𑁯. 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑀭𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀸𑀯𑀢𑁆𑀣𑀺𑀢𑁄 𑀅𑀯𑀺𑀤𑀽𑀭𑁂 𑀦𑀺𑀕𑀫𑀕𑀸𑀫𑁂 𑀚𑀸𑀢𑀲𑀁𑀯𑀟𑁆𑀠𑁄 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 ‘‘𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀦𑀺𑀩𑀤𑁆𑀥𑀁 𑀜𑀸𑀢𑀺𑀕𑀸𑀫𑁂𑀬𑁂𑀯 𑀧𑀺𑀡𑁆𑀟𑀸𑀬 𑀯𑀺𑀘𑀭𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀲𑀼 𑀫𑀳𑀸𑀤𑀸𑀦𑀸𑀦𑀺 𑀓𑀭𑁄𑀦𑁆𑀢𑁂𑀲𑀼, 𑀧𑀲𑁂𑀦𑀤𑀺𑀓𑁄𑀲𑀮𑁂 𑀅𑀲𑀤𑀺𑀲𑀤𑀸𑀦𑀁 𑀓𑀭𑁄𑀦𑁆𑀢𑁂𑀧𑀺 𑀲𑀸𑀯𑀢𑁆𑀣𑀺𑀁 𑀦𑀸𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽 ‘‘𑀅𑀬𑀁 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑁄 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀜𑀸𑀢𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀲𑀼 𑀫𑀳𑀸𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼, 𑀧𑀲𑁂𑀦𑀤𑀺𑀓𑁄𑀲𑀮𑁂 𑀅𑀲𑀤𑀺𑀲𑀤𑀸𑀦𑀁 𑀓𑀭𑁄𑀦𑁆𑀢𑁂𑀧𑀺 𑀦𑁂𑀯 𑀆𑀕𑀘𑁆𑀙𑀢𑀻’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀫𑀬𑁆𑀳𑀁 𑀜𑀸𑀢𑀺𑀲𑀁𑀲𑀕𑁆𑀕𑁄, 𑀅𑀳𑀁 𑀏𑀢𑁂 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬 𑀅𑀚𑁆𑀛𑁄𑀳𑀭𑀡𑀻𑀬𑀫𑀢𑁆𑀢𑀁 𑀆𑀳𑀸𑀭𑀁 𑀮𑀪𑀸𑀫𑀺 𑀮𑀽𑀔𑁂 𑀯𑀸 𑀧𑀡𑀻𑀢𑁂 𑀯𑀸. 𑀬𑀸𑀧𑀦𑀫𑀢𑁆𑀢𑁂 𑀮𑀤𑁆𑀥𑁂 𑀧𑀼𑀦 𑀓𑀺𑀁 𑀆𑀳𑀸𑀭𑀧𑀭𑀺𑀬𑁂𑀲𑀦𑁂𑀦𑀸𑀢𑀺 𑀦 𑀕𑀘𑁆𑀙𑀸𑀫𑀺, 𑀜𑀸𑀢𑀻𑀳𑀺 𑀧𑀦 𑀫𑁂 𑀲𑀁𑀲𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀸 𑀧𑀓𑀢𑀺𑀬𑀸𑀧𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀚𑀸𑀦𑀦𑁆𑀢𑁄 𑁋 ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁 𑀪𑀺𑀓𑁆𑀔𑀼, 𑀬𑀁 𑀢𑁆𑀯𑀁 𑀫𑀸𑀤𑀺𑀲𑀁 𑀆𑀘𑀭𑀺𑀬𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀺𑀘𑁆𑀙𑁄 𑀅𑀳𑁄𑀲𑀺. 𑀅𑀬𑀜𑁆𑀳𑀺 𑀅𑀧𑁆𑀧𑀺𑀘𑁆𑀙𑀢𑀸 𑀦𑀸𑀫 𑀫𑀫 𑀢𑀦𑁆𑀢𑀺, 𑀫𑀫 𑀧𑀯𑁂𑀡𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀳𑀺𑀫𑀯𑀦𑁆𑀢𑁂 𑀕𑀗𑁆𑀕𑀸𑀢𑀻𑀭𑁂 𑀏𑀓𑀲𑁆𑀫𑀺𑀁 𑀉𑀤𑀼𑀫𑁆𑀩𑀭𑀯𑀦𑁂 𑀅𑀦𑁂𑀓𑀲𑀳𑀲𑁆𑀲𑀸 𑀲𑀼𑀯𑀸 𑀯𑀲𑀺𑀁𑀲𑀼. 𑀢𑀢𑁆𑀭𑁂𑀓𑁄 𑀲𑀼𑀯𑀭𑀸𑀚𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀭𑀼𑀓𑁆𑀔𑀲𑁆𑀲 𑀨𑀮𑁂𑀲𑀼 𑀔𑀻𑀡𑁂𑀲𑀼 𑀬𑀁 𑀬𑀤𑁂𑀯 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀅𑀗𑁆𑀓𑀼𑀭𑁄 𑀯𑀸 𑀧𑀢𑁆𑀢𑀁 𑀯𑀸 𑀢𑀘𑁄 𑀯𑀸, 𑀢𑀁 𑀢𑀁 𑀔𑀸𑀤𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀭𑀫𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺. 𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀪𑀸𑀯𑀕𑀼𑀡𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀭𑀼𑀓𑁆𑀔𑀁 𑀲𑀼𑀓𑁆𑀔𑀸𑀧𑁂𑀲𑀺. 