𑁧𑁭. 𑀓𑁄𑀥𑀯𑀕𑁆𑀕𑁄

𑁧. 𑀭𑁄𑀳𑀺𑀦𑀻𑀔𑀢𑁆𑀢𑀺𑀬𑀓𑀜𑁆𑀜𑀸𑀯𑀢𑁆𑀣𑀼

𑀓𑁄𑀥𑀁 𑀚𑀳𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀭𑁄𑀳𑀺𑀦𑀺𑀁 𑀦𑀸𑀫 𑀔𑀢𑁆𑀢𑀺𑀬𑀓𑀜𑁆𑀜𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀓𑀧𑀺𑀮𑀯𑀢𑁆𑀣𑀼𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀜𑀸𑀢𑀓𑀸 ‘‘𑀣𑁂𑀭𑁄 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼 𑀞𑀧𑁂𑀢𑁆𑀯𑀸 𑀭𑁄𑀳𑀺𑀦𑀺𑀁 𑀦𑀸𑀫 𑀣𑁂𑀭𑀲𑁆𑀲 𑀪𑀕𑀺𑀦𑀺𑀁. 𑀣𑁂𑀭𑁄 𑀜𑀸𑀢𑀓𑁂 𑀧𑀼𑀘𑁆𑀙𑀺 ‘‘𑀓𑀳𑀁, 𑀭𑁄𑀳𑀺𑀦𑀻’’𑀢𑀺? ‘‘𑀕𑁂𑀳𑁂, 𑀪𑀦𑁆𑀢𑁂’’𑀢𑀺. ‘‘𑀓𑀲𑁆𑀫𑀸 𑀇𑀥 𑀦𑀸𑀕𑀢𑀸’’𑀢𑀺? ‘‘𑀲𑀭𑀻𑀭𑁂 𑀢𑀲𑁆𑀲𑀸 𑀙𑀯𑀺𑀭𑁄𑀕𑁄 𑀉𑀧𑁆𑀧𑀦𑁆𑀦𑁄𑀢𑀺 𑀮𑀚𑁆𑀚𑀸𑀬 𑀦𑀸𑀕𑀢𑀸, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀝𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀆𑀕𑀢𑀁 𑀏𑀯𑀫𑀸𑀳 𑁋 ‘‘𑀭𑁄𑀳𑀺𑀦𑀺, 𑀓𑀲𑁆𑀫𑀸 𑀦𑀸𑀕𑀢𑀸𑀲𑀻’’𑀢𑀺? ‘‘𑀲𑀭𑀻𑀭𑁂 𑀫𑁂, 𑀪𑀦𑁆𑀢𑁂, 𑀙𑀯𑀺𑀭𑁄𑀕𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀮𑀚𑁆𑀚𑀸𑀬 𑀦𑀸𑀕𑀢𑀸𑀫𑁆𑀳𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺? ‘‘𑀆𑀲𑀦𑀲𑀸𑀮𑀁 𑀓𑀸𑀭𑁂𑀳𑀻’’𑀢𑀺. ‘‘𑀓𑀺𑀁 𑀕𑀳𑁂𑀢𑁆𑀯𑀸’’𑀢𑀺? ‘‘𑀓𑀺𑀁 𑀢𑁂 𑀧𑀲𑀸𑀥𑀦𑀪𑀡𑁆𑀟𑀓𑀁 𑀦𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀫𑀽𑀮’’𑀦𑁆𑀢𑀺? ‘‘𑀤𑀲𑀲𑀳𑀲𑁆𑀲𑀫𑀽𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀢𑁂𑀦 𑀳𑀺 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀲𑀦𑀲𑀸𑀮𑀁 𑀓𑀸𑀭𑁂𑀳𑀻’’𑀢𑀺. ‘‘𑀓𑁄 𑀫𑁂, 𑀪𑀦𑁆𑀢𑁂, 𑀓𑀸𑀭𑁂𑀲𑁆𑀲𑀢𑀻’’𑀢𑀺? 𑀣𑁂𑀭𑁄 𑀲𑀫𑀻𑀧𑁂 𑀞𑀺𑀢𑀜𑀸𑀢𑀓𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀪𑀸𑀭𑁄 𑀳𑁄𑀢𑀽’’𑀢𑀺 𑀆𑀳. ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀳𑀫𑁆𑀧𑀺 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀏𑀢𑀺𑀲𑁆𑀲𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀆𑀳𑀭𑀣𑀸’’𑀢𑀺. 𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀆𑀳𑀭𑀺𑀁𑀲𑀼.

𑀣𑁂𑀭𑁄 𑀆𑀲𑀦𑀲𑀸𑀮𑀁 𑀲𑀁𑀯𑀺𑀤𑀳𑀦𑁆𑀢𑁄 𑀭𑁄𑀳𑀺𑀦𑀺𑀁 𑀆𑀳 𑁋 ‘‘𑀤𑁆𑀯𑀺𑀪𑀽𑀫𑀺𑀓𑀁 𑀆𑀲𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀉𑀧𑀭𑀺 𑀧𑀤𑀭𑀸𑀦𑀁 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸𑀲𑀸𑀮𑀁 𑀦𑀺𑀩𑀤𑁆𑀥𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀳𑀺, 𑀦𑀺𑀩𑀤𑁆𑀥𑀁 𑀧𑀸𑀦𑀻𑀬𑀖𑀝𑁂 𑀉𑀧𑀝𑁆𑀞𑀸𑀧𑁂𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀧𑀲𑀸𑀥𑀦𑀪𑀡𑁆𑀟𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑁆𑀯𑀺𑀪𑀽𑀫𑀺𑀓𑀆𑀲𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀉𑀧𑀭𑀺 𑀧𑀤𑀭𑀸𑀦𑀁 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸𑀲𑀸𑀮𑀁 𑀲𑀫𑁆𑀫𑀚𑁆𑀚𑀦𑀸𑀤𑀻𑀦𑀺 𑀅𑀓𑀸𑀲𑀺. 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀽 𑀦𑀺𑀲𑀻𑀤𑀦𑁆𑀢𑀺. 𑀅𑀣𑀲𑁆𑀲𑀸 𑀆𑀲𑀦𑀲𑀸𑀮𑀁 𑀲𑀫𑁆𑀫𑀚𑁆𑀚𑀦𑁆𑀢𑀺𑀬𑀸𑀯 𑀙𑀯𑀺𑀭𑁄𑀕𑁄 𑀫𑀺𑀮𑀸𑀬𑀺. 𑀲𑀸 𑀆𑀲𑀦𑀲𑀸𑀮𑀸𑀬 𑀦𑀺𑀝𑁆𑀞𑀺𑀢𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀆𑀲𑀦𑀲𑀸𑀮𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 ‘‘𑀓𑀲𑁆𑀲𑁂𑀢𑀁 𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀪𑀕𑀺𑀦𑀺𑀬𑀸 𑀫𑁂, 𑀪𑀦𑁆𑀢𑁂, 𑀭𑁄𑀳𑀺𑀦𑀺𑀬𑀸’’𑀢𑀺. ‘‘𑀲𑀸 𑀧𑀦 𑀓𑀳’’𑀦𑁆𑀢𑀺? ‘‘𑀕𑁂𑀳𑁂, 𑀪𑀦𑁆𑀢𑁂’’𑀢𑀺. ‘‘𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺? 𑀲𑀸 𑀆𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀦𑀺𑀘𑁆𑀙𑀫𑀸𑀦𑀫𑁆𑀧𑀺 𑀧𑀓𑁆𑀓𑁄𑀲𑀸𑀧𑁂𑀲𑀺𑀬𑁂𑀯. 𑀆𑀕𑀦𑁆𑀢𑁆𑀯𑀸 𑀘 𑀧𑀦 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀆𑀳 𑁋 ‘‘𑀭𑁄𑀳𑀺𑀦𑀺, 𑀓𑀲𑁆𑀫𑀸 𑀦𑀸𑀕𑀫𑀺𑀢𑁆𑀣𑀸’’𑀢𑀺? ‘‘𑀲𑀭𑀻𑀭𑁂 𑀫𑁂, 𑀪𑀦𑁆𑀢𑁂, 𑀙𑀯𑀺𑀭𑁄𑀕𑁄 𑀅𑀢𑁆𑀣𑀺, 𑀢𑁂𑀦 𑀮𑀚𑁆𑀚𑀫𑀸𑀦𑀸 𑀦𑀸𑀕𑀢𑀸𑀫𑁆𑀳𑀻’’𑀢𑀺. ‘‘𑀚𑀸𑀦𑀸𑀲𑀺 𑀧𑀦 𑀓𑀺𑀁 𑀢𑁂 𑀦𑀺𑀲𑁆𑀲𑀸𑀬 𑀏𑀲 𑀉𑀧𑁆𑀧𑀦𑁆𑀦𑁄’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀢𑀯 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀏𑀲𑁄’’𑀢𑀺. ‘‘𑀓𑀺𑀁 𑀧𑀦 𑀫𑁂, 𑀪𑀦𑁆𑀢𑁂, 𑀓𑀢’’𑀦𑁆𑀢𑀺? ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀏𑀓𑀺𑀲𑁆𑀲𑀸 𑀭𑀜𑁆𑀜𑁄 𑀦𑀸𑀝𑀓𑀺𑀢𑁆𑀣𑀺𑀬𑀸 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀤𑀼𑀓𑁆𑀔𑀫𑀲𑁆𑀲𑀸 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀓𑀘𑁆𑀙𑀼𑀨𑀮𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀢𑀁 𑀦𑀸𑀝𑀓𑀺𑀢𑁆𑀣𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀬𑀣𑀸 𑀲𑀸 𑀦 𑀚𑀸𑀦𑀸𑀢𑀺, 𑀏𑀯𑀫𑀲𑁆𑀲𑀸 𑀲𑀬𑀦𑁂 𑀘𑁂𑀯 𑀧𑀸𑀯𑀸𑀭𑀓𑁄𑀚𑀯𑀸𑀤𑀻𑀦𑀜𑁆𑀘 𑀅𑀦𑁆𑀢𑀭𑁂𑀲𑀼 𑀓𑀘𑁆𑀙𑀼𑀘𑀼𑀡𑁆𑀡𑀸𑀦𑀺 𑀞𑀧𑀸𑀧𑁂𑀲𑀺, 𑀓𑁂𑀴𑀺𑀁 𑀓𑀼𑀭𑀼𑀫𑀸𑀦𑀸 𑀯𑀺𑀬 𑀢𑀲𑁆𑀲𑀸 𑀲𑀭𑀻𑀭𑁂𑀧𑀺 𑀑𑀓𑀺𑀭𑀺. 𑀢𑀁 𑀔𑀡𑀁𑀬𑁂𑀯 𑀢𑀲𑁆𑀲𑀸 𑀲𑀭𑀻𑀭𑀁 𑀉𑀧𑁆𑀧𑀓𑁆𑀓𑀼𑀧𑁆𑀧𑀓𑁆𑀓𑀁 𑀕𑀡𑁆𑀟𑀸𑀕𑀡𑁆𑀟𑀚𑀸𑀢𑀁 𑀅𑀳𑁄𑀲𑀺. 𑀲𑀸 𑀓𑀡𑁆𑀟𑀼𑀯𑀦𑁆𑀢𑀻 𑀕𑀦𑁆𑀢𑁆𑀯𑀸 𑀲𑀬𑀦𑁂 𑀦𑀺𑀧𑀚𑁆𑀚𑀺, 𑀢𑀢𑁆𑀭𑀸𑀧𑀺𑀲𑁆𑀲𑀸 𑀓𑀘𑁆𑀙𑀼𑀘𑀼𑀡𑁆𑀡𑁂𑀳𑀺 𑀔𑀸𑀤𑀺𑀬𑀫𑀸𑀦𑀸𑀬 𑀔𑀭𑀢𑀭𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀢𑀤𑀸 𑀅𑀕𑁆𑀕𑀫𑀳𑁂𑀲𑀻 𑀭𑁄𑀳𑀺𑀦𑀻 𑀅𑀳𑁄𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀭𑁄𑀳𑀺𑀦𑀺, 𑀢𑀤𑀸 𑀢𑀬𑀸𑀯𑁂𑀢𑀁 𑀓𑀫𑁆𑀫𑀁 𑀓𑀢𑀁. 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀳𑀺 𑀓𑁄𑀥𑁄 𑀯𑀸 𑀇𑀲𑁆𑀲𑀸 𑀯𑀸 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀭𑀽𑀧𑁄 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁧. ‘‘𑀓𑁄𑀥𑀁 𑀚𑀳𑁂 𑀯𑀺𑀧𑁆𑀧𑀚𑀳𑁂𑀬𑁆𑀬 𑀫𑀸𑀦𑀁,

𑀲𑀁𑀬𑁄𑀚𑀦𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑁂𑀬𑁆𑀬;

𑀢𑀁 𑀦𑀸𑀫𑀭𑀽𑀧𑀲𑁆𑀫𑀺𑀫𑀲𑀚𑁆𑀚𑀫𑀸𑀦𑀁,

𑀅𑀓𑀺𑀜𑁆𑀘𑀦𑀁 𑀦𑀸𑀦𑀼𑀧𑀢𑀦𑁆𑀢𑀺 𑀤𑀼𑀓𑁆𑀔𑀸’’𑀢𑀺.

𑀢𑀢𑁆𑀣 𑀓𑁄𑀥𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀫𑁆𑀧𑀺 𑀓𑁄𑀥𑀁 𑀦𑀯𑀯𑀺𑀥𑀫𑁆𑀧𑀺 𑀫𑀸𑀦𑀁 𑀚𑀳𑁂𑀬𑁆𑀬. 𑀲𑀁𑀬𑁄𑀚𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀺𑀓𑀁 𑀤𑀲𑀯𑀺𑀥𑀫𑁆𑀧𑀺 𑀲𑀩𑁆𑀩𑀲𑀁𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀅𑀲𑀚𑁆𑀚𑀫𑀸𑀦𑀦𑁆𑀢𑀺 𑀅𑀮𑀕𑁆𑀕𑀫𑀸𑀦𑀁. 𑀬𑁄 𑀳𑀺 ‘‘𑀫𑀫 𑀭𑀽𑀧𑀁 𑀫𑀫 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀭𑀽𑀧𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀺𑀜𑁆𑀘 𑀪𑀺𑀚𑁆𑀚𑀫𑀸𑀦𑁂 𑀲𑁄𑀘𑀢𑀺 𑀯𑀺𑀳𑀜𑁆𑀜𑀢𑀺, 𑀅𑀬𑀁 𑀦𑀸𑀫𑀭𑀽𑀧𑀲𑁆𑀫𑀺𑀁 𑀲𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀅𑀯𑀺𑀳𑀜𑁆𑀜𑀦𑁆𑀢𑁄 𑀦 𑀲𑀚𑁆𑀚𑀢𑀺 𑀦𑀸𑀫. 𑀢𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀅𑀲𑀚𑁆𑀚𑀫𑀸𑀦𑀁 𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑀁 𑀤𑀼𑀓𑁆𑀔𑀸 𑀦𑀸𑀫 𑀦𑀸𑀦𑀼𑀧𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀭𑁄𑀳𑀺𑀦𑀻𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲𑀸 𑀲𑀭𑀻𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀳𑁄𑀲𑀺.

