𑁨𑁫. 𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀓𑀓𑀼𑀲𑀦𑁆𑀥𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀲𑀸𑀲𑀦𑁂 𑀘 𑀅𑀦𑁆𑀢𑀭𑀳𑀺𑀢𑁂 𑀲𑀢𑁆𑀢𑁂𑀲𑀼 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀧𑀭𑀳𑀺𑀢𑀓𑁄𑀡𑀸𑀕𑀫𑀦𑁄 𑀓𑁄𑀡𑀸𑀕𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀅𑀣 𑀯𑀸 𑀓𑀦𑀓𑀸𑀕𑀫𑀦𑀢𑁄 𑀓𑁄𑀡𑀸𑀕𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀢𑁆𑀣 𑀓-𑀓𑀸𑀭𑀲𑁆𑀲 𑀓𑁄𑀆𑀤𑁂𑀲𑀁 𑀓𑀢𑁆𑀯𑀸 𑀦-𑀓𑀸𑀭𑀲𑁆𑀲 𑀡𑀸𑀤𑁂𑀲𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀓-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀓𑀦𑀓𑀲𑁆𑀲 𑀓𑀦𑀓𑀸𑀤𑀺𑀆𑀪𑀭𑀡𑀲𑁆𑀲 𑀆𑀕𑀫𑀦𑀁 𑀧𑀯𑀲𑁆𑀲𑀦𑀁 𑀬𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀓𑀸𑀮𑁂 𑀲𑁄 𑀓𑁄𑀡𑀸𑀕𑀫𑀦𑁄 𑀦𑀸𑀫. 𑀏𑀢𑁆𑀣 𑀧𑀦 𑀆𑀬𑀼 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀻𑀦𑀲𑀤𑀺𑀲𑀁 𑀓𑀢𑀁, 𑀦 𑀏𑀯𑀁 𑀧𑀭𑀺𑀳𑀻𑀦𑀁, 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀁 𑀧𑀦 𑀆𑀬𑀼 𑀧𑀭𑀺𑀳𑀸𑀬𑀫𑀸𑀦𑀁 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀢𑁆𑀯𑀸 𑀢𑀢𑁄 𑀧𑀭𑀺𑀳𑀸𑀬𑀫𑀸𑀦𑀁 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀞𑀺𑀢𑀁, 𑀢𑀤𑀸 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑁄𑀪𑀯𑀢𑀻𑀦𑀕𑀭𑁂 𑀬𑀜𑁆𑀜𑀤𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀭𑀽𑀧𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀦𑀼𑀢𑁆𑀢𑀭𑀸𑀬 𑀉𑀢𑁆𑀢𑀭𑀸𑀬 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀼𑀪𑀯𑀢𑀻𑀉𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀚𑀸𑀬𑀫𑀸𑀦𑁂 𑀧𑀦 𑀢𑀲𑁆𑀫𑀺𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑁄 𑀓𑀦𑀓𑀯𑀲𑁆𑀲𑀁 𑀯𑀲𑁆𑀲𑀺. 𑀢𑁂𑀦𑀲𑁆𑀲 𑀓𑀦𑀓𑀸𑀕𑀫𑀦𑀓𑀸𑀭𑀡𑀢𑁆𑀢𑀸 ‘‘𑀓𑀦𑀓𑀸𑀕𑀫𑀦𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑀁 𑀧𑀦𑀲𑁆𑀲 𑀦𑀸𑀫𑀁 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀡𑀫𑀫𑀸𑀦𑀁 𑀓𑁄𑀡𑀸𑀕𑀫𑀦𑁄’’𑀢𑀺 𑀚𑀸𑀢𑀁. 𑀲𑁄 𑀧𑀦 𑀢𑀻𑀡𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀼𑀲𑀺𑀢-𑀲𑀦𑁆𑀢𑀼𑀲𑀺𑀢-𑀲𑀦𑁆𑀢𑀼𑀝𑁆𑀞𑀦𑀸𑀫𑀓𑀸 𑀧𑀦𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀭𑀼𑀘𑀺𑀕𑀢𑁆𑀢𑀸𑀩𑁆𑀭𑀸𑀳𑁆𑀫𑀡𑀻𑀧𑀫𑀼𑀔𑀸𑀦𑀺 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀭𑀼𑀘𑀺𑀕𑀢𑁆𑀢𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀢𑁆𑀣𑀯𑀸𑀳𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀳𑀢𑁆𑀣𑀺𑀬𑀸𑀦𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀢𑀺𑀁𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀙 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀅𑀕𑁆𑀕𑀺𑀲𑁄𑀦𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸𑀬 𑀅𑀕𑁆𑀕𑀺𑀲𑁄𑀦𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀺𑀬𑀸 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀔𑀤𑀺𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀚𑀝𑀸𑀢𑀺𑀦𑁆𑀤𑀼𑀓𑁂𑀦 𑀦𑀸𑀫 𑀬𑀯𑀧𑀸𑀮𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀉𑀤𑀼𑀫𑁆𑀩𑀭𑀩𑁄𑀥𑀺𑀁 𑀧𑀼𑀡𑁆𑀟𑀭𑀻𑀓𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀨𑀮𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀤𑀓𑁆𑀔𑀺𑀡𑀢𑁄 𑀉𑀧𑀕𑀦𑁆𑀢𑁆𑀯𑀸 𑀯𑀻𑀲𑀢𑀺𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀫𑀸𑀭𑀩𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀤𑀲𑀩𑀮𑀜𑀸𑀡𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑀕𑀦𑀧𑀣𑁂𑀦 𑀕𑀦𑁆𑀢𑁆𑀯𑀸 𑀲𑀼𑀤𑀲𑁆𑀲𑀦𑀦𑀕𑀭𑀲𑀫𑀻𑀧𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀑𑀢𑀭𑀺𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑀤𑀸 𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 𑀲𑀼𑀦𑁆𑀤𑀭𑀦𑀕𑀭𑀤𑁆𑀯𑀸𑀭𑁂 𑀫𑀳𑀸𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀯𑀻𑀲𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀉𑀢𑁆𑀢𑀭𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸𑀦𑀁 𑀲𑀫𑀸𑀕𑀢𑀸𑀦𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀦𑁆𑀢𑁂 𑀪𑀕𑀯𑀢𑀺 𑀤𑀲𑀦𑁆𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧. ‘‘𑀓𑀓𑀼𑀲𑀦𑁆𑀥𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑁄𑀡𑀸𑀕𑀫𑀦𑁄 𑀦𑀸𑀫 𑀚𑀺𑀦𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄.

