𑁨𑁮. 𑀩𑀼𑀤𑁆𑀥𑀧𑀓𑀺𑀡𑁆𑀡𑀓𑀓𑀣𑀸

𑁧-𑁧𑁮. ‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀘𑀢𑀼𑀭𑁄 𑀆𑀲𑀼𑀁 𑀯𑀺𑀦𑀸𑀬𑀓𑀸’’𑀢𑀺𑀆𑀤𑀺𑀓𑀸 𑀅𑀝𑁆𑀞𑀸𑀭𑀲𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀞𑀧𑀺𑀢𑀸 𑀦𑀺𑀕𑀫𑀦𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀯𑁂𑀫𑀢𑁆𑀢𑀓𑀣𑀸

𑀇𑀫𑀲𑁆𑀫𑀺𑀁 𑀧𑀦 𑀲𑀓𑀮𑁂𑀧𑀺 𑀩𑀼𑀤𑁆𑀥𑀯𑀁𑀲𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀅𑀝𑁆𑀞 𑀯𑁂𑀫𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀆𑀬𑀼𑀯𑁂𑀫𑀢𑁆𑀢𑀁, 𑀧𑀫𑀸𑀡𑀯𑁂𑀫𑀢𑁆𑀢𑀁, 𑀓𑀼𑀮𑀯𑁂𑀫𑀢𑁆𑀢𑀁, 𑀧𑀥𑀸𑀦𑀯𑁂𑀫𑀢𑁆𑀢𑀁, 𑀭𑀲𑁆𑀫𑀺𑀯𑁂𑀫𑀢𑁆𑀢𑀁, 𑀬𑀸𑀦𑀯𑁂𑀫𑀢𑁆𑀢𑀁, 𑀩𑁄𑀥𑀺𑀯𑁂𑀫𑀢𑁆𑀢𑀁, 𑀧𑀮𑁆𑀮𑀗𑁆𑀓𑀯𑁂𑀫𑀢𑁆𑀢𑀦𑁆𑀢𑀺.

𑀢𑀢𑁆𑀣 𑀆𑀬𑀼𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀺 𑀓𑁂𑀘𑀺 𑀅𑀧𑁆𑀧𑀸𑀬𑀼𑀓𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑁄 𑀓𑁄𑀡𑁆𑀟𑀜𑁆𑀜𑁄 𑀅𑀦𑁄𑀫𑀤𑀲𑁆𑀲𑀻 𑀧𑀤𑀼𑀫𑁄 𑀧𑀤𑀼𑀫𑀼𑀢𑁆𑀢𑀭𑁄 𑀅𑀢𑁆𑀣𑀤𑀲𑁆𑀲𑀻 𑀥𑀫𑁆𑀫𑀤𑀲𑁆𑀲𑀻 𑀲𑀺𑀤𑁆𑀥𑀢𑁆𑀣𑁄 𑀢𑀺𑀲𑁆𑀲𑁄𑀢𑀺 𑀇𑀫𑁂 𑀦𑀯 𑀩𑀼𑀤𑁆𑀥𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀫𑀗𑁆𑀕𑀮𑁄 𑀲𑀼𑀫𑀦𑁄 𑀲𑁄𑀪𑀺𑀢𑁄 𑀦𑀸𑀭𑀤𑁄 𑀲𑀼𑀫𑁂𑀥𑁄 𑀲𑀼𑀚𑀸𑀢𑁄 𑀧𑀺𑀬𑀤𑀲𑁆𑀲𑀻 𑀨𑀼𑀲𑁆𑀲𑁄𑀢𑀺 𑀇𑀫𑁂 𑀅𑀝𑁆𑀞 𑀩𑀼𑀤𑁆𑀥𑀸 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀭𑁂𑀯𑀢𑁄 𑀯𑁂𑀲𑁆𑀲𑀪𑀽 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁄𑀲𑀺. 𑀲𑀺𑀔𑀻 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀬𑀣𑀸𑀓𑁆𑀓𑀫𑁂𑀦 𑀲𑀢𑁆𑀢𑀢𑀺𑀘𑀢𑁆𑀢𑀸𑀮𑀻𑀲𑀢𑀺𑀁𑀲𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀯𑀲𑁆𑀲𑀲𑀢𑀁 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀉𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀁 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀲𑀫𑀼𑀧𑁂𑀢𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀬𑀼𑀕𑀯𑀲𑁂𑀦 𑀆𑀬𑀼𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀅𑀬𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀆𑀬𑀼𑀯𑁂𑀫𑀢𑁆𑀢𑀁 𑀦𑀸𑀫.

