𑁨𑁭. 𑀕𑁄𑀢𑀫𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀤𑀽𑀭𑁂𑀦𑀺𑀤𑀸𑀦𑀓𑀣𑀸

‘‘𑀇𑀤𑀸𑀦𑀺 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁, 𑀩𑀼𑀤𑁆𑀥𑀯𑀁𑀲𑀲𑁆𑀲 𑀯𑀡𑁆𑀡𑀦𑀸;

𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀧𑀢𑁆𑀢𑀸, 𑀢𑀲𑁆𑀫𑀸𑀬𑀁 𑀢𑀲𑁆𑀲 𑀯𑀡𑁆𑀡𑀦𑀸’’.

𑀢𑀢𑁆𑀣 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀤𑀻𑀧𑀗𑁆𑀓𑀭𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀅𑀥𑀺𑀓𑀸𑀭𑀁 𑀓𑀭𑁄𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀆𑀕𑀢𑁄. 𑀓𑀲𑁆𑀲𑀧𑀲𑁆𑀲 𑀧𑀦 𑀪𑀕𑀯𑀢𑁄 𑀑𑀭𑀪𑀸𑀕𑁂 𑀞𑀧𑁂𑀢𑁆𑀯𑀸 𑀇𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀩𑀼𑀤𑁆𑀥𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀤𑀻𑀧𑀗𑁆𑀓𑀭𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀬𑁂𑀦𑁂𑀦 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 ‘‘𑀳𑀦𑁆𑀤, 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄’’𑀢𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 ‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺 𑀤𑀸𑀦𑀧𑀸𑀭𑀫𑀺𑀢𑀸𑀤𑀬𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀤𑀺𑀝𑁆𑀞𑀸, 𑀢𑁂 𑀧𑀽𑀭𑁂𑀦𑁆𑀢𑁄 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀸 𑀆𑀕𑀫𑀺, 𑀆𑀕𑀘𑁆𑀙𑀦𑁆𑀢𑁄 𑀘 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀆𑀦𑀺𑀲𑀁𑀲𑀸 𑀲𑀁𑀯𑀡𑁆𑀡𑀺𑀢𑀸 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺.

‘‘𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘;

𑀦𑀺𑀚𑁆𑀛𑀸𑀫𑀢𑀡𑁆𑀳𑀸 𑀔𑀼𑀧𑁆𑀧𑀺𑀧𑀸𑀲𑀸, 𑀦 𑀳𑁄𑀦𑁆𑀢𑀺 𑀓𑀸𑀴𑀓𑀜𑁆𑀚𑀺𑀓𑀸.

‘‘𑀦 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀸 𑀧𑀸𑀡𑀸, 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀤𑀼𑀕𑁆𑀕𑀢𑀺𑀁;

𑀚𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑁂𑀲𑀼, 𑀚𑀘𑁆𑀘𑀦𑁆𑀥𑀸 𑀦 𑀪𑀯𑀦𑁆𑀢𑀺 𑀢𑁂.

‘‘𑀲𑁄𑀢𑀯𑁂𑀓𑀮𑁆𑀮𑀢𑀸 𑀦𑀢𑁆𑀣𑀺, 𑀦 𑀪𑀯𑀦𑁆𑀢𑀺 𑀫𑀽𑀕𑀧𑀓𑁆𑀔𑀺𑀓𑀸;

𑀇𑀢𑁆𑀣𑀺𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸.

‘‘𑀦 𑀪𑀯𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀫𑀼𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁂𑀳𑀺, 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑀦𑁆𑀢𑀺, 𑀓𑀫𑁆𑀫𑀓𑀺𑀭𑀺𑀬𑀤𑀲𑁆𑀲𑀦𑀸;

𑀯𑀲𑀫𑀸𑀦𑀸𑀧𑀺 𑀲𑀕𑁆𑀕𑁂𑀲𑀼, 𑀅𑀲𑀜𑁆𑀜𑀁 𑀦𑀽𑀧𑀧𑀚𑁆𑀚𑀭𑁂.

‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺;

𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀸 𑀲𑀧𑁆𑀧𑀼𑀭𑀺𑀲𑀸, 𑀯𑀺𑀲𑀁𑀬𑀼𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬𑁄, 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸);

𑀢𑁂 𑀆𑀦𑀺𑀲𑀁𑀲𑁂 𑀅𑀥𑀺𑀕𑀦𑁆𑀢𑁆𑀯𑀸𑀯 𑀆𑀕𑀢𑁄. 𑀏𑀯𑀁 𑀆𑀕𑀘𑁆𑀙𑀦𑁆𑀢𑁄 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀺𑀢𑁄 𑁋

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪) 𑁋

𑀏𑀯𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀸𑀤𑀻𑀦𑀺 𑀫𑀳𑀸𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺.

𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸

𑀢𑀼𑀲𑀺𑀢𑀧𑀼𑀭𑁂 𑀯𑀲𑀫𑀸𑀦𑁂𑀬𑁂𑀯 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀉𑀤𑀧𑀸𑀤𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀦𑁆𑀢𑀺. 𑀢𑀢𑁆𑀣 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀫𑀸𑀭𑀺𑀲𑀸, 𑀫𑀸𑀭𑀺𑀲𑀸, 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀉𑀲𑁆𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀉𑀟𑁆𑀟𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁, 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁, 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀫𑀸𑀢𑀭𑀁 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀇𑀤𑀁 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫.

‘‘𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀧𑀸𑀮𑀤𑁂𑀯𑀢𑀸 𑁋 ‘‘𑀇𑀢𑁄, 𑀫𑀸𑀭𑀺𑀲𑀸, 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀺𑀬𑁄 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫.

‘‘𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸 𑁋 ‘‘𑀇𑀢𑁄, 𑀫𑀸𑀭𑀺𑀲𑀸, 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀺𑀬𑁄 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫 (𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀗𑁆𑀕𑀮𑀧𑀜𑁆𑀳𑀲𑀫𑀼𑀝𑁆𑀞𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸).

𑀢𑁂𑀲𑀼 𑀩𑀼𑀤𑁆𑀥𑀓𑁄𑀮𑀸𑀳𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀅𑀲𑀼𑀓𑁄 𑀦𑀸𑀫 𑀲𑀢𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀸𑀘𑀦𑁆𑀢𑀺, 𑀆𑀬𑀸𑀘𑀫𑀸𑀦𑀸 𑀘 𑀢𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀆𑀬𑀸𑀘𑀦𑁆𑀢𑀺. 𑀢𑀤𑀸 𑀧𑀦 𑀲𑀩𑁆𑀩𑀸𑀧𑀺 𑀢𑀸 𑀏𑀓𑁂𑀓𑀘𑀓𑁆𑀓𑀯𑀸𑀴𑁂 𑀘𑀢𑀼𑀫𑀳𑀸𑀭𑀸𑀚-𑀲𑀓𑁆𑀓-𑀲𑀼𑀬𑀸𑀫-𑀲𑀦𑁆𑀢𑀼𑀲𑀺𑀢-𑀲𑀼𑀦𑀺𑀫𑁆𑀫𑀺𑀢-𑀯𑀲𑀯𑀢𑁆𑀢𑀺-𑀫𑀳𑀸𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀉𑀧𑁆𑀧𑀦𑁆𑀦𑀘𑀼𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀫𑀸𑀭𑀺𑀲, 𑀢𑀼𑀫𑁆𑀳𑁂𑀳𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀧𑀽𑀭𑁂𑀦𑁆𑀢𑁂𑀳𑀺 𑀘 𑀦 𑀲𑀓𑁆𑀓𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀆𑀤𑀺𑀓𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀯𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑀸 𑀩𑀼𑀤𑁆𑀥𑀢𑁆𑀢𑀸𑀬 𑁋

‘‘𑀓𑀸𑀮𑁄 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭) 𑁋

𑀬𑀸𑀘𑀺𑀁𑀲𑀼.

𑀅𑀣 𑀫𑀳𑀸𑀲𑀢𑁆𑀢𑁄 𑀤𑁂𑀯𑀢𑀸𑀳𑀺 𑀏𑀯𑀁 𑀆𑀬𑀸𑀘𑀺𑀬𑀫𑀸𑀦𑁄 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮-𑀤𑀻𑀧-𑀤𑁂𑀲-𑀓𑀼𑀮-𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀦 𑀓𑀸𑀮𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀯𑀟𑁆𑀠𑀺𑀢𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑁂𑀲𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀦𑁆𑀢𑀻’’𑀢𑀺 𑀦𑁂𑀯 𑀲𑁄𑀢𑀩𑁆𑀩𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀔𑀺𑀧𑁆𑀧𑀁 𑀯𑀺𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫. 𑀢𑀤𑀸 𑀧𑀦 𑀯𑀲𑁆𑀲𑀲𑀢𑀓𑀸𑀮𑁄 𑀅𑀳𑁄𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀓𑀸𑀮𑀁 𑀧𑀲𑁆𑀲𑀺.

𑀢𑀢𑁄 𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 𑀲𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺.

𑀢𑀢𑁄 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄. 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀑𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. ‘‘𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀝𑁆𑀞𑀫𑀕𑀫𑀸𑀲𑀺.

𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀯𑁂𑀲𑁆𑀲𑀓𑀼𑀮𑁂 𑀯𑀸 𑀲𑀼𑀤𑁆𑀤𑀓𑀼𑀮𑁂 𑀯𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑁄𑀓𑀲𑀫𑁆𑀫𑀢𑁂 𑀧𑀦 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀢𑀭𑀳𑀺 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺.

𑀢𑀢𑁄 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸𑀬𑁂𑀯 𑀳𑁄𑀢𑀺. 𑀅𑀬𑀜𑁆𑀘 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀏𑀤𑀺𑀲𑀻, 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲𑀸 𑀆𑀬𑀽𑀢𑀺, 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺.

𑀇𑀢𑀺 𑀇𑀫𑀁 𑀧𑀜𑁆𑀘𑀯𑀺𑀥𑀁 𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑁋 ‘‘𑀓𑀸𑀮𑁄 𑀫𑁂, 𑀫𑀸𑀭𑀺𑀲𑀸, 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀸𑀦𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑁋 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀢𑀸 𑀤𑁂𑀯𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀼𑀲𑀺𑀢𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀢𑀼𑀲𑀺𑀢𑀧𑀼𑀭𑁂 𑀦𑀦𑁆𑀤𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀳𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀭 𑀦𑀁 𑀤𑁂𑀯𑀢𑀸 𑁋 ‘‘𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑁄𑀓𑀸𑀲𑀁 𑀲𑀸𑀭𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀯𑀁 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀓𑀼𑀲𑀮𑀁 𑀲𑀸𑀭𑀬𑀫𑀸𑀦𑀸𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀭 𑀯𑀺𑀘𑀭𑀦𑁆𑀢𑁄𑀯 𑀘𑀯𑀺𑀢𑁆𑀯𑀸 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀫𑀸𑀢𑀼 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀡𑁆𑀳𑀦𑀓𑁆𑀔𑀡𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺. 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁.

𑀏𑀯𑀁 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑁂𑀯 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁆𑀣𑀁 𑀔𑀕𑁆𑀕𑀳𑀢𑁆𑀣𑀸 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼 𑀧𑀼𑀭𑀺𑀲𑁂𑀲𑀼 𑀭𑀸𑀕𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀘 𑀲𑀸 𑀅𑀳𑁄𑀲𑀺 𑀲𑀼𑀔𑀺𑀦𑀻 𑀅𑀓𑀺𑀮𑀦𑁆𑀢𑀓𑀸𑀬𑀸. 𑀩𑁄𑀥𑀺𑀲𑀢𑁆𑀢𑀜𑁆𑀘 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀕𑀢𑀁 𑀯𑀺𑀧𑁆𑀧𑀲𑀦𑁆𑀦𑁂 𑀫𑀡𑀺𑀭𑀢𑀦𑁂 𑀆𑀯𑀼𑀢𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀺𑀬 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀓𑀼𑀘𑁆𑀙𑀺 𑀦𑀸𑀫 𑀘𑁂𑀢𑀺𑀬𑀕𑀩𑁆𑀪𑀲𑀤𑀺𑀲𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀢𑁆𑀢𑁂𑀦 𑀆𑀯𑀲𑀺𑀢𑀼𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀸𑀳𑀚𑀸𑀢𑁂 𑀩𑁄𑀥𑀺𑀲𑀢𑁆𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀬𑀣𑀸 𑀧𑀦 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀤𑀲 𑀫𑀸𑀲𑁂 𑀅𑀧𑁆𑀧𑀢𑁆𑀯𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀦𑀺𑀧𑀦𑁆𑀦𑀸𑀧𑀺 𑀯𑀺𑀚𑀸𑀬𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀧𑀦 𑀩𑁄𑀥𑀺𑀲𑀢𑁆𑀢𑀁 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀞𑀺𑀢𑀸𑀯 𑀯𑀺𑀚𑀸𑀬𑀢𑀺. 𑀅𑀬𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀥𑀫𑁆𑀫𑀢𑀸.

𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀜𑀸𑀢𑀺𑀖𑀭𑀁 𑀕𑀦𑁆𑀢𑀼𑀓𑀸𑀫𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀇𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚, 𑀤𑁂𑀯𑀤𑀳𑀦𑀕𑀭𑀁 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀬𑀸𑀯 𑀤𑁂𑀯𑀤𑀳𑀦𑀕𑀭𑀸 𑀅𑀜𑁆𑀚𑀲𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀓𑀤𑀮𑀺𑀧𑀼𑀡𑁆𑀡𑀖𑀝𑀓𑀫𑀼𑀓𑀥𑀚𑀧𑀝𑀸𑀓𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀦𑀯𑀓𑀦𑀓𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀢𑀺𑀬𑀸 𑀯𑀺𑀪𑀽𑀢𑀺𑀬𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀧𑁂𑀲𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀦𑀕𑀭𑀸𑀦𑀁 𑀅𑀦𑁆𑀢𑀭𑁂 𑀉𑀪𑀬𑀦𑀕𑀭𑀯𑀸𑀲𑀻𑀦𑀁 𑀧𑀭𑀺𑀪𑁄𑀕𑀸𑀭𑀳𑀁 𑀮𑀼𑀫𑁆𑀩𑀺𑀦𑀻𑀯𑀦𑀁 𑀦𑀸𑀫 𑀫𑀗𑁆𑀕𑀮𑀲𑀸𑀮𑀯𑀦𑀁 𑀅𑀢𑁆𑀣𑀺, 𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀽𑀮𑀢𑁄 𑀬𑀸𑀯 𑀅𑀕𑁆𑀕𑀲𑀸𑀔𑀸 𑀲𑀩𑁆𑀩𑀁 𑀏𑀓𑀨𑀸𑀮𑀺𑀨𑀼𑀮𑁆𑀮𑀁 𑀅𑀳𑁄𑀲𑀺. 𑀲𑀸𑀔𑀦𑁆𑀢𑀭𑁂𑀳𑀺 𑀘𑁂𑀯 𑀧𑀼𑀧𑁆𑀨𑀦𑁆𑀢𑀭𑁂𑀳𑀺 𑀘 𑀧𑀭𑀫𑀭𑀢𑀺𑀓𑀭𑀫𑀥𑀼𑀭𑀫𑀦𑁄𑀭𑀫𑀯𑀺𑀭𑀼𑀢𑀸𑀳𑀺 𑀫𑀤𑀫𑀼𑀤𑀺𑀢𑀸𑀳𑀺 𑀅𑀦𑀼𑀪𑀼𑀢𑁆𑀢𑀧𑀜𑁆𑀘𑀭𑀸𑀳𑀺 𑀧𑀭𑀪𑀢𑀫𑀥𑀼𑀓𑀭𑀯𑀥𑀽𑀳𑀺 𑀉𑀧𑀕𑀻𑀬𑀫𑀸𑀦𑀲𑀼𑀭𑀦𑀦𑁆𑀤𑀦𑀦𑀦𑁆𑀤𑀦𑀯𑀦𑀲𑀤𑀺𑀲𑀲𑁄𑀪𑀁 𑀯𑀦𑀁 𑀤𑀺𑀲𑁆𑀯𑀸 𑀤𑁂𑀯𑀺𑀬𑀸 𑀲𑀸𑀮𑀯𑀦𑀓𑀻𑀴𑀫𑀦𑀼𑀪𑀯𑀺𑀢𑀼𑀁 𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀺 (𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸).

‘‘𑀯𑀺𑀪𑀽𑀲𑀺𑀢𑀸 𑀩𑀸𑀮𑀚𑀦𑀸𑀢𑀺𑀘𑀸𑀮𑀺𑀦𑀻, 𑀯𑀺𑀪𑀽𑀲𑀺𑀢𑀗𑁆𑀕𑀻 𑀯𑀦𑀺𑀢𑁂𑀯 𑀫𑀸𑀮𑀺𑀦𑀻;

𑀲𑀤𑀸 𑀚𑀦𑀸𑀦𑀁 𑀦𑀬𑀦𑀸𑀮𑀺𑀫𑀸𑀮𑀺𑀦𑀻, 𑀯𑀺𑀮𑀼𑀫𑁆𑀧𑀺𑀦𑀻𑀯𑀸𑀢𑀺𑀯𑀺𑀭𑁄𑀘𑀺 𑀮𑀼𑀫𑁆𑀩𑀺𑀦𑀻’’.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀮𑀼𑀫𑁆𑀩𑀺𑀦𑀻𑀯𑀦𑀁 𑀧𑀯𑀺𑀲𑀺𑀁𑀲𑀼. 𑀲𑀸 𑀫𑀗𑁆𑀕𑀮𑀲𑀸𑀮𑀫𑀽𑀮𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀉𑀚𑀼𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑀲𑁆𑀲 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀲𑀫𑀮𑀗𑁆𑀓𑀢𑀲𑁆𑀲 𑀬𑀁 𑀲𑀸𑀔𑀁 𑀕𑀡𑁆𑀳𑀺𑀢𑀼𑀓𑀸𑀫𑀸 𑀅𑀳𑁄𑀲𑀺, 𑀲𑀸 𑀲𑀸𑀮𑀲𑀸𑀔𑀸 𑀅𑀩𑀮𑀸 𑀚𑀦𑀳𑀤𑀬𑀮𑁄𑀮𑀸 𑀲𑀬𑀫𑁂𑀯 𑀯𑀺𑀮𑀫𑁆𑀩𑀫𑀸𑀦𑀸 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀓𑀭𑀢𑀮𑀲𑁆𑀫𑀺𑀁 𑀲𑀫𑀼𑀧𑀕𑀢𑀸. 𑀅𑀣 𑀲𑀸 𑀢𑀁 𑀲𑀸𑀮𑀲𑀸𑀔𑀁 𑀢𑀫𑁆𑀩𑀢𑀼𑀗𑁆𑀕𑀦𑀔𑀼𑀚𑁆𑀚𑀮𑁂𑀦 𑀓𑀫𑀮𑀤𑀮𑀯𑀢𑁆𑀢𑀺𑀯𑀝𑁆𑀝𑀗𑁆𑀕𑀼𑀮𑀺𑀦𑀸 𑀦𑀯𑀓𑀦𑀓𑀓𑀝𑀯𑀮𑀬𑀲𑁄𑀪𑀺𑀦𑀸 𑀤𑀓𑁆𑀔𑀺𑀡𑁂𑀦 𑀧𑀭𑀫𑀭𑀢𑀺𑀓𑀭𑁂𑀦 𑀓𑀭𑁂𑀦 𑀅𑀕𑁆𑀕𑀳𑁂𑀲𑀺. 𑀲𑀸 𑀢𑀁 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀅𑀲𑀺𑀢𑀚𑀮𑀥𑀭𑀯𑀺𑀯𑀭𑀕𑀢𑀸 𑀩𑀸𑀮𑀘𑀦𑁆𑀤𑀮𑁂𑀔𑀸 𑀯𑀺𑀬 𑀘 𑀅𑀘𑀺𑀭𑀝𑁆𑀞𑀺𑀢𑀺𑀓𑀸 𑀅𑀘𑁆𑀘𑀺𑀧𑀪𑀸 𑀯𑀺𑀬 𑀘 𑀦𑀦𑁆𑀤𑀦𑀯𑀦𑀚𑀸𑀢𑀸 𑀤𑁂𑀯𑀻 𑀯𑀺𑀬 𑀘 𑀤𑁂𑀯𑀻 𑀯𑀺𑀭𑁄𑀘𑀺𑀢𑁆𑀣. 𑀢𑀸𑀯𑀤𑁂𑀯 𑀘𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀅𑀣𑀲𑁆𑀲𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀚𑀦𑁄 𑀧𑀝𑀺𑀓𑁆𑀓𑀫𑀺. 𑀲𑀸 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀫𑀸𑀦𑀸𑀬 𑀏𑀯 𑀢𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺.

