𑁫. 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀯𑀢𑁆𑀣𑀼

𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀻𑀲𑀢𑀺𑀔𑀻𑀡𑀸𑀲𑀯𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀝𑁆𑀞𑀧𑀺 𑀤𑀲𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀅𑀕𑀦𑁆𑀢𑀼𑀓𑀤𑀸𑀦𑀸𑀤𑀻𑀦𑀺 𑀅𑀤𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀏𑀯𑀁 𑀅𑀦𑀼𑀫𑁄𑀤𑀦𑀫𑀓𑀸𑀲𑀺 𑁋

‘‘𑀉𑀧𑀸𑀲𑀓𑀸 𑀇𑀥 𑀏𑀓𑀘𑁆𑀘𑁄 ‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀧𑀭𑁂𑀦 𑀲𑀫𑀸𑀤𑀧𑀺𑀢𑁂𑀦𑀸’𑀢𑀺 𑀅𑀢𑁆𑀢𑀦𑀸𑀯 𑀤𑀸𑀦𑀁 𑀤𑁂𑀢𑀺, 𑀧𑀭𑀁 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀧𑀭𑀺𑀯𑀸𑀭𑀲𑀫𑁆𑀧𑀤𑀁. 𑀏𑀓𑀘𑁆𑀘𑁄 𑀧𑀭𑀁 𑀲𑀫𑀸𑀤𑀧𑁂𑀢𑀺, 𑀅𑀢𑁆𑀢𑀦𑀸 𑀦 𑀤𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀭𑀺𑀯𑀸𑀭𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀪𑁄𑀕𑀲𑀫𑁆𑀧𑀤𑀁 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸𑀧𑀺 𑀦 𑀤𑁂𑀢𑀺, 𑀧𑀭𑀫𑁆𑀧𑀺 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀦𑁂𑀯 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦 𑀧𑀭𑀺𑀯𑀸𑀭𑀲𑀫𑁆𑀧𑀤𑀁, 𑀯𑀺𑀖𑀸𑀲𑀸𑀤𑁄𑀯 𑀳𑀼𑀢𑁆𑀯𑀸 𑀚𑀻𑀯𑀢𑀺. 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀤𑁂𑀢𑀺, 𑀧𑀭𑀜𑁆𑀘 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀤𑀫𑁆𑀧𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑁄 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑀸𑀦𑀺 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀫𑁂 𑀤𑁆𑀯𑁂𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. ‘‘𑀓𑀺𑀢𑁆𑀢𑀓𑁂𑀳𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄’’𑀢𑀺? ‘‘𑀓𑀺𑀢𑁆𑀢𑀓𑁄 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑁄’’𑀢𑀺? ‘‘𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀻’’𑀢𑀺. ‘‘𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑀸𑀢𑀦𑀸𑀬 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀲𑁆𑀯𑀸𑀢𑀦𑀸𑀬 𑀫𑀬𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, 𑀢𑀼𑀫𑁆𑀳𑁂 𑀬𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀢𑀢𑁆𑀢𑀓𑀸𑀦𑀁 𑀤𑀸𑀦𑀁 𑀤𑁂𑀣𑀸’’𑀢𑀺 𑀆𑀭𑁄𑀘𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑀬𑀁 𑀤𑀲𑀦𑁆𑀦𑀁 𑀤𑀲𑁆𑀲𑀸𑀫, 𑀫𑀬𑀁 𑀯𑀻𑀲𑀢𑀺𑀬𑀸, 𑀫𑀬𑀁 𑀲𑀢𑀲𑁆𑀲, 𑀫𑀬𑀁 𑀧𑀜𑁆𑀘𑀲𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂𑀲𑀁 𑀯𑀘𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀡𑁆𑀡𑁂 𑀆𑀭𑁄𑀧𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀅𑀢𑀺𑀤𑀼𑀕𑁆𑀕𑀢𑀪𑀸𑀯𑁂𑀦𑁂𑀯 ‘‘𑀫𑀳𑀸𑀤𑀼𑀕𑁆𑀕𑀢𑁄’’𑀢𑀺 𑀧𑀜𑁆𑀜𑀸𑀢𑁄 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀣𑀺. 𑀲𑁄 𑀢𑀫𑁆𑀧𑀺 𑀲𑀫𑁆𑀫𑀼𑀔𑀸𑀕𑀢𑀁 𑀤𑀺𑀲𑁆𑀯𑀸, 𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, 𑀲𑁆𑀯𑁂 𑀦𑀕𑀭𑀯𑀸𑀲𑀺𑀦𑁄 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, ‘‘𑀢𑁆𑀯𑀁 𑀓𑀢𑀺 𑀪𑀺𑀓𑁆𑀔𑀽 𑀪𑁄𑀚𑁂𑀲𑁆𑀲𑀲𑀻’’𑀢𑀺? ‘‘𑀲𑀸𑀫𑀺, 𑀫𑀬𑁆𑀳𑀁 𑀓𑀺𑀁 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽𑀳𑀺 𑀦𑀸𑀫 𑀲𑀥𑀦𑀸𑀦𑀁 𑀅𑀢𑁆𑀣𑁄, 𑀫𑀬𑁆𑀳𑀁 𑀧𑀦 𑀲𑁆𑀯𑁂 𑀬𑀸𑀕𑀼𑀅𑀢𑁆𑀣𑀸𑀬 𑀢𑀡𑁆𑀟𑀼𑀮𑀦𑀸𑀴𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀸𑀫𑀺, 𑀓𑀺𑀁 𑀫𑁂 𑀪𑀺𑀓𑁆𑀔𑀽𑀳𑀻’’𑀢𑀺? 𑀲𑀫𑀸𑀤𑀧𑀓𑁂𑀦 𑀦𑀸𑀫 𑀩𑁆𑀬𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀲𑁄 𑀢𑁂𑀦 ‘‘𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀼𑀡𑁆𑀳𑀻𑀪𑀽𑀢𑁄 𑀅𑀳𑀼𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀔𑀼𑀫𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀸𑀦𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀲𑀺𑀭𑀺𑀲𑀬𑀦𑁂 𑀲𑀬𑀫𑀸𑀦𑀸 𑀩𑀳𑀽 𑀚𑀦𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀢𑁆𑀯𑀁 𑀧𑀦 𑀤𑀺𑀯𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀓𑀼𑀘𑁆𑀙𑀺𑀧𑀽𑀭𑀡𑀫𑀢𑁆𑀢𑀫𑁆𑀧𑀺 𑀦 𑀮𑀪𑀲𑀺, 𑀏𑀯𑀁 𑀲𑀦𑁆𑀢𑁂𑀧𑀺 ‘𑀅𑀳𑀁 𑀧𑀼𑀩𑁆𑀩𑁂 𑀧𑀼𑀜𑁆𑀜𑀁 𑀅𑀓𑀢𑀢𑁆𑀢𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀻’𑀢𑀺 𑀦 𑀚𑀸𑀦𑀸𑀲𑀻’’𑀢𑀺? ‘‘𑀚𑀸𑀦𑀸𑀫𑀺, 𑀲𑀸𑀫𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀇𑀤𑀸𑀦𑀺 𑀧𑀼𑀜𑁆𑀜𑀁 𑀦 𑀓𑀭𑁄𑀲𑀺, 𑀢𑁆𑀯𑀁 𑀬𑀼𑀯𑀸 𑀩𑀮𑀲𑀫𑁆𑀧𑀦𑁆𑀦𑁄, 𑀓𑀺𑀁 𑀢𑀬𑀸 𑀪𑀢𑀺𑀁 𑀓𑀢𑁆𑀯𑀸𑀧𑀺 𑀬𑀣𑀸𑀩𑀮𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? 𑀲𑁄 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀫𑀬𑁆𑀳𑀫𑁆𑀧𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀡𑁆𑀡𑁂 𑀆𑀭𑁄𑀧𑁂𑀳𑀺, 𑀓𑀺𑀜𑁆𑀘𑀺𑀤𑁂𑀯 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀓𑀺𑀁 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑁂𑀦𑀸’’𑀢𑀺 𑀦 𑀆𑀭𑁄𑀧𑁂𑀲𑀺? 𑀫𑀳𑀸𑀤𑀼𑀕𑁆𑀕𑀢𑁄𑀧𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀦𑀕𑀭𑀯𑀸𑀲𑀺𑀦𑁄 𑀲𑁆𑀯𑁂 𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀲𑀫𑀸𑀤𑀧𑀓𑁂𑀦 ‘𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑁂𑀳𑀻’𑀢𑀺 𑀯𑀼𑀢𑁆𑀢𑁄, 𑀫𑀬𑀫𑁆𑀧𑀺 𑀲𑁆𑀯𑁂 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺. 𑀅𑀣𑀲𑁆𑀲 𑀪𑀭𑀺𑀬𑀸 ‘‘𑀫𑀬𑀁 𑀤𑀮𑀺𑀤𑁆𑀤𑀸, 𑀓𑀲𑁆𑀫𑀸 𑀢𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢’’𑀦𑁆𑀢𑀺 𑀅𑀯𑀢𑁆𑀯𑀸𑀯, ‘‘𑀲𑀸𑀫𑀺, 𑀪𑀤𑁆𑀤𑀓𑀁 𑀢𑁂 𑀓𑀢𑀁, 𑀫𑀬𑀁 𑀧𑀼𑀩𑁆𑀩𑁂𑀧𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀇𑀤𑀸𑀦𑀺 𑀤𑀼𑀕𑁆𑀕𑀢𑀸 𑀚𑀸𑀢𑀸, 𑀫𑀬𑀁 𑀉𑀪𑁄𑀧𑀺 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀪𑁄𑀧𑀺 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑀺𑀝𑁆𑀞𑀸𑀦𑀁 𑀅𑀕𑀫𑀁𑀲𑀼.