𑁨. ‘‘𑀤𑀲 𑀥𑀫𑁆𑀫𑁂 𑀧𑀽𑀭𑀬𑀺𑀢𑁆𑀯𑀸𑀦, 𑀓𑀦𑁆𑀢𑀸𑀭𑀁 𑀲𑀫𑀢𑀺𑀓𑁆𑀓𑀫𑀺;

𑀧𑀯𑀸𑀳𑀺𑀬 𑀫𑀮𑀁 𑀲𑀩𑁆𑀩𑀁, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. ‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑁄𑀡𑀸𑀕𑀫𑀦𑀦𑀸𑀬𑀓𑁂;

𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. ‘‘𑀧𑀸𑀝𑀺𑀳𑀻𑀭𑀁 𑀓𑀭𑁄𑀦𑁆𑀢𑁂 𑀘, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑁂;

𑀯𑀻𑀲𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. ‘‘𑀢𑀢𑁄 𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀚𑀺𑀦𑁄 𑀤𑁂𑀯𑀧𑀼𑀭𑀁 𑀕𑀢𑁄;

𑀯𑀲𑀢𑁂 𑀢𑀢𑁆𑀣 𑀲𑀫𑁆𑀩𑀼𑀤𑁆𑀥𑁄, 𑀲𑀺𑀮𑀸𑀬 𑀧𑀡𑁆𑀟𑀼𑀓𑀫𑁆𑀩𑀮𑁂.

