𑁧𑁦. 𑀤𑀲𑀓𑀦𑀺𑀧𑀸𑀢𑁄

[𑁪𑁩𑁯] 𑁧. 𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀘𑀢𑀼𑀤𑁆𑀯𑀸𑀭𑀫𑀺𑀤𑀁 𑀦𑀕𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑀚𑀸𑀢𑀓𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑀢𑀸𑀬 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀆𑀧𑀸𑀤𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀏𑀓𑁄 𑀧𑀼𑀢𑁆𑀢𑁄 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀲𑁄 𑀧𑀦 𑀤𑀼𑀲𑁆𑀲𑀻𑀮𑁄 𑀅𑀲𑁆𑀲𑀤𑁆𑀥𑁄. 𑀅𑀣 𑀦𑀁 𑀅𑀧𑀭𑀪𑀸𑀕𑁂 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀫𑀸𑀢𑀸 𑀓𑀼𑀝𑀼𑀫𑁆𑀩𑀁 𑀯𑀺𑀘𑀸𑀭𑁂𑀦𑁆𑀢𑀻 𑀆𑀳 𑁋 ‘‘𑀢𑀸𑀢, 𑀢𑀬𑀸 𑀤𑀼𑀮𑁆𑀮𑀪𑀁 𑀫𑀦𑀼𑀲𑁆𑀲𑀢𑁆𑀢𑀁 𑀮𑀤𑁆𑀥𑀁, 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔𑀸𑀳𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀳𑀺, 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺. 𑀅𑀫𑁆𑀫, 𑀦 𑀫𑀬𑁆𑀳𑀁 𑀤𑀸𑀦𑀸𑀤𑀻𑀳𑀺 𑀅𑀢𑁆𑀣𑁄, 𑀫𑀸 𑀫𑀁 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣, 𑀅𑀳𑀁 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀯𑀤𑀦𑁆𑀢𑀫𑁆𑀧𑀺 𑀦𑀁 𑀏𑀓𑀤𑀺𑀯𑀲𑀁 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀅𑀚𑁆𑀚 𑀅𑀪𑀺𑀮𑀓𑁆𑀔𑀺𑀢𑁄 𑀫𑀳𑀸𑀉𑀧𑁄𑀲𑀣𑀤𑀺𑀯𑀲𑁄, 𑀅𑀚𑁆𑀚 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀳𑀺, 𑀅𑀳𑀁 𑀢𑁂 𑀲𑀳𑀲𑁆𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀥𑀦𑀮𑁄𑀪𑁂𑀦 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀁 𑀬𑀣𑀸 𑀏𑀓𑀫𑁆𑀧𑀺 𑀥𑀫𑁆𑀫𑀧𑀤𑀁 𑀓𑀡𑁆𑀡𑀁 𑀦 𑀧𑀳𑀭𑀢𑀺, 𑀢𑀣𑀸 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺.

𑀫𑀸𑀢𑀸 𑀧𑀦𑀲𑁆𑀲 ‘‘𑀅𑀚𑁆𑀚 𑀫𑁂 𑀧𑀼𑀢𑁆𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀸𑀢𑁄𑀯 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀁 𑀆𑀤𑀸𑀬 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀬𑀸𑀕𑀼𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀲𑁆𑀲𑀸𑀕𑀫𑀦𑀁 𑀧𑀝𑀺𑀫𑀸𑀦𑁂𑀦𑁆𑀢𑀻 𑀢𑀁 𑀏𑀓𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀥𑀫𑁆𑀫𑀓𑀣𑀺𑀓𑁄 𑀓𑁂𑀦 𑀦 𑀆𑀦𑀻𑀢𑁄’’𑀢𑀺 𑀯𑀢𑁆𑀯𑀸 ‘‘𑀦 𑀫𑀬𑁆𑀳𑀁 𑀥𑀫𑁆𑀫𑀓𑀣𑀺𑀓𑁂𑀦 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀬𑀸𑀕𑀼𑀁 𑀧𑀺𑀯𑀸’’𑀢𑀺 𑀆𑀳. 𑀲𑁄 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀲𑀳𑀲𑁆𑀲𑀁 𑀧𑀝𑀺𑀲𑁆𑀲𑀼𑀢𑀁, 𑀢𑀁 𑀢𑀸𑀯 𑀫𑁂 𑀤𑁂𑀣, 𑀧𑀘𑁆𑀙𑀸 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀧𑀺𑀯, 𑀢𑀸𑀢, 𑀧𑀘𑁆𑀙𑀸 𑀤𑀲𑁆𑀲𑀸𑀫𑀻’’𑀢𑀺. ‘‘𑀕𑀳𑁂𑀢𑁆𑀯𑀸𑀯 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀫𑀸𑀢𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀧𑀼𑀭𑀢𑁄 𑀞𑀧𑁂𑀲𑀺. 𑀲𑁄 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀯𑀻𑀲𑀲𑀢𑀲𑀳𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀸𑀯𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 ‘‘𑀅𑀫𑁆𑀫, 𑀅𑀳𑀁 𑀦𑀸𑀯𑀸𑀬 𑀯𑁄𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀫𑀸𑀢𑀸 ‘‘𑀢𑁆𑀯𑀁 𑀢𑀸𑀢, 𑀏𑀓𑀧𑀼𑀢𑁆𑀢𑀓𑁄, 𑀇𑀫𑀲𑁆𑀫𑀺𑀁 𑀖𑀭𑁂 𑀥𑀦𑀫𑁆𑀧𑀺 𑀩𑀳𑀼, 𑀲𑀫𑀼𑀤𑁆𑀤𑁄 𑀅𑀦𑁂𑀓𑀸𑀤𑀻𑀦𑀯𑁄, 𑀫𑀸 𑀕𑀫𑀻’’𑀢𑀺 𑀦𑀺𑀯𑀸𑀭𑁂𑀲𑀺. 𑀲𑁄 ‘‘𑀅𑀳𑀁 𑀕𑀫𑀺𑀲𑁆𑀲𑀸𑀫𑁂𑀯, 𑀦 𑀲𑀓𑁆𑀓𑀸 𑀫𑀁 𑀦𑀺𑀯𑀸𑀭𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀳𑀁 𑀢𑀁, 𑀢𑀸𑀢, 𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀸 𑀳𑀢𑁆𑀣𑁂 𑀕𑀳𑀺𑀢𑁄 𑀳𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺.

𑀦𑀸𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀢𑁆𑀢𑀯𑀺𑀦𑁆𑀤𑀓𑀁 𑀦𑀺𑀲𑁆𑀲𑀸𑀬 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀦𑀺𑀘𑁆𑀘𑀮𑀸 𑀅𑀝𑁆𑀞𑀸𑀲𑀺. 𑀓𑀸𑀴𑀓𑀡𑁆𑀡𑀺𑀲𑀮𑀸𑀓𑀸 𑀓𑀭𑀺𑀬𑀫𑀸𑀦𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲𑁂𑀯 𑀳𑀢𑁆𑀣𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀢𑀺. 𑀅𑀣𑀲𑁆𑀲 𑀉𑀴𑀼𑀫𑁆𑀧𑀁 𑀤𑀢𑁆𑀯𑀸 ‘‘𑀇𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀢𑀁 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀔𑀺𑀧𑀺𑀁𑀲𑀼. 𑀢𑀸𑀯𑀤𑁂𑀯 𑀦𑀸𑀯𑀸 𑀚𑀯𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺. 𑀲𑁄𑀧𑀺 𑀉𑀴𑀼𑀫𑁆𑀧𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀨𑀮𑀺𑀓𑀯𑀺𑀫𑀸𑀦𑁂 𑀘𑀢𑀲𑁆𑀲𑁄 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀅𑀤𑁆𑀤𑀲. 𑀢𑀸 𑀲𑀢𑁆𑀢𑀸𑀳𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀲𑀢𑁆𑀢𑀸𑀳𑀁 𑀲𑀼𑀔𑀁. 𑀲𑁄 𑀢𑀸𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀸𑀳𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺. 𑀅𑀣 𑀦𑀁 𑀢𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀢𑁆𑀣𑀸𑀬 𑀕𑀘𑁆𑀙𑀫𑀸𑀦𑀸 ‘‘𑀲𑀸𑀫𑀺, 𑀫𑀬𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀫𑀺𑀲𑁆𑀲𑀸𑀫, 𑀬𑀸𑀯 𑀫𑀬𑀁 𑀆𑀕𑀘𑁆𑀙𑀸𑀫, 𑀢𑀸𑀯 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀇𑀥𑁂𑀯 𑀯𑀲𑀸’’𑀢𑀺 𑀯𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀨𑀮𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀘𑁆𑀙𑀦𑁆𑀢𑁄 𑀅𑀧𑀭𑀁 𑀤𑀻𑀧𑀓𑀁 𑀧𑀢𑁆𑀯𑀸 𑀢𑀢𑁆𑀣 𑀭𑀚𑀢𑀯𑀺𑀫𑀸𑀦𑁂 𑀅𑀝𑁆𑀞 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀤𑀺𑀲𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀧𑀭𑀲𑁆𑀫𑀺𑀁 𑀤𑀻𑀧𑀓𑁂 𑀫𑀡𑀺𑀯𑀺𑀫𑀸𑀦𑁂 𑀲𑁄𑀴𑀲, 𑀅𑀧𑀭𑀲𑁆𑀫𑀺𑀁 𑀤𑀻𑀧𑀓𑁂 𑀓𑀦𑀓𑀯𑀺𑀫𑀸𑀦𑁂 𑀤𑁆𑀯𑀢𑁆𑀢𑀺𑀁𑀲 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀤𑀺𑀲𑁆𑀯𑀸 𑀢𑀸𑀳𑀺 𑀲𑀤𑁆𑀥𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀸𑀲𑀫𑁆𑀧𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼𑀁 𑀕𑀢𑀓𑀸𑀮𑁂 𑀧𑀼𑀦 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀘𑀢𑀼𑀤𑁆𑀯𑀸𑀭𑀁 𑀦𑀕𑀭𑀁 𑀅𑀤𑁆𑀤𑀲. 𑀉𑀲𑁆𑀲𑀤𑀦𑀺𑀭𑀬𑁄 𑀓𑀺𑀭𑁂𑀲, 𑀩𑀳𑀽𑀦𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀓𑀫𑁆𑀫𑀓𑀭𑀡𑀸𑀦𑀼𑀪𑀯𑀦𑀝𑁆𑀞𑀸𑀦𑀁 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀦𑀕𑀭𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺.

𑀲𑁄 ‘‘𑀇𑀫𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑁂 𑀧𑀘𑁆𑀘𑀫𑀸𑀦𑀁 𑀦𑁂𑀭𑀬𑀺𑀓𑀲𑀢𑁆𑀢𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀢𑀁 𑀢𑀲𑁆𑀲 𑀲𑀻𑀲𑁂 𑀔𑀼𑀭𑀘𑀓𑁆𑀓𑀁 𑀧𑀤𑀼𑀫𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀉𑀭𑁂 𑀧𑀜𑁆𑀘𑀗𑁆𑀕𑀺𑀓𑀩𑀦𑁆𑀥𑀦𑀁 𑀉𑀭𑀘𑁆𑀙𑀤𑀧𑀲𑀸𑀥𑀦𑀁 𑀳𑀼𑀢𑁆𑀯𑀸 𑀲𑀻𑀲𑀢𑁄 𑀕𑀮𑀦𑁆𑀢𑀁 𑀮𑁄𑀳𑀺𑀢𑀁 𑀮𑁄𑀳𑀺𑀢𑀘𑀦𑁆𑀤𑀦𑀯𑀺𑀮𑁂𑀧𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀧𑀭𑀺𑀤𑁂𑀯𑀦𑀲𑀤𑁆𑀤𑁄 𑀫𑀥𑀼𑀭𑀲𑀭𑁄 𑀕𑀻𑀢𑀲𑀤𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀘𑀺𑀭𑀁 𑀢𑀬𑀸 𑀧𑀤𑀼𑀫𑀁 𑀥𑀸𑀭𑀺𑀢𑀁, 𑀤𑁂𑀳𑀺 𑀫𑁂 𑀏𑀢’’𑀦𑁆𑀢𑀺 𑀆𑀳. ‘‘𑀲𑀫𑁆𑀫, 𑀦𑀬𑀺𑀤𑀁 𑀧𑀤𑀼𑀫𑀁, 𑀔𑀼𑀭𑀘𑀓𑁆𑀓𑀁 𑀏𑀢’’𑀦𑁆𑀢𑀺. ‘‘𑀢𑁆𑀯𑀁 𑀫𑀬𑁆𑀳𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀏𑀯𑀁 𑀯𑀤𑀲𑀻’’𑀢𑀺. 𑀦𑁂𑀭𑀬𑀺𑀓𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀓𑀫𑁆𑀫𑀁 𑀔𑀻𑀡𑀁 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸𑀧𑀺 𑀫𑀬𑀸 𑀯𑀺𑀬 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀆𑀕𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀤𑀲𑁆𑀲𑀸𑀫𑀺𑀲𑁆𑀲 𑀔𑀼𑀭𑀘𑀓𑁆𑀓’’𑀦𑁆𑀢𑀺. 𑀅𑀣 𑀦𑀁 ‘‘𑀏𑀳𑀺 𑀪𑁄, 𑀕𑀡𑁆𑀳 𑀇𑀫’’𑀦𑁆𑀢𑀺 𑀯𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀢𑀲𑁆𑀲 𑀲𑀻𑀲𑁂 𑀔𑀺𑀧𑀺, 𑀢𑀁 𑀢𑀲𑁆𑀲 𑀫𑀢𑁆𑀣𑀓𑀁 𑀧𑀺𑀲𑀫𑀸𑀦𑀁 𑀪𑀲𑁆𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀲𑁆𑀲 𑀔𑀼𑀭𑀘𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀯 𑀔𑀼𑀭𑀘𑀓𑁆𑀓𑀁 𑀕𑀡𑁆𑀳, 𑀢𑀯 𑀔𑀼𑀭𑀘𑀓𑁆𑀓𑀁 𑀕𑀡𑁆𑀳𑀸’’𑀢𑀺 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀧𑀭𑀺𑀤𑁂𑀯𑀺, 𑀇𑀢𑀭𑁄 𑀅𑀦𑁆𑀢𑀭𑀥𑀸𑀬𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀲𑁆𑀲𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀸𑀫𑀺 𑀤𑁂𑀯𑀭𑀸𑀚, 𑀇𑀤𑀁 𑀫𑀁 𑀘𑀓𑁆𑀓𑀁 𑀲𑀡𑁆𑀳𑀓𑀭𑀡𑀺𑀬𑀁 𑀯𑀺𑀬 𑀢𑀺𑀮𑀸𑀦𑀺 𑀧𑀺𑀲𑀫𑀸𑀦𑀁 𑀑𑀢𑀭𑀢𑀺, 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀁 𑀧𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧. ‘‘𑀘𑀢𑀼𑀤𑁆𑀯𑀸𑀭𑀫𑀺𑀤𑀁 𑀦𑀕𑀭𑀁, 𑀆𑀬𑀲𑀁 𑀤𑀴𑁆𑀳𑀧𑀸𑀓𑀸𑀭𑀁;

𑀑𑀭𑀼𑀤𑁆𑀥𑀧𑀝𑀺𑀭𑀼𑀤𑁆𑀥𑁄𑀲𑁆𑀫𑀺, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

𑁨. ‘‘𑀲𑀩𑁆𑀩𑁂 𑀅𑀧𑀺𑀳𑀺𑀢𑀸 𑀤𑁆𑀯𑀸𑀭𑀸, 𑀑𑀭𑀼𑀤𑁆𑀥𑁄𑀲𑁆𑀫𑀺 𑀬𑀣𑀸 𑀤𑀺𑀚𑁄;

𑀓𑀺𑀫𑀸𑀥𑀺𑀓𑀭𑀡𑀁 𑀬𑀓𑁆𑀔, 𑀘𑀓𑁆𑀓𑀸𑀪𑀺𑀦𑀺𑀳𑀢𑁄 𑀅𑀳’’𑀦𑁆𑀢𑀺.

