𑁧𑁬. 𑀧𑀺𑀬𑀯𑀕𑁆𑀕𑁄

𑁧. 𑀢𑀬𑁄𑀚𑀦𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑀅𑀬𑁄𑀕𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀬𑁄 𑀧𑀩𑁆𑀩𑀚𑀺𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀫𑀸𑀢𑀸𑀧𑀺𑀢𑀽𑀦𑀁 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺 𑀧𑀺𑀬𑁄 𑀫𑀦𑀸𑀧𑁄. 𑀲𑁄 𑀏𑀓𑀤𑀺𑀯𑀲𑀁 𑀕𑁂𑀳𑁂 𑀦𑀺𑀫𑀦𑁆𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀸𑀦𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂 𑀦𑀸𑀦𑀼𑀚𑀸𑀦𑀺𑀁𑀲𑀼. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀩𑀳𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀧𑀺𑀢𑀸 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁄 ‘‘𑀇𑀫𑀁 𑀭𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀫𑀸𑀢𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺, 𑀫𑀸𑀢𑀸 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀻 𑀧𑀺𑀢𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀧𑀺𑀢𑀭𑀺 𑀩𑀳𑀺 𑀕𑀢𑁂 𑀫𑀸𑀢𑀸 ‘‘𑀧𑀼𑀢𑁆𑀢𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀏𑀓𑀁 𑀧𑀸𑀤𑁂𑀳𑀺 𑀉𑀧𑁆𑀧𑀻𑀴𑁂𑀢𑁆𑀯𑀸 𑀙𑀫𑀸𑀬 𑀦𑀺𑀲𑀺𑀦𑁆𑀦𑀸 𑀲𑀼𑀢𑁆𑀢𑀁 𑀓𑀦𑁆𑀢𑀢𑀺. 𑀲𑁄 ‘‘𑀇𑀫𑀁 𑀯𑀜𑁆𑀘𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀫, 𑀣𑁄𑀓𑀁 𑀢𑀸𑀯 𑀅𑀧𑁂𑀳𑀺, 𑀲𑀭𑀻𑀭𑀯𑀮𑀜𑁆𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀬 𑀧𑀸𑀤𑁂 𑀲𑀫𑀺𑀜𑁆𑀚𑀺𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀕𑁂𑀦 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂’’𑀢𑀺 𑀬𑀸𑀘𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺.

𑀅𑀣𑀲𑁆𑀲 𑀧𑀺𑀢𑀸 𑀆𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀫𑁂 𑀧𑀼𑀢𑁆𑀢𑁄’’𑀢𑀺? ‘‘𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀅𑀳𑁄𑀲𑀻’’𑀢𑀺. 𑀲𑁄 ‘‘𑀓𑀳𑀁 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀅𑀤𑀺𑀲𑁆𑀯𑀸 ‘‘𑀯𑀺𑀳𑀸𑀭𑀁 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸, ‘‘𑀢𑀸𑀢, 𑀓𑀺𑀁 𑀫𑀁 𑀦𑀸𑀲𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀇𑀤𑀸𑀦𑀺 𑀕𑁂𑀳𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀬𑀫𑁆𑀧𑀺 𑀪𑀺𑀓𑁆𑀔𑀽 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑁄 𑀘 𑀧𑀢𑀺 𑀘 𑀘𑀺𑀭𑀸𑀬𑀦𑁆𑀢𑀺, 𑀓𑀘𑁆𑀘𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑀸’’𑀢𑀺 𑀢𑁂 𑀑𑀮𑁄𑀓𑁂𑀦𑁆𑀢𑀻 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀫𑀫 𑀕𑁂𑀳𑁂𑀦 𑀓𑁄 𑀅𑀢𑁆𑀣𑁄’’𑀢𑀺 𑀲𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀯𑀺𑀳𑀸𑀭𑁂𑀧𑀺 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑁂𑀧𑀺 𑀏𑀓𑀢𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀲𑀮𑁆𑀮𑀧𑀦𑁆𑀢𑀸 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀢𑁂𑀦 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀽𑀦𑀺𑀬𑁄𑀧𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀦𑁂𑀲𑀁 𑀓𑀺𑀭𑀺𑀬𑀁 𑀲𑀢𑁆𑀣𑀼𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀏𑀯𑀁 𑀓𑀭𑁄𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀣? 𑀦 𑀳𑀺 𑀏𑀲 𑀧𑀩𑁆𑀩𑀚𑀺𑀢𑀸𑀦𑀁 𑀬𑁄𑀕𑁄’’𑀢𑀺. ‘‘𑀪𑀦𑁆𑀢𑁂, 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺. ‘‘𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀓𑀭𑀡𑀁 𑀅𑀬𑀼𑀢𑁆𑀢𑀁. 𑀧𑀺𑀬𑀸𑀦𑀜𑁆𑀳𑀺 𑀅𑀤𑀲𑁆𑀲𑀦𑀁, 𑀅𑀧𑁆𑀧𑀺𑀬𑀸𑀦𑀜𑁆𑀘 𑀤𑀲𑁆𑀲𑀦𑀁 𑀤𑀼𑀓𑁆𑀔𑀫𑁂𑀯. 𑀢𑀲𑁆𑀫𑀸 𑀲𑀢𑁆𑀢𑁂𑀲𑀼 𑀘 𑀲𑀗𑁆𑀔𑀸𑀭𑁂𑀲𑀼 𑀘 𑀓𑀜𑁆𑀘𑀺 𑀧𑀺𑀬𑀁 𑀯𑀸 𑀅𑀧𑁆𑀧𑀺𑀬𑀁 𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦𑁯. ‘‘𑀅𑀬𑁄𑀕𑁂 𑀬𑀼𑀜𑁆𑀚𑀫𑀢𑁆𑀢𑀸𑀦𑀁, 𑀬𑁄𑀕𑀲𑁆𑀫𑀺𑀜𑁆𑀘 𑀅𑀬𑁄𑀚𑀬𑀁;

𑀅𑀢𑁆𑀣𑀁 𑀳𑀺𑀢𑁆𑀯𑀸 𑀧𑀺𑀬𑀕𑁆𑀕𑀸𑀳𑀻, 𑀧𑀺𑀳𑁂𑀢𑀢𑁆𑀢𑀸𑀦𑀼𑀬𑁄𑀕𑀺𑀦𑀁.

𑁨𑁧𑁦. ‘‘𑀫𑀸 𑀧𑀺𑀬𑁂𑀳𑀺 𑀲𑀫𑀸𑀕𑀜𑁆𑀙𑀺, 𑀅𑀧𑁆𑀧𑀺𑀬𑁂𑀳𑀺 𑀓𑀼𑀤𑀸𑀘𑀦𑀁;

𑀧𑀺𑀬𑀸𑀦𑀁 𑀅𑀤𑀲𑁆𑀲𑀦𑀁 𑀤𑀼𑀓𑁆𑀔𑀁, 𑀅𑀧𑁆𑀧𑀺𑀬𑀸𑀦𑀜𑁆𑀘 𑀤𑀲𑁆𑀲𑀦𑀁.

𑁨𑁧𑁧. ‘‘𑀢𑀲𑁆𑀫𑀸 𑀧𑀺𑀬𑀁 𑀦 𑀓𑀬𑀺𑀭𑀸𑀣, 𑀧𑀺𑀬𑀸𑀧𑀸𑀬𑁄 𑀳𑀺 𑀧𑀸𑀧𑀓𑁄;

𑀕𑀦𑁆𑀣𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀲𑀁 𑀦𑀢𑁆𑀣𑀺 𑀧𑀺𑀬𑀸𑀧𑁆𑀧𑀺𑀬’’𑀦𑁆𑀢𑀺.