𑀢𑀗𑁆𑀔𑀡𑀁𑀬𑁂𑀯 𑀘𑀢𑁆𑀢𑀸𑀭𑁄 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑁂𑀦 𑀲𑀼𑀯𑀡𑁆𑀡𑀚𑀸𑀮𑁂𑀦 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑁋 ‘‘𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺, 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀳𑀁𑀲𑀼. 𑀬𑀣𑀸 𑀧𑀦 𑀅𑀜𑁆𑀜𑁂 𑀲𑀢𑁆𑀢𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀧𑀝𑀺𑀓𑁆𑀓𑀽𑀮𑁂𑀦 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀤𑁆𑀯𑁂 𑀳𑀢𑁆𑀣𑁂 𑀤𑁆𑀯𑁂 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄𑀯 𑀲𑀼𑀤𑁆𑀥𑁄 𑀯𑀺𑀲𑀤𑁄 𑀓𑀸𑀲𑀺𑀓𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀭𑀢𑀦𑀁 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀲𑀓𑁆𑀓𑀸𑀭𑀢𑁆𑀣𑀁 𑀆𑀓𑀸𑀲𑀢𑁄 𑀤𑁆𑀯𑁂 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀸𑀢𑀼𑀬𑀸 𑀘 𑀲𑀭𑀻𑀭𑁂 𑀉𑀢𑀼𑀁 𑀕𑀸𑀳𑀸𑀧𑁂𑀲𑀼𑀁.

𑀅𑀣 𑀦𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀫𑀗𑁆𑀕𑀮𑀲𑀫𑁆𑀫𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀕𑀡𑁆𑀳𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀧𑀼𑀧𑁆𑀨𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑁋 ‘‘𑀫𑀳𑀸𑀧𑀼𑀭𑀺𑀲, 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀏𑀢𑁆𑀣 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀤𑀲 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀺. 𑀕𑀘𑁆𑀙𑀦𑁆𑀢𑁄 𑀘 𑀧𑀣𑀯𑀺𑀬𑀸 𑀏𑀯 𑀕𑀢𑁄, 𑀦𑀸𑀓𑀸𑀲𑁂𑀦. 𑀅𑀘𑁂𑀮𑀓𑁄𑀯 𑀕𑀢𑁄, 𑀦 𑀲𑀘𑁂𑀮𑀓𑁄. 𑀤𑀳𑀭𑁄𑀯 𑀕𑀢𑁄, 𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄. 𑀫𑀳𑀸𑀚𑀦𑀲𑁆𑀲 𑀧𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀯𑀺𑀬 𑀘 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬 𑀘 𑀅𑀳𑁄𑀲𑀺. 𑀢𑀢𑁄 𑀲𑀢𑁆𑀢𑀫𑁂 𑀧𑀤𑁂 𑀞𑀢𑁆𑀯𑀸 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺𑀓𑀁 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭) 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑀫𑀳𑁄𑀲𑀥𑀢𑁆𑀢𑀪𑀸𑀯𑁂, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀢𑀺. 𑀫𑀳𑁄𑀲𑀥𑀢𑁆𑀢𑀪𑀸𑀯𑁂 𑀓𑀺𑀭𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀲𑁆𑀲𑁂𑀯 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀘𑀦𑁆𑀤𑀦𑀲𑀸𑀭𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀕𑀢𑁄, 𑀢𑀁 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄. 𑀅𑀣 𑀦𑀁 𑀫𑀸𑀢𑀸 𑁋 ‘‘𑀢𑀸𑀢, 𑀢𑁆𑀯𑀁 𑀓𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀑𑀲𑀥𑀁, 𑀅𑀫𑁆𑀫𑀸’’𑀢𑀺. 𑀇𑀢𑀺 𑀑𑀲𑀥𑀁 𑀕𑀳𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 ‘‘𑀑𑀲𑀥𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀫𑀓𑀁𑀲𑀼.

𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀅𑀫𑁆𑀫, 𑀓𑀺𑀜𑁆𑀘𑀺 𑀕𑁂𑀳𑀲𑁆𑀫𑀺𑀁 𑀥𑀦𑀁, 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀫𑀸𑀢𑀸 𑁋 ‘‘𑀲𑀥𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀁 𑀅𑀢𑁆𑀢𑀦𑁄 𑀳𑀢𑁆𑀣𑀢𑀮𑁂 𑀓𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀲𑀺.

𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀇𑀫𑀁 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀚𑀸𑀢𑀓𑁆𑀔𑀡𑁂𑀧𑀺𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀮𑀼𑀫𑁆𑀩𑀺𑀦𑀻𑀯𑀦𑁂 𑀚𑀸𑀢𑁄 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀭𑀸𑀳𑀼𑀮𑀫𑀸𑀢𑀸 𑀤𑁂𑀯𑀻 𑀆𑀦𑀦𑁆𑀤𑁄 𑀙𑀦𑁆𑀦𑁄 𑀓𑀸𑀴𑀼𑀤𑀸𑀬𑀻 𑀅𑀫𑀘𑁆𑀘𑁄 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀘 𑀚𑀸𑀢𑀸, 𑀢𑀢𑁆𑀣 𑀏𑀓𑁄 𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀏𑀓𑁄 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑁄 𑀏𑀓𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀏𑀓𑁄 𑀬𑁄𑀚𑀦𑀧𑁆𑀧𑀫𑀸𑀡𑁄 𑀅𑀳𑁄𑀲𑀺. 𑀇𑀫𑁂 𑀲𑀢𑁆𑀢 𑀲𑀳𑀚𑀸𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀫𑀳𑀸𑀧𑀼𑀭𑀺𑀲𑀁 𑀕𑀳𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀫𑁂𑀯 𑀅𑀕𑀫𑀁𑀲𑀼. 𑀢𑀁𑀤𑀺𑀯𑀲𑀫𑁂𑀯 𑁋 ‘‘𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀳𑀝𑁆𑀞𑀢𑀼𑀝𑁆𑀞𑀸 𑀤𑁂𑀯𑀲𑀗𑁆𑀖𑀸 𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 𑀧𑀯𑀢𑁆𑀢𑁂𑀦𑁆𑀢𑀸 𑀓𑀻𑀴𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑀽𑀧𑀓𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀓𑀸𑀴𑀤𑁂𑀯𑀮𑁄 𑀦𑀸𑀫 𑀢𑀸𑀧𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀢𑀸 𑀤𑁂𑀯𑀢𑀸 𑀢𑀼𑀝𑁆𑀞𑀫𑀸𑀦𑀲𑀸 𑀓𑀻𑀴𑀦𑁆𑀢𑀺𑀬𑁄 𑀤𑀺𑀲𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀢𑀼𑀝𑁆𑀞𑀫𑀸𑀦𑀲𑀸 𑀧𑀫𑀼𑀤𑀺𑀢𑀳𑀤𑀬𑀸 𑀓𑀻𑀴𑀣, 𑀫𑀬𑁆𑀳𑀁 𑀢𑀁 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑀢𑁄 𑀤𑁂𑀯𑀢𑀸 𑀆𑀳𑀁𑀲𑀼 𑁋 ‘‘𑀫𑀸𑀭𑀺𑀲, 𑀲𑀼𑀤𑁆𑀥𑁄𑀤𑀦𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀸𑀢𑁄, 𑀲𑁄 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀢𑀲𑁆𑀲 ‘𑀅𑀦𑀦𑁆𑀢𑀭𑀽𑀧𑀁 𑀩𑀼𑀤𑁆𑀥𑀮𑀻𑀴𑀁 𑀧𑀲𑁆𑀲𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀼𑀝𑁆𑀞𑀫𑁆𑀳𑀸’’𑀢𑀺.

𑀅𑀣 𑀢𑀸𑀧𑀲𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀭𑀫𑀤𑀲𑁆𑀲𑀦𑀻𑀬𑀭𑀢𑀦𑀸𑀯𑀮𑁄𑀓𑀢𑁄 𑀤𑁂𑀯𑀮𑁄𑀓𑀢𑁄 𑀑𑀭𑀼𑀬𑁆𑀳 𑀦𑀭𑀧𑀢𑀺𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑀢𑁄 𑀓𑀢𑀧𑀝𑀺𑀲𑀦𑁆𑀣𑀸𑀭𑀁 𑀭𑀸𑀚𑀸𑀦𑀁 𑁋 ‘‘𑀧𑀼𑀢𑁆𑀢𑁄 𑀓𑀺𑀭 𑀢𑁂, 𑀫𑀳𑀸𑀭𑀸𑀚, 𑀚𑀸𑀢𑁄, 𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀭𑀸𑀚𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀢𑀦𑀬𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑁂𑀯𑀮𑀢𑀸𑀧𑀲𑀁 𑀯𑀦𑁆𑀤𑀸𑀧𑁂𑀢𑀼𑀁 𑀅𑀪𑀺𑀳𑀭𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀤𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀅𑀲𑀺𑀢𑀚𑀮𑀥𑀭𑀓𑀽𑀝𑁂𑀲𑀼 𑀢𑀸𑀧𑀲𑀲𑁆𑀲 𑀚𑀝𑀸𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁂𑀦 𑀳𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀯𑀦𑁆𑀤𑀺𑀢𑀩𑁆𑀩𑁄 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀺. 𑀢𑀢𑁄 𑀢𑀸𑀧𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀦𑁆𑀤𑀺. 𑀢𑀸𑀧𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑁋 ‘‘𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀜𑀢𑁆𑀯𑀸 𑁋 ‘‘𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀲𑀺𑀢𑀁 𑀅𑀓𑀸𑀲𑀺.

𑀢𑀢𑁄 ‘‘𑀅𑀳𑀁 𑀇𑀫𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀦 𑀮𑀪𑀺𑀲𑁆𑀲𑀸𑀫𑀺, 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀢𑁂𑀦𑀧𑀺 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀧𑀺 𑀕𑀦𑁆𑀢𑁆𑀯𑀸 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀅𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀲𑁆𑀯𑀸 𑁋 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁄𑀤𑀺. 𑀫𑀦𑀼𑀲𑁆𑀲𑀸 𑀧𑀦 𑀤𑀺𑀲𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀇𑀤𑀸𑀦𑁂𑀯 𑀳𑀲𑀺𑀢𑁆𑀯𑀸 𑀧𑀼𑀦 𑀭𑁄𑀤𑀺𑀢𑀼𑀫𑀸𑀭𑀪𑀺, 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑀸𑀧𑀲𑁄 𑀆𑀳 𑁋 ‘‘𑀦𑀢𑁆𑀣𑁂𑀢𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀦𑀺𑀲𑁆𑀲𑀁𑀲𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀧𑀭𑁄𑀤𑀺𑀢𑁆𑀣𑀸’’𑀢𑀺? ‘‘𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀲𑁄𑀘𑀦𑁆𑀢𑁄 𑀭𑁄𑀤𑀸𑀫𑀻’’𑀢𑀺 𑀆𑀳.

𑀢𑀢𑁄 𑀩𑁄𑀥𑀺𑀲𑀢𑁆𑀢𑀁 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑁋 ‘‘𑀦𑀸𑀫𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀪𑀯𑀦𑀁 𑀘𑀢𑀼𑀚𑁆𑀚𑀸𑀢𑀺𑀓𑀕𑀦𑁆𑀥𑁂𑀦 𑀉𑀧𑀮𑀺𑀫𑁆𑀧𑀺𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀓𑀼𑀲𑀼𑀫𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀗𑁆𑀕𑀢𑁂 𑀅𑀝𑁆𑀞𑀲𑀢𑁂 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀭𑀸𑀚𑀪𑀯𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀥𑀼𑀧𑀸𑀬𑀸𑀲𑀁 𑀪𑁄𑀚𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀸𑀳𑀸𑀧𑁂𑀲𑀼𑀁. 𑀢𑁂𑀲𑀼 𑀭𑀸𑀫𑀸𑀤𑀬𑁄 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀲𑀢𑁆𑀢 𑀚𑀦𑀸 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂𑀥𑀸 𑀩𑁆𑀬𑀸𑀓𑀭𑀺𑀁𑀲𑀼 𑁋 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑀫𑀸𑀦𑁄 𑀩𑀼𑀤𑁆𑀥𑁄’’𑀢𑀺. 𑀢𑁂𑀲𑀁 𑀧𑀦 𑀲𑀩𑁆𑀩𑀤𑀳𑀭𑁄 𑀕𑁄𑀢𑁆𑀢𑁂𑀦 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀯𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑁋 ‘‘𑀏𑀢𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀓𑀸𑀭𑀡𑀁 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦𑁂𑀯 𑀯𑀺𑀯𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀩𑁆𑀬𑀸𑀓𑀸𑀲𑀺. 𑀅𑀣𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀸 𑀲𑀩𑁆𑀩𑀮𑁄𑀓𑀢𑁆𑀣𑀲𑀺𑀤𑁆𑀥𑀺𑀓𑀭𑀢𑁆𑀢𑀸 𑀲𑀺𑀤𑁆𑀥𑀢𑁆𑀣𑁄𑀢𑀺 𑀦𑀸𑀫𑀫𑀓𑀁𑀲𑀼.

𑀅𑀣 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑁂 𑀫𑀳𑀮𑁆𑀮𑀓𑀸, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀁 𑀲𑀫𑁆𑀪𑀸𑀯𑁂𑀬𑁆𑀬𑀸𑀫 𑀯𑀸 𑀦𑁄 𑀯𑀸, 𑀢𑀼𑀫𑁆𑀳𑁂 𑀧𑀦 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀣𑀸’’𑀢𑀺. 𑀢𑀢𑁄 𑀲𑀢𑁆𑀢𑀧𑀺 𑀚𑀦𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸. 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄 𑀅𑀭𑁄𑀕𑁄 𑀅𑀳𑁄𑀲𑀺. 𑀢𑀤𑀸 𑀧𑀦 𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑁋 ‘‘𑀓𑀺𑀁 𑀤𑀺𑀲𑁆𑀯𑀸 𑀫𑀫 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀢𑁂 𑀧𑀼𑀘𑁆𑀙𑀺. ‘‘𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺, 𑀤𑁂𑀯𑀸’’𑀢𑀺. ‘‘𑀓𑀢𑀭𑀜𑁆𑀘 𑀓𑀢𑀭𑀜𑁆𑀘𑀸’’𑀢𑀺? ‘‘𑀚𑀺𑀡𑁆𑀡𑀁 𑀩𑁆𑀬𑀸𑀥𑀺𑀢𑀁 𑀫𑀢𑀁 𑀧𑀩𑁆𑀩𑀚𑀺𑀢’’𑀦𑁆𑀢𑀺. 𑀭𑀸𑀚𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀸𑀦𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑀺𑀢𑀼𑀁 𑀫𑀸 𑀅𑀤𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀘𑀓𑁆𑀔𑀼𑀧𑀣𑁂 𑀚𑀺𑀡𑁆𑀡𑀧𑀼𑀭𑀺𑀲𑀸𑀤𑀻𑀦𑀁 𑀆𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀸𑀯𑀼𑀢𑀕𑀸𑀯𑀼𑀢𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀁𑀤𑀺𑀯𑀲𑀁 𑀫𑀗𑁆𑀕𑀮𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀅𑀲𑀻𑀢𑀺𑀬𑀸 𑀜𑀸𑀢𑀺𑀓𑀼𑀮𑀲𑀳𑀲𑁆𑀲𑁂𑀲𑀼 𑀏𑀓𑀫𑁂𑀓𑁄 𑀏𑀓𑀫𑁂𑀓𑀁 𑀧𑀼𑀢𑁆𑀢𑀁 𑀧𑀝𑀺𑀚𑀸𑀦𑀺 𑁋 ‘‘𑀅𑀬𑀁 𑀩𑀼𑀤𑁆𑀥𑁄 𑀯𑀸 𑀳𑁄𑀢𑀼 𑀭𑀸𑀚𑀸 𑀯𑀸, 𑀫𑀬𑀁 𑀏𑀓𑀫𑁂𑀓𑀁 𑀧𑀼𑀢𑁆𑀢𑀁 𑀤𑀲𑁆𑀲𑀸𑀫, 𑀲𑀘𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀲𑀫𑀡𑁂𑀳𑁂𑀯 𑀧𑀭𑀺𑀯𑀼𑀢𑁄 𑀯𑀺𑀘𑀭𑀺𑀲𑁆𑀲𑀢𑀺. 𑀲𑀘𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀳𑁂𑀯 𑀧𑀭𑀺𑀯𑀼𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺. 𑀅𑀣 𑀭𑀸𑀚𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀭𑀫𑀭𑀽𑀧𑀲𑀫𑁆𑀧𑀦𑁆𑀦𑀸 𑀯𑀺𑀕𑀢𑀲𑀩𑁆𑀩𑀤𑁄𑀲𑀸 𑀘𑀢𑀼𑀲𑀝𑁆𑀞𑀺 𑀥𑀸𑀢𑀺𑀬𑁄 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀸 𑀲𑀺𑀭𑀺𑀲𑀫𑀼𑀤𑀬𑁂𑀦 𑀯𑀟𑁆𑀠𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀯𑀧𑁆𑀧𑀫𑀗𑁆𑀕𑀮𑀁 𑀦𑀸𑀫 𑀅𑀳𑁄𑀲𑀺. 𑀢𑀁𑀤𑀺𑀯𑀲𑀁 𑀭𑀸𑀚𑀸 𑀫𑀳𑀢𑀺𑀬𑀸 𑀯𑀺𑀪𑀽𑀢𑀺𑀬𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀧𑀼𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸𑀯 𑀅𑀕𑀫𑀸𑀲𑀺. 𑀓𑀲𑀺𑀓𑀫𑁆𑀫𑀝𑁆𑀞𑀸𑀦𑁂 𑀏𑀓𑁄 𑀚𑀫𑁆𑀩𑀼𑀭𑀼𑀓𑁆𑀔𑁄 𑀧𑀭𑀫𑀭𑀫𑀡𑀻𑀬𑁄 𑀖𑀦𑀲𑀦𑁆𑀤𑀘𑁆𑀙𑀸𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀳𑁂𑀝𑁆𑀞𑀸 𑀓𑀼𑀫𑀸𑀭𑀲𑁆𑀲 𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀯𑀭𑀓𑀦𑀓𑀢𑀸𑀭𑀸𑀔𑀘𑀺𑀢𑀁 𑀭𑀢𑁆𑀢𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀦𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑀫𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀧𑀭𑀫𑀫𑀗𑁆𑀕𑀮𑀁 𑀲𑀼𑀯𑀡𑁆𑀡𑀦𑀗𑁆𑀕𑀮𑀁 𑀕𑀡𑁆𑀳𑀸𑀢𑀺, 𑀅𑀫𑀘𑁆𑀘𑀸𑀤𑀬𑁄 𑀭𑀚𑀢𑀦𑀗𑁆𑀕𑀮𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀺. 𑀢𑀁𑀤𑀺𑀯𑀲𑀁 𑀦𑀗𑁆𑀕𑀮𑀲𑀳𑀲𑁆𑀲𑀁 𑀬𑁄𑀚𑀻𑀬𑀢𑀺. 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀥𑀸𑀢𑀺𑀬𑁄 𑁋 ‘‘𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀲𑀸𑀡𑀺𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 𑀲𑀳𑀲𑀸 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀆𑀦𑀸𑀧𑀸𑀦𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀥𑀸𑀢𑀺𑀬𑁄 𑀔𑀚𑁆𑀚𑀪𑁄𑀚𑁆𑀚𑀦𑁆𑀢𑀭𑁂 𑀯𑀺𑀘𑀭𑀦𑁆𑀢𑀺𑀬𑁄 𑀣𑁄𑀓𑀁 𑀘𑀺𑀭𑀸𑀬𑀺𑀁𑀲𑀼. 𑀲𑁂𑀲𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀦𑀺𑀯𑀢𑁆𑀢𑀸, 𑀢𑀲𑁆𑀲 𑀧𑀦 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀙𑀸𑀬𑀸 𑀧𑀭𑀺𑀫𑀡𑁆𑀟𑀮𑀸 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀥𑀸𑀢𑀺𑀢𑁄 𑀧𑀦𑀲𑁆𑀲 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀏𑀓𑀓𑁄𑀯𑀸’’𑀢𑀺 𑀯𑁂𑀕𑁂𑀦 𑀲𑀸𑀡𑀺𑀧𑀸𑀓𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀬𑁂𑀲𑀦𑁆𑀢𑀺𑀬𑁄 𑀲𑀺𑀭𑀺𑀲𑀬𑀦𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀯𑁄, 𑀢𑀸𑀢, 𑀤𑀼𑀢𑀺𑀬𑀯𑀦𑁆𑀤𑀦𑀸’’𑀢𑀺 𑀧𑀼𑀢𑁆𑀢𑀁 𑀯𑀦𑁆𑀤𑀺.

