𑁫. 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀯𑀢𑁆𑀣𑀼

𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁.

𑀭𑀸𑀚𑀕𑀳𑀦𑀕𑀭𑀲𑁆𑀲 𑀓𑀺𑀭 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀁 𑀦𑀸𑀫 𑀦𑀺𑀕𑀫𑁄 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀧𑀝𑀺𑀯𑀲𑀢𑀺. 𑀲𑁄 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀧𑀭𑁂𑀲𑀁 𑀦 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀢𑀺𑀲𑁆𑀲 𑀢𑀁 𑀯𑀺𑀪𑀯𑀚𑀸𑀢𑀁 𑀦𑁂𑀯 𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺, 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀸 𑀧𑁄𑀓𑁆𑀔𑀭𑀡𑀻 𑀯𑀺𑀬 𑀅𑀧𑀭𑀺𑀪𑁄𑀕𑀁 𑀢𑀺𑀝𑁆𑀞𑀢𑀺. 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀓𑀮𑀮𑁄𑀓𑀥𑀸𑀢𑀼𑀬𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀯𑀲𑀦𑁆𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀲𑀧𑀚𑀸𑀧𑀢𑀺𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀢𑀢𑁄 𑀧𑀼𑀭𑀺𑀫𑀤𑀺𑀯𑀲𑁂 𑀧𑀦 𑀲𑁄 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 𑀭𑀸𑀚𑀽𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀙𑀸𑀢𑀚𑁆𑀛𑀢𑁆𑀢𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀓𑀼𑀫𑁆𑀫𑀸𑀲𑀧𑀽𑀭𑀁 𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀺𑀧𑀸𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻𑀢𑀺 𑀯𑀓𑁆𑀔𑀸𑀫𑀺, 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀬𑀸 𑀲𑀤𑁆𑀥𑀺𑀁 𑀔𑀸𑀤𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀩𑀳𑀽𑀦𑀺 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀦 𑀓𑀲𑁆𑀲𑀘𑀺 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀘𑀭𑀢𑀺. 𑀲𑁄 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀚𑀸𑀢𑁄. 𑀢𑀢𑁄 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀏𑀯𑀁 𑀕𑀢𑁄𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀓𑀣𑁂𑀲𑀺.

