𑁭. 𑀫𑀖𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑁂𑀦 𑀫𑀖𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀯𑁂𑀲𑀸𑀮𑀺𑀬𑀜𑁆𑀳𑀺 𑀫𑀳𑀸𑀮𑀺 𑀦𑀸𑀫 𑀮𑀺𑀘𑁆𑀙𑀯𑀻 𑀯𑀲𑀢𑀺, 𑀲𑁄 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 (𑀤𑀻. 𑀦𑀺. 𑁨.𑁩𑁪𑁪 𑀆𑀤𑀬𑁄) 𑀲𑀼𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀫𑀳𑀢𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, ‘𑀤𑀺𑀲𑁆𑀯𑀸 𑀦𑀼 𑀔𑁄 𑀓𑀣𑁂𑀲𑀺, 𑀉𑀤𑀸𑀳𑀼 𑀅𑀤𑀺𑀲𑁆𑀯𑀸. 𑀚𑀸𑀦𑀸𑀢𑀺 𑀦𑀼 𑀔𑁄 𑀲𑀓𑁆𑀓𑀁, 𑀉𑀤𑀸𑀳𑀼 𑀦𑁄’𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣 𑀔𑁄, 𑀫𑀳𑀸𑀮𑀺, 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀫𑀳𑀸𑀮𑀺, 𑀮𑀺𑀘𑁆𑀙𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀝𑁆𑀞𑁄 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺? ‘‘𑀤𑀺𑀝𑁆𑀞𑁄 𑀔𑁄 𑀫𑁂, 𑀫𑀳𑀸𑀮𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺. ‘‘𑀲𑁄 𑀳𑀺 𑀦𑀼𑀦, 𑀪𑀦𑁆𑀢𑁂, 𑀲𑀓𑁆𑀓𑀧𑀢𑀺𑀭𑀽𑀧𑀓𑁄 𑀪𑀯𑀺𑀲𑁆𑀲𑀢𑀺. 𑀤𑀼𑀤𑁆𑀤𑀲𑁄 𑀳𑀺, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺. ‘‘𑀲𑀓𑁆𑀓𑀜𑁆𑀘 𑀔𑁆𑀯𑀸𑀳𑀁, 𑀫𑀳𑀸𑀮𑀺, 𑀧𑀚𑀸𑀦𑀸𑀫𑀺 𑀲𑀓𑁆𑀓𑀓𑀭𑀡𑁂 𑀘 𑀥𑀫𑁆𑀫𑁂, 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸, 𑀢𑀜𑁆𑀘 𑀧𑀚𑀸𑀦𑀸𑀫𑀺’’.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀫𑀖𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀆𑀯𑀲𑀣𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀯𑀸𑀲𑀯𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀳𑀲𑁆𑀲𑀫𑁆𑀧𑀺 𑀅𑀢𑁆𑀣𑀁 𑀫𑀼𑀳𑀼𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀲𑀳𑀲𑁆𑀲𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀚𑀸 𑀦𑀸𑀫 𑀅𑀲𑀼𑀭𑀓𑀜𑁆𑀜𑀸, 𑀧𑀚𑀸𑀧𑀢𑀺, 𑀢𑀲𑁆𑀫𑀸 ‘‘𑀲𑀼𑀚𑀫𑁆𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸. 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺? 𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀲𑀡𑁆𑀳𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀧𑀺𑀲𑀼𑀡𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀁, 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄 𑀅𑀲𑁆𑀲𑀁. 𑀬𑀸𑀯𑀚𑀻𑀯𑀁 𑀲𑀘𑁆𑀘𑀯𑀸𑀘𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀅𑀓𑁆𑀓𑁄𑀥𑀦𑁄 𑀅𑀲𑁆𑀲𑀁, ‘‘𑀲𑀘𑁂𑀧𑀺 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀦 𑀧𑀝𑀺𑀯𑀺𑀦𑁂𑀬𑁆𑀬’’𑀦𑁆𑀢𑀺. 𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸𑀢𑀺.

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁫𑁭) 𑁋

𑀇𑀤𑀁, 𑀫𑀳𑀸𑀮𑀺, 𑀲𑀓𑁆𑀓𑁂𑀦 𑀫𑀖𑀫𑀸𑀡𑀯𑀓𑀸𑀮𑁂 𑀓𑀢𑀓𑀫𑁆𑀫𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀦 ‘‘𑀓𑀣𑀁, 𑀪𑀦𑁆𑀢𑁂, 𑀫𑀖𑀫𑀸𑀡𑀯𑁄 𑀧𑀝𑀺𑀧𑀚𑁆𑀚𑀻’’𑀢𑀺? 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑀢𑁄 𑀲𑁄𑀢𑀼𑀓𑀸𑀫𑁂𑀦 𑀧𑀼𑀝𑁆𑀞𑁄 ‘‘𑀢𑁂𑀦 𑀳𑀺, 𑀫𑀳𑀸𑀮𑀺, 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀕𑀸𑀫𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀁 𑀧𑀸𑀤𑀦𑁆𑀢𑁂𑀦 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀧𑀭𑁄 𑀢𑀁 𑀩𑀸𑀳𑀼𑀦𑀸 𑀧𑀳𑀭𑀺𑀢𑁆𑀯𑀸 𑀢𑀢𑁄 𑀅𑀧𑀦𑁂𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀅𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲 𑀅𑀓𑀼𑀚𑁆𑀛𑀺𑀢𑁆𑀯𑀸𑀯 𑀅𑀜𑁆𑀜𑀁 𑀞𑀸𑀦𑀁 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀞𑀺𑀢𑁄. 𑀢𑀢𑁄𑀧𑀺 𑀦𑀁 𑀅𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀩𑀸𑀳𑀼𑀦𑀸 𑀧𑀳𑀭𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀲𑀬𑀁 𑀅𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲𑀧𑀺 𑀅𑀓𑀼𑀚𑁆𑀛𑀺𑀢𑁆𑀯𑀸𑀯 𑀅𑀜𑁆𑀜𑀁 𑀞𑀸𑀦𑀁 𑀭𑀫𑀡𑀻𑀬𑀁 𑀓𑀢𑁆𑀯𑀸 𑀞𑀺𑀢𑁄, 𑀇𑀢𑀺 𑀢𑀁 𑀕𑁂𑀳𑀢𑁄 𑀦𑀺𑀓𑁆𑀔𑀦𑁆𑀢𑀸 𑀦𑀺𑀓𑁆𑀔𑀦𑁆𑀢𑀸 𑀧𑀼𑀭𑀺𑀲𑀸 𑀩𑀸𑀳𑀼𑀦𑀸 𑀧𑀳𑀭𑀺𑀢𑁆𑀯𑀸 𑀞𑀺𑀢𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀲𑀼𑀁. 𑀲𑁄 ‘‘𑀲𑀩𑁆𑀩𑁂𑀧𑁂𑀢𑁂 𑀫𑀁 𑀦𑀺𑀲𑁆𑀲𑀸𑀬 𑀲𑀼𑀔𑀺𑀢𑀸 𑀚𑀸𑀢𑀸, 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀫𑀬𑁆𑀳𑀁 𑀲𑀼𑀔𑀤𑀸𑀬𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀧𑀼𑀦𑀤𑀺𑀯𑀲𑁂 𑀓𑀼𑀤𑀸𑀮𑀁 𑀆𑀤𑀸𑀬 𑀔𑀮𑀫𑀡𑁆𑀟𑀮𑀫𑀢𑁆𑀢𑀁 𑀞𑀸𑀦𑀁 𑀭𑀫𑀡𑀻𑀬𑀁 𑀅𑀓𑀸𑀲𑀺. 𑀲𑀩𑁆𑀩𑁂 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀲𑀻𑀢𑀲𑀫𑀬𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺, 𑀕𑀺𑀫𑁆𑀳𑀓𑀸𑀮𑁂 𑀉𑀤𑀓𑀁. 𑀢𑀢𑁄 ‘‘𑀭𑀫𑀡𑀻𑀬𑀁 𑀞𑀸𑀦𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀧𑀺𑀬𑀁, 𑀓𑀲𑁆𑀲𑀘𑀺 𑀅𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀬𑀸 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀦𑁆𑀢𑁂𑀦 𑀯𑀺𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀙𑀺𑀦𑁆𑀤𑀺𑀢𑁆𑀯𑀸, 𑀳𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀸 𑀭𑀼𑀓𑁆𑀔𑀲𑀸𑀔𑀸 𑀳𑀭𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣 𑀦𑀁 𑀅𑀧𑀭𑁄 𑀤𑀺𑀲𑁆𑀯𑀸 𑀆𑀳 𑁋 ‘‘𑀲𑀫𑁆𑀫, 𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀫𑀬𑁆𑀳𑀁 𑀲𑀕𑁆𑀕𑀕𑀸𑀫𑀺𑀦𑀁 𑀫𑀕𑁆𑀕𑀁 𑀓𑀭𑁄𑀫𑀺, 𑀲𑀫𑁆𑀫𑀸’’𑀢𑀺. ‘‘𑀢𑁂𑀦 𑀳𑀺 𑀅𑀳𑀫𑁆𑀧𑀺 𑀢𑁂 𑀲𑀳𑀸𑀬𑁄 𑀳𑁄𑀫𑀻’’𑀢𑀺. ‘‘𑀳𑁄𑀳𑀺, 𑀲𑀫𑁆𑀫, 𑀲𑀕𑁆𑀕𑁄 𑀦𑀸𑀫 𑀩𑀳𑀽𑀦𑀫𑁆𑀧𑀺 𑀫𑀦𑀸𑀧𑁄 𑀲𑀼𑀔𑀩𑀳𑀼𑀮𑁄’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀚𑀦𑀸 𑀅𑀳𑁂𑀲𑀼𑀁. 𑀢𑁂 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀅𑀧𑀭𑁄𑀧𑀺 𑀢𑁂𑀲𑀁 𑀲𑀳𑀸𑀬𑁄 𑀚𑀸𑀢𑁄, 𑀏𑀯𑀁 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀲𑀩𑁆𑀩𑁂𑀧𑀺 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀚𑀸𑀢𑀸. 𑀢𑁂 𑀲𑀩𑁆𑀩𑁂𑀧𑀺 𑀓𑀼𑀤𑀸𑀮𑀸𑀤𑀺𑀳𑀢𑁆𑀣𑀸 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀦𑁆𑀢𑀸 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺.

