𑁨𑁪. 𑀓𑀓𑀼𑀲𑀦𑁆𑀥𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀯𑁂𑀲𑁆𑀲𑀪𑀼𑀫𑁆𑀳𑀺 𑀲𑀬𑀫𑁆𑀪𑀼𑀫𑁆𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀅𑀢𑀺𑀓𑁆𑀓𑀦𑁆𑀢𑁂 𑀏𑀓𑀽𑀦𑀢𑁆𑀢𑀺𑀁𑀲𑀓𑀧𑁆𑀧𑁂𑀲𑀼 𑀚𑀺𑀦𑀤𑀺𑀯𑀲𑀓𑀭𑀸 𑀦𑀼𑀧𑁆𑀧𑀚𑁆𑀚𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀧𑀦 𑀪𑀤𑁆𑀤𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄𑀢𑀺. 𑀫𑁂𑀢𑁆𑀢𑁂𑀬𑁆𑀬𑁄 𑀧𑀦 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀓𑀧𑁆𑀧𑁄 𑀧𑀜𑁆𑀘𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀪𑀤𑁆𑀤𑀓𑀧𑁆𑀧𑁄𑀢𑀺 𑀪𑀕𑀯𑀢𑀸 𑀯𑀡𑁆𑀡𑀺𑀢𑁄. 𑀢𑀢𑁆𑀣 𑀓𑀓𑀼𑀲𑀦𑁆𑀥𑁄 𑀦𑀸𑀫 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀔𑁂𑀫𑀯𑀢𑀻𑀦𑀕𑀭𑁂 𑀔𑁂𑀫𑀗𑁆𑀓𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑀲𑁆𑀲 𑀅𑀕𑁆𑀕𑀺𑀤𑀢𑁆𑀢𑀲𑁆𑀲 𑀦𑀸𑀫 𑀧𑀼𑀭𑁄𑀳𑀺𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀺𑀲𑀸𑀔𑀸𑀬 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀬𑀤𑀸 𑀧𑀦 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀬𑀤𑀸 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀔𑀢𑁆𑀢𑀺𑀬𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀤𑀸 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀤𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸 𑀔𑀢𑁆𑀢𑀺𑀬𑁂𑀳𑀺 𑀲𑀓𑁆𑀓𑀭𑀻𑀬𑀦𑁆𑀢𑀺 𑀕𑀭𑀼𑀓𑀭𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀲𑀘𑁆𑀘𑀲𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀩𑁄𑀥𑀺𑀲𑀢𑁆𑀢𑁄 𑀯𑀺𑀪𑀯𑀲𑀺𑀭𑀺𑀲𑀫𑀼𑀤𑀬𑁂𑀦𑀸𑀓𑀼𑀮𑁂 𑀅𑀦𑀸𑀓𑀼𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀓𑀫𑁆𑀧𑀬𑀦𑁆𑀢𑁄 𑀉𑀤𑀧𑀸𑀤𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀔𑁂𑀫𑀯𑀢𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀲𑀼𑀯𑀡𑁆𑀡𑀮𑀢𑀸𑀢𑁄 𑀅𑀕𑁆𑀕𑀺𑀚𑀸𑀮𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀲𑁄 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀓𑀸𑀫𑀓𑀸𑀫𑀯𑀡𑁆𑀡𑀓𑀸𑀫𑀲𑀼𑀤𑁆𑀥𑀺𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀭𑁄𑀘𑀺𑀦𑀻𑀩𑁆𑀭𑀸𑀳𑁆𑀫𑀡𑀻𑀧𑀫𑀼𑀔𑀸𑀦𑀺 𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀭𑁄𑀘𑀺𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀅𑀦𑀼𑀢𑁆𑀢𑀭𑁂 𑀉𑀢𑁆𑀢𑀭𑁂 𑀦𑀸𑀫 𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀬𑀼𑀢𑁆𑀢𑁂𑀦 