𑁫. 𑀲𑀸𑀦𑀼𑀲𑀸𑀫𑀡𑁂𑀭𑀯𑀢𑁆𑀣𑀼

𑀇𑀤𑀁 𑀧𑀼𑀭𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀦𑀼𑀁 𑀦𑀸𑀫 𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀺𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀸 𑀤𑀳𑀭𑀓𑀸𑀮𑁂𑀬𑁂𑀯 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀻𑀮𑀯𑀸 𑀅𑀳𑁄𑀲𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀆𑀕𑀦𑁆𑀢𑀼𑀓𑀸𑀦𑀁 𑀯𑀢𑁆𑀢𑀁 𑀓𑀢𑀫𑁂𑀯 𑀳𑁄𑀢𑀺. 𑀫𑀸𑀲𑀲𑁆𑀲 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀉𑀤𑀓𑀫𑀸𑀴𑀓𑁂 𑀉𑀤𑀓𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀣𑀸𑀫𑀁 𑀜𑀢𑁆𑀯𑀸 ‘‘𑀲𑀭𑀪𑀜𑁆𑀜𑀁 𑀪𑀡 𑀲𑀸𑀫𑀡𑁂𑀭𑀸’’𑀢𑀺 𑀅𑀚𑁆𑀛𑁂𑀲𑀦𑁆𑀢𑀺. 𑀲𑁄 ‘‘𑀫𑀬𑁆𑀳𑀁 𑀳𑀤𑀬𑀯𑀸𑀢𑁄 𑀭𑀼𑀚𑀢𑀺, 𑀓𑀸𑀬𑁄 𑀯𑀸 𑀩𑀸𑀥𑀢𑀻’’𑀢𑀺 𑀓𑀺𑀜𑁆𑀘𑀺 𑀧𑀘𑁆𑀘𑀸𑀳𑀸𑀭𑀁 𑀅𑀓𑀢𑁆𑀯𑀸 𑀥𑀫𑁆𑀫𑀸𑀲𑀦𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀲𑀭𑀪𑀜𑁆𑀜𑀁 𑀯𑀢𑁆𑀯𑀸 𑀑𑀢𑀭𑀦𑁆𑀢𑁄 ‘‘𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀇𑀫𑀲𑁆𑀫𑀺𑀁 𑀲𑀭𑀪𑀜𑁆𑀜𑁂 𑀧𑀢𑁆𑀢𑀺𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺. 𑀢𑀲𑁆𑀲 𑀫𑀦𑀼𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀢𑁆𑀢𑀺𑀬𑀸 𑀤𑀺𑀦𑁆𑀦𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺. 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦𑀲𑁆𑀲 𑀫𑀸𑀢𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀲𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 ‘‘𑀲𑀸𑀫𑀡𑁂𑀭𑁂𑀦 𑀤𑀺𑀦𑁆𑀦𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀸𑀫𑀺, 𑀢𑀸𑀢𑀸’’𑀢𑀺 𑀯𑀤𑀢𑀺. ‘‘𑀲𑀻𑀮𑀲𑀫𑁆𑀧𑀦𑁆𑀦𑁄 𑀘 𑀦𑀸𑀫 𑀪𑀺𑀓𑁆𑀔𑀼 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀺𑀬𑁄 𑀳𑁄𑀢𑀻’’𑀢𑀺 𑀢𑀲𑁆𑀫𑀺𑀁 𑀲𑀸𑀫𑀡𑁂𑀭𑁂 𑀤𑁂𑀯𑀢𑀸 𑀲𑀮𑀚𑁆𑀚𑀸 𑀲𑀕𑀸𑀭𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀦𑀁 𑀫𑀜𑁆𑀜𑀦𑁆𑀢𑀺. 𑀲𑀸𑀫𑀡𑁂𑀭𑁂 𑀕𑀸𑀭𑀯𑁂𑀦 𑀢𑀜𑁆𑀘 𑀬𑀓𑁆𑀔𑀺𑀦𑀺𑀁 𑀕𑀭𑀼𑀓𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺. 𑀢𑀸 𑀥𑀫𑁆𑀫𑀲𑁆𑀲𑀯𑀦𑀬𑀓𑁆𑀔𑀲𑀫𑀸𑀕𑀫𑀸𑀤𑀻𑀲𑀼 ‘‘𑀲𑀸𑀦𑀼𑀫𑀸𑀢𑀸 𑀲𑀸𑀦𑀼𑀫𑀸𑀢𑀸’’𑀢𑀺 𑀬𑀓𑁆𑀔𑀺𑀦𑀺𑀬𑀸 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁 𑀤𑁂𑀦𑁆𑀢𑀺. 𑀫𑀳𑁂𑀲𑀓𑁆𑀔𑀸𑀧𑀺 𑀬𑀓𑁆𑀔𑀸 𑀢𑀁 𑀤𑀺𑀲𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑀦𑁆𑀢𑀺, 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀺.

