𑁯. 𑀦𑀯𑀓𑀦𑀺𑀧𑀸𑀢𑁄

[𑁪𑁨𑁭] 𑁧. 𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸

𑀧𑀭𑀺𑀲𑀗𑁆𑀓𑀼𑀧𑀣𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀅𑀢𑁆𑀣𑀓𑀸𑀫𑁂𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀘𑁂𑀯 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀘 ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀆𑀮𑁄𑀓𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀮𑁄𑀓𑀺𑀢𑀩𑁆𑀩𑀁, 𑀏𑀯𑀁 𑀲𑀫𑀺𑀜𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀧𑀲𑀸𑀭𑀺𑀢𑀩𑁆𑀩𑀁, 𑀏𑀯𑀁 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩𑀁, 𑀏𑀯𑀁 𑀧𑀢𑁆𑀢𑁄 𑀕𑀳𑁂𑀢𑀩𑁆𑀩𑁄, 𑀬𑀸𑀧𑀦𑀫𑀢𑁆𑀢𑀁 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁂𑀦 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑀸 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀤𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀦𑀸𑀫 𑀚𑀸𑀦𑀺𑀢𑀩𑁆𑀩𑀁, 𑀇𑀤𑀁 𑀕𑀫𑀺𑀓𑀯𑀢𑁆𑀢𑀁 𑀦𑀸𑀫, 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺. 𑀢𑀢𑁆𑀣 𑀢𑁂 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀇𑀫𑁂 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸 𑀦𑀸𑀫, 𑀏𑀢𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺𑀬𑀫𑀸𑀦𑁄 𑀤𑀼𑀩𑁆𑀩𑀘𑁄 𑀅𑀳𑁄𑀲𑀺 𑀅𑀓𑁆𑀔𑀫𑁄 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺𑀁. ‘‘𑀅𑀳𑀁 𑀢𑀼𑀫𑁆𑀳𑁂 𑀦 𑀯𑀤𑀸𑀫𑀺, 𑀢𑀼𑀫𑁆𑀳𑁂 𑀧𑀦 𑀫𑀁 𑀓𑀲𑁆𑀫𑀸 𑀯𑀤𑀣, 𑀅𑀳𑀫𑁂𑀯 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀸 𑀅𑀦𑀢𑁆𑀣𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀅𑀯𑀘𑀦𑀻𑀬𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀤𑀼𑀩𑁆𑀩𑀘𑀪𑀸𑀯𑀁 𑀜𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀅𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀣𑀓𑀸𑀫𑀸𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀺𑀚𑁆𑀛𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀲𑀼𑀧𑀢𑁆𑀢𑁄 𑀦𑀸𑀫 𑀕𑀺𑀚𑁆𑀛𑀭𑀸𑀚𑀸 𑀅𑀦𑁂𑀓𑀲𑀳𑀲𑁆𑀲𑀕𑀺𑀚𑁆𑀛𑀧𑀭𑀺𑀯𑀸𑀭𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺, 𑀣𑀸𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀦 𑀅𑀢𑀺𑀤𑀽𑀭𑀁 𑀉𑀧𑁆𑀧𑀢𑀢𑀺. 𑀅𑀣 𑀦𑀁 𑀧𑀺𑀢𑀸 ‘‘𑀢𑀸𑀢, 𑀏𑀢𑁆𑀢𑀓𑀁 𑀦𑀸𑀫 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸𑀧𑀺 𑀏𑀓𑀤𑀺𑀯𑀲𑀁 𑀧𑀦 𑀯𑀼𑀝𑁆𑀞𑁂 𑀤𑁂𑀯𑁂 𑀕𑀺𑀚𑁆𑀛𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀢𑀺𑀢𑁆𑀯𑀸 𑀲𑁂𑀲𑁂 𑀑𑀳𑀸𑀬 𑀅𑀢𑀺𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑀁 𑀧𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧. ‘‘𑀧𑀭𑀺𑀲𑀗𑁆𑀓𑀼𑀧𑀣𑁄 𑀦𑀸𑀫, 𑀕𑀺𑀚𑁆𑀛𑀧𑀦𑁆𑀣𑁄 𑀲𑀦𑀦𑁆𑀢𑀦𑁄;

𑀢𑀢𑁆𑀭𑀸𑀲𑀺 𑀫𑀸𑀢𑀸𑀧𑀺𑀢𑀭𑁄, 𑀕𑀺𑀚𑁆𑀛𑁄 𑀧𑁄𑀲𑁂𑀲𑀺 𑀚𑀺𑀡𑁆𑀡𑀓𑁂;

𑀢𑁂𑀲𑀁 𑀅𑀚𑀕𑀭𑀫𑁂𑀤𑀁, 𑀅𑀘𑁆𑀘𑀳𑀸𑀲𑀺 𑀩𑀳𑀼𑀢𑁆𑀢𑀲𑁄.

𑁨. ‘‘𑀧𑀺𑀢𑀸 𑀘 𑀧𑀼𑀢𑁆𑀢𑀁 𑀅𑀯𑀘, 𑀚𑀸𑀦𑀁 𑀉𑀘𑁆𑀘𑀁 𑀧𑀧𑀸𑀢𑀺𑀦𑀁;

𑀲𑀼𑀧𑀢𑁆𑀢𑀁 𑀣𑀸𑀫𑀲𑀫𑁆𑀧𑀦𑁆𑀦𑀁, 𑀢𑁂𑀚𑀲𑁆𑀲𑀺𑀁 𑀤𑀽𑀭𑀕𑀸𑀫𑀺𑀦𑀁.

𑁩. ‘‘𑀧𑀭𑀺𑀧𑁆𑀮𑀯𑀦𑁆𑀢𑀁 𑀧𑀣𑀯𑀺𑀁, 𑀬𑀤𑀸 𑀢𑀸𑀢 𑀯𑀺𑀚𑀸𑀦𑀳𑀺;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁;

𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀲𑁆𑀲𑀼, 𑀫𑀸𑀲𑁆𑀲𑀼 𑀏𑀢𑁆𑀢𑁄 𑀧𑀭𑀁 𑀕𑀫𑀺.

𑁪. ‘‘𑀉𑀤𑀧𑀢𑁆𑀢𑁄𑀲𑀺 𑀯𑁂𑀕𑁂𑀦, 𑀩𑀮𑀻 𑀧𑀓𑁆𑀔𑀻 𑀤𑀺𑀚𑀼𑀢𑁆𑀢𑀫𑁄;

𑀑𑀮𑁄𑀓𑀬𑀦𑁆𑀢𑁄 𑀯𑀓𑁆𑀓𑀗𑁆𑀕𑁄, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘.

𑁫. ‘‘𑀅𑀤𑁆𑀤𑀲𑁆𑀲 𑀧𑀣𑀯𑀺𑀁 𑀕𑀺𑀚𑁆𑀛𑁄, 𑀬𑀣𑀸𑀲𑀸𑀲𑀺 𑀧𑀺𑀢𑀼𑀲𑁆𑀲𑀼𑀢𑀁;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁.

𑁬. ‘‘𑀢𑀜𑁆𑀘 𑀲𑁄 𑀲𑀫𑀢𑀺𑀓𑁆𑀓𑀫𑁆𑀫, 𑀧𑀭𑀫𑁂𑀯𑀘𑁆𑀘𑀯𑀢𑁆𑀢𑀣;

𑀢𑀜𑁆𑀘 𑀯𑀸𑀢𑀲𑀺𑀔𑀸 𑀢𑀺𑀓𑁆𑀔𑀸, 𑀅𑀘𑁆𑀘𑀳𑀸𑀲𑀺 𑀩𑀮𑀺𑀁 𑀤𑀺𑀚𑀁.

𑁭. ‘‘𑀦𑀸𑀲𑀓𑁆𑀔𑀸𑀢𑀺𑀕𑀢𑁄 𑀧𑁄𑀲𑁄, 𑀧𑀼𑀦𑀤𑁂𑀯 𑀦𑀺𑀯𑀢𑁆𑀢𑀺𑀢𑀼𑀁;

𑀤𑀺𑀚𑁄 𑀩𑁆𑀬𑀲𑀦𑀫𑀸𑀧𑀸𑀤𑀺, 𑀯𑁂𑀭𑀫𑁆𑀪𑀸𑀦𑀁 𑀯𑀲𑀁 𑀕𑀢𑁄.

𑁮. ‘‘𑀢𑀲𑁆𑀲 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀫𑀸𑀧𑀸𑀤𑀼𑀁, 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂.

𑁯. ‘‘𑀏𑀯𑀫𑁆𑀧𑀺 𑀇𑀥 𑀯𑀼𑀟𑁆𑀠𑀸𑀦𑀁, 𑀬𑁄 𑀯𑀸𑀓𑁆𑀬𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑀺𑀲𑀻𑀫𑀘𑀭𑁄 𑀤𑀺𑀢𑁆𑀢𑁄, 𑀕𑀺𑀚𑁆𑀛𑁄𑀯𑀸𑀢𑀻𑀢𑀲𑀸𑀲𑀦𑁄;

𑀲 𑀯𑁂 𑀩𑁆𑀬𑀲𑀦𑀁 𑀧𑀧𑁆𑀧𑁄𑀢𑀺, 𑀅𑀓𑀢𑁆𑀯𑀸 𑀯𑀼𑀟𑁆𑀠𑀲𑀸𑀲𑀦’’𑀦𑁆𑀢𑀺.

𑀢𑀢𑁆𑀣 𑀧𑀭𑀺𑀲𑀗𑁆𑀓𑀼𑀧𑀣𑁄𑀢𑀺 𑀲𑀗𑁆𑀓𑀼𑀧𑀣𑁄. 𑀫𑀦𑀼𑀲𑁆𑀲𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀢𑁂𑀲𑀼 𑀭𑀚𑁆𑀚𑀼𑀬𑁄 𑀩𑀦𑁆𑀥𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀦 𑀲𑁄 𑀕𑀺𑀚𑁆𑀛𑀧𑀩𑁆𑀩𑀢𑁂 𑀚𑀗𑁆𑀖𑀫𑀕𑁆𑀕𑁄 ‘‘𑀲𑀗𑁆𑀓𑀼𑀧𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀕𑀺𑀚𑁆𑀛𑀧𑀦𑁆𑀣𑁄𑀢𑀺 𑀕𑀺𑀚𑁆𑀛𑀧𑀩𑁆𑀩𑀢𑀫𑀢𑁆𑀣𑀓𑁂 𑀫𑀳𑀸𑀫𑀕𑁆𑀕𑁄. 𑀲𑀦𑀦𑁆𑀢𑀦𑁄𑀢𑀺 𑀧𑁄𑀭𑀸𑀡𑁄. 𑀢𑀢𑁆𑀭𑀸𑀲𑀻𑀢𑀺 𑀢𑀲𑁆𑀫𑀺𑀁 𑀕𑀺𑀚𑁆𑀛𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀗𑁆𑀓𑀼𑀧𑀣𑁂 𑀏𑀓𑁄 𑀕𑀺𑀚𑁆𑀛𑁄 𑀆𑀲𑀺, 𑀲𑁄 𑀚𑀺𑀡𑁆𑀡𑀓𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺. 𑀅𑀚𑀕𑀭𑀫𑁂𑀤𑀦𑁆𑀢𑀺 𑀅𑀚𑀕𑀭𑀸𑀦𑀁 𑀫𑁂𑀤𑀁. 𑀅𑀘𑁆𑀘𑀳𑀸𑀲𑀻𑀢𑀺 𑀅𑀢𑀺𑀯𑀺𑀬 𑀆𑀳𑀭𑀺. 𑀩𑀳𑀼𑀢𑁆𑀢𑀲𑁄𑀢𑀺 𑀩𑀳𑀼𑀲𑁄. 𑀚𑀸𑀦𑀁 𑀉𑀘𑁆𑀘𑀁 𑀧𑀧𑀸𑀢𑀺𑀦𑀦𑁆𑀢𑀺 ‘‘𑀧𑀼𑀢𑁆𑀢𑁄 𑀢𑁂 𑀅𑀢𑀺𑀉𑀘𑁆𑀘𑀁 𑀞𑀸𑀦𑀁 𑀮𑀗𑁆𑀖𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀉𑀘𑁆𑀘𑁂 𑀧𑀧𑀸𑀢𑀻 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑁄. 𑀢𑁂𑀚𑀲𑁆𑀲𑀺𑀦𑁆𑀢𑀺 𑀧𑀼𑀭𑀺𑀲𑀢𑁂𑀚𑀲𑀫𑁆𑀧𑀦𑁆𑀦𑀁. 𑀤𑀽𑀭𑀕𑀸𑀫𑀺𑀦𑀦𑁆𑀢𑀺 𑀢𑁂𑀦𑁂𑀯 𑀢𑁂𑀚𑁂𑀦 𑀤𑀽𑀭𑀕𑀸𑀫𑀺𑀁. 𑀧𑀭𑀺𑀧𑁆𑀮𑀯𑀦𑁆𑀢𑀦𑁆𑀢𑀺 𑀉𑀧𑁆𑀧𑀮𑀧𑀢𑁆𑀢𑀁 𑀯𑀺𑀬 𑀉𑀤𑀓𑁂 𑀉𑀧𑁆𑀮𑀯𑀫𑀸𑀦𑀁. 𑀯𑀺𑀚𑀸𑀦𑀳𑀻𑀢𑀺 𑀯𑀺𑀚𑀸𑀦𑀸𑀲𑀺. 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀬𑀲𑁆𑀫𑀺𑀁 𑀢𑁂 𑀧𑀤𑁂𑀲𑁂 𑀞𑀺𑀢𑀲𑁆𑀲 𑀲𑀫𑀼𑀤𑁆𑀤𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀚𑀫𑁆𑀩𑀼𑀤𑀻𑀧𑁄 𑀘𑀓𑁆𑀓𑀫𑀡𑁆𑀟𑀮𑀁𑀯 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀸𑀳𑀻𑀢𑀺 𑀑𑀯𑀤𑀦𑁆𑀢𑁄 𑀏𑀯𑀫𑀸𑀳.