𑀢𑁂 𑀤𑀺𑀲𑁆𑀯𑀸 𑀕𑀸𑀫𑀪𑁄𑀚𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀅𑀬𑁄𑀕𑁂 𑀬𑀼𑀢𑁆𑀢𑀸, 𑀲𑀘𑁂 𑀇𑀫𑁂 𑀅𑀭𑀜𑁆𑀜𑀢𑁄 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀯𑀸 𑀆𑀳𑀭𑁂𑀬𑁆𑀬𑀼𑀁. 𑀲𑀼𑀭𑀁 𑀯𑀸 𑀓𑀢𑁆𑀯𑀸 𑀧𑀺𑀯𑁂𑀬𑁆𑀬𑀼𑀁, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀭𑁂𑀬𑁆𑀬𑀼𑀁, 𑀅𑀳𑀫𑁆𑀧𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀮𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀣𑀸’’𑀢𑀺? ‘‘𑀲𑀕𑁆𑀕𑀫𑀕𑁆𑀕𑀁, 𑀲𑀸𑀫𑀻’’𑀢𑀺. ‘‘𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁂𑀳𑀺 𑀦𑀸𑀫 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀭𑀜𑁆𑀜𑀢𑁄 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀆𑀳𑀭𑀺𑀢𑀼𑀁, 𑀲𑀼𑀭𑀁 𑀓𑀢𑁆𑀯𑀸 𑀧𑀸𑀢𑀼𑀁, 𑀦𑀸𑀦𑀧𑁆𑀧𑀓𑀸𑀭𑁂 𑀘 𑀓𑀫𑁆𑀫𑀦𑁆𑀢𑁂 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀺𑀁𑀲𑀼, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼𑀬𑁂𑀯. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀦𑀸𑀲𑁂𑀲𑁆𑀲𑀸𑀫𑀺 𑀦𑁂’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀘𑁄𑀭𑁂 𑀢𑁂, 𑀤𑁂𑀯, 𑀯𑀕𑁆𑀕𑀩𑀦𑁆𑀥𑀦𑁂𑀦 𑀯𑀺𑀘𑀭𑀦𑁆𑀢𑁂 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, ‘‘𑀕𑀘𑁆𑀙, 𑀢𑁂 𑀕𑀳𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀩𑁆𑀩𑁂 𑀢𑁂 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀅𑀯𑀻𑀫𑀁𑀲𑀺𑀢𑁆𑀯𑀸𑀯 ‘‘𑀳𑀢𑁆𑀣𑀺𑀦𑀸 𑀫𑀤𑁆𑀤𑀸𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀫𑀖𑁄 𑀲𑁂𑀲𑀸𑀦𑀁 𑀑𑀯𑀸𑀤𑀫𑀤𑀸𑀲𑀺 𑁋 ‘‘𑀲𑀫𑁆𑀫𑀸, 𑀞𑀧𑁂𑀢𑁆𑀯𑀸 𑀫𑁂𑀢𑁆𑀢𑀁 𑀅𑀜𑁆𑀜𑁄 𑀅𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀓𑀢𑁆𑀣𑀘𑀺 𑀓𑁄𑀧𑀁 𑀅𑀓𑀢𑁆𑀯𑀸 𑀭𑀜𑁆𑀜𑁂 𑀘 𑀕𑀸𑀫𑀪𑁄𑀚𑀓𑁂 𑀘 𑀫𑀤𑁆𑀤𑀦𑀳𑀢𑁆𑀣𑀺𑀫𑁆𑀳𑀺 𑀘 𑀅𑀢𑁆𑀢𑀦𑀺 𑀘 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀲𑀫𑀘𑀺𑀢𑁆𑀢𑀸𑀯 𑀳𑁄𑀣𑀸’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀅𑀣 𑀦𑁂𑀲𑀁 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀳𑀢𑁆𑀣𑀻 𑀉𑀧𑁆𑀧𑀲𑀗𑁆𑀓𑀫𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀺. 𑀭𑀸𑀚𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀫𑀤𑁆𑀤𑀺𑀢𑀼𑀁 𑀦 𑀯𑀺𑀲𑀳𑀺𑀲𑁆𑀲𑀢𑀺? ‘‘𑀕𑀘𑁆𑀙𑀣, 𑀦𑁂 𑀓𑀺𑀮𑀜𑁆𑀚𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀤𑁆𑀤𑀸𑀧𑁂𑀣𑀸’’𑀢𑀺 𑀆𑀳. 𑀢𑁂 𑀓𑀺𑀮𑀜𑁆𑀚𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀤𑁆𑀤𑀺𑀢𑀼𑀁 𑀧𑁂𑀲𑀺𑀬𑀫𑀸𑀦𑁄𑀧𑀺 𑀳𑀢𑁆𑀣𑀻 𑀤𑀽𑀭𑀢𑁄𑀯 𑀧𑀝𑀺𑀓𑁆𑀓𑀫𑀺.

𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀓𑀸𑀭𑀡𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸, 𑀫𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀓𑀺𑀁 𑀦 𑀮𑀪𑀣𑀸’’𑀢𑀺? ‘‘𑀓𑀺𑀁 𑀦𑀸𑀫𑁂𑀢𑀁, 𑀤𑁂𑀯𑀸’’𑀢𑀺? ‘‘𑀢𑀼𑀫𑁆𑀳𑁂 𑀓𑀺𑀭 𑀯𑀕𑁆𑀕𑀩𑀦𑁆𑀥𑀦𑁂𑀦 𑀘𑁄𑀭𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀘𑀭𑀣𑀸’’𑀢𑀺? ‘‘𑀓𑁄 𑀏𑀯𑀫𑀸𑀳, 𑀤𑁂𑀯𑀸’’𑀢𑀺? ‘‘𑀕𑀸𑀫𑀪𑁄𑀚𑀓𑁄, 𑀢𑀸𑀢𑀸’’𑀢𑀺. ‘‘𑀦 𑀫𑀬𑀁, 𑀤𑁂𑀯, 𑀘𑁄𑀭𑀸, 𑀫𑀬𑀁 𑀧𑀦 𑀅𑀢𑁆𑀢𑀦𑁄 𑀲𑀕𑁆𑀕𑀫𑀕𑁆𑀕𑀁 𑀲𑁄𑀥𑁂𑀦𑁆𑀢𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀫, 𑀕𑀸𑀫𑀪𑁄𑀚𑀓𑁄 𑀅𑀫𑁆𑀳𑁂 𑀅𑀓𑀼𑀲𑀮𑀓𑀺𑀭𑀺𑀬𑀸𑀬 𑀦𑀺𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀓𑀭𑁄𑀦𑁆𑀢𑁂 𑀦𑀸𑀲𑁂𑀢𑀼𑀓𑀸𑀫𑁄 𑀓𑀼𑀚𑁆𑀛𑀺𑀢𑁆𑀯𑀸 𑀏𑀯𑀫𑀸𑀳𑀸’’𑀢𑀺. 𑀅𑀣 𑀭𑀸𑀚𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸, ‘‘𑀢𑀸𑀢𑀸, 𑀅𑀬𑀁 𑀢𑀺𑀭𑀘𑁆𑀙𑀸𑀦𑁄 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀚𑀸𑀦𑀸𑀢𑀺, 𑀅𑀳𑀁 𑀫𑀦𑀼𑀲𑁆𑀲𑀪𑀽𑀢𑁄 𑀚𑀸𑀦𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀔𑀫𑀣 𑀫𑁂’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑀁 𑀕𑀸𑀫𑀪𑁄𑀚𑀓𑀁 𑀢𑁂𑀲𑀁 𑀤𑀸𑀲𑀁, 𑀳𑀢𑁆𑀣𑀺𑀁 𑀆𑀭𑁄𑀳𑀦𑀺𑀬𑀁, 𑀢𑀜𑁆𑀘 𑀕𑀸𑀫𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀢𑁂 ‘‘𑀇𑀥𑁂𑀯 𑀦𑁄 𑀓𑀢𑀧𑀼𑀜𑁆𑀜𑀲𑁆𑀲𑀸𑀦𑀺𑀲𑀁𑀲𑁄 𑀤𑀺𑀝𑁆𑀞𑁄’’𑀢𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀫𑀸𑀦𑀲𑀸 𑀳𑀼𑀢𑁆𑀯𑀸 𑀢𑀁 𑀳𑀢𑁆𑀣𑀺𑀁 𑀯𑀸𑀭𑁂𑀦 𑀯𑀸𑀭𑁂𑀦 𑀅𑀪𑀺𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀸 𑀫𑀦𑁆𑀢𑀬𑀺𑀁𑀲𑀼 ‘‘𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀅𑀢𑀺𑀭𑁂𑀓𑀢𑀭𑀁 𑀧𑀼𑀜𑁆𑀜𑀁 𑀓𑀸𑀢𑀩𑁆𑀩𑀁, 𑀓𑀺𑀁 𑀓𑀭𑁄𑀫? 𑀘𑀢𑀼𑀫𑀳𑀸𑀧𑀣𑁂 𑀣𑀸𑀯𑀭𑀁 𑀓𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀯𑀺𑀲𑁆𑀲𑀫𑀦𑀲𑀸𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀸𑀮𑀁 𑀧𑀝𑁆𑀞𑀧𑁂𑀲𑀼𑀁. 𑀫𑀸𑀢𑀼𑀕𑀸𑀫𑁂𑀲𑀼 𑀧𑀦 𑀯𑀺𑀕𑀢𑀘𑁆𑀙𑀦𑁆𑀤𑀢𑀸𑀬 𑀢𑀲𑁆𑀲𑀸 𑀲𑀸𑀮𑀸𑀬 𑀫𑀸𑀢𑀼𑀕𑀸𑀫𑀸𑀦𑀁 𑀧𑀢𑁆𑀢𑀺𑀁 𑀦𑀸𑀤𑀁𑀲𑀼.