𑀅𑀣 𑀔𑁄 𑀲𑀸𑀫𑀡𑁂𑀭𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀼𑀴𑁆𑀳𑀓𑁂𑀲𑀦𑀔𑁄 𑀓𑀺𑀮𑀺𑀝𑁆𑀞𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁄 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀏𑀓𑀓𑁄𑀯 𑀫𑀸𑀢𑀼𑀖𑀭𑀁 𑀅𑀕𑀫𑀸𑀲𑀺. 𑀉𑀧𑀸𑀲𑀺𑀓𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀢𑀸𑀢, 𑀢𑁆𑀯𑀁 𑀧𑀼𑀩𑁆𑀩𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀯𑀸 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀇𑀥𑀸𑀕𑀘𑁆𑀙𑀲𑀺, 𑀓𑀲𑁆𑀫𑀸 𑀏𑀓𑀓𑁄𑀯 𑀅𑀚𑁆𑀚 𑀆𑀕𑀢𑁄𑀲𑀻’’𑀢𑀺? 𑀲𑁄 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀲𑀸 𑀉𑀧𑀸𑀲𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀢𑁆𑀢𑀁 𑀑𑀯𑀤𑀫𑀸𑀦𑀸𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀮𑁆𑀮𑀓𑁆𑀔𑁂𑀬𑁆𑀬𑀸’’𑀢𑀺 𑀅𑀦𑀼𑀬𑁆𑀬𑁄𑀚𑁂𑀢𑁆𑀯𑀸 ‘‘𑀢𑀺𑀝𑁆𑀞, 𑀢𑀸𑀢, 𑀬𑀸𑀯 𑀢𑁂 𑀬𑀸𑀕𑀼𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀫𑀺, 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀢𑁂 𑀫𑀦𑀸𑀧𑀸𑀦𑀺 𑀯𑀢𑁆𑀣𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀲𑀸𑀫𑀡𑁂𑀭𑁄. 𑀉𑀧𑀸𑀲𑀺𑀓𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀬𑀸𑀕𑀼𑀔𑀚𑁆𑀚𑀓𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣 ‘‘𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀸 𑀢𑀡𑁆𑀟𑀼𑀮𑁂 𑀥𑁄𑀯𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸 𑀬𑀓𑁆𑀔𑀺𑀦𑀻 ‘‘𑀓𑀳𑀁 𑀦𑀼 𑀔𑁄 𑀲𑀸𑀫𑀡𑁂𑀭𑁄, 𑀓𑀘𑁆𑀘𑀺 𑀪𑀺𑀓𑁆𑀔𑀸𑀳𑀸𑀭𑀁 𑀮𑀪𑀢𑀺, 𑀦𑁄’’𑀢𑀺 𑀆𑀯𑀚𑁆𑀚𑀫𑀸𑀦𑀸 𑀢𑀲𑁆𑀲 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀢𑀸𑀬 𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀫𑁂 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁 𑀅𑀦𑁆𑀢𑀭𑁂 𑀮𑀚𑁆𑀚𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀕𑀘𑁆𑀙𑀸𑀫𑀺𑀲𑁆𑀲 𑀯𑀺𑀩𑁆𑀪𑀫𑀦𑁂 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀔𑁂𑀴𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀪𑀽𑀫𑀺𑀬𑀁 𑀦𑀺𑀧𑀢𑀺. 𑀉𑀧𑀸𑀲𑀺𑀓𑀸 𑀧𑀼𑀢𑁆𑀢𑀲𑁆𑀲 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀊𑀭𑀽𑀲𑀼 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀆𑀕𑀦𑁆𑀢𑁆𑀯𑀸 𑀩𑀮𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑀺𑀁𑀲𑀼. 𑀉𑀧𑀸𑀲𑀺𑀓𑀸 𑀧𑀦 𑀧𑀭𑀺𑀤𑁂𑀯𑀫𑀸𑀦𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂;

𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑀁 𑀲𑀼𑀢𑀁;

𑀲𑀸 𑀤𑀸𑀦𑀺 𑀅𑀚𑁆𑀚 𑀧𑀲𑁆𑀲𑀸𑀫𑀺, 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺 𑀲𑀸𑀦𑀼𑀦𑀸’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀉𑀧𑀸𑀲𑀺𑀓𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂;

𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀲𑀸𑀳𑀼 𑀢𑁂 𑀅𑀭𑀳𑀢𑀁 𑀲𑀼𑀢’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁩𑁯) 𑁋

𑀯𑀢𑁆𑀯𑀸 𑀆𑀳 𑁋

‘‘𑀲𑀸𑀦𑀼𑀁 𑀧𑀩𑀼𑀤𑁆𑀥𑀁 𑀯𑀚𑁆𑀚𑀸𑀲𑀺, 𑀬𑀓𑁆𑀔𑀸𑀦𑀁 𑀯𑀘𑀦𑀁 𑀇𑀤𑀁;

𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀲𑀺 𑀓𑀭𑁄𑀲𑀺 𑀯𑀸;

𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁆𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀏𑀯𑀁 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀓𑀼𑀡𑀲𑁆𑀲 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸 𑀧𑀮𑀸𑀬𑀢𑁄𑀧𑀺 𑀢𑁂 𑀫𑁄𑀓𑁆𑀔𑁄 𑀦𑀢𑁆𑀣𑀻𑀢𑀺 𑀯𑀢𑁆𑀯𑀸 𑀲𑀸 𑀬𑀓𑁆𑀔𑀺𑀦𑀻 𑀲𑀸𑀫𑀡𑁂𑀭𑀁 𑀫𑀼𑀜𑁆𑀘𑀺. 𑀲𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸𑀢𑀭𑀁 𑀓𑁂𑀲𑁂 𑀯𑀺𑀓𑀺𑀭𑀺𑀬 𑀅𑀲𑁆𑀲𑀲𑀦𑁆𑀢𑀺𑀁 𑀧𑀲𑁆𑀲𑀲𑀦𑁆𑀢𑀺𑀁 𑀭𑁄𑀤𑀫𑀸𑀦𑀁 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀘 𑀲𑀦𑁆𑀦𑀺𑀧𑀢𑀺𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀬𑀓𑁆𑀔𑁂𑀦 𑀕𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀳𑀁 𑀧𑀼𑀩𑁆𑀩𑁂 𑀧𑀻𑀞𑁂 𑀦𑀺𑀲𑀺𑀦𑁆𑀦𑁄, 𑀫𑀸𑀢𑀸 𑀫𑁂 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀡𑁆𑀟𑀼𑀮𑁂 𑀥𑁄𑀯𑀺, 𑀇𑀤𑀸𑀦𑀺 𑀧𑀦𑀫𑁆𑀳𑀺 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑁄, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀦𑀺𑀧𑀦𑁆𑀦𑀓𑁄𑀯 𑀫𑀸𑀢𑀭𑀁 𑀆𑀳 𑁋

‘‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀻, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’’𑀢𑀺. (𑀣𑁂𑀭𑀕𑀸. 𑁪𑁪; 𑀲𑀁. 𑀦𑀺. 𑁧.𑁨𑁩𑁯);

𑀅𑀣𑀲𑁆𑀲 𑀫𑀸𑀢𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑀲𑁆𑀲 𑀧𑀼𑀦 𑀯𑀺𑀩𑁆𑀪𑀫𑀦𑀢𑁆𑀣𑀁 𑀆𑀕𑀫𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

‘‘𑀫𑀢𑀁 𑀯𑀸 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀬𑁄 𑀘 𑀓𑀸𑀫𑁂 𑀘𑀚𑀺𑀢𑁆𑀯𑀸𑀦, 𑀧𑀼𑀦𑀭𑀸𑀕𑀘𑁆𑀙𑀢𑁂 𑀇𑀥;