𑀉𑀤𑀧𑀢𑁆𑀢𑁄𑀲𑀻𑀢𑀺 𑀧𑀺𑀢𑀼 𑀑𑀯𑀸𑀤𑀁 𑀅𑀓𑀢𑁆𑀯𑀸 𑀏𑀓𑀤𑀺𑀯𑀲𑀁 𑀕𑀺𑀚𑁆𑀛𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀢𑀺𑀢𑁄 𑀢𑁂 𑀑𑀳𑀸𑀬 𑀧𑀺𑀢𑀭𑀸 𑀓𑀣𑀺𑀢𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀑𑀮𑁄𑀓𑀬𑀦𑁆𑀢𑁄𑀢𑀺 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀳𑁂𑀝𑁆𑀞𑀸 𑀑𑀮𑁄𑀓𑁂𑀦𑁆𑀢𑁄. 𑀯𑀓𑁆𑀓𑀗𑁆𑀕𑁄𑀢𑀺 𑀯𑀗𑁆𑀓𑀕𑀻𑀯𑁄. 𑀬𑀣𑀸𑀲𑀸𑀲𑀺 𑀧𑀺𑀢𑀼𑀲𑁆𑀲𑀼𑀢𑀦𑁆𑀢𑀺 𑀬𑀣𑀸𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀲𑀼𑀢𑀁 𑀆𑀲𑀺, 𑀢𑀣𑁂𑀯 𑀅𑀤𑁆𑀤𑀲, ‘‘𑀬𑀣𑀸𑀲𑁆𑀲𑀸𑀲𑀻’’𑀢𑀺𑀧𑀺 𑀧𑀸𑀞𑁄. 𑀧𑀭𑀫𑁂𑀯𑀘𑁆𑀘𑀯𑀢𑁆𑀢𑀣𑀸𑀢𑀺 𑀧𑀺𑀢𑀭𑀸 𑀅𑀓𑁆𑀔𑀸𑀢𑀝𑁆𑀞𑀸𑀦𑀢𑁄 𑀧𑀭𑀁 𑀅𑀢𑀺𑀯𑀢𑁆𑀢𑁄𑀯. 𑀢𑀜𑁆𑀘 𑀯𑀸𑀢𑀲𑀺𑀔𑀸 𑀢𑀺𑀓𑁆𑀔𑀸𑀢𑀺 𑀢𑀁 𑀅𑀦𑁄𑀯𑀸𑀤𑀓𑀁 𑀩𑀮𑀺𑀫𑁆𑀧𑀺 𑀲𑀫𑀸𑀦𑀁 𑀤𑀺𑀚𑀁 𑀢𑀺𑀔𑀺𑀡𑀯𑁂𑀭𑀫𑁆𑀪𑀯𑀸𑀢𑀲𑀺𑀔𑀸 𑀅𑀘𑁆𑀘𑀳𑀸𑀲𑀺 𑀅𑀢𑀺𑀳𑀭𑀺, 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀅𑀓𑀸𑀲𑀺. 𑀦𑀸𑀲𑀓𑁆𑀔𑀸𑀢𑀺𑀕𑀢𑁄𑀢𑀺 𑀦𑀸𑀲𑀓𑁆𑀔𑀺 𑀅𑀢𑀺𑀕𑀢𑁄. 𑀧𑁄𑀲𑁄𑀢𑀺 𑀲𑀢𑁆𑀢𑁄. 𑀅𑀦𑁄𑀯𑀸𑀤𑀓𑀭𑁂𑀢𑀺 𑀢𑀲𑁆𑀫𑀺𑀁 𑀤𑀺𑀚𑁂 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀓𑀭𑁄𑀦𑁆𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀓𑀢𑁆𑀯𑀸 𑀯𑀼𑀟𑁆𑀠𑀲𑀸𑀲𑀦𑀦𑁆𑀢𑀺 𑀯𑀼𑀟𑁆𑀠𑀸𑀦𑀁 𑀳𑀺𑀢𑀓𑀸𑀫𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀏𑀯𑀫𑁂𑀯 𑀩𑁆𑀬𑀲𑀦𑀁 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀸 𑀕𑀺𑀚𑁆𑀛𑀲𑀤𑀺𑀲𑁄 𑀪𑀯, 𑀅𑀢𑁆𑀣𑀓𑀸𑀫𑀸𑀦𑀁 𑀯𑀘𑀦𑀁 𑀓𑀭𑁄𑀳𑀻𑀢𑀺. 𑀲𑁄 𑀲𑀢𑁆𑀣𑀸𑀭𑀸 𑀏𑀯𑀁 𑀑𑀯𑀤𑀺𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀯𑀘𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀩𑁆𑀩𑀘𑀕𑀺𑀚𑁆𑀛𑁄 𑀏𑀢𑀭𑀳𑀺 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀕𑀺𑀚𑁆𑀛𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁨𑁮] 𑁨. 𑀓𑁄𑀲𑀫𑁆𑀩𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀧𑀼𑀣𑀼𑀲𑀤𑁆𑀤𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀁 𑀦𑀺𑀲𑁆𑀲𑀸𑀬 𑀖𑁄𑀲𑀺𑀢𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀫𑁆𑀩𑀺𑀬𑀁 𑀪𑀡𑁆𑀟𑀦𑀓𑀸𑀭𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁫𑁧 𑀆𑀤𑀬𑁄) 𑀆𑀕𑀢𑀫𑁂𑀯, 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀢𑀤𑀸 𑀓𑀺𑀭 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀺𑀁𑀲𑀼 𑀯𑀺𑀦𑀬𑀥𑀭𑁄 𑀘 𑀲𑀼𑀢𑁆𑀢𑀦𑁆𑀢𑀺𑀓𑁄 𑀘. 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑀺𑀓𑁄 𑀏𑀓𑀤𑀺𑀯𑀲𑀁 𑀲𑀭𑀻𑀭𑀯𑀮𑀜𑁆𑀚𑀁 𑀓𑀢𑁆𑀯𑀸 𑀉𑀤𑀓𑀓𑁄𑀝𑁆𑀞𑀓𑁂 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀧𑀘𑁆𑀙𑀸 𑀯𑀺𑀦𑀬𑀥𑀭𑁄 𑀢𑀢𑁆𑀣 𑀧𑀯𑀺𑀝𑁆𑀞𑁄 𑀢𑀁 𑀉𑀤𑀓𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀢𑀭𑀁 𑀧𑀼𑀘𑁆𑀙𑀺 ‘‘𑀆𑀯𑀼𑀲𑁄, 𑀢𑀬𑀸 𑀉𑀤𑀓𑀁 𑀞𑀧𑀺𑀢’’𑀦𑁆𑀢𑀺. ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁆𑀣 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀲𑀻’’𑀢𑀺? ‘‘𑀆𑀫𑀸𑀯𑀼𑀲𑁄 𑀦 𑀚𑀸𑀦𑀸𑀫𑀻’’𑀢𑀺. ‘‘𑀳𑁄𑀢𑀺, 𑀆𑀯𑀼𑀲𑁄, 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺? ‘‘𑀢𑁂𑀦 𑀳𑀺 𑀧𑀝𑀺𑀓𑀭𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. ‘‘𑀲𑀘𑁂 𑀧𑀦 𑀢𑁂, 𑀆𑀯𑀼𑀲𑁄, 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺. 𑀯𑀺𑀦𑀬𑀥𑀭𑁄𑀧𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑀸𑀦𑀁 ‘‘𑀅𑀬𑀁 𑀲𑀼𑀢𑁆𑀢𑀦𑁆𑀢𑀺𑀓𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲 𑀦𑀺𑀲𑁆𑀲𑀺𑀢𑀓𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺 𑀆𑀳𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀏𑀯𑀫𑀸𑀳 𑁋 ‘‘𑀅𑀬𑀁 𑀯𑀺𑀦𑀬𑀥𑀭𑁄 𑀧𑀼𑀩𑁆𑀩𑁂 ‘𑀅𑀦𑀸𑀧𑀢𑁆𑀢𑀻’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀆𑀧𑀢𑁆𑀢𑀻’𑀢𑀺 𑀯𑀤𑀢𑀺, 𑀫𑀼𑀲𑀸𑀯𑀸𑀤𑀻 𑀏𑀲𑁄’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀫𑀼𑀲𑀸𑀯𑀸𑀤𑀻’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼. 𑀢𑀢𑁄 𑀯𑀺𑀦𑀬𑀥𑀭𑁄 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂𑀦 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸 𑀉𑀧𑀸𑀲𑀓𑀸𑀧𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀳𑁂𑀲𑀼𑀁. 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀺𑀓𑀸 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀆𑀭𑀓𑁆𑀔𑀤𑁂𑀯𑀢𑀸𑀧𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀳𑁂𑀲𑀼𑀁. 𑀢𑀸𑀲𑀁 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀸 𑀤𑁆𑀯𑁂 𑀧𑀓𑁆𑀔𑀸 𑀅𑀳𑁂𑀲𑀼𑀁. 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀧𑀦 𑀇𑀤𑀁 𑀓𑁄𑀮𑀸𑀳𑀮𑀁 𑀅𑀕𑀫𑀸𑀲𑀺.

𑀅𑀣𑁂𑀓𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 ‘‘𑀥𑀫𑁆𑀫𑀺𑀓𑁂𑀦𑁂𑀯 𑀓𑀫𑁆𑀫𑁂𑀦 𑀅𑀬𑀁 𑀉𑀓𑁆𑀔𑀺𑀢𑁆𑀢𑁄, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀁 𑀅𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄’’𑀢𑀺 𑀮𑀤𑁆𑀥𑀺𑀁, 𑀉𑀓𑁆𑀔𑁂𑀧𑀓𑁂𑀳𑀺 𑀯𑀸𑀭𑀺𑀬𑀫𑀸𑀦𑀸𑀦𑀫𑁆𑀧𑀺 𑀢𑁂𑀲𑀁 𑀢𑀁 𑀅𑀦𑀼𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀡𑀪𑀸𑀯𑀜𑁆𑀘 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀲𑀫𑀕𑁆𑀕𑀸 𑀓𑀺𑀭 𑀳𑁄𑀦𑁆𑀢𑀽’’𑀢𑀺 𑀤𑁆𑀯𑁂 𑀯𑀸𑀭𑁂 𑀧𑁂𑀲𑁂𑀢𑁆𑀯𑀸 ‘‘𑀦 𑀇𑀘𑁆𑀙𑀦𑁆𑀢𑀺 𑀪𑀦𑁆𑀢𑁂 𑀲𑀫𑀕𑁆𑀕𑀸 𑀪𑀯𑀺𑀢𑀼’’𑀦𑁆𑀢𑀺 𑀲𑀼𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 ‘‘𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 𑀉𑀓𑁆𑀔𑁂𑀧𑀦𑁂, 𑀇𑀢𑀭𑁂𑀲𑀜𑁆𑀘 𑀅𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀆𑀤𑀻𑀦𑀯𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦 𑀢𑁂𑀲𑀁 𑀢𑀢𑁆𑀣𑁂𑀯 𑀏𑀓𑀲𑀻𑀫𑀸𑀬𑀁 𑀉𑀧𑁄𑀲𑀣𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀪𑀡𑁆𑀟𑀦𑀚𑀸𑀢𑀸𑀦𑀁 ‘‘𑀆𑀲𑀦𑀦𑁆𑀢𑀭𑀺𑀓𑀸𑀬 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀪𑀢𑁆𑀢𑀕𑁆𑀕𑁂 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺𑀧𑀺 𑀪𑀡𑁆𑀟𑀦𑀚𑀸𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑀯𑀸𑀤𑀺𑀦𑀸 𑀪𑀕𑀯𑀢𑁄 𑀯𑀺𑀳𑁂𑀲𑀁 𑀅𑀦𑀺𑀘𑁆𑀙𑀦𑁆𑀢𑁂𑀦 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑀸𑀫𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼, 𑀫𑀬𑀁 𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑁋

𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀓𑀸𑀲𑀺𑀭𑀸𑀚𑀸 𑀅𑀳𑁄𑀲𑀻𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀭𑀚𑁆𑀚𑀁 𑀅𑀘𑁆𑀙𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀯𑀲𑀦𑁆𑀢𑀲𑁆𑀲 𑀫𑀸𑀭𑀺𑀢𑀪𑀸𑀯𑀜𑁆𑀘𑁂𑀯 𑀤𑀻𑀖𑀸𑀯𑀼𑀓𑀼𑀫𑀸𑀭𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑁂 𑀤𑀺𑀦𑁆𑀦𑁂 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀲𑀫𑀕𑁆𑀕𑀪𑀸𑀯𑀜𑁆𑀘 𑀓𑀣𑁂𑀢𑁆𑀯𑀸 ‘‘𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀆𑀤𑀺𑀦𑁆𑀦𑀤𑀡𑁆𑀟𑀸𑀦𑀁 𑀆𑀤𑀺𑀦𑁆𑀦𑀲𑀢𑁆𑀣𑀸𑀦𑀁 𑀏𑀯𑀭𑀽𑀧𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑀁 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣, 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀔𑀫𑀸 𑀘 𑀪𑀯𑁂𑀬𑁆𑀬𑀸𑀣 𑀲𑁄𑀭𑀢𑀸 𑀘𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦’’𑀦𑁆𑀢𑀺 𑀯𑀸𑀭𑁂𑀢𑁆𑀯𑀸 𑀅𑀦𑁄𑀭𑀫𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀧𑀭𑀺𑀬𑀸𑀤𑀺𑀡𑁆𑀡𑀭𑀽𑀧𑀸 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸, 𑀦 𑀬𑀺𑀫𑁂 𑀲𑀼𑀓𑀭𑀸 𑀲𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀬𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀗𑁆𑀖𑀫𑀚𑁆𑀛𑁂 𑀆𑀓𑀸𑀲𑁂 𑀞𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦. ‘‘𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;

𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀁.

𑁧𑁧. ‘‘𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽.

𑁧𑁨. ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁧𑁩. ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

𑁧𑁪. ‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑁧𑁫. ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁧𑁬. ‘‘𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸 𑀧𑀸𑀡𑀳𑀭𑀸, 𑀕𑀯𑀸𑀲𑁆𑀲𑀥𑀦𑀳𑀸𑀭𑀺𑀦𑁄;

𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁, 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺;

𑀓𑀲𑁆𑀫𑀸 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸.

𑁧𑁭. ‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑁧𑁮. ‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁧𑁯. ‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀧𑀸𑀧𑀸𑀦𑀺 𑀓𑀬𑀺𑀭𑀸, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑀢𑀢𑁆𑀣 𑀧𑀼𑀣𑀼 𑀫𑀳𑀸𑀲𑀤𑁆𑀤𑁄 𑀅𑀲𑁆𑀲𑀸𑀢𑀺 𑀧𑀼𑀣𑀼𑀲𑀤𑁆𑀤𑁄. 𑀲𑀫𑀚𑀦𑁄𑀢𑀺 𑀲𑀫𑀸𑀦𑁄 𑀏𑀓𑀲𑀤𑀺𑀲𑁄 𑀚𑀦𑁄, 𑀲𑀩𑁆𑀩𑁄𑀯𑀸𑀬𑀁 𑀪𑀡𑁆𑀟𑀦𑀓𑀸𑀭𑀓𑀚𑀦𑁄 𑀲𑀫𑀦𑁆𑀢𑀢𑁄 𑀲𑀤𑁆𑀤𑀦𑀺𑀘𑁆𑀙𑀸𑀭𑀡𑁂𑀦 𑀧𑀼𑀣𑀼𑀲𑀤𑁆𑀤𑁄 𑀘𑁂𑀯 𑀲𑀤𑀺𑀲𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣𑀸𑀢𑀺 𑀢𑀢𑁆𑀣 𑀓𑁄𑀘𑀺 𑀏𑀓𑁄𑀧𑀺 ‘‘𑀅𑀳𑀁 𑀩𑀸𑀮𑁄’’𑀢𑀺 𑀦 𑀫𑀜𑁆𑀜𑀺𑀢𑁆𑀣, 𑀲𑀩𑁆𑀩𑁂 𑀧𑀡𑁆𑀟𑀺𑀢𑀫𑀸𑀦𑀺𑀦𑁄, 𑀲𑀩𑁆𑀩𑁄𑀯𑀸𑀬𑀁 𑀪𑀡𑁆𑀟𑀦𑀓𑀸𑀭𑀓𑁄 𑀚𑀦𑁄𑀬𑁂𑀯. 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀦𑁆𑀢𑀺 𑀓𑁄𑀘𑀺 𑀏𑀓𑁄𑀧𑀺 ‘‘𑀅𑀳𑀁 𑀩𑀸𑀮𑁄’’𑀢𑀺 𑀦 𑀫𑀜𑁆𑀜𑀺𑀢𑁆𑀣, 𑀪𑀺𑀬𑁆𑀬𑁄 𑀘 𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑁂 𑀅𑀜𑁆𑀜𑀫𑁆𑀧𑀺 𑀏𑀓𑀁 ‘‘𑀫𑀬𑁆𑀳𑀁 𑀓𑀸𑀭𑀡𑀸 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻’’𑀢𑀺 𑀇𑀤𑀁 𑀓𑀸𑀭𑀡𑀁 𑀦 𑀫𑀜𑁆𑀜𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀫𑀼𑀝𑁆𑀞𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀦𑁄. 𑀧𑀡𑁆𑀟𑀺𑀢𑀸𑀪𑀸𑀲𑀸𑀢𑀺 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀫𑀸𑀦𑁂𑀦 𑀧𑀡𑁆𑀟𑀺𑀢𑀲𑀤𑀺𑀲𑀸. 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄𑀢𑀺 𑀭𑀸-𑀓𑀸𑀭𑀲𑁆𑀲 𑀭𑀲𑁆𑀲𑀸𑀤𑁂𑀲𑁄 𑀓𑀢𑁄, 𑀯𑀸𑀘𑀸𑀕𑁄𑀘𑀭𑀸 𑀘 𑀦 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀅𑀭𑀺𑀬𑀥𑀫𑁆𑀫𑀕𑁄𑀘𑀭𑀸, 𑀪𑀸𑀡𑀺𑀦𑁄 𑀘. 𑀓𑀣𑀁 𑀪𑀸𑀡𑀺𑀦𑁄? 𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀦𑁆𑀢𑀺, 𑀬𑀸𑀯 𑀫𑀼𑀔𑀁 𑀧𑀲𑀸𑀭𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀸𑀯 𑀧𑀲𑀸𑀭𑁂𑀢𑁆𑀯𑀸 𑀅𑀕𑁆𑀕𑀧𑀸𑀤𑁂𑀳𑀺 𑀞𑀢𑁆𑀯𑀸 𑀪𑀸𑀡𑀺𑀦𑁄, 𑀏𑀓𑁄𑀧𑀺 𑀲𑀗𑁆𑀖𑀕𑀸𑀭𑀯𑁂𑀦 𑀫𑀼𑀔𑀲𑀗𑁆𑀓𑁄𑀘𑀦𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀦 𑀦𑀻𑀢𑀸𑀢𑀺 𑀬𑁂𑀦 𑀪𑀡𑁆𑀟𑀦𑁂𑀦 𑀇𑀫𑀁 𑀦𑀺𑀮𑁆𑀮𑀚𑁆𑀚𑀪𑀸𑀯𑀁 𑀦𑀻𑀢𑀸. 𑀦 𑀢𑀁 𑀯𑀺𑀤𑀽𑀢𑀺 𑀏𑀯𑀁 ‘‘𑀆𑀤𑀻𑀦𑀯𑀁 𑀇𑀤’’𑀦𑁆𑀢𑀺 𑀢𑀁 𑀦 𑀚𑀸𑀦𑀦𑁆𑀢𑀺.

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀻𑀢𑀺 𑀢𑀁 ‘‘𑀅𑀓𑁆𑀓𑁄𑀘𑁆𑀙𑀺 𑀫’’𑀦𑁆𑀢𑀺𑀆𑀤𑀺𑀓𑀁 𑀆𑀓𑀸𑀭𑀁 𑀬𑁂 𑀉𑀧𑀦𑀬𑁆𑀳𑀦𑁆𑀢𑀺. 𑀲𑀦𑀦𑁆𑀢𑀦𑁄𑀢𑀺 𑀧𑁄𑀭𑀸𑀡𑁄. 𑀧𑀭𑁂𑀢𑀺 𑀧𑀡𑁆𑀟𑀺𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑀪𑀡𑁆𑀟𑀦𑀓𑀸𑀭𑀓𑀸 𑀧𑀭𑁂 𑀦𑀸𑀫. 𑀢𑁂 𑀏𑀢𑁆𑀣 𑀲𑀗𑁆𑀖𑀫𑀚𑁆𑀛𑁂 𑀓𑁄𑀮𑀸𑀳𑀮𑀁 𑀓𑀭𑁄𑀦𑁆𑀢𑀸 ‘‘𑀫𑀬𑀁 𑀬𑀫𑀸𑀫𑀲𑁂 𑀉𑀧𑀬𑀫𑀸𑀫 𑀦𑀲𑁆𑀲𑀸𑀫, 𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀢𑀢𑁆𑀣 𑀧𑀡𑁆𑀟𑀺𑀢𑀸 ‘‘𑀫𑀬𑀁 𑀫𑀘𑁆𑀘𑀼𑀲𑀫𑀻𑀧𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀪𑀺𑀓𑁆𑀔𑀯𑁂, 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑁂𑀥𑀕𑀸𑀦𑀁 𑀓𑀮𑀳𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺.

𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸𑀢𑀺 𑀅𑀬𑀁 𑀕𑀸𑀣𑀸 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀤𑀻𑀖𑀸𑀯𑀼𑀓𑀼𑀫𑀸𑀭𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺. 𑀓𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀦 𑀳𑁄𑀢𑀺? 𑀬𑁂𑀲𑀁 𑀯𑁄 𑀦𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀅𑀝𑁆𑀞𑀻𑀦𑀺 𑀙𑀺𑀦𑁆𑀦𑀸𑀦𑀺, 𑀦 𑀧𑀸𑀡𑀸 𑀳𑀝𑀸, 𑀦 𑀕𑀯𑀸𑀲𑁆𑀲𑀥𑀦𑀸𑀦𑀺 𑀳𑀝𑀸𑀦𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀯𑁂, 𑀢𑁂𑀲𑀜𑁆𑀳𑀺 𑀦𑀸𑀫 𑀆𑀤𑀺𑀦𑁆𑀦𑀤𑀡𑁆𑀟𑀸𑀦𑀁 𑀆𑀤𑀺𑀦𑁆𑀦𑀲𑀢𑁆𑀣𑀸𑀦𑀁 𑀭𑀸𑀚𑀽𑀦𑀁 𑀏𑀯𑀭𑀽𑀧𑀸 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀏𑀓𑀢𑁄 𑀧𑀸𑀦𑀪𑁄𑀚𑀦𑀁 𑀳𑁄𑀢𑀺, 𑀢𑀼𑀫𑁆𑀳𑁂 𑀏𑀯𑀭𑀽𑀧𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑁂𑀭𑀫𑀢𑁆𑀢𑀫𑁆𑀧𑀺 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀣, 𑀓𑁄 𑀢𑀼𑀫𑁆𑀳𑀸𑀓𑀁 𑀪𑀺𑀓𑁆𑀔𑀼𑀪𑀸𑀯𑁄𑀢𑀺.

