𑁩. 𑀘𑀺𑀢𑁆𑀢𑀯𑀕𑁆𑀕𑁄

𑁧. 𑀫𑁂𑀖𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑀨𑀦𑁆𑀤𑀦𑀁 𑀘𑀧𑀮𑀁 𑀘𑀺𑀢𑁆𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀘𑀸𑀮𑀺𑀓𑀸𑀬 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑁂𑀖𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀯𑀢𑁆𑀣𑀼𑀁 𑀯𑀺𑀪𑀸𑀯𑀦𑀢𑁆𑀣𑀁 𑀲𑀩𑁆𑀩𑀁 𑀫𑁂𑀖𑀺𑀬𑀲𑀼𑀢𑁆𑀢𑀦𑁆𑀢𑀁 (𑀉𑀤𑀸. 𑁩𑁧) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑀢𑁆𑀣𑀸 𑀧𑀦 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑀢𑀸𑀬 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀧𑀥𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀆𑀕𑀢𑀁 𑀫𑁂𑀖𑀺𑀬𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀅𑀢𑀺𑀪𑀸𑀭𑀺𑀬𑀁 𑀢𑁂, 𑀫𑁂𑀖𑀺𑀬, 𑀓𑀢𑀁 ‘𑀆𑀕𑀫𑁂𑀳𑀺 𑀢𑀸𑀯, 𑀫𑁂𑀖𑀺𑀬, 𑀏𑀓𑀓𑁄𑀫𑁆𑀳𑀺 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻’𑀢𑀺 𑀫𑀁 𑀬𑀸𑀘𑀦𑁆𑀢𑀁 𑀏𑀓𑀓𑀁 𑀧𑀳𑀸𑀬 𑀕𑀘𑁆𑀙𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀁 𑀘𑀺𑀢𑁆𑀢𑀯𑀲𑀺𑀓𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀮𑀳𑀼𑀓𑀁, 𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩. ‘‘𑀨𑀦𑁆𑀤𑀦𑀁 𑀘𑀧𑀮𑀁 𑀘𑀺𑀢𑁆𑀢𑀁, 𑀤𑀽𑀭𑀓𑁆𑀔𑀁 𑀤𑀼𑀦𑁆𑀦𑀺𑀯𑀸𑀭𑀬𑀁;

𑀉𑀚𑀼𑀁 𑀓𑀭𑁄𑀢𑀺 𑀫𑁂𑀥𑀸𑀯𑀻, 𑀉𑀲𑀼𑀓𑀸𑀭𑁄𑀯 𑀢𑁂𑀚𑀦𑀁.

𑁩𑁪. ‘‘𑀯𑀸𑀭𑀺𑀚𑁄𑀯 𑀣𑀮𑁂 𑀔𑀺𑀢𑁆𑀢𑁄, 𑀑𑀓𑀫𑁄𑀓𑀢𑀉𑀩𑁆𑀪𑀢𑁄;

𑀧𑀭𑀺𑀧𑁆𑀨𑀦𑁆𑀤𑀢𑀺𑀤𑀁 𑀘𑀺𑀢𑁆𑀢𑀁, 𑀫𑀸𑀭𑀥𑁂𑀬𑁆𑀬𑀁 𑀧𑀳𑀸𑀢𑀯𑁂’’𑀢𑀺.

𑀢𑀢𑁆𑀣 𑀨𑀦𑁆𑀤𑀦𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀺𑀧𑁆𑀨𑀦𑁆𑀤𑀫𑀸𑀦𑀁. 𑀘𑀧𑀮𑀦𑁆𑀢𑀺 𑀏𑀓𑀇𑀭𑀺𑀬𑀸𑀧𑀣𑁂𑀦 𑀅𑀲𑀡𑁆𑀞𑀳𑀦𑁆𑀢𑁄 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄 𑀘𑀧𑀮𑀁. 𑀘𑀺𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀁, 𑀪𑀽𑀫𑀺𑀯𑀢𑁆𑀣𑀼𑀆𑀭𑀫𑁆𑀫𑀡𑀓𑀺𑀭𑀺𑀬𑀸𑀤𑀺𑀯𑀺𑀘𑀺𑀢𑁆𑀢𑀢𑀸𑀬 𑀧𑀦𑁂𑀢𑀁 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀽𑀭𑀓𑁆𑀔𑀦𑁆𑀢𑀺 𑀓𑀺𑀝𑁆𑀞𑀲𑀫𑁆𑀩𑀸𑀥𑁂 𑀞𑀸𑀦𑁂 𑀓𑀺𑀝𑁆𑀞𑀔𑀸𑀤𑀓𑀕𑁄𑀡𑀁 𑀯𑀺𑀬 𑀏𑀓𑁂𑀓𑀲𑁆𑀫𑀺𑀁 𑀲𑀧𑁆𑀧𑀸𑀬𑀸𑀭𑀫𑁆𑀫𑀡𑁂𑀬𑁂𑀯 𑀤𑀼𑀝𑁆𑀞𑀧𑀦𑀢𑁄 𑀤𑀽𑀭𑀓𑁆𑀔𑀁. 𑀤𑀼𑀦𑁆𑀦𑀺𑀯𑀸𑀭𑀬𑀦𑁆𑀢𑀺 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀕𑀘𑁆𑀙𑀦𑁆𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 𑀤𑀼𑀓𑁆𑀔𑀢𑁆𑀢𑀸 𑀤𑀼𑀦𑁆𑀦𑀺𑀯𑀸𑀭𑀬𑀁. 𑀉𑀲𑀼𑀓𑀸𑀭𑁄𑀯 𑀢𑁂𑀚𑀦𑀦𑁆𑀢𑀺 𑀬𑀣𑀸 𑀦𑀸𑀫 𑀉𑀲𑀼𑀓𑀸𑀭𑁄 𑀅𑀭𑀜𑁆𑀜𑀢𑁄 𑀏𑀓𑀁 𑀯𑀗𑁆𑀓𑀤𑀡𑁆𑀟𑀓𑀁 𑀆𑀳𑀭𑀺𑀢𑁆𑀯𑀸 𑀦𑀺𑀢𑁆𑀢𑀘𑀁 𑀓𑀢𑁆𑀯𑀸 𑀓𑀜𑁆𑀚𑀺𑀬𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑁂 𑀢𑀸𑀧𑁂𑀢𑁆𑀯𑀸 𑀭𑀼𑀓𑁆𑀔𑀸𑀮𑀓𑁂 𑀉𑀧𑁆𑀧𑀻𑀴𑁂𑀢𑁆𑀯𑀸 𑀦𑀺𑀯𑀗𑁆𑀓𑀁 𑀉𑀚𑀼𑀁 𑀯𑀸𑀮𑀯𑀺𑀚𑁆𑀛𑀦𑀬𑁄𑀕𑁆𑀕𑀁 𑀓𑀭𑁄𑀢𑀺, 𑀓𑀢𑁆𑀯𑀸 𑀘 𑀧𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀮𑀪𑀢𑀺, 𑀏𑀯𑀫𑁂𑀯 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀨𑀦𑁆𑀤𑀦𑀸𑀤𑀺𑀲𑀪𑀸𑀯𑀫𑁂𑀢𑀁 𑀘𑀺𑀢𑁆𑀢𑀁 𑀥𑀼𑀢𑀗𑁆𑀕𑀸𑀭𑀜𑁆𑀜𑀸𑀯𑀸𑀲𑀯𑀲𑁂𑀦, 𑀦𑀺𑀢𑁆𑀢𑀘𑀁 𑀅𑀧𑀕𑀢𑀑𑀴𑀸𑀭𑀺𑀓𑀓𑀺𑀮𑁂𑀲𑀁 𑀓𑀢𑁆𑀯𑀸 𑀲𑀤𑁆𑀥𑀸𑀲𑀺𑀦𑁂𑀳𑁂𑀦 𑀢𑁂𑀫𑁂𑀢𑁆𑀯𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀢𑀸𑀧𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀓𑁂 𑀉𑀧𑁆𑀧𑀻𑀴𑁂𑀢𑁆𑀯𑀸 𑀉𑀚𑀼𑀁 𑀅𑀓𑀼𑀝𑀺𑀮𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑁄𑀢𑀺, 𑀓𑀢𑁆𑀯𑀸 𑀘 𑀧𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀳𑀦𑁆𑀢𑀁 𑀅𑀯𑀺𑀚𑁆𑀚𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑁆𑀯𑀸, ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀳𑀢𑁆𑀣𑀕𑀢𑀫𑁂𑀯 𑀓𑀢𑁆𑀯𑀸 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀮𑀪𑀢𑀺.

𑀯𑀸𑀭𑀺𑀚𑁄𑀯𑀸𑀢𑀺 𑀫𑀘𑁆𑀙𑁄 𑀯𑀺𑀬, 𑀣𑀮𑁂 𑀔𑀺𑀢𑁆𑀢𑁄𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀚𑀸𑀮𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁂𑀦 𑀣𑀮𑁂 𑀙𑀟𑁆𑀟𑀺𑀢𑁄. 𑀑𑀓𑀫𑁄𑀓𑀢𑀉𑀩𑁆𑀪𑀢𑁄𑀢𑀺 ‘‘𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀻’’𑀢𑀺 𑀏𑀢𑁆𑀣 (𑀫𑀳𑀸𑀯. 𑁩𑁦𑁬) 𑀉𑀤𑀓𑀁 𑀑𑀓𑀁, ‘‘𑀑𑀓𑀁 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻’’𑀢𑀺 𑀏𑀢𑁆𑀣 (𑀲𑀼. 𑀦𑀺. 𑁮𑁫𑁦) 𑀆𑀮𑀬𑁄, 𑀏𑀢𑁆𑀣 𑀉𑀪𑀬𑀫𑁆𑀧𑀺 𑀮𑀩𑁆𑀪𑀢𑀺. ‘‘𑀑𑀓𑀫𑁄𑀓𑀢𑀉𑀩𑁆𑀪𑀢𑁄’’𑀢𑀺 𑀳𑀺 𑀏𑀢𑁆𑀣 𑀑𑀓𑀫𑁄𑀓𑀢𑁄𑀢𑀺 𑀉𑀤𑀓𑀲𑀗𑁆𑀔𑀸𑀢𑀸 𑀆𑀮𑀬𑀸𑀢𑀺 𑀅𑀬𑀫𑀢𑁆𑀣𑁄. 𑀉𑀩𑁆𑀪𑀢𑁄𑀢𑀺 𑀉𑀤𑁆𑀥𑀝𑁄. 𑀧𑀭𑀺𑀧𑁆𑀨𑀦𑁆𑀤𑀢𑀺𑀤𑀁 𑀘𑀺𑀢𑁆𑀢𑀦𑁆𑀢𑀺 𑀬𑀣𑀸 𑀲𑁄 𑀉𑀤𑀓𑀸𑀮𑀬𑀢𑁄 𑀉𑀩𑁆𑀪𑀢𑁄 𑀣𑀮𑁂 𑀔𑀺𑀢𑁆𑀢𑁄 𑀫𑀘𑁆𑀙𑁄 𑀉𑀤𑀓𑀁 𑀅𑀮𑀪𑀦𑁆𑀢𑁄 𑀧𑀭𑀺𑀧𑁆𑀨𑀦𑁆𑀤𑀢𑀺, 𑀏𑀯𑀫𑀺𑀤𑀁 𑀧𑀜𑁆𑀘𑀓𑀸𑀫𑀕𑀼𑀡𑀸𑀮𑀬𑀸𑀪𑀺𑀭𑀢𑀁 𑀘𑀺𑀢𑁆𑀢𑀁 𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀫𑀸𑀭𑀥𑁂𑀬𑁆𑀬𑀲𑀗𑁆𑀔𑀸𑀢𑀁 𑀯𑀝𑁆𑀝𑀁 𑀧𑀳𑀸𑀢𑀼𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂 𑀔𑀺𑀢𑁆𑀢𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀲𑀦𑁆𑀢𑀸𑀧𑀺𑀬𑀫𑀸𑀦𑀁 𑀧𑀭𑀺𑀧𑁆𑀨𑀦𑁆𑀤𑀢𑀺, 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀼𑀭𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑁂𑀥𑀸𑀯𑀻 𑀧𑀼𑀕𑁆𑀕𑀮𑁄 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀚𑀼𑀁 𑀓𑀫𑁆𑀫𑀦𑀺𑀬𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀭𑁄 𑀦𑀬𑁄 𑁋 𑀇𑀤𑀁 𑀫𑀸𑀭𑀥𑁂𑀬𑁆𑀬𑀁 𑀓𑀺𑀮𑁂𑀲𑀯𑀝𑁆𑀝𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀘𑀺𑀢𑁆𑀢𑀁 𑀲𑁄 𑀯𑀸𑀭𑀺𑀚𑁄 𑀯𑀺𑀬 𑀧𑀭𑀺𑀧𑁆𑀨𑀦𑁆𑀤𑀢𑀺, 𑀢𑀲𑁆𑀫𑀸 𑀫𑀸𑀭𑀥𑁂𑀬𑁆𑀬𑀁 𑀧𑀳𑀸𑀢𑀯𑁂, 𑀬𑁂𑀦 𑀓𑀺𑀮𑁂𑀲𑀯𑀝𑁆𑀝𑀲𑀗𑁆𑀔𑀸𑀢𑁂𑀦 𑀫𑀸𑀭𑀥𑁂𑀬𑁆𑀬𑁂𑀦𑁂𑀯 𑀧𑀭𑀺𑀧𑁆𑀨𑀦𑁆𑀤𑀢𑀺, 𑀢𑀁 𑀧𑀳𑀸𑀢𑀩𑁆𑀩𑀦𑁆𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀫𑁂𑀖𑀺𑀬𑀢𑁆𑀣𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀚𑀸𑀢𑀸𑀢𑀺.

𑀫𑁂𑀖𑀺𑀬𑀢𑁆𑀣𑁂𑀭𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼

𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀯𑀺𑀚𑀺𑀢𑁂 𑀧𑀩𑁆𑀩𑀢𑀧𑀸𑀤𑁂 𑀫𑀸𑀢𑀺𑀓𑀕𑀸𑀫𑁄 𑀦𑀸𑀫 𑀏𑀓𑁄 𑀖𑀦𑀯𑀸𑀲𑁄 𑀕𑀸𑀫𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀅𑀣 𑀦𑁂 𑀬𑁄 𑀢𑀲𑁆𑀲 𑀕𑀸𑀫𑀲𑁆𑀲 𑀲𑀸𑀫𑀺𑀓𑁄 𑀫𑀸𑀢𑀺𑀓𑁄 𑀦𑀸𑀫, 𑀢𑀲𑁆𑀲 𑀫𑀸𑀢𑀸 𑀤𑀺𑀲𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑁂𑀦 𑀬𑀸𑀕𑀼𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀢𑁆𑀣 𑀕𑀦𑁆𑀢𑀼𑀓𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀬𑀣𑀸 𑀨𑀸𑀲𑀼𑀓𑀝𑁆𑀞𑀸𑀦𑀁 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺. 𑀲𑀸 ‘‘𑀯𑀲𑁆𑀲𑀸𑀯𑀸𑀲𑀝𑁆𑀞𑀸𑀦𑀁, 𑀅𑀬𑁆𑀬𑀸, 𑀧𑀭𑀺𑀬𑁂𑀲𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀜𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀲𑀘𑁂, 𑀅𑀬𑁆𑀬𑀸, 𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀢𑀻𑀡𑀺 𑀲𑀭𑀡𑀸𑀦𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀕𑀳𑁂𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀪𑀺𑀓𑁆𑀔𑀽 ‘‘𑀫𑀬𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀸𑀬 𑀅𑀓𑀺𑀮𑀫𑀦𑁆𑀢𑀸 𑀪𑀯𑀦𑀺𑀲𑁆𑀲𑀭𑀡𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀅𑀥𑀺𑀯𑀸𑀲𑀬𑀺𑀁𑀲𑀼. 𑀲𑀸 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀅𑀤𑀸𑀲𑀺.

𑀢𑁂 𑀢𑀢𑁆𑀣𑁂𑀯 𑀯𑀲𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀯𑀤𑀺𑀁𑀲𑀼, ‘‘𑀆𑀯𑀼𑀲𑁄, 𑀅𑀫𑁆𑀳𑁂𑀳𑀺 𑀧𑀫𑀸𑀤𑀘𑀸𑀭𑀁 𑀘𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀫𑁆𑀳𑀸𑀓𑀜𑁆𑀳𑀺 𑀲𑀓𑀕𑁂𑀳𑀁 𑀯𑀺𑀬 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸 𑀯𑀺𑀯𑀝𑀤𑁆𑀯𑀸𑀭𑀸𑀬𑁂𑀯, 𑀥𑀭𑀫𑀸𑀦𑀓𑀩𑀼𑀤𑁆𑀥𑀲𑁆𑀲 𑀔𑁄 𑀧𑀦 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀫𑀬𑀁 𑀆𑀕𑀢𑀸, 𑀩𑀼𑀤𑁆𑀥𑀸 𑀘 𑀦𑀸𑀫 𑀧𑀤𑀸𑀦𑀼𑀧𑀤𑀺𑀓𑀁 𑀯𑀺𑀘𑀭𑀦𑁆𑀢𑁂𑀦𑀸𑀧𑀺 𑀲𑀞𑁂𑀦 𑀆𑀭𑀸𑀥𑁂𑀢𑀼𑀁 𑀦 𑀲𑀓𑁆𑀓𑀸, 𑀬𑀣𑀸𑀚𑁆𑀛𑀸𑀲𑀬𑁂𑀦𑁂𑀯 𑀆𑀭𑀸𑀥𑁂𑀢𑀼𑀁 𑀲𑀓𑁆𑀓𑀸, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣, 𑀤𑁆𑀯𑀻𑀳𑀺 𑀏𑀓𑀝𑁆𑀞𑀸𑀦𑁂 𑀦 𑀞𑀸𑀢𑀩𑁆𑀩𑀁, 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀸𑀬𑀁 𑀔𑁄 𑀧𑀦 𑀣𑁂𑀭𑀽𑀧𑀝𑁆𑀞𑀸𑀦𑀓𑀸𑀮𑁂 𑀧𑀸𑀢𑁄𑀯 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫, 𑀲𑁂𑀲𑀓𑀸𑀮𑁂 𑀤𑁆𑀯𑁂 𑀏𑀓𑀢𑁄 𑀦 𑀪𑀯𑀺𑀲𑁆𑀲𑀸𑀫, 𑀅𑀧𑀺𑀘 𑀔𑁄 𑀧𑀦 𑀅𑀨𑀸𑀲𑀼𑀓𑁂𑀦 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀖𑀡𑁆𑀟𑀺𑀬𑀸 𑀧𑀳𑀢𑀸𑀬 𑀖𑀡𑁆𑀟𑀺𑀲𑀜𑁆𑀜𑀸𑀬 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀢𑁂𑀲𑀼 𑀏𑀯𑀁 𑀓𑀢𑀺𑀓𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁂𑀲𑀼 𑀏𑀓𑀤𑀺𑀯𑀲𑀁 𑀲𑀸 𑀉𑀧𑀸𑀲𑀺𑀓𑀸 𑀲𑀧𑁆𑀧𑀺𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀤𑀸𑀲𑀺𑀓𑀫𑁆𑀫𑀓𑀭𑀸𑀤𑀻𑀳𑀺 𑀧𑀭𑀺𑀯𑀼𑀢𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀪𑀺𑀓𑁆𑀔𑀽 𑀅𑀤𑀺𑀲𑁆𑀯𑀸, ‘‘𑀓𑀳𑀁 𑀦𑀼 𑀔𑁄, 𑀅𑀬𑁆𑀬𑀸, 𑀕𑀢𑀸’’𑀢𑀺 𑀧𑀼𑀭𑀺𑀲𑁂 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀬𑁆𑀬𑁂’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀤𑀝𑁆𑀞𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀢𑀺𑀓𑀯𑀢𑁆𑀢𑀁 𑀚𑀸𑀦𑀦𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀖𑀡𑁆𑀟𑀺𑀬𑀸 𑀧𑀳𑀢𑀸𑀬 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀅𑀬𑁆𑀬𑁂’’𑀢𑀺. 𑀲𑀸 𑀘 𑀖𑀡𑁆𑀟𑀺𑀁 𑀧𑀳𑀭𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀖𑀡𑁆𑀟𑀺𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀓𑀲𑁆𑀲𑀘𑀺 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀓𑀲𑀓𑀝𑁆𑀞𑀸𑀦𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀤𑁆𑀯𑁂𑀧𑀺 𑀚𑀦𑀸 𑀏𑀓𑀫𑀕𑁆𑀕𑁂𑀦𑀸𑀕𑀢𑀸 𑀦𑀸𑀫 𑀦𑀢𑁆𑀣𑀺. 𑀉𑀧𑀸𑀲𑀺𑀓𑀸 𑀏𑀓𑁂𑀓𑀝𑁆𑀞𑀸𑀦𑀢𑁄 𑀏𑀓𑁂𑀓𑀫𑁂𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀫𑀫 𑀧𑀼𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀮𑀳𑀁 𑀦𑀼 𑀔𑁄, 𑀪𑀦𑁆𑀢𑁂, 𑀓𑀭𑀺𑀢𑁆𑀣𑀸’’𑀢𑀺? ‘‘𑀦 𑀓𑀭𑁄𑀫, 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺. ‘‘𑀲𑀘𑁂 𑀯𑁄, 𑀪𑀦𑁆𑀢𑁂, 𑀓𑀮𑀳𑁄 𑀦𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀬𑀣𑀸 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀸 𑀲𑀩𑁆𑀩𑁂 𑀏𑀓𑀢𑁄𑀯 𑀆𑀕𑀘𑁆𑀙𑀣, 𑀏𑀯𑀁 𑀅𑀦𑀸𑀕𑀦𑁆𑀢𑁆𑀯𑀸 𑀏𑀓𑁂𑀓𑀝𑁆𑀞𑀸𑀦𑀢𑁄 𑀏𑀓𑁂𑀓𑀸𑀯 𑀆𑀕𑀢𑀸’’𑀢𑀺? ‘‘𑀫𑀳𑀸𑀉𑀧𑀸𑀲𑀺𑀓𑁂, 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀫𑁆𑀳𑀸’’𑀢𑀺. ‘‘𑀓𑁄 𑀏𑀲, 𑀪𑀦𑁆𑀢𑁂, 𑀲𑀫𑀡𑀥𑀫𑁆𑀫𑁄 𑀦𑀸𑀫𑀸’’𑀢𑀺? ‘‘𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀚𑁆𑀛𑀸𑀬𑀁 𑀓𑀭𑁄𑀫, 𑀅𑀢𑁆𑀢𑀪𑀸𑀯𑁂 𑀘 𑀔𑀬𑀯𑀬𑀁 𑀧𑀝𑁆𑀞𑀧𑁂𑀫, 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁, 𑀅𑀢𑁆𑀢𑀪𑀸𑀯𑁂 𑀘 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑀼𑀁 𑀢𑀼𑀫𑁆𑀳𑀸𑀓𑀫𑁂𑀯 𑀯𑀝𑁆𑀝𑀢𑀺, 𑀉𑀤𑀸𑀳𑀼 𑀅𑀫𑁆𑀳𑀸𑀓𑀫𑁆𑀧𑀻𑀢𑀺, 𑀓𑀲𑁆𑀲𑀘𑀺𑀧𑀺 𑀅𑀯𑀸𑀭𑀺𑀢𑁄 𑀏𑀲 𑀥𑀫𑁆𑀫𑁄, 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀬𑁆𑀳𑀫𑁆𑀧𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀤𑁂𑀣, 𑀅𑀢𑁆𑀢𑀪𑀸𑀯𑁂 𑀘 𑀔𑀬𑀯𑀬𑀧𑀝𑁆𑀞𑀧𑀦𑀁 𑀆𑀘𑀺𑀓𑁆𑀔𑀣𑀸’’𑀢𑀺. ‘‘𑀢𑁂𑀦 𑀳𑀺 𑀉𑀕𑁆𑀕𑀡𑁆𑀳, 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺 𑀲𑀩𑁆𑀩𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀼𑀁.

𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀅𑀢𑁆𑀢𑀦𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀭𑁂𑀢𑀭𑀫𑁂𑀯 𑀢𑀬𑁄 𑀫𑀕𑁆𑀕𑁂, 𑀢𑀻𑀡𑀺 𑀘 𑀨𑀮𑀸𑀦𑀺 𑀧𑀸𑀧𑀼𑀡𑀺. 𑀫𑀕𑁆𑀕𑁂𑀦𑁂𑀯 𑀘𑀲𑁆𑀲𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀅𑀪𑀺𑀜𑁆𑀜𑀸 𑀘 𑀆𑀕𑀫𑀺𑀁𑀲𑀼. 𑀲𑀸 𑀫𑀕𑁆𑀕𑀨𑀮𑀲𑀼𑀔𑀢𑁄 𑀯𑀼𑀝𑁆𑀞𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸, ‘‘𑀓𑀤𑀸 𑀦𑀼 𑀔𑁄 𑀫𑀫 𑀧𑀼𑀢𑁆𑀢𑁂𑀳𑀺 𑀅𑀬𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 𑀲𑀩𑁆𑀩𑁂𑀧𑀺𑀫𑁂 𑀲𑀭𑀸𑀕𑀸 𑀲𑀤𑁄𑀲𑀸 𑀲𑀫𑁄𑀳𑀸 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀫𑁆𑀧𑀺 𑀢𑁂𑀲𑀁 𑀦𑀢𑁆𑀣𑀺, ‘‘𑀓𑀺𑀁 𑀦𑀼 𑀔𑁄 𑀫𑀬𑁆𑀳𑀁 𑀧𑀼𑀢𑁆𑀢𑀸𑀦𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸, ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸, ‘‘𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀁 𑀦𑀼 𑀔𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀢𑀫𑁆𑀧𑀺 𑀤𑀺𑀲𑁆𑀯𑀸, ‘‘𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀦𑀼 𑀔𑁄 𑀮𑀪𑀦𑁆𑀢𑀺, 𑀦 𑀮𑀪𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀲𑀺, 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀫𑁆𑀧𑀺 𑀤𑀺𑀲𑁆𑀯𑀸, ‘‘𑀆𑀳𑀸𑀭𑀲𑀧𑁆𑀧𑀸𑀬𑀁 𑀦𑀼 𑀔𑁄 𑀮𑀪𑀦𑁆𑀢𑀺, 𑀦 𑀮𑀪𑀦𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 ‘‘𑀆𑀳𑀸𑀭𑀲𑀧𑁆𑀧𑀸𑀬𑀁 𑀦𑁂𑀲𑀁 𑀦𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀦𑀸𑀦𑀸𑀯𑀺𑀥𑀁 𑀬𑀸𑀕𑀼𑀁, 𑀅𑀦𑁂𑀓𑀧𑁆𑀧𑀓𑀸𑀭𑀁 𑀔𑀚𑁆𑀚𑀓𑀁, 𑀦𑀸𑀦𑀕𑁆𑀕𑀭𑀲𑀜𑁆𑀘 𑀪𑁄𑀚𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀕𑁂𑀳𑁂 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀬𑀁 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀦𑀺𑀬𑁆𑀬𑀸𑀤𑁂𑀲𑀺. 𑀢𑁂 𑀬𑀣𑀸𑀭𑀼𑀘𑀺 𑀬𑀸𑀕𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂𑀲𑀁 𑀲𑀧𑁆𑀧𑀸𑀬𑀸𑀳𑀸𑀭𑀁 𑀮𑀪𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺.

𑀢𑁂 𑀏𑀓𑀕𑁆𑀕𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀳𑁄 𑀫𑀳𑀸𑀉𑀧𑀸𑀲𑀺𑀓𑀸 𑀅𑀫𑁆𑀳𑀸𑀓𑀁 𑀧𑀢𑀺𑀝𑁆𑀞𑀸 𑀚𑀸𑀢𑀸, 𑀲𑀘𑁂 𑀫𑀬𑀁 𑀲𑀧𑁆𑀧𑀸𑀬𑀸𑀳𑀸𑀭𑀁 𑀦 𑀮𑀪𑀺𑀫𑁆𑀳, 𑀦 𑀦𑁄 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀅𑀪𑀯𑀺𑀲𑁆𑀲, 𑀇𑀤𑀸𑀦𑀺 𑀯𑀼𑀝𑁆𑀞𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀢𑁂 ‘‘𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸’’𑀢𑀺 𑀫𑀳𑀸𑀉𑀧𑀸𑀲𑀺𑀓𑀁 𑀆𑀧𑀼𑀘𑁆𑀙𑀺𑀁𑀲𑀼. ‘‘𑀫𑀳𑀸𑀉𑀧𑀸𑀲𑀺𑀓𑀸 𑀲𑀸𑀥𑀼, 𑀅𑀬𑁆𑀬𑀸’’𑀢𑀺. 𑀢𑁂 𑀅𑀦𑀼𑀕𑀦𑁆𑀢𑁆𑀯𑀸 𑀧𑀼𑀦𑀧𑀺, ‘‘𑀪𑀦𑁆𑀢𑁂, 𑀅𑀫𑁆𑀳𑁂 𑀑𑀮𑁄𑀓𑁂𑀬𑁆𑀬𑀸𑀣𑀸’’𑀢𑀺 𑀩𑀳𑀽𑀦𑀺 𑀧𑀺𑀬𑀯𑀘𑀦𑀸𑀦𑀺 𑀯𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺. 𑀢𑁂𑀧𑀺 𑀔𑁄 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀔𑀫𑀦𑀻𑀬𑀁, 𑀪𑀦𑁆𑀢𑁂, 𑀬𑀸𑀧𑀦𑀻𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀧𑀦 𑀦𑁂𑀯 𑀓𑀺𑀮𑀫𑀺𑀫𑁆𑀳. 𑀅𑀫𑁆𑀳𑀸𑀓𑀜𑁆𑀳𑀺 𑀫𑀸𑀢𑀺𑀓𑀫𑀸𑀢𑀸 𑀦𑀸𑀫𑁂𑀓𑀸 𑀉𑀧𑀸𑀲𑀺𑀓𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸, ‘𑀅𑀳𑁄 𑀯𑀢 𑀦𑁄 𑀏𑀯𑀭𑀽𑀧𑀁 𑀦𑀸𑀫 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀬𑁆𑀬𑀸’𑀢𑀺 𑀘𑀺𑀦𑁆𑀢𑀺𑀢𑁂 𑀬𑀣𑀸𑀘𑀺𑀦𑁆𑀢𑀺𑀢𑀁 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀅𑀤𑀸𑀲𑀻’’𑀢𑀺 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼.

𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀁 𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀚𑁂𑀢𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀕𑀸𑀫𑀁 𑀧𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀦𑀤𑀺𑀯𑀲𑁂𑀬𑁂𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀺𑀭 𑀉𑀧𑀸𑀲𑀺𑀓𑀸 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀚𑀸𑀦𑀸𑀢𑀺, 𑀅𑀳𑀜𑁆𑀘 𑀫𑀕𑁆𑀕𑀓𑀺𑀮𑀦𑁆𑀢𑁄 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀳𑁄 𑀯𑀢 𑀫𑁂 𑀯𑀺𑀳𑀸𑀭𑀧𑀝𑀺𑀚𑀕𑁆𑀕𑀓𑀁 𑀫𑀦𑀼𑀲𑁆𑀲𑀁 𑀧𑁂𑀲𑁂𑀬𑁆𑀬𑀸’’𑀢𑀺. 𑀉𑀧𑀸𑀲𑀺𑀓𑀸 𑀕𑁂𑀳𑁂 𑀦𑀺𑀲𑀺𑀦𑁆𑀦𑀸𑀯 𑀆𑀯𑀚𑁆𑀚𑁂𑀦𑁆𑀢𑀻 𑀢𑀫𑀢𑁆𑀣𑀁 𑀜𑀢𑁆𑀯𑀸, ‘‘𑀕𑀘𑁆𑀙, 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀏𑀳𑀻’’𑀢𑀺 𑀫𑀦𑀼𑀲𑁆𑀲𑀁 𑀧𑁂𑀲𑁂𑀲𑀺. 𑀇𑀢𑀭𑁄𑀧𑀺 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑁄 ‘‘𑀅𑀳𑁄 𑀯𑀢 𑀫𑁂 𑀲𑀓𑁆𑀔𑀭𑀧𑀸𑀦𑀓𑀁 𑀓𑀢𑁆𑀯𑀸 𑀧𑁂𑀲𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀺𑀓𑀸 𑀢𑀫𑁆𑀧𑀺 𑀧𑁂𑀲𑁂𑀲𑀺. 𑀲𑁄 𑀧𑀼𑀦𑀤𑀺𑀯𑀲𑁂 ‘‘𑀧𑀸𑀢𑁄𑀯 𑀲𑀺𑀦𑀺𑀤𑁆𑀥𑀬𑀸𑀕𑀼𑀁 𑀫𑁂 𑀲𑀉𑀢𑁆𑀢𑀭𑀺𑀪𑀗𑁆𑀕𑀁 𑀧𑁂𑀲𑁂𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀺𑀓𑀸 𑀢𑀣𑀸 𑀅𑀓𑀸𑀲𑀺. 𑀲𑁄 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸, ‘‘𑀅𑀳𑁄 𑀯𑀢 𑀫𑁂 𑀏𑀯𑀭𑀽𑀧𑀁 𑀔𑀚𑁆𑀚𑀓𑀁 𑀧𑁂𑀲𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀺𑀓𑀸 𑀢𑀫𑁆𑀧𑀺 𑀧𑁂𑀲𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀉𑀧𑀸𑀲𑀺𑀓𑀸 𑀫𑀬𑀸 𑀲𑀩𑁆𑀩𑀁 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀧𑁂𑀲𑁂𑀲𑀺, 𑀅𑀳𑀁 𑀏𑀢𑀁 𑀤𑀝𑁆𑀞𑀼𑀓𑀸𑀫𑁄, 𑀅𑀳𑁄 𑀯𑀢 𑀫𑁂 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀉𑀧𑀸𑀲𑀺𑀓𑀸 ‘‘𑀫𑀫 𑀧𑀼𑀢𑁆𑀢𑁄 𑀫𑀁 𑀤𑀝𑁆𑀞𑀼𑀓𑀸𑀫𑁄, 𑀆𑀕𑀫𑀦𑀁 𑀫𑁂 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀪𑁄𑀚𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀲𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 ‘‘𑀫𑀸𑀢𑀺𑀓𑀫𑀸𑀢𑀸 𑀦𑀸𑀫 𑀢𑁆𑀯𑀁, 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀢𑀸𑀢𑀸’’𑀢𑀺. ‘‘𑀢𑁆𑀯𑀁 𑀧𑀭𑀘𑀺𑀢𑁆𑀢𑀁 𑀚𑀸𑀦𑀸𑀲𑀻’’𑀢𑀺? ‘‘𑀓𑀺𑀁 𑀫𑀁 𑀧𑀼𑀘𑁆𑀙𑀲𑀺, 𑀢𑀸𑀢𑀸’’𑀢𑀺? ‘‘𑀫𑀬𑀸 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀲𑀩𑁆𑀩𑀫𑀓𑀸𑀲𑀺, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀻’’𑀢𑀺. ‘‘𑀧𑀭𑀘𑀺𑀢𑁆𑀢𑀚𑀸𑀦𑀦𑀓𑀪𑀺𑀓𑁆𑀔𑀽 𑀩𑀳𑀽, 𑀢𑀸𑀢𑀸’’𑀢𑀺? ‘‘𑀦𑀸𑀳𑀁 𑀅𑀜𑁆𑀜𑁂 𑀧𑀼𑀘𑁆𑀙𑀸𑀫𑀺, 𑀢𑀼𑀯𑀁 𑀧𑀼𑀘𑁆𑀙𑀸𑀫𑀺, 𑀉𑀧𑀸𑀲𑀺𑀓𑁂’’𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀉𑀧𑀸𑀲𑀺𑀓𑀸 ‘‘𑀧𑀭𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀭𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀸 𑀦𑀸𑀫 𑀏𑀯𑀁 𑀓𑀭𑁄𑀦𑁆𑀢𑀺 𑀧𑀼𑀢𑁆𑀢𑀸’’𑀢𑀺 𑀆𑀳. 𑀲𑁄 ‘‘𑀪𑀸𑀭𑀺𑀬𑀁 𑀯𑀢𑀺𑀤𑀁 𑀓𑀫𑁆𑀫𑀁, 𑀧𑀼𑀣𑀼𑀚𑁆𑀚𑀦𑀸 𑀦𑀸𑀫 𑀲𑁄𑀪𑀦𑀫𑁆𑀧𑀺 𑀅𑀲𑁄𑀪𑀦𑀫𑁆𑀧𑀺 𑀘𑀺𑀦𑁆𑀢𑁂𑀦𑁆𑀢𑀺, 𑀲𑀘𑀸𑀳𑀁 𑀓𑀺𑀜𑁆𑀘𑀺 𑀅𑀬𑀼𑀢𑁆𑀢𑀁 𑀘𑀺𑀦𑁆𑀢𑀬𑀺𑀲𑁆𑀲𑀸𑀫𑀺, 𑀲𑀳 𑀪𑀡𑁆𑀟𑀓𑁂𑀦 𑀘𑁄𑀭𑀁 𑀘𑀽𑀴𑀸𑀬 𑀕𑀡𑁆𑀳𑀦𑁆𑀢𑀻 𑀯𑀺𑀬 𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀬𑁆𑀬, 𑀫𑀬𑀸 𑀇𑀢𑁄 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀉𑀧𑀸𑀲𑀺𑀓𑁂, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀳𑀁, 𑀅𑀬𑁆𑀬𑀸’’𑀢𑀺? ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁, 𑀉𑀧𑀸𑀲𑀺𑀓𑁂’’𑀢𑀺. ‘‘𑀯𑀲𑀣 𑀢𑀸𑀯, 𑀪𑀦𑁆𑀢𑁂, 𑀇𑀥𑀸’’𑀢𑀺. ‘‘𑀦 𑀯𑀲𑀺𑀲𑁆𑀲𑀸𑀫𑀺, 𑀉𑀧𑀸𑀲𑀺𑀓𑁂, 𑀕𑀫𑀺𑀲𑁆𑀲𑀸𑀫𑁂𑀯𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀪𑀺𑀓𑁆𑀔𑀼 𑀦 𑀢𑁆𑀯𑀁 𑀢𑀢𑁆𑀣 𑀯𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀦 𑀲𑀓𑁆𑀓𑀸 𑀢𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀓𑀸𑀭𑀡𑀸 𑀪𑀺𑀓𑁆𑀔𑀽’’𑀢𑀺? ‘‘𑀪𑀦𑁆𑀢𑁂, 𑀲𑀸 𑀉𑀧𑀸𑀲𑀺𑀓𑀸 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀧𑀼𑀣𑀼𑀚𑁆𑀚𑀦𑀸 𑀘 𑀦𑀸𑀫 𑀲𑁄𑀪𑀦𑀫𑁆𑀧𑀺 𑀅𑀲𑁄𑀪𑀦𑀫𑁆𑀧𑀺 𑀘𑀺𑀦𑁆𑀢𑁂𑀦𑁆𑀢𑀺, 𑀲𑀘𑀸𑀳𑀁 𑀓𑀺𑀜𑁆𑀘𑀺 𑀅𑀬𑀼𑀢𑁆𑀢𑀁 𑀘𑀺𑀦𑁆𑀢𑁂𑀲𑁆𑀲𑀸𑀫𑀺, 𑀲𑀳 𑀪𑀡𑁆𑀟𑀓𑁂𑀦 𑀘𑁄𑀭𑀁 𑀘𑀽𑀴𑀸𑀬 𑀕𑀡𑁆𑀳𑀦𑁆𑀢𑀻 𑀯𑀺𑀬 𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻𑀢𑀺. ‘‘𑀪𑀺𑀓𑁆𑀔𑀼, 𑀢𑀢𑁆𑀣𑁂𑀯 𑀢𑀬𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺, ‘‘𑀦 𑀲𑀓𑁆𑀓𑁄𑀫𑀺, 𑀪𑀦𑁆𑀢𑁂, 𑀦𑀸𑀳𑀁 𑀢𑀢𑁆𑀣 𑀯𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀓𑀫𑁂𑀯 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀢𑀯 𑀘𑀺𑀢𑁆𑀢𑀫𑁂𑀯 𑀭𑀓𑁆𑀔, 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀤𑀼𑀭𑀓𑁆𑀔𑀁, 𑀢𑁆𑀯𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀫𑁂𑀯 𑀦𑀺𑀕𑁆𑀕𑀡𑁆𑀳, 𑀫𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀘𑀺𑀦𑁆𑀢𑀬𑀺, 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀤𑀼𑀦𑁆𑀦𑀺𑀕𑁆𑀕𑀳’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁫. ‘‘𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄;

𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳’’𑀦𑁆𑀢𑀺.