𑀢𑀢𑁆𑀣 𑀤𑀴𑁆𑀳𑀧𑀸𑀓𑀸𑀭𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀁. ‘‘𑀤𑀴𑁆𑀳𑀢𑁄𑀭𑀡’’𑀦𑁆𑀢𑀺𑀧𑀺 𑀧𑀸𑀞𑁄, 𑀣𑀺𑀭𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀑𑀭𑀼𑀤𑁆𑀥𑀧𑀝𑀺𑀭𑀼𑀤𑁆𑀥𑁄𑀲𑁆𑀫𑀻𑀢𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀧𑀸𑀓𑀸𑀭𑁂𑀦 𑀭𑀼𑀤𑁆𑀥𑁄, 𑀧𑀮𑀸𑀬𑀦𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀓𑀺𑀁 𑀧𑀸𑀧𑀁 𑀧𑀓𑀢𑀦𑁆𑀢𑀺 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀅𑀧𑀺𑀳𑀺𑀢𑀸𑀢𑀺 𑀣𑀓𑀺𑀢𑀸. 𑀬𑀣𑀸 𑀤𑀺𑀚𑁄𑀢𑀺 𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑁄 𑀲𑀓𑀼𑀡𑁄 𑀯𑀺𑀬. 𑀓𑀺𑀫𑀸𑀥𑀺𑀓𑀭𑀡𑀦𑁆𑀢𑀺 𑀓𑀺𑀁 𑀓𑀸𑀭𑀡𑀁. 𑀘𑀓𑁆𑀓𑀸𑀪𑀺𑀦𑀺𑀳𑀢𑁄𑀢𑀺 𑀘𑀓𑁆𑀓𑁂𑀦 𑀅𑀪𑀺𑀦𑀺𑀳𑀢𑁄.

𑀅𑀣𑀲𑁆𑀲 𑀤𑁂𑀯𑀭𑀸𑀚𑀸 𑀓𑀸𑀭𑀡𑀁 𑀓𑀣𑁂𑀢𑀼𑀁 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁩. ‘‘𑀮𑀤𑁆𑀥𑀸 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺;

𑀅𑀦𑀼𑀓𑀫𑁆𑀧𑀓𑀸𑀦𑀁 𑀜𑀸𑀢𑀻𑀦𑀁, 𑀯𑀘𑀦𑀁 𑀲𑀫𑁆𑀫 𑀦𑀸𑀓𑀭𑀺.

𑁪. ‘‘𑀮𑀗𑁆𑀖𑀺𑀁 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺, 𑀲𑀸𑀕𑀭𑀁 𑀅𑀧𑁆𑀧𑀲𑀺𑀤𑁆𑀥𑀺𑀓𑀁;

𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲.

𑁫. ‘‘𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁬. ‘‘𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻;

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁭. ‘‘𑀩𑀳𑀼𑀪𑀡𑁆𑀟𑀁 𑀅𑀯𑀳𑀸𑀬, 𑀫𑀕𑁆𑀕𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬;

𑀬𑁂𑀲𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀢𑀁, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁮. ‘‘𑀓𑀫𑁆𑀫𑀁 𑀲𑀫𑁂𑀓𑁆𑀔𑁂 𑀯𑀺𑀧𑀼𑀮𑀜𑁆𑀘 𑀪𑁄𑀕𑀁, 𑀇𑀘𑁆𑀙𑀁 𑀦 𑀲𑁂𑀯𑁂𑀬𑁆𑀬 𑀅𑀦𑀢𑁆𑀣𑀲𑀁𑀳𑀺𑀢𑀁;

𑀓𑀭𑁂𑀬𑁆𑀬 𑀯𑀸𑀓𑁆𑀬𑀁 𑀅𑀦𑀼𑀓𑀫𑁆𑀧𑀓𑀸𑀦𑀁, 𑀢𑀁 𑀢𑀸𑀤𑀺𑀲𑀁 𑀦𑀸𑀢𑀺𑀯𑀢𑁆𑀢𑁂𑀬𑁆𑀬 𑀘𑀓𑁆𑀓’’𑀦𑁆𑀢𑀺.

𑀢𑀢𑁆𑀣 𑀮𑀤𑁆𑀥𑀸 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀻𑀢𑀺 𑀢𑁆𑀯𑀁 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀺𑀓𑀸 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀲𑀢𑀲𑀳𑀲𑁆𑀲𑀸𑀦𑀺 𑀘 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺 𑀮𑀪𑀺𑀢𑁆𑀯𑀸. 𑀦𑀸𑀓𑀭𑀻𑀢𑀺 𑀢𑁂𑀦 𑀥𑀦𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑁄 𑀲𑀫𑀼𑀤𑁆𑀤𑁂 𑀆𑀤𑀻𑀦𑀯𑀜𑁆𑀘 𑀓𑀣𑁂𑀢𑁆𑀯𑀸 𑀫𑀸𑀢𑀼𑀬𑀸 𑀯𑀸𑀭𑀺𑀬𑀫𑀸𑀦𑁄𑀧𑀺 𑀅𑀦𑀼𑀓𑀫𑁆𑀧𑀓𑀸𑀦𑀁 𑀜𑀸𑀢𑀻𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀲𑁄𑀢𑀸𑀧𑀦𑁆𑀦𑀁 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸𑀲𑀻𑀢𑀺 𑀤𑀻𑀧𑁂𑀢𑀺.

𑀮𑀗𑁆𑀖𑀺𑀦𑁆𑀢𑀺 𑀦𑀸𑀯𑀁 𑀉𑀮𑁆𑀮𑀗𑁆𑀖𑀦𑀲𑀫𑀢𑁆𑀣𑀁. 𑀧𑀓𑁆𑀔𑀦𑁆𑀤𑀻𑀢𑀺 𑀧𑀓𑁆𑀔𑀦𑁆𑀤𑁄𑀲𑀺. 𑀅𑀧𑁆𑀧𑀲𑀺𑀤𑁆𑀥𑀺𑀓𑀦𑁆𑀢𑀺 𑀫𑀦𑁆𑀤𑀲𑀺𑀤𑁆𑀥𑀺𑀁 𑀯𑀺𑀦𑀸𑀲𑀩𑀳𑀼𑀮𑀁. 𑀘𑀢𑀼𑀩𑁆𑀪𑀺 𑀅𑀝𑁆𑀞𑀸𑀢𑀺 𑀅𑀣 𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀦𑀸𑀯𑀸𑀬 𑀨𑀮𑀓𑀁 𑀤𑀢𑁆𑀯𑀸 𑀲𑀫𑀼𑀤𑁆𑀤𑁂 𑀔𑀺𑀢𑁆𑀢𑁄𑀧𑀺 𑀢𑁆𑀯𑀁 𑀫𑀸𑀢𑀭𑀁 𑀦𑀺𑀲𑁆𑀲𑀸𑀬 𑀏𑀓𑀤𑀺𑀯𑀲𑀁 𑀓𑀢𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀨𑀮𑀺𑀓𑀯𑀺𑀫𑀸𑀦𑁂 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀮𑀪𑀺𑀢𑁆𑀯𑀸 𑀢𑀢𑁄 𑀭𑀚𑀢𑀯𑀺𑀫𑀸𑀦𑁂 𑀅𑀝𑁆𑀞, 𑀫𑀡𑀺𑀯𑀺𑀫𑀸𑀦𑁂 𑀲𑁄𑀴𑀲, 𑀓𑀦𑀓𑀯𑀺𑀫𑀸𑀦𑁂 𑀤𑁆𑀯𑀢𑁆𑀢𑀺𑀁𑀲 𑀅𑀥𑀺𑀕𑀢𑁄𑀲𑀻𑀢𑀺. 𑀅𑀢𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄𑀢𑀺 𑀅𑀣 𑀢𑁆𑀯𑀁 𑀬𑀣𑀸𑀮𑀤𑁆𑀥𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀅𑀢𑁆𑀭 𑀉𑀢𑁆𑀢𑀭𑀺𑀢𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀮𑀤𑁆𑀥𑀁 𑀮𑀤𑁆𑀥𑀁 𑀅𑀢𑀺𑀓𑁆𑀓𑀫𑀦𑀮𑁄𑀪𑀲𑀗𑁆𑀔𑀸𑀢𑀸𑀬 𑀅𑀢𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑀺𑀘𑁆𑀙𑁄 𑀧𑀸𑀧𑀧𑀼𑀕𑁆𑀕𑀮𑁄 𑀢𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀔𑀻𑀡𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲 𑀇𑀢𑁆𑀣𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀫𑀁 𑀧𑁂𑀢𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀼𑀧𑀳𑀸𑀭𑀤𑀸𑀦𑀅𑀓𑀼𑀲𑀮𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀤𑀁 𑀔𑀼𑀭𑀘𑀓𑁆𑀓𑀁 𑀲𑀫𑁆𑀧𑀢𑁆𑀢𑁄𑀲𑀺. ‘‘𑀅𑀢𑁆𑀭𑀺𑀘𑁆𑀙’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀫𑀸𑀦𑁄𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀭𑀺𑀘𑁆𑀙𑀸’’𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀭𑀺𑀘𑁆𑀙𑀸𑀬𑀸𑀢𑀺 𑀅𑀢𑁆𑀣𑁄. 𑀪𑀫𑀢𑀻𑀢𑀺 𑀢𑀲𑁆𑀲 𑀢𑁂 𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲 𑀇𑀤𑀁 𑀘𑀓𑁆𑀓𑀁 𑀫𑀢𑁆𑀣𑀓𑀁 𑀧𑀺𑀲𑀫𑀸𑀦𑀁 𑀇𑀤𑀸𑀦𑀺 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀁 𑀯𑀺𑀬 𑀫𑀢𑁆𑀣𑀓𑁂 𑀪𑀫𑀢𑀻𑀢𑀺 𑀅𑀢𑁆𑀣𑁄.

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀻𑀢𑀺 𑀢𑀡𑁆𑀳𑀸 𑀦𑀸𑀫𑁂𑀲𑀸 𑀕𑀘𑁆𑀙𑀦𑁆𑀢𑀻 𑀉𑀧𑀭𑀽𑀧𑀭𑀺 𑀯𑀺𑀲𑀸𑀮𑀸 𑀳𑁄𑀢𑀺, 𑀲𑀫𑀼𑀤𑁆𑀤𑁄 𑀯𑀺𑀬 𑀘 𑀤𑀼𑀧𑁆𑀧𑀽𑀭𑀸, 𑀭𑀽𑀧𑀸𑀤𑀻𑀲𑀼 𑀢𑀲𑁆𑀲 𑀢𑀲𑁆𑀲 𑀇𑀘𑁆𑀙𑀦𑀇𑀘𑁆𑀙𑀸𑀬 𑀯𑀺𑀲𑀝𑀕𑀸𑀫𑀺𑀦𑀻, 𑀢𑀁 𑀏𑀯𑀭𑀽𑀧𑀁 𑀢𑀡𑁆𑀳𑀁 𑀬𑁂 𑀘 𑀅𑀦𑀼𑀕𑀺𑀚𑁆𑀛𑀦𑁆𑀢𑀺 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀅𑀮𑁆𑀮𑀻𑀬𑀦𑁆𑀢𑀺. 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄𑀢𑀺 𑀢𑁂 𑀏𑀯𑀁 𑀧𑀘𑁆𑀘𑀦𑁆𑀢𑀸 𑀔𑀼𑀭𑀘𑀓𑁆𑀓𑀁 𑀥𑀸𑀭𑁂𑀦𑁆𑀢𑀺. 𑀩𑀳𑀼𑀪𑀡𑁆𑀟𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀩𑀳𑀼𑀥𑀦𑀁 𑀑𑀳𑀸𑀬. 𑀫𑀕𑁆𑀕𑀦𑁆𑀢𑀺 𑀕𑀦𑁆𑀢𑀩𑁆𑀩𑀁 𑀅𑀧𑁆𑀧𑀲𑀺𑀤𑁆𑀥𑀺𑀓𑀁 𑀲𑀫𑀼𑀤𑁆𑀤𑀫𑀕𑁆𑀕𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀬𑀣𑀸 𑀢𑁆𑀯𑀁 𑀧𑀝𑀺𑀧𑀦𑁆𑀦𑁄, 𑀏𑀯𑀫𑁂𑀯 𑀅𑀜𑁆𑀜𑁂𑀲𑀫𑁆𑀧𑀺 𑀬𑁂𑀲𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀢𑀁 𑀅𑀯𑀻𑀫𑀁𑀲𑀺𑀢𑀁, 𑀢𑁂 𑀬𑀣𑀸 𑀢𑁆𑀯𑀁 𑀢𑀣𑁂𑀯 𑀢𑀡𑁆𑀳𑀸𑀯𑀲𑀺𑀓𑀸 𑀳𑀼𑀢𑁆𑀯𑀸 𑀥𑀦𑀁 𑀧𑀳𑀸𑀬 𑀕𑀫𑀦𑀫𑀕𑁆𑀕𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀧𑀦𑁆𑀦𑀸 𑀘𑀓𑁆𑀓𑀥𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀓𑀫𑁆𑀫𑀁 𑀲𑀫𑁂𑀓𑁆𑀔𑁂𑀢𑀺 𑀢𑀲𑁆𑀫𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 ‘‘𑀲𑀤𑁄𑀲𑀁 𑀦𑀼 𑀔𑁄, 𑀦𑀺𑀤𑁆𑀤𑁄𑀲’’𑀦𑁆𑀢𑀺 𑀲𑀫𑁂𑀓𑁆𑀔𑁂𑀬𑁆𑀬 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬. 𑀯𑀺𑀧𑀼𑀮𑀜𑁆𑀘 𑀪𑁄𑀕𑀦𑁆𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀮𑀤𑁆𑀥𑀁 𑀥𑀦𑀭𑀸𑀲𑀺𑀫𑁆𑀧𑀺 𑀲𑀫𑁂𑀓𑁆𑀔𑁂𑀬𑁆𑀬. 𑀦𑀸𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑀢𑀁 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀇𑀤𑀁 𑀘𑀓𑁆𑀓𑀁 𑀦 𑀅𑀢𑀺𑀯𑀢𑁆𑀢𑁂𑀬𑁆𑀬 𑀦𑀸𑀯𑀢𑁆𑀣𑀭𑁂𑀬𑁆𑀬. ‘‘𑀦𑀸𑀢𑀺𑀯𑀢𑁆𑀢𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀦𑀸𑀯𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 ‘‘𑀇𑀫𑀺𑀦𑀸 𑀤𑁂𑀯𑀧𑀼𑀢𑁆𑀢𑁂𑀦 𑀫𑀬𑀸 𑀓𑀢𑀓𑀫𑁆𑀫𑀁 𑀢𑀣𑀢𑁄 𑀜𑀸𑀢𑀁, 𑀅𑀬𑀁 𑀫𑀬𑁆𑀳𑀁 𑀧𑀘𑁆𑀘𑀦𑀧𑀫𑀸𑀡𑀫𑁆𑀧𑀺 𑀚𑀸𑀦𑀺𑀲𑁆𑀲𑀢𑀺, 𑀧𑀼𑀘𑁆𑀙𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁯. ‘‘𑀓𑀻𑀯𑀘𑀺𑀭𑀁 𑀦𑀼 𑀫𑁂 𑀬𑀓𑁆𑀔, 𑀘𑀓𑁆𑀓𑀁 𑀲𑀺𑀭𑀲𑀺 𑀞𑀲𑁆𑀲𑀢𑀺;

𑀓𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀅𑀣𑀲𑁆𑀲 𑀓𑀣𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁦. ‘‘𑀅𑀢𑀺𑀲𑀭𑁄 𑀧𑀘𑁆𑀘𑀲𑀭𑁄, 𑀫𑀺𑀢𑁆𑀢𑀯𑀺𑀦𑁆𑀤 𑀲𑀼𑀡𑁄𑀳𑀺 𑀫𑁂;

𑀘𑀓𑁆𑀓𑀁 𑀢𑁂 𑀲𑀺𑀭𑀲𑀺 𑀫𑀸𑀯𑀺𑀤𑁆𑀥𑀁, 𑀦 𑀢𑀁 𑀚𑀻𑀯𑀁 𑀧𑀫𑁄𑀓𑁆𑀔𑀲𑀻’’𑀢𑀺.

