𑁨𑁬. 𑀓𑀲𑁆𑀲𑀧𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀓𑁄𑀡𑀸𑀕𑀫𑀦𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀲𑀸𑀲𑀦𑁂 𑀘 𑀅𑀦𑁆𑀢𑀭𑀳𑀺𑀢𑁂 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀲𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀅𑀧𑀭𑀺𑀫𑀺𑀢𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀲𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀅𑀦𑁂𑀓𑀫𑀦𑀼𑀲𑁆𑀲𑀧𑁄 𑀓𑀲𑁆𑀲𑀧𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺 (𑀲𑀼. 𑀦𑀺. 𑀅𑀝𑁆𑀞. 𑀆𑀫𑀓𑀕𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸). 𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀻𑀦𑀕𑀭𑁂 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀧𑀼𑀮𑀕𑀼𑀡𑀯𑀢𑀺𑀬𑀸 𑀥𑀦𑀯𑀢𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀕𑁄𑀢𑁆𑀢𑀯𑀲𑁂𑀦 𑀧𑀦𑀲𑁆𑀲 ‘‘𑀓𑀲𑁆𑀲𑀧𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀤𑁆𑀯𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀳𑀁𑀲𑀯𑀸 𑀬𑀲𑀯𑀸 𑀲𑀺𑀭𑀺𑀦𑀦𑁆𑀤𑁄𑀢𑀺 𑀢𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀼𑀦𑀦𑁆𑀤𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀧𑁆𑀧𑀫𑀼𑀔𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀦𑀦𑁆𑀤𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀯𑀺𑀚𑀺𑀢𑀲𑁂𑀦𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 ‘‘𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀲𑀫𑀦𑀦𑁆𑀢𑀭𑀫𑁂𑀯 𑀧𑀸𑀲𑀸𑀤𑁄 𑀓𑀼𑀮𑀸𑀮𑀘𑀓𑁆𑀓𑀫𑀺𑀯 𑀪𑀫𑀺𑀢𑁆𑀯𑀸 𑀕𑀕𑀦𑀢𑀮𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀫𑀭𑀼𑀘𑀺𑀭𑀓𑀭𑀦𑀺𑀓𑀭𑁄 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑁄 𑀯𑀺𑀬 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀅𑀦𑁂𑀓𑀦𑀭𑀲𑀢𑀧𑀭𑀺𑀯𑀼𑀢𑁄 𑀕𑀕𑀦𑀢𑀮𑀫𑀮𑀗𑁆𑀓𑀭𑁄𑀦𑁆𑀢𑁄 𑀯𑀺𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀬 𑀚𑀦𑀦𑀬𑀦𑀳𑀤𑀬𑀸𑀦𑀺 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬 𑀭𑀼𑀓𑁆𑀔𑀕𑁆𑀕𑀸𑀦𑀺 𑀧𑀭𑀁 𑀲𑁄𑀪𑀬𑀫𑀸𑀦𑁄 𑀯𑀺𑀬 𑀘 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀩𑁄𑀥𑀺𑀁 𑀫𑀚𑁆𑀛𑁂𑀓𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀅𑀭𑀳𑀢𑁆𑀢𑀤𑁆𑀥𑀚𑀫𑀸𑀤𑀸𑀬 𑀧𑀩𑁆𑀩𑀚𑀺. 𑀢𑀲𑁆𑀲 𑀦𑀸𑀝𑀓𑀺𑀢𑁆𑀣𑀺𑀬𑁄 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀅𑀟𑁆𑀠𑀕𑀸𑀯𑀼𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀲𑀧𑀭𑀺𑀯𑀸𑀭𑀸 𑀲𑁂𑀦𑀸𑀲𑀦𑁆𑀦𑀺𑀯𑁂𑀲𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀇𑀢𑁆𑀣𑀺𑀧𑀭𑀺𑀘𑀸𑀭𑀺𑀓𑁂 𑀞𑀧𑁂𑀢𑁆𑀯𑀸 𑀲𑀳𑀸𑀕𑀢𑀸 𑀲𑀩𑁆𑀩𑁂 𑀧𑀩𑁆𑀩𑀚𑀺𑀁𑀲𑀼.

𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀲𑀢𑁆𑀢𑀸𑀳𑀁 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀦𑀦𑁆𑀤𑀸𑀬 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀔𑀤𑀺𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀫𑁂𑀦 𑀦𑀸𑀫 𑀬𑀯𑀧𑀸𑀮𑀓𑁂𑀦 𑀉𑀧𑀦𑀻𑀢𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀩𑁄𑀥𑀺𑀁 𑀉𑀧𑀕𑀦𑁆𑀢𑁆𑀯𑀸 𑀧𑀜𑁆𑀘𑀤𑀲𑀳𑀢𑁆𑀣𑀸𑀬𑀸𑀫𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑀕𑀦𑀢𑀮𑁂𑀦 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀑𑀢𑀭𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀯𑀻𑀲𑀢𑀺𑀬𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧. ‘‘𑀓𑁄𑀡𑀸𑀕𑀫𑀦𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄.