𑀫𑀳𑀸𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀪𑀢𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀬𑀁 𑀢𑀼𑀫𑁆𑀳𑁂 𑀓𑀸𑀭𑁂𑀲𑁆𑀲𑀣, 𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑀁 𑀲𑁆𑀯𑁂 𑀤𑁆𑀯𑁂 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑁄𑀚𑁂𑀲𑁆𑀲𑀸𑀫, 𑀏𑀳𑀺, 𑀤𑀸𑀭𑀽𑀦𑀺 𑀨𑀸𑀮𑁂𑀳𑀻’’𑀢𑀺 𑀯𑀸𑀲𑀺𑀨𑀭𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑀸𑀧𑁂𑀲𑀺. 𑀫𑀳𑀸𑀤𑀼𑀕𑁆𑀕𑀢𑁄 𑀤𑀴𑁆𑀳𑀁 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀼𑀲𑁆𑀲𑀸𑀳𑀧𑁆𑀧𑀢𑁆𑀢𑁄 𑀯𑀸𑀲𑀺𑀁 𑀧𑀳𑀸𑀬 𑀨𑀭𑀲𑀼𑀁 𑀕𑀡𑁆𑀳𑀦𑁆𑀢𑁄, 𑀨𑀭𑀲𑀼𑀁 𑀧𑀳𑀸𑀬 𑀯𑀸𑀲𑀺𑀁 𑀕𑀡𑁆𑀳𑀦𑁆𑀢𑁄 𑀤𑀸𑀭𑀽𑀦𑀺 𑀨𑀸𑀮𑁂𑀢𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀆𑀳 𑁋 ‘‘𑀲𑀫𑁆𑀫, 𑀢𑁆𑀯𑀁 𑀅𑀚𑁆𑀚 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀲𑀸𑀫𑀺, 𑀅𑀳𑀁 𑀲𑁆𑀯𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀧𑀲𑀦𑁆𑀦𑀫𑀸𑀦𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀇𑀫𑀺𑀦𑀸 𑀤𑀼𑀓𑁆𑀓𑀭𑀁 𑀓𑀢𑀁, ‘𑀅𑀳𑀁 𑀤𑀼𑀕𑁆𑀕𑀢𑁄’𑀢𑀺 𑀢𑀼𑀡𑁆𑀳𑀻𑀪𑀸𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 ‘𑀪𑀢𑀺𑀁 𑀓𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’𑀢𑀺 𑀯𑀤𑀢𑀻’’𑀢𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀢𑀲𑁆𑀲 𑀪𑀭𑀺𑀬𑀁 𑀤𑀺𑀲𑁆𑀯𑀸, ‘‘𑀅𑀫𑁆𑀫, 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀁 𑀢𑀼𑀫𑁆𑀳𑁂 𑀓𑀸𑀭𑁂𑀲𑁆𑀲𑀣, 𑀢𑀁 𑀓𑀭𑁄𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑀼𑀓𑁆𑀔𑀮𑀲𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀲𑀼𑀧𑁆𑀧𑀫𑀼𑀲𑀮𑀸𑀤𑀻𑀦𑀺 𑀤𑀸𑀧𑁂𑀲𑀺. 𑀲𑀸 𑀦𑀘𑁆𑀘𑀦𑁆𑀢𑀻 𑀯𑀺𑀬 𑀢𑀼𑀝𑁆𑀞𑀧𑀳𑀝𑁆𑀞𑀸 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺 𑀘𑁂𑀯 𑀑𑀨𑀼𑀡𑀸𑀢𑀺 𑀘. 𑀅𑀣 𑀦𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀢𑁆𑀯𑀁 𑀅𑀢𑀺𑀯𑀺𑀬 𑀢𑀼𑀝𑁆𑀞𑀧𑀳𑀝𑁆𑀞𑀸 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀅𑀬𑁆𑀬𑁂, 𑀇𑀫𑀁 𑀪𑀢𑀺𑀁 𑀓𑀢𑁆𑀯𑀸 𑀫𑀬𑀫𑁆𑀧𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀢𑀲𑁆𑀲𑀁 ‘‘𑀅𑀳𑁄 𑀯𑀢𑀸𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸’’𑀢𑀺 𑀧𑀲𑀻𑀤𑀺. 𑀲𑁂𑀝𑁆𑀞𑀺 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀤𑀸𑀭𑀽𑀦𑀁 𑀨𑀸𑀮𑀺𑀢𑀓𑀸𑀮𑁂 ‘‘𑀅𑀬𑀁 𑀢𑁂 𑀪𑀢𑀻’’𑀢𑀺 𑀲𑀸𑀮𑀻𑀦𑀁 𑀘𑀢𑀲𑁆𑀲𑁄 𑀦𑀸𑀴𑀺𑀬𑁄 𑀤𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀢𑀼𑀝𑁆𑀞𑀺𑀤𑀸𑀬𑁄’’𑀢𑀺 𑀅𑀧𑀭𑀸𑀧𑀺 𑀘𑀢𑀲𑁆𑀲𑁄 𑀦𑀸𑀴𑀺𑀬𑁄 𑀤𑀸𑀧𑁂𑀲𑀺.

𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀫𑀬𑀸 𑀪𑀢𑀺𑀁 𑀓𑀢𑁆𑀯𑀸 𑀲𑀸𑀮𑀺 𑀮𑀤𑁆𑀥𑁄, 𑀅𑀬𑀁 𑀦𑀺𑀯𑀸𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀬𑀸 𑀮𑀤𑁆𑀥𑀸𑀬 𑀪𑀢𑀺𑀬𑀸 𑀤𑀥𑀺𑀢𑁂𑀮𑀓𑀝𑀼𑀓𑀪𑀡𑁆𑀟𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀧𑀼𑀦 𑀢𑀲𑁆𑀲𑀸 𑀏𑀓𑀁 𑀲𑀧𑁆𑀧𑀺𑀓𑀭𑁄𑀝𑀺𑀓𑀜𑁆𑀘𑁂𑀯 𑀤𑀥𑀺𑀪𑀸𑀚𑀦𑀜𑁆𑀘 𑀓𑀝𑀼𑀓𑀪𑀡𑁆𑀟𑀜𑁆𑀘 𑀲𑀼𑀤𑁆𑀥𑀢𑀡𑁆𑀟𑀼𑀴𑀺𑀦𑀸𑀴𑀺𑀜𑁆𑀘 𑀤𑀸𑀧𑁂𑀲𑀺. 𑀇𑀢𑀺 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀦𑀯 𑀢𑀡𑁆𑀟𑀼𑀮𑀦𑀸𑀴𑀺𑀬𑁄 𑀅𑀳𑁂𑀲𑀼𑀁. 𑀢𑁂 ‘‘𑀤𑁂𑀬𑁆𑀬𑀥𑀫𑁆𑀫𑁄 𑀦𑁄 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀳𑀝𑁆𑀞𑀸 𑀧𑀸𑀢𑁄𑀯 𑀉𑀝𑁆𑀞𑀳𑀺𑀁𑀲𑀼. 𑀪𑀭𑀺𑀬𑀸 𑀫𑀳𑀸𑀤𑀼𑀕𑁆𑀕𑀢𑀁 𑀆𑀳 𑁋 ‘‘𑀕𑀘𑁆𑀙, 𑀲𑀸𑀫𑀺, 𑀧𑀡𑁆𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀳𑀭𑀸’’𑀢𑀺. 𑀲𑁄 𑀅𑀦𑁆𑀢𑀭𑀸𑀧𑀡𑁂 𑀧𑀡𑁆𑀡𑀁 𑀅𑀤𑀺𑀲𑁆𑀯𑀸 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚 𑀅𑀬𑁆𑀬𑀸𑀦𑀁 𑀪𑁄𑀚𑀦𑀁 𑀤𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀝𑁆𑀞𑀫𑀸𑀦𑀲𑁄 𑀕𑀸𑀬𑀦𑁆𑀢𑁄 𑀧𑀡𑁆𑀡𑀁 𑀉𑀘𑁆𑀘𑀺𑀦𑀢𑀺. 𑀫𑀳𑀸𑀚𑀸𑀮𑀁 𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀓𑁂𑀯𑀝𑁆𑀝𑁄 ‘‘𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀤𑁆𑀤𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀅𑀢𑀺𑀯𑀺𑀬 𑀢𑀼𑀝𑁆𑀞𑀘𑀺𑀢𑁆𑀢𑁄 𑀕𑀸𑀬𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀧𑀡𑁆𑀡𑀁 𑀉𑀘𑁆𑀘𑀺𑀦𑀸𑀫𑀺, 𑀲𑀫𑁆𑀫𑀸’’𑀢𑀺. ‘‘𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑁄 𑀲𑀼𑀔𑀺𑀢𑁄, 𑀪𑀺𑀓𑁆𑀔𑀼, 𑀲𑁄 𑀢𑀯 𑀓𑀺𑀁 𑀧𑀡𑁆𑀡𑀁 𑀔𑀸𑀤𑀺𑀲𑁆𑀲𑀢𑀻’’𑀢𑀺? ‘‘𑀓𑀺𑀁 𑀓𑀭𑁄𑀫𑀺, 𑀲𑀫𑁆𑀫, 𑀅𑀢𑁆𑀢𑀦𑀸 𑀮𑀤𑁆𑀥𑀧𑀡𑁆𑀡𑁂𑀦 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀏𑀳𑀻’’𑀢𑀺. ‘‘𑀓𑀺𑀁 𑀓𑀭𑁄𑀫𑀺, 𑀲𑀫𑁆𑀫𑀸’’𑀢𑀺? ‘‘𑀇𑀫𑁂 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀧𑀸𑀤𑀕𑁆𑀖𑀦𑀓𑀸𑀦𑀺 𑀅𑀟𑁆𑀠𑀕𑁆𑀖𑀦𑀓𑀸𑀦𑀺 𑀓𑀳𑀸𑀧𑀡𑀕𑁆𑀖𑀦𑀓𑀸𑀦𑀺 𑀘 𑀉𑀤𑁆𑀤𑀸𑀦𑀸𑀦𑀺 𑀓𑀭𑁄𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀩𑀤𑁆𑀥𑀩𑀤𑁆𑀥𑁂 𑀫𑀘𑁆𑀙𑁂 𑀦𑀕𑀭𑀯𑀸𑀲𑀺𑀦𑁄 𑀦𑀺𑀫𑀦𑁆𑀢𑀺𑀢𑀦𑀺𑀫𑀦𑁆𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀳𑀭𑀺𑀁𑀲𑀼. 𑀢𑀲𑁆𑀲 𑀫𑀘𑁆𑀙𑀼𑀤𑁆𑀤𑀸𑀦𑀸𑀦𑀺 𑀓𑀭𑁄𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀧𑀸𑀧𑀼𑀡𑀺. 𑀲𑁄 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀳𑀁, 𑀲𑀫𑁆𑀫, 𑀅𑀬𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀯𑁂𑀮𑀸’’𑀢𑀺 𑀆𑀳. ‘‘𑀅𑀢𑁆𑀣𑀺 𑀧𑀦 𑀓𑀺𑀜𑁆𑀘𑀺 𑀫𑀘𑁆𑀙𑀼𑀤𑁆𑀤𑀸𑀦’’𑀦𑁆𑀢𑀺? ‘‘𑀦𑀢𑁆𑀣𑀺, 𑀲𑀫𑁆𑀫, 𑀲𑀩𑁆𑀩𑀸𑀦𑀺 𑀔𑀻𑀡𑀸𑀦𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸𑀮𑀼𑀓𑀸𑀬 𑀦𑀺𑀔𑀡𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀭𑁄𑀳𑀺𑀢𑀫𑀘𑁆𑀙𑀸 𑀞𑀧𑀺𑀢𑀸, 𑀲𑀘𑁂 𑀪𑀺𑀓𑁆𑀔𑀼𑀁 𑀪𑁄𑀚𑁂𑀢𑀼𑀓𑀸𑀫𑁄𑀲𑀺, 𑀇𑀫𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀢𑁂 𑀫𑀘𑁆𑀙𑁂 𑀢𑀲𑁆𑀲 𑀅𑀤𑀸𑀲𑀺.

𑀢𑀁 𑀤𑀺𑀯𑀲𑀁 𑀧𑀦 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀢𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀳𑀸𑀤𑀼𑀕𑁆𑀕𑀢𑁄 ‘𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’𑀢𑀺 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀳𑀺𑀬𑁆𑀬𑁄 𑀪𑀢𑀺𑀁 𑀅𑀓𑀸𑀲𑀺, 𑀓𑀢𑀭𑀁 𑀦𑀼 𑀔𑁄 𑀪𑀺𑀓𑁆𑀔𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀦𑀼𑀲𑁆𑀲𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑀲𑀜𑁆𑀜𑀸𑀬 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀦𑀺𑀲𑀻𑀤𑀸𑀧𑁂𑀲𑁆𑀲𑀦𑁆𑀢𑀺, 𑀫𑀳𑀸𑀤𑀼𑀕𑁆𑀕𑀢𑁄 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀲𑀺. 𑀩𑀼𑀤𑁆𑀥𑀸 𑀓𑀺𑀭 𑀤𑀼𑀕𑁆𑀕𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 ‘‘𑀫𑀳𑀸𑀤𑀼𑀕𑁆𑀕𑀢𑀁 𑀲𑀗𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀳𑀸𑀤𑀼𑀕𑁆𑀕𑀢𑁂𑀧𑀺 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀳𑀺𑀬𑁆𑀬𑁄, 𑀫𑀳𑀸𑀤𑀼𑀕𑁆𑀕𑀢𑁄 ‘𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀪𑀢𑀺𑀁 𑀅𑀓𑀸𑀲𑀺, 𑀓𑀢𑀭𑀁 𑀦𑀼 𑀔𑁄 𑀪𑀺𑀓𑁆𑀔𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀢𑁆𑀣𑁂𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼, 𑀲𑀢𑁆𑀣𑀸 𑀧𑀦 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄. 𑀫𑀳𑀸𑀤𑀼𑀕𑁆𑀕𑀢𑁄 𑀅𑀢𑁆𑀢𑀦𑁄 𑀉𑀧𑀓𑀧𑁆𑀧𑀦𑀓𑀁 𑀬𑀸𑀕𑀼𑀪𑀢𑁆𑀢𑀁 𑀧𑀡𑁆𑀡𑀲𑀽𑀧𑁂𑀬𑁆𑀬𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀤𑀤𑁂𑀬𑁆𑀬, ‘‘𑀬𑀁𑀦𑀽𑀦𑀸𑀳𑀁 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀸𑀭𑀓𑀓𑀫𑁆𑀫𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀢𑀲𑁆𑀲 𑀕𑁂𑀳𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀪𑀢𑀺𑀬𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀤𑀼𑀕𑁆𑀕𑀢𑁄 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀲𑀫𑁆𑀫, 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁, 𑀲𑀸𑀫𑀺, 𑀲𑀩𑁆𑀩𑀲𑀺𑀧𑁆𑀧𑀺𑀓𑁄, 𑀫𑀬𑁆𑀳𑀁 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀚𑀸𑀦𑀸𑀫𑀻’’𑀢𑀺. ‘‘𑀲𑀫𑁆𑀫, 𑀫𑀬𑀁 𑀢𑀯 𑀓𑀫𑁆𑀫𑁂𑀦 𑀅𑀢𑁆𑀣𑀺𑀓𑀸, 𑀢𑀼𑀬𑁆𑀳𑀁 𑀧𑀦 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀪𑀢𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺, 𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀲𑀁𑀯𑀺𑀥𑀸𑀦𑀁 𑀇𑀘𑁆𑀙𑀸𑀫𑀻’’𑀢𑀺. ‘‘𑀲𑀘𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀲𑀺, 𑀦 𑀫𑁂 𑀪𑀢𑀺𑀬𑀸 𑀅𑀢𑁆𑀣𑁄, 𑀓𑀺𑀁 𑀫𑀫 𑀧𑀼𑀜𑁆𑀜𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀏𑀯𑀁 𑀲𑀦𑁆𑀢𑁂 𑀲𑀸𑀥𑀼, 𑀲𑀫𑁆𑀫, 𑀧𑀯𑀺𑀲𑀸’’𑀢𑀺. 𑀲𑁄 𑀢𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙, 𑀅𑀢𑁆𑀢𑀦𑁄 𑀧𑀢𑁆𑀢𑀪𑀺𑀓𑁆𑀔𑀼𑀁 𑀆𑀦𑁂𑀳𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀤𑀸𑀦𑀯𑁂𑀬𑁆𑀬𑀸𑀯𑀝𑀺𑀓𑁄𑀧𑀺 𑀧𑀡𑁆𑀡𑁂 𑀆𑀭𑁄𑀧𑀺𑀢𑀦𑀺𑀬𑀸𑀫𑁂𑀦𑁂𑀯 𑀢𑁂𑀲𑀁 𑀢𑁂𑀲𑀁 𑀕𑁂𑀳𑀸𑀦𑀺 𑀪𑀺𑀓𑁆𑀔𑀽 𑀧𑀳𑀺𑀡𑀺.

