𑁮. 𑀫𑀸𑀭𑀯𑀢𑁆𑀣𑀼

𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀯𑀺𑀓𑀸𑀮𑁂 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀚𑁂𑀢𑀯𑀦𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀉𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀅𑀜𑁆𑀜𑀢𑁆𑀣 𑀯𑀲𑀦𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀕𑀦𑁆𑀥𑀓𑀼𑀝𑀺𑀬𑀸 𑀧𑀫𑀼𑀔𑁂 𑀦𑀺𑀧𑀚𑁆𑀚𑀺. 𑀢𑀤𑀸 𑀲𑁄 𑀆𑀬𑀲𑁆𑀫𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀯𑀲𑁆𑀲𑀺𑀓𑁄𑀯 𑀳𑁄𑀢𑀺. 𑀫𑀸𑀭𑁄 𑀯𑀲𑀯𑀢𑁆𑀢𑀺𑀪𑀯𑀦𑁂 𑀞𑀺𑀢𑁄𑀬𑁂𑀯 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀭𑀼𑀚𑀦𑀓𑀅𑀗𑁆𑀕𑀼𑀮𑀻 𑀩𑀳𑀺 𑀦𑀺𑀧𑀦𑁆𑀦𑁄, 𑀲𑀬𑀁 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀧𑀦𑁆𑀦𑁄, 𑀅𑀗𑁆𑀕𑀼𑀮𑀺𑀬𑀸 𑀧𑀻𑀴𑀺𑀬𑀫𑀸𑀦𑀸𑀬 𑀲𑀬𑀫𑁆𑀧𑀺 𑀧𑀻𑀴𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀆𑀕𑀫𑁆𑀫 𑀲𑁄𑀡𑁆𑀟𑀸𑀬 𑀣𑁂𑀭𑀲𑁆𑀲 𑀫𑀢𑁆𑀣𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀓𑁄𑀜𑁆𑀘𑀦𑀸𑀤𑀁 𑀭𑀯𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑀲𑁆𑀲 𑀫𑀸𑀭𑀪𑀸𑀯𑀁 𑀜𑀢𑁆𑀯𑀸, ‘‘𑀫𑀸𑀭, 𑀢𑀸𑀤𑀺𑀲𑀸𑀦𑀁 𑀲𑀢𑀲𑀳𑀲𑁆𑀲𑁂𑀦𑀸𑀧𑀺 𑀫𑀫 𑀧𑀼𑀢𑁆𑀢𑀲𑁆𑀲 𑀪𑀬𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸. 𑀧𑀼𑀢𑁆𑀢𑁄 𑀳𑀺 𑀫𑁂 𑀅𑀲𑀦𑁆𑀢𑀸𑀲𑀻 𑀯𑀻𑀢𑀢𑀡𑁆𑀳𑁄 𑀫𑀳𑀸𑀯𑀻𑀭𑀺𑀬𑁄 𑀫𑀳𑀸𑀧𑀜𑁆𑀜𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁫𑁧. ‘‘𑀦𑀺𑀝𑁆𑀞𑀗𑁆𑀕𑀢𑁄 𑀅𑀲𑀦𑁆𑀢𑀸𑀲𑀻, 𑀯𑀻𑀢𑀢𑀡𑁆𑀳𑁄 𑀅𑀦𑀗𑁆𑀕𑀡𑁄;

𑀅𑀘𑁆𑀙𑀺𑀦𑁆𑀤𑀺 𑀪𑀯𑀲𑀮𑁆𑀮𑀸𑀦𑀺, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄.

𑁩𑁫𑁨. ‘‘𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀁, 𑀚𑀜𑁆𑀜𑀸 𑀧𑀼𑀩𑁆𑀩𑀸𑀧𑀭𑀸𑀦𑀺 𑀘;

𑀲 𑀯𑁂 𑀅𑀦𑁆𑀢𑀺𑀫𑀲𑀸𑀭𑀻𑀭𑁄,

𑀫𑀳𑀸𑀧𑀜𑁆𑀜𑁄 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀳𑀢𑁆𑀢𑀁 𑀦𑀺𑀝𑁆𑀞𑀁 𑀦𑀸𑀫, 𑀢𑀁 𑀕𑀢𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑀸𑀲𑀻𑀢𑀺 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀲𑀦𑁆𑀢𑀸𑀲𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀲𑀦𑁆𑀢𑀲𑀦𑀓𑁄. 𑀅𑀘𑁆𑀙𑀺𑀦𑁆𑀤𑀺 𑀪𑀯𑀲𑀮𑁆𑀮𑀸𑀦𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀪𑀯𑀕𑀸𑀫𑀻𑀦𑀺 𑀲𑀮𑁆𑀮𑀸𑀦𑀺 𑀅𑀘𑁆𑀙𑀺𑀦𑁆𑀤𑀺. 𑀲𑀫𑀼𑀲𑁆𑀲𑀬𑁄𑀢𑀺 𑀅𑀬𑀁 𑀏𑀢𑀲𑁆𑀲 𑀅𑀦𑁆𑀢𑀺𑀫𑁄 𑀤𑁂𑀳𑁄.