𑀲𑀘𑁂 𑀮𑀪𑁂𑀣𑀸𑀢𑀺𑀆𑀤𑀺𑀕𑀸𑀣𑀸𑀬𑁄 𑀧𑀡𑁆𑀟𑀺𑀢𑀲𑀳𑀸𑀬𑀲𑁆𑀲 𑀘 𑀩𑀸𑀮𑀲𑀳𑀸𑀬𑀲𑁆𑀲 𑀘 𑀯𑀡𑁆𑀡𑀸𑀯𑀡𑁆𑀡𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀲𑀩𑁆𑀩𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀫𑀦𑁄 𑀲𑀢𑀺𑀫𑀸 𑀘𑀭𑁂𑀬𑁆𑀬. 𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬𑀸𑀢𑀺 𑀬𑀣𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀫𑀳𑀸𑀚𑀦𑀓𑀭𑀸𑀚𑀸 𑀘 𑀅𑀭𑀺𑀦𑁆𑀤𑀫𑀭𑀸𑀚𑀸 𑀘 𑀧𑀳𑀸𑀬 𑀏𑀓𑀓𑁄𑀯 𑀘𑀭𑀺𑀁𑀲𑀼, 𑀏𑀯𑀁 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄𑀢𑀺 𑀫𑀸𑀢𑀗𑁆𑀕𑁄 𑀅𑀭𑀜𑁆𑀜𑁂 𑀦𑀸𑀕𑁄𑀯. 𑀫𑀸𑀢𑀗𑁆𑀕𑁄𑀢𑀺 𑀳𑀢𑁆𑀣𑀻 𑀯𑀼𑀘𑁆𑀘𑀢𑀺, 𑀦𑀸𑀕𑁄𑀢𑀺 𑀫𑀳𑀦𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀬𑀣𑀸 𑀳𑀺 𑀫𑀸𑀢𑀼𑀧𑁄𑀲𑀓𑁄 𑀫𑀸𑀢𑀗𑁆𑀕𑀦𑀸𑀕𑁄 𑀅𑀭𑀜𑁆𑀜𑁂 𑀏𑀓𑀓𑁄 𑀘𑀭𑀺, 𑀦 𑀘 𑀧𑀸𑀧𑀸𑀦𑀺 𑀅𑀓𑀸𑀲𑀺, 𑀬𑀣𑀸 𑀘 𑀲𑀻𑀮𑀯𑀳𑀢𑁆𑀣𑀺𑀦𑀸𑀕𑁄. 𑀬𑀣𑀸 𑀘 𑀧𑀸𑀮𑀺𑀮𑁂𑀬𑁆𑀬𑀓𑁄, 𑀏𑀯𑀁 𑀏𑀓𑁄 𑀘𑀭𑁂, 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀢𑁆𑀣𑀸 𑀏𑀯𑀁 𑀓𑀣𑁂𑀢𑁆𑀯𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑀸𑀮𑀓𑀮𑁄𑀡𑀓𑀕𑀸𑀫𑀁 𑀕𑀦𑁆𑀢𑁆𑀯𑀸 𑀪𑀕𑀼𑀢𑁆𑀣𑁂𑀭𑀲𑁆𑀲 𑀏𑀓𑀻𑀪𑀸𑀯𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀢𑀢𑁄 𑀢𑀺𑀡𑁆𑀡𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀸𑀫𑀕𑁆𑀕𑀺𑀯𑀸𑀲𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀢𑀢𑁄 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀓𑁄𑀲𑀫𑁆𑀩𑀺𑀁 𑀅𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀓𑁄𑀲𑀫𑁆𑀩𑀺𑀯𑀸𑀲𑀺𑀦𑁄𑀧𑀺 𑀉𑀧𑀸𑀲𑀓𑀸 ‘‘𑀇𑀫𑁂 𑀔𑁄 𑀅𑀬𑁆𑀬𑀸, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀸, 𑀇𑀫𑁂𑀳𑀺 𑀉𑀩𑁆𑀩𑀸𑀴𑁆𑀳𑁄 𑀪𑀕𑀯𑀸 𑀧𑀓𑁆𑀓𑀦𑁆𑀢𑁄, 𑀇𑀫𑁂𑀲𑀁 𑀦𑁂𑀯 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫, 𑀦 𑀉𑀧𑀕𑀢𑀸𑀦𑀁 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫, 𑀏𑀯𑀁 𑀇𑀫𑁂 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺 𑀯𑀸 𑀯𑁂𑀭𑀁 𑀯𑀺𑀭𑀫𑀺𑀲𑁆𑀲𑀦𑁆𑀢𑀺 𑀯𑀸 𑀪𑀕𑀯𑀦𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀻’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀢𑀣𑁂𑀯 𑀅𑀓𑀁𑀲𑀼. 𑀢𑁂 𑀢𑁂𑀦 𑀤𑀡𑁆𑀟𑀓𑀫𑁆𑀫𑁂𑀦 𑀧𑀻𑀴𑀺𑀢𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀅𑀳𑁄𑀲𑀺, 𑀫𑀸𑀢𑀸 𑀫𑀳𑀸𑀫𑀸𑀬𑀸, 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀲𑀫𑁆𑀩𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁨𑁯] 𑁩. 𑀫𑀳𑀸𑀲𑀼𑀯𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀫𑁄 𑀬𑀤𑀸 𑀳𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀓𑁄𑀲𑀮𑀚𑀦𑀧𑀤𑁂 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑁂 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀲𑁂𑀦𑀸𑀲𑀦𑀁 𑀓𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀢𑀲𑁆𑀲 𑀯𑀲𑁆𑀲𑀽𑀧𑀕𑀢𑀲𑁆𑀲 𑀧𑀞𑀫𑀫𑀸𑀲𑁂𑀬𑁂𑀯 𑀲𑁄 𑀕𑀸𑀫𑁄 𑀛𑀸𑀬𑀺, 𑀫𑀦𑀼𑀲𑁆𑀲𑀸𑀦𑀁 𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀝𑁆𑀞𑀁 𑀦𑀸𑀳𑁄𑀲𑀺. 𑀢𑁂 𑀢𑀲𑁆𑀲 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑁄 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂𑀧𑀺 𑀧𑀺𑀡𑁆𑀟𑀧𑀸𑀢𑁂𑀦 𑀓𑀺𑀮𑀫𑀦𑁆𑀢𑁄 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀢𑁂𑀫𑀸𑀲𑀘𑁆𑀘𑀬𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑀁 𑀲𑀢𑁆𑀣𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀘𑁆𑀘𑀺 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑁂𑀦 𑀦 𑀓𑀺𑀮𑀫𑀦𑁆𑀢𑁄𑀲𑀺, 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀜𑁆𑀘 𑀅𑀳𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑀲𑁆𑀲 𑀲𑁂𑀦𑀸𑀲𑀦𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀜𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀲𑀫𑀡𑁂𑀦 𑀦𑀸𑀫 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑁂 𑀲𑀢𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀳𑀸𑀬 𑀓𑀺𑀜𑁆𑀘𑀺𑀤𑁂𑀯 𑀬𑀣𑀸𑀮𑀤𑁆𑀥𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀦𑁆𑀢𑀼𑀝𑁆𑀞𑁂𑀦 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀲𑀼𑀓𑁆𑀔𑀭𑀼𑀓𑁆𑀔𑁂 𑀘𑀼𑀡𑁆𑀡𑀁 𑀔𑀸𑀤𑀦𑁆𑀢𑀸𑀧𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀳𑀸𑀬 𑀲𑀦𑁆𑀢𑀼𑀝𑁆𑀞𑀸 𑀫𑀺𑀢𑁆𑀢𑀥𑀫𑁆𑀫𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀫𑀺𑀁𑀲𑀼, 𑀢𑁆𑀯𑀁 𑀧𑀦 𑀓𑀲𑁆𑀫𑀸 ‘𑀧𑀺𑀡𑁆𑀟𑀧𑀸𑀢𑁄 𑀧𑀭𑀺𑀢𑁆𑀢𑁄 𑀮𑀽𑀔𑁄’𑀢𑀺 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀧𑀭𑀺𑀘𑁆𑀘𑀚𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀳𑀺𑀫𑀯𑀦𑁆𑀢𑁂 𑀕𑀗𑁆𑀕𑀸𑀢𑀻𑀭𑁂 𑀏𑀓𑀲𑁆𑀫𑀺𑀁 𑀉𑀤𑀼𑀫𑁆𑀩𑀭𑀯𑀦𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀲𑀼𑀓𑀸 𑀯𑀲𑀺𑀁𑀲𑀼. 𑀢𑀢𑁆𑀭 𑀏𑀓𑁄 𑀲𑀼𑀯𑀭𑀸𑀚𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀭𑀼𑀓𑁆𑀔𑀲𑁆𑀲 𑀨𑀮𑁂𑀲𑀼 𑀔𑀻𑀡𑁂𑀲𑀼 𑀬𑀤𑁂𑀯 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀅𑀗𑁆𑀓𑀼𑀭𑁄 𑀯𑀸 𑀧𑀢𑁆𑀢𑀁 𑀯𑀸 𑀢𑀘𑁄 𑀯𑀸 𑀧𑀧𑀝𑀺𑀓𑀸 𑀯𑀸, 𑀢𑀁 𑀔𑀸𑀤𑀺𑀢𑁆𑀯𑀸 𑀕𑀗𑁆𑀕𑀸𑀬 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀭𑀫𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺. 𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀪𑀸𑀯𑀕𑀼𑀡𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀭𑀼𑀓𑁆𑀔𑀁 𑀲𑀼𑀓𑁆𑀔𑀸𑀧𑁂𑀲𑀺. 𑀭𑀼𑀓𑁆𑀔𑁄 𑀔𑀸𑀡𑀼𑀓𑀫𑀢𑁆𑀢𑁄 𑀳𑀼𑀢𑁆𑀯𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀆𑀓𑁄𑀝𑀺𑀬𑀫𑀸𑀦𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀙𑀺𑀤𑁆𑀤𑁂𑀳𑀺 𑀘𑀼𑀡𑁆𑀡𑀸𑀦𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀲𑀼𑀯𑀭𑀸𑀚𑀸 𑀢𑀸𑀦𑀺 𑀘𑀼𑀡𑁆𑀡𑀸𑀦𑀺 𑀔𑀸𑀤𑀺𑀢𑁆𑀯𑀸 𑀕𑀗𑁆𑀕𑀸𑀬 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀯𑀸𑀢𑀸𑀢𑀧𑀁 𑀅𑀕𑀡𑁂𑀢𑁆𑀯𑀸 𑀉𑀤𑀼𑀫𑁆𑀩𑀭𑀔𑀸𑀡𑀼𑀓𑁂 𑀦𑀺𑀲𑀻𑀤𑀺. 𑀲𑀓𑁆𑀓𑁄 𑀢𑀲𑁆𑀲 𑀧𑀭𑀫𑀧𑁆𑀧𑀺𑀘𑁆𑀙𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀺𑀢𑁆𑀢𑀥𑀫𑁆𑀫𑀕𑀼𑀡𑀁 𑀓𑀣𑀸𑀧𑁂𑀢𑁆𑀯𑀸 𑀯𑀭𑀫𑀲𑁆𑀲 𑀤𑀢𑁆𑀯𑀸 𑀉𑀤𑀼𑀫𑁆𑀩𑀭𑀁 𑀅𑀫𑀢𑀨𑀮𑀁 𑀓𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑁄 𑀳𑀁𑀲𑀭𑀸𑀚𑀸 𑀳𑀼𑀢𑁆𑀯𑀸 𑀲𑀼𑀚𑀁 𑀅𑀲𑀼𑀭𑀓𑀜𑁆𑀜𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀢𑀁 𑀉𑀤𑀼𑀫𑁆𑀩𑀭𑀯𑀦𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀏𑀓𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁦. ‘‘𑀤𑀼𑀫𑁄 𑀬𑀤𑀸 𑀳𑁄𑀢𑀺 𑀨𑀮𑀽𑀧𑀧𑀦𑁆𑀦𑁄, 𑀪𑀼𑀜𑁆𑀚𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸 𑀲𑀫𑁆𑀧𑀢𑀦𑁆𑀢𑀸;