𑀲𑀸 𑀢𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀘𑀢𑀼𑀦𑁆𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀲𑀻𑀫𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀺𑀓𑀸 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀘𑀢𑁆𑀢𑀸𑀭𑁄𑀧𑀺 𑀤𑁂𑀯𑀧𑀼𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀸 𑀳𑀼𑀢𑁆𑀯𑀸 ‘‘𑀫𑀫 𑀲𑀻𑀫𑀸𑀬 𑀅𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀸, 𑀫𑀫 𑀲𑀻𑀫𑀸𑀬 𑀅𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀯𑀺𑀯𑀤𑀦𑁆𑀢𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀇𑀫𑀁 𑀦𑁄 𑀦𑀺𑀲𑁆𑀲𑀸𑀬 𑀅𑀟𑁆𑀟𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀯𑀺𑀦𑀺𑀘𑁆𑀙𑀺𑀦𑀸𑀣𑀸’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄𑀧𑀺 𑀢𑀁 𑀑𑀮𑁄𑀓𑁂𑀢𑁆𑀯𑀸𑀯 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 𑀳𑀼𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀇𑀫𑀸𑀬 𑀯𑁄 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀣𑀁 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀻’’𑀢𑀺. 𑀅𑀣𑁂𑀓𑁄 𑀆𑀳 𑁋 ‘‘𑀫𑀫 𑀢𑀸𑀯 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀲𑀗𑁆𑀕𑀸𑀫𑀪𑁂𑀭𑀺 𑀯𑀺𑀬 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺. 𑀤𑀼𑀢𑀺𑀬𑁄 ‘‘𑀫𑀫 𑀘𑀺𑀢𑁆𑀢𑀁 𑀧𑀩𑁆𑀩𑀢𑀦𑀤𑀻 𑀯𑀺𑀬 𑀲𑀻𑀖𑀁 𑀧𑀯𑀢𑁆𑀢𑀢𑀺𑀬𑁂𑀯𑀸’’𑀢𑀺. 𑀢𑀢𑀺𑀬𑁄 ‘‘𑀫𑀫 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀓𑁆𑀓𑀝𑀲𑁆𑀲 𑀯𑀺𑀬 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀺𑀁𑀲𑀽’’𑀢𑀺. 𑀘𑀢𑀼𑀢𑁆𑀣𑁄 ‘‘𑀫𑀫 𑀘𑀺𑀢𑁆𑀢𑀁 𑀘𑁂𑀢𑀺𑀬𑁂 𑀉𑀲𑁆𑀲𑀸𑀧𑀺𑀢𑀥𑀚𑁄 𑀯𑀺𑀬 𑀦𑀺𑀘𑁆𑀘𑀮𑀁 𑀞𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺. 𑀅𑀣 𑀦𑁂 𑀲𑀓𑁆𑀓𑁄 𑀆𑀳 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀢𑀸𑀯 𑀘𑀺𑀢𑁆𑀢𑀸𑀦𑀺 𑀧𑀲𑀬𑁆𑀳𑀭𑀽𑀧𑀸𑀦𑀺, 𑀅𑀳𑀁 𑀧𑀦 𑀇𑀫𑀁 𑀮𑀪𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀤𑁂𑀯𑀧𑀼𑀢𑁆𑀢𑀸, ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀫𑀭𑀡𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀢𑀁 𑀲𑀓𑁆𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑀸 𑀲𑀓𑁆𑀓𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. ‘‘𑀅𑀲𑀼𑀓𑀓𑀻𑀴𑀁 𑀦𑀸𑀫 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀓𑁆𑀓𑁄 𑀢𑀲𑁆𑀲𑀸 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦𑀸𑀲𑀓𑁆𑀔𑀻𑀢𑀺.

𑀭𑁄𑀳𑀺𑀦𑀻𑀔𑀢𑁆𑀢𑀺𑀬𑀓𑀜𑁆𑀜𑀸𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑁄 𑀯𑁂 𑀉𑀧𑁆𑀧𑀢𑀺𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸𑀭𑀸 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑁂 𑀅𑀦𑀼𑀜𑁆𑀜𑀸𑀢𑁂 𑀭𑀸𑀚𑀕𑀳𑀲𑁂𑀝𑁆𑀞𑀺𑀆𑀤𑀻𑀳𑀺 𑀲𑁂𑀦𑀸𑀲𑀦𑁂𑀲𑀼 𑀓𑀭𑀺𑀬𑀫𑀸𑀦𑁂𑀲𑀼 𑀏𑀓𑁄 𑀆𑀴𑀯𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑁄 𑀏𑀓𑀁 𑀫𑀦𑀸𑀧𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀢𑀢𑁆𑀣 𑀧𑀦 𑀦𑀺𑀩𑁆𑀩𑀢𑁆𑀢𑀸 𑀏𑀓𑀸 𑀢𑀭𑀼𑀡𑀧𑀼𑀢𑁆𑀢𑀸 𑀤𑁂𑀯𑀢𑀸 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦𑀸𑀤𑀸𑀬 𑀞𑀺𑀢𑀸 𑀬𑀸𑀘𑀺 ‘‘𑀫𑀸 𑀫𑁂, 𑀲𑀸𑀫𑀺, 𑀯𑀺𑀫𑀸𑀦𑀁 𑀙𑀺𑀦𑁆𑀤𑀺, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀧𑀼𑀢𑁆𑀢𑀁 𑀆𑀤𑀸𑀬 𑀅𑀦𑀸𑀯𑀸𑀲𑀸 𑀯𑀺𑀘𑀭𑀺𑀢𑀼’’𑀦𑁆𑀢𑀺. 𑀲𑁄 ‘‘𑀅𑀳𑀁 𑀅𑀜𑁆𑀜𑀢𑁆𑀭 𑀈𑀤𑀺𑀲𑀁 𑀭𑀼𑀓𑁆𑀔𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀦𑀸𑀤𑀺𑀬𑀺. 𑀲𑀸 ‘‘𑀇𑀫𑀫𑁆𑀧𑀺 𑀢𑀸𑀯 𑀤𑀸𑀭𑀓𑀁 𑀑𑀮𑁄𑀓𑁂𑀢𑁆𑀯𑀸 𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀧𑀼𑀢𑁆𑀢𑀁 𑀭𑀼𑀓𑁆𑀔𑀲𑀸𑀔𑀸𑀬 𑀞𑀧𑁂𑀲𑀺. 𑀲𑁄𑀧𑀺 𑀪𑀺𑀓𑁆𑀔𑀼 𑀉𑀓𑁆𑀔𑀺𑀧𑀺𑀢𑀁 𑀨𑀭𑀲𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀙𑀺𑀦𑁆𑀤𑀺, 𑀤𑁂𑀯𑀢𑀸 𑀉𑀧𑁆𑀧𑀦𑁆𑀦𑀩𑀮𑀯𑀓𑁄𑀥𑀸 ‘‘𑀧𑀳𑀭𑀺𑀢𑁆𑀯𑀸 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀁 𑀢𑀸𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀻𑀮𑀯𑀸. 𑀲𑀘𑀸𑀳𑀁 𑀇𑀫𑀁 𑀫𑀸𑀭𑁂𑀲𑁆𑀲𑀸𑀫𑀺, 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀸𑀫𑀺. 𑀲𑁂𑀲𑀤𑁂𑀯𑀢𑀸𑀧𑀺 𑀅𑀢𑁆𑀢𑀦𑁄 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘𑀅𑀲𑀼𑀓𑀤𑁂𑀯𑀢𑀸𑀬 𑀏𑀯𑀁 𑀦𑀸𑀫 𑀫𑀸𑀭𑀺𑀢𑁄 𑀪𑀺𑀓𑁆𑀔𑀽’𑀢𑀺 𑀫𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀫𑀸𑀭𑁂𑀲𑁆𑀲𑀦𑁆𑀢𑀺. 𑀅𑀬𑀜𑁆𑀘 𑀲𑀲𑀸𑀫𑀺𑀓𑁄 𑀪𑀺𑀓𑁆𑀔𑀼, 𑀲𑀸𑀫𑀺𑀓𑀲𑁆𑀲𑁂𑀯 𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀉𑀓𑁆𑀔𑀺𑀢𑁆𑀢𑀳𑀢𑁆𑀣𑁂 𑀅𑀧𑀦𑁂𑀢𑁆𑀯𑀸 𑀭𑁄𑀤𑀫𑀸𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀤𑁂𑀯𑀢𑁂’’𑀢𑀺 𑀆𑀳. 𑀲𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀫𑁂 𑀲𑀸𑀯𑀓𑁂𑀦 𑀇𑀤𑀁 𑀦𑀸𑀫 𑀓𑀢𑀁, 𑀅𑀳𑀫𑁆𑀧𑀺 𑀦𑀁 𑀫𑀸𑀭𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀇𑀤𑀁 𑀦𑀸𑀫 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀸𑀭𑁂𑀢𑁆𑀯𑀸𑀯 𑀇𑀥𑀸𑀕𑀢𑀸’’𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑀢𑁄 𑀆𑀭𑁄𑀘𑁂𑀲𑀺.

𑀲𑀢𑁆𑀣𑀸 𑀢𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀼, 𑀲𑀸𑀥𑀼 𑀤𑁂𑀯𑀢𑁂, 𑀲𑀸𑀥𑀼 𑀢𑁂 𑀓𑀢𑀁 𑀏𑀯𑀁 𑀉𑀕𑁆𑀕𑀢𑀁 𑀓𑁄𑀧𑀁 𑀪𑀦𑁆𑀢𑀁 𑀭𑀣𑀁 𑀯𑀺𑀬 𑀦𑀺𑀕𑁆𑀕𑀡𑁆𑀳𑀫𑀸𑀦𑀸𑀬𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁨. ‘‘𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂;

𑀢𑀫𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀭𑀲𑁆𑀫𑀺𑀕𑁆𑀕𑀸𑀳𑁄 𑀇𑀢𑀭𑁄 𑀚𑀦𑁄’’𑀢𑀺.

𑀢𑀢𑁆𑀣 𑀉𑀧𑁆𑀧𑀢𑀺𑀢𑀦𑁆𑀢𑀺 𑀉𑀧𑁆𑀧𑀦𑁆𑀦𑀁. 𑀭𑀣𑀁 𑀪𑀦𑁆𑀢𑀁 𑀯𑀸𑀢𑀺 𑀬𑀣𑀸 𑀦𑀸𑀫 𑀙𑁂𑀓𑁄 𑀲𑀸𑀭𑀣𑀺 𑀅𑀢𑀺𑀯𑁂𑀕𑁂𑀦 𑀥𑀸𑀯𑀦𑁆𑀢𑀁 𑀭𑀣𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀬𑀣𑀺𑀘𑁆𑀙𑀓𑀁 𑀞𑀧𑁂𑀢𑀺, 𑀏𑀯𑀁 𑀬𑁄 𑀧𑀼𑀕𑁆𑀕𑀮𑁄 𑀉𑀧𑁆𑀧𑀦𑁆𑀦𑀁 𑀓𑁄𑀥𑀁 𑀯𑀸𑀭𑀬𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀫𑀳𑀦𑁆𑀢𑀺 𑀢𑀁 𑀅𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺. 𑀇𑀢𑀭𑁄 𑀚𑀦𑁄𑀢𑀺 𑀇𑀢𑀭𑁄 𑀧𑀦 𑀭𑀸𑀚𑀉𑀧𑀭𑀸𑀚𑀸𑀤𑀻𑀦𑀁 𑀭𑀣𑀲𑀸𑀭𑀣𑀺𑀚𑀦𑁄 𑀭𑀲𑁆𑀫𑀺𑀕𑁆𑀕𑀸𑀳𑁄 𑀦𑀸𑀫 𑀳𑁄𑀢𑀺, 𑀦 𑀉𑀢𑁆𑀢𑀫𑀲𑀸𑀭𑀣𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀤𑁂𑀯𑀢𑀸 𑀧𑀦 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸𑀧𑀺 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀤𑁂𑀯𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀯𑀺𑀫𑀸𑀦𑀁 𑀫𑁂 𑀦𑀝𑁆𑀞𑀁, 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀅𑀮𑀁 𑀤𑁂𑀯𑀢𑁂, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑁂 𑀯𑀺𑀫𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀲𑀫𑀻𑀧𑁂 𑀧𑀼𑀭𑀺𑀫𑀤𑀺𑀯𑀲𑁂 𑀘𑀼𑀢𑀤𑁂𑀯𑀢𑀁 𑀏𑀓𑀁 𑀭𑀼𑀓𑁆𑀔𑀁 𑀅𑀧𑀤𑀺𑀲𑀦𑁆𑀢𑁄 ‘‘𑀅𑀫𑀼𑀓𑀲𑁆𑀫𑀺𑀁 𑀑𑀓𑀸𑀲𑁂 𑀭𑀼𑀓𑁆𑀔𑁄 𑀯𑀺𑀯𑀺𑀢𑁆𑀢𑁄, 𑀢𑀢𑁆𑀣 𑀉𑀧𑀕𑀘𑁆𑀙𑀸’’𑀢𑀺 𑀆𑀳. 𑀲𑀸 𑀢𑀢𑁆𑀣 𑀉𑀧𑀕𑀜𑁆𑀙𑀺. 𑀢𑀢𑁄 𑀧𑀝𑁆𑀞𑀸𑀬 ‘‘𑀩𑀼𑀤𑁆𑀥𑀤𑀢𑁆𑀢𑀺𑀬𑀁 𑀇𑀫𑀺𑀲𑁆𑀲𑀸 𑀯𑀺𑀫𑀸𑀦’’𑀦𑁆𑀢𑀺 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀧𑀺 𑀆𑀕𑀦𑁆𑀢𑁆𑀯𑀸 𑀢𑀁 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀻𑀢𑀺.

𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀉𑀢𑁆𑀢𑀭𑀸𑀉𑀧𑀸𑀲𑀺𑀓𑀸𑀯𑀢𑁆𑀣𑀼

𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀢𑁆𑀢𑀭𑀸𑀬 𑀕𑁂𑀳𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀉𑀢𑁆𑀢𑀭𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀭𑀸𑀚𑀕𑀳𑁂 𑀓𑀺𑀭 𑀲𑀼𑀫𑀦𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀡𑁆𑀡𑁄 𑀦𑀸𑀫 𑀤𑀮𑀺𑀤𑁆𑀤𑁄 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀢𑀺. 𑀢𑀲𑁆𑀲 𑀪𑀭𑀺𑀬𑀸 𑀘 𑀉𑀢𑁆𑀢𑀭𑀸 𑀦𑀸𑀫 𑀥𑀻𑀢𑀸 𑀘𑀸𑀢𑀺 𑀤𑁆𑀯𑁂𑀬𑁂𑀯 𑀕𑁂𑀳𑀫𑀸𑀦𑀼𑀲𑀓𑀸. 𑀅𑀣𑁂𑀓𑀤𑀺𑀯𑀲𑀁 ‘‘𑀲𑀢𑁆𑀢𑀸𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀩𑁆𑀩’’𑀦𑁆𑀢𑀺 𑀭𑀸𑀚𑀕𑀳𑁂 𑀖𑁄𑀲𑀦𑀁 𑀓𑀭𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑀼𑀫𑀦𑀲𑁂𑀝𑁆𑀞𑀺 𑀧𑀸𑀢𑁄𑀯 𑀆𑀕𑀢𑀁 𑀧𑀼𑀡𑁆𑀡𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀧𑀭𑀺𑀚𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀓𑀸𑀫𑁄, 𑀢𑁆𑀯𑀁 𑀓𑀺𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀪𑀢𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀦𑀓𑁆𑀔𑀢𑁆𑀢𑀁 𑀦𑀸𑀫 𑀲𑀥𑀦𑀸𑀦𑀁 𑀳𑁄𑀢𑀺, 𑀫𑀫 𑀧𑀦 𑀕𑁂𑀳𑁂 𑀲𑁆𑀯𑀸𑀢𑀦𑀸𑀬 𑀬𑀸𑀕𑀼𑀢𑀡𑁆𑀟𑀼𑀮𑀫𑁆𑀧𑀺 𑀦𑀢𑁆𑀣𑀺, 𑀓𑀺𑀁 𑀫𑁂 𑀦𑀓𑁆𑀔𑀢𑁆𑀢𑁂𑀦, 𑀕𑁄𑀡𑁂 𑀮𑀪𑀦𑁆𑀢𑁄 𑀓𑀲𑀺𑀢𑀼𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀕𑁄𑀡𑁂 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀩𑀮𑀯𑀕𑁄𑀡𑁂 𑀘 𑀦𑀗𑁆𑀕𑀮𑀜𑁆𑀘 𑀕𑀳𑁂𑀢𑁆𑀯𑀸, ‘‘𑀪𑀤𑁆𑀤𑁂, 𑀦𑀸𑀕𑀭𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀺, 𑀅𑀳𑀁 𑀤𑀮𑀺𑀤𑁆𑀤𑀢𑀸𑀬 𑀪𑀢𑀺𑀁 𑀓𑀸𑀢𑀼𑀁 𑀕𑀫𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀢𑀸𑀯 𑀅𑀚𑁆𑀚 𑀤𑁆𑀯𑀺𑀕𑀼𑀡𑀁 𑀦𑀺𑀯𑀸𑀧𑀁 𑀧𑀘𑀺𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑁂𑀬𑁆𑀬𑀸𑀲𑀻’’𑀢𑀺 𑀪𑀭𑀺𑀬𑀁 𑀯𑀢𑁆𑀯𑀸 𑀔𑁂𑀢𑁆𑀢𑀁 𑀅𑀕𑀫𑀸𑀲𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀢𑀁 𑀤𑀺𑀯𑀲𑀁 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀼𑀡𑁆𑀡𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀲𑀤𑁆𑀥𑁄 𑀦𑀼 𑀔𑁄 𑀏𑀲, 𑀲𑀓𑁆𑀔𑀺𑀲𑁆𑀲𑀢𑀺 𑀯𑀸 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀤𑁆𑀥𑀪𑀸𑀯𑀜𑁆𑀘 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀜𑁆𑀘 𑀢𑀧𑁆𑀧𑀘𑁆𑀘𑀬𑀸 𑀘𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀜𑁆𑀘 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑀢𑀻𑀭𑁂 𑀏𑀓𑀁 𑀕𑀼𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺.