𑀢𑀢𑁆𑀣 𑀅𑀢𑀺𑀲𑀭𑁄𑀢𑀺 𑀅𑀢𑀺𑀲𑀭𑀻𑀢𑀺𑀧𑀺 𑀅𑀢𑀺𑀲𑀭𑁄, 𑀅𑀢𑀺𑀲𑀭𑀺𑀲𑁆𑀲𑀢𑀻𑀢𑀺𑀧𑀺 𑀅𑀢𑀺𑀲𑀭𑁄. 𑀧𑀘𑁆𑀘𑀲𑀭𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀫𑀺𑀢𑁆𑀢𑀯𑀺𑀦𑁆𑀤𑀓, 𑀲𑀼𑀡𑁄𑀳𑀺 𑀫𑁂 𑀯𑀘𑀦𑀁, 𑀢𑁆𑀯𑀜𑁆𑀳𑀺 𑀅𑀢𑀺𑀤𑀸𑀭𑀼𑀡𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀅𑀢𑀺𑀲𑀭𑁄, 𑀢𑀲𑁆𑀲 𑀧𑀦 𑀦 𑀲𑀓𑁆𑀓𑀸 𑀯𑀲𑁆𑀲𑀕𑀡𑀦𑀸𑀬 𑀯𑀺𑀧𑀸𑀓𑁄 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀅𑀧𑀭𑀺𑀫𑀸𑀡𑀁 𑀅𑀢𑀺𑀫𑀳𑀦𑁆𑀢𑀁 𑀯𑀺𑀧𑀸𑀓𑀤𑀼𑀓𑁆𑀔𑀁 𑀲𑀭𑀺𑀲𑁆𑀲𑀲𑀺 𑀧𑀝𑀺𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀅𑀢𑀺𑀲𑀭𑁄. 𑀢𑁂𑀦 𑀢𑁂 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀺𑀭𑀲𑀺𑀫𑀸𑀯𑀺𑀤𑁆𑀥𑀦𑁆𑀢𑀺 𑀬𑀁 𑀧𑀦 𑀢𑁂 𑀇𑀤𑀁 𑀘𑀓𑁆𑀓𑀁 𑀲𑀺𑀭𑀲𑁆𑀫𑀺𑀁 𑀆𑀯𑀺𑀤𑁆𑀥𑀁 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀫𑀺𑀯 𑀪𑀫𑀢𑀺. 𑀦 𑀢𑀁 𑀚𑀻𑀯𑀁 𑀧𑀫𑁄𑀓𑁆𑀔𑀲𑀻𑀢𑀺 𑀢𑀁 𑀢𑁆𑀯𑀁 𑀬𑀸𑀯 𑀢𑁂 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀔𑀻𑀬𑀢𑀺, 𑀢𑀸𑀯 𑀚𑀻𑀯𑀫𑀸𑀦𑁄 𑀦 𑀧𑀫𑁄𑀓𑁆𑀔𑀲𑀺, 𑀓𑀫𑁆𑀫𑀯𑀺𑀧𑀸𑀓𑁂 𑀧𑀦 𑀔𑀻𑀡𑁂 𑀇𑀤𑀁 𑀘𑀓𑁆𑀓𑀁 𑀧𑀳𑀸𑀬 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀲𑀻𑀢𑀺.

𑀇𑀤𑀁 𑀯𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀕𑀢𑁄, 𑀇𑀢𑀭𑁄𑀧𑀺 𑀫𑀳𑀸𑀤𑀼𑀓𑁆𑀔𑀁 𑀧𑀝𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀅𑀬𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁪𑁦] 𑁨. 𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀓𑀡𑁆𑀳𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀧𑀺𑀮𑀯𑀢𑁆𑀣𑀼𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀺𑀢𑀧𑀸𑀢𑀼𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀲𑀢𑁆𑀣𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀗𑁆𑀖𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀪𑀕𑀯𑀢𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬, 𑀦 𑀅𑀳𑁂𑀢𑀼 𑀢𑀣𑀸𑀕𑀢𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯𑀸’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀓𑀡𑁆𑀳𑁄 𑀦𑀸𑀫 𑀇𑀲𑀺 𑀅𑀳𑁄𑀲𑀺, 𑀲𑁄 𑀇𑀫𑀲𑁆𑀫𑀺𑀁 𑀪𑀽𑀫𑀺𑀧𑁆𑀧𑀤𑁂𑀲𑁂 𑀯𑀺𑀳𑀸𑀲𑀺 𑀛𑀸𑀬𑀻 𑀛𑀸𑀦𑀭𑀢𑁄, 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀯𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀧𑀸𑀓𑀝𑀢𑁆𑀢𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑁂𑀦 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂𑀦 𑀅𑀧𑀼𑀢𑁆𑀢𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀼𑀢𑁆𑀢𑁂 𑀧𑀢𑁆𑀣𑀺𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀓𑀸𑀴𑀯𑀡𑁆𑀡𑀢𑁆𑀢𑀸 𑀧𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀓𑀡𑁆𑀳𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀫𑀡𑀺𑀧𑀝𑀺𑀫𑀸 𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀭𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀧𑁂𑀲𑀺𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀺. 𑀅𑀣 𑀦𑀁 𑀧𑀺𑀢𑀸 𑀅𑀦𑀼𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀧𑀝𑀺𑀧𑀚𑁆𑀚𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀯𑀭𑀧𑀮𑁆𑀮𑀗𑁆𑀓𑀫𑀚𑁆𑀛𑀕𑀢𑁄 𑀲𑀼𑀯𑀡𑁆𑀡𑀧𑀝𑁆𑀝𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀥𑀦𑀁 𑀅𑀲𑀼𑀓𑁂𑀦 𑀉𑀧𑁆𑀧𑀸𑀤𑀺𑀢𑀁, 𑀏𑀢𑁆𑀢𑀓𑀁 𑀅𑀲𑀼𑀓𑁂𑀦𑀸’’𑀢𑀺 𑀧𑀼𑀩𑁆𑀩𑀜𑀸𑀢𑀻𑀳𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑀸𑀦𑀺 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀬𑁂𑀳𑀺 𑀇𑀫𑀁 𑀥𑀦𑀁 𑀉𑀧𑁆𑀧𑀸𑀤𑀺𑀢𑀁, 𑀢𑁂 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀥𑀦𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀏𑀓𑁄𑀧𑀺 𑀇𑀤𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄 𑀦𑀸𑀫 𑀦𑀢𑁆𑀣𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀥𑀦𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀦𑁆𑀢𑀼𑀁. 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀳𑀺 𑀅𑀲𑀸𑀭𑀲𑁆𑀲 𑀥𑀦𑀲𑁆𑀲 𑀤𑀸𑀦𑀁 𑀲𑀸𑀭𑁄, 𑀩𑀳𑀼𑀭𑁄𑀕𑀲𑀸𑀥𑀸𑀭𑀡𑀪𑀸𑀯𑁂𑀦 𑀅𑀲𑀸𑀭𑀲𑁆𑀲 𑀲𑀭𑀻𑀭𑀲𑁆𑀲 𑀲𑀻𑀮𑀯𑀦𑁆𑀢𑁂𑀲𑀼 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀲𑀸𑀭𑁄, 𑀅𑀦𑀺𑀘𑁆𑀘𑀸𑀪𑀺𑀪𑀽𑀢𑀪𑀸𑀯𑁂𑀦 𑀅𑀲𑀸𑀭𑀲𑁆𑀲 𑀚𑀻𑀯𑀺𑀢𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬𑁄𑀕𑁄 𑀲𑀸𑀭𑁄, 𑀢𑀲𑁆𑀫𑀸 𑀅𑀲𑀸𑀭𑁂𑀳𑀺 𑀪𑁄𑀕𑁂𑀳𑀺 𑀲𑀸𑀭𑀕𑁆𑀕𑀳𑀡𑀢𑁆𑀣𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺.

𑀲𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀬𑀸𑀯 𑀲𑀢𑁆𑀢𑀫𑀸 𑀤𑀺𑀯𑀲𑀸 𑀥𑀦𑀁 𑀅𑀧𑀭𑀺𑀓𑁆𑀔𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀫𑁂 𑀥𑀦𑁂𑀦, 𑀬𑀸𑀯 𑀫𑀁 𑀚𑀭𑀸 𑀦𑀸𑀪𑀺𑀪𑀯𑀢𑀺, 𑀢𑀸𑀯𑀤𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑁂 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀤𑀺𑀦𑁆𑀦𑀁 𑀫𑁂, 𑀳𑀭𑀦𑁆𑀢𑀽’’𑀢𑀺 𑀅𑀲𑀼𑀘𑀺𑀁 𑀯𑀺𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀢𑁆𑀣𑀼𑀓𑀸𑀫𑁂 𑀧𑀳𑀸𑀬 𑀫𑀳𑀸𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀭𑀫𑀡𑀻𑀬𑀁 𑀪𑀽𑀫𑀺𑀪𑀸𑀕𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀞𑀸𑀦𑀁 𑀧𑀢𑁆𑀯𑀸 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀇𑀦𑁆𑀤𑀯𑀸𑀭𑀼𑀡𑀻𑀭𑀼𑀓𑁆𑀔𑀁 𑀕𑁄𑀘𑀭𑀕𑀸𑀫𑀁 𑀅𑀥𑀺𑀝𑁆𑀞𑀸𑀬 𑀢𑀲𑁆𑀲𑁂𑀯 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀯𑀺𑀳𑀸𑀲𑀺. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀳𑀸𑀬 𑀆𑀭𑀜𑁆𑀜𑀺𑀓𑁄 𑀅𑀳𑁄𑀲𑀺, 𑀧𑀡𑁆𑀡𑀲𑀸𑀮𑀁 𑀅𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀺𑀓𑁄 𑀅𑀳𑁄𑀲𑀺, 𑀅𑀩𑁆𑀪𑁄𑀓𑀸𑀲𑀺𑀓𑁄 𑀦𑁂𑀲𑀚𑁆𑀚𑀺𑀓𑁄. 𑀲𑀘𑁂 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑁄, 𑀪𑀽𑀫𑀺𑀬𑀁𑀬𑁂𑀯 𑀦𑀺𑀧𑀚𑁆𑀚𑀢𑀺, 𑀤𑀦𑁆𑀢𑀫𑀽𑀲𑀮𑀺𑀓𑁄 𑀳𑀼𑀢𑁆𑀯𑀸 𑀅𑀦𑀕𑁆𑀕𑀺𑀧𑀓𑁆𑀓𑀫𑁂𑀯 𑀔𑀸𑀤𑀢𑀺, 𑀣𑀼𑀲𑀧𑀭𑀺𑀓𑁆𑀔𑀺𑀢𑁆𑀢𑀁 𑀓𑀺𑀜𑁆𑀘𑀺 𑀦 𑀔𑀸𑀤𑀢𑀺, 𑀏𑀓𑀤𑀺𑀯𑀲𑀁 𑀏𑀓𑀯𑀸𑀭𑀫𑁂𑀯 𑀔𑀸𑀤𑀢𑀺, 𑀏𑀓𑀸𑀲𑀦𑀺𑀓𑁄 𑀅𑀳𑁄𑀲𑀺. 𑀔𑀫𑀸𑀬 𑀧𑀣𑀯𑀻𑀆𑀧𑀢𑁂𑀚𑀯𑀸𑀬𑀼𑀲𑀫𑁄 𑀳𑀼𑀢𑁆𑀯𑀸 𑀏𑀢𑁂 𑀏𑀢𑁆𑀢𑀓𑁂 𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀇𑀫𑀲𑁆𑀫𑀺𑀁 𑀓𑀺𑀭 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀧𑀭𑀫𑀧𑁆𑀧𑀺𑀘𑁆𑀙𑁄 𑀅𑀳𑁄𑀲𑀺. 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀢𑀢𑁆𑀣𑁂𑀯 𑀯𑀲𑀢𑀺, 𑀨𑀮𑀸𑀨𑀮𑀢𑁆𑀣𑀫𑁆𑀧𑀺 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺, 𑀭𑀼𑀓𑁆𑀔𑀲𑁆𑀲 𑀨𑀮𑀺𑀢𑀓𑀸𑀮𑁂 𑀨𑀮𑀁 𑀔𑀸𑀤𑀢𑀺, 𑀧𑀼𑀧𑁆𑀨𑀺𑀢𑀓𑀸𑀮𑁂 𑀧𑀼𑀧𑁆𑀨𑀁 𑀔𑀸𑀤𑀢𑀺, 𑀲𑀧𑀢𑁆𑀢𑀓𑀸𑀮𑁂 𑀧𑀢𑁆𑀢𑀸𑀦𑀺 𑀔𑀸𑀤𑀢𑀺, 𑀦𑀺𑀧𑁆𑀧𑀢𑁆𑀢𑀓𑀸𑀮𑁂 𑀧𑀧𑀝𑀺𑀓𑀁 𑀔𑀸𑀤𑀢𑀺. 𑀏𑀯𑀁 𑀧𑀭𑀫𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀺𑀭𑀁 𑀯𑀲𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀓𑁆𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀺, 𑀕𑀡𑁆𑀳𑀦𑁆𑀢𑁄 𑀧𑀦 𑀮𑁄𑀮𑀼𑀧𑁆𑀧𑀘𑀸𑀭𑁂𑀦 𑀉𑀝𑁆𑀞𑀸𑀬 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀦 𑀕𑀡𑁆𑀳𑀸𑀢𑀺, 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀳𑀢𑁆𑀣𑀧𑁆𑀧𑀲𑀸𑀭𑀡𑀝𑁆𑀞𑀸𑀦𑁂 𑀞𑀺𑀢𑀸𑀦𑀺 𑀨𑀮𑀸𑀦𑀺 𑀲𑀁𑀳𑀭𑀢𑀺, 𑀢𑁂𑀲𑀼𑀧𑀺 𑀫𑀦𑀸𑀧𑀸𑀫𑀦𑀸𑀧𑀁 𑀅𑀯𑀺𑀘𑀺𑀦𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀭𑀫𑀲𑀦𑁆𑀢𑀼𑀝𑁆𑀞𑀲𑁆𑀲 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀁 𑀓𑀺𑀭 𑀲𑀓𑁆𑀓𑀲𑁆𑀲 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀺 𑀧𑀼𑀜𑁆𑀜𑀓𑁆𑀔𑀬𑁂𑀦 𑀯𑀸, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀫𑀳𑀸𑀦𑀼𑀪𑀸𑀯𑀲𑀢𑁆𑀢𑁂 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁂, 𑀥𑀫𑁆𑀫𑀺𑀓𑀸𑀦𑀁 𑀯𑀸 𑀫𑀳𑀺𑀤𑁆𑀥𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑀢𑁂𑀚𑁂𑀦 𑀉𑀡𑁆𑀳𑀁 𑀳𑁄𑀢𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀯𑀲𑀦𑁆𑀢𑀁 𑀓𑀡𑁆𑀳𑀁 𑀇𑀲𑀺𑀁 𑀭𑀼𑀓𑁆𑀔𑀨𑀮𑀸𑀦𑀺 𑀉𑀘𑁆𑀘𑀺𑀦𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀇𑀲𑀺 𑀖𑁄𑀭𑀢𑀧𑁄 𑀧𑀭𑀫𑀚𑀺𑀢𑀺𑀦𑁆𑀤𑁆𑀭𑀺𑀬𑁄, 𑀇𑀫𑀁 𑀥𑀫𑁆𑀫𑀓𑀣𑀸𑀬 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀲𑀼𑀓𑀸𑀭𑀡𑀁 𑀲𑀼𑀢𑁆𑀯𑀸 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀇𑀫𑀫𑀲𑁆𑀲 𑀭𑀼𑀓𑁆𑀔𑀁 𑀥𑀼𑀯𑀨𑀮𑀁 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀫𑀳𑀦𑁆𑀢𑁂𑀦𑀸𑀦𑀼𑀪𑀸𑀯𑁂𑀦 𑀲𑀻𑀖𑀁 𑀑𑀢𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀢𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀅𑀯𑀡𑁆𑀡𑁂 𑀓𑀣𑀺𑀢𑁂 𑀓𑀼𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧. ‘‘𑀓𑀡𑁆𑀳𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀓𑀡𑁆𑀳𑀁 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁;

𑀓𑀡𑁆𑀳𑁂 𑀪𑀽𑀫𑀺𑀧𑀤𑁂𑀲𑀲𑁆𑀫𑀺𑀁, 𑀦 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑁄’’𑀢𑀺.

