𑁧𑁫. 𑀲𑀼𑀔𑀯𑀕𑁆𑀕𑁄

𑁧. 𑀜𑀸𑀆𑀢𑀺𑀓𑀮𑀳𑀯𑀽𑀧𑀲𑀫𑀦𑀯𑀢𑁆𑀣𑀼

𑀲𑀼𑀲𑀼𑀔𑀁 𑀯𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀦𑁆𑀢𑁄 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀜𑀸𑀢𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀓𑀺𑀬𑀓𑁄𑀮𑀺𑀬𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯 𑀆𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀺. 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀓𑀸𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀬𑀢𑁄 𑀳𑀭𑀺𑀬𑀫𑀸𑀦𑀁 𑀦𑁂𑀯 𑀢𑀼𑀫𑁆𑀳𑀸𑀓𑀁, 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀇𑀢𑀭𑁂𑀧𑀺 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑀓𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀦 𑀫𑀬𑀁 𑀤𑀲𑁆𑀲𑀸𑀫𑀸𑀢𑀺. 𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸𑀢𑀺 𑀏𑀯𑀁 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼.

𑀓𑁄𑀮𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘𑁂𑀯 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀸𑀓𑀺𑀬𑀓𑀫𑁆𑀫𑀓𑀸𑀭𑀸𑀧𑀺 𑀯𑀤𑀦𑁆𑀢𑀺 ‘‘𑀢𑀼𑀫𑁆𑀳𑁂 𑀇𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀸𑀦𑀁 𑀅𑀫𑀘𑁆𑀘𑀸𑀦𑀁 𑀓𑀣𑀬𑀺𑀁𑀲𑀼, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁. 𑀢𑀢𑁄 𑀲𑀸𑀓𑀺𑀬𑀸 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀢𑀓𑁂 𑀤𑀺𑀲𑁆𑀯𑀸 ‘‘𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀇𑀫𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀓𑁄𑀯 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀭𑁄𑀳𑀺𑀡𑀺𑀦𑀤𑀺𑀬𑀸 𑀫𑀚𑁆𑀛𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀜𑀸𑀢𑀓𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀅𑀣 𑀦𑁂 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁 𑀓𑀮𑀳𑁄 𑀦𑀸𑀫𑁂𑀲, 𑀫𑀳𑀸𑀭𑀸𑀚𑀸’’𑀢𑀺? ‘‘𑀦 𑀚𑀸𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀤𑀸𑀦𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀢𑁂 ‘‘𑀉𑀧𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀲𑁂𑀦𑀸𑀧𑀢𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀬𑀸𑀯 𑀤𑀸𑀲𑀓𑀫𑁆𑀫𑀓𑀭𑁂 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀉𑀤𑀓𑀓𑀮𑀳𑁄’’𑀢𑀺 𑀆𑀳𑀁𑀲𑀼. ‘‘𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀧𑁆𑀧𑀕𑁆𑀖𑀁, 𑀪𑀦𑁆𑀢𑁂’’𑀢𑀺. ‘‘𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀺 𑀫𑀳𑀸𑀭𑀸𑀚𑀸’’𑀢𑀺? ‘‘𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸, 𑀪𑀦𑁆𑀢𑁂’’𑀢𑀺. ‘‘𑀅𑀬𑀼𑀢𑁆𑀢𑀁 𑀢𑀼𑀫𑁆𑀳𑀸𑀓𑀁 𑀅𑀧𑁆𑀧𑀫𑀢𑁆𑀢𑀢𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀢𑀼’’𑀦𑁆𑀢𑀺. 𑀢𑁂 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀢𑁂 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀫𑀳𑀸𑀭𑀸𑀚𑀸 𑀏𑀯𑀭𑀽𑀧𑀁 𑀓𑀭𑁄𑀣, 𑀫𑀬𑀺 𑀅𑀲𑀦𑁆𑀢𑁂 𑀅𑀚𑁆𑀚 𑀮𑁄𑀳𑀺𑀢𑀦𑀤𑀻 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀅𑀬𑀼𑀢𑁆𑀢𑀁 𑀯𑁄 𑀓𑀢𑀁, 𑀢𑀼𑀫𑁆𑀳𑁂 𑀧𑀜𑁆𑀘𑀳𑀺 𑀯𑁂𑀭𑁂𑀳𑀺 𑀲𑀯𑁂𑀭𑀸 𑀯𑀺𑀳𑀭𑀣, 𑀅𑀳𑀁 𑀅𑀯𑁂𑀭𑁄 𑀯𑀺𑀳𑀭𑀸𑀫𑀺. 𑀢𑀼𑀫𑁆𑀳𑁂 𑀓𑀺𑀮𑁂𑀲𑀸𑀢𑀼𑀭𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣, 𑀅𑀳𑀁 𑀅𑀦𑀸𑀢𑀼𑀭𑁄. 𑀢𑀼𑀫𑁆𑀳𑁂 𑀓𑀸𑀫𑀕𑀼𑀡𑀧𑀭𑀺𑀬𑁂𑀲𑀦𑀼𑀲𑁆𑀲𑀼𑀓𑁆𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣, 𑀅𑀳𑀁 𑀅𑀦𑀼𑀲𑁆𑀲𑀼𑀓𑁆𑀓𑁄 𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁯𑁭. ‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀯𑁂𑀭𑀺𑀦𑁂𑀲𑀼 𑀅𑀯𑁂𑀭𑀺𑀦𑁄,

𑀯𑁂𑀭𑀺𑀦𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀯𑁂𑀭𑀺𑀦𑁄.

𑁧𑁯𑁮. ‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸;

𑀆𑀢𑀼𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀸𑀢𑀼𑀭𑀸.

𑁧𑁯𑁯. ‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀉𑀲𑁆𑀲𑀼𑀓𑁂𑀲𑀼 𑀅𑀦𑀼𑀲𑁆𑀲𑀼𑀓𑀸;

𑀉𑀲𑁆𑀲𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀼𑀲𑁆𑀲𑀼𑀓𑀸’’𑀢𑀺.

𑀢𑀢𑁆𑀣 𑀲𑀼𑀲𑀼𑀔𑀦𑁆𑀢𑀺 𑀲𑀼𑀝𑁆𑀞𑀼 𑀲𑀼𑀔𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀕𑀺𑀳𑀺𑀦𑁄 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦, 𑀧𑀩𑁆𑀩𑀚𑀺𑀢𑀸 𑀯𑀸 𑀧𑀦 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀼𑀔𑁂𑀦 𑀚𑀻𑀯𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀫𑀬𑀫𑁂𑀯 𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂 𑀫𑀬𑀁 𑀧𑀜𑁆𑀘𑀳𑀺 𑀯𑁂𑀭𑀻𑀳𑀺 𑀯𑁂𑀭𑀺𑀦𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀅𑀯𑁂𑀭𑀺𑀦𑁄, 𑀓𑀺𑀮𑁂𑀲𑀸𑀢𑀼𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀅𑀦𑀸𑀢𑀼𑀭𑀸, 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀬𑁂𑀲𑀦𑁂 𑀉𑀲𑁆𑀲𑀼𑀓𑁂𑀲𑀼 𑀢𑀸𑀬 𑀧𑀭𑀺𑀬𑁂𑀲𑀦𑀸𑀬 𑀅𑀪𑀸𑀯𑁂𑀦 𑀅𑀦𑀼𑀲𑁆𑀲𑀼𑀓𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀜𑀸𑀢𑀺𑀓𑀮𑀳𑀯𑀽𑀧𑀲𑀫𑀦𑀯𑀢𑁆𑀣𑀼 𑀧𑀞𑀫𑀁.

