𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

[𑁪𑁧𑁭] 𑁧. 𑀓𑀘𑁆𑀘𑀸𑀦𑀺𑀚𑀸𑀢𑀓𑀯𑀡𑁆𑀡𑀦𑀸

𑀑𑀤𑀸𑀢𑀯𑀢𑁆𑀣𑀸 𑀲𑀼𑀘𑀺 𑀅𑀮𑁆𑀮𑀓𑁂𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀸𑀢𑀼𑀧𑁄𑀲𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀤𑀸𑀭𑀓𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀫𑀸𑀢𑀼𑀤𑁂𑀯𑀢𑁄 𑀳𑀼𑀢𑁆𑀯𑀸 𑀫𑀼𑀔𑀥𑁄𑀯𑀦𑀤𑀦𑁆𑀢𑀓𑀝𑁆𑀞𑀤𑀸𑀦𑀦𑁆𑀳𑀸𑀧𑀦𑀧𑀸𑀤𑀥𑁄𑀯𑀦𑀸𑀤𑀺𑀯𑁂𑀬𑁆𑀬𑀸𑀯𑀘𑁆𑀘𑀓𑀫𑁆𑀫𑁂𑀦 𑀘𑁂𑀯 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀘 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀺. 𑀅𑀣 𑀦𑀁 𑀫𑀸𑀢𑀸 ‘‘𑀢𑀸𑀢, 𑀢𑀯 𑀅𑀜𑁆𑀜𑀸𑀦𑀺𑀧𑀺 𑀖𑀭𑀸𑀯𑀸𑀲𑀓𑀺𑀘𑁆𑀘𑀸𑀦𑀺 𑀅𑀢𑁆𑀣𑀺, 𑀏𑀓𑀁 𑀲𑀫𑀚𑀸𑀢𑀺𑀓𑀁 𑀓𑀼𑀮𑀓𑀼𑀫𑀸𑀭𑀺𑀓𑀁 𑀕𑀡𑁆𑀳𑀸𑀳𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀺, 𑀢𑁆𑀯𑀫𑁆𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀅𑀫𑁆𑀫, 𑀅𑀳𑀁 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀅𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀸𑀫𑀺, 𑀓𑁄 𑀅𑀜𑁆𑀜𑁄 𑀏𑀯𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺? ‘‘𑀓𑀼𑀮𑀯𑀟𑁆𑀠𑀦𑀓𑀫𑁆𑀫𑀁 𑀦𑀸𑀫 𑀢𑀸𑀢, 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀦 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀅𑀳𑀁 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀥𑀽𑀫𑀓𑀸𑀮𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀫𑀸𑀢𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸𑀧𑀺 𑀫𑀦𑀁 𑀅𑀮𑀪𑀫𑀸𑀦𑀸 𑀢𑀲𑁆𑀲 𑀙𑀦𑁆𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀚𑀸𑀢𑀺𑀓𑀁 𑀓𑀼𑀮𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀺. 𑀲𑁄 𑀫𑀸𑀢𑀭𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸𑀧𑀺 ‘‘𑀫𑀬𑁆𑀳𑀁 𑀲𑀸𑀫𑀺𑀓𑁄 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀫𑀸𑀢𑀭𑀁 𑀉𑀧𑀝𑁆𑀞𑀳𑀢𑀺, 𑀅𑀳𑀫𑁆𑀧𑀺 𑀦𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀏𑀯𑀫𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺. 𑀲𑁄 ‘‘𑀅𑀬𑀁 𑀫𑁂 𑀫𑀸𑀢𑀭𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀻’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀮𑀤𑁆𑀥𑀸𑀦𑀺 𑀫𑀥𑀼𑀭𑀔𑀸𑀤𑀦𑀻𑀬𑀸𑀤𑀻𑀦𑀺 𑀢𑀲𑁆𑀲𑀸𑀬𑁂𑀯 𑀤𑁂𑀢𑀺. 𑀲𑀸 𑀅𑀧𑀭𑀪𑀸𑀕𑁂 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀮𑀤𑁆𑀥𑀮𑀤𑁆𑀥𑀸𑀦𑀺 𑀫𑀥𑀼𑀭𑀔𑀸𑀤𑀦𑀻𑀬𑀸𑀤𑀻𑀦𑀺 𑀫𑀬𑁆𑀳𑀜𑁆𑀜𑁂𑀯 𑀤𑁂𑀢𑀺, 𑀅𑀤𑁆𑀥𑀸 𑀫𑀸𑀢𑀭𑀁 𑀦𑀻𑀳𑀭𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀦𑀻𑀳𑀭𑀡𑀽𑀧𑀸𑀬𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀏𑀓𑀁 𑀤𑀺𑀯𑀲𑀁 𑀆𑀳 𑁋 ‘‘𑀲𑀸𑀫𑀺, 𑀢𑀬𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁂 𑀢𑀯 𑀫𑀸𑀢𑀸 𑀫𑀁 𑀅𑀓𑁆𑀓𑁄𑀲𑀢𑀻’’𑀢𑀺. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑀳𑀮𑁆𑀮𑀺𑀓𑀁 𑀉𑀚𑁆𑀛𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀧𑀝𑀺𑀓𑀽𑀮𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀕𑀼𑀁 𑀤𑀤𑀫𑀸𑀦𑀸 𑀅𑀘𑁆𑀘𑀼𑀡𑁆𑀳𑀁 𑀯𑀸 𑀅𑀢𑀺𑀲𑀻𑀢𑀮𑀁 𑀯𑀸 𑀅𑀢𑀺𑀮𑁄𑀡𑀁 𑀯𑀸 𑀅𑀮𑁄𑀡𑀁 𑀯𑀸 𑀤𑁂𑀢𑀺. ‘‘𑀅𑀫𑁆𑀫, 𑀅𑀘𑁆𑀘𑀼𑀡𑁆𑀳𑀸’’𑀢𑀺 𑀯𑀸 ‘‘𑀅𑀢𑀺𑀮𑁄𑀡𑀸’’𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀲𑀻𑀢𑁄𑀤𑀓𑀁 𑀧𑀓𑁆𑀔𑀺𑀧𑀢𑀺. 𑀧𑀼𑀦 ‘‘𑀅𑀢𑀺𑀲𑀻𑀢𑀮𑀸, 𑀅𑀮𑁄𑀡𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀸𑀦𑁂𑀯 ‘𑀅𑀘𑁆𑀘𑀼𑀡𑁆𑀳𑀸, 𑀅𑀢𑀺𑀮𑁄𑀡𑀸’𑀢𑀺 𑀯𑀢𑁆𑀯𑀸 𑀧𑀼𑀦 ‘𑀅𑀢𑀺𑀲𑀻𑀢𑀮𑀸, 𑀅𑀮𑁄𑀡𑀸’𑀢𑀺 𑀯𑀤𑀲𑀺, 𑀓𑀸 𑀢𑀁 𑀢𑁄𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀢𑀺. 𑀦𑁆𑀳𑀸𑀦𑁄𑀤𑀓𑀫𑁆𑀧𑀺 𑀅𑀘𑁆𑀘𑀼𑀡𑁆𑀳𑀁 𑀓𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀆𑀲𑀺𑀜𑁆𑀘𑀢𑀺. ‘‘𑀅𑀫𑁆𑀫, 𑀧𑀺𑀝𑁆𑀞𑀺 𑀫𑁂 𑀤𑀳𑀢𑀻’’𑀢𑀺 𑀘 𑀯𑀼𑀢𑁆𑀢𑁂 𑀧𑀼𑀦 𑀧𑀽𑀭𑁂𑀢𑁆𑀯𑀸 𑀲𑀻𑀢𑁄𑀤𑀓𑀁 𑀧𑀓𑁆𑀔𑀺𑀧𑀢𑀺. ‘‘𑀅𑀢𑀺𑀲𑀻𑀢𑀁, 𑀅𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀸𑀦𑁂𑀯 ‘𑀅𑀘𑁆𑀘𑀼𑀡𑁆𑀳’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘𑀅𑀢𑀺𑀲𑀻𑀢’𑀦𑁆𑀢𑀺 𑀯𑀤𑀢𑀺, 𑀓𑀸 𑀏𑀢𑀺𑀲𑁆𑀲𑀸 𑀅𑀯𑀫𑀸𑀦𑀁 𑀲𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀯𑀺𑀲𑁆𑀲𑀓𑀸𑀦𑀁 𑀓𑀣𑁂𑀲𑀺. ‘‘𑀅𑀫𑁆𑀫, 𑀫𑀜𑁆𑀘𑀓𑁂 𑀫𑁂 𑀩𑀳𑀽 𑀫𑀗𑁆𑀕𑀼𑀮𑀸’’𑀢𑀺 𑀘 𑀯𑀼𑀢𑁆𑀢𑀸 𑀫𑀜𑁆𑀘𑀓𑀁 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀅𑀢𑁆𑀢𑀦𑁄 𑀫𑀜𑁆𑀘𑀓𑀁 𑀧𑁄𑀣𑁂𑀢𑁆𑀯𑀸 ‘‘𑀧𑁄𑀣𑀺𑀢𑁄 𑀫𑁂’’𑀢𑀺 𑀅𑀢𑀺𑀳𑀭𑀺𑀢𑁆𑀯𑀸 𑀧𑀜𑁆𑀜𑀧𑁂𑀢𑀺. 𑀫𑀳𑀸𑀉𑀧𑀸𑀲𑀺𑀓𑀸 𑀤𑀺𑀕𑀼𑀡𑁂𑀳𑀺 𑀫𑀗𑁆𑀕𑀼𑀮𑁂𑀳𑀺 𑀔𑀚𑁆𑀚𑀫𑀸𑀦𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀲𑀺𑀦𑁆𑀦𑀸𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀅𑀫𑁆𑀫, 𑀲𑀩𑁆𑀩𑀭𑀢𑁆𑀢𑀺𑀁 𑀫𑀗𑁆𑀕𑀼𑀮𑁂𑀳𑀺 𑀔𑀸𑀤𑀺𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺. 𑀇𑀢𑀭𑀸 ‘‘𑀳𑀺𑀬𑁆𑀬𑁄 𑀢𑁂 𑀫𑀜𑁆𑀘𑀓𑁄 𑀧𑁄𑀣𑀺𑀢𑁄, 𑀓𑀸 𑀇𑀫𑀺𑀲𑁆𑀲𑀸 𑀓𑀺𑀘𑁆𑀘𑀁 𑀦𑀺𑀢𑁆𑀣𑀭𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀧𑀝𑀺𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀦𑀁 𑀧𑀼𑀢𑁆𑀢𑁂𑀦 𑀉𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 ‘‘𑀓𑀸 𑀇𑀫𑀁 𑀲𑀓𑀮𑀕𑁂𑀳𑀁 𑀅𑀲𑀼𑀘𑀺𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀢𑀸 𑀢𑁂 𑀏𑀯𑀭𑀽𑀧𑀁 𑀓𑀭𑁄𑀢𑀺, ‘𑀫𑀸 𑀓𑀭𑀻’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀓𑀮𑀳𑀁 𑀓𑀭𑁄𑀢𑀺, 𑀅𑀳𑀁 𑀏𑀯𑀭𑀽𑀧𑀸𑀬 𑀓𑀸𑀴𑀓𑀡𑁆𑀡𑀺𑀬𑀸 𑀲𑀤𑁆𑀥𑀺𑀁 𑀏𑀓𑀕𑁂𑀳𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀢𑀁 𑀯𑀸 𑀖𑀭𑁂 𑀯𑀲𑀸𑀧𑁂𑀳𑀺, 𑀫𑀁 𑀯𑀸’’𑀢𑀺 𑀆𑀳.

𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀢𑀭𑀼𑀡𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀚𑀻𑀯𑀺𑀢𑀼𑀁 𑀲𑀓𑁆𑀓𑀸, 𑀫𑀸𑀢𑀸 𑀧𑀦 𑀫𑁂 𑀚𑀭𑀸𑀤𑀼𑀩𑁆𑀩𑀮𑀸, 𑀅𑀳𑀫𑁂𑀯𑀲𑁆𑀲𑀸 𑀧𑀝𑀺𑀲𑀭𑀡𑀁, 𑀢𑁆𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀕𑁂𑀳𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀻𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀦 𑀲𑀓𑁆𑀓𑀸 𑀇𑀫𑀁 𑀫𑀸𑀢𑀼 𑀅𑀦𑁆𑀢𑀭𑁂 𑀪𑀺𑀦𑁆𑀤𑀺𑀢𑀼𑀁, 𑀏𑀓𑀁𑀲𑁂𑀦𑀲𑁆𑀲 𑀫𑀸𑀢𑀸 𑀧𑀺𑀬𑀸, 𑀲𑀘𑁂 𑀧𑀦𑀸𑀳𑀁 𑀓𑀼𑀮𑀖𑀭𑀁 𑀕𑀫𑀺𑀲𑁆𑀲𑀁, 𑀯𑀺𑀥𑀯𑀯𑀸𑀲𑀁 𑀯𑀲𑀦𑁆𑀢𑀻 𑀤𑀼𑀓𑁆𑀔𑀺𑀢𑀸 𑀪𑀯𑀺𑀲𑁆𑀲𑀸𑀫𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀲𑁆𑀲𑀼𑀁 𑀆𑀭𑀸𑀥𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀫𑀲𑀤𑀺𑀲𑀫𑁂𑀯 𑀢𑀁 𑀧𑀝𑀺𑀚𑀕𑁆𑀕𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀉𑀧𑁄𑀲𑀓𑁄 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. ‘‘𑀓𑀺𑀁, 𑀉𑀧𑀸𑀲𑀓, 𑀢𑁆𑀯𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀦 𑀧𑀫𑀚𑁆𑀚𑀲𑀺, 𑀫𑀸𑀢𑀼𑀉𑀧𑀝𑁆𑀞𑀸𑀦𑀓𑀫𑁆𑀫𑀁 𑀧𑀽𑀭𑁂𑀲𑀻’’𑀢𑀺 𑀘 𑀯𑀼𑀢𑁆𑀢𑁄 ‘‘𑀆𑀫, 𑀪𑀦𑁆𑀢𑁂, 𑀲𑀸 𑀧𑀦 𑀫𑀫 𑀫𑀸𑀢𑀸 𑀫𑀬𑁆𑀳𑀁 𑀅𑀭𑀼𑀘𑀺𑀬𑀸𑀬𑁂𑀯 𑀏𑀓𑀁 𑀓𑀼𑀮𑀤𑀸𑀭𑀺𑀓𑀁 𑀆𑀦𑁂𑀲𑀺, 𑀲𑀸 𑀇𑀤𑀜𑁆𑀘𑀺𑀤𑀜𑁆𑀘 𑀅𑀦𑀸𑀘𑀸𑀭𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀲𑀩𑁆𑀩𑀁 𑀲𑀢𑁆𑀣𑀼 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀢𑀺 𑀪𑀕𑀯𑀸 𑀲𑀸 𑀇𑀢𑁆𑀣𑀻 𑀦𑁂𑀯 𑀫𑀁 𑀫𑀸𑀢𑀼 𑀅𑀦𑁆𑀢𑀭𑁂 𑀪𑀺𑀦𑁆𑀤𑀺𑀢𑀼𑀁 𑀲𑀓𑁆𑀔𑀺, 𑀇𑀤𑀸𑀦𑀺 𑀦𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀸𑀯 𑀢𑁆𑀯𑀁 𑀉𑀧𑀸𑀲𑀓, 𑀢𑀲𑁆𑀲𑀸 𑀯𑀘𑀦𑀁 𑀦 𑀅𑀓𑀸𑀲𑀺, 𑀧𑀼𑀩𑁆𑀩𑁂 𑀧𑀦𑁂𑀢𑀺𑀲𑁆𑀲𑀸 𑀯𑀘𑀦𑁂𑀦 𑀢𑀯 𑀫𑀸𑀢𑀭𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀫𑀁 𑀦𑀺𑀲𑁆𑀲𑀸𑀬 𑀧𑀼𑀦 𑀕𑁂𑀳𑀁 𑀆𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀫𑀸𑀢𑀼𑀤𑁂𑀯𑀢𑁄 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. ‘‘𑀅𑀳𑀁 𑀏𑀯𑀭𑀽𑀧𑀸𑀬 𑀓𑀸𑀴𑀓𑀡𑁆𑀡𑀺𑀬𑀸 𑀲𑀤𑁆𑀥𑀺𑀁 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀢𑀁 𑀯𑀸 𑀖𑀭𑁂 𑀯𑀲𑀸𑀧𑁂𑀳𑀺, 𑀫𑀁 𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀓𑀣𑀁 𑀕𑀳𑁂𑀢𑁆𑀯𑀸 ‘‘𑀫𑀸𑀢𑀼𑀬𑁂𑀯 𑀫𑁂 𑀤𑁄𑀲𑁄’’𑀢𑀺 𑀫𑀸𑀢𑀭𑀁 𑀆𑀳 ‘‘𑀅𑀫𑁆𑀫, 𑀢𑁆𑀯𑀁 𑀦𑀺𑀘𑁆𑀘𑀁 𑀇𑀫𑀲𑁆𑀫𑀺𑀁 𑀖𑀭𑁂 𑀓𑀮𑀳𑀁 𑀓𑀭𑁄𑀲𑀺, 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀬𑀣𑀸𑀭𑀼𑀘𑀺𑀢𑁂 𑀞𑀸𑀦𑁂 𑀯𑀲𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀭𑁄𑀤𑀫𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀲𑀫𑀺𑀤𑁆𑀥𑀓𑀼𑀮𑀁 𑀦𑀺𑀲𑁆𑀲𑀸𑀬 𑀪𑀢𑀺𑀁 𑀓𑀢𑁆𑀯𑀸 𑀤𑀼𑀓𑁆𑀔𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑀲𑁆𑀲𑀼𑀬𑀸 𑀖𑀭𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀲𑀼𑀡𑀺𑀲𑀸𑀬 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 ‘‘𑀢𑀸𑀬 𑀓𑀸𑀴𑀓𑀡𑁆𑀡𑀺𑀬𑀸 𑀕𑁂𑀳𑁂 𑀯𑀲𑀫𑀸𑀦𑀸𑀬 𑀕𑀩𑁆𑀪𑀫𑁆𑀧𑀺 𑀦 𑀧𑀝𑀺𑀮𑀪𑀺𑀁, 𑀇𑀤𑀸𑀦𑀺 𑀫𑁂 𑀕𑀩𑁆𑀪𑁄 𑀮𑀤𑁆𑀥𑁄’’𑀢𑀺 𑀧𑀢𑀺𑀦𑁄 𑀘 𑀧𑀝𑀺𑀯𑀺𑀲𑁆𑀲𑀓𑀸𑀦𑀜𑁆𑀘 𑀓𑀣𑁂𑀦𑁆𑀢𑀻 𑀯𑀺𑀘𑀭𑀢𑀺.

𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀸𑀫𑀺𑀓𑀁 𑀆𑀳 ‘‘𑀢𑀯 𑀫𑀸𑀢𑀭𑀺 𑀕𑁂𑀳𑁂 𑀯𑀲𑀫𑀸𑀦𑀸𑀬 𑀧𑀼𑀢𑁆𑀢𑀁 𑀦 𑀮𑀪𑀺𑀁, 𑀇𑀤𑀸𑀦𑀺 𑀫𑁂 𑀮𑀤𑁆𑀥𑁄, 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀢𑀲𑁆𑀲𑀸 𑀓𑀸𑀴𑀓𑀡𑁆𑀡𑀺𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺. 𑀇𑀢𑀭𑀸 ‘‘𑀫𑀫 𑀓𑀺𑀭 𑀦𑀺𑀓𑁆𑀓𑀟𑁆𑀠𑀺𑀢𑀓𑀸𑀮𑁂 𑀧𑀼𑀢𑁆𑀢𑀁 𑀮𑀪𑀻’’𑀢𑀺 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀤𑁆𑀥𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀥𑀫𑁆𑀫𑁄 𑀫𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀳𑀺 𑀥𑀫𑁆𑀫𑁄 𑀫𑀢𑁄 𑀦 𑀪𑀯𑁂𑀬𑁆𑀬, 𑀫𑀸𑀢𑀭𑀁 𑀧𑁄𑀣𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀸 𑀧𑀼𑀢𑁆𑀢𑀁 𑀦 𑀮𑀪𑁂𑀬𑁆𑀬𑀼𑀁, 𑀲𑀼𑀔𑀁 𑀦 𑀚𑀻𑀯𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀫𑀢𑀓𑀪𑀢𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀢𑀺𑀮𑀧𑀺𑀝𑁆𑀞𑀜𑁆𑀘 𑀢𑀡𑁆𑀟𑀼𑀮𑀜𑁆𑀘 𑀧𑀘𑀦𑀣𑀸𑀮𑀺𑀜𑁆𑀘 𑀤𑀩𑁆𑀩𑀺𑀜𑁆𑀘 𑀆𑀤𑀸𑀬 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀢𑀻𑀳𑀺 𑀫𑀦𑀼𑀲𑁆𑀲𑀲𑀻𑀲𑁂𑀳𑀺 𑀉𑀤𑁆𑀥𑀦𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀉𑀤𑀓𑀁 𑀑𑀭𑀼𑀬𑁆𑀳 𑀲𑀲𑀻𑀲𑀁 𑀦𑁆𑀳𑀢𑁆𑀯𑀸 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀤𑁆𑀥𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑁂𑀲𑁂 𑀫𑁄𑀘𑁂𑀢𑁆𑀯𑀸 𑀢𑀡𑁆𑀟𑀼𑀮𑁂 𑀥𑁄𑀯𑀺𑀢𑀼𑀁 𑀆𑀭𑀪𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑀸 𑀘 𑀦𑀸𑀫 𑀅𑀧𑁆𑀧𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 ‘‘𑀥𑀫𑁆𑀫𑁄 𑀫𑀢𑁄’’𑀢𑀺 𑀲𑀜𑁆𑀜𑀸𑀬 𑀥𑀫𑁆𑀫𑀲𑁆𑀲 𑀫𑀢𑀓𑀪𑀢𑁆𑀢𑀁 𑀤𑀸𑀢𑀼𑀓𑀸𑀫𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀩𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀫𑀳𑀸𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 ‘‘𑀅𑀫𑁆𑀫, 𑀲𑀼𑀲𑀸𑀦𑁂 𑀆𑀳𑀸𑀭𑀁 𑀧𑀘𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑁆𑀯𑀁 𑀇𑀫𑀺𑀦𑀸 𑀇𑀥 𑀧𑀓𑁆𑀓𑁂𑀦 𑀢𑀺𑀮𑁄𑀤𑀦𑁂𑀦 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧. ‘‘𑀑𑀤𑀸𑀢𑀯𑀢𑁆𑀣𑀸 𑀲𑀼𑀘𑀺 𑀅𑀮𑁆𑀮𑀓𑁂𑀲𑀸, 𑀓𑀘𑁆𑀘𑀸𑀦𑀺 𑀓𑀺𑀁 𑀓𑀼𑀫𑁆𑀪𑀺𑀫𑀥𑀺𑀲𑁆𑀲𑀬𑀺𑀢𑁆𑀯𑀸;

𑀧𑀺𑀝𑁆𑀞𑀸 𑀢𑀺𑀮𑀸 𑀥𑁄𑀯𑀲𑀺 𑀢𑀡𑁆𑀟𑀼𑀮𑀸𑀦𑀺, 𑀢𑀺𑀮𑁄𑀤𑀦𑁄 𑀳𑁂𑀳𑀺𑀢𑀺 𑀓𑀺𑀲𑁆𑀲𑀳𑁂𑀢𑀽’’𑀢𑀺.

𑀢𑀢𑁆𑀣 𑀓𑀘𑁆𑀘𑀸𑀦𑀻𑀢𑀺 𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀓𑀼𑀫𑁆𑀪𑀺𑀫𑀥𑀺𑀲𑁆𑀲𑀬𑀺𑀢𑁆𑀯𑀸𑀢𑀺 𑀧𑀘𑀦𑀣𑀸𑀮𑀺𑀓𑀁 𑀫𑀦𑀼𑀲𑁆𑀲𑀲𑀻𑀲𑀼𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸. 𑀳𑁂𑀳𑀺𑀢𑀻𑀢𑀺 𑀅𑀬𑀁 𑀢𑀺𑀮𑁄𑀤𑀦𑁄 𑀓𑀺𑀲𑁆𑀲 𑀳𑁂𑀢𑀼 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀅𑀜𑁆𑀜𑀁 𑀓𑀸𑀭𑀡𑀫𑀢𑁆𑀣𑀻𑀢𑀺.

𑀅𑀣𑀲𑁆𑀲 𑀲𑀸 𑀆𑀘𑀺𑀓𑁆𑀔𑀦𑁆𑀢𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨. ‘‘𑀦 𑀔𑁄 𑀅𑀬𑀁 𑀩𑁆𑀭𑀸𑀳𑁆𑀫𑀡 𑀪𑁄𑀚𑀦𑀢𑁆𑀣𑀸, 𑀢𑀺𑀮𑁄𑀤𑀦𑁄 𑀳𑁂𑀳𑀺𑀢𑀺 𑀲𑀸𑀥𑀼𑀧𑀓𑁆𑀓𑁄;

𑀥𑀫𑁆𑀫𑁄 𑀫𑀢𑁄 𑀢𑀲𑁆𑀲 𑀧𑀳𑀼𑀢𑁆𑀢𑀫𑀚𑁆𑀚, 𑀅𑀳𑀁 𑀓𑀭𑀺𑀲𑁆𑀲𑀸𑀫𑀺 𑀲𑀼𑀲𑀸𑀦𑀫𑀚𑁆𑀛𑁂’’𑀢𑀺.

𑀢𑀢𑁆𑀣 𑀥𑀫𑁆𑀫𑁄𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑁄 𑀘𑁂𑀯 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁄 𑀘. 𑀢𑀲𑁆𑀲 𑀧𑀳𑀼𑀢𑁆𑀢𑀫𑀚𑁆𑀚𑀸𑀢𑀺 𑀢𑀲𑁆𑀲𑀸𑀳𑀁 𑀥𑀫𑁆𑀫𑀲𑁆𑀲 𑀇𑀤𑀁 𑀫𑀢𑀓𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀢𑀢𑁄 𑀲𑀓𑁆𑀓𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩. ‘‘𑀅𑀦𑀼𑀯𑀺𑀘𑁆𑀘 𑀓𑀘𑁆𑀘𑀸𑀦𑀺 𑀓𑀭𑁄𑀳𑀺 𑀓𑀺𑀘𑁆𑀘𑀁, 𑀥𑀫𑁆𑀫𑁄 𑀫𑀢𑁄 𑀓𑁄 𑀦𑀼 𑀢𑀯𑁂𑀯 𑀲𑀁𑀲𑀺;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀅𑀢𑀼𑀮𑀸𑀦𑀼𑀪𑀸𑀯𑁄, 𑀦 𑀫𑀺𑀬𑁆𑀬𑀢𑀻 𑀥𑀫𑁆𑀫𑀯𑀭𑁄 𑀓𑀤𑀸𑀘𑀻’’𑀢𑀺.

𑀢𑀢𑁆𑀣 𑀅𑀦𑀼𑀯𑀺𑀘𑁆𑀘𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀓𑁄 𑀦𑀼 𑀢𑀯𑁂𑀯 𑀲𑀁𑀲𑀻𑀢𑀺 𑀓𑁄 𑀦𑀼 𑀢𑀯 𑀏𑀯𑀁 𑀆𑀘𑀺𑀓𑁆𑀔𑀺. 𑀲𑀳𑀲𑁆𑀲𑀦𑁂𑀢𑁆𑀢𑁄𑀢𑀺 𑀅𑀢𑁆𑀢𑀸𑀦𑀁 𑀥𑀫𑁆𑀫𑀯𑀭𑀁 𑀉𑀢𑁆𑀢𑀫𑀥𑀫𑁆𑀫𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪. ‘‘𑀤𑀴𑁆𑀳𑀧𑁆𑀧𑀫𑀸𑀡𑀁 𑀫𑀫 𑀏𑀢𑁆𑀣 𑀩𑁆𑀭𑀳𑁆𑀫𑁂, 𑀥𑀫𑁆𑀫𑁄 𑀫𑀢𑁄 𑀦𑀢𑁆𑀣𑀺 𑀫𑀫𑁂𑀢𑁆𑀣 𑀓𑀗𑁆𑀔𑀸;

𑀬𑁂 𑀬𑁂𑀯 𑀤𑀸𑀦𑀺 𑀧𑀸𑀧𑀸 𑀪𑀯𑀦𑁆𑀢𑀺, 𑀢𑁂 𑀢𑁂𑀯 𑀤𑀸𑀦𑀺 𑀲𑀼𑀔𑀺𑀢𑀸 𑀪𑀯𑀦𑁆𑀢𑀺.

𑁫. ‘‘𑀲𑀼𑀡𑀺𑀲𑀸 𑀳𑀺 𑀫𑀬𑁆𑀳𑀁 𑀯𑀜𑁆𑀛𑀸 𑀅𑀳𑁄𑀲𑀺, 𑀲𑀸 𑀫𑀁 𑀯𑀥𑀺𑀢𑁆𑀯𑀸𑀦 𑀯𑀺𑀚𑀸𑀬𑀺 𑀧𑀼𑀢𑁆𑀢𑀁;

𑀲𑀸 𑀤𑀸𑀦𑀺 𑀲𑀩𑁆𑀩𑀲𑁆𑀲 𑀓𑀼𑀮𑀲𑁆𑀲 𑀇𑀲𑁆𑀲𑀭𑀸, 𑀅𑀳𑀁 𑀧𑀦𑀫𑁆𑀳𑀺 𑀅𑀧𑀯𑀺𑀤𑁆𑀥𑀸 𑀏𑀓𑀺𑀓𑀸’’𑀢𑀺.

𑀢𑀢𑁆𑀣 𑀤𑀴𑁆𑀳𑀧𑁆𑀧𑀫𑀸𑀡𑀦𑁆𑀢𑀺 𑀤𑀴𑁆𑀳𑀁 𑀣𑀺𑀭𑀁 𑀦𑀺𑀲𑁆𑀲𑀁𑀲𑀬𑀁 𑀩𑁆𑀭𑀸𑀳𑁆𑀫𑀡 𑀏𑀢𑁆𑀣 𑀫𑀫 𑀧𑀫𑀸𑀡𑀦𑁆𑀢𑀺 𑀯𑀤𑀢𑀺. 𑀬𑁂 𑀬𑁂𑀢𑀺 𑀢𑀲𑁆𑀲 𑀫𑀢𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑀻 𑀏𑀯𑀫𑀸𑀳. 𑀯𑀥𑀺𑀢𑁆𑀯𑀸𑀦𑀸𑀢𑀺 𑀧𑁄𑀣𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸. 𑀅𑀧𑀯𑀺𑀤𑁆𑀥𑀸𑀢𑀺 𑀙𑀟𑁆𑀟𑀺𑀢𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀏𑀓𑀺𑀓𑀸 𑀯𑀲𑀸𑀫𑀺.

𑀢𑀢𑁄 𑀲𑀓𑁆𑀓𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁬. ‘‘𑀚𑀻𑀯𑀸𑀫𑀺 𑀯𑁄𑀳𑀁 𑀦 𑀫𑀢𑁄𑀳𑀫𑀲𑁆𑀫𑀺, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑁄𑀲𑁆𑀫𑀺;

𑀬𑀸 𑀢𑀁 𑀯𑀥𑀺𑀢𑁆𑀯𑀸𑀦 𑀯𑀺𑀚𑀸𑀬𑀺 𑀧𑀼𑀢𑁆𑀢𑀁, 𑀲𑀳𑀸𑀯 𑀧𑀼𑀢𑁆𑀢𑁂𑀦 𑀓𑀭𑁄𑀫𑀺 𑀪𑀲𑁆𑀫’’𑀦𑁆𑀢𑀺.

𑀢𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑀇𑀢𑀭𑀸 𑀢𑀁 𑀲𑀼𑀢𑁆𑀯𑀸 ‘‘𑀥𑀻 𑀅𑀳𑀁 𑀓𑀺𑀁 𑀓𑀣𑁂𑀲𑀺𑀁, 𑀫𑀫 𑀦𑀢𑁆𑀢𑀼 𑀅𑀫𑀭𑀡𑀓𑀸𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭. ‘‘𑀏𑀯𑀜𑁆𑀘 𑀢𑁂 𑀭𑀼𑀘𑁆𑀘𑀢𑀺 𑀤𑁂𑀯𑀭𑀸𑀚, 𑀫𑀫𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑁄𑀲𑀺;

𑀅𑀳𑀜𑁆𑀘 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀫𑀸’’𑀢𑀺.

𑀅𑀣𑀲𑁆𑀲𑀸 𑀲𑀓𑁆𑀓𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁮. ‘‘𑀏𑀯𑀜𑁆𑀘 𑀢𑁂 𑀭𑀼𑀘𑁆𑀘𑀢𑀺 𑀓𑀸𑀢𑀺𑀬𑀸𑀦𑀺, 𑀳𑀢𑀸𑀧𑀺 𑀲𑀦𑁆𑀢𑀸 𑀦 𑀚𑀳𑀸𑀲𑀺 𑀥𑀫𑁆𑀫𑀁;

𑀢𑀼𑀯𑀜𑁆𑀘 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀣𑀸’’𑀢𑀺.

𑀢𑀢𑁆𑀣 𑀳𑀢𑀸𑀧𑀺 𑀲𑀦𑁆𑀢𑀸𑀢𑀺 𑀬𑀤𑀺 𑀢𑁆𑀯𑀁 𑀧𑁄𑀣𑀺𑀢𑀸𑀧𑀺 𑀦𑀺𑀓𑁆𑀓𑀟𑁆𑀠𑀺𑀢𑀸𑀧𑀺 𑀲𑀫𑀸𑀦𑀸 𑀢𑀯 𑀤𑀸𑀭𑀓𑁂𑀲𑀼 𑀫𑁂𑀢𑁆𑀢𑀥𑀫𑁆𑀫𑀁 𑀦 𑀚𑀳𑀸𑀲𑀺, 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀢𑁆𑀯𑀁 𑀇𑀘𑁆𑀙𑀲𑀺, 𑀢𑀣𑀸 𑀳𑁄𑀢𑀼, 𑀅𑀳𑀁 𑀢𑁂 𑀇𑀫𑀲𑁆𑀫𑀺𑀁 𑀕𑀼𑀡𑁂 𑀧𑀲𑀦𑁆𑀦𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑀘𑁆𑀘𑀸𑀦𑀺 𑀢𑁆𑀯𑀁 𑀫𑀸 𑀪𑀸𑀬𑀺, 𑀧𑀼𑀢𑁆𑀢𑁄 𑀘 𑀢𑁂 𑀲𑀼𑀡𑀺𑀲𑀸 𑀘 𑀫𑀫𑀸𑀦𑀼𑀪𑀸𑀯𑁂𑀦 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀔𑀫𑀸𑀧𑁂𑀢𑁆𑀯𑀸 𑀆𑀤𑀸𑀬 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀞𑀸𑀦𑀫𑁂𑀯 𑀕𑀢𑁄. 𑀢𑁂𑀧𑀺 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀢𑀲𑁆𑀲𑀸 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀓𑀳𑀁 𑀦𑁄 𑀫𑀸𑀢𑀸’’𑀢𑀺 𑀅𑀦𑁆𑀢𑁄𑀕𑀸𑀫𑁂 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀼𑀲𑀸𑀦𑀸𑀪𑀺𑀫𑀼𑀔𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀫𑁆𑀫, 𑀅𑀫𑁆𑀫𑀸’’𑀢𑀺 𑀲𑀼𑀲𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸𑀯 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀅𑀫𑁆𑀫, 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀔𑀫𑀸𑀳𑀻’’𑀢𑀺 𑀢𑀁 𑀔𑀫𑀸𑀧𑁂𑀲𑀼𑀁. 𑀲𑀸𑀧𑀺 𑀦𑀢𑁆𑀢𑀸𑀭𑀁 𑀕𑀡𑁆𑀳𑀺. 𑀇𑀢𑀺 𑀢𑁂 𑀲𑀫𑁆𑀫𑁄𑀤𑀫𑀸𑀦𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼.

