𑁧𑁨. 𑀲𑀫𑁆𑀧𑀦𑁆𑀦𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀤𑁆𑀯𑀸𑀤𑀲𑀫𑁂 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀏𑀢𑁆𑀣 𑀢𑀺𑀯𑀺𑀥𑀁 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀲𑀫𑀗𑁆𑀕𑀻𑀫𑀥𑀼𑀭𑀯𑀲𑁂𑀦. 𑀢𑁂𑀲𑀼 𑁋

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂’’𑀢𑀺. (𑀚𑀸. 𑁧.𑁧𑁪.𑁧) 𑁋

𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀏𑀢𑁆𑀣 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. ‘‘𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀁 𑁋 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀮𑀓𑀁, 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺 (𑀧𑀸𑀭𑀸. 𑁧𑁭) 𑀏𑀢𑁆𑀣 𑀫𑀥𑀼𑀭𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. 𑀇𑀥 𑀧𑀦 𑀧𑀭𑀺𑀧𑀼𑀡𑁆𑀡𑀢𑁆𑀣𑁂𑀧𑀺 𑀲𑀫𑀗𑁆𑀕𑀺𑀪𑀸𑀯𑁂𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸 𑀳𑀼𑀢𑁆𑀯𑀸𑀢𑀺𑀧𑀺, 𑀲𑀻𑀮𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸𑀢𑀺𑀧𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘‘𑀧𑀭𑀺𑀧𑀼𑀡𑁆𑀡𑀲𑀻𑀮𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀔𑁂𑀢𑁆𑀢𑀤𑁄𑀲𑀯𑀺𑀕𑀫𑁂𑀦 𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑁂𑀢𑁆𑀢𑀤𑁄𑀲𑀯𑀺𑀕𑀫𑁂𑀦 𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀺 𑀯𑀺𑀬 𑀲𑀻𑀮𑀤𑁄𑀲𑀯𑀺𑀕𑀫𑁂𑀦 𑀲𑀻𑀮𑀧𑀸𑀭𑀺𑀧𑀽𑀭𑀺 𑀯𑀼𑀢𑁆𑀢𑀸’’𑀢𑀺. ‘‘𑀲𑀻𑀮𑀲𑀫𑀗𑁆𑀕𑀺𑀦𑁄’’𑀢𑀺 𑀇𑀫𑀺𑀦𑀸 𑀧𑀦 𑀅𑀢𑁆𑀣𑁂𑀦 𑀲𑀻𑀮𑁂𑀦 𑀲𑀫𑀗𑁆𑀕𑀻𑀪𑀽𑀢𑀸 𑀲𑀫𑁄𑀥𑀸𑀦𑀕𑀢𑀸 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀲𑀻𑀮𑀢𑀸 𑀳𑁄𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀘. 𑀢𑀤𑀼𑀪𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁦-𑁨𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀺𑀭 𑀪𑀕𑀯𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸’’𑀢𑀺 𑀇𑀫𑀺𑀦𑀸 𑀚𑁂𑀝𑁆𑀞𑀓𑀲𑀻𑀮𑀁 𑀤𑀲𑁆𑀲𑁂𑀢𑀻𑀢𑀺𑀆𑀤𑀺𑀦𑀸 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀓𑀺𑀫𑀲𑁆𑀲 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀯𑀺𑀳𑀭𑀢𑀁 𑀢𑀼𑀫𑁆𑀳𑀸𑀓𑀁 𑀓𑀺𑀦𑁆𑀢𑀺 𑀲𑀺𑀬𑀸 𑀉𑀢𑁆𑀢𑀭𑀺 𑀓𑀸𑀢𑀩𑁆𑀩𑀁, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀘𑁂𑀢𑀺 𑀅𑀢𑁆𑀣𑁄.