𑀧𑀼𑀡𑁆𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀓𑀲𑀺𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀤𑀦𑁆𑀢𑀓𑀝𑁆𑀞𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀧𑀢𑁆𑀢𑀜𑁆𑀘 𑀧𑀭𑀺𑀲𑁆𑀲𑀸𑀯𑀦𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 ‘‘𑀧𑀸𑀦𑀻𑀬𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀆𑀤𑀸𑀬 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀭𑁂𑀲𑀁 𑀧𑀘𑁆𑀙𑀺𑀫𑀕𑁂𑀳𑁂 𑀯𑀲𑀢𑀺. 𑀲𑀘𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀪𑀭𑀺𑀬𑀸 𑀫𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀢𑀺. 𑀬𑀸𑀯𑀲𑁆𑀲𑀸 𑀪𑀢𑁆𑀢𑀁 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀸𑀯 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁆𑀣𑁂𑀯 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀫𑀕𑁆𑀕𑀸𑀭𑀼𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀧𑁆𑀧𑁂𑀓𑀤𑀸𑀳𑀁 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀅𑀬𑁆𑀬𑀁 𑀦 𑀧𑀲𑁆𑀲𑀸𑀫𑀺, 𑀅𑀧𑁆𑀧𑁂𑀓𑀤𑀸 𑀫𑁂 𑀅𑀬𑁆𑀬𑀁 𑀧𑀲𑁆𑀲𑀦𑁆𑀢𑀺𑀬𑀸 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺. 𑀅𑀚𑁆𑀚 𑀧𑀦 𑀫𑁂 𑀅𑀬𑁆𑀬𑁄 𑀘 𑀤𑀺𑀝𑁆𑀞𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀘𑀸𑀬𑀁 𑀅𑀢𑁆𑀣𑀺, 𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳’’𑀦𑁆𑀢𑀺. 𑀲𑀸 𑀪𑀢𑁆𑀢𑀪𑀸𑀚𑀦𑀁 𑀑𑀭𑁄𑀧𑁂𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑀸𑀲𑀲𑁆𑀲 𑀯𑁄 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀢𑀸𑀬 𑀏𑀓𑁂𑀦 𑀳𑀢𑁆𑀣𑁂𑀦 𑀪𑀸𑀚𑀦𑀁 𑀥𑀸𑀭𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀢𑀢𑁄 𑀪𑀢𑁆𑀢𑀁 𑀤𑀤𑀫𑀸𑀦𑀸𑀬 𑀉𑀧𑀟𑁆𑀠𑀪𑀢𑁆𑀢𑁂 𑀤𑀺𑀦𑁆𑀦𑁂 ‘‘𑀅𑀮’’𑀦𑁆𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀲𑀸, ‘‘𑀪𑀦𑁆𑀢𑁂, 𑀏𑀓𑁄𑀯 𑀧𑀝𑀺𑀯𑀺𑀲𑁄, 𑀦 𑀲𑀓𑁆𑀓𑀸 𑀤𑁆𑀯𑀺𑀥𑀸 𑀓𑀸𑀢𑀼𑀁. 𑀢𑀼𑀫𑁆𑀳𑀸𑀓𑀁 𑀤𑀸𑀲𑀲𑁆𑀲 𑀇𑀥𑀮𑁄𑀓𑀲𑀗𑁆𑀕𑀳𑀁 𑀅𑀓𑀢𑁆𑀯𑀸 𑀧𑀭𑀮𑁄𑀓𑀲𑀗𑁆𑀕𑀳𑀁 𑀓𑀭𑁄𑀣, 𑀦𑀺𑀭𑀯𑀲𑁂𑀲𑀫𑁂𑀯 𑀤𑀸𑀢𑀼𑀓𑀸𑀫𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀫𑁂𑀯 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲𑁂𑀯 𑀪𑀸𑀕𑀻 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀫𑁄𑀤𑀦𑀁 𑀓𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀲𑀸𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀡𑁆𑀟𑀼𑀮𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺. 𑀧𑀼𑀡𑁆𑀡𑁄𑀧𑀺 𑀅𑀟𑁆𑀠𑀓𑀭𑀻𑀲𑀫𑀢𑁆𑀢𑀝𑁆𑀞𑀸𑀦𑀁 𑀓𑀲𑀺𑀢𑁆𑀯𑀸 𑀚𑀺𑀖𑀘𑁆𑀙𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀭𑀼𑀓𑁆𑀔𑀘𑁆𑀙𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀅𑀣𑀲𑁆𑀲 𑀪𑀭𑀺𑀬𑀸 𑀪𑀢𑁆𑀢𑀁 𑀆𑀤𑀸𑀬 𑀕𑀘𑁆𑀙𑀫𑀸𑀦𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀏𑀲 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑁄 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄. 𑀲𑀘𑁂 𑀫𑀁 ‘𑀅𑀢𑀺𑀯𑀺𑀬 𑀚𑁂 𑀘𑀺𑀭𑀸𑀬𑀻’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑀢𑁄𑀤𑀮𑀝𑁆𑀞𑀺𑀬𑀸 𑀫𑀁 𑀧𑀳𑀭𑀺𑀲𑁆𑀲𑀢𑀺, 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀪𑀯𑀺𑀲𑁆𑀲𑀢𑀺. 𑀧𑀝𑀺𑀓𑀘𑁆𑀘𑁂𑀯𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀸𑀫𑀺, 𑀅𑀚𑁆𑀚𑁂𑀓𑀤𑀺𑀯𑀲𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀫𑀸 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀓𑀭𑀺. 𑀅𑀳𑀜𑁆𑀳𑀺 𑀧𑀸𑀢𑁄𑀯 𑀢𑁂 𑀪𑀢𑁆𑀢𑀁 𑀆𑀳𑀭𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀤𑀺𑀲𑁆𑀯𑀸 𑀢𑀯 𑀪𑀢𑁆𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀆𑀕𑀢𑀸, 𑀧𑀲𑀸𑀤𑁂𑀳𑀺, 𑀲𑀸𑀫𑀺, 𑀘𑀺𑀢𑁆𑀢’’𑀦𑁆𑀢𑀺. 𑀲𑁄 ‘‘𑀓𑀺𑀁 𑀯𑀤𑁂𑀲𑀺, 𑀪𑀤𑁆𑀤𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸, ‘‘𑀪𑀤𑁆𑀤𑁂, 𑀲𑀸𑀥𑀼 𑀯𑀢 𑀢𑁂 𑀓𑀢𑀁 𑀫𑀫 𑀪𑀢𑁆𑀢𑀁 𑀅𑀬𑁆𑀬𑀲𑁆𑀲 𑀤𑀤𑀫𑀸𑀦𑀸𑀬, 𑀫𑀬𑀸𑀧𑀺𑀲𑁆𑀲 𑀅𑀚𑁆𑀚 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦’’𑀦𑁆𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀢𑀁 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀉𑀲𑁆𑀲𑀼𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀓𑀺𑀮𑀦𑁆𑀢𑀓𑀸𑀬𑁄 𑀢𑀲𑁆𑀲𑀸 𑀅𑀗𑁆𑀓𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀅𑀣𑀲𑁆𑀲 𑀧𑀸𑀢𑁄𑀯 𑀓𑀲𑀺𑀢𑀝𑁆𑀞𑀸𑀦𑀁 𑀧𑀁𑀲𑀼𑀘𑀼𑀡𑁆𑀡𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀭𑀢𑁆𑀢𑀲𑀼𑀯𑀡𑁆𑀡𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀲𑁄𑀪𑀫𑀸𑀦𑀁 𑀅𑀝𑁆𑀞𑀸𑀲𑀺. 𑀲𑁄 𑀧𑀩𑀼𑀤𑁆𑀥𑁄 𑀑𑀮𑁄𑀓𑁂𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀏𑀢𑀁 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀫𑀫 𑀲𑀼𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀫𑁂 𑀅𑀢𑀺𑀉𑀲𑁆𑀲𑀼𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀅𑀓𑁆𑀔𑀻𑀦𑀺 𑀪𑀫𑀦𑁆𑀢𑀻’’𑀢𑀺. ‘‘𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀏𑀯𑀫𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀉𑀝𑁆𑀞𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀫𑁂 𑀤𑀺𑀦𑁆𑀦𑀤𑀸𑀦𑁂𑀦 𑀅𑀚𑁆𑀚𑁂𑀯 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄, 𑀦 𑀔𑁄 𑀧𑀦 𑀲𑀓𑁆𑀓𑀸 𑀏𑀢𑁆𑀢𑀓𑀁 𑀥𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀪𑀭𑀺𑀬𑀸𑀬 𑀆𑀪𑀢𑀁 𑀪𑀢𑁆𑀢𑀧𑀸𑀢𑀺𑀁 𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀓𑀢𑁄𑀓𑀸𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀤𑁂𑀯, 𑀅𑀚𑁆𑀚 𑀫𑀬𑀸 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀲𑀼𑀯𑀡𑁆𑀡𑀪𑀭𑀺𑀢𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢𑀁, 𑀇𑀤𑀁 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀧𑀼𑀡𑁆𑀡𑁄 𑀦𑀸𑀫 𑀅𑀳’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂 𑀅𑀚𑁆𑀚 𑀓𑀢’’𑀦𑁆𑀢𑀺? ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀫𑁂 𑀅𑀚𑁆𑀚 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦𑀁, 𑀪𑀭𑀺𑀬𑀸𑀬𑀧𑀺 𑀫𑁂 𑀫𑀬𑁆𑀳𑀁 𑀆𑀳𑀭𑀡𑀪𑀢𑁆𑀢𑀁 𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀚𑁆𑀚𑁂𑀯 𑀓𑀺𑀭, 𑀪𑁄, 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀤𑀺𑀦𑁆𑀦𑀤𑀸𑀦𑁂𑀦 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄’’𑀢𑀺 𑀯𑀢𑁆𑀯𑀸, ‘‘𑀢𑀸𑀢, 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀳𑀽𑀦𑀺 𑀲𑀓𑀝𑀲𑀳𑀲𑁆𑀲𑀸𑀦𑀺 𑀧𑀳𑀺𑀡𑀺𑀢𑁆𑀯𑀸 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀲𑀓𑀝𑀸𑀦𑀺 𑀧𑀳𑀺𑀡𑀺. 𑀭𑀸𑀚𑀧𑀼𑀭𑀺𑀲𑁂𑀲𑀼 ‘‘𑀭𑀜𑁆𑀜𑁄 𑀲𑀦𑁆𑀢𑀓’’𑀦𑁆𑀢𑀺 𑀕𑀡𑁆𑀳𑀦𑁆𑀢𑁂𑀲𑀼 𑀕𑀳𑀺𑀢𑀕𑀳𑀺𑀢𑀁 𑀫𑀢𑁆𑀢𑀺𑀓𑀸𑀯 𑀳𑁄𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀕𑀳𑀺𑀢’’𑀦𑁆𑀢𑀺. 𑀧𑀼𑀝𑁆𑀞𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓’’𑀦𑁆𑀢𑀺 𑀆𑀳𑀁𑀲𑀼. 𑀦 𑀫𑀬𑁆𑀳𑀁, 𑀢𑀸𑀢𑀸, 𑀲𑀦𑁆𑀢𑀓𑀁, 𑀕𑀘𑁆𑀙𑀣 ‘‘𑀧𑀼𑀡𑁆𑀡𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀕𑀳𑀺𑀢𑀕𑀳𑀺𑀢𑀁 𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀲𑀩𑁆𑀩𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀫𑀓𑀁𑀲𑀼, 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀭𑀸𑀲𑀺 𑀅𑀳𑁄𑀲𑀺. 𑀭𑀸𑀚𑀸 𑀦𑀸𑀕𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀢𑁆𑀣𑀺 𑀓𑀲𑁆𑀲𑀘𑀺 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡’’𑀦𑁆𑀢𑀺? ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀧𑀦𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑁂𑀝𑁆𑀞𑀺𑀙𑀢𑁆𑀢𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀩𑀸𑀳𑀼𑀥𑀦𑀲𑁂𑀝𑁆𑀞𑀺 𑀦𑀸𑀫 𑀳𑁄𑀢𑀽’’𑀢𑀺 𑀫𑀳𑀦𑁆𑀢𑁂𑀦 𑀪𑁄𑀕𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀲𑁂𑀝𑁆𑀞𑀺𑀙𑀢𑁆𑀢𑀫𑀤𑀸𑀲𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀫𑀬𑀁, 𑀤𑁂𑀯, 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀭𑀓𑀼𑀮𑁂 𑀯𑀲𑀺𑀫𑁆𑀳𑀸, 𑀯𑀲𑀦𑀝𑁆𑀞𑀸𑀦𑀁 𑀦𑁄 𑀤𑁂𑀣𑀸’’𑀢𑀺. ‘‘𑀢𑁂𑀦 𑀳𑀺 𑀧𑀲𑁆𑀲, 𑀏𑀲 𑀕𑀼𑀫𑁆𑀩𑁄 𑀧𑀜𑁆𑀜𑀸𑀬𑀢𑀺, 𑀏𑀢𑀁 𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀓𑀸𑀭𑁂𑀳𑀻’’𑀢𑀺 𑀧𑀼𑀭𑀸𑀡𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀢𑀺𑀧𑀸𑀳𑁂𑀦𑁂𑀯 𑀕𑁂𑀳𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑁂𑀳𑀧𑁆𑀧𑀯𑁂𑀲𑀦𑀫𑀗𑁆𑀕𑀮𑀜𑁆𑀘 𑀙𑀢𑁆𑀢𑀫𑀗𑁆𑀕𑀮𑀜𑁆𑀘 𑀏𑀓𑀢𑁄𑀯 𑀓𑀭𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀤𑀸𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀧𑀼𑀡𑁆𑀡𑀲𑁂𑀝𑁆𑀞𑀺 𑀘 𑀪𑀭𑀺𑀬𑀸 𑀘𑀲𑁆𑀲 𑀥𑀻𑀢𑀸 𑀘 𑀉𑀢𑁆𑀢𑀭𑀸𑀢𑀺 𑀢𑀬𑁄 𑀚𑀦𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀼𑀡𑁆𑀡𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀸𑀭𑁂𑀲𑀺. 𑀲𑁄 ‘‘𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀫𑀸 𑀏𑀯𑀁 𑀓𑀭𑁄𑀢𑀼, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀦𑁂𑀯 𑀢𑁂 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸, 𑀤𑁂𑀢𑀼 𑀫𑁂 𑀧𑀼𑀢𑁆𑀢𑀲𑁆𑀲 𑀥𑀻𑀢𑀭’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀫𑀫 𑀥𑀻𑀢𑀸 𑀢𑀻𑀳𑀺 𑀭𑀢𑀦𑁂𑀳𑀺 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑁂𑀯𑀲𑁆𑀲 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑀳𑀽 𑀲𑁂𑀝𑁆𑀞𑀺𑀕𑀡𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑀸 ‘‘𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀪𑀺𑀦𑁆𑀤𑀺, 𑀤𑁂𑀳𑀺𑀲𑁆𑀲 𑀥𑀻𑀢𑀭’’𑀦𑁆𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀥𑀻𑀢𑀭𑀁 𑀅𑀤𑀸𑀲𑀺. 𑀲𑀸 𑀧𑀢𑀺𑀓𑀼𑀮𑀁 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑀼𑀁 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀦𑀸𑀮𑀢𑁆𑀣. 𑀏𑀯𑀁 𑀅𑀟𑁆𑀠𑀢𑀺𑀬𑁂𑀲𑀼 𑀫𑀸𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀲𑀦𑁆𑀢𑀺𑀓𑁂 𑀞𑀺𑀢𑀁 𑀧𑀭𑀺𑀘𑀸𑀭𑀺𑀓𑀁 𑀧𑀼𑀘𑁆𑀙𑀺 𑁋 ‘‘𑀇𑀤𑀸𑀦𑀺 𑀓𑀺𑀢𑁆𑀢𑀓𑀁 𑀅𑀦𑁆𑀢𑁄𑀯𑀲𑁆𑀲𑀲𑁆𑀲 𑀅𑀯𑀲𑀺𑀝𑁆𑀞’’𑀦𑁆𑀢𑀺? ‘‘𑀅𑀟𑁆𑀠𑀫𑀸𑀲𑁄, 𑀅𑀬𑁆𑀬𑁂’’𑀢𑀺. 𑀲𑀸 𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀓𑀲𑁆𑀫𑀸 𑀫𑀁 𑀏𑀯𑀭𑀽𑀧𑁂 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀺𑀁𑀲𑀼, 𑀯𑀭𑀁 𑀫𑁂 𑀮𑀓𑁆𑀔𑀡𑀸𑀳𑀢𑀁 𑀓𑀢𑁆𑀯𑀸 𑀧𑀭𑁂𑀲𑀁 𑀤𑀸𑀲𑀺𑀁 𑀲𑀸𑀯𑁂𑀢𑀼𑀁. 𑀏𑀯𑀭𑀽𑀧𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀲𑁆𑀲 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀤𑀲𑁆𑀲𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀻’’𑀢𑀺.