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀘𑀺𑀭𑀺𑀦𑁆𑀥𑀦𑀺𑀕𑀫𑁂 𑀯𑀚𑀺𑀭𑀺𑀦𑁆𑀥𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀔𑀤𑀺𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀼𑀪𑀤𑁆𑀤𑁂𑀦 𑀦𑀸𑀫 𑀬𑀯𑀧𑀸𑀮𑀓𑁂𑀦 𑀉𑀧𑀦𑀻𑀢𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀲𑀺𑀭𑀻𑀲𑀩𑁄𑀥𑀺𑀁 𑀧𑀸𑀝𑀮𑀺𑀬𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀤𑀺𑀩𑁆𑀩𑀕𑀦𑁆𑀥𑀁 𑀉𑀧𑀯𑀸𑀬𑀫𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀘𑀢𑀼𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀤𑀺𑀲𑁆𑀯𑀸 𑀏𑀓𑀸𑀳𑁂𑀦𑁂𑀯 𑀫𑀓𑀺𑀮𑀦𑀕𑀭𑀲𑀫𑀻𑀧𑁂 𑀲𑀫𑁆𑀪𑀽𑀢𑀁 𑀇𑀲𑀺𑀧𑀢𑀦𑀁 𑀦𑀸𑀫 𑀫𑀺𑀕𑀤𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀪𑀕𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 𑀓𑀡𑁆𑀡𑀓𑀼𑀚𑁆𑀚𑀦𑀕𑀭𑀤𑁆𑀯𑀸𑀭𑁂 𑀫𑀳𑀸𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀔𑁂𑀫𑀯𑀢𑀻𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁂𑀯𑀸𑀬𑀢𑀦𑁂 𑀅𑀪𑀺𑀫𑀢𑀦𑀭𑀤𑁂𑀯𑁄 𑀦𑀭𑀤𑁂𑀯𑁄 𑀦𑀸𑀫 𑀬𑀓𑁆𑀔𑁄 𑀤𑀺𑀲𑁆𑀲𑀫𑀸𑀦𑀫𑀦𑀼𑀲𑁆𑀲𑀲𑀭𑀻𑀭𑁄 𑀳𑀼𑀢𑁆𑀯𑀸 𑀓𑀦𑁆𑀢𑀸𑀭𑀫𑀚𑁆𑀛𑁂 𑀏𑀓𑀲𑁆𑀲 𑀓𑀫𑀮𑀓𑀼𑀯𑀮𑀬𑀼𑀧𑁆𑀧𑀮𑀲𑀫𑀮𑀗𑁆𑀓𑀢𑀲𑀮𑀺𑀮𑀲𑀻𑀢𑀮𑀲𑁆𑀲 𑀧𑀭𑀫𑀫𑀥𑀼𑀭𑀲𑀺𑀲𑀺𑀭𑀯𑀸𑀭𑀺𑀦𑁄 𑀲𑀩𑁆𑀩𑀚𑀦𑀲𑀼𑀭𑀪𑀺𑀭𑀫𑀲𑁆𑀲 𑀲𑀭𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 𑀓𑀫𑀮𑀓𑀼𑀯𑀮𑀬𑀓𑀮𑁆𑀮𑀳𑀸𑀭𑀸𑀤𑀻𑀳𑀺 𑀲𑀢𑁆𑀢𑁂 𑀉𑀧𑀮𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀔𑀸𑀤𑀢𑀺. 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀧𑀘𑁆𑀙𑀺𑀦𑁆𑀦𑁂 𑀚𑀦𑀲𑀫𑁆𑀧𑀸𑀢𑀭𑀳𑀺𑀢𑁂 𑀫𑀳𑀸𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑁂 𑀲𑀢𑁆𑀢𑁂 𑀔𑀸𑀤𑀢𑀺. 𑀲𑁄 𑀮𑁄𑀓𑀯𑀺𑀲𑁆𑀲𑀼𑀢𑁄 𑀫𑀳𑀸𑀓𑀦𑁆𑀢𑀸𑀭𑀫𑀕𑁆𑀕𑁄 𑀅𑀳𑁄𑀲𑀺. 𑀉𑀪𑀢𑁄𑀓𑀦𑁆𑀢𑀸𑀭𑀤𑁆𑀯𑀸𑀭𑁂 𑀓𑀺𑀭 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀅𑀝𑁆𑀞𑀸𑀲𑀺. 𑀅𑀣 𑀯𑀺𑀕𑀢𑀪𑀯𑀩𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀕𑀢𑀁 𑀢𑀁 𑀫𑀳𑁂𑀲𑀓𑁆𑀔𑀁 𑀦𑀭𑀤𑁂𑀯𑀬𑀓𑁆𑀔𑀁 𑀢𑀜𑁆𑀘 𑀚𑀦𑀲𑀫𑀽𑀳𑀫𑀤𑁆𑀤𑀲. 𑀤𑀺𑀲𑁆𑀯𑀸 𑀘 𑀧𑀦 𑀕𑀕𑀦𑀢𑀮𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀚𑀦𑀓𑀸𑀬𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀪𑀕𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀢𑀲𑁆𑀲 𑀦𑀭𑀤𑁂𑀯𑀬𑀓𑁆𑀔𑀲𑁆𑀲 𑀪𑀯𑀦𑁂 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀫𑀗𑁆𑀕𑀮𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺.