𑁬. ‘‘𑀧𑀓𑀭𑀡𑁂 𑀲𑀢𑁆𑀢 𑀤𑁂𑀲𑁂𑀦𑁆𑀢𑁄, 𑀯𑀲𑁆𑀲𑀁 𑀯𑀲𑀢𑀺 𑀲𑁄 𑀫𑀼𑀦𑀺;

𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀤𑀲 𑀥𑀫𑁆𑀫𑁂 𑀧𑀽𑀭𑀬𑀺𑀢𑁆𑀯𑀸𑀦𑀸𑀢𑀺 𑀤𑀲 𑀧𑀸𑀭𑀫𑀺𑀥𑀫𑁆𑀫𑁂 𑀧𑀽𑀭𑀬𑀺𑀢𑁆𑀯𑀸. 𑀓𑀦𑁆𑀢𑀸𑀭𑀁 𑀲𑀫𑀢𑀺𑀓𑁆𑀓𑀫𑀻𑀢𑀺 𑀚𑀸𑀢𑀺𑀓𑀦𑁆𑀢𑀸𑀭𑀁 𑀲𑀫𑀢𑀺𑀓𑁆𑀓𑀫𑀺. 𑀧𑀯𑀸𑀳𑀺𑀬𑀸𑀢𑀺 𑀧𑀯𑀸𑀳𑁂𑀢𑁆𑀯𑀸. 𑀫𑀮𑀁 𑀲𑀩𑁆𑀩𑀦𑁆𑀢𑀺 𑀭𑀸𑀕𑀸𑀤𑀺𑀫𑀮𑀢𑁆𑀢𑀬𑀁. 𑀧𑀸𑀝𑀺𑀳𑀻𑀭𑀁 𑀓𑀭𑁄𑀦𑁆𑀢𑁂 𑀘, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑁂𑀢𑀺 𑀧𑀭𑀯𑀸𑀤𑀺𑀯𑀸𑀤𑀧𑁆𑀧𑀫𑀤𑁆𑀤𑀦𑁂, 𑀪𑀕𑀯𑀢𑀺 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀯𑀺𑀓𑀼𑀩𑁆𑀩𑀦𑀦𑁆𑀢𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀁, 𑀲𑀼𑀦𑁆𑀤𑀭𑀦𑀕𑀭𑀤𑁆𑀯𑀸𑀭𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑀁 𑀕𑀢𑁄 𑀢𑀢𑁆𑀣 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑀺. 𑀓𑀣𑀁 𑀯𑀲𑀻𑀢𑀺? 𑀧𑀓𑀭𑀡𑁂 𑀲𑀢𑁆𑀢 𑀤𑁂𑀲𑁂𑀦𑁆𑀢𑁄𑀢𑀺 𑀢𑀢𑁆𑀣 𑀤𑁂𑀯𑀸𑀦𑀁 𑀲𑀢𑁆𑀢𑀧𑁆𑀧𑀓𑀭𑀡𑀲𑀗𑁆𑀔𑀸𑀢𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀦𑁆𑀢𑁄 𑀯𑀲𑀺. 𑀏𑀯𑀁 𑀢𑀢𑁆𑀣 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀪𑀕𑀯𑀢𑀺 𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀤𑁂𑀯𑀸𑀦𑀁 𑀅𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀲𑀼𑀤𑁆𑀥𑀧𑀸𑀭𑀫𑀺𑀧𑀽𑀭𑀡𑀸𑀕𑀫𑀦𑀲𑁆𑀲 𑀓𑁄𑀡𑀸𑀕𑀫𑀦𑀲𑁆𑀲𑀧𑀺 𑀏𑀓𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀲𑀼𑀭𑀺𑀦𑁆𑀤𑀯𑀢𑀻𑀦𑀕𑀭𑁂 𑀲𑀼𑀭𑀺𑀦𑁆𑀤𑀯𑀢𑀼𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁄 𑀪𑀺𑀬𑁆𑀬𑀲𑀲𑁆𑀲 𑀭𑀸𑀚𑀧𑀼𑀢𑁆𑀢𑀲𑁆𑀲 𑀘 𑀉𑀢𑁆𑀢𑀭𑀲𑁆𑀲 𑀘 𑀭𑀸𑀚𑀧𑀼𑀢𑁆𑀢𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀺𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑁂𑀯 𑀢𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀫𑀸𑀖𑀧𑀼𑀡𑁆𑀡𑀫𑀸𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭. ‘‘𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀏𑀓𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. ‘‘𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄;