𑀢𑀢𑁆𑀣 𑀓𑀡𑁆𑀳𑁄𑀢𑀺 𑀓𑀸𑀴𑀯𑀡𑁆𑀡𑁄. 𑀪𑁄𑀚𑀦𑀦𑁆𑀢𑀺 𑀭𑀼𑀓𑁆𑀔𑀨𑀮𑀪𑁄𑀚𑀦𑀁.

𑀓𑀡𑁆𑀳𑁄 𑀇𑀲𑀺 𑀲𑀓𑁆𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀻’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀓𑁄’’𑀢𑀺 𑀜𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨. ‘‘𑀦 𑀓𑀡𑁆𑀳𑁄 𑀢𑀘𑀲𑀸 𑀳𑁄𑀢𑀺, 𑀅𑀦𑁆𑀢𑁄𑀲𑀸𑀭𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀲𑁆𑀫𑀺𑀁 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀲 𑀯𑁂 𑀓𑀡𑁆𑀳𑁄 𑀲𑀼𑀚𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀢𑀘𑀲𑀸𑀢𑀺 𑀢𑀘𑁂𑀦 𑀓𑀡𑁆𑀳𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀸𑀭𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀭𑀽𑀧𑁄 𑀳𑀺 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑁄𑀢𑀺. 𑀲 𑀯𑁂𑀢𑀺 𑀬𑀲𑁆𑀫𑀺𑀁 𑀧𑀦 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀅𑀢𑁆𑀣𑀺, 𑀲𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄𑀧𑀺 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀧𑀺 𑀓𑀸𑀴𑀓𑁄𑀯.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀓𑀡𑁆𑀳𑀪𑀸𑀯𑀓𑀭𑀸𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀏𑀓𑀯𑀺𑀥𑀸𑀤𑀺𑀪𑁂𑀤𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀭𑀳𑀺𑀢𑁆𑀯𑀸 𑀲𑀻𑀮𑀸𑀤𑀬𑁄 𑀕𑀼𑀡𑁂 𑀧𑀲𑀁𑀲𑀺𑀢𑁆𑀯𑀸 𑀆𑀓𑀸𑀲𑁂 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀲𑀓𑁆𑀓𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀫𑀼𑀤𑀺𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀫𑀳𑀸𑀲𑀢𑁆𑀢𑀁 𑀯𑀭𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩. ‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀏𑀢𑀲𑁆𑀫𑀺𑀦𑁆𑀢𑀺 𑀬𑀁 𑀇𑀤𑀁 𑀢𑀬𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀯𑀺𑀬 𑀲𑀼𑀮𑀧𑀺𑀢𑀁, 𑀢𑀲𑁆𑀫𑀺𑀁 𑀲𑀼𑀮𑀧𑀺𑀢𑁂 𑀢𑀼𑀫𑁆𑀳𑀸𑀓𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀇𑀘𑁆𑀙𑀲𑀺, 𑀲𑀩𑁆𑀩𑀁 𑀢𑁂 𑀬𑀁 𑀯𑀭𑀁 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁, 𑀢𑀁 𑀤𑀫𑁆𑀫𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀺𑀁 𑀦𑀼 𑀔𑁄 𑀅𑀢𑁆𑀢𑀦𑁄 𑀅𑀯𑀡𑁆𑀡𑁂 𑀓𑀣𑀺𑀢𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄𑀢𑀺 𑀫𑀁 𑀯𑀻𑀫𑀁𑀲𑀦𑁆𑀢𑁄 𑀫𑀬𑁆𑀳𑀁 𑀙𑀯𑀺𑀯𑀡𑁆𑀡𑀜𑁆𑀘 𑀪𑁄𑀚𑀦𑀜𑁆𑀘 𑀯𑀲𑀦𑀝𑁆𑀞𑀸𑀦𑀜𑁆𑀘 𑀕𑀭𑀳𑀺𑀢𑁆𑀯𑀸 𑀇𑀤𑀸𑀦𑀺 𑀫𑀬𑁆𑀳𑀁 𑀅𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀭𑀁 𑀤𑁂𑀢𑀺, 𑀫𑀁 𑀔𑁄 𑀧𑀦𑁂𑀲 ‘𑀲𑀓𑁆𑀓𑀺𑀲𑁆𑀲𑀭𑀺𑀬𑀩𑁆𑀭𑀳𑁆𑀫𑀺𑀲𑁆𑀲𑀭𑀺𑀬𑀸𑀦𑀁 𑀅𑀢𑁆𑀣𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’𑀢𑀺𑀧𑀺 𑀫𑀜𑁆𑀜𑁂𑀬𑁆𑀬, 𑀢𑀢𑁆𑀭𑀲𑁆𑀲 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀁 𑀫𑀬𑁆𑀳𑀁 𑀧𑀭𑁂𑀲𑀼 𑀓𑁄𑀥𑁄 𑀯𑀸 𑀤𑁄𑀲𑁄 𑀯𑀸 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀧𑀭𑀲𑀫𑁆𑀧𑀢𑁆𑀢𑀺𑀬𑀁 𑀮𑁄𑀪𑁄 𑀯𑀸 𑀧𑀭𑁂𑀲𑀼 𑀲𑀺𑀦𑁂𑀳𑁄 𑀯𑀸 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀫𑀚𑁆𑀛𑀢𑁆𑀢𑁄𑀯 𑀪𑀯𑁂𑀬𑁆𑀬𑀦𑁆𑀢𑀺 𑀇𑀫𑁂 𑀫𑀬𑀸 𑀘𑀢𑁆𑀢𑀸𑀭𑁄 𑀯𑀭𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀲𑁆𑀲 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀸𑀬 𑀘𑀢𑁆𑀢𑀸𑀭𑁄 𑀯𑀭𑁂 𑀕𑀡𑁆𑀳𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁪. ‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀲𑀼𑀦𑀺𑀓𑁆𑀓𑁄𑀥𑀁 𑀲𑀼𑀦𑀺𑀤𑁆𑀤𑁄𑀲𑀁, 𑀦𑀺𑀮𑁆𑀮𑁄𑀪𑀁 𑀯𑀼𑀢𑁆𑀢𑀺𑀫𑀢𑁆𑀢𑀦𑁄;

𑀦𑀺𑀲𑁆𑀦𑁂𑀳𑀫𑀪𑀺𑀓𑀗𑁆𑀔𑀸𑀫𑀺, 𑀏𑀢𑁂 𑀫𑁂 𑀘𑀢𑀼𑀭𑁄 𑀯𑀭𑁂’’𑀢𑀺.

𑀢𑀢𑁆𑀣 𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓𑀸𑀢𑀺 𑀲𑀘𑁂 𑀢𑁆𑀯𑀁 𑀫𑀬𑁆𑀳𑀁 𑀯𑀭𑀁 𑀅𑀤𑀸𑀲𑀺. 𑀲𑀼𑀦𑀺𑀓𑁆𑀓𑁄𑀥𑀦𑁆𑀢𑀺 𑀅𑀓𑀼𑀚𑁆𑀛𑀦𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀓𑁆𑀓𑁄𑀥𑀁. 𑀲𑀼𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀤𑀼𑀲𑁆𑀲𑀦𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀤𑁆𑀤𑁄𑀲𑀁. 𑀦𑀺𑀮𑁆𑀮𑁄𑀪𑀦𑁆𑀢𑀺 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀦𑀺𑀮𑁆𑀮𑁄𑀪𑀁. 𑀯𑀼𑀢𑁆𑀢𑀺𑀫𑀢𑁆𑀢𑀦𑁄𑀢𑀺 𑀏𑀯𑀭𑀽𑀧𑀁 𑀅𑀢𑁆𑀢𑀦𑁄 𑀯𑀼𑀢𑁆𑀢𑀺𑀁. 𑀦𑀺𑀲𑁆𑀦𑁂𑀳𑀦𑁆𑀢𑀺 𑀧𑀼𑀢𑁆𑀢𑀥𑀻𑀢𑀸𑀤𑀻𑀲𑀼 𑀯𑀸 𑀲𑀯𑀺𑀜𑁆𑀜𑀸𑀡𑀓𑁂𑀲𑀼 𑀥𑀦𑀥𑀜𑁆𑀜𑀸𑀤𑀻𑀲𑀼 𑀯𑀸 𑀅𑀯𑀺𑀜𑁆𑀜𑀸𑀡𑀓𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼𑀧𑀺 𑀦𑀺𑀲𑁆𑀦𑁂𑀳𑀁 𑀅𑀧𑀕𑀢𑀮𑁄𑀪𑀁. 𑀅𑀪𑀺𑀓𑀗𑁆𑀔𑀸𑀫𑀻𑀢𑀺 𑀏𑀯𑀭𑀽𑀧𑀁 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀦𑁄 𑀯𑀼𑀢𑁆𑀢𑀺𑀁 𑀅𑀪𑀺𑀓𑀗𑁆𑀔𑀸𑀫𑀺. 𑀏𑀢𑁂 𑀫𑁂 𑀘𑀢𑀼𑀭𑁄 𑀯𑀭𑁂𑀢𑀺 𑀏𑀢𑁂 𑀦𑀺𑀓𑁆𑀓𑁄𑀥𑀸𑀤𑀺𑀓𑁂 𑀘𑀢𑀼𑀭𑁄 𑀫𑀬𑁆𑀳𑀁 𑀯𑀭𑁂 𑀤𑁂𑀳𑀻𑀢𑀺.

𑀓𑀺𑀁 𑀧𑀦𑁂𑀲 𑀦 𑀚𑀸𑀦𑀸𑀢𑀺 ‘‘𑀬𑀣𑀸 𑀦 𑀲𑀓𑁆𑀓𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀭𑀁 𑀕𑀳𑁂𑀢𑁆𑀯𑀸 𑀯𑀭𑁂𑀦 𑀓𑁄𑀥𑀸𑀤𑀬𑁄 𑀳𑀦𑀺𑀢𑀼’’𑀦𑁆𑀢𑀺. 𑀦𑁄 𑀦 𑀚𑀸𑀦𑀸𑀢𑀺, 𑀲𑀓𑁆𑀓𑁂 𑀔𑁄 𑀧𑀦 𑀯𑀭𑀁 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀸𑀫𑀻𑀢𑀺 𑀯𑀘𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀘 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀸𑀬 𑀕𑀡𑁆𑀳𑀺. 𑀢𑀢𑁄 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀡𑁆𑀳𑀧𑀡𑁆𑀟𑀺𑀢𑁄 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀅𑀢𑀺𑀯𑀺𑀬 𑀅𑀦𑀯𑀚𑁆𑀚𑁂 𑀯𑀭𑁂 𑀕𑀡𑁆𑀳𑀺, 𑀏𑀢𑁂𑀲𑀼 𑀯𑀭𑁂𑀲𑀼 𑀕𑀼𑀡𑀤𑁄𑀲𑀁 𑀏𑀢𑀫𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁫. ‘‘𑀓𑀺𑀁𑀦𑀼 𑀓𑁄𑀥𑁂 𑀯𑀸 𑀤𑁄𑀲𑁂 𑀯𑀸, 𑀮𑁄𑀪𑁂 𑀲𑁆𑀦𑁂𑀳𑁂 𑀘 𑀩𑁆𑀭𑀸𑀳𑁆𑀫𑀡;

𑀆𑀤𑀻𑀦𑀯𑀁 𑀢𑁆𑀯𑀁 𑀧𑀲𑁆𑀲𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡 𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀓𑁄𑀥𑁂 𑀤𑁄𑀲𑁂 𑀮𑁄𑀪𑁂 𑀲𑁆𑀦𑁂𑀳𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀲𑀺, 𑀢𑀁 𑀢𑀸𑀯 𑀫𑁂 𑀧𑀼𑀘𑁆𑀙𑀺𑀢𑁄 𑀅𑀓𑁆𑀔𑀸𑀳𑀺, 𑀦 𑀳𑀺 𑀫𑀬𑀁 𑀏𑀢𑁆𑀣 𑀆𑀤𑀻𑀦𑀯𑀁 𑀚𑀸𑀦𑀸𑀫𑀸𑀢𑀺.

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬. ‘‘𑀅𑀧𑁆𑀧𑁄 𑀳𑀼𑀢𑁆𑀯𑀸 𑀩𑀳𑀼 𑀳𑁄𑀢𑀺, 𑀯𑀟𑁆𑀠𑀢𑁂 𑀲𑁄 𑀅𑀔𑀦𑁆𑀢𑀺𑀚𑁄;

𑀆𑀲𑀗𑁆𑀕𑀻 𑀩𑀳𑀼𑀧𑀸𑀬𑀸𑀲𑁄, 𑀢𑀲𑁆𑀫𑀸 𑀓𑁄𑀥𑀁 𑀦 𑀭𑁄𑀘𑀬𑁂.

𑁧𑁭. ‘‘𑀤𑀼𑀝𑁆𑀞𑀲𑁆𑀲 𑀨𑀭𑀼𑀲𑀸 𑀯𑀸𑀘𑀸, 𑀧𑀭𑀸𑀫𑀸𑀲𑁄 𑀅𑀦𑀦𑁆𑀢𑀭𑀸;

𑀢𑀢𑁄 𑀧𑀸𑀡𑀺 𑀢𑀢𑁄 𑀤𑀡𑁆𑀟𑁄, 𑀲𑀢𑁆𑀣𑀲𑁆𑀲 𑀧𑀭𑀫𑀸 𑀕𑀢𑀺;

𑀤𑁄𑀲𑁄 𑀓𑁄𑀥𑀲𑀫𑀼𑀝𑁆𑀞𑀸𑀦𑁄, 𑀢𑀲𑁆𑀫𑀸 𑀤𑁄𑀲𑀁 𑀦 𑀭𑁄𑀘𑀬𑁂.

𑁧𑁮. ‘‘𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸, 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘;

𑀤𑀺𑀲𑁆𑀲𑀦𑁆𑀢𑀺 𑀮𑁄𑀪𑀥𑀫𑁆𑀫𑁂𑀲𑀼, 𑀢𑀲𑁆𑀫𑀸 𑀮𑁄𑀪𑀁 𑀦 𑀭𑁄𑀘𑀬𑁂.

𑁧𑁯. ‘‘𑀲𑁆𑀦𑁂𑀳𑀲𑀗𑁆𑀕𑀣𑀺𑀢𑀸 𑀕𑀦𑁆𑀣𑀸, 𑀲𑁂𑀦𑁆𑀢𑀺 𑀫𑀦𑁄𑀫𑀬𑀸 𑀧𑀼𑀣𑀽;

𑀢𑁂 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁆𑀦𑁂𑀳𑀁 𑀦 𑀭𑁄𑀘𑀬𑁂’’𑀢𑀺.