𑀫𑀖𑀲𑁆𑀲 𑀧𑀦 𑀕𑁂𑀳𑁂 𑀦𑀦𑁆𑀤𑀸, 𑀘𑀺𑀢𑁆𑀢𑀸, 𑀲𑀼𑀥𑀫𑁆𑀫𑀸, 𑀲𑀼𑀚𑀸𑀢𑀺 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀳𑁄𑀦𑁆𑀢𑀺. 𑀢𑀸𑀲𑀼 𑀲𑀼𑀥𑀫𑁆𑀫𑀸 𑀯𑀟𑁆𑀠𑀓𑀺𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸, ‘‘𑀪𑀸𑀢𑀺𑀓, 𑀇𑀫𑀺𑀲𑁆𑀲𑀸 𑀲𑀸𑀮𑀸𑀬 𑀫𑀁 𑀚𑁂𑀝𑁆𑀞𑀺𑀓𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀮𑀜𑁆𑀚𑀁 𑀅𑀤𑀸𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀞𑀫𑀫𑁂𑀯 𑀓𑀡𑁆𑀡𑀺𑀓𑀢𑁆𑀣𑀸𑀬 𑀭𑀼𑀓𑁆𑀔𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀓𑀡𑁆𑀡𑀺𑀓𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸, ‘‘𑀲𑀼𑀥𑀫𑁆𑀫𑀸 𑀦𑀸𑀫 𑀅𑀬𑀁 𑀲𑀸𑀮𑀸’’𑀢𑀺 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀣𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀦𑁂 𑀯𑀟𑁆𑀠𑀓𑀻 𑀲𑀸𑀮𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀡𑁆𑀡𑀺𑀓𑀸𑀭𑁄𑀧𑀦𑀤𑀺𑀯𑀲𑁂 ‘‘𑀅𑀳𑁄, 𑀅𑀬𑁆𑀬𑀸, 𑀏𑀓𑀁 𑀓𑀭𑀡𑀻𑀬𑀁 𑀦 𑀲𑀭𑀺𑀫𑁆𑀳𑀸’’𑀢𑀺 𑀆𑀳. ‘‘𑀓𑀺𑀁 𑀦𑀸𑀫, 𑀪𑁄’’𑀢𑀺? ‘‘𑀓𑀡𑁆𑀡𑀺𑀓’’𑀦𑁆𑀢𑀺. ‘‘𑀳𑁄𑀢𑀼 𑀢𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀇𑀤𑀸𑀦𑀺 𑀙𑀺𑀦𑁆𑀦𑀭𑀼𑀓𑁆𑀔𑁂𑀦 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀧𑀼𑀩𑁆𑀩𑁂𑀬𑁂𑀯 𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑀺𑀢𑀓𑀡𑁆𑀡𑀺𑀓𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀲𑀘𑁂 𑀓𑀲𑁆𑀲𑀘𑀺 𑀕𑁂𑀳𑁂 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀓𑁆𑀓𑀸𑀬𑀺𑀓𑀓𑀡𑁆𑀡𑀺𑀓𑀸 𑀅𑀢𑁆𑀣𑀺, 𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸’’𑀢𑀺. 𑀢𑁂 𑀧𑀭𑀺𑀬𑁂𑀲𑀦𑁆𑀢𑀸 𑀲𑀼𑀥𑀫𑁆𑀫𑀸𑀬 𑀕𑁂𑀳𑁂 𑀤𑀺𑀲𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸𑀧𑀺 𑀫𑀽𑀮𑁂𑀦 𑀦 𑀮𑀪𑀺𑀁𑀲𑀼. ‘‘𑀲𑀘𑁂 𑀫𑀁 𑀲𑀸𑀮𑀸𑀬 𑀧𑀢𑁆𑀢𑀺𑀁 𑀓𑀭𑁄𑀣, 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀫𑀬𑀁 𑀫𑀸𑀢𑀼𑀕𑀸𑀫𑀸𑀦𑀁 𑀧𑀢𑁆𑀢𑀺𑀁 𑀦 𑀤𑀫𑁆𑀫𑀸’’𑀢𑀺 𑀆𑀳𑀁𑀲𑀼.

𑀅𑀣 𑀦𑁂 𑀯𑀟𑁆𑀠𑀓𑀻 𑀆𑀳 𑁋 ‘‘𑀅𑀬𑁆𑀬𑀸, 𑀢𑀼𑀫𑁆𑀳𑁂 𑀓𑀺𑀁 𑀓𑀣𑁂𑀣, 𑀞𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀅𑀜𑁆𑀜𑀁 𑀫𑀸𑀢𑀼𑀕𑀸𑀫𑀭𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀕𑀡𑁆𑀳𑀣 𑀓𑀡𑁆𑀡𑀺𑀓𑀁. 𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀺𑀝𑁆𑀞𑀁 𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀓𑀡𑁆𑀡𑀺𑀓𑀁 𑀕𑀳𑁂𑀢𑁆𑀯𑀸 𑀲𑀸𑀮𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀺𑀥𑀸 𑀯𑀺𑀪𑀚𑀺𑀁𑀲𑀼. 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀇𑀲𑁆𑀲𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀭𑀺𑀁𑀲𑀼, 𑀏𑀓𑀲𑁆𑀫𑀺𑀁 𑀤𑀼𑀕𑁆𑀕𑀢𑀸𑀦𑀁, 𑀏𑀓𑀲𑁆𑀫𑀺𑀁 𑀕𑀺𑀮𑀸𑀦𑀸𑀦𑀁. 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀢𑁂𑀢𑁆𑀢𑀺𑀁𑀲 𑀨𑀮𑀓𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀳𑀢𑁆𑀣𑀺𑀲𑁆𑀲 𑀲𑀜𑁆𑀜𑀁 𑀅𑀤𑀁𑀲𑀼 𑁋 ‘‘𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑁆𑀯𑀸 𑀬𑀲𑁆𑀲 𑀅𑀢𑁆𑀣𑀢𑀨𑀮𑀓𑁂 𑀦𑀺𑀲𑀻𑀤𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀲𑀸𑀫𑀺𑀓𑀲𑁆𑀲𑁂𑀯 𑀕𑁂𑀳𑁂 𑀧𑀢𑀺𑀝𑁆𑀞𑀧𑁂𑀳𑀺, 𑀢𑀲𑁆𑀲 𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀧𑀸𑀦𑀻𑀬𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑀬𑀦𑀸𑀦𑀺 𑀲𑀩𑁆𑀩𑀸𑀦𑀺 𑀨𑀮𑀓𑀲𑀸𑀫𑀺𑀓𑀲𑁆𑀲𑁂𑀯 𑀪𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀳𑀢𑁆𑀣𑀻 𑀆𑀕𑀢𑀸𑀕𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀲𑀸𑀫𑀺𑀓𑀲𑁆𑀲𑁂𑀯 𑀖𑀭𑀁 𑀦𑁂𑀢𑀺. 𑀲𑁄 𑀢𑀲𑁆𑀲 𑀢𑀁 𑀤𑀺𑀯𑀲𑀁 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺. 𑀫𑀖𑁄 𑀲𑀸𑀮𑀸𑀬 𑀅𑀯𑀺𑀤𑀽𑀭𑁂 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀁 𑀭𑁄𑀧𑁂𑀢𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀧𑀸𑀲𑀸𑀡𑀨𑀮𑀓𑀁 𑀅𑀢𑁆𑀣𑀭𑀺. 𑀲𑀸𑀮𑀁 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑀸 𑀚𑀦𑀸 𑀓𑀡𑁆𑀡𑀺𑀓𑀁 𑀑𑀮𑁄𑀓𑁂𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀯𑀸𑀘𑁂𑀢𑁆𑀯𑀸, ‘‘𑀲𑀼𑀥𑀫𑁆𑀫𑀸 𑀦𑀸𑀫𑁂𑀲𑀸 𑀲𑀸𑀮𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀢𑁆𑀢𑀺𑀁𑀲𑀚𑀦𑀸𑀦𑀁 𑀦𑀸𑀫𑀁 𑀦 𑀧𑀜𑁆𑀜𑀸𑀬𑀢𑀺. 𑀦𑀦𑁆𑀤𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀲𑀸𑀮𑀁 𑀓𑀭𑁄𑀦𑁆𑀢𑀸 𑀅𑀫𑁆𑀳𑁂 𑀅𑀧𑀢𑁆𑀢𑀺𑀓𑀸 𑀓𑀭𑀺𑀁𑀲𑀼, 𑀲𑀼𑀥𑀫𑁆𑀫𑀸 𑀧𑀦 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀓𑀡𑁆𑀡𑀺𑀓𑀁 𑀓𑀢𑁆𑀯𑀸 𑀧𑀢𑁆𑀢𑀺𑀓𑀸 𑀚𑀸𑀢𑀸, 𑀫𑀬𑀸𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺? 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀸𑀮𑀁 𑀆𑀕𑀢𑀸𑀕𑀢𑀸𑀦𑀁 𑀧𑀸𑀦𑀻𑀬𑀜𑁆𑀘𑁂𑀯 𑀦𑁆𑀳𑀸𑀦𑁄𑀤𑀓𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀧𑁄𑀓𑁆𑀔𑀭𑀡𑀺𑀁 𑀓𑀸𑀭𑁂𑀲𑀺. 𑀘𑀺𑀢𑁆𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀼𑀥𑀫𑁆𑀫𑀸𑀬 𑀓𑀡𑁆𑀡𑀺𑀓𑀸 𑀤𑀺𑀦𑁆𑀦𑀸, 𑀦𑀦𑁆𑀤𑀸𑀬 𑀧𑁄𑀓𑁆𑀔𑀭𑀡𑀻 𑀓𑀸𑀭𑀺𑀢𑀸, 𑀫𑀬𑀸𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺? 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀸𑀮𑀁 𑀆𑀕𑀢𑀸𑀕𑀢𑁂𑀳𑀺 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀕𑀫𑀦𑀓𑀸𑀮𑁂𑀧𑀺 𑀫𑀸𑀮𑀁 𑀧𑀺𑀮𑀦𑁆𑀥𑀺𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀸𑀭𑀸𑀫𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀭𑀫𑀡𑀻𑀬𑀁 𑀧𑀼𑀧𑁆𑀨𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀫𑀺𑀁 𑀆𑀭𑀸𑀫𑁂 ‘‘𑀅𑀲𑀼𑀓𑁄 𑀦𑀸𑀫 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑁄 𑀦𑀢𑁆𑀣𑀻’’𑀢𑀺 𑀦𑀸𑀳𑁄𑀲𑀺.