𑀑𑀖𑀸𑀦𑀫𑀢𑀺𑀓𑁆𑀓𑀦𑁆𑀢𑀸𑀦𑀁, 𑀪𑀺𑀚𑁆𑀚𑀺𑀢𑀸𑀦𑀜𑁆𑀘 𑀫𑀘𑁆𑀘𑀼𑀬𑀸’’𑀢𑀺.

𑀢𑀢𑁆𑀣 𑀑𑀖𑀸𑀦𑀦𑁆𑀢𑀺 𑀓𑀸𑀫𑁄𑀖𑀸𑀤𑀻𑀦𑀁, 𑀘𑀢𑀼𑀦𑁆𑀦𑀫𑁄𑀖𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀲𑁆𑀲 𑀧𑀦 𑀢𑁂 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸, 𑀢𑁂𑀲𑀁 𑀑𑀖𑀸𑀦𑀁, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀼𑀩𑁆𑀩𑀺𑀥𑁂 𑀑𑀖𑁂 𑀅𑀢𑀺𑀓𑁆𑀓𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀚𑁆𑀚𑀺𑀢𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀘𑁆𑀘𑀼𑀬𑀸𑀢𑀺 𑀫𑀘𑁆𑀘𑀼𑀦𑁄.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀫𑀺𑀣𑀺𑀮𑀦𑀕𑀭𑁂 𑀧𑀩𑁆𑀩𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀤𑀸 ‘‘𑀲𑀭𑀡𑀕𑀢𑀲𑀩𑁆𑀩𑀧𑀸𑀡𑀸𑀕𑀫𑀦𑀁 𑀓𑁄𑀡𑀸𑀕𑀫𑀦𑀁 𑀫𑀺𑀣𑀺𑀮𑀦𑀕𑀭𑀫𑀦𑀼𑀧𑁆𑀧𑀢𑁆𑀢’’𑀦𑁆𑀢𑀺 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀬𑀸𑀘𑀺𑀢𑁆𑀯𑀸 𑀢𑁂𑀫𑀸𑀲𑀁 𑀲𑀲𑀸𑀯𑀓𑀲𑀗𑁆𑀖𑀁 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀢𑁆𑀢𑀼𑀡𑁆𑀡𑀘𑀻𑀦𑀧𑀝𑁆𑀝𑀓𑀫𑁆𑀩𑀮𑀓𑁄𑀲𑁂𑀬𑁆𑀬𑀤𑀼𑀓𑀽𑀮𑀓𑀧𑁆𑀧𑀸𑀲𑀺𑀓𑀸𑀤𑀻𑀦𑀺 𑀫𑀳𑀕𑁆𑀖𑀸𑀦𑀺 𑀘𑁂𑀯 𑀲𑀼𑀔𑀼𑀫𑀯𑀢𑁆𑀣𑀸𑀦𑀺 𑀘 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀘𑁂𑀯 𑀅𑀜𑁆𑀜𑀜𑁆𑀘 𑀩𑀳𑀼𑀧𑀭𑀺𑀓𑁆𑀔𑀸𑀭𑀫𑀤𑀸𑀲𑀺. 𑀲𑁄𑀧𑀺 𑀦𑀁 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀲𑁄 𑀫𑀳𑀸𑀧𑀼𑀭𑀺𑀲𑁄 𑀢𑀲𑁆𑀲 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯. ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀧𑀩𑁆𑀩𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀅𑀦𑀦𑁆𑀢𑀩𑀮𑀯𑀸𑀳𑀦𑁄.