𑀢𑀢𑁆𑀣 𑀅𑀬𑁄𑀕𑁂𑀢𑀺 𑀅𑀬𑀼𑀜𑁆𑀚𑀺𑀢𑀩𑁆𑀩𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂. 𑀯𑁂𑀲𑀺𑀬𑀸𑀕𑁄𑀘𑀭𑀸𑀤𑀺𑀪𑁂𑀤𑀲𑁆𑀲 𑀳𑀺 𑀙𑀩𑁆𑀩𑀺𑀥𑀲𑁆𑀲 𑀅𑀕𑁄𑀘𑀭𑀲𑁆𑀲 𑀲𑁂𑀯𑀦𑀁 𑀇𑀥 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫, 𑀢𑀲𑁆𑀫𑀺𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀅𑀢𑁆𑀢𑀸𑀦𑀁 𑀬𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑁄𑀕𑀲𑁆𑀫𑀺𑀦𑁆𑀢𑀺 𑀢𑀩𑁆𑀩𑀺𑀧𑀭𑀻𑀢𑁂 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀅𑀬𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀁 𑀳𑀺𑀢𑁆𑀯𑀸𑀢𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀁 𑀅𑀢𑁆𑀣𑁄 𑀦𑀸𑀫, 𑀢𑀁 𑀅𑀢𑁆𑀣𑀁 𑀳𑀺𑀢𑁆𑀯𑀸. 𑀧𑀺𑀬𑀕𑁆𑀕𑀸𑀳𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀁 𑀧𑀺𑀬𑀫𑁂𑀯 𑀕𑀡𑁆𑀳𑀦𑁆𑀢𑁄. 𑀧𑀺𑀳𑁂𑀢𑀢𑁆𑀢𑀸𑀦𑀼𑀬𑁄𑀕𑀺𑀦𑀦𑁆𑀢𑀺 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀢𑁄 𑀘𑀼𑀢𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸 𑀧𑀘𑁆𑀙𑀸 𑀬𑁂 𑀅𑀢𑁆𑀢𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀲𑀻𑀮𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑀸 𑀲𑀓𑁆𑀓𑀸𑀭𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀧𑀺𑀳𑁂𑀢𑀺, ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀏𑀯𑀭𑀽𑀧𑁄 𑀅𑀲𑁆𑀲’’𑀦𑁆𑀢𑀺 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀫𑀸 𑀧𑀺𑀬𑁂𑀳𑀻𑀢𑀺 𑀧𑀺𑀬𑁂𑀳𑀺 𑀲𑀢𑁆𑀢𑁂𑀳𑀺 𑀯𑀸 𑀲𑀗𑁆𑀔𑀸𑀭𑁂𑀳𑀺 𑀯𑀸 𑀓𑀼𑀤𑀸𑀘𑀦𑀁 𑀏𑀓𑀓𑁆𑀔𑀡𑁂𑀧𑀺 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬, 𑀢𑀣𑀸 𑀅𑀧𑁆𑀧𑀺𑀬𑁂𑀳𑀺. 𑀓𑀺𑀁 𑀓𑀸𑀭𑀡𑀸? 𑀧𑀺𑀬𑀸 𑀦𑀜𑁆𑀳𑀺 𑀯𑀺𑀬𑁄𑀕𑀯𑀲𑁂𑀦 𑀅𑀤𑀲𑁆𑀲𑀦𑀁 𑀅𑀧𑁆𑀧𑀺𑀬𑀸𑀦𑀜𑁆𑀘 𑀉𑀧𑀲𑀗𑁆𑀓𑀫𑀦𑀯𑀲𑁂𑀦 𑀤𑀲𑁆𑀲𑀦𑀁 𑀦𑀸𑀫 𑀤𑀼𑀓𑁆𑀔𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀉𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀸 𑀲𑀗𑁆𑀔𑀸𑀭𑀁 𑀯𑀸 𑀧𑀺𑀬𑀁 𑀦𑀸𑀫 𑀦 𑀓𑀭𑁂𑀬𑁆𑀬. 𑀧𑀺𑀬𑀸𑀧𑀸𑀬𑁄 𑀳𑀻𑀢𑀺 𑀧𑀺𑀬𑁂𑀳𑀺 𑀅𑀧𑀸𑀬𑁄 𑀯𑀺𑀬𑁄𑀕𑁄. 𑀧𑀸𑀧𑀓𑁄𑀢𑀺 𑀮𑀸𑀫𑀓𑁄. 𑀕𑀦𑁆𑀣𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺, 𑀢𑁂𑀲𑀁 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀧𑀳𑀻𑀬𑀢𑀺. 𑀬𑁂𑀲𑀁 𑀅𑀧𑁆𑀧𑀺𑀬𑀁 𑀦𑀢𑁆𑀣𑀺, 𑀢𑁂𑀲𑀁 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀳𑀻𑀦𑁂𑀲𑀼 𑀲𑁂𑀲𑀕𑀦𑁆𑀣𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀧𑀺𑀬𑀁 𑀯𑀸 𑀅𑀧𑁆𑀧𑀺𑀬𑀁 𑀯𑀸 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀢𑁂𑀦 𑀧𑀦 𑀢𑀬𑁄 𑀚𑀦𑀸 ‘‘𑀫𑀬𑀁 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑁂𑀳𑀫𑁂𑀯 𑀅𑀕𑀫𑀺𑀁𑀲𑀽𑀢𑀺.

𑀢𑀬𑁄𑀚𑀦𑀧𑀩𑁆𑀩𑀚𑀺𑀢𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀜𑁆𑀜𑀢𑀭𑀓𑀼𑀝𑀼𑀫𑁆𑀩𑀺𑀓𑀯𑀢𑁆𑀣𑀼

𑀧𑀺𑀬𑀢𑁄 𑀚𑀸𑀬𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀳𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀓𑀸𑀮𑀓𑀢𑁂 𑀧𑀼𑀢𑁆𑀢𑀲𑁄𑀓𑀸𑀪𑀺𑀪𑀽𑀢𑁄 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀭𑁄𑀤𑀢𑀺, 𑀧𑀼𑀢𑁆𑀢𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀏𑀓𑀁 𑀧𑀘𑁆𑀙𑀸𑀲𑀫𑀡𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀸𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀢𑁆𑀣𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀕𑁂𑀳𑀫𑀚𑁆𑀛𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄, 𑀉𑀧𑀸𑀲𑀓, 𑀤𑀼𑀓𑁆𑀔𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀧𑀼𑀢𑁆𑀢𑀯𑀺𑀬𑁄𑀕𑀤𑀼𑀓𑁆𑀔𑁂 𑀆𑀭𑁄𑀘𑀺𑀢𑁂, ‘‘𑀉𑀧𑀸𑀲𑀓, 𑀫𑀸 𑀘𑀺𑀦𑁆𑀢𑀬𑀺, 𑀇𑀤𑀁 𑀫𑀭𑀡𑀁 𑀦𑀸𑀫 𑀦 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂, 𑀦 𑀘 𑀏𑀓𑀲𑁆𑀲𑁂𑀯 𑀳𑁄𑀢𑀺, 𑀬𑀸𑀯𑀢𑀸 𑀧𑀦 𑀪𑀯𑀼𑀧𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑁄𑀢𑀺𑀬𑁂𑀯. 𑀏𑀓𑀲𑀗𑁆𑀔𑀸𑀭𑁄𑀧𑀺 𑀦𑀺𑀘𑁆𑀘𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 ‘𑀫𑀭𑀡𑀥𑀫𑁆𑀫𑀁 𑀫𑀢𑀁, 𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀦𑁆𑀦’𑀦𑁆𑀢𑀺 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀦 𑀲𑁄𑀘𑀺𑀢𑀩𑁆𑀩𑀁. 𑀧𑁄𑀭𑀸𑀡𑀧𑀡𑁆𑀟𑀺𑀢𑀸𑀧𑀺 𑀳𑀺 𑀧𑀼𑀢𑁆𑀢𑀲𑁆𑀲 𑀫𑀢𑀓𑀸𑀮𑁂 ‘𑀫𑀭𑀡𑀥𑀫𑁆𑀫𑀁 𑀫𑀢𑀁, 𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀦𑁆𑀦’𑀦𑁆𑀢𑀺 𑀲𑁄𑀓𑀁 𑀅𑀓𑀢𑁆𑀯𑀸 𑀫𑀭𑀡𑀲𑁆𑀲𑀢𑀺𑀫𑁂𑀯 𑀪𑀸𑀯𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁂 𑀏𑀯𑀫𑀓𑀁𑀲𑀼, 𑀓𑀤𑀸 𑀘 𑀅𑀓𑀁𑀲𑀼, 𑀆𑀘𑀺𑀓𑁆𑀔𑀣 𑀫𑁂’’𑀢𑀺 𑀬𑀸𑀘𑀺𑀢𑁄 𑀢𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀦𑀼𑀁;

𑀏𑀯𑀁 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂, 𑀧𑁂𑀢𑁂 𑀓𑀸𑀮𑀓𑀢𑁂 𑀲𑀢𑀺.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. (𑀚𑀸. 𑁧.𑁫.𑁧𑁯-𑁨𑁦) 𑁋

𑀇𑀫𑀁 𑀧𑀜𑁆𑀘𑀓𑀦𑀺𑀧𑀸𑀢𑁂 𑀉𑀭𑀕𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀏𑀯𑀁 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀧𑀺𑀬𑀧𑀼𑀢𑁆𑀢𑁂 𑀓𑀸𑀮𑀓𑀢𑁂 𑀬𑀣𑀸 𑀏𑀢𑀭𑀳𑀺 𑀢𑁆𑀯𑀁 𑀓𑀫𑁆𑀫𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀭𑀸𑀳𑀸𑀭𑁄 𑀭𑁄𑀤𑀦𑁆𑀢𑁄 𑀯𑀺𑀘𑀭𑀲𑀺, 𑀢𑀣𑀸 𑀅𑀯𑀺𑀘𑀭𑀺𑀢𑁆𑀯𑀸 𑀫𑀭𑀡𑀲𑁆𑀲𑀢𑀺𑀪𑀸𑀯𑀦𑀸𑀩𑀮𑁂𑀦 𑀲𑁄𑀓𑀁 𑀅𑀓𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼, 𑀓𑀫𑁆𑀫𑀦𑁆𑀢𑀜𑁆𑀘 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀸 ‘𑀧𑀺𑀬𑀧𑀼𑀢𑁆𑀢𑁄 𑀫𑁂 𑀓𑀸𑀮𑀓𑀢𑁄’𑀢𑀺 𑀫𑀸 𑀘𑀺𑀦𑁆𑀢𑀬𑀺. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀺 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀧𑀺𑀬𑀫𑁂𑀯 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁨. ‘‘𑀧𑀺𑀬𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀧𑀺𑀬𑀢𑁄 𑀚𑀸𑀬𑀢𑀻 𑀪𑀬𑀁;

