𑁧𑁦. 𑀥𑀫𑁆𑀫𑀲𑁆𑀲𑀯𑀦𑀯𑀢𑁆𑀣𑀼

𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁆𑀲𑀯𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑀯𑀻𑀣𑀺𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀕𑀡𑀩𑀦𑁆𑀥𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀲𑀼𑀁, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀦 𑀥𑀫𑁆𑀫𑀁 𑀲𑁄𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀏𑀓𑀘𑁆𑀘𑁂 𑀓𑀸𑀫𑀭𑀢𑀺𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀧𑀼𑀦 𑀕𑁂𑀳𑀫𑁂𑀯 𑀕𑀢𑀸, 𑀏𑀓𑀘𑁆𑀘𑁂 𑀤𑁄𑀲𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀏𑀓𑀘𑁆𑀘𑁂 𑀫𑀸𑀦𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀏𑀓𑀘𑁆𑀘𑁂 𑀣𑀺𑀦𑀫𑀺𑀤𑁆𑀥𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀧𑀘𑀮𑀸𑀬𑀦𑁆𑀢𑀸 𑀲𑁄𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀇𑀫𑀸 𑀲𑀢𑁆𑀢𑀸 𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑀺𑀲𑁆𑀲𑀺𑀢𑀸, 𑀪𑀯𑁂𑀲𑀼 𑀏𑀯 𑀮𑀕𑁆𑀕𑀸 𑀯𑀺𑀳𑀭𑀦𑁆𑀢𑀺, 𑀧𑀸𑀭𑀕𑀸𑀫𑀺𑀦𑁄 𑀦𑀸𑀫 𑀅𑀧𑁆𑀧𑀓𑀸’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁮𑁫. ‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

𑁮𑁬. ‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀣 𑀅𑀧𑁆𑀧𑀓𑀸𑀢𑀺 𑀣𑁄𑀓𑀸 𑀦 𑀩𑀳𑀽. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀕𑀸𑀫𑀺𑀦𑁄. 𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸𑀢𑀺 𑀬𑀸 𑀧𑀦𑀸𑀬𑀁 𑀅𑀯𑀲𑁂𑀲𑀸 𑀧𑀚𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑀻𑀭𑀫𑁂𑀯 𑀅𑀦𑀼𑀥𑀸𑀯𑀢𑀺, 𑀅𑀬𑀫𑁂𑀯 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀤𑀓𑁆𑀔𑀸𑀢𑁂𑀢𑀺 𑀲𑀫𑁆𑀫𑀸 𑀅𑀓𑁆𑀔𑀸𑀢𑁂 𑀲𑀼𑀓𑀣𑀺𑀢𑁂. 𑀥𑀫𑁆𑀫𑁂𑀢𑀺 𑀤𑁂𑀲𑀦𑀸𑀥𑀫𑁆𑀫𑁂. 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄𑀢𑀺 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀭𑀡𑁂𑀦 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄. 𑀧𑀸𑀭𑀫𑁂𑀲𑁆𑀲𑀦𑁆𑀢𑀻𑀢𑀺 𑀢𑁂 𑀏𑀯𑀭𑀽𑀧𑀸 𑀚𑀦𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀫𑀘𑁆𑀘𑀼𑀥𑁂𑀬𑁆𑀬𑀦𑁆𑀢𑀺 𑀓𑀺𑀮𑁂𑀲𑀫𑀸𑀭𑀲𑀗𑁆𑀔𑀸𑀢𑀲𑁆𑀲 𑀫𑀘𑁆𑀘𑀼𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀢𑁂𑀪𑀽𑀫𑀺𑀓𑀯𑀝𑁆𑀝𑀁. 𑀲𑀼𑀤𑀼𑀢𑁆𑀢𑀭𑀦𑁆𑀢𑀺 𑀬𑁂 𑀚𑀦𑀸 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄, 𑀢𑁂 𑀏𑀢𑀁 𑀲𑀼𑀤𑀼𑀢𑁆𑀢𑀭𑀁 𑀤𑀼𑀭𑀢𑀺𑀓𑁆𑀓𑀫𑀁 𑀫𑀸𑀭𑀥𑁂𑀬𑁆𑀬𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀥𑀫𑁆𑀫𑀲𑁆𑀲𑀯𑀦𑀯𑀢𑁆𑀣𑀼 𑀤𑀲𑀫𑀁.