𑀅𑀣 𑀦𑀁 𑀪𑀭𑀺𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, ‘‘𑀓𑀺𑀁 𑀢𑁂, 𑀲𑀸𑀫𑀺, 𑀅𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀫𑁂 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀢𑁂 𑀭𑀸𑀚𑀸 𑀓𑀼𑀧𑀺𑀢𑁄’’𑀢𑀺? ‘‘𑀭𑀸𑀚𑀸𑀧𑀺 𑀫𑁂 𑀦 𑀓𑀼𑀧𑁆𑀧𑀢𑀻’’𑀢𑀺. ‘‘𑀅𑀣 𑀓𑀺𑀁 𑀢𑁂 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀳𑀺 𑀯𑀸 𑀓𑀺𑀜𑁆𑀘𑀺 𑀅𑀫𑀦𑀸𑀧𑀁 𑀓𑀢𑀁 𑀅𑀢𑁆𑀣𑀻’’𑀢𑀺? ‘‘𑀏𑀯𑀭𑀽𑀧𑀫𑁆𑀧𑀺 𑀦𑀢𑁆𑀣𑀻’’𑀢𑀺. ‘‘𑀓𑀺𑀲𑁆𑀫𑀺𑀜𑁆𑀘𑀺 𑀧𑀦 𑀢𑁂 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄𑀯 𑀦𑀺𑀧𑀚𑁆𑀚𑀺, 𑀅𑀣 𑀦𑀁 𑀪𑀭𑀺𑀬𑀸 ‘‘𑀓𑀣𑁂𑀳𑀺, 𑀲𑀸𑀫𑀺 𑀓𑀺𑀲𑁆𑀫𑀺𑀜𑁆𑀘𑀺 𑀢𑁂 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺 𑀆𑀳. 𑀲𑁄 𑀯𑀘𑀦𑀁 𑀧𑀭𑀺𑀕𑀺𑀮𑀦𑁆𑀢𑁄 𑀯𑀺𑀬 ‘‘𑀅𑀢𑁆𑀣𑀺 𑀫𑁂 𑀢𑀡𑁆𑀳𑀸’’𑀢𑀺 𑀆𑀳. ‘‘𑀓𑀺𑀁 𑀢𑀡𑁆𑀳𑀸, 𑀲𑀸𑀫𑀻’’𑀢𑀺? ‘‘𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺. ‘‘𑀅𑀣 𑀓𑀺𑀫𑀢𑁆𑀣𑀁 𑀫𑁂 𑀦 𑀓𑀣𑁂𑀲𑀺, 𑀓𑀺𑀁 𑀢𑁆𑀯𑀁 𑀤𑀮𑀺𑀤𑁆𑀤𑁄𑀲𑀺, 𑀇𑀤𑀸𑀦𑀺 𑀲𑀓𑀮𑀦𑀺𑀕𑀫𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀓𑀧𑀮𑁆𑀮𑀓𑀧𑀽𑀯𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀺, 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀭𑀘𑁆𑀙𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀤𑁆𑀥𑀦𑀪𑀸𑀯’’𑀦𑁆𑀢𑀺. ‘‘𑀇𑀫𑀲𑁆𑀫𑀺𑀁 𑀕𑁂𑀳𑀲𑀸𑀫𑀦𑁆𑀢𑁂 𑀲𑀩𑁆𑀩𑁂𑀲𑀁 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀚𑁆𑀛𑀸𑀲𑀬𑀪𑀸𑀯’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁂 𑀧𑀼𑀢𑁆𑀢𑀤𑀸𑀭𑀫𑀢𑁆𑀢𑀲𑁆𑀲𑁂𑀯 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀻’’𑀢𑀺? ‘‘𑀓𑀺𑀁 𑀧𑀦 𑀢𑀼𑀬𑁆𑀳𑀜𑁆𑀘 𑀫𑀬𑁆𑀳𑀜𑁆𑀘 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺? ‘‘𑀢𑁆𑀯𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀓𑀲𑁆𑀲𑁂𑀯 𑀢𑁂 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀘𑀫𑀸𑀦𑁂 𑀩𑀳𑀽 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀲𑀓𑀮𑀢𑀡𑁆𑀟𑀼𑀮𑁂 𑀞𑀧𑁂𑀢𑁆𑀯𑀸 𑀪𑀺𑀦𑁆𑀦𑀢𑀡𑁆𑀟𑀼𑀮𑁂 𑀘 𑀉𑀤𑁆𑀥𑀦𑀓𑀧𑀮𑁆𑀮𑀸𑀦𑀺 𑀘 𑀆𑀤𑀸𑀬 𑀣𑁄𑀓𑀁 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀜𑁆𑀘 𑀕𑀳𑁂𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑀁 𑀆𑀭𑀼𑀬𑁆𑀳 𑀧𑀘, 𑀢𑀢𑁆𑀣𑀸𑀳𑀁 𑀏𑀓𑀓𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀤𑀸𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀦𑁆𑀢𑁄 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸 𑀲𑀢𑁆𑀢𑀫𑀢𑀮𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣𑀧𑀺 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀉𑀤𑁆𑀥𑀦𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀓𑀧𑀮𑁆𑀮𑀁 𑀆𑀭𑁄𑀧𑁂𑀢𑁆𑀯𑀸 𑀧𑀽𑀯𑁂 𑀧𑀘𑀺𑀢𑀼𑀁 𑀆𑀭𑀪𑀺.