𑀅𑀣 𑀫𑀳𑀸𑀧𑀼𑀭𑀺𑀲𑁄 𑀅𑀦𑀼𑀓𑁆𑀓𑀫𑁂𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀅𑀳𑁄𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀭𑀫𑁆𑀫-𑀲𑀼𑀭𑀫𑁆𑀫-𑀲𑀼𑀪𑀦𑀸𑀫𑀓𑁂 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑁂𑀲𑀺. 𑀏𑀓𑀁 𑀦𑀯𑀪𑀽𑀫𑀺𑀓𑀁 𑀏𑀓𑀁 𑀲𑀢𑁆𑀢𑀪𑀽𑀫𑀺𑀓𑀁 𑀏𑀓𑀁 𑀧𑀜𑁆𑀘𑀪𑀽𑀫𑀺𑀓𑀁. 𑀢𑀬𑁄𑀧𑀺 𑀧𑀸𑀲𑀸𑀤𑀸 𑀉𑀩𑁆𑀩𑁂𑀥𑁂𑀦 𑀲𑀫𑀧𑁆𑀧𑀫𑀸𑀡𑀸 𑀅𑀳𑁂𑀲𑀼𑀁. 𑀪𑀽𑀫𑀺𑀓𑀸𑀲𑀼 𑀧𑀦 𑀦𑀸𑀦𑀢𑁆𑀢𑀁 𑀅𑀳𑁄𑀲𑀺.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀯𑀬𑀧𑁆𑀧𑀢𑁆𑀢𑁄 𑀙𑀢𑁆𑀢𑀫𑀲𑁆𑀲 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀸𑀓𑀺𑀬𑀸𑀦𑀁 𑀧𑀡𑁆𑀡𑀸𑀦𑀺 𑀧𑀳𑀺𑀡𑀺 ‘‘𑀧𑀼𑀢𑁆𑀢𑁄 𑀫𑁂 𑀯𑀬𑀧𑁆𑀧𑀢𑁆𑀢𑁄, 𑀭𑀚𑁆𑀚𑁂 𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀇𑀫𑀁 𑀕𑁂𑀳𑀁 𑀧𑁂𑀲𑁂𑀦𑁆𑀢𑀽’’𑀢𑀺. 𑀢𑁂 𑀭𑀜𑁆𑀜𑁄 𑀲𑀸𑀲𑀦𑀁 𑀲𑀼𑀢𑁆𑀯𑀸 𑁋 ‘‘𑀓𑀼𑀫𑀸𑀭𑁄 𑀓𑁂𑀯𑀮𑀁 𑀭𑀽𑀧𑀲𑀫𑁆𑀧𑀦𑁆𑀦𑁄, 𑀦 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀤𑀸𑀭𑀪𑀭𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀫𑀬𑀁 𑀥𑀻𑀢𑀭𑁄 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀓𑀺𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀲𑀳𑀲𑁆𑀲𑀢𑁆𑀣𑀸𑀫𑀁 𑀥𑀦𑀼𑀁 𑀆𑀭𑁄𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀸𑀢𑀸’’𑀢𑀺. ‘‘𑀢𑁂𑀦 𑀳𑀺 𑀆𑀳𑀭𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀆𑀳𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀁 𑀥𑀦𑀼𑀁 𑀧𑀼𑀭𑀺𑀲𑀲𑀳𑀲𑁆𑀲𑀁 𑀆𑀭𑁄𑀧𑁂𑀢𑀺, 𑀧𑀼𑀭𑀺𑀲𑀲𑀳𑀲𑁆𑀲𑀁 𑀑𑀭𑁄𑀧𑁂𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀢𑀁 𑀲𑀭𑀸𑀲𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄𑀯 𑀚𑀺𑀬𑀁 𑀧𑀸𑀤𑀗𑁆𑀕𑀼𑀝𑁆𑀞𑀓𑁂 𑀯𑁂𑀞𑀸𑀧𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑁂𑀯 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀟𑁆𑀠𑀺𑀢𑁆𑀯𑀸 𑀚𑀺𑀬𑀁 𑀭𑁄𑀧𑁂𑀲𑀺. 𑀲𑀓𑀮𑀦𑀕𑀭𑀁 𑀉𑀧𑁆𑀧𑀢𑁆𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. ‘‘𑀓𑀺𑀁 𑀏𑀲𑁄 𑀲𑀤𑁆𑀤𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀤𑁂𑀯𑁄 𑀕𑀚𑁆𑀚𑀢𑀻’’𑀢𑀺 𑀆𑀳𑀁𑀲𑀼. 𑀅𑀣𑀜𑁆𑀜𑁂 ‘‘𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀦 𑀤𑁂𑀯𑁄 𑀕𑀚𑁆𑀚𑀢𑀺, 𑀅𑀗𑁆𑀕𑀻𑀭𑀲𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑀳𑀲𑁆𑀲𑀢𑁆𑀣𑀸𑀫𑀁 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀚𑀺𑀬𑀁 𑀧𑁄𑀞𑁂𑀦𑁆𑀢𑀲𑁆𑀲 𑀚𑀺𑀬𑀧𑁆𑀧𑀳𑀸𑀭𑀲𑀤𑁆𑀤𑁄 𑀏𑀲𑁄’’𑀢𑀺 𑀆𑀳𑀁𑀲𑀼. 𑀲𑀸𑀓𑀺𑀬𑀸 𑀢𑀁 𑀲𑀼𑀢𑁆𑀯𑀸 𑀢𑀸𑀯𑀢𑀓𑁂𑀦𑁂𑀯 𑀆𑀭𑀤𑁆𑀥𑀘𑀺𑀢𑁆𑀢𑀸 𑀢𑀼𑀝𑁆𑀞𑀫𑀸𑀦𑀲𑀸 𑀅𑀳𑁂𑀲𑀼𑀁.

𑀅𑀣 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀅𑀝𑁆𑀞𑀗𑁆𑀕𑀼𑀮𑀩𑀳𑀮𑀁 𑀅𑀬𑁄𑀧𑀝𑁆𑀝𑀁 𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀘𑀢𑀼𑀭𑀗𑁆𑀕𑀼𑀮𑀩𑀳𑀮𑀁 𑀅𑀲𑀦𑀨𑀮𑀓𑀁 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀯𑀺𑀤𑀢𑁆𑀣𑀺𑀩𑀳𑀮𑀁 𑀉𑀤𑀼𑀫𑁆𑀩𑀭𑀨𑀮𑀓𑀁 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀢𑁄 ‘‘𑀯𑀸𑀮𑀼𑀓𑀲𑀓𑀝𑀸𑀦𑀻’’𑀢𑀺 𑀆𑀳𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀯𑀸𑀮𑀼𑀓𑀲𑀓𑀝𑀫𑁆𑀧𑀺 𑀧𑀮𑀸𑀮𑀲𑀓𑀝𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀤𑀓𑁂 𑀏𑀓𑀽𑀲𑀪𑀧𑁆𑀧𑀫𑀸𑀡𑀁 𑀓𑀡𑁆𑀟𑀁 𑀧𑁂𑀲𑁂𑀲𑀺 𑀣𑀮𑁂 𑀅𑀝𑁆𑀞𑀉𑀲𑀪𑀧𑁆𑀧𑀫𑀸𑀡𑀁. 𑀅𑀣 𑀦𑀁 ‘‘𑀯𑀸𑀢𑀺𑀗𑁆𑀕𑀡𑀲𑀜𑁆𑀜𑀸𑀬 𑀯𑀸𑀮𑀁 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. ‘‘𑀢𑁂𑀦 𑀳𑀺 𑀬𑁄𑀚𑀦𑀫𑀢𑁆𑀢𑀁 𑀯𑀸𑀢𑀺𑀗𑁆𑀕𑀡𑀁 𑀩𑀦𑁆𑀥𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀬𑁄𑀚𑀦𑀫𑀢𑁆𑀢𑀓𑁂 𑀯𑀸𑀢𑀺𑀗𑁆𑀕𑀡𑀲𑀜𑁆𑀜𑀸𑀬 𑀯𑀸𑀮𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑁂 𑀫𑁂𑀖𑀧𑀝𑀮𑁂𑀳𑀺 𑀙𑀦𑁆𑀦𑀸𑀲𑀼 𑀤𑀺𑀲𑀸𑀲𑀼 𑀓𑀡𑁆𑀟𑀁 𑀔𑀺𑀧𑀺. 𑀢𑀁 𑀕𑀦𑁆𑀢𑁆𑀯𑀸 𑀬𑁄𑀚𑀦𑀫𑀢𑁆𑀢𑀓𑁂 𑀯𑀸𑀮𑀁 𑀨𑀸𑀮𑁂𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀦 𑀓𑁂𑀯𑀮𑀁 𑀏𑀢𑁆𑀢𑀓𑀫𑁂𑀯, 𑀢𑀁𑀤𑀺𑀯𑀲𑀁 𑀫𑀳𑀸𑀧𑀼𑀭𑀺𑀲𑁄 𑀮𑁄𑀓𑁂 𑀯𑀢𑁆𑀢𑀫𑀸𑀦𑀁 𑀲𑀺𑀧𑁆𑀧𑀁 𑀲𑀩𑁆𑀩𑀫𑁂𑀯 𑀤𑀲𑁆𑀲𑁂𑀲𑀺.

𑀅𑀣 𑀲𑀸𑀓𑀺𑀬𑀸 𑀅𑀢𑁆𑀢𑀦𑁄 𑀥𑀻𑀢𑀭𑁄 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑁂𑀲𑀬𑀺𑀁𑀲𑀼. 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀅𑀳𑁂𑀲𑀼𑀁. 𑀭𑀸𑀳𑀼𑀮𑀫𑀸𑀢𑀸 𑀧𑀦 𑀤𑁂𑀯𑀻 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀲𑀼𑀭𑀬𑀼𑀯𑀢𑀻𑀳𑀺 𑀧𑀭𑀺𑀯𑀼𑀢𑁄 𑀦𑀭𑀬𑀼𑀯𑀢𑀻𑀳𑀺 𑀧𑀭𑀺𑀯𑀼𑀢𑁄 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀼𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀉𑀢𑀼𑀯𑀸𑀭𑁂𑀦 𑀉𑀢𑀼𑀯𑀸𑀭𑁂𑀦 𑀢𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀯𑀺𑀳𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑀼𑀓𑀸𑀫𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀭𑀣𑀁 𑀬𑁄𑀚𑁂𑀳𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀫𑀳𑀸𑀭𑀳𑀁 𑀯𑀭𑀭𑀼𑀘𑀺𑀭𑀣𑀺𑀭𑀓𑀼𑀩𑁆𑀩𑀭𑀯𑀭𑀢𑁆𑀢𑀁 𑀣𑀺𑀭𑀢𑀭𑀦𑁂𑀫𑀺𑀦𑀸𑀪𑀺𑀁 𑀯𑀭𑀓𑀦𑀓𑀭𑀚𑀢𑀫𑀡𑀺𑀭𑀢𑀦𑀔𑀘𑀺𑀢𑀈𑀲𑀸𑀫𑀼𑀔𑀁 𑀦𑀯𑀓𑀦𑀓𑀭𑀚𑀢𑀢𑀸𑀭𑀓𑀔𑀘𑀺𑀢𑀦𑁂𑀫𑀺𑀧𑀲𑁆𑀲𑀁 𑀲𑀫𑁄𑀲𑀭𑀺𑀢𑀯𑀺𑀯𑀺𑀥𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑀲𑀲𑁆𑀲𑀺𑀭𑀺𑀓𑀁 𑀭𑀯𑀺𑀭𑀣𑀲𑀤𑀺𑀲𑀤𑀲𑁆𑀲𑀦𑀻𑀬𑀁 𑀯𑀭𑀭𑀣𑀁 𑀲𑀫𑀮𑀗𑁆𑀓𑀭𑀺𑀢𑁆𑀯𑀸 𑀲𑀲𑀺𑀓𑀼𑀫𑀼𑀤𑀲𑀤𑀺𑀲𑀯𑀡𑁆𑀡𑁂 𑀅𑀦𑀺𑀮𑀕𑀭𑀼𑀴𑀚𑀯𑁂 𑀆𑀚𑀸𑀦𑀻𑀬𑁂 𑀘𑀢𑁆𑀢𑀸𑀭𑁄 𑀫𑀗𑁆𑀕𑀮𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀯𑁂𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀢𑀁 𑀭𑀣𑀯𑀭𑀫𑀸𑀭𑀼𑀬𑁆𑀳 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀅𑀣 𑀤𑁂𑀯𑀢𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀸𑀮𑁄 𑀆𑀲𑀦𑁆𑀦𑁄, 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀤𑁂𑀯𑀧𑀼𑀢𑁆𑀢𑀁 𑀚𑀭𑀸𑀚𑀚𑁆𑀚𑀭𑀲𑀭𑀻𑀭𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀗𑁆𑀓𑀕𑀢𑁆𑀢𑀁 𑀤𑀡𑁆𑀟𑀳𑀢𑁆𑀣𑀁 𑀧𑀯𑁂𑀥𑀫𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀢𑀁 𑀩𑁄𑀥𑀺𑀲𑀢𑁆𑀢𑁄 𑀘𑁂𑀯 𑀲𑀸𑀭𑀣𑀺 𑀘 𑀧𑀲𑁆𑀲𑀦𑁆𑀢𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀲𑀸𑀭𑀣𑀺 𑀓𑁄 𑀦𑀸𑀫𑁂𑀲 𑀧𑀼𑀭𑀺𑀲𑁄 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁪𑁩 𑀆𑀤𑀬𑁄) 𑀆𑀕𑀢𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑁋 ‘‘𑀥𑀺𑀭𑀢𑁆𑀣𑀼 𑀯𑀢, 𑀪𑁄, 𑀚𑀸𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁫, 𑁪𑁭) 𑀲𑀁𑀯𑀺𑀕𑁆𑀕𑀳𑀤𑀬𑁄 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀫𑁂𑀯 𑀅𑀪𑀺𑀭𑀼𑀳𑀺.

𑀭𑀸𑀚𑀸 ‘‘𑀓𑀺𑀁𑀓𑀸𑀭𑀡𑀸 𑀫𑀫 𑀧𑀼𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀚𑀺𑀡𑁆𑀡𑀧𑀼𑀭𑀺𑀲𑀁 𑀤𑀺𑀲𑁆𑀯𑀸, 𑀤𑁂𑀯𑀸’’𑀢𑀺. 𑀢𑀢𑁄 𑀓𑀫𑁆𑀧𑀫𑀸𑀦𑀫𑀸𑀦𑀲𑁄 𑀭𑀸𑀚𑀸 𑀅𑀟𑁆𑀠𑀬𑁄𑀚𑀦𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀸𑀳𑀺 𑀏𑀯 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀩𑁆𑀬𑀸𑀥𑀺𑀢𑀜𑁆𑀘 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀫𑁂𑀯 𑀅𑀪𑀺𑀭𑀼𑀳𑀺. 𑀭𑀸𑀚𑀸 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀝𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀧𑀩𑁆𑀩𑀚𑁆𑀚𑀸𑀬 𑀫𑀸𑀦𑀲𑀁 𑀅𑀲𑁆𑀲 𑀪𑀺𑀦𑁆𑀦𑀁 𑀓𑀭𑀺𑀲𑁆𑀲’’𑀦𑁆𑀢𑀺 𑀆𑀭𑀓𑁆𑀔𑀁 𑀯𑀟𑁆𑀠𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺.

𑀧𑀼𑀦𑀧𑀺 𑀩𑁄𑀥𑀺𑀲𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀣𑁂𑀯 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀓𑀸𑀮𑀗𑁆𑀓𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀫𑀪𑀺𑀭𑀼𑀳𑀺. 𑀭𑀸𑀚𑀸 𑀦𑀺𑀯𑀢𑁆𑀢𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀆𑀭𑀓𑁆𑀔𑀁 𑀯𑀟𑁆𑀠𑁂𑀢𑁆𑀯𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺.

