀆𑀭𑀓𑁆𑀔𑁂 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀯𑀭𑀢𑀮𑁂 𑀅𑀮𑀗𑁆𑀓𑀢𑀲𑀺𑀭𑀺𑀕𑀩𑁆𑀪𑁂 𑀏𑀓𑀺𑀓𑀸𑀯 𑀦𑀺𑀘𑁆𑀘𑀮𑀸 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀺. 𑀅𑀣 𑀲𑀓𑁆𑀓𑁄 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀬𑀦𑀕𑀩𑁆𑀪𑁂𑀬𑁂𑀯 𑀧𑀸𑀢𑀼𑀪𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁭. ‘‘𑀏𑀓𑀸 𑀦𑀺𑀲𑀺𑀦𑁆𑀦𑀸 𑀲𑀼𑀘𑀺 𑀲𑀜𑁆𑀜𑀢𑀽𑀭𑀽, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀅𑀦𑀺𑀦𑁆𑀤𑀺𑀢𑀗𑁆𑀕𑀻;

𑀬𑀸𑀘𑀸𑀫𑀺 𑀢𑀁 𑀓𑀺𑀦𑁆𑀦𑀭𑀦𑁂𑀢𑁆𑀢𑀘𑀓𑁆𑀔𑀼, 𑀇𑀫𑁂𑀓𑀭𑀢𑁆𑀢𑀺𑀁 𑀉𑀪𑀬𑁄 𑀯𑀲𑁂𑀫𑀸’’𑀢𑀺.

𑀢𑀢𑁆𑀣 𑀲𑀼𑀘𑀻𑀢𑀺 𑀲𑀼𑀘𑀺𑀯𑀢𑁆𑀣𑀦𑀺𑀯𑀢𑁆𑀣𑀸. 𑀲𑀜𑁆𑀜𑀢𑀽𑀭𑀽𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑀊𑀭𑀽, 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸 𑀲𑀼𑀘𑀺𑀯𑀢𑁆𑀣𑀸 𑀏𑀓𑀺𑀓𑀸𑀯 𑀦𑀺𑀲𑀺𑀦𑁆𑀦𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀺𑀦𑁆𑀤𑀺𑀢𑀗𑁆𑀕𑀻𑀢𑀺 𑀧𑀸𑀤𑀦𑁆𑀢𑀢𑁄 𑀬𑀸𑀯 𑀓𑁂𑀲𑀕𑁆𑀕𑀸 𑀅𑀦𑀺𑀦𑁆𑀤𑀺𑀢𑀲𑀭𑀻𑀭𑀸 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀲𑀭𑀻𑀭𑀸. 𑀓𑀺𑀦𑁆𑀦𑀭𑀦𑁂𑀢𑁆𑀢𑀘𑀓𑁆𑀔𑀽𑀢𑀺 𑀢𑀻𑀳𑀺 𑀫𑀡𑁆𑀟𑀮𑁂𑀳𑀺 𑀧𑀜𑁆𑀘𑀳𑀺 𑀘 𑀧𑀲𑀸𑀤𑁂𑀳𑀺 𑀉𑀧𑀲𑁄𑀪𑀺𑀢𑀢𑁆𑀢𑀸 𑀓𑀺𑀦𑁆𑀦𑀭𑀸𑀦𑀁 𑀦𑁂𑀢𑁆𑀢𑀲𑀤𑀺𑀲𑁂𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀇𑀫𑁂𑀓𑀭𑀢𑁆𑀢𑀺𑀦𑁆𑀢𑀺 𑀇𑀫𑀁 𑀏𑀓𑀭𑀢𑁆𑀢𑀁 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀅𑀮𑀗𑁆𑀓𑀢𑀲𑀬𑀦𑀕𑀩𑁆𑀪𑁂 𑀏𑀓𑀢𑁄 𑀯𑀲𑁂𑀬𑁆𑀬𑀸𑀫𑀸𑀢𑀺 𑀬𑀸𑀘𑀢𑀺.

𑀢𑀢𑁄 𑀭𑀸𑀚𑀥𑀻𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁮. ‘‘𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀁, 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀁;

𑀭𑀓𑁆𑀔𑀺𑀢𑀁 𑀔𑀕𑁆𑀕𑀳𑀢𑁆𑀣𑁂𑀳𑀺, 𑀤𑀼𑀧𑁆𑀧𑀯𑁂𑀲𑀫𑀺𑀤𑀁 𑀧𑀼𑀭𑀁.