𑀅𑀣 𑀲𑀢𑁆𑀣𑀸 𑀧𑀸𑀢𑁄𑀯 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀦𑀺𑀕𑀫𑁂 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 ‘𑀓𑀧𑀮𑁆𑀮𑀓𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀪𑀬𑁂𑀦 𑀲𑀢𑁆𑀢𑀪𑀽𑀫𑀺𑀓𑁂 𑀧𑀸𑀲𑀸𑀤𑁂 𑀓𑀧𑀮𑁆𑀮𑀓𑀧𑀽𑀯𑁂 𑀧𑀘𑀸𑀧𑁂𑀢𑀺, 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀚𑀸𑀬𑀫𑁆𑀧𑀢𑀺𑀓𑁂 𑀧𑀽𑀯𑁂 𑀘 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀚𑁂𑀢𑀯𑀦𑀁 𑀆𑀦𑁂𑀳𑀺, 𑀅𑀚𑁆𑀚𑀸𑀳𑀁 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀏𑀯 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀧𑀽𑀯𑁂𑀳𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀤𑁂𑀯 𑀇𑀤𑁆𑀥𑀺𑀩𑀮𑁂𑀦 𑀢𑀁 𑀦𑀺𑀕𑀫𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀻𑀳𑀧𑀜𑁆𑀚𑀭𑀤𑁆𑀯𑀸𑀭𑁂 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀆𑀓𑀸𑀲𑁂 𑀏𑀯 𑀫𑀡𑀺𑀭𑀽𑀧𑀓𑀁 𑀯𑀺𑀬 𑀅𑀝𑁆𑀞𑀸𑀲𑀺. 𑀫𑀳𑀸𑀲𑁂𑀝𑁆𑀞𑀺𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀳𑀤𑀬𑀫𑀁𑀲𑀁 𑀓𑀫𑁆𑀧𑀺. 𑀲𑁄 𑀅𑀳𑀁 𑀏𑀯𑀭𑀽𑀧𑀸𑀦𑀁𑀬𑁂𑀯 𑀤𑀲𑁆𑀲𑀦𑀪𑀬𑁂𑀦 𑀇𑀫𑀁 𑀞𑀸𑀦𑀫𑀸𑀕𑀢𑁄, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀤𑁆𑀯𑀸𑀭𑁂 𑀞𑀺𑀢𑁄𑀢𑀺. 𑀲𑁄 𑀕𑀳𑁂𑀢𑀩𑁆𑀩𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀤𑁄𑀲𑁂𑀦 𑀢𑀝𑀢𑀝𑀸𑀬𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀲𑀫𑀡, 𑀆𑀓𑀸𑀲𑁂 𑀞𑀢𑁆𑀯𑀸𑀧𑀺 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄𑀧𑀺 𑀦𑁂𑀯 𑀮𑀪𑀺𑀲𑁆𑀲𑀲𑀻’’𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀏𑀯 𑀞𑀸𑀦𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺. 𑀲𑁂𑀝𑁆𑀞𑀺 ‘‘𑀘𑀗𑁆𑀓𑀫𑀦𑁆𑀢𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺𑀬𑁂𑀯𑀸’’𑀢𑀺 𑀆𑀳. 𑀣𑁂𑀭𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 ‘‘𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀲𑁆𑀲 𑀉𑀫𑁆𑀫𑀸𑀭𑁂 𑀞𑀺𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀣𑁂𑀭𑁄 𑀉𑀫𑁆𑀫𑀸𑀭𑁂 𑀞𑀺𑀢𑁄. ‘‘𑀉𑀫𑁆𑀫𑀸𑀭𑁂 𑀞𑀺𑀢𑁄𑀧𑀺 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀥𑀽𑀫𑀸𑀬𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺 𑀏𑀯𑀸’’𑀢𑀺 𑀆𑀳. 𑀣𑁂𑀭𑁄𑀧𑀺 𑀥𑀽𑀫𑀸𑀬𑀺. 