𑀢𑀁 𑀯𑀸𑀧𑀺 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀧𑀼𑀦 𑀚𑀻𑀯𑀁 𑀫𑀢𑁄 𑀳𑀺 𑀲𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀖𑀭𑀸𑀯𑀸𑀲𑀁 𑀓𑀼𑀓𑁆𑀓𑀼𑀴𑀲𑀤𑀺𑀲𑀜𑁆𑀘𑁂𑀯 𑀦𑀭𑀓𑀲𑀤𑀺𑀲𑀜𑁆𑀘 𑀓𑀢𑁆𑀯𑀸 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑀻 𑀧𑀼𑀦 𑀆𑀳 𑁋

‘‘𑀓𑀼𑀓𑁆𑀓𑀼𑀴𑀸 𑀉𑀩𑁆𑀪𑀢𑁄 𑀢𑀸𑀢, 𑀓𑀼𑀓𑁆𑀓𑀼𑀴𑀁 𑀧𑀢𑀺𑀢𑀼𑀫𑀺𑀘𑁆𑀙𑀲𑀺;

𑀦𑀭𑀓𑀸 𑀉𑀩𑁆𑀪𑀢𑁄 𑀢𑀸𑀢, 𑀦𑀭𑀓𑀁 𑀧𑀢𑀺𑀢𑀼𑀫𑀺𑀘𑁆𑀙𑀲𑀻’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀅𑀣 𑀦𑀁, ‘‘𑀧𑀼𑀢𑁆𑀢, 𑀪𑀤𑁆𑀤𑀁 𑀢𑀯 𑀳𑁄𑀢𑀼, 𑀫𑀬𑀸 𑀧𑀦 ‘𑀅𑀬𑀁 𑀦𑁄 𑀧𑀼𑀢𑁆𑀢𑀓𑁄 𑀟𑀬𑁆𑀳𑀫𑀸𑀦𑁄’𑀢𑀺 𑀕𑁂𑀳𑀸 𑀪𑀡𑁆𑀟𑀁 𑀯𑀺𑀬 𑀦𑀻𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀸𑀚𑀺𑀢𑁄, 𑀖𑀭𑀸𑀯𑀸𑀲𑁂 𑀧𑀼𑀦 𑀟𑀬𑁆𑀳𑀺𑀢𑀼𑀁 𑀇𑀘𑁆𑀙𑀲𑀺. 𑀅𑀪𑀺𑀥𑀸𑀯𑀣 𑀧𑀭𑀺𑀢𑁆𑀢𑀸𑀬𑀣 𑀦𑁄𑀢𑀺 𑀇𑀫𑀫𑀢𑁆𑀣𑀁 𑀓𑀲𑁆𑀲 𑀉𑀚𑁆𑀛𑀸𑀧𑀬𑀸𑀫 𑀓𑀁 𑀦𑀺𑀚𑁆𑀛𑀸𑀧𑀬𑀸𑀫𑀸’’𑀢𑀺 𑀤𑀻𑀧𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀪𑀺𑀥𑀸𑀯𑀣 𑀪𑀤𑁆𑀤𑀦𑁆𑀢𑁂, 𑀓𑀲𑁆𑀲 𑀉𑀚𑁆𑀛𑀸𑀧𑀬𑀸𑀫𑀲𑁂;