𑀏𑀯𑀁 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀧𑀸𑀤𑀦𑀽𑀧𑀸𑀬𑁂𑀦 𑀲𑀤𑁆𑀥𑀺𑀁 𑀲𑀻𑀮𑀲𑀫𑁆𑀧𑀤𑀸𑀬 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀦𑁆𑀢𑁄 𑀅𑀦𑁂𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀅𑀦𑁂𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀯 𑀳𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀪𑀺𑀚𑁆𑀛𑀸𑀬𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸, 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀲𑁆𑀲 𑀮𑁄𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑁆𑀬𑀸𑀧𑀚𑁆𑀚𑀢𑀺 𑀧𑀽𑀢𑀺𑀪𑀯𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀏𑀓𑀽𑀦𑀯𑀻𑀲𑀢𑀺𑀆𑀖𑀸𑀢𑀯𑀢𑁆𑀣𑀼𑀯𑀺𑀲𑀬𑀲𑁆𑀲 𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦’’𑀦𑁆𑀢𑀺 (𑀥. 𑀲. 𑁧𑁧𑁫𑁯), 𑀢𑀣𑀸 ‘‘𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁩𑁯𑁧), ‘‘𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁪𑁧𑁮, 𑁧𑁨𑁩𑁭) 𑀘 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀕𑀢𑁄 𑀳𑁄𑀢𑀻𑀢𑀺 𑀅𑀬𑀜𑁆𑀘 𑀅𑀪𑀺𑀚𑁆𑀛𑀸, 𑀅𑀬𑀜𑁆𑀘 𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺 𑀅𑀧𑀕𑀢𑁄, 𑀧𑀳𑀻𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀘 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀘 𑀧𑀳𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀣𑀺𑀦𑀜𑁆𑀘𑁂𑀯 𑀫𑀺𑀤𑁆𑀥𑀜𑁆𑀘. 𑀢𑁂𑀲𑀼 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸 𑀣𑀺𑀦𑀁, 𑀆𑀮𑀲𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀁, 𑀧𑀘𑀮𑀸𑀬𑀺𑀓𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨-𑁧𑁧𑁬𑁩) 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀜𑁆𑀘𑁂𑀯 𑀓𑀼𑀓𑁆𑀓𑀼𑀘𑁆𑀘𑀜𑁆𑀘. 𑀢𑀢𑁆𑀣 𑀉𑀤𑁆𑀥𑀘𑁆𑀘𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀸𑀓𑀸𑀭𑁄, 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀅𑀓𑀢𑀓𑀮𑁆𑀬𑀸𑀡𑀲𑁆𑀲 𑀓𑀢𑀧𑀸𑀧𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀉𑀤𑁆𑀥𑀘𑁆𑀘𑀁? 𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀁 𑀅𑀯𑀽𑀧𑀲𑀫𑁄 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁫) 𑀯𑀺𑀢𑁆𑀣𑀸𑀭𑁄. ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀦𑀁; 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁮; 𑀦𑁂𑀢𑁆𑀢𑀺. 𑁧𑁨𑁦) 𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀁𑀲𑀬𑁄. 𑀢𑀲𑁆𑀲𑀸 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁯𑁧𑁫), ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀬𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁦𑁮) 𑀘 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀯𑀺𑀕𑀫𑀯𑀲𑁂𑀦 𑀘 𑀧𑀳𑀸𑀦𑀯𑀲𑁂𑀦 𑀘 𑀢𑁂𑀲𑀁 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀘𑀺𑀢𑁆𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺 (𑀯𑀺𑀪. 𑁫𑁦𑁮).

𑀢𑀢𑁆𑀣 𑀬𑀣𑀸 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀜𑁆𑀘 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺? 