𑀧𑀫𑀸𑀡𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸 𑀳𑁄𑀦𑁆𑀢𑀺 𑀓𑁂𑀘𑀺 𑀭𑀲𑁆𑀲𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭-𑀭𑁂𑀯𑀢-𑀧𑀺𑀬𑀤𑀲𑁆𑀲𑀻-𑀅𑀢𑁆𑀣𑀤𑀲𑁆𑀲𑀻-𑀥𑀫𑁆𑀫𑀤𑀲𑁆𑀲𑀻-𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀸𑀦𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑁄𑀡𑁆𑀟𑀜𑁆𑀜-𑀫𑀗𑁆𑀕𑀮-𑀦𑀸𑀭𑀤-𑀲𑀼𑀫𑁂𑀥𑀸𑀦𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀓𑀸𑀬𑁄 𑀅𑀳𑁄𑀲𑀺. 𑀲𑀼𑀫𑀦𑀲𑁆𑀲 𑀦𑀯𑀼𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺. 𑀲𑁄𑀪𑀺𑀢-𑀅𑀦𑁄𑀫𑀤𑀲𑁆𑀲𑀻-𑀧𑀤𑀼𑀫-𑀧𑀤𑀼𑀫𑀼𑀢𑁆𑀢𑀭-𑀨𑀼𑀲𑁆𑀲𑀩𑀼𑀤𑁆𑀥𑀸𑀦𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺. 𑀲𑀼𑀚𑀸𑀢𑁄 𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀲𑀭𑀻𑀭𑁄 𑀅𑀳𑁄𑀲𑀺. 𑀲𑀺𑀤𑁆𑀥𑀢𑁆𑀣-𑀢𑀺𑀲𑁆𑀲-𑀯𑁂𑀲𑁆𑀲𑀪𑀼𑀦𑁄 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀸 𑀅𑀳𑁂𑀲𑀼𑀁. 𑀲𑀺𑀔𑀻 𑀲𑀢𑁆𑀢𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀅𑀳𑁄𑀲𑀺. 𑀓𑀓𑀼𑀲𑀦𑁆𑀥-𑀓𑁄𑀡𑀸𑀕𑀫𑀦-𑀓𑀲𑁆𑀲𑀧𑀸 𑀬𑀣𑀸𑀓𑁆𑀓𑀫𑁂𑀦 𑀘𑀢𑁆𑀢𑀸𑀮𑀻𑀲𑀢𑀺𑀁𑀲𑀯𑀻𑀲𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀸 𑀅𑀳𑁂𑀲𑀼𑀁. 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀩𑁆𑀩𑁂𑀥𑁄 𑀅𑀳𑁄𑀲𑀺. 𑀅𑀬𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀧𑀫𑀸𑀡𑀯𑁂𑀫𑀢𑁆𑀢𑀁 𑀦𑀸𑀫.

𑀓𑀼𑀮𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀓𑁂𑀘𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂. 𑀢𑀣𑀸 𑀳𑀺 𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀤𑀻𑀧𑀗𑁆𑀓𑀭𑀸𑀤𑀺𑀕𑁄𑀢𑀫𑀩𑀼𑀤𑁆𑀥𑀧𑀭𑀺𑀬𑀦𑁆𑀢𑀸 𑀤𑁆𑀯𑀸𑀯𑀻𑀲𑀢𑀺 𑀩𑀼𑀤𑁆𑀥𑀸 𑀔𑀢𑁆𑀢𑀺𑀬𑀓𑀼𑀮𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀅𑀬𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀓𑀼𑀮𑀯𑁂𑀫𑀢𑁆𑀢𑀁 𑀦𑀸𑀫.

𑀧𑀥𑀸𑀦𑀯𑁂𑀫𑀢𑁆𑀢𑀁 𑀦𑀸𑀫 𑀤𑀻𑀧𑀗𑁆𑀓𑀭-𑀓𑁄𑀡𑁆𑀟𑀜𑁆𑀜-𑀲𑀼𑀫𑀦-𑀅𑀦𑁄𑀫𑀤𑀲𑁆𑀲𑀻-𑀲𑀼𑀚𑀸𑀢𑀲𑀺𑀤𑁆𑀥𑀢𑁆𑀣-𑀓𑀓𑀼𑀲𑀦𑁆𑀥𑀸𑀦𑀁 𑀤𑀲𑀫𑀸𑀲𑀺𑀓𑀸 𑀧𑀥𑀸𑀦𑀘𑀭𑀺𑀬𑀸. 𑀫𑀗𑁆𑀕𑀮-𑀲𑀼𑀫𑁂𑀥𑀢𑀺𑀲𑁆𑀲 𑀲𑀺𑀔𑀻𑀦𑀁 𑀅𑀝𑁆𑀞𑀫𑀸𑀲𑀺𑀓𑀸. 𑀭𑁂𑀯𑀢𑀲𑁆𑀲 𑀲𑀢𑁆𑀢𑀫𑀸𑀲𑀺𑀓𑀸. 𑀲𑁄𑀪𑀺𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀧𑀤𑀼𑀫𑀅𑀢𑁆𑀣𑀤𑀲𑁆𑀲𑀻 𑀯𑀺𑀧𑀲𑁆𑀲𑀻𑀦𑀁 𑀅𑀟𑁆𑀠𑀫𑀸𑀲𑀺𑀓𑀸. 𑀦𑀸𑀭𑀤-𑀧𑀤𑀼𑀫𑀼𑀢𑁆𑀢𑀭-𑀥𑀫𑁆𑀫𑀤𑀲𑁆𑀲𑀻-𑀓𑀲𑁆𑀲𑀧𑀸𑀦𑀁 𑀲𑀢𑁆𑀢𑀸𑀳𑀸𑀦𑀺. 𑀧𑀺𑀬𑀤𑀲𑁆𑀲𑀻-𑀨𑀼𑀲𑁆𑀲-𑀯𑁂𑀲𑁆𑀲𑀪𑀽 𑀓𑁄𑀡𑀸𑀕𑀫𑀦𑀸𑀦𑀁 𑀙𑀫𑀸𑀲𑀺𑀓𑀸. 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀘𑀭𑀺𑀬𑀸 𑀅𑀳𑁄𑀲𑀺. 𑀅𑀬𑀁 𑀧𑀥𑀸𑀦𑀯𑁂𑀫𑀢𑁆𑀢𑀁 𑀦𑀸𑀫.

𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀦𑀸𑀫 𑀫𑀗𑁆𑀕𑀮𑀲𑁆𑀲 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀲𑁆𑀫𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀬𑁄𑀚𑀦𑀺𑀓𑀸 𑀅𑀳𑁄𑀲𑀺. 𑀲𑀺𑀔𑀺𑀲𑁆𑀲 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸. 𑀓𑀓𑀼𑀲𑀦𑁆𑀥𑀲𑁆𑀲 𑀤𑀲𑀬𑁄𑀚𑀦𑀺𑀓𑀸. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀫𑀦𑁆𑀢𑀢𑁄 𑀩𑁆𑀬𑀸𑀫𑀧𑁆𑀧𑀫𑀸𑀡𑀸. 𑀲𑁂𑀲𑀸𑀦𑀁 𑀅𑀦𑀺𑀬𑀢𑀸 𑀅𑀳𑁄𑀲𑀺. 𑀅𑀬𑀁 𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀦𑀸𑀫 𑀅𑀚𑁆𑀛𑀸𑀲𑀬𑀧𑀝𑀺𑀩𑀤𑁆𑀥𑀁, 𑀬𑁄 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀲𑀭𑀻𑀭𑀧𑁆𑀧𑀪𑀸 𑀢𑀢𑁆𑀢𑀓𑀁 𑀨𑀭𑀢𑀺, 𑀧𑀝𑀺𑀯𑀺𑀤𑁆𑀥𑀕𑀼𑀡𑁂 𑀧𑀦 𑀓𑀲𑁆𑀲𑀘𑀺 𑀯𑁂𑀫𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀦𑀸𑀫.

𑀬𑀸𑀦𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀳𑀢𑁆𑀣𑀺𑀬𑀸𑀦𑁂𑀦 𑀓𑁂𑀘𑀺 𑀅𑀲𑁆𑀲𑀬𑀸𑀦𑁂𑀦 𑀓𑁂𑀘𑀺 𑀭𑀣𑀧𑀤-𑀧𑀸𑀲𑀸𑀤-𑀲𑀺𑀯𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑀺. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭-𑀲𑀼𑀫𑀦-𑀲𑀼𑀫𑁂𑀥-𑀨𑀼𑀲𑁆𑀲-𑀲𑀺𑀔𑀻-𑀓𑁄𑀡𑀸𑀕𑀫𑀦𑀸 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀡𑁆𑀟𑀜𑁆𑀜-𑀭𑁂𑀯𑀢-𑀧𑀤𑀼𑀫-𑀧𑀺𑀬𑀤𑀲𑁆𑀲𑀻-𑀯𑀺𑀧𑀲𑁆𑀲𑀻-𑀓𑀓𑀼𑀲𑀦𑁆𑀥𑀸 𑀭𑀣𑀬𑀸𑀦𑁂𑀦. 𑀫𑀗𑁆𑀕𑀮-𑀲𑀼𑀚𑀸𑀢-𑀅𑀢𑁆𑀣𑀤𑀲𑁆𑀲𑀻-𑀢𑀺𑀲𑁆𑀲-𑀕𑁄𑀢𑀫𑀸 𑀅𑀲𑁆𑀲𑀬𑀸𑀦𑁂𑀦. 𑀅𑀦𑁄𑀫𑀤𑀲𑁆𑀲𑀻𑀲𑀺𑀤𑁆𑀥𑀢𑁆𑀣𑀯𑁂𑀲𑁆𑀲𑀪𑀼𑀦𑁄 𑀲𑀺𑀯𑀺𑀓𑀸𑀬𑀸𑀦𑁂𑀦. 𑀦𑀸𑀭𑀤𑁄 𑀧𑀤𑀲𑀸 𑀦𑀺𑀓𑁆𑀔𑀫𑀺. 𑀲𑁄𑀪𑀺𑀢-𑀧𑀤𑀼𑀫𑀼𑀢𑁆𑀢𑀭-𑀥𑀫𑁆𑀫𑀤𑀲𑁆𑀲𑀻-𑀓𑀲𑁆𑀲𑀧𑀸 𑀧𑀸𑀲𑀸𑀤𑁂𑀦 𑀦𑀺𑀓𑁆𑀔𑀫𑀺𑀁𑀲𑀼. 𑀅𑀬𑀁 𑀬𑀸𑀦𑀯𑁂𑀫𑀢𑁆𑀢𑀁 𑀦𑀸𑀫.

