𑁮. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 ‘‘𑀯𑀺𑀲𑁂𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀳𑀦𑁆𑀢𑀁 𑀤𑀸𑀯𑀕𑁆𑀕𑀺𑀁 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀏𑀓𑀁 𑀫𑀼𑀡𑁆𑀟𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑀺𑀦𑁆𑀦𑁄 𑀅𑀭𑀜𑁆𑀜𑀁 𑀟𑀬𑁆𑀳𑀫𑀸𑀦𑀁 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀆𑀭𑀫𑁆𑀫𑀡𑀁 𑀕𑀡𑁆𑀳𑀺 𑁋 ‘‘𑀬𑀣𑀸 𑀅𑀬𑀁 𑀅𑀕𑁆𑀕𑀺 𑀫𑀳𑀦𑁆𑀢𑀸𑀦𑀺 𑀘 𑀔𑀼𑀤𑁆𑀤𑀓𑀸𑀦𑀺 𑀘 𑀉𑀧𑀸𑀤𑀸𑀦𑀸𑀦𑀺 𑀟𑀳𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀯𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸𑀧𑀺 𑀫𑀳𑀦𑁆𑀢𑀸𑀦𑀺 𑀘 𑀔𑀼𑀤𑁆𑀤𑀓𑀸𑀦𑀺 𑀘 𑀲𑀁𑀬𑁄𑀚𑀦𑀸𑀦𑀺 𑀟𑀳𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸, ‘‘𑀏𑀯𑀫𑁂𑀯, 𑀪𑀺𑀓𑁆𑀔𑀼, 𑀫𑀳𑀦𑁆𑀢𑀸𑀦𑀺𑀧𑀺 𑀔𑀼𑀤𑁆𑀤𑀓𑀸𑀦𑀺𑀧𑀺 𑀉𑀧𑀸𑀤𑀸𑀦𑀸𑀦𑀺 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀅𑀡𑀼𑀁𑀣𑀽𑀮𑀸𑀦𑀺 𑀲𑀁𑀬𑁄𑀚𑀦𑀸𑀦𑀺, 𑀢𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀛𑀸𑀧𑁂𑀢𑁆𑀯𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑁄 𑀇𑀫𑀁 𑀑𑀪𑀸𑀲𑀕𑀸𑀣𑀫𑀸𑀳 𑁋

𑁩𑁧. ‘‘𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀲𑀁𑀬𑁄𑀚𑀦𑀁 𑀅𑀡𑀼𑀁 𑀣𑀽𑀮𑀁, 𑀟𑀳𑀁 𑀅𑀕𑁆𑀕𑀻𑀯 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀅𑀧𑁆𑀧𑀫𑀸𑀤𑀭𑀢𑁄𑀢𑀺 𑀅𑀧𑁆𑀧𑀫𑀸𑀤𑁂 𑀭𑀢𑁄 𑀅𑀪𑀺𑀭𑀢𑁄, 𑀅𑀧𑁆𑀧𑀫𑀸𑀤𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸𑀢𑀺 𑀦𑀺𑀭𑀬𑀼𑀧𑁆𑀧𑀢𑁆𑀢𑀺𑀆𑀤𑀺𑀓𑀁 𑀧𑀫𑀸𑀤𑁂 𑀪𑀬𑀁 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄, 𑀢𑀸𑀲𑀁 𑀯𑀸 𑀉𑀧𑁆𑀧𑀢𑁆𑀢𑀻𑀦𑀁 𑀫𑀽𑀮𑀢𑁆𑀢𑀸 𑀧𑀫𑀸𑀤𑀁 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄. 𑀲𑀁𑀬𑁄𑀚𑀦𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀁 𑀩𑀦𑁆𑀥𑀦𑀁 𑀧𑀚𑀸𑀦𑀁 𑀯𑀝𑁆𑀝𑁂 𑀑𑀲𑀻𑀤𑀸𑀧𑀦𑀲𑀫𑀢𑁆𑀣𑀁 𑀤𑀲𑀯𑀺𑀥𑀁 𑀲𑀁𑀬𑁄𑀚𑀦𑀁. 𑀅𑀡𑀼𑀁 𑀣𑀽𑀮𑀦𑁆𑀢𑀺 𑀫𑀳𑀦𑁆𑀢𑀜𑁆𑀘 𑀔𑀼𑀤𑁆𑀤𑀓𑀜𑁆𑀘. 𑀟𑀳𑀁 𑀅𑀕𑁆𑀕𑀻𑀯 𑀕𑀘𑁆𑀙𑀢𑀻𑀢𑀺 𑀬𑀣𑀸 𑀅𑀬𑀁 𑀅𑀕𑁆𑀕𑀻 𑀏𑀢𑀁 𑀫𑀳𑀦𑁆𑀢𑀜𑁆𑀘 𑀔𑀼𑀤𑁆𑀤𑀓𑀜𑁆𑀘 𑀉𑀧𑀸𑀤𑀸𑀦𑀁 𑀟𑀳𑀦𑁆𑀢𑁄𑀯 𑀕𑀘𑁆𑀙𑀢𑀺. 𑀏𑀯𑀫𑁂𑀲𑁄 𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼 𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑁂𑀦 𑀜𑀸𑀡𑀕𑁆𑀕𑀺𑀦𑀸 𑀏𑀢𑀁 𑀲𑀁𑀬𑁄𑀚𑀦𑀁 𑀟𑀳𑀦𑁆𑀢𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀓𑀭𑁄𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀺 𑀛𑀸𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀣𑁄𑀫𑁂𑀢𑁆𑀯𑀸 𑀯𑀡𑁆𑀡𑁂𑀢𑁆𑀯𑀸 𑀯𑀦𑁆𑀤𑀫𑀸𑀦𑁄𑀯 𑀧𑀓𑁆𑀓𑀸𑀫𑀻𑀢𑀺.

𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.