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀸𑀯 𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀏𑀯𑀁 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀳𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀲𑀼𑀪𑀫𑁆𑀧𑀺 𑀅𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄, 𑀧𑀣𑀫𑀦𑀲𑀺𑀓𑀸𑀭𑁄, 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀤𑀼𑀓𑁆𑀔𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸, 𑀅𑀦𑀢𑁆𑀢𑀦𑀺 𑀅𑀦𑀢𑁆𑀢𑀸𑀢𑀺 𑀯𑀸, 𑀅𑀲𑀼𑀪𑁂 𑀅𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀪𑀸𑀯𑁂𑀦𑁆𑀢𑀲𑁆𑀲𑀧𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀲𑁆𑀲𑀧𑀺 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀺 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄𑀧𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑀲𑀅𑀲𑀼𑀪𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀧𑀝𑀺𑀖𑀦𑀺𑀫𑀺𑀢𑁆𑀢𑁂 𑀆𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀧𑀝𑀺𑀖𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁, 𑀧𑀝𑀺𑀖𑀸𑀭𑀫𑁆𑀫𑀡𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀩𑁆𑀩𑀢𑁆𑀣 𑀏𑀓𑀮𑀓𑁆𑀔𑀡𑁄 𑀏𑀯. 𑀢𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀫𑁂𑀢𑁆𑀢𑀸𑀬 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑀢𑁆𑀣 ‘‘𑀫𑁂𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺, ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀧𑀦 𑀅𑀧𑁆𑀧𑀦𑀸𑀯. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀯. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀑𑀥𑀺𑀲𑀓𑀸𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀑𑀥𑀺𑀲𑁄 𑀅𑀦𑁄𑀥𑀺𑀲𑁄 𑀤𑀺𑀲𑀸𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, ‘‘𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀓𑀺𑀫𑀲𑁆𑀲 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺 𑀦𑀦𑀼 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀲𑀺, 𑀧𑀭𑀲𑁆𑀲 𑀓𑀼𑀚𑁆𑀛𑀦𑀁 𑀦𑀸𑀫 𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑀢𑀢𑁆𑀢𑀅𑀬𑀲𑀮𑀸𑀓𑀕𑀽𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑀢𑀸 𑀯𑀺𑀬 𑀳𑁄𑀢𑀺. 𑀏𑀲𑁄𑀧𑀺 𑀢𑀯 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀢𑁂 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺 𑀏𑀲 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬, 𑀧𑀝𑀺𑀯𑀸𑀢𑀁 𑀔𑀺𑀢𑁆𑀢𑀭𑀚𑁄𑀫𑀼𑀝𑁆𑀞𑀺 𑀯𑀺𑀬 𑀘 𑀏𑀢𑀲𑁆𑀲𑁂𑀯 𑀏𑀲 𑀓𑁄𑀥𑁄 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀬𑁂𑀲𑀁 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀧𑀺, 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀫𑁂𑀢𑁆𑀢𑀸𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀭𑀢𑀺 𑀦𑀸𑀫 𑀉𑀓𑁆𑀓𑀡𑁆𑀞𑀺𑀢𑀢𑀸, 𑀢𑀦𑁆𑀤𑀻 𑀦𑀸𑀫 𑀓𑀸𑀬𑀸𑀮𑀲𑀺𑀬𑀁, 𑀯𑀺𑀚𑀫𑁆𑀪𑀺𑀢𑀸 𑀦𑀸𑀫 𑀓𑀸𑀬𑀯𑀺𑀦𑀫𑀦𑀸, 𑀪𑀢𑁆𑀢𑀲𑀫𑁆𑀫𑀤𑁄 𑀦𑀸𑀫 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀧𑀭𑀺𑀴𑀸𑀳𑁄, 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀮𑀻𑀦𑀸𑀓𑀸𑀭𑁄. 𑀇𑀫𑁂𑀲𑀼 𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀭𑀢𑀺 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 𑀪𑀢𑁆𑀢𑀲𑀫𑁆𑀫𑀤𑁄 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀲𑀼 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀆𑀭𑀫𑁆𑀪𑀥𑀸𑀢𑀼 𑀦𑀸𑀫 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬𑀁, 𑀦𑀺𑀓𑁆𑀓𑀫𑀥𑀸𑀢𑀼 𑀦𑀸𑀫 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑀸𑀬 𑀢𑀢𑁄 𑀩𑀮𑀯𑀢𑀭𑀁, 𑀧𑀭𑀓𑁆𑀓𑀫𑀥𑀸𑀢𑀼 𑀦𑀸𑀫 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀇𑀫𑀲𑁆𑀫𑀺𑀁 𑀢𑀺𑀧𑁆𑀧𑀪𑁂𑀤𑁂 𑀯𑀻𑀭𑀺𑀬𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑁋 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀆𑀳𑀭𑀳𑀢𑁆𑀣𑀓𑀪𑀼𑀢𑁆𑀢𑀯𑀫𑀺𑀢𑀓𑀢𑀢𑁆𑀣𑀯𑀝𑁆𑀝𑀓𑀅𑀮𑀁𑀲𑀸𑀝𑀓𑀓𑀸𑀓𑀫𑀸𑀲𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀣𑀺𑀦𑀫𑀺𑀤𑁆𑀥𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀑𑀢𑁆𑀣𑀭𑀦𑁆𑀢𑀁 𑀆𑀕𑀘𑁆𑀙𑀢𑀺, 𑀘𑀢𑀼𑀧𑀜𑁆𑀘𑀆𑀮𑁄𑀧𑀑𑀓𑀸𑀲𑀁 𑀧𑀦 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀦 𑀳𑁄𑀢𑀺. 