𑀲𑀼𑀚𑀸 𑀧𑀦 ‘‘𑀅𑀳𑀁 𑀫𑀖𑀲𑁆𑀲 𑀫𑀸𑀢𑀼𑀮𑀥𑀻𑀢𑀸 𑀘𑁂𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀘, 𑀏𑀢𑁂𑀦 𑀓𑀢𑀁 𑀓𑀫𑁆𑀫𑀁 𑀫𑀬𑁆𑀳𑀫𑁂𑀯, 𑀫𑀬𑀸 𑀓𑀢𑀁 𑀏𑀢𑀲𑁆𑀲𑁂𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀅𑀢𑁆𑀢𑀪𑀸𑀯𑀫𑁂𑀯 𑀫𑀡𑁆𑀟𑀬𑀫𑀸𑀦𑀸 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀫𑀖𑁄𑀧𑀺 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀦𑀓𑀫𑁆𑀫𑀁 𑀲𑀘𑁆𑀘𑀯𑀸𑀘𑀁 𑀅𑀨𑀭𑀼𑀲𑀯𑀸𑀘𑀁 𑀅𑀧𑀺, 𑀲𑀼𑀡𑀯𑀸𑀘𑀁 𑀫𑀘𑁆𑀙𑁂𑀭𑀯𑀺𑀦𑀬𑀁 𑀅𑀓𑁆𑀓𑁄𑀥𑀦𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑁋

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

‘‘𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 ‘𑀲𑀧𑁆𑀧𑀼𑀭𑀺𑀲𑁄’𑀇𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁫𑁭) 𑁋

𑀏𑀯𑀁 𑀧𑀲𑀁𑀲𑀺𑀬𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀧𑀺𑀲𑁆𑀲 𑀲𑀳𑀸𑀬𑀓𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀯𑀟𑁆𑀠𑀓𑀻 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀲𑀼𑀭𑀸 𑀯𑀲𑀦𑁆𑀢𑀺. 𑀢𑁂 ‘‘𑀅𑀪𑀺𑀦𑀯𑀸 𑀤𑁂𑀯𑀧𑀼𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀤𑀺𑀩𑁆𑀩𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀓𑀲𑁆𑀲𑀘𑀺 𑀅𑀧𑀺𑀯𑀦𑀢𑁆𑀣𑀸𑀬 𑀲𑀜𑁆𑀜𑀫𑀤𑀸𑀲𑀺. 𑀅𑀲𑀼𑀭𑀸 𑀤𑀺𑀩𑁆𑀩𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀫𑀚𑁆𑀚𑀺𑀁𑀲𑀼. 𑀲𑀓𑁆𑀓𑁄 ‘‘𑀓𑀺𑀁 𑀫𑁂 𑀇𑀫𑁂𑀳𑀺 𑀲𑀸𑀥𑀸𑀭𑀡𑁂𑀦 𑀭𑀚𑁆𑀚𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 𑀢𑁂 𑀧𑀸𑀤𑁂𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀔𑀺𑀧𑀸𑀧𑁂𑀲𑀺. 𑀢𑁂 𑀅𑀯𑀁𑀲𑀺𑀭𑀸 𑀲𑀫𑀼𑀤𑁆𑀤𑁂 𑀧𑀢𑀺𑀁𑀲𑀼. 𑀅𑀣 𑀦𑁂𑀲𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀺𑀦𑁂𑀭𑀼𑀦𑁄 𑀳𑁂𑀝𑁆𑀞𑀺𑀫𑀢𑀮𑁂 𑀅𑀲𑀼𑀭𑀯𑀺𑀫𑀸𑀦𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺, 𑀘𑀺𑀢𑁆𑀢𑀧𑀸𑀝𑀮𑀺 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺.

𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀧𑀦 𑀅𑀲𑀼𑀭𑁂𑀲𑀼 𑀧𑀭𑀸𑀚𑀺𑀢𑁂𑀲𑀼 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀤𑁂𑀯𑀦𑀕𑀭𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀦 𑀦𑀕𑀭𑀲𑁆𑀲 𑀧𑀸𑀘𑀻𑀦𑀧𑀘𑁆𑀙𑀺𑀫𑀤𑁆𑀯𑀸𑀭𑀸𑀦𑀁 𑀅𑀦𑁆𑀢𑀭𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀺, 𑀢𑀣𑀸 𑀤𑀓𑁆𑀔𑀺𑀡𑀼𑀢𑁆𑀢𑀭𑀤𑁆𑀯𑀸𑀭𑀸𑀦𑀁. 𑀢𑀁 𑀔𑁄 𑀧𑀦 𑀦𑀕𑀭𑀁 𑀤𑁆𑀯𑀸𑀭𑀲𑀳𑀲𑁆𑀲𑀬𑀼𑀢𑁆𑀢𑀁 𑀅𑀳𑁄𑀲𑀺 𑀆𑀭𑀸𑀫𑀧𑁄𑀓𑁆𑀔𑀭𑀡𑀺𑀧𑀝𑀺𑀫𑀡𑁆𑀟𑀺𑀢𑀁. 𑀢𑀲𑁆𑀲 𑀫𑀚𑁆𑀛𑁂 𑀲𑀸𑀮𑀸𑀬 𑀦𑀺𑀲𑁆𑀲𑀦𑁆𑀤𑁂𑀦 𑀢𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁂𑀳𑀺 𑀥𑀚𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀲𑀢𑁆𑀢𑀭𑀢𑀦𑀫𑀬𑁄 𑀲𑀢𑁆𑀢𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀯𑁂𑀚𑀬𑀦𑁆𑀢𑁄 𑀦𑀸𑀫 𑀧𑀸𑀲𑀸𑀤𑁄 𑀉𑀕𑁆𑀕𑀜𑁆𑀙𑀺. 𑀲𑀼𑀯𑀡𑁆𑀡𑀬𑀝𑁆𑀞𑀻𑀲𑀼 𑀫𑀡𑀺𑀥𑀚𑀸 𑀅𑀳𑁂𑀲𑀼𑀁, 𑀫𑀡𑀺𑀬𑀝𑁆𑀞𑀻𑀲𑀼 𑀲𑀼𑀯𑀡𑁆𑀡𑀥𑀚𑀸; 𑀧𑀯𑀸𑀴𑀬𑀝𑁆𑀞𑀻𑀲𑀼 𑀫𑀼𑀢𑁆𑀢𑀥𑀚𑀸, 𑀫𑀼𑀢𑁆𑀢𑀬𑀝𑁆𑀞𑀻𑀲𑀼 𑀧𑀯𑀸𑀴𑀥𑀚𑀸; 𑀲𑀢𑁆𑀢𑀭𑀢𑀦𑀫𑀬𑀸𑀲𑀼 𑀬𑀝𑁆𑀞𑀻𑀲𑀼 𑀲𑀢𑁆𑀢𑀭𑀢𑀦𑀥𑀚𑀸, 𑀫𑀚𑁆𑀛𑁂 𑀞𑀺𑀢𑁄 𑀥𑀚𑁄 𑀢𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀅𑀳𑁄𑀲𑀺. 𑀇𑀢𑀺 𑀲𑀸𑀮𑀸𑀬 𑀦𑀺𑀲𑁆𑀲𑀦𑁆𑀤𑁂𑀦 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀧𑀸𑀲𑀸𑀤𑁄 𑀲𑀢𑁆𑀢𑀭𑀢𑀦𑀫𑀬𑁄𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀦𑀺𑀩𑁆𑀩𑀢𑁆𑀢𑀺, 𑀧𑀸𑀲𑀸𑀡𑀨𑀮𑀓𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀤𑀻𑀖𑀢𑁄 𑀲𑀝𑁆𑀞𑀺𑀬𑁄𑀚𑀦𑀸 𑀧𑀼𑀣𑀼𑀮𑀢𑁄 𑀧𑀡𑁆𑀡𑀸𑀲𑀬𑁄𑀚𑀦𑀸 𑀩𑀳𑀮𑀢𑁄 𑀧𑀜𑁆𑀘𑀤𑀲𑀬𑁄𑀚𑀦𑀸 𑀚𑀬𑀲𑀼𑀫𑀦𑀭𑀢𑁆𑀢𑀓𑀫𑁆𑀩𑀮𑀯𑀡𑁆𑀡𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀓𑀸𑀮𑁂 𑀉𑀧𑀟𑁆𑀠𑀓𑀸𑀬𑁄 𑀧𑀯𑀺𑀲𑀢𑀺, 𑀉𑀝𑁆𑀞𑀺𑀢𑀓𑀸𑀮𑁂 𑀊𑀦𑀁 𑀧𑀭𑀺𑀧𑀽𑀭𑀢𑀺.