𑁩𑁯. ‘‘𑀤𑀳𑀭𑀲𑁆𑀲 𑀬𑀼𑀯𑀺𑀦𑁄 𑀘𑀸𑀧𑀺, 𑀆𑀕𑀫𑁄 𑀘 𑀦 𑀯𑀺𑀚𑁆𑀚𑀢𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀲𑀗𑁆𑀕𑀫𑀁 𑀇𑀘𑁆𑀙𑀲𑁂 𑀫𑀬𑀸’’𑀢𑀺.

𑀢𑀢𑁆𑀣 𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀦𑁆𑀢𑀺 𑀇𑀤𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀼𑀭𑀼𑀦𑁆𑀥𑀦𑀧𑀼𑀭𑀁 𑀅𑀦𑁆𑀢𑀭𑀦𑁆𑀢𑀭𑀸 𑀉𑀤𑀓𑀧𑀭𑀺𑀔𑀸𑀦𑀁 𑀓𑀤𑁆𑀤𑀫𑀧𑀭𑀺𑀔𑀸𑀦𑀁 𑀲𑀼𑀓𑁆𑀔𑀧𑀭𑀺𑀔𑀸𑀦𑀁 𑀑𑀓𑀺𑀡𑁆𑀡𑀢𑁆𑀢𑀸 𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀁. 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀦𑁆𑀢𑀺 𑀣𑀺𑀭𑀢𑀭𑁂𑀳𑀺 𑀅𑀝𑁆𑀝𑀸𑀮𑀓𑁂𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀔𑀕𑁆𑀕𑀳𑀢𑁆𑀣𑁂𑀳𑀻𑀢𑀺 𑀆𑀯𑀼𑀥𑀳𑀢𑁆𑀣𑁂𑀳𑀺 𑀤𑀲𑀳𑀺 𑀬𑁄𑀥𑀲𑀳𑀲𑁆𑀲𑁂𑀳𑀺 𑀭𑀓𑁆𑀔𑀺𑀢𑀁. 𑀤𑀼𑀧𑁆𑀧𑀯𑁂𑀲𑀫𑀺𑀤𑀁 𑀧𑀼𑀭𑀦𑁆𑀢𑀺 𑀇𑀤𑀁 𑀲𑀓𑀮𑀧𑀼𑀭𑀫𑁆𑀧𑀺 𑀢𑀲𑁆𑀲 𑀅𑀦𑁆𑀢𑁄 𑀫𑀸𑀧𑀺𑀢𑀁 𑀫𑀬𑁆𑀳𑀁 𑀦𑀺𑀯𑀸𑀲𑀧𑀼𑀭𑀫𑁆𑀧𑀺 𑀉𑀪𑀬𑀁 𑀓𑀲𑁆𑀲𑀘𑀺 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀆𑀕𑀫𑁄 𑀘𑀸𑀢𑀺 𑀇𑀥 𑀇𑀫𑀸𑀬 𑀯𑁂𑀮𑀸𑀬 𑀢𑀭𑀼𑀡𑀲𑁆𑀲 𑀯𑀸 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀲𑁆𑀲 𑀯𑀸 𑀣𑀸𑀫𑀲𑀫𑁆𑀧𑀦𑁆𑀦𑀬𑁄𑀥𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀆𑀕𑀫𑁄 𑀦𑀸𑀫 𑀦𑀢𑁆𑀣𑀺. 𑀲𑀗𑁆𑀕𑀫𑀦𑁆𑀢𑀺 𑀅𑀣 𑀢𑁆𑀯𑀁 𑀓𑁂𑀦 𑀓𑀸𑀭𑀡𑁂𑀦 𑀇𑀫𑀸𑀬 𑀯𑁂𑀮𑀸𑀬 𑀫𑀬𑀸 𑀲𑀳 𑀲𑀫𑀸𑀕𑀫𑀁 𑀇𑀘𑁆𑀙𑀲𑀻𑀢𑀺.