𑀔𑀻𑀡𑀦𑁆𑀢𑀺 𑀜𑀢𑁆𑀯𑀸𑀦 𑀤𑀼𑀫𑀁 𑀨𑀮𑀘𑁆𑀘𑀬𑁂, 𑀤𑀺𑀲𑁄𑀤𑀺𑀲𑀁 𑀬𑀦𑁆𑀢𑀺 𑀢𑀢𑁄 𑀯𑀺𑀳𑀗𑁆𑀕𑀫𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀼𑀯𑀭𑀸𑀚, 𑀭𑀼𑀓𑁆𑀔𑁄 𑀦𑀸𑀫 𑀬𑀤𑀸 𑀨𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀤𑀸 𑀢𑀁 𑀲𑀸𑀔𑀢𑁄 𑀲𑀸𑀔𑀁 𑀲𑀫𑁆𑀧𑀢𑀦𑁆𑀢𑀸𑀯 𑀯𑀺𑀳𑀗𑁆𑀕𑀫𑀸 𑀪𑀼𑀜𑁆𑀚𑀦𑁆𑀢𑀺, 𑀢𑀁 𑀧𑀦 𑀔𑀻𑀡𑀁 𑀜𑀢𑁆𑀯𑀸 𑀨𑀮𑀸𑀦𑀁 𑀅𑀘𑁆𑀘𑀬𑁂𑀦 𑀢𑀢𑁄 𑀭𑀼𑀓𑁆𑀔𑀢𑁄 𑀤𑀺𑀲𑁄𑀤𑀺𑀲𑀁 𑀯𑀺𑀳𑀗𑁆𑀕𑀫𑀸 𑀕𑀘𑁆𑀙𑀦𑁆𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀢𑁄 𑀦𑀁 𑀉𑀬𑁆𑀬𑁄𑀚𑁂𑀢𑀼𑀁 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁧. ‘‘𑀘𑀭 𑀘𑀸𑀭𑀺𑀓𑀁 𑀮𑁄𑀳𑀺𑀢𑀢𑀼𑀡𑁆𑀟 𑀫𑀸 𑀫𑀭𑀺, 𑀓𑀺𑀁 𑀢𑁆𑀯𑀁 𑀲𑀼𑀯 𑀲𑀼𑀓𑁆𑀔𑀤𑀼𑀫𑀫𑁆𑀳𑀺 𑀛𑀸𑀬𑀲𑀺;

𑀢𑀤𑀺𑀗𑁆𑀖 𑀫𑀁 𑀩𑁆𑀭𑀽𑀳𑀺 𑀯𑀲𑀦𑁆𑀢𑀲𑀦𑁆𑀦𑀺𑀪, 𑀓𑀲𑁆𑀫𑀸 𑀲𑀼𑀯 𑀲𑀼𑀓𑁆𑀔𑀤𑀼𑀫𑀁 𑀦 𑀭𑀺𑀜𑁆𑀘𑀲𑀻’’𑀢𑀺.

𑀢𑀢𑁆𑀣 𑀛𑀸𑀬𑀲𑀻𑀢𑀺 𑀓𑀺𑀁𑀓𑀸𑀭𑀡𑀸 𑀲𑀼𑀓𑁆𑀔𑀔𑀸𑀡𑀼𑀫𑀢𑁆𑀣𑀓𑁂 𑀛𑀸𑀬𑀦𑁆𑀢𑁄 𑀧𑀚𑁆𑀛𑀸𑀬𑀦𑁆𑀢𑁄 𑀢𑀺𑀝𑁆𑀞𑀲𑀺. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀲𑀦𑁆𑀢𑀲𑀦𑁆𑀦𑀺𑀪𑀸𑀢𑀺 𑀯𑀲𑀦𑁆𑀢𑀓𑀸𑀮𑁂 𑀯𑀦𑀲𑀡𑁆𑀟𑁄 𑀲𑀼𑀯𑀕𑀡𑀲𑀫𑁄𑀓𑀺𑀡𑁆𑀡𑁄 𑀯𑀺𑀬 𑀦𑀻𑀮𑁄𑀪𑀸𑀲𑁄 𑀳𑁄𑀢𑀺, 𑀢𑁂𑀦 𑀢𑀁 ‘‘𑀯𑀲𑀦𑁆𑀢𑀲𑀦𑁆𑀦𑀺𑀪𑀸’’𑀢𑀺 𑀆𑀮𑀧𑀢𑀺. 𑀦 𑀭𑀺𑀜𑁆𑀘𑀲𑀻𑀢𑀺 𑀦 𑀙𑀟𑁆𑀟𑁂𑀲𑀺.

𑀅𑀣 𑀦𑀁 𑀲𑀼𑀯𑀭𑀸𑀚𑀸 ‘‘𑀅𑀳𑀁 𑀳𑀁𑀲 𑀅𑀢𑁆𑀢𑀦𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀢𑀸𑀬 𑀇𑀫𑀁 𑀭𑀼𑀓𑁆𑀔𑀁 𑀦 𑀚𑀳𑀸𑀫𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨. ‘‘𑀬𑁂 𑀯𑁂 𑀲𑀔𑀻𑀦𑀁 𑀲𑀔𑀸𑀭𑁄 𑀪𑀯𑀦𑁆𑀢𑀺, 𑀧𑀸𑀡𑀘𑁆𑀘𑀬𑁂 𑀤𑀼𑀓𑁆𑀔𑀲𑀼𑀔𑁂𑀲𑀼 𑀳𑀁𑀲;

𑀔𑀻𑀡𑀁 𑀅𑀔𑀻𑀡𑀫𑁆𑀧𑀺 𑀦 𑀢𑀁 𑀚𑀳𑀦𑁆𑀢𑀺, 𑀲𑀦𑁆𑀢𑁄 𑀲𑀢𑀁 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑀸.

𑁨𑁩. ‘‘𑀲𑁄𑀳𑀁 𑀲𑀢𑀁 𑀅𑀜𑁆𑀜𑀢𑀭𑁄𑀲𑁆𑀫𑀺 𑀳𑀁𑀲, 𑀜𑀸𑀢𑀻 𑀘 𑀫𑁂 𑀳𑁄𑀢𑀺 𑀲𑀔𑀸 𑀘 𑀭𑀼𑀓𑁆𑀔𑁄;

𑀢𑀁 𑀦𑀼𑀲𑁆𑀲𑀳𑁂 𑀚𑀻𑀯𑀺𑀓𑀢𑁆𑀣𑁄 𑀧𑀳𑀸𑀢𑀼𑀁, 𑀔𑀻𑀡𑀦𑁆𑀢𑀺 𑀜𑀢𑁆𑀯𑀸𑀦 𑀦 𑀳𑁂𑀲 𑀥𑀫𑁆𑀫𑁄’’𑀢𑀺.

𑀢𑀢𑁆𑀣 𑀬𑁂 𑀯𑁂 𑀲𑀔𑀻𑀦𑀁 𑀲𑀔𑀸𑀭𑁄 𑀪𑀯𑀦𑁆𑀢𑀻𑀢𑀺 𑀬𑁂 𑀲𑀳𑀸𑀬𑀸𑀦𑀁 𑀲𑀳𑀸𑀬𑀸 𑀳𑁄𑀦𑁆𑀢𑀺. 𑀔𑀻𑀡𑀁 𑀅𑀔𑀻𑀡𑀫𑁆𑀧𑀻𑀢𑀺 𑀧𑀡𑁆𑀟𑀺𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀳𑀸𑀬𑀁 𑀪𑁄𑀕𑀧𑀭𑀺𑀓𑁆𑀔𑀬𑁂𑀦 𑀔𑀻𑀡𑀫𑁆𑀧𑀺 𑀅𑀔𑀻𑀡𑀫𑁆𑀧𑀺 𑀦 𑀚𑀳𑀦𑁆𑀢𑀺. 𑀲𑀢𑀁 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑀸𑀢𑀺 𑀧𑀡𑁆𑀟𑀺𑀢𑀸𑀦𑀁 𑀧𑀯𑁂𑀡𑀺𑀁 𑀅𑀦𑀼𑀲𑁆𑀲𑀭𑀫𑀸𑀦𑀸. 𑀜𑀸𑀢𑀻 𑀘 𑀫𑁂𑀢𑀺 𑀳𑀁𑀲𑀭𑀸𑀚, 𑀅𑀬𑀁 𑀭𑀼𑀓𑁆𑀔𑁄 𑀲𑀫𑁆𑀧𑀺𑀬𑀸𑀬𑀦𑀢𑁆𑀣𑁂𑀦 𑀫𑀬𑁆𑀳𑀁 𑀜𑀸𑀢𑀺 𑀘 𑀲𑀫𑀸𑀘𑀺𑀡𑁆𑀡𑀘𑀭𑀡𑀢𑀸𑀬 𑀲𑀔𑀸 𑀘. 𑀚𑀻𑀯𑀺𑀓𑀢𑁆𑀣𑁄𑀢𑀺 𑀢𑀫𑀳𑀁 𑀚𑀻𑀯𑀺𑀓𑀸𑀬 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀧𑀳𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺.

𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀧𑀲𑀁𑀲𑀺𑀢𑁆𑀯𑀸 𑀯𑀭𑀁 𑀤𑀸𑀢𑀼𑀓𑀸𑀫𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁪. ‘‘𑀲𑀸𑀥𑀼 𑀲𑀓𑁆𑀔𑀺 𑀓𑀢𑀁 𑀳𑁄𑀢𑀺, 𑀫𑁂𑀢𑁆𑀢𑀺 𑀲𑀁𑀲𑀢𑀺 𑀲𑀦𑁆𑀣𑀯𑁄;

𑀲𑀘𑁂𑀢𑀁 𑀥𑀫𑁆𑀫𑀁 𑀭𑁄𑀘𑁂𑀲𑀺, 𑀧𑀸𑀲𑀁𑀲𑁄𑀲𑀺 𑀯𑀺𑀚𑀸𑀦𑀢𑀁.

𑁨𑁫. ‘‘𑀲𑁄 𑀢𑁂 𑀲𑀼𑀯 𑀯𑀭𑀁 𑀤𑀫𑁆𑀫𑀺, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀭𑀁 𑀯𑀭𑀲𑁆𑀲𑀼 𑀯𑀓𑁆𑀓𑀗𑁆𑀕, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 𑀲𑀫𑁆𑀧𑀳𑀁𑀲𑀦𑀁. 𑀲𑀓𑁆𑀔𑀺 𑀓𑀢𑀁 𑀳𑁄𑀢𑀺, 𑀫𑁂𑀢𑁆𑀢𑀺 𑀲𑀁𑀲𑀢𑀺 𑀲𑀦𑁆𑀣𑀯𑁄𑀢𑀺 𑀲𑀔𑀺𑀪𑀸𑀯𑁄 𑀘 𑀫𑁂𑀢𑁆𑀢𑀺 𑀘 𑀧𑀭𑀺𑀲𑀫𑀚𑁆𑀛𑁂 𑀲𑀦𑁆𑀣𑀯𑁄 𑀘𑀸𑀢𑀺 𑀢𑀬𑀸 𑀫𑀺𑀢𑁆𑀢𑀁 𑀓𑀢𑀁 𑀲𑀸𑀥𑀼 𑀳𑁄𑀢𑀺 𑀮𑀤𑁆𑀥𑀓𑀁 𑀪𑀤𑁆𑀤𑀓𑀫𑁂𑀯. 𑀲𑀘𑁂𑀢𑀁 𑀥𑀫𑁆𑀫𑀦𑁆𑀢𑀺 𑀲𑀘𑁂 𑀏𑀢𑀁 𑀫𑀺𑀢𑁆𑀢𑀥𑀫𑁆𑀫𑀁. 𑀯𑀺𑀚𑀸𑀦𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀯𑀺𑀜𑁆𑀜𑀽𑀦𑀁 𑀧𑀲𑀁𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀢𑁂𑀢𑀺 𑀲𑁄 𑀅𑀳𑀁 𑀢𑀼𑀬𑁆𑀳𑀁. 𑀯𑀭𑀲𑁆𑀲𑀽𑀢𑀺 𑀇𑀘𑁆𑀙𑀲𑁆𑀲𑀼. 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀇𑀘𑁆𑀙𑀲𑀺, 𑀲𑀩𑁆𑀩𑀁 𑀢𑀁 𑀯𑀭𑀁 𑀤𑀤𑀸𑀫𑀺 𑀢𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀼𑀯𑀭𑀸𑀚𑀸 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀯𑀭𑀜𑁆𑀘 𑀫𑁂 𑀳𑀁𑀲 𑀪𑀯𑀁 𑀤𑀤𑁂𑀬𑁆𑀬, 𑀅𑀬𑀜𑁆𑀘 𑀭𑀼𑀓𑁆𑀔𑁄 𑀧𑀼𑀦𑀭𑀸𑀬𑀼𑀁 𑀮𑀪𑁂𑀣;

𑀲𑁄 𑀲𑀸𑀔𑀯𑀸 𑀨𑀮𑀺𑀫𑀸 𑀲𑀁𑀯𑀺𑀭𑀽𑀴𑁆𑀳𑁄, 𑀫𑀥𑀼𑀢𑁆𑀣𑀺𑀓𑁄 𑀢𑀺𑀝𑁆𑀞𑀢𑀼 𑀲𑁄𑀪𑀫𑀸𑀦𑁄’’𑀢𑀺.