𑀧𑀺𑀬𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀧𑀺𑀬𑀢𑁄𑀢𑀺 𑀯𑀝𑁆𑀝𑀫𑀽𑀮𑀓𑁄 𑀳𑀺 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀺𑀬𑀫𑁂𑀯 𑀲𑀢𑁆𑀢𑀁 𑀯𑀸 𑀲𑀗𑁆𑀔𑀸𑀭𑀁 𑀯𑀸 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀦 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀉𑀪𑀬𑀫𑁆𑀧𑁂𑀢𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀓𑀼𑀝𑀼𑀫𑁆𑀩𑀺𑀓𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀯𑀺𑀲𑀸𑀔𑀸𑀯𑀢𑁆𑀣𑀼

𑀧𑁂𑀫𑀢𑁄 𑀚𑀸𑀬𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀧𑀼𑀢𑁆𑀢𑀲𑁆𑀲 𑀥𑀻𑀢𑀭𑀁 𑀲𑀼𑀤𑀢𑁆𑀢𑀁 𑀦𑀸𑀫 𑀓𑀼𑀫𑀸𑀭𑀺𑀓𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀕𑁂𑀳𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀭𑁂𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀫𑀓𑀸𑀲𑀺. 𑀲𑀸 𑀢𑀲𑁆𑀲𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀼𑀓𑁆𑀔𑀺𑀦𑀻 𑀤𑀼𑀫𑁆𑀫𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀯𑀺𑀲𑀸𑀔𑁂, 𑀤𑀼𑀓𑁆𑀔𑀺𑀦𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀦𑀺𑀲𑀺𑀦𑁆𑀦𑀸’’𑀢𑀺 𑀆𑀳. 𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀧𑀺𑀬𑀸 𑀫𑁂, 𑀪𑀦𑁆𑀢𑁂, 𑀲𑀸 𑀓𑀼𑀫𑀸𑀭𑀺𑀓𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑀸, 𑀇𑀤𑀸𑀦𑀺 𑀢𑀣𑀸𑀭𑀽𑀧𑀁 𑀦 𑀧𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀺𑀢𑁆𑀢𑀓𑀸 𑀧𑀦, 𑀯𑀺𑀲𑀸𑀔𑁂, 𑀲𑀸𑀯𑀢𑁆𑀣𑀺𑀬𑀁 𑀫𑀦𑀼𑀲𑁆𑀲𑀸’’𑀢𑀺? ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺𑀬𑁂𑀯 𑀫𑁂 𑀓𑀣𑀺𑀢𑀁 𑀲𑀢𑁆𑀢 𑀚𑀦𑀓𑁄𑀝𑀺𑀬𑁄’’𑀢𑀺. ‘‘𑀲𑀘𑁂 𑀧𑀦𑀸𑀬𑀁 𑀏𑀢𑁆𑀢𑀓𑁄 𑀚𑀦𑁄 𑀢𑀯 𑀦𑀢𑁆𑀢𑀸𑀬 𑀲𑀤𑀺𑀲𑁄 𑀪𑀯𑁂𑀬𑁆𑀬, 𑀇𑀘𑁆𑀙𑁂𑀬𑁆𑀬𑀸𑀲𑀺 𑀦’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀢𑀺 𑀧𑀦 𑀚𑀦𑀸 𑀲𑀸𑀯𑀢𑁆𑀣𑀺𑀬𑀁 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀩𑀳𑀽, 𑀪𑀦𑁆𑀢𑁂’’𑀢𑀺. ‘‘𑀦𑀦𑀼 𑀏𑀯𑀁, 𑀪𑀦𑁆𑀢𑁂, 𑀢𑀯 𑀅𑀲𑁄𑀘𑀦𑀓𑀸𑀮𑁄 𑀦 𑀪𑀯𑁂𑀬𑁆𑀬, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀭𑁄𑀤𑀦𑁆𑀢𑀻𑀬𑁂𑀯 𑀯𑀺𑀘𑀭𑁂𑀬𑁆𑀬𑀸𑀲𑀻’’𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂, 𑀜𑀸𑀢𑀁 𑀫𑀬𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀫𑀸 𑀲𑁄𑀘𑀺, 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀧𑁂𑀫𑀢𑁄𑀯 𑀚𑀸𑀬𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁩. ‘‘𑀧𑁂𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀧𑁂𑀫𑀢𑁄 𑀚𑀸𑀬𑀢𑀻 𑀪𑀬𑀁;

𑀧𑁂𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀧𑁂𑀫𑀢𑁄𑀢𑀺 𑀧𑀼𑀢𑁆𑀢𑀥𑀻𑀢𑀸𑀤𑀻𑀲𑀼 𑀓𑀢𑀁 𑀧𑁂𑀫𑀫𑁂𑀯 𑀦𑀺𑀲𑁆𑀲𑀸𑀬 𑀲𑁄𑀓𑁄 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀺𑀲𑀸𑀔𑀸𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀮𑀺𑀘𑁆𑀙𑀯𑀻𑀯𑀢𑁆𑀣𑀼

𑀭𑀢𑀺𑀬𑀸 𑀚𑀸𑀬𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀮𑀺𑀘𑁆𑀙𑀯𑀻 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀕𑀫𑀦𑀢𑁆𑀣𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀬𑁄, 𑀬𑁂𑀳𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀢𑁂 𑀇𑀫𑁂 𑀑𑀮𑁄𑀓𑁂𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑁂𑀧𑀺 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀦𑀕𑀭𑀲𑁄𑀪𑀺𑀦𑀺𑀁 𑀇𑀢𑁆𑀣𑀺𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀇𑀲𑁆𑀲𑀸𑀪𑀺𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀮𑁄𑀳𑀺𑀢𑀁 𑀦𑀤𑀺𑀁 𑀯𑀺𑀬 𑀧𑀯𑀢𑁆𑀢𑀬𑀺𑀁𑀲𑀼. 𑀅𑀣 𑀦𑁂 𑀫𑀜𑁆𑀘𑁂𑀦𑀸𑀤𑀸𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀫𑀁𑀲𑀼. 𑀲𑀢𑁆𑀣𑀸𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀪𑀺𑀓𑁆𑀔𑀽𑀧𑀺 𑀮𑀺𑀘𑁆𑀙𑀯𑀬𑁄 𑀢𑀣𑀸 𑀦𑀻𑀬𑀫𑀸𑀦𑁂 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀧𑀸𑀢𑁄𑀯 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀤𑁂𑀯𑀸 𑀯𑀺𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀤𑀸𑀦𑀺 𑀏𑀓𑀁 𑀇𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀩𑁆𑀬𑀲𑀦𑀁 𑀧𑀢𑁆𑀢𑀸’’𑀢𑀺. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁪. ‘‘𑀭𑀢𑀺𑀬𑀸 𑀚𑀸𑀬𑀢𑀻 𑀲𑁄𑀓𑁄, 𑀭𑀢𑀺𑀬𑀸 𑀚𑀸𑀬𑀢𑀻 𑀪𑀬𑀁;

𑀭𑀢𑀺𑀬𑀸 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀭𑀢𑀺𑀬𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀢𑁄, 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀮𑀺𑀘𑁆𑀙𑀯𑀻𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑀯𑀢𑁆𑀣𑀼