𑀲𑀓𑀮𑀧𑀸𑀲𑀸𑀤𑁄 𑀏𑀓𑀥𑀽𑀫𑁄 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀦𑁄 𑀅𑀓𑁆𑀔𑀻𑀦𑀁 𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺, 𑀕𑁂𑀳𑀚𑁆𑀛𑀸𑀬𑀦𑀪𑀬𑁂𑀦 𑀧𑀦 ‘‘𑀢𑁆𑀯𑀁 𑀧𑀚𑁆𑀚𑀮𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀅𑀯𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀲𑀼𑀝𑁆𑀞𑀼 𑀮𑀕𑁆𑀕𑁄, 𑀅𑀮𑀤𑁆𑀥𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀓𑀫𑀲𑁆𑀲 𑀧𑀽𑀯𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂 𑀏𑀓𑀁 𑀔𑀼𑀤𑁆𑀤𑀓𑀧𑀽𑀯𑀁 𑀧𑀘𑀺𑀢𑁆𑀯𑀸 𑀲𑀫𑀡𑀲𑁆𑀲 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀳𑀺 𑀦’’𑀦𑁆𑀢𑀺. 𑀲𑀸 𑀣𑁄𑀓𑀁 𑀏𑀯 𑀧𑀺𑀝𑁆𑀞𑀁 𑀓𑀧𑀮𑁆𑀮𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺, 𑀫𑀳𑀸𑀧𑀽𑀯𑁄 𑀳𑀼𑀢𑁆𑀯𑀸 𑀲𑀓𑀮𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀩𑀳𑀼𑀁 𑀢𑀬𑀸 𑀧𑀺𑀝𑁆𑀞𑀁 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀤𑀩𑁆𑀩𑀺𑀓𑀡𑁆𑀡𑁂𑀦 𑀣𑁄𑀓𑀁 𑀧𑀺𑀝𑁆𑀞𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺, 𑀧𑀽𑀯𑁄 𑀧𑀼𑀭𑀺𑀫𑀧𑀽𑀯𑀢𑁄 𑀫𑀳𑀦𑁆𑀢𑀢𑀭𑁄 𑀚𑀸𑀢𑁄. 𑀏𑀯𑀁 𑀬𑀁 𑀬𑀁 𑀧𑀘𑀢𑀺, 𑀲𑁄 𑀲𑁄 𑀫𑀳𑀦𑁆𑀢𑀫𑀳𑀦𑁆𑀢𑁄𑀯 𑀳𑁄𑀢𑀺. 𑀲𑁄 𑀦𑀺𑀩𑁆𑀩𑀺𑀦𑁆𑀦𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀲𑁆𑀲 𑀏𑀓𑀁 𑀧𑀽𑀯𑀁 𑀤𑁂𑀳𑀻’’𑀢𑀺. 𑀢𑀲𑁆𑀲𑀸 𑀧𑀘𑁆𑀙𑀺𑀢𑁄 𑀏𑀓𑀁 𑀧𑀽𑀯𑀁 𑀕𑀡𑁆𑀳𑀦𑁆𑀢𑀺𑀬𑀸 𑀲𑀩𑁆𑀩𑁂 𑀏𑀓𑀸𑀩𑀤𑁆𑀥𑀸 𑀅𑀮𑁆𑀮𑀻𑀬𑀺𑀁𑀲𑀼. 𑀲𑀸 𑀲𑁂𑀝𑁆𑀞𑀺𑀁 𑀆𑀳 𑁋 ‘‘𑀲𑀸𑀫𑀺, 𑀲𑀩𑁆𑀩𑁂 𑀧𑀽𑀯𑀸 𑀏𑀓𑀢𑁄 𑀮𑀕𑁆𑀕𑀸, 𑀯𑀺𑀲𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀅𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀧𑀺 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀉𑀪𑁄𑀧𑀺 𑀚𑀦𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸𑀧𑀺 𑀯𑀺𑀬𑁄𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼 𑀏𑀯. 𑀅𑀣𑀲𑁆𑀲 𑀧𑀽𑀯𑁂𑀳𑀺 𑀲𑀤𑁆𑀥𑀺𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀧𑀺𑀧𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀺. 𑀢𑀢𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀦 𑀫𑁂 𑀧𑀽𑀯𑁂𑀳𑀺 𑀅𑀢𑁆𑀣𑁄, 𑀧𑀘𑁆𑀙𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀇𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑀸 𑀧𑀘𑁆𑀙𑀺𑀁 𑀆𑀤𑀸𑀬 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀉𑀪𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀓𑀣𑁂𑀲𑀺, ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 𑀤𑀺𑀦𑁆𑀦𑀤𑀸𑀦𑀸𑀤𑀻𑀦𑀁 