𑁨. 𑀫𑀸𑀭𑀯𑀢𑁆𑀣𑀼

𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀜𑁆𑀘𑀲𑀸𑀮𑀸𑀬 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀧𑀜𑁆𑀘𑀲𑀢𑀸𑀦𑀁 𑀓𑀼𑀫𑀸𑀭𑀺𑀓𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀢𑀸𑀧𑀺 𑀓𑀼𑀫𑀸𑀭𑀺𑀓𑀸𑀬𑁄 𑀏𑀓𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀕𑀸𑀫𑀸𑀪𑀺𑀫𑀼𑀔𑀺𑀬𑁄 𑀧𑀸𑀬𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀢𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀅𑀣 𑀫𑀸𑀭𑁄 𑀲𑀓𑀮𑀕𑀸𑀫𑀯𑀸𑀲𑀻𑀦𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀬𑀣𑀸 𑀲𑀢𑁆𑀣𑀸 𑀓𑀝𑀘𑁆𑀙𑀼𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀮𑀪𑀢𑀺, 𑀏𑀯𑀁 𑀓𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀲𑀢𑁆𑀣𑀸𑀭𑀁 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀳 𑁋 ‘‘𑀅𑀧𑀺, 𑀲𑀫𑀡, 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀧𑀸𑀧𑀺𑀫, 𑀢𑀣𑀸 𑀅𑀓𑀸𑀲𑀺, 𑀬𑀣𑀸𑀳𑀁 𑀧𑀺𑀡𑁆𑀟𑀁 𑀦 𑀮𑀪𑁂𑀬𑁆𑀬’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀧𑀼𑀦 𑀧𑀯𑀺𑀲𑀣𑀸’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑁂 𑀧𑀼𑀦 𑀧𑀯𑀺𑀲𑀢𑀺, 𑀲𑀩𑁆𑀩𑁂𑀲𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀲 𑀧𑀼𑀭𑀢𑁄 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑁆𑀲𑀓𑁂𑀴𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀫𑀸𑀭𑁄𑀧𑀺 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑀁 𑀅𑀮𑀪𑀫𑀸𑀦𑀸 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑀢𑁆𑀣𑀸’’𑀢𑀺. 𑀲𑀢𑁆𑀣𑀸 ‘‘𑀅𑀚𑁆𑀚 𑀫𑀬𑀁, 𑀧𑀸𑀧𑀺𑀫, 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸𑀧𑀺 𑀆𑀪𑀲𑁆𑀲𑀭𑀮𑁄𑀓𑁂 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁦. ‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂𑀲𑀁 𑀦𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸’’𑀢𑀺.

𑀢𑀢𑁆𑀣 𑀬𑁂𑀲𑀁 𑀦𑁄𑀢𑀺 𑀬𑁂𑀲𑀁 𑀅𑀫𑁆𑀳𑀸𑀓𑀁 𑀧𑀮𑀺𑀩𑀼𑀚𑁆𑀛𑀦𑀢𑁆𑀣𑁂𑀦 𑀭𑀸𑀕𑀸𑀤𑀻𑀲𑀼 𑀓𑀺𑀜𑁆𑀘𑀦𑁂𑀲𑀼 𑀏𑀓𑀫𑁆𑀧𑀺 𑀓𑀺𑀜𑁆𑀘𑀦𑀁 𑀦𑀢𑁆𑀣𑀺. 𑀧𑀻𑀢𑀺𑀪𑀓𑁆𑀔𑀸𑀢𑀺 𑀬𑀣𑀸 𑀆𑀪𑀲𑁆𑀲𑀭𑀸 𑀤𑁂𑀯𑀸 𑀧𑀻𑀢𑀺𑀪𑀓𑁆𑀔𑀸 𑀳𑀼𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀏𑀯𑀁 𑀫𑀬𑀫𑁆𑀧𑀺, 𑀧𑀸𑀧𑀺𑀫, 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀓𑀼𑀫𑀸𑀭𑀺𑀓𑀸𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀫𑀸𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀯𑀢𑁆𑀣𑀼

𑀚𑀬𑀁 𑀯𑁂𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀓𑀸𑀲𑀺𑀓𑀕𑀸𑀫𑀁 𑀦𑀺𑀲𑁆𑀲𑀸𑀬 𑀪𑀸𑀕𑀺𑀦𑁂𑀬𑁆𑀬𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑁄 𑀢𑁂𑀦 𑀢𑀬𑁄 𑀯𑀸𑀭𑁂 𑀧𑀭𑀸𑀚𑀺𑀢𑁄 𑀢𑀢𑀺𑀬𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀔𑀻𑀭𑀫𑀼𑀔𑀫𑁆𑀧𑀺 𑀤𑀸𑀭𑀓𑀁 𑀧𑀭𑀸𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺. 𑀲𑁄 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀲𑀸 𑀧𑀯𑀢𑁆𑀢𑀺 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀭𑀸𑀚𑀸 𑀓𑀺𑀭 𑀓𑀸𑀲𑀺𑀓𑀕𑀸𑀫𑀓𑀁 𑀦𑀺𑀲𑁆𑀲𑀸𑀬 𑀢𑀬𑁄 𑀯𑀸𑀭𑁂 𑀧𑀭𑀸𑀚𑀺𑀢𑁄, 𑀲𑁄 𑀇𑀤𑀸𑀦𑀺 𑀧𑀭𑀸𑀚𑀺𑀢𑁆𑀯𑀸 𑀆𑀕𑀢𑁄 ‘𑀔𑀻𑀭𑀫𑀼𑀔𑀫𑁆𑀧𑀺 𑀤𑀸𑀭𑀓𑀁 𑀧𑀭𑀸𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’𑀢𑀺 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁄’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀚𑀺𑀦𑀦𑁆𑀢𑁄𑀧𑀺 𑀯𑁂𑀭𑀁 𑀧𑀲𑀯𑀢𑀺, 𑀧𑀭𑀸𑀚𑀺𑀢𑁄 𑀧𑀦 𑀤𑀼𑀓𑁆𑀔𑀁 𑀲𑁂𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁧. ‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀤𑀼𑀓𑁆𑀔𑀁 𑀲𑁂𑀢𑀺 𑀧𑀭𑀸𑀚𑀺𑀢𑁄;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬’’𑀦𑁆𑀢𑀺.

𑀢𑀢𑁆𑀣 𑀚𑀬𑀦𑁆𑀢𑀺 𑀧𑀭𑀁 𑀚𑀺𑀦𑀦𑁆𑀢𑁄 𑀯𑁂𑀭𑀁 𑀧𑀝𑀺𑀮𑀪𑀢𑀺. 𑀧𑀭𑀸𑀚𑀺𑀢𑁄𑀢𑀺 𑀧𑀭𑁂𑀦 𑀧𑀭𑀸𑀚𑀺𑀢𑁄 ‘‘𑀓𑀤𑀸 𑀦𑀼 𑀔𑁄 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀤𑀝𑁆𑀞𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀓𑁆𑀔𑀁 𑀲𑁂𑀢𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀼𑀓𑁆𑀔𑀫𑁂𑀯 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀲𑀦𑁆𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀉𑀧𑀲𑀦𑁆𑀢𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀔𑀻𑀡𑀸𑀲𑀯𑁄 𑀚𑀬𑀜𑁆𑀘 𑀧𑀭𑀸𑀚𑀬𑀜𑁆𑀘 𑀳𑀺𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀫𑁂𑀯 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀜𑁆𑀜𑀢𑀭𑀓𑀼𑀮𑀤𑀸𑀭𑀺𑀓𑀸𑀯𑀢𑁆𑀣𑀼