𑁨. ‘‘𑀲𑀜𑁆𑀙𑀟𑁆𑀟𑀺𑀢𑀁 𑀓𑀼𑀮𑀫𑀽𑀮𑀁, 𑀩𑀳𑁆𑀯𑀦𑁆𑀦𑀧𑀸𑀦𑀪𑁄𑀚𑀦𑀁;

𑀤𑀢𑁆𑀯𑀸𑀦 𑀬𑀸𑀘𑀓𑁂 𑀤𑀸𑀦𑀁, 𑀧𑀽𑀭𑀬𑀺𑀢𑁆𑀯𑀸𑀦 𑀫𑀸𑀦𑀲𑀁;

𑀉𑀲𑀪𑁄𑀯 𑀆𑀴𑀓𑀁 𑀪𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. ‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑀲𑁆𑀲𑀧𑁂 𑀮𑁄𑀓𑀦𑀸𑀬𑀓𑁂;

𑀯𑀻𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀲𑀜𑁆𑀙𑀟𑁆𑀟𑀺𑀢𑀦𑁆𑀢𑀺 𑀙𑀟𑁆𑀟𑀺𑀢𑀁 𑀉𑀚𑁆𑀛𑀺𑀢𑀁 𑀧𑀭𑀺𑀘𑁆𑀘𑀢𑁆𑀢𑀁. 𑀓𑀼𑀮𑀫𑀽𑀮𑀦𑁆𑀢𑀺 𑀓𑀼𑀮𑀖𑀭𑀁, 𑀅𑀧𑀭𑀺𑀫𑀺𑀢𑀪𑁄𑀕𑀓𑁆𑀔𑀦𑁆𑀥𑀁 𑀅𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀥𑀦𑀲𑀜𑁆𑀘𑀬𑀁 𑀤𑀲𑀲𑀢𑀦𑀬𑀦𑀪𑀯𑀦𑀲𑀤𑀺𑀲𑀪𑁄𑀕𑀁 𑀅𑀢𑀺𑀤𑀼𑀘𑁆𑀘𑀚𑀁 𑀢𑀺𑀡𑀫𑀺𑀯 𑀙𑀟𑁆𑀟𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀸𑀘𑀓𑁂𑀢𑀺 𑀬𑀸𑀘𑀓𑀸𑀦𑀁 𑀤𑀢𑁆𑀯𑀸. 𑀆𑀴𑀓𑀦𑁆𑀢𑀺 𑀕𑁄𑀝𑁆𑀞𑀁, 𑀬𑀣𑀸 𑀉𑀲𑀪𑁄 𑀕𑁄𑀝𑁆𑀞𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀫𑀳𑀸𑀧𑀼𑀭𑀺𑀲𑁄𑀧𑀺 𑀕𑁂𑀳𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄.

𑀧𑀼𑀦 𑀘𑀢𑀼𑀫𑀸𑀲𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀲𑀢𑁆𑀣𑀭𑀺 𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀲𑀼𑀦𑁆𑀤𑀭𑀦𑀕𑀭𑀤𑁆𑀯𑀸𑀭𑁂 𑀅𑀲𑀦𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀧𑀜𑁆𑀘𑀦𑁆𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀧𑀼𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀲𑀼𑀭𑀭𑀺𑀧𑀼𑀤𑀼𑀭𑀪𑀺𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀼𑀥𑀫𑁆𑀫𑀸 𑀦𑀸𑀫 𑀤𑁂𑀯𑀲𑀪𑀸 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀥𑀦𑀯𑀢𑀻𑀤𑁂𑀯𑀺𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀤𑁂𑀯𑀢𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀦𑁆𑀢𑁄 𑀢𑀻𑀡𑀺 𑀤𑁂𑀯𑀢𑀸𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪. ‘‘𑀘𑀢𑀼𑀫𑀸𑀲𑀁 𑀬𑀤𑀸 𑀩𑀼𑀤𑁆𑀥𑁄, 𑀮𑁄𑀓𑁂 𑀘𑀭𑀢𑀺 𑀘𑀸𑀭𑀺𑀓𑀁;

𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. ‘‘𑀬𑀫𑀓𑀁 𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀜𑀸𑀡𑀥𑀸𑀢𑀼𑀁 𑀧𑀓𑀺𑀢𑁆𑀢𑀬𑀺;

𑀧𑀜𑁆𑀘𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. ‘‘𑀲𑀼𑀥𑀫𑁆𑀫𑀸 𑀤𑁂𑀯𑀧𑀼𑀭𑁂 𑀭𑀫𑁆𑀫𑁂, 𑀢𑀢𑁆𑀣 𑀥𑀫𑁆𑀫𑀁 𑀧𑀓𑀺𑀢𑁆𑀢𑀬𑀺;

𑀢𑀻𑀡𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑁂𑀯𑀸𑀦𑀁 𑀩𑁄𑀥𑀬𑀻 𑀚𑀺𑀦𑁄.

𑁭. ‘‘𑀦𑀭𑀤𑁂𑀯𑀲𑁆𑀲 𑀬𑀓𑁆𑀔𑀲𑁆𑀲, 𑀅𑀧𑀭𑁂 𑀥𑀫𑁆𑀫𑀤𑁂𑀲𑀦𑁂;

𑀏𑀢𑁂𑀲𑀸𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸’’𑀢𑀺.

𑀢𑀢𑁆𑀣 𑀘𑀢𑀼𑀫𑀸𑀲𑀦𑁆𑀢𑀺 𑀘𑀸𑀢𑀼𑀫𑀸𑀲𑁂. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀘𑀭𑀢𑀻𑀢𑀺 𑀅𑀘𑀭𑀺. 𑀬𑀫𑀓𑀁 𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸𑀢𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸. 𑀜𑀸𑀡𑀥𑀸𑀢𑀼𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀪𑀸𑀯𑀁. ‘‘𑀲𑀩𑁆𑀩𑀜𑀸𑀡𑀥𑀸𑀢𑀼’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀓𑀺𑀢𑁆𑀢𑀬𑀻𑀢𑀺 𑀫𑀳𑀸𑀚𑀦𑀲𑁆𑀲 𑀧𑀓𑀸𑀲𑁂𑀲𑀺. 𑀲𑀼𑀥𑀫𑁆𑀫𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀼𑀥𑀫𑁆𑀫𑀸 𑀦𑀸𑀫 𑀲𑀪𑀸 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀅𑀪𑀺𑀥𑀫𑁆𑀫𑀁.

