𑁨𑁭. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀆𑀲𑀸 𑀬𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀣𑁂𑀭𑁄 𑀓𑀺𑀭 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀚𑀦𑀧𑀤𑁂 𑀏𑀓𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀜𑁆𑀙𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀩𑀳𑀼𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀝𑀺𑀲𑁆𑀲𑀼𑀡𑀺𑀁𑀲𑀼. 𑀣𑁂𑀭𑁄 𑀧𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀯𑀲𑁆𑀲𑀸𑀯𑀸𑀲𑀺𑀓𑁂 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀽 𑀆𑀳 𑁋 ‘‘𑀤𑀳𑀭𑀸𑀦𑀜𑁆𑀘𑁂𑀯 𑀲𑀸𑀫𑀡𑁂𑀭𑀸𑀦𑀜𑁆𑀘 𑀫𑀦𑀼𑀲𑁆𑀲𑁂𑀳𑀺 𑀯𑀲𑁆𑀲𑀸𑀯𑀸𑀲𑀺𑀓𑁂 𑀆𑀳𑀝𑁂 𑀕𑀳𑁂𑀢𑁆𑀯𑀸 𑀧𑁂𑀲𑁂𑀬𑁆𑀬𑀸𑀣, 𑀞𑀧𑁂𑀢𑁆𑀯𑀸 𑀯𑀸 𑀲𑀸𑀲𑀦𑀁 𑀧𑀳𑀺𑀡𑁂𑀬𑁆𑀬𑀸𑀣𑀸’’𑀢𑀺. 𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀚𑁆𑀚𑀸𑀧𑀺 𑀫𑀜𑁆𑀜𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀢𑀡𑁆𑀳𑀸 𑀅𑀢𑁆𑀣𑀺𑀬𑁂𑀯. 𑀢𑀣𑀸 𑀳𑀺 𑀫𑀦𑀼𑀲𑁆𑀲𑁂𑀳𑀺 𑀯𑀲𑁆𑀲𑀸𑀯𑀸𑀲𑀺𑀓𑁂 𑀤𑀺𑀦𑁆𑀦𑁂 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 ‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑁂𑀲𑁂𑀬𑁆𑀬𑀸𑀣, 𑀞𑀧𑁂𑀢𑁆𑀯𑀸 𑀯𑀸 𑀲𑀸𑀲𑀦𑀁 𑀧𑀳𑀺𑀡𑁂𑀬𑁆𑀬𑀸𑀣𑀸’𑀢𑀺 𑀪𑀺𑀓𑁆𑀔𑀽𑀦𑀁 𑀯𑀢𑁆𑀯𑀸 𑀆𑀕𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀲𑁆𑀲 𑀢𑀡𑁆𑀳𑀸 𑀅𑀢𑁆𑀣𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀧𑀼𑀜𑁆𑀜𑀢𑁄 𑀤𑀳𑀭𑀲𑀸𑀫𑀡𑁂𑀭𑀸𑀦𑀜𑁆𑀘 𑀥𑀫𑁆𑀫𑀺𑀓𑀮𑀸𑀪𑀢𑁄 𑀧𑀭𑀺𑀳𑀸𑀦𑀺 𑀫𑀸 𑀅𑀳𑁄𑀲𑀻𑀢𑀺 𑀢𑁂𑀦𑁂𑀯𑀁 𑀓𑀣𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁦. ‘‘𑀆𑀲𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀦𑀺𑀭𑀸𑀲𑀸𑀲𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀆𑀲𑀸𑀢𑀺 𑀢𑀡𑁆𑀳𑀸. 𑀦𑀺𑀭𑀸𑀲𑀸𑀲𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀯𑀻𑀲𑀢𑀺𑀫𑀁.