𑀳𑀢𑁆𑀣𑀻 𑀧𑀦 𑀏𑀭𑀸𑀯𑀡𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀤𑁂𑀯𑀮𑁄𑀓𑀲𑁆𑀫𑀺𑀜𑁆𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀦𑀺𑀓𑁆𑀔𑀫𑀦𑀓𑀸𑀮𑁂 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀏𑀭𑀸𑀯𑀡𑁄 𑀦𑀸𑀫 𑀳𑀢𑁆𑀣𑀻 𑀅𑀳𑁄𑀲𑀺. 𑀲𑁄 𑀢𑁂𑀢𑁆𑀢𑀺𑀁𑀲𑀚𑀦𑀸𑀦𑀁 𑀅𑀢𑁆𑀣𑀸𑀬 𑀢𑁂𑀢𑁆𑀢𑀺𑀁𑀲 𑀓𑀼𑀫𑁆𑀪𑁂 𑀫𑀸𑀧𑁂𑀲𑀺 𑀆𑀯𑀝𑁆𑀝𑁂𑀦 𑀢𑀺𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑁂, 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀲𑀓𑁆𑀓𑀲𑁆𑀲 𑀅𑀢𑁆𑀣𑀸𑀬 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀢𑀺𑀁𑀲𑀬𑁄𑀚𑀦𑀺𑀓𑀁 𑀓𑀼𑀫𑁆𑀪𑀁 𑀫𑀸𑀧𑁂𑀲𑀺. 𑀢𑀲𑁆𑀲 𑀉𑀧𑀭𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀭𑀢𑀦𑀫𑀡𑁆𑀟𑀧𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀲𑀢𑁆𑀢𑀭𑀢𑀦𑀫𑀬𑀸 𑀬𑁄𑀚𑀦𑀼𑀩𑁆𑀩𑁂𑀥𑀸 𑀥𑀚𑀸 𑀉𑀝𑁆𑀞𑀳𑀦𑁆𑀢𑀺. 𑀧𑀭𑀺𑀬𑀦𑁆𑀢𑁂 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀁 𑀑𑀮𑀫𑁆𑀩𑀢𑀺. 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀤𑁆𑀤𑀲𑀁𑀫𑀺𑀲𑁆𑀲𑁄 𑀤𑀺𑀩𑁆𑀩𑀕𑀻𑀢𑀲𑀤𑁆𑀤𑁄 𑀯𑀺𑀬 𑀭𑀯𑁄 𑀦𑀺𑀘𑁆𑀙𑀭𑀢𑀺. 𑀫𑀡𑁆𑀟𑀧𑀫𑀚𑁆𑀛𑁂 𑀲𑀓𑁆𑀓𑀲𑁆𑀲𑀢𑁆𑀣𑀸𑀬 𑀬𑁄𑀚𑀦𑀺𑀓𑁄 𑀫𑀡𑀺𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑀓𑁆𑀓𑁄 𑀦𑀺𑀲𑀻𑀤𑀺. 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑀸 𑀅𑀢𑁆𑀢𑀦𑁄 𑀓𑀼𑀫𑁆𑀪𑁂 𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀢𑁆𑀢𑀺𑀁𑀲𑀸𑀬 𑀓𑀼𑀫𑁆𑀪𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀓𑀼𑀫𑁆𑀪𑁂 𑀲𑀢𑁆𑀢 𑀲𑀢𑁆𑀢 𑀤𑀦𑁆𑀢𑁂 𑀫𑀸𑀧𑁂𑀲𑀺. 𑀢𑁂𑀲𑀼 𑀏𑀓𑁂𑀓𑁄 𑀧𑀡𑁆𑀡𑀸𑀲𑀬𑁄𑀚𑀦𑀸𑀬𑀸𑀫𑁄, 𑀏𑀓𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀤𑀦𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀧𑁄𑀓𑁆𑀔𑀭𑀡𑀺𑀬𑁄 𑀳𑁄𑀦𑁆𑀢𑀺, 𑀏𑀓𑁂𑀓𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀲𑀢𑁆𑀢 𑀲𑀢𑁆𑀢 𑀧𑀤𑀼𑀫𑀺𑀦𑀻𑀕𑀘𑁆𑀙𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀕𑀘𑁆𑀙𑁂 𑀲𑀢𑁆𑀢 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀼𑀧𑁆𑀨𑁂 𑀲𑀢𑁆𑀢 𑀲𑀢𑁆𑀢 𑀧𑀢𑁆𑀢𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀢𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀤𑁂𑀯𑀥𑀻𑀢𑀭𑁄 𑀦𑀘𑁆𑀘𑀦𑁆𑀢𑀺. 𑀏𑀯𑀁 𑀲𑀫𑀦𑁆𑀢𑀸 𑀧𑀡𑁆𑀡𑀸𑀲𑀬𑁄𑀚𑀦𑀞𑀸𑀦𑁂𑀲𑀼 𑀳𑀢𑁆𑀣𑀺𑀤𑀦𑁆𑀢𑁂𑀲𑀼𑀬𑁂𑀯 𑀦𑀝𑀲𑀫𑀚𑁆𑀚𑀸 𑀳𑁄𑀦𑁆𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀦𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀘𑀭𑀢𑀺.