𑀢𑀤𑀸 𑀓𑀺𑀭 𑀆𑀦𑀼𑀪𑀸𑀯𑀯𑀺𑀚𑀺𑀢𑀦𑀭𑀤𑁂𑀯𑁄 𑀦𑀭𑀤𑁂𑀯𑁄 𑀦𑀸𑀫 𑀫𑀳𑁂𑀲𑀓𑁆𑀔𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀭𑀤𑁂𑀯𑀬𑀓𑁆𑀔𑁄 𑀯𑀺𑀬 𑀫𑀳𑀺𑀤𑁆𑀥𑀺𑀓𑁄 𑀬𑀓𑁆𑀔𑁄 𑀅𑀳𑁄𑀲𑀺. 𑀲𑁄 𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑁆𑀫𑀺𑀁 𑀦𑀕𑀭𑁂 𑀭𑀜𑁆𑀜𑁄 𑀬𑀸𑀤𑀺𑀲𑀁 𑀭𑀽𑀧𑀁, 𑀢𑀸𑀤𑀺𑀲𑀁 𑀭𑀽𑀧𑀲𑀡𑁆𑀞𑀸𑀦𑀁 𑀲𑀭𑀓𑀼𑀢𑁆𑀢𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀲𑀳𑀅𑀦𑁆𑀢𑁂𑀧𑀼𑀭𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀺𑀫𑀺𑀢𑀫𑀁𑀲𑀪𑁄𑀚𑀦𑁄 𑀅𑀳𑁄𑀲𑀺. 𑀲𑁄 𑀓𑀺𑀭 𑀇𑀢𑁆𑀣𑀺𑀥𑀼𑀢𑁆𑀢𑁄 𑀘 𑀅𑀳𑁄𑀲𑀺. 𑀬𑀤𑀸 𑀧𑀦 𑀢𑀁 𑀓𑀼𑀲𑀮𑀸 𑀙𑁂𑀓𑀸 𑀇𑀢𑁆𑀣𑀺𑀬𑁄 𑁋 ‘‘𑀦𑀸𑀬𑀁 𑀅𑀫𑁆𑀳𑀸𑀓𑀁 𑀭𑀸𑀚𑀸, 𑀅𑀫𑀦𑀼𑀲𑁆𑀲𑁄 𑀏𑀲𑁄’’𑀢𑀺 𑀚𑀸𑀦𑀦𑁆𑀢𑀺, 𑀢𑀤𑀸 𑀲𑁄 𑀮𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀢𑀸 𑀲𑀩𑁆𑀩𑀸 𑀔𑀸𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀕𑀭𑀁 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀲𑁄 𑀦𑀭𑀤𑁂𑀯𑀬𑀓𑁆𑀔𑁄 𑀫𑀦𑀼𑀲𑁆𑀲𑁂 𑀪𑀓𑁆𑀔𑀬𑀦𑁆𑀢𑁄 𑀬𑀤𑀸 𑀲𑀼𑀦𑁆𑀤𑀭𑀦𑀕𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺, 𑀢𑀤𑀸 𑀢𑀁 𑀤𑀺𑀲𑁆𑀯𑀸 𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀲𑀦𑁆𑀢𑀸𑀲𑀸 𑀲𑀓𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀧𑀮𑀸𑀬𑀺𑀁𑀲𑀼. 𑀅𑀣 𑀢𑁂 𑀫𑀦𑀼𑀲𑁆𑀲𑁂 𑀧𑀮𑀸𑀬𑀫𑀸𑀦𑁂 𑀤𑀺𑀲𑁆𑀯𑀸 𑀓𑀲𑁆𑀲𑀧𑀤𑀲𑀩𑀮𑁄 𑀢𑀲𑁆𑀲 𑀦𑀭𑀤𑁂𑀯𑀲𑁆𑀲 𑀬𑀓𑁆𑀔𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀦𑀭𑀤𑁂𑀯𑁄 𑀏𑀯𑀁 𑀤𑁂𑀯𑀤𑁂𑀯𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀯𑀺𑀲𑁆𑀲𑀭𑀁 𑀖𑁄𑀭𑀁 𑀦𑀸𑀤𑀁 𑀦𑀤𑀺𑀢𑁆𑀯𑀸 𑀪𑀕𑀯𑀢𑁄 𑀪𑀬𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀁 𑀤𑀫𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀲𑀫𑁆𑀧𑀢𑁆𑀢𑀸𑀦𑀁 𑀦𑀭𑀫𑀭𑀸𑀦𑀁 𑀕𑀡𑀦𑀧𑀣𑀸𑀢𑀻𑀢𑀸𑀦𑀁 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀭𑀤𑁂𑀯𑀲𑁆𑀲 𑀬𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑀭𑁂 𑀥𑀫𑁆𑀫𑀤𑁂𑀲𑀦𑁂𑀢𑀺 𑀅𑀧𑀭𑀲𑁆𑀫𑀺𑀁 𑀥𑀫𑁆𑀫𑀤𑁂𑀲𑀦𑁂. 𑀏𑀢𑁂𑀲𑀸𑀦𑀦𑁆𑀢𑀺 𑀏𑀢𑁂𑀲𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀲𑁆𑀲 𑀧𑀦 𑀓𑀲𑁆𑀲𑀧𑀪𑀕𑀯𑀢𑁄 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀩𑀸𑀭𑀸𑀡𑀲𑀻𑀦𑀕𑀭𑁂 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀓𑀲𑁆𑀲𑀧𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑁂 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀺𑀢𑀼𑀦𑁄 𑀪𑀸𑀲𑀢𑁄 𑀲𑀼𑀢𑁆𑀯𑀸 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀏𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀼𑀤𑁆𑀥𑀫𑀼𑀦𑀺𑀕𑀡𑀯𑀦𑁆𑀢𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸𑀦𑀺 𑀯𑀻𑀲𑀢𑀺𑀢𑀸𑀧𑀲𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀅𑀧𑀭𑀪𑀸𑀕𑁂 ‘‘𑀓𑀲𑁆𑀲𑀧𑀓𑀼𑀫𑀸𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀲𑀧𑀭𑀺𑀯𑀸𑀭𑁄 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀓𑀲𑁆𑀲𑀧𑁄 𑀪𑀕𑀯𑀸 𑀫𑀸𑀖𑀧𑀼𑀡𑁆𑀡𑀫𑀸𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮. ‘‘𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀏𑀓𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁯. ‘‘𑀯𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄;

𑀅𑀢𑀺𑀓𑁆𑀓𑀦𑁆𑀢𑀪𑀯𑀦𑁆𑀢𑀸𑀦𑀁, 𑀳𑀺𑀭𑀺𑀲𑀻𑀮𑁂𑀦 𑀢𑀸𑀤𑀺𑀦’’𑀦𑁆𑀢𑀺.