𑀭𑀼𑀓𑁆𑀔𑁄 𑀑𑀪𑀕𑁆𑀕𑁄 𑀔𑀸𑀡𑀼𑀫𑀢𑁆𑀢𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄𑀯 𑀳𑀼𑀢𑁆𑀯𑀸 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀆𑀓𑁄𑀝𑀺𑀢𑁄 𑀯𑀺𑀬 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀙𑀺𑀤𑁆𑀤𑁂𑀳𑀺 𑀘𑀼𑀡𑁆𑀡𑀸𑀦𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀲𑀼𑀯𑀭𑀸𑀚𑀸 𑀢𑀸𑀦𑀺 𑀔𑀸𑀤𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀯𑀸𑀢𑀸𑀢𑀧𑀁 𑀅𑀕𑀡𑁂𑀢𑁆𑀯𑀸 𑀉𑀤𑀼𑀫𑁆𑀩𑀭𑀔𑀸𑀡𑀼𑀫𑀢𑁆𑀣𑀓𑁂 𑀦𑀺𑀲𑀻𑀤𑀢𑀺. 𑀲𑀓𑁆𑀓𑁄 𑀢𑀲𑁆𑀲 𑀧𑀭𑀫𑀧𑁆𑀧𑀺𑀘𑁆𑀙𑀪𑀸𑀯𑀁 𑀜𑀢𑁆𑀯𑀸, ‘‘𑀫𑀺𑀢𑁆𑀢𑀥𑀫𑁆𑀫𑀕𑀼𑀡𑀁 𑀓𑀣𑀸𑀧𑁂𑀢𑁆𑀯𑀸 𑀯𑀭𑀫𑀲𑁆𑀲 𑀤𑀢𑁆𑀯𑀸 𑀉𑀤𑀼𑀫𑁆𑀩𑀭𑀁 𑀅𑀫𑀢𑀨𑀮𑀁 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑁄 𑀳𑀁𑀲𑀭𑀸𑀚𑀸 𑀳𑀼𑀢𑁆𑀯𑀸 𑀲𑀼𑀚𑀁 𑀅𑀲𑀼𑀭𑀓𑀜𑁆𑀜𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀉𑀤𑀼𑀫𑁆𑀩𑀭𑀯𑀦𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀏𑀓𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀦𑁆𑀢𑀺 𑀭𑀼𑀓𑁆𑀔𑀸 𑀳𑀭𑀺𑀧𑀢𑁆𑀢𑀸, 𑀤𑀼𑀫𑀸𑀦𑁂𑀓𑀨𑀮𑀸 𑀩𑀳𑀽;

𑀓𑀲𑁆𑀫𑀸 𑀦𑀼 𑀲𑀼𑀓𑁆𑀔𑁂 𑀓𑁄𑀴𑀸𑀧𑁂, 𑀲𑀼𑀯𑀲𑁆𑀲 𑀦𑀺𑀭𑀢𑁄 𑀫𑀦𑁄’’𑀢𑀺. (𑀚𑀸. 𑁧.𑁯.𑁩𑁦);

𑀲𑀩𑁆𑀩𑀁 𑀲𑀼𑀯𑀚𑀸𑀢𑀓𑀁 𑀦𑀯𑀓𑀦𑀺𑀧𑀸𑀢𑁂 𑀆𑀕𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑁂𑀯 𑀳𑀺 𑀢𑀢𑁆𑀣 𑀘 𑀇𑀥 𑀘 𑀦𑀸𑀦𑀸, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀢𑀤𑀸 𑀲𑀓𑁆𑀓𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀼𑀯𑀭𑀸𑀚𑀸 𑀅𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸, ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀘𑁆𑀙𑀢𑀸 𑀦𑀸𑀫𑁂𑀲𑀸 𑀫𑀫 𑀢𑀦𑁆𑀢𑀺, 𑀫𑀫 𑀧𑀯𑁂𑀡𑀻, 𑀅𑀦𑀘𑁆𑀙𑀭𑀺𑀬𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀲𑁆𑀲 𑀫𑀸𑀤𑀺𑀲𑀁 𑀆𑀘𑀭𑀺𑀬𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀺𑀘𑁆𑀙𑀢𑀸, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑁂𑀦 𑀯𑀺𑀬 𑀅𑀧𑁆𑀧𑀺𑀘𑁆𑀙𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀯𑀸 𑀫𑀕𑁆𑀕𑀨𑀮𑁂𑀳𑀺 𑀯𑀸 𑀧𑀭𑀺𑀳𑀸𑀦𑀸𑀬, 𑀅𑀜𑁆𑀜𑀤𑀢𑁆𑀣𑀼 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨. ‘‘𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬𑀸𑀢𑀺 𑀲𑁄 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀯𑀸 𑀫𑀕𑁆𑀕𑀨𑀮𑁂𑀳𑀺 𑀯𑀸 𑀧𑀭𑀺𑀳𑀸𑀦𑀸𑀬 𑀅𑀪𑀩𑁆𑀩𑁄, 𑀦𑀸𑀧𑀺 𑀧𑀢𑁆𑀢𑁂𑀳𑀺 𑀧𑀭𑀺𑀳𑀸𑀬𑀢𑀺, 𑀦 𑀅𑀧𑁆𑀧𑀢𑁆𑀢𑀸𑀦𑀺 𑀦 𑀧𑀸𑀧𑀼𑀡𑀸𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂𑀬𑁂𑀯𑀸𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀦𑀺𑀕𑀫𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑀅𑀧𑁆𑀧𑀫𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸. 𑀤𑀼𑀢𑀺𑀬𑁄 𑀯𑀕𑁆𑀕𑁄.