𑀅𑀣𑀲𑁆𑀲𑀸 𑀧𑀺𑀢𑀸 ‘‘𑀤𑀼𑀓𑁆𑀔𑀺𑀢𑀸 𑀯𑀢 𑀫𑁂 𑀥𑀻𑀢𑀸’’𑀢𑀺 𑀅𑀦𑀢𑁆𑀢𑀫𑀦𑀢𑀁 𑀧𑀯𑁂𑀤𑁂𑀢𑁆𑀯𑀸 𑀧𑀜𑁆𑀘𑀤𑀲 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀺𑀭𑀺𑀫𑀸 𑀦𑀸𑀫 𑀕𑀡𑀺𑀓𑀸 𑀅𑀢𑁆𑀣𑀺, 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀺. 𑀇𑀫𑁂𑀳𑀺 𑀓𑀳𑀸𑀧𑀡𑁂𑀳𑀺 𑀢𑀁 𑀆𑀦𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀲𑀬𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀽’’𑀢𑀺. 𑀲𑀸 𑀲𑀺𑀭𑀺𑀫𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀳𑀸𑀬𑀺𑀓𑁂 𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀢𑀯 𑀲𑀳𑀸𑀬𑀓𑀁 𑀧𑀭𑀺𑀘𑀭𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀲𑀸 𑀢𑀁 𑀆𑀤𑀸𑀬 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀺𑀭𑀺𑀫𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀫𑀺, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀫𑀫 𑀲𑀳𑀸𑀬𑀺𑀓𑀸 𑀢𑀼𑀫𑁆𑀳𑁂 𑀧𑀭𑀺𑀘𑀭𑀢𑀼, 𑀅𑀳𑀁 𑀧𑀦 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀤𑀸𑀦𑀜𑁆𑀘𑁂𑀯 𑀤𑀸𑀢𑀼𑀓𑀸𑀫𑀸 𑀥𑀫𑁆𑀫𑀜𑁆𑀘 𑀲𑁄𑀢𑀼𑀓𑀸𑀫𑀸’’𑀢𑀺 𑀆𑀳. 𑀲𑁄 𑀢𑀁 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀉𑀢𑁆𑀢𑀭𑀸𑀧𑀺 𑀔𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀲𑀢𑁆𑀣𑀼 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀧𑀯𑀸𑀭𑀡𑀸, 𑀢𑀸𑀯 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀏𑀯𑀁 𑀬𑀸𑀕𑀼𑀁 𑀧𑀘𑀣, 𑀏𑀯𑀁 𑀧𑀽𑀯𑁂 𑀧𑀘𑀣𑀸’’𑀢𑀺 𑀫𑀳𑀸𑀦𑀲𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀁𑀯𑀺𑀤𑀳𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 ‘‘𑀲𑁆𑀯𑁂 𑀧𑀯𑀸𑀭𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀦𑀲𑀸𑀪𑀺𑀫𑀼𑀔𑁄 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀭𑁄𑀦𑁆𑀢𑀻 𑀲𑀸 𑀅𑀦𑁆𑀥𑀩𑀸𑀮𑀸 𑀯𑀺𑀘𑀭𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀲𑁂𑀝𑁆𑀞𑀻𑀥𑀻𑀢𑀭𑀁 𑀲𑁂𑀤𑀓𑀺𑀮𑀺𑀦𑁆𑀦𑀁 𑀙𑀸𑀭𑀺𑀓𑀸𑀬 𑀑𑀓𑀺𑀡𑁆𑀡𑀁 𑀅𑀗𑁆𑀕𑀸𑀭𑀫𑀲𑀺𑀫𑀓𑁆𑀔𑀺𑀢𑀁 𑀢𑀣𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀺𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀦𑁆𑀥𑀩𑀸𑀮𑀸 𑀏𑀯𑀭𑀽𑀧𑁂 𑀞𑀸𑀦𑁂 𑀇𑀫𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀦𑀸𑀦𑀼𑀪𑀯𑀢𑀺, ‘𑀫𑀼𑀡𑁆𑀟𑀓𑀲𑀫𑀡𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀘𑀭𑀢𑀻’’𑀢𑀺 𑀳𑀲𑀺𑀢𑁆𑀯𑀸 𑀅𑀧𑀕𑀜𑁆𑀙𑀺.

𑀢𑀲𑁆𑀫𑀺𑀁 𑀅𑀧𑀕𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀲𑀺𑀭𑀺𑀫𑀸 ‘‘𑀓𑀺𑀁 𑀦𑀼 𑀔𑁄 𑀑𑀮𑁄𑀓𑁂𑀢𑁆𑀯𑀸 𑀏𑀲 𑀳𑀲𑀻’’𑀢𑀺 𑀢𑁂𑀦𑁂𑀯 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀻 𑀉𑀢𑁆𑀢𑀭𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑀺𑀦𑀸 𑀳𑀲𑀺𑀢𑀁, 𑀅𑀤𑁆𑀥𑀸 𑀇𑀫𑀲𑁆𑀲 𑀏𑀢𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸 𑀓𑀺𑀭 𑀅𑀟𑁆𑀠𑀫𑀸𑀲𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀩𑀸𑀳𑀺𑀭𑀓𑀇𑀢𑁆𑀣𑀻 𑀳𑀼𑀢𑁆𑀯𑀸 𑀯𑀲𑀫𑀸𑀦𑀸𑀧𑀺 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀇𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀅𑀳𑀁 𑀖𑀭𑀲𑀸𑀫𑀺𑀦𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺. 𑀲𑀸 𑀉𑀢𑁆𑀢𑀭𑀸𑀬 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀤𑀼𑀓𑁆𑀔𑀫𑀲𑁆𑀲𑀸 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀫𑀳𑀸𑀦𑀲𑀁 𑀧𑀯𑀺𑀲𑀺𑀢𑁆𑀯𑀸 𑀧𑀽𑀯𑀧𑀘𑀦𑀝𑁆𑀞𑀸𑀦𑁂 𑀧𑀓𑁆𑀓𑀼𑀣𑀺𑀢𑀁 𑀲𑀧𑁆𑀧𑀺𑀁 𑀓𑀝𑀘𑁆𑀙𑀼𑀦𑀸 𑀆𑀤𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀧𑀸𑀬𑀸𑀲𑀺. 𑀉𑀢𑁆𑀢𑀭𑀸 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀫 𑀲𑀳𑀸𑀬𑀺𑀓𑀸𑀬 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄, 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄. 𑀅𑀳𑀜𑁆𑀳𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀁. 𑀲𑀘𑁂 𑀫𑀫 𑀏𑀢𑀺𑀲𑁆𑀲𑀸 𑀉𑀧𑀭𑀺 𑀓𑁄𑀧𑁄 𑀅𑀢𑁆𑀣𑀺, 𑀇𑀤𑀁 𑀲𑀧𑁆𑀧𑀺 𑀫𑀁 𑀤𑀳𑀢𑀼. 𑀲𑀘𑁂 𑀦𑀢𑁆𑀣𑀺, 𑀫𑀸 𑀤𑀳𑀢𑀽’’𑀢𑀺 𑀢𑀁 𑀫𑁂𑀢𑁆𑀢𑀸𑀬 𑀨𑀭𑀺. 𑀢𑀸𑀬 𑀢𑀲𑁆𑀲𑀸 𑀫𑀢𑁆𑀣𑀓𑁂 𑀆𑀲𑀺𑀢𑁆𑀢𑀁 𑀧𑀓𑁆𑀓𑀼𑀣𑀺𑀢𑀲𑀧𑁆𑀧𑀺 𑀲𑀻𑀢𑀼𑀤𑀓𑀁 𑀯𑀺𑀬 𑀅𑀳𑁄𑀲𑀺.

𑀅𑀣 𑀦𑀁 ‘‘𑀇𑀤𑀁 𑀲𑀻𑀢𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀝𑀘𑁆𑀙𑀼𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑀺𑀁 𑀉𑀢𑁆𑀢𑀭𑀸𑀬 𑀤𑀸𑀲𑀺𑀬𑁄 𑀤𑀺𑀲𑁆𑀯𑀸 ‘‘𑀅𑀧𑁂𑀳𑀺 𑀤𑀼𑀩𑁆𑀩𑀺𑀦𑀻𑀢𑁂, 𑀦 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀧𑀓𑁆𑀓𑀼𑀣𑀺𑀢𑀁 𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀉𑀝𑁆𑀞𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀼𑀁. 𑀉𑀢𑁆𑀢𑀭𑀸 𑀯𑀸𑀭𑁂𑀦𑁆𑀢𑀻𑀧𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑀲𑁆𑀲𑀸 𑀉𑀧𑀭𑀺 𑀞𑀺𑀢𑀸 𑀲𑀩𑁆𑀩𑀸 𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀓𑀺𑀲𑁆𑀲 𑀢𑁂 𑀏𑀯𑀭𑀽𑀧𑀁 𑀪𑀸𑀭𑀺𑀬𑀁 𑀓𑀢’’𑀦𑁆𑀢𑀺 𑀲𑀺𑀭𑀺𑀫𑀁 𑀑𑀯𑀤𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀺𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀫𑀺𑀓𑀲𑁆𑀲 𑀳𑀲𑀦𑀫𑀢𑁆𑀢𑀓𑀸𑀭𑀡𑀸 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀧𑀓𑁆𑀓𑀼𑀣𑀺𑀢𑀁 𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀦𑁆𑀢𑀺𑀬𑀸, 𑀅𑀬𑀁 ‘𑀕𑀡𑁆𑀳𑀣 𑀦’𑀦𑁆𑀢𑀺 𑀤𑀸𑀲𑀺𑀬𑁄 𑀦 𑀆𑀡𑀸𑀧𑁂𑀲𑀺. 𑀫𑀁 𑀯𑀺𑀳𑁂𑀞𑀦𑀓𑀸𑀮𑁂𑀧𑀺 𑀲𑀩𑁆𑀩𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 𑀫𑀬𑁆𑀳𑀁 𑀓𑀢𑁆𑀢𑀩𑁆𑀩𑀫𑁂𑀯 𑀅𑀓𑀸𑀲𑀺. 𑀲𑀘𑀸𑀳𑀁 𑀇𑀫𑀁 𑀦 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀫𑀼𑀤𑁆𑀥𑀸 𑀫𑁂 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀅𑀬𑁆𑀬𑁂, 𑀔𑀫𑀸𑀳𑀺 𑀫𑁂’’𑀢𑀺 𑀆𑀳. 𑀅𑀳𑀁 𑀲𑀧𑀺𑀢𑀺𑀓𑀸 𑀥𑀻𑀢𑀸, 𑀧𑀺𑀢𑀭𑀺 𑀔𑀫𑀦𑁆𑀢𑁂 𑀔𑀫𑀸𑀫𑀻𑀢𑀺. 𑀳𑁄𑀢𑀼, 𑀅𑀬𑁆𑀬𑁂, 𑀧𑀺𑀢𑀭𑀁 𑀢𑁂 𑀧𑀼𑀡𑁆𑀡𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀲𑁆𑀲𑀸𑀫𑀻𑀢𑀺. 𑀧𑀼𑀡𑁆𑀡𑁄 𑀫𑀫 𑀯𑀝𑁆𑀝𑀚𑀦𑀓𑀧𑀺𑀢𑀸, 𑀯𑀺𑀯𑀝𑁆𑀝𑀚𑀦𑀓𑁂 𑀧𑀺𑀢𑀭𑀺 𑀔𑀫𑀦𑁆𑀢𑁂 𑀧𑀦𑀸𑀳𑀁 𑀔𑀫𑀺𑀲𑁆𑀲𑀸𑀫𑀻𑀢𑀺. 𑀓𑁄 𑀧𑀦 𑀢𑁂 𑀯𑀺𑀯𑀝𑁆𑀝𑀚𑀦𑀓𑀧𑀺𑀢𑀸𑀢𑀺? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀫𑀬𑁆𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀻𑀢𑀺. 𑀅𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀢𑁆𑀣𑀸 𑀲𑁆𑀯𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀇𑀥𑀸𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀬𑀣𑀸𑀮𑀤𑁆𑀥𑀁 𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀔𑀫𑀸𑀧𑁂𑀳𑀻𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀉𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀢𑀸 𑀧𑀭𑀺𑀯𑀸𑀭𑀺𑀢𑁆𑀣𑀺𑀬𑁄 𑀆𑀡𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀘𑁂𑀯 𑀲𑀽𑀧𑁂𑀬𑁆𑀬𑀸𑀦𑀺 𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀲𑀓𑁆𑀓𑀸𑀭𑀁 𑀆𑀤𑀸𑀬 𑀉𑀢𑁆𑀢𑀭𑀸𑀬 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀸𑀯 𑀲𑀁𑀯𑀺𑀤𑀳𑀺. 𑀲𑀺𑀭𑀺𑀫𑀸𑀧𑀺 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺.

𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀓𑁄 𑀢𑁂 𑀅𑀧𑀭𑀸𑀥𑁄’’𑀢𑀺? 𑀪𑀦𑁆𑀢𑁂, 𑀫𑀬𑀸 𑀳𑀺𑀬𑁆𑀬𑁄 𑀇𑀤𑀁 𑀦𑀸𑀫 𑀓𑀢𑀁, 𑀅𑀣 𑀫𑁂 𑀲𑀳𑀸𑀬𑀺𑀓𑀸 𑀫𑀁 𑀯𑀺𑀳𑁂𑀞𑀬𑀫𑀸𑀦𑀸 𑀤𑀸𑀲𑀺𑀬𑁄 𑀦𑀺𑀯𑀸𑀭𑁂𑀢𑁆𑀯𑀸 𑀫𑀬𑁆𑀳𑀁 𑀉𑀧𑀓𑀸𑀭𑀫𑁂𑀯 𑀅𑀓𑀸𑀲𑀺. 𑀲𑀸𑀳𑀁 𑀇𑀫𑀺𑀲𑁆𑀲𑀸 𑀕𑀼𑀡𑀁 𑀚𑀸𑀦𑀺𑀢𑁆𑀯𑀸 𑀇𑀫𑀁 𑀔𑀫𑀸𑀧𑁂𑀲𑀺𑀁, 𑀅𑀣 𑀫𑀁 𑀏𑀲𑀸 ‘‘𑀢𑀼𑀫𑁆𑀳𑁂𑀲𑀼 𑀔𑀫𑀦𑁆𑀢𑁂𑀲𑀼 𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀏𑀯𑀁 𑀓𑀺𑀭 𑀉𑀢𑁆𑀢𑀭𑁂’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀻𑀲𑁂 𑀫𑁂 𑀲𑀳𑀸𑀬𑀺𑀓𑀸𑀬 𑀧𑀓𑁆𑀓𑀼𑀣𑀺𑀢𑀲𑀧𑁆𑀧𑀺 𑀆𑀲𑀺𑀢𑁆𑀢’’𑀦𑁆𑀢𑀺. 𑀅𑀣 ‘‘𑀢𑀬𑀸 𑀓𑀺𑀁 𑀘𑀺𑀦𑁆𑀢𑀺𑀢’’𑀦𑁆𑀢𑀺? ‘‘𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄. 𑀅𑀳𑀜𑁆𑀳𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀅𑀮𑀢𑁆𑀣𑀁, 𑀲𑀘𑁂 𑀫𑁂 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀓𑁄𑀧𑁄 𑀅𑀢𑁆𑀣𑀺, 𑀇𑀤𑀁 𑀫𑀁 𑀤𑀳𑀢𑀼. 𑀦𑁄 𑀘𑁂, 𑀫𑀸 𑀤𑀳𑀢𑀽’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀫𑁂𑀢𑁆𑀢𑀸𑀬 𑀨𑀭𑀺𑀁, 𑀪𑀦𑁆𑀢𑁂𑀢𑀺. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀉𑀢𑁆𑀢𑀭𑁂, 𑀏𑀯𑀁 𑀓𑁄𑀥𑀁 𑀚𑀺𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁄𑀥𑁄 𑀳𑀺 𑀦𑀸𑀫 𑀅𑀓𑁆𑀓𑁄𑀥𑁂𑀦, 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀅𑀦𑀓𑁆𑀓𑁄𑀲𑀦𑁆𑀢𑁂𑀦 𑀅𑀧𑀭𑀺𑀪𑀸𑀲𑀦𑁆𑀢𑁂𑀦, 𑀣𑀤𑁆𑀥𑀫𑀘𑁆𑀙𑀭𑀻 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀤𑀸𑀦𑁂𑀦, 𑀫𑀼𑀲𑀸𑀯𑀸𑀤𑀻 𑀲𑀘𑁆𑀘𑀯𑀘𑀦𑁂𑀦 𑀚𑀺𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁩. ‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺.

𑀢𑀢𑁆𑀣 𑀅𑀓𑁆𑀓𑁄𑀥𑁂𑀦𑀸𑀢𑀺 𑀓𑁄𑀥𑀦𑁄 𑀳𑀺 𑀧𑀼𑀕𑁆𑀕𑀮𑁄 𑀅𑀓𑁆𑀓𑁄𑀥𑁂𑀦 𑀳𑀼𑀢𑁆𑀯𑀸 𑀚𑀺𑀦𑀺𑀢𑀩𑁆𑀩𑁄. 𑀅𑀲𑀸𑀥𑀼𑀦𑁆𑀢𑀺 𑀅𑀪𑀤𑁆𑀤𑀓𑁄 𑀪𑀤𑁆𑀤𑀓𑁂𑀦 𑀳𑀼𑀢𑁆𑀯𑀸 𑀚𑀺𑀦𑀺𑀢𑀩𑁆𑀩𑁄. 𑀓𑀤𑀭𑀺𑀬𑀦𑁆𑀢𑀺 𑀣𑀤𑁆𑀥𑀫𑀘𑁆𑀙𑀭𑀻 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀘𑀸𑀕𑀘𑀺𑀢𑁆𑀢𑁂𑀦 𑀚𑀺𑀦𑀺𑀢𑀩𑁆𑀩𑁄. 𑀅𑀮𑀺𑀓𑀯𑀸𑀤𑀻 𑀲𑀘𑁆𑀘𑀯𑀘𑀦𑁂𑀦 𑀚𑀺𑀦𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁…𑀧𑁂… 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀺𑀭𑀺𑀫𑀸 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑀸𑀳𑀺 𑀇𑀢𑁆𑀣𑀻𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀉𑀢𑁆𑀢𑀭𑀸𑀉𑀧𑀸𑀲𑀺𑀓𑀸𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼

𑀲𑀘𑁆𑀘𑀁 𑀪𑀡𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀣𑁂𑀭𑁄 𑀤𑁂𑀯𑀘𑀸𑀭𑀺𑀓𑀁 𑀕𑀦𑁆𑀢𑁆𑀯𑀸 𑀫𑀳𑁂𑀲𑀓𑁆𑀔𑀸𑀬 𑀤𑁂𑀯𑀢𑀸𑀬 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀏𑀯𑀫𑀸𑀳 𑁋 ‘‘𑀤𑁂𑀯𑀢𑁂 𑀫𑀳𑀢𑀻 𑀢𑁂 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀅𑀮𑀢𑁆𑀣𑀸’’𑀢𑀺? ‘‘𑀫𑀸 𑀫𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀣𑀸’’𑀢𑀺. 𑀤𑁂𑀯𑀢𑀸 𑀓𑀺𑀭 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀓𑀫𑁆𑀫𑁂𑀦 𑀮𑀚𑁆𑀚𑀫𑀸𑀦𑀸 𑀏𑀯𑀁 𑀯𑀤𑀢𑀺. 𑀲𑀸 𑀧𑀦 𑀣𑁂𑀭𑁂𑀦 ‘‘𑀓𑀣𑁂𑀳𑀺𑀬𑁂𑀯𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀸 𑀦𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁, 𑀦 𑀧𑀽𑀚𑀸 𑀓𑀢𑀸, 𑀦 𑀥𑀫𑁆𑀫𑁄 𑀲𑀼𑀢𑁄, 𑀓𑁂𑀯𑀮𑀁 𑀲𑀘𑁆𑀘𑀫𑀢𑁆𑀢𑀁 𑀭𑀓𑁆𑀔𑀺𑀢’’𑀦𑁆𑀢𑀺. 𑀣𑁂𑀭𑁄 𑀅𑀜𑁆𑀜𑀸𑀦𑀺 𑀯𑀺𑀫𑀸𑀦𑀤𑁆𑀯𑀸𑀭𑀸𑀦𑀺 𑀕𑀦𑁆𑀢𑁆𑀯𑀸 𑀆𑀕𑀢𑀸𑀕𑀢𑀸 𑀅𑀧𑀭𑀸𑀧𑀺 𑀤𑁂𑀯𑀥𑀻𑀢𑀭𑁄 𑀧𑀼𑀘𑁆𑀙𑀺. 𑀢𑀸𑀲𑀼𑀧𑀺 𑀢𑀣𑁂𑀯 𑀦𑀺𑀕𑀼𑀳𑀺𑀢𑁆𑀯𑀸 𑀣𑁂𑀭𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻𑀲𑀼 𑀏𑀓𑀸 𑀢𑀸𑀯 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀸 𑀦𑁂𑀯 𑀤𑀸𑀦𑀸𑀤𑀻𑀲𑀼 𑀓𑀢𑀁 𑀦𑀸𑀫 𑀅𑀢𑁆𑀣𑀺, 𑀅𑀳𑀁 𑀧𑀦 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀭𑀲𑁆𑀲 𑀤𑀸𑀲𑀻 𑀅𑀳𑁄𑀲𑀺𑀁, 𑀢𑀲𑁆𑀲𑀸 𑀫𑁂 𑀲𑀸𑀫𑀺𑀓𑁄 𑀅𑀢𑀺𑀯𑀺𑀬 𑀘𑀡𑁆𑀟𑁄 𑀨𑀭𑀼𑀲𑁄, 𑀕𑀳𑀺𑀢𑀕𑁆𑀕𑀳𑀺𑀢𑁂𑀦𑁂𑀯 𑀓𑀝𑁆𑀞𑁂𑀦 𑀯𑀸 𑀓𑀮𑀺𑀗𑁆𑀕𑀭𑁂𑀦 𑀯𑀸 𑀲𑀻𑀲𑀁 𑀪𑀺𑀦𑁆𑀤𑀢𑀺. 𑀲𑀸𑀳𑀁 𑀉𑀧𑁆𑀧𑀦𑁆𑀦𑁂 𑀓𑁄𑀧𑁂 ‘𑀏𑀲 𑀢𑀯 𑀲𑀸𑀫𑀺𑀓𑁄 𑀮𑀓𑁆𑀔𑀡𑀸𑀳𑀢𑀁 𑀯𑀸 𑀓𑀸𑀢𑀼𑀁 𑀦𑀸𑀲𑀸𑀤𑀻𑀦𑀺 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀇𑀲𑁆𑀲𑀭𑁄, 𑀫𑀸 𑀓𑀼𑀚𑁆𑀛𑀻’𑀢𑀺 𑀅𑀢𑁆𑀢𑀸𑀦𑀫𑁂𑀯 𑀧𑀭𑀺𑀪𑀸𑀲𑁂𑀢𑁆𑀯𑀸 𑀓𑁄𑀧𑀁 𑀦𑀸𑀫 𑀦 𑀅𑀓𑀸𑀲𑀺𑀁, 𑀢𑁂𑀦 𑀫𑁂 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺. 𑀅𑀧𑀭𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀉𑀘𑁆𑀙𑀼𑀔𑁂𑀢𑁆𑀢𑀁 𑀭𑀓𑁆𑀔𑀫𑀸𑀦𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀘𑁆𑀙𑀼𑀬𑀝𑁆𑀞𑀺𑀁 𑀅𑀤𑀸𑀲𑀺𑀁’’. 𑀅𑀧𑀭𑀸 𑀏𑀓𑀁 𑀢𑀺𑀫𑁆𑀩𑀭𑀼𑀲𑀓𑀁 𑀅𑀤𑀸𑀲𑀺𑀁. 𑀅𑀧𑀭𑀸 𑀏𑀓𑀁 𑀏𑀴𑀸𑀮𑀼𑀓𑀁 𑀅𑀤𑀸𑀲𑀺𑀁. 𑀅𑀧𑀭𑀸 𑀏𑀓𑀁 𑀨𑀸𑀭𑀼𑀲𑀓𑀁 𑀅𑀤𑀸𑀲𑀺𑀁. 𑀅𑀧𑀭𑀸 𑀏𑀓𑀁 𑀫𑀽𑀮𑀫𑀼𑀝𑁆𑀞𑀺𑀁. 𑀅𑀧𑀭𑀸 ‘‘𑀦𑀺𑀫𑁆𑀩𑀫𑀼𑀝𑁆𑀞𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀓𑀢𑀁 𑀧𑀭𑀺𑀢𑁆𑀢𑀤𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀫𑁆𑀳𑁂𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀆𑀳𑀁𑀲𑀼.

𑀣𑁂𑀭𑁄 𑀢𑀸𑀳𑀺 𑀓𑀢𑀓𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀘𑁆𑀘𑀓𑀣𑀦𑀫𑀢𑁆𑀢𑁂𑀦, 𑀓𑁄𑀧𑀦𑀺𑀩𑁆𑀩𑀸𑀧𑀦𑀫𑀢𑁆𑀢𑁂𑀦, 𑀅𑀢𑀺𑀧𑀭𑀺𑀢𑁆𑀢𑀓𑁂𑀦 𑀢𑀺𑀫𑁆𑀩𑀭𑀼𑀲𑀓𑀸𑀤𑀺𑀤𑀸𑀦𑀫𑀢𑁆𑀢𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀮𑀤𑁆𑀥𑀼’’𑀦𑁆𑀢𑀺. ‘‘𑀓𑀲𑁆𑀫𑀸 𑀫𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀼𑀘𑁆𑀙𑀲𑀺, 𑀦𑀦𑀼 𑀢𑁂 𑀤𑁂𑀯𑀢𑀸𑀳𑀺 𑀅𑀬𑀁 𑀅𑀢𑁆𑀣𑁄 𑀓𑀣𑀺𑀢𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀮𑀩𑁆𑀪𑀢𑀺 𑀫𑀜𑁆𑀜𑁂 𑀏𑀢𑁆𑀢𑀓𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀲𑀘𑁆𑀘𑀫𑀢𑁆𑀢𑀁 𑀓𑀣𑁂𑀢𑁆𑀯𑀸𑀧𑀺 𑀓𑁄𑀧𑀫𑀢𑁆𑀢𑀁 𑀚𑀳𑀺𑀢𑁆𑀯𑀸𑀧𑀺 𑀧𑀭𑀺𑀢𑁆𑀢𑀓𑀁 𑀤𑀸𑀦𑀁 𑀤𑀢𑁆𑀯𑀸𑀧𑀺 𑀤𑁂𑀯𑀮𑁄𑀓𑀁 𑀕𑀘𑁆𑀙𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁪. ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬, 𑀤𑀚𑁆𑀚𑀸 𑀅𑀧𑁆𑀧𑀫𑁆𑀧𑀺 𑀬𑀸𑀘𑀺𑀢𑁄;