𑀢𑀢𑁆𑀣 𑀅𑀢𑀺𑀓𑁆𑀓𑀦𑁆𑀢𑀪𑀯𑀦𑁆𑀢𑀸𑀦𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁, 𑀲𑀩𑁆𑀩𑁂𑀲𑀁 𑀔𑀻𑀡𑀸𑀲𑀯𑀸𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀳𑀺𑀭𑀺𑀲𑀻𑀮𑁂𑀦 𑀢𑀸𑀤𑀺𑀦𑀦𑁆𑀢𑀺 𑀳𑀺𑀭𑀺𑀬𑀸 𑀘 𑀲𑀻𑀮𑁂𑀦 𑀘 𑀲𑀤𑀺𑀲𑀸𑀦𑀁.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀪𑀽𑀫𑀺𑀬𑀜𑁆𑀘𑁂𑀯 𑀅𑀦𑁆𑀢𑀮𑀺𑀓𑁆𑀔𑁂 𑀘 𑀧𑀸𑀓𑀝𑁄 𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀳𑀸𑀬𑁄 𑀅𑀳𑁄𑀲𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀲𑀺. 𑀲𑁄𑀧𑀺 𑀢𑀁 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦. ‘‘𑀅𑀳𑀁 𑀢𑀤𑀸 𑀫𑀸𑀡𑀯𑀓𑁄, 𑀚𑁄𑀢𑀺𑀧𑀸𑀮𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁧. ‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄;

𑀪𑀽𑀫𑀦𑁆𑀢𑀮𑀺𑀓𑁆𑀔𑀓𑀼𑀲𑀮𑁄, 𑀓𑀢𑀯𑀺𑀚𑁆𑀚𑁄 𑀅𑀦𑀯𑀬𑁄.

𑁧𑁨. ‘‘𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄, 𑀖𑀝𑀺𑀓𑀸𑀭𑁄 𑀦𑀸𑀫𑀼𑀧𑀝𑁆𑀞𑀓𑁄;

𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄, 𑀦𑀺𑀩𑁆𑀩𑀼𑀢𑁄 𑀢𑀢𑀺𑀬𑁂 𑀨𑀮𑁂.

𑁧𑁩. ‘‘𑀆𑀤𑀸𑀬 𑀫𑀁 𑀖𑀝𑀻𑀓𑀸𑀭𑁄, 𑀉𑀧𑀕𑀜𑁆𑀙𑀺 𑀓𑀲𑁆𑀲𑀧𑀁 𑀚𑀺𑀦𑀁;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁪. ‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸, 𑀯𑀢𑁆𑀢𑀸𑀯𑀢𑁆𑀢𑁂𑀲𑀼 𑀓𑁄𑀯𑀺𑀤𑁄;

𑀦 𑀓𑁆𑀯𑀘𑀺 𑀧𑀭𑀺𑀳𑀸𑀬𑀸𑀫𑀺, 𑀧𑀽𑀭𑁂𑀲𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁫. ‘‘𑀬𑀸𑀯𑀢𑀸 𑀩𑀼𑀤𑁆𑀥𑀪𑀡𑀺𑀢𑀁, 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁬. ‘‘𑀫𑀫 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀲𑁄𑀧𑀺 𑀩𑀼𑀤𑁆𑀥𑁄 𑀯𑀺𑀬𑀸𑀓𑀭𑀺;

𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁭. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁩𑁦. ‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁩𑁧. ‘‘𑀏𑀯𑀫𑀳𑀁 𑀲𑀁𑀲𑀭𑀺𑀢𑁆𑀯𑀸, 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀅𑀦𑀸𑀘𑀭𑀁;

𑀤𑀼𑀓𑁆𑀓𑀭𑀜𑁆𑀘 𑀓𑀢𑀁 𑀫𑀬𑁆𑀳𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸’’𑀢𑀺.