𑀩𑁄𑀥𑀺𑀯𑁂𑀫𑀢𑁆𑀢𑀁 𑀦𑀸𑀫 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀓𑀧𑀻𑀢𑀦𑀭𑀼𑀓𑁆𑀔𑁄 𑀩𑁄𑀥𑀺; 𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑁄, 𑀫𑀗𑁆𑀕𑀮-𑀲𑀼𑀫𑀦-𑀭𑁂𑀯𑀢-𑀲𑁄𑀪𑀺𑀢𑀸𑀦𑀁 𑀦𑀸𑀕𑀭𑀼𑀓𑁆𑀔𑁄, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀅𑀚𑁆𑀚𑀼𑀦𑀭𑀼𑀓𑁆𑀔𑁄, 𑀧𑀤𑀼𑀫𑀦𑀸𑀭𑀤𑀸𑀦𑀁 𑀫𑀳𑀸𑀲𑁄𑀡𑀭𑀼𑀓𑁆𑀔𑁄, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀮𑀮𑀭𑀼𑀓𑁆𑀔𑁄, 𑀲𑀼𑀫𑁂𑀥𑀲𑁆𑀲 𑀦𑀻𑀧𑁄, 𑀲𑀼𑀚𑀸𑀢𑀲𑁆𑀲 𑀯𑁂𑀴𑀼, 𑀧𑀺𑀬𑀤𑀲𑁆𑀲𑀺𑀦𑁄 𑀓𑀓𑀼𑀥𑁄, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀘𑀫𑁆𑀧𑀓𑀭𑀼𑀓𑁆𑀔𑁄, 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀭𑀢𑁆𑀢𑀓𑀼𑀭𑀯𑀓𑀭𑀼𑀓𑁆𑀔𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀓𑀡𑀺𑀓𑀸𑀭𑀭𑀼𑀓𑁆𑀔𑁄, 𑀢𑀺𑀲𑁆𑀲𑀲𑁆𑀲 𑀅𑀲𑀦𑀭𑀼𑀓𑁆𑀔𑁄, 𑀨𑀼𑀲𑁆𑀲𑀲𑁆𑀲 𑀆𑀫𑀮𑀓𑀭𑀼𑀓𑁆𑀔𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀧𑀸𑀝𑀮𑀺𑀭𑀼𑀓𑁆𑀔𑁄, 𑀲𑀺𑀔𑀺𑀲𑁆𑀲 𑀧𑀼𑀡𑁆𑀟𑀭𑀻𑀓𑀭𑀼𑀓𑁆𑀔𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀲𑀸𑀮𑀭𑀼𑀓𑁆𑀔𑁄, 𑀓𑀓𑀼𑀲𑀦𑁆𑀥𑀲𑁆𑀲 𑀲𑀺𑀭𑀻𑀲𑀭𑀼𑀓𑁆𑀔𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄, 𑀓𑀲𑁆𑀲𑀧𑀲𑁆𑀲 𑀦𑀺𑀕𑁆𑀭𑁄𑀥𑁄, 𑀕𑁄𑀢𑀫𑀲𑁆𑀲 𑀅𑀲𑁆𑀲𑀢𑁆𑀣𑁄𑀢𑀺 𑀅𑀬𑀁 𑀩𑁄𑀥𑀺𑀯𑁂𑀫𑀢𑁆𑀢𑀁 𑀦𑀸𑀫.