𑀨𑀮𑀁 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀤𑀲𑁆𑀲𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺 ‘‘𑀪𑀦𑁆𑀢𑁂, 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄, ‘‘𑀫𑀳𑀸𑀲𑁂𑀝𑁆𑀞𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀅𑀳𑀁 𑀯𑁄 𑀦𑁂𑀲𑁆𑀲𑀸𑀫𑀺, 𑀲𑁂𑀝𑁆𑀞𑀺𑀪𑀭𑀺𑀬𑀁 𑀧𑀽𑀯𑁂 𑀘 𑀔𑀻𑀭𑀸𑀤𑀻𑀦𑀺 𑀘 𑀕𑀡𑁆𑀳𑀸𑀧𑁂𑀣, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀓𑀳𑀁 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺? ‘‘𑀇𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀚𑁂𑀢𑀯𑀦𑀯𑀺𑀳𑀸𑀭𑁂, 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀪𑀦𑁆𑀢𑁂, 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀫𑀳𑀸𑀲𑁂𑀝𑁆𑀞𑀺, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀅𑀳𑀁 𑀯𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀸𑀲𑀸𑀤𑁂 𑀲𑁄𑀧𑀸𑀦𑀲𑀻𑀲𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀏𑀯 𑀪𑀯𑀺𑀲𑁆𑀲𑀢𑀺, 𑀲𑁄𑀧𑀸𑀦𑀧𑀭𑀺𑀬𑁄𑀲𑀸𑀦𑀁 𑀧𑀦 𑀯𑁄 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀪𑀯𑀺𑀲𑁆𑀲𑀢𑀺, 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀭𑀡𑀓𑀸𑀮𑀫𑀢𑁆𑀢𑁂𑀦𑁂𑀯 𑀚𑁂𑀢𑀯𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀣𑁂𑀭𑁄 𑀲𑁄𑀧𑀸𑀦𑀲𑀻𑀲𑀁 𑀢𑀢𑁆𑀣𑁂𑀯 𑀓𑀢𑁆𑀯𑀸 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑀁 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀣𑁂𑀯 𑀅𑀳𑁄𑀲𑀺. 𑀇𑀢𑀺 𑀣𑁂𑀭𑁄 𑀲𑁂𑀝𑁆𑀞𑀺𑀜𑁆𑀘 𑀲𑁂𑀝𑁆𑀞𑀺𑀪𑀭𑀺𑀬𑀜𑁆𑀘 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀭𑀡𑀓𑀸𑀮𑀢𑁄 𑀔𑀺𑀧𑁆𑀧𑀢𑀭𑀁 𑀚𑁂𑀢𑀯𑀦𑀁 𑀲𑀫𑁆𑀧𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀪𑀢𑁆𑀢𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀫𑀳𑀸𑀲𑁂𑀝𑁆𑀞𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀅𑀤𑀸𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀽𑀯𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀧𑀺 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺𑀁𑀲𑀼. 𑀲𑁂𑀝𑁆𑀞𑀺 𑀔𑀻𑀭𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀤𑀻𑀦𑀺 𑀤𑀤𑀫𑀸𑀦𑁄 𑀦 𑀔𑀬𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀫𑀳𑀸𑀲𑁂𑀝𑁆𑀞𑀺𑀧𑀺 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺. 