𑁧. 𑀅𑀜𑁆𑀜𑀢𑀭𑀧𑀼𑀭𑀺𑀲𑀯𑀢𑁆𑀣𑀼

𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀲𑁂𑀦𑀤𑀺𑀓𑁄𑀲𑀮𑀜𑁆𑀘𑁂𑀯 𑀅𑀜𑁆𑀜𑀢𑀭𑀜𑁆𑀘 𑀧𑀼𑀭𑀺𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀸 𑀓𑀺𑀭 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀩𑁆𑀩𑀲𑁂𑀢𑀁 𑀏𑀓𑀁 𑀧𑀼𑀡𑁆𑀟𑀭𑀻𑀓𑀁 𑀦𑀸𑀫 𑀳𑀢𑁆𑀣𑀺𑀁 𑀅𑀪𑀺𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑀺𑀬𑀫𑀸𑀦𑁄 𑀫𑀳𑀸𑀚𑀦𑁄 𑀧𑀮𑀸𑀬𑀦𑁆𑀢𑁄 𑀕𑀻𑀯𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸𑀧𑀺 𑀑𑀮𑁄𑀓𑁂𑀢𑀺𑀬𑁂𑀯. 𑀭𑀸𑀚𑀽𑀦𑀁 𑀓𑀺𑀭 𑀲𑀼𑀤𑀺𑀦𑁆𑀦𑀤𑀸𑀦𑀲𑁆𑀲𑁂𑀢𑀁 𑀨𑀮𑀁. 𑀅𑀜𑁆𑀜𑀢𑀭𑀲𑁆𑀲𑀸𑀧𑀺 𑀤𑀼𑀕𑁆𑀕𑀢𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀢𑀮𑁂 𑀞𑀺𑀢𑀸 𑀏𑀓𑀁 𑀯𑀸𑀢𑀧𑀸𑀦𑀓𑀯𑀸𑀝𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀑𑀮𑁄𑀓𑁂𑀢𑁆𑀯𑀸𑀯 𑀅𑀧𑀕𑀘𑁆𑀙𑀺. 𑀭𑀜𑁆𑀜𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀮𑀸𑀳𑀓𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀔𑀺𑀧𑁆𑀧𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀁 𑀯𑀺𑀲𑁆𑀲𑀸𑀲𑀓𑀁 𑀅𑀫𑀘𑁆𑀘𑀁 𑀆𑀳 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀢𑁂 𑀫𑀬𑀸 𑀑𑀮𑁄𑀓𑀺𑀢𑀧𑀸𑀲𑀸𑀤𑁄 𑀤𑀺𑀝𑁆𑀞𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑀢𑁆𑀣𑁂𑀓𑀁 𑀇𑀢𑁆𑀣𑀺𑀁 𑀅𑀤𑁆𑀤𑀲𑀸’’𑀢𑀺? ‘‘𑀅𑀤𑁆𑀤𑀲𑀁, 𑀤𑁂𑀯𑀸’’𑀢𑀺. ‘‘𑀕𑀘𑁆𑀙, 𑀢𑀲𑁆𑀲𑀸 𑀲𑀲𑀸𑀫𑀺𑀓𑀅𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 ‘‘𑀲𑀲𑀸𑀫𑀺𑀓𑀸’’𑀢𑀺 𑀆𑀭𑁄𑀘𑁂𑀲𑀺. 𑀅𑀣 𑀭𑀜𑁆𑀜𑀸 ‘‘𑀢𑁂𑀦 𑀳𑀺 𑀢𑀲𑁆𑀲𑀸 𑀲𑀸𑀫𑀺𑀓𑀁 𑀧𑀓𑁆𑀓𑁄𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑁄 𑀕𑀦𑁆𑀢𑁆𑀯𑀸, ‘‘𑀏𑀳𑀺, 𑀪𑁄, 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳. 𑀲𑁄 ‘‘𑀪𑀭𑀺𑀬𑀁 𑀫𑁂 𑀦𑀺𑀲𑁆𑀲𑀸𑀬 𑀪𑀬𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀆𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀫𑀁 𑀇𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀳𑀻’’𑀢𑀺 𑀆𑀳. ‘‘𑀅𑀮𑀁, 𑀤𑁂𑀯, 𑀅𑀳𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀼𑀗𑁆𑀓𑀁 𑀤𑀤𑀸𑀫𑀺, 𑀖𑀭𑁂𑀬𑁂𑀯 𑀫𑁂 𑀚𑀻𑀯𑀺𑀓𑀸 𑀳𑁄𑀢𑀽’’𑀢𑀺. ‘‘𑀢𑀯 𑀲𑀼𑀗𑁆𑀓𑁂𑀦 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀫𑀁 𑀉𑀧𑀝𑁆𑀞𑀸𑀳𑀻’’𑀢𑀺 𑀢𑀲𑁆𑀲 𑀨𑀮𑀓𑀜𑁆𑀘 𑀆𑀯𑀼𑀥𑀜𑁆𑀘 𑀤𑀸𑀧𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀓𑀜𑁆𑀘𑀺𑀤𑁂𑀯𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀖𑀸𑀢𑁂𑀢𑁆𑀯𑀸 𑀪𑀭𑀺𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀲𑁄 𑀫𑀭𑀡𑀪𑀬𑀪𑀻𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺.

