𑁩𑁦. 𑀘𑀦𑁆𑀤𑀸𑀪𑀢𑁆𑀣𑁂𑀭𑀯𑀢𑁆𑀣𑀼

𑀘𑀦𑁆𑀤𑀁 𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀦𑁆𑀤𑀸𑀪𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀅𑀢𑀻𑀢𑁂 𑀏𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀯𑀸𑀡𑀺𑀚𑁄 ‘‘𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀘𑀦𑁆𑀤𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀽𑀦𑀺 𑀯𑀢𑁆𑀣𑀸𑀪𑀭𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀅𑀝𑀯𑀺𑀬𑀁 𑀕𑁄𑀧𑀸𑀮𑀤𑀸𑀭𑀓𑁂 𑀧𑀼𑀘𑁆𑀙𑀺 𑁋 ‘‘𑀇𑀫𑀲𑁆𑀫𑀺𑀁 𑀕𑀸𑀫𑁂 𑀧𑀩𑁆𑀩𑀢𑀧𑀸𑀤𑀓𑀫𑁆𑀫𑀺𑀓𑁄 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀅𑀢𑁆𑀣𑀻’’𑀢𑀺? ‘‘𑀆𑀫, 𑀅𑀢𑁆𑀣𑀻’’𑀢𑀺. ‘‘𑀓𑁄 𑀦𑀸𑀫𑁂𑀲𑁄’’𑀢𑀺? ‘‘𑀅𑀲𑀼𑀓𑁄 𑀦𑀸𑀫𑀸’’𑀢𑀺. ‘‘𑀪𑀭𑀺𑀬𑀸𑀬 𑀧𑀦𑀲𑁆𑀲 𑀧𑀼𑀢𑁆𑀢𑀸𑀦𑀁 𑀯𑀸 𑀓𑀺𑀁𑀦𑀸𑀫’’𑀦𑁆𑀢𑀺? ‘‘𑀇𑀤𑀜𑁆𑀘𑀺𑀤𑀜𑁆𑀘𑀸’’𑀢𑀺. ‘‘𑀓𑀳𑀁 𑀧𑀦𑀲𑁆𑀲 𑀞𑀸𑀦𑁂 𑀕𑁂𑀳’’𑀦𑁆𑀢𑀺? ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫𑀸’’𑀢𑀺. 𑀲𑁄 𑀢𑁂𑀳𑀺 𑀤𑀺𑀦𑁆𑀦𑀲𑀜𑁆𑀜𑀸𑀬 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀑𑀭𑀼𑀬𑁆𑀳 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀲𑀼𑀓𑀦𑀸𑀫𑁂’’𑀢𑀺 𑀢𑀁 𑀇𑀢𑁆𑀣𑀺𑀁 𑀧𑀓𑁆𑀓𑁄𑀲𑀺. 𑀲𑀸 ‘‘𑀏𑀓𑁄 𑀦𑁄 𑀜𑀸𑀢𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀦𑀸𑀫𑀁 𑀯𑀢𑁆𑀯𑀸 ‘‘𑀫𑀫 𑀲𑀳𑀸𑀬𑁄 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀅𑀭𑀜𑁆𑀜𑀁 𑀕𑀢𑁄, 𑀲𑀸𑀫𑀻’’𑀢𑀺. ‘‘𑀫𑀫 𑀧𑀼𑀢𑁆𑀢𑁄 𑀅𑀲𑀼𑀓𑁄 𑀦𑀸𑀫, 𑀫𑀫 𑀥𑀻𑀢𑀸 𑀅𑀲𑀼𑀓𑀸 𑀦𑀸𑀫 𑀓𑀳’’𑀦𑁆𑀢𑀺 𑀲𑀩𑁆𑀩𑁂𑀲𑀁 𑀦𑀸𑀫𑀁 𑀓𑀺𑀢𑁆𑀢𑁂𑀦𑁆𑀢𑁄𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀦𑁂𑀲𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀤𑀤𑁂𑀬𑁆𑀬𑀸𑀲𑀺, 𑀲𑀳𑀸𑀬𑀲𑁆𑀲𑀸𑀧𑀺 𑀫𑁂 𑀅𑀝𑀯𑀺𑀢𑁄 𑀆𑀕𑀢𑀓𑀸𑀮𑁂 𑀇𑀤𑀁 𑀯𑀢𑁆𑀣𑀸𑀪𑀭𑀡𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀅𑀤𑀸𑀲𑀺. 𑀲𑀸 𑀢𑀲𑁆𑀲 𑀉𑀴𑀸𑀭𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀆𑀕𑀢𑀓𑀸𑀮𑁂 ‘‘𑀲𑀸𑀫𑀺, 𑀇𑀫𑀺𑀦𑀸 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀦𑀸𑀫𑀁 𑀯𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀤𑀺𑀦𑁆𑀦’’𑀦𑁆𑀢𑀺 𑀆𑀳. 𑀲𑁄𑀧𑀺𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀭𑀺.

