𑁧𑁪. 𑀉𑀕𑁆𑀕𑀲𑁂𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀕𑁆𑀕𑀲𑁂𑀦𑀁 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀫𑀼𑀜𑁆𑀘 𑀧𑀼𑀭𑁂 𑀫𑀼𑀜𑁆𑀘 𑀧𑀘𑁆𑀙𑀢𑁄’’𑀢𑀺 (𑀥. 𑀧. 𑁩𑁪𑁮) 𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀢𑀤𑀸 𑀳𑀺 𑀲𑀢𑁆𑀣𑀸, ‘‘𑀪𑀦𑁆𑀢𑁂, 𑀉𑀕𑁆𑀕𑀲𑁂𑀦𑁄 ‘𑀦 𑀪𑀸𑀬𑀸𑀫𑀻’𑀢𑀺 𑀯𑀤𑀢𑀺, 𑀅𑀪𑀽𑀢𑁂𑀦 𑀫𑀜𑁆𑀜𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀲𑀤𑀺𑀲𑀸 𑀙𑀺𑀦𑁆𑀦𑀲𑀁𑀬𑁄𑀚𑀦𑀸 𑀦 𑀪𑀸𑀬𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁭. ‘‘𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸, 𑀬𑁄 𑀯𑁂 𑀦 𑀧𑀭𑀺𑀢𑀲𑁆𑀲𑀢𑀺;

𑀲𑀗𑁆𑀕𑀸𑀢𑀺𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀲𑀁𑀬𑁄𑀚𑀦𑀁. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸𑀬 𑀦 𑀪𑀸𑀬𑀢𑀺. 𑀢𑀫𑀳𑀦𑁆𑀢𑀺 𑀢𑀁 𑀅𑀳𑀁 𑀭𑀸𑀕𑀸𑀤𑀻𑀦𑀁 𑀲𑀗𑁆𑀕𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀗𑁆𑀕𑀸𑀢𑀺𑀕𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀬𑁄𑀕𑀸𑀦𑀁 𑀅𑀪𑀸𑀯𑁂𑀦 𑀯𑀺𑀲𑀁𑀬𑀼𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀉𑀕𑁆𑀕𑀲𑁂𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀘𑀼𑀤𑁆𑀤𑀲𑀫𑀁.