𑀧𑀼𑀦𑀧𑀺 𑀩𑁄𑀥𑀺𑀲𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀣𑁂𑀯 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀲𑀼𑀦𑀺𑀯𑀢𑁆𑀣𑀁 𑀲𑀼𑀧𑀸𑀭𑀼𑀢𑀁 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 𑁋 ‘‘𑀓𑁄 𑀦𑀸𑀫𑁂𑀲𑁄, 𑀲𑀫𑁆𑀫, 𑀲𑀸𑀭𑀣𑀻’’𑀢𑀺 𑀲𑀸𑀭𑀣𑀺𑀁 𑀧𑀼𑀘𑁆𑀙𑀺. 𑀲𑀸𑀭𑀣𑀺 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀧𑀩𑁆𑀩𑀚𑀺𑀢𑀕𑀼𑀡𑁂 𑀯𑀸 𑀦 𑀚𑀸𑀦𑀸𑀢𑀺, 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀧𑀦 ‘‘𑀧𑀩𑁆𑀩𑀚𑀺𑀢𑁄 𑀦𑀸𑀫𑀸𑀬𑀁 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀢𑀲𑁆𑀲 𑀯𑀡𑁆𑀡𑁂𑀲𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀤𑀻𑀖𑀸𑀬𑀼𑀓𑀸 𑀩𑁄𑀥𑀺𑀲𑀢𑁆𑀢𑀸 𑀯𑀲𑁆𑀲𑀲𑀢𑁂 𑀯𑀲𑁆𑀲𑀲𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀚𑀺𑀡𑁆𑀡𑀸𑀤𑀻𑀲𑀼 𑀏𑀓𑁂𑀓𑀁 𑀅𑀤𑁆𑀤𑀲𑀁𑀲𑀼. 𑀅𑀫𑁆𑀳𑀸𑀓𑀁 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀅𑀧𑁆𑀧𑀸𑀬𑀼𑀓𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀏𑀓𑁂𑀓𑀁 𑀅𑀤𑁆𑀤𑀲. 𑀤𑀻𑀖𑀪𑀸𑀡𑀓𑀸 𑀧𑀦𑀸𑀳𑀼 𑁋 ‘‘𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀤𑀺𑀯𑀲𑁂𑀦𑁂𑀯 𑀤𑀺𑀲𑁆𑀯𑀸 𑀅𑀕𑀫𑀸𑀲𑀻’’𑀢𑀺. 𑀢𑀢𑁆𑀣 𑀤𑀺𑀯𑀲𑀪𑀸𑀕𑀁 𑀓𑀻𑀴𑀺𑀢𑁆𑀯𑀸 𑀉𑀬𑁆𑀬𑀸𑀦𑀭𑀲𑀫𑀦𑀼𑀪𑀯𑀺𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀫𑀗𑁆𑀕𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑀼𑀓𑀸𑀫𑁄. 𑀅𑀣𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀫𑀜𑁆𑀜𑀸𑀬 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀡𑀢𑁆𑀢𑁄 𑀯𑀺𑀲𑁆𑀲𑀓𑀫𑁆𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑁂𑀯 𑀓𑀧𑁆𑀧𑀓𑀲𑀤𑀺𑀲𑁄 𑀳𑀼𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺. 𑀅𑀣𑀲𑁆𑀲 𑀲𑀩𑁆𑀩𑀸𑀮𑀗𑁆𑀓𑀸𑀭𑀲𑀫𑀮𑀗𑁆𑀓𑀢𑀲𑁆𑀲 𑀲𑀩𑁆𑀩𑀢𑀸𑀮𑀸𑀯𑀘𑀭𑁂𑀲𑀼 𑀲𑀓𑀸𑀦𑀺 𑀲𑀓𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀤𑀲𑁆𑀲𑀬𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 ‘‘𑀚𑀬 𑀦𑀦𑁆𑀤𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀼𑀢𑀫𑀗𑁆𑀕𑀮𑀺𑀓𑀸𑀤𑀻𑀲𑀼 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀫𑀗𑁆𑀕𑀮𑀯𑀘𑀦𑀢𑁆𑀣𑀼𑀢𑀺𑀖𑁄𑀲𑁂𑀳𑀺 𑀲𑀫𑁆𑀪𑀸𑀯𑁂𑀦𑁆𑀢𑁂𑀲𑀼 𑀲𑀩𑁆𑀩𑀸𑀮𑀗𑁆𑀓𑀸𑀭𑀲𑀫𑀮𑀗𑁆𑀓𑀢𑀁 𑀭𑀣𑀯𑀭𑀁 𑀅𑀪𑀺𑀭𑀼𑀳𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑁋 ‘‘𑀭𑀸𑀳𑀼𑀮𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀢𑀼𑀝𑁆𑀞𑀺𑀁 𑀦𑀺𑀯𑁂𑀤𑁂𑀣𑀸’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑁋 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 𑁋 ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑁂 𑀦𑀢𑁆𑀢𑀸 ‘𑀭𑀸𑀳𑀼𑀮𑀓𑀼𑀫𑀸𑀭𑁄’𑀢𑁆𑀯𑁂𑀯 𑀦𑀸𑀫𑀁 𑀳𑁄𑀢𑀽’’𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀭𑀣𑀯𑀭𑀫𑀸𑀭𑀼𑀬𑁆𑀳 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀅𑀢𑀺𑀫𑀦𑁄𑀭𑀫𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀲𑀺𑀭𑀺𑀬𑀸 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀓𑀺𑀲𑀸 𑀓𑀺𑀲𑀸𑀕𑁄𑀢𑀫𑀻 𑀦𑀸𑀫 𑀔𑀢𑁆𑀢𑀺𑀬𑀓𑀜𑁆𑀜𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀢𑀮𑀕𑀢𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀲𑀺𑀭𑀺𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸 𑁋

‘‘𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀫𑀸𑀢𑀸, 𑀦𑀺𑀩𑁆𑀩𑀼𑀢𑁄 𑀦𑀽𑀦 𑀲𑁄 𑀧𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀦𑀸𑀭𑀻, 𑀬𑀲𑁆𑀲𑀸𑀬𑀁 𑀈𑀤𑀺𑀲𑁄 𑀧𑀢𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀥. 𑀧. 𑀅𑀝𑁆𑀞. 𑁧.𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂 𑀲𑀼𑀲𑁆𑀲𑀯𑀦𑀁 𑀯𑀘𑀦𑀁 𑀲𑀸𑀯𑁂𑀲𑀺, 𑀅𑀳𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀸𑀫𑀺, 𑀅𑀚𑁆𑀚𑁂𑀯 𑀫𑀬𑀸 𑀖𑀭𑀸𑀯𑀸𑀲𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀅𑀬𑀁 𑀇𑀫𑀺𑀲𑁆𑀲𑀸 𑀆𑀘𑀭𑀺𑀬𑀪𑀸𑀕𑁄 𑀳𑁄𑀢𑀽’’𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀓𑀡𑁆𑀞𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀧𑀭𑀫𑀭𑀢𑀺𑀓𑀭𑀁 𑀫𑀼𑀢𑁆𑀢𑀸𑀳𑀸𑀭𑀁 𑀧𑁂𑀲𑁂𑀲𑀺. 𑀲𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀬𑀺 𑀧𑀝𑀺𑀩𑀤𑁆𑀥𑀳𑀤𑀬𑁄 𑀳𑀼𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀻’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀳𑀢𑀸 𑀲𑀺𑀭𑀺𑀲𑀫𑀼𑀤𑀬𑁂𑀦 𑀧𑀭𑀫𑀭𑀫𑀡𑀻𑀬𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺. 𑀢𑀸𑀯𑀤𑁂𑀯 𑀦𑀁 𑀧𑀭𑀺𑀧𑀼𑀡𑁆𑀡𑀭𑀚𑀦𑀺𑀓𑀭𑀲𑀤𑀺𑀲𑀭𑀼𑀘𑀺𑀭𑀯𑀭𑀯𑀤𑀦𑀸 𑀩𑀺𑀫𑁆𑀩𑀨𑀮𑀲𑀤𑀺𑀲𑀤𑀲𑀦𑀯𑀲𑀦𑀸 𑀲𑀺𑀢𑀯𑀺𑀫𑀮𑀲𑀫𑀲𑀁𑀳𑀺𑀢𑀸𑀯𑀺𑀭𑀴𑀯𑀭𑀤𑀲𑀦𑀸 𑀅𑀲𑀺𑀢𑀦𑀬𑀦𑀓𑁂𑀲𑀧𑀸𑀲𑀸 𑀲𑀼𑀚𑀸𑀢𑀜𑁆𑀚𑀦𑀸𑀢𑀺𑀦𑀻𑀮𑀓𑀼𑀝𑀺𑀮𑀪𑀫𑀼𑀓𑀸 𑀲𑀼𑀚𑀸𑀢𑀳𑀁𑀲𑀲𑀫𑀲𑀁𑀳𑀺𑀢𑀧𑀬𑁄𑀥𑀭𑀸 𑀭𑀢𑀺𑀓𑀭𑀦𑀯𑀓𑀦𑀓𑀭𑀚𑀢𑀯𑀺𑀭𑀘𑀺𑀢𑀯𑀭𑀫𑀡𑀺𑀫𑁂𑀔𑀮𑀸 𑀧𑀭𑀺𑀕𑀢𑀯𑀺𑀧𑀼𑀮𑀖𑀦𑀚𑀖𑀦𑀢𑀝𑀸 𑀓𑀭𑀺𑀓𑀭𑀲𑀦𑁆𑀦𑀺𑀪𑁄𑀭𑀼𑀬𑀼𑀕𑀮𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀲𑀼 𑀓𑀼𑀲𑀮𑀸 𑀲𑀼𑀭𑀬𑀼𑀯𑀢𑀺𑀲𑀤𑀺𑀲𑀭𑀽𑀧𑀲𑁄𑀪𑀸 𑀯𑀭𑀬𑀼𑀯𑀢𑀺𑀬𑁄 𑀫𑀥𑀼𑀭𑀭𑀯𑀸𑀦𑀺 𑀢𑀼𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀫𑀸𑀧𑀬𑀦𑁆𑀢𑀺𑀬𑁄 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀺 𑀧𑀬𑁄𑀚𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀓𑀺𑀮𑁂𑀲𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸𑀬 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀅𑀦𑀪𑀺𑀭𑀢𑁄 𑀫𑀼𑀳𑀼𑀢𑁆𑀢𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀬𑀲𑁆𑀲𑀢𑁆𑀣𑀸𑀬 𑀦𑀘𑁆𑀘𑀸𑀤𑀻𑀦𑀺 𑀫𑀬𑀁 𑀧𑀬𑁄𑀚𑁂𑀫, 𑀲𑁄 𑀦𑀺𑀤𑁆𑀤𑀁 𑀉𑀧𑀕𑀢𑁄, 𑀇𑀤𑀸𑀦𑀺 𑀓𑀺𑀫𑀢𑁆𑀣𑀁 𑀓𑀺𑀮𑀫𑀸𑀫𑀸’’𑀢𑀺 𑀕𑀳𑀺𑀢𑀸𑀦𑀺 𑀢𑀼𑀭𑀺𑀬𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼, 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑀸 𑀘 𑀛𑀸𑀬𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀅𑀤𑁆𑀤𑀲 𑀢𑀸 𑀇𑀢𑁆𑀣𑀺𑀬𑁄 𑀢𑀼𑀭𑀺𑀬𑀪𑀡𑁆𑀟𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺𑀬𑁄 𑀧𑀕𑁆𑀖𑀭𑀺𑀢𑀮𑀸𑀮𑀸 𑀓𑀺𑀮𑀺𑀦𑁆𑀦𑀓𑀧𑁄𑀮𑀕𑀢𑁆𑀢𑀸, 𑀏𑀓𑀘𑁆𑀘𑀸 𑀤𑀦𑁆𑀢𑁂 𑀔𑀸𑀤𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀓𑀸𑀓𑀘𑁆𑀙𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀯𑀝𑀫𑀼𑀔𑀸, 𑀏𑀓𑀘𑁆𑀘𑀸 𑀅𑀧𑀕𑀢𑀯𑀲𑀦𑀭𑀲𑀦𑀸, 𑀧𑀸𑀓𑀝𑀩𑀻𑀪𑀘𑁆𑀙𑀲𑀫𑁆𑀩𑀸𑀥𑀝𑁆𑀞𑀸𑀦𑀸, 𑀏𑀓𑀘𑁆𑀘𑀸 𑀯𑀺𑀫𑀼𑀢𑁆𑀢𑀸𑀓𑀼𑀮𑀲𑀺𑀭𑁄𑀭𑀼𑀳𑀸 𑀲𑀼𑀲𑀸𑀦𑀭𑀽𑀧𑀭𑀽𑀧𑀁 𑀥𑀸𑀭𑀬𑀫𑀸𑀦𑀸 𑀲𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑀸𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀤𑀲𑀲𑀢𑀦𑀬𑀦𑀪𑀯𑀦𑀲𑀤𑀺𑀲𑀁 𑀭𑀼𑀘𑀺𑀭𑀲𑁄𑀪𑀫𑁆𑀧𑀺 𑀧𑀸𑀲𑀸𑀤𑀯𑀭𑀢𑀮𑀁 𑀅𑀧𑀯𑀺𑀤𑁆𑀥𑀫𑀢𑀲𑀭𑀻𑀭𑀓𑀼𑀡𑀧𑀪𑀭𑀺𑀢𑀁 𑀆𑀫𑀓𑀲𑀼𑀲𑀸𑀦𑀫𑀺𑀯 𑀧𑀭𑀫𑀧𑀝𑀺𑀓𑁆𑀓𑀽𑀮𑀁 𑀉𑀧𑀝𑁆𑀞𑀸𑀲𑀺. 𑀢𑀬𑁄𑀧𑀺 𑀪𑀯𑀸 𑀆𑀤𑀺𑀢𑁆𑀢𑀪𑀯𑀦𑀲𑀤𑀺𑀲𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. ‘‘𑀉𑀧𑀤𑁆𑀤𑀼𑀢𑀁 𑀯𑀢, 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺 𑀘 𑀯𑀸𑀘𑀁 𑀧𑀯𑀢𑁆𑀢𑁂𑀲𑀺. 𑀅𑀢𑀺𑀯𑀺𑀬 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺.

𑀲𑁄 ‘‘𑀅𑀚𑁆𑀚𑁂𑀯 𑀫𑀬𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀺𑀭𑀺𑀲𑀬𑀦𑀢𑁄 𑀉𑀝𑁆𑀞𑀸𑀬 𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑁋 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀙𑀦𑁆𑀦𑁄 𑀆𑀳 𑁋 ‘‘𑀅𑀳𑀁, 𑀅𑀬𑁆𑀬𑀧𑀼𑀢𑁆𑀢, 𑀙𑀦𑁆𑀦𑁄’’𑀢𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀅𑀳𑀁 𑀅𑀚𑁆𑀚 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄, 𑀦 𑀓𑀜𑁆𑀘𑀺 𑀧𑀝𑀺𑀯𑁂𑀤𑀺𑀢𑁆𑀯𑀸 𑀲𑀻𑀖𑀫𑁂𑀓𑀁 𑀅𑀢𑀺𑀚𑀬𑀁 𑀲𑀺𑀦𑁆𑀥𑀯𑀁 𑀓𑀧𑁆𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀅𑀲𑁆𑀲𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀲𑀸𑀮𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑁂𑀲𑀼 𑀚𑀮𑀦𑁆𑀢𑁂𑀲𑀼 𑀲𑀼𑀫𑀦𑀧𑀝𑁆𑀝𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀧𑀭𑀫𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀞𑀺𑀢𑀁 𑀅𑀭𑀺𑀫𑀦𑁆𑀣𑀓𑀁 𑀓𑀡𑁆𑀟𑀓𑀁 𑀢𑀼𑀭𑀗𑁆𑀕𑀯𑀭𑀁 𑀤𑀺𑀲𑁆𑀯𑀸 𑁋 ‘‘𑀅𑀚𑁆𑀚 𑀫𑀬𑀸 𑀅𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀇𑀫𑀫𑁂𑀯 𑀫𑀗𑁆𑀕𑀮𑀳𑀬𑀁 𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀡𑁆𑀟𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀓𑀧𑁆𑀧𑀺𑀬𑀫𑀸𑀦𑁄𑀯 𑀅𑀜𑁆𑀜𑀸𑀲𑀺 𑁋 ‘‘𑀅𑀬𑀁 𑀓𑀧𑁆𑀧𑀦𑀸 𑀅𑀢𑀺𑀕𑀸𑀴𑁆𑀳𑀸, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀉𑀬𑁆𑀬𑀸𑀦𑀓𑀻𑀴𑀁 𑀕𑀫𑀦𑀓𑀸𑀮𑁂 𑀓𑀧𑁆𑀧𑀦𑀸 𑀯𑀺𑀬 𑀦 𑀳𑁄𑀢𑀺. 𑀦𑀺𑀲𑁆𑀲𑀁𑀲𑀬𑀁 𑀅𑀚𑁆𑀚𑁂𑀯 𑀅𑀬𑁆𑀬𑀧𑀼𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀲𑁄 𑀦𑀸𑀤𑁄 𑀢𑀁 𑀲𑀓𑀮𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀉𑀦𑁆𑀦𑀸𑀤𑀁 𑀓𑀭𑁂𑀬𑁆𑀬, 𑀤𑁂𑀯𑀢𑀸 𑀧𑀦 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀦 𑀓𑀲𑁆𑀲𑀘𑀺 𑀲𑁄𑀢𑀼𑀁 𑀅𑀤𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ‘‘𑀧𑀼𑀢𑁆𑀢𑀁 𑀢𑀸𑀯 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀉𑀝𑁆𑀞𑀸𑀬 𑀭𑀸𑀳𑀼𑀮𑀫𑀸𑀢𑀼𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑁄𑀕𑀩𑁆𑀪𑁂 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑁄 𑀛𑀸𑀬𑀢𑀺. 𑀭𑀸𑀳𑀼𑀮𑀫𑀸𑀢𑀸 𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀦𑀁 𑀅𑀫𑁆𑀩𑀡𑀫𑀢𑁆𑀢𑁂𑀦 𑀅𑀢𑁆𑀢𑀺𑀧𑁆𑀧𑀓𑀺𑀡𑁆𑀡𑁂 𑀯𑀭𑀲𑀬𑀦𑁂 𑀧𑀼𑀢𑁆𑀢𑀲𑁆𑀲 𑀫𑀢𑁆𑀣𑀓𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀫𑁆𑀫𑀸𑀭𑁂 𑀧𑀸𑀤𑀁 𑀞𑀧𑁂𑀢𑁆𑀯𑀸 𑀞𑀺𑀢𑀓𑁄𑀯 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀲𑀘𑀸𑀳𑀁 𑀤𑁂𑀯𑀺𑀬𑀸 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀤𑁂𑀯𑀻 𑀧𑀩𑀼𑀚𑁆𑀛𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀅𑀪𑀺𑀦𑀺𑀓𑁆𑀔𑀫𑀦𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺. 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀲𑀸𑀤𑀢𑀮𑀢𑁄 𑀑𑀢𑀭𑀺𑀢𑁆𑀯𑀸 𑀅𑀲𑁆𑀲𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀢𑀸𑀢 𑀓𑀡𑁆𑀟𑀓, 𑀢𑁆𑀯𑀁 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀫𑀁 𑀢𑀸𑀭𑀬, 𑀅𑀳𑀁 𑀢𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀓𑀡𑁆𑀟𑀓𑁄 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀆𑀬𑀸𑀫𑀢𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑁄 𑀳𑁄𑀢𑀺 𑀢𑀤𑀦𑀼𑀭𑀽𑀧𑁂𑀦 𑀉𑀩𑁆𑀩𑁂𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀭𑀽𑀧𑀕𑁆𑀕𑀚𑀯𑀩𑀮𑀲𑀫𑁆𑀧𑀦𑁆𑀦𑁄 𑀲𑀩𑁆𑀩𑀲𑁂𑀢𑁄 𑀥𑁄𑀢𑀲𑀗𑁆𑀔𑀲𑀤𑀺𑀲𑀤𑀲𑁆𑀲𑀦𑀻𑀬𑀯𑀡𑁆𑀡𑁄. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀯𑀭𑀢𑀼𑀭𑀗𑁆𑀕𑀧𑀺𑀝𑁆𑀞𑀺𑀕𑀢𑁄 𑀙𑀦𑁆𑀦𑀁 𑀅𑀲𑁆𑀲𑀲𑁆𑀲 𑀯𑀸𑀮𑀥𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀦𑀕𑀭𑀲𑁆𑀲 𑀫𑀳𑀸𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄.