𑀢𑀢𑁆𑀣 𑀪𑀽𑀫𑀦𑁆𑀢𑀮𑀺𑀓𑁆𑀔𑀓𑀼𑀲𑀮𑁄𑀢𑀺 𑀪𑀽𑀫𑀺𑀲𑀺𑀓𑁆𑀔𑀸𑀲𑀼 𑀘 𑀅𑀦𑁆𑀢𑀮𑀺𑀓𑁆𑀔𑁂𑀲𑀼 𑀘 𑀚𑁄𑀢𑀺𑀘𑀓𑁆𑀓𑀸𑀘𑀸𑀭𑁂 𑀚𑁄𑀢𑀺𑀯𑀺𑀚𑁆𑀚𑀸𑀬 𑀘 𑀓𑀼𑀲𑀮𑁄𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀓𑁄𑀢𑀺 𑀉𑀧𑀝𑁆𑀞𑀸𑀬𑀓𑁄. 𑀲𑀧𑁆𑀧𑀢𑀺𑀲𑁆𑀲𑁄𑀢𑀺 𑀲𑀧𑁆𑀧𑀢𑀺𑀲𑁆𑀲𑀬𑁄. 𑀦𑀺𑀩𑁆𑀩𑀼𑀢𑁄𑀢𑀺 𑀯𑀺𑀦𑀻𑀢𑁄, 𑀯𑀺𑀲𑁆𑀲𑀼𑀢𑁄 𑀯𑀸. 𑀢𑀢𑀺𑀬𑁂 𑀨𑀮𑁂𑀢𑀺 𑀦𑀺𑀫𑀺𑀢𑁆𑀢𑀲𑀢𑁆𑀢𑀫𑀻, 𑀢𑀢𑀺𑀬𑀨𑀮𑀸𑀥𑀺𑀕𑀫𑀳𑁂𑀢𑀼 𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑁄. 𑀆𑀤𑀸𑀬𑀸𑀢𑀺 𑀫𑀁 𑀕𑀳𑁂𑀢𑁆𑀯𑀸. 𑀯𑀢𑁆𑀢𑀸𑀯𑀢𑁆𑀢𑁂𑀲𑀽𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀫𑀳𑀸𑀯𑀢𑁆𑀢𑁂𑀲𑀼. 𑀓𑁄𑀯𑀺𑀤𑁄𑀢𑀺 𑀢𑁂𑀲𑀁 𑀧𑀽𑀭𑀡𑁂 𑀓𑀼𑀲𑀮𑁄. 𑀦 𑀓𑁆𑀯𑀘𑀺 𑀧𑀭𑀺𑀳𑀸𑀬𑀸𑀫𑀻𑀢𑀺 𑀓𑁆𑀯𑀘𑀺𑀧𑀺 𑀲𑀻𑀮𑁂𑀲𑀼 𑀯𑀸 𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀆𑀤𑀻𑀲𑀼 𑀯𑀸 𑀓𑀢𑁆𑀣𑀘𑀺 𑀓𑀼𑀢𑁄𑀧𑀺 𑀦 𑀧𑀭𑀺𑀳𑀸𑀬𑀸𑀫𑀺, 𑀲𑀩𑁆𑀩𑀢𑁆𑀣 𑀫𑁂 𑀧𑀭𑀺𑀳𑀸𑀦𑀺 𑀦𑀸𑀫 𑀦 𑀯𑀺𑀚𑁆𑀚𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀦 𑀓𑁄𑀘𑀺 𑀧𑀭𑀺𑀳𑀸𑀬𑀸𑀫𑀻’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄.

𑀬𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀫𑁂𑀢𑀁, 𑀬𑀸𑀯𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀪𑀡𑀺𑀢𑀦𑁆𑀢𑀺 𑀩𑀼𑀤𑁆𑀥𑀯𑀘𑀦𑀁. 𑀲𑁄𑀪𑀬𑀺𑀦𑁆𑀢𑀺 𑀲𑁄𑀪𑁂𑀲𑀺𑀁 𑀧𑀓𑀸𑀲𑁂𑀲𑀺𑀁. 𑀫𑀫 𑀅𑀘𑁆𑀙𑀭𑀺𑀬𑀦𑁆𑀢𑀺 𑀫𑀫 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀁 𑀓𑀲𑁆𑀲𑀧𑁄 𑀪𑀕𑀯𑀸 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀁𑀲𑀭𑀺𑀢𑁆𑀯𑀸𑀢𑀺 𑀲𑀁𑀲𑀸𑀭𑁂 𑀲𑀁𑀲𑀭𑀺𑀢𑁆𑀯𑀸. 𑀅𑀦𑀸𑀘𑀭𑀦𑁆𑀢𑀺 𑀅𑀦𑀸𑀘𑀸𑀭𑀁 𑀅𑀓𑀢𑁆𑀢𑀩𑁆𑀩𑀁, 𑀅𑀓𑀭𑀡𑀻𑀬𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀚𑀸𑀢𑀦𑀕𑀭𑀁 𑀩𑀸𑀭𑀸𑀡𑀲𑀻 𑀦𑀸𑀫 𑀅𑀳𑁄𑀲𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀧𑀭𑀫𑀕𑀼𑀡𑀯𑀢𑀻 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀦𑀼𑀴𑀸 𑀘 𑀉𑀭𑀼𑀯𑁂𑀴𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀯𑀻𑀲𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀼𑀦𑀦𑁆𑀤𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀯𑀺𑀚𑀺𑀢𑀲𑁂𑀦𑁄 𑀦𑀸𑀫 𑀧𑀼𑀢𑁆𑀢𑁄, 𑀧𑀸𑀲𑀸𑀤𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁨. ‘‘𑀦𑀕𑀭𑀁 𑀩𑀸𑀭𑀸𑀡𑀲𑀻 𑀦𑀸𑀫, 𑀓𑀺𑀓𑀻 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀯𑀲𑀢𑁂 𑀢𑀢𑁆𑀣 𑀦𑀕𑀭𑁂, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁.

𑁩𑁩. ‘‘𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀤𑀢𑁆𑀢𑁄𑀯, 𑀆𑀲𑀺 𑀩𑀼𑀤𑁆𑀥𑀲𑁆𑀲 𑀲𑁄 𑀧𑀺𑀢𑀸;

𑀥𑀦𑀯𑀢𑀻 𑀦𑀸𑀫 𑀚𑀦𑀺𑀓𑀸, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁮. ‘‘𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁯. ‘‘𑀅𑀦𑀼𑀴𑀸 𑀉𑀭𑀼𑀯𑁂𑀴𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀦𑀺𑀕𑁆𑀭𑁄𑀥𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁪𑁧. ‘‘𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀯𑀻𑀲𑀢𑀺𑀭𑀢𑀦𑀼𑀕𑁆𑀕𑀢𑁄;

𑀯𑀺𑀚𑁆𑀚𑀼𑀮𑀝𑁆𑀞𑀻𑀯 𑀆𑀓𑀸𑀲𑁂, 𑀘𑀦𑁆𑀤𑁄𑀯 𑀕𑀳𑀧𑀽𑀭𑀺𑀢𑁄.