𑀧𑀽𑀯𑀸𑀦𑀁 𑀧𑀭𑀺𑀬𑁄𑀲𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑀢𑀺. 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀜𑁆𑀘 𑀯𑀺𑀖𑀸𑀲𑀸𑀤𑀸𑀦𑀜𑁆𑀘 𑀤𑀺𑀦𑁆𑀦𑁂𑀲𑀼𑀧𑀺 𑀧𑀭𑀺𑀬𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑁂𑀯. ‘‘𑀪𑀦𑁆𑀢𑁂, 𑀧𑀽𑀯𑀸 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀦𑁆𑀢𑀻’’𑀢𑀺 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀙𑀟𑁆𑀟𑁂𑀣𑀸’’𑀢𑀺. 𑀅𑀣 𑀦𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀬𑀺𑀁𑀲𑀼. 𑀬𑀸𑀯𑀚𑁆𑀚𑀢𑀦𑀸𑀧𑀺 𑀢𑀁 𑀞𑀸𑀦𑀁 𑀓𑀧𑀮𑁆𑀮𑀓𑀧𑀽𑀯𑀧𑀩𑁆𑀪𑀸𑀭𑀦𑁆𑀢𑁂𑀯 𑀧𑀜𑁆𑀜𑀸𑀬𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀲𑀳 𑀪𑀭𑀺𑀬𑀸𑀬 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀲𑁄𑀧𑀸𑀦𑀁 𑀆𑀭𑀼𑀬𑁆𑀳 𑀅𑀢𑁆𑀢𑀦𑁄 𑀧𑀸𑀲𑀸𑀤𑁂𑀬𑁂𑀯 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀯𑀺𑀓𑁆𑀓𑀺𑀭𑀺. 𑀧𑀼𑀦𑀤𑀺𑀯𑀲𑁂 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀁, 𑀅𑀦𑀼𑀧𑀳𑀘𑁆𑀘 𑀦𑀸𑀫 𑀲𑀤𑁆𑀥𑀁, 𑀅𑀦𑀼𑀧𑀳𑀘𑁆𑀘 𑀪𑁄𑀕𑁂 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺𑀁 𑀫𑀼𑀳𑀼𑀢𑁆𑀢𑁂𑀦𑁂𑀯 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀽𑀯𑁂 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀆𑀦𑁂𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀅𑀳𑁄 𑀫𑀳𑀸𑀦𑀼𑀪𑀸𑀯𑁄 𑀣𑁂𑀭𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀓𑀣𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀓𑀼𑀮𑀤𑀫𑀓𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀅𑀦𑀼𑀧𑀳𑀘𑁆𑀘 𑀲𑀤𑁆𑀥𑀁, 𑀅𑀦𑀼𑀧𑀳𑀘𑁆𑀘 𑀪𑁄𑀕𑁂, 𑀓𑀼𑀮𑀁 𑀅𑀓𑀺𑀮𑀫𑁂𑀢𑁆𑀯𑀸 𑀅𑀯𑀺𑀳𑁂𑀞𑁂𑀢𑁆𑀯𑀸 𑀧𑀼𑀧𑁆𑀨𑀢𑁄 𑀭𑁂𑀡𑀼𑀁 𑀕𑀡𑁆𑀳𑀦𑁆𑀢𑁂𑀦 𑀪𑀫𑀭𑁂𑀦 𑀯𑀺𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀁 𑀚𑀸𑀦𑀸𑀧𑁂𑀢𑀩𑁆𑀩𑀁, 𑀢𑀸𑀤𑀺𑀲𑁄 𑀫𑀫 𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀣𑁂𑀭𑀁 𑀧𑀲𑀁𑀲𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁯. ‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀁, 𑀯𑀡𑁆𑀡𑀕𑀦𑁆𑀥𑀫𑀳𑁂𑀞𑀬𑀁;

𑀧𑀮𑁂𑀢𑀺 𑀭𑀲𑀫𑀸𑀤𑀸𑀬, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂’’𑀢𑀺.