𑁯. ‘‘𑀲𑀸 𑀓𑀸𑀢𑀺𑀬𑀸𑀦𑀻 𑀲𑀼𑀡𑀺𑀲𑀸𑀬 𑀲𑀤𑁆𑀥𑀺𑀁, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑀺𑀢𑁆𑀣;

𑀧𑀼𑀢𑁆𑀢𑁄 𑀘 𑀦𑀢𑁆𑀢𑀸 𑀘 𑀉𑀧𑀝𑁆𑀞𑀳𑀺𑀁𑀲𑀼, 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀥𑀺𑀕𑁆𑀕𑀳𑀻𑀢𑀸’’𑀢𑀺. 𑁋

𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 𑀲𑀸 𑀓𑀸𑀢𑀺𑀬𑀸𑀦𑀻𑀢𑀺 𑀪𑀺𑀓𑁆𑀔𑀯𑁂, 𑀲𑀸 𑀓𑀘𑁆𑀘𑀸𑀦𑀕𑁄𑀢𑁆𑀢𑀸. 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀥𑀺𑀕𑁆𑀕𑀳𑀻𑀢𑀸𑀢𑀺 𑀤𑁂𑀯𑀺𑀦𑁆𑀤𑁂𑀦 𑀲𑀓𑁆𑀓𑁂𑀦 𑀅𑀦𑀼𑀕𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀽𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀸𑀢𑀼𑀧𑁄𑀲𑀓𑁄 𑀏𑀢𑀭𑀳𑀺 𑀫𑀸𑀢𑀼𑀧𑁄𑀲𑀓𑁄 𑀅𑀳𑁄𑀲𑀺, 𑀪𑀭𑀺𑀬𑀸𑀧𑀺𑀲𑁆𑀲 𑀢𑀤𑀸 𑀪𑀭𑀺𑀬𑀸𑀬𑁂𑀯, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀘𑁆𑀘𑀸𑀦𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁧𑁮] 𑁨. 𑀅𑀝𑁆𑀞𑀲𑀤𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀇𑀤𑀁 𑀧𑀼𑀭𑁂 𑀦𑀺𑀦𑁆𑀦𑀫𑀸𑀳𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀲𑀼𑀢𑀁 𑀪𑀺𑀁𑀲𑀦𑀓𑀁 𑀅𑀯𑀺𑀦𑀺𑀩𑁆𑀪𑁄𑀕𑀲𑀤𑁆𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀮𑁄𑀳𑀓𑀼𑀫𑁆𑀪𑀺𑀚𑀸𑀢𑀓𑁂 (𑀚𑀸. 𑁧.𑁪.𑁫𑁩 𑀆𑀤𑀬𑁄) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀼𑀢𑀢𑁆𑀢𑀸 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀦 𑀢𑁂 𑀏𑀢𑁂𑀲𑀁 𑀲𑀼𑀢𑀧𑀘𑁆𑀘𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀦 𑀳𑀺, 𑀫𑀳𑀸𑀭𑀸𑀚, 𑀏𑀯𑀭𑀽𑀧𑀁 𑀪𑀬𑀸𑀦𑀓𑀁 𑀅𑀯𑀺𑀦𑀺𑀩𑁆𑀪𑁄𑀕𑀲𑀤𑁆𑀤𑀁 𑀢𑁆𑀯𑀫𑁂𑀯𑁂𑀓𑁄 𑀲𑀼𑀡𑀺, 𑀧𑀼𑀩𑁆𑀩𑁂𑀧𑀺 𑀭𑀸𑀚𑀸𑀦𑁄 𑀏𑀯𑀭𑀽𑀧𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀁 𑀬𑀚𑀺𑀢𑀼𑀓𑀸𑀫𑀸 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀜𑁆𑀜𑀳𑀭𑀡𑀢𑁆𑀣𑀸𑀬 𑀕𑀳𑀺𑀢𑀲𑀢𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑁂 𑀫𑀸𑀖𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀭𑀢𑀦𑀯𑀺𑀮𑁄𑀓𑀦𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀺𑀪𑀯𑀚𑀸𑀢𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀘𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀲𑀺𑀭𑀺𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀅𑀝𑁆𑀞 𑀲𑀤𑁆𑀤𑁂 𑀅𑀲𑁆𑀲𑁄𑀲𑀺 𑁋 𑀧𑀞𑀫𑀁 𑀭𑀸𑀚𑀦𑀺𑀯𑁂𑀲𑀦𑀲𑀸𑀫𑀦𑁆𑀢𑀸 𑀉𑀬𑁆𑀬𑀸𑀦𑁂 𑀏𑀓𑁄 𑀩𑀓𑁄 𑀲𑀤𑁆𑀤𑀫𑀓𑀸𑀲𑀺, 𑀤𑀼𑀢𑀺𑀬𑀁 𑀢𑀲𑁆𑀫𑀺𑀁 𑀲𑀤𑁆𑀤𑁂 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀬𑁂𑀯 𑀳𑀢𑁆𑀣𑀺𑀲𑀸𑀮𑀸𑀬 𑀢𑁄𑀭𑀡𑀦𑀺𑀯𑀸𑀲𑀺𑀦𑀻 𑀓𑀸𑀓𑀻 𑀲𑀤𑁆𑀤𑀫𑀓𑀸𑀲𑀺, 𑀢𑀢𑀺𑀬𑀁 𑀭𑀸𑀚𑀕𑁂𑀳𑁂 𑀓𑀡𑁆𑀡𑀺𑀓𑀸𑀬𑀁 𑀦𑀺𑀯𑀼𑀢𑁆𑀣𑀖𑀼𑀡𑀧𑀸𑀡𑀓𑁄 𑀲𑀤𑁆𑀤𑀫𑀓𑀸𑀲𑀺, 𑀘𑀢𑀼𑀢𑁆𑀣𑀁 𑀭𑀸𑀚𑀕𑁂𑀳𑁂 𑀧𑁄𑀲𑀸𑀯𑀦𑀺𑀬𑀓𑁄𑀓𑀺𑀮𑁄 𑀲𑀤𑁆𑀤𑀫𑀓𑀸𑀲𑀺, 𑀧𑀜𑁆𑀘𑀫𑀁 𑀢𑀢𑁆𑀣𑁂𑀯 𑀧𑁄𑀲𑀸𑀯𑀦𑀺𑀬𑀫𑀺𑀕𑁄 𑀲𑀤𑁆𑀤𑀫𑀓𑀸𑀲𑀺, 𑀙𑀝𑁆𑀞𑀁 𑀢𑀢𑁆𑀣𑁂𑀯 𑀧𑁄𑀲𑀸𑀯𑀦𑀺𑀬𑀯𑀸𑀦𑀭𑁄 𑀲𑀤𑁆𑀤𑀫𑀓𑀸𑀲𑀺, 𑀲𑀢𑁆𑀢𑀫𑀁 𑀢𑀢𑁆𑀣𑁂𑀯 𑀧𑁄𑀲𑀸𑀯𑀦𑀺𑀬𑀓𑀺𑀦𑁆𑀦𑀭𑁄 𑀲𑀤𑁆𑀤𑀫𑀓𑀸𑀲𑀺, 𑀅𑀝𑁆𑀞𑀫𑀁 𑀢𑀲𑁆𑀫𑀺𑀁 𑀲𑀤𑁆𑀤𑁂 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀬𑁂𑀯 𑀭𑀸𑀚𑀦𑀺𑀯𑁂𑀲𑀦𑀫𑀢𑁆𑀣𑀓𑁂𑀦 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀏𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀲𑀤𑁆𑀤𑀫𑀓𑀸𑀲𑀺.

𑀩𑀸𑀭𑀸𑀡𑀲𑀺𑀭𑀸𑀚𑀸 𑀇𑀫𑁂 𑀅𑀝𑁆𑀞 𑀲𑀤𑁆𑀤𑁂 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀧𑀼𑀦𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀅𑀦𑁆𑀢𑀭𑀸𑀬𑁄 𑀢𑁂, 𑀫𑀳𑀸𑀭𑀸𑀚, 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑀸 ‘‘𑀬𑀣𑀸𑀭𑀼𑀘𑀺𑀢𑀁 𑀓𑀭𑁄𑀣𑀸’’𑀢𑀺 𑀅𑀦𑀼𑀜𑁆𑀜𑀸𑀢𑀸 𑀳𑀝𑁆𑀞𑀧𑀳𑀝𑁆𑀞𑀸 𑀭𑀸𑀚𑀓𑀼𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀜𑁆𑀜𑀓𑀫𑁆𑀫𑀁 𑀆𑀭𑀪𑀺𑀁𑀲𑀼. 𑀅𑀣 𑀦𑁂𑀲𑀁 𑀚𑁂𑀝𑁆𑀞𑀓𑀲𑁆𑀲 𑀬𑀜𑁆𑀜𑀓𑀸𑀭𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀫𑀸𑀡𑀯𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀆𑀘𑀭𑀺𑀬𑀁 𑀆𑀳 𑁋 ‘‘𑀆𑀘𑀭𑀺𑀬, 𑀏𑀯𑀭𑀽𑀧𑀁 𑀓𑀓𑁆𑀔𑀴𑀁 𑀨𑀭𑀼𑀲𑀁 𑀅𑀲𑀸𑀢𑀁 𑀩𑀳𑀽𑀦𑀁 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑀓𑀫𑁆𑀫𑀁 𑀫𑀸 𑀓𑀭𑀻’’𑀢𑀺. ‘‘𑀢𑀸𑀢, 𑀢𑁆𑀯𑀁 𑀓𑀺𑀁 𑀚𑀸𑀦𑀸𑀲𑀺, 𑀲𑀘𑁂𑀧𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀪𑀯𑀺𑀲𑁆𑀲𑀢𑀺, 𑀫𑀘𑁆𑀙𑀫𑀁𑀲𑀁 𑀢𑀸𑀯 𑀩𑀳𑀼𑀁 𑀔𑀸𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. ‘‘𑀆𑀘𑀭𑀺𑀬, 𑀓𑀼𑀘𑁆𑀙𑀺𑀁 𑀦𑀺𑀲𑁆𑀲𑀸𑀬 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀫𑀁 𑀫𑀸 𑀓𑀭𑁄𑀣𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀲𑀩𑁆𑀭𑀸𑀳𑁆𑀫𑀡𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀢𑀻’’𑀢𑀺 𑀢𑀲𑁆𑀲 𑀓𑀼𑀚𑁆𑀛𑀺𑀁𑀲𑀼. 𑀫𑀸𑀡𑀯𑁄 𑀢𑁂𑀲𑀁 𑀪𑀬𑁂𑀦 ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂𑀯 𑀫𑀘𑁆𑀙𑀫𑀁𑀲𑀔𑀸𑀤𑀦𑀽𑀧𑀸𑀬𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀦𑀕𑀭𑁂 𑀭𑀸𑀚𑀸𑀦𑀁 𑀦𑀺𑀯𑀸𑀭𑁂𑀢𑀼𑀁 𑀲𑀫𑀢𑁆𑀣𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀁 𑀉𑀧𑀥𑀸𑀭𑁂𑀦𑁆𑀢𑁄 𑀭𑀸𑀚𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀸 𑀦𑀢𑁆𑀣𑀺, 𑀭𑀸𑀚𑀸 𑀩𑀳𑀽 𑀲𑀢𑁆𑀢𑁂 𑀫𑀸𑀭𑁂𑀢𑁆𑀯𑀸 𑀬𑀜𑁆𑀜𑀁 𑀬𑀚𑀸𑀧𑁂𑀢𑀺, 𑀓𑀺𑀁 𑀯𑁄 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀫𑀸𑀡𑀯, 𑀏𑀢𑁆𑀣 𑀦𑁂𑀯 𑀭𑀸𑀚𑀸 𑀅𑀫𑁆𑀳𑁂 𑀚𑀸𑀦𑀸𑀢𑀺, 𑀦 𑀫𑀬𑀁 𑀭𑀸𑀚𑀸𑀦𑀁 𑀚𑀸𑀦𑀸𑀫𑀸’’𑀢𑀺. ‘‘𑀚𑀸𑀦𑀸𑀣 𑀧𑀦, 𑀪𑀦𑁆𑀢𑁂, 𑀭𑀜𑁆𑀜𑀸 𑀲𑀼𑀢𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺’’𑀦𑁆𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. ‘‘𑀚𑀸𑀦𑀦𑁆𑀢𑀸 𑀭𑀜𑁆𑀜𑁄 𑀓𑀲𑁆𑀫𑀸 𑀦 𑀓𑀣𑁂𑀣𑀸’’𑀢𑀺? ‘‘𑀫𑀸𑀡𑀯 𑀓𑀺𑀁 𑀲𑀓𑁆𑀓𑀸 ‘𑀅𑀳𑀁 𑀚𑀸𑀦𑀸𑀫𑀻’𑀢𑀺 𑀦𑀮𑀸𑀝𑁂 𑀲𑀺𑀗𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀘𑀭𑀺𑀢𑀼𑀁, 𑀲𑀘𑁂 𑀇𑀥𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀓𑀣𑁂𑀲𑁆𑀲𑀸𑀫𑀻’’𑀢𑀺.

𑀫𑀸𑀡𑀯𑁄 𑀯𑁂𑀕𑁂𑀦 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀳𑀺 𑀲𑀼𑀢𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀚𑀸𑀦𑀦𑀓𑁄 𑀏𑀓𑁄 𑀢𑀸𑀧𑀲𑁄 𑀢𑀼𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑁄 ‘𑀲𑀘𑁂 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀓𑀣𑁂𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀕𑀦𑁆𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀭𑀸𑀚𑀸 𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀬𑀸 𑀲𑀼𑀢𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀓𑀣𑁂𑀣 𑀢𑀁 𑀫𑁂’’𑀢𑀺. ‘‘𑀫𑀳𑀸𑀭𑀸𑀚, 𑀢𑁂𑀲𑀁 𑀲𑀼𑀢𑀧𑀘𑁆𑀘𑀬𑀸 𑀢𑀯 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺, 𑀧𑁄𑀭𑀸𑀡𑀼𑀬𑁆𑀬𑀸𑀦𑁂 𑀧𑀦 𑀢𑁂 𑀏𑀓𑁄 𑀩𑀓𑁄 𑀅𑀢𑁆𑀣𑀺, 𑀲𑁄 𑀕𑁄𑀘𑀭𑀁 𑀅𑀮𑀪𑀦𑁆𑀢𑁄 𑀚𑀺𑀖𑀘𑁆𑀙𑀸𑀬 𑀧𑀭𑁂𑀢𑁄 𑀧𑀞𑀫𑀁 𑀲𑀤𑁆𑀤𑀫𑀓𑀸𑀲𑀻’’𑀢𑀺 𑀢𑀲𑁆𑀲 𑀓𑀺𑀭𑀺𑀬𑀁 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦. ‘‘𑀇𑀤𑀁 𑀧𑀼𑀭𑁂 𑀦𑀺𑀦𑁆𑀦𑀫𑀸𑀳𑀼, 𑀩𑀳𑀼𑀫𑀘𑁆𑀙𑀁 𑀫𑀳𑁄𑀤𑀓𑀁;

𑀆𑀯𑀸𑀲𑁄 𑀩𑀓𑀭𑀸𑀚𑀲𑁆𑀲, 𑀧𑁂𑀢𑁆𑀢𑀺𑀓𑀁 𑀪𑀯𑀦𑀁 𑀫𑀫;

𑀢𑁆𑀬𑀚𑁆𑀚 𑀪𑁂𑀓𑁂𑀦 𑀬𑀸𑀧𑁂𑀫, 𑀑𑀓𑀁 𑀦 𑀯𑀺𑀚𑀳𑀸𑀫𑀲𑁂’’𑀢𑀺.

𑀢𑀢𑁆𑀣 𑀇𑀤𑀦𑁆𑀢𑀺 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸 𑀳𑀺 𑀧𑀼𑀩𑁆𑀩𑁂 𑀉𑀤𑀓𑀢𑀼𑀫𑁆𑀩𑁂𑀦 𑀉𑀤𑀓𑁂 𑀧𑀯𑀺𑀲𑀦𑁆𑀢𑁂 𑀫𑀳𑁄𑀤𑀓𑀸 𑀩𑀳𑀼𑀫𑀘𑁆𑀙𑀸, 𑀇𑀤𑀸𑀦𑀺 𑀧𑀦 𑀉𑀤𑀓𑀲𑁆𑀲 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀦 𑀫𑀳𑁄𑀤𑀓𑀸 𑀚𑀸𑀢𑀸. 𑀢𑁆𑀬𑀚𑁆𑀚 𑀪𑁂𑀓𑁂𑀦𑀸𑀢𑀺 𑀢𑁂 𑀫𑀬𑀁 𑀅𑀚𑁆𑀚 𑀫𑀘𑁆𑀙𑁂 𑀅𑀮𑀪𑀦𑁆𑀢𑀸 𑀫𑀡𑁆𑀟𑀽𑀓𑀫𑀢𑁆𑀢𑁂𑀦 𑀬𑀸𑀧𑁂𑀫. 𑀑𑀓𑀦𑁆𑀢𑀺 𑀏𑀯𑀁 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑀸𑀧𑀺 𑀯𑀲𑀦𑀝𑁆𑀞𑀸𑀦𑀁 𑀦 𑀯𑀺𑀚𑀳𑀸𑀫.

𑀇𑀢𑀺, 𑀫𑀳𑀸𑀭𑀸𑀚, 𑀲𑁄 𑀩𑀓𑁄 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀲𑀤𑁆𑀤𑀫𑀓𑀸𑀲𑀺. 𑀲𑀘𑁂𑀧𑀺 𑀢𑀁 𑀚𑀺𑀖𑀘𑁆𑀙𑀸𑀢𑁄 𑀫𑁄𑀘𑁂𑀢𑀼𑀓𑀸𑀫𑁄, 𑀢𑀁 𑀉𑀬𑁆𑀬𑀸𑀦𑀁 𑀲𑁄𑀥𑀸𑀧𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀉𑀤𑀓𑀲𑁆𑀲 𑀧𑀽𑀭𑁂𑀳𑀻𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀢𑀼𑀁 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺.