𑀢𑀢𑁆𑀣 𑀅𑀔𑀦𑁆𑀢𑀺𑀚𑁄𑀢𑀺 𑀲𑁄 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀲𑁆𑀲 𑀅𑀔𑀦𑁆𑀢𑀺𑀢𑁄 𑀚𑀸𑀢𑁄 𑀓𑁄𑀥𑁄 𑀧𑀞𑀫𑀁 𑀧𑀭𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀩𑀳𑀼 𑀳𑁄𑀢𑀺 𑀅𑀧𑀭𑀸𑀧𑀭𑀁 𑀯𑀟𑁆𑀠𑀢𑀺. 𑀢𑀲𑁆𑀲 𑀯𑀟𑁆𑀠𑀦𑀪𑀸𑀯𑁄 𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑁂𑀦 (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀘𑁂𑀯 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑁂𑀦 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀘 𑀯𑀡𑁆𑀡𑁂𑀢𑀩𑁆𑀩𑁄. 𑀅𑀧𑀺𑀘 𑀢𑀺𑀲𑁆𑀲𑀸𑀫𑀘𑁆𑀘𑀲𑁆𑀲𑀧𑁂𑀢𑁆𑀣 𑀪𑀭𑀺𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀧𑀭𑀺𑀚𑀦𑀁 𑀫𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀫𑀸𑀭𑀺𑀢𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀆𑀲𑀗𑁆𑀕𑀻𑀢𑀺 𑀆𑀲𑀗𑁆𑀕𑀓𑀭𑀡𑁄. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀺𑀢𑀁 𑀓𑀭𑁄𑀢𑀺, 𑀢𑀁 𑀯𑀢𑁆𑀣𑀼𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀢𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀓𑁆𑀓𑁄𑀲𑀦𑀸𑀤𑀻𑀦𑀺 𑀓𑀸𑀭𑁂𑀢𑀺. 𑀩𑀳𑀼𑀧𑀸𑀬𑀸𑀲𑁄𑀢𑀺 𑀩𑀳𑀼𑀦𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀦 𑀉𑀧𑀸𑀬𑀸𑀲𑁂𑀦 𑀓𑀺𑀮𑀫𑀣𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀳𑀺 𑀓𑁄𑀥𑀯𑀲𑁂𑀦 𑀅𑀭𑀺𑀬𑀸𑀤𑀻𑀲𑀼 𑀓𑀢𑀯𑀻𑀢𑀺𑀓𑁆𑀓𑀫𑀸 𑀤𑀺𑀝𑁆𑀞𑀥𑀫𑁆𑀫𑁂 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀯𑀥𑀩𑀦𑁆𑀥𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀦𑀺 𑀘𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀭𑀡𑀸𑀤𑀻𑀦𑀺 𑀘 𑀩𑀳𑀽𑀦𑀺 𑀤𑀼𑀓𑁆𑀔𑀸𑀦𑀺 𑀅𑀦𑀼𑀪𑀯𑀦𑁆𑀢𑀻𑀢𑀺 𑀓𑁄𑀥𑁄 𑀩𑀳𑀼𑀧𑀸𑀬𑀸𑀲𑁄 𑀦𑀸𑀫. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀲 𑀏𑀯𑀁 𑀅𑀦𑁂𑀓𑀸𑀤𑀻𑀦𑀯𑁄, 𑀢𑀲𑁆𑀫𑀸 𑀓𑁄𑀥𑀁 𑀦 𑀭𑁄𑀘𑁂𑀫𑀺.

𑀤𑀼𑀝𑁆𑀞𑀲𑁆𑀲𑀸𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀤𑀼𑀲𑁆𑀲𑀦𑀮𑀓𑁆𑀔𑀡𑁂𑀦 𑀤𑁄𑀲𑁂𑀦 𑀤𑀼𑀝𑁆𑀞𑀲𑁆𑀲 𑀧𑀞𑀫𑀁 𑀢𑀸𑀯 ‘‘𑀅𑀭𑁂, 𑀤𑀸𑀲, 𑀧𑁂𑀲𑁆𑀲𑀸’’𑀢𑀺 𑀨𑀭𑀼𑀲𑀯𑀸𑀘𑀸 𑀦𑀺𑀘𑁆𑀙𑀭𑀢𑀺, 𑀯𑀸𑀘𑀸𑀬 𑀅𑀦𑀦𑁆𑀢𑀭𑀸 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀯𑀲𑁂𑀦 𑀳𑀢𑁆𑀣𑀧𑀭𑀸𑀫𑀸𑀲𑁄, 𑀢𑀢𑁄 𑀅𑀦𑀦𑁆𑀢𑀭𑀸 𑀉𑀧𑀓𑁆𑀓𑀫𑀦𑀯𑀲𑁂𑀦 𑀧𑀸𑀡𑀺 𑀧𑀯𑀢𑁆𑀢𑀢𑀺, 𑀢𑀢𑁄 𑀤𑀡𑁆𑀟𑁄, 𑀤𑀡𑁆𑀟𑀧𑁆𑀧𑀳𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀦 𑀏𑀓𑀢𑁄𑀥𑀸𑀭𑀉𑀪𑀢𑁄𑀥𑀸𑀭𑀲𑁆𑀲 𑀲𑀢𑁆𑀣𑀲𑁆𑀲 𑀧𑀭𑀫𑀸 𑀕𑀢𑀺, 𑀲𑀩𑁆𑀩𑀧𑀭𑀺𑀬𑀦𑁆𑀢𑀸 𑀲𑀢𑁆𑀣𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑀺. 𑀬𑀤𑀸 𑀳𑀺 𑀲𑀢𑁆𑀣𑁂𑀦 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑁂𑀦𑁂𑀯 𑀲𑀢𑁆𑀣𑁂𑀦 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀤𑀸 𑀤𑁄𑀲𑁄 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀤𑁄𑀲𑁄 𑀓𑁄𑀥𑀲𑀫𑀼𑀝𑁆𑀞𑀸𑀦𑁄𑀢𑀺 𑀬𑀣𑀸 𑀅𑀦𑀫𑁆𑀩𑀺𑀮𑀁 𑀢𑀓𑁆𑀓𑀁 𑀯𑀸 𑀓𑀜𑁆𑀚𑀺𑀓𑀁 𑀯𑀸 𑀧𑀭𑀺𑀡𑀸𑀫𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀫𑁆𑀩𑀺𑀮𑀁 𑀳𑁄𑀢𑀺, 𑀢𑀁 𑀏𑀓𑀚𑀸𑀢𑀺𑀓𑀫𑁆𑀧𑀺 𑀲𑀫𑀸𑀦𑀁 𑀅𑀫𑁆𑀩𑀺𑀮𑀁 𑀅𑀦𑀫𑁆𑀩𑀺𑀮𑀦𑁆𑀢𑀺 𑀦𑀸𑀦𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄 𑀧𑀭𑀺𑀡𑀫𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀤𑁄𑀲𑁄 𑀳𑁄𑀢𑀺. 𑀲𑁄 𑀅𑀓𑀼𑀲𑀮𑀫𑀽𑀮𑀢𑁆𑀢𑁂𑀦 𑀏𑀓𑀚𑀸𑀢𑀺𑀓𑁄𑀧𑀺 𑀲𑀫𑀸𑀦𑁄 𑀓𑁄𑀥𑁄 𑀤𑁄𑀲𑁄𑀢𑀺 𑀦𑀸𑀦𑀸 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀦𑀫𑁆𑀩𑀺𑀮𑀢𑁄 𑀅𑀫𑁆𑀩𑀺𑀮𑀁, 𑀏𑀯𑀁 𑀲𑁄𑀧𑀺 𑀓𑁄𑀥𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀓𑁄𑀥𑀲𑀫𑀼𑀝𑁆𑀞𑀸𑀦𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀅𑀦𑁂𑀓𑀸𑀤𑀻𑀦𑀯𑁄 𑀤𑁄𑀲𑁄, 𑀢𑀲𑁆𑀫𑀸 𑀤𑁄𑀲𑀫𑁆𑀧𑀺 𑀦 𑀭𑁄𑀘𑁂𑀫𑀺.

𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸𑀢𑀺 𑀤𑀺𑀯𑀸 𑀤𑀺𑀯𑀲𑁆𑀲𑁂𑀯 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑀸𑀦𑀺 𑀘 𑀆𑀯𑀼𑀥𑀁 𑀲𑀭𑀻𑀭𑁂 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀫𑁂 𑀤𑁂𑀳𑀻’’𑀢𑀺 𑀲𑀸𑀳𑀲𑀸𑀓𑀸𑀭𑀸 𑀘. 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘𑀸𑀢𑀺 𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀲𑁆𑀲 𑀳𑀭𑀡𑀁 𑀦𑀺𑀓𑀢𑀺 𑀦𑀸𑀫, 𑀲𑀸 𑀅𑀲𑀼𑀯𑀡𑁆𑀡𑀫𑁂𑀯 ‘‘𑀲𑀼𑀯𑀡𑁆𑀡’’𑀦𑁆𑀢𑀺 𑀓𑀽𑀝𑀓𑀳𑀸𑀧𑀡𑀁 ‘‘𑀓𑀳𑀸𑀧𑀡𑁄’’𑀢𑀺 𑀤𑀢𑁆𑀯𑀸 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑁂 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀪𑀸𑀦𑀯𑀲𑁂𑀦 𑀧𑀦 𑀉𑀧𑀸𑀬𑀓𑀼𑀲𑀮𑀢𑀸𑀬 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑀁 𑀯𑀜𑁆𑀘𑀦𑀁 𑀦𑀸𑀫. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸 𑁋 𑀏𑀓𑁄 𑀓𑀺𑀭 𑀉𑀚𑀼𑀚𑀸𑀢𑀺𑀓𑁄 𑀕𑀸𑀫𑀺𑀓𑀧𑀼𑀭𑀺𑀲𑁄 𑀅𑀭𑀜𑁆𑀜𑀢𑁄 𑀲𑀲𑀓𑀁 𑀆𑀦𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀑𑀢𑀭𑀺. 𑀅𑀣𑁂𑀓𑁄 𑀥𑀼𑀢𑁆𑀢𑁄 𑀢𑀁 𑀲𑀲𑀓𑀁 𑀲𑀻𑀲𑁂 𑀓𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀑𑀢𑀺𑀡𑁆𑀡𑁄. 𑀇𑀢𑀭𑁄 𑀉𑀢𑁆𑀢𑀭𑀺𑀢𑁆𑀯𑀸 𑀲𑀲𑀓𑀁 𑀅𑀧𑀲𑁆𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀲𑀺. 𑀢𑀫𑁂𑀦𑀁 𑀥𑀼𑀢𑁆𑀢𑁄 ‘‘𑀓𑀺𑀁 𑀪𑁄 𑀯𑀺𑀮𑁄𑀓𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀲𑀲𑀓𑁄 𑀞𑀧𑀺𑀢𑁄, 𑀢𑀁 𑀦 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑁆𑀥𑀩𑀸𑀮, 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀲𑀲𑀓𑀸 𑀦𑀸𑀫 𑀦𑀤𑀻𑀢𑀻𑀭𑁂 𑀞𑀧𑀺𑀢𑀸 𑀧𑀮𑀸𑀬𑀦𑁆𑀢𑀺, 𑀧𑀲𑁆𑀲 𑀅𑀳𑀁 𑀅𑀢𑁆𑀢𑀦𑁄 𑀲𑀲𑀓𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸𑀯 𑀦𑁆𑀳𑀸𑀬𑀸𑀫𑀻’’𑀢𑀺 𑀆𑀳. 𑀲𑁄 𑀅𑀧𑁆𑀧𑀝𑀺𑀪𑀸𑀦𑀢𑀸𑀬 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀸𑀫𑀺. 𑀏𑀓𑀓𑀳𑀸𑀧𑀡𑁂𑀦 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀢𑀁 𑀤𑀢𑁆𑀯𑀸 𑀤𑁆𑀯𑀺𑀓𑀳𑀸𑀧𑀡𑀕𑁆𑀖𑀦𑀓𑀲𑁆𑀲 𑀫𑀺𑀕𑀲𑁆𑀲 𑀕𑀳𑀺𑀢𑀯𑀢𑁆𑀣𑀼𑀧𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀤𑀺𑀲𑁆𑀲𑀦𑁆𑀢𑀺 𑀮𑁄𑀪𑀥𑀫𑁆𑀫𑁂𑀲𑀽𑀢𑀺 𑀲𑀓𑁆𑀓, 𑀇𑀫𑁂 𑀆𑀮𑁄𑀧𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀮𑁄𑀪𑀲𑀪𑀸𑀯𑁂𑀲𑀼 𑀮𑁄𑀪𑀸𑀪𑀺𑀪𑀽𑀢𑁂𑀲𑀼 𑀲𑀢𑁆𑀢𑁂𑀲𑀼 𑀤𑀺𑀲𑁆𑀲𑀦𑁆𑀢𑀺. 𑀦 𑀳𑀺 𑀅𑀮𑀼𑀤𑁆𑀥𑀸 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀮𑁄𑀪𑁄 𑀅𑀦𑁂𑀓𑀸𑀤𑀻𑀦𑀯𑁄, 𑀢𑀲𑁆𑀫𑀸 𑀮𑁄𑀪𑀫𑁆𑀧𑀺 𑀦 𑀭𑁄𑀘𑁂𑀫𑀺.

𑀲𑁆𑀦𑁂𑀳𑀲𑀗𑁆𑀕𑀣𑀺𑀢𑀸 𑀕𑀦𑁆𑀣𑀸𑀢𑀺 𑀆𑀭𑀫𑁆𑀫𑀡𑁂𑀲𑀼 𑀅𑀮𑁆𑀮𑀻𑀬𑀦𑀮𑀓𑁆𑀔𑀡𑁂𑀦 𑀲𑁆𑀦𑁂𑀳𑁂𑀦 𑀲𑀗𑁆𑀕𑀣𑀺𑀢𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀯𑀲𑁂𑀦 𑀖𑀝𑀺𑀢𑀸 𑀲𑀼𑀢𑁆𑀢𑁂𑀦 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀩𑀤𑁆𑀥𑀸 𑀦𑀸𑀦𑀧𑁆𑀧𑀓𑀸𑀭𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸. 𑀲𑁂𑀦𑁆𑀢𑀺 𑀫𑀦𑁄𑀫𑀬𑀸 𑀧𑀼𑀣𑀽𑀢𑀺 𑀢𑁂 𑀧𑀼𑀣𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀲𑀼𑀯𑀡𑁆𑀡𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀺 𑀆𑀪𑀭𑀡𑀸𑀤𑀻𑀦𑀺 𑀯𑀺𑀬 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁂𑀦𑁆𑀢𑀺 𑀅𑀦𑀼𑀲𑁂𑀦𑁆𑀢𑀺. 𑀢𑁂 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀻𑀢𑀺 𑀢𑁂 𑀏𑀯𑀁 𑀅𑀦𑀼𑀲𑀬𑀺𑀢𑀸 𑀩𑀮𑀯𑀢𑀸𑀧𑀁 𑀚𑀦𑁂𑀦𑁆𑀢𑀸 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀺 𑀅𑀢𑀺𑀓𑀺𑀮𑀫𑁂𑀦𑁆𑀢𑀺. 𑀢𑁂𑀲𑀁 𑀧𑀦 𑀪𑀼𑀲𑀁 𑀉𑀧𑀢𑀸𑀧𑀦𑁂 ‘‘𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺 (𑀲𑀼. 𑀦𑀺. 𑁭𑁭𑁩) 𑀕𑀸𑀣𑀸𑀬 𑀯𑀢𑁆𑀣𑀼, ‘‘𑀧𑀺𑀬𑀚𑀸𑀢𑀺𑀓𑀸 𑀳𑀺 𑀕𑀳𑀧𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀧𑀺𑀬𑀧𑁆𑀧𑀪𑀼𑀢𑀺𑀓𑀸’’ (𑀫. 𑀦𑀺. 𑁨.𑁩𑁫𑁩), ‘‘𑀧𑀺𑀬𑀢𑁄 𑀚𑀸𑀬𑀢𑀻 𑀲𑁄𑀓𑁄’’𑀢𑀺𑀆𑀤𑀻𑀦𑀺 (𑀥. 𑀧. 𑁨𑁧𑁨) 𑀲𑀼𑀢𑁆𑀢𑀸𑀦𑀺 𑀘 𑀆𑀳𑀭𑀺𑀢𑀩𑁆𑀩𑀸𑀦𑀺. 𑀅𑀧𑀺𑀘 𑀫𑀗𑁆𑀕𑀮𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀭𑀓𑁂 𑀤𑀢𑁆𑀯𑀸 𑀩𑀮𑀯𑀲𑁄𑀓𑁂𑀦 𑀳𑀤𑀬𑀁 𑀨𑀮𑀺, 𑀯𑁂𑀲𑁆𑀲𑀦𑁆𑀢𑀭𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀏𑀯𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀲𑀢𑁆𑀢𑀸𑀦𑀁 𑀧𑁂𑀫𑀁 𑀉𑀧𑀢𑀸𑀧𑀁 𑀓𑀭𑁄𑀢𑀺𑀬𑁂𑀯. 𑀅𑀬𑀁 𑀲𑁆𑀦𑁂𑀳𑁂 𑀆𑀤𑀻𑀦𑀯𑁄, 𑀢𑀲𑁆𑀫𑀸 𑀲𑁆𑀦𑁂𑀳𑀫𑁆𑀧𑀺 𑀦 𑀭𑁄𑀘𑁂𑀫𑀻𑀢𑀺.