𑀏𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺, 𑀕𑀘𑁆𑀙𑁂 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀲𑀘𑁆𑀘𑀁 𑀪𑀡𑁂𑀢𑀺 𑀲𑀘𑁆𑀘𑀁 𑀤𑀻𑀧𑁂𑀬𑁆𑀬 𑀯𑁄𑀳𑀭𑁂𑀬𑁆𑀬, 𑀲𑀘𑁆𑀘𑁂 𑀧𑀢𑀺𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦 𑀓𑀼𑀚𑁆𑀛𑁂𑀬𑁆𑀬𑀸𑀢𑀺 𑀧𑀭𑀲𑁆𑀲 𑀦 𑀓𑀼𑀚𑁆𑀛𑁂𑀬𑁆𑀬. 𑀬𑀸𑀘𑀺𑀢𑁄𑀢𑀺 𑀬𑀸𑀘𑀓𑀸 𑀦𑀸𑀫 𑀲𑀻𑀮𑀯𑀦𑁆𑀢𑁄 𑀧𑀩𑁆𑀩𑀚𑀺𑀢𑀸. 𑀢𑁂 𑀳𑀺 𑀓𑀺𑀜𑁆𑀘𑀸𑀧𑀺 ‘‘𑀤𑁂𑀣𑀸’’𑀢𑀺 𑀅𑀬𑀸𑀘𑀺𑀢𑁆𑀯𑀸𑀯 𑀖𑀭𑀤𑁆𑀯𑀸𑀭𑁂 𑀢𑀺𑀝𑁆𑀞𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑀬𑀸𑀘𑀦𑁆𑀢𑀺𑀬𑁂𑀯 𑀦𑀸𑀫. 𑀏𑀯𑀁 𑀲𑀻𑀮𑀯𑀦𑁆𑀢𑁂𑀳𑀺 𑀬𑀸𑀘𑀺𑀢𑁄 𑀅𑀧𑁆𑀧𑀲𑁆𑀫𑀺𑀁 𑀤𑁂𑀬𑁆𑀬𑀥𑀫𑁆𑀫𑁂 𑀯𑀺𑀚𑁆𑀚𑀫𑀸𑀦𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀤𑀤𑁂𑀬𑁆𑀬. 𑀏𑀢𑁂𑀳𑀺 𑀢𑀻𑀳𑀻𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀏𑀓𑁂𑀦𑀸𑀧𑀺 𑀓𑀸𑀭𑀡𑁂𑀦 𑀤𑁂𑀯𑀮𑁄𑀓𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀩𑀼𑀤𑁆𑀥𑀧𑀺𑀢𑀼𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀅𑀳𑀺𑀁𑀲𑀓𑀸 𑀬𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀓𑁂𑀢𑀁 𑀦𑀺𑀲𑁆𑀲𑀸𑀬 𑀅𑀜𑁆𑀚𑀦𑀯𑀦𑁂 𑀯𑀺𑀳𑀭𑀦𑁆𑀢𑁄 𑀪𑀺𑀓𑁆𑀔𑀽𑀳𑀺 𑀧𑀝𑁆𑀞𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀪𑀕𑀯𑀢𑁄 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀲𑁆𑀲 𑀲𑀸𑀓𑁂𑀢𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑀓𑀸𑀮𑁂 𑀏𑀓𑁄 𑀲𑀸𑀓𑁂𑀢𑀯𑀸𑀲𑀻 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁆𑀢𑀭𑀖𑀭𑀤𑁆𑀯𑀸𑀭𑁂 𑀤𑀲𑀩𑀮𑀁 𑀤𑀺𑀲𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸, ‘‘𑀢𑀸𑀢, 𑀦𑀦𑀼 𑀦𑀸𑀫 𑀧𑀼𑀢𑁆𑀢𑁂𑀳𑀺 𑀚𑀺𑀡𑁆𑀡𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸, 𑀓𑀲𑁆𑀫𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑀸𑀓𑀁 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀲𑀺. 𑀫𑀬𑀸 𑀢𑀸𑀯 𑀤𑀺𑀝𑁆𑀞𑁄𑀲𑀺, 𑀫𑀸𑀢𑀭𑀫𑁆𑀧𑀺 𑀧𑀲𑁆𑀲𑀺𑀢𑀼𑀁 𑀏𑀳𑀻’’𑀢𑀺 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀩𑁆𑀭𑀸𑀳𑁆𑀫𑀡𑀻𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸, ‘‘𑀢𑀸𑀢, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀼𑀳𑀺𑀁 𑀕𑀢𑁄𑀲𑀺, 𑀦𑀦𑀼 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀫𑀳𑀮𑁆𑀮𑀓𑀓𑀸𑀮𑁂 𑀉𑀧𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀭𑁄 ‘‘𑀏𑀣 𑀪𑀸𑀢𑀭𑀁 𑀯𑀦𑁆𑀤𑀣𑀸’’𑀢𑀺 𑀯𑀦𑁆𑀤𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀢𑀼𑀝𑁆𑀞𑀫𑀸𑀦𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀥𑁂𑀯 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 ‘‘𑀩𑀼𑀤𑁆𑀥𑀸 𑀦𑀸𑀫 𑀏𑀓𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑁂 𑀯𑁄 𑀦𑀺𑀫𑀦𑁆𑀢𑁂𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑁂𑀬𑁆𑀬𑀸𑀣𑀸’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀫𑀦𑁆𑀢𑁂𑀢𑀼𑀁 𑀆𑀕𑀢𑁂 ‘‘𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀫𑀬𑀁 𑀲𑁆𑀯𑀸𑀢𑀦𑀸𑀬 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀫𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀯𑀤𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀕𑁂𑀳𑀢𑁄 𑀪𑀢𑁆𑀢𑀪𑀸𑀚𑀦𑀲𑀽𑀧𑁂𑀬𑁆𑀬𑀪𑀸𑀚𑀦𑀸𑀦𑀺 𑀆𑀤𑀸𑀬 𑀲𑀢𑁆𑀣𑀼 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀅𑀜𑁆𑀜𑀢𑁆𑀭 𑀧𑀦 𑀦𑀺𑀫𑀦𑁆𑀢𑀦𑁂 𑀅𑀲𑀢𑀺 𑀲𑀢𑁆𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀕𑁂𑀳𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀢𑁂 𑀉𑀪𑁄𑀧𑀺 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀁 𑀦𑀺𑀘𑁆𑀘𑀓𑀸𑀮𑀁 𑀢𑀣𑀸𑀕𑀢𑀲𑁆𑀲 𑀤𑁂𑀦𑁆𑀢𑀸 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀩𑁆𑀭𑀸𑀳𑁆𑀫𑀡𑁄 ‘𑀢𑀣𑀸𑀕𑀢𑀲𑁆𑀲 𑀲𑀼𑀤𑁆𑀥𑁄𑀤𑀦𑁄 𑀧𑀺𑀢𑀸, 𑀫𑀳𑀸𑀫𑀸𑀬𑀸 𑀫𑀸𑀢𑀸’𑀢𑀺 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄𑀯 𑀲𑀤𑁆𑀥𑀺𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀣𑀸𑀕𑀢𑀁 ‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄’𑀢𑀺 𑀯𑀤𑀢𑀺, 𑀲𑀢𑁆𑀣𑀸𑀧𑀺 𑀢𑀣𑁂𑀯 𑀅𑀥𑀺𑀯𑀸𑀲𑁂𑀢𑀺. 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀉𑀪𑁄𑀧𑀺 𑀢𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑁂𑀯 𑀧𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀦𑀺𑀭𑀦𑁆𑀢𑀭𑀁 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀬𑁆𑀳𑀁 𑀧𑀺𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀧𑀺𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀧𑀺𑀢𑀸. 𑀲𑀸𑀧𑀺 𑀫𑁂 𑀩𑁆𑀭𑀸𑀳𑁆𑀫𑀡𑀻 𑀦𑀺𑀭𑀦𑁆𑀢𑀭𑀫𑁂𑀯 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀫𑀸𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀫𑀸𑀢𑀸. 𑀏𑀯𑀸𑀳𑀁 𑀤𑀺𑀬𑀟𑁆𑀠𑀚𑀸𑀢𑀺𑀲𑀳𑀲𑁆𑀲𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀲𑀁𑀯𑀟𑁆𑀠𑁄, 𑀤𑀺𑀬𑀟𑁆𑀠𑀚𑀸𑀢𑀺𑀲𑀳𑀲𑁆𑀲𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀳𑀢𑁆𑀣𑁂𑀢𑀺 𑀢𑀻𑀡𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀢𑁂𑀲𑀁 𑀧𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀢𑀺;

𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑁂 𑀧𑁄𑀲𑁂, 𑀓𑀸𑀫𑀁 𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀲𑁂. (𑀚𑀸. 𑁧.𑁧.𑁬𑁮);

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀲𑀢𑁆𑀣𑀸 𑀢𑁂𑀫𑀸𑀲𑀫𑁂𑀯 𑀢𑀁 𑀓𑀼𑀮𑀁 𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀢𑁂 𑀉𑀪𑁄𑀧𑀺 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀏𑀓𑀓𑀽𑀝𑀸𑀕𑀸𑀭𑀫𑁂𑀯 𑀆𑀭𑁄𑀧𑁂𑀢𑁆𑀯𑀸 𑀦𑀻𑀳𑀭𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀆𑀴𑀸𑀳𑀦𑀁 𑀅𑀕𑀫𑀸𑀲𑀺. ‘‘𑀩𑀼𑀤𑁆𑀥𑀸𑀦𑀁 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀫𑀳𑀸𑀚𑀦𑁄 𑀦𑀺𑀓𑁆𑀔𑀫𑀺. 𑀲𑀢𑁆𑀣𑀸𑀧𑀺 𑀆𑀴𑀸𑀳𑀦𑀲𑀫𑀻𑀧𑁂 𑀏𑀓𑀁 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀢𑁆𑀯𑀸, ‘‘𑀪𑀦𑁆𑀢𑁂, ‘𑀫𑀸𑀢𑀸𑀧𑀺𑀢𑀭𑁄 𑀯𑁄 𑀓𑀸𑀮𑀓𑀢𑀸’𑀢𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀺. 𑀲𑀢𑁆𑀣𑀸 𑀢𑁂 ‘‘𑀫𑀸 𑀏𑀯𑀁 𑀅𑀯𑀘𑀼𑀢𑁆𑀣𑀸’’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀲𑀸𑀬 𑀆𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁,

𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺;

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺,

𑀅𑀣 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻’’𑀢𑀺. (𑀲𑀼. 𑀦𑀺. 𑁮𑁧𑁦; 𑀫𑀳𑀸𑀦𑀺. 𑁩𑁯) 𑁋

𑀇𑀤𑀁 𑀚𑀭𑀸𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀺𑀬𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀸, ‘‘𑀪𑀦𑁆𑀢𑁂, 𑀢𑁂𑀲𑀁 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀸𑀦𑀁 𑀅𑀲𑁂𑀔𑀫𑀼𑀦𑀻𑀦𑀁 𑀅𑀪𑀺𑀲𑀫𑁆𑀧𑀭𑀸𑀬𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀭𑀽𑀧𑀸 𑀳𑀺 𑀅𑀘𑁆𑀘𑀼𑀢𑀁 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀫𑁂𑀯 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁫. ‘‘𑀅𑀳𑀺𑀁𑀲𑀓𑀸 𑀬𑁂 𑀫𑀼𑀦𑀬𑁄, 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀲𑀁𑀯𑀼𑀢𑀸;

𑀢𑁂 𑀬𑀦𑁆𑀢𑀺 𑀅𑀘𑁆𑀘𑀼𑀢𑀁 𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺.

𑀢𑀢𑁆𑀣 𑀫𑀼𑀦𑀬𑁄𑀢𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀸𑀬 𑀫𑀕𑁆𑀕𑀨𑀮𑀧𑀢𑁆𑀢𑀸 𑀅𑀲𑁂𑀔𑀫𑀼𑀦𑀬𑁄. 𑀓𑀸𑀬𑁂𑀦𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁, 𑀢𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀲𑀼𑀲𑀁𑀯𑀼𑀢𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀼𑀢𑀦𑁆𑀢𑀺 𑀲𑀲𑁆𑀲𑀢𑀁. 𑀞𑀸𑀦𑀦𑁆𑀢𑀺 𑀅𑀓𑀼𑀧𑁆𑀧𑀝𑁆𑀞𑀸𑀦𑀁 𑀥𑀼𑀯𑀝𑁆𑀞𑀸𑀦𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂 𑀦 𑀲𑁄𑀘𑀦𑁆𑀢𑀺 𑀦 𑀯𑀺𑀳𑀜𑁆𑀜𑀦𑁆𑀢𑀺, 𑀢𑀁 𑀞𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀩𑀼𑀤𑁆𑀥𑀧𑀺𑀢𑀼𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀼𑀡𑁆𑀡𑀤𑀸𑀲𑀻𑀯𑀢𑁆𑀣𑀼