𑀫𑀳𑀸𑀤𑀼𑀕𑁆𑀕𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀢𑁆𑀢𑀪𑀺𑀓𑁆𑀔𑀼𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀢𑀺𑀁 𑀮𑀪𑀺𑀢𑁆𑀯𑀸 ‘‘𑀅𑀳𑀁 𑀢𑀯 𑀪𑀺𑀓𑁆𑀔𑀼𑀁 𑀧𑀫𑀼𑀝𑁆𑀞𑁄’’𑀢𑀺 𑀆𑀳. 𑀫𑀳𑀸𑀤𑀼𑀕𑁆𑀕𑀢𑁄 𑀢𑀺𑀔𑀺𑀡𑀸𑀬 𑀲𑀢𑁆𑀢𑀺𑀬𑀸 𑀓𑀼𑀘𑁆𑀙𑀺𑀬𑀁 𑀧𑀳𑀝𑁄 𑀯𑀺𑀬, ‘‘𑀲𑀸𑀫𑀺, 𑀓𑀲𑁆𑀫𑀸 𑀫𑀁 𑀦𑀸𑀲𑁂𑀲𑀺, 𑀅𑀳𑀁 𑀢𑀬𑀸 𑀳𑀺𑀬𑁆𑀬𑁄 𑀲𑀫𑀸𑀤𑀧𑀺𑀢𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀤𑀺𑀯𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀅𑀚𑁆𑀚 𑀧𑀸𑀢𑁄𑀯 𑀧𑀡𑁆𑀡𑀢𑁆𑀣𑀸𑀬 𑀦𑀤𑀻𑀢𑀻𑀭𑁂 𑀆𑀳𑀺𑀡𑁆𑀟𑀺𑀢𑁆𑀯𑀸 𑀆𑀕𑀢𑁄, 𑀤𑁂𑀳𑀺 𑀫𑁂 𑀏𑀓𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀭𑀺𑀤𑁂𑀯𑀺. 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀫𑁂𑀢𑀁, 𑀫𑀳𑀸𑀤𑀼𑀕𑁆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂 𑀯𑁂𑀬𑁆𑀬𑀸𑀯𑀝𑀺𑀓𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀲𑀘𑁆𑀘𑀁 𑀓𑀺𑀭, 𑀲𑀫𑁆𑀫, 𑀢𑀬𑀸 𑀏𑀲 ‘𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑁂𑀳𑀻’𑀢𑀺 𑀲𑀫𑀸𑀤𑀧𑀺𑀢𑁄’’𑀢𑀺? ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀪𑀸𑀭𑀺𑀬𑀁 𑀢𑁂 𑀓𑀫𑁆𑀫𑀁 𑀓𑀢𑀁, 𑀬𑁄 𑀢𑁆𑀯𑀁 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀁𑀯𑀺𑀤𑀳𑀦𑁆𑀢𑁄 𑀏𑀢𑀲𑁆𑀲 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀸𑀤𑀸𑀲𑀻’’𑀢𑀺. 𑀲𑁄 𑀢𑁂𑀲𑀁 𑀯𑀘𑀦𑁂𑀦 𑀫𑀗𑁆𑀓𑀼𑀪𑀽𑀢𑁄 𑀢𑀁 𑀆𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀫𑀸 𑀫𑀁 𑀦𑀸𑀲𑀬𑀺, 𑀅𑀳𑀁 𑀢𑀯 𑀓𑀸𑀭𑀡𑀸 𑀫𑀳𑀸𑀯𑀺𑀳𑁂𑀲𑀁 𑀧𑀢𑁆𑀢𑁄, 𑀫𑀦𑀼𑀲𑁆𑀲𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑀦𑀺𑀬𑀸𑀫𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀪𑀺𑀓𑁆𑀔𑀽 𑀦𑀬𑀺𑀁𑀲𑀼, 𑀅𑀢𑁆𑀢𑀦𑁄 𑀕𑁂𑀳𑁂 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀢𑁆𑀣𑀸 𑀧𑀦 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀫𑁂𑀯 𑀦𑀺𑀲𑀺𑀦𑁆𑀦𑁄, 𑀭𑀸𑀚𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀬𑁄 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀁 𑀑𑀮𑁄𑀓𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀩𑀼𑀤𑁆𑀥𑀸 𑀦𑀸𑀫 𑀤𑀼𑀕𑁆𑀕𑀢𑁂 𑀅𑀦𑀼𑀓𑀫𑁆𑀧𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀤𑀼𑀕𑁆𑀕𑀢𑁄𑀫𑁆𑀳𑀺, 𑀪𑀦𑁆𑀢𑁂, 𑀫𑀫 𑀲𑀗𑁆𑀕𑀳𑀁 𑀓𑀭𑁄𑀣𑀸’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤, 𑀲𑀘𑁂 𑀢𑁂 𑀧𑀼𑀜𑁆𑀜𑀁 𑀅𑀢𑁆𑀣𑀺, 𑀅𑀤𑁆𑀥𑀸 𑀮𑀘𑁆𑀙𑀲𑀻’’𑀢𑀺.

𑀲𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀯𑀺𑀳𑀸𑀭𑁂 𑀯𑀺𑀖𑀸𑀲𑀸𑀤𑀪𑀸𑀯𑁂𑀦 𑀤𑀺𑀝𑁆𑀞𑀢𑁆𑀢𑀸 𑀭𑀸𑀚𑀬𑀼𑀯𑀭𑀸𑀚𑀸𑀤𑀬𑁄, ‘‘𑀫𑀳𑀸𑀤𑀼𑀕𑁆𑀕𑀢, 𑀦 𑀢𑀸𑀯 𑀪𑀢𑁆𑀢𑀓𑀸𑀮𑁄, 𑀓𑀲𑁆𑀫𑀸 𑀢𑁆𑀯𑀁 𑀆𑀕𑀘𑁆𑀙𑀲𑀻’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀚𑀸𑀦𑀸𑀫𑀺, 𑀲𑀸𑀫𑀺, ‘𑀦 𑀢𑀸𑀯 𑀪𑀢𑁆𑀢𑀓𑀸𑀮𑁄’𑀢𑀺. 𑀲𑀢𑁆𑀣𑀸𑀭𑀁 𑀧𑀦 𑀯𑀦𑁆𑀤𑀺𑀢𑀼𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀫𑀬𑀸 𑀤𑀼𑀕𑁆𑀕𑀢𑀢𑀭𑁄 𑀦𑀢𑁆𑀣𑀺, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣, 𑀓𑀭𑁄𑀣 𑀫𑁂 𑀲𑀗𑁆𑀕𑀳’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑁄 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀧𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀭𑀸𑀚𑀬𑀼𑀯𑀭𑀸𑀚𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀼𑀔𑀸𑀦𑀺 𑀑𑀮𑁄𑀓𑀬𑀺𑀁𑀲𑀼. 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀧𑀢𑁆𑀢𑀜𑁆𑀳𑀺 𑀓𑁄𑀘𑀺 𑀇𑀲𑁆𑀲𑀭𑀺𑀬𑀯𑀲𑁂𑀦 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀧𑀦 𑀯𑀤𑀺𑀁𑀲𑀼, ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀲𑀢𑁆𑀣𑀼 𑀧𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑁂𑀳𑀺 𑀏𑀢𑁆𑀢𑀓𑀁 𑀦𑀸𑀫 𑀢𑁂 𑀥𑀦𑀁 𑀤𑀲𑁆𑀲𑀸𑀫, 𑀢𑁆𑀯𑀁 𑀤𑀼𑀕𑁆𑀕𑀢𑁄 𑀥𑀦𑀁 𑀕𑀡𑁆𑀳𑀸𑀳𑀺, 𑀓𑀺𑀁 𑀢𑁂 𑀧𑀢𑁆𑀢𑁂𑀦𑀸’’𑀢𑀺? 