𑀢𑀢𑁆𑀣 𑀲𑀸𑀔𑀯𑀸𑀢𑀺 𑀲𑀸𑀔𑀲𑀫𑁆𑀧𑀦𑁆𑀦𑁄. 𑀨𑀮𑀺𑀫𑀸𑀢𑀺 𑀨𑀮𑁂𑀦 𑀉𑀧𑁂𑀢𑁄. 𑀲𑀁𑀯𑀺𑀭𑀽𑀴𑁆𑀳𑁄𑀢𑀺 𑀲𑀫𑀦𑁆𑀢𑀢𑁄 𑀯𑀺𑀭𑀽𑀴𑁆𑀳𑀧𑀢𑁆𑀢𑁄 𑀢𑀭𑀼𑀡𑀧𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸. 𑀫𑀥𑀼𑀢𑁆𑀣𑀺𑀓𑁄𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀫𑀥𑀼𑀭𑀨𑀮𑁂𑀲𑀼 𑀧𑀓𑁆𑀔𑀺𑀢𑁆𑀢𑀫𑀥𑀼 𑀯𑀺𑀬 𑀫𑀥𑀼𑀭𑀨𑀮𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀣𑀲𑁆𑀲 𑀲𑀓𑁆𑀓𑁄 𑀯𑀭𑀁 𑀤𑀤𑀫𑀸𑀦𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁭. ‘‘𑀢𑀁 𑀧𑀲𑁆𑀲 𑀲𑀫𑁆𑀫 𑀨𑀮𑀺𑀫𑀁 𑀉𑀴𑀸𑀭𑀁, 𑀲𑀳𑀸𑀯 𑀢𑁂 𑀳𑁄𑀢𑀼 𑀉𑀤𑀼𑀫𑁆𑀩𑀭𑁂𑀦;

𑀲𑁄 𑀲𑀸𑀔𑀯𑀸 𑀨𑀮𑀺𑀫𑀸 𑀲𑀁𑀯𑀺𑀭𑀽𑀴𑁆𑀳𑁄, 𑀫𑀥𑀼𑀢𑁆𑀣𑀺𑀓𑁄 𑀢𑀺𑀝𑁆𑀞𑀢𑀼 𑀲𑁄𑀪𑀫𑀸𑀦𑁄’’𑀢𑀺.

𑀢𑀢𑁆𑀣 𑀲𑀳𑀸𑀯 𑀢𑁂 𑀳𑁄𑀢𑀼 𑀉𑀤𑀼𑀫𑁆𑀩𑀭𑁂𑀦𑀸𑀢𑀺 𑀢𑀯 𑀉𑀤𑀼𑀫𑁆𑀩𑀭𑁂𑀦 𑀲𑀤𑁆𑀥𑀺𑀁 𑀲𑀳 𑀏𑀓𑀢𑁄𑀯 𑀯𑀸𑀲𑁄 𑀳𑁄𑀢𑀼.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀓𑁆𑀓𑁄 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀲𑀼𑀚𑀸𑀬 𑀘 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀕𑀗𑁆𑀕𑀸𑀢𑁄 𑀳𑀢𑁆𑀣𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀉𑀤𑀼𑀫𑁆𑀩𑀭𑀔𑀸𑀡𑀼𑀓𑀁 𑀧𑀳𑀭𑀺. 𑀢𑀸𑀯𑀤𑁂𑀯 𑀲𑀸𑀔𑀸𑀯𑀺𑀝𑀧𑀲𑀘𑁆𑀙𑀦𑁆𑀦𑁄 𑀫𑀥𑀼𑀭𑀨𑀮𑁄 𑀭𑀼𑀓𑁆𑀔𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀼𑀡𑁆𑀟𑀫𑀡𑀺𑀧𑀩𑁆𑀩𑀢𑁄 𑀯𑀺𑀬 𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑁄 𑀅𑀝𑁆𑀞𑀸𑀲𑀺. 𑀲𑀼𑀯𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀲𑀓𑁆𑀓𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁨𑁮. ‘‘𑀏𑀯𑀁 𑀲𑀓𑁆𑀓 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀔𑀺𑀢𑁄, 𑀤𑀺𑀲𑁆𑀯𑀸𑀦 𑀲𑀨𑀮𑀁 𑀤𑀼𑀫’’𑀦𑁆𑀢𑀺.

𑀲𑀓𑁆𑀓𑁄𑀧𑀺 𑀢𑀲𑁆𑀲 𑀯𑀭𑀁 𑀤𑀢𑁆𑀯𑀸 𑀉𑀤𑀼𑀫𑁆𑀩𑀭𑀁 𑀅𑀫𑀢𑀨𑀮𑀁 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀲𑀼𑀚𑀸𑀬 𑀅𑀢𑁆𑀢𑀦𑁄 𑀞𑀸𑀦𑀫𑁂𑀯 𑀕𑀢𑁄. 𑀢𑀫𑀢𑁆𑀣𑀁 𑀤𑀻𑀧𑀬𑀫𑀸𑀦𑀸 𑀑𑀲𑀸𑀦𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀞𑀧𑀺𑀢𑀸 𑁋

𑁨𑁯. ‘‘𑀲𑀼𑀯𑀲𑁆𑀲 𑀘 𑀯𑀭𑀁 𑀤𑀢𑁆𑀯𑀸, 𑀓𑀢𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁;

𑀧𑀓𑁆𑀓𑀸𑀫𑀺 𑀲𑀳 𑀪𑀭𑀺𑀬𑀸𑀬, 𑀤𑁂𑀯𑀸𑀦𑀁 𑀦𑀦𑁆𑀤𑀦𑀁 𑀯𑀦’’𑀦𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀅𑀮𑁄𑀮𑀼𑀧𑁆𑀧𑀘𑀸𑀭𑀸 𑀅𑀳𑁂𑀲𑀼𑀁. 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀮𑀼𑀧𑁆𑀧𑀘𑀸𑀭𑀁 𑀘𑀭𑀲𑀺, 𑀕𑀘𑁆𑀙 𑀢𑀢𑁆𑀣𑁂𑀯 𑀯𑀲𑀸𑀳𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀲𑁆𑀲 𑀓𑀣𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀲𑀼𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀳𑀸𑀲𑀼𑀯𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁩𑁦] 𑁪. 𑀘𑀽𑀴𑀲𑀼𑀯𑀚𑀸𑀢𑀓𑀯𑀡𑁆𑀡𑀦𑀸

𑀲𑀦𑁆𑀢𑀺 𑀭𑀼𑀓𑁆𑀔𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑁂𑀭𑀜𑁆𑀚𑀓𑀡𑁆𑀟𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀭𑀺 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑁄 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑁄 𑀫𑀳𑀦𑁆𑀢𑁂𑀦 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄𑀧𑀺 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑁂𑀫𑀸𑀲𑀁 𑀯𑀲𑀦𑁆𑀢𑁄 𑀫𑀸𑀭𑀸𑀯𑀝𑁆𑀝𑀦𑀯𑀲𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀏𑀓𑀤𑀺𑀯𑀲𑀫𑁆𑀧𑀺 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀳𑀸𑀬 𑀢𑁂𑀫𑀸𑀲𑀁 𑀧𑀢𑁆𑀣𑀧𑀼𑀮𑀓𑀧𑀺𑀝𑁆𑀞𑁄𑀤𑀓𑁂𑀦 𑀬𑀸𑀧𑁂𑀦𑁆𑀢𑁄 𑀅𑀜𑁆𑀜𑀢𑁆𑀣 𑀦 𑀅𑀕𑀫𑀸𑀲𑀺, 𑀅𑀳𑁄 𑀢𑀣𑀸𑀕𑀢𑀸𑀦𑀁 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀪𑀸𑀯𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀇𑀤𑀸𑀦𑀺 𑀮𑁄𑀮𑀼𑀧𑁆𑀧𑀘𑀸𑀭𑀧𑁆𑀧𑀳𑀸𑀦𑀁, 𑀧𑀼𑀩𑁆𑀩𑁂𑀧𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀳𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺. 𑀲𑀩𑁆𑀩𑀫𑁆𑀧𑀺 𑀯𑀢𑁆𑀣𑀼 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁩𑁦. ‘‘𑀲𑀦𑁆𑀢𑀺 𑀭𑀼𑀓𑁆𑀔𑀸 𑀳𑀭𑀺𑀧𑀢𑁆𑀢𑀸, 𑀤𑀼𑀫𑀸 𑀦𑁂𑀓𑀨𑀮𑀸 𑀩𑀳𑀽;

𑀓𑀲𑁆𑀫𑀸 𑀦𑀼 𑀲𑀼𑀓𑁆𑀔𑁂 𑀓𑁄𑀴𑀸𑀧𑁂, 𑀲𑀼𑀯𑀲𑁆𑀲 𑀦𑀺𑀭𑀢𑁄 𑀫𑀦𑁄.

𑁩𑁧. ‘‘𑀨𑀮𑀲𑁆𑀲 𑀉𑀧𑀪𑀼𑀜𑁆𑀚𑀺𑀫𑁆𑀳𑀸, 𑀦𑁂𑀓𑀯𑀲𑁆𑀲𑀕𑀡𑁂 𑀩𑀳𑀽;

𑀅𑀨𑀮𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦, 𑀲𑀸𑀯 𑀫𑁂𑀢𑁆𑀢𑀺 𑀬𑀣𑀸 𑀧𑀼𑀭𑁂.

𑁩𑁨. ‘‘𑀲𑀼𑀓𑁆𑀔𑀜𑁆𑀘 𑀭𑀼𑀓𑁆𑀔𑀁 𑀓𑁄𑀴𑀸𑀧𑀁, 𑀑𑀧𑀢𑁆𑀢𑀫𑀨𑀮𑀁 𑀤𑀼𑀫𑀁;

𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀤𑁄𑀲𑀁 𑀧𑀲𑁆𑀲𑀲𑁂 𑀤𑀺𑀚.

𑁩𑁩. ‘‘𑀬𑁂 𑀨𑀮𑀢𑁆𑀣𑀸 𑀲𑀫𑁆𑀪𑀚𑀦𑁆𑀢𑀺, 𑀅𑀨𑀮𑁄𑀢𑀺 𑀚𑀳𑀦𑁆𑀢𑀺 𑀦𑀁;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀤𑀼𑀫𑁆𑀫𑁂𑀥𑀸, 𑀢𑁂 𑀳𑁄𑀦𑁆𑀢𑀺 𑀧𑀓𑁆𑀔𑀧𑀸𑀢𑀺𑀦𑁄.

𑁩𑁪. ‘‘𑀲𑀸𑀥𑀼 𑀲𑀓𑁆𑀔𑀺 𑀓𑀢𑀁 𑀳𑁄𑀢𑀺, 𑀫𑁂𑀢𑁆𑀢𑀺 𑀲𑀁𑀲𑀢𑀺 𑀲𑀦𑁆𑀣𑀯𑁄;

𑀲𑀘𑁂𑀢𑀁 𑀥𑀫𑁆𑀫𑀁 𑀭𑁄𑀘𑁂𑀲𑀺, 𑀧𑀸𑀲𑀁𑀲𑁄𑀲𑀺 𑀯𑀺𑀚𑀸𑀦𑀢𑀁.

𑁩𑁫. ‘‘𑀲𑁄 𑀢𑁂 𑀲𑀼𑀯 𑀯𑀭𑀁 𑀤𑀫𑁆𑀫𑀺, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀭𑀁 𑀯𑀭𑀲𑁆𑀲𑀼 𑀯𑀓𑁆𑀓𑀗𑁆𑀕, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁩𑁬. ‘‘𑀅𑀧𑀺 𑀦𑀸𑀫 𑀦𑀁 𑀧𑀲𑁆𑀲𑁂𑀬𑁆𑀬𑀁, 𑀲𑀧𑀢𑁆𑀢𑀁 𑀲𑀨𑀮𑀁 𑀤𑀼𑀫𑀁;

𑀤𑀮𑀺𑀤𑁆𑀤𑁄𑀯 𑀦𑀺𑀥𑀺𑀁 𑀮𑀤𑁆𑀥𑀸, 𑀦𑀦𑁆𑀤𑁂𑀬𑁆𑀬𑀸𑀳𑀁 𑀧𑀼𑀦𑀧𑁆𑀧𑀼𑀦𑀁.

𑁩𑁭. ‘‘𑀢𑀢𑁄 𑀅𑀫𑀢𑀫𑀸𑀤𑀸𑀬, 𑀅𑀪𑀺𑀲𑀺𑀜𑁆𑀘𑀺 𑀫𑀳𑀻𑀭𑀼𑀳𑀁;

𑀢𑀲𑁆𑀲 𑀲𑀸𑀔𑀸 𑀯𑀺𑀭𑀽𑀳𑀺𑀁𑀲𑀼, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸.