‘‘𑀳𑀢𑁆𑀣𑀺𑀲𑀸𑀮𑀢𑁄𑀭𑀡𑁂 𑀧𑀦 𑀢𑁂, 𑀫𑀳𑀸𑀭𑀸𑀚, 𑀏𑀓𑀸 𑀓𑀸𑀓𑀻 𑀯𑀲𑀫𑀸𑀦𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁄𑀓𑁂𑀦 𑀤𑀼𑀢𑀺𑀬𑀁 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧. ‘‘𑀓𑁄 𑀤𑀼𑀢𑀺𑀬𑀁 𑀅𑀲𑀻𑀮𑀺𑀲𑁆𑀲, 𑀩𑀦𑁆𑀥𑀭𑀲𑁆𑀲𑀓𑁆𑀔𑀺 𑀪𑁂𑀘𑁆𑀙𑀢𑀺;

𑀓𑁄 𑀫𑁂 𑀧𑀼𑀢𑁆𑀢𑁂 𑀓𑀼𑀮𑀸𑀯𑀓𑀁, 𑀫𑀜𑁆𑀘 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀯𑀢𑁆𑀯𑀸 𑀘 𑀧𑀦 ‘‘𑀓𑁄 𑀦𑀸𑀫 𑀢𑁂, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑀸𑀮𑀸𑀬 𑀳𑀢𑁆𑀣𑀺𑀫𑁂𑀡𑁆𑀟𑁄’’𑀢𑀺 𑀧𑀼𑀘𑁆𑀙𑀺. ‘‘𑀩𑀦𑁆𑀥𑀭𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀏𑀓𑀓𑁆𑀔𑀺𑀓𑀸𑀡𑁄 𑀲𑁄, 𑀫𑀳𑀸𑀭𑀸𑀚𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑀸𑀮𑀸𑀬 𑀢𑁂 𑀤𑁆𑀯𑀸𑀭𑀢𑁄𑀭𑀡𑁂 𑀏𑀓𑀸 𑀓𑀸𑀓𑀻 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸 𑀅𑀡𑁆𑀟𑀓𑀸𑀦𑀺 𑀦𑀺𑀓𑁆𑀔𑀺𑀧𑀺. 𑀢𑀸𑀦𑀺 𑀧𑀭𑀺𑀡𑀢𑀸𑀦𑀺 𑀓𑀸𑀓𑀧𑁄𑀢𑀓𑀸 𑀦𑀺𑀓𑁆𑀔𑀦𑁆𑀢𑀸, 𑀳𑀢𑁆𑀣𑀺𑀫𑁂𑀡𑁆𑀟𑁄 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀲𑀸𑀮𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀘 𑀧𑀯𑀺𑀲𑀦𑁆𑀢𑁄 𑀘 𑀅𑀗𑁆𑀓𑀼𑀲𑀓𑁂𑀦 𑀓𑀸𑀓𑀺𑀫𑁆𑀧𑀺 𑀧𑀼𑀢𑁆𑀢𑀓𑁂𑀧𑀺𑀲𑁆𑀲𑀸 𑀧𑀳𑀭𑀢𑀺, 𑀓𑀼𑀮𑀸𑀯𑀓𑀫𑁆𑀧𑀺 𑀯𑀺𑀤𑁆𑀥𑀁𑀲𑁂𑀢𑀺. 𑀲𑀸 𑀢𑁂𑀦 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑀸 𑀢𑀲𑁆𑀲 𑀅𑀓𑁆𑀔𑀺𑀪𑁂𑀤𑀦𑀁 𑀆𑀬𑀸𑀘𑀦𑁆𑀢𑀻 𑀏𑀯𑀫𑀸𑀳, 𑀲𑀘𑁂 𑀢𑁂 𑀓𑀸𑀓𑀺𑀬𑀸 𑀫𑁂𑀢𑁆𑀢𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀏𑀢𑀁 𑀩𑀦𑁆𑀥𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀼𑀮𑀸𑀯𑀓𑀯𑀺𑀤𑁆𑀥𑀁𑀲𑀦𑀢𑁄 𑀯𑀸𑀭𑁂𑀳𑀻𑀢𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀳𑀸𑀭𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀢𑀁 𑀳𑀢𑁆𑀣𑀺𑀁 𑀅𑀤𑀸𑀲𑀺.

‘‘𑀧𑀸𑀲𑀸𑀤𑀓𑀡𑁆𑀡𑀺𑀓𑀸𑀬 𑀧𑀦 𑀢𑁂, 𑀫𑀳𑀸𑀭𑀸𑀚, 𑀏𑀓𑁄 𑀖𑀼𑀡𑀧𑀸𑀡𑀓𑁄 𑀯𑀲𑀢𑀺. 𑀲𑁄 𑀢𑀢𑁆𑀣 𑀨𑁂𑀕𑁆𑀕𑀼𑀁 𑀔𑀸𑀤𑀺𑀢𑁆𑀯𑀸 𑀢𑀲𑁆𑀫𑀺𑀁 𑀔𑀻𑀡𑁂 𑀲𑀸𑀭𑀁 𑀔𑀸𑀤𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑁄 𑀪𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀺𑀤𑁂𑀯𑀫𑀸𑀦𑁄 𑀢𑀢𑀺𑀬𑀁 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨. ‘‘𑀲𑀩𑁆𑀩𑀸 𑀧𑀭𑀺𑀓𑁆𑀔𑀢𑀸 𑀨𑁂𑀕𑁆𑀕𑀼, 𑀬𑀸𑀯 𑀢𑀲𑁆𑀲𑀸 𑀕𑀢𑀻 𑀅𑀳𑀼;

𑀔𑀻𑀡𑀪𑀓𑁆𑀔𑁄 𑀫𑀳𑀸𑀭𑀸𑀚, 𑀲𑀸𑀭𑁂 𑀦 𑀭𑀫𑀢𑀻 𑀖𑀼𑀡𑁄’’𑀢𑀺.

𑀢𑀢𑁆𑀣 𑀬𑀸𑀯 𑀢𑀲𑁆𑀲𑀸 𑀕𑀢𑀻 𑀅𑀳𑀽𑀢𑀺 𑀬𑀸𑀯 𑀢𑀲𑁆𑀲𑀸 𑀨𑁂𑀕𑁆𑀕𑀼𑀬𑀸 𑀦𑀺𑀧𑁆𑀨𑀢𑁆𑀢𑀺 𑀅𑀳𑁄𑀲𑀺, 𑀲𑀸 𑀲𑀩𑁆𑀩𑀸 𑀔𑀸𑀤𑀺𑀢𑀸. 𑀦 𑀭𑀫𑀢𑀻𑀢𑀺 ‘‘𑀫𑀳𑀸𑀭𑀸𑀚, 𑀲𑁄 𑀧𑀸𑀡𑀓𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀫𑀦𑀝𑁆𑀞𑀸𑀦𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 𑀧𑀭𑀺𑀤𑁂𑀯𑀢𑀺, 𑀦𑀻𑀳𑀭𑀸𑀧𑁂𑀳𑀺 𑀦’’𑀦𑁆𑀢𑀺 𑀆𑀳. 𑀭𑀸𑀚𑀸 𑀏𑀓𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀢𑁆𑀯𑀸 𑀉𑀧𑀸𑀬𑁂𑀦 𑀦𑀁 𑀦𑀻𑀳𑀭𑀸𑀧𑁂𑀲𑀺.

‘‘𑀦𑀺𑀯𑁂𑀲𑀦𑁂 𑀧𑀦 𑀢𑁂, 𑀫𑀳𑀸𑀭𑀸𑀚, 𑀏𑀓𑀸 𑀧𑁄𑀲𑀸𑀯𑀦𑀺𑀬𑀸 𑀓𑁄𑀓𑀺𑀮𑀸 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀭𑀸𑀚, 𑀲𑀸 𑀅𑀢𑁆𑀢𑀦𑀸 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀁 𑀯𑀦𑀲𑀡𑁆𑀟𑀁 𑀲𑀭𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘𑀓𑀤𑀸 𑀦𑀼 𑀔𑁄 𑀇𑀫𑀫𑁆𑀳𑀸 𑀧𑀜𑁆𑀚𑀭𑀸 𑀫𑀼𑀘𑁆𑀘𑀺𑀢𑁆𑀯𑀸 𑀭𑀫𑀡𑀻𑀬𑀁 𑀯𑀦𑀲𑀡𑁆𑀟𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’𑀢𑀺 𑀘𑀢𑀼𑀢𑁆𑀣𑀁 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁩. ‘‘𑀲𑀸 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀼𑀢𑁆𑀢𑀸 𑀦𑀺𑀯𑁂𑀲𑀦𑀸;

𑀅𑀢𑁆𑀢𑀸𑀦𑀁 𑀭𑀫𑀬𑀺𑀲𑁆𑀲𑀸𑀫𑀺, 𑀤𑀼𑀫𑀲𑀸𑀔𑀦𑀺𑀓𑁂𑀢𑀺𑀦𑀻’’𑀢𑀺.

𑀢𑀢𑁆𑀣 𑀤𑀼𑀫𑀲𑀸𑀔𑀦𑀺𑀓𑁂𑀢𑀺𑀦𑀻𑀢𑀺 𑀲𑀼𑀧𑀼𑀧𑁆𑀨𑀺𑀢𑀸𑀲𑀼 𑀭𑀼𑀓𑁆𑀔𑀲𑀸𑀔𑀸𑀲𑀼 𑀲𑀓𑀦𑀺𑀓𑁂𑀢𑀸 𑀳𑀼𑀢𑁆𑀯𑀸. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑀸, 𑀫𑀳𑀸𑀭𑀸𑀚, 𑀲𑀸 𑀓𑁄𑀓𑀺𑀮𑀸, 𑀯𑀺𑀲𑁆𑀲𑀚𑁆𑀚𑁂𑀳𑀺 𑀦’’𑀦𑁆𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺.

‘‘𑀦𑀺𑀯𑁂𑀲𑀦𑁂 𑀧𑀦 𑀢𑁂, 𑀫𑀳𑀸𑀭𑀸𑀚, 𑀏𑀓𑁄 𑀧𑁄𑀲𑀸𑀯𑀦𑀺𑀬𑁄 𑀫𑀺𑀕𑁄 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀭𑀸𑀚, 𑀲𑁄 𑀏𑀓𑁄 𑀬𑀽𑀣𑀧𑀢𑀺 𑀅𑀢𑁆𑀢𑀦𑁄 𑀫𑀺𑀕𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑁄 𑀧𑀜𑁆𑀘𑀫𑀁 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁪. ‘‘𑀲𑁄 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀼𑀢𑁆𑀢𑁄 𑀦𑀺𑀯𑁂𑀲𑀦𑀸;

𑀅𑀕𑁆𑀕𑁄𑀤𑀓𑀸𑀦𑀺 𑀧𑀺𑀲𑁆𑀲𑀸𑀫𑀺, 𑀬𑀽𑀣𑀲𑁆𑀲 𑀧𑀼𑀭𑀢𑁄 𑀯𑀚’’𑀦𑁆𑀢𑀺.

𑀢𑀢𑁆𑀣 𑀅𑀕𑁆𑀕𑁄𑀤𑀓𑀸𑀦𑀻𑀢𑀺 𑀅𑀕𑁆𑀕𑀉𑀤𑀓𑀸𑀦𑀺, 𑀅𑀜𑁆𑀜𑁂𑀳𑀺 𑀫𑀺𑀕𑁂𑀳𑀺 𑀧𑀞𑀫𑀢𑀭𑀁 𑀅𑀧𑀻𑀢𑀸𑀦𑀺 𑀅𑀦𑀼𑀘𑁆𑀙𑀺𑀝𑁆𑀞𑁄𑀤𑀓𑀸𑀦𑀺 𑀬𑀽𑀣𑀲𑁆𑀲 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀓𑀤𑀸 𑀦𑀼 𑀔𑁄 𑀧𑀺𑀯𑀺𑀲𑁆𑀲𑀸𑀫𑀻𑀢𑀺.

𑀫𑀳𑀸𑀲𑀢𑁆𑀢𑁄 𑀢𑀫𑁆𑀧𑀺 𑀫𑀺𑀕𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 ‘‘𑀦𑀺𑀯𑁂𑀲𑀦𑁂 𑀧𑀦 𑀢𑁂, 𑀫𑀳𑀸𑀭𑀸𑀚, 𑀧𑁄𑀲𑀸𑀯𑀦𑀺𑀬𑁄 𑀫𑀓𑁆𑀓𑀝𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑁄𑀧𑀺, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀬𑀽𑀣𑀧𑀢𑀺 𑀫𑀓𑁆𑀓𑀝𑀻𑀳𑀺 𑀲𑀤𑁆𑀥𑀺𑀁 𑀓𑀸𑀫𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀪𑀭𑀢𑁂𑀦 𑀦𑀸𑀫 𑀮𑀼𑀤𑁆𑀤𑁂𑀦 𑀇𑀥 𑀆𑀦𑀻𑀢𑁄, 𑀇𑀤𑀸𑀦𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀢𑀢𑁆𑀣𑁂𑀯 𑀕𑀦𑁆𑀢𑀼𑀓𑀸𑀫𑁄 𑀙𑀝𑁆𑀞𑀁 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁫. ‘‘𑀢𑀁 𑀫𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑀁, 𑀭𑀢𑁆𑀢𑀁 𑀓𑀸𑀫𑁂𑀲𑀼 𑀫𑀼𑀘𑁆𑀙𑀺𑀢𑀁;

𑀆𑀦𑀬𑀻 𑀪𑀭𑀢𑁄 𑀮𑀼𑀤𑁆𑀤𑁄, 𑀩𑀸𑀳𑀺𑀓𑁄 𑀪𑀤𑁆𑀤𑀫𑀢𑁆𑀣𑀼 𑀢𑁂’’𑀢𑀺.

𑀢𑀢𑁆𑀣 𑀩𑀸𑀳𑀺𑀓𑁄𑀢𑀺 𑀩𑀸𑀳𑀺𑀓𑀭𑀝𑁆𑀞𑀯𑀸𑀲𑀻. 𑀪𑀤𑁆𑀤𑀫𑀢𑁆𑀣𑀼 𑀢𑁂𑀢𑀺 𑀇𑀫𑀫𑀢𑁆𑀣𑀁 𑀲𑁄 𑀯𑀸𑀦𑀭𑁄 𑀆𑀳, 𑀢𑀼𑀬𑁆𑀳𑀁 𑀧𑀦 𑀪𑀤𑁆𑀤𑀫𑀢𑁆𑀣𑀼, 𑀯𑀺𑀲𑁆𑀲𑀚𑁆𑀚𑁂𑀳𑀺 𑀦𑀦𑁆𑀢𑀺.

𑀫𑀳𑀸𑀲𑀢𑁆𑀢𑁄 𑀢𑀁 𑀯𑀸𑀦𑀭𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 ‘‘𑀦𑀺𑀯𑁂𑀲𑀦𑁂 𑀧𑀦 𑀢𑁂, 𑀫𑀳𑀸𑀭𑀸𑀚, 𑀧𑁄𑀲𑀸𑀯𑀦𑀺𑀬𑁄 𑀓𑀺𑀦𑁆𑀦𑀭𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑁄, 𑀫𑀳𑀸𑀭𑀸𑀚, 𑀅𑀢𑁆𑀢𑀦𑁄 𑀓𑀺𑀦𑁆𑀦𑀭𑀺𑀬𑀸 𑀓𑀢𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀓𑀺𑀮𑁂𑀲𑀸𑀢𑀼𑀭𑁄 𑀲𑀤𑁆𑀤𑀫𑀓𑀸𑀲𑀺. 𑀲𑁄 𑀳𑀺 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑀁 𑀢𑀼𑀗𑁆𑀕𑀧𑀩𑁆𑀩𑀢𑀲𑀺𑀔𑀭𑀁 𑀆𑀭𑀼𑀳𑀺. 𑀢𑁂 𑀢𑀢𑁆𑀣 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀸 𑀧𑀺𑀴𑀦𑁆𑀥𑀦𑁆𑀢𑀸 𑀲𑀽𑀭𑀺𑀬𑀁 𑀅𑀢𑁆𑀣𑀗𑁆𑀕𑀢𑀁 𑀦 𑀲𑀮𑁆𑀮𑀓𑁆𑀔𑁂𑀲𑀼𑀁, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀑𑀢𑀭𑀦𑁆𑀢𑀸𑀦𑀁 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀢𑀢𑁆𑀭 𑀦𑀁 𑀓𑀺𑀦𑁆𑀦𑀭𑀻 ‘𑀲𑀸𑀫𑀺, 𑀅𑀦𑁆𑀥𑀓𑀸𑀭𑁄 𑀯𑀢𑁆𑀢𑀢𑀺, 𑀅𑀧𑀓𑁆𑀔𑀮𑀦𑁆𑀢𑁄 𑀅𑀧𑁆𑀧𑀫𑀸𑀤𑁂𑀦 𑀑𑀢𑀭𑀸𑀳𑀻’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀑𑀢𑀸𑀭𑁂𑀲𑀺, 𑀲𑁄 𑀢𑀸𑀬 𑀢𑀁 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀤𑁆𑀤𑀫𑀓𑀸𑀲𑀺, 𑀢𑀢𑁄𑀧𑀺 𑀢𑁂 𑀪𑀬𑀁 𑀦𑀢𑁆𑀣𑀻’’𑀢𑀺 𑀢𑀁 𑀓𑀸𑀭𑀡𑀁 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁬. ‘‘𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁, 𑀢𑀼𑀗𑁆𑀕𑁂 𑀉𑀧𑀭𑀺𑀧𑀩𑁆𑀩𑀢𑁂;

𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀫𑀸 𑀧𑀸𑀤𑀁 𑀔𑀮𑀺 𑀬𑀲𑁆𑀫𑀦𑀻’’𑀢𑀺.

𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀅𑀦𑁆𑀥𑀪𑀸𑀯𑀓𑀸𑀭𑀓𑁂 𑀢𑀫𑁂. 𑀢𑀼𑀗𑁆𑀕𑁂𑀢𑀺 𑀢𑀺𑀔𑀺𑀡𑁂. 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸𑀢𑀺 𑀫𑀝𑁆𑀞𑁂𑀦 𑀫𑀼𑀤𑀼𑀓𑁂𑀦 𑀯𑀘𑀦𑁂𑀦. 𑀫𑀸 𑀧𑀸𑀤𑀁 𑀔𑀮𑀺 𑀬𑀲𑁆𑀫𑀦𑀻𑀢𑀺 𑀬-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀕𑀳𑀺𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀸 𑀫𑀁 𑀓𑀺𑀦𑁆𑀦𑀭𑀻 𑀲𑀡𑁆𑀳𑁂𑀦 𑀫𑀼𑀤𑀓𑁂𑀦 𑀯𑀘𑀦𑁂𑀦 ‘‘𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀸 𑀧𑀸𑀤𑀁 𑀔𑀮𑀺 𑀅𑀲𑁆𑀫𑀦𑀺, 𑀬𑀣𑀸 𑀢𑁂 𑀉𑀧𑀓𑁆𑀔𑀮𑀺𑀢𑁆𑀯𑀸 𑀧𑀸𑀤𑁄 𑀧𑀸𑀲𑀸𑀡𑀲𑁆𑀫𑀺𑀁 𑀦 𑀔𑀮𑀢𑀺, 𑀢𑀣𑀸 𑀑𑀢𑀭𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀑𑀢𑀸𑀭𑁂𑀲𑀻𑀢𑀺.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀓𑀺𑀦𑁆𑀦𑀭𑁂𑀦 𑀓𑀢𑀲𑀤𑁆𑀤𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀝𑁆𑀞𑀫𑁄 𑀉𑀤𑀸𑀦𑀲𑀤𑁆𑀤𑁄 𑀅𑀳𑁄𑀲𑀺. 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀲𑁆𑀫𑀺𑀁 𑀓𑀺𑀭 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀁 𑀜𑀢𑁆𑀯𑀸 ‘𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀫𑀦𑀼𑀲𑁆𑀲𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 𑀲𑀸𑀥𑀼𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀓𑀢𑁆𑀯𑀸 𑀲𑀕𑁆𑀕𑀧𑀣𑀁 𑀧𑀽𑀭𑁂𑀲𑁆𑀲𑀦𑁆𑀢𑀻’𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀆𑀕𑀘𑁆𑀙𑀦𑁆𑀢𑁄 𑀢𑀯 𑀧𑀸𑀲𑀸𑀤𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑀓𑀸𑀮𑁂 𑀔𑀦𑁆𑀥𑀪𑀸𑀭𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀼𑀭𑀧𑀯𑁂𑀲𑀦𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀁 𑀕𑀸𑀣𑀫𑀸𑀳 𑁋

𑁧𑁭. ‘‘𑀅𑀲𑀁𑀲𑀬𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀦 𑀕𑀩𑁆𑀪𑀲𑁂𑀬𑁆𑀬𑀁 𑀧𑀼𑀦𑀭𑀸𑀯𑀚𑀺𑀲𑁆𑀲𑀁;

𑀅𑀬𑀫𑀦𑁆𑀢𑀺𑀫𑀸 𑀧𑀘𑁆𑀙𑀺𑀫𑀸 𑀕𑀩𑁆𑀪𑀲𑁂𑀬𑁆𑀬𑀸, 𑀔𑀻𑀡𑁄 𑀫𑁂 𑀲𑀁𑀲𑀸𑀭𑁄 𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀚𑀸𑀢𑀺𑀬𑀸 𑀔𑀬𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻 𑀅𑀳𑀁 𑀅𑀲𑀁𑀲𑀬𑀁 𑀧𑀼𑀦 𑀕𑀩𑁆𑀪𑀲𑁂𑀬𑁆𑀬𑀁 𑀦 𑀆𑀯𑀚𑀺𑀲𑁆𑀲𑀁, 𑀅𑀬𑀁 𑀫𑁂 𑀅𑀦𑁆𑀢𑀺𑀫𑀸 𑀚𑀸𑀢𑀺, 𑀧𑀘𑁆𑀙𑀺𑀫𑀸 𑀕𑀩𑁆𑀪𑀲𑁂𑀬𑁆𑀬𑀸, 𑀔𑀻𑀡𑁄 𑀫𑁂 𑀧𑀼𑀦𑀩𑁆𑀪𑀯𑀸𑀬 𑀔𑀦𑁆𑀥𑀧𑀝𑀺𑀧𑀸𑀝𑀺𑀲𑀗𑁆𑀔𑀸𑀢𑁄 𑀲𑀁𑀲𑀸𑀭𑁄𑀢𑀺.

‘‘𑀇𑀤𑀜𑁆𑀘 𑀧𑀦 𑀲𑁄 𑀉𑀤𑀸𑀦𑀁 𑀯𑀢𑁆𑀯𑀸 𑀇𑀫𑀁 𑀉𑀬𑁆𑀬𑀸𑀦𑀯𑀦𑀁 𑀆𑀕𑀫𑁆𑀫 𑀏𑀓𑀲𑁆𑀲 𑀲𑀼𑀧𑀼𑀧𑁆𑀨𑀺𑀢𑀲𑁆𑀲 𑀲𑀸𑀮𑀲𑁆𑀲 𑀫𑀽𑀮𑁂 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀳𑀺, 𑀫𑀳𑀸𑀭𑀸𑀚, 𑀲𑀭𑀻𑀭𑀓𑀺𑀘𑁆𑀘𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀭𑀻𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀬𑀜𑁆𑀜𑀁 𑀳𑀸𑀭𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀁 𑀤𑀢𑁆𑀯𑀸 𑀦𑀕𑀭𑁂 𑀫𑀸𑀖𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀘𑀺𑀢𑀓𑁂 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀘𑀢𑀼𑀫𑀳𑀸𑀧𑀣𑁂 𑀣𑀽𑀧𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀼𑀢𑀓𑀸𑀭𑀡𑀸 𑀢𑀯 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀻’’𑀢𑀺 𑀬𑀜𑁆𑀜𑀁 𑀳𑀭𑀸𑀧𑁂𑀢𑁆𑀯𑀸 ‘‘𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀁 𑀤𑁂𑀳𑀻’’𑀢𑀺 𑀚𑀻𑀯𑀺𑀢𑀤𑀸𑀦𑀁 𑀤𑀸𑀧𑁂𑀢𑁆𑀯𑀸 𑀦𑀕𑀭𑁂 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀫𑀸𑀡𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀝𑁆𑀞𑀲𑀤𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁧𑁯] 𑁩. 𑀲𑀼𑀮𑀲𑀸𑀚𑀸𑀢𑀓𑀯𑀡𑁆𑀡𑀦𑀸

𑀇𑀤𑀁 𑀲𑀼𑀯𑀡𑁆𑀡𑀓𑀸𑀬𑀽𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀤𑀸𑀲𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀏𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀤𑀸𑀲𑀺𑀕𑀡𑁂𑀦 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀻 𑀅𑀢𑁆𑀢𑀦𑁄 𑀲𑀸𑀫𑀺𑀦𑀺𑀁 𑀧𑀼𑀜𑁆𑀜𑀮𑀓𑁆𑀔𑀡𑀤𑁂𑀯𑀺𑀁 𑀆𑀪𑀭𑀡𑀁 𑀬𑀸𑀘𑀺. 𑀲𑀸 𑀢𑀲𑁆𑀲𑀸 𑀲𑀢𑀲𑀳𑀲𑁆𑀲𑀫𑀽𑀮𑀁 𑀅𑀢𑁆𑀢𑀦𑁄 𑀆𑀪𑀭𑀡𑀁 𑀅𑀤𑀸𑀲𑀺. 𑀲𑀸 𑀢𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀤𑀸𑀲𑀺𑀕𑀡𑁂𑀦 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀅𑀣𑁂𑀓𑁄 𑀘𑁄𑀭𑁄 𑀢𑀲𑁆𑀲𑀸 𑀆𑀪𑀭𑀡𑁂 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀇𑀫𑀁 𑀫𑀸𑀭𑁂𑀢𑁆𑀯𑀸 𑀆𑀪𑀭𑀡𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀫𑀘𑁆𑀙𑀫𑀁𑀲𑀲𑀼𑀭𑀸𑀤𑀻𑀦𑀺 𑀅𑀤𑀸𑀲𑀺. 𑀲𑀸 ‘‘𑀓𑀺𑀮𑁂𑀲𑀯𑀲𑁂𑀦 𑀤𑁂𑀢𑀺 𑀫𑀜𑁆𑀜𑁂’’𑀢𑀺 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀦𑀺𑀧𑀦𑁆𑀦𑁂 𑀤𑀸𑀲𑀺𑀕𑀡𑁂 𑀉𑀝𑁆𑀞𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 ‘‘𑀪𑀤𑁆𑀤𑁂, 𑀇𑀫𑀁 𑀞𑀸𑀦𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁, 𑀣𑁄𑀓𑀁 𑀧𑀼𑀭𑀢𑁄 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀇𑀢𑀭𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀓𑁆𑀓𑀸 𑀭𑀳𑀲𑁆𑀲𑀓𑀫𑁆𑀫𑀁 𑀓𑀸𑀢𑀼𑀁, 𑀅𑀬𑀁 𑀧𑀦 𑀦𑀺𑀲𑁆𑀲𑀁𑀲𑀬𑀁 𑀫𑀁 𑀫𑀸𑀭𑁂𑀢𑁆𑀯𑀸 𑀧𑀺𑀴𑀦𑁆𑀥𑀦𑀪𑀡𑁆𑀟𑀁 𑀳𑀭𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀳𑁄𑀢𑀼, 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀸𑀫𑀺, 𑀲𑀼𑀭𑀸𑀫𑀤𑁂𑀦 𑀫𑁂 𑀲𑀼𑀓𑁆𑀔𑀁 𑀲𑀭𑀻𑀭𑀁, 𑀧𑀸𑀦𑀻𑀬𑀁 𑀢𑀸𑀯 𑀫𑀁 𑀧𑀸𑀬𑁂𑀳𑀻’’𑀢𑀺 𑀏𑀓𑀁 𑀓𑀽𑀧𑀁 𑀦𑁂𑀢𑁆𑀯𑀸 ‘‘𑀇𑀢𑁄 𑀫𑁂 𑀧𑀸𑀦𑀻𑀬𑀁 𑀑𑀲𑀺𑀜𑁆𑀘𑀸’’𑀢𑀺 𑀭𑀚𑁆𑀚𑀼𑀜𑁆𑀘 𑀖𑀝𑀜𑁆𑀘 𑀤𑀲𑁆𑀲𑁂𑀲𑀺. 𑀘𑁄𑀭𑁄 𑀭𑀚𑁆𑀚𑀼𑀁 𑀓𑀽𑀧𑁂 𑀑𑀢𑀸𑀭𑁂𑀲𑀺, 𑀅𑀣 𑀦𑀁 𑀑𑀦𑀫𑀺𑀢𑁆𑀯𑀸 𑀉𑀤𑀓𑀁 𑀑𑀲𑀺𑀜𑁆𑀘𑀦𑁆𑀢𑀁 𑀫𑀳𑀩𑁆𑀩𑀮𑀤𑀸𑀲𑀻 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀆𑀡𑀺𑀲𑀤𑀁 𑀧𑀳𑀭𑀺𑀢𑁆𑀯𑀸 𑀓𑀽𑀧𑁂 𑀔𑀺𑀧𑀺𑀢𑁆𑀯𑀸 ‘‘𑀦 𑀢𑁆𑀯𑀁 𑀏𑀢𑁆𑀢𑀓𑁂𑀦 𑀫𑀭𑀺𑀲𑁆𑀲𑀲𑀻’’𑀢𑀺 𑀏𑀓𑀁 𑀫𑀳𑀦𑁆𑀢𑀁 𑀇𑀝𑁆𑀞𑀓𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺. 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄. 𑀲𑀸𑀧𑀺 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀫𑀺𑀦𑀺𑀬𑀸 𑀆𑀪𑀭𑀡𑀁 𑀤𑀤𑀫𑀸𑀦𑀸 ‘‘𑀫𑀦𑀫𑁆𑀳𑀺 𑀅𑀚𑁆𑀚 𑀇𑀫𑀁 𑀆𑀪𑀭𑀡𑀁 𑀦𑀺𑀲𑁆𑀲𑀸𑀬 𑀫𑀢𑀸’’𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺, 𑀲𑀸𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑁄𑀘𑁂𑀲𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀇𑀤𑀸𑀦𑁂𑀯 𑀲𑀸 𑀤𑀸𑀲𑀻 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀧𑀼𑀩𑁆𑀩𑁂𑀧𑀺 𑀲𑀫𑀦𑁆𑀦𑀸𑀕𑀢𑀸𑀯, 𑀦 𑀘 𑀇𑀤𑀸𑀦𑁂𑀯 𑀢𑀸𑀬 𑀲𑁄 𑀫𑀸𑀭𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀦𑀁 𑀫𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀼𑀮𑀲𑀸 𑀦𑀸𑀫 𑀦𑀕𑀭𑀲𑁄𑀪𑀺𑀦𑀻 𑀧𑀜𑁆𑀘𑀲𑀢𑀯𑀡𑁆𑀡𑀤𑀸𑀲𑀺𑀧𑀭𑀺𑀯𑀸𑀭𑀸 𑀅𑀳𑁄𑀲𑀺, 𑀲𑀳𑀲𑁆𑀲𑁂𑀦 𑀭𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑀢𑁆𑀢𑀼𑀓𑁄 𑀦𑀸𑀫 𑀘𑁄𑀭𑁄 𑀅𑀳𑁄𑀲𑀺 𑀦𑀸𑀕𑀩𑀮𑁄, 𑀭𑀢𑁆𑀢𑀺𑀪𑀸𑀕𑁂 𑀇𑀲𑁆𑀲𑀭𑀖𑀭𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀁 𑀯𑀺𑀮𑀼𑀫𑁆𑀧𑀢𑀺. 𑀦𑀸𑀕𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀜𑁆𑀜𑁄 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 𑀦𑀕𑀭𑀕𑀼𑀢𑁆𑀢𑀺𑀓𑀁 𑀆𑀡𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀼𑀫𑁆𑀩𑀁 𑀞𑀧𑀸𑀧𑁂𑀢𑁆𑀯𑀸 𑀘𑁄𑀭𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀣𑀸’’𑀢𑀺 𑀆𑀳. 𑀢𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀓𑀲𑀸𑀳𑀺 𑀢𑀸𑀴𑁂𑀢𑁆𑀯𑀸 𑀆𑀖𑀸𑀢𑀦𑀁 𑀦𑁂𑀦𑁆𑀢𑀺. ‘‘𑀘𑁄𑀭𑁄 𑀓𑀺𑀭 𑀕𑀳𑀺𑀢𑁄’’𑀢𑀺 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. 𑀢𑀤𑀸 𑀲𑀼𑀮𑀲𑀸 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀲𑀘𑁂 𑀇𑀫𑀁 𑀘𑁄𑀭𑁄𑀢𑀺 𑀕𑀳𑀺𑀢𑀧𑀼𑀭𑀺𑀲𑀁 𑀫𑁄𑀘𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀇𑀤𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀁 𑀅𑀓𑀢𑁆𑀯𑀸 𑀇𑀫𑀺𑀦𑀸𑀯 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸 𑀓𑀡𑀯𑁂𑀭𑀚𑀸𑀢𑀓𑁂 (𑀚𑀸. 𑁧.𑁪.𑁬𑁯 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀲𑀳𑀲𑁆𑀲𑀁 𑀧𑁂𑀲𑁂𑀢𑁆𑀯𑀸 𑀢𑀁 𑀫𑁄𑀘𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺. 𑀘𑁄𑀭𑁄 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀼𑀘𑁆𑀙𑀳𑀢𑁆𑀣𑁂𑀦 𑀧𑀮𑀸𑀬𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸, 𑀲𑀼𑀮𑀲𑀸𑀬 𑀧𑀺𑀴𑀦𑁆𑀥𑀦𑀪𑀡𑁆𑀟𑀁 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀲𑀼𑀮𑀲𑀁 𑀫𑀸𑀭𑁂𑀢𑁆𑀯𑀸 𑀇𑀤𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀆𑀳 𑁋 ‘‘𑀪𑀤𑁆𑀤𑁂, 𑀅𑀳𑀁 𑀢𑀤𑀸 𑀭𑀸𑀚𑀧𑀼𑀭𑀺𑀲𑁂𑀳𑀺 𑀦𑀻𑀬𑀫𑀸𑀦𑁄 𑀅𑀲𑀼𑀓𑀧𑀩𑁆𑀩𑀢𑀫𑀢𑁆𑀣𑀓𑁂 𑀭𑀼𑀓𑁆𑀔𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀧𑀝𑀺𑀲𑁆𑀲𑀼𑀡𑀺𑀁, 𑀲𑀸 𑀫𑀁 𑀩𑀮𑀺𑀓𑀫𑁆𑀫𑀁 𑀅𑀮𑀪𑀫𑀸𑀦𑀸 𑀪𑀸𑀬𑀸𑀧𑁂𑀢𑀺, 𑀩𑀮𑀺𑀓𑀫𑁆𑀫𑀫𑀲𑁆𑀲𑀸 𑀓𑀭𑁄𑀫𑀸’’𑀢𑀺. ‘‘𑀲𑀸𑀥𑀼, 𑀲𑀸𑀫𑀺, 𑀲𑀚𑁆𑀚𑁂𑀢𑁆𑀯𑀸 𑀧𑁂𑀲𑁂𑀳𑀻’’𑀢𑀺. ‘‘𑀪𑀤𑁆𑀤𑁂, 𑀧𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀫𑀬𑀁 𑀉𑀪𑁄𑀧𑀺 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀤𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼, 𑀲𑀸𑀫𑀺, 𑀢𑀣𑀸 𑀓𑀭𑁄𑀫𑀸’’𑀢𑀺.