𑀫𑀳𑀸𑀤𑀼𑀕𑁆𑀕𑀢𑁄 ‘‘𑀦 𑀓𑀲𑁆𑀲𑀘𑀺 𑀤𑀲𑁆𑀲𑀸𑀫𑀺, 𑀦 𑀫𑁂 𑀥𑀦𑁂𑀦 𑀅𑀢𑁆𑀣𑁄, 𑀲𑀢𑁆𑀣𑀸𑀭𑀁𑀬𑁂𑀯 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀯𑀲𑁂𑀲𑀸 𑀢𑀁 𑀬𑀸𑀘𑀺𑀢𑁆𑀯𑀸 𑀧𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀭𑀸𑀚𑀸 𑀧𑀦 ‘‘𑀫𑀳𑀸𑀤𑀼𑀕𑁆𑀕𑀢𑁄 𑀥𑀦𑁂𑀦 𑀧𑀮𑁄𑀪𑀺𑀬𑀫𑀸𑀦𑁄𑀧𑀺 𑀲𑀢𑁆𑀣𑀼 𑀧𑀢𑁆𑀢𑀁 𑀦 𑀤𑁂𑀢𑀺, 𑀲𑀢𑁆𑀣𑀸𑀭𑀸 𑀘 𑀲𑀬𑀁 𑀤𑀺𑀦𑁆𑀦𑀧𑀢𑁆𑀢𑀁 𑀓𑁄𑀘𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀫𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄 𑀦𑀸𑀫 𑀓𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀺𑀦𑁆𑀦𑀓𑀸𑀮𑁂 𑀲𑀢𑁆𑀣𑀸𑀭𑀁 𑀆𑀤𑀸𑀬 𑀕𑁂𑀳𑀁 𑀦𑁂𑀢𑁆𑀯𑀸 𑀫𑀬𑁆𑀳𑀁 𑀲𑀫𑁆𑀧𑀸𑀤𑀺𑀢𑀁 𑀆𑀳𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺. 𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀢𑁆𑀣𑀼 𑀦𑀺𑀲𑀻𑀤𑀦𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀫𑀳𑀸𑀤𑀼𑀕𑁆𑀕𑀢𑁄 𑀲𑀢𑁆𑀣𑀸𑀭𑀁 𑀦𑁂𑀢𑁆𑀯𑀸 ‘‘𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀯𑀲𑀦𑀕𑁂𑀳𑀜𑁆𑀘𑀲𑁆𑀲 𑀦𑀻𑀘𑀁 𑀳𑁄𑀢𑀺, 𑀅𑀦𑁄𑀦𑀢𑁂𑀦 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀩𑀼𑀤𑁆𑀥𑀸 𑀘 𑀦𑀸𑀫 𑀕𑁂𑀳𑀁 𑀧𑀯𑀺𑀲𑀦𑁆𑀢𑀸 𑀦 𑀑𑀦𑀫𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀺. 𑀕𑁂𑀳𑀜𑁆𑀳𑀺 𑀧𑀯𑀺𑀲𑀦𑀓𑀸𑀮𑁂 𑀫𑀳𑀸𑀧𑀣𑀯𑀻 𑀯𑀸 𑀳𑁂𑀝𑁆𑀞𑀸 𑀑𑀕𑀘𑁆𑀙𑀢𑀺, 𑀕𑁂𑀳𑀁 𑀯𑀸 𑀉𑀤𑁆𑀥𑀁 𑀕𑀘𑁆𑀙𑀢𑀺. 𑀇𑀤𑀁 𑀢𑁂𑀲𑀁 𑀲𑀼𑀤𑀺𑀦𑁆𑀦𑀤𑀸𑀦𑀲𑁆𑀲 𑀨𑀮𑀁. 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑀓𑀸𑀮𑁂 𑀲𑀩𑁆𑀩𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀞𑀺𑀢𑀓𑁄𑀯 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑁂𑀦 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀭𑀸𑀚𑀸 𑀆𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀢𑀬𑀸 𑀅𑀫𑁆𑀳𑀸𑀓𑀁 𑀬𑀸𑀘𑀦𑁆𑀢𑀸𑀦𑀫𑁆𑀧𑀺 𑀲𑀢𑁆𑀣𑀼 𑀧𑀢𑁆𑀢𑁄 𑀦 𑀤𑀺𑀦𑁆𑀦𑁄, 𑀧𑀲𑁆𑀲𑀸𑀫 𑀢𑀸𑀯, 𑀓𑀻𑀤𑀺𑀲𑁄 𑀢𑁂 𑀲𑀢𑁆𑀣𑀼 𑀲𑀓𑁆𑀓𑀸𑀭𑁄 𑀓𑀢𑁄’’𑀢𑀺? 𑀅𑀣𑀲𑁆𑀲 𑀲𑀓𑁆𑀓𑁄 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂𑀲𑀁 𑀯𑀸𑀲𑀕𑀦𑁆𑀥𑁄 𑀲𑀓𑀮𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀬𑀸𑀕𑀼𑀆𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀪𑀦𑁆𑀢𑁂, ‘𑀅𑀳𑀁 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄 𑀓𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑁂 𑀤𑀺𑀦𑁆𑀦𑁂 𑀲𑀢𑁆𑀣𑀸𑀭𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀺𑀢𑀁 𑀆𑀳𑀸𑀭𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑁄, 𑀫𑀬𑀸 𑀏𑀯𑀭𑀽𑀧𑁄 𑀆𑀳𑀸𑀭𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀫𑀬𑀺 𑀇𑀥 𑀞𑀺𑀢𑁂 𑀫𑀳𑀸𑀤𑀼𑀕𑁆𑀕𑀢𑁄 𑀓𑀺𑀮𑀫𑁂𑀬𑁆𑀬, 𑀕𑀘𑁆𑀙𑀸𑀫𑀳’’𑀦𑁆𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀓𑁆𑀓𑁄𑀧𑀺 𑀲𑀢𑁆𑀣𑀸𑀭𑀁 𑀬𑀸𑀕𑀼𑀆𑀤𑀻𑀦𑀺 𑀤𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺. 𑀲𑀢𑁆𑀣𑀸𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀲𑀓𑁆𑀓𑁄 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀕𑀘𑁆𑀙𑀺. 𑀲𑀓𑁆𑀓𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀆𑀓𑀸𑀲𑀁 𑀑𑀮𑁄𑀓𑁂𑀲𑀺. 𑀢𑀸𑀯𑀤𑁂𑀯 𑀆𑀓𑀸𑀲𑀢𑁄 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺𑀢𑁆𑀯𑀸 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀓𑀮𑀁 𑀕𑁂𑀳𑀁 𑀧𑀽𑀭𑁂𑀲𑀺. 𑀢𑀲𑁆𑀲 𑀕𑁂𑀳𑁂 𑀑𑀓𑀸𑀲𑁄 𑀦𑀸𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀤𑀸𑀭𑀓𑁂 𑀩𑀳𑀺 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀲𑀓𑀮𑀁 𑀦𑁄 𑀕𑁂𑀳𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀼𑀡𑁆𑀡𑀁, 𑀧𑀯𑀺𑀲𑀺𑀢𑀼𑀁 𑀑𑀓𑀸𑀲𑁄 𑀦𑀢𑁆𑀣𑀻’’𑀢𑀺. 𑀲𑁄 ‘‘𑀅𑀚𑁆𑀚𑁂𑀯 𑀫𑁂 𑀤𑀸𑀦𑁂𑀦 𑀯𑀺𑀧𑀸𑀓𑁄 𑀤𑀺𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀆𑀳 𑁋‘‘𑀤𑁂𑀯, 𑀕𑁂𑀳𑀁 𑀫𑁂 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀼𑀡𑁆𑀡𑀁, 𑀢𑀁 𑀥𑀦𑀁 𑀕𑀡𑁆𑀳𑀣𑀸’’𑀢𑀺. 𑀭𑀸𑀚𑀸 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀤𑀺𑀦𑁆𑀦𑀤𑀸𑀦𑀁, 𑀅𑀚𑁆𑀚𑁂𑀯 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀆𑀳 𑁋 ‘‘𑀓𑀺𑀁 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀥𑀦𑀳𑀭𑀡𑀢𑁆𑀣𑀸𑀬 𑀲𑀓𑀝𑀲𑀳𑀲𑁆𑀲𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀲𑀓𑀝𑀲𑀳𑀲𑁆𑀲𑀁 𑀧𑁂𑀲𑁂𑀢𑁆𑀯𑀸 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀑𑀓𑀺𑀭𑀸𑀧𑁂𑀲𑀺. 𑀢𑀸𑀮𑀧𑁆𑀧𑀫𑀸𑀡𑁄 𑀭𑀸𑀲𑀺 𑀅𑀳𑁄𑀲𑀺. 𑀭𑀸𑀚𑀸 𑀦𑀕𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀢𑁆𑀣𑀺 𑀓𑀲𑁆𑀲𑀘𑀺 𑀏𑀢𑁆𑀢𑀓𑀁 𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀏𑀯𑀁 𑀫𑀳𑀸𑀥𑀦𑀲𑁆𑀲 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀸𑀧𑁂𑀲𑀺.