𑀧𑀮𑁆𑀮𑀗𑁆𑀓𑀯𑁂𑀫𑀢𑁆𑀢𑀁 𑀦𑀸𑀫 𑀤𑀻𑀧𑀗𑁆𑀓𑀭-𑀭𑁂𑀯𑀢-𑀧𑀺𑀬𑀤𑀲𑁆𑀲𑀻-𑀅𑀢𑁆𑀣𑀤𑀲𑁆𑀲𑀻-𑀥𑀫𑁆𑀫𑀤𑀲𑁆𑀲𑀻-𑀯𑀺𑀧𑀲𑁆𑀲𑀻𑀦𑀁 𑀢𑁂𑀧𑀡𑁆𑀡𑀸𑀲𑀳𑀢𑁆𑀣𑀧𑀮𑁆𑀮𑀗𑁆𑀓𑀸 𑀅𑀳𑁂𑀲𑀼𑀁; 𑀓𑁄𑀡𑁆𑀟𑀜𑁆𑀜-𑀫𑀗𑁆𑀕𑀮-𑀦𑀸𑀭𑀤-𑀲𑀼𑀫𑁂𑀥𑀸𑀦𑀁 𑀲𑀢𑁆𑀢𑀧𑀡𑁆𑀡𑀸𑀲𑀳𑀢𑁆𑀣𑀸; 𑀲𑀼𑀫𑀦𑀲𑁆𑀲 𑀲𑀝𑁆𑀞𑀺𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺; 𑀲𑁄𑀪𑀺𑀢-𑀅𑀦𑁄𑀫𑀤𑀲𑁆𑀲𑀻-𑀧𑀤𑀼𑀫-𑀧𑀤𑀼𑀫𑀼𑀢𑁆𑀢𑀭-𑀨𑀼𑀲𑁆𑀲𑀸𑀦𑀁 𑀅𑀝𑁆𑀞𑀢𑁆𑀢𑀺𑀁𑀲𑀳𑀢𑁆𑀣𑀸, 𑀲𑀼𑀚𑀸𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀳𑀢𑁆𑀣𑁄, 𑀲𑀺𑀤𑁆𑀥𑀢𑁆𑀣-𑀢𑀺𑀲𑁆𑀲-𑀯𑁂𑀲𑁆𑀲𑀪𑀽𑀦𑀁 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀸, 𑀲𑀺𑀔𑀺𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀳𑀢𑁆𑀣𑁄, 𑀓𑀓𑀼𑀲𑀦𑁆𑀥𑀲𑁆𑀲 𑀙𑀩𑁆𑀩𑀻𑀲𑀢𑀺𑀳𑀢𑁆𑀣𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀯𑀻𑀲𑀢𑀺𑀳𑀢𑁆𑀣𑁄, 𑀓𑀲𑁆𑀲𑀧𑀲𑁆𑀲 𑀧𑀦𑁆𑀦𑀭𑀲𑀳𑀢𑁆𑀣𑁄, 𑀕𑁄𑀢𑀫𑀲𑁆𑀲 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺. 𑀅𑀬𑀁 𑀧𑀮𑁆𑀮𑀗𑁆𑀓𑀯𑁂𑀫𑀢𑁆𑀢𑀁 𑀦𑀸𑀫. 𑀇𑀫𑀸𑀦𑀺 𑀅𑀝𑁆𑀞 𑀯𑁂𑀫𑀢𑁆𑀢𑀸𑀦𑀺 𑀦𑀸𑀫.

𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀓𑀣𑀸

𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀦 𑀘𑀢𑁆𑀢𑀸𑀭𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁄 𑀅𑀯𑀺𑀚𑀳𑀺𑀢𑁄 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀳𑁄𑀢𑀺. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀤𑁂𑀯𑁄𑀭𑁄𑀳𑀡𑀓𑀸𑀮𑁂 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀞𑀫𑀓𑁆𑀓𑀧𑀸𑀤𑀝𑁆𑀞𑀸𑀦𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀸 𑀘𑀢𑁆𑀢𑀸𑀭𑀺 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀯𑀺𑀳𑀸𑀭𑁄 𑀧𑀦 𑀔𑀼𑀤𑁆𑀤𑀓𑁄𑀧𑀺 𑀫𑀳𑀦𑁆𑀢𑁄𑀧𑀺 𑀳𑁄𑀢𑀺. 𑀯𑀺𑀳𑀸𑀭𑁄 𑀦 𑀯𑀺𑀚𑀳𑀢𑀺𑀬𑁂𑀯, 𑀦𑀕𑀭𑀁 𑀧𑀦 𑀯𑀺𑀚𑀳𑀢𑀺.

𑀲𑀳𑀚𑀸𑀢𑀧𑀭𑀺𑀘𑁆𑀙𑁂𑀤-𑀦𑀓𑁆𑀔𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀣𑀸

𑀅𑀧𑀭𑀁 𑀧𑀦 𑀅𑀫𑁆𑀳𑀸𑀓𑀁𑀬𑁂𑀯 𑀪𑀕𑀯𑀢𑁄 𑀲𑀳𑀚𑀸𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀦𑀓𑁆𑀔𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀤𑀻𑀧𑁂𑀲𑀼𑀁. 𑀅𑀫𑁆𑀳𑀸𑀓𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀦 𑀓𑀺𑀭 𑀲𑀤𑁆𑀥𑀺𑀁 𑀭𑀸𑀳𑀼𑀮𑀫𑀸𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀙𑀦𑁆𑀦𑁄 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸 𑀦𑀺𑀥𑀺𑀓𑀼𑀫𑁆𑀪𑁄 𑀫𑀳𑀸𑀩𑁄𑀥𑀺 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀲𑀳𑀚𑀸𑀢𑀸𑀦𑀺. 𑀅𑀬𑀁 𑀲𑀳𑀚𑀸𑀢𑀧𑀭𑀺𑀘𑁆𑀙𑁂𑀤𑁄. 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄 𑀘 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀘. 𑀫𑀸𑀖𑀦𑀓𑁆𑀔𑀢𑁆𑀢𑁂𑀦 𑀢𑀲𑁆𑀲 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀘 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑀚𑁆𑀚𑀦𑀜𑁆𑀘 𑀅𑀳𑁄𑀲𑀺. 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑁂𑀦 𑀤𑁂𑀯𑁄𑀭𑁄𑀳𑀡𑀁. 𑀅𑀬𑀁 𑀦𑀓𑁆𑀔𑀢𑁆𑀢𑀧𑀭𑀺𑀘𑁆𑀙𑁂𑀤𑁄𑀢𑀺.