𑀅𑀣 𑀔𑁄 𑀲𑁄 𑀫𑀦𑀼𑀲𑁆𑀲𑀪𑀓𑁆𑀔𑁄 𑀬𑀓𑁆𑀔𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁 𑀇𑀦𑁆𑀤𑀥𑀦𑀼𑀧𑀭𑀺𑀯𑀼𑀢𑀫𑀺𑀯 𑀤𑀺𑀯𑀲𑀓𑀭𑀁 𑀫𑀼𑀦𑀺𑀤𑀺𑀯𑀲𑀓𑀭𑀁 𑀧𑀯𑀦𑀧𑀣𑁂𑀦𑀸𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀤𑀲𑀩𑀮𑁄 𑀫𑀫𑀸𑀦𑀼𑀓𑀫𑁆𑀧𑀸𑀬 𑀇𑀥𑀸𑀕𑀘𑁆𑀙𑀢𑀻’’𑀢𑀺 𑀧𑀲𑀦𑁆𑀦𑀳𑀤𑀬𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀬𑀓𑁆𑀔𑁂𑀳𑀺 𑀲𑀤𑁆𑀥𑀺𑀁 𑀅𑀦𑁂𑀓𑀫𑀺𑀕𑀕𑀡𑀯𑀦𑁆𑀢𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑀕𑀦𑁆𑀥𑀸𑀦𑀺 𑀚𑀮𑀚𑀣𑀮𑀚𑀸𑀦𑀺 𑀓𑀼𑀲𑀼𑀫𑀸𑀦𑀺 𑀧𑀭𑀫𑀫𑀦𑁄𑀭𑀫𑀸𑀦𑀺 𑀲𑀼𑀕𑀦𑁆𑀥𑀕𑀦𑁆𑀥𑁂 𑀲𑀫𑀸𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀯𑀺𑀕𑀢𑀭𑀦𑁆𑀥𑀁 𑀓𑀓𑀼𑀲𑀦𑁆𑀥𑀁 𑀮𑁄𑀓𑀦𑀸𑀬𑀓𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀳𑀺 𑀧𑀽𑀚𑀬𑀺𑀢𑁆𑀯𑀸 𑀣𑀼𑀢𑀺𑀲𑀗𑁆𑀕𑀻𑀢𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑁄 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀦𑀼𑀲𑁆𑀲𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀳𑀤𑀬𑀸 𑀲𑀫𑀸𑀕𑀫𑁆𑀫 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀅𑀣 𑀅𑀧𑁆𑀧𑀝𑀺𑀲𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀪𑀺𑀧𑀽𑀚𑀺𑀢𑀦𑀭𑀤𑁂𑀯𑀬𑀓𑁆𑀔𑀁 𑀦𑀭𑀤𑁂𑀯𑀬𑀓𑁆𑀔𑀁 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑁂𑀦 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀦𑀺𑀭𑀬𑀓𑀣𑀸𑀬 𑀲𑀦𑁆𑀢𑀸𑀲𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀣𑀁 𑀓𑀣𑁂𑀲𑀺, 𑀢𑀤𑀸 𑀅𑀧𑀭𑀺𑀫𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧. ‘‘𑀯𑁂𑀲𑁆𑀲𑀪𑀼𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑀓𑀼𑀲𑀦𑁆𑀥𑁄 𑀦𑀸𑀫 𑀦𑀸𑀫𑁂𑀦, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄.