𑀲𑀓𑁆𑀓𑁄 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀲𑀼𑀢𑁆𑀯𑀸 ‘‘𑀓𑀡𑁆𑀳𑀧𑀡𑁆𑀟𑀺𑀢 𑀢𑀬𑀸 𑀇𑀫𑁂 𑀧𑀜𑁆𑀳𑀸 𑀩𑀼𑀤𑁆𑀥𑀮𑀻𑀴𑀸𑀬 𑀲𑀸𑀥𑀼𑀓𑀁 𑀓𑀣𑀺𑀢𑀸, 𑀅𑀢𑀺𑀯𑀺𑀬 𑀢𑀼𑀝𑁆𑀞𑁄𑀲𑁆𑀫𑀺 𑀢𑁂, 𑀅𑀧𑀭𑀫𑁆𑀧𑀺 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁨𑁦. ‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁨𑁧. ‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀢𑁄, 𑀦𑀺𑀘𑁆𑀘𑀁 𑀏𑀓𑀯𑀺𑀳𑀸𑀭𑀺𑀦𑁄;

𑀆𑀩𑀸𑀥𑀸 𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑁆𑀢𑀭𑀸𑀬𑀓𑀭𑀸 𑀪𑀼𑀲𑀸’’𑀢𑀺.

𑀢𑀢𑁆𑀣 𑀅𑀦𑁆𑀢𑀭𑀸𑀬𑀓𑀭𑀸 𑀪𑀼𑀲𑀸𑀢𑀺 𑀇𑀫𑀲𑁆𑀲 𑀫𑁂 𑀢𑀧𑁄𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀸.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀓𑀡𑁆𑀳𑀧𑀡𑁆𑀟𑀺𑀢𑁄 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀦 𑀆𑀫𑀺𑀲𑀲𑀦𑁆𑀦𑀺𑀲𑁆𑀲𑀺𑀢𑀁 𑀕𑀡𑁆𑀳𑀸𑀢𑀺, 𑀢𑀧𑁄𑀓𑀫𑁆𑀫𑀦𑀺𑀲𑁆𑀲𑀺𑀢𑀫𑁂𑀯 𑀕𑀡𑁆𑀳𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑁄 𑀅𑀧𑀭𑀫𑁆𑀧𑀺 𑀯𑀭𑀁 𑀤𑀤𑀫𑀸𑀦𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁨. ‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀯𑀭𑀕𑁆𑀕𑀳𑀡𑀸𑀧𑀤𑁂𑀲𑁂𑀦 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁨𑁩. ‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀦𑁄 𑀯𑀸 𑀲𑀭𑀻𑀭𑀁 𑀯𑀸, 𑀫𑀁-𑀓𑀢𑁂 𑀲𑀓𑁆𑀓 𑀓𑀲𑁆𑀲𑀘𑀺;

𑀓𑀤𑀸𑀘𑀺 𑀉𑀧𑀳𑀜𑁆𑀜𑁂𑀣, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂’’𑀢𑀺.

𑀢𑀢𑁆𑀣 𑀫𑀦𑁄 𑀯𑀸𑀢𑀺 𑀫𑀦𑁄𑀤𑁆𑀯𑀸𑀭𑀁 𑀯𑀸. 𑀲𑀭𑀻𑀭𑀁 𑀯𑀸𑀢𑀺 𑀓𑀸𑀬𑀤𑁆𑀯𑀸𑀭𑀁 𑀯𑀸, 𑀯𑀘𑀻𑀤𑁆𑀯𑀸𑀭𑀫𑁆𑀧𑀺 𑀏𑀢𑁂𑀲𑀁 𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀁-𑀓𑀢𑁂𑀢𑀺 𑀫𑀫 𑀓𑀸𑀭𑀡𑀸. 𑀉𑀧𑀳𑀜𑁆𑀜𑁂𑀣𑀸𑀢𑀺 𑀉𑀧𑀖𑀸𑀢𑀁 𑀆𑀧𑀚𑁆𑀚𑁂𑀬𑁆𑀬 𑀅𑀧𑀭𑀺𑀲𑀼𑀤𑁆𑀥𑀁 𑀅𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀓𑁆𑀓 𑀤𑁂𑀯𑀭𑀸𑀚, 𑀫𑀫 𑀓𑀸𑀭𑀡𑀸 𑀫𑀁 𑀦𑀺𑀲𑁆𑀲𑀸𑀬 𑀫𑀫 𑀅𑀦𑀢𑁆𑀣𑀓𑀸𑀫𑀢𑀸𑀬 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀇𑀤𑀁 𑀢𑀺𑀯𑀺𑀥𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀁 𑀦 𑀉𑀧𑀳𑀜𑁆𑀜𑁂𑀣, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀺𑀫𑀼𑀢𑁆𑀢𑀁 𑀧𑀭𑀺𑀲𑀼𑀤𑁆𑀥𑀫𑁂𑀯 𑀪𑀯𑁂𑀬𑁆𑀬𑀸𑀢𑀺.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀙𑀲𑀼𑀧𑀺 𑀞𑀸𑀦𑁂𑀲𑀼 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀫𑁂𑀯 𑀕𑀡𑁆𑀳𑀺, 𑀚𑀸𑀦𑀸𑀢𑀺 𑀘𑁂𑀲 ‘‘𑀲𑀭𑀻𑀭𑀁 𑀦𑀸𑀫 𑀩𑁆𑀬𑀸𑀥𑀺𑀥𑀫𑁆𑀫𑀁, 𑀦 𑀢𑀁 𑀲𑀓𑁆𑀓𑀸 𑀲𑀓𑁆𑀓𑁂𑀦 𑀅𑀩𑁆𑀬𑀸𑀥𑀺𑀥𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺. 𑀲𑀢𑁆𑀢𑀸𑀦𑀜𑁆𑀳𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑁄 𑀅𑀲𑀓𑁆𑀓𑀸𑀬𑀢𑁆𑀢𑁄𑀯, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑁂 𑀯𑀭𑁂 𑀕𑀡𑁆𑀳𑀺. 𑀲𑀓𑁆𑀓𑁄𑀧𑀺 𑀢𑀁 𑀭𑀼𑀓𑁆𑀔𑀁 𑀥𑀼𑀯𑀨𑀮𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀅𑀭𑁄𑀕𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀆𑀦𑀦𑁆𑀤, 𑀧𑀼𑀩𑁆𑀩𑁂 𑀫𑀬𑀸 𑀦𑀺𑀯𑀼𑀢𑁆𑀣𑀪𑀽𑀫𑀺𑀧𑁆𑀧𑀤𑁂𑀲𑁄 𑀘𑁂𑀲𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀓𑀡𑁆𑀳𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁪𑁧] 𑁩. 𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑁨𑁪-𑁩𑁮. 𑀬𑁄 𑀓𑁄𑀧𑀦𑁂𑀬𑁆𑀬𑁄𑀢𑀺 𑀇𑀤𑀁 𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀁 𑀧𑀼𑀡𑁆𑀡𑀓𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁪𑁨] 𑁪. 𑀲𑀗𑁆𑀔𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀲𑁆𑀲𑀼𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀉𑀧𑀸𑀲𑀓𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀣𑀸𑀕𑀢𑀲𑁆𑀲 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀉𑀧𑀸𑀲𑀓𑁄 𑀲𑀧𑀼𑀢𑁆𑀢𑀤𑀸𑀭𑁄 𑀲𑀧𑀭𑀺𑀚𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀲𑁆𑀯𑀸𑀢𑀦𑀸𑀬𑀸𑀢𑀺 𑀏𑀯𑀁 𑀲𑀢𑁆𑀢𑀸𑀳𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀁 𑀅𑀤𑀸𑀲𑀺. 𑀢𑀁 𑀧𑀦 𑀤𑀤𑀫𑀸𑀦𑁄 𑀉𑀧𑀸𑀳𑀦𑀤𑀸𑀦𑀁 𑀉𑀲𑁆𑀲𑀦𑁆𑀦𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀤𑀲𑀩𑀮𑀲𑁆𑀲 𑀤𑀺𑀦𑁆𑀦𑁄 𑀉𑀧𑀸𑀳𑀦𑀲𑀗𑁆𑀖𑀸𑀝𑁄 𑀲𑀳𑀲𑁆𑀲𑀕𑁆𑀖𑀦𑀓𑁄 𑀅𑀳𑁄𑀲𑀺, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀜𑁆𑀘𑀲𑀢𑀕𑁆𑀖𑀦𑀓𑁄, 𑀲𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀢𑀕𑁆𑀖𑀦𑀓𑁄. 𑀇𑀢𑀺 𑀲𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀉𑀧𑀸𑀲𑀓, 𑀉𑀴𑀸𑀭𑀁 𑀢𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁, 𑀅𑀢𑁆𑀢𑀫𑀦𑁄 𑀳𑁄𑀳𑀺, 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀏𑀓𑀁 𑀉𑀧𑀸𑀳𑀦𑀲𑀗𑁆𑀖𑀸𑀝𑀁 𑀤𑀢𑁆𑀯𑀸 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀉𑀧𑀸𑀳𑀦𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀧𑀢𑀺𑀝𑁆𑀞𑀁 𑀮𑀪𑀺𑀁𑀲𑀼, 𑀢𑁆𑀯𑀁 𑀧𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀲 𑀢𑁂 𑀉𑀧𑀸𑀳𑀦𑀤𑀸𑀦𑀲𑁆𑀲 𑀨𑀮𑀁 𑀓𑀲𑁆𑀫𑀸 𑀦 𑀧𑀢𑀺𑀝𑁆𑀞𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀅𑀬𑀁 𑀩𑀸𑀭𑀸𑀡𑀲𑀻 𑀫𑁄𑀴𑀺𑀦𑀻 𑀦𑀸𑀫 𑀅𑀳𑁄𑀲𑀺. 𑀫𑁄𑀴𑀺𑀦𑀺𑀦𑀕𑀭𑁂 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀯𑀺𑀢𑁆𑀢𑀼𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑀲𑀼𑀯𑀡𑁆𑀡𑀭𑀚𑀢𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀘𑀸𑀢𑀺 𑀙𑀲𑀼 𑀞𑀸𑀦𑁂𑀲𑀼 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀧𑀡𑀤𑁆𑀥𑀺𑀓𑀸𑀦𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀕𑁂𑀳𑁂 𑀥𑀦𑁂 𑀔𑀻𑀡𑁂 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑀭𑀺𑀓𑁆𑀔𑀻𑀡𑁂𑀬𑁂𑀯 𑀥𑀦𑁂 𑀦𑀸𑀯𑀸𑀬 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀪𑀡𑁆𑀟𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀫𑁂 𑀤𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀯𑀼𑀢𑁄 𑀙𑀢𑁆𑀢𑀁 𑀆𑀤𑀸𑀬 𑀉𑀧𑀸𑀳𑀦𑀁 𑀆𑀭𑀼𑀬𑁆𑀳 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀧𑀝𑁆𑀝𑀦𑀕𑀸𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀦𑁆𑀥𑀫𑀸𑀤𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀯𑀚𑁆𑀚𑁂𑀢𑁆𑀯𑀸 𑀢𑀁 𑀥𑀦𑀸𑀳𑀭𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀭𑀺𑀲𑁄 𑀥𑀦𑀁 𑀆𑀳𑀭𑀺𑀢𑀼𑀁 𑀕𑀘𑁆𑀙𑀢𑀺, 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀲𑁆𑀲 𑀲𑀫𑀼𑀤𑁆𑀤𑁂 𑀅𑀦𑁆𑀢𑀭𑀸𑀬𑁄, 𑀦𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀏𑀲 𑀫𑀁 𑀤𑀺𑀲𑁆𑀯𑀸 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀜𑁆𑀘 𑀫𑀬𑁆𑀳𑀁 𑀤𑀢𑁆𑀯𑀸 𑀉𑀧𑀸𑀳𑀦𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀧𑀢𑀺𑀝𑁆𑀞𑀁 𑀮𑀪𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀸𑀫𑀺𑀲𑁆𑀲 𑀅𑀦𑀼𑀕𑁆𑀕𑀳’’𑀦𑁆𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 𑀘𑀡𑁆𑀟𑀯𑀸𑀢𑀸𑀢𑀧𑁂 𑀅𑀗𑁆𑀕𑀸𑀭𑀲𑀦𑁆𑀣𑀭𑀲𑀤𑀺𑀲𑀁 𑀉𑀡𑁆𑀳𑀯𑀸𑀮𑀼𑀓𑀁 𑀫𑀤𑁆𑀤𑀦𑁆𑀢𑁄 𑀢𑀲𑁆𑀲 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀺.

𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑁂 𑀆𑀕𑀢𑀁, 𑀅𑀚𑁆𑀚 𑀫𑀬𑀸 𑀏𑀢𑁆𑀣 𑀤𑀸𑀦𑀩𑀻𑀚𑀁 𑀭𑁄𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀯𑁂𑀕𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀣𑁄𑀓𑀁 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀇𑀫𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀸𑀲𑀺𑀢𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀉𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀸 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳 𑀙𑀢𑁆𑀢𑀁 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀙𑀢𑁆𑀢𑀼𑀧𑀸𑀳𑀦𑀁 𑀅𑀤𑀸𑀲𑀺. 𑀲𑁄 𑀅𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀲𑁆𑀲 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀅𑀣𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀧𑀝𑀺𑀧𑀦𑁆𑀦𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀯𑀺𑀯𑀭𑀁 𑀅𑀤𑀸𑀲𑀺, 𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀫𑀳𑀸𑀚𑀦𑁄 𑀫𑀭𑀡𑀪𑀬𑀪𑀻𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀫𑀳𑀸𑀲𑀢𑁆𑀢𑁄 𑀏𑀓𑀁 𑀉𑀧𑀝𑁆𑀞𑀸𑀓𑀁 𑀕𑀳𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀲𑀓𑁆𑀔𑀭𑀘𑀼𑀡𑁆𑀡𑀁 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀢𑀫𑁆𑀧𑀺 𑀔𑀸𑀤𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀽𑀧𑀓𑀬𑀝𑁆𑀞𑀺𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀇𑀫𑀸𑀬 𑀤𑀺𑀲𑀸𑀬 𑀅𑀫𑁆𑀳𑀸𑀓𑀁 𑀦𑀕𑀭’’𑀦𑁆𑀢𑀺 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀫𑀘𑁆𑀙𑀓𑀘𑁆𑀙𑀧𑀧𑀭𑀺𑀧𑀦𑁆𑀣𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀉𑀲𑀪𑀫𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑀺. 𑀫𑀳𑀸𑀚𑀦𑁄 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀉𑀧𑀝𑁆𑀞𑀸𑀓𑁂𑀦 𑀲𑀤𑁆𑀥𑀺𑀁 𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀁 𑀆𑀭𑀪𑀺. 𑀢𑀲𑁆𑀲 𑀢𑀭𑀦𑁆𑀢𑀲𑁆𑀲𑁂𑀯 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀚𑀸𑀢𑁄. 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀮𑁄𑀡𑁄𑀤𑀓𑁂𑀦 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀅𑀳𑁄𑀲𑀺𑀬𑁂𑀯.