𑁩𑁮. ‘‘𑀏𑀯𑀁 𑀲𑀓𑁆𑀓 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀔𑀺𑀢𑁄, 𑀤𑀺𑀲𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁.

𑁩𑁯. ‘‘𑀲𑀼𑀯𑀲𑁆𑀲 𑀘 𑀯𑀭𑀁 𑀤𑀢𑁆𑀯𑀸, 𑀓𑀢𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁;

𑀧𑀓𑁆𑀓𑀸𑀫𑀺 𑀲𑀳 𑀪𑀭𑀺𑀬𑀸𑀬, 𑀤𑁂𑀯𑀸𑀦𑀁 𑀦𑀦𑁆𑀤𑀦𑀁 𑀯𑀦’’𑀦𑁆𑀢𑀺. 𑁋

𑀧𑀜𑁆𑀳𑀧𑀝𑀺𑀧𑀜𑁆𑀳𑀸𑀧𑀺 𑀅𑀢𑁆𑀣𑁄𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀅𑀦𑀼𑀢𑁆𑀢𑀸𑀦𑀧𑀤𑀫𑁂𑀯 𑀧𑀦 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀳𑀭𑀺𑀧𑀢𑁆𑀢𑀸𑀢𑀺 𑀦𑀻𑀮𑀧𑀢𑁆𑀢𑀲𑀘𑁆𑀙𑀦𑁆𑀦𑀸. 𑀓𑁄𑀴𑀸𑀧𑁂𑀢𑀺 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀆𑀓𑁄𑀝𑀺𑀢𑀲𑀤𑁆𑀤𑀁 𑀯𑀺𑀬 𑀫𑀼𑀜𑁆𑀘𑀫𑀸𑀦𑁂 𑀦𑀺𑀲𑁆𑀲𑀸𑀭𑁂. 𑀲𑀼𑀯𑀲𑁆𑀲𑀸𑀢𑀺 𑀆𑀬𑀲𑁆𑀫𑀢𑁄 𑀲𑀼𑀯𑀭𑀸𑀚𑀲𑁆𑀲 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀭𑀼𑀓𑁆𑀔𑁂 𑀫𑀦𑁄 𑀦𑀺𑀭𑀢𑁄. 𑀨𑀮𑀲𑁆𑀲𑀸𑀢𑀺 𑀨𑀮𑀁 𑀅𑀲𑁆𑀲 𑀭𑀼𑀓𑁆𑀔𑀲𑁆𑀲. 𑀦𑁂𑀓𑀯𑀲𑁆𑀲𑀕𑀡𑁂𑀢𑀺 𑀅𑀦𑁂𑀓𑀯𑀲𑁆𑀲𑀕𑀡𑁂. 𑀩𑀳𑀽𑀢𑀺 𑀲𑀫𑀸𑀦𑁂𑀧𑀺 𑀅𑀦𑁂𑀓𑀲𑀢𑁂 𑀦 𑀤𑁆𑀯𑁂 𑀢𑀬𑁄, 𑀅𑀣 𑀔𑁄 𑀩𑀳𑀽𑀯. 𑀯𑀺𑀤𑀺𑀢𑁆𑀯𑀸𑀦𑀸𑀢𑀺 𑀳𑀁𑀲𑀭𑀸𑀚 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀇𑀫𑀁 𑀭𑀼𑀓𑁆𑀔𑀁 𑀅𑀨𑀮𑀁 𑀯𑀺𑀤𑀺𑀢𑁆𑀯𑀸𑀧𑀺 𑀬𑀣𑀸 𑀧𑀼𑀭𑁂 𑀏𑀢𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺, 𑀲𑀸𑀯 𑀫𑁂𑀢𑁆𑀢𑀺, 𑀢𑀜𑁆𑀳𑀺 𑀫𑀬𑀁 𑀦 𑀪𑀺𑀦𑁆𑀤𑀸𑀫, 𑀫𑁂𑀢𑁆𑀢𑀺𑀁 𑀪𑀺𑀦𑁆𑀤𑀦𑁆𑀢𑀸 𑀳𑀺 𑀅𑀦𑀭𑀺𑀬𑀸 𑀅𑀲𑀧𑁆𑀧𑀼𑀭𑀺𑀲𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀧𑀓𑀸𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀑𑀧𑀢𑁆𑀢𑀦𑁆𑀢𑀺 𑀅𑀯𑀧𑀢𑁆𑀢𑀁 𑀦𑀺𑀧𑁆𑀧𑀢𑁆𑀢𑀁 𑀧𑀢𑀺𑀢𑀧𑀢𑁆𑀢𑀁. 𑀓𑀺𑀁 𑀤𑁄𑀲𑀁 𑀧𑀲𑁆𑀲𑀲𑁂𑀢𑀺 𑀅𑀜𑁆𑀜𑁂 𑀲𑀓𑀼𑀡𑀸 𑀏𑀢𑀁 𑀑𑀳𑀸𑀬 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀁 𑀏𑀯𑀁 𑀕𑀫𑀦𑁂 𑀓𑀺𑀁 𑀦𑀸𑀫 𑀤𑁄𑀲𑀁 𑀧𑀲𑁆𑀲𑀲𑀺. 𑀬𑁂 𑀨𑀮𑀢𑁆𑀣𑀸𑀢𑀺 𑀬𑁂 𑀧𑀓𑁆𑀔𑀺𑀦𑁄 𑀨𑀮𑀢𑁆𑀣𑀸𑀬 𑀨𑀮𑀓𑀸𑀭𑀡𑀸 𑀲𑀫𑁆𑀪𑀚𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺, 𑀅𑀨𑀮𑁄𑀢𑀺 𑀜𑀢𑁆𑀯𑀸 𑀏𑀢𑀁 𑀚𑀳𑀦𑁆𑀢𑀺. 𑀅𑀢𑁆𑀢𑀢𑁆𑀣𑀧𑀜𑁆𑀜𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀜𑁆𑀜𑀸, 𑀧𑀭𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀺𑀬𑁂𑀯 𑀯𑀸 𑀞𑀺𑀢𑀸 𑀏𑀢𑁂𑀲𑀁 𑀧𑀜𑁆𑀜𑀸𑀢𑀺 𑀅𑀢𑁆𑀢𑀢𑁆𑀣𑀧𑀜𑁆𑀜𑀸. 𑀧𑀓𑁆𑀔𑀧𑀸𑀢𑀺𑀦𑁄𑀢𑀺 𑀢𑁂 𑀅𑀢𑁆𑀢𑀦𑁄𑀬𑁂𑀯 𑀯𑀼𑀟𑁆𑀠𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀫𑀺𑀢𑁆𑀢𑀧𑀓𑁆𑀔𑀁 𑀧𑀸𑀢𑁂𑀦𑁆𑀢𑀺 𑀦𑀸𑀲𑁂𑀦𑁆𑀢𑀻𑀢𑀺 𑀧𑀓𑁆𑀔𑀧𑀸𑀢𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺. 𑀅𑀢𑁆𑀢𑀧𑀓𑁆𑀔𑁂𑀬𑁂𑀯 𑀯𑀸 𑀧𑀢𑀦𑁆𑀢𑀻𑀢𑀺 𑀧𑀓𑁆𑀔𑀧𑀸𑀢𑀺𑀦𑁄.