𑁨. ‘‘𑀉𑀕𑁆𑀖𑀸𑀝𑁂𑀢𑁆𑀯𑀸 𑀲𑀩𑁆𑀩𑀪𑀯𑀁, 𑀘𑀭𑀺𑀬𑀸𑀬 𑀧𑀸𑀭𑀫𑀺𑀁 𑀕𑀢𑁄;

𑀲𑀻𑀳𑁄𑀯 𑀧𑀜𑁆𑀚𑀭𑀁 𑀪𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. ‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑀓𑀼𑀲𑀦𑁆𑀥𑁂 𑀮𑁄𑀓𑀦𑀸𑀬𑀓𑁂;

𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. ‘‘𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀆𑀓𑀸𑀲𑁂, 𑀬𑀫𑀓𑀁 𑀓𑀢𑁆𑀯𑀸 𑀯𑀺𑀓𑀼𑀩𑁆𑀩𑀦𑀁;

𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀩𑁄𑀥𑁂𑀲𑀺 𑀤𑁂𑀯𑀫𑀸𑀦𑀼𑀲𑁂.

𑁫. ‘‘𑀦𑀭𑀤𑁂𑀯𑀲𑁆𑀲 𑀬𑀓𑁆𑀔𑀲𑁆𑀲, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁂;

𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀲𑁆𑀲, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑁄’’𑀢𑀺.

𑀢𑀢𑁆𑀣 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀲𑀫𑀽𑀳𑀦𑀺𑀢𑁆𑀯𑀸. 𑀲𑀩𑁆𑀩𑀪𑀯𑀦𑁆𑀢𑀺 𑀲𑀩𑁆𑀩𑀁 𑀦𑀯𑀯𑀺𑀥𑀁 𑀪𑀯𑀁, 𑀪𑀯𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀘𑀭𑀺𑀬𑀸𑀬 𑀧𑀸𑀭𑀫𑀺𑀁 𑀕𑀢𑁄𑀢𑀺 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀽𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑁄. 𑀲𑀻𑀳𑁄𑀯 𑀧𑀜𑁆𑀚𑀭𑀁 𑀪𑁂𑀢𑁆𑀯𑀸𑀢𑀺 𑀲𑀻𑀳𑁄 𑀯𑀺𑀬 𑀧𑀜𑁆𑀚𑀭𑀁 𑀫𑀼𑀦𑀺𑀓𑀼𑀜𑁆𑀚𑀭𑁄 𑀪𑀯𑀧𑀜𑁆𑀚𑀭𑀁 𑀯𑀺𑀦𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀓𑀼𑀲𑀦𑁆𑀥𑀲𑁆𑀲 𑀯𑀺𑀤𑁆𑀥𑀲𑁆𑀢𑀪𑀯𑀩𑀦𑁆𑀥𑀦𑀲𑁆𑀲 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀓𑀡𑁆𑀡𑀓𑀼𑀚𑁆𑀚𑀦𑀕𑀭𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀫𑀸𑀖𑀧𑀼𑀡𑁆𑀡𑀫𑀸𑀬𑀁 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬. ‘‘𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄, 𑀏𑀓𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭. ‘‘𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄;

𑀤𑀦𑁆𑀢𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀸𑀦𑀁, 𑀆𑀲𑀯𑀸𑀭𑀺𑀕𑀡𑀓𑁆𑀔𑀬𑀸’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀔𑁂𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀅𑀜𑁆𑀚𑀦𑀸𑀤𑀻𑀦𑀺 𑀲𑀩𑁆𑀩𑀪𑁂𑀲𑀚𑁆𑀚𑀸𑀦𑀺 𑀘 𑀅𑀤𑀸𑀲𑀺. 𑀅𑀜𑁆𑀜𑀜𑁆𑀘 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀤𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀳𑀤𑀬𑁄 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑁄 𑀧𑀦 𑀲𑀢𑁆𑀣𑀸 𑁋 ‘‘𑀅𑀦𑀸𑀕𑀢𑁂 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮. ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀔𑁂𑀫𑁄 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀢𑀣𑀸𑀕𑀢𑁂 𑀚𑀺𑀦𑀧𑀼𑀢𑁆𑀢𑁂, 𑀤𑀸𑀦𑀁 𑀤𑀢𑁆𑀯𑀸 𑀅𑀦𑀧𑁆𑀧𑀓𑀁.

𑁯. ‘‘𑀧𑀢𑁆𑀢𑀜𑁆𑀘 𑀘𑀻𑀯𑀭𑀁 𑀤𑀢𑁆𑀯𑀸, 𑀅𑀜𑁆𑀚𑀦𑀁 𑀫𑀥𑀼𑀮𑀝𑁆𑀞𑀺𑀓𑀁;

𑀇𑀫𑁂𑀢𑀁 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀬𑀸𑀤𑁂𑀫𑀺 𑀯𑀭𑀁 𑀯𑀭𑀁.