𑁪𑁨. ‘‘𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁪𑁩. ‘‘𑀥𑀫𑁆𑀫𑀢𑀴𑀸𑀓𑀁 𑀫𑀸𑀧𑀬𑀺𑀢𑁆𑀯𑀸, 𑀲𑀻𑀮𑀁 𑀤𑀢𑁆𑀯𑀸 𑀯𑀺𑀮𑁂𑀧𑀦𑀁;

𑀥𑀫𑁆𑀫𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀥𑀫𑁆𑀫𑀫𑀸𑀮𑀁 𑀯𑀺𑀪𑀚𑁆𑀚𑀺𑀬.

𑁪𑁪. ‘‘𑀥𑀫𑁆𑀫𑀯𑀺𑀫𑀮𑀫𑀸𑀤𑀸𑀲𑀁, 𑀞𑀧𑀬𑀺𑀢𑁆𑀯𑀸 𑀫𑀳𑀸𑀚𑀦𑁂;

𑀓𑁂𑀘𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑀸, 𑀧𑀲𑁆𑀲𑀦𑁆𑀢𑀼 𑀫𑁂 𑀅𑀮𑀗𑁆𑀓𑀭𑀁.

𑁪𑁫. ‘‘𑀲𑀻𑀮𑀓𑀜𑁆𑀘𑀼𑀓𑀁 𑀤𑀢𑁆𑀯𑀸𑀦, 𑀛𑀸𑀦𑀓𑀯𑀘𑀯𑀫𑁆𑀫𑀺𑀢𑀁;

𑀥𑀫𑁆𑀫𑀘𑀫𑁆𑀫𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀤𑀢𑁆𑀯𑀸 𑀲𑀦𑁆𑀦𑀸𑀳𑀫𑀼𑀢𑁆𑀢𑀫𑀁.

𑁪𑁬. ‘‘𑀲𑀢𑀺𑀨𑀮𑀓𑀁 𑀤𑀢𑁆𑀯𑀸𑀦, 𑀢𑀺𑀔𑀺𑀡𑀁 𑀜𑀸𑀡𑀓𑀼𑀦𑁆𑀢𑀺𑀫𑀁;

𑀥𑀫𑁆𑀫𑀔𑀕𑁆𑀕𑀯𑀭𑀁 𑀤𑀢𑁆𑀯𑀸, 𑀲𑀻𑀮𑀲𑀁𑀲𑀕𑁆𑀕𑀫𑀤𑁆𑀤𑀦𑀁.

𑁪𑁭. ‘‘𑀢𑁂𑀯𑀺𑀚𑁆𑀚𑀸𑀪𑀽𑀲𑀦𑀁 𑀤𑀢𑁆𑀯𑀸𑀦, 𑀆𑀯𑁂𑀴𑀁 𑀘𑀢𑀼𑀭𑁄 𑀨𑀮𑁂;

𑀙𑀴𑀪𑀺𑀜𑁆𑀜𑀸𑀪𑀭𑀡𑀁 𑀤𑀢𑁆𑀯𑀸, 𑀥𑀫𑁆𑀫𑀧𑀼𑀧𑁆𑀨𑀧𑀺𑀴𑀦𑁆𑀥𑀦𑀁.

𑁪𑁮. ‘‘𑀲𑀤𑁆𑀥𑀫𑁆𑀫𑀧𑀡𑁆𑀟𑀭𑀘𑁆𑀙𑀢𑁆𑀢𑀁, 𑀤𑀢𑁆𑀯𑀸 𑀧𑀸𑀧𑀦𑀺𑀯𑀸𑀭𑀡𑀁;

𑀫𑀸𑀧𑀬𑀺𑀢𑁆𑀯𑀸𑀪𑀬𑀁 𑀧𑀼𑀧𑁆𑀨𑀁, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁪𑁯. ‘‘𑀏𑀲𑁄 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄;

𑀏𑀲𑁄 𑀳𑀺 𑀥𑀫𑁆𑀫𑀭𑀢𑀦𑁄, 𑀲𑁆𑀯𑀸𑀓𑁆𑀔𑀸𑀢𑁄 𑀏𑀳𑀺𑀧𑀲𑁆𑀲𑀺𑀓𑁄.