𑀲𑀤𑀸 𑀚𑀸𑀕𑀭𑀫𑀸𑀦𑀸𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀦𑁆𑀢𑁄 𑀧𑀼𑀡𑁆𑀡𑀁 𑀦𑀸𑀫 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀤𑀸𑀲𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀓𑁄𑀝𑁆𑀝𑀦𑀢𑁆𑀣𑀸𑀬 𑀩𑀳𑀼𑀯𑀻𑀳𑀺𑀁 𑀅𑀤𑀁𑀲𑀼. 𑀲𑀸 𑀭𑀢𑁆𑀢𑀺𑀫𑁆𑀧𑀺 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀯𑀻𑀳𑀺𑀁 𑀓𑁄𑀝𑁆𑀝𑁂𑀦𑁆𑀢𑀻 𑀯𑀺𑀲𑁆𑀲𑀫𑀦𑀢𑁆𑀣𑀸𑀬 𑀲𑁂𑀤𑀢𑀺𑀦𑁆𑀢𑁂𑀦 𑀕𑀢𑁆𑀢𑁂𑀦 𑀩𑀳𑀺𑀯𑀸𑀢𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀅𑀳𑁄𑀲𑀺. 𑀲𑁄 𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀕𑀘𑁆𑀙𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀗𑁆𑀕𑀼𑀮𑀺𑀁 𑀚𑀸𑀮𑁂𑀢𑁆𑀯𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀫𑀕𑁆𑀕𑀤𑁂𑀲𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀮𑁄𑀓𑀁 𑀦𑀺𑀫𑁆𑀫𑀺𑀦𑀺. 𑀧𑀼𑀡𑁆𑀡𑀸 𑀢𑁂𑀦𑀸𑀮𑁄𑀓𑁂𑀦 𑀧𑀩𑁆𑀩𑀢𑁂 𑀯𑀺𑀘𑀭𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀅𑀳𑀁 𑀢𑀸𑀯 𑀅𑀢𑁆𑀢𑀦𑁄 𑀤𑀼𑀓𑁆𑀔𑁂𑀦 𑀉𑀧𑀤𑁆𑀤𑀼𑀢𑀸 𑀇𑀫𑀸𑀬𑀧𑀺 𑀯𑁂𑀮𑀸𑀬 𑀦𑀺𑀤𑁆𑀤𑀁 𑀦 𑀉𑀧𑁂𑀫𑀺, 𑀪𑀤𑁆𑀤𑀦𑁆𑀢𑀸 𑀓𑀺𑀁 𑀓𑀸𑀭𑀡𑀸 𑀦 𑀦𑀺𑀤𑁆𑀤𑀸𑀬𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀅𑀨𑀸𑀲𑀼𑀓𑀁 𑀯𑀸 𑀪𑀯𑀺𑀲𑁆𑀲𑀢𑀺, 𑀤𑀻𑀖𑀚𑀸𑀢𑀺𑀓𑁂𑀦 𑀯𑀸 𑀉𑀧𑀤𑁆𑀤𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀧𑀸𑀢𑁄𑀯 𑀓𑀼𑀡𑁆𑀟𑀓𑀁 𑀆𑀤𑀸𑀬 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀽𑀯𑀁 𑀓𑀢𑁆𑀯𑀸 𑀅𑀗𑁆𑀕𑀸𑀭𑁂𑀲𑀼 𑀧𑀘𑀺𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀢𑀺𑀢𑁆𑀣𑀫𑀕𑁆𑀕𑁂 𑀔𑀸𑀤𑀺𑀲𑁆𑀲𑀸𑀫𑀻𑀢𑀺 𑀖𑀝𑀁 𑀆𑀤𑀸𑀬 𑀢𑀺𑀢𑁆𑀣𑀸𑀪𑀺𑀫𑀼𑀔𑀻 𑀧𑀸𑀬𑀸𑀲𑀺. 𑀲𑀢𑁆𑀣𑀸𑀧𑀺 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀁 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀲𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀲𑀢𑁆𑀣𑀭𑀺 𑀤𑀺𑀝𑁆𑀞𑁂𑀧𑀺 𑀫𑀫 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺, 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀲𑀢𑁆𑀣𑀸𑀭𑀁 𑀦 𑀧𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀅𑀢𑁆𑀣𑀺, 𑀲𑀢𑁆𑀣𑀸 𑀘 𑀲𑀫𑁆𑀫𑀼𑀔𑀻𑀪𑀽𑀢𑁄. 𑀲𑀘𑁂 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬, 𑀤𑀤𑁂𑀬𑁆𑀬𑀸𑀳𑀁 𑀇𑀫𑀁 𑀧𑀽𑀯’’𑀦𑁆𑀢𑀺 𑀖𑀝𑀁 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀮𑀽𑀔𑀁 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀫𑀫 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀁 𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀧𑀽𑀯𑀁 𑀕𑀡𑁆𑀳𑀺. 𑀧𑀼𑀡𑁆𑀡𑀸𑀧𑀺 𑀢𑀁 𑀲𑀢𑁆𑀣𑀼 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀯 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑁄𑀬𑁂𑀯 𑀫𑁂 𑀲𑀫𑀺𑀚𑁆𑀛𑀢𑀽’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀞𑀺𑀢𑀓𑁄𑀯 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑀧𑀼𑀡𑁆𑀡𑀸𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀜𑁆𑀘𑀸𑀧𑀺 𑀫𑁂 𑀲𑀢𑁆𑀣𑀸 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀽𑀯𑀁 𑀕𑀡𑁆𑀳𑀺, 𑀦 𑀧𑀦𑀺𑀤𑀁 𑀔𑀸𑀤𑀺𑀲𑁆𑀲𑀢𑀺. 𑀅𑀤𑁆𑀥𑀸 𑀧𑀼𑀭𑀢𑁄 𑀓𑀸𑀓𑀲𑁆𑀲 𑀯𑀸 𑀲𑀼𑀦𑀔𑀲𑁆𑀲 𑀯𑀸 𑀤𑀢𑁆𑀯𑀸 𑀭𑀜𑁆𑀜𑁄 𑀯𑀸 𑀭𑀸𑀚𑀧𑀼𑀢𑁆𑀢𑀲𑁆𑀲 𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸𑀧𑀺 ‘‘𑀓𑀺𑀁 𑀦𑀼 𑀔𑁄 𑀏𑀲𑀸 𑀘𑀺𑀦𑁆𑀢𑁂𑀲𑀻’’𑀢𑀺 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀢𑁆𑀣𑀸 𑀩𑀳𑀺𑀦𑀕𑀭𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀤𑁂𑀯𑀢𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀧𑁆𑀧𑀦𑀓𑀁 𑀑𑀚𑀁 𑀫𑀥𑀼𑀧𑀝𑀮𑀁 𑀯𑀺𑀬 𑀧𑀻𑀴𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼. 𑀧𑀼𑀡𑁆𑀡𑀸 𑀘 𑀑𑀮𑁄𑀓𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀣𑁂𑀭𑁄 𑀉𑀤𑀓𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀼𑀡𑁆𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀢𑁆𑀯𑀁 𑀧𑀼𑀡𑁆𑀡𑁂 𑀫𑀫 𑀲𑀸𑀯𑀓𑁂 𑀧𑀭𑀺𑀪𑀯𑀲𑀻’’𑀢𑀺 𑀆𑀳. 𑀦 𑀧𑀭𑀺𑀪𑀯𑀸𑀫𑀺, 𑀪𑀦𑁆𑀢𑁂𑀢𑀺. 𑀅𑀣 𑀢𑀬𑀸 𑀫𑀫 𑀲𑀸𑀯𑀓𑁂 𑀑𑀮𑁄𑀓𑁂𑀢𑁆𑀯𑀸 𑀓𑀺𑀁 𑀓𑀣𑀺𑀢𑀦𑁆𑀢𑀺? ‘‘𑀅𑀳𑀁 𑀢𑀸𑀯 𑀇𑀫𑀺𑀦𑀸 𑀤𑀼𑀓𑁆𑀔𑀼𑀧𑀤𑁆𑀤𑀯𑁂𑀦 𑀦𑀺𑀤𑁆𑀤𑀁 𑀦 𑀉𑀧𑁂𑀫𑀺, 𑀪𑀤𑁆𑀤𑀦𑁆𑀢𑀸 𑀓𑀺𑀫𑀢𑁆𑀣𑀁 𑀦𑀺𑀤𑁆𑀤𑀁 𑀦 𑀉𑀧𑁂𑀦𑁆𑀢𑀺, 𑀅𑀤𑁆𑀥𑀸 𑀓𑀲𑁆𑀲𑀘𑀺 𑀅𑀨𑀸𑀲𑀼𑀓𑀁 𑀯𑀸 𑀪𑀯𑀺𑀲𑁆𑀲𑀢𑀺, 𑀤𑀻𑀖𑀚𑀸𑀢𑀺𑀓𑁂𑀦 𑀯𑀸 𑀉𑀧𑀤𑁆𑀤𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑀁 𑀫𑀬𑀸, 𑀪𑀦𑁆𑀢𑁂, 𑀘𑀺𑀦𑁆𑀢𑀺𑀢𑀦𑁆𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀧𑀼𑀡𑁆𑀡𑁂 𑀢𑁆𑀯𑀁 𑀦 𑀢𑀸𑀯 𑀤𑀼𑀓𑁆𑀔𑀼𑀧𑀤𑁆𑀤𑀯𑁂𑀦 𑀦𑀺𑀤𑁆𑀤𑀸𑀬𑀲𑀺, 𑀫𑀫 𑀲𑀸𑀯𑀓𑀸 𑀲𑀤𑀸 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑀢𑀸𑀬 𑀦 𑀦𑀺𑀤𑁆𑀤𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁨𑁬. ‘‘𑀲𑀤𑀸 𑀚𑀸𑀕𑀭𑀫𑀸𑀦𑀸𑀦𑀁, 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀁;

𑀦𑀺𑀩𑁆𑀩𑀸𑀦𑀁 𑀅𑀥𑀺𑀫𑀼𑀢𑁆𑀢𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸’’𑀢𑀺.

𑀢𑀢𑁆𑀣 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀦𑁆𑀢𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀫𑀸𑀦𑀸𑀦𑀁. 𑀦𑀺𑀩𑁆𑀩𑀸𑀦𑀁 𑀅𑀥𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀚𑁆𑀛𑀸𑀲𑀬𑀸𑀦𑀁. 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀭𑀽𑀧𑀸𑀦𑀁 𑀲𑀩𑁆𑀩𑁂𑀧𑀺 𑀆𑀲𑀯𑀸 𑀅𑀢𑁆𑀣𑀁 𑀯𑀺𑀦𑀸𑀲𑀁 𑀦𑀢𑁆𑀣𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀬𑀣𑀸𑀞𑀺𑀢𑀸 𑀧𑀼𑀡𑁆𑀡𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀢𑁆𑀣𑀸 𑀓𑀼𑀡𑁆𑀟𑀓𑀅𑀗𑁆𑀕𑀸𑀭𑀧𑀽𑀯𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀤𑀼𑀓𑁆𑀓𑀭𑀁, 𑀆𑀯𑀼𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀢𑀁 𑀧𑀼𑀡𑁆𑀡𑀸𑀬 𑀤𑀺𑀦𑁆𑀦𑁂𑀦 𑀓𑀼𑀡𑁆𑀟𑀓𑀅𑀗𑁆𑀕𑀸𑀭𑀧𑀽𑀯𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂𑀦𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑀬𑀸 𑀇𑀫𑀸𑀬 𑀤𑀺𑀦𑁆𑀦𑀓𑀼𑀡𑁆𑀟𑀓𑀁 𑀧𑀭𑀺𑀪𑀼𑀢𑁆𑀢𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀪𑀼𑀢𑁆𑀯𑀸 𑀢𑀺𑀡𑀧𑀭𑀺𑀖𑀸𑀲𑀁, 𑀪𑀼𑀢𑁆𑀯𑀸 𑀆𑀘𑀸𑀫𑀓𑀼𑀡𑁆𑀟𑀓𑀁;

𑀏𑀢𑀁 𑀢𑁂 𑀪𑁄𑀚𑀦𑀁 𑀆𑀲𑀺, 𑀓𑀲𑁆𑀫𑀸 𑀤𑀸𑀦𑀺 𑀦 𑀪𑀼𑀜𑁆𑀚𑀲𑀺.

‘‘𑀬𑀢𑁆𑀣 𑀧𑁄𑀲𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀩𑀳𑀼𑀁 𑀢𑀢𑁆𑀣 𑀫𑀳𑀸𑀩𑁆𑀭𑀳𑁆𑀫𑁂, 𑀅𑀧𑀺 𑀆𑀘𑀸𑀫𑀓𑀼𑀡𑁆𑀟𑀓𑀁.

‘‘𑀢𑁆𑀯𑀜𑁆𑀘 𑀔𑁄 𑀫𑀁 𑀧𑀚𑀸𑀦𑀸𑀲𑀺, 𑀬𑀸𑀤𑀺𑀲𑀸𑀬𑀁 𑀳𑀬𑀼𑀢𑁆𑀢𑀫𑁄;

𑀚𑀸𑀦𑀦𑁆𑀢𑁄 𑀚𑀸𑀦𑀫𑀸𑀕𑀫𑁆𑀫, 𑀦 𑀢𑁂 𑀪𑀓𑁆𑀔𑀸𑀫𑀺 𑀓𑀼𑀡𑁆𑀟𑀓’’𑀦𑁆𑀢𑀺. (𑀚𑀸. 𑁧.𑁩.𑁧𑁦-𑁧𑁨) 𑁋

𑀇𑀫𑀁 𑀓𑀼𑀡𑁆𑀟𑀓𑀲𑀺𑀦𑁆𑀥𑀯𑀧𑁄𑀢𑀓𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺.

𑀧𑀼𑀡𑁆𑀡𑀤𑀸𑀲𑀻𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀅𑀢𑀼𑀮𑀉𑀧𑀸𑀲𑀓𑀯𑀢𑁆𑀣𑀼

𑀧𑁄𑀭𑀸𑀡𑀫𑁂𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑀼𑀮𑀁 𑀦𑀸𑀫 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀳𑀺 𑀲𑀸𑀯𑀢𑁆𑀣𑀺𑀯𑀸𑀲𑀻 𑀉𑀧𑀸𑀲𑀓𑁄 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑁄 𑀏𑀓𑀤𑀺𑀯𑀲𑀁 𑀢𑁂 𑀉𑀧𑀸𑀲𑀓𑁂 𑀆𑀤𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀭𑁂𑀯𑀢𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀧𑀦𑀸𑀬𑀲𑁆𑀫𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀲𑀻𑀳𑁄 𑀯𑀺𑀬 𑀏𑀓𑀘𑀸𑀭𑁄, 𑀢𑀲𑁆𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺. 𑀲𑁄 ‘‘𑀅𑀬𑀁 𑀣𑁂𑀭𑁄 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀻’’𑀢𑀺 𑀓𑀼𑀤𑁆𑀥𑁄 𑀉𑀝𑁆𑀞𑀸𑀬 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀣𑁂𑀭𑁂𑀦 ‘‘𑀓𑁂𑀦𑀢𑁆𑀣𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁, 𑀪𑀦𑁆𑀢𑁂, 𑀇𑀫𑁂 𑀉𑀧𑀸𑀲𑀓𑁂 𑀆𑀤𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀭𑁂𑀯𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀁, 𑀢𑀲𑁆𑀲 𑀫𑁂 𑀣𑁂𑀭𑁄 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀲𑁆𑀯𑀸𑀳𑀁 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀇𑀥𑀸𑀕𑀢𑁄, 𑀥𑀫𑁆𑀫𑀁 𑀫𑁂 𑀓𑀣𑁂𑀣𑀸’’𑀢𑀺 𑀆𑀳. 𑀅𑀣 𑀣𑁂𑀭𑁄 ‘‘𑀢𑁂𑀦 𑀳𑀺 𑀉𑀧𑀸𑀲𑀓𑀸 𑀦𑀺𑀲𑀻𑀤𑀣𑀸’’𑀢𑀺 𑀯𑀢𑁆𑀯𑀸 𑀩𑀳𑀼𑀓𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀉𑀧𑀸𑀲𑀓𑁄𑀧𑀺 ‘‘𑀅𑀪𑀺𑀥𑀫𑁆𑀫𑀓𑀣𑀸 𑀦𑀸𑀫 𑀅𑀢𑀺𑀲𑀡𑁆𑀳𑀸, 𑀣𑁂𑀭𑁄 𑀩𑀳𑀼𑀁 𑀅𑀪𑀺𑀥𑀫𑁆𑀫𑀫𑁂𑀯 𑀓𑀣𑁂𑀲𑀺, 𑀅𑀫𑁆𑀳𑀸𑀓𑀁 𑀇𑀫𑀺𑀦𑀸 𑀓𑁄 𑀅𑀢𑁆𑀣𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀧𑀭𑀺𑀲𑀁 𑀆𑀤𑀸𑀬 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀣𑁂𑀭𑁂𑀦𑀸𑀧𑀺 ‘‘𑀓𑀺𑀁 𑀉𑀧𑀸𑀲𑀓𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀫𑀬𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀭𑁂𑀯𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀮𑀸𑀧𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀓𑀼𑀤𑁆𑀥𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀺𑀫𑁆𑀳𑀸, 𑀲𑁄𑀧𑀺 𑀦𑁄 𑀅𑀢𑀺𑀲𑀡𑁆𑀳𑀁 𑀩𑀳𑀼𑀁 𑀅𑀪𑀺𑀥𑀫𑁆𑀫𑀫𑁂𑀯 𑀓𑀣𑁂𑀲𑀺, ‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀓𑁄 𑀅𑀢𑁆𑀣𑁄’𑀢𑀺 𑀏𑀢𑀲𑁆𑀲𑀸𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀇𑀥𑀸𑀕𑀫𑀺𑀫𑁆𑀳𑀸, 𑀓𑀣𑁂𑀳𑀺 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀓𑀣’’𑀦𑁆𑀢𑀺. 𑀢𑁂𑀦 𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀣𑀸𑀢𑀺 𑀣𑁂𑀭𑁄 𑀢𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀅𑀧𑁆𑀧𑀓𑀫𑁂𑀯 𑀥𑀫𑁆𑀫𑀁 𑀓𑀣𑁂𑀲𑀺. 𑀢𑁂 𑀣𑁂𑀭𑀲𑁆𑀲𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀣 𑀦𑁂 𑀲𑀢𑁆𑀣𑀸 𑀆𑀳 𑁋 ‘‘𑀓𑀲𑁆𑀫𑀸 𑀉𑀧𑀸𑀲𑀓𑀸 𑀆𑀕𑀢𑀢𑁆𑀣𑀸’’𑀢𑀺? ‘‘𑀥𑀫𑁆𑀫𑀲𑁆𑀲𑀯𑀦𑀸𑀬, 𑀪𑀦𑁆𑀢𑁂’’𑀢𑀺. ‘‘𑀲𑀼𑀢𑁄 𑀧𑀦 𑀯𑁄 𑀥𑀫𑁆𑀫𑁄’’𑀢𑀺? ‘‘𑀪𑀦𑁆𑀢𑁂, 𑀫𑀬𑀁 𑀆𑀤𑀺𑀢𑁄 𑀭𑁂𑀯𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸, 𑀲𑁄 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸, 𑀢𑁂𑀦 𑀦𑁄 𑀩𑀳𑀼 𑀅𑀪𑀺𑀥𑀫𑁆𑀫𑁄 𑀓𑀣𑀺𑀢𑁄, 𑀢𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸, 𑀢𑁂𑀦 𑀦𑁄 𑀅𑀧𑁆𑀧𑀫𑀢𑁆𑀢𑀓𑁄𑀯 𑀥𑀫𑁆𑀫𑁄 𑀓𑀣𑀺𑀢𑁄, 𑀢𑀲𑁆𑀲𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀇𑀥𑀸𑀕𑀢𑀫𑁆𑀳𑀸’’𑀢𑀺.