𑀅𑀣 𑀦𑀁 𑀲𑀸𑀬𑀁 𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 𑁋 ‘‘𑀲𑀫𑁆𑀫, 𑀧𑀩𑁆𑀩𑀢𑀧𑀸𑀤𑁂 𑀘𑀭𑀦𑁆𑀢𑁂𑀦 𑀢𑁂 𑀓𑀺𑀁 𑀩𑀳𑀼𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺? ‘‘𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀭𑀢𑁆𑀢𑀲𑀸𑀔𑀸 𑀧𑀦 𑀫𑁂 𑀩𑀳𑀽 𑀭𑀼𑀓𑁆𑀔𑀸 𑀤𑀺𑀝𑁆𑀞𑀸’’𑀢𑀺. ‘‘𑀩𑀳𑀽 𑀭𑀼𑀓𑁆𑀔𑀸’’𑀢𑀺? ‘‘𑀆𑀫, 𑀩𑀳𑀽’’𑀢𑀺. 𑀢𑁂𑀦 𑀳𑀺 𑀢𑁂 𑀅𑀫𑁆𑀳𑀸𑀓𑀁 𑀤𑀲𑁆𑀲𑁂𑀳𑀻𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀭𑀢𑁆𑀢𑀘𑀦𑁆𑀤𑀦𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀆𑀳 𑁋 ‘‘𑀲𑀫𑁆𑀫, 𑀩𑀸𑀭𑀸𑀡𑀲𑀺𑀬𑀁 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀫𑀫 𑀕𑁂𑀳𑀁, 𑀓𑀸𑀮𑁂𑀦 𑀓𑀸𑀮𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀅𑀜𑁆𑀜𑁂𑀦 𑀘 𑀫𑁂 𑀧𑀡𑁆𑀡𑀸𑀓𑀸𑀭𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀭𑀢𑁆𑀢𑀲𑀸𑀔𑀭𑀼𑀓𑁆𑀔𑁂 𑀏𑀯 𑀆𑀳𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀭𑀢𑁆𑀢𑀘𑀦𑁆𑀤𑀦𑀫𑁂𑀯 𑀆𑀳𑀭𑀢𑀺, 𑀲𑁄𑀧𑀺𑀲𑁆𑀲 𑀩𑀳𑀼𑀥𑀦𑀁 𑀤𑁂𑀢𑀺.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀲𑁆𑀲𑀧𑀤𑀲𑀩𑀮𑁂 𑀧𑀢𑀺𑀝𑁆𑀞𑀺𑀢𑁂 𑀓𑀜𑁆𑀘𑀦𑀣𑀽𑀧𑁂 𑀲𑁄 𑀧𑀼𑀭𑀺𑀲𑁄 𑀩𑀳𑀼𑀁 𑀘𑀦𑁆𑀤𑀦𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀲𑁄 𑀲𑀳𑀸𑀬𑀓𑁄 𑀯𑀸𑀡𑀺𑀚𑁄 𑀩𑀳𑀼𑀁 𑀘𑀦𑁆𑀤𑀦𑀁 𑀧𑀺𑀲𑀸𑀧𑁂𑀢𑁆𑀯𑀸 𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀬𑀸𑀯 𑀪𑀢𑁆𑀢𑀁 𑀧𑀘𑀢𑀺, 𑀢𑀸𑀯 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀘𑀦𑁆𑀤𑀦𑀧𑀽𑀚𑀁 𑀅𑀓𑀸𑀲𑀺. 𑀲𑁄𑀧𑀺𑀲𑁆𑀲 𑀧𑀘𑁆𑀘𑀦𑁆𑀢𑀯𑀸𑀲𑀻 𑀲𑀳𑀸𑀬𑀓𑁄 𑀘𑁂𑀢𑀺𑀬𑀓𑀼𑀘𑁆𑀙𑀺𑀬𑀁 𑀘𑀦𑁆𑀤𑀦𑁂𑀦 𑀘𑀦𑁆𑀤𑀫𑀡𑁆𑀟𑀮𑀁 𑀅𑀓𑀸𑀲𑀺. 𑀏𑀢𑁆𑀢𑀓𑀫𑁂𑀯𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁.

𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀢𑁆𑀣 𑀔𑁂𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀪𑀺𑀫𑀡𑁆𑀟𑀮𑀢𑁄 𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑀸 𑀧𑀪𑀸 𑀉𑀝𑁆𑀞𑀳𑀺, 𑀢𑁂𑀦𑀲𑁆𑀲 𑀘𑀦𑁆𑀤𑀸𑀪𑁄𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀘𑁂𑀢𑀺𑀬𑁂 𑀓𑀺𑀭𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀓𑀭𑀡𑀦𑀺𑀲𑁆𑀲𑀦𑁆𑀤𑁄 𑀏𑀲. 𑀩𑁆𑀭𑀸𑀳𑁆𑀫𑀡𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀇𑀫𑀁 𑀕𑀳𑁂𑀢𑁆𑀯𑀸 𑀮𑁄𑀓𑀁 𑀔𑀸𑀤𑀺𑀢𑀼’’𑀦𑁆𑀢𑀺. 𑀢𑀁 𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀬𑁄 𑀇𑀫𑀲𑁆𑀲 𑀲𑀭𑀻𑀭𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀢𑀺, 𑀲𑁄 𑀏𑀯𑀭𑀽𑀧𑀁 𑀦𑀸𑀫 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀮𑀪𑀢𑀻’’𑀢𑀺 𑀯𑀢𑁆𑀯𑀸 𑀯𑀺𑀘𑀭𑀺𑀁𑀲𑀼. 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀤𑀤𑀫𑀸𑀦𑀸 𑀏𑀯 𑀢𑀲𑁆𑀲 𑀲𑀭𑀻𑀭𑀁 𑀳𑀢𑁆𑀣𑁂𑀦 𑀨𑀼𑀲𑀺𑀢𑀼𑀁 𑀮𑀪𑀦𑁆𑀢𑀺. 𑀢𑁂 𑀏𑀯𑀁 𑀅𑀦𑀼𑀯𑀺𑀘𑀭𑀦𑁆𑀢𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸 𑀦𑀕𑀭𑀲𑁆𑀲 𑀘 𑀯𑀺𑀳𑀸𑀭𑀲𑁆𑀲 𑀘 𑀅𑀦𑁆𑀢𑀭𑀸 𑀦𑀺𑀯𑀸𑀲𑀁 𑀕𑀡𑁆𑀳𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀫𑁆𑀧𑀺 𑀧𑀜𑁆𑀘𑀓𑁄𑀝𑀺𑀫𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀯𑀢𑁆𑀣𑀪𑁂𑀲𑀚𑁆𑀚𑀸𑀤𑀺𑀳𑀢𑁆𑀣𑀸 𑀥𑀫𑁆𑀫𑀲𑁆𑀲𑀯𑀦𑀸𑀬 𑀕𑀘𑁆𑀙𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀢𑁂 𑀤𑀺𑀲𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀸𑀬𑀸𑀢𑀺. 𑀏𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀣, 𑀅𑀫𑁆𑀳𑀸𑀓𑀁 𑀘𑀦𑁆𑀤𑀸𑀪𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀦𑀼𑀪𑀸𑀯𑀲𑀤𑀺𑀲𑁄 𑀆𑀦𑀼𑀪𑀸𑀯𑁄 𑀦𑀢𑁆𑀣𑀺. 𑀏𑀢𑀲𑁆𑀲 𑀳𑀺 𑀲𑀭𑀻𑀭𑀁 𑀨𑀼𑀲𑀦𑁆𑀢𑀸 𑀇𑀤𑀁 𑀦𑀸𑀫 𑀮𑀪𑀦𑁆𑀢𑀺, 𑀏𑀣 𑀧𑀲𑁆𑀲𑀣 𑀦𑀦𑁆𑀢𑀺. 𑀢𑀼𑀫𑁆𑀳𑀸𑀓𑀁 𑀘𑀦𑁆𑀤𑀸𑀪𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄 𑀆𑀦𑀼𑀪𑀸𑀯𑁄 𑀦𑀸𑀫, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀬𑁂𑀯 𑀫𑀳𑀸𑀦𑀼𑀪𑀸𑀯𑁄𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀦𑁆𑀤𑀸𑀪𑀲𑁆𑀲 𑀯𑀸 𑀅𑀫𑁆𑀳𑀸𑀓𑀁 𑀯𑀸 𑀲𑀢𑁆𑀣𑀼 𑀆𑀦𑀼𑀪𑀸𑀯𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀬𑁂𑀯 𑀘𑀦𑁆𑀤𑀸𑀪𑀸𑀬 𑀅𑀦𑁆𑀢𑀭𑀥𑀸𑀦𑀁 𑀅𑀓𑀸𑀲𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀗𑁆𑀕𑀸𑀭𑀧𑀘𑁆𑀙𑀺𑀬𑀁 𑀓𑀸𑀓𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑀫𑀦𑁆𑀢𑀁 𑀦𑀬𑀺𑀁𑀲𑀼, 𑀆𑀪𑀸 𑀧𑀝𑀺𑀧𑀸𑀓𑀢𑀺𑀓𑀸 𑀅𑀳𑁄𑀲𑀺. 