𑀲𑀼𑀥𑀫𑁆𑀫𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑀼𑀥𑀫𑁆𑀫𑀸 𑀦𑀸𑀫 𑀦𑀯 𑀬𑁄𑀚𑀦𑀲𑀢𑀺𑀓𑀸 𑀤𑁂𑀯𑀲𑀪𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀭𑀫𑀡𑀻𑀬𑀢𑀭𑀁 𑀓𑀺𑀭 𑀅𑀜𑁆𑀜𑀁 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀫𑀸𑀲𑀲𑁆𑀲 𑀅𑀝𑁆𑀞 𑀤𑀺𑀯𑀲𑁂 𑀥𑀫𑁆𑀫𑀲𑁆𑀲𑀯𑀦𑀁 𑀢𑀢𑁆𑀣𑁂𑀯 𑀳𑁄𑀢𑀺. 𑀬𑀸𑀯𑀚𑁆𑀚𑀢𑀦𑀸 𑀅𑀜𑁆𑀜𑀢𑀭𑀁 𑀭𑀫𑀡𑀻𑀬𑀁 𑀞𑀸𑀦𑀁 𑀤𑀺𑀲𑁆𑀯𑀸, ‘‘𑀲𑀼𑀥𑀫𑁆𑀫𑀸 𑀤𑁂𑀯𑀲𑀪𑀸 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀦𑀦𑁆𑀤𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸 𑀦𑀦𑁆𑀤𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀦𑀺𑀩𑁆𑀩𑀢𑁆𑀢𑀺. 𑀘𑀺𑀢𑁆𑀢𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀸𑀧𑀺 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀘𑀺𑀢𑁆𑀢𑀮𑀢𑀸𑀯𑀦𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁆𑀣 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂 𑀤𑁂𑀯𑀧𑀼𑀢𑁆𑀢𑁂 𑀦𑁂𑀢𑁆𑀯𑀸 𑀫𑁄𑀳𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑀼𑀚𑀸 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀏𑀓𑀺𑀲𑁆𑀲𑀸 𑀕𑀺𑀭𑀺𑀓𑀦𑁆𑀤𑀭𑀸𑀬 𑀏𑀓𑀸 𑀩𑀓𑀲𑀓𑀼𑀡𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀲𑀼𑀥𑀫𑁆𑀫𑀸 𑀇𑀥𑁂𑀯 𑀦𑀺𑀩𑁆𑀩𑀢𑁆𑀢𑀸, 𑀢𑀣𑀸 𑀦𑀦𑁆𑀤𑀸 𑀘 𑀘𑀺𑀢𑁆𑀢𑀸 𑀘, 𑀲𑀼𑀚𑀸 𑀦𑀼 𑀔𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀢𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀁 𑀤𑀺𑀲𑁆𑀯𑀸, ‘‘𑀩𑀸𑀮𑀸 𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀅𑀓𑀢𑁆𑀯𑀸 𑀇𑀤𑀸𑀦𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸, 𑀇𑀤𑀸𑀦𑀺 𑀧𑀦 𑀢𑀁 𑀧𑀼𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀇𑀥𑀸𑀦𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀺𑀁 𑀓𑀭𑁄𑀦𑁆𑀢𑀻 𑀇𑀥 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑁄 𑀧𑀦 𑀢𑁆𑀯𑀁, 𑀲𑀸𑀫𑀻’’𑀢𑀺? ‘‘𑀅𑀳𑀁 𑀢𑁂 𑀲𑀸𑀫𑀺𑀓𑁄 𑀫𑀖𑁄’’𑀢𑀺. ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄𑀲𑀺, 𑀲𑀸𑀫𑀻’’𑀢𑀺? ‘‘𑀅𑀳𑀁 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄’’. ‘‘𑀢𑀯 𑀲𑀳𑀸𑀬𑀺𑀓𑀸𑀦𑀁 𑀧𑀦 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀲𑀸𑀫𑀻’’𑀢𑀺. ‘‘𑀢𑀸𑀧𑀺 𑀫𑀫𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀧𑀲𑁆𑀲𑀺𑀲𑁆𑀲𑀲𑀺 𑀢𑀸 𑀲𑀳𑀸𑀬𑀺𑀓𑀸’’𑀢𑀺. ‘‘𑀓𑀣𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺? 𑀲𑀓𑁆𑀓𑁄 ‘‘𑀅𑀳𑀁 𑀢𑀁 𑀢𑀢𑁆𑀣 𑀦𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀢𑀮𑁂 𑀞𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀦𑀦𑁆𑀤𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀢𑀭𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀺𑀓𑀁 𑀲𑀼𑀚𑀁 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺. ‘‘𑀓𑀼𑀳𑀺𑀁 𑀲𑀸, 𑀤𑁂𑀯𑀸’’𑀢𑀺? ‘‘𑀦𑀦𑁆𑀤𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀞𑀺𑀢𑀸’’𑀢𑀺 𑀆𑀳. 𑀢𑀸 𑀢𑀺𑀲𑁆𑀲𑁄𑀧𑀺 𑀕𑀦𑁆𑀢𑁆𑀯𑀸, ‘‘𑀅𑀳𑁄 𑀅𑀬𑁆𑀬𑀸𑀬 𑀏𑀯𑀭𑀽𑀧𑀁 𑀅𑀢𑁆𑀢𑀪𑀸𑀯𑀫𑀡𑁆𑀟𑀦𑀲𑁆𑀲 𑀨𑀮𑀁, 𑀇𑀤𑀸𑀦𑀺𑀲𑁆𑀲𑀸 𑀢𑀼𑀡𑁆𑀟𑀁 𑀧𑀲𑁆𑀲𑀣, 𑀧𑀸𑀤𑁂 𑀧𑀲𑁆𑀲𑀣, 𑀚𑀗𑁆𑀖𑀸 𑀧𑀲𑁆𑀲𑀣, 𑀲𑁄𑀪𑀢𑀺 𑀯𑀢𑀲𑁆𑀲𑀸 𑀅𑀢𑁆𑀢𑀪𑀸𑀯𑁄’’𑀢𑀺 𑀓𑁂𑀴𑀺𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀧𑀼𑀦 𑀲𑀓𑁆𑀓𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑀺𑀝𑁆𑀞𑀸 𑀢𑁂 𑀲𑀳𑀸𑀬𑀺𑀓𑀸’’𑀢𑀺 𑀯𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀫𑀁 𑀉𑀧𑁆𑀧𑀡𑁆𑀟𑁂𑀢𑁆𑀯𑀸 𑀕𑀢𑀸, 𑀢𑀢𑁆𑀣𑁂𑀯 𑀫𑀁 𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀢𑀢𑁆𑀣𑁂𑀯 𑀦𑁂𑀢𑁆𑀯𑀸 𑀉𑀤𑀓𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, ‘‘𑀤𑀺𑀝𑁆𑀞𑀸 𑀢𑁂 𑀢𑀸𑀲𑀁 𑀲𑀫𑁆𑀧𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑀺𑀝𑁆𑀞𑀸, 𑀤𑁂𑀯𑀸’’𑀢𑀺? ‘‘𑀢𑀬𑀸𑀧𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀽𑀧𑀸𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺? ‘‘𑀫𑀬𑀸 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀭𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀭𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺. 𑀅𑀣𑀲𑁆𑀲𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀤𑀢𑁆𑀯𑀸, ‘‘𑀅𑀧𑁆𑀧𑀫𑀢𑁆𑀢𑀸 𑀭𑀓𑁆𑀔𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀬𑀁𑀫𑀢𑀫𑀘𑁆𑀙𑀓𑁂𑀬𑁂𑀯 𑀧𑀭𑀺𑀬𑁂𑀲𑀺𑀢𑁆𑀯𑀸 𑀔𑀸𑀤𑀢𑀺. 𑀲𑀓𑁆𑀓𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑀲𑁆𑀲𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸, 𑀯𑀸𑀮𑀼𑀓𑀸𑀧𑀺𑀝𑁆𑀞𑁂 𑀫𑀢𑀫𑀘𑁆𑀙𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀫𑀢𑀫𑀘𑁆𑀙𑀓𑁄’’𑀢𑀺 𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀫𑀘𑁆𑀙𑁄 𑀕𑀺𑀮𑀦𑀓𑀸𑀮𑁂 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀲𑀺. 𑀲𑀸 ‘‘𑀲𑀚𑀻𑀯𑀫𑀘𑁆𑀙𑀓𑁄’’𑀢𑀺 𑀉𑀤𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲𑀸 𑀧𑀼𑀭𑀢𑁄 𑀉𑀢𑁆𑀢𑀸𑀦𑁄 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀧𑀼𑀦 𑀲𑀸 ‘‘𑀫𑀢𑀫𑀘𑁆𑀙𑀓𑁄’’𑀢𑀺 𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀕𑀺𑀮𑀦𑀓𑀸𑀮𑁂 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀲𑀺. 𑀢𑀁 𑀤𑀺𑀲𑁆𑀯𑀸 ‘‘𑀲𑀚𑀻𑀯𑀫𑀘𑁆𑀙𑁄’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀲𑀸𑀥𑀼𑀓𑀁 𑀲𑀻𑀮𑀁 𑀭𑀓𑁆𑀔𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 ‘‘𑀅𑀳𑀁 𑀢𑀯 𑀯𑀻𑀫𑀁𑀲𑀦𑀢𑁆𑀣𑀸𑀬 𑀆𑀕𑀢𑁄, 𑀲𑀸𑀥𑀼𑀓𑀁 𑀲𑀻𑀮𑀁 𑀭𑀓𑁆𑀔𑀲𑀺, 𑀏𑀯𑀁 𑀭𑀓𑁆𑀔𑀫𑀸𑀦𑀸 𑀦 𑀘𑀺𑀭𑀲𑁆𑀲𑁂𑀯 𑀫𑀫 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀬𑀁𑀫𑀢𑀫𑀘𑁆𑀙𑀁 𑀮𑀪𑀢𑀺 𑀯𑀸, 𑀦 𑀯𑀸. 𑀅𑀮𑀪𑀫𑀸𑀦𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑁂𑀯 𑀲𑀼𑀲𑁆𑀲𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲 𑀲𑀻𑀮𑀲𑁆𑀲 𑀨𑀮𑁂𑀦 𑀩𑀸𑀭𑀸𑀡𑀲𑀺𑀬𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲𑀸 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀲𑀓𑁆𑀓𑁄 ‘‘𑀓𑀼𑀳𑀺𑀁 𑀦𑀼 𑀔𑁄 𑀲𑀸 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀺𑀲𑁆𑀯𑀸, ‘‘𑀇𑀤𑀸𑀦𑀺 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀴𑀸𑀮𑀼𑀓𑀯𑀡𑁆𑀡𑁂𑀦 𑀧𑀜𑁆𑀜𑀸𑀬𑀫𑀸𑀦𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀢𑀁 𑀧𑀸𑀚𑁂𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀏𑀴𑀸𑀮𑀼𑀓𑀸𑀦𑀺 𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑁄 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀫𑀼𑀕𑁆𑀕𑀫𑀸𑀲𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑁂 𑀧𑀦 ‘‘𑀫𑀽𑀮𑁂𑀦 𑀦 𑀤𑁂𑀫𑀻’’𑀢𑀺 𑀯𑀢𑁆𑀯𑀸, ‘‘𑀓𑀣𑀁 𑀤𑁂𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀲𑀻𑀮𑀭𑀓𑁆𑀔𑀺𑀓𑀸𑀬 𑀇𑀢𑁆𑀣𑀺𑀬𑀸 𑀤𑀫𑁆𑀫𑀻’’𑀢𑀺 𑀆𑀳. ‘‘𑀲𑀻𑀮𑀁 𑀦𑀸𑀫, 𑀲𑀸𑀫𑀺, 𑀓𑀻𑀤𑀺𑀲𑀁, 𑀓𑀺𑀁 𑀓𑀸𑀴𑀁, 𑀉𑀤𑀸𑀳𑀼 𑀦𑀻𑀮𑀸𑀤𑀺𑀯𑀡𑁆𑀡’’𑀦𑁆𑀢𑀺? ‘‘𑀢𑀼𑀫𑁆𑀳𑁂 ‘𑀲𑀻𑀮𑀁 𑀓𑀻𑀤𑀺𑀲’𑀦𑁆𑀢𑀺𑀧𑀺 𑀦 𑀚𑀸𑀦𑀸𑀣, 𑀓𑀺𑀫𑁂𑀯 𑀦𑀁 𑀭𑀓𑁆𑀔𑀺𑀲𑁆𑀲𑀣, 𑀲𑀻𑀮𑀭𑀓𑁆𑀔𑀺𑀓𑀸𑀬 𑀧𑀦 𑀤𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀫𑀺, 𑀏𑀲𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀥𑀻𑀢𑀸 ‘𑀲𑀻𑀮𑀁 𑀭𑀓𑁆𑀔𑀸𑀫𑀻’𑀢𑀺 𑀯𑀺𑀘𑀭𑀢𑀺, 𑀏𑀢𑀺𑀲𑁆𑀲𑀸 𑀤𑁂𑀳𑀻’’𑀢𑀺. 𑀲𑀸𑀧𑀺 𑀦𑀁 ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀤𑁂𑀳𑀺, 𑀲𑀸𑀫𑀻’’𑀢𑀺 𑀆𑀳. ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀅𑀯𑀺𑀚𑀳𑀺𑀢𑀧𑀜𑁆𑀘𑀲𑀻𑀮𑀸’’𑀢𑀺. ‘‘𑀢𑀼𑀬𑁆𑀳𑀫𑁂𑀯𑁂𑀢𑀸𑀦𑀺 𑀫𑀬𑀸 𑀆𑀦𑀻𑀢𑀸𑀦𑀻’’𑀢𑀺 𑀬𑀸𑀦𑀓𑀁 𑀧𑀸𑀚𑁂𑀦𑁆𑀢𑁄 𑀢𑀲𑁆𑀲𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀳𑀺 𑀅𑀦𑀸𑀳𑀭𑀺𑀬𑀁 𑀓𑀢𑁆𑀯𑀸 𑀏𑀴𑀸𑀮𑀼𑀓𑀯𑀡𑁆𑀡𑁂𑀦 𑀤𑁂𑀯𑀤𑀢𑁆𑀢𑀺𑀬𑀁 𑀥𑀦𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸, ‘‘𑀇𑀤𑀁 𑀢𑁂 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀥𑀦𑀁, 𑀧𑀜𑁆𑀘𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀤𑀻𑀦𑀺 𑀓𑀢𑁆𑀯𑀸 𑀭𑀓𑁆𑀔𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸𑀧𑀺 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀲𑀼𑀭𑀪𑀯𑀦𑁂 𑀅𑀲𑀼𑀭𑀚𑁂𑀝𑁆𑀞𑀓𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀲𑀓𑁆𑀓𑀲𑁆𑀲 𑀯𑁂𑀭𑀺𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀤𑁆𑀯𑀻𑀲𑀼 𑀧𑀦 𑀅𑀢𑁆𑀢𑀪𑀸𑀯𑁂𑀲𑀼 𑀲𑀻𑀮𑀲𑁆𑀲 𑀲𑀼𑀭𑀓𑁆𑀔𑀺𑀢𑀢𑁆𑀢𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀲𑀸𑀥𑀸𑀭𑀡𑀸𑀬 𑀭𑀽𑀧𑀲𑀺𑀭𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀯𑁂𑀧𑀘𑀺𑀢𑁆𑀢𑀺𑀅𑀲𑀼𑀭𑀺𑀦𑁆𑀤𑁄 𑀆𑀕𑀢𑀸𑀕𑀢𑀸𑀦𑀁 𑀅𑀲𑀼𑀭𑀸𑀦𑀁 ‘‘𑀢𑀼𑀫𑁆𑀳𑁂 𑀫𑀫 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀸 𑀦 𑀳𑁄𑀣𑀸’’𑀢𑀺 𑀢𑀁 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸, ‘‘𑀫𑀫 𑀥𑀻𑀢𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀲𑀸𑀫𑀺𑀓𑀁 𑀕𑀳𑁂𑀲𑁆𑀲𑀢𑀻’’𑀢𑀺 𑀅𑀲𑀼𑀭𑀩𑀮𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸, ‘‘𑀢𑀼𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑀁 𑀲𑀸𑀫𑀺𑀓𑀁 𑀕𑀡𑁆𑀳𑀸’’𑀢𑀺 𑀢𑀲𑁆𑀲𑀸, 𑀳𑀢𑁆𑀣𑁂 𑀧𑀼𑀧𑁆𑀨𑀤𑀸𑀫𑀁 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸, ‘‘𑀇𑀤𑀸𑀦𑀺 𑀫𑀬𑀸 𑀕𑀦𑁆𑀢𑁆𑀯𑀸 𑀢𑀁 𑀆𑀦𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀮𑁆𑀮𑀓𑀅𑀲𑀼𑀭𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀲𑀸𑀧𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀤𑀺𑀝𑁆𑀞𑀫𑀢𑁆𑀢𑀸𑀯 𑀧𑀼𑀩𑁆𑀩𑀲𑀦𑁆𑀦𑀺𑀯𑀸𑀲𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀦 𑀧𑁂𑀫𑁂𑀦 𑀫𑀳𑁄𑀖𑁂𑀦𑁂𑀯 𑀅𑀚𑁆𑀛𑁄𑀢𑁆𑀣𑀝𑀳𑀤𑀬𑀸 𑀳𑀼𑀢𑁆𑀯𑀸, ‘‘𑀏𑀲𑁄 𑀫𑁂 𑀲𑀸𑀫𑀺𑀓𑁄’’𑀢𑀺 𑀢𑀲𑁆𑀲 𑀉𑀧𑀭𑀺 𑀧𑀼𑀧𑁆𑀨𑀤𑀸𑀫𑀁 𑀔𑀺𑀧𑀺. 𑀅𑀲𑀼𑀭𑀸 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀁 𑀅𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀮𑀪𑀺, 𑀅𑀬𑀫𑁂𑀯𑀲𑁆𑀲 𑀥𑀻𑀢𑀼 𑀧𑀺𑀢𑀸𑀫𑀳𑀢𑁄 𑀫𑀳𑀮𑁆𑀮𑀓𑁄 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀮𑀚𑁆𑀚𑀫𑀸𑀦𑀸 𑀅𑀧𑀓𑁆𑀓𑀫𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺 𑀦𑀤𑀺𑀢𑁆𑀯𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺. 𑀅𑀲𑀼𑀭𑀸 ‘‘𑀯𑀜𑁆𑀘𑀺𑀢𑀫𑁆𑀳𑀸 𑀚𑀭𑀲𑀓𑁆𑀓𑁂𑀦𑀸’’𑀢𑀺 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀫𑀸𑀢𑀮𑀺, 𑀲𑀗𑁆𑀕𑀸𑀳𑀓𑁄 𑀯𑁂𑀚𑀬𑀦𑁆𑀢𑀭𑀣𑀁 𑀆𑀳𑀭𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑁆𑀞𑀸𑀲𑀺. 𑀲𑀓𑁆𑀓𑁄 𑀢𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 𑀤𑁂𑀯𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀲𑀺𑀧𑁆𑀧𑀮𑀺𑀯𑀦𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀭𑀣𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀻𑀢𑀸 𑀕𑀭𑀼𑀴𑀧𑁄𑀢𑀓𑀸 𑀯𑀺𑀭𑀯𑀺𑀁𑀲𑀼. 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀫𑀸𑀢𑀮𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑁂 𑀏𑀢𑁂 𑀯𑀺𑀭𑀯𑀦𑁆𑀢𑀻’’𑀢𑀺? ‘‘𑀕𑀭𑀼𑀴𑀧𑁄𑀢𑀓𑀸, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀭𑀣𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑁂𑀦𑀸’’𑀢𑀺. ‘‘𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑁄 𑀤𑀺𑀚𑁄 𑀭𑀣𑀯𑁂𑀕𑁂𑀦 𑀯𑀺𑀘𑀼𑀡𑁆𑀡𑀺𑀢𑁄 𑀫𑀸 𑀦𑀲𑁆𑀲𑀺, 𑀦𑀺𑀯𑀢𑁆𑀢𑁂𑀳𑀺 𑀭𑀣’’𑀦𑁆𑀢𑀺. 𑀲𑁄𑀧𑀺 𑀲𑀺𑀦𑁆𑀥𑀯𑀲𑀳𑀲𑁆𑀲𑀲𑁆𑀲 𑀤𑀡𑁆𑀟𑀓𑀲𑀜𑁆𑀜𑀁 𑀤𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀲𑀼𑀭𑀸 ‘‘𑀚𑀭𑀲𑀓𑁆𑀓𑁄 𑀅𑀲𑀼𑀭𑀧𑀼𑀭𑀢𑁄 𑀧𑀝𑁆𑀞𑀸𑀬 𑀧𑀮𑀸𑀬𑀦𑁆𑀢𑁄 𑀇𑀤𑀸𑀦𑀺 𑀭𑀣𑀁 𑀦𑀺𑀯𑀢𑁆𑀢𑁂𑀲𑀺, 𑀅𑀤𑁆𑀥𑀸 𑀢𑁂𑀦 𑀉𑀧𑀢𑁆𑀣𑀫𑁆𑀪𑁄 𑀮𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑁂𑀦𑁂𑀯 𑀅𑀲𑀼𑀭𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀲𑀻𑀲𑀁 𑀦 𑀉𑀓𑁆𑀔𑀺𑀧𑀺𑀁𑀲𑀼.