𑀢𑀤𑀸 𑀧𑀦 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀫𑀡𑀺𑀫𑁂𑀔𑀮𑀸 𑀦𑀸𑀫 𑀤𑁂𑀯𑀥𑀻𑀢𑀸 ‘‘𑀲𑀘𑁂 𑀲𑀫𑀼𑀤𑁆𑀤𑁂 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀢𑀺𑀲𑀭𑀡𑀕𑀢𑀸 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀯𑀸 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀓𑀸 𑀯𑀸 𑀫𑀦𑀼𑀲𑁆𑀲𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂 𑀭𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀲𑀫𑀼𑀤𑁆𑀤𑁂 𑀆𑀭𑀓𑁆𑀔𑀡𑀢𑁆𑀣𑀸𑀬 𑀞𑀧𑀺𑀢𑀸 𑀳𑁄𑀢𑀺. 𑀲𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀲𑀢𑁆𑀢𑀸𑀳𑀫𑀦𑀼𑀪𑀯𑀺𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀼𑀤𑁆𑀤𑀁 𑀑𑀮𑁄𑀓𑁂𑀦𑁆𑀢𑀻 𑀲𑀻𑀮𑀸𑀘𑀸𑀭𑀲𑀁𑀬𑀼𑀢𑁆𑀢𑀁 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀲𑀫𑀼𑀤𑁆𑀤𑁂 𑀧𑀢𑀺𑀢𑀲𑁆𑀲, 𑀲𑀘𑁂 𑀲𑁄 𑀫𑀭𑀺𑀲𑁆𑀲𑀢𑀺 𑀅𑀢𑀺𑀯𑀺𑀬 𑀕𑀸𑀭𑀬𑁆𑀳𑀸 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀳𑀤𑀬𑀸 𑀳𑀼𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄, 𑀇𑀤𑀁 𑀤𑀺𑀩𑁆𑀩𑀪𑁄𑀚𑀦𑀁 𑀪𑀼𑀜𑁆𑀚𑀸’’𑀢𑀺 𑀆𑀳. 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀧𑀦𑁂𑀳𑀺 𑀢𑀯 𑀪𑀢𑁆𑀢𑀁, 𑀅𑀳𑀁 𑀉𑀧𑁄𑀲𑀣𑀺𑀓𑁄’’𑀢𑀺 𑀆𑀳. 𑀅𑀣𑀲𑁆𑀲 𑀉𑀧𑀝𑁆𑀞𑀸𑀓𑁄 𑀧𑀘𑁆𑀙𑀢𑁄 𑀆𑀕𑀢𑁄 𑀤𑁂𑀯𑀢𑀁 𑀅𑀤𑀺𑀲𑁆𑀯𑀸 𑀲𑀤𑁆𑀤𑀫𑁂𑀯 𑀲𑀼𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀓𑀢𑀺𑀲𑀼𑀔𑀼𑀫𑀸𑀮𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀤𑀼𑀓𑁆𑀔𑀺𑀢𑁄 𑀫𑀭𑀡𑀪𑀬𑁂𑀦 𑀯𑀺𑀮𑀧𑀢𑀺 𑀫𑀜𑁆𑀜𑁂, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁯. ‘‘𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀫𑁆𑀫𑁄𑀲𑀺 𑀲𑀗𑁆𑀔, 𑀤𑀺𑀝𑁆𑀞𑀸 𑀢𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀣𑀓𑁆𑀔𑀡𑁂 𑀤𑀲𑁆𑀲𑀬𑀲𑁂 𑀯𑀺𑀮𑀸𑀧𑀁, 𑀅𑀜𑁆𑀜𑁄 𑀦𑀼 𑀓𑁄 𑀢𑁂 𑀧𑀝𑀺𑀫𑀦𑁆𑀢𑀓𑁄 𑀫𑀬𑀸’’𑀢𑀺.

𑀢𑀢𑁆𑀣 𑀲𑀼𑀢𑀥𑀫𑁆𑀫𑁄𑀲𑀻𑀢𑀺 𑀥𑀫𑁆𑀫𑁄𑀧𑀺 𑀢𑀬𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑁄 𑀅𑀲𑀺. 𑀤𑀺𑀝𑁆𑀞𑀸 𑀢𑀬𑀸𑀢𑀺 𑀢𑁂𑀲𑀁 𑀧𑀘𑁆𑀘𑀬𑁂 𑀤𑁂𑀦𑁆𑀢𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀢𑀬𑀸 𑀤𑀺𑀝𑁆𑀞𑀸. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀳𑀺 𑀧𑀲𑁆𑀲𑀦𑁆𑀢𑁄𑀧𑀺 𑀢𑁂 𑀦 𑀧𑀲𑁆𑀲𑀢𑀺𑀬𑁂𑀯. 𑀅𑀣𑀓𑁆𑀔𑀡𑁂𑀢𑀺 𑀅𑀣 𑀅𑀓𑁆𑀔𑀡𑁂 𑀲𑀮𑁆𑀮𑀧𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑁂𑀦 𑀯𑀘𑀦𑀲𑁆𑀲 𑀅𑀦𑁄𑀓𑀸𑀲𑁂. 𑀤𑀲𑁆𑀲𑀬𑀲𑁂𑀢𑀺 ‘‘𑀅𑀳𑀁 𑀉𑀧𑁄𑀲𑀣𑀺𑀓𑁄’’𑀢𑀺 𑀯𑀤𑀦𑁆𑀢𑁄 𑀯𑀺𑀮𑀸𑀧𑀁 𑀤𑀲𑁆𑀲𑁂𑀲𑀺. 𑀧𑀝𑀺𑀫𑀦𑁆𑀢𑀓𑁄𑀢𑀺 𑀫𑀬𑀸 𑀅𑀜𑁆𑀜𑁄 𑀓𑁄 𑀢𑀯 𑀧𑀝𑀺𑀫𑀦𑁆𑀢𑀓𑁄 𑀧𑀝𑀺𑀯𑀘𑀦𑀤𑀸𑀬𑀓𑁄, 𑀓𑀺𑀁𑀓𑀸𑀭𑀡𑀸 𑀏𑀯𑀁 𑀯𑀺𑀧𑁆𑀧𑀮𑀧𑀲𑀻𑀢𑀺?

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀲 𑀤𑁂𑀯𑀢𑀸 𑀦 𑀧𑀜𑁆𑀜𑀸𑀬𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀦𑀸𑀳𑀁 𑀫𑀭𑀡𑀲𑁆𑀲 𑀪𑀸𑀬𑀸𑀫𑀺, 𑀅𑀢𑁆𑀣𑀺 𑀧𑀦 𑀫𑁂 𑀅𑀜𑁆𑀜𑁄 𑀧𑀝𑀺𑀫𑀦𑁆𑀢𑀓𑁄’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁦. ‘‘𑀲𑀼𑀩𑁆𑀪𑀽 𑀲𑀼𑀪𑀸 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀼, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 𑀧𑀸𑀢𑀺𑀬𑀸;

‘𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁’ 𑀇𑀢𑀺 𑀫𑀁 𑀯𑀤𑁂𑀢𑀺, 𑀲𑀤𑁆𑀥𑀸𑀯𑀺𑀢𑁆𑀢𑀸, 𑀢𑀫𑀳𑀁 𑀦𑁄𑀢𑀺 𑀩𑁆𑀭𑀽𑀫𑀻’’𑀢𑀺.

𑀢𑀢𑁆𑀣 𑀲𑀼𑀩𑁆𑀪𑀽𑀢𑀺 𑀲𑀼𑀪𑀫𑀼𑀔𑀸. 𑀲𑀼𑀪𑀸𑀢𑀺 𑀧𑀸𑀲𑀸𑀤𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸. 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀽𑀢𑀺 𑀧𑀝𑀺𑀫𑀼𑀓𑁆𑀓𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀸. 𑀧𑀕𑁆𑀕𑀬𑁆𑀳𑀸𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀲𑀤𑁆𑀥𑀸𑀯𑀺𑀢𑁆𑀢𑀸𑀢𑀺 𑀲𑀤𑁆𑀥𑀸 𑀘𑁂𑀯 𑀢𑀼𑀝𑁆𑀞𑀘𑀺𑀢𑁆𑀢𑀸 𑀘. ‘‘𑀲𑀤𑁆𑀥𑀁 𑀘𑀺𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀲𑀤𑁆𑀥𑀦𑁆𑀢𑀺 𑀲𑀤𑁆𑀤𑀳𑀦𑁆𑀢𑀁, 𑀘𑀺𑀢𑁆𑀢𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀁. 𑀢𑀫𑀳𑀁 𑀦𑁄𑀢𑀻𑀢𑀺 𑀢𑀫𑀳𑀁 𑀤𑁂𑀯𑀢𑀁 𑀉𑀧𑁄𑀲𑀣𑀺𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦𑁄𑀢𑀺 𑀩𑁆𑀭𑀽𑀫𑀺, 𑀦 𑀯𑀺𑀧𑁆𑀧𑀮𑀧𑀸𑀫𑀺 𑀲𑀫𑁆𑀫𑀸𑀢𑀺.

𑀅𑀣𑀲𑁆𑀲 𑀲𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧. ‘‘𑀏𑀢𑀸𑀤𑀺𑀲𑀁 𑀩𑁆𑀭𑀸𑀳𑁆𑀫𑀡 𑀤𑀺𑀲𑁆𑀯𑀸𑀦 𑀬𑀓𑁆𑀔𑀁, 𑀧𑀼𑀘𑁆𑀙𑁂𑀬𑁆𑀬 𑀧𑁄𑀲𑁄 𑀲𑀼𑀔𑀫𑀸𑀲𑀺𑀲𑀸𑀦𑁄;

𑀉𑀝𑁆𑀞𑁂𑀳𑀺 𑀦𑀁 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀽’’𑀢𑀺.

𑀢𑀢𑁆𑀣 𑀲𑀼𑀔𑀫𑀸𑀲𑀺𑀲𑀸𑀦𑁄𑀢𑀺 𑀏𑀢𑀸𑀤𑀺𑀲𑀁 𑀬𑀓𑁆𑀔𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀼𑀔𑀁 𑀆𑀲𑀻𑀲𑀦𑁆𑀢𑁄 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 ‘‘𑀅𑀫𑁆𑀳𑀸𑀓𑀁 𑀲𑀼𑀔𑀁 𑀪𑀯𑀺𑀲𑁆𑀲𑀢𑀺, 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑁂𑀬𑁆𑀬. 𑀉𑀝𑁆𑀞𑁂𑀳𑀻𑀢𑀺 𑀉𑀤𑀓𑀢𑁄 𑀉𑀝𑁆𑀞𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀉𑀝𑁆𑀞𑀳. 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙𑀸𑀢𑀺 𑀅𑀜𑁆𑀚𑀮𑀺𑀓𑁄 𑀳𑀼𑀢𑁆𑀯𑀸 𑀅𑀪𑀺𑀧𑀼𑀘𑁆𑀙. 𑀉𑀤 𑀫𑀸𑀦𑀼𑀲𑀻𑀢𑀺 𑀉𑀤𑀸𑀳𑀼 𑀫𑀳𑀺𑀤𑁆𑀥𑀺𑀓𑀸 𑀫𑀸𑀦𑀼𑀲𑀻 𑀢𑁆𑀯𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀬𑀼𑀢𑁆𑀢𑀁 𑀓𑀣𑁂𑀲𑀻’’𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁨. ‘‘𑀬𑀁 𑀢𑁆𑀯𑀁 𑀲𑀼𑀔𑁂𑀦𑀸𑀪𑀺𑀲𑀫𑁂𑀓𑁆𑀔𑀲𑁂 𑀫𑀁, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁 𑀇𑀢𑀺 𑀫𑀁 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀺 𑀫𑀳𑀸𑀦𑀼𑀪𑀸𑀯𑁂, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀽’’𑀢𑀺.

𑀢𑀢𑁆𑀣 𑀬𑀁 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀲𑀼𑀔𑁂𑀦 𑀫𑀁 𑀅𑀪𑀺𑀲𑀫𑁂𑀓𑁆𑀔𑀲𑁂, 𑀧𑀺𑀬𑀘𑀓𑁆𑀔𑀽𑀳𑀺 𑀑𑀮𑁄𑀓𑁂𑀲𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺.

𑀢𑀢𑁄 𑀤𑁂𑀯𑀥𑀻𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁩. ‘‘𑀤𑁂𑀯𑀻 𑀅𑀳𑀁 𑀲𑀗𑁆𑀔 𑀫𑀳𑀸𑀦𑀼𑀪𑀸𑀯𑀸, 𑀇𑀥𑀸𑀕𑀢𑀸 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂;

𑀅𑀦𑀼𑀓𑀫𑁆𑀧𑀺𑀓𑀸 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀸𑀲𑁆𑀫𑀺.

𑁪𑁪. ‘‘𑀇𑀥𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀬𑀸𑀦𑀸𑀦𑀺 𑀦𑀸𑀦𑀸𑀯𑀺𑀯𑀺𑀥𑀸𑀦𑀺 𑀲𑀗𑁆𑀔;

𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀁 𑀧𑀝𑀺𑀧𑀸𑀤𑀬𑀸𑀫𑀺, 𑀬𑀁 𑀓𑀺𑀜𑁆𑀘𑀺 𑀢𑀼𑀬𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺.

𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀲𑀫𑀼𑀤𑁆𑀤𑁂. 𑀦𑀸𑀦𑀸𑀯𑀺𑀯𑀺𑀥𑀸𑀦𑀻𑀢𑀺 𑀩𑀳𑀽𑀦𑀺 𑀘 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀘 𑀳𑀢𑁆𑀣𑀺𑀬𑀸𑀦𑀅𑀲𑁆𑀲𑀬𑀸𑀦𑀸𑀤𑀻𑀦𑀺 𑀅𑀢𑁆𑀣𑀺. 𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀦𑁆𑀢𑀺 𑀢𑀲𑁆𑀲 𑀅𑀦𑁆𑀦𑀧𑀸𑀦𑀸𑀤𑀺𑀦𑁄 𑀲𑀩𑁆𑀩𑀲𑁆𑀲 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀢𑀁 𑀢𑁂 𑀅𑀦𑁆𑀦𑀧𑀸𑀦𑀸𑀤𑀺𑀁 𑀧𑀝𑀺𑀧𑀸𑀤𑀬𑀸𑀫𑀺 𑀤𑀤𑀸𑀫𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀇𑀘𑁆𑀙𑀺𑀢𑀁, 𑀢𑀁 𑀲𑀩𑁆𑀩𑀁 𑀢𑁂 𑀤𑀫𑁆𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀤𑁂𑀯𑀥𑀻𑀢𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀫𑀬𑁆𑀳𑀁 ‘𑀇𑀤𑀜𑁆𑀘𑀺𑀤𑀜𑁆𑀘 𑀤𑀫𑁆𑀫𑀻’𑀢𑀺 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀏𑀲𑀸 𑀫𑀬𑀸 𑀓𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑀸𑀢𑀼𑀓𑀸𑀫𑀸, 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀩𑀮𑁂𑀦, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁪𑁫. ‘‘𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 𑀫𑀬𑁆𑀳𑀁, 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀁 𑀲𑀼𑀕𑀢𑁆𑀢𑁂;

𑀲𑀼𑀲𑁆𑀲𑁄𑀡𑀺 𑀲𑀼𑀩𑁆𑀪𑀫𑀼 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂, 𑀓𑀺𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺.