𑀅𑀣 𑀲𑀓𑁆𑀓𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁦. ‘‘𑀬𑀓𑁆𑀔𑁄𑀳𑀫𑀲𑁆𑀫𑀺 𑀓𑀮𑁆𑀬𑀸𑀡𑀺, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀢𑁆𑀯𑀁 𑀫𑀁 𑀦𑀦𑁆𑀤𑀬 𑀪𑀤𑁆𑀤𑀦𑁆𑀢𑁂, 𑀧𑀼𑀡𑁆𑀡𑀓𑀁𑀲𑀁 𑀤𑀤𑀸𑀫𑀺 𑀢𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀮𑁆𑀬𑀸𑀡𑀺, 𑀲𑀼𑀦𑁆𑀤𑀭𑀤𑀲𑁆𑀲𑀦𑁂 𑀅𑀳𑀫𑁂𑀓𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀇𑀥𑀸𑀕𑀢𑁄, 𑀢𑁆𑀯𑀁 𑀅𑀚𑁆𑀚 𑀫𑀁 𑀦𑀦𑁆𑀤𑀬 𑀢𑁄𑀲𑁂𑀳𑀺, 𑀅𑀳𑀁 𑀢𑁂 𑀇𑀫𑀁 𑀲𑀼𑀯𑀡𑁆𑀡𑀫𑀸𑀲𑀓𑀧𑀼𑀡𑁆𑀡𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀤𑀤𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀥𑀻𑀢𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁪𑁧. ‘‘𑀤𑁂𑀯𑀁𑀯 𑀬𑀓𑁆𑀔𑀁 𑀅𑀣 𑀯𑀸 𑀫𑀦𑀼𑀲𑁆𑀲𑀁, 𑀦 𑀧𑀢𑁆𑀣𑀬𑁂 𑀉𑀤𑀬𑀫𑀢𑀺𑀘𑁆𑀘 𑀅𑀜𑁆𑀜𑀁;

𑀕𑀘𑁆𑀙𑁂𑀯 𑀢𑁆𑀯𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀫𑀸 𑀘𑀲𑁆𑀲𑀼 𑀕𑀦𑁆𑀢𑁆𑀯𑀸 𑀧𑀼𑀦𑀭𑀸𑀯𑀚𑀺𑀢𑁆𑀣𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀤𑁂𑀯𑀭𑀸𑀚, 𑀤𑁂𑀯𑀁 𑀯𑀸 𑀬𑀓𑁆𑀔𑀁 𑀯𑀸 𑀉𑀤𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀫𑀺, 𑀲𑁄 𑀢𑁆𑀯𑀁 𑀕𑀘𑁆𑀙𑁂𑀯, 𑀫𑀸 𑀇𑀥 𑀅𑀝𑁆𑀞𑀸𑀲𑀺, 𑀦 𑀫𑁂 𑀢𑀬𑀸 𑀆𑀪𑀢𑁂𑀦 𑀧𑀡𑁆𑀡𑀸𑀓𑀸𑀭𑁂𑀦 𑀅𑀢𑁆𑀣𑁄, 𑀕𑀦𑁆𑀢𑁆𑀯𑀸 𑀘 𑀫𑀸 𑀇𑀫𑀁 𑀞𑀸𑀦𑀁 𑀧𑀼𑀦𑀭𑀸𑀯𑀚𑀺𑀢𑁆𑀣𑀸𑀢𑀺.

𑀲𑁄 𑀢𑀲𑁆𑀲𑀸 𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀅𑀝𑁆𑀞𑀢𑁆𑀯𑀸 𑀕𑀢𑀲𑀤𑀺𑀲𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀳𑀺𑀢𑁄 𑀅𑀝𑁆𑀞𑀸𑀲𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀢𑀸𑀬 𑀯𑁂𑀮𑀸𑀬𑀫𑁂𑀯 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀭𑀚𑀢𑀧𑀸𑀢𑀺𑀁 𑀆𑀤𑀸𑀬 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁪𑁨. ‘‘𑀬𑀸 𑀲𑀸 𑀭𑀢𑀺 𑀉𑀢𑁆𑀢𑀫𑀸 𑀓𑀸𑀫𑀪𑁄𑀕𑀺𑀦𑀁, 𑀬𑀁𑀳𑁂𑀢𑀼 𑀲𑀢𑁆𑀢𑀸 𑀯𑀺𑀲𑀫𑀁 𑀘𑀭𑀦𑁆𑀢𑀺;