𑀢𑀤𑀸 𑀧𑀦 𑀭𑀸𑀚𑀸 𑀧𑀼𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀫𑀦𑀧𑀝𑀺𑀲𑁂𑀥𑀦𑀢𑁆𑀣𑀸𑀬 𑀤𑁆𑀯𑀻𑀲𑀼 𑀤𑁆𑀯𑀸𑀭𑀓𑀯𑀸𑀝𑁂𑀲𑀼 𑀏𑀓𑁂𑀓𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀯𑀺𑀯𑀭𑀺𑀢𑀩𑁆𑀩𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀩𑀳𑀼𑀧𑀼𑀭𑀺𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀧𑀼𑀭𑀺𑀲𑀕𑀡𑀦𑀸𑀬 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲 𑀩𑀮𑀁 𑀥𑀸𑀭𑁂𑀲𑀺, 𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀲𑁆𑀲. 𑀢𑀲𑁆𑀫𑀸 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀤𑀺 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀻𑀬𑀢𑀺, 𑀅𑀚𑁆𑀚 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄 𑀙𑀦𑁆𑀦𑀁 𑀯𑀸𑀮𑀥𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀓𑀡𑁆𑀟𑀓𑀁 𑀊𑀭𑀽𑀳𑀺 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀙𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀉𑀕𑁆𑀖𑀸𑀧𑀬𑀢𑀺, 𑀅𑀳𑀁 𑀅𑀬𑁆𑀬𑀧𑀼𑀢𑁆𑀢𑀁 𑀔𑀦𑁆𑀥𑁂 𑀓𑀢𑁆𑀯𑀸 𑀓𑀡𑁆𑀟𑀓𑀁 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀉𑀧𑀓𑀘𑁆𑀙𑀓𑁂 𑀓𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀸𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀓𑀡𑁆𑀟𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑁆𑀯𑀸𑀭𑁂 𑀅𑀯𑀺𑀯𑀭𑀺𑀬𑀫𑀸𑀦𑁂 𑀬𑀣𑀸𑀦𑀺𑀲𑀺𑀦𑁆𑀦𑀫𑁂𑀯 𑀅𑀬𑁆𑀬𑀧𑀼𑀢𑁆𑀢𑀁 𑀕𑀳𑀺𑀢𑀯𑀸𑀮𑀥𑀺𑀦𑀸 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀸𑀓𑀸𑀭𑀲𑁆𑀲 𑀧𑀼𑀭𑀢𑁄 𑀧𑀢𑀺𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀫𑁂𑀯 𑀢𑀬𑁄 𑀧𑀼𑀭𑀺𑀲𑀸 𑀘𑀺𑀦𑁆𑀢𑀬𑀺𑀁𑀲𑀼. 𑀤𑁆𑀯𑀸𑀭𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀳𑀸𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼.

𑀢𑀲𑁆𑀫𑀺𑀁 𑀔𑀡𑁂 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀫𑀳𑀸𑀲𑀢𑁆𑀢𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀕𑀕𑀦𑀢𑀮𑁂 𑀞𑀢𑁆𑀯𑀸 𑀆𑀳 𑁋

‘‘𑀫𑀸 𑀦𑀺𑀓𑁆𑀔𑀫 𑀫𑀳𑀸𑀯𑀻𑀭, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀦𑁂;

𑀤𑀺𑀩𑁆𑀩𑀁 𑀢𑀼 𑀘𑀓𑁆𑀓𑀭𑀢𑀦𑀁, 𑀅𑀤𑁆𑀥𑀸 𑀧𑀸𑀢𑀼 𑀪𑀯𑀺𑀲𑁆𑀲𑀢𑀺. 𑁋

𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀲𑀺, 𑀦𑀺𑀯𑀢𑁆𑀢, 𑀫𑀸𑀭𑀺𑀲𑀸’’𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀆𑀳 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺. 𑀅𑀳𑀁 𑀯𑀲𑀯𑀢𑁆𑀢𑀻𑀢𑀺.

‘‘𑀚𑀸𑀦𑀸𑀫𑀳𑀁 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀘𑀓𑁆𑀓𑀲𑁆𑀲 𑀲𑀫𑁆𑀪𑀯𑀁;

𑀅𑀦𑀢𑁆𑀣𑀺𑀓𑁄𑀳𑀁 𑀭𑀚𑁆𑀚𑁂𑀦, 𑀕𑀘𑁆𑀙 𑀢𑁆𑀯𑀁 𑀫𑀸𑀭 𑀫𑀸 𑀇𑀥.

‘‘𑀲𑀓𑀮𑀁 𑀤𑀲𑀲𑀳𑀲𑁆𑀲𑀫𑁆𑀧𑀺, 𑀮𑁄𑀓𑀥𑀸𑀢𑀼𑀫𑀳𑀁 𑀧𑀦;

𑀉𑀦𑁆𑀦𑀸𑀤𑁂𑀢𑁆𑀯𑀸 𑀪𑀯𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀦𑀸𑀬𑀓𑁄’’𑀢𑀺. 𑁋

𑀆𑀳. 𑀲𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀫𑀳𑀸𑀲𑀢𑁆𑀢𑁄 𑀏𑀓𑀽𑀦𑀢𑁆𑀢𑀺𑀁𑀲𑀯𑀲𑁆𑀲𑀓𑀸𑀮𑁂 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑁂𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀦𑀺𑀯𑀸𑀲𑀪𑀽𑀢𑀸 𑀭𑀸𑀚𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀕𑀭𑀁 𑀅𑀧𑀮𑁄𑀓𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀯𑀺𑀢𑀓𑁆𑀓𑀲𑀫𑀦𑀦𑁆𑀢𑀭𑀫𑁂𑀯 𑀘𑀲𑁆𑀲 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀲𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀧𑀭𑀺𑀯𑀢𑁆𑀢𑀺. 𑀬𑀣𑀸𑀞𑀺𑀢𑁄𑀯 𑀫𑀳𑀸𑀲𑀢𑁆𑀢𑁄 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀤𑀺𑀲𑁆𑀯𑀸 𑀢𑀲𑁆𑀲𑀺𑀁 𑀪𑀽𑀫𑀺𑀧𑁆𑀧𑀤𑁂𑀲𑁂 𑀓𑀡𑁆𑀟𑀓𑀦𑀺𑀯𑀢𑁆𑀢𑀦𑀁 𑀦𑀸𑀫 𑀘𑁂𑀢𑀺𑀬𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀫𑀕𑀸𑀪𑀺𑀫𑀼𑀔𑀁𑀬𑁂𑀯 𑀓𑀡𑁆𑀟𑀓𑀁 𑀓𑀢𑁆𑀯𑀸 𑀧𑀸𑀬𑀸𑀲𑀺 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀉𑀴𑀸𑀭𑁂𑀦 𑀲𑀺𑀭𑀺𑀲𑀫𑀼𑀤𑀬𑁂𑀦. 𑀢𑀤𑀸 𑀫𑀳𑀸𑀲𑀢𑁆𑀢𑁂 𑀕𑀘𑁆𑀙𑀦𑁆𑀢𑁂 𑀢𑀲𑁆𑀲 𑀧𑀼𑀭𑀢𑁄 𑀤𑁂𑀯𑀢𑀸 𑀲𑀝𑁆𑀞𑀺 𑀉𑀓𑁆𑀓𑀸𑀲𑀢𑀲𑀳𑀲𑁆𑀲𑀸𑀦𑀺 𑀥𑀸𑀭𑀬𑀺𑀁𑀲𑀼, 𑀢𑀣𑀸 𑀧𑀘𑁆𑀙𑀢𑁄 𑀲𑀝𑁆𑀞𑀺 𑀤𑀓𑁆𑀔𑀺𑀡𑀢𑁄 𑀲𑀝𑁆𑀞𑀺 𑀉𑀓𑁆𑀓𑀸𑀲𑀢𑀲𑀳𑀲𑁆𑀲𑀸𑀦𑀺, 𑀢𑀣𑀸 𑀯𑀸𑀫𑀧𑀲𑁆𑀲𑀢𑁄. 𑀅𑀧𑀭𑀸 𑀤𑁂𑀯𑀢𑀸 𑀲𑀼𑀭𑀪𑀺𑀓𑀼𑀲𑀼𑀫𑀫𑀸𑀮𑀸𑀤𑀸𑀫𑀘𑀦𑁆𑀤𑀦𑀘𑀼𑀡𑁆𑀡𑀘𑀸𑀫𑀭𑀥𑀚𑀧𑀝𑀸𑀓𑀸𑀳𑀺 𑀲𑀓𑁆𑀓𑀭𑁄𑀦𑁆𑀢𑀺𑀬𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀤𑀺𑀩𑁆𑀩𑀸𑀦𑀺 𑀲𑀗𑁆𑀕𑀻𑀢𑀸𑀦𑀺 𑀅𑀦𑁂𑀓𑀸𑀦𑀺 𑀘 𑀢𑀼𑀭𑀺𑀬𑀸𑀦𑀺 𑀯𑀚𑁆𑀚𑀺𑀁𑀲𑀼.

𑀇𑀫𑀺𑀦𑀸 𑀲𑀺𑀭𑀺𑀲𑀫𑀼𑀤𑀬𑁂𑀦 𑀕𑀘𑁆𑀙𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀓𑀭𑀢𑁆𑀢𑁂𑀦𑁂𑀯 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀢𑀺𑀁𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀸 𑀦𑀸𑀫𑀸𑀬𑀁 𑀦𑀤𑀻’’𑀢𑀺? ‘‘𑀅𑀦𑁄𑀫𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑁄𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀡𑁆𑀳𑀺𑀬𑀸 𑀅𑀲𑁆𑀲𑀁 𑀖𑀝𑁆𑀝𑁂𑀦𑁆𑀢𑁄 𑀅𑀲𑁆𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀅𑀲𑁆𑀲𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀅𑀝𑁆𑀞𑀉𑀲𑀪𑀯𑀺𑀢𑁆𑀣𑀸𑀭𑀸𑀬 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀭𑀼𑀬𑁆𑀳 𑀫𑀼𑀢𑁆𑀢𑀭𑀸𑀲𑀺𑀲𑀤𑀺𑀲𑁂 𑀯𑀸𑀮𑀼𑀓𑀸𑀧𑀼𑀮𑀺𑀦𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫 𑀙𑀦𑁆𑀦, 𑀢𑁆𑀯𑀁 𑀫𑀬𑁆𑀳𑀁 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀆𑀤𑀸𑀬 𑀕𑀘𑁆𑀙, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀙𑀦𑁆𑀦𑁄, ‘‘𑀅𑀳𑀫𑁆𑀧𑀺, 𑀤𑁂𑀯, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋 ‘‘𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼𑀁, 𑀕𑀘𑁆𑀙𑁂𑀯 𑀢𑁆𑀯’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀯𑀸𑀭𑁂𑀢𑁆𑀯𑀸 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑁆𑀳𑀁 𑀓𑁂𑀲𑀸 𑀲𑀫𑀡𑀲𑀸𑀭𑀼𑀧𑁆𑀧𑀸 𑀦 𑀳𑁄𑀦𑁆𑀢𑀺, 𑀢𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀧𑀭𑀫𑀦𑀺𑀲𑀺𑀢𑀫𑀲𑀺𑀯𑀭𑀁 𑀕𑀳𑁂𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀫𑁄𑀴𑀺𑀬𑀸 𑀲𑀤𑁆𑀥𑀺𑀁 𑀘𑀽𑀴𑀁 𑀕𑀳𑁂𑀢𑁆𑀯𑀸 𑀙𑀺𑀦𑁆𑀤𑀺, 𑀓𑁂𑀲𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀆𑀯𑀝𑁆𑀝𑀫𑀸𑀦𑀸 𑀲𑀻𑀲𑁂 𑀅𑀮𑁆𑀮𑀻𑀬𑀺𑀁𑀲𑀼. 𑀢𑁂𑀲𑀁 𑀧𑀦 𑀓𑁂𑀲𑀸𑀦𑀁 𑀬𑀸𑀯𑀚𑀻𑀯𑀁 𑀢𑀤𑁂𑀯 𑀧𑀫𑀸𑀡𑀁 𑀅𑀳𑁄𑀲𑀺, 𑀫𑀲𑁆𑀲𑀼 𑀘 𑀢𑀤𑀦𑀼𑀭𑀽𑀧𑀁, 𑀧𑀼𑀦 𑀓𑁂𑀲𑀫𑀲𑁆𑀲𑀼𑀑𑀳𑀸𑀭𑀡𑀓𑀺𑀘𑁆𑀘𑀫𑁆𑀧𑀺𑀲𑁆𑀲 𑀦𑀸𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀳 𑀫𑁄𑀴𑀺𑀬𑀸 𑀘𑀽𑀴𑀁 𑀕𑀳𑁂𑀢𑁆𑀯𑀸 𑁋 ‘‘𑀲𑀘𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀆𑀓𑀸𑀲𑁂 𑀢𑀺𑀝𑁆𑀞𑀢𑀼, 𑀦𑁄 𑀘𑁂, 𑀪𑀽𑀫𑀺𑀬𑀁 𑀧𑀢𑀢𑀽’’𑀢𑀺 𑀆𑀓𑀸𑀲𑁂 𑀔𑀺𑀧𑀺. 𑀢𑀁 𑀘𑀽𑀴𑀸𑀫𑀡𑀺𑀩𑀦𑁆𑀥𑀦𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺.

𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀬𑁄𑀚𑀦𑀺𑀓𑁂𑀦 𑀭𑀢𑀦𑀘𑀗𑁆𑀓𑁄𑀝𑀓𑁂𑀦 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀬𑁄𑀚𑀦𑀁 𑀲𑀢𑁆𑀢𑀭𑀢𑀦𑀫𑀬𑀁 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑀁 𑀦𑀸𑀫 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀬𑀣𑀸𑀳 𑁋

‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁, 𑀯𑁂𑀳𑀸𑀬𑀲𑀁 𑀉𑀓𑁆𑀔𑀺𑀧𑀺 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀺, 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀯𑀭𑁂𑀦 𑀯𑀸𑀲𑀯𑁄’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨𑁨𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁨; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸);

𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸𑀦𑀺 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀫𑀳𑀕𑁆𑀖𑀸𑀦𑀺, 𑀦 𑀫𑀬𑁆𑀳𑀁 𑀲𑀫𑀡𑀲𑀸𑀭𑀼𑀧𑁆𑀧𑀸𑀦𑀻’’𑀢𑀺. 𑀅𑀣𑀲𑁆𑀲 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀼𑀭𑀸𑀡𑀲𑀳𑀸𑀬𑀓𑁄 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀯𑀺𑀦𑀸𑀲𑀪𑀸𑀯𑀸𑀧𑁆𑀧𑀢𑁆𑀢𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑁂 𑀲𑀳𑀸𑀬𑀓𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀲𑀫𑀡𑀧𑀭𑀺𑀓𑁆𑀔𑀸𑀭𑀫𑀲𑁆𑀲 𑀕𑀳𑁂𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺.

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑀜𑁆𑀘 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁫; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁪; 𑁨.𑁩𑁪𑁯; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁮; 𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁨𑁦𑁬) 𑁋

𑀇𑀫𑁂 𑀅𑀝𑁆𑀞 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀅𑀭𑀳𑀤𑁆𑀥𑀚𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀫𑀁 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀸𑀝𑀓𑀬𑀼𑀕𑀮𑀁 𑀆𑀓𑀸𑀲𑁂 𑀔𑀺𑀧𑀺. 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀩𑁆𑀩𑀭𑀢𑀦𑀫𑀬𑀁 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑁋 ‘‘𑀙𑀦𑁆𑀦, 𑀫𑀫 𑀯𑀘𑀦𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀕𑁆𑀬𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑀢𑁄 𑀙𑀦𑁆𑀦𑁄 𑀫𑀳𑀸𑀧𑀼𑀭𑀺𑀲𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀡𑁆𑀟𑀓𑁄 𑀧𑀦 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀡𑀦𑁆𑀢𑁄 𑀞𑀢𑁆𑀯𑀸 𑁋 ‘‘𑀦𑀢𑁆𑀣𑀺 𑀤𑀸𑀦𑀺 𑀫𑀬𑁆𑀳𑀁 𑀧𑀼𑀦 𑀲𑀸𑀫𑀺𑀦𑁄 𑀤𑀲𑁆𑀲𑀦’’𑀦𑁆𑀢𑀺 𑀘𑀓𑁆𑀔𑀼𑀧𑀣𑀫𑀲𑁆𑀲 𑀯𑀺𑀚𑀳𑀦𑁆𑀢𑁄 𑀯𑀺𑀬𑁄𑀕𑀤𑀼𑀓𑁆𑀔𑀫𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀭𑀭𑀺𑀧𑀼𑀤𑀼𑀭𑀪𑀺𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀓𑀡𑁆𑀟𑀓𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑀺𑀫𑀮𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀸 𑀯𑀺𑀫𑀸𑀦𑀯𑀢𑁆𑀣𑀼𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑀸. 𑀙𑀦𑁆𑀦𑀲𑁆𑀲 𑀧𑀞𑀫𑀁 𑀏𑀓𑁄𑀯 𑀲𑁄𑀓𑁄 𑀅𑀳𑁄𑀲𑀺. 𑀲𑁄 𑀓𑀡𑁆𑀟𑀓𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀤𑀼𑀢𑀺𑀬𑁂𑀦 𑀲𑁄𑀓𑁂𑀦 𑀧𑀻𑀴𑀺𑀬𑀫𑀸𑀦𑁄 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀤𑀼𑀓𑁆𑀔𑁂𑀦 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀅𑀦𑀼𑀧𑀺𑀬𑀁 𑀦𑀸𑀫 𑀅𑀫𑁆𑀩𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁄 𑀧𑀘𑁆𑀙𑀸 𑀲𑀜𑁆𑀛𑀸𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀲𑀮𑀺𑀮𑀥𑀭𑀲𑀁𑀯𑀼𑀢𑁄 𑀲𑀭𑀤𑀲𑀫𑀬𑁂 𑀧𑀭𑀺𑀧𑀼𑀡𑁆𑀡𑀭𑀚𑀦𑀺𑀓𑀭𑁄 𑀯𑀺𑀬 𑀓𑀸𑀲𑀸𑀯𑀯𑀭𑀲𑀁𑀯𑀼𑀢𑁄 𑀏𑀓𑀓𑁄𑀧𑀺 𑀅𑀦𑁂𑀓𑀚𑀦𑀧𑀭𑀺𑀯𑀼𑀢𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀢𑀁 𑀯𑀦𑀯𑀸𑀲𑀺𑀫𑀺𑀕𑀧𑀓𑁆𑀔𑀻𑀦𑀁 𑀦𑀬𑀦𑀸𑀫𑀢𑀧𑀸𑀦𑀫𑀺𑀯 𑀓𑀭𑁄𑀦𑁆𑀢𑁄 𑀏𑀓𑀘𑀭𑁄 𑀲𑀻𑀳𑁄 𑀯𑀺𑀬 𑀦𑀭𑀲𑀻𑀳𑁄 𑀫𑀢𑁆𑀢𑀫𑀸𑀢𑀗𑁆𑀕𑀯𑀺𑀮𑀸𑀲𑀕𑀸𑀫𑀻 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀯𑀺𑀬 𑀯𑀲𑀼𑀦𑁆𑀥𑀭𑀁 𑀧𑀸𑀤𑀢𑀮𑁂𑀳𑀺 𑀏𑀓𑀤𑀺𑀯𑀲𑁂𑀦𑁂𑀯 𑀢𑀺𑀁𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀉𑀢𑁆𑀢𑀼𑀗𑁆𑀕𑀢𑀭𑀗𑁆𑀕𑀪𑀗𑁆𑀕𑀁 𑀅𑀲𑀗𑁆𑀕𑀁 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀭𑀢𑀦𑀚𑀼𑀢𑀺𑀯𑀺𑀲𑀭𑀯𑀺𑀭𑀸𑀚𑀺𑀢𑀯𑀭𑀭𑀼𑀘𑀺𑀭𑀭𑀸𑀚𑀕𑀳𑀁 𑀭𑀸𑀚𑀕𑀳𑀁 𑀦𑀸𑀫 𑀦𑀕𑀭𑀁 𑀧𑀸𑀯𑀺𑀲𑀺. 𑀧𑀯𑀺𑀲𑀺𑀢𑁆𑀯𑀸 𑀘 𑀧𑀦 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺. 𑀲𑀓𑀮𑀁 𑀧𑀦 𑀢𑀁 𑀦𑀕𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑁂𑀦 𑀥𑀦𑀧𑀸𑀮𑀓𑁂 𑀧𑀯𑀺𑀝𑁆𑀞𑁂 𑀢𑀁 𑀦𑀕𑀭𑀁 𑀯𑀺𑀬 𑀅𑀲𑀼𑀭𑀺𑀦𑁆𑀤𑁂 𑀧𑀯𑀺𑀝𑁆𑀞𑁂 𑀤𑁂𑀯𑀦𑀕𑀭𑀁 𑀯𑀺𑀬 𑀲𑀗𑁆𑀔𑁄𑀪𑀫𑀕𑀫𑀸𑀲𑀺. 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀫𑀳𑀸𑀧𑀼𑀭𑀺𑀲𑁂 𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀫𑀳𑀸𑀲𑀢𑁆𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑁂𑀦 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀚𑀸𑀢𑀯𑀺𑀫𑁆𑀳𑀺𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑀸𑀯𑀚𑁆𑀚𑀺𑀢𑀳𑀤𑀬𑀸 𑀅𑀳𑁂𑀲𑀼𑀁.

𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀢𑀭𑁄 𑀅𑀜𑁆𑀜𑀢𑀭𑀫𑁂𑀯𑀫𑀸𑀳 𑁋 ‘‘𑀓𑀺𑀦𑁆𑀦𑀼 𑀬𑀁, 𑀪𑁄, 𑀭𑀸𑀳𑀼𑀪𑀬𑁂𑀦 𑀦𑀺𑀕𑀽𑀴𑁆𑀳𑀓𑀺𑀭𑀡𑀚𑀸𑀮𑁄 𑀧𑀼𑀡𑁆𑀡𑀘𑀦𑁆𑀤𑁄 𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀢𑁄’’𑀢𑀺. 𑀢𑀫𑀜𑁆𑀜𑁄 𑀲𑀺𑀢𑀁 𑀓𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀓𑀣𑁂𑀲𑀺, 𑀲𑀫𑁆𑀫, 𑀓𑀤𑀸 𑀦𑀸𑀫 𑀢𑀬𑀸 𑀧𑀼𑀡𑁆𑀡𑀘𑀦𑁆𑀤𑁄 𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀦𑀦𑀼 𑀏𑀲 𑀓𑀼𑀲𑀼𑀫𑀓𑁂𑀢𑀼𑀓𑀸𑀫𑀤𑁂𑀯𑁄 𑀯𑁂𑀲𑀦𑁆𑀢𑀭𑀫𑀸𑀤𑀸𑀬 𑀅𑀫𑁆𑀳𑀸𑀓𑀁 𑀫𑀳𑀸𑀭𑀸𑀚𑀲𑁆𑀲 𑀦𑀸𑀕𑀭𑀸𑀦𑀜𑁆𑀘 𑀧𑀭𑀫𑀮𑀻𑀴𑀸𑀯𑀺𑀪𑀽𑀢𑀺𑀁 𑀤𑀺𑀲𑁆𑀯𑀸 𑀓𑀻𑀴𑀺𑀢𑀼𑀫𑀸𑀕𑀢𑁄’’𑀢𑀺. 𑀢𑀫𑀜𑁆𑀜𑁄 𑀲𑀺𑀢𑀁 𑀓𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁, 𑀪𑁄, 𑀢𑁆𑀯𑀁 𑀉𑀫𑁆𑀫𑀢𑁆𑀢𑁄𑀲𑀺, 𑀦𑀦𑀼 𑀓𑀸𑀫𑁄 𑀇𑀲𑁆𑀲𑀭𑀓𑁄𑀥𑀳𑀼𑀢𑀸𑀲𑀦𑀧𑀭𑀺𑀤𑀟𑁆𑀠𑀲𑀭𑀻𑀭𑁄 𑀲𑀼𑀭𑀧𑀢𑀺𑀤𑀲𑀲𑀢𑀦𑀬𑀦𑁄 𑀏𑀲𑁄 𑀅𑀫𑀭𑀧𑀼𑀭𑀲𑀜𑁆𑀜𑀸𑀬 𑀇𑀥𑀸𑀕𑀢𑁄’’𑀢𑀺! 𑀢𑀫𑀜𑁆𑀜𑁄 𑀈𑀲𑀓𑀁 𑀳𑀲𑀺𑀢𑁆𑀯𑀸 𑁋 ‘‘𑀓𑀺𑀁 𑀯𑀤𑁂𑀲𑀺, 𑀪𑁄, 𑀢𑁂 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀁, 𑀓𑀼𑀢𑁄 𑀧𑀦𑀲𑁆𑀲 𑀤𑀲𑀲𑀢𑀦𑀬𑀦𑀸𑀦𑀺, 𑀓𑀼𑀢𑁄 𑀯𑀚𑀺𑀭𑀁, 𑀓𑀼𑀢𑁄 𑀏𑀭𑀸𑀯𑀡𑁄. 𑀅𑀤𑁆𑀥𑀸 𑀩𑁆𑀭𑀳𑁆𑀫𑀸 𑀏𑀲 𑀩𑁆𑀭𑀸𑀳𑁆𑀫𑀡𑀚𑀦𑀁 𑀧𑀫𑀢𑁆𑀢𑀁 𑀜𑀢𑁆𑀯𑀸 𑀯𑁂𑀤𑀯𑁂𑀤𑀗𑁆𑀕𑀸𑀤𑀻𑀲𑀼 𑀦𑀺𑀬𑁄𑀚𑀦𑀢𑁆𑀣𑀸𑀬 𑀆𑀕𑀢𑁄’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀧𑀲𑀸𑀤𑁂𑀢𑁆𑀯𑀸 𑀅𑀜𑁆𑀜𑁄 𑀧𑀡𑁆𑀟𑀺𑀢𑀚𑀸𑀢𑀺𑀓𑁄 𑀏𑀯𑀫𑀸𑀳 𑁋 ‘‘𑀦𑁂𑀯𑀸𑀬𑀁 𑀧𑀼𑀡𑁆𑀡𑀘𑀦𑁆𑀤𑁄, 𑀦 𑀘 𑀓𑀸𑀫𑀤𑁂𑀯𑁄, 𑀦𑀸𑀧𑀺 𑀤𑀲𑀲𑀢𑀦𑀬𑀦𑁄, 𑀦 𑀘𑀸𑀧𑀺 𑀩𑁆𑀭𑀳𑁆𑀫𑀸, 𑀲𑀩𑁆𑀩𑀮𑁄𑀓𑀦𑀸𑀬𑀓𑁄 𑀲𑀢𑁆𑀣𑀸 𑀏𑀲 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄’’𑀢𑀺.

𑀏𑀯𑀁 𑀲𑀮𑁆𑀮𑀧𑀦𑁆𑀢𑁂𑀲𑀼 𑀏𑀯 𑀦𑀸𑀕𑀭𑁂𑀲𑀼 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀤𑁂𑀯, 𑀤𑁂𑀯𑁄 𑀯𑀸 𑀕𑀦𑁆𑀥𑀩𑁆𑀩𑁄 𑀯𑀸 𑀉𑀤𑀸𑀳𑀼 𑀦𑀸𑀕𑀭𑀸𑀚𑀸 𑀯𑀸 𑀬𑀓𑁆𑀔𑁄 𑀯𑀸 𑀓𑁄 𑀦𑀼 𑀯𑀸 𑀅𑀫𑁆𑀳𑀸𑀓𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀞𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀭𑀸𑀚𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀢𑀁 𑀯𑀻𑀫𑀁𑀲𑀣, 𑀲𑀘𑁂 𑀅𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀲𑀘𑁂 𑀤𑁂𑀯𑀢𑀸 𑀪𑀯𑀺𑀲𑁆𑀲𑀢𑀺, 𑀆𑀓𑀸𑀲𑁂𑀦 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀦𑀸𑀕𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀮𑀤𑁆𑀥𑀁 𑀪𑀺𑀓𑁆𑀔𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺.

𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀭𑀽𑀧𑀲𑁄𑀪𑀸𑀬 𑀫𑀳𑀸𑀚𑀦𑀲𑁆𑀲 𑀦𑀬𑀦𑀸𑀦𑀺 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄 𑀫𑀺𑀲𑁆𑀲𑀓𑀪𑀢𑁆𑀢𑀁 𑀬𑀸𑀧𑀦𑀫𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 𑀧𑀯𑀺𑀝𑁆𑀞𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀘𑁆𑀙𑀸𑀬𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑁄 𑀧𑀭𑀺𑀪𑀼𑀜𑁆𑀚𑀺. 𑀢𑀢𑁄 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀤𑀽𑀢𑀯𑀘𑀦𑀁 𑀲𑀼𑀢𑁆𑀯𑀸 𑀫𑀕𑀥𑀸𑀥𑀺𑀧𑀢𑀺 𑀭𑀸𑀚𑀸 𑀩𑀸𑀮𑀚𑀦𑁂𑀳𑀺 𑀤𑀼𑀭𑀦𑀼𑀲𑀸𑀭𑁄 𑀫𑁂𑀭𑀼𑀫𑀦𑁆𑀤𑀸𑀭𑀲𑀸𑀭𑁄 𑀲𑀢𑁆𑀢𑀲𑀸𑀭𑁄 𑀩𑀺𑀫𑁆𑀩𑀺𑀲𑀸𑀭𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀲𑁆𑀲𑀯𑀦𑁂𑀦𑁂𑀯 𑀲𑀜𑁆𑀚𑀸𑀢𑀤𑀲𑁆𑀲𑀦𑀓𑀼𑀢𑀽𑀳𑀮𑁄 𑀯𑁂𑀕𑁂𑀦 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀑𑀭𑀼𑀬𑁆𑀳 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀓𑀢𑀸𑀦𑀼𑀜𑁆𑀜𑁄 𑀩𑀦𑁆𑀥𑀼𑀚𑀦𑀲𑀺𑀦𑁂𑀳𑀲𑀻𑀢𑀮𑁂 𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀦𑀸𑀫𑀕𑁄𑀢𑁆𑀢𑀸𑀤𑀻𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺. 𑀅𑀳𑀜𑁆𑀳𑀺 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀣𑀬𑀦𑁆𑀢𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀆𑀳. 𑀭𑀸𑀚𑀸 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀬𑀸𑀘𑀦𑁆𑀢𑁄𑀧𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑁋 ‘‘𑀅𑀤𑁆𑀥𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀩𑀼𑀤𑁆𑀥𑀪𑀽𑀢𑁂𑀦 𑀧𑀦 𑀢𑀬𑀸 𑀧𑀞𑀫𑀁 𑀫𑀫 𑀯𑀺𑀚𑀺𑀢𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑁄.

‘‘𑀅𑀣 𑀭𑀸𑀚𑀕𑀳𑀁 𑀯𑀭𑀭𑀸𑀚𑀕𑀳𑀁, 𑀦𑀭𑀭𑀸𑀚𑀯𑀭𑁂 𑀦𑀕𑀭𑀁 𑀢𑀼 𑀕𑀢𑁂;

𑀕𑀺𑀭𑀺𑀭𑀸𑀚𑀯𑀭𑁄 𑀫𑀼𑀦𑀺𑀭𑀸𑀚𑀯𑀭𑁄, 𑀫𑀺𑀕𑀭𑀸𑀚𑀕𑀢𑁄 𑀲𑀼𑀕𑀢𑁄𑀧𑀺 𑀕𑀢𑁄’’.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀆𑀴𑀸𑀭𑀜𑁆𑀘 𑀓𑀸𑀮𑀸𑀫𑀁 𑀉𑀤𑀓𑀜𑁆𑀘 𑀭𑀸𑀫𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑁋 ‘‘𑀦𑀸𑀬𑀁 𑀫𑀕𑁆𑀕𑁄 𑀩𑁄𑀥𑀺𑀬𑀸’’𑀢𑀺 𑀢𑀁 𑀲𑀫𑀸𑀧𑀢𑁆𑀢𑀺𑀪𑀸𑀯𑀦𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑀼𑀓𑀸𑀫𑁄 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑁋 ‘‘𑀭𑀫𑀡𑀻𑀬𑁄 𑀯𑀢𑀸𑀬𑀁 𑀪𑀽𑀫𑀺𑀪𑀸𑀕𑁄’’𑀢𑀺 𑀢𑀢𑁆𑀣𑁂𑀯 𑀯𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺. 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑀓𑁄𑀡𑁆𑀟𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀚𑀦𑀸 𑀧𑀞𑀫𑀁𑀬𑁂𑀯 𑀧𑀩𑁆𑀩𑀚𑀺𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀦𑁆𑀢𑀸 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀦𑀁 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀁 𑁋 ‘‘𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀳𑀫𑀸𑀦𑀸 𑀲𑀦𑁆𑀢𑀺𑀓𑀸𑀯𑀘𑀭𑀸𑀯𑀲𑁆𑀲 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄𑀧𑀺 𑁋 ‘‘𑀓𑁄𑀝𑀺𑀧𑁆𑀧𑀢𑁆𑀢𑀁 𑀤𑀼𑀓𑁆𑀓𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀳𑀺 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀩𑁆𑀩𑀲𑁄𑀧𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑀁 𑀅𑀓𑀸𑀲𑀺. 𑀤𑁂𑀯𑀢𑀸𑀧𑀺 𑀮𑁄𑀫𑀓𑀽𑀧𑁂𑀳𑀺 𑀤𑀺𑀩𑁆𑀩𑁄𑀚𑀁 𑀉𑀧𑀳𑀸𑀭𑀬𑀫𑀸𑀦𑀸 𑀧𑀓𑁆𑀔𑀺𑀧𑀺𑀁𑀲𑀼.

𑀅𑀣𑀲𑁆𑀲 𑀢𑀸𑀬 𑀦𑀺𑀭𑀸𑀳𑀸𑀭𑀢𑀸𑀬 𑀧𑀭𑀫𑀓𑀺𑀲𑀪𑀸𑀯𑀧𑁆𑀧𑀢𑁆𑀢𑀓𑀸𑀬𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀸𑀬𑁄 𑀓𑀸𑀴𑀯𑀡𑁆𑀡𑁄 𑀅𑀳𑁄𑀲𑀺, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀅𑀳𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀅𑀦𑁆𑀢𑀁 𑀕𑀦𑁆𑀢𑁆𑀯𑀸 𑁋 ‘‘𑀦𑀸𑀬𑀁 𑀫𑀕𑁆𑀕𑁄 𑀩𑁄𑀥𑀺𑀬𑀸’’𑀢𑀺 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀼𑀁 𑀕𑀸𑀫𑀦𑀺𑀕𑀫𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀺. 𑀅𑀣𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀸𑀓𑀢𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀓𑀸𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺. 𑀅𑀣 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀺𑀬𑀫𑀸𑀦𑁄 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀏𑀲 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀓𑀺𑀁 𑀦𑁄 𑀇𑀫𑀺𑀦𑀸’’𑀢𑀺 𑀫𑀳𑀸𑀧𑀼𑀭𑀺𑀲𑀁 𑀧𑀳𑀸𑀬 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑀁 𑀅𑀕𑀫𑀁𑀲𑀼.