𑀓𑀸𑀫𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑁆𑀭𑀳𑁆𑀫𑀮𑁄𑀓𑀸 𑀘𑀼𑀢𑀲𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀇𑀢𑁆𑀣𑀺𑀲𑀫𑀻𑀧𑀁 𑀉𑀧𑀕𑀦𑁆𑀢𑀼𑀁 𑀦 𑀇𑀘𑁆𑀙𑀢𑀺, 𑀇𑀢𑁆𑀣𑀺𑀬𑀸 𑀕𑀬𑁆𑀳𑀫𑀸𑀦𑁄 𑀭𑁄𑀤𑀢𑀺. 𑀯𑀢𑁆𑀣𑀘𑀼𑀫𑁆𑀩𑀝𑀓𑁂𑀦 𑀦𑀁 𑀕𑀳𑁂𑀢𑁆𑀯𑀸 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺, ‘‘𑀢𑀸𑀢, 𑀆𑀯𑀸𑀳𑀁 𑀢𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀫𑁂 𑀇𑀢𑁆𑀣𑀺𑀬𑀸 𑀅𑀢𑁆𑀣𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄 𑀧𑀜𑁆𑀘𑀲𑀢𑁂 𑀲𑀼𑀯𑀡𑁆𑀡𑀓𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 𑀅𑀢𑀺𑀯𑀺𑀬 𑀧𑀸𑀲𑀸𑀤𑀺𑀓𑀁 𑀖𑀦𑀓𑁄𑀝𑁆𑀝𑀺𑀫𑀁 𑀇𑀢𑁆𑀣𑀺𑀭𑀽𑀧𑀁 𑀓𑀸𑀭𑁂𑀢𑁆𑀯𑀸 𑀧𑀼𑀦 𑀫𑀸𑀢𑀸𑀧𑀺𑀢𑀽𑀳𑀺, ‘‘𑀢𑀸𑀢, 𑀢𑀬𑀺 𑀆𑀯𑀸𑀳𑀁 𑀅𑀓𑀭𑁄𑀦𑁆𑀢𑁂 𑀓𑀼𑀮𑀯𑀁𑀲𑁄 𑀦 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀓𑀼𑀫𑀸𑀭𑀺𑀓𑀁 𑀢𑁂 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀲𑀘𑁂 𑀫𑁂 𑀏𑀯𑀭𑀽𑀧𑀁 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑁆𑀲𑀣, 𑀓𑀭𑀺𑀲𑁆𑀲𑀸𑀫𑀺 𑀯𑁄 𑀯𑀘𑀦’’𑀦𑁆𑀢𑀺 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑀲𑁆𑀲𑁂𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀪𑀺𑀜𑁆𑀜𑀸𑀢𑁂 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀫𑀳𑀸𑀧𑀼𑀜𑁆𑀜𑁄, 𑀅𑀯𑀲𑁆𑀲𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀓𑀢𑀧𑀼𑀜𑁆𑀜𑀸 𑀓𑀼𑀫𑀸𑀭𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀕𑀘𑁆𑀙𑀣 𑀇𑀫𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀕𑀳𑁂𑀢𑁆𑀯𑀸 𑀏𑀯𑀭𑀽𑀧𑀁 𑀓𑀼𑀫𑀸𑀭𑀺𑀓𑀁 𑀆𑀳𑀭𑀣𑀸’’𑀢𑀺 𑀧𑀳𑀺𑀡𑀺𑀁𑀲𑀼. 𑀢𑁂 ‘‘𑀲𑀸𑀥𑀽’’𑀢𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀕𑀢𑀸. 𑀢𑀲𑁆𑀫𑀺𑀜𑁆𑀘 𑀦𑀕𑀭𑁂 𑀏𑀓𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀪𑀺𑀭𑀽𑀧𑀸 𑀓𑀼𑀫𑀸𑀭𑀺𑀓𑀸 𑀅𑀳𑁄𑀲𑀺, 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲𑀽𑀧𑀭𑀺𑀫𑀢𑀮𑁂 𑀧𑀭𑀺𑀯𑀸𑀲𑁂𑀲𑀼𑀁. 𑀢𑁂𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀸 ‘‘𑀲𑀘𑁂 𑀇𑀥 𑀏𑀯𑀭𑀽𑀧𑀸 𑀓𑀼𑀫𑀸𑀭𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀤𑀺𑀲𑁆𑀯𑀸 ‘𑀅𑀬𑀁 𑀅𑀲𑀼𑀓𑀲𑁆𑀲 𑀓𑀼𑀮𑀲𑁆𑀲 𑀥𑀻𑀢𑀸 𑀯𑀺𑀬 𑀅𑀪𑀺𑀭𑀽𑀧𑀸’𑀢𑀺 𑀯𑀓𑁆𑀔𑀦𑁆𑀢𑀻’’𑀢𑀺 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀢𑀺𑀢𑁆𑀣𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀅𑀣𑀲𑁆𑀲 𑀓𑀼𑀫𑀸𑀭𑀺𑀓𑀸𑀬 𑀥𑀸𑀢𑀻 𑀢𑀁 𑀓𑀼𑀫𑀸𑀭𑀺𑀓𑀁 𑀦𑁆𑀳𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀢𑀺𑀢𑁆𑀣𑀁 𑀆𑀕𑀢𑀸 𑀢𑀁 𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀥𑀻𑀢𑀸 𑀫𑁂’’𑀢𑀺 𑀲𑀜𑁆𑀜𑀸𑀬 ‘‘𑀤𑀼𑀩𑁆𑀩𑀺𑀦𑀻𑀢𑀸𑀲𑀺, 𑀇𑀤𑀸𑀦𑁂𑀯𑀸𑀳𑀁 𑀦𑁆𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸, 𑀢𑁆𑀯𑀁 𑀫𑀬𑀸 𑀧𑀼𑀭𑁂𑀢𑀭𑀁 𑀇𑀥𑀸𑀕𑀢𑀸𑀲𑀻’’𑀢𑀺 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 𑀣𑀤𑁆𑀥𑀪𑀸𑀯𑀜𑁆𑀘𑁂𑀯 𑀦𑀺𑀩𑁆𑀩𑀺𑀓𑀸𑀭𑀢𑀜𑁆𑀘 𑀜𑀢𑁆𑀯𑀸 ‘‘𑀅𑀳𑀁 𑀫𑁂, 𑀥𑀻𑀢𑀸𑀢𑀺 𑀲𑀜𑁆𑀜𑀫𑀓𑀸𑀲𑀺𑀁, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀢𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀏𑀯𑀭𑀽𑀧𑀸 𑀢𑁂, 𑀅𑀫𑁆𑀫, 𑀥𑀻𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀅𑀬𑀁 𑀫𑀫 𑀥𑀻𑀢𑀼 𑀲𑀦𑁆𑀢𑀺𑀓𑁂 𑀓𑀺𑀁 𑀅𑀕𑁆𑀖𑀢𑀻𑀢𑀺? 𑀢𑁂𑀦 𑀳𑀺 𑀢𑁂 𑀥𑀻𑀢𑀭𑀁 𑀅𑀫𑁆𑀳𑀸𑀓𑀁 𑀤𑀲𑁆𑀲𑁂𑀳𑀻𑀢𑀺. 𑀲𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀓𑀢𑀧𑀝𑀺𑀲𑀫𑁆𑀫𑁄𑀤𑀦𑀸 𑀥𑀻𑀢𑀭𑀁 𑀑𑀢𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑀼𑀯𑀡𑁆𑀡𑀭𑀽𑀧𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀲𑀼𑀁. 𑀲𑀼𑀯𑀡𑁆𑀡𑀭𑀽𑀧𑀓𑀁 𑀦𑀺𑀧𑁆𑀧𑀪𑀁 𑀅𑀳𑁄𑀲𑀺, 𑀓𑀼𑀫𑀸𑀭𑀺𑀓𑀸 𑀲𑀧𑁆𑀧𑀪𑀸 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀢𑁂𑀲𑀁 𑀤𑀢𑁆𑀯𑀸 𑀓𑀼𑀫𑀸𑀭𑀺𑀓𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑀬𑀺𑀁𑀲𑀼. 𑀢𑁂 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀕𑀘𑁆𑀙𑀣, 𑀦𑀁 𑀲𑀻𑀖𑀁 𑀆𑀦𑁂𑀣𑀸’’𑀢𑀺 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀧𑀳𑀺𑀡𑀺𑀁𑀲𑀼.

𑀓𑀼𑀫𑀸𑀭𑁄𑀧𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀓𑀜𑁆𑀘𑀦𑀭𑀽𑀧𑀢𑁄𑀧𑀺 𑀓𑀺𑀭 𑀅𑀪𑀺𑀭𑀽𑀧𑀢𑀭𑀸 𑀤𑀸𑀭𑀺𑀓𑀸 𑀅𑀢𑁆𑀣𑀻’’𑀢𑀺 𑀲𑀯𑀦𑀯𑀲𑁂𑀦𑁂𑀯 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀻𑀖𑀁 𑀆𑀦𑁂𑀦𑁆𑀢𑀽’’𑀢𑀺 𑀆𑀳. 𑀲𑀸𑀧𑀺 𑀔𑁄 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀆𑀦𑀻𑀬𑀫𑀸𑀦𑀸 𑀅𑀢𑀺𑀲𑀼𑀔𑀼𑀫𑀸𑀮𑀢𑀸𑀬 𑀬𑀸𑀦𑀼𑀕𑁆𑀖𑀸𑀢𑁂𑀦 𑀲𑀫𑀼𑀧𑁆𑀧𑀸𑀤𑀺𑀢𑀯𑀸𑀢𑀭𑁄𑀕𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀓𑀼𑀫𑀸𑀭𑁄𑀧𑀺 ‘‘𑀆𑀕𑀢𑀸’’𑀢𑀺 𑀦𑀺𑀭𑀦𑁆𑀢𑀭𑀁 𑀧𑀼𑀘𑁆𑀙𑀢𑀺, 𑀢𑀲𑁆𑀲 𑀅𑀢𑀺𑀲𑀺𑀦𑁂𑀳𑁂𑀦 𑀧𑀼𑀘𑁆𑀙𑀦𑁆𑀢𑀲𑁆𑀲 𑀲𑀳𑀲𑀸𑀯 𑀅𑀦𑀸𑀭𑁄𑀘𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑀬𑀺𑀁𑀲𑀼. 𑀲𑁄 ‘‘𑀢𑀣𑀸𑀭𑀽𑀧𑀸𑀬 𑀦𑀸𑀫 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀫𑀁 𑀦𑀸𑀮𑀢𑁆𑀣’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁄 𑀧𑀩𑁆𑀩𑀢𑁂𑀦 𑀯𑀺𑀬 𑀲𑁄𑀓𑀤𑀼𑀓𑁆𑀔𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀁 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀢𑁆𑀣𑀸𑀭𑀁 𑀅𑀦𑁆𑀢𑁄𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀁𑀲𑀼. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 ‘‘𑀓𑀳𑀁 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑁄’’𑀢𑀺 𑀧𑀼𑀘𑁆𑀙𑀺. ‘‘𑀏𑀲𑁄, 𑀪𑀦𑁆𑀢𑁂, 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄, 𑀓𑀼𑀫𑀸𑀭, 𑀩𑀮𑀯𑀲𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂, ‘𑀏𑀯𑀭𑀽𑀧𑀸 𑀦𑀸𑀫 𑀇𑀢𑁆𑀣𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀸𑀮𑀓𑀢𑀸’𑀢𑀺 𑀲𑀼𑀢𑁆𑀯𑀸 𑀩𑀮𑀯𑀲𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀢𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀓𑀼𑀫𑀸𑀭, 𑀓𑀺𑀁 𑀢𑁂 𑀦𑀺𑀲𑁆𑀲𑀸𑀬 𑀲𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀸𑀫𑀁 𑀦𑀺𑀲𑁆𑀲𑀸𑀬, 𑀓𑀼𑀫𑀸𑀭, 𑀩𑀮𑀯𑀲𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀓𑀸𑀫𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁫. ‘‘𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀓𑀸𑀫𑀢𑁄 𑀚𑀸𑀬𑀢𑀻 𑀪𑀬𑀁;