𑁧𑁦. ‘‘𑀲𑀫𑁆𑀩𑀼𑀤𑁆𑀥𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸, 𑀲𑀼𑀢𑁆𑀯𑀸 𑀥𑀫𑁆𑀫𑀫𑀦𑀼𑀢𑁆𑀢𑀭𑀁;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀚𑀺𑀦𑀲𑀗𑁆𑀖𑀁, 𑀤𑀸𑀦𑀁 𑀤𑀢𑁆𑀯𑀸 𑀬𑀤𑀺𑀘𑁆𑀙𑀓𑀁.

𑁧𑁧. ‘‘𑀧𑀢𑁆𑀢𑀼𑀡𑁆𑀡𑀁 𑀘𑀻𑀦𑀧𑀝𑁆𑀝𑀜𑁆𑀘, 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀫𑁆𑀧𑀺 𑀘;

𑀲𑀼𑀯𑀡𑁆𑀡𑀧𑀸𑀤𑀼𑀓𑀜𑁆𑀘𑁂𑀯, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀲𑀸𑀯𑀓𑁂.

𑁧𑁨. ‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁪. ‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. ‘‘𑀲𑀩𑁆𑀩𑀜𑁆𑀜𑀼𑀢𑀁 𑀕𑀯𑁂𑀲𑀦𑁆𑀢𑁄, 𑀤𑀸𑀦𑀁 𑀤𑀢𑁆𑀯𑀸 𑀦𑀭𑀼𑀢𑁆𑀢𑀫𑁂;

𑀑𑀳𑀸𑀬𑀸𑀳𑀁 𑀫𑀳𑀸𑀭𑀚𑁆𑀚𑀁, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀅𑀦𑀦𑁆𑀢𑀩𑀮𑀯𑀸𑀳𑀦𑁄𑀢𑀺 𑀩𑀳𑀼𑀓𑀁 𑀅𑀦𑀦𑁆𑀢𑀁 𑀫𑀬𑁆𑀳𑀁 𑀩𑀮𑀁 𑀅𑀲𑁆𑀲𑀳𑀢𑁆𑀣𑀺𑀆𑀤𑀺𑀓𑀁 𑀯𑀸𑀳𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀼𑀤𑁆𑀥𑀤𑀲𑁆𑀲𑀦𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀸𑀬. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀬𑀸𑀯𑀤𑀺𑀘𑁆𑀙𑀓𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀘𑀢𑀼𑀩𑁆𑀩𑀺𑀥𑁂𑀦 𑀆𑀳𑀸𑀭𑁂𑀦 ‘‘𑀅𑀮𑀫𑀮’’𑀦𑁆𑀢𑀺 𑀧𑀯𑀸𑀭𑀸𑀧𑁂𑀢𑁆𑀯𑀸, 𑀳𑀢𑁆𑀣𑁂𑀦 𑀧𑀺𑀤𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀼𑀲𑀸𑀯𑀓𑁂𑀢𑀺 𑀲𑀢𑁆𑀣𑀼𑀦𑁄 𑀘𑁂𑀯 𑀲𑀸𑀯𑀓𑀸𑀦𑀜𑁆𑀘 𑀅𑀤𑀸𑀲𑀺𑀁. 𑀦𑀭𑀼𑀢𑁆𑀢𑀫𑁂𑀢𑀺 𑀦𑀭𑀼𑀢𑁆𑀢𑀫𑀲𑁆𑀲. 𑀑𑀳𑀸𑀬𑀸𑀢𑀺 𑀧𑀳𑀸𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸.