𑀅𑀣𑀲𑁆𑀲 𑀧𑀼𑀩𑁆𑀩𑁂 𑀏𑀓𑀲𑁆𑀲 𑀲𑁂𑀝𑁆𑀞𑀺𑀦𑁄 𑀕𑁂𑀳𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀚𑀸𑀢𑁂 𑀕𑀘𑁆𑀙𑁂 𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀲𑀸𑀳𑀻’’𑀢𑀺 𑀆𑀳. 𑀢𑀲𑁆𑀲 𑀢𑀁 𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀲𑀫𑀁 𑀓𑀢𑁆𑀯𑀸 𑀪𑀽𑀫𑀺𑀬𑀸 𑀔𑀜𑁆𑀜𑀫𑀸𑀦𑀸𑀬 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀭𑀜𑁆𑀜𑁄 𑀆𑀭𑁄𑀘𑀺𑀢𑁂 ‘‘𑀢𑀯 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀸, 𑀢𑁆𑀯𑀫𑁂𑀯 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀕𑁂𑀳𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀢𑀢𑁄 𑀧𑀭𑀫𑁆𑀧𑀺 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄.

𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁄 𑀘𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀽𑀧𑀝𑁆𑀞𑀸𑀓𑀓𑀼𑀮𑁂 𑀲𑁂𑀝𑁆𑀞𑀺𑀥𑀻𑀢𑀼 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀁𑀲𑀼. 𑀢𑀲𑁆𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀳𑁄 𑀯𑀢𑀸𑀳𑀁 𑀥𑀫𑁆𑀫𑀤𑁂𑀲𑀦𑀸𑀧𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺. 𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺, 𑀤𑁄𑀳𑀴𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀅𑀣𑀲𑁆𑀲𑀸 𑀢𑀢𑁄 𑀅𑀧𑀭𑁂𑀲𑀼𑀧𑀺 𑀲𑀢𑁆𑀢𑀲𑀼 𑀫𑀗𑁆𑀕𑀮𑁂𑀲𑀼 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑁄𑀚𑁂𑀲𑀼𑀁. 𑀲𑀩𑁆𑀩𑀁 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑀲𑁆𑀲 𑀧𑀦 𑀫𑀳𑀸𑀤𑀼𑀕𑁆𑀕𑀢𑀓𑀸𑀮𑁂 𑀤𑀺𑀦𑁆𑀦𑀲𑁆𑀲 𑀭𑁄𑀳𑀺𑀢𑀫𑀘𑁆𑀙𑀭𑀲𑀤𑀸𑀦𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁄. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲, ‘‘𑀪𑀦𑁆𑀢𑁂, 𑀤𑀸𑀲𑀲𑁆𑀲 𑀯𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀣𑀸’’𑀢𑀺 𑀫𑀸𑀢𑀭𑀸 𑀯𑀼𑀢𑁆𑀢𑁂 𑀣𑁂𑀭𑁄 𑀆𑀳 𑁋 ‘‘𑀓𑁄𑀦𑀸𑀫𑁄 𑀅𑀬𑀁 𑀤𑀸𑀭𑀓𑁄’’𑀢𑀺? ‘‘𑀪𑀦𑁆𑀢𑁂, 𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀚𑀴𑀸 𑀏𑀴𑀫𑀽𑀕𑀸𑀧𑀺 𑀧𑀡𑁆𑀟𑀺𑀢𑀸 𑀚𑀸𑀢𑀸, 𑀢𑀲𑁆𑀫𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀡𑁆𑀟𑀺𑀢𑁄𑀢𑁆𑀯𑁂𑀯 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀸𑀲𑀺. 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀦𑀲𑁆𑀲 ‘‘𑀦𑀸𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀢𑀸𑀢, ‘𑀅𑀳𑀁 𑀢𑀯 𑀅𑀚𑁆𑀛𑀸𑀲𑀬𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀺𑀘𑁆𑀘𑁂𑀯 𑀫𑀦𑀁 𑀉𑀧𑁆𑀧𑀸𑀤𑁂𑀲𑀺’’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀤𑀸𑀲𑁄 𑀯𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀅𑀳𑀁 𑀇𑀫𑀁 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀕𑀺𑀳𑀺𑀓𑀸𑀮𑁂 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑀁 𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀣𑁂𑀭𑀲𑁆𑀲 𑀅𑀤𑀸𑀲𑀺.

𑀣𑁂𑀭𑁄 𑀧𑀩𑁆𑀩𑀚𑁆𑀚𑀸𑀬 𑀤𑀼𑀓𑁆𑀓𑀭𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀓𑀭𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀓𑁂𑀲𑁂 𑀢𑁂𑀫𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺𑀲𑁆𑀲 𑀲𑀢𑁆𑀢𑀸𑀳𑀁 𑀯𑀺𑀳𑀸𑀭𑁂𑀬𑁂𑀯 𑀯𑀲𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀬𑀁 𑀕𑁂𑀳𑀁 𑀅𑀕𑀫𑀁𑀲𑀼. 𑀣𑁂𑀭𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦𑀸𑀕𑀫𑀸𑀲𑀺. 𑀓𑀺𑀁 𑀓𑀸𑀭𑀡𑀸? 𑀦 𑀢𑀸𑀯𑀲𑁆𑀲 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀸𑀦𑀺 𑀯𑀸 𑀇𑀭𑀺𑀬𑀸𑀧𑀣𑁄 𑀯𑀸 𑀧𑀸𑀲𑀸𑀤𑀺𑀓𑁄 𑀳𑁄𑀢𑀺, 𑀅𑀧𑀺𑀘 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀅𑀢𑁆𑀣𑀺. 𑀣𑁂𑀭𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁂 𑀲𑀓𑀮𑀯𑀺𑀳𑀸𑀭𑀁 𑀯𑀺𑀘𑀭𑀦𑁆𑀢𑁄 𑀅𑀲𑀫𑁆𑀫𑀚𑁆𑀚𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀼𑀘𑁆𑀙𑀪𑀸𑀚𑀦𑁂𑀲𑀼 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀸𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀘𑁆𑀙𑀸 𑀕𑀸𑀫𑀁 𑀧𑀯𑀺𑀲𑀢𑀺. 𑀅𑀧𑀺𑀘 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀢𑀼𑀘𑁆𑀙𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘𑀧𑀲𑁆𑀲𑀣 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀦𑀻’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀺𑀁𑀲𑀽’’𑀢𑀺 𑀲𑀓𑀮𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀘𑁆𑀙𑀸 𑀕𑀸𑀫𑀁 𑀧𑀯𑀺𑀲𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀫𑁆𑀧𑀺 𑀲𑀸𑀫𑀡𑁂𑀭𑁂𑀦 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀯𑀸𑀢𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀸𑀢𑀺𑀓𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀓𑀺𑀁 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀸𑀢𑀺𑀓𑀸 𑀦𑀸𑀫, 𑀲𑀸𑀫𑀡𑁂𑀭𑀸’’𑀢𑀺. ‘‘𑀇𑀫𑀸𑀬 𑀓𑀺𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀇𑀢𑁄 𑀘𑀺𑀢𑁄 𑀘 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀲𑁆𑀲𑀓𑀫𑁆𑀫𑀁 𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀉𑀤𑀓𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀸𑀯𑀼𑀲𑁄’’𑀢𑀺. ‘‘𑀏𑀯𑀭𑀽𑀧𑀁 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀳𑀭𑀦𑁆𑀢𑀺, 𑀪𑀦𑁆𑀢𑁂’’𑀢𑀺? ‘‘𑀆𑀫𑀸𑀯𑀼𑀲𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀏𑀯𑀭𑀽𑀧𑀫𑁆𑀧𑀺 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀳𑀭𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸𑀧𑀺 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣𑁂𑀲𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀉𑀲𑀼𑀓𑀸𑀭𑁂 𑀲𑀭𑀤𑀡𑁆𑀟𑀓𑀁 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀅𑀓𑁆𑀔𑀺𑀓𑁄𑀝𑀺𑀬𑀸 𑀑𑀮𑁄𑀓𑁂𑀢𑁆𑀯𑀸 𑀉𑀚𑀼𑀓𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀇𑀫𑁂, 𑀪𑀦𑁆𑀢𑁂, 𑀓𑁂 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀉𑀲𑀼𑀓𑀸𑀭𑀸 𑀦𑀸𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁂 𑀓𑀭𑁄𑀦𑁆𑀢𑀻’’𑀢𑀺? ‘‘𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀲𑀭𑀤𑀡𑁆𑀟𑀓𑀁 𑀉𑀚𑀼𑀁 𑀓𑀭𑁄𑀦𑁆𑀢𑀻’’𑀢𑀺. ‘‘𑀲𑀘𑀺𑀢𑁆𑀢𑀓𑁄, 𑀪𑀦𑁆𑀢𑁂, 𑀏𑀲𑁄’’𑀢𑀺? ‘‘𑀅𑀘𑀺𑀢𑁆𑀢𑀓𑁄, 𑀆𑀯𑀼𑀲𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀘𑀺𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀉𑀚𑀼𑀁 