𑁧𑁦. ‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀓𑀓𑀼𑀲𑀦𑁆𑀥𑁄 𑀯𑀺𑀦𑀸𑀬𑀓𑁄;

𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁧. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁩. ‘‘𑀦𑀕𑀭𑀁 𑀔𑁂𑀫𑀯𑀢𑀻 𑀦𑀸𑀫, 𑀔𑁂𑀫𑁄 𑀦𑀸𑀫𑀸𑀲𑀳𑀁 𑀢𑀤𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀕𑀯𑁂𑀲𑀦𑁆𑀢𑁄, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀅𑀜𑁆𑀚𑀦𑀁 𑀧𑀸𑀓𑀝𑀫𑁂𑀯. 𑀫𑀥𑀼𑀮𑀝𑁆𑀞𑀺𑀓𑀦𑁆𑀢𑀺 𑀬𑀝𑁆𑀞𑀺𑀫𑀥𑀼𑀓𑀁. 𑀇𑀫𑁂𑀢𑀦𑁆𑀢𑀺 𑀇𑀫𑀁 𑀏𑀢𑀁. 𑀧𑀢𑁆𑀣𑀺𑀢𑀦𑁆𑀢𑀺 𑀇𑀘𑁆𑀙𑀺𑀢𑀁. 𑀧𑀝𑀺𑀬𑀸𑀤𑁂𑀫𑀻𑀢𑀺 𑀤𑀚𑁆𑀚𑀸𑀫𑀺, 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀭𑀁 𑀯𑀭𑀦𑁆𑀢𑀺 𑀲𑁂𑀝𑁆𑀞𑀁 𑀲𑁂𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. ‘‘𑀬𑀤𑁂𑀢𑀁 𑀧𑀢𑁆𑀣𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀬𑀁 𑀇𑀘𑁆𑀙𑀢𑀺, 𑀏𑀢𑀁 𑀲𑀩𑁆𑀩𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀲𑀼𑀦𑁆𑀤𑀭𑀢𑀭𑁄.

𑀢𑀲𑁆𑀲 𑀧𑀦 𑀅𑀤𑀦𑁆𑀥𑀲𑁆𑀲 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀅𑀕𑁆𑀕𑀺𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀯𑀺𑀲𑀸𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀯𑀺𑀥𑀼𑀭𑁄 𑀘 𑀲𑀜𑁆𑀚𑀻𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀩𑀼𑀤𑁆𑀥𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀸𑀫𑀸 𑀘 𑀘𑀫𑁆𑀧𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑀺𑀭𑀻𑀲𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀫𑀦𑁆𑀢𑀸 𑀤𑀲𑀬𑁄𑀚𑀦𑀸𑀦𑀺 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀙𑀭𑀢𑀺, 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀪𑀭𑀺𑀬𑀸 𑀧𑀦𑀲𑁆𑀲 𑀭𑁄𑀘𑀺𑀦𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻, 𑀉𑀢𑁆𑀢𑀭𑁄 𑀦𑀸𑀫 𑀧𑀼𑀢𑁆𑀢𑁄, 𑀆𑀚𑀜𑁆𑀜𑀭𑀣𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪. ‘‘𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀤𑀢𑁆𑀢𑁄 𑀘, 𑀆𑀲𑀺 𑀩𑀼𑀤𑁆𑀥𑀲𑁆𑀲 𑀲𑁄 𑀧𑀺𑀢𑀸;

𑀯𑀺𑀲𑀸𑀔𑀸 𑀦𑀸𑀫 𑀚𑀦𑀺𑀓𑀸, 𑀓𑀓𑀼𑀲𑀦𑁆𑀥𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁫. ‘‘𑀯𑀲𑀢𑁂 𑀢𑀢𑁆𑀣 𑀔𑁂𑀫𑁂 𑀧𑀼𑀭𑁂, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁;

𑀦𑀭𑀸𑀦𑀁 𑀧𑀯𑀭𑀁 𑀲𑁂𑀝𑁆𑀞𑀁, 𑀚𑀸𑀢𑀺𑀫𑀦𑁆𑀢𑀁 𑀫𑀳𑀸𑀬𑀲𑀁.