𑀦𑀢𑁆𑀣𑀺 𑀭𑀸𑀕𑀲𑀫𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀮𑀤𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲𑀸 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀆𑀯𑀸𑀳𑀁 𑀓𑀢𑁆𑀯𑀸 𑀫𑀗𑁆𑀕𑀮𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀸𑀧𑀺 𑀔𑁄 𑀯𑀥𑀼𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀤𑀓𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀻 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀢𑀺. 𑀲𑀸𑀫𑀺𑀓𑁄𑀧𑀺𑀲𑁆𑀲𑀸 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀭𑀸𑀕𑀯𑀲𑁂𑀦 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀦𑁆𑀢𑁄 𑀓𑀺𑀮𑁂𑀲𑁄 𑀲𑀫𑀼𑀤𑀸𑀘𑀭𑀺. 𑀲𑁄 𑀅𑀜𑁆𑀜𑀸𑀡𑀸𑀪𑀺𑀪𑀽𑀢𑁄 𑀦𑁂𑀯 𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺, 𑀦 𑀅𑀲𑀻𑀢𑀺 𑀫𑀳𑀸𑀣𑁂𑀭𑁂. 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀢𑀁 𑀯𑀥𑀼𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀘𑀺𑀢𑁆𑀢𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀬𑀣𑀸 𑀢𑀁 𑀇𑀢𑁆𑀣𑀺𑀁 𑀦 𑀧𑀲𑁆𑀲𑀢𑀺, 𑀏𑀯𑀫𑀓𑀸𑀲𑀺. 𑀲𑁄 𑀅𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑀓𑀸𑀮𑁂 ‘‘𑀓𑀼𑀫𑀸𑀭𑀓, 𑀦 𑀳𑀺 𑀭𑀸𑀕𑀕𑁆𑀕𑀺𑀦𑀸 𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫, 𑀤𑁄𑀲𑀓𑀮𑀺𑀦𑀸 𑀲𑀤𑀺𑀲𑁄 𑀓𑀮𑀺 𑀦𑀸𑀫, 𑀔𑀦𑁆𑀥𑀧𑀭𑀺𑀳𑀭𑀡𑀤𑀼𑀓𑁆𑀔𑁂𑀦 𑀲𑀤𑀺𑀲𑀁 𑀤𑀼𑀓𑁆𑀔𑀁 𑀦𑀸𑀫 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀲𑀼𑀔𑀲𑀤𑀺𑀲𑀁 𑀲𑀼𑀔𑀫𑁆𑀧𑀺 𑀦𑀢𑁆𑀣𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁨. ‘‘𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺, 𑀦𑀢𑁆𑀣𑀺 𑀤𑁄𑀲𑀲𑀫𑁄 𑀓𑀮𑀺;

𑀦𑀢𑁆𑀣𑀺 𑀔𑀦𑁆𑀥𑀲𑀫𑀸 𑀤𑀼𑀓𑁆𑀔𑀸, 𑀦𑀢𑁆𑀣𑀺 𑀲𑀦𑁆𑀢𑀺𑀧𑀭𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀦𑀢𑁆𑀣𑀺 𑀭𑀸𑀕𑀲𑀫𑁄𑀢𑀺 𑀥𑀽𑀫𑀁 𑀯𑀸 𑀚𑀸𑀮𑀁 𑀯𑀸 𑀅𑀗𑁆𑀕𑀸𑀭𑀁 𑀯𑀸 𑀅𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀛𑀸𑀧𑁂𑀢𑁆𑀯𑀸 𑀪𑀲𑁆𑀫𑀫𑀼𑀝𑁆𑀞𑀺𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀭𑀸𑀕𑁂𑀦 𑀲𑀫𑁄 𑀅𑀜𑁆𑀜𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀺. 𑀓𑀮𑀻𑀢𑀺 𑀤𑁄𑀲𑁂𑀦 𑀲𑀫𑁄 𑀅𑀧𑀭𑀸𑀥𑁄𑀧𑀺 𑀦𑀢𑁆𑀣𑀺. 𑀔𑀦𑁆𑀥𑀲𑀫𑀸𑀢𑀺 𑀔𑀦𑁆𑀥𑁂𑀳𑀺 𑀲𑀫𑀸. 𑀬𑀣𑀸 𑀧𑀭𑀺𑀳𑀭𑀺𑀬𑀫𑀸𑀦𑀸 𑀔𑀦𑁆𑀥𑀸 𑀤𑀼𑀓𑁆𑀔𑀸, 𑀏𑀯𑀁 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺. 𑀲𑀦𑁆𑀢𑀺𑀧𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀢𑁄 𑀉𑀢𑁆𑀢𑀭𑀺𑀁 𑀅𑀜𑁆𑀜𑀁 𑀲𑀼𑀔𑀫𑁆𑀧𑀺 𑀦𑀢𑁆𑀣𑀺. 𑀅𑀜𑁆𑀜𑀜𑁆𑀳𑀺 𑀲𑀼𑀔𑀁 𑀲𑀼𑀔𑀫𑁂𑀯, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀼𑀫𑀸𑀭𑀺𑀓𑀸 𑀘 𑀓𑀼𑀫𑀸𑀭𑀓𑁄 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀤𑀲𑁆𑀲𑀦𑀸𑀓𑀸𑀭𑀁 𑀅𑀓𑀸𑀲𑀻𑀢𑀺.

𑀅𑀜𑁆𑀜𑀢𑀭𑀓𑀼𑀮𑀤𑀸𑀭𑀺𑀓𑀸𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀏𑀓𑀉𑀧𑀸𑀲𑀓𑀯𑀢𑁆𑀣𑀼