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸𑀧𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣𑁂𑀲𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑀸𑀭𑀽𑀦𑀺 𑀅𑀭𑀦𑁂𑀫𑀺𑀦𑀸𑀪𑀺𑀆𑀤𑀻𑀦𑀺 𑀢𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑁂 𑀓𑁂 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀘𑁆𑀙𑀓𑀸 𑀦𑀸𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁂 𑀓𑀭𑁄𑀦𑁆𑀢𑀻’’𑀢𑀺? ‘‘𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀬𑀸𑀦𑀓𑀸𑀤𑀻𑀦𑀁 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀆𑀯𑀼𑀲𑁄’’𑀢𑀺. ‘‘𑀏𑀢𑀸𑀦𑀺 𑀧𑀦 𑀲𑀘𑀺𑀢𑁆𑀢𑀓𑀸𑀦𑀺, 𑀪𑀦𑁆𑀢𑁂’’𑀢𑀺? ‘‘𑀅𑀘𑀺𑀢𑁆𑀢𑀓𑀸𑀦𑀺, 𑀆𑀯𑀼𑀲𑁄’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀘𑀺𑀢𑁆𑀢𑀓𑀸𑀦𑀺 𑀓𑀝𑁆𑀞𑀓𑀮𑀺𑀗𑁆𑀕𑀭𑀸𑀦𑀺 𑀕𑀳𑁂𑀢𑁆𑀯𑀸 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀇𑀫𑀸𑀦𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀲𑀘𑁂 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑁂 𑀢𑀼𑀫𑁆𑀳𑁂 𑀕𑀡𑁆𑀳𑁂𑀬𑁆𑀬𑀸𑀣, 𑀅𑀳𑀁 𑀦𑀺𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺. 𑀣𑁂𑀭𑁄 ‘‘𑀅𑀬𑀁 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁄 𑀤𑀳𑀭𑀲𑀸𑀫𑀡𑁂𑀭𑁄 𑀫𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀏𑀯𑀁 𑀯𑀤𑁂𑀢𑀻’’𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯 ‘‘𑀆𑀳𑀭, 𑀲𑀸𑀫𑀡𑁂𑀭𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺.

𑀲𑀸𑀫𑀡𑁂𑀭𑁄𑀧𑀺 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀆𑀳𑀸𑀭𑀁 𑀆𑀳𑀭𑀦𑁆𑀢𑁄 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀆𑀳𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. ‘‘𑀓𑀣𑀁 𑀮𑀪𑀺𑀲𑁆𑀲𑀸𑀫𑀸𑀯𑀼𑀲𑁄’’𑀢𑀺? ‘‘𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂𑀦 𑀅𑀮𑀪𑀦𑁆𑀢𑀸 𑀫𑀫 𑀧𑀼𑀜𑁆𑀜𑁂𑀦 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀤𑀳𑀭𑀲𑀸𑀫𑀡𑁂𑀭𑀲𑁆𑀲 𑀩𑀳𑀺 𑀦𑀺𑀲𑀺𑀦𑁆𑀦𑀓𑀲𑁆𑀲 𑀧𑀭𑀺𑀧𑀦𑁆𑀣𑁄𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀓𑀼𑀜𑁆𑀚𑀺𑀓𑀁 𑀤𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀲𑀦𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀲𑀫𑁆𑀫𑀲𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀕𑀼𑀡𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂 𑀯𑀲𑀦𑁆𑀢𑁂 𑀲𑀓𑀼𑀡𑁂 𑀧𑀮𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀆𑀭𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑀁 ‘‘𑀘𑀦𑁆𑀤𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀁 ‘‘𑀲𑀽𑀭𑀺𑀬𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀬𑀁 𑀕𑀦𑁆𑀢𑁆𑀯𑀸 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀯𑀺𑀳𑀸𑀭𑁂 𑀧𑀼𑀭𑀸𑀡𑀧𑀡𑁆𑀡𑀲𑁆𑀲 𑀧𑀢𑀦𑁆𑀢𑀲𑁆𑀲𑀧𑀺 𑀲𑀤𑁆𑀤𑁄 𑀦𑀸𑀳𑁄𑀲𑀺, 𑀲𑀸𑀫𑀡𑁂𑀭𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀲𑁄 𑀅𑀦𑁆𑀢𑀭𑀸𑀪𑀢𑁆𑀢𑁂𑀬𑁂𑀯 𑀅𑀢𑁆𑀢𑀪𑀸𑀯𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀸𑀧𑀼𑀡𑀺.

𑀣𑁂𑀭𑁄𑀧𑀺 ‘‘𑀲𑀸𑀫𑀡𑁂𑀭𑁄 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀲 𑀉𑀧𑀓𑀧𑁆𑀧𑀦𑀓𑀁 𑀪𑁄𑀚𑀦𑀁 𑀅𑀲𑀼𑀓𑀓𑀼𑀮𑁂 𑀦𑀸𑀫 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺 𑀏𑀓𑀁 𑀧𑁂𑀫𑀕𑀸𑀭𑀯𑀬𑀼𑀢𑁆𑀢𑀁 𑀉𑀧𑀝𑁆𑀞𑀸𑀓𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀘 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀯𑀲𑀁 𑀭𑁄𑀳𑀺𑀢𑀫𑀘𑁆𑀙𑁂 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀣𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀪𑀤𑁆𑀤𑀓𑀁 𑀯𑁄 𑀓𑀢𑀁 𑀇𑀥𑀸𑀕𑀘𑁆𑀙𑀦𑁆𑀢𑁂𑀳𑀻’’𑀢𑀺 𑀅𑀦𑁆𑀢𑁄𑀕𑁂𑀳𑁂 𑀧𑀯𑁂𑀲𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀅𑀤𑀁𑀲𑀼. 𑀣𑁂𑀭𑁄 𑀳𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀧𑀭𑀺𑀪𑀼𑀜𑁆𑀚𑀣, 𑀪𑀦𑁆𑀢𑁂, 𑀳𑀭𑀡𑀓𑀪𑀢𑁆𑀢𑀫𑁆𑀧𑀺 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀢𑁆𑀢𑀁 𑀭𑁄𑀳𑀺𑀢𑀫𑀘𑁆𑀙𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀁𑀲𑀼. 𑀣𑁂𑀭𑁄 ‘‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’’𑀢𑀺 𑀲𑀻𑀖𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀁 𑀤𑀺𑀯𑀲𑀁 𑀓𑀸𑀮𑀲𑁆𑀲𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀆𑀯𑀚𑁆𑀚𑁂𑀲𑀺 𑁋 ‘‘𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀺𑀡𑁆𑀡𑀁 𑀨𑀮𑀸𑀦𑀁 𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 ‘‘𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀫𑀡𑁂𑀭𑀲𑁆𑀲 𑀪𑀢𑁆𑀢𑀁 𑀆𑀤𑀸𑀬 𑀲𑀻𑀖𑀁 𑀆𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀬𑀫𑁆𑀧𑀺𑀲𑁆𑀲 𑀓𑀭𑁂𑀬𑁆𑀬 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀅𑀣 𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀲𑁆𑀫𑀺𑀁 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁂 𑀲𑀸𑀫𑀡𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀲𑀫𑁆𑀧𑀢𑁆𑀢𑀁 𑀣𑁂𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺, 𑀧𑀼𑀝𑁆𑀞𑀁 𑀧𑀼𑀝𑁆𑀞𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀢𑀢𑁆𑀭𑀺𑀤𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑁋 𑀲𑀢𑁆𑀣𑀸 𑀓𑀺𑀭 𑀦𑀁 𑀆𑀳 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁 𑀢𑁂 𑀮𑀤𑁆𑀥’’𑀦𑁆𑀢𑀺? ‘‘𑀆𑀳𑀸𑀭𑁄, 𑀪𑀦𑁆𑀢𑁂’’𑀢𑀺. ‘‘𑀆𑀳𑀸𑀭𑁄 𑀦𑀸𑀫 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀯𑁂𑀤𑀦𑀁, 𑀪𑀦𑁆𑀢𑁂’’𑀢𑀺. ‘‘𑀯𑁂𑀤𑀦𑀁 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀭𑀽𑀧𑀁, 𑀪𑀦𑁆𑀢𑁂’’𑀢𑀺. ‘‘𑀭𑀽𑀧𑀁 𑀧𑀦 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀨𑀲𑁆𑀲𑀁, 𑀪𑀦𑁆𑀢𑁂’’𑀢𑀺. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀚𑀺𑀖𑀘𑁆𑀙𑀺𑀢𑁂𑀦 𑀳𑀺 𑀧𑀭𑀺𑀪𑀼𑀢𑁆𑀢𑁄 𑀆𑀳𑀸𑀭𑁄 𑀢𑀲𑁆𑀲 𑀔𑀼𑀤𑁆𑀤𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀆𑀳𑀭𑀢𑀺. 𑀆𑀳𑀸𑀭𑀧𑀭𑀺𑀪𑁄𑀕𑁂𑀦 𑀲𑀼𑀔𑀺𑀢𑀲𑁆𑀲 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀲𑀭𑀻𑀭𑁂 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀯𑁂𑀤𑀦𑀸 𑀭𑀽𑀧𑀁 𑀆𑀳𑀭𑀢𑀺. 𑀲𑀼𑀔𑀺𑀢𑁄 𑀧𑀦 𑀆𑀳𑀸𑀭𑀚𑀭𑀽𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀼𑀔𑀲𑁄𑀫𑀦𑀲𑁆𑀲𑁄 ‘𑀇𑀤𑀸𑀦𑀺 𑀫𑁂 𑀅𑀲𑁆𑀲𑀸𑀤𑁄 𑀚𑀸𑀢𑁄’𑀢𑀺 𑀦𑀺𑀧𑁆𑀧𑀚𑁆𑀚𑀦𑁆𑀢𑁄 𑀯𑀸 𑀦𑀺𑀲𑀻𑀤𑀦𑁆𑀢𑁄 𑀯𑀸 𑀲𑀼𑀔𑀲𑀫𑁆𑀨𑀲𑁆𑀲𑀁 𑀧𑀝𑀺𑀮𑀪𑀢𑀻’’𑀢𑀺.