𑀫𑀸 𑀢𑀁 𑀭𑀢𑀺𑀁 𑀚𑀻𑀬𑀺 𑀢𑀼𑀯𑀁 𑀲𑀼𑀘𑀺𑀫𑁆𑀳𑀺𑀢𑁂, 𑀤𑀤𑀸𑀫𑀺 𑀢𑁂 𑀭𑀽𑀧𑀺𑀬𑀁 𑀓𑀁𑀲𑀧𑀽𑀭’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑁂, 𑀭𑀸𑀚𑀥𑀻𑀢𑁂 𑀬𑀸 𑀏𑀲𑀸 𑀓𑀸𑀫𑀪𑁄𑀕𑀺𑀲𑀢𑁆𑀢𑀸𑀦𑀁 𑀭𑀢𑀻𑀲𑀼 𑀫𑁂𑀣𑀼𑀦𑀓𑀸𑀫𑀭𑀢𑀺 𑀦𑀸𑀫 𑀉𑀢𑁆𑀢𑀫𑀸 𑀭𑀢𑀺, 𑀬𑀲𑁆𑀲𑀸 𑀭𑀢𑀺𑀬𑀸 𑀓𑀸𑀭𑀡𑀸 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀁 𑀘𑀭𑀦𑁆𑀢𑀺, 𑀢𑀁 𑀭𑀢𑀺𑀁 𑀢𑁆𑀯𑀁 𑀪𑀤𑁆𑀤𑁂, 𑀲𑀼𑀘𑀺𑀫𑁆𑀳𑀺𑀢𑁂 𑀫𑀦𑀸𑀧𑀳𑀲𑀺𑀢𑁂 𑀫𑀸 𑀚𑀻𑀬𑀺, 𑀅𑀳𑀫𑁆𑀧𑀺 𑀆𑀕𑀘𑁆𑀙𑀦𑁆𑀢𑁄 𑀦 𑀢𑀼𑀘𑁆𑀙𑀳𑀢𑁆𑀣𑁄 𑀆𑀕𑀢𑁄, 𑀳𑀺𑀬𑁆𑀬𑁄 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀳𑀭𑀺𑀁, 𑀅𑀚𑁆𑀚 𑀭𑀽𑀧𑀺𑀬𑀧𑀸𑀢𑀺𑀁, 𑀇𑀫𑀁 𑀢𑁂 𑀅𑀳𑀁 𑀭𑀽𑀧𑀺𑀬𑀧𑀸𑀢𑀺𑀁 𑀲𑀼𑀯𑀡𑁆𑀡𑀧𑀽𑀭𑀁 𑀤𑀤𑀸𑀫𑀻𑀢𑀺.

𑀭𑀸𑀚𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀣𑀸𑀲𑀮𑁆𑀮𑀸𑀧𑀁 𑀮𑀪𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀆𑀕𑀫𑀺𑀲𑁆𑀲𑀢𑀺, 𑀦 𑀤𑀸𑀦𑀺 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺.

𑀲𑀓𑁆𑀓𑁄 𑀢𑀲𑁆𑀲𑀸 𑀅𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀳𑀺𑀢𑁄 𑀳𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀸𑀬𑀫𑁂𑀯 𑀯𑁂𑀮𑀸𑀬 𑀮𑁄𑀳𑀧𑀸𑀢𑀺𑀁 𑀓𑀳𑀸𑀧𑀡𑀧𑀽𑀭𑀁 𑀆𑀤𑀸𑀬 ‘‘𑀪𑀤𑁆𑀤𑁂, 𑀢𑁆𑀯𑀁 𑀫𑀁 𑀓𑀸𑀫𑀭𑀢𑀺𑀬𑀸 𑀲𑀦𑁆𑀢𑀧𑁆𑀧𑁂𑀳𑀺, 𑀇𑀫𑀁 𑀢𑁂 𑀓𑀳𑀸𑀧𑀡𑀧𑀽𑀭𑀁 𑀮𑁄𑀳𑀧𑀸𑀢𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀥𑀻𑀢𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁪𑁩. ‘‘𑀦𑀸𑀭𑀺𑀁 𑀦𑀭𑁄 𑀦𑀺𑀚𑁆𑀛𑀧𑀬𑀁 𑀥𑀦𑁂𑀦, 𑀉𑀓𑁆𑀓𑀁𑀲𑀢𑀻 𑀬𑀢𑁆𑀣 𑀓𑀭𑁄𑀢𑀺 𑀙𑀦𑁆𑀤𑀁;