𑁫𑁦. ‘‘𑀏𑀲𑁄 𑀳𑀺 𑀲𑀗𑁆𑀖𑀭𑀢𑀦𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀢𑁆𑀢𑀭𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀯𑀺𑀚𑁆𑀚𑀼𑀮𑀝𑁆𑀞𑀻𑀯𑀸𑀢𑀺 𑀖𑀦𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬. 𑀘𑀦𑁆𑀤𑁄𑀯 𑀕𑀳𑀧𑀽𑀭𑀺𑀢𑁄𑀢𑀺 𑀧𑀭𑀺𑀯𑁂𑀲𑀕𑀳𑀧𑀭𑀺𑀓𑁆𑀔𑀺𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬. 𑀥𑀫𑁆𑀫𑀢𑀴𑀸𑀓𑀁 𑀫𑀸𑀧𑀬𑀺𑀢𑁆𑀯𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀢𑀴𑀸𑀓𑀁 𑀫𑀸𑀧𑀬𑀺𑀢𑁆𑀯𑀸. 𑀲𑀻𑀮𑀁 𑀤𑀢𑁆𑀯𑀸 𑀯𑀺𑀮𑁂𑀧𑀦𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀯𑀺𑀪𑀽𑀲𑀦𑀢𑁆𑀣𑀁 𑀯𑀺𑀮𑁂𑀧𑀦𑀁 𑀤𑀢𑁆𑀯𑀸. 𑀥𑀫𑁆𑀫𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀝𑀓𑀬𑀼𑀕𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀥𑀫𑁆𑀫𑀫𑀸𑀮𑀁 𑀯𑀺𑀪𑀚𑁆𑀚𑀺𑀬𑀸𑀢𑀺 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀓𑀼𑀲𑀼𑀫𑀫𑀸𑀮𑀁 𑀯𑀺𑀪𑀚𑀺𑀢𑁆𑀯𑀸. 𑀯𑀺𑀤𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀯𑀺𑀫𑀮𑀫𑀸𑀤𑀸𑀲𑀦𑁆𑀢𑀺 𑀯𑀺𑀫𑀮𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑀁 𑀆𑀤𑀸𑀲𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀲𑀮𑁆𑀮𑀓𑁆𑀔𑀡𑀢𑁆𑀣𑀁 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀢𑀴𑀸𑀓𑀢𑀻𑀭𑁂 𑀥𑀫𑁆𑀫𑀸𑀤𑀸𑀲𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀚𑀦𑁂𑀢𑀺 𑀫𑀳𑀸𑀚𑀦𑀲𑁆𑀲. 𑀓𑁂𑀘𑀻𑀢𑀺 𑀬𑁂 𑀓𑁂𑀘𑀺. 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀫𑀮𑀯𑀺𑀮𑀬𑀓𑀭𑀁 𑀅𑀫𑀢𑀫𑀲𑀗𑁆𑀔𑀢𑀫𑀦𑀻𑀢𑀺𑀓𑀁 𑀧𑀭𑀫𑀲𑀦𑁆𑀢𑀁 𑀅𑀘𑁆𑀘𑀼𑀢𑀺𑀭𑀲𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑁂 𑀇𑀫𑀁 𑀅𑀮𑀗𑁆𑀓𑀸𑀭𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀫𑀬𑀸 𑀤𑀲𑁆𑀲𑀺𑀢𑀁 𑀧𑀲𑁆𑀲𑀦𑁆𑀢𑀽𑀢𑀺 𑀅𑀢𑁆𑀣𑁄. ‘‘𑀦𑀺𑀩𑁆𑀩𑀸𑀦𑀫𑀪𑀺𑀧𑀢𑁆𑀣𑁂𑀦𑁆𑀢𑀸, 𑀧𑀲𑁆𑀲𑀦𑁆𑀢𑀼 𑀫𑀁 𑀅𑀮𑀗𑁆𑀓𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀅𑀮𑀗𑁆𑀓𑀭𑀦𑁆𑀢𑀺 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀻𑀮𑀓𑀜𑁆𑀘𑀼𑀓𑀁 𑀤𑀢𑁆𑀯𑀸𑀦𑀸𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀬𑀁 𑀓𑀜𑁆𑀘𑀼𑀓𑀁 𑀤𑀢𑁆𑀯𑀸. 𑀛𑀸𑀦𑀓𑀯𑀘𑀯𑀫𑁆𑀫𑀺𑀢𑀦𑁆𑀢𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀓𑀯𑀘𑀩𑀦𑁆𑀥𑀁 𑀩𑀦𑁆𑀥𑀺𑀢𑁆𑀯𑀸. 𑀥𑀫𑁆𑀫𑀘𑀫𑁆𑀫𑀁 𑀧𑀸𑀭𑀼𑀧𑀺𑀢𑁆𑀯𑀸𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑀥𑀫𑁆𑀫𑀘𑀫𑁆𑀫𑀁 𑀧𑀸𑀭𑀼𑀧𑀺𑀢𑁆𑀯𑀸. 𑀤𑀢𑁆𑀯𑀸 𑀲𑀦𑁆𑀦𑀸𑀳𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀲𑀦𑁆𑀦𑀸𑀳𑀁 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀨𑀮𑀓𑀁 𑀤𑀢𑁆𑀯𑀸𑀦𑀸𑀢𑀺 𑀭𑀸𑀕𑀸𑀤𑀺𑀤𑁄𑀲𑀸𑀭𑀺𑀧𑀸𑀧𑀦𑀺𑀯𑀸𑀭𑀡𑀢𑁆𑀣𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀨𑀮𑀓𑀦𑀺𑀯𑀸𑀭𑀡𑀁 𑀤𑀢𑁆𑀯𑀸. 