𑀲𑀥𑀫𑁆𑀫𑀢𑀸𑀓𑀣𑀸

𑀇𑀤𑀸𑀦𑀺 𑀧𑀦 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀸𑀥𑀸𑀭𑀡𑀥𑀫𑁆𑀫𑀢𑀁 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀫𑀢𑁆𑀢𑀺𑀁𑀲𑀯𑀺𑀥𑀸 𑀥𑀫𑁆𑀫𑀢𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀁, 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀩𑀳𑀺𑀫𑀼𑀔𑁄𑀮𑁄𑀓𑀦𑀁, 𑀞𑀺𑀢𑀸𑀬 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀯𑀺𑀚𑀸𑀬𑀦𑀁, 𑀅𑀭𑀜𑁆𑀜𑁂𑀬𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀁, 𑀓𑀜𑁆𑀘𑀦𑀧𑀝𑁆𑀝𑁂𑀲𑀼 𑀧𑀢𑀺𑀝𑁆𑀞𑀺𑀢𑀧𑀸𑀤𑀸𑀦𑀁 𑀉𑀢𑁆𑀢𑀭𑀸𑀪𑀺𑀫𑀼𑀔𑀸𑀦𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀸𑀦𑀁 𑀕𑀦𑁆𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀲𑀻𑀳𑀦𑀸𑀤𑀦𑀤𑀦𑀁, 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀚𑀸𑀢𑀫𑀢𑁆𑀢𑀧𑀼𑀢𑁆𑀢𑀸𑀦𑀁 𑀫𑀳𑀸𑀲𑀢𑁆𑀢𑀸𑀦𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁, 𑀅𑀭𑀳𑀤𑁆𑀥𑀚𑀫𑀸𑀤𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑀳𑁂𑀝𑁆𑀞𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀭𑀺𑀬𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑀤𑀺𑀯𑀲𑁂 𑀧𑀸𑀬𑀸𑀲𑀪𑁄𑀚𑀦𑀁, 𑀢𑀺𑀡𑀲𑀦𑁆𑀣𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀓𑀫𑁆𑀫𑀁, 𑀫𑀸𑀭𑀩𑀮𑀯𑀺𑀤𑁆𑀥𑀁𑀲𑀦𑀁, 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀆𑀤𑀺𑀁 𑀓𑀢𑁆𑀯𑀸 𑀅𑀲𑀸𑀥𑀸𑀭𑀡𑀜𑀸𑀡𑀸𑀤𑀺𑀕𑀼𑀡𑀧𑀝𑀺𑀮𑀸𑀪𑁄, 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑀦𑀁, 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀆𑀬𑀸𑀘𑀦𑀁, 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀫𑀸𑀖𑀧𑀼𑀡𑁆𑀡𑀫𑀸𑀬 𑀘𑀢𑀼𑀭𑀗𑁆𑀕𑀺𑀓𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄, 𑀚𑁂𑀢𑀯𑀦𑀝𑁆𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑁄, 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀪𑀺𑀥𑀫𑁆𑀫𑀤𑁂𑀲𑀦𑀸, 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀤𑁂𑀯𑀮𑁄𑀓𑀢𑁄 𑀑𑀢𑀭𑀡𑀁 𑀲𑀢𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀯𑁂𑀦𑁂𑀬𑁆𑀬𑀚𑀦𑀸𑀯𑀮𑁄𑀓𑀦𑀁, 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀉𑀧𑁆𑀧𑀦𑁆𑀦𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀚𑀸𑀢𑀓𑀓𑀣𑀦𑀁, 𑀜𑀸𑀢𑀺𑀲𑀫𑀸𑀕𑀫𑁂 𑀩𑀼𑀤𑁆𑀥𑀯𑀁𑀲𑀓𑀣𑀦𑀁, 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀁, 𑀦𑀺𑀫𑀦𑁆𑀢𑀺𑀢𑀸𑀦𑀁 𑀯𑀼𑀝𑁆𑀞𑀯𑀲𑁆𑀲𑀸𑀦𑀁 𑀅𑀦𑀸𑀧𑀼𑀘𑁆𑀙𑀸 𑀅𑀕𑀫𑀦𑀁, 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀓𑀭𑀡𑀁, 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀫𑀁𑀲𑀭𑀲𑀪𑁄𑀚𑀦𑀁, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑀸 𑀲𑀫𑀢𑁆𑀢𑀺𑀁𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀢𑀸𑀢𑀺.

𑀅𑀦𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀓𑀣𑀸

𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀘𑀢𑁆𑀢𑀸𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀩𑀼𑀤𑁆𑀥𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀳𑀝𑀸𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀩𑀼𑀤𑁆𑀥𑀸𑀦𑀁 𑀆𑀬𑀼𑀦𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀧𑀭𑀽𑀧𑀓𑁆𑀓𑀫𑁂𑀦 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁪𑁨). 𑀩𑀼𑀤𑁆𑀥𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀜𑁆𑀘 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀩𑀼𑀤𑁆𑀥𑀭𑀁𑀲𑀻𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀦𑀸𑀫𑀸𑀢𑀺.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀕𑀢𑀸 𑀲𑀺𑀤𑁆𑀥𑀺𑀁, 𑀩𑀼𑀤𑁆𑀥𑀯𑀁𑀲𑀲𑁆𑀲 𑀯𑀡𑁆𑀡𑀦𑀸;

𑀲𑀼𑀯𑀡𑁆𑀡𑀧𑀤𑀯𑀺𑀜𑁆𑀜𑀸𑀢𑀯𑀺𑀘𑀺𑀢𑁆𑀢𑀦𑀬𑀲𑁄𑀪𑀺𑀢𑀸.