𑀏𑀯𑀁 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀧𑀺, 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀁 𑀤𑀻𑀧𑀸𑀮𑁄𑀓𑀁 𑀉𑀓𑁆𑀓𑀸𑀮𑁄𑀓𑀁 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀧𑀺, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀦𑁆𑀢𑀲𑁆𑀲𑀧𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀯𑀽𑀧𑀲𑀫𑁄 𑀦𑀸𑀫 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄, 𑀅𑀢𑁆𑀣𑀢𑁄 𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀲𑀫𑀸𑀥𑀺𑀲𑀗𑁆𑀔𑀸𑀢𑁂 𑀧𑀦 𑀘𑁂𑀢𑀲𑁄 𑀯𑀽𑀧𑀲𑀫𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀯𑀽𑀧𑀲𑀫𑁄. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀟𑁆𑀠𑀲𑁂𑀯𑀺𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀧𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀢𑀸𑀬 𑀧𑀓𑀢𑀜𑁆𑀜𑀼𑀦𑁄𑀧𑀺, 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀧𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀦𑀬𑀥𑀭𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀸𑀭𑀡𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀯. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀓𑀼𑀲𑀮𑀸𑀤𑀺𑀥𑀫𑁆𑀫𑁂𑀲𑀼 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸, 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀸 𑀥𑀫𑁆𑀫𑀸, 𑀳𑀻𑀦𑀧𑀡𑀻𑀢𑀸 𑀥𑀫𑁆𑀫𑀸, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑀘𑁆𑀘𑀯𑀲𑁂𑀦𑀧𑀺 𑀳𑀺 𑀏𑀓𑀁 𑀯𑀸…𑀧𑁂… 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀓𑀼𑀲𑀮𑀸𑀤𑀺𑀪𑁂𑀤𑁂𑀲𑀼 𑀥𑀫𑁆𑀫𑁂𑀲𑀼 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀧𑀺, 𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀧𑀺, 𑀢𑀻𑀲𑀼 𑀭𑀢𑀦𑁂𑀲𑀼 𑀑𑀓𑀧𑁆𑀧𑀦𑀻𑀬, 𑀲𑀤𑁆𑀥𑀸𑀲𑀗𑁆𑀔𑀸𑀢, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀧𑀺, 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀏𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑁂𑀳𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀸𑀦𑀁 𑀇𑀫𑁂𑀲𑀁 𑀦𑀻𑀯𑀭𑀡𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀢𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀢𑀣𑀸 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀲𑁆𑀲 𑀘. 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀧𑀦 𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀲𑁆𑀲 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀢𑀣𑀸 𑀧𑀳𑀸𑀦𑀸𑀬 𑀉𑀧𑀓𑀸𑀭𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀤𑀫𑁂𑀯 𑀯𑀸 𑀬𑀣𑀸𑀯𑀼𑀢𑁆𑀢𑀁 𑀅𑀪𑀺𑀚𑁆𑀛𑀸𑀤𑀻𑀦𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁, 𑀬𑀲𑁆𑀫𑀸 𑀳𑀻𑀦𑀯𑀻𑀭𑀺𑀬𑀢𑀸𑀬 𑀓𑀼𑀲𑀻𑀢𑁂𑀦, 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀫𑀼𑀝𑁆𑀞𑀲𑁆𑀲𑀢𑀺𑀦𑀸, 𑀅𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀢𑀸𑀬 𑀲𑀸𑀭𑀤𑁆𑀥𑀓𑀸𑀬𑁂𑀦, 𑀅𑀲𑀫𑀸𑀳𑀺𑀢𑀢𑀸𑀬 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂𑀦 𑀦 𑀓𑀤𑀸𑀘𑀺𑀧𑀺 𑀢𑁂 𑀲𑀓𑁆𑀓𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀧𑀕𑁂𑀯 𑀇𑀢𑀭𑀁, 𑀢𑀲𑁆𑀫𑀸 𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲 𑀲𑁄 𑀅𑀪𑀺𑀚𑁆𑀛𑀸𑀤𑀻𑀦𑀁 𑀯𑀺𑀕𑀫𑁄 𑀧𑀳𑀸𑀦𑀁 𑀲𑀫𑁆𑀪𑀯𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀲𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀁 𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀤𑁆𑀥𑀢𑁆𑀢𑀸 𑀏𑀯 𑀘 𑀅𑀦𑁆𑀢𑀭𑀸 𑀲𑀗𑁆𑀓𑁄𑀘𑀲𑁆𑀲 𑀅𑀦𑀸𑀧𑀚𑁆𑀚𑀦𑀢𑁄 𑀅𑀲𑀮𑁆𑀮𑀻𑀦𑀁.

𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀯𑀻𑀭𑀺𑀬𑀫𑁂𑀯, 𑀲𑀢𑀺𑀧𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀢𑀣𑀸 𑀉𑀧𑀝𑁆𑀞𑀺𑀢𑀢𑁆𑀢𑀸 𑀏𑀯 𑀘 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀲𑀭𑀡𑀲𑀫𑀢𑁆𑀣𑀢𑀸𑀬 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄𑀢𑀺 𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀓𑀸𑀬𑁄𑀧𑀺𑀲𑁆𑀲 𑀧𑀲𑁆𑀲𑀤𑁆𑀥𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺𑀲𑁆𑀲 𑀧𑀲𑁆𑀲𑀤𑁆𑀥𑁄 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄’’𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀧𑀲𑁆𑀲𑀤𑁆𑀥𑁄 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀭𑀤𑁆𑀥𑁄𑀢𑀺 𑀲𑁄 𑀘 𑀧𑀲𑁆𑀲𑀤𑁆𑀥𑀢𑁆𑀢𑀸 𑀏𑀯 𑀅𑀲𑀸𑀭𑀤𑁆𑀥𑁄, 𑀯𑀺𑀕𑀢𑀤𑀭𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺𑀲𑁆𑀲 𑀲𑀫𑁆𑀫𑀸 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺, 𑀲𑀫𑀸𑀳𑀺𑀢𑀢𑁆𑀢𑀸 𑀏𑀯 𑀘 𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦𑀁 𑀦𑀺𑀭𑀺𑀜𑁆𑀚𑀦𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀛𑀸𑀦𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀢𑁂𑀦𑁂𑀯𑀸𑀳 𑁋

‘‘𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀇𑀢𑀺𑀯𑀼. 𑁧𑁧𑁦).

𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯.

𑀕𑀸𑀣𑀸𑀲𑀼 𑀬𑀢𑀁 𑀘𑀭𑁂𑀢𑀺 𑀬𑀢𑀫𑀸𑀦𑁄 𑀘𑀭𑁂𑀬𑁆𑀬, 𑀘𑀗𑁆𑀓𑀫𑀦𑀸𑀤𑀺𑀯𑀲𑁂𑀦 𑀕𑀫𑀦𑀁 𑀓𑀧𑁆𑀧𑁂𑀦𑁆𑀢𑁄𑀧𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁬𑁫𑁧-𑁬𑁬𑁨; 𑀯𑀺𑀪. 𑁩𑁯𑁦) 𑀦𑀬𑁂𑀦 𑀯𑀼𑀢𑁆𑀢𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀲𑁂𑀦 𑀬𑀢𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀬𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀕𑀫𑀦𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑁂𑀘𑀺 𑀧𑀦 ‘‘𑀬𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀁𑀬𑀢𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀺𑀝𑁆𑀞𑁂𑀢𑀺 𑀢𑀺𑀝𑁆𑀞𑁂𑀬𑁆𑀬 𑀞𑀸𑀦𑀁 𑀓𑀧𑁆𑀧𑁂𑀬𑁆𑀬. 𑀅𑀘𑁆𑀙𑁂𑀢𑀺 𑀦𑀺𑀲𑀻𑀤𑁂𑀬𑁆𑀬. 𑀲𑀬𑁂𑀢𑀺 𑀦𑀺𑀧𑀚𑁆𑀚𑁂𑀬𑁆𑀬. 𑀬𑀢𑀫𑁂𑀦𑀁 𑀧𑀲𑀸𑀭𑀬𑁂𑀢𑀺 𑀏𑀢𑀁 𑀧𑀲𑀸𑀭𑁂𑀢𑀩𑁆𑀩𑀁 𑀳𑀢𑁆𑀣𑀧𑀸𑀤𑀸𑀤𑀺𑀁 𑀬𑀢𑀁 𑀬𑀢𑀫𑀸𑀦𑁄 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀲𑀫𑀗𑁆𑀕𑀻𑀬𑁂𑀯 𑀳𑀼𑀢𑁆𑀯𑀸 𑀧𑀲𑀸𑀭𑁂𑀬𑁆𑀬, 𑀲𑀩𑁆𑀩𑀢𑁆𑀣 𑀧𑀫𑀸𑀤𑀁 𑀯𑀺𑀚𑀳𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀬𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀬𑀢𑀁 𑀬𑀢𑀫𑀸𑀦𑁄 𑀦𑀸𑀫 𑀳𑁄𑀢𑀺, 𑀢𑀁 𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺. 