𑀲𑀢𑁆𑀣𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸, ‘‘𑀅𑀢𑀼𑀮, 𑀧𑁄𑀭𑀸𑀡𑀢𑁄 𑀧𑀝𑁆𑀞𑀸𑀬 𑀆𑀘𑀺𑀡𑁆𑀡𑀫𑁂𑀯𑁂𑀢𑀁, 𑀢𑀼𑀡𑁆𑀳𑀻𑀪𑀽𑀢𑀫𑁆𑀧𑀺 𑀩𑀳𑀼𑀓𑀣𑀫𑁆𑀧𑀺 𑀫𑀦𑁆𑀤𑀓𑀣𑀫𑁆𑀧𑀺 𑀕𑀭𑀳𑀦𑁆𑀢𑀺𑀬𑁂𑀯. 𑀏𑀓𑀦𑁆𑀢𑀁 𑀕𑀭𑀳𑀺𑀢𑀩𑁆𑀩𑁄𑀬𑁂𑀯 𑀯𑀸 𑀳𑀺 𑀧𑀲𑀁𑀲𑀺𑀢𑀩𑁆𑀩𑁄𑀬𑁂𑀯 𑀯𑀸 𑀦𑀢𑁆𑀣𑀺. 𑀭𑀸𑀚𑀸𑀦𑁄𑀧𑀺 𑀏𑀓𑀘𑁆𑀘𑁂 𑀦𑀺𑀦𑁆𑀤𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀲𑀁𑀲𑀦𑁆𑀢𑀺. 𑀫𑀳𑀸𑀧𑀣𑀯𑀺𑀫𑁆𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀧𑀺 𑀆𑀓𑀸𑀲𑀸𑀤𑀬𑁄𑀧𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀫𑁆𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀓𑀘𑁆𑀘𑁂 𑀕𑀭𑀳𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀲𑀁𑀲𑀦𑁆𑀢𑀺. 𑀅𑀦𑁆𑀥𑀩𑀸𑀮𑀸𑀦𑀜𑁆𑀳𑀺 𑀦𑀺𑀦𑁆𑀤𑀸 𑀯𑀸 𑀧𑀲𑀁𑀲𑀸 𑀯𑀸 𑀅𑀧𑁆𑀧𑀫𑀸𑀡𑀸, 𑀧𑀡𑁆𑀟𑀺𑀢𑁂𑀦 𑀧𑀦 𑀫𑁂𑀥𑀸𑀯𑀺𑀦𑀸 𑀦𑀺𑀦𑁆𑀤𑀺𑀢𑁄 𑀦𑀺𑀦𑁆𑀤𑀺𑀢𑁄 𑀦𑀸𑀫, 𑀧𑀲𑀁𑀲𑀺𑀢𑁄 𑀘 𑀧𑀲𑀁𑀲𑀺𑀢𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨𑁭. ‘‘𑀧𑁄𑀭𑀸𑀡𑀫𑁂𑀢𑀁 𑀅𑀢𑀼𑀮, 𑀦𑁂𑀢𑀁 𑀅𑀚𑁆𑀚𑀢𑀦𑀸𑀫𑀺𑀯;

𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀻𑀦𑀁, 𑀦𑀺𑀦𑁆𑀤𑀦𑁆𑀢𑀺 𑀩𑀳𑀼𑀪𑀸𑀡𑀺𑀦𑀁;

𑀫𑀺𑀢𑀪𑀸𑀡𑀺𑀫𑁆𑀧𑀺 𑀦𑀺𑀦𑁆𑀤𑀦𑁆𑀢𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀺𑀦𑁆𑀤𑀺𑀢𑁄.

𑁨𑁨𑁮. ‘‘𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺, 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺;

𑀏𑀓𑀦𑁆𑀢𑀁 𑀦𑀺𑀦𑁆𑀤𑀺𑀢𑁄 𑀧𑁄𑀲𑁄, 𑀏𑀓𑀦𑁆𑀢𑀁 𑀯𑀸 𑀧𑀲𑀁𑀲𑀺𑀢𑁄.

𑁨𑁨𑁯. ‘‘𑀬𑀁 𑀘𑁂 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺, 𑀅𑀦𑀼𑀯𑀺𑀘𑁆𑀘 𑀲𑀼𑀯𑁂 𑀲𑀼𑀯𑁂;

𑀅𑀘𑁆𑀙𑀺𑀤𑁆𑀤𑀯𑀼𑀢𑁆𑀢𑀺𑀁 𑀫𑁂𑀥𑀸𑀯𑀺𑀁, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑀁.

𑁨𑁩𑁦. ‘‘𑀦𑀺𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺;

𑀤𑁂𑀯𑀸𑀧𑀺 𑀦𑀁 𑀧𑀲𑀁𑀲𑀦𑁆𑀢𑀺, 𑀩𑁆𑀭𑀳𑁆𑀫𑀼𑀦𑀸𑀧𑀺 𑀧𑀲𑀁𑀲𑀺𑀢𑁄’’𑀢𑀺.

𑀢𑀢𑁆𑀣 𑀧𑁄𑀭𑀸𑀡𑀫𑁂𑀢𑀦𑁆𑀢𑀺 𑀧𑀼𑀭𑀸𑀡𑀓𑀁 𑀏𑀢𑀁. 𑀅𑀢𑀼𑀮𑀸𑀢𑀺 𑀢𑀁 𑀉𑀧𑀸𑀲𑀓𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀦𑁂𑀢𑀁 𑀅𑀚𑁆𑀚𑀢𑀦𑀸𑀫𑀺𑀯𑀸𑀢𑀺 𑀇𑀤𑀁 𑀦𑀺𑀦𑁆𑀤𑀦𑀁 𑀯𑀸 𑀧𑀲𑀁𑀲𑀦𑀁 𑀯𑀸 𑀅𑀚𑁆𑀚𑀢𑀦𑀁 𑀅𑀥𑀼𑀦𑀸 𑀉𑀧𑁆𑀧𑀦𑁆𑀦𑀁 𑀯𑀺𑀬 𑀦 𑀳𑁄𑀢𑀺. 𑀢𑀼𑀡𑁆𑀳𑀺𑀫𑀸𑀲𑀻𑀦𑀦𑁆𑀢𑀺 𑀓𑀺𑀁 𑀏𑀲𑁄 𑀫𑀽𑀕𑁄 𑀯𑀺𑀬 𑀩𑀥𑀺𑀭𑁄 𑀯𑀺𑀬 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀢𑀺 𑀦𑀺𑀦𑁆𑀤𑀦𑁆𑀢𑀺. 𑀩𑀳𑀼𑀪𑀸𑀡𑀺𑀦𑀦𑁆𑀢𑀺 𑀓𑀺𑀁 𑀏𑀲 𑀯𑀸𑀢𑀸𑀳𑀢𑀢𑀸𑀮𑀧𑀡𑁆𑀡𑀁 𑀯𑀺𑀬 𑀢𑀝𑀢𑀝𑀸𑀬𑀢𑀺, 𑀇𑀫𑀲𑁆𑀲 𑀓𑀣𑀸𑀧𑀭𑀺𑀬𑀦𑁆𑀢𑁄𑀬𑁂𑀯 𑀦𑀢𑁆𑀣𑀻𑀢𑀺 𑀦𑀺𑀦𑁆𑀤𑀦𑁆𑀢𑀺. 𑀫𑀺𑀢𑀪𑀸𑀡𑀺𑀫𑁆𑀧𑀻𑀢𑀺 𑀓𑀺𑀁 𑀏𑀲 𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀁 𑀯𑀺𑀬 𑀅𑀢𑁆𑀢𑀦𑁄 𑀯𑀘𑀦𑀁 𑀫𑀜𑁆𑀜𑀫𑀸𑀦𑁄 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀦𑀺𑀦𑁆𑀤𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀦𑀺𑀦𑁆𑀤𑀺𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦 𑀘𑀸𑀳𑀽𑀢𑀺 𑀅𑀢𑀻𑀢𑁂𑀧𑀺 𑀦𑀸𑀳𑁄𑀲𑀺, 𑀅𑀦𑀸𑀕𑀢𑁂𑀧𑀺 𑀦 𑀪𑀯𑀺𑀲𑁆𑀲𑀢𑀺.

𑀬𑀁 𑀘𑁂 𑀯𑀺𑀜𑁆𑀜𑀽𑀢𑀺 𑀩𑀸𑀮𑀸𑀦𑀁 𑀦𑀺𑀦𑁆𑀤𑀸 𑀯𑀸 𑀧𑀲𑀁𑀲𑀸 𑀯𑀸 𑀅𑀧𑁆𑀧𑀫𑀸𑀡𑀸, 𑀬𑀁 𑀧𑀦 𑀧𑀡𑁆𑀟𑀺𑀢𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀦𑀼𑀯𑀺𑀘𑁆𑀘 𑀦𑀺𑀦𑁆𑀤𑀓𑀸𑀭𑀡𑀁 𑀯𑀸 𑀧𑀲𑀁𑀲𑀓𑀸𑀭𑀡𑀁 𑀯𑀸 𑀚𑀸𑀦𑀺𑀢𑁆𑀯𑀸 𑀧𑀲𑀁𑀲𑀦𑁆𑀢𑀺, 𑀅𑀘𑁆𑀙𑀺𑀤𑁆𑀤𑀸𑀬 𑀯𑀸 𑀲𑀺𑀓𑁆𑀔𑀸𑀬 𑀅𑀘𑁆𑀙𑀺𑀤𑁆𑀤𑀸𑀬 𑀯𑀸 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀘𑁆𑀙𑀺𑀤𑁆𑀤𑀯𑀼𑀢𑁆𑀢𑀺𑀁 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑁂𑀥𑀸𑀯𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀘𑁂𑀯 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑀁 𑀧𑀲𑀁𑀲𑀦𑁆𑀢𑀺, 𑀢𑀁 𑀲𑀼𑀯𑀡𑁆𑀡𑀤𑁄𑀲𑀯𑀺𑀭𑀳𑀺𑀢𑀁 𑀖𑀝𑁆𑀝𑀦𑀫𑀚𑁆𑀚𑀦𑀓𑁆𑀔𑀫𑀁 𑀚𑀫𑁆𑀩𑁄𑀦𑀤𑀦𑀺𑀓𑁆𑀔𑀁 𑀯𑀺𑀬 𑀓𑁄 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀸𑀧𑀻𑀢𑀺 𑀤𑁂𑀯𑀢𑀸𑀧𑀺 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸𑀧𑀺 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀝𑁆𑀞𑀸𑀬 𑀣𑁄𑀫𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀩𑁆𑀭𑀳𑁆𑀫𑀼𑀦𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀫𑀦𑀼𑀲𑁆𑀲𑁂𑀳𑀺, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑀸𑀧𑀺 𑀏𑀲 𑀧𑀲𑀁𑀲𑀺𑀢𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀉𑀧𑀸𑀲𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀅𑀢𑀼𑀮𑀉𑀧𑀸𑀲𑀓𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼

𑀓𑀸𑀬𑀧𑁆𑀧𑀓𑁄𑀧𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑁂𑀲𑀁 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀬𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀓𑀝𑁆𑀞𑀧𑀸𑀤𑀼𑀓𑀸 𑀆𑀭𑀼𑀬𑁆𑀳 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀘𑀗𑁆𑀓𑀫𑀦𑁆𑀢𑀸𑀦𑀁 𑀔𑀝𑀔𑀝𑀸𑀢𑀺𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀧𑀸𑀤𑀼𑀓𑀸 𑀆𑀭𑀼𑀬𑁆𑀳 𑀘𑀗𑁆𑀓𑀫𑀦𑁆𑀢𑀸𑀦𑀁 𑀔𑀝𑀔𑀝𑀲𑀤𑁆𑀤𑁄’’𑀢𑀺 𑀲𑀼𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀓𑀸𑀬𑀸𑀤𑀻𑀦𑀺 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩𑁧. ‘‘𑀓𑀸𑀬𑀧𑁆𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀲𑀺𑀬𑀸;

𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁨. ‘‘𑀯𑀘𑀻𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀲𑀺𑀬𑀸;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁩. ‘‘𑀫𑀦𑁄𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀫𑀦𑀲𑀸 𑀲𑀁𑀯𑀼𑀢𑁄 𑀲𑀺𑀬𑀸;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁪. ‘‘𑀓𑀸𑀬𑁂𑀦 𑀲𑀁𑀯𑀼𑀢𑀸 𑀥𑀻𑀭𑀸, 𑀅𑀣𑁄 𑀯𑀸𑀘𑀸𑀬 𑀲𑀁𑀯𑀼𑀢𑀸;

𑀫𑀦𑀲𑀸 𑀲𑀁𑀯𑀼𑀢𑀸 𑀥𑀻𑀭𑀸, 𑀢𑁂 𑀯𑁂 𑀲𑀼𑀧𑀭𑀺𑀲𑀁𑀯𑀼𑀢𑀸’’𑀢𑀺.

𑀢𑀢𑁆𑀣 𑀓𑀸𑀬𑀧𑁆𑀧𑀓𑁄𑀧𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀭𑀓𑁆𑀔𑁂𑀬𑁆𑀬. 𑀓𑀸𑀬𑁂𑀦 𑀲𑀁𑀯𑀼𑀢𑁄𑀢𑀺 𑀓𑀸𑀬𑀤𑁆𑀯𑀸𑀭𑁂 𑀤𑀼𑀘𑁆𑀘𑀭𑀺𑀢𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀲𑀁𑀯𑀼𑀢𑁄 𑀧𑀺𑀳𑀺𑀢𑀤𑁆𑀯𑀸𑀭𑁄 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸 𑀓𑀸𑀬𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑁄 𑀉𑀪𑀬𑀫𑁆𑀧𑁂𑀢𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑁂𑀢𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑁂𑀦 𑀲𑀁𑀯𑀼𑀢𑀸 𑀥𑀻𑀭𑀸𑀢𑀺 𑀬𑁂 𑀧𑀡𑁆𑀟𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀸 𑀓𑀸𑀬𑁂𑀦, 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀸 𑀯𑀸𑀘𑀸𑀬, 𑀅𑀪𑀺𑀚𑁆𑀛𑀸𑀤𑀻𑀦𑀺 𑀅𑀲𑀫𑀼𑀝𑁆𑀞𑀧𑁂𑀦𑁆𑀢𑀸 𑀫𑀦𑀲𑀸 𑀲𑀁𑀯𑀼𑀢𑀸, 𑀢𑁂 𑀇𑀥 𑀮𑁄𑀓𑀲𑁆𑀫𑀺𑀁 𑀲𑀼𑀲𑀁𑀯𑀼𑀢𑀸 𑀲𑀼𑀭𑀓𑁆𑀔𑀺𑀢𑀸 𑀲𑀼𑀕𑁄𑀧𑀺𑀢𑀸 𑀲𑀼𑀧𑀺𑀳𑀺𑀢𑀤𑁆𑀯𑀸𑀭𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀓𑁄𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑁄 𑀯𑀕𑁆𑀕𑁄.