𑀧𑁄𑀭𑀸𑀡𑀝𑁆𑀞𑀓𑀣𑀸𑀫𑀕𑁆𑀕𑀁, 𑀧𑀸𑀴𑀺𑀅𑀢𑁆𑀣𑀧𑁆𑀧𑀓𑀸𑀲𑀓𑀁;

𑀆𑀤𑀸𑀬𑁂𑀯 𑀓𑀢𑀸 𑀩𑀼𑀤𑁆𑀥-𑀯𑀁𑀲𑀲𑁆𑀲𑀝𑁆𑀞𑀓𑀣𑀸 𑀫𑀬𑀸.

𑀧𑀧𑀜𑁆𑀘𑀢𑁆𑀣𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀫𑀥𑀼𑀭𑀢𑁆𑀣𑀲𑁆𑀲 𑀲𑀩𑁆𑀩𑀲𑁄;

𑀲𑀫𑁆𑀧𑀓𑀸𑀲𑀦𑀢𑁄 𑀢𑀲𑁆𑀫𑀸, 𑀫𑀥𑀼𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀻.

𑀓𑀸𑀯𑀻𑀭𑀚𑀮𑀲𑀫𑁆𑀧𑀸𑀢-𑀧𑀭𑀺𑀧𑀽𑀢𑀫𑀳𑀻𑀢𑀮𑁂;

𑀓𑀸𑀯𑀻𑀭𑀧𑀝𑁆𑀝𑀦𑁂 𑀭𑀫𑁆𑀫𑁂, 𑀦𑀸𑀦𑀸𑀦𑀸𑀭𑀺𑀦𑀭𑀸𑀓𑀼𑀮𑁂.

𑀓𑀸𑀭𑀺𑀢𑁂 𑀓𑀡𑁆𑀳𑀤𑀸𑀲𑁂𑀦, 𑀲𑀡𑁆𑀳𑀯𑀸𑀘𑁂𑀦 𑀲𑀸𑀥𑀼𑀦𑀸;

𑀯𑀺𑀳𑀸𑀭𑁂 𑀯𑀺𑀯𑀺𑀥𑀸𑀓𑀸𑀭-𑀘𑀸𑀭𑀼𑀧𑀸𑀓𑀸𑀭𑀕𑁄𑀧𑀼𑀭𑁂.

𑀙𑀸𑀬𑀸𑀲𑀮𑀺𑀮𑀲𑀫𑁆𑀧𑀦𑁆𑀦𑁂, 𑀤𑀲𑁆𑀲𑀦𑀻𑀬𑁂 𑀫𑀦𑁄𑀭𑀫𑁂;

𑀳𑀢𑀤𑀼𑀚𑁆𑀚𑀦𑀲𑀫𑁆𑀩𑀸𑀥𑁂, 𑀧𑀯𑀺𑀯𑁂𑀓𑀲𑀼𑀔𑁂 𑀲𑀺𑀯𑁂.

𑀢𑀢𑁆𑀣 𑀧𑀸𑀘𑀻𑀦𑀧𑀸𑀲𑀸𑀤-𑀢𑀮𑁂 𑀧𑀭𑀫𑀲𑀻𑀢𑀮𑁂;

𑀯𑀲𑀢𑀸 𑀩𑀼𑀤𑁆𑀥𑀯𑀁𑀲𑀲𑁆𑀲, 𑀫𑀬𑀸 𑀲𑀁𑀯𑀡𑁆𑀡𑀦𑀸 𑀓𑀢𑀸.

𑀬𑀣𑀸 𑀩𑀼𑀤𑁆𑀥𑀯𑀁𑀲𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀁, 𑀕𑀢𑀸 𑀲𑀸𑀥𑀼 𑀲𑀺𑀤𑁆𑀥𑀺𑀁 𑀯𑀺𑀦𑀸 𑀅𑀦𑁆𑀢𑀭𑀸𑀬𑀁;

𑀢𑀣𑀸 𑀥𑀫𑁆𑀫𑀬𑀼𑀢𑁆𑀢𑀸 𑀚𑀦𑀸𑀦𑀁 𑀯𑀺𑀢𑀓𑁆𑀓𑀸, 𑀯𑀺𑀦𑀸𑀯𑀦𑁆𑀢𑀭𑀸𑀬𑁂𑀦 𑀲𑀺𑀤𑁆𑀥𑀺𑀁 𑀯𑀚𑀦𑁆𑀢𑀼.