𑀢𑀺𑀭𑀺𑀬𑀦𑁆𑀢𑀺 𑀢𑀺𑀭𑀺𑀬𑀢𑁄, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀺𑀯𑀲𑁂𑀦 𑀲𑀫𑀦𑁆𑀢𑀢𑁄 𑀤𑀺𑀲𑀸𑀪𑀸𑀕𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀧𑀸𑀘𑀻𑀦𑀦𑁆𑀢𑀺 𑀳𑁂𑀝𑁆𑀞𑀸. 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀲𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀲𑁆𑀲 𑀮𑁄𑀓𑀲𑁆𑀲 𑀧𑀯𑀢𑁆𑀢𑀺, 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀅𑀦𑀯𑀲𑁂𑀲𑀢𑁄 𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀯𑀺𑀲𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀫𑀯𑁂𑀓𑁆𑀔𑀺𑀢𑀸𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀜𑀸𑀬𑁂𑀦 𑀅𑀯𑁂𑀓𑁆𑀔𑀺𑀢𑀸, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀲𑀼𑀜𑁆𑀜𑀸𑀦𑀁. 𑀔𑀦𑁆𑀥𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀉𑀤𑀬𑀩𑁆𑀩𑀬𑀦𑁆𑀢𑀺 𑀉𑀤𑀬𑀜𑁆𑀘 𑀯𑀬𑀜𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀧𑀭𑀺 𑀢𑀺𑀭𑀺𑀬𑀁 𑀅𑀥𑁄𑀢𑀺 𑀢𑀺𑀲𑀗𑁆𑀕𑀳𑁂 𑀲𑀩𑁆𑀩𑀲𑁆𑀫𑀺𑀁 𑀮𑁄𑀓𑁂 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸𑀦𑀁 𑀲𑀩𑁆𑀩𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀲𑀫𑁆𑀫𑀲𑀦𑀸𑀥𑀺𑀕𑀢𑁂𑀦 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀧𑀜𑁆𑀘𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀉𑀤𑀬𑀁, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀯𑀬𑀜𑁆𑀘 𑀲𑀫𑀯𑁂𑀓𑁆𑀔𑀺𑀢𑀸 𑀲𑀫𑀦𑀼𑀧𑀲𑁆𑀲𑀺𑀢𑀸 𑀪𑀯𑁂𑀬𑁆𑀬𑀸𑀢𑀺.

𑀘𑁂𑀢𑁄𑀲𑀫𑀣𑀲𑀸𑀫𑀻𑀘𑀺𑀦𑁆𑀢𑀺 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑀦𑀢𑁄 𑀘𑁂𑀢𑁄𑀲𑀫𑀣𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁. 𑀲𑀺𑀓𑁆𑀔𑀫𑀸𑀦𑀦𑁆𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀁 𑀪𑀸𑀯𑁂𑀦𑁆𑀢𑀁 𑀜𑀸𑀡𑀧𑀭𑀫𑁆𑀧𑀭𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁, 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘. 𑀲𑀢𑀦𑁆𑀢𑀺 𑀘𑀢𑀼𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀸𑀬 𑀲𑀢𑀺𑀬𑀸 𑀲𑀢𑁄𑀓𑀸𑀭𑀺𑀁. 𑀲𑀢𑀢𑀁 𑀧𑀳𑀺𑀢𑀢𑁆𑀢𑁄𑀢𑀺 𑀲𑀩𑁆𑀩𑀓𑀸𑀮𑀁 𑀧𑀳𑀺𑀢𑀢𑁆𑀢𑁄 𑀦𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑀺𑀢𑀢𑁆𑀢𑁄𑀢𑀺 𑀢𑀣𑀸𑀯𑀺𑀥𑀁 𑀪𑀺𑀓𑁆𑀔𑀼𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀳𑀼 𑀆𑀘𑀺𑀓𑁆𑀔𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑁆𑀯𑀸𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.