𑀚𑀺𑀖𑀘𑁆𑀙𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀆𑀴𑀯𑀺𑀬𑀁 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀆𑀴𑀯𑀺𑀬𑀁 𑀏𑀓𑀁 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀆𑀴𑀯𑀺𑀁 𑀅𑀕𑀫𑀸𑀲𑀺. 𑀆𑀴𑀯𑀺𑀯𑀸𑀲𑀺𑀦𑁄 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀲𑁄𑀧𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 ‘‘𑀲𑀢𑁆𑀣𑀸 𑀓𑀺𑀭 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀫𑀦𑀁 𑀅𑀓𑀸𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀘𑀲𑁆𑀲 𑀏𑀓𑁄 𑀕𑁄𑀡𑁄 𑀧𑀮𑀸𑀬𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀕𑁄𑀡𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀥𑀫𑁆𑀫𑀁 𑀲𑀼𑀡𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑁄𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀧𑀸𑀢𑁄𑀯 𑀕𑁂𑀳𑀸 𑀦𑀺𑀓𑁆𑀔𑀫𑀺. 𑀆𑀴𑀯𑀺𑀯𑀸𑀲𑀺𑀦𑁄𑀧𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺𑀁𑀲𑀼. 𑀲𑀢𑁆𑀣𑀸 ‘‘𑀬𑀁 𑀦𑀺𑀲𑁆𑀲𑀸𑀬 𑀅𑀳𑀁 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀆𑀕𑀢𑁄, 𑀲𑁄 𑀕𑁄𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀲𑁆𑀫𑀺𑀁 𑀆𑀕𑀢𑁂𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀲𑁄𑀧𑀺 𑀫𑀦𑀼𑀲𑁆𑀲𑁄 𑀤𑀺𑀯𑀸 𑀕𑁄𑀡𑀁 𑀤𑀺𑀲𑁆𑀯𑀸 𑀕𑁄𑀕𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀘𑁂𑀧𑀺 𑀅𑀜𑁆𑀜𑀁 𑀦𑀢𑁆𑀣𑀺, 𑀲𑀢𑁆𑀣𑀼 𑀯𑀦𑁆𑀤𑀦𑀫𑀢𑁆𑀢𑀫𑁆𑀧𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄𑀧𑀺 𑀕𑁂𑀳𑀁 𑀕𑀫𑀦𑀸𑀬 𑀫𑀦𑀁 𑀅𑀓𑀢𑁆𑀯𑀸 𑀯𑁂𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀞𑀺𑀢𑀓𑀸𑀮𑁂 𑀤𑀸𑀦𑀯𑁂𑀬𑁆𑀬𑀸𑀯𑀝𑀺𑀓𑀁 𑀆𑀳 𑁋 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀢𑀺𑀭𑀺𑀢𑁆𑀢𑀪𑀢𑁆𑀢’’𑀦𑁆𑀢𑀺? ‘‘𑀪𑀦𑁆𑀢𑁂, 𑀲𑀩𑁆𑀩𑀁 𑀅𑀢𑁆𑀣𑀻’’𑀢𑀺. 𑀢𑁂𑀦 𑀳𑀺 ‘‘𑀇𑀫𑀁 𑀧𑀭𑀺𑀯𑀺𑀲𑀸𑀳𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺. 𑀲𑁄 𑀪𑀼𑀢𑁆𑀢𑀪𑀢𑁆𑀢𑁄 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀞𑀧𑁂𑀢𑁆𑀯𑀸 𑀓𑀺𑀭 𑀇𑀫𑀁 𑀞𑀸𑀦𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀜𑁆𑀜𑀢𑁆𑀣 𑀕𑀢𑀸𑀕𑀢𑀲𑁆𑀲 𑀪𑀢𑁆𑀢𑀯𑀺𑀘𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀧𑀲𑁆𑀲𑀤𑁆𑀥𑀤𑀭𑀣𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀚𑀦𑁄 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸𑀬𑁂𑀯 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀲𑀢𑁆𑀣𑀼 𑀓𑀫𑁆𑀫𑀁, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀏𑀯𑀭𑀽𑀧𑀁 𑀦𑀢𑁆𑀣𑀺, 𑀅𑀚𑁆𑀚 𑀧𑀦𑁂𑀓𑀁 𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸𑀯 𑀬𑀸𑀕𑀼𑀆𑀤𑀻𑀦𑀺 𑀯𑀺𑀘𑀸𑀭𑁂𑀢𑁆𑀯𑀸 𑀤𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀓𑁄𑀯 ‘‘𑀓𑀺𑀁 𑀓𑀣𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀅𑀳𑀁 𑀢𑀺𑀁𑀲𑀬𑁄𑀚𑀦𑀁 𑀓𑀦𑁆𑀢𑀸𑀭𑀁 𑀆𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀆𑀕𑀢𑁄, 𑀲𑁄 𑀅𑀢𑀺𑀯𑀺𑀬 𑀚𑀺𑀖𑀘𑁆𑀙𑀺𑀢𑁄, 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀕𑁄𑀡𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀭𑀜𑁆𑀜𑁂 𑀯𑀺𑀘𑀭𑀺. ‘𑀚𑀺𑀖𑀘𑁆𑀙𑀤𑀼𑀓𑁆𑀔𑁂𑀦 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀁 𑀅𑀓𑀸𑀲𑀺𑀁, 𑀚𑀺𑀖𑀘𑁆𑀙𑀸𑀭𑁄𑀕𑀲𑀤𑀺𑀲𑁄 𑀭𑁄𑀕𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁩. ‘‘𑀚𑀺𑀖𑀘𑁆𑀙𑀸𑀧𑀭𑀫𑀸 𑀭𑁄𑀕𑀸, 𑀲𑀗𑁆𑀔𑀸𑀭𑀧𑀭𑀫𑀸 𑀤𑀼𑀔𑀸;

𑀏𑀢𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀚𑀺𑀖𑀘𑁆𑀙𑀸𑀧𑀭𑀫𑀸 𑀭𑁄𑀕𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑁄 𑀭𑁄𑀕𑁄 𑀲𑀓𑀺𑀁 𑀢𑀺𑀓𑀺𑀘𑁆𑀙𑀺𑀢𑁄 𑀯𑀺𑀦𑀲𑁆𑀲𑀢𑀺 𑀯𑀸 𑀢𑀤𑀗𑁆𑀕𑀯𑀲𑁂𑀦 𑀯𑀸 𑀧𑀳𑀻𑀬𑀢𑀺, 𑀚𑀺𑀖𑀘𑁆𑀙𑀸 𑀧𑀦 𑀦𑀺𑀘𑁆𑀘𑀓𑀸𑀮𑀁 𑀢𑀺𑀓𑀺𑀘𑁆𑀙𑀺𑀢𑀩𑁆𑀩𑀸𑀬𑁂𑀯𑀸𑀢𑀺 𑀲𑁂𑀲𑀭𑁄𑀕𑀸𑀦𑀁 𑀅𑀬𑀁 𑀧𑀭𑀫𑀸 𑀦𑀸𑀫. 𑀲𑀗𑁆𑀔𑀸𑀭𑀸𑀢𑀺 𑀧𑀜𑁆𑀘 𑀔𑀦𑁆𑀥𑀸. 𑀏𑀢𑀁 𑀜𑀢𑁆𑀯𑀸𑀢𑀺 𑀚𑀺𑀖𑀘𑁆𑀙𑀸𑀲𑀫𑁄 𑀭𑁄𑀕𑁄 𑀦𑀢𑁆𑀣𑀺, 𑀔𑀦𑁆𑀥𑀧𑀭𑀺𑀳𑀭𑀡𑀲𑀫𑀁 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀢𑀫𑀢𑁆𑀣𑀁 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀧𑀡𑁆𑀟𑀺𑀢𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺 𑀓𑀭𑁄𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀦𑁆𑀢𑀺 𑀢𑀜𑁆𑀳𑀺 𑀲𑀩𑁆𑀩𑀲𑀼𑀔𑀸𑀦𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀏𑀓𑀉𑀧𑀸𑀲𑀓𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀲𑁂𑀦𑀤𑀺𑀓𑁄𑀲𑀮𑀯𑀢𑁆𑀣𑀼

𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀓𑁄𑀲𑀮𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀸 𑀢𑀡𑁆𑀟𑀼𑀮𑀤𑁄𑀡𑀲𑁆𑀲 𑀑𑀤𑀦𑀁 𑀢𑀤𑀼𑀧𑀺𑀬𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀪𑀢𑁆𑀢𑀲𑀫𑁆𑀫𑀤𑀁 𑀅𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀬𑀫𑀸𑀦𑁄𑀧𑀺 𑀉𑀚𑀼𑀓𑀁 𑀦𑀺𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀯𑀺𑀲𑁆𑀲𑀫𑀺𑀢𑁆𑀯𑀸𑀯 𑀆𑀕𑀢𑁄𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁂 𑀫𑀳𑀸𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀅𑀢𑀺𑀩𑀳𑀼𑀪𑁄𑀚𑀦𑀁 𑀏𑀯𑀁 𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘,

𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄,

𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. (𑀥. 𑀧. 𑁩𑁨𑁫); 𑁋

𑀇𑀫𑀸𑀬 𑀕𑀸𑀣𑀸𑀬 𑀑𑀯𑀤𑀺𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀦𑀸𑀫 𑀫𑀢𑁆𑀢𑀸𑀬 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀢𑁆𑀢𑀪𑁄𑀚𑀺𑀦𑁄 𑀳𑀺 𑀲𑀼𑀔𑀁 𑀳𑁄𑀢𑀻’’𑀢𑀺 𑀉𑀢𑁆𑀢𑀭𑀺 𑀑𑀯𑀤𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄,

𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸,

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁨𑁪);

𑀭𑀸𑀚𑀸 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀫𑀻𑀧𑁂 𑀞𑀺𑀢𑀁 𑀧𑀦 𑀪𑀸𑀕𑀺𑀦𑁂𑀬𑁆𑀬𑀁, 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀫𑀸𑀡𑀯𑀁 ‘‘𑀇𑀫𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳, 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀭𑀜𑁆𑀜𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀑𑀲𑀸𑀦𑀧𑀺𑀡𑁆𑀟𑀓𑀸𑀮𑁂 𑀇𑀫𑀁 𑀕𑀸𑀣𑀁 𑀯𑀤𑁂𑀬𑁆𑀬𑀸𑀲𑀺, 𑀭𑀸𑀚𑀸 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀁 𑀧𑀺𑀡𑁆𑀟𑀁 𑀙𑀟𑁆𑀟𑁂𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀲𑀺𑀢𑁆𑀣𑀕𑀡𑀦𑀸𑀬 𑀭𑀜𑁆𑀜𑁄 𑀪𑀢𑁆𑀢𑀧𑀘𑀦𑀓𑀸𑀮𑁂 𑀢𑀢𑁆𑀢𑀓𑁂 𑀢𑀡𑁆𑀟𑀼𑀮𑁂 𑀳𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀬𑀫𑁆𑀧𑀺 𑀧𑀸𑀢𑁄𑀧𑀺 𑀭𑀜𑁆𑀜𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀑𑀲𑀸𑀦𑀧𑀺𑀡𑁆𑀟𑀓𑀸𑀮𑁂 𑀢𑀁 𑀕𑀸𑀣𑀁 𑀉𑀤𑀸𑀳𑀭𑀺𑀢𑁆𑀯𑀸 𑀢𑁂𑀦 𑀙𑀟𑁆𑀟𑀺𑀢𑀧𑀺𑀡𑁆𑀟𑁂 𑀲𑀺𑀢𑁆𑀣𑀕𑀡𑀦𑀸𑀬 𑀢𑀡𑁆𑀟𑀼𑀮𑁂 𑀳𑀸𑀧𑁂𑀲𑀺. 𑀭𑀸𑀚𑀸𑀧𑀺 𑀢𑀲𑁆𑀲 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀤𑀸𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀳𑀺𑀢𑁆𑀯𑀸 𑀲𑀼𑀔𑀧𑁆𑀧𑀢𑁆𑀢𑁄 𑀢𑀦𑀼𑀲𑀭𑀻𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀫𑁂 𑀲𑀼𑀔𑀁 𑀚𑀸𑀢𑀁, 𑀫𑀺𑀕𑀫𑁆𑀧𑀺 𑀅𑀲𑁆𑀲𑀫𑁆𑀧𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑀲𑀫𑀢𑁆𑀣𑁄 𑀚𑀸𑀢𑁄𑀫𑁆𑀳𑀺. 𑀧𑀼𑀩𑁆𑀩𑁂 𑀫𑁂 𑀪𑀸𑀕𑀺𑀦𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀫𑁂𑀯 𑀳𑁄𑀢𑀺, 𑀇𑀤𑀸𑀦𑀺 𑀯𑀚𑀻𑀭𑀓𑀼𑀫𑀸𑀭𑀺𑀁 𑀦𑀸𑀫 𑀥𑀻𑀢𑀭𑀁 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀢𑁆𑀯𑀸 𑀲𑁄 𑀕𑀸𑀫𑁄 𑀢𑀲𑁆𑀲𑀸𑀬𑁂𑀯 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀁 𑀓𑀢𑁆𑀯𑀸 𑀤𑀺𑀦𑁆𑀦𑁄, 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀳𑁄 𑀯𑀽𑀧𑀲𑀦𑁆𑀢𑁄, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢𑀁. 𑀓𑀼𑀮𑀲𑀦𑁆𑀢𑀓𑀁 𑀭𑀸𑀚𑀫𑀡𑀺𑀭𑀢𑀦𑀁 𑀦𑁄 𑀕𑁂𑀳𑁂 𑀧𑀼𑀭𑀺𑀫𑀤𑀺𑀯𑀲𑁂 𑀦𑀝𑁆𑀞𑀁, 𑀢𑀫𑁆𑀧𑀺 𑀇𑀤𑀸𑀦𑀺 𑀳𑀢𑁆𑀣𑀧𑀢𑁆𑀢𑀁 𑀆𑀕𑀢𑀁, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢𑀁. 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀇𑀘𑁆𑀙𑀦𑁆𑀢𑁂𑀦 𑀜𑀸𑀢𑀺𑀥𑀻𑀢𑀸𑀧𑀺 𑀦𑁄 𑀕𑁂𑀳𑁂 𑀓𑀢𑀸, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢’’𑀦𑁆𑀢𑀺. 𑀲𑀢𑁆𑀣𑀸 ‘‘𑀆𑀭𑁄𑀕𑁆𑀬𑀁 𑀦𑀸𑀫, 𑀫𑀳𑀸𑀭𑀸𑀚, 𑀧𑀭𑀫𑁄 𑀮𑀸𑀪𑁄, 𑀬𑀣𑀸𑀮𑀤𑁆𑀥𑁂𑀦 𑀲𑀦𑁆𑀢𑀼𑀝𑁆𑀞𑀪𑀸𑀯𑀲𑀤𑀺𑀲𑀫𑁆𑀧𑀺 𑀥𑀦𑀁, 𑀯𑀺𑀲𑁆𑀲𑀸𑀲𑀲𑀤𑀺𑀲𑁄 𑀘 𑀧𑀭𑀫𑀸 𑀜𑀸𑀢𑀺, 𑀦𑀺𑀩𑁆𑀩𑀸𑀦𑀲𑀤𑀺𑀲𑀜𑁆𑀘 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁪. ‘‘𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸, 𑀲𑀦𑁆𑀢𑀼𑀝𑁆𑀞𑀺𑀧𑀭𑀫𑀁 𑀥𑀦𑀁;

𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀺, 𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸𑀢𑀺 𑀅𑀭𑁄𑀕𑀪𑀸𑀯𑀧𑀭𑀫𑀸 𑀮𑀸𑀪𑀸. 𑀭𑁄𑀕𑀺𑀦𑁄 𑀳𑀺 𑀯𑀺𑀚𑁆𑀚𑀫𑀸𑀦𑀸𑀧𑀺 𑀮𑀸𑀪𑀸 𑀅𑀮𑀸𑀪𑀸𑀬𑁂𑀯, 𑀢𑀲𑁆𑀫𑀸 𑀅𑀭𑁄𑀕𑀲𑁆𑀲 𑀲𑀩𑁆𑀩𑀮𑀸𑀪𑀸 𑀆𑀕𑀢𑀸𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸’’𑀢𑀺. 𑀲𑀦𑁆𑀢𑀼𑀝𑁆𑀞𑀺𑀧𑀭𑀫𑀁 𑀥𑀦𑀦𑁆𑀢𑀺 𑀕𑀺𑀳𑀺𑀦𑁄 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀬𑀁 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀢𑁂𑀦𑁂𑀯 𑀢𑀼𑀲𑁆𑀲𑀦𑀪𑀸𑀯𑁄 𑀲𑀦𑁆𑀢𑀼𑀝𑁆𑀞𑀻 𑀦𑀸𑀫 𑀲𑁂𑀲𑀥𑀦𑁂𑀳𑀺 𑀧𑀭𑀫𑀁 𑀥𑀦𑀁. 𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀻𑀢𑀺 𑀫𑀸𑀢𑀸 𑀯𑀸 𑀳𑁄𑀢𑀼 𑀧𑀺𑀢𑀸 𑀯𑀸, 𑀬𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀲𑁄 𑀅𑀜𑁆𑀜𑀸𑀢𑀓𑁄𑀯. 𑀬𑁂𑀦 𑀅𑀜𑁆𑀜𑀸𑀢𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀅𑀢𑁆𑀣𑀺, 𑀲𑁄 𑀅𑀲𑀫𑁆𑀩𑀦𑁆𑀥𑁄𑀧𑀺 𑀧𑀭𑀫𑁄 𑀉𑀢𑁆𑀢𑀫𑁄 𑀜𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀻’’𑀢𑀺. 𑀦𑀺𑀩𑁆𑀩𑀸𑀦𑀲𑀤𑀺𑀲𑀁 𑀧𑀦 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀢𑁂𑀦𑁂𑀯𑀸𑀳 𑁋 𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀲𑁂𑀦𑀤𑀺𑀓𑁄𑀲𑀮𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀧𑀯𑀺𑀯𑁂𑀓𑀭𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸𑀭𑀸 𑀳𑀺, ‘‘𑀪𑀺𑀓𑁆𑀔𑀯𑁂, 𑀅𑀳𑀁 𑀇𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀢𑁆𑀢 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀺𑀁𑀲𑀼, 𑀔𑀻𑀡𑀸𑀲𑀯𑀸𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺, 𑀧𑀼𑀣𑀼𑀚𑁆𑀚𑀦𑀸 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀪𑀺𑀓𑁆𑀔𑀽 𑀯𑀕𑁆𑀕𑀸 𑀯𑀕𑁆𑀕𑀸 𑀳𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀅𑀣𑁂𑀓𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀪𑀺𑀓𑁆𑀔𑀽 ‘‘𑀲𑀢𑁆𑀣𑀸 𑀓𑀺𑀭 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀅𑀯𑀻𑀢𑀭𑀸𑀕𑁄, 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂𑀬𑁂𑀯 𑀫𑀬𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀯𑀺𑀳𑀸𑀲𑀺. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀕𑀫𑀦𑀁 𑀯𑀸 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀯𑀸 𑀦𑀢𑁆𑀣𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑀺𑀲𑁆𑀲 𑀢𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺. 𑀲𑁄 𑀢𑁂𑀲𑀁 𑀓𑀣𑀁 𑀦 𑀲𑀼𑀡𑀸𑀢𑀺. 𑀢𑁂 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀺𑀦𑁂𑀳𑁄 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀢𑀺𑀲𑁆𑀲 𑀏𑀯𑀁 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀆𑀭𑁄𑀘𑀺𑀢𑁂 ‘‘𑀲𑀸𑀥𑀼, 𑀢𑀺𑀲𑁆𑀲𑀸’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀫𑀬𑀺 𑀲𑀺𑀦𑁂𑀳𑁄 𑀢𑀺𑀲𑁆𑀲𑀲𑀤𑀺𑀲𑁄𑀯 𑀳𑁄𑀢𑀼. 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑀸𑀧𑀺 𑀦𑁂𑀯 𑀫𑀁 𑀧𑀽𑀚𑁂𑀦𑁆𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀫𑀸𑀦𑀸𑀬𑁂𑀯 𑀧𑀦 𑀫𑀁 𑀧𑀽𑀚𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁫. ‘‘𑀧𑀯𑀺𑀯𑁂𑀓𑀭𑀲𑀁 𑀧𑀺𑀢𑁆𑀯𑀸, 𑀭𑀲𑀁 𑀉𑀧𑀲𑀫𑀲𑁆𑀲 𑀘;

𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀥𑀫𑁆𑀫𑀧𑀻𑀢𑀺𑀭𑀲𑀁 𑀧𑀺𑀯’’𑀦𑁆𑀢𑀺.

𑀢𑀢𑁆𑀣 𑀧𑀯𑀺𑀯𑁂𑀓𑀭𑀲𑀦𑁆𑀢𑀺 𑀧𑀯𑀺𑀯𑁂𑀓𑀢𑁄 𑀉𑀧𑁆𑀧𑀦𑁆𑀦𑀁 𑀭𑀲𑀁, 𑀏𑀓𑀻𑀪𑀸𑀯𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀢𑁆𑀯𑀸𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀆𑀭𑀫𑁆𑀫𑀡𑀢𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦 𑀧𑀺𑀯𑀺𑀢𑁆𑀯𑀸. 𑀉𑀧𑀲𑀫𑀲𑁆𑀲 𑀘𑀸𑀢𑀺 𑀓𑀺𑀮𑁂𑀲𑀽𑀧𑀲𑀫𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀲𑀁 𑀧𑀺𑀢𑁆𑀯𑀸. 𑀦𑀺𑀤𑁆𑀤𑀭𑁄 𑀳𑁄𑀢𑀻𑀢𑀺 𑀢𑁂𑀦 𑀉𑀪𑀬𑀭𑀲𑀧𑀸𑀦𑁂𑀦 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀤𑀭𑀣𑀸𑀤𑀻𑀦𑀁 𑀅𑀪𑀸𑀯𑁂𑀦 𑀦𑀺𑀤𑁆𑀤𑀭𑁄 𑀘𑁂𑀯 𑀦𑀺𑀧𑁆𑀧𑀸𑀧𑁄 𑀘 𑀳𑁄𑀢𑀺. 𑀭𑀲𑀁 𑀧𑀺𑀯𑀦𑁆𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀭𑀲𑀁 𑀧𑀺𑀯𑀦𑁆𑀢𑁄𑀧𑀺 𑀦𑀺𑀤𑁆𑀤𑀭𑁄 𑀦𑀺𑀧𑁆𑀧𑀸𑀧𑁄 𑀘 𑀳𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀲𑀓𑁆𑀓𑀯𑀢𑁆𑀣𑀼