𑀅𑀣 𑀦𑀁 𑀢𑀣𑀸 𑀓𑀸𑀭𑁂𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀕𑀢𑀓𑀸𑀮𑁂 𑀆𑀳 𑁋 ‘‘𑀪𑀤𑁆𑀤𑁂, 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 𑀤𑁂𑀯𑀢𑀸 𑀩𑀮𑀺𑀓𑀫𑁆𑀫𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀢𑀺, 𑀫𑀬𑀁 𑀉𑀪𑁄𑀯 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑁂𑀫𑀸’’𑀢𑀺. 𑀲𑁄 𑀢𑀸𑀬 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀢𑀁 𑀩𑀮𑀺𑀧𑀸𑀢𑀺𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀲𑀬𑀁 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀳𑀼𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀏𑀓𑀁 𑀲𑀢𑀧𑁄𑀭𑀺𑀲𑀧𑀧𑀸𑀢𑀁 𑀦𑀺𑀲𑁆𑀲𑀸𑀬 𑀚𑀸𑀢𑀭𑀼𑀓𑁆𑀔𑀫𑀽𑀮𑁂 𑀩𑀮𑀺𑀪𑀸𑀚𑀦𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀦𑀸𑀳𑀁 𑀩𑀮𑀺𑀓𑀫𑁆𑀫𑀢𑁆𑀣𑀸𑀬 𑀆𑀕𑀢𑁄, 𑀢𑀁 𑀧𑀦 𑀫𑀸𑀭𑁂𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀢𑁂 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀺, 𑀢𑀯 𑀧𑀺𑀴𑀦𑁆𑀥𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀪𑀡𑁆𑀟𑀺𑀓𑀁 𑀓𑀭𑁄𑀳𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀫𑀁 𑀓𑀲𑁆𑀫𑀸 𑀫𑀸𑀭𑁂𑀲𑀻’’𑀢𑀺? ‘‘𑀥𑀦𑀓𑀸𑀭𑀡𑀸’’𑀢𑀺. ‘‘𑀲𑀸𑀫𑀺, 𑀫𑀬𑀸 𑀓𑀢𑀕𑀼𑀡𑀁 𑀅𑀦𑀼𑀲𑁆𑀲𑀭, 𑀅𑀳𑀁 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀦𑀻𑀬𑀫𑀸𑀦𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀸𑀧𑁂𑀲𑀺𑀁, 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀮𑀪𑀫𑀸𑀦𑀸𑀧𑀺 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦 𑀑𑀮𑁄𑀓𑁂𑀫𑀺, 𑀏𑀯𑀜𑁆𑀳𑀺 𑀢𑀯 𑀉𑀧𑀓𑀸𑀭𑀺𑀓𑀁 𑀫𑀸 𑀫𑀁 𑀫𑀸𑀭𑁂𑀳𑀺, 𑀩𑀳𑀼𑀜𑁆𑀘 𑀢𑁂 𑀥𑀦𑀁 𑀤𑀲𑁆𑀲𑀸𑀫𑀺, 𑀢𑀯 𑀤𑀸𑀲𑀻 𑀘 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀘𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁮. ‘‘𑀇𑀤𑀁 𑀲𑀼𑀯𑀡𑁆𑀡𑀓𑀸𑀬𑀽𑀭𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀲𑀩𑁆𑀩𑀁 𑀳𑀭𑀲𑁆𑀲𑀼 𑀪𑀤𑁆𑀤𑀦𑁆𑀢𑁂, 𑀫𑀜𑁆𑀘 𑀤𑀸𑀲𑀻𑀢𑀺 𑀲𑀸𑀯𑀬𑀸’’𑀢𑀺.

𑀢𑀢𑁆𑀣 𑀓𑀸𑀬𑀽𑀭𑀦𑁆𑀢𑀺 𑀕𑀻𑀯𑀸𑀬𑀁 𑀧𑀺𑀴𑀦𑁆𑀥𑀦𑀧𑀲𑀸𑀥𑀦𑀁 𑀓𑀸𑀬𑀽𑀭𑀁. 𑀲𑀸𑀯𑀬𑀸𑀢𑀺 𑀫𑀳𑀸𑀚𑀦𑀫𑀚𑁆𑀛𑁂 𑀲𑀸𑀯𑁂𑀢𑁆𑀯𑀸 𑀤𑀸𑀲𑀺𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺.

𑀢𑀢𑁄 𑀲𑀢𑁆𑀢𑀼𑀓𑁂𑀦 𑁋

𑁧𑁯. ‘‘𑀑𑀭𑁄𑀧𑀬𑀲𑁆𑀲𑀼 𑀓𑀮𑁆𑀬𑀸𑀡𑀺, 𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑀲𑀺;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀳𑀦𑁆𑀢𑁆𑀯𑀸 𑀥𑀦𑀫𑀸𑀪𑀢’’𑀦𑁆𑀢𑀺. 𑁋

𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀤𑀼𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀸𑀬 𑀲𑀼𑀮𑀲𑀸 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀅𑀬𑀁 𑀘𑁄𑀭𑁄 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀦 𑀤𑀲𑁆𑀲𑀢𑀺, 𑀉𑀧𑀸𑀬𑁂𑀦 𑀦𑀁 𑀧𑀞𑀫𑀢𑀭𑀁 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁨𑁦. ‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑀸𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀢𑀬𑀸.

𑁨𑁧. ‘‘𑀏𑀳𑀺 𑀢𑀁 𑀉𑀧𑀕𑀽𑀳𑀺𑀲𑁆𑀲𑀁, 𑀓𑀭𑀺𑀲𑁆𑀲𑀜𑁆𑀘 𑀧𑀤𑀓𑁆𑀔𑀺𑀡𑀁;

𑀦 𑀳𑀺 𑀤𑀸𑀦𑀺 𑀧𑀼𑀦 𑀅𑀢𑁆𑀣𑀺, 𑀫𑀫 𑀢𑀼𑀬𑁆𑀳𑀜𑁆𑀘 𑀲𑀗𑁆𑀕𑀫𑁄’’𑀢𑀺.

𑀲𑀢𑁆𑀢𑀼𑀓𑁄 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀲𑀸𑀥𑀼, 𑀪𑀤𑁆𑀤𑁂, 𑀏𑀳𑀺 𑀉𑀧𑀕𑀽𑀳𑀲𑁆𑀲𑀼 𑀫’’𑀦𑁆𑀢𑀺 𑀆𑀳. 𑀲𑀼𑀮𑀲𑀸 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀉𑀧𑀕𑀽𑀳𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀁, 𑀲𑀸𑀫𑀺, 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀬𑀁 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀩𑀸𑀳𑀼𑀧𑀲𑁆𑀲𑁂 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀺𑀫𑀧𑀲𑁆𑀲𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀫𑀸𑀦𑀸 𑀯𑀺𑀬 𑀳𑀼𑀢𑁆𑀯𑀸 𑀦𑀸𑀕𑀩𑀮𑀸 𑀕𑀡𑀺𑀓𑀸 𑀘𑁄𑀭𑀁 𑀤𑁆𑀯𑀻𑀲𑀼 𑀧𑀘𑁆𑀙𑀸𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀻𑀲𑀁 𑀓𑀢𑁆𑀯𑀸 𑀲𑀢𑀧𑁄𑀭𑀺𑀲𑁂 𑀦𑀭𑀓𑁂 𑀔𑀺𑀧𑀺. 𑀲𑁄 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀧𑀢𑁆𑀯𑀸 𑀫𑀭𑀺. 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨. ‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

𑁨𑁩. ‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀮𑀳𑀼𑀁 𑀅𑀢𑁆𑀣𑀁 𑀯𑀺𑀘𑀺𑀦𑁆𑀢𑀺𑀓𑀸.

𑁨𑁪. ‘‘𑀮𑀳𑀼𑀜𑁆𑀘 𑀯𑀢 𑀔𑀺𑀧𑁆𑀧𑀜𑁆𑀘, 𑀦𑀺𑀓𑀝𑁆𑀞𑁂 𑀲𑀫𑀘𑁂𑀢𑀬𑀺;

𑀫𑀺𑀕𑀁 𑀧𑀼𑀡𑁆𑀡𑀸𑀬𑀢𑁂𑀦𑁂𑀯, 𑀲𑀼𑀮𑀲𑀸 𑀲𑀢𑁆𑀢𑀼𑀓𑀁 𑀯𑀥𑀺.

𑁨𑁫. ‘‘𑀬𑁄𑀥 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀲𑁄 𑀳𑀜𑁆𑀜𑀢𑀺 𑀫𑀦𑁆𑀤𑀫𑀢𑀺, 𑀘𑁄𑀭𑁄𑀯 𑀕𑀺𑀭𑀺𑀕𑀩𑁆𑀪𑀭𑁂.

𑁨𑁬. ‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀲𑀼𑀮𑀲𑀸 𑀲𑀢𑁆𑀢𑀼𑀓𑀸𑀫𑀺𑀯𑀸’’𑀢𑀺.

𑀢𑀢𑁆𑀣 𑀧𑀡𑁆𑀟𑀺𑀢𑀸 𑀳𑁄𑀢𑀻𑀢𑀺 𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸 𑀳𑁄𑀢𑀺, 𑀅𑀣 𑀯𑀸 𑀇𑀢𑁆𑀣𑀻 𑀧𑀡𑁆𑀟𑀺𑀢𑀸 𑀘𑁂𑀯 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸 𑀘 𑀳𑁄𑀢𑀺. 𑀮𑀳𑀼𑀁 𑀅𑀢𑁆𑀣𑀁 𑀯𑀺𑀘𑀺𑀦𑁆𑀢𑀺𑀓𑀸𑀢𑀺 𑀮𑀳𑀼𑀁 𑀔𑀺𑀧𑁆𑀧𑀁 𑀅𑀢𑁆𑀣𑀁 𑀯𑀺𑀘𑀺𑀦𑁆𑀢𑀺𑀓𑀸. 𑀮𑀳𑀼𑀜𑁆𑀘 𑀯𑀢𑀸𑀢𑀺 𑀅𑀤𑀦𑁆𑀥𑀜𑁆𑀘 𑀯𑀢. 𑀔𑀺𑀧𑁆𑀧𑀜𑁆𑀘𑀸𑀢𑀺 𑀅𑀘𑀺𑀭𑁂𑀦𑁂𑀯. 𑀦𑀺𑀓𑀝𑁆𑀞𑁂 𑀲𑀫𑀘𑁂𑀢𑀬𑀻𑀢𑀺 𑀲𑀦𑁆𑀢𑀺𑀓𑁂 𑀞𑀺𑀢𑀸𑀯 𑀢𑀲𑁆𑀲 𑀫𑀭𑀡𑀽𑀧𑀸𑀬𑀁 𑀘𑀺𑀦𑁆𑀢𑁂𑀲𑀺. 𑀧𑀼𑀡𑁆𑀡𑀸𑀬𑀢𑁂𑀦𑁂𑀯𑀸𑀢𑀺 𑀧𑀽𑀭𑀺𑀢𑀥𑀦𑀼𑀲𑁆𑀫𑀺𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀙𑁂𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀲𑀓𑀡𑁆𑀟𑀧𑀼𑀡𑁆𑀡𑀥𑀦𑀼𑀲𑁆𑀫𑀺𑀁 𑀔𑀺𑀧𑁆𑀧𑀁 𑀫𑀺𑀕𑀁 𑀯𑀥𑀢𑀺, 𑀏𑀯𑀁 𑀲𑀼𑀮𑀲𑀸 𑀲𑀢𑁆𑀢𑀼𑀓𑀁 𑀯𑀥𑀻𑀢𑀺. 𑀬𑁄𑀥𑀸𑀢𑀺 𑀬𑁄 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀦𑀺𑀩𑁄𑀥𑀢𑀻𑀢𑀺 𑀚𑀸𑀦𑀸𑀢𑀺. 𑀲𑀢𑁆𑀢𑀼𑀓𑀸𑀫𑀺𑀯𑀸𑀢𑀺 𑀲𑀢𑁆𑀢𑀼𑀓𑀸 𑀇𑀯, 𑀬𑀣𑀸 𑀲𑀼𑀮𑀲𑀸 𑀫𑀼𑀢𑁆𑀢𑀸, 𑀏𑀯𑀁 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑀼𑀮𑀲𑀸 𑀘𑁄𑀭𑀁 𑀯𑀥𑀺𑀢𑁆𑀯𑀸 𑀧𑀩𑁆𑀩𑀢𑀸 𑀑𑀭𑀼𑀬𑁆𑀳 𑀅𑀢𑁆𑀢𑀦𑁄 𑀧𑀭𑀺𑀚𑀦𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀓𑀳’’𑀦𑁆𑀢𑀺 𑀧𑀼𑀝𑁆𑀞𑀸 ‘‘𑀫𑀸 𑀢𑀁 𑀧𑀼𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀕𑀭𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀢𑁂 𑀉𑀪𑁄𑀧𑀺 𑀇𑀫𑁂𑀬𑁂𑀯 𑀅𑀳𑁂𑀲𑀼𑀁, 𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀮𑀲𑀸𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁨𑁦] 𑁪. 𑀲𑀼𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸

𑀪𑀼𑀲𑀫𑁆𑀳𑀺 𑀓𑀼𑀤𑁆𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑁄𑀯𑀸𑀤𑀲𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀭𑀜𑁆𑀜𑀸 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀲𑀼𑀫𑀗𑁆𑀕𑀮𑁄 𑀦𑀸𑀫 𑀉𑀬𑁆𑀬𑀸𑀦𑀧𑀸𑀮𑁄 𑀅𑀳𑁄𑀲𑀺. 𑀅𑀣𑁂𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀫𑁂𑀦𑀁 𑀭𑀸𑀚𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀳𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑀼𑀫𑀗𑁆𑀕𑀮𑀁 𑀦𑀸𑀫 𑀉𑀬𑁆𑀬𑀸𑀦𑀧𑀸𑀮𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀓𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀭𑀸𑀚𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑁄 𑀢𑀢𑁆𑀣 𑀘𑀺𑀭𑀁 𑀯𑀲𑀺, 𑀲𑀼𑀫𑀗𑁆𑀕𑀮𑁄𑀧𑀺 𑀦𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺.

𑀅𑀣𑁂𑀓𑀤𑀺𑀯𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀼𑀫𑀗𑁆𑀕𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁 𑀓𑀢𑀺𑀧𑀸𑀳𑀁 𑀅𑀲𑀼𑀓𑀕𑀸𑀫𑀁 𑀦𑀺𑀲𑁆𑀲𑀸𑀬 𑀯𑀲𑀺𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀸𑀫𑀺, 𑀭𑀜𑁆𑀜𑁄 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀼𑀫𑀗𑁆𑀕𑀮𑁄𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀲𑀸𑀬𑀁 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀢𑀁 𑀉𑀬𑁆𑀬𑀸𑀦𑀁 𑀧𑀘𑁆𑀘𑀸𑀕𑀫𑀺. 𑀲𑀼𑀫𑀗𑁆𑀕𑀮𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀣𑁄𑀓𑀁 𑀘𑀗𑁆𑀓𑀫𑀺𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺. 𑀢𑀁 𑀤𑀺𑀯𑀲𑀁 𑀧𑀦 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀖𑀭𑀁 𑀧𑀸𑀳𑀼𑀦𑀓𑀸 𑀆𑀕𑀫𑀺𑀁𑀲𑀼. 𑀲𑁄 𑀢𑁂𑀲𑀁 𑀲𑀽𑀧𑀩𑁆𑀬𑀜𑁆𑀚𑀦𑀢𑁆𑀣𑀸𑀬 ‘‘𑀉𑀬𑁆𑀬𑀸𑀦𑁂 𑀅𑀪𑀬𑀮𑀤𑁆𑀥𑀁 𑀫𑀺𑀕𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀥𑀦𑀼𑀁 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀺𑀕𑀁 𑀉𑀧𑀥𑀸𑀭𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀫𑀺𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀚𑁆𑀛𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀻𑀲𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀲𑀼𑀫𑀗𑁆𑀕𑀮𑀸’’𑀢𑀺 𑀆𑀳. 𑀲𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀆𑀕𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘𑀫𑀺𑀕𑁄’𑀢𑀺 𑀲𑀜𑁆𑀜𑀸𑀬 𑀯𑀺𑀚𑁆𑀛𑀺𑀁, 𑀔𑀫𑀣 𑀫𑁂’’𑀢𑀺 𑀯𑀢𑁆𑀯𑀸 ‘‘𑀳𑁄𑀢𑀼 𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀏𑀳𑀺 𑀲𑀭𑀁 𑀮𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀯𑀦𑁆𑀤𑀺𑀢𑁆𑀯𑀸 𑀲𑀭𑀁 𑀮𑀼𑀜𑁆𑀘𑀺, 𑀫𑀳𑀢𑀻 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀉𑀬𑁆𑀬𑀸𑀦𑀧𑀸𑀮𑁄 ‘‘𑀲𑀘𑁂 𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀦𑀸𑀲𑁂𑀲𑁆𑀲𑀢𑀻’’𑀢𑀺 𑀧𑀼𑀢𑁆𑀢𑀤𑀸𑀭𑀁 𑀕𑀳𑁂𑀢𑁆𑀯𑀸 𑀢𑀢𑁄𑀯 𑀧𑀮𑀸𑀬𑀺. 𑀢𑀸𑀯𑀤𑁂𑀯 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀚𑀸𑀢𑀁.

𑀧𑀼𑀦𑀤𑀺𑀯𑀲𑁂 𑀫𑀦𑀼𑀲𑁆𑀲𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀉𑀬𑁆𑀬𑀸𑀦𑀧𑀸𑀮𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀫𑀸𑀭𑁂𑀢𑁆𑀯𑀸 𑀧𑀮𑀸𑀢𑁄’’𑀢𑀺 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀲𑀭𑀻𑀭𑀧𑀽𑀚𑀁 𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀆𑀤𑀸𑀬 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀢𑀁 𑀧𑀽𑀚𑁂𑀦𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑀼𑀫𑀗𑁆𑀕𑀮𑁄𑀧𑀺 𑀏𑀓𑀲𑀁𑀯𑀘𑁆𑀙𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀏𑀓𑀁 𑀅𑀫𑀘𑁆𑀘𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀫𑀬𑀺 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀚𑀸𑀦𑀸𑀳𑀻’’𑀢𑀺 𑀆𑀳. 𑀅𑀫𑀘𑁆𑀘𑁄𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺. 𑀭𑀸𑀚𑀸 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀧𑀼𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀭𑀜𑁆𑀜𑁄 𑀅𑀦𑀢𑁆𑀢𑀫𑀦𑀪𑀸𑀯𑀁 𑀲𑀼𑀫𑀗𑁆𑀕𑀮𑀲𑁆𑀲 𑀓𑀣𑁂𑀲𑀺. 𑀲𑁄 𑀤𑀼𑀢𑀺𑀬𑀲𑀁𑀯𑀘𑁆𑀙𑀭𑁂𑀧𑀺 𑀆𑀕𑀦𑁆𑀢𑁆𑀯𑀸 𑀢𑀣𑁂𑀯 𑀭𑀸𑀚𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀲𑀁𑀯𑀘𑁆𑀙𑀭𑁂 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀕𑀳𑁂𑀢𑁆𑀯𑀸𑀯 𑀆𑀕𑀫𑀺. 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀭𑀸𑀚𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲𑀸𑀕𑀢𑀪𑀸𑀯𑀁 𑀭𑀜𑁆𑀜𑁄 𑀓𑀣𑁂𑀲𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀫𑀗𑁆𑀕𑀮, 𑀓𑀲𑁆𑀫𑀸 𑀢𑀬𑀸 𑀫𑀫 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀸𑀭𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀦𑀸𑀳𑀁, 𑀤𑁂𑀯, ‘𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀫𑀸𑀭𑁂𑀫𑀻’𑀢𑀺 𑀫𑀸𑀭𑁂𑀲𑀺𑀁, 𑀅𑀧𑀺𑀘 𑀔𑁄 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀇𑀤𑀁 𑀦𑀸𑀫 𑀅𑀓𑀸𑀲𑀺’’𑀦𑁆𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀅𑀣 𑀦𑀁 𑀭𑀸𑀚𑀸 ‘‘𑀢𑁂𑀦 𑀳𑀺 𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦 𑀉𑀬𑁆𑀬𑀸𑀦𑀧𑀸𑀮𑀫𑁂𑀯 𑀅𑀓𑀸𑀲𑀺.