𑀢𑀢𑁆𑀣 𑀬𑀺𑀝𑁆𑀞𑀦𑁆𑀢𑀺 𑀤𑀸𑀦𑀯𑀲𑁂𑀦 𑀬𑀚𑀺𑀢𑀁. 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀯𑀲𑁂𑀦 𑀤𑀺𑀦𑁆𑀦𑀁. 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀦𑁆𑀢𑀺 𑀢𑀲𑁆𑀲 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀢𑁆𑀯𑀁 𑀇𑀲𑁆𑀲𑀭𑀸, ‘‘𑀇𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀇𑀫𑀲𑁆𑀲 𑀅𑀬’’𑀦𑁆𑀢𑀺 𑀩𑁆𑀬𑀸𑀓𑀭𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀼𑀲𑁆𑀲𑁄𑀡𑀻𑀢𑀺 𑀲𑀼𑀦𑁆𑀤𑀭𑀊𑀭𑀼𑀮𑀓𑁆𑀔𑀡𑁂. 𑀲𑀼𑀩𑁆𑀪𑀫𑀽𑀢𑀺 𑀲𑀼𑀦𑁆𑀤𑀭𑀪𑀫𑀼𑀓𑁂. 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂𑀢𑀺 𑀲𑀼𑀝𑁆𑀞𑀼𑀯𑀺𑀮𑀕𑁆𑀕𑀺𑀢𑀢𑀦𑀼𑀫𑀚𑁆𑀛𑁂. 𑀓𑀺𑀲𑁆𑀲 𑀫𑁂𑀢𑀺 𑀫𑀬𑀸 𑀓𑀢𑀓𑀫𑁆𑀫𑁂𑀲𑀼 𑀓𑀢𑀭𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀅𑀧𑁆𑀧𑀢𑀺𑀝𑁆𑀞𑁂 𑀲𑀫𑀼𑀤𑁆𑀤𑁂 𑀧𑀢𑀺𑀝𑁆𑀞𑀁 𑀮𑀪𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀥𑀻𑀢𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 ‘𑀬𑀁 𑀢𑁂𑀦 𑀓𑀼𑀲𑀮𑀁 𑀓𑀢𑀁, 𑀢𑀁 𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻’𑀢𑀺 𑀅𑀜𑁆𑀜𑀸𑀬 𑀧𑀼𑀘𑁆𑀙𑀢𑀺 𑀫𑀜𑁆𑀜𑁂, 𑀓𑀣𑀬𑀺𑀲𑁆𑀲𑀸𑀫𑀺 𑀤𑀸𑀦𑀺𑀲𑁆𑀲𑀸’’𑀢𑀺 𑀢𑀁 𑀓𑀣𑁂𑀦𑁆𑀢𑀻 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁬. ‘‘𑀖𑀫𑁆𑀫𑁂 𑀧𑀣𑁂 𑀩𑁆𑀭𑀸𑀳𑁆𑀫𑀡 𑀏𑀓𑀪𑀺𑀓𑁆𑀔𑀼𑀁, 𑀉𑀕𑁆𑀖𑀝𑁆𑀝𑀧𑀸𑀤𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀧𑀝𑀺𑀧𑀸𑀤𑀬𑀻 𑀲𑀗𑁆𑀔 𑀉𑀧𑀸𑀳𑀦𑀸𑀦𑀺, 𑀲𑀸 𑀤𑀓𑁆𑀔𑀺𑀡𑀸 𑀓𑀸𑀫𑀤𑀼𑀳𑀸 𑀢𑀯𑀚𑁆𑀚𑀸’’𑀢𑀺.

𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀦𑁆𑀢𑀺 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀦𑁆𑀥𑀸𑀬𑀸𑀳. 𑀉𑀕𑁆𑀖𑀝𑁆𑀝𑀧𑀸𑀤𑀦𑁆𑀢𑀺 𑀉𑀡𑁆𑀳𑀯𑀸𑀮𑀼𑀓𑀸𑀬 𑀖𑀝𑁆𑀝𑀺𑀢𑀧𑀸𑀤𑀁. 𑀢𑀲𑀺𑀢𑀦𑁆𑀢𑀺 𑀧𑀺𑀧𑀸𑀲𑀺𑀢𑀁. 𑀧𑀝𑀺𑀧𑀸𑀤𑀬𑀻𑀢𑀺 𑀧𑀝𑀺𑀧𑀸𑀤𑁂𑀲𑀺, 𑀬𑁄𑀚𑁂𑀲𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀤𑀼𑀳𑀸𑀢𑀺 𑀲𑀩𑁆𑀩𑀓𑀸𑀫𑀤𑀸𑀬𑀺𑀓𑀸.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀏𑀯𑀭𑀽𑀧𑁂𑀧𑀺 𑀦𑀸𑀫 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂 𑀫𑀬𑀸 𑀤𑀺𑀦𑁆𑀦𑀉𑀧𑀸𑀳𑀦𑀤𑀸𑀦𑀁 𑀫𑀫 𑀲𑀩𑁆𑀩𑀓𑀸𑀫𑀤𑀤𑀁 𑀚𑀸𑀢𑀁, 𑀅𑀳𑁄 𑀲𑀼𑀤𑀺𑀦𑁆𑀦𑀁 𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀦’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁪𑁭. ‘‘𑀲𑀸 𑀳𑁄𑀢𑀼 𑀦𑀸𑀯𑀸 𑀨𑀮𑀓𑀽𑀧𑀧𑀦𑁆𑀦𑀸, 𑀅𑀦𑀯𑀲𑁆𑀲𑀼𑀢𑀸 𑀏𑀭𑀓𑀯𑀸𑀢𑀬𑀼𑀢𑁆𑀢𑀸;

𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀦 𑀳𑁂𑀢𑁆𑀣 𑀪𑀽𑀫𑀺, 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀁 𑀧𑀸𑀧𑀬𑀲𑁆𑀲𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀤𑁂𑀯𑀢𑁂, 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀏𑀓𑀁 𑀦𑀸𑀯𑀁 𑀫𑀸𑀧𑁂𑀳𑀺, 𑀔𑀼𑀤𑁆𑀤𑀓𑀁 𑀧𑀦 𑀏𑀓𑀤𑁄𑀡𑀺𑀓𑀦𑀸𑀯𑀁 𑀫𑀸𑀧𑁂𑀳𑀺, 𑀬𑀁 𑀦𑀸𑀯𑀁 𑀫𑀸𑀧𑁂𑀲𑁆𑀲𑀲𑀺, 𑀲𑀸 𑀳𑁄𑀢𑀼 𑀦𑀸𑀯𑀸 𑀩𑀳𑀽𑀳𑀺 𑀲𑀼𑀲𑀺𑀩𑁆𑀩𑀺𑀢𑁂𑀳𑀺 𑀨𑀮𑀓𑁂𑀳𑀺 𑀉𑀧𑀧𑀦𑁆𑀦𑀸, 𑀉𑀤𑀓𑀧𑀯𑁂𑀲𑀦𑀲𑁆𑀲𑀸𑀪𑀸𑀯𑁂𑀦 𑀅𑀦𑀯𑀲𑁆𑀲𑀼𑀢𑀸, 𑀏𑀭𑀓𑁂𑀦 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀯𑀸𑀢𑁂𑀦 𑀬𑀼𑀢𑁆𑀢𑀸, 𑀞𑀧𑁂𑀢𑁆𑀯𑀸 𑀤𑀺𑀩𑁆𑀩𑀦𑀸𑀯𑀁 𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀏𑀢𑁆𑀣 𑀪𑀽𑀫𑀺 𑀦𑀢𑁆𑀣𑀺, 𑀢𑀸𑀬 𑀧𑀦 𑀤𑀺𑀩𑁆𑀩𑀦𑀸𑀯𑀸𑀬 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀦𑀕𑀭𑀁 𑀧𑀸𑀧𑀬𑀲𑁆𑀲𑀽𑀢𑀺.

𑀤𑁂𑀯𑀥𑀻𑀢𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 𑀲𑀢𑁆𑀢𑀭𑀢𑀦𑀫𑀬𑀁 𑀦𑀸𑀯𑀁 𑀫𑀸𑀧𑁂𑀲𑀺. 𑀲𑀸 𑀤𑀻𑀖𑀢𑁄 𑀅𑀝𑁆𑀞𑀉𑀲𑀪𑀸 𑀅𑀳𑁄𑀲𑀺 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀉𑀲𑀪𑀸, 𑀕𑀫𑁆𑀪𑀻𑀭𑀢𑁄 𑀯𑀻𑀲𑀢𑀺𑀬𑀝𑁆𑀞𑀺𑀓𑀸. 𑀢𑀲𑁆𑀲𑀸 𑀇𑀦𑁆𑀤𑀦𑀻𑀮𑀫𑀬𑀸 𑀢𑀬𑁄 𑀓𑀽𑀧𑀓𑀸, 𑀲𑁄𑀯𑀡𑁆𑀡𑀫𑀬𑀸𑀦𑀺 𑀬𑁄𑀢𑁆𑀢𑀸𑀦𑀺 𑀭𑀚𑀢𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀘 𑀨𑀺𑀬𑀸𑀭𑀺𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀤𑁂𑀯𑀢𑀸 𑀢𑀁 𑀦𑀸𑀯𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀽𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀅𑀮𑀗𑁆𑀓𑀢𑀦𑀸𑀯𑀸𑀬 𑀆𑀭𑁄𑀧𑁂𑀲𑀺, 𑀉𑀧𑀝𑁆𑀞𑀸𑀓𑀁 𑀧𑀦𑀲𑁆𑀲 𑀦 𑀑𑀮𑁄𑀓𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀓𑀢𑀓𑀮𑁆𑀬𑀸𑀡𑀢𑁄 𑀢𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀲𑁄 𑀅𑀦𑀼𑀫𑁄𑀤𑀺. 𑀢𑀤𑀸 𑀤𑁂𑀯𑀢𑀸 𑀢𑀫𑁆𑀧𑀺 𑀆𑀮𑀺𑀗𑁆𑀕𑀺𑀢𑁆𑀯𑀸 𑀦𑀸𑀯𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣 𑀦𑀁 𑀦𑀸𑀯𑀁 𑀫𑁄𑀴𑀺𑀦𑀺𑀦𑀕𑀭𑀁 𑀦𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑁂 𑀥𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑁋

𑁪𑁮. ‘‘𑀲𑀸 𑀢𑀢𑁆𑀣 𑀯𑀺𑀢𑁆𑀢𑀸 𑀲𑀼𑀫𑀦𑀸 𑀧𑀢𑀻𑀢𑀸, 𑀦𑀸𑀯𑀁 𑀲𑀼𑀘𑀺𑀢𑁆𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸;

𑀆𑀤𑀸𑀬 𑀲𑀗𑁆𑀔𑀁 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁, 𑀉𑀧𑀸𑀦𑀬𑀻 𑀦𑀕𑀭𑀁 𑀲𑀸𑀥𑀼𑀭𑀫𑁆𑀫’’𑀦𑁆𑀢𑀺. 𑁋

𑀇𑀫𑀁 𑀑𑀲𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀸𑀢𑀺 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸 𑀢𑀢𑁆𑀣 𑀲𑀫𑀼𑀤𑁆𑀤𑀫𑀚𑁆𑀛𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀯𑀺𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀧𑀻𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑁆𑀢𑀸. 𑀲𑀼𑀫𑀦𑀸𑀢𑀺 𑀲𑀼𑀦𑁆𑀤𑀭𑀫𑀦𑀸 𑀧𑀸𑀫𑁄𑀚𑁆𑀚𑁂𑀦 𑀧𑀢𑀻𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀘𑀺𑀢𑁆𑀭𑀦𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀘𑀸𑀭𑀓𑁂𑀦 𑀲𑀤𑁆𑀥𑀺𑀁 𑀆𑀤𑀸𑀬 𑀲𑀸𑀥𑀼𑀭𑀫𑁆𑀫𑀁 𑀅𑀢𑀺𑀭𑀫𑀡𑀻𑀬𑀁 𑀦𑀕𑀭𑀁 𑀉𑀧𑀸𑀦𑀬𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀬𑀸𑀯𑀚𑀻𑀯𑀁 𑀅𑀧𑀭𑀺𑀫𑀺𑀢𑀥𑀦𑀁 𑀕𑁂𑀳𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀲𑁄 𑀤𑁂𑀯𑀦𑀕𑀭𑀁 𑀧𑀭𑀺𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀉𑀧𑀝𑁆𑀞𑀸𑀓𑀧𑀼𑀭𑀺𑀲𑁄 𑀆𑀦𑀦𑁆𑀤𑁄, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀗𑁆𑀔𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁪𑁩] 𑁫. 𑀘𑀽𑀴𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀢𑁂 𑀇𑀫𑀁 𑀯𑀺𑀲𑀸𑀮𑀓𑁆𑀔𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑁄𑀥𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀓𑁄𑀥𑀁 𑀦𑀺𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑁄𑀥𑀦𑁄 𑀅𑀳𑁄𑀲𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀺 𑀓𑀼𑀧𑁆𑀧𑀺 𑀩𑁆𑀬𑀸𑀧𑀚𑁆𑀚𑀺 𑀧𑀢𑀺𑀝𑁆𑀞𑀬𑀺. 𑀲𑀢𑁆𑀣𑀸 𑀢𑀲𑁆𑀲 𑀓𑁄𑀥𑀦𑀪𑀸𑀯𑀁 𑀲𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀓𑁄𑀥𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑁄𑀥𑁄 𑀦𑀸𑀫 𑀯𑀸𑀭𑁂𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀳𑀺 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀅𑀦𑀢𑁆𑀣𑀓𑀸𑀭𑀓𑁄, 𑀢𑁆𑀯𑀁 𑀦𑀺𑀓𑁆𑀓𑁄𑀥𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀫𑀸 𑀓𑀼𑀚𑁆𑀛𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀩𑀸𑀳𑀺𑀭𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀓𑁄𑀥𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀦𑀺𑀕𑀫𑁂 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀧𑀼𑀢𑁆𑀢𑀓𑁄 𑀅𑀳𑁄𑀲𑀺, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀧𑀼𑀢𑁆𑀢𑀁 𑀧𑀢𑁆𑀣𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀩𑁄𑀥𑀺𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀢𑀲𑁆𑀲 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀫𑀸𑀢𑀸𑀧𑀺𑀢𑀭𑁄 𑀲𑀫𑀸𑀦𑀚𑀸𑀢𑀺𑀓𑀸 𑀓𑀼𑀮𑀸 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀼𑀁. 𑀲𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀸 𑀘𑀼𑀢𑀸𑀯 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸. 𑀢𑁂𑀲𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑀺𑀁𑀲𑀼. 𑀉𑀪𑀺𑀦𑁆𑀦𑀁 𑀧𑀦𑁂𑀢𑁂𑀲𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑁄 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑁄, 𑀲𑀁𑀭𑀸𑀕𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀑𑀮𑁄𑀓𑀦𑀁 𑀦𑀸𑀫 𑀦𑀸𑀳𑁄𑀲𑀺, 𑀲𑀼𑀧𑀺𑀦𑁂𑀧𑀺 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀯𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀅𑀳𑁂𑀲𑀼𑀁.

𑀅𑀣𑀸𑀧𑀭𑀪𑀸𑀕𑁂 𑀫𑀳𑀸𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀲𑀼 𑀓𑀸𑀮𑀓𑀢𑁂𑀲𑀼 𑀢𑁂𑀲𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀇𑀫𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀕𑀳𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀸𑀳𑀻’’𑀢𑀺 𑀆𑀳. ‘‘𑀓𑀺𑀁 𑀓𑀭𑀺𑀲𑁆𑀲𑀣 𑀢𑀼𑀫𑁆𑀳𑁂 𑀧𑀦, 𑀅𑀬𑁆𑀬𑀧𑀼𑀢𑁆𑀢𑀸’’𑀢𑀺? ‘‘𑀫𑀬𑁆𑀳𑀁 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀅𑀬𑁆𑀬𑀧𑀼𑀢𑁆𑀢 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀧𑀼𑀭𑀺𑀲𑀸𑀦𑀜𑁆𑀜𑁂𑀯 𑀯𑀝𑁆𑀝𑀢𑀻’’𑀢𑀺? ‘‘𑀇𑀢𑁆𑀣𑀻𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀪𑀤𑁆𑀤𑁂’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀙𑀝𑁆𑀝𑀺𑀢𑀔𑁂𑀴𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀤𑁆𑀤𑁂’’𑀢𑀺. 𑀢𑁂 𑀉𑀪𑁄𑀧𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑀸 𑀢𑀢𑁆𑀣 𑀤𑀲𑀫𑀢𑁆𑀢𑀸𑀦𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀲𑀺𑀁𑀲𑀼, 𑀛𑀸𑀦𑀁 𑀧𑀦 𑀦𑁂𑀲𑀁 𑀦 𑀢𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂 𑀢𑀢𑁆𑀣 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦𑁂𑀯 𑀤𑀲 𑀲𑀁𑀯𑀘𑁆𑀙𑀭𑁂 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀁𑀲𑀼.