𑁬. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑀩𑀸𑀳𑀺𑀢𑀧𑀸𑀧𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 ‘𑀧𑀩𑁆𑀩𑀚𑀺𑀢𑀸’𑀢𑀺 𑀯𑀤𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀧𑀩𑁆𑀩𑀚𑀺𑀢𑁄, 𑀫𑀫𑁆𑀧𑀺 𑀔𑁄 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀦𑀸𑀳𑀁 𑀏𑀢𑁆𑀢𑀓𑁂𑀦 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀤𑀸𑀫𑀺, 𑀓𑀺𑀮𑁂𑀲𑀫𑀮𑀸𑀦𑀁 𑀧𑀦 𑀧𑀩𑁆𑀩𑀸𑀚𑀺𑀢𑀢𑁆𑀢𑀸 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁮. ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀘𑀭𑀺𑀬𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺;

𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀲𑀫𑀘𑀭𑀺𑀬𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀸𑀦𑀺 𑀲𑀫𑁂𑀢𑁆𑀯𑀸 𑀘𑀭𑀡𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀅𑀓𑀼𑀲𑀮𑀸𑀦𑀺 𑀲𑀫𑁂𑀢𑁆𑀯𑀸 𑀘𑀭𑀡𑁂𑀦 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀬𑁄 𑀅𑀢𑁆𑀢𑀦𑁄 𑀭𑀸𑀕𑀸𑀤𑀺𑀫𑀮𑀁 𑀧𑀩𑁆𑀩𑀸𑀚𑀬𑀦𑁆𑀢𑁄 𑀯𑀺𑀦𑁄𑀤𑁂𑀦𑁆𑀢𑁄 𑀘𑀭𑀢𑀺, 𑀲𑁄𑀧𑀺 𑀢𑁂𑀦 𑀧𑀩𑁆𑀩𑀸𑀚𑀦𑁂𑀦 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀯𑀢𑁆𑀣𑀼 𑀙𑀝𑁆𑀞𑀁.