𑁨𑁦. ‘‘𑀯𑀺𑀥𑀼𑀭𑁄 𑀘 𑀲𑀜𑁆𑀚𑀻𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀩𑀼𑀤𑁆𑀥𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑀓𑀼𑀲𑀦𑁆𑀥𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁧. ‘‘𑀲𑀸𑀫𑀸 𑀘 𑀘𑀫𑁆𑀧𑀸𑀦𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀲𑀺𑀭𑀻𑀲𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁩. ‘‘𑀘𑀢𑁆𑀢𑀸𑀮𑀻𑀲𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀓𑀦𑀓𑀧𑁆𑀧𑀪𑀸 𑀦𑀺𑀘𑁆𑀙𑀭𑀢𑀺, 𑀲𑀫𑀦𑁆𑀢𑀸 𑀤𑀲𑀬𑁄𑀚𑀦𑀁.

𑁨𑁪. ‘‘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁫. ‘‘𑀥𑀫𑁆𑀫𑀸𑀧𑀡𑀁 𑀧𑀲𑀸𑀭𑁂𑀢𑁆𑀯𑀸, 𑀦𑀭𑀦𑀸𑀭𑀻𑀦𑀁 𑀲𑀤𑁂𑀯𑀓𑁂;

𑀦𑀤𑀺𑀢𑁆𑀯𑀸 𑀲𑀻𑀳𑀦𑀸𑀤𑀁𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁬. ‘‘𑀅𑀝𑁆𑀞𑀗𑁆𑀕𑀯𑀘𑀦𑀲𑀫𑁆𑀧𑀦𑁆𑀦𑁄, 𑀅𑀘𑁆𑀙𑀺𑀤𑁆𑀤𑀸𑀦𑀺 𑀦𑀺𑀭𑀦𑁆𑀢𑀭𑀁;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀯𑀲𑀢𑁂 𑀢𑀢𑁆𑀣 𑀔𑁂𑀫𑁂 𑀧𑀼𑀭𑁂𑀢𑀺 𑀅𑀬𑀁 𑀕𑀸𑀣𑀸 𑀓𑀓𑀼𑀲𑀦𑁆𑀥𑀲𑁆𑀲 𑀚𑀸𑀢𑀦𑀕𑀭𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀳𑀸𑀓𑀼𑀮𑀦𑁆𑀢𑀺 𑀉𑀤𑀺𑀢𑁄𑀤𑀺𑀢𑀁 𑀪𑀕𑀯𑀢𑁄 𑀧𑀺𑀢𑀼𑀓𑀼𑀮𑀁. 𑀦𑀭𑀸𑀦𑀁 𑀧𑀯𑀭𑀁 𑀲𑁂𑀝𑁆𑀞𑀦𑁆𑀢𑀺 𑀚𑀸𑀢𑀺𑀯𑀲𑁂𑀦 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀁 𑀧𑀯𑀭𑀁 𑀲𑁂𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀫𑀦𑁆𑀢𑀦𑁆𑀢𑀺 𑀅𑀪𑀺𑀚𑀸𑀢𑀺𑀯𑀦𑁆𑀢𑀁, 𑀉𑀢𑁆𑀢𑀫𑀸𑀪𑀺𑀚𑀸𑀢𑀁. 𑀫𑀳𑀸𑀬𑀲𑀦𑁆𑀢𑀺 𑀫𑀳𑀸𑀧𑀭𑀺𑀯𑀸𑀭𑀁, 𑀓𑀺𑀁 𑀢𑀁 𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀼𑀮𑀁? 𑀢𑀢𑁆𑀣 𑀫𑀳𑀸𑀓𑀼𑀮𑀁 𑀔𑁂𑀫𑁂 𑀧𑀼𑀭𑁂 𑀯𑀲𑀢𑁂𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄.