𑀓𑀸𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀓𑀸𑀫𑀢𑁄𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀢𑁄, 𑀤𑀼𑀯𑀺𑀥𑀫𑁆𑀧𑁂𑀢𑀁 𑀓𑀸𑀫𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀢𑀡𑁆𑀳𑀸𑀬 𑀚𑀸𑀬𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀏𑀓𑀤𑀺𑀯𑀲𑀁 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀔𑁂𑀢𑁆𑀢𑀁 𑀲𑁄𑀥𑁂𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸𑀧𑀺 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀭𑁂𑀢𑀭𑀁 𑀆𑀮𑀧𑀺𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀓𑀭𑁄𑀲𑀻’’𑀢𑀺 𑀆𑀳. ‘‘𑀔𑁂𑀢𑁆𑀢𑀁, 𑀪𑁄 𑀕𑁄𑀢𑀫, 𑀲𑁄𑀥𑁂𑀫𑀻’’𑀢𑀺. 𑀲𑀢𑁆𑀣𑀸 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 𑀕𑀢𑁄. 𑀧𑀼𑀦𑀤𑀺𑀯𑀲𑁂𑀧𑀺 𑀢𑀲𑁆𑀲 𑀔𑁂𑀢𑁆𑀢𑀁 𑀓𑀲𑀺𑀢𑀼𑀁 𑀆𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀔𑁂𑀢𑁆𑀢𑀁 𑀓𑀲𑀸𑀫𑀺, 𑀪𑁄 𑀕𑁄𑀢𑀫𑀸’’𑀢𑀺 𑀲𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀺 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀔𑁂𑀢𑁆𑀢𑀁 𑀯𑀧𑀸𑀫𑀺 𑀦𑀺𑀤𑁆𑀤𑁂𑀫𑀺 𑀭𑀓𑁆𑀔𑀸𑀫𑀻’’𑀢𑀺 𑀲𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀪𑁄 𑀕𑁄𑀢𑀫, 𑀢𑁆𑀯𑀁 𑀫𑀫 𑀔𑁂𑀢𑁆𑀢𑀲𑁄𑀥𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀕𑀢𑁄. 𑀲𑀘𑁂 𑀫𑁂 𑀲𑀲𑁆𑀲𑀁 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀼𑀬𑁆𑀳𑀫𑁆𑀧𑀺 𑀲𑀁𑀯𑀺𑀪𑀸𑀕𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀅𑀤𑀢𑁆𑀯𑀸 𑀲𑀬𑀁 𑀦 𑀔𑀸𑀤𑀺𑀲𑁆𑀲𑀸𑀫𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀢𑁆𑀯𑀁 𑀫𑀫 𑀲𑀳𑀸𑀬𑁄’’𑀢𑀺.

𑀅𑀣𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀲𑁆𑀲𑀁 𑀲𑀫𑁆𑀧𑀚𑁆𑀚𑀺, 𑀢𑀲𑁆𑀲 ‘‘𑀲𑀫𑁆𑀧𑀦𑁆𑀦𑀁 𑀫𑁂 𑀲𑀲𑁆𑀲𑀁, 𑀲𑁆𑀯𑁂 𑀤𑀸𑀦𑀺 𑀮𑀸𑀬𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀮𑀸𑀬𑀦𑀢𑁆𑀣𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀭𑀢𑁆𑀢𑀺𑀁 𑀫𑀳𑀸𑀫𑁂𑀖𑁄 𑀯𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀁 𑀲𑀲𑁆𑀲𑀁 𑀳𑀭𑀺, 𑀔𑁂𑀢𑁆𑀢𑀁 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑀲𑀤𑀺𑀲𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀧𑀦 𑀧𑀞𑀫𑀤𑀺𑀯𑀲𑀁𑀬𑁂𑀯 ‘‘𑀢𑀁 𑀲𑀲𑁆𑀲𑀁 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 ‘‘𑀔𑁂𑀢𑁆𑀢𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀕𑀢𑁄 𑀢𑀼𑀘𑁆𑀙𑀁 𑀔𑁂𑀢𑁆𑀢𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀔𑁂𑀢𑁆𑀢𑀲𑁄𑀥𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀕𑀢𑁄, 𑀅𑀳𑀫𑁆𑀧𑀺 𑀦𑀁 ‘𑀇𑀫𑀲𑁆𑀫𑀺𑀁 𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀢𑀼𑀬𑁆𑀳𑀫𑁆𑀧𑀺 𑀲𑀁𑀯𑀺𑀪𑀸𑀕𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀅𑀤𑀢𑁆𑀯𑀸 𑀲𑀬𑀁 𑀦 𑀔𑀸𑀤𑀺𑀲𑁆𑀲𑀸𑀫𑀺, 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀺 𑀢𑁆𑀯𑀁 𑀫𑀫 𑀲𑀳𑀸𑀬𑁄’𑀢𑀺 𑀅𑀯𑀘𑀁. 𑀲𑁄𑀧𑀺 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀻’’𑀢𑀺 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀲𑀢𑁆𑀣𑀼 𑀆𑀕𑀫𑀦𑀁 𑀲𑀼𑀢𑁆𑀯𑀸 ‘‘𑀲𑀳𑀸𑀬𑀁 𑀫𑁂 𑀆𑀦𑁂𑀢𑁆𑀯𑀸 𑀇𑀥 𑀦𑀺𑀲𑀻𑀤𑀸𑀧𑁂𑀣𑀸’’𑀢𑀺 𑀆𑀳. 𑀧𑀭𑀺𑀚𑀦𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀳𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀩𑁆𑀪𑁂 𑀦𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀆𑀳 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺? 𑀪𑁄 𑀕𑁄𑀢𑀫, 𑀢𑀼𑀫𑁆𑀳𑁂 𑀫𑀫 𑀔𑁂𑀢𑁆𑀢𑀲𑁄𑀥𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀕𑀢𑀸, 𑀅𑀳𑀫𑁆𑀧𑀺 ‘‘𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀢𑀼𑀫𑁆𑀳𑀸𑀓𑀁 𑀲𑀁𑀯𑀺𑀪𑀸𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀘𑀁. 𑀲𑁄 𑀫𑁂 𑀫𑀦𑁄𑀭𑀣𑁄 𑀅𑀦𑀺𑀧𑁆𑀨𑀦𑁆𑀦𑁄, 𑀢𑁂𑀦 𑀫𑁂 𑀲𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀢𑀻𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀚𑀸𑀦𑀸𑀲𑀺 𑀧𑀦, 𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀢𑁂 𑀦𑀺𑀲𑁆𑀲𑀸𑀬 𑀲𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀺, 𑀪𑁄 𑀕𑁄𑀢𑀫, 𑀢𑁆𑀯𑀁 𑀧𑀦 𑀚𑀸𑀦𑀸𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑁄𑀓𑁄 𑀯𑀸 𑀪𑀬𑀁 𑀯𑀸 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁬. ‘‘𑀢𑀡𑁆𑀳𑀸𑀬 𑀚𑀸𑀬𑀢𑀻 𑀲𑁄𑀓𑁄, 𑀢𑀡𑁆𑀳𑀸𑀬 𑀚𑀸𑀬𑀢𑀻 𑀪𑀬𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀢𑀡𑁆𑀳𑀸𑀬𑀸𑀢𑀺 𑀙𑀤𑁆𑀯𑀸𑀭𑀺𑀓𑀸𑀬 𑀢𑀡𑁆𑀳𑀸𑀬, 𑀏𑀢𑀁 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀧𑀜𑁆𑀘𑀲𑀢𑀤𑀸𑀭𑀓𑀯𑀢𑁆𑀣𑀼

𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀜𑁆𑀘𑀲𑀢𑀤𑀸𑀭𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀧𑀜𑁆𑀘𑀲𑀢𑁂 𑀤𑀸𑀭𑀓𑁂 𑀧𑀽𑀯𑀧𑀘𑁆𑀙𑀺𑀬𑁄 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁂 𑀅𑀤𑁆𑀤𑀲. 𑀢𑁂𑀧𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼, 𑀢𑁂 𑀏𑀓𑀁 𑀪𑀺𑀓𑁆𑀔𑀼𑀫𑁆𑀧𑀺 ‘‘𑀧𑀽𑀯𑀁 𑀕𑀡𑁆𑀳𑀣𑀸’’𑀢𑀺 𑀦 𑀯𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀕𑀢𑀓𑀸𑀮𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀔𑀸𑀤𑀺𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀧𑀽𑀯𑁂’’𑀢𑀺. ‘‘𑀓𑀳𑀁 𑀪𑀦𑁆𑀢𑁂, 𑀧𑀽𑀯𑀸’’𑀢𑀺? ‘‘𑀓𑀺𑀁 𑀦 𑀧𑀲𑁆𑀲𑀣 𑀢𑁂 𑀤𑀸𑀭𑀓𑁂 𑀧𑀽𑀯𑀧𑀘𑁆𑀙𑀺𑀬𑁄 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑁂’’𑀢𑀺? ‘‘𑀪𑀦𑁆𑀢𑁂, 𑀏𑀯𑀭𑀽𑀧𑀸 𑀦𑀸𑀫 𑀤𑀸𑀭𑀓𑀸 𑀓𑀲𑁆𑀲𑀘𑀺 𑀧𑀽𑀯𑀁 𑀦 𑀤𑁂𑀦𑁆𑀢𑀻’’𑀢𑀺. ‘‘𑀪𑀺𑀓𑁆𑀔𑀯𑁂, 𑀓𑀺𑀜𑁆𑀘𑀸𑀧𑀺 𑀏𑀢𑁂 𑀫𑀁 𑀯𑀸 𑀢𑀼𑀫𑁆𑀳𑁂 𑀯𑀸 𑀧𑀽𑀯𑁂𑀳𑀺 𑀦 𑀦𑀺𑀫𑀦𑁆𑀢𑀬𑀺𑀁𑀲𑀼, 𑀧𑀽𑀯𑀲𑀸𑀫𑀺𑀓𑁄 𑀧𑀦 𑀪𑀺𑀓𑁆𑀔𑀼 𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀺, 𑀧𑀽𑀯𑁂 𑀔𑀸𑀤𑀺𑀢𑁆𑀯𑀸𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀓𑀧𑀼𑀕𑁆𑀕𑀮𑁂𑀧𑀺 𑀇𑀲𑁆𑀲𑀸 𑀯𑀸 𑀤𑁄𑀲𑁄 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀫𑀁 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀙𑀸𑀬𑀸𑀬 𑀦𑀺𑀲𑀻𑀤𑀺. 𑀤𑀸𑀭𑀓𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀸 𑀧𑀻𑀢𑀺𑀯𑁂𑀕𑁂𑀦 𑀧𑀭𑀺𑀧𑀼𑀡𑁆𑀡𑀲𑀭𑀻𑀭𑀸 𑀳𑀼𑀢𑁆𑀯𑀸 𑀧𑀘𑁆𑀙𑀺𑀬𑁄 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀽𑀯𑁂 𑀧𑀘𑁆𑀙𑀻𑀳𑀺 𑀲𑀤𑁆𑀥𑀺𑀁𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀣𑁂𑀭𑀁 𑀯𑀤𑀺𑀁𑀲𑀼. 𑀅𑀣 𑀦𑁂 𑀣𑁂𑀭𑁄 𑀆𑀳 𑁋 ‘‘𑀏𑀲 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄, 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀁𑀯𑀺𑀪𑀸𑀕𑀁 𑀓𑀭𑁄𑀣𑀸’’𑀢𑀺. 𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀧𑀽𑀯𑁂 𑀤𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀏𑀓𑀫𑀦𑁆𑀢𑁂 𑀞𑀢𑁆𑀯𑀸 𑀧𑀭𑀺𑀪𑁄𑀕𑀸𑀯𑀲𑀸𑀦𑁂 𑀉𑀤𑀓𑀁 𑀅𑀤𑀁𑀲𑀼. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀤𑀸𑀭𑀓𑁂𑀳𑀺 𑀫𑀼𑀔𑁄𑀮𑁄𑀓𑀦𑁂𑀦 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀸 𑀫𑀳𑀸𑀣𑁂𑀭𑁂 𑀯𑀸 𑀧𑀽𑀯𑁂𑀳𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀧𑀘𑁆𑀙𑀻𑀳𑀺 𑀲𑀤𑁆𑀥𑀺𑀁𑀬𑁂𑀯 𑀆𑀤𑀸𑀬 𑀆𑀕𑀫𑀺𑀁𑀲𑀽’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑀺𑀲𑁄 𑀪𑀺𑀓𑁆𑀔𑀼 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀢𑁂 𑀘 𑀢𑀲𑁆𑀲 𑀘𑀢𑀼𑀧𑀘𑁆𑀘𑀬𑁂𑀦 𑀧𑀽𑀚𑀁 𑀓𑀭𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁭. ‘‘𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁, 𑀥𑀫𑁆𑀫𑀝𑁆𑀞𑀁 𑀲𑀘𑁆𑀘𑀯𑁂𑀤𑀺𑀦𑀁;

𑀅𑀢𑁆𑀢𑀦𑁄 𑀓𑀫𑁆𑀫 𑀓𑀼𑀩𑁆𑀩𑀸𑀦𑀁, 𑀢𑀁 𑀚𑀦𑁄 𑀓𑀼𑀭𑀼𑀢𑁂 𑀧𑀺𑀬’’𑀦𑁆𑀢𑀺.

𑀢𑀢𑁆𑀣 𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀘𑁂𑀯 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑁂𑀦 𑀘 𑀲𑀫𑁆𑀫𑀸𑀤𑀲𑁆𑀲𑀦𑁂𑀦 𑀲𑀫𑁆𑀧𑀦𑁆𑀦𑀁. 𑀥𑀫𑁆𑀫𑀝𑁆𑀞𑀦𑁆𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀞𑀺𑀢𑀁, 𑀲𑀘𑁆𑀙𑀺𑀓𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀯𑁂𑀤𑀺𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀘𑁆𑀙𑀺𑀓𑀢𑀢𑁆𑀢𑀸 𑀲𑀘𑁆𑀘𑀜𑀸𑀡𑁂𑀦 𑀲𑀘𑁆𑀘𑀯𑁂𑀤𑀺𑀦𑀁. 𑀅𑀢𑁆𑀢𑀦𑁄 𑀓𑀫𑁆𑀫 𑀓𑀼𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦𑀸𑀫 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀢𑀸 𑀧𑀽𑀭𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀚𑀦𑁄𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀮𑁄𑀓𑀺𑀬𑀫𑀳𑀸𑀚𑀦𑁄 𑀧𑀺𑀬𑀁 𑀓𑀭𑁄𑀢𑀺, 𑀤𑀝𑁆𑀞𑀼𑀓𑀸𑀫𑁄 𑀯𑀦𑁆𑀤𑀺𑀢𑀼𑀓𑀸𑀫𑁄 𑀧𑀘𑁆𑀘𑀬𑁂𑀦 𑀧𑀽𑀚𑁂𑀢𑀼𑀓𑀸𑀫𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀤𑀸𑀭𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀜𑁆𑀘𑀲𑀢𑀤𑀸𑀭𑀓𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀏𑀓𑀅𑀦𑀸𑀕𑀸𑀫𑀺𑀢𑁆𑀣𑁂𑀭𑀯𑀢𑁆𑀣𑀼

𑀙𑀦𑁆𑀤𑀚𑀸𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀸𑀕𑀸𑀫𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀢𑀁 𑀣𑁂𑀭𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀅𑀢𑁆𑀣𑀺 𑀧𑀦 𑀯𑁄, 𑀪𑀦𑁆𑀢𑁂, 𑀯𑀺𑀲𑁂𑀲𑀸𑀥𑀺𑀕𑀫𑁄’’𑀢𑀺. 𑀣𑁂𑀭𑁄 ‘‘𑀅𑀦𑀸𑀕𑀸𑀫𑀺𑀨𑀮𑀁 𑀦𑀸𑀫 𑀕𑀳𑀝𑁆𑀞𑀸𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂𑀬𑁂𑀯 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀳𑀭𑀸𑀬𑀫𑀸𑀦𑁄 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸𑀯 𑀓𑀸𑀮𑀓𑀢𑁄 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀦𑁆𑀢𑀸𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀭𑁄𑀤𑀣𑀸’’𑀢𑀺 𑀆𑀳. ‘‘𑀉𑀧𑀚𑁆𑀛𑀸𑀬𑁄 𑀦𑁄, 𑀪𑀦𑁆𑀢𑁂, 𑀓𑀸𑀮𑀓𑀢𑁄’’𑀢𑀺. ‘‘𑀳𑁄𑀢𑀼, 𑀪𑀺𑀓𑁆𑀔𑀯𑁂, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀥𑀼𑀯𑀥𑀫𑁆𑀫𑁄 𑀦𑀸𑀫𑁂𑀲𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀚𑀸𑀦𑀸𑀫, 𑀅𑀧𑀺𑀘 𑀫𑀬𑀁 𑀉𑀧𑀚𑁆𑀛𑀸𑀬𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀧𑀼𑀘𑁆𑀙𑀺𑀫𑁆𑀳𑀸, 𑀲𑁄 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸𑀯 𑀓𑀸𑀮𑀓𑀢𑁄, 𑀢𑁂𑀦𑀫𑁆𑀳 𑀤𑀼𑀓𑁆𑀔𑀺𑀢𑀸’’𑀢𑀺. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀉𑀧𑀚𑁆𑀛𑀸𑀬𑁂𑀦 𑀯𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀁, 𑀲𑁄 ‘𑀕𑀺𑀳𑀻𑀧𑁂𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀦𑁂𑀲𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺 𑀳𑀭𑀸𑀬𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀲𑁆𑀲𑀸𑀲𑀣, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑁄 𑀯𑁄 𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁧𑁮. ‘‘𑀙𑀦𑁆𑀤𑀚𑀸𑀢𑁄 𑀅𑀦𑀓𑁆𑀔𑀸𑀢𑁂, 𑀫𑀦𑀲𑀸 𑀘 𑀨𑀼𑀝𑁄 𑀲𑀺𑀬𑀸;