𑀲𑀓𑁆𑀓𑁄𑀧𑀺 𑀲𑀼𑀚𑀁 𑀅𑀲𑀼𑀭𑀓𑀜𑁆𑀜𑀁 𑀤𑁂𑀯𑀦𑀕𑀭𑀁 𑀦𑁂𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀸𑀦𑀁 𑀅𑀘𑁆𑀙𑀭𑀸𑀓𑁄𑀝𑀻𑀦𑀁 𑀚𑁂𑀝𑁆𑀞𑀺𑀓𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀲𑀓𑁆𑀓𑀁 𑀯𑀭𑀁 𑀬𑀸𑀘𑀺 𑁋 ‘‘𑀫𑀳𑀸𑀭𑀸𑀚, 𑀫𑀫 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀫𑀸𑀢𑀸𑀧𑀺𑀢𑀭𑁄 𑀯𑀸 𑀪𑀸𑀢𑀺𑀓𑀪𑀕𑀺𑀦𑀺𑀬𑁄 𑀯𑀸 𑀦𑀢𑁆𑀣𑀺, 𑀬𑀢𑁆𑀣 𑀬𑀢𑁆𑀣 𑀕𑀘𑁆𑀙𑀲𑀺, 𑀢𑀢𑁆𑀣 𑀢𑀢𑁆𑀣 𑀫𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲𑀸 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀺𑀢𑀸𑀬 𑀅𑀲𑀼𑀭𑀸 ‘‘𑀅𑀫𑁆𑀳𑀸𑀓𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀤𑀺𑀩𑁆𑀩𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀧𑀼𑀧𑁆𑀨𑀦𑀓𑀸𑀮𑁄’’𑀢𑀺 𑀬𑀼𑀤𑁆𑀥𑀢𑁆𑀣𑀸𑀬 𑀲𑀕𑁆𑀕𑀁 𑀅𑀪𑀺𑀭𑀼𑀳𑀦𑁆𑀢𑀺. 𑀲𑀓𑁆𑀓𑁄 𑀳𑁂𑀝𑁆𑀞𑀸𑀲𑀫𑀼𑀤𑁆𑀤𑁂 𑀦𑀸𑀕𑀸𑀦𑀁 𑀆𑀭𑀓𑁆𑀔𑀁 𑀅𑀤𑀸𑀲𑀺, 𑀢𑀢𑁄 𑀲𑀼𑀧𑀡𑁆𑀡𑀸𑀦𑀁, 𑀢𑀢𑁄 𑀓𑀼𑀫𑁆𑀪𑀡𑁆𑀟𑀸𑀦𑀁, 𑀢𑀢𑁄 𑀬𑀓𑁆𑀔𑀸𑀦𑀁. 𑀢𑀢𑁄 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁. 𑀲𑀩𑁆𑀩𑀽𑀧𑀭𑀺 𑀧𑀦 𑀉𑀧𑀤𑁆𑀤𑀯𑀦𑀺𑀯𑀢𑁆𑀢𑀦𑀢𑁆𑀣𑀸𑀬 𑀤𑁂𑀯𑀦𑀕𑀭𑀤𑁆𑀯𑀸𑀭𑁂𑀲𑀼 𑀯𑀚𑀺𑀭𑀳𑀢𑁆𑀣𑀸 𑀇𑀦𑁆𑀤𑀧𑀝𑀺𑀫𑀸 𑀞𑀧𑁂𑀲𑀺. 𑀅𑀲𑀼𑀭𑀸 𑀦𑀸𑀕𑀸𑀤𑀬𑁄 𑀚𑀺𑀦𑀺𑀢𑁆𑀯𑀸 𑀆𑀕𑀢𑀸𑀧𑀺 𑀇𑀦𑁆𑀤𑀧𑀝𑀺𑀫𑀸 𑀤𑀽𑀭𑀢𑁄 𑀤𑀺𑀲𑁆𑀯𑀸 ‘‘𑀲𑀓𑁆𑀓𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀧𑀮𑀸𑀬𑀦𑁆𑀢𑀺. 𑀏𑀯𑀁, 𑀫𑀳𑀸𑀮𑀺, 𑀫𑀖𑁄 𑀫𑀸𑀡𑀯𑁄 𑀅𑀧𑁆𑀧𑀫𑀸𑀤𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺. 𑀏𑀯𑀁 𑀅𑀧𑁆𑀧𑀫𑀢𑁆𑀢𑁄 𑀧𑀦𑁂𑀲 𑀏𑀯𑀭𑀽𑀧𑀁 𑀇𑀲𑁆𑀲𑀭𑀺𑀬𑀁 𑀧𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀧𑁆𑀧𑀫𑀸𑀤𑁄 𑀦𑀸𑀫𑁂𑀲 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑁄. 𑀅𑀧𑁆𑀧𑀫𑀸𑀤𑀜𑁆𑀳𑀺 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀯𑀺𑀲𑁂𑀲𑀸𑀦𑀁 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦. ‘‘𑀅𑀧𑁆𑀧𑀫𑀸𑀤𑁂𑀦 𑀫𑀖𑀯𑀸, 𑀤𑁂𑀯𑀸𑀦𑀁 𑀲𑁂𑀝𑁆𑀞𑀢𑀁 𑀕𑀢𑁄;

𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀧𑀫𑀸𑀤𑁄 𑀕𑀭𑀳𑀺𑀢𑁄 𑀲𑀤𑀸’’𑀢𑀺.

𑀢𑀢𑁆𑀣 𑀅𑀧𑁆𑀧𑀫𑀸𑀤𑁂𑀦𑀸𑀢𑀺 𑀫𑀘𑀮𑀕𑀸𑀫𑁂 𑀪𑀽𑀫𑀺𑀧𑁆𑀧𑀤𑁂𑀲𑀲𑁄𑀥𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀢𑁂𑀦 𑀅𑀧𑁆𑀧𑀫𑀸𑀤𑁂𑀦. 𑀫𑀖𑀯𑀸𑀢𑀺 𑀇𑀤𑀸𑀦𑀺 ‘‘𑀫𑀖𑀯𑀸’’𑀢𑀺𑀧𑀜𑁆𑀜𑀸𑀢𑁄 𑀫𑀖𑁄 𑀫𑀸𑀡𑀯𑁄 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀭𑀸𑀚𑀪𑀸𑀯𑁂𑀦 𑀤𑁂𑀯𑀸𑀦𑀁 𑀲𑁂𑀝𑁆𑀞𑀢𑀁 𑀕𑀢𑁄. 𑀧𑀲𑀁𑀲𑀦𑁆𑀢𑀻𑀢𑀺 𑀩𑀼𑀤𑁆𑀥𑀸𑀤𑀬𑁄 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀫𑁂𑀯 𑀣𑁄𑀫𑁂𑀦𑁆𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑁂𑀲𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀯𑀺𑀲𑁂𑀲𑀸𑀦𑀁 𑀧𑀝𑀺𑀮𑀸𑀪𑀓𑀸𑀭𑀡𑀢𑁆𑀢𑀸. 𑀧𑀫𑀸𑀤𑁄 𑀕𑀭𑀳𑀺𑀢𑁄 𑀲𑀤𑀸𑀢𑀺 𑀧𑀫𑀸𑀤𑁄 𑀧𑀦 𑀢𑁂𑀳𑀺 𑀅𑀭𑀺𑀬𑁂𑀳𑀺 𑀦𑀺𑀘𑁆𑀘𑀁 𑀕𑀭𑀳𑀺𑀢𑁄 𑀦𑀺𑀦𑁆𑀤𑀺𑀢𑁄. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑀯𑀺𑀧𑀢𑁆𑀢𑀻𑀦𑀁 𑀫𑀽𑀮𑀪𑀸𑀯𑀢𑁄. 𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑀁 𑀯𑀸 𑀳𑀺 𑀅𑀧𑀸𑀬𑀼𑀧𑁆𑀧𑀢𑁆𑀢𑀺 𑀯𑀸 𑀲𑀩𑁆𑀩𑀸 𑀧𑀫𑀸𑀤𑀫𑀽𑀮𑀺𑀓𑀸𑀬𑁂𑀯𑀸𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀮𑀺 𑀮𑀺𑀘𑁆𑀙𑀯𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀚𑀸𑀢𑀸𑀢𑀺.

𑀫𑀖𑀯𑀢𑁆𑀣𑀼 𑀲𑀢𑁆𑀢𑀫𑀁.