𑀲𑀫𑀦𑁆𑀢𑀸 𑀤𑀲𑀬𑁄𑀚𑀦𑀦𑁆𑀢𑀺 𑀲𑀫𑀦𑁆𑀢𑀢𑁄 𑀤𑀲 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀦𑀺𑀘𑁆𑀘𑀓𑀸𑀮𑀁 𑀲𑀭𑀻𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀧𑀪𑀸 𑀦𑀺𑀘𑁆𑀙𑀭𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀧𑀡𑀦𑁆𑀢𑀺 𑀥𑀫𑁆𑀫𑀲𑀗𑁆𑀔𑀸𑀢𑀁 𑀆𑀧𑀡𑀁. 𑀧𑀲𑀸𑀭𑁂𑀢𑁆𑀯𑀸𑀢𑀺 𑀪𑀡𑁆𑀟𑀯𑀺𑀓𑁆𑀓𑀺𑀡𑀦𑀢𑁆𑀣𑀁 𑀦𑀸𑀦𑀸𑀪𑀡𑁆𑀟𑀲𑀫𑀺𑀤𑁆𑀥𑀫𑀸𑀧𑀡𑀁 𑀯𑀺𑀬 𑀥𑀫𑁆𑀫𑀸𑀧𑀡𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀭𑀦𑀸𑀭𑀻𑀦𑀦𑁆𑀢𑀺 𑀯𑁂𑀦𑁂𑀬𑁆𑀬𑀦𑀭𑀦𑀸𑀭𑀻𑀦𑀁 𑀛𑀸𑀦𑀲𑀫𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀭𑀢𑀦𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸𑀬. 𑀲𑀻𑀳𑀦𑀸𑀤𑀁 𑀯𑀸𑀢𑀺 𑀲𑀻𑀳𑀦𑀸𑀤𑀁 𑀯𑀺𑀬, 𑀅𑀪𑀬𑀦𑀸𑀤𑀁 𑀦𑀤𑀺𑀢𑁆𑀯𑀸. 𑀅𑀝𑁆𑀞𑀗𑁆𑀕𑀯𑀘𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑀭𑁄 𑀲𑀢𑁆𑀣𑀸. 𑀅𑀘𑁆𑀙𑀺𑀤𑁆𑀤𑀸𑀦𑀻𑀢𑀺 𑀙𑀺𑀤𑁆𑀤𑀸𑀤𑀺𑀪𑀸𑀯𑀭𑀳𑀺𑀢𑀸𑀦𑀺 𑀲𑀻𑀮𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺. 𑀅𑀣 𑀯𑀸 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀯𑀺𑀯𑀭𑀸𑀦𑀺 𑀲𑀸𑀯𑀓𑀬𑀼𑀕𑀴𑀸𑀤𑀻𑀦𑀺. 𑀦𑀺𑀭𑀦𑁆𑀢𑀭𑀦𑁆𑀢𑀺 𑀲𑀢𑀢𑀁 𑀲𑀩𑁆𑀩𑀓𑀸𑀮𑀁. 𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀦𑁆𑀢𑀺 𑀲𑀢𑁆𑀣𑀸 𑀘 𑀲𑀸𑀯𑀓𑀬𑀼𑀕𑀴𑀸𑀤𑀻𑀦𑀺 𑀘 𑀢𑀁 𑀲𑀩𑁆𑀩𑀁 𑀫𑀼𑀦𑀺𑀪𑀸𑀯𑀫𑀼𑀧𑀕𑀦𑁆𑀢𑁆𑀯𑀸 𑀅𑀤𑀲𑁆𑀲𑀦𑀪𑀸𑀯𑀫𑀼𑀧𑀕𑀢𑀦𑁆𑀢𑀺 𑀅𑀢𑁆𑀣𑁄.

‘‘𑀅𑀧𑁂𑀢𑀩𑀦𑁆𑀥𑁄 𑀓𑀓𑀼𑀲𑀦𑁆𑀥𑀩𑀼𑀤𑁆𑀥𑁄, 𑀅𑀤𑀦𑁆𑀥𑀧𑀜𑁆𑀜𑁄 𑀕𑀢𑀲𑀩𑁆𑀩𑀭𑀦𑁆𑀥𑁄;

𑀢𑀺𑀮𑁄𑀓𑀲𑀦𑁆𑀥𑁄 𑀓𑀺𑀭 𑀲𑀘𑁆𑀘𑀲𑀦𑁆𑀥𑁄, 𑀔𑁂𑀫𑁂 𑀧𑀦𑁂 𑀯𑀸𑀲𑀫𑀓𑀧𑁆𑀧𑀬𑀺𑀢𑁆𑀣’’.

𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀓𑀓𑀼𑀲𑀦𑁆𑀥𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀩𑀸𑀯𑀻𑀲𑀢𑀺𑀫𑁄 𑀩𑀼𑀤𑁆𑀥𑀯𑀁𑀲𑁄.