𑀓𑀸𑀫𑁂𑀲𑀼 𑀘 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀉𑀤𑁆𑀥𑀁𑀲𑁄𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀙𑀦𑁆𑀤𑀚𑀸𑀢𑁄𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀚𑀸𑀢𑀙𑀦𑁆𑀤𑁄 𑀉𑀲𑁆𑀲𑀸𑀳𑀧𑀢𑁆𑀢𑁄. 𑀅𑀦𑀓𑁆𑀔𑀸𑀢𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀢𑀜𑁆𑀳𑀺 ‘‘𑀅𑀲𑀼𑀓𑁂𑀦 𑀓𑀢𑀁 𑀯𑀸 𑀦𑀻𑀮𑀸𑀤𑀻𑀲𑀼 𑀏𑀯𑀭𑀽𑀧𑀁 𑀯𑀸’’𑀢𑀺 𑀅𑀯𑀢𑁆𑀢𑀩𑁆𑀩𑀢𑀸𑀬 𑀅𑀦𑀓𑁆𑀔𑀸𑀢𑀁 𑀦𑀸𑀫. 𑀫𑀦𑀲𑀸 𑀘 𑀨𑀼𑀝𑁄 𑀲𑀺𑀬𑀸𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀫𑀕𑁆𑀕𑀨𑀮𑀘𑀺𑀢𑁆𑀢𑁂𑀳𑀺 𑀨𑀼𑀝𑁄 𑀧𑀽𑀭𑀺𑀢𑁄 𑀪𑀯𑁂𑀬𑁆𑀬. 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀲𑁂𑀦 𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀉𑀤𑁆𑀥𑀁𑀲𑁄𑀢𑁄𑀢𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀉𑀤𑁆𑀥𑀁𑀲𑁄𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀤𑀺𑀲𑁄 𑀯𑁄 𑀉𑀧𑀚𑁆𑀛𑀸𑀬𑁄𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀏𑀓𑀅𑀦𑀸𑀕𑀸𑀫𑀺𑀢𑁆𑀣𑁂𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀦𑀦𑁆𑀤𑀺𑀬𑀯𑀢𑁆𑀣𑀼

𑀘𑀺𑀭𑀧𑁆𑀧𑀯𑀸𑀲𑀺𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀇𑀲𑀺𑀧𑀢𑀦𑁂 𑀯𑀺𑀳𑀭𑀦𑁆𑀢𑁄 𑀦𑀦𑁆𑀤𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀓𑀼𑀮𑀲𑁆𑀲 𑀦𑀦𑁆𑀤𑀺𑀬𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀼𑀭𑀽𑀧𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀲𑀫𑁆𑀫𑀼𑀔𑀕𑁂𑀳𑀢𑁄 𑀫𑀸𑀢𑀼𑀮𑀥𑀻𑀢𑀭𑀁 𑀭𑁂𑀯𑀢𑀺𑀁 𑀦𑀸𑀫 𑀆𑀦𑁂𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀲𑀸 𑀧𑀦 𑀅𑀲𑁆𑀲𑀤𑁆𑀥𑀸 𑀅𑀤𑀸𑀦𑀲𑀻𑀮𑀸, 𑀦𑀦𑁆𑀤𑀺𑀬𑁄 𑀢𑀁 𑀦 𑀇𑀘𑁆𑀙𑀺. 𑀅𑀣𑀲𑁆𑀲 𑀫𑀸𑀢𑀸 𑀭𑁂𑀯𑀢𑀺𑀁 𑀆𑀳 𑁋 ‘‘𑀅𑀫𑁆𑀫, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀚𑁆𑀚𑀦𑀝𑁆𑀞𑀸𑀦𑀁 𑀉𑀧𑀮𑀺𑀫𑁆𑀧𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀳𑀺, 𑀆𑀥𑀸𑀭𑀓𑁂 𑀞𑀧𑁂𑀳𑀺, 𑀪𑀺𑀓𑁆𑀔𑀽𑀦𑀁 𑀆𑀕𑀢𑀓𑀸𑀮𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀥𑀫𑁆𑀫𑀓𑀭𑀡𑁂𑀦 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑁂 𑀧𑀢𑁆𑀢𑁂 𑀥𑁄𑀯, 𑀏𑀯𑀁 𑀫𑁂 𑀧𑀼𑀢𑁆𑀢𑀲𑁆𑀲 𑀆𑀭𑀸𑀥𑀺𑀢𑀸 𑀪𑀯𑀺𑀲𑁆𑀲𑀲𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 ‘‘𑀑𑀯𑀸𑀤𑀓𑁆𑀔𑀫𑀸 𑀚𑀸𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀆𑀯𑀸𑀳𑀁 𑀓𑀭𑀺𑀁𑀲𑀼.

𑀅𑀣 𑀦𑀁 𑀦𑀦𑁆𑀤𑀺𑀬𑁄 𑀆𑀳 𑁋 ‘‘𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀫𑀸𑀢𑀸𑀧𑀺𑀢𑀭𑁄 𑀘 𑀫𑁂 𑀉𑀧𑀝𑁆𑀞𑀳𑀺𑀲𑁆𑀲𑀲𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀺𑀢𑀼𑀁 𑀮𑀪𑀺𑀲𑁆𑀲𑀲𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀲𑀤𑁆𑀥𑀸 𑀯𑀺𑀬 𑀳𑀼𑀢𑁆𑀯𑀸 𑀪𑀢𑁆𑀢𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑀻 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀦𑀦𑁆𑀤𑀺𑀬𑀲𑁆𑀲𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼, 𑀕𑁂𑀳𑁂 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀢𑀲𑁆𑀲𑀸𑀬𑁂𑀯 𑀅𑀳𑁄𑀲𑀺. 𑀦𑀦𑁆𑀤𑀺𑀬𑁄𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀮𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀸𑀦𑀧𑀢𑀺 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀫𑁆𑀧𑀺 𑀕𑁂𑀳𑀤𑁆𑀯𑀸𑀭𑁂 𑀧𑀸𑀓𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀆𑀯𑀸𑀲𑀤𑀸𑀦𑁂 𑀆𑀦𑀺𑀲𑀁𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀲𑀺𑀧𑀢𑀦𑁂 𑀫𑀳𑀸𑀯𑀺𑀳𑀸𑀭𑁂 𑀘𑀢𑀽𑀳𑀺 𑀕𑀩𑁆𑀪𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀘𑀢𑀼𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀢𑀁 𑀆𑀯𑀸𑀲𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀅𑀤𑀸𑀲𑀺. 𑀲𑀢𑁆𑀣𑀼 𑀳𑀢𑁆𑀣𑁂 𑀤𑀓𑁆𑀔𑀺𑀡𑁄𑀤𑀓𑀧𑀢𑀺𑀝𑁆𑀞𑀸𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀲𑀩𑁆𑀩𑀤𑀺𑀲𑀸𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀉𑀤𑁆𑀥𑀁 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀲𑀢𑁆𑀢𑀭𑀢𑀦𑀫𑀬𑁄 𑀦𑀸𑀭𑀻𑀕𑀡𑀲𑀫𑁆𑀧𑀦𑁆𑀦𑁄 𑀤𑀺𑀩𑁆𑀩𑀧𑀸𑀲𑀸𑀤𑁄 𑀉𑀕𑁆𑀕𑀘𑁆𑀙𑀺.