𑀢𑀲𑁆𑀲 𑀧𑀦 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀲𑁄𑀪𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀜𑁆𑀜𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀉𑀢𑁆𑀢𑀭𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀪𑀺𑀬𑁆𑀬𑀲𑁄 𑀘 𑀉𑀢𑁆𑀢𑀭𑁄 𑀘𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀢𑁆𑀣𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀫𑀼𑀤𑁆𑀤𑀸 𑀘 𑀉𑀢𑁆𑀢𑀭𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀢𑀺𑀁𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀪𑀭𑀺𑀬𑀸 𑀧𑀦𑀲𑁆𑀲 𑀭𑀼𑀘𑀺𑀕𑀢𑁆𑀢𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻, 𑀲𑀢𑁆𑀣𑀯𑀸𑀳𑁄 𑀦𑀸𑀫 𑀧𑀼𑀢𑁆𑀢𑁄, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬. ‘‘𑀦𑀕𑀭𑀁 𑀲𑁄𑀪𑀯𑀢𑀻 𑀦𑀸𑀫, 𑀲𑁄𑀪𑁄 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀯𑀲𑀢𑁂 𑀢𑀢𑁆𑀣 𑀦𑀕𑀭𑁂, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁.

𑁧𑁭. ‘‘𑀩𑁆𑀭𑀸𑀳𑁆𑀫𑀡𑁄 𑀬𑀜𑁆𑀜𑀤𑀢𑁆𑀢𑁄 𑀘, 𑀆𑀲𑀺 𑀩𑀼𑀤𑁆𑀥𑀲𑁆𑀲 𑀲𑁄 𑀧𑀺𑀢𑀸;

𑀉𑀢𑁆𑀢𑀭𑀸 𑀦𑀸𑀫 𑀚𑀦𑀺𑀓𑀸, 𑀓𑁄𑀡𑀸𑀕𑀫𑀦𑀲𑁆𑀲 𑀲𑀢𑁆𑀣𑀼𑀦𑁄;

𑁨𑁨. ‘‘𑀪𑀺𑀬𑁆𑀬𑀲𑁄 𑀉𑀢𑁆𑀢𑀭𑁄 𑀦𑀸𑀫, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑁄𑀢𑁆𑀣𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁩. ‘‘𑀲𑀫𑀼𑀤𑁆𑀤𑀸 𑀉𑀢𑁆𑀢𑀭𑀸 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀉𑀤𑀼𑀫𑁆𑀩𑀭𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁫. ‘‘𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀢𑀺𑀁𑀲𑀳𑀢𑁆𑀣𑀲𑀫𑀼𑀕𑁆𑀕𑀢𑁄;

𑀉𑀓𑁆𑀓𑀸𑀫𑀼𑀔𑁂 𑀬𑀣𑀸 𑀓𑀫𑁆𑀩𑀼, 𑀏𑀯𑀁 𑀭𑀁𑀲𑀻𑀳𑀺 𑀫𑀡𑁆𑀟𑀺𑀢𑁄.

𑁨𑁬. ‘‘𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀩𑀼𑀤𑁆𑀥𑀲𑁆𑀲 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭. ‘‘𑀥𑀫𑁆𑀫𑀘𑁂𑀢𑀺𑀁 𑀲𑀫𑀼𑀲𑁆𑀲𑁂𑀢𑁆𑀯𑀸, 𑀥𑀫𑁆𑀫𑀤𑀼𑀲𑁆𑀲𑀯𑀺𑀪𑀽𑀲𑀺𑀢𑀁;