𑀏𑀯𑀁 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀯𑀺𑀲𑁆𑀲𑀚𑁆𑀚𑀺𑀓𑁂𑀲𑀼 𑀲𑀸𑀫𑀡𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀲𑀢𑁆𑀣𑀸𑀧𑀺 𑀣𑁂𑀭𑀁 𑀆𑀳 𑁋 ‘‘𑀕𑀘𑁆𑀙, 𑀲𑀸𑀭𑀺𑀧𑀼𑀢𑁆𑀢, 𑀢𑀯 𑀲𑀸𑀫𑀡𑁂𑀭𑀲𑁆𑀲 𑀪𑀢𑁆𑀢𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀲𑀸𑀫𑀡𑁂𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀢𑁆𑀯𑀸 𑀢𑀸𑀮𑀯𑀡𑁆𑀝𑁂𑀦 𑀣𑁂𑀭𑀁 𑀩𑀻𑀚𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀸𑀫𑀡𑁂𑀭, 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺. ‘‘𑀓𑀢𑀁 𑀫𑀬𑀸 𑀪𑀢𑁆𑀢𑀓𑀺𑀘𑁆𑀘𑀁, 𑀢𑁆𑀯𑀁 𑀓𑀭𑁄𑀳𑀻’’𑀢𑀺. 𑀲𑀢𑁆𑀢𑀯𑀲𑁆𑀲𑀺𑀓𑀤𑀸𑀭𑀓𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀁 𑀔𑀡𑀁 𑀯𑀺𑀓𑀲𑀺𑀢𑀧𑀤𑀼𑀫𑀼𑀧𑁆𑀧𑀮𑀲𑀤𑀺𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀧𑀘𑁆𑀘𑀯𑁂𑀓𑁆𑀔𑀺𑀢𑀝𑁆𑀞𑀸𑀦𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀢𑁂𑀦 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀓𑀸𑀮𑁂 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀲𑀽𑀭𑀺𑀬𑀫𑀡𑁆𑀟𑀮𑀁. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀕𑀮𑀺𑀢𑁆𑀯𑀸 𑀕𑀢𑁄.

𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼, ‘‘𑀙𑀸𑀬𑀸 𑀅𑀥𑀺𑀓𑀧𑁆𑀧𑀫𑀸𑀡𑀸 𑀚𑀸𑀢𑀸, 𑀲𑀽𑀭𑀺𑀬𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀕𑀮𑀺𑀢𑁆𑀯𑀸 𑀕𑀢𑁄, 𑀲𑀸𑀫𑀡𑁂𑀭𑁂𑀦 𑀘 𑀇𑀤𑀸𑀦𑁂𑀯 𑀪𑀼𑀢𑁆𑀢𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣𑀸’’𑀢𑀺? ‘‘𑀇𑀤𑀁 𑀦𑀸𑀫, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀯𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑀡𑀓𑀸𑀮𑁂 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀘𑀦𑁆𑀤𑀫𑀡𑁆𑀟𑀮𑀁, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀲𑀽𑀭𑀺𑀬𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀺𑀳𑀸𑀭𑁄𑀧𑀯𑀦𑁂 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺, 𑀅𑀳𑀫𑁆𑀧𑀺 ‘𑀩𑀼𑀤𑁆𑀥𑁄𑀫𑁆𑀳𑀻’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀲𑀻𑀤𑀺𑀢𑀼𑀁 𑀦𑀸𑀮𑀢𑁆𑀣𑀁, 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀆𑀭𑀓𑁆𑀔𑀁 𑀅𑀕𑁆𑀕𑀳𑁂𑀲𑀺𑀁, 𑀦𑁂𑀢𑁆𑀢𑀺𑀓𑁂 𑀘 𑀫𑀸𑀢𑀺𑀓𑀸𑀬 𑀉𑀤𑀓𑀁 𑀳𑀭𑀦𑁆𑀢𑁂, 𑀉𑀲𑀼𑀓𑀸𑀭𑁂 𑀘 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑁂, 𑀢𑀘𑁆𑀙𑀓𑁂 𑀘 𑀤𑀸𑀭𑀽𑀦𑀺 𑀢𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀏𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀡𑁆𑀟𑀺𑀢𑀸 𑀅𑀢𑁆𑀢𑀸𑀦𑀁 𑀤𑀫𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁦. ‘‘𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀢𑁆𑀣 𑀉𑀤𑀓𑀦𑁆𑀢𑀺 𑀧𑀣𑀯𑀺𑀬𑀸 𑀣𑀮𑀝𑁆𑀞𑀸𑀦𑀁 𑀔𑀡𑀺𑀢𑁆𑀯𑀸 𑀆𑀯𑀸𑀝𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀫𑀸𑀢𑀺𑀓𑀁 𑀯𑀸 𑀓𑀢𑁆𑀯𑀸 𑀭𑀼𑀓𑁆𑀔𑀤𑁄𑀡𑀺𑀁 𑀯𑀸 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀤𑀓𑀁. 𑀦𑁂𑀦𑁆𑀢𑀻𑀢𑀺 𑀦𑁂𑀢𑁆𑀢𑀺𑀓𑀸. 𑀢𑁂𑀚𑀦𑀦𑁆𑀢𑀺 𑀓𑀡𑁆𑀟𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑁂𑀢𑁆𑀢𑀺𑀓𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀤𑀓𑀁 𑀦𑀬𑀦𑁆𑀢𑀺, 𑀉𑀲𑀼𑀓𑀸𑀭𑀸𑀧𑀺 𑀢𑀸𑀧𑁂𑀢𑁆𑀯𑀸 𑀢𑁂𑀚𑀦𑀁 𑀦𑀫𑀬𑀦𑁆𑀢𑀺 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑀺. 𑀢𑀘𑁆𑀙𑀓𑀸𑀧𑀺 𑀦𑁂𑀫𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀢𑀘𑁆𑀙𑀦𑁆𑀢𑀸 𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀚𑀼𑀁 𑀯𑀸 𑀯𑀗𑁆𑀓𑀁 𑀯𑀸 𑀓𑀭𑁄𑀦𑁆𑀢𑀺. 𑀏𑀯𑀁 𑀏𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀡𑁆𑀟𑀺𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑀸 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀧𑀦 𑀏𑀓𑀦𑁆𑀢𑀤𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.