𑀅𑀧𑀺 𑀦𑀸𑀫 𑀦𑀦𑁆𑀢𑀺 𑀳𑀁𑀲𑀭𑀸𑀚, 𑀲𑀘𑁂 𑀫𑁂 𑀫𑀦𑁄𑀭𑀣𑁄 𑀦𑀺𑀧𑁆𑀨𑀚𑁆𑀚𑁂𑀬𑁆𑀬, 𑀢𑀬𑀸 𑀤𑀺𑀦𑁆𑀦𑁄 𑀯𑀭𑁄 𑀲𑀫𑁆𑀧𑀚𑁆𑀚𑁂𑀬𑁆𑀬, 𑀅𑀧𑀺 𑀦𑀸𑀫 𑀅𑀳𑀁 𑀇𑀫𑀁 𑀭𑀼𑀓𑁆𑀔𑀁 𑀲𑀧𑀢𑁆𑀢𑀁 𑀲𑀨𑀮𑀁 𑀧𑀼𑀦 𑀧𑀲𑁆𑀲𑁂𑀬𑁆𑀬𑀁, 𑀢𑀢𑁄 𑀤𑀮𑀺𑀤𑁆𑀤𑁄 𑀦𑀺𑀥𑀺𑀁 𑀮𑀪𑀺𑀢𑁆𑀯𑀸𑀯 𑀧𑀼𑀦𑀧𑁆𑀧𑀼𑀦𑀁 𑀏𑀢𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁, 𑀢𑀁 𑀤𑀺𑀲𑁆𑀯𑀸𑀯 𑀧𑀫𑁄𑀤𑁂𑀬𑁆𑀬𑀁. 𑀅𑀫𑀢𑀫𑀸𑀤𑀸𑀬𑀸𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀞𑀺𑀢𑁄 𑀕𑀗𑁆𑀕𑁄𑀤𑀓𑀁 𑀕𑀳𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀬𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀇𑀫𑀸𑀬 𑀲𑀤𑁆𑀥𑀺𑀁 𑀤𑁆𑀯𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀲𑀼𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀲𑀼𑀯𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁩𑁧] 𑁫. 𑀳𑀭𑀺𑀢𑀘𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀢𑀁 𑀫𑁂𑀢𑀁 𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀏𑀓𑀁 𑀅𑀮𑀗𑁆𑀓𑀢𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑀁 𑀤𑀻𑀖𑀓𑁂𑀲𑀦𑀔𑀮𑁄𑀫𑀁 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀭𑀼𑀘𑀺𑀬𑀸 𑀆𑀦𑀻𑀢𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀯𑀢𑁆𑀯𑀸 ‘‘𑀅𑀮𑀗𑁆𑀓𑀢𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀯𑀲𑁂𑀦, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑀺𑀮𑁂𑀲𑁄 𑀦𑀸𑀫 𑀕𑀼𑀡𑀯𑀺𑀤𑁆𑀥𑀁𑀲𑀓𑁄 𑀅𑀧𑁆𑀧𑀲𑁆𑀲𑀸𑀤𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀺, 𑀏𑀲 𑀧𑀦 𑀓𑀺𑀮𑁂𑀲𑁄 𑀓𑀺𑀁𑀓𑀸𑀭𑀡𑀸 𑀢𑀁 𑀦 𑀓𑀺𑀮𑀫𑁂𑀲𑁆𑀲𑀢𑀺? 𑀦 𑀳𑀺 𑀲𑀺𑀦𑁂𑀭𑀼𑀁 𑀧𑀳𑀭𑀺𑀢𑁆𑀯𑀸 𑀧𑀳𑀭𑀡𑀯𑀸𑀢𑁄 𑀧𑀼𑀭𑀸𑀡𑀧𑀡𑁆𑀡𑀲𑁆𑀲 𑀮𑀚𑁆𑀚𑀢𑀺, 𑀇𑀫𑀜𑁆𑀳𑀺 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀩𑁄𑀥𑀺𑀜𑀸𑀡𑀲𑁆𑀲 𑀅𑀦𑀼𑀧𑀤𑀁 𑀘𑀭𑀫𑀸𑀦𑀸 𑀧𑀜𑁆𑀘𑀅𑀪𑀺𑀜𑁆𑀜𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀯𑀺𑀲𑀼𑀤𑁆𑀥𑀫𑀳𑀸𑀧𑀼𑀭𑀺𑀲𑀸𑀧𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀛𑀸𑀦𑀁 𑀅𑀦𑁆𑀢𑀭𑀥𑀸𑀧𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀓𑀜𑁆𑀘𑀦𑀙𑀯𑀺𑀢𑀸𑀬 𑀧𑀦𑀲𑁆𑀲 ‘‘𑀳𑀭𑀺𑀢𑀘𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀥𑀦𑀯𑀺𑀮𑁄𑀓𑀦𑀁 𑀓𑀢𑁆𑀯𑀸 ‘‘𑀥𑀦𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀥𑀦𑀲𑁆𑀲 𑀉𑀧𑁆𑀧𑀸𑀤𑀓𑀸 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀬𑀸𑀧𑀺 𑀫𑀭𑀡𑀫𑀼𑀔𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀭𑀡𑀪𑀬𑀪𑀻𑀢𑁄 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁆𑀣 𑀘𑀺𑀭𑀁 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀧𑀩𑁆𑀩𑀢𑀸 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀬𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀭𑀸𑀚𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀅𑀢𑀺𑀭𑁂𑀓𑀢𑀭𑀁 𑀧𑀲𑀻𑀤𑀺𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 ‘‘𑀯𑀲𑁆𑀲𑀸𑀯𑀸𑀲𑀝𑁆𑀞𑀸𑀦𑀁 𑀉𑀧𑀥𑀸𑀭𑁂𑀫, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀢𑀁 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀭𑀺𑀘𑀸𑀭𑀓𑀁 𑀓𑀢𑁆𑀯𑀸 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀫𑀳𑀸𑀲𑀢𑁆𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀭𑀜𑁆𑀜𑁄 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑁄 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀢𑀢𑁆𑀣 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑁄 ‘‘𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑀸 𑀧𑀫𑀚𑁆𑀚𑀻’’𑀢𑀺 𑀫𑀳𑀸𑀲𑀢𑁆𑀢𑀁 𑀤𑁂𑀯𑀺𑀬𑀸 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀫𑀳𑀸𑀲𑀢𑁆𑀢𑀁 𑀲𑀳𑀢𑁆𑀣𑀸 𑀧𑀭𑀺𑀯𑀺𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀸 𑀪𑁄𑀚𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀭𑀸𑀬𑀫𑀸𑀦𑁂 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀢𑁆𑀯𑀸 𑀲𑀡𑁆𑀳𑀁 𑀫𑀝𑁆𑀞𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀲𑀭𑀻𑀭𑁂 𑀯𑀸𑀢𑀁 𑀧𑀳𑀭𑀸𑀧𑁂𑀦𑁆𑀢𑀻 𑀔𑀼𑀤𑁆𑀤𑀓𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀤𑀺𑀯𑀸𑀢𑀭𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀪𑀺𑀓𑁆𑀔𑀸𑀪𑀸𑀚𑀦𑀁 𑀆𑀤𑀸𑀬 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀧𑀸𑀧𑀼𑀡𑀺. 𑀤𑁂𑀯𑀺𑀬𑀸 𑀢𑀲𑁆𑀲 𑀯𑀸𑀓𑀘𑀺𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀉𑀝𑁆𑀞𑀳𑀦𑁆𑀢𑀺𑀬𑀸 𑀫𑀝𑁆𑀞𑀲𑀸𑀝𑀓𑁄 𑀪𑀲𑁆𑀲𑀺, 𑀫𑀳𑀸𑀲𑀢𑁆𑀢𑀲𑁆𑀲 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀁 𑀧𑀝𑀺𑀳𑀜𑁆𑀜𑀺. 𑀅𑀣𑀲𑁆𑀲 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑀸𑀮𑁂 𑀅𑀩𑁆𑀪𑀦𑁆𑀢𑀭𑁂 𑀦𑀺𑀯𑀼𑀢𑁆𑀣𑀓𑀺𑀮𑁂𑀲𑁄 𑀓𑀭𑀡𑁆𑀟𑀓𑁂 𑀲𑀬𑀺𑀢𑀆𑀲𑀻𑀯𑀺𑀲𑁄 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀲𑁄 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀤𑁂𑀯𑀺𑀁 𑀳𑀢𑁆𑀣𑁂 𑀕𑀡𑁆𑀳𑀺, 𑀢𑀸𑀯𑀤𑁂𑀯 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀮𑁄𑀓𑀥𑀫𑁆𑀫𑀁 𑀲𑁂𑀯𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀁 𑀢𑀣𑁂𑀯 𑀅𑀓𑀸𑀲𑀺. 𑀢𑀲𑁆𑀲 𑀢𑀸𑀬 𑀲𑀤𑁆𑀥𑀺𑀁 𑀮𑁄𑀓𑀥𑀫𑁆𑀫𑀧𑀝𑀺𑀲𑁂𑀯𑀦𑀁 𑀲𑀓𑀮𑀦𑀕𑀭𑁂 𑀧𑀸𑀓𑀝𑀁 𑀚𑀸𑀢𑀁. 𑀅𑀫𑀘𑁆𑀘𑀸 ‘‘𑀳𑀭𑀺𑀢𑀘𑀢𑀸𑀧𑀲𑁄 𑀏𑀯𑀫𑀓𑀸𑀲𑀻’’𑀢𑀺 𑀭𑀜𑁆𑀜𑁄 𑀧𑀡𑁆𑀡𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 ‘‘𑀫𑀁 𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀏𑀯𑀁 𑀯𑀤𑀦𑁆𑀢𑀻’’𑀢𑀺 𑀅𑀲𑀤𑁆𑀤𑀳𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑁂𑀯𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁, 𑀓𑀺𑀭 𑀫𑀫 𑀅𑀬𑁆𑀬𑁄 𑀳𑀭𑀺𑀢𑀘𑀢𑀸𑀧𑀲𑁄 𑀢𑀬𑀸 𑀲𑀤𑁆𑀥𑀺𑀁 𑀮𑁄𑀓𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺. 𑀲𑁄 𑀢𑀲𑁆𑀲𑀸𑀧𑀺 𑀅𑀲𑀤𑁆𑀤𑀳𑀺𑀢𑁆𑀯𑀸 ‘‘𑀢𑀫𑁂𑀯 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁦. ‘‘𑀲𑀼𑀢𑀁 𑀫𑁂𑀢𑀁 𑀫𑀳𑀸𑀩𑁆𑀭𑀳𑁆𑀫𑁂, 𑀓𑀸𑀫𑁂 𑀪𑀼𑀜𑁆𑀚𑀢𑀺 𑀳𑀸𑀭𑀺𑀢𑁄;

𑀓𑀘𑁆𑀘𑁂𑀢𑀁 𑀯𑀘𑀦𑀁 𑀢𑀼𑀘𑁆𑀙𑀁, 𑀓𑀘𑁆𑀘𑀺 𑀲𑀼𑀤𑁆𑀥𑁄 𑀇𑀭𑀺𑀬𑁆𑀬𑀲𑀻’’𑀢𑀺.

𑀢𑀢𑁆𑀣 𑀓𑀘𑁆𑀘𑁂𑀢𑀦𑁆𑀢𑀺 𑀓𑀘𑁆𑀘𑀺 𑀏𑀢𑀁 ‘‘𑀳𑀸𑀭𑀺𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀅𑀫𑁆𑀳𑁂𑀳𑀺 𑀲𑀼𑀢𑀁 𑀯𑀘𑀦𑀁 𑀢𑀼𑀘𑁆𑀙𑀁 𑀅𑀪𑀽𑀢𑀁, 𑀓𑀘𑁆𑀘𑀺 𑀢𑁆𑀯𑀁 𑀲𑀼𑀤𑁆𑀥𑁄 𑀇𑀭𑀺𑀬𑁆𑀬𑀲𑀺 𑀯𑀺𑀳𑀭𑀲𑀻𑀢𑀺.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 ‘𑀦𑀸𑀳𑀁 𑀧𑀭𑀺𑀪𑀼𑀜𑁆𑀚𑀸𑀫𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀫 𑀲𑀤𑁆𑀤𑀳𑀺𑀲𑁆𑀲𑀢𑁂𑀯, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀘𑁆𑀘𑀲𑀤𑀺𑀲𑀻 𑀧𑀢𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺. 𑀉𑀚𑁆𑀛𑀺𑀢𑀲𑀘𑁆𑀘𑀸 𑀳𑀺 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀫𑀬𑀸 𑀲𑀘𑁆𑀘𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀏𑀓𑀘𑁆𑀘𑁂𑀲𑀼 𑀞𑀸𑀦𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀫𑁆𑀧𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄𑀧𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯, 𑀅𑀢𑁆𑀣𑀪𑁂𑀤𑀓𑀯𑀺𑀲𑀁𑀯𑀸𑀤𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀘𑀫𑁂𑀯 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧. ‘‘𑀏𑀯𑀫𑁂𑀢𑀁 𑀫𑀳𑀸𑀭𑀸𑀚, 𑀬𑀣𑀸 𑀢𑁂 𑀯𑀘𑀦𑀁 𑀲𑀼𑀢𑀁;

𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀫𑁄𑀳𑀦𑁂𑀬𑁆𑀬𑁂𑀲𑀽𑀢𑀺 𑀓𑀸𑀫𑀕𑀼𑀡𑁂𑀲𑀼. 𑀓𑀸𑀫𑀕𑀼𑀡𑁂𑀲𑀼 𑀳𑀺 𑀮𑁄𑀓𑁄 𑀫𑀼𑀬𑁆𑀳𑀢𑀺, 𑀢𑁂 𑀘 𑀮𑁄𑀓𑀁 𑀫𑁄𑀳𑀬𑀦𑁆𑀢𑀺, 𑀢𑀲𑁆𑀫𑀸 𑀢𑁂 ‘‘𑀫𑁄𑀳𑀦𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁨. ‘‘𑀅𑀤𑀼 𑀧𑀜𑁆𑀜𑀸 𑀓𑀺𑀫𑀢𑁆𑀣𑀺𑀬𑀸, 𑀦𑀺𑀧𑀼𑀡𑀸 𑀲𑀸𑀥𑀼𑀘𑀺𑀦𑁆𑀢𑀺𑀦𑀻;

𑀬𑀸𑀬 𑀉𑀧𑁆𑀧𑀢𑀺𑀢𑀁 𑀭𑀸𑀕𑀁, 𑀓𑀺𑀁 𑀫𑀦𑁄 𑀦 𑀯𑀺𑀦𑁄𑀤𑀬𑁂’’𑀢𑀺.

𑀢𑀢𑁆𑀣 𑀅𑀤𑀽𑀢𑀺 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀦𑁆𑀢𑁂, 𑀕𑀺𑀮𑀸𑀦𑀲𑁆𑀲 𑀦𑀸𑀫 𑀪𑁂𑀲𑀚𑁆𑀚𑀁, 𑀧𑀺𑀧𑀸𑀲𑀺𑀢𑀲𑁆𑀲 𑀧𑀸𑀦𑀻𑀬𑀁 𑀧𑀝𑀺𑀲𑀭𑀡𑀁, 𑀢𑀼𑀫𑁆𑀳𑀸𑀓𑀁 𑀧𑀦𑁂𑀲𑀸 𑀦𑀺𑀧𑀼𑀡𑀸 𑀲𑀸𑀥𑀽𑀦𑀁 𑀅𑀢𑁆𑀣𑀸𑀦𑀁 𑀘𑀺𑀦𑁆𑀢𑀺𑀦𑀻 𑀧𑀜𑁆𑀜𑀸 𑀓𑀺𑀫𑀢𑁆𑀣𑀺𑀬𑀸, 𑀬𑀸𑀬 𑀧𑀼𑀦 𑀉𑀧𑁆𑀧𑀢𑀺𑀢𑀁 𑀭𑀸𑀕𑀁 𑀓𑀺𑀁 𑀫𑀦𑁄 𑀦 𑀯𑀺𑀦𑁄𑀤𑀬𑁂, 𑀓𑀺𑀁 𑀘𑀺𑀢𑁆𑀢𑀁 𑀯𑀺𑀦𑁄𑀤𑁂𑀢𑀼𑀁 𑀦𑀸𑀲𑀓𑁆𑀔𑀻𑀢𑀺.

𑀅𑀣𑀲𑁆𑀲 𑀓𑀺𑀮𑁂𑀲𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀳𑀸𑀭𑀺𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁩. ‘‘𑀘𑀢𑁆𑀢𑀸𑀭𑁄𑀫𑁂 𑀫𑀳𑀸𑀭𑀸𑀚, 𑀮𑁄𑀓𑁂 𑀅𑀢𑀺𑀩𑀮𑀸 𑀪𑀼𑀲𑀸;

𑀭𑀸𑀕𑁄 𑀤𑁄𑀲𑁄 𑀫𑀤𑁄 𑀫𑁄𑀳𑁄, 𑀬𑀢𑁆𑀣 𑀧𑀜𑁆𑀜𑀸 𑀦 𑀕𑀸𑀥𑀢𑀻’’𑀢𑀺.

𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀢𑁆𑀢𑁂𑀲𑀼 𑀫𑀳𑁄𑀖𑁂 𑀧𑀢𑀺𑀢𑀸 𑀯𑀺𑀬 𑀧𑀜𑁆𑀜𑀸 𑀕𑀸𑀥𑀁 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁪𑁪. ‘‘𑀅𑀭𑀳𑀸 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀼𑀤𑁆𑀥𑁄 𑀘𑀭𑀢𑀺 𑀳𑀸𑀭𑀺𑀢𑁄;

𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀘𑁂𑀯, 𑀇𑀢𑀺 𑀦𑁄 𑀲𑀫𑁆𑀫𑀢𑁄 𑀪𑀯’’𑀦𑁆𑀢𑀺.