𑀅𑀣𑁂𑀓𑀤𑀺𑀯𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀤𑁂𑀯𑀘𑀸𑀭𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀆𑀕𑀢𑁂 𑀤𑁂𑀯𑀧𑀼𑀢𑁆𑀢𑁂 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀲𑁂𑀲𑁄 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑀧𑀸𑀲𑀸𑀤𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀅𑀣𑀲𑁆𑀲 𑀤𑁂𑀯𑀧𑀼𑀢𑁆𑀢𑀸 𑀯𑀺𑀫𑀸𑀦𑀲𑀸𑀫𑀺𑀓𑀁 𑀆𑀘𑀺𑀓𑁆𑀔𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀬𑁂𑀦 𑀦𑀦𑁆𑀤𑀺𑀬𑁂𑀦 𑀦𑀸𑀫 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀇𑀲𑀺𑀧𑀢𑀦𑁂 𑀲𑀢𑁆𑀣𑀼 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀤𑀺𑀦𑁆𑀦𑁄, 𑀢𑀲𑁆𑀲𑀢𑁆𑀣𑀸𑀬 𑀏𑀢𑀁 𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀅𑀘𑁆𑀙𑀭𑀸𑀲𑀗𑁆𑀖𑁄𑀧𑀺 𑀦𑀁 𑀤𑀺𑀲𑁆𑀯𑀸 𑀧𑀸𑀲𑀸𑀤𑀢𑁄 𑀑𑀭𑁄𑀳𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀁 ‘𑀦𑀦𑁆𑀤𑀺𑀬𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺 𑀇𑀥 𑀦𑀺𑀩𑁆𑀩𑀢𑁆𑀢𑀸, 𑀢𑀁 𑀧𑀦 𑀅𑀧𑀲𑁆𑀲𑀦𑁆𑀢𑀻 𑀅𑀢𑀺𑀯𑀺𑀬 𑀉𑀓𑁆𑀓𑀡𑁆𑀞𑀺𑀢𑀫𑁆𑀳𑀸, 𑀫𑀢𑁆𑀢𑀺𑀓𑀧𑀸𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀕𑀳𑀡𑀁 𑀯𑀺𑀬 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀚𑀳𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀕𑀳𑀡𑀁, 𑀇𑀥𑀸𑀕𑀫𑀦𑀢𑁆𑀣𑀸𑀬 𑀦𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺. 𑀣𑁂𑀭𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀦𑀺𑀩𑁆𑀩𑀢𑁆𑀢𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀮𑁄𑀓𑁂 𑀞𑀺𑀢𑀸𑀦𑀁𑀬𑁂𑀯 𑀓𑀢𑀓𑀮𑁆𑀬𑀸𑀡𑀸𑀦𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻’’𑀢𑀺. ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀦𑀦𑀼 𑀢𑁂 𑀤𑁂𑀯𑀮𑁄𑀓𑁂 𑀦𑀦𑁆𑀤𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀲𑀸𑀫𑀁 𑀤𑀺𑀝𑁆𑀞𑀸, 𑀓𑀲𑁆𑀫𑀸 𑀫𑀁 𑀧𑀼𑀘𑁆𑀙𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑁄𑀕𑁆𑀕𑀮𑁆𑀮𑀸𑀦𑀁 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺. 𑀬𑀣𑀸 𑀳𑀺 𑀘𑀺𑀭𑀧𑁆𑀧𑀯𑀼𑀝𑁆𑀞𑀁 𑀧𑀼𑀢𑁆𑀢𑀁 𑀯𑀸 𑀪𑀸𑀢𑀭𑀁 𑀯𑀸 𑀯𑀺𑀧𑁆𑀧𑀯𑀸𑀲𑀢𑁄 𑀆𑀕𑀘𑁆𑀙𑀦𑁆𑀢𑀁 𑀕𑀸𑀫𑀤𑁆𑀯𑀸𑀭𑁂 𑀞𑀺𑀢𑁄 𑀓𑁄𑀘𑀺𑀤𑁂𑀯 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 ‘𑀅𑀲𑀼𑀓𑁄 𑀦𑀸𑀫 𑀆𑀕𑀢𑁄’𑀢𑀺 𑀆𑀭𑁄𑀘𑁂𑀬𑁆𑀬, 𑀅𑀣𑀲𑁆𑀲 𑀜𑀸𑀢𑀓𑀸 𑀳𑀝𑁆𑀞𑀧𑀳𑀝𑁆𑀞𑀸 𑀯𑁂𑀕𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 ‘𑀆𑀕𑀢𑁄𑀲𑀺, 𑀢𑀸𑀢, 𑀅𑀭𑁄𑀕𑁄𑀲𑀺, 𑀢𑀸𑀢𑀸’𑀢𑀺 𑀢𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀼𑀁, 𑀏𑀯𑀫𑁂𑀯 𑀇𑀥 𑀓𑀢𑀓𑀮𑁆𑀬𑀸𑀡𑀁 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀇𑀫𑀁 𑀮𑁄𑀓𑀁 𑀚𑀳𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀢𑀁 𑀤𑀲𑀯𑀺𑀥𑀁 𑀤𑀺𑀩𑁆𑀩𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 ‘𑀅𑀳𑀁 𑀧𑀼𑀭𑀢𑁄, 𑀅𑀳𑀁 𑀧𑀼𑀭𑀢𑁄’𑀢𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀤𑁂𑀯𑀢𑀸 𑀅𑀪𑀺𑀦𑀦𑁆𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁧𑁯. ‘‘𑀘𑀺𑀭𑀧𑁆𑀧𑀯𑀸𑀲𑀺𑀁 𑀧𑀼𑀭𑀺𑀲𑀁, 𑀤𑀽𑀭𑀢𑁄 𑀲𑁄𑀢𑁆𑀣𑀺𑀫𑀸𑀕𑀢𑀁;

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀁.

𑁨𑁨𑁦. ‘‘𑀢𑀣𑁂𑀯 𑀓𑀢𑀧𑀼𑀜𑁆𑀜𑀫𑁆𑀧𑀺, 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀕𑀢𑀁;

𑀧𑀼𑀜𑁆𑀜𑀸𑀦𑀺 𑀧𑀝𑀺𑀕𑀡𑁆𑀳𑀦𑁆𑀢𑀺, 𑀧𑀺𑀬𑀁 𑀜𑀸𑀢𑀻𑀯 𑀆𑀕𑀢’’𑀦𑁆𑀢𑀺.

𑀢𑀢𑁆𑀣 𑀘𑀺𑀭𑀧𑁆𑀧𑀯𑀸𑀲𑀺𑀦𑁆𑀢𑀺 𑀘𑀺𑀭𑀧𑁆𑀧𑀯𑀼𑀝𑁆𑀞𑀁. 𑀤𑀽𑀭𑀢𑁄 𑀲𑁄𑀢𑁆𑀣𑀺𑀫𑀸𑀕𑀢𑀦𑁆𑀢𑀺 𑀯𑀡𑀺𑀚𑁆𑀚𑀁 𑀯𑀸 𑀭𑀸𑀚𑀧𑁄𑀭𑀺𑀲𑀁 𑀯𑀸 𑀓𑀢𑁆𑀯𑀸 𑀮𑀤𑁆𑀥𑀮𑀸𑀪𑀁 𑀦𑀺𑀧𑁆𑀨𑀦𑁆𑀦𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀧𑀤𑁆𑀤𑀯𑁂𑀦 𑀤𑀽𑀭𑀝𑁆𑀞𑀸𑀦𑀢𑁄 𑀆𑀕𑀢𑀁. 𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘𑀸𑀢𑀺 𑀓𑀼𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀜𑀸𑀢𑀻 𑀘 𑀲𑀦𑁆𑀤𑀺𑀝𑁆𑀞𑀸𑀤𑀺𑀪𑀸𑀯𑁂𑀦 𑀫𑀺𑀢𑁆𑀢𑀸 𑀘 𑀲𑀼𑀳𑀤𑀬𑀪𑀸𑀯𑁂𑀦 𑀲𑀼𑀳𑀚𑁆𑀚𑀸 𑀘. 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀦𑁆𑀢𑀺 𑀦𑀁 𑀤𑀺𑀲𑁆𑀯𑀸 𑀆𑀕𑀢𑀦𑁆𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀸 𑀅𑀜𑁆𑀚𑀮𑀺𑀓𑀭𑀡𑀫𑀢𑁆𑀢𑁂𑀦 𑀯𑀸 𑀕𑁂𑀳𑀲𑀫𑁆𑀧𑀢𑁆𑀢𑀁 𑀧𑀦 𑀦𑀸𑀦𑀧𑁆𑀧𑀓𑀸𑀭𑀧𑀡𑁆𑀡𑀸𑀓𑀸𑀭𑀸𑀪𑀺𑀳𑀭𑀡𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑁆𑀢𑀺. 𑀢𑀣𑁂𑀯𑀸𑀢𑀺 𑀢𑁂𑀦𑁂𑀯𑀸𑀓𑀸𑀭𑁂𑀦 𑀓𑀢𑀧𑀼𑀜𑁆𑀜𑀫𑁆𑀧𑀺 𑀧𑀼𑀕𑁆𑀕𑀮𑀁 𑀇𑀫𑀲𑁆𑀫𑀸 𑀮𑁄𑀓𑀸 𑀧𑀭𑀮𑁄𑀓𑀁 𑀕𑀢𑀁 𑀤𑀺𑀩𑁆𑀩𑀁 𑀆𑀬𑀼𑀯𑀡𑁆𑀡𑀲𑀼𑀔𑀬𑀲𑀆𑀥𑀺𑀧𑀢𑁂𑀬𑁆𑀬𑀁, 𑀤𑀺𑀩𑁆𑀩𑀁 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀦𑁆𑀢𑀺 𑀇𑀫𑀁 𑀤𑀲𑀯𑀺𑀥𑀁 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀺𑀬𑀁 𑀜𑀸𑀢𑀻𑀯𑀸𑀢𑀺 𑀇𑀥𑀮𑁄𑀓𑁂 𑀧𑀺𑀬𑀜𑀸𑀢𑀓𑀁 𑀆𑀕𑀢𑀁 𑀲𑁂𑀲𑀜𑀸𑀢𑀓𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀦𑀦𑁆𑀤𑀺𑀬𑀯𑀢𑁆𑀣𑀼 𑀦𑀯𑀫𑀁.

𑀧𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀫𑁄 𑀯𑀕𑁆𑀕𑁄.