𑀲𑀸𑀳𑀼 𑀤𑀲𑁆𑀲𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀕𑀸𑀫𑀓𑁂 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀣𑀸𑀕𑀢𑀲𑁆𑀲 𑀳𑀺 𑀆𑀬𑀼𑀲𑀗𑁆𑀔𑀸𑀭𑁂 𑀯𑀺𑀲𑁆𑀲𑀝𑁆𑀞𑁂 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀩𑀸𑀥𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀫𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀧𑀸𑀤𑁂 𑀧𑀭𑀺𑀫𑀚𑁆𑀚𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 ‘‘𑀓𑁄 𑀏𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀲𑀓𑁆𑀓𑁄’’𑀢𑀺. ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? ‘‘𑀢𑀼𑀫𑁆𑀳𑁂 𑀕𑀺𑀮𑀸𑀦𑁂 𑀉𑀧𑀝𑁆𑀞𑀳𑀺𑀢𑀼𑀁, 𑀪𑀦𑁆𑀢𑁂’’𑀢𑀺. ‘‘𑀲𑀓𑁆𑀓, 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀕𑀦𑁆𑀥𑁄 𑀬𑁄𑀚𑀦𑀲𑀢𑀢𑁄 𑀧𑀝𑁆𑀞𑀸𑀬 𑀕𑀮𑁂 𑀩𑀤𑁆𑀥𑀓𑀼𑀡𑀧𑀁 𑀯𑀺𑀬 𑀳𑁄𑀢𑀺, 𑀕𑀘𑁆𑀙 𑀢𑁆𑀯𑀁, 𑀅𑀢𑁆𑀣𑀺 𑀫𑁂 𑀕𑀺𑀮𑀸𑀦𑀼𑀧𑀝𑁆𑀞𑀓𑀸 𑀪𑀺𑀓𑁆𑀔𑀽’’𑀢𑀺. ‘‘𑀪𑀦𑁆𑀢𑁂, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀣𑀓𑁂 𑀞𑀺𑀢𑁄 𑀢𑀼𑀫𑁆𑀳𑀸𑀓𑀁 𑀲𑀻𑀮𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀆𑀕𑀢𑁄, 𑀅𑀳𑀫𑁂𑀯 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀲𑀢𑁆𑀣𑀼 𑀲𑀭𑀻𑀭𑀯𑀴𑀜𑁆𑀚𑀦𑀪𑀸𑀚𑀦𑀁 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂𑀦𑀸𑀧𑀺 𑀨𑀼𑀲𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀲𑁂𑀬𑁂𑀯 𑀞𑀧𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑁄 𑀫𑀼𑀔𑀲𑀗𑁆𑀓𑁄𑀘𑀦𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺, 𑀕𑀦𑁆𑀥𑀪𑀸𑀚𑀦𑀁 𑀧𑀭𑀺𑀳𑀭𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀏𑀯𑀁 𑀲𑀢𑁆𑀣𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀲𑀢𑁆𑀣𑀼 𑀨𑀸𑀲𑀼𑀓𑀓𑀸𑀮𑁂𑀬𑁂𑀯 𑀅𑀕𑀫𑀸𑀲𑀺.

𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀳𑁄 𑀲𑀢𑁆𑀣𑀭𑀺 𑀲𑀓𑁆𑀓𑀲𑁆𑀲 𑀲𑀺𑀦𑁂𑀳𑁄, 𑀏𑀯𑀭𑀽𑀧𑀁 𑀦𑀸𑀫 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀫𑀼𑀔𑀲𑀗𑁆𑀓𑁄𑀘𑀦𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀕𑀦𑁆𑀥𑀪𑀸𑀚𑀦𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀲𑀢𑁆𑀣𑀼 𑀲𑀭𑀻𑀭𑀯𑀴𑀜𑁆𑀚𑀦𑀪𑀸𑀚𑀦𑀁 𑀲𑀻𑀲𑁂𑀦 𑀦𑀻𑀳𑀭𑀦𑁆𑀢𑁄 𑀉𑀧𑀝𑁆𑀞𑀸𑀦𑀫𑀓𑀸𑀲𑀻’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀓𑀺𑀁 𑀯𑀤𑁂𑀣, 𑀪𑀺𑀓𑁆𑀔𑀯𑁂, 𑀅𑀦𑀘𑁆𑀙𑀭𑀺𑀬𑀁 𑀏𑀢𑀁, 𑀬𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀬𑀺 𑀲𑀺𑀦𑁂𑀳𑀁 𑀓𑀭𑁄𑀢𑀺. 𑀅𑀬𑀁 𑀲𑀓𑁆𑀓𑁄 𑀳𑀺 𑀤𑁂𑀯𑀭𑀸𑀚𑀸 𑀫𑀁 𑀦𑀺𑀲𑁆𑀲𑀸𑀬 𑀚𑀭𑀲𑀓𑁆𑀓𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀢𑀭𑀼𑀡𑀲𑀓𑁆𑀓𑀲𑁆𑀲 𑀪𑀸𑀯𑀁 𑀧𑀢𑁆𑀢𑁄, 𑀅𑀳𑀁 𑀳𑀺𑀲𑁆𑀲 𑀫𑀭𑀡𑀪𑀬𑀢𑀚𑁆𑀚𑀺𑀢𑀲𑁆𑀲 𑀧𑀜𑁆𑀘𑀲𑀺𑀔𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀕𑀢𑀓𑀸𑀮𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀤𑁂𑀯𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀲𑁆𑀲 𑁋

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’𑀢𑀺. (𑀤𑀻. 𑀦𑀺. 𑁨.𑁩𑁫𑁬) 𑁋

𑀯𑀢𑁆𑀯𑀸 𑀢𑀲𑁆𑀲 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺𑀁. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀼𑀤𑁆𑀤𑀲𑀦𑁆𑀦𑀁 𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀲𑀓𑁆𑀓𑁄𑀧𑀺 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀢𑀭𑀼𑀡𑀲𑀓𑁆𑀓𑁄 𑀚𑀸𑀢𑁄. 𑀏𑀯𑀫𑀲𑁆𑀲𑀸𑀳𑀁 𑀩𑀳𑀽𑀧𑀓𑀸𑀭𑁄. 𑀢𑀲𑁆𑀲 𑀫𑀬𑀺 𑀲𑀺𑀦𑁂𑀳𑁄 𑀦𑀸𑀫 𑀅𑀦𑀘𑁆𑀙𑀭𑀺𑀬𑁄. 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀦𑀜𑁆𑀳𑀺 𑀤𑀲𑁆𑀲𑀦𑀫𑁆𑀧𑀺 𑀲𑀼𑀔𑀁, 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀲𑀦𑁆𑀦𑀺𑀯𑀸𑀲𑁄𑀧𑀺 𑀲𑀼𑀔𑁄. 𑀩𑀸𑀮𑁂𑀳𑀺 𑀲𑀤𑁆𑀥𑀺𑀁 𑀧𑀦 𑀲𑀩𑁆𑀩𑀫𑁂𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦𑁬. ‘‘𑀲𑀸𑀳𑀼 𑀤𑀲𑁆𑀲𑀦𑀫𑀭𑀺𑀬𑀸𑀦𑀁, 𑀲𑀦𑁆𑀦𑀺𑀯𑀸𑀲𑁄 𑀲𑀤𑀸 𑀲𑀼𑀔𑁄;

𑀅𑀤𑀲𑁆𑀲𑀦𑁂𑀦 𑀩𑀸𑀮𑀸𑀦𑀁, 𑀦𑀺𑀘𑁆𑀘𑀫𑁂𑀯 𑀲𑀼𑀔𑀻 𑀲𑀺𑀬𑀸.

𑁨𑁦𑁭. ‘‘𑀩𑀸𑀮𑀲𑀗𑁆𑀕𑀢𑀘𑀸𑀭𑀻 𑀳𑀺, 𑀤𑀻𑀖𑀫𑀤𑁆𑀥𑀸𑀦 𑀲𑁄𑀘𑀢𑀺;

𑀤𑀼𑀓𑁆𑀔𑁄 𑀩𑀸𑀮𑁂𑀳𑀺 𑀲𑀁𑀯𑀸𑀲𑁄, 𑀅𑀫𑀺𑀢𑁆𑀢𑁂𑀦𑁂𑀯 𑀲𑀩𑁆𑀩𑀤𑀸;

𑀥𑀻𑀭𑁄 𑀘 𑀲𑀼𑀔𑀲𑀁𑀯𑀸𑀲𑁄, 𑀜𑀸𑀢𑀻𑀦𑀁𑀯 𑀲𑀫𑀸𑀕𑀫𑁄’’.