𑀇𑀫𑀁 𑀩𑀼𑀤𑁆𑀥𑀯𑀁𑀲𑀲𑁆𑀲 𑀲𑀁𑀯𑀡𑁆𑀡𑀦𑀁 𑀫𑁂, 𑀓𑀭𑁄𑀦𑁆𑀢𑁂𑀦 𑀬𑀁 𑀧𑀢𑁆𑀣𑀺𑀢𑀁 𑀧𑀼𑀜𑁆𑀜𑀚𑀸𑀢𑀁;

𑀲𑀤𑀸 𑀢𑀲𑁆𑀲 𑀤𑁂𑀯𑀸𑀦𑀼𑀪𑀸𑀯𑁂𑀦 𑀮𑁄𑀓𑁄, 𑀥𑀼𑀯𑀁 𑀲𑀦𑁆𑀢𑀫𑀘𑁆𑀘𑀦𑁆𑀢𑀫𑀢𑁆𑀣𑀁 𑀧𑀬𑀸𑀢𑀁.

𑀯𑀺𑀦𑀲𑁆𑀲𑀦𑁆𑀢𑀼 𑀭𑁄𑀕𑀸 𑀫𑀦𑀼𑀲𑁆𑀲𑁂𑀲𑀼 𑀲𑀩𑁆𑀩𑁂, 𑀧𑀯𑀲𑁆𑀲𑀦𑁆𑀢𑀼 𑀤𑁂𑀯𑀸𑀧𑀺 𑀯𑀲𑁆𑀲𑀦𑁆𑀢𑀓𑀸𑀮𑁂;

𑀲𑀼𑀔𑀁 𑀳𑁄𑀢𑀼 𑀦𑀺𑀘𑁆𑀘𑀁 𑀯𑀭𑀁 𑀦𑀸𑀭𑀓𑀸𑀧𑀺, 𑀧𑀺𑀲𑀸𑀘𑀸𑀧𑀬𑀸𑀢𑀸 𑀧𑀺𑀧𑀸𑀲𑀸 𑀪𑀯𑀦𑁆𑀢𑀼.

𑀲𑀼𑀭𑀸 𑀅𑀘𑁆𑀙𑀭𑀸𑀦𑀁 𑀕𑀡𑀸𑀤𑀻𑀳𑀺 𑀲𑀤𑁆𑀥𑀺𑀁, 𑀘𑀺𑀭𑀁 𑀤𑁂𑀯𑀮𑁄𑀓𑁂 𑀲𑀼𑀔𑀁 𑀘𑀸𑀦𑀼𑀪𑁄𑀦𑁆𑀢𑀼;

𑀘𑀺𑀭𑀁 𑀞𑀸𑀢𑀼 𑀥𑀫𑁆𑀫𑁄 𑀫𑀼𑀦𑀺𑀦𑁆𑀤𑀲𑁆𑀲 𑀮𑁄𑀓𑁂, 𑀲𑀼𑀔𑀁 𑀮𑁄𑀓𑀧𑀸𑀮𑀸 𑀫𑀳𑀺𑀁 𑀧𑀸𑀮𑀬𑀦𑁆𑀢𑀼.

𑀕𑀭𑀽𑀳𑀺 𑀕𑀻𑀢𑀦𑀸𑀫𑁂𑀦, 𑀩𑀼𑀤𑁆𑀥𑀤𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀣𑁂𑀭𑁄 𑀓𑀢𑁆𑀯𑀸 𑀅𑀝𑁆𑀞𑀓𑀣𑀁, 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀁.

𑀧𑁄𑀢𑁆𑀣𑀓𑀁 𑀞𑀧𑀬𑀺𑀢𑁆𑀯𑁂𑀫𑀁, 𑀧𑀭𑀫𑁆𑀧𑀭𑁂 𑀳𑀺𑀢𑀸𑀯𑀳𑀁;

𑀅𑀘𑀺𑀭𑀝𑁆𑀞𑀺𑀢𑀪𑀸𑀯𑁂𑀦, 𑀅𑀳𑁄 𑀫𑀘𑁆𑀘𑀼𑀯𑀲𑀁 𑀕𑀢𑁄.

𑀇𑀢𑀺 𑀪𑀸𑀡𑀯𑀸𑀭𑀯𑀲𑁂𑀦 𑀙𑀩𑁆𑀩𑀻𑀲𑀢𑀺𑀪𑀸𑀡𑀯𑀸𑀭𑀸, 𑀕𑀦𑁆𑀣𑀯𑀲𑁂𑀦 𑀧𑀜𑁆𑀘𑀲𑀢𑀸𑀥𑀺𑀓𑀙𑀲𑀳𑀲𑁆𑀲𑀕𑀦𑁆𑀣𑀸, 𑀅𑀓𑁆𑀔𑀭𑀯𑀲𑁂𑀦 𑀢𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂𑀲𑀢𑀲𑀳𑀲𑁆𑀲𑀓𑁆𑀔𑀭𑀸𑀦𑀺.

𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀏𑀲𑀸, 𑀬𑀣𑀸 𑀦𑀺𑀝𑁆𑀞𑀁 𑀉𑀧𑀸𑀕𑀢𑀸;

𑀢𑀣𑀸 𑀲𑀺𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀲𑀢𑁆𑀢𑀸𑀦𑀁 𑀥𑀫𑁆𑀫𑀦𑀺𑀲𑁆𑀲𑀺𑀢𑀸𑀢𑀺.

𑀇𑀢𑀺 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀻 𑀦𑀸𑀫

𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.