𑀢𑀢𑁆𑀣 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀤𑀼𑀓𑁆𑀔𑁂𑀦 𑀦𑀺𑀕𑁆𑀕𑀬𑁆𑀳𑀢𑀻𑀢𑀺 𑀤𑀼𑀦𑁆𑀦𑀺𑀕𑁆𑀕𑀳𑀁. 𑀮𑀳𑀼𑀁 𑀉𑀧𑁆𑀧𑀚𑁆𑀚𑀢𑀺 𑀘 𑀦𑀺𑀭𑀼𑀚𑁆𑀛𑀢𑀺 𑀘𑀸𑀢𑀺 𑀮𑀳𑀼. 𑀢𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄. 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺𑀤𑁂𑀯 𑀦𑀺𑀧𑀢𑀦𑀲𑀻𑀮𑀲𑁆𑀲. 𑀏𑀢𑀜𑁆𑀳𑀺 𑀮𑀪𑀺𑀢𑀩𑁆𑀩𑀝𑁆𑀞𑀸𑀦𑀁 𑀯𑀸 𑀅𑀮𑀪𑀺𑀢𑀩𑁆𑀩𑀝𑁆𑀞𑀸𑀦𑀁 𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑀁 𑀯𑀸 𑀅𑀬𑀼𑀢𑁆𑀢𑀝𑁆𑀞𑀸𑀦𑀁 𑀯𑀸 𑀦 𑀚𑀸𑀦𑀸𑀢𑀺, 𑀦𑁂𑀯 𑀚𑀸𑀢𑀺𑀁 𑀑𑀮𑁄𑀓𑁂𑀢𑀺, 𑀦 𑀕𑁄𑀢𑁆𑀢𑀁, 𑀦 𑀯𑀬𑀁. 𑀬𑀢𑁆𑀣 𑀬𑀢𑁆𑀣 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀧𑀢𑀢𑀻𑀢𑀺 ‘‘𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀤𑀦𑁆𑀢𑀪𑀸𑀯𑁄 𑀬𑀣𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀳𑁄𑀢𑀺, 𑀢𑀣𑀸 𑀓𑀢𑀪𑀸𑀯𑁄 𑀲𑀸𑀥𑀼. 𑀓𑀺𑀁 𑀓𑀸𑀭𑀡𑀸? 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑀁 𑀫𑀕𑁆𑀕𑀨𑀮𑀲𑀼𑀔𑀁 𑀧𑀭𑀫𑀢𑁆𑀣𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀆𑀯𑀳𑀢𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁, 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀲𑀢𑁆𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑀁 𑀑𑀯𑀸𑀤𑀁 𑀤𑀢𑁆𑀯𑀸, ‘‘𑀕𑀘𑁆𑀙, 𑀪𑀺𑀓𑁆𑀔𑀼, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀸𑀳𑀻’’𑀢𑀺 𑀧𑀳𑀺𑀡𑀺. 𑀲𑁄 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺. 𑀓𑀺𑀜𑁆𑀘𑀺 𑀩𑀳𑀺𑀤𑁆𑀥𑀸 𑀘𑀺𑀦𑁆𑀢𑀦𑀁 𑀦𑀸𑀫 𑀦 𑀘𑀺𑀦𑁆𑀢𑁂𑀲𑀺. 𑀫𑀳𑀸𑀉𑀧𑀸𑀲𑀺𑀓𑀸𑀧𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑀻 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀇𑀤𑀸𑀦𑀺 𑀑𑀯𑀸𑀤𑀤𑀸𑀬𑀓𑀁 𑀆𑀘𑀭𑀺𑀬𑀁 𑀮𑀪𑀺𑀢𑁆𑀯𑀸 𑀧𑀼𑀦𑀸𑀕𑀢𑁄 𑀫𑀫 𑀧𑀼𑀢𑁆𑀢𑁄’’𑀢𑀺 𑀅𑀢𑁆𑀢𑀦𑁄 𑀜𑀸𑀡𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀲𑀧𑁆𑀧𑀸𑀬𑀸𑀳𑀸𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀲𑁂𑀯𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 ‘‘𑀅𑀳𑁄 𑀫𑀳𑀸𑀉𑀧𑀸𑀲𑀺𑀓𑀸 𑀫𑀬𑁆𑀳𑀁 𑀧𑀢𑀺𑀝𑁆𑀞𑀸 𑀚𑀸𑀢𑀸, 𑀅𑀳𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀪𑀯𑀦𑀺𑀲𑁆𑀲𑀭𑀡𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀢𑀸𑀯 𑀫𑁂 𑀅𑀢𑁆𑀢𑀪𑀸𑀯𑁂 𑀧𑀢𑀺𑀝𑁆𑀞𑀸 𑀚𑀸𑀢𑀸, 𑀲𑀁𑀲𑀸𑀭𑁂 𑀧𑀦 𑀫𑁂 𑀲𑀁𑀲𑀭𑀦𑁆𑀢𑀲𑁆𑀲 𑀅𑀜𑁆𑀜𑁂𑀲𑀼𑀧𑀺 𑀅𑀢𑁆𑀢𑀪𑀸𑀯𑁂𑀲𑀼 𑀅𑀬𑀁 𑀧𑀢𑀺𑀝𑁆𑀞𑀸 𑀪𑀽𑀢𑀧𑀼𑀩𑁆𑀩𑀸, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀏𑀓𑀽𑀦𑀅𑀢𑁆𑀢𑀪𑀸𑀯𑀲𑀢𑀁 𑀅𑀦𑀼𑀲𑁆𑀲𑀭𑀺. 𑀲𑀸𑀧𑀺 𑀏𑀓𑀽𑀦𑀅𑀢𑁆𑀢𑀪𑀸𑀯𑀲𑀢𑁂 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀜𑁆𑀜𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀏𑀢𑁆𑀢𑀓𑀁 𑀅𑀕𑀼𑀡𑀁 𑀤𑀺𑀲𑁆𑀯𑀸, ‘‘𑀅𑀳𑁄 𑀫𑀬𑀁 𑀫𑀳𑀸𑀉𑀧𑀸𑀲𑀺𑀓𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀫𑀳𑀸𑀉𑀧𑀸𑀲𑀺𑀓𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑀸𑀯 ‘‘𑀓𑀺𑀁 𑀦𑀼 𑀔𑁄 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀢𑀓𑀁 𑀧𑀢𑁆𑀢𑀁, 𑀦𑁄’’𑀢𑀺 𑀉𑀧𑀥𑀸𑀭𑀬𑀫𑀸𑀦𑀸 𑀢𑀲𑁆𑀲 𑀅𑀭𑀳𑀢𑁆𑀢𑀧𑀢𑁆𑀢𑀺𑀁 𑀜𑀢𑁆𑀯𑀸 𑀉𑀢𑁆𑀢𑀭𑀺 𑀉𑀧𑀥𑀸𑀭𑀺𑀬𑀫𑀸𑀦𑀸, ‘‘𑀫𑀫 𑀧𑀼𑀢𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀳𑁄 𑀯𑀢 𑀫𑁂 𑀅𑀬𑀁 𑀉𑀧𑀸𑀲𑀺𑀓𑀸 𑀫𑀳𑀢𑀻 𑀧𑀢𑀺𑀝𑁆𑀞𑀸 𑀚𑀸𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀢𑀻𑀢𑁂𑀧𑀺 𑀦𑀼 𑀔𑁄 𑀫𑁂 𑀅𑀬𑀁 𑀧𑀢𑀺𑀝𑁆𑀞𑀸 𑀪𑀽𑀢𑀧𑀼𑀩𑁆𑀩𑀸, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀏𑀓𑀽𑀦𑀅𑀢𑁆𑀢𑀪𑀸𑀯𑀲𑀢𑀁 𑀅𑀦𑀼𑀲𑁆𑀲𑀭𑀺, ‘‘𑀅𑀳𑀁 𑀔𑁄 𑀧𑀦 𑀏𑀓𑀽𑀦𑀅𑀢𑁆𑀢𑀪𑀸𑀯𑀲𑀢𑁂 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺𑀁, 𑀅𑀬𑀁 𑀫𑁂 𑀏𑀢𑁆𑀢𑀓𑀁 𑀅𑀕𑀼𑀡𑀁 𑀤𑀺𑀲𑁆𑀯𑀸 ‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁 𑀉𑀧𑀸𑀲𑀺𑀓𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀯𑀁 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀺𑀬𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀉𑀧𑀓𑀸𑀭𑁄 𑀓𑀢𑀧𑀼𑀩𑁆𑀩𑁄’’𑀢𑀺 𑀉𑀧𑀥𑀸𑀭𑀬𑀫𑀸𑀦𑀸 𑀢𑀢𑁄 𑀉𑀢𑁆𑀢𑀭𑀺𑀁 𑀲𑀢𑀫𑀁 𑀅𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀢𑀫𑁂 𑀅𑀢𑁆𑀢𑀪𑀸𑀯𑁂 𑀫𑀬𑀸 𑀏𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸𑀬 𑀳𑀼𑀢𑁆𑀯𑀸 𑀏𑀢𑀲𑁆𑀫𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀝𑁆𑀞𑀸𑀦𑁂 𑀚𑀻𑀯𑀺𑀢𑀤𑀸𑀦𑀁 𑀤𑀺𑀦𑁆𑀦𑀁, 𑀅𑀳𑁄 𑀫𑀬𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀫𑀳𑀸𑀉𑀧𑀓𑀸𑀭𑁄 𑀓𑀢𑀧𑀼𑀩𑁆𑀩𑁄’’𑀢𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑀸𑀯 𑀉𑀢𑁆𑀢𑀭𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀲𑀢𑀫𑀁 𑀅𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁆𑀣 𑀢𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀤𑀺𑀲𑁆𑀯𑀸, ‘‘𑀅𑀳𑁄 𑀫𑀫 𑀇𑀫𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀉𑀧𑀓𑀸𑀭𑁄 𑀓𑀢𑀧𑀼𑀩𑁆𑀩𑁄’’𑀢𑀺 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀢𑀢𑁆𑀣𑁂𑀯 𑀘𑀢𑀽𑀲𑀼 𑀫𑀕𑁆𑀕𑀨𑀮𑁂𑀲𑀼 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀅𑀜𑁆𑀜𑀢𑀭𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀼𑀤𑀼𑀤𑁆𑀤𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀭𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀏𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀓𑀼𑀮𑀽𑀧𑀕𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀏𑀓𑀁 𑀫𑁂 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀆𑀳. ‘‘𑀲𑀸𑀥𑀸𑀯𑀼𑀲𑁄, 𑀲𑀘𑁂𑀲𑀺 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑀮𑀸𑀓𑀪𑀢𑁆𑀢𑀁 𑀤𑁂𑀳𑀺, 𑀧𑀓𑁆𑀔𑀺𑀓𑀪𑀢𑁆𑀢𑀁 𑀤𑁂𑀳𑀺, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀳𑀺, 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀤𑁂𑀳𑀺, 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑀁 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑁂𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀳𑀺, 𑀏𑀓𑁂𑀦 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀳𑀺, 𑀏𑀓𑀁 𑀩𑀼𑀤𑁆𑀥𑀲𑀸𑀲𑀦𑁂 𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀁 𑀓𑀢𑁆𑀯𑀸 𑀧𑀼𑀦 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀢𑁄 𑀉𑀢𑁆𑀢𑀭𑀺𑀁 𑀅𑀜𑁆𑀜𑀁 𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺? ‘‘𑀆𑀯𑀼𑀲𑁄, 𑀢𑀻𑀡𑀺 𑀲𑀭𑀡𑀸𑀦𑀺 𑀕𑀡𑁆𑀳, 𑀧𑀜𑁆𑀘 𑀲𑀻𑀮𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺. 𑀢𑀸𑀦𑀺𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺𑀁 𑀧𑀼𑀘𑁆𑀙𑀺. ‘‘𑀢𑁂𑀦 𑀳𑀺 𑀤𑀲 𑀲𑀻𑀮𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀕𑀡𑁆𑀳𑀺. 𑀲𑁄 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑀸𑀫 𑀚𑀸𑀢𑁄. 𑀢𑀢𑁄 ‘‘𑀉𑀢𑁆𑀢𑀭𑀺𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀢𑁂𑀦 𑀳𑀺 𑀧𑀩𑁆𑀩𑀚𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀲𑁆𑀲𑁂𑀓𑁄 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀼 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀏𑀓𑁄 𑀯𑀺𑀦𑀬𑀥𑀭𑁄 𑀉𑀧𑀚𑁆𑀛𑀸𑀬𑁄. 𑀢𑀲𑁆𑀲 𑀮𑀤𑁆𑀥𑀽𑀧𑀲𑀫𑁆𑀧𑀤𑀲𑁆𑀲 𑀆𑀘𑀭𑀺𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀅𑀪𑀺𑀥𑀫𑁆𑀫𑁂 𑀧𑀜𑁆𑀳𑀁 𑀓𑀣𑁂𑀲𑀺 𑁋 ‘‘𑀩𑀼𑀤𑁆𑀥𑀲𑀸𑀲𑀦𑁂 𑀦𑀸𑀫 𑀇𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀻’’𑀢𑀺. 𑀉𑀧𑀚𑁆𑀛𑀸𑀬𑁄𑀧𑀺𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀯𑀺𑀦𑀬𑁂 𑀧𑀜𑁆𑀳𑀁 𑀓𑀣𑁂𑀲𑀺 𑁋 ‘‘𑀩𑀼𑀤𑁆𑀥𑀲𑀸𑀲𑀦𑁂 𑀦𑀸𑀫 𑀇𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀺, 𑀇𑀤𑀁 𑀓𑀧𑁆𑀧𑀢𑀺, 𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀪𑀸𑀭𑀺𑀬𑀁 𑀇𑀤𑀁 𑀓𑀫𑁆𑀫𑀁, 𑀅𑀳𑀁 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀧𑀩𑁆𑀩𑀚𑀺𑀢𑁄, 𑀇𑀥 𑀘 𑀫𑀫 𑀳𑀢𑁆𑀣𑀧𑀲𑀸𑀭𑀡𑀝𑁆𑀞𑀸𑀦𑀫𑁆𑀧𑀺 𑀦 𑀧𑀜𑁆𑀜𑀸𑀬𑀢𑀺, 𑀕𑁂𑀳𑁂 𑀞𑀢𑁆𑀯𑀸𑀯 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀁 𑀲𑀓𑁆𑀓𑀸, 𑀫𑀬𑀸 𑀕𑀺𑀳𑀺𑀦𑀸 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀚𑁆𑀛𑀸𑀬𑀁 𑀦 𑀓𑀭𑁄𑀢𑀺, 𑀉𑀤𑁆𑀤𑁂𑀲𑀁 𑀦 𑀕𑀡𑁆𑀳𑀸𑀢𑀺, 𑀓𑀺𑀲𑁄 𑀮𑀽𑀔𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀆𑀮𑀲𑁆𑀲𑀺𑀬𑀸𑀪𑀺𑀪𑀽𑀢𑁄 𑀓𑀘𑁆𑀙𑀼𑀧𑀭𑀺𑀓𑀺𑀡𑁆𑀡𑁄 𑀅𑀳𑁄𑀲𑀺.

𑀅𑀣 𑀦𑀁 𑀤𑀳𑀭𑀲𑀸𑀫𑀡𑁂𑀭𑀸, ‘‘𑀆𑀯𑀼𑀲𑁄, 𑀓𑀺𑀁 𑀢𑁆𑀯𑀁 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑁄𑀯 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀯 𑀅𑀳𑁄𑀲𑀺, 𑀧𑀡𑁆𑀟𑀼𑀭𑁄𑀕𑀸𑀪𑀺𑀪𑀽𑀢𑁄 𑀓𑀺𑀲𑁄 𑀮𑀽𑀔𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀆𑀮𑀲𑁆𑀲𑀺𑀬𑀸𑀪𑀺𑀪𑀽𑀢𑁄 𑀓𑀘𑁆𑀙𑀼𑀧𑀭𑀺𑀓𑀺𑀡𑁆𑀡𑁄, 𑀓𑀺𑀁 𑀢𑁂 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺. ‘‘𑀏𑀯𑀁 𑀓𑀺𑀭 𑀪𑀺𑀓𑁆𑀔𑀽’’𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄𑀯 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀲 𑀫𑁂 𑀆𑀘𑀭𑀺𑀬𑁄 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀉𑀧𑀚𑁆𑀛𑀸𑀬𑁄 𑀯𑀺𑀦𑀬𑀓𑀣𑀁 𑀓𑀣𑁂𑀲𑀺, 𑀲𑁆𑀯𑀸𑀳𑀁 ‘𑀇𑀥 𑀫𑁂 𑀳𑀢𑁆𑀣𑀧𑀲𑀸𑀭𑀡𑀝𑁆𑀞𑀸𑀦𑀫𑁆𑀧𑀺 𑀦𑀢𑁆𑀣𑀺, 𑀕𑀺𑀳𑀺𑀦𑀸 𑀳𑀼𑀢𑁆𑀯𑀸 𑀲𑀓𑁆𑀓𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀁, 𑀕𑀺𑀳𑀺 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺𑀁, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀓𑀫𑁂𑀯 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀅𑀯𑀲𑁂𑀲𑀸𑀦𑀁 𑀭𑀓𑁆𑀔𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀢𑀯 𑀘𑀺𑀢𑁆𑀢𑀫𑁂𑀯 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀫𑁂𑀯 𑀭𑀓𑁆𑀔𑀸𑀳𑀺, 𑀲𑀓𑁆𑀓𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺 𑀇𑀫𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬. ‘‘𑀲𑀼𑀤𑀼𑀤𑁆𑀤𑀲𑀁 𑀲𑀼𑀦𑀺𑀧𑀼𑀡𑀁, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑀁;

𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻, 𑀘𑀺𑀢𑁆𑀢𑀁 𑀕𑀼𑀢𑁆𑀢𑀁 𑀲𑀼𑀔𑀸𑀯𑀳’’𑀦𑁆𑀢𑀺.

𑀢𑀢𑁆𑀣 𑀲𑀼𑀤𑀼𑀤𑁆𑀤𑀲𑀦𑁆𑀢𑀺 𑀲𑀼𑀝𑁆𑀞𑀼 𑀤𑀼𑀤𑁆𑀤𑀲𑀁. 𑀲𑀼𑀦𑀺𑀧𑀼𑀡𑀦𑁆𑀢𑀺 𑀲𑀼𑀝𑁆𑀞𑀼 𑀦𑀺𑀧𑀼𑀡𑀁 𑀧𑀭𑀫𑀲𑀡𑁆𑀳𑀁. 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀮𑀪𑀺𑀢𑀩𑁆𑀩𑀸𑀮𑀪𑀺𑀢𑀩𑁆𑀩𑀬𑀼𑀢𑁆𑀢𑀸𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀧𑀢𑀦𑀲𑀻𑀮𑀁. 𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻𑀢𑀺 𑀅𑀦𑁆𑀥𑀩𑀸𑀮𑁄 𑀤𑀼𑀫𑁆𑀫𑁂𑀥𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀘𑀺𑀢𑁆𑀢𑀯𑀲𑀺𑀓𑁄 𑀳𑀼𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀫𑁂𑀥𑀸𑀯𑀻 𑀧𑀦 𑀧𑀡𑁆𑀟𑀺𑀢𑁄𑀯 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑁆𑀯𑀫𑁆𑀧𑀺 𑀘𑀺𑀢𑁆𑀢𑀫𑁂𑀯 𑀕𑁄𑀧𑁂𑀳𑀺. 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀕𑀼𑀢𑁆𑀢𑀁 𑀲𑀼𑀔𑀸𑀯𑀳𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀆𑀯𑀳𑀢𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁, 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀲𑀗𑁆𑀖𑀭𑀓𑁆𑀔𑀺𑀢𑀪𑀸𑀕𑀺𑀦𑁂𑀬𑁆𑀬𑀢𑁆𑀣𑁂𑀭𑀯𑀢𑁆𑀣𑀼

𑀤𑀽𑀭𑀗𑁆𑀕𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀦𑀸𑀫 𑀳𑀼𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀻 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀪𑀸𑀕𑀺𑀦𑁂𑀬𑁆𑀬𑀲𑀗𑁆𑀖𑀭𑀓𑁆𑀔𑀺𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑀸𑀭𑀸𑀫𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸, ‘‘𑀏𑀓𑀁 𑀲𑀢𑁆𑀢𑀳𑀢𑁆𑀣𑀁, 𑀏𑀓𑀁 𑀅𑀝𑁆𑀞𑀳𑀢𑁆𑀣’’𑀦𑁆𑀢𑀺 𑀤𑁆𑀯𑁂 𑀯𑀲𑁆𑀲𑀸𑀯𑀸𑀲𑀺𑀓𑀲𑀸𑀝𑀓𑁂 𑀮𑀪𑀺𑀢𑁆𑀯𑀸 𑀅𑀝𑁆𑀞𑀳𑀢𑁆𑀣𑀁 ‘‘𑀉𑀧𑀚𑁆𑀛𑀸𑀬𑀲𑁆𑀲 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀲𑀢𑁆𑀢𑀳𑀢𑁆𑀣𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑁄 ‘‘𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑁂 𑀯𑀺𑀳𑀸𑀭𑀁 𑀅𑀦𑀸𑀕𑀢𑁂𑀬𑁂𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀲𑁆𑀲 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀤𑁄𑀤𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸𑀕𑀫𑀦𑀪𑀸𑀯𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀸𑀮𑀯𑀡𑁆𑀝𑀁 𑀆𑀤𑀸𑀬 𑀩𑀻𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀤𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑀁 𑀲𑀸𑀝𑀓𑀁 𑀆𑀦𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀩𑀻𑀚𑀬𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀗𑁆𑀖𑀭𑀓𑁆𑀔𑀺𑀢, 𑀫𑀬𑁆𑀳𑀁 𑀘𑀻𑀯𑀭𑀁 𑀧𑀭𑀺𑀧𑀼𑀡𑁆𑀡𑀁, 𑀢𑁆𑀯𑀫𑁂𑀯 𑀧𑀭𑀺𑀪𑀼𑀜𑁆𑀚𑀸’’𑀢𑀺. ‘‘𑀪𑀦𑁆𑀢𑁂, 𑀫𑀬𑀸 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀬𑀁 𑀢𑀼𑀫𑁆𑀳𑀸𑀓𑀫𑁂𑀯 𑀲𑀮𑁆𑀮𑀓𑁆𑀔𑀺𑀢𑁄, 𑀧𑀭𑀺𑀪𑁄𑀕𑀁 𑀓𑀭𑁄𑀣𑀸’’𑀢𑀺. ‘‘𑀳𑁄𑀢𑀼, 𑀲𑀗𑁆𑀖𑀭𑀓𑁆𑀔𑀺𑀢, 𑀧𑀭𑀺𑀧𑀼𑀡𑁆𑀡𑀁 𑀫𑁂 𑀘𑀻𑀯𑀭𑀁, 𑀢𑁆𑀯𑀫𑁂𑀯 𑀧𑀭𑀺𑀪𑀼𑀜𑁆𑀚𑀸’’𑀢𑀺. ‘‘𑀪𑀦𑁆𑀢𑁂, 𑀫𑀸 𑀏𑀯𑀁 𑀓𑀭𑁄𑀣, 𑀢𑀼𑀫𑁆𑀳𑁂𑀳𑀺 𑀧𑀭𑀺𑀪𑀼𑀢𑁆𑀢𑁂 𑀫𑀬𑁆𑀳𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀲𑁆𑀲𑀧𑀺 𑀣𑁂𑀭𑁄 𑀦 𑀇𑀘𑁆𑀙𑀺𑀬𑁂𑀯.

𑀏𑀯𑀁 𑀲𑁄 𑀩𑀻𑀚𑀬𑀫𑀸𑀦𑁄 𑀞𑀺𑀢𑁄𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀣𑁂𑀭𑀲𑁆𑀲 𑀕𑀺𑀳𑀺𑀓𑀸𑀮𑁂 𑀪𑀸𑀕𑀺𑀦𑁂𑀬𑁆𑀬𑁄, 𑀧𑀩𑁆𑀩𑀚𑀺𑀢𑀓𑀸𑀮𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀏𑀯𑀫𑁆𑀧𑀺 𑀫𑀬𑀸 𑀲𑀤𑁆𑀥𑀺𑀁 𑀉𑀧𑀚𑁆𑀛𑀸𑀬𑁄 𑀧𑀭𑀺𑀪𑁄𑀕𑀁 𑀦 𑀓𑀢𑁆𑀢𑀼𑀓𑀸𑀫𑁄. 𑀇𑀫𑀲𑁆𑀫𑀺𑀁 𑀫𑀬𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀅𑀓𑀭𑁄𑀦𑁆𑀢𑁂 𑀓𑀺𑀁 𑀫𑁂 𑀲𑀫𑀡𑀪𑀸𑀯𑁂𑀦, 𑀕𑀺𑀳𑀺 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀤𑀼𑀲𑁆𑀲𑀡𑁆𑀞𑀸𑀧𑀺𑀢𑁄 𑀖𑀭𑀸𑀯𑀸𑀲𑁄, 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀕𑀺𑀳𑀺𑀪𑀽𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀳𑀢𑁆𑀣𑀲𑀸𑀝𑀓𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀏𑀓𑀁 𑀏𑀴𑀺𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀏𑀴𑀺𑀓𑀸 𑀦𑀸𑀫 𑀔𑀺𑀧𑁆𑀧𑀁 𑀯𑀺𑀚𑀸𑀬𑀢𑀺, 𑀲𑁆𑀯𑀸𑀳𑀁 𑀯𑀺𑀚𑀸𑀢𑀁 𑀯𑀺𑀚𑀸𑀢𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀫𑀽𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀽𑀮𑁂 𑀩𑀳𑀽 𑀓𑀢𑁆𑀯𑀸 𑀏𑀓𑀁 𑀧𑀚𑀸𑀧𑀢𑀺𑀁 𑀆𑀦𑁂𑀲𑁆𑀲𑀸𑀫𑀺, 𑀲𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀫𑀫 𑀫𑀸𑀢𑀼𑀮𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀘𑀽𑀴𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀜𑁆𑀘 𑀪𑀭𑀺𑀬𑀜𑁆𑀘 𑀆𑀤𑀸𑀬 𑀫𑀸𑀢𑀼𑀮𑀁 𑀯𑀦𑁆𑀤𑀺𑀢𑀼𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀆𑀕𑀘𑁆𑀙𑀦𑁆𑀢𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀫 𑀪𑀭𑀺𑀬𑀁 𑀏𑀯𑀁 𑀯𑀓𑁆𑀔𑀸𑀫𑀺 𑁋 ‘𑀆𑀦𑁂𑀳𑀺 𑀢𑀸𑀯 𑀫𑁂 𑀧𑀼𑀢𑁆𑀢𑀁 𑀯𑀳𑀺𑀲𑁆𑀲𑀸𑀫𑀺𑀦’𑀦𑁆𑀢𑀺. 𑀲𑀸 ‘𑀓𑀺𑀁 𑀢𑁂 𑀧𑀼𑀢𑁆𑀢𑁂𑀦, 𑀏𑀳𑀺, 𑀇𑀫𑀁 𑀬𑀸𑀦𑀓𑀁 𑀧𑀸𑀚𑁂𑀳𑀻’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸, ‘𑀅𑀳𑀁 𑀦𑁂𑀲𑁆𑀲𑀸𑀫𑀺 𑀦’𑀦𑁆𑀢𑀺 𑀦𑁂𑀢𑁆𑀯𑀸 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀘𑀓𑁆𑀓𑀧𑀣𑁂 𑀙𑀟𑁆𑀟𑁂𑀲𑁆𑀲𑀢𑀺. 𑀅𑀣𑀲𑁆𑀲 𑀲𑀭𑀻𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘𑀓𑁆𑀓𑀁 𑀕𑀫𑀺𑀲𑁆𑀲𑀢𑀺, 𑀅𑀣 𑀦𑀁 ‘𑀢𑁆𑀯𑀁 𑀫𑀫 𑀧𑀼𑀢𑁆𑀢𑀁 𑀦𑁂𑀯 𑀫𑀬𑁆𑀳𑀁 𑀅𑀤𑀸𑀲𑀺, 𑀦𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺 𑀦𑀸𑀲𑀺𑀢𑁄𑀲𑁆𑀫𑀺 𑀢𑀬𑀸’𑀢𑀺 𑀯𑀢𑁆𑀯𑀸 𑀧𑀢𑁄𑀤𑀬𑀝𑁆𑀞𑀺𑀬𑀸 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀲𑁄 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄𑀯 𑀞𑀢𑁆𑀯𑀸 𑀩𑀻𑀚𑀬𑀫𑀸𑀦𑁄 𑀣𑁂𑀭𑀲𑁆𑀲 𑀲𑀻𑀲𑁂 𑀢𑀸𑀮𑀯𑀡𑁆𑀝𑁂𑀦 𑀧𑀳𑀭𑀺. 𑀣𑁂𑀭𑁄 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀲𑀻𑀲𑁂 𑀧𑀳𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑁂𑀦 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀲𑀩𑁆𑀩𑀁 𑀜𑀢𑁆𑀯𑀸, ‘‘𑀲𑀗𑁆𑀖𑀭𑀓𑁆𑀔𑀺𑀢, 𑀫𑀸𑀢𑀼𑀕𑀸𑀫𑀲𑁆𑀲 𑀧𑀳𑀸𑀭𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀓𑁄 𑀏𑀢𑁆𑀣 𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀤𑁄𑀲𑁄’’𑀢𑀺 𑀆𑀳. 𑀲𑁄 ‘‘𑀅𑀳𑁄 𑀦𑀝𑁆𑀞𑁄𑀫𑁆𑀳𑀺, 𑀜𑀸𑀢𑀁 𑀓𑀺𑀭 𑀫𑁂 𑀉𑀧𑀚𑁆𑀛𑀸𑀬𑁂𑀦 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁, 𑀓𑀺𑀁 𑀫𑁂 𑀲𑀫𑀡𑀪𑀸𑀯𑁂𑀦𑀸’’𑀢𑀺 𑀢𑀸𑀮𑀯𑀡𑁆𑀝𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄.