𑀭𑀸𑀚𑀸 𑀢𑀲𑁆𑀲 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑁄 𑀓𑀸𑀫𑀧𑀭𑀺𑀴𑀸𑀳𑁂 𑀯𑀟𑁆𑀠𑀦𑁆𑀢𑁂 ‘‘𑀏𑀓𑀫𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀸𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄 𑀇𑀢𑁄 𑀬𑁄𑀚𑀦𑀫𑀢𑁆𑀣𑀓𑁂 𑀦𑀤𑀺𑀬𑀸 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀫𑀫 𑀦𑁆𑀳𑀸𑀦𑀯𑁂𑀮𑀸𑀬 𑀓𑀼𑀫𑀼𑀤𑀼𑀧𑁆𑀧𑀮𑀸𑀦𑀺 𑀘𑁂𑀯 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀜𑁆𑀘 𑀆𑀳𑀭. 𑀲𑀘𑁂 𑀢𑀲𑁆𑀫𑀺𑀁 𑀔𑀡𑁂 𑀦𑀸𑀕𑀘𑁆𑀙𑀲𑀺, 𑀆𑀡𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁂𑀯𑀓𑁄 𑀓𑀺𑀭 𑀘𑀢𑀽𑀳𑀺𑀧𑀺 𑀤𑀸𑀲𑁂𑀳𑀺 𑀧𑀢𑀺𑀓𑀺𑀝𑁆𑀞𑀢𑀭𑁄. 𑀥𑀦𑀓𑁆𑀓𑀻𑀢𑀸𑀤𑀬𑁄 𑀳𑀺 𑀤𑀸𑀲𑀸 ‘‘𑀲𑀻𑀲𑀁 𑀫𑁂 𑀭𑀼𑀚𑁆𑀚𑀢𑀺, 𑀧𑀺𑀝𑁆𑀞𑀺 𑀫𑁂 𑀭𑀼𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀅𑀘𑁆𑀙𑀺𑀢𑀼𑀁 𑀮𑀪𑀦𑁆𑀢𑀺𑀬𑁂𑀯. 𑀲𑁂𑀯𑀓𑀲𑁆𑀲𑁂𑀢𑀁 𑀦𑀢𑁆𑀣𑀺, 𑀆𑀡𑀢𑁆𑀢𑀓𑀫𑁆𑀫𑀁 𑀓𑀸𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀲𑁄 ‘‘𑀅𑀯𑀲𑁆𑀲𑀁 𑀫𑀬𑀸 𑀕𑀦𑁆𑀢𑀩𑁆𑀩𑀁, 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀸 𑀦𑀸𑀫 𑀦𑀸𑀕𑀪𑀯𑀦𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀁 𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀫𑀭𑀡𑀪𑀬𑀪𑀻𑀢𑁄 𑀯𑁂𑀕𑁂𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸, ‘‘𑀪𑀤𑁆𑀤𑁂, 𑀦𑀺𑀝𑁆𑀞𑀺𑀢𑀁 𑀫𑁂 𑀪𑀢𑁆𑀢’’𑀦𑁆𑀢𑀺 𑀆𑀳. ‘‘𑀉𑀤𑁆𑀥𑀦𑀫𑀢𑁆𑀣𑀓𑁂, 𑀲𑀸𑀫𑀻’’𑀢𑀺. 𑀲𑁄 𑀬𑀸𑀯 𑀪𑀢𑁆𑀢𑀁 𑀑𑀢𑀭𑀢𑀺, 𑀢𑀸𑀯 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀴𑀼𑀗𑁆𑀓𑁂𑀦 𑀓𑀜𑁆𑀚𑀺𑀓𑀁 𑀳𑀭𑀸𑀧𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑁂𑀦 𑀩𑁆𑀬𑀜𑁆𑀚𑀦𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑀫𑁂𑀯 𑀪𑀢𑁆𑀢𑀁 𑀧𑀘𑁆𑀙𑀺𑀬𑀁 𑀑𑀧𑀻𑀴𑁂𑀢𑁆𑀯𑀸 𑀆𑀤𑀸𑀬 𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀧𑀓𑁆𑀔𑀦𑁆𑀤𑁄, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀪𑀢𑁆𑀢𑀁 𑀧𑀓𑁆𑀓𑀁 𑀅𑀳𑁄𑀲𑀺. 𑀲𑁄 𑀅𑀦𑀼𑀘𑁆𑀙𑀺𑀝𑁆𑀞𑀁 𑀓𑀢𑁆𑀯𑀸𑀯 𑀣𑁄𑀓𑀁 𑀪𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀏𑀓𑀁 𑀅𑀤𑁆𑀥𑀺𑀓𑀁 𑀤𑀺𑀲𑁆𑀯𑀸 𑀫𑀬𑀸 𑀅𑀧𑀦𑁂𑀢𑁆𑀯𑀸 𑀞𑀧𑀺𑀢𑀁 𑀣𑁄𑀓𑀁 𑀅𑀦𑀼𑀘𑁆𑀙𑀺𑀝𑁆𑀞𑀁 𑀪𑀢𑁆𑀢𑀫𑁂𑀯 𑀅𑀢𑁆𑀣𑀺 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚 𑀲𑀸𑀫𑀻𑀢𑀺. 𑀲𑁄 𑀕𑀡𑁆𑀳𑀺𑀢𑁆𑀯𑀸 𑀪𑀼𑀜𑁆𑀚𑀺. 𑀇𑀢𑀭𑁄𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀁 𑀪𑀢𑁆𑀢𑀫𑀼𑀝𑁆𑀞𑀺𑀁 𑀉𑀤𑀓𑁂 𑀔𑀺𑀧𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 ‘‘𑀇𑀫𑀲𑁆𑀫𑀺𑀁 𑀦𑀤𑀻𑀧𑀤𑁂𑀲𑁂 𑀅𑀥𑀺𑀯𑀢𑁆𑀣𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀤𑁂𑀯𑀢𑀸 𑀘 𑀯𑀘𑀦𑀁 𑀫𑁂 𑀲𑀼𑀡𑀦𑁆𑀢𑀼, 𑀭𑀸𑀚𑀸 𑀫𑀬𑁆𑀳𑀁 𑀆𑀡𑀁 𑀓𑀸𑀢𑀼𑀓𑀸𑀫𑁄 ‘𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀆𑀳𑀭𑀸’𑀢𑀺 𑀫𑀁 𑀆𑀡𑀸𑀧𑁂𑀲𑀺, 𑀅𑀤𑁆𑀥𑀺𑀓𑀫𑀦𑀼𑀲𑁆𑀲𑀲𑁆𑀲 𑀘 𑀫𑁂 𑀪𑀢𑁆𑀢𑀁 𑀤𑀺𑀦𑁆𑀦𑀁, 𑀢𑀁 𑀲𑀳𑀲𑁆𑀲𑀸𑀦𑀺𑀲𑀁𑀲𑀁, 𑀉𑀤𑀓𑁂 𑀫𑀘𑁆𑀙𑀸𑀦𑀁 𑀤𑀺𑀦𑁆𑀦𑀁, 𑀢𑀁 𑀲𑀢𑀸𑀦𑀺𑀲𑀁𑀲𑀁. 𑀏𑀢𑁆𑀢𑀓𑀁 𑀧𑀼𑀜𑁆𑀜𑀨𑀮𑀁 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑀫𑁆𑀫𑀺, 𑀫𑀬𑁆𑀳𑀁 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀆𑀳𑀭𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀲𑁆𑀲𑀸𑀯𑁂𑀲𑀺. 𑀢𑀢𑁆𑀣 𑀅𑀥𑀺𑀯𑀢𑁆𑀣𑁄 𑀦𑀸𑀕𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀳𑀮𑁆𑀮𑀓𑀯𑁂𑀲𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀲𑀻’’𑀢𑀺 𑀆𑀳. 𑀲𑁄 𑀧𑀼𑀦𑀧𑀺 𑀢𑀣𑁂𑀯 𑀯𑀢𑁆𑀯𑀸 ‘‘𑀫𑀬𑁆𑀳𑀁 𑀢𑀁 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀤𑁂𑀫𑀻’’𑀢𑀺 𑀆𑀳. 𑀧𑀼𑀦𑀧𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀤𑁂𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀏𑀯𑀁 𑀲𑁄 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀢𑁆𑀢𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀅𑀤𑀸𑀲𑀺.

𑀭𑀸𑀚𑀸 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀼𑀫𑀸𑀬𑀸, 𑀲𑀘𑁂 𑀲𑁄 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀮𑀪𑁂𑀬𑁆𑀬, 𑀓𑀺𑀘𑁆𑀘𑀁 𑀫𑁂 𑀦 𑀦𑀺𑀧𑁆𑀨𑀚𑁆𑀚𑁂𑀬𑁆𑀬𑀸’’𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀫𑀼𑀤𑁆𑀤𑀺𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀳𑀭𑀸𑀧𑁂𑀲𑀺. 𑀇𑀢𑀭𑁄𑀧𑀺 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀦𑁆𑀳𑀸𑀦𑀯𑁂𑀮𑀸𑀬𑀫𑁂𑀯𑀸𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑁄 𑀤𑁆𑀯𑀸𑀭𑀧𑀸𑀮𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀆𑀳. ‘‘𑀦 𑀲𑀓𑁆𑀓𑀸 𑀯𑀺𑀯𑀭𑀺𑀢𑀼𑀁, 𑀭𑀸𑀚𑀸 𑀓𑀸𑀮𑀲𑁆𑀲𑁂𑀯 𑀫𑀼𑀤𑁆𑀤𑀺𑀓𑀁 𑀤𑀢𑁆𑀯𑀸 𑀭𑀸𑀚𑀕𑁂𑀳𑀁 𑀆𑀳𑀭𑀸𑀧𑁂𑀲𑀻’’𑀢𑀺. 𑀲𑁄 ‘‘𑀭𑀸𑀚𑀤𑀽𑀢𑁄 𑀅𑀳𑀁, 𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀯𑀢𑁆𑀯𑀸𑀧𑀺 ‘‘𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑁄 𑀦𑀢𑁆𑀣𑀺 𑀫𑁂 𑀇𑀤𑀸𑀦𑀺 𑀚𑀻𑀯𑀺𑀢𑀁. 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑀸𑀭𑀲𑁆𑀲 𑀉𑀧𑀭𑀺𑀉𑀫𑁆𑀫𑀸𑀭𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑀽𑀧𑀭𑀺 𑀧𑀼𑀧𑁆𑀨𑀸𑀦𑀺 𑀮𑀕𑁆𑀕𑁂𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄, ‘‘𑀅𑀫𑁆𑀪𑁄, 𑀦𑀕𑀭𑀯𑀸𑀲𑀺𑀦𑁄 𑀭𑀜𑁆𑀜𑁄 𑀫𑀬𑀸 𑀆𑀡𑀢𑁆𑀢𑀺𑀬𑀸 𑀕𑀢𑀪𑀸𑀯𑀁 𑀚𑀸𑀦𑀸𑀣, 𑀭𑀸𑀚𑀸 𑀫𑀁 𑀅𑀓𑀸𑀭𑀡𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀭𑀯𑀺𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀽 𑀦𑀸𑀫 𑀫𑀼𑀤𑀼𑀳𑀤𑀬𑀸, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀇𑀫𑁂 𑀳𑀺 𑀦𑀸𑀫 𑀲𑀢𑁆𑀢𑀸 𑀲𑀼𑀔𑀺𑀢𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀅𑀚𑀸𑀦𑀺𑀢𑁆𑀯𑀸 𑀤𑀼𑀓𑁆𑀔𑀸𑀪𑀺𑀪𑀽𑀢𑀓𑀸𑀮𑁂 𑀯𑀺𑀳𑀸𑀭𑀁 𑀕𑀦𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄𑀧𑀺 ‘‘𑀫𑁂 𑀅𑀜𑁆𑀜𑀁 𑀢𑀸𑀡𑀁 𑀦𑀢𑁆𑀣𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀺. 𑀅𑀣 𑀭𑀜𑁆𑀜𑁄𑀧𑀺 𑀢𑀁 𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑀲𑁆𑀲 𑀢𑀁 𑀇𑀢𑁆𑀣𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀯𑀺𑀪𑀸𑀢𑀓𑁆𑀔𑀡𑁂𑀬𑁂𑀯 𑀢𑀁 𑀧𑀼𑀭𑀺𑀲𑀁 𑀖𑀸𑀢𑀸𑀧𑁂𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺.