𑀢𑀲𑁆𑀫𑀸 𑀳𑀺 𑁋

𑁨𑁦𑁮. ‘‘𑀥𑀻𑀭𑀜𑁆𑀘 𑀧𑀜𑁆𑀜𑀜𑁆𑀘 𑀩𑀳𑀼𑀲𑁆𑀲𑀼𑀢𑀜𑁆𑀘,𑀥𑁄𑀭𑀬𑁆𑀳𑀲𑀻𑀮𑀁 𑀯𑀢𑀯𑀦𑁆𑀢𑀫𑀭𑀺𑀬𑀁;

𑀢𑀁 𑀢𑀸𑀤𑀺𑀲𑀁 𑀲𑀧𑁆𑀧𑀼𑀭𑀺𑀲𑀁 𑀲𑀼𑀫𑁂𑀥𑀁,𑀪𑀚𑁂𑀣 𑀦𑀓𑁆𑀔𑀢𑁆𑀢𑀧𑀣𑀁 𑀯 𑀘𑀦𑁆𑀤𑀺𑀫𑀸’’𑀢𑀺.

𑀢𑀢𑁆𑀣 𑀲𑀸𑀳𑀽𑀢𑀺 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁. 𑀲𑀦𑁆𑀦𑀺𑀯𑀸𑀲𑁄𑀢𑀺 𑀦 𑀓𑁂𑀯𑀮𑀜𑁆𑀘 𑀢𑁂𑀲𑀁 𑀤𑀲𑁆𑀲𑀦𑀫𑁂𑀯, 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀦𑀸𑀤𑀺𑀪𑀸𑀯𑁄𑀧𑀺 𑀢𑁂𑀲𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀸𑀢𑀼𑀁 𑀮𑀪𑀦𑀪𑀸𑀯𑁄𑀧𑀺 𑀲𑀸𑀥𑀼𑀬𑁂𑀯. 𑀩𑀸𑀮𑀲𑀗𑁆𑀕𑀢𑀘𑀸𑀭𑀻 𑀳𑀻𑀢𑀺 𑀬𑁄 𑀩𑀸𑀮𑁂𑀦 𑀲𑀳𑀘𑀸𑀭𑀻. 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀲𑁄 𑀩𑀸𑀮𑀲𑀳𑀸𑀬𑁂𑀦 ‘‘𑀏𑀳𑀺 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀭𑁄𑀫𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑁄 𑀳𑀼𑀢𑁆𑀯𑀸 𑀢𑀸𑀦𑀺 𑀓𑀭𑁄𑀦𑁆𑀢𑁄 𑀳𑀢𑁆𑀣𑀘𑁆𑀙𑁂𑀤𑀸𑀤𑀻𑀦𑀺 𑀧𑀢𑁆𑀯𑀸 𑀤𑀻𑀖𑀫𑀤𑁆𑀥𑀸𑀦𑀁 𑀲𑁄𑀘𑀢𑀺. 𑀲𑀩𑁆𑀩𑀤𑀸𑀢𑀺 𑀬𑀣𑀸 𑀅𑀲𑀺𑀳𑀢𑁆𑀣𑁂𑀦 𑀯𑀸 𑀅𑀫𑀺𑀢𑁆𑀢𑁂𑀦 𑀆𑀲𑀻𑀯𑀺𑀲𑀸𑀤𑀻𑀳𑀺 𑀯𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀸𑀲𑁄 𑀦𑀸𑀫 𑀦𑀺𑀘𑁆𑀘𑀁 𑀤𑀼𑀓𑁆𑀔𑁄, 𑀢𑀣𑁂𑀯 𑀩𑀸𑀮𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀥𑀻𑀭𑁄 𑀘 𑀲𑀼𑀔𑀲𑀁𑀯𑀸𑀲𑁄𑀢𑀺 𑀏𑀢𑁆𑀣 𑀲𑀼𑀔𑁄 𑀲𑀁𑀯𑀸𑀲𑁄 𑀏𑀢𑁂𑀦𑀸𑀢𑀺 𑀲𑀼𑀔𑀲𑀁𑀯𑀸𑀲𑁄, 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀲𑀁𑀯𑀸𑀲𑁄 𑀲𑀼𑀔𑁄𑀢𑀺 𑀅𑀢𑁆𑀣𑁄. 𑀓𑀣𑀁? 𑀜𑀸𑀢𑀻𑀦𑀁𑀯 𑀲𑀫𑀸𑀕𑀫𑁄𑀢𑀺 𑀬𑀣𑀸𑀧𑀺 𑀜𑀸𑀢𑀻𑀦𑀁 𑀲𑀫𑀸𑀕𑀫𑁄 𑀲𑀼𑀔𑁄, 𑀏𑀯𑀁 𑀲𑀼𑀔𑁄.

𑀢𑀲𑁆𑀫𑀸 𑀳𑀻𑀢𑀺 𑀬𑀲𑁆𑀫𑀸 𑀩𑀸𑀮𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀤𑀼𑀓𑁆𑀔𑁄, 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀲𑀼𑀔𑁄, 𑀢𑀲𑁆𑀫𑀸 𑀳𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀁 𑀥𑀻𑀭𑀜𑁆𑀘, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀁 𑀧𑀜𑁆𑀜𑀜𑁆𑀘, 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀁 𑀩𑀳𑀼𑀲𑁆𑀲𑀼𑀢𑀜𑁆𑀘, 𑀅𑀭𑀳𑀢𑁆𑀢𑀧𑀸𑀧𑀦𑀓𑀲𑀗𑁆𑀔𑀸𑀢𑀸𑀬 𑀥𑀼𑀭𑀯𑀳𑀦𑀲𑀻𑀮𑀢𑀸𑀬 𑀥𑁄𑀭𑀬𑁆𑀳𑀲𑀻𑀮𑀁, 𑀲𑀻𑀮𑀯𑀢𑁂𑀦 𑀘𑁂𑀯 𑀥𑀼𑀢𑀗𑁆𑀕𑀯𑀢𑁂𑀦 𑀘 𑀯𑀢𑀯𑀦𑁆𑀢𑀁, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑀸𑀬 𑀅𑀭𑀺𑀬𑀁, 𑀢𑀣𑀸𑀭𑀽𑀧𑀁 𑀲𑀧𑁆𑀧𑀼𑀭𑀺𑀲𑀁 𑀲𑁄𑀪𑀦𑀧𑀜𑁆𑀳𑀁 𑀬𑀣𑀸 𑀦𑀺𑀫𑁆𑀫𑀮𑀁 𑀦𑀓𑁆𑀔𑀢𑁆𑀢𑀧𑀣𑀲𑀗𑁆𑀔𑀸𑀢𑀁 𑀆𑀓𑀸𑀲𑀁 𑀘𑀦𑁆𑀤𑀺𑀫𑀸 𑀪𑀚𑀢𑀺, 𑀏𑀯𑀁 𑀪𑀚𑁂𑀣 𑀧𑀬𑀺𑀭𑀼𑀧𑀸𑀲𑁂𑀣𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀓𑁆𑀓𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀲𑀼𑀔𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀦𑁆𑀦𑀭𑀲𑀫𑁄 𑀯𑀕𑁆𑀕𑁄.