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼, 𑀆𑀪𑀸 𑀢𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀫𑀸𑀦𑀁 𑀆𑀪𑀁 𑀤𑀺𑀲𑁆𑀯𑀸 𑀘𑀦𑁆𑀤𑀸𑀪𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀆𑀪𑀸𑀬 𑀅𑀦𑁆𑀢𑀭𑀥𑀸𑀦𑀫𑀦𑁆𑀢𑀁 𑀚𑀸𑀦𑀸𑀢𑀺 𑀫𑀜𑁆𑀜𑁂’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄 𑀆𑀪𑀸𑀬 𑀅𑀦𑁆𑀢𑀭𑀥𑀸𑀦𑀫𑀦𑁆𑀢𑀁 𑀚𑀸𑀦𑀸𑀣𑀸’’𑀢𑀺? 𑀆𑀫, 𑀚𑀸𑀦𑀸𑀫𑀻𑀢𑀺. 𑀢𑁂𑀦 𑀳𑀺 𑀫𑁂 𑀤𑁂𑀣𑀸𑀢𑀺. 𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑀸𑀢𑀼𑀦𑁆𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁂 𑀆𑀳 𑁋 ‘‘𑀏𑀢𑀲𑁆𑀫𑀺𑀁 𑀫𑀦𑁆𑀢𑁂 𑀕𑀳𑀺𑀢𑁂 𑀅𑀳𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀏𑀢𑁆𑀣𑁂𑀯 𑀳𑁄𑀣, 𑀅𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀫𑀦𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺. 𑀅𑀣𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀆𑀘𑀺𑀓𑁆𑀔𑀺. 𑀲𑁄 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. 𑀇𑀤𑀁 𑀫𑀦𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀲𑀚𑁆𑀛𑀸𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀩𑁆𑀭𑀸𑀳𑁆𑀫𑀡𑀸𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀆𑀕𑀦𑁆𑀢𑁆𑀯𑀸 ‘‘𑀕𑀳𑀺𑀢𑁄 𑀢𑁂 𑀫𑀦𑁆𑀢𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀦 𑀢𑀸𑀯 𑀕𑀡𑁆𑀳𑀸𑀫𑀻𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀳𑀺 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑀓𑀸𑀮𑁂 ‘‘𑀬𑀸𑀣 𑀢𑀼𑀫𑁆𑀳𑁂, 𑀇𑀤𑀸𑀦𑀸𑀳𑀁 𑀅𑀦𑀸𑀕𑀫𑀦𑀥𑀫𑁆𑀫𑁄 𑀚𑀸𑀢𑁄’’𑀢𑀺 𑀆𑀳. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀔𑀻𑀡𑀸𑀲𑀯𑁄 𑀇𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀘𑀦𑁆𑀤𑀸𑀪𑁄, 𑀪𑀽𑀢𑀫𑁂𑀯𑁂𑀲 𑀓𑀣𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁩. ‘‘𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀯𑀺𑀫𑀮𑀦𑁆𑀢𑀺 𑀅𑀩𑁆𑀪𑀸𑀤𑀺𑀫𑀮𑀭𑀳𑀺𑀢𑀁. 𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀯𑀺𑀧𑁆𑀧𑀲𑀦𑁆𑀦𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀁. 𑀅𑀦𑀸𑀯𑀺𑀮𑀦𑁆𑀢𑀺 𑀓𑀺𑀮𑁂𑀲𑀸𑀯𑀺𑀮𑀢𑁆𑀢𑀭𑀳𑀺𑀢𑀁. 𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀧𑀭𑀺𑀓𑁆𑀔𑀻𑀡𑀢𑀡𑁆𑀳𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀘𑀦𑁆𑀤𑀸𑀪𑀢𑁆𑀣𑁂𑀭𑀯𑀢𑁆𑀣𑀼 𑀢𑀺𑀁𑀲𑀢𑀺𑀫𑀁.