𑀢𑀲𑁆𑀫𑀺𑀁 𑀔𑀡𑁂𑀬𑁂𑀯 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀧𑀓𑁆𑀓𑀼𑀣𑀺𑀢𑀸𑀬 𑀉𑀓𑁆𑀔𑀮𑀺𑀬𑀸 𑀢𑀡𑁆𑀟𑀼𑀮𑀸 𑀯𑀺𑀬 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀧𑀘𑁆𑀘𑀫𑀸𑀦𑀸 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀳𑁂𑀝𑁆𑀞𑀺𑀫𑀢𑀮𑀁 𑀧𑀢𑁆𑀯𑀸 𑀅𑀧𑀭𑁂𑀳𑀺 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀧𑀼𑀦 𑀫𑀼𑀔𑀯𑀝𑁆𑀝𑀺𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸. 𑀭𑀸𑀚𑀸 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀻𑀢𑁄 𑀉𑀢𑁆𑀭𑀲𑁆𑀢𑀫𑀸𑀦𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑀬𑁆𑀳𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀫𑁂 𑀅𑀕𑁆𑀕𑀫𑀳𑁂𑀲𑀺𑀬𑀸, 𑀉𑀤𑀸𑀳𑀼 𑀫𑁂 𑀭𑀚𑁆𑀚𑀁 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀏𑀯 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀫𑀬𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀫𑀳𑀦𑁆𑀢𑀸 𑀪𑁂𑀭𑀯𑀲𑀤𑁆𑀤𑀸 𑀲𑀼𑀢𑀸, ‘𑀭𑀚𑁆𑀚𑀲𑁆𑀲 𑀯𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀸 𑀫𑀬𑁆𑀳𑀁 𑀯𑀸 𑀓𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀦 𑀚𑀸𑀦𑀸𑀫𑀺, 𑀢𑁂𑀦 𑀫𑁂 𑀢𑁆𑀯𑀁 𑀧𑀓𑁆𑀓𑁄𑀲𑀸𑀧𑀺𑀢𑁄’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀲𑀤𑁆𑀤𑀸 𑀲𑀼𑀢𑀸𑀢𑀺? ‘‘𑀆𑀘𑀭𑀺𑀬, 𑀤𑀼-𑀇𑀢𑀺 𑀲-𑀇𑀢𑀺 𑀦-𑀇𑀢𑀺 𑀲𑁄-𑀇𑀢𑀻𑀢𑀺 𑀇𑀫𑁂 𑀲𑀤𑁆𑀤𑁂 𑀅𑀲𑁆𑀲𑁄𑀲𑀺𑀁, 𑀇𑀫𑁂𑀲𑀁 𑀦𑀺𑀧𑁆𑀨𑀢𑁆𑀢𑀺𑀁 𑀉𑀧𑀥𑀸𑀭𑁂𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀲𑁆𑀲 𑀯𑀺𑀬 𑀦 𑀓𑀺𑀜𑁆𑀘𑀺 𑀧𑀜𑁆𑀜𑀸𑀬𑀢𑀺, ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀦 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺 𑀪𑀸𑀬𑀺𑀢𑁆𑀯𑀸 ‘‘𑀪𑀸𑀭𑀺𑀬𑀁, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀓𑀺𑀁, 𑀆𑀘𑀭𑀺𑀬𑀸’’𑀢𑀺? ‘‘𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀤𑁆𑀯𑀺𑀕𑀼𑀡𑀁 𑀪𑀻𑀢𑁄, ‘‘𑀆𑀘𑀭𑀺𑀬, 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀧𑀦 𑀧𑀝𑀺𑀖𑀸𑀢𑀓𑀸𑀭𑀡’’𑀦𑁆𑀢𑀺 𑀆𑀳. ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀅𑀳𑀁 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀩𑁆𑀩𑀲𑀢𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? 𑀳𑀢𑁆𑀣𑀺𑀲𑀢𑀁 𑀅𑀲𑁆𑀲𑀲𑀢𑀁 𑀉𑀲𑀪𑀲𑀢𑀁 𑀥𑁂𑀦𑀼𑀲𑀢𑀁 𑀅𑀚𑀲𑀢𑀁 𑀉𑀭𑀩𑁆𑀪𑀲𑀢𑀁 𑀓𑀼𑀓𑁆𑀓𑀼𑀝𑀲𑀢𑀁 𑀲𑀽𑀓𑀭𑀲𑀢𑀁 𑀤𑀸𑀭𑀓𑀲𑀢𑀁 𑀤𑀸𑀭𑀺𑀓𑀸𑀲𑀢𑀦𑁆𑀢𑀺 𑀏𑀯𑀁 𑀏𑀓𑁂𑀓𑀁 𑀧𑀸𑀡𑀚𑀸𑀢𑀺𑀁 𑀲𑀢𑀁 𑀲𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀧𑁂𑀦𑁆𑀢𑁄 ‘‘𑀲𑀘𑁂 𑀫𑀺𑀕𑀚𑀸𑀢𑀺𑀫𑁂𑀯 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀺, ‘𑀅𑀢𑁆𑀢𑀦𑁄 𑀔𑀸𑀤𑀦𑀻𑀬𑀫𑁂𑀯 𑀕𑀡𑁆𑀳𑀸𑀧𑁂𑀢𑀻’𑀢𑀺 𑀯𑀓𑁆𑀔𑀦𑁆𑀢𑀻’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀫𑀦𑀼𑀲𑁆𑀲𑁂𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀭𑀸𑀚𑀸 ‘‘𑀫𑀫 𑀚𑀻𑀯𑀺𑀢𑀫𑁂𑀯 𑀫𑀬𑁆𑀳𑀁 𑀮𑀸𑀪𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀩𑁆𑀩𑀧𑀸𑀡𑁂 𑀲𑀻𑀖𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀆𑀡𑀢𑁆𑀢𑀫𑀦𑀼𑀲𑁆𑀲𑀸 𑀅𑀥𑀺𑀓𑀢𑀭𑀁 𑀕𑀡𑁆𑀳𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀓𑁄𑀲𑀮𑀲𑀁𑀬𑀼𑀢𑁆𑀢𑁂 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀧𑀜𑁆𑀘 𑀘 𑀉𑀲𑀪𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀧𑀜𑁆𑀘 𑀘 𑀅𑀚𑀲𑀢𑀸𑀦𑀺 𑀧𑀜𑁆𑀘 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁨𑁦).