𑀅𑀣 𑀫𑀳𑀸𑀧𑀼𑀭𑀺𑀲𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀸𑀦𑀺𑀕𑀫𑁂 𑀲𑁂𑀦𑀸𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀸𑀬 𑀲𑀫𑁆𑀧𑀲𑀸𑀤𑀦𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀧𑀝𑀺𑀲𑁄𑀢𑀁 𑀔𑀺𑀧𑀺𑀢𑁆𑀯𑀸 𑀓𑀸𑀴𑀦𑀸𑀕𑀭𑀸𑀚𑀁 𑀲𑀼𑀧𑀦𑁆𑀢𑀁 𑀩𑁄𑀥𑁂𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀦𑁂𑀭𑀜𑁆𑀚𑀭𑀸𑀢𑀻𑀭𑁂 𑀲𑀼𑀭𑀪𑀺𑀓𑀼𑀲𑀼𑀫𑀲𑀫𑀮𑀗𑁆𑀓𑀢𑁂 𑀦𑀻𑀮𑁄𑀪𑀸𑀲𑁂 𑀫𑀦𑁄𑀭𑀫𑁂 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀤𑁂𑀯𑀢𑀸𑀳𑀺 𑀅𑀮𑀗𑁆𑀓𑀢𑁂𑀦 𑀫𑀕𑁆𑀕𑁂𑀦 𑀩𑁄𑀥𑀺𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀤𑁂𑀯𑀦𑀸𑀕𑀬𑀓𑁆𑀔𑀲𑀺𑀤𑁆𑀥𑀸𑀤𑀬𑁄 𑀤𑀺𑀩𑁆𑀩𑁂𑀳𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀧𑀽𑀚𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀢𑁆𑀣𑀺𑀬𑁄 𑀦𑀸𑀫 𑀢𑀺𑀡𑀳𑀸𑀭𑀓𑁄 𑀢𑀺𑀡𑀁 𑀆𑀤𑀸𑀬 𑀧𑀝𑀺𑀧𑀣𑁂 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀆𑀓𑀸𑀭𑀁 𑀜𑀢𑁆𑀯𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀅𑀲𑀺𑀢𑀜𑁆𑀚𑀦𑀕𑀺𑀭𑀺𑀲𑀗𑁆𑀓𑀸𑀲𑀁 𑀆𑀘𑀭𑀦𑁆𑀢𑀫𑀺𑀯 𑀤𑀺𑀦𑀓𑀭𑀚𑀸𑀮𑀁 𑀲𑀓𑀳𑀤𑀬𑀫𑀺𑀯 𑀓𑀭𑀼𑀡𑀸𑀲𑀻𑀢𑀮𑀁 𑀲𑀻𑀢𑀘𑁆𑀙𑀸𑀬𑀁 𑀯𑀺𑀯𑀺𑀥𑀯𑀺𑀳𑀕𑀕𑀡𑀲𑀫𑁆𑀧𑀸𑀢𑀯𑀺𑀭𑀳𑀺𑀢𑀁 𑀫𑀦𑁆𑀤𑀫𑀸𑀭𑀼𑀢𑁂𑀭𑀺𑀢𑀸𑀬 𑀖𑀦𑀲𑀸𑀔𑀸𑀬 𑀲𑀫𑀮𑀗𑁆𑀓𑀢𑀁 𑀦𑀘𑁆𑀘𑀦𑁆𑀢𑀫𑀺𑀯 𑀧𑀻𑀢𑀺𑀬𑀸 𑀭𑀜𑁆𑀚𑀫𑀸𑀦𑀫𑀺𑀯 𑀘 𑀢𑀭𑀼𑀕𑀡𑀸𑀦𑀁 𑀯𑀺𑀭𑁄𑀘𑀫𑀸𑀦𑀯𑀺𑀚𑀬𑀢𑀭𑀼𑀫𑀲𑁆𑀲𑀢𑁆𑀣𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀫𑀼𑀧𑀕𑀦𑁆𑀢𑁆𑀯𑀸 𑀅𑀲𑁆𑀲𑀢𑁆𑀣𑀤𑀼𑀫𑀭𑀸𑀚𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀺𑀢𑁄 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺. 𑀢𑀸𑀯𑀤𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺. 𑀢𑀸𑀦𑀺 𑀘 𑀢𑀺𑀡𑀸𑀦𑀺 𑀘𑀺𑀢𑁆𑀢𑀓𑀸𑀭𑁂𑀦 𑀮𑁂𑀔𑀸𑀕𑀳𑀺𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣 𑀘𑀼𑀤𑁆𑀤𑀲𑀳𑀢𑁆𑀣𑁂 𑀢𑀺𑀡𑀲𑀦𑁆𑀣𑀭𑁂 𑀢𑀺𑀲𑀦𑁆𑀥𑀺𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀻𑀞𑁂 𑀞𑀧𑀺𑀢𑀭𑀚𑀢𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀧𑀜𑁆𑀜𑀸𑀲𑀳𑀢𑁆𑀣𑀁 𑀩𑁄𑀥𑀺𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀉𑀧𑀭𑀺 𑀫𑀡𑀺𑀙𑀢𑁆𑀢𑁂𑀦 𑀯𑀺𑀬 𑀩𑁄𑀥𑀺𑀲𑀸𑀔𑀸𑀳𑀺 𑀥𑀸𑀭𑀺𑀬𑀫𑀸𑀦𑁄 𑀦𑀺𑀲𑀻𑀤𑀺. 𑀲𑀼𑀯𑀡𑁆𑀡𑀯𑀡𑁆𑀡𑁂 𑀧𑀦𑀲𑁆𑀲 𑀘𑀻𑀯𑀭𑁂 𑀩𑁄𑀥𑀺𑀅𑀗𑁆𑀓𑀼𑀭𑀸 𑀧𑀢𑀫𑀸𑀦𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀧𑀯𑀸𑀴𑀸 𑀯𑀺𑀬 𑀦𑀺𑀓𑁆𑀔𑀺𑀢𑁆𑀢𑀸 𑀯𑀺𑀭𑁄𑀘𑀬𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁂 𑀧𑀦 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀬𑁂𑀯 𑀯𑀲𑀯𑀢𑁆𑀢𑀺𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑁋 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀫 𑀯𑀺𑀲𑀬𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄, 𑀦 𑀤𑀸𑀦𑀸𑀳𑀫𑀢𑀺𑀓𑁆𑀓𑀫𑀺𑀢𑀼𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀫𑀸𑀭𑀩𑀮𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀫𑀸𑀭𑀩𑀮𑀫𑀸𑀤𑀸𑀬 𑀦𑀺𑀓𑁆𑀔𑀫𑀺. 𑀲𑀸 𑀓𑀺𑀭 𑀫𑀸𑀭𑀲𑁂𑀦𑀸 𑀫𑀸𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸 𑀅𑀳𑁄𑀲𑀺, 𑀢𑀣𑀸 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀧𑀲𑁆𑀲𑀢𑁄 𑀘, 𑀧𑀘𑁆𑀙𑀢𑁄 𑀧𑀦 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑀸, 𑀉𑀤𑁆𑀥𑀁 𑀦𑀯𑀬𑁄𑀚𑀦𑀼𑀩𑁆𑀩𑁂𑀥𑀸 𑀅𑀳𑁄𑀲𑀺. 𑀬𑀲𑁆𑀲𑀸 𑀧𑀦 𑀉𑀦𑁆𑀦𑀤𑀦𑁆𑀢𑀺𑀬𑀸 𑀲𑀤𑁆𑀤𑁄 𑀦𑀯𑀬𑁄𑀚𑀦𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀲𑀼𑀬𑁆𑀬𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀚𑀬𑀼𑀢𑁆𑀢𑀭𑀁 𑀦𑀸𑀫 𑀲𑀗𑁆𑀔𑀁 𑀥𑀫𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀲𑀗𑁆𑀔𑁄 𑀯𑀻𑀲𑀳𑀢𑁆𑀣𑀲𑀢𑀺𑀓𑁄 𑀅𑀳𑁄𑀲𑀺. 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀢𑀺𑀕𑀸𑀯𑀼𑀢𑀸𑀬𑀢𑀁 𑀩𑁂𑀴𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀯𑀸𑀤𑀬𑀫𑀸𑀦𑁄 𑀫𑀗𑁆𑀕𑀮𑀬𑀼𑀢𑁆𑀢𑀸𑀦𑀺 𑀕𑀻𑀢𑀸𑀦𑀺 𑀕𑀸𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀼𑀬𑀸𑀫𑁄 𑀤𑁂𑀯𑀭𑀸𑀚𑀸 𑀢𑀺𑀕𑀸𑀯𑀼𑀢𑀸𑀬𑀢𑀁 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑀲𑀲𑁆𑀲𑀺𑀭𑀺𑀓𑀁 𑀤𑀺𑀩𑁆𑀩𑀘𑀸𑀫𑀭𑀁 𑀕𑀳𑁂𑀢𑁆𑀯𑀸 𑀫𑀦𑁆𑀤𑀁 𑀫𑀦𑁆𑀤𑀁 𑀩𑀻𑀚𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀢𑀺𑀬𑁄𑀚𑀦𑀯𑀺𑀢𑁆𑀣𑀢𑀁 𑀤𑀼𑀢𑀺𑀬𑀫𑀺𑀯 𑀧𑀼𑀡𑁆𑀡𑀘𑀦𑁆𑀤𑀁 𑀲𑁂𑀢𑀘𑁆𑀙𑀢𑁆𑀢𑀁 𑀪𑀕𑀯𑀢𑁄 𑀉𑀤𑁆𑀥𑀁 𑀥𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀓𑀸𑀴𑁄𑀧𑀺 𑀦𑀸𑀕𑀭𑀸𑀚𑀸 𑀅𑀲𑀻𑀢𑀺𑀬𑀸 𑀦𑀸𑀕𑀦𑀸𑀝𑀓𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀣𑀼𑀢𑀺𑀲𑀗𑁆𑀕𑀻𑀢𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸𑀬𑁄 𑀦𑀸𑀦𑀸𑀯𑀺𑀥𑁂𑀳𑀺 𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑀥𑀽𑀧𑀘𑀼𑀡𑁆𑀡𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀫𑀸𑀦𑀸 𑀅𑀝𑁆𑀞𑀁𑀲𑀼.

𑀅𑀣 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀳𑀺𑀫𑀕𑀺𑀭𑀺𑀲𑀺𑀔𑀭𑀲𑀤𑀺𑀲𑀁 𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑀁 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀭𑀢𑀦𑀔𑀘𑀺𑀢𑀯𑀭𑀯𑀸𑀭𑀡𑀁 𑀅𑀭𑀺𑀯𑀸𑀭𑀡𑀯𑀸𑀭𑀡𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀦𑀸𑀦𑀸𑀯𑀼𑀥𑀸𑀦𑀺 𑀅𑀕𑁆𑀕𑀳𑀸𑀧𑁂𑀲𑀺. 𑀫𑀸𑀭𑀧𑀭𑀺𑀲𑀸𑀧𑀺 𑀅𑀲𑀺𑀨𑀭𑀲𑀼𑀲𑀭𑀲𑀢𑁆𑀢𑀺𑀲𑀩𑀮𑀸 𑀲𑀫𑀼𑀲𑁆𑀲𑀺𑀢𑀥𑀦𑀼𑀫𑀼𑀲𑀮-𑀨𑀸𑀮-𑀲𑀗𑁆𑀓𑀼-𑀓𑀼𑀦𑁆𑀢-𑀢𑁄𑀫𑀭-𑀉𑀧𑀮-𑀮𑀕𑀼𑀴-𑀯𑀮𑀬-𑀓𑀡𑀬-𑀓𑀧𑁆𑀧𑀡-𑀘𑀓𑁆𑀓𑀓𑀝𑀓𑀥𑀸𑀭𑀸𑀭𑀼𑀭𑀼- 𑀲𑀻𑀳-𑀔𑀕𑁆𑀕-𑀲𑀭𑀪-𑀯𑀭𑀸𑀳-𑀩𑁆𑀬𑀕𑁆𑀖-𑀯𑀸𑀦𑀭𑁄𑀭𑀕-𑀫𑀚𑁆𑀚𑀸𑀭𑁄𑀮𑀽𑀓𑀯𑀤𑀦𑀸 𑀫𑀳𑀺𑀁𑀲-𑀧𑀲𑀤-𑀢𑀼𑀭𑀗𑁆𑀕-𑀤𑀺𑀭𑀤𑀸𑀤𑀺𑀯𑀤𑀦𑀸 𑀘 𑀦𑀸𑀦𑀸𑀪𑀻𑀫𑀯𑀺𑀭𑀽𑀧𑀩𑀻𑀪𑀘𑁆𑀙𑀓𑀸𑀬𑀸 𑀫𑀦𑀼𑀲𑁆𑀲𑀬𑀓𑁆𑀔𑀧𑀺𑀲𑀸𑀘𑀲𑀤𑀺𑀲𑀓𑀸𑀬𑀸 𑀘 𑀫𑀳𑀸𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀸 𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀢𑁆𑀯𑀸 𑀫𑀸𑀭𑀲𑁆𑀲 𑀲𑀦𑁆𑀤𑁂𑀲𑀁 𑀲𑀫𑀼𑀤𑀺𑀓𑁆𑀔𑀫𑀸𑀦𑀸 𑀅𑀝𑁆𑀞𑀸𑀲𑀺.

𑀢𑀢𑁄 𑀫𑀸𑀭𑀩𑀮𑁂 𑀩𑁄𑀥𑀺𑀫𑀡𑁆𑀟𑀫𑀼𑀧𑀲𑀗𑁆𑀓𑀫𑀦𑁆𑀢𑁂𑀬𑁂𑀯 𑀢𑁂𑀲𑀁 𑀲𑀓𑁆𑀓𑀸𑀤𑀻𑀦𑀁 𑀏𑀓𑁄𑀧𑀺 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀲𑀓𑁆𑀓𑁄 𑀧𑀦 𑀤𑁂𑀯𑀭𑀸𑀚𑀸 𑀢𑀁 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀧𑀺𑀝𑁆𑀞𑀺𑀬𑀁 𑀓𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀝𑁆𑀞𑀸𑀲𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀘𑀓𑁆𑀓𑀯𑀸𑀴𑀓𑁄𑀝𑀺𑀬𑀁 𑀞𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀓𑀸𑀴𑁄 𑀦𑀸𑀕𑀭𑀸𑀚𑀸 𑀲𑀩𑁆𑀩𑀦𑀸𑀝𑀓𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀫𑀜𑁆𑀚𑁂𑀭𑀺𑀓𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑁂𑀦 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀏𑀓𑀤𑁂𑀯𑀢𑀸𑀧𑀺 𑀢𑀢𑁆𑀣 𑀞𑀸𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀸𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀲𑀼𑀜𑁆𑀜𑀯𑀺𑀫𑀸𑀦𑁂 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬 𑀏𑀓𑀓𑁄𑀯 𑀦𑀺𑀲𑀻𑀤𑀺. ‘‘𑀇𑀤𑀸𑀦𑀺 𑀫𑀸𑀭𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀞𑀫𑀫𑁂𑀯 𑀅𑀦𑁂𑀓𑀭𑀽𑀧𑀸𑀦𑀺 𑀅𑀦𑀺𑀝𑁆𑀞𑀸𑀦𑀺 𑀤𑀼𑀦𑁆𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁.

‘‘𑀧𑀫𑀢𑁆𑀢𑀩𑀦𑁆𑀥𑀼𑀲𑁆𑀲 𑀘 𑀬𑀼𑀤𑁆𑀥𑀓𑀸𑀮𑁂, 𑀢𑀺𑀮𑁄𑀓𑀩𑀦𑁆𑀥𑀼𑀲𑁆𑀲 𑀘 𑀯𑀢𑁆𑀢𑀫𑀸𑀦𑁂;

𑀉𑀓𑁆𑀓𑀸 𑀲𑀫𑀦𑁆𑀢𑀸 𑀦𑀺𑀧𑀢𑀺𑀁𑀲𑀼 𑀖𑁄𑀭𑀸, 𑀥𑀽𑀫𑀦𑁆𑀥𑀓𑀸𑀭𑀸 𑀘 𑀤𑀺𑀲𑀸 𑀅𑀳𑁂𑀲𑀼𑀁.

‘‘𑀅𑀘𑁂𑀢𑀦𑀸𑀬𑀫𑁆𑀧𑀺 𑀲𑀘𑁂𑀢𑀦𑀸 𑀬𑀣𑀸, 𑀕𑀢𑀸 𑀯𑀺𑀬𑁄𑀕𑀁 𑀧𑀢𑀺𑀦𑁂𑀯 𑀓𑀸𑀫𑀺𑀦𑀻;

𑀮𑀢𑁂𑀯 𑀯𑀸𑀢𑀸𑀪𑀺𑀳𑀢𑀸 𑀲𑀲𑀸𑀕𑀭𑀸, 𑀧𑀓𑀫𑁆𑀧𑀺 𑀦𑀸𑀦𑀸𑀲𑀥𑀭𑀸 𑀥𑀭𑀸 𑀫𑀳𑀻.

‘‘𑀅𑀳𑁂𑀲𑀼𑀫𑀼𑀤𑁆𑀥𑀽𑀢𑀚𑀮𑀸 𑀲𑀫𑀼𑀤𑁆𑀤𑀸, 𑀯𑀳𑀺𑀁𑀲𑀼 𑀦𑀚𑁆𑀚𑁄 𑀧𑀝𑀺𑀮𑁄𑀫𑀫𑁂𑀯;

𑀓𑀽𑀝𑀸𑀦𑀺 𑀦𑀸𑀦𑀸𑀢𑀭𑀼𑀲𑀗𑁆𑀖𑀝𑀸𑀦𑀺, 𑀪𑁂𑀢𑁆𑀯𑀸 𑀕𑀺𑀭𑀻𑀦𑀁 𑀧𑀣𑀯𑀺𑀁 𑀪𑀚𑀺𑀁𑀲𑀼.

‘‘𑀧𑀯𑀸𑀬𑀺 𑀯𑀸𑀢𑁄 𑀨𑀭𑀼𑀲𑁄 𑀲𑀫𑀦𑁆𑀢𑀸, 𑀦𑀺𑀖𑀝𑁆𑀝𑀲𑀤𑁆𑀤𑁄 𑀢𑀼𑀫𑀼𑀮𑁄 𑀅𑀳𑁄𑀲𑀺;

𑀪𑀚𑀺𑀢𑁆𑀣 𑀖𑁄𑀭𑀁 𑀭𑀯𑀺𑀭𑀦𑁆𑀥𑀓𑀸𑀭𑀁, 𑀓𑀩𑀦𑁆𑀥𑀭𑀽𑀧𑀁 𑀕𑀕𑀦𑁂 𑀘𑀭𑀺𑀢𑁆𑀣.

‘‘𑀏𑀯𑀁𑀧𑀓𑀸𑀭𑀁 𑀅𑀲𑀺𑀯𑀁 𑀅𑀦𑀺𑀝𑁆𑀞𑀁, 𑀆𑀓𑀸𑀲𑀕𑀁 𑀪𑀽𑀫𑀺𑀕𑀢𑀜𑁆𑀘 𑀖𑁄𑀭𑀁;

𑀅𑀦𑁂𑀓𑀭𑀽𑀧𑀁 𑀓𑀺𑀭 𑀤𑀼𑀦𑁆𑀦𑀺𑀫𑀺𑀢𑁆𑀢𑀁, 𑀅𑀳𑁄𑀲𑀺 𑀫𑀸𑀭𑀸𑀕𑀫𑀦𑁂 𑀲𑀫𑀦𑁆𑀢𑀸.

‘‘𑀢𑀁 𑀤𑁂𑀯𑀤𑁂𑀯𑀁 𑀅𑀪𑀺𑀳𑀦𑁆𑀢𑀼𑀓𑀸𑀫𑀁, 𑀓𑀸𑀫𑀁 𑀢𑀼 𑀤𑀺𑀲𑁆𑀯𑀸 𑀧𑀦 𑀤𑁂𑀯𑀲𑀗𑁆𑀖𑀸;

𑀳𑀸𑀳𑀸𑀢𑀺 𑀲𑀤𑁆𑀤𑀁 𑀅𑀦𑀼𑀓𑀫𑁆𑀧𑀫𑀸𑀦𑀸, 𑀅𑀓𑀁𑀲𑀼 𑀲𑀤𑁆𑀥𑀺𑀁 𑀅𑀫𑀭𑀗𑁆𑀕𑀦𑀸𑀳𑀺.

‘‘𑀧𑀘𑁆𑀙𑀸𑀧𑀺 𑀧𑀲𑁆𑀲𑀺𑀁𑀲𑀼 𑀲𑀼𑀤𑀦𑁆𑀢𑀭𑀽𑀧𑀁, 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀧𑀮𑀸𑀬𑀫𑀸𑀦𑀁;

𑀲𑀅𑀦𑁆𑀢𑀓𑀁 𑀢𑀁 𑀲𑀩𑀮𑀁 𑀅𑀦𑁂𑀓𑀁, 𑀳𑀢𑁆𑀣𑁂 𑀘 𑀣𑀭𑀽 𑀘 𑀧𑀸𑀢𑀸 𑀢𑀬𑀺𑀁𑀲𑀼.

‘‘𑀯𑀺𑀳𑀗𑁆𑀕𑀫𑀸𑀦𑀁 𑀕𑀭𑀼𑀴𑁄𑀯 𑀫𑀚𑁆𑀛𑁂, 𑀫𑀚𑁆𑀛𑁂 𑀫𑀺𑀕𑀸𑀦𑀁 𑀧𑀭𑀫𑁄𑀯 𑀲𑀻𑀳𑁄;

𑀫𑀳𑀸𑀬𑀲𑁄 𑀫𑀸𑀭𑀩𑀮𑀲𑁆𑀲 𑀫𑀚𑁆𑀛𑁂, 𑀯𑀺𑀲𑀸𑀭𑀤𑁄 𑀯𑀻𑀢𑀪𑀬𑁄 𑀦𑀺𑀲𑀻𑀤𑀺’’.