𑀅𑀣 𑀦𑀁 𑀤𑀳𑀭𑀸 𑀘 𑀲𑀸𑀫𑀡𑁂𑀭𑀸 𑀘 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀆𑀕𑀢𑀢𑁆𑀣, 𑀏𑀓𑁄 𑀯𑁄 𑀪𑀺𑀓𑁆𑀔𑀼 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀇𑀫𑀁 𑀤𑀳𑀭𑀁 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑀫𑁆𑀳𑀸’’𑀢𑀺. ‘‘𑀏𑀯𑀁 𑀓𑀺𑀭 𑀪𑀺𑀓𑁆𑀔𑀽’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀫𑀢𑁆𑀣𑀁 𑀢𑁂 𑀪𑀺𑀓𑁆𑀔𑀼 𑀏𑀯𑀁 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀦𑀦𑀼 𑀢𑁆𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄, 𑀫𑀸𑀤𑀺𑀲𑀲𑁆𑀲 𑀦𑀸𑀫 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀫𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀸 𑀲𑀓𑀤𑀸𑀕𑀸𑀫𑀻𑀢𑀺 𑀯𑀸 𑀅𑀦𑀸𑀕𑀸𑀫𑀻𑀢𑀺 𑀯𑀸 𑀅𑀭𑀳𑀸𑀢𑀺 𑀯𑀸 𑀯𑀤𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀺𑀫𑀢𑁆𑀣𑀁 𑀏𑀯𑀁 𑀪𑀸𑀭𑀺𑀬𑀁 𑀓𑀫𑁆𑀫𑀫𑀓𑀸𑀲𑀻’’𑀢𑀺? ‘‘𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺? 𑀲𑁄 𑀏𑀯𑀁 𑀯𑀲𑁆𑀲𑀸𑀯𑀸𑀲𑀺𑀓𑀲𑀸𑀝𑀓𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀣𑁂𑀭𑀲𑁆𑀲 𑀢𑀸𑀮𑀯𑀡𑁆𑀝𑁂𑀦 𑀧𑀳𑀸𑀭𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀮𑀸𑀢𑁄𑀲𑁆𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀏𑀳𑀺 𑀪𑀺𑀓𑁆𑀔𑀼, 𑀫𑀸 𑀘𑀺𑀦𑁆𑀢𑀬𑀺 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀤𑀽𑀭𑁂 𑀳𑁄𑀦𑁆𑀢𑀫𑁆𑀧𑀺 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑀓𑀚𑀸𑀢𑀺𑀓𑀁, 𑀭𑀸𑀕𑀤𑁄𑀲𑀫𑁄𑀳𑀩𑀦𑁆𑀥𑀦𑀸 𑀫𑀼𑀘𑁆𑀘𑀦𑀢𑁆𑀣𑀸𑀬 𑀯𑀸𑀬𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁭. ‘‘𑀤𑀽𑀭𑀗𑁆𑀕𑀫𑀁 𑀏𑀓𑀘𑀭𑀁, 𑀅𑀲𑀭𑀻𑀭𑀁 𑀕𑀼𑀳𑀸𑀲𑀬𑀁;

𑀬𑁂 𑀘𑀺𑀢𑁆𑀢𑀁 𑀲𑀁𑀬𑀫𑁂𑀲𑁆𑀲𑀦𑁆𑀢𑀺, 𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸’’𑀢𑀺.

𑀢𑀢𑁆𑀣 𑀤𑀽𑀭𑀗𑁆𑀕𑀫𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀳𑀺 𑀫𑀓𑁆𑀓𑀝𑀲𑀼𑀢𑁆𑀢𑀫𑀢𑁆𑀢𑀓𑀫𑁆𑀧𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀪𑀸𑀕𑁂𑀦 𑀕𑀫𑀦𑀸𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀤𑀽𑀭𑁂 𑀲𑀦𑁆𑀢𑀫𑁆𑀧𑀺 𑀧𑀦 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀤𑀽𑀭𑀗𑁆𑀕𑀫𑀁 𑀦𑀸𑀫 𑀚𑀸𑀢𑀁. 𑀲𑀢𑁆𑀢𑀝𑁆𑀞𑀘𑀺𑀢𑁆𑀢𑀸𑀦𑀺 𑀧𑀦 𑀏𑀓𑀢𑁄 𑀓𑀡𑁆𑀡𑀺𑀓𑀩𑀤𑁆𑀥𑀸𑀦𑀺 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀏𑀓𑁂𑀓𑀫𑁂𑀯 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀧𑀼𑀦 𑀏𑀓𑁂𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀓𑀘𑀭𑀁 𑀦𑀸𑀫 𑀚𑀸𑀢𑀁. 𑀘𑀺𑀢𑁆𑀢𑀲𑁆𑀲 𑀲𑀭𑀻𑀭𑀲𑀡𑁆𑀞𑀸𑀦𑀁 𑀯𑀸 𑀦𑀻𑀮𑀸𑀤𑀺𑀧𑁆𑀧𑀓𑀸𑀭𑁄 𑀯𑀡𑁆𑀡𑀪𑁂𑀤𑁄 𑀯𑀸 𑀦𑀢𑁆𑀣𑀻𑀢𑀺 𑀅𑀲𑀭𑀻𑀭𑀁 𑀦𑀸𑀫 𑀚𑀸𑀢𑀁. 𑀕𑀼𑀳𑀸 𑀦𑀸𑀫 𑀘𑀢𑀼𑀫𑀳𑀸𑀪𑀽𑀢𑀕𑀼𑀳𑀸, 𑀇𑀤𑀜𑁆𑀘 𑀳𑀤𑀬𑀭𑀽𑀧𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺 𑀕𑀼𑀳𑀸𑀲𑀬𑀁 𑀦𑀸𑀫 𑀚𑀸𑀢𑀁. 𑀬𑁂 𑀘𑀺𑀢𑁆𑀢𑀦𑁆𑀢𑀺 𑀬𑁂 𑀓𑁂𑀘𑀺 𑀧𑀼𑀭𑀺𑀲𑀸 𑀯𑀸 𑀇𑀢𑁆𑀣𑀺𑀬𑁄 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀅𑀦𑀼𑀧𑁆𑀧𑀚𑁆𑀚𑀦𑀓𑀓𑀺𑀮𑁂𑀲𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀤𑁂𑀦𑁆𑀢𑀸 𑀲𑀢𑀺𑀲𑀫𑁆𑀫𑁄𑀲𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀧𑀚𑀳𑀦𑁆𑀢𑀸 𑀘𑀺𑀢𑁆𑀢𑀁 𑀲𑀁𑀬𑀫𑁂𑀲𑁆𑀲𑀦𑁆𑀢𑀺 𑀲𑀁𑀬𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸𑀢𑀺 𑀲𑀩𑁆𑀩𑁂𑀢𑁂 𑀓𑀺𑀮𑁂𑀲𑀩𑀦𑁆𑀥𑀦𑀸𑀪𑀸𑀯𑁂𑀦 𑀫𑀸𑀭𑀩𑀦𑁆𑀥𑀦𑀲𑀗𑁆𑀔𑀸𑀢𑀸 𑀢𑁂𑀪𑀽𑀫𑀓𑀯𑀝𑁆𑀝𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀪𑀸𑀕𑀺𑀦𑁂𑀬𑁆𑀬𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀚𑀸𑀢𑀸, 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀗𑁆𑀖𑀭𑀓𑁆𑀔𑀺𑀢𑀪𑀸𑀕𑀺𑀦𑁂𑀬𑁆𑀬𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀘𑀺𑀢𑁆𑀢𑀳𑀢𑁆𑀣𑀢𑁆𑀣𑁂𑀭𑀯𑀢𑁆𑀣𑀼

𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑀳𑀢𑁆𑀣𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀦𑀝𑁆𑀞𑀕𑁄𑀡𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀕𑁄𑀡𑀁 𑀤𑀺𑀲𑁆𑀯𑀸 𑀕𑁄𑀬𑀽𑀣𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, ‘‘𑀅𑀯𑀲𑁆𑀲𑀁 𑀅𑀬𑁆𑀬𑀸𑀦𑀁 𑀲𑀦𑁆𑀢𑀺𑀓𑁂 𑀆𑀳𑀸𑀭𑀫𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀧𑀻𑀴𑀺𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀪𑀺𑀓𑁆𑀔𑀽𑀦𑀁 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀪𑀼𑀢𑁆𑀢𑀸𑀯𑀲𑁂𑀲𑀓𑀁 𑀪𑀢𑁆𑀢𑀁 𑀳𑁄𑀢𑀺, 𑀢𑁂 𑀢𑀁 𑀙𑀸𑀢𑀓𑀧𑀻𑀴𑀺𑀢𑀁 𑀤𑀺𑀲𑁆𑀯𑀸, ‘‘𑀇𑀢𑁄 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀸𑀳𑀻’’𑀢𑀺 𑀯𑀤𑀺𑀁𑀲𑀼. 𑀩𑀼𑀤𑁆𑀥𑀓𑀸𑀮𑁂 𑀘 𑀧𑀦 𑀅𑀦𑁂𑀓𑀲𑀽𑀧𑀩𑁆𑀬𑀜𑁆𑀚𑀦𑀁 𑀪𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁄 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀺𑀁, 𑀪𑀦𑁆𑀢𑁂, 𑀅𑀚𑁆𑀚, 𑀅𑀬𑁆𑀬𑀸, 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑀁 𑀅𑀕𑀫𑀁𑀲𑀽’’𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺, 𑀉𑀧𑀸𑀲𑀓, 𑀪𑀺𑀓𑁆𑀔𑀽 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀦𑀺𑀩𑀤𑁆𑀥𑀁 𑀮𑀪𑀦𑁆𑀢𑀻’’𑀢𑀺. 𑀲𑁄 ‘‘𑀫𑀬𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑀺𑀩𑀤𑁆𑀥𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀧𑀺 𑀏𑀯𑀁 𑀫𑀥𑀼𑀭𑀩𑁆𑀬𑀜𑁆𑀚𑀦𑀁 𑀪𑀢𑁆𑀢𑀁 𑀦 𑀮𑀪𑀸𑀫, 𑀇𑀫𑁂 𑀓𑀺𑀭 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀺, 𑀓𑀺𑀁 𑀫𑁂 𑀕𑀺𑀳𑀺𑀪𑀸𑀯𑁂𑀦, 𑀪𑀺𑀓𑁆𑀔𑀼 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺 𑀧𑀩𑁆𑀩𑀸𑀚𑁂𑀲𑀼𑀁.

𑀲𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀩𑁆𑀩𑀧𑁆𑀧𑀓𑀸𑀭𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀅𑀓𑀸𑀲𑀺. 𑀲𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑁂𑀦 𑀮𑀸𑀪𑀲𑀓𑁆𑀓𑀸𑀭𑁂𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀣𑀽𑀮𑀲𑀭𑀻𑀭𑁄 𑀅𑀳𑁄𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀢𑁂𑀦, 𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑁂𑀳𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀕𑁂𑀳𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀢𑀺𑀧𑀸𑀳𑁂𑀦𑁂𑀯 𑀲𑀭𑀻𑀭𑀁 𑀫𑀺𑀮𑀸𑀬𑀺. 𑀢𑀢𑁄 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀤𑀼𑀓𑁆𑀔𑁂𑀦, 𑀲𑀫𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀯𑀺𑀩𑁆𑀪𑀫𑀺, 𑀧𑀩𑁆𑀩𑀚𑀺𑀢𑀓𑀸𑀮𑁂 𑀧𑀦 𑀪𑀺𑀓𑁆𑀔𑀽𑀦𑀁 𑀉𑀧𑀓𑀸𑀭𑀓𑁄 𑀳𑁄𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀧𑀼𑀦𑀧𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸, ‘‘𑀓𑀺𑀁 𑀫𑁂 𑀕𑀺𑀳𑀺𑀪𑀸𑀯𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀉𑀧𑀓𑀸𑀭𑀯𑀲𑁂𑀦 𑀧𑀼𑀦 𑀧𑀩𑁆𑀩𑀸𑀚𑀬𑀺𑀁𑀲𑀼. 𑀏𑀯𑀁 𑀲𑁄 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀙𑀓𑁆𑀔𑀢𑁆𑀢𑀼𑀁 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺𑀢𑁄. 𑀢𑀲𑁆𑀲 𑀪𑀺𑀓𑁆𑀔𑀽 ‘‘𑀏𑀲 𑀘𑀺𑀢𑁆𑀢𑀯𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀻’’𑀢𑀺 𑀘𑀺𑀢𑁆𑀢𑀳𑀢𑁆𑀣𑀢𑁆𑀣𑁂𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼.

𑀢𑀲𑁆𑀲𑁂𑀯𑀁 𑀅𑀧𑀭𑀸𑀧𑀭𑀁 𑀯𑀺𑀘𑀭𑀦𑁆𑀢𑀲𑁆𑀲𑁂𑀯 𑀪𑀭𑀺𑀬𑀸 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀲𑁄 𑀲𑀢𑁆𑀢𑀫𑁂 𑀯𑀸𑀭𑁂 𑀅𑀭𑀜𑁆𑀜𑀢𑁄 𑀓𑀲𑀺𑀪𑀡𑁆𑀟𑀫𑀸𑀤𑀸𑀬 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀓𑀁 𑀞𑀧𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀓𑀸𑀲𑀸𑀯𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀩𑁆𑀪𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲 𑀪𑀭𑀺𑀬𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀢𑀲𑁆𑀲𑀸 𑀦𑀺𑀯𑀢𑁆𑀣𑀲𑀸𑀝𑀓𑁄 𑀅𑀧𑀕𑀢𑁄 𑀳𑁄𑀢𑀺, 𑀫𑀼𑀔𑀢𑁄 𑀘 𑀮𑀸𑀮𑀸 𑀧𑀕𑁆𑀖𑀭𑀢𑀺, 𑀦𑀸𑀲𑀸 𑀖𑀼𑀭𑀖𑀼𑀭𑀸𑀬𑀢𑀺, 𑀫𑀼𑀔𑀁 𑀯𑀺𑀯𑀝𑁆𑀝𑀁, 𑀤𑀦𑁆𑀢𑀁 𑀖𑀁𑀲𑀢𑀺, 𑀲𑀸 𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀓𑀲𑀭𑀻𑀭𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀇𑀤’’𑀦𑁆𑀢𑀺 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸, ‘‘𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀩𑁆𑀩𑀚𑀺𑀢𑁆𑀯𑀸 𑀇𑀫𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀪𑀸𑀯𑁂 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀓𑀸𑀲𑀸𑀬𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀉𑀤𑀭𑁂 𑀩𑀦𑁆𑀥𑀺𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀔𑀫𑀺.

𑀅𑀣𑀲𑁆𑀲 𑀅𑀦𑀦𑁆𑀢𑀭𑀕𑁂𑀳𑁂 𑀞𑀺𑀢𑀸 𑀲𑀲𑁆𑀲𑀼 𑀢𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀧𑀝𑀺𑀉𑀓𑁆𑀓𑀡𑁆𑀞𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀓𑀸𑀲𑀸𑀯𑀁 𑀉𑀤𑀭𑁂 𑀩𑀦𑁆𑀥𑀺𑀢𑁆𑀯𑀸𑀯 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑁄 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄’’𑀢𑀺 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀫𑀸𑀦𑀁 𑀥𑀻𑀢𑀭𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀇𑀫𑀁 𑀤𑀺𑀲𑁆𑀯𑀸 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀕𑀢𑁄’’𑀢𑀺 𑀜𑀢𑁆𑀯𑀸 𑀥𑀻𑀢𑀭𑀁 𑀧𑀳𑀭𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺 𑀓𑀸𑀴𑀓𑀡𑁆𑀡𑀺, 𑀲𑀸𑀫𑀺𑀓𑁄 𑀢𑁂 𑀢𑀁 𑀦𑀺𑀤𑁆𑀤𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀕𑀢𑁄, 𑀦𑀢𑁆𑀣𑀺 𑀲𑁄 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀬𑁆𑀳’’𑀦𑁆𑀢𑀺 𑀆𑀳. ‘‘𑀅𑀧𑁂𑀳𑀺 𑀅𑀧𑁂𑀳𑀺, 𑀅𑀫𑁆𑀫, 𑀓𑀼𑀢𑁄 𑀢𑀲𑁆𑀲 𑀕𑀫𑀦𑀁 𑀅𑀢𑁆𑀣𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀧𑀼𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑁄𑀧𑀺 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀲𑁄 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫 𑀫𑀁𑀬𑀁 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁, 𑀓𑀼𑀢𑁄 𑀢𑀼𑀬𑁆𑀳𑀁 𑀲𑀫𑀡𑀪𑀸𑀯𑁄, 𑀲𑀢𑁆𑀣𑀓𑀦𑀺𑀲𑀸𑀦𑀧𑀸𑀲𑀸𑀡𑀲𑀤𑀺𑀲𑀁 𑀢𑀯 𑀲𑀻𑀲’’𑀦𑁆𑀢𑀺. ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀫𑀁 𑀅𑀦𑀼𑀓𑀫𑁆𑀧𑀸𑀬 𑀏𑀓𑀯𑀸𑀭𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀢𑁂 𑀢𑀁 𑀉𑀧𑀓𑀸𑀭𑀯𑀲𑁂𑀦 𑀧𑀩𑁆𑀩𑀸𑀚𑀬𑀺𑀁𑀲𑀼. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑁂𑀧𑀺 𑀦𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀘𑀺𑀢𑁆𑀢𑀳𑀢𑁆𑀣, 𑀢𑀯 𑀕𑀫𑀦𑀲𑀫𑀬𑀁 𑀢𑁆𑀯𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀢𑁂 𑀘𑀺𑀭𑀸𑀬𑀺𑀢’’𑀦𑁆𑀢𑀺. ‘‘𑀪𑀦𑁆𑀢𑁂, 𑀲𑀁𑀲𑀕𑁆𑀕𑀲𑁆𑀲 𑀅𑀢𑁆𑀣𑀺𑀪𑀸𑀯𑀓𑀸𑀮𑁂 𑀕𑀢𑀫𑁆𑀳𑀸, 𑀲𑁄 𑀦𑁄 𑀲𑀁𑀲𑀕𑁆𑀕𑁄 𑀙𑀺𑀦𑁆𑀦𑁄, 𑀇𑀤𑀸𑀦𑀺 𑀅𑀕𑀫𑀦𑀥𑀫𑁆𑀫𑀸 𑀚𑀸𑀢𑀫𑁆𑀳𑀸’’𑀢𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀅𑀫𑁆𑀳𑁂𑀳𑀺 𑀏𑀯𑀁 𑀯𑀼𑀢𑁆𑀢𑁄 𑀏𑀯𑀁 𑀦𑀸𑀫 𑀓𑀣𑁂𑀲𑀺, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀅𑀪𑀽𑀢𑀁 𑀯𑀤𑀢𑀻’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀓𑀸𑀮𑁂 𑀲𑀤𑁆𑀥𑀫𑁆𑀫𑀁 𑀅𑀚𑀸𑀦𑀦𑀓𑀸𑀮𑁂 𑀕𑀫𑀦𑀸𑀕𑀫𑀦𑀁 𑀅𑀓𑀸𑀲𑀺, 𑀇𑀤𑀸𑀦𑀺𑀲𑁆𑀲 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘 𑀧𑀳𑀻𑀦’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀆𑀳 𑁋

𑁩𑁮. ‘‘𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑁄;

𑀧𑀭𑀺𑀧𑁆𑀮𑀯𑀧𑀲𑀸𑀤𑀲𑁆𑀲, 𑀧𑀜𑁆𑀜𑀸 𑀦 𑀧𑀭𑀺𑀧𑀽𑀭𑀢𑀺.