𑀆𑀤𑀺𑀢𑁆𑀢𑀸 𑀦𑀻𑀳𑀢𑀁 𑀪𑀡𑁆𑀟𑀁, 𑀧𑀼𑀦 𑀟𑀬𑁆𑀳𑀺𑀢𑀼𑀫𑀺𑀘𑁆𑀙𑀲𑀻’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀲𑁄 𑀫𑀸𑀢𑀭𑀺 𑀓𑀣𑁂𑀦𑁆𑀢𑀺𑀬𑀸 𑀓𑀣𑁂𑀦𑁆𑀢𑀺𑀬𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀕𑀺𑀳𑀺𑀪𑀸𑀯𑁂𑀦 𑀅𑀢𑁆𑀣𑁄’’𑀢𑀺 𑀆𑀳. 𑀅𑀣𑀲𑁆𑀲 𑀫𑀸𑀢𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀼𑀝𑁆𑀞𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀪𑀸𑀯𑀁 𑀜𑀢𑁆𑀯𑀸 𑀢𑀺𑀘𑀻𑀯𑀭𑀁 𑀧𑀝𑀺𑀬𑀸𑀤𑁂𑀲𑀺. 𑀲𑁄 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺. 𑀅𑀣𑀲𑁆𑀲 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀢𑁆𑀣𑀸 𑀘𑀺𑀢𑁆𑀢𑀦𑀺𑀕𑁆𑀕𑀳𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 ‘‘𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀤𑀻𑀖𑀭𑀢𑁆𑀢𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑀁 𑀅𑀦𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀗𑁆𑀓𑀼𑀲𑁂𑀦 𑀫𑀢𑁆𑀢𑀳𑀢𑁆𑀣𑀺𑀦𑁄 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑁂 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨𑁬. ‘‘𑀇𑀤𑀁 𑀧𑀼𑀭𑁂 𑀘𑀺𑀢𑁆𑀢𑀫𑀘𑀸𑀭𑀺 𑀘𑀸𑀭𑀺𑀓𑀁,

𑀬𑁂𑀦𑀺𑀘𑁆𑀙𑀓𑀁 𑀬𑀢𑁆𑀣𑀓𑀸𑀫𑀁 𑀬𑀣𑀸𑀲𑀼𑀔𑀁;

𑀢𑀤𑀚𑁆𑀚𑀳𑀁 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺 𑀬𑁄𑀦𑀺𑀲𑁄,

𑀳𑀢𑁆𑀣𑀺𑀧𑁆𑀧𑀪𑀺𑀦𑁆𑀦𑀁 𑀯𑀺𑀬 𑀅𑀗𑁆𑀓𑀼𑀲𑀕𑁆𑀕𑀳𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀇𑀤𑀁 𑀘𑀺𑀢𑁆𑀢𑀁 𑀦𑀸𑀫 𑀇𑀢𑁄 𑀧𑀼𑀩𑁆𑀩𑁂 𑀭𑀽𑀧𑀸𑀤𑀻𑀲𑀼 𑀘 𑀆𑀭𑀫𑁆𑀫𑀡𑁂𑀲𑀼 𑀭𑀸𑀕𑀸𑀤𑀻𑀦𑀁 𑀬𑁂𑀦 𑀓𑀸𑀭𑀡𑁂𑀦 𑀇𑀘𑁆𑀙𑀢𑀺, 𑀬𑀢𑁆𑀣𑁂𑀯𑀲𑁆𑀲 𑀓𑀸𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀲𑁂𑀦 𑀬𑀢𑁆𑀣 𑀓𑀸𑀫𑀁 𑀬𑀣𑀸𑀭𑀼𑀘𑀺 𑀘𑀭𑀦𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀺, 𑀢𑀣𑁂𑀯 𑀯𑀺𑀘𑀭𑀡𑀢𑁄 𑀬𑀣𑀸𑀲𑀼𑀔𑀁 𑀤𑀻𑀖𑀭𑀢𑁆𑀢𑀁 𑀘𑀸𑀭𑀺𑀓𑀁 𑀘𑀭𑀺, 𑀢𑀁 𑀅𑀚𑁆𑀚 𑀅𑀳𑀁 𑀧𑀪𑀺𑀦𑁆𑀦𑀁 𑀫𑀢𑁆𑀢𑀳𑀢𑁆𑀣𑀺𑀁 𑀳𑀢𑁆𑀣𑀸𑀘𑀭𑀺𑀬𑀲𑀗𑁆𑀔𑀸𑀢𑁄 𑀙𑁂𑀓𑁄 𑀅𑀗𑁆𑀓𑀼𑀲𑀕𑁆𑀕𑀳𑁄 𑀅𑀗𑁆𑀓𑀼𑀲𑁂𑀦 𑀯𑀺𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀦𑀸𑀲𑁆𑀲 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀸𑀦𑀼𑀦𑀸 𑀲𑀤𑁆𑀥𑀺𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀸𑀦𑀁 𑀩𑀳𑀽𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑁄𑀧𑀸𑀬𑀲𑁆𑀫𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀸𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀯𑀻𑀲𑀯𑀲𑁆𑀲𑀲𑀢𑀁 𑀞𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀲𑀸𑀦𑀼𑀲𑀸𑀫𑀡𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.