𑀫𑀳𑀸𑀚𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀼𑀜𑀸𑀢𑀻𑀦𑀁 𑀅𑀢𑁆𑀣𑀸𑀬 𑀧𑀭𑀺𑀤𑁂𑀯𑀫𑀸𑀦𑁄 𑀫𑀳𑀸𑀲𑀤𑁆𑀤𑀫𑀓𑀸𑀲𑀺, 𑀫𑀳𑀸𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂, 𑀫𑀳𑀸𑀭𑀸𑀚, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀸𑀓𑀢𑀺𑀓𑀸𑀦𑀺, 𑀓𑀺𑀮𑀦𑁆𑀢𑀭𑀽𑀧𑀸𑀦𑀺 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀢𑀼𑀬𑁆𑀳𑀁, 𑀫𑀮𑁆𑀮𑀺𑀓𑁂, 𑀢𑁆𑀯𑀁 𑀫𑀫 𑀓𑀡𑁆𑀡𑀫𑀽𑀮𑁂𑀦 𑀆𑀲𑀺𑀯𑀺𑀲𑀫𑁆𑀧𑀺 𑀕𑀘𑁆𑀙𑀦𑁆𑀢𑀁 𑀦 𑀚𑀸𑀦𑀸𑀲𑀻’’𑀢𑀺? ‘‘𑀓𑀺𑀁 𑀧𑀦𑁂𑀢𑀁, 𑀤𑁂𑀯𑀸’’𑀢𑀺? ‘‘𑀭𑀢𑁆𑀢𑀺𑀪𑀸𑀕𑁂 𑀫𑁂 𑀏𑀯𑀭𑀽𑀧𑁄 𑀦𑀸𑀫 𑀲𑀤𑁆𑀤𑁄 𑀲𑀼𑀢𑁄, 𑀲𑁆𑀯𑀸𑀳𑀁 𑀧𑀼𑀭𑁄𑀳𑀺𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀲𑀢𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀲𑀼𑀢𑁆𑀯𑀸 ‘‘𑀫𑀫 𑀚𑀻𑀯𑀺𑀢𑀫𑁂𑀯 𑀫𑀬𑁆𑀳𑀁 𑀮𑀸𑀪𑁄’’𑀢𑀺 𑀇𑀫𑁂 𑀧𑀸𑀡𑁂 𑀕𑀡𑁆𑀳𑀸𑀧𑁂𑀲𑀺𑀦𑁆𑀢𑀺. 𑀫𑀮𑁆𑀮𑀺𑀓𑀸 𑀤𑁂𑀯𑀻, ‘‘𑀅𑀦𑁆𑀥𑀩𑀸𑀮𑁄𑀲𑀺, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀫𑀳𑀸𑀪𑀓𑁆𑀔𑁄𑀲𑀺, 𑀅𑀦𑁂𑀓𑀲𑀽𑀧𑀩𑁆𑀬𑀜𑁆𑀚𑀦𑀯𑀺𑀓𑀢𑀺𑀓𑀁 𑀤𑁄𑀡𑀧𑀸𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀺, 𑀤𑁆𑀯𑀻𑀲𑀼 𑀭𑀝𑁆𑀞𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀧𑀜𑁆𑀜𑀸 𑀧𑀦 𑀢𑁂 𑀫𑀦𑁆𑀤𑀸’’𑀢𑀺 𑀆𑀳. ‘‘𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀺, 𑀤𑁂𑀯𑀻’’𑀢𑀺? ‘‘𑀓𑀳𑀁 𑀢𑀬𑀸 𑀅𑀜𑁆𑀜𑀲𑁆𑀲 𑀫𑀭𑀡𑁂𑀦 𑀅𑀜𑁆𑀜𑀲𑁆𑀲 𑀚𑀻𑀯𑀺𑀢𑀮𑀸𑀪𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀅𑀦𑁆𑀥𑀩𑀸𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 𑀓𑀲𑁆𑀫𑀸 𑀫𑀳𑀸𑀚𑀦𑀲𑁆𑀲 𑀉𑀧𑀭𑀺 𑀤𑀼𑀓𑁆𑀔𑀁 𑀔𑀺𑀧𑀲𑀺, 𑀥𑀼𑀭𑀯𑀺𑀳𑀸𑀭𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀧𑀼𑀕𑁆𑀕𑀮𑁄 𑀅𑀢𑀻𑀢𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀲𑀢𑁆𑀣𑀸 𑀯𑀲𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀲𑀮𑁆𑀮𑀳𑀼𑀓𑁂𑀳𑀺 𑀬𑀸𑀦𑁂𑀳𑀺 𑀫𑀮𑁆𑀮𑀺𑀓𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺 𑀧𑀞𑀫𑀢𑀭𑀁 𑀆𑀮𑀧𑀺. 𑀲𑁄 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀢𑀢𑁄 𑀫𑀮𑁆𑀮𑀺𑀓𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀪𑀦𑁆𑀢𑁂, 𑀭𑀜𑁆𑀜𑀸 𑀓𑀺𑀭 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑀤𑁆𑀤𑁄 𑀲𑀼𑀢𑁄. 𑀅𑀣 𑀦𑀁 𑀧𑀼𑀭𑁄𑀳𑀺𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀧𑀼𑀭𑁄𑀳𑀺𑀢𑁄 ‘𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬 𑀲𑀩𑁆𑀩𑀲𑀢𑁂 𑀧𑀸𑀡𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀬𑀜𑁆𑀜𑁂 𑀬𑀚𑀺𑀢𑁂 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀻’𑀢𑀺 𑀆𑀳. 𑀭𑀸𑀚𑀸 𑀧𑀸𑀡𑁂 𑀕𑀡𑁆𑀳𑀸𑀧𑁂𑀲𑀺, 𑀢𑁂𑀦𑀸𑀬𑀁 𑀫𑀬𑀸 𑀇𑀥𑀸𑀦𑀻𑀢𑁄’’𑀢𑀺. ‘‘𑀏𑀯𑀁 𑀓𑀺𑀭, 𑀫𑀳𑀸𑀭𑀸𑀚𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀦𑁆𑀢𑀺 𑀢𑁂 𑀲𑀤𑁆𑀤𑁄 𑀲𑀼𑀢𑁄’’𑀢𑀺? 𑀲𑁄 𑀅𑀢𑁆𑀢𑀦𑀸 𑀲𑀼𑀢𑀦𑀺𑀬𑀸𑀫𑁂𑀦𑁂𑀯 𑀆𑀘𑀺𑀓𑁆𑀔𑀺. 𑀢𑀣𑀸𑀕𑀢𑀲𑁆𑀲 𑀢𑀁 𑀲𑀼𑀢𑁆𑀯𑀸𑀯 𑀏𑀓𑁄𑀪𑀸𑀲𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀢𑁆𑀢𑀸 𑀆𑀳 𑁋 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀢𑀯 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺, 𑀧𑀸𑀧𑀓𑀫𑁆𑀫𑀺𑀦𑁄 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀆𑀯𑀻𑀓𑀭𑁄𑀦𑁆𑀢𑀸 𑀏𑀯𑀫𑀸𑀳𑀁𑀲𑀽’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑁂𑀳𑀺 𑀓𑀢’’𑀦𑁆𑀢𑀺? 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀓𑀫𑁆𑀫𑀁 𑀆𑀘𑀺𑀓𑁆𑀔𑀺𑀢𑀼𑀁 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀓𑀲𑁆𑀲𑀧𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀻𑀲𑀢𑀺𑀬𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀫𑀕𑀫𑀸𑀲𑀺. 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀩𑀳𑀼𑀢𑀭𑀸𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑀼𑀓𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀸 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀼𑀥𑀦𑀁, 𑀢𑁂𑀦 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀏𑀯𑀭𑀽𑀧𑁂 𑀩𑀼𑀤𑁆𑀥𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀤𑀸𑀦𑀁 𑀤𑀲𑁆𑀲𑀸𑀫, 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫, 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀓𑁄𑀧𑀺 𑀅𑀯𑀢𑁆𑀯𑀸 𑀢𑁂𑀲𑀼 𑀏𑀓𑁄 𑀢𑀸𑀯 𑀏𑀯𑀫𑀸𑀳 𑁋 ‘‘𑀢𑀺𑀔𑀺𑀡𑀲𑀼𑀭𑀁 𑀧𑀺𑀯𑀦𑁆𑀢𑀸 𑀫𑀥𑀼𑀭𑀫𑀁𑀲𑀁 𑀔𑀸𑀤𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫, 𑀇𑀤𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀨𑀮’’𑀦𑁆𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀤𑁂𑀯𑀲𑀺𑀓𑀁 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑀢𑁆𑀢𑀁 𑀦𑀸𑀦𑀕𑁆𑀕𑀭𑀲𑁂𑀳𑀺 𑀪𑀼𑀜𑁆𑀚𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀦𑀸𑀦𑀧𑁆𑀧𑀓𑀸𑀭𑀁 𑀧𑀽𑀯𑀔𑀚𑁆𑀚𑀓𑀯𑀺𑀓𑀢𑀺𑀁 𑀧𑀘𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀲𑀫𑁆𑀫𑀸 𑀫𑀬𑀁 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀓𑀭𑀺𑀲𑁆𑀲𑀸𑀫, ‘𑀥𑀦𑀁 𑀤𑀲𑁆𑀲𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀦𑀺𑀘𑁆𑀙𑀫𑀸𑀦𑀸 𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀥𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼, 𑀲𑀸𑀥𑀽’’𑀢𑀺 𑀲𑀩𑁆𑀩𑁂𑀯 𑀢𑀲𑁆𑀲 𑀓𑀣𑀸𑀬 𑀅𑀝𑁆𑀞𑀁𑀲𑀼.

𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀅𑀪𑀺𑀭𑀽𑀧𑀸𑀦𑀁 𑀇𑀢𑁆𑀣𑀻𑀦𑀁 𑀥𑀦𑀁 𑀧𑁂𑀲𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀳𑁂𑀝𑁆𑀞𑀺𑀫𑀢𑀮𑀁 𑀧𑀢𑁆𑀯𑀸 𑀧𑀼𑀦𑀧𑀺 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀮𑁄𑀳𑀓𑀼𑀫𑁆𑀪𑀺𑀫𑀼𑀔𑀁 𑀧𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀼𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸, 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸. ‘‘𑀯𑀤𑁂𑀳𑀺, 𑀫𑀳𑀸𑀭𑀸𑀚, 𑀧𑀞𑀫𑀁 𑀢𑁂 𑀓𑀺𑀁 𑀲𑀤𑁆𑀤𑁄 𑀦𑀸𑀫 𑀲𑀼𑀢𑁄’’𑀢𑀺? ‘‘𑀤𑀼-𑀇𑀢𑀺, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀢𑁂𑀦 𑀅𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳 𑁋

‘‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳, 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂;

𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄’’𑀢𑀺. (𑀚𑀸. 𑁧.𑁪.𑁫𑁩; 𑀧𑁂. 𑀯. 𑁮𑁦𑁪);

𑀅𑀣 𑀭𑀜𑁆𑀜𑁄 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸, ‘‘𑀓𑀺𑀁 𑀢𑁂, 𑀫𑀳𑀸𑀭𑀸𑀚, 𑀤𑀼𑀢𑀺𑀬𑀲𑀤𑁆𑀤𑁄 𑀢𑀢𑀺𑀬𑀲𑀤𑁆𑀤𑁄 𑀘𑀢𑀼𑀢𑁆𑀣𑀲𑀤𑁆𑀤𑁄 𑀲𑀼𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀅𑀯𑀲𑁂𑀲𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑁋

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀫𑀸𑀭𑀺𑀲𑀸.

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. (𑀚𑀸. 𑁧.𑁪.𑁫𑁪-𑁫𑁬; 𑀧𑁂. 𑀯. 𑁮𑁦𑁨, 𑁮𑁦𑁩, 𑁮𑁦𑁫) 𑁋

𑀧𑀝𑀺𑀧𑀸𑀝𑀺𑀬𑀸 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 𑀢𑀸𑀲𑀁 𑀅𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀢𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸𑀧𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑀓𑀫𑁂𑀯 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀼𑀦 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸’’𑀢𑀺 𑀆𑀳.

𑀭𑀜𑁆𑀜𑀸 𑀓𑀺𑀭 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂 𑀳𑁂𑀝𑁆𑀞𑀸 𑀪𑀲𑁆𑀲𑀦𑁆𑀢𑀺 𑀏𑀯, 𑀅𑀚𑁆𑀚𑀸𑀧𑀺 𑀏𑀓𑀁 𑀯𑀲𑁆𑀲𑀲𑀳𑀲𑁆𑀲𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺. 𑀭𑀜𑁆𑀜𑁄 𑀢𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀳𑀸𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀪𑀸𑀭𑀺𑀬𑀁 𑀯𑀢𑀺𑀤𑀁 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀦𑀸𑀫, 𑀏𑀓𑀁 𑀓𑀺𑀭 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀏𑀯𑀫𑁆𑀧𑀺 𑀦𑁂𑀲𑀁 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑀓𑀸𑀮𑁄 𑀦 𑀧𑀜𑁆𑀜𑀸𑀬𑀢𑀺, 𑀅𑀳𑀫𑁆𑀧𑀺 𑀧𑀭𑀤𑀸𑀭𑁂 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀦 𑀮𑀪𑀺𑀁, 𑀇𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀧𑀭𑀤𑀸𑀭𑁂 𑀫𑀸𑀦𑀲𑀁 𑀦 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀅𑀚𑁆𑀚 𑀫𑁂 𑀭𑀢𑁆𑀢𑀺𑀬𑀸 𑀤𑀻𑀖𑀪𑀸𑀯𑁄 𑀜𑀸𑀢𑁄’’𑀢𑀺. 𑀲𑁄𑀧𑀺 𑀧𑀼𑀭𑀺𑀲𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀮𑀤𑁆𑀥𑁄 𑀫𑁂 𑀩𑀮𑀯𑀧𑁆𑀧𑀘𑁆𑀘𑀬𑁄’’𑀢𑀺 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀭𑀜𑁆𑀜𑀸 𑀢𑀸𑀯 𑀅𑀚𑁆𑀚 𑀭𑀢𑁆𑀢𑀺𑀬𑀸 𑀤𑀻𑀖𑀪𑀸𑀯𑁄 𑀜𑀸𑀢𑁄, 𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀲𑀬𑀫𑁂𑀯 𑀬𑁄𑀚𑀦𑀲𑁆𑀲 𑀤𑀻𑀖𑀪𑀸𑀯𑀁 𑀅𑀜𑁆𑀜𑀸𑀲𑀺’’𑀦𑁆𑀢𑀺. 𑀲𑀢𑁆𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀣𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀏𑀓𑀘𑁆𑀘𑀲𑁆𑀲 𑀭𑀢𑁆𑀢𑀺 𑀤𑀻𑀖𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀬𑁄𑀚𑀦𑀁 𑀤𑀻𑀖𑀁 𑀳𑁄𑀢𑀺, 𑀩𑀸𑀮𑀲𑁆𑀲 𑀧𑀦 𑀲𑀁𑀲𑀸𑀭𑁄 𑀤𑀻𑀖𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁦. ‘‘𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢’’𑀦𑁆𑀢𑀺.

𑀢𑀢𑁆𑀣 𑀤𑀻𑀖𑀸𑀢𑀺 𑀭𑀢𑁆𑀢𑀺 𑀦𑀸𑀫𑁂𑀲𑀸 𑀢𑀺𑀬𑀸𑀫𑀫𑀢𑁆𑀢𑀸𑀯, 𑀚𑀸𑀕𑀭𑀦𑁆𑀢𑀲𑁆𑀲 𑀧𑀦 𑀤𑀻𑀖𑀸 𑀳𑁄𑀢𑀺, 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀔𑀸𑀬𑀢𑀺. 𑀢𑀲𑁆𑀲𑀸 𑀤𑀻𑀖𑀪𑀸𑀯𑀁 𑀅𑀢𑁆𑀢𑀸𑀦𑀁 𑀫𑀗𑁆𑀓𑀼𑀡𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑁂𑀫𑀸𑀦𑁄 𑀫𑀳𑀸𑀓𑀼𑀲𑀻𑀢𑁄𑀧𑀺, 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀲𑀬𑀫𑀸𑀦𑁄 𑀓𑀸𑀫𑀪𑁄𑀕𑀻𑀧𑀺 𑀦 𑀚𑀸𑀦𑀸𑀢𑀺, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀦 𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀘, 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀘, 𑀆𑀲𑀦𑀲𑀫𑀻𑀧𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀘, 𑀲𑀻𑀲𑀭𑁄𑀕𑀸𑀤𑀺𑀨𑀼𑀝𑁆𑀞𑁄 𑀯𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀸𑀤𑀺𑀁 𑀧𑀢𑁆𑀢𑁄 𑀯𑀸 𑀯𑁂𑀤𑀦𑀸𑀪𑀺𑀪𑀽𑀢𑁄 𑀘, 𑀭𑀢𑁆𑀢𑀺𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀤𑁆𑀥𑀺𑀓𑁄 𑀘 𑀚𑀸𑀦𑀸𑀢𑀺. 𑀬𑁄𑀚𑀦𑀦𑁆𑀢𑀺 𑀬𑁄𑀚𑀦𑀫𑁆𑀧𑀺 𑀘𑀢𑀼𑀕𑀸𑀯𑀼𑀢𑀫𑀢𑁆𑀢𑀫𑁂𑀯, 𑀲𑀦𑁆𑀢𑀲𑁆𑀲 𑀧𑀦 𑀓𑀺𑀮𑀦𑁆𑀢𑀲𑁆𑀲 𑀤𑀻𑀖𑀁 𑀳𑁄𑀢𑀺, 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀁 𑀯𑀺𑀬 𑀔𑀸𑀬𑀢𑀺. 𑀲𑀓𑀮𑀤𑀺𑀯𑀲𑀜𑁆𑀳𑀺 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑁄 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀼𑀭𑀢𑁄 𑀕𑀸𑀫𑁄 𑀓𑀻𑀯𑀤𑀽𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀧𑀭𑀫𑁆𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦𑀸𑀧𑀺 ‘‘𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀧𑀭𑀫𑁆𑀧𑀺 𑀧𑀼𑀘𑁆𑀙𑀢𑀺. 𑀲𑁄𑀧𑀺 ‘‘𑀬𑁄𑀚𑀦’’𑀦𑁆𑀢𑀺 𑀯𑀤𑀢𑀺. 𑀲𑁄 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀸 𑀬𑁄𑀚𑀦𑀦𑁆𑀢𑁂𑀯 𑀯𑀤𑀦𑁆𑀢𑀺, 𑀤𑀻𑀖𑀁 𑀯𑀢𑀺𑀤𑀁 𑀬𑁄𑀚𑀦𑀁, 𑀏𑀓𑀬𑁄𑀚𑀦𑀁 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀯𑀺𑀬 𑀫𑀜𑁆𑀜𑁂𑀢𑀺. 𑀩𑀸𑀮𑀸𑀦𑀦𑁆𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀁 𑀧𑀦 𑀅𑀚𑀸𑀦𑀦𑁆𑀢𑀸𑀦𑀁 𑀩𑀸𑀮𑀸𑀦𑀁 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀧𑀭𑀺𑀬𑀦𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀬𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑀁 𑀲𑀤𑁆𑀥𑀫𑁆𑀫𑀁 𑀜𑀢𑁆𑀯𑀸 𑀲𑀁𑀲𑀸𑀭𑀲𑁆𑀲 𑀅𑀦𑁆𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑀁 𑀲𑀁𑀲𑀸𑀭𑁄 𑀤𑀻𑀖𑁄 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀤𑀻𑀖𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁨𑁪). 𑀩𑀸𑀮𑀸𑀦𑀁 𑀧𑀦 𑀧𑀭𑀺𑀬𑀦𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀅𑀢𑀺𑀤𑀻𑀖𑁄𑀬𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀧𑀼𑀭𑀺𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀬𑁂𑀯 𑀢𑁂 𑀲𑀢𑁆𑀢𑁂 𑀩𑀦𑁆𑀥𑀦𑀸 𑀫𑁄𑀘𑁂𑀲𑀺. 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸 𑀩𑀦𑁆𑀥𑀦𑀸 𑀫𑀼𑀢𑁆𑀢𑀸 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀲𑀓𑀸𑀦𑀺 𑀕𑁂𑀳𑀸𑀦𑀺 𑀕𑀘𑁆𑀙𑀦𑁆𑀢𑀸 ‘‘𑀘𑀺𑀭𑀁 𑀚𑀻𑀯𑀢𑀼 𑀦𑁄, 𑀅𑀬𑁆𑀬𑀸, 𑀫𑀮𑁆𑀮𑀺𑀓𑀸 𑀤𑁂𑀯𑀻, 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀫𑁆𑀳𑀸’’𑀢𑀺 𑀫𑀮𑁆𑀮𑀺𑀓𑀸𑀬 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀧𑀡𑁆𑀟𑀺𑀢𑀸 𑀯𑀢𑀸𑀬𑀁, 𑀫𑀮𑁆𑀮𑀺𑀓𑀸, 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀅𑀤𑀸𑀲𑀻’’𑀢𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀺𑀓𑀸, 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀏𑀓𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀬 𑀤𑁂𑀯𑀢𑀸𑀬 𑀆𑀬𑀸𑀘𑀺 𑁋 ‘‘𑀲𑀸𑀫𑀺 𑀤𑁂𑀯𑀭𑀸𑀚, 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀭𑀸𑀚𑀸𑀦𑁄 𑀏𑀓𑀲𑀢𑀅𑀕𑁆𑀕𑀫𑀳𑁂𑀲𑀺𑀬𑁄, 𑀲𑀘𑀸𑀳𑀁 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀮𑀪𑀺𑀲𑁆𑀲𑀸𑀫𑀻, 𑀏𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀩𑀮𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀭𑀚𑁆𑀚𑀁 𑀧𑀢𑁆𑀯𑀸 ‘‘𑀤𑁂𑀯𑀢𑀸𑀬 𑀫𑁂 𑀆𑀦𑀼𑀪𑀸𑀯𑁂𑀦 𑀭𑀚𑁆𑀚𑀁 𑀧𑀢𑁆𑀢𑀁, 𑀩𑀮𑀺𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀅𑀕𑁆𑀕𑀫𑀳𑁂𑀲𑀻𑀳𑀺 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀉𑀕𑁆𑀕𑀲𑁂𑀦𑀲𑁆𑀲 𑀦𑀸𑀫 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀭𑀜𑁆𑀜𑁄 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀕𑀭𑀼𑀕𑀩𑁆𑀪𑀸, 𑀢𑀁 𑀑𑀳𑀸𑀬 𑀆𑀕𑀦𑁆𑀢𑁆𑀯𑀸 ‘‘𑀏𑀢𑁆𑀢𑀓𑀚𑀦𑀁 𑀯𑀺𑀲𑀧𑀸𑀦𑀓𑀁 𑀧𑀸𑀬𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀫𑀽𑀮𑀁 𑀲𑁄𑀥𑀸𑀧𑁂𑀲𑀺. 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀏𑀢𑁆𑀢𑀓𑁂 𑀭𑀸𑀚𑀸𑀦𑁄 𑀕𑀡𑁆𑀳𑀦𑁆𑀢𑁄 ‘𑀫𑀁 𑀦𑀺𑀲𑁆𑀲𑀸𑀬 𑀕𑀳𑀺𑀢𑀸 𑀇𑀫𑁂’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀫𑀬𑁆𑀳𑀁 𑀩𑀮𑀺𑀁 𑀓𑀸𑀢𑀼𑀓𑀸𑀫𑁄, 𑀲𑀘𑁂 𑀧𑀦𑀸𑀬𑀁 𑀏𑀢𑁂 𑀖𑀸𑀢𑁂𑀲𑁆𑀲𑀢𑀺, 𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀭𑀼𑀓𑁆𑀔𑀫𑀽𑀮𑁂𑀧𑀺, 𑀫𑁂 𑀅𑀲𑀼𑀘𑀺 𑀪𑀯𑀺𑀲𑁆𑀲𑀢𑀺, 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀏𑀢𑀁 𑀦𑀺𑀯𑀸𑀭𑁂𑀢𑀼’’𑀦𑁆𑀢𑀺. 𑀲𑀸 𑀉𑀧𑀥𑀸𑀭𑁂𑀦𑁆𑀢𑀻 ‘‘𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀜𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀤𑁂𑀯𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑁆𑀯𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀸𑀬𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀅𑀜𑁆𑀜𑀫𑁆𑀧𑀺 𑀅𑀜𑁆𑀜𑀫𑁆𑀧𑀻𑀢𑀺 𑀏𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀳𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀬𑀁 𑀦 𑀲𑀓𑁆𑀓𑁄𑀫, 𑀅𑀫𑁆𑀳𑀸𑀓𑀁 𑀧𑀦 𑀭𑀸𑀚𑀸 𑀅𑀫𑁆𑀳𑁂𑀳𑀺 𑀧𑀼𑀜𑁆𑀜𑁂𑀦 𑀘 𑀧𑀜𑁆𑀜𑀸𑀬 𑀘 𑀯𑀺𑀲𑀺𑀝𑁆𑀞𑁄, 𑀢𑀁 𑀧𑀼𑀘𑁆𑀙𑀸’’𑀢𑀺 𑀢𑁂𑀳𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀮𑁂 𑀲𑀓𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀤𑁂𑀯, 𑀢𑀼𑀫𑁆𑀳𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀦𑁆𑀦𑁂𑀲𑀼 𑀔𑀢𑁆𑀢𑀺𑀬𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀝𑀺𑀲𑀭𑀡𑀁 𑀳𑁄𑀣𑀸’’𑀢𑀺 𑀆𑀳. 𑀲𑀓𑁆𑀓𑁄 ‘‘𑀅𑀳𑀫𑁆𑀧𑀺 𑀦𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀉𑀧𑀸𑀬𑀁 𑀧𑀦 𑀢𑁂 𑀯𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺 𑁋 ‘‘𑀕𑀘𑁆𑀙, 𑀢𑁆𑀯𑀁 𑀭𑀜𑁆𑀜𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀓𑁆𑀔𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀳𑀺. 𑀅𑀣 𑀢𑀁 𑀭𑀸𑀚𑀸 ‘𑀤𑁂𑀯𑀢𑀸 𑀕𑀘𑁆𑀙𑀢𑀺, 𑀦𑀺𑀯𑀢𑁆𑀢𑀸𑀧𑁂𑀲𑁆𑀲𑀸𑀫𑀺 𑀦’𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀬𑀸𑀘𑀺𑀲𑁆𑀲𑀢𑀺. 𑀅𑀣 𑀦𑀁 𑀯𑀤𑁂𑀬𑁆𑀬𑀸𑀲𑀺 ‘𑀢𑁆𑀯𑀁 𑀏𑀓𑀲𑀢𑀭𑀸𑀚𑀸𑀦𑁄 𑀲𑀤𑁆𑀥𑀺𑀁 𑀅𑀕𑁆𑀕𑀫𑀳𑁂𑀲𑀻𑀳𑀺 𑀆𑀦𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀩𑀮𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀫𑀬𑁆𑀳𑀁 𑀆𑀬𑀸𑀘𑀺𑀢𑁆𑀯𑀸 𑀉𑀕𑁆𑀕𑀲𑁂𑀦𑀲𑁆𑀲 𑀭𑀜𑁆𑀜𑁄 𑀤𑁂𑀯𑀺𑀁 𑀑𑀳𑀸𑀬 𑀆𑀕𑀢𑁄, 𑀦𑀸𑀳𑀁 𑀢𑀸𑀤𑀺𑀲𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀲 𑀩𑀮𑀺𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺, ‘‘𑀏𑀯𑀁 𑀓𑀺𑀭 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀁 𑀆𑀡𑀸𑀧𑁂𑀲𑁆𑀲𑀢𑀺, 𑀲𑀸 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀢𑀻’’𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀓𑁆𑀓𑁄 𑀤𑁂𑀯𑀢𑀸𑀬 𑀇𑀫𑀁 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺. 𑀤𑁂𑀯𑀢𑀸 𑀢𑀣𑀸 𑀅𑀓𑀸𑀲𑀺.

𑀭𑀸𑀚𑀸𑀧𑀺 𑀢𑀁 𑀆𑀡𑀸𑀧𑁂𑀲𑀺. 𑀲𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀭𑀸𑀚𑀽𑀦𑀁 𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀫𑁆𑀧𑀺 𑀅𑀢𑁆𑀢𑀦𑁄 𑀭𑀸𑀚𑀸𑀦𑀫𑁂𑀯 𑀯𑀦𑁆𑀤𑀺. 𑀭𑀸𑀚𑀸 ‘‘𑀫𑀬𑀺 𑀲𑀩𑁆𑀩𑀭𑀸𑀚𑀚𑁂𑀝𑁆𑀞𑀓𑁂 𑀞𑀺𑀢𑁂 𑀲𑀩𑁆𑀩𑀓𑀦𑀺𑀝𑁆𑀞𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀯𑀦𑁆𑀤𑀢𑀻’’𑀢𑀺 𑀢𑀲𑁆𑀲𑀸 𑀓𑀼𑀚𑁆𑀛𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀓𑀺𑀁 𑀫𑀬𑁆𑀳𑀁 𑀢𑀬𑀺 𑀧𑀝𑀺𑀩𑀤𑁆𑀥𑀁, 𑀅𑀬𑀁 𑀧𑀦 𑀫𑁂 𑀲𑀸𑀫𑀺𑀓𑁄 𑀇𑀲𑁆𑀲𑀭𑀺𑀬𑀲𑁆𑀲 𑀤𑀸𑀬𑀓𑁄, 𑀇𑀫𑀁 𑀅𑀯𑀦𑁆𑀤𑀺𑀢𑁆𑀯𑀸 𑀓𑀲𑁆𑀫𑀸 𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺? 𑀭𑀼𑀓𑁆𑀔𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀦𑀸 𑀧𑀽𑀚𑁂𑀲𑀺. 𑀧𑀼𑀦 𑀭𑀸𑀚𑀸 𑀆𑀳 𑁋 ‘‘𑀲𑀘𑁂 𑀫𑀁 𑀦 𑀯𑀦𑁆𑀤𑀲𑀺, 𑀫𑀬𑁆𑀳𑀁 𑀭𑀚𑁆𑀚𑀲𑀺𑀭𑀺𑀤𑀸𑀬𑀺𑀓𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀤𑁂𑀯𑀢𑀁 𑀓𑀲𑁆𑀫𑀸 𑀦 𑀯𑀦𑁆𑀤𑀲𑀻’’𑀢𑀺? ‘‘𑀫𑀳𑀸𑀭𑀸𑀚, 𑀢𑀬𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂 𑀞𑀢𑁆𑀯𑀸 𑀭𑀸𑀚𑀸𑀦𑁄 𑀕𑀳𑀺𑀢𑀸, 𑀦 𑀤𑁂𑀯𑀢𑀸𑀬 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀧𑀽𑀚𑁂𑀲𑀺. 𑀧𑀼𑀦 𑀲𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀢𑁆𑀯𑀁 ‘𑀤𑁂𑀯𑀢𑀸𑀬 𑀫𑁂 𑀏𑀢𑁆𑀢𑀓𑀸 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀸’𑀢𑀺 𑀯𑀤𑁂𑀲𑀺, 𑀇𑀤𑀸𑀦𑀺 𑀢𑁂 𑀤𑁂𑀯𑀢𑀸𑀬 𑀉𑀧𑀭𑀺 𑀯𑀸𑀫𑀧𑀲𑁆𑀲𑁂 𑀭𑀼𑀓𑁆𑀔𑁄 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑀸 𑀢𑀁 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀓𑀲𑁆𑀫𑀸 𑀦𑀸𑀲𑀓𑁆𑀔𑀺, 𑀬𑀤𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀧𑀽𑀚𑁂𑀲𑀺.

𑀲𑀸 𑀓𑀣𑀬𑀫𑀸𑀦𑀸 𑀞𑀺𑀢𑀸 𑀭𑁄𑀤𑀺 𑀘𑁂𑀯 𑀳𑀲𑀺 𑀘. 𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀉𑀫𑁆𑀫𑀢𑁆𑀢𑀺𑀓𑀸𑀲𑀻’’𑀢𑀺 𑀆𑀳. ‘‘𑀓𑀲𑁆𑀫𑀸 𑀤𑁂𑀯 𑀏𑀯𑀁 𑀯𑀤𑁂𑀲𑀺’’? ‘‘𑀦 𑀫𑀸𑀤𑀺𑀲𑀺𑀬𑁄 𑀉𑀫𑁆𑀫𑀢𑁆𑀢𑀺𑀓𑀸 𑀳𑁄𑀦𑁆𑀢𑀻’’𑀢𑀺. 𑀅𑀣 ‘‘𑀦𑀁 𑀓𑀺𑀁 𑀓𑀸𑀭𑀡𑀸 𑀭𑁄𑀤𑀲𑀺 𑀘𑁂𑀯 𑀳𑀲𑀲𑀺 𑀘𑀸’’𑀢𑀺? ‘‘𑀲𑀼𑀡𑀸𑀳𑀺, 𑀫𑀳𑀸𑀭𑀸𑀚, 𑀅𑀳𑀜𑁆𑀳𑀺 𑀅𑀢𑀻𑀢𑁂 𑀓𑀼𑀮𑀥𑀻𑀢𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑁂 𑀯𑀲𑀦𑁆𑀢𑀻 𑀲𑀸𑀫𑀺𑀓𑀲𑁆𑀲 𑀲𑀳𑀸𑀬𑀓𑀁 𑀧𑀸𑀳𑀼𑀦𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀢𑁆𑀢𑀁 𑀧𑀘𑀺𑀢𑀼𑀓𑀸𑀫𑀸 ‘𑀫𑀁𑀲𑀁 𑀆𑀳𑀭𑀸’𑀢𑀺 𑀤𑀸𑀲𑀺𑀬𑀸 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀢𑀸𑀬 𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 𑀆𑀕𑀢𑀸𑀬 ‘𑀦𑀢𑁆𑀣𑀺 𑀫𑀁𑀲’𑀦𑁆𑀢𑀺 𑀯𑀼𑀢𑁆𑀢𑁂 𑀕𑁂𑀳𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑁂 𑀲𑀬𑀺𑀢𑀸𑀬 𑀏𑀴𑀺𑀓𑀸𑀬 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀲𑀺𑀁. 𑀲𑀸𑀳𑀁 𑀏𑀓𑀺𑀲𑁆𑀲𑀸𑀬 𑀏𑀴𑀺𑀓𑀸𑀬 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀢𑀲𑁆𑀲𑀸 𑀮𑁄𑀫𑀕𑀡𑀦𑀸𑀬 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀺𑀁, ‘𑀢𑁆𑀯𑀁 𑀏𑀢𑁆𑀢𑀓𑀁 𑀚𑀦𑀁 𑀯𑀥𑀺𑀢𑁆𑀯𑀸 𑀓𑀤𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀲𑀻’𑀢𑀺 𑀏𑀯𑀫𑀳𑀁 𑀢𑀯 𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀭𑁄𑀤𑀺’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀓𑀺𑀲𑁆𑀲𑀸 𑀓𑀡𑁆𑀞𑀁 𑀙𑁂𑀢𑁆𑀯𑀸𑀦, 𑀮𑁄𑀫𑀕𑀡𑀦𑀸𑀬 𑀧𑀘𑁆𑀘𑀺𑀲𑀁;

𑀩𑀳𑀽𑀦𑀁 𑀓𑀡𑁆𑀞𑁂 𑀙𑁂𑀢𑁆𑀯𑀸𑀦, 𑀓𑀣𑀁 𑀓𑀸𑀳𑀲𑀺 𑀔𑀢𑁆𑀢𑀺𑀬𑀸’’𑀢𑀺.

𑀅𑀣 ‘‘𑀓𑀲𑁆𑀫𑀸 𑀢𑁆𑀯𑀁 𑀳𑀲𑀲𑀻’’𑀢𑀺? ‘‘‘𑀏𑀢𑀲𑁆𑀫𑀸 𑀤𑀼𑀓𑁆𑀔𑀸 𑀫𑀼𑀢𑁆𑀢𑀸𑀫𑁆𑀳𑀻’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸, 𑀫𑀳𑀸𑀭𑀸𑀚𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀧𑀼𑀧𑁆𑀨𑀫𑀼𑀝𑁆𑀞𑀺𑀦𑀸 𑀧𑀽𑀚𑁂𑀲𑀺. 𑀭𑀸𑀚𑀸 ‘‘𑀅𑀳𑁄 𑀫𑁂 𑀪𑀸𑀭𑀺𑀬𑀁 𑀓𑀢𑀁 𑀓𑀫𑁆𑀫𑀁, 𑀅𑀬𑀁 𑀓𑀺𑀭 𑀏𑀓𑀁 𑀏𑀴𑀺𑀓𑀁 𑀯𑀥𑀺𑀢𑁆𑀯𑀸 𑀦𑀺𑀭𑀬𑁂 𑀧𑀓𑁆𑀓𑀸𑀯𑀲𑁂𑀲𑁂𑀦 𑀢𑀲𑁆𑀲𑀸 𑀮𑁄𑀫𑀕𑀡𑀦𑀸𑀬 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀺, 𑀅𑀳𑀁 𑀏𑀢𑁆𑀢𑀓𑀁 𑀚𑀦𑀁 𑀯𑀥𑀺𑀢𑁆𑀯𑀸 𑀓𑀤𑀸 𑀲𑁄𑀢𑁆𑀣𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀳𑀮𑁆𑀮𑀓𑀢𑀭𑁂 𑀯𑀦𑁆𑀤𑀺𑀢𑁆𑀯𑀸 𑀤𑀳𑀭𑀤𑀳𑀭𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀩𑁆𑀩𑁂 𑀔𑀫𑀸𑀧𑁂𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀫𑁂𑀯 𑀧𑀳𑀺𑀡𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀦 𑀇𑀤𑀸𑀦𑁂𑀯, 𑀫𑀮𑁆𑀮𑀺𑀓𑀸 𑀤𑁂𑀯𑀻, 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀳𑁄𑀲𑀺, 𑀥𑀫𑁆𑀫𑀤𑀺𑀦𑁆𑀦𑀸, 𑀤𑁂𑀯𑀻 𑀫𑀮𑁆𑀮𑀺𑀓𑀸, 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑀫𑁂𑀯𑀸’’𑀢𑀺. 𑀏𑀯𑀁 𑀅𑀢𑀻𑀢𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, ‘‘𑀪𑀺𑀓𑁆𑀔𑀯𑁂, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫 𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑁄. 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀳𑀺 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

‘‘𑀇𑀥 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺,

𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀲𑁄𑀘𑀢𑀺;

𑀲𑁄 𑀲𑁄𑀘𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺,

𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀫𑀢𑁆𑀢𑀦𑁄’’𑀢𑀺. (𑀥. 𑀧. 𑁧𑁫);

‘‘𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄;

𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻’’𑀢𑀺. (𑀚𑀸. 𑁧.𑁧.𑁧𑁮);

𑀅𑀜𑁆𑀜𑀢𑀭𑀧𑀼𑀭𑀺𑀲𑀯𑀢𑁆𑀣𑀼 𑀧𑀞𑀫𑀁.