𑀢𑀺𑀔𑀺𑀡𑀁 𑀜𑀸𑀡𑀓𑀼𑀦𑁆𑀢𑀺𑀫𑀦𑁆𑀢𑀺 𑀧𑀝𑀺𑀯𑁂𑀥𑀲𑀫𑀢𑁆𑀣𑀁 𑀢𑀺𑀔𑀺𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀓𑀼𑀦𑁆𑀢𑀯𑀦𑁆𑀢𑀁, 𑀯𑀺𑀧𑀲𑁆𑀲𑀦𑀸𑀜𑀸𑀡𑀦𑀺𑀲𑀺𑀢𑀓𑀼𑀦𑁆𑀢𑀯𑀭𑀦𑁆𑀢𑀺 𑀅𑀢𑁆𑀣𑁄, 𑀓𑀺𑀮𑁂𑀲𑀩𑀮𑀦𑀺𑀥𑀦𑀓𑀭𑀲𑀫𑀢𑁆𑀣𑀁 𑀯𑀸 𑀬𑁄𑀕𑀸𑀯𑀘𑀭𑀬𑁄𑀥𑀯𑀭𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀔𑀕𑁆𑀕𑀯𑀭𑀁 𑀤𑀢𑁆𑀯𑀸𑀢𑀺 𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀯𑀻𑀭𑀺𑀬𑀼𑀧𑀮𑀢𑀮𑀦𑀺𑀲𑀺𑀢𑀥𑀸𑀭𑀁 𑀫𑀕𑁆𑀕𑀧𑀜𑁆𑀜𑀸𑀯𑀭𑀔𑀕𑁆𑀕𑀁 𑀤𑀢𑁆𑀯𑀸. 𑀲𑀻𑀮𑀲𑀁𑀲𑀕𑁆𑀕𑀫𑀤𑁆𑀤𑀦𑀦𑁆𑀢𑀺 𑀅𑀭𑀺𑀬𑀁 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀓𑀺𑀮𑁂𑀲𑀲𑀁𑀲𑀕𑁆𑀕𑀫𑀤𑁆𑀤𑀦𑀢𑁆𑀣𑀸𑀬, 𑀓𑀺𑀮𑁂𑀲𑀦𑀺𑀖𑀸𑀢𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀢𑁂𑀯𑀺𑀚𑁆𑀚𑀸𑀪𑀽𑀲𑀦𑀁 𑀤𑀢𑁆𑀯𑀸𑀢𑀺 𑀢𑁂𑀯𑀺𑀚𑁆𑀚𑀸𑀫𑀬𑀁 𑀯𑀺𑀪𑀽𑀲𑀦𑀁 𑀤𑀢𑁆𑀯𑀸. 𑀆𑀯𑁂𑀴𑀁 𑀘𑀢𑀼𑀭𑁄 𑀨𑀮𑁂𑀢𑀺 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀯𑀝𑀁𑀲𑀓𑀁 𑀓𑀢𑁆𑀯𑀸. 𑀙𑀴𑀪𑀺𑀜𑁆𑀜𑀸𑀪𑀭𑀡𑀦𑁆𑀢𑀺 𑀆𑀪𑀭𑀡𑀢𑁆𑀣𑀸𑀬 𑀅𑀮𑀗𑁆𑀓𑀸𑀭𑀓𑀭𑀡𑀢𑁆𑀣𑀸𑀬 𑀙 𑀅𑀪𑀺𑀜𑁆𑀜𑀸𑀬𑁄 𑀤𑀢𑁆𑀯𑀸. 𑀥𑀫𑁆𑀫𑀧𑀼𑀧𑁆𑀨𑀧𑀺𑀴𑀦𑁆𑀥𑀦𑀦𑁆𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀗𑁆𑀔𑀸𑀢𑀁 𑀓𑀼𑀲𑀼𑀫𑀫𑀸𑀮𑀁 𑀓𑀢𑁆𑀯𑀸. 𑀲𑀤𑁆𑀥𑀫𑁆𑀫𑀧𑀡𑁆𑀟𑀭𑀘𑁆𑀙𑀢𑁆𑀢𑀁, 𑀤𑀢𑁆𑀯𑀸 𑀧𑀸𑀧𑀦𑀺𑀯𑀸𑀭𑀡𑀦𑁆𑀢𑀺 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀁 𑀯𑀺𑀫𑀼𑀢𑁆𑀢𑀺𑀲𑁂𑀢𑀘𑁆𑀙𑀢𑁆𑀢𑀁 𑀲𑀩𑁆𑀩𑀸𑀓𑀼𑀲𑀮𑀸𑀢𑀧𑀦𑀺𑀯𑀸𑀭𑀡𑀁 𑀤𑀢𑁆𑀯𑀸. 𑀫𑀸𑀧𑀬𑀺𑀢𑁆𑀯𑀸𑀪𑀬𑀁 𑀧𑀼𑀧𑁆𑀨𑀦𑁆𑀢𑀺 𑀅𑀪𑀬𑀧𑀼𑀭𑀕𑀸𑀫𑀺𑀦𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀁 𑀧𑀼𑀧𑁆𑀨𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀓𑀲𑁆𑀲𑀧𑁄 𑀓𑀺𑀭 𑀪𑀕𑀯𑀸 𑀓𑀸𑀲𑀺𑀭𑀝𑁆𑀞𑁂 𑀲𑁂𑀢𑀩𑁆𑀬𑀦𑀕𑀭𑁂 𑀲𑁂𑀢𑀩𑁆𑀬𑀼𑀬𑁆𑀬𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀥𑀸𑀢𑀼𑀬𑁄 𑀓𑀺𑀭𑀲𑁆𑀲 𑀦 𑀯𑀺𑀓𑀺𑀭𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑁂𑀓𑀁 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑁄𑀝𑀺𑀅𑀕𑁆𑀖𑀦𑀓𑀁 𑀭𑀢𑀦𑀯𑀺𑀘𑀺𑀢𑁆𑀢𑀁 𑀩𑀳𑀺𑀘𑀺𑀦𑀦𑀢𑁆𑀣𑀁 𑀏𑀓𑁂𑀓𑀁 𑀅𑀟𑁆𑀠𑀓𑁄𑀝𑀺𑀅𑀕𑁆𑀖𑀦𑀓𑀁 𑀅𑀩𑁆𑀪𑀦𑁆𑀢𑀭𑀧𑀽𑀭𑀡𑀢𑁆𑀣𑀁 𑀫𑀦𑁄𑀲𑀺𑀮𑀸𑀬 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀢𑁂𑀮𑁂𑀦 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀬𑁄𑀚𑀦𑀼𑀩𑁆𑀩𑁂𑀥𑀁 𑀣𑀽𑀧𑀫𑀓𑀁𑀲𑀼.

‘‘𑀓𑀲𑁆𑀲𑀧𑁄𑀧𑀺 𑀪𑀕𑀯𑀸 𑀓𑀢𑀓𑀺𑀘𑁆𑀘𑁄, 𑀲𑀩𑁆𑀩𑀲𑀢𑁆𑀢𑀳𑀺𑀢𑀫𑁂𑀯 𑀓𑀭𑁄𑀦𑁆𑀢𑁄;

𑀓𑀸𑀲𑀺𑀭𑀸𑀚𑀦𑀕𑀭𑁂 𑀫𑀺𑀕𑀤𑀸𑀬𑁂, 𑀮𑁄𑀓𑀦𑀦𑁆𑀤𑀦𑀓𑀭𑁄 𑀦𑀺𑀯𑀲𑀻’’𑀢𑀺.

𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀇𑀢𑀺 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀸 𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸𑀬

𑀓𑀲𑁆𑀲𑀧𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀢𑁆𑀢𑀸𑀯𑀢𑀸 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.