𑀅𑀣 𑀦𑀁 𑀲𑁄 𑀅𑀫𑀘𑁆𑀘𑁄 𑀧𑀼𑀘𑁆𑀙𑀺 ‘‘𑀤𑁂𑀯, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀤𑁆𑀯𑁂 𑀯𑀸𑀭𑁂 𑀲𑀼𑀫𑀗𑁆𑀕𑀮𑀲𑁆𑀲 𑀕𑀼𑀡𑀁 𑀲𑀼𑀢𑁆𑀯𑀸𑀧𑀺 𑀓𑀺𑀜𑁆𑀘𑀺 𑀦 𑀓𑀣𑀬𑀺𑀢𑁆𑀣, 𑀓𑀲𑁆𑀫𑀸 𑀧𑀦 𑀢𑀢𑀺𑀬𑀯𑀸𑀭𑁂 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀼𑀓𑀫𑁆𑀧𑀺𑀢𑁆𑀣𑀸’’𑀢𑀺? 𑀭𑀸𑀚𑀸 ‘‘𑀢𑀸𑀢, 𑀭𑀜𑁆𑀜𑀸 𑀦𑀸𑀫 𑀓𑀼𑀤𑁆𑀥𑁂𑀦 𑀲𑀳𑀲𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁂𑀦𑀸𑀳𑀁 𑀧𑀼𑀩𑁆𑀩𑁂 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀲𑀼𑀫𑀗𑁆𑀕𑀮𑁂 𑀫𑀫 𑀘𑀺𑀢𑁆𑀢𑀲𑁆𑀲 𑀫𑀼𑀤𑀼𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺’’𑀦𑁆𑀢𑀺 𑀭𑀸𑀚𑀯𑀢𑁆𑀢𑀁 𑀓𑀣𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁭. ‘‘𑀪𑀼𑀲𑀫𑁆𑀳𑀺 𑀓𑀼𑀤𑁆𑀥𑁄𑀢𑀺 𑀅𑀯𑁂𑀓𑁆𑀔𑀺𑀬𑀸𑀦, 𑀦 𑀢𑀸𑀯 𑀤𑀡𑁆𑀟𑀁 𑀧𑀡𑀬𑁂𑀬𑁆𑀬 𑀇𑀲𑁆𑀲𑀭𑁄;

𑀅𑀝𑁆𑀞𑀸𑀦𑀲𑁄 𑀅𑀧𑁆𑀧𑀢𑀺𑀭𑀽𑀧𑀫𑀢𑁆𑀢𑀦𑁄, 𑀧𑀭𑀲𑁆𑀲 𑀤𑀼𑀓𑁆𑀔𑀸𑀦𑀺 𑀪𑀼𑀲𑀁 𑀉𑀤𑀻𑀭𑀬𑁂.

𑁨𑁮. ‘‘𑀬𑀢𑁄 𑀘 𑀚𑀸𑀦𑁂𑀬𑁆𑀬 𑀧𑀲𑀸𑀤𑀫𑀢𑁆𑀢𑀦𑁄, 𑀅𑀢𑁆𑀣𑀁 𑀦𑀺𑀬𑀼𑀜𑁆𑀚𑁂𑀬𑁆𑀬 𑀧𑀭𑀲𑁆𑀲 𑀤𑀼𑀓𑁆𑀓𑀝𑀁;

𑀢𑀤𑀸𑀬𑀫𑀢𑁆𑀣𑁄𑀢𑀺 𑀲𑀬𑀁 𑀅𑀯𑁂𑀓𑁆𑀔𑀺𑀬, 𑀅𑀣𑀲𑁆𑀲 𑀤𑀡𑁆𑀟𑀁 𑀲𑀤𑀺𑀲𑀁 𑀦𑀺𑀯𑁂𑀲𑀬𑁂.

𑁨𑁯. ‘‘𑀦 𑀘𑀸𑀧𑀺 𑀛𑀸𑀧𑁂𑀢𑀺 𑀧𑀭𑀁 𑀦 𑀅𑀢𑁆𑀢𑀦𑀁, 𑀅𑀫𑀼𑀘𑁆𑀙𑀺𑀢𑁄 𑀬𑁄 𑀦𑀬𑀢𑁂 𑀦𑀬𑀸𑀦𑀬𑀁;

𑀬𑁄 𑀤𑀡𑁆𑀟𑀥𑀸𑀭𑁄 𑀪𑀯𑀢𑀻𑀥 𑀇𑀲𑁆𑀲𑀭𑁄, 𑀲 𑀯𑀡𑁆𑀡𑀕𑀼𑀢𑁆𑀢𑁄 𑀲𑀺𑀭𑀺𑀬𑀸 𑀦 𑀥𑀁𑀲𑀢𑀺.

𑁩𑁦. ‘‘𑀬𑁂 𑀔𑀢𑁆𑀢𑀺𑀬𑀸 𑀲𑁂 𑀅𑀦𑀺𑀲𑀫𑁆𑀫𑀓𑀸𑀭𑀺𑀦𑁄, 𑀧𑀡𑁂𑀦𑁆𑀢𑀺 𑀤𑀡𑁆𑀟𑀁 𑀲𑀳𑀲𑀸 𑀧𑀫𑀼𑀘𑁆𑀙𑀺𑀢𑀸;

𑀅𑀯𑀡𑁆𑀡𑀲𑀁𑀬𑀼𑀢𑀸 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁, 𑀇𑀢𑁄 𑀯𑀺𑀫𑀼𑀢𑁆𑀢𑀸𑀧𑀺 𑀘 𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧. ‘‘𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀭𑀢𑀸, 𑀅𑀦𑀼𑀢𑁆𑀢𑀭𑀸 𑀢𑁂 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘;

𑀢𑁂 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀺𑀲𑀡𑁆𑀞𑀺𑀢𑀸, 𑀯𑀚𑀦𑁆𑀢𑀺 𑀮𑁄𑀓𑀁 𑀤𑀼𑀪𑀬𑀁 𑀢𑀣𑀸𑀯𑀺𑀥𑀸.

𑁩𑁨. ‘‘𑀭𑀸𑀚𑀸𑀳𑀫𑀲𑁆𑀫𑀺 𑀦𑀭𑀧𑀫𑀤𑀸𑀦𑀫𑀺𑀲𑁆𑀲𑀭𑁄, 𑀲𑀘𑁂𑀧𑀺 𑀓𑀼𑀚𑁆𑀛𑀸𑀫𑀺 𑀞𑀧𑁂𑀫𑀺 𑀅𑀢𑁆𑀢𑀦𑀁;

𑀦𑀺𑀲𑁂𑀥𑀬𑀦𑁆𑀢𑁄 𑀚𑀦𑀢𑀁 𑀢𑀣𑀸𑀯𑀺𑀥𑀁, 𑀧𑀡𑁂𑀫𑀺 𑀤𑀡𑁆𑀟𑀁 𑀅𑀦𑀼𑀓𑀫𑁆𑀧 𑀬𑁄𑀦𑀺𑀲𑁄’’𑀢𑀺.

𑀢𑀢𑁆𑀣 𑀅𑀯𑁂𑀓𑁆𑀔𑀺𑀬𑀸𑀦𑀸𑀢𑀺 𑀅𑀯𑁂𑀓𑁆𑀔𑀺𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀦𑀸𑀫 ‘‘𑀅𑀳𑀁 𑀪𑀼𑀲𑀁 𑀓𑀼𑀤𑁆𑀥𑁄 𑀩𑀮𑀯𑀓𑁄𑀥𑀸𑀪𑀺𑀪𑀽𑀢𑁄’’𑀢𑀺 𑀜𑀢𑁆𑀯𑀸 𑀅𑀝𑁆𑀞𑀯𑀢𑁆𑀣𑀼𑀓𑀸𑀤𑀺𑀪𑁂𑀤𑀁 𑀤𑀡𑁆𑀟𑀁 𑀧𑀭𑀲𑁆𑀲 𑀦 𑀧𑀡𑀬𑁂𑀬𑁆𑀬 𑀦 𑀯𑀢𑁆𑀢𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀓𑀼𑀤𑁆𑀥𑁄 𑀳𑀺 𑀅𑀝𑁆𑀞𑀯𑀢𑁆𑀣𑀼𑀓𑀁 𑀲𑁄𑀴𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀅𑀝𑁆𑀞𑀸𑀦𑁂𑀦 𑀅𑀓𑀸𑀭𑀡𑁂𑀦 𑀅𑀢𑁆𑀢𑀦𑁄 𑀭𑀸𑀚𑀪𑀸𑀯𑀲𑁆𑀲 𑀅𑀦𑀦𑀼𑀭𑀽𑀧𑀁 ‘‘𑀇𑀫𑀁 𑀏𑀢𑁆𑀢𑀓𑀁 𑀦𑀸𑀫 𑀆𑀳𑀭𑀣, 𑀇𑀤𑀜𑁆𑀘 𑀢𑀲𑁆𑀲 𑀓𑀭𑁄𑀣𑀸’’𑀢𑀺 𑀧𑀭𑀲𑁆𑀲 𑀪𑀼𑀲𑀁 𑀤𑀼𑀓𑁆𑀔𑀸𑀦𑀺 𑀩𑀮𑀯𑀤𑀼𑀓𑁆𑀔𑀸𑀦𑀺 𑀉𑀤𑀻𑀭𑀬𑁂.

𑀬𑀢𑁄𑀢𑀺 𑀬𑀤𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀸 𑀧𑀦 𑀭𑀸𑀚𑀸 𑀧𑀭𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀁 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀚𑀸𑀦𑁂𑀬𑁆𑀬, 𑀅𑀣 𑀧𑀭𑀲𑁆𑀲 𑀤𑀼𑀓𑁆𑀓𑀝𑀁 𑀅𑀢𑁆𑀣𑀁 𑀦𑀺𑀬𑀼𑀜𑁆𑀚𑁂𑀬𑁆𑀬 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀢𑀤𑀸 𑀏𑀯𑀁 𑀦𑀺𑀬𑀼𑀜𑁆𑀚𑀦𑁆𑀢𑁄 ‘‘𑀅𑀬𑀁 𑀦𑀸𑀫𑁂𑀢𑁆𑀣 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀤𑁄𑀲𑁄’’𑀢𑀺 𑀲𑀬𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀣𑀲𑁆𑀲 𑀅𑀧𑀭𑀸𑀥𑀓𑀸𑀭𑀓𑀲𑁆𑀲 𑀅𑀝𑁆𑀞𑀯𑀢𑁆𑀣𑀼𑀓𑀳𑁂𑀢𑀼 𑀅𑀝𑁆𑀞𑁂𑀯, 𑀲𑁄𑀴𑀲𑀯𑀢𑁆𑀣𑀼𑀓𑀳𑁂𑀢𑀼 𑀲𑁄𑀴𑀲𑁂𑀯 𑀓𑀳𑀸𑀧𑀡𑁂 𑀕𑀡𑁆𑀳𑀫𑀸𑀦𑁄 𑀤𑀡𑁆𑀟𑀁 𑀲𑀤𑀺𑀲𑀁 𑀓𑀢𑀤𑁄𑀲𑀸𑀦𑀼𑀭𑀽𑀧𑀁 𑀦𑀺𑀯𑁂𑀲𑀬𑁂 𑀞𑀧𑁂𑀬𑁆𑀬 𑀧𑀯𑀢𑁆𑀢𑁂𑀬𑁆𑀬𑀸𑀢𑀺.

𑀅𑀫𑀼𑀘𑁆𑀙𑀺𑀢𑁄𑀢𑀺 𑀙𑀦𑁆𑀤𑀸𑀤𑀻𑀳𑀺 𑀅𑀕𑀢𑀺𑀓𑀺𑀮𑁂𑀲𑁂𑀳𑀺 𑀅𑀫𑀼𑀘𑁆𑀙𑀺𑀢𑁄 𑀅𑀦𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀬𑁄 𑀦𑀬𑀸𑀦𑀬𑀁 𑀦𑀬𑀢𑁂 𑀉𑀧𑀧𑀭𑀺𑀓𑁆𑀔𑀢𑀺, 𑀲𑁄 𑀦𑁂𑀯 𑀧𑀭𑀁 𑀛𑀸𑀧𑁂𑀢𑀺, 𑀦 𑀅𑀢𑁆𑀢𑀸𑀦𑀁. 𑀙𑀦𑁆𑀤𑀸𑀤𑀺𑀯𑀲𑁂𑀦 𑀳𑀺 𑀅𑀳𑁂𑀢𑀼𑀓𑀁 𑀤𑀡𑁆𑀟𑀁 𑀧𑀯𑀢𑁆𑀢𑁂𑀦𑁆𑀢𑁄 𑀧𑀭𑀫𑁆𑀧𑀺 𑀢𑁂𑀦 𑀤𑀡𑁆𑀟𑁂𑀦 𑀛𑀸𑀧𑁂𑀢𑀺 𑀤𑀳𑀢𑀺 𑀧𑀻𑀴𑁂𑀢𑀺, 𑀅𑀢𑁆𑀢𑀸𑀦𑀫𑁆𑀧𑀺 𑀢𑀢𑁄𑀦𑀺𑀤𑀸𑀦𑁂𑀦 𑀧𑀸𑀧𑁂𑀦. 𑀅𑀬𑀁 𑀧𑀦 𑀦 𑀧𑀭𑀁 𑀛𑀸𑀧𑁂𑀢𑀺, 𑀦 𑀅𑀢𑁆𑀢𑀸𑀦𑀁. 𑀬𑁄 𑀤𑀡𑁆𑀟𑀥𑀸𑀭𑁄 𑀪𑀯𑀢𑀻𑀥 𑀇𑀲𑁆𑀲𑀭𑁄𑀢𑀺 𑀬𑁄 𑀇𑀥 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀇𑀥 𑀲𑀢𑁆𑀢𑀮𑁄𑀓𑁂 𑀤𑁄𑀲𑀸𑀦𑀼𑀘𑁆𑀙𑀯𑀺𑀓𑀁 𑀤𑀡𑁆𑀟𑀁 𑀧𑀯𑀢𑁆𑀢𑁂𑀦𑁆𑀢𑁄 𑀤𑀡𑁆𑀟𑀥𑀸𑀭𑁄 𑀳𑁄𑀢𑀺. 𑀲 𑀯𑀡𑁆𑀡𑀕𑀼𑀢𑁆𑀢𑁄𑀢𑀺 𑀕𑀼𑀡𑀯𑀡𑁆𑀡𑁂𑀦 𑀘𑁂𑀯 𑀬𑀲𑀯𑀡𑁆𑀡𑁂𑀦 𑀘 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀲𑀺𑀭𑀺𑀬𑀸 𑀦 𑀥𑀁𑀲𑀢𑀺 𑀦 𑀧𑀭𑀺𑀳𑀸𑀬𑀢𑀺. 𑀅𑀯𑀡𑁆𑀡𑀲𑀁𑀬𑀼𑀢𑀸 𑀚𑀳𑀦𑁆𑀢𑀻𑀢𑀺 𑀅𑀥𑀫𑁆𑀫𑀺𑀓𑀸 𑀮𑁄𑀮𑀭𑀸𑀚𑀸𑀦𑁄 𑀅𑀯𑀡𑁆𑀡𑁂𑀦 𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀚𑀻𑀯𑀺𑀢𑀁 𑀚𑀳𑀦𑁆𑀢𑀺.

𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂𑀢𑀺 𑀬𑁂 𑀭𑀸𑀚𑀸𑀦𑁄 𑀆𑀘𑀸𑀭𑀅𑀭𑀺𑀬𑁂𑀳𑀺 𑀥𑀫𑁆𑀫𑀺𑀓𑀭𑀸𑀚𑀽𑀳𑀺 𑀧𑀯𑁂𑀤𑀺𑀢𑁂 𑀤𑀲𑀯𑀺𑀥𑁂 𑀭𑀸𑀚𑀥𑀫𑁆𑀫𑁂 𑀭𑀢𑀸. 𑀅𑀦𑀼𑀢𑁆𑀢𑀭𑀸 𑀢𑁂𑀢𑀺 𑀢𑁂 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘 𑀢𑀻𑀳𑀺𑀧𑀺 𑀏𑀢𑁂𑀳𑀺 𑀅𑀦𑀼𑀢𑁆𑀢𑀭𑀸 𑀚𑁂𑀝𑁆𑀞𑀓𑀸. 𑀢𑁂 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀺𑀲𑀡𑁆𑀞𑀺𑀢𑀸𑀢𑀺 𑀢𑁂 𑀅𑀕𑀢𑀺𑀧𑀳𑀸𑀦𑁂𑀦 𑀓𑀺𑀮𑁂𑀲𑀲𑀦𑁆𑀢𑀺𑀬𑀜𑁆𑀘 𑀲𑀼𑀲𑀻𑀮𑁆𑀬𑀲𑀗𑁆𑀔𑀸𑀢𑁂 𑀲𑁄𑀭𑀘𑁆𑀘𑁂 𑀘 𑀏𑀓𑀕𑁆𑀕𑀢𑀸𑀲𑀫𑀸𑀥𑀺𑀫𑁆𑀳𑀺 𑀘 𑀲𑀡𑁆𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸 𑀥𑀫𑁆𑀫𑀺𑀓𑀭𑀸𑀚𑀸𑀦𑁄. 𑀯𑀚𑀦𑁆𑀢𑀺 𑀮𑁄𑀓𑀁 𑀤𑀼𑀪𑀬𑀦𑁆𑀢𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀢𑁄 𑀤𑁂𑀯𑀮𑁄𑀓𑀁, 𑀤𑁂𑀯𑀮𑁄𑀓𑀢𑁄 𑀫𑀦𑀼𑀲𑁆𑀲𑀮𑁄𑀓𑀦𑁆𑀢𑀺 𑀉𑀪𑀬𑀮𑁄𑀓𑀫𑁂𑀯 𑀯𑀚𑀦𑁆𑀢𑀺, 𑀦𑀺𑀭𑀬𑀸𑀤𑀻𑀲𑀼 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦𑀭𑀧𑀫𑀤𑀸𑀦𑀦𑁆𑀢𑀺 𑀦𑀭𑀸𑀦𑀜𑁆𑀘 𑀦𑀸𑀭𑀻𑀦𑀜𑁆𑀘. 𑀞𑀧𑁂𑀫𑀺 𑀅𑀢𑁆𑀢𑀦𑀦𑁆𑀢𑀺 𑀓𑀼𑀤𑁆𑀥𑁄𑀧𑀺 𑀓𑁄𑀥𑀯𑀲𑁂𑀦 𑀅𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑁄𑀭𑀸𑀡𑀓𑀭𑀸𑀚𑀽𑀳𑀺 𑀞𑀧𑀺𑀢𑀦𑀬𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀞𑀧𑁂𑀫𑀺, 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑀁 𑀦 𑀪𑀺𑀦𑁆𑀤𑀸𑀫𑀻𑀢𑀺.

𑀏𑀯𑀁 𑀙𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀓𑀣𑀺𑀢𑁂 𑀲𑀩𑁆𑀩𑀸𑀧𑀺 𑀭𑀸𑀚𑀧𑀭𑀺𑀲𑀸 𑀢𑀼𑀝𑁆𑀞𑀸 ‘‘𑀅𑀬𑀁 𑀲𑀻𑀮𑀸𑀘𑀸𑀭𑀕𑀼𑀡𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀅𑀦𑀼𑀭𑀽𑀧𑀸’’𑀢𑀺 𑀭𑀜𑁆𑀜𑁄 𑀕𑀼𑀡𑁂 𑀓𑀣𑁂𑀲𑀼𑀁. 𑀲𑀼𑀫𑀗𑁆𑀕𑀮𑁄 𑀧𑀦 𑀧𑀭𑀺𑀲𑀸𑀬 𑀓𑀣𑀺𑀢𑀸𑀯𑀲𑀸𑀦𑁂 𑀉𑀝𑁆𑀞𑀸𑀬 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀭𑀜𑁆𑀜𑁄 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩. ‘‘𑀲𑀺𑀭𑀻 𑀘 𑀮𑀓𑁆𑀔𑀻 𑀘 𑀢𑀯𑁂𑀯 𑀔𑀢𑁆𑀢𑀺𑀬, 𑀚𑀦𑀸𑀥𑀺𑀧 𑀫𑀸 𑀯𑀺𑀚𑀳𑀺 𑀓𑀼𑀤𑀸𑀘𑀦𑀁;

𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀅𑀦𑀻𑀖𑁄 𑀢𑀼𑀯𑀁 𑀯𑀲𑁆𑀲𑀲𑀢𑀸𑀦𑀺 𑀧𑀸𑀮𑀬.

𑁩𑁪. ‘‘𑀕𑀼𑀡𑁂𑀳𑀺 𑀏𑀢𑁂𑀳𑀺 𑀉𑀧𑁂𑀢 𑀔𑀢𑁆𑀢𑀺𑀬, 𑀞𑀺𑀢𑀫𑀭𑀺𑀬𑀯𑀢𑁆𑀢𑀻 𑀲𑀼𑀯𑀘𑁄 𑀅𑀓𑁄𑀥𑀦𑁄;

𑀲𑀼𑀔𑀻 𑀅𑀦𑀼𑀧𑁆𑀧𑀻𑀴 𑀧𑀲𑀸𑀲 𑀫𑁂𑀤𑀺𑀦𑀺𑀁, 𑀇𑀢𑁄 𑀯𑀺𑀫𑀼𑀢𑁆𑀢𑁄𑀧𑀺 𑀘 𑀬𑀸𑀳𑀺 𑀲𑀼𑀕𑁆𑀕𑀢𑀺𑀁.

𑁩𑁫. ‘‘𑀏𑀯𑀁 𑀲𑀼𑀦𑀻𑀢𑁂𑀦 𑀲𑀼𑀪𑀸𑀲𑀺𑀢𑁂𑀦, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀉𑀧𑀸𑀬𑀲𑁄 𑀦𑀬𑀁;

𑀦𑀺𑀩𑁆𑀩𑀸𑀧𑀬𑁂 𑀲𑀗𑁆𑀔𑀼𑀪𑀺𑀢𑀁 𑀫𑀳𑀸𑀚𑀦𑀁, 𑀫𑀳𑀸𑀯 𑀫𑁂𑀖𑁄 𑀲𑀮𑀺𑀮𑁂𑀦 𑀫𑁂𑀤𑀺𑀦𑀺’’𑀦𑁆𑀢𑀺.

𑀢𑀢𑁆𑀣 𑀲𑀺𑀭𑀻 𑀘 𑀮𑀓𑁆𑀔𑀻 𑀘𑀸𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀘 𑀧𑀜𑁆𑀜𑀸 𑀘. 𑀅𑀦𑀻𑀖𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄 𑀳𑀼𑀢𑁆𑀯𑀸. 𑀉𑀧𑁂𑀢 𑀔𑀢𑁆𑀢𑀺𑀬𑀸𑀢𑀺 𑀉𑀧𑁂𑀢𑁄 𑀔𑀢𑁆𑀢𑀺𑀬, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀞𑀺𑀢𑀫𑀭𑀺𑀬𑀯𑀢𑁆𑀢𑀻𑀢𑀺 𑀞𑀺𑀢𑀅𑀭𑀺𑀬𑀯𑀢𑁆𑀢𑀺, 𑀅𑀭𑀺𑀬𑀯𑀢𑁆𑀢𑀺 𑀦𑀸𑀫 𑀤𑀲𑀭𑀸𑀚𑀥𑀫𑁆𑀫𑀲𑀗𑁆𑀔𑀸𑀢𑀁 𑀧𑁄𑀭𑀸𑀡𑀭𑀸𑀚𑀯𑀢𑁆𑀢𑀁, 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀞𑀺𑀢𑀭𑀸𑀚𑀥𑀫𑁆𑀫𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑁆𑀧𑀻𑀴 𑀧𑀲𑀸𑀲 𑀫𑁂𑀤𑀺𑀦𑀺𑀦𑁆𑀢𑀺 𑀅𑀦𑀼𑀧𑁆𑀧𑀻𑀴𑀁 𑀧𑀲𑀸𑀲 𑀫𑁂𑀤𑀺𑀦𑀺𑀜𑁆𑀘, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀼𑀦𑀻𑀢𑁂𑀦𑀸𑀢𑀺 𑀲𑀼𑀦𑀬𑁂𑀦 𑀲𑀼𑀝𑁆𑀞𑀼 𑀓𑀸𑀭𑀡𑁂𑀦. 𑀥𑀫𑁆𑀫𑁂𑀦𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀦. 𑀜𑀸𑀬𑁂𑀦𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀧𑀸𑀬𑀲𑁄𑀢𑀺 𑀉𑀧𑀸𑀬𑀓𑁄𑀲𑀮𑁆𑀮𑁂𑀦. 𑀦𑀬𑀦𑁆𑀢𑀺 𑀦𑀬𑀦𑁆𑀢𑁄 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀥𑀫𑁆𑀫𑀺𑀓𑀭𑀸𑀚𑀸. 𑀦𑀺𑀩𑁆𑀩𑀸𑀧𑀬𑁂𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀤𑀭𑀣𑀁 𑀅𑀧𑀦𑁂𑀦𑁆𑀢𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑀗𑁆𑀔𑀼𑀪𑀺𑀢𑀫𑁆𑀧𑀺 𑀫𑀳𑀸𑀚𑀦𑀁 𑀫𑀳𑀸𑀫𑁂𑀖𑁄 𑀲𑀮𑀺𑀮𑁂𑀦 𑀫𑁂𑀤𑀺𑀦𑀺𑀁 𑀯𑀺𑀬 𑀦𑀺𑀩𑁆𑀩𑀸𑀧𑁂𑀬𑁆𑀬, 𑀢𑁆𑀯𑀫𑁆𑀧𑀺 𑀢𑀣𑁂𑀯 𑀦𑀺𑀩𑁆𑀩𑀸𑀧𑁂𑀳𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀲𑀢𑁆𑀣𑀸 𑀓𑁄𑀲𑀮𑀭𑀜𑁆𑀜𑁄 𑀑𑀯𑀸𑀤𑀯𑀲𑁂𑀦 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀼𑀫𑀗𑁆𑀕𑀮𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁨𑁧] 𑁫. 𑀕𑀗𑁆𑀕𑀫𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀅𑀗𑁆𑀕𑀸𑀭𑀚𑀸𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀉𑀧𑁄𑀲𑀣𑀺𑀓𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀉𑀧𑀸𑀲𑀓𑀸 𑀲𑀸𑀥𑀼𑀭𑀽𑀧𑀁 𑀯𑁄 𑀓𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁂𑀳𑀺, 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀓𑁄𑀥𑁄 𑀦 𑀓𑀸𑀢𑀩𑁆𑀩𑁄, 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀉𑀧𑁄𑀲𑀣𑀯𑀸𑀲𑁄 𑀯𑀲𑀺𑀢𑀩𑁆𑀩𑁄, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀳𑀺 𑀏𑀓𑀁 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀫𑀳𑀸𑀬𑀲𑀁 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀼𑀘𑀺𑀧𑀭𑀺𑀯𑀸𑀭𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀯𑀺𑀪𑀯𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑁄. 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀸𑀧𑀺 𑀧𑀭𑀺𑀚𑀦𑁄𑀧𑀺 𑀅𑀦𑁆𑀢𑀫𑀲𑁄 𑀢𑀲𑁆𑀫𑀺𑀁 𑀖𑀭𑁂 𑀯𑀘𑁆𑀙𑀧𑀸𑀮𑀓𑀸𑀧𑀺 𑀲𑀩𑁆𑀩𑁂 𑀫𑀸𑀲𑀲𑁆𑀲 𑀙 𑀤𑀺𑀯𑀲𑁂 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀪𑀢𑀺𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀚𑀻𑀯𑀢𑀺. 𑀲𑁄 ‘‘𑀪𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀪𑀢𑀺𑀬𑀸 𑀓𑀫𑁆𑀫𑀓𑀭𑀡𑀢𑁆𑀣’’𑀦𑁆𑀢𑀺 𑀆𑀳. 𑀲𑁂𑀝𑁆𑀞𑀺 𑀅𑀜𑁆𑀜𑁂𑀲𑀁 𑀪𑀢𑀺𑀓𑀸𑀦𑀁 𑀆𑀕𑀢𑀤𑀺𑀯𑀲𑁂𑀬𑁂𑀯 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀺, 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀲𑀻𑀮𑀭𑀓𑁆𑀔𑀡𑀆𑀘𑀺𑀓𑁆𑀔𑀡𑁂 𑀲𑀜𑁆𑀜𑀁 𑀅𑀓𑀢𑁆𑀯𑀸 ‘‘𑀲𑀸𑀥𑀼, 𑀢𑀸𑀢, 𑀅𑀢𑁆𑀢𑀦𑁄 𑀪𑀢𑀺𑀁 𑀚𑀸𑀦𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀯𑀘𑁄 𑀳𑀼𑀢𑁆𑀯𑀸 𑀉𑀭𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀓𑀺𑀮𑀫𑀣𑀁 𑀅𑀕𑀡𑁂𑀢𑁆𑀯𑀸 𑀢𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀧𑀸𑀢𑁄𑀯 𑀓𑀫𑁆𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀆𑀕𑀘𑁆𑀙𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀦𑀕𑀭𑁂 𑀙𑀡𑀁 𑀖𑁄𑀲𑁂𑀲𑀼𑀁. 𑀫𑀳𑀸𑀲𑁂𑀝𑁆𑀞𑀺 𑀤𑀸𑀲𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚𑀼𑀧𑁄𑀲𑀣𑀤𑀺𑀯𑀲𑁄, 𑀕𑁂𑀳𑁂 𑀓𑀫𑁆𑀫𑀓𑀭𑀸𑀦𑀁 𑀧𑀸𑀢𑁄𑀯 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀤𑁂𑀳𑀺, 𑀓𑀸𑀮𑀲𑁆𑀲𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀓𑀫𑁆𑀫𑀦𑁆𑀢𑀁 𑀅𑀕𑀫𑀸𑀲𑀺, ‘‘𑀅𑀚𑁆𑀚𑀼𑀧𑁄𑀲𑀣𑀺𑀓𑁄 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀢𑀲𑁆𑀲 𑀓𑁄𑀘𑀺 𑀦𑀸𑀭𑁄𑀘𑁂𑀲𑀺. 𑀲𑁂𑀲𑀓𑀫𑁆𑀫𑀓𑀭𑀸 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸𑀯 𑀅𑀳𑁂𑀲𑀼𑀁. 𑀲𑁂𑀝𑁆𑀞𑀺𑀧𑀺 𑀲𑀧𑀼𑀢𑁆𑀢𑀤𑀸𑀭𑁄 𑀲𑀧𑀭𑀺𑀚𑀦𑁄 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀳𑀺, 𑀲𑀩𑁆𑀩𑁂𑀧𑀺 𑀉𑀧𑁄𑀲𑀣𑀺𑀓𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀲𑀓𑀮𑀤𑀺𑀯𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀆𑀕𑀢𑁄. 𑀅𑀣𑀲𑁆𑀲 𑀪𑀢𑁆𑀢𑀓𑀸𑀭𑀺𑀓𑀸 𑀳𑀢𑁆𑀣𑀥𑁄𑀯𑀦𑀁 𑀤𑀢𑁆𑀯𑀸 𑀧𑀸𑀢𑀺𑀬𑀁 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀸𑀬 𑀯𑁂𑀮𑀸𑀬 𑀫𑀳𑀸𑀲𑀤𑁆𑀤𑁄 𑀳𑁄𑀢𑀺, 𑀅𑀚𑁆𑀚 𑀓𑀳𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀩𑁆𑀩𑁂 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀦𑀺 𑀕𑀢𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀏𑀢𑁆𑀢𑀓𑀸𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀅𑀳𑀁 𑀏𑀓𑁄 𑀤𑀼𑀲𑁆𑀲𑀻𑀮𑁄 𑀳𑀼𑀢𑁆𑀯𑀸 𑀦 𑀯𑀲𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀉𑀧𑁄𑀲𑀣𑀗𑁆𑀕𑁂𑀲𑀼 𑀅𑀥𑀺𑀝𑁆𑀞𑀺𑀢𑁂𑀲𑀼 𑀳𑁄𑀢𑀺 𑀦𑀼 𑀔𑁄 𑀉𑀧𑁄𑀲𑀣𑀓𑀫𑁆𑀫𑀁, 𑀦𑁄’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀢𑀸𑀢 𑀧𑀸𑀢𑁄𑀯 𑀅𑀦𑀥𑀺𑀝𑁆𑀞𑀺𑀢𑀢𑁆𑀢𑀸 𑀲𑀓𑀮𑀁 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀳𑁄𑀢𑀺, 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀁 𑀧𑀦 𑀳𑁄𑀢𑀻’’𑀢𑀺 𑀆𑀳.

𑀲𑁄 ‘‘𑀏𑀢𑁆𑀢𑀓𑀫𑁆𑀧𑀺 𑀳𑁄𑀢𑀽’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀳𑀼𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀲𑀓𑀮𑀤𑀺𑀯𑀲𑀁 𑀦𑀺𑀭𑀸𑀳𑀸𑀭𑀢𑀸𑀬 𑀧𑀘𑁆𑀙𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑀢𑁆𑀣𑀓𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀁𑀲𑀼. 𑀲𑁂𑀝𑁆𑀞𑀺𑀦𑀸 𑀦𑀸𑀦𑀸𑀯𑀺𑀥𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀪𑀼𑀜𑁆𑀚𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀉𑀧𑁄𑀲𑀣𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀺’’𑀦𑁆𑀢𑀺 𑀆𑀳. 𑀩𑀮𑀯𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺, 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 ‘‘𑀇𑀤𑀸𑀦𑀺 𑀫𑀭𑀺𑀲𑁆𑀲𑀢𑀻’’𑀢𑀺 𑀦𑀻𑀳𑀭𑀺𑀢𑁆𑀯𑀸 ‘‘𑀑𑀲𑀸𑀭𑀓𑁂 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀢𑀲𑁆𑀫𑀺𑀁 𑀔𑀡𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀭𑀣𑀯𑀭𑀕𑀢𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀢𑀁 𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀫𑀺𑀁 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀭𑀚𑁆𑀚𑀁 𑀧𑀢𑁆𑀣𑁂𑀲𑀺. 𑀲𑁄 𑀘𑀯𑀺𑀢𑁆𑀯𑀸 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀮𑀤𑁆𑀥𑀕𑀩𑁆𑀪𑀧𑀭𑀺𑀳𑀸𑀭𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀉𑀤𑀬𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺, 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 ‘‘𑀅𑀧𑁆𑀧𑀓𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫 𑀇𑀤’’𑀦𑁆𑀢𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀲𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀫𑀳𑀦𑁆𑀢𑀁 𑀲𑀺𑀭𑀺𑀯𑀺𑀪𑀯𑀁 𑀑𑀮𑁄𑀓𑁂𑀢𑁆𑀯𑀸 𑀢𑀤𑁂𑀯 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.