𑁩𑁯. ‘‘𑀅𑀦𑀯𑀲𑁆𑀲𑀼𑀢𑀘𑀺𑀢𑁆𑀢𑀲𑁆𑀲, 𑀅𑀦𑀦𑁆𑀯𑀸𑀳𑀢𑀘𑁂𑀢𑀲𑁄;

𑀧𑀼𑀜𑁆𑀜𑀧𑀸𑀧𑀧𑀳𑀻𑀦𑀲𑁆𑀲, 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀓𑀲𑁆𑀲𑀘𑀺 𑀦𑀺𑀩𑀤𑁆𑀥𑀁 𑀯𑀸 𑀣𑀸𑀯𑀭𑀁 𑀯𑀸 𑀦𑀢𑁆𑀣𑀺. 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀁 𑀯𑀺𑀬 𑀘 𑀣𑀼𑀲𑀭𑀸𑀲𑀺𑀫𑁆𑀳𑀺 𑀓𑁄𑀝𑁆𑀝𑀺𑀢𑀔𑀸𑀡𑀼𑀓𑁄 𑀯𑀺𑀬 𑀘 𑀔𑀮𑁆𑀮𑀸𑀝𑀲𑀻𑀲𑁂 𑀞𑀧𑀺𑀢𑀓𑀤𑀫𑁆𑀩𑀧𑀼𑀧𑁆𑀨𑀁 𑀯𑀺𑀬 𑀘 𑀦 𑀓𑀢𑁆𑀣𑀘𑀺 𑀲𑀡𑁆𑀞𑀸𑀢𑀺, 𑀓𑀤𑀸𑀘𑀺 𑀩𑀼𑀤𑁆𑀥𑀲𑀸𑀯𑀓𑁄 𑀳𑁄𑀢𑀺, 𑀓𑀤𑀸𑀘𑀺 𑀆𑀚𑀻𑀯𑀓𑁄, 𑀓𑀤𑀸𑀘𑀺 𑀦𑀺𑀕𑀡𑁆𑀞𑁄, 𑀓𑀤𑀸𑀘𑀺 𑀢𑀸𑀧𑀲𑁄. 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑁄 𑀦𑀸𑀫. 𑀢𑀲𑁆𑀲 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲. 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑁄𑀢𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀪𑁂𑀤𑀁 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀲𑀤𑁆𑀥𑀢𑀸𑀬 𑀯𑀸 𑀉𑀧𑁆𑀮𑀯𑀲𑀤𑁆𑀥𑀢𑀸𑀬 𑀯𑀸 𑀧𑀭𑀺𑀧𑁆𑀮𑀯𑀧𑀲𑀸𑀤𑀲𑁆𑀲 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑀸 𑀧𑀜𑁆𑀜𑀸 𑀦 𑀧𑀭𑀺𑀧𑀽𑀭𑀢𑀺. 𑀓𑀸𑀫𑀸𑀯𑀘𑀭𑀸𑀬𑀧𑀺 𑀅𑀧𑀭𑀺𑀧𑀽𑀭𑀬𑀫𑀸𑀦𑀸𑀬 𑀓𑀼𑀢𑁄𑀯 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸 𑀧𑀭𑀺𑀧𑀽𑀭𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀦𑀯𑀲𑁆𑀲𑀼𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀭𑀸𑀕𑁂𑀦 𑀅𑀢𑀺𑀦𑁆𑀢𑀘𑀺𑀢𑁆𑀢𑀲𑁆𑀲. 𑀅𑀦𑀦𑁆𑀯𑀸𑀳𑀢𑀘𑁂𑀢𑀲𑁄𑀢𑀺 ‘‘𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄’’𑀢𑀺 (𑀤𑀻. 𑀦𑀺. 𑁩.𑁩𑁧𑁯; 𑀯𑀺𑀪. 𑁯𑁪𑁧; 𑀫. 𑀦𑀺. 𑁧.𑁧𑁮𑁫) 𑀆𑀕𑀢𑀝𑁆𑀞𑀸𑀦𑁂 𑀤𑁄𑀲𑁂𑀦 𑀘𑀺𑀢𑁆𑀢𑀲𑁆𑀲 𑀧𑀳𑀢𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀤𑁄𑀲𑁂𑀦 𑀅𑀧𑁆𑀧𑀝𑀺𑀳𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀧𑀸𑀧𑀧𑀳𑀻𑀦𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀧𑀳𑀻𑀦𑀧𑀼𑀜𑁆𑀜𑀲𑁆𑀲 𑀘𑁂𑀯 𑀧𑀳𑀻𑀦𑀧𑀸𑀧𑀲𑁆𑀲 𑀘 𑀔𑀻𑀡𑀸𑀲𑀯𑀲𑁆𑀲. 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬𑀦𑁆𑀢𑀺 𑀔𑀻𑀡𑀸𑀲𑀯𑀲𑁆𑀲 𑀚𑀸𑀕𑀭𑀦𑁆𑀢𑀲𑁆𑀲𑁂𑀯 𑀅𑀪𑀬𑀪𑀸𑀯𑁄 𑀓𑀣𑀺𑀢𑁄 𑀯𑀺𑀬. 𑀲𑁄 𑀧𑀦 𑀲𑀤𑁆𑀥𑀸𑀤𑀻𑀳𑀺 𑀧𑀜𑁆𑀘𑀳𑀺 𑀚𑀸𑀕𑀭𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀚𑀸𑀕𑀭𑁄 𑀦𑀸𑀫. 𑀢𑀲𑁆𑀫𑀸 𑀢𑀲𑁆𑀲 𑀚𑀸𑀕𑀭𑀦𑁆𑀢𑀲𑁆𑀲𑀸𑀧𑀺 𑀅𑀚𑀸𑀕𑀭𑀦𑁆𑀢𑀲𑁆𑀲𑀸𑀧𑀺 𑀓𑀺𑀮𑁂𑀲𑀪𑀬𑀁 𑀦𑀢𑁆𑀣𑀺 𑀓𑀺𑀮𑁂𑀲𑀸𑀦𑀁 𑀅𑀧𑀘𑁆𑀙𑀸𑀯𑀢𑁆𑀢𑀦𑀢𑁄. 𑀦 𑀳𑀺 𑀢𑀁 𑀓𑀺𑀮𑁂𑀲𑀸 𑀅𑀦𑀼𑀩𑀦𑁆𑀥𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀦𑀼𑀧𑀕𑀫𑀦𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻’’𑀢𑀺 (𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁭).

𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀲𑀨𑀮𑀸 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀪𑀸𑀭𑀺𑀬𑀸 𑀯𑀢𑀺𑀫𑁂, 𑀆𑀯𑀼𑀲𑁄, 𑀓𑀺𑀮𑁂𑀲𑀸 𑀦𑀸𑀫, 𑀏𑀯𑀭𑀽𑀧𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀸𑀬𑀲𑀫𑁆𑀧𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 𑀓𑀺𑀮𑁂𑀲𑁂𑀳𑀺 𑀆𑀮𑁄𑀴𑀺𑀢𑁄 𑀲𑀢𑁆𑀢𑀯𑀸𑀭𑁂 𑀕𑀺𑀳𑀻 𑀳𑀼𑀢𑁆𑀯𑀸 𑀲𑀢𑁆𑀢𑀯𑀸𑀭𑁂 𑀧𑀩𑁆𑀩𑀚𑀺𑀢𑁄’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀢𑀁 𑀓𑀣𑀸𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀕𑀫𑀦𑁂𑀦 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀏𑀯𑀫𑁂𑀯, 𑀪𑀺𑀓𑁆𑀔𑀯𑁂, 𑀓𑀺𑀮𑁂𑀲𑀸 𑀦𑀸𑀫 𑀪𑀸𑀭𑀺𑀬𑀸, 𑀲𑀘𑁂 𑀏𑀢𑁂 𑀭𑀽𑀧𑀺𑀦𑁄 𑀳𑀼𑀢𑁆𑀯𑀸 𑀓𑀢𑁆𑀣𑀘𑀺 𑀧𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬𑀼𑀁, 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄𑀢𑀺 𑀑𑀓𑀸𑀲𑁄 𑀦𑁂𑀲𑀁 𑀦 𑀪𑀯𑁂𑀬𑁆𑀬, 𑀫𑀸𑀤𑀺𑀲𑀫𑁆𑀧𑀺 𑀦𑀸𑀫𑁂𑀢𑁂 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀁 𑀧𑀼𑀭𑀺𑀲𑀸𑀚𑀸𑀦𑁂𑀬𑁆𑀬𑀁 𑀆𑀮𑁄𑀴𑁂𑀦𑁆𑀢𑀺, 𑀅𑀯𑀲𑁂𑀲𑁂𑀲𑀼 𑀓𑀸 𑀓𑀣𑀸? ‘‘𑀅𑀳𑀜𑁆𑀳𑀺 𑀅𑀟𑁆𑀠𑀦𑀸𑀴𑀺𑀫𑀢𑁆𑀢𑀁 𑀯𑀭𑀓𑀘𑁄𑀭𑀓𑀁 𑀓𑀼𑀡𑁆𑀞𑀓𑀼𑀤𑀸𑀮𑀜𑁆𑀘 𑀦𑀺𑀲𑁆𑀲𑀸𑀬 𑀙 𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑁄’’𑀢𑀺. ‘‘𑀓𑀤𑀸, 𑀪𑀦𑁆𑀢𑁂, 𑀓𑀤𑀸 𑀲𑀼𑀕𑀢𑀸’’𑀢𑀺? ‘‘𑀲𑀼𑀡𑀺𑀲𑁆𑀲𑀣, 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀲𑀼𑀡𑀸𑀣𑀸’’𑀢𑀺 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀓𑀼𑀤𑀸𑀮𑀧𑀡𑁆𑀟𑀺𑀢𑁄 𑀦𑀸𑀫 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀪𑀽𑀫𑀺𑀬𑀸 𑀢𑀺𑀦𑁆𑀢𑀸𑀬 ‘‘𑀕𑁂𑀳𑁂 𑀫𑁂 𑀅𑀟𑁆𑀠𑀦𑀸𑀴𑀺𑀫𑀢𑁆𑀢𑁄 𑀯𑀭𑀓𑀘𑁄𑀭𑀓𑁄 𑀘 𑀓𑀼𑀡𑁆𑀞𑀓𑀼𑀤𑀸𑀮𑀓𑁄 𑀘 𑀅𑀢𑁆𑀣𑀺, 𑀯𑀭𑀓𑀘𑁄𑀭𑀓𑀩𑀻𑀚𑀁 𑀫𑀸 𑀦𑀲𑁆𑀲𑀻’’𑀢𑀺 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀁 𑀞𑀸𑀦𑀁 𑀓𑀼𑀤𑀸𑀮𑁂𑀦 𑀓𑀲𑀺𑀢𑁆𑀯𑀸 𑀢𑀁 𑀩𑀻𑀚𑀁 𑀯𑀧𑀺𑀢𑁆𑀯𑀸 𑀯𑀢𑀺𑀁 𑀓𑀢𑁆𑀯𑀸 𑀧𑀓𑁆𑀓𑀓𑀸𑀮𑁂 𑀉𑀤𑁆𑀥𑀭𑀺𑀢𑁆𑀯𑀸 𑀦𑀸𑀴𑀺𑀫𑀢𑁆𑀢𑀩𑀻𑀚𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀔𑀸𑀤𑀺. 𑀲𑁄 ‘‘𑀓𑀺𑀁 𑀫𑁂 𑀤𑀸𑀦𑀺 𑀕𑁂𑀳𑁂𑀦, 𑀧𑀼𑀦 𑀅𑀝𑁆𑀞 𑀫𑀸𑀲𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀦𑀸𑀴𑀺𑀫𑀢𑁆𑀢𑀁 𑀯𑀭𑀓𑀘𑁄𑀭𑀓𑀜𑁆𑀘 𑀓𑀼𑀡𑁆𑀞𑀓𑀼𑀤𑀸𑀮𑀜𑁆𑀘 𑀦𑀺𑀲𑁆𑀲𑀸𑀬 𑀲𑀢𑁆𑀢𑀯𑀸𑀭𑁂 𑀕𑀺𑀳𑀻 𑀳𑀼𑀢𑁆𑀯𑀸 𑀲𑀢𑁆𑀢𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀧𑀦 𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀙 𑀯𑀸𑀭𑁂 𑀇𑀫𑀁 𑀓𑀼𑀡𑁆𑀞𑀓𑀼𑀤𑀸𑀮𑀁 𑀦𑀺𑀲𑁆𑀲𑀸𑀬 𑀕𑀺𑀳𑀻 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀓𑀢𑁆𑀣𑀘𑀺𑀤𑁂𑀯 𑀦𑀁 𑀙𑀟𑁆𑀟𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀕𑀗𑁆𑀕𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸, ‘‘𑀧𑀢𑀺𑀢𑀝𑁆𑀞𑀸𑀦𑀁 𑀧𑀲𑁆𑀲𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀁, 𑀬𑀣𑀸𑀲𑁆𑀲 𑀧𑀢𑀺𑀢𑀝𑁆𑀞𑀸𑀦𑀁 𑀦 𑀧𑀲𑁆𑀲𑀸𑀫𑀺, 𑀢𑀣𑀸 𑀦𑀁 𑀙𑀟𑁆𑀟𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀸𑀴𑀺𑀫𑀢𑁆𑀢𑀁 𑀩𑀻𑀚𑀁 𑀧𑀺𑀮𑁄𑀢𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀧𑀺𑀮𑁄𑀢𑀺𑀓𑀁 𑀓𑀼𑀤𑀸𑀮𑀨𑀮𑀓𑁂 𑀩𑀦𑁆𑀥𑀺𑀢𑁆𑀯𑀸 𑀓𑀼𑀤𑀸𑀮𑀁 𑀅𑀕𑁆𑀕𑀤𑀡𑁆𑀟𑀓𑁂 𑀕𑀳𑁂𑀢𑁆𑀯𑀸 𑀕𑀗𑁆𑀕𑀸𑀬 𑀢𑀻𑀭𑁂 𑀞𑀺𑀢𑁄 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑁆𑀯𑀸 𑀉𑀧𑀭𑀺𑀲𑀻𑀲𑁂 𑀢𑀺𑀓𑁆𑀔𑀢𑁆𑀢𑀼𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀔𑀺𑀧𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀢𑀺𑀢𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸 ‘‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀓𑀸𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀦𑀤𑀻𑀢𑀻𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑁆𑀳𑀸𑀦𑀢𑁆𑀣𑀸𑀬 𑀦𑀤𑀺𑀁 𑀑𑀢𑀺𑀡𑁆𑀡𑁄 𑀢𑀁 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺. 𑀭𑀸𑀚𑀽𑀦𑀜𑁆𑀘 𑀦𑀸𑀫 ‘‘𑀚𑀺𑀢𑀁 𑀫𑁂’’𑀢𑀺 𑀲𑀤𑁆𑀤𑁄 𑀅𑀫𑀦𑀸𑀧𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀳𑀁 𑀇𑀤𑀸𑀦𑀺 𑀅𑀫𑀺𑀢𑁆𑀢𑀫𑀤𑁆𑀤𑀦𑀁 𑀓𑀢𑁆𑀯𑀸 ‘𑀚𑀺𑀢𑀁 𑀫𑁂’𑀢𑀺 𑀆𑀕𑀢𑁄, 𑀢𑁆𑀯𑀁 𑀧𑀦 ‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’𑀢𑀺 𑀯𑀺𑀭𑀯𑀲𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀓𑀼𑀤𑀸𑀮𑀧𑀡𑁆𑀟𑀺𑀢𑁄 ‘‘𑀢𑁆𑀯𑀁 𑀩𑀸𑀳𑀺𑀭𑀓𑀘𑁄𑀭𑁂 𑀚𑀺𑀦𑀺, 𑀢𑀬𑀸 𑀚𑀺𑀢𑀁 𑀧𑀼𑀦 𑀅𑀯𑀚𑀺𑀢𑀫𑁂𑀯 𑀳𑁄𑀢𑀺, 𑀫𑀬𑀸 𑀧𑀦 𑀅𑀚𑁆𑀛𑀢𑁆𑀢𑀺𑀓𑁄 𑀮𑁄𑀪𑀘𑁄𑀭𑁄 𑀚𑀺𑀢𑁄, 𑀲𑁄 𑀧𑀼𑀦 𑀫𑀁 𑀦 𑀚𑀺𑀦𑀺𑀲𑁆𑀲𑀢𑀺, 𑀢𑀲𑁆𑀲𑁂𑀯 𑀚𑀬𑁄 𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀅𑀯𑀚𑀻𑀬𑀢𑀺;

𑀢𑀁 𑀔𑁄 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀦𑀸𑀯𑀚𑀻𑀬𑀢𑀻’’𑀢𑀺. (𑀚𑀸. 𑁧.𑁧.𑁭𑁦);

𑀢𑀁 𑀔𑀡𑀁𑀬𑁂𑀯 𑀘 𑀕𑀗𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀆𑀧𑁄𑀓𑀲𑀺𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑁄 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀭𑀸𑀚𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦 𑀧𑀩𑁆𑀩𑀚𑀺. 𑀬𑁄𑀚𑀦𑀫𑀢𑁆𑀢𑀸 𑀧𑀭𑀺𑀲𑀸 𑀅𑀳𑁄𑀲𑀺. 𑀅𑀧𑀭𑁄𑀧𑀺 𑀲𑀸𑀫𑀦𑁆𑀢𑀭𑀸𑀚𑀸 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸, ‘‘𑀢𑀲𑁆𑀲 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀢𑀣𑀸 𑀲𑀫𑀺𑀤𑁆𑀥𑀁 𑀦𑀕𑀭𑀁 𑀲𑀼𑀜𑁆𑀜𑀁 𑀤𑀺𑀲𑁆𑀯𑀸, ‘‘𑀏𑀯𑀭𑀽𑀧𑀁 𑀦𑀕𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀭𑀸𑀚𑀸 𑀑𑀭𑀓𑁂 𑀞𑀸𑀦𑁂 𑀦 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀸𑀧𑀺 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀧𑀩𑁆𑀩𑀚𑀺. 𑀏𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀲𑀢𑁆𑀢 𑀭𑀸𑀚𑀸𑀦𑁄 𑀧𑀩𑁆𑀩𑀚𑀺𑀁𑀲𑀼. 𑀲𑀢𑁆𑀢𑀬𑁄𑀚𑀦𑀺𑀓𑁄 𑀅𑀲𑁆𑀲𑀫𑁄 𑀅𑀳𑁄𑀲𑀺. 𑀲𑀢𑁆𑀢 𑀭𑀸𑀚𑀸𑀦𑁄 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸 𑀏𑀢𑁆𑀢𑀓𑀁 𑀚𑀦𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀤𑀸 𑀓𑀼𑀤𑀸𑀮𑀧𑀡𑁆𑀟𑀺𑀢𑁄 𑀅𑀳𑁄𑀲𑀺𑀁, 𑀓𑀺𑀮𑁂𑀲𑀸 𑀦𑀸𑀫𑁂𑀢𑁂 𑀏𑀯𑀁 𑀪𑀸𑀭𑀺𑀬𑀸’’𑀢𑀺 𑀆𑀳.

𑀘𑀺𑀢𑁆𑀢𑀳𑀢𑁆𑀣𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀓𑀼𑀫𑁆𑀪𑀽𑀧𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸, ‘‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀬𑁄𑀚𑀦𑀲𑀢𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀳𑀸𑀯𑀸𑀲𑀕𑀸𑀫𑀁 𑀅𑀕𑀫𑀁𑀲𑀼. 𑀅𑀣 𑀢𑁂 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀳𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀓𑀳𑀁, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀇𑀫𑀁 𑀢𑁂𑀫𑀸𑀲𑀁 𑀇𑀥𑁂𑀯 𑀯𑀲𑀣, 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀢𑁂𑀲𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸, ‘‘𑀅𑀯𑀺𑀤𑀽𑀭𑁂 𑀞𑀸𑀦𑁂 𑀫𑀳𑀦𑁆𑀢𑁄 𑀯𑀦𑀲𑀡𑁆𑀟𑁄 𑀅𑀢𑁆𑀣𑀺, 𑀏𑀢𑁆𑀣 𑀯𑀲𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁. 𑀪𑀺𑀓𑁆𑀔𑀽 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀁𑀲𑀼. 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀲𑀻𑀮𑀯𑀦𑁆𑀢𑁄, 𑀅𑀬𑁆𑀬𑀸, 𑀇𑀫𑀁 𑀯𑀦𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀬𑀼𑀢𑁆𑀢𑀁 𑀔𑁄 𑀧𑀦 𑀅𑀲𑁆𑀫𑀸𑀓𑀁 𑀅𑀬𑁆𑀬𑁂𑀲𑀼 𑀇𑀥 𑀯𑀲𑀦𑁆𑀢𑁂𑀲𑀼 𑀧𑀼𑀢𑁆𑀢𑀤𑀸𑀭𑁂 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑁂 𑀅𑀪𑀺𑀭𑀼𑀬𑁆𑀳 𑀯𑀲𑀺𑀢𑀼’’𑀦𑁆𑀢𑀺 𑀭𑀼𑀓𑁆𑀔𑀢𑁄 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼, ‘‘𑀅𑀬𑁆𑀬𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀚𑁆𑀚𑁂𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀅𑀤𑁆𑀥𑀸 𑀲𑁆𑀯𑁂 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀺𑀓𑁆𑀔𑀽𑀧𑀺 𑀧𑀼𑀦𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀼𑀦 𑀢𑀫𑁂𑀯 𑀯𑀦𑀲𑀡𑁆𑀟𑀁 𑀆𑀕𑀫𑀺𑀁𑀲𑀼. 𑀤𑁂𑀯𑀢𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑁆𑀯𑀸𑀢𑀦𑀸𑀬 𑀓𑁂𑀦𑀘𑀺 𑀦𑀺𑀫𑀦𑁆𑀢𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀧𑀼𑀦𑀸𑀕𑀘𑁆𑀙𑀢𑀺, 𑀅𑀚𑁆𑀚 𑀕𑀫𑀦𑀁 𑀦 𑀪𑀯𑀺𑀲𑁆𑀲𑀢𑀺, 𑀲𑁆𑀯𑁂 𑀕𑀫𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀪𑀽𑀫𑀺𑀬𑀫𑁂𑀯 𑀅𑀘𑁆𑀙𑀺𑀁𑀲𑀼.