𑀥𑀫𑁆𑀫𑀧𑀼𑀧𑁆𑀨𑀕𑀼𑀴𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁮. ‘‘𑀫𑀳𑀸𑀯𑀺𑀮𑀸𑀲𑁄 𑀢𑀲𑁆𑀲 𑀚𑀦𑁄, 𑀲𑀺𑀭𑀺𑀥𑀫𑁆𑀫𑀧𑁆𑀧𑀓𑀸𑀲𑀦𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀉𑀓𑁆𑀓𑀸𑀫𑀼𑀔𑁂𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑁂. 𑀬𑀣𑀸 𑀓𑀫𑁆𑀩𑀽𑀢𑀺 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀯𑀺𑀬. 𑀏𑀯𑀁 𑀭𑀁𑀲𑀻𑀳𑀺 𑀫𑀡𑁆𑀟𑀺𑀢𑁄𑀢𑀺 𑀏𑀯𑀁 𑀭𑀲𑁆𑀫𑀻𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀲𑀫𑀮𑀗𑁆𑀓𑀢𑁄. 𑀥𑀫𑁆𑀫𑀘𑁂𑀢𑀺𑀁 𑀲𑀫𑀼𑀲𑁆𑀲𑁂𑀢𑁆𑀯𑀸𑀢𑀺 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀫𑀬𑀁 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀥𑀫𑁆𑀫𑀤𑀼𑀲𑁆𑀲𑀯𑀺𑀪𑀽𑀲𑀺𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀝𑀸𑀓𑀯𑀺𑀪𑀽𑀲𑀺𑀢𑀁. 𑀥𑀫𑁆𑀫𑀧𑀼𑀧𑁆𑀨𑀕𑀼𑀴𑀁 𑀓𑀢𑁆𑀯𑀸𑀢𑀺 𑀥𑀫𑁆𑀫𑀫𑀬𑀧𑀼𑀧𑁆𑀨𑀫𑀸𑀮𑀸𑀕𑀼𑀴𑀁 𑀓𑀢𑁆𑀯𑀸. 𑀫𑀳𑀸𑀚𑀦𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑁂𑀢𑀺𑀬𑀗𑁆𑀕𑀡𑁂 𑀞𑀺𑀢𑀲𑁆𑀲 𑀦𑀫𑀲𑁆𑀲𑀦𑀢𑁆𑀣𑀸𑀬 𑀥𑀫𑁆𑀫𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀲𑀸𑀯𑀓𑀲𑀗𑁆𑀖𑁄 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀯𑀺𑀮𑀸𑀲𑁄𑀢𑀺 𑀫𑀳𑀸𑀇𑀤𑁆𑀥𑀺𑀯𑀺𑀮𑀸𑀲𑀧𑁆𑀧𑀢𑁆𑀢𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀪𑀕𑀯𑀢𑁄. 𑀚𑀦𑁄𑀢𑀺 𑀲𑀸𑀯𑀓𑀚𑀦𑁄. 𑀲𑀺𑀭𑀺𑀥𑀫𑁆𑀫𑀧𑁆𑀧𑀓𑀸𑀲𑀦𑁄𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑁆𑀧𑀓𑀸𑀲𑀦𑁄 𑀲𑁄 𑀪𑀕𑀯𑀸 𑀘 𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄.

‘‘𑀲𑀼𑀔𑁂𑀦 𑀓𑁄𑀡𑀸𑀕𑀫𑀦𑁄 𑀕𑀢𑀸𑀲𑀯𑁄, 𑀯𑀺𑀓𑀸𑀫𑀧𑀸𑀡𑀸𑀕𑀫𑀦𑁄 𑀫𑀳𑁂𑀲𑀻;

𑀯𑀦𑁂 𑀯𑀺𑀯𑁂𑀓𑁂 𑀲𑀺𑀭𑀺𑀦𑀸𑀫𑀥𑁂𑀬𑁆𑀬𑁂, 𑀯𑀺𑀲𑀼𑀤𑁆𑀥𑀯𑀁𑀲𑀸𑀕𑀫𑀦𑁄 𑀯𑀲𑀺𑀢𑁆𑀣’’.

𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀢𑁂𑀯𑀻𑀲𑀢𑀺𑀫𑁄 𑀩𑀼𑀤𑁆𑀥𑀯𑀁𑀲𑁄.