𑀅𑀣 𑀫𑀸𑀭𑁄 𑁋 ‘‘𑀲𑀺𑀤𑁆𑀥𑀢𑁆𑀣𑀁 𑀪𑀺𑀁𑀲𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀢𑀯𑀲𑁆𑀲𑀁 𑀧𑀳𑀭𑀡𑀯𑀲𑁆𑀲𑀁 𑀧𑀸𑀲𑀸𑀡𑀯𑀲𑁆𑀲𑀁 𑀧𑀼𑀦 𑀅𑀗𑁆𑀕𑀸𑀭𑀓𑀼𑀓𑁆𑀓𑀼𑀴𑀯𑀸𑀮𑀼𑀓𑀓𑀮𑀮𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀦𑀯𑀳𑀺 𑀫𑀸𑀭𑀇𑀤𑁆𑀥𑀻𑀳𑀺 𑀩𑁄𑀥𑀺𑀲𑀢𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀼𑀤𑁆𑀥𑀫𑀸𑀦𑀲𑁄 𑁋 ‘‘𑀓𑀺𑀁, 𑀪𑀡𑁂, 𑀢𑀺𑀝𑁆𑀞𑀣, 𑀇𑀫𑀁 𑀲𑀺𑀤𑁆𑀥𑀢𑁆𑀣𑀫𑀲𑀺𑀤𑁆𑀥𑀢𑁆𑀣𑀁 𑀓𑀭𑁄𑀣, 𑀕𑀡𑁆𑀳𑀣 𑀳𑀦𑀣 𑀙𑀺𑀦𑁆𑀤𑀣 𑀩𑀦𑁆𑀥𑀣 𑀦 𑀫𑀼𑀜𑁆𑀘𑀣 𑀧𑀮𑀸𑀧𑁂𑀣𑀸’’𑀢𑀺 𑀫𑀸𑀭𑀧𑀭𑀺𑀲𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀜𑁆𑀘 𑀕𑀺𑀭𑀺𑀫𑁂𑀔𑀮𑀲𑁆𑀲 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑁂𑀦 𑀓𑀭𑁂𑀦 𑀲𑀭𑀁 𑀪𑀫𑀬𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀪𑁄 𑀲𑀺𑀤𑁆𑀥𑀢𑁆𑀣, 𑀉𑀝𑁆𑀞𑀳 𑀧𑀮𑁆𑀮𑀗𑁆𑀓𑀸’’𑀢𑀺 𑀆𑀳. 𑀫𑀸𑀭𑀧𑀭𑀺𑀲𑀸𑀧𑀺 𑀫𑀳𑀸𑀲𑀢𑁆𑀢𑀲𑁆𑀲 𑀅𑀢𑀺𑀖𑁄𑀭𑀁 𑀧𑀻𑀴𑀫𑀓𑀸𑀲𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀓𑀤𑀸 𑀢𑁂 𑀧𑀽𑀭𑀺𑀢𑀸, 𑀫𑀸𑀭, 𑀧𑀮𑁆𑀮𑀗𑁆𑀓𑀢𑁆𑀣𑀸𑀬 𑀧𑀸𑀭𑀫𑀻’’𑀢𑀺𑀆𑀤𑀻𑀦𑀺 𑀯𑀘𑀦𑀸𑀦𑀺 𑀯𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀣𑀯𑀺𑀁 𑀦𑀺𑀦𑁆𑀦𑀸𑀫𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀘𑀼𑀤𑁆𑀤𑀲𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑀲𑀲𑀢𑀲𑀳𑀲𑁆𑀲𑀬𑁄𑀚𑀦𑀩𑀳𑀮𑀸𑀦𑀺 𑀧𑀣𑀯𑀺𑀲𑀦𑁆𑀥𑀸𑀭𑀓𑀸𑀦𑀺 𑀯𑀸𑀢𑀼𑀤𑀓𑀸𑀦𑀺 𑀧𑀞𑀫𑀁 𑀓𑀫𑁆𑀧𑁂𑀢𑁆𑀯𑀸 𑀢𑀤𑀦𑁆𑀢𑀭𑀁 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀙𑀥𑀸 𑀧𑀓𑀫𑁆𑀧𑀺𑀢𑁆𑀣. 𑀉𑀧𑀭𑀺 𑀆𑀓𑀸𑀲𑁂 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀯𑀺𑀚𑁆𑀚𑀼𑀮𑀢𑀸 𑀘 𑀅𑀲𑀦𑀻 𑀘 𑀨𑀮𑀺𑀁𑀲𑀼. 𑀅𑀣 𑀕𑀺𑀭𑀺𑀫𑁂𑀔𑀮𑀤𑀺𑀭𑀤𑁄 𑀚𑀡𑁆𑀡𑀼𑀓𑁂𑀦 𑀧𑀢𑀺. 𑀫𑀸𑀭𑁄 𑀕𑀺𑀭𑀺𑀫𑁂𑀔𑀮𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄 𑀪𑀽𑀫𑀺𑀬𑀁 𑀧𑀢𑀺. 𑀫𑀸𑀭𑀧𑀭𑀺𑀲𑀸𑀧𑀺 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀓𑀺𑀭𑀺𑀁𑀲𑀼.

𑀅𑀣 𑀫𑀳𑀸𑀧𑀼𑀭𑀺𑀲𑁄𑀧𑀺 𑀢𑀁 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀯𑀻𑀭𑀺𑀬𑀧𑀜𑁆𑀜𑀸𑀤𑀻𑀦𑀁 𑀅𑀢𑁆𑀢𑀦𑁄 𑀧𑀸𑀭𑀫𑀻𑀦𑀫𑀸𑀦𑀼𑀪𑀸𑀯𑁂𑀦 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑁂 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀫𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀥𑀺𑀕𑀢𑁂𑀦 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪) 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀓𑀣𑀸

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀇𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀓𑀸𑀭𑀡𑀸 𑀲𑀦𑁆𑀥𑀸𑀯𑀺𑀁, 𑀅𑀬𑀁 𑀫𑁂 𑀧𑀮𑁆𑀮𑀗𑁆𑀓𑁄 𑀯𑀺𑀚𑀬𑀧𑀮𑁆𑀮𑀗𑁆𑀓𑁄 𑀫𑀗𑁆𑀕𑀮𑀧𑀮𑁆𑀮𑀗𑁆𑀓𑁄, 𑀏𑀢𑁆𑀣 𑀫𑁂 𑀦𑀺𑀲𑀺𑀦𑁆𑀦𑀲𑁆𑀲 𑀬𑀸𑀯 𑀲𑀗𑁆𑀓𑀧𑁆𑀧𑁄 𑀦 𑀧𑀭𑀺𑀧𑀼𑀡𑁆𑀡𑁄, 𑀦 𑀢𑀸𑀯 𑀇𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑁄 𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻’’𑀢𑀺 (𑀫𑀳𑀸𑀯. 𑁧).

𑀅𑀣𑁂𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑁋 ‘‘𑀅𑀚𑁆𑀚𑀸𑀧𑀺 𑀢𑀸𑀯 𑀦𑀽𑀦 𑀲𑀺𑀤𑁆𑀥𑀢𑁆𑀣𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀧𑀮𑁆𑀮𑀗𑁆𑀓𑀲𑁆𑀫𑀺𑀜𑁆𑀳𑀺 𑀆𑀮𑀬𑀁 𑀦 𑀯𑀺𑀚𑀳𑀢𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀅𑀣 𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀯𑀺𑀢𑀓𑁆𑀓𑀁 𑀜𑀢𑁆𑀯𑀸 𑀢𑀸𑀲𑀁 𑀯𑀺𑀢𑀓𑁆𑀓𑀽𑀧𑀲𑀫𑀦𑀢𑁆𑀣𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀏𑀯𑀁 𑀇𑀫𑀺𑀦𑀸 𑀧𑀸𑀝𑀺𑀳𑀸𑀭𑀺𑀬𑁂𑀦 𑀤𑁂𑀯𑀢𑀸𑀦𑀁 𑀯𑀺𑀢𑀓𑁆𑀓𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀢𑁄 𑀈𑀲𑀓𑀁 𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 𑁋 ‘‘𑀇𑀫𑀲𑁆𑀫𑀺𑀁 𑀯𑀢 𑀫𑁂 𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥’’𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀸𑀥𑀺𑀕𑀫𑀦𑀝𑁆𑀞𑀸𑀦𑀁 𑀧𑀮𑁆𑀮𑀗𑁆𑀓𑀜𑁆𑀘 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀅𑀦𑀺𑀫𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀅𑀦𑀺𑀫𑀺𑀲𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀅𑀣 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀢𑁄 𑀆𑀬𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀭𑀢𑀦𑀘𑀗𑁆𑀓𑀫𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀘𑀢𑀼𑀢𑁆𑀣𑁂 𑀧𑀦 𑀲𑀢𑁆𑀢𑀸𑀳𑁂 𑀩𑁄𑀥𑀺𑀢𑁄 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀤𑁂𑀯𑀢𑀸 𑀭𑀢𑀦𑀖𑀭𑀁 𑀫𑀸𑀧𑀬𑀺𑀁𑀲𑀼. 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀘𑀺𑀦𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀧𑀦 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀏𑀯𑀁 𑀪𑀕𑀯𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭𑀸𑀧𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀲𑀢𑁆𑀣𑀸 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀼𑀘𑀮𑀺𑀦𑁆𑀤𑀫𑀽𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀬 𑀉𑀧𑁆𑀧𑀦𑁆𑀦𑀸𑀬 𑀲𑀻𑀢𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀫𑀼𑀘𑀮𑀺𑀦𑁆𑀤𑁂𑀦 𑀦𑀸𑀕𑀭𑀸𑀚𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀲𑀫𑁆𑀩𑀸𑀥𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀯𑀺𑀳𑀭𑀦𑁆𑀢𑁄 𑀯𑀺𑀬 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑀁 𑀉𑀧𑀲𑀗𑁆𑀓𑀫𑀺. 𑀢𑀢𑁆𑀣𑀧𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄𑀯 𑀲𑀢𑁆𑀢𑀸𑀳𑀁 𑀦𑀺𑀲𑀻𑀤𑀺. 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀏𑀢𑁆𑀣𑀦𑁆𑀢𑀭𑁂 𑀪𑀕𑀯𑀢𑁄 𑀦𑁂𑀯 𑀫𑀼𑀔𑀥𑁄𑀯𑀦𑀁 𑀦 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀦𑀸𑀳𑀸𑀭𑀓𑀺𑀘𑁆𑀘𑀁 𑀅𑀳𑁄𑀲𑀺, 𑀨𑀮𑀲𑀼𑀔𑁂𑀦𑁂𑀯 𑀯𑀻𑀢𑀺𑀯𑀢𑁆𑀢𑁂𑀲𑀺. 𑀅𑀣 𑀲𑀢𑁆𑀢𑀲𑀢𑁆𑀢𑀸𑀳𑀫𑀢𑁆𑀣𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀢𑀺𑀫𑁂 𑀤𑀺𑀯𑀲𑁂 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀉𑀧𑀦𑀻𑀢𑁂𑀦 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑁂𑀦 𑀘 𑀅𑀦𑁄𑀢𑀢𑁆𑀢𑀤𑀳𑁄𑀤𑀓𑁂𑀦 𑀘 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀭𑀸𑀚𑀸𑀬𑀢𑀦𑀫𑀽𑀮𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀦𑀸𑀫 𑀤𑁆𑀯𑁂 𑀯𑀸𑀡𑀺𑀚𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬 𑀲𑀢𑁆𑀣𑀼 𑀆𑀳𑀸𑀭𑀤𑀸𑀦𑁂 𑀉𑀲𑁆𑀲𑀸𑀳𑀺𑀢𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀆𑀤𑀸𑀬 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀪𑀕𑀯𑀸 𑀇𑀫𑀁 𑀆𑀳𑀸𑀭𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀧𑀸𑀬𑀸𑀲𑀧𑀝𑀺𑀕𑁆𑀕𑀳𑀡𑀤𑀺𑀯𑀲𑁂𑀬𑁂𑀯 𑀤𑁂𑀯𑀤𑀢𑁆𑀢𑀺𑀬𑀲𑁆𑀲 𑀧𑀢𑁆𑀢𑀲𑁆𑀲 𑀅𑀦𑁆𑀢𑀭𑀳𑀺𑀢𑀢𑁆𑀢𑀸 𑁋 ‘‘𑀦 𑀔𑁄 𑀢𑀣𑀸𑀕𑀢𑀸 𑀳𑀢𑁆𑀣𑁂𑀲𑀼 𑀆𑀳𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀇𑀫𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑁂 𑀘𑀢𑁆𑀢𑀸𑀭𑁄 𑀧𑀢𑁆𑀢𑁂 𑀉𑀧𑀦𑀸𑀫𑁂𑀲𑀼𑀁. 𑀪𑀕𑀯𑀸 𑀢𑁂 𑀧𑀝𑀺𑀓𑁆𑀔𑀺𑀧𑀺. 𑀧𑀼𑀦 𑀫𑀼𑀕𑁆𑀕𑀯𑀡𑁆𑀡𑁂 𑀲𑀺𑀮𑀸𑀫𑀬𑁂 𑀘𑀢𑁆𑀢𑀸𑀭𑁄 𑀧𑀢𑁆𑀢𑁂 𑀉𑀧𑀦𑀸𑀫𑁂𑀲𑀼𑀁. 𑀪𑀕𑀯𑀸 𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀸𑀦𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀆𑀳𑀸𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀢𑁂 𑀤𑁆𑀯𑁂 𑀪𑀸𑀢𑀭𑁄 𑀯𑀸𑀡𑀺𑀚𑀸 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀤𑁆𑀯𑁂𑀯𑀸𑀘𑀺𑀓𑀸 𑀉𑀧𑀸𑀲𑀓𑀸 𑀅𑀳𑁂𑀲𑀼𑀁.

𑀅𑀣 𑀲𑀢𑁆𑀣𑀸 𑀧𑀼𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑁂𑀯 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀥𑀺𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑁄 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁬𑁪; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭) 𑀧𑀭𑁂𑀲𑀁 𑀥𑀫𑁆𑀫𑀁 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀓𑀸𑀭𑀧𑁆𑀧𑀢𑁆𑀢𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀅𑀣 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄’’𑀢𑀺 (𑀤𑀻. 𑀦𑀺. 𑁨.𑁬𑁬; 𑀫. 𑀦𑀺. 𑁧.𑁨𑁮𑁨; 𑁨.𑁩𑁩𑁮; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀘 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁬𑁬; 𑀫. 𑀦𑀺. 𑁧.𑁨𑁮𑁨; 𑁨.𑁩𑁩𑁮; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑀦𑀬𑁂𑀦 𑀥𑀫𑁆𑀫𑀤𑁂𑀲𑀦𑀁 𑀆𑀬𑀸𑀘𑀺.

𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀩𑀳𑀽𑀧𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀭𑀩𑁆𑀪 𑀫𑀦𑀲𑀺𑀓𑀸𑀭𑀁 𑀓𑀢𑁆𑀯𑀸 𑁋 ‘‘𑀓𑀳𑀁 𑀦𑀼 𑀔𑁄 𑀢𑁂 𑀏𑀢𑀭𑀳𑀺 𑀯𑀺𑀳𑀭𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑁋 ‘‘𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂’’𑀢𑀺 𑀜𑀢𑁆𑀯𑀸 𑁋 ‘‘𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀓𑀢𑀺𑀧𑀸𑀳𑀁 𑀩𑁄𑀥𑀺𑀫𑀡𑁆𑀟𑀲𑀸𑀫𑀦𑁆𑀢𑁂𑀬𑁂𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀯𑀺𑀳𑀭𑀺𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀁 𑀩𑀸𑀭𑀸𑀡𑀲𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀳𑀝𑁆𑀞𑀢𑀼𑀧𑀕𑀁 𑀉𑀧𑀓𑀁 𑀦𑀸𑀫 𑀆𑀚𑀻𑀯𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁𑀤𑀺𑀯𑀲𑀁𑀬𑁂𑀯 𑀲𑀸𑀬𑀦𑁆𑀳𑀲𑀫𑀬𑁂 𑀇𑀲𑀺𑀧𑀢𑀦𑀁 𑀅𑀕𑀫𑀸𑀲𑀺.

𑀧𑀜𑁆𑀘𑀯𑀕𑁆𑀕𑀺𑀬𑀸 𑀧𑀦 𑀢𑀣𑀸𑀕𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀲𑀫𑀡𑁄 𑀕𑁄𑀢𑀫𑁄 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀓𑀸𑀬𑁄 𑀧𑀻𑀡𑀺𑀦𑁆𑀤𑁆𑀭𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀇𑀫𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑀺𑀲𑁆𑀲𑀸𑀫, 𑀆𑀲𑀦𑀫𑀢𑁆𑀢𑀁 𑀧𑀦 𑀧𑀜𑁆𑀜𑀸𑀧𑁂𑀬𑁆𑀬𑀸𑀫𑀸’’𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁆𑀲𑀓𑀯𑀲𑁂𑀦 𑀨𑀭𑀡𑀲𑀫𑀢𑁆𑀣𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀲𑀁𑀔𑀺𑀧𑀺𑀢𑁆𑀯𑀸 𑀑𑀥𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀨𑀭𑀺. 𑀢𑁂 𑀪𑀕𑀯𑀢𑁄 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀨𑀼𑀝𑁆𑀞𑀸 𑀢𑀣𑀸𑀕𑀢𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀲𑀓𑀸𑀬 𑀓𑀢𑀺𑀓𑀸𑀬 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀓𑀁𑀲𑀼. 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀦𑀬𑀫𑀳𑀸𑀯𑀕𑁆𑀕𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀢𑁂 𑀜𑀸𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑀬𑁄𑀕𑁂 𑀯𑀢𑁆𑀢𑀫𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑁂 𑀣𑁂𑀭𑁂 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑀺. 𑀢𑁂𑀲𑀼 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀦𑁆𑀢𑁄 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧. ‘‘𑀅𑀳𑀫𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀕𑁄𑀢𑀫𑁄 𑀲𑀓𑁆𑀬𑀯𑀟𑁆𑀠𑀦𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁨. ‘‘𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺𑀁;

𑀅𑀝𑁆𑀞𑀸𑀭𑀲𑀦𑁆𑀦𑀁 𑀓𑁄𑀝𑀻𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀏𑀢𑀭𑀳𑀻𑀢𑀺 𑀅𑀲𑁆𑀫𑀺𑀁 𑀓𑀸𑀮𑁂. 𑀲𑀓𑁆𑀬𑀯𑀟𑁆𑀠𑀦𑁄𑀢𑀺 𑀲𑀸𑀓𑀺𑀬𑀓𑀼𑀮𑀯𑀟𑁆𑀠𑀦𑁄. ‘‘𑀲𑀓𑁆𑀬𑀧𑀼𑀗𑁆𑀕𑀯𑁄’’𑀢𑀺𑀧𑀺 𑀧𑀸𑀞𑁄. 𑀧𑀥𑀸𑀦𑀦𑁆𑀢𑀺 𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀺. 𑀧𑀤𑀳𑀺𑀢𑁆𑀯𑀸𑀦𑀸𑀢𑀺 𑀖𑀝𑁂𑀢𑁆𑀯𑀸 𑀯𑀸𑀬𑀫𑀺𑀢𑁆𑀯𑀸, 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀓𑁄𑀝𑀻𑀦𑀦𑁆𑀢𑀺 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀩𑁆𑀭𑀳𑁆𑀫𑀓𑁄𑀝𑀻𑀦𑀁 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀪𑀕𑀯𑀸 𑀅𑀢𑀻𑀢𑀁 𑀓𑀣𑁂𑀢𑁆𑀯𑀸 𑀅𑀦𑀸𑀕𑀢𑀁 𑀅𑀪𑀺𑀲𑀫𑀬𑀁 𑀓𑀣𑁂𑀦𑁆𑀢𑁄 𑁋