𑀢𑀢𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀪𑀤𑀦𑁆𑀢𑀸 𑀇𑀫𑀁 𑀢𑁂𑀫𑀸𑀲𑀁 𑀇𑀥𑁂𑀯 𑀫𑀜𑁆𑀜𑁂 𑀯𑀲𑀺𑀲𑁆𑀲𑀦𑁆𑀢𑀺, 𑀇𑀥𑁂𑀯 𑀔𑁄 𑀧𑀦 𑀇𑀫𑁂𑀲𑀼 𑀯𑀲𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀭𑀼𑀓𑁆𑀔𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀫𑁆𑀧𑀺 𑀦 𑀬𑀼𑀢𑁆𑀢𑀁, 𑀢𑁂𑀫𑀸𑀲𑀁 𑀧𑀼𑀢𑁆𑀢𑀤𑀸𑀭𑁂 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀸𑀦𑀺𑀧𑀺 𑀤𑀼𑀓𑁆𑀔𑀸𑀦𑀺, 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀫𑁂 𑀪𑀺𑀓𑁆𑀔𑀽 𑀧𑀮𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀸 𑀢𑁂𑀲𑀼 𑀢𑁂𑀲𑀼 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀘𑁂𑀯 𑀘𑀗𑁆𑀓𑀫𑀦𑀓𑁄𑀝𑀻𑀲𑀼 𑀘 𑀙𑀺𑀦𑁆𑀦𑀲𑀻𑀲𑀸𑀦𑀺 𑀓𑀩𑀦𑁆𑀥𑀸𑀦𑀺 𑀤𑀲𑁆𑀲𑁂𑀢𑀼𑀁 𑀅𑀫𑀦𑀼𑀲𑁆𑀲𑀲𑀤𑁆𑀤𑀜𑁆𑀘 𑀪𑀸𑀯𑁂𑀢𑀼𑀁 𑀆𑀭𑀪𑀺𑀁𑀲𑀼. 𑀪𑀺𑀓𑁆𑀔𑀽𑀦𑀁 𑀔𑀺𑀧𑀺𑀢𑀓𑀸𑀲𑀸𑀤𑀬𑁄 𑀭𑁄𑀕𑀸 𑀧𑀯𑀢𑁆𑀢𑀺𑀁𑀲𑀼. 𑀢𑁂 𑀅𑀜𑁆𑀜𑀫𑀜𑁆𑀜𑀁 ‘‘𑀢𑀼𑀬𑁆𑀳𑀁, 𑀆𑀯𑀼𑀲𑁄, 𑀓𑀺𑀁 𑀭𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸, ‘‘𑀫𑀬𑁆𑀳𑀁 𑀔𑀺𑀧𑀺𑀢𑀭𑁄𑀕𑁄, 𑀫𑀬𑁆𑀳𑀁 𑀓𑀸𑀲𑁄’’𑀢𑀺 𑀯𑀢𑁆𑀯𑀸, ‘‘𑀆𑀯𑀼𑀲𑁄, 𑀅𑀳𑀁 𑀅𑀚𑁆𑀚 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀙𑀺𑀦𑁆𑀦𑀲𑀻𑀲𑀁 𑀅𑀤𑁆𑀤𑀲𑀁, 𑀅𑀳𑀁 𑀭𑀢𑁆𑀢𑀺𑀝𑁆𑀞𑀸𑀦𑁂 𑀓𑀩𑀦𑁆𑀥𑀁 𑀅𑀤𑁆𑀤𑀲𑀁, 𑀅𑀳𑀁 𑀤𑀺𑀯𑀸𑀝𑁆𑀞𑀸𑀦𑁂 𑀅𑀫𑀦𑀼𑀲𑁆𑀲𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀁, 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑀺𑀤𑀁 𑀞𑀸𑀦𑀁, 𑀅𑀫𑁆𑀳𑀸𑀓𑀁 𑀇𑀥 𑀅𑀨𑀸𑀲𑀼𑀓𑀁 𑀅𑀳𑁄𑀲𑀺, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀦𑁂 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀏𑀯𑀭𑀽𑀧𑀸𑀦𑀺 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀏𑀯𑀭𑀽𑀧𑀁 𑀅𑀨𑀸𑀲𑀼𑀓𑀁 𑀳𑁄𑀢𑀺, 𑀢𑁂𑀦 𑀫𑀬𑀁 ‘𑀯𑀚𑁆𑀚𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑀺𑀤𑀁 𑀞𑀸𑀦’𑀦𑁆𑀢𑀺 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑀸’’𑀢𑀺. ‘‘𑀪𑀺𑀓𑁆𑀔𑀯𑁂, 𑀢𑀢𑁆𑀣𑁂𑀯 𑀢𑀼𑀫𑁆𑀳𑀸𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂’’𑀢𑀺. ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀆𑀯𑀼𑀥𑀁 𑀅𑀕𑁆𑀕𑀳𑁂𑀢𑁆𑀯𑀸 𑀕𑀢𑀸, 𑀇𑀤𑀸𑀦𑀺 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺. ‘‘𑀓𑀢𑀭𑀸𑀯𑀼𑀥𑀁, 𑀪𑀦𑁆𑀢𑁂’’𑀢𑀺? 𑀲𑀢𑁆𑀣𑀸 ‘‘𑀅𑀳𑀁 𑀆𑀯𑀼𑀥𑀁 𑀯𑁄 𑀤𑀲𑁆𑀲𑀸𑀫𑀺, 𑀫𑀬𑀸 𑀤𑀺𑀦𑁆𑀦𑀁 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑁋

‘‘𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦, 𑀬𑀦𑁆𑀢 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘;

𑀲𑀓𑁆𑀓𑁄 𑀉𑀚𑀽 𑀘 𑀲𑀼𑀳𑀼𑀚𑀽 𑀘, 𑀲𑀼𑀯𑀘𑁄 𑀘𑀲𑁆𑀲 𑀫𑀼𑀤𑀼 𑀅𑀦𑀢𑀺𑀫𑀸𑀦𑀻’’𑀢𑀺. (𑀔𑀼. 𑀧𑀸. 𑁯.𑁧; 𑀲𑀼. 𑀦𑀺. 𑁧𑁪𑁩) 𑁋

𑀲𑀓𑀮𑀁 𑀫𑁂𑀢𑁆𑀢𑀲𑀼𑀢𑁆𑀢𑀁 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀇𑀫𑀁 𑀢𑀼𑀫𑁆𑀳𑁂 𑀩𑀳𑀺 𑀯𑀺𑀳𑀸𑀭𑀲𑁆𑀲 𑀯𑀦𑀲𑀡𑁆𑀟𑀢𑁄 𑀧𑀝𑁆𑀞𑀸𑀬 𑀲𑀚𑁆𑀛𑀸𑀬𑀦𑁆𑀢𑀸 𑀅𑀦𑁆𑀢𑁄𑀯𑀺𑀳𑀸𑀭𑀁 𑀧𑀯𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀩𑀳𑀺𑀯𑀺𑀳𑀸𑀭𑁂 𑀕𑀡𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀚𑁆𑀛𑀸𑀬𑀫𑀸𑀦𑀸 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀁𑀲𑀼. 𑀲𑀓𑀮𑀯𑀦𑀲𑀡𑁆𑀟𑁂 𑀤𑁂𑀯𑀢𑀸 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁 𑀆𑀧𑀼𑀘𑁆𑀙𑀺𑀁𑀲𑀼, 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀁 𑀆𑀧𑀼𑀘𑁆𑀙𑀺𑀁𑀲𑀼, 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼, 𑀧𑀓𑁆𑀓𑀥𑀽𑀧𑀦𑀢𑁂𑀮𑀁 𑀯𑀺𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀅𑀳𑁂𑀲𑀼𑀁. 𑀓𑀢𑁆𑀣𑀘𑀺 𑀅𑀫𑀦𑀼𑀲𑁆𑀲𑀲𑀤𑁆𑀤𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀢𑁂 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸, ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦𑀸𑀫 𑀪𑀺𑀚𑁆𑀚𑀦𑀓𑀝𑁆𑀞𑁂𑀦 𑀅𑀣𑀸𑀯𑀭𑀝𑁆𑀞𑁂𑀦 𑀓𑀼𑀮𑀸𑀮𑀪𑀸𑀚𑀦𑀲𑀤𑀺𑀲𑁄’’𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑀬𑀺𑀁𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀕𑀦𑁆𑀥𑀓𑀼𑀝𑀺𑀬𑀸 𑀦𑀺𑀲𑀺𑀦𑁆𑀦𑁄𑀯 𑀢𑁂𑀲𑀁 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀏𑀯𑀫𑁂𑀯, 𑀪𑀺𑀓𑁆𑀔𑀯𑁂, 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦𑀸𑀫 𑀪𑀺𑀚𑁆𑀚𑀦𑀓𑀝𑁆𑀞𑁂𑀦 𑀅𑀣𑀸𑀯𑀭𑀝𑁆𑀞𑁂𑀦 𑀓𑀼𑀮𑀸𑀮𑀪𑀸𑀚𑀦𑀲𑀤𑀺𑀲𑁄 𑀏𑀯𑀸’’𑀢𑀺 𑀯𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀬𑁄𑀚𑀦𑀲𑀢𑁂 𑀞𑀺𑀢𑁄𑀧𑀺 𑀅𑀪𑀺𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀭𑀽𑀧𑁂𑀦 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦. ‘‘𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀁𑀫 𑀯𑀺𑀤𑀺𑀢𑁆𑀯𑀸, 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸;

𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦, 𑀚𑀺𑀢𑀜𑁆𑀘 𑀭𑀓𑁆𑀔𑁂 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀓𑀼𑀫𑁆𑀪𑀽𑀧𑀫𑀦𑁆𑀢𑀺 𑀅𑀩𑀮𑀤𑀼𑀩𑁆𑀩𑀮𑀝𑁆𑀞𑁂𑀦 𑀅𑀦𑀤𑁆𑀥𑀦𑀺𑀬𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦 𑀇𑀫𑀁 𑀓𑁂𑀲𑀸𑀤𑀺𑀲𑀫𑀽𑀳𑀲𑀗𑁆𑀔𑀸𑀢𑀁 𑀓𑀸𑀬𑀁 𑀓𑀼𑀫𑁆𑀪𑀽𑀧𑀫𑀁 𑀓𑀼𑀮𑀸𑀮𑀪𑀸𑀚𑀦𑀲𑀤𑀺𑀲𑀁 𑀯𑀺𑀤𑀺𑀢𑁆𑀯𑀸. 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸𑀢𑀺 𑀦𑀕𑀭𑀁 𑀦𑀸𑀫 𑀩𑀳𑀺𑀤𑁆𑀥𑀸 𑀣𑀺𑀭𑀁 𑀳𑁄𑀢𑀺, 𑀕𑀫𑁆𑀪𑀻𑀭𑀧𑀭𑀺𑀔𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀤𑁆𑀯𑀸𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁, 𑀅𑀦𑁆𑀢𑁄𑀲𑀼𑀯𑀺𑀪𑀢𑁆𑀢𑀯𑀻𑀣𑀺𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀲𑀫𑁆𑀧𑀦𑁆𑀦𑀁 𑀅𑀦𑁆𑀢𑀭𑀸𑀧𑀡𑀁, 𑀢𑀁 ‘‘𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀺𑀤𑁆𑀥𑀸 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀩𑁆𑀩𑀢𑀁 𑀆𑀲𑀚𑁆𑀚 𑀧𑀝𑀺𑀳𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀣𑀺𑀭𑀁 𑀦𑀕𑀭𑀲𑀤𑀺𑀲𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀦𑀕𑀭𑁂 𑀞𑀺𑀢𑁄 𑀏𑀓𑀢𑁄𑀥𑀸𑀭𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀯𑀼𑀥𑁂𑀦 𑀘𑁄𑀭𑀕𑀡𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀫𑀬𑁂𑀦 𑀘 𑀅𑀭𑀺𑀬𑀫𑀕𑁆𑀕𑀫𑀬𑁂𑀦 𑀘 𑀧𑀜𑁆𑀜𑀸𑀯𑀼𑀥𑁂𑀦 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀁 𑀓𑀺𑀮𑁂𑀲𑀫𑀸𑀭𑀁 𑀧𑀝𑀺𑀩𑀸𑀳𑀦𑁆𑀢𑁄 𑀢𑀁 𑀢𑀁 𑀓𑀺𑀮𑁂𑀲𑀫𑀸𑀭𑀁 𑀬𑁄𑀥𑁂𑀣, 𑀧𑀳𑀭𑁂𑀬𑁆𑀬𑀸𑀣𑀸𑀢𑀺 𑀅𑀢𑁆𑀣𑁄. 𑀚𑀺𑀢𑀜𑁆𑀘 𑀭𑀓𑁆𑀔𑁂𑀢𑀺 𑀚𑀺𑀢𑀜𑁆𑀘 𑀉𑀧𑁆𑀧𑀸𑀤𑀺𑀢𑀁 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀆𑀯𑀸𑀲𑀲𑀧𑁆𑀧𑀸𑀬𑀉𑀢𑀼𑀲𑀧𑁆𑀧𑀸𑀬𑀪𑁄𑀚𑀦𑀲𑀧𑁆𑀧𑀸𑀬𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀸𑀤𑀻𑀦𑀺 𑀆𑀲𑁂𑀯𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀭𑀓𑁆𑀔𑁂𑀬𑁆𑀬.

𑀅𑀦𑀺𑀯𑁂𑀲𑀦𑁄 𑀲𑀺𑀬𑀸𑀢𑀺 𑀅𑀦𑀸𑀮𑀬𑁄 𑀪𑀯𑁂𑀬𑁆𑀬. 𑀬𑀣𑀸 𑀦𑀸𑀫 𑀬𑁄𑀥𑁄 𑀲𑀗𑁆𑀕𑀸𑀫𑀲𑀻𑀲𑁂 𑀩𑀮𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑁄 𑀙𑀸𑀢𑁄 𑀯𑀸 𑀧𑀺𑀧𑀸𑀲𑀺𑀢𑁄 𑀯𑀸 𑀳𑀼𑀢𑁆𑀯𑀸 𑀲𑀦𑁆𑀦𑀸𑀳𑁂 𑀯𑀸 𑀲𑀺𑀣𑀺𑀮𑁂 𑀆𑀯𑀼𑀥𑁂 𑀯𑀸 𑀧𑀢𑀺𑀢𑁂 𑀩𑀮𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀲𑀦𑁆𑀦𑀳𑀺𑀢𑁆𑀯𑀸 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑁄 𑀧𑀭𑀲𑁂𑀦𑀁 𑀫𑀤𑁆𑀤𑀢𑀺, 𑀅𑀚𑀺𑀢𑀁 𑀚𑀺𑀦𑀸𑀢𑀺, 𑀚𑀺𑀢𑀁 𑀭𑀓𑁆𑀔𑀢𑀺. 𑀲𑁄 𑀳𑀺 𑀲𑀘𑁂 𑀩𑀮𑀓𑁄𑀝𑁆𑀞𑀓𑁂 𑀞𑀺𑀢𑁄 𑀏𑀯𑀁 𑀯𑀺𑀲𑁆𑀲𑀫𑀦𑁆𑀢𑁄 𑀢𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀅𑀘𑁆𑀙𑁂𑀬𑁆𑀬, 𑀭𑀚𑁆𑀚𑀁 𑀧𑀭𑀳𑀢𑁆𑀣𑀕𑀢𑀁 𑀓𑀭𑁂𑀬𑁆𑀬, 𑀏𑀯𑀫𑁂𑀯, 𑀪𑀺𑀓𑁆𑀔𑀼, 𑀧𑀝𑀺𑀮𑀤𑁆𑀥𑀁 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀉𑀢𑁆𑀢𑀭𑀺𑀫𑀕𑁆𑀕𑀨𑀮𑀧𑀝𑀺𑀮𑀸𑀪𑁂𑀦 𑀓𑀺𑀮𑁂𑀲𑀫𑀸𑀭𑀁 𑀚𑀺𑀦𑀸𑀢𑀺. 𑀲𑀘𑁂 𑀧𑀦 𑀲𑁄 𑀲𑀫𑀸𑀧𑀢𑁆𑀢𑀺𑀫𑁂𑀯 𑀅𑀲𑁆𑀲𑀸𑀤𑁂𑀢𑀺, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀔𑀸𑀭𑁂 𑀦 𑀲𑀫𑁆𑀫𑀲𑀢𑀺, 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀭𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀭𑀓𑁆𑀔𑀦𑁆𑀢𑁄 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸, 𑀲𑀫𑀸𑀧𑀢𑁆𑀢𑀺𑀁 𑀦𑀺𑀯𑁂𑀲𑀦𑀁 𑀓𑀢𑁆𑀯𑀸 𑀢𑀢𑁆𑀣 𑀦 𑀦𑀺𑀯𑁂𑀲𑁂𑀬𑁆𑀬, 𑀆𑀮𑀬𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀸 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀓𑀭𑁄𑀣𑀸’’𑀢𑀺 𑀏𑀯𑀁 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀯𑀡𑁆𑀡𑀬𑀦𑁆𑀢𑀸 𑀣𑁄𑀫𑁂𑀦𑁆𑀢𑀸 𑀯𑀦𑁆𑀤𑀦𑁆𑀢𑀸𑀯 𑀆𑀕𑀘𑁆𑀙𑀺𑀁𑀲𑀽𑀢𑀺.

𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀘𑀺𑀭𑀁 𑀯𑀢𑀬𑀁 𑀓𑀸𑀬𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀲𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀲𑁆𑀲 𑀲𑀭𑀻𑀭𑁂 𑀭𑁄𑀕𑁄 𑀉𑀤𑀧𑀸𑀤𑀺. 𑀲𑀸𑀲𑀧𑀫𑀢𑁆𑀢𑀺𑀬𑁄 𑀧𑀺𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀼𑀕𑁆𑀕𑀫𑀢𑁆𑀢𑀸 𑀓𑀮𑀸𑀬𑀫𑀢𑁆𑀢𑀸 𑀓𑁄𑀮𑀝𑁆𑀞𑀺𑀫𑀢𑁆𑀢𑀸 𑀆𑀫𑀮𑀓𑀫𑀢𑁆𑀢𑀸 𑀩𑁂𑀴𑀼𑀯𑀲𑀮𑀸𑀝𑀼𑀫𑀢𑁆𑀢𑀸 𑀩𑁂𑀴𑀼𑀯𑀫𑀢𑁆𑀢𑀸 𑀳𑀼𑀢𑁆𑀯𑀸 𑀧𑀪𑀺𑀚𑁆𑀚𑀺𑀁𑀲𑀼, 𑀲𑀓𑀮𑀲𑀭𑀻𑀭𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀅𑀳𑁄𑀲𑀺. 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀉𑀤𑀧𑀸𑀤𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀅𑀝𑁆𑀞𑀻𑀦𑀺 𑀪𑀺𑀚𑁆𑀚𑀺𑀁𑀲𑀼. 𑀲𑁄 𑀅𑀧𑁆𑀧𑀝𑀺𑀚𑀕𑁆𑀕𑀺𑀬𑁄 𑀅𑀳𑁄𑀲𑀺. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀼𑀩𑁆𑀩𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀚𑀸𑀮𑀧𑀽𑀯𑀲𑀤𑀺𑀲𑀁 𑀅𑀳𑁄𑀲𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀧𑀝𑀺𑀚𑀕𑁆𑀕𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀙𑀟𑁆𑀟𑀬𑀺𑀁𑀲𑀼. 𑀲𑁄 𑀅𑀦𑀸𑀣𑁄 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀩𑀼𑀤𑁆𑀥𑀸𑀦𑀜𑁆𑀘 𑀦𑀸𑀫 𑀤𑁆𑀯𑁂 𑀯𑀸𑀭𑁂 𑀮𑁄𑀓𑀯𑁄𑀮𑁄𑀓𑀦𑀁 𑀅𑀯𑀺𑀚𑀳𑀺𑀢𑀁 𑀳𑁄𑀢𑀺. 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺𑀅𑀪𑀺𑀫𑀼𑀔𑀁 𑀜𑀸𑀡𑀁 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺, 𑀲𑀸𑀬𑀁 𑀑𑀮𑁄𑀓𑁂𑀦𑁆𑀢𑀸 𑀕𑀦𑁆𑀥𑀓𑀼𑀝𑀺𑀢𑁄 𑀧𑀝𑁆𑀞𑀸𑀬 𑀩𑀸𑀳𑀺𑀭𑀸𑀪𑀺𑀫𑀼𑀔𑀁 𑀜𑀸𑀡𑀁 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀪𑀕𑀯𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀜𑁆𑀜𑀸𑀬𑀺. 𑀲𑀢𑁆𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀳𑀺 𑀙𑀟𑁆𑀟𑀺𑀢𑁄, 𑀇𑀤𑀸𑀦𑀺𑀲𑁆𑀲 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀯𑀺𑀬 𑀅𑀕𑁆𑀕𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀉𑀓𑁆𑀔𑀮𑀺𑀁 𑀥𑁄𑀯𑀺𑀢𑁆𑀯𑀸 𑀉𑀤𑀓𑀁 𑀤𑀢𑁆𑀯𑀸 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀢𑀢𑁆𑀢𑀪𑀸𑀯𑀁 𑀆𑀕𑀫𑀬𑀫𑀸𑀦𑁄 𑀅𑀕𑁆𑀕𑀺𑀲𑀸𑀮𑀸𑀬𑀫𑁂𑀯 𑀅𑀝𑁆𑀞𑀸𑀲𑀺. 𑀢𑀢𑁆𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀧𑀦𑁆𑀦𑀫𑀜𑁆𑀘𑀓𑁄𑀝𑀺𑀬𑀁 𑀕𑀡𑁆𑀳𑀺, 𑀢𑀤𑀸 𑀪𑀺𑀓𑁆𑀔𑀽 ‘‘𑀅𑀧𑁂𑀣, 𑀪𑀦𑁆𑀢𑁂, 𑀫𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀫𑀜𑁆𑀘𑀓𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀲𑀸𑀮𑀁 𑀆𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀅𑀫𑁆𑀩𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀲𑁆𑀲 𑀧𑀸𑀭𑀼𑀧𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑁂 𑀫𑀤𑁆𑀤𑀸𑀧𑁂𑀢𑁆𑀯𑀸 𑀫𑀦𑁆𑀤𑀸𑀢𑀧𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀲𑀭𑀻𑀭𑀁 𑀉𑀡𑁆𑀳𑁄𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀖𑀁𑀲𑀺𑀢𑁆𑀯𑀸 𑀦𑁆𑀳𑀸𑀧𑁂𑀲𑀺, 𑀢𑀲𑁆𑀲 𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀭𑀼𑀧𑀦𑀁 𑀲𑀼𑀓𑁆𑀔𑀺. 𑀅𑀣 𑀦𑀁 𑀢𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀣𑀓𑀸𑀲𑀸𑀯𑀁 𑀉𑀤𑀓𑁂 𑀫𑀤𑁆𑀤𑀸𑀧𑁂𑀢𑁆𑀯𑀸 𑀆𑀢𑀧𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲 𑀕𑀢𑁆𑀢𑁂 𑀉𑀤𑀓𑁂 𑀙𑀺𑀦𑁆𑀦𑀫𑀢𑁆𑀢𑁂 𑀢𑀫𑁆𑀧𑀺 𑀲𑀼𑀓𑁆𑀔𑀺. 𑀲𑁄 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀮𑁆𑀮𑀳𑀼𑀓𑀲𑀭𑀻𑀭𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀲𑁆𑀲𑀻𑀲𑀓𑁂 𑀞𑀢𑁆𑀯𑀸, ‘‘𑀪𑀺𑀓𑁆𑀔𑀼 𑀅𑀬𑀁 𑀢𑀯 𑀓𑀸𑀬𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄 𑀦𑀺𑀭𑀼𑀧𑀓𑀸𑀭𑁄 𑀳𑀼𑀢𑁆𑀯𑀸 𑀓𑀮𑀺𑀗𑁆𑀕𑀭𑀁 𑀯𑀺𑀬 𑀧𑀣𑀯𑀺𑀬𑀁 𑀲𑁂𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧. ‘‘𑀅𑀘𑀺𑀭𑀁 𑀯𑀢𑀬𑀁 𑀓𑀸𑀬𑁄, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺;

𑀙𑀼𑀤𑁆𑀥𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄, 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭’’𑀦𑁆𑀢𑀺.