𑀯𑀺𑀧𑀘𑁆𑀘𑀦𑀻𑀓𑁄 𑀢𑀯 𑀤𑁂𑀯𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀢𑁄 𑀣𑁄𑀓𑀢𑀭𑁂𑀦 𑀏𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑁄 𑀧𑀼𑀭𑀺𑀲, 𑀢𑁆𑀯𑀁 𑀚𑀴𑁄. 𑀦𑀭𑁄 𑀳𑀺 𑀦𑀸𑀫 𑀦𑀸𑀭𑀺𑀁 𑀓𑀺𑀮𑁂𑀲𑀭𑀢𑀺𑀓𑀸𑀭𑀡𑀸 𑀥𑀦𑁂𑀦 𑀦𑀺𑀚𑁆𑀛𑀸𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑁂𑀦𑁆𑀢𑁄 𑀬𑀢𑁆𑀣 𑀦𑀸𑀭𑀺𑀬𑀸 𑀙𑀦𑁆𑀤𑀁 𑀓𑀭𑁄𑀢𑀺, 𑀢𑀁 𑀉𑀓𑁆𑀓𑀁𑀲𑀢𑀺 𑀯𑀡𑁆𑀡𑁂𑀢𑁆𑀯𑀸 𑀣𑁄𑀫𑁂𑀢𑁆𑀯𑀸 𑀩𑀳𑀼𑀢𑀭𑁂𑀦 𑀥𑀦𑁂𑀦 𑀧𑀮𑁄𑀪𑁂𑀢𑀺, 𑀢𑀼𑀬𑁆𑀳𑀁 𑀧𑀦𑁂𑀲𑁄 𑀤𑁂𑀯𑀲𑀪𑀸𑀯𑁄 𑀯𑀺𑀧𑀘𑁆𑀘𑀦𑀻𑀓𑁄, 𑀢𑁆𑀯𑀜𑁆𑀳𑀺 𑀫𑀬𑀸 𑀧𑀘𑁆𑀘𑀓𑁆𑀔𑀢𑁄 𑀣𑁄𑀓𑀢𑀭𑁂𑀦 𑀏𑀲𑀺, 𑀧𑀞𑀫𑀤𑀺𑀯𑀲𑁂 𑀲𑀼𑀯𑀡𑁆𑀡𑀧𑀽𑀭𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀳𑀭𑀺𑀢𑁆𑀯𑀸, 𑀤𑀼𑀢𑀺𑀬𑀤𑀺𑀯𑀲𑁂 𑀲𑀼𑀯𑀡𑁆𑀡𑀧𑀽𑀭𑀁 𑀭𑀽𑀧𑀺𑀬𑀧𑀸𑀢𑀺𑀁, 𑀢𑀢𑀺𑀬𑀤𑀺𑀯𑀲𑁂 𑀓𑀳𑀸𑀧𑀡𑀧𑀽𑀭𑀁 𑀮𑁄𑀳𑀧𑀸𑀢𑀺𑀁 𑀆𑀳𑀭𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀪𑀤𑁆𑀤𑁂 𑀭𑀸𑀚𑀓𑀼𑀫𑀸𑀭𑀺, 𑀅𑀳𑀁 𑀙𑁂𑀓𑀯𑀸𑀡𑀺𑀚𑁄 𑀦 𑀦𑀺𑀭𑀢𑁆𑀣𑀓𑁂𑀦 𑀅𑀢𑁆𑀣𑀁 𑀦𑀸𑀲𑁂𑀫𑀺, 𑀲𑀘𑁂 𑀢𑁆𑀯𑀁 𑀆𑀬𑀼𑀦𑀸 𑀯𑀸 𑀯𑀡𑁆𑀡𑁂𑀦 𑀯𑀸 𑀯𑀟𑁆𑀠𑁂𑀬𑁆𑀬𑀸𑀲𑀺, 𑀅𑀳𑀁 𑀢𑁂 𑀧𑀡𑁆𑀡𑀸𑀓𑀸𑀭𑀁 𑀯𑀟𑁆𑀠𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀁, 𑀢𑁆𑀯𑀁 𑀧𑀦 𑀧𑀭𑀺𑀳𑀸𑀬𑀲𑁂𑀯, 𑀢𑁂𑀦𑀸𑀳𑀫𑁆𑀧𑀺 𑀥𑀦𑀁 𑀧𑀭𑀺𑀳𑀸𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁪. ‘‘𑀆𑀬𑀼 𑀘 𑀯𑀡𑁆𑀡𑁄 𑀘 𑀫𑀦𑀼𑀲𑁆𑀲𑀮𑁄𑀓𑁂, 𑀦𑀺𑀳𑀻𑀬𑀢𑀺 𑀫𑀦𑀼𑀚𑀸𑀦𑀁 𑀲𑀼𑀕𑀢𑁆𑀢𑁂;