𑀅𑀦𑀸𑀤𑀸𑀦𑁄𑀢𑀺 𑀔𑀦𑁆𑀥𑀸𑀤𑀻𑀲𑀼 𑀦𑀺𑀕𑁆𑀕𑀳𑀡𑁄. 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄𑀢𑀺 𑀦𑀺𑀭𑀼𑀢𑁆𑀢𑀺𑀬𑀜𑁆𑀘 𑀲𑁂𑀲𑀧𑀤𑁂𑀲𑀼 𑀘𑀸𑀢𑀺 𑀘𑀢𑀽𑀲𑀼𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀙𑁂𑀓𑁄𑀢𑀺 𑀅𑀢𑁆𑀣𑁄. 𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀁, 𑀚𑀜𑁆𑀜𑀸 𑀧𑀼𑀩𑁆𑀩𑀸𑀧𑀭𑀸𑀦𑀺 𑀘𑀸𑀢𑀺 𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀁 𑀅𑀓𑁆𑀔𑀭𑀧𑀺𑀡𑁆𑀟𑀜𑁆𑀘 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀓𑁆𑀔𑀭𑁂𑀦 𑀅𑀧𑀭𑀓𑁆𑀔𑀭𑀁, 𑀅𑀧𑀭𑀓𑁆𑀔𑀭𑁂𑀦 𑀧𑀼𑀩𑁆𑀩𑀓𑁆𑀔𑀭𑀜𑁆𑀘 𑀚𑀸𑀦𑀸𑀢𑀺. 𑀧𑀼𑀩𑁆𑀩𑀓𑁆𑀔𑀭𑁂𑀦 𑀅𑀧𑀭𑀓𑁆𑀔𑀭𑀁 𑀚𑀸𑀦𑀸𑀢𑀺 𑀦𑀸𑀫 𑁋 𑀆𑀤𑀺𑀫𑁆𑀳𑀺 𑀧𑀜𑁆𑀜𑀸𑀬𑀫𑀸𑀦𑁂 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀧𑀜𑁆𑀜𑀸𑀬𑀫𑀸𑀦𑁂𑀲𑀼𑀧𑀺 ‘‘𑀇𑀫𑁂𑀲𑀁 𑀅𑀓𑁆𑀔𑀭𑀸𑀦𑀁 𑀇𑀤𑀁 𑀫𑀚𑁆𑀛𑀁, 𑀇𑀤𑀁 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀚𑀸𑀦𑀸𑀢𑀺. 𑀅𑀧𑀭𑀓𑁆𑀔𑀭𑁂𑀦 𑀧𑀼𑀩𑁆𑀩𑀓𑁆𑀔𑀭𑀁 𑀚𑀸𑀦𑀸𑀢𑀺 𑀦𑀸𑀫 𑁋 𑀅𑀦𑁆𑀢𑁂 𑀧𑀜𑁆𑀜𑀸𑀬𑀫𑀸𑀦𑁂 𑀆𑀤𑀺𑀫𑀚𑁆𑀛𑁂𑀲𑀼 𑀅𑀧𑀜𑁆𑀜𑀸𑀬𑀫𑀸𑀦𑁂𑀲𑀼 ‘‘𑀇𑀫𑁂𑀲𑀁 𑀅𑀓𑁆𑀔𑀭𑀸𑀦𑀁 𑀇𑀤𑀁 𑀫𑀚𑁆𑀛𑀁, 𑀅𑀬𑀁 𑀆𑀤𑀻’’𑀢𑀺 𑀚𑀸𑀦𑀸𑀢𑀺. 𑀫𑀚𑁆𑀛𑁂 𑀧𑀜𑁆𑀜𑀸𑀬𑀫𑀸𑀦𑁂𑀧𑀺 ‘‘𑀇𑀫𑁂𑀲𑀁 𑀅𑀓𑁆𑀔𑀭𑀸𑀦𑀁 𑀅𑀬𑀁 𑀆𑀤𑀺, 𑀅𑀬𑀁 𑀅𑀦𑁆𑀢𑁄’’𑀢𑀺 𑀚𑀸𑀦𑀸𑀢𑀺. 𑀏𑀯𑀁 𑀫𑀳𑀸𑀧𑀜𑁆𑀜𑁄. 𑀲 𑀯𑁂 𑀅𑀦𑁆𑀢𑀺𑀫𑀲𑀸𑀭𑀻𑀭𑁄𑀢𑀺 𑀏𑀲 𑀓𑁄𑀝𑀺𑀬𑀁 𑀞𑀺𑀢𑀲𑀭𑀻𑀭𑁄, 𑀫𑀳𑀦𑁆𑀢𑀸𑀦𑀁 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀜𑁆𑀘 𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀧𑀜𑁆𑀜𑁄, ‘‘𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁩𑁭𑁭) 𑀯𑀘𑀦𑀢𑁄 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀘 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀫𑀸𑀭𑁄𑀧𑀺 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀫𑀸𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.