𑀢𑀢𑁆𑀣 𑀅𑀘𑀺𑀭𑀁 𑀯𑀢𑀸𑀢𑀺 𑀪𑀺𑀓𑁆𑀔𑀼 𑀦 𑀘𑀺𑀭𑀲𑁆𑀲𑁂𑀯 𑀅𑀬𑀁 𑀓𑀸𑀬𑁄 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀇𑀫𑀺𑀲𑁆𑀲𑀸 𑀧𑀓𑀢𑀺𑀲𑀬𑀦𑁂𑀦 𑀲𑀬𑀺𑀢𑀸𑀬 𑀧𑀣𑀯𑀺𑀬𑀸 𑀉𑀧𑀭𑀺 𑀲𑀬𑀺𑀲𑁆𑀲𑀢𑀺. 𑀙𑀼𑀤𑁆𑀥𑁄𑀢𑀺 𑀅𑀧𑀯𑀺𑀤𑁆𑀥𑁄, 𑀅𑀧𑀕𑀢𑀯𑀺𑀜𑁆𑀜𑀸𑀡𑀢𑀸𑀬 𑀢𑀼𑀘𑁆𑀙𑁄 𑀳𑀼𑀢𑁆𑀯𑀸 𑀲𑁂𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀓𑀺𑀁? 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀁 𑀦𑀺𑀭𑀼𑀧𑀓𑀸𑀭𑀁 𑀦𑀺𑀭𑀢𑁆𑀣𑀓𑀁 𑀓𑀝𑁆𑀞𑀔𑀡𑁆𑀟𑀁 𑀯𑀺𑀬. 𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀣𑀺𑀓𑀸 𑀳𑀺 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀚𑀼𑀓𑀁 𑀉𑀚𑀼𑀓𑀲𑀡𑁆𑀞𑀸𑀦𑁂𑀦 𑀯𑀗𑁆𑀓𑀁 𑀯𑀗𑁆𑀓𑀲𑀡𑁆𑀞𑀸𑀦𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁 𑀕𑀡𑁆𑀳𑀦𑁆𑀢𑀺, 𑀅𑀯𑀲𑁂𑀲𑀁 𑀧𑀦 𑀲𑀼𑀲𑀺𑀭𑀜𑁆𑀘 𑀧𑀽𑀢𑀺𑀓𑀜𑁆𑀘 𑀅𑀲𑀸𑀭𑀓𑀜𑁆𑀘 𑀕𑀡𑁆𑀞𑀺𑀚𑀸𑀢𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀙𑀟𑁆𑀟𑁂𑀦𑁆𑀢𑀺. 𑀅𑀜𑁆𑀜𑁂 𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀣𑀺𑀓𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀇𑀢𑀭𑀁 𑀧𑀣𑀯𑀻𑀕𑀢𑀫𑁂𑀯 𑀳𑁄𑀢𑀺. 𑀢𑀁 𑀧𑀦 𑀢𑁂𑀦 𑀢𑁂𑀦 𑀉𑀧𑀸𑀬𑁂𑀦 𑀫𑀜𑁆𑀘𑀧𑀝𑀺𑀧𑀸𑀤𑀓𑀁 𑀯𑀸 𑀧𑀸𑀤𑀓𑀣𑀮𑀺𑀓𑀁 𑀯𑀸 𑀨𑀮𑀓𑀧𑀻𑀞𑀁 𑀯𑀸 𑀓𑀸𑀢𑀼𑀁 𑀲𑀓𑁆𑀓𑀸𑀧𑀺 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀤𑁆𑀯𑀢𑁆𑀢𑀺𑀁𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑁄𑀧𑀺 𑀫𑀜𑁆𑀘𑀧𑀝𑀺𑀧𑀸𑀤𑀓𑀸𑀤𑀺𑀯𑀲𑁂𑀦 𑀅𑀜𑁆𑀜𑁂𑀦 𑀯𑀸 𑀉𑀧𑀓𑀸𑀭𑀫𑀼𑀔𑁂𑀦 𑀕𑀬𑁆𑀳𑀽𑀧𑀕𑁄 𑀦𑀸𑀫 𑀦𑀢𑁆𑀣𑀺, 𑀓𑁂𑀯𑀮𑀁 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀁 𑀅𑀬𑀁 𑀓𑀸𑀬𑁄 𑀅𑀧𑀕𑀢𑀯𑀺𑀜𑁆𑀜𑀸𑀡𑁄 𑀓𑀢𑀺𑀧𑀸𑀳𑁂𑀦𑁂𑀯 𑀧𑀣𑀯𑀺𑀬𑀁 𑀲𑁂𑀲𑁆𑀲𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀣𑁂𑀭𑁄𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀺𑀓𑁆𑀔𑀯𑁂’’𑀢𑀺. ‘‘𑀪𑀦𑁆𑀢𑁂, 𑀏𑀯𑀭𑀽𑀧𑀲𑁆𑀲 𑀧𑀦 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀁 𑀓𑀸𑀭𑀡𑀸 𑀕𑀢𑁆𑀢𑀁 𑀧𑀼𑀢𑀺𑀓𑀁 𑀚𑀸𑀢𑀁, 𑀓𑀺𑀁 𑀓𑀸𑀭𑀡𑀸 𑀅𑀝𑁆𑀞𑀻𑀦𑀺 𑀪𑀺𑀦𑁆𑀦𑀸𑀦𑀺, 𑀓𑀺𑀫𑀲𑁆𑀲 𑀓𑀸𑀭𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀧𑀢𑁆𑀢’’𑀦𑁆𑀢𑀺? ‘‘𑀪𑀺𑀓𑁆𑀔𑀯𑁂, 𑀲𑀩𑁆𑀩𑀫𑁂𑀢𑀁 𑀏𑀢𑀲𑁆𑀲 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑁂𑀦𑁂𑀯 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂𑀦, 𑀪𑀦𑁆𑀢𑁂, 𑀓𑀢’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀬𑀁 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑀸𑀓𑀼𑀡𑀺𑀓𑁄 𑀳𑀼𑀢𑁆𑀯𑀸 𑀩𑀳𑀽 𑀲𑀓𑀼𑀡𑁂 𑀯𑀥𑀺𑀢𑁆𑀯𑀸 𑀇𑀲𑁆𑀲𑀭𑀚𑀦𑀁 𑀉𑀧𑀝𑁆𑀞𑀳𑀺. 𑀢𑁂𑀲𑀁 𑀤𑀺𑀦𑁆𑀦𑀸𑀯𑀲𑁂𑀲𑁂 𑀯𑀺𑀓𑁆𑀓𑀺𑀡𑀸𑀢𑀺, ‘‘𑀯𑀺𑀓𑁆𑀓𑀺𑀢𑀸𑀯𑀲𑁂𑀲𑀸 𑀫𑀸𑀭𑁂𑀢𑁆𑀯𑀸 𑀞𑀧𑀺𑀢𑀸 𑀧𑀽𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀬𑀣𑀸 𑀉𑀧𑁆𑀧𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀣𑀸 𑀢𑁂𑀲𑀁 𑀚𑀗𑁆𑀖𑀝𑁆𑀞𑀻𑀦𑀺 𑀘 𑀧𑀓𑁆𑀔𑀝𑁆𑀞𑀻𑀦𑀺 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑁂𑀢𑀺, 𑀢𑁂 𑀧𑀼𑀦𑀤𑀺𑀯𑀲𑁂 𑀯𑀺𑀓𑁆𑀓𑀺𑀡𑀸𑀢𑀺. 𑀅𑀢𑀺𑀩𑀳𑀽𑀦𑀁 𑀧𑀦 𑀮𑀤𑁆𑀥𑀓𑀸𑀮𑁂 𑀅𑀢𑁆𑀢𑀦𑁄𑀧𑀺 𑀅𑀢𑁆𑀣𑀸𑀬 𑀧𑀘𑀸𑀧𑁂𑀢𑀺. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀭𑀲𑀪𑁄𑀚𑀦𑁂 𑀧𑀓𑁆𑀓𑁂 𑀏𑀓𑁄 𑀔𑀻𑀡𑀸𑀲𑀯𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, ‘‘𑀫𑀬𑀸 𑀩𑀳𑀽 𑀧𑀸𑀡𑀸 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑀸, 𑀅𑀬𑁆𑀬𑁄 𑀘 𑀫𑁂 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄, 𑀅𑀦𑁆𑀢𑁄𑀕𑁂𑀳𑁂 𑀘 𑀭𑀲𑀪𑁄𑀚𑀦𑀁 𑀲𑀁𑀯𑀺𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀢𑁆𑀢𑀁 𑀆𑀤𑀸𑀬 𑀧𑀽𑀭𑁂𑀢𑁆𑀯𑀸 𑀭𑀲𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀆𑀳. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. ‘‘𑀪𑀺𑀓𑁆𑀔𑀯𑁂, 𑀢𑀤𑀸 𑀓𑀢𑀓𑀫𑁆𑀫𑀯𑀲𑁂𑀦𑁂𑀢𑀁 𑀢𑀺𑀲𑁆𑀲𑀲𑁆𑀲 𑀦𑀺𑀧𑁆𑀨𑀦𑁆𑀦𑀁, 𑀲𑀓𑀼𑀡𑀸𑀦𑀁 𑀅𑀝𑁆𑀞𑀺𑀪𑁂𑀤𑀦𑀦𑀺𑀲𑁆𑀲𑀦𑁆𑀤𑁂𑀦 𑀢𑀺𑀲𑁆𑀲𑀲𑁆𑀲 𑀕𑀢𑁆𑀢𑀜𑁆𑀘 𑀧𑀽𑀢𑀺𑀓𑀁 𑀚𑀸𑀢𑀁, 𑀅𑀝𑁆𑀞𑀻𑀦𑀺 𑀘 𑀪𑀺𑀦𑁆𑀦𑀸𑀦𑀺, 𑀔𑀻𑀡𑀸𑀲𑀯𑀲𑁆𑀲 𑀭𑀲𑀧𑀺𑀡𑁆𑀟𑀧𑀸𑀢𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺.

𑀧𑀽𑀢𑀺𑀕𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀦𑀦𑁆𑀤𑀕𑁄𑀧𑀸𑀮𑀓𑀯𑀢𑁆𑀣𑀼

𑀤𑀺𑀲𑁄 𑀤𑀺𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀓𑁄𑀲𑀮𑀚𑀦𑀧𑀤𑁂 𑀦𑀦𑁆𑀤𑀕𑁄𑀧𑀸𑀮𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀦𑀦𑁆𑀤𑁄 𑀦𑀸𑀫 𑀕𑁄𑀧𑀸𑀮𑀓𑁄 𑀕𑁄𑀬𑀽𑀣𑀁 𑀭𑀓𑁆𑀔𑀢𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀲𑁄 𑀓𑀺𑀭 𑀬𑀣𑀸 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀧𑀩𑁆𑀩𑀚𑁆𑀚𑀸𑀯𑁂𑀲𑁂𑀦, 𑀏𑀯𑀁 𑀕𑁄𑀧𑀸𑀮𑀓𑀢𑁆𑀢𑁂𑀦 𑀭𑀸𑀚𑀩𑀮𑀺𑀁 𑀧𑀭𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀓𑀼𑀝𑀼𑀫𑁆𑀩𑀁 𑀭𑀓𑁆𑀔𑀢𑀺. 𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀧𑀜𑁆𑀘 𑀕𑁄𑀭𑀲𑁂 𑀆𑀤𑀸𑀬 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀬𑀸𑀘𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀆𑀕𑀦𑁆𑀢𑁆𑀯𑀸 𑀧𑀭𑀺𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀏𑀓𑀤𑀺𑀯𑀲𑀁 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀸𑀲𑀦𑁆𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀦𑀦𑁆𑀤𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀡𑀻𑀢𑀁 𑀧𑀜𑁆𑀘𑀕𑁄𑀭𑀲𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀤𑀸𑀦𑀓𑀣𑀸𑀤𑀺𑀪𑁂𑀤𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀦𑀦𑁆𑀤𑀕𑁄𑀧𑀸𑀮𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀤𑀽𑀭𑀁 𑀕𑀦𑁆𑀢𑁆𑀯𑀸, ‘‘𑀢𑀺𑀝𑁆𑀞, 𑀉𑀧𑀸𑀲𑀓𑀸’’𑀢𑀺 𑀦𑀺𑀯𑀢𑁆𑀢𑀺𑀬𑀫𑀸𑀦𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀅𑀣 𑀦𑀁 𑀏𑀓𑁄 𑀮𑀼𑀤𑁆𑀤𑀓𑁄 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸 𑀪𑀺𑀓𑁆𑀔𑀽 𑀦𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳𑀁𑀲𑀼 𑁋 ‘‘𑀦𑀦𑁆𑀤𑁄, 𑀪𑀦𑁆𑀢𑁂, 𑀕𑁄𑀧𑀸𑀮𑀓𑁄 𑀢𑀼𑀫𑁆𑀳𑀸𑀓𑀁 𑀇𑀥𑀸𑀕𑀢𑀢𑁆𑀢𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀦𑁆𑀢𑁄 𑀫𑀸𑀭𑀺𑀢𑁄, 𑀲𑀘𑁂 𑀢𑀼𑀫𑁆𑀳𑁂 𑀦𑀸𑀕𑀘𑁆𑀙𑀺𑀲𑁆𑀲𑀣, 𑀦𑀸𑀲𑁆𑀲 𑀫𑀭𑀡𑀁 𑀅𑀪𑀯𑀺𑀲𑁆𑀲𑀸’’𑀢𑀺. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀬𑀺 𑀆𑀕𑀢𑁂𑀧𑀺 𑀅𑀦𑀸𑀕𑀢𑁂𑀧𑀺 𑀢𑀲𑁆𑀲 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀘 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀫𑀭𑀡𑀢𑁄 𑀫𑀼𑀘𑁆𑀘𑀦𑀽𑀧𑀸𑀬𑁄 𑀦𑀸𑀫 𑀦𑀢𑁆𑀣𑀺. 𑀬𑀜𑁆𑀳𑀺 𑀦𑁂𑀯 𑀘𑁄𑀭𑀸, 𑀦 𑀯𑁂𑀭𑀺𑀦𑁄 𑀓𑀭𑁄𑀦𑁆𑀢𑀺, 𑀢𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀦𑁆𑀢𑁄𑀧𑀤𑀼𑀝𑁆𑀞𑀁 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀫𑁂𑀯 𑀓𑀭𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁨. ‘‘𑀤𑀺𑀲𑁄 𑀤𑀺𑀲𑀁 𑀬𑀁 𑀢𑀁 𑀓𑀬𑀺𑀭𑀸, 𑀯𑁂𑀭𑀻 𑀯𑀸 𑀧𑀦 𑀯𑁂𑀭𑀺𑀦𑀁;

𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂’’𑀢𑀺.

𑀢𑀢𑁆𑀣 𑀤𑀺𑀲𑁄 𑀤𑀺𑀲𑀦𑁆𑀢𑀺 𑀘𑁄𑀭𑁄 𑀘𑁄𑀭𑀁. ‘‘𑀤𑀺𑀲𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀬𑀁 𑀢𑀁 𑀓𑀬𑀺𑀭𑀸𑀢𑀺 𑀬𑀁 𑀢𑀁 𑀢𑀲𑁆𑀲 𑀅𑀦𑀬𑀩𑁆𑀬𑀲𑀦𑀁 𑀓𑀭𑁂𑀬𑁆𑀬. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑁄 𑀏𑀓𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀻 𑀘𑁄𑀭𑁄 𑀧𑀼𑀢𑁆𑀢𑀤𑀸𑀭𑀔𑁂𑀢𑁆𑀢𑀯𑀢𑁆𑀣𑀼 𑀕𑁄𑀫𑀳𑀺𑀁𑀲𑀸𑀤𑀻𑀲𑀼 𑀅𑀧𑀭𑀚𑁆𑀛𑀦𑁆𑀢𑁄 𑀬𑀲𑁆𑀲 𑀅𑀧𑀭𑀚𑁆𑀛𑀢𑀺, 𑀢𑀫𑁆𑀧𑀺 𑀢𑀣𑁂𑀯 𑀅𑀢𑁆𑀢𑀦𑀺 𑀅𑀧𑀭𑀚𑁆𑀛𑀦𑁆𑀢𑀁 𑀘𑁄𑀭𑀁 𑀤𑀺𑀲𑁆𑀯𑀸, 𑀯𑁂𑀭𑀺 𑀯𑀸 𑀧𑀦 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀩𑀤𑁆𑀥𑀯𑁂𑀭𑀁 𑀯𑁂𑀭𑀺𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑀸𑀬 𑀤𑀸𑀭𑀼𑀡𑀢𑀸𑀬 𑀬𑀁 𑀢𑀁 𑀢𑀲𑁆𑀲 𑀅𑀦𑀬𑀩𑁆𑀬𑀲𑀦𑀁 𑀓𑀭𑁂𑀬𑁆𑀬, 𑀧𑀼𑀢𑁆𑀢𑀤𑀸𑀭𑀁 𑀯𑀸 𑀧𑀻𑀴𑁂𑀬𑁆𑀬, 𑀔𑁂𑀢𑁆𑀢𑀸𑀤𑀻𑀦𑀺 𑀯𑀸 𑀦𑀸𑀲𑁂𑀬𑁆𑀬, 𑀚𑀻𑀯𑀺𑀢𑀸 𑀯𑀸 𑀧𑀦 𑀦𑀁 𑀯𑁄𑀭𑁄𑀧𑁂𑀬𑁆𑀬, 𑀤𑀲𑀲𑀼 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀫𑀺𑀘𑁆𑀙𑀸𑀞𑀧𑀺𑀢𑀢𑁆𑀢𑀸 𑀫𑀺𑀘𑁆𑀙𑀸𑀧𑀳𑀺𑀡𑀺𑀢𑀁 𑀘𑀺𑀢𑁆𑀢𑀁 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂 𑀢𑀁 𑀧𑀼𑀭𑀺𑀲𑀁 𑀢𑀢𑁄 𑀧𑀸𑀧𑀢𑀭𑀁 𑀓𑀭𑁂𑀬𑁆𑀬. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺, 𑀤𑀺𑀲𑁄 𑀤𑀺𑀲𑀲𑁆𑀲 𑀯𑀸 𑀯𑁂𑀭𑀻 𑀯𑁂𑀭𑀺𑀦𑁄 𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀁 𑀯𑀸 𑀉𑀧𑁆𑀧𑀸𑀤𑁂𑀬𑁆𑀬, 𑀚𑀻𑀯𑀺𑀢𑀓𑁆𑀔𑀬𑀁 𑀯𑀸 𑀓𑀭𑁂𑀬𑁆𑀬. 𑀇𑀤𑀁 𑀧𑀦 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀫𑀺𑀘𑁆𑀙𑀸𑀞𑀧𑀺𑀢𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀺, 𑀅𑀢𑁆𑀢𑀪𑀸𑀯𑀲𑀢𑀲𑀳𑀲𑁆𑀲𑁂𑀲𑀼𑀧𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀢𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀤𑁂𑀲𑀦𑀸 𑀚𑀸𑀢𑀸. 𑀉𑀧𑀸𑀲𑀓𑁂𑀦 𑀧𑀦 𑀪𑀯𑀦𑁆𑀢𑀭𑁂 𑀓𑀢𑀓𑀫𑁆𑀫𑀁 𑀪𑀺𑀓𑁆𑀔𑀽𑀳𑀺 𑀦 𑀧𑀼𑀘𑁆𑀙𑀺𑀢𑀁, 𑀢𑀲𑁆𑀫𑀸 𑀲𑀢𑁆𑀣𑀸𑀭𑀸 𑀦 𑀓𑀣𑀺𑀢𑀦𑁆𑀢𑀺.

𑀦𑀦𑁆𑀤𑀕𑁄𑀧𑀸𑀮𑀓𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑁄𑀭𑁂𑀬𑁆𑀬𑀢𑁆𑀣𑁂𑀭𑀯𑀢𑁆𑀣𑀼

𑀦 𑀢𑀁 𑀫𑀸𑀢𑀸 𑀧𑀺𑀢𑀸 𑀓𑀬𑀺𑀭𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁄𑀭𑁂𑀬𑁆𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀯𑀢𑁆𑀣𑀼 𑀲𑁄𑀭𑁂𑀬𑁆𑀬𑀦𑀕𑀭𑁂 𑀲𑀫𑀼𑀝𑁆𑀞𑀺𑀢𑀁, 𑀲𑀸𑀯𑀢𑁆𑀣𑀺𑀬𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑁄𑀭𑁂𑀬𑁆𑀬𑀦𑀕𑀭𑁂 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀏𑀓𑁂𑀦 𑀲𑀳𑀸𑀬𑀓𑁂𑀦 𑀲𑀤𑁆𑀥𑀺𑀁 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑁆𑀳𑀸𑀦𑀢𑁆𑀣𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁄 𑀲𑁄𑀭𑁂𑀬𑁆𑀬𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀩𑀳𑀺𑀦𑀕𑀭𑁂 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀢𑀺. 𑀣𑁂𑀭𑀲𑁆𑀲 𑀘 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁. 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀯𑀢 𑀅𑀬𑀁 𑀯𑀸 𑀣𑁂𑀭𑁄 𑀫𑀫 𑀪𑀭𑀺𑀬𑀸 𑀪𑀯𑁂𑀬𑁆𑀬, 𑀫𑀫 𑀯𑀸 𑀪𑀭𑀺𑀬𑀸𑀬 𑀲𑀭𑀻𑀭𑀯𑀡𑁆𑀡𑁄 𑀏𑀢𑀲𑁆𑀲 𑀲𑀭𑀻𑀭𑀯𑀡𑁆𑀡𑁄 𑀯𑀺𑀬 𑀪𑀯𑁂𑀬𑁆𑀬𑀸’’𑀢𑀺. 𑀢𑀲𑁆𑀲 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀬𑁂𑀯 𑀧𑀼𑀭𑀺𑀲𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀮𑀚𑁆𑀚𑀫𑀸𑀦𑁄 𑀬𑀸𑀦𑀓𑀸 𑀑𑀭𑀼𑀬𑁆𑀳 𑀧𑀮𑀸𑀬𑀺. 𑀧𑀭𑀺𑀚𑀦𑁄 𑀢𑀁 𑀅𑀲𑀜𑁆𑀚𑀸𑀦𑀦𑁆𑀢𑁄 ‘‘𑀓𑀺𑀫𑁂𑀢’’𑀦𑁆𑀢𑀺 𑀆𑀳. 𑀲𑀸𑀧𑀺 𑀢𑀓𑁆𑀓𑀲𑀺𑀮𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀳𑀸𑀬𑀓𑁄𑀧𑀺𑀲𑁆𑀲𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀺𑀢𑁆𑀯𑀸𑀧𑀺 𑀦𑀸𑀤𑁆𑀤𑀲. 𑀲𑀩𑁆𑀩𑁂 𑀦𑁆𑀳𑀸𑀬𑀺𑀢𑁆𑀯𑀸 𑀕𑁂𑀳𑀁 𑀅𑀕𑀫𑀺𑀁𑀲𑀼. ‘‘𑀓𑀳𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄’’𑀢𑀺 𑀘 𑀯𑀼𑀢𑁆𑀢𑁂, ‘‘𑀦𑁆𑀳𑀢𑁆𑀯𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀺𑀫𑁆𑀳𑀸’’𑀢𑀺 𑀯𑀤𑀺𑀁𑀲𑀼. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸, ‘‘𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀢𑀓𑀪𑀢𑁆𑀢𑀁 𑀅𑀤𑀁𑀲𑀼. 𑀲𑀸 𑀏𑀓𑀁 𑀢𑀓𑁆𑀓𑀲𑀺𑀮𑀕𑀸𑀫𑀺𑀁 𑀲𑀢𑁆𑀣𑀯𑀸𑀳𑀁 𑀤𑀺𑀲𑁆𑀯𑀸 𑀬𑀸𑀦𑀓𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺.

𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀬𑀸𑀦𑀓𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀕𑀘𑁆𑀙𑀢𑀺, 𑀫𑀬𑀁 ‘𑀓𑀲𑁆𑀲𑁂𑀲𑀸 𑀤𑀸𑀭𑀺𑀓𑀸’𑀢𑀺 𑀢𑀁 𑀦 𑀚𑀸𑀦𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀲𑀸𑀧𑀺 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀬𑀸𑀦𑀓𑀁 𑀧𑀸𑀚𑁂𑀣, 𑀅𑀳𑀁 𑀧𑀤𑀲𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀻 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁 𑀤𑀢𑁆𑀯𑀸 𑀏𑀓𑀲𑁆𑀫𑀺𑀁 𑀬𑀸𑀦𑀓𑁂 𑀑𑀓𑀸𑀲𑀁 𑀓𑀸𑀭𑁂𑀲𑀺. 𑀫𑀦𑀼𑀲𑁆𑀲𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀢𑀓𑁆𑀓𑀲𑀺𑀮𑀦𑀕𑀭𑁂 𑀅𑀫𑁆𑀳𑀸𑀓𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸 𑀦𑀢𑁆𑀣𑀺, 𑀢𑀲𑁆𑀲 𑀆𑀘𑀺𑀓𑁆𑀔𑀺𑀲𑁆𑀲𑀸𑀫, 𑀫𑀳𑀸𑀧𑀡𑁆𑀡𑀸𑀓𑀸𑀭𑁄 𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂 𑀕𑁂𑀳𑀁 𑀕𑀦𑁆𑀢𑁆𑀯𑀸, ‘‘𑀲𑀸𑀫𑀺, 𑀅𑀫𑁆𑀳𑁂𑀳𑀺 𑀢𑀼𑀫𑁆𑀳𑀸𑀓𑀁 𑀏𑀓𑀁 𑀇𑀢𑁆𑀣𑀺𑀭𑀢𑀦𑀁 𑀆𑀦𑀻𑀢’’𑀦𑁆𑀢𑀺 𑀆𑀳𑀁𑀲𑀼. 𑀲𑁄 𑀢𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀬𑀸𑀦𑀼𑀭𑀽𑀧𑀁 𑀅𑀪𑀺𑀭𑀽𑀧𑀁 𑀧𑀸𑀲𑀸𑀤𑀺𑀓𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 𑀕𑁂𑀳𑁂 𑀅𑀓𑀸𑀲𑀺. 𑀧𑀼𑀭𑀺𑀲𑀸 𑀳𑀺 𑀇𑀢𑁆𑀣𑀺𑀬𑁄, 𑀇𑀢𑁆𑀣𑀺𑀬𑁄 𑀯𑀸 𑀧𑀼𑀭𑀺𑀲𑀸 𑀅𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺. 𑀧𑀼𑀭𑀺𑀲𑀸 𑀳𑀺 𑀧𑀭𑀲𑁆𑀲 𑀤𑀸𑀭𑁂𑀲𑀼 𑀅𑀢𑀺𑀘𑀭𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀚𑀸𑀢𑀺𑀁 𑀆𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀪𑀸𑀯𑀲𑀢𑁂 𑀇𑀢𑁆𑀣𑀺𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀧𑀸𑀭𑀫𑀻 𑀅𑀭𑀺𑀬𑀲𑀸𑀯𑀓𑁄 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀫𑁆𑀫𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀧𑀭𑀤𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀘𑀼𑀤𑁆𑀤𑀲𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀧𑀼𑀭𑀺𑀲𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀇𑀢𑁆𑀣𑀻 𑀅𑀳𑁄𑀲𑀺, 𑀲𑀢𑁆𑀢𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀩𑀻𑀚𑀼𑀤𑁆𑀥𑀭𑀡𑀁 𑀧𑀸𑀧𑀼𑀡𑀺. 𑀇𑀢𑁆𑀣𑀺𑀬𑁄 𑀧𑀦 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀇𑀢𑁆𑀣𑀺𑀪𑀸𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, ‘‘𑀇𑀤𑀁 𑀦𑁄 𑀧𑀼𑀜𑁆𑀜𑀁 𑀧𑀼𑀭𑀺𑀲𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀪𑀸𑀯𑀁 𑀧𑀝𑀺𑀮𑀪𑀦𑁆𑀢𑀺, 𑀧𑀢𑀺𑀤𑁂𑀯𑀢𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀯𑀲𑁂𑀦𑀸𑀧𑀺 𑀧𑀼𑀭𑀺𑀲𑀢𑁆𑀢𑀪𑀸𑀯𑀁 𑀧𑀝𑀺𑀮𑀪𑀦𑁆𑀢𑁂𑀯.

𑀅𑀬𑀁 𑀧𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀣𑁂𑀭𑁂 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀇𑀢𑁆𑀣𑀺𑀪𑀸𑀯𑀁 𑀧𑀝𑀺𑀮𑀪𑀺. 𑀢𑀓𑁆𑀓𑀲𑀺𑀮𑀸𑀬𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀦 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀅𑀧𑀭𑀫𑁆𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺. 𑀏𑀯𑀫𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀸 𑀤𑁆𑀯𑁂, 𑀲𑁄𑀭𑁂𑀬𑁆𑀬𑀦𑀕𑀭𑁂 𑀢𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀸 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑁄𑀭𑁂𑀬𑁆𑀬𑀦𑀕𑀭𑀢𑁄 𑀢𑀲𑁆𑀲𑀸 𑀲𑀳𑀸𑀬𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀼𑀔𑀬𑀸𑀦𑀓𑁂 𑀦𑀺𑀲𑀺𑀦𑁆𑀦𑁄 𑀦𑀕𑀭𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀲𑀸 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀤𑀸𑀲𑀺𑀁 𑀧𑁂𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀢𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀪𑀤𑁆𑀤𑁂, 𑀢𑁆𑀯𑀁 𑀇𑀢𑁄 𑀧𑀼𑀩𑁆𑀩𑁂 𑀅𑀫𑁆𑀳𑁂𑀳𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀅𑀣 𑀘 𑀧𑀦 𑀦𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑁄𑀲𑀺, 𑀚𑀸𑀦𑀸𑀲𑀺 𑀢𑁆𑀯𑀁 𑀅𑀫𑁆𑀳𑁂’’𑀢𑀺. ‘‘𑀆𑀫, 𑀲𑀸𑀫𑀺, 𑀚𑀸𑀦𑀸𑀫𑀺, 𑀦𑀦𑀼 𑀢𑀼𑀫𑁆𑀳𑁂 𑀲𑁄𑀭𑁂𑀬𑁆𑀬𑀦𑀕𑀭𑀯𑀸𑀲𑀺𑀦𑁄’’𑀢𑀺? ‘‘𑀆𑀫, 𑀪𑀤𑁆𑀤𑁂’’𑀢𑀺. 𑀲𑀸 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀪𑀭𑀺𑀬𑀸𑀬 𑀘 𑀧𑀼𑀢𑁆𑀢𑀸𑀦𑀜𑁆𑀘 𑀅𑀭𑁄𑀕𑀪𑀸𑀯𑀁 𑀧𑀼𑀘𑁆𑀙𑀺. 𑀇𑀢𑀭𑁄 ‘‘𑀆𑀫, 𑀪𑀤𑁆𑀤𑁂, 𑀅𑀭𑁄𑀕𑀸’’𑀢𑀺 𑀯𑀢𑁆𑀯𑀸 ‘‘𑀚𑀸𑀦𑀸𑀲𑀺 𑀢𑁆𑀯𑀁 𑀏𑀢𑁂’’𑀢𑀺 𑀆𑀳. ‘‘𑀆𑀫 𑀲𑀸𑀫𑀺, 𑀚𑀸𑀦𑀸𑀫𑀺. 𑀢𑁂𑀲𑀁 𑀏𑀓𑁄 𑀧𑀼𑀢𑁆𑀢𑁄 𑀅𑀢𑁆𑀣𑀺, 𑀲𑁄 𑀓𑀳𑀁, 𑀲𑀸𑀫𑀻’’𑀢𑀺? ‘‘𑀪𑀤𑁆𑀤𑁂, 𑀫𑀸 𑀏𑀢𑀁 𑀓𑀣𑁂𑀳𑀺, 𑀫𑀬𑀁 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑀁 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀦𑀺𑀓𑁆𑀔𑀦𑁆𑀢𑀸 𑀦𑁂𑀯𑀲𑁆𑀲 𑀕𑀢𑀺𑀁 𑀚𑀸𑀦𑀸𑀫, 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀺𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑀬𑀺𑀫𑁆𑀳𑀸, 𑀢𑁂𑀧𑀺𑀲𑁆𑀲 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀧𑁂𑀢𑀓𑀺𑀘𑁆𑀘𑀁 𑀓𑀺𑀭𑀺𑀁𑀲𑀽’’𑀢𑀺. ‘‘𑀅𑀳𑀁 𑀲𑁄, 𑀲𑀸𑀫𑀻’’𑀢𑀺. ‘‘𑀅𑀧𑁂𑀳𑀺, 𑀪𑀤𑁆𑀤𑁂, 𑀓𑀺𑀁 𑀓𑀣𑁂𑀲𑀺 𑀫𑀬𑁆𑀳𑀁 𑀲𑀳𑀸𑀬𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀏𑀓𑁄 𑀧𑀼𑀭𑀺𑀲𑁄’’𑀢𑀺? ‘‘𑀳𑁄𑀢𑀼, 𑀲𑀸𑀫𑀺, 𑀅𑀳𑀁 𑀲𑁄’’𑀢𑀺. ‘‘𑀅𑀣 𑀇𑀤𑀁 𑀓𑀺𑀁 𑀦𑀸𑀫𑀸’’𑀢𑀺? ‘‘𑀢𑀁 𑀤𑀺𑀯𑀲𑀁 𑀢𑁂 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁄 𑀤𑀺𑀝𑁆𑀞𑁄’’𑀢𑀺? ‘‘𑀆𑀫, 𑀤𑀺𑀝𑁆𑀞𑁄’’𑀢𑀺. 𑀅𑀳𑀁 𑀅𑀬𑁆𑀬𑀁 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀳𑁄 𑀯𑀢 𑀅𑀬𑀁 𑀯𑀸 𑀣𑁂𑀭𑁄 𑀫𑀫 𑀪𑀭𑀺𑀬𑀸 𑀪𑀯𑁂𑀬𑁆𑀬, 𑀏𑀢𑀲𑁆𑀲 𑀯𑀸 𑀲𑀭𑀻𑀭𑀯𑀡𑁆𑀡𑁄 𑀯𑀺𑀬 𑀫𑀫 𑀪𑀭𑀺𑀬𑀸𑀬 𑀲𑀭𑀻𑀭𑀯𑀡𑁆𑀡𑁄 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺𑀁. 𑀘𑀺𑀦𑁆𑀢𑀺𑀢𑀓𑁆𑀔𑀡𑁂𑀬𑁂𑀯 𑀫𑁂 𑀧𑀼𑀭𑀺𑀲𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀺. 𑀅𑀣𑀸𑀳𑀁 𑀮𑀚𑁆𑀚𑀫𑀸𑀦𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀇𑀥𑀸𑀕𑀢𑀸, 𑀲𑀸𑀫𑀻𑀢𑀺.

‘‘𑀅𑀳𑁄 𑀯𑀢 𑀢𑁂 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀓𑀲𑁆𑀫𑀸 𑀫𑀬𑁆𑀳𑀁 𑀦𑀸𑀘𑀺𑀓𑁆𑀔𑀺, 𑀅𑀧𑀺𑀘 𑀧𑀦 𑀢𑁂 𑀣𑁂𑀭𑁄 𑀔𑀫𑀸𑀧𑀺𑀢𑁄’’𑀢𑀺? ‘‘𑀦 𑀔𑀫𑀸𑀧𑀺𑀢𑁄, 𑀲𑀸𑀫𑀺. 𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁 𑀓𑀳𑀁 𑀣𑁂𑀭𑁄’’𑀢𑀺? ‘‘𑀇𑀫𑀫𑁂𑀯 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺. ‘‘𑀲𑀘𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀇𑀥𑀸𑀕𑀘𑁆𑀙𑁂𑀬𑁆𑀬, 𑀅𑀳𑀁 𑀫𑀫 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀸𑀳𑀸𑀭𑀁 𑀤𑀤𑁂𑀬𑁆𑀬𑀁, 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀲𑀻𑀖𑀁 𑀲𑀓𑁆𑀓𑀸𑀭𑀁 𑀓𑀭𑁄𑀳𑀺, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑁄 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄, ‘‘𑀪𑀦𑁆𑀢𑁂, 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. ‘‘𑀦𑀦𑀼 𑀢𑁆𑀯𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢, 𑀆𑀕𑀦𑁆𑀢𑀼𑀓𑁄𑀲𑀻’’𑀢𑀺. ‘‘𑀪𑀦𑁆𑀢𑁂, 𑀫𑀸 𑀅𑀫𑁆𑀳𑀸𑀓𑀁 𑀆𑀕𑀦𑁆𑀢𑀼𑀓𑀪𑀸𑀯𑀁 𑀧𑀼𑀘𑁆𑀙𑀣, 𑀲𑁆𑀯𑁂 𑀫𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺, 𑀕𑁂𑀳𑁂𑀧𑀺 𑀣𑁂𑀭𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑁄 𑀧𑀝𑀺𑀬𑀢𑁆𑀢𑁄. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀢𑀁 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀳𑀸𑀬𑀺𑀓𑀸𑀬 𑀔𑀫𑀣𑀸’’𑀢𑀺 𑀆𑀳. ‘‘𑀓𑀺𑀫𑁂𑀢’’𑀦𑁆𑀢𑀺? ‘‘𑀅𑀬𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑀓𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑁂 𑀑𑀮𑁄𑀓𑁂𑀢𑁆𑀯𑀸 𑀏𑀯𑀁 𑀦𑀸𑀫 𑀘𑀺𑀦𑁆𑀢𑁂𑀲𑀺, 𑀅𑀣𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀺, 𑀔𑀫𑀣, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀉𑀝𑁆𑀞𑀳𑀣, 𑀔𑀫𑀸𑀫𑀺 𑀯𑁄 𑀅𑀳’’𑀦𑁆𑀢𑀺. 𑀣𑁂𑀭𑁂𑀦 ‘‘𑀔𑀫𑀸𑀫𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀺.

𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀸𑀢𑀼𑀪𑀽𑀢𑀫𑀢𑁆𑀢𑁂𑀬𑁂𑀯 𑀢𑀁 𑀢𑀓𑁆𑀓𑀲𑀺𑀮𑀸𑀬 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀆𑀳 𑁋 ‘‘𑀲𑀫𑁆𑀫 𑀲𑀳𑀸𑀬𑀓, 𑀇𑀫𑁂 𑀤𑁆𑀯𑁂 𑀤𑀸𑀭𑀓𑀸 𑀢𑀯 𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀢𑁆𑀢𑀸 𑀫𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺𑀦𑁄 𑀧𑀼𑀢𑁆𑀢𑀸 𑀏𑀯, 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫, 𑀫𑀸 𑀉𑀓𑁆𑀓𑀡𑁆𑀞𑀻’’𑀢𑀺. ‘‘𑀲𑀫𑁆𑀫, 𑀅𑀳𑀁 𑀏𑀓𑁂𑀦𑀢𑁆𑀢𑀪𑀸𑀯𑁂𑀦 𑀧𑀞𑀫𑀁 𑀧𑀼𑀭𑀺𑀲𑁄 𑀳𑀼𑀢𑁆𑀯𑀸 𑀇𑀢𑁆𑀣𑀺𑀪𑀸𑀯𑀁 𑀧𑀢𑁆𑀯𑀸 𑀧𑀼𑀦 𑀧𑀼𑀭𑀺𑀲𑁄 𑀚𑀸𑀢𑁄𑀢𑀺 𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄, 𑀧𑀞𑀫𑀁 𑀫𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀧𑀼𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀸, 𑀇𑀤𑀸𑀦𑀺 𑀫𑁂 𑀓𑀼𑀘𑁆𑀙𑀺𑀢𑁄 𑀤𑁆𑀯𑁂 𑀧𑀼𑀢𑁆𑀢𑀸 𑀦𑀺𑀓𑁆𑀔𑀦𑁆𑀢𑀸, 𑀲𑁆𑀯𑀸𑀳𑀁 𑀏𑀓𑁂𑀦𑀢𑁆𑀢𑀪𑀸𑀯𑁂𑀦 𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄, 𑀧𑀼𑀦 ‘𑀕𑁂𑀳𑁂 𑀯𑀲𑀺𑀲𑁆𑀲𑀢𑀻’𑀢𑀺 𑀲𑀜𑁆𑀜𑀁 𑀫𑀸 𑀓𑀭𑀺, 𑀅𑀳𑀁 𑀫𑀫 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀇𑀫𑁂 𑀤𑁆𑀯𑁂 𑀤𑀸𑀭𑀓𑀸 𑀢𑀯 𑀪𑀸𑀭𑀸𑀢𑀺, 𑀇𑀫𑁂𑀲𑀼 𑀫𑀸 𑀧𑀫𑀚𑁆𑀚𑀻’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑁂 𑀲𑀻𑀲𑁂 𑀧𑀭𑀺𑀘𑀼𑀫𑁆𑀩𑀺𑀢𑁆𑀯𑀸 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀺𑀢𑀼 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀣𑁂𑀭𑁄𑀧𑀺 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸𑀯 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀲𑁄𑀭𑁂𑀬𑁆𑀬𑀢𑁆𑀣𑁂𑀭𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀚𑀦𑀧𑀤𑀯𑀸𑀲𑀺𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀲𑀗𑁆𑀔𑀼𑀪𑀺𑀢𑁆𑀯𑀸 𑀓𑁄𑀢𑀽𑀳𑀮𑀚𑀸𑀢𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀏𑀯𑀁 𑀓𑀺𑀭, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀆𑀯𑀼𑀲𑁄’’𑀢𑀺. ‘‘𑀪𑀦𑁆𑀢𑁂, 𑀏𑀯𑀭𑀽𑀧𑀫𑁆𑀧𑀺 𑀓𑀸𑀭𑀡𑀁 𑀦𑀸𑀫 𑀳𑁄𑀢𑀺’’? ‘‘𑀢𑀼𑀫𑁆𑀳𑀸𑀓𑀁 𑀓𑀼𑀘𑁆𑀙𑀺𑀬𑀁 𑀓𑀺𑀭 𑀤𑁆𑀯𑁂 𑀧𑀼𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀸, 𑀢𑀼𑀫𑁆𑀳𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀚𑀸𑀢𑀸, 𑀢𑁂𑀲𑀁 𑀯𑁄 𑀓𑀢𑀭𑁂𑀲𑀼 𑀩𑀮𑀯𑀲𑀺𑀦𑁂𑀳𑁄 𑀳𑁄𑀢𑀻’’𑀢𑀺? ‘‘𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀓𑁂𑀲𑀼, 𑀆𑀯𑀼𑀲𑁄’’𑀢𑀺. 𑀆𑀕𑀢𑀸𑀕𑀢𑀸 𑀦𑀺𑀩𑀤𑁆𑀥𑀁 𑀢𑀣𑁂𑀯 𑀧𑀼𑀘𑁆𑀙𑀺𑀁𑀲𑀼.

𑀣𑁂𑀭𑁄 ‘‘𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀢𑀓𑁂𑀲𑀼 𑀏𑀯 𑀲𑀺𑀦𑁂𑀳𑁄 𑀩𑀮𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁄 𑀳𑀭𑀸𑀬𑀫𑀸𑀦𑁄 𑀏𑀓𑁄𑀯 𑀦𑀺𑀲𑀻𑀤𑀢𑀺, 𑀏𑀓𑁄𑀯 𑀢𑀺𑀝𑁆𑀞𑀢𑀺. 𑀲𑁄 𑀏𑀯𑀁 𑀏𑀓𑀢𑁆𑀢𑀽𑀧𑀕𑀢𑁄 𑀅𑀢𑁆𑀢𑀪𑀸𑀯𑁂 𑀔𑀬𑀯𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀆𑀕𑀢𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀪𑀦𑁆𑀢𑁂, 𑀏𑀯𑀁 𑀓𑀺𑀭 𑀦𑀸𑀫 𑀅𑀳𑁄𑀲𑀻’’𑀢𑀺? ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀓𑀢𑀭𑁂𑀲𑀼 𑀲𑀺𑀦𑁂𑀳𑁄 𑀩𑀮𑀯𑀸’’𑀢𑀺? ‘‘𑀫𑀬𑁆𑀳𑀁 𑀓𑀢𑁆𑀣𑀘𑀺 𑀲𑀺𑀦𑁂𑀳𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀪𑀺𑀓𑁆𑀔𑀽 ‘‘𑀅𑀬𑀁 𑀅𑀪𑀽𑀢𑀁 𑀓𑀣𑁂𑀲𑀺, 𑀧𑀼𑀭𑀺𑀫𑀤𑀺𑀯𑀲𑁂𑀲𑀼 ‘𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀧𑀼𑀢𑁆𑀢𑁂𑀲𑀼 𑀲𑀺𑀦𑁂𑀳𑁄 𑀩𑀮𑀯𑀸’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀫𑀬𑁆𑀳𑀁 𑀓𑀢𑁆𑀣𑀘𑀺 𑀲𑀺𑀦𑁂𑀳𑁄 𑀦𑀢𑁆𑀣𑀻’𑀢𑀺 𑀯𑀤𑀢𑀺, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀫𑁆𑀫𑀸𑀧𑀡𑀺𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀫𑀕𑁆𑀕𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀓𑀢𑁆𑀣𑀘𑀺 𑀲𑀺𑀦𑁂𑀳𑁄 𑀚𑀸𑀢𑁄, 𑀬𑀁 𑀲𑀫𑁆𑀧𑀢𑁆𑀢𑀺𑀁 𑀦𑁂𑀯 𑀫𑀸𑀢𑀸, 𑀦 𑀧𑀺𑀢𑀸 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀯𑀢𑁆𑀢𑀁 𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀫𑁂𑀯 𑀤𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁩. ‘‘𑀦 𑀢𑀁 𑀫𑀸𑀢𑀸 𑀧𑀺𑀢𑀸 𑀓𑀬𑀺𑀭𑀸, 𑀅𑀜𑁆𑀜𑁂 𑀯𑀸𑀧𑀺 𑀘 𑀜𑀸𑀢𑀓𑀸;

𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺.

𑀢𑀢𑁆𑀣𑀦 𑀢𑀦𑁆𑀢𑀺 𑀢𑀁 𑀓𑀸𑀭𑀡𑀁 𑀦𑁂𑀯 𑀫𑀸𑀢𑀸 𑀓𑀭𑁂𑀬𑁆𑀬, 𑀦 𑀧𑀺𑀢𑀸, 𑀦 𑀅𑀜𑁆𑀜𑁂 𑀜𑀸𑀢𑀓𑀸. 𑀲𑀫𑁆𑀫𑀸𑀧𑀡𑀺𑀳𑀺𑀢𑀦𑁆𑀢𑀺 𑀤𑀲𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀲𑀫𑁆𑀫𑀸 𑀞𑀧𑀺𑀢𑀁. 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂𑀢𑀺 𑀢𑀢𑁄 𑀓𑀸𑀭𑀡𑀢𑁄 𑀲𑁂𑀬𑁆𑀬𑀲𑁄 𑀦𑀁 𑀯𑀭𑀢𑀭𑀁 𑀉𑀢𑁆𑀢𑀭𑀺𑀢𑀭𑀁 𑀓𑀭𑁂𑀬𑁆𑀬, 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀥𑀦𑀁 𑀤𑀤𑀫𑀸𑀦𑀸 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀁 𑀥𑀦𑀁 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀯𑀺𑀲𑀸𑀔𑀸𑀬 𑀫𑀸𑀢𑀸𑀧𑀺𑀢𑀭𑁄𑀧𑀺 𑀢𑀸𑀯 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸, 𑀢𑀲𑁆𑀲𑀸 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀼𑀔𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀁 𑀥𑀦𑀁 𑀅𑀤𑀁𑀲𑀼. 𑀘𑀢𑀽𑀲𑀼 𑀧𑀦 𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀸𑀫 𑀧𑀼𑀢𑁆𑀢𑀸𑀦𑀁 𑀦𑀢𑁆𑀣𑀺, 𑀧𑀕𑁂𑀯 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀯𑀸, 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀤𑀸𑀦𑁂 𑀓𑀣𑀸𑀯 𑀦𑀢𑁆𑀣𑀺, 𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀧𑀦 𑀘𑀺𑀢𑁆𑀢𑀁 𑀲𑀩𑁆𑀩𑀫𑁆𑀧𑁂𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀲𑁄𑀭𑁂𑀬𑁆𑀬𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑀘𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀯𑀕𑁆𑀕𑁄.