𑀢𑀢𑁆𑀣 𑀪𑀫𑀭𑁄𑀢𑀺 𑀬𑀸 𑀓𑀸𑀘𑀺 𑀫𑀥𑀼𑀓𑀭𑀚𑀸𑀢𑀺. 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑁂 𑀘𑀭𑀦𑁆𑀢𑁄 𑀧𑀼𑀧𑁆𑀨𑀜𑁆𑀘 𑀯𑀡𑁆𑀡𑀜𑁆𑀘 𑀕𑀦𑁆𑀥𑀜𑁆𑀘 𑀅𑀳𑁂𑀞𑀬𑀦𑁆𑀢𑁄 𑀅𑀯𑀺𑀦𑀸𑀲𑁂𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀧𑀮𑁂𑀢𑀻𑀢𑀺 𑀏𑀯𑀁 𑀘𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀅𑀧𑀭𑀫𑁆𑀧𑀺 𑀫𑀥𑀼𑀓𑀭𑀡𑀢𑁆𑀣𑀸𑀬 𑀆𑀤𑀸𑀬 𑀧𑀮𑁂𑀢𑀺, 𑀲𑁄 𑀏𑀯𑀁 𑀯𑀦𑀕𑀳𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀲𑀼𑀲𑀺𑀭𑁂 𑀢𑀁 𑀭𑀚𑀫𑀺𑀲𑁆𑀲𑀓𑀁 𑀭𑀲𑀁 𑀞𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀥𑀼𑀭𑀭𑀲𑀁 𑀫𑀥𑀼𑀁 𑀓𑀭𑁄𑀢𑀺, 𑀦 𑀢𑀲𑁆𑀲 𑀧𑀼𑀧𑁆𑀨𑀸𑀭𑀸𑀫𑁂 𑀯𑀺𑀘𑀭𑀺𑀢𑀧𑀘𑁆𑀘𑀬𑀸 𑀧𑀼𑀧𑁆𑀨𑀁 𑀯𑀸 𑀯𑀡𑁆𑀡𑀕𑀦𑁆𑀥𑀁 𑀯𑀸𑀲𑁆𑀲 𑀯𑀺𑀕𑀘𑁆𑀙𑀢𑀺, 𑀅𑀣 𑀔𑁄 𑀲𑀩𑁆𑀩𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂𑀢𑀺 𑀏𑀯𑀁 𑀲𑁂𑀔𑀸𑀲𑁂𑀔𑀪𑁂𑀤𑁄 𑀅𑀦𑀸𑀕𑀸𑀭𑀺𑀬𑀫𑀼𑀦𑀺 𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀕𑀸𑀫𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀲𑁆𑀲 𑀕𑀸𑀫𑁂 𑀘𑀭𑀡𑀧𑀘𑁆𑀘𑀬𑀸 𑀓𑀼𑀮𑀸𑀦𑀁 𑀲𑀤𑁆𑀥𑀸𑀳𑀸𑀦𑀺 𑀯𑀸 𑀪𑁄𑀕𑀳𑀸𑀦𑀺 𑀯𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀸𑀧𑀺 𑀪𑁄𑀕𑀸𑀧𑀺 𑀧𑀸𑀓𑀢𑀺𑀓𑀸𑀯 𑀳𑁄𑀦𑁆𑀢𑀺. 𑀏𑀯𑀁 𑀘𑀭𑀺𑀢𑁆𑀯𑀸 𑀘 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁂𑀔𑀫𑀼𑀦𑀺 𑀢𑀸𑀯 𑀩𑀳𑀺𑀕𑀸𑀫𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀓𑁆𑀔𑀪𑀜𑁆𑀚𑀦𑀯𑀡𑀧𑀝𑀺𑀘𑁆𑀙𑀸𑀤𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀤𑀺𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀭𑀽𑀧𑀁 𑀯𑀦𑀲𑀡𑁆𑀟𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀳𑀢𑁆𑀣𑀕𑀢𑀸𑀦𑁂𑀯 𑀓𑀭𑁄𑀢𑀺. 𑀅𑀲𑁂𑀔𑀫𑀼𑀦𑀺 𑀧𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀜𑁆𑀚𑀢𑀺. 𑀅𑀬𑀫𑀲𑁆𑀲 𑀪𑀫𑀭𑁂𑀦 𑀲𑀤𑁆𑀥𑀺𑀁 𑀫𑀥𑀼𑀓𑀭𑀡𑀲𑀭𑀺𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀔𑀻𑀡𑀸𑀲𑀯𑁄𑀯 𑀅𑀥𑀺𑀧𑁆𑀧𑁂𑀢𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀢𑀼𑀁 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 𑀤𑀫𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀦𑀁 𑀤𑀫𑁂𑀢𑁆𑀯𑀸 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁 𑀚𑀸𑀦𑀸𑀧𑁂𑀲𑀺 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀉𑀪𑁄 𑀔𑀜𑁆𑀚𑀸 𑀉𑀪𑁄 𑀓𑀼𑀡𑀻, 𑀉𑀪𑁄 𑀯𑀺𑀲𑀫𑀘𑀓𑁆𑀔𑀼𑀓𑀸;

𑀉𑀪𑀺𑀦𑁆𑀦𑀁 𑀧𑀺𑀴𑀓𑀸 𑀚𑀸𑀢𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀇𑀮𑁆𑀮𑀺𑀲’’𑀦𑁆𑀢𑀺. (𑀚𑀸. 𑁧.𑁧.𑁭𑁮) 𑁋

𑀇𑀫𑀁 𑀇𑀮𑁆𑀮𑀺𑀲𑀚𑀸𑀢𑀓𑀁 𑀓𑀣𑁂𑀲𑀻𑀢𑀺.

𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀯𑀢𑁆